//rgya gar skad du/ AR+Ya sa mA d+hi tsakra nA ma mahA yA na sU tra/ bod skad du/ 'phags pa ting nge 'dzin gyi 'khor lo zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab bya rgod kyi phung po'i ri la bzhugs te/ dge slong gi dge 'dun stong nyis brgya lnga bcu dang / byang chub sems dpa'i dge 'dun tshad med grangs med pa dang thabs gcig tu bzhugs so/ /gzhan yang lha dang / klu dang / gnod sbyin la sogs pa'i 'khor sna tshogs pas bskor nas chos ston par gyur te/ de'i tshe bcom ldan 'das ting nge 'dzin gyi 'khor lo zhes bya ba'i ting nge 'dzin la snyoms par zhugs pa dang / ting nge 'dzin de'i mthus sangs rgyas kyi zhing thams cad rab tu g.yos par gyur to/ /snang ba chen pos kyang thams cad gsal bar gyur te/ de nas 'khor der byang chub sems dpa' 'jam dpal gzhon nur gyur pa 'dug par gyur te/ stan las langs nas bcom ldan 'das la 'di skad ces gsol to/ /bcom ldan 'das/ ting nge 'dzin gyi 'khor lo la snyoms par zhugs pa ni/ bcom 465b ldan 'das/ ngo mtshar to/ /bde bar gshegs pa/ shin tu ngo mtshar lags so/ /bcom ldan 'das kyis bka' stsal pa/ 'jam dpal/ khyod kyis yang dag pa'i mtha' shes sam/ byang chub sems dpa' 'jam dpal gyis gsol pa/ bcom ldan 'das/ bdag gis 'tshal lags so/ /bka' stsal pa/ 'jam dpal/ yang dag pa'i mtha' gang na 'dug / gsol pa/ bcom ldan 'das/ yang dag pa'i mtha' ni gang na ma mchis pa de na mchis lags so/ /bka' stsal pa/ 'jam dpal/ gang na med pa de gang yin/ gsol pa/ bcom ldan 'das/ yul thams cad dang bral ba'o/ /bka' stsal pa/ 'jam dpal/ sgom pa gang yin/ bcom ldan 'das/ sgom pa ni sgom pa ma mchis pa'i don to/ /'jam dpal gyis gsol pa/ de bzhin gshegs pas chos ji ltar ston par mdzad/ bka' stsal pa/ 'jam dpal/ nga ni gzugs rnam par 'jig pa med pa dang / skye ba med par chos ston to/ / tshor ba dang / 'du shes dang / 'du byed dang / rnam par shes pa rnam par 'jig pa med pa dang / skye ba med par chos ston to/ /'dod chags dang / zhe sdang dang / gti mug rnam par 'jig pa med pa dang / skye ba med pa'i chos kyi 'khor lo skor ro/ /ngas ni 'di ltar chos gang yang ma bshig /ma bskyed pa de ltar bla na med pa yang dag par rdzogs pa'i sangs rgyas su gsungs so/ / 466a @#/ /de nas bcom ldan 'das kyis mkhyen bzhin du 'jam dpal gzhon nur gyur pa la 'di skad ces bka' stsal to/ /'jam dpal/ khyod kyis chos kyi dbyings shes sam/ gsol pa/ gal te bdag gis dmigs na 'tshal lags so/ /bka' stsal pa/ 'jam dpal/ khyod kyis 'jig rten gang la spyod pa shes sam/ gsol pa/ bcom ldan 'das/ 'jig rten na sgyu ma sprul pa'i mi gang kho na la spyod pa de la spyod pas so/ /bcom ldan 'das/ 'jig rten zhes bgyi ba ni dngos po ma mchis pa'i ngo bo nyid lags so| |bcom ldan 'das kyis bka' stsal pa/ de bzhin gshegs pa chos gsan par ni bzhed kyi/ khyod spobs par gyis shig /gsol pa/ ci las brtsams te spobs par bgyid pa lags/ bka' stsal pa/ 'jam dpal/ khyod chos kyi dbyings las rtsoms shig /gsol pa/ bcom ldan 'das/ gang bdag gis chos kyi dbyings ma lags pa'i chos de bdag gis yang dag par rjes su ma mthong lags so/ /bka' stsal pa/ mngon pa'i nga rgyal can rnams rab tu skrag par 'gyur ro/ /gsol pa/ bcom ldan 'das/ gal te yang dag pa'i mtha' skrag par gyur na/ de'i slad du mngon pa'i nga rgyal kyang skrag par 'gyur ro/ /de ci'i slad du zhe na/ yang dag pa'i mtha' dang / mngon 466b pa'i nga rgyal can gnyis gcig cing dbyer med pa'i phyir ro/ /bcom ldan 'das kyis bka' stsal pa/ 'jam dpal/ khyod ni rdo rje'i gzhi yin no/ /'jam dpal gyis gsol pa/ bcom ldan 'das/ chos thams cad mi phyed cing bsam gyis mi khyab pas na rdo rje'i gzhi lags so/ /de ci'i slad du rdo rje'i gzhi zhes bgyi na/ sems can ma mchis pa dang / dngos po ma mchis pa'i slad du rdo rje'i gzhi lags so/ /gsol pa/ bcom ldan 'das/ de ltar lags pa'i yang dag pa'i mtha' ni ma mchis pa lags te/ de lta bu'i mtha' gang lags pa de ni tshur mchi ba dang / phar mchi ba ma mchis te/ bcom ldan 'das/ de lta bu'i mtha' can gyi don la gnas nas rang bzhin med pa'i don sgom par byed do/ /dben pa sten par yang byed do/ /'du 'dzi spong ngo / /de nas tshe dang ldan pa shA ri'i bus byang chub sems dpa' 'jam dpal la 'di skad ces smras so/ /'jam dpal/ khyod kyis chos bstan pa ni rab tu ngo mtshar to/ /'jam dpal gyis smras pa/ btsun pa shA ri'i bu/ ngo mtshar mi che ste/ dgra bcom pa zag pa med pa ni chos ston pa'i snod ma yin te/ de ci'i phyir zhe na/ 'di ltar chos bstan pa 'di ni so so'i skye bo'i chos la zhugs pa ma yin/ dgra bcom pa'i chos la zhugs pa ma yin/ rang sangs rgyas kyi chos la zhugs pa ma yin/ de bzhin gshegs 467a @#/ /pa'i chos la zhugs pa ma yin pa'i phyir te/ 'di ni chos dmigs pa'i phyir yang zhugs pa ma yin no/ /'di ni gang du'ang zhugs pa dang / ldog pa med pa'i phyir ro/ /chos thams cad shin tu dben pa'i phyir ro/ /smras pa/ 'jam dpal/ ci la bsams te smra/ 'jam dpal gyis smras pa/ btsun pa shA ri'i bu/ dgra bcom pa nyid ni 'dod chags dang / zhe sdang dang / gti mug zad pa yin na de dag gang gi snod yin zhing de gang ji lta bu zhig gi snod du 'gyur snyam ste/ de las bsams nas dgra bcom pa| zag pa zad pa/ chos bstan pa'i snod ma yin par kho bo de skad smra'o/ /smras pa/ btsun pa shA ri'i bu/ khyod 'chi 'pho ba dang / skye ba med pa'i chos yin par mos sam/ smras pa/ 'jam dpal/ bdag mos so/ /de nas bcom ldan 'das kyis byang chub sems dpa' 'jam dpal la bka' stsal pa/ 'jam dpal/ legs so/ /legs so/ /chos zab mo'i don la khyod rab tu mkhas par bsngags gyur to/ /bcom ldan 'das kyis de skad ces bka' stsal nas/ byang chub sems dpa' 'jam dpal gzhon nur gyur pa dang / tshe dang ldan pa shA ri'i bu dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa ting nge 'dzin gyi 'khor lo 467b zhes bya ba theg pa chen po'i mdo rdzogs so// |