//rgya gar skad du/ nand pra pra dz+yA sU tra/ bod skad du/ /dga' bo rab tu byung ba'i mdo/ thams cad mkhyen pa la phyag 'tshal lo/ /'di skad bdag gis thos pa'i dus gcig na/ bcom ldan 'das ser skya'i gnas kyi nya gro d+h+'+ai kun dga'i ra ba na bzhugs 389b so| |de nas bcom ldan 'das snga dro chos gos dang / sham thabs man bas te/ lhung bzed bsnams nas phyi bzhin 'brang ba'i dge sbyong tshe dang ldan pa kun dga' bo dang / ser skya'i gnas su bsod snyoms la gshegs so/ /de nas bcom ldan 'das rigs kyi bu dga' bo'i khyim ga la ba der gshegs pa dang / rigs kyi bu dga' bos bcom ldan 'das rgyang ring po nas gshegs pa mthong ngo / /mthong nas kyang rings pa rings par bcom ldan 'das kyi ched du gdan bshams nas 'di skad ces gsol to/ /bcom ldan 'das/ tshur gshegs/ bcom ldan 'das/ gshegs pa legs so/ /bcom ldan 'das/ gdan bshams pa la bzhugs su gsol/ bcom ldan 'das bzhugs so/ /de nas rigs kyi bu dga' bo bcom ldan 'das kyi zhabs gnyis la phyag btsal te/ bcom ldan 'das kyis spyan sngar 'dug go/ de nas bcom ldan 'das kyis rigs kyi bu dga' bo la 'di skad ces bka' stsal to/ /dga' bo/ ci'i phyir rab tu mi 'byung / dga' bos gsol pa/ bcom ldan 'das/ rab tu 'byung ba zhes bya ba'i tshig gi don ci lags/ bcom ldan 'das gis bka' stsal pa/ sdig pa thams cad yongs su spong ba yin no/ /'dod chags dang / zhe sdang dang / gti mug rab tu sel ba yin no/ /'thab pa dang / 'thab mo dang / mtshang 390a @#/ /'dru ba dang / rtsod pa dang / 'gyed pa dang / sgyu dang / g.yo'i nu pas bsdus pa'i dri ma thams cad 'khru ba yin no/ /lo tog thams cad kyis gzhi lta bur yon tan thams cad kyi gzhi yin no/ /rin po che thams cad kyi 'byung gnas yin no/ /bde ba thams cad kyi yid bzhin gyi nor bu yin no/ /yin tan thams cad kyi go 'phang gi gnas yin no/ /sems can thams cad dbugs 'byin pa yin no/ /'byung po thams cad kyi yid brtan pa yin no/ /srog chags thams cad la mi 'jigs pa sbyin pa yin no/ /sems can dbul po thams cad kyi bum pa bzang po yin no/ /skyabs med pa rnams kyi dpung gnyen yin no/ /kun tu tshol bas phongs pa dang / sdug bsngal gyis nyam thag pa rnams kyi bstis yin no/ /sangs rgyas thams cad kyi ma 'dres pa yin no/ /sems can thams cad kyi mchod par bya ba yin no/ /mkhas pa rnams kyis bsngags pa yin no/ /thar pa 'gro ba rnams kyi lam yin no/ /sems can dag pa rnams kyi bsnyen par bya ba yin no/ /snod du gyur pa rnams kyis bsten par bya ba yin no// ngan song gi sgo gcod pa yin no/ /mtho ris dang / thar pa'i sgo 'byed pa yin no/ /lha'i 'gro ba rnams kun tu 'grengs pa yin no/ /sdug bsngal thams cad kun tu 390b gcod pa yin no/ /sred pa'i 'ching bas bcings pa rnams rnam par grol bar byed pa yin te/ dga' bo/ de ni rab tu 'byung ba zhes bya'o/ /yang dag pa'i lta ba'i khyim yin no/ /thar pa'i yang dag par sdom pa yin no/ /mya ngan las 'das pa la bsnyen pa yin no/ /rgyun nye bar gcod pa yin no/ /nyon mongs pa rnams sreg pa yin no| |phra rgyas rnams 'byin pa yin no/ /lta ba ngan pa'i dra ba rnams 'jig par byed pa yin no/ /bdud kyi rgyal mtshan snyol ba yin no/ /bzod pa smra ba sgreng ba yin no/ /'khor ba'i 'khor lo ldog par byed pa yin no/ /chos kyi 'khor lo skor bar byed pa yin no/ /nu zho'i rgya mtsho skems pa yin no/ /rus pa'i ri 'jig par byed pa yin no/ /skye ba dang / rga ba dang / na ba dang / 'chi ba'i mtha' yin no/ /phung po'i khur 'joms pa yin no/ /nyon mongs pa'i 'dam du bying ba rnams 'byin pa yin no/ /khyim gyi gzeb tu bcing pa rnams rnam par grol bar byed pa yin no/ /gnod pa'i tshor ba rnams zad par byed pa yin no/ /theg tshom rnams dang / nyon mongs pa'i dri ma brtan por gyur pa rnams gcod pa yin no/ /rga shis 'jigs pa rnams dbugs 'byin pa yin no/ /sdug pa dang / bral bzad par byed pa yin no/ /'khor ba'i sdug bsngal gyis gtses pa rnams kyi bde ba dang / mi 'jigs pa'i 'gram 391a @#/ /yin no/ /'dod pa'i khams las rgal bar byed pa yin no/ /gzugs kyi khams las yang dag par rgal bar byed pa yin no/ /gzugs med pa'i khams las rnam par rgal par byed pa yin no/ /de dam par mya ngan las 'das pa mchog thob par byed pa yin te/ dga' bo/ de ni rab tu byung ba zhes bya ba'o/ /'jig rten thams cad kyi mig lta bu yin no/ /gti mug gi mug pa'i sgron ma yin no/ /rgyud dag par byed pa yin no/ /nyon mongs pa'i nad thams cad rab tu zhi bar byed pa yin no/ / lam stor ba rnams la lam kun tu ston pa yin no/ /chos thams cad kyi de kho na ston pa yin no/ /mdud pa thams cad rnam par grol bar byed pa yin no/ /ma rig pa'i mun pa thams cad sel bar byed pa yin no/ /mi shes pa'i rab rib kyi sgrib ba'i mun pa rnams 'dral bar byed pa yin no/ /le lo can rnams brtson 'grus la rtsom par byed pa yin no/ / tshul khrims la ltung ba rnams skyo bar byed pa yin no/ /tshul khrims phun sum tshogs pa rnams rab tu dga' bar byed pa yin no/ /brtson 'grus brtsams pa rnams mchog tu dga' ba yin no/ /nang du yang dga' jog la mngon par dga' ba rnams rab tu dga' ba yin no/ /rnal 'byor spyod pa rnams mchog tu chog shes par byed 391b pa yin no/ /nyon mongs pa'i dgra 'joms par byed pa rnams kyi mtshon cha yin no/ /phyir mi 'ong ba rnams mchog tu rgyal bar byed pa yin no/ /gnas med pa rnams kyi gnas so/ / skyo ba pa med pa rnams kyi skye ba pa yin no/ /'jigs pas 'brel ba rnams kyi mi 'jigs par byed pa yin no/ /skyabs med pa rnams kyi skyabs yin no/ /sdug bsngal rnams kyi bde ba'i yo byad yin no/ /'khor ba'i 'ching bas bcings pa rnams 'grol bar byed pa yin te/ /dga' bo/ de ni rab tu byung ba zhes bya'o/ /lha dang / mi rnams kyis bkur sti byas pa yin no/ /mi'i dbang po rnams kyis mchod pa yin no/ /sangs rgyas thams cad kyi dgongs pa yin no/ /khyim gyi gnas yongs su gtong ba yin no/ /mya ngan las 'das pa'i lam 'dran pa yin no/ /skra'i khur 'dreg pa yin no/ /gos dur smrig ni 'dod chags dang bral ba'i rtags yin no/ /rigs pa la brtson pa brtson 'grus kyi zhing yin no/ /'di ni drang spong rnams kyi rgyal mtshan yin no/ /bdud sdig to can rnams kyi grags pa 'joms pa yin no/ /lha dang / mi rnams rab tu dga' bar byed pa yin te/ dga' bo/ rab tu byung ba ni de lta bu yin na ci'i phyir rab tu mi 'byung / dga' bo/ rab tu byung ba ni 'khor los bsgyur ba'i rgyal srid kyi bde ba bas kyang ches khyad par du 'phags par bde ba yin na/ 392a @#/ /dga' bo/ gzhan yang / dal ba thob pa ni bskal pas byed ba brgyar yang shin tu rnyed par dka' ba yin te/ sangs rgyas 'byung ba ni de bas kyang ches rnyed pa par dka' ba yin no/ /dga' bo/ thar bar 'dod pa rgyal po'i drang srong rnams dang / gzhan yang / 'khor los bsgyur ba'i rgyal po rin po che sna bdun dang ldan pa rnams kyang btsun mo'i 'khor dang bcas te/ sa bor nas rab tu byung ngo / /de bzhin du khyim bdag dang / bram ze'i tshogs gzhan rnams kyang khyim rnams bor nas rab tu byung ngo / /de nas bcom ldan 'das la rigs kyi bu dga' bos 'di skad ces gsol to/ /btsun pa/ bdag ni khyim par mchis la sbyin pa dag stsal/ bsod nams dag byi zhing / bcom ldan 'das nyan thos kyi dge 'dun dang bcas pa la'ang bsnyen bkur bgyi zhing / chos gos dang / bsod snyoms dang / gzigs cha dang / snun gyi gsos sman dang / yo byad rnams kyang bsgrub par bgyi'o/ /bcom ldan 'das kyis bka' stsal pa/ de bzhin gshegs pa dag bcom pa yang dag par rdzogs pa'i pa'i sangs rgyas rnams kyis khams gsum pa gang dag yin pa'i 'jig rten gang bar gyur la/ rigs kyi bu'am/ rigs kyi bu mo dad pa can las lo ba rgyar 'di lta 392b ste| chos gos dang / bsod snyoms dang / mal stan dang / nad kyi gsos sman dang / yo byad rnams kyis bsnyen bkur byed na/ dga' bo/ de ni rab tu byung bar nges par 'byung ba'i sems kyi bcu drug gi char yang mi phod do/ /dga' bo khyod kyis rab tu byung / /dal ba shin tu rnyed dka' ste/ /dga' bo ston pa mngon gyur pa/ /ngal mi mnyes ma byed cig / dga' bo/ dper na/ sa chen po 'di chu gcig pur rgya mtshor gyur la/ de na rus spal zhar ba gcig kyang yod/ de na gnya' shing bug gcig pa gcig kyang rgya la rus spal zhar ba de/ 'di skad du/ gnya' shing gi bu ga der mgrin pa chud par bya'o snyam du sems skye zhing / gnya' shing bu ga can de'ang rlung gis bskyod nas phyogs phyogs su rgyug par byed pa na/ dga' bo/ brgya la rkyen zhig gis rus spal zhar ba de'i mgrin pa gnya' shing gi bu ga der 'jug par 'gyur gyi/ dga' bo/ mi nyid thob pa ni ma yin no/ /dal ba yun sum tshogs pa'ang de bzhin no/ /dga' bo/ khyod kyis mi nyid shin tu rnyed pa dka' ba dang / bde bzhin du dal ba phun sum tshogs pa'ang rnyed na/ dga' bo/ khyod kyis rab tu byung / /dal ba shin tu rnyed dka' rnyed/ /dga' bo ston pa mngon gyur na/ /nga la mi mnyes ma byed cig/ dper na/ 'ga' zhig gis khab kyi mig gnam du bstan te yungs 393a @#/ /kar gyi 'bru rnams 'thor bar byed na/ dga' bo/ brgya la rkyen zhig gis der yungs kar gyi 'bru gang yin pa gcig chud par 'gyur gyi/ dga' bo| mi nyid rnyed pa ni ma yin no/ /dal ba phun sum tshogs pa'ang de bzhin no/ /dga' bo/ mi nyid shin tu rnyed par dka' ba dang / de bzhin du dal ba phun sum tshogs pa'ang rnyed na/ dga' bo khyod kyis rab tu byung / dal ba shin tu rnyed dka' rnyed/ /dga' bo ston pa mngon gyur pa/ /nga la mi mnyes ma byed cig/ de ci'i phyir zhe na/ bskal ba bye ba stong dang ni/ /brgya dang khrag khrig dag tu yang / /sangs rgyas sgra ni mi thos na/ /sangs rgyas mthong ba ga la zhig/ u du ma bA ra'i me tog ni/ /shing las shin tu rnyed dka' ltar/ /de bzhin sangs rgyas rnyed dka' ste/ /khyed kyis nga ni rnyed gyur na/ /dga' bo khyod kyis rab tu byung / /dal ba shin tu rnyed dka' ste/ /dga' bo ston pa mngon gyur pa/ /ngal mi mnyes ma byed cig/ de nas rigs kyi bu dga' bo skra dang kha spu bregs te gos ngur smrig bgos te/ rgyal ba'i bstan pa la yang dag par dad pa kho nas khyim nas khyim med par rab tu byung ngo / /bcom ldan 'das kyis de skad ces bka' stsal ba dang / tshe dang ldan pa kun dga' bo dang / rigs kyi bu dga' bo bcom 393b ldan 'das kyis gsungs pa la mngon par bstod do/ /dga' bo rab tu byung ba'i mdo rdzogs so// //rtsa ngas de ban+d+ra rak+Shi tas zhus chen bgyis pa// |