rgya gar skad du/ AR+Ya mai tri nA ma aSh+To t+ta ra sha ta ka d+hA ra Ni man+t+ra sa hi ta/ bod skad du/ 'phags pa byams pa'i mtshan brgya rtsa brgyad pa gzungs dang bcas pa/ byang chub sems dpa' sems dpa' chen po byams pa la phyag 'tshal lo/ /de nas byang chub sems dpa' sems dpa' chen po byams pas rang gi snying po smras pa/ na mas+t+rai ya d+h+wi kA nAn/ sarba thA ga tA nAn/ ta d+ya thA/ oM sa ra sa ra/ su ru su ru/ d+ha ra d+ha ra/ ma hA d+ha ra/ tsa ra tsa ra/ ma hA tsa ra/ b+ha ra b+ha ra/ ma hA b+ha ra/ kam+pa kam+pa/ ma hA kam+pa hUM/ ma hA s+pha ra Na/ d+harma a gra sA ga ra swA hA/ de nas de bzhin gshegs pa thams cad kyis 'di skad ces bka' stsal to/ / kye ma gzungs chen po 'di ni yon tan che ba ste/ mtha' yas par khyab pa/ bskal pa bye ba phrag mang por yang shin tu thos par dka' ba/ sangs rgyas 'byung ba thams cad ston pa/ de bzhin gshegs pa grangs med pa 'jig rten gyi khams thams cad snyed kyis bsnyen bkur mdzad pa/ sgrib pa dang / sdug bsngal ba dang / 'khrug pa dang / rmi lam ngan pa dang / ltas ngan pa thams cad las thar bar byed pa/ sems can gyi khams mtha' yas mu med pa yongs su thar bar byed pa 66b ste| shin tu dkon pa'o/ /de nas rdo rje dkyil 'khor gyi 'khor lha dang / lha ma yin du bcas pa nor bu'i cod pan gyis bsgyings pa/ rgyan phreng rab tu g.yo ba rnams kyis spyi bor thal mo sbyar nas byang chub sems dpa'i mchog 'phags pa byams pa la mtshan brgya rtsa brgyad kyis mngon par bstod pa/ dpa' bo chen po thabs brnyes pa/ /rgyal tshab mi yi bdag po ste/ /'jig rten bdag po rnam par gsal/ /dar ba chen po mngon par rgyas/ /tshan chen stobs ldan che ba ste// de bzhin gshegs shing rdul dang bral/ /dbang chen brtse ldan 'od ldan pa/ /sa yi dbang phyug rnam par gnon/ /rgyal chen mtshon che brgya pa ste/ /mtshon cha chen po rdo rje'i mtshon/ /yon tan 'od rgyas bsgyings pa ste/ /nor bu'i rna cha'i rgyan thogs pa/ /srid gsum dge na dpa' ba'i sku/ /rgya mtsho lta bu'i spyod yul can// lhun po zla 'byin ti se yi/ /rtse nas dkyil 'khor 'char ba po/ /dkyil 'khor chen po longs spyod pa/ /rab tu dga' ba de bzhin des/ /yongs su dga' ldan chen po'i lha/ /che ba lha rnams kun gyi mchog /sangs rgyas gdung brgyud rgyas mdzad cing / /sangs rgyas dkyil 'khor rgyan dang ldan/ /sangs rgyas longs spyod 67a @#/ /longs par spyod/ /sangs rgyas bstan pa ston pa po/ /ti si zla 'byin bzhin du gnas/ /sa yi dbang phyug bde mdzad pa/ /rdo rje'i pad+ma legs par skyes/ /chos kyi longs spyod longs par spyod/ /sa dang mnyam pa thub par dka'/ /snang bar byed pa 'byung ba po/ /srid gsum ye shes nyi ma lags| |gtso bo chen po cher grags pa/ /seng+ge chen po stobs po che/ /cha lugs chen po zhal che ba/ /skye bo ngan dang sdug bsngal 'dul/ /rdo rje byi ru bai DUR+Ya/ / nor bu'i dbu thod rgyan du thogs/ /byi ru gser gyi gcal bkram la/ /sku chen zhabs kyi stabs kyis gshegs/ /zhal gdangs nyi ma du ma'i gzi/ /lcang lo cod pan dbu thod can/ /rig sngags 'chang brgyas zhabs la gtugs/ /brjed par bya ba rnams kyis mchod/ /nor bu rgyan 'gul 'od zer gyis/ / brang gi phyogs rnams dag par byas/ /cod pan can te 'od 'tsher ba/ /nyi ma bye ba brgya 'od ldan/ /rin chen sna tshogs mchog bkram zhing / /dri med dkyil 'khor rab tu 'phro/ /rlung gis ma lus bskyod pa yi/ /'bar ba chen po'i lta ba can/ /'od zer mang pos phog pa yi/ /phan pa'i thabs ni rab ston pa/ / 67b brjid pa'i tshul gyis bshad pa yi/ /'od kyi zhal gsal rnga yab bskyod/ /dpung rgyan 'od zer spel mar bkod/ /tshon bris shin tu mdzes par 'tsher/ /lhun po phrad cing 'khrug pa ltar/ /ha ha zhes pa'i sgra chen sgrog /rdo rje chen po'i rtse mo can/ /shin tu dga' mdzad bde sbyin pa/ /byams pa'i dkyil 'khor go char bgos// btsan pa kun las rnam par rgyal/ /snying rje'i stobs las byung ba ste/ /mtshon cha chen po shin tu 'bar/ /byams pa byams pa'i rtog pa can/ /kun nas dpa' ba'i dkyil 'khor ba/ /ma pham thub med dag pa ste/ /sangs rgyas cha lugs mnyam med che/ /byams pa'i snying po snying po che/ /byams pa'i pad+ma las byung ba/ /rdo rje 'chang chen rdo rje can/ /rdo rje'i bstan pa'i dkyil 'khor ba/ rig sngags 'chang ba rnams kyis btud/ /de bzhin bsten cing bstod pa'o/ /grub pa chen po'i rig sngags grub| |rdo rje'i dkyil 'khor mdzes par mdzad/ /thams cad grub mdzad grub pa po/ /sangs rgyas gdung gi sdong chen lags/ /gsang sngags chen po'i rnam par nges| |mdo sde'i bkod pa mdo sdud pa/ /nges gyur nges pa'i 'od sgron gyi/ /snang bas dri ma sel bar mdzad/ /'bar brtsa dmar 'od snang ba/ /dkyil 'khor dkar 68a @#/ /po che ba ste| |gzhung dang mthun pa'i chos dbyings dang / /nye bar gyur cing shin tu nges/ /swA hA swA hA'i bdag po mchog /'od zer bde legs bde legs mdzad/ /stobs che 'chang ba bkra shis pa/ /nyi ma 'dra ste snyoms pa lags/ /stobs byed rgyal ba'i longs spyod ldan/ /mkha' ltar dri med spyod yul can/ /dpa' bo rdo rje 'joms par mdzad/ /rdo rje chen po rab sgrub pa/ /sgrub pa po ste rtsod pa med/ /dkyil 'khor ldan pa rdo rjes ston/ /rlung chen shugs kyis bskyod pa yi/ /g.yo dang 'brug sgrog sgra ldan pa/ /sangs rgyas spyod yul pad+ma ste/ /de bzhin nyid kyi mtsho las skyes/ /mngon shes chen po mngon shes brnyes| |khyab bdag sangs rgyas kun dang mnyam/ /de nas sa yi dbang phyug po/ /byams pa'i dkyil 'khor byams pa la/ /bstod nas kun mkhyen gnod bral ba| |thub pa'i nyi mas bka' stsal pa/ /kye ma ming brgya rtsa brgya mchog /ming gi yon tan 'od ldan la/ /bde dang phun sum tshogs sgrub pa/ /thabs chen bla na med pa ste/ /ming brgya rtsa brgyad 'di dag ni/ /'jig rten kun gyis bde skyed pa/ /'di ni bton pa tsam gyis kyang / /sdig pa thams cad dag par 'gyur/ /sdig 68b pa dag las rgyal ba yi/ /byams pa bstod pa'i gnas po la/ /ming brgya rtsa brgyad dam pa 'dis/ /ming ni la la gang bstod pa/ /de la lha la sogs kun dang / /lag na rdo rje stobs chen rnams/ /rtag pa nyid du sdug bsngal kun/ /gtan du bsal phyir brtson par byed/ /gang zhig ming brgya rtsa brgyad mchog /myur du 'don pa'i mi de ni/ /sangs rgyas sa yang thob 'gyur te/ /'di la the tshom yong med do/ /nang par mal nas langs nas ni/ /gang zhig byams pa'i sems kyis bstod/ /de la byams pa rtogs pa yi/ /byams pa bde legs byed par 'gyur/ / de phyir dri ma thams cad sel byed cing / /sdig 'joms yon tan thams cad bskyed pa dang / /de bzhin 'jig rten sdug bsngal sel ba yi/ /ming brgya rtsa brgyad ched du dag par lhogs// 'phags pa byams pa'i mtshan brgya rtsa brgyad pa gzungs sngags dang bcas pa rdzogs so// // |