//rgya gar skad du/ b+ha ga wa ti pra dz+nyA pa ra mI ta sarba ta thA ga ta mA ta e ka a k+Sha ri nA ma/ bod skad du/ bcom ldan 'das ma shes rab kyi pha rol tu phyin pa de bzhin gshegs pa thams cad kyi yum yi ge gcig ma zhes bya ba/ shes rab kyi pha rol tu phyin ma la phyag 'tshal lo/ /'di skad bdag gis thos pa'i dus gcig na bcom ldan 'das rgyal po'i khab bya rgod phung po'i ri la dge slong gi dge 'dun chen po brgya phrag phyed dang bcu gsum dang / byang chub sems dpa' bye ba khrag khrig brgya stong mang po dag dang thabs cig tu bzhugs te/ yang de'i tshe bcom ldan 'das kyis tshe dang ldan pa kun dga' bo la bka' stsal pa/ kun dga' bo/ khyod kyis shes rab kyi pha rol tu phyin pa yi ge gcig ma zhes bya ba 'di/ sems can rnams la phan pa dang / bde ba'i phyir zungs shig/ 'di lta ste/ a/ bcom ldan 'das kyis de skad ces bka' stsal nas tshe dang ldan pa kun dga' bo dang / dge slong gi dge 'dun chen po dang / byang chub sems dpa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la 253a @#/ /mngon par bstod do/ /shes rab kyi pha rol tu phyin pa yi ge gcig ma rdzogs so// |