//'phags pa 'khar gsil gyi mdo/ /sangs rgyas dang / byang chub sems dpa' thams cad la phyag 'tshal lo/ /de nas bcom ldan 'das kyis dge slong rnams la bka' stsal pa/ khyod kyis 'khar gsil 'di yongs su bcang bar bya ste/ de ci'i phyir zhe na/ 'das pa'i sangs rgyas rnams kyis kyang 'khar gsil 'di bsnams so/ /ma byon pa'i sangs rgyas rnams kyis kyang 'khar gsil 'di bsnams so/ /da ltar gyi sangs rgyas rnams kyis kyang 'khar gsil 'di bsnams pa yin te/ nga da ltar mngon par sangs rgyas nas 'khar gsil bsnams pa de bzhin du 'das pa dang / ma byon pa dang / da ltar bzhugs pa'i sangs rgyas rnams kyis kyang nyan thos rnams la 'khar gsil bcang bar bya'o zhes ston par mdzad pas/ deng nga mngon par rdzogs par sangs 414a @#/ /rgyas nas kyang sangs rgyas rnams kyi chos ji lta ba bzhin du khyed la bstan pa yin gyi/ khyed kyis kyang 'khar gsil bcang bar bya'o/ /de ci'i phyir zhe na/ 'khar gsil zhes bya ba ni ye shes kyi 'khar ba zhes kyang bya'o/ /yon tan gyi 'khar ba zhes kyang bya ste/ 'phags pa'i ye shes rab tu ston pa'i phyir ye shes kyi 'khar ba zhes bya'o/ /yon tan gyi gzhi sgrub pa'i phyir yon tan gyi 'khar ba zhes bya ste/ 'khar gsil 'di ni 'phags pa'i gang zag gi rigs can skyes bu dam par mtshon pa'i lam gyi chos la phyogs pa'i rgyal mtshan rjes su dran pa rnam par bzhag pa'i don gyi spyod pa yin pas de'i phyir khyod kyis chos bzhin du bcang bar bya'o/ /de nas tshe dang ldan pa 'od srung chen po stan las langs te/ gos tshags bcos nas bla gos phrag pa gcig tu gzar te thal mo sbyar nas pus mo sa la btsugs te bcom ldan 'das la 'di skad ces gsol to/ /bcom ldan 'das/ ci'i slad du 'khar gsil zhes bgyi/ ji ltar na bcang bar bgyi/ bcom ldan 'das kyis bshad du gsol/ bdag cag rnams kyis kyang bka' bzhin du spyod par 'tshal lo zhes gsol ba dang / bcom ldan 'das kyis 'od srung la 414b bka' stsal pa/ legs par nyon la yid la zungs shig dang ngas bshad par bya'o/ /de la 'khar gsil zhes bya ba ni yang ba yin te/ gang gis 'khar ba 'di la brtan pa 'di dag nyon mongs pa bsal nas khams gsum las nges par 'byung ba'i phyir yang zhes bya'o/ /'khar gsil zhes bya ba ni snang bar byed pa yin te/ 'khar gsil 'dzin pa'i gang zag gang yin pa de dag shas rab kyi snang ba thob par 'gyur pa'i phyir snang bar byed pa zhes bya'o/ /'khar gsil zhes bya ba ni phyir mi ldog par byed pa yin te/ 'khar gsil 'dzin pa'i gang zag gang yin pa de dag srid pa gsum las nges par 'byung zhing yang mngon par zhen pa nyid du mi 'gyur ba'i phyir mi ldog par byed pa zhes bya'o/ /'khar gsil zhes bya ba ni khong du chud par byed pa yin te/ gang 'khar gsil 'dzin par byed pa yin zhe na/ sdug bsngal dang / stong pa dang / khams gsum gyi nyon mongs pa'i kun nas dkris par khong du chud pa dang / bden pa bzhi dang / rten cing 'brel bar 'byung ba bcu gnyis po 'di dag gsal bar rtogs par 'gyur ba'i phyir khong du chud par byed pa zhes bya'o/ /'khar gsil zhes bya ba ni nga rgyal med par byed pa yin te/ gang 'khar gsil 'dzin pa de dag nga rgyal gyi las 415a @#/ /rab tu spong bar 'gyur ba'i phyir nga rgyal med par byed pa zhes bya'o/ /'khar gsil zhes bya ba ni rgyang bsrings pa yin te/ gang 'khar gsil 'di 'dzin pa'i gang zag gang yin pa de dag 'dod pa lnga thag ring du byed pas de dag 'dod pas sred pa'i kun nas dkris pa spong ba dang / phung po lnga po rnams rnam par 'thor ba dang / srid pa lnga po dag yongs su spong ba dang / mya ngan las 'das pa la phyogs shing 'du byed kyi las kyang thag ring du spong ba'i phyir rgyang bsrings pa zhes bya'o/ /'khar gsil zhes bya ba ni len par byed pa yin te/ gang 'khar gsil 'dzin par byed pa de dag sangs rgyas rnams kyi tshul khrims dang / ting nge 'dzin dang / shes rab rin po che blangs pas rnam par grol ba thob par 'gyur ba'i phyir len par byed pa zhes bya'o/ /'khar gsil zhes bya ba ni yongs su grub par 'gyur ba yin te/ gang 'khar gsil 'dzin pa dag sangs rgyas kyi chos kyi sde snod mngon par grub pa dang / ji ltar bstan pa bzhin du bsgrubs pas ma nyams par phun sum tshogs par 'gyur ba'i phyir mngon par 'grub par 'gyur ba zhes bya'o/ /bcom ldan 'das kyis bka' stsal pa/ 'od srung / 'khar gsil zhes bya ba'i yi ge'i 415b don rgya che zhing mang bas yongs su rdzogs par brjod mi nus kyang khyed kyis re zhig de bzhin du yongs su gzung bar bya'o/ /bcom ldan 'das la 'od srung gis 'di skad ces gsol to/ /bcom ldan 'das/ 'khar gsil zhes bya ba'i don ni de lta bu lags ni/ ci'i slad du ye shes kyi 'khar ba zhes bya bgyi ba nas dran pa nye bar gzhag pa'i don gyi spyod pa zhes bgyi ba'i bar gyi don gang lags pa bcom ldan 'das kyis bka' bshad du gsol/ bcom ldan 'das kyis bka' stsal pa/ 'khar gsil zhes bya ba ni ye shes kyi spyod pa bsgrub pa dang / mang du thos pa rgya cher sgrub pa dang / 'jig rten dang / 'jig rten las 'das pa'i shes rab dang / dge ba dang / mi dge ba dang / 'dus byas dang / 'dus ma byas dang / zag pa dang bcas pa dang / zag pa med pa rnam par thogs pa med par khong du chud cing shes rab mngon par 'grub par byed pa'i phyir ye shes kyi 'khar ba zhes kyang bya'o/ /tshul khrims dam por srung ba dang / bzod pa dang / bsam gtan la sems rtse gcig tu g.yeng ba med par bsgom pa dang / rtag tu bsod nams kyi las bsgrubs pas mgo'am/ thod la me bar ba bzhin du skad cig tsam du'ang mi gtong ba'i phyir 416a @#/ /yon tan gyi 'khar ba zhes bya'o/ /'khar gsil 'di yongs su 'di 'dzin pa gang yin pa de dag ni gang gi spyod pa rnam pa bcu drug po 'di lta ste/ bden pa bzhi po sdug bsngal dang / kun 'byung ba dang / 'gog pa dang / lam dang / tshad med pa bzhi po byams pa dang / snying rje dang / dga' ba dang / btang snyoms dang / bsam gtan bzhi po bsam gtan dang po dang / bsam gtan gnyis pa dang / bsam gtan gsum pa dang / bsam gtan bzhi pa dang / gzugs med pa'i snyoms par 'jug pa bzhi po nam mkha' mtha' byas skye mched dang / rnam shes mtha' byas skye mched dang / ci'ang med pa'i skye mched dang / 'du shes med 'du shes med min gyi skye mched kyi phun sum tshogs pa dang / gzhan yang / spyod pa sum cu rtsa bdun po/ 'di lta ste/ byang chub kyi phyogs kyi chos sum cu rtsa bdun phun sum tshogs shing chos de dag gsal bar rnam par byed pa dang / bdag nyid kyi lus kyis mngon sum du byas pas sgra'i rjes su mi 'brang ba dang / chos de dag la bdag nyid rnam par rtsen pa dang / stong pa nyid dang / mtshan ma med pa dang / smon pa med pa'i rnam par thar pa'i sgor 416b 'jug pa la rang dbang du gyur cing dga' ba med pa gang yin pa de ni 'phags pa zhes bya ste/ nang yon tan de lta bu dang ldan pas phyi rol 'khar gsil 'dzin pa yin te| 'dis ni gang gdon mi za bar 'phags pa'i yon tan tshul khrims dang / bzod pa dang / bsam gtan dang / shes rab dang / rig pa gsum dang / mngon par shes pa drug dang / rnam par thar pa brgyad po rnams phun sum tshogs pa yin te/ gang zag de 'phags pa yin par mtshon pa nyid kyis gus pa skyed par 'gyur ba'i phyir 'phags pa'i gang zag gi rtags zhes bya'o/ /skyes bu dam par mtshon pa zhes bya ba ni nang na ye shes kyi ngo bo nyid dang ldan pas dam pa zhes bya ste/ gang zag de 'phags pa yin par mtshon pa nyid kyis gus pa skyed par 'gyur ba'i phyir 'phags pa'i nang na ye shes kyi ngo bo nyid dang ldan pas yon tan gyi gzhi sgrub pa dang / chos gong nas gong du rtsol zhing legs par sgrub par byed do zhes ston par byed pa'i phyir skyes bu dam par mtshon pa zhes bya'o/ /gang zag gsal ba de ring por mi thogs par shes rab kyis mngon par grub nas 'dus ma byas kyi gnas rab tu zhi zhing dben pa mya ngan las 'das pa'i bde ba don dam pa'i gnas kyi lam du 'jug par 'gyur ro zhes shes par 417a @#/ /byed pa'i phyir lam gyi chos la phyogs pa'i rgyal mtshan zhes bya'o/ /rjes su dran pa'i rnam par bzhag pa'i don gyi spyod pa zhes bya ba ni 'khor ba 'di rim pa gsum dang ldan par dum bu gsum gyi rim pa mthong ba nyid kyis ngan song gsum gyi sdug bsngal rjes su dran nas tshul khrims dang / ting nge 'dzin dang / shes rab sgom par byed pa dang / gnod pa gsum po rga ba dang / na ba dang / 'chi ba rjes su dran na dug gsum po 'dod chags dang / zhe sdang dang / gti mug yongs su sil bar byed pa dang / khams gsum po dag mi rtag pa yin pa nyid du rjes su dran nas dkon mchog gsum la mngon par yid ches shing gus pa dang / srid pa gsum bsal ba dang / dag pa gtsang ba dang / las rnam gsum rnam par spyad pa dang / rig pa gsum dang ldan par 'dod pa dang / rnam par thar ba gsum la 'jug pa dang / rjes su dran pa drug gi gnas gsum thob pa dang / ye shes thag ring du byed pa gsum rtogs par 'gyur ba'i phyir dum bu gsum rim par rnam par bzhag pa yin no/ /gzhan yang / bzhi sgril du byas pa ni skye ba rnam pa bzhi yongs su bcad pa dang / bden pa bzhi rjes su dran par bya ba dang / tshad med pa bzhi sgom pa dang / 417b bsam gtan bzhi la 'jug par bya ba dang / snyoms par 'jug pa bzhi yongs su dag par bya ba dang / dran pa nye bar gzhag pa bzhi rab tu bstan pa dang / yang dag pa spong ba bzhi bstan par bya ba dang / ting nge 'dzin rkang pa bzhi thob par bya ba'i phyir bzhi sgril du rnam par bzhag pa yin no/ /dbus kyi shing gtogs par rnam par gzhag pa ni lta ba lnga po dag spang ba dang / 'gro ba lnga po dag gi 'khor ba'i sdug bsngal gyi 'khrug pa yongs su spong ba dang / dbang po lnga sgom pa dang / stobs lnga dang ldan par bya ba dang / sgrib pa lnga po dag bsal ba dang / phung po lnga po dag rnam par gshig pa dang / cha lnga dang ldan pa'i chos kyi sku thob par bya ba'i phyir rnam pa lngar bzhag pa yin no/ /sil sgril bcu gnyis su bstan pa ni rten cing 'brel bar 'gyur ba yan lag bcu gnyis su dran par bya zhing thogs pa med par bya ba dang / sgo bcu gnyis pa'i bsam gtan bsgom par bya ba dang / sems la skyon med par rjes su dran par bya'o/ /rim pa gsum dang bzhi sgril du bsdus te/ grangs bdun du bstan pa ni de bzhin gshegs pa'i byang chub kyi yan lag bdun gyi chos rjes su dran par bya ba dang / 'phags pa'i nor bdun mngon par bsgrub par bya'o/ /mar 418a @#/ /rtse gtogs par brgyad du bstan pa ni lam yan lag brgyad pa rjes su bstan par bya ba dang / rnam par thar pa brgyad thob par bya ba dang / mi khom pa brgyad yongs su bsal ba'i phyir rnam pa brgyad bstan pa yin no/ /'khar gsil gyi don mdor bstan pa de lta bu yin pas khyed kyis legs par yongs su gzung bar bya'o/ /bcom ldan 'das la 'od srung gis gsol pa/ bcom ldan 'das/ 'phags pa'i gsung rab la ji skad bstan pa bzhin du 'tshal lo zhes gsol to| |de nas 'od srung chen pos yang bcom ldan 'das la 'di skad ces gsol to/ /bcom ldan 'das/ dus gsum gyi de bzhin gshegs pa rnams kyi chos kun mtshungs pa zhig lags sam/ bcom ldan 'das kyis bka' stsal pa/ kha cig 'khar ba mtshungs kyang spyod pa mi mtshungs pas kha cig tshe na ni bzhi sgril du byas pa'o/ /kha cig gi tshe na ni nyis sgril du byas pa ste/ sil sgril gyi grangs la ni bye brag tu gyur pa med do/ /nga ni deng 'dir bzhi sgril sil sgril bcu gnyis su byas pa'i bstan pa de spyod do/ /gnyis sgril du byas pa ni de bzhin gshegs pa 'od srung gis rnam par bzhag pa yin te/ sems can rnams bden pa gnyis po kun 418b rdzob kyi bden pa dang / don dam pa'i bden pa rjes su dran par bya ba'i ched du don 'di rnam par bzhag pa yin no/ /de'i tshe bcom ldan 'das kyis de skad ces bka' stsal nas tshe dang ldan pa 'od srung chen po 'khor stong nyis brgya dang / 'khor 'dus pa chen po rnams shin tu dga' zhing gus pas mngon par bstod do/ /'phags pa 'khar gsil zhes bya ba theg pa chen po'i mdo rdzogs so// |