rgya gar skad du/ AR+Ya a b+hi Shiny+tsa ni nA ma d+ha NI/ bod skad du/ 'phags pa dbang bskur ba zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na dge slong gi dge 'dun chen po dang / byang chub sems dpa' grangs med pa/ sngon gyi rgyal ba la lhag par bya ba byas pa rnams dang thabs gcig tu bzhugs te/ de nas bcom ldan 'das kyis tshe dang ldan pa shA ri'i bu la bka' stsal pa/ shA ri'i bu/ khyod kyis 'de lta ste/ byang chub sems dpa'i ma dang / byang chub sems dpa'i sngon gyi spyod pa dang / bden pa'i smon lam dang / byang chub sems dpas yongs su bzung ba dang / byang chub sems dpa'i chos 'di dag sgoms shig/ ston cig/ 'di lta ste/ gzungs kyi chos kyi rnam grangs so/ /de nas tshe dang ldan pa shA ri'i bus bcom ldan 'das la 'di skad ces gsol to/ /bcom ldan 'das/ gzungs ni/ yul la mi gnas/ phyogs na mi gnas na/ bcom 429a @#/ /ldan 'das/ gzungs zhes bgyi ba la/ bcom ldan 'das/ gzungs zhes bgyi ba 'di'i tshig gi don gang lags/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ shA ri'i bu/ legs so legs so/ shA ri'i bu/ khyod 'di ltar theg pa chen po la yang dag par zhugs pa dang / theg pa chen po la mngon par brtson pa dang / theg pa chen po lhag par byed pa dang / khyod gzugs yul na mi gnas/ phyogs na mi gnas par ston pa yang legs so/ /de ci'i phyir zhe na/ shA ri'i bu/ gzungs ni/ chos nyid kyis 'das pa dang / ma 'ongs pa dang / da ltar byung ba ma yin te/ shA ri'i bu/ gzungs ni/ 'das pa zhes mi 'chad/ ma 'ongs pa zhes mi 'chad/ da ltar byung ba zhes mi 'chad/ dngos por mi 'chad/ dngos po med par mi 'chad/ mtshan ma dang / mtshan ma med par mi 'chad/ chos gang skye ba'i phyir ram/ 'gag pa'i phyir mi 'chad mod kyi/ shA ri'i bu/ 'on kyang byang chub sems dpa' la phan par bzhed pa'i phyir chos ston te/ gang 'di chos kyi rnam grangs kyi gzungs ni/ gzungs med par bya ba'i lam du gyur pa/ rigs pa'i stobs kyis gnas pa/ sangs rgyas kyi yon 429b tan| sangs rgyas kyi lhag par bya ba sgrub pa/ sangs rgyas kyi tshul khrims/ sangs rgyas kyi bsdus pa/ sangs rgyas kyi mtshams sbyor ba/ sangs rgyas 'byung ba'o/ /de nas tshe dang ldan pa shA ri'i bus bcom ldan 'das la 'di skad ces gsol to/ /bcom ldan 'das/ gang la gnas shing gzungs de thob na/ byang chub sems dpa' bla na med pa yang dag par rdzogs pa'i byang chub ba las phyir mi ldog par 'gyur ba dang / dam bca' ba bzang ba dang / chos la mi gnas pa dang / bdag the tshom ma mchis pa dang / slob dpon ma mchis pa dang / rang gi lam la gnas pa bcom ldan 'das kyis bshad du gsol/ bde bar gshegs pas bshad du gsol/ bcom ldan 'das kyis bka' stsal pa| shA ri'i bu/ legs so legs so/ /shA ri'i bu/ gzungs thob pa'i byang chub sems dpa' ni/ sangs rgyas nyid du brjod do/ /shA ri'i bu/ gang la la zhig byang chub sems dpa' gzungs thob pa la bsti stang byed dam/ bla mar byed dam/ rim gror byed dam/ mchod na/ des sangs rgyas thams cad la bsti stang byas par 'gyur ro// gang dag gis gzungs 'di thos pa dang / gang dag mos pa de dag kyang sangs rgyas ji lta ba de bzhin du mchod pa'i 'os su 'gyur zhing / byang chub kyi sems dang mi 'bral 430a @#/ /bar 'gyur ro/ /shA ri'i bu/ gzungs ni/ 'di lta ste/ san+d+ha ra NI/ ut+ta ra Ni/ san pra tiSh+Thi te/ ut+ta ma su pra tiSh+Thi te/ bi dza ya ba la/ sarba pra ti dz+nyA/ a ha ra dz+nyA na pa ti/ ut+pa da ni/ bi ni mA nI a b+hi Shiny+tsa ni/ a b+hi b+ha ha ra/ shu b+ha ba ti/ a ni shri ta/ ba hu ku b+ha/ a b+hi pa tsa/ shA ri'i bu/ 'di dag ni/ dbang bskur pa zhes bya ba'i gzungs kyi chos kyi ming rnams te/ 'das pa rnams dang / ma 'ongs pa rnams dang da ltar byung ba rnams dang legs par gnas pa rnams byang chub sems dpa' gang gis legs par bzung ste 'chad pa de/ myur du mngon par rdzogs par 'tshang rgya bar bya ba'i phyir bskal ba brgya dang / bskal pa stong dag tu smon lam gyis zad par byed par mi 'gyur/ de la mtshon gyis mi tshugs par 'gyur/ me dang srog chags mi srun pa rnams kyis mi tshugs par 'gyur ro/ /de ci'i phyir zhe na/ 'di ltar shA ri'i bu| gzungs 'di ni/ 'das pa'i sangs rgyas rnams kyi yum mo/ /shA ri'i bu/ rigs kyi bu'am/ rigs kyi bu mo gang la las stong gsum gyi stong chen po'i grangs/ med pa bcu mthar chags su gang ba'i sangs rgyas rnams lan bza' dang / zhal zas bzang pos bskal pa grangs med par dbul ba byas pa bas/ rigs kyi bu'am 430b rigs kyi bu mo gzhan gang gis gzungs 'di las tha na tshig gcig tsam bzung ba de pas bsod nams ches mang du bskyed do/ /de ci'i phyir zhe na/ shA ri'i bu /dbang bskur ba'i gzungs 'di ni/ sangs rgyas kyi yum yin pa'i phyir ro/ /bcom ldan 'das kyis de skad ces bka' stsal nas dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa dbang bskur ba zhes bya ba'i gzungs rdzogs so// //rgya gar gyi mkhan po dzin mi tra dang / dA nA shI la dang / zhu chen gyi lots+tsha ba ban+d+he ye shes sdes bsgyur cing zhus te skad gsar bcad kyis kyang bcos nas gtan la phab pa/ |