//rgya gar skad du/ AR+Ya b+ha ga ba ti pra dz+nyA ba ra mi tA hri da ya/ bod skad du/ 'phags pa bcom ldan 'das ma shes rab kyi pha rol tu phyin pa'i snying po| bam po gcig go/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das rgyal 259b bo'i khab na bya rgod phung po'i ri la dge slong gi dge 'dun chen po dang / byang chub sems dpa'i dge 'dun chen po dang thabs cig tu bzhugs te/ de'i tshe bcom ldan 'das zab mo snang ba zhes bya ba'i chos kyi rnam grangs kyi ting nge 'dzin la snyoms par zhugs so/ /yang de'i tshe byang chub sems dpa' sems dpa' chen po 'phags pa spyan ras gzigs dbang phyug shes rab kyi pha rol tu phyin pa zab mo spyod par rnam par blta zhing / phung po lnga po de dag la yang ngo bo nyid kyis stong par rnam par blta'o/ /de nas sangs rgyas kyi mthus tshe dang ldan pa shA radwa ti'i bus byang chub sems dpa' sems dpa' chen po 'phags pa spyan ras gzigs dbang phyug la 'di skad ces smras so/ /rigs kyi bu'am/ rigs kyi bu mo gang la la shes rab kyi pha rol tu phyin pa zab mo'i spyod pa spyad par 'dod pa des ji ltar bslab par bya/ de skad ces smras pa dang / byang chub sems dpa' sems dpa' chen po 'phags pa spyan ras gzigs dbang phyug gis tshe dang ldan pa shA ri'i bu la 'di skad ces smras so/ /shA ri'i bu/ rigs kyi bu'am/ rigs kyi bu mo gang la la shes rab kyi pha rol tu phyin pa zab mo'i spyod pa spyad par 'dod pa des 'di ltar rnam par blta bar bya ste/ phung po lnga po de dag kyang ngo bo nyid kyis stong par rnam par rjes su blta'o/ /gzugs stong pa'o/ /stong pa nyid gzugs so/ /gzugs las stong pa 260a @#/ /nyid gzhan ma yin/ stong pa nyid las gzugs gzhan ma yin no/ /de bzhin du tshor ba dang / 'du shes dang / 'du byed rnams dang / rnam par shes pa rnams stong pa'o/ /shA ri'i bu/ de lta bas na/ chos thams cad stong pa nyid de/ mtshan nyid med pa/ ma skyes pa/ ma 'gag pa/ dri ma med pa/ dri ma dang bral ba med pa/ bri ba med pa /gang ba med pa'o/ /shA ri'i bu/ de lta bas na stong pa nyid la gzugs med/ tshor ba med/ 'du shes med/ 'du byed rnams med/ rnam par shes pa med/ mig med/ rna ba med/ sna med/ lce med| lus med/ yid med/ gzugs med/ sgra med/ dri med/ ro med/ reg bya med/ chos med do/ /mig gi khams med cing / mig gi rnam par shes pa'i khams med pa nas yid kyi khams med cing / yid kyi rnam par shes pa'i khams kyi bar du yang med do/ /ma rig pa med cing / ma rig pa zad pa med pa nas rga shi med cing / rga shi zad pa'i bar du yang med do| |sdug bsngal ba dang / kun 'byung ba dang / 'gog pa dang / lam med/ ye shes med/ thob pa med/ ma thob pa yang med do/ /shA ri'i bu/ de lta bas na/ byang chub sems dpa' rnams thob pa med pa'i phyir shes rab kyi pha rol tu phyin pa la brten nas gnas te sems la sgrib pa med pas 'jigs pa med de/ phyin ci log las shin tu 'das nas 260b mya ngan las 'das pa'i mthar phyin to/ /dus gsum du rnam par bzhugs pa'i sangs rgyas thams cad kyang shes rab kyi pha rol tu phyin pa la brten te bla na med pa yang dag par rdzogs pa'i byang chub mngon par rdzogs par sangs rgyas so/ /de lta bas na/ shes rab kyi pha rol tu phyin pa'i sngags/ rig pa chen po'i sngags/ bla na med pa'i sngags/ mi mnyam pa dang mnyam pa'i sngags/ sdug bsngal thams cad rab tu zhi bar byed pa'i sngags/ mi rdzun pas na/ bden par shes par bya ste/ shes rab kyi pha rol tu phyin pa'i sngags smras pa/ tad+ya tha/ ga te ga te/ pa ra ga te/ pa ra saM ga te/ bo d+hi swAhA/ shA ri'i bu/ byang chub sems dpa' sems dpa' chen pos shes rab kyi pha rol tu phyin pa zab mo la de ltar bslab par bya'o/ /de nas bcom ldan 'das ting nge 'dzin de las bzhengs te byang chub sems dpa' sems dpa' chen po 'phags pa spyan ras gzigs dbang phyug la legs so/ /zhes bya ba byin nas legs so/ / legs so/ /rigs kyi bu/ de de bzhin no/ /de de bzhin te/ ji ltar khyod kyis bstan pa de bzhin du shes rab kyi pha rol tu phyin pa zab mo la spyad par bya ste/ de bzhin gshegs pa rnams kyang rjes su yi rang ngo / /bcom ldan 'das kyis de skad ces bka' stsal nas tshe dang ldan pa shA ri'i bu dang / byang chub sems dpa' 'phags pa spyan ras gzigs kyi dbang phyug dang / 261a @#/ /thams cad dang ldan pa'i 'khor de dag lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /bcom ldan 'das ma shes rab kyi pha rol tu phyin pa'i snying po zhes bya ba theg pa chen po'i mdo rdzogs so/ /rgya gar gyi mkhan po bi ma la mi tra dang / lo tsA ba dge slong rin chen sdes bsgyur cing / zhu chen gyi lo tsA ba dge blo dang / nam mkha' la sogs pas zhus te gtan la phab pa'o// |