@##/ /rgya gar skad du/ Ar+ya nai ra ad ma pa ri prits+tshA nA ma ma hA yA na sU tra/ bod skad du/ 'phags pa bdag med pa dris pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /de nas dmigs pa'i lta ba can rnam par rtog pa dang / bcas shing rnam par dpyod pa dang bcas pa'i mu stegs pa de dag rnams theg pa chen po'i nang du song ste/ zhe sa dang bcas shing thal mo sbyar nas bdag med pa'i dri ba dag yongs su dris pa/ rigs kyi bu thams cad mkhyen pas ni lus la bdag med do zhes gsungs la/ gal te lus la yang dag par bdag med na ji ltar na de las rtse ba dang / dgod pa dang / ngu ba dang / rol ba dang / khro ba dang / nga rgyal dang / phrag dog dang / phra ma la sogs pa kun tu 'byung bar 'gyur/ ci lus la yang dag par na bdag yod dam med pa yin/ bdag cag gi the tsom de dag khyod kyis bsal ba'i rigs so/ /theg pa chen po pa rnams kyis smras pa/ grogs po dag lus la ni bdag yang dag par yod do zhe 'am/ med do zhes gnyi gar yang 'dir brjod par mi bya ste/ yang dag par yod do zhes brjod pa na med do zhes brjod pa ni log par smra ba'o/ /gal te yod na ji ltar na de skra dang sen mo dang / lpags pa dang / mgo bo dang / sha dang / rus pa dang / rkang dang / tshil dang / rgyus pa dang / mchin pa dang / rgyu ma dang / mid pa dang / lag pa dang / rkang pa dang / yan lag dang / nying lag la sogs pa lus thams cad kyi phyi dang nang du bcas pa la rnam 55.6a par brtags na bdag yang dag par mi snang ngo / /mu stegs pa rnams kyis smras pa/ lha'i mig dang ldan pa 'ga' zhig gis mthong gis/ bdag cag rnams ni sha'i mig can yin pas bdag yang dag par ji ltar mthong / theg pa chen po pa rnams kyis smras pa/ lha'i mig dang ldan pa rnams kyis kyang mi mthong ste/ gang la kha dog med pa dang / gzugs med pa dang / dbyibs med pa de ji ltar mthong bar 'gyur/ mu stegs pa rnams kyis smras pa/ ci med pa yin nam/ theg pa chen po pa rnams kyis smras pa/ med do zhes brjod pa na yod do zhes brjod pa ni log par smra ba'o/ /gal te med na ji ltar 'di mngon sum du yod par rtse ba dang / dgod pa dang / ngu ba dang / rol pa dang / khro ba dang / nga rgyal dang / phrag dog dang / phra ma la sogs pa kun tu 'byung bar 'gyur/ de bas na med do zhes brjod par yang mi rung ste/ yod dam med ces gang 'di ltar brjod par mi bya ste/ nyes pa 'di yod pas na yod pa'o zhe 'am/ med pa'o zhes brjod par mi bya'o/ /mu stegs pa rnams kyis smras pa/ 'o na 'dir gang zhig dmigs par 'gyur/ theg pa chen po pa rnams kyis smras pa/ dmigs par gyur pa ni ci yang med do/ /mu stegs pa rnams kyis smras pa/ ci nam mkha' ltar stong pa nyid yin nam/ theg pa chen po pa rnams kyis smras pa/ grogs po dag de de bzhin de/ nam mkha' ltar stong pa nyid yin no/ /mu stegs pa rnams kyis smras pa/ gal te de ltar yin na rtse ba dang / dgod pa dang / ngu ba dang / rol pa dang / khro ba dang / nga rgyal dang / phrag dog dang / phra ma la sogs pa ji ltar blta bar bgyi/ theg pa chen po pa rnams kyis smras pa/ sgyu ma dang / rmi lam dang / mig 'phrul dang 'dra ba nyid yin no/ /mu stegs pa rnams kyis smras pa/ sgyu ma ni ji lta bu lags/ rmi lam dang / mig 'phrul ni ji lta bu lags/ theg pa chen po pa rnams kyis smras pa/ sgyu ma ni mtshon pa tsam mo/ /rmi lam ni so sor snang ba tsam ste/ gzung bar bya ba ma yin zhing rang bzhin gyis stong pa/ yod pa ma 55.6b yin pa'i ngo bo nyid do/ /mig 'phrul ni bcos ma tsam du dgos pa'o/ /grogs po dag de de bzhin de/ dngos po ji snyed pa thams cad ni sgyu ma dang / rmi lam dang / mig 'phrul dang 'dra bar shes par bya'o/ /gzhan yang kun rdzob dang / don dam pa dag bstan par bya ste/ de la kun rdzob ces bya ba ni 'di ni bdag go/ /'di ni gzhan no zhes bya ba dang / srog dang / skyes bu dang / gang zag dang / byed pa po dang / tshor ba po dang / nor dang / bu dang / chung ma dang / mdza' bshes dang / nye du la sogs par rtog pa de ni kun rdzob ces bya'o/ /gang la bdag med pa dang / gzhan med pa dang / srog med pa dang / skyes bu med pa dang / gang zag med pa dang / byed pa po med pa dang / tshor ba po med pa dang / nor med pa dang / bu med pa dang / chung ma med pa dang / mdza' bshes med pa dang / nye du la sogs pa med pa de ni don dam pa zhes bya'o/ /gang la rang bzhin gyis dngos po thams cad du yongs su brtags shing dge ba dang / mi dge ba'i 'bras bu dang / skye ba dang / 'gag pa ni kun rdzob bo/ /dge ba dang mi dge ba'i 'bras bu med pa dang / skye ba med pa dang / 'gag pa med pa de bzhin nyid kyi ngo bo nyid de la ni kun nas nyon mongs pa dang / rnam par byang ba med de/ de ni dbu ma'i chos rnams kyi sgrub pa lhur len pa'o/ /de la 'di skad ces bya ste/ kun rdzob dang ni don dam ste/ /dbye ba gnyis su yang dag bshad/ /kun rdzob 'jig rten pa'i chos/ /don dam 'jig rten 'das pa'o/ /kun rdzob chos la zhugs pa yi/ /sems can nyon mongs dbang du 'gro/ /don dam yongs su ma shes pas/ /'khor bar yun ring 'khor bar 'gyur/ /kun rdzob 'jig rten chos rnams la/ /mi 'khas pa dag rtog par byed/ /kun tu rtog pa de yis ni/ /sdug bsngal nyams su myong bar 'gyur/ /ji ltar so so'i skye bo yi/ /byis pas grol lam mi shes pas/ /mi zad pa'i sdug bsngal dag /mang po rjes su myong bar 'gyur/ /gang du srid pa 'gag 'gyur ba'i/ /don dam dag ni mi shes pas/ /skye ba dang ni 'gag 'gyur zhing / /skye med 'gro dang 'ong bar 'gyur/ / 55.7a 'jig rten chos la gnas pa yi/ /blun po 'khor lo bzhin du 'khor/ /sdug bsngal gnas can 'khor ba 'dir/ /yang dang yang du 'khor bar 'gyur/ /ji ltar nyi ma zla ba dag /slar yang 'ong zhing 'gro bar byed/ /de bzhin srid par 'pho ba na/ /slar yang 'ong zhing 'gro bar 'gyur/ /'khor ba thams cad mi rtag cing / /mi brtan skad cig 'jig pa nyid/ /de bas don dam shes pa yis/ /kun rdzob bden pa'i gnas spong ngo / /mtho ris gnas nas lha rnams dang / /dri za lha mi rnams kyang ni/ /kun la 'pho ba yod gyur pa/ /kun kyang kun rdzob 'bras bu yin/ /grub dang rigs 'dzin gnod sbyin dang / /dri za dang ni lto 'phye rnams/ /slar yang dmyal bar 'gro 'gyur ba/ /kun kyang kun rdzob 'bras bu yin/ /gang zhig brtson drag lha rnams dang / /yon tan 'byung gnas la gnas gang / /mtho ris las 'pho ltung gyur pa/ /thams cad kun rdzob 'bras bu yin/ /brgya byin 'khor los sgyur nyid de/ /gang gis dam pa'i gnas thob nas/ /slar yang byol song skyes nas 'jug /thams cad kun rdzob 'bras bu yin/ /de bas mtho ris lha rnams kyi/ /bden pa bzang po kun spong la/ /byang chub sems ni 'od gsal ba/ /rnal 'byor pas ni rtag tu bsgom/ /dngos po med cing dmigs su med/ /thams cad stong pa gnas med pa/ /spros pa rnams las yang dag 'das/ /byang chub sems dpa'i mtshan nyid yin/ /sra ba ma yin 'jam pa min/ /dro ba ma yin grang ba min/ /de ni reg min bzung bya min/ /byang chub sems kyi mtshan nyid yin/ /ring po ma yin thung ba min/ /zlum po ma yin gru gsum min/ /phra ba ma yin sbom pa'ang min/ /byang chub sems kyi mtshan nyid yin/ /sgom pa rnams las rnam 'das shing / /mu stegs rnams kyi spyod yul min/ /shes rab pha rol phyin sbyor ba/ /byang chub sems kyi mtshan nyid yin/ /dpe med bsgom du med pa dang / /mthong min gnas kyi mchog gyur la/ /rang bzhin gyis ni rnam dag pa/ /byang chub sems kyi mtshan nyid yin/ /thams cad dbu ba lta bu ste/ /chu bur lta bur snying po med/ /rtag pa ma yin bdag med te/ /sgyu ma mig rgyu dag dang mtshungs/ / 55.7b gong bu bzhin du bsdus gyur pa/ /spros pa rnams kyis yongs su gang / /'dod chags zhe sdang la sogs ltar/ /de ni sgyu mtshungs 'ba' shig yin/ /ji ltar nang na thig le ni/ /skad cig de la mi mthong ste/ /shes rab pha rol phyin mthong ma/ /de bzhin blo ni 'dus ma byas/ /rtag tu dgod cing rtse ba dang / /smra zhing gru dang rol mo dang / /gzhi la sogs pa'i bde ba rnams/ /de dag thams cad rmi lam mtshungs/ /lus can kun gyis 'dus byas pa/ /'di kun rmi lam dang mtshungs la/ /rmi lam sems kyi kun rtog ste/ /sems kyang nam mkha' lta bu yin/ /gang zhig tshul 'di rtag sgom pa/ /shes rab pha rol phyin pa'i tshul/ /gang zhig 'di ni rtag sgom pa/ /dngos po kun las rnam grol nas/ /go 'phang mchog ni thob par 'gyur/ /bla na med pa'i byang chub gang / /sangs rgyas kun gyis rnam bsgoms pa/ /bsgoms dang bcas pas 'dzin na ni/ /theg chen 'bras bu 'thob par 'gyur/ /'phags pa bdag myed pa dris pa zhes bya ba theg pa chen po'i mdo rdzogs so// // rgya gar gyi mkhan po ka ma la gub ta dang / zhu chen gyi lo ts+tsha ba dge slong rin chen bzang pos bsgyur cing zhus te gtan la phab bo// |