//rgya gar skad du/ AR+Ya bud+d+hA hri da yaM nA ma d+ha ra Ni/ d+harma paR+YA ya/ bod skad du/ 'phags pa sangs rgyas kyi snying po zhes bya ba'i gzungs kyi chos kyi rnam grangs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das de bzhin gshegs pa'i spyod yul chos kyi dpya dgon pa rin po che bkod pa'i 'khor gyi khyams/ ye shes kyi rnam par spyad pa| sngon gyi sangs rgyas kyis byin gyis brlabs pa/ sems can thams cad kyis mngon par bstod pa/ byang chub sems dpa' chen po'i gnas/ rnam pa thams cad kyi mchog dang ldan pa/ chos thams cad mnyam pa nyid kyi rjes su spyod pa/ kun nas 'od zer gyi khang bzang gi dbus na byang chub sems dpa' bye ba khrag khrig 'bum phrag du ma thams 10a @#/ /cad kyang 'jig rten gyi khams tha dad pa nas lung bstan pa/ thams cad kyang 'jig rten gyi khams tha dad pa nas 'dus pa/ thams cad kyang de bzhin gshegs pa'i chos kyi rgyal po'i sras/ thams cad kyang gzungs dang / ting nge 'dzin sna tshogs thob pa sha stag gis yongs su bskor cing mdun gyis bltas nas thabs gcig tu bzhugs te chos ston to/ /de nas bcom ldan 'das kyis byang chub sems dpa' 'khor rgya chen po la bka' stsal pa/ rigs kyi bu dag /skye bo mang po la phan pa dang / skye bo mang po la bde ba dang / 'jig rten la thugs brtse ba dang / lha dang / mi'i skye bo phal po che'i chos kyi don dang / phan pa dang / bde ba'i phyir de bzhin gshegs pa dgra bcom pa yang dag par rdzogs pa'i sangs rgyas gang gA'i klung gi bye ma snyed kyis gsungs pa/ sangs rgyas kyi snying po zhes bya ba'i gzungs kyi chos kyi rnam grangs yod do/ /rigs kyi bu 'am| rigs kyi bu mo gang la la sangs rgyas kyi snying po zhes bya ba'i gzungs kyi chos kyi rnam grangs 'di 'chang ngam/ 'dzin tam/ klog gam/ kun chub par byed dam/ gzhan dag la yang rgya cher yang dag par rab tu ston tam/ dad dam/ lhag pa'i bsam pas mos par byed na/ de bla na med pa yang dag par rdzogs pa'i byang chub las phyir mi ldog 10b par 'gyur/ chos thams cad 'dzin pa dang mi 'bral bar 'gyur/ sangs rgyas bcom ldan 'das rnams dang mi 'bral bar 'gyur/ de bzhin gshegs pa la blta ba dang / bsnyen bkur byed pa dang mi 'bral bar 'gyur/ chos nyan pa dang mi 'bral bar 'gyur/ dge 'dun la rim gro byed pa dang mi 'bral bar 'gyur/ bskal pa stong du 'khor ba'i srid pa'i rgya mtsho phyir bsnyil bar 'gyur/ bla na med pa yang dag par rdzogs pa'i byang chub tu mngon par rdzogs par sangs rgyas kyi bar du tshe rabs dran par 'gyur/ myur du bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur/ de la 'byung po'i tshogs thams cad bsrung bar 'gyur/ lha dang / klu dang / gnod sbyin dang / dri za dang / lha ma yin dang| nam mkha' lding dang / mi'am ci dang / lto 'phye chen po dang / mi dang / mi ma yin pa thams cad dga' bar 'gyur/ /de'i lus la nad kyis mi tshugs par 'gyur/ pha rol gyi gnod pas 'chi ba'i dus byed par mi 'gyur/ chad pa spong ba dang / mtshon cha spong ba dang / dug gzhil bas 'chi ba'i dus byed par mi 'gyur/ de la bdud sdig can gyis glag rnyed par mi 'gyur/ bdud kyi ris kyi lha rnams kyis skabs rnyed par mi 'gyur te/ gang du yid la byas pa der bdud kyi ris kyi lha de dag thams cad skrag cing dngangs la dngang 11a @#/ /par 'gyur zhing phyogs bcur 'bros par 'gyur ro/ /de la 'di dag ni sangs rgyas kyi tshig go/ /sangs rgyas kyi tshig chen po'o/ /sangs rgyas kyis gnang ba'i tshig chen po'o/ /sangs rgyas thams cad kyi tshig go /de bzhin gshegs pa thams cad kyi tshig yin no/ /tad+ya thA/ bud+d+he su bud+d+he/ mahA bud+d+he/ i ha bud+d+he/ ta tra bud+d+he/ bud+d+he bud+d+he/ bud+d+he bud+d+he ma ti bud+d+he/ sarba bud+d+ha/ a nu ma te/ sarba bud+d+he/ a nu dz+nyA na te/ bud+d+ha/ bud+d+ha/ bud+d+ha/ bud+d+ha/ bud+d+ha/ bud+d+ha/ bud+d+ha/ bud+d+ha/ bud+d+ha/ bud+d+ha/ sangs rgyas kyi yul mtha' yas te/ chos bstan pa yang mtha' yas mod kyi/ gcig tu yid la bya ba ni mdor na chos sgom pa'o/ /gzungs 'di ni sems can rnams la thugs brtse ba'i phyir/ sangs rgyas thams cad kyis gsungs pa ste/ chos thams cad kyi phyag rgya yin no/ /tad+ya thA/ shud+d+he/ su shud+d+he/ su shud+d+he/ sho d+ha ni/ saM sho d+ha ni/ ni rma le ma la a pa ga te/ gte sa mA ti kran+ti/ kra me sa ma sa re/ sa rA sa ra pa ri a sho ke/ bi sho ka/ sho ka sha ma ni/ shAn+te/ u pa shAn+te/ pa shAn+te/ a ba b+hA se/ sarba pu N+ye pa ri miN+Ti te/ sarba d+harma pra ti maN+Di te/ ha ra ha ra/ ma la ha ra/ tsa ra tsa ra/ saM tsa ra/ tsa la tsa la| saM tsa la/ ta la ta la ma ta la/ sa ma ta la/ ri Ne ri Ne/ su ri Ne/ sa ma ri Ne/ ri Na ma ti loka d+ha re/ lo ka d+ha ri Na/ d+ha ra d+ha ra/ Da ra Da ra/ ro d+ha ro d+ha/ mahA bi dza ya/ bA hi ni/ 11b ha na ha na/ sarba bud+d+he/ hri phre shi tra si/ sarba dz+nyA pa the/ sarba dz+nyA pa ri mi te/ ma hA pra ti b+hA na/ saM pan+ne/ sa man+ta/ A lo ke bud+d+he/ bi Sha ye/ bud+d+ha/ pra ti maN+Di te/ b+ha ga ba te/ sa ra sa ra/ pra sa ra pra sa ra/ bi sa ra bi sa ra/ pra sa ra sarba sho ka a ba ga te swAhA/ bcom ldan 'das kyis sangs rgyas kyi snying po'i gzungs kyi chos kyi rnam grangs 'di bshad ma thag tu ri dang gnas su bcas pa dang / tshal rnam pa drug tu g.yos/ stong gsum gyi stong chen po'i 'jig rten gyi khams kyis yang g.yos/ rab tu g.yos/ kun tu rab tu g.yos so/ /rgya mtsho chen po yang 'khrug/ /rab tu 'khrugs/ kun tu rab tu 'khrugs so/ /ri'i rgyal po ri rab kyang ldeg cing 'gul to/ /bdud kyi gnas thams cad kyang skrag nas bdud kyi ris kyi lha rnams dang / bdud sdig can rnams shin tu sdug bsngal zhing / yid mi bde bar gyur nas nyam thag go /sems can gang dgas chen po g.yos par mthong ba de dag gis/ de bzhin gshegs pa dgra bcom pa yang dag par rdzogs pa'i sangs rgyas la phyag 'tshal lo/ /de bzhin gshegs pa dgra bcom pa yang dag par rdzogs pa'i sangs rgyas la phyag 'tshal lo zhes ched du brjod pa lan gsum ched du brjod do/ /lha gang dag sangs rgyas la mngon par dad pa de dag gis/ lha'i me tog man+dA ra ba dang / man+dA ra ba chen pos bcom ldan 12a @#/ /'das la gtor/ mngon par gtor nas/ gang dag sangs rgyas la skyabs su dong ba de dag thams cad rab tu dga' ba skyes so/ /de la 'di skad ces bya ste/ shAkya seng+ge yang dag rdzogs pa yi/ /sangs rgyas skyob pas skad cig yud gang la/ /sangs rgyas thams cad kyi ni snying po yi/ /gzungs 'di dag ni rab tu bshad pa yi/ /skad cig yud der sa yang rnam drug g.yos/ /rgya mtsho 'khrugs shing bdud kyi gnas kun kyang / /rab tu g.yos nas bdud kyi ris rnams ni/ /lha dag rab tu dngangs shing 'khrugs par 'gyur/ /bdud yid mi bde sdug bsngal mya ngan non/ /de tshe lha rnams ngo mtshar rab thos nas/ /'jig rten mgon la mchod pa bya ba'i phyir/ /nam mkhar gnas nas me tog man dA 'thor/ /gang dag sangs rgyas mngon dad gzhan rnams kyis/ /se mo do dang do shal spos rnams dang / /phye ma dag dang byug pa gos rnams dang / /rgyan dang dpung rgyan dag kyang rab tu 'bul/ /brgyad po 'di dag ni de'i yon tan gyi phan yon gyi rgyan du 'gyur ba'o/ /brgyad gang zhe na/ 'di lta ste/ byang chub kyi sems mi brjed pa'i rgyan dang / thos pa thams cad yongs su 'tshol bas mi ngoms pa'i rgyan dang chos zab mo rnam par nges pa rten cing 'brel par 'byung ba'i rgyan dang / sems can thams cad kyi dbang po mchog dang / mchog ma yin par shes pa'i rgyan dang / ji ltar thos pa dang 12b ji ltar khong du chud pa'i chos rnams la tshul bzhin so sor rtog cing spyod pa'i rgyan dang / sems can yongs su smin par bya ba'i phyir chos thams cad mi dmigs pa'i rgyan dang / rgyan de yang sangs rgyas kyi byin gyis brlabs kyis thabs la mkhas pa'i rgyan dang / gzungs thob pa'i rgyan te/ brgyad po de dag ni de'i yon tan gyi phan yon gyi rgyan du 'gyur ro/ /gzungs 'di ni rtag tu rgyun du yid la bya'o/ /sangs rgyas rjes su dran pa bsgom par bya'o/ /gzungs kyi gzhi 'di dag rnams yid la byas na/ las kyi sgrib pa thams cad yongs su byang par 'gyur ro/ /pad+ma rnam par bkod pa zhes bya ba'i ting nge 'dzin kyang thob bo/ /nad thams cad dang / na ba thams cad la lag pas byab par bya'o/ /bzlas brjod kyang dpag tu med par bya'o/ /bcom ldan 'das kyis de skad ces bka' stsal pa dang / byang chub sems dpa' sems dpa' chen po de dag dang / nyan thos chen po de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa sangs rgyas kyi snying po zhes bya ba'i gzungs kyi chos kyi rnam grangs rdzogs so// //rgya gar gyi mkhan po jin mi tra dang / dA na shI la dang / zhu chen gyi lots+tsha ba ban+de ye shes sdes bsgyur cing zhus te/ skad gsar bcad kyis kyang bcos nas gtan la phab pa/ |