་།།ཐམས་ཅད་མཁྱེན་པ་ལ་ཕྱག་འཚལ་ལོ། །འདུལ་བ་གཞུང་ནི་དམ་པ་འདི། །འཕགས་པ་ཉེ་བ་འཁོར་གྱིས་ནི། །མ་འོངས་པ་ཡི་གང་ཟག་གི་།མ་རྟོགས་ལ་སོགས་བསལ་བའི་ཕྱིར། །གཞི་དང་རྣམ་འབྱེད་ལ་སོགས་ཀྱི། །འགྲེལ་བཤད་ངེས་པ་དོན་གྱི་ལུང ། །ཞུས་ནས་རྒྱལ་བས་བཀའ་སྩལ་ཏོ། །དེ་དག་རྣམས་ཀྱང་གང་ཞེ་ན། ་་་་་་་་་་་།སྤྱིའི་སྡོམ་ལ། ཞུ་བ་འདུལ་བྱེད་གཅིག་ལས་འཕྲོས། །ལྔ་ཚན་བཅུ་དྲུག་ཚན་དང་ནི། །གླེང་གཞི་རྐྱང་པ་གཏམ་གྱི་གཞི། །མ་ན་པི་ཀ་མ་མོ་དང ། །ལུས་སོགས་སྟོན་པ་ཐ་མ་སྟེ། །ལེའུ་དག་ཏུ་ཡང་དག་འདོད། །ཐོག་མར་ཞུས་པ་དེ་ཡང་ནི། །རྣམ་འབྱེད་ལྟུང་བ་སྡེ་བཞི་དང ། །རང་བྱུང་ལ་སོགས་གཞི་རྣམས་ཀྱི། །གཏན་ལ་འབེབས་པ་དག་ཏུ་འདོད། །དེ་ཉིད་དྲིས་ལན་ཞེས་ཀྱང་བསྒྲགས། །དེ་ནས་འདུལ་བྱེད་དག་ཡིན་ཏེ། །ཕམ་པ་བཞི་དང་ལྷག་མ་ཡི། །སྨྱན་གྱི་ལྟུང་བ་ཡན་ཆད་དག་།གཏན་ལ་འབེབས་པར་བྱེད་པ་ཡིན། །དེ་ནས་གཅིག་ལས་འཕྲོས་པ་སྟེ། །གཅིག་ནས་བཅུ་ཡི་བར་དུ་ཡིན། །གཅིག་ལས་འཛེགས་པ་ཞེས་ཀྱང་བསྒྲགས། །དེ་ནས་འདུལ་བ་ལྔ་ཚན་ཏེ། །ལྔ་ལྔ་སྟོན་ཕྱིར་ལྔ་ཚན་ནོ། །བཅུ་དྲུག་སྡེ་ཚན་སྟོན་པའི་ཕྱིར། །དེ་ནས་འདུལ་བ་བཅུ་དྲུག་ཚན། །གླེང་གཞི་ལ་ནི་སྒོ་ལྔ་ལས། །དང་པོ་བཞི་ལ་སྡོམ་གྱི་ནི། །ཚིགས་བཅད་བཅུ་བཅུའོ་ལྔ་པ་ལ། །སྡོམ་གྱི་ཚིགས་བཅད་དྲུག་ཡོད་དེ། །གླེང་གཞི་དག་ལ་བརྟེན་པའི་ཕྱིར། །གླེང་གཞི་ཞེས་ནི་བཏགས་པ་ཡིན། །རྐྱང་པ་སྒོ་བཞི་རེ་རེ་ཡང ། །ཚིགས་བཅད་བཅུ་བཅུའོ་དེ་ཉིད་ལ། །སིལ་བུ་ཞེས་བྱ་བསླབ་པའི་གཞི། །རིགས་མི་འཐུན་པ་ཕྲ་མོ་རྣམས། །སྟོན་ཕྱིར་དོན་དང་ལྡན་པ་ཡིན། །འདུལ་བ་གཏམ་གྱི་དངོས་པོ་ནི། །ལྡེབས་ཀྱི་ཚུལ་དུ་བྱུང་བ་སྟེ། །སྡོམ་གྱི་ཚིག་གིས་བསྡུས་པ་མེད། ། 13.318b མཱུ་ལ་ཞེས་པའི་སྒྲ་ཡི་དོན། །གཞི་དང་རྩ་བ་དངོས་པོ་ལའང ། །འཇུག་ཕྱིར་གཏམ་གྱི་གཞིར་ཡང་འགྱུར། །མ་ན་པི་ཀའི་སྒོ་དང་པོ། །ཚིགས་བཅད་བཅུ་ཡིན་གཉིས་པ་ལ། །ཚིགས་བཅད་བཅུ་དང་ལྷག་ཙམ་ཡོད། །ཤིན་དུ་ཕྲ་ཞིབ་ཆེ་བས་ན། །བྲམ་ཟེའི་བུ་མོ་ལྟ་བུ་ཞེས། །དོན་དང་འཐུན་པའི་མཚན་ཡིན་ནོ། །འདུལ་བ་མ་མོ་ལྟ་བུ་ལ། །བསྙེན་པར་རྫོགས་པའི་ཕུང་པོ་དང ། །རབ་ཏུ་ལྡན་དང་བྱ་བ་ཡི། །ཕུང་པོ་གསུམ་དུ་ཤེས་པར་བྱ། །མ་དང་འདྲ་ཕྱིར་མ་མོའོ། །ལུས་དང་དམིགས་པ་བྱིན་བརླབ་དང ། །མཚན་ཉིད་གླེང་གཞི་ངོ་བོ་དང ། །འབྲས་བུའི་དོན་རྣམས་ཐ་མ་སྟེ། །ུ་པཱ་ལི་ཡིས་ཞུས་པ་ནི། །དེ་དག་རྣམས་ཀྱིས་རྫོགས་པ་ཡིན། །མཚན་གྱི་གྲངས་ཀྱི་རིམ་པ་དང ། །མཚན་གྱི་བཤད་པ་དེ་ཡིན་པས། །དེ་ལྟར་བསྡོགས་ནས་བལྟ་བར་བྱ། །དེ་ལྟར་ན་གཞུང་དམ་པའི་བརྗོད་བྱ་དོན་གྱི་ལུས་ནི་དེ་དག་ཉིད་ཡིན་ལ། རྗོད་བྱེད་གཞུང་གི་ལུས་ནི་ཞུ་བ་མ་རྫོགས་པ་ལ་འགྲེལ་པར། འཕགས་པ་ཉེ་བ་འཁོར་གྱིས་ཞུས་པའི་གཞུང་རྒྱ་གར་ཡུལ་པ་ཡང་ཤོ་ལོ་ཀ་ཉིས་སྟོང་ཙམ་གྱི་ཚད་ཅིག་ལ་ལན་སྤྱོད་པ་ཁོ་ནའོ་ཞེས་ཡུལ་ཁ་ཅིག་ན་ཞུ་བ་མ་རྫོགས་པ་ལ་ཤོ་ལོ་ཀ་ཉིས་སྟོང་ལས་མེད་པའང་བཤད་མོད་ཀྱི། བོད་དུ་འགྱུར་བའི་ཞུ་བ་མ་རྫོགས་པ་ལ་ཤོ་ལོ་ཀ་སུམ་སྟོང་དྲུག་བརྒྱ་སྟེ་བམ་པོ་བཅུ་གཉིས་དང ། ཞུ་བ་རྫོགས་པ་ལ་ཤོ་ལོ་ཀ་ཁྲི་ལྔ་སྟོང་དགུ་བརྒྱ་སྟེ། བམ་པོ་ལྔ་བཅུ་རྩ་གསུམ་ཡོད་པས་སྤྱིར་བསྡོམས་ན་ཤོ་ལོ་ཀ་ཁྲི་དགུ་སྟོང་ལྔ་བརྒྱ་སྟེ། བམ་པོ་དྲུག་བཅུ་རྩ་ལྔ་ཡོད་དོ།། །།བསོད་ནམས་ཆེན་པོའི་དཔལ་གྱིས་ཕྱོགས་ལས་རྣམ་པར་རྒྱལ་བ་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དང་མཚུངས་པ་རྒྱལ་པོ་ཆེན་པོའི་བླའི་མཆོད་གནས་བདེ་བར་གཤེགས་པའི་གཞུང་ལུགས་མང་དུ་ཐོས་པ། རིག་པ་དང་གྲོལ་བའི་སྤོབས་པ་དགེ་བ་ཅན། ལུང་དང་རིགས་པའི་དབང་ཕྱུག་།གངས་ཅན་གྱི་རྒྱུད་ཀྱི་མཁས་པ་ཆེན་པོ། སྡོམ་བརྩོན་དམ་པ་ཤཱཀྱའི་དགེ་སློང་འཇམ་པའི་དབྱངས་ཀྱིས། བཀའ་འགྱུར་ལེགས་པར་བཞེངས་པ 13.319a རྣམས་ལས་འདི་དག་ནི་མཁན་པོ་ཆེན་པོ་མཆིམས་ཀྱིས་དགེ་བའི་བཤེས་གཉེན་རྒྱ་འདུལ་བ་འཛིན་པ་ཞལ་བཞུགས་པའི་དུས་ན། དགེ་བའི་བཤེས་གཉེན་འདུལ་བ་འཛིན་པ་ཞིང་མོ་ཆེ་བ་བྱང་ཆུབ་སེང་གེས་གཉེར་མཛད་ནས། ལུང་ཕྲན་ཚེགས་ཀྱི་བམ་པོ་བཅུ་གཉིས་མ་ཚང་བ་དང ། གཞུང་བླ་མའི་ཞུ་བ་མ་རྫོགས་པ་བམ་པོ་བཅུ་གཉིས་དང ། སྡོམ་ཚིག་ཡི་གེ་ཚར་གཉིས་མ་ཚང་བ་རྣམས་བསམ་ཡས་མཆིམས་ཕུ་ལ་སོགས་པ་དབུས་གཙང་གི་གཙུག་ལག་ཁང་རྣམས་ནས་བཙལ་ཏེ། ལ་སྟོད་འོལ་རྒོད་ཀྱི་གཙུག་ལག་ཁང་དུ་གནས་བརྟན་དྷརྨཱ་སེང་གེས་ལུང་སྡེ་བཞི་ཚང་བར་བཞེངས་པ་སྣར་ཐང་གི་གཙུག་ལག་ཁང་དུ་གདན་དྲངས་ཏེ། དེ་ལ་དཔེ་ཕྱི་མཛད་ནས་བཞེངས་པ་དང ། གཞན་ཡང་ཆུ་མིག་རིང་མོའི་གཙུག་ལག་ཁང་དང ། རུང་ཀླུང་ཤོད་གྲོག་གི་གཙུག་ལག་ཁང་གི་འདུལ་བ་ལུང་ལ་སོགས་པ་རྣམས་ལ་གཏུགས་ཏེ་སྔ་ཞུས་ལེགས་པར་བགྱིས་ནས་བཞེངས་པ་སངས་རྒྱས་ཀྱི་བསྟན་པའི་རྩ་བ་ལེགས་པར་གསུངས་པ་དམ་པའི་ཆོས་འདུལ་བ་ལུང་སྡེ་བཞིའོ། །དེའི་བཀའ་འགྱུར་གྱི་དཔེ་ཕྱི་རྣམ་པར་དག་པ་རྣམས། མཁས་པའི་འབྱུང་གནས་དཔལ་སྣར་ཐང་གི་གཙུག་ལག་ཁང་ནས་གདན་དྲངས་ཏེ། འཕགས་པ་འཇིག་རྟེན་དབང་ཕྱུག་གི་སྤྲུལ་པའི་སྐུ་ཆོས་རྒྱལ་སྲོང་བཙན་སྒམ་པོའི་ནང་བློན་ཆེན་པོ་མགར་སྟོང་བཙན་ཡུལ་ཟུངས་ཀྱི་རྒྱུད་པ། གཙུག་ལག་གཉིས་ཀྱི་མཛད་པས། བསྟན་པ་རིན་པོ་ཆེའི་ཞབས་ཏོག་ལ་གཡེལ་བ་མི་མངའ་ཞིང ། འགྲོ་བ་མང་པོའི་མགོན་སྐྱབས་དམ་པར་གྱུར་པ་དཔལ་ལྡན་རྒྱལ་བའི་སྡེ་ཡིས། འགྲོ་བ་མ་ལུས་པའི་གནས་སྐབས་དང་མཐར་ཐུག་གི་ཕན་བདེ་མ་ལུས་པའི་འབྱུང་གནས་རྒྱལ་བའི་བསྟན་པ་རིན་པོ་ཆེ་ཡུན་རིང་དུ་གནས་ཤིང ། ཕྱོགས་ཀུན་དུ་དར་ཞིང་རྒྱས་པར་བྱ་བའི་ཕྱིར། བོད་ཁམས་སུ་སྨོན་ལམ་གྱི་སྟོབས་ཅན་མངའ་བདག་ལྷ་བཙན་པོ་བྱང་ཆུབ་སེམས་དཔའ་རྣམས་དང ། ལོ་པཎ་སྐྱེས་མཆོག་ཁྱད་པར་ཅན་རྣམས་ཀྱི་བདག་རྐྱེན་ལ་བརྟེན་ནས། བདེ་བར་གཤེགས་པའི 13.319b གསུང་རབ་ཐོག་མཐའ་བར་དུ་དགེ་ཞིང་སྒྲོ་སྐུར་གྱི་མཐའ་དང་བྲལ་ལ་གཞུང་ལུགས་ངན་པའི་དྲི་མས་དབེན་པ་མདོ་སྡེ་དང ། རྒྱུད་སྡེའི་ཕྱོགས་སྔ་ཕྱིར་བོད་དུ་འགྱུར་རོ་ཅོག་རྣམས་མིའི་དབང་པོ་ཐོ་གེ་ན་ཐེ་མུར་གྱི་རིང་ལ། ཏི་ཤྲི་ཀུན་དགའ་རྒྱལ་མཚན་དཔལ་བཟང་པོ་བསྟན་པ་སྐྱོང་བའི་དུས། རྒྱལ་བའི་བསྟན་པ་ལྔ་བརྒྱ་བདུན་པའི་མཐར་ཉེ་བ། འགྲོ་བའི་བླ་མ་སྟོན་པ་གདུལ་བྱའི་ངོར་ཞི་བར་གཤེགས་པའི་ཚུལ་བསྟན་ནས་ལོ་སུམ་སྟོང་བཞི་བརྒྱ་བརྒྱད་བཅུ་འདས་པ་མེ་མོ་ཕག་གི་ལོ་གསར་གྱི་ཟླ་བ་ཚེས་གྲངས་གཟའ་སྐར་བཟང་པོ་ལ་དབུ་བཙུགས་ཏེ། རྒྱལ་བའི་སྲས་པོ་རིག་པ་འཛིན་པ་བྱང་ཆུབ་དཔལ་ལྡན་གྱིས། བསྟན་པ་ལ་ཤེས་ནས་མི་ཕྱེད་པའི་དད་པ་བརྟན་པོས་ཀུན་ནས་བསླང་ནས་ཞལ་ཏའི་རིམ་པ་རྣམས་དང ། རྒྱུའི་དངོས་པོ་བཟང་ཞིང་མང་ལ་ཁ་ན་མ་ཐོ་བ་མེད་པས་འཐུན་པའི་རྐྱེན་བསྒྲུབས་ནས་བསྟན་པའི་འབྱུང་གནས་དཔལ་ན་ལེན་དྲ་དང་མཚུངས་པ་སྤྲུལ་པའི་རྒྱལ་པོ་སེ་ཆེན་གན་གྱི་དགོས་ཀྱི་ལྷ་ཁང་དཔལ་གུང་ཐང་གི་གཙུག་ལག་ཁང་ཆེན་པོར་ལེགས་པར་བཞེངས་ཏེ། སྡེ་སྣོད་ཀྱི་ཚུལ་ལ་ཅུང་ཟད་བློ་ཁ་ཕྱོགས་པ་ཐང་པོ་ཆེ་བའི་བཙུན་པ་ཀུན་དགའ་འབུམ་གྱིས་ཁ་ཏ་དང ། ཞུས་དག་གི་དང་དོས་པ་བགྱིས་ཤིང ། གཞན་ཡང་དད་པ་དང་བརྩོན་འགྲུས་ཆེ་ཞིང་བློ་གྲོས་གསལ་བའི་སྡོམ་བརྩོན་དམ་པ་མང་དུ་ཐོས་ཤིང་སྡེ་སྣོད་འཛིན་པ་མཁས་པ་རྣམས་ཀྱིས། རྒྱ་གར་སྐད་ལ་སོགས་པ་ལེགས་པར་སྦྱར་བའི་སྐད་སོར་བཞག་རྣམས་ནི་སྔོན་གྱི་ལོཙྪ་བ་ཆེན་པོ་རྣམས་ཀྱིས་མཛད་པའི་བྱེ་བྲག་ཏུ་རྟོགས་བྱེད་ཆེན་པོ་དང ། སྒྲ་སྦྱོར་བམ་པོ་གཉིས་པ་ལ་སོགས་པ་ལ་བརྟེན་ནས་དག་པར་བྱས་ཤིང ། བོད་སྐད་རྣམས་ནི་ཡུལ་སྐད་དང ། འཕྲལ་སྐད་ངན་པ་རྣམས་དང་མ་འདྲེས་པར་བོད་ཡུལ་གྱི་སྔོན་གྱི་བརྡའ་མེས་མཁན་པོ་རྣམས་དང ། སྒྱུར་བྱེད་དམ་པ་སྔ་ཕྱིར་བྱོན་པ་རྣམས་ཀྱི་བརྡའ་གསར་རྙིང་དང ། སྐད་གསར་བཅད་ལ་སོགས་པའི་རྗེས་སུ་འབྲངས་ནས་ད་དྲག་དང ། མ་མྱ་དང ། ས་སྩོགས་ལ་སོགས་པ་ཡོད་མེད་རྣམས་མཁས་པ་རྣམས་ཀྱིས་ཇི་ལྟར 13.320a མཛད་པ་ལྟར་བརྡའ་དོན་མ་ནོར་བར་དག་པར་བགྱིས་ནས། གཞི་དུང་གི་ས་གཞི་ལྟར་དཀར་འཇམ་མཁྲེགས་པ་ལྷོ་རྒྱལ་པོ་ལྷ་ཁང་གི་ཤོ་གུ་ལ། དམ་ཆེ་ཞིང་མདངས་གསལ་བ་ཨུད་པལ་སྔོན་པོ་ལྟ་བུ་རྒྱ་ནག་ཆེན་པོ་ལས་འོངས་པའི་སྣག་ཚས། འབུར་དཀྱུས་ཚུགས་གསུམ་ལ་མཁས་པའི་མཐར་ཕྱིན་པས་ཡི་གེའི་རིག་བྱེད་ལ་སློབ་དཔོན་གྱི་གོ་འཕང་ཐོབ་པས་དག་སྙོམས་མཛེས་པར་བཞེངས་པ་དཔོན་དཔལ་བཟངས་རིན་ཆེན་དང ། སངས་རྒྱས་གྲགས་ལ་སོགས་པ་དབུས་གཙང་གི་ཡི་གེ་པ་ཡིད་གཞུངས་ཤིང་མཁས་པ་རྣམས་ཀྱིས་ལེགས་པར་བྲིས་པ་ལ་ཞུས་དག་ལན་གསུམ་དུ་བགྱིས་ཏེ་བཞེངས་པ་རྣམས། ས་མོ་གླང་གི་ལོ་བཀྲ་ཤིས་ལོ་གསར་གྱི་ཟླ་བ་ལ་ལེགས་པར་གྲུབ་ཅིང ། འབྲས་བུ་དང་བསྒྲུབ་པའི་དུས་ཀྱི་ལྔ་བརྒྱ་ཕྲག་དྲུག་དང ། ལུང་མངོན་པའི་དུས་ཀྱི་བཞི་བརྒྱ་བརྒྱད་བཅུ་རྩ་གཉིས་འདས་ལ། ལྷག་མ་མངོན་པའི་ལོ་བཅཝ་བརྒྱད་དང ། མདོ་སྡེ། འདུལ་བ། རྟགས་ཙམ་འཛིན་པའི་ལྔ་བརྒྱ་ཕྲག་གསུམ་སྟེ། སྟོང་ལྔ་བརྒྱ་བཅཝ་བརྒྱད་བསྟན་པའི་ལྷག་མར་ཡོད་པའི་དུས་སུ་བཀའ་འགྱུར་ལེགས་པར་གྲུབ་པ་རྣམས་ལས་འདི་དག་ནི་ལུང་སྡེ་བཞིའོ། །འདུལ་བ་ལུང་ཕལ་ཆེ་བ་ལ་དགེ་སློང་ཕ་མའི་སོ་སོར་ཐར་པ་དང་ཞུ་བ་མ་རྫོགས་པ་བཞེངས་པ་མེད་མོད་ཀྱི་འོན་ཀྱང་སོ་སོར་ཐར་པ་གཉིས་རྣམ་འབྱེད་གཉིས་ཀྱི་རྩ་བ་ཡིན་ཞིང ། རྣམ་འབྱེད་གཉིས་ནི་སོ་སོར་ཐར་པ་རྣམ་པ་གཉིས་ཀྱི་འགྲེལ་པ་ཡིན་ལ། ཞུ་བ་མ་རྫོགས་པ་ནི་ཞུ་བ་དག་ཤོས་ཡིན་པའི་ཕྱིར་ལུང་རྣམ་འབྱེད་སོ་སོའི་དབུ་དང ། གཞུང་བླ་མ་མ་རྫོགས་པ་དབུ་ཉིད་དུ་བཞེངས་སོ། །ལུང་སྡེ་བཞིའི་གོ་རིམ་ནི་གཞི་དང ། རྣམ་པར་འབྱེད་པ་དང ། དེ་དག་གི་དཀའ་བའི་གནས་ཞུས་ལན་གྱིས་གཏན་ལ་འབེབས་པ་གཞུང་བླ་མ་དང ། དེ་དག་ཏུ་མ་ཚང་བ་ཁ་སྐོང་བ་ཕྲན་ཚེགས་སོ། །དོན་གྱི་གོ་རིམས་དེ་ལྟར་ཡིན་ཡང་མཁས་པ་རྣམས་ཀྱིས་གཞི་དང ། རྣམ་པར་འབྱེད་པའི་རྗེས་ལ་ཕྲན་ཚེགས་དང ། དེའི་རྗེས་ལ་གཞུང་དམ་པ་ཉིད་བྲིས་ཤིང ། ཀ་ཅོག་ལ་སོགས་པས་མཛད་པའི་མཚན་བྱང་དཀར་ཆག 13.320b ལས་ཀྱང་རིམ་པ་དེ་ཁོ་ན་ལྟར་འབྱུང་བས་འདིར་ཡང་གཞུང་དམ་པ་མཇུག་ཉིད་དུ་བྲིས་སོ། །འདི་རྣམས་ཀྱི་བམ་པོའི་གྲངས་ནི་ཤོ་ལོ་ཀ་སུམ་བརྒྱ་ལ་བམ་པོ་རེར་བྱས་ནས་ལུང་གཞི་ལ་བམ་པོ་བརྒྱ་དང་དགུ། དགེ་སློང་ཕའི་རྣམ་འབྱེད་ལ་བམ་པོ་བརྒྱད་བཅུ་རྩ་གསུམ་དང་བམ་པོ་སུམ་ཆ། དགེ་སློང་མའི་རྣམ་འབྱེད་ལ་བམ་པོ་ཉི་ཤུ་རྩ་བརྒྱད། ཕྲན་ཚེགས་ལ་བམ་པོ་ལྔ་བཅུ་རྩ་དགུ། གཞུང་བླ་མའི་ཞུ་བ་མ་རྫོགས་པ་ལ་བམ་པོ་བཅུ་གཉིས། ཞུ་བ་རྫོགས་པའི་གཞུང་དམ་པ་ལ་བམ་པོ་ལྔ་བཅུ་རྩ་གསུམ་སྟེ་བསྡོམས་ན་གཞུང་དམ་པ་ལ་བམ་པོ་དྲུག་བཅུ་རྩ་ལྔ་ཡོད་པས་སྤྱིར་ལུང་སྡེ་བཞི་ཆད་པ་ལ་བམ་པོ་སུམ་བརྒྱ་བཞི་བཅུ་རྩ་བཞི་དང་བམ་པོ་སུམ་ཆ་ཡོད་དོ། །སྔར་མ་ཚང་བ་རྣམས་ཚང་བར་བཞེངས་པའི་ཚུལ་ནི་ཕྲན་ཚེགས་དང ། ཞུ་བ་མ་རྫོགས་པའི་མཇུག་དག་ཏུ་བྲིས་ཟིན་པའི་ཕྱིར་དེ་དག་ཏུ་བལྟ་བར་བྱའོ།། ་དེ་ལྟར་བསོད་ནམས་དཔལ་གྱིས་རབ་མཐོ་བ། །འཛམ་གླིང་མི་དབང་ཆེན་པོའི་མཛད་པ་ལྟར། །མཆོག་གི་བློ་གྲོས་མཚུངས་པ་མེད་པ་དེས། །སྡོམ་བརྩོན་དམ་པ་དགེ་སྦྱོང་ཆེན་པོ་དེའི། །ཐུགས་དགོངས་བླ་མེད་རྫོགས་པར་བྱ་ཕྱིར་དང ། །བསྟན་པ་སྤེལ་ཕྱིར་བདེ་བར་གཤེགས་པའི་གསུང ། །གངས་རིའི་ཁྲོད་འདིར་ཇི་སྙེད་འགྱུར་རོ་ཅོག་།ལེགས་པར་བཞེངས་པར་གྱུར་བ་དེ་དག་ལས། །འདི་ནི་སྟོན་པའི་གསུང་རབ་བསྟན་པ་ཡི། །རྩ་བ་ལེགས་གསུངས་དམ་ཆོས་འདུལ་བ་ལུང ། །དེ་ལྟར་དཔལ་ལྡན་ལྷག་བསམ་དག་པའི་མཐུས། །གསུང་རབ་རིན་ཆེན་ཚུལ་བཞིན་བཞེངས་པ་ལས།། བྱུང་བའི་དགེ་བ་སྟོན་ཀའི་ཟླ་འོད་དང ། །མཁའ་ལྟར་དག་ཅིང་ཡངས་པ་གང་ཐོབ་དེས། །འགྲོ་ཀུན་ཕན་བདེའི་འབྱུང་གནས་རྒྱལ་བ་ཡི། །བསྟན་པ་རིན་ཕྱོགས་དུས་ཀུན་ཁྱབ་ཅིང ། །སྡེ་འཛིན་སྐྱོང་དང་བསྲུང་བའི་དམ་པ་རྣམས། །སྐྱེ་དགུའི་དཔལ་དུ་ཡུན་རིང་བཞུགས་གྱུར་ཅིག་།གང་གིས་གསུང་རབ་དྲི་མེད་འདི་བཞེངས་བའི། །རྒྱལ་བའི་སྲས་པོ་བྱང་ཆུབ་དཔལ་ལྡན་ཡང ། །བསྟན་དང་འགྲོ་བའི་རྩ་ལག་དམ་པར་ནི། །ས་ཆེན་སྟེང 13.321a འདིར་ཡུན་རིང་བཞུགས་གྱུར་ཅིག་།ཁྱད་པར་དུ་ཡང་དེས་པས་ས་སྐྱོང་བའི། །མི་དབང་ཡོན་མཆོད་འཁོར་དང་བཅས་པ་རྣམ། །སྙུན་མེད་སྐུ་ཚེ་རིང་ཞིང་ཆབ་སྲིད་བརྟན། །བྱམས་བརྩེའི་ཐུགས་ཀྱིས་འགྲོ་བ་སྐྱོང་གྱུར་ཅིག་།སྲིད་འབངས་རྣམས་ཀྱང་ཕན་ཚུན་བྱམས་ལྡན་ཞིང ། །ནད་དང་མུ་གེ་འཐབ་རྩོད་ལས་སོགས་པ། །ཕྱི་ནང་ཉེར་འཚེའི་གནོད་པ་ཀུན་ཞི་ནས། །ཚེ་རིང་འབྱོར་ལྡན་བསྟན་ལ་དད་གྱུར་ཅིག་།གང་དག་འདི་ལ་སྒོ་གསུམ་གུས་པ་ཡིས། །བྱ་བ་བྱེད་དང་རྗེས་སུ་ཡི་རང་དང ། །རྒྱུ་རྐྱེན་འབུལ་དང་ཆོས་སྤྱོད་རྣམ་བཅུ་ཡིས། །ཚུལ་བཞིན་སྒྲུབ་པར་བྱེད་པ་དེ་དག་ཀྱང ། །ཚེ་འདིར་ཚེ་རིང་ནད་མེད་འབྱོར་ལྡན་ཞིང ། །སྐྱེ་ཞིང་སྐྱེ་བའི་སྐྱེ་བ་ཐམས་ཅད་དུའང ། །འཁོར་ལོ་བཞི་དང་ཡོན་ཏན་རྣམ་བདུན་དང ། །རྣམ་སྨིན་བརྒྱད་ལྡན་དལ་འབྱོར་ལུས་ཐོབ་ནས། །མཐོང་དང་བསྒོམ་པས་སྤང་བྱའི་ཉོན་མོངས་དང ། །ཤེས་བྱའི་སྒྲིབ་པ་བག་ཆགས་བཅས་པ་ཀུན། །སྤོང་བྱེད་གཉེན་པོ་ལམ་ལྔ་ས་བཅུ་རྣམས། །རིམ་གྱིས་བགྲོད་ནས་ཀུན་མཁྱེན་ཐོབ་པར་ཤོག་།གང་གིས་དགག་སྒྲུབ་གནང་བའི་གནས་སྟོན་ཅིང ། །མཐའ་གཉིས་སྤྱོད་པ་སྤངས་ནས་འཁོར་བ་ལས། །ངེས་པར་འབྱུང་བའི་ཚུལ་ཁྲིམས་གསལ་བྱེད་པ། །ལེགས་གསུངས་དམ་ཆོས་འདུལ་བའི་བཀྲ་ཤིས་ཤོག ། |