//rgya gar skad du/ AR+Ya gu Na rat+na sang ku su mi ta pr-its+tshA nA ma mahA yA na sU tra/ bod 442b skad du/ 'phags pa yon tan rin chen me tog kun du rgyas pas zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das rgyal po'i khab na bya rgod kyi phung po'i ri la dge slong stong nyis brgya lnga bcu'i dge slong gi dge 'dun chen po dang / byang chub sems dpa' stong phrag rab tu mang por nams dang thabs gcig tu bzhugs te/ de'i tshe 'khor de nyid du byang chub sems dpa' sems dpa' chen po grong khyer yangs pa'i li tsA byi gzhon nu yon tan rin chen me tog kun du rgyas pa zhes bya ba zhig 'dus par gyur te 'dug go /de nas byang chub sems dpa' sems dpa' chen po yon tan rin chen me tog kun du rgyas pa stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs dbye bar gnang na/ btsun pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /da skad ces gsol pa dang / bcom ldan 'das kyis byang chub sems dpa' sems dpa' chen po yon tan rin chen me tog kun du 443a @#/ /rgyas pa la 'di skad ces bka' stsal to/ /yon tan rin chen me tog kun du rgyas pa khyod de bzhin gshegs pa dgra bcom pa yang dag par rdzogs pa'i sangs rgyas la ci dang ci 'dod pa dris shig dang / zhu ba de dang de nyid kyi lung bstan pas ngas khyod kyi sems rangs par bya'o/ /de nas byang chub sems dpa' sems dpa' chen po yon tan rin chen me tog kun du rgyas pas bcom ldan 'das la 'di skad ces gsol to/ /bcom ldan 'das/ de ltar na 'jig rten gyi khams gzhan dag na sangs rgyas bcom ldan 'das rnams bzhugs te 'tsho zhing gzhes pa de rnams kyi mtshan bzung na/ rigs kyi bu'am rigs kyi bu mo myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba lta dag bzhugs lags sam/ de skad ces gsol pa dang / bcom ldan 'das kyis byang chub sems dpa' sems dpa' chen po yon tan rin chen me tog kun du rgyas pa la 'di skad ces bka' stsal to/ /yon tan rin chen me tog kun du rgyas pa legs so/ /legs so/ /yon tan rin chen me tog kun du rgyas pa khyod da ltar dang / ma 'ongs pa'i skye bo mang po la phan pa dang / skye bo mang po la bde ba dang / 'jig rten la snying brtse ba dang / byang chub sems dpa' rnams dang / lha dang mi rnams kyi don dang / phan pa dang bde ba'i phyir khyod de bzhin gshegs pa la 443b don 'di zhu bar sems pa ni/ yon tan rin chen me tog kun du rgyas pa khyod yang legs so/ /de'i phyir yon tan rin chen me tog kun du rgyas pa khyod legs par rab tu nyon la yid la gzung zhi dang| ngas khyod la bshad do/ /bcom ldan 'das/ de ltar 'chal lo zhes gsol nas/ byang chub sems dpa' sems dpa' chen po yon tan rin chen me tog kun du rgyas pas bcom ldan 'das kyi ltar nyan pa dang / bcom ldan 'das kyis 'di skad ces bka' stsal to/ /yon tan rin chen me tog kun du rgyas pa/ shar phyogs na chos thams cad kyi yon tan bkod pa'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas yon tan rin chen dpag tu med pa bkod pa'i gzi brjid kyi rgyal po lta bu zhes bya ba zhig da ltar bzhugs te 'tsho zhing gzhes pa yod do/ /bskal pa de ni rgyas pa thams cad kun nas bsdus pa zhes bya'o/ /de na sems can rnams kyi tshe ni dpag tu med do/ /bcom ldan 'das de'i byang chub sems dpa' thams cad kyi 'khor dpag tu med do/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas yon tan rin chen dpag tu med pa bkod pa'i gzi brjid kyi rgyal po lta bu de'i mtshan 'dzin pa'i rigs kyi bu'am/ rigs kyi bu mo dad pa can ni bskal pa stong phrag drug cu'i 'khor ba bsnyil par byed do/ /tshe brjes 444a @#/ /nas kyang sgrib pa med par ston pa zhes bya ba'i gzungs thob par 'gyur ro/ /sangs rgyas kyi zhing bye ba phrag bcu rnams kyi sangs rgyas bcom ldan 'das rnams kyis spobs pa nye bar bsgrub par mdzad do/ /chos ston pa na bag tsha ba yang med par 'gyur ro/ /de la 'di skad ces bya ste/ /mi gang sangs rgyas mtshan 'di rjod byed pa/ /de la yon tan 'di rnams myur du 'byung / /de la bde bas lhag pa'i gzhan yang 'byung / /de la bla med byang chub dka' ma yin/ /yon tan rin chen me tog kun du rgyas pa/ lho phyogs na yon tan rin chen bkod pa'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas yon tan rin chen dpal bkod pa'i gzi brjid kyi rgyal po lta bu zhes bya ba zhig da ltar bzhugs te 'tsho zhing gzhes pa yod do/ /bskal pa de ni yon tan rgyas pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas yon tan rin chen dpal bkod pa'i gzi brjid kyi rgyal po lta bu de'i mtshan 'dzin pa'i rigs kyi bu'am/ rigs kyi bu mo dad pa can ni/ tshe brjes ma thag tu nyi ma'i dkyil 'khor gyi mtha' snang ba zhes bya ba'i ting nge 'dzin 'thob par 'gyur ro/ /sangs rgyas kyi zhing yon tan dpag tu med pa bkod pa yang yongs su 'dzin par 'gyur ro/ /tshe brjes ma thag tu skyes bu 444b chen po mtshan sum cu rtsa gnyis 'thob par 'gyur ro/ /sangs rgyas kyi zhing gang dang gang du smon lam 'debs pa'i sangs rgyas kyi zhing de dang der skye bar 'gyur ro/ /skye ba gcig gis thogs pas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /spobs pa rgyun mi 'chad pa yang 'thob par 'gyur ro/ /de la 'di skad ces bya ste/ mi gang sangs rgyas mtshan 'di rjod byed pa/ /de la ting 'dzin bsam yas de skyes shing / /sum cu rtsa gnyis mtshan ldan lus 'thob la/ /de ni byang chub skye ba gcig thogs 'gyur/ /yon tan rin chen me tog kun du rgyas pa/ nub phyogs na mya ngan dang mun pa thams cad dang bral ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas chos thams cad la spobs pa bkod pa'i dpal zhes bya ba zhig da ltar bzhugs te 'tsho zhing gzhes pa yod do/ /bskal pa de ni shAkya mngon par mdzes pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos thams cad la spobs pa bkod pa'i dpal de'i mtshan 'dzin pa'i rigs kyi bu'am/ rigs kyi bu mo dad pa can ni/ mtshon gyis 'chi ba'i dus byed par mi 'gyur ro/ /dug gis ma yin/ chus ma yin te/ mes kyang 'chi ba'i dus byed par mi 'gyur ro/ /brdzus te skye bar yang 'gyur ro/ /tshe brjes ma thag tu yang shugs 445a @#/ /brgya pa zhes bya ba'i gzungs 'thob par 'gyur ro/ /de la 'di skad ces bya ste/ /mi gang sangs rgyas mtshan 'di rjod byed pa/ /'di la mi de'i lus mes mi 'chi zhing| |mtshon gyis min la chus min dug gis min/ /de ni brdzus te skye ba kho nar 'gyur/ /yon tan rin chen me tog kun du rgyas pa/ byang phyogs na mun pa dang / rdul dang bral ba zhes bya ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas spobs pa dpag med bkod pa yang dag par spyod pa'i blo zhes bya ba zhig da ltar bzhugs te 'tsho zhing gzhes pa yod do/ /bskal pa de ni grags pa chen po 'dzin pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas spobs pa dpag med bkod pa yang dag par spyad pa'i blo de'i mtshan 'dzin pa'i rigs kyi bu'am/ rigs kyi bu mo dad pa can ni sangs rgyas bye ba khrag khrig phrag bcu mnyes par byed par 'gyur ro/ /thams cad du rjes su song ba zhes bya ba'i gzungs kyang thob par 'gyur ro/ /zad mi shes pa'i za ma tog ces bya ba'i gzungs kyang thob par 'gyur ba nas bla na med pa yang dag par rdzogs pa'i byang chub mngon par rdzogs par 'tshang rgya ba'i bar du yang 'gyur ro/ /ngan song gsum po rnams su skye bar mi 'gyur ro/ /byang chub sems dpa'i spyad 445b pa spyod pa na/ sangs rgyas kyi zhing gang dang gang du skye bar 'gyur ba de dang der ngan song du skyes pa'i sems can rnams yongs su thar bar byed do/ /bla na med pa yang dag par rdzogs pa'i byang chub las phyir mi ldog par yang 'gyur ro/ /de la 'di skad ces bya ste/ /mi gang sangs rgyas mtshan 'di rjod byed pa/ /de yi yon tan bgrang bar mi nus shing / /de ni byang chub 'thob par the tshom med/ /de la the tshom med par gzungs skye'o/ /yon tan rin chen me tog kun du rgyas pa/ shar lho mtshams kyi phyogs na shin tu mdzes pa bkod pa'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas 'brug stong bsgrags pa'i sgra skad kyi rgyal po zhes bya ba zhig da ltar bzhugs te 'tsho zhing gzhes pa yod do/ /bskal pa de ni yon tan 'byung ba zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas 'brug stong bsgrags pa'i sgra skad kyi rgyal po de'i mtshan 'dzin pa'i rigs kyi bu'am rigs kyi bu mo dad pa can de ni tshe brjes ma thag tu mi 'jigs pa bzhi 'thob par 'gyur ro/ /rdzu 'phrul gyi rkang pa bzhi 'thob par 'gyur ro/ /byams pa chen po dang / snying rje chen po 'thob par 'gyur ro/ /sangs rgyas kyi chos ma 'dres pa bco brgyad 'thob par 'gyur ro/ /de bzhin gshegs pa tshe dpag med kyi sangs rgyas kyi zhing gi yon tan bkod pa ci 'dra ba de 446a @#/ /lta bu 'thob par 'gyur ro/ /bud med kyi tshe brjes nas kyang skyes pa'i lus thob par 'gyur ro/ /de la 'di skad ces bya ste/ /gang zhig rgyal ba'i mtshan 'di 'dzin byed pa'i/ /byang chub sems dpa' yon tan 'di dang gzhan/ /bsam gyis mi khyab rtag tu 'thob par 'gyur/ /byang chub sems dpas sangs rgyas mang po mthong / /yon tan rin chen me tog kun du rgyas pa/ lho nub mtshams kyi phyogs na bkod pa dpag tu med pa'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas gser mchog 'od dpal zhes bya ba zhig da ltar bzhugs te 'tsho zhing gzhes pa yod do/ /bskal pa de ni chos thams cad yang dag par bskyed pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser mchog 'od dpal de'i mtshan 'dzin pa'i rigs kyi bu'am/ rigs kyi bu mo dad pa can de'i mtshan de thos pa des sangs rgyas bcom ldan 'das bye ba phrag dgu mnyes par byed par 'gyur ro/ /sems can thams cad mchog tu 'gro bar byed pa zhes bya ba'i ting nge 'dzin thob par 'gyur ro/ /rgyu gang gis na sems can thams cad mchog tu 'gro bar byed ces bya zhe na/ rigs kyi bu'am rigs kyi bu mo gang la ting nge 'dzin 'di la gnas nas chos ston par 446b 'gyur zhing / de chos ston pa na ting nge 'dzin de'i chos nyid thob pas stong gsum gyi stong chen po'i 'jig rten gyi khams na sems can gang dag 'khod pa de dag thams cad bde ba dang ldan par 'gyur te| dper na/ de bzhin gshegs pa dgra bcom pa yang dag par rdzogs pa'i sangs rgyas yid 'ong gi sangs rgyas kyi zhing ni sems can rnams gcig tu bde ba dang ldan zhing / sems can ngan song du skyes pa thams cad yongs su thar par 'gyur te/ de dag de nas yongs su grol nas lha dang mi yi lus 'thob par 'gyur zhing bla na med pa yang dag par rdzogs pa'i byang chub tu nges par 'gyur ba bzhin no/ /de la 'di skad ces bya ste/ gser mchog 'od dpal gyi ni mtshan 'dzin pa/ /de la gzi brjid dpal mdog stobs dbang po/ /tshe rabs kun du rnyed par dka' ma yin| |de la blo thogs med pa mtha' yas 'gyur/ /yon tan rin chen me tog kun du rgyas pa/ nub byang mtshams kyi phyogs na sdig pa dang bral ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas gzi brjid kyi rgyal po rnam mang dpal snang zhes bya ba zhig da ltar bzhugs te 'tsho zhing gzhes pa yod de/ bskal pa de ni khyim rgyas pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gzi brjid kyi rgyal po rnam mang dpal snang de'i mtshan 'dzin pa'i rigs kyi bu'am/ rigs 447a @#/ /kyi bu mo dad pa can de ni tshe ba rjes ma thag tu spobs pa dpag tu med pa bkod pa zhes bya ba'i gzungs 'thob par 'gyur ro/ /tshegs chung dus de bzhin gshegs pa dgra bcom pa yang dag par rdzogs pa'i sangs rgyas tshe dpag med kyi sangs rgyas kyi zhing gi yon tan bkod pa 'dzin par 'gyur ro/ /sangs rgyas bye ba phrag brgyad cu'i chos ston pa yang thos par 'gyur/ 'dzin par 'gyur ro/ /de la 'di skad ces bya ste/ /gang zhig rgyal ba de yi mtshan 'dzin pa/ /tshe dpag med kyi sangs rgyas zhing du de/ /de ni tshe dpag med ldan chos shes 'gyur/ /skye gcig thogs pas byang chub rdzogs 'tshang rgya/ /yon tan rin chen me tog kun du rgyas pa/ byang shar mtshams kyi phyogs na mya ngan thams cad las brgal ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas bskal pa bye ba grangs med par byang chub yang dag par bsgrub pa zhes bya ba zhig da ltar bzhugs te 'tsho zhing gzhes pa yod do/ /bskal pa de ni spobs pa bkod pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bskal pa grangs med pa byang chub yang dag par bsgrubs pa de'i mtshan 'dzin pa'i rigs kyi bu'am/ rigs kyi bu mo dad pa can de ni tshe brjes ma thag tu rnam pa drug cu dang 447b ldan pa'i sgra dbyangs kyi spobs pa phun sum tshogs pa 'thob par 'gyur ro/ /sangs rgyas bye ba phrag brgyad cu la dge ba'i rtsa ba bskyed pa 'dzin par 'gyur ro/ /de la 'di skad ces bya ste/ /sgra dbyangs yan lag drug cu phun sum tshogs/ /de ni kun du shes pa'ang pha rol phyin/ /rgyal ba bye ba brgyad cu mchod byed pa'i/ /bsod nams gang yin bsam yas de 'thob 'gyur/ /yon tan rin chen me tog kun du rgyas pa/ steng gi phyogs na yon tan dpag tu med pa bkod pa'i gzi brjid kyi 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas gser bzang po dang nam mkha' nges par sgrogs pa bkod pa'i 'od ces bya ba zhig da ltar bzhugs te 'tsho zhing gzhes pa yod do/ /bskal pa de ni tshad med len zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzang po dang nam mkha' nges par sgrogs pa bkod pa'i 'od de'i mtshan 'dzin pa'i rigs kyi bu'am/ rigs kyi bu mo dad pa can de ni tshul khrims kyi phung po dpag tu med pa yongs su sbyong bar 'gyur ro/ /ting nge 'dzin gyi phung po dpag tu med pa dang / shes rab kyi phung po dpag tu med pa dang / rnam par grol ba'i phung po dpag tu med pa dang / rnam par grol ba'i ye shes mthong ba'i phung po dpag tu med pa yongs su sbyong bar 'gyur ro/ /sa nas sa yang 'thob par 'gyur ro/ /tshig bzung bar 'os pa nyid kyang 448a @#/ /'thob par 'gyur ro/ /spobs pa bul ba med pa phun sum tshogs pa yang 'thob par 'gyur ro/ /myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /yi ge dang sgra'i brda yang 'thob par 'gyur ro/ /rigs mthon po dang / rigs chen po yang 'thob par 'gyur ro/ /mngon par shes pa lnga yang 'thob par 'gyur ro/ /tshe rabs dran par yang 'gyur ro/ /sangs rgyas kyi chos ma 'dres pa bco brgyad kyang 'thob par 'gyur ro/ /de la 'di skad ces bya ste/ gang zhig rgyal ba'i mtshan mchog 'dzin byed pa/ /de ni yan lag brgyad dbyangs phun sum 'thob/ /de ni sangs rgyas bral bar yang mi skye/ /mi de mi thogs byang chub 'tshang rgyar 'gyur/ /yon tan rin chen me tog kun du rgyas pa/ 'og gi phyogs na tha dad pa med pa nyid la dga' ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas chos thams cad kyi tshul la rnam par 'phrul ba'i gzi brjid kyi 'od ces bya ba zhig da ltar bzhugs te 'tsho zhing gzhes pa yod do/ /bskal pa de ni ye shes kun nas bsdus pa zhes bya'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos thams cad kyi tshul la rnam par 'phrul ba'i gzi brjid kyi 'od de'i 448b mtshan 'dzin pa'i rigs kyi bu'am/ rigs kyi bu mo dad pa can de ni tshe brjes ma thag tu sangs rgyas yongs su 'grub pa zhes bya ba'i gzungs 'thob par 'gyur ro/ /skye ba gcig gis thogs pas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /sangs rgyas bye ba phrag dgu bcu'i chos bstan pa yang thos par 'gyur ro/ /thos nas kyang thams cad kun du 'dzin par 'gyur ro/ /de la 'di skad ces bya ste/ /sangs rgyas mtshan 'dzin sangs rgyas bye ba phrag /dgu bcu rnams kyi chos bstan thos 'gyur zhing / /skye ba gcig thogs bla na med pa yi/ /byang chub mngon par rdzogs par 'tshang rgyar 'gyur/ /de nas byang chub sems dpa' sems dpa' chen po yon tan rin chen me tog kun du rgyas pa dang / byang chub sems dpa' sems dpa' chen po yon tan rin chen thams cad dang ldan pa'i spobs pa'i skad kyis gzungs thob par gyur to/ /byang chub sems dpa' bye ba phrag brgyad cus bla na med pa yang dag par rdzogs pa'i byang chub las phyir mi ldog pa'i sa thob bo/ /lha dang mi yi skye dgu sum khris ni bla na med pa yang dag par rdzogs pa'i byang chub tu sems bskyed do/ /bcom ldan 'das kyis de skad ces bka' stsal nas/ byang chub sems dpa' sems dpa' chen po yon tan rin chen me tog kun du rgyas pa dang / thams cad dang ldan pa'i 'khor de dag dang / lha dang / 449a @#/ /mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las/ yon tan rin chen me tog kun du rgyas pas zhus pa'i le'u zhes bya ste/ 'dus pa sum cu rtsa bzhi pa rdzogs so|| ||rgya gar gyi mkhan po dzi na mi tra dang / pradz+nyA warma dang / zhu chen gyi lo ts+tsha ba ban de ye shes sde la sogs pas bsgyur cing zhus te gtan la phab pa// // |