//rgya gar skad du/ mahA kA sh+ya pa sU tra/ bod skad du/ 'od srung chen po'i mdo/ 'phags pa dkon mchog gsum la gus pas phyag 'tshal lo/ /'di skad bdag gis thos pa'i dus gcig na/ rgyal po'i khab 'od ma'i tshal ka land ka'i gnas na bzhugs so/ /de'i tshe de'i dus na tshe dang ldan pa 'od srung chen po pi bya la'i phug na bzhugs te/ nad dam pos gzir zhing sdug bsngal bar gyur to/ /de nas bcom ldan 'das srod la'i dus su so sor thams cad rtog cing bzhugs so/ /tshe dang ldan pa 'od srung chen po ga la ba der gshegs shing nye bar gshegs te gdan bshams pa la bzhugs te/ bzhugs nas yang bcom ldan 'das kyis tshe dang ldan pa 'od srung chen po la 'di skad ces bka' stsal to/ /'od srung / khyod ji ltar bza' ba 'dod dam/ ji ltar sdug bsngal myong / ji 439a @#/ /ltar zhi bar 'gyur/ zhi bar byed pa'i thabs kyis mi zhi ba ma yin no/ /de nas tshe dang ldan pa 'od srung chen pos gsol pa/ btsun pa/ bdag ni bza' ba dang / btung ba la mi sred par gyur/ bdag nad dam pos gzir bar gyur te/ zhi ba'am/ mi zhi bar 'gyur/ zhi bar byed pa'i thabs mdzad du gsol/ byang chub kyi yan lag bdun po 'di ngas legs par bshad par bya'o/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /bdun po gang zhe na/ dran pa yang dag byang chub kyi yan lag 'di/ 'od srung / ngas yang dag pa'i byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /yang 'od srung / ngas chos rnam par 'byed pa yang dag pa'i byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /yang 'od srung / ngas brtson 'grus yang dag byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /yang 'od srung / ngas dga' 439b ba yang dag byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /yang 'od srung| ngas shin tu sbyangs pa yang dag byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /yang 'od srung / ngas ting nge 'dzin yang dag byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang| mya ngan las 'das par gyur to/ /yang 'od srung / ngas btang snyoms yang dag byang chub kyi yan lag tu bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /'od srung / 'di ni byang chub kyi yan lag bdun te ngas bshad do/ /de mang du bsgoms par byas pa na/ mngon par shes pa dang / byang chub pa dang / mya ngan las 'das par gyur to/ /bcom ldan 'das de bzhin gshegs pas gsungs pa'i byang chub kyi yan lag la bslab par bya'o/ / bcom ldan 'das kyi de skad ces bka' stsal pa dang / tshe dang ldan pa 'od srung chen po bcom ldan 'das kyis gsungs pa la mngon par bstod do/ /de ma thag tu nad zhi bar 440a @#/ /gyur nas/ tshe dang ldan pa 'od srung chen po langs so/ /tshe dang ldan pa 'od srung chen po'i nang zhi bar gyur to/ /gnas brtan 'od srung chen po'i mdo rdzogs so|| ||paN+Di ta chen po A nan+ta shrI'i zhal snga nas/ mang du thos pa'i lo ts+tsha ba shAkya'i dge slong nyi ma rgyal mtshan dpal bzang pos skad gnyis smra ba rnams kyi gdan sa| gtsug lag khang chen po dpal thar pa gling du bsgyur cing zhus te gtan la phab pa'o/ /sa'i steng du nyi ma dang / zla ba ltar gyur cig/ |