//rgya gar skad du/ AR+Ya aSh+Ta bud+d+hA kaM nA ma ma hA yA na sU tra/ bod skad du/ 'phags pa sangs rgyas brgyad pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang thabs gcig tu bzhugs te/ thams cad kyang dgra bcom pa zag pa zad pa/ nyon mongs pa med pa/ dbang dang ldan par gyur pa/ sems shin tu rnam par grol ba/ shes rab 76a @#/ /shin tu rnam par grol ba/ cang shes pa/ glang po chen po/ bya ba byas pa/ byed pa byas pa/ khur bor ba/ rang gi don rjes su thob pa/ srid pa kun tu sbyor ba yongs su zad pa yang dag pa'i shes pas sems shin tu rnam par grol ba/ sems kyi dbang thams cad kyi dam pa'i pha rol tu son pa sha stag ste/ gang zag gcig ma gtogs pa ni/ 'di lta ste/ tshe dang ldan pa kun dga' bo'o/ /de'i tshe tshe dang ldan pa shA ri'i bu 'khor de nyid du 'dus par gyur te 'dug go /de nas de'i mdo la stong gsum gyi stong chen po'i 'jig rten gyi khams 'di'ang rnam pa drug tu g.yos/ ma dkrol bar bar snang las sil snyan bye ba khrag khrig brgya stong gi sgra dag kyang byung / lha'i me tog mnad ra ba dang / man+dA ra ba chen po dang / many+dzu sha Sha dang / many+dzu sha Sha chen po'i me tog gi char yang bab ste/ rgyal bu rgyal byed kyi tshal mgon med zas sbyin gyi kun dga' ra ba thams cad rin po che'i me tog gis chal pas gang bar gyur to/ /de nas de'i mod la thams cad dang ldan pa'i stong gsum gyi stong chen po'i 'jig rten gyi khams 'di gser gyi kha dog gi snang ba chen pos khyab par gyur to// de nas de'i mod la shar phyogs nas pad+ma sdong po ni gser/ 'dab ma ni dngul/ ze'u 'bru ni bai DUR+Ya/ snying po ni rdo'i snying po las grub pa brgyad cig byung bar gyur to/ /pad+ma'i snying 76b po thams cad kyi steng na seng ge'i khri gru bzhi pa/ rtsa ba bzhi zug pa/ bkra ba/ blta na sdug pa/ dri dang ldan pa/ yid du 'ong ba/ dar gyi lnga ldi dpyangs pa/ bog phor nas spos kyi dris shin tu bdugs pa/ rin po che sna tshogs du ma dag gis legs par brgyan pa/ dril bu g.yer ka'i dra ba du ma 'khrol ba/ rin po che du ma'i bla bre bres pa dag byung bar gyur to/ /seng ge'i khri thams cad kyi stang na de bzhin gshegs pa'i sku dag kyang bzhugs par yang snang sta/ mdzes pa/ blta na sdug pa/ dbang po zhi ba/ thugs zhi ba/ dul ba dang / zhi gnas mchog brnyes pa/ dul ba dang / zhi gnas dam pa brnyes pa/ dbang po bsrungs shing thul ba/ glang po shin tu dul ba lta bu/ mtsho ltar dang zhing rnyog pa med la gsal ba/ skyes bu chen po'i mtshan sum cu rtsa gnyis po de dag gis sku legs par brgyan pa/ gser gyi kha dog lta bu'i skus nyi ma dang / zla ba'i gzi brjid zil gyis mnan te bzhugs pa/ spyod lam brgya stong du ma dang ldan pa/ sku mdog blta bas chog mi shes pa dag snang ngo / /de nas sangs rgyas kyi mthus tshe dang ldan pa shA ri'i bu stan las langs te bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das/ shar phyogs nas pad+ma sdong po ni gser/ 'dab ma ni dngul/ ze'u 'bru ni bai DUR+Ya/ snying po ni rdo'i snying 77a @#/ /po las grub pa brgyad po 'di dag byung bar gyur te/ pad+ma'i snying po thams cad kyi steng na seng+ge'i khri gru bzhi pa/ rtsa ba bzhi zug pa/ bkra ba/ blta na sdug pa/ dri dang ldan pa| yid du mchi ba/ dar gyi lda ldi dbyangs pa/ pog phor nas spos kyi dris shin tu bdugs pa| rin po che sna tshogs du mas legs par brgyan pa/ dril bu g.yer kha'i dran ba du ma 'khrol ba| rin po che du ma'i bla bre bres pa dag byung bar gyur ba/ seng ge'i khri thams cad kyi steng na de bzhin gshegs pa'i sku dag bzhugs par yang gda' ste/ mdzes pa/ blta na sdug pa/ dbang po zhi ba/ thugs zhi ba/ dul ba dang / zhi gnas mchog brnyes pa/ dul ba dang / zhi gnas dam pa brnyes pa/ dbang po bsrungs shing thul ba/ glang po che shin tu dul ba lta bu/ mtsho ltar dang zhing rnyog pa med lags la ba/ skyes bu chen po'i mtshan sum cu rtsa gnyis po dag gis sku legs par brgyan pa/ gser gyi kha dog lta bu'i skus nyi ma dang / zla ba'i gzi brjid zil gyis mnan ste bzhugs pa/ spyod lam brgya stong du ma dang ldan pa/ sku mdog blta bas chog mi shes pa dag gda' ba'i rgyu gang lags/ rkyen gang lags/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu/ khyod de'i phyir legs par rab tu nyon la yid la zungs shig dang bshad do/ /tshe dang 77b ldan pa shA ri'i bus/ bcom ldan 'das/ de bzhin no zhes gsol nas/ bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to// shA ri'i bu / sangs rgyas kyi zhing 'di nas shar phyogs logs su sangs rgyas kyi zhing gang+gA'i klung gcig gi bye ma snyed 'das pa na 'jig rten gyi khams gzhan gyis mi thub pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas shin tu yongs su bsgrags dpal zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su sangs rgyas kyi zhing gang+gA'i klung gnyis kyi bye ma snyed 'das pa na 'jig rten gyi khams yid 'ong dga' zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas dbang po'i tog gi rgyal mtshan gyi rgyal po zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su sangs rgyas kyi zhing gang+gA'i klung gsum gyi bye ma snyed 'das pa na 'jig rten gyi khams sdug dga' zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas shin tu rnam par gnon pa grags mchog dpal zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ 78a @#/ /sangs rgyas kyi zhing 'di nas shar phyogs logs su sangs rgyas kyi zhing gang+gA'i klung bzhi'i bye ma snyed 'das pa na 'jig rten gyi khams sgo kun nas 'jug pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas g.yul las shin tu rnam par rgyal ba'i rtsal zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su sangs rgyas kyi zhing gang+gA'i klung lnga'i bye ma snyed 'das pa na 'jig rten gyi khams rnam dag brtsegs pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas yon tan bkod pa'i dpal kun tu snang ba zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su sangs rgyas kyi zhing gang+gA'i klung drug gi bye ma snyed 'das pa na 'jig rten gyi khams 'gyur med ldan zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas sman gyi rgyal po dpal thogs pa med pa zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su sangs rgyas kyi zhing gang+gA'i klung bdun gyi bye ma snyed 'das pa na 'jig rten gyi khams spobs pa brtsegs pa 78b gang ba zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin po che'i pad+ma las rnam par gnon pas bzhud pa zhes bya ba da ltar bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su sangs rgyas kyi zhing gang+gA'i klung brgyad kyi bye ma snyed 'das pa na 'jig rten gyi khams sgra dbyangs snyan pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin po che'i pad+ma la rab tu gnas pa sA la'i rgyal po zhes bya ba da ltar bzhugs te 'tsho zhing gzhes la chos kyang ston to// shA ri'i bu/ sangs rgyas bcom ldan 'das de dag gi sangs rgyas kyi zhing dag ni yongs su dag pa ste/ snyigs ma lnga med do/ /ya mtshan can thams cad med do/ /gseg ma dang / gyo mo dag med do/ /nye ba'i nyon mongs pa med do/ /bud med med do/ /dud 'gro dang / gshin rje'i 'jig rten yang med do/ /sbrang bu dang / sha sbrang dang / sdig sbrul gyis reg pa rnams med do/ /shA ri'i bu/ rigs kyi bu'am rigs kyi bu mo gang dag sangs rgyas bcom ldan 'das de dag gi mtshan nyan pa dang / 'dzin pa dang / 'chang ba dang / klog pa dang / ston pa dang / rab tu 'don pa dang / kun chub par byed pa de dag ngan song gsum du 'gro ba de ni gnas ma yin zhing go skabs med do/ /shA ri'i bu/ de dag sems can dmyal ba'am/ dud 'gro'i skye 79a @#/ /gnas sam/ gshin rje'i 'jig rten du 'gro ba de ni gnas med do/ /mtshams med pa byed pa dang / dam pa'i chos spong ba'i gang zag ni ma gtogs te/ de'ang chung ngu myong zhing mang du myong bar mi 'gyur ro// shA ri'i bu/ rigs kyi bu'am/ rigs kyi bu mo gang sangs rgyas bcom ldan 'das de dag gi mtshan nyan pa dang / 'dzin pa dang / 'chang ba dang / klog pa dang| ston pa dang / rab tu 'don pa dang / kun chub par byed pa de byang chub kyi snying po la thug gi bar du nam yang mngon par shes pa dang bral bar mi 'gyur/ nam yang mtshan dang bral bar mi 'gyur/ nam yang gzungs dang bral bar mi 'gyur/ nam yang dbang po ma tshang bar mi 'gyur/ nam yang sgra dbyangs shin tu rgyas pa dang bral bar mi 'gyur/ nam yang rnga sgra'i dbyangs dang bral bar mi 'gyur/ nam yang sbyin gnas dang / phyir mi ldog pa dang bral bar mi 'gyur/ nam yang byang chub kyi yan lag gi me tog dang bral bar mi 'gyur/ nam yang theg pa chen po'i mdo sde shin tu rgyas pa dang bral bar mi 'gyur ro/ /shA ri'i bu/ gnas ma yin zhing go skabs med do/ /shA ri'i bu/ bud med gang sangs rgyas bcom ldan 'das de dag gi mtshan nyan pa dang / 'dzin pa dang / 'chang ba dang / klog pa dang / ston pa dang / rab tu 'don pa dang / kun chub par byed pa de bud med kyi dngos po lan gnyis thob par 'gyur ba de ni 79b gnas med do/ /smon lam gyi dbang gis len pa ni ma gtogs so/ /shA ri'i bu/ gnas ma yin zhing go skabs med do/ /shA ri'i bu/ rigs kyi bu'am/ rigs kyi bu mo sangs rgyas bcom ldan 'das de dag gi mtshan nyan pa dang / 'dzin pa dang / 'chang ba dang / klog pa dang / ston pa dang / rab tu 'don pa dang / kun chub par byed na rigs kyi bu'am/ rigs kyi bu mo de rgyal pos 'jigs par 'gyur ba'am/ rkun pos sam/ mes sam/ chus sam/ ma rungs pas sam/ klus sam/ gnod sbyin gyis sam/ dri zas sam/ lha ma yin gyis sam/ mis sam/ mi ma yin pas 'jigs par 'gyur ba'am/ gang gis kyang glags rnyed par 'gyur ba de ni gnas med do/ /las kyi rnam par smin pa drag po ni ma gtogs te/ de'ang chung ngu myong zhing mang du myong bar mi 'gyur ro/ /de 'jig rten pa'am/ 'jig rten las 'das pa'i don gang ci rtsom yang rung ste/ de dge ba'i chos rnams 'phel ba nyid du 'gyur gyi/ 'grib par mi 'gyur bar re bar bya'o/ /de nas bcom ldan 'das kyis de'i tshe tshigs su bcad pa 'di dag bka' stsal to/ /'jig rten mgon po de dag gi /mtshan rnams 'dzin par byed pa ni/ /mi khom thams cad yongs spangs nas/ /myur du bzang 'gror 'gro bar 'gyur/ /sangs rgyas 'byung ba mnyes byas nas/ /ston pa de mthong dad byed cing / /'jig rten sgron ma mthong nas kyang / /mchod pa bzang po byed par 'gyur/ /bskal pa bye ba 80a @#/ /grangs med du/ /'khor ba rnam par spong bar byed/ /gang gis 'dren rnams mthong 'gyur ba'i/ /dri med mig kyang rnam par sbyong / /'jig rten mgon po de dag gi /mtshan rnams su zhig 'dzin byed pa/ /de ni gang dang gar skyes par/ /'jig rten phyag bya'i 'os su 'gyur/ /de yi gzugs mtshan phun sum tshogs/ /phyug po'i khyim du skye bar 'gyur/ /dpa' zhing sbyin pa'i bdag por 'gyur/ /ser sna med cing lhug par gtong / /mtshan rnams 'di dag su 'dzin pa/ /bskal pa bye ba mang por ni/ /lha yi tsan+dan na dmar po yi/ /dri ngad kha nas 'byung bar 'gyur/ /drang srong chen po de dag gi /mtshan rnams bud med thos gyur na/ /bud med dngos po rnams spangs te/ /skyes bu mkhas par red par 'gyur/ /mtshan rnams 'di dag su 'dzin pa| |pha dang ma dang spun rnams dang / /mdza' bshes nye du'i tshogs rnams kyi/ /sdug bsngal nam yang mthong mi 'gyur/ /mtshan rnams 'di dag su 'dzin pa/ /de dang de dag 'jig rten na| |'dab ma stong phrag bye ldan pa'i/ /rin chen pad+mar skye bar 'gyur/ /mtshan rnams 'di dag su 'dzin pa/ /sangs rgyas zhing rnams thams cad du/ /nam mkha' las ni 'gro byed cing| |'jig rten mgon po sangs rgyas zhing / /rnam par dag pa mthong bar 'gyur/ /'jig rten mgon po'i drung dag tu/ /zab mo'i chos ni nyan byed cing / /ji ltar thos pa chud mi gson// 80b mtshan rnams 'di dag su 'dzin pa/ /de dag la ni sdig can bdud/ /nag po'i rtsa lag sder bcas pas/ /nam yang glags rnyed mi 'gyur ro/ /mtshan rnams 'di dag su 'dzin pa/ /de dag mtshon gyis mi gsod cing / /dug dang mes kyang ma yin la/ /rgyal po dang ni rkun po yis/ /de dag gtse bar byed mi 'gyur/ /lha dang klu dang gnod sbyin dang / /dri za lto 'phye che rnams kyis/ /glags kyang rnyed par mi 'gyur ro/ /sangs rgyas 'di dag mi mchog ste/ /dpal gyi snying po 'brug gi rgyal/ /mdzangs pa bag yod gyur nas ni/ /mkhas mi su zhig mtshan mi 'dzin/ /'jig rten mgon po thams cad kyi/ /mtshan rnams 'di dag su nyan pa/ /mi de dag ni cho gas nyan/ /grags ldan rnams kyi mtshan thos nas/ /de dag dpa' zhing shes rab che/ /'jig rten mi mchog sangs rgyas 'gyur/ /bcom ldan 'das kyis de skad ces bka' stsal nas/ tshe dang ldan pa shA ri'i bu dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa sangs rgyas brgyad pa zhes bya ba theg po'i mdo rdzogs so// //rgya gar gyi mkhan po dzin mi tra dang / su ren+d+ra bo d+hi dang / zhus chen gyi lo tsA ba ban+de ye shes sdes zhus te gtan la phab pa/ sh+lo ka dgu bcu rtsa gcig/ |