rgya gar skad du/ AR+Ya badz+ra a dzi ta a na la pra mo ha ni nA ma d+ha ra NI/ bod skad du| 'phags pa rdo rje mi pham pa me ltar rab tu rmongs byed ces bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rin po che'i khang pa brtsegs pa can gyi ri'i gangs/ ri sul gyi mchog/ ri rab kyi smad dang rked ltar gser gyi rdo sna tshogs kyis gang zhing ri'ur bres pa 'bar ba/ rin po che'i rdo du ma'i 'od sna tshogs 'ja' lta bu byung ba'i rdo leb yangs pa/ me tog dri zhim po bkram zhing phye ma dang / bdug pa dri zhim pa mang pos phug gi nang dang nags bsgos pa/ bdug pa dang / a ga ru dang / phye ma dang / dril bu dang / bla res mdzes par byas pa'i ri bo mchog la bzhugs te de na bcom ldan 'das lha rnams dang / lha'i bu rnams dang / lha ma yin rnams dang / lha ma yin gyi bu rnams dang / lha rnams dang /nam mkha' lding rnams dang / klu rnams dang / gnod sbyin rnams dang / mi 'am ci rnams dang / srin po rnams dang / dri za rnams dang / rig sngags 'chang grub pa rnams dang / 335b 'byung po rnams dang / log 'dren rnams dang / sha za rnams dang / snang ba dang / mi snang ba'i ma mo'i tshogs khyab par byed pa rgya chen po dag gis dpag tshad lnga brgyar 'khor gyi dkyil 'khor du gyur par 'dus te/ de na gnas pa'i byang chub sems dpa' bdun khri lnga stong dang / dge slong khri nyis stong lnga brgya dang thabs cig go/ bcom ldan 'das ni| chos ston te/ gnas par bde ba/ mnyan na bde ba/ 'khor ba las nges par 'byung ba'i chos ston to/ /de na lha rnams dang / lha'i bu rnams dang / lha ma yin rnams dang / lha ma yin gyi bu rnams dang / rlung lha rnams dang / rlung lha'i bu rnams dang / nam mkha' lding rnams dang / klu rnams dang / gnod sbyin rnams dang / mi'am ci rnams dang / srin po rnams dang / srin po'i bu rnams dang / dri za rnams dang /rig sngags grub pa rnams dang / 'byung po rnams dang / log 'dren rnams dang / sha za rnams dang /snang ba dang / mi snang ba'i ma mo'i tshogs rnams dang / 'byung po'i tshogs rnams rnam par rgyu zhing ku co dang / 'jigs pa dang / nyam thag pa'i sgra 'byin to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pas sgra de dag gsan nas 'di skad ces bka' stsal to/ /kye bzhin bzang 336a @#/ /dag /ci'i phyir ku co dang / 'jigs pa dang / nyam thag pa dang / 'khrug pa'i sgra 'byin/ de dag gis gsol pa/ bcom ldan 'das /bdag cag ni/ dag du bgyis te/ gnod pa dang drang bas bkug cing drangs te mtho brtsams na/ bcom ldan 'das/ bskyab tu gsol/ de skad ces gsol pa dang / bcom ldan 'das kyis thams cad kyi steng gi dkyil 'khor yangs pa ston pa'i mchog gi blo gros dang / blo dang / las dang / las kyi mtha' dang ldan pa/ sa chen po las sa gzhan thob pa rgyal tshab tu nye ste chos kyi rgyal srid la dbang bskur ba'i byang chub sems dpa' sems dpa' chen po rjes su dgongs par mdzad pa tsam gyis 'ongs te/ rdo rje'i zom ltar dpung mgo yangs pa/ rdo rje ltar mkhregs pa'i cod pan 'od zer 'tsher ba can rdo rje'i dpung rgyan dang ldan pa/ lus mkhregs shing sra ba/ lag na rdo rje dang / zhags pa dang / lag cha brtan po 'bar ba thogs pa/ rdo rje phur bu sra bas rab tu 'joms par byed pa/ mthu chen po g.yog bzhi 'bum lnga khri dang ldan pa/ 'jig rten gyi khams 'di kun tu snang bar byed cing rdo rje'i rigs kyi gzhon nu dang / rdo rje'i be con dang / rdo rje'i snying po dang / rdo rje'i tog dang / rdo rje'i snang ba dang / rdo rje sngon po dang / 336b rin po che'i rdo rje dang / gsang ba'i rdo rje dang / 'khor lo rdo rje la sogs pa dang / rdo rje'i dmag dpon chen po rnams dang / dmag skyong rnams dang / sa skyong rnams dang / rdo rje rigs pa'i rgyal po yang dag pa dang / yang dag pa ma yin pa yang dag par rtogs pa rnams dang / rdo rje'i yum rnams dang / rdo rje rnam par 'dren rnams dang lhan cig tu rdo rje gzhon nu'i gdon rnams dang / rdo rje gnon po rnams dang / rdo rje rmi lam ngan byed rnams yang dag par bskul/ rnam par bskul zhing 'khor gyi khyams chen por 'dus pa kun snang bar byed/ rnam par snang bar byed/ gsal bar byed/ rnam par gsal bar byed/ rab tu dga' bar byed/ yang dag par bskul/ so sor bskul zhing bcom ldan 'das ga la ba der song ste bla gos phud nas zhabs la cod pan gyis gtugs te lan gsum du bskor ba byas nas thal mo sbyar te phyogs gcig tu 'dug go/ de nas bcom ldan 'das kyis rjes su yi rang ba mdzad de/ rdo rje 'chang / khyod song la lha rnams dang / lha'i bu rnams dang / lha ma yin rnams dang / lha ma yin gyi bu rnams dang / rlung lha rnams dang / rlung lha'i bu rnams dang / nam mkha' lding rnams dang /nam mkha' lding gi bu rnams dang / 'dus pa chen po'i bar dag sgra 'byin cing nyam thag 337a @#/ /pa myong ba rnams kyi bsam pa rdzogs par gyis shig /de nas rdo rje 'chang stan las langs te lha dang / lha ma yin dang / rlung lha dang / nam mkha' lding dang / 'byung po'i tshogs kyi nang du song nas rjes su ston cing rdo rje mtshon cha'i me sgron zhes bya ba'i ting nge 'dzin la snyoms par zhugs te/ rdzu 'phrul gyis stong gsum gyi stong chen po'i 'jig rten gyi khams su me lce 'bar ba'i 'od 'phro ba dang / me stag rnam par 'phro ba dang / lce 'bebs pa'i glog rnams kyis 'jig rten gyi khams rnams gzir to/ /de nas bskal pa chen po sngar rmi lam dang / chu dang / gang+gA'i klung gi bye ma'i grangs kyi tshad tsam dag gis mdangs dang / gzi brjid dang / tshangs par spyod pa dang / gtsang ma dang / bzod pa dang / tshul khrims dang / brtul zhugs dang / dka' thub dang / rang gi longs spyod thams cad las byung ba'i las grub pa'i rdo rje de byang chub sems dpa' lag na rdo rje de'i lag tu byin no/ /de ni/ sangs rgyas bcom ldan 'das rnams kyi gsung rab gyi chos ston par gyur pa/ dgra bcom pa rnams kyi chos dang tshul khrims dang / ting nge 'dzin byed pa/ byang chub sems dpa' rnams kyi pha rol tu phyin pa dang / tshul khrims dang / bzod pa dang / snying rje byed ba/ rang gi rdo rje dang / 337b rigs kyi rig pa dang / dkyil 'khor dang / bklags pa'i tshul du gyur pa/ drag po dang / dbang po dang / gshin rje dang / chu lha dang / lus ngan dang / rlung lha dang / nam mkha' lding gdul dka' ba rnams 'dul ba ste/ de ltar de las byung ba'i bcom ldan 'das khro bo drag po rnams rmongs par byed pa/ sgyu dang ldan pa rnams rmugs par byed pa/ sdang ba rnams skyong pa/ rmongs pa rnams 'jigs pa/ dam po rnams rtsad nas 'don pa/ rgyas pa rnams spur mar rlog pa/ yon po rnams srong ba/ gcod pa rnams snying rjes byed ba/ 'byung po rnams skrag par byed pa/ srin po rnams sdangs par byed pa/ rang gi gsang sngags rnams rdzogs par byed pa/ gzhan gyi gsang sngags rnams phur bus 'bebs pa| nus pa rnams ston par byed pa/ gsod par byed pa gsod pa/ gnod par byed ba phung bar byed pa de der song nas lha rnams dang / lha'i bu rnams dbang du byed de/ de ltar drag po drag po grub pa dang / khyab 'jug pa khyab 'jug pa dang / lha ma yin pa lha ma yin grub pa dang / de dag spyir bskul zhing dkyil 'khor du 'jug/ skyod par byed/ mthu ston par byed/ brjed par byed/ rnam par skrag par byed do/ /stobs bcu'i dgongs pa bka' stsal pa'i rdo rje 'chang gis mi pham pa me ltar rab tu rmongs byed ces bya ba'i 338a @#/ /gzungs gsungs pa dang / gzungs 'di'i stobs dang / bden pa'i byin gyi rlabs kyis 'od kyi 'od zer gyi dkyil 'khor chen po las byung ba'i 'od zer rnams kyis rdo rje dang bcas pa'i lag na rdo rje bskul nas 'od des de rab tu dga' ste rdo rje las snang ba bkye ba rnams kyis sa gsum gyi ston gyi skar ma dang / zla ba'i 'od zil du brlags par byas nas snang ba gcig pur byed cing rgya mtsho chen po ni/ skem/ ri'i rgyal po ri rab ni/ g.yo bar byed/ glog gi 'khor lo dang / lce 'bebs pa'i 'brug ni| bsgrags/ sgra drag po ni/ phyung / bsgyings pa'i sgra ni/ bsgrags/ skrag par ni/ byas so/ /de na rdo rje mi pham pa me ltar rab tu rmongs byed ces bya ba'i gzungs me lce 'od 'phro chen po khong na 'dug pa/ skra tshogs gser dang rin po che 'dra ba/ rdo rje 'chang ba rdo rje'i bu mo zhes bya ba'i bcom ldan 'das ma des lan gsum bskor ba byas nas yid ches mgyogs pa'i shugs 'od 'phro zhing 'bar ba lta bur drag pas/ byang chub sems dpa' sems dpa' chen po rdzu 'phrul chen po la skyabs su song ngo / /de 'ongs pa dang / 'phags pa rdo rje 'chang gis smras pa/ skal ba chen po dge ma/ de bzhin gshegs pa'i ting nge 'dzin gyi sems dang ldan ma 'di dag la lag cha dang 338b mthun par bya ba'i stobs byin cig /de nas gzungs kyis smras pa/ 'di dag bka' stsal pa de bzhin du bgyi'o/ /zhes lan gsum tshig tu smras so/ /thor tshugs gsum ma/ sa gsum dang / dus gsum dang / drag po'i rtse gsum dang / khyab 'jug gi 'khor lo dang / gshin rje'i be con dang / lus ngan gyi dbyug tho dang / dbang po'i rdo rje dang / chu lha'i zhags pa dang / log 'dren rnams kyi bgegs dang / lha ma yin rnams kyi sgyu dang / rlung lha rnams kyi gzi dang / shugs dang / grub pa rnams kyi rmongs byed dang / ma mo'i tshogs rnams kyi gcod pa dang / klu rnams kyi dam tshig dang / dug dang / khro bo dang / gnod sbyin dang / srin po dang / mi 'am ci dang / sha za dang / 'byung po dang / tshangs pa'i srin po dang / grul bum dang / bden bral dang / gnon po dang / ro langs kyi skabs su rgol ba rnams dang / de bzhin du thams cad kyang skyongs shig /mig gi 'dzum pa tsam gyis yud tsam la thams cad mchod nas lag na rdo rje la snying po 'di phul te smras pa/ dkon mchog gsum la phyag 'tshal lo/ /gnod sbyin gyi sde dpon chen po lag na rdo rje drag po la phyag 'tshal lo/ /tad+ya thA/ ta thA ga ta sa mA d+ha d+hI ra Ni/ ma hA A brta yi Sh+yA mi/ a hi badz+re/ ku Ti le/ ko Ti pA ba kA ku la shi khi/ ka pi la ke shi/ ta Ti tsi Ti mi Ti mi/ karka 339a @#/ /Ta mu Ti ba Ta Ti badz+re/ ma hA bi d+hu la lo le/ pu gu pu lu/ su mu su mu/ sa ra sa ra/ phaT phaT/ su d+yo te/ piM ga le tsi te/ bi tsa Ti/ dz+wa la Ti/ dz+wa la ping+ga le sarba de ba ga Na/ pra ha ra Na mA yA/ sid+d+ha dA yi ke /su ru ke /ku ru ka /badz+ra g+ho Ne/ badz+ra dr-i D+ha/ sA ra pra ha ra Ne/ rat+na tra ya/ da kri la bud+d+he te/ badz+ra d+ha ra bi shwa sa ni ka /a pra ti ha ta pra mard ni swAhA/ gang gsang sngags 'di rjes su dran nas klog gam /sgom mam/ 'dzin pa de thos na/ ngan 'gro log par ltung bar 'gro bar mi 'gyur ro/ /'jig rten pa dang / 'jig rten las 'das pa'i dkyil 'khor thams cad la mchod pa byas par 'gyur ro/ /dam tshig dang / phyag rgya la zhugs par 'gyur ro/ /bsam ba dang rjes su yi rang bas 'gugs par byed do/ /dug dang / gsang sngags dang / mdud pa dang / rdeg pa dang / 'ching ba'i 'jigs pa la sogs pa rnam par skrag par byed do/ /de nas lha dang / lha'i bu de dag gis de'i mthus bcom ldan 'das rdo rje 'chang de'i rnam par rol pa dang / bcom ldan 'das kyis gsungs pa rnam pa mang po du ma yang myong nas steng gi gnas gtsang ma dang / 'og min gyi lha dang / 'jig rten gyi khams gzhan na gnas pa dag gis 'od dang ldan pa'i me tog dang / bdug pa'i sprin dang / rin po che 339b mang po'i char rgya chen pos mchod nas bstod pa snyan pas bstod de/ snyan cing zab la rnga sgra lta bu dang / bsil ba dang / bsod nams kyi tshigs su bcad pa dag kyang smras so| |bcom ldan 'das kyis de skad ces bka' stsal nas dge slong de dag dang / byang chub sems dpa' de dag dang / thams cad dang ldan pa'i 'khor de dag yi rang ste bcom ldan 'das kyis gsungs pa la mngon par bstod do/ /'phags pa rdo rje mi pham pa me ltar rab tu rmongs byed ces bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban+d+he ye shes sdes bsgyur cing zhus te skad gsar bcad kyis kyang bcos nas gtan la phab pa/ |