rgya gar skad du/ aru \?\d+harma \?\ na ma \?\ ma ha ya na shA hA \?\/ bod skad du/ 'phags pa chos kyi phung po zhes bya ba theg pa chen po'i mdo/ sangs rgyas 42a @#/ /dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das ser skya'i gnas na shing n+ya gro d+ha'i kun dga' ra ba na dge slong lnga brgya tham pa'i dge slong gi dge 'dun chen po dang thabs cig tu bzhugs te/ de nas tshe dang ldan pa shA ri'i bu dang / tshe dang ldan pa maung+gal gyi bu chen po dang / tshe dang ldan pa 'od srung chen po dang / tshe dang ldan pa kun dga' bo dang / tshe dang ldan pa sgrag can zin bcom ldan 'das ga la der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /phyogs gcig tu 'dug nas tshe dang ldan pa shA ri'i bus bcom ldan 'das la 'di skad ces gsol to/ / bcom ldan 'das/ chos kyi phung po chos kyi phung po zhes bgyi na/ de bzhin gshegs pas chos kyi phung po'i tshad ji tsam gyis chos kyi phung po zhes bka' stsal/ chos kyi phung po ni / ji tsam zhig /chos kyi phung po ni/ gang lags/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu/ de bzhin gshegs pas chos kyi phung po ni/ brgyad khri bzhi stong du gsungs te/ shA ri'i bu/ de la chos thams cad skye ba med pa 'di ni/ chos kyi phung po'i rjes su 'jug pa dang po yin no// 42b shA ri'i bu/ chos 'ga' zhig la chos she'am/ chos gang yang skye ba'am 'gag pa zhes nga mi smra'o/ /de ci'i phyir zhe na/ shA ri'i bu/ chos thams cad ni/ skye ba med pa'i chos can dang / 'gag pa med pa'i chos can yin pa'i phyir ro/ /shA ri'i bu/ 'di lta ste/ dper na/ ma ning ni/ skyes pa'am bud med ces bya ba'i ming mi 'thob cing / skyes pa'am bud med ces brjod par bya ba ma yin no/ /de ci'i phyir zhe na/ shA ri'i bu/ de ni/ skyes pa'am bud med du gdags su med pa'i phyir ro/ /shA ri'i bu/ de bzhin du chos thams cad de bzhin gshegs pas bla na med pa yang dag par rdzogs pa'i byang chub mngon par rdzogs par sangs rgyas te/ de'i phyir chos kyis chos rab tu shes so/ /zhes brjod par mi bya'o/ /shA ri'i bu/ 'di lta ste/ dper na| za ma'am/ ma ning ni/ 'dod pa'i 'dod chags sbangs pa'ang ma yin la 'dod pa la sten pa'ang ma yin no/ /shA ri'i bu/ de dag gis bud med sdug gu mthong nas 'dod chags kyi sems skyes pas za ma'am ma ning rnams las phal cher byin pa nad kyis btab par 'gyur/ byin pa 'dzag par 'gyur/ byin pa khar ba lta bur 'gyur/ bzhin dmar por 'gyur ro// shA ri'i bu/ /'di ji snyam du sems/ za ma'am/ ma ning gang yin pa de la ma 'gyel/ de'i las la mtshon gyis ma btab par ci'i phyir de dag byin pa na bar 'gyur snyam/ de skad 43a @#/ /ces bka' stsal ba dang / bcom ldan 'das la tshe dang ldan pa shA ri'i bus 'di skad ces gsol to/ /bcom ldan 'das/ za ma'am/ ma ning ni / btsun mo'i 'khor srung ba lags te/ de dag bud med sdug gu mthong nas 'dod chags kyi sems skye lags so/ /de dag 'dod chags kyi sems kyis nyon mongs pa khol bar 'gyur te/ nyon mongs pa khol ba de dag gi lus khu chus rgyas par gyur pas de dag 'dod chags kyi gdung bas gdungs pa na byin pa shin tu gas par 'gyur lags te/ de ltar de dag gi lus ma rungs par 'gyur lags so/ /de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu/ za ma'am ma ning las gang dag bde 'gro mtho ris kyi 'jig rten du skye ba ni/ nyung ste/ phal cher sems can dmyal bar 'gro bar 'gyur ro/ /shA ri'i bu/ dge sbyong shAkya'i bu rnams las gang dag 'dod chags kyis 'phrog par mi 'gyur ba'i khyad par la ltos/ de ci'i phyir zhe na/ 'dod pa rnams ni/ dngos po med par shes/ 'dod pa rnams ni / mi gtsang bar shes nas de dag 'dod pa rnams kyis skyo zhing yid byung la mngon par mi dga' nas tshangs par spyad pa spyod de/ bzhin dang 'phral ba'i mdangs gsal ba yin no/ /shA 43b ri'i bu| skyes bu ngan pa rnams kyis ni/ skyo ba'am yid 'byung bar mi nus so/ /de ci'i phyir zhe na/ shA ri'i bu/ 'di ltar skyes bu ngan pa de dag ni/ 'dod pa la kun tu rtog pa rnams kyis kun tu rtog pa rnams dang ldan pa'i phyir ro/ /shA ri'i bu/ skyes bu ngan pa rnams kyis kun tu rtog pa rnams gang zhe na/ gang dag med pa la rtog par byed pa ste/ mi gtsang ba la gtsang bar rtog par byed/ 'du shes med pa la 'du shes su rtog par byed/ bud med la bud med du rtog par byed/ 'dod chags dang bcas pa la 'dod chags dang bcas par rtog par byed pa ste/ shA ri'i bu/ de lta bu de dag ni/ skyes bu ngan pa rnams kyi kun tu rtog pa rnams yin no/ /shA ri'i bu/ de dag ni/ za ma dang ma ning 'dod pas zin pa rnams kyi las rnams yin te| de dag skyes bu dam pa'i las rnams ni/ ma yin no/ /shA ri'i bu/ ma ning gang la la zhig skyes bu ngan pa rnams kyi kun tu rtog pa de lta bu dag la kun tu rtog par byed pa ni/ bdag gis reg go /zhes nyams su myong bar byed de/ bu ga dgu'i sgo dang ldan pa 'di mi gtsang ba 'dzag pa 'di la gtsang bar 'du shes skyed par byed do/ /'di dag thams cad ni/ bya ba ma yin pa ste/ de dag ni/ skyes bu dam pa'i las rnams ma yin no/ shA ri'i bu/ dge slong ngam/ bram ze gang la la dag 'dod pa'i nyes dmigs yang dag pa ji lta ba bzhin du mi 44a @#/ /\?\ zhes pa de dag ni/ bud med pa kun tu rtag cing mig la mtshan mar 'dzun par byed de/ baiDUR+Ya lta bu'i 'du shes su byed la chu'i dbu ba bzhin du 'du shes su ni mi byed do/ /shA ri'i bu/ 'di lta ste/ dper na/ bong mo 'brangs pa dang / phag mo 'brangs pa ni/ 'brangs pas lus stong par 'gyur zhing lus las sha ma mi gtsang ba/ btsog pa/ blta bar bya ba ma yin pa 'byung ngo / /shA ri'i bu/ mig kyang de dang 'dra bar brjod de/ 'di lta ste/ dper na/ bong mo'i sha ma'am/ phag mo'am/ khyi mo'i sha ma dang 'dra bar mig kyang de bzhin 'dug ste/ mig gi 'bras bu'i nang de ni/ chu'i chu bur lta bur 'dug go /de ltar mi gtsang ba 'byung zhing de ltar mi mthun pa ste/ rnag dang khrag rab tu 'dzag cing mi gtsang ba rab tu 'dzag go /shA ri'i bu/ mi gtsang ba rnag dang khrag rab tu 'dzag cing chu'i snying po 'dzag pa'i lus la chags pa gang yin pa de lta bu ni/ mig ces brjod do| |shA ri'i bu/ 'di la rgyu gang gis mig ces bya ba de'i rgyu ni/ gang / rkyen ni/ gang zhe na/ de ni/ lus kyi gtso bo yin te/ gzugs la blta bas thog ma dang / dbus dang / mthar ngoms pa med la lus kyis mi dge ba rgya mtsho snyed byed de/ rgyu des na mig ces bya'o/ /shA ri'i bu/ 'di la gang gis na de mig ces bya ba'i rgyu ni/ gang / rkyen ni/ gang zhe 44b na| mi mthun pa'i phyir ro/ /shA ri'i bu/ mig gi mi mthun pa de gang zhe na/ gang gzugs med pa la gzugs su 'du shes pa dang / tshor ba med pa la tshor bar 'du shes pa dang / 'du shes med pa dang / 'du byed rnams med pa dang / rnam par shes pa med pa la rnam par shes par 'du shes pa'o/ /yang 'di la rgyu gang gis de mig ces bya ba'i rgyu ni/ gang / rkyen ni| gang zhe na/ 'dis dge ba spyod pa nyams par byed de/ rgyu des na mig ces bya'o/ /'dis dge slong gi dngos po las nyams par byed pas na mig ces bya'o/ /shA ri'i bu/ mig ni| mi rtag pa/ mi brtan pa/ ther zug ma yin pa ste/ rgyu des na mig ces bya bar shes par bya'o/ /shA ri'i bu/ dge slong mkhas pa/ mang du thos pa/ zhum pa med pa rnams kyis ni/ mig bud med ma yin/ skyes pa ma yin/ skyes pa can ma yin/ srog ma yin/ gso ba ma yin/ gang zag ma yin pa dang / shA ri'i bu/ de bzhin du sbyar te rna ba dang / sna dang / lce dang / lus dang / yid ni/ bud med ma yin/ skyes pa ma yin/ sems can ma yin/ srog ma yin/ gso ba ma yin/ gang zag ma yin te/ de dag ni/ phung po lnga la phyin ci log pa las byung ba'o/ shA ri'i bu/ dge slong \?\kha cig 'dod pa rnams kyi nyes dmigs yang dag pa ji lta ba de bzhin du rab tu mi shes pa de dag ni / 45a @#/ /'dod chags kyi yongs su gdung bas gdungs par 'gyur la/ kha dog ngan cing skya skya bor 'gyur ro/ /shA ri'i bu/ 'di lta ste/ dper na/ shing ljon pa chen po'i lo ma'am/ ljon pa'i 'bras bu smin pa 'brul ba'i tshe skya bor 'gyur ro/ /shA ri'i bu/ de bzhin du dge slong ngam/ dge slong ma'am/ dge bsnyen nam/ dge bsnyen ma gang dag kha cig 'dod pa rnams kyi nyes dmigs yang dag pa ji lta ba bzhin du rab tu mi shes pa de dag ni/ 'dod chags kyi yongs su gdung bas gdungs bar 'gyur| kha dog ngan par 'gyur/ bsam pa mi gsal bar 'gyur/ kha dog ngan cing blta na mi sdug par 'gyur ro/ /shA ri'i bu/ dge slong gang dag gsar bu dar la bab pa| gzhon nu rab tu byung nas ring po ma lon pa de dag ni/ 'dod pa rnams dngos po med do/ /zhes 'dod pa rnams yang dag pa ji lta ba bzhin du rab tu shes so/ / 'dod pa'i rtog pa skyes na'ang myur ba nyid du rab tu zhi bar byed de/ /de dag mi dge ba yin par shes par yang byed/ shA ri'i bu/ de ltar na/ dge slong dag gis 'dod pa rnams kyi nyes dmigs mthong nas 'dod pa de dag las yid 'byung bar byed/ 'dod chags dang bral bar byed de/ mngon par dga' nas tshangs par spyad pa spyod/ bzhin dang 45b 'phral ba'i mdangs gsal bar 'gyur ro/ /shA ri'i bu/ 'di lta ste/ dper na/ mi zhig gi lus la nad kyis thebs la rnag smin nas de'i yan lag dang / nyid lag thams cad la rma'i kha brgyad khri bzhi stong yod la/ rma'i kha re re la'ang srin bu'i tshogs brgyad khri bzhi stong yod de/ de dag mchu rno zhing mchu kha gnyis na yod la/ kha zas yongs su zos pa rnams kyis tshim par mi 'gyur zhing / de ma dag ma spungs pa'i drung du 'dug na/ ji tsam na srog chags de dag mes gdungs par gyur ba dang / de la phyir zhing za bar byed/ yongs su za bar byed na/ shA ri'i bu| 'di ji snyam du sems/ mi de srog chags de dag gis zos pa yin nam/ 'on te ma zos/ de skad ces bka' stsal pa dang / tshe dang ldan pa shA ri'i bus bcom ldan 'das la 'di skad ces gsol to/ /bcom ldan 'das/ bdag ni/ 'di thos pa nyid kyis lus kyi spu zing zhes bgyid par gyur na/ mi de'i mi mthun pa lta smos kyang ci 'tshal te/ bcom ldan 'das/ mi de ni| srog chags kyi rigs de dag gis 'tshal ba lags kyi/ ma 'tshal ba ni/ ma lags so/ /de srog chags brgyad khri bzhi stong po de dag gis lus g.ya' bar bgyid cing 'di \?\ ra bzhi bar ma bgyid la/ bde ba jo \?\ mi bgyid pa lags so/ shA ri'i bu/ 'di ji snyam du sems/ mi de'i lus la rnag dang khrag 'dzag cing de lta bur gyur pa de smad par 46a @#/ /bya ba yin nam/ gsol pa/ smad par bgyi ba lags/ mi mthun pa lags/ blta bar mi 'os pa lags so/ /bka' stsal pa/ shA ri'i bu/ de bzhin du dge slong mkhas pa dag ni/ 'di la so so yang dag par slob ste/ bud med ni/ 'di ltar btsog pa/ 'di ltar dri nga ba/ 'di ltar mi mthun pa/ 'di ltar blta bar mi 'os pa'o| /nyon mongs pa khol ba'i bud med de dag bstan par bya ba ma yin te/ 'dod pa rnams ni/ dri nga ba'o/ /'dod pa rnams ni/ mi mthun pa'o/ /'dod pa rnams ni/ mi gtsang ba'o/ /'dod pa rnams ni/ blta bar mi 'os pa'o/ /zhes bcom ldan 'das kyis bka' stsal to snyam mo/ /shA ri'i bu/ skyes pa'i lus la yod pa lta bu ma yin pa/ bud med la ches lhag pa srin bu'i tshogs lnga yod de/ shA ri'i bu/ srin bu'i tshogs lnga po de dag ni/ bud med kyi gci ba'i lam na gnas te/ srin bu'i tshogs re re la srin bu brgyad cu brgyad cu yod la/ mchu rno zhing mchu kha gnyis na yod de/ de dag rtag tu rgyun mi 'chad par bud med kyi lus la za'o/ /des na nyon mongs pa dag gis bud med log par g.yem spyod ste/ 'dod pa yongs su spyod pa dag gis ngoms mi myong ngo / /shA ri'i bu/ de ltar na/ 'dod pa rnams ni/ nyes dmigs yin par mthong na/ de dag 'dod pa rnams las yid 'byung bar 'gyur/ 'dod 46b chags dang bral bar 'gyur te/ mngon par dga' nas tshangs par spyad pa spyod cing bzhin dang 'phral ba'i mdangs gsal ba yin no/ /shA ri'i bu/ 'di ni/ 'dod pa'i phung po las brtsams nas chos bstan pa yin te/ shA ri'i bu/ 'dod pa yongs su spyod pa dag las yid 'byung bar bya'o/ /shA ri'i bu/ kun nas nyon mongs pa gang zhe na/ shA ri'i bu/ kun nas nyon mongs pa ni/ rang gis byas ba'o/ /shA ri'i bu/ rnam par byang ba dang / rnam par zhi ba gang zhe na/ shA ri'i bu/ rnam par byang ba dang / rnam par zhi ba ni/ rang gis byas pa'o/ /shA ri'i bu/ kun nas nyon mongs pa ni/ gang / rang gis byas pa ni/ gang zhe na/ chos su 'du shes pa la mngon par zhen pa gang yin pa'o/ /chos su 'du shes pa la mngon par zhen pa gang zhe na/ 'di lta ste| skye bar 'du shes pa dang / 'gag par 'du shes pa dang / bdag yod pa dang / bdag med par bdag tu bdu shes pa la mngon par zhen pa yod de/ de ni/ de bzhin gshegs pas chos kyi phung po zhes bka' stsal to/ /shA ri'i bu/ byis pa so so'i skye bo rnams ni/ long ba yin te/ gzugs kyi phung po'o/ /zhes rlom sems su byed/ tshor ba dang / 'du shes dang / 'du byed rnams dang / rnam par shes pa'i phung po'o/ /zhes rlom sems su byed de/ rlom sems su byed na 'ching ngo / /rlom sems su mi byed na grol lo/ /shA ri'i bu/ rlom sems su byed 47a @#/ /pa gang yin pa de ni/ gzugs kyi phung por 'gyur ro/ /shA ri'i bu/ bcu po 'di dag ni/ tshul khrims 'chal pa'i chal pa'i tshul khrims kyi nyes pa yin te| bcu gang zhe na/ tshul khrims 'chal pa ni/ 'chi ba'i dus kyi tshe gdung bar 'gyur ba dang / dge slong tshul khrims nyams pa 'gyod par 'gyur ba dang / mnar med par 'gro'o| |zhes 'khor gyi nang na 'dug na skrag pa dang / bdag nyid tshul khrims la skur ba 'debs pa dang / bdag ni/ sangs rgyas rnams kyis yongs su spangs pa dang / bdag ni/ nyan thos rnams kyis yongs su spangs pa dang / bdag ni/ lha rnams kyis yongs su spangs pa'i \?\ snyam pa dang / 'chi ba'i tshe 'jigs pa dang bcas pa dang / ngan 'gror 'gro ba dang / mi'i lus thob par dka' ba'o/ /shA ri'i bu/ de dag ni/ dge slong tshul khrims 'chal ba'i 'chal pa'i tshul khrims kyi nyes pa ste/ tshul khrims 'chal pa ni/ 'chi ba'i dus kyi tshe gdung ba 'byung bar 'gyur ro/ /shA ri'i bu/ de lta bas na 'dod pa rnams la nyes dmigs kyi 'du shes bskyed par bya'o/ /shA ri'i bu/ 'di la dge slong dgon pa na gnas pa'am/ shing drung na gnas pa'am/ khang stong na gnas pa'am/ bla gab med pa na gnas pa ni/ 'dod pa rnams ni/ dri nga ba'o/ /'dod pa rnams ni/ mi mthun pa'o/ / 47b 'dod pa rnams ni/ rma'i kha lta bu'o/ /'dod pa rnams ni/ blta bar mi 'os pa'o/ /'dod pa rnams ni/ smad par bya ba'o/ /'dod pa rnams ni/ bshang bas yongs su gang ba'i ro lta bu'o| |zhes de ltar so sor yang dag par slob bo/ /de dag ni/ byis pa 'phyar ba'i spyod yul yin te/ shA ri'i bu/ bud med la bsten pa dang bsnyen pas chog go /shA ri'i bu/ bud med kyi lus phyis dang mchil mas yongs su gang ba de la su zhig dga' ste/ shA ri'i bu/ de dag ni/ 'jig rten gyi khyi ro rul pa dang 'dra bar smad par bya ba yin no/ /shA ri'i bu / 'di lta ste/ dper na/ khyi ro mi gtsang ba/ rul pa/ dri nga ba/ mdog mi sdug cing sngo la pags pa mugs pa/ srog chags kyis yongs su gang ba zhig lam ga na snang la/ de'i steng na char pa'ang bab cing de rlung gis kyang kun nas btab/ der mi rnams kyang kun nas 'khor bar gyur te/ de dag gis dri de tshor na/ shA ri'i bu/ 'di ji snyam du sems/ mi de dag dri mi zhim pa de snom par byed dam/ 'on te mi snom/ gsol pa/ bcom ldan 'das/ de ni/ ma lags so/ /de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu/ 'di ji snyam du sems/ khyi ro de la rig par byed dam/ skyod par byed dam/ mngon par dga' bar byed na/ de skye bo mang pos bsngags par bya 48a @#/ /ba yin nam/ de skad ces bka' stsal pa dang / bcom ldan 'das la tshe dang ldan pa shA ri'i bus 'di skad ces gsol to/ /bcom ldan 'das/ mi de ni| blta bar dka' ste/ de la bsngags par ga la bgyid/ de skad ces gsol ba dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ / shA ri'i bu/ khyi ro de la 'khyud par byed pa'am/ skyod par byed pa'am/ mngon par dga' ba'i mi de la ni/ de bzhin gshegs pas bsngags pa mdzad kyi/ gang zhig bud med yul gyi bzang mo na tshod lo bcu drug lon pa'am/ lhag pa lta bu/ gzugs bzang ba/ mdzes pa/ blta na sdug pa/ nu ma rgyas pas mdzes pa/ rgyan gyis brgyan pa/ shin tu gzhon pa/ reg na bde ba/ nad dang bral ba de la tha na rkang pa'i mthe bos reg par byed pa'i mi de la ni/ de bzhin gshegs pas bsngags par mi mdzad de/ shA ri'i bu/ yul gyi bzang mo de la tha na rkang ba'i mthe bos reg par byed pa'i mi gang zag de lta bu de ni/ shin tu smad par bya ba yin te/ khyi ro de la 'khyud par byed pa'am/ skyod par byed pa'am/ mngon par dga' bar byed pa ni/ de lta ma yin no/ /shA ri'i bu/ 'di ji snyam du sems/ khyi rol 'khyud pa'am/ reg pas sems can dmyal bar 'gro bar 'gyur ram/ gsol ba/ 48b bcom ldan 'das/ de ni/ ma lags so/ /bka' stsal pa/ shA ri'i bu/ 'di ltar dge slong gis 'dod pa rnams la nyes dmigs kyi 'du shes bskyed par bya'o/ /shA ri'i bu/ ji ltar na/ dge slong gis lus la nyes dmigs kyi 'du shes bskyed par bya zhe na/ shA ri'i bu/ lus 'di ni/ gnod pa mang pa'o/ /'khrug pa mang pa'o/ /shA ri'i bu/ bud med kyi lus la ni/ skyes pa'i lus la yod pa lta bu ma yin pa ches lhag pa srin bu'i tshogs nyi shu rtsa lnga yod de/ shA ri'i bu/ bud med kyi mgo klad pa'i nang na srin bu'i tshogs 'phrog byed ces bya ba dag yod de/ de dag bud med kyi klad pa la za bar byed do/ /shA ri'i bu/ bud med kyi sna'i nang na srin bu'i tshogs kha rdzogs zhes bya ba dag yod de/ de dag bud med kyi kha spu la za ste/ des na bud med la kha spu mi skye'o/ /shA ri'i bu| bud med kyi rna khung na srin bu'i tshogs za bar byed pa zhes bya ba ngag yod de/ de dag bud med kyi rna ba la za zhing bud med kyi rna ba 'bigs par byed do/ /shA ri'i bu/ bud med kyi mgrin pa'i mtshams dang / mgo bo'i mtshams la srin bu'i tshogs zhen byed ces bya ba dag yod de/ de dag bud med kyi rna ba za zhing bud med kyi rna ba 'bigs par byed la mig kyang rno bar byed do/ /shA ri'i bu| skyes pa'i rna ba la mi 'bigs kyi bud med kyi rna ba la 'bigs so/ /shA ri'i bu/ bud med la srin bu'i tshogs a ba re ba na zhes bya ba dag yod de/ de dag rtag tu rgyun mi 'chad par bud 49a @#/ /med kyi kha la za ste/ des na bud med kyi mgul dma' ba yin te/ skyes pa la ni/ de lta bu med do/ /bza' ba dang bca' ba khar bcug ma thag tu thog mar de dag za bar byed do/ /de dag nyal nyil bud med kyi nu ma'i nang du 'jog ste/ des na bud med nu ma 'phyang ba yin no/ /gang gi tshe bud med sbrum par gyur pa de'i tshe srin bu de dag kyang sbrum par gyur te/ des na bud med kyi nu zho mang ba yin no/ /shA ri'i bu/ bud med kyi lus kyi nang mngal gyi gnas gang na mngal yod pa'i phyogs de na srin bu zad par byed pa dpa' ba zhes bya ba dag yod de/ de dag srin bu rab tu ldag byed ces bya ba dag bsad nas za'o/ /de dag srin bu rab tu ldag byed de dag ma rnyed na de dag kyang 'chi'o/ /srin bu'i tshogs de gnyis ka shi ste med pa dang / pha ma 'dus pa las mngal chags par 'gyur ro/ /shA ri'i bu/ bud med kyi lus la lus kyi nang skye gnas kyi sgo na srin bu'i tshogs bzhi yod de / 'di lta ste/ mchu mchog ces bya ba dang / gong bu sbed ces bya ba dang / rlung 'byin ces bya ba dang / 'dod len ces bya ba ste/ de dag rtag tu rgyun mi 'chad par bud med kyi lus la za ste/ des na bud med nyon mongs pa rnams kyis shin tu 'bar bar byas te 'dod pa yongs su spyad pas mi ngoms pa yin no/ /de lta bas na/ de bzhin gshegs pas bud med kyi 49b skyon ches lhag pa de dag mkhyen nas bslab pa'i gzhi lhag pa dang bca' bar mdzad do/ /shA ri'i bu/ chos kyi phung po'i chos kyi rnam grangs 'di yang dang yang du 'khor bzhi po dag la ston cig / de ci'i phyir zhe na/ 'dod pa rnams ni/ smad par bya ba yin par shes par 'gyur/ lus ni/ smad par bya ba yin par shes par 'gyur ba'i phyir ro/ /shA ri'i bu/ de ltar lus 'di bcos ma yin par shes nas byis pa so so'i skye bo thos pa dang mi ldan pa ma gtogs par su zhig 'dod pa rnams la sten par byed de/ de ni/ gnas med do/ /shA ri'i bu/ de lta bas na/ lus 'di la mngon par dga' bar mi bya/ lhag par chags par mi bya'o/ /bcom ldan 'das kyis de skad ces bka' stsal te/ bde bar gshegs pas de skad gsungs nas de bzhin du ston pas gzhan yang 'di skad ces bka' stsal to/ /lus ni mi gtsang las byung ste/ /rtag tu srog chags rnams kyang gnas/ /gcin dang rtug pas rab gang na/ /de la byis pa rab tu chags / dge slong ba dang dge slong ma/ /dge bsnyen pha dang dge bsnyen ma/ /'di thos nas ni 'dod chags 'bral/ /'dod chags bral nas rnam par grol/ /chos dang ldan pa rnams la ni/ /nyes pa 'di dag ngas ma bstan/ /gang dag 'dod la longs spyod pa/ /de dag la ni skyon rnams bshad/ /sangs rgyas kyis ni bstan pa bzhin/ /bud med mthong na su rtog ste/ /yang dag bskul ba 50a @#/ /shes nas su/ /mkhas pa de dag rtog mi byed/ bcom ldan 'das kyis de skad ces bka' stsal nas tshe dang ldan pa shA ri'i bu dang / lha dang / mi dang / lha ma yin du bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa chos kyi phung po zhes bya ba theg pa chen po'i mdo rdzogs so// // rgya gar gyi mkhan po pra dz+nyA warma dang / zhu chen gyi lo tsA ba ban+d+he ye shes sdes bsgyur cing zhus te gtan la phab pa/ |