rgya gar skad du/ AR+Ya bo d+hi pak+Sha ni rde sha nA ma ma hA yA na sU tra/ bod skad du/ 'phags pa byang chub kyi phyogs bstan pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong lnga brgya tsam gyi dge slong gi dag 378a @#/ /'dun chen po dang / byams pa dang / 'jam dpal la sogs pa byang chub sems dpa' sems dpa' chen po rnams dang thabs gcig tu bzhugs te/ de nas bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal/ phyin ci log bzhi po dag gis sems phyin ci log tu gyur pa'i sems can rnams 'phags pa'i bden pa bzhi po dag yang dag pa ji lta ba bzhin du ma mthong ba'i phyir 'di ltar yang dag pa ma yin pa'i 'khor ba 'di las mi 'da'o/ /de skad ces bka' stsal pa dang| bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das/ ji ltar dmigs na sems can rnams 'khor ba las mi 'da' ba bshad du gsol/ bcom ldan 'das kyis bka' stsal pa/ 'jam dpal/ sems can rnams bdag dang / bdag gir khas len pa'i phyir 'khor ba las mi 'da'o/ /de ci'i phyir zhe na/ 'jam dpal/ su bdag dang / gzhan du yang dag par rjes su mthong ba de/ las mngon par 'du byed par 'gyur ba'i phyir ro/ /'jam dpal/ byis pa so so'i skye bo thos pa dang mi ldan pa ni thams cad shin tu yongs su mya ngan las 'das par rab tu mi shes te/ bdag dang / gzhan du dmigs so/ /dmigs nas lus dang / ngag dang / 378b yid kyi las rnam pa gsum mngon par 'du byed do/ /de med pa la sgro btags nas bdag 'dod chags so/ /bdag zhe sdang ngo / /bdag gti mug go zhes rnam par rtog go /gal te de de bzhin gshegs pa'i bstan pa la rab tu byung na de 'di snyam du sems te/ bdag ni tshul khrims dang ldan pa/ bdag ni tshangs par spyod pa ste/ bdag 'khor ba las 'da' bar bya'o/ /bdag yongs su mya ngan las 'das pa rjes su thob par bya'o/ /bdag sdug bsngal rnams las thar bar bya'o snyam mo/ /de chos 'di dag ni dge ba dag go / chos 'di dag ni mi dge ba dag go snyam du rtog go /de chos 'di dag ni spang bar bya ba dag go /chos 'di dag ni mngon du bya ba dag go /sdug bsngal ni yongs su shes par bya ba'o// kun 'byung ba ni spang bar bya ba'o/ /'gog pa ni mngon sum du bya ba'o/ /lam ni bsgom par bya'o snyam du rtog go /de 'du byed rnams ni mi rtag pa/ 'du byed rnams ni sdug bsngal pa| 'du byed rnams ni kun tu 'bar ba ste/ 'du byed rnams las bdag 'bros par bya'o snyam du rtog go /nges de ltar brtags pas mtshan ma sngon du 'gro ba'i yid 'byung ba dang ldan pa/ mtshan ma sngon du 'gro ba'i 'du shes yid la byed pa dag skye'o/ /de 'di snyam du sems te/ gang chos 'di dag yongs su shes pa de ni sdug bsngal yongs su shes 379a @#/ /pa'o snyam mo/ /de 'di snyam du sems te/ bdag gis kun 'byung ba spang bar bya'o snyam nas de chos thams cad kyis nyon te ma rtogs so/ /skrag go |dngang ngo / dngang bar 'gyur ro/ /de 'di snyam du sems te/ chos 'di dag mngon du byed pa gang yin pa dang / chos de dag gis nyen pa gang yin pa de ni/ kun 'byung ba spong ba'o snyam mo/ /de 'di snyam du sems te/ bdag gis 'gog pa mngon sum du bya'o snyam nas des chos de dag brtags te 'gog pa yin pa snyam du shes so/ /de 'di snyam du sems te/ 'di dag ni 'gog pa mngon sum du byed pa'o snyam mo/ /de 'di snyam du sems te/ bdag gis lam bsgom par bya'o snyam nas de gcig pu dben par song ste chos de dag yid la byed pas zhi gnas 'thob bo/ /de yid 'byung ba yid la byed pa de dang / zhi gnas 'thob pa des chos thams cad dang sems 'gras so/ /'bral lo| |ldog go /log nas mngon par mi dga' ba'i sems bskyed do/ /de 'di snyam du sems te/ bdag ni sdug bsngal thams cad las thar te/ bdag gis yang gung du bya ba ci zhig yod kyi/ bdag ni dgra bcom pa'o snyam du bdag nyid kyis shes pa las de 'chi ba'i dus kyi tshe skye ba yang dag par rjes su mthong nas de sangs rgyas kyi byang chub la 379b dogs pa dang / yid gnyis dang / the tshom za'o/ /de the tshom du lhung ba'i sems kyis 'chi ba'i dus byas nas sems can dmyal ba chen po rnams su skye'o/ /de ci'i phyir zhe na/ de chos thams cad ma skyes pa la rnam par brtags pa'i phyir ro/ /de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das/ 'phags pa'i bden pa bzhi po dag ji ltar blta bar bgyi/ bka' stsal pa/ 'jam dpal/ sus 'du byed thams cad skye ba med par mthong ba des sdug bsngal yongs su shes so/ /sus chos thams cad 'byung ba med par mthong ba des kun 'byung ba spangs so/ /sus chos thams cad shin tu yongs su mya ngan las 'das par mthong ba des 'gog pa mngon sum du byas so/ /sus chos thams cad dngos po med par mthong ba des lam bsgoms so/ /'jam dpal/ sus 'phags pa'i bden pa bzhi po dag 'di lta bur mthong ba de chos 'di dag ni dge ba dag go /chos 'di dag ni mi dge ba dag go /chos 'di dag ni spang bar bya ba dag go /chos 'di dag ni mngon sum du bya ba dag go |sdug bsngal ni yongs su shes par bya ba'o/ /kun 'byung ba ni spang bar bya'o/ /'gog pa ni mngon sum du bya ba'o/ /lam ni bsgom par bya'o snyam du mi rtog/ /rnam 380a @#/ /par mi rtog go /de ci'i phyir zhe na/ gang la byis pa so so'i skye bo dag chags pa dang / zhe sdang dang / gti mug pa'i chos de ma skyes par des mthong zhing yang dag pa ma yin pa kun brtags pa dang / rnam par bsgrubs par mthong ba'i phyir te/ de chos gang yang mi len to/ /mi 'dor ro/ /de khams gsum pa la sems mi chags te/ khams gsum pa thams cad ma skyes pa dang / sgyu ma lta bu dang / rmi lam lta bu dang / brag ca lta bu dang / mi g.yor lta bur mthong ngo / / de chos thams cad kyi rang bzhin de ltar mthong bas sems can thams cad la rjes su chags pa dang / khong khro ba dang bral bar 'gyur ro/ /de ci'i phyir zhe na/ des gang la rjes su chags pa dang / khong khro bar 'gyur ba'i chos de mi dmigs te/ des nam mkha' dang mtshungs pa'i sems kyis sangs rgyas kyang yang dag par rjes su mi mthong / chos dang / dge 'dun yang yang dag par rjes su mi mthong ngo / /des chos thams cad stong par yang dag par rjes su mi mthong ste/ chos gang la'ang the tshom mi za'o// the tshom mi za bas nye bar len par mi 'gyur ro/ /nye bar mi len pas len pa med par yongs su mya ngan las 'da'o/ /'jam dpal/ dge slong rab 'byor gyis 380b chos thams cad rnam pa de lta bur shes pas de bzhin gshegs pa'i zhabs la phyag 'tshal du mi 'ong ngo / /de ci'i phyir zhe na/ bdag nyid kyang mi dmigs na de bzhin gshegs pa dmigs par 'gyur ba lta ci smos te/ de ni gnas ma yin pa'i phyir ro/ /de nas bcom ldan 'das la 'jam dpal gzhon nur gyur pas 'di skad ces gsol te/ bcom ldan 'das/ dran pa nye bar gzhag pa bzhi po dag ji ltar blta bar bgyi/ bcom ldan 'das kyis bka' stsal pa/ 'jam dpal/ ma 'ongs pa'i dus na dge slong dag mi sdug pa'i rnam par lus la lus kyi rjes su lta ba'i dran pa nye bar gzhag pa ston par gyur/ skye ba dang / 'gog par tshor ba rnams la tshor ba'i rjes su lta ba'i dran pa nye bar gzhag pa ston par 'gyur/ sems la skye ba'i chos dang / 'gag pa'i chos su blta'o snyam du de ltar sems la sems kyi rjes su lta ba'i dran pa nye bar gzhag pa ston par 'gyur/ gang ril por 'du shes par mi 'gyur ba de ltar chos rnams la chos kyi rjes su lta ba'i dran pa nye bar gzhag pa ston par 'gyur ba de dag 'byung ngo / /de skad ces bka' stsal pa dang / bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das/ dran pa nye bar gzhag pa bzhi po dag 381a @#/ /ji ltar blta bar bgyi/ bcom ldan 'das kyis bka' stsal pa/ 'jam dpal/ de bzhin gshegs pa'i ldem po ngag shes par dka' yi thongs shig /'jam dpal gyis gsol pa/ bcom ldan 'das/ dran pa nye bar gzhag pa sgom pa bshad du gsol/ /bcom ldan 'das kyis bka' stsal pa/ 'jam dpal/ lus nam mkha' dang 'dra bar mthong ba 'di ni lus la lus kyi rjes su blta ba'i dran pa nye bar gzhag pa'o/ /'jam dpal/ sus tshor ba nang na'ang ma yin/ phyi rol na'ang ma yin zhing gnyis ka med pa la mi dmigs pa 'di ni tshor ba rnams la tshor ba'i rjes su lta ba'i dran pa nye bar gzhag pa'o/ /'jam dpal/ sus sems la ming tsam du zad par shes pa 'di ni sems la sems kyi rjes su lta ba'i dran pa nye bar gzhag pa'o/ /'jam dpal/ sus dge ba dang / mi dge ba dang / lung du ma bstan pa'i chos mi dmigs pa 'di ni chos rnams la chos kyi rjes su lta ba'i dran pa nye bar gzhag pa ste/ 'jam dpal/ dran pa nye bar gzhag pa bzhi po dag ni de ltar blta bar bya'o// 'jam dpal gyis gsol pa/ bcom ldan 'das/ 'phags pa'i lam yan lag brgyad pa ji ltar blta bar bgyi/ bcom ldan 'das kyis bka' stsal pa/ 'jam 381b dpal/ sus chos thams cad mi mnyam pa med la gnyis su med cing / gnyis su dbyer med par mthong ba 'di ni yang dag pa'i lta ba'o/ /'jam dpal/ sus mi mthong ba'i tshul gyis chos thams cad mi rtog /rnam par mi rtog /kun tu mi rtog par mthong ba 'di ni yang dag pa'i rtog pa'o/ /'jam dpal/ sus brjod pa mnyam pa nyid shin tu bsgoms pa'i phyir chos thams cad brjod du med par mthong ba 'di ni yang dag pa'i ngag go /'jam dpal/ sus byed pa po mi dmigs pa'i phyir chos thams cad bya ba med pa dang / byed pa med pa mthong ba 'di ni yang dag pa'i las kyi mtha'o/ /'jam dpal/ sus 'tsho ba mnyam pa nyid du gnas pa'i phyir/ chos thams cad 'phel bar yang mi byed/ 'grib par yang mi byed pa 'di ni yang dag pa'i 'tsho ba'o/ /'jam dpal/ sus rtsol ba med par brtul ba'i tshul gyis chos thams cad kun nas mi slong ba 'di ni yang dag pa'i rtsol ba'o/ /'jam dpal/ dran pa'i las dben pa'i phyir sus chos thams cad dran par mi byed pa 'di ni yang dag pa'i dran pa'o/ /'jam dpal/ sus dmigs pa mi dmigs pa'i phyir chos thams cad rang bzhin gyis mnyam par bzhag cing ma 'khrugs par mthong ba 'di ni yang dag pa'i ting nge 'dzin te/ 'jam dpal/ 'phags 382a @#/ /pa'i lam yan lag brgyad pa ni de ltar blta bar bya'o/ /'jam dpal gyis gsol pa/ bcom ldan 'das/ dbang po lnga po dag ji ltar blta bar bgyi/ bcom ldan 'das kyis bka' stsal pa/ 'jam dpal/ sus rang bzhin gyis ma skyes pa'i phyir chos thams cad ma skyes par mthong bar yid ches pa 'di ni dad pa'i dbang po'o/ /'jam dpal/ sus nye ba'i 'du shes dang / ring ba'i 'du shes dang bral ba'i phyir chos thams cad la sems mi gtong ba 'di ni brtson 'grus kyi dbang po'o/ /'jam dpal/ sus dmigs pa dben pa'i phyir chos thams cad yid la mi byed cing dran pa mi 'dogs pa 'di ni dran pa'i dbang po'o/ /'jam dpal// sus gnyis su mi dmigs pa'i phyir chos thams cad gnyis su med par mthong ba 'di ni ting nge 'dzin gyi dbang po'o/ /'jam dpal/ sus skye ba dang bral ba dang / mi shes pa dang bral ba'i phyir chos thams cad rang bzhin gyis stong par mthong ba 'di ni shes rab kyi dbang po ste/ 'jam dpal/ dbang po lnga po dag ni de ltar blta bar bya'o| |'jam dpal gyis gsol pa/ bcom ldan 'das/ byang chub kyi yan lag bdun po dag ji ltar blta bar bgyi/ bcom ldan 'das kyis bka' stsal pa/ 'jam dpal/ 382b sus dran pa med cing yid la byed pa med pa'i phyir chos thams cad dngos po med par mthong ba 'di ni dran pa yang dag byang chub kyi yan lag go /'jam dpal/ sus dge ba dang / mi dge ba dang / lung du ma bstan pa yongs su mi 'grub pa'i phyir chos thams cad dben zhing mi dmigs pa 'di ni chos rnam par 'byed pa yang dag byang chub kyi yan lag go /'jam dpal/ sus khams kyi 'du shes shin tu bshig pa'i phyir khams gsum pa mi len mi 'dor ba 'di ni brtson 'grus yang dag byang chub kyi yan lag go /'jam dpal/ sus dga' ba dang| mi dga' ba rnam par bshig pa'i phyir 'du byed thams cad la dga' ba mi skyed pa 'di ni dga' ba yang dag byang chub kyi yan lag go /'jam dpal/ sus dmigs pa'i dngos po mi dmigs pa'i phyir chos thams cad la sems shin tu sbyangs par gyur pa 'di ni shin tu sbyangs pa yang dag byang chub kyi yan lag go /'jam dpal/ sus chos thams cad la rnam par gzhig pa rjes su rtogs pa'i phyir sems mi dmigs pa 'di ni ting nge 'dzin yang dag byang chub kyi yan lag go /'jam dpal/ sus chos thams cad la gnas par mi byed/ rten par mi byed/ chags par mi byed/ 'ching bar mi byed cing de chos thams cad yang dag par rjes su mi mthong ba'i btang snyoms can du gyur te/ dga' ba thob pa 'di ni btang snyoms yang dag byang chub 383a @#/ /kyi yan lag ste/ 'jam dpal/ byang chub kyi yan lag bdun po dag ni de ltar blta bar bya'o/ /'jam dpal/ gang la las 'phags pa'i bden pa bzhi po dag dang / dran pa nye bar gzhag pa bzhi po dag dang / 'phags pa'i lam yan lag brgyad pa dang / dbang po lnga po dag dang / byang chub kyi yan lag bdun po dag de lta bur mthong ba 'di ni brgal ba'o zhes nga smra ste/ pha rol tu son pa'o/ /thang la gnas pa'o/ /bde ba thob pa'o/ /mi 'jigs pa thob pa'o/ /khur bor ba'o| |rdul dang bral ba'o/ /ci'ang med pa'o/ /nyon mongs pa med pa'o/ /len pa med pa'o/ /dgra bcom pa'o/ /dge sbyong ngo / /bram ze'o/ /bkrus pa'o/ /rig pa'o| |ring du song ba'o/ /gtsang ma'o/ /sangs rgyas kyi sras so/ /shAkya'i sras so/ /tsher ma dkrugs pa'o/ /'obs las brgal ba'o/ /shin tu brtan pa'o/ /rims nad med pa'o/ /dge slong ngo / /'phags pa'o/ /rgyal mtshan rdzogs pa'o zhes smra'o/ /'jam dpal/ bzod pa de lta bu dang ldan pa ni lha dang bcas pa'i 'jig rten gyi sbyin gnas yin te/ rnyed pa dang / bkur sti'i 'os kyang yin no/ /'jam dpal/ de lta bas na dge slong yul 'khor gyi bsod snyoms don yod par yongs su bza' bar 383b 'dod pa dang / bdud 'dul bar 'dod pa dang / 'khor ba las yang dag par 'da' bar 'dod pa dang / mya ngan las 'das pa thob par 'dod pa dang / sdug bsngal rnams las grol bar 'dod pas chos 'di dag la brtson par bya'o/ /chos kyi rnam grangs 'di bstan pa na lha'i bu sum khri nyis stong gis chos mngon par rtogs par gyur nas de dag gis bcom ldan 'das la man+dA ra ba'i me tog gis gtor te tshig 'di skad ces smras so/ /bcom ldan 'das/ chos bstan pa 'di su dag gi rna lam du grags par 'gyur ba de dag ni/ de bzhin gshegs pa'i bstan pa la legs par rab tu byung ba legs par 'gyur na/ gang dag thos nas mos pa dang / dad pa dang / de bzhin nyid du 'dzin par 'gyur pa dag lta smos kyang ci 'tshal/ bcom ldan 'das/ chos bstan pa 'di su dag gi rna lam du grags par 'gyur ba de dag ni/ mngon pa'i nga rgyal ma mchis par 'gyur ro/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / nyan thos chen po de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa byang chub kyi phyogs bstan pa zhes bya ba theg pa chen po'i mdo rdzogs so// //rgya gar gyi 384a @#/ /mkhan po dzi na mi tra dang / dz+nyA na sid+d+hi dang / zhus chen gyi lo tsA ba ban+de ye shes sdes bsgyur cing zhus te skad gsar bcad kyis kyang bcos nas gtan la phab pa/ sh+lo ka dgu bcu rtsa gnyis// |