//rgya gar skad du/ a ni t+ya tA sU tra/ bod skad du/ mi rtag pa nyid kyi mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das kyis dge slong rnams la bka' stsal pa/ dge slong dag/ 'du byed thams cad mi rtag pa dang / mi brtan pa dang / yid brtan du mi rung ba dang / yongs su 'gyur ba'i chos can te/ dge slong dag /chog gi 'du byed thams cad las sems zlog 239a @#/ /cig |dge slong dag /ma chags pa dang / ma zhen pa dang / rnam par grol bar gyis shig /gang yang sems can thams cad dang / 'byung po thams cad dang / srog chags thams cad kyi gson pa'i mtha' ni 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang khyim bdag gi rigs shing sA la chen po lta bu'am/ bram ze'i rigs shing sA la chen po lta bu'am/ rgyal rigs shing sA la chen po lta bu phyug pa/ nor mang ba/ longs spyod che ba/ nor bu dang / mu tig dang / bai DUR+Ya dang / shang ka shi la dang / byu ru dang / gser dang / dngul dang / nor dang / longs spyod mang ba dang / 'bru dang / dbyig dang / gser dang / mdzod dang / bang ba ba sags pa mang ba dang / bran pho dang / bran mo dang / zho shas 'tsho ba mang ba dang / mdza' bshes dang / nye du dang / snag gi gnyen mtshams mang ba de dag gi gson pa'i mtha' yang 'chi bar 'gyur ba ste/ skyes nas 'chi bar mi 'gyur ba med do/ /gang yang rgyal po rgyal rigs spyi bo nas dbang bskur ba/ yul la dbang ba/ mthu thob pa/ sa chen po'i dkyil 'khor du mngon par rgyal bas gnas pa de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang drang 239b srong nags na gnas pa rtsa ba dang / 'bras bu za zhing rtsa ba dang / 'bras bu la spyod pa/ rtsa ba dang / 'bras bus 'tsho zhing gnas pa de dag gi gson pa'i mtha' yang 'chi bar 'gyur ba ste/ skyes nas 'chi bar mi 'gyur ba med do/ /gang yang rgyal chen bzhi'i ris kyi lha rnams dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams te/ de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang gzugs can gyi lha rnams te| bsam gtan dang po thob pa/ tshangs ris dang / tshangs pa mdun na 'don dang / tshangs chen te/ de dag gi'ang gson pa'i mtha' 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang bsam gtan gnyis pa thob pa'i lha rnams te/ 'od chung dang / tshad med 'od dang / 'od gsal ba ste/ de dag gi'ang gson pa'i mtha' 'chi ba yin zhing mthar 'chi bar 'gyur pa ste/ skyes nas 'chi bar mi 'gyur ba med do/ /gang yang bsam gtan gsum pa thob pa'i lha rnams te/ dge chung dang / tshad med dge dang / dge rgyas pa ste/ de dag gi gson pa'i mtha' yang 'chi ba yin zhing mthar yang 'chi bar 'gyur ba ste/ skyes nas 'chi bar mi 'gyur ba med do/ /gang yang bsam gtan bzhi pa thob pa'i lha 240a @#/ /rnams te/ sprin med dang / bsod nams 'phel dang / 'bras bu che ba dang / 'du shes med pa'i sems can dang / mi che ba dang / mi gdung ba dang / shin tu mthong ba dang / gya nom snang dang / 'og min gyi lha rnams te/ de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang gzugs med pa'i lha rnams te/ nam mkha' mtha' yas skye mched du nye bar gtogs pa dang / rnam shes mtha' yas skye mched du nye bar gtogs pa dang| ci'ang med pa'i skye mchod du nye bar gtogs pa dang / 'du shes med 'du shes med min skye mched du nye bar gtogs pa'i lha rnams te/ de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob ba/ srid par kun tu sbyor ba yongs su zad pa/ yang dag pa'i shes pas sems shin tu rnam par grol ba/ sems kyi dbang thams cad kyi nam pa'i pha rol tu son ba de rnams kyang yid du 'ong ba'i lus spong bar phyag pa'i chos can no/ /gang yang rang sangs rgyas bse ru lta bu dang / tshogs na spyod pa bdag 240b nyid gcig pu 'dul bar byed cing bdag nyid zhi bar byed la/ bdag nyid yongs su mya ngan las 'da' bar byed pa de rnams kyang yid du 'ong ba'i lus spong bar byed pa'i chos can no/ /gang yang de bzhin gshegs pa dgra bcom pa yang dag par rdzogs pa'i sangs rgyas stobs bcu'i stobs dang ldan pa/ mi 'jigs pa bzhis bsnyengs pa mi mnga' ba| khyu mchog gi gnas su zhal gyis 'che ba/ sku la sred med kyi stobs brtan pa 'dus pa/ seng ge'i sgra yang dag par sgrogs pa de rnams kyang yid du 'ong ba'i sku spong bar mdzad pa'i chos can no/ /dge slong dag /'di lta ste/ rdza mkhan gyi snod rnams byas pa ni/ so btang ba'am/ so ma btang ba de dag thams cad kyang 'jig pa dang / mthar zad par 'gyur ro/ /dge slong dag /de bzhin du sems can thams cad dang / 'byung po thams cad dang / srog chags thams cad kyi gson pa'i mtha' ni 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad bka' stsal to/ /kye ma 'du byed rnams mi rtag /skye zhing 'jig pa'i chos can yin/ /skyes nas 'jig par 'gyur ba ste/ /de bas nye bar zhi ba bde/ /de 241a @#/ /ltar rab tu 'bar ba la/ /dgar byar ci yod mgur ci yod/ /mun pa'i nang zhugs gnas pa dag /ci phyir sgron ma tshol mi byed/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ /mi rtag pa nyid kyi mdo rdzogs so// // |