rgya gar skad du/ AR+Ya sarba bi da l+ya saM gra ha nA ma mahA yA na sU tra/ bod skad du/ 'phags pa rnam par 'thag pa thams cad bsdus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong drug khri nyis stong gi dge slong gi dge 'dun chen po dang / byang chub sems dpa' bye ba phrag brgyad cu dang / lha drug khri dang / dge bsnyen stong phrag mang po dang thabs cig tu bzhugs te/ de'i tshe bcom ldan 'das yongs su mya ngan las 'da' ba'i dus la bab ste/ 'di ni/ bcom ldan 'das rgyal po'i kha ba na dbyar gnas shing bzhugs pa'i tha ma yin no/ /de nas bcom ldan 'das kyis ting nge 'dzin rnam pa ji lta bus stong gsum gyi stong chen po'i 'jig rten gyi khams 'di dar gyi lda ldi bres pas brgyan pa dang / pog por gyis brgyan cing bdug 287b bas bdugs pa dang / me tog sil mas chal par gang ba dang / pad+ma 'dab ma stong phrag brgya bas khebs par gyur pa de lta bu'i ting nge 'dzin la snyoms par zhugs so/ /stong gsum gyi stong chen po'i 'jig rten gyi khams 'di na tshangs pa bye ba phrag stong ji snyed yod pa'i tshangs pa de dag re re zhing yang g.yog 'khor bye ba phrag stong dang / bcom ldan 'das ga la ba der dong nas phyin pa dang / bcom ldan 'das kyis zhabs la mgo bos phyag btsal te thal mo sbyar nas bcom ldan 'das la phyag 'tshal zhing phyogs gcig tu 'khod par gyur to/ /stong gsum gyi stong chen po'i 'jig rten gyi khams 'di na gnas gtsang ma'i ris kyi lha'i bu rnams dang / lha'i bu dbang phyug rnams dang / dbang phyug chen po rnams dang / lha'i dbang po rnams dang / klu'i dbang po rnams dang / gnod sbyin gyi dbang po rnams dang / lha ma yin gyi dbang po rnams dang / nam mkha' lding gi dbang po rnams dang / mi'am ci'i dbang po rnams dang / lto 'phye chen po'i dbang po rnams ji snyed pa de dag thams cad g.yog 'khor bye ba brgya stong phrag du ma dang / bcom ldan 'das ga la ba der dong ste phyin pa dang / bcom ldan 'das kyi zhabs la mgo bos phyag btsal te thal mo sbyar nas bcom ldan 'das la phyag 'tshal zhing phyogs gcig tu 'khod 288a @#/ /par gyur to/ /phyogs bcu'i 'jig rten gyi khams gang+gA'i klung gi bye ma snyed dag na byang chub sems dpa' sems dpa' chen po dbang che ba/ dbang che bar grags pa ji snyed pa de dag kyang bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te thal mo sbyar nas bcom ldan 'das la phyag 'tshal zhing phyogs gcig tu 'khod par gyur to/ /de'i tshe stong gsum gyi stong chen po'i 'jig rten gyi khams 'di srid pa'i rtse mo man chad lha dang / klu dang gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dbang che ba/ dbang che bar grags pa dag gis gang bar ma gyur pa ni/ tha na 'khor ba'i rtse mo gzugs pa'i phyogs tsam yang med do/ /de nas bcom ldan 'das dgongs shing mkhyen bzhin du ting nge 'dzin de las bzhengs te/ bzhengs nas kyang 'khor la lan gsum gzigs so/ /'khor la gzigs nas kyang seng+ge'i bsgyings pa chen po lan gsum mdzad do/ /bsgyings nas kyang ljags kyi dbang po lan gsum phyung ngo / / ljags kyi dbang po lan gsum phyung nas kyang stong gsum gyi stong chen po'i 'jig rten gyi khams ljags kyi dbang pos lan gsum khyab par mdzad do/ /stong gsum gyi stong chen 288b po'i 'jig rten gyi khams ljags kyi dbang pos lan gsum khyab par mdzad cing rdzu 'phrul mngon par 'du bya ba des khyab par mdzad nas yang rnam par gzigs so/ /de nas thams cad dang ldan pa'i 'khor de stan las langs te thal mo sbyar nas bcom ldan 'das nyid la phyag 'tshal zhing 'khod par gyur to/ /de nas bcom ldan 'das kyis byang chub sems dpa' sems dpa' chen po byams pa la bka' stsal pa/ mi pham pa/ de bzhin gshegs pa ring po mi thogs par yongs su mya ngan las 'da' bar 'gyur gyi/ 'di ni| khyod de bzhin gshegs pa la yongs su dri ba'i dus yin no/ /'di ni/ tshod yin no/ /khyed gang su dag chos la the tshom yod pa de dag de bzhin gshegs pa la yongs su ma zhus na de bzhin gshegs pa mngon sum du bzhugs pa'i tshe bdag cag gis ma zhus pa ga la srid ces phyis 'gyod par gyur ta re/ de skad ces bka' stsal pa dang / byang chub sems dpa' sems dpa' chen po byams pas bcom ldan 'das la 'di skad ces gsol to/ /bcom ldan 'das nyid mkhas pa/ bcom ldan 'das nyid dus mkhyen pa/ tshod mkhyen pa/ ran pa mkhyen pa/ bcom ldan 'das nyid thams cad mkhyen cing thams cad gzigs pa ste/ chos thams cad rtogs par thugs su chud pa lags na/ bcom ldan 'das kyis 289a @#/ /chos bstan pa rnam pa ji lta bus yang dag par rdzogs pa'i sangs rgyas thams cad kyi chos kyis tshul 'di yun ring du gnas par 'gyur ba de lta bur chos legs par bstan du gsol/ de nas lha'i bu dbang phyug chen po gnas gtsang ma'i ris kyi lha'i bu bye ba phrag brgyad cu'i g.yog 'khor dang ldan pas bcom ldan 'das kyi zhabs la mgo bos phyag btsal te thal mo sbyar nas bcom ldan 'das la 'di skad ces gsol to/ /bcom ldan 'das/ rnam par 'thag pa thams cad bsdus pa zhes bgyi ba'i chos kyi rnam grangs 'di ston gyi de bzhin gshegs pa dgra bcom pa yang dag par rdzogs pa'i sangs rgyas rnams kyis sngon gsungs na/ de skye bo mang po la sman pa dang / skye bo mang po la bde ba dang / de bzhin gshegs pa'i bstan pa 'di'ang yun ring du gnas par 'gyur ba'i slad du bcom ldan 'das kyis kyang bstan du gsol zhes gsol nas bcom ldan 'das kyis lha'i bu dbang phyug chen po la cang mi gsung bas gnang bar mdzad do/ /de nas lha'i bu dbang phyug chen pos bcom ldan 'das kyis cang mi gsung bas gnang bar rig nas phyogs gcig tu 'dug go /de nas bcom ldan 'das kyis byang chub sems dpa' sems dpa' chen po byams pa la bka' stsal pa/ mi pham pa/ 'das pa'i dus kyi 289b de bzhin gshegs pa dgra bcom pa yang dag par rdzogs pa'i sangs rgyas gang rnam par 'thag pa thams cad bsdus pa'i mdo'i chos kyi rnam grangs 'di ma gsungs pa de mi bzhugs so/ /ma 'ongs pa'i dus na de bzhin gshegs pa 'byung ba gang chos kyi rnam grangs 'di gsung bar mi 'gyur ba gang yang mi 'byung ngo / /de ci'i phyir zhe na/ gang zhig chos 'di la sbyang pa ma byas par chos ston pa de ni/ de bzhin gshegs pa la skur ba 'debs pa yin/ chos spong ba yin/ dge 'dun la smod pa yin no/ /su dkon mchog gsum la log par zhugs pa de ni/ ngas ngo na song ba sems can dmyal ba par gsungs so/ /byams pa/ de lta bas na/ rigs kyi bu'am rigs kyi bu mo byang chub la yang dag par zhugs pa gang dag bdag la 'khrul pa med par 'dod pa de dag gis chos kyi rnam grangs 'di rtogs par khong du chud par byas la de nas gdod chos bstan par bya'o/ /byams pa/ phyi ma'i dus na dam pa'i chos bsdu ba 'di khyod kyi las yin gyi/ soms shig /byang chub sems dpa' sems dpa' chen po byams pas bcom ldan 'das/ de bzhin no/ /zhes gsol te bcom ldan 'das kyi ltar nyan to/ /de nas yang bcom ldan 'das kyis byang chub sems dpa' sems dpa' chen po byams pa la bos te 'di skad ces bka' stsal to/ /mi pham pa/ gang 290a @#/ /gi nub mo de bzhin gshegs pa bla na med pa yang dag par rdzogs pa'i byang chub mngon par rdzogs par sangs rgyas pa dang / byams pa/ gang gi nub mo de bzhin gshegs pa len pa med par yongs su mya ngan las 'da' bar 'gyur ba'i bar du de bzhin gshegs pa la 'khrul ba'am/ ca co'am/ bsnyel pa'am/ gsung gis nyes par gsungs pa'am/ nyes par dgongs pa'am/ 'phrin las nyes par mdzad pa ci'ang yod dam/ gsol pa/ bcom ldan 'das/ de ni/ ma mchis so// bka' stsal pa/ mi pham pa/ gang gi nub mo de bzhin gshegs pa bla na med pa yang dag par rdzogs pa'i byang chub mngon par rdzogs par sangs rgyas pa dang / gang gi nub mo de bzhin gshegs pa len pa med par yongs su mya ngan las 'da' bar 'gyur ba de'i bar du de bzhin gshegs pas gang ci gsungs pa de dag thams cad ni/ yang dag pa| de kho na de bzhin/ ma nor ba de bzhin te/ gzhan du ma yin no/ /'di la mi blun po kha cig de bzhin gshegs pa'i thabs la mkhas pa mi shes shing khong du ma chud par nga'i ldem po dag la 'di skad du 'di ni/ rung ngo / /'di ni/ mi rung ngo / /zhes zer te/ de lta bu de dag ni/ dam pa'i chos spong ba yin/ de dag ni/ de bzhin gshegs 290b pa la skur pa 'debs pa yin te/ rgyu des na/ de dag ni/ sems can dmyal ba pa zhes nga 'chad do/ /mi pham pa/ ma 'ongs pa'i dus phyi ma'i tshe phyi ma'i dus lnga brgya pa tha ma la dge slong dang / dge slong ma dang / dge bsnyen dang / dge bsnyen ma byang chub sems dpar khas 'che ba/ sngon mu stegs can du gyur pa/ smon lam gyi dbang gis de bzhin gshegs pa'i bstan pa legs par gsungs pa'i chos 'dul ba la rab tu byung nas phyogs gcig la spyod pa/ gnyen la gdu pa/ rnyed pa dang / bkur sti la chags pa/ khyim la ser sna byed pa/ khyim sum par byed pa/ mdog ngan pa/ dman pa la mos pa/ bka' blo mi bde ba/ ma grags pa/ rigs dma' ba/ yo byad la yongs su chags pa/ chos la bde bar gnas pa'i zas thams cad dang bral ba/ ting nge 'dzin gyi zas las shin tu ring zhing rnam par ring ba/ sgyu dang g.yo la gnas pa dag gzhan du smra zhing gzhan du byed de/ de dag mi shes bzhin du nged ni/ shes pa dang ldan no/ / zhes zer/ mi mkhas bzhin du nged ni/ mkhas so/ /zhes zer te/ ngas sems can thams cad la sems mnyam pa la gnas nas thugs rje chen po dang thabs la mkhas pas de bzhin gshegs pa'i stobs bsnyel ba mi mnga' ba la gnas te/ mos pa la gzung ba'i phyir sems can thams cad la byang chub bstan pa gang yin pa de la de dag kha cig 'di skad 291a @#/ /du gang nyan thos rnams la gsungs pa'i mdo sde de dag la byang chub sems dpa' rnams kyis bslab par mi bya'o/ /de dag mnyan par mi bya'o/ /de ni/ bdag cag gi chos ma yin te/ 'di ni/ nyan thos dang ldan pa yin gyi/ de la byang chub sems dpa' rnams kyis bslab par mi bya'o/ /gang rang sangs rgyas rnams la gsungs pa'i mdo sde de dag la byang chub sems dpa' rnams kyis bslab par mi bya'o/ /de dag mnyan par mi bya'o/ /de ni/ bdag cag gi chos ma yin te/ 'di ni/ rang sangs rgyas dang ldan pa yin gyi| de la byang chub sems dpa' rnams kyis bslab par mi bya'o/ /zhes zer ba dag 'byung bar 'gyur ro/ /mi pham pa/ ngas ni/ lha rnams la chos bstan te/ ngas mos pa ji lta ba bzhin du btul to/ /de bzhin du ngas ni/ klu rnams dang / gnod sbyin rnams dang / lha ma yin rnams dang / nam mkha' lding rnams dang / mi'am ci rnams dang / lto 'phye chen po rnams dang / dri za rnams dang / mi rnams la chos bstan te/ ngas mos pa ji lta ba bzhin du btul to/ /mi pham pa/ nga ni/ sems can rnams kyi don bya ba'i phyir phyogs bcu'i 'jig rten gyi khams gang+gA'i klung gi bye ma snyed du 'gro zhing der yang mos pa ji lta ba bzhin du sems can rnams la chos ston na/ de ni/ byang chub sems dpa' khas 'che ba/ byang 291b chub sems dpa' dmu rgod/ byang chub sems dpa' la skur ba 'debs pa/ brdzun du smra ba/ thos pa nyung ba de dag nga'i byang chub gnyis kyis rab tu phye ba ma yin pa 'di la gnyis su smra ste/ 'di la ni/ byang chub sems dpas bslab par bya/ 'di la ni/ byang chub sems dpas bslab par mi bya'o/ /zhes zer te/ sems des de bzhin gshegs pa la skur ba 'debs so/ /chos spong ngo / /dge 'dun la smod do/ /de dag lus zhig ste shi nas sems can dmyal ba rnams su skye bar 'gyur te/ de dag der bskal pa mang po dang / bskal pa brgya phrag mang po 'das nas thar pa 'thob ste/ yang de dag dbul po'i rigs su skye bar 'gyur ro/ /gang gi tshe brgya lam brgya lam na byang chub tu lung bstan pa 'thob par 'gyur na/ yang snyigs ma lnga'i dus na lung bstan pa thob par 'gyur te/ dper na/ da ltar nga yun ring po 'gyangs pas dus kyi snyogs ma'i tshe byang chub mngon par rdzogs par sangs rgyas pa lta bu'o/ /gang dag de dag gi ltar nyan pa'am/ byed pa'am/ yid ches par sems pa de dag kyang 'di lta ste/ sdig pa'i grogs po la mos pas 'gro ba de lta bu nyid du 'gro bar 'gyur ro/ /mi pham pa/ sngon byung ba 'das pa'i dus bskal pa grangs med pas yang ches grangs med pa de'i tshe de'i dus na de bzhin gshegs pa dgra bcom 292a @#/ /pa yang dag par rdzogs pa'i sangs rgyas dri ma med pa'i 'od 'phro las byung ba'i grags pa zhes bya ba 'jig rten du byung ste/ des lo khrag khrig phrag brgyad cur sems can rnams la chos bstan to/ /de'i gsung rab la dge slong 'tsho ba yongs su dag pa zhes bya ba/ chos smra ba/ gtam sna tshogs smra ba/ skye bo mang po la yang dag par ston pa/ skye bo mang po yang dag par 'dzin du 'jug pa/ skye bo mang po la yang dag par gzengs bstod pa/ skye bo mang po la yang dag par dga' bar byed pa byung nas de la de bzhin gshegs pa dri ma med pa'i 'od 'phro las byung ba'i grags pa des phyi ma'i tshe phyi ma'i dus na dam pa'i chos bsdu bar bcol te/ des de bzhin gshegs pa de yongs su mya ngan las 'das pa'i 'og tu lo bye bar dam pa'i chos kyi tshul bzung ste/ de rnam par 'thag pa thams cad bsdus pa'i chos kyi rnam grangs 'di la zhugs nas chos ston te/ mos pa ji lta ba de bzhin du sems can rnams la chos bstan to/ /des grong khyer stong phrag brgyad cur smon lam ji lta ba bzhin du sems can rnams rab tu dga' bar byas nas de grong khyer chen po bzang po zhes bya bar song ste/ khyim bye ba phrag brgyad cu la mos pa ji lta ba bzhin du chos bstan nas grong khyer de nas srog 292b chags bye ba phrag brgyad cu rab tu dad par byas so/ /de'i nang nas bye ba phrag gcig ni/ byang chub la rab tu bkod do/ /sems can bye ba phrag bdun cu rtsa dgu ni/ nyan thos kyi theg pa la rab tu bkod de btul to/ /de nas dge slong 'tsho ba yongs su dag pa de dge slong khri dang lhan cig tu byang chub kyi snying po ga la ba der yul rgyu zhing song ngo / /mi pham pa/ dge slong 'tsho ba yongs su dag pa song nas ring po ma lon par grong khyer chen po bzang po der dge slong chos zhes bya ba phyin te/ des rnam par 'thag pa'i mdo stong bzung ngo / /bsam gtan bzhi'ang thob par gyur to/ /dge slong 'tsho ba yongs su dag pas ni/ mdo sde bye ba phrag bcu dang / rnam par 'thag pa'i mdo drug khri bzung bar gyur to/ /de nas dge slong chos des grong khyer chen po bzang po der tshul gcig gis chos bstan pas skye bo rab tu dga' bar byas kyang de mos pa ji lta ba bzhin du chos bstan pa la mkhas pa ma yin te/ de skye bo de dag la chos thams cad ni/ stong pa'o zhes stong pa nyid kyis 'doms shing stong pa nyid kyis rjes su ston te/ gang des chos thams cad stong pa'o zhes bstan pa 'di ni/ de bzhin gshegs pa'i bka' kho na yin no/ /gang 'tsho ba yongs su dag pa des bshad pa de ni/ skyon chags pa ste/ dge slong de 'tsho ba yongs su dag pa ma yin na/ ci'i phyir ming 'tsho ba 293a @#/ /yongs su dag pa zhes bya/ de ni/ 'tsho ba yongs su dag pa ma yin te/ de ci'i phyir zhe na/ me tog yongs su len cing blangs nas yongs su spyod do/ / spos dang byug pa yongs su len cing blangs nas yongs su spyod do/ /de ni/ shes pa ma yin te/ byis pa'o/ /nga ni/ tshangs par spyad nas yun ring ba yin gyi/ de ni/ gsar bu ste/ bsnyen par rdzogs nas ring por ma lon pa yin gyi/ de ltar yid ches par ma byed cig /ces zer ro/ /dge slong de ni/ bag yod pa yin te/ dge slong 'tsho ba yongs su dag pa de la skye bo de dag rab tu dad pas de ltar des skye bo de dag la dbyen byas na dbye bar ma nus so/ /de nas dge slong chos de 'chi ba'i dus byas par gyur te 'chi ba'i dus byas nas 'di ltar de bzhin gshegs pa la skur pa btab pa dang / 'di ltar chos spangs pas bskal pa bdun cur sems can dmyal bar skyes so/ /de bskal pa bdun cu po de dag 'das nas bskal pa drug cur byang chub kyi sems brjed do/ /bskal pa drug cu po de dag 'das nas de bzhin gshegs pa kun nas spos rin po che'i 'od kyi gsung rab la de bzhin gshegs pa des byang chub tu sems bskyed du bcug nas des byang chub tu sems bskyed do/ /tshe rabs dgu khrir dud 'gro'i skye gnas su skyes so/ /tshe rabs drug khrir mi dbul po rnams kyi nang du skyes te thams cad 293b du'ang lce med par gyur to/ /dge slong 'tsho ba yongs su dag pa de sangs rgyas khrag khrig phrag lnga'i gan na chos smra bar gyur te/ thams cad du'ang mngon par shes pa lnga dang ldan par gyur to| |sangs rgyas bcom ldan 'das de dag gis 'bod par 'os par gyur to/ /chos thams cad la yongs su dgra par chos ston par yang gyur to/ /mi pham pa/ de'i tshe de'i dus na dge slong 'tsho ba yongs su dag pa zhes bya bar gyur pa de gzhan zhig yin pa snyam du khyod sems na/ khyod kyis de ltar mi blta ste/ de bzhin gshegs pa 'od dpag med ces bya ba de'i che de'i dus na dge slong chos smra ba 'tsho ba yongs su dag pa zhes bya bar gyur to/ /mi pham pa/ de'i tshe de'i dus na dge slong chos smra ba zhes bya ba de gzhan zhig yin pa snyam du khyod sems na/ khyod kyis de ltar mi blta ste/ nga de'i tshe de'i dus na dge slong chos zhes bya bar gyur te/ nga nyid las de lta bu'i mi tshul ba byung ngo / /mi pham pa/ chos kyis phongs par 'gyur ba'i las kyi sgrib pa ni/ de ltar shes par dka' ste/ las de'i rnam par smin pas nga snyigs ma lnga'i dus na byang chub mngon par rdzogs par sangs rgyas so/ /mi pham pa/ byang chub sems dpa' gang dag gnyis su 'byed cing chos ston pa de dag ni/ las de'i rnam par smin pas dus kyi snyigs ma'i tshe byang chub mngon par rdzogs par 'tshang rgya bar 'gyur te/ de dag gi 294a @#/ /sangs rgyas kyi zhing der byang chub par bya ba dang / chos bstan pa la bdud dang bar chad mang po 'byung bar 'gyur ro/ /de nas thams cad dang ldan pa'i 'khor de mchi ma blags te dus nas tshig 'di skad ces deng phan chad dge slong chos kyis ji skad smras pa ltar su'ang chos ston par ma gyur cig ces 'dzer te/ /de'i tshe byang chub sems dpa' sems dpa' chen po 'khor der 'dus pa dag kyang stan las langs te sa la 'khod do/ /sa la 'khod nas kyang ngus so/ /de nas bcom ldan 'das kyis mkhyen bzhin du byang chub sems dpa' de dag la 'di skad ces bka' stsal to/ /rigs kyi bu dag/ khyed ci'i phyir sa la 'khod cing ngu / de dag gis gsol pa/ bcom ldan 'das/ bdag cag ni/ las kyi sgrib pa de dang ldan par bdag cag nyid kyis mthong lags so/ /bcom ldan 'das kyis bka' stsal pa/ rigs kyi bu dag /de bzhin te/ de bzhin gshegs pa mar me mdzad yongs su mya ngan las 'das nas de'i gsung rab la shes rab brtsegs zhas bya ba chos smra ba zhig byung ba la khyed kyis smad de/ de phyin chad khyed kyis nam yang sangs rgyas ma mthong ngo / /nam yang byang chub kyi sems ma rnyed do/ /gzungs dang ting nge 'dzin ma rnyed do/ /rigs kyi bu dag /khyed pa'i byang chub la yang dag par zhugs kyang bskal 294b pa bzang po 'di la de bzhin gshegs pa gang 'byung ba'i tha ma pa'i tshe khyed mi skye ba'i chos la bzod pa thob par 'gyur ro/ /de phyin chad bskal pa grangs med pa gsum gyis bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /rigs kyi bu dag /de bas na/ byang chub sems dpa' de dag gis byang chub sems dpa' mthong na sems kyis gzhan bsam par mi bya ste/ bdag cag gis mchod rten nam/ de bzhin gshegs pa mthong ngo / /bdag cag gi mdun na sangs rgyas bzhugs so snyam du bsam mo/ /rigs kyi bu dag /gal te byang chub sems dpas byang chub sems dpa' mthong na mchod rten gyi 'du shes sam/ de bzhin gshegs pa'i 'du shes bskyed pa ma gtogs par 'du shes gzhan bskyed par mi bya'o/ /gzhan du gyur na byang chub sems dpas bdag nyid la rma byung bar 'gyur ro/ /de la dgongs te de bzhin gshegs pa mi 'khrags pas thugs dam bzhes pa/ gal te bdag gis sems dang po bskyed pa'i byang chub sems dpa' mthong ste sangs rgyas kyi 'du shes ma bskyed na/ ngas 'jig rten gyi khams dpag tu med pa rnams na gang dag bzhugs pa'i sangs rgyas bcom ldan 'das thams cad la bslus par gyur cig ces bya ba yin no/ /rigs kyi bu dag/ 295a @#/ /phyi ma'i tshe phyi ma'i dus lnga brgya tha ma la gang su dag gzungs thob pa'am/ ting nge 'dzin thob par 'gyur ba de dag thams cad ni/ de bzhin gshegs pa'i mthus thob par 'gyur te/ rigs kyi bu dag /de lta bas na/ 'di la su chos smra ba la mi snyan par brjod pa des ni/ de bzhin gshegs pa spangs par 'gyur ro/ /rigs kyi bu dag /gang su zhig sems can dag ji ltar mos pas mos pa bzhin du de bzhin gshegs pa'i chos ston pa de thams cad ni/ de bzhin gshegs pa'i mthu yin no/ /'khor gang du byang chub sems dpa'i theg pa dag lan 'ga' zhig spu zing zhes byed dam/ mchi ma lan 'ga' zhig klog pa de thams cad kyang de bzhin gshegs pa'i mthur shes par bya ba yin no/ /de la mi blun po byang chub sems dpa' ma yin par byang chub sems dpa' khas 'che ba/ byang chub sems dpa' sun 'byin par gyur pa/ chos rku pa/ tshul 'chos pa/ cho ga ngan pa la spyod pa de dag kha cig 'di skad ces 'di lta bu zhig ci shes zhes zer ro/ /byams pa/ ngas byang chub kyi phyir spyod pa na bdag nyid kyis gang tshigs su bcad pa nyos pa ni/ rang gi lus yongs su btang ba dang / chung ma yongs su btang ba dang / pu dang bu mo yongs su btang ba 295b dang / rgyal srid yongs su btang bas nyos shing / byams pa/ legs par bshad pa'i tshigs su bcad pa gcig gi phyir dzam+bu'i gling byin te nyos par ngas mngon par dran na/ de dag ni| rnyed pa dang bkur sti srung zhing sangs rgyas dang 'dra ba'i gan du 'gro bar mi sems so/ /mi pham pa/ dam pa'i chos kyi tshul 'di gzung ba yang 'byor ba dang ldan pas nus kyi/ mi ldan pas ni| ma yin no/ /mi pham pa/ ngas mngon par rdzogs par sangs rgyas nas sangs rgyas kyi ye shes kyi chos gang bstan pa de la de dag 'di skad du de ni/ lung mnod par bya ba ma yin no/ /zhes zer te/ sems can de dag 'byung ba ma yin pa'i nyes pa chen po ji tsam dang ldan pa la ltos/ mi pham pa/ dge slong chos des rnam par 'thag pa'i mdo stong bstan te/ bsam gtan bzhi bskyed kyang de lta bu'i gnas su gyur na/ gang phyogs tsam mam/ cha tsam la reg pa/ rnam par 'thag pa'i 'dzin pa'i dge slong rnams la mngon par mi dga' zhing rnam par 'thag pa la skyon 'dogs pa lta ci smos te/ de dag ni/ chos smra ba'i dge slong la skur pa 'debs pa yin/ sangs rgyas kyi chos spong ba yin/ rlom sems chen pos skur ba 'debs pa yin te/ sems can dmyal bar skye ba de dag la ni/ legs par byas pa zhes nga mi smra'o/ /de ci'i phyir zhe na/ gang dag chos smra ba la rnam par smod pa de dag 296a @#/ /ni/ sangs rgyas la rnam par smod pa yin/ chos la rnam par smod pa yin no/ /gang dag chos smra ba la rim gro med pa de dag ni/ sangs rgyas la rim gro med pa yin no/ /gang dag chos smra ba la mi snyan pa brjod pa de dag ni/ sangs rgyas mthong bar mi 'dod pa yin/ sangs rgyas la mi snyan par brjod pa yin no/ /gang dag sems dang po bskyed pa'i byang chub sems dpa' la khong khro ba'i sems bskyed pa de dag gis ni/ sangs rgyas yongs su btang ba yin te/ ji snyed du khong khro ba'i sems bskyed par byed pa de snying kyi bskal par sems can dmyal bar gnas par go cha dgos so/ /ji tsam du khong khro ba'i mig gis lta ba de srid du long ba'i skye mched thob par 'gyur ro// ji tsam du mi snyan par brjod pa de srid du lce'i skye mched med pa thob par 'gyur ro/ /mi pham pa/ ji ltar byang chub sems dpa' rnams la gnod pa'i sems bskyed las byang chub sems dpa' ngan song du 'gro bar log par ltung bar 'gyur ba'i chos de lta bu gzhan ngas ma mthong ngo / /mi pham pa/ sems can gyi 'du shes dang / chos kyi 'du shes la gnas pa rnams la ni/ las mngon par 'du bya ba yod de/ mi dmigs pa la ni/ med do/ /byang chub sems dpa' gang dag chos tha dad du 'byed cing ston pa de dag ni/ spros 296b pa la gnas pa yin no/ /mi pham pa/ byang chub sems dpa' rnams kyi pha rol tu phyin pa drug yang dag par sgrub pa 'di ni/ byang chub kyi phyir yin no/ /de la'ang mi blun po de dag 'di skad du shes rab kyi pha rol tu phyin pa kho na la byang chub sems dpas bslab par bya'o/ /zhes zer zhing pha rol tu phyin pa lhag ma rnams la sun 'byin te/ mi pham pa/ 'di ji snyam du sems/ ka shi ka'i rgyal po gang yin pas mgo byin par gyur pa de 'chal ba'i shes rab yin nam/ gsol pa/ bcom ldan 'das/ de ni/ ma lags so/ /bka' stsal pa| mi pham pa/ ngas pha rol tu phyin pa drug dang ldan pa'i mdo gang dag bstan pa de dag ci byang chub 'thob par 'gyur ba ma yin nam/ gsol pa/ bcom ldan 'das/ byang chub thob par 'gyur ba lags so/ /bka' stsal pa/ mi pham pa/ khyod kyis bskal pa drug cur sbyin pa'i pha rol tu phyin pa la spyad/ bskal pa drug cur tshul khrims kyi pha rol tu phyin pa la spyad| bskal pa drug cur bzod pa'i pha rol tu phyin pa la spyad/ bskal pa drug cur brtson 'grus kyi pha rol tu phyin pa la spyad/ bskal pa drug cur bsam gtan gyi pha rol tu phyin pa la spyod na/ de la mi blun po dag 'di skad du 'di lta ste/ mi dmigs pa'i tshul gcig pus byang chub 'thob bo/ /zhes zer te/ de dag ni/ spyod pa yongs su ma dag pa yin/ 297a @#/ /tshig tsam gyis dga' bar sems shing sgrub pa snying por byed pa ma yin/ ngag gi las lhur len gyi nan tan las ring ba yin te/ phrag dog can du gyur pa| chags par gnas pa/ nye du la gdu ba yin no/ /mi pham pa/ nga'ang mag byin pas dga' ba tsam du 'khor los bsgyur ba'i rgyal srid thob pas ni/ ma yin na/ de la mi blun po zang zing la ser sna byed pa de dag gzhan gyi khyim rnams su dong nas 'di skad du byang chub tu ni/ 'di ltar spyad do/ /'di ni/ byang chub sems dpa'i spyod pa ste/ 'di ni| tshul lo/ /gzhan ni/ tshul ma yin no/ /chos kyi tshul 'di ni/ chos smra ba phal cher gyis kyang shes so/ /zhes zer te/ de dag rnyed pa dang / bkur sti'i phyir chos smra bdag la kun nas mnar sems mang po byung ngo / /mi pham pa/ 'tsho ba can gyi mi de dag ni/ bskal pa brgyas kyang mthun pa'i bzod pa thob par nga mi smra na/ byang chub lta smos kyang ci dgos te/ mi pham pa/ g.yo dang ldan pa la byang chub med do/ /phrag dog can la med do/ /rim gro med pa la med do/ /yang dag pa'i shes pa med pa la med do/ / khyim sun par byed pa la med do/ /gnyis su spyod pa la med do/ /mi pham pa/ mi blun po de dag ni khang bas kyang ches mkhas par khas 'che zhing nyan thos kyi chos sam/ rang 297b sangs rgyas kyi chos gang yin pa'i chos de ni/ de bzhin gshegs pas gsungs pa ma yin no/ /zhes zer ro/ /de nas bcom ldan 'das kyis tshe dang ldan pa rab 'byor la bka' stsal pa| rab 'byor/ gnyis su med pa spyod pa la shes rab kyi pha rol tu phyin pa yod mod/ gsol pa/ bcom ldan 'das/ de lta lags so/ /bka' stsal pa/ rab 'byor/ mi gnas pa la byang chub yod mod/ gsol pa/ bcom ldan 'das/ de lta lags so/ /bka' stsal pa/ rab 'byor spros pa med pa la byang chub yod mod/ gsol pa/ bcom ldan 'das/ de lta lags so/ /bka' stsal pa/ rab 'byor/ nye du la gdu ba'i phyir ngo tsha med pa de dag gis 'di lta ste dbul por 'gyur ba'i las kyi rnam par smin pa ji tsam yongs su gzung bar sems pa la ltos/ mi pham pa/ gzhan yang byang chub sems dpas chos thams cad nyan thos kyi chos so/ /zhes skrag par mi bya'o/ /chos thams cad rang sangs rgyas kyi chos so/ /zhes skrag par mi bya'o/ /chos thams cad sangs rgyas kyi chos so/ /zhes skrag par mi bya'o/ /mngon par zhen par mi bya'o/ /chos thams cad nyan thos kyi chos ma yin no/ /zhes skrag par mi bya'o/ /chos thams cad rang sangs rgyas kyi chos ma yin no/ /zhes skrag par mi bya'o/ /chos thams cad sangs rgyas kyi chos ma yin no/ /zhes 298a @#/ /skrag par mi bya'o/ /mngon par zhen par mi bya'o/ /chos thams cad so so'i skye bo'i chos so/ /zhes skrag par mi bya'o/ /chos thams cad so so'i skye bo'i chos ma yin no/ /zhes skrag par mi bya'o/ /chos thams cad kun nas nyon mongs pa'i chos so/ /zhes skrag par mi bya'o/ /chos thams cad kun nas nyon mongs pa med pa'i chos so/ /zhes skrag par mi bya'o/ /chos thams cad rnam par byang ba'i chos so/ /zhes skrag par mi bya'o/ /chos thams cad rnam par byang ba med pa'i chos so/ /zhes skrag par mi bya'o/ /chos thams cad nye bar len pa'i chos so/ /zhes skrag par mi bya'o/ /chos thams cad nye bar len pa med pa'i chos so/ /zhes skrag par mi bya'o/ /chos thams cad bya ba dang bcas pa'i chos so/ /zhes skrag par mi bya'o/ /chos thams cad bya ba med pa'i chos so/ /zhes skrag par mi bya'o/ /chos thams cad gsar pa'i chos so| |zhes skrag par mi bya'o/ /chos thams cad gsar ba ma yin pa'i chos so/ /zhes skrag par mi bya'o/ /chos thams cad srid pa'i chos so/ /zhes skrag par mi bya'o| |chos thams cad srid pa med pa'i chos so/ /zhes skrag par mi bya'o/ /chos thams cad sems kyi chos so/ /zhes skrag par mi bya'o/ /chos thams cad sems med 298b pa'i chos so/ /zhes skrag par mi bya'o/ /chos thams cad sems pa'i chos so/ /zhes skrag par mi bya'o/ /chos thams cad sems med pa'i chos so/ /zhes skrag par mi bya'o/ /chos thams cad las kyi chos so/ /zhes skrag par mi bya'o/ /chos thams cad las med pa'i chos so/ /zhes skrag par mi bya'o/ /chos thams cad rnam par smin pa'i chos so/ /zhes skrag par mi bya'o/ /chos thams cad rnam par smin pa med pa'i chos so/ /zhes skrag par mi bya'o/ /chos thams cad bzod pa'i chos so/ /zhes skrag par mi bya'o/ /chos thams cad bzod pa med pa'i chos so/ /zhes skrag par mi bya'o/ /chos thams cad thar pa'i chos so/ /zhes skrag par mi bya'o/ /chos thams cad thar pa med pa'i chos so/ /zhes skrag par mi bya'o/ /chos thams cad rnal 'byor gyi chos so/ /zhes skrag par mi bya'o/ /chos thams cad rnal 'byor med pa'i chos so/ /zhes skrag par mi bya'o/ /chos thams cad 'phags pa'i chos so/ /zhes skrag par mi bya'o/ /chos thams cad 'phags pa med pa'i chos so/ /zhes skrag par mi bya'o/ /chos thams cad sems can gyi chos so/ /zhes skrag par mi bya'o/ /chos thams cad sems can med pa'i chos so/ /zhes skrag par mi bya'o/ /chos thams cad gzung ba'i chos so/ /zhes skrag par mi bya'o/ /chos thams cad gzung du med pa'i chos so/ /zhes skrag par mi bya'o/ /chos 299a @#/ /thams cad bden pa'i chos so/ /zhes skrag par mi bya'o/ /chos thams cad bden pa med pa'i chos so/ /zhes skrag par mi bya'o/ /chos thams cad tshul bzhin gyi chos so/ /zhes skrag par mi bya'o/ /chos thams cad tshul bzhin med pa'i chos so/ /zhes skrag par mi bya'o/ /chos thams cad brtan pa'i chos so/ /zhes skrag par mi bya'o/ / chos thams cad mi brtan pa'i chos so/ /zhes skrag par mi bya'o/ /mi pham pa/ ngas byang chub kyi snying por chos nyid mngon par rdzogs par sangs rgyas te chos kyi yul thams cad mkhyen kyang dmigs pas ma yin no/ /chos thams cad kyi ngo bo nyid kun tu mkhyen kyang mngon par zhen pas 'jig rten la chos mi ston to/ /byang chub sems dpa' rnams la chos rnams kyi snang ba thob par bya ba dang / gzungs dang chos kyi phyag rgya rnams bskyed pa'i phyir ngas de bzhin nyid rnam par dkrugs pa med/ chos rnams bsal ba ma byas/ gzhag pa ma byas so| |mi pham pa/ ngas gling bzhi chen po'i 'jig rten gyi khams 'dir 'og min gyi gnas man chad du chos bstan pa'i tshe sems can rnams 'di snyam du de bzhin gshegs pa ni| bdag cag kho na la chos ston to snyam mo/ /de bzhin du sbyar te/ gling bzhi pa gnyis pa dang / de bzhin du stong gsum gyi stong chen po'i 'jig rten gyi khams su chos bstan pa'i 299b tshe sems can rnams 'di snyam du de bzhin gshegs pa ni/ bdag cag kho na la chos ston to/ /'di na de bzhin gshegs pa chos ston to/ /'dir de bzhin gshegs pa skyes so/ /'dir chos kyi 'khor lo bskor ro/ /chos kyi 'khor lo bskor nas chos bston to snyam mo/ /mi pham pa/ 'di la nga ni/ thabs 'dis 'jig rten gyi khams mtha' yas mu med pa dag tu snga dro'i dus kyi tshe'ang chos ston cing de ltar sangs rgyas kyi mdzad pa mdzad do/ /nyi ma gung gi dus kyi tshe'ang de ltar sangs rgyas kyi mdzad pa mdzad do/ /phyi dro'i dus kyi tshe'ang de ltar sangs rgyas kyi mdzad pa mdzad de/ chos thams cad dang / sems can thams cad dang / 'jig rten gyi khams thams cad du de bzhin gshegs pa'i spyan thogs pa mi mnga' bar gzigs pa dang / shes rab dang ye shes kyi gzigs pa 'jug ste/ de ltar sangs rgyas kyi yul bsam gyis mi khyab cing tshad med na de la de dag 'di ltar chos spong ba la gnas pas byang chub sems dpas 'di la ni/ bslab par bya'o/ /'di la ni/ bslab par mi bya'o/ /zhes zer te/ gang su dag chos spong bar gnas pa de dag ni/ sangs rgyas la skur pa 'debs par gnas pa yin/ gang dag sangs rgyas la skur ba 'debs par gnas pa de dag ni/ 'di lta ste/ ngan song gi g.yang sa'i sa la gnas pa yin te/ de dag ni/ chos kyis 300a @#/ /'phongs par 'gyur ba la gnas pa yin no/ /mi pham pa/ de lta bas na/ de bzhin gshegs pa'i thabs mkhas pas bstan pa'i chos la bdag bsrung bar bya'o/ /de nas 'jam dpal gzhon nur gyur pa dang / byang chub sems dpa' shes rab kyi phung po yang dag grub pa dang / byang chub sems dpa' mthong ba don yod dang / byang chub sems dpa' gcig tu spobs pa rnam par nges pa'i blo gros dang / byang chub sems dpa' shin tu rnam par nges pa'i sems ston pa'i blo gros dang / byang chub sems dpa' shes rab spobs pas smra ba dang / byang chub sems dpa' 'jigs bral yang dag gsal byed dang / byang chub sems dpa' mchog tu dga' ba'i rgyal po dang / byang chub sems dpa' khengs med gnas dang / byang chub sems dpa' sangs rgyas kyi zhing mtha' yas pa'i cho ga sems pa dang / byang chub sems dpa' spyan ras gzigs dbang phyug dang / byang chub sems dpa' spos kyi glang po che dang / byang chub sems dpa' bal glang spos kyi glang po che dang / byang chub sems dpa' gzi brjid dbyangs kyi dbang phyug dang / byang chub sems dpa' sgrib pa thams cad rnams par sel ba dang / byang chub sems dpa' brtson pa mi gtong ba gnas pa dang / byang chub sems dpa' yon tan brgya stong brgyan dang / byang 300b chub sems dpa' thams cad mkhyen gyi ye shes la rmongs pa med par sems pa dang / byang chub sems dpa' brjod pa grags pa'i tog gi rgyal mtshan dang / byang chub sems dpa' chos thams cad kyis phang dgas sems pa dang / byang chub sems dpa' sangs rgyas kyi yul dang ma bral bar gnas pa dang / byang chub sems dpa' tsan+dan gyis brgyan pa'i gzi brjid kyis btul bas rnam par gnon pa dang / byang chub sems dpa' 'jig rten kun gyis mchod grags dang / byang chub sems dpa' nyi shu po de dag gis bcom ldan 'das la 'di skad ces gsol to/ /bcom ldan 'das/ de de lta lags so/ /bde bar gshegs pa/ de de lta lags te/ bdag cag kyang shar phyogs kyi sangs rgyas kyi zhing gang+gA'i klung bcu'i bye ma snyed du mchis te/ sangs rgyas bcom ldan 'das la bsnyen bkur bgyis na/ thams cad na'ang bcom ldan 'das nyid chos ston pa mdzad do/ /de bzhin du phyogs bcu'i 'jig rten gyi khams rnams su mchis na'ang de bzhin du sems can rnams la chos ston pa mdzad do/ /bcom ldan 'das/ de dag tu bdag cag gis gdugs bdun du sangs rgyas kyi zhing du rgyu ba bgyis na/ sangs rgyas gzhan ma mthong nas slar 'dir chos nyan du mchis so/ /de nas bcom ldan 'das kyis 'jam dpal gzhon nur gyur pa la bka' stsal pa/ 'jam 301a @#/ /dpal ltos/ de bzhin gshegs pa'i yul dang ye shes ni/ de ltar tshad med/ sangs rgyas kyi yul ni/ de ltar bsam gyis mi khyab/ de ltar de bzhin gshegs pa ni/ de bzhin gshegs pa'i chos rnams kyis mi mnyam pa dang mnyam na/ 'jam dpal/ de la skyes bu blun po de dag 'di skad du 'di lta ste/ byang chub sems dpa' rnams kyi de bzhin gshegs pa'i phyir spyod pa ni/ shes rab kyi pha rol tu phyin pa'o/ /zhes zer ro/ /'jam dpal/ 'di lta ste/ byang chub sems dpa'i spyod pa ni/ dpag tu med pa'i spyod pa'o/ /'di lta ste/ byang chub sems dpa'i spyod pa ni/ mnyam pa med pa'i spyod pa'o/ /'di lta ste/ byang chub sems dpa'i spyod pa ni/ yongs su 'dzin pa med pa'i spyod pa'o/ /'di lta ste/ byang chub sems dpa'i spyod pa ni/ mi 'dor ba'i spyod pa'o/ /byang chub sems dpa'i spyod pa ni/ dam bcas pa la brtan zhing lhag pa'i bsam pa yongs su dag pa'i spyod pa'o/ /byang chub sems dpa'i spyod pa ni/ gzhan la phan gdags pas yongs su mi skyo ba'i spyod pa'o/ /'jam dpal/ byang chub sems dpa' rnams kyi spyod pa yongs su dag pa 'di lta bu ni/ nga'i chos yin na de'i tshe mthong dka' bar 'gyur ro/ /'jam dpal de lta bas na/ skyes bu dam pa nyi shu po khyed thams cad 301b gyis ci nas kyang nga'i byang chub bskal pa grangs med pa bye bar yang dag par bsgrubs pa thabs mkhas pas bstan pa 'di gzhan gyis shes par 'gyur bar chos yang dag par blang ba la gnas te bag yod par bya'o/ /dam bcas pa la brtan par bya'o/ /khong khro ba med pa'i sems su bya'o/ /sems can dag 'di lta ste/ chos spong ba'i g.yang sa chen por mi ltung bar bya'o| |de nas 'jam dpal gyis gsol pa/ bcom ldan 'das/ chos spong ba zhes bgyi ba gang lags/ bcom ldan 'das kyis bka' stsal pa/ 'jam dpal/ gang de bzhin gshegs pas gsungs pa'i bka' la la ni/ bzang bar 'du shes/ la la ni/ ngan par 'du shes pa de ni/ chos spong ba'o/ /gang chos spang ba des chos spangs pas de bzhin gshegs pa la skur ba 'debs pa yin/ dge 'dun la ngan du brjod pa yin no/ /'di ni/ rigs pa'o/ /'di ni/ mi rigs pa'o/ /zhes zer na/ chos spong ba yin no/ /'di ni/ byang chub sems dpa' rnams kyi ched du gsungs pa'o/ /'di ni/ nyan thos rnams kyi ched du gsungs pa'o/ /zhes zer na chos spong ba yin no/ /'di ni/ rang sangs rgyas rnams kyi ched du gsungs pa'o| |zhes zer na/ chos spong ba yin no/ /'di ni/ byang chub sems dpa'i bslab pa'o/ /'di ni/ byang chub sems dpa'i bslab pa ma yin no/ /zhes zer na/ chos spong ba yin no/ / 302a @#/ /spobs pa yod do/ /zhe'am/ spobs pa med do/ /zhes zer na/ chos spong ba yin no/ /chos ni/ chos ma yin par ston to/ /zhes zer na/ chos spong ba yin no| |sangs rgyas 'byung ba med par gzungs 'thob ces zer na/ chos spong ba yin no/ /gzungs thob pa'i thob pa ni/ yongs su dag pa ma yin no/ /zhes zer na/ chos spong ba yin no/ /chos smra ba'i spyod pa nyes par byas pa dang ldan no/ /zhes zer na/ chos spong ba yin no/ /chos smra ba sgrub pa phun sum tshogs pa ma yin no/ /zhes zer na/ chos spong ba yin no| |bag med par gleng na/ chos spong ba yin no/ /spyod lam gyis gleng na/ chos spong ba yin no/ /spyod pa dang tshul khrims nyams pas gleng na/ chos spong ba yin no/ /spobs pas go bar mi byed do/ /zhes zer na/ chos spong ba yin no/ /snang ba legs par ma bshad do/ /zhes zer na/ chos spong ba yin no/ /khong du ma chud pas tshig dang tshig tu 'gal bar byas so| |zhes zer na/ chos spong ba yin no/ /yi ge ming gis de bzhin gshegs pa'i bka' la 'jug go /zhes zer na/ chos spong ba yin no/ /mdo sde dang mdo sde 'gal bar byas so| |zhes zer na/ chos spong ba yin no/ /tshigs su bcad pa dang tshigs su bcad par 'gal bar byas so/ /zhes zer na/ chos spong ba yin no/ /don la la la mos shing 302b don la la la ma mos so/ /zhes zer na/ chos spong ba yin no/ /chos 'chad pa'i tshe gtam gzhan du bsgyur na/ chos spong ba yin no/ /dkrugs ma byed na/ chos sdong ba yin no/ /kun tu rtog pas smra na/ chos spong ba yin no/ /'di la spyad 'di la mi spyad ces zer na/ chos spong ba yin no/ /'di ni/ rigs/ 'di ni/ mi rigs zhes zer na/ chos spong ba yin no/ /'jam dpal| nyan thos rnams kyi spobs pa gang ji snyed pa dang / byang chub sems dpa' rnams kyi spobs pa gang ji snyed pa de dag thams cad ni/ de bzhin gshegs pa'i mthu yin no/ / 'jam dpal/ ngas ni/ nyan thos rnams kyi spobs pa gang ji snyed pa dang / byang chub sems dpa' rnams kyi spobs pa gang ji snyed pa de thams cad de bzhin gshegs pa'i mthu las byung bar smon lam legs par btab pa yin/ 'jam dpal/ ngas ni/ byang chub tu'ang smon lam legs par btab pa yin no/ /'di ltar mi blun po de dag ngan song du 'gro bar bdud kyis byin gyis brlabs pa'i phyir de la'ang skyon 'dogs par sems so/ /de bzhin gshegs pas gnang ba'i chos smra ba de dag la'ang skyon 'dogs par sems so/ /rnyed pa'i phyir khyim srung bar gnas pa yin gyi/ de bzhin gshegs pa'i bstan pa bsrung ba'i phyir gnas pa ma yin/ rigs la gdu bas bram ze dang khyim bdag rnams la smra ba ni/ 'di skad 303a @#/ /khyod kyis legs par smras so/ /khyod kyis de bzhin gshegs pa'i bka' legs par rtogs so/ /zhes zer te/ phyogs kyi'ang phyogs gcig smras pa la rjes su yi rang ba'i gzhis de dag chos spong bar gyur pas 'di lta ste/ ngan song chen por 'gro bar 'gro ba mtshungs par 'gyur ro/ /'jam dpal/ mngon par zhen pa la byang chub sems dpa'i spyod pa'o/ /zhes nga mi smra'o/ /khyim la chags pa'i 'tsho ba rnam par dag pa zhes nga mi smra'o/ /gnyis su ston pa rnams kyis chos kyis 'phongs par 'gyur ba las grol bar nga mi smra'o/ /gcig tu ston pa rnams ngan song las grol bar nga mi smra'o/ /smra ba la dga' ba rnams yongs su dag pa'o/ /zhes nga mi smra'o/ /'jam dpal/ ngas ni/ gang+gA'i klung gi bye ma ji snyed pa de snyed kyi chos kyi sgo rnams mi dmigs pa'i tshul gyis bstan to/ /'jam dpal/ gang+gA'i klung gi bye ma ji snyed pa de snyed kyi chos kyi sgo rnams ngas dmigs pa'i tshul gyis ma bstan to/ /'jam dpal/ ngas ni/ stong pa nyid la mos pa rnams la gang+gA'i klung gi bye ma ci snyed kyi chos kyi sgo rnams bstan to/ /ngas ni/ sems can du 'du shes pas de snyed du chos kyi sgo rnams bstan to/ /ngas ni/ mtshan ma med pa'i sgo nas de snyed kyi chos kyi sgo rnams bstan to/ /ngas ni/ rnam par rtog pa'i sgo nas de snyed kyi 303b chos kyi sgo rnams bstan to/ /ngas ni/ smon pa med pa'i sgo nas de snyed kyi chos kyi sgo rnams bstan to/ /ngas ni/ smon pa'i sgo nas de snyed kyi chos kyi sgo rnams bstan to/ /ngas ni/ gang zag gi sgo nas de snyed kyi chos kyi sgo rnams bstan to/ /ngas ni/ gang zag med pa'i sgo nas de snyed kyi chos kyi sgo rnams bstan to/ /ngas ni/ 'jug pas de snyed dang / ldog pas de snyed dang / ngas ni/ yod pas de snyed dang / med pas de snyed dang / ngas ni/ 'dus byas kyis de snyed dang / 'dus ma byas kyis de snyed dang / ngas ni/ drang bas de snyed dang / drang ba med pas de snyed dang / ngas ni/ gsang bas de snyed dang / gsad pa med pas de snyed dang / ngas ni/ 'khor ba'i sgo de snyed dang / ngas ni/ mya ngan las 'das pa'i sgo de snyed dang / ngas ni/ 'jig rten de snyed dang / ngas ni/ 'jig rten las 'das pa de snyed dang / ngas ni/ 'dod chags kyi sgo de snyed dang / ngas ni/ zhe sdang gi sgo de snyed dang / ngas ni/ gti mug gi sgo de snyed dang / 'jam dpal/ ngas ni/ gang+gA'i klung gi bye ma ji snyed pa de snyed kyi spang ba'i sgo'i chos kyi sgo rnams bstan to/ 'jam dpal/ thams cad kyang 'di lta ste/ mi rtag pa'i tshul du shes rab kyi pha rol tu phyin pa'i tshul yin na/ de la phyogs kyi'ang phyogs gcig shes pas de bzhin gshegs pa la skur ba 'debs so/ /de nas bcom ldan 'das la 'jam dpal gzhon 304a @#/ /nur gyur pas 'di skad ces gsol to/ /bcom ldan 'das/ gal te la la zhig sdig pa'i grogs po'i dbang gis chos spong ba 'di lta bu 'di bgyis par gyur na| bcom ldan 'das/ de tshe 'di nyid la ji ltar thar par 'gyur/ de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal/ gal te lo bdun gyi bar du nyin gcig cing dus gsum du nyes pa la nyes par bshags na/ de'i 'og tu byang bar 'gyur te/ de phyin chad nyung na bskal pa bcus bzod pa 'thob par 'gyur ro/ /'jam dpal/ gal te byang chub sems dpa'i theg pa pa'i rigs kyi bu'am rigs kyi bu mo zhig chos kyi rnam grangs 'di ma bzung ma bklags par smra na/ chos kyis 'phongs par 'gyur ba las ma smras par thar bar shin tu dka'o/ /de lta bas na/ byang chub sems dpas 'di la bslab nas phyis chos bstan par bya ste/ de ltar na/ de smas par mi 'gyur ro/ /'jam dpal/ byang chub sems dpas mnyam pa nyid bzhi khong du chud par bya ste/ bzhi gang zhe na/ sems can mnyam pa nyid dang / chos mnyam pa nyid dang / byang chub mnyam pa nyid dang / lhag mthong mnyam pa nyid de/ mnyam pa nyid bzhi po de dag byang chub sems dpas khong du chud par bya'o/ /gang zhig 304b mnyam pa nyid bzhi po de dag khong du ma chud par smra na/ ci smra'ang de bdag smras par 'gyur ro/ /gzhan yang chos bzhi dang ldan na/ byang chub sems dpa' sems dpa' chen po rigs kyi bu'am| rigs kyi bu mo ma smras par thar par 'gyur te/ bzhi gang zhe na/ sems can thams cad la khong khro ba med pa'i sems dang / shes pas mos nas chos smra ba rnams la 'gal bar mi byed pa dang / pha rol mi spong ba dang / de bzhin gshegs pas gsungs pa thams cad la gus pa yin te/ chos bzhi po de dang ldan na/ rigs kyi bu'am/ rigs kyi bu mo de ma smas par thar par 'gyur ro/ /'jam dpal/ byang chub sems dpa' gang zhig gis bskal pa gang+gA'i klung gi bye ma snyed du sangs rgyas kyi zhing thams cad rin po che sna bdun gyis brgyan te sangs rgyas bcom ldan 'das gang+gA'i klung gi bye ma snyed la nyin gcig bzhin du dbul ba phul ba bas/ gang zhig gis rnam par 'thag pa thams cad bsdus pa'i mdo'i chos kyi rnam grangs 'di bris shing glegs bam du byas te tha na lan gsum bklags na/ 'di ni/ de bas bsod nams ches mang du skyed par 'gyur ro/ /de ci'i phyir zhe na| byang chub sems dpa' gang rnam par 'thag pa thams cad bsdus pa'i mdo 'di la bslab pa'i bsod nams kyi phung po dang mnyam pa'i sbyin pa dang / tshul khrims dang / bzod 305a @#/ /pa dang / brtson 'grus dang / bsam gtan dang / shes rab de med do/ /chos kyi rnam grangs 'di bshad pa na byang chub sems dpa' gang+gA'i klung sum cu'i bye ma snyed mi skye ba'i chos la bzod pa thob par gyur to/ /byang chub sems dpa' gang+gA'i klung bdun cu'i bye ma snyed ni/ bla na med pa yang dag par rdzogs pa'i byang chub las phyir mi ldog par gyur to/ /stong gsum gyi stong chen po'i 'jig rten gyi khams 'di'i sems can bye ba khrag khrig brgya stong phrag drug cus chos kyi rnam grangs 'di la yi rang nas byang chub tu go cha chen po bgos pas de dag thams cad bskal pa brgyad cur 'khor bar 'khor nas thams cad kyang bskal pa brgyad cus bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /byang chub sems dpa' dag nan tan gyis bsgrubs na/ chos kyi rnam grangs 'di de ltar don che zhing de ltar 'bras bu che ste phan yon che la gsal ba che zhing rgyas pa che'o/ /'jam dpal/ de lta bas na/ khyed kyis chos kyi rnam grangs 'di la bslab ste phyi ma'i dus na chos gzung bar bya'o/ /de ltar na khyed ma smras par thar par 'gyur ro/ /de nas chos smra ba nyi shu po de dag gis bcom ldan 'das la 'di skad ces gsol to/ /bcom ldan 'das chos kyi rje/ chos kyi rgyal po 305b bcom ldan 'das kyis ji skad bka' stsal pa de bzhin du bgyi'o/ /sangs rgyas kyi mthu dang / sangs rgyas kyi byin gyi rlabs kyis de bzhin gshegs pa'i bka' legs par rab tu bsgrub par bgyi'o/ /bcom ldan 'das kyis de skad ces bka' stsal nas 'jam dpal gzhon nur gyur pa dang / byang chub sems dpa' sems dpa' chen po de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa rnam par 'thag pa thams cad bsdus pa zhes bya ba theg pa chen po'i mdo rdzogs so// //rgya gar gyi mkhan po dzi na mi tra dang mu ni warma dang / zhu chen gyi lo tsA ba ban+d+he ye shes sdes bsgyur cing zhus te gtan la phab pa/ |