//rgya gar skad du/ AR+Ya k+She mang ka ra pa ri pr-its+tshA nA ma ma hA yA na sU tra/ bod skad du| 'phags pa bde byed kyis zhus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das shAkya'i yul ser skya'i gnas na shAkya rnams kyi shing n+ya gro d+ha'i kun dga' ra ba nas dge slong lnga brgya'i dge slong gi dge 'dun chen po dang thabs 265a @#/ /gcig tu bzhugs so/ /de'i tshe shAkya'i bu bde byed ces bya ba ser skya'i gnas kyi grong khyer chen po nas byung ste/ shing n+ya gro d+ha'i kun ra ba ga la ba dang| bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag btsal nas phyogs gcig tu 'dug go /de nas shAkya'i bu bde byed bcom ldan 'das ga la ba der logs su thal mo sbyar ba btud de/ bcom ldan 'das la 'di skad ces gsol to/ /bcom ldan 'das/ byang chub sems dpa' chos du dang ldan na bla na med pa yang dag par rdzogs pa'i byang chub las phyir mi ldog par 'gyur/ tshegs chung dus kyang skyes bu chen po'i mtshan sum cu rtsa gnyis mngon par sgrub par bgyid/ sangs rgyas kyi zhing nas sangs rgyas kyi zhing du mchi bar bgyid/ rmongs pa ma mchis par 'gum pa'i dus bgyid par 'gyur/ skyes nas kyang mngon par shes pa lnga dang ldan par 'gyur/ mi khom pa thams cad rnam par spong zhing khom pa 'byor pa thob par 'gyur/ gzungs kyang thob par 'gyur/ spobs pa thogs pa ma mchis pa dang yang ldan par 'gyur/ phyir mi ldog pa'i chos dang ldan zhing stong pa nyid la lhag par mos par yang 'gyur/ rtag tu rab tu 'byung ba la mngon par dga' bar 'gyur/ khyim 265b na gnas kyang rtag tu tshangs par spyod pa la mngon par dga' bar 'gyur lags/ de skad ces gsol pa dang / bcom ldan 'das kyis shAkya'i bu bde byed la 'di skad ces bka' stsal to/ /rigs kyi bu/ khyod de bzhin gshegs pa la don 'di yongs su zhu bar sems pa ni rigs kyi bu khyod skye bo mang po la phan pa dang / skye bo mang po la bde ba dang / 'jig rten la snying brtse ba dang / skye bo phal po che'i don dang / lha dang / mi rnams la phan pa dang / bde ba'i phyir zhugs pa yin te/ legs so/ /legs so/ /de'i phyir/ rigs kyi bu/ khyod legs par rab tu nyon la yid la zungs shig dang ngas khyod la bshad do/ /byang chub sems dpa' chos bzhi dang ldan na ji skad smos pa'i yon tan de dag rjes su 'thob ste/ bzhi gang zhe na/ rigs kyi bu/ 'di la byang chub sems dpa' bzod pa'i stobs dang ldan zhing bzod pa la gnas pa de pha rol gshe'ang slar mi gshe ba dang / brdegs kyang slar mi rdeg pa dang / mtshang brus kyang slar mtshang mi 'bru ba dang / khros kyang slar mi khro ba ste/ rigs kyi bu/ chos bzhi po de dag dang ldan pa'i byang chub sems dpa' ni bla na med pa yang dag par rdzogs pa'i byang chub las phyir mi ldog cing ji skad smras pa'i yon tan phun sum tshogs pa'ang rjes su 'thob bar 'gyur ro/ /bcom ldan 'das kyis de skad ces bka' stsal te / 266a @#/ /bde bar gshegs pas de skad gsungs nas de bzhin du ston pas/ gzhan yang / 'di skad ces bka' stsal to/ /kun tu spyos kyang gshe bar mi byed la/ /gnod byas gzhan la de ni gnod mi byed/ /de ni mi lus spang ba byas nas kyang / /byang chub sems dpa' yon tan de dag 'thob/ /sdig pa'i tshig rnams rtag tu srung byed cing / sdig pa'i sems kyi dbang du mi 'gro la/ /sdig las log ste 'bras bu de thob nas/ ye shes mchog nyid myur du thob par 'gyur/ /skye bo gang dag 'tshog rung dga' byed cing / /khro gtum gnod par sems pa'i sems ldan rnams/ /sangs rgyas ye shes yongs su spongs nas su/ /mi mkhas de dag sdug bsngal mi bzad ldan/ /de lta bas na gzhan la mi 'tshog cing / /rgyu dang mi rgyu rnams la dbyug pa spang / /sems can kun la phan zhing snying brtser ldan/ /des 'dir ye shes dam pa myur du 'thob/ /skye bo rmongs pa khros pas zil non pa/ /'jig rten mkhas pa'i bstan las de ring ste/ /de ni log lta rnams kyis ngan 'dzin yin/ /de lta bas na mkhas mis dkrug mi bya/ /byang chub sems de pa'i gang 'dir mi khro zhing / /bden pa rjes srung gzhan la mi gnod pa/ /spyad pa dkon pa 'di dag rdzogs byas nas/ / 266b sum cu rtsa gnyis mtshan mdzes phun sum tshogs/ /mi mkhas rtag tu phung zhing sdang sems ldan/ /pha ma la yang 'di na gus mi byed/ /kun nas nyon mongs rtsa ba rab gnas ba| |skyes bu tha ma'i nyes pa 'di rnams yin/ /de bas rtag tu bzod pa kho na bsten/ /dge slong chos smra pa la bsten par bya/ /dge ba'i bshes gnyen yongs su mi gtong ste/ de la byang chub mchog ni dka' ba med/ /rigs kyi bu/ gzhan yang / byang chub sems dpa' chos bzhi dang ldan na bla na med pa yang dag par rdzogs pa'i byang chub las phyir mi ldog cing ji skad smos pa'i yon tan phun sum tshogs pa'ang rjes su thob bo/ /bzhi gang zhe na/ rigs kyi bu/ 'di la chos don du gnyer ba dang / chos 'dod pa dang / chos kyi kun dga' la dga' zhing mos pa dang / chos 'dzin pa dang / chos ston pa yin/ bud med yongs su spong zhing bud med la sten par mi byed pa yin/ sbyin pa'i bdag po dang / kun bged pa'i ngang tshul can dang / kun bged pa la dga' ba dang / rmugs pa dang / gnyid yongs su spong ba yin/ stong pa nyid la mos pa dang / stong pa nyid la gnas pa yin te| rigs kyi bu/ chos bzhi po de dag dang ldan pa'i byang chub sems dpa' ni bla na med pa yang dag par rdzogs pa'i byang chub las phyir mi ldog cing ji skad smos pa'i 267a @#/ /yon tan de dag kyang 'thob par 'gyur ro/ /bcom ldan 'das kyis de skad ces bka' stsal te/ bde bar gshegs pas de skad gsungs nas de bzhin du ston pas/ gzhan yang / 'di skad ces bka' stsal to/ /sems can gang dag chos ni 'dod pa dang / /chos kyi don du brtson 'grus bskyed pa dkon/ /gang dag chos kyi 'khor lo skor byed pa/ /de dag ye shes dam pa thob par 'gyur/ /gzhan las thos nas yang dag 'dzin byed cing / /pha rol don du gnyer la chos ston la/ /shes ldan de dag 'khor du zhum pa med/ /bla med byang chub mchog la reg par 'gyur/ /log par ltung rgyu bud med rnam par spangs/ /rgyal sras rtag tu tshangs par spyod par 'gyur/ /tshangs par spyod la brtan par de gnas shing / /'khor lo bla med dam pa skor bar byed/ /bud med rnams la mtshan ma 'ga' yod de/ /'di ltar sdug bsngal nyam thag skem par 'gyur/ /de dag bsten na zhi ba med pa ste/ /de bas yongs su spongs la byang chub spyod/ /de nas shAkya'i bu bde byed bstan pa 'di thos nas tshim zhing mgu la yi rangs shing rab tu dga' ste/ dga' ba dang / yid bde ba skyes nas rang gi lus las rgyan bkrol te/ bcom ldan 'das ga la ba de logs su gtor ro/ /de nas 267b bcom ldan 'das kyi mthus rgyan de dag bcom ldan 'das kyis dbu'i drang thad kyi steng gi bar snang la rin po che'i khang pa brtsegs pa zhig tu 'dug par gyur nas/ rin po che'i khang pa brtsegs pa de nas mi rgyan thams cad kyis brgyan pa lnga brgya byung nas bcom ldan 'das la rgyan rnams 'thor zhing bla na med pa yang dag par rdzogs pa'i byang chub tu'ang sems bskyed nas tshig 'di skad ces/ bcom ldan 'das/ bdag cag gi dge ba'i rtsa ba 'di sems can thams cad dang thun mong bgyis te/ bla na med pa yang dag par rdzogs pa'i byang chub tu yongs su bsngo bar bgyi'o zhes 'dzer to/ /de nas shAkya'i bu bde byed kyis kyang sprul pa'i mi de dag mthong ngo / /mthong nas kyang lus kyi spu zing zhes byed par gyur te bcom ldan 'das la 'di skad ces gsol to/ /bcom ldan 'das/ mi 'di rnams gang nas mchis/ shar phyogs sam/ lho phyogs sam/ nub phyogs sam/ byang phyogs sam 'og gam/ steng gi phyogs sam/ 'on te phyogs mtshams gang nas mchis/ bcom ldan 'das kyis bka' stsal pa/ rigs kyi bu/ mi 'di rnams shar phyogs nas ma 'ongs/ lho dang / nub dang / byang phyogs dang / 'og dang / steng gi phyogs dang / phyogs mtshams gang nas ma 'ongs te/ 'di rnams ni lha ma yin/ klu ma yin/ gnod sbyin 268a @#/ /yin| dri za ma yin/ lha ma yin ma yin/ nam mkha' lding ma yin/ mi'am ci ma yin/ lto 'phye chen po ma yin/ mi ma yin/ mi ma yin pa ma yin na/ /sa'i khams la mi brten/ chu'i khams la mi brten/ mo'i khams la mi brten/ rlung gi khams la mi brten/ nam mkha'i khams la mi brten to/ /'di dag la ni gzugs med/ tshor ba med/ 'du shes dang / 'du byed rnams dang / sems med/ yid med/ rnam par shes pa med/ las med/ las kyi rnam par smin pa med| 'jig rten 'di med/ 'jig rten pha rol med/ 'ong ba med/ 'gro ba med/ gnas pa med/ 'chi 'pho med/ skye ba med do/ /'on kyang / rigs kyi bu/ 'di dag ni sprul pa zhes bya ba yin no/ /'di dag ni gzhi med pa zhes bya yin no/ /'di dag ni srog med pa zhes bya ba yin no/ /'di dag ni skyes bu med pa zhes bya ba yin no/ /'di dag ni gang zag med pa zhes bya ba yin no/ /'di dag ni mtshan nyid med pa zhes bya ba yin no/ /'di dag ni dben pa zhes bya ba yin no/ /'di dag ni stong pa zhes bya ba yin no/ /'di dag ni ngo bo nyid med pa zhes bya ba yin no/ /bde byed/ rig kyi bu dang / rigs kyi bu mo gang dag de ltar chos thams cad sprul pa lta bur 'dod pa dang / bzod pa 268b dang / khong du chud pa dang / mngon par dad pa dang / yid ches pa dang / gzhan gyi dring mi 'jog par 'gyur ba'i rigs kyi bu dang / rigs kyi bu mo de dag ni/ bde byed/ nga'i bu zhes bya'o/ /nga'i rjes su skyes pa zhes bya'o/ /snang ba 'dzin pa zhes bya'o/ /'od byed pa zhes bya'o/ /mun pa bsal ba zhes bya'o/ /nyon mongs pa spangs pa zhes bya'o/ / ston pa zhes bya'o/ /bsod nams kyi zhing zhes bya'o/ /yon tan gyi gnas zhes bya'o/ /dge sbyong zhes bya'o/ /bram ze zhes bya'o/ /tshor ba pa zhes bya'o/ /glang po zhes bya'o/ / mi skye ba'i chos la bzod pa dang ldan pa zhes bya'o/ /byang chub sems dpa' zhes bya'o/ /sems dpa' chen po zhes bya'o/ /phyir mi ldog pa'i chos dang ldan pa zhes bya'o| |byang chub sems dpa' chos dang ldan pa zhes bya'o/ /lung bstan pa zhes bya'o/ /rigs kyi bu/ gang su'ang rung ba dag de ltar chos thams cad sprul pa lta bur mi 'dod/ mi bzod/ mi 'jug/ mi mos/ mi dad/ thos nas kyang dngang zhing skrag la dngang bar 'gyur ba dang / slar zlog pa dang / phyir gshe ba'i rigs kyi bu de dag ni dge sbyong ma yin pa zhes bya'o/ /bram ze ma yin pa zhes bya'o/ /mu stegs can zhes bya'o/ /dmigs pa can zhes bya'o/ /dkrugs ma pa zhes bya'o/ /sdig pa'i grogs po zhes bya'o// 269a @#/ /yongs su spang par bya ba zhes bya'o/ /byang chub sems dpa' ngan g.yo can zhes bya'o/ /byang chub sems dpa' 'chal ba zhes bya'o/ /byang chub sems dpa' ltar bcos pa zhes bya'o/ /byang chub sems dpa' sred lta bu zhes bya'o/ /byang chub sems sun 'byin pa zhes bya'o/ /byang chub sems dpa' gtum pa zhes bya'o// de nas bdud sdig can sdug bsngal zhing yid mi bde nas bcom ldan 'das ga la ba der song ste phyin nas bcom ldan 'das la 'di skad ces gsol to/ /bcom ldan 'das/ chos kyi rnam grangs 'di bshad pas sems can ji snyed cig gi don mdzad/ bcom ldan 'das kyis bka' stsal pa/ sdig can/ chos kyi rnam grangs 'di bshad pas 'dod pa na spyod pa dang / gzugs na spyod pa'i lha'i bu brgyad khri bzhi stong gis mi skye ba'i chos la bzod pa thob bo/ /dge slong lnga brgya len pa med par zag pa rnams las sems rnam par grol lo/ /dge slong ma bdun cu rtsa lngas kyang mi skye ba'i chos la bzod pa thob bo/ /byang chub sems dpa' bde byed dang / dge bsnyen lnga brgya gzhan dag kyang mi skye ba'i chos la bzod pa thob bo/ /dge bsnyen ma nyi shu rtsa lnga'ang chos rnams la chos kyi mig rdul med cing dri ma dang bral ba rnam 269b par dag ste/ de dag thams cad kyang mi skye ba'i chos la bzod pa dang ldan par gyur to/ /de dag thams cad kyang 'di nas shi 'phos nas/ de bzhin gshegs pa dgra bcom pa yang dag par rdzogs pa'i sangs rgyas 'od dpag med kyi sangs rgyas kyi zhing 'jig rten gyi khams bde ba can du skye bar 'gyur ro/ /der skyes nas thams cad lhan cig mthun par sangs rgyas bcom ldan 'das dpag tu med pa rnams kyis sangs rgyas kyi byang chub 'dzin par 'gyur/ brjod par 'gyur/ ston par 'gyur/ yang dag par rab tu ston par 'gyur ro/ /de dag phyis gang+gA'i klung gi bye ma snyed kyi bskal pa 'das nas bskal pa bzang po zhes bya ba 'di nyid la stong gsum gyi stong chen po'i 'jig rten gyi khams 'dir bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /de nas bdud sdig can sdug bsngal zhing yid mi bde la 'gyod cing mchims brnangs la du bzhin du gyur te/ de nyid nas phyir 'gro zhing tshig 'di skad du/ bcom ldan 'das/ chos kyi rnam grangs 'di slan chad mi bshad du gsol zhes smras so/ /bcom ldan 'das kyi bka' stsal pa/ sdig can khyod/ de skad ma smra zhig /de ci'i phyir zhe na/ sangs rgyas bcom ldan 'das thams cad kyi chos kyi 'khor 270a @#/ /lo bskor ba 'di ni thogs pa med pa yin no/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo/ de'i phyir khyod kyis chos kyi rnam grangs 'di byang chub sems dpa' nges par 'byung ba zhes bya bar zungs shig /bde byed kyis zhus pa zhes bya bar yang zungs shig /kun dga' bo/ ngas chos kyi rnam grangs 'di khyod la gtad de| gzung ba dang / bklag pa dang / bshad pa dang / gzhan dag la rgya cher yang dag par rab tu bstan par bya ba'i phyir yongs su gtad do/ /de ci'i phyir zhe na/ kun dga' bo/ rigs kyi bu'am/ rigs kyi bu mo theg pa chen po la yang dag par zhugs pa gang gis shes rab kyi pha rol tu phyin pa ma gtogs par pha rol tu phyin pa lnga po dag la bskal pa bcur spyad pa bas/ rigs kyi bu'am/ rigs kyi bu mo gang zhig chos kyi rnam grangs 'di 'dzin pa dang / 'chang ba dang / klog pa dang / kun chub par byed pa dang / gzhan dag la'ang rgya cher yang dag par rab tu ston pa dang / tha na glegs bam du byas te 'chang ba de ni de bsod nams ches mang du skyed pa'i phyir ro/ /de nas bcom ldan 270b 'das kyis de'i tshe tshigs su bcad pa 'di dag bka' stsal to/ /gang zhig tshul 'di ma thos par/ /bskal pa bcur ni sbyin byin yang / /bla na med pa'i sbyin pa zhes/ /de ni bsngags par mi 'gyur ro/ /gang zhig bskal pa bcu rnams su/ /'jig rten pa yi tshul khrims srung / /de ni dmigs la gnas pas na/ /tshul khrims de ni dag mi 'gyur// gang zhig sangs rgyas kyis bsngags pa'i/ /mdo sde zab mo 'di 'dzin pa/ /tshul khrims de ni bla na med/ /sangs rgyas kun gyis bsngags pa yin/ /gang 'dir bskal pa bcu rnams su/ /bzod pa smra ba'i ming gyur la/ /gshe bar byed pa'i srog chags rnams/ /kun la bzod par byed gyur kyang / /'di ni tshul 'di ma thos na/ /bzod pa de ni bsngags ma yin/ /gang zhig mdo sde 'di 'dzin cing / /gzhan dag la yang rab ston na/ /bzod pa de ni bla na med/ /sangs rgyas kun gyis bsngags pa yin/ /gang zhig tshul 'di mthos par/ /bskal pa dag ni bcu rnams su/ /'chag pa dag las mi 'da' yang / /brtson 'grus de ni bsngags ma yin/ /gang zhig sangs rgyas kyis bshad pa/ / mdo sde zab mo 'di 'dzin na/ /brtson 'grus de ni bla na med/ /sangs rgyas kun gyis bsngags pa yi/ /gang zhig bskal pa bcu rnams su/ /bsam gtan ldan pa'i mir gyur 271a @#/ /gyur la/ /bsam gtan ro la de gnas na/ /bsam gtan pa zhes de mi brjod/ /nang dang phyi rol rnams la yang / /rdul tsam chos kyang mi rtogs na| |bsam gtan de ni bla na med/ /de ni bsam gtan pa zhes bya/ /de ltar sbyin dang tshul khrims dang / /bzod pa dang ni brtson 'grus dang / /bsam gtan shes rab mnyam nyid kyis/ /de ni byang chub myur 'thob 'gyur/ /bcom ldan 'das kyis de skad ces bka' stsal nas/ tshe dang ldan pa kun dga' bo dang / shAkya'i bu bde byed dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa bde byed kyis zhus pa zhes bya ba theg pa chen po'i mdo rdzogs so// //rgya gar gyi mkhan po pradz+nyA warma dang / zhus chen gyi lo tsA ba ban+de ye shes sde la sogs pas bsgyur cing zhus te gtan la phab pa// |