//rgya gar skad du/ AR+Ya saM dz+nyA na e ka da sha ni rde sha sU tra/ bod skad du/ 'phags pa 'du shes bcu gcig bstan pa'i mdo/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das ku sha'i grong khyer na gyad kyi nye 'khor shing sA la zung gi tshal na bzhugs te/ yongs su mya ngan las 'da' ba'i dus kyi tshe/ dge slong rnams la bka' stsal pa/ dge slong dag /nam 'chi ba'i dus kyi tshe dge slong gis 'du shes bcu gcig mngon du bya'o/ /bcu gcig gang zhe na/ 'di la ma chags pa'i 'du shes dang / sems can thams cad la byams pa'i 'du 242a @#/ /shes dang / 'khon du 'dzin pa thams cad yongs su dor ba'i 'du shes dang / 'chal ba'i tshul khrims thams cad bshags pa'i 'du shes dang / tshul khrims thams cad yang dag par blang ba'i 'du shes dang / nyes pa chen po byas pa dag la'ang yangs pa'i 'du shes dang / dge ba'i rtsa ba chung du dag la che ba'i 'du shes dang / 'jig rten pha rol dag la 'jigs pa med pa'i 'du shes dang / 'dus byas thams cad la mi rtag pa'i 'du shes dang / chos thams cad la bdag med pa'i 'du shes dang / mya ngan las 'das pa ni zhi ba'o snyam pa'i 'du shes mngon du bya'o/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ /'du shes bcu gcig bstan pa bcom ldan 'das kyi zhal chems rdzogs so// // |