//rgya gar skad du/ bud+d+ha b+ha ga wAn aSh+Ta sha ta nA ma d+hA ra NI/ bod skad du/ sangs rgyas bcom ldan 'das kyi mtshan brgya rtsa brgyad pa gzungs sngags dang bcas pa/ thams cad mkhyen pa la phyag 'tshal lo/ /bcom ldan 'das snying rje'i tsan+dan dri zhim po'i spos chus byugs pa'i sku/ zhabs pad+ma lha dang / lha ma yin gyi nor bu'i cod pan gyis gtugs pa/ rang byung sel mdzad bla ma 'jig rten la phan par mdzad pa/ ston pa de bzhin gshegs pa thub pa nyes pa dang bral pa/ zhi ba'i bdag nyid can/ gzugs mdzes pa/ mtshan gsal ba'i gzi brjid can/ sku dpe byad kyis brgyan pa/ yon tan thams cad yang dag par rdzogs pa la phyag 'tshal lo/ /pad+ma rgyas pa ltar zhal bzhad de/ tshems dkar zhing snyoms la thags bzang bas rab tu rgyas shing / snang la nor bu dri ma med pa ltar 'od gsal zhing mdzes te/ spa zhing gsal ba la nyi ma 'od zer stong 'bar ba mang po'i 'od snang ba'i dkyil 'khor zil gyis gnon pa/ thub 47b pa'i mchog stobs bcu dang ldan pa la phyag 'tshal lo/ /'dud do/ /rab tu 'dud do/ /bstod do/ /oM b+h+yo hUM hUM hUM/ A A/ hI hI/ shi ba shi ba/ shAn+ti shAn+ti/ sha ma sha ma/ sha mA pa ya/ ta thA ga ta a nu ga ta/ swa b+hA ba/ a b+hA ba/ sa mud tA ya/ a sa ma ba la/ a bi ra la ba la/ a mi tA ba la/ a ti ba la/ hUM g+huM g+huM/ d+h+ro d+h+ro/ b+h+rau b+h+rau/ b+h+re du b+h+re du/ hI hI/ b+ha ga ban/ b+ha bAn ta ka su ra ta b+ho ga ma hA shAn+ti ka ra/ pA ba ki lbe Sha nA sha ka swA hA/ /de nas dpe byad mtshan gsal bas/ /yan lag thams cad rab brgyan cing / /nyi ma bzhin du gsal ba po/ /'bar ba'i dkyil 'khor rgyan mnga' ba/ /grags shing dri ma rab spangs la/ /dri med skyon bral chos kyi blo/ /khyab bdag chen po stobs bcur ldan/ / rdul bral dpal dang ldan pa po/ /rin chen sa gzhi chen po la/ /pho brang rtse mo rdo rje'i rtse/ /rgyal ba'i sras rnams gnas gyur pa/ /nor bu du ma rab 'phro zhing / /'od zer dri med gsal bkod pa'i/ /rdo rje'i dkyil 'khor pho brang na/ /thub pa'i longs spyod sa gzhi la/ /seng ge'i khri rten yangs la bzhugs/ /nor bu dbyig gi sa gzhi dang / /khri chen rab spa de nyid la/ /de bzhin gshegs pa dgyes chen gyis/ /phun sum tshogs pa rgyan bkod lta/ /thub pa me zla nor bu'i 'od/ /nyi zer non pa'i 'od ldan pa/ /bde blag shin tu bkra 48a @#/ /shis tshul/ /'od gsal skyil mo krung bcas nas/ /sku 'od 'bar ba'i dkyil 'khor can/ /'od gsal rgyas pas thub dbang gi /dri med 'od zer bkye ba ni/ /mi g.yo rdo rje can zhes bya/ /dkyil 'khor chen por zhugs pa yi/ /rdo rje can dag rab 'dul ba/ /gang yin de kun dag byas nas/ /dkyil 'khor dri med skor bar byed/ /ngan song dam tshig dri ma kun/ /legs par shin tu dag pas so/ /srid gsum dkyil 'khor rgya che la/ /rnam pa du mar 'od gsal ba/ /'gro dang mi 'gro ma lus pa/ /bkod nas bde chen rdo rje can/ /rdo rje ral gri thogs pa de/ /cod pan ma g.yos nang du zhugs/ /de nas 'jigs pa'i sgra skad kyis/ /'gengs shing mig ni glog ltar 'gyu/ /rig sngags hUM zhes sgrogs pa po/ /rdo rje 'jigs byed 'jigs byed pa/ /bzhin mdzes 'dzum gyis rnam par brgyan/ /sdig med mig rtsa rgod gyur cing / /stan las langs te phyag 'tshal nas/ /legs par mchod byas smras pa ni/ /kye ma skye ba'i phyogs 'joms shing / /bskal pa du ma'i dri ma sel/ /rig sngags yon tan sgrub byed pa| |thub mchog rnams kyis rab tu gsungs/ /de gzigs dge ba du ma brnyes/ /sangs rgyas blo gros rgyas par gyur/ /byang chub sems dpa' blo gros che/ /bskal ba 48b gcig tu spyod pas kyang / /rgyud mar sangs rgyas kun 'byung zhing / /spyod pa du ma 'byung ba yi/ /yon tan brgya yi spos ldan 'di/ /thos pa spro bar mi nus so/ /longs spyod rgya mtsho chen po can/ /byang chub sems mchog dkyil 'khor du/ /rgyal mchog rnams kyis dbang bskur ba'i/ /phyir mi ldog pa'i chos chen ldan/ /'di thos sangs rgyas spyod pa yis/ / sems can kun gyi sdig pa rnams/ /ma lus rab tu bsal nas ni/ /blo gros dri ma med par 'gyur/ /zhi zhing dag byed bkra shis la/ /rdul med brgyan te zhi bar byed/ /dge zhing mya ngan thams cad sel/ /sdug bsngal thams cad nges par 'joms/ /dbang byed gsang sngags dam pa ste/ /sa steng sdig pa thams cad sel/ /ma smad 'bras bu nges par sbyin| |bstan pa yin te sdang ba 'dul/ /nyes pa byas pa sel ba yi/ /gzungs 'di gang gis thos gyur des/ /sangs rgyas rnyed par dka' ba yang / /ring por mi thogs thob par 'gyur/ /sgrib pa thams cad rab zhi zhing / /khyab bdag nyon mongs kun sel ba/ /gang zhig nyon mongs zhi byed pa'i/ /gzungs 'di 'chang bar byed pa yis/ /kun tu bzang po nyid dang ni/ /lag na rdo rje nyid kyang 'thob/ /rig sngags 'chang gi bdag po yang / /'di thos pas ni thob par 'gyur/ /'jig rten kun la lha ma me ba/ /bcom ldan rnam par 49a @#/ /snang mdzad kyang / /dkyil 'khor dam pa gting med pa/ /'di ni ji srid ma gsan par/ /rab zhi nyon mongs 'dul ba yi/ /rang byung go 'phang ma brnyes te| |rnam par dag phyir gsan gyur nas/ /gsan ma thag tu rnam par dag /de phyir phun sum tshogs pa dang / /legs par 'dod pas brjod par bya/ /gzhan gyis mi thub gzungs gsan nas/ /thub pa kun gyis gang brnyes pa/ /'khor ba 'di ni nam du yang / /bdud kyi las dang 'khrug med dang / /mya ngan med cing 'thab med pa/ /gzungs la gnas pas 'thob par 'gyur/ /gnas kyi dam pa thob nas kyang / /thub pa dri ma med pa'i blo/ /gzigs pa bzang rnams gar gshegs pa'i/ /bzang 'gro der ni 'gro bar 'gyur/ /legs par 'dod pa rnams kyis ni/ /tshig gi mdo 'di mnyan par bgyis/ /nyon mongs zad par bya ba la/ /rgyal bas gsungs pa'i gzungs 'di mchog / sdig pa byed cing dge la sdang / /sdig pa'i rang bzhin rab 'jungs pa/ /gang gis thos nas de spang ba/ /nga yis mngon sum 'byor par 'gyur/ /sdig pa gzhan yang mi bya zhing / /snga ma rnams kyang bshags par bya/ /gzungs mchog 'di yi mthu stobs kyis/ /sdig pa thams cad 'byang bar 'gyur/ /tshe rabs gzhan ni stong dag dang / /tshe 49b 'phos bye ba phrag brgyar yang / /sdig pa mi dge gang byas pa/ /dag 'gyur 'di la the tshom med/ /yar gyi ngo yi tshes brgyad dang / /de bzhin tshes ni bco lnga la/ /bsnyen gnas legs par lhur blangs la/ /cho ga bzhin du sangs rgyas mchod/ /de nas rmongs pa med par yang / /nyon mongs dgra ni rab 'joms shing / /shin tu thub dka' dpe med pa/ /nyes pa zlog pa'i gzungs brjod na/ /thub pa'i zhal gyi zla ba'i 'od/ /'bar ba nges par mthong bar 'gyur/ /de nas tshogs rnams rdzogs pa yi/ /rgyal ba'i sras po nyid du 'gyur/ /'od dpag med la mnga' ba yi/ /yon tan mtha' yas rab brgyan pa/ /bskal pa bye ba stong du yang / /mtha' mi rtogs pa thob par 'gyur/ /de nas rdo rje 'chang gi tshig /dkyil 'khor dag na gnas rnams kyis/ /thos nas rgyan rnams sna tshogs ba/ /bcom ldan 'das la dbul bar byed/ /rdo rje ral gri la sogs pa/ /lha bdag gsal ba thams cad dang / /ri bo ti se ri rab la/ /gnas pa'i rig sngags 'chang rnams dang / /de bzhin dkyil 'khor chen po na/ /'khod pa'i rig sngags 'chang rnams dang / /ma la ya yi ri bo la/ /gnas shing rgyan 'bar thogs rnams dang / /khyab 'jug lha chen la sogs pa/ /lha yi bdag po rnams dang ni/ /lag na rdo rje la sogs pa/ /byang chub sems dpa' stobs chen 50a @#/ /rnams/ /nor bu'i dpung rgyan rna cha dang / /rgyan rnams rab tu g.yo ba'i lus/ /rab tu bskyod de langs nas ni/ /sdig bral mnga' bdag rgyal ba la| |phyag btsal thal mo sbyar byas nas/ /kun gyis sa yi dbang phyug bo/ /thub mchog dam pa de la ni/ /mtshan brgya rtsa brgyad dag gis bstod/ /mnyam nyid chos de de bzhin nyid/ /shin tu rtogs pa lam me ba/ /dul ba brtan pa dri ma sel/ /dri ma med pa skyon bral ba/ /thub pa sangs rgyas shin tu zhi/ /'jig rten mgon po skye dgu'i bdag/ de bzhin gshegs pa nyon mongs thul/ /de bzhin rgyal ba rdul bsal ba/ /ston pa ston mdzad brtan pa ste/ /sdig pa med pa rdul dang bral/ /'jig rten mgon po snang mdzad pa/ /dag pa zhi ba zas gtsang sras/ /nyon mongs rab bcom phan 'dogs pa/ /ston pa po ste dri ma sel/ /spyod tshul dri med tshul bzang ba/ /zab pa rnam par gnon pa brtan/ /btsan po thugs brtse rnam par rgyal/ /mgon po de bzhin mgon mdzad pa/ /zhi ba'i bdag nyid zhe sdang bral/ /bcings pa las grol nges par grol// 'jig rten kun mchog 'khra ba'i sa/ /bdag gir mi 'dzin dri ma med/ /nyon mongs sel ba dpal dang ldan/ /dpal mdzad de bzhin phan mdzad pa/ /mnyam pa med 50b pa dpe med pa/ /khyab bdag nyon mongs las rnams spong / /khengs pa med pa dman pa med/ /mnyam pa de bzhin mi mnyam mnyam/ /snang ba brnyes pa snang byed med/ /'jig rten snang mdzad sdig med pa/ /sgrib pa thams cad spangs pa ste/ /'jig rten kun la phan par brtson/ /dpa' bo zhi ba zhi mdzad pa/ /nyon mongs dgra rnams zad par mdzad/ /mnga' bdag thabs mkhyen thabs che ba/ /sems can kun gyi 'khras lags/ /don yod rnyed dka' blo dang ldan/ /rdo rje'i dkyil 'khor thub par dka'/ /skyob pa 'jigs sel tshangs pa ste| |de bzhin sangs rgyas chos 'dzin pa/ /dpa' bo chen po 'jigs pa med/ /gzugs bzang mtshan rnams gsal ba ste/ /sum cu rtsa gnyis mtshan mnga' ba/ /chos kyi longs spyod rgya mtsho lags/ /dpe byad bzang po bkod pa yis/ /spras pa'i bdag nyid ya mtshan ston/ /dka' ba med pa'i ston pa po/ /de bzhin des pa bde sbyin pa/ /mthu chen yangs ba rgya che ba/ /bdud bzhi'i stobs rnams sel mdzad pa/ /brtson chen spro ba che ba ste/ /dgyes pa chen po stobs po che/ /mthu brnyes bstan pa chen po ste/ /gnas ldan dbang gis dar ba lags/ /gsal ba gsung ldan dpe med pa/ /dge ba stong pa nyid kyis rgyal/ /rab tu zhi ba mun pa med/ /blo gros chen po chos 'dzin te/ /phun sum tshogs 51a @#/ /ldan sa chen brnyes/ /'dod pa rnams ni 'dul mdzad pa/ /dpal mdzad dpal mnga' dpal dang ldan/ /dpal gyi longs spyod shin tu rgyas/ /bcom ldan legs bsgos bsgo bar mdzad/ /gsung ldan bkra shis rgyal ba'i gnas/ /mnyam nyid mnyam pa nyid mkhyen pa/ /mnyam pa nyid kyi mtshan dpag med/ /rab tu dgyes la longs spyod gsal/ /gzhi bcas sems pa mnyam pa lags/ /blo dag blo ldan dri ma spangs/ /gnas chen brtan par ldan pa ste/ /rgyas par longs spyod dri ma med/ / thub pa thugs rje'i rgyan mnga' ba/ /bskal pa bzang po 'jigs pa'i skyabs/ /de bzhin 'jigs med nyon mongs sel/ /dri med skyon bral longs spyod can/ /sna tshogs 'od ldan dkyil 'khor mdzes/ /sku bzang dag pa rig ba'i mchog /thugs rje'i 'od ldan 'od bzang ba/ /mi gnas longs spyod dam ba lags/ /chos kyi rgyu ste yon tan gnas/ /rjed 'os mchog gnas longs spyod che/ /nam mkha'i mtshan te rnam dag blo/ /rin chen gzugs 'dra bkra shis pa/ /khyu mchog che spyan ba rdzi ma/ /rgyal ba skyon bsal shes rab can/ /shes rab thabs dang ldan pa ste/ /'jig rten mi dge kun las 'das/ /dag par longs spyod brtan pa can/ /sa dang stobs dang ye 51b shes bzod/ /pha rol phyin pa kun la mnga'/ /ting 'dzin mnyam par longs spyod pa/ /rnam par sgo la mngon sum pa/ /stong pas sangs rgyas kun dang mnyam/ /chos chen bde bar 'char ba lags/ /thams cad mkhyen ba yul las 'das/ /spyod yul sgrib pa mi mnga' ba/ /byang chub sems dpa'i dbang po rgyal/ /dam pa'i don te tshul che ba/ /shes bya'i yul rnams mtha' dag la/ /sgrib pa med par 'char ba brnyes/ /rigs chen mthun par skyes pa ste/ /de bzhin gshegs pa'i dge ba'i gnas/ /khyad par brnyes pa mnyam nyid brnyes/ /mi mnyam sangs rgyas kun dang mnyam/ /don chen shin tu mthar phyin pa/ /nyon mongs bral ba thub par dka'/ /dge sbyong sdig pa sbyong mdzad pa/ /gnod pa med par bde bar 'byin/ /blo rgya che ba thams cad mkhyen/ /thos pa'i mtshon cha ma lus gsan/ /dkon pa bde bar thob 'gyur ba/ /mnyam pa khyad par yul dang ldan/ /'jig rten thams cad dar mdzad mgon/ /zhi gnas mtshon cha thub par dka'/ /bsam gyis mi khyab bsam yas yul/ /dpe med pa ste dper bya ba/ /'od bzang rab dgyes dpal dang ldan/ /legs gsung blo yi stobs kyis 'byung / /mkhas pa zhal bzang bde sbyin pa/ /rab dgyes 'das pa'i spyod yul can/ /gsung ba chen po ye shes che/ / 52a @#/ /gnas chen bkra shis chen po ste/ /mchod par gyur pa yul las 'das/ /bya ba'i mtshan nyid med pa po/ /sangs rgyas yul du skyes pa ste/ /shes bya'i spyod yul rgya che ba/ /kun mkhyen longs spyod 'bras bu can/ /'jig rten dbang 'das spyod yul ba/ /kun mkhyen yul gyi snang ba ste/ /thabs mkhas phun sum tshogs ldan pa/ /rdzu 'phrul rol pa'i thabs dang ldan/ /chos kyi gar thabs ston pa po/ /rab ston yon tan sgyur mdzad pa/ /spyod pa ma lus 'dul bar mdzad/ /yongs su rdzogs pa rnam par dag /sangs rgyas spyod yul rnam sangs rgyas/ /bgegs byed ma legs byed pa bcom/ /bdud kyi dregs pa sel bar mdzad/ /g.yul ngor rnam par rgyal ba brnyes/ /dpa' bo chen po pham med stobs/ /theg pa chen po'i shing rta bcibs/ /blo chen brgal bar dka' ba yi/ /nyon mongs rgya mtsho'i pha rol gshegs/ /theg pa chen po'i tshul la gnas/ /theg pa mchog la longs spyod pa/ /nyan thos 'das pa'i spyod yul can/ /rang rgyal las kyang 'das pa ste/ /sangs rgyas sa yi 'bras bur gnas/ / gong nas gong du khyad par mkhyen/ /khyod ni nam mkha'i gnas na bzhugs/ /bde 'byung sa dang zhing rnams kyi/ /mtsho chen dag la longs par spyod/ /sangs rgyas dbang 52b po rgyas pa la/ /mtshan brgya rtsa brgyad kyis bstod nas/ /de la lha sogs tshogs rnams kyis/ /phyag byas mgo smad phyogs gcig 'khod/ /de nas dkyil 'khor chen po na/ /gnas pa ma lus chem mer 'khod/ /thod du rdo rje'i thod 'ching ba/ /langs nas cod pan rab tu g.yos/ /dkyil 'khor mthon po thams cad du/ /skad ber chen por yongs bkang nas/ / nor bu'i rgyan ni rnam g.yo zhing / /ha ha grags pa'i sgra sgrogs te/ /kye ma sangs rgyas yon tan che/ /bskal pa grangs med gsum bsags pa/ /byang chub sems sogs mchog rnams kyis/ /mtshan brgya rtsa brgyad legs par brjod/ /kye ma rnyed dang bde 'byung ba/ /mtshan brgya rtsa brgyad thos nas kyang / /gang zhig klog cing rgyal la bstod/ /'bras bu chen po 'grub par 'gyur/ /mtshan brgya rtsa brgyad sngags bcas pa/ /bcom ldan 'das drung brjod na ni/ /sgrib dang kun nas nyon mongs dang / /sdig pa thams cad dag pa thob/ / mtshan brgya rtsa brgyad mchog bton na/ /sgrib pa kun las nges grol zhing / /nyon mongs mtha' dag rnam par spong / /shes rab che ba nyid du 'gyur/ /de ni longs spyod chen po dang / /bde ba las kyang nyams mi 'gyur/ /de ni tshe rabs thams cad du/ /blo ldan tshe rabs dran par 'gyur/ /de nas rdo rje'i thod 'ching ba/ /yon tan mtha' yas sras de la/ / 53a @#/ /bcom ldan bdud las rgyal pa yis/ /mngon sum gzigs nas bka' stsal pa/ /rgyal ba'i sa 'di zhi ba ste/ /nga rgyal la sogs nyon mongs 'joms/ /'jig rten bde ba kun las 'das/ /de bzhin gshegs bde mngon du phyogs/ /gzhan gyi mi tshugs gzungs dang ni/ /mtshan brgya rtsa brgyad nyan byed pa/ / de dag rnam dag bdag nyid de/ /sems can kun la bde 'dod pa/ /lan gcig thos pa tsam gyis kyang / /de dag sa chen 'bras bur gnas/ /ring por mi thogs dga' 'gyur na/ /'chang sogs lta la ci zhig smos/ /de phyir rtag tu rab bsgrims la/ /gtan du bde ba 'dod pa yis/ /yon tan rgya mtsho ldan pa'i gzungs/ /mnyan par bya zhing bcang par bya/ /gang zhig nang par langs nas brjod/ /bdag nyid kyis kyang bton na ni/ /de yi don kun 'grub 'gyur la/ /gnod pa dang yang phrad mi 'gyur/ /'di ni yon tan kun gyi snod/ /dge ba phun sum tshogs sbyin pa/ /kun mkhyen 'bras bu bla med mchog /bde 'byung thob par byed pa yin/ /'bras bu 'byor pa ci yang rung| |thob par mi 'gyur dogs pa med/ /kun mkhyen go 'phang thob gyur nas/ /dpe med gnas su 'gro bar 'gyur/ /'di ni dge zhing 'bras bur ldan/ /sangs 53b rgyas sa yi 'bras bu sbyin/ /yid du 'ong zhing yon tan ldan/ /snying rje dri ma med sbyin pa/ /'di ni mnyam pa nyid kyi mdo/ /'jig rten kun gnas dga' ba ste/ /'jig rten kun gyi bde 'byung ba/ /'di dang 'dra ba gang yang med/ /ston pa sangs rgyas bcom ldan 'das kyi mtshan brgya rtsa brgyad pa gzungs sngags dang bcas pa rdzogs so// // |