//rgya gar skad du/ rA dza de sha nA ma mahA yA na sU tra/ bod skad du/ rgyal po la gdams pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na / bcom ldan 'das grong khyer chen po wA ra NA si na 'khor rnams la tshos ston pa na/ bad sa la'i rgyal po 'char byed 'dul ba'i dus la bab par gzigs nas 'khor dang bcas pa bad sa la'i yul du gshegs pa dang / bad sa la'i rgyal po 'char byed grong khyer chen po gser can zhes bya ba gzhom pa'i phyir dmag bzhi dang chas pa dang phrad pas rgyal 321a @#/ /po 'char byed khros te/ 'di 'dra ba'i bkra mi shis pa dang phrad pas bsad par rigs so zhes nas mda' ste'u kha nya rnga ma blangs te/ bcom ldan 'das la 'phangs so/ /de nas mda' de nam mkha' la 'khor zhing 'di skad ces grag go /zhe sdang gis ni sdug bsngal bskyed/ /'dir yang sha thang 'thab dang rtsod/ /phyi mar dmyal ba'i sdug bsngal 'byung / /des na zhe sdang 'thab rtsod spang / /zhes bya ba'i tshig de rgyal po 'char byed kyis thos par gyur pa dang / bcom ldan 'das la mos par gyur te phyag btsal nas phyogs gcig tu 'khod do/ /bcom ldan 'das kyis bka' stsal pa/ rgyal po chen po/ 'thab rtsod ni 'dir sha thang la phyi mar ngan song du skye na/ ci'i phyir/ rtag tu 'thab rtsod 'ba' zhig byed/ rgyal pos gsol pa/ gau ta ma/ bdag gis gang dang 'thabs kyang pham ma myong ste rgyal bas bdag ni dmag dang 'thab pa la mos pa lags so/ /bcom ldan 'das kyis bka' stsal pa/ rgyal po chen po/ dgra 'di ni dgra chung ngu yin te/ rgyal po chen po/ 'di ma yin pa'i dgra chen po shar gnyer ba zhig yod do/ /rgyal pos gsol pa/ dgra de gang lags/ bcom ldan 'das kyis bka' stsal pa/ dgra chen po nyon mongs pa bdag tu 321b tu 'dzin pa zhes bya ba zhig yod do/ /rgyal pos gsol pa/ dgra de ji lta bu lags bshad du gsol/ bcom ldan 'das kyis bka' stsal pa/ rnam rtog bdag tu 'dzin pa'i dgra chen po/ /'di ni rgyu bzhin dngos po med bzhin du/ /thog ma med nas bdag la gnas nas ni/ /bdag gi chos sku yid bzhin rin chen de/ /gzod ma'i mu nas dgra yis brkus nas su/ /mtshan ma'i tshang tshing gseb tu sbas nas bdag /da rung 'ching zhing 'khor bar 'khyam du 'jug /'jig rten dgras ni bsad nas nor 'phrog tsam/ /de la bzod byas bsod nams tshogs kyang rdzogs/ /dgra 'di zhi bde thar pa'i srog kyang gcod/ /de bsten bsod nams 'khor bar 'dam du 'ching / /rgyal pos gsol pa/ dgra chen po de dang ji ltar 'thab par bgyi/ /bcom ldan 'das kyis bka' stsal pa/ rnam rtog dgra la rgol ba'i shom ra yang / /dad pas sbyin dang tshul khrims mkhar brtsigs te/ / dge ba'i dpung byas bzod pa'i go gyon la/ /brtson 'grus lcag thogs bsam gtan gzhu brdungs te/ /bdag med stong pa'i mda' yis bdag 'dzin bsad/ /rgyal pos gsol pa| bdag med pa zhes pa de bshad du gsol/ bcom ldan 'das kyis bka' stsal pa/ gang zag bdag med rgyal po mnyan par gyis/ /gang zag lnga phung rgyun yin ci phyir na/ / 322a @#/ /rgyu ni las dang nyon mongs pas gang nas/ /'bras bu phung por zag ste de yi bdag /bdag ni sems can so so'i lus 'di la/ /nga dang bdag tu bzung nas chags gyur te/ /bdag ni na dang shi bkres grang gis dogs/ /bstod na dga' zhing smad na mi dga' ste/ /de la dmigs nas mu stegs lnga rnams 'jug /nga 'am bdag de yod pa ma yin te/ /phung po 'di la brtags nas 'khrul pa yin/ /ming ni bdag ma yin te btags pa tsam/ /lus ni bdag ma yin te sha rus rnams/ / 'byung chen 'dus pa phyi rol rtsig pa 'dra/ /sems kyang bdag ma yin te dngos po med/ /chos la bdag med rgyal po mnyan par gyis/ /chos ni gzugs sogs dngos po thams cad yin/ /byed pa med la mtshan nyid 'dzin phyir ro/ /de dag log rtog mtshan mar bcas pa dang / /lta mi mthun pa yin te de med do/ /ci phyir zhe na phyi nang chos 'di la/ /dngos 'di spangs nas stong nyid mi btsal gyi/ /snang ba nyid na stong pa nyid yin phyir/ /gzhig bcom mi rtag tsam la stong ming gdags/ /snang la rang bzhin med par cis mngon na/ /yod med dbus dang gsum du mi gnas te/ /yod par grags pa 'khor ba mya ngan 'das/ /'khor ba'i rang bzhin yul sems rnam gnyis 322b te| |yul 'di dngos po med par 'di ltar brtag /rang snang rdul bshig rdul yang chas gzhigs med/ /dngos snang thams cad sems yin rmi lam bzhin/ /sems kyang kha dog dbyibs sogs rnams dang bral/ /des na 'khor ba stong zhing bdag med do/ /'khor ba med pas mya ngan 'das pa'ang med/ /yod pa ma grub pas na med pa'ang med/ /mtha' gnyis med phyir dbus kyang med pa yin/ /de ltar rgyal pos bdag med sgom byas na/ /bdag 'dzin 'khor ba rtsad nas chod par 'gyur/ /rgyal pos gsol pa/ snga gong yan chad dgra ma yin pa la dgrar bzung ste/ bdag zhe sdang gis mnar bar gyur to/ /da ni bdag gis yang dag pa'i dgra ngo shes pas dgra de dang 'thab pa'i phyir bdag med pa la mos par gyur lags so/ /bcom ldan 'das kyis bka' stsal pa/ rgyal po chen po/ legs so/ /bdag tu 'dzin pa'i dgra pham par byas so/ /bcom ldan 'das kyis de skad ces bka' stsal pa dang / bad sa'i rgyal po 'char byed la sogs pa yi rangs te/ bcom ldan 'das kyis gsungs pa la mngon par bstod do/ /bdas la'i rgyal po 'char byed la gdams pa zhes bya ba theg pa chen po'i mdo rdzogs so// //rgya gar gyi mkhan po dA na shI la dang / band ye shes sdes bsgyur cing zhus te gtan la phab pa// // |