dpal gyi lha mo'i mtshan bcu gnyis pa/ /dkon mchog gsum la phyag 'tshal lo/ /'phags pa spyan ras gzigs dbang phyug la phyag 'tshal lo/ /phyag na rdo rje la phyag 'tshal lo/ / dpal lha mo chen mo la phyag 'tshal lo/ /'di skad bdag gis thos pa dus gcig na/ bcom ldan 'das bde ba can gyi 'jig rten na bzhugs te/ de nas byang chub sems dpa' sems dpa' chen po spyan ras gzigs dbang phyug bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te phyogs 110b gcig tu 'dug go/ /de nas byang chub sems dpa' sems dpa' chen po dpal lha mo chen mo yang bcom ldan 'das ga la ba der song ste drung du phyin nas bcom ldan 'das kyi zhabs gnyis la mgo bos phyag 'tshal te phyogs gcig tu 'dug go /de nas bcom ldan 'das kyis dpal chen mo la gzigs nas spyan ras gzigs dbang phyug la 'di skad ces bka' stsal to/ / spyan ras gzigs dbang phyug /dge slong ngam/ dge slong ma'am/ dge bsnyen nam/ dge bsnyen ma'am/ sems can gang su yang rung bas dpal chen mo 'di'i ming bcu gnyis shes te 'chang ba dang / klog pa dang / sgrub par byed pa dang / brjod par byed na/ de dbul po spangs nas phyug po chen por 'gyur ro/ /de nas 'byung po'i tshogs thams cad kyis kyang de bzhin du gyur cig ces smras so/ /dpal lha mo chen mo'i ming bcu gnyis 'di lta ste/ bkra shis ma/ dpal ldan ma/ pad+ma'i phreng thogs ma/ nor bdag ma/ dkar sham ma/ grags chen ma| pad+ma spyan mnga' ma/ 'od chen ma/ byed pa mo/ zas sbyin ma/ rin chen 'od ldan ma/ dpal chen mo ma/ sangs rgyas thams cad la phyag 'tshal lo/ /spyan ras gzigs dbang phyug la phyag 'tshal lo/ /dpal chen mo la phyag 'tshal lo/ /'di lta ste/ dzi ni/ g+h+ri ni/ dgos pa thams cad sgrub par mdzad ma/ si mi si mi/ ni mi ni mi/ bdag gi mi 111a @#/ /shes pa thams cad bsal bar mdzod cig swAhA/ bcom ldan 'das kyis de skad ces bka' stsal pa dang / byang chub sems dpa' sems dpa' chen po spyan ras gzigs dbang phyug bcom ldan 'das kyis bka' stsal pa la mngon par dga'o/ /dpal gyi lha mo'i mtshan bcu gnyis rdzogs so// //rgya gar gyi mkhan po dzi na mi tra dang / zhu chen gyi lots+tsha ba ban+d+he ye shes sdes bsgyur cing zhus te gtan la phab pa/ |