//bod skad du/ mchog tu gdags pa'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das nyan thos kyi dge 'dun dang bcas pa/ rgyal po'i khab na 'od ma'i tshal bya ka land ka gnas par dbyar ngas par dam bcas te bzhugs so/ /der bcom ldan 'das kyis dge slong rnams la bka' stsal pa/ dge slong dag /'di gsum ni mchog tu gdags pa yin te/ gsum gang zhe na/ sangs rgyas mchog tu gdags pa dang / chos mchog tu gdags pa dang / dge 'dun mchog tu gdags pa'o/ /de la sangs rgyas mchog tu gdags pa gang zhe na/ sems can rkang med rnams sam/ rkang gnyis rnams sam/ rkang bzhi rnams sam/ rkang mang rnams sam/ gzugs can rnams sam gzugs can ma yin pa rnams sam/ 'du shes can rnams sam/ 'du shes can ma yin pa rnams sam/ 'du shes yod pa'ang ma yin 'du shes med pa'ang ma yin pa gang yang rung ste/ de dag gi nang na ni de bzhin gshegs pa dgra bcom pa yang dag par rdzogs pa'i sangs rgyas mchog yin par bstan to/ /sangs rgyas la mngon par dga' ba 202a @#/ /su'ang rung ba de dag ni mchog la mngon par dga' ba yin te/ mchog la mngon par dga' ba de dag ni rnam par smin pa'ang lha rnams kyi nang du ltar gyur pa rnams sam/ mi rnams kyi nang du mir gyur pa rnams kyi mchog 'ba' zhig tu 'gyur bar shes par bya ste/ 'di ni sangs rgyas mchog tu gdags pa zhes bya'o/ /chos mchog tu gdags pa gang zhe na/ 'dus byas sam/ 'dus ma byas kyi chos rnams gang yang rung ste/ de dag gi nang na ni 'dod chags dang bral pa'i chos mchog yin par bstan to// chos la mngon par dga' ba su'ang rung ba de dag ni/ mchog la mngon par dga' ba yin te/ mchog la mngon par dga' ba de dag ni/ rnam par smin pa'ang lha rnams kyi nang du lhar gyur pa rnams sam/ mi rnams kyi nang du mir gyur pa rnams kyi mchog 'ba' zhig tu 'gyur bar shes par bya ste/ 'di ni chos mchog tu gdags pa zhes bya'o| |dge 'dun mchog tu gdags pa gang zhe na/ tshogs sam/ 'dus pa'am/ mang po'am/ 'khor gang yang rung ste/ de dag gi nang na ni de bzhin gshegs pa dgra bcom pa yang dag par rdzogs pa'i sangs rgyas rnams kyi nyan thos kyi dge 'dun mchog yin par bstan to/ /dge 'dun la mngon par dga' ba su'ang rung ba de dag ni mchog 202b la mngon par dga' ba yin te/ mchog la mngon par dga' ba de dag ni rnam par smin pa'ang lha rnams kyi nang du lhar gyur pa rnams sam/ mi rnams kyi nang du mir gyur pa rnams kyi mchog 'ba' zhig tu 'gyur bar shes par bya ste/ 'di ni dge 'dun mchog tu gdags pa zhes bya'o/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ /mchog tu gdags pa'i mdo rdzogs so// |