de bzhin gshegs pa'i mtshan brgya rtsa brgyad pa/ 'jig rten kun gyi mgon gcig pa/ /thams cad mkhyen pa thub pa che| |yon tan rgya mtsho mtha' yas pa'i/ /mtshan brgya rtsa brgyad legs par brjod/ /bkra shis kun gyi bkra shis pa/ /sdig pa thams cad rab 'joms pa/ /sdug bsngal thams cad sel pa po/ /ston pa la ni bdag phyag 'tshal/ /bkra shis thams cad sbyin pa po/ /lus can kun gyi skyabs mdzad pa/ /kun tu bde ba sbyin pa po/ /zla ba bzang la bdag phyag 'tshal/ /bkra shis thams cad yongs su rdzogs/ /sems can kun la thugs brtse ba/ /sems can kun gyi mgon po mchog /thams cad mkhyen la bdag phyag 'tshal/ / rig pa thams cad legs bsgrubs pa/ /sangs rgyas thogs med rtogs pa po/ /gnod pa thams cad sel mdzad pa/ /don kun grub la phyag 'tshal lo/ /rdzogs sangs rgyas pa 'gro ba'i gnyen/ /lha yi lha la bstod pa yi/ /mtshan brgya rtsa brgyad dam pa 'di/ /mchog tu dge ba bdag gis bshad/ /don kun grub pa rdzogs sangs rgyas/ /shAkya'i skyes 520b mchog thams cad mkhyen/ /chos kun dbang phyug brtan pa pa/ /drang srong chen po yon tan mtsho/ /dgra bcom bde gshegs de bzhin gshegs/ /bcom ldan 'jig rten kun mkhyen pa/ /nyes pa'i dri ma kun las 'das/ /chos kyi snang ba mdzad pa'i mchog /'jigs med shAkya zas gtsang sras/ /bu ram shing pa'i rigs dga' ba/ /gau ta ma ste nyi ma'i rigs| |thub dpal nyi ma'i rgyud bdag po/ /'jig rten mgon po stobs bcur ldan/ /bdud dpung nges par 'joms pa po/ /nyes pa spangs pa drug bcom pa/ /mi 'dul kha lo bzang po pa/ /rig pa grol ba mun sel ba/ /zhi ba dul ba dpang po thul/ /tshul khrims rnam dag dri ma med/ /'dod chags bral ba ser sna med/ /dpag tu med pa 'jigs med brnyes/ / chos kyi mchog dang ldan pa po/ /mtha' yas dpe med gsum ldan pa/ /bsam gyis mi khyab ya mtshan stabs/ /'jig rten gsum gnyer gsum rig pa/ /dus gsum mkhyen pa nyes gsum 'joms/ /cho 'phrul gsum dang ldan pa po/ /phung po gsum gyi lam ston pa/ /mtshon cha rtsod med rims nad med/ /bdag gi med pa nga rgyal med/ /tsher ma med pa spros pa med/ /'jigs med kha na ma tho med/ /dpa' bo mchog sbyin mchog don so/ /smra ba'i seng+ge mi yi mchog /rnam par dul ba nyon mongs bral/ /rnam dag bdag nyid rnam par 521a @#/ /'dren| |rig dang zhabs su ldan pa po/ /khyab 'jug kun rgyal rnam par mdzes/ /sems rdul dri ma mi mnga' ba/ /rdul dang bral ba rig pa'i mchog /zhi bar mdzad pa sdig pa zhi/ /bsil bar gyur pa shis par mdzad/ /ston pa 'gro ba'i skyabs 'os pa/ /dpa' bo dag pa bsnyengs mi mnga'/ /mtshan rnams yongs rdzogs dpal dang ldan/ /mig mkhan zug rngu 'byin pa po/ /shAkya seng+ge dge sbyong dbang / /dge ba'i chos kyi 'byung gnas gtsang / /sangs rgyas chos drug rgyan mnga' ba/ /chos drug dri ma med pa'i spyan/ /mngon shes drug dang ldan pa'i mchog /'gro drug rgya mtsho'i pha rol gshegs/ /rang byung bde gshegs grub pa po/ /'jig rten kun la phan par dgyes/ /mnyam bzhag shes rab mtshungs pa med/ /ting nge 'dzin la rtag tu dgyes/ /sems can kun gyi phan pa tshol/ /bden pa gsung pa dbang po bsdams/ /'jig rten kun la dge ba po// sems can snying po kun gzigs pa/ /'khor ba'i dgon las rgal ba po/ /dgongs pa thams cad rdzogs gyur pa/ /dbang ldan yul las rnam par rgyal/ /bden pa bzhi ni rab ston pa/ /pha rol gshegs pa grol mdzad mchog /'dren pa shin tu mya ngan 'das/ /bram ze tshangs pa thu bo btsun/ /gtso bo bde mdzad bde ldan pa/ /gsung mdzad rnam 521b rgyal bdag nyid che/ /rnam grangs 'jig rten zhi bar mdzad/ /sems can kun la phan pa po/ /snying stobs ldan pa kun gyi mchog /'jig rten mchod gnas 'jig rten mkhyen/ / 'jig rten snang ba snang mdzad pa/ /rnyed ldan 'jig rten bya ba 'das/ /'jig rten 'das pa'i lam du gshegs/ /chos kyi mnga' bdag chos kyi rgyal/ /ded dpon lags te 'od mdzad pa| |skyob pa po ste rkang gnyis mchog /bzod pa gsung ba bzod dang ldan/ /gzugs bzang blo bzang zhi ba ste/ /mdza' bo bde sbyin ngang tshul bzang / /gser gyi mdog can 'od rab gsal| |tshul bzang dge bar rab sbyin pa/ /sangs rgyas dpa' chen mi'i seng+ge/ /dpa' bo gcig tu mun sel ba/ /'joms pa med pa 'gro ba'i skyabs/ /rgyal ba bla ma mi mnyam mnyam| |zhags las grol ba srid pa med/ /mi yi skye mchog nga rgyal bcom/ /spyan dang ldan pa kun tu gzigs/ /mi rnams mig ste gsung ba'i mchog /mtshan brgya rtsa brgyad dam pa 'di/ /rtag tu gang zhig klog byed pa/ /de ni 'khor ba'i 'jigs pa rgal/ /go 'phang mchog kyang thob par 'gyur/ /de phyir rtag tu rab bsgrims te/ /nang par langs nas mkhas pa dag /brjod dam yang na nyan pa 'am/ /yang na yid la sems kyang rung / /rgyal ba'i mtshan bstod dge ba de/ /bkra shis bsod nams mchog tu 'gyur/ /dag byed sdig 522a @#/ /pa sel ba ste/ /don kun grub cing srung ba yin/ /sdig pa kun las rab tu grol/ /sdug bsngal kun dang 'jigs las grol/ /nyon mongs kun las rnam grol zhing / /sangs rgyas nyid ni bde bar thob/ /de ltar bdag gis thub pa'i yon tan mtshan bsgrags pas/ /dge ba rgya chen yang dag 'di bsdus gang yin pa/ /'di yis 'jig rten lha yul dang ni sa steng du/ /bde rnams thob nas bde ba mchog gis sangs rgyas spyod/ /de bzhin gshegs pa'i mtshan brgya rtsa brgyad pa rdzogs so// // |