@##/ /rgya gar skad du/ AR+Ya a bi kalpa pra be sha nA ma d+hA ra NI| bod skad du/ 'phags pa rnam par mi rtog par 'jug pa zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis 2a @#/ /thos pa dus gcig na/ bcom ldan 'das rgyal po'i khab na khams gsum pa thams cad las khyad par du 'phags pa rnam par mi rtog pa'i chos kyi dbyings kyi snying po'i khang bzang na dge slong gi dge 'dun chen po dang / byang chub sems dpa'i tshogs chen po dang thabs cig tu bzhugs te/ 'di lta ste/ byang chub sems dpa' sems dpa' chen po rnam par mi rtog dang / 2b rnam par mi rtog snang ba dang / rnam par mi rtog zla ba dang / rnam par rtog med dpa' bo dang / rnam par rtog med chos ston mkhas pa dang / rnam par rtog med ngo bo nyid dang / rnam par rtog med blo gros dang / rnam par rtog med nga ro dang / rnam par rtog med khyab byed dang / rnam par rtog med dbang phyug dang / rnam par rtog med dbang phyug chen po dang / rnam par rtog med byams pa chen po'i dbang phyug dang / byang chub sems dpa' sems dpa' chen po 'phags pa spyan ras gzigs dbang phyug dang thabs cig go /de nas bcom ldan 'das 'khor brgya stong du 3a @#/ /mas yongs su bskor te mdun gyis bltas nas 'di lta ste/ theg pa chen po la chos rnams kyi rnam par mi rtog pa nyid las brtsams te chos ston to/ /de nas bcom ldan 'das kyis thams cad dang ldan pa'i byang chub sems dpa'i 'khor la kun tu gzigs nas byang chub sems dpa' rnams la bka' stsal pa/ rigs kyi bu dag / khyod kyis rnam par mi rtog par 'jug pa zhes bya ba'i gzungs zungs shig /de bzung na/ byang chub sems dpa' myur ba myur bar sangs rgyas kyi chos rnams sgrub cing rtag tu khyad par du'ang 'gro'o/ /de nas 3b 'khor de nyid kyi byang chub sems dpa' sems dpa' chen po rnam par mi rtog snang ba zhes bya ba stan las langs te bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das/ byang chub sems dpa' sems dpa' chen pos gang thos nas 'dzin pa dang / klog pa dang / tshul bzhin yid la bgyid pa dang / gzhan dag la'ang rgya cher ston par 'gyur bar rnam par mi rtog par 'jug pa'i gzungs bshad du gsol/ de skad ces gsol pa dang / bcom ldan 'das kyis bka' stsal pa/ rigs kyi bu dag /de'i phyir legs par nyon la rab tu yid la zungs shig dang / ngas rnam par mi rtog par 'jug pa'i gzungs bshad do/ /bcom ldan 'das/ legs so/ /zhes gsol to/ /byang chub sems dpa' sems dpa' chen po de dag bcom ldan 'das kyi ltar nyan pa dang / bcom ldan 'das kyis de dag la 'di skad ces bka' stsal to/ /rigs kyi 4a @#/ /bu de dag la byang chub sems dpa' sems dpa' chen po rnam par mi rtog pa'i dang du bya ba'i chos thos te/ rnam par mi rtog pa la bsam pa bzhag nas rnam par mi rtog pa'i mtshan ma thams cad yongs su spong ste/ de thog ma nyid du 'di lta ste/ gzung ba'am 'dzin pa'ang rung rang bzhin la rnam par rtog pa'i mtshan ma thams cad yongs su spong ngo / /de la gang zag pa dang bcas pa'i dngos po'i mtshan ma de ni/ rang bzhin la rnam par rtog pa'i mtshan ma'o/ /zag pa dang bcas pa'i dngos po ni/ nye bar len pa'i phung po lnga po rnams te/ 'di lta ste/ gzugs nye bar len pa'i phung po dang / tshor ba nye bar len pa'i phung po dang / 'du shes nye bar len pa'i phung po dang / 'du byed nye bar len pa'i phung po dang / rnam par shes pa nye bar len pa'i phung po'o/ /ji ltar rang bzhin la rnam par rtog pa'i mtshan ma de dag yongs su spong zhe na/ snang bar 'gyur ba'i tshul gyis mngon du gyur pa dag yid la mi byed pas yongs su spong ngo / /de rang bzhin la rnam par rtog pa'i 4b mtshan ma de dag rim gyis yongs su spong ba na/ de ma yin pa gzhan gnyen po la dpyod pa rnam par rtog pa'i mtshan ma rnams snang bar 'gyur ba'i tshul gyis kun tu 'byung zhing mngon du 'gyur te/ 'di lta ste/ sbyin pa la dpyod pa rnam par rtog pa'i mtshan ma dang / tshul khrims la dpyod pa rnam par rtog pa'i mtshan ma dang / bzod pa la dpyod pa rnam par rtog pa'i mtshan ma dang / brtson 'grus la dpyod pa rnam par rtog pa'i mtshan ma dang / bsam gtan la dpyod pa rnam par rtog pa'i mtshan ma dang / shes rab la dpyod pa rnam rtog pa'i mtshan ma ste/ 'di lta ste/ ngo bo nyid la dpyod pa'am/ yon tan la dpyod pa'am/ snying po la dpyod pa'ang rung / des de dag kyang yid la mi byed pas yongs su spong ngo / /des de dag yongs su spong ba na gzhan de kho na la dpyod pa'i rnam par rtog pa'i mtshan ma rnams snang bar 'gyur ba'i tshul gyis kun tu 'byung zhing mngon du 'gyur te/ 'di lta ste/ stong pa nyid la dpyod pa rnam par rtog pa'i mtshan ma dang / de bzhin nyid la dpyod pa rnam par rtog pa'i mtshan ma dang / yang dag pa'i mtha' la dpyod pa rnam par rtog pa'i mtshan ma dang / mtshan ma med pa dang / don dam pa dang / chos kyi dbyings 5a @#/ /la dpyod pa rnam par rtog pa'i mtshan ma ste/ 'di lta ste/ rang gi mtshan nyid la dpyod pa'am/ yon tan la dpyod pa'am/ snying po la dpyod pa'ang rung / des de kho na la dpyod pa rnam par rtog pa'i mtshan ma de dag kyang yid la mi byed pas yongs su spong ngo / /des de dag yongs su spong ba na gzhan thob pa la dpyod pa rnam par rtog pa'i mtshan ma rnams snang bar 'gyur ba'i tshul gyis kun tu 'byung zhing mngon du 'gyur te/ 'di lta ste/ sa dang po thob pa la dpyod pa rnam par rtog pa'i mtshan ma nas sa bcu pa'i bar du thob pa la dpyod pa rnam par rtog pa'i mtshan ma dang / mi skye ba'i chos la bzod pa thob pa la dpyod pa rnam par rtog pa'i mtshan ma dang / lung bstan pa thob pa la dpyod pa rnam par rtog pa'i mtshan ma dang / sangs rgyas kyi zhing yongs su dag pa thob pa la dpyod pa rnam par rtog pa'i mtshan ma dang / sems can yongs su smin par byed pa thob pa la dpyod pa rnam par rtog pa'i mtshan ma dang / dban bskur ba thob pa la dpyod pa rnam par rtog pa'i mtshan ma nas rnam pa thams cad mkhyen pa nyid thob pa'i bar la dpyod pa rnam par rtog pa'i mtshan ma ste/ 'di lta ste/ rang gi mtshan nyid 5b la dpyod pa'am/ yon tan la dpyod pa'am/ snying po la dpyod pa'ang rung / des thob pa la dpyod pa rnam par rtog pa'i mtshan ma de dag kyang yid la mi byed pas yongs su spong ngo / /de ltar byang chub sems dpa' sems dpa' chen po rnam par rtog pa'i mtshan ma'i rnam pa thams cad yid la mi byed pas yongs su spong ba na/ de rnam par mi rtog pa'i dbyings la shin tu brtsen pa yin te/ re zhig rnam par mi rtog pa'i dbyings la ni/ ma reg mod kyi/ rnam par mi rtog pa'i dbyings la reg par 'gyur ba'i tshul bzhin gyi ting nge 'dzin ni/ yod do/ /de yang dag par sbyor ba de dang bsten pas rjes su 'gro /bsgoms pas rjes su 'gro /mang du byas pas rjes su 'gro /yang dag par yid la bya bas rjes su 'gro ba na/ mngon par 'du bya ba med cing lhun gyis grub pa rnam par mi rtog pa'i dbyings la reg ste rim gyis yongs su spong ngo / /ci'i phyir rnam par mi rtog pa'i dbyings la rnam par mi rtog pa zhes bya zhe na/ dpyad pa'i rnam par brtag pa thams cad las shin tu 'das pa dang / bstan pa dang / dper rnam par brtag pa thams cad las shin tu 'das pa dang / dbang por rnam par brtag pa thams cad las shin tu 'das pa dang / yul du rnam par brtag pa thams 6a @#/ /cad las shin tu 'das pa dang / rnam par rig par rnam par brtag pa thams cad las shin tu 'das pa dang / nyon mongs pa thams cad dang shes bya'i sgrib pa thams cad kyi gnas med pa'i phyir te/ de'i phyir rnam par mi rtog pa'i dbyings la rnam par mi rtog pa zhes bya'o/ /rnam par mi rtog pa de'ang gang zhe na/ rnam par mi rtog pa ni/ gzugs med pa/ bstan du med pa/ rten med pa/ snang ba med pa/ rnam par rig pa ma yin pa/ gnas med pa'o/ / byang chub sems dpa' sems dpa' chen po rnam par mi rtog pa'i dbyings la rab tu gnas pas ni/ shes bya dang khyad par med pa rnam par mi rtog pa'i ye shes kyi chos thams cad nam mkha'i dkyil dang mtshungs par mthong ngo / /rnam par mi rtog pa'i rjes las thob pa'i shes pas ni/ chos thams cad sgyu ma dang / smig rgyu dang / rmi lam dang / mig yor dang / brag ca dang / gzugs brnyan dang / chu zla dang / sprul pa dang mtshungs par mthong ngo / /bde ba chen po la gnas pa shin tu rgyas pa'ang thob bo/ /sems phun sum tshogs pa chen po shin tu rgyas pa'ang thob bo/ /shes rab dang ye shes che zhing shin tu rgyas pa'ang thob bo/ / 6b bshad pa chen po la dbang ba shin tu rgyas pa'ang thob bo/ /dus thams cad du sems can thams cad kyi don gyi rnam pa thams cad kyang byed nus par 'gyur te/ sangs rgyas kyi mdzad pa lhun gyis grub pa'ang rgyun mi gcod do/ /rigs kyi bu dag /'di lta ste/ dper na/ brag gcig tu mkhregs shing sra ba'i 'og na yid bzhin gyi nor bu rin po che chen po sna tshogs 'od gsal ba 'di lta ste/ dngul rin po che dang / gser rin po che dang / rdo'i snying po rin po che sna tshogs kyi rin po che tha dad pas yongs su gang ba'i gter chen po zhig yod la/ de nas gter chen po 'dod pa'i mi la la zhig 'ongs pa de la gter chen po mngon par shes pa'i mis 'di skad du/ kye skyes bu/ brag gcig tu mkhregs shing sra ba de'i 'og na rin po che 'od gsal bas yongs su gang ba'i rin po che'i gter chen po yod de/ de'i 'og na yid bzhin gyi nor bu rin po che'i gter yod kyi/ khyod kyis thog ma kho nar rdo'i rang bzhin thams cad rkos shig /de brkos pa dang dngul du snang ba'i rdo khyod la snang bar 'gyur ro/ /de la khyod kyis gter chen por 'du shes mi bya'i/ de yongs su shes par byos te rkos shig /de brkos pa dang gser du snang ba'i rdo snang bar 'gyur te/ de la'ang khyod kyis gter chen 7a @#/ /por 'du shes mi bya'i/ de'ang yongs su shes par byos te rkos shig /de brkos pa dang rin po che sna tshogs su snang ba'i rdo snang bar 'gyur te| de la'ang khyod kyis gter chen por 'du shes mi bya'i/ de'ang yongs su shes par byos te rkos shig /kye skyes bu/ khyod kyis brtson par byas na/ brko pa'i mngon par 'du bya ba med cing 'bad mi dgos par yid bzhin gyi nor bu rin po che'i gter chen po mthong bar 'gyur ro/ /yid bzhin gyi nor bu rin po che'i gter chen po de rnyed na/ khyod phyug cing nor che la longs spyod che bar 'gyur te/ bdag dang gzhan gyi don la mthu yod par 'gyur ro/ /zhes smras pa ltar rigs kyi bu dag /ji tsam du don 'di shes par bya ba'i phyir 'di dper byas pa ste/ brag gcig tu mkhregs shing sra ba zhes bya ba de ni/ 'du byed kyi rnam pa kun nas nyon mongs pa dang / gnyis la so sor nye bar gnas pa'i tshig bla dwags so/ /'og na yid bzhin gyi nor bu rin po che'i gter chen po zhes bya ba de ni/ rnam par mi rtog pa'i dbyings kyi tshig bla dwags so| |yid bzhin gyi nor bu rin po che'i gter chen po 'dod pa'i mi zhes bya ba de ni/ byang chub sems dpa' sems dpa' chen po'i tshig bla dwags so/ /gter chen 7b po mngon par shes pa'i mi zhes bya ba de ni/ de bzhin gshegs pa dgra bcom pa yang dag par rdzogs pa'i sangs rgyas kyi tshig bla dwags so/ /brag ces bya ba de ni/ rang bzhin la rnam par rtog pa'i mtshan ma rnams kyi tshig bla dwags so/ /rkos shig ces bya ba de ni/ yid la mi byed ces bya ba'i tshig bla dwags so/ /dngul du snang ba'i rdo zhes bya ba de ni/ gnyen po la rnam par rtog pa'i mtshan ma rnams kyi tshig bla dwags so/ /gser du snang ba'i rdo zhes bya ba de ni/ stong pa nyid la sogs pa la rnam par rtog pa'i mtshan ma rnams kyi tshig bla dwags so/ /rin po che sna tshogs su snang ba'i rdo zhes bya ba de ni/ thob pa la rnam par rtog pa'i mtshan ma rnams kyi tshig bla dwags so/ /yid bzhin gyi nor bu rin po che'i gter chen po rnyed ces bya ba de ni/ rnam par mi rtog pa'i dbyings la reg pa'i tshig bla dwags so/ /rigs kyi bu dag /de ltar dpe nye bar bkod pa 'dis rnam par mi rtog pa'i dbyings su 'jug pa khong du chud par bya'o/ /rigs kyi bu dag /'di ji ltar na'ang byang chub sems dpa' sems dpa' chen po rnam par rtog pa'i mtshan ma ji skad bstan pa de dag la nye bar rtog cing rnam par mi rtog pa'i dbyings su 'jug ce na/ rigs kyi bu dag /'di la byang chub sems dpa' sems dpa' 8a @#/ /chen po de ltar rnam par mi rtog pa'i dbyings la rab tu gnas pa ni/ gzugs kyi rang bzhin la rnam par rtog pa'i mtshan ma mngon du gyur na| 'di ltar nye bar rtog ste/ gang bdag gi gzugs zhes spyod na/ rnam par rtog pa la spyod pa'o/ /gzhan dag gi gzugs zhes spyod na/ rnam par rtog pa la spyod pa'o| |gzugs 'di yod do zhes spyod na/ rnam par rtog pa la spyod pa'o/ /gzugs skye'o/ /'gag go /kun nas nyon mongs pa'o/ /rnam par byang ba'o zhes spyod na/ rnam par rtog pa la spyod pa'o/ /gzugs med ces spyod na/ rnam par rtog pa la spyod pa'o/ /gzugs ni/ ngo bo nyid kyis kyang med/ rgyur yang med/ 'bras bur yang med/ las su'ang med/ ldan par yang med/ 'jug par yang med ces spyod na/ rnam par rtog pa la spyod pa'o/ /gzugs ni/ rnam par rig pa tsam zhes spyod na/ rnam par rtog pa la spyod pa'o/ /ji ltar gzugs med pa de bzhin du gzugs su snang ba'i rnam par rig pa'ang med do zhes spyod na/ rnam par rtog pa la spong pa'o snyam mo/ /rigs kyi bu dag /'di ltar byang chub sems dpa' sems dpa' chen po gzugs kyang mi dmigs/ gzugs su snang ba'i rnam par rig 8b pa'ang mi dmigs mod kyi/ rnam par rig pa thams cad kyi thams cad du chud gzon pa ni/ ma yin no/ rnam par rig pa ma gtogs par chos gang yang mi dmigs la| rnam par rig pa de'ang dngos po med par yang yang dag par rjes su mi mthong / rnam par rig pa ma gtogs par dngos po med par yang yang dag par rjes su mi mthong / gzugs su snang ba'i rnam par rig pa med pa de dang / rnam par rig pa de gcig par yang yang dag par rjes su mi mthong / tha dad par yang yang dag par rjes su mi mthong / rnam par rig pa dngos po med pa de la dngos por yang yang dag par rjes su mi mthong / dngos po med par yang yang dag par rjes su mi mthong ste/ rigs kyi bu dag /rnam par rtog pa thams cad kyis gang rnam par ma brtags pa de rnam par mi rtog pa'i dbyings so zhes kyang yang dag par rjes su mi mthong / rigs kyi bu dag /'di ni/ rnam par mi rtog pa'i dbyings su 'jug pa'i tshul yin te/ de ltar na/ byang chub sems dpa' sems dpa' chen po rnam par mi rtog pa'i dbyings la rab tu gnas pa yin no/ /de bzhin du tshor ba dang / 'du shes dang / 'du byed rnams dang / rnam par shes pa dang / de bzhin du sbyin pa'i pha rol tu phyin pa dang / tshul 9a @#/ /khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa dang / de bzhin du stong pa nyid la sogs pa nas rnam pa thams cad mkhyen pa nyid kyi bar du sbyar ro/ /rigs kyi bu dag /'di la byang chub sems dpa' sems dpa' chen po rnam pa thams cad mkhyen pa nyid la spyod pa'i rnam par rtog pa mngon du gyur na/ 'di ltar nye bar rtog ste/ gang bdag gi rnam pa thams cad mkhyen pa nyid ces spyod na/ de rnam par rtog pa la spyod pa'o/ /gzhan dag gi rnam pa thams cad mkhyen pa nyid ces spyod na/ rnam par rtog pa la spyod pa'o/ /rnam pa thams cad mkhyen pa nyid ni/ 'di'o zhes spyod na/ rnam par rtog pa la spyod pa'o/ /rnam pa thams cad mkhyen pa nyid thob ces spyod na| rnam par rtog pa la spyod pa'o/ /rnam pa thams cad mkhyen pa nyid ni/ nyon mongs pa dang / shes bya'i sgrib pa thams cad sbyong ba'i zhes spyod na/ rnam par rtog pa la spyod pa'o/ /rnam pa thams cad mkhyen pa nyid shin tu rnam par byang ba'o zhes spyod na/ rnam par rtog pa la spyod pa'o/ /rnam pa thams cad mkhyen pa nyid med do zhes spyod 9b na| rnam par rtog pa la spyod pa'o/ /rnam pa thams cad mkhyen pa nyid la ngo bo nyid kyis kyang med/ rgyur yang med/ 'bras bur yang med/ las su'ang med/ ldan par yang med/ 'jug par yang med ces spyod na/ rnam par rtog pa la spyod pa'o/ /rnam pa thams cad mkhyen pa nyid rnam par rig pa tsam mo zhes spyod na/ rnam par rtog pa la spyod pa'o/ /ji ltar na/ rnam pa thams cad mkhyen pa nyid med pa de bzhin du rnam pa thams cad mkhyen pa nyid du snang ba'i rnam par rig pa'ang med do zhes spyod na/ rnam par rtog pa la spyod pa'o snyam mo/ /rigs kyi bu dag /'di ltar byang chub sems dpa' sems dpa' chen po ji ltar rnam pa thams cad mkhyen pa nyid mi dmigs pa de bzhin du der snang ba'i rnam par rig pa'ang mi dmigs mod kyi/ rnam par rig pa thams cad kyi thams cad du chud gzon pa ma yin no/ /rnam par rig pa ma gtogs par chos gang yang mi dmigs la/ rnam par rig pa de'ang dngos po med par yang dag par rjes su mi mthong / rnam par rig pa ma gtogs par dngos po med par yang yang dag par rjes su mi mthong / rnam pa thams cad mkhyen pa nyid du snang ba'i rnam par rig pa med pa de dang / rnam par rig pa de gcig par yang yang dag par rjes su mi mthong ngo / / 10a @#/ /tha dad par yang yang dag par rjes su mi mthong / rnam par rig pa med pa de la dngos por yang yang dag par rjes su mi mthong ngo / / dngos po med par yang yang dag par rjes su mi mthong ste/ rigs kyi bu dag /rnam pa thams cad mkhyen pa'i rnam par rtog pa thams cad kyis gang rnam par ma brtags pa de rnam par mi rtog pa'i chos kyi dbyings so zhes kyang yang dag par rjes su mi mthong ngo / /de ltar 'di ni/ rnam par mi rtog pa'i dbyings la 'jug pa'i tshul yin te/ rigs kyi bu dag /de ltar na/ byang chub sems dpa' sems dpa' chen po rnam par mi rtog pa'i dbyings la rab tu gnas pa yin no/ /rigs kyi bu dag /chos kyi rnam grangs 'di 'dzin pa dang / yi ger 'bri ba dang / 'chang ba dang / klog pa'i bsod nams ni/ rab tu mang gi /lus gang+gA'i klung gi bye ma snyed yongs su btang ba ni/ de lta ma yin no/ /'jig rten gyi khams gang+gA'i klung gi bye ma snyed yongs su gang ba'i sbyin pa byin pa de ni/ de lta ma yin no/ /de bzhin gshegs pa'i gzugs brnyan rin po che las byas te 'jig rten gyi khams gang+gA'i klung gi bye ma snyed yongs su btang ba'i bsod nams kyi phung po ni/ de lta ma yin 10b no| |de nas de'i tshe bcom ldan 'das kyis tshigs su bcad pa 'di dag gsungs so/ /dam chos 'di la rgyal ba'i sras/ /rnam par mi rtog bsam gyur na/ /rnam rtog bgrod dka' rnam 'das te/ /rim gyis mi rtog thob par 'gyur/ /de las rab zhi mi g.yo mchog /dbang byed mnyam la mi mnyam pa/ /rnam par mi rtog bde ba ni/ /byang chub sems dpas thob par 'gyur/ /bcom ldan 'das kyis de skad ces bka' stsal nas byang chub sems dpa' sems dpa' chen po rnam par mi rtog snang ba dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do|| //'phags pa rnam par mi rtog par 'jug pa zhes bya ba'i gzungs rdzogs so// //rgya gar gyi mkhan po dzin mi tra dang / dA na shI la dang / zhu chen gyi lo ts+tsha ba ka ba dpal brtsegs kyis bsgyur te gtan la phab pa/ |