@##/ /rgya gar skad du/ Ar+ya tsa tur d+ha rma nir de sha na nA ma ma hA yA na sU tra/ bod skad du/ 'phags pa chos bzhi bstan pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das sum cu rtsa gsum lha'i nang na lha'i 'dun sa chos bzang na dge slong lnga brgya tham pa'i dge slong gi dge 'dun chen po dang / byams pa dang / 'jam dpal la sogs pa byang chub sems dpa' sems dpa' chen po rab tu mang po dang thabs cig tu bzhugs te/ de nas bcom ldan 'das kyis byang chub sems dpa' sems dpa' chen po byams pa la bka' stsal pa/ byams pa byang chub sems dpa' sems dpa' chen po chos bzhi dang ldan na sdig pa byas shing bsags pa zil gyis non par 'gyur ro/ /bzhi gang zhe na/ 'di lta ste/ rnam par sun 066-164 'byin pa kun tu spyod pa dang / gnyen po kun tu spyod pa dang / sor chud par byed pa'i stobs dang / rten gyi stobs so/ /de la rnam par sun 'byin pa kun tu spyod pa ni mi dge ba'i las spyad na de la 'gyod pa mang ba yin no/ /de la gnyen po kun tu spyod pa ni mi dge ba'i las byas nas kyang dge ba'i las la shin tu brtson pa'o/ /de la sor chud par byed pa'i stobs ni sdom pa yang dag par blangs pas mi phyed pa'i sdom pa thob pa'o/ /de la rten gyi stobs ni sangs rgyas dang | chos dang / dge 'dun la skyabs su 'gro ba dang / byang chub kyi sems mi gtong ba ste/ de stobs dang ldan pa la rten pas sdig pas zil gyis gnon par mi nus sa so/ /byams pa byang chub sems dpa' sems dpa' chen po chos bzhi po de dag dang ldan na sdig pa byas shing bsags pa zil gyis non par 'gyur ro/ /byang chub sems dpa' sems dpa' chen pos mdo 'di rtag tu bklag par bya'o/ /kha ton du bya'o/ /bsam par bya'o/ /bsgom par bya'o/ / mang du bya'o/ /des na nyes par spyad pa 'bras bu 'byin mi nus par 'gyur ro// bcom ldan 'das kyis de skad ces bka' stsal nas/ byang chub sems dpa' sems dpa' chen po byams pa dang / dge slong de dag dang / byang chub sems dpa' de dag dang / brgya byin la sogs pa'i lha'i bu rnams dang / thams cad dang ldan pa'i 'khor de dag yi rangs te / bcom ldan 'das kyis gsungs pa la mngon par bstod do// // 'phags pa chos bzhi bstan pa zhes bya ba theg pa chen po'i mdo rdzogs so|/ // rgya gar gyi mkhan po su ren dra bo d+hi dang / zhu chen gyi lo ts+tsha ba ban de |