rKTs


J90

(e-text produced by ADARSHA)

see text in transliteration
52.33b
༄#། །རྒྱ་གར་སྐད་དུ། ཨཱརྱ་བོ་དྷི་ས་ཏྭ་གོ་ཙ་ར་ཨུ་པཱ་ཡ་བི་ཥ་ཡ་བི་ཀུརྦ་ཎ་ནིར་དེ་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་འཕགས་རྒྱལ་ན་རྒྱལ་པོ་གཏུམ་པོ་རབ་སྣང་གི་བསྐྱེད་མོས་ཚལ་ཤིང་སཱ་ལ་དང ། ཏ་ལ་དང ། ཏ་མ་ལ་དང ། དོང་ཀ་ཤིང་དང ། ནྱ་གྲོ་དྷ་དང ། པལག་ཤ་དང ། ུ་དུམ་བ་ར་དང ། བར་ཤི་ཤི་ཀ་དང ། དྷ་ནུ་ཀ་རི་དང ། ་ཏི་མུག་ཏ་ཏ་ཀ་དང ། ཙམ་པ་ཀ་དང ། མྱ་ངན་འཚང་དང ། སྐྱ་སྣར་གྱིས་ལེགས་པར་བརྒྱན་པ། འབབ་ཆུའི་དངོ་དང ། མཚོ་དང ། མཚོ་བྲན་དང ། མཚེའུ་དང ། རྫིང་དང ། ལུ་མ་མང་པོས་མཛེས་པར་བྱས་པ། མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོས་མངོན་པར་གང་བ། ངང་པ་དང ། ཁྲུང་ཁྲུང་དང ། རྨ་བྱ་དང་ཁུ་བྱུག་དང ། ཀུ་ན་ལ་དང ། མང་བ་སྐྱོབ་དང ། ནེ་ཙོ་དང ། རི་སྐེགས་དང ། ཤང་ཤང་ཏེའུ་དག་སྒྲ་མངོན་པར་སྒྲོགས་པ་དང་ལྡན་པ། བུང་བ་མང་པོས་གང་བ། ས་གཞི་ནིའུ་སིང་སྔོ་བ་དང་ལྡན་པའི་ནགས་ཚལ་ཆེན་པོ་མཆོག་ན། དགེ་སློང་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང
52.34a
ཐབས་གཅིག་ཏུ་བཞུགས་ཏེ། འདི་ལྟ་སྟེ། ཚེ་དང་ལྡན་པ་ཤཱ་རིའི་བུ་དང ། མཽདྒལ་གྱི་བུ་ཆེན་པོ་དང ། འོད་སྲུང་ཆེན་པོ་དང ། མ་འགགས་པ་དང ། རབ་འབྱོར་དང ། ཀཱཏྱཱའི་བུ་ཆེན་པོ་དང ། ཀ་པི་ན་ཆེན་པོ་དང ། ནག་པོ་དང ། དགའ་བོ་དང ། ལྟེང་རྒྱས་འོད་སྲུང་དང ། ཆུ་ཀླུང་འོད་སྲུང་དང ། ག་ཡཱ་འོད་སྲུང་དང ། བྱམས་མའི་བུ་གང་པོ་དང ། བ་ལང་བདག་དང ། བ་ཀ་ཀུ་ལ་དང ། ལམ་བསྟན་དང ། ལམ་ཕྲན་བསྟན་དང ། གྱད་བུ་ནོར་དང ། སེང་ལྡེང་ནགས་དང ། སྐུལ་བྱེད་དང ། གསུས་པོ་ཆེ་དང ། སྒྲ་གཅན་ཟིན་དང ། ཚེ་དང་ལྡན་པ་ཀུན་དགའ་བོ་དང ། དེ་དག་ལ་སོགས་པ་དགེ་སློང་ཁྲི་ཉིས་སྟོང་དང་ཐབས་གཅིག་སྟེ། ཐམས་ཅད་ཀྱང་ཆོས་ཀྱི་དབྱིངས་ཚུལ་གཅིག་པའི་སྤྱོད་ཡུལ་ལ་གནས་པ། ངོ་བོ་ཉིད་ཀྱི་ཆོས་ཀྱི་ཚུལ་ལ་ཞུགས་པ་ནམ་མཁའ་གནས་མེད་པའི་སྤྱོད་ཡུལ་བ། མི་རྟེན་པར་གནས་པ། ཉོན་མོངས་པ་དང ། སྒྲིབ་པ་དང ། ཆོད་པ་དང ། ཀུན་ནས་དཀྲིས་པ་ཐམས་ཅད་དང་བྲལ་བ། དེ་བཞིན་གཤེགས་པའི་ཆོས་ཀྱི་དབྱིངས་སྣང་བའི་ཚུལ་ལ་ཞུགས་པ། ཆོས་ཐམས་ཅད་ཚུལ་གཅིག་པ་ལ་ཡང་དག་པར་གཞོལ་བ། ཐམས་ཅད་མཁྱེན་པ་ཉིད་ལ་མངོན་པར་ཕྱོགས་པ། ལམ་གྱི་རྒྱུན་མ་ཆད་པ། ཐམས་ཅད་མཁྱེན་པ་ཉིད་ལ་མོས་པ་མི་ཟློགས་པའི་ཡིད་དང་ལྡན་པ། ཤེས་རབ་དང་ཡེ་ཤེས་རྣམ་པར་མཐོང་བའི་དམ་པའི་ཕ་རོལ་ཏུ་ཕྱིན་པ། ཐབས་ཀྱི་ཡུལ་དང་སྤྱོད་ཡུལ་ལ་ངེས་པར་བྱང་བ་ཤ་སྟག་གོ། །དགེ་སློང་མ་སྐྱེ་དགུའི་བདག་མོ་ཆེན་མོ་དང་གྲགས་འཛིན་ལ་སོགས་པ་དགེ་སློང་མ་བརྒྱད་འབུམ་དང་ཡང་ཐབས་གཅིག་སྟེ་ཆོས་དཀར་པོ་ཤིན་དུ་ཡོངས་སུ་བསྡུས་པ་ཐམས་ཅད་མཁྱེན་པ་ཉིད་ཀྱི་ལམ་རབ་ཏུ་རྟོགས་པ། ཐམས་ཅད་མཁྱེན་པའི་ཡེ་ཤེས་དང་ཉེ་བར་གྱུར་པ། དངོས་པོ་མེད་པའི་ཆོས་ཀྱི་ཚུལ་ཤིན་དུ་རྟོགས་པ། མཚན་ཉིད་མེད་པའི་ཆོས་ཀྱི་ཚུལ་ལ་རྟོགས་པ། ཆོས་ཐམས་ཅད་ཡང་དག་པའི་མཐས་མཐའ་མེད་པར་ཤིན་དུ་མོས་པ། སྒྲིབ་པ་མེད་པའི་རྣམ་པར་ཐར་པ་ཐོབ་པ། གདུལ་བའི་འགྲོ་བ་ཇི་ལྟ་བ་དེ་བཞིན་དུ་གཟུགས་ཀུན་དུ་སྟོན་པ་ལ་མཁས་པ་ཤ་སྟག་གོ། །བྱང་ཆུབ་སེམས་དཔའ་ས་ཡ་ཕྲག་བདུན་དང་ཉིས་འབུམ་གྱི་བྱང་ཆུབ་སེམས་དཔའི་དགེ་འདུན་ཆེན་པོ་དང་ཡང་ཐབས་གཅིག་སྟེ
52.34b
འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་ཆེན་དང ། ཤུགས་ཆེན་འཛིན་དང ། རྣམ་པར་འཕྲུལ་པ་ཆེན་པོ་དང ། རྣམ་པར་འཕྲུལ་པ་ཆེན་པོའི་རྒྱལ་པོ་དང ། བརྩོན་འགྲུས་ཆེན་པོས་རྣམ་པར་གནོན་པ་དང ། རྩལ་ཆེན་དཔའ་བོ་དང ། ཆེར་བསྒྱིངས་དང ། ཆེར་བསྒྱིངས་སྟོབས་ལྡན་དང ། ཚོགས་ཆེན་དབང་པོ་དང ། གླང་པོ་ཆེན་པོ་སྤོས་ཀྱི་གླང་པོ་དང ། ཟླ་བ་ཆེན་པོ་དང ། ཟླ་བ་བཟང་པོ་དང ། ཡོན་ཏན་ཟླ་བ་དང ། རིན་ཆེན་ཟླ་བ་དང ། ཀུན་དུ་སྣང་བའི་ཟླ་བ་དང ། ཆོས་དྲི་མ་མེད་པའི་ཟླ་བ་དང ། རྣམ་པར་སྣང་བྱེད་ཟླ་བ་དང ། རྣམ་པར་གྲགས་པའི་ཟླ་བ་དང ། འོད་ཟེར་རབ་ཏུ་འགྱེད་པའི་ཟླ་བ་དང ། རྒྱས་པའི་ཟླ་བ་དང ། ཚངས་པའི་དབྱངས་དང ། ཚངས་པའི་དབང་པོ་ལྟར་སྒྲོགས་པའི་དབྱངས་དང ། ས་ལ་ངེས་པར་སྒྲོགས་པའི་དབྱངས་དང ། ཆོས་ཀྱི་དབྱིངས་ངེས་པར་སྒྲོགས་པའི་དབྱངས་དང་བདུད་ཀྱི་དཀྱིལ་འཁོར་ཐམས་ཅད་སྨ་འབེབས་པའི་དབྱངས་དང ། ཆོས་ཀྱི་སྒྲ་ངེས་པར་སྒྲོག་པའི་དབྱངས་དང ། ཐམས་ཅད་དུ་གོ་བར་བྱེད་པའི་དབྱངས་དང་རྣམ་པར་མི་རྟོགས་པས་རྣམ་པར་མ་བརྟགས་པའི་དབྱངས་དང ། ས་སྟེང་ངེས་པར་སྒྲོགས་པའི་དབྱངས་དང ། དབྱངས་ཀྱི་ཡན་ལག་ཐམས་ཅད་ཟིལ་གྱིས་མནོན་པའི་དབྱངས་དང ། ཀུན་ནས་སྙིང་པོ་དང ། ཡོན་ཏན་སྙིང་པོ་དང ། ཆོས་དྲི་མ་མེད་པའི་སྙིང་པོ་དང ། རྣམ་པར་སྣང་བྱེད་སྙིང་པོ་དང ། ཟླ་བའི་སྙིང་པོ་དང ། ཉི་མའི་སྙིང་པོ་དང ། སྣང་བའི་སྙིང་པོ་དང ། པད་མའི་སྙིང་པོ་དང ། པད་མའི་དཔལ་གྱི་སྙིང་པོ་དང ། བསོད་ནམས་དཔལ་གྱི་སྙིང་པོ་དང ། ཡེ་ཤེས་དཔལ་གྱི་སྙིང་པོ་དང ། བློ་གྲོས་ཆེན་པོ་དང ། ཁྱད་པར་བློ་གྲོས་དང ། རྣམ་གྲགས་བློ་གྲོས་དང ། རླབས་ཆེན་བློ་གྲོས་དང ། བླ་མའི་བློ་གྲོས་དང ། རིན་ཆེན་བློ་གྲོས་དང ། འཕེལ་བའི་བློ་གྲོས་དང ། མཐའ་ཡས་བློ་གྲོས་དང ། རྒྱ་ཆེན་བློ་གྲོས་དང ། སངས་རྒྱས་བློ་གྲོས་དང ། བློ་གྲོས་མི་ཟད་པ་དང ། བློ་གྲོས་རྒྱ་མཚོ་དང ། ལྷུན་པོའི་སྒྲོན་མ་དང ། སྒྲོན་མ་ཆེན་པོ་དང ། ཆོས་ཏ་ལ་ལའི་སྒྲོན་མ་དང ། ཕྱོགས་ཐམས་ཅད་རྒྱས་པར་འགེངས་པའི་སྒྲོན་མ་དང ། ཀུན་དུ་སྒྲོན་མ་དང ། མུན་པ་ཐམས་ཅད་སེལ་བའི་སྒྲོན་མ་དང ། འགྲོ་བ་ཐམས་ཅད
52.35a
སྣང་བར་བྱེད་པའི་སྒྲོན་མ་དང ། ཤིན་དུ་སྣང་བའི་སྒྲོན་མ་དང ། ཟླ་བའི་སྒྲོན་མ་དང ། ཉི་མའི་སྒྲོན་མ་དང ། ངན་སོང་སེལ་བ་དང ། བདུད་ཕམ་བྱེད་དང ། བདུད་ཆེན་ཕམ་བྱེད་དང ། མངོན་པར་འབྱུང་དཀའ་དང ། ཐུབ་དཀའ་དང ། གཏིང་དཔག་དཀའ་བ་དང ། བློ་རྟོགས་དཀའ་བ་དང ། ངན་འགྲོ་སྐེམས་དང ། མཐུ་ཆེན་ཐོབ་དང ། སྤྱན་རས་གཟིགས་དབང་ཕྱུག་དང ། བྱམས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་ས་ཡ་ཕྲག་བདུན་དང་འབུམ་ཕྲག་གཉིས་དང་ཐབས་གཅིག་སྟེ། ཐམས་ཅད་ཀྱང་སྐྱེ་བ་གཅིག་གིས་ཐོགས་པ་གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་མཐའ་ཡས་པ་ཐོབ་པ། ཐོགས་པ་མེད་པའི་མི་འཇིགས་པ་ཐོབ་པ། ་རྫུ་འཕྲུལ་ལ་དབང་བ་དམ་པའི་ཕ་རོལ་དུ་ཕྱིན་པ། སངས་རྒྱས་ཀྱི་ཞིང་མཐའ་ཡས་པར་འགྲོ་བའི་མངོན་པར་ཤེས་པས་རྣམ་པར་རྩེ་བ། ལུས་དང་སེམས་རྣམ་པར་གྲོལ་བ། ཆགས་པ་མེད་ཅིང་སྒྲིབ་པ་མེད་པའི་ཡེ་ཤེས་མཐོང་བ་དང་ལྡན་པ། སངས་རྒྱས་མི་བཞུགས་པའི་འཇིག་རྟེན་གྱི་ཁམས་སུ་སངས་རྒྱས་འབྱུང་བ་ཀུན་དུ་སྟོན་པ། ཆོས་ཀྱི་འཁོར་ལོ་ཁྱད་པར་ཐོབ་པར་བྱེད་པ་ལ་མཁས་པ། སེམས་ཅན་ཐམས་ཅད་ལ་སོ་སོ་ཅི་རིགས་པར་ཆོས་ཡང་དག་པར་སྟོན་པ། ཕྱིར་མི་ཟློགས་པའི་ཆོས་སྟོན་པ། བླང་བ་མེད་པ་དང ། དོར་བ་མེད་པའི་ཆོས་ཀྱི་ངོ་བོ་ཉིད་ཀྱི་ཚུལ་ལ་ཞུགས་པ། སྟོང་པ་ཉིད་རྗོད་པ། སེང་གེའི་སྒྲ་ཆེན་པོ་སྒྲོགས་པ། ་ཕས་ཀྱི་རྒོལ་བ་ཐམས་ཅད་སྨ་འབེབས་པ། བདུད་ཕྱིར་རྒོལ་བ་ཐམས་ཅད་བཅོམ་པ། བྱང་ཆུབ་སེམས་དཔའི་སྤྱོད་པ་དང ། རྫུ་འཕྲུལ་ཐམས་ཅད་ཐོབ་པ། རྗེས་སུ་ཆགས་པ་དང ། ཁོང་ཁྲོ་བ་མེད་པ། ཆུ་དང ། མེ་དང ། རླུང་དང ། ས་ལྟ་བུའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་གསང་བའི་གནས་སུ་ཆུད་པ། སེམས་ཅན་ཐམས་ཅད་ལ། སངས་རྒྱས་ཀྱི་མཛད་པས་ཉེ་བར་གནས་པ། དེ་བཞིན་གཤེགས་པ་ཐམས་ཅད་ཀྱིས་བསྟོད་བསྔགས་སྙན་པར་བརྗོད་བརྗོད་ཅིང་བཀུར་བ། ཕྱི་མའི་མཐའི་བསྐལ་པར་བྱིན་གྱི་བརླབས་ཀྱིས་བྱིན་གྱིས་བརླབས་པ། དེ་བཞིན་གཤེགས་པ་ཐམས་ཅད་ཀྱི་ཆོས
52.35b
ཀྱི་ཚུལ་ཡང་དག་པར་འཛིན་པ། ཆོས་རིན་པོ་ཆེའི་འོད་ཟེར་དང་ལྡན་པ། ཡོན་ཏན་གྱི་བསྔགས་པ་ཐམས་ཅད་མཐར་ཕྱིན་པ་དང་ལྡན་པ། འཇིག་རྟེན་གྱི་དབང་པོར་གྱུར་པ། སྔོན་གྱི་སྨོན་ལམ་ཕུན་སུམ་ཚོགས་པ། དེ་བཞིན་གཤེགས་པ་ལ་མོས་པའི་སྤྱོད་ཡུལ་ངེས་པར་བྱུང་བ། སྔོན་ཐེག་པ་ཆེན་པོ་ལ་སྤྱད་པ་ལེགས་པར་སྤྱད་པ། སངས་རྒྱས་ཀྱི་ཡེ་ཤེས་ཀྱི་ཚུལ་གྱིས་དྲི་མ་མེད་ཅིང་ཡོངས་སུ་དག་པ་རྟག་ཏུ་རྒྱུན་མི་འཆད་པར་དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པ་ལ་བརྩོན་པ། ཕྱིར་མི་ཟློགས་པའི་གོ་ཆ་བགོས་པ། སྙིང་རྗེ་ཆེན་པོ་མངོན་དུ་གྱུར་པ། རང་བཞིན་གྱིས་རྒྱ་ཆེན་པོ་ལ་མོས་པའི་སེམས་དང་ལྡན་པ། ནེམ་ནུར་དང་ཐེ་ཙོམ་དང་ཡིད་གཉིས་ཐམས་ཅད་ལས་ཡང་དག་པར་འདས་པ། དེ་བཞིན་གཤེགས་པའི་བྱིན་གྱིས་བརླབས་ཀྱི་བྱིན་གྱིས་བརླབས་པ་ཤ་སྟག་གོ། །དགེ་བསྙེན་དང ། དགེ་བསྙེན་མ་དུ་མ་དང་ཡང་ཐབས་གཅིག་གོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་འམ། ལྷའི་དབང་པོ་འམ། ཀླུ་འམ། ཀླུའི་དབང་པོ་འམ། གནོད་སྦྱིན་ནམ། གནོད་སྦྱིན་གྱི་དབང་པོ་འམ། དྲི་ཟ་འམ། དྲི་ཟའི་དབང་པོ་འམ། ལྷ་མ་ཡིན་ནམ། ལྷ་མ་ཡིན་གྱི་དབང་པོ་འམ། ནམ་མཁའ་ལྡིང་ངམ། ནམ་མཁའ་ལྡིང་གི་དབང་པོ་འམ། མི་འམ་ཅི་འམ། མིའམ་ཅིའི་དབང་པོ་འམ། ལྟོ་འཕྱེ་ཆེན་པོ་འམ། ལྟོ་འཕྱེ་ཆེན་པོའི་དབང་པོ་འམ། མི་འམ་མིའི་དབང་པོ་གཟི་བརྗིད་ཆེ་བ་གཟི་བརྗིད་ཆེ་བ་རྒྱ་ཆེ་བ་རྒྱ་ཆེ་བ། གཡོག་འཁོར་འབུམ་ཕྲག་དུ་མ་དང་ལྡན་པ་གང་དག་གནས་པ་དེ་དག་ཐམས་ཅད་ཀྱང་འཁོར་དེ་ཉིད་དུ་འདུས་ཏེ་འཁོད་པར་གྱུར་ཏོ། །དེའི་ཚེ་བཅོམ་ལྡན་འདས་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་དཔལ་གྱི་སྙིང་པོའི་སེང་གེའི་ཁྲི་ལ་བཞུགས་ཏེ། སྐུ་མདོག་དང ། གཟི་བརྗིད་དང ། སྐུའི་འོད་ཀྱིས་འཁོར་ཐམས་ཅད་ཟིལ་གྱིས་མནན་ནས་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན་རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་འཕགས་ཤིང ། རི་ནག་པོ་གཞན་ཟིལ་གྱིས་མནན་ནས་ལམ་མེ་ལྷན་ནེ་ལྷང་ངེ་བ་དེ་བཞིན་དུ། བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལྷ་དང་མིར་བཅས་པའི་འཇིག་རྟེན
52.36a
ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། ཟླ་བ་ཡར་གྱི་ངོའི་ཟླ་བ་ཉ་ལ་བབ་སྟེ། ཟླ་བའི་དཀྱིལ་འཁོར་རྒྱས་པ་ནི་རྒྱུ་སྐར་དང་སྐར་མའི་ཚོགས་ཐམས་ཅད་ཟིལ་གྱིས་མནན་ཏེ་མོག་མོག་པོར་བྱས་ནས་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལྷ་དང་བཅས་པའི་འཇིག་རྟེན་ཟིལ་གྱིས་མནན་ཏེ། མོག་མོག་པོར་མཛད་ནས་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། དག་ཅིང་དྲི་མ་མེད་པའི་ནམ་མཁའ་སྤྲིན་མེད་པ་ལ་ཉི་མའི་དཀྱིལ་འཁོར་འོད་ཟེར་གྱི་དྲ་བ་རབ་ཏུ་འཕྲོ་བར་འདུག་པ་ནི་སྲིན་བུ་མེ་ཁྱེར་ཐམས་ཅད་ཟིལ་གྱིས་མནན་ཏེ། མོག་མོག་པོར་བྱས་ནས་ཤིན་དུ་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་ཀྱི་འོད་ཟིལ་གྱིས་མནན་ཏེ། མོག་མོག་པོར་མཛད་ནས་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། མཚན་མོ་རི་ཆེན་པོའི་སྤོ་ལ་མེ་ཆེན་པོ་འབར་བ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ལ་ཡང་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། ནོར་བུ་རིན་པོ་ཆེ་བཻ་དཱུརྱ་ཡན་ལག་བརྒྱད་དང་ལྡན་ཞིང་དྲི་མ་མེད་པ་འོད་ཟེར་རབ་ཏུ་འཕྲོ་བ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་ཤིང་ཕྱོགས་བཅུ་ཐམས་ཅད་སྣང་བར་མཛད་པ་ཡང་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་ནི་གླིང་བཞིའི་སེམས་ཅན་ཐམས་ཅད་ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། ལྷའི་དབང་པོ་བརྒྱ་བྱིན་བརྒྱ་བྱིན་ཐོགས་པའི་ནོར་བུ་རིན་པོ་ཆེ་ཐོགས་ཤིང་ལྷའི་འདུན་ས་ཆོས་བཟངས་ན་གནས་པ་ནི་ལྷ་ཐམས་ཅད་ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལྷ་དང་བཅས་པའི་འཇིག་རྟེན་ཟིལ་གྱིས་མནན་ཅིང་ལམ
52.36b
མེ་ལྷན་ནེ་ལྷང་ངེའོ། །དེ་ནས་འཇམ་དཔལ་གཞོན་ནུར་གྱུར་པས་དེ་ལྟ་བུའི་འཁོར་ཆེན་པོ་འདུས་པར་ཡང་རིག་ཅིང་དེ་བཞིན་གཤེགས་པའི་སྐུ་བསྙེན་པར་དཀའ་བ་དེ་ཡང་མཐོང་ནས་འདི་སྙམ་དུ་སེམས་ཏེ། འདི་ལྟར་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ཤིན་དུ་ལམ་མེ་ལྷན་ནེ་ལྷང་ངེའོ། །འཁོར་ཆེན་པོ་འདི་ཡང་འདུས་པར་གྱུར་ན་འདི་གོ་ཅིའི་སྔ་ལྟས་ཞིག་ཏུ་འགྱུར། བདག་གིས་དེའི་དོན་དེ་བཞིན་གཤེགས་པ་ལ་ཞུ་བར་བྱའོ་སྙམ་ནས་དེའི་ཚེ་འཇམ་དཔལ་གཞོན་ནུར་གྱུར་པ་སྟན་ལས་ལངས་ནས་བླ་གོས་ཕྲག་པ་གཅིག་ལ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྟོབས་བཅུ་མངའ་བས་ལྷར་བཅས་འཇིག་རྟེན་འདི། །ཟིལ་གྱིས་མནན་ནས་ཁྱོད་ནི་ལྷན་ནེར་བཞུགས། །སྲིད་པ་གསུམ་ན་ཁྱོད་འདྲ་མ་མཆིས་ན། །ལྷག་པའི་སེམས་ཅན་མཆིས་པར་ག་ལ་འགྱུར། །དཔེར་ན་ལྷ་གནས་གྱུར་པ་ལྷུན་པོ་ནི། །རི་བོ་ཀུན་གྱི་ནང་ནས་མངོན་འཕགས་ཏེ། །རི་བོ་གཞན་དག་ཟིལ་གྱིས་མནན་ནས་སུ། །ཕྱོགས་རྣམས་ཀུན་ནས་ལྷན་ནེར་རྣམ་པར་མཛེས། །དེ་བཞིན་ཐུབ་པ་ཡོན་ཏན་མངའ་བ་པོ། །ཡེ་ཤེས་རི་བོའི་དབང་པོ་འཇིག་རྟེན་ལས། །མངོན་པར་འཕགས་ཤིང་འཁོར་ཀུན་ཟིལ་མནན་ཏེ། །རྟག་ཏུ་ལྷན་ནེར་བཞུགས་ཤིང་རྣམ་པར་མཛེས། །དཔེར་ན་མཁའ་ལ་གནས་པའི་དགུང་ཟླ་ནི། །མར་གྱི་ངོ་ལ་མཛེས་པ་མ་ལགས་ཀྱི། །དཔལ་ལྡན་དགུང་ཟླ་ཉ་བ་རྒྱས་པ་ནི། །སྐར་མའི་ཚོགས་རྣམས་ཐམས་ཅད་ཟིལ་གྱིས་གནོན། །དེ་བཞིན་སྟོབས་བཅུ་མངའ་བ་ཐུབ་པ་ཁྱོད། །རང་གི་སློབ་མ་སྐར་ཚོགས་ཞབས་འབྲིང་མངའ། །འཇིག་རྟེན་ཐམས་ཅད་ཟིལ་གྱིས་མནན་མཛད་ཅིང ། །ཡེ་ཤེས་འོད་རྣམས་ཀྱིས་ཀྱང་སིམ་པར་མཛད། །དྲང་སྲོང་དཔེར་ན་གདུགས་ཀྱི་དཀྱིལ་འཁོར་ནི། །འཇིག་རྟེན་ཐམས་ཅད་ཟིལ་མནན་རབ་ཏུ་ལྷན། །མི་ཡི་ཉི་མ་ཁྱོད་ཀྱང་དེ་བཞིན་ཏེ། །
52.37a
བློ་གྲོས་འོད་ཀྱིས་འཇིག་རྟེན་ཀུན་ཟིལ་གནོན། །དཔེར་ན་རི་མཆོག་མཆིས་པའི་ཞུགས་ཀྱི་ཚོགས། །གཟི་བརྗིད་ཀྱིས་ནི་ཕྱོགས་བཅུ་རྣམ་པར་མཛེས། །དེ་བཞིན་ཡེ་ཤེས་རི་བཞུགས་ཐུབ་པ་ཡང ། །ཕྱོགས་བཅུ་དག་ཏུ་རྣམ་པར་མཛེས་པ་ལགས། །དཔེར་ན་རི་དགས་རྒྱལ་པོས་རི་དགས་ཕྲན། །ཟིལ་གྱིས་མནན་ཅིང་དེར་གནས་མངོན་པར་མཛེས། །མུ་སྟེགས་ཅན་གཞན་གྱི་ནང་རྣམ་གནས་ཤིང ། །ཐུབ་པ་ཁྱོད་ཀྱང་དེ་བཞིན་རྣམ་པར་མཛེས། །དཔེར་ན་འདི་ན་མི་བདག་འཁོར་ལོས་སྒྱུར། །འགྲོ་བ་ཟིལ་གྱིས་མནན་ཅིང་རྣམ་པར་མཛེས། །མགོན་པོ་ཆོས་མཆོག་འཁོར་ལོས་སྒྱུར་བ་ཡང ། །འགྲོ་བའི་ནང་ན་དེ་བཞིན་རྣམ་པར་མཛེས། །དཔེར་ན་སུམ་བཅུ་གསུམ་དབང་བརྒྱ་བྱིན་ནི། །ལྷ་རྣམས་ཟིལ་གྱིས་མནན་ནས་མངོན་པར་མཛེས། །མཚུངས་པ་མ་མཆིས་དེ་བཞིན་ཚོགས་པ་རྣམས། །ཐམས་ཅད་ཟིལ་གྱིས་མནན་ནས་རྣམ་པར་མཛེས། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཐོས་པས་རྒྱ་ཆེན་པོ་ལ་མོས་པའི་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དང ། དམན་པ་ལ་མོས་པའི་སེམས་ཅན་རྣམས་ཀྱང་རྒྱ་ཆེན་པོ་ལ་འཇུག་པ་ལ་གནས་པར་འགྱུར་བ་དང ། བྱང་ཆུབ་ཏུ་སེམས་བསྐྱེད་པའི་སེམས་ཅན་རྣམས་ཀྱང་བྱང་ཆུབ་ལ་དམིགས་པ་རྣམ་པར་འཕེལ་བར་འགྱུར་བ་དང ། དམན་པ་ལ་སྦྱོར་བའི་སེམས་ཅན་རྣམས་ཀྱང་བརྩམ་པ་ཆེན་པོ་རྩོམ་པར་འགྱུར་བ་དང ། ལམ་ལས་ཉམས་པའི་སེམས་ཅན་རྣམས་ཀྱང་བྱང་ཆུབ་ཀྱི་ལམ་དུ་འཇུག་པར་འགྱུར་བ་དང ། བྱང་ཆུབ་ཀྱི་ལམ་དུ་ཞུགས་པའི་སེམས་ཅན་རྣམས་ཀྱང་དེ་བཞིན་གཤེགས་པའི་ཡེ་ཤེས་ཀྱིས་རྣམ་པར་བསྒྲུབས་པའི་དགོངས་པའི་ཚུལ་ལ་འཇུག་པར་འགྱུར་བ། བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བགྱི་བའི་ཆོས་ཀྱི་རྣམ་གྲངས་དེ་འཁོར་འདིར་བསྟན་དུ
52.37b
གསོལ། དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ལྡེམ་པོ་དག་དགོངས་ཏེ་བསྟན་པ་ནི་ལྷ་དང་བཅས་པའི་འཇིག་རྟེན་གྱིས་མོས་པར་དཀའ་བ། ཤེས་པར་དཀའ་བ། རྟོགས་པར་དཀའ་བ། རྣམ་པར་ཤེས་པར་དཀའ་བ། འཇུག་པར་དཀའ་བ། ཡོངས་སུ་རྟོགས་པར་དཀའ་བ་ཡིན་པས་ཆོ་ག་ཉམས་པ་འམ། ལྟ་བ་ཉམས་པ་འམ། ཚུལ་ཁྲིམས་ཉམས་པས། ཡོངས་སུ་ཤེས་པ་འམ། རྣམ་པར་ཤེས་པར་མི་ནུས་སོ། །དམན་པ་ལ་མོས་པ་རྣམས་ཀྱིས་མོས་པར་མི་ནུས་སོ། །བསམ་པ་ཉམས་པ་རྣམས་ཀྱིས་ཡིད་ཆེས་པར་མི་ནུས་སོ། །སྡིག་པའི་གྲོག་པོས་ཡོངས་སུ་ཟིན་པ་རྣམས་ཀྱིས་འཇུག་པར་མི་ནུས་སོ། །དགེ་བའི་བཤེས་གཉེན་གྱིས་ཡོངས་སུ་མ་ཟིན་པ་རྣམས་ཀྱིས་རྟོགས་པར་མི་ནུས་སོ། །ཆོས་དེ་ལྟ་བུ་ནི་ཡང་དག་པར་རྫོགས་པའི་སངས་རྒྱས་ཀྱིས་བྱིན་གྱིས་མ་བརླབས་པར་མཉན་པར་ཡང་མི་ནུས་ན། མོས་པར་ལྟ་ག་ལ་ནུས་ཏེ། དེ་བཞིན་གཤེགས་པའི་བྱིན་གྱི་བརླབས་མ་གཏོགས་པར་དེ་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཡིད་འོང་སྙན་པའི་དབྱངས་དང་ལྡན་ཁྱོད་ཀྱིས། །ང་ལ་གང་དྲིས་དོན་དེ་ངས་བསྟན་ཉོན། །སེམས་ཅན་དམན་པ་མུན་པ་བསྒྲིབས་པ་ཡིན། །ཆོས་ཚུལ་དམ་པ་ཁོང་དུ་ཆུད་མི་ནུས། །གང་དག་སྔོན་སངས་རྒྱས་ལ་སྤྱོད་སྤྱད་ཅིང ། །འཇིག་རྟེན་མགོན་པོ་རྣམས་ཀྱིས་བྱིན་བརླབས་པ། །དེ་དག་ཆོས་ཚུལ་དམ་པ་འདི་ཐོས་ན། །མི་རྟོག་ཤིན་དུ་གྱ་ནོམ་འབྱུང་བར་འགྱུར། །གང་དག་སྡིག་གྲོགས་སྦྲུལ་གྱིས་སེམས་ཟིན་ཅིང ། །དགེ་བའི་བཤེས་ཀྱི་དུག་སྨན་རྣམ་སྤངས་པ། །དེ་དག་དམ་ཆོས་དཀོན་མཆོག་འདི་ཐོས་ན། །ཀྱེ་མ་བག་མེད་གཡང་ས་ཆེ་ལས་ལྟུང ། །གང་དག་སེམས་ཆུང་དམན་ཞིང་ཞུམ་གྱུར་དང ། །གང་དག་ལྷག་པའི་བསམ་པ་ཆེ་མེད་པ། །ཡིད་ཆེས་མེད་པ་མོས་པ་ཉམས་པས་ན
52.38a
ཐོས་ཀྱང་དེ་དག་དགའ་བར་མི་འགྱུར་རོ། །ཆོས་མཆོག་འདི་ལ་དད་པར་མ་གྱུར་པ། །དེ་དག་ཡུན་རིང་སྡུག་བསྔལ་ལྟུང་འགྱུར་ཏེ། །ཀྱེ་མ་སྡུག་བསྔལ་རྣམས་ལ་གནོད་འགྱུར་ཞེས། །དེ་ལ་སྙིང་རྗེ་མངོན་བྱས་དེ་མ་བསྟན། །དེ་སྐད་ཅེས་བཀའ་སྩལ་པ་དང ། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདུས་པ་འདི་ནི་དག་པ་ལགས་ཏེ། སྤྱད་པ་རྣམས་ལེགས་པར་སྤྱད་པ་སངས་རྒྱས་འབྱུང་བ་རྣམས་ལེགས་པར་བསྙེན་བཀུར་བགྱིས་པ་དགེ་བའི་བཤེས་གཉེན་རྣམས་ཀྱིས་ལེགས་པར་ཡོངས་སུ་བཟུངས་བ། དད་པའི་མིག་ལེགས་པར་ཡོངས་སུ་དག་པ། མོས་པའི་སྤྱོད་ཡུལ་ལ་ངེས་པར་བྱུང་བ་བསམ་པ་དང་ལྷག་པའི་བསམ་པ་ལེགས་པར་ཡོངས་སུ་དག་པ་རྣམ་པ་བཟང་པོ་རྟོགས་པར་འགྱུར་བ་ཤ་སྟག་སྟེ། འཁོར་འདུས་པ་འདི་ནི་དེ་ལྟ་བུ་ལགས་པས་དེ་དག་གིས་ཆོས་ཀྱི་ཚུལ་འདི་འཚལ་བར་འགྱུར་ཞིང ། རྣམ་པར་འཚལ་བར་འགྱུར་ན་སེམས་ཅན་རྣམས་ལ་ཐུགས་བརྩེ་བའི་སླད་དུ། བཅོམ་ལྡན་འདས་ཀྱིས་ལེགས་པར་ཡང་དག་པར་བཤད་དུ་གསོལ། དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ། །དྲང་སྲོང་ཆེན་པོ་གང་དག་ཆོས་འདི་འཚལ་འགྱུར་བའི། །སེམས་ཅན་དཔལ་ཡོན་ལྡན་པ་འདི་ན་མང་དུ་མཆིས། །གང་དག་སྔོན་སངས་རྒྱས་ལ་སྤྱད་པ་ལེགས་སྤྱད་པ། །དེ་དག་རྣམས་ལ་ཐུབ་དབང་དེ་རིང་ཆོས་བསྟན་གསོལ། །དེ་དག་གུས་དང་བཅས་ཤིང་ཐལ་མོ་སྦྱར་མཆིས་ནས། །མི་ཡི་ལྷ་ཡི་ཞལ་དུ་ལྟ་ཞིང་མཆིས་ལགས་ན། །དྲང་སྲོང་ཆེན་པོ་དེ་སླད་ཐུགས་རྗེ་བསྐྱེད་མཛད་ཅིང ། །དམ་ཆོས་ཆར་པ་དགྱེས་པ་བཞིན་དུ་དབབ་དུ་གསོལ། །ཆོས་རྒྱལ་ཁྱོད་ལ་བདག་ནི་གསོལ་བ་འདེབས་ལགས་ན། །ཆོས་ཀྱི་དམ་པ་གྱ་ནོམ་རབ་ཏུ་བསྟན་དུ་གསོལ། །རྫོགས་པའི་བྱང་ཆུབ་སེམས་དཔའ་ཁྱུ་མཆོག་བསྡུ་སླད་དུ། །མགོན་པོ་དམ་ཆོས་ཕྱག་མཛོད་དབྱེ་བ་མཛད་དུ་གསོལ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར
52.38b
རྫོགས་པའི་སངས་རྒྱས་ལ་དོན་འདི་འདྲི་བར་སེམས་པ་ལེགས་སོ་ལགས་སོ། །འདི་ལྟར་འཇམ་དཔལ་ཁྱོད་ནི་ཆོས་འདི་དག་ལ་མངོན་སུམ་དུ་གནས་པ། ཆོས་ཐམས་ཅད་ལ་ཐེ་ཙོམ་མེད་ཅིང་ཤེས་རབ་ཀྱི་ཕ་རོལ་དུ་ཕྱིན་པ་དང་ཐབས་ལ་མཁས་པས་ངེས་པར་འབྱུང་བ་སྟེ། འཇམ་དཔལ་ཁྱོད་ནི་སྐྱེ་བོ་མང་པོ་ལ་ཕན་པའི་ཕྱིར་ཞུགས་པའོ། །འཇམ་དཔལ་ཁྱོད་ནི་མ་འོངས་པའི་བྱང་ཆུབ་སེམས་དཔའ་རྣམས་ལ་སྣང་བ་བྱ་བར་འདོད་པའོ། །འཇམ་དཔལ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་།བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་ངས་ཁྱོད་ལ་བཤད་དོ། །བཅོམ་ལྡན་འདས་དེ་བཞིན་འཚལ་ལོ། ཞེས་འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་དེ་དག་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་པ། རིགས་ཀྱི་བུ་ཆོས་བཅུ་གཉིས་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བར་འགྱུར་རོ། །བཅུ་གཉིས་གང་ཞེ་ན་འདི་ལྟ་སྟེ། རང་བཞིན་གྱིས་རྒྱ་ཆེན་པོ་ལ་མོས་ཤིང་དམན་པ་ལ་མོས་པ་མེད་པ་ཡིན། རང་བཞིན་གྱིས་སྙིང་རྗེའི་སྤྱོད་ཡུལ་དང་ལྡན་ཞིང་དཀར་པོའི་རང་བཞིན་ཅན་ཡིན། བཅོས་མ་མ་ཡིན་པའི་ལྷག་པའི་བསམ་པའི་སྤྱོད་ཡུལ་དང་ལྡན་ཞིང་ཡི་དམ་ལ་བརྟན་པ་ཡིན། ཚོགས་ཤིན་དུ་བསགས་ཤིང་སྤྱད་པ་ལེགས་པར་སྤྱད་པ་ཡིན། སངས་རྒྱས་འབྱུང་བ་ལེགས་པར་བསྙེན་བཀུར་ཞིང་དཀར་པོའི་ཆོས་ལེགས་པར་ཡོངས་སུ་བསྡུས་པ་ཡིན། ལུས་དང་ངག་དང་ཡིད་ཀྱི་ལས་ཀྱི་མཐའ་ཁ་ན་མ་ཐོ་བ་མེད་པ་དང་ལྡན་ཞིང་སྡིག་པའི་ལས་ཐམས་ཅད་བོར་བ་ཡིན། སྡིག་པའི་གྲོགས་པོ་ཐམས་ཅད་ཡོངས་སུ་སྤངས་ཤིང་དགེ་བའི་བཤེས་གཉེན་ལ་བརྟེན་པ་ཡིན། ཇི་ལྟར་སྨྲས་པ་དེ་བཞིན་དུ་བྱེད་ཅིང་སླུ་བ་མེད་པ་ཡིན། བགེད་པའི་ངང་ཚུལ་ཅན་ཡིན་ཞིང་རོ་བྲོ་བ་རྣམས་ལ་མ་ཞེན་མ་ཆགས་པ་མང་བ་ཡིན། དེ་བཞིན་གཤེགས་པའི་བྱིན་གྱི་བརླབས་ཀྱིས
52.39a
བརླབས་ཤིང་བདུད་ཀྱི་བྱིན་ཀྱི་བརླབས་དང་བྲལ་བ་ཡིན། སེམས་ཅན་ཐམས་ཅད་ལ་ཡང་དང་ཡང་སྙིང་རྗེ་ཆེན་པོ་ཡང་དག་པར་འཇུག་པ་ཡིན། བདོག་པ་ཐམས་ཅད་ཡོངས་སུ་གཏོང་ཞིང་མ་ཆགས་པའི་སེམས་དང་ལྡན་པ་ཡིན་ཏེ་རིགས་ཀྱི་བུ་ཡོན་ཏན་ཀྱི་ཆོས་བཅུ་གཉིས་པོ་དེ་དག་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་སྟེ། འདི་ལྟ་སྟེ། སེམས་ཅན་ཐམས་ཅད་བདེ་བར་བྱ་བའི་ཕྱིར་ཕན་པའི་སེམས་སོ་སྡིག་པ་ཐམས་ཅད་མི་བྱེད་པའི་ཕྱིར་སྙིང་རྗེའི་སེམས་སོ། །སེམས་ཅན་ཐམས་ཅད་ཀྱི་ཁུར་བསྐུར་བའི་ཕྱིར་སྙིང་རྗེ་ཆེན་པོའི་སེམས་སོ། །ངན་འགྲོ་ཐམས་ཅད་རབ་ཏུ་སིམ་པར་བྱེད་པའི་ཕྱིར་བྱམས་པ་ཆེན་པོའི་སེམས་སོ། །ཐེག་པ་གཞན་མི་འདོད་པའི་ཕྱིར་དག་པའི་སེམས་སོ། །ཉོན་མོངས་པའི་རྙོག་པ་སེལ་བའི་ཕྱིར་ཉོན་མོངས་པ་མེད་པའི་སེམས་སོ། །རང་བཞིན་གྱིས་འོད་གསལ་བའི་ཕྱིར་འོད་གསལ་བའི་སེམས་སོ། །རྫས་མེད་པའི་ཕྱིར་སྒྱུ་མ་ལྟ་བུའི་སེམས་སོ། །དངོས་པོ་དང་བྲལ་བའི་ཕྱིར་དངོས་པོ་མེད་པའི་སེམས་སོ། །མི་སྒུལ་བའི་ཕྱིར་བརྟན་པའི་སེམས་སོ། །ཆོས་ཐམས་ཅད་ངེས་པར་རྟོག་པའི་ཕྱིར་མི་ཟློག་པའི་སེམས་སོ། །ཇི་སྐད་སྨྲས་པ་དེ་བཞིན་དུ་བྱེད་པའི་ཕྱིར་སེམས་ཅན་ཐམས་ཅད་སྒྲོལ་བའི་སེམས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྒྱལ་སྲས་གང་དག་སྤྱོད་པ་ལེགས་སྤྱོད་ཅིང ། །དཀར་པོའི་ཆོས་ཀྱིས་བསམ་པ་ཡོངས་དག་ལ། །དགྲ་ལ་འང་བྱམས་ཤིང་སྙིང་རྗེས་སེམས་བརླན་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་སྡིག་གྲོགས་དགྲ་བོ་རྣམ་སྤངས་ཤིང ། །བྱང་ཆུབ་སྟོན་པའི་དགེ་བཤེས་བསྟེན་གྱུར་ཏེ། །བྱང་ཆུབ་ཐེག་པར་སྨོན་ལམ་སྦྱོང་བྱེད་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་སྔོན་མཐར་སྤྱད་པ་སྤྱོད་པ་ན། །ནམས་ཀྱང་སྐྱོ་བའི་སེམས་ནི་མི་སྐྱེ་ལ། །རྡོ་རྗེ་ལྟ་བུར་མི་ཟློགས་སེམས་ལྡན་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་སྐྱེ་བོ་ཀུན་ལ་བྱམས་སེམས་ལྡན། །
52.39b
སེམས་ཅན་ཐམས་ཅད་བདེ་ལ་སྦྱོར་འདོད་ཅིང ། །སྡིག་པ་ཐམས་ཅད་སྤང་བའི་བསམ་པ་ཅན། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །ཐེག་པ་གཞན་གྱི་ཡོན་ཏན་མི་འདོད་ཅིང ། །བྱང་ཆུབ་རྒྱ་ཆེན་ཡོན་ཏན་མཆོག་སེམས་ཤིང་རྣམ་དག་ཉོན་མོངས་མེད་པའི་སེམས་ལྡན་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །སྲིད་པ་ཞི་བ་གང་ལ་ཡང་དག་ཏུ། །སྐད་ཅིག་ཙམ་ཡང་ཡོད་མེད་རྟོག་མེད་ཅིང ། །མེ་ལོང་གདོང་ལྟར་འགྲོ་བ་ཀུན་ལྟ་བ། །འདི་ནི་ཡང་དག་ཏུ་ན་བྱང་ཆུབ་སེམས། །ཉོན་མོངས་སྐྱོན་གྱི་རྡུལ་རྣམས་རྣམ་སྤངས་ཤིང ། །དྲི་མེད་ནམ་མཁའ་ལྟ་བུར་རྣམ་མཛེས་ལ། །ཚིག་ལམ་ངེས་ཚིག་ཐམས་ཅད་མཐོང་དགའ་བ། །འདི་ནི་བཟང་པོའི་བྱང་ཆུབ་སེམས་ཤེས་བྱ། །གཟུངས་དང་སོ་སོ་རིག་དང་སྤྱོད་མཆོག་གི། །རྩ་བ་འདི་ཡིན་མཚན་གྱི་འབྱུང་གནས་ཏེ། །དཔེ་བྱད་བཟང་པོ་འབར་བ་ལུས་གྱི་རྒྱུ། །སངས་རྒྱས་ཡོན་ཏན་ཀུན་གྱི་རིགས་སུ་གནས། །གླེང་གཞིའི་ལེའུ་སྟེ་དང་པོའོ།། །། ་འཇམ་དཔལ་ཡོན་ཏན་གྱི་ཆོས་དེ་ལྟ་བུ་ལ་གནས་པའི་བྱང་ཆུབ་སེམས་དཔའ་ཡོན་ཏན་གྱི་ཕན་ཡོན་བཅུ་གཉིས་ཡང་དག་པར་མཐོང་བ་དེས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་ཀྱི་ལམ་སྟོན་པར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། ལོངས་སྤྱོད་ཆེན་པོ་ཡོངས་སུ་སྒྲུབ་པའི་ལམ་ཡིན་པར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང་འདོད་པའི་རིགས་སུ་སྐྱེ་བར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། སེར་སྣ་ཚར་གཅོད་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། གཏོང་བའི་རྒྱུན་འཕེལ་བར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། ཡི་དགས་ཀྱི་གྲོང་ཁྱེར་གྱི་སྒོ་གཅོད་པར་བྱེད་པར་འགྱུར་བར་ཡང་དག་པར་མཐོང་བས
52.40a
སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། སྐྱེ་བོ་མང་པོ་དང་ཐུན་མོང་གི་ལོངས་སྤྱོད་རྣམས་ལས་སྙིང་པོ་ལེན་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང་ཡོ་བྱད་ཡོངས་སུ་རྫོགས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། བདོག་པ་ཐམས་ཅད་ཡོངས་སུ་གཏོང་བ་ལ་གོམས་པར་བྱས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། དངོས་པོ་ཐམས་ཅད་ལ་འཛིན་པའི་སེམས་བདག་ལ་མེད་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། བདག་གི་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་དང ། དེ་བཞིན་གཤེགས་པའི་རྗེས་སུ་བསྟན་པ་ལ་འཐུན་པར་ཞུགས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་བ་སྟེ། རིགས་ཀྱི་བུ་ཡོན་ཏན་གྱི་ཕན་ཡོན་བཅུ་གཉིས་པོ་དེ་དག་ཡང་དག་པར་མཐོང་བའི་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་དུ་ཕྱིན་པ་ལ་སྦྱར་བར་བྱ་སྟེ། སྦྱིན་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྦྱིན་པ་རྒྱ་ཆེན་མཚུངས་མེད་བྱིན་པས་དེ་དག་བྱང་ཆུབ་འགྲུབ་འགྱུར་ཞེས། །རྐང་ལག་མགོ་དང་དྲི་མེད་མིག་དང་རྐང་དང་དེ་བཞིན་རུས་པ་དང ། །ཕྱི་དང་ནང་གི་དངོས་པོ་ཐམས་ཅད་སེར་སྣ་མེད་པའི་བློས་ཀྱང་གཏོང ། །ཕྱིར་ཞིང་ཕན་ཡོན་མཐོང་བ་རྒྱ་ཆེན་སེམས་ལྡན་གང་དུ་འང་ལྟ་བ་མེད། །བདག་ནི་ལོངས་སྤྱོད་བཟང་པོ་རྫོགས་འགྱུར་རིགས་ཀྱི་མཆོག་ཏུ་སྐྱེ་བར་འགྱུར། །སངས་རྒྱས་དྲི་མེད་ལམ་འཕེལ་ཡོན་ཏན་སེར་སྣ་ཡོངས་སུ་སྤངས་པར་འགྱུར། །དབང་དང་ཕ་རོལ་ཕྱིན་ལ་སོགས་པ་རྫོགས
52.40b
འགྱུར་སྦྱིན་འདི་རྒྱལ་བས་བསྔགས། །མཁས་པ་དེ་ལྟར་དུ་མར་རྟོག་ཅིང་དོན་ཀུན་གཏོང་ལ་དགའ་བར་བྱེད། །རིགས་ཀྱི་བུ་ཡོན་ཏན་གྱི་ཆོས་བཅུ་གཉིས་པོ་འདི་དག་མཐོང་བའི་བྱང་ཆུབ་སེམས་དཔས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། བདག་གིས་བྱིན་གྱི་བརླབས་ཕུན་སུམ་ཚོགས་པ་ཡོངས་སུ་ཟིན་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བྱང་ཆུབ་སེམས་དཔའི་ལམ་དུ་ཞུགས་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་གིས་ཉོན་མོངས་པའི་འཆིང་བ་རྣམས་ལྷོད་པར་འགྱུར་བར་མཐོང་བས། ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་ངན་འགྲོ་ཐམས་ཅད་ལས་ཡང་དག་པར་འདའ་བར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་གིས་ངན་འགྲོའི་ལམ་ཐམས་ཅད་རྣམ་པར་སྦྱངས་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་གིས་ལུས་དང་ངག་དང ། ཡིད་ཀྱི་ལས་ཁ་ན་མ་ཐོ་བ་མེད་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། མཁས་པའི་སྐྱེ་བོ་རྣམས་ཀྱིས་སྨད་པ་མེད་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་བག་ཡོད་པའི་ཆོས་ལ་བརྟེན་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་གིས་སེམས་ཅན་ཐམས་ཅད་ལ་མི་འཇིགས་པའི་སྦྱིན་པ་བྱིན་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། ལུས་དང་ངག་དང་ཡིད་ཀྱི་ལས་སྡོམ་པ་ཐོབ་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་དང ། བདག་གིས་སངས་རྒྱས་ཀྱི་ཆོས་ཐམས་ཅད་བསྒྲུབ་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ
52.41a
བརྩོན་པར་བྱ་བ་དང ། བདག་གིས་དེ་བཞིན་གཤེགས་པའི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་བླ་ན་མེད་པ་ཡོངས་སུ་སྦྱངས་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་བ་སྟེ། རིགས་ཀྱི་བུ་ཡོན་ཏན་གྱི་ཕན་ཡོན་བཅུ་གཉིས་པོ་དེ་དག་ཡང་དག་པར་མཐོང་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པར་བྱ་སྟེ། ཚུལ་ཁྲིམས་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བདག་གི་ཉོན་མོངས་འཆིང་བ་ལྷོད་འགྱུར་ཞིང ། །བདག་ནི་ངན་འགྲོའི་སྒོ་བཅད་འགྱུར་རོ་ཞེས། །མཁས་པས་ཕན་ཡོན་ཡོངས་སུ་བསམ་བྱས་ལ། །ཚུལ་ཁྲིམས་གཡག་རྔ་བཞིན་དུ་བསྲུང་བར་བྱ། །སངས་རྒྱས་རྗེས་བསྟན་རྗེས་སུ་བདག་འབྲང་ཞིང ། །བདེ་བར་གཤེགས་པས་རྟག་ཏུ་བསྔགས་འགྱུར་ལ། །བདག་གིས་བྱིན་བརླབས་དོན་མེད་མི་འགྱུར་བ། །ཚུལ་ཁྲིམས་གནས་ལས་འགྱུར་ཞེས་ཚུལ་ཁྲིམས་བསྲུང ། །ལུས་དང་ངག་ལ་ཁ་ན་མ་ཐོ་མེད། །སེམས་ལ་སྐྱོན་མེད་ཆོས་ལ་སྤྱོད་པར་འགྱུར། །ལུས་ཀྱིས་བསྲུངས་ལ་ངག་གིས་བསྲུངས་གྱུར་ཅིང ། །སེམས་ཀྱིས་སྡིག་པ་རྣམ་པར་སེམས་མི་འགྱུར། །བག་ཡོད་བདེ་བར་གཤེགས་པས་བསྔགས་པ་སྟེ། །དགེ་བའི་ལས་ཀྱི་རྩ་བར་གང་གྱུར་པ། །དེ་ལ་རྟག་ཏུ་བག་ཡོད་བདག་གནས་བྱ། །བག་མེད་ཐམས་ཅད་རྟག་པར་ཡོངས་སུ་སྤང ། །ཚུལ་ཁྲིམས་ཕ་རོལ་ཕྱིན་པའི་མཆོག་གནས་ན། །སངས་རྒྱས་ཆོས་རྣམས་བདག་གིས་ཐོབ་པར་འགྱུར། །སངས་རྒྱས་ཚུལ་ཁྲིམས་རབ་ཏུ་སྦྱང་བར་བྱ། །དེ་ནི་ཚུལ་ཁྲིམས་མཆོག་ཅེས་འཕགས་པས་གསུངས། །ཡོན་ཏན་དེ་དག་ཐོབ་པར་གང་འདོད་ཅིང ། །བྱང་ཆུབ་སེམས་དཔའ་བྱང་ཆུབ་མཆོག་འདོད་པ། །དེས་ན་ཚུལ་ཁྲིམས་གཡག་རྔ་བཞིན་བསྲུངས་ན། །ཡོན་ཏན་ཐམས་ཅད་མཁས་པས་མྱུར་དུ་འཐོབ། །
52.41b
རིགས་ཀྱི་བུ་གཞན་ཡང་ཆོས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་བཅུ་གཉིས་ཀྱིས་བཟོད་པ་བསྒོམ་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་སྐད་ཅིག་པའོ། །ཞེས་བཟོད་པ་བསྒོམ་པར་བྱ་བ་དང་བདག་མི་དམིགས་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང ། བདག་དང་གཞན་ཡོངས་སུ་བསྲུང་བའི་ཕྱིར་བཟོད་པ་བསྒོམ་པར་བྱ་བ་དང ། འཁྲུག་པ་གཏན་མེད་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང ། བག་ལ་ཉལ་དང་ཀུན་ནས་དཀྲིས་པ་རྣམ་པར་བསལ་བའི་ཕྱིར་བཟོད་པ་བསྒོམ་པར་བྱ་བ་དང ། རྗེས་སུ་ཆགས་པ་དང་ཁོང་ཁྲོ་བ་སྤང་བའི་ཕྱིར་བཟོད་པ་བསྒོམ་པར་བྱ་བ་དང ། མཚན་དང་དཔེ་བྱད་བཟང་པོ་ཡོངས་སུ་བསྒྲུབ་པའི་ཕྱིར་བཟོད་པ་བསྒོམ་པར་བྱ་བ་དང ། ཚངས་པའི་འཇིག་རྟེན་དུ་སྐྱེ་བ་ཐོབ་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང ། གཞན་གྱི་གནོད་པ་ཐམས་ཅད་ལས་ཡང་དག་པར་འདའ་བར་བྱ་བའི་ཕྱིར་བཟོད་པ་བསྒོམ་པར་བྱ་བ་དང ། ཟད་པ་ཤེས་པ་དང་མི་སྐྱེ་བ་ཤེས་པ་ཐོབ་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང ། བདུད་ཀྱི་ཡུལ་ཐམས་ཅད་ལས་ཡང་དག་པར་འདའ་བར་བྱ་བའི་ཕྱིར་བཟོད་པ་བསྒོམ་པར་བྱ་བ་དང ། དེ་བཞིན་གཤེགས་པའི་སྐུ་ཚད་མེད་པ་ཡང་དག་པར་མཐོང་བས་བཟོད་པ་བསྒོམ་པར་བྱ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་བཅུ་གཉིས་པོ་དེ་དག་གིས་བཟོད་པ་བསྒོམ་པར་བྱ་སྟེ། བཟོད་པ་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཀྱེ་མ་ཆོས་རྣམས་སྐད་ཅིག་ཡ་མ་བརླ། །དེ་ལ་ནམས་ཀྱང་སེམས་ཅན་རྙེད་མི་འགྱུར། །ཡོན་ཏན་ཆོས་རྣམས་རབ་ཏུ་རྟོགས་གྱུར་ན། །འཕགས་པ་སངས་རྒྱས་ཡོན་ཏན་གནས་པར་འགྱུར། །མཐའ་གཉིས་རྣམ་པར་སྤང་བ་བྱས་པས་ན། །བདག་དང་གཞན་ལ་རྟག་ཏུ་གནོད་མེད་པར། །བཟོད་པ་ཕུན་སུམ་ཚོགས་པ་མྱུར་བསྒོམ་ཞེས། །ཐུགས་རྗེ་ཆེན་པོའི་དབང་པོ་དེ་སྐད་གསུང ། །རྟག་ཏུ་རྣམ་རྟོག་མེད་པར་བྱ་བ་ལ། །དེ་ནི་བརྟན་པའི་ཡིད་ཀྱིས་བཟོད་པ་སྟེན། །
52.42a
ཟད་པ་ཤེས་པ་བདག་གིས་ཐོབ་བྱ་ཞེས། །ཉོན་མོངས་ཞི་བར་བྱ་ཕྱིར་བཟོད་པ་སྟེན། །མཚན་གཟུགས་དཔེ་བྱད་བཟང་པོ་དག་བྱ་དང ། །ཚངས་པའི་གནས་སུ་འགྲོ་བར་སུ་འདོད་པ། །བརྩོན་འགྲུས་བརྟན་པ་དེ་ཡིས་བཟོད་སྟོབས་སྟེན། །བཟོད་ལ་མོས་ན་ཐམས་ཅད་འབྱོར་པར་འགྱུར། །བདུད་ཀྱི་སྟོབས་ནི་སྟོབས་མེད་བྱ་བ་ལ། །བཟོད་པ་འདྲ་བ་སྟོབས་ཟླ་གང་ཡང་མེད། །དེ་ནི་ཡོན་ཏན་ཀུན་ཀྱི་འབྱུང་གནས་ཏེ། །དེ་ཕྱིར་བཟོད་པའི་ཡོན་ཏན་དེ་བསྟེན་བྱ། །རིགས་ཀྱི་བུ་གཞན་ཡང་བྱང་ཆུབ་སེམས་དཔས་རྟུལ་བ་བཅུ་གཉིས་ཀྱིས་བརྩོན་འགྲུས་བརྩམ་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། ཆོས་ཐམས་ཅད་མངོན་པར་རྫོགས་པར་བྱང་ཆུབ་པར་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། དེ་བཞིན་གཤེགས་པ་ཐམས་ཅད་མཉེས་པར་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སེམས་ཅན་ཐམས་ཅད་སངས་རྒྱས་ཀྱི་ཆོས་ལ་དགོད་པའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སེམས་ཅན་ཐམས་ཅད་ཀྱི་མི་ཤེས་པ་བསལ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཉེ་བར་བསྒྲུབ་པའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱོང་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། ཕྱི་མའི་མཐའི་མུར་ཐུག་པའི་བསྐལ་པར་སེམས་ཅན་གྱི་དོན་དུ་སྤྱོད་པ་སྤྱད་པས་ཡོངས་སུ་མི་སྐྱོ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སྐད་ཅིག་གཅིག་གིས་འཇིག་རྟེན་གྱི་ཁམས་ཐམས་ཅད་དུ་འགྲོ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང ། སངས་རྒྱས་ཀྱི་ཞིང་ཐམས་ཅད་དུ་བླ་ན་མེད་པ་ཡང
52.42b
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་ཆོས་ཀྱི་འཁོར་ལོ་བསྐོར་བའི་རྟུལ་པས་བརྩོན་འགྲུས་བརྩམ་པར་བྱ་བ་སྟེ། རིགས་ཀྱི་བུ་རྟུལ་བ་བཅུ་གཉིས་པོ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོས་བརྩོན་འགྲུས་བརྩམ་པར་བྱ་སྟེ། བརྩོན་འགྲུས་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དྲང་སྲོང་སྲས་པོ་གང་དག་བྱང་ཆུབ་མཆོག་འདོད་པ། །ཁྱུ་མཆོག་དེ་དག་རྣམས་ཀྱི་བརྩོན་འགྲུས་མ་ཞུམ་མཆོག་།དེ་དག་སངས་རྒྱས་ཞིང་ནི་བརྒྱར་ཡང་འགྲོ་བར་བྱེད། །དེ་དག་ཡུན་རིང་སྤྱད་པ་སྤྱོད་ཀྱང་སྐྱོ་བ་མེད། །སེམས་ཅན་ཡོངས་སུ་སྨིན་པར་བྱ་ཕྱིར་བརྩོན་འགྲུས་ཅན། །དེ་དག་བསྐལ་པ་བརྒྱ་ཕྲག་མང་པོར་སྡུག་བསྔལ་བཟོད། །སྐྱེ་བོ་སྡུག་བསྔལ་དཔག་མེད་ཞི་བདེ་སྦྱིན་འདོད་པ། །ལེ་ལོ་མེད་པ་དེ་དག་བརྩོན་འགྲུས་མི་ཉམས་འདོད། །ཞིང་ཀུན་རྣམ་པར་སྦྱོང་བར་བདག་ནི་སྨོན་ལམ་འདེབས། །ཆོས་རྣམས་འདི་དག་ཐམས་ཅད་རྣམ་པ་ཀུན་རྟོགས་བྱ། །ཞིང་བརྒྱ་ཀུན་དུ་ཆོས་ཀྱི་འཁོར་ལོ་བསྐོར་བར་བྱ། །ཐེག་པ་མཆོག་ལ་བདག་གིས་སེམས་ཅན་བྱེ་བ་གདུལ། །ཤིན་དུ་རྒྱ་ཆེན་ཞིང་རྣམས་སྤྲུལ་པ་བྱས་ནས་སུ། །སེམས་ཀྱི་སྐད་ཅིག་གཅིག་ལ་བྱང་ཆུབ་མཆོག་འཚང་རྒྱ། །རྒྱལ་བའི་སྲས་པོ་བརྩོན་འགྲུས་ཕ་རོལ་དོང་བ་དག་།སེམས་ཅན་དོན་དུ་རྣམ་པར་འཕྲུལ་པ་འདི་ན་སྟོན། །རིགས་ཀྱི་བུ་བྱང་ཆུབ་སེམས་དཔས་རྣམ་པ་བཅུ་གཉིས་ཀྱིས་བསམ་གཏན་རྣམས་བསྒོམ་པར་བྱའོ། །བཅུ་གཉིས་པོ་དེ་དག་གང་ཞེ་ན། འདི་ལྟ་སྟེ། ཤིན་དུ་མི་འཁྲུགས་པའི་ཕྱིར་ཉོན་མོངས་པ་ཞི་བར་བྱ་བའི་རྣམ་པ་དང་ཡུལ་རྣམས་ལ་མི་རྒྱུག་པའི་ཕྱིར་སེམས་གནས་པའི་རྣམ་པ་དང ། འདོད་པ་དང་གཟུགས་དང་གཟུགས་མེད་པའི་ཁམས་ལས་ཡང་དག་པར་འདའ་བའི་ཕྱིར་མི་གནས་པའི་རྣམ་པ་དང ། འཇིག་རྟེན་པའི་སྙོམས་པར་འཇུག་པ་ཟིལ་གྱིས་གནོན་པའི་ཕྱིར
52.43a
འཇིག་རྟེན་ལས་འདས་པའི་རྣམ་པ་དང ། དེ་ལ་མ་ཆགས་པའི་ཕྱིར་ཁྱད་པར་གྱི་རྣམ་པ་དང ། བསམ་གཏན་ཟློག་པའི་ཕྱིར་འདོད་རྒྱལ་གྱི་རྣམ་པ་དང ། དངོས་པོའི་འདུ་ཤེས་དང་བྲལ་བའི་ཕྱིར་ངོ་བོ་ཉིད་ཀྱི་རྣམ་པ་དང་ཚད་ཡོད་པའི་ཏིང་ངེ་འཛིན་ལ་སྨོད་པའི་ཕྱིར་ཚད་མེད་པའི་རྣམ་པ་དང ། ཤིན་དུ་ཞི་བའི་ཕྱིར་ཞི་གནས་ཀྱི་རྣམ་པ་དང ། ཅང་ཤེས་པའི་ཕྱིར་སེམས་དུལ་བའི་རྣམ་པ་དང ། དབང་པོ་ངེས་པར་བསྡམས་པའི་ཕྱིར་ངེས་པར་སེམས་པའི་རྣམ་པ་དང ། བྱང་ཆུབ་ཀྱི་བསམ་པ་མ་བོར་བའི་ཕྱིར་ཐབས་མཁས་པའི་རྣམ་པས་བྱང་ཆུབ་སེམས་དཔའ་རྣམས་བསམ་གཏན་སྒོམ་གྱི། ང་རྒྱལ་དང་ལྟ་བ་དང་སྲེད་པ་ཤས་ཆེ་བའི་ད་བསམ་གཏན་པ་ནི་མ་ཡིན་ཏེ། དེའི་ཕྱིར་བྱང་ཆུབ་སེམས་དཔའ་རྣམས་སྙོམས་པར་འཇུག་པ་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ་རྣམ་པ་བཅུ་གཉིས་པོ་དེ་དག་གིས་བྱང་ཆུབ་སེམས་དཔས་བསམ་གཏན་རྣམས་བསྒོམ་པར་བྱ་སྟེ། བསམ་གཏན་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་གཟི་ལྡན་པ། །དེ་ཉིད་དེ་དག་བསམ་གཏན་ནི། །ཉོན་མོངས་ཐམས་ཅད་ཞི་ཕྱིར་དང ། །ཤིན་དུ་འཁྲུག་མེད་དོན་ཕྱིར་ཡིན། །ཞི་བའི་ཞི་གནས་ངེས་པར་སེམས། །ཡུལ་ལ་རྟག་པར་དགའ་བ་མེད། །སེམས་འཁྲུལ་གྱུར་པ་གནས་རྣམས་སུ། །རྟག་པར་ཡང་དག་རབ་ཏུ་སྦྱོར། །མི་གནས་དེ་དག་བསམ་གཏན་བྱེད། །འདོད་དང་གཟུགས་དང་གཟུགས་མེད་པ། །གང་ལའང་དེ་དག་མི་གནས་ཏེ། །དེ་དག་མི་གནས་བསམ་གཏན་བྱེད། །བྱང་ཆུབ་སེམས་དཔའ་ཡེ་ཤེས་ཅན། །བསམ་གཏན་འཇིག་རྟེན་འདས་པར་བརྗོད། །དེ་བས་ཏིང་ངེ་འཛིན་རྣམས་ཀྱིས། །ཉན་ཐོས་རྣམས་དང་འཇིག་རྟེན་འཕགས། །དེ་དག་བསམ་གཏན་ལས་སུ་རུང ། །ཇི་ལྟར་འདོད་བཞིན་དབང་ཡང་སྒྱུར། །འདོད་པའི་ཁམས་སུ་སྐྱེ་མི་འདོད། །དེ་དག་བསམ་གཏན་ཟློག་པར་བྱེད། །བདག་ཉིད་ཆེན་པོ་དེ་དག
52.43b
གི། །བསམ་གཏན་རྣམས་ནི་རྣམ་པས་འཕགས། །དེ་དག་དེར་ཆགས་མེད་པ་ཞེས། །དེ་ཕྱིར་རྒྱལ་བས་བཀའ་སྩལ་ཏོ། །སེམས་ཅན་མེད་ཆོས་དྲི་མེད་དེ། །དེ་དག་བསམ་གཏན་ཚད་མེད་དོ། །ཕྱོགས་གཅིག་བསམ་གཏན་བྱེད་པ་དག་།ཟིལ་ཀྱིས་མནན་ཅིང་བསམ་གཏན་བྱེད། །ཤེས་རབ་ཐབས་དང་ལྡན་པ་པོ། །མ་སྨད་བསམ་གཏན་བསམ་གཏན་བྱེད། །དེ་དག་ལྟ་བའི་རྣམ་པ་སྤངས། །ཤིན་དུ་དགེ་བའི་སྤྱོད་ཡུལ་ཅན། །དངོས་ལ་མི་གནས་ཤེས་རབ་ལྡན། །དངོས་པོ་མེད་ལའང་མི་གནས་ཏེ། །དངོས་དང་དངོས་མེད་འདུ་ཤེས་སྤངས། །དེ་དག་བསམ་གཏན་བསམ་གཏན་བྱེད། །གཟི་ལྡན་དེ་དག་འདྲ་བ་ཡི། །རྣམ་པས་མཉམ་མེད་བསམ་གཏན་བྱེད། །དེ་ལ་དགྲ་བཅོམ་རང་སངས་རྒྱས། །བློ་ནི་ཤིན་དུ་རྨོངས་པར་འགྱུར། །རིགས་ཀྱི་བུ་རྣམ་པ་བཅུ་གཉིས་ཀྱིས་བྱང་ཆུབ་སེམས་དཔས་ཤེས་རབ་ཀྱི་ཕ་རོལ་དུ་ཕྱིན་པ་རྟོགས་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། གཏི་མུག་གི་མུན་པ་མུན་ནག་མེད་པའི་ཕྱིར་སྣང་བའི་རྣམ་པ་དང ། ཉོན་མོངས་པའི་ཐིབས་པོ་སྣང་བར་བྱེད་པའི་ཕྱིར་སྒྲོན་མའི་རྣམ་པ་དང ། མི་ཤེས་པ་དང་བྲལ་བའི་ཕྱིར་ཡེ་ཤེས་ཀྱི་འོད་ཟེར་རབ་ཏུ་འགྱེད་པའི་རྣམ་པ་དང ། མ་རིག་པ་དྲུངས་ནས་འབྱིན་པའི་ཕྱིར་ཐོང་གཤོལ་གྱི་རྣམ་པ་དང ། སྲེད་པའི་རྒྱ་མོ་རྣམ་པར་འཇིག་པར་བྱེད་པའི་ཕྱིར་ལྕགས་ཀྱུའི་རྣམ་པ་དང ། ཉོན་མོངས་པ་རྡུལ་དུ་རློག་པའི་ཕྱིར་རྡོ་རྗེའི་རྣམ་པ་དང ། ཉོན་མོངས་པའི་འདམ་རྫབ་སྐེམས་པའི་ཕྱིར་ཉི་མའི་དཀྱིལ་འཁོར་གྱི་རྣམ་པ་དང ། སྐྱེ་བའི་ཤིང་སྲེག་པའི་ཕྱིར་མེའི་རྣམ་པ་དང ། རྨོངས་པ་མེད་པར་བྱེད་པའི་ཕྱིར་ནོར་བུ་ལྟ་བུའི་རྣམ་པ་དང ། རྫས་མེད་པའི་ཕྱིར་སྟོང་པ་ཉིད་ཀྱི་རྣམ་པ་དང ། མཚན་ཉིད་མེད་པའི་ཕྱིར་མཚན་མ་མེད་པའི་རྣམ་པ་དང ། ཁམས་གསུམ་ལས་ཡང་དག་པར་འདའ་བའི་ཕྱིར་སྨོན་པ་མེད་པའི་རྣམ་པ་སྟེ། རིགས་ཀྱི་བུ་རྣམ་པ་བཅུ་གཉིས་པོ་དེ་དག་གིས་བྱང་ཆུབ་སེམས་དཔས་ཤེས་རབ་ཀྱི་ཕ་རོལ་དུ་ཕྱིན་པ་རྟོགས་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ
52.44a
འདི་དག་བཀའ་སྩལ་ཏོ། །ཤེས་རབ་འཕགས་པ་འདི་ནི་སྣང་ལྟ་བུར། །རྟག་ཏུ་སྐྱེ་དགུ་རྣམས་ཀྱི་མུན་པ་སེལ། །དེ་ནི་སྒྲོན་མ་ལྟ་བུར་སྣང་ཕྱིར་བྱུང ། །ཉོན་མོངས་ཚོགས་ལ་འདི་ནི་སྣང་བར་བྱེད། །སྲེད་དང་རྨོངས་པའི་རྩ་རྣམས་བསལ་བའི་ཕྱིར། །དགེ་བའི་ཡིད་ནི་ཐོང་གཤོལ་འདྲ་བ་ཡིན། །ཉོན་མོངས་རི་རྣམས་རྡུལ་དུ་རློག་པ་སྟེ། །ལྷ་མིན་ལྡང་ལ་དབང་པོའི་རྡོ་རྗེ་བཞིན། །རང་གི་སྣང་བས་ཤེས་རབ་མུན་བྲལ་བས། །དམ་པ་རྣམས་ཀྱིས་མར་མེ་འདྲ་ཞེས་བསྟན། །དེ་ནི་ཉོན་མོངས་འདམ་རྫབ་ངན་སྐེམས་ཕྱིར། །དཔྱིད་ཉི་འདྲ་ཞེས་དམ་པ་རྣམས་ཀྱིས་བརྗོད། །དེ་ནི་ཉོན་མོངས་ཆུ་བོར་ནུབ་པ་ལ། །གྲུ་བཞིན་འཇིག་རྟེན་ཡང་དག་སྒྲོལ་བ་བྱེད། །དེ་ནི་གཏི་མུག་ཤིང་ཆེན་གཅོད་པས་ན། །དག་ཅིང་མི་རྟོག་རལ་གྲི་རྣོ་དང་མཚུངས། །རྨོངས་པ་མེད་འགྱུར་ནོར་བུ་རིན་ཆེན་འདྲ། །དངོས་མེད་ཆོས་ཀྱི་མཚན་ཉིད་རྟོགས་པར་བྱེད། །སྟོང་པ་རང་དབང་བྱེད་ཅིང་རྟོག་མེད་པས། །དེ་ནི་སྲིད་དང་ཞི་ལ་མི་གནས་སོ། །ནེམ་ནུར་ཐེ་ཙོམ་ལ་སོགས་འཇིག་བྱེད་དེ། །དྲིས་པ་ལན་གདབ་པ་ལའང་དེ་མཁས་སོ། །འཁོར་བའི་ཉེས་པའང་དེ་ཉིད་སེལ་བྱེད་དེ། མྱ་ངན་འདས་ལམ་མཚོན་ལ་དེས་སྒྲོན་ཡིན། །དེ་ལ་མིག་ཅེས་ཐུབ་པ་ཟླ་བ་གསུང ། །མངོན་སུམ་བྱེད་པ་རྟོགས་པའི་མཚན་ཉིད་དེ། །དེ་གྲོགས་བྱང་ཆུབ་སེམས་དཔའ་དྲི་མེད་རྣམས། །སྒྲོལ་མའི་ཡིད་ལྟར་བྱང་ཆུབ་སྤྱད་པ་སྤྱོད། །ཕ་རོལ་དུ་ཕྱིན་པ་བསྟན་པའི་ལེའུ་སྟེ་གཉིས་པའོ།། །། རིགས་ཀྱི་བུ་བྱང་ཆུབ་སེམས་དཔའི་ཐབས་ནི་ཡུལ་བཅུ་གཉིས་ལ་བལྟ་བར་བྱ་སྟེ། བཅུ་གཉིས་པོ་དག་གང་ཞེ་ན། རིགས་ཀྱི་བུ་འདི་ལ་ནི་བྱང་ཆུབ་སེམས་དཔའ་ནི་མྱ་ངན་ལས་འདས་པའི་ཡུལ་ལ་གནས་པ་འང་ཡིན་ལ། ཐབས་ཀྱིས་འཁོར་བའི་ཡུལ་ལ་ཡང་གནས་པར་སྣང་བ་དང ། དབེན་པའི་ཡུལ་ལ་གནས་པཡང་ཡིན་ལ། ཐབས་ཀྱིས་འདུ་འཛིའི་ཡུལ་ལ་གནས་པར་ཡང་སྣང་བ་དང ། བསམ་གཏན་གྱི་ཡུལ་ལ་གནས་པ་འང་ཡིན་ལ། ཐབས་ཀྱིས་བཙུན་མོའི་འཁོར་གྱི་ནང་ན་གནས་པར་ཡང་སྣང་བ་དང ། མངོན་པར་འདུ་མི་བྱེད་པའི་ཡུལ་ལ་གནས
52.44b
པའང་ཡིན་ལ། ཐབས་ཀྱིས་མངོན་པར་འདུ་བྱེད་པ་ཐམས་ཅད་ཀྱི་ཡུལ་ལ་གནས་པར་ཡང་སྣང་བ་དང ། སྐྱེ་བ་མེད་པའི་ཡུལ་ལ་གནས་པའང་ཡིན་ལ། ཐབས་ཀྱིས་སྐྱེ་བ་དང ། ་ཤི་འཕོའི་ཡུལ་ལ་གནས་པར་ཡང་སྣང་བ་དང ། བདུད་བཞིའི་ཡུལ་ལ་ཡང་དག་པར་འདས་པའང་ཡིན་ལ། ཐབས་ཀྱིས་བདུད་འདུལ་བ་ཡང་སྟོན་པ་དང ། འཕགས་པའི་སྐྱེ་བོའི་ཡུལ་ལ་གནས་པའང་ཡིན་ལ། ཐབས་ཀྱིས་འཕགས་པ་མ་ཡིན་པའི་ཡུལ་ལ་གནས་པར་ཡང་སྣང་བ་དང ། འཇིག་རྟེན་གྱི་ཡུལ་ལས་ཡང་དག་པར་འདས་པ་ཡང་ཡིན་ལ། ཐབས་ཀྱིས་འཇིག་རྟེན་གྱི་ཡུལ་ལ་གནས་པར་ཡང་སྣང་བ་དང ། ཡེ་ཤེས་ཀྱི་ཡུལ་རྙེད་པ་ཡང་ཡིན་ལ་ཐབས་ཀྱིས་མི་ཤེས་པའི་མཐའི་ཡུལ་ལ་གནས་པར་ཡང་སྣང་བ་དང ། ཡང་དག་པའི་མཐའི་ཡུལ་མངོན་སུམ་དུ་གྱུར་པ་ཡང་ཡིན་ལ། ཐབས་ཀྱིས་ཉན་ཐོས་དང་རང་སངས་རྒྱས་ཀྱི་ཡུལ་དུ་ཡང་མི་ལྟུང་བ་དང ། མཚན་ཉིད་མེད་པའི་ཆོས་ཁོང་དུ་ཆུད་པ་ཡང་ཡིན་ལ། ཐབས་ཀྱིས་མཚན་དང ། དཔེ་བྱད་བཟང་པོས་ལེགས་པར་བརྒྱན་ཅིང་སྤུད་པའི་ལུས་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་ཡུལ་ལ་གནས་པར་ཡང་སྣང་བ་དང ། སངས་རྒྱས་ཀྱི་ཡུལ་ལ་ཡང་དག་པར་ཞུགས་པ་ཡང་ཡིན་ལ། ཐབས་ཀྱིས་བདུད་ཀྱི་ཡུལ་ཐམས་ཅད་ལ་གནས་པར་ཡང་སྣང་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐབས་ནི་ཡུལ་བཅུ་གཉིས་པོ་དེ་དག་ལ་བལྟ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་དག་རྣམས་ཀྱི། །ཐབས་ཀྱི་ཡུལ་ནི་འདི་ཡིན་ཏེ། །ཡུལ་རྣམས་གང་ལ་གནས་གྱུར་ཀྱང ། །ཡུལ་རྣམས་ཀུན་ལ་འང་སྣང་བ་ཡིན། །མྱ་ངན་འདས་པའི་མཚོར་བཀྲུས་ཀྱང ། །ཐབས་ཀྱིས་འཁོར་བའི་ཆུ་ན་སྣང ། །ཐབས་ཀྱི་བསམ་པ་ཐོབ་པས་ན། །གཉི་གའི་སྐྱོན་གྱིས་གོས་པ་མེད། །འགྲོ་ཕན་ཐམས་ཅད་ལུས་ཡིད་ཀྱིས། །དབེན་པ་དམ་པ་ཐོབ་གྱུར་ནས། །མེ་ཏོག་ནགས་ཀྱི་བུང་བ་བཞིན། །འདུ་འཛི་དག་དང་འདྲེས་པ་མེད། །
52.45a
གདུ་བུ་འཁྲོལ་བའི་སྒྲ་ཆེན་འབྱུང་བ་ཡི། །བཙུན་མོའི་འཁོར་ན་དེ་དག་སྒེག་པར་སྣང ། །སེམས་ཅན་དམྱལ་ལ་སོགས་པའི་གནོད་པ་ཡིས། །སེམས་ཅན་སྡུག་བསྔལ་སེམས་ཤིང་རྟག་མི་གཡོ། །དེ་དག་རྟག་ཏུ་ཞི་ཞིང་མཉམ་བཞག་ཀྱང ། །རྣམ་པར་གཡེངས་པའི་ཡུལ་དུའང་སྣང་བ་ཡིན། །རྣམ་པར་གཡེངས་པའི་གཞི་ནི་བསལ་བ་སྟེ། །དེ་དག་ཐབས་མཁས་ཚུལ་ནི་དེ་ཡིན་ནོ། །དེ་དག་མི་རྟོག་མངོན་པར་འདུ་བྱེད་མེད། །རྣམ་པར་རྟོག་པའི་མེ་ཡང་ཡོད་མིན་ཀྱང ། །ཐབས་ཀྱིས་སྤྲོས་པ་དང་ནི་འདུ་བྱེད་དང ། །རྟོག་དང་ལྡན་པ་དེ་དག་སྣང་བ་ཡིན། །ཆོས་རྣམས་འཆི་འཕོ་སྐྱེ་བ་མེད་ལྡན་ཞིང ། །ཡང་དག་ཉིད་དུ་སྐྱེ་མེད་ལྡན་མཐོང་ཡང ། །མཁས་པ་རྣམས་ནི་ཐབས་ཀྱི་ཡེ་ཤེས་ཀྱིས། །སྐྱེ་བ་དང་ནི་འཆི་འཕོ་སྟོན་པར་བྱེད། །བདུད་ཀྱི་ཡུལ་ལས་ཡོངས་འདས་ཤིང ། །བརྟན་རྣམས་སངས་རྒྱས་ཡུལ་གནས་ཀྱང ། །བརྟན་པ་རྣམས་ཀྱི་ཐབས་ཀྱིས་སུ། །བདུད་ཀྱི་ཡུལ་ལ་རྒྱུ་བར་སྣང ། །འཕགས་པའི་ཚོགས་ཀྱི་སྤྱིར་གནས་ཀྱང ། །ཐབས་ཀྱིས་བྱིས་པ་ཉིད་དུ་སྟོན། །ཡེ་ཤེས་སྟོབས་ཅན་རྣམ་འཕྲུལ་ཀྱང ། །སེམས་ཅན་དག་པ་སྙིང་རྗེས་ཟིན། །ཆོས་རྣམས་སྟོང་པ་ཉིད་ཀྱི་མཆོག་།ཆོས་ཉིད་དེ་དག་རྟོགས་ཡིན་ཞིང ། ཤིན་དུ་མྱ་ངན་ལས་འདས་པའི། །ཐབས་ལ་འང་དེ་དག་སྤྱོད་པར་བྱེད། །ཆོས་ཀུན་རང་བཞིན་མེད་པ་དང ། །སྟོང་ཞི་མཚན་ཉིད་མེད་རྟོགས་ཀྱང ། །ཐབས་ཀྱིས་མཚན་ཀྱིས་བརྒྱན་པ་ཡི། །ལུས་ཀྱིས་སེམས་ཅན་དོན་ཀྱང་སྤྱོད། །ཤེས་རབ་ཉམས་ཤིང་བརྩེ་མེད་པ། །སྙིང་རྗེ་མེད་བློ་འཚོ་བ་མིན། །ཤེས་རབ་འཕགས་དང་སྙིང་རྗེ་ནི། །དག་པས་དེ་ཕྱིར་ཐབས་སུ་འདོད། །བྱང་ཆུབ་སེམས་དཔའ་ཆེ་རྣམས་ཀྱི། །མཐུ་ལྡན་ཐབས་ནི་འདི་ཡིན་ཏེ། །འཕགས་པ་དེ་དག་དེར་གནས་ཤིང ། །རྣམ་པར་འཕྲུལ་པ་བརྒྱ་དག་སྟོན། །རིགས་ཀྱི་བུ་འདི་ལྟར་ཡང་དེ་བཞིན་གཤེགས་པ་རྣམས་ཀྱི་ཐབས་སུ་བལྟ་བར་བྱ་སྟེ། གང་འདི་ལྟར་ཡོན་ཏན་གྱི་སྙིང་པོ་རྣམ་པ་བཅུ་གཉིས་ཀྱིས་མངོན་པར་འཕགས་པའི
52.45b
སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱང་བསྐལ་པའི་སྙིགས་མ་སྟོན་པ་དང ། དུས་ཀྱི་སྙིགས་མ་སྟོན་པ་དང ། སེམས་ཅན་གྱི་སྙིགས་མ་སྟོན་པ་དང ། ཉོན་མོངས་པའི་སྙིགས་མ་སྟོན་པ་དང ། ཚེའི་སྙིགས་མ་སྟོན་པ་དང ། ཐེག་པ་ཐ་དད་པ་སྟོན་པ་དང ། ཀུན་ནས་ཉོན་མོངས་པ་ཅན་གྱི་སངས་རྒྱས་ཀྱི་ཞིང་སྟོན་པ་དང ། སེམས་ཅན་དམུ་རྒོད་སྟོན་པ་དང ། ཆོས་བསྟན་པ་ལ་བྱེ་བྲག་སྟོན་པ་དང་གཞན་མུ་སྟེགས་ཅན་གྱི་འཁྲུག་པ་ཡོད་པར་སྟོན་པ་དང ། བདུད་རྣམས་དང ། བདུད་ཀྱི་ལས་རྣམས་ཀྱང་སྟོན་ལ། ཉེས་པ་དེ་དག་ཀྱང་ཡོད་པ་མ་ཡིན་པ་ཐམས་ཅད་ནི་དེ་བཞིན་གཤེགས་པའི་ཐབས་སུ་བལྟ་བར་བྱའོ། །དེ་སྐད་ཅེས་བཀའ་སྩལ་པ་དང ། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡོན་ཏན་གྱི་སྙིང་པོ་གང་དང་ལྡན་ན་གང་དུ་སངས་རྒྱས་བཅོམ་ལྡན་འདས་རྣམས་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་ལྟ་བུར་འགྱུར་བའི་ཡོན་ཏན་གྱི་སྙིང་པོ་བཅུ་གཉིས་པོ་དེ་དག་བཅོམ་ལྡན་འདས་ཀྱིས་བསྟན་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལ་གང་དུ་སངས་རྒྱས་བཅོམ་ལྡན་འདས་རྣམས་བྱང་ཆུབ་མངོན་པར་འཚང་རྒྱ་བའི་སངས་རྒྱས་ཀྱི་ཞིང་དེ་ནི་ཡོན་ཏན་གྱི་སྙིང་པོས་བསྒྲུབས་པའི་ཕྱིར་བསྐལ་པའི་སྙིང་པོ་དང་ལྡན་པ་ཡིན། །སངས་རྒྱས་ཀྱི་ཞིང་དེ་ནི་ཆོས་སྤྱད་པའི་དུས་ལས་མི་འདའ་བའི་ཕྱིར་དུས་ཀྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་ཆོས་ཤེས་པར་འགྱུར་བ་དང་ལྡན་པའི་ཕྱིར་སེམས་ཅན་གྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་ལེགས་པར་ཡོངས་སུ་དག་པའི་ཕྱིར་ཉོན་མོངས་པ་ཅན་མ་ཡིན་པའི་ཞིང་གི་སྙིང་པོ་དང་ལྡན་པ་ཡིན་སངས་རྒྱས་ཀྱི་ཞིང་དེ་ནི་སེམས་ཅན་དམུ་རྒོད་མེད་པའི་ཕྱིར་སེམས་ཅན་ཅང་ཤེས་ཀྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་ཐེག་པ་གཅིག་གིས་ངེས་པར་འབྱུང་བའི་ཕྱིར་ཐེག་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་རྫས་ཀྱི་ལྷག་མ་ཡོད་པའི་ཕྱིར་སའི་སྙིང་པོ་དང་ལྡན་པ་ཡིན།
52.46a
སངས་རྒྱས་ཀྱི་ཞིང་དེ་ནི་གཞན་མུ་སྟེགས་ཅན་ཐམས་ཅད་ཀྱི་བསྟན་པ་མི་སྤྱོད་པའི་ཕྱིར་བསྟན་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་གཡོ་མེད་པའི་ཕྱིར་ཡོན་ཏན་གྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་སེམས་ཅན་རང་བཞིན་གྱིས་དཀར་བའི་གནས་སུ་གྱུར་པའི་ཕྱིར་བསམ་པ་དང་ལྷག་པའི་བསམ་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་སྦྱིན་པའི་གནས་དང་མི་འབྲལ་བའི་ཕྱིར་འཕགས་པའི་སྙིང་པོ་དང་ལྡན་པ་ཡིན། ་སངས་རྒྱས་ཀྱི་ཞིང་དེ་ནི་སྔོན་གྱི་དེ་བཞིན་གཤེགས་པ་རྣམས་བཞུད་ཅིང་རྗེས་སུ་བཞུད་པའི་ཕྱིར་བྱང་ཆུབ་ཀྱི་སྙིང་པོ་དང་ལྡན་པ་ཡིན་ཏེ། འཇམ་དཔལ་གང་དུ་སངས་རྒྱས་བཅོམ་ལྡན་འདས་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་ནི་ཡོན་ཏན་གྱི་སྙིང་པོ་དེ་དག་དང་ལྡན་པ་ཡིན་ནོ། །ཐབས་ལ་མཁས་པའི་ལེའུ་སྟེ་གསུམ་པའོ།། །། འཇམ་དཔལ་དེ་ལྟར་རྣམ་གྲངས་དེས་ཀྱང་འདི་ལྟར་ང་ལ་ཉན་ཐོས་དང་རང་སངས་རྒྱས་ཀྱི་ཐེག་པ་རྣམ་པར་བཀོད་པ་མེད་པར་ཁྱོད་ཀྱིས་རིག་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་འདུ་ཤེས་ཐ་དད་པ་མེད་པའི་ཕྱིར་རོ། །འཇམ་དཔལ་གལ་ཏེ་དེ་བཞིན་གཤེགས་པ་སེམས་ཅན་ཁ་ཅིག་ལ་ནི་ཐེག་པ་ཆེན་པོ་སྟོན། ཁ་ཅིག་ལ་ནི་རང་སངས་རྒྱས་ཀྱི་ཐེག་པ་སྟོན། ཁ་ཅིག་ལ་ནི་ཉན་ཐོས་ཀྱི་ཐེག་པ་སྟོན་ན། དེ་ནི་དེ་བཞིན་གཤེགས་པའི་སེམས་ཡོངས་སུ་མ་དག་པར་འགྱུར་རོ། །སེམས་མ་སྙོམས་པ་ཉིད་དུ་ཡང་འགྱུར་རོ། །མངོན་པར་ཞེན་པའི་སྐྱོན་དུ་ཡང་འགྱུར་རོ། །སྙིང་རྗེ་ཆེན་པོ་ཕྱོགས་གཅིག་པར་ཡང་འགྱུར་རོ། །འདུ་ཤེས་ཐ་དད་པའི་སྐྱོན་དུ་ཡང་འགྱུར་རོ། །ངས་ཆོས་ལ་སློབ་དཔོན་གྱི་དཔེ་མཁྱུད་བྱས་པར་ཡང་འགྱུར་རོ། །འཇམ་དཔལ་ངས་སེམས་ཅན་རྣམས་ལ་ཆོས་གང་དང་གང་བསྟན་པ་དེ་དག་ཐམས་ཅད་ནི་འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར་བྱང་ཆུབ་ལ་གཞོལ་བ་ཐེག་པ་ཆེན་པོ་ལ་འབབ་པ། ཐམས་ཅད་མཁྱེན་པ་ཉིད་བསྒྲུབ་པ། ཡུལ་གཅིག་ཏུ་ཡང་དག་པར་ཕྱིན་པར་བྱེད་པ་སྟེ། དེ་བས་ན་ང་ལ་ཐེག་པ་ཐ་དད་པར་རྣམ་པར
52.46b
དགོད་པ་མེད་དོ། །འཇམ་དཔལ་གྱིས་གསོལ་པ་བཅོམ་ལྡན་འདས་གལ་ཏེ་ཐེག་པ་རྣམ་པར་དགོད་པ་མ་མཆིས་ན་ཅིའི་སླད་དུ་དེ་བཞིན་གཤེགས་པས་འདི་ནི་ཉན་ཐོས་ཀྱི་ཐེག་པའོ། །འདི་ནི་རང་སངས་རྒྱས་ཀྱི་ཐེག་པའོ། །འདི་ནི་ཐེག་པ་ཆེན་པོའོ་ཞེས་ཐེག་པ་གསུམ་བརྩམས་ཏེ། ་སེམས་ཅན་རྣམས་ལ་ཆོས་བསྟན་པ་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཐེག་པ་རྣམ་པར་དགོད་པ་ཞེས་བྱ་བ་དེ་ནི་དེ་བཞིན་གཤེགས་པས་ས་རྣམ་པར་དགོད་པ་མཛད་པ་ཡིན་གྱི། ཐེག་པ་རྣམ་པར་བཀོད་པ་མ་ཡིན་ནོ། །དེ་ནི་དེ་བཞིན་གཤེགས་པས་ཆོས་ཀྱི་མཚན་ཉིད་རྣམ་པར་དགོད་པ་མཛད་པ་ཡིན། དེ་ནི་དེ་བཞིན་གཤེགས་པས་གང་ཟག་རྣམ་པར་དགོད་པ་མཛད་པ་ཡིན། དེ་ནི་དེ་བཞིན་གཤེགས་པས་ཚོགས་ཆུང་བ་དང ། ཚོགས་ཚད་མེད་པ་རྣམ་པར་དགོད་པ་མཛད་པ་ཡིན་ཏེ། ཆོས་ཀྱི་དབྱིངས་ལ་ཐ་དད་པ་མེད་པའི་ཕྱིར་འདི་ལ་ཐེག་པ་ཐ་དད་པར་འགྱུར་བ་གང་ཡང་མེད་དོ། །འཇམ་དཔལ་དེ་ནི་དེ་བཞིན་གཤེགས་པས་འཇུག་པའི་སྒོ་བསྟན་པ་སྟེ། བཟོ་སློབ་པ་ནི་རིམ་གྱིས་སློབ་པ་ལ་འཇུག་པ་ལྟར་བལྟ་བར་བྱའོ། །འཇམ་དཔལ་འདི་ལྟ་སྟེ་དཔེར་ན་འཕོང་གི་སློབ་དཔོན་འཕོང་དཔྱད་ཀྱི་ཕ་རོལ་དུ་ཕྱིན་པའི་མཆོག་ཐོབ་པ་ནི་སློབ་མ་རྣམས་ལ་ཐབས་སྣ་ཚོགས་དང ། རྩོལ་བ་སྣ་ཚོགས་ཀྱིས་འཕོང་དཔྱད་སྟོན་ཏེ། འཕོང་ཤེས་པར་བྱ་བ་ནི་གཅིག་ཏུ་ཟད་དོ་འཇམ་དཔལ་དེ་བཞིན་དུ་དེ་བཞིན་གཤེགས་པ་ཆོས་ཀྱི་འཕོང་གི་སློབ་དཔོན་མཁས་པ་ཡང་ཐམས་ཅད་མཁྱེན་པའི་ཡེ་ཤེས་གཅིག་པོ་དེ་ཉིད་རྣམ་པ་གསུམ་དུ་སྟོན་པ་མཛད་དོ། །འཇམ་དཔལ་འདི་ལྟ་སྟེ། དཔེར་ན་མེ་ལྕེ་ཆུང་ངུ་དེ་ཉིད་མཆེད་ན་སྲེག་པའི་བསྐལ་པའི་བར་དུ་འཚིག་པའི་མཐུ་ཡོད་པར་འགྱུར་རོ། །འཇམ་དཔལ་དེ་བཞིན་དུ་ཡེ་ཤེས་སྣང་བ་གཅིག་པོ་དེ་ཡང་རིམ་གྱིས་རྣམ་པར་འཕེལ་ན། ཉོན་མོངས་པ་ཐམས་ཅད་སྲེག་པའི་ཕྱིར་དེ་བཞིན་གཤེགས་པའི་ཡེ་ཤེས་ཀྱི་སྣང་བ་ཆེན་པོའི་བར་དུ་སྦྱིན་པར་བྱེད་དོ། །འཇམ་དཔལ་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ནི་རྣམ་པར་རྟོག་པ་མེད་དེ། དེའི་དྲུང་དུ་སེམས་ཅན་གང་དག་ཁ་ཅིག་ཕྱིན་པ་དེ་ཐམས་ཅད་འདི་ལྟ་སྟེ། གསེར་གྱི་མདོག་ཏུ་ཁ་དོག་གཅིག་པར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པའི
52.47a
ཡེ་ཤེས་ཀྱི་རི་རབ་ཆེན་པོ་བླ་ན་མེད་པ་ཡང་རྣམ་པར་མི་རྟོག་སྟེ། དེར་སེམས་ཅན་གང་དག་ཁ་ཅིག་དེ་བཞིན་གཤེགས་པའི་ཆོས་ཉིད་ལ་རྣམ་པར་ལྟ་བ་དེ་དག་ཐམས་ཅད་འདི་ལྟ་སྟེ་ཐམས་ཅད་མཁྱེན་པ་ཉིད་ཀྱི་མདོག་ཏུ་ཁ་དོག་གཅིག་པར་འགྱུར་རོ། །འཇམ་དཔལ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཆེན་པོ་ཨན་ད་རྙིལ་ནི་ཕྱོགས་གང་ན་འདུག་པ་དེར་རིན་པོ་ཆེ་ཆེན་པོ་དེའི་ཡུལ་དུ་ཇི་ཙམ་དུ་གྱུར་པ་ཚུན་ཆད་ན་ཁ་དོག་ཐ་དད་པ་གཟུགས་ཁ་དོག་སྣ་ཚོགས་སྣང་བ་གང་དག་ཇི་སྙེད་ཅིག་ཡོད་པ་དེ་དག་ནོར་བུ་རིན་པོ་ཆེ་དེའི་གཟི་བརྗིད་འདི་འདི་ལྟ་སྟེ། སྔོ་བའི་མདོག་དུ་ཁ་དོག་གཅིག་པར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་བླ་ན་མེད་པའི་ནོར་བུ་རིན་པོ་ཆེ་ཨན་ད་རྙིལ་ཆེན་པོའི་ཆོས་སྣང་བ་དང་འོད་ཀྱིས་སེམས་ཅན་གང་ལ་བབ་པ་དེ་ཐམས་ཅད་འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་མདོག་དུ་ཁ་དོག་གཅིག་པར་འགྱུར་རོ། །འཇམ་དཔལ་འདི་ལྟ་སྟེ། དཔེར་ན་རྒྱ་མཚོ་ཆེན་པོར་ནི་སྒོ་ཐ་དད་པ་ནས་ཆུ་མང་པོ་འབབ་སྟེ། དེར་བབས་ནས་ཐམས་ཅད་ཀྱང་འདི་ལྟ་སྟེ། ལན་ཚཝའི་རོར་རོ་གཅིག་པར་རྟག་ཏུ་གནས་པར་འགྱུར་རོ། །འཇམ་དཔལ་དེ་ལ་རྒྱ་མཚོ་ཆེན་པོ་ཞེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དགས་སོ། །སྒོ་ཐ་དད་པ་ནས་ཆུ་མང་པོ་འབབ་ཅེས་བྱ་བ་དེ་ནི་ཉན་ཐོས་དང ། རང་སངས་རྒྱས་དང ། བྱང་ཆུབ་སེམས་དཔའ་རྣམས་ཀྱི་ཚིག་བླ་དགས་སོ། །དེར་བབས་ནས་དེ་ཐམས་ཅད་རོ་གཅིག་ཏུ་འགྱུར་ཞེས་བྱ་བ་དེ་ནི་རྣམ་པར་མི་རྟོག་པའི་ཕྱིར་ཐེག་པ་གཅིག་གི་ཚིག་བླ་དགས་ཏེ། །འཇམ་དཔལ་རྣམ་གྲངས་དེས་ཀྱང་འདི་ལྟར་དེ་བཞིན་གཤེགས་པས་དེ་ནི་ཡོངས་སུ་སྦྱང་བ་བྱ་བའི་སར་རྣམ་པར་བཀོད་པ་དེ་ནི་དེ་བཞིན་གཤེགས་པས་འཇུག་པའི་ཚུལ་དུ་གསུངས་པ། དེ་ནི་དེ་བཞིན་གཤེགས་པས་ཆོས་རྣམ་པར་དགོད་པ་མཛད་པ། དེ་ནི་དེ་བཞིན་གཤེགས་པས་བསྟན་པ་ལ་རིམ་གྱིས་འཇུག་པར་བསྟན་པ་སྟེ། ཚོགས་ཆུང་ངུ་དང་ཚོགས་ཆེན་པོའི་གང་ཟག་རྣམས་རྣམ་པར་དགོད་པ་ཐབས་མཁས་པའི་རྣམ་པར་འཕྲུལ་པ་སྟེ། དེ་བཞིན་གཤེགས་པའི་སོ་སོ་ཡང་དག་པར་རིག་པ་སྣ་ཚོགས་དང་ཀུན་རྫོབ་ལ
52.47b
འཇུག་པ་བསྟན་པ་ཡིན་པར་དེ་ལྟར་རིག་པར་བྱ་སྟེ། དོན་དམ་པར་ནི་ཐེག་པ་གཅིག་སྟེ་གཉིས་སུ་མེད་དོ། །འཇམ་དཔལ་སངས་རྒྱས་ཀྱི་ཞིང་འདི་ན་གཞན་མུ་སྟེགས་ཅན་སྤྱོད་པ་པ་དང་ཀུན་དུ་རྒྱུ་དག་སྣང་བ་འདི་ཡང་དེ་བཞིན་གཤེགས་པའི་ཐབས་ཡིན་པར་བལྟ་བར་བྱ་སྟེ། དེ་བཞིན་གཤེགས་པའི་བྱིན་ཀྱི་བརླབས་ཀྱི་མངའ་དབང་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པས་ནི་གཉེན་པོ་ཐམས་ཅད་བསལ་བའི་ཕྱིར་ཕྱིར་རྒོལ་བ་ཐམས་ཅད་ཀྱི་ཐམས་ཅད་མེད་དེ། འཇམ་དཔལ་འཁོར་ལོས་སྒྱུར་བའི་རྒྱལ་པོ་དགེ་བའི་རྩ་བ་འཇིག་པའི་ཚུལ་ཅན་དང་ལྡན་པ། འདོད་ཆགས་དང་བཅས་པ་ཞེ་སྡང་དང་བཅས་པ། གཏི་མུག་དང་བཅས་པ། ཉེ་བར་ལེན་པ་དང་བཅས་པ་དང་བག་ལ་ཉལ་དང་བཅས་པ་ཉོན་མོངས་པ་དང་བཅས་པ་ལ་ཡང་ཕྱིར་རྒོལ་བ་ཐམས་ཅད་ཀྱི་ཐམས་ཅད་མེད་ཅིང་བསྡོ་བའི་དམག་ཚོགས་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་འཁོར་ལོས་སྒྱུར་བའི་རྒྱལ་པོ་ལ་འཚེ་བ་མེད་པའི་ཕྱིར་ཏེ། འཇམ་དཔལ་འཁོར་ལོས་སྒྱུར་བའི་རྒྱལ་པོ་ཡང་དེ་ལྟ་ན་དེ་བཞིན་གཤེགས་པ་ཆོས་ཀྱི་འཁོར་ལོས་སྒྱུར་བའི་རྒྱལ་པོ་ཆེན་པོ་བསོད་ནམས་དང་ཡེ་ཤེས་ཀྱི་ཚོགས་ཚད་མེད་པ་བསགས་པ། སྙིང་རྗེ་ཆེན་པོ་རྒྱུན་མི་འཆད་པ་བརྙེས་པ། ཟག་པ་མེད་པའི་ཆོས་ཀྱི་ནམ་མཁའ་ལ་རྒྱུ་བ། བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ། བསྙེལ་བ་མི་མངའ་བའི་ཆོས་ཅན། ཆོས་ཀྱི་འཁོར་ལོས་སྒྱུར་བའི་རྒྱལ་པོ་ཆེན་པོའི་ཆོས་ཀྱི་རྒྱལ་སྲིད་ལ་འཚེ་བ་ཡོད་པ་འམ། བསྡོ་བའི་དམག་ཚོགས་ཀྱི་འཇིགས་པར་འགྱུར་བ་ལྟ་ག་ལ་ཡོད་དེ་དེ་ནི་གནས་མེད་དོ། །འཇམ་དཔལ་ཡང་སངས་རྒྱས་ཀྱི་ཞིང་འདི་ན་གཞན་མུ་སྟེགས་ཅན་སྤྱོད་པ་པ་དང ། ཀུན་དུ་རྒྱུ་གང་དག་སྣང་བ་འདི་ཡང་དེ་བཞིན་གཤེགས་པའི་བྱིན་ཀྱི་བརླབས་ཡིན་པར་བལྟ་བར་བྱ་སྟེ། རིགས་ཀྱི་བུ་དེ་དག་ཀུན་ཀྱང་མུ་སྟེགས་གཅིག་ལ་གནས་པ་ཡིན་པར་རིག་པར་བྱའོ། །འཇམ་དཔལ་འདི་ལྟ་སྟེ། དཔེར་ན་རི་དགས་ཀྱི་རྒྱལ་པོ་སེང་གེའི་མདུན་དུ་ནི་རི་དགས་ཕྲ་མོ་ཐམས་ཅད་གནས་པར་མི་ནུས་སོ། །འཇམ་དཔལ་དེ་བཞིན་དུ་གཞན་མུ་སྟེགས་ཅན་སྤྱོད་པ་པ་དང ། ཀུན་དུ་རྒྱུ་ཐམས་ཅད་ཀྱིས
52.48a
དེ་བཞིན་གཤེགས་པའི་ཡུལ་མནན་པར་བྱ་བ་འམ། དེ་བཞིན་གཤེགས་པ་སྐྱེས་བུ་སེང་གེ་ཆེན་པོ་སྟོབས་བཅུ་མངའ་བ་མི་འཇིགས་པ་བཞི་བརྙེས་པའི་མདུན་དུ་གནས་པར་བྱ་བ་འམ། བརྩད་པར་བྱ་བར་དེ་བཞིན་གཤེགས་པའི་བྱིན་གྱི་བརླབས་མ་གཏོགས་པར་མི་ནུས་ཏེ་དེ་ནི་གནས་མེད་དོ། །འཇམ་དཔལ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ཤར་ཅིང་འོད་ཟེར་མང་པོ་བཀྱེ་བའི་ཚེ་སྲིན་བུ་མེ་ཁྱེར་ཐམས་ཅད་ཀྱང་འོད་མེད་པར་འགྱུར་ཞིང ། མེ་དང་ནོར་བུ་དང་སྐར་མ་ཐམས་ཅད་ཀྱི་འོད་ཟེར་རྣམས་ཀྱང་མི་སྣང་ངོ ། །འཇམ་དཔལ་དེ་བཞིན་དུ་དེ་བཞིན་གཤེགས་པ་ཉི་མའི་དཀྱིལ་འཁོར་ཆེན་པོ་ཤར་ཅིང་ཡེ་ཤེས་ཀྱི་འོད་ཟེར་མང་པོ་བཀྱེ་བའི་ཚེ་གཞན་མུ་སྟེགས་ཅན་སྤྱོད་པ་པ་དང་ཀུན་དུ་རྒྱུ་ཐམས་ཅད་ཟིལ་ཀྱིས་ནོན་ཅིང་མི་སྣང་ངོ ། །འཇམ་དཔལ་འདི་ལྟ་སྟེ། དཔེར་ན་ལྕགས་ཀྱི་རྒྱལ་པོ་ཁབ་ལོང་སའི་ཕྱོགས་གང་དུ་བྱུང་བ་དེར་ཁབ་ལོང་གི་མི་འདྲེ་བའི་མཚན་ཉིད་ཀྱི་ཕྱིར་ལྕགས་ཐམས་ཅད་མི་གནས་སོ། །འཇམ་དཔལ་དེ་བཞིན་དུ་སངས་རྒྱས་ཀྱི་ཞིང་གང་དུ་སངས་རྒྱས་བྱུང་བར་གྱུར་པ་དེ་ནི་གཞན་མུ་སྟེགས་ཅན་སྤྱོད་པ་པ་དང ། ཀུན་དུ་རྒྱུ་ཐམས་ཅད་རྒྱུ་བ་མེད་པར་རིག་པར་བྱའོ། །དེ་ཅིའི་ཕྱིར་ཞེ་ན། དེ་ནི་སངས་རྒྱས་བྱུང་བའི་མི་འདྲེ་བའི་ཆོས་ཀྱི་མཚན་ཉིད་ཀྱི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་གང་དུ་བྱུང་བ་དེར་ནི་མཆིང་བུ་རྣམས་མི་འབྱུང་ངོ ། །འཇམ་དཔལ་དེ་བཞིན་དུ། དེ་བཞིན་གཤེགས་པ་ཡེ་ཤེས་རིན་པོ་ཆེ་ཆེན་པོ་གང་དུ་བྱུང་བ་དེར་ནི་གཞན་མུ་སྟེགས་ཅན་སྤྱོད་པ་པ་དང་ཀུན་དུ་རྒྱུ་ཐམས་ཅད་མི་འབྱུང་བར་རིག་པར་བྱའོ། །འཇམ་དཔལ་འདི་ལྟ་སྟེ་དཔེར་ན་རིན་པོ་ཆེའི་འབྱུང་ཁུང་གང་ནས་འཛམ་བུའི་ཆུ་བོའི་གསེར་བྱུང་བ་དེ་ནས་ལྕགས་འགྱེས་ཀྱི་ཕུང་པོ་མི་འབྱུང་ངོ ། །འཇམ་དཔལ་དེ་བཞིན་དུ་འཇིག་རྟེན་གྱི་ཁམས་གང་དུ་དེ་བཞིན་གཤེགས་པ་བྱུང་བ་དེར་གཞན་མུ་སྟེགས་ཅན་སྤྱོད་པ་པ་དང་ཀུན་དུ་རྒྱུ་ཐམས་ཅད་མི་འབྱུང་ངོ ། །འཇམ་དཔལ་རྣམ་གྲངས་དེས་ཀྱང་འདི་ལྟར་དེ་བཞིན་གཤེགས་པ་གང་དུ་བྱུང་བ་དེར་གཞན་མུ་སྟེགས་ཅན་སྤྱོད་པ་པ་དང ། ཀུན་དུ་རྒྱུ་ཐམས་ཅད་མི་འབྱུང་བར་རིག་པར་བྱའོ་འཇམ་དཔལ་ཡང་སངས་རྒྱས་ཀྱི་ཞིང་འདི
52.48b
ན་གཞན་མུ་སྟེགས་ཅན་སྤྱོད་པ་པ་དང་ཀུན་དུ་རྒྱུ་གང་དག་སྣང་བ་འདི་ཡང་དེ་བཞིན་གཤེགས་པའི་བྱིན་གྱི་བརླབས་དང་ཐབས་ལ་མཁས་པའི་ཡུལ་བསམ་གྱིས་མི་ཁྱབ་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་མུ་སྟེགས་ཅན་གཞན་གྱི་སྒོ་འདི་དག་ཐམས་ཅད་ནི་རྣམ་པར་ཐར་པ་བསམ་གྱིས་མི་ཁྱབ་པའི་སྒོ་ལ་གནས་པ་དག་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ལས་ངེས་པར་བྱུང་བ་དག་གོ། །ཐབས་ལ་མཁས་པས་རྣམ་པར་རྩེ་བ་དག་གོ་སངས་རྒྱས་དང་ཆོས་དང་དགེ་འདུན་ཡིད་ལ་བྱ་བ་མ་བཏང་བ་དག་གོ། །སེམས་ཅན་ཡོངས་སུ་སྨིན་པར་བྱ་བ་རྣམས་ལ་དམ་པའི་ཕ་རོལ་དུ་སོན་པ་དག་གོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པའི་བྱིན་གྱི་བརླབས་ཀྱིས་བྱིན་གྱིས་བརླབས་པ་དག་གོ། །བསྟན་པ་འདི་བཤད་པ་ན་ལྷའི་བུ་ཉན་ཐོས་ཀྱི་ཐེག་པ་ལ་གནས་པ་བརྒྱད་སྟོང་གིས་ཐེག་པ་གཅིག་ཅེས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དགེ་སློང་ལྔ་བརྒྱས་ཐེག་པ་གཅིག་ཏུ་ཡང་དག་པར་འདུ་བའི་སྒྲོན་མའི་ཏིང་ངེ་འཛིན་ཐོབ་པར་གྱུར་ཏོ། །བྱང་ཆུབ་སེམས་དཔའ་སྟོང་ཉིས་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏོ། །སྟེང་གི་བར་སྣང་ལས་ཀྱང་ལྷའི་མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོའི་ཆར་མངོན་པར་བབ་བོ། །ལྷའི་ཙན་དན་གྱི་ཕྱེ་མའི་ཆར་དག་ཀྱང་དེ་བཞིན་གཤེགས་པའི་ཞབས་ཀྱི་དྲུང་དུ་བབ་པར་གྱུར་ཏོ། །ལྷའི་བུ་འབུམ་དག་ཀྱང་སྟེང་གི་བར་སྣང་ལ་འདུག་ནས་ཅ་ཅོ་དང་ག་ཞའི་སྒྲ་བརྒྱ་སྟོང་དུ་མ་བྱུང་བར་གྱུར་ཏེ་ལྷའི་གོས་དག་ཀྱང་གཡབ་མོ་ཐབས་སུ་གཡོབ་བོ། །ལྷའི་རྔ་དག་ཀྱང་བརྡུངས་པར་གྱུར་ཏོ། །ཆེད་དུ་བརྗོད་པ་འདི་སྐད་ཀྱང་ཆེད་དུ་བརྗོད་དེ་ཀྱེ་མ་སྔོན་མ་ཐོས་པའི་ཆོས་ཀྱི་རྣམ་གྲངས་འཇིག་རྟེན་དུ་བྱུང་ངོ ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡུན་རིང་པོར་འཛམ་བུའི་གླིང་ན་གནས་པར་གྱུར་ཅིག་ཅེས་བརྗོད་དོ། །དགེ་སློང་མ་བརྒྱད་བརྒྱས་ཀྱང་རང་རང་གི་བླ་གོས་དེ་བཞིན་གཤེགས
52.49a
པའི་སྐུ་ལ་གསོལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་དོན་འདི་ཉིད་རྒྱ་ཆེར་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡི་ཐབས་ཡུལ་བསམ་གྱིས་མི་ཁྱབ་འདི། །འཇམ་དཔལ་ཁྱོད་ཀྱིས་དེ་ལྟར་ཤེས་པར་གྱིས། བཅུད་ཀྱི་དུས་ལ་བྱང་ཆུབ་སངས་རྒྱས་ཀྱང ། །འདི་འདྲའི་དུས་ནི་ང་ནི་སྟོན་པ་མཛད། །ང་ལ་དུས་ཀྱི་ཉེས་པ་མི་མངའ་སྟེ། །ཆོས་ཀྱི་དུས་ནི་རྟག་ཏུ་ཉེ་བར་གནས། །ང་ལས་སེམས་ཅན་ཆོས་ཐོས་འཇུག་པར་བྱེད། །སེམས་ཅན་སྐྱོན་ནི་ནམ་ཡང་ཡོད་མ་ཡིན། །ཡོན་ཏན་རྫས་ཀྱི་ཁྱད་ཀྱིས་བསྐལ་པའི་བཅུད། །དྲི་མེད་ཡོངས་སུ་དག་པ་ཞིང་གི་བཅུད། །དུས་ཀྱི་བཅུད་ལ་བྱང་ཆུབ་ངས་བརྙེས་ཏེ། །དེ་བས་ང་ལ་རྙོག་པ་ཡོང་མེད་དོ། །ངས་ནི་བསྐལ་པ་བྱེ་བ་ཇི་སྙེད་ཀྱིས། །སངས་རྒྱས་ཡེ་ཤེས་མཚུངས་མེད་བསྒྲུབ་བྱས་པ། །བྱང་ཆུབ་བརྙེས་ནས་དེ་སྲིད་ངའི་ཚེ། །བར་མ་དོར་ནི་མྱ་ངན་འདའ་བ་མེད། །འོན་ཀྱང་མྱ་ངན་འདའ་བ་ངས་བསྟན་ཏེ། །རྟག་པའི་འདུ་ཤེས་ཅན་རྣམས་མི་རྟག་བསྟན། །ལྷག་མ་ལུས་པ་ལྟར་ཡང་ངས་བསྟན་ཏེ། །ང་ཡི་ཚེ་ནམ་ཕྱི་མའི་མཐར་བརྟགས་སོ། །ང་ཡི་མྱ་ངན་འདའ་གཅིག་ཐེག་པ་གཅིག་།ང་ཡི་ཐེག་པ་ཐ་དད་མེད་པ་སྟེ། །ཡང་དག་ཏུ་ན་ཐེག་པ་གཅིག་ཏུ་བསྟན། །དེ་ནི་ཐབས་ཀྱི་ཡུལ་དུ་ཤེས་པར་གྱིས། །རྒྱུད་ཞན་བསམ་པ་ཆུང་བའི་སྐྱེ་བོ་དག་།འཕྲལ་དུ་ཐོས་པས་འཇིགས་པར་འགྱུར་སྲིད་ཅེས། །དེ་དག་རྣམས་ལ་ཐེག་པ་གསུམ་བསྟན་གྱི། །ཐེག་པ་གཅིག་སྟེ་ཐེག་པ་གཉིས་སུ་མེད། །ངས་བསྟན་འདིས་ནི་ཆོས་ལ་མོས་པ་དང ། །བསྟན་པའི་ལམ་ལ་དེ་བཞིན་འཇུག་འགྱུར་ཞེས། །ཐེག་པ་གཅིག་པོ་རྣམ་པ་གསུམ་དུ་བསྟན། །ཐེག་པ་ཐ་དད་ནམ་ཡང་ཡོད་པ་མིན། །དཔེར་ན་འཕོང་ཤེས་ཕ་རོལ་ཕྱིན་གྱུར་པ། །ཤེས་པ་དེ་ཉིད་རྣམ་པ་གསུམ་དུ་སྟོན། །དེ་བཞིན་སྟོན་པ་ཆོས་ལ་མཁས་པའི་མཆོག་།ཐེག་པ་གཅིག་པོ་རྣམ་པ་གསུམ་དུ་སྟོན། །འདྲེན་པ་སེམས་ཅན་ཀུན་ལ་མཉམ་པའི་སེམས། །ང་ལ་ཐ་དད་འདུ་ཤེས་ནམ་ཡང་མེད། །ཐེག་པ་དམན་པ་གཞན་ལ་ངས་བསྟན་ན། །དེ་ནི་ང་ལ་སེར་སྣའི་སྐྱོན་དུ་འགྱུར། །དཔེར་ན་རིན་ཆེན་དམ་པ་ཨན་ད་རྙིལ། །གང་དང་གང་གི་གནས་སུ་གཞག་གྱུར་པ། །ཕྱོགས་དེ་ཐམས་ཅད
52.49b
མདོག་གཅིག་སྒྱུར་བྱེད་དེ། །ཁ་དོག་སྔོན་པོར་གྱུར་ཡང་རྟོག་པ་མེད། །འཇིག་རྟེན་འདྲེན་པ་ཡེ་ཤེས་རིན་ཆེན་ཡང ། །དེ་བཞིན་འོད་འགྱེད་ཞིང་ཀུན་རྒྱས་མཛད་ཅིང ། །སྲོག་ཆགས་ཐམས་ཅད་ཁ་དོག་གཅིག་བསྒྱུར་ཏེ། །བྱང་ཆུབ་མཆོག་བསྒྱུར་རྣམ་རྟོག་སེམས་མི་མངའ། །དཔེར་ན་མེ་སྟག་ཆུང་ངུ་འཕེལ་གྱུར་ན། །མེ་ལྕེ་ཆེན་པོ་འབར་ཞིང་མཆེད་པ་ལྟར། །ཉན་ཐོས་ཡེ་ཤེས་མེ་ཡི་མེ་སྟག་ཀྱང ། །དེ་ཉིད་སངས་རྒྱས་ཡོན་ཏན་མེ་ལྕེ་སྐྱེད། །དཔེར་ན་གང་དག་རི་རྒྱལ་ལྷུན་པོའི་དྲུང ། །ཕྱིན་པ་དེ་དག་དེ་མཐུས་མདོག་གཅིག་འགྱུར། །དེ་བཞིན་སྟོབས་བཅུ་དག་ན་གང་འོངས་པ། །མཁས་པ་དེ་དག་བྱང་ཆུབ་མཆོག་ཏུ་འགྱུར། །དཔེར་ན་སྦྲང་མ་དག་གི་མཆུ་ཡིས་ནི། །བཟང་དང་མི་བཟང་སྣ་ཚོགས་གང་བླངས་པ། །དེ་དག་ཐམས་ཅད་གཅིག་ཏུ་བསོགས་བྱས་ཤིང ། །སྦྲང་རྩི་ཉིད་དུ་སྒྱུར་བར་བྱེད་པ་ལྟར། །དེ་བཞིན་མཁས་པ་འཇིག་རྟེན་གྲགས་པ་ཡང ། །ཐེག་པ་གསུམ་པོ་ཉེ་བར་བསྟན་མཛད་ཅིང ། །དཀར་པོ་ཐམས་ཅད་ཡོངས་སུ་བསྡུད་མཛད་དེ། །མཚན་ཉིད་མེད་པའི་བྱང་ཆུབ་མཚན་དུ་སྒྱུར། །རྒྱལ་པོ་འཁོར་ལོས་སྒྱུར་ལ་འཚེ་མེད་དེ། །དེ་ལ་བསྡོ་བའི་དམག་ཚོགས་ཡོད་མ་ཡིན། །ཆོས་ཀྱི་རྒྱལ་སྲིད་ཆེན་པོ་ངས་བཟུང་ན། །དེ་ལ་མུ་སྟེགས་ཅན་གྱི་ཡུལ་མེད་དོ། །དཔེར་ན་ཉི་མའི་དཀྱིལ་འཁོར་ཤར་གྱུར་ན། །སྲིན་བུ་མེ་ཁྱེར་ཀུན་འོད་ཟིལ་ཀྱིས་གནོན། །དེ་བཞིན་ཡེ་ཤེས་དཀྱིལ་འཁོར་ཤར་གྱུར་ན། །མུ་སྟེགས་ཅན་རྣམས་ཐམས་ཅད་འོད་མེད་འགྱུར། །ཡུལ་ནི་གང་ན་ཁབ་ལོང་གནས་གྱུར་པ། །དེ་ན་ལྕགས་ཀྱི་རྣམ་པ་གཞན་མེད་དེ། །ཞིང་མཆོག་གང་ན་དེ་བཞིན་གཤེགས་བཞུགས་པ། །དེར་ནི་མུ་སྟེགས་ཅན་རྣམས་འབྱུང་བ་མེད། །གསེར་གྱི་རྒྱལ་པོ་ཡུལ་གང་བྱུང་གྱུར་པ། །དེ་ནས་འགྱེས་པའི་ཕུང་པོའི་ལྕགས་མི་འབྱུང ། །གང་དུ་འདྲེན་པས་བྱང་ཆུབ་བརྙེས་གྱུར་པ། །ཞིང་དེར་མུ་སྟེགས་ཅན་གྱི་ཚོགས་མི་འབྱུང ། །ཡིད་བཞིན་ནོར་བུ་མཆིང་བུ་ཕྲད་འགྱུར་བ། །བདེན་པའི་ཚུལ་དུ་ནམ་ཡང་འབྱུང་བ་མེད། །དེ་བཞིན་སངས་རྒྱས་རིན་ཆེན་མུ་སྟེགས་ཅན། །ཞིང་གཅིག་ཏུ་ནི་ནམ་ཡང་འབྱུང་མི་འགྱུར། །མུ་སྟེགས་ཅན་སྒོ་འདི་ཀུན་བསམ་གཏན་དང ། །
52.50a
མངོན་ཤེས་དབང་སྒྱུར་མཁས་ཡིན་ཤེས་པར་གྱིས། །ཤེས་རབ་ཐབས་ཀྱི་སྤྱོད་པས་བློ་ལྡན་རྣམས། །རྣམ་པར་འཕྲུལ་པ་སྣ་ཚོགས་སྟོན་པར་བྱེད། །ཐབས་ཀྱི་ཡུལ་དེ་ཐོས་པར་གྱུར་པའི་ཚེ། །རྒྱལ་བའི་སྲས་རྣམས་ཐམས་ཅད་དཀར་གྱུར་ཏེ། །དགའ་སྐྱེས་ཉམས་བདེ་མཚུངས་པ་མེད་ཐོབ་ནས། །རྣམ་པར་འདྲེན་ལ་མེ་ཏོག་མང་པོས་གཏོར། །ས་ཆེན་འདི་ཡང་རྣམ་པ་དྲུག་ཏུ་གཡོས། །ལྷ་ཡི་རྔ་ཡང་བར་སྣང་མཁའ་ལས་རྡུང ། །ལྷ་མང་བྱེ་བ་མཁའ་ལས་ཐལ་སྦྱོར་ཅིང ། །འདྲེན་པ་དེ་ལ་ལེགས་སོ་ལེགས་ཤེས་གསོལ། །ཐེག་པ་གཅིག་ཏུ་བསྟན་པའི་ལེའུ་སྟེ་བཞི་པའོ།། །།དེའི་ཚེ་ལྷོ་ཕྱོགས་ཀྱི་རྒྱུད་ཆེན་པོ་ནས་གཅེར་བུ་པའི་བུ་བདེན་སྨྲ་ཞེས་བྱ་བ་གཅེར་བུ་པ་འབུམ་ཕྲག་བརྒྱད་བཅུ་དང་ལྷན་ཅིག་ཏུ་ཡུལ་རྒྱུ་བ་སྤྱོད་ཅིང་རིམ་གྱིས་གྲོང་ཁྱེར་ཆེན་པོ་འཕགས་རྒྱལ་དུ་ཕྱིན་ཏོ། །དེ་དེ་ལྟར་སྐྱེ་བོའི་ཚོགས་མང་པོ་དང་འགྲོགས་ཤིང་ཅ་ཅོ་དང་ག་ཞ་འབུམ་དག་བྱེད་པ་ཕྱི་བཞིན་འབྲང་ཞིང་གཅེར་བུ་པའི་བུ་བདེན་སྨྲ་ལྷོ་ཕྱོགས་ཀྱི་རྒྱུད་ནས་གཅེར་བུ་པ་འབུམ་ཕྲག་བརྒྱད་བཅུ་དང་ལྷན་ཅིག་ཏུ་གྲོང་ཁྱེར་འཕགས་རྒྱལ་དུ་ཕྱིན་ནས་སྐྱེ་བོའི་ཚོགས་ཆེན་པོ་དུ་མས་ཡོངས་སུ་བསྐོར་ཅིང་མདུན་དུ་བདར་བ་ཞིག་ཡོད་དོ་ཞེས་རྒྱལ་པོ་གཏུམ་པོ་རབ་སྣང་གིས་ཐོས་ཏེ། ཐོས་ནས་ཀྱང་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་བདེན་སྨྲ་ལ་སེམས་དང་བར་གྱུར་ཏོ། །དེ་སེམས་དང་བར་གྱུར་ནས་བློན་པོ་ཆེན་པོ་དང ། ཞབས་འབྲིང་བ་དང ། ཆབ་སྒོ་བ་དང ། འཁོར་བ་དང ། གྲོང་ཁྱེར་བ་དང ། ཡུལ་གྱི་མི་དང ། ཡུལ་འཁོར་བ་དང ། །མདུན་ན་འདོན་དང ། རྒྱལ་བུ་རྣམས་དང་ལྷན་ཅིག་ཏུ་ཡན་ལག་བཞི་པའི་དཔུང་གི་ཚོགས་དང་བཅས་ཏེ། གླང་པོ་ཆེ་པ་དང ། རྟ་པ་དང ། ཤིང་རྟ་དང ། དཔུང་བུ་ཆུང་དག་རྗེས་སུ་འབྲང་ཞིང་རྒྱལ་པོའི་མཐུ་ཆེན་པོ་དང ། རྒྱལ་པོའི་ཕུན་སུམ་ཚོགས་པ་ཆེན་པོ་དང་ཆས་ཏེ། བུམ་པ་གང་བ་འབུམ་དག་གིས་ནི་མདུན་དུ་དྲངས། རོལ་མོ་སིལ་སྙན་འབུམ་དག་ནི་བརྡུངས་ཤིང་དཀྲོལ། དུང་འབུམ་དག་ནི་བུས། གདུགས་དང ། རྒྱལ་མཚན་དང ། བ་དན་དང་འཕན་རིངས་འབུམ་དག་ནི་བསྒྲེང ། མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོ་དང ། མྱ་ངན་འཚང་དང ། བ་ཀུ་ལ་དང ། ཏི་ལ་ཀ་དང ། ་ཏི་མུག་ཏ་ཀ་དག་གིས་ནི་ལམ
52.50b
ཚལ་པར་བཀང་སྟེ། གཅེར་བུ་པའི་བུ་བདེན་སྨྲ་བསུ་བའི་ཕྱིར་དོང་ངོ ། །དེ་ནས་གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་མངོན་དུ་འོང་བ་མཐོང་ནས། །ལམ་ནས་གཟུར་ཏེ་ཤིང་དྲུང་ཞིག་ཏུ་སྟན་བཏིང་ནས་འདུག་གོ་དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ཤིང་དྲུང་དུ་འདུག་པར་ཤེས་ནས་གླང་པོ་ཆེ་ལས་བབས་ཏེ་རྐང་པས་སོང་ནས་ལེགས་པར་བརྗོད་དེ། བདག་གི་ཁྲི་རིན་པོ་ཆེའི་རྩ་བ་ཅན་ལ་འདུག་གོ། །དེ་ནས་གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་ཡང་དག་པར་དགའ་བའི་གཏམ་བྱས་པ། རྒྱལ་པོ་ཆེན་པོ་བྱོན་པ་ལེགས་སོ། །འདི་ལྟར་ཁྱོད་ཕུན་སུམ་ཚོགས་པ་རྒྱ་ཆེན་པོས་ངང་དེས་པ་མ་ཉམས་པར་དགེ་སྦྱོང་དང་བྲམ་ཟེའི་གན་དུ་བྱོན་པ་ལེགས་སོ། །རྒྱལ་པོ་ཆེན་པོ་ཁྱོད་ཀྱི་རྒྱལ་སྲིད་ལ་འཚེ་བ་མ་མཆིས་སམ་གནོད་པར་བགྱིད་པ་མ་མཆིས་སམ་མ་ཉམས་མ་དམས་སམ་ཁྱོད་ཀྱི་ཁམས་ན་མ་རུང་བ་དང་བཀྲབས་པ་དང་རོལ་མོ་མཁན་དང ། རྐུན་པོ་དང ། ཡང་རྐོན་དང ། ལ་གཅན་པ་དང ། ར་མ་པ་དང ། བྱི་བ་པ་དག་གིས་རྒྱལ་སྲིད་ལ་གནོད་པར་མ་གྱུར་ཏམ། རྒྱལ་པོ་ཆེན་པོ་ཁྱོད་ཀྱི་ཁམས་ན་དགེ་སློང་དང་བྲམ་ཟེ་དག་གནས་དང ། ཁ་ཟས་དང ། གོས་དང ། ཆོས་སྒྲུབ་པའི་ཡོ་བྱད་ཀྱིས་ཉོན་མི་མོངས་ཤིང་བདེ་བར་གནས་སམ། རྒྱལ་པོ་ཆེན་པོ་ཁྱོད་ཀྱི་ཁམས་ན་རྔོན་པ་དང ། ཉ་པ་དང ། ཁྱི་ར་བ་དང ། ཕག་འཚོང་དང ། ཤན་པ་དང་སྦྲུལ་འཛིན་པ་དང ། བྱ་བ་དག་གིས་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་རྣམས་གཙེས་པར་མ་གྱུར་ཏམ། རྒྱལ་པོ་ཆེན་པོ་ཁྱོད་ཀྱང་ད་ཙམ་མི་རིགས་པར་རྒྱལ་སྲིད་ལ་མངའ་མི་མཛད་དམ། རྐང་གཉིས་པ་དང ། རྐང་བཞི་པ་དང ། རྐང་མེད་པ་དང ། རྐང་མངས་ཀྱི་སྲོག་ཆགས་རྣམས་ལ་གཙེ་བའི་བློ་མ་སྐྱེས་ལགས་གྲང ། དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སེམས་ཅན་ཐམས་ཅད་ལ་ནི་སྲོག་ཕངས་ཀྱིས། རྒྱལ་པོ་ཆེན་པོ་དེའི་སླད་དུ་ཁྱོད་ཀྱིས་སྲོག་གཅོད་པ་སྤང་ཞིང་ཆད་པ་སྤང་བ་དང ། ཐོ་བརྩམ་པ་མ་མཆིས་པར་མཛད་ཅིང ། མ་བྱིན་པར་ལེན་པ་སྤང་ཞིང་བདག་གི་ལོངས་སྤྱོད་ཀྱིས་ཆོག་མཁྱེན་པ་དང ། གཞན་གྱི་ལོངས་སྤྱོད་ལ་གནོད་པ་མ་མཆིས་པར་མཛོད་ཅིག་།འདོད་པ་ལ་ལོག་པར་གཡེམ་པ་སྤང་ཞིང་བདག་གི་བཙུན་མོ་ལ་དགྱེས་པ་དང ། གཞན་གྱི་མཆིས་བྲང་ལ་བཞེད་པ་མ་མཆིས་པར
52.51a
མཛོད་ཅིག་།བརྫུན་དུ་སྨྲ་བ་སྤང་ཞིང་མང་བར་གསུང་བ་དང་ཆོས་དང་ལྡན་པར་བརྗོད་པར་མཛོད་ཅིག་།ཕྲ་མའི་ཚིག་སྤང་ཞིང་དབྱེན་གྱི་ཚིག་མ་མཆིས་པ་དང་འདུམ་པར་བགྱི་བར་མཛོད་ཅིག་།ངག་རྩུབ་པོ་སྤང་ཞིང་སྙན་པ་དང ། འཇམ་པའི་ཚིག་ཏུ་བརྗོད་པར་མཛོད་ཅིག་།ཚིག་ཀྱལ་པ་སྤང་ཞིང་ཇི་ལྟར་གསུངས་པ་བཞིན་དུ་བགྱི་བ་དང་དེས་པར་བརྗོད་པར་མཛོད་ཅིག་།རྒྱལ་པོ་ཆེན་པོ་ཁྱོད་ཀྱིས་གཞན་གྱི་ལོངས་སྤྱོད་རྣམས་དང་གཞན་གྱི་ནོར་རྣམས་ལ་བརྣབ་སེམས་སུ་མི་བགྱི་སྟེ། དེའི་གོང་དུ་རྗེས་སུ་དགྱེས་པའི་ཐུགས་བསྐྱེད་པར་མཛོད་ཅིག་།རྒྱལ་པོ་ཆེན་པོ་ཁྱོད་ཀྱིས་གནོད་སེམས་མ་མཆིས་ཤིང་བྱམས་པ་དང་ལྡན་པ་དང ། ཡིད་ཀྱི་ལས་ཀྱི་མཐའ་ཡོངས་སུ་དག་པར་མཛོད་ཅིག་།ལོག་པར་ལྟ་བ་སྤང་ཞིང་རང་གི་ལས་ཀྱི་འབྲས་བུ་གཟིགས་པ་དང ། འཕགས་པ་རྣམས་ཀྱི་ཡང་དག་པར་ལྟ་བའི་རྗེས་སྙེགས་པར་མཛོད་ཅིག་།དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སྲོག་གཅོད་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཚེ་ཐུང་བ་དང་ནད་མང་བའོ། །མ་བྱིན་པར་ལེན་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ལོངས་སྤྱོད་ཆུང་བ་ཉིད་དང ། ལོངས་སྤྱོད་ཐུན་མོང་ཅན་ཉིད་དོ། །འདོད་པ་ལ་ལོག་པར་གཡེམ་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། གཡོག་འཁོར་མི་སྲུན་པ་དང ། འགྲན་ཟླ་དང་བཅས་པའི་ཆུང་མ་ཅན་དུ་འགྱུར་རོ། །བརྫུན་དུ་སྨྲ་བས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ་དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། སྐུར་པ་མང་བ
52.51b
ཉིད་དང་གཞན་གྱིས་སླུ་བ་ཉིད་དོ། །ཕྲ་མའི་ཚིག་གིས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། གཡོག་འཁོར་མི་འདུམ་པ་ཉིད་དང ། གཡོག་འཁོར་ངན་པ་ཉིད་དོ། །ངག་རྩུབ་པོས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཡིད་དུ་མི་འོང་བའི་ཚིག་ཐོས་པ་ཉིད་དང ། ཐབ་མོའི་ཚིག་ཉིད་དོ། །ཚིག་འཁྱལ་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེས་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཚིག་མི་བཙུན་པ་ཉིད་དང ། མ་ངེས་པའི་སྤོབས་པ་ཉིད་དོ། །བརྣབ་སེམས་ཀྱིས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཆོག་མི་ཤེས་པ་ཉིད་དང ། འདོད་པ་ཆེ་བ་ཉིད་དོ། །གནོད་སེམས་ཀྱིས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། མི་ཕན་པ་ཚོལ་བ་ཉིད་དང ། གཞན་ལ་གནོད་པ་བྱེད་པ་ཉིད་དོ། །ལོག་པར་ལྟ་བས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ལྟ་བ་ངན་པར་ལྟུང་བར་འགྱུར་བ་དང ། གཡོ་སྒྱུ་ཅན་དུ་འགྱུར་བའོ། །རྒྱལ་པོ་ཆེན་པོ་དེ་ལྟར་ན་མི་དགེ་བ་བཅུའི་ལས་ཀྱི་ལམ་འདི་དག་གིས་ནི་སྡུག་བསྔལ་གྱི་ཕུང་པོ་ཆེ
52.52a
ཞིང་ཚད་མ་མཆིས་པར་ཡང་དག་པར་འདུ་བར་འགྱུར་རོ། །རྒྱལ་པོ་ཆེན་པོ་དེའི་སླད་དུ་བག་མཆིས་པ་དང ། མི་རྟག་པར་སོ་སོར་བརྟག་པ་མང་བར་མཛོད་ཅིག་།རྒྱལ་པོ་ཆེན་པོ་འཚོ་བའི་ཡུན་ནི་ཐུང་ངོ ། །ཚེའི་ཚད་ནི་རིང་པོར་མི་ཐུབ་བོ་ཕ་རོལ་དུ་ནི་བཞུད་འཚལ་ལོ། །ཚེའི་འདུ་བྱེད་ནི་རིའི་འབབ་ཆུ་ལྟར་མི་བརྟན་ཞིང་གཡོ་སྟེ། སྐད་ཅིག་ཀྱང་མི་གནས་ཀྱིས་དེའི་སླད་དུ་རྒྱལ་པོ་ཆེན་པོ་ལས་ཀྱི་རྣམ་པར་སྨིན་པའི་དྲུངས་མི་འབྱུང་ཞིང་འཇིག་རྟེན་ཕ་རོལ་གྱིས་འཇིགས་པ་གཟིགས་པར་མཛོད་ཅིག་།དེ་ནས་གཅེར་བུ་པའི་བུ་བདེན་སྨྲས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ས་ཡི་བདག་པོ་རྟག་ཏུ་བག་ཡོད་མཛོད། །བག་མེད་སེམས་ཅན་དམྱལ་བའི་གཡང་སར་འོར། །བག་མེད་སྤྱོད་པ་སེམས་ཅན་དམྱལ་བར་མཆི། །བག་མཆིས་གང་ལགས་དེ་ནི་མཐོ་རིས་མཆི། །རྒྱལ་པོ་ཁྱོད་ནི་སྲོག་གཅོད་མ་མཛད་ཅིག་།སྐྱེ་བོ་ཀུན་ལ་སྲོག་ནི་རབ་ཏུ་འཕངས། །དེ་བས་ཡུན་རིང་ཚེ་སྲུང་སུ་འདོད་པས། །ཡིད་ཀྱི་དགུ་ལའང་སྲོག་གཅོད་མི་བསམ་མོ། །འཇིག་རྟེན་སྐྱོང་བ་རྐུ་བ་རྟག་ཏུ་སྤོངས། །དེས་ནི་ལོངས་སྤྱོད་འབྱོར་པ་བརྟན་པ་འཐོབ། །སྲོག་ཆེད་ཉོན་མོངས་ཐུན་ཁོལ་བསགས་བསགས་པ། །གཞན་ནོར་བླངས་པས་དབུལ་པོ་ཉིད་དུ་འགྱུར། །གཞན་གྱི་ཆུང་མ་རྟག་ཏུ་སྤོང་མཛད་ཅིང ། ས་ཡི་བདག་པོ་བཙུན་མོས་འཚལ་བར་མཛོད། དེས་ན་རང་གི་བཙུན་མོ་སྡུག་པར་འགྱུར། །བཙུན་མོ་དགྲ་ཟླ་མ་མཆིས་འཐོབ་པར་མཆི། །བརྫུན་གྱི་ཚིག་ནི་ནམ་ཡང་བརྗོད་མ་མཛད། །རྒྱལ་པོ་དབང་པོ་དམ་བཅས་མང་བར་མཛོད། །བདེན་པར་སྨྲ་བ་དབང་པོའི་གནས་སུ་མཆི། །བརྫུན་དུ་གང་སྨྲ་གཤིན་རྗེའི་འཇིག་རྟེན་མཆི། །ཕྲ་མའི་སྐྱོན་ལྡན་ཚིག་ནི་ཡོངས་སྤངས་ནས། །སྐྱེ་བོ་བྱེ་བ་འདུམ་པར་སྡུམས་བགྱིད་ན། །མི་ཕྱེད་གཡོག་འཁོར་འཕགས་པ་འཐོབ་པར་འགྱུར། །འདི་ནས་ཤི་འཕོས་མཐོ་རིས་རབ་ཏུ་མཆི། །ས་ཡི་བདག་པོ་ངག་རྩུབ་སྤང་བར་མཛོད། །གཞན་གྱི་རྣར་སྙན་བདེ་བ་བཀའ་སྩོལ་ཅིག་།དེ་རྒྱུས་འཇིག་རྟེན་ཕ་རོལ་ལྷ་དག་གི། །སྣ་ཚོགས་ཡིད་འོང་མཐོ་རིས་ཚིག་གསན་འགྱུར། །ཀྱལ་པའི་ཚིག་རྣམས
52.52b
རྣམ་པར་སྤང་མཛད་དེ། །ཤིན་དུ་དེས་ཤིང་བརྟན་པའི་ཚིག་ཀྱང་གསུངས། །ཕ་རོལ་ལྷ་ཡི་དབང་ཕྱུག་འཇིག་རྟེན་དུ། །སེམས་ཅན་རྣམས་ལ་བཙུན་པའི་ཚིག་ལྡན་འགྱུར། །གཞན་གྱི་ཕུན་སུམ་ཚོགས་པ་མཐོང་གྱུར་ན། །སྐྱེ་དགུའི་བདག་པོ་ཕན་འཚལ་ཆགས་མི་བགྱི། །གཞན་གྱི་ལོངས་སྤྱོད་དག་ལ་ཆགས་བགྱིས་ན། །ལོངས་སྤྱོད་ཐུན་མོང་ཅན་དུ་དེས་འགྱུར་རོ། །ས་ཡི་བདག་པོ་གནོད་སེམས་མ་མཛད་ཅིག་།སེམས་ཅན་རྣམས་ལ་བྱམས་པ་རྟག་ཏུ་མཛོད། །གནོད་སེམས་ལྡན་པའི་མི་རྣམས་ཤི་འཕོས་ནས། །དགེ་བ་བགྱིས་ཀྱང་མནར་མེད་དམྱལ་བར་མཆི། །མི་ཡི་བདག་པོ་ལོག་པར་ལྟ་སྤོང་མཛོད། །ཡང་དག་གཟིགས་པས་བདག་ཉིད་བརྟན་པར་མཛོད། །དགེ་ཆོས་འདི་དག་ཡང་དག་བླང་བགྱིས་ན། །ལྷ་ཡི་གཞལ་མེད་ཁང་དུ་དགྱེས་པར་འགྱུར། །དགེ་སློང་བྲམ་ཟེ་ཚུལ་ཁྲིམས་ལྡན་པ་དང ། །ཡབ་དང་ཡུམ་ལ་མཆོད་པ་གུས་བགྱིས་ན། །ངན་སོང་ས་ཆེན་ཁྱོད་ཀྱིས་སྤངས་འགྱུར་ཞིང ། །མཐོ་རིས་དགྱེས་པ་བརྙེས་པས་དགྱེས་པར་འགྱུར། །དེ་ནས་གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་བག་ཡོད་པ་དང་ལྡན་པའི་གཏམ་དེ་ལྟ་བུ་དག་བྱས་ནས་ཅང་མི་སྨྲ་བར་འདུག་གོ། །རྒྱལ་པོའི་དྲུང་དུ་ཕྱིན་པའི་ལེའུ་སྟེ་ལྔ་པའོ།། །། དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲའི་ཚིག་དེ་ལ་མངོན་པར་དགའ་སྟེ། ཡང་དག་པར་དགའ་བར་འགྱུར་བ་དང ། ཡང་དག་པར་ཆགས་པར་འགྱུར་བའི་གཏམ་སྣ་ཚོགས་བྱས་ནས་གནོད་པ་ཆུང་བ་དང ། ཉམ་ང་བ་ཉུང་བའི་གཏམ་དྲིས་ཏེ་འདི་སྐད་ཅེས་སྨྲས་སོ། །བྲམ་ཟེ་གལ་ཏེ་བདག་གིས་དྲིས་ལ་དྲིས་པ་ལན་གདབ་པར་ཁྱོད་ཀྱིས་སྐབས་དབྱེ་ན་ཕྱོགས་འགའ་ཞིག་དྲིའོ། །དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཅི་དང་ཅི་བཞེད་པ་སྨྲར་གསོལ། སྨྲས་པ་དེ་དང་དེ་ཉིད་ཀྱི་ལན་གསོལ་པས། བདག་གིས་ཁྱོད་ཀྱི་ཐུགས་རངས་པར་བགྱིའོ། །སྐབས་ཕྱེ་བས་དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ།
52.53a
བདེན་སྨྲ་ལ་འདི་སྐད་ཅེས་སྨྲས་སོ་བྲམ་ཟེ་སྐྱེ་དགུ་སྐྱེ་དགུ་ཞེས་བྱ་ན། དེ་ལྟར་སྐྱེ་དགུ་ཞེས་བྱ་བ་དེ་ཆོས་གང་གི་ཚིག་བླ་དགས་ཡིན། སྨྲས་པ་རྒྱལ་པོ་ཆེན་པོ་འདི་ལྟར་སྐྱེ་དགུ་ཞེས་བགྱི་བ་ནི་ཉེ་བར་ལེན་པའི་ཕུང་པོ་ལྔའི་ཚིག་བླ་དགས་ཏེ། ལྔ་པོ་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཉེ་བར་ལེན་པའི་ཕུང་པོའོ། །རྒྱལ་པོ་ཆེན་པོ་ཡང་ཉེ་བར་ལེན་པའི་ཕུང་པོ་ལྔ་པོ་དེ་དག་ཉིད་ཉེ་བར་བཟུང་སྟེ། སེམས་ཅན་གྱི་འཇིག་རྟེན་དང ། སྣོད་ཀྱི་འཇིག་རྟེན་གདགས་པ་ལགས་སོ། །དེ་ལ་སེམས་ཅན་གྱི་འཇིག་རྟེན་གདགས་པ་ནི་སྐྱེ་གནས་བཞིས་ཟིན་པ་སྟེ། མངལ་ནས་སྐྱེ་བ་དང ། སྒོ་ང་ལས་སྐྱེ་བ་དང ། དྲོད་གཤེར་ལས་སྐྱེ་བ་དང ། བརྫུས་ཏེ་སྐྱེ་བའོ། །སྣོད་ཀྱི་འཇིག་རྟེན་གདགས་པ་ནི་ས་དང ། ཆུ་དང ། མེ་དང ། རླུང་དང ། ནམ་མཁའི་ཁམས་ཀྱིས་ཟིན་པའོ། །སྨྲས་པ། བྲམ་ཟེ་སྐྱེ་དགུ་སྐྱོང་བ་གང་ཡིན། སྨྲས་པ། རྒྱལ་པོ་ཆེན་པོ་རང་གི་ལས་ཀྱི་དབང་དང་བདག་པོའོ། །སྨྲས་པ། བྲམ་ཟེ་རྣམ་པ་གང་གིས་ཇི་ལྟར་རང་གི་ལས་ཀྱི་དབང་སྐྱེ་དགུ་སྐྱོང་བར་བྱེད། སྨྲས་པ། རྒྱལ་པོ་ཆེན་པོ་སེམས་ཅན་གང་དག་རང་གི་ལས་ཀྱི་དབང་གིས་རྣམ་པ་དེ་ལྟ་བུའི་གནས་སུ་སྐྱེས་ཤིང་བདག་གིར་བགྱི་བ་མ་མཆིས་པ་དང ། ཡོངས་སུ་བཟུངས་བར་མ་མཆིས་པ་དང་མ་རྨོས་མ་བཏབ་པའི་ཡོ་བྱད་རྣམས་ལ་སྤྱོད་ཅིང་ནད་དང་དགྲ་དང ། སྡུག་བསྔལ་ཆེན་པོ་རྣམ་པར་སྤངས་པས་གཅིག་ལ་གཅིག་མི་འཁུ་ཞིང་ཇི་སྲིད་འཚོའི་བར་དུ་འབྱོར་པ་དང ། མོད་པའི་ཡུལ་དུ་བདེ་བ་ལ་རེག་པར་གནས་ཤིང་དུས་ལ་བབ་སྟེ། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་བ་དག་མཆིས་ཏེ། འདི་ལྟ་སྟེ་དཔེར་ན། བྱང་གི་སྒྲ་མི་སྙན་གྱི་སེམས་ཅན་ལྟ་བུ་དག་ལགས་སོ། །སེམས་ཅན་གང་དག་རང་གི་ལས་ཀྱི་དབང་གིས་རྣམ་པ་དེ་ལྟ་བུའི་དུས་སུ་སྐྱེ་ཞིང་འོད་རང་ལས་འབྱུང་བ། ནམ་མཁའ་ལ་མཆི་བ། དགའ་བའི་ཁ་ཟས་དང་ལྡན་པ། མངལ་ནས་མ་སྐྱེས་པ། ཚེ་རིང་བ་ཡུན་རིང་པོར་འཚོ་བ་དག་མཆིས་ཏེ། འདི་ལྟ་སྟེ་དཔེར་ན། བསྐལ་པ་དང་པོ་པའི་སེམས་ཅན་ལྟ་བུ་དག
52.53b
ལགས་སོ། །སེམས་ཅན་གང་དག་རང་གི་ལས་ཀྱི་དབང་གིས་སྔོན་གྱི་བསོད་ནམས་ཀྱི་རྒྱུའི་སྟོབས་བསྐྱེད་པ་དང་ལྡན་ཞིང་ཚེ་འདི་ལ་ཕར་ཤེས་པ། མར་ཤེས་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། དོན་བགྱིད་པ་དགོས་པ་བགྱིད་པ། རིགས་ཀྱི་གཙོ་བོ་ལ་རིམ་གྲོ་བྱེད་པ། ཁ་ན་མ་ཐོ་བས་འཇིགས་པར་ལྟ་བ། སྦྱིན་པ་དག་སྦྱིན་པ། བསོད་ནམས་དག་བགྱིད་པ། ཉེ་བར་གནས་པས་ཉེ་བར་གནས་པ། ཚུལ་ཁྲིམས་ཡང་དག་པར་བཟུང་ཞིང་གནས་པ་དག་མཆིས་ཏེ། འདི་ལྟ་སྟེ་དཔེར་ན་དུས་བཟང་པོའི་སེམས་ཅན་ལྟ་བུ་དག་ལགས་ཏེ། དེ་དག་ལ་རྒྱལ་པོར་གདགས་པ་མ་མཆིས་སོ། །རྒྱལ་པོ་ཆེན་པོ་དེ་ལྟར་ན་བདག་གི་ལས་ཀྱི་དབང་ནི་སྐྱེ་དགུ་སྐྱོང་ཞེས་བགྱིའོ། །སྨྲས་པ། བྲམ་ཟེ་ཇི་ལྟར་ན་སྐྱེ་དགུའི་བདག་པོས་སྐྱོང་ཞེས་བྱ། སྨྲས་པ། རྒྱལ་པོ་ཆེན་པོ་རྒྱལ་པོ་རྣམས་ནི་སྐྱེ་དགུ་རྣམས་ཀྱི་དབང་པོ་ཞེས་བགྱི་སྟེ། ་དེ་དག་ཀྱང་ཆོས་དང་ལྡན་ཞིང་ཚུལ་ཁྲིམས་དང ། ཚུལ་དང ། ཡང་དག་པར་སྤྱོད་པ་སྐྱེ་དགུ་རྣམས་དགའ་བར་སྦྱོར་བས་མཛེས་པས་ན་དེའི་སླད་དུ་རྒྱལ་པོ་ཞེས་བགྱིའོ། །དེ་དག་ཀྱང་རྣམ་པ་བཞི་སྟེ་འདི་ལྟ་སྟེ། འཁོར་ལོས་སྒྱུར་བ་རྣམས་དང ། རྒྱལ་པོ་ཆེན་པོ་རྣམས་དང ། ཁམས་ཀྱི་རྒྱལ་པོ་རྣམས་དང ། རྒྱལ་ཕྲན་རྣམས་ལགས་སོ། །དེ་ལ་འཁོར་ལོས་སྒྱུར་བ་ཞེས་བགྱི་བ་ནི་འདི་ན་ལ་ལ་རྒྱལ་པོ་འཁོར་ལོས་སྒྱུར་བ་རྒྱལ་རིགས་སྤྱི་བོ་ནས་དབང་བསྐུར་བ། མཐའ་བཞིར་རྒྱལ་བ། ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ལགས་སོ། །དེའི་རིན་པོ་ཆེ་སྣ་བདུན་ནི་འདི་དག་ལགས་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། བུད་མེད་རིན་པོ་ཆེ་དང ། ནོར་བུ་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དག་གོ། །དེ་ས་ཆེན་པོ་མ་ལུས་པ་གནོད་པར་བསྡོ་བ་མ་མཆིས་ཤིང་འཚེ་བ་མ་མཆིས་ལ། ཆད་པ་མ་མཆིས་ཤིང་མཚོན་གྱིས་བདའ་བ་མ་མཆིས་པ་འདི་ཉིད་ཆོས་དང་འཐུན་པར་སྙོམས་པས་ལེགས་པར་ཕབ་སྟེ། གནས་ལགས་སོ་སྨྲས་པ། རྣམ་པ་གང་གིས་ཇི་ལྟར་མཐའ་བཞིར་རྒྱལ་བར
52.54a
འགྱུར་སྨྲས་པ་གླིང་བཞི་ལ་དབང་གིས་དབང་སྒྱུར་བའི་སླད་དུའོ། །སྨྲས་པ། ཇི་ལྟར་ན་རྣམ་པར་རྒྱལ་བ་ཡིན། སྨྲས་པ། བཀའ་ལས་འགལ་བར་བགྱིད་པ་མ་མཆིས་པའི་སླད་དུའོ། །སྨྲས་པ། ཇི་ལྟར་ན་ཆོས་དང་ལྡན་པ་ཡིན། སྨྲས་པ། བདག་ཉིད་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཤིང་གནས་པའི་སླད་དུའོ། །སྨྲས་པ། ཇི་ལྟར་ན་ཆོས་ཀྱི་རྒྱལ་པོ་ཡིན། སྨྲས་པ། གཞན་དག་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཤིང་གནས་སུ་སྩལ་བའི་སླད་དུའོ། །སྨྲས་པ། ཅིའི་ཕྱིར་འཁོར་ལོ་རིན་པོ་ཆེ་དང་ལྡན་པར་འགྱུར། སྨྲས་པ། ཚེགས་ཆུང་ངུས་རྣམ་པར་རྒྱལ་ཞིང་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་གླང་པོ་རིན་པོ་ཆེ་དང་རྟ་རིན་པོ་ཆེ་དང་ལྡན་པར་འགྱུར་སྨྲས་པ། བཞོན་པའི་མཆོག་ངོ་མཚར་གྱི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་བུད་མེད་རིན་པོ་ཆེ་དང་ལྡན་པར་འགྱུར། སྨྲས་པ། དགའ་བའི་མཆོག་གིས་རྩེ་བ་དང་དགའ་བའི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་ནོར་བུ་རིན་པོ་ཆེ་དང་ལྡན་པར་འགྱུར། སྨྲས་པ། སྣང་བ་དམ་པའི་ཡོ་བྱད་ཀྱི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་ཁྱིམ་བདག་རིན་པོ་ཆེ་དང་ལྡན་པར་འགྱུར། སྨྲས་པ། ལོངས་སྤྱོད་ཀྱི་དབང་ཕྱུག་མཆོག་གི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་བློན་པོ་རིན་པོ་ཆེ་དང་ལྡན་པར་འགྱུར། སྨྲས་པ། ཤུལ་དུ་ཞུགས་ན་ཉོན་མོངས་ཤིང་སྐྱོ་བར་མི་འགྱུར་བའི་བདེ་བ་འཐོབ་པའི་སླད་དུའོ། །སྨྲས་པ། ཇི་ལྟར་ན་ས་འདི་མ་ལུས་པ་དག་ལ་གནས་པར་འགྱུར། སྨྲས་པ། མཐའ་དག་ལ་གནས་པའི་སླད་དུའོ། །སྨྲས་པ། ཇི་ལྟར་ན་གནོད་པར་བསྡོ་བ་མེད་པ་ཡིན། སྨྲས་པ། ཕྱིར་རྒོལ་བ་མ་མཆིས་པའི་སླད་དུའོ། །སྨྲས་པ་ཇི་ལྟར་ན་འཚེ་བ་མེད་པ་ཡིན། སྨྲས་པ། ནན་གྱིས་བགྱི་བ་མ་མཆིས་པའི་སླད་དུའོ། །སྨྲས་པ་ཇི་ལྟར་ན་ཆད་པ་མེད་པ་དང ། མཚོན་གྱིས་བདའ་བ་མེད་པ་ཡིན། སྨྲས་པ། ཆད་པ་དང་མཚོན་ཆས་གནོད་པར་བགྱི་བ་མ་མཆིས་པའི་སླད་དུའོ། །སྨྲས་པ། ཇི་ལྟར་ན་ཆོས་དང་འཐུན་པ་ཡིན། སྨྲས་པ། མི་རིགས་པའི་ཆགས་པ་དང་ཞེ་སྡང་དང་གཏི
52.54b
མུག་རྣམ་པར་སྤངས་པའི་སླད་དུའོ། །སྨྲས་པ། ཇི་ལྟར་ན་སྙོམས་པ་ཡིན། སྨྲས་པ། ཕྱོགས་སུ་མ་ལྷུང་བར་ཡོངས་སུ་སྐྱོང་བའི་སླད་དུའོ། །ཇི་ལྟར་ན་ལེགས་པར་ཕབ་སྟེ་གནས་པར་འགྱུར། སྨྲས་པ། གཞན་དག་རང་རང་གི་རིས་ནས་མ་སྐྱེས་པའི་སླད་དུའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་འདི་ལྟར་འཁོར་ལོས་སྒྱུར་བའི་རྒྱལ་པོ་གང་གི་ཚེ་གླིང་ལས་རྣམ་པར་རྒྱལ་བར་བགྱིད་པ་དེའི་ཚེ་དེ་ན་རྒྱལ་ཕྲན་ཇི་སྙེད་ཅིག་གནས་པ་དེ་དག་ལྷགས་ནས་འཁོར་ལོས་སྒྱུར་བའི་རྒྱལ་པོ་ལ་འདི་སྐད་ཅེས་མཆིའོ། །ལྷའི་རྣམ་པར་རྒྱལ་བ་འདི་དག་ནི་འབྱོར་པ་རྒྱས་པ། བདེ་བ། ལོ་ལེགས་པ། སྐྱེ་བོ་མང་པོ་དང་མིས་གཏམས་པ་ལགས་ཏེ། དེ་དག་ལྷས་བསྐྱང་བ་མཛད་དུ་གསོལ། བདག་ཅག་ཀྱང་ལྷའི་ཞབས་འབྲིང་འཚལ་ལོ་ཞེས་མཆིའོ། །དེ་དག་ལ་འཁོར་ལོས་སྒྱུར་བའི་རྒྱལ་པོ་འདི་སྐད་བསྒོ་སྟེ། དེའི་ཕྱིར་ཡུལ་གྱི་བདག་པོ་དག་རང་རང་གི་རྣམ་པར་རྒྱལ་བ་ལེགས་པར་སྐྱོང་ཤིག་།དེ་ཡང་ཆོས་དང་འཐུན་པས་བསྐྱང་གི་ཆོས་དང་མི་འཐུན་པས་མ་ཡིན་ནོ། །སྙོམས་པས་བསྐྱང་གི་།མི་སྙོམས་པས་མ་ཡིན་ནོ། །ཁྱེད་ཀྱིས་ཆོས་དང་མི་འཐུན་པར་སྤྱད་པ་འམ་མི་རིགས་པར་སྤྱད་པས་ཡུལ་འཁོར་ན་འཁོད་པར་དགའ་བར་མ་བྱེད་ཅིག་།དེ་ལྟར་ན་ཁྱོད་ཀྱང་ངའི་རྗེས་སུ་འབྲང་བ་ཡིན་ནོ། །ཞེས་རྣམ་པ་དེ་ལྟ་བུའི་འཁོར་ལོས་སྒྱུར་བའི་རྒྱལ་པོ་ནི་སྐྱེ་དགུ་དེ་ལྟར་སྐྱོང་སྟེ། རྒྱལ་པོ་ཆེན་པོ་ཁམས་ཀྱི་རྒྱལ་པོ་དང་རྒྱལ་ཕྲན་དེ་དག་ནི་དེའི་རྗེས་སུ་འབྲང་བ་ལགས་ཏེ། རྒྱལ་པོ་ཆེན་པོ་དེ་ལྟར་ན་བདག་པོས་སྐྱེ་དགུ་སྐྱོང་བ་ལགས་པའི་སླད་དུའོ། །སྨྲས་པ། བྲམ་ཟེ་ཆོས་དང་ལྡན་པའི་རྒྱལ་པོ་ཅི་ལ་གནས་ཤིང་སྐྱེ་དགུ་སྐྱོང་བར་བྱེད། སྨྲས་པ། རྒྱལ་པོ་ཆེན་པོ་འཁོར་ལོས་སྒྱུར་བའི་རྒྱལ་པོ་མ་གཏོགས་པར་གཞན་ནི་བསྟན་བཅོས་ལ་གནས་ཤིང་སྐྱེ་དགུ་སྐྱོང་ལགས་སོ། །དེ་ཅིའི་སླད་དུ་ཞེ་ན། འཁོར་ལོས་སྒྱུར་བའི་རྒྱལ་པོས་སྐྱེ་དགུ་སྐྱོང་བ་དེའི་ཚེ་ན་ཆོས་མ་ལགས་པའི་དད་པ་ལ་དགའ་བ་ལ་ཆགས་པ་འམ། མི་རིགས་པའི་འདོད་ཆེན་གྱིས་ཟིལ་གྱིས་ནོན་པ་འམ། ལོག་པའི་ཆོས་ཀྱིས་འཁོར་བ་དེ
52.55a
ལྟ་བུའི་སེམས་ཅན་མ་མཆིས་ཏེ། དེའི་ཚེ་འཁོར་ལོས་སྒྱུར་བའི་རྒྱལ་པོ་དེ་རང་གི་ཆོས་ཀྱི་དབང་གིས་རྒྱལ་པོའི་བགྱི་བ་དེ་དང་དེ་དག་ལ་མི་ཟློགས་པའི་རྟོགས་པ་དང་ལྡན་པས་དེའི་དོན་ཐམས་ཅད་ཚེགས་ཆུང་ངུས་འགྲུབ་ཅིང་ཀུན་ཀྱང་འཐུན་པར་གནས་པས་དེའི་སླད་དུ་དེ་ལ་བསྟན་བཅོས་མི་འཚལ་ལོ། །གང་གི་ཚེ་སེམས་ཅན་རྣམས་ཆོས་མ་ལགས་པའི་འདོད་པ་ལ་ཆགས་ཤིང་མི་རིགས་པའི་འདོད་ཆེན་གྱིས་ཟིལ་ཀྱིས་ནོན་པ་དང་ལོག་པའི་ཆོས་ཀྱིས་འཁོར་བར་གྱུར་པའི་ཚེ་རྒྱལ་པོ་རྣམས་ཀྱི་རང་རང་གི་སྤོབས་པ་ལ་འབྲི་བར་འགྱུར་ཏེ། དེ་ལ་ཆོས་ཀྱིས་སྐྱེ་དགུ་ཡོངས་སུ་བསྐྱང་བའི་སླད་དུ་དྲང་སྲོང་ཆེན་པོ་རྣམས་བསྟན་བཅོས་དག་བགྱིད་དོ། །སྨྲས་པ། བྲམ་ཟེ་ཆོས་མ་ཡིན་པའི་འདོད་པ་ལ་ཆགས་པ་གང་ཡིན། སྨྲས་པ། རྒྱལ་པོ་ཆེན་པོ་གང་མི་དགེ་བ་བཅུའི་ལས་ཀྱི་ལམ་ལ་མངོན་པར་དགའ་བ་ལགས་སོ། །སྨྲས་པ། མི་རིགས་པའི་འདོད་ཆེན་གང་ཡིན། སྨྲས་པ། གང་རང་གི་ལག་མཐུས་བསྒྲུབས་པ་དུས་ལ་གཏོགས་པ། ཆོས་དང་ལྡན་པར་ཆོས་ཀྱིས་ཐོབ་པའི་ལོངས་སྤྱོད་རྣམས་ཀྱིས་ཆོག་མ་འཚལ་བ་ལགས་སོ། །སྨྲས་པ། ལོག་པའི་ཆོས་ཀྱིས་འཁོར་ཞེས་བྱ་བ་གང་ཡིན། སྨྲས་པ། དོན་གྱི་བསྟན་བཅོས་སུ་མིང་བཏགས་པ། གནོད་པར་འགྱུར་བ་དང་ལྡན་པ། དམ་པའི་ཆོས་ལྟར་བཅོས་པ། རྩོད་པའི་དུས་ན་སྐྱེས་བུ་དམ་པ་མ་ལགས་པས་བགྱིས་པ་ལ་མོས་པས་ཡོངས་སུ་བསྒོས་པའི་ལྟ་བས་ཡོན་ཏན་དུ་ལྟ་བ་ལགས་སོ། །སྨྲས་པ། བྲམ་ཟེ་བསྟན་བཅོས་གང་ལ་ཆོས་དང་ལྡན་པའི་རྒྱལ་པོས་བརྟེན་ཅིང་སྐྱེ་དགུ་སྐྱོང་བར་བྱེད་པའི་བསྟན་བཅོས་གང་ཡིན་སྨྲས་པ། རྒྱལ་པོ་ཆེན་པོ་དེ་ནི་བསྟན་བཅོས་གང་ལས་མི་རིགས་པའི་ཆགས་པ་དང ། ་མི་རིགས་པའི་ཞེ་སྡང་དང ། མི་རིགས་པའི་གཏི་མུག་གི་གཉེན་པོ་རང་བཞིན་ནམ། ་རབ་ཏུ་དབྱེ་བ་འམ། ཕན་ཡོན་གྱི་སྒོ་ནས་བསྟན་པ་སྟེ། དེ་ལ་གཉེན་པོའི་རང་བཞིན་ནི་འདི་ལགས་ཏེ། འདི་ལྟ་སྟེ། དེའི་གཉེན་པོར་འགྱུར་བ་མ་ཆགས་པ་དགེ་བའི་རྩ་བ་དང ། ཞེ་སྡང་མ་མཆིས་པའི་དགེ་བའི་རྩ་བ་དང ། གཏི་མུག་མ་མཆིས་པའི་དགེ་བའི་རྩ་བ་ལགས་སོ། །དེ་ལ་གཉེན་པོ་ཀུན་ནས་སློང་བ་ནི་འདི
52.55b
ལགས་ཏེ། འདི་ལྟ་སྟེ། བག་མཆིས་པ་དང་སྙིང་རྗེ་ལགས་སོ། །རྒྱལ་པོ་ཆེན་པོ་དེ་ལ་ཆོས་དང་ལྡན་པའི་རྒྱལ་པོའི་ལོངས་སྤྱོད་རྣམས་དང་བདག་ཉིད་ཀྱང་མི་རྟག་པར་རྟོགས་ཤིང་དྲན་པ་ཉེ་བར་གཞག་སྟེ། ཉེས་དམིགས་སུ་ལྟ་ཞིང་ངེས་པར་འབྱུང་བ་འཚལ་བས་ལོངས་སྤྱོད་རྣམས་ལ་སྤྱོད་ཅིང་རྒྱལ་པོའི་དབང་ཕྱུག་གི་དབང་བགྱིད་པ་འདི་ནི་དེའི་བག་མཆིས་པ་ལགས་སོ། །གང་ལ་གནས་ཏེ་མ་ཐོབ་པའི་ལོངས་སྤྱོད་ཀྱི་འབྲས་བུ་ལ་ཉེ་བར་མི་འཚོ་བ་དང་ཐོབ་པ་ལ་འང་དུས་མ་ཡིན་པར་ཉེ་བར་མི་འཚོ་བ་དང ། དུས་ལ་བབ་ཀྱང་དབུལ་པོ་རྣམས་ལ་གནོད་པ་བགྱིས་ཤིང་ཉེ་བར་མི་འཚོ་བ་དང ། མུ་གེའི་གནོད་པ་ཞིག་བྱུང་ན་སྐྱེ་དགུ་རྣམས་ཀྱི་སྐྱབས་བགྱིད་པ་དང ། ཆོམ་རྐུན་གྱི་གནོད་པ་དང ། ཕ་རོལ་གྱི་དམག་ཚོགས་ཀྱི་གནོད་པ་དང ། གཅིག་ལ་གཅིག་གནོད་པར་གྱུར་པ་ཞིག་བྱུང་ན་ཡང་དག་པར་ཕན་འདོགས་པར་བགྱིད་པ་དང ། དབུལ་པོ་རྣམས་ལ་ནོར་སྦྱིན་པ་དང ། མི་སྲུན་པ་རྣམས་ལ་ཡང་དག་པར་ཆད་པས་བཅད་པ་འདི་ནི་དེའི་སྙིང་རྗེ་ཞེས་བགྱི་སྟེ། རྒྱལ་པོ་ཆེན་པོ་ཆོས་གཉིས་པོ་དེ་དག་དང་ལྡན་ན་ཆོས་དང་ལྡན་པའི་རྒྱལ་པོ་སྐྱེ་དགུ་ཡང་དག་པར་སྐྱོང་བར་བགྱིད་ཅེས་བགྱི་བ་ལགས་ཏེ། བག་མཆིས་པ་དང་སྙིང་རྗེ་གཉིས་ལགས་སོ། །སྨྲས་པ། བྲམ་ཟེ་རྣམ་པ་གང་གིས་ན་ཇི་ལྟར་ཆོས་དང་ལྡན་པའི་རྒྱལ་པོ་སྙིང་རྗེ་ཅན་མི་སྲུན་པ་ཆད་པས་གཅོད་པ་ཡིན། སྨྲས་པ། རྒྱལ་པོ་ཆེན་པོ་ཆོས་ཀྱི་རྒྱལ་པོ་ཆོས་དང་ལྡན་པ་སྙིང་རྗེ་ཅན་ནི་གནས་ལྔ་ལ་དྲན་པ་ཉེ་བར་གཞག་ཅིང་མི་སྤུན་པ་ཆད་པས་གཅོད་པ་ལགས་སོ། །དེ་ཡང་ཡང་དག་པས་ལགས་ཀྱི་ལོག་པས་མ་ལགས་སོ། །དུས་སུ་ལགས་ཀྱི་དུས་མ་ལགས་པས་མ་ལགས་སོ། །དོན་དང་ལྡན་པར་ལགས་ཀྱི་དོན་དང་མི་ལྡན་པར་མ་ལགས་སོ། །འཇམ་པར་ལགས་ཀྱི་བརླང་བར་མ་ལགས་སོ། །བྱམས་པས་ལགས་ཀྱི་ཞེ་སྡང་གིས་མ་ལགས་སོ། །སྨྲས་པ། རྣམ་པ་གང་གིས་ཇི་ལྟར་ན་ཡང་དག་པས་ཡིན་གྱི་ལོག་པས་མ་ཡིན་ཞེས་བྱ། སྨྲས་པ། གལ་ཏེ་གཡོན་ལ་མི་གནས་པ་མ་ལགས་ཀྱི་ཡང་དག་པར་གཡོན་ལ་གནས་པར་གྱུར་པའོ། །སྨྲས་པ། ཇི་ལྟར་ན་དུས་སུ་ཡིན་གྱི་དུས་མ་ཡིན་པར་མ་ཡིན་ཞེས
52.56a
བྱ་སྨྲས་པ། གལ་ཏེ་རྒྱལ་པོས་མི་སྲུན་པ་ཆད་པས་བཅད་པའི་འཐུ་མཆིས་ན་ལགས་ཀྱི་མཐུ་མ་མཆིས་ན་མ་ལགས་པའོ། །སྨྲས་པ། ཇི་ལྟར་ན་དོན་དང་ལྡན་པར་ཡིན་གྱི་དོན་དང་མི་ལྡན་པར་མ་ཡིན་ཞེས་བྱ། སྨྲས་པ། གལ་ཏེ་ཁས་བླངས་པ་ལ་གནས་པར་བགྱིས་པ་ལགས་ཀྱི་གནས་པར་མ་བགྱིས་པ་མ་ལགས་སོ། །སྨྲས་པ། ཇི་ལྟར་ན་འཇམ་པར་ཡིན་གྱི་བརླང་བར་མ་ཡིན་ཞེས་བྱ། སྨྲས་པ། གལ་ཏེ་སྐྱོན་བརྗོད་པ་ཙམ་གྱིས་འགྲུབ་པར་རྟོགས་པ་ཞིག་ན་ཡང་བཅིང་བ་དང་གསད་པ་ལ་སོགས་པས་གནོད་པར་མི་བགྱི་བར་ཡང་དག་པར་སྐྱོན་བརྗོད་པ་ལགས་ཀྱི་སྐྱོན་མ་བརྗོད་པར་མ་ལགས་སོ། །སྨྲས་པ། ཇི་ལྟར་ན་བྱམས་པས་ཡིན་གྱི་ཞེ་སྡང་གིས་མ་ཡིན་ཞེས་བྱ། སྨྲས་པ། གལ་ཏེ་སྐྱོན་བརྗོད་པ་ཙམ་གྱིས་མི་འགྲུབ་པར་རྟོགས་པ་ཞིག་ན་འགུམ་པ་དང་དབང་པོ་ཉམས་པར་བགྱིད་པ་དང ། ཡན་ལག་གཏུབ་པ་མ་གཏོགས་པར། བྱམས་པའི་སེམས་དང་སྙིང་རྗེའི་སེམས་ཉེ་བར་གཞག་སྟེ་བཅིང་བ་དང་གོ་རར་སྩལ་བ་དང ། བརྡེག་པ་དང ། བསྡིགས་པ་དང ། གནོད་པར་བགྱི་བ་དང ། སྤྱོ་བ་དང ། བརྒྱད་བཀག་པ་དང ། གནས་ནས་བཀར་བ་དང ། ལོངས་སྤྱོད་འཕྲོག་པ་ལ་སོགས་པ་བརླང་བའི་རྣམ་པ་རྣམས་ཀྱིས་བརླང་བར་བགྱི་བ་སྟེ། དེ་ལས་འདས་པར་བརླང་བར་བགྱི་བ་མ་ལགས་སོ། །སྨྲས་པ། བྲམ་ཟེ་ཇི་ལྟར་ན་ཆོས་དང་ལྡན་པའི་རྒྱལ་པོ་བརླང་བའི་རྣམ་པ་དེ་དག་གིས་སེམས་ཅན་མི་སྲུན་པ་དག་ལ་བྱམས་པའི་སེམས་དང་སྙིང་རྗེའི་སེམས་ཉེ་བར་གཞག་ཅིང་བརླང་བར་སྤྱོད་པ་ཡིན། དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེའི་སླད་དུ་དོན་འདི་རབ་ཏུ་བསྒྲུབ་པའི་སླད་དུ་དཔེ་གསན་དུ་གསོལ། རྒྱལ་པོ་ཆེན་པོ་འདི་ལྟ་སྟེ། དཔེར་བགྱི་ན་ཕས་བུ་མི་སྲུན་པ་ཞིག་བཅོས་པར་འཚལ་ན་བྱམས་པའི་སེམས་དང་སྙིང་རྗེའི་སེམས་ཉེ་བར་གཞག་སྟེ། དགུམ་པ་དང་དབང་པོ་ཉམས་པར་བགྱི་བ་དང ། ཡན་ལག་གཏུབ་པ་མ་གཏོགས་པར་གནོད་པའི་རྣམ་པ་གཞན་གྱིས་བརླང་བར་བགྱིད་དེ། འོན་ཀྱང་དེ་ལ་གཏང་བའི
52.56b
སེམས་སམ། གནོད་པར་བགྱི་བའི་སེམས་མི་འབྱུང་སྟེ། གཞན་དུ་ན་ཉེས་པ་བཟློག་པ་ཉིད་ཀྱི་ཆེད་དུ་བགྱིས་ཏེ། ཉེས་པ་མ་བྱུང་བ་རྣམས་མི་འབྱུང་བར་བྱའོ་སྙམ་སྟེ་བརླང་བར་བགྱིད་དོ། །དེ་བཞིན་དུ་རྒྱལ་པོ་ཆོས་དང་ལྡན་པ་ཡང་སྐྱེ་དགུ་རྣམས་ལ་བུའི་འདུ་ཤེས་ཉེ་བར་གཞག་སྟེ། སེམས་ཅན་མི་སྲུན་པ་རྣམས་འཆོས་ན་སྲོག་བཅད་པ་དང ། དབང་པོ་ཉམས་པར་བགྱི་བ་དང ། ཡན་ལག་གཏུབ་པ་མ་གཏོགས་པར་བྱམས་པའི་སེམས་དང་སྙིང་རྗེའི་སེམས་སུ་བགྱིས་ཏེ་བཅིང་བ་དང ། ་གོ་རར་སྩལ་བ་དང་བརྡེག་པ་དང ། བསྡིགས་པ་དང ། སྤྱོ་བ་དང ། བརྒྱད་བཀག་པ་དང ། གནས་ནས་བཀར་བ་དང ། ལོངས་སྤྱོད་འཕྲོག་པ་ལ་སོགས་པ་བརླང་བའི་རྣམ་པ་རྣམས་ཀྱིས་བརླང་བར་བགྱིད་ཀྱང ། དེ་སེམས་ཅན་དེ་དག་ལ་བཏང་བའི་སེམས་སམ་གནོད་པར་བགྱི་བའི་སེམས་མི་འབྱུང་སྟེ། གཞན་དུ་ན་ཉེས་པ་བཟློག་པ་ཉིད་ཀྱི་ཆེད་དུ་བགྱིས་ཏེ། དེ་མ་ལགས་པ་གཞན་རྗེས་སུ་བསླབ་པ་དང ། ཉེས་པ་མ་བྱུང་བ་རྣམས་མི་འབྱུང་བར་བྱའོ་སྙམ་སྟེ། བརླང་བར་བགྱིད་དོ། །སྨྲས་པ། བྲམ་ཟེ་མི་སྲུན་པ་དེ་དག་ཇི་ལྟ་བུ་ཡིན་པར་ཤེས་པར་བྱ། སྨྲས་པ། རྒྱལ་པོ་ཆེན་པོ་མདོར་ན་མི་སྲུན་པ་ནི་རྣམ་པ་ལྔར་མཁྱེན་པར་བགྱི་སྟེ། རྒྱལ་པོ་ལ་གནོད་པ་བགྱིད་པ་དང ། ་གཅིག་ལ་གཅིག་གནོད་པར་བགྱིད་པ་དང ། བཀའ་མི་ཉན་པ་དང ། ལོག་པས་འཚོ་བ་དང ། ལོག་པར་ཞུགས་པ་ལགས་སོ། །དེ་ལ་རྒྱལ་པོ་ལ་གནོད་པ་བགྱིད་པ་ནི་འགུམས་པ་དང ། འགུམས་སུ་སྩོལ་བ་དང ། དུག་སྩོལ་བ་དང ། ཕྱག་མཛོད་རྐུ་བ་དང ། དོན་མ་རུང་བར་བགྱིད་པ་དང ། བརྩུན་མོ་འདྲིད་པ་དང ། བཀའ་ལྟར་མི་བགྱིད་པ་དང ། གསང་མི་ཐུབ་པ་དང ། ཁམས་ཀྱི་དཀྲུགས་མ་བགྱིད་པ་དང ། ཁ་རྒོད་མཆི་བ་དང ། ཁ་ཕྱར་གཏོང་བ་དང ། དེ་ལྟ་བུ་ལ་སོགས་པ་དག་ནི་རྒྱལ་པོ་ཆེན་པོ་རྒྱལ་པོ་ལ་གནོད་པ་བགྱིད་པ་ལགས་པར་མཁྱེན་པར་བགྱིའོ། །དེ་ལ་གཅིག་ལ་གཅིག་གནོད་པར་བགྱིད་པ་ནི་སེམས་ཅན་འདི་དག་གཅིག་ལ་གཅིག་སྲོག་ལ་རྒལ་བ་འམ། ལོངས་སྤྱོད་འཕྲོག་པ་འམ། མཆིས་བྲང་ལ་བྱི་བ་བགྱིད་པ་འམ། སྒྱུའི་དབང་གིས་ཕ་རོལ་སླུ་བ་འམ། མཛའ་བ་འབྱེད་པ་འམ། ངག་མི་སྙན་པས་འཐབ་པ་འམ། ལས་དང ། སྲང་དང་ཚད་སྒྱུ་མས
52.57a
གཞན་འདྲིད་པ་འམ། གཅིག་ལ་གཅིག་མི་སྙན་པར་བརྗོད་པ་འམ། རྒྱལ་པོ་ཆེན་པོ་དེ་ལྟ་བུ་ལ་སོགས་པ་དག་ནི་གཅིག་ལ་གཅིག་གནོད་པ་བགྱིད་པ་ལགས་པར་མཁྱེན་པར་བགྱིའོ། །དེ་ལ་བཀའ་མི་ཉན་པ་ནི་རྒྱལ་པོ་ཆེན་པོ་ལ་རྟེན་པའི་ཁམས་ཀྱི་རྒྱལ་ཕྲན་དང ། རྒྱལ་པོའི་བཀའ་ལྟར་མི་བགྱིད་པ་སྟེ། རྒྱལ་པོ་ཆེན་པོ་དེ་ལྟ་བུ་ལ་སོགས་པ་དག་ནི་བཀའ་མི་ཉན་པ་ལགས་པར་མཁྱེན་པར་བགྱིའོ། །དེ་ལ་ལོག་པས་འཚོ་བ་ནི་སེམས་ཅན་གང་དག་སྡོམ་པ་མ་མཆིས་པ་སྟེ་དེ་དག་ཀྱང་ཤན་པ་དང་བྱ་པ་དང་ཕག་འཚོང་དང ། དེ་ལྟ་བུ་ལ་སོགས་པ་དག་ལགས་པར་མཁྱེན་པར་བགྱིའོ། །དེ་ལ་ལོག་པར་ཞུགས་པ་ནི་སེམས་ཅན་གང་དག་ལོངས་སྤྱོད་ལས་ཕྱིར་ལོག་སྟེ་མཚན་མ་ཅན་དུ་གྱུར་པ་རྣམས་ཚུལ་ཁྲིམས་ཉམས་པ་དང་ལྟ་བ་ཉམས་པ་དང་ཆོ་ག་ཉམས་པ་དང་འཚོ་བ་ཉམས་པར་གྱུར་ཅིང་རང་རང་གི་ཆོས་ཡོངས་སུ་བཟུང་བ་རྣམས་ལ་མི་གནས་པ་ལགས་ཏེ་དེ་དག་ནི་རྒྱལ་པོ་ཆེན་པོ་ལོག་པར་ཞུགས་པ་ལགས་པར་མཁྱེན་པར་བགྱིའོ། །སྨྲས་པ་བྲམ་ཟེ་རྣམ་པ་གང་གིས་ཇི་ལྟར་ན་ཆོས་དང་ལྡན་པའི་རྒྱལ་པོས་རྒྱལ་པོ་ལ་གནོད་པ་བྱེད་པའི་མི་སྲུན་པ་རྣམས་ཆད་པས་བཅད་པར་བྱ། སྨྲས་པ་རྒྱལ་པོ་ཆེན་པོ་དེ་ནི་སྐྱོན་བརྗོད་པས་དགག་པ་འམ། ལོངས་སྤྱོད་དབྲོག་པས་དགག་པ་འམ། བཅིང་བ་དང་བསྐྲད་པ་དང་སྨད་པས་དགག་པར་བགྱིའོ། །སྨྲས་པ་གཅིག་ལ་གནོད་པར་བྱེད་པ་ལ་ཇི་ལྟར་ནན་ཏན་དུ་བྱ། སྨྲས་པ་རྒྱལ་པོ་ཆེན་པོ་བསྡིགས་པ་དང་གནོད་པར་བགྱི་བ་དང ། བརྡེག་པ་དང ། གོ་རར་སྩལ་བ་དང ། སྤྱོ་བ་དང་ཆད་པས་བཅད་པས་བཟློག་པར་བགྱིའོ། །སྨྲས་པ་བཀའ་མི་ཉན་པ་རྣམས་ལ་ཇི་ལྟར་ནན་ཏན་དུ་བྱ། སྨྲས་པ་ཟིལ་གྱིས་མནན་ཏེ་དབང་དུ་བསྒྱུར་བ་ལ་རང་རང་གི་རིས་ནས་བསྐྱོད་པར་མི་བགྱི་བས་བཟློག་པར་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་འདི་ལྟར་དེ་དག་རང་རང་གི་རིས་ནས་བསྐྱོད་པར་མ་བགྱིས་ན་རྒྱལ་པོའི་བཀའ་དྲིན་གཟོ་ཞིང་འཇིགས་པས་བཀའ་ཉན་པར་འགྱུར་ཏེ། གཞན་བཀའ་མི་ཉན་པའི་སྐབས་ཀྱང་ཡོངས་སུ་ཆད་པར་འགྱུར་ཞིང་ཕྱག་མི་འཚལ་བ་རྣམས་ཀྱང་ཕྱག་འཚལ་བར་འགྱུར་ཕྱོགས་དང་ཕྱོགས་མཚམས་རྣམས་སུ་ཡང་སྙན་པར་གྲགས་པའི་སྒྲ་དང་ཚིགས་སུ་བཅད་པ་འབྱུང་བར་འགྱུར་ཞིང་གཞི་དེ་ལས་བསོད
52.57b
ནམས་ཀྱང་མང་དུ་འཕེལ་བའི་སླད་དུའོ། །སྨྲས་པ། ལོག་པར་འཚོ་བ་རྣམས་ལ་ཇི་ལྟར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་བསྡིགས་ཤིང་ད་ཕན་ཆད་གལ་ཏེ་དེ་ལྟར་བྱེད་ན་ཆད་པ་འདི་དང་འདིས་བཅད་དོ་ཞེས་འཇིགས་པ་བསྟན་པས་དགག་པར་བགྱིའོ། །སྨྲས་པ། ལོག་པར་ཞུགས་པར་ཞུགས་པ་རྣམས་ལ་ཇི་ལྟར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་ཡང་དག་པའི་གཉེན་པོའི་ཕྱོགས་ལ་གཟུད་པས་བཟློག་པར་བགྱིའོ། །རྒྱལ་པོ་ཆེན་པོ་གལ་ཏེ་གང་ཟག་ཚུལ་ཁྲིམས་ཉམས་པ་འམ། ལྟ་བ་ཉམས་པ་འམ། ཆོ་ག་ཉམས་པ་འམ། འཚོ་བ་ཉམས་པ་ཞིག་དགེ་འདུན་འཐུན་པས་སྦྱངས་ཏེ་བརྟགས་ནས་བསྐྲད་པར་བགྱིས་པ་འམ། རང་གིས་ཁས་བླངས་པ་ལས་དགེ་འདུན་གྱིས་བསྐྲད་པར་མི་ནུས་ན། དེ་ལ་ཆོས་དང་ལྡན་པའི་རྒྱལ་པོས་ཡང་དག་པ་ལ་ཡང་དག་པར་རྟོགས་པར་བགྱིས་ཏེ། བཙུན་པའི་ཕྱོགས་ཀྱི་གྲོགས་བགྱིའོ། །གལ་ཏེ་དགེ་འདུན་གཉིས་མི་མཐུན་པའི་རྩོད་པར་གྱུར་ཏེ། ཚུལ་ཁྲིམས་ཉམས་པ་འམ་ཆོ་ག་ཉམས་པ་འམ། ལྟ་བ་ཉམས་པ་འམ། འཚོ་བ་ཉམས་པ་ལས་བརྩམས་ནས་ཡུས་རྟོད་ཅིང་རྩད་པ་ཞིག་ཏུ་གྱུར་ན། དེ་ལ་ཆོས་དང་ལྡན་པའི་རྒྱལ་པོས་བདག་ཉིད་ཆོས་ཀྱི་དོན་ལ་མཁས་སམ། མི་མཁས་ཀྱང་རུང་སྟེ། རིས་དེ་ན་ཡ་རབས་སུ་བཏུ་བའི་དགེ་སྦྱོང་ངམ། བྲམ་ཟེ་ཆོས་ཀྱི་དོན་ལ་མཁས་པ་མཆིས་པ་དེ་དག་བསྡུས་ཏེ་རྩོད་པ་དེ་སྦྱང་བར་བགྱིའོ། །དེ་ལྟར་སྦྱངས་ནས་དེ་ལ་གང་རིགས་པར་སྨྲ་བ་དེའི་ཕྱོགས་ཀྱི་གྲོགས་བགྱི་ཞིང་བསྐྲད་པ་འམ་ལོག་པ་ལ་བརྩོན་པ་བཟློག་པའི་སླད་དུ་བསྟང་བར་བགྱིའོ། །སྨྲས་པ་བྲམ་ཟེ་རྒྱལ་པོ་ཉིད་མི་སྲུན་པ་ཞིག་ཏུ་གྱུར་ན་དེ་ལ་སུས་ཆད་པས་བཅད་པར་ནན་ཏན་དུ་བྱ་སྨྲས་པ་རྒྱལ་པོ་ཆེན་པོ་རྒྱལ་པོ་དེ་ཉིད་ཀྱིས་སོ། །གལ་ཏེ་རྒྱལ་པོ་བག་མ་མཆིས་པར་གྱུར་ཏམ་སྙིང་རྗེ་མ་མཆིས་པར་གྱུར་ན་དེའི་སླད་དུ་དེས་ཤེས་རབ་ཀྱི་སྟོབས་ལ་བརྟེན་ཏེ་མི་སྙན་པར་འགྱུར་བའི་འཇིགས་པ་འམ་ངན་སོང་གི་འཇིགས་པ་དང ། ཆོས་གཉིས་པོ་འདི་དག་གིས་བག་མ་མཆིས་པ་དང་སྙིང་རྗེ་མ་མཆིས་པ་ལས་བདག་ཉིད་བཟློག་པར་བགྱིའོ། །རྒྱལ་པོ་ཆེན་པོ་ཆོས
52.58a
དང་ལྡན་པའི་རྒྱལ་པོས་ནི་རང་གི་རིས་ན་ཡ་རབས་སུ་བཏུ་བའི་དགེ་སྦྱོང་དང་བྲམ་ཟེ་མཁས་པ། གསལ་བ་རིག་པ་དང་ལྡན་པ་དེ་དག་གི་དྲུང་དུ་མཆི་ཞིང་དུས་དུས་སུ་དགེ་བ་ནི་གང་མི་དགེ་བ་ནི་གང་ཅི་བྱས་ན་ལེགས་པར་འགྱུར། ཅི་བྱས་ན་སྡིག་པར་མི་འགྱུར་ཞེས་དྲི་བར་བགྱི་ཞིང་དེ་དག་ཆོས་སྟོན་པར་འགྱུར་བའི་སྐབས་དབྱེ་བར་བགྱིའོ། །དེ་དག་གིས་ཀྱང་དེ་ལ་རྒྱལ་པོའི་ཚུལ་རྙིང་དག་བསྟན་པར་བགྱི་སྟེ། སྐབས་ཕྱེ་ན་ཚིག་གི་ཚུལ་འཇམ་པོས་སྐྱོན་བརྗོད་པར་བགྱི་སྟེ་དེ་ལྟར་ན་དེས་འདི་ལྟ་སྟེ་ནང་གི་སྟོབས་སམ། ཕྱི་རོལ་གྱི་སྟོབས་ལ་བརྟེན་ཅིང་བདག་ཉིད་མི་སྲུན་པ་ལས་ལེགས་པར་ཆད་པས་བཅད་པར་འགྱུར་རོ། །སྨྲས་པ་བྲམ་ཟེ་སྣོད་གྱི་འཇིག་རྟེན་གྱིས་ཡོངས་སུ་ཟིན་པའི་སྐྱེ་དགུ་ཆོས་དང་ལྡན་པའི་རྒྱལ་པོས་ཇི་ལྟར་བསྲུང་བར་བྱ་སྨྲས་པ་རྒྱལ་པོ་ཆེན་པོ་མི་བསྲེག་མི་གཞིག་པ་ལ་སོགས་པས་བགྱིས་ཏེ་འདི་ལྟར་རྒྱལ་པོ་ཁྲོ་བའི་གནས་ལ་ཁྲོས་ཀྱང་གྲོང་བསྲེག་པའམ། རྫིང་རྡལ་བ་འམ་གནས་གཞིག་པ་འམ་བཟའ་ཤིང་བཅད་པ་འམ་ལོ་གཞོམ་པ་འམ་གང་ཅི་ཡང་རུང་སྟེ་ལེགས་པར་བཤམས་པ་ལེགས་པར་བསྒྲུབས་པ་ལེགས་པར་བྲེས་པའི་སའི་ཕྱོགས་ཉམས་དགའ་བ་དེ་དང་དེ་དག་གཞིག་པར་བགྱི་བར་མི་རིགས་སོ། །དེ་ཅིའི་སླད་དུ་ཞེ་ན་འདི་ལྟར་དངོས་པོ་དེ་དག་ནི་དེ་མ་ལགས་པའི་སེམས་ཅན་གཞན་དག་དང་ཐུན་མོང་གི་ཉེ་བར་འཚོ་བ་ལགས་ཏེ་དེ་དག་གིས་ནོངས་པར་མ་བགྱིས་པའི་སླད་དུའོ། །རྒྱལ་པོ་ཆེན་པོ་འདི་ལྟར་དངོས་པོ་དེ་དག་ལ་ཁྱིམ་དང་གཙུག་ལག་ཁང་དང ། མཆོད་རྟེན་དང་བཟའ་ཤིང་ར་བ་ལ་སོགས་པ་སོ་སོའི་ལྷ་གནས་པ་དེ་དག་ཀྱང་དེ་བཤིག་ན་མི་དགའ་བར་འགྱུར་ལགས་སོ་རྒྱལ་པོ་ཆེན་པོ་འདི་ལྟར་དངོས་པོ་དེ་དག་ལ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་སྣ་ཚོགས་དག་ཀྱང་གནས་ཏེ། དེ་དག་གིས་ཀྱང་ནོངས་པ་མ་བགྱིས་ན་གནོད་པ་མི་བགྱིད་པ་ཀུན་ཀྱང་ཆུད་གཟན་པར་འགྱུར་རོ། །དེ་ལྟ་ལགས་པས་ན་ཆོས་དང་ལྡན་པའི་རྒྱལ་པོས་སྣོད་ཀྱི་འཇིག་རྟེན་གྱིས་ཡོངས་སུ་ཟིན་པའི་སྐྱེ་དགུ་རྣམས་ཕུང་བར་མི་བགྱིའོ། །དེ་ལྟར་ཕུང་བར་མ་བགྱིས་ན་ཡོངས་སུ་བསྐྱངས་པ་ལགས་ཏེ། དེ་ཡོངས་སུ་བསྐྱངས་པས་སེམས་ཅན་རྣམས་ལ་ཡང་སྨན་པར་བགྱིས་པར་འགྱུར་རོ། །
52.58b
སྨྲས་པ་བྲམ་ཟེ་རྒྱལ་པོའི་ཁམས་ན་ལྷ་གང་དག་གནས་པ་དེ་དག་ཆོས་དང་ལྡན་པའི་རྒྱལ་པོས་ཇི་ལྟར་བསྐྱང་བར་བྱ། སྨྲས་པ་རྒྱལ་པོ་ཆེན་པོ་ཡང་དག་པའི་གཏོར་མ་བཤམས་ཏེ་བསྩལ་བར་བགྱིའོ། །དེ་ལྟར་ན་ཆོས་དང་ལྡན་པའི་རྒྱལ་པོས་སྐྱེ་དགུ་ཐམས་ཅད་བསྐྱངས་པར་འགྱུར་རོ། །མི་སྲུན་པ་ཐམས་ཅད་ཀྱང་ཆད་པས་གཅད་པར་འགྱུར་རོ། །ཁ་ན་མ་ཐོ་བ་ཡང་མ་མཆིས་པར་འགྱུར་རོ། །གཞི་དེ་ལས་ཚེ་སླད་མ་པའི་བསོད་ནམས་ཀྱང་མང་དུ་འཕེལ་ལགས་སོ་སྨྲས་པ་བྲམ་ཟེ་རྒྱལ་པོ་ཆོས་དང་ལྡན་པའི་ཁམས་ན་ཕ་དང་མ་རྒས་པ་ལ་མ་གུས་ཤིང་ཕར་མི་ཤེས་པ་དང ། མར་མི་ཤེས་པ་དང ། བུ་དང ། ཆུང་མ་དང ། བྲན་དང ། བྲན་མོ་དང ། ལས་བྱེད་པ་འམ་ཞོ་ཤས་འཚོ་བ་དག་ལ་ལེགས་པར་བགོ་བཤའ་མི་བྱེད་ཅིང ། ལས་ཆེན་པོ་དང་ལས་ངན་པས་ཤིན་དུ་སྙོན་སྨོངས་པར་བྱེད་པ་དེ་དག་མི་སྲུན་པའི་ཕྱོགས་གང་གི་ནང་དུ་བགྲང་བར་བྱ། སྨྲས་པ་རྒྱལ་པོ་ཆེན་པོ་ལོག་པར་འཚོ་བའི་ཕྱོགས་མི་སྲུན་པའི་ནང་དུའོ། །དེ་ཅིའི་སླད་དུ་ཞེ་ན། འདི་ལྟ་སྟེ། ཕན་འདོགས་པའི་སེམས་ཅན་རྣམས་ལ་སྦྱིན་པར་བགྱི་བའི་ཆོས་བགོ་བཤའ་བགྱི་བར་འོས་པ་དག་ལ། བགོ་བཤའ་མི་བགྱིད་ཅིང་གཅིག་པུ་སྤྱོད་པ་འདི་ནི་ལོག་པས་འཚོ་བ་ཆེན་པོ་ལགས་པའི་སླད་དུའོ། །སྨྲས་པ་བྲམ་ཟེ་སློང་བའི་དགེ་སློང་དང་བྲམ་ཟེ་འོང་ཞིང་འདུ་བ་དག་གི་མདུན་ནས་མི་རིགས་ཤིང་བརླང་བའི་ཚིག་གིས་མི་སྙན་པར་བརྗོད་པ་དང ། གཤེ་བ་དང་བརྒྱད་བཀག་པ་དང་ཆེད་དུ་བོས་ཤིང་ཟན་གཅོད་པ་འམ། ་ཆོས་ཉིད་དང་འགལ་བའི་ཁ་ཟས་སྟོབས་པ་འམ་དབྱུག་པ་འམ་རྡོས་འཚོག་པ་འམ་ལག་པས་བརྡེག་པ་འམ་མཚོན་གྱིས་རྡེག་པ་དེ་དག་མི་སྲུན་པའི་ཕྱོགས་གང་གི་ནང་དུ་བགྲང་བར་བྱ་སྨྲས་པ། རྒྱལ་པོ་ཆེན་པོ་ལོག་པར་ཞུགས་པའི་མི་སྲུན་པའི་ཕྱོགས་སུའོ། །དེ་ཅིའི་སླད་དུ་ཞེ་ན། རིམ་གྲོ་བགྱི་བའི་འོས་རྣམས་ལ་རིམ་གྲོ་མི་བགྱིད་པ་ནི་ལོག་པར་ཞུགས་པ་ཆེན་པོ་ལགས་པའི་སླད་དུ་སྟེ། རྒྱལ་པོ་ཆེན་པོ་ལོག་པར་ཞུགས་པ་དེ་ལྟ་བུས་ནི་ལྷ་རྣམས་ཀྱང་དུས་སུ་ཆར་གྱི་རྒྱུན་ལེགས་པར་མི་འབེབས་ཏེ་དེས་མུ་གེའི་དགོན་པ་ཉམ་ང་བར་འགྱུར་ཞིང་མི་མ་ལགས་པ། རྣམས་ཡམས་ཀྱི་ནད་དང །
52.59a
གནོད་པ་དང ། འགོ་བའི་ནད་གཏོང་བར་འགྱུར་ཏེ། དེས་སེམས་ཅན་རྣམས་ཡམས་ཀྱི་ནད་ཅན། གནོད་པ་ཅན། ནད་འགོ་བ་ཅན་དུ་འགྱུར་ཞིང་ཚེ་ཡང་ཡོངས་སུ་འབྲི། ལོངས་སྤྱོད་ཀྱང་ཡོངས་སུ་འབྲི། ནད་མེད་པ་ཡང་ཡོངས་སུ་འབྲི་བར་འགྱུར་རོ། །སྨྲས་པ། བྲམ་ཟེ་རྒྱལ་པོ་ཉོན་མོངས་པ་ཅན་གྱི་སེམས་དང་ལྡན་པས་ཅིའི་ཕྱིར་དབང་པོ་དང་ཡན་ལག་གཏུབ་ཅིང་ཉམས་པར་བྱ་བ་དང ། སེམས་ཅན་བསད་པ་མི་བྱ་བ་ཡིན། སྨྲས་པ། རྒྱལ་པོ་ཆེན་པོ་རྒྱལ་པོ་ཉོན་མོངས་པ་ཅན་གྱི་སེམས་དང་ལྡན་པ་ཡང་གཡོན་ལ་གནས་པ་སྲོག་གཅད་པ་འམ། དབང་པོ་དང་ཡན་ལག་དང་ཉིང་ལག་དང་དབྲལ་བར་མི་སེམས་ཏེ། དེ་ཅིའི་སླད་དུ་ཞེ་ན། འདི་ལྟར་དེས་རང་གི་ལས་ཀྱི་དབང་གིས་འཆི་ན་ཡང་ཁོང་ཁྲོ་བའི་སེམས་བསྐྱེད་དེ་དུས་བགྱིས་ན་ངན་སོང་རྣམས་སུ་སྐྱེ་བར་འགྱུར་བ་དང ། ཡུན་རིང་པོར་རྗེས་སུ་འབྲང་བའི་ཤ་ཁོན་དུ་འགྱུར་བ་མཐོང་བས་དེའི་སླད་དུ་སེམས་ཅན་དགུམ་པར་མ་བརྗོད་དེ། དབང་པོ་དང ། ཡན་ལག་དང ། ཉིང་ལག་རྣམས་ཀྱང་ཕྱིར་གླན་དུ་མི་རུང་བས་དེའི་སླད་དུ་དེ་དག་གཏུབ་ཅིང་ཉམས་པར་རུང་བར་མ་བརྗོད་པ་ལགས་སོ། །རྒྱལ་པོ་ཆེན་པོ་བཅིང་བ་དང ། གོ་རར་སྩལ་བ་ལ་སོགས་པ་ནི་བཅོས་སུ་རུང་བས་ན་དེའི་སླད་དུ་རུང་བར་བརྗོད་དོ། །རྒྱལ་པོ་ནི་སྐྱེ་དགུ་ཐམས་ཅད་ཡོངས་སུ་སྐྱོང་བ་ལགས་ན། དེ་ལྟར་བགྱིས་ན་དེ་ཉིད་མ་བསྐྱངས་པར་འགྱུར་བས། དེའི་སླད་དུ། རྒྱལ་པོས་སྐྱེ་དགུ་ཡོངས་སུ་བསྐྱང་བ་ཡང་རྫོགས་པར་མ་བགྱིས་པར་འགྱུར་ཏེ། རྒྱལ་པོ་ཆེན་པོ་འདི་ལྟ་སྟེ། དགུམ་པ་དང ། དབང་པོ་དང ། ཡན་ལག་དང ། ཉིང་ལག་གཏུབ་ཅིང་ཉམས་པར་བགྱི་བ་ནི་སྐྱེ་དགུ་མ་མོས་པར་འགྱུར་བའི་གནས་ལགས་ཏེ། དེ་ནི་ཆོས་དང་ལྡན་པའི་རྒྱལ་པོས་བགྱི་བ་མ་ལགས་སོ། །སྨྲས་པ། བྲམ་ཟེ་རྒྱལ་པོའི་ཁམས་ན་ལོངས་སྤྱོད་ཀྱི་འབྲས་བུ་འདུ་བ་ཡོད་པ་དེ་དག་རྒྱལ་པོ་རང་གི་ཡིན་ཞེས་བྱ་འམ། གཞན་གྱི་ཡིན་ཞེས་བྱ། སྨྲས་པ། རྒྱལ་པོ་ཆེན་པོ་དེ་ནི་རང་གི་ཡང་མ་ལགས། གཞན་གྱི་ཡང་མ་ལགས་སོ། །དེ་ཅིའི་སླད་དུ་ཞེ་ན། གཞན་དག་གིས་ནི་རང་གི་ལག་མཐུས་བསྒྲུབས་པས་ན། རང་གི་མ་ལགསོ། །
52.59b
རྒྱལ་པོས་ཡོངས་སུ་བསྲུངས་ཤིང་དེ་དག་གིས་ཀྱང་དེ་མངའ་བར་བཏགས་པས་གཞན་གྱི་མ་ལགས་སོ། །སྨྲས་པ། བྲམ་ཟེ་གལ་ཏེ་སྐྱེ་དགུ་ལ་ལོངས་སྤྱོད་ཡོད་བཞིན་དུ་ལོངས་སྤྱོད་ཀྱི་རྒྱུ་དཔྱ་དབུལ་བའི་རིགས་པ་རྒྱལ་པོ་ལ་དབུལ་དུ་མི་བཏུབ་ན། དེས་དེ་དག་གི་མ་བྱིན་པར་ལེན་པར་འགྱུར་ཞེས་བྱ་འམ་མི་བྱ། སྨྲས་པ། རྒྱལ་པོ་ཆེན་པོ་དེ་ནི་མི་འགྱུར་ཏེ། གལ་ཏེ་ལོངས་སྤྱོད་མཆིས་བཞིན་མ་སྟེར་ན་སེར་སྣ་ལས་བྱུང་བའི་ཁ་ན་མ་ཐོ་བ་དང་བསོད་ནམས་མ་ལགས་པ་ནི་ཆེར་འཕེལ་ལོ། །སྨྲས་པ། བྲམ་ཟེ་གལ་ཏེ་ལོངས་སྤྱོད་ཡོད་བཞིན་དུ་ལོངས་སྤྱོད་ཀྱི་རྒྱུ་དཔྱ་དབུལ་བའི་རིགས་པ་འབུལ་དུ་མི་བཏུབ་པ་ལ་རྒྱལ་པོས་ནན་གྱིས་མནན་ཏེ་དབུལ་དུ་བཅུག་ན་དེས་དེའི་མ་བྱིན་པར་ལེན་པ་ཞེས་བྱའམ་མི་བྱ། སྨྲས་པ། རྒྱལ་པོ་ཆེན་པོ་དེ་ནི་གླ་རྔན་བསྒྲུབ་པའི་དཔེའི་ཚུལ་གྱིས་མ་བྱིན་པར་ལེན་པ་ཞེས་མི་བགྱིའོ། །སྨྲས་པ། བྲམ་ཟེ་གལ་ཏེ་རྒྱལ་པོས་དབུལ་པོ་ཞིག་ནན་གྱིས་མནན་ཏེ། ལོངས་སྤྱོད་ཀྱི་རྒྱུ་དཔྱ་དབུལ་བའི་རིགས་པ་དབུལ་དུ་བཅུག་ན་དེ་ཁ་ན་མ་ཐོ་བ་ཞེས་བྱ་འམ་མི་བྱ། སྨྲས་པ། རྒྱལ་པོ་ཆེན་པོ་དེ་ལ་ལར་ནི་ཁ་ན་མ་ཐོ་བར་འགྱུར། དེ་ལ་ལར་ནི་ཁ་ན་མ་ཐོ་བར་མི་འགྱུར་ལགས་སོ། །རྒྱལ་པོ་ཆེན་པོ་དེ་ལ་གལ་ཏེ་མི་དེས་ལོངས་སྤྱོད་དེ་དག་སྨད་འཚོང་ལ་ཞུགས་པ་འམ། བརྒྱན་པོ་ལ་ཞུགས་པ་འམ། ཆུད་གསན་པ་འམ། ལོག་པར་སྤྱད་པ་སྤྱོད་པ་ཞིག་ཏུ་གྱུར་ལ། དེ་ལ་རྒྱལ་པོས་དེ་ལྟ་བུའི་སེམས་ཀྱིས་སླད་ཀྱིས་ཤས་སླར་སྩལ་བའི་ཤགས་མཆིས་པར་བགྱིས་ལ་ནན་གྱིས་འབུལ་དུ་སྩལ་བས། གལ་ཏེ་ཕྱིན་ཆད་ཚུལ་མ་ལགས་པས་ལོངས་སྤྱོད་ཆུད་མི་གསོན་ན་རྒྱལ་པོས་གཉིས་ཀའི་དོན་བགྱིས་པར་འགྱུར་ཏེ། བདག་གི་དཀོར་འཕེལ་བའི་དོན་དང ། གཞན་རྒུད་པར་འགྱུར་བ་ལས་གཟུང་བའི་དོན་བགྱིས་པར་འགྱུར་རོ། །གལ་ཏེ་མི་དེའི་ལོངས་སྤྱོད་དེ་དག་ཞུགས་ཀྱིས་དྲལ་ཏམ། ཆབ་ཀྱིས་འཚལ་ཏམ། བགོ་སྐལ་ལ་སྤྱོད་པ་མི་མཛའ་བ་དག་གིས་ཕྲོགས་སམ། རྐུན་པོས་བརྐུས་སམ། སྦས་པ་ལས་རུལ་ཏམ། ལོ་ཏོག་སེར་བས་ཁྱེར་རམ། བྱེ་བ་དང ། ནེ་ཙོ་དང ། བྱི་བས་འཚལ་ཏམ། ཆར་མ་བབ་ཏེ་མ་འཁྲུངས་སམ།
52.60a
དེ་དག་ལ་སོགས་པའི་རྣམ་པས་དེའི་ལོངས་སྤྱོད་དག་ཆབ་འཚལ་བར་གྱུར་ན་ཆོས་དང་ལྡན་པའི་རྒྱལ་པོས་ལོངས་སྤྱོད་ཀྱི་རྒྱུ་དཔྱ་འབུལ་བའི་རིགས་པ་ཡངས་པར་གཞག་པའི་རིགས་ཏེ། དེ་ལྟར་མ་བགྱིས་ན། དེ་མ་བསྐྱངས་པའི་སླད་དུ་ཁ་ན་མ་ཐོ་བར་འགྱུར་ལགས་སོ། །རྒྱལ་པོ་ཆེན་པོ་འདི་ལྟ་སྟེ། དཔེར་བགྱི་ན་སྐྱེས་བུ་ལ་ལ་ཞིག་གིས་སློང་བའི་དགེ་སྦྱོངས་དང་བྲམ་ཟེ་དག་གཅིག་ཟས་ལ་བོས་པ་ལས། དེ་ནས་དེའི་དུས་ལ་བབ་པ་དང ། ཟས་སྦྱར་སྦྱར་བ་དེ་ཆབ་འཚལ་བར་གྱུར་ཏེ། མི་གཙང་བའི་ནང་དུ་ལྷུང་ངམ། ཞུགས་ཀྱིས་དྲལ་ཏམ། གསེག་མ་དང ། རྡུལ་དང ། ཆར་པས་ཆབ་འཚལ་བར་གྱུར་ཏམ། ་རྐུན་པོས་འཚལ་བ་ཞིག་ཏུ་གྱུར་ཏེ། དེས་དེའི་སླད་དུ་དེའི་དུས་སུ་མཆིས་པའི་དགེ་སྦྱོང་དང་བྲམ་ཟེ་དག་ཟས་མ་སྩལ་ན། དེ་ནི་དེ་ལྟར་བཟར་མི་རུང་བ་འམ། བཟར་མ་མཆིས་པར་གྱུར་ཏེ། དགེ་སྦྱོང་དང ། བྲམ་ཟེ་ལ་དབུལ་བར་དགའ་ཡང་ཆ་མ་ལགས་པར་འགྱུར་བས། དེ་ལྟར་མ་སྩལ་བའི་སླད་དུ་ཁ་ན་མ་ཐོ་བ་དང་བཅས་པར་མི་འགྱུར་ཏེ། རྒྱལ་པོ་ཆེན་པོ་དེ་ཡང་ཚུལ་འདི་འདྲ་བར་གཟིགས་པར་བགྱིའོ། །སྨྲས་པ། བྲམ་ཟེ་དེ་ལྟར་བག་ཡོད་ཅིང་སྙིང་རྗེ་དང་ལྡན་པའི་ཆོས་ཀྱི་རྒྱལ་པོ་དེ་ལྟ་བུ་ཡན་ལག་དུ་ཞིག་གིས་རྣམ་པ་ཐམས་ཅད་ཡོངས་སུ་རྫོགས་པའི་རྒྱལ་པོའི་ཆོས་དང་ལྡན་པར་འགྱུར། སྨྲས་པ། རྒྱལ་པོ་ཆེན་པོ་རྣམ་པ་བཅུས་ཏེ། གནམ་གྱིས་བསྐོས་པ་ཕུན་སུམ་ཚོགས་པ་དང ། འཁོར་སྲུན་པ་དང ། ཤེས་རབ་ཕུན་སུམ་ཚོགས་པ་དང ། བརྩོན་པ་དང ། ཆོས་ལ་གུས་པ་དང་མཁས་པ་དང ། དེས་པ་དང ། འཇིག་རྟེན་ཀུན་སྤྱོད་རབ་ཏུ་རིག་པར་སྤྱོད་པ་དང ། མི་བདེ་བ་བཟོད་པ་དང ། ཆོས་ལ་ཕྱིན་ཅི་མ་ལོག་པར་འཛིན་པའོ། །དེ་ལ་གནམ་གྱིས་བསྐོས་པ་ཕུན་སུམ་ཚོགས་པའི་རྒྱལ་པོ་ནི་བློན་པོ་དང ། བཀྲབས་པ་དང་མདའ་རབ་བའི་མཆོག་དང ། གྲོང་རྡལ་གྱི་མི་དང ། ཡུལ་གྱི་མི་རྣམས་ལ་དབེན་ཅིང་གནོད་པ་ཆུང་བ་དང ། ནད་མ་མཆིས་པའི་རང་བཞིན་ཅན་ནོ། །འཁོར་སྲུན་པ་དང་ལྡན་པའི་རྒྱལ་པོ་ནི་རྒྱལ་པོའི་བགྱི་བ་ལ་ཚེགས་ཆུང་ངུར་རྟག་ཏུ་བདེ་བར
52.60b
གནས་ལ། རྒྱལ་པོའི་ཚུལ་ལས་མི་ཉམས་པའོ། །ཤེས་རབ་ཕུན་སུམ་ཚོགས་པའི་རྒྱལ་པོ་ནི་ཆོས་ཀྱིས་སྐྱེ་དགུ་བསྐྱངས་པ་ལ་ཐབས་མཁས་ཤིང་བགྱི་བ་རྣམས་ལ་གཞན་གྱི་དྲིང་མི་འཇོག་པའོ། །བརྩོན་པའི་རྒྱལ་པོ་ནི་དགྲ་མ་མཆིས་པས་དགའ་བར་གནས་ཤིང་མཛོད་འཕེལ་བར་བགྱིད་པའོ། །ཆོས་ལ་གུས་པའི་རྒྱལ་པོ་ནི་བསོད་ནམས་ཀྱི་བགྱི་བ་ཡང་མི་གཏོད་ལ་མི་སྲུན་པ་རྣམས་ཚར་གཅོད་པའོ། །མཁས་པའི་རྒྱལ་པོ་ནི་བསམ་པ་མྱུར་དུ་རྫོགས་ཤིང་མཐའ་མི་རིང་བས་བགྱི་བ་དག་ལས་མི་ཉམ་པའོ། །དེས་པའི་རྒྱལ་པོ་ནི་སྐྱེ་བོ་ཐམས་ཅད་འཁོར་ཞིང་གྲོང་རྡལ་གྱི་མི་དང ། ཡུལ་གྱི་མི་ཐམས་ཅད་ཀྱིས་ཡིད་བརྟན་དུ་རུང་བའོ་འཇིག་རྟེན་གྱི་ཀུན་སྤྱོད་རབ་ཏུ་རིག་པར་སྤྱོད་པའི་རྒྱལ་པོ་ནི་སྲུན་པ་མི་སྲུན་པའི་བྱེ་བྲག་ཀྱང་ཡང་དག་པ་ཇི་ལྟ་བ་བཞིན་དུ་རྟོགས་ལ་ལོངས་སྤྱོད་འདུ་བའི་སྒོ་ཡང་ཆད་པར་མི་བགྱིད་པའོ། །མི་བདེ་བ་བཟོད་པའི་རྒྱལ་པོ་ནི་རྒྱལ་པོའི་བགྱི་བ་ཡང་རྫོགས་པར་སྒྲུབ་ལ་སྡུག་བསྔལ་གྱིས་ཀྱང་མི་འཇིགས་པའོ། །ཆོས་ལ་ཕྱིན་ཅི་མ་ལོག་པར་འཛིན་པ་ནི་ཁྱད་པར་དུ་འགྲོ་བའི་ལམ་ཡང་སྒྲུབ་ལ་དགེ་བའི་བཤེས་གཉེན་དག་དང་ཡང་མ་བྲལ་བའོ། །རྒྱལ་པོ་ཆེན་པོ་ཡན་ལག་བཅུ་པོ་དེ་དག་དང་ལྡན་པའི་ཆོས་ཀྱི་རྒྱལ་པོ་ནི་རྣམ་པ་ཐམས་ཅད་ཡོངས་སུ་རྫོགས་པའི་རྒྱལ་པོ་ཆོས་དང་ལྡན་པ་ལགས་སོ། །སྨྲས་པ། བྲམ་ཟེ་རྒྱལ་པོའི་ཆོས་དེ་ལྟར་ཡོངས་སུ་རྫོགས་པ་དང་ལྡན་པའི་ཆོས་ཀྱི་རྒྱལ་པོས་ཐབ་མོའི་གཡུལ་ཞིག་ཉེ་བར་གནས་ན་ཇི་ལྟར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་དུས་གསུམ་དུ་ཐབས་ལ་མཁས་པའི་རྣམ་པ་གསུམ་གྱིས་ནན་ཏན་དུ་བགྱིའོ། །དེ་ལ་དུས་གསུམ་ནི་ཐོག་མའི་དུས་དང ། བར་གྱི་དུས་དང ། ཐ་མའི་དུས་སོ། །དེ་ལ་ཐོག་མའི་དུས་ཀྱི་ཐབས་མཁས་པ་ནི་གལ་ཏེ་རྒྱལ་པོ་འམ། བློན་པོ་མཛའ་བར་བགྱི་བས་འགྲུབ་པར་གདའ་ན་ཡང་མཛའ་བར་བགྱི་བས་ཉེ་བར་བཟུང་སྟེ་ཐབ་མོ་དེ་ཞི་བར་བགྱིའོ། །གལ་ཏེ་ཕན་གདགས་པ་ཞིག་གིས་འགྲུབ་པར་གདའ་ན་ཡང་ཕན་གདགས་པས་ཉེ་བར་བཟུང་སྟེ་ཐབ་མོ་དེ་ཞི་བར་བགྱིའོ། །གལ་ཏེ་ཕྱོགས་མང་པོ་ཡོངས་སུ་བཟུང་བ་དང་དེ་བས་ལྷག་པའི་དགྲར་འགྱུར་བའི་འཇིགས་པ་ལ་སོགས་པ་བསྟན་པས་འགྲུབ
52.61a
པར་གདའ་ན་ཡང ། དེ་གཉིས་བསྟན་པས་ཉེ་བར་བཟུང་སྟེ། ཐབ་མོ་དེ་ཞི་བར་བགྱི་སྟེ། དེ་ལྟར་དུས་དང་པོ་ལ་ཐབས་མཁས་པ་སྦྱར་བར་བགྱིའོ། །གལ་ཏེ་དེ་དག་མཛའ་བར་བགྱི་བ་དང ། ཕན་གདགས་པ་དང ། འཇིགས་པ་བསྟན་པ་གང་གིས་ཀྱང་བསྒོ་སྟེ་མ་བཏུབ་ན་ཆོས་དང་ལྡན་པའི་རྒྱལ་པོས་སེམས་གསུམ་ཉེ་བར་གཞག་སྟེ་ཐབ་མོ་བགྱིའོ། །གསུམ་གང་ཞེ་ན། བདག་ཆོས་དང་ལྡན་པའི་རྒྱལ་པོ་ཡིན་ན། བདག་གིས་སྐྱེ་དགུ་རྣམས་ཕུང་བར་བྱས་པར་མི་འགྱུར་གྲང ། ཕུང་བར་འགྱུར་བ་ལས་མ་བཟློག་པ་ལྟའང་མེད་དམ་ཞེས་དང་པོར་སྐྱེ་དགུ་ཡོངས་སུ་བསྐྱང་བ་ལ་སེམས་ཉེ་བར་གཞག་པར་བགྱིའོ། །གཉིས་པ་ནི་ཕས་ཀྱི་དགྲ་ལས་རྒྱལ་བར་བགྱི་བའི་སེམས་སོ། །གསུམ་པ་ནི་སྲོག་གཟུང་བའི་སེམས་ཏེ། སེམས་གསུམ་པོ་འདི་དག་ཉེ་བར་གཞག་ལ་དཔུང་གི་ཚོགས་ཡན་ལག་བཞི་པ་ལ་བཀའ་སྩལ་བར་བགྱི་སྟེ། དེ་ལྟར་དུས་བར་མ་ལ་ཐབས་མཁས་པ་སྦྱར་བར་བགྱིའོ། །དུས་ཐ་མ་ལ་ནི་དཔུང་གི་ཚོགས་ཡན་ལག་བཞི་པ་དེ་དག་དཔའ་བ་ཐ་མ་དང ། དཔའ་བ་འབྲིང་དང ། དཔའ་བ་རབ་ཀྱི་ཚུལ་དུ་གཡུལ་བཤམ་པར་བགྱིའོ། །དེ་ལ་དཔའ་བ་ཐ་མ་རྣམས་ནི་ཐོག་མར་བཤམ་མོ། །དཔའ་བ་འབྲིང་རྣམས་ནི་དེའི་རྒྱབ་དུ་བཤམ་མོ། །རྟ་པའི་ཚོགས་ནི་དེ་གཉིས་ཀའི་རྒྱབ་རྒྱབ་ནས་བགྱེའོ། །རྒྱལ་པོ་བདག་ནི་དེ་དག་བག་དྲོ་ཞིང་བདེ་བར་རྒལ་བ་དང ། རྐང་ཐང་པ་རྣམས་ཡོངས་སུ་བསྲུང་བའི་ཕྱིར་དཔའ་བའི་རབ་རྣམས་དང ། དེའི་ཕྱི་བཞིན་བསྡད་པར་བགྱིའོ། །དེ་ལྟར་བགྱིས་ན་དེ་དག་ཆུ་གང་དང ། འཇིགས་པ་དང ། སྤྱན་མཉེས་པར་བགྱི་བ་དང ། རྒྱབ་རྣམས་རྣམ་པར་དག་པ་དང ། བྱས་པ་གཟོ་བར་བགྱི་བའི་སླད་དུ་རྔོ་ཅི་ཐོག་གིས་རྒོལ་ཞིང་སླར་མི་ལྡོག་སྟེ། ད་ལྟར་ཐ་མའི་དུས་ལ་ཐབས་མཁས་པ་སྦྱར་བར་བྱའོ། །དེ་ལྟར་ཐབས་མཁས་ཤིང་གཡུལ་ལེགས་པར་ཤོམ་པའི་རྒྱལ་པོས་ནི་ཕ་རོལ་གྱི་དཔུང་བཀུམ་འམ། རྨ་ཕྱུང་ཡང་དེས་རྒྱལ་པོ་ལ་ཁ་ན་མ་ཐོ་བ་ཆུང་ཞིང་བསོད་ནམས་མ་ལགས་པ་ཆུང་བ་དང ། འབྲས་བུ་མྱོང་བ་ཡང་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན།
52.61b
འདི་ལྟར་དེས་སྙིང་རྗེ་བ་དང ། ཡོངས་སུ་མི་གཏང་བའི་སེམས་ཀྱིས་ལས་དེ་མངོན་པར་འདུ་བགྱིས་པའི་སླད་དུའོ། །གང་དེས་སྐྱེ་དགུ་ཡོངས་སུ་བསྐྱང་བ་དང ། བུ་དང་ཆུང་མ་དང ། རིགས་ཀྱི་དོན་དུ་བདག་དང་ལོངས་སྤྱོད་ཡོངས་སུ་བཏང་སྟེ་ལས་དེ་བགྱིས་པས། གཞི་དེ་ལས་བསོད་ནམས་ཚད་མ་མཆིས་པ་ཡང་རབ་ཏུ་འཕེལ་ལོ། །རྒྱལ་པོ་ཆེན་པོ་ཐབ་མོའི་གཡུལ་ཞིག་ཉེ་བར་གནས་ན་ཆོས་དང་ལྡན་པའི་རྒྱལ་པོས་དེ་ལྟར་ནན་ཏན་དུ་བགྱིའོ། །བྲམ་ཟེ་དེ་ལྟར་སྐྱེ་དགུ་ཡོངས་སུ་བསྐྱང་བ་ལ་བརྩོན་པའི་ཆོས་ཀྱི་རྒྱལ་པོས་འདུ་ཤེས་ཀྱིས་གནས་པ་རྣམ་པ་དུ་ཞིག་གིས་གནས་པར་བྱ། སྨྲས་པ། རྒྱལ་པོ་ཆེན་པོ་བརྒྱད་ཀྱིས་ཏེ། སྐྱེ་དགུའི་རིས་སུ་གཏོགས་པའི་སེམས་ཅན་རྣམས་ལ་བུའི་འདུ་ཤེས་དང ། མི་སྲུན་པའི་རྣམས་ལ་ནད་པའི་འདུ་ཤེས་དང ། སྡུག་བསྔལ་བ་རྣམས་ལ་སྙིང་རྗེའི་འདུ་ཤེས་དང ། བདེ་བ་རྣམས་ལ་དགའ་བའི་འདུ་ཤེས་དང ། དགྲ་རྣམས་ལ་དེའི་རྒྱུས་ཉེས་པའི་འདུ་ཤེས་དང ། མཛའ་བཤེས་རྣམས་ལ་རྗེས་སུ་བསྲུང་བའི་འདུ་ཤེས་དང ། ་ལོངས་སྤྱོད་རྣམས་ལ་སྨན་གྱི་འདུ་ཤེས་དང ། བདག་ལ་བདག་མེད་པའི་འདུ་ཤེས་སོ། །དེ་ལ་སྐྱེ་དགུའི་རིས་སུ་གཏོགས་པའི་སེམས་ཅན་རྣམས་ལ་བུའི་འདུ་ཤེས་ཀྱིས་གནས་པ་ནི་རྒྱལ་པོ་དེ་ཕས་བུ་བཅོས་པ་ལྟར་མི་སྲུན་པ་ཚར་གཅད་པ་ལ་འཇུག་ཀྱང་སྙིང་རྗེའི་བསམ་པ་མི་གཏོང་བའོ། །མི་སྲུན་པ་རྣམས་ལ་ནད་པའི་འདུ་ཤེས་ཀྱིས་གནས་པ་ནི་སྨན་པ་ལྟར་གནོད་པ་ལ་མི་ཁྲོ་ཞིང་སྐྱོན་རབ་ཏུ་བསལ་བའི་སླད་དུ་སྦྱོར་བའོ། །སྡུག་བསྔལ་བ་རྣམས་ལ་སྙིང་རྗེའི་འདུ་ཤེས་ཀྱིས་གནས་པ་ནི་གནོད་པ་ཐམས་ཅད་ཀྱང་ཡོངས་སུ་སྤོང་བར་བགྱིད་པ་དང ། ཕན་པ་བསྒྲུབ་པའི་སླད་དུ་འཇུག་པའོ། །བདེ་བ་རྣམས་ལ་དགའ་བའི་འདུ་ཤེས་ཀྱིས་གནས་པ་དེ་ནི་གཞན་གྱི་ནོར་དང ། གཞན་གྱི་ཡོ་བྱད་ལ་བརྣབ་སེམས་དང་ཕྲག་དོག་གི་སེམས་མི་སྐྱེད་པའོ། །དགྲ་རྣམས་ལ་དེའི་རྒྱུས་ཉེས་པའི་འདུ་ཤེས་ཀྱིས་གནས་པ་ནི་དེའི་རྒྱུ་ཡོངས་སུ་སྤོང་ཞིང་སྐྱེའོ་གཞན་ལྟ་ཅི་སྨོས་ཀྱི། དགྲ་རྣམས་དང་ཡང་མཛའ་བར་བགྱིད་པའོ། །མཛའ་བཤེས་རྣམས
52.62a
ལ་རྗེས་སུ་བསྲུང་བའི་འདུ་ཤེས་ཀྱིས་གནས་པ་ནི་མཛའ་བ་བརྟན་པ་དང ། ཐམས་ཅད་དང་མཛའ་བའོ། །ལོངས་སྤྱོད་རྣམས་ལ་སྨན་གྱི་འདུ་ཤེས་ཀྱིས་གནས་པ་ནི་འདོད་པ་ལ་ལོག་པར་གཡེམ་པས་ཡོངས་སུ་མི་སྤྱོད་ཅིང་ལོངས་སྤྱོད་རྣམས་ལ་མ་ཆགས་པར་ཡོངས་སུ་སྤྱོད་པའོ། །བདག་ལ་བདག་མེད་པའི་འདུ་ཤེས་ཀྱིས་གནས་པ་ནི་ཆོས་དོན་དུ་གཉེར་ཞིང་དགེ་སྦྱོང་དང་བྲམ་ཟེ་རྣམས་ཀྱི་དྲུང་དུ་མཆིས་ཏེ་རྗེས་སུ་འཐུན་པའི་ཆོས་ལ་ནན་ཏན་དུ་བགྱི་བ་ལ་འཇུག་པ་སྟེ། རྒྱལ་པོ་ཆེན་པོ་འདུ་ཤེས་ཀྱིས་གནས་པ་བརྒྱད་པོ་དེ་དག་གིས་གནས་པ་ཆོས་དང་ལྡན་པའི་རྒྱལ་པོ་ནི་སྐྱེས་ཕུལ་བ་ཙམ་གྱིས་ཀྱང་ཕྱག་མཛོད་མངོན་པར་འཕེལ་བར་འགྱུར་གྱི། ཆོས་དང་མི་ལྡན་པས་ནི་སྒྱུའི་སྦྱོར་བ་དང ། གཡོའི་རྣམ་པ་ཐམས་ཅད་ཀྱིས་བསྒྲུབས་ཀྱང་དེ་ལྟར་འཕེལ་བར་མི་འགྱུར་ལགས་སོ། །འདུ་ཤེས་ཀྱིས་གནས་པ་བརྒྱད་པོ་དེ་དག་གིས་གནས་ན་ཚེས་གྲངས་དང ། སྐར་མ་དང ། བཀྲ་ཤིས་ཀྱི་ལས་བརྩམས་པ་ཐམས་ཅད་འཐུན་པར་འགྱུར་ཏེ། དེས་ན་དེ་ལ་མི་འམ། མི་མ་ལགས་པ་གླགས་ཚོལ་བ་རྣམས་ཀྱིས་ཀྱང་གླགས་མི་རྙེད་པར་འགྱུར་ལགས་སོ། །འདུ་ཤེས་ཀྱིས་གནས་པ་བརྒྱད་པོ་དེ་དག་གིས་གནས་ན་ཆར་ཡང་དུས་དུས་སུ་འབབ་པར་འགྱུར་ཏེ། དེས་དེའི་ཁམས་སུ་ལོ་ལེགས་པར་འགྱུར་ཏེ། མུ་གེའི་དགོན་པ་འབྱུང་བར་མི་འགྱུར་ལགས་སོ། །ལོ་ཏོག་ཆབ་འཚལ་བར་འགྱུར་བའི་རྐྱེན་སེར་བ་དང ། བྱེ་བ་དང ། ནེ་ཙོ་དང ། བྱི་བ་ལ་སོགས་པའི་འཇིགས་པ་མི་འབྱུང་བ་ལགས་སོ། །གཅན་ཟན་མི་སྲུན་པ་རྣམས་ཀྱང་ཉུང་དུ་འགྱུར། ཚེགས་ཆུང་ངུས་ཀྱང་དེ་ལ་གནོད་པར་སེམས་པའི་དགྲ་རྣམས་རང་རང་གི་ལས་རྣམ་པར་སྨིན་པའི་ཉེས་པས་ཕུང་ཞིང་བས་པ་དང ། མ་མཆིས་པར་འགྱུར། རྒྱལ་པོ་ཆེན་པོ་ཆོས་དང་ལྡན་པའི་ཆོས་ཀྱི་རྒྱལ་པོ་དེ་ལྟར་སྐྱེ་དགུ་སྐྱོང་བ་ནི་འཇིག་རྟེན་ན་དེས་པ་རྣམས་ལ་ནོངས་པ་མ་མཆིས་པ་ལགས་ཏེ། ལུས་ཞིག་ནས་གུམ་པའི་འོག་ཏུ་ཡང་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་ལགས་སོ། །དེ་ལ་འདི་སྐད་ཅེས
52.62b
བྱ་སྟེ། ཆོས་ལ་གུས་ཤིང་བག་མཆིས་དང ། །སྐྱེ་དགུ་ཕན་སྤྱོད་ཡུལ་འཁོར་ལྡན། །གཞན་གྱི་སྤྱོད་པ་རབ་རྟོགས་ཤིང ། །གཙང་ལ་མ་ཆགས་རྒྱལ་པོ་རྒྱལ། །དགའ་བརྟན་པར་\ུ0f9\ུ0f7ཅན་འགྲུས་ལྡན་གྱུར་ཅིང ། །འཇིག་རྟེན་བསྟན་བཅོས་བཟོ་རྩལ་མཁས། །བརྩོན་ཞིང་མཐར་ཕྱིན་སྒྲུབ་པ་ཡི། །རྒྱལ་པོ་བདེ་བར་སྐྱེ་དགུ་སྐྱོང ། །ཕན་ཞིང་བརྩོན་ལ་ངེས་སྨྲ་སྟེ། །སྙིང་རྗེ་ལྡན་ཞིང་གཞན་ཕན་བརྩོན། །སྐྱོན་ནམ་ཡོན་ཏན་ལྡན་རྟོགས་ན། །སྐྱེ་དགུ་ཕན་པའི་རྒྱལ་པོ་དགའ། །འབངས་ཀྱི་ཚོགས་རྣམས་ཀུན་དགའ་ཞིང ། །སྦྱིན་བགྱིད་དོན་སྤྱོད་གཞན་ལ་སྙོམས། །དཔུང་དང་བཞོན་པ་ལེགས་སྐྱོང་བའི། །རྒྱལ་པོ་རྒྱལ་སྲིད་ཡུན་རིང་སྐྱོང ། །སྲོག་གཅོད་སྤངས་དང་མ་བྱིན་ལེན། །གཞན་གྱི་མཆིས་བྲང་ལོག་སྨྲ་དང ། །ཕྲ་མ་དང་ནི་ངག་རྩུབ་དང ། །ཀྱལ་པའི་སྐྱོན་དང་ཆང་སྤངས་ཏེ། །འཚོ་དག་མི་ཡི་རྒྱལ་སྲིད་རྣམས། །སྤངས་ནས་ལྷ་ཡི་རྒྱལ་སྲིད་ལ། །རྒྱལ་པོ་གནས་འགྱུར་དེ་སླད་དུ། །རྒྱལ་པོ་ཚུལ་ཁྲིམས་བཟང་པོར་མཛོད། །རྒྱལ་པོའི་ཚུལ་གྱི་ལེའུ་སྟེ་དྲུག་པའོ།། །།དེ་ནས་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་བདེན་སྨྲས་དྲིས་པའི་ལན་བཏབ་པས་མགུ་ནས། གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བྲམ་ཟེ་ཚུར་ཤོག་།ངའི་ཕོ་བྲང་དུ་འདོང ། དེ་ཅིའི་ཕྱིར་ཞེ་ན། བྲམ་ཟེ་འཁོར་དང་བཅས་པར་ངས་ཟན་ལ་བོད་དོ། །དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ལེགས་སོ། །ལེགས་སོ། །དུས་ལ་བབ་པར་གསུངས་སོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་བདག་ཅག་ནི་ཤུལ་ན་དུབ་ཅིང་བཀྲེས་པ་ལགས་སོ། །རྒྱལ་པོ་ཆེན་པོ་ཁྱོད་ཀྱིས་ཇི་སྐད་བཀའ་སྩལ་པ་དེ་བཞིན་དུ་བགྱིའོ། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་འཁོར་དང་བཅས་ཏེ། མདུན་དུ་བཀྱེ་ནས་ཕོ་བྲང་བཀོད་པ་ཆེན་པོར་ཕྱིན་ཏོ། །དེར་ཕྱིན་པ་དང ། གཅེར་བུ་པའི་བུ
52.63a
བདེན་སྨྲ་རྒྱལ་པོའི་སྟན་ལ་བཞག་གོ། །གཅེར་བུ་པའི་ལྷག་མ་གཞན་ཡང་རྐྱེན་རྐྱེན་གྱི་སྟན་ལ་བཀོད་དེ་རིམ་གྲོ་བྱས། བླ་མར་བྱས་ནས་གུས་པ་དང་བཅས་ཤིང་ཞེ་ས་དང་བཅས་པར་རང་གིས་ལག་དར་ཏེ། གཅེར་བུ་པའི་བུ་བདེན་སྨྲ་འཁོར་དང་བཅས་པ་ལ་ཁ་ཟས་རོ་བརྒྱ་དང་ལྡན་པས་བདར་ཏེ་ཚིམ་པར་བྱས་སོ། །དེ་ལྟར་བདར་བས་ཚིམ་པར་བྱས་ཏེ། ཟན་ཟོས་པར་ཤེས་ནས་བརྒྱ་ཕྲག་སྟོང་རི་བའི་གོས་ཕྲུགས་སུ་བཤམས་པ་བསྐོན་ནོ། །གོས་བསྐོན་ནས་ཕྱོགས་གཅིག་ཏུ་འདུག་གོ། །དེ་ནས་གཅེར་བུ་པའི་བུ་བདེན་སྨྲ་ཟས་ཀྱི་བྱ་བ་བྱས་ནས་སླེའུ་གྱུ་སྟེ། ལག་པ་བསྙལ་ཏེ་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་སྦྱིན་པ་འདི་མཛད་པས་ཁྱོད་ཀྱིས་ཐོག་མ་ཉིད་དུ་སེར་སྣ་བཅོམ་སྟེ་གཏོང་བའི་ཕྱག་མངོན་པར་བརྐྱང་བས་མེད་པར་ལྟ་བ་ནི་བསལ། ཡང་དག་པར་ལྟ་བ་ནི་མངོན་པར་ཕྱུང ། སྐྱེས་བུ་དམ་པ་རྣམས་ཀྱི་རྗེས་ནི་བསྙགས། སྐྱེས་བུ་ངན་པ་རྣམས་ནི་ཡོངས་སུ་སྤངས། མཐོ་རིས་དང་ཐར་པའི་སྒོ་རྣམས་ནི་ཕྱེ། ངན་སོང་གི་སྒོ་རྣམས་ནི་བཅད། དགེ་བའི་རྩ་བ་ནི་བསྐྱེད། མི་དགེ་བའི་རྩ་བ་ནི་ཕྱུང ། ཉོན་མོངས་པ་ནི་བསྲབས། དགེ་བའི་ཕྱོགས་ནི་སྤེལ། ཚུལ་ཁྲིམས་དང་ལྡན་པ་རྣམས་ནི་ཚིམ་པར་བགྱིས། བདག་ལ་སྨན་པ་དང ། གཞན་ལ་སྨན་པ་ནི་མཛད་པར་གྱུར་ཏོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སྦྱིན་པས་ནི་ལོངས་སྤྱོད་ཆེན་པོར་འགྱུར། །ཁ་དོག་ཕུན་སུམ་ཚོགས་པས་ནི་ཁ་དོག་དང་ལྡན་པར་འགྱུར། དྲི་ཕུན་སུམ་ཚོགས་པས་ནི་གྲགས་པ་དང་ལྡན་པར་འགྱུར། རོ་ཕུན་སུམ་ཚོགས་པས་ནི་ཡོ་བྱད་དམ་པ་འཐོབ་པར་འགྱུར། རེག་ཕུན་སུམ་ཚོགས་པས་ནི་རྐང་ལག་འཇམ་ཞིང་གཞོན་ཤ་ཆགས་པར་འགྱུར། རིམ་གྲོར་བགྱིས་ཏེ་སྩལ་བས་ནི་གཉེན་ལ་སོགས་པས་རིམ་གྲོར་བགྱི་བར་འགྱུར། ལག་དར་ཏེ་སྩལ་བས་ནི་རིམ་གྲོ་པ་འཐོབ་པར་འགྱུར། དུས་སུ་སྩལ་བས་ནི་དོན་རྣམས་དུས་སུ་འགྲུབ་པར་འགྱུར། འཐུན་པ་ཡིད་དུ་འོང་བ་སྩལ
52.63b
བས་ནི་ཡིད་དུ་འོང་བའི་ལོངས་སྤྱོད་རྣམས་ལ་སེམས་འཇུག་པར་འགྱུར། གཞན་ལ་མི་གནོད་པར་སྩལ་བས་ནི་ལོངས་སྤྱོད་བརྟན་པ་དག་འཐོབ་པར་འགྱུར། མི་བདེ་བ་བཟོད་པས་སྩལ་བས་ནི་འཁོར་སྙིང་ཉེ་བར་འགྱུར། ཁ་ཟས་སྩལ་བས་ནི་ཉམ་སྟོབས་དང་ལྡན་པར་འགྱུར། གོས་སྩལ་བས་ནི་མདོག་དང་ལྡན་པར་འགྱུར། མར་མེ་སྩལ་བས་ནི་མིག་དང་ལྡན་པར་འགྱུར། ་སིལ་སྙན་སྩལ་བས་ནི་མ་ཉམས་པའི་རྣ་བ་དང་ལྡན་པར་འགྱུར། བཞོན་པ་སྩལ་བས་ནི་བདེ་བར་འགྱུར། སྨན་སྩལ་བས་ནི་ནད་ཉུང་བར་འགྱུར། གནས་སྩལ་བས་ནི་ཐམས་ཅད་སྩལ་བར་འགྱུར། ཆོས་སྩལ་བས་ནི་བདུད་རྩི་སྩལ་བར་འགྱུར། སྲོག་གཅོད་པ་སྤངས་པས་ནི་ཚེ་རིང་བར་འགྱུར། མ་བྱིན་པར་ལེན་པ་སྤངས་པས་ནི་ལོངས་སྤྱོད་ཆེན་པོར་འགྱུར། འདོད་པ་ལ་ལོག་པར་གཡེམ་པ་སྤངས་པས་ནི་འགྲན་ཟླ་མ་མཆིས་པའི་ཆུང་མ་དང་ལྡན་པར་འགྱུར། བརྫུན་དུ་སྨྲ་བ་སྤངས་པས་ནི་སྐུར་པ་ཉུང་བར་འགྱུར། ཕྲ་མ་སྤངས་པས་ནི་འཁོར་མི་ཕྱེད་པ་དང་ལྡན་པར་འགྱུར། ངག་རྩུབ་པོ་སྤངས་པས་ནི་ཡིད་དུ་འོང་བའི་སྒྲ་ཐོས་པར་འགྱུར། ཚིག་ཀྱལ་པ་སྤངས་པས་ནི་ཚིག་བཙུན་པར་འགྱུར། །བརྣབ་སེམས་སྤངས་པས་ནི་མི་ཟད་པའི་འདོད་ཆགས་མ་མཆིས་པར་འགྱུར། གནོད་སེམས་སྤངས་པས་ནི་མི་ཟད་པའི་ཞེ་སྡང་མ་མཆིས་པར་འགྱུར། ལོག་པར་ལྟ་བ་སྤངས་པས་ནི་མི་ཟད་པའི་གཏི་མུག་མ་མཆིས་པར་འགྱུར། ང་རྒྱལ་སྤངས་པས་ནི་རིགས་མཐོན་པོར་སྐྱེ་བར་འགྱུར། ཁོང་ཁྲོ་བ་སྤངས་པས་ནི་མཛེས་པར་འགྱུར། ཕྲག་དོག་སྤངས་པས་ནི་གཟི་བྱིན་ཆེ་བར་འགྱུར། སེར་སྣ་སྤངས་པས་ནི་ཕྱུག་པར་འགྱུར། ཡན་ལག་མ་ཚང་བ་མེད་པར་སྩལ་བས་ནི་ཡན་ལག་ཐམས་ཅད་དང་ལྡན་པའི་སྐྱེས་བུར་འགྱུར་བའི་སླད་དུ་སྟེ། དེ་ལྟར་ཟས་སྩལ་བས་ནི་སྲོག་སྩལ་བར་འགྱུར། ཁ་དོག་དང ། སྟོབས་དང ། བདེ་བ་དང ། སྤོབས་པ་སྩལ་བར་འགྱུར་ཏེ། དེ་ལྟར་ན་སྦྱིན་པ་བགྱིད་པ་ནི་སྐྱེ་བོ་མང་པོ་ལ་བསྟེན་པ་ལགས་སོ། །དམ་པ་རྣམས་ཀྱིས་བསྙེན་པ་ལགས་སོ། །དེའི་གྲགས་པ་ཡང་ཐམས་ཅད་དུ
52.64a
གྲགས་པར་འགྱུར། འཁོར་དུ་མཆི་ནའང་འཇིགས་པ་མ་མཆིས་པར་འགྱུར། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར། ཐ་མར་ཡང་ཕྱིར་སྐྱེ་བ་མ་མཆིས་པ་འཐོབ་པར་འགྱུར་ལགས་སོ། །དེ་ལ་འདི་སྐད་ཅེས་བྱ་སྟེ། གང་ཞིག་ཡང་དག་སྡོམ་རྣམས་ལ། །གུས་པར་དུས་སུ་ཟས་སྩོལ་བ། །སེམས་དད་དེ་ནི་ཕྱི་ཚེ་ལ། །གནས་བདུན་ཡང་དག་འཐོབ་པར་འགྱུར། །སྟོབས་དང་ཚེ་དང་ཁ་དོག་དང ། །བདེ་བ་དང་ནི་སྤོབས་པ་དང ། །རྟག་ཏུ་བདེ་འགྲོར་སྐྱེ་བར་འགྱུར། །ཐ་མར་ཡང་སྲིད་མ་མཆིས་འཐོབ། །གང་གི་སླད་དུ་སྦྱིན་སྩལ་བ། །དེ་ཡི་དོན་དུ་དེ་འགྱུར་ཏེ། །བདེ་བའི་སླད་དུ་སྦྱིན་སྩལ་ན། །དེ་ནི་བདེ་བ་ཉིད་དུ་འགྱུར། །བསོད་ནམས་རྣམ་སྨིན་བདེ་བ་ལ། །ཇི་ལྟར་བསམས་པ་དེ་བཞིན་འགྲུབ། །མི་དང་ལྷར་ནི་སྐྱེ་བ་འམ། །གཟུགས་དང་གཟུགས་མེད་རྣམསུ་སྐྱེ། །གལ་ཏེ་སྦྱིན་དང་གང་ལྡན་ཞིག་།ཤེས་རབ་ཀྱིས་ནི་རྩོལ་བགྱིད་པ། །སྡུག་བསྔལ་ཐ་མར་དབྱུང་བ་ལ། །དེ་ཡི་ཡེ་ཤེས་ཆེན་པོ་སྐྱེ། །བདུད་ཀྱི་རིས་ཀྱི་ལྷ་རྣམས་དང ། སྡིག་པ་སྤྱོད་པ་ཅན་རྣམས་ཀྱིས། །བསོད་ནམས་ལེགས་པར་བགྱིས་པ་ལ། །བར་ཆད་བགྱི་བར་ཡོང་མི་ནུས། །བདེ་འགྲོ་དང་ནི་ནོར་རྙེད་དང ། །ཡང་སྲིད་མ་མཆིས་གསུམ་པ་སྟེ། །གསུམ་པོ་དེ་དག་དོན་གཉེར་ཞིང ། །དེ་སླད་སྦྱིན་པ་སྩལ་བར་བགྱི། །བདེན་སྨྲ་འགྲོན་དུ་བོས་པའི་ལེའུ་སྟེ་བདུན་པའོ།། །། དེ་ནས་རྒྱལ་པོ་གཏུམ་པོ་རབ་སྣང་གིས་འདི་སྙམ་བསམས་ཏེ་འདི་ལྟར་གཅེར་བུ་པའི་བུ་བདེན་སྨྲའི་ཆོས་བསྟན་པ་དེ་ཀུན་ཀྱང་དེ་བཞིན་གཤེགས་པའི་བཀའ་དང་འཐུན་པ་ཤ་སྟག་ན། བདག་གིས་གཅེར་བུ་པའི་བུ་བདེན་སྨྲ་འདི་དེ་བཞིན་གཤེགས་པ་ལ་དད་པ་ཡོད་དམ་མེད་བརྟག་པར་བྱའོ་སྙམ་མོ། །དེ་ནས་རྒྱལ་པོ་གཏུམ་པོ་རབ་སྣང་གིས་དེ་སྙམ་བསམས་ཏེ་སྟན་ཤིན་དུ་དམའ་བ་ཞིག་བཏིང་ནས་གཅེར་བུ་པའི་བུ་བདེན་སྨྲའི་མདུན་དུ་འདུག་སྟེ། འདི་སྐད་ཅེས་སྨྲས་སོ། །བྲམ་ཟེ་གལ་ཏེ་དྲིས་ནས་དྲིས་པ་ལན་གདབ་པའི་ཕྱིར་སྐབས་ཕྱེ་ན་ངས་དྲི་བ
52.64b
གཅིག་གཅིག་ཁྱོད་ལ་དྲིའོ། །དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཅི་དང་ཅི་བཞེད་པ་དེ་སྨྲར་གསོལ། སྨྲས་པ་དེ་དང་དེའི་ལན་གསོལ་བས་བདག་གིས་ཁྱོད་ཀྱི་ཐུགས་རངས་པར་བགྱིའོ། །སྐབས་ཕྱེ་བས་དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་དེ་ལྟ་བུ་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་བྲམ་ཟེ་དབྱར་བྱེད་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ལགས་ཏེ། སྐར་མའི་རིགས་ལ་མཁས་པ། མཆོད་སྦྱིན་གྱི་རྒྱུད་ལ་མཁས་པ། སྦྱིན་སྲེག་དང ། བཟླས་བརྗོད་དང ། བསྲེག་པའི་ཆོ་ག་ལ་ཤིན་དུ་བསླབས་པ། ཟླ་བ་དང་ཉི་མ་སྤྱང་ཀིས་འཛིན་པ་དང ། སྐར་མ་ལྟུང་བ་དང ། ལྕེ་འབབ་པ་དང་ས་གཡོ་བའི་རྒྱུས་ཚར་ཕྱིན་པ། ལོ་ལེགས་པ་དང ། མུ་གེ་དང ། འཇིག་རྟེན་འཇིག་པ་དང ། ལོ་ཁྱུད་ཁོར་གྱི་རྒྱུས་རྣམས་རྟོགས་པར་ཁོང་དུ་ཆུད་པ་ལགས་ན། དེ་ནི་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་བྲམ་ཟེ་དབྱར་བྱེད་ཀྱི་སྐྱོན་གང ། སྨྲས་པ། རྒྱལ་པོ་ཆེན་པོ་བྲམ་ཟེ་དབྱར་བྱེད་ནི་བྱི་བ་ལ་དགའ་བ་སྟེ། རྒྱལ་པོ་ཆེན་པོ་མཁས་པས་ནི་གཞན་གྱི་མཆིས་བྲང་དང་བསྟེན་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་གཞན་གྱི་མཆིས་བྲང་བསྟེན་པས་ནི་ཚེ་འདི་དང་ཚེ་ཕྱི་མ་ལ་སྡུག་བསྔལ་ཆེས་མང་པོ་འཐོབ་པར་འགྱུར་ཏེ། ལྷ་དང་མིར་བཅས་པའི་འཇིག་རྟེན་གྱིས་ཀྱང་སྨད་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། བྱི་བ་བགྱིད་པའི་ངང་ཚུལ་ཅན། །མ་བསྡམས་མི་སྲུན་ཡུལ་ལ་བརྐམ། །བདག་གི་ཆུང་མས་མི་ཆོག་སྟེ། །འཇིག་རྟེན་དག་ན་སྨད་འོས་ལགས། །འདི་དང་ཕ་རོལ་སྡུག་བསྔལ་འགྱུར། །བསད་བཅིང་ཆད་པ་དྲག་པོ་མྱོང ། །
52.65a
སེམས་ཅན་དམྱལ་བ་རྣམས་སུ་སྐྱེ། །བདེ་བ་ཆུང་ཞིང་སེམས་ལ་གནོད། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་བྲམ་ཟེ་བྷ་ར་དྭཱ་ཛ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་སྟེ། ཚུལ་དང་འདུལ་བ་ལ་མཁས་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་བྲམ་ཟེ་བྷ་ར་དྭཱ་ཛའི་སྐྱོན་གང ། སྨྲས་པ། རྒྱལ་པོ་ཆེན་པོ་བྲམ་ཟེ་བྷ་ར་དྭ་ཛ་འདི་ནི་རྨུགས་པ་དང་ཡུར་བ་མང་བ་དང ། ཧ་ཅང་གཉིད་ཆེ་བ་ལགས་ཏེ། རྒྱལ་པོ་ཆེན་པོ་མཁས་པས་ནི་རྨུགས་པ་དང་ཡུར་བ་དང་གཉིད་ཆེ་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་རྨུགས་པ་དང་གཉིད་འདི་ནི་འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་འགྲིབ་པར་བགྱིད་པའི་ཆོས་ཏེ། ཡེ་ཤེས་དང་སྤོང་བའི་བར་ཆད་དུ་ཡང་འགྱུར་བའི་སླད་དུའོ། །དེ་ལ་འདི་སྐད་ཅེས་བྱ་སྟེ། གང་ཞིག་རྨུགས་ཡུར་གཉིད་ཆེ་བ། །སྐྱེ་བོ་དེ་ནི་ལེ་ལོས་ནོན། །མ་ཐོབ་པ་དག་དེས་མི་འཐོབ། །ཐོབ་པར་གྱུར་པ་འང་འགྲིབ་པར་འགྱུར། །དེ་ལྟར་ཁྱད་པར་ཐོབ་འཚལ་བས། །སྙོམ་ལས་དང་ནི་ལེ་ལོ་དང ། །རྨུགས་པ་དང་ནི་ཡུར་དང་གཉིད། །བག་མེད་ལྷན་ཅིག་སྤང་བར་བགྱི། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནག་པོ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་སྟེ། མོས་པ་ཆེན་པོ་དང་ལྡན་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ
52.65b
ནག་པོའི་སྐྱོན་ནི་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནག་པོ་ནི་ཤིན་དུ་སེར་སྣ་ཅན་ལགས་ཏེ། རྒྱལ་པོ་ཆེན་པོ་མཁས་པས་ནི་སེར་སྣ་ཅན་དུ་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ལོངས་སྤྱོད་ཕུན་སུམ་ཚོགས་པ་ཐོབ་ལ་སེར་སྣ་ལ་གནས་པ་ནི་དེས་ལོངས་སྤྱོད་རྣམས་ལས་སྙིང་པོ་མ་བླངས་ཏེ། དེ་ལག་པ་སྟོང་པར་འགུམ་པའི་དུས་བགྱིས་ནས་གཤིན་རྗེའི་ཡུལ་དུ་མཆིས་ཏེ། དེར་བཀྲེས་པ་དང་སྐོམ་པ་ལ་སོགས་པའི་སྡུག་བསྔལ་མྱོང་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། གང་ཞིག་ལོངས་སྤྱོད་ཕུན་ལྡན་ལ། །སེར་སྣས་ཟིལ་ནོན་མི་དེ་ནི། །ལག་སྟོང་གཤིན་རྗེའི་ཡུལ་དུ་མཆི། །བཀྲེས་པས་ཉེན་པ་མྱོང་བར་འགྱུར། །དེར་ནི་བཀྲེས་སྐོམ་གདུངས་པ་དང ། །མྱ་ངན་གྲང་སོགས་སྡུག་བསྔལ་མྱོང ། །དེ་བས་མཁས་པས་རང་གི་བློས། །འཇུངས་པའི་དྲི་མས་གོས་མི་བགྱི། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་རྒྱལ་སྡེ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་སྟེ། མོས་པ་ཆེ་ཞིང་འཇིགས་པ་མ་མཆིས་ལ། གཏོང་བ་དང་ལྡན་ཞིང་སྙིང་སྟོབས་ཕུན་སུམ་ཚོགས་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་རྒྱལ་སྡེའི་སྐྱོན་ནི་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་རྒྱལ་སྡེ་ནི་སྲོག་གཅོད་པ་སྟེ། རྒྱལ་པོ་ཆེན་པོ་མཁས་པས་ནི་སྲོག་གཅོད་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སྐྱེས་བུ་གང་ཟག་སྲོག་གཅོད་པ་ནི་ཚེ་ཐུང་བར་འགྱུར་བ་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དུ་མཆི་བར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། སྲོག་གཅོད
52.66a
བགྱིད་པའི་གང་ཟག་ནི། །ཚེ་ཐུང་ནད་ཀྱང་རབ་ཏུ་མང ། །གང་ན་མི་བདེ་ཆེ་བ་ཡི། །སེམས་ཅན་དམྱལ་བར་སྐྱེ་བར་འགྱུར། །དེ་བས་སྡུག་བསྔལ་མི་འཚལ་ཞིང ། །ཚེ་འདིར་བདེ་འཚལ་མཁས་པ་ཡིས། །གཞན་གྱི་སྲོག་གཅད་མི་བགྱི་སྟེ། །སྲོག་ཆགས་རྣམས་ནི་བདག་བཞིན་བསྲུང ། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་འཇིགས་མེད་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་འཇིགས་མེད་ཀྱི་སྐྱོན་གང ། སྨྲས་པ། རྒྱལ་པོ་ཆེན་པོ་རྒྱལ་བུ་འཇིགས་མེད་ནི་ཧ་ཅང་སྙིང་རྗེ་ཅན་ལགས་ཏེ། རྒྱལ་པོ་ཆེན་པོ་མཁས་པས་ནི་ཧ་ཅང་སྙིང་རྗེ་ཅན་དུ་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་གང་རྒྱལ་པོ་དབང་ཕྱུག་ཆེན་པོ་དང་ལྡན་ལ། ཧ་ཅང་སྙིང་རྗེ་ཆེས་ན་དེའི་རྒྱལ་སྲིད་ལ་ཆད་པ་མ་མཆིས་པས་མ་རུངས་པ་མང་པོས་འཁྲུག་པར་འགྱུར་ཞིང་ཆོམ་རྐུན་གྱི་གནོད་པ་མང་པོ་ཡང་མི་ཟློགས་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། རྒྱལ་པོ་ཧ་ཅང་སྙིང་རྗེ་ན། །མ་རུངས་པ་དང་བཀྲབས་པ་དང ། །རྐུན་པོས་རྒྱལ་སྲིད་འཁྲུག་ཅིང་སྐྱོ། །རྒྱལ་པོས་རྟག་ཏུ་ཤེས་གུས་བརྩོན། །དེ་བས་ས་ཡི་བདག་པོ་ཡིས། །སྐྱོན་དེ་མཐོང་ནས་སྤང་བགྱི་སྟེ། །ཧ་ཅང་སྙིང་རྗེར་མི་བགྱིའོ། །ཉམ་ཐག་སྲོག་ཆགས་སྙིང་རྗེ་འང་བགྱིད། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ལ་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ
52.66b
བུ་གཞོན་ནུ་སྟོབས་ལྷ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་སྟོབས་ལྷའི་སྐྱོན་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་སྟོབས་ལྷ་ནི་ཤིན་དུ་ཆང་ལ་ཆགས་པ་སྟེ། རྒྱལ་པོ་ཆེན་པོ་མཁས་པས་ནི་ཤིན་དུ་ཆང་ལ་ཆགས་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཆང་གི་བཏུང་བ་ནི་དྲན་པ་ཡོངས་སུ་ཉམས་པར་འགྱུར་བའི་རྒྱུ་སྟེ། ཡན་ལག་དམ་པའི་བགེགས་སུ་འགྱུར་ཞིང་འཇིག་རྟེན་པ་དང ། འཇིག་རྟེན་ལས་འདས་པའི་དོན་ཆེན་པོ་རྣམས་འགྲིབ་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། ཆང་དགའ་དགོས་པ་ཐམས་ཅད་ལ། །རྟག་ཏུ་བག་མེད་སྤྱོད་པར་འགྱུར། །མཁས་པ་རྣམས་ཀྱིས་སྨད་འགྱུར་ཞིང ། འདི་དག་གཞན་དུ་རྣམ་པར་རྨོངས། །དེ་བས་སྐྱེས་བུ་མཁས་པ་ཡིས། །ཆང་ལ་དགའ་བ་སྤང་བར་བགྱི། །དེ་ནི་ཡོན་ཏན་འགྲིབ་པར་བགྱིད། །གཞན་དུ་འང་སྨྱོན་པར་བགྱིད་པ་ལགས། སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནོར་ལྷ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་སྟེ། མོས་པ་ཆེ་ཞིང་འཇིགས་པ་མ་མཆིས་ལ། གཏོང་བ་དང་ལྡན་ཞིང་སྙིང་སྟོབས་ཕུན་སུམ་ཚོགས་པ་ལགས་ན་དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་ནོར་ལྷའི་སྐྱོན་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནོར་ལྷ་ནི་ཤིན་དུ་མཐའ་རིང་བ་སྟེ། རྒྱལ་པོ་ཆེན་པོ་མཁས་པས་ནི་ཤིན་དུ་མཐའ་རིང་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཧ་ཅང་མཐའ་རིངས་ཏེ་ལུས་ན་དོན་ཉམས་པར་འགྱུར་ཏེ། སྐྱོན་རྣམས་ཀྱང་བརྟན་པར་གྱུར་པས་ཞི་བར་མི་འགྱུར་བའི་སླད་དུ། རྒྱལ་པོ་ཆེན་པོ་དེ་ལྟ་ལགས་པས
52.67a
མཁས་པས་ཤིན་དུ་མཐའ་རིང་བར་མི་བགྱིའོ། །དེ་ལ་འདི་སྐད་ཅེས་བགྱི་སྟེ། ཤིན་དུ་མཐའ་རིང་ཤེད་བུ་ཡི། །དོན་རྣམས་ཐམས་ཅད་འཇིག་པར་འགྱུར། །མ་ཐོབ་པ་ནི་འཐོབ་མི་འགྱུར། །ཐོབ་པ་རྣམས་ཀྱང་ཉམས་པར་འགྱུར། །དེ་བས་མཐའ་རིང་སྤང་བགྱིས་ལ། །མཁས་པས་ཤིན་དུ་བསྒྲིམ་པར་བགྱི། །དུས་ཀྱི་འབྲས་བུ་བཀོང་བར་འགྱུར། །དེས་ན་དེ་ནི་འགྲིབ་པ་འཐོབ། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་སྡེ་ཆེན་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་མོས་པ་ཆེ་བ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་སྡེ་ཆེན་གྱི་སྐྱོན་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་སྡེ་ཆེན་ནི་ཧ་ཅང་བརྐམ་ཆགས་ཅན་ཏེ། མི་རིགས་པའི་འདོད་ཆེན་གྱི་ཟིལ་གྱིས་ནོན་ཅིང་གཞན་གྱི་ནོར་འཕྲོག་པ་སྟེ། རྒྱལ་པོ་ཆེན་པོ་མཁས་པས་ནི་ཧ་ཅང་འདོད་ཆེན་ཆེ་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་འདོད་ཆེན་ཆེ་བ་ནི་ཚེ་འདི་ཉིད་ལ་ཡང་སེམས་ཅན་རྣམས་ཀྱིས་ཡིད་བརྟན་དུ་མི་རུང་བ་ལགས་ལ། ལུས་ཞིག་ནས་ཀྱང་ངན་སོང་རྣམས་སུ་སྐྱེ་བར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། གང་ཞིག་སོགས་ལ་བརྩོན་གྱུར་ཅིང ། །ལོངས་སྤྱོད་ཐོབ་ཀྱང་དགར་མི་ཚོར། །གཞན་གྱི་ལོངས་སྤྱོད་འཕྲོག་བགྱིད་ཅིང ། །མི་རིགས་འདོད་ལྡན་སེམས་ཅན་གང ། །དེ་ནི་གུམ་ནས་ངན་སོང་མཆི། །ཚེ་འདིར་སྲོག་ཆགས་ཡིད་མི་མཆི། །དེ་བས་སྐྱེས་བུ་མཁས་པ་ཡིས། མི་རིགས་འདོད་ཆེན་ཡོངས་སུ་སྤང ། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། །དེ་ཡང་སྐྱོན་དང་བཅས་པར་གྱུར་པ་གཞན་ཡང
52.67b
ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ལྷ་ཆེན་པོ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ལགས་ན། །དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་ལྷ་ཆེན་པོའི་སྐྱོན་གང ། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ལྷ་ཆེན་པོ་ནི་རྒོད་ཅིང་ཅ་ཅོ་ཅན་མ་ཞི་བ་སྟེ། རྒྱལ་པོ་ཆེན་པོ་མཁས་པས་ནི་རྒོད་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་རྒོད་པ་ནི་ཞི་གནས་དང ། ལྷག་མཐོང་གི་བགེགས་སུ་འགྱུར་བའི་ཆོས་ལགས་པ་དང ། ངན་སོང་དུ་མཆི་བའི་རྒྱུར་གྱུར་པའི་སླད་དུའོ། །དེ་བས་ན་མཁས་པས་རྒོད་པར་མི་བགྱིའོ། །དེ་ལ་འདི་སྐད་ཅེས་བགྱི་སྟེ། རྒོད་པའི་དྲི་མར་བཅས་པའི་སེམས། །མཁས་པས་བསྔགས་པ་མ་ལགས་ཏེ། །སྡུག་བསྔལ་མཐར་ཕྱིན་ཏིང་ངེ་འཛིན། །བསྒྲིམས་ཀྱང་མི་འཐོབ་ག་ལ་ཐར། །ཡོན་ཏན་གྲགས་པ་འཇིག་བགྱིད་པའི། །རྒོད་པ་དེ་སླད་སྤང་བར་བགྱི། །སྐྱེས་བུ་དོན་ཆེན་འཚལ་བ་ལ། །འདི་དང་གཞན་དུ་འང་དེ་གནོད་འགྱུར། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་ཡུལ་ཀོ་ས་ལའི་རྒྱལ་པོ་གསལ་རྒྱལ་འདི་ནི་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ལགས་ན་དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་སྐྱོན་གང ། སྨྲས་པ། རྒྱལ་པོ་ཆེན་པོ་ཡུལ་ཀོ་ས་ལའི་རྒྱལ་པོ་གསལ་རྒྱལ་ནི་ཤིན་དུ་མང་དུ་ཟ་བ་སྟེ། རྒྱལ་པོ་ཆེན་པོ་མཁས་པས་ནི་ཤིན་དུ་མང་དུ་ཟ་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཤིན་དུ་མང་དུ་ཟ་བ་ནི་ལེ་ལོ་ཅན་དུ་འགྱུར། ལུས་ལྕི་བར་འགྱུར་དེའི་ཁ་ཟས་བདེ་བར་འཇུ་བར་མི་འགྱུར། ཚེ་འདི་དང་ཕ་རོལ་གྱི་དོན་རྣམས་ཀྱང
52.68a
ཡོངས་སུ་འགྲིབ་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། སྐྱེས་བུ་གང་ཞིག་མང་ཟ་བ། །དེ་ནི་ལུས་ལྕི་ལེ་ལོ་ཅན། །འདི་དང་ཕ་རོལ་ཚེ་ཡི་དོན། །ངེས་པར་རབ་ཏུ་འགྲིབ་པར་འགྱུར། །དེ་ནི་སད་ན་འང་སྡུག་བསྔལ་ཏེ། ཉལ་ན་འང་སྡུག་བསྔལ་གཞན་གནོད་བགྱིད། །དེ་བས་ཕན་དང་རན་པར་བཟའ། །ཟས་ཀྱི་དུས་ནི་ངེས་པར་བགྱི། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་འཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་ཁྱོད་ཀྱང་འཛངས་ཤིང་མཁས་ལ་བརྟགས་ཤིང་ཡིད་གཞུངས་ལ་མོས་པ་ཆེ་ཞིང་འཇིགས་པ་མ་མཆིས་ལ་གཏོང་བ་དང་ལྡན་ཞིང་ཐུགས་སྟོབས་ཕུན་སུམ་ཚོགས་པ་ལགས་ན། ཁྱོད་ཀྱང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་ངའི་སྐྱོན་གང་ཡིན། སྨྲས་པ། རྒྱལ་པོ་ཆེན་པོ་ཁྱོད་ནི་ཤིན་དུ་གཏུམ་མོ། །རྒྱལ་པོ་ཆེན་པོ་ཁྱོད་ནི་ཤིན་དུ་ཁྲོའོ། །རྒྱལ་པོ་ཆེན་པོ་ཁྱོད་ནི་ཤིན་དུ་བརླང་ངོ ། །རྒྱལ་པོ་ཆེན་པོ་ཁྱོད་ནི་ཤིན་དུ་རྩུབ་བོ། །རྒྱལ་པོ་ཆེན་པོ་ཁྱོད་ནི་ཤིན་དུ་གཟུ་ལུམས་ཆེའོ། །རྒྱལ་པོ་ཆེན་པོ་མཁས་པས་ནི་ཤིན་དུ་གཏུམ་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་རྒྱལ་པོ་འམ། རྒྱལ་པོའི་བློན་པོ་ཤིན་དུ་གཏུམ་པ་གང་ལགས་པ་དེ་ལ་ནི་སྐྱེ་བོ་མང་པོ་མི་དགའ་བར་འགྱུར་བ། ལགས་ཏེ་བདག་གི་ཕ་མ་ལ་ཡང་མི་སྡུག་པ་ལགས་ན་གྲོང་རྡལ་གྱི་མི་དང་ཡུལ་གྱི་མི་གཞན་ལ་ལྟ་ཅི་སྨོས་པའི་སླད་དུ་སྟེ། །རྒྱལ་པོ་ཆེན་པོ་དེ་ལྟ་ལགས་པས་མཁས་པས་ཤིན་དུ་གཏུམ་པར་མི་བགྱིའོ། །རྒྱལ་པོ་ཆེན་པོ་མཁས་པས་ནི་ཕྱི་རྗེས་རིང་དུ་བལྟ་བར་བགྱིའོ། །དེ་ལ་འདི་སྐད་ཅེས་བགྱི་སྟེ། རྒྱལ་པོ་གང་ཞིག་གཏུམ་གྱུར་ལ། །ཁྲོ་དབང་དགོས་པ་ཁྱད་གསོད་པ། །དེ་ནི་རང་གི་ཕ་མ་ཡང ། །ཤིན་དུ་སྐྱོ་བར་བགྱིད་པ་ལགས། །སྐྱེ་བོ་གཞན་ལྟ་ཅི་སྨོས་ཏེ། །སྐད་ཅིག་ཙམ་ཡང་ག་ལ་དགའ། །དེ་བས་མཁས་པས
52.68b
ནན་ཏན་དུ། །ཁྲོ་བ་ཡོངས་སུ་སྤང་བར་བགྱི། །དེ་ནས་རྒྱལ་པོ་གཏུམ་པོ་རབ་སྣང་གིས་མངོན་སུམ་དུ་བདག་ལ་མི་སྙན་པར་རྗོད་པ་དེ་ལྟ་བུ་ཐོས་ནས་ཁྲོས་འཁྲུགས་ཏེ། ཡིད་མ་རངས་ཤིང་ཚིག་པ་ཟ་བར་གྱུར་ནས། གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་ཁྱོད་ཀྱིས་འཁོར་འདི་ལྟ་བུའི་མདུན་དུ་ང་ལ་དེ་སྐད་ཀྱི་མི་སྙན་པ་བྱ་འམ། དེ་བས་ན་ཁྱོད་ནི་གསད་པ་འོས་པའོ་ཞེས་བྱས་ནས། དེས་ཁྲོས་པའི་སེམས་ཀྱིས་དགེ་སྦྱོང་འདི་ནི་རྒྱལ་པོ་ལ་ངན་དུ་སྨྲ་བ་ཡིན་གྱིས་སོད་ཅིག་ཅེས་ཚིག་ཕྱུང་བར་གྱུར་ཏོ། །དེ་ནས་གཅེར་བུ་པའི་བུ་བདེན་སྨྲ་འཇིགས་ཤིང་སྐྲག་སྟེ། རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེ་ལྟར་གཟུ་ལུམས་མ་མཛད་པར་རྒྱལ་པོ་ཆེན་པོ་བདག་ལ་མི་འཇིགས་པ་སྩལ་དུ་གསོལ། གསོལ་བ་འདི་ཡང་གསན་དུ་གསོལ། སྨྲས་པ། བདེན་སྨྲ་མི་འཇིགས་པ་སྦྱིན་གྱིས་ཅི་གསོལ་སྨྲོས་ཤིག་།སྨྲས་པ། རྒྱལ་པོ་ཆེན་པོ་བདག་ཀྱང་སྐྱོན་དང་བཅས་པ་ལགས་སོ། །སྨྲས་པ། ཁྱོད་ཀྱི་སྐྱོན་གང ། སྨྲས་པ། རྒྱལ་པོ་ཆེན་པོ་ཁྱོད་དེ་ལྟར་གཏུམ་པ། དེ་ལྟར་ཁྲོ་བ། དེ་ལྟར་ཞེ་སྡང་བ། དེ་ལྟར་གཟུ་ལུམས་ཅན་གྱི་སྤྱན་སྔར་བདག་འདི་ལྟར་ཡང་དག་པ་ཇི་ལྟ་བ་བཞིན་དུ་སྨྲ་བ་ནི་བདག་ཀྱང་ཧ་ཅང་ངོར་རོ་བར་སྨྲ་བ་ལགས་ཏེ། བདག་ནི་དེ་ཁོ་ན་སྨྲ་བར་གྱུར་ཏོ། །རྒྱལ་པོ་ཆེན་པོ་མཁས་པས་ནི་དུས་ཐམས་ཅད་དུ་ཡང་དག་པ་ཇི་ལྟ་བ་བཞིན་དུ་སྨྲ་བར་མི་བགྱིའོ། །རྒྱལ་པོ་ཆེན་པོ་མཁས་པས་ནི་དུས་དང་དུས་མ་ལགས་པ་དང ། ཡུལ་དང་ཡུལ་མ་ལགས་པ་འཚལ་བར་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཡང་དག་པར་སྨྲ་བ་ནི་འཇིག་རྟེན་ཡིད་མི་བདེ་ཞིང་མི་དགའ་བར་འགྱུར་ཏེ། དེས་པ་རྣམས་ཀྱིས་མི་བསྔགས་ཤིང་གླེན་པའི་སྐྱེ་བོ་རྣམས་ཞེ་སྡང་བར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། གང་ཞིག་ཡང་དག་སྨྲ་བགྱིད་ཅིང ། །སྨྲ་དུས་དུས་མིན་མ་འཚལ་བ། །དེ་ནི་མཁས་པས་སྨད་འགྱུར་ན། །འཇིག་རྟེན་གཞན་ལྟ་ཅི་ཞིག་སྨོས། །དེ་བས་བདེན་པའི་ཚིག་ལགས་ཀྱང ། །བློ་ལྡན
52.69a
ཀུན་དུ་སྨྲ་མི་བགྱི། །བདག་ཀྱང་འདིར་ནི་འདི་ལྟ་བུར། །བདེན་སྨྲས་རང་ལ་གནོད་པར་གྱུར། །ཡོན་ཏན་དང་སྐྱོན་བསྟན་པའི་ལེའུ་སྟེ། བརྒྱད་པའོ།། །།དེ་ནས་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་བདེན་སྨྲའི་ལེགས་པར་བཤད་པས་མགུ་སྟེ། རྗེས་སུ་ཡི་རང་ནས་ཡང་དྲི་བ་གཞན་དག་དྲིས་སོ། །བྲམ་ཟེ་ཡང་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཁས་ཤིང་འཛངས་ལ་བརྟགས་ཤིང་ཡིད་གཞུངས་ལ། ཚུལ་དང་འདུལ་བའི་ཆོ་ག་ལ་མཁས་པ་ཡང་ཡིན་ལ། དེ་ལ་སྐྱོན་ཡང་མེད་པ་དེ་ལྟ་བུ་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང ། སྨྲས་པ། རྒྱལ་པོ་ཆེན་པོ་དགེ་སྦྱོང་གཽ་ཏ་མ་ནི་ཤཱཀྱའི་རིགས་ལས་རབ་ཏུ་བྱུང་བ་དེ་ནི་བདག་ཅག་གི་རིག་བྱེད་ལས་འབྱུང་བ་བཞིན་དུ་སྐྱོན་མ་མཆིས་པ་སྟེ། དེ་ནི་རིགས་ཀྱི་ཆེ་བ་ཉིད་ཀྱིས་སྐྱོན་གདགས་པར་མི་ནུས་ཏེ། འདི་ལྟར་འཁོར་ལོས་སྒྱུར་བའི་རིགས་སུ་བྱུང་བའོ། །དེ་ནི་རྒྱུད་ལས་སྨོས་ནས་སྐྱོན་གདགས་སུ་མི་ནུས་ཏེ། འདི་ལྟར་བུ་རམ་ཤིང་པའི་རིགས་ཀྱི་རྒྱུད་དུ་བྱུང་བའོ། །དེ་ནི་ལུས་ཀྱི་ཆེ་བ་ཉིད་ཀྱིས་ཀྱང་སྐྱོན་གདགས་སུ་མི་ནུས་ཏེ། འདི་ལྟར་མཚན་དང་དཔེ་བྱད་བཟང་པོས་ལེགས་པར་བརྒྱན་པའི་ལུས་དང་ལྡན་པའོ། །དེ་ནི་ཆོས་དང་བཅས་པར་སྐྱོན་གདགས་སུ་མི་ནུས་ཏེ། འདི་ལྟར་ཚུལ་ཁྲིམས་དང ། སྟོབས་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་དང་ལྡན་པས་དེའི་སླད་དུ་དེ་ནི་སྐྱོན་མ་མཆིས་པ་ལགས་སོ། །རྒྱལ་པོ་ཆེན་པོ་གལ་ཏེ་དགེ་སྦྱོང་གཽ་ཏ་མ་དེ་ཁྱིམ་ནས་ཁྱིམ་མ་མཆིས་པར་རབ་ཏུ་མ་བྱུང་ན་ནི་དེ་རྒྱལ་པོ་འཁོར་ལོས་སྒྱུར་བ། མཐའ་བཞིར་རྣམ་པར་རྒྱལ་བ། ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་དུ་གདོན་མ་འཚལ་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བདུན་པ་བློན་པོ་རིན་པོ་ཆེ་ལགས་སོ། །
52.69b
དེ་ལ་སྲས་ཀྱང་སྟོང་ཐམ་པ་མངའ་བར་འགྱུར་དུ་གདོན་མ་འཚལ་ཏེ། དཔའ་བ་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ། འཁོར་ལོས་སྒྱུར་བའི་མཚན་དང་ལྡན་པ་ཤ་སྟག་འབྱུང་བར་འགྱུར་དུ་གོར་མ་བཀུམ་མོ། །དེ་ནི་གླིང་བཞི་པའི་འཇིག་རྟེན་གྱི་ཁམས་འདིར་གཅིག་པུ་སྤྱོད་པའི་དབང་སྒྱུར་བར་འགྱུར་ཞིང་གཞན་གྱི་དྲིང་མི་འཇོག་པར་འགྱུར་དུ་གདོན་མ་འཚལ་ཏེ། དེས་ས་ཆེན་པོ་མ་ལུས་པ་གནོད་པར་སྡོ་བ་མ་མཆིས་ཤིང་འཚེ་བ་མ་མཆིས་པ་འདི་ཉིད་ཆད་པ་མ་མཆིས་ཤིང་མཚོན་གྱིས་བདའ་བ་མ་མཆིས་ལ། ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་དུ་གདོན་མ་འཚལ་བ་ཞིག་ན། དེ་ཁྱིམ་ནས་ཁྱིམ་མ་མཆིས་པར་རབ་ཏུ་བྱུང་ནས་བརྟུལ་ཞུགས་དང་དཀའ་ཐུབ་ཆེན་པོ་བརྩམས་ཏེ། རྒྱ་ཤུག་གི་འབྲས་བུ་འམ། ཏིལ་གྱི་འབྲུམ་བུ་འམ། འབྲས་ཀྱི་འབྲུ་འགས་ལོ་དྲུག་འདས་པར་བགྱིས་ཏེ། བྱང་ཆུབ་ཀྱི་ཤིང་དྲུང་དུ་བཞུགས་ནས། བདུད་ཀྱི་སྡེ་དཔུང་དང་བཅས་པ་རབ་ཏུ་ཕམ་པར་བགྱིས་ཏེ། སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཤེས་པར་བགྱི་བ་དང ། ཐོབ་པར་བགྱི་བ་དང ། མཐོང་བར་བགྱི་བ་དང ། ཁོང་དུ་ཆུད་པར་བགྱི་བ་དང ། མངོན་དུ་བགྱི་བ་གང་ཅི་ཡང་རུང་བ་དེ་ཐམས་ཅད་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ། དེ་དང་མཉམ་པའི་སེམས་ཅན་ཡང་འཇིག་རྟེན་ན་མ་མཆིས་ན། དེའི་གོང་དུ་ཕྱིན་པ་ལྟ་ག་ལ་མཆིས་ཏེ། དགེ་སྦྱོང་གཽ་ཏ་མ་ནི་མི་མཉམ་པ་དང་མཉམ་ཞིང་ཟླ་གང་ཡང་མ་མཆིས་པ་སྟེ། དེའི་སླད་དུ་དེ་ནི་སྐྱོན་མ་མཆིས་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དགེ་སྦྱོང་གཽ་ཏ་མ་དེ་ནི་རིགས་དང ། རྒྱུད་ཀྱིས་འདྲ་བ་མ་མཆིས་པ་དང ། གཟུགས་ཀྱི་ཆེ་བ་ཉིད་ཀྱིས་འདྲ་བ་མ་མཆིས་པ་དང ། ཡེ་ཤེས་ཀྱི་ཆེ་བ་ཉིད་ཀྱིས་མཚུངས་པ་མ་མཆིས་པའི་སླད་དུ་སྟེ། དེའི་སླད་དུ་དེ་སྐྱོན་མ་མཆིས་པ་ལགས་སོ། །དེ་ལ་འདི་སྐད་ཅེས་བགྱི་སྟེ། རིགས་དང་རྒྱུད་དང་གཟུགས་དང་ལྡན། །མཚན་རྣམས་ཀྱིས
52.70a
ནི་འབར་བའི་སྐུ། །དཔེ་བྱད་བཟང་པོ་བརྒྱད་བཅུས་ཀྱང ། །ཐུབ་པའི་ཟླ་བ་མངོན་པར་བརྒྱན། །མུ་སྟེགས་ཚོགས་རྣམས་ཟིལ་མནན་ཏེ། །ལོ་དྲུག་ཡུན་རིང་དཀའ་ཐུབ་སྤྱད། །བདུད་ཀྱང་བཏུལ་བ་མཛད་ནས་སུ། །བདེ་གཤེགས་ཐམས་ཅད་མཁྱེན་ཉིད་བརྙེས། །སེམས་ཅན་མེད་ཅིང་སྲོག་མེད་ཆོས། །འཕགས་པའི་བདེན་བཞི་ཕུན་ཚོགས་པ། །དྲང་སྲོང་ལྷུང་བར་དེས་བཤད་པས། །དེ་སླད་དེ་ལ་སྐྱོན་མ་མཆིས། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ་ཆེན་པོ་དགེ་སྦྱོང་གཽ་ཏ་མ་དེ་མཚན་གང་དག་དང་ལྡན་ན་མཚན་གྱིས་ལེགས་པར་བརྒྱན་པའི་སྐུ་དང་ལྡན་པ་ཞེས་བྱ་བ་དེ་བཞིན་གཤེགས་པ་སྐྱེས་བུ་ཆེན་པོ་སེང་གེ་དེའི་མཚན་སུམ་བཅུ་རྩ་གཉིས་པོ་དེ་དག་གང་ཡིན། དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེའི་སླད་དུ་གསན་དུ་གསོལ། །བརྗོད་པར་བགྱིའོ། །རྒྱལ་པོ་ཆེན་པོ་འདི་ལྟ་སྟེ། དགེ་སྦྱོང་གཽ་ཏ་མ་དེ་ནི་ཞབས་ཤིན་དུ་གནས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཕྱག་དང་ཞབས་ཀྱི་མཐིལ་འཁོར་ལོ་རྩིབས་སྟོང་དང་ལྡན་པ་མངའ་བའོ། །དགེ་སྦྱོང་གཽ་ཏ་མ་དེ་ནི་ཕྱག་དང་ཞབས་དྲ་བར་འབྲེལ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཕྱག་དང་ཞབས་འཇམ་ཞིང་གཞོན་ཤ་ཆགས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སོར་མོ་རིང་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་བདུན་མཐོ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཞབས་ཀྱི་རྟིང་པ་ཡངས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཞབས་ལོང་མོའི་ཚིགས་མི་མངོན་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་བྱིན་པ་རི་དགས་ཨེ་ན་ཡའི་ལྟ་བུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་བརླ་ཟླུམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་བཞེངས་བཞིན་དུ་མ་བཏུད་པར་ཕྱག་པུས་མོར་སླེབས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་མདོམས་ཀྱི་སྦ་བ་སྦུབས་སུ་ནུབ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྤུ་རེ་རེ་ནས་སྐྱེ་བ་དང་ལྡན་པའོ། །དགེ་སྦྱོང
52.70b
གཽ་ཏ་མ་དེ་ནི་དབུ་སྐྲ་མཐོན་མཐིང་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་དབུ་སྐྲ་གཡས་ཕྱོགས་སུ་འཁྱིལ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྐུའི་སྤུ་གྱེན་དུ་འཁྱིལ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ལྤགས་པ་འཇམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ལྤགས་པ་གསེར་གྱི་ཁ་དོག་ལྟ་བུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་དཔུང་མགོ་ཤིན་དུ་ཟླུམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཐལ་གོང་རྒྱས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྐུ་ཆེ་ཞིང་དྲང་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་འགྲམ་པ་སེང་གེའི་འདྲ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་བཞི་བཅུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་ཐགས་བཟང་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་མཉམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་ཤིན་དུ་དཀར་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་རོ་བྲོ་བ་མཆོག་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ལྗགས་ཤིན་དུ་རིང་ཞིང་སྲབ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚངས་པའི་དབྱངས་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྤྱན་གྱི་རྫི་མ་བའི་ལྟ་བུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྤྱན་མཐོན་མཐིང་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚོགས་ཡོངས་སུ་རྫོགས་པའི་མཛོད་སྤུ་དང་ལྡན་པའོ། །རྒྱལ་པོ་ཆེན་པོ་འདི་དག་ནི་དགེ་སྦྱོང་གཽ་ཏ་མའི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་དག་སྟེ། དེ་དག་དང་ལྡན་པས་དགེ་སྦྱོང་གཽ་ཏ་མ་དེ་མཚན་གྱིས་ལེགས་པར་བརྒྱན་པའི་སྐུ་དང་ལྡན་ཞེས་བགྱི་སྟེ། དེའི་སླད་དུ་དེ་སྐྱོན་མ་མཆིས་པ་ལགས་སོ། །དེ་ལ་འདི་སྐད་ཅེས་བགྱི་སྟེ། སྤྱི་བོ་གཙུག་ཏོར་མཛེས་པས་རྣམ་པར་བརྒྱན། །དབུ་སྐྲ་མཐོན་མཐིང་གཡས་སུ་འཁྱིལ་བ་མངའ། །རྫི་མ་བའི་འདྲ་ཨུད་པལ་མཆོག་གི་སྤྱན། །དེ་བས་འདི་ན་རྒྱལ་བ་སྐྱོན་མ་མཆིས། །ཚངས་པ་ཀ་ལ་པིང་ཀ་མཆོག་གི་དབྱངས། །པད་མའི་འདབ་ལྟར་དྲི་མེད་ཡངས་པའི་ལྗགས། །དེ་ཡི་ལྗགས་ཀྱང་ཞལ་ཀུན་ཁེབས་པ་སྟེ། །དེ་བས་དེ་འདྲའི་སེམས་ཅན་འགའ་མ་མཆིས། །རོ་མཆོག་གཅིག་ཀྱང་ཐམས་ཅད་རོ་ལྡན་པར། །མཚན་རབ་དེ་ཡིས་རབ་ཏུ་མྱུར
52.71a
འགྱུར་ཏེ། །རྒྱལ་བའི་ལྗགས་ནི་དེ་དང་ལྡན་པས་ན། །དེ་བས་འདི་ན་རྒྱལ་བ་སྐྱོན་མ་མཆིས། །ཚེམས་ཀྱི་ཡོན་ཏན་མཉམ་མེད་མཉམ་པ་སྟེ། །དེ་ཡི་ཚེམས་ནི་བཞི་བཅུ་ཐམ་པ་ཚང ། །དེས་ནི་འཇིག་རྟེན་ལྷར་བཅས་ཐམས་ཅད་ཀྱང ། །བདེ་གཤེགས་དེ་ལ་དགའ་འགྱུར་ངོ་མཚར་འཐོབ། །སེང་གེའི་ཟ་འགྲམ་སྒྲོས་ནི་བིམ་པའི་མཆོག་།མཚུངས་མེད་ཐལ་གོང་ཤིན་དུ་རྒྱས་དང་ལྡན། །དཔུང་མགོ་ཤིན་དུ་ཟླུམ་ཞིང་མཛེས་པར་ལྡན། །དཔལ་ལྡན་ཤིང་ལྟར་ཆུ་ཞེང་གབ་པའི་སྐུ། །དཔེ་ལེགས་སྐུ་ནི་ཡངས་ཤིང་རྐྱེན་དུ་འབབ། །ཡིད་ཅན་ཀུན་ལ་སྡུག་པའི་སྐུ་ཡང་མངའ། །ཐུབ་པ་དཔའ་བོ་མཐོ་བ་བདུན་དང་ལྡན། །ལྤགས་པའི་མདོག་ནི་གསེར་མཆོག་བཙོ་མ་འདྲ། །ཤིན་དུ་འཇམ་སྐུ་སྤུ་ནི་གྱེན་དུ་འཁྱིལ། །སྡུག་ཅིང་མི་སྲབ་མཐོན་མཐིང་དྲི་མེད་དབུ། །དབུ་འཇམ་གཡས་སུ་འཁྱིལ་དང་ལྡན་པ་སྟེ། །དེ་བས་བདེ་གཤེགས་མཉམ་པ་འགའ་མ་མཆིས། །བདེ་བར་གཤེགས་ནི་མ་བཏུད་བཞུགས་དང་ལྡན། །མདོམས་སྦ་མི་གདའ་གླང་པོའི་རྒྱལ་པོ་བཞིན། །བརླ་ཟླུམ་བྱིན་པ་ཨེ་ན་ཡ་ཡི་འདྲ། །བདེ་གཤེགས་དེ་ལ་ཡིད་ཅན་སུ་མི་སྟེན། །ཕྱག་དང་ཞབས་ཀྱི་སོར་མོ་དྲ་བས་འབྲེལ། །སེན་མོ་ཟངས་མདོག་སོར་མོ་ལེགས་པར་ཟླུམ། །དུང་ལྟར་མཐོ་བའི་ཞབས་ལྡན་མཉམ་པའི་ཞབས། །རྟིང་པ་ཡངས་ཤིང་མཉམ་པ་དྲང་སྲོང་མཆོག་།ཕྱག་དང་ཞབས་ལ་འཁོར་ལོ་འཇམ་པ་མངའ། །དྲང་སྲོང་ཆེན་པོ་སོར་མོ་རིང་དང་ལྡན། །ཐུབ་པའི་དབང་པོ་ཞབས་མཐིལ་ཤིན་དུ་གནས། །དེས་ནི་ས་ལ་མི་གཡོའི་སྐུར་བཞུད་དེ། །འདི་ནི་དྲང་སྲོང་ཆེན་པོའི་མཚན་གྱི་ཚོགས། །དེ་ཡིས་བརྒྱན་སྐུ་ཤིན་དུ་མཛེས་པར་གདའ། །མཉམ་མེད་འཁོར་གྱི་ནང་ན་བཞུགས་པའི་ཚེ། །སྐར་ཚོགས་མང་དབུས་ཟླ་བ་གནས་པ་བཞིན། །སྐྱེས་བུ་ཆེན་པོའི་སྐུ་མཆོག་གཟུགས་དེ་ཡང ། །འགྲོ་བ་ཀུན་དུ་དེ་བཞིན་ཤིན་དུ་གདའ། །བདེ་བར་གཤེགས་པའི་ཡོན་ཏན་དྲི་མེད་ཆོས། །གང་ལགས་དེ་ཀུན་ཐུབ་པ་ཉིད་གསུང་གྲང ། །སྨྲས་པ། བྲམ་ཟེ་ཅིའི་ཕྱིར
52.71b
ན་དགེ་སྦྱོང་གཽ་ཏ་མ་དེ་བསོད་ནམས་བརྒྱ་པའི་མཚན་དང་ལྡན་ཞེས་བྱ། སྨྲས་པ། རྒྱལ་པོ་ཆེན་པོ་དེའི་སླད་དུ། དོན་འདི་ཉིད་རབ་ཏུ་བསྒྲུབ་པའི་སླད་དུ་དཔེ་གསོལ་བར་འཚལ་ལོ། །རྒྱལ་པོ་ཆེན་པོ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་སྐྱེ་གནས་བཞིས་ཡོངས་སུ་ཟིན་པ་གང་ཇི་སྙེད་ཅིག་མཆིས་པ་དེ་དག་ཐམས་ཅད་ཡོངས་སུ་བརྟག་པ་ཉེ་བར་བཟུང་སྟེ། མིའི་ལུས་ཐོབ་པར་གྱུར་ལ། མིའི་ལུས་ཐོབ་པ་དེ་དག་རེ་རེ་ཞིང་འཁོར་ལོས་སྒྱུར་བའི་བསོད་ནམས་དང་ལྡན་པར་གྱུར་ལ། འཁོར་ལོས་སྒྱུར་བའི་བསོད་ནམས་དང་ལྡན་པའི་སེམས་ཅན་དེ་དག་ཐམས་ཅད་ཀྱི་བསོད་ནམས་ཀྱི་ཕུང་པོ་གང་ལགས་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་སྤུའི་ཁུང་བུ་གཅིག་མངོན་པར་འགྲུབ་སྟེ། དེ་བཞིན་དུ་སྤུའི་ཁུང་བུ་རེ་རེ་ཡོངས་སུ་གྲུབ་བོ། །སྤུའི་ཁུང་བུ་ཐམས་ཅད་དུ་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་དཔེ་བྱད་བཟང་པོ་གཅིག་མངོན་པར་འགྲུབ་སྟེ། དེ་བཞིན་དུ་དཔེ་བྱད་བཟང་པོ་རེ་རེ་ཡོངས་སུ་འགྲུབ་བོ། །དཔེ་བྱད་བཟང་པོ་ཐམས་ཅད་དུ་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་སྐྱེས་བུ་ཆེན་པོའི་མཚན་གཅིག་མངོན་པར་འགྲུབ་སྟེ། དེ་བཞིན་དུ་མཚན་སུམ་བཅུ་རེ་རེ་ནས་ཡོངས་སུ་འགྲུབ་བོ། །མཚན་སུམ་བཅུར་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་སྐྱེས་བུ་ཆེན་པོའི་མཚན་དབུ་གཙུག་ཏོར་དང་ལྡན་པ་མངོན་པར་འགྲུབ་བོ། །དབུ་གཙུག་ཏོར་དུ་གཏོགས་པའི་བསོད་ནམས་ཀྱི་ཕུང་པོ་དེ་ལས་བྱེ་བ་ཕྲག་འབུམ་དུ་བསྒྱུར་བའི་བསོད་ནམས་ཀྱི་ཕུང་པོས་དགེ་སྦྱོང་གཽ་ཏ་མའི་ཆོས་ཀྱི་དུང་མངོན་པར་འགྲུབ་སྟེ། ཆོས་ཀྱི་དུང་དེ་དང་ལྡན་པས་དགེ་སྦྱོང་གཽ་ཏ་མ་དེ་བཞེད་ན། འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་སེམས་ཅན་དུ་བསྡུས་པའི་སེམས་ཅན་གང་དག་གནས་པ་དེ་དག་ཐམས་ཅད་ཀྱིས་གལ་ཏེ་རྣམ་པ
52.72a
སྣ་ཚོགས་སུ་སྨྲས་པ། དགེ་སྦྱོང་གཽ་ཏ་མ་ལ་དུས་གཅིག་ཏུ་དྲི་བ་དྲིས་ཏེ། གཅིག་གིས་གང་དྲིས་པ་དེ་གཉིས་པ་མི་འདྲི་བར་སོ་སོ་ནས་དྲིས་ཀྱང་དེ་དག་ཐམས་ཅད་དགེ་སྦྱོང་གཽ་ཏ་མ་དེ་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བཟུང་ཞིང་གསུང་གཅིག་གིས་སེམས་ཅན་དེ་དག་གིས་ཇི་སྐད་དུ་དྲིས་པའི་དྲི་བ་དེ་དག་གི་ལན་གློན་ཞིང་སེམས་ཅན་དེ་དག་གིས་ཀྱང་རང་རང་གི་སྐད་དུ་འཚལ་བར་འགྱུར་ཏེ། རྒྱལ་པོ་ཆེན་པོ་དེའི་སླད་དུ་དགེ་སྦྱོང་གཽ་ཏ་མ་དེ་ནི་བསོད་ནམས་བརྒྱ་པའི་མཚན་དང་ལྡན་པ་དང ། ཚངས་པའི་སྒྲ་དབྱངས་ཀྱི་གསུང་དང་ལྡན་པ་ཞེས་བགྱིའོ། །དེ་ལ་འདི་སྐད་ཅེས་བགྱི་སྟེ། བསོད་ནམས་བརྒྱ་པའི་མཚན་དང་ལྡན་པས་ན། །ལྷར་བཅས་འཇིག་རྟེན་ནང་ན་བསོད་ནམས་གཏེར། །མཐོང་དང་ཐོས་དང་བཞེས་པ་མཛད་པས་ཀྱང ། །སེམས་ཅན་ཀུན་ལ་ཕན་པ་མཛད་པ་ལགས། །འདི་ལྟར་སེམས་ཅན་ཀུན་གྱིས་ངེས་པའི་ཚིག་།མང་པོ་དག་གིས་དུས་གཅིག་ཞུས་ཞུས་ན། །སེམས་ཀྱི་སྐད་ཅིག་གཅིག་ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཡང་འདེབས། །དེ་ལྟ་བས་ན་འདྲེན་པ་འཇིག་རྟེན་ན། །ཚངས་པའི་སྒྲ་དབྱངས་གསུང་སྒྲོག་མཁྱེན་པར་མཛོད། །དེ་ནི་ལྷ་མི་སྡུག་བསྔལ་མཐར་འབྱིན་པའི། །ཆོས་ཀྱི་འཁོར་ལོ་རབ་ཏུ་བསྐོར་བར་མཛད། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་ཚིགས་སུ་བཅད་དེ་དྲིས་པ། གང་རྣམས་ཁྱོད་ཀྱིས་སྔར་བཤད་དེ། །དཔེ་བྱད་བཟང་པོ་ཡོད་སྨྲས་པ། །ཐུབ་པའི་དཔེ་བྱད་བཟང་པོ་གང ། །བྲམ་ཟེ་ཆེན་པོས་བརྗོད་པར་གྱིས། །དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས། རྒྱལ་པོ་གཏུམ་པོ་རབ་སྣང་ལ་ཚིགས་སུ་བཅད་དེ་སླར་སྨྲས་པ། གང་དག་གིས་ན་ཐུབ་པ་དེ་ཡི་སྐུ། །དཔེ་བྱད་བཟང་པོ་བརྒྱད་བཅུ་ལྡན་བརྗོད་པ། །བདེ་གཤེགས་དཔེ་བྱད་བཟང་པོ་བརྒྱད་བཅུ་རྣམས། །བཤད་པར་འཚལ་གྱིས་རྒྱལ་པོ་གསན་དུ་གསོལ། །སེན་མོ་མཐོ་ཞིང་སེན་མོ་ཟངས་མདོག་འདྲ། །སེན་མོ་སྣུམ་ཞིང་ཕྱག་གི་སོར་མོ་མཉམ། །སོར་མོ
52.72b
ཟླུམ་ཞིང་སོར་མོ་རྒྱས་པ་སྟེ། །སོར་མོ་རྣམས་ནི་བྱིན་གྱིས་ཕྲ་བ་ལགས། །རྩ་རྣམས་མི་མངོན་སྒྲོས་ནི་བིམ་པ་འདྲ། །ཞབས་གཉིས་མཉམ་ཞིང་ལོང་བུ་མི་མངོན་ལགས། །ཕྱག་གི་རི་མོ་བྱིན་གྱིས་ཕྲ་བ་སྟེ། །རི་མོ་རྣམས་ནི་ཟབ་ཅིང་ཤིན་དུ་གསལ། །ལྗགས་ནི་ཟངས་མདོག་ཤིན་དུ་མཉེན་ཞིང་འཇམ། ཚིགས་རྣམས་མི་མངོན་ཕྱག་ནི་ཤིན་དུ་རིང ། །གླང་པོས་སྒྲ་བསྒྲགས་ལྟ་བུའི་གསུང་དང་ལྡན། །འབྲུག་སྒྲ་འདྲ་བར་སྙན་པའི་འཇམ་དབྱངས་ཅན། །སྐུ་ནི་སྙོམས་ཤིང་གསལ་ལ་ཤིན་དུ་མཁྲེགས། །ཤིན་དུ་ལེགས་སྐུ་ཕྱག་གི་སོར་མོ་སྣུམ། །སྐུ་ཡི་དངོས་པོ་ཤིན་དུ་གཙང་དང་ལྡན། །རྒྱལ་བའི་ཟླ་བ་སྐུ་ཡིས་ཤིན་དུ་བཙུན། །སྐུ་ནི་ཤིན་དུ་མཉམ་པར་བཞག་པ་སྟེ། །ཡན་ལག་རབ་འབྱེས་ནག་ནོག་མ་མཆིས་སྐུ། །སྐུ་ཡི་རོ་སྟོད་རྒྱས་ཡངས་ཤིན་དུ་མཁྲེགས། །དཔེ་བྱད་བཟང་པོ་རྣམས་ནི་ཡོངས་སུ་རྫོགས། །སྐུ་ནི་རིམ་གྱིས་རྒྱས་ཤིང་ཤིན་དུ་མཛེས། །སྤྱོད་པ་གཙང་ལྡན་ཤིན་དུ་འཇམ་པའི་སྐུ། །ལྟེ་བའི་ཁུང་བུ་ནག་ནོག་མ་མཆིས་ལ། །ཡོངས་སུ་རྫོགས་ཤིང་ཤིན་དུ་ཟབ་དང་ལྡན། །འོད་ནི་ནག་ནོག་མ་མཆིས་ཡོངས་སུ་དག་།སྐུ་ནི་ཀུན་ནས་བཟང་ཞིང་ཤིན་དུ་མཁྲེགས། །དེ་ནི་ཀུན་ནས་བཟང་དང་ཤིན་དུ་ལྡན། །མགོན་པོའི་སྐུ་ནི་བལྟ་བས་ཆོག་མི་མྱོང ། །བལ་གླང་འདྲ་བར་བརྗིད་པའི་འགྲོས་སུ་གཤེགས། །ཁྱུ་མཆོག་འགྲོས་དང་སེང་གེ་ངང་པའི་འགྲོས། །གསུང་ནི་ཧ་ཅང་མཐོ་བ་མ་ལགས་ལ། །བཟང་བའི་སྐུ་མངའ་འཇམ་ཞིང་སྣུམ་པའི་སྐུ། །ཕྱག་ནི་ཤིན་དུ་ཟླུམ་ཞིང་འཇམ་ལ་མཛེས། །གཡས་ནས་གཤེགས་ཤིང་གཤེགས་ཐབས་མཛེས་ལ་བཟང ། །ཤིན་དུ་ཕྱང་ངེར་གནས་པའི་ཕྱལ་དང་ལྡན། །འདོད་དང་འཇིགས་མེད་ནག་ནོག་མེད་པའི་སྐུ། །སྨིན་མ་གནག་ཅིང་ཤིན་དུ་གཟངས་རིང་མཛེས། །ཕྱལ་ནི་མ་ཞོམ་སྤྱན་གྱི་དཀྱུས་ཀྱང་རིང ། །ཞལ་ནི་རབ་ལེགས་གཙང་མའི་སྤྱན་དང་ལྡན། །དྲི་མེད་སྤྱན་མངའ་སྤྱན་ནི་ཤིན་དུ་ཡངས། །ཚེམས་ཀྱི་མཆེ་བ་བྱིན་གྱིས་གྱེན་དུ་འཕགས། །སྨིན་ཚུགས་འཇའ་ཁུགས་འདྲ་ཞིང་ཤངས་དབྱིབས་མཐོ། །
52.73a
ུད་པལ་སྔོན་པོའི་འདབ་འདྲའི་སྤྱན་དང་ལྡན། །སྨིན་མ་སྟུག་ཅིང་ཚེམས་ཀྱི་མཆེ་བ་ཟླུམ། །སྨིན་མ་མཉམ་ཞིང་འདབ་ཆགས་འབྲེལ་དང་ལྡན། །སྙན་གཉིས་མཉམ་ཞིང་ཚེམས་ཀྱི་མཆེ་བ་རྣོ། །ཞལ་གྱི་མཁུར་ཙོས་སྐྱོན་དང་བྲལ་བ་མངའ། །རྒྱལ་བའི་སྤྱོད་པ་སྐྱོན་བག་ཡོད་མ་མཆིས། །དཔྲལ་བའི་དབྱེས་ལ་གཉེར་མ་མི་མངའ་ཞིང ། །མགུར་ནི་དུང་འདྲ་མཁྲེགས་པའི་སྐུ་མངའ་ལ། །ཚིགས་རྣམས་སྲེད་མེད་བུ་ཡི་སྟོབས་དང་ལྡན། །ཡན་ལག་དམ་པ་དབུ་ནི་གདུགས་དབྱིབས་འདྲ། །དབུ་ཡི་སྟོད་རྣམས་ལྕང་ལོ་འཁྱིལ་དང་ལྡན། །དབུ་གནག་སྟུག་ཅིང་སྤོས་ཞིམ་དྲི་དང་ལྡན། །རྒྱལ་བའི་དབུ་སྐྲ་བཤོར་བ་མ་ལགས་ཏེ། །དབུ་སྐྲ་མི་འཛིངས་ཤིན་དུ་མཛེས་པའི་སྐུ། །དབུ་སྐྲ་སྟུག་ཅིང་ལེགས་པར་རིམ་གྱིས་གནས། །དབུ་དང་བ་སྤུ་འཇམ་ཞིང་ཕྲ་ལ་གནག་།དབུ་སྐྲ་བུང་བའི་ལྟོ་ལྟར་གནག་དང་ལྡན། །མཉམ་ཞིང་ཁོད་སྙོམས་དབུ་མཆོག་ཆུ་རླབས་འདྲ། །སེང་གེ་ཁྲི་དང་ཉ་དང་རྒྱལ་མཚན་དང ། །རྡོ་རྗེ་ལྕགས་ཀྱུ་བུམ་པ་གཡུང་དྲུང་འཁྱིལ། །དཔལ་གྱི་བེའུ་དང་དུང་དང་པད་མ་དང ། །བཀྲ་ཤིས་ལྡན་རྣམས་ཕྱག་ཞབས་མཐིལ་ལ་མངའ། །རྒྱལ་པོ་ཆེན་པོ་བཟང་མཛེས་འདི་དག་ནི། །བདེ་བར་གཤེགས་པའི་དཔེ་བྱད་བཟང་པོའི་མཆོག་།དཔེ་ལེགས་སྨོས་པ་འདི་དག་ཐམས་ཅད་ནི། །མུ་སྟེགས་ཅན་མི་གཞན་ལ་ཡོང་མ་མཆིས། །རྒྱལ་པོ་ཆེན་པོ་འདི་ནི་རེ་ཞིག་དགེ་སྦྱོང་གཽ་ཏ་མ་དེའི་གཟུགས་ཀྱི་ཆེ་བ་ཉིད་དེ། དེ་ནི་སེམས་ཅན་ཐམས་ཅད་ལ་མ་མཆིས་པས་དེའི་སླད་དུ་དེ་ལ་སྐྱོན་མ་མཆིས་ལགས་སོ། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་བྱམས་པ་ཆེན་པོའི་སྟོབས་དང་ལྡན་པ་སྟེ། སེམས་ཅན་ཐམས་ཅད་ལ་ཁོང་ཁྲོ་བ་མ་མཆིས་པའི་ཐུགས་དང་ལྡན་པའོ། །དེའི་བྱམས་པ་དེ་ཡང་མ་ཆགས་ལ་སྒྲིབ་པ་མ་མཆིས་ཤིང་རྟག་ཏུ་འབྱུང་བ་སྟེ། ལྷུན་གྱིས་གྲུབ་པར་རྒྱས་པར་འགེང་བ། འཇིག་རྟེན་གྱི་ཁམས་ཐམས་ཅད་དུ་ཁྱབ་པ། སེམས་ཅན་ཐམས་ཅད་ཀྱི་བསམ་པའི་རྗེས་སུ་ཞུགས་པ་སྟེ། རྒྱལ་པོ་ཆེན་པོ་འདི་ལྟ་སྟེ་དཔེར་བགྱི་ན། ནོར་བུ་རིན
52.73b
པོ་ཆེ་ཆུ་འདང་ནི་རང་བཞིན་གྱིས་དག་ཅིང་ཆབ་ཀྱི་རྙོག་མ་ཐམས་ཅད་དང་བར་བགྱིད་དོ། །རྒྱལ་པོ་ཆེན་པོ་དེ་བཞིན་དུ་དགེ་སྦྱོང་གཽ་ཏ་མ་དེ་ཡང་ནང་ཡོངས་སུ་དག་ཅིང་སེམས་ཅན་ཐམས་ཅད་ཀྱི་ཉོན་མོངས་པའི་རྙོག་པ་དང་བར་མཛད་པ་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། །དུས་རྣམས་ཀུན་དང་ཞིང་ཀུན་དང ། །འཇིག་རྟེན་བྱམས་པས་ཁྱབ་པར་མཛད། །འགྲོ་བ་ཀུན་གྱི་བསམ་པ་ཡང ། །ཁྱབ་མཛད་ཀུན་མཁྱེན་བྱམས་དང་ལྡན། །ཟླ་མེད་ཐུབ་པའི་བྱམས་པ་ཡིས། །མ་ཁྱབ་ཕྱོགས་འགའ་མ་མཆིས་ཏེ། །ཁམས་དང་བསམ་པ་རྣམས་ཀྱང་ཁྱབ། །དེ་བས་ཀུན་མཁྱེན་སྐྱོན་མ་མཆིས། །དཔེར་ན་ནོར་བུ་ཆུ་འདང་བ། །ཤིན་དུ་རྣམ་དག་ཆབ་འདང་བགྱིད། །དེ་བཞིན་དྲང་སྲོང་ཐུགས་དག་པ། །སྐྱེ་བོའི་རྙོག་པ་དང་བར་མཛད། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་རྣམ་པ་སུམ་བཅུ་རྩ་གཉིས་དང་ལྡན་པའི་ཐུགས་རྗེ་ཆེན་པོ་དང་ལྡན་པ་ལགས་ཏེ། རྣམ་པ་སུམ་བཅུ་རྩ་གཉིས་པོ་དེ་དག་གང་ཞེ་ན། འདི་ལྟ་སྟེ། གཏི་མུག་གི་མུན་པར་ཞུགས་པའི་འཇིག་རྟེན་གནས་པ་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། མ་རིག་པ་ཆེན་པོའི་སྒོ་ངའི་སྦུབས་སུ་ཆུད་པའི་འཇིག་རྟེན་གནས་པ་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། འཁོར་བ་ཆེན་པོར་ལྷུང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། རྟག་ཏུ་གཡེན་སྤྱོ་ཞིང་མ་ཞི་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ཉོན་མོངས་པའི་ཆུ་བོ་ཆེན་པོས་ཁྱེར་བའི་སེམས་ཅན་རྒྱུན་གྱི་རྗེས་སུ་འགྲོ་བ་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། གཡང་ས་ཆེན་པོ་ནས་ལྷུང་ཞིང་སྡུག་བསྔལ་ཆེན་པོ་མྱོང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ལམ་ངན་པར་ཞུགས་པའི་སེམས་ཅན་འཕགས་པའི་ལམ་དང་བྲལ་བ་དག
52.74a
གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་ཉོན་མོངས་པ་ཆེན་པོའི་བཅིང་བས་བཅིངས་པས་རྟག་ཏུ་དཀྲི་བས་དཀྲིས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ཡུན་རིང་པོར་ཡུལ་གྱིས་དགང་དཀའ་ཞིང་ངོམས་མི་ཤེས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། སྲེད་པས་འཁོལ་ཅིང་རྟག་ཏུ་གཞན་གྱི་དབང་དུ་གྱུར་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། རྒ་ཤིས་ཡོངས་སུ་མནར་ཞིང་ཤིན་དུ་ཉོན་མོངས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ནད་སྣ་ཚོགས་མང་པོས་ཡོངས་སུ་མནར་ཅིང་རྟག་ཏུ་ནད་པར་གྱུར་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། མེ་གསུམ་རབ་ཏུ་འབར་ཞིང་རྟག་ཏུ་སྲེག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། དམན་ཞིང་ཡོངས་སུ་མ་དག་ལ་འཁོར་བ་རྣམ་པར་འཕེལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། རྟག་ཏུ་སྐྲག་ཅིང་རྟག་ཏུ་ཡིད་སྐྲག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། རོ་བྲོ་བ་ཆུང་བ་ལ་ཆགས་ཤིང་ཉེས་དམིགས་མ་མཐོང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། དྲེགས་པ་སྣ་ཚོགས་མང་པོས་མྱོས་ཤིང་ཡུན་རིང་པོར་གཉིད་ཀྱིས་ལོག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། དགོན་པ་ཆེན་པོའི་ལམ་དུ་ཞུགས་ཤིང་གསོད་པ་རྟག་ཏུ་ཕྱི་བཞིན་འབྲང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས
52.74b
རྗེ་ཆེན་པོ་འཇུག་པ་དང ། རྟག་ཏུ་གནོད་པར་གྱུར་ཅིང་དུས་ཐམས་ཅད་དུ་འཇུག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། མ་རིག་པས་ལོང་བར་གྱུར་ཅིང་རྟག་ཏུ་རབ་རིབ་ཀྱིས་བསྒྲིབས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ཐགས་འཁྲུགས་པ་ལྟ་བུར་གྱུར་ཅིང་དྲུ་བུ་འཛིངས་པ་ལྟ་བུར་གྱུར་ལ་རྩ་མུན་ཛ་དང་བལ་བ་ཛ་ལྟ་བུར་གྱུར་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། གནོད་པ་དང་ལྡན་ཞིང་གནོད་པ་མ་མཆིས་པ་དང་བྲལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། མི་ཁོམ་པ་དང་ལྡན་པར་གྱུར་ཅིང་དལ་བ་དང་བྲལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ཐེ་ཙོམ་ཅན་དུ་གྱུར་ཅིང་ལོག་པར་ལྟ་བར་ཞུགས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ཤིང་བལ་གྱི་འདའ་བ་ལྟར་གྱུར་ཅིང་ལྟ་བ་སྣ་ཚོགས་ལ་རྟེན་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། འདུ་ཤེས་དང་སེམས་ཕྱིན་ཅི་ལོག་ཏུ་གྱུར་ཅིང་མི་རྟག་པ་ལ་རྟག་པར་འདུ་ཤེས་པ་དང ། སྡུག་བསྔལ་ལ་བདེ་བར་འདུ་ཤེས་པ་དང ། མི་སྡུག་པ་ལ་སྡུག་པར་འདུ་ཤེས་པ་དང ། དངོས་པོ་མ་མཆིས་པ་ལ་དངོས་པོ་མཆིས་པར་འདུ་ཤེས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། ཁུར་གྱིས་གཟིར་ཅིང་ཡུན་རིང་པོ་ནས་དུབ་སྟེ། སྡུག་བསྔལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། མཐུ་ཆུང་བ་ལ་རྟེན་ཅིང་སྙིང་པོ་མ་མཆིས་པ་སྙིང་པོར་འདུ་ཤེས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། རྟག་ཏུ་ཉེ་བར་ཉོན་མོངས་པ་དང་ལྡན་པར་གྱུར
52.75a
ཅིང་དྲི་མས་གོས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། སྲིད་པའི་འདོད་ཆགས་ཀྱིས་བརླགས་ཤིང་ཡིད་ཞུམ་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། རྙེད་པ་དང་བཀུར་སྟིའི་ཟིལ་གྱིས་ནོན་ཅིང་རྟག་ཏུ་རྙེད་པ་ཚོལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམ་པ་མང་པོས་གཟིར་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་སྐྱེ་བ་སྟེ། དགེ་སྦྱོང་གཽ་ཏ་མ་དེ་ནི་རྣམ་པ་སུམ་བཅུ་རྩ་གཉིས་པོ་དེ་དང་ལྡན་པའི་ཐུགས་རྗེ་ཆེན་པོ་དང་ལྡན་པ་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། གཏི་མུག་མུན་པ་མུན་ནག་གིས་རྟག་ཏུ། །སེམས་ནི་བསྒྲིབས་པར་གྱུར་པའི་སྐྱེ་དགུ་དང ། །འཁོར་བའི་བཙོན་རར་ཆུད་པ་རྣམས་གཟིགས་ན། །དྲང་སྲོང་དམ་པ་དེ་ནི་ཐུགས་རྗེ་སྐྱེད། །རྟག་ཏུ་གཡོན་སྤྱོར་གྱུར་དང་རྟག་ཏུ་ཡང ། །ཆུ་བོ་བཞི་པོ་དག་གིས་ཁྱེར་གྱུར་ཅིང ། །འཁོར་བའི་རྒྱུན་ལ་གནས་པའི་སེམས་ཅན་རྣམས། །གཟིགས་ན་སྟོབས་བཅུ་མངའ་བ་ཐུགས་རྗེ་སྐྱེ། །གཡང་ས་ཆེན་པོར་ལྷུང་བར་གྱུར་པ་འམ། །ལམ་ངན་ཞུགས་པའི་སེམས་ཅན་རྣམས་གཟིགས་ན། །ཐུབ་པ་ཐུགས་རྗེས་ཞི་བའི་གནས་དང་ནི། །འཕགས་པའི་རྒྱལ་པོའི་ལམ་ལ་འགོད་པ་མཛད། །བཅིངས་པར་གྱུར་དང་སྲེད་པས་འཁོལ་བ་དང ། །རྟག་ཏུ་ཡུལ་ལ་ཆགས་དང་རྒ་བ་དང ། །འཆི་བའི་གཏིང་ལྷུང་སེམས་ཅན་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །སྡུག་བསྔལ་རྣམ་པ་མང་པོས་མནར་བ་དང ། །མེ་གསུམ་འབར་བའི་སྐྱེ་དགུ་འདི་དག་དང ། །ངན་སོང་སས་འཇིགས་པ་རྣམས་གཟིགས་གྱུར་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །རོ་ལ་བརྐམ་པའི་སེམས་དང་ལྡན་པ་དང ། །བག་མེད་རྟག
52.75b
ཏུ་ཡུལ་ལ་ཆགས་པ་དང ། །སྲིད་པའི་དགོན་པར་ཉོན་མོངས་སེམས་ཅན་རྣམས། །གཟིགས་པར་གྱུར་ན་རྣམ་པར་གྲོལ་བར་མཛད། །མ་རིག་ལྡོངས་ཤིང་རབ་རིབ་ཁེབས་པ་དང ། །བལ་བ་ཛ་དང་མུན་ཛ་འདྲར་གྱུར་དང ། །ཞེ་འགྲས་གྱུར་པའི་སེམས་ཅན་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །འཁོར་བར་བཅིངས་པའི་སེམས་དང་ལྡན་པ་དང ། །མི་ཁོམ་སྐྱེས་པའི་སྐྱེ་དགུ་འདི་དག་དང ། །ལོག་པར་ལྟ་བར་ལྷུང་བ་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །སྡུག་བསྔལ་བདེ་དང་མི་སྡུག་སྡུག་ཤེས་དང ། །མི་རྟག་རྟག་དང་བདག་མ་མཆིས་པ་ལ། །བདག་དུ་འདུ་ཤེས་འཁྲུལ་བ་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །ཁུར་གྱིས་ནོན་ཅིང་གཟིར་བར་གྱུར་རྣམས་དང ། །དེ་བཞིན་མཐུ་ཆུང་རྟེན་པའི་བྱིས་པ་དང ། །རྟག་ཏུ་ཉོན་མོངས་ཉོན་མོངས་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །འདོད་པའི་ཟིལ་གྱིས་ནོན་པའི་ཡིད་ལྡན་དང ། །སྲེད་པ་ཆེ་ཞིང་རྟག་ཏུ་ཡུལ་བརྐམ་དང ། སྲིད་པའི་འདོད་ཆགས་རྒྱ་མཚོར་ལྷུང་བ་རྣམས། །གཟིགས་ནས་རྒྱལ་བའི་ཐུགས་རྗེ་ཆེན་པོ་སྐྱེ། །ནད་དང་མྱ་ངན་རྣམ་པ་མང་དག་གིས། །ཤིན་དུ་གཙེས་པའི་སྐྱེ་དགུ་ཉོན་མོངས་རྣམས། །གཟིགས་ནས་སྡུག་བསྔལ་མ་ལུས་བསལ་སླད་དུ། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །ཐུབ་པའི་ཐུགས་རྗེ་ཆེན་པོ་རྟག་བྱུང་སྟེ། །དེ་མི་འབྱུང་བ་ནམ་ཡང་སྲིད་མི་འགྱུར། །འགྲོ་བ་ཀུན་གྱི་བསམ་པ་གནས་པ་སྟེ། །དེ་བས་སངས་རྒྱས་དེ་ལ་སྐྱོན་མི་མངའ། །རྒྱལ་པོ་ཆེན་པོ་མདོར་ན་དགེ་སྦྱོང་གཽ་ཏ་མ་དེ་ནི་དྲན་པ་ཉེ་བར་གཞག་པ་བཞི་དང་ལྡན་པའོ། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་ཡང་དག་པའི་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་དང་ལྡན་པ་སྟེ། དེའི་སླད་དུ་དེ་ལ་སྐྱོན་མ་མཆིས་པ་ལགས་སོ། །དེ་ལ་འདི་སྐད་ཅེས་བགྱི་སྟེ། དྲན་པ་ཉེ་བར་གཞག་པ་བཞི་པོ་མཁྱེན། །ཡང་དག་སྤོང་བཞི
52.76a
མཁྱེན་ཏེ་ཟླ་མ་མཆིས། །ཏིང་འཛིན་བསམ་གཏན་སྦྱོར་ལ་དེ་མངའ་ཆེ། །དེ་ལྟར་སེམས་ཅན་རླབས་ཆེན་སྐྱོན་མ་མཆིས། །འཇིག་རྟེན་མགོན་གཅིག་རྫུ་འཕྲུལ་རྐང་མཉམ་པས། །སོ་སོ་ཡང་དག་རིག་པའི་ཕ་རོལ་བྱོན། །དྲང་སྲོང་ཆེན་པོ་རིག་དང་རྣམ་གྲོལ་མཁས། །ཐུབ་པ་རྣམ་དག་སེམས་ཅན་ཐབས་མཁྱེན་ལྡན། །བྱམས་དང་སྙིང་རྗེ་དགའ་དང་བཏང་སྙོམས་དང ། །ཚངས་པའི་གནས་པ་བཞི་ལ་དེ་དབང་སྒྱུར། །ལྷག་མཐོང་ཞི་གནས་གཉིས་ལ་རྣལ་འབྱོར་པ། དེ་བས་དེ་ལ་ནམ་ཡང་སྐྱོན་མ་མཆིས། །བྱང་ཆུབ་ཡན་ལག་རིན་ཆེན་རྒྱན་མཆོག་ལྡན། །ཡན་ལག་བརྒྱད་ལྡན་ལམ་ཆུ་དྲི་མེད་བཀྲུས། །བདེ་ཞིང་མི་གཡོ་འཇིགས་དང་གང་བྲལ་བའི། །ལམ་དེ་ཉིད་ལ་འགྲོ་བ་སྦྱོར་བར་མཛད། །ཐུབ་པ་ཁྱུ་མཆོག་དེ་དང་གང་འདྲ་བའི། །སེམས་ཅན་འཇིག་རྟེན་འདི་ན་འགའ་མ་མཆིས། །ཐམས་ཅད་ཟིལ་གནོན་ཡོན་ཏན་ཀུན་དང་ལྡན། །ཡོན་ཏན་དབང་ཕྱུག་དེ་ལ་སྨད་མ་མཆིས། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་སྟོབས་བཅུ་དང་ལྡན་པའོ། །སྨྲས་པ། བྲམ་ཟེ་ཆེན་པོ་དེ་བཞིན་གཤེགས་པའི་སྟོབས་བཅུ་པོ་དེ་དག་གང་སྨྲས་པ། རྒྱལ་པོ་ཆེན་པོ་འདི་ལྟ་སྟེ། འདི་ན་དེ་བཞིན་གཤེགས་པ་ནི་གནས་ལ་ཡང་གནས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། གནས་མ་ལགས་པ་ལ་ཡང་གནས་མ་ལགས་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། རྒྱལ་པོ་ཆེན་པོ་འདི་ནི་དགེ་སྦྱོང་གཽ་ཏ་མ་དེའི་དེ་བཞིན་གཤེགས་པའི་སྟོབས་དང་པོའོ། །དེ་བཞིན་གཤེགས་པ་དེ་ནི་འདས་པ་དང ། མ་འོངས་པ་དང་ད་ལྟར་བྱུང་བའི་ལས་ཡང་དག་པར་བླངས་པ་རྣམས་གནས་དང ། རིགས་དང ། རྣམ་པར་སྨིན་པ་ལས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འཇིག་རྟེན་གྱི་ཁམས་དུ་མ་པ་དང ། ཁམས་སྣ་ཚོགས་པ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་གཞན་དག་དང་གང་ཟག་གཞན་རྣམས་ཀྱི་མོས་པ་དུ་མ་དང་མོས་པ་སྣ་ཚོགས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་གཞན་དག་དང་གང་ཟག་གཞན་རྣམས་ཀྱི་དབང་པོ་མཆོག
52.76b
དང་མཆོག་མ་ཡིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཐམས་ཅད་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་གཞན་དག་དང་གང་ཟག་གཞན་རྣམས་ཀྱི་དབང་པོ་དང ། སྟོབས་དང ། བྱང་ཆུབ་ཀྱི་ཡན་ལན་དང ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་རྣམས་ཀྱི་ཀུན་ནས་ཉོན་མོངས་པ་དང་རྣམ་པར་བྱང་བ་དང་ལྡན་པ་དང ། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། ཚེ་རབ་གཅིག་ཀྱང་རྗེས་སུ་དྲན་ཞིང ། ཚེ་རབས་བྱེ་བ་ཁྲག་ཁྲིག་འབུམ་ཕྲག་དུ་མའི་བར་དག་ཀྱང་རྣམ་པ་དང་བཅས་པ་དང ། ས་ཕྱོགས་དང་བཅས་པ་དང ། རྒྱུ་མཚན་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །དེ་ལྷའི་སྤྱན་རྣམ་པར་དག་པ་མིའི་ལས་འདས་པས་སེམས་ཅན་འཆི་འཕོ་བ་དང ། སྐྱེ་བ་ལས་བདེ་འགྲོ་དང་ངན་འགྲོར་སྐྱེ་བ་རྣམས་གཟིགས་སོ། །ཟག་པ་ཟད་པས་ཟག་པ་མེད་པ་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། འདི་ནི་དགེ་སྦྱོང་གཽ་ཏ་མའི་དེ་བཞིན་གཤེགས་པའི་སྟོབས་བཅུ་པའོ། །རྒྱལ་པོ་ཆེན་པོ་དེ་དག་ནི་དེ་བཞིན་གཤེགས་པའི་སྟོབས་བཅུ་པོ་དེ་དག་སྟེ། སྟོབས་དེ་དག་དང་ལྡན་པས་དེ་བཞིན་གཤེགས་པ་དེ་སྟོབས་བཅུ་མངའ་ཞེས་བགྱི་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། གནས་དང་དེ་བཞིན་གནས་མ་ལགས། །ཡང་དག་ཇི་བཞིན་དེ་མཁྱེན་ཏེ། །དཔའ་བོ་ཆེན་པོ་ཡང་དག་གསུང ། །དེ་ལ་སྐྱོན་ནི་མ་མཆིས་སོ། །དེ་ནི་འདས་པའི་དུས་ལ་ཡང ། །མ་ཆགས་པ་ཡི་ཡེ་ཤེས་འཇུག་།ད་ལྟར་བྱུང་དང་མ་འོངས་ལ། །དེ་ཡི་ཡེ་ཤེས་རྨོངས་མ་མཆིས། །ལས་དང་ལས་ཀྱི་རྣམ་སྨིན་དང ། །རྒྱུ་ཡི་ཤེས་པ་གང་ལགས་པ། །དེ་དག་ཐམས་ཅད་མ་ལུས་པར། །འཇིག་རྟེན་རྣམ་པར་འདྲེན་པས་མཁྱེན། །དུ་མའི་ཁམས་ཅན་འཇིག་རྟེན་དང ། །སྣ་ཚོགས་ཁམས
52.77a
ཅན་དེས་མཁྱེན་ཏོ། །ཁམས་མཁྱེན་ཚུལ་ལ་མཁས་པ་སྟེ། །འཇིག་རྟེན་གང་ཟག་ཟླ་མ་མཆིས། །མོས་པ་སྣ་ཚོགས་ལྡན་པ་དང ། །དེ་བཞིན་མོས་པ་དུ་མ་ཅན། །འཇིག་རྟེན་སྒྲོན་མ་དེས་མཁྱེན་ཏེ། །ཡང་དག་ཇི་བཞིན་གཞན་དུ་མིན། །དབང་པོ་རྟུལ་བའང་རབ་ཏུ་མཁྱེན། །དེ་བཞིན་དབང་པོ་འབྲིང་ཡང་མཁྱེན། །ཡོངས་སྨིན་དབང་པོ་དེས་མཁྱེན་ཏེ། །དབང་པོ་ཚོགས་ལ་དབང་ཕྱུག་གོ། །ཐམས་ཅད་དུ་ནི་འགྲོ་བའི་ལམ། །ཡང་དག་ཇི་བཞིན་དེས་མཁྱེན་ཏེ། །མངོན་ཤེས་དབང་པོ་བསམ་གཏན་སྟོབས། །བྱང་ཆུབ་ཡན་ལག་རྣམ་ཐར་མཁྱེན། །ཀུན་ནས་ཉོན་མོངས་རྣམ་བྱང་དག་།རྣམ་པར་དགོད་པ་འང་དེས་མཁྱེན་ཏོ། །ཐོགས་མེད་ཡེ་ཤེས་གཟིགས་མངའ་བས། །དེ་ལ་ཐོགས་པ་ཡོང་མ་མཆིས། །སྔོན་ཚེ་དཔག་ཏུ་མེད་པ་དག་།རྣམ་པ་དུ་མར་དེས་གཟིགས་ཏེ། །བདག་དང་གཞན་གྱི་མ་ལུས་པར། །ཡང་དག་ཇི་བཞིན་གཞན་དུ་མིན། །དེའི་སྤྱན་དྲི་མ་མ་མཆིས་ཤིང ། །མིའི་ལས་ཤིན་དུ་འདས་པ་སྟེ། །སེམས་ཅན་ཤི་འཕོ་སྐྱེ་བ་ཡང ། །དེས་ནི་འདྲེན་པས་རབ་ཏུ་གཟིགས། །ཟག་པ་ཟད་པ་མཁྱེན་པ་སྟེ། །རྣམ་པར་གྲོལ་བ་འང་རབ་ཏུ་མཁྱེན། །ཟག་མེད་ཁམས་ནི་གང་ལགས་པ། །དེ་ནི་འདྲེན་པས་རབ་ཏུ་མཁྱེན། །སངས་རྒྱས་མངའ་ཆེན་སྒྱུར་བ་ཡི། །སྟོབས་བཅུ་འདི་དག་མཚུངས་མ་མཆིས། །སེམས་གཅིག་ལ་ནི་ཀུན་གནས་ཀྱང ། །སེམས་ལ་རྟོག་པ་མི་མངའ་སྟེ། །བླང་མེད་དོར་བ་མེད་ཚུལ་དུ། །ལྷུན་གྱིས་གྲུབ་པར་དེ་དག་འབྱུང ། །སྔར་བསྐོར་འཁོར་ལོའི་ཤུགས་བཞིན་དུ། །རྟོག་པ་མི་མངར་འབྱུང་བ་སྟེ། །སེམས་ཅན་ཀུན་གྱིས་རྣམ་བསམས་པ། །སེམས་གཅིག་གིས་ནི་རབ་ཏུ་མཁྱེན། །འོན་ཀྱང་སེམས་དང་སེམས་ཅན་ལ། །གཉིས་ཀྱི་བློ་ནི་མི་འབྱུང་ངོ ། །དེ་བས་སངས་རྒྱས་དབང་སྒྱུར་ལ། །སྐྱོན་ནི་གང་ཡང་མི་མངའ་སྟེ། །ཆོས་རྣམས་ཀུན་ལ་མཁས་པ་དེ། །ཡོན་ཏན་དཔལ་ནི་ཀུན་ལས་འཕགས། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་མི་འཇིགས་པ་བཞི་དང་ལྡན་པའོ། །སྨྲས་པ། བྲམ
52.77b
ཟེ་ཆེན་པོ་དགེ་སྦྱོང་གཽ་ཏ་མ་དེ་མི་འཇིགས་པ་གང་དག་དང་ལྡན་པས་མི་འཇིགས་པ་བཞི་དང་ལྡན་པ་ཞེས་བྱ་བའི་དེ་བཞིན་གཤེགས་པའི་མི་འཇིགས་པ་བཞི་པོ་དེ་དག་གང་ཡིན། སྨྲས་པ། རྒྱལ་པོ་ཆེན་པོ་འདི་ལ་དགེ་སྦྱོང་གཽ་ཏ་མ་དེ་ནི་ང་ཡང་དག་པར་རྫོགས་པའི་སངས་རྒྱས་སོ་ཞེས་བདག་ཉིད་དམ་བཅས་ན་ཆོས་འདི་རྣམས་ཁྱོད་ཀྱིས་མངོན་པར་རྫོགས་པར་སངས་མ་རྒྱས་སོ་ཞེས་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ་དང ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང་མི་འཇིགས་པ་བརྙེས་ནས་གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ། ཚངས་པའི་འཁོར་ལོ་དགེ་སྦྱོང་ངམ། བྲམ་ཟེ་འམ། གཞན་སུ་འང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་དང ། ནོར་དེ་ཟག་པ་ཟད་པ་སྟེ། ང་ནི་ཟག་པ་ཟད་དོ་ཞེས་བདག་ཉིད་དམ་བཅས་ན། དེ་ལ་ཁྱོད་ཀྱིས་ཟག་པ་དེ་དག་མ་ཟད་དོ་ཞེས་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང ། མི་འཇིགས་པ་བརྙེས་ནས་གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ་ཚངས་པའི་འཁོར་ལོ་དགེ་སྦྱོང་ངམ། བྲམ་ཟེ་འམ། གཞན་སུ་ཡང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་དང ། དེ་བཞིན་གཤེགས་པས་གང་དག་བར་དུ་གཅོད་པའི་ཆོས་སུ་གསུངས་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་རོ་ཞེས་ལྷ་དང་བཅས་པ། བདུད་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག
52.78a
པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང་མི་འཇིགས་པ་བརྙེས་ནས་གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ། ཚངས་པའི་འཁོར་ལོ་དགེ་སྦྱོང་ངམ། བྲམ་ཟེ་འམ། གཞན་སུ་ཡང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་དང ། དེ་བཞིན་གཤེགས་པས་འཕགས་པ་ངེས་པར་འབྱིན་པའི་ལམ་གང་གསུངས་པ་དེ་བསྟེན་ཀྱང་ཡང་དག་པར་སྡུག་བསྔལ་ཟད་པའི་རྒྱུར་མི་འགྱུར་རོ་ཞེས་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན། ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང ། མི་འཇིགས་པ་བརྙེས་ནས་གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ། ཚངས་པའི་འཁོར་ལོ་དགེ་སྦྱོང་ངམ། བྲམ་ཟེ་འམ། གཞན་སུ་ཡང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་སྟེ། རྒྱལ་པོ་ཆེན་པོ་འདི་དག་ནི་དེ་བཞིན་གཤེགས་པའི་མི་འཇིགས་པ་བཞི་སྟེ། དེ་དག་དང་ལྡན་པའི་དེ་བཞིན་གཤེགས་པ་ནི་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། ང་དང་མཚུངས་པའི་སེམས་ཅན་ནི། །འགའ་མེད་ལྷག་པ་ག་ལ་ཞེས། །མི་ཡི་འདྲེན་པ་འཁོར་ནང་དུ། །སེང་གེའི་སྒྲ་ནི་སྒྲོག་པར་མཛད། །ང་ཡི་ཆོས་རྣམས་སངས་རྒྱས་པ། །དེ་དག་ཡང་དག་གཞན་དུ་མིན། །དེ་གཟིགས་རྫོགས་པའི་སངས་རྒྱས་དེ། །བསྙེངས་པ་མི་མངའ་སེང་གེ་བཞིན། །ལ་ལ་དེ་ལ་རྒོལ་འགྱུར་བའི། །རྒྱུ་ནི་ཡང་དག་མི་གཟིགས་ཏེ། །རྒྱུ་ཡང་གཟིགས་པར་མ་གྱུར་པས། །འདྲེན་པ་བསྙེངས་པ་མི་མངའ་སྒྲོག་།ཟག་པ་ཐམས་ཅད་ཟད་གྱུར་ཏེ། །ང་ཡི་སྐུ་ལ་ཟག་པ་མེད། །དེ་ཕྱིར་ལྷར་བཅས་འཇིག་རྟེན་ན། །
52.78b
ང་དང་མཚུངས་པ་གང་ཡང་མེད། །བར་དུ་གཅོད་པའི་ཆོས་གང་དག་།སྐྱེ་བོ་རྣམས་ལ་ངས་བསྟན་པ། །དེ་ཀུན་ཡང་དག་ཉིད་དུ་སྨྲས། །གཞན་དུ་འགྱུར་བ་ཡོད་མ་ཡིན། །ངེས་པར་འབྱིན་པའི་ཆོས་གང་དག་།ངས་སངས་རྒྱས་ནས་རབ་བསྟན་པ། །ཆོས་རྣམས་དེ་དག་བསྟེན་བྱས་ནས། །བར་དུ་གཅོད་པར་འགྱུར་བ་མེད། །དེ་འདྲ་དཔའ་བོ་ཆེན་པོས་མཁྱེན། །དེ་བཞིན་གཤེགས་པས་བདེ་བརྙེས་པས། །འཇིགས་མེད་བདེ་བ་བརྙེས་གྱུར་ཏེ། །ཐུབ་པ་བསྙེངས་པ་མི་མངར་བཞུགས། །སུས་ཀྱང་བསྐོར་བར་མ་གྱུར་པའི། །ཚངས་པའི་འཁོར་ལོ་རབ་ཏུ་སྐོར། །རྐང་གཉིས་དམ་པ་མ་གཏོགས་པར། །འཇིག་རྟེན་དག་ན་སྐོར་མི་ནུས། །རྒྱལ་པོ་ཆེན་པོ་ཡང་དགེ་སྦྱོང་གཽ་ཏ་མ་དེ་ནི་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་པོ་དག་དང་ལྡན་པའོ། །སྨྲས་པ། བྲམ་ཟེ་ཆེན་པོ་དགེ་སྦྱོང་གཽ་ཏ་མའི་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་པོ་དེ་དག་གང་ཡིན། སྨྲས་པ། རྒྱལ་པོ་ཆེན་པོ་དེ་ལ་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ནི་དེ་བཞིན་གཤེགས་པ་ལ་འཁྲུལ་པ་མི་མངའ་བ་དང ། ཅ་ཅོ་མི་མངའ་བ་དང ། བསྙེལ་བ་མི་མངའ་བ་དང ། སེམས་མཉམ་པར་མ་བཞག་པ་མི་མངའ་བ་དང ། ཐ་དད་པའི་འདུ་ཤེས་མི་མངའ་བ་དང ། སོ་སོར་མ་བརྟགས་པའི་བཏང་སྙོམས་མི་མངའ་བ་དང ། འདུན་པ་ཉམས་པ་མི་མངའ་བ་དང ། བརྩོན་འགྲུས་ཉམས་པ་མི་མངའ་བ་དང ། དྲན་པ་ཉམས་པ་མི་མངའ་བ་དང ། ཏིང་ངེ་འཛིན་ཉམས་པ་མི་མངའ་བ་དང ། ཤེས་རབ་ཉམས་པ་མི་མངའ་བ་དང ། རྣམ་པར་གྲོལ་བ་ཉམས་པ་མི་མངའ་བ་དང ། ལུས་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང ། ངག་གི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང ། ཡིད་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང ། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང ། མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ
52.79a
འཇུག་པ་དང ། ད་ལྟར་གྱི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་སྟེ། བཅཝ་བརྒྱད་པོ་དེ་དག་ནི་དགེ་སྦྱོང་གཽ་ཏ་མ་དེའི་སངས་རྒྱས་ཀྱི་ཆོས་མ་འདྲེས་པ་རྣམས་ཏེ། རྒྱལ་པོ་ཆེན་པོ་དེ་བཞིན་གཤེགས་པ་ནི་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་པོ་དེ་དག་དང་ལྡན་པས་དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། སངས་རྒྱས་ལ་ནི་འཁྲུལ་མི་མངའ། །ཅ་ཅོ་དེ་བཞིན་མི་མངའ་སྟེ། དེ་ཡི་དགོངས་པ་ཉམས་མི་མངའ། །དེ་ཕྱིར་ཀུན་མཁྱེན་སྐྱོན་མི་མངའ། །ཐ་དད་འདུ་ཤེས་མི་མངའ་སྟེ། །རྣམ་པར་གཡེང་བའི་ཐུགས་མི་མངའ། །སོ་སོར་བརྟགས་པའི་བཏང་སྙོམས་ཏེ། །འདུན་པ་ཉམས་པ་མི་མངའོ། །དེ་ཡི་བརྩོན་འགྲུས་རྟག་ཏུ་འབར། །བསྙེལ་བ་མངའ་བ་མ་ལགས་ཏེ། །ཤེས་རབ་དང་ནི་རྣམ་གྲོལ་དང ། །དབང་པོ་གཟིགས་པ་ཉམས་མི་མངའ། །ཡེ་ཤེས་ཀྱིས་ཀྱང་དེ་མི་འཁྲུགས། །དེ་ཡི་ལུས་དང་ངག་ཡིད་ལས། །ཡེ་ཤེས་སྔོན་དུ་འགྲོ་བ་སྟེ། །ཡེ་ཤེས་ཀྱི་ནི་རྗེས་སུ་འབྲང ། །ཡེ་ཤེས་འབྲལ་བ་མ་མཆིས་ཏེ། །འདས་པའི་དུས་ལ་ཐོགས་མ་མཆིས། །མ་འོངས་དུས་དང་ད་ལྟར་ལ་འང ། །དེ་ཡི་ཡེ་ཤེས་ཐོགས་མ་མཆིས། །དགེ་སྦྱོང་བདག་ཉིད་ཆེ་བ་ཡིས། །དེ་ཡི་ཡོན་ཏན་འདི་འདྲ་བས། །འདི་ལས་གཞན་ཡང་ཚད་མེད་པ། དག་གིས་བགྲང་བར་རྔོ་མི་ཐོག་།དེ་ནས་རྒྱལ་པོ་གཏུམ་པོ་རབ་སྣང་དེ་བཞིན་གཤེགས་པའི་ཡོན་ཏན་དང་ཆེ་བ་བསམ་གྱིས་མི་ཁྱབ་པ་རྣམ་པ་དེ་ལྟ་བུ་དག་ཐོས་ནས། །ཚིམ་ཞིང་མགུ་ལ་ཡི་རུངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། གཅེར་བུ་པའི་བུ་བདེན་སྨྲ་ལ་དད་པ་ཚད་མེད་ཅིང་བསམ་གྱིས་མི་ཁྱབ་པ་སྐྱེས་པར་གྱུར་ཏེ། སྟོན་པའི་འདུ་ཤེས་རྙེད་ནས། དགེ་བའི་བཤེས་གཉེན་གྱི་འདུ་ཤེས་དང ། བྱང་ཆུབ་སྟོན་པའི་འདུ་ཤེས་དང ། ཐམས་ཅད་མཁྱེན་པར་སྒྲོལ་བའི་འདུ་ཤེས་དང ། ཡང་དག་པར་སྐུལ་བའི་འདུ་ཤེས་དང ། རྗེས་སུ་དྲན་པར་བྱེད་པའི་འདུ་ཤེས་དང ། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་ལ་གནས་པའི་འདུ་ཤེས་ཀྱང
52.79b
ཐོབ་པར་གྱུར་ཏོ། །དེས་འདུ་ཤེས་ཡིད་ལ་བྱ་བ་དེ་ལྟ་བུ་དང་ལྡན་པའི་སེམས་ཀྱིས་མུ་ཏིག་གི་ཕྲེང་བ་འབུམ་རི་བ་དང་རིན་ཐང་མེད་པའི་རས་བཅོས་བུ་ཕྲུགས་སུ་སྦྱར་བས་གཅེར་བུ་པའི་བུ་བདེན་སྨྲ་ལ་ཆོས་ཀྱི་དགབ་པའི་ཕྱིར་བསྐོན་ནོ། །འདི་སྐད་ཀྱི་ཚིག་ཏུ་བརྗོད་པ་ཡང་ཆེད་དུ་བརྗོད་དེ། བདེན་སྨྲ་ཁྱོད་ཀྱིས་ཆོས་ཀྱི་ཚུལ་ལ་མཁས་པ་རྣམ་པ་འདི་ལྟ་བུ་འདི་ལེགས་པར་སྨྲས་པ་ལེགས་སོ་ལེགས་སོ། །བདེན་སྨྲ་ཁྱོད་ཀྱིས་ཆོས་བསྟན་པ་འདི་ནི་ཐམས་ཅད་མཁྱེན་པའི་ཡེ་ཤེས་དང་འཐུན་པའི་ཕྱིར་རྗེས་སུ་འཐུན་པའོ། །ཁྱོད་ཀྱིས་ཆོས་བསྟན་པ་འདི་ནི་ཐམས་ཅད་མཁྱེན་པ་ཉིད་ཐོབ་པར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་འཁོར་བ་ནས་འབྱུང་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་ཉོན་མོངས་པའི་དྲི་མ་རྣམས་དག་པར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་སེར་སྣའི་སྒོ་གླེགས་རྣམས་འཇོམས་པའོ། །ཁྱོད་ཀྱིས་ཆོས་བསྟན་པ་འདི་ནི་གཏོང་བའི་རྔ་རྣམས་རྡུང་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་ང་རྒྱལ་གྱི་རི་རྣམས་རྙིལ་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་སྲེད་པའི་རྒྱ་མཚོ་སྐམ་པར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་མི་ཤེས་པའི་ཐིབས་པོ་སྣང་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་སེམས་ཅན་ཡོངས་སུ་སྨིན་པར་བྱེད་པའི་དུས་དང་ཚོད་ལས་མི་འདའ་བའོ། །དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས། རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེ་དེ་བཞིན་ཏེ། བྱང་ཆུབ་སེམས་དཔའ་རྣམས་ཀྱི་སྤྱོད་ལམ་ནི་གང་ཡང་རུང་སེམས་ཅན་འདུལ་བར་མི་འགྱུར་བ་དེ་གང་ཡང་མ་མཆིས་སོ། །ཆོས་བསྟན་པ་གང་ཡང་རུང་ཐེག་པ་ཆེན་པོ་དང་མི་མཐུན་པ་དེ་གང་ཡང་མ་མཆིས་སོ། །ཐམས་ཅད་མཁྱེན་པའི་ཡེ་ཤེས་ཡང་དག་པར་མི་སྒྲུབ་པ་དེ་ལྟ་བུ་མ་མཆིས་སོ། །ཉོན་མོངས་པ་ཐམས་ཅད་ཟད་པར་མི་བགྱིད་པ་དེ་ལྟ་བུ་མ་མཆིས་སོ། །འཁོར་བའི་ཉེས་པ་མི་སྟོན་པ་དེ་ལྟ་བུ་མ་མཆིས་སོ། །མྱ་ངན་ལས་འདས་པ་མི་སྒྲུབ་པ་དེ་ལྟ་བུ་མ་མཆིས་སོ། །བྱང་ཆུབ་སེམས་དཔའི་སྤྱོད་པ་དང་མི་མཐུན་པ་དེ་ལྟ་བུ་མ་མཆིས་སོ། །
52.80a
རྒྱལ་པོ་ཆེན་པོ་བྱང་ཆུབ་སེམས་དཔའི་རྩོལ་བ་ཐམས་ཅད་ནི་བདག་གི་དོན་དང་གཞན་གྱི་དོན་དང་གཉིས་ཀའི་དོན་ཡོངས་སུ་གྲུབ་པར་བགྱིད་པའོ། །གཅེར་བུ་པའི་བུ་བདེན་སྨྲས་བསྟན་པ་འདི་ནི་བཤད་པའི་ཚེ། རྒྱལ་པོ་གཏུམ་པོ་རབ་སྣང་གིས་ཕྱིར་མི་ཟློག་པའི་དད་པ་ཐོབ་པར་གྱུར་ཏོ། །རྒྱལ་བུ་གཞོན་ནུ་བཅུ་དྲུག་གིས་དགའ་བའི་ཤུགས་ཀྱི་ཡུལ་ཞེས་བྱ་བའི་དད་པ་ཐོབ་པར་གྱུར་ཏོ། །ལྷའི་བུ་ཁྲི་བརྒྱད་སྟོང་གིས་སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ། །རྒྱལ་པོའི་ཕོ་བྲང་དེའི་མི་དང ། གཅེར་བུ་པའི་བུ་འཁོར་དེའི་ནང་ནས་མི་ཁྲི་སུམ་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་པར་གྱུར་ཏེ། དེ་དག་ཐམས་ཅད་ཀྱིས་རང་རང་གི་གོས་གཅེར་བུ་པའི་བུ་བདེན་སྨྲ་ལ་ཆོས་ཀྱིས་དགབ་པའི་ཕྱིར་བསྐོན་ཏེ་འདི་སྐད་ཀྱི་ཚིག་ཀྱང་བརྗོད་པར་གྱུར་ཏེ། བདག་ཅག་གིས་འདི་ལྟར་རིགས་ཀྱི་བུ་བདེན་སྨྲ་མཐོང་ཞིང་རྗེས་སུ་འཐུན་པའི་ཆོས་བསྟན་པ་འདི་ཐོས་པ་ནི་བདག་ཅག་གི་རྙེད་པ་ལེགས་པར་རྙེད་དོ་ཞེས་བརྗོད་ནས་འདི་སྐད་ཀྱི་ཚིག་ཀྱང་སྨྲས་ཏེ། བདེན་སྨྲ་ཚུར་སྤྱོན་ད་བཅོམ་ལྡན་འདས་དེ་བལྟ་བ་དང ། དེ་ལ་ཕྱག་བྱ་བ་དང ། བསྙེན་བཀུར་བྱ་བའི་ཕྱིར་བཞུད་དོ། །དེ་བཞིན་གཤེགས་པ་དེ་ནི་བདག་ཅག་ཉིད་ཀྱི་བསྐྱེད་མོས་ཚལ་ན་བཞུགས་སོ། །བདེན་སྨྲས་སྨྲས་པ། ཀུན་ཀྱང་ཚུར་ཤོག་།རྒྱལ་པོ་དང་བཅས། དཔུང་དང་བཅས། བློན་པོ་དང་བཅས། གྲོང་རྡལ་གྱི་མི་དང་བཅས། ཡུལ་གྱི་མི་དང་བཅས། འཁོར་གྱི་མི་དང་བཅས་པར་ལྷན་ཅིག་འཐུན་པར་བགྱིས་ཏེ་བཀོད་པ་ཆེན་པོས་འདོང་ངོ ། །དེ་ནས་རྒྱལ་པོ་གཏུམ་པོ་རབ་སྣང་གིས་གྲོང་ཁྱེར་ཐམས་ཅད་དུ་དྲིལ་གྱི་སྒྲ་བསྒྲགས་ཏེ། དེ་བཞིན་གཤེགས་པའི་གན་དུ་སུ་མི་འགྲོ་བ་དེའི་ཆད་པ་ནི་བསད་པའོ་ཞེས་བསྒོའོ། །དེ་ནས་གྲོང་གི་མི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ཐམས་ཅད་ཀྱིས་རྒྱལ་པོ་གཏུམ་པོ་རབ་སྣང་གི་བཀའ་དེ་ཐོས་ནས། མེ་ཏོག་དང ། སྤོས་དང ། མེ་ཏོག་ཕྲེང་དང ། བྱུག་པ་དང ། སིལ་སྙན་དང ། ཕེག་རྣམས་ཐོགས་ཏེ། གྲོང་ཁྱེར
52.80b
ཆེན་པོ་འཕགས་རྒྱལ་ནས་ཕྱི་རོལ་དུ་འཐོན་ཏེ། བསྐྱེད་མོས་ཚལ་དུ་འདོང་བར་ཆས་ནས་རྒྱལ་པོ་གཏུམ་པོ་རབ་སྣང་ལ་སྡོད་ཅིང་འཁོད་པར་གྱུར་ཏོ། །དེ་ནས་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་བདེན་སྨྲ་དང་ལྷན་ཅིག་།བློན་པོའི་ཚོགས་དང་ལྷན་ཅིག་།རྒྱལ་བུ་གཞོན་ནུ་དང ། དཔུང་གི་ཚོགས་དང་ལྷན་ཅིག་།བཙུན་མོའི་འཁོར་དང་ལྷན་ཅིག་།གྲོང་རྡལ་པའི་མི་དང་ཡུལ་གྱི་མི་རྣམས་དང་ལྷན་ཅིག་།འཁོར་གྱི་མི་དང་ཆབ་སྒོ་པ་རྣམས་དང་ལྷན་ཅིག་ཏུ་ཐམས་ཅད་ཀྱིས་ཡོངས་སུ་བསྐོར་ཅིང་དཔུང་གི་བཀོད་པ་ཆེན་པོས་མདུན་དུ་བདར་ནས། གདུགས་དང ། རྒྱལ་མཚན་དང ། བ་དན་དག་ནི་བསྒྲེང ། སིལ་སྙན་བྱེ་བ་འབུམ་དག་ནི་བུན་ལོང་དུ་བྱས། གར་དང ། གླུ་དང ། རོལ་མོའི་སྒྲ་དབྱངས་ནི་བསྒྲགས། རོལ་མོའི་སྤྱད་ཀི་མ་པ་ལ་དང ། ན་ཀུ་ལ་དང ། ཁར་དཀྲོལ་དང ། ཕེག་གི་སྒྲ་ནི་བསྒྲགས། རྟ་དང་གླང་པོ་ཆེ་རྣམས་སྒྲ་ནི་འབྱིན། བཀྲ་ཤིས་ཀྱི་བུམ་པ་གསེར་ཐག་གིས་བཏགས་པ་འབུམ་དག་ཐོགས་པ་རྣམས་ནི་མདུན་དུ་བཀྱེ་སྟེ། གླང་པོ་ཆེའི་ཤིང་རྟ་པ་རྣམས་དང ། རྟའི་ཤིང་རྟ་པ་རྣམས་དང ། སྲོག་ཆགས་འབུམ་ཕྲག་དགུ་བཅུ་རྩ་བརྒྱད་དང་ལྷན་ཅིག་ཏུ་རྒྱལ་པོའི་མཐུ་ཆེན་པོ་དང ། རྒྱལ་པོའི་འབྱོར་པ་ཆེན་པོ་དང ། རྒྱལ་པོའི་རྣམ་པར་འཕྲུལ་པ་ཆེན་པོ་དང ། རྒྱལ་པོའི་རྣམ་པར་རྩེ་བ་ཆེན་པོས་རང་གི་བསྐྱེད་མོས་ཚལ་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །གཅེར་བུ་པའི་བུ་བདེན་སྨྲ་ཡང ། འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ལན་འབུམ་ཕྲག་དུ་མར་བསྐོར་བ་བྱས་ཏེ། ཐལ་མོ་སྦྱར་ནས་མིག་མི་འཛུམས་པར་བཅོམ་ལྡན་འདས་ལ་བལྟ་ཞིང་འདུག་གོ། །དེ་ནས་ཚེ་དང་ལྡན་པ་ཤཱ་རིའི་བུས་གཅེར་བུ་པའི་བུ་བདེན་སྨྲ་བཅོམ་ལྡན་འདས་ཀྱི་སྤྱན་སྔ་ན་མིག་མི་འཛུམས་པར་བཅོམ་ལྡན་འདས་ལ་བལྟ་ཞིང་འདུག་པ་མཐོང་ངོ ། །མཐོང་ནས་ཀྱང་འདི་སྙམ
52.81a
དུ་སེམས་ཏེ། ཀྱེ་མ་གཅེར་བུ་པའི་བུ་བདེན་སྨྲ་འདི་ཅི་ཞིག་འདིར་འོངས་སྙམ་ནས། དེ་ལྟར་རྣམ་པར་བརྟགས་ཏེ། གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་ཁྱོད་ཅི་ཞིག་འདོད་དེ་དེ་བཞིན་གཤེགས་པའི་ཐད་དུ་འོངས། ཅི་བཅོམ་ལྡན་འདས་བལྟ་བར་འདོད་དམ། ཆོས་ཉན་པར་འདོད། དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས། ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་ཁོ་བོ་ནི་བཅོམ་ལྡན་འདས་བལྟ་བར་འདོད་པ་མ་ཡིན། ཆོས་ཉན་པར་འདོད་པ་ཡང་མ་ཡིན་ཏེ། བཙུན་པ་ཤཱ་ར་དྭ་ཏིའི་བུ་ཁོ་བོ་ནི་ཆོས་ཐམས་ཅད་མི་འདོད་པའི་ཕྱིར་བཅོམ་ལྡན་འདས་ཀྱི་ཐད་དུ་འོངས་སོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་གཟུགས་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། སའི་ཁམས་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ཆུའི་ཁམས་དང ། མེའི་ཁམས་དང ། རླུང་གི་ཁམས་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། བདག་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། སེམས་ཅན་དང ། སྲོག་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། གང་ཟག་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན་ངར་འཛིན་པ་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ང་ཡིར་འཛིན་པ་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། མཚན་མ་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན་པའི་ཕྱིར་ཏེ། བཙུན་པ་ཤཱ་ར་དྭ་ཏིའི་བུ་མཚན་མ་ཐམས་ཅད་མ་མཐོང་བ་དེ་ནི་དེ་བཞིན་གཤེགས་པ་མཐོང་བའོ། །མངོན་པར་ཞེན་པ་མེད་པ་མཐོང་བ་ནི་དེ་བཞིན་གཤེགས་པ་མཐོང་བའོ། །དངོས་པོ་མེད་པ་མཐོང་བ་ནི་དེ་བཞིན་གཤེགས་པ་མཐོང་བའོ། །ངོ་བོ་ཉིད་མེད་པ་མཐོང་བ་ནི་དེ་བཞིན་གཤེགས་པ་མཐོང་བའོ། །ཡང་དག་པའི་མཐའ་མེད་པར་མཐོང་བ་ནི་དེ་བཞིན་གཤེགས་པ་མཐོང་བའོ། །མིག་གཟུགས་ལ་འདོད་ཆགས་དང་བྲལ
52.81b
བར་མཐོང་བ་ནི་དེ་བཞིན་གཤེགས་པ་མཐོང་བའོ། །རྣ་བ་སྒྲ་ལ་རྣམ་པར་རིག་པ་མེད་པར་མཐོང་བ་ནི་དེ་བཞིན་གཤེགས་པ་མཐོང་བའོ། །སྣ་དྲི་ལ་འཕོ་བ་མེད་པར་མཐོང་བ་ནི་དེ་བཞིན་གཤེགས་པ་མཐོང་བའོ། །ལྕེ་རོ་ལ་རྣམ་པར་ཤེས་པར་མི་མཐོང་བ་ནི་དེ་བཞིན་གཤེགས་པ་མཐོང་བའོ། །ལུས་རེག་བྱ་ལ་རེག་པར་མི་མཐོང་བ་ནི་དེ་བཞིན་གཤེགས་པ་མཐོང་བའོ་ཡིད་ཆོས་ལ་རྣམ་པར་མ་བརྟགས་པར་མཐོང་བ་ནི་དེ་བཞིན་གཤེགས་པ་མཐོང་བའོ། །ཤཱ་ར་དྭ་ཏིའི་བུས་སྨྲས་པ་བདེན་སྨྲ་དེ་ལྟར་མཐོང་བས་གལ་ཏེ་དེ་བཞིན་གཤེགས་པ་མཐོང་བ་ཡིན་ན། འོ་ན་དེ་བཞིན་གཤེགས་པ་ཇི་ལྟར་བལྟ་བར་བྱ། བདེན་སྨྲས་སྨྲས་པ། བཙུན་པ་ཤཱ་ར་དྭ་ཏིའི་བུ་དེ་བཞིན་གཤེགས་པ་ནི་རིགས་སུ་མི་བལྟའོ། །རུས་སུ་མི་བལྟའོ། །མཚན་ཉིད་དུ་མི་བལྟའོ། །མཚན་ཉིད་མེད་པར་མི་བལྟའོ། །ཆོས་སུ་མི་བལྟའོ། །ཆོས་མ་ཡིན་པར་མི་བལྟའོ། །ཡང་དག་པར་མི་བལྟའོ། །ཡང་དག་པ་མ་ཡིན་པར་མི་བལྟའོ། །དམིགས་པར་མི་བལྟའོ། །དམིགས་པ་མེད་པར་མི་བལྟའོ། །ཡིད་ལ་བྱ་བར་མི་བལྟའོ། །ཡིད་ལ་བྱ་བ་མེད་པར་མི་བལྟའོ། །རྟོག་པར་མི་བལྟའོ། །མི་རྟོག་པར་མི་བལྟའོ། །འདུས་བྱས་སུ་མི་བལྟའོ། །འདུས་མ་བྱས་སུ་མི་བལྟའོ། །དངོས་པོ་ཡོད་པར་མི་བལྟའོ། །དངོས་པོ་མེད་པར་མི་བལྟའོ། །གོང་བུར་མི་བལྟའོ། །རྫས་སུ་མི་བལྟའོ། །གཟུགས་སུ་མི་བལྟའོ། །ཚོར་བར་མི་བལྟའོ། །འདུ་ཤེས་སུ་མི་བལྟའོ། །འདུ་བྱེད་རྣམས་སུ་མི་བལྟའོ། །རྣམ་པར་ཤེས་པར་མི་བལྟའོ། །ཉེ་བར་ལེན་པར་མི་བལྟའོ། །ཉེ་བར་ལེན་པ་མེད་པར་མི་བལྟའོ། །དེ་བཞིན་གཤེགས་པ་ནི་སྐྱེ་བར་མི་བལྟའོ། །སྐྱེ་བ་མེད་པར་མི་བལྟའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་ཤཱ་ར་དྭ་ཏིའི་བུས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་གལ་ཏེ་དེ་བཞིན་གཤེགས་པ་དེ་ལྟར་མི་ལྟ་ན་སྐྱེས་བུ་དམ་པ་ཁྱོད་དེ་བཞིན་གཤེགས་པ་ལ་ཇི་ལྟར་བལྟ། སྨྲས་པ། བཙུན་པ་ཤཱ་ར་དྭ་ཏིའི་བུ་ཁོ་བོ་ནི་དེ་བཞིན་གཤེགས་པ་གཟུགས་སུ་མི་བལྟའོ། །དེ་བཞིན་གཤེགས་པ་གཟུགས་ལས་གཞན་དུ་ཡང་མི་བལྟའོ། །དེ་བཞིན་གཤེགས་པ
52.82a
གཟུགས་གཞིག་པའི་ཕྱིར་མི་བལྟའོ། །བཙུན་པ་ཤཱ་ར་དྭ་ཏིའི་བུ་ཁོ་བོ་ནི་དེ་བཞིན་གཤེགས་པ་ཚོར་བ་དང ། འདུ་ཤེས་དང ། འདུ་བྱེད་རྣམས་དང་རྣམ་པར་ཤེས་པར་མི་བལྟའོ། །དེ་བཞིན་གཤེགས་པ་རྣམ་པར་ཤེས་པ་ལས་གཞན་དུ་ཡང་མི་བལྟའོ། །དེ་བཞིན་གཤེགས་པ་རྣམ་པར་ཤེས་པ་གཞིག་པའི་ཕྱིར་ཡང་མི་བལྟའོ། །དེ་བཞིན་གཤེགས་པ་འཇིག་རྟེན་དུ་གཏོགས་པར་མི་བལྟའོ། །དེ་བཞིན་གཤེགས་པ་འཇིག་རྟེན་ལས་རྒལ་བར་མི་བལྟའོ། །དེ་བཞིན་གཤེགས་པ་ཕུང་པོས་རབ་ཏུ་ཕྱེ་བར་མི་བལྟའོ། །དེ་བཞིན་གཤེགས་པ་ཁམས་ཀྱིས་རབ་ཏུ་ཕྱེ་བར་མི་བལྟའོ། །དེ་བཞིན་གཤེགས་པ་སྐྱེ་མཆེད་ཀྱིས་རབ་ཏུ་ཕྱེ་བར་མི་བལྟ་སྟེ། དེ་བཞིན་གཤེགས་པ་ནི་ཚིག་གི་ལམ་ཐམས་ཅད་ཀྱིས་བརྗོད་དུ་མེད་པར་བལྟ་ཞིང་ཅི་ནས་ཀྱང་མི་མཐོང་བ་དང་རྣམ་པར་མི་མཐོང་བ་དང ། མི་དམིགས་པ་དང ། མི་རྟོག་པ་དང ། རྣམ་པར་མི་རྟོག་པ་དང ། ཡོངས་སུ་མི་རྟོག་པ་དང ། རྣམ་པར་མཐོ་བརྩམ་པ་མེད་པ་དང ། ཀུན་ནས་སློང་བ་མེད་པ་དང ། ལེན་པ་མེད་པ་དང ། འདོར་བ་མེད་པ་དང ། སྤྲོས་པ་མེད་པ་དང ། མཚན་མར་བྱ་བ་མེད་པ་དང ། མཚན་མར་བྱ་བ་མེད་པ་མ་ཡིན་པ་དང ། བྱ་བ་མེད་པ་དང ། རྣམ་པར་བྱ་བ་མེད་པ་དང ། ཡོད་པར་བྱ་བ་མེད་པ་དང ། མེད་པར་བྱ་བ་མེད་པ་དང ། བླང་བ་མེད་པ་དང ། དོར་བ་མེད་པ་དང ། བསམ་པ་མེད་པ་དང ། ལྷུན་གྱིས་གྲུབ་པ་མེད་པ་དང ། དམིགས་སུ་མེད་པ་ཡང་མ་ཡིན་པ་དེ་ལྟར་དེ་བཞིན་གཤེགས་པ་བལྟ་སྟེ། བརྗོད་དུ་མེད་པ་དང ། བརྗོད་དུ་མེད་པ་ཡང་མ་ཡིན་པ་དེ་ལྟར་དེ་བཞིན་གཤེགས་པ་བལྟའོ། །ཚིག་གི་ལམ་དང་དབྱངས་སུ་བརྗོད་པ་ཡང་མ་ཡིན་པ་དེ་ལྟར་དེ་བཞིན་གཤེགས་པ་བལྟ་སྟེ། ་དེ་བཞིན་གཤེགས་པ་བལྟའོ། །བཙུན་པ་ཤཱ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ཀྱང་དེ་བཞིན་གཤེགས་པ་ལ་དེ་ལྟར་བལྟ་སྟེ། ཁོ་བོ་ཡང་དེ་བཞིན་དུ་བལྟའོ། །ཤཱ་ར་དྭ་ཏིའི་བུས་སྨྲས་པ་དེ་བཞིན་གཤེགས་པ་ལ་གལ་ཏེ་དེ་ལྟར་བལྟ་ན། དེའི་ཆོས་བསྟན་པ་ཡང་ཇི་ལྟར་ཉན། སྨྲས་པ། བཙུན་པ་ཤཱ་ར་དྭ་ཏིའི་བུ་གལ་ཏེ་ཁོ་བོ་ལ་ཆོས་ཀྱི་འདུ་ཤེས་སྐྱེ་བ་ཞིག་ཡོད་དམ། ཆོས་མ
52.82b
ཡིན་པའི་འདུ་ཤེས་སྐྱེ་བ་ཞིག་ཡོད་ན་ནི་ཁོ་བོ་ཡང་བཅོམ་ལྡན་འདས་ཀྱི་ཆོས་བསྟན་པ་ཉན་ཏོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་བརྗོད་པ་ཐམས་ཅད་ལས་བྱང་ཆུབ་སེམས་དཔའི་ཆོས་ཀྱི་ཚིག་འབྱུང་བ་མེད་དེ། དེ་ལ་མངོན་པར་ཞེན་པ་ཡང་མེད་ལ་ཆོས་ཀྱི་འདུ་ཤེས་ཀྱང་མི་སྐྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། འདུ་ཤེས་ཐམས་ཅད་དང་བྲལ་བའི་ཕྱིར་རོ། །ཤཱ་ར་དྭ་ཏིའི་བུས་སྨྲས་པ། བདེན་སྨྲ་ཁྱོད་ཆོས་དོན་དུ་གཉེར་བའི་ཕྱིར་དེ་བཞིན་གཤེགས་པའི་ཐད་དུ་མ་འོངས་སམ། སྨྲས་པ། བཙུན་པ་ཤཱ་ར་དྭ་ཏིའི་བུ་ཁོ་བོ་ནི་ཆོས་དོན་དུ་གཉེར་བ་ཡང་མ་ཡིན། ཆོས་མ་ཡིན་པ་དོན་དུ་གཉེར་བ་ཡང་མ་ཡིན་པར་དེ་བཞིན་གཤེགས་པའི་ཐད་དུ་འོངས་སོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་ཆོས་དོན་དུ་གཉེར་ཞེས་བྱ་བ་དེ་ནི་ཆོས་ཐམས་ཅད་ལ་དོན་དུ་གཉེར་བ་མེད་པའི་ཚིག་བླ་དགས་ཏེ། ་བཙུན་པ་ཤཱ་ར་དྭ་ཏིའི་བུ་གང་ཆོས་དོན་དུ་གཉེར་བ་དེ་ནི་སངས་རྒྱས་ལ་མངོན་པར་ཞེན་པར་འདོད་པ་མ་ཡིན། ཆོས་ལ་སྒྲོ་གདགས་པར་འདོད་པ་མ་ཡིན། དགེ་འདུན་བསྐྱེད་པར་འདོད་པ་མ་ཡིན། སྡུག་བསྔལ་ཡོངས་སུ་ཤེས་པར་བྱ་བར་འདོད་པ་མ་ཡིན། ཀུན་འབྱུང་བ་སྤང་བར་འདོད་པ་མ་ཡིན། ལམ་བསྒོམ་པར་འདོད་པ་མ་ཡིན། འགོག་པ་མངོན་དུ་བྱ་བར་འདོད་པ་མ་ཡིན། འདོད་པའི་ཁམས་ལས་ཡང་དག་པར་འདའ་བར་འདོད་པ་མ་ཡིན། གཟུགས་ཀྱི་ཁམས་དང་གཟུགས་མེད་པའི་ཁམས་ལས་ཡང་དག་པར་འདའ་བར་འདོད་པ་མ་ཡིན། མྱ་ངན་ལས་འདའ་བར་འདོད་པ་མ་ཡིན་པའི་ཕྱིར་ཏེ། བཙུན་པ་ཤཱ་ར་དྭ་ཏིའི་བུ་རྣམ་གྲངས་དེས་ན་འདི་ལྟར་ཁོ་བོ་ནི་ཆོས་ཐམས་ཅད་ལ་དོན་དུ་གཉེར་བ་མེད་པར་དེ་བཞིན་གཤེགས་པའི་སྤྱན་སྔར་ཕྱིན་པར་རིག་པར་བགྱིའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་ཤཱ་ར་དྭ་ཏིའི་བུས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་ཅི་ལས་བསམས་ཏེ་དེ་སྐད་ཅེས་སྨྲ། སྨྲས་པ། བཙུན་པ་ཤཱ་ར་དྭ་ཏིའི་བུ་ཁོ་བོ་ནི་བསམས་པ་མེད་པར་ཆོས་ཐམས་ཅད་དེ་ལྟར་སྟོན་ཏོ། །བཙུན་པ་ཤཱ་ར་དྭ་ཏིའི་བུ་ཆོས་ཀྱི་དབྱིངས་ལ་ནི་གཉིས་མི་དམིགས
52.83a
པའི་ཕྱིར་བསམས་པ་ཡང་མི་དམིགས་མ་བསམས་པ་ཡང་མི་དམིགས་སོ། །སྨྲས་པ། བདེན་སྨྲ་ཁྱོད་འགྲོ་བ་དག་དང་མི་སྦྱོར་རམ། སྨྲས་པ། བཙུན་པ་ཤཱ་ར་དྭ་ཏིའི་བུ་གལ་ཏེ་ཁོ་བོས་འགྲོ་བ་ཞིག་དམིགས་ན་ནི་སྦྱོར་བ་ཡང་ཡོད་གལ་ཏེ་ཁོ་བོ་ལ་སྐྱེ་བ་ཞིག་ཡོད་ན་ནི་སྐྱེ་བར་ཡང་འགྱུར། གལ་ཏེ་ཁོ་བོ་ལ་འཕོ་བ་ཞིག་ཡོད་ན་ནི་འཕོ་བར་ཡང་འགྱུར་ན། བཙུན་པ་ཤཱ་ར་དྭ་ཏིའི་བུ་ཆོས་ཐམས་ཅད་ནི་འཕོ་བ་མེད་པ་སྟེ། འགྲོ་བ་མེད་ཅིང་ཤི་འཕོ་དང་སྐྱེ་བ་མེད་པའོ། །སྨྲས་པ། བདེན་སྨྲ་དེ་བཞིན་གཤེགས་པས་དགེ་སློང་ཁྱོད་ནི་སྐྱེའོ། །རྒའོ་འཆིའོ། །འཕོའོ། །འབྱུང་ངོ་ཞེས་འདི་མ་གསུངས་སམ། སྨྲས་པ། བཙུན་པ་ཤཱ་ར་དྭ་ཏིའི་བུ་འགྲོ་བ་ལ་རྟེན་ཅིང་ལྷག་པའི་ང་རྒྱལ་ཡོད་པའི་སེམས་ཅན་རྣམས་ཀྱི་རྟེན་པ་བསལ་བའི་ཕྱིར་དེ་བཞིན་གཤེགས་པ་དེ་སྐད་ཅེས་སྟོན་ཏེ། བསྟན་པའི་ཆོས་ཉིད་ཇི་ལྟ་བ་བཞིན་དུ་བྱ་ན་འདི་ལ་འགྲོ་བ་མེད། ཤི་འཕོ་མེད། སྐྱེ་བ་མེད་དོ། །ཤཱ་ར་དྭ་ཏིའི་བུས་སྨྲས་པ། བདེན་སྨྲ་ལེགས་སོ་ལེགས་སོ། །འདི་ལྟར་ཐེག་པ་ཆེན་པོ་འདི་བསྟན་པའི་དོན་རྣམ་པར་ངེས་པ་ལ་མཁས་པ་ལེགས་སོ་ལེགས་སོ། །བདེན་སྨྲས་སྨྲས་པ། བཙུན་པ་ཤཱ་ར་དྭ་ཏིའི་བུ་ཁྱོད་ཀྱིས་དོན་ནི་གང ། རྣམ་པར་ངེས་པ་ནི་གང་ཡིན་པ་མཁྱེན་ཏམ། ཤཱ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁོ་བོ་ནི་སྟོན་པར་འདོད་པ་མ་ཡིན་གྱི་ཉན་པར་འདོད་པ་ཡིན་གྱིས། རིགས་ཀྱི་བུ་དོན་ནི་གང ། རྣམ་པར་ངེས་པ་ནི་གང་ཁྱོད་ཀྱིས་སྟོན་ཅིག་དེ་སྐད་ཅེས་སྨྲས་པ་དང ། གཅེར་བུ་པའི་བུ་བདེན་སྨྲས། ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་དོན་ཞེས་བྱ་བ་ནི་བརྗོད་དུ་མེད་པའོ། །དེ་བརྗོད་པ་གང་ཡིན་པ་དེ་ནི་རྣམ་པར་ངེས་པ་ཞེས་བྱའོ། །དོན་ཞེས་བྱ་བ་ནི་སྨྲར་མེད་པའོ། །དེ་སྨྲ་བ་དེ་ནི་རྣམ་པར་ངེས་པ་ཞེས་བྱའོ། །དོན་ཞེས་བྱ་བ་ནི་སྨོས་སུ་མེད་པའོ། །དེ་སྨོས་པ་གང་ཡིན་པ་དེ་ནི་རྣམ་པར་ངེས་པ་ཞེས་བྱའོ། །དོན་ཞེས་བྱ་བ་ནི་གཡོ་བ་མེད་པ། བསམ་པ་མེད་པ། སྤྲོས་པ་མེད་པ། བརྟགས་པ་མེད་པ། རྣམ་པར་བསྒྲུབས་པ་མེད་པ། དངོས་པོ་མེད་པ། རྫས་མེད་པ། ངར་འཛིན་པ་མེད་པ། དབའ་རླབས
52.83b
མེད་པ། གཟུང་བ་མེད་པ། གནས་མེད་པ། གནས་ཀྱི་ཚིག་གི་ལམ་ཐམས་ཅད་ལས་ཡང་དག་པར་འདས་པའོ། །རྣམ་པར་ངེས་པ་ཞེས་བྱ་བ་ནི་བསམ་པ་དང ། གཞལ་བ་དང ། བགྲང་བ་དང ། བརྟག་པ་དང ། གཞན་གྱི་སེམས་ཀྱི་རྒྱུད་ལ་གོ་བར་བྱེད་པའོ། །དོན་ཞེས་བྱ་བ་ནི་དོན་སོ་སོ་ཡང་དག་པར་རིག་པའོ། །རྣམ་པར་ངེས་པ་ཞེས་བྱ་བ་ནི་ཆོས་དང་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་སྟེ། བཙུན་པ་ཤཱ་ར་དྭ་ཏིའི་བུ་འདི་ནི་མདོར་ན་དོན་ཏོ། །འདི་ནི་རྣམ་པར་ངེས་པའོ། །དེ་ནས་བཅོམ་ལྡན་འདས་ཀྱིས་རིགས་ཀྱི་བུ་བདེན་སྨྲ་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །ཇི་ལྟར་ཁྱོད་སྟོན་པ་དེ་ལྟར་གཞན་གྱིས་ཀྱང་བསྟན་པར་བྱའོ། །ཁྱོད་ཀྱིས་བསྟན་པ་འདི་བཤད་པས་ལྷའི་བུ་སྟོང་ཕྲག་གསུམ་མི་སྐྱེ་བའི་ཆོས་ལ་བཟོད་པ་སྐྱེས་པར་གྱུར་ཏོ། །སྲོག་ཆགས་ཉི་ཁྲིས་ཁྱོད་ཀྱི་སྤོབས་པའི་ཆེ་བ་ཕུན་སུམ་ཚོགས་པ་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་བདེན་སྨྲས་མུ་སྟེགས་ཅན་གྱི་ཆ་བྱད་འདིས་སེམས་ཅན་ཇི་སྙེད་ཅིག་ཡོངས་སུ་སྨིན་པར་བགྱིས་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ཆེན་པོ་གནས་འདི་ཐོས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་ལྷ་དང་བཅས་པའི་འཇིག་རྟེན་རྨོངས་པར་འགྱུར་རོ། །མཽད་གལ་གྱི་བུ་ཆེན་པོ་འོན་ཀྱང་མགོ་ཙམ་ཞིག་བསྟན་གྱིས་རིགས་ཀྱི་བུ་བདེན་སྨྲ་འདིས་ཁ་དོག་དང ། གཟུགས་དང ། སྤྱོད་ལམ་སྣ་ཚོགས་ཀྱིས་སེམས་ཅན་ཇི་སྙེད་ཡོངས་སུ་སྨིན་པར་བྱས་པ་ཉོན་ཅིག་།མཽད་གལ་གྱི་བུ་ཆེན་པོ་རིགས་ཀྱི་བུ་བདེན་སྨྲ་འདིས་མུ་སྟེགས་ཅན་གྱི་གཟུགས་སུ་གནས་ཏེ། སེམས་ཅན་རི་རབ་ཀྱི་རྡུལ་ཕྲ་རབ་ཀྱི་རྡུལ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སྤྱོད་པའི
52.84a
གཟུགས་ཀྱིས་སེམས་ཅན་གླིང་བཞི་པའི་རྡུལ་ཕྲ་རབ་ཀྱི་རྡུལ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཀུན་དུ་རྒྱུའི་གཟུགས་ཀྱིས་སེམས་ཅན་གང་གཱའི་ཀླུང་བརྒྱད་བཅུ་རྩ་བཞིའི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཉན་ཐོས་ཀྱི་གཟུགས་ཀྱིས་སེམས་ཅན་གང་གཱའི་ཀླུང་བཅུའི་བྱེ་མ་སྙེད་ཉན་ཐོས་ཀྱི་བྱང་ཆུབ་ཏུ་ངེས་པར་འབྱུང་བར་བསྟན་ནས་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་བས་ཀྱང་ཆེས་མང་བའི་སེམས་ཅན་རྣམས་རང་སངས་རྒྱས་ཀྱི་གཟུགས་ཀྱིས་ཡོངས་སུ་སྨིན་པར་བྱས་སོ། །བྱང་ཆུབ་སེམས་དཔའི་གཟུགས་ཀྱིས་སེམས་ཅན་བགྲང་བ་ལས་འདས་པ་ཡོངས་སུ་སྨིན་པར་བྱས་སོ། །གཞན་དག་བརྒྱ་བྱིན་གྱི་གཟུགས་ཀྱིས། གཞན་དག་ཚངས་པའི་གཟུགས་ཀྱིས། གཞན་དག་འཁོར་ལོས་སྒྱུར་བའི་གཟུགས་ཀྱིས། གཞན་དག་འཇིག་རྟེན་སྐྱོང་བའི་གཟུགས་ཀྱིས། ་གཞན་དག་མི་འམ་ཅིའི་གཟུགས་ཀྱིས། གཞན་དག་ལྷ་མ་ཡིན་གྱི་གཟུགས་ཀྱིས་གཞན་དག་ནམ་མཁའ་ལྡིང་གི་གཟུགས་ཀྱིས། གཞན་དག་ལྟོ་འཕྱེ་ཆེན་པོའི་གཟུགས་ཀྱིས་གཞན་དག་སྐྱེས་པའི་གཟུགས་ཀྱིས་གཞན་དག་བུད་མེད་ཀྱི་གཟུགས་ཀྱིས་གཞན་དག་ཁྱེའུའི་གཟུགས་ཀྱིས་གཞན་དག་བུ་མོའི་གཟུགས་ཀྱིས་གཞན་དག་སའི་ལྷའི་གཟུགས་ཀྱིས་གཞན་དག་ལྷན་ཅིག་སྐྱེས་པའི་གཟུགས་ཀྱིས། གཞན་དག་དྲང་སྲོང་གི་གཟུགས་ཀྱིས། གཞན་དག་བྲམ་ཟེའི་ཁྱེའུའི་གཟུགས་ཀྱིས། གཞན་དག་དགེ་སློང་གི་གཟུགས་ཀྱིས། གཞན་དག་དགེ་སློང་མའི་གཟུགས་ཀྱིས། གཞན་དག་དགེ་བསྙེན་གྱི་གཟུགས་ཀྱིས། གཞན་དག་དགེ་བསྙེན་མའི་གཟུགས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་ཏེ། མཽད་གལ་གྱི་བུ་རིགས་ཀྱི་བུ་བདེན་སྨྲ་འདིས་དེ་ལྟར་སེམས་ཅན་མང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །གསོལ་པ། འདིས་དེ་བཞིན་གཤེགས་པ་ཇི་སྙེད་ཅིག
52.84b
མཉེས་པར་བགྱིས་ལགས། བཀའ་སྩལ་པ། མཽད་གལ་གྱི་བུ་སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། སེམས་ཅན་གྱི་ཁམས་ཀྱི་མཐའ་ནི་རྟོགས་པར་ནུས་སྲིད་ཀྱི། རིགས་ཀྱི་བུ་བདེན་སྨྲ་འདིས་དེ་བཞིན་གཤེགས་པ་ཇི་སྙེད་ཅིག་གཟུགས་སྣ་ཚོགས་ཀྱིས་མཉེས་པར་བྱས་པའི་སངས་རྒྱས་བྱུང་བ་དེ་དག་གི་མཐའ་ནི་རྟོགས་པར་མི་ནུས་སོ། །དེ་ནས་གནས་བརྟན་འོད་སྲུང་ཆེན་པོས་རིགས་ཀྱི་བུ་བདེན་སྨྲ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་མང་པོ་མཉེས་པར་བྱས་ན་དེ་ལྟར་བསམ་པ་ཡོངས་སུ་རྫོགས་པ་ཅིའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ། བདེན་སྨྲས་སྨྲས་པ། བཙུན་པ་འོད་སྲུང་གལ་ཏེ་ཁོ་བོའི་བྱང་ཆུབ་བམ། མངོན་པར་རྫོགས་པར་འཚང་རྒྱ་བར་བྱེད་པ་ཞིག་དམིགས་ན་ནི་ཁོ་བོ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །སྨྲས་པ། བདེན་སྨྲ་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་སམ། མངོན་པར་རྫོགས་པར་འཚང་མི་རྒྱ་འམ། མངོན་པར་རྫོགས་པར་འཚང་རྒྱ་བར་མི་འགྱུར་རམ། སྨྲས་པ། བཙུན་པ་འོད་སྲུང་དེ་ནི་སེམས་ཅན་མངོན་པའི་ང་རྒྱལ་ཅན་རྣམས་ལ་གྲངས་སུ་བྱས་པ་ཡིན་ཏེ། འདི་ལ་དོན་དམ་པར་ན་བྱང་ཆུབ་དམིགས་སུ་མེད་དོ། །བྱང་ཆུབ་སེམས་དཔའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་འདི་ལྟར་བྱང་ཆུབ་ནི་འདུས་མ་བྱས་པ་སྟེ། གྲངས་ཐམས་ཅད་དང་བྲལ་བ། གཟུགས་མེད་པ། བསྟན་དུ་མེད་པ་སྟེ། སྔོན་པོ་མ་ཡིན་སེར་པོ་མ་ཡིན། དཀར་པོ་མ་ཡིན། བཙོད་ཀ་མ་ཡིན། ཤེལ་གྱི་མདོག་མ་ཡིན། ཁ་དོག་མེད་པ། དབྱིབས་མེད་པ། རྟགས་མེད་པ།
52.85a
མཚན་མ་མེད་པ་མཚན་མ་ཐམས་ཅད་ལས་ཡང་དག་པར་འདས་པ། གནས་མེད་པ། གནས་ཐམས་ཅད་ཡང་དག་པར་བཅོམ་པ། དངོས་པོ་མེད་པ། དངོས་པོ་ཐམས་ཅད་དང་བྲལ་བ། མཚན་ཉིད་མེད་པ། མཚན་ཉིད་ཐམས་ཅད་དང་བྲལ་བ། བརྗོད་དུ་མེད་པ། ཚིག་གི་ལམ་ཐམས་ཅད་ཀྱིས་རྟོགས་པར་མི་ནུས་པ། བལྟར་མེད་པ། རིལ་པོ་མ་ཡིན་པ། རྫས་མེད་པ། མུན་པ་མེད་པ། སྣང་བ་མེད་པ། རྟགས་མེད་པ། དབྱིབས་མེད་པ། སྨྲར་མེད་པ། སྨོས་སུ་མེད་པ། རེག་པར་བྱར་མེད་པ། རྣམ་པར་ཤེས་པར་མི་རུང་བ། ཐོས་པར་མི་རུང་བ། དབྱངས་མེད་པ། ཚིག་གི་ལམ་མེད་པ། ཐོགས་པ་མེད་པ། མ་བཅིངས་པ། མ་གྲོལ་བ། འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པ། རྒྱུ་ཐམས་ཅད་ཀྱིས་གདགས་སུ་མེད་པ། གདགས་པར་བྱ་བ་མ་ཡིན་པ་སྟེ། བཙུན་པ་འོད་སྲུང་བྱང་ཆུབ་ནི་དེ་ལྟ་བུའི་རང་བཞིན་ཡིན་པས་དེ་ནི་ལུས་ཀྱིས་མངོན་པར་རྫོགས་པར་འཚང་རྒྱ་བར་མི་ནུས་སོ། །སེམས་ཀྱིས་ཀྱང་མི་ནུས་སོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ལུས་ནི་སེམས་མེད་པ། གཡོ་བ་མེད་པ། རྩཝ་དང ། ཤིང་དང ། རྩིག་པ་དང ། བོང་བ་སྣང་བ་ལྟ་བུ་སྟེ། དེས་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །སེམས་ཀྱང་དེ་ལྟ་བུའི་རང་བཞིན་ཡིན་ཞིང་བལྟར་མེད་པ། དེས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བར་མི་ནུས་སོ། །གང་གིས་མངོན་པར་རྫོགས་པར་འཚང་རྒྱ་བར་བྱ་བའི་སེམས་ཅན་དེ་དག་ཀྱང་མི་དམིགས་ཏེ། བཙུན་པ་འོད་སྲུང་ཆོས་ཐམས་ཅད་དེ་ལྟ་བུའི་རང་བཞིན་ཡིན་ན། དེ་ལ་ཅིའི་ཕྱིར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་ཞེས་ཇི་སྟེ་དེ་ལྟར་སེམས་པར་གྱུར། དེ་ནས་བྱང་ཆུབ་སེམས་དཔའ་དེ་དག་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དེ་དག་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་སེམས་ཅན་བདག་ཅག་གི་བསམ་པ་དང་མོས་པ་བཞིན་དུ་ཐེ་ཙོམ་དང་ནེར་ནུར་དང
52.85b
ཡིད་གཉིས་བསལ་བའི་ཕྱིར་རིགས་ཀྱི་བུ་བདེན་སྨྲ་འདི་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང ། འཇིག་རྟེན་གྱི་ཁམས་གང་དུ་མངོན་པར་རྫོགས་པར་འཚང་རྒྱ་བ་དང ། འདི་བྱང་ཆུབ་ཐོབ་ནས་མཚན་ཅི་ཞེས་བྱ་བར་འགྱུར་བ་དང ། ཚེའི་ཚད་ཇི་ཙམ་དུ་འགྱུར་བ་དང ། བྱང་ཆུབ་ཐོབ་ནས་དེའི་འཁོར་འདུས་པ་ཇི་སྙེད་ཅིག་ཏུ་འགྱུར་བ་ལུང་བསྟན་ཀྱང་ཅི་མ་རུང་སྙམ་པ་དང ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དེ་དག་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་ཐུགས་སུ་ཆུད་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་རིགས་ཀྱི་བུ་བདེན་སྨྲ་འདི་ནི་བསྐལ་པ་བཟང་པོ་འདི་འདས་པའི་འོག་ཏུ་བསྐལ་པ་བགྲང་བ་ལས་ཡང་དག་པར་འདས་པ་སྙེད་ཅིག་ན་བསྐལ་པ་གནོད་པར་སྡོ་བའི་དགྲ་མེད་པ་ཞེས་བྱ་བ་ལ་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པའི་བློ་གྲོས་ཀྱི་རྟོག་གི་རྒྱལ་པོ་ཞེས་བྱ་བར་འགྱུར་རོ། །འཇམ་དཔལ་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་ཞེས་བྱ་བ་དེ་ནི་བཟང་ཞིང་མཛེས་ལ་བལྟ་ན་སྡུག་པ། རིན་པོ་ཆེ་སྣ་བདུན་གྱིས་རབ་ཏུ་བརྒྱན་པ། རིན་པོ་ཆེའི་རབ་འབུམ་ཕྲག་བདུན་གྱིས་བསྐོར་བ། སྤོས་ཆུའི་འོབས་འབུམ་ཕྲག་བདུན་གྱིས་རྗེས་སུ་བསྐོར་བ། ནོར་བུ་རིན་པོ་ཆེ་བཻ་དཱུརྱ་ཆེན་པོ་འབུམ་ཕྲག་བདུན་གྱི་ཤིང་ཐགས་བཙུགས་པ། འཛམ་བུ་ཆུ་བོའི་གསེར་གྱི་དྲ་བ་ས་ཡ་དག་གིས་སྟེང་ནས་ཡོངས་སུ་བཀབ་པ། ནོར་བུ་རིན་པོ་ཆེ་ས་ཡ་དག་གིས་བརྒྱན་པའི་རྟ་བབས་དང་ལྡན་པ། ནོར་བུ་རིན་པོ་ཆེ་སེང་གེ་ཡིད་དུ་འོང་བ་ས་ཡ་དག་གིས་སྤྲས་པའི་པུ་ཤུ་དང ། སྐར་ཁུང་དག་གིས་མཛེས་པར་བྱས་པ། ནོར་བུ་རིན་པོ་ཆེ་སེང་གེའི་རྒྱལ་མཚན་ས་ཡ་དག་གིས་སྤྲས་པའི་མཁའ་རྟེན་རྣམས་ཀྱིས་མཛེས་པར་བྱས་པ། ནོར་བུ་རིན་པོ་ཆེ་སྣང་བའི་རྒྱལ་མཚན
52.86a
ས་ཡ་དག་གིས་གཅིག་ཏུ་འབར་བར་སྣང་བར་བྱས་པ། དྲིལ་བུ་གཡེར་ཀའི་དྲ་བ་ས་ཡ་དག་གིས་ཀུན་ནས་སྒྲ་ཕྱུང་བའི་སྒྲ་ཡིད་དུ་འོང་བ་དང་ལྡན་པ། གསེར་གྱི་ལྡ་ལྡི་ས་ཡ་དག་ཀུན་ནས་མངོན་པར་བྲེས་པ་དང་ལྡན་པ། ནོར་བུ་རིན་པོ་ཆེ་ཏོག་གི་རྒྱལ་མཚན་གྱི་ལྷའི་བ་དན་དང ། རྒྱལ་མཚན་ས་ཡ་བསྒྲེང་བ་དང་ལྡན་པར་འགྱུར་ཏེ། འཇམ་དཔལ་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་དེ་ནི་ལག་མཐིལ་ལྟར་མཉམ་ཞིང་རིན་པོ་ཆེའི་ཤིང་ལྗོན་པ་དག་གིས་ཀུན་དུ་གང་བར་འགྱུར་ཏེ། དེ་ན་རྩཝ་སྐྱེ་བ་དག་འཇམ་ཞིང་གཡུང་དྲུང་འཁྱིལ་བ་ལྟར་གཡས་སུ་འཁྱིལ་ལ། རྨ་བྱའི་མགྲིན་པ་འདྲ་ཞིང་ཀ་ཙ་ལིན་དི་ཀའི་གོས་ལྟར་འཇམ་པ་ཤ་སྟག་གིས་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་དེ་ཀུན་ནས་གཡོག་པར་འགྱུར། བསྐྱེད་མོས་ཚལ་ས་ཡ་དག་གིས་བརྒྱན་པར་འགྱུར། བསྐྱེད་མོས་ཚལ་རེ་རེ་ཡང་རྫིང་བུ་ས་ཡ་དག་གིས་ལེགས་པར་བརྒྱན་ཅིང་ཀུན་ནས་མཛེས་པར་འགྱུར། རྫིང་བུ་རེ་རེ་ཡང་སྟེགས་བརྒྱད་དང་བཅས་པ་ནོར་བུ་རིན་པོ་ཆེ་ཡན་ལག་བརྒྱད་དང་ལྡན་པས་སྤྲས་པ། འཛམ་བུ་ཆུ་བོའི་གསེར་གྱི་བྱེ་མ་བདལ་བ། ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། རིན་པོ་ཆེའི་པད་མས་ཀུན་ནས་ཡོག་པ། ངང་པ་དང ། ངུར་པ་དང ། ཁྲུང་ཁྲུང་སྒྲ་སྐད་འབྱིན་པ་དང་ལྡན་པར་འགྱུར་ཏེ། འཇམ་དཔལ་དེ་ལྟར་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་དེ་ནི་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ས་ཡ་དག་གིས་ཀུན་ནས་བརྒྱན་པར་འགྱུར། གྲོང་ཁྱེར་ཆེན་པོ་རེ་རེ་ཡང་གྲོང་ཁྱེར་ས་ཡ་ས་ཡ་དག་གིས་ལེགས་པར་བརྒྱན་པར་འགྱུར་ཞིང་དེ་བཞིན་དུ་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཐམས་ཅད་ཀྱང་དེ་སྙེད་དུ་འགྱུར་ཏེ། གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་ས་ཡ་ས་ཡ་ཐམས་ཅད་ཀྱང་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དུ་མ་དག་གིས་གང་བར་འགྱུར་རོ། །འཇམ་དཔལ་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ
52.86b
ཅན་དེར་གླིང་བཞི་པའི་འཇིག་རྟེན་གྱི་ཁམས་བར་མ་བལྟ་ན་ཡིད་དུ་འོང་བ་ཞེས་བྱ་བ། ཤིན་དུ་བལྟ་ན་སྡུག་པ། ཤིན་དུ་མཛེས་པ། ཤིན་དུ་འབྱོར་པ། ཤིན་དུ་རྒྱས་པ། སྐྱེས་པ་དང ། བུད་མེད་ཤིན་དུ་མང་བས་གང་བ་འབྱུང་བར་འགྱུར་ཏེ། དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེའི་སྐྱེ་བའི་གྲོང་ཁྱེར་དུ་འགྱུར་རོ། །འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་ནི་བྲམ་ཟེའི་རིགས་ལས་མངོན་པར་འབྱུང་བར་འགྱུར་རོ། །དེའི་ཡུམ་ནི་ཤུགས་ལྡན་ཞེས་བྱ་བར་འགྱུར་ཏེ། ད་ལྟར་ངའི་ཡུམ་ལྷ་མོ་སྒྱུ་འཕྲུལ་ལྟ་བུར་འགྱུར་རོ། །དེའི་ཡབ་ནི་ཚངས་པའི་དབྱིག་ཅེས་བྱ་བར་འགྱུར་ཏེ། ད་ལྟར་ངའི་ཡབ་རྒྱལ་པོ་ཟས་གཙང་མ་ལྟ་བུར་འགྱུར་རོ། །དེའི་སྲས་ནི་སྒྲ་རྣམ་པར་གྲགས་པ་ཞེས་བྱ་བར་འགྱུར་ཏེ། །ད་ལྟར་ངའི་གཞོན་ནུ་སྒྲ་གཅན་འཛིན་ལྟ་བུར་འགྱུར་རོ། །དེའི་བཙུན་མོ་དམ་པ་ནི་བློ་གྲོས་ཆེན་པོ་ཞེས་བྱ་བར་འགྱུར་ཏེ། ད་ལྟར་ངའི་ཤཱཀྱའི་བུ་མོ་ས་འཚོ་མ་ལྟ་བུར་འགྱུར་རོ། །དེའི་མ་མ་ནི་གྲགས་པ་ཆེན་པོ་ཞེས་བྱ་བར་འགྱུར་ཏེ། ད་ལྟར་ངའི་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལྟ་བུར་འགྱུར་རོ། །བཅོམ་ལྡན་འདས་དེའི་རིམ་གྲོ་པ་ནི་རྟག་ཏུ་རྗེས་སུ་འབྲང་བ་ཞེས་བྱ་བར་འགྱུར་ཏེ། ད་ལྟར་ངའི་རིམ་གྲོ་པ་འདུན་པ་ལྟ་བུར་འགྱུར་རོ། །དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་གང་ལ་བཅིབས་ཏེ། མངོན་པར་འབྱུང་བར་འགྱུར་བའི་རྟའི་རྒྱལ་པོ་དེ་ནི་ཤུགས་ཅན་ལྡན་ཞེས་བྱ་བར་འགྱུར་ཏེ། ད་ལྟར་ངའི་རྟའི་རྒྱལ་པོ་མངགས་ལྡན་ལྟ་བུར་འགྱུར་རོ། །བཅོམ་ལྡན་འདས་དེའི་བྱང་ཆུབ་ཀྱི་སྙིང་པོ་ནི་ཆོས་ཀྱིས་འཕགས་པ་ཞེས་བྱ་བར་འགྱུར་ཏེ། དེར་དེ་བཞིན་གཤེགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བྱང་ཆུབ་ཀྱི་སྙིང་པོ་དེ་ནི་བྱང་ཆུབ་ཀྱི་ཤིང་འབུམ་ཕྲག་བརྒྱད་ཅུས་ཡོངས་སུ་བསྐོར་བར་འགྱུར་རོ། །འཇམ་དཔལ་དེའི་ཚེ་དེའི་དུས་ན་བདུད་དམ་བདུད་ཀྱི་རིས་ཀྱི་ལྷ་རྣམས་འབྱུང་བར་མི་འགྱུར་ཏེ་འཇམ་དཔལ
52.87a
གང་གི་ཚེ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་འཇིག་རྟེན་གྱི་ཁམས་དེ་ན་སེམས་ཅན་གྱི་རིས་གང་ཇི་སྙེད་ཅིག་ཡོད་པ་དེ་དག་ཐམས་ཅད་མེ་ཏོག་དང་ཕྲེང་བ་དང ། སྤོས་དང ། ཕྱེ་མ་དང ། བྱུག་པ་དང ། སིལ་སྙན་དང ། ཕེག་ཐོགས་ཤིང་བྱང་ཆུབ་ཀྱི་སྙིང་པོ་ཆོས་ཀྱིས་འཕགས་པ་ག་ལ་བ་དེར་དོང་སྟེ། གླུ་དང་རོལ་མོ་སྣ་ཚོགས་བྱེད་པར་འགྱུར་རོ། །འོག་མིན་རིས་ཀྱི་མཐར་ཐུག་པའི་ལྷའི་ཚོགས་ཐམས་ཅད་ཀྱང་དེར་འདུ་བར་འགྱུར་རོ། །གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། མི་འམ་ཅི་དང ། ལྟོ་འཕྱེ་ཆེན་པོའི་ཚོགས་ཕལ་པོ་ཆེ་འང་དེར་འདུ་བར་འགྱུར་རོ། །ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དག་ནས་ཀྱང་བྱང་ཆུབ་སེམས་དཔའི་ཚོགས་ཤིན་དུ་མང་བ་འདུ་བར་འགྱུར་རོ། །འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་ཐོག་མ་མངོན་པར་རྫོགས་པར་སངས་རྒྱས་ནས་འདུས་པའི་འཁོར་དུ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་བ་བསྟན་པའི་ཆོས་ཀྱི་རྣམ་གྲངས་ཆེན་པོ་མདོ་སྡེ་བྱེ་བ་འབུམ་ཕྲག་དུ་མའི་འཁོར་དང་ལྡན་པ་སྟོན་པར་འགྱུར་ཏེ། འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེས་ཆོས་ཀྱི་རྣམ་གྲངས་དེ་བསྟན་པའི་ཚེ་སེམས་ཅན་གང་གཱའི་ཀླུང་གི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེས་ཆོས་སྟོན་པ་ནི་ཐེག་པ་གསུམ་རྣམ་པར་དགོད་པས་མི་སྟོན་ཏེ། སངས་རྒྱས་ཀྱི་ཞིང་དེར་ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པ་དག་འབྱུང་བར་མི་འགྱུར་རོ། །སེམས་ཅན་ཐམས་ཅད་ཀྱང་ཐེག་པ་གཅིག་ལ་མོས་པ་རྒྱ་ཆེན་པོ་ལ་མོས་པ་ཤ་སྟག་སངས་རྒྱས་ཀྱི་ཞིང་དེར་སྐྱེ་བར་འགྱུར་ཏེ། འཇམ་དཔལ་དེ་ལྟར་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེའི་འདུས་པ
52.87b
དང་པོ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་གང་གཱའི་ཀླུང་གི་བྱེ་མ་སྙེད་དུ་འགྱུར་རོ། །འདུས་པ་གཉིས་པ་ནི་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཁྲག་ཁྲིག་ཕྲག་བརྒྱད་བཅུར་འགྱུར་རོ། །འདུས་པ་གསུམ་པ་ནི་བྱང་ཆུབ་སེམས་དཔའ་དཀྲིགས་ཕྲག་དྲུག་བཅུར་འགྱུར་ཏེ། དེ་ཕྱིན་ཅད་སེམས་ཅན་གྲངས་དང་བགྲང་བ་ལས་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་འགོད་པར་འགྱུར་རོ། །འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་བྱང་ཆུབ་ཐོབ་པའི་ཚེའི་ཚད་ནི་བར་གྱི་བསྐལ་པ་དྲུག་བཅུར་འགྱུར་རོ། །དེ་ཡོངས་སུ་མྱ་ངན་ལས་འདས་ནས་ཀྱང་ལོ་བྱེ་བ་ཁྲག་ཁྲིག་འབུམ་ཕྲག་བརྒྱད་བཅུར་དམ་པའི་ཆོས་གནས་པར་འགྱུར་རོ། །དམ་པའི་ཆོས་རྒྱས་པས་སེམས་ཅན་དེ་སྙེད་འདུལ་བར་འགྱུར་རོ། །འཇམ་དཔལ་དེ་བཞིན་གཤེགས་པ་དེ་གང་གི་ཚེ་ཡོངས་སུ་མྱ་ངན་ལས་འདའ་བར་འགྱུར་བ་དེའི་ཚེ་བྱང་ཆུབ་སེམས་དཔའ་ཏོག་ཆེན་པོ་ཞེས་བྱ་བ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་བཀོད་པ་ཆེན་པོ་ཞེས་བྱ་བར་འགྱུར་རོ་ཞེས་བྱང་ཆུབ་སེམས་དཔའ་ཏོག་ཆེན་པོ་ཞེས་བྱ་བ་ལུང་བསྟན་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་དེའི་ཚེ་ཐམས་ཅད་དང་ལྡན་པའི་འཁོར་དེ་དེའི་ཚེ་དེའི་དུས་ན་བྱང་ཆུབ་སེམས་དཔའ་ཏོག་ཆེན་པོ་ཞེས་བྱ་བ་འབྱུང་ཞིང ། བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཀོད་པ་ཆེན་པོ་ཞེས་བྱ་བར་འགྱུར་བ་དེ་གང་ཞིག་ཡིན་སྙམ་དུ་ཡ་མཚན་དུ་འཛིན་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེའི་སེམས་ཀྱི་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས་འཇམ་དཔལ་གཞོན་ནུར
52.88a
གྱུར་པ་ལ་བཀའ་སྩལ་པ། འཇམ་དཔལ་རིགས་ཀྱི་བུ་བདེན་སྨྲ་འདིའི་མདུན་དུ་བྲམ་ཟེའི་ཁྱེའུ་བདེན་དགའ་ཞེས་བྱ་བ་འདུག་པ་བྲམ་ཟེའི་བྱིས་པ་ཐམས་ཅད་ཀྱི་ནང་ན་མཆོག་ཏུ་བྱ་བ་འདི་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཀོད་པ་ཆེན་པོ་ཞེས་བྱ་བར་འགྱུར་ཏེ། དེའི་སངས་རྒྱས་ཀྱི་ཞིང་གི་བཀོད་པ་དེ་དག་ནི་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོའི་སངས་རྒྱས་ཀྱི་ཞིང་གི་བཀོད་པ་བཞིན་དུ་འགྱུར་རོ། །སངས་རྒྱས་ཀྱི་ཞིང་གི་ཡོན་ཏན་བཀོད་པའི་ཆེ་བ་དེ་ཐོས་ནས་འཁོར་གྱི་དཀྱིལ་འཁོར་དེ་ལས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་བཅུས་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་སྟེ། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་པ་དེའི་ཚེ་བདག་ཅག་ཀྱང་འཇིག་རྟེན་གྱི་ཁམས་དེར་སྐྱེ་བར་ཤོག་ཤིག་ཅེས་སྨོན་ལམ་བཏབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་དག་ཐམས་ཅད་ཀྱང་སངས་རྒྱས་ཀྱི་ཞིང་དེར་སྐྱེ་བར་ལུང་བསྟན་ཏོ། །དེ་ནས་གཅེར་བུ་པ་འབུམ་ཕྲག་བརྒྱད་བཅུ་པོ་དེ་དག་གིས་ཀྱང་ཚིག་འཐུན་པར་སྨྲས་པ། བཅོམ་ལྡན་འདས་བདག་ཅག་ཀྱང་སངས་རྒྱས་ཀྱི་ཞིང་དེར་སྐྱེ་བར་གྱུར་ཅིག་ཅེས་སྨོན་ལམ་བཏབ་བོ། །དེ་ནས་བཅོམ་ལྡན་འདས་ཀྱིས་དེ་དག་ཀྱང་སངས་རྒྱས་ཀྱི་ཞིང་དེར་སྐྱེ་བར་ལུང་བསྟན་ཏོ། །དེ་ནས་སྟེང་གི་བར་སྣང་ལས་ཀྱང་ལྷའི་བུ་བྱེ་བ་ཁྲག་ཁྲིག་འབུམ་ཕྲག་དགུ་བཅུས་འདི་སྐད་ཀྱི་ཚིག་བརྗོད་དེ། བཅོམ་ལྡན་འདས་བདག་ཅག་ཀྱང་བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་བྱང་ཆུབ་བརྙེས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་དེར་སྐྱེ་བར་གྱུར་ཅིག་།ཡོན་ཏན་བཀོད་པ་བསམ་གྱིས་མི་ཁྱབ་པ་དེ་ཡང་མཐོང་བར་ཤོག་ཤིག་ཅེས་སྨོན་ལམ་བཏབ་བོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་ཁྱེད་ཅག་ཀྱང་འཇིག
52.88b
རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་དེར་སྐྱེ་བར་འགྱུར་ཏེ། དེ་བཞིན་གཤེགས་པ་དེ་ཡང་མཉེས་པར་བྱེད་པར་འགྱུར་རོ། །ལྷའི་བུ་ཁྱེད་ཀྱང་འཇིག་རྟེན་གྱི་ཁམས་ཤིན་དུ་རྣམ་པར་བལྟས་པའི་གྲགས་པ་ཅན་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མིང་ཐ་དད་པའི་དེ་བཞིན་གཤེགས་པར་འགྱུར་ལ་ཚེའི་ཚད་ནི་འཐུན་པར་འགྱུར་རོ། །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ། སའི་འོག་ནས་པད་མ་འཛམ་བུ་ཆུ་བོའི་གསེར་གྱི་མདབ་མ་ཅན་ནོར་བུ་རིན་པོ་ཆེ་ཆེན་པོ་ཨན་ད་རྙིལ་གྱི་ཟེ་བའི་ཚོགས་ཅན། སྤུག་གི་སྙིང་པོ་དང་ལྡན་པ། ནོར་བུ་རིན་པོ་ཆེ་བཻ་དཱུརྱའི་ཆུ་བ་ཅན། བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ས་གཞི་བརྟོལ་ནས་མངོན་པར་འཕགས་ཏེ། པད་མ་དེ་དག་ཐམས་ཅད་ལ་བྱང་ཆུབ་སེམས་དཔའི་གཟུགས་སྐྱིལ་མོ་ཀྲུང་དུ་འཁོད་པ་མཚན་དང་དཔེ་བྱད་བཟང་པོས་ལེགས་པར་བརྒྱན་པའི་ལུས་ཀྱིས་བཅོམ་ལྡན་འདས་ལ་འདུད་ཅིང་ཕྱག་འཚལ་བར་སྣང་བར་གྱུར་ཏེ། དེ་དག་གིས་རིན་པོ་ཆེ་སྣ་ཚོགས་ཀྱི་སྤྲིན་གྱི་དྲ་བ་དག་གིས་བཅོམ་ལྡན་འདས་ལ་མངོན་པར་བཀབ་ནས་འདི་སྐད་ཀྱི་ཚིག་བརྗོད་དོ། །བཅོམ་ལྡན་འདས་བདག་ཅག་ནི་འཇིག་རྟེན་གཞན་དང་གཞན་གྱི་ཁམས་ནས་དེ་བཞིན་གཤེགས་པས་བྱང་ཆུབ་སེམས་དཔའི་ཡོན་ཏན་བསམ་གྱིས་མི་ཁྱབ་པ་བཀའ་སྩལ་པ་འདི་འང་ཉན། བཅོམ་ལྡན་འདས་ལ་ཡང་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བ་དང ། རིགས་ཀྱི་བུ་བདེན་སྨྲ་འདི་དང་འཁོར་འདུས་པ་འདི་ཡང་བལྟ་བའི་སླད་དུ་འདིར་མཆིས་ཏེ། བཅོམ་ལྡན་འདས་ཆོས་ཀྱི་རྣམ་གྲངས་འདི་ཐོས་པས་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་དག་ཏུ་བྱང་ཆུབ་སེམས་དཔའ་བགྲང་བ་ལས་འདས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་དོན་འདི་ཉིད་ཤིན་དུ་གསལ་བར་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །
52.89a
རྩེ་གཅིག་སེམས་སུ་དབང་པོ་མཉམ་ཞོག་སྟེ། །དེ་རིང་ངས་སྨྲས་འདི་དོན་མཉན་པར་གྱིས། །དེ་བཞིན་གཤེགས་ལ་བརྫུན་གྱི་ཚིག་མི་མངའ། །བདེ་གཤེགས་རང་བྱུང་ཚིག་ནི་གཞན་དུ་མིན། །སྐྱེ་བོ་དེ་དགའ་བདེན་སྨྲ་འདི་ཉིད་ནི། །དག་ཅིང་དྲི་མེད་གནོད་མེད་བསྐལ་པ་ལ། །བསྐལ་པ་གྲངས་མེད་མང་པོས་འཇིག་རྟེན་དུ། །འཚང་རྒྱ་བདེན་པའི་བློ་གྲོས་ཏོག་གི་རྒྱལ། །ཉོན་མོངས་གནོད་པ་དེ་ལ་མི་འབྱུང་སྟེ། །དེ་ཕྱིར་བསྐལ་པ་དེ་ནི་གནོད་མེད་པ། །འཇིག་རྟེན་མིང་ཡང་རྣམ་པར་བལྟས་པ་སྟེ། །བསྐལ་པ་དེ་ནི་དཔལ་གྱི་ཕུང་པོར་འགྱུར། །རྣམ་པར་འདྲེན་པ་དེ་ཡི་བསྐལ་པ་དེ། །ལྷ་མི་རྣམས་ཀྱིས་བལྟ་བའི་འོས་འགྱུར་ཏེ། །རིན་ཆེན་ཚོགས་ཀྱི་འོབས་དང་རྟ་བབས་རྣམས། །ཉམས་དགའ་ཀུན་ནས་ཤིན་དུ་མཛེས་པར་འགྱུར། །འཛམ་བུ་ཀླུང་གི་གསེར་གྱི་དྲ་བས་གཡོགས། །ཆོས་ཀྱི་སྒྲ་དབྱངས་ཡིད་དུ་འོང་བ་བསྒྲགས། །སེང་གེའི་རྒྱལ་མཚན་རབ་རྣམས་རྟག་ཏུ་བསྒྲེང ། །རིན་ཆེན་ཚོགས་ཀྱི་ལྡ་ལྡི་བརྒྱ་དག་སྤྱངས། །རྩིག་པའི་རྒྱུད་ནི་རིན་ཆེན་དྲི་མེད་དེ། །དེ་ནི་ལྷ་ཡི་ཁྱིམ་དང་འདྲ་བར་འགྱུར། །མཚེའུ་དང་ལུ་མ་པད་མའི་མཚོ་དག་གིས། །དེ་ནི་རྟག་ཏུ་ལེགས་པར་བརྒྱན་པར་འགྱུར། །དེ་ཡི་ཆུ་དང་པད་མ་ཨུད་པལ་དང ། །པད་མ་དཀར་པོ་དག་གིས་ཀུན་ཁེབས་འགྱུར། །གླིང་བཞི་པ་ཡི་འཇིག་རྟེན་བར་མ་དེ། །མིང་ནི་བལྟ་ན་སྡུག་ཅིང་ཡིད་འོང་སྟེ། །དེ་ནི་བདེ་གཤེགས་དེ་ཡི་སྐྱེ་བ་ཡིས། །རང་བྱུང་དེ་ནི་བྲམ་ཟེའི་རིགས་ལས་འབྱུང ། །ཐུབ་པའི་ཡུམ་ནི་ཤུགས་དང་ལྡན་ཞེས་བྱ། །ཡབ་ནི་ཚངས་པའི་དབྱིག་ཅེས་བྱ་བར་འགྱུར། །དེ་ཡི་བུ་ནི་རྣམ་གྲགས་སྒྲ་ཞེས་བྱ། །དཔེར་ན་ངའི་བུ་སྒྲ་གཅན་ཟིན་འདི་འདྲ། །བདེ་གཤེགས་དེ་ཡི་བཙུན་མོ་དམ་པ་ནི། །བློ་གྲོས་ཆེན་མོ་ང་ཡི་ས་འཚོ་བཞིན། །དེ་ཡི་མ་མ་མིང་ནི་གྲགས་ཆེན་ཏེ། །ང་ཡི་སྐྱེ་དགུའི་བདག་མོ་ཆེན་མོ་བཞིན། །ཐུབ་པའི་རིམ་གྲོ་བྱེད་པའི་སེམས་ཅན་འཕགས། །རྟག་ཏུ་རྗེས་སུ་འབྲང་ཞེས་བྱ་བ་སྟེ། །ང་ཡི་རིམ་གྲོ་འདུན་པ་གུས
52.89b
ལྡན་བཞིན། །དེ་ནི་འདྲེན་པ་དེ་ལ་རིམ་གྲོ་བྱེད། །ཐུབ་པ་དེ་ཡི་རྟ་མཆོག་འགྱུར་བ་ཡི། །ཤུགས་ཅན་ཞེས་བྱའི་མིང་དང་ལྡན་འགྱུར་ཏེ། །བདེ་གཤེགས་མངོན་པར་འབྱུང་ཚེ་བཅིབས་པར་འགྱུར། །ང་ཡི་རྟ་མཆོག་བསྔགས་ལྡན་གྱུར་པ་བཞིན། །བདེ་གཤེགས་དེ་ཡི་རྫོགས་པའི་བྱང་ཆུབ་ཤིང ། །ཆོས་ཀྱི་འཕགས་ཤེས་བྱ་བ་དེ་ཚེ་འབྱུང ། །ཤིང་མཆོག་བརྒྱ་ཕྲག་སྟོང་དུ་བསྒྱུར་བ་ཡིན། །ཕྲག་ནི་བརྒྱད་ཅུ་དག་གིས་དེ་བསྐོར་འགྱུར། །ཤིང་མཆོག་དེ་དྲུང་ཀྱེ་མ་ཆོས་ཀྱི་རྒྱལ། །རང་བྱུང་ཟླ་མེད་བདེན་ཞེས་བྱ་བཞུགས་ནས། །བླ་ན་མེད་པའི་བྱང་ཆུབ་རབ་ཞི་བ། །མྱ་ངན་མེད་པ་མངོན་པར་འཚང་རྒྱར་འགྱུར། །དེ་ན་བདུད་མེད་བདུད་ཀྱི་ཕྱོགས་ཀྱང་མེད། །བདུད་ཀྱི་ལས་ཀྱང་དེར་འབྱུང་མི་འགྱུར་རོ། །རྒྱལ་བ་ཐུབ་པ་གང་ཟག་ཟླ་མེད་པའི། །སངས་རྒྱས་ཞིང་ནི་གནོད་བདོ་མེད་པར་འགྱུར། །མི་དང་ལྷ་ཚོགས་མང་པོ་འདུ་འགྱུར་ཏེ། །རྣམ་དག་ཤིན་དུ་སྦྱངས་པ་དེ་ཚེ་འབྱུང ། །དེ་ཀུན་མེ་ཏོག་ཕྲེང་བ་གོས་དང་གླུ། །རོལ་མོ་སྒྲ་ཡིས་བདེ་གཤེགས་དྲུང་འདོང་འགྱུར། །རྒྱལ་བས་དེ་དག་བསམ་མཁྱེན་མདོ་སྡེ་འདི། །མདོ་གཞན་ལྷན་ཅིག་དྲང་སྲོང་གསུང་བར་འགྱུར། །རྒྱལ་བ་དེས་ནི་རབ་ཏུ་གསུངས་པ་ཡི། །མདོ་སྡེ་ཁྱད་པར་འཕགས་པ་འདི་ཐོས་ནས། །སེམས་ཅན་དཔག་ཡས་གང་གཱའི་བྱེ་མ་སྙེད། །ཐུབ་དབང་བྱང་ཆུབ་མཆོག་ཏུ་མི་ལྡོག་འགྱུར། །ཐེག་པ་དམན་པ་དེར་འབྱུང་མི་འགྱུར་ཏེ། །རང་རྒྱལ་ཐེག་པའང་ཞིང་དེར་འབྱུང་མི་འགྱུར། །རྒྱལ་བ་དེ་ཡི་སངས་རྒྱས་ཞིང་མཆོག་དེར། །བྱང་ཆུབ་སེམས་དཔའ་འབྱུང་ཀུན་དཔའ་ཞིང་འཛངས། །རྐང་གཉིས་མཆོག་དེའི་འདུས་པ་དང་པོར་ནི། །རྒྱལ་སྲས་གྲགས་པའི་འོད་ལྡན་གང་འབྱུང་བ། །རྫོགས་པའི་བྱང་ཆུབ་སེམས་དཔའ་ཕྱིར་མི་ལྡོག་།རྣམ་དག་གང་གཱའི་རྡུལ་བས་མང་བ་འབྱུང ། །བློ་བཟང་ལྡན་པའི་འདུས་པ་གཉིས་པ་ནི། །སྐྱེ་བ་གཅིག་གནས་ཁྲག་ཁྲིག་བརྒྱད་ཅུ་འབྱུང ། །འདུས་པ་གསུམ་པ་བྱང་ཆུབ་སེམས
52.90a
དཔའ་མཆོག་།དཀྲིགས་ཕྲག་དྲུག་བཅུ་དག་ནི་འབྱུང་བར་འགྱུར། །བདེ་བར་གཤེགས་པའི་ཚེའི་ཚད་འགྱུར་བ། །བསྐལ་པ་བར་མ་དྲུག་བཅུ་ཚང་བ་སྟེ། །རྒྱལ་བ་དེ་ནི་མྱ་ངན་འདས་གྱུར་ནས། །མི་ཡི་འདྲེན་པའི་ཆོས་ཀྱི་སྒྲོན་མ་ཡང ། །ལོ་གྲངས་བྱེ་བ་ཁྲག་ཁྲིག་སྟོང་ཕྲག་ནི། །བརྒྱད་བཅུ་ཐམ་པར་གནས་པར་འགྱུར་བ་ཡིན། །རང་གི་སྐུ་གདུང་རིང་བསྲེལ་རྒྱས་མཛད་ཅིང ། །དེ་ནི་གདུལ་བ་རབ་མང་འདུལ་བར་འགྱུར། །དྲང་སྲོང་ཆེ་དེ་བྱང་ཆུབ་སེམས་དཔའ་ནི། །ཏོག་ཆེན་ལུང་བསྟན་མཛད་ནས་མྱ་ངན་འདའ། །འདི་ནི་བཀོད་ཆེན་ཞེས་བྱའི་ཐུབ་དབང་འགྱུར། །རྒྱལ་བ་དགྲ་ལས་རྒྱལ་བར་འདི་འགྱུར་རོ། །རྒྱལ་བ་དེ་ཡི་ཞིང་བཀོད་འདི་འདྲ་སྟེ། །འཇིག་རྟེན་ཕན་པར་མཛད་པ་འདི་བཞིན་ནོ། །རྒྱལ་བའི་བྱང་ཆུབ་མཉམ་མེད་དྲི་མེད་པ། །རབ་ཞི་རྫོགས་པའི་སངས་རྒྱས་མགོན་པོར་འགྱུར། །ང་ཡི་མཁྱེན་པ་དེ་འདྲ་ནམ་མཁའི་ཚད། །བསྐལ་པ་འབྱུང་བ་མང་པོ་རབ་ཏུ་ཤེས། །འདས་པ་ལོས་ཤེས་ད་ལྟར་ཅི་ཞིག་སེམས། །ཡེ་ཤེས་ཀུན་དུ་ཐོགས་པ་མེད་པ་མངའ། །ང་ཡི་ཚིག་ནི་དག་ཅིང་བརྫུན་མེད་དེ། །བརྫུན་དུ་མི་སྨྲ་དོན་དམ་བདེན་པ་ལ། །ང་གནས་ནས་ནི་ནམ་ཡང་མི་སྨྲའོ། །ཇི་སྐད་གསུངས་པ་འདི་ལ་ཡིད་ཆེས་གྱིས། །དྲང་སྲོང་ཆེན་པོའི་གསུང་འདི་ཐོས་གྱུར་ནས། །འཁོར་རྣམས་ཀུན་ཀྱང་དགའ་བའི་སེམས་གྱུར་ཏེ། །དེ་ཚེ་ཁམས་དེར་སྐྱེ་བར་ཤོག་ཤིག་ཅེས། །ཞིང་མཆོག་དེར་སྐྱེར་དད་པས་སྨོན་ལམ་བཏབ། །འཇིག་རྟེན་ཁམས་མཆོག་དེར་ནི་སྐྱེ་འགྱུར་ཏེ། །འཇིག་རྟེན་འདྲེན་པས་དེ་དག་ལུང་བསྟན་ཏེ། །དེར་ནི་ཁྱེད་ཀྱིས་བདེ་གཤེགས་ཐོབ་གྱུར་ནས། །ཀུན་ཀྱང་སེམས་ཅན་དོན་མང་བྱེད་པར་འགྱུར། །མདོ་སྡེ་རྒྱལ་པོ་འདི་བསྟན་དེ་ཡི་ཚེ། །ས་ཆེན་འདི་ཡང་རྣམ་པ་དྲུག་ཏུ་གཡོས། །བྱང་ཆུབ་སེམས་དཔའ་པད་མར་གནས་པ་དག་།དེ་ཚེ་ཐལ་སྦྱར་ཐུབ་ལ་འདི་སྐད་གསོལ། །ཁྱོད་ཀྱིས་ཆོས་ཚུལ་དམ་པ་འདི་གསུངས་པ། །ཐུབ་པ་ཟླ་མེད་རང་བཞིན་ཤིན་དུ་ལེགས། །
52.90b
ཆོས་ཀྱི་ཚུལ་རབ་དམ་པ་མཉན་པ་དང ། །རྒྱལ་བའི་ཆོས་འཚལ་བདག་ཅག་འདིར་མཆིས་ལགས། །དེ་ནས་ཐམས་ཅད་དང་ལྡན་པའི་འཁོར་དེ་ཚིམ་ཞིང་མགུ་སྟེ། ཡི་རངས་ལ་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་གོས་རེ་རེ་བཞག་སྟེ། །གོས་གཞན་དག་བཅོམ་ལྡན་འདས་ཀྱི་སྐུ་ལ་གསོལ་ནས་ཚིག་འདི་སྐད་ཀྱང་སྨྲས་ཏེ། ཀྱེ་མ་འཇིག་རྟེན་དུ་ཆོས་ཀྱི་འཁོར་ལོ་བསྐོར་བ་གཉིས་པ་བྱུང་བར་གྱུར་ཏེ། དང་པོ་ནི་གྲོང་ཁྱེར་བ་ར་ན་སེར་བསྐོར་ཏོ། །ཆོས་ཀྱི་འཁོར་ལོ་གཉིས་པ་ནི་བཅོམ་ལྡན་འདས་ཀྱིས་དེ་རིང་འདིར་བསྐོར་ཏོ། །བཅོམ་ལྡན་འདས་བདག་ཅག་ཀྱང་རྟག་ཏུ་རྒྱུན་མི་ཆད་པར་ཆོས་རིན་པོ་ཆེ་འདི་དང་མི་འབྲལ་ཞིང་སྐྱེས་བུ་དམ་པ་འདི་དང་མི་འབྲལ་བར་ཤོག་ཤིག་ཅེས་སྨོན་ལམ་བཏབ་བོ། །སྟེང་གི་བར་སྣང་ལས་ཀྱང་ལྷའི་རྔ་ཆེན་པོ་དག་སྒྲ་མངོན་པར་འབྱིན་པར་གྱུར་ཏོ། །ལྷའི་མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོའི་ཆར་ཆེན་པོ་ཡང་བཅོམ་ལྡན་འདས་ཀྱི་ཞབས་ཀྱི་དྲུང་དུ་མངོན་པར་བབ་པར་གྱུར་ཏོ། །སྟེང་གི་བར་སྣང་ལ་ཡང་ལྷ་རྣམས་ཀྱིས་ལྷའི་གོས་དག་གཡབ་མོ་ཐབས་སུ་བསྐོར་ཏེ། །ཚིག་འདི་སྐད་ཀྱང་བརྗོད་པར་གྱུར་ཏོ། །སྐྱེས་བུ་དམ་པ་གང་དག་ཆོས་ཀྱི་རྣམ་གྲངས་འདི་འཛིན་པ་དང ། ཀློག་པ་དང ། ཀུན་ཆུབ་པར་བྱེད་པ་དེ་དག་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །དེ་སྐད་ཅེས་སྨྲས་པ་དང ། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དང ། གླེགས་བམ་དུ་བགྱིས་ཤིང་འཆང་བ་ན་བསོད་ནམས་ཀྱི་ཕུང་པོ་ཇི་སྙེད་ཅིག་འཕེལ་བར་འགྱུར་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །
52.91a
འཇམ་དཔལ་གལ་ཏེ་རིགས་ཀྱི་བུ་འམ། རིགས་ཀྱི་བུ་མོ་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སེམས་ཅན་གཟུགས་ཅན་ནམ། གཟུགས་ཅན་མ་ཡིན་པ་འམ། འདུ་ཤེས་ཅན་ནམ་འདུ་ཤེས་ཅན་མ་ཡིན་པ་ཇི་སྙེད་པ་དང་སེམས་ཅན་གྱི་ཁམས་ན་སེམས་ཅན་ཇི་སྙེད་ཅིག་ཡོད་པར་སངས་རྒྱས་ཀྱི་ཡེ་ཤེས་ཀྱིས་མཁྱེན་པ་དེ་དག་ཐམས་ཅད་སྔ་ཕྱི་མེད་པར་མིའི་ལུས་ཐོབ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ལ་དེ་དག་ཐམས་ཅད་ལ་རིགས་ཀྱི་བུ་འམ། རིགས་ཀྱི་བུ་མོ་ལ་ལ་ཞིག་གིས་བསྐལ་པར་གནས་པའི་ཚེ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས། བླ་མར་བྱས། སྟི་སྟང་དུ་བྱས། མཆོད་པ་བྱས་ན། འཇམ་དཔལ་འདི་ཇི་སྙམ་དུ་སེམས། རིགས་ཀྱི་བུ་འམ། རིགས་ཀྱི་བུ་མོ་དེ་བསོད་ནམས་མང་དུ་སྐྱེད་དམ། གསོལ་པ་བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་ཏེ། འདི་ལྟར་བགྲང་བ་འམ། བརྩི་བར་ཡང་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བས་ཀྱང་གང་གིས་ཆོས་ཀྱི་རྣམ་གྲངས་འདི་འཛིན་ཏམ། ཀློག་གམ། གཞན་དག་ལ་ཡང་རྒྱ་ཆེར་ཡང་དག་པར་སྟོན་ཏམ། གླེགས་བམ་དུ་བྲིས་ཏེ་འཆང་ངམ། གཞན་དག་ལ་ཡང་རྒྱ་ཆེར་ཡང་དག་པར་བསྟན་ན། ཆོས་ཀྱི་རྣམ་གྲངས་འདི་ལུང་འབོག་པ་དེ་བསོད་ནམས་མང་དུ་སྐྱེད་དོ། །དེ་སྐད་ཅེས་བཀའ་སྩལ་པ་དང ། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་འཇིག་རྟེན་ཐམས་ཅད་ལ་སྨན་པའི་སླད་དུ་ཆོས་ཀྱི་རྣམ་གྲངས་འདི་བསྟན་པ་ངོ་མཚར་ལགས་སོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡུན་རིང་པོ་ཇི་སྲིད་ཅིག་ཏུ་འཛམ་བུའི་གླིང་ན་མཆིས་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ།
52.91b
འཇམ་དཔལ་ང་མྱ་ངན་ལས་འདས་ནས་གང་གི་ཚེ་རྒྱལ་པོ་བརྒྱད་ཀྱིས་ངའི་རིང་བསྲེལ་རྒྱ་ཆེར་བྱ་བའི་ཕྱིར་བརྒྱད་དུ་བགོས་ནས་ཟ་མ་ཏོག་བརྒྱད་དུ་བཅུག་སྟེ། རང་རང་གི་ཡུལ་དུ་མཆོད་རྟེན་གྱི་ཁང་པ་ཡངས་པར་འཇོག་པར་འགྱུར་ཏེ། རྒྱལ་པོ་མ་སྐྱེས་དགྲས་ནི་ངའི་རིང་བསྲེལ་རྣམས་ལས་བརྒྱད་ཆ་བླངས་ནས་རིན་པོ་ཆེའི་ཟ་མ་ཏོག་ཏུ་བཅུག་སྟེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཕྱི་རོལ་དུ་ས་བརྐོས་ནས་རིང་བསྲེལ་ལ་པོག་སྣོད་ཁ་གབ་བཅད་ནས་སྤོས་ཀྱིས་ནི་བདུགས། གདུགས་དང་རྒྱལ་མཚན་ནི་བཙུགས། རིན་པོ་ཆེའི་མེ་ཏོག་ནི་གཏོར། ལོ་བརྒྱར་བྱིན་གྱིས་བརླབས་པའི་མར་མེ་མེ་ལྕེ་གཅིག་ཏུ་འབར་བ་ནི་བུས་ཤིང་རིང་བསྲེལ་གྱི་ཟ་མ་ཏོག་འཇོག་པར་འགྱུར་ལ། རྒྱལ་པོ་མྱ་ངན་མེད་པ་འབྱུང་བར་འགྱུར་བ་བསྡད་པའི་ཕྱིར་མདོའི་རྒྱལ་པོ་འདི་གསེར་གྱི་གླེགས་བམ་ལ་བྲིས་ནས་རིང་བསྲེལ་གྱི་ཟ་མ་ཏོག་དེ་ཉིད་དུ་འཇུག་པར་འགྱུར་རོ། །འཇམ་དཔལ་འདི་ལྟ་སྟེ། རྒྱལ་པོ་མྱ་ངན་མེད་པ་དེ་ནི་མྱ་ངན་ལས་འདས་ནས་ལོ་བརྒྱ་ལོན་པ་ན་འབྱུང་བར་འགྱུར་ཏེ། དེ་ནི་མོའུ་རྱའི་རིགས་སུ་སྐྱེས་པ། འཛམ་བུའི་གླིང་ལ་དབང་བ། མཐུ་དང་བརྩོན་པ་ཐོབ་པ། སྟོབས་ཀྱི་འཁོར་ལོས་སྒྱུར་བར་འགྱུར་ཏེ། དེ་ངའི་རྣམ་པ་ལས་རྗེས་སུ་དྲན་པར་བྱེད་པར་འགྱུར་རོ། །ངའི་བསྟན་པ་ལ་ཡང་དད་པ་ཐོབ་པར་འགྱུར་རོ། །དེའི་ཚེ་དེའི་དུས་ན་དགེ་སློང་དབང་པོ་བདེ་བ་ཞེས་བྱ་བ་རྫུ་འཕྲུལ་ཆེ་བ། མཐུ་ཆེ་བ། དམ་པའི་ཆོས་ཡོངས་སུ་འཛིན་པ། ཤིན་དུ་རྒྱས་པའི་མདོ་སྡེ་འཛིན་པ། རྒྱལ་པོའི་རིགས་ལས་རབ་ཏུ་བྱུང་བ། རྒྱལ་པོ་མྱ་ངན་མེད་པས་བཀུར་བ་གྲོང་དུ་འཇུག་པ་འབྱུང་བར་འགྱུར་རོ། །འཇམ་དཔལ་དེ་ལྟར་རྒྱལ་པོ་མྱ་ངན་མེད་པ་དེས་ངའི་རིང་བསྲེལ་རྒྱ་ཆེར་བྱ་བའི་ཕྱིར་སྐྱེ་བོ་མང་པོས་ཡོངས་སུ་བསྐོར་ཅིང་བཀོད་པ་ཆེན་པོ་དང་རྒྱལ་པོའི་མཐུ་ཆེན་པོས་མེ་ཏོག་ཕྲེང་བ་དང ། སྤོས་དང ། ཕྱེ་མ་དང ། བྱུག་པ་དང ། སིལ་སྙན་དང ། ཕེག་ཐོགས་ཏེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་སོང་ནས་མཆོད་པའི་ཆོ་ག་མངོན་པར་འདུ་བྱ་བ་ཆེན་པོ་བྱས
52.92a
ཏེ་སའི་ཕྱོགས་དེ་ནས་རིང་བསྲེལ་གྱི་ཟ་མ་ཏོག་དེ་ཕྱུང་ནས། ཉི་མ་བདུན་གྱི་བར་དུ་སྤོས་ཐམས་ཅད་དང ། མེ་ཏོག་ཐམས་ཅད་དང ། མེ་ཏོག་ཕྲེང་ཐམས་ཅད་དང ། ཕྱེ་མ་ཐམས་ཅད་དང ། བྱུག་པ་ཐམས་ཅད་དང ། སིལ་སྙན་ཐམས་ཅད་དང ། ཕེག་རྡོབ་པ་དང ། གླུ་དབྱངས་ཐམས་ཅད་ཀྱིས་མཆོད་པ་རྣམ་པ་དུ་མ་བྱས་ཏེ། སྐར་མ་དང ། སྦྱོར་བ་དང་ལྡན་པ་གཅིག་ལ་ཡུལ་སྣ་ཚོགས་སུ་ཆོས་ཀྱི་རྒྱལ་པོས་བྱས་པའི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་རོ། །དེའི་ཚེ་ཆོས་སྨྲ་བ་དབང་པོ་བདེ་བས་ཆོས་ཀྱི་རྣམ་གྲངས་འདི་རིང་བསྲེལ་གྱི་ཟ་མ་ཏོག་ནས་ཕྱུང་ནས་བྱང་ཕྱོགས་ཀྱི་རྒྱུད་ཀྱི་ཡུལ་ཆེན་པོར་འཇོག་པར་འགྱུར་ཏེ། སྐྱེ་བོ་མང་པོས་ཤེས་པར་མི་འགྱུར། སྐྱེ་བོ་མང་པོས་རིག་པར་མི་འགྱུར། སྐྱེ་བོ་མང་པོས་ཡོངས་སུ་བཟུང་བར་མི་འགྱུར་ལ་ཆོས་ཀྱི་རྣམ་གྲངས་འཛིན་པ་ཉུང་བ་དང ། ཀློག་པ་ཉུང་བར་འགྱུར་ཏེ། འཇམ་དཔལ་ཆོས་ཀྱི་རྣམ་གྲངས་འདི་ནི་རྟག་ཏུ་སྒྲོམ་དུ་བཅུག་པ་དང་སྣོད་དུ་བཅུག་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཚོལ་བ་མེད་ཅིང་སྣོད་མ་ཡིན་པའི་ཕྱིར་རོ། །འཇམ་དཔལ་ཆོས་ཀྱི་རྣམ་གྲངས་འདི་ནི་མོས་པར་དཀའ་ཞིང་ཡིད་ཆེས་པར་དཀའ་ལ། རྟོགས་པར་དཀའ་བ་སྟེ། མུན་སྤྲུལ་དུ་མངོན་པར་ཡིད་ཆེས་པ་འམ། འཇུག་པར་མི་ནུས་སོ། །འཇམ་དཔལ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་བབ་པའི་ཚེ་ཆོས་ཀྱི་རྣམ་གྲངས་འདི་གང་ལ་ལ་དག་གིས་ཐོས་ཏེ། ཡིད་ཆེས་པར་གྱུར་ཏམ། ཚོལ་ལམ་རྟོག་ན་དེ་དག་ནི་འཇམ་དཔལ་ཁྱོད་ཀྱིས་སངས་རྒྱས་མང་པོ་ལ་སྙེན་བཀུར་བྱས་པ། ལེགས་པར་སྤྱོད་པ་སྤྱད་པ། ཐེག་པ་ཆེན་པོ་འདིའི་སྣོད་དུ་གྱུར་པར་ངེས་པར་རིག་པར་བྱ་སྟེ། རིགས་ཀྱི་བུ་འམ། རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བྱེད་པ་དང ། གླེགས་བམ་དུ་བྱས་ཤིང་འཆང་བ་དེ་དག་ཐམས་ཅད་ཀྱིས་ཀྱང་བདག་ཅག་གིས་ནི་སྔོན་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་དག་མཐོང
52.92b
བར་གྱུར་ཏོ། །མཉེས་པར་བྱས་སོ། །བསྙེན་བཀུར་བྱས་སོ་ཞེས་བྱ་བ་དང ། དེ་དག་གིས་ནི་ང་ཡང་བསྐྱེད་མོས་ཚལ་འདི་ན་ཆོས་ཀྱི་རྣམ་གྲངས་འདི་བསྟན་པ་དང ། འཁོར་འདུས་པ་འདི་ཡང་མཐོང་ངོ་ཞེས་དེ་ལྟར་ཤེས་པར་བྱའོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ལོང་ཤིག་།ཟུང་ཤིག་།ཀུན་ཆུབ་པར་གྱིས་ཤིག་།དབང་པོ་རྣོན་པོ་རྣམས་མ་གཏོགས་པར་གར་བབ་བབ་ཀྱི་བདུན་དུ་མ་སྟོན་ཅིག་།དེ་ཅིའི་ཕྱིར་ཞེ་ན་ཀུན་དགའ་བོ་འདི་ནི་དེ་བཞིན་གཤེགས་པའི་གསང་བ་ཡིན་པ་དང ། འདི་ནི་དེ་བཞིན་གཤེགས་པའི་གསང་ཆེན་ཡིན་པ་དང ། འདི་ནི་དེ་བཞིན་གཤེགས་པའི་བར་ཆད་མེད་པའི་ཆོས་བསྟན་པ་ཡིན་པ་དང ། འདི་ནི་དེ་བཞིན་གཤེགས་པའི་ཕྱག་རྒྱ་ཡིན་པ་དང ། འདི་ནི་དེ་བཞིན་གཤེགས་པའི་བསྲུང་བ་བསྒོམ་པ་ཡིན་པ་དང ། འདི་ནི་དེ་བཞིན་གཤེགས་པའི་གཏེར་གྱི་མཆོག་ཡིན་པའི་ཕྱིར་ཏེ། ཀུན་དགའ་བོ་དེ་བས་ན་ངའི་བུ་ཐུ་བོ་ཆོས་ཀྱི་མཛོད་འཛིན་པ། ཆོས་ཀྱི་མཛོད་སྲུང་བ་དེ་དག་ལ་སྦྱིན་པར་བྱ་བ་མ་གཏོགས་པར་འདི་ནི་ཤིན་དུ་སྦ་བར་བྱ་ཞིང་སུ་ལའང་སྦྱིན་པར་མི་བྱའོ། །ཀུན་དགའ་བོས་གསོལ་པ་བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་བཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་བཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བྱ་བར་ཟུང་ཤིག་།དེ་བཞིན་གཤེགས་པའི་གསང་བའི་གནས་ཤེས་བྱ་བ་དང ། དེ་བཞིན་གཤེགས་པའི་བར་མེད་པའི་ཆོས་བསྟན་པ་ཞེས་བྱ་བ་དང ། དེ་བཞིན་གཤེགས་པའི་ཡུལ་ཞེས་བྱ་བ་དང ། ཐེག་པ་གཅིག་ཏུ་བསྟན་པ་ཞེས་བྱ་བ་དང ། འཇམ་དཔལ་གྱིས་ཡོངས་སུ་དྲིས་པ་ཞེས་བྱ་བ་དང ། བདེན་སྨྲ་ལུང་བསྟན་པ་ཞེས་བྱ་བ་དང ། བདེན་སྨྲའི་ལེའུ་ཞེས་བྱ་བར་ཡང་ཟུང་ཤིག་།ཆོས་ཀྱི་རྣམ
52.93a
གྲངས་འདི་བསྟན་པའི་ཚེ་སྲོག་ཆགས་ཁྲག་ཁྲིག་ཕྲག་སུམ་བཅུ་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་སྐྱེས་པ་ལས་སེམས་སྐྱེས་པར་གྱུར་ཏོ། །བྱང་ཆུབ་སེམས་དཔའ་དྲུག་ཁྲིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སེམས་ཅན་ཚད་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་དེ་དག་ཐམས་ཅད་དང ། ཐམས་ཅད་དང་ལྡན་པའི་འཁོར་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ལུང་བསྟན་པའི་ལེའུ་སྟེ་བཅུ་པའོ། ། འཕགས་པ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་པྲཛྙཱ་བར་མ་དང ། ཞུ་ཆེན་གྱི་ལོཙྪ་བ་བན་དྷེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ལན་གཉིས་ཞུས། ཕྱིས་ཤིན་ཏུ་དག་པར་སྐར་མས་ཞུས་ཤིང་བར་དུ་མ་དག་པ་མང་པོ་བཅོས་འདུག་པ་ད་བཅོས་པར་བཞག་གོ།