།༄། ། རྒྱ་གར་སྐད་དུ། ཨཱརྱ་སཱ་ག་ར་ནཱ་ག་རཱ་ཛ་པ་རི་པྲྀཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་ཀླུའི་རྒྱལ་པོ་རྒྱ་མཚོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱ་མཚོ་ཆེན་པོ་ན་ཀླུའི་རྒྱལ་པོ་རྒྱ་མཚོའི་གནས་ཀླུའི་རྒྱལ་པོ་རྒྱ་མཚོའི་འཁོར་གྱི་ཁྱམས་བཀོད་པ་ན། དགེ་སློང་བརྒྱད་སྟོང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་མངོན་པར་ཤེས་པ་རབ་ཏུ་མང་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་མང་པོ་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེ་འདུས་པར་མཁྱེན་ནས་ཀླུའི་རྒྱལ་པོ་རྒྱ་མཚོ་ལ་བཀའ་སྩལ་པ། ཀླུའི་བདག་པོ་ཀྱེ་མ་འཇིག་རྟེན་གནས་པ་འདི་ནི་ལས་རྣམ་པ་སྣ་ཚོགས་ཀྱིས་བསྐྱོད་ནས་སེམས་ཀྱི་དམིགས་པ་སྣ་ཚོགས་ཀྱིས་ལས་རྣམ་པ་སྣ་ཚོགས་མངོན་པར་འདུ་བྱ་བ་མངོན་པར་འདུ་བྱེད་དེ། དེ་ཡིས་འགྲོ་བ་ཡང་སྣ་ཚོགས་སུ་གྱུར་ཏོ། །ཀླུའི་བདག་པོ་འཁོར་འདི་དང ། རྒྱ་མཚོ་ཆེན་པོ་འདི་ན་གཟུགས་རྣམ་པ་སྣ་ཚོགས་ཇི་སྙེད་པ་དང ། གཟུགས་ཐ་མལ་པ་ཇི་སྙེད་སྣང་བ་ལ་ལྟོས། ཀླུའི་བདག་པོ་འདི་དག་ཐམས་ཅད་ནི་རང་རང་གི་སེམས 53.222b དང ། ལུས་དང ། ངག་དང ། ཡིད་ཀྱི་ལས་དགེ་བ་དང་མི་དགེ་བ་སྣ་ཚོགས་སུ་བྱས་པས་སྣ་ཚོགས་སུ་གྱུར་པ་དག་གོ། །སེམས་ནི་གཟུགས་མེད་པ། བསྟན་དུ་མེད་པ། གཟུང་དུ་མེད་པའོ། །ཀླུའི་བདག་པོ་འདི་ལྟར་ཐམས་ཅད་ནི་བཅོས་མ་སྒྲུབ་པས་གནས་པའི་མཚན་ཉིད་དེ་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པའོ། །དེ་དག་ནི་ལས་ཇི་ལྟར་བསགས་པས་བསྒྲུབས་པ་སྣ་ཚོགས་སུ་བྱས་པ་དག་སྟེ། འདི་ལ་བྱེད་པ་པོ་གང་ཡང་མེད་དོ། །ཀླུའི་བདག་པོ་འདི་ལྟར་ཆོས་འདི་དག་ཐམས་ཅད་ནི་བསམ་གྱིས་མི་ཁྱབ་པ་སྒྱུ་མའི་མཚན་ཉིད་ཀྱི་ངོ་བོ་ཉིད་དོ། །ཀླུའི་བདག་པོ་དེ་ལ་བྱང་ཆུབ་སེམས་དཔའ་མཁས་པས་ཆོས་ཐམས་ཅད་སྒྲུབ་པས་གནས་པའི་མཚན་ཉིད་དུ་ཤེས་ནས་དགེ་བའི་ལས་མངོན་པར་འདུ་བྱ་བ་དག་མངོན་པར་འདུ་བྱའོ། །དེ་དགེ་བའི་ལས་མངོན་པར་འདུ་བྱ་བར་འདུ་བྱེད་ན་སྒྲུབ་པས་གནས་པའི་མཚན་ཉིད་ཀྱི་ཆོས་རྣམས་ཀྱིས་ཕུང་པོ་དང ། ཁམས་དང ། སྐྱེ་མཆེད་གང་དག་མངོན་པར་འགྲུབ་པ་དེ་དག་མཛེས་ཤིང་བལྟ་ན་སྡུག་ལ་གཟུགས་བཟང་བ་དག་ཏུ་མངོན་པར་འགྲུབ་བོ། །ཀླུའི་བདག་པོ་དེ་བཞིན་གཤེགས་པའི་སྐུ་བསོད་ནམས་བྱེ་བ་ཁྲག་ཁྲིག་བརྒྱ་སྟོང་ལས་སྐྱེས་པ་མཚན་རྣམས་ཀྱིས་ཇི་ལྟར་བརྒྱན་པ་དང ། ཇི་ལྟར་བསྒྲུབས་པ་དང ། དཔལ་གྱིས་ལྷ་དང་མིར་བཅས་པའི་འཇིག་རྟེན་ཟིལ་གྱིས་མནན་ནས་མ་ཆགས་པར་བཞུགས་ཏེ། གང་ན་བརྒྱ་སྟོང་ཕྲག་བཅུ་ལ་དབང་སྒྱུར་བའི་ཚངས་པ་ཆེན་པོ་འདི་དག་མོག་མོག་པོར་གྱུར་ནས་དེ་བཞིན་གཤེགས་པའི་སྐུ་ལ་ལྟ་ན་ཡང་མིག་ཟི་ཟི་པོར་གྱུར་པ་ལ་ལྟོས། ཀླུའི་བདག་པོ་བྱང་ཆུབ་སེམས་དཔའ་འདི་དག་གི་གཟུགས་དང ། 53.223a མཚན་དང ། ལུས་དང ། རྒྱན་རྣམས་ལ་ལྟོས། ཀླུའི་བདག་པོ་དེ་དག་ཐམས་ཅད་ནི་དགེ་བའི་ལས་མངོན་པར་འདུ་བྱ་བ་རྣམས་ཀྱིས་མངོན་པར་འདུས་བྱས་པས་བརྒྱན་པ་བསྒྲུབས་པའོ། །ཀླུའི་བདག་པོ་ཁྱོད་ཀྱི་བཀོད་པ་འདི་ཡང་བསོད་ནམས་ཐམས་ཅད་ལས་བྱུང་བའོ། །ཀླུའི་བདག་པོ་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་འདི་དག་གི་བཀོད་པ་གང་ཡིན་པ་དེ་དག་ཐམས་ཅད་ཀྱང་བསོད་ནམས་ལས་བྱུང་བའོ། །ཀླུའི་བདག་པོ་རྒྱ་མཚོ་ཆེན་པོ་འདི་ན་གང་དག་ལུས་སྣ་ཚོགས་གཟུགས་མི་སྡུག་ཅིང་དབྱིབས་མ་ལེགས་པ་དང ། དབྱིབས་ལེགས་པ་དང ། ལུས་རགས་ཤིང་ཆེ་བ་རྣམས་དང ། གང་དག་ལུས་ཕྲ་ཞིང་ཆུང་བ་དེ་དག་ཐམས་ཅད་ཀྱང་རང་རང་གི་སེམས་དང ། ལུས་དང ། ངག་དང ། ཡིད་ཀྱི་ལས་དགེ་བ་དང་མི་དགེ་བས་སྣ་ཚོགས་སུ་གྱུར་པ་དག་གོ། །ཀླུའི་བདག་པོ་དེ་བས་ན་ལས་བདག་གིར་བྱ་བ་ལས་ཀྱི་བགོ་སྐལ་ལ་སྤྱོད་པ། ལས་ཀྱི་སྐྱེ་གནས་པ། ལས་ཀྱི་རྣམ་པར་སྨིན་པ་ལ་རྟེན་པར་བྱའོ་ཞེས་ཀླུའི་བདག་པོ་ཁྱེད་ཀྱྀས་དེ་ལྟར་སློབས་ཤིག་དང ། ལས་བདག་གིར་བྱ་བ། ལས་ཀྱི་བགོ་སྐལ་ལ་སྤྱོད་པ། ལས་ཀྱི་རྣམ་པར་སྨིན་པ་ལ་རྟེན་པ་ཁྱེད་དགེ་བའི་ཆོས་མངོན་པར་འདུ་བྱ་བ་ལ་བློ་འཇུག་པར་འགྱུར་རོ། །ལྟ་བ་ཆུད་གསོན་པར་བྱེད་པར་མི་འགྱུར་རོ། །ཆད་པ་དང་རྟག་པར་ལྟ་བ་ལ་གནས་པར་མི་འགྱུར་རོ། །ཁྱེད་ཀྱིས་སྦྱིན་པའི་གནས་རྣམས་མགུ་བར་བྱེད་པར་འགྱུར་རོ། །མགུ་བར་བྱས་ནས་ཀྱང་སྟི་སྟང་བྱེད་པར་འགྱུར་རོ། །སྟི་སྟང་བྱས་པའི་རྒྱུ་ལས་བྱུང་བས་ལྷ་དང་བཅས་པའི་འཇིག་གྱིས་སྟི 53.223b སྟང་བྱས་པར་འགྱུར་རོ། །ཀླུའི་བདག་པོ་ཆོས་གཅིག་གིས་སེམས་ཅན་ཐམས་ཅད་ཀྱི་ངན་འགྲོ་ངན་སོང་མི་ཁོམ་པའི་ལམ་ཐམས་ཅད་ཡང་དག་པར་གཅོད་དོ། །ཆོས་གཅིག་པོ་གང་ཞེ་ན། འདི་ལྟ་སྟེ། བདག་ཇི་ལྟར་གྱུར་ཅིང་ཉིན་ཞག་རྣམས་འགྲོ་ཞིག་གུ་སྙམ་དུ་དགེ་བའི་ཆོས་རྣམས་ལ་རབ་ཏུ་རྟོག་པའོ། །དེ་དེ་ལྟར་དགེ་བའི་ཆོས་ལ་རབ་ཏུ་རྟོག་པ་མང་བས་མི་དགེ་བའི་སེམས་དང་སེམས་ལས་བྱུང་བའི་ཆོས་རྣམས་ཀྱི་གོ་སྐབས་མི་འབྱེད་དོ། །དེ་མི་དགེ་བའི་ཆོས་སྤངས་ཏེ་དགེ་བའི་ཆོས་དང་ལྡན་པས་བསམ་པ་དག་པའི་སེམས་ཅན་འདི་ལྟ་སྟེ། སངས་རྒྱས་དང ། བྱང་ཆུབ་སེམས་དཔའ་དང ། འཕགས་པ་ཉན་ཐོས་དང ། རང་སངས་རྒྱས་རྣམས་དང་འགྲོགས་པ་རྙེད་པར་འགྱུར་རོ། །ཀླུའི་བདག་པོ་དེ་ལ་དགེ་བའི་ཆོས་རྣམས་གང་ཞེ་ན། དགེ་བའི་ཆོས་རྣམས་ཤེས་བྱ་བ་ནི་ལྷ་དང་མིའི་ཕུན་སུམ་ཚོགས་པའི་རྩ་བ་དང་རྟེན་ཏོ། །ཉན་ཐོས་དང་རང་སངས་རྒྱས་ཀྱི་བྱང་ཆུབ་ཀྱི་རྩ་བ་དང་རྟེན་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྩ་བ་དང་རྟེན་ཏོ། །དེ་ལ་རྩ་བ་དང་རྟེན་གང་ཞེ་ན། གང་འདི་དགེ་བ་བཅུའི་ལས་ཀྱི་ལམ་རྣམས་སོ། །དགེ་བ་བཅུའི་ལས་ཀྱི་ལམ་དེ་དག་ཀྱང་གང་ཞེ་ན། འདི་ལྟ་སྟེ། སྲོག་གཅོད་པ་སྤོང་བ་དང ། མ་བྱིན་པར་ལེན་པ་དང ། འདོད་པ་ལ་ལོག་པར་གཡེམ་པ་དང ། བརྫུན་སྨྲ་བ་དང ། ཕྲ་མ་དང ། ཚིག་རྩུབ་པོ་དང ། ཚིག་ཀྱལ་པ་དང ། བརྣབ་སེམས་དང ། གནོད་སེམས་དང ། ལོག་པར་ལྟ་བ་སྤོང་བའོ། །འདི་དག་ནི་དགེ་བ་བཅུའི་ལས་ཀྱི་ལམ་ཞེས་བྱ་སྟེ། འཇིག་རྟེན་པ་དང ། འཇིག་རྟེན་ལས་འདས་པའི་ཕུན་སུམ་ཚོགས་པ་རྣམས་ཀྱི་རྩ་བ་དང་རྟེན་ཏོ། །ཀླུའི་བདག་པོ་དེ་ལ་སྲོག་གཅོད་པ་སྤངས་པའི་སྐྱེས་བུ་གང་ཟག་ནི 53.224a རབ་ཏུ་ཞི་བར་བྱེད་པའི་ཆོས་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ། འདིས་སེམས་ཅན་ཐམས་ཅད་ལ་མི་འཇིགས་པ་བྱིན་པ་ཡིན་ནོ། །དེ་སེམས་སེམས་ཅན་ཐམས་ཅད་ལ་བྱམས་པར་དམིགས་པ་ལ་གནས་པ་ཡིན་ནོ། །དེའི་ཞེ་སྡང་གི་བག་ཆགས་ཡང་དག་པར་ཆད་པ་ཡིན་ནོ། །དེས་ནད་ཉུང་བར་འགྱུར་བར་སྒྲུབ་པ་ཡོངས་སུ་བཟུང་བ་ཡིན་ནོ། །དེས་ཚེ་རིང་བར་འགྱུར་བའི་ས་བོན་བཏབ་པ་ཡིན་ནོ། །དེ་ལ་མི་མ་ཡིན་པ་རྣམས་ཀྱང་སྲུང་བ་དང ། བསྐྱབ་པ་དང ། སྦེད་པར་བྱེད་དོ། །བདེ་བར་ཉལ་ཞིང་བདེ་བར་སད་པ་དང ། སྡིག་པའི་རྨི་ལམ་མི་མཐོང་བ་ཡིན་ནོ། །དེ་ཉལ་བ་ན་ཡང་ལྷ་རྣམས་སྲུང་བར་བྱེད་དོ། །དེ་ལ་ཤར་གཉེར་བ་མེད་པ་ཡིན་ཏེ། ཤར་གཉེར་བའི་བག་ལ་ཉལ་མེད་པ་ཡིན་ནོ། །ངན་འགྲོ་ཐམས་ཅད་ཀྱིས་མི་འཇིགས་པ་དང་ཤི་འཕོས་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ཀླུའི་བདག་པོ་སྲོག་གཅོད་པ་སྤངས་པའི་སྐྱེས་བུ་གང་ཟག་ནི་རབ་ཏུ་ཞི་བར་བྱེད་པའི་ཆོས་བཅུ་པོ་དེ་དག་འཐོབ་བོ། །སྲོག་གཅོད་པ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་ན། དེ་དགེ་བའི་རྩ་བ་དེས་བྱང་ཆུབ་ཐོབ་པ་ན་སེམས་ཀྱི་དབང་གིས་ཚེ་ཚད་མེད་པར་འགྱུར་རོ། །ཀླུའི་བདག་པོ་མ་བྱིན་པར་ལེན་པ་སྤངས་པའི་སྐྱེས་བུ་གང་ཟག་ནི་ཡིད་བརྟན་པའི་ཆོས་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ། ལོངས་སྤྱོད་ཆེ་ཞིང་དེའི་ལོངས་སྤྱོད་དེ་དག་རྒྱལ་པོ་དང ། རྐུན་པོ་དང ། མེ་དང ། ཆུ་དང ། མི་མཛའ་བ་དང ། ཉེ་མཚམས་ཀྱིས་མི་འཕྲོགས་པ་ཡིན་ནོ། །སྐྱེ་བོ་མང་པོའི་ཡིད་དུ་འོང་བས་སྐྱེ་བོ་མང་པོ་དགའ་བ་ཡིན་ནོ། །ཉེ་བའི་ཉོན་མོངས་པ་མེད་པ་ཡིན་ནོ། །ནོར་འབྲེལ་པ་རྣམས་ལ་ཡིད་བརྟན་དུ་རུང་བ་ཡིན 53.224b ནོ། །ཕྱོགས་དང་ཕྱོགས་མཚམས་རྣམས་སུ་དེའི་བསྔགས་པ་རྗོད་ཅིང་དེ་ལ་ཕ་རོལ་གྱི་གནོད་པའི་འཇིགས་པ་ཐམས་ཅད་མེད་པ་ཡིན་ནོ། །དེའི་དགེ་བ་བརྗོད་པའི་སྒྲ་དང་ཚིགས་སུ་བཅད་པ་མངོན་པར་འཕགས་པར་འགྱུར་རོ། །བག་ཚ་བ་མེད་པར་འཁོར་གྱི་ནང་དུ་འཇུག་སྟེ་ཞུམ་ཞུམ་པོ་མེད་པར་འགྱུར་རོ། །ཚེ་དང ། སྟོབས་དང ། ཁ་དོག་དང ། བདེ་བ་དང ། སྤོབས་པ་དང ། ལོངས་སྤྱོད་དང ། ཕྱུག་པ་ཕུན་སུམ་ཚོགས་པ་རབ་ཏུ་འཛིན་པར་འགྱུར་རོ། །དེའི་སེམས་སྦྱིན་པ་ཡང་དག་པར་འགེད་པ་ལ་འགྲོ་བར་འགྱུར་རོ། །ལུས་དང་བྲལ་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ཀླུའི་བདག་པོ་དེ་ལྟར་མ་བྱིན་པར་ལེན་པ་སྤངས་པའི་སྐྱེས་བུ་གང་ཟག་ནི་ཡིད་བརྟན་པའི་ཆོས་བཅུ་པོ་དེ་དག་འཐོབ་བོ། །མ་བྱིན་པར་ལེན་པ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་དེ་བཞིན་གཤེགས་པ་ཉེ་བའི་ཉོན་མོངས་པ་ཅན་མ་ཡིན་པའི་ཡེ་ཤེས་ཅན་དུ་རང་གི་མངོན་པར་ཤེས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཀླུའི་བདག་པོ་འདོད་པ་ལ་ལོག་པར་གཡེམ་པ་སྤངས་པའི་སྐྱེས་བུ་གང་ཟག་ནི་མཁས་པས་བསྔགས་པའི་ཆོས་བཞི་འཐོབ་བོ། །བཞི་གང་ཞེ་ན། འདི་ལྟ་སྟེ། དབང་པོ་སྡོམ་པ་དང ། རྒོད་པ་ལས་ཡང་དག་པར་འདའ་བ་དང ། འཇིག་རྟེན་ཐམས་ཅད་ཀྱིས་བསྔགས་པ་དང ། ཆུང་མ་མི་འཕྲོགས་པ་སྟེ། ཀླུའི་བདག་པོ་འདོད་པ་ལ་ལོག་པར་གཡེམ་པ་སྤངས་པའི་སྐྱེས་བུ་གང་ཟག་ནི་མཁས་པས་བསྔགས་པའི་ཆོས་བཞི་པོ་དེ་དག་འཐོབ་བོ། །འདོད་པ་ལ་ལོག 53.225a པར་གཡེམ་པ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་སྐྱེས་བུ་ཆེན་པོའི་མཚན་མདོམས་ཀྱི་སྦ་བ་སྦུབས་སུ་ནུབ་པ་འཐོབ་བོ། །ཀླུའི་བདག་པོ་བརྫུན་དུ་སྨྲ་བ་སྤངས་པའི་སྐྱེས་བུ་གང་ཟག་ནི་ལྷ་དང་མིས་བསྔགས་པའི་ཆོས་བརྒྱད་འཐོབ་བོ། །བརྒྱད་གང་ཞེ་ན། འདི་ལྟ་སྟེ། ཨུད་པ་ལའི་དྲི་འབྱུང་བས་ཁ་ཡོངས་སུ་དག་པ་འཐོབ་པར་འགྱུར་བ་དང ། འཇིག་རྟེན་ཐམས་ཅད་ཀྱི་ཚད་མར་འགྱུར་བ་དང ། ལྷ་དང་མི་དགའ་བས་དབང་གཅིག་པོར་འགྱུར་བ་དང ། དབུགས་འབྱིན་པས་འབྱུང་པོ་རྣམས་དོགས་པ་མེད་པར་འགྱུར་བ་དང ། ལྷག་པའི་བསམ་པ་ཕུན་སུམ་ཚོགས་པས་ལུས་དང ། ངག་དང ། སེམས་ཡོངས་སུ་དག་པར་འགྱུར་བ་དང ། ཚིག་འཁྲུལ་པ་མེད་པས་མཆོག་ཏུ་དགའ་བ་མང་བར་འགྱུར་བ་དང ། ཚིག་བཟུང་བར་འོས་པས་ངག་ཉན་པར་འགྱུར་བ་དང ། ཤེས་རབ་ཐོབ་པས་ལྷ་དང་མི་རྣམས་ཀྱི་ནང་དུ་ཁ་ན་མ་ཐོ་བ་མེད་པར་འགྱུར་བ་ཡིན་ཏེ། ཀླུའི་བདག་པོ་བརྫུན་དུ་སྨྲ་བ་སྤངས་པའི་སྐྱེས་བུ་གང་ཟག་ནི་ལྷ་དང་མིས་བསྔགས་པའི་ཆོས་བརྒྱད་པོ་དེ་དག་འཐོབ་བོ། །བརྫུན་དུ་སྨྲ་བ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་བདེན་པའི་རྗེས་སུ་འཇུག་པའི་ཚིག་ཏུ་འགྱུར་རོ། །ཀླུའི་བདག་པོ་ཕྲ་མའི་ཚིག་སྤངས་པའི་སྐྱེས་བུ་གང་ཟག་ནི་མི་ཕྱེད་པ་ལྔ་འཐོབ་བོ། །ལྔ་གང་ཞེ་ན། འདི་ལྟ་སྟེ། གཞན་གྱི་གནོད་པའི་འཇིགས་པ་ཐམས་ཅད་ལས་ཤིན་དུ་འདའ་བས་ལུས་མི་ཕྱེད་པ་འཐོབ་པ་དང ། གཞན་དག་གི་ལ་ཆགས་པ་མེད་པས 53.225b གཡོག་མི་ཕྱེད་པ་འཐོབ་པ་དང ། ལས་ཀྱི་རྣམ་པར་སྨིན་པ་ལ་ཡིད་ཆེས་པས་དད་པ་མི་ཕྱེད་པ་འཐོབ་པ་དང ། སྒྲུབ་པ་སྙིང་པོར་བྱེད་པས་ཆོས་ལས་མི་ཕྱེད་པ་འཐོབ་པ་དང ། མི་སླུ་བས་མཛའ་བོ་མི་ཕྱེད་པ་འཐོབ་པ་སྟེ། ཀླུའི་བདག་པོ་ཕྲ་མའི་ཚིག་སྤངས་པའི་སྐྱེས་བུ་གང་ཟག་ནི་མི་ཕྱེད་པ་ལྔ་པོ་དེ་དག་འཐོབ་བོ། །ཕྲ་མའི་ཚིག་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་གཡོག་མི་ཕྱེད་པའི་དེ་བཞིན་གཤེགས་པར་འགྱུར་ཏེ། བདུད་དང་ཕས་ཀྱི་རྒོལ་བ་ཐམས་ཅད་ཀྱིས་ཀྱང་དེ་བཞིན་གཤེགས་པ་དེའི་འཁོར་དབྱེ་བར་མི་ནུས་སོ། །ཀླུའི་བདག་པོ་ཚིག་རྩུབ་པོ་སྤངས་པའི་སྐྱེས་བུ་གང་ཟག་ནི་ངག་གི་ལས་ཡོངས་སུ་དག་པ་བརྒྱད་འཐོབ་བོ། །བརྒྱད་གང་ཞེ་ན། འདི་ལྟ་སྟེ། ཚིག་རན་པ་དང ། ཕན་པའི་ཚིག་དང ། རིགས་པའི་ཚིག་དང ། འཇམ་པའི་ཚིག་དང ། གཟུང་བའི་ཚིག་དང ། མཉན་པའི་ཚིག་དང ། སྐྱེ་བོ་མང་པོ་དགའ་བའི་ཚིག་དང ། མ་སྨད་པའི་ཚིག་ཡིན་ཏེ། ཀླུའི་བདག་པོ་ཚིག་རྩུབ་པོ་སྤངས་པའི་སྐྱེས་བུ་གང་ཟག་ནི་ངག་གི་ལས་ཡོངས་སུ་དག་པ་བརྒྱད་པོ་དེ་དག་འཐོབ་བོ། །ཚིག་རྩུབ་པོ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་དེ་བཞིན་གཤེགས་པ་ཚངས་པའི་སྒྲ་སྐད་བསྒྲགས་པའི་དབྱངས་སུ་འགྱུར་རོ། །ཀླུའི་བདག་པོ་ཚིག་ཀྱལ་པ་སྤངས་པའི་སྐྱེས་བུ་གང་ཟག་ནི་གཅིག་ཏུ་ངེས་པ་གསུམ་འཐོབ་བོ། །གསུམ་གང་ཞེ་ན། འདི་ལྟ་སྟེ། ཚིག་རན་པས་མཁས་པ་རྣམས་གཅིག་ཏུ་ངེས་པར་དགའ་བ་དང ། ལན་ལེགས་པར་ལོན་པས་གཅིག་ཏུ་ངེས་པར་དེའི་བློ་བདེན་པ་ལ་འགྲོ་བ་དང ། 53.226a བཅོས་མ་མ་ཡིན་པར་མཛའ་བས་གཅིག་ཏུ་ངེས་པར་ལྷ་དང་མིའི་ཆེ་བ་ཉིད་འཐོབ་པ་ཡིན་ཏེ། ཀླུའི་བདག་པོ་ཚིག་ཀྱལ་པ་སྤངས་པའི་སྐྱེས་བུ་གང་ཟག་ནི་གཅིག་ཏུ་ངེས་པ་གསུམ་པོ་དེ་དག་འཐོབ་བོ། །ཚིག་ཀྱལ་པ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་ཕྱད་པར་ལུང་སྟོན་ཅིང་གཞན་དུ་མི་གསུང་བའི་དེ་བཞིན་གཤེགས་པར་འགྱུར་རོ། །ཀླུའི་བདག་པོ་བརྣབ་སེམས་སྤངས་པའི་སྐྱེས་བུ་གང་ཟག་ནི་དབང་པོ་ལྔ་འཐོབ་བོ། །ལྔ་གང་ཞེ་ན། འདི་ལྟ་སྟེ། དབང་པོ་མ་ཚང་བ་མེད་པས་ལུས་དང ། ངག་དང ། སེམས་ལ་དབང་བ་འཐོབ་པ་དང ། དགྲ་ཐམས་ཅད་ཀྱིས་མི་རྫི་བས་ལོངས་སྤྱོད་དང་དབང་ཕྱུག་ལ་དབང་བ་རྒྱ་ཆེན་པོ་འཐོབ་པ་དང ། བསོད་ནམས་ཀྱི་དབང་གིས་དེའི་སེམས་ལོངས་སྤྱོད་དང་ཡོངས་སུ་སྤྱོད་པ་རྒྱ་ཆེན་པོ་ཐམས་ཅད་ལ་འགྲོ་བ་དང ། དགབ་པ་མཆོག་འཐོབ་པས་རྒྱལ་པོ་དང་དབང་པོས་མཆོད་པ་དང ། སྔོན་ཕྲག་དོག་མེད་པས་ལོངས་སྤྱོད་ཇི་ལྟར་སྨོན་པ་རྣམས་དེ་ལས་སྟོང་ཕྲག་བརྒྱ་འགྱུར་དུ་ཁྱད་པར་དུ་འགྱུར་བ་འཐོབ་པ་སྟེ། ཀླུའི་བདག་པོ་བརྣབ་སེམས་སྤངས་པའི་སྐྱེས་བུ་གང་ཟག་ནི་དབང་པོ་ལྔ་པོ་དེ་དག་འཐོབ་བོ། །བརྣབ་སེམས་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་འཇིག་རྟེན་གསུམ་གྱིས་མཆོད་པའི་དེ་བཞིན་གཤེགས་པ་སྟོན་པ་གཅིག་པུར་འགྱུར་རོ། །ཀླུའི་བདག་པོ་གནོད་སེམས་སྤངས་པའི་སྐྱེས་བུ་གང་ཟག་ནི་ཡིད་བདེ་བར་བྱེད་པའི་ཆོས་བརྒྱད་འཐོབ་བོ། །བརྒྱད་གང་ཞེ་ན། འདི་ལྟ་སྟེ། དེའི་སེམས་རྣམ 53.226b པར་མི་འཚེ་བ་ལ་འགྲོ་བར་འགྱུར་བ་དང ། དེའི་སེམས་གནོད་སེམས་རབ་ཏུ་ཞི་བ་ལ་འགྲོ་བར་འགྱུར་བ་དང ། དེའི་སེམས་རྩོད་པ་མེད་ཅིང་འཐབ་པ་མེད་པ་ལ་འགྲོ་བར་འགྱུར་བ་དང ། དེའི་སེམས་དྲང་ཞིང་མཉེན་ལ་དེས་པ་ལ་འགྲོ་བར་འགྱུར་བ་དང ། འཕགས་པའི་སྐྱེ་བོར་གྲགས་པར་འགྱུར་བ་དང ། སེམས་ཅན་ཐམས་ཅད་ལ་བདེ་བར་དགའ་ཞིང་བྱམས་པའི་སེམས་ཕན་པའི་དངོས་པོ་མང་བར་འགྱུར་བ་དང ། བདེ་བ་ལ་མངོན་པར་དགའ་ཞིང་དད་པ་མང་ལ་སྐྱེ་བོ་མང་པོས་སྟི་སྟང་བྱ་བར་འགྱུར་བ་དང ། སེམས་སྣུམ་ཞིང་ལས་སུ་རུང་བས་ཚངས་པའི་འཇིག་རྟེན་དུ་སྐྱེ་བ་འཐོབ་པ་མི་དཀོན་པར་འགྱུར་བ་སྟེ། ཀླུའི་བདག་པོ་གནོད་སེམས་སྤངས་པའི་སྐྱེས་བུ་གང་ཟག་ནི་ཡིད་བདེ་བར་བྱེད་པའི་ཆོས་བརྒྱད་པོ་དེ་དག་འཐོབ་བོ། །གནོད་སེམས་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་དགེ་བའི་རྩ་བ་དེས་སེམས་ཐོགས་པ་མེད་པའི་དེ་བཞིན་གཤེགས་པ་བལྟ་བས་མི་ངོམས་པར་འགྱུར་རོ། །ཀླུའི་བདག་པོ་ལོག་པར་ལྟ་བ་སྤངས་པའི་སྐྱེས་བུ་གང་ཟག་ནི་ཡོན་ཏན་གྱི་ཆོས་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ། བསམ་པ་དགེ་བར་འགྱུར་ཞིང་གྲོགས་པོ་དགེ་བ་རྙེད་པར་འགྱུར་བ་ཡིན། ལས་ཀྱི་རྣམ་པར་སྨིན་པ་ལ་ཡིད་ཆེས་པས་སྲོག་གི་ཕྱིར་ཡང་སྡིག་པའི་ལས་མི་བྱེད་པ་ཡིན། ལྷར་སངས་རྒྱས་འཛིན་ཀྱི་གཞན་ལྷར་མི་འཛིན་པ་ཡིན། ངོ་མཚར་དང་བཀྲ་ཤིས་དང་བྲལ་བས་ལྟ་བ་དྲང་བ་ཡིན། གྲོགས་ལྷ་དང་མི་ཡིན་གྱི་དུད་འགྲོའི་སྐྱེ་གནས་པ་དང་གཤིན་རྗེའི་འཇིག་རྟེན་པ་གྲོགས་སུ་མི་འགྱུར་བ་ཡིན། བསོད་ནམས 53.227a སྦྱངས་པས་ཁྱད་པར་དུ་འགྲོ་བ་ཡིན། ལོག་པ་ཐམས་ཅད་མེད་པས་འཕགས་པའི་ལམ་དུ་ཞུགས་པ་ཡིན། འཇིག་ཚོགས་ལ་ལྟ་བ་དང་བྲལ་ཞིང་སྡིག་པ་ཐམས་ཅད་ཡོངས་སུ་སྤངས་པ་ཡིན། ཡང་དག་པར་སོང་ཞིང་ཡང་དག་པར་ཞུགས་པས་སྒྲིབ་པ་མེད་པར་མཐོང་བ་ཡིན། ལྷ་དང་མི་རྣམས་ཀྱི་ནང་དུ་མི་ཁོམ་པ་དང་བྲལ་བ་ཡིན་ཏེ། ཀླུའི་བདག་པོ་ལོག་པར་ལྟ་བ་སྤངས་པའི་སྐྱེས་བུ་གང་ཟག་ནི་ཡོན་ཏན་གྱི་ཆོས་བཅུ་པོ་དེ་དག་འཐོབ་བོ། །ལོག་པར་ལྟ་བ་སྤངས་པའི་དགེ་བའི་རྩ་བ་དེ་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དགེ་བའི་རྩ་བ་དེས་དེ་ལ་སངས་རྒྱས་ཀྱི་ཆོས་ཐམས་ཅད་མངོན་དུ་འགྱུར་ཏེ། མངོན་པར་ཤེས་པ་མྱུར་བའི་དེ་བཞིན་གཤེགས་པར་འགྱུར་རོ། །ཀླུའི་བདག་པོ་དགེ་བ་བཅུའི་ལས་ཀྱི་ལམ་འདི་དག་ནི་འཇིག་རྟེན་པ་དང ། འཇིག་རྟེན་ལས་འདས་པའི་ཕུན་སུམ་ཚོགས་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་གྱི་རྩ་བ་དང་རྟེན་ཏོ། །བཟློག་ན་མི་དགེ་བ་བཅུའི་ལས་ཀྱི་ལམ་རྣམས་ཏེ། དེ་དག་ཤས་ཆེར་བསྟེན་ཅིང་བསྒོམས་ཏེ་མང་དུ་བྱས་ན་སེམས་ཅན་དམྱལ་བའི་རྒྱུའོ། །འབྲིང་ནི་དུད་འགྲོའི་སྐྱེ་གནས་ཀྱི་རྒྱུའོ། །ཆུང་ངུ་ནི་གཤིན་རྗེའི་འཇིག་རྟེན་གྱི་རྒྱུའོ། །ཀླུའི་བདག་པོ་དེ་ལ་སྲོག་གཅོད་པ་བསྟེན་ཅིང་བསྒོམས་ཏེ་མང་དུ་བྱས་ན་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། ཚེ་ཐུང་བ་དང ། ནད་མང་བར་འགྱུར་བའོ། །མ་བྱིན་པར་ལེན་པས་ནི་སེམས་ཅན། དམྱལ 53.227b བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། ལོངས་སྤྱོད་ཆུང་བ་དང ། ཐུན་མོང་གི་ལོངས་སྤྱོད་དུ་འགྱུར་བའོ། །འདོད་པ་ལ་ལོག་པར་གཡེམ་པས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེས་ནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། གཡོག་འཁོར་ཡིད་བརྟན་དུ་མི་རུང་བ་དང ། འགྲན་ཟླ་དང་བཅས་པའི་ཆུང་མར་འགྱུར་བའོ། །བརྫུན་དུ་སྨྲ་བས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། སྐུར་པ་མང་བ་དང ། གཞན་གྱིས་སླུ་བར་འགྱུར་བའོ། །ཕྲ་མས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། གཡོག་འཁོར་མི་འདུམ་པ་དང ། གཡོག་འཁོར་ངན་པར་འགྱུར་བའོ། །ཚིག་རྩུབ་པོས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། ཡིད་དུ་མི་འོང་བ་ཐོས་པ་དང ། ཐབ་མོའི་ཚིག་ཏུ་འགྱུར་བའོ། །ཚིག་ཀྱལ་པས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང 53.228a རྣམ་པར་སྨིན་པ་གཉིས་མངོན་པར་སྒྲུབ་སྟེ། གཟུང་བར་འོས་པའི་ཚིག་མ་ཡིན་པ་དང ། མ་ངེས་པའི་སྤོབས་པར་འགྱུར་བའོ། །བརྣབ་སེམས་ཀྱིས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། ཆོག་མི་ཤེས་པ་དང ། འདོད་པ་ཆེ་བར་འགྱུར་བའོ། །གནོད་སེམས་ཀྱིས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། མི་ཕན་པ་འདོད་པ་དང ། གཞན་གྱིས་གནོད་པ་བྱ་བར་འགྱུར་བའོ། །ལོག་པར་ལྟ་བས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། ལྟ་བ་ངན་པར་ལྟུང་བ་དང ། གཡོ་སྒྱུ་ཅན་དུ་འགྱུར་བའོ། །ཀླུའི་བདག་པོ་དེ་ལྟར་ན་མི་དགེ་བ་བཅུ་པོ་འདི་དག་གིས་སྡུག་བསྔལ་གྱི་ཕུང་པོ་ཆེན་པོ་ཚད་མེད་པ་ཡང་དག་པར་སྒྲུབ་པར་འགྱུར་རོ། །ཀླུའི་བདག་པོ་དེ་ལ་སྲོག་གཅོད་པ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང་ཚེ་རིང་བར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་གཞན་གྱིས་གནོད་པ་བྱ་བའི་འཇིགས་པ་ལས་ཡང་དག་པར་འདས་པར་འགྱུར་རོ། །ཀླུའི་བདག་པོ་མ་བྱིན་པར་ལེན་པ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང་དངོས་པོ 53.228b ཐམས་ཅད་ལ་མི་ལྟ་བར་ཡོངས་སུ་གཏོང་བ་ཅན་དུ་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་སངས་རྒྱས་ཀྱི་ཆོས་ཐམས་ཅད་ཡང་དག་པར་སྒྲུབ་པས་བླ་ན་མེད་པའི་ཆོས་རྙེད་པར་འགྱུར་རོ། །ཀླུའི་བདག་པོ་འདོད་པ་ལ་ལོག་པར་གཡེམ་པ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མ་འཕྲོགས་པ་དང་ཆུང་མ་མི་གཡེམ་པར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་མ་དང ། བུ་དང ། ཆུང་མ་ལ་སུ་ཡང་སྡང་བའི་སེམས་ཀྱིས་ལྟ་བར་མི་འགྱུར་རོ། །ཀླུའི་བདག་པོ་བརྫུན་དུ་སྨྲ་བ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང ། སྐུར་པ་འདེབས་པ་མེད་པར་འགྱུར་བ་ནི་ནན་ཏན་སྲུང་བར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་ཇི་སྐད་སྨྲས་པ་དེ་བཞིན་བྱེད་དེ་ཡི་དམ་ལ་བརྟེན་པར་འགྱུར་རོ། །ཀླུའི་བདག་པོ་ཕྲ་མའི་ཚིག་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང་གཡོག་འཁོར་མི་ཕྱེད་པར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་བསམ་པ་འཐུན་པས་བྱང་ཆུབ་སེམས་དཔའི་གཡོག་འཁོར་འཐོབ་བོ། །ཀླུའི་བདག་པོ་ཚིག་རྩུབ་པོ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང ། གཟུང་བའི་ཚིག་ཏུ་འགྱུར། བཙུན་པའི་ཚིག་ཏུ་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་འཁོར་མ་མགུ་བར་སུ་ཡང་མི་འགྲོའོ། །ཀླུའི་བདག་པོ་ཚིག་ཀྱལ་པ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས 53.229a པ་དང ། མཉན་པར་འོས་པའི་ཚིག་ཏུ་འགྱུར། ཡིད་ཆེས་པའི་ཚིག་ཏུ་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་ཐེ་ཙོམ་ཐམས་ཅད་གཅོད་པ་ལ་མཁས་པར་འགྱུར་རོ། །ཀླུའི་བདག་པོ་བརྣབ་སེམས་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང ། ལོངས་སྤྱོད་དང་ཡོངས་སུ་སྤྱོད་པ་རྒྱ་ཆེན་པོ་ལ་དེའི་སེམས་འགྲོ་བར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་རྒྱ་ཆེན་པོ་ལ་མོས་ཤིང་དབང་ཆེ་བར་གྲགས་པར་འགྱུར་རོ། །ཀླུའི་བདག་པོ་གནོད་སེམས་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང ། མཛེས་པ་དང་སྐྱེ་བོ་མང་པོ་དགའ་ཞིང་ཡིད་དུ་འོང་བར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་ཐོགས་པ་མེད་པའི་བློ་དང ། ཐོགས་པ་མེད་པའི་སེམས་དང ། དབང་པོ་མ་ཚང་བ་མེད་པར་འགྱུར་རོ། །ཀླུའི་བདག་པོ་ལོག་པར་ལྟ་བ་སྤངས་པའི་བྱང་ཆུབ་སེམས་དཔས་སྦྱིན་པ་བྱིན་ན་ལོངས་སྤྱོད་ཆེ་བར་འགྱུར། ལོངས་སྤྱོད་མི་འཕྲོགས་པ་དང ། སངས་རྒྱས་ལ་དད་ཅིང་ཡང་དག་པར་ལྟ་བའི་ཁྱིམ་དུ་སྐྱེའོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་སངས་རྒྱས་ལ་ལྟ་བ་དང ། ཆོས་ཉན་པ་དང ། དགེ་འདུན་ལ་བསྙེན་བཀུར་བྱེད་པ་དང ། བྱང་ཆུབ་ཏུ་སེམས་སྐྱེད་པ་དང་མི་འབྲལ་བར་འགྱུར་རོ། །ཀླུའི་བདག་པོ་དེ་ལྟར་དགེ་བ་བཅུའི་ལས་ཀྱི་ལམ་འདི་དག་སྦྱིན་པས་བརྒྱན་ན་འབྱོར་པ་ཆེན་པོར་འགྱུར་རོ། །དགེ་བ་བཅུའི་ལས་ཀྱི་ལམ་འདི་དག་ཉིད་ཚུལ་ཁྲིམས་ཀྱིས་བརྒྱན་ན་སངས་རྒྱས་ཀྱི་ཆོས་ཐམས་ཅད་ཀྱི་དོན་དུ་སྨོན་པ་ཡོངས་སུ་རྫོགས་པར་འགྱུར་རོ། །དགེ་བ་བཅུའི་ལས་ཀྱི་ལམ་འདི་དག་ཉིད 53.229b བཟོད་པས་བརྒྱན་ན་མཚན་དང ། དཔེ་བྱད་བཟང་པོ་དང ། སངས་རྒྱས་ཀྱི་དབྱངས་ཡོངས་སུ་རྫོགས་པར་འགྱུར་རོ། །དེ་བཞིན་དུ་སྦྱར་ཏེ་བརྩོན་འགྲུས་ཀྱིས་བརྒྱན་ན་བདུད་ཕྱིར་རྒོལ་བ་བཅོམ་པ་དང་སངས་རྒྱས་ཀྱི་ཆོས་ཐམས་ཅད་རྫོགས་པར་འགྱུར་རོ། །བསམ་གཏན་གྱིས་བརྒྱན་ན་དྲན་པ་དང ། བློ་གྲོས་དང ། རྟོགས་པ་དང ། ངོ་ཚ་ཤེས་པ་དང ། དགའ་བ་ཡོངས་སུ་དག་པར་འགྱུར་རོ། ཤེས་རབ་ཀྱིས་བརྒྱན་ན་ལྟ་བ་ངན་པ་ཐམས་ཅད་ཡང་དག་པར་འཇོམ་པར་འགྱུར་རོ། །བྱམས་པས་བརྒྱན་ན་སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་སུ་འགྱུར་རོ། །སྙིང་རྗེས་བརྒྱན་ན་སེམས་ཅན་ཐམས་ཅད་ཡོངས་སུ་མི་གཏོང་བར་འགྱུར་རོ། །དགའ་བས་བརྒྱན་ན་ཞུམ་པ་མེད་པའི་སེམས་སུ་འགྱུར་རོ། །བཏང་སྙོམས་ཀྱིས་བརྒྱན་ན་རྗེས་སུ་ཆགས་པ་དང་ཁོང་ཁྲོ་བ་སྤོང་བར་འགྱུར་རོ། །བསྡུ་བའི་དངོས་པོས་བརྒྱན་ན་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་འགྱུར་རོ། །དྲན་པ་ཉེ་བར་གཞག་པས་བརྒྱན་ན་ལུས་དང ། ཚོར་བ་དང ། སེམས་དང ། ཆོས་ལ་མཁས་པར་འགྱུར་རོ། །ཡང་དག་པར་སྤོང་བས་བརྒྱན་ན་མི་དགེ་བའི་ཆོས་ཐམས་ཅད་སྤོང་བ་དང ། དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །རྫུ་འཕྲུལ་གྱི་རྐང་པས་བརྒྱན་ན་ལུས་དང་སེམས་ཡང་བར་འགྱུར་རོ། །དབང་པོ་ལྔས་བརྒྱན་ན་དད་པ་བརྟན་པ་དང ། བརྩོན་འགྲུས་འབར་བ་དང ། རྨོངས་པ་མེད་པ་དང ། སེམས་ལས་སུ་རུང་བ་ལ་མཁས་པ་དང ། ཉོན་མོངས་པ་ཐམས་ཅད་སྤོང་བ་ལ་མཁས་པར་འགྱུར་རོ། །སྟོབས་ཀྱིས་བརྒྱན་ན་རྫི་བ་མེད་ཅིང་དབུལ་བ་དང་ཉེས་པ་ཐམས་ཅད་འཇོམ་པར་འགྱུར་རོ། །བྱང་ཆུབ་ཀྱི་ཡན་ལག་གིས་བརྒྱན་ན་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད 53.230a པར་འགྱུར་རོ། །ལམ་གྱིས་བརྒྱན་ན་ཡང་དག་པའི་ཡེ་ཤེས་འགྲུབ་པར་འགྱུར་རོ། །ཞི་གནས་ཀྱིས་བརྒྱན་ན་ཉོན་མོངས་པ་ཐམས་ཅད་འཇོམ་པར་འགྱུར་རོ། །ལྷག་མཐོང་གིས་བརྒྱན་ན་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཤེས་རབ་དང་ཡེ་ཤེས་སུ་འགྱུར་རོ། །ཐབས་ཀྱིས་བརྒྱན་ན་འདུས་བྱས་དང་འདུས་མ་བྱས་ཀྱི་བདེ་བ་འཐོབ་པར་འགྱུར་རོ། །ཀླུའི་བདག་པོ་མདོར་ན་དགེ་བ་བཅུའི་ལས་ཀྱི་ལམ་འདི་དག་གིས་སྟོབས་བཅུ་ཡོངས་སུ་རྫོགས་པར་འགྱུར་རོ། །མི་འཇིགས་པ་བཞི་འཐོབ་པ་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་འཐོབ་པ་ནས། སངས་རྒྱས་ཀྱི་ཆོས་ཐམས་ཅད་ཀྱི་བར་དག་འཐོབ་པ་ཡོངས་སུ་རྫོགས་པར་འགྱུར་རོ། །ཀླུའི་བདག་པོ་དེ་བས་ན་དགེ་བ་བཅུའི་ལས་ཀྱི་ལམ་འདི་དག་རྒྱ་ཆེར་རྣམ་པར་དབྱེ་བས་བརྒྱན་པའི་ཕྱིར་བརྩོན་པར་གྱིས་ཤིག་།ཀླུའི་བདག་པོ་འདི་ལྟ་སྟེ། དཔེར་ན་ས་ལ་གནས་པའི་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཐམས་ཅད་དང ། རྩཝ་དང ། ཤིང་གེལ་པ་དང ། སྨན་དང ། ནགས་ཚལ་ཐམས་ཅད་དང ། ལས་ཀྱི་མཐའ་ཐམས་ཅད་དང ། ས་བོན་གྱི་ཚོགས་ཐམས་ཅད་དང ། འབྱུང་བའི་ཚོགས་ཐམས་ཅད་དང ། ལོ་ཏོག་ཐམས་ཅད་སྐྱེད་པ་དང ། རྨོ་བ་བརྐོ་བ་བྱ་བ་འབྱུང་བ་དེ་དག་གི་གནས་ནི་ས་ཡིན་ནོ། །ཀླུའི་བདག་པོ་དེ་བཞིན་དུ་དགེ་བ་བཅུའི་ལས་ཀྱི་ལམ་རྣམས་ཀྱང་ལྷ་དང་མིར་སྐྱེ་བའི་རྟེན་ཏོ། །སློབ་པ་དང་མི་སློབ་པའི་འབྲས་བུ་རྙེད་པ་དང ། ཉན་ཐོས་དང་རང་སངས་རྒྱས་ཀྱི་བྱང་ཆུབ་དང ། སངས་རྒྱས་དང་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྟེན་ཡིན་པ་ནས་སངས་རྒྱས་ཀྱི་ཆོས་ཐམས་ཅད 53.230b ཀྱི་བར་གྱི་རྟེན་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཀླུའི་རྒྱལ་པོ་རྒྱ་མཚོ་དང ། དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཀླུའི་རྒྱལ་པོ་རྒྱ་མཚོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། རྫོགས་སོ།། |