@##/ /rgya gar skad du/ dwI da sha lo tsa na nA ma sU tra/ bod skad du/mig bcu gnyis pa zhes bya ba'i mdo/grub par gyur cig sangs rgyas bcom ldan 'das rgyal po'i khab kyi grong khyer 'od ma'i tshal na bzhugs te/ de'i tshe glog byung / skar mda' ltung / gnam lcags bab pa dang / de nas rgyal po gzugs can snying po 'khor dang bcas pas ltas mkhan bram ze rnams bkug nas smras pa/ ci'i rgyu ci'i rkyen gyis gnam kun 'khrug par 'gyur/ bram ze rnams kyis gsol pa/ ltas 'di lta bu dag mig bcu gnyis zhes bgyi ba'i gtsug lag las 'byung ste/ bdag gis khrel bar rngo mi thogs so/ /de nas rgyal po gzugs can snying po bcom ldan 'das ga la ba der song ste 76-1-278a zhabs la phyag 'tshal nas 'di skad ces gsol to/ /bcom ldan 'das sems can gyi don du thugs brtse bar dgongs te/ mig bcu gnyis kyi ltas kyi gtsug lag bshad du gsol/ bcom ldan 'das kyis bka' stsal pa/ rab tu byung bas ni phyi rol pa 'jig rten gyi gtsug lag 'di lta bu dag bshad pa'i cha ma yin no/ /de nas yang rgyal po gzugs can snying pos bcom ldan 'das la bskyar te gsol pa/ bcom ldan 'das bdag la thugs brtse bar dgongs te the tshom 'di dgrol du gsol/ de nas bcom ldan 'das kyis bshad par gnang nas sngon gyi gleng gzhi bka' stsal pa/ rgyal po chen po sngon 'das pa'i dus na gangs kyi ri drung na drang srong b+ha ga ba zhes bya ba zhig gnas pa de dus gzhan zhig na stag mo gzhon nu zhig 'khyam pa mthong ba dang 'dod chags skyes te/ drang srong gis 'khrig pa'i chos spyad pa las lo dus su bu bcu gnyis byung bar gyur to/ /bu btsas nas lo bdun lon pa dang pha ma gnyis shi nas phru gu rnams kyis lo bcu gnyis kyi bar du tshangs pa'i dngos grub bsgrubs nas/ bsam pa dang re ba bskang bar gsol ba dang / de nas tshangs pas snying rjes bltas te/ brgya byin lha'i dbang po dang / rgyal po chen po bzhi 'khor dang bcas par 'dzam bu'i gling du lhags te/ de nas tshangs pas byis pa de rnams la smras pa/ bu khyed rnams ci 'dod/ de nas byis pa rnams kyis tshangs pa la smras pa/ lha bdag cag rnams ni byis pa'i rang bzhin shin tu blo dman pa lags te/ legs nyes ma 'tshal lags na/ nyi zla dang / gza' dang / rgyu skar gyi ltas dang / dkyil 'khor dang / gtsug lag ji lta bu lags pa bshad du gsol/ de nas brgya byin lha'i dbang pos tshangs pa la 'di skad ces smras so/ / lha'i ston pa khyod kyis byis pa 'di rnams la dngos grub stsal ba'i rigs so/ /de nas tshangs pas byis pa rnams la smras pa/ byis pa nyon cig /rgyu skar nyi shu rtsa brgyad dang / skar ma thams cad kyi dkyil 'khor dang / ltas dang / nyi zla dang / gza' dang / gnam lcags 'bab pa dang / sa 76-1-278b g.yo zhing 'gul ba dang / ltas kyi gtsug lag ji lta bu yin pa dag bstan par bya'o/ /dgun zla ra ba yar gyi ngo dang / mar gyi ngo dang / tshes brgyad dang / bcu bzhi dang / bco lnga la nyi ma'i 'od mun pa 'dra ba nag por gyur na mi ya rabs mdzangs shing mkhas pa rnams la bgegs chen po 'byung bar 'gyur ro/ /rgyu skar a shwi nI'i nyi ma la nyi ma las du ba 'dra ba byung ste/ 'khor zhing 'thul na lo bcu gnyis kyi bar du char mi 'bab par 'gyur ro/ /rgyu skar b+ha ra NI'i nyi ma la nyi ma gser gyi mdog 'dra bar gyur na nye skor gyi rgyal khams kyi yul 'jig pa dang / dbus su mu ge chen po 'byung ngo / /dgun zla tha chungs kyi ngo rgyu skar kArti kA'i nyi ma la nyi ma lhag par gsal bar gyur na mtha'i yul khams 'jig cing dbus su char mi 'ong ngo / /dpyid zla ra ba'i ngo rgyu skar A grA'i nyi ma la nyi ma 'khyims pa dang / nyi ma gnyis su snang na mi nad 'byung / rgyal po sde gnyis la gnod pa'i bgegs 'byung / dpyid zla 'bring po'i ngo rgyu skar pu Sh+ya'i nyi ma la nyi ma mun pa 'dra bar 'gyur zhing nyi ma nub kar kha dog skya bor gyur na rgyal po chen po la bgegs 'byung / dpyid zla tha chungs kyi ngo rgyu skar b+ha ra NI'i dus la nyi zla gzas zin na blon pos rgyal po bsad par 'ong ngo / /dbyar zla ra ba'i ngo rgyu skar pU ra ba b+ha dra pA dA'i dus la nyi ma dmar por gyur na/ rgyal po dang / blon po dang / de'i yul 'khor du gnod pa'i bgegs chen po 'byung / dbyar zla 'bring po'i ngo rgyu skar bUrbA shA D+hA'i dus la zla ba nya la gzas zin na yul 'khor 'khrug pa dang / mi nad dang mu ge 'byung / dbyar zla tha chungs kyi ngo rgyu skar mU laM'i dus la nyi zla gas shing ser ga byung bar snang na yul der gnod pa chen po 'byung / ston zla ra ba'i ngo rgyu skar a shwi nI'i dus la nyi zla dus gcig tu shar na yul 'khor der khrag 'khrug chen pos khrag 'bab par 'ong ngo / /ston zla 'bring po'i ngo rgyu skar kArti kA'i dus zla ba nya la zla ba me'i kha dog 'dra bar gyur na yul 'khor der dgra'i dmag gis yul 'jig par 'gyur/ dgun zla ra ba'i ngo rgyu skar b+ha ra NI'i nyi ma la rlung dmar nag po byung la nyi ma mi gsal bar gyur na/ dgra'i tshogs kyis yul 'jig par 'gyur ro/ /dgun zla tha 76-1-279a chungs kyi ngo rgyu skar pUr ba phal gu nI'i nyi ma la sa bab cing rlung dmar chen po byung na rgyal po chen po la gnod pa 'byung / dpyid zla ra ba dang 'bring po'i ngo rgyu skar bi shA khA'i nyi ma la ser ba bab na yul 'khor der khrag nad dang gnod pa 'byung / dpyid zla tha chungs kyi ngo rgyu skar dz+yeSh+ThA'i nyi ma la nam langs kar skar ma nyi ma bas 'od bzang por gsal bar byung na gza' thams cad la bgegs chen po 'byung / dbyar zla ra ba'i ngo rgyu skar pUrbA shA D+hA'i nyi ma la sa bab cing nyi ma mi gsal na rgyal po stong 'khrug cing 'thab par 'gyur/ yang dbyar zla ra ba'i ngo rgyu skar pUrbA shA D+hA'i nyi ma la rlung chen po byung na chu dkon/ kha zas dang / 'bru zan ma rung bar 'gyur/ dbyar zla 'bring po'i ngo rgyu skar shra ba NA'i nyi ma la rlung drag por langs shing nam mkha' mun par gyur na nyen kor gyi yul khams gzhan du 'jigs pa chen po 'byung / dbyar zla 'bring po'i ngo rgyu skar pUrbA b+ha drA pA dA'i nyi ma la ser ba bab/ gnam lcags grum na yul 'khor der nad dang mu ge 'byung / dbyar zla tha chungs kyi ngo rgyu skar pUrbA b+ha drA pA dA'i nyi ma la byang phyogs nas rlung dmar chen po langs nas lha khang dang / mchod rten dang / khang khyim dang / shing sdong po chen po bsgyel na yul khams su gnod pa chen po 'byung ngo / /ston zla ra ba'i ngo rgyu skar A shwi nI'i nyi ma la thog bab bam/ skar mda' ltung ngam/ ser ba bab na yul khams der thab mo chen po 'ong / dgun zla ra ba'i ngo rgyu skar ma g+hA'i nyi ma la char pa bab na yul khams thams cad kha zas mod par 'ong / dgun zla tha chungs kyi ngo rgyu skar A grA'i nyi ma la gnam me'i kha dog 'dra bar gyur na ltas rab tu ngan te/ yul khams su mi bde ba dang 'jigs pa chen po 'byung ngo / /dpyid zla tha chungs kyi ngo rgyu skar b+ha ra NI'i nyi ma la byang phyogs nas sgra chen po byung ngam/ gnam ser por song na dgra thams cad kyis yul khams gshig par 'gyur ro/ /dpyid zla ra ba'i ngo rgyu skar swA tI'i nyi ma la char bab la rlung ma langs par 'ja' byung na grong khyer chen po mes tshig par 'gyur ro/ /dbyar zla ra ba'i ngo rgyu skar pu Sh+ya'i nyi ma la glog dang / sbur ma dang / nyal nyil gyi char bab na yul khams der mu ge 'byung / dbyar zla 'bring po'i 76-1-279b ngo rgyu skar mU laM'i nyi ma la char cher bab la 'ja' byung na/ rgyal rigs rnams la gnod par 'gyur/ dbyar zla tha chungs kyi ngo rgyu skar ut+ta ra b+hadra pA dA'i nyi ma la sa las sgra byung ngam/ rlung nag po langs na yul der mu ge 'byung / dbyar zla 'bring po'i ngo phyogs mtshams dag nas sgra chen po byung na yul phyogs der khrag khrug chen po 'byung / ston zla ra ba'i ngo rgyu skar b+ha ra NI'i nyi ma la gnam las sgra chen po byung na btsun pa dang / dka' thub can rnams la gnod pa 'byung / ston zla ra ba'i ngo dbang po'i nyi ma la gnam nas sgra byung na mi le lo can dang / phyugs la gnod pa 'byung / ston zla tha chungs kyi ngo rgyu skar d+ha ni Sh+thA'i nyi ma la gnam las rol mo'i sgra byung na rtswa dang / lo tog legs par 'gyur/ char dus su 'bab/ mjug tu mi nad 'byung / dgun zla ra ba'i ngo rgyu skar swA tI'i nyi ma la gnam las sgra chen po 'byung zhing gnam 'khrug na yul 'khor der 'jigs pa chen po 'byung / dgun zla tha chungs kyi ngo rgyu skar dz+yeSh+ThA'i nyi ma la tshub ma langs shing sa g.yos na dge sbyong dang / bram ze rnams la bgegs dang gnod pa 'byung / dpyid zla ra ba'i ngo rgyu skar pUrbA b+ha drA pA dA'i nyi ma la nyin par sa g.yos na lo gnyis kyi bar du dus su yul khams der dmag 'ong / dpyid zla 'bring po'i ngo rgyu skar pUrbA shAD+hA'i nyi ma la sa 'gul na blon pos rgyal po bsad pa dang / yul khams der 'khrug pa chen po 'byung / dbyar zla 'bring po'i ngo rgyu skar mU laM dbang ba la nub mo sa g.yos na khams kyi dbang po rnams la gnod pa 'byung / dbyar zla tha chungs kyi ngo rgyu skar ro hi NI dbang ba la nub mo sa g.yos shing rlung dmar byung / char ma bab na 'bru zan ma rungs par 'gyur zhing dmag 'ong / ston zla 'bring po'i ngo rgyu skar ut+ta ra b+ha drA pA dA'i nyi ma la nyin par sa g.yos na pha rol gyi dgras rgyal po de pham par 'gyur/ yul phyogs kyang chom rkun gyis 'jigs par 'gyur/ ston zla tha chungs kyi ngo rgyu skar kArti kA'i nyi ma la sa g.yos na grong khyer chen po dang / khang khyim 'jig cing mu ge 'byung / dgun zla ra ba'i ngo rgyu skar a shwi nI dang / ut+ta ra phal gu NI dbang ba'i nub mo sa g.yos na byis pa chung ngu dang / bud med sbrum ma la bgegs dang gnod pa 'byung / dgun zla 'bring po'i ngo rgyu skar mr-i ga shi rA dang / pUrbA 76-1-280a b+ha drA pA dA'i nyin par sa g.yos na rkang 'gros la bgegs dang gnod pa 'byung / dbang po'am/ ma g+hA'i nyi ma la gtsug lag khang sku gzugs g.yos shing 'gul lam/ sa 'phos na yul khams de myur du 'jig par 'gyur/ gtsug lag khang gi sku gzugs gdan las 'phos sam/ dngul lta bu byung ngam/ 'gyel na yul khams de rgyal po dang bcas par rgyal khams gzhan gyi dbang du 'gyur/ gtsug lag khang gi sku gzugs 'phos sam/ spyan nas mchi ma byung na yul khams de'i mi dpa' bo gces pa bu smad dang bcas par yul byung bar 'gyur/ gtsug lag khang gi sku gzugs gdan las 'phos sam/ 'gul la lha khang nas dud pa 'dra ba byung na/ yul khams de'i rgyal po la gnod par 'gyur/ gtsug lag khang chen po dang / gnas khang lta bu g.yos na/ grong khyer de phyogs rgyal khams gzhan gyis gnangs su bcad pa'am mes tshig par 'gyur/ zla ba'i zur la gza' phur bu byung na mi phyug po la rgyal pos nor 'phrog cing gnod par 'gyur/ nyi zla dmar por song na khams kyi dbang po la gnod pa 'byung / gza' spen pa zla ba'i steng du byung na yul 'khor der 'jigs pa chen po dang bgegs 'byung / ltas 'di rnams byung ba'i dus su zla ba gzas zin na rgyal po chen po rnams la gnod pa dang bgegs 'byung / rgyal po dang po skyes pa'i rgyu skar gyi steng du zla ba byung zhing / zla ba'i steng du yang gza' mjug rings byung na/ yul khams de'i rgyal po dang / rgyal khams nye ba gzhan gyi rgyal po dang 'thab mo 'ong / gza' spen pa rgyu skar ro ha NI dang / kArti kA'i dbus su shar na rgyal khams de'i mi thams cad la gnod pa chen po dang / bgegs byung nas mi sum cha cig lus par 'gyur/ gza' pa ba sangs dang / rgyu skar ma g+hA dang pUrba phal gu ni zla ba'i dbus su shar na lo tog la gnod pa 'byung / gza' phur bu dang / pa ba sangs dang / spen pa rnams dmar por song na yul khams der 'jigs pa chen po 'byung / gza' mjug rings rgyu skar puSh+yA'i steng du shar na ring po mi thogs par phyogs bzhi nas dmag chen po 'byung / gza' phur bu dang / mig dmar rgyu skar shra ba NA'i steng du shar na lo gsum gyi bar du yul khams der 'jigs pa chen po dang gnod pa 'byung / gza' phur bu dang / spen pa rgyu skar bi shA khA'i 76-1-280b steng du shar na mi mang po 'thab mo la 'chi bar 'gyur ro/ /lha khang dang khang pa chen po'i steng du bya rog gar byed cing 'phyang mo nyug na yul khams der 'thab mo chen po 'byung / bud med la mi ma yin pa'i bu byung ngam/ yang na phyugs la mi'i bu byung na yul khams de'i bud med la bgegs dang gnod pa chen po 'byung / ma'i mngal na bu yod pa rgod dam/ smra'am/ ngu na yul khams de 'jig par 'gyur/ bud med kyi mngal nas bu rkang gcig pa'am/ rkang gsum pa'am/ rkang bzhi pa byung na yul de'i rgyal po la gnod pa 'byung / bud med kyi lto nas bu ma ning mtshan gnyis pa byung na yul khams de'i rgyal po 'chi bar 'gyur/ bud med las byol song gi bu dang bu mgo mang po can byung na yul khams de 'jig par 'gyur/ bud med las bu mgo gcig la gdong gnyis mig gsum pa byung na yul khams de myur du 'jig par 'gyur/ bud med las bu grul bum mgo bzhi pa byung na yul 'khor der 'jigs pa chen po 'byung / bud med las bu phag gi gdong can byung na phyogs bzhi nas yul khams de 'jig par 'gyur/ bud med las bu gdong nyi ma'i 'od bzhin 'bar ba byung na nang 'khrug gis yul khams de 'jig par 'gyur/ byis pa tshem bu na gnas pa chen po bzhin tshig smra na yul 'khor de 'jig par 'gyur/ ma nyid kyis ma tshor bar mngal nas bu byung na yul khams der bgegs dang gnod pa chen po 'byung / bud med kyi lto nas bu phag gam sbrul lta bu byung na 'dre gdon dang / bgegs nad kyis yul khams de 'jig cing 'jigs pa chen po 'byung / bud med las bu skye nub pa dang / so skyes pa byung na yul khams de dgon par 'gyur te/ mi thams cad kyang phyogs gzhan du 'gro bar 'gyur/ bud med las bu mgo med pa lag pa gcig pa byung na yul khams der gnod pa chen po 'byung / yul khams su me tog dang shing tog 'bras bu lan gnyis 'byung zhing / shing dang 'bras bu las khu ba 'dzag na rgyal po'i rgyal tshab la bgegs dang gnod pa 'byung / dus ma yin par bza' shing las me tog dang 'bras bu skye na rgyal po dang / yul mir bcas pas yul bor bar 'gyur/ bza' shing gi 'bras bu lhag par mdog bzang por gyur tam/ yang na khrag 'dra ba 'dzag na yul khams der 'jigs pa chen po dang / nad dang mu ge 'byung / bskyed shing gi grib ma mi 'khor bar phyogs gcig tu 'dug na dgra'i dmag byin chen pos yul phyogs de bcom 76-1-281a par 'gyur/ bskyed shing 'gro ba ltar snang na yul 'khor der 'jigs pa chen po 'byung / bskyed shing lhag par bgyid cing gsal bar snang na yul khams de'i rgyal po tshe thung bar 'gyur/ 'jig rten pa'i lha mchod pa'i tshe lha smra'am 'dzum na/ rgyal po la bgegs dang gnod pa 'byung / me tog gi char 'bab pa'am/ rlung dmar langs shing gnam las srin bu bab na yul khams der chom rkun gyis 'jig par 'gyur/ 'jig rten pa'i lha khang du me ma bus par du ba byung zhing / lha yang mtshan dang cho 'phrul ston na rgyal po la bgegs dang gnod pa 'byung / 'jig rten pa'i lha khang du me mar ma bus par me mar 'dra bar snang na rgyal po'i gnang chen la bgegs dang gnod pa 'byung / rgyal po btsun mo'i 'khor du song ste 'dod chags mi ldang na rgyal po'i pho brang mes tshig cing rgyal po la mi dge ba sna tshogs 'byung / char pa dang ser ba 'bab la/ gnam la kha dog gsal ba dag byung na yul khams der 'jigs pa chen po 'byung / grong khyer tshub mas bskor cing 'gro ba dang / rlung dmar langs shing char pa khrag 'dra ba bab na yul khams der 'jigs pa chen po 'byung / glog 'byung zhing char pa 'bab la sprin 'khor ling 'khor ling du chad de/ sprin 'khor ling du chad pa'i bar bar na dri za'i grong khyer 'dra ba snang na yul khams der 'jigs pa chen po 'byung / zla ba dmar por gyur na yul khams der grong khyer mes tshig pa dang / rims kyis mi ngas par 'gyur/ zla ba mtha' dmar la dbus nag por song na yul khams der 'jigs pa chen por 'gyur/ zla ba'i kha dog btsag 'dra bar dmar por snang la slar yang 'phral du dkar po'i rang bzhin du gyur na rlung mi ldang bar drag por 'bab/ ri skam lta bur chu mig byung na lo tog legs par 'gyur/ me ma bus par yul khams der du ba byung na yul khams der 'jigs pa chen po 'byung / mda' gzhu skyis kor la me'am dud pa byung na yul khams der dgra'i 'jigs pa 'byung ngo / /de skad ces bcom ldan 'das kyis bka' stsal pa dang / rgyal po gzugs can snying po 'khor dang bcas pa bcom ldan 'das kyis gsungs pa la yi rangs te mngon par bstod do// //mig bcu gnyis pa zhes bya ba'i mdo rdzogs so// // 76-1-281b @#/ /rgya nag skad du/ h+pho ba sho za shI i la TAd kying / bod skad du/ 'phags pa dum bu zhe gnyis pa zhes bya ba'i mdo/ dkon mchog gsum la phyag 'tshal lo/ de'i tshe bcom ldan 'das kyis bla na med pa'i byang chub mngon du mdzad de 'di ltar dgongs so/ chags pa dang bral zhing rab tu zhi ba ni khyad du 'phags te/ ting nge 'dzin chen po la gnas nas bdud ste thams cad bcom pas/ da ni sems can rnams grol bar bya ba'i phyir chos kyi 'khor lo bskor bar dgongs te/ drang srong lhung ba ri dwags kyi nags su gshegs nas tshe dang ldan pa kun shes ko+o N+Di n+ya la sogs pa'i lnga sde la bden bzhi'i chos 'khor bskor bas de dag lam dang 'bras bu la bkod par mdzad do/ /de nas dge slong gzhan dag bcom ldan 'das kyi drung du lhags te rang rang gi sems kyi rtog pa bcom ldan 'das la zhus so/ /bcom ldan 'das kyis yang dag par bstan pas de dag sems kyi rtog pa las rnam par grol bar gyur te/ bcom ldan 'das kyi ga la ba de lags su thal mo sbyar ba gtad nas bcom ldan 'das kyis bstan pa la gus pas mnyan par gyur to/ / de'i tshe bcom ldan 'das kyis dam pa'i chos du ma bu bzhi bcu rtsa gnyis pa zhes bya ba 'di gsungs so/ /bcom ldan 'das kyis bka' stsal ba/ nye du dag spangs khyim nas rab tu byung te bslab pa la gnas nas sems kyi de nyid mthong bar byed cing 'du ma byas pa'i chos rtogs par byed pa la dge sbyong zhes bya'o/ /khrims nyis brgya lnga bcu rtsa gsum ma lus pa la gnas shing brtson pas bden pa bzhi'i lam 'bad pas bsgrubs nas yongs su dag par byas pa la dgra bcom pa zhes bya'o/ /yang bcom ldan 'das kyis bka' stsal ba/ / dgra bcom pa ni steng gi nam mkhar 'phags te rdzu 'phrul dang sprul pa sna tshogs ston pa dang / 'jig rten gyi khams rnams kun nas g.yo bar nus pa dang / tshe'i 'du byed kyang ji 'dod du yongs su 'dzin nus pa'o/ de'i 'og ma ni phyir mi 'ong ngo / / 76-1-282a phyir mi 'ong ni tshe 'phos nas lha gnas pa bcu dgu pa la skyes nas gnas de nyid du dgra bcom 'thob par 'gyur ba'o/ /de'i 'og ma lan cig phyir 'ong ba'o/ /lan cig phyir 'ong ni tshe 'phos nas khams gong mar skye bar 'gyur zhing de nas phyir 'ongs nas dgra bcom 'thob par 'gyur ba'o/ /de'i 'og ma rgyun du zhugs pa'o/ /rgyun du zhugs pa ni tshe lan bdun 'pho zhing skye ba lan bdun blangs pa'i mthar dgra bcom 'thob par 'gyur ba'o/ /'dod sred yongs su spangs pa ni lus kyi yan lag yongs su bcad pa dang 'dra ste/ phyis yongs su bsten du mi rung bar 'gyur ro/ /yang bcom ldan 'das kyis bka' stsal ba/ rab tu byung ba'i dge slong rnams 'dod sred dang bral zhing rang gi sems nyid yongs su shes nas sangs rgyas kyi lam zab mo'i don 'dus byas pa rtogs par byas pas/ thob pa med pa/ tshol ba med pa/ lam gyis bcing du med pa/ lam gyis sbyor du med pa/ bsam du med pa/ byed du med pa/ bsgom du med pa/ mngon du byar med pa/ thams cad du mi gnas pa/ rang bzhin gyis mchog phul du byung ba de la lam zhes bya'o/ /yang bcom ldan 'das kyis bka' stsal pa/ skra dang kha spu bregs te dge slong du gyur nas bcom ldan 'das kyi bstan pa la rab tu zhugs pa rnams kyis 'jig rten gyi zang zing spangs te bsod snyoms la spyod cing nyin phyed du zas gcig bza' zhing gnas mal shing drung du 'cha' zhing bag yod pas zas phyis len par mi bya'o/ de ci'i phyir zhe na/ 'dod pa la sred pas skye bo dag rmongs par byed pa'i phyir ro/ /yang bcom ldan 'das kyis bka' stsal pa/ sems can dag gis rnam pa bcus dge ba sgrub par 'gyur la rnam pa bcus mi dge ba sgrub par 'gyur ro/ /bcu gang zhe na/ lus kyi gsum dang / ngag gi bzhi dang / yid kyi gsum mo/ lus kyi rnam pa gsum gang zhe na/ srog gcod pa dang/ ma byin par len pa dang / 'dod pas log par g.yem 76-1-282b pa'o/ ngag gi rnam pa bzhi gang zhe na/ rdzun du smra ba dang / tshig 'khyal smra ba dang / tshig rtsub smra ba dang / phra ma smra ba'o/ /yid kyi gsum gang zhe na/ brnabs sems dang / gnod sems dang / rmongs pas mchog gsum la yid mi ches te shing phyin ci log lta ba'o/ /dge bsnyen rnams chos rnam pa lnga las le los mi ldog cing rnam pa bcus dge ba la spyad pas nges par 'bras bu thob par 'gyur ro/ yang bcom ldan 'das kyis bka' stsal pa/ skye bo dag nyes pa mang po byas la 'gyod pa med par rim gyis bsags pa'i sdig pa'i 'bras bu rang nyid la smin par 'gyur te/ dper na/ chu klung rnams rgya mtsho chen por babs pa na rang gis zab cing yangs bar gyur te brgal dka' bar 'gyur ba bzhin no/ /skye bo dag nyes pa mthong nas slan chad bsdams pas dge ba'i chos rnams 'phel bar 'gyur zhing sdig pa rim gyis zhi bar 'gyur te lam rnams kyang 'grub par 'gyur ro/ /yang bcom ldan 'das kyis bka' stsal ba/ skye bo rmongs pa dag gis de bzhin gshegs pa la sdig pa mi dge ba'i las byas kyang byams pa tshad med pas yongs su 'dzin cing phyi phyir tshul min gyi sa thob tsams kyang phyir zhing byams sogs tshad med pa'i thugs rjes bskyangs par mdzad do/ /gzhi des de bzhin gshegs pa ni bsod nams dang yon tan gyi dpal la mnga' brnyes so/ skye bo de dag la gnod pa dang sdug bsngal ba 'byung ngo/ /yang rmongs pa 'ga' zhig sangs rgyas bcom ldan 'das kyi kun tu spyod pa'i chos nyid ni byams pa dang thugs rje'i bdag nyid ni 'di lags pas tho btsams kyang phyir zhing byams par mdzad do zhes thos nas bcom ldan 'das kyi drung du 'ongs te spyos kyang cang mi gsung bar bzhugs te/ 'di ni gti mug can mi gsal ba rmongs pa'o zhes thugs rje chen pos dgongs so/ /spyos rnyes par bcom ldan 'das kyis bka' stsal ba/ bu khyod kyis gzhan zhig la bsnyen bkur byas pa la des dang du ma blangs na ji ltar bya/ des gsol ba/ phyir 'brangs 76-1-283a bar bya'o/ /bcom ldan 'das kyis bka' stsal ba/ bu khyod kyis da bzod spyos pa de bzhin gshegs pas bdag gir ma mdzad pas phyir khur zhig khyod la sdug bsngal 'byung ngo/ /dper na/ brag cha sgra'i rjes su 'brangs pa dang / grib ma lus kyi rjes su 'brangs pa ltar nam yang rnam smin de dang 'bral bar mi 'gyur ro/ /de'i phyir sdig pa mi dge ba'i las la 'joms par bya'o/ /yang bcom ldan 'das kyis bka' stsal ba/ dam pa dag la sdig can rnams kyis 'tshe bar byed pa ni/ dper na/ nam mkhar mchil ma 'dor ba dang 'dra ste/ mchil mas nam mkha' sbags mi nus shing rang nyid sbags par 'gyur ba dang / rlung gi rdzi phyogs su gzhan la thal ba 'thor ba ltar rdul pha rol po la bsgo mi nus shing phyir zhing rang nyid la 'gos par 'gyur ba dang mtshungs so/ /dam pa dag la skur pa 'debs par mi bya ste/ dam pa dag la gnod pa byas pas rang nyid nyams par 'gyur ro/ /yang bcom ldan 'das kyis bka' stsal ba/ spyod pa la slob pa dag gis byams pa dang snying rje la brtson par bya zhing sbyin pa yang sbyin par bya ste/ sbyin pa'i phan yon shin tu che'o/ /bsdams pa'i yid kyis legs par chos spyad na de'i bsod nams shin tu che'o/ /gzhan gyis chos spyod pa mthong ba'i tshe phan 'dogs shing rjes su yi rang byas pas kyang bsod nams kyi rnam smin 'thob par 'gyur ro/ /gsol ba/ bcom ldan 'das de ltar na de'i bsod nams kyi phung po de bri bar mi 'gyur ram/ bka' stsal ba/ dper na/ gnas zhig na dpal 'bar sbar ba zhig yod la phyogs bzhi'i skye bo mang pos dpal 'bar mang po khyer te de las sbar te bza' bca' dag 'ched par byed/ mun pa dag sel bar byas kyang me de zad par mi 'gyur ba ltar bsod nams kyi phung po de yang de bzhin no/ /yang bcom ldan 'das kyis bka' stsal pa/ 76-1-283b skye bo tha mal ba brgya la zas byin babs dam pa gcig la zas byin pa'i char mi phod/ /dam pa stong la zas byin pa bas las bslab pa'i gzhi lnga 'dzin pa gcig la zas byin pa'i char mi phod/ bslab pa'i gzhi lnga 'dzin pa khri phrag la zas byin pa bas rgyun tu zhugs pa gcig la zas byin pa'i char mi phod/ rgyun tu zhugs pa khri phrag brgya la zas byin pa bas lan cig phyir 'ong gcig la zas byin pa'i char mi phod/ lan cig phyir 'ong khri phrag stong la zas byin pa bas phyir mi 'ong gcig la zas byin pa'i char mi phod/ phyir mi 'ong bye ba la zas byin pa bas dgra bcom pa gcig la zas byin pa'i char mi phod/ /dgra bcom pa dung phyur la zas byin pa pas rang sangs rgyas gcig la zas byin pa'i char mi phod/ rang sangs rgyas bye ba brgya la zas byin pa bas sangs rgyas gcig la gdugs tshod gsol ba'i char mi phod do/ /de ci'i phyir zhe na/ sangs rgyas kyi lam yongs su 'tshol cing slob par 'dod pa dang sems can thams cad la phan pa bsgrub par 'dod pa'i phyir ro/ /de bas na dam pa rnams la zas phul ba'i bsod nams kyi phung po shin tu che'o/ /gang dag gis 'jig rten gyi lha 'dre 'byung po dag la bsnyen bkur ba bas pha ma la gus pa dang sri zhu bgyid pa mchog ste/ pha ma gnyis bsod nams kyi zhing mchog tu gyur ba'o/ /yang bcom ldan 'das kyis bka' stsal pa/ 'jig rten na dka' ba rnam pa nyi shu yod de/ /de dag gang zhe na 'di lta ste/ dbul bos sbyin pa gtong ba dka'/ phyug 'byor ldan pas lam la slob pa dka'/ srog blos nges par gtong ba dka'/ /gsung rab dam pa'i chos blta' ba dka'/ / sangs rgyas byung ba'i zhing khams su skye ba dka'/ 'dod pa la mi chags shing sran tshugs pa dka'/ yid 'ong mthong bas mi re ba dka'/ stobs 'byor can stobs 'byor gyi dbang du mi 'gro ba dka'/ smod phyir byed pa la mi khro ba dka'/ bya 76-1-284a ba'i yul dang 'phrad pa'i tshe sems 'du mi byed pa dka'/ mang du bslabs kyang mthar phyin pa dka'/ ma bslabs bdag la mi brnyas pa dka'/ nga'o snyam pa'i nga rgyal gzhom pa dka'/ dge ba'i bshes gnyen dang 'phrad pa dka'/ sems kyi rang bzhin shes nas lam la slob pa dka'/ yul dang phrad pa'i tshe kun nas mi g.yo ba dka'/ blo dang 'tshams pa'i thabs kyis spyod pa dka'/ khams dang mthun par gdul ba dka'/ sems btang snyoms su 'jog pa dka'/ bya ba dang bya ba ma yin pa mi smra ba dka'o/ /bcom ldan 'das la dge slong zhig gis gsol pa/ rgyu gang gis byang chub thob par 'gyur/ rkyen gang gis sngon gyi gnas rjes su dran par 'gyur lags/ bcom ldan 'das kyis bka' stsal pa/ byang chub la rtags dang mtshan ma med pa zhes pa tsam gyas mi phan pas sems kyi spyad pa bsrung ba gal che'o/ /dper na/ me long phyis pas g.ya' dag ste dwangs shing gsal bar gyur bas gzugs brnyan gsal bar snang bar 'gyur ro/ /de bzhin du 'dod pa yongs su spangs shing stong pa'i chos la kun tu spyad pas 'phags pa'i lam yang dag pa ji lta ba bzhin du 'thob par 'gyur zhing sngon gyi gnas kyang rjes su dran par 'gyur ro/ /yang bcom ldan 'das kyis bka' stsal pa/ dge ba'i mchog gang zhe na/ lam la spyod pa nyid dge ba'i mchog go /che ba'i mchog gang zhe na/ blo chos dang mthun par sbyor ba che ba'i mchog go /stobs dang ldan pa'i mchog gang zhe na/ bzod pa gang yin pa ste/ bzod pa dang ldan na sdig pa'i las mi byed pas nges par mi rnams kyis bkur bar 'gyur ro/ /mchog tu gsal ba gang zhe na/ gang sgrib pa med pa dri ma dang bral ba/ nyes spyod med pa yongs dag pa/ thog ma med pa nas da lta'i bar gyi phyogs bcu'i 'jig rten na gang dag yod pa de dag thams cad ma mkhyen pa'am/ ma gzigs pa'am/ rnam par ma mkhyen pa'am/ ma gsan pa cung zad tsam yang mi mnga' zhing 76-1-284b rnam pa thams cad mkhyen pa'i ye shes dang ldan pa de la gsal ba zhes bya'o/ /yang bcom ldan 'das kyis bka' stsal pa/ sems can 'dod chags dang bcas pa'i sems kyis bsgribs pas tha ma yang dag pa ji lta ba bzhin du mthong bar mi 'gyur te/ dper na/ chu rnyogs pa can la tshon rtsi sna lnga btab ste ci nus pa'i stobs kyis dkrugs pa la skye bo gang dag der bltas pa'i tshe rang gi lus kyi gzugs brnyan mthong mi nus so/ /de bzhin du 'dod chags kyis 'khrul ba'i sems rnyogs pa can du byas pas lam mthong bar mi 'gyur ro/ /'on kyang skye bo gang dag mos pas nyes pa rim gyis bshags shing bsdams te dge ba'i bshes gnyen mnyes par byas pa na chu'i rnyogs pa'i dri ma dag ste gzugs brnyan gsal bar 'gyur ba ltar lam mthong bar 'gyur ro/ /yang 'di lta ste dper na/ zangs kyi 'og tu me lce mched par byas nas nang gi chu shin tu khol ba'i steng du ras kyis bkab pa la skye bo gang dag zangs kyi thad du 'ongs nas bltas pa'i tshe rang gi gzugs brnyan mi mthong ba lta bu ste/ rgyud du thog ma med pa nas gnas pa'i dug gsum gyis dkrugs shing sgrib pa lngas g.yogs par byas pas lam mthong bar mi nus so/ / sems kyi dri ma yongs su zad pa na rnam par shes ba gang nas 'ongs shing skyes pa dang / shi 'phos nas sangs rgyas kyi zhing gang dag tu 'gro bar 'gyur ba shes shing lam gyi yon tan rnams kyang mthong bar 'gyur ro/ /yang bcom ldan 'das kyis bka' stsal pa/ spyod pa la slob dpon gyis dper na/ lag tu sgron me thogs te mun khang du zhugs pa na mun pa sel zhing snang ba nyid du bya ba dang 'dra ste/ lam la bslabs te bden pa mthong ba'i tshe gti mug rmongs pa'i mun pa sangs pas gang yang mi gsal ba med do/ /yang bcom ldan 'das kyis bka' stsal pa/ de bzhin gshegs pas gang dgongs pa thams cad lam la dgongs pa'o/ /gang mdzad pa thams cad lam mdzad pa'o/ /gang gsungs pa thams cad lam gsungs pa'o/ /de bzhin gshegs pa ni dran pas lam yang dag pa mi bsnyel ba'o/ /yang bcom ldan 'das kyis bka' 76-1-285a stsal pa/ nam mkha' dang sa mthong ba'i tshe mi rtag pa'o zhes sems par bya'o/ /ri dang lung ba mthong ba'i tshe 'di ni mi rtag pa'o zhes sems par bya'o/ /dngos po rnams kyi dbyibs dang gzugs 'phel zhing rgyas pa mthong ba'i tshe de yang mi rtag pa'o zhes sems par bya ste/ 'di ltar bsams pas ring por mi thogs par lam rnams 'thob par 'gyur ro/ /yang bcom ldan 'das kyis bka' stsal pa/ nyin re bzhin rgyun du lam la sems pa dang spyad par bya ste/ des dad pa'i dbang po rjes su 'thob pas bsod nams kyi rnam grangs tshad med do/ /yang bcom ldan 'das kyis bka' stsal pa/ lus kyi 'byung ba chen po dag la bdag ces pa'i tha snyad gdags kyang de dag bdag med pa'o/ /bdag ni re zhig tsam du zad kyi rtag tu gnas pa ma yin te/ dper na sgyu ma bzhin no/ /yang bcom ldan 'das kyis bka' stsal pa/ / sems can 'dod chags kyi rjes su 'brangs te grags pa don du gnyer ba ni/ dper na/ bdug spos kyis bdugs pa dang 'dra ste/ gang dag de'i dri tshor nas bdug spos kun tu bdugs par byas pa las bdug spos de yongs su mdzad pa las mi 'da'o/ /de bzhin du blun po dag 'jig rten tha mal ba'i snyan grags la chags te bden pa yang dag pa'i grags pa la brtson par mi byed pa dag grags pa dang rnyed pas phongs par gyur te 'gyod pa skye bar 'gyur ro/ /yang bcom ldan 'das kyis bka' stsal pa/ gzugs dang nor ni/ dper na/ gri'i so la chags pa'i sbrang rtsi dang 'dra ste khye'u chung dag gis de'i ro myangs pa tsam gyis lce smas pa'i sdug bsngal 'byung ngo/ /yang bcom ldan 'das kyis bka' stsal pa/ sems can gang dag bu dang chung ma dang nor dang khyim gyis bcings pa'i 'jigs pa ni/ dper na/ btson rar bcug pa'i mi la gdos dang lcags sgrog sogs kyi 'jigs pa las che ba'i 'jigs pa'o/ /btson ra'i 'jigs pa las stes dbang gis thar ba 'byung la/ bu dang chung ma sogs la chags pa ni stag gi khar tshud pa dang 'dra ba'i 'jigs pa yod bzhin du rmongs pa dag bag med par 'jug pas na de las thar bar mi nus so/ / 76-1-285b yang bcom ldan 'das kyis bka' stsal pa/ 'dod yon la chags pa'i nang na gzugs la chags pa ni chags pa gzhan las lhag go /gzugs la chags pa las lhag pa'i chags pa med do/ /stes dbang gis gzugs la 'dod cing chags pa ni gcig nyid de/ de 'dra ba gnyis pa zhig grub na 'jig rten na lam la slob nus pa 'byung bar mi 'gyur ro/ /yang bcom ldan 'das kyis bka' stsal pa/ 'dod chags kyi yul la 'jug pa ni/ dper na/ rmongs bdag lag tu sgron me thogs te rlung gi rdzi phyogs su gtad nas 'gro ba dang mtshungs te/ sgron me de ma 'dor na lag bsreg pa'i nyes pa nges par 'byung ngo / /'dod chags zhe sdang gti mug gsum rgyud la yod pa sngon du lam gyis ma bsal na rmongs pa dag lag tu sgron me thogs pa ma btang bas lag pa sre pa dang mtshungs pa'i nyes dmigs che'o/ /de nas lha zhig gis tshod bag mas pa'i phyir bcom ldan 'das kyi spyan sngar lha'i bu mo zhig btang ngo / /bcom ldan 'das kyis de la bka' stsal pa/ mi gtsang ba sna tshogs kyis gang ba'i rgyal ba khyod ci'i phyir du 'ongs/ skye bo tha mal ba bslu nus kyi de bzhin gshegs pa mngon par shes pa drug dang ldan pa rnam pa thams cad du g.yo bar ga la nus/ khyod de bzhin gshegs pa la dgos pa med do song zhig /de nas lha de bcom ldan 'das la mngon par dad par gyur nas sems kyi rtog pa zhus pa dang / bcom ldan 'das kyis rnam par phye ste bstan pas rgyun du zhugs pa'i 'bras bu la bkong bar mdzad do/ /yang bcom ldan 'das kyis bka' stsal pa/ skye bo dag lam la slob pa'i tshe chu'i kha la g.yengs pa'i shing dang mtshungs te/ gal te shing de chu'i rgyun phyogs su khyer ba phar 'gram du yang ma reg tshur 'gram du yang ma reg /mis ma blangs/ lha 'dre dag gis kyang ma bzlog /klong du'ang ma lus/ rul bar yang ma gyur na nges par rgya mtsho chen por 'babs par 'gyur ro zhes nga smra'o/ /de bzhin du gal te skye bo gang dag lam la slob pa'i tshe 'dod chags kyis rmongs par ma gyur/ phyin ci log dag gis ma zin/ nem 76-1-286a nur mi byed cing 'bad pas 'grus par byas na skye bo de nges par lam thob par 'gyur ro zhes nga smra'o/ /yang bcom ldan 'das kyis bka' stsal pa/ dge sbyong dag sems la yid ma ches shig /sems la gtan nas yid ches par mi bya'o/ /bag yod bar gyis shig /gzugs la chags par ma byed cig /gzugs la chags pas sdug bsngal 'byung ngo / /gang tshe dgra bcom pa mngon du byas pa de'i tshe gdod sems la yid ches par rigs so/ /de nas bcom ldan 'das kyis yang dge sbyong rnams la bka' stsal pa/ dge sbyong dag bag yod par gyis shig /bud med la blta bar mi bya'o/ /gal te 'phrad pa'i tshe yang blta bar mi bya bag dang ldan par bgyis te gtam smra bar mi bya ste/ gal te gtam smra tshe bsams bab dag ni dge sbyong ste/ snyigs ma'i 'jig rten du pad ma'i dam gyis ma gos pa ltar gnas par bya'o snyam nas rgan mo la ma'i 'du shes/ rang las cung zad rgan pa la a phyi'i 'du shes/ rang las gzhon pa la sring mo'i 'du shes bskyed par bya zhing / na tshod chung ba dag la tshul min gyis brnyas par mi bya'o/ /gal te tshul min yid byed byung ba'i tshe zhib tu dpyad cing brtag par bya'o/ /'di ltar brtag par bya ste/ lus kyi spyi bo nas rkang mthil gyi bar du brtag par bya'o/ de nas lus kyi nang du brtag par bya ste/ lus kyi nang mi gtsang ba sna tshogs kyis kun nas gang zhing 'dzag pa nyid yin no zhes tshul min yid byed de yongs su bsal bar bya'o/ /yang bcom ldan 'das kyis bka' stsal pa/ dper na/ rtswa skam la me mched pa'i tshe de las rings rtabs kyis bzlos dgos pa ltar lam la slob pa'i skye bo dag 'dod chags kyi yul rnams rgyang ring du 'dor bar bya'o/ /yang bcom ldan 'das kyis bka' stsal pa/ skye bo zhig yid 'dod chags kyis gdungs te chags sems de zhi ba'i thabs ma rnyed nas rang gi mtshan ma sta gris bcad do/ /bcom ldan 'das kyis de la 'di skad ces bka' stsal to/ /khyod kyis mtshan ma gcod pa las sems gcod pa mchog go /sems ni 76-1-286b gtso bo ste gtso bo chod na 'khor ngang gis 'gag par 'gyur ro/ /phyin ci log gi sems ma bcad par mtshan ma bcad pas ci la phan zhes gsungs so/ /de nas mi de shi bar gyur to/ /bcom ldan 'das kyis bka' stsal pa/ 'jig rten gyi skye bo log lta can dag mi gti mug can 'di dang 'dra ba'i blun po'o/ /yang gzhon nu ma zhig skyes pa zhig dang dus btab pa las skyes pa de dus su ma slebs pas gzhon nu ma de 'gyod nas tshigs su bcad pa smras pa/ 'dod chags khyod kyi rtsa ba nga yis shes/ /khyod ni rnam par rtog las byung ba yin/ /khyod la nga yis rtog par ma byas tshe/ khyod ni nam yang skye bar mi 'gyur ro/ /zhes smras so/ /de'i tshe lam de nas bcom ldan 'das gshegs pas gsan te/ /dge sbyong dag la gsungs pa/ dge sbyong dag zungs shig /tshigs su bcad pa 'di ni bcom ldan 'das sangs rgyas 'od srungs kyis gsungs pa 'jig rten du grags shing rgyun 'byams pa'o/ /yang bcom ldan 'das kyis bka' stsal pa/ sems can 'dod yon la chags pas sdug bsngal 'byung zhing sdug bsngal las 'jigs pa 'byung bar 'gyur ro/ /chags pa med pas sdug bsngal mi 'byung / sdug bsngal med pas 'jigs pa 'byung bar mi 'gyur ro/ /yang bcom ldan 'das kyis bka' stsal pa/ skye bo dag lam la slob pa'i tshe mi gcig mi khri phrag mang po dag dang g.yul 'gyed pa lta bu ste/ dper na/ mi zhig go gyon mtshon thogs nas phyir thon pa dang 'jigs sngangs kyis phyir ldog pa'am/ lam gyi bar mdor ldog pa'am/ g.yul bkyes pas bsad pa'am/ rgyal nas rang yul du 'khor te gtso bor 'gyur ba'ang yod do/ /de bzhin du shin tu brtan pa'i yid kyis spyod pa la 'bad cing brtson pas gti mug gis bslus par ma gyur na 'dod chags nges par spangs te 'bras bu 'thob par 'gyur ro/ /de'i tshe dge sbyong zhig mtshan mo klog pa byas pa'i tshe gdangs drag la myur ba las gdungs pas 'gyod de khyim du 'bab bo snyam du sems par gyur to/ /de'i tshe bcom ldan 'das 76-1-287a kyis de bos nas bka' stsal pa/ khyod sngon khyim na gnas pa'i tshe las ci zhig bgyid/ gsol pa/ pi wang brdung ba'i las byed pa lags so/ /bka' stsal pa/ rgyud lhod na cir 'gyur/ gsol pa/ sgra 'byung bar mi 'gyur ro/ / rgyud dam na cir 'gyur/ sgra 'chad par 'gyur ro/ /rgyud ran par bcas na cir 'gyur/ rgyud mtho dman med cing snyoms par 'gyur lags so/ /de nas bcom ldan 'das kyis dge sbyong de la bka' stsal pa/ lam la slob pa'i tshe yang de lta bur sems snyoms par bsdams pas lam thob par 'gyur ro/ /yang bcom ldan 'das kyis bka' stsal pa/ lam la slob pa dang / /dper na/ lcags bzhu sbyang byas te rim gyis brdungs pas g.ya' dag par byas pa de las snod ci byed kyang las su rung bar 'gyur ba lta bu ste/ lam la slob pa dag sems kyi dri ma rim gyis dag par byas te brtson pas byang chub sbyang bar byas pas gdon mi za bar byang chub 'grub par 'gyur te/ gzhan du na rang nyid skyo bar 'gyur/ skyobs nyon mongs par 'gyur/ kun nas nyon mongs pas lam las ldog par 'gyur/ lam las log pas ldig pa'i las gsogs par 'gyur ro/ /yang bcom ldan 'das kyis bka' stsal pa/ skye bo dag la mal spyod kyang sdug bsngal la lam la mi spyod kyang sdug bsngal lo/ sems can skyes nas rga ba'i bar dang / rgas nas na ba dang 'chi ba'i bar sdug bsngal 'byung ba ni dpag par dka' ste/ sems nyon mongs pas dkrugs shing sdig pa'i las bsags pas skye 'chi brgyud mar 'byung ba'i phyir sdug bsngal brjod kyis longs pa ma yin no/ /yang bcom ldan 'das kyis bka' stsal pa/ sems can ngan song las grol te mi'i lus rten thob pa dka'/ mi'i lus rten thob kyang bud med kyi rten las log ste skyes pa'i dngos po thob pa dka'/ skyes pa'i lus rten thob kyang dbang po kun tshang ba dka'/ dbang po thams cad tshang yang yul dbus su skye ba dka'/ yul dbus su skyes kyang sangs rgyas kyi bstan pa'i rjes su slob pa dka'/ sangs rgyas kyi bstan pa'i rjes 76-1-287b su bslabs kyang chos ldan gyi rgyal po dang 'phrad pa dka'/ chos ldan gyi rgyal po dang phrad kyang byang chub sems dpa'i khyim du skye ba dka'/ byang chub sems dpa'i khyim du skyes kyang mchog gsum la dad cing sangs rgyas bzhugs pa'i 'jig rten gyi khams su skye ba dka'o/ /yang bcom ldan 'das kyis dge sbyong dag la bka' stsal pa/ mi'i srog ji tsam du gnas/ dge sbyong zhig gis gsol pa/ zhag bcu tsam du gnas so/ /bka' stsal pa/ bu khyod kyis da dung lam la sbyang ba ma byas so/ /yang dge sbyong zhig la bka' stsal pa/ mi'i srog ci tsam du gnas/ des gsol pa/ 'tshal ma 'tshal ba'i yun tsam du'o/ /bka' stsal pa/ song zhig khyod kyis kyang lam la sbyang ba ma byas so/ /yang dge sbyong zhig la bka' stsal pa/ mi'i srog ji tsam du gnas/ des gsol pa/ dbugs 'byung 'jug gi yun tsam du gnas lags so/ /de nas bcom ldan 'das kyis gsungs pa/ legs so/ /de'i phyir bu khyod kyis lam la sbyang ba byas so zhes brjod par bya'o/ /yang bcom ldan 'das kyis bka' stsal pa/ nyan thos rnams de bzhin gshegs pa las thag ring dpag tshad stong du phyin yang bcom ldan 'das kyi 'dul ba'i bslab pa yid la byas na gdon mi za bar 'bras bu thob par 'gyur ro/ /gal te ston pa'i spyan sngar gnas kyang don ma yin pa yid la byas na nam yang lam gyi 'bras bu thob par mi 'gyur ro/ /de'i gnad ni spyod pa la rag las te/ ston pa'i drung du gnas kyang rang gis ma sbyang na don cung zad tsam yang mi rnyed do/ /yang bcom ldan 'das kyis bka' stsal pa/ skye bo dag lam la spyod pa ni sbrang rtsi lta bu ste/ mtha' dbus kun nas ro mngar ba'o/ /sangs rgyas kyi chos kyang de ltar kun nas dga' ba dang bde ba'i don dang ldan pa spyad pas lam thob par 'gyur ro/ / yang bcom ldan 'das kyis bka' stsal pa/ skye bo dag la mal spyad pas 'dod chags kun drung nas 'byin par 'gyur te/ /dper na/ bar snang la bkal ba'i phreng ba'i rdog po re re nas blangs pas phreng ba rim gyis zad par 'gyur ba ltar/ des kyang sgrib pa thams cad rim gyis zad de lam 76-1-288a gyi 'bras bu 'thob par 'gyur ro/ /yang bcom ldan 'das kyis bka' stsal pa/ dge sbyong dag la mal slob pa'i tshe khal bkal pa'i ba lang 'dam dbyin nas ji tsam ngal yang 'gram gnyis gang rung du phyin te ngal bso snyam pa med pa ltar/ dge sbyong 'dod pa la 'dam gyi 'jigs pa de lta bu las kyang ches 'jigs shing drang po'i sems kyis gcig tu lam la 'grus pas 'khor ba'i sdug bsngal las bskyab par bya'o/ /yang bcom ldan 'das kyis bka' stsal pa/ de bzhin gshegs pas rgyal po dang blon po'i 'byor pa phun sum tshogs pa thams cad mchil ma dang thal ba lta bur gzigs so/ /gser dngul sogs rin po che rnams gseg ma dang gyo mo lta bur gzigs so/ /gos dar sogs rin thang can gyi gos rnams gos hrul lta bur gzigs so/ /stong chen po'i 'jig rten gyi khams skyu ru ra lta bur gzigs so/ /rgya mtsho chen po bzhi'i chu rkang mthil mnyed pa'i 'bru mar lta bur gzigs so/ /thabs mkhas kyi sgo rin po ches gang ba'i gzings lta bur gzigs so/ /theg pa chen po rmi lam gyi gser dang gos lta bur gzigs so/ /sangs rgyas kyi lam 'tshol ba mig sngar gnas pa'i me tog lta bur gzigs so/ /ting nge 'dzin 'tshol ba lhun po ltar brtan pa'i ka ba lta bur gzigs so/ /yongs su mya ngan las 'das pa 'tshol ba nyin mtshan kun tu sad pa lta bur gzigs so/ /yang dag dang yang dag ma yin pa klu drug gi gar lta bur gzigs so/ /btang snyoms pa bden pa nyid lta bur gzigs so/ /dar rgud dus bzhi'i ljon shing lta bur gzigs so/ /de skad ces bcom ldan 'das kyis bka' stsal to/ /'khor gyi dge slong thams cad yi rangs te bcom ldan 'das kyis gsungs pa la mngon par bstod do/ /de yang Ti'u To'u wang gi lo nyer bzhi ba shing pho stag lo'i zla ba bzhi pa'i tshes brgyad la lho nub kyi mtshams nas 'od kyi phung po zhig pho brang du byung ba rgyal pos blon po ltas shes pa dag la dris pas de phyogs su bdag nyid chen po 'byung ba'i ltas yin pa dang / lo stong nas de'i bstan pa yul 'dir dar bar lung bstan to/ /de nas mu wang gi lo nga 76-1-288b gsum pa chu pho sprel lo'i zla ba gnyis pa'i tshes bco lnga la ston pa mya ngan las 'das tshul bstan/ de nas lo chig stong bcu gsum pa la hAn ming d+hi rgyal po yung phing gi lo bdun pa'i zla ba dang po'i tshes bco lnga'i mtshan mo rgyal po'i rmi lam du skyes bu chen po srid du 'dom do lhag mnga' ba gser gyi mdog can nyi 'od lta bu'i 'od 'phro ba zhig pho brang du babs te nga'i bstan pa yul 'dir rim gyis dar bar 'gyur ro zhes gsungs so/ /phyi nyin blon po rnams la dris pas blon po h+phu yi zhes bya bas/ sngon Ti'u To'u wang gi dus kyi lung bstan zhus shing rgyal po'i rmi lam de dang mthun no zhes gsol/ de nas rgyal pos yig rnying rnams bklags pa sa Ti'u To'u wang gi dus kyi lung bstan de rnyed nas dgyes shing / rgyal pos blon po wang tsun sogs mi bco brgyad mngags te nub phyogs su sangs rgyas kyi bstan pa 'tshol bar btang / de dag yA shi zhes pa'i rgyal khams su 'byor ba dang / de skabs rgya gar nas 'od srungs kyi rigs las dgra bcom pa ma tang gi ba dang / paN+Di ta go b+ha ra na gnyis kyis rta dkar po cig la ston pa'i bris thang gcig /gsung rab mdo dum bu zhe gnyis pa sogs theg pa che chung gi mdo dang/ ston pa'i rang bsrel bum pa gang bcas byon pa lam thog tu 'dzom ste/ gong pheng gi lo bcu pa'i zla ba bcu gnyis pa'i gnam gang la le'u yang mkhar du 'byor/ de nas lo drug na dgra bcom pa dang / paN+Di ta gnyis kyis rgya'i bon po btul/ de nas dgra bcom pa dang / paN+Di ta gnyis kyis bar snang la 'phags te/ rgyal po la tshigs su bcad pa gsungs pa/ wa skyes seng ge'i rigs ma yin/ /sgron me nyi zla bzhin gsal min/ /rdzing bur rgya mtsho shong ba min/ /ri 'bur lhun bzhin ltar mdzes min/ /chos sprin 'jig rten kun la khyab/ /chos char 'gro rgyud myu gu brlan/ /rdzu 'phrul rmad byung mngon du bstan/ /phyogs rnams kun tu 'gro ba 'dul/ /zhes gsungs nas rdzu 'phrul gyis rgya gar du gshegs so/ /de lta bu'i khungs dang ldan pa'i mdo 'di sngon bod du ma 'gyur zhing rgya'i bka' 'gyur na bzhugs pa las gnam skyong gong ma'i 76-1-289a bkas many+dzu'i skad du bsgyur zhing bod skad du bka' bcu su b+hag shre yang+h+wa dza dang bka' bcu d+h+yA nA riSh+DaM byAs gnyis kyis bsgyur/ sog skad du rab 'byams pa pradz+nyod ya byA sas bsgyur ba/ rgyal bstan la lhag par dad pa'i sbyin bdag hIng lIn gyis chos sbyin rgya cher spel ba'i phyir dngul srang brgyas skad bzhi shan sbyar ba'i sbar bsgrubs te ci lcogs shig sbar nas zhing mchog dam par 'gyur ba rnams la phul ba'i dge ba'i rtsa bas rgyal bstan rin po che dar zhing rgyas la yun ring du gnas pa dang / 'jig rten gyi khams su nad dang mu ge 'khrugs rtsod nam yang mi 'byung zhing ma gyur sems can thams cad myur ba nyid du bla na med pa'i byang chen thob par gyur cig /sarba mang+ga laM/ / |