rgya gar skad du/ AR+Ya ba su d+ha ra nA ma d+hA ra Ni/ bod skad du/ 'phags pa nor gyi rgyun zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das kau sham+b+hi na tsher ma can zhes bya ba'i nags chen po na dge slong lnga brgya tsam gyi dge slong gi dge 'dun chen po dang / byang chub sems dpa' sems dpa' chen po sangs rgyas kyi yon tan 177b thams cad dang ldan pa rab tu mang po dang thabs cig tu bzhugs te/ de'i tshe kau sham+b+hi pa'i grong khyer chen po na khyim bdag zla ba bzang po zhes bya ba/ dbang po nye bar zhi ba/ yid nye bar zhi ba/ bu pho dang bu mo mang ba/ bza' mi mang po dang ldan pa/ dad cing cher dad pa zhig gnas pa de bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te lan 'bum phrag du mar bskor ba byas nas phyogs gcig tu 'dug go/ /phyogs gcig tu 'dug nas khyim bdag zla ba bzang pos bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /de skad ces gsol ba dang / bcom ldan 'das kyis khyim bdag zla ba bzang po la 'di skad ces bka' stsal to/ /khyim bdag /khyod ci dang ci 'dod pa dris shig dang / khyod kyis ji ltar dris pa'i dri ba lung bstan pas ngas khyod kyi sems rangs par bya'o/ /de skad ces bka' 178a @#/ /stsal pa dang / khyim bdag zla ba bzang pos bcom ldan 'das la legs so zhes gsol te/ bcom ldan 'das kyi ltar nyan nas bcom ldan 'das la 'di skad ces gsol to/ /bcom ldan 'das/ rigs kyi bu'am/ rigs kyi bu mo dbul por gyur pa las ji ltar dbul ba ma mchis par 'gyur zhing / bro nad kyis thebs na yang bro nad ma mchis par 'gyur pa lags/ de nas bcom ldan 'das kyis mkhyen bzhin du khyim bdag zla ba bzang po la 'di skad ces bka' stsal to/ /khyim bdag /khyod ci'i phyir dbul po'i don du 'dri/ de skad ces bka' stsal pa dang / bcom ldan 'das la khyim bdag zla ba bzang pos 'di skad ces gsol to/ /bcom ldan 'das/ bdag ni/ dbul ba mang ba dang / gso ba mang ba dang / bu pho dang bu mo mang ba/ bza' mi mang po dang ldan pa lags te/ de'i slad du/ gang gis sems can dbul por rnams kyi dbul ba ma mchis par 'gyur ba dang / bro nad kyis thebs pa rnams bro nad ma mchis par 'gyur pa dang / nor dang / 'bru dang / mdzod dang / bang mdzod 178b mang po dang ldan par 'gyur ba dang / sdug pa dang / yid du mchis pa dang / mthong na yid du 'thad pa dang / dbang phyug tu 'gyur pa dang / sbyin pa bdag mdzod pas mi 'tshal zhing / dbyig dang / gser dang / nor dang / 'bru'i mdzod dang / bang mdzod rnams dang / nor bu dang / mu tig dang / rdo rje dang / bai DUR+Ya dang / dung dang / man shel dang / byi ru dang / sa le sbram dang / dbul bas ma 'tshal cing 'byor par 'gyur ba dang / khyim gyi bu smad dang / bza' mi rnams brtan par 'gyur ba'i chos kyi rnam grangs de bcom ldan 'das kyis legs par bshad du gsol/ de skad ces gsol ba dang / bcom ldan 'das kyis khyim bdag zla ba bzang po la 'di skad ces bka' stsal to/ /khyim bdag /'das pa'i dus bskal ba grangs med pa 'das par gyur pa de'i tshe de'i dus na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa sangs rgyas bcom ldan 'das rdo rje 'chang rgya mtsho'i 179a @#/ /dbyangs zhes bya ba 'jig rten du byung ste/ rigs kyi bu/ ngas de bzhin gshegs pa de las nor gyi rgyun zhes bya ba'i gzungs 'di thos te/ bzung zhing bcangs/ bklags/ kun chub par byas/ rjes su yi rang bar byas shing / gzhan dag la yang rgya cher yang dag par rab tu bstan te/ rigs kyi bu/ da yang ngas de bshad par bya'o/ /rigs kyi bu/ gzungs 'di'i mthus mi rnams rnam par mtho 'tsham par mi byed do| |mi ma yin pa rnams rnam par mtho 'tsham par mi byed do/ /gnod sbyin rnams rnam par mtho 'tsham par mi byed do/ /srin po rnams rnam par mtho 'tsham par mi byed do/ /yi dwags rnams rnam par mtho 'tsham par mi byed do/ /sha za rnams rnam par mtho 'tsham par mi byed do/ / 'byung po rnams rnam par mtho 'tsham par mi byed do/ /grul bum rnams rnam par mtho 'tsham par mi byed do/ /brjed byed rnams rnam par mtho 'tsham par mi byed do/ /gnon po rnams rnam par mtho 'tsham par mi byed do/ /lus srul po rnams rnam par mtho 'tsham par mi byed do/ /lha rnams rnam par 179b mtho 'tsham par mi byed do/ /lha ma yin rnams rnam par mtho 'tsham par mi byed do/ /zas su mi gtsang ba za ba rnams dang / zas su gcin 'thung ba rnams dang zas su khrag 'thung ba rnams dang / zas su sha za ba rnams dang / zas su rnag 'thung ba rnams dang / zas su zhag za ba rnams dang / zas su rkang za ba rnams dang / zas su ngar snabs za ba rnams dang / zas su gtor khung nas 'bab pa 'thung ba rnams dang / zas su dbugs rngub pa rnams dang / 'byung ba za ba'i bar rnams rnam par 'tshe bar mi 'gyur ro/ /rigs kyi bu/ nor gyi rgyun gyi gzungs 'di rigs kyi bu'am/ rigs kyi bu mo gang gi khyim na yod dam/ snying la yod dam/ lag na yod dam/ glegs bam du chud dam/ thos par gyur tam/ kun chub par byas sam/ bklags sam/ bzung ngam/ rjes su yi rang bar byas sam/ gzhan dag la rgya cher rab tu bstan pa'i rigs kyi bu'am/ rigs kyi bu mo de la yun ring po'i don dang / phan pa dang / dge ba dang / grub pa dang / bde ba dang / lo legs bar 'gyur ro/ /su zhig de bzhin gshegs pa rnams la mchod pa byas te nor gyi rgyun gyi gzungs 'di 180a @#/ /nam phyed na lan gnyis sam/ lan gsum mam/ lan bzhi bton na/ de'i lha yid rangs te de bzhin gshegs pa'i bstan pa la dga' ba dang / chos gdags pa byas pas dga' ba dang / dge 'dun gdags pa byas pas dga' ba dang / chos smra ba la dga' ba dang / lhag pa'i bsam pas bdag nyid 'ongs te 'bru'i char 'bebs so/ /na mo badz+ra d+ha ra sA ga ra nir g+ho ShA ya/ ta thA ga tA ya/ tad+ya thA/ oM su ra be/ b+ha dre/ b+ha dra ba ti/ aM ga le/ maM ga le/ maM ga le ba ti/ a le/ a tsa le/ a ra le/ a tsa ba le/ ud b+he da ni/ pa s+ya pa ti/ dA na pa ti/ d+ha ma pra ti/ shrI ma ti/ pra b+ha ba ti/ a ma le/ bi ma le/ ni rma le/ ru ru/ su ra pe/ su rU pa ma le/ bi ma le/ tsa le/ a tsan+te/ a nan+te/ bi nan+te/ bi shwa ke shai/ pi shwa ni shi/ aM ku re/ maM ku re/ pra baM ku re/ bI ra me/ bI ra me/ bi d+ha ma/ ri ri me/ di di me/ du du me/ kha kha me/ ta ta re/ ta re ta ra| tA ra tA ra/ badz+re badz+re badz+re/ ba me/ Ta ke Ta ke/ tha ke tha ke/ u ka ke buka ke/ tha ke tha ra ke/ a brta ni/ baR+Sha ni/ Sha da ni badz+ra d+ha ra sA ga ra nir g+ho Sha 180b Na/ ta thA ga ta ma nu sma ra/ sma ra sma ra/ sarba ta thA ga tA sa t+ya ma nu sma ra/ d+harma sat+ya ma nu sma ra/ saM g+ha sa t+ya ma nu sma ra/ da ta da ta/ pu ra pu ra/ pU ra ya pU ra ya/ pU ra Ni/ b+ha ra b+ha ra Ni/ a ma le/ su maM ga le/ shAn+ta ma ti/ shu b+ha ma ti/ maM ga la b+ha ni/ ma hA ma ti/ ma hA ma ti/ b+ha dra ba ti/ pra b+hA ba ti/ su tsan+d+ra ma ti/ A gats+tsha gats+tsha/ sa ma ya ma nu sma ra swAhA/ A ba ra Ni ma nu sma ra swAhA/ pra b+ha ba ma nu sma ra swAhA/ di di ma nu sma ra swAhA/ te dzo ma nu sma ra swAhA/ bi dza ya ma nu sma ra swAhA/ hr-i da ya ma nu sma ra swAhA/ sarba satwa bi na ya ma nu sma ra swAhA/ oM bA su d+ha ra swAhA/ oM bA su shrI ye swAhA/ oM sh+'+ri bA su swAhA/ oM ba su swAhA/ rigs kyi bu/ 'di ni/ nor gyi rgyun ches bya ba'i gzungs te/ gzungs 'di'i mthus mu ge dang / nad dang / 'chi ngas 'byung bar mi 'gyur ro/ /rigs kyi bu/ su zhig de bzhin gshegs pa dgra bcom pa yang dag par rdzogs pa'i sangs rgyas rnams la mchod pa byas te nor gyi rgyun gyi gzungs kyi gsang sngags kyi tshig 'di dag nub gcig bton na/ de nas dngos grub tu 'gyur ro/ /rgyas pa'i don du bdag gi khyim mam/ gzhan 181a @#/ /gyi khyim mam/ gnas gtsang ma'i bang mdzod dam/ gnas gang yang rung bar de bzhin gshegs pa spyan ras gzigs dbang phyug dang / sangs rgyas dang / byang chub sems dpa' thams cad dang / gsang sngags kyi lha'i phyir tsan+dan gyi dkyil 'khor gru bzhir byas te nub gcig bton na/ rigs kyi bu/ de'i khyim nor dang / 'bru dang / gser dang / dngul dang / yo byad thams cad kyi rgyun mi chen po'i tshad tsam gyis gang bar 'gyur ro/ /'jigs pa dang gnod pa thams cad kyang med par 'gyur ro/ /rigs kyi bu/ de'i phyir khyod rab tu bsgrims la nor gyi rgyun gyi gzungs 'di zungs shig /chongs shig /lhogs shig /ston cig /gzhan dag la yang rgya cher yang dag par rab tu ston cig dang / des khyod kyi yun ring po'i don dang / phan pa dang / bde bar 'gyur ro/ /bcom ldan 'das/ legs so/ /zhes gsol te khyim bdag zla ba bzang pos bcom ldan 'das las nor gyi rgyun gyi gzungs 'di thos nas tshim zhing dga' la mgu zhing yid rangs te rab tu dga' nas dga' ba dang / yid bde ba skyes te/ 181b bcom ldan 'das kyi zhabs la mgo bos phyag 'tshal nas bcom ldan 'das la 'di skad ces gsol to/ /bcom ldan 'das/ bdag gis nor gyi rgyun ces bgyi ba blangs lags/ gzungs su zin lags/ bzung lags/ bklags lags/ kun chub par bgyis lags/ rjes su yi rang bar bgyis lags so| |gzhan dag la yang rgya cher yang dag par rab tu bstan par bgyis lags so/ /de'i skad cig cam la khyim bdag zla ba bzang po'i bang mdzod rnams yongs su gang bar gyur to/ /de nas khyim bdag zla ba bzang pos bcom ldan 'das la lan 'bum phrag du mar bskor ba byas te bcom ldan 'das kyi zhabs la phyag 'tshal nas bcom ldan 'das kyi thad nas song ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo/ khyod song la khyim bdag zla ba bzang po'i khyim nor dang / 'brus yongs su gang ba phun sum tshogs pa dang / mdzod chen po dang / bang mdzod yongs su gang ba rnams la ltos/ de nas tshe dang ldan pa kun dga' bos bcom ldan 'das kyi ltar mnyan nas kau sham+b+hi'i grong khyer chen po ga la ba dang / 182a @#/ /khyim bdag zla ba bzang po'i khyim ga la ba der song ste phyin nas nang du zhugs pa dang / nor dang / 'brus yongs su gang ba phun sum tshogs pa dang / rin po che phun sum tshogs pa dang / yo byad thams cad kyi mchod pa chen po dang / bang mdzod rnams kyang yongs su gang bar mthong ngo / /mthong nas kyang tshim zhing dga' la mgu zhing yid rangs te rab tu dga' nas dga' ba dang / yid bde ba skyes te bcom ldan 'das ga la ba der song ngo / /de nas tshe dang ldan pa kun dga' bo ya mtshan du 'dzin cing dga' ba dang / yid bde ba skyes nas bcom ldan 'das la 'di skad ces gsol to| |bcom ldan 'das/ gang gis khyim bdag zla ba bzang po nor mang zhing mdzod chen po dang / bang mdzod rnams kyang nor dang / 'bru phun sum tshogs pa'i rgyu gang lags/ rkyen gang lags/ bcom ldan 'das kyis bka' stsal pa/ kun dga' bo/ rigs kyi bu khyim bdag zla ba bzang po dad cing mchog tu dad la dge ba'i bsam pa can des nor gyi rgyun gyi gzungs 'di bzung zhing rab tu bton te blangs shing bklags/ kun chub par byas/ rjes su 182b yi rang bar byas shing / gzhan dag la yang rgya cher yang dag par rab tu bstan pa'i phyir ro/ /kun dga' bo/ de'i phyir khyod kyis kyang nor gyi rgyun gyi gzung 'di longs shig /chongs shig /lhogs shig /ston cig /zungs shig /kun chub par gyis shig /gzhan dag la yang rgya cher yang dag par rab tu ston cig dang / de ni/ skye bo mang po la phan pa dang / skye bo mang po la bde ba dang / 'jig rten la snying brtse ba dang / skye bo phal po che dang / lha dang / mi rnams kyi don dang / phan pa dang / bde bar 'gyur ro/ /kun dga' bo/ su zhig rig sngags 'di las gzhan du smra ba ni/ lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram zer bcas pa dang / lha dang mi dang lha ma yin du bcas pa'i 'jig rten na ngas ma mthong ngo / /lan gnyis su bton tam/ lan gsum du bton kyang 'gal bar byed pa de ni/ gnas med do/ /kun dga' bo/ gzungs kyi gsang sngags kyi tshig 'di dag ni| mi phyed pa yin no/ /kun dga' bo/ 'di dag ni/ sems can dge ba'i rtsa ba zad pa rnams kyi rna lam du grags par mi 'gyur na/ glegs bam la yi ge 183a @#/ /ger 'bri ba dang / yid la gzung ba lta ci smos/ de ci'i phyir zhe na/ 'di ni/ de bzhin gshegs pa thams cad kyi bka' ste/ gzungs sngags 'di ni/ sems can dbul po dang / nad sna tshogs kyis gzir ba dang / 'jigs pa dang / sems can sdang bas gnod par byas pa thams cad kyi don du de bzhin gshegs pa thams cad kyis gsungs pa dang / bshad pa dang / rjes su yi rang ba dang / rab tu phye ba dang / bsngags pa dang / bkrol ba dang / gsal bar mdzad pa dang / bskyed pa dang / byin gyis brlabs pa dang / chos kyi phyag rgyas btab pa dang / bstod pa dang / snyan par brjod pa dang / go bar mjad pa dang / bsnyad pa'i phyir ro/ /de nas tshe dang ldan pa kun dga' bo stan las langs te de'i tshe thal mo sbyar nas ched du brjod pa 'di ched du brjod cing tshigs su bcad pa 'di dag gsol to/ /sangs rgyas bcom ldan bsam gyis mi khyab ste/ /sangs rgyas chos kyang bsam gyis mi khyab lags/ /bsam gyis mi khyab pa la dang rnams kyi/ /rnam par smin pa'ang bsam gyis mi khyab lags/ /zhi ba ci yang mkhyen pa thams cad mkhyen/ / 183b chos kyi rgyal po rga shi mi mnga' ba/ /ye shes pha rol bgrod par byon gyur pa/ /sangs rgyas dpa' po khyod la phyag 'tshal lo/ /de nas tshe dang ldan pa kun dga' bo tshim zhing dga' la mgu zhing yid rangs nas rab tu dga' ste/ dga' ba dang / yid bde ba skyes nas bcom ldan 'das la 'di skad ces gsol to/ / bcom ldan 'das/ chos kyi rnam grangs 'di'i ming ci lags/ ji ltar gzung bar bgyi/ /bcom ldan 'das kyis bka' stsal pa/ kun dga' bo/ 'di ni| khyim bdag zla ba bzang pos zhus pa zhes bya bar zungs shig /nor dang / 'bru dang / rin po che thams cad kyi gter zhes bya bar yang zungs shig /de bzhin gshegs pa thams cad kyis bsngags pa nor gyi rgyun gyi gzungs zhes bya bar yang zungs shig /bcom ldan 'das kyis de skad ces bka' stsal nas tshe dang ldan pa kun dga' bo dang / dge slong de dag dang / byang chub sems dpa' de dag dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yid rangs te bcom ldan 'das kyis gsungs pa la mngon par bstod do/ /'phags pa nor gyi rgyun zhes bya ba'i 184a @#/ /gzungs rdzogs so// // |