//rgya gar skad du/ AR+Ya lo kA nu sa mA nA a ba tA ra nA ma ma hA yA na sU tra/ bod skad du/ 'phags pa 'jig rten gyi rjes su mthun par 'jug pa zhes bya ba theg pa chen po'i mdo/ /sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ thub pa'i rgyal po ril bzhugs/ /byang chub sems dpa' chen po dang / nyan thos rnams kyis mdun gyis bltas/ /de nas mkhas pa 'jam dbyangs kyis/ /btud de rgyal la 'di skad gsol/ /slad ma'i skye bo rnams slad du/ /dpa' bo chen pos bshad du gsol/ /sangs rgyas kun gyi yon tan 'byung / / zab cing rgya che phun sum tshogs/ /mdo sde dam pa blo rab kyi/ /smra ba'i mchog gis bshad du gsol/ /'jig rten mgon po'i thugs skyes sras/ /gces 'dzin mchog la 479a @#/ /bka' stsal pa/ /rtse gcig sems su yid byos la/ /nyon cig ngas ni bshad par bya/ /blo dang ldan pas yon tan zhus/ /de bzhin gshegs pas bka' stsal pa/ /chos smra sems can mchog rnams kyis/ /chos nyid de ni mnyan par gyis/ /de bzhin gshegs rnams dpag med las/ /rang sangs rgyas ni thams cad dang / /nyan thos dag gis rnam kun tu/ /rdzogs pa'i sangs rgyas bsags pa na/ /de bzhin gshegs pa spros med la/ /byis pa spros pa spyod pa yi/ /sems can kun gyis rgyal ba rnams/ /rig par mi nus smos ci dgos/ /sangs rgyas kyis ni sangs rgyas dang / /sangs rgyas chos nyid gang yin dang / /rang byung sku thugs ci 'dra dang / / shes rab ci 'dra rab tu mkhyen/ /'jig rten du ni 'jig rten sgron/ /rnam par 'dren pa rnams byung yang / /'jig rten dang ni 'dres med la/ /'jig rten du yang snang ba ston| |sku dang sku yi phrin las dang / /gsung gis gang dag brjod pa dang / /yid dang yid kyi rnam rtog rnams/ /rgyal ba'i thams cad 'jig rten 'das/ /'jig rten na ni thugs brtse bas/ /'jig rten mgon po 'od mdzad pa/ /'jig rten ji ltar rtog pa bzhin/ /sems can rnams la chos ston to/ /'jig rten 'das pa'i spyod rnams 479b kyis| |sangs rgyas thams cad yang dag 'phags/ /de dag phrin las 'jig rten 'das/ /rnam par smin pa bla na med/ /gal te 'jig rten rnam 'dren rnams/ /'jig rten mthun par mi 'jug na/ /sangs rgyas chos nyid gang yin dang / /sangs rgyas sus kyang shes mi 'gyur/ /'jig rten kun la phan bzhed pa/ /skyob pa rdzu 'phrul ldan pa po/ /rang byung sdig pa mi mnga' ba/ /de dag g.yo ba bsam mi khyab/ /bde bar gshegs pa rnams kyi sku/ /'khrig pa las ni byung min la/ /yab dang yum yang ston mdzad pa/ /'di ni 'jig rten mthun 'jug yin/ /bskal pa bye ba grangs med nas/ /shes rab pha rol phyin las byung / /'on kyang byis pa nyid ston pa/ /'di ni 'jig rten mthun 'jug yin/ /sangs rgyas 'od ni dpag med de/ /phyogs bcu dag tu snang mdzad kyang / /'dom gang 'od du ston mdzad pa/ /'di ni 'jig rten mthun 'jug yin/ /mi yi dam pa nam du yang / /zhabs gnyis sa la mi reg ste/ /'on kyang lam srang de ston pa/ /'di ni 'jig rten mthun 'jug yin/ /'dod pa de dag rnams smad de/ /'dod pa'i rdzab las yang dag 'phags/ /'on kyang sras la sogs ston pa/ /'di ni 'jig rten mthun 'jug yin/ /mar me mdzad nas bzung nas su/ /de bzhin gshegs pa 'dod chags bral/ /sgra gcan 'dzin la sras 480a @#/ /zhes gsungs/ /'di ni 'jig rten mthun 'jug yin/ /lha dang 'jig rten bcas pa yi/ /nga ni mchog ces bka' stsal pa/ /phyin nas chos ni tshol mdzad pa/ /'di ni 'jig rten mthun 'jug yin/ /thub chen 'dzam shing grib ma la/ /bzhugs te bsam gtan mdzad bstan dang / /lo drug par du dka' spyod pa/ /'di ni 'jig rten mthun 'jug yin/ /gnyis su med par zhing 'di na/ /byang chub snying por bzhugs nas ni/ /bdud 'dul rnam par ston mdzad pa/ /'di ni 'jig rten mthun 'jug yin/ /byang chub mtshungs med sangs rgyas te/ /lhar bcas 'jig rten ston yin yang // thugs las chung ngu nyid ston pa/ /'di ni 'jig rten mthun 'jug yin// dpa' bo thugs rje che ldan pa/ /bstan pa'i phyir ni 'dir gshegs la/ /gsol ba 'debs la gzhes mdzad pa/ /'di ni 'jig rten mthun 'jug yin/ /rang byung rnams kyi mkhyen pa ni/ /phyir zhing 'jug pa mi mnga' yang / /de dag dran pa ston mdzad pa/ /'di ni 'jig rten mthun 'jug yin/ /rdzogs pa'i sangs rgyas rnams la ni/ /byon dang bzhud pa mi mnga' yang / /'on kyang bzhud par rnam snang ba/ /'di ni 'jig rten mthun 'jug yin/ /rgyal ba rnams ni mkha' 'dra ste/ /chos rnams kun la mi gnas 480b kyang| |ldang ba ltar yang snang ba ni/ /'di ni 'jig rten mthun 'jug yin/ /zhabs ni pad+ma'i 'dab 'dra ste/ /de dag rdul gyis mi gos la/ /zhabs kyang 'khru ba mdzad pa ni/ / 'di ni 'jig rten mthun 'jug yin/ /de dag dri ma mi mnga' ste/ /sku ni gser gyi mdog 'dra yang / /rdzogs pa'i sangs rgyas khrus mdzad pa/ /'di ni 'jig rten mthun 'jug yin| |zhal ni pad+ma'i dri ldan zhing / /tshems ni dri med mu tig 'dra/ /'on kyang tshems shing gsol mdzad pa/ /'di ni 'jig rten mthun 'jug yin/ /de dag bsgrim pa mi mnga' yang| |de dag zhal zas gsol mdzad cing // sbyin pa po la 'bras bu tshe/ /'di ni 'jig rten mthun 'jug yin/ /sku mkhregs rdo rje 'dra ba'i phyir/ /zag pa dag ni mi mnga' yang // bshang ba'i sar ni gshegs mdzad pa/ /'di ni 'jig rten mthun 'jug yin/ /de dag snyun ni mi mnga' yang / /dge 'dun bsdu ba mdzad pa'i phyir/ /sman kyang bsten par mdzad pa ni/ /'di ni 'jig rten mthun 'jug yin/ /sangs rgyas yon tan kun ldan te/ /sku la 'gyur ba mi mnga' yang / /de dag rga ba ston mdzad pa/ /'di ni 'jig rten mthun 'jug yin/ /'jig rten khams ni dpag tu med/ /zhabs kyi mthe bos g.yo mdzad la/ /'on kyang nyam chung ston mdzad pa/ /'di ni 'jig rten mthun 'jug yin/ / 481a @#/ /yid kyi sku dang rab ldan pas/ /de bzhin gshegs pa chos sku yang / /rang can sku ni ston mdzad pa/ /'di ni 'jig rten mthun 'jug yin/ / sangs rgyas rnam rtog mi mnga' yang / /sems can spyod yul ji bzhin du/ /de dag spyod pa rnam par rtog /'di ni 'jig rten mthun 'jug yin/ /de dag rtag tu mnyam bzhag la/ /'greng dang bzhugs dang bzhud pa dang / /de bzhin mnal bar snang ba yang / /'di ni 'jig rten mthun 'jug yin/ /rdzogs pa'i sangs rgyas thub dka' la| |grang dang tsha dang grib ma dang / /de bzhin nyi ma ston mdzad pa/ /'di ni 'jig rten mthun 'jug yin/ /tshangs pa'i khyim na tshangs pa ltar/ /rgyal ba rtag par na bza' gsol/ /'on kyang na bza' legs mdzad pa/ /'di ni 'jig rten mthun 'jug yin/ /spyi gtsug ltar ni mi mthong phyir/ /spu gris gcad du mong med kyang| |dbu 'dreg par ni ston mdzad pa/ /'di ni 'jig rten mthun 'jug yin/ /rdzu 'phrul rkang pa rab bsgoms te/ /de dag rdzu 'phrul nam ston la/ /bsam gtan mdzad pa snang ba yang / /'di ni 'jig rten mthun 'jug yin/ /'jig rten rnam par 'dren pa kun/ /ro bro mchog rnams brnyes gyur kyang // ngan ngon dag ni 481b bsten mdzad pa/ /'di ni 'jig rten mthun 'jug yin/ /bsod nams mi zad thams cad kyi/ /sangs rgyas thams cad yang dag 'phags/ /'on kyang ma brnyes ston mdzad pa| |'di ni 'jig rten mthun 'jug yin/ /dga' ba'i zas ni mngon bsgrubs te/ /bskal pa bye ba bzhugs mdzad kyang / /rtag tu zhal zas gsol mdzad pa/ /'di ni 'jig rten mthun 'jug yin/ /bsod nams pha rol phyin pas 'phags/ /lha yin bza' brnyes gyur kyang / /phyag dar khrod pa gsol mdzad pa/ /'di ni 'jig rten mthun 'jug yin/ /'og min gzhal med khang pa rnams/ /rnam 'dren rnams kyis yongs spangs te/ /rtswa khyim rnams ni bsten mdzad pa/ /'di ni 'jig rten mthun 'jug yin| |'dren pa rnams ni zhal dbugs kyis/ /rgya mtsho chen po bskams mdzad kyang / /char pa'i skyabs kyang rab 'dzin pa/ /'di ni 'jig rten mthun 'jug yin/ /bdud rnams bye ba dpag med pa/ /thugs bskyed tsam gyis 'dul mdzad kyang / /bdud kyi bgegs rnams ston mdzad pa/ /'di ni 'jig rten mthun 'jug yin/ /nga dang nga zhes lta ba gang / /de ni rang byung rnams la med/ /'on kyang nga dang nga'i zhes gsungs/ /'di ni 'jig rten mthun 'jug yin/ /skyob pa sangs rgyas chos kun la/ /mi mkhyen pa ni mi 482a @#/ /mnga' yang / /gzhan la yongs su 'dri mdzad pa/ /'di ni 'jig rten mthun 'jug yin/ /sems can kun gyi don gyi phyir/ /rnam par 'dren pa 'byung mdzad kyang / /rab tu dben par snang ba ste/ /'di ni 'jig rten mthun 'jug yin/ /de dag sna tshogs sku med kyang / /sems can mos pa ji bzhin du| |sku lus sprul pa mdzad pa ni/ /'di ni 'jig rten mthun 'jug yin/ /'jig rten kun gyi sgra skad kyis/ /de bzhin gshegs pa mi g.yo la/ /'on kyang sgra chung bsten mdzad pa/ /'di ni 'jig rten mthun 'jug yin/ /rdzogs pa'i sangs rgyas spros mi mnga'/ /chos rnams kun la gsal gyur kyang / /spros dang bcas par gsung mdzad pa/ /'di ni 'jig rten mthun 'jug yin/ /ming med pa yi chos kyi rnams/ /bsam du med pa'i ming dag gis/ /sems can rnams la yongs brjod pa| |'di ni 'jig rten mthun 'jug yin/ /chos rnams sems can med pa dang / /shin tu dngos po med mkhyen la/ /sems can mang po 'dul mdzad pa/ /'di ni 'jig rten mthun 'jug yin/ /gang gis las byas 'di nyid kyis/ /myong bar gyur pa ma yin yang / /gang gis byas pa ston mdzad pa/ /'di ni 'jig rten 482b mthun 'jug yin/ /chos rnams thams cad stong pa la/ /skyes bu mchog rnams mngon sum yang / /'chi 'pho skye ba ston mdzad pa/ /'di ni 'jig rten mthun 'jug yin| |'jig rten 'di nas srid gzhan du/ /su yang 'khor bar yong min la/ /'khor ba yang ni ston mdzad pa/ /'di ni 'jig rten mthun 'jug yin/ /phung po dang / dang khams rnams dang / /skye mched rang bzhin gcig bzhed la/ /khams gsum po dag ston mdzad pa/ /'di ni 'jig rten mthun 'jug yin/ /dus gsum dag tu sems can gyi/ /rang bzhin dmigs pa ma yin la/ /sems can khams kyang ston mdzad pa/ /'di ni 'jig rten mthun 'jug yin/ /kun la mi mkhyen rnam bral te/ / thams cad mkhyen cing thams cad gzigs/ /'on kyang sngon mtha' mi gsung ba/ /'di ni 'jig rten mthun 'jug yin/ /yang dag ji bzhin gzhan min par/ /chos rnams rtogs par thugs chud la/ /'on kyang gzhag pa ston mdzad pa/ /'di ni 'jig rten mthun 'jug yin/ /dam pa'i don du chos rnams kun/ /zab par rab tu mkhyen gyur la/ /sna tshogs su ni ston mdzad pa/ /'di ni 'jig rten mthun 'jug yin/ /sems can bsam pa ji bzhin du/ /'phags pa'i bden pa ston 483a @#/ /mdzad cing / /rdzun par yang ni ston mdzad pa/ /'di ni 'jig rten mthun 'jug yin/ /bdud ni bye ba phrag brgya yis/ /dge 'dun dbye bar mi nus kyang / /dge 'dun dbyen ni ston mdzad pa/ /'di ni 'jig rten mthun 'jug yin/ /chos gang yang ni mi bslabs la/ /ma bslabs pa yang gang yang med| |slob dang mi slob ston mdzad pa/ /'di ni 'jig rten mthun 'jug yin/ /'dus byas rnams ni ngo bo nyid/ /ngo bo nyid kyis grol bcings med/ /'on kyang rnam par grol ba ston/ /'di ni 'jig rten mthun 'jug yin/ /mya ngan 'das la 'gro med kyang / /dgra bcom de ni 'gro 'ong zhes/ /sems can rnams la de bstan pa/ /'di ni 'jig rten mthun 'jug yin/ /don dang don min mi gzigs la/ 'gog pa dang ni dam pa'i don/ /smra ba rnams kyis mchog gsung pa/ / 'di ni 'jig rten mthun 'jug yin/ /dngos po med pa gsal ba'i dngos/ /rnyog ma med pa rab ston kyang / /chos rnams chud za med ces pa/ /'di ni 'jig rten mthun 'jug yin/ /chos rnams thams cad brjod med par/ /de bzhin gshegs pas rab mkhyen kyang / /brjod pa dag ni ston mdzad pa/ /'di ni 'jig 483b rten mthun 'jug yin/ /sangs rgyas mkhyen pa chags mi mnga'/ /dus rnams kun tu mnyam gzhag kyang / /dbang po rnams ni sbed mdzad pa/ /'di ni 'jig rten mthun 'jug yin/ /de bzhin gshegs pa rdo rje'i sku/ /sangs rgyas cung zad mi bsnyun yang / /dge slong byang chub yan lag smros/ /'di ni 'jig rten mthun 'jug yin/ /sdig pa thams cad yongs zad de/ /bsod nams kun gyis mngon 'phags kyang / /las kyi rgyud ni ston mdzad pa/ /'di ni 'jig rten mthun 'jug yin| |skyob pa sangs rgyas dus gsum la/ /mthar thug 'gyur ba yod min yang / /mtshams gcod pa yang ston mdzad pa/ /'di ni 'jig rten mthun 'jug yin/ / de bzhin gshegs pa chos sku ste/ /gcig ci 'dra bar de bzhin kun/ /'on kyang tha dad ston mdzad pa/ /'di ni 'jig rten mthun 'jug yin/ /sangs rgyas rang sangs rgyas rnams dang / /nyan thos so so'i skye bo dang / /'khor ba dang ni mya ngan 'das/ /tshig gi lam gyis rab tu phye/ /sangs rgyas ye shes mtha' yas te/ / chos kyi dbyings las byung yin yang / /sangs rgyas zhing ni ston mdzad pa/ /'di ni 'jig rten mthun 'jug yin/ /rdzogs pa'i sangs rgyas bsam mi khyab/ /de bzhin 484a @#/ /gshegs pa bsam mi khyab/ /sems can 'dul ba'i don gyi phyir/ /'di ni 'jig rten mthun 'jug yin/ /zag med yod pa ma yin yang / /de bzhin gshegs pa nyan thos la/ /zag pa med pa nyid gsung ba/ /'di ni 'jig rten mthun 'jug yin/ /mkhyen pas de dag gnyis min yang| |dus gsum dag ni rnams gzigs shing / /gnyis kyi 'du shes ston mdzad pa/ /'di ni 'jig rten mthun 'jug yin/ /sangs rgyas chos nyid gang yin dang / /sangs rgyas rig par su 'dod pa/ /de ni chos dbyings zhugs shig pa/ /'di ni 'jig rten mthun 'jug yin/ /skye ba med pa bzod ston pa/ /rtag tu yang dag rab tu mkhyen/ /mkhyen nas rab tu ston mdzad pa/ /'di ni 'jig rten mthun 'jug yin/ /rtag tu chos kyi dbyings mtshungs te/ /'jug pa med cing 'byung med kyang / /'gro ba gnas pa ston mdzad pa/ /'di ni 'jig rten mthun 'jug yin/ /mi skye ba la gcig pa'am/ /mang po yod pa ma yin yang / /sna tshogs rim pa ston mdzad pa/ /'di ni 'jig rten mthun 'jug yin/ /de dag tha dad sku med kyang / /sangs rgyas zhing rnams dpag med de/ /sku lus dag ni 484b sprul mdzad pa/ /'di ni 'jig rten mthun 'jug yin/ /stong gsum bye ba brgya bgrangs pa/ /sangs rgyas zhing du brjod bya ba/ /der ni skye ba ston mdzad pa/ /'di ni 'jig rten mthun 'jug yin/ /de bzhin gshegs pas dus kun tu/ /chos ni gnas par rab mkhyen kyang / /chos kyi 'khor lo rab bskor ba/ /'di ni 'jig rten mthun 'jug yin/ /sangs rgyas 'od ni dpag med cing / /sku lus dpag tu med min yang / /dpag tu yod pa ston mdzad pa/ /'di ni 'jig rten mthun 'jug yin| |chos kyi dbyings la mchog med de/ /dus gsum dag tu stong nyid kyang / /mchog gis chos rnams ston mdzad pa/ /'di ni 'jig rten mthun 'jug yin/ /zhig pa med cing skye med la/ /chos kyi dbyings dang mnyam gyur kyang / /sreg pa'i bskal pa ston mdzad pa/ /'di ni 'jig rten mthun 'jug yin/ /chos kyi dbyings ni grub med de/ /de la ngo bo nyid med kyang / /'on kyang nges par 'byung ston pa/ /'di ni 'jig rten mthun 'jug yin/ /gzigs pa ci yang mi mnga' yang / /lhag mthong gis ni gzigs gyur cing / /lta ba thams cad ston mdzad pa/ /'di ni 'jig rten mthun 'jug yin/ /chos rnams kun la byed pa po/ /shin tu yod pa ma yin yang / /byas 485a @#/ /dang ma byas ston mdzad pa/ /'di ni 'jig rten mthun 'jug yin/ /mya ngan 'das dang nam mkha' ni/ /rgyal ba grangs su ma chud kyang / /khams kyi grangs rnams ston mdzad pa/ /'di ni 'jig rten mthun 'jug yin/ /grangs med stobs rnams brnyes gyur la/ /mthu las nyams pa mi mnga' yang / /zhabs 'bring pa dag tshol mdzad pa/ /'di ni 'jig rten mthun 'jug yin/ /nam yang byis pa'i blo ldan dang / /sangs rgyas 'dren pa mi mnga' yang / /byis pa de dag 'dul mdzad pa| |'di ni 'jig rten mthun 'jug yin/ /yon tan ldan pa thams cad kyi/ /pha rol de bzhin gshegs byon kyang / /de la nga ni gzhan zhes pa/ /'di ni 'jig rten mthun 'jug yin/ /mi skye ba ni rtag tu skyes/ /de dag rgyu las byung min yang / /ma rig rkyen gyis 'byung zhes pa/ /'di ni 'jig rten mthun 'jug yin/ /rgyal po rnyed dang bkur sti las/ /sgrib pa med pa nyid brnyes la/ /chog shes pa ni ston mdzad pa/ /'di ni 'jig rten mthun 'jug yin/ /gang na sems can 'dul yod par| |snang ba der ni 'dren pa rnams/ /de dag spyod pa ston mdzad pa/ /'di ni 'jig rten mthun 'jug yin/ /rig pa gsum gyis tshogs bsags pa/ /rig pa bskyed 485b par nges par ston/ /'di la mthong ba ci yang med/ /'di ni 'jig rten mthun 'jug yin/ /'jig rten sgron mas thams cad du/ /skye bo dpag tu med pa 'dul/ /gling bzhi dag kyang ston mdzad pa/ /'di ni 'jig rten mthun 'jug yin/ /'jig rten gsum po gang na yang / /chos gang phung po gnas pa med/ /'on kyang chos grub bka' stsal pa/ / 'di ni 'jig rten mthun 'jug yin/ /mtha' gsum gyi ni mthar skyes pa/ /de bzhin gshegs rnams ston mdzad cing / /sems can rnams la rab ston pa/ /'di ni 'jig rten mthun 'jug yin/ /chos rnams kun gyi rgyud mkhyen nas/ /'chi 'pho skye ba rnam spangs la/ /de dag thams cad ston mdzad pa/ /'di ni 'jig rten mthun 'jug yin/ /mi skye ba ni gang mthong ba/ /ma rig de ni ye shes bgegs/ /rig pa bskyed par ston mdzad pa/ /'di ni 'jig rten mthun 'jug yin/ /rdzogs pa'i sangs rgyas gcig yin yang / /sems can yongs su smin bya'i phyir/ /'byung ba dag ni bsam mi khyab/ /'di ni 'jig rten mthun 'jug yin/ /gang dag mdo sde 'di 'dra 'di| |phyi ma'i dus na thos 'gyur zhing / /the tshom med la shes 'gyur ba/ /de dag sngon gyi rgyal ba mthong / /'jig rten mgon gyis de gsungs nas/ /sras po 'jam pa'i 486a @#/ /dbyangs la sogs/ /rab tu dga' zhing yi rang te/ /ston pa'i bka' la mngon bar bstod/ /'phags pa 'jig rten gyi rjes su mthun par 'jug pa zhes bya ba theg pa chen po'i mdo rdzogs so// //rgya gar gyi mkhan po dzi na mi tra dang / dA na shI la dang / zhus chen gyi lo tsA ba ban+de ye shes sdes bsgyur cing zhus te| skad gsar bcad kyis kyang bcos nas gtan la phab pa// // |