//rgya gar skad du/ tsa tur de wi ba ri pr-its+tshA/ bod skad du/ lha mo bzhis yongs su zhus pa| dpal rdo rje sems dpa' la phyag 'tshal lo/ /lha mo bzhi dang mnyam ldan zhing / /sangs rgyas gzugs kyis nyer brgyan pa/ /shin tu dga' ba'i sbyor chen la/ /rdo rje sems dpa' cher bzhugs te/ /'od zer 'chang zhing 'khrigs pa yi/ /gsang chen chos kyi 'byung gnas la/ /byang chub sems ni 'phros nas su/ /chos kyi dbyings gnas zhu mdzad do/ zhu ba'i dngos po de mthong nas/ /lha mo spyan mas yongs zhus pa/ /bcom ldan rdo rje sems dpa' la/ /tshig 'di dag ni gsol ba ste/ /chos kyi dbyings rnams 'phro ba ni/ /gang las skye bar 'gyur pa lags| |dang po ji ltar 'ong ba yin/ /de bzhin phyir 'gro ji ltar lags/ /yan lag med pa gang de ni/ /yan lag dang bcas 'gyur nas su/ /lus dngos 'gyur ba ji ltar lags/ / 188a @#/ /mig dang rna ba sna dang ni/ /de bzhin lce dang lus dang yid/ /dbang po phung po'i dngos rnams dang / /khams rnams su ni 'jug pa yang / /ma rig bag chags sred pa yis/ /bcings pa'i nyon mongs 'dod chags sogs/ /rnam par shes pa sna tshogs pa/ /ji ltar dngos su 'dus pa lags/ /dngos po med pa sgom pa'i gzugs/ /gzugs sogs spyod yul mtshan nyid rnams/ /rang bzhin med cing dmigs med la/ /dmigs pa dang bcas ji ltar lags/ /de dag ngo mtshar chen po ni/ /bdag gi the tshom lha sa bka' stsol/ /de ltar zhus ma thag tu ni/ /bcom ldan rdo rje sems dpas gsungs/ /shes rab zab mo zad med ni/ /nyon cig spyan ma bshad par bya/ /g.yad du med cing shes bya min| |de bzhin dpyad mkhan gyis shes dka'/ /sangs rgyas kun gyi gsang chen ni/ /nam mkha' nam mkha'i spyod yul lo/ /mi shes mun pas bsgribs pas na/ /nyan thos rnams kyis shes pa min/ /spyod yul bag chags shes mkhan ste/ /rang sangs rgyas su sprul pas te/ /de dag kun gyis kyang mi shes/ /shes med so so'i skye gnas dag /ma 'ongs pa dang 'das pa dang / /da ltar byung ba'i dus gsum la/ /byol song bag chags las byung ba'i/ /dud 'gro yi dgas skye ba rnams/ /de kun gyis kyang mi shes te/ /sangs rgyas 188b spyod yul gsang chen no/ /snying po shin tu snying po'i mchog /gang de kun bdag la gnas pa'i/ /sangs rgyas kun gyi gsang chen ni/ /lha mo khyod la bshad par bya/ /byang chub sems dpa' 'od gsal ba/ /zla ba shel dang mnyam pa'i 'od/ /de nyid ye shes lnga yi dngos/ /yungs kar che ba'i tshad tsam mo/ /de yi dbus su bzhugs pa'i lha/ /mi gsal gsal ba'i gzugs can te/ /phyed tshad tsam gyi phra mo'i mchog /yid kyi dngos po'i thig le'i gzugs/ /rtag tu snying gi dbus gnas pa/ /'od zer chen po 'bar ba can/ /ji snyed dgu pa'i bar du ni/ /dpral ba la gnas rkang mthil bar/ /thig le de kho nar bsdus te/ /lte ba'i dbus su rnam par gnas/ /cha shas lnga pa tsam yin te/ /bcu gnyis kyi ni tha ma la/ /cha shas drug gis mtshan pa nyid| |nga ro thig les brgyan byed pa/ /rdo rje khong nas phyung nas su/ /sa bon skye gnas dbus bzhag ste/ /chos kyi dbyings ni zhu bar byed/ /de ni rim par bskyed byed na/ /sgo dgu la ni kun tu 'gro/ /khyab cing khyab gnas 'gro kun la/ /mi g.yo la sogs g.yo dang bcas/ /tshangs sogs lha dang lha min gyi/ /gzhi ni de las gyur pa'o/ /gang las gtso bor skyed byed pa| |sa dang nam mkha' de zhes gsungs/ /ji snyed lus la gnas pa'i bar/ /de yis las dang las min byed/ /dge dang mi dge bsam pa yang / /bya ba'i las kun byed pa yin/ /sbyor 189a @#/ /brtag tu de gsungs te/ /mchod bsgom par gsungs pa yin/ /gang tshe las kyi lus zhig na/ /de tshe de yi rang mthu yin/ /de 'dra'i lus su de 'gyur te/ /gang gis g.yo dang mi g.yo khyab/ /nam mkha' mnyam pa nyid 'dra ba/ /de ni gnas par shes par bya/ /bcu yi gnyis mtha' tshig gi don/ /gang gis rtag tu bsgoms byas na// des ni dngos grub rgyas pa yi/ /rdo rje 'dzin par bdag nyid 'gyur/ /so dang mchu dang rkan dang lce/ /mgul gnas gang la yod pa ni/ /gang la de ni yig 'bru nyid/ /de ni zad dang gnas phyir ro/ /brjod pa med cing the tshom med/ /sgra yig rnam par spangs pa ni/ /rang gi phyi nang de bzhin nyid/ /byang chub sems ni 'dir gsungs so/ /lha mo bzhis yongs su zhus pa las/ lha mo spyan mas yongs su zhus pa'i le'u ste dang po'o// //de nas lha mo mA ma kyis/ /rdo rje can la 'di zhus te/ /byang chub sems kyi rim pa yis/ /kha snying lte ba gsang ba la/ /'gro dang phyir 'ong bstan pa ni/ /rdo rje chen mos bka' stsal 'tshal/ /cha shas rnam pa du zhig gsungs/ /gnas kyi rnam pa bsgyur ba du/ /kha dog rnam pa du zhig gsungs/ /de bzhin gdan yang ji ltar 'tshal/ /rdo rje can gyis bka' stsal pa/ /cha shas bzhi dang mnyam ldan zhing / /pad+ma bzhi la yang dag gnas/ /snying ga'i pad+ma 189b la gnas nag /kha yi pad+ma la gnas dkar/ /nga ro lte ba'i pad+mar gnas/ /gsang ba'i pad+ma nga ro mthar/ /stabs kyi mtha' ru 'gro byed pas/ /thig le'i sbyor bar rab tu gnas/ /snom byed pa dang thos byed pa/ /de tshe mthong byed za byed pa/ /reg par byed kyang de kho nas/ /bde dang sdug bsngal tshor byed pa'o/ /gang las bzhang byed bza' byed pa/ /de bzhin tsho de dang du ba// 'byed pa gcod pa de kho nas/ /cho ga rnam pa mang po shes/ /rgyal po don yang byed par 'gyur/ /dbang phyug don yang byed par 'gyur/ /bram ze rgyal po rje'i rigs dang / /dmangs rigs smad pa'i rigs rnams dang / /bud med du ma sprul par byed/ /dud 'gro yi dwags skye ba dang / /gzugs can rnams dang gzugs med dang / /de bzhin 'dod pa'i srid rnams las/ / 'byung ba thams cad skyed byed pa/ /de nyid kho na rdzu 'phrul 'phang gnas/ /de ltar de bzhin nyid shes pa/ /dam pa'i yig 'phang gnas/ /de ltar de bzhin nyid shes pa/ /dam pa'i yig 'bru shes pa gang / /des ni gsang chen shes pas te/ /gang des bdag nyid kun gnas pa/ /kha dog med cing kha dog dmar/ /kha dog dkar dang ser ba yi/ /thig le'i gzugs su bsgyur ba 'dis/ /'gro dang phyir 'ong rnam par bstan/ /gang de rig pa rdzu 'phrul che/ /mtha' yas bcas pa sna tshogs gzugs/ /skye dang bsdus dang 'jig pa la/ /thig le'i gzugs su rab 190a @#/ /gnas so/ /gang gis brgyad khri rtsa bzhi'i chos/ /stong phrag brgya ru shes na yang / /de yi de nyid mi shes te/ /de dag kun kyang 'bras med do/ /bcu gnyis lnga yi lnga pa yang / /brgyad kyi mtha' ru 'byung ba 'dis/ /sgra yig dang po yi ge a/ /lnga pa yis ni yang dag brgyan/ /snying rje chen po las byung ba/ /kha mar bltas pa'i dur gas brtags| |gdod ma mtha' ma med pa'i lha/ /de ni spyi bor bstan pa yin/ /de dag gsang chen dam pa yin/ /lha mo bdag gis rab bstan to/ /lha mo bzhis yongs su zhus pa las| lha mo mA ma kIs zhus pa ste le'u gnyis pa'o// //de nas lha mo gos dkar mos/ /yan lag kun gyis btud nas su/ /thal mo snying gar sbyar byas te/ /rdo rje sems dpa' la gsol ba/ /chos kyi dbyings kyi bsdus pa dang / /sku gsung thugs kyi rdo rje yi/ /rang bzhin nyid ni ji ltar lags/ /lha yi dbang phyug khyod la zhu/ /gang gis 'od kyi gong bur bsdu/ /rdo rje sems dpa' ji ltar lags/ /gsungs shig de nyid yig 'bru'i tshig/ 'dus pa gsungs pa ji ltar lags/ /chu khams dang ni me yi khams/ /ji ltar ro ni mnyam por 'gyur/ /ma las skye ba gsum tsam dang / /de bzhin pha las skye ba gsum/ /de dag drug sogs gong bu las/ /ji ltar mi rnams skye ba lags/ /sangs rgyas 190b gzugs ni bdag mi 'tshal/ /thub pa chen pos bka' stsal mdzod/ /rdo rje can gyis bka' stsal ba/ /gsang ba shin tu gsang gyur ba/ /nyon cig lha mo bshad par bya// skye gnas dbus su rtsa gnyis ni/ /g.yon dang de bzhin g.yas pa ste/ /g.yon du byang chub sems zhes bya/ /g.yas su de bzhin rak+ta 'o/ /de gnyis phrad nas gcig 'gyur ba/ /chos kyi dbyings ni 'dus pa yin/ /mun pa sku ste rdul gsung gzugs/ /thugs kyi rang bzhin snying stobs te/ /rdul ni rak+ta byang chub sems/ /mun pa de bzhin bskyed pa yin/ /rdo rje pad+ma mnyam sbyar nas/ /rang bzhin mnyam pa'i ror 'gyur ro/ /dri chen chu dang shel me tog /de bzhin lnga pa byang chub sems/ /bdud rtsi lnga dngos gong bur bsdus/ /de las rdo rje 'dir gsungs so/ /cha shas gnyis pa dang ldan pa/ /de bzhin dgu ba yab yin no/ /de skad gsungs pa de la ni/ /sum cu dang ni bcu dang ni/ /de bzhin lnga pa'i sa bon te/ /cha shas gnyis pa lnga yi ni/ /drug gi btags pa des byung ba/ /de ni thig ler gsungs pa'o/ /chos kyi dbyings kyi yi ge bruM/ /skye gnas pad+ma la gnas pa/ /de nyid sa bon swAhA mtha'/ /'dus pa la ni shes par bya/ /chu khams pha las skyes zhes bya/ /me yi khams ni ma las skyes/ /sha dang khrag dang pags pa yang / /ma las skyes pa zhes bshad do/ /tshil dang rkang dang khu ba 191a @#/ /ni| |pha las skyes zhes bshad pa yin/ /gong bur yang dag 'dus pa ni/ /de dag tsam du bshad pa yin/ /gzugs dang tshor ba 'du shes dang / /de bzhin 'du byed rnam shes rnams/ /sangs rgyas dngos po lnga yi gzugs/ /phung po zhes byar bshad pa'o/ /lha mo bzhis yongs su zhus pa las/ lha mo gos dkar mos zhus pa ste le'u gsum pa'o// //de nas bzhad pa'i zhal gyur te/ /lha mo sgrol ma bcom ldan mas/ /rdo rje sems dpa' la zhus pa/ /chos kyi dbyings kyi sgrub pa ni/ /gsungs shig rdo rje can chen po// //rdzas rnams sgrub pa bka' stsal 'tshal/ /de bzhin rig pa'i sngags rnams kyang / /dkyil 'khor rnams ni brtag pa dang / /sbyin sreg so sor bya ba dang / /de bzhin mchod pa'i cho ga yang / khyad par du yang bka' stsal 'tshal/ /de ltar lha mos zhus ma thag /rdo rje sems dpas bka' stsal pa/ /chos kyi dbyings kyi sgrub thabs ni/ /nyon cig lha mo bshad par bya/ /gzugs dang sgra dang dri dang ni/ /de bzhin ro dang reg la sogs/ /khams bco brgyad po de dag kyang / /chos kyi dbyings zhes bya ba'o/ /de dag nyid las byung ba ni| |byang chub sems zhes shes par bya/ /byang chub sems las dong bu skyes/ /gong bu las kyang yid bskyed do/ /yid las nam mkha'i khams kyang ni/ khams rnams dang ni 191b skye mched rnams/ /dbang po phung po 'byung ba rnams/ /de ltar dbyings su bsdu ba ste/ /bsdu ba de ni bstan byas pa/ /chos kyi dbyings kyi sgrub pa yin/ /de bas nan tan thams cad kyi// sgrub pa yang dag spyad par bya'o/ /ji ltar gal po zhes dngos kyis/ /bsgrub par bya ba rab tu brtag /chos dbyings sgrub pa bshad nas su/ /rdzas brgyad yan lag sgrub pa bshad/ /ril bu mig sman dngos grub dang / /sa 'og ral gri'i dngos grub dang / /nam mkhar 'phur dang mi smang dang / /'chi ba med dang nad 'joms dang / /mig dang glang po che dang rta/ /glang dang khyi dang bong bu dang / /rnga mo ma he sbyang ki rnams/ /cha ni mnyam po bya ba'o/ /mthe bong tshigs tshad tsam du ni/ /shin tu mnyam par bzhag nas sbyar/ /dri chen chu dang rak+ta dang / /byang chub sems ni tshad tsam ni/ /sngags bzlas nas ni sbyar byas te/ /byin gyis brlabs kyang bya ba 'o/ /phyag 'tshal dang ni yi ge AH/ /dbus su de bzhin hUM byas te/ /'bar ba'i hUM yig 'bar byed pa| |dgu po de ni rab tu bsgrub/ /lan ni nyi shu rtsa gcig tu/ /sngags bzlas nas ni phye mar brtag /yungs kar lnga yi tshad tsam du/ /lnga dang lnga ni 'byor bar bya/ /tshes brgyad dang ni bcu bzhi la| |ril bu rnams ni byas nas su/ /pad+ma'i snod la bzhag byas te/ /stong phrag brgyar ni bzla bar bya/ /mtshams bzhi la ni bsgoms byas nas/ /nyin dang mtshan du bza' bar 192a @#/ /bya| |de ni bskal pa'i mtha' bar yang / /dngos grub rgyas par 'gro ba ste/ /gzi brjid mdangs dang stobs brtson 'grus/ /lnga pa la ni smon lam yang / / mngon par shes pa lnga thob pa/ /ril bu chen po zos phyir ro/ /rdzas kyi sgrub pa rnams rdzogs nas/ /rig pa'i sngags rnams bdag la stsol/ /yi ge e dang baM yig dang / /laM yig dbus su yang dag gnas/ /dang po'i mdog ni dmar po ste/ /gnyis pa yi ni mdog dkar ba/ /gsum pa kha dog ser ba rnams/ /b+ha ga'i dbus su bsgom par bya/ / 'khor lo ltar ni bskor ba ni/ /nyin phyed dang ni mtshan phyed la/ /rig pa de ni rab 'byor na/ /de ni skad cig kho nar 'grub/ /lha mo lha min bu mo dang / /mi yi bu mo rnam pa bzhi/ / sa yi dkyil 'khor kun tu ni/ /sngags kyis bkug nas spyad par bya/ /sgom pa de bzhin rig pa'i sngags/ /bdag gis bshad pa zin byas te/ /dkyil 'khor rnams ni bshad par bya/ /dga' ma sems kyis rtse gcig nyon/ /dkyil 'khor lus zhes gsungs pa ste/ /dkyil 'khor b+ha gar bstan pa yin/ /dkyil 'khor byang chub sems dang ni| |dkyil 'khor gsum du brtags pa ni/ /brtags pa rnams kyang 'dus pa ste/ /gang du gtso bo skyed par byed/ /phung po rnams ni sangs rgyas gsungs/ /'byung ba rig 192b mar brtags pa'o/ /chags pa lcags kyu kho na ste/ /zhags pa pad+mar chud byed pa/ /kha phrad pa ni sgrog yin par/ /sgra bsgrags pa ni dril bur bshad/ /spos ni dri chen zhes gsungs te/ me tog rak+ta zhes 'dod do/ /mar me sha rnams kho na yin/ /dri ni byang chub sems zhes 'dod/ /sgeg mo ling+gar bstan pa ste/ /phreng ba b+ha ga kho na yin/ /dbyangs ma dbugs su bstan pa dang / /gar mkhan ma ni rnal 'byor te/ /bcom ldan 'das kyis bzang por gsungs/ /de rtogs pa ni skal bzang yin/ /rtogs pa de rnams byams pa sogs/ /de ltar nang gi bdag nyid gsungs/ /dkyil 'khor gzhan ni sngon bshad zin/ /sbyin sreg las ni bshad par bya/ /nyon cig sbyin sreg rnam pa bzhi/ /sbyin sreg phyi dang nang gsungs te/ /phyi ni sngon du bstan pa yin/ /nyon cig khyod kyis nang gi ni/ /pad+ma bzhi rnams 'byor pa ni/ /lus kyi dbus su nye bar gnas/ /me dang de bzhin rlung dang ni/ /dbang chen dang ni chu de bzhin/ / rlung gis me ni 'bar byas te/ /chu yis yongs su smin par byed/ /dbang chen dkyil 'khor las byung ba/ /gang du me ni bskyod pa'o/ /ra yig mngon spyod yi ge ste/ /ya yig dbang gi las kho na/ /la yig rgyas par 'gyur ba ste/ /ba yig zhi ba zhes gsungs so/ /gang zhig zas dang btung ba ni/ /de dag thams cad chu la ste/ /pad+mar k+Sha yig kha mar lta/ /snying gi 193a @#/ /pad+mar btsud par bya/ /lte ba'i pad+mar 'gro phyi rol/ /kha sbyor tshul gyi sbyor ba yis/ /gsang ba'i pad+mar 'gro ma thag /thal bar mtha' ru rnam par bstan/ / de ltar sbyin sreg bdag bshad pa/ /nyin dang mtshan du bya ba ste/ /rtag par rgyun du zas zos na/ /tshe 'di kho nar 'grub par 'gyur/ /rgas pa med cing nad kyang med/ /'chi ba med cing 'bras rnams med/ /de ni glo bur 'chi ba med/ /'tshe ba thams cad zad 'gyur zhing / /rmi lam ngan yang zhi bar 'gyur/ /bzang po skal par gson pa ste/ /sems can thams cad dga' bar smra/ /mthong ba tsam gyis bskul byed do/ /sbyin sreg las rnams bshad byas nas/ /lha mo mchod pa bstan par bya/ /dri dang phreng sogs gos rnams dang / /spos me zas dang lha bshos kyis/ /dbang po gnyis ni rab 'byor nas/ /bdag la mchod pa rnams ni bya/ /bdag ni thams cad sangs rgyas nyid/ /sangs rgyas kun gyi gnas yin te/ /de bas nan tan thams cad kyis/ /rnal 'byor pas ni rtag tu mchod/ /gang zhig 'ga' yang bya ba'i las/ /rnal 'byor pa yis mchod par bsgom/ /zas dang btung ba de bzhin gos// de bzhin dri dang phreng kho nas/ /rig ma bzhi yis rnam brgyan pa'i/ /bdag ni lha nyid bsam par bya/ /de ltar bshad nas rdo rje de/ /cang mi gsung ba'i dngos por bzhugs/ /de nas lha 193b mo bzhi rnams kyis/ /phyag gi thal mo sbyar gyur te/ /dgyes pas rab tu zhal bzhad nas/ /rab tu dang ba'i sems kyis ni/ /rnam par mi rtog pa thob ste/ /dang mi gsung bar bzhugs gyur to/ |lha mo bzhis yongs su zhus pa las/ lha mo sgrol mas zhus pa'i le'u ste bzhi pa'o// //thams cad kyi gsang ba'i mchog dam pa gsang chen zhes bya ba'i rgyud lha mo bzhis yongs su zhus pa dpal o D+yan gyi yul nas byung ba rnal 'byor ma chen mo'i de kho na nyid rdzogs so// //rgya gar gyi mkhan po smr-i ti dz+nyA na kIrti nyid kyis bsgyur cing zhus te bshad nas gtan la phab pa/ |