rgya gar skad du/ AR+Ya shrI ya mahA de bI byA ka ra Na/ bod skad du/ 'phags pa lha mo chen mo dpal lung bstan pa/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bde ba can na byang chub sems dpa'i dge 'dun mang po 'di 390b lta ste/ byang chub sems dpa' sems dpa' chen po 'phags pa spyan ras gzigs dbang phyug dang / byang chub sems dpa' sems dpa' chen po mthu chen thob pa dang / byang chub sems dpa' sems dpa' chen po sgrib pa thams cad rnam par sel ba dang / byang chub sems dpa' sems dpa' chen po sa'i snying po dang / byang chub sems dpa' sems dpa' chen po kun tu bzang po dang / byang chub sems dpa' sems dpa' chen po nam mkha'i snying po dang / byang chub sems dpa' sems dpa' chen po lag na rdo rje dang / byang chub sems dpa' sems dpa' chen po 'jig pa thams cad sel ba dang / de bzhin du byang chub sems dpa' sems dpa' chen po dga' byed kyi bkra shis thams cad 'dzin pa dang / byang chub sems dpa' sems dpa' chen po bsod nams kyi mtshan thams cad 'dzin pa dang / byang chub sems dpa' sems dpa' chen po nyi zla dang / 'jig rten gsum 'dzin pa dang / byang chub sems dpa' sems dpa' chen po mu stegs kyi bkra shis thams cad 'dzin pa dang / byang chub sems dpa' sems dpa' chen po 'jam dpal gzhon nur gyur pa dang / de dag la sogs pa bskal pa bzang po'i byang chub sems dpa' sems dpa' 391a @#/ /chen po dang / thams cad dang thabs gcig tu bzhugs so/ /de nas byang chub sems dpa' sems dpa' chen po spyan ras gzigs dbang phyug bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /lha mo chen mo dpal yang bcom ldan 'das kyi thad du song ste phyin nas bcom ldan 'das kyi zhabs la mgo bos phyag btsal te lan gsum bskor ba byas nas bde ba can na gnas pa'i byang chub sems dpa' sems dpa' chen po de dag thams cad la'ang mgo bos phyag btsal te phyogs gcig tu 'dug go /de nas bcom ldan 'das bsod nams brgya stong du mas brgyan cing de bzhin gshegs pa bye ba snyed kyis yongs su bskor te/ brgya byin dang / tshangs pa dang / 'jig rten skyong ba thams cad kyis bstod cing bsngags pas lha mo chen mo dpal la gzigs nas/ tshangs pa chen po'i gsung gis byang chub sems dpa' sems dpa' chen po spyan ras gzigs dbang phyug la 'di skad ces bka' stsal to/ /spyan ras gzigs dbang phyug /rgyal po'am/ blon po'am/ dge slong ngam/ dge slong ma'am/ dge bsnyen nam/ dge bsnyen 391b ma'am/ bram ze'am/ rgyal rigs sam/ rje'u rigs sam/ dmangs rigs gang la la lha mo chen mo dpal gyi ming brgya rtsa brgyad dri ma med par grags pa zhes bya ba'i bstod pa 'chad na/ rgyal rigs kyi rgyal po de'i yul dang / sems can de dag gi 'jigs pa dang / yams kyi nad dang / gnod pa thams cad zhi bar 'gyur zhing chom rkun dang / g.yon can dang / mi dang / mi ma yin pa'i 'jigs pa thams cad 'byung bar mi 'gyur te/ nor dang / 'bru dang / mdzod dang / bang ba thams cad rnam par 'phel bar 'gyur ro/ /rgyal rigs kyi rgyal po de'i khyim du'ang dpal nges par gnas par 'gyur ro/ /de nas byang chub sems dpa' sems dpa' chen po de dag gis tshig 'di skad ces gsol to/ /bcom ldan 'das/ tshig 'di legs par bka' stsal pa/ legs so/ /legs so/ /gang dag lha mo chen mo dpal gyi ming rnams 'dzin pa dang / thos nas nyams su len pa gang lags pa de dag gi yon tan dang / phan yon ni de dag tu 'gyur lags so/ /de nas byang chub sems dpa' sems dpa' chen po 'phags pa spyan ras gzigs dbang phyug gis bcom ldan 'das la 'di skad ces gsol to/ /bcom ldan 'das/ lha mo chen mo dpal gyis dge ba'i rtsa ba gang du bskyed lags/ 392a @#/ /bcom ldan 'das kyis bka' stsal pa/ lha mo chen mo dpal gyis ni de bzhin gshegs pa gang+gA'i klung gi bye ma snyed la dge ba'i rtsa ba bskyed de| spyan ras gzigs dbang phyug /sngon byung ba 'das pa'i dus na 'jig rten gyi khams rin po che las byung ba zhes bya ba na/ de bzhin gshegs pa rin po che'i me tog yon tan gyi rgya mtsho bai DUR+Ya dang / gser gyi ri bo mdog mdzes gser 'od dpal zhes bya ba 'jig rten du byung ste/ de dang / de bzhin gshegs pa mang po gzhan dag la'ang lha mo chen mo dpal gyis dge ba'i rtsa ba bskyed do/ /de bzhin gshegs pa'i mtshan 'di dag kyang lha mo chen mo dpal de'i dge ba'i rtsa ba rnam par 'phel ba dang / 'grub par byed pa dang / rtag tu rjes su 'brang ba yin te/ de dag ni 'dir lha mo chen mo dpal gyis yang dag par brjod pa dang / sdig pa thams cad sel ba dang / nyes sdig thams cad med par byed pa dang / lus thams cad dri ma med par byed pa dang / nor dang / 'bru rnams 'du zhing 'phel bar byed pa dang / dbul ba gcod par byed pa dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po thams cad 'dul 392b zhing 'gugs par byed pa dang / yams kyi nad dang / gnod pa dang / 'thab pa dang / 'khrug pa dang / 'gyed pa dang / rtsod pa thams cad zhi bar byed pa dang / pha rol tu phyin pa drug rdzogs par byed pa'o/ /'di lta ste/ de bzhin gshegs pa dpal stug po la phyag 'tshal lo/ /de bzhin gshegs pa rin po che'i me tog yon tan gyi rgya mtsho bai DUR+Ya dang / gser gyi ri bo mdog mdzes gser 'od dpal la phyag 'tshal lo/ /de bzhin gshegs pa gang+gA'i mu stegs kyi sgo thams cad kyi bkra shis kyi dpal la phyag 'tshal lo/ /de bzhin gshegs pa tsan+dan gyi me tog gzi brjid skar ma'i 'od kyi dpal la phyag 'tshal lo/ /de bzhin gshegs pa kun tu snang ba g.yul las rnam par rgyal ba'i dpal la phyag 'tshal lo/ /de bzhin gshegs pa yon tan rgya mtsho snang ba'i dkyil 'khor gyi dpal la phyag 'tshal lo/ /de bzhin gshegs pa chos kyi cho 'phrul rgyal mtshan shugs kyi dpal la phyag 'tshal lo/ /de bzhin gshegs pa skar 'od zhi ba'i spos snang dpal la phyag 'tshal lo/ /de bzhin gshegs pa sems can gyi bsam pa zhi bar mdzad pa'i sku'i dpal la phyag 'tshal lo/ /de bzhin gshegs pa smon lam rgya mtsho snang ba'i dpal la phyag 'tshal lo/ /de bzhin gshegs pa shin tu yongs su brjod pa mtshan gsol 393a @#/ /dpal la phyag 'tshal lo/ /de bzhin gshegs pa phyir mi ldog pa'i 'khor lo rin po che'i gnas kyi dpal la phyag 'tshal lo/ /de bzhin gshegs pa nyi ma'i dkyil 'khor 'od 'phags dpal la phyag 'tshal lo/ /de bzhin gshegs pa brtson 'grus grangs med pa la rab tu zhugs pa'i dpal la phyag 'tshal lo/ /de bzhin gshegs pa dpag tu med pa'i gser mdog snang ba'i dpal la phyag 'tshal lo/ /de bzhin gshegs pa gsung gi yan lag thams cad kyi sgra dbyangs dpal la phyag 'tshal lo/ /de bzhin gshegs pa shes rab sgron ma grangs med pa'i 'od kyi me tog gi dpal la phyag 'tshal lo/ /de bzhin gshegs pa sred med kyi bu'i brtul zhugs kyi go cha ri rab kyi dpal la phyag 'tshal lo/ /de bzhin gshegs pa tshangs pa'i dpal la phyag 'tshal lo/ /de bzhin gshegs pa dbang phyug chen po'i dpal la phyag 'tshal lo/ /de bzhin gshegs pa nyi zla'i 'od dpal la phyag 'tshal lo/ /de bzhin gshegs pa zab mo'i chos kyi 'od kyi rgyal po'i dpal la phyag 'tshal lo/ /de bzhin gshegs pa nam mkha'i sgron ma'i 'od bzang dpal la phyag 'tshal lo/ /de bzhin gshegs pa nyi 'od tog gi dpal la phyag 'tshal lo/ /de bzhin gshegs pa spos kyi sgron 393b ma'i dpal la phyag 'tshal lo/ /de bzhin gshegs pa rgya mtsho'i snying po las byung ba'i dpal la phyag 'tshal lo/ /de bzhin gshegs pa sprul pa'i 'brug sgra snyan pa'i dpal la phyag 'tshal lo/ /de bzhin gshegs pa chos kyi snang ba thams cad bkod pa'i dpal la phyag 'tshal lo/ /de bzhin gshegs pa shing gi rgyal po ltar skyes pa'i dpal la phyag 'tshal lo/ /de bzhin gshegs pa rin chen 'od 'phro ri bo'i dpal la phyag 'tshal lo/ /de bzhin gshegs pa ye shes 'od 'phro rgya mtsho'i dpal la phyag 'tshal lo/ /de bzhin gshegs pa smon lam chen po'i shugs kyi dpal la phyag 'tshal lo/ /de bzhin gshegs pa sprin chen po'i dpal la phyag 'tshal lo/ /de bzhin gshegs pa dran pa'i tog gi rgyal po'i dpal la phyag 'tshal lo/ /de bzhin gshegs pa dbang po'i tog gi rgyal mtshan gyi rgyal po'i dpal la phyag 'tshal lo/ /de bzhin gshegs pa nor dang / 'bru thams cad sdud pa'i dpal la phyag 'tshal lo/ /de bzhin gshegs pa zhi ba 'dren pa'i dpal la phyag 'tshal lo/ /de bzhin gshegs pa phun sum tshogs pa 'gugs pa'i dpal la phyag 'tshal lo/ /de bzhin gshegs pa'i mtshan 'di dag rim gror byas te bcang bar bya'o/ /bklag par bya'o/ /de ltar byas na rigs kyi bu'am/ rigs kyi bu 394a @#/ /mo de la bsod nams shin tu mang du 'phel bar 'gyur ro/ /lha mo chen mo dpal yang de bzhin gshegs pa thams cad kyis kyang lung bstan to// lha mo chen mo dpal/ khyod ma 'ongs pa'i dus na 'jig rten gyi khams dpal rin po ches brgyan pa zhes bya bar de bzhin gshegs pa dgra bcom pa yang dag par rdzogs pa'i sangs rgyas dpal nor bu rin po che las 'byung ba zhes bya bar 'gyur te/ 'jig rten gyi khams de'ang lha'i rin po sna tshogs kyis brgyan par 'gyur ro/ / 'jig rten gyi khams der de bzhin gshegs pa de nyid snang bar mdzad par 'gyur la/ 'jig rten gyi khams de na gnas pa'i byang chub sems dpa' de dag kyang rang las 'od 'byung zhing tshe dpag tu med par 'gyur ro/ /nam mkha' las kyang sangs rgyas dang / chos dang / dge 'dun gyi sgra 'byung bar 'gyur ro/ /sangs rgyas kyi zhing der byang chub sems dpa' gang dag skye bar 'gyur ba de dag thams cad kyang pad+ma'i snying po dag las skye bar 'gyur ro zhes lung bstan to/ /de la ming brgya rtsa brgyad dri ma med par grags pa zhes bya ba'i bstod pa brgyad cu gnyis pa gang zhe na/ 'jigs pa med pa spyan ras gzigs dbang phyug /lha mo chen mo dpal gyi ming rnams 394b nyon cig /'di lta ste/ de bzhin gshegs pa thams cad kyis dbang bskur ba/ lha thams cad kyis dbang bskur ba/ de bzhin gshegs pa thams cad kyi yum/ lha thams cad kyi ma/ de bzhin gshegs pa thams cad kyi dpal/ byang chub sems dpa' thams cad kyi dpal/ 'phags pa nyan thos dang / rang sangs rgyas thams cad kyi dpal/ tshangs pa dang / khyab 'jug dang / dbang phyug chen po thams cad kyi dpal/ lha la sogs pa thams cad kyi dpal/ gnas thams cad na yod pa'i dpal/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po thams cad kyi dpal/ rig sngags 'chang dang / lag na rdo rje dang / rdo rje 'chang ba thams cad kyi dpal/ 'jig rten skyong ba bzhi dang lnga'i dpal/ gza' brgyad dang / rgyu skar nyi shu rtsa brgyad kyi dpal lo/ /oM nyi ma'i bu mo/ ma ma yum/ rig byed bzhi'i dpal/ bkra shis ma/ sems can rnams kyi ma/ rgyal ma/ rnam rgyal ma/ gang+gA ma/ mu stegs kyi sgo thams cad kyi bkra shis ma/ dri ma med pa/ dri ma med par byed pa'i dpal/ sdig pa thams cad 'phrog ma/ rgyags pa med pa/ zla ba'i dpal/ nyi ma'i dpal/ zla thams cad kyi dpal/ seng+ge la zhon ma/ pad+ma'i mchog 'bum gyis 395a @#/ /bkab ma/ pad+ma pad+ma la gnas pa/ pad+ma 'dzin pa/ pad+ma las byung ma/ pad+ma dang ldan pa/ 'od zer 'bar ba du mas 'khor ba/ nor sbyin ma/ dkar mo/ dkar mo chen mo/ lag dkar ma/ bkra shis thams cad 'dzin pa/ bsod nams kyi phung po thams cad kyi lus can/ shes nyen can gyi bu mo/ lag pa 'bum dang ldan ma/ mig 'bum dang ldan ma/ mgo 'bum dang ldan ma/ nor bu rnam pa sna tshogs kyis mdzes par byas pa'i cod pan thogs pa/ gzugs bzang ba/ gzugs sna tshogs can/ rab grags ma/ shin tu grags ma/ zhi pa ma/ sprin ma/ sgra gtsang ma/ zla ba ltar mdzes ma/ nyi ma ltar mdzes ma/ dge ma/ dge byed ma/ sems can thams cad la mngon du phyogs ma'i dpal/ 'phags ma/ me tog la gnas ma/ me tog gi dbang phyug ma/ ri bo'i rgyal po ri rab thams cad kyi dpal/ chu klung dang / mtsho thams cad kyi dpal/ chu thams cad kyi rgya mtsho'i dpal/ mu stegs thams cad du mngon du phyogs pa'i dpal/ sman dang / rtsi tog dang / shing dang / nor dang / 'bru thams cad kyi dpal/ gser sbyin ma/ zas dang / gos sbyin ma/ 'od gsal ma/ snang ba ma/ lus gtsang ma/ de bzhin gshegs pa thams cad kyi dbang sgyur 395b ma| lha'i tshogs thams cad la mngon du phyogs pa'i dpal/ gshin rje dang / chu lha dang / ku be ra dang / brgya byin la sogs pa'i dpal/ sbyin pa ma/ longs spyod ma/ gzi brjid ldan ma| phun sum tshogs ma/ 'byor pa ma/ rnam par skye ba ma/ mthong ma/ chos kyi dpal/ khyab 'jug la brten pa/ ku mu de la gnas ma/ bzod ldan ma/ mthu rtsal gyi gnas/ dag byed dang / bkra shis thams cad kyi lag pa dang ldan pa/ bkra mi shis pa thams cad med par byed pa/ bsod nams thams cad sdud pa'i dpal/ sa thams cad dang / rgyal po thams cad kyi dpal/ rig sngags 'chang gi rgyal po thams cad kyi dpal/ 'byung po thams cad dang / gnod sbyin dang / srin po dang / yi dwags dang / sha za dang / grul bum dang / lto 'phye chen po thams cad kyi dpal/ lha'i gnas dang / lha thams cad kyi dpal/ bzlas brjod dang / bzlas brjod du bya ba dang / sbyin sreg dang / sbyin bsreg tu bya ba dang / bkra shis thams cad kyi dpal/ 'od la dga' ba/ skal pa dang ldan par 'dod pa/ drang srong thams cad dag par byed pa'i dpal/ bud med kyi gnas thams cad kyi gtso mo dang / dpal gyi mchog mi'am ci mo thams cad dang / lha ma yin mo thams cad kyi dpal gyi mchog /kha na ma tho ba med pa'i gnas 396a @#/ /na 'dug ma/ yid du 'ong ma/ sim par byed ma/ ku be ra'i snying du sdug ma/ chos kyi rgyal po'i dpal/ oM sdug bsngal thams cad las rnam par gzigs shig /sgrol cig /thar bar mdzod cig /bsod nams kyi tshogs thams cad bdag la mngon du gyur par mdzod cig swAhA/ oM gaM ga sarba ti r+tha mu khi swAhA/ oM sarba bi tri swAhA/ sarba maM ga la d+hA ra Nai swAhA/ tsa tu rbed sarba na k+Sha tra gra hA pa Na ga Na a d+hi mU r+t+yai swAhA/ brah+mA ya swAhA/ biSh+Na be swA hA/ ru dra ya swAhA/ bi shwa mu khA ya swAhA/ oM kli ni kli ni sarba kAR+YA sA d+ha ni/ sa ni sa ni/ A ba ha de bi shrI/ bai shrA ba NA ya swAhA/ su bar+Na d+ha na d+han+ya/ A kaR+Sha N+yai swAhA/ sarba pUr+Na A kaR+Sha N+yai swAhA/ shrI ha ma ba tI A kaR+Sh+ya N+yai swA hA/ sarba pA pa nA sha n+ye swA hA/ sarba a kA la mr-i t+yu pra sha ma n+yai swA hA/ sarba ta thA ga ta a b+hi She ka tA yai swA hA/ sarba de ba tA b+hi mu kha shrI ye swA hA/ A yurba la bar+d+ha ka rA yai swAhA/ sarba bi dwa maM ga la ha stA ye swAhA/ saM haM ba hi nI yai swAhA/ pad+ma sam+ba d+hA yai swAhA/ sarba kr-i t+ya ka khord bi nA sha n+yai swAhA/ 'jigs pa med pa spyan ras gzigs dbang phyug /gang la la lha mo chen mo dpal gyi ming nyes sdig thams cad med par byed pa/ sdig pa thams cad 'joms par byed pa/ bsod nams thams 396b cad sdud par byed pa/ bkra mi shis pa thams cad med par byed pa/ dpal dang / bde ba dang / skal ba bzang po thams cad sdud par byed pa 'di dag dang / de bzhin gshegs pa'i mtshan 'di dag 'chang ba dang / klog par byed pa des nang par langs te gtsang mar byas la/ sangs rgyas thams cad la me tog dang / bdug pa gsol nas lha mo chen mo dpal la'ang tsan+dan gyi bdug pa phul te/ bklags na des dpal thams cad thob par 'gyur zhing bde ba dang / yid bde ba thams cad thob par 'gyur te/ lha thams cad kyang bsrung ba dang / bskyab pa dang / sbed pa byed par 'gyur la de'i don thams cad kyang 'grub par 'gyur ro/ /bcom ldan 'das kyis de skad ces bka' stsal nas/ byang chub sems dpa' 'jigs pa med pa spyan ras gzigs dbang phyug dang / lha mo chen mo dpal de dang / 'khor de dag thams cad dang / lha dang / mi dang / lha ma yin dang / dri zar bcas pa'i 'jig rten gyi rangs te/ bcom ldan 'das kyis gsungs pa la mngon par bstod do/ /'phags pa lha mo chen mo dpal lung bstan pa rdzogs so|| |