rgya gar skad du/ aR+Ya d+harma ar+tha bi b+ha ga nA ma ma hA yA na sU tra/ bod skad du/ 'phags pa chos dang don rnam par 'byed pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyam yod na rgyal bu rgyal byed kyi tshal mgon med 65a @#/ /zas sbyin gyi kun dga' ra ba na dge slong gi dge 'dun chen po dang thabs cig tu bzhugs te/ byang chub sems dpa'i dge 'dun chen po dang yang thabs cig go /de nas bcom ldan 'das kyis byang chub sems dpa' sems dpa' chen po rgyal bas dga' la bka' stsal pa/ rigs kyi bu/ sngon byung ba 'das pa'i dus bskal pa grangs med pa'i yang ches grangs med cing tshad med par gyur pa de'i tshe de'i dus na 'jig rten gyi khams me tog gi 'byung gnas zhes bya ba 'byor ba rgyas pa/ bde ba/ lo legs pa| nyams dga' ba/ skye bo mang po dang mi rnams kyis gang ba/ lag mthil ltar mnyam par gyur ba zhig byung ngo / /rigs kyi bu/ 'jig rten gyi khams me tog gi 'byung gnas de na de bzhin gshegs pa dgra bcom pa yang dag par rdzogs pa'i sangs rgyas me tog las byung ba zhes bya ba da ltar yang bzhugs te 'tsho zhing gzhes la 'khor bzhi dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang / mi ma yin pa rnams la chos kyang ston to/ /rigs kyi bu| 'jig rten gyi khams me tog gi 'byung gnas de na mi'i dbang po 'khor los bsgyur ba'i rgyal po stong gsum yi stong chen po'i 'jig rten gyi khams la dbang byed pa rgyal ba 65b thob pa zhes bya ba zhig byung ngo / /rigs kyi bu/ rgyal po rgyal ba thob pa de'i tshe tshig rab la sems can de dag bde zhing yid bde ba skyes la/ dge ba bcu'i las kyi lam dang ldan zhing bdag gi chung mas mngon par dga'o/ /sems can de dag thams cad kyang theg pa gcig la yang dag par zhugs pa sha stag ste/ 'di lta ste/ theg pa chen po la yang dag par zhugs pa| theg pa mchog la yang dag par zhugs pa/ theg pa gtso bo la yang dag par zhugs pa/ theg pa dam pa la yang dag par zhugs pa/ theg pa khyad par du 'phags pa dang / rab dang / phul dang / bla ma dang / bla ma'i yang bla ma dang / bla na med pa la yang dag par zhugs pa/ theg pa mnyam pa med pa la yang dag par zhugs pa/ theg pa mi mnyam pa dang mnyam pa la yang dag par zhugs pa/ theg pa bsam gyis mi khyab pa la yang dag par zhugs pa/ theg pa gzhal du med pa la yang dag par zhugs pa sha stag go /rigs kyi bu / rgyal po rgyal ba thob pa de'i tshe tshig rab la theg pa chen po ma gtogs par theg pa gzhan gyi ming yang mi grags so/ /rigs kyi bu/ rgyal po rgyal ba thob pa de'i btsun mo'i 'khor ni / dgu khri dgu stong yod de/ de dag thams cad kyang theg pa gzhan ma yin pa la yang dag par zhugs pa/ theg pa chen po'i khong su 'dus pa/ nyin mtshan du chos 'dod cing chos la 66a @#/ /dga' ba sha stag go /rigs kyi bu/ de nas rgyal po de'i btsun mo dam pa rin po che dpal zhes bya ba byang chub sems dpa' sdud pa/ sangs rgyas dang chos dang dge 'dun la yang dag par zhugs pa/ theg pa chen po'i khongs su 'dus pa/ nyin mtshan du chos 'dod pa/ chos kyi kun dga' la dga' ba zhig yod de/ rigs kyi bu/ rin chen dpal de chen po la 'os pa'i seng+ge'i khri la 'dug pa dang / de'i pang nas bu rin chen 'byung gnas zhes bya ba lha'i rgyan gyis rnam par brgyan pa/ lha'i gos bgos pa/ lus mtshan dang dpe byad bzang pos legs par brgyan pa zhig skyil mo krung bcas te byung nas gzhon nu de byung ma thag tu gzhon du des ma la 'di skad ces smras so/ /yum/ de bzhin gshegs pa me tog las byung ba de 'tsho'am/ de nas rgyal mo rin chen dpal des gzhon nu de la 'di skad ces smras so/ /bu gcig kun mkhyen 'jig rten mgon/ /bla na med pa dga' mdzad pa/ /lha dang mi dang bcas pa yi/ /'jig rten na ni de 'tsho 'o/ /de nas rgyal bu rin chen 'byung gnas kyis pha ma la 'di skad ces smras so/ /yab yum tshur gshegs/ de bzhin gshegs pa dgra bcom pa yang dag par rdzogs pa'i sangs rgyas me tog las byung ba de la blta ba dang / phyag bgyi ba dang / mchod pa dang / bsnyen bkur bgyi ba dang / 66b chos mnyam pa'i slad du gshegs so/ /de ci'i slad du zhe na/ yab yum/ de bzhin gshegs pa de ni/ lha dang mir bcas pa'i 'jig rten na dka' ba mdzad pa ste/ ma grol ba rnams grol mdzad mgon/ /ljongs pa rnams la mig sbyin mdzad/ /chos la dpa' zhing cher dpa' ba/ /lhun po lta bur mi g.yos so/ /de nas rgyal po rgyal ba thob dang / rgyal mo rin chen dpal gyis bu de blangs te btsun mo'i 'khor dang g.yog tu bcas par bcom ldan 'das de'i zhabs kyi drung du phyin nas bcom ldan 'das la lan bdun bskor ba byas te brgya stong ri ba'i mu tig gi se mo do phul lo/ /phul nas kyang 'khor de nyid du 'dug par gyur to/ /rigs kyi bu/ de nas rgyal bu des rdzu 'phrul gyi stobs skyed pa byas nas shing ta la bdun srid tsam gyi bar snang gi nam mkha' la 'dug ste bcom ldan 'das me tog las byung ba de la rin po che'i char dang / me tog gi char dang / spos kyi char rnams kyis gtor/ mngon par gtor te/ /gtor nas bcom ldan 'das la 'di skad ces gsol to/ /ston pa rgal nas sems can rnams/ /sdug bsngal chu bo che las sgrol/ /bdag ni thams cad mkhyen pa khyod| |blta ba'i slad du 'dir mchis so/ /'jig rten mgon po bla na med/ /lha dang mi yi 'jig rten na/ /khyod kyis yon tan gang bstan dang / /khyod 'dra ba ni yong ma mchis/ /sems 67a @#/ /can shul ngan lhung gyur cing / /'dod chags zhe sdang dbang mchis rnams/ /theg pa dman la bzhag mdzad nas/ /theg pa chen po rjod par mdzad/ thabs la mkhas shing dpa' ba ste/ /thugs rje chen po'i dbang du gyur/ /chos ni don te chos kyi ngoms/ /chos rtsom yon tan 'byung gnas so/ /gang dag skye ba ma mchis pa// chos de snying po med mkhyen nas/ /chos nyid kyang ni khyod kyis mkhyen/ /des na khyod kyis dka' ba mdzad/ /de nas gzhon nu des tshig 'di dag gis bcom ldan 'das de bla bstod nas yang bskor ba byas te bcom ldan 'das kyi zhabs kyi drung du 'dug go /de nas bcom ldan 'das kyis pad+ma'i 'dab ma ltar yangs pa'i spyan gyis phyogs thams cad du gzigs te 'khor bzhi po de dag gi sems dang sems las byung ba mkhyen nas rgyal po rgyal ba thob pa de la 'di skad ces bka' stsal to/ /rgyal po chen po/ phung po lnga po de dag ni/ snying po med pa yin no/ byis pa so so'i skye bo rnams ni/ snying por 'du shes so/ /rgyal po chen po/ phung po rnams ni/ kha dog ngan pa/ dring ba/ khrag dang rang 'byung ba/ shing dang / bong ba dang / lam dang mtshungs pa/ snying po med pa/ g.yo ba med pa dang / dga' ba dang mi dga' bar 'brel ba/ srid pa'i lu gu rgyud kyis phan tshun 67b sbrel ba| nyon mongs pa mang ba/ smad pa yin na/ snying po med pa la snying por 'du shes/ mi rtag pa la rtag par 'du shes/ mi sdug pa la sdug par 'du shes/ mi gcang ba la gtsang bar 'du shes/ bden pa ma yin pa la bden par 'du shes so/ /rgyal po chen po/ phung po nga ni/ rang gi las kyis rnam par bris pa ste/ rgyal po chen po/ dper na/ rma bya'i 'jug tshogs tshon sna lnga pa de la ri mo mkhan gyis bris pa'ang med/ tshon kyang ci'ang med de/ /de ni/ rang gi las kyis rnam par bris pa nyid do/ /rgyal po chen po/ de bzhin du byis pa so so'i skye bo rnams kyang rang gi las kyis rnam par bris pa phan tshun gyi rkyen las byung ba dag go /de nas 'khor de'i nang nas byang chub sems dpa' sems dpa' chen po mi pham dbang phyug ces bya ba de stan las langs te bcom ldan 'das la bskor ba byas nas bla gos phrag pa gcig tu gzar te bus mo g.yas pa'i lha nga sa la btsugs nas lus btud lus smad de sor mo bcu thal mo sbyar nas bcom ldan 'das la 'di skad ces gsol to/ /bcom ldan 'das/ phung po 'di dag ni/ kha dog ngan pa/ dring ba/ khrag dang rang 'byung ba/ shing dang / bong ba dang / rtsig pa dang / lam dang 'dra ba/ snying po ma mchis pa/ g.yo ba ma mchis pa lags na/ byis pa so so'i skye bo rnams ni/ snying por 'du shes te/ 68a @#/ /yang dag pa ma lags pa/ ldongs pa/ rmongs pa dang 'dra ba/ gti mug la gzhol ba/ mun pa dang / rab rib dang / ling tog gis kun nas khebs pa/ lta ba thams cad kyi tshang tshing thibs pos gtibs pa lags so/ /bcom ldan 'das/ chos kyi phung po bzhi po 'di dag ni/ zab ste/ nam mkha' dang mtshungs shing 'dra ba lags so/ /bcom ldan 'das/ gang dag 'di lta bu'i mdo sde'i tshig bshad pa 'di dag la yang dag pa'i 'du shes skyed pa'i sems can de dag 'byung bar 'gyur lags sam| de skad ces gsol pa dang / bcom ldan 'das me tog las byung ba des byang chub sems dpa' sems dpa' chen po de la 'di skad ces bka' stsal to/ /rigs kyi bu/ gang gi tshe byang chub sems dpa' sems dpa' chen po 'byung ba de'i tshe sems can rnams sbyang ba'i phyir 'byung ste/ mos pa ji lta ba bzhin du sems can rnams la chos kyang ston to| |sred pas nyam thag pa rnams kyi sred pa gcod do/ /sdug bsngal gyis nyam thag pa rnams kyi mya ngan sel to/ /chos thams cad snying po med par shes te nam mkha' dang mtshungs shing 'dra bar shes nas sems can rnams chos nyid la rab tu 'god de/ de'i tshe byang chub sems dpa' rnams sems can sbyong bar byed pa zhes bya'o/ /bcom ldan 68b 'das de bzhin gshegs pa dgra bcom pa yang dag par rdzogs pa'i sangs rgyas me tog las byung ba des sems can bstan pa 'di bshad pa na rgyal po rgyal ba thob pa bu dang bcas pa dang / rgyal mo rin chen dpal de dang / btsun mo'i 'khor dang / g.yog 'khor du bcas pa thams cad skra dang kha spu bregs te bcom ldan 'das de las rab tu byung ngo / /de nas bcom ldan 'das kyis 'khor de dag la 'di skad ces bka' stsal to/ /rigs kyi bu dag/ rgyal bu gzhon nu 'di la ltos/ rigs kyi bu dag /skyes bu dam pa 'dis sangs rgyas bye ba khrag khrig brgya stong phrag dgu bcu rtsa dgu la dge ba'i rtsa ba bskyed de/ thams cad du'ang chos smra bar gyur to/ /'di ni/ rtag tu skyes bu dam pa 'di'i phar gyur te/ rtag tu skyes bu dam pa 'dis bla na med pa yang dag par rdzogs pa'i byang chub la yongs su smin par byas so/ /rigs kyi bu dag /rgyal bu gzhon nu rin chen 'byung gnas 'di ni/ nga yongs su mya ngan las 'das ma thag tu sangs rgyas su 'gyur te/ rin po che du ma bkod pa'i byang chub kyi shing drung du 'dug nas de byang chub thob pa'i tshe de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston 69a @#/ /pa/ sangs rgyas bcom ldan 'das 'od zer kun nas mngon 'phags dpal brtsegs rgyal po zhes bya bar 'gyur ro/ /'jig rten gyi khams ni/ kun nas rin po ches yang dag par bris pa zhes bya bar 'gyur ro/ /de'i nyan thos kyi dge 'dun ni/ tshad med par 'gyur ro/ /de'i tshe'i tshad ni/ bskal pa bye ba khrag khrig phrag dgu bcu rtsa drug thub par 'gyur ro/ /de'i dam pa'i chos kyi gzugs brnyan ni/ lo 'bum phrag bdun cu rtsa lngar gnas par 'gyur ro/ /rigs kyi bu/ de nas byang chub sems dpa' sems dpa' chen po'i lung bstan pa brjod pa bshad pa na srog chags brgyad khri bzhi stong mi skye ba'i chos la bzod pa thob par gyur to/ /rigs kyi bu/ de'i tshe de'i dus kyi de bzhin gshegs pa de gzhan zhig yin pa snyam du khyod dogs shing the tshom za'am yid gnyis su gyur na/ de ltar mi blta'o/ /de ci'i phyir zhe na/ rigs kyi bu/ de bzhin gshegs pa dgra bcom pa yang dag par rdzogs pa'i sangs rgyas 'od dpag med ces bya ba 'di de'i tshe de'i dus na de bzhin gshegs pa me tog las byung zhes bya bar gyur te/ 'jig rten gyi khams der chos bstan par gyur to/ /rigs kyi bu/ de'i tshe de'i dus na gzhon nu rin chen 'byung gnas zhes bya ba de gzhan zhig yin pa snyam du khyod dogs shing the tshom za'am yid gnyis 69b su gyur na/ de ltar mi blta'o/ /de ci'i phyir zhe na/ rigs kyi bu/ byang chub sems dpa' spyan ras gzigs dbang phyug 'di de'i tshe de'i dus na rgyal po rgyal ba thob pa zhes bya ba de'i bur gyur te| de bzhin gshegs pa des nga las 'tshang rgya bar 'gyur ro/ /zhes lung bstan to/ /de nas 'khor de'i byang chub sems dpa' sems dpa' chen po rgyal bas dga' zhes bya bas bcom ldan 'das la sor mo bcu'i thal mo sbyar te bcom ldan 'das la 'di skad ces gsol to/ /bcom ldan 'das/ chos kyi rnam grangs 'di ni/ sems can dge ba'i rtsa ba ma bskyed pa rnams kyi rna lam du grags par yang mi 'gyur ro/ /gang dag yi ger 'bri ba dang / yi ger 'brir stsol ba dang / 'dzin pa dang / kha ton bgyid pa dang / me tog dang / bdug pa dang / spos rnams kyis mchod par 'gyur ba lta smos kyang ci 'tshal/ de nas bcom ldan 'das kyis byang chub sems dpa' sems dpa' chen po rgyal bas dga' la 'di skad ces bka' stsal to/ /rigs kyi bu/ gang dag gis sangs rgyas bcom ldan 'das gang+gA'i klung gi bye ma snyed la bsnyen bkur byas pa de dag gis mdo sde 'di rnyed par 'gyur ro/ /rigs kyi bu| chos kyi rnam grangs 'di dag gang gi rna lam du grag par gyur la the tshom mi za ba'i sems can de dag 'di nas shi 'phos nas 'jig rten gyi khams bde ba can du skye bar 'gyur ro/ /rigs 70a @#/ /kyi bu| gang na mdo sde 'di lta bu dag 'dzin pa'i sa phyogs de dag phyag bya ba'i 'os su 'gyur ro/ /rigs kyi bu/ phyi ma'i tshe phyi ma'i dus na bud med gang la la zhig chos kyi rnam grangs 'di 'chang ngam/ klog na/ de bud med kyi lus brjes nas 'jig rten gyi khams bde ba can du skye bar 'gyur te/ de nyid de'i bud med kyi lus kyi tha ma yin no/ /'chi ba'i dus kyi tshe na'ang de bzhin gshegs pa 'od dpag med mthong bar 'gyur ro/ /bcom ldan 'das kyis de skad ces bka' stsal nas byang chub sems dpa' sems dpa' chen po rgyal bas dga' ba dang / byang chub sems dpa' de dag dang / dge slong de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par stod do/ /'phags pa chos dang don rnam par 'byed pa zhes bya ba thag pa chen po'i mdo rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo tsA ba ban+d+he ye shes sdes bsgyur cing zhus te gtan la phab pa/ |