//rgya gar skad du/ sU ka ri ka a ba dA na nA ma sU tra/ bod skad du/ phag mo'i rtogs pa brjod pa zhes bya ba'i mdo/ /dkon mchog gsum la phyag 'tshal lo/ /'di skad bdag gis thos pa'i dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das kyis dge slong rnams la bka' stsal pa/ dge slong dag/ lha'i bu'i 'chi 'pho'i chos kyi snga ltas rnam pa lnga 'byung bar 'gyur te/ lnga gang zhe na/ gos rnams sngon dri ma mi chags pa las dri ma la chags pa dang / me tog phreng rnams sngon mi snyis pa las rnyis pa dang / mchan khung gnyis nas rdul 'byung ba dang / lus las dri mi zhim pa 'byung ba dang / lha'i bu'i 'chi 'pho'i chos ni rang gi stan la dga' ba mi thob pa'o/ /dge slong dag /de nas lha'i bu zhig 'chi 'pho'i chos kyis sa la 'gre ldog ste/ brang rdung zhing du la snying rje rje skad du smre sngags 'don te/ kyi hud dal gyis 'dab pa/ kyi hud rdzing / kyi hud rdzing bu/ kyi hud shing rta sna tshogs can gyi tshal/ kyi hud rtsub 'gyur gyi tshal/ kyi hud dga' ba'i tshal/ kyi hud 'dres pa'i tshal/ kyi hud yongs su 'du/ kyi hud sdug pa/ kyi hud ar 450b mo nig lta bu'i rdo leb/ kyi hud lha'i mdun sa/ kyi hud blta na sdug pa zhes snying rje rje skad du smre sngags 'don to/ /lha'i dbang po brgya byin gyis lha'i bu de shin tu sa la 'gre ldog cing snying rje skad du smre sngags 'don pa mthong ste mthong nas kyang / lha'i bu gal ba der song ste phyin nas lha'i bu de la 'di skad ces smras so/ /grogs po/ khyed ci'i phyir shin tu sa la 'gre ldog cing snying rje rje'i skad du smre sngags 'don te/ kyi hud gal gyis 'bab pa/ kyi hud rdzing / kyi hud rdzing bu/ kyi hud shing rta sna tshogs can gyi tshal/ kyi hud rtsub 'gyur gyi tshal/ kyi hud dga' ba'i tshal/ kyi hud 'dres pa'i tshal/ kyi hud yongs 'du/ kyi hud sdug pa/ kyi hud ar mo nig lta bu'i rdo leb/ kyi hud lha'i 'dun sa/ kyi hud blta na sdug pa zhes snying rje rje skad du smre sngags 'don par byed/ de skad ces smras pa dang / lha'i dbang po brgya byin la/ lha'i bu des 'di skad ces smras so/ /ko'u shi ka/ bdag ni 'dir lha'i bde ba dang bral te zhag bdun na 'di nas rgyal po'i khab kyi grong khyer chen por phag mo'i mngal du skye bar 'gyur te/ bdag ni der lo mang po zhig tu phyis dang gcin 'tshal bar 'gyur bas/ de'i slad du bdag de skad mchi'o/ /grogs po tshur shog /khyod rkang gnyis rnams kyi mchog sangs rgyas la skyabs su song zhig/ 'dod chags dang bral ba rnams kyi mchog chos la skyabs su song zhig/ tshogs rnams kyi mchog 451a @#/ /dge 'dun la skyabs su song zhig/ des 'di skad ces smras so/ /grogs po/ bdag ni rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ /tshogs rnams kyi mchog dge 'dun la skyabs su mchi'o/ /de nas lha'i bu des skyabs gsum bzung ste/ 'chi 'pho'i dus byas nas/ dga' ldan gyi lha'i ris su skyes so/ /de nas lha'i dbang po brgya byin gyis lha'i bu de bltas pa/ ci lha'i bu de phag mo'i mngal du skyes sam/ ma skyes zhes bltas na'ang yang ma skyes/ sems can dmyal ba dang / dud 'gro'i skye gnas su skyes sam/ ma skyes zhes bltas na yang ma skyes te/ lha rnams ni chos nyid kyis 'og ma la shes pa dang / mthong ba 'jug gi/ gong ma la ni ma yin no/ /de nas lha'i dbang po brgya byin the tshom skyes nas/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag btsal te/ phyogs gcig tu 'dug go/ phyogs gcig tu 'dug nas kyang / lha'i dbang po brgya byin gyis/ bcom ldan 'das la 'di skad ces gsol to/ /bcom ldan 'das/ bdag gis 'di na lha'i bu zhig 'chi 'pho'i chos byung nas/ dog sa la 'gre ldog cing / snying rje rje skad du smre sngags 'don te/ kyi hud dal gyis 'bab pa/ kyi 451b hud rdzing / kyi hud rdzing bu/ kyi hud shing rta sna tshogs can gyi tshal/ kyi hud rtsub 'gyur gyi tshal/ kyi hud dga' ba'i tshal/ kyi hud 'dres pa'i tshal/ kyi hud yongs 'du/ kyi hud sdug pa/ kyi hud ar mo nig lta bu'i rdo leb/ kyi hud lha'i 'dun sa/ kyi hud blta na sdug pa zhes snying rje rje skad du smre sngags 'don pa mthong ste/ bdag der mchis nas 'di skad ces bgyis so/ / grogs po/ khyod ci'i phyir brang rdung zhing du la mya ngan byed de du zhing smre sngags 'don/ des smras pa/ bdag ni 'dir lha'i bde ba dang bral te/ zhag bdun na 'di nas rgyal po'i khab kyi grong khyer chen po phag mo'i mngal du skye bar 'gyur te/ bdag ni der lo mang zhig tu phyis dang / gcin 'tshal bar 'gyur bas/ de'i slad du bdag de skad mchi'o/ /grogs po tshur shog/ khyod rkang gnyis rnams kyi mchog sangs rgyas la skyabs su song zhig /'dod chags dang bral ba rnams kyi mchog chos la skyabs su song zhig /tshogs rnams kyi mchog dge 'dun la skyabs su song zhig /de nas lha'i bu de dud 'gro'i skye gnas kyi 'jigs shing skrag/ 'chi bas 'jigs shing skrag ste/ de 'di skad ces mchi'o/ /grogs po/ bdag ni 'di ltar rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ /tshogs rnams kyi mchog dge 'dun la 452a @#/ /skyabs su mchi'o/ /de nas lha'i bu des skyabs gsum bzung nas 'chi 'pho'i dus bgyis pa de/ bcom ldan 'das/ gang du skyes lags/ bcom ldan 'das kyis bka' stsal pa/ ko'u shi ka/ lha'i bu de ni dga' ldan gyi lha'i ris der skyes te/ lha'i 'dod pa thams cad kyang phun sum tshogs so/ /de nas lha'i dbang po brgya byin tshim zhing mgu ste/ rab tu dga' nas/ dga' ba dang / yid bde ba skyes te/ dbang po tshim nas de'i tshe tshigs su bcad de gsol pa/ gang dag sangs rgyas skyabs mchi ba/ /de dag ngan 'gror mi mchi ste/ /mi yi lus rnams spangs nas su/ /de dag lha lus thob par 'gyur/ /gang dag chos la skyabs mchi ba/ /de dag ngan 'gror mi mchi ste/ /mi yi lus rnams spangs nas su/ /de dag lha lus thob par 'gyur/ /gang dag dge 'dun skyabs 'chi ba/ /de dag ngan 'gror mi mchi ste/ /mi yi lus rnams spangs nas su/ /de dag lha lus thob par 'gyur/ /gang dag nyin mtshan rtag par yang / /sangs rgyas rjes su dran pa dang / /gang dag sangs rgyas skyabs mchis pa/ /mi de dag gi rnyed pa tshe/ /gang dag nyin mtshan rtag par yang / /chos ni rjes su dran pa dang / /gang dag chos la skyabs mchis pa/ /mi de dag ni rnyed pa che/ /gang dag nyin mtshan rtag par yang / /dge 'dun rjes 452b su dran pa dang / /gang dag dge 'dun skyabs mchis pa/ /mi de dag ni rnyed pa che/ /de nas bcom ldan 'das kyis lha'i dbang po brgya byin gyi rjes su mthun par brjod pa'i tshigs su bcad pa bka' stsal pa/ ko'u shi ka/ de de bzhin te/ de de bzhin no/ /gang dag sangs rgyas skyabs dong ba/ /de dag ngan 'gror mi 'gro ste/ /mi yi lus rnams spangs nas su/ /de dag lha lus thob par 'gyur gang dag chos la skyabs dong ba/ /de dag ngan 'gror mi 'gro ste/ /mi yi lus rnams spangs nas su/ /de dag lha lus thob par 'gyur/ /gang dag dge 'dun skyabs dong ba/ /de dag ngan 'gror mi 'gro ste/ /mi yi lus rnams spangs nas su/ /de dag lha lus thob par 'gyur/ /de nas lha'i dbang po brgya byin bcom ldan 'das kyis gsungs pa la mngon par dga' nas/ /bcom ldan 'das kyi zhabs la mgo bos phyag 'tshal te/ bcom ldan 'das la lag pa thal mo sbyar nas lan gsum bskor ba byas te/ de nyid du mi snang bar gyur to/ /bcom ldan 'das kyis de skad ces bka' stsal nas/ dge slong dag yi rangs te bcom ldan 'das kyis gsungs pa la mngon par bstod do/ /phag mo'i rtogs pa brjod pa'i mdo rdzogs so|| |