༄། ་།རྒྱ་གར་སྐད་དུ། བཛྲ་དུན་ད་ནཱ་མ་ནཱ་ག་ས་མ་ཡ། བོད་སྐད་དུ། རྡོ་རྗེ་མཆུ་ཞེས་བྱ་བ་ཀླུའི་དམ་ཚིག་གོ་།ཐམས་ཅད་མཁྱེན་པ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་གྲོང་ཁྱེར་ཆེན་པོ་གཡོག་འདོར་ན་བཞུགས་ཏེ། འཁོར་འདུས་པ་ཆེན་པོ་འཇོག་པོ་ལ་སོགས་པ་ཀླུའི་འཁོར་དང ། ལྷ་དང་མིའི་ཚོགས་ཀྱི་འཁོར་ཆེན་པོ་ལ་སེམས་ཅན་རྣམས་ཀྱི་དོན་ཆེན་པོའི་ཕྱིར་ཏེ། བསམ་པ་དང་རེ་བ་ཐམས་ཅད་ཡོངས་སུ་སྐོང་བ་བདེ་བར་བྱེད་པའི་ཆོས་སྟོན་ཏོ། །དེ་ནས་གྲོང་ཁྱེར་དེ་ན་བྲམ་ཟེའི་ཁྱེའུ་ཁྱབ་མ་སྤྱན་ཞེས་བྱ་བ་ཕྱུག་པ་ནོར་ཆེ་བ། ལོངས་སྤྱོད་ཆེ་བ། རྫས་དང་ཡོ་བྱད་མང་པོ་ཕུན་སུམ་ཚོགས་པ། རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་ཕྱིན་པ། སྔགས་ལ་འཇུག་པ། སྔགས་གྲུབ་པ་ཞིག་འདུག་སྟེ། དེ་ཡང་ཡང་དང་ཡང་དུ་ཀླུ་འགུགས་ཞིང་མེའི་སྦྱིན་བསྲེག་བྱེད་དོ། །བྲམ་ཟེ་དེའི་ལོ་ཏོག་སྨིན་ཀར་ཆར་ཆད་པར་གྱུར་ནས། དེས་ང་རྒྱལ་གྱི་སྒྲས་སྔགས་བརྗོད་པ་དང་འཐུན་པས་འདི་སྐད་ཅེས་བདག་གིས་ཆར་གྱི་རྒྱུན་དབབ་ཅིང་ཀླུ་དགུག་པར་བྱའོ་ཞེས་སྨྲས་ཏེ་དེས་མེའི་སྦྱིན་བསྲེག་བྱ་བར་བཤམས་ནས་ཏིལ་དང ། འབྲས་དང་ཡུངས་དཀར་རྣམས་འབྲུ་མར་ཚ་བ་དང་བསྲེགས་ཏེ་སྦྱིན་བསྲེག་བྱེད་དོ། །དེ་ནས་ཀླུ་མི་སྲུན་པ་ཞིག་གི་གཟུགས་བྱས་ཏེ། དེས་ལྕགས་ཀྱི་ཕུར་བུ་ལ་སྔགས་ནས་ཀླུའི་སྤྱི་བོར་བཏབ་པ་དང ། ཀླུའི་སྤྱི་བོ་གས་ནས་སྡུག་བསྔལ་གྱི་ཚོར་བ་ཆེན་པོར་གྱུར་ཏོ། །ཀླུ་དེ་ཡང་ཆེར་འཁྲུགས་ཏེ་ཁྲོས 107.54a ནས་སྐད་ཅིག་ཐང་ཅིག་ཡུད་ཙམ་དེ་ལ་ཀླུས་ཁྱབ་པར་བྱེད་པའི་ཤུགས་ཀྱིས་ཆེར་གནོད་ཅིང་རྡུལ་འབྱུང་བའི་འོད་ཟེར་ཚ་བ་རང་གི་ལུས་ལས་བཀྱེ་སྟེ་གནོད་པ་ཆེན་པོས་ཁེབས་པར་བྱས་ནས་བྲམ་ཟེ་དེའི་ཞིང་ཚིག་པར་བྱས་སོ། །དེ་ཡང་ལྕེ་འབབ་པའི་ཆར་གྱི་རྒྱུན་ཆེན་པོ་བྲམ་ཟེའི་ལུས་ལ་ཕབ་ནས་བྲམ་ཟེ་དེ་མགོན་མེད་སྐྱབས་མེད། དཔུང་གཉེན་མེད་དེ། མེའི་སྦྱིན་བསྲེག་བྱེད་པ་བཏང་ནས་དེ་བཅོམ་ལྡན་འདས་ལ་མགོན་དང་སྐྱབས་དང ། དཔུང་གཉེན་བཙལ་ཏེ་འབྲོས་པར་བསམས་ནས་བཅོམ་ལྡན་འདས་ཀྱི་དྲུང་དུ་བརྒྱུགས་ཏེ། བཅོམ་ལྡན་འདས་ག་ལ་བ་དེར་སོང་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀླུ་ཁྲོ་བོ་བདག་གི་སྲོག་མ་རུངས་པར་བགྱིད་པར་འཚལ་ཏེ་སྐྱབས་སུ་ཡང་མ་མཆིས་ན། བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དེ་དབུགས་ཕྱུང་ནས་འདི་སྐད་ཅེས་བཀའ་སྩལ་ཏོ། །བྲམ་ཟེ་ཆེན་པོ་མ་འཇིགས་ཤིག་།ངས་ཁྱོད་ཀྱི་མགོན་དང ། སྐྱབས་དང ། དཔུང་གཉེན་བྱའོ་ཞེས་བཀའ་སྩལ་ནས་ཅང་མི་གསུང་བར་བཞུགས་སོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟིགས་སུ་གསོལ། མངོན་སུམ་དུ་གྱུར་བཞིན་དུ་ཡང་ཀླུ་མི་བགྲུངས་པས་ལོ་ཏོག་མ་རུངས་པར་བགྱིད་ན། བཅོམ་ལྡན་འདས་ཁྱོད་ཡོངས་སུ་མྱ་ངན་ལས་འདས་ཀྱི་སླད་ན་སླད་མའི་ཚེ་སླད་མའི་དུས་ན་སེམས་ཅན་ཐམས་ཅད་ཀྱི་རྟེན་ནི་སུ་ལགས། ཇི་ལྟར་འགྱུར། བཅོམ་ལྡན་འདས་ལོ་ཏོག་ཐམས་ཅད་ཀྱི་དོན་དུ། ལོ་ཏོག་རྣམས་ཚིམ་པར་མི་འགྱུར་བ་དང ། ཀུན་ཏུ་བསྲུང་བ་དང ། རབ་ཏུ་འཕེལ་བར་བགྱིད་པར་གྱུར་པ་ལོ་ཏོག་ཡོངས་སུ་སྐྱོང་ཞིང་ཀླུ་ཟློག་པ་དེ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་ཏོ། །ལག་ན་རྡོ་རྗེས་ཀླུ་རབ་ཏུ་འགྲོ་བར་བྱེད་པའི་སྙིང་པོ་སྦས་པ་རྡོ་རྗེ་ཞེས་བྱ་བའི་གཟུངས་དེ་བཞིན་གཤེགས 107.54b པའི་སྙིང་པོ་དང་ཕྱག་རྒྱ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པ་ཡོད་དེ་ངས་བཤད་པར་བྱའོ། །དེས་མྱུར་དུ་གནོད་པ་བཀག་པའི་ཕྱིར་ལོ་ཏོག་ཐམས་ཅད་མྱུར་དུ་བསྐྱང་བར་འགྱུར་རོ། །ལེགས་པར་གསྲུངས་པར་འགྱུར། མེའི་རི་སུལ་ཆེན་པོ་སོ་སོ་ཕྱོགས་བཅུ་ཀུན་ནས་ཀླུ་ཐམས་ཅད་ཀྱི་མཚམས་བཅད་པར་འགྱུར་རོ། །མེ་ལྕེ་འབར་བའི་རིམ་པའི་སྤྲིན་ཆེན་པོ་ནམ་མཁའ་ལྡིང་འདབ་མ་གདེངས་པའི་ཤུགས་ཞེས་བྱ་བའི་སྤྲིན་གྱི་རིམ་པས་ནམ་མཁའ་ཁེབས་པར་བྱེད་དོ། །ལོ་ཏོག་དང་མེ་ཏོག་དང ། འབྲས་བུ་ཐམས་ཅད་ཀུན་ཏུ་བསྲུང་སྟེ་གནས་པར་འགྱུར་རོ། །དེས་ཀླུ་ལ་སོགས་པ་ཐམས་ཅད་ཀུན་དུ་རབ་ཏུ་འབར་བར་འགྱུར་རོ། །ཀླུ་མི་བགྲུངས་པ་རྣམས་ཕུང་བར་འགྱུར་རོ། །འདུམ་པར་འགྱུར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་སྨན་པའི་སླད་དུ་གཟུངས་ཆེན་པོ་འདིའི་སྔགས་ཀྱི་ཚིག་བཤད་དུ་གསོལ། དེ་ནས་བཅོམ་ལྡན་འདས་ཀྱིས་སྙིང་པོ་འདི་བཀའ་སྩལ་ཏོ། །ན་མོ་བྷ་ག་བཱ་ཏེ། སརྦ་བུད་དྷ་ནཱན། ན་མོ་བྷ་ག་བཱ་ཏེ་ཤཱཀྱ་རཱ་ཛཱ་ཡ། ཨོཾ་ཛྭ་ལ་ཛྭ་ལ། གི་རཱི་བ་བྷ་ནི། ཏིབ་ཏ་བེ་ག་མ་ཧཱ་བ་དེ་བྷ་ག་བཱ་ཏེ་མ་ཧཱ་ཙཎ་ཌ་ཧྲི་ད་ཡ་ས་ལ་ནི། ཧུ་རུ་ཧུ་རུ། ཧ་ར་ཧ་ར། ད་ཧ་ད་ཧ། པ་ཙ་པ་ཙ། སརྦ་སསྱ་ན་ཤ་ཡ། ནཱ་ག་ཀུ་ལ་བང་ཤན་དྷ་ར་དྷ་ར་པྲ་ས་ར་ཙཎ་ཌ་བེ་ག་མ་ཧཱ་བ་ལ་པ་ར་ཀྲ་མ་སྤུ་རི་ཏ་རཽ་དྲ་བག་དྲ། མ་ཐ་མ་ཐ། པྲ་ཛྭ་ལ་མཱ་ལ་དྷཱ་ར་ཎཱི། ཙཎ་ཌ་བེ་ག་བ་ཏི། པྲ་པ་ར་བི་མན་དྷཱ་ར་ཎཱི། ཧཱུཾ་ཧཱུཾ། བ་ལ་བ་ཏི། བེ་ག་བ་ཏི། ས་ར་ས་ར། བི་ས་ར་བི་ས་ར་ས་རན་ཏི། སརྦ་ས་དྲི་སྱེན་ནཱ་མ་དྲི་བ་ན་ཡ་དྲི། པུ་ཡ་ཕ་ལ་ཕཊ། དྲ་སན་དྷཱ་ར་ཎཱི། ཨ་པ་སརྦ་ན་དུ་སརྦ་ནཱ་ག་ཏོ་ཤ་སརྦ་བ་བྷ་བ་བྷ་ནི། བ་ག་ཏ་བེ་ག་བ་ཏི་སཝཱ་ཧཱ། ཧཱུཾ་ཧཱུཾ་ཕཊ། ནཱ་ག་བི་ས་ར་ནི་ཕཊ། ཛྭ་ལ་མཱ་ལི་ནི་ཕཊ། ཛྭ་ལམ་ལི་ནི་ཕཊ། ཕཊ་ཕཊ་ཕཊ་སཝཱ་ཧཱ། བཅོམ་ལྡན་འདས་ཀྱིས་ཀླུ་ཐམས་ཅད་དང ། ཀླུ་མི་བགྲུངས་པ་ཐམས་ཅད་མ་རུངས་པར་བྱེད་པའི་རིག་པ་འདི 107.55a བཤད་མ་ཐག་ཏུ་ཀླུ་དང་ཀླུ་ཆེན་པོ་ཐམས་ཅད་ཀླད་པ་ན་བར་གྱུར། ལུས་རུལ་ཏེ་ལུས་རྣགས་ཞིང་དྲི་མི་ཞིམ་པར་གྱུར་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཀྱི་ཚིག་ཤིན་ཏུ་མི་བཟད་པ་དག་བཀའ་སྩལ་ཏོ། །བཅོམ་ལྡན་འདས་བདག་ཅག་གིས་ནོངས་པ་བགྱིས་མི་དྲན་དུ་ལགས་ཀྱིས་ཀྱང ། བཅོམ་ལྡན་འདས་རིག་འཛིན་གནོད་པ་བགྱིད་པས་བདག་ཅག་ལ་བརྙས་པ་དང ། རྡེག་པ་དང་འཆིང་བ་དང ། སྐྲོད་པ་དང ། གནོད་པ་དེའི་ཚེ་བཅོམ་ལྡན་འདས་ཀླུ་མི་བགྲུངས་པ་རྣམས་འཁྲུགས་ཏེ། དེའི་ཚེ་ལོ་ཏོག་དང ། མེ་ཏོག་དང ། འབྲས་བུ་མ་རུང་བར་བགྱིད། སེར་བ་འབབ་པར་བགྱིད། སད་དང་རླུང་གིས་འཁྲུག་པར་བགྱིད། ཧ་ཆང་ཆར་ཆེ་བ་དང ། ཆར་མི་འབབ་པ་དང ། དུས་མ་ལགས་པར་ཆར་འབབ་པར་བགྱིད་དོ། །བཅོམ་ལྡན་འདས་རིག་པ་འཛིན་པ་སྔགས་སྨྲ་བས་བྱམས་པ་ལ་གནས་པར་བགྱི། བྱམས་པའི་གོ་བགོ་བར་བགྱི། བྱམས་པའི་རལ་གྲི་ལག་ན་ཐོགས་པར་བགྱི་སྟེ། བྱམས་པས་གནོད་པར་བགྱིད་པ་ཐམས་ཅད་ཞི་བར་བགྱིད་དོ། །བཅོམ་ལྡན་འདས་དེང་སླན་ཆད་དེ་བཞིན་གཤེགས་པའི་སྤྱན་སྔར་བདག་ཅག་དམ་བཅའ་བར་འཚལ་ཏེ། གང་ན་རིག་པའི་རྒྱལ་མོ་འདི་རབ་ཏུ་སྤྱོད་པ་དེར་བཅོམ་ལྡན་འདས་ཀླུ་གཙེ་བར་མི་བགྱིད་དོ། །གང་ན་སྙིང་པོའི་གཟུངས་འདིས་སྲུང་བར་བགྱིས་པ་དང ། ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བར་བགྱིས་པ་དང ། སྲད་བུ་བྲེ་བ་དང ། མཚམས་དགུམ་པ་དང ། དཀྱིལ་འཁོར་གྱི་ས་རིས་གཅད་པར་བགྱིས་པ་དེར་བཅོམ་ལྡན་འདས་བདག་ཅག་གིས་རྟག་པར་རྒྱུན་དུ་གནོད་པ་ཐམས་ཅད་བཟློག་པར་བགྱི་འཚལ་ལོ། །ལོ་ཏོག་དང་མེ་ཏོག་དང ། འབྲས་བུ་ཐམས་ཅད་ཀུན་དུ་བསྲུང་བར་འཚལ་ལོ། །ཡོངས་སུ་བསྐྱང་བར་འཚལ་ལོ། །ཐ་ན་རྐུན་པོ་དང ། གཡོ་ཅན་དང ། རི་དགས་དང ། བྱ་རྣམས་ཀྱང་ཀུན་དུ་བསྲུང་བར་འཚལ་ཏེ། སླད་ཀྱིས་ཀྱང་མ་རུངས་པར་མི་བགྱིད་དོ། །དེ་ནས་བཅོམ་ལྡན་འདས་ཀྱིས་ཀླུའི་བདག་པོ་དེ་དག་ལ་ལེགས་སོ་ཞེས་བྱ་བ་གནང་སྟེ། ཀླུའི་བདག་པོ་དག་ལེགས་སོ་ལེགས་སོ། །ཁྱོད་ཀྱིས་དེ་ལྟར 107.55b གྱིས་ཤིག་།ཁྱེད་ཀྱིས་འཛམ་བུའི་གླིང་ལེགས་པར་བསྲུངས་པས་བསྲུང་བར་གྱིས་ཤིག་།དེ་ནས་དེའི་འོག་ཏུ་ཆོ་གར་བྱ་བ་ལས་ཐམས་ཅད་བྱེད་པ་དགེ་བར་བྱ་བ་བརྗོད་པར་བྱའོ། །ལོ་ཏོག་ལ་གནོད་པར་བྱེད་ན་དེའི་ཚེ་རིག་པ་འཛིན་པས་ཞིང་གི་དབུས་སམ་ཁང་སྟེང་ངམ། གནས་མཐོན་པོར་དཀྱིལ་འཁོར་གྲུ་བཞི་པ་བྱས་ལ་ཕྱོགས་བཞིར་བུམ་པ་བཀང་བ་བཞི་གཞག་གོ་།མེ་ཏོག་སིལ་མས་གཅལ་བཀྲམ་སྟེ་གཞག་གོ་།གཟུགས་འཁྱིལ་པ་བདུན་བྱའོ། །འབྲས་ལས་བྱས་པའི་འཁྱིལ་པ་བདུན་བྱ་སྟེ། གཟུགས་རེ་རེ་ཞིང་ཡང་གཟུངས་ཉི་ཤུ་རྩ་རེ་བྱའོ། །འབྲས་དང་འོ་ཐུག་བསྲེས་པ་དང་ཞོ་དང་འོ་མ་གཞག་པར་བགྱིའོ། །ཕྱོགས་བཞིར་དྲིལ་བུ་གཞག་པར་བྱའོ། །པད་མ་ལྟ་བུར་ཟན་གྱི་གཏོར་མ་སྔ་མ་བཞིན་གཞག་པར་བྱའོ། །དཀྱིལ་འཁོར་གྱི་དབུས་སུ་བུམ་པ་ཆེན་པོ་གཞག་སྟེ་བ་ལས་བྱུང་བ་ལྔ་དང ། འོ་མ་དང་ཆུས་དགང་ངོ ། །ཡུངས་དཀར་དང་འབྲས་ཡོས་བླུགས་པར་བྱའོ། །སྔགས་ལན་དྲུག་བཅུར་ཡོངས་སུ་བཟླས་པར་བྱའོ། །སེང་ལྡེང་གི་ཕུར་བུ་བཞི་དང ། ལྕགས་ཀྱི་ཕུར་བུ་གཅིག་བྱ་སྟེ། ཐམས་ཅད་སོར་བརྒྱད་ཀྱི་ཚད་དུ་བྱའོ། །བ་སེར་སྐྱའི་ལྕི་བ་འམ། བག་ཕྱེ་ལས་བྱས་པའི་ཀླུའི་གཟུགས་བཞི་བྱ་སྟེ། དཀྱིལ་འཁོར་གྱི་གྲཝ་བཞིར་གཞག་པར་བྱའོ། །སེང་ལྡེང་གི་ཕུར་བུ་དེ་དག་ཀྱང་སྙིང་ཀར་ནུབ་པར་གཟུགས་སོ། །སྔགས་བརྒྱ་རྩ་བརྒྱད་ཡོངས་སུ་བཟླས་པར་བྱའོ། །ཤར་ཕྱོགས་སུ་ཀླུ་མགོ་བདུན་པ་བཞག་པར་བྱའོ། །ནུབ་ཕྱོགས་སུ་མགོ་བརྒྱད་པའོ། །ལྷོ་ཕྱོགས་སུ་མགོ་ལྔ་པའོ། །བྱང་ཕྱོགས་སུ་མགོ་གསུམ་པའོ། །དཀྱིལ་འཁོར་གྱི་དབུས་སུ་མགོ་དགུ་པ་གཞག་པར་བྱའོ། །པོག་པོར་རེ་རེ་སྟེ་ལྔ་གཞག་པར་བྱའོ། །ཡུངས་དཀར་དང་བྲ་ཡོས་སུ་བསྲེས་པ་ལ་ལན་ཉི་ཤུ་རྩ་གཅིག་བཟླས་པར་བྱའོ། །ཕྱོགས་བཞིར་གཏོར་རོ། །གཟུངས་འདི་བྲིས་ལ་རྒྱལ་མཚན་གྱི་རྩེ་མོ་ལ་བཏགས་ཏེ་དཀྱིལ་འཁོར་གྱི་གྲཝ་བཞིར་གཟུགས་སོ། །ཞིང་གི་དབུས་སུ་ཡང་གཟུགས་སོ། །བསྐྱེད་མོས་ཚལ་གྱི་དབུས་སུ་ཡང་གཟུགས་སོ། །དེ་བཙུགས་མ་ཐག་ཏུ་ཕྱོགས་བཞི་ཀུན་ནས་རི་སུལ་ཆེན་པོས་མཚམས་བཅད་པར་འགྱུར་རོ། །ཇི་སྲིད་དུ་ཕུར་བུ་མ་ཕྱུང་བ་དེ་སྲིད་དུ་མཚམས་བཅད་པ་ཆེན་པོར་འགྱུར་རོ། ། 107.56a ལོ་ཏོག་ཐམས་ཅད་དང་མེ་ཏོག་དང ། འབྲས་བུ་ཐམས་ཅད་ལེགས་པར་བསྲུངས་པར་འགྱུར་རོ། །ཐ་ན་འདབ་མ་གཅིག་ཀྱང་སྐམས་པར་མི་འགྱུར་ན། ཡལ་ག་དང་སྡོང་བུ་སྐམ་པར་འགྱུར་བ་ལྟ་ཅི་སྨོས། སྲོག་ཆགས་ཀྱི་རིགས་རི་དགས་དང་བྱ་ཐམས་ཅད་ཀྱང་ཁ་བཅིངས་པར་འགྱུར་རོ། །མ་རུངས་པར་བྱེད་ཀྱང་མི་ནུས་སོ། །གནས་དེར་རླུང་དང ། སྤྲིན་དང་སེར་བ་དང་སད་དང ། དུས་མ་ཡིན་པའི་རླུང་གིས་ཀྱང་མ་རུངས་པར་བྱེད་མི་ནུས་སོ། །ཀླུའི་གནོད་པ་བྱས་ཀྱང་མ་རུང་པར་བྱེད་མི་ནུས་སོ། །མ་རུང་པ་ཞིག་ཏུ་གྱུར་ན་དེ་ཡང་སླར་རྟས་པར་འགྱུར་རོ། །ཡང་སྟོབས་དང ། རྟས་པ་དང་འོངས་ཡོད་པར་འགྱུར་རོ། །བུམ་པ་ཆེན་པོ་ནང་ན་ཡོད་པ་དེ་ཡང་ཞིང་དང ། ཀུན་དགའ་ར་བ་དང ། བསྐྱེད་མོས་ཚལ་གྱི་ཕྱོགས་བཞི་ཀུན་དུ་གཏོར་བ་བྱས་ན་སྲོག་ཆགས་ཐམས་ཅད་མེད་པར་འགྱུར་རོ། །སྦྲུལ་དང ། བྱི་བ་དང ། ནེའུ་ལེ་དང ། བྱི་དུར་དང ། དོམ་དང ། སྦལ་པ་དང ། ཤ་སྦྲང་དང ། སྦྲང་བུ་དང ། འདབ་ཆགས་རྣམས་མེད་པར་འགྱུར་རོ། །གྲོག་སྦུར་ཐམས་ཅད་མེད་པར་འགྱུར་རོ། །ཐ་ན་ཕྱེ་མ་ལེབ་ལ་སོགས་པ་ཡང་ནམ་ཡང་མི་འབྱུང་ངོ ། །དྲོད་གཤེར་ལས་སྐྱེས་པ་དང ། རྫུས་ཏེ་སྐྱེས་པ་དང ། སྒོ་ང་ལས་སྐྱེས་པའི་བར་གྱིས་ཀྱང་མ་རུངས་པར་བྱེད་མི་ནུས་སོ། །རླན་དང་མེ་ཏོག་ལས་སྐྱེས་པའི་སྲོག་ཆགས་ཀྱི་རྣམ་པ་དག་ཀྱང་ཕུར་བུ་མ་ཕྱུང་གི་བར་དུ་ནམ་ཡང་མི་འབྱུང་ངོ ། །ཕུར་བུ་མ་ཕྱུང་གི་བར་དུ་ཀླུའི་ཉེས་པ་རྣམ་པ་སྣ་ཚོགས་མི་འབྱུང་ཞིང་རབ་ཏུ་འབྱུང་བར་མི་འགྱུར་རོ། །བདེ་བ་དང་ལོ་ལེགས་པ་དང ། ལོ་ཏོག་དང ། མེ་ཏོག་དང ། འབྲས་བུ་ཐམས་ཅད་ཡོངས་སུ་འགྲུབ་པར་འགྱུར་རོ། །རོ་ཞིམ་པ་དང་འཇམ་པར་འགྱུར་རོ། །ཀླུ་ཐམས་ཅད་ཀྱང་རྟག་པར་རྒྱུན་དུ་བསྲུང་བ་དང ། སྐྱོབ་པ་དང་སྦེད་པ་བྱེད་པར་འགྱུར་རོ། །ཕྱེ་མ་ལ་ལན་ཉི་ཤུ་རྩ་གཅིག་བཟླས་པར་བྱ་སྟེ། ལོ་ཏོག་དང ། མེ་ཏོག་དང ། འདབ་མ་དང ། ཤིང་ལྗོན་པ་རྣམས་ལ་གཏོར་ན་སྲོག་ཆགས་ཐམས་ཅད་ལྷུང་ཞིང་མེད་པར་འགྱུར་རོ། །སྲིན་བུ་ཏྲཻ་མ་བུ་ཀ་དང ། ཏྲཻ་ལ་ཏ་དང ། སྦྲུལ་གདུག་པ་དང ། རྐང་བརྒྱད་པ་དང ། སྲོག་ཆགས་ཀྱི་རིགས་གཞན་དག་ཀྱང་ཕུར་བུ་མ་ཕྱུང་གི་བར་དུ་མེད་པར་འགྱུར་རོ། །མི་འབྱུང་བར་འགྱུར་རོ། །ཞིང་གི་ཕྱོགས་བཞིར་ཞི་བའི 107.56b ལས་བྱ་སྟེ། ནས་དང ། གྲོ་དང ། ཏིལ་དང ། ཡུངས་དཀར་དང ། འབྲས་དང་མར་བསྲེས་ཏེ་སྦྱིན་བསྲེག་བྱས་ན་ཞི་བ་ཆེན་པོར་འགྱུར་རོ། །ཐ་ན་དུད་འགྲོའི་སྐྱེ་གནས་སུ་སོང་བ་དག་གིས་ཀྱང་མ་རུངས་པར་བྱེད་མི་ནུས་སོ། །གཟུངས་འདི་དང ། ཆོ་གར་བྱ་བ་འབྱུང་བ་མཐའ་དག་བྲི་བར་བྱ་སྟེ། སངས་རྒྱས་བཅོམ་ལྡན་འདས་དང ། དྲང་སྲོང་ཆེན་པོ་ཉེས་འདོར་དང ། རྡོ་རྗེ་འཛིན་བྲིས་ལ་རྒྱལ་མཚན་གྱི་རྩེ་མོ་ལ་བཏགས་ཏེ་གནས་མཐོན་པོར་གཟུགས་སོ། །གཏོར་མ་དང ། མེ་ཏོག་དང ། བདུག་པ་ཡང་འབུལ་ལོ། །སེང་ལྡེང་གི་ཕུར་བུ་སོར་བརྒྱད་པ་ལ་ལན་སྟོང་ཡོངས་སུ་བཟླས་པ་བྱས་ཏེ་ཁང་སྟེང་དུ་བཙུགས་ན་རླུང་དང ། སད་དང ། སྤྲིན་དང ། སེར་བ་ཐམས་ཅད་ཐུབ་པར་འགྱུར་རོ། །ལོ་ཏོག་དང ། མེ་ཏོག་དང ། འབྲས་བུ་དང ། འདབ་མ་མ་རུངས་པར་བྱེད་པའི་སྲོག་ཆགས་རྣམས་མེད་པར་འགྱུར་ཏེ། ཤ་སྦྲང་དང ། སྦྲང་བུ་དང ། པི་ཙི་ལི་ཀ་དང ། བྱི་བ་དང་སྦྲང་མ་དང ། ཏྲཻ་མ་བུ་ཀ་དང ། ཏྲཻ་ལ་ཏ་དང ། བི་ཤ་ཀི་ཏ་ཀ་དང ། ཉ་ཕྱིས་ཅན་དང་ཉ་དང་ལོ་མི་ཀ་དང ། སྦལ་པ་དང ། ནེའུ་ལེ་དང ། ཕག་དང ། ཀན་ཏི་ཀ་དང་སེང་གེ་དང ། རྐང་མངས་དང ། རྐང་གཅིག་པ་དང ། རུས་སྦལ་དང ། གྲོག་མོ་དང ། སྦྲང་རྩིའི་སྦྲང་མ་དང ། ཐང་གི་སྦྲང་མ་དང ། བུང་བ་དང ། ནག་པོ་དང ། ཤང་ག་ནི་ཀ་དང ། སའི་འོག་ནས་བྱུང་བ་དང ། མ་ལུ་ཤི་ཀ་དང ། འུག་པ་དང ། བྱི་བ་དང ། མཆུ་རིངས་ལ་སོགས་པའི་སྲོག་ཆགས་ཀྱི་རིགས་ཐམས་ཅད་མེད་པར་འགྱུར་རོ། །མི་འབྱུང་བར་འགྱུར་རོ། །ཐམས་ཅད་ཕུང་བར་འགྱུར་རོ། །བྱ་རོག་དང ། བྱེའུ་དང ། ཁུག་རྟ་དང ། ཕུག་རོན་དང ། མུ་དུ་རི་ཀ་དང ། འུག་པ་དང ། ཁ་ན་ཛ་ན་ཀ་དང ། ནེའུ་ཚོ་དང ། རི་སྐེགས་ལ་སོགས་པ་ཐམས་ཅད་མེད་པར་འགྱུར་རོ། །སྔགས་འདིས་ཕུར་བུ་ལ་ཡོངས་སུ་བཟླས་པར་བྱས་ཏེ་ཕྱོགས་བཅིང་ངོ ། །ན་མོ་བུད་དྷཱ་ཡ། ཨོཾ`་ཀི་ལི་མི་ལི་ཙཎ་ཌེ། མེ་རི་ལི། ཙཎ་ཌ་ཙཎ་ཌེ་བན་དྷ་ཡ་སཝཱ་ཧཱ། དེ་ནས་དྲང་སྲོང་ཆེན་པོ་ཉེས་འདོར་བཅོམ་ལྡན་འདས་དང་ཧ་ཆང་ཡང་མི་རིང་བ་ཞིག་ན་འདུག་པས་གཟུངས་འདི་ཐོས་ནས་དེ་སྟན་ལས་ལངས་ནས། བཅོམ་ལྡན་འདས་ཀྱི་ཞབས་གཉིས་ལ་བཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་སྲོག་ཆགས་ཀྱི་རིགས་གནོད་པར་སེམས་པ། རབ་ཏུ་གནོད་པར་སེམས་པ། དུག་འཆང་བ 107.57a ལོ་ཏོག་དང ། མེ་ཏོག་དང ། འབྲས་བུ་དང་འདབ་མ་དང ། སྡོང་བུ་དང ། རྩ་བ་མ་རུངས་པར་བགྱིད་པ་ཐམས་ཅད་ཀྱི་ཁ་བཅིང་བར་བགྱིའོ། །བཟློག་པར་བགྱིའོ། །བསྡིགས་པར་བགྱིའོ། །ཕྱོགས་བཞི་ཀུན་ནས་དཔག་ཚད་དུ་མཚམས་གཅད་པ་ཆེན་པོ་བགྱིའོ། །ཀུན་དུ་བསྲུང་བར་བགྱིའོ། །བཅོམ་ལྡན་འདས་སླད་མའི་ཚེ་སླད་མའི་དུས་ན་གནོད་པར་སེམས་པ། རབ་ཏུ་གནོད་པར་སེམས་པ་ཐམས་ཅད་བཟློག་པར་བགྱིའོ། །སྔགས་ཀྱི་ཚིག་རྗེས་སུ་གསལ་བར་བགྱིའོ། །བཅོམ་ལྡན་འདས་སེམས་ཅན་ཐམས་ཅད་ཀྱི་དོན་དང ། བདག་ལ་ཐུགས་བརྩེ་བའི་སླད་དུ་དེ་བྱིན་གྱིས་བརླབ་ཏུ་གསོལ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་ངས་བྱིན་གྱི་བརླབས་ཀྱིས ། སེམས་ཅན་ཐམས་ཅད་ཀྱི་དོན་དང ། ལོ་ཏོག་དང ། མེ་ཏོག་དང ། འབྲས་བུ་དང ། འདུམ་པ་ཡོངས་སུ་བསྲུང་བའི་ཕྱིར་གཟུངས་ཀྱི་སྔགས་ཀྱི་ཚིག་སྨྲོས་ཤིག་།དེ་ནས་དྲང་སྲོང་ཆེན་པོ་རྣམས་ཀྱིས་བཅོམ་ལྡན་འདས་ཀྱི་སྤྱན་སྔར་འདུག་ནས་འདི་སྐད་ཅེས་སྨྲས་སོ། །ན་མོ་བྷ་ག་བཱ་ཏེ་ཤཱཀྱ་རཱ་ཛཱ་ཡ། ཏ་ཐཱ་ག་ཏཱ་ཡ། ན་མོ་ཨ་ཀ་ཏཱ་ཡ། མ་ཧཱ་རཱི་ཥཱི་ཡ། ཏདྱ་ཐཱ། ཀྵ་མི་ཙུ་ལི། ཙ་ལ་ཙ་ར་ཙ་ར། ཧོ་མི་ལི། བན་དྷ་ནི། ནཱ་ཤ་ནི། ད་ཧ་ད་ཧ། སུ་མུ་རི་ཙ་རི། སརྦ་དུཥྚན་བྷན་དྷ་ནི། དུན་ད་བན་དྷ་ནི། ས་ར་ས་ར་ཎི། ཀྵུ་ཀྵུ་ཀྵུ། མ་ནི་ཤུ་རི་བི་ས་ར་ས་ར། ཧ་ལི་ཧུ་ལི། ཧུ་ཏི་ཧུ་ཏི། ས་ར་མ་ནི། ས་རན་དུ། སརྦ་པཱ་པ་པཱ་ན་ག་ཀྵུ་དྷ་ལི་སཝཱ་ཧཱ། དྲང་སྲོང་ཆེན་པོ་ཉེས་འདོར་གྱིས་བཅོམ་ལྡན་འདས་ཀྱི་སྤྱན་སྔར་རིག་པ་འདི་སྨྲས་མ་ཐག་ཏུ་ཀླུ་དང ། གནོད་སྦྱིན་དང ། སྲིན་པོ་གནོད་པར་སེམས་པ་དེ་དག་ཐམས་ཅད་ཁས་བུབ་ཏུ་འགྱེལ་ནས་བཅོམ་ལྡན་འདས་ལ་སྐད་ཀྱི་གསང་མཐོན་པོས་སྨྲེ་སྔགས་འདོན་ཏེ། བཅོམ་ལྡན་འདས་བདག་ཅག་མ་རུང་ལགས་སོ། །དྲང་སྲོང་གི་དམོད་པ་བབ་པར་གྱུར་ཏོ། །བཅོམ་ལྡན་འདས་བདག་ཅག་དྲང་སྲོང་གི་དམོད་པའི་མེས་ཚིག་གོ་།ཀུན་དུ་ཚིག་གོ་།བཅོམ་ལྡན་འདས་བདག་ཅག་སླན་ཆད་འཛམ་བུའི་གླིང་དུ་སེམས་ཅན་རྣམས་ལ་རྣམ་པར་འཚེ་བར་མི་བགྱིད་དོ། །བཅོམ་ལྡན་འདས་བདག་ཅག་སླན་ཆད་ལོ་ཏོག་དང ། མེ་ཏོག་དང ། འབྲས་བུ་དང ། འདབ་མ་མ་རུངས་པར་མི་བགྱིད་དོ། །སྲོག་ཆགས་ཀྱི་རིགས་ཐམས་ཅད་བཟློག་པར་བགྱིད་དོ། ། 107.57b བཅོམ་ལྡན་འདས་ཀྱིས་དེ་དག་ལ་བཀའ་སྩལ་པ། ཀླུའི་བདག་པོ་དག་ཁྱེད་ཀྱིས་དེ་ལྟར་གྱིས་ཤིག་།འཛམ་བུའི་གླིང་པའི་སེམས་ཅན་ཐམས་ཅད་ལོ་ཏོག་དང ། མེ་ཏོག་དང་འབྲས་བུ་དང ། འདབ་མ་དང ། ཡལ་ག་བདེ་བར་ཀུན་ཏུ་འཕེལ་བར་གྱུར་པ་རྗེས་སུ་སྲུངས་ཤིག་།དེ་ནས་དྲང་སྲོང་ཆེན་པོ་དེས་ཆོ་གར་བྱ་བ་སྨྲས་པ། བཅོམ་ལྡན་འདས་ཁ་ཤར་ཕྱོགས་སུ་བལྟས་ཏེ་མཆིས་ལ། རིག་པ་དྲང་སྲོང་ཆེན་པོའི་སྙིང་པོ་འདི་རིལ་བ་འབྲིང་པོ་ཆུས་བཀང་ལ་ལན་བརྒྱ་རྩ་བརྒྱད་ཡོངས་སུ་བཟླས་པ་བགྱི་སྟེ། དྲང་སྲོང་གི་མི་སྨྲ་བས་ཕྱོགས་བཞིར་གཏོར་བར་བགྱིའོ། ། པ་ས་ར་ས་ར། ཤ་པ་ཏ་པ་དཱ་མ། ཧྲི་ད་ཡ་ཀྲོ་ད། ཨ་བ་མུ་ཀ་བན་དྷ་ཡ། པྲ་ན་ཙ་ར། སུ་མུ་རུ་ཙ་ལ་སཝཱ་ཧཱ། སྔགས་འདི་ལན་བདུན་སྟོང་བཟླས་པ་བགྱི་སྟེ། བཟླས་པ་ཙམ་གྱིས་ཀླུ་གནོད་པར་སེམས་པ་ཐམས་ཅད་ཚ་བས་གདུངས་པར་འགྱུར་རོ། །རྐང་གཉིས་པ་དང ། རྐང་བཞི་པའི་བར་གྱི་སྲོག་ཆགས་ཀྱི་རིགས་ཐམས་ཅད་དམོད་པས་གདུངས་པར་གྱུར་ཏེ་ཐམས་ཅད་འབྱེར་རོ། །སླར་ཡང་ཕྱོགས་དེར་ལོ་ཏོག་ལ་གནོད་པ་མི་བགྱིད་དོ། །སྲོག་ཆགས་ཀྱི་རིགས་ཐམས་ཅད་མ་མཆིས་པར་འགྱུར་རོ། །སྲོག་ཆགས་ཀྱི་རིགས་ཐམས་ཅད་ཕྱིས་ཀྱང་མ་མཆིས་པར་འགྱུར་རོ། །ཡང་ལོ་ཏོག་དང ། མེ་ཏོག་དང ། འབྲས་བུ་དང ། འདབ་མ་མ་རུངས་པར་མི་བགྱིད་དོ། །དེ་ནས་བཅོམ་ལྡན་འདས་ཀྱིས་དྲང་སྲོང་ཆེན་པོ་ལ་ལེགས་སོ་ཞེས་བྱ་བ་གནང་སྟེ། དྲང་སྲོང་ཆེན་པོ་ལེགས་སོ་ལེགས་སོ། །ཁྱོད་ཀྱིས་ཅི་ནས་ཀྱང་སེམས་ཅན་ཐམས་ཅད་ལ་ལེགས་པར་བསྲུངས་བར་འགྱུར་བ་དང ། ལོ་ཏོག་དང ། མེ་ཏོག་དང་འབྲས་བུ་ཐམས་ཅད་ལེགས་པར་བསྲུང་བར་གྱུར་པ་དེ་ལྟར་གྱིས་ཤིག་།དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །སླད་མའི་ཚེ་སླད་མའི་དུས་ན་རྗེས་སུ་སྲུང་བར་བགྱིད། ཡོངས་སུ་སྲུང་བར་བགྱིད་ན། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ལག་ན་རྡོ་རྗེ་ལེགས་སོ་ལེགས་སོ། །སེམས་ཅན་ཐམས་ཅད་ཡོངས་སུ་སྲུངས་ཤིག་།ལོ་ཐོག་ལ་གནོད་པར་བྱེད་པ་ཀླུའི་ཆོ་ག་རྫོགས་སྷོ།། །།དེ་ནས་དེའི་འོག་ཏུ་བཅོམ་ལྡན་འདས 107.58a ཞམ་རིང་ཆེན་པོ་དང ། འཁོར་འདུས་པ་ཆེན་པོ་དང ། བཀོད་པ་ཆེན་པོ་དང ། དོན་ཡོད་པའི་མཐུ་ཆེན་པོ་དང ། ཆོ་འཕྲུལ་ཆེན་པོ་ཀུན་ཏུ་སྟོན་པས་རྒྱལ་པོ་ཆེན་པོ་རྣམ་ཐོས་ཀྱི་བུའི་གནས་སུ་གཤེགས་སོ། །དེ་ནས་བཅོམ་ལྡན་འདས་རྣམ་ཐོས་ཀྱི་བུའི་གནས་དང་ཧ་ཅང་ཡང་མི་རིང་བ་ཞིག་ཏུ་བྱོན་པ་དང ། ས་ཕྱོགས་དེ་ན་འབྲོག་གི་ནགས་ཉི་ཤུ་པ་ཞེས་བྱ་བ་ཞིག་ཡོད་དེ། ནགས་དེའི་མཐོངས་ན་རྫིང་བུ་ཞིག་ཡོད་ལ། རྫིང་བུ་དེའི་མཐུས་ལྕང་ལོ་ཅན་གྱི་ཕོ་བྲང་འཁོར་གྱི་ཞིང་དང་ཀུན་དགའ་ར་བ་དང ། ནགས་དང་འདབ་མ་དང ། མེ་ཏོག་དང ། འབྲས་བུ་རྣམས་ཀུན་དུ་ཚིམ་པར་གྱུར་ཏོ། །སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང ། བ་ལང་དང ། རྟ་དང་རྟ་རྒོད་མ་དང ། མ་ཧེ་དང་གླང་པོ་ཆེ་དང ། བོང་བུ་དང ། སྐྱེ་བོའི་ཚོགས་ཐམས་ཅད་བདེ་བས་ཚིམ་པར་གྱུར་ཏོ། །རྫིང་བུ་དེ་ཡང་ཕྱོགས་བཞི་ཀུན་དུ་རྒྱར་དཔག་ཚད་གཉིས་ཀྱི་ཚད་དོ། །རྫིང་བུ་དེ་ཡང་མེ་ཏོག་ཨུད་པ་ལ་དང ། པད་མ་དང ། ཀུ་མུ་ཏ་དང ། པུན་ད་རི་ཀ་སྣ་ཚོགས་ཀྱིས་ཀུན་ཏུ་ཁེབས་ཤིང ། ཉ་སྣ་ཚོགས་དང ། ཆུ་བྲན་དང ། ཉ་མིད་དང ། ཆུ་སྲིན་བྱིས་པ་གསོད་དང ། བུང་བ་གཟུགས་སྣ་ཚོགས་ཅན་ནོ། །དེ་ནས་དེའི་འོག་ཏུ་ཐན་པ་བྱུང་བ་དེའི་ཚེ་ནགས་ཚལ་དང ། མེ་ཏོག་དང ། འབྲས་བུ་དང ། འདབ་མ་དང ། ཡལ་ག་ཐམས་ཅད་སྐམས་ཏེ་མེ་ཏོག་དེ་དག་རྙིངས་སོ། །ཉ་དང ། ཆུ་སྲིན་དང ། ཉ་མིད་དང ། ཆུ་སྲིན་བྱིས་པ་གསོད་དང ། བུང་བ་གཟུགས་སྣ་ཚོགས་པ་དེ་དག་ཀྱང་ཆུ་བྲི་སྟེ་ཆུ་ཅུང་ཟད་ཅིག་ལུས་པས་ཕྱོགས་བཅུར་རྒྱུག་།ཀུན་ཏུ་རྒྱུག་རབ་ཏུ་རྒྱུག་སྟེ། སྲོག་འགགས་ལ་ཐུག་།སྲོག་འཆད་ལ་ཐུག་པས་སྙིང་འཕར་ཞིང་རྒྱུག་གོ་།དེ་ནས་བཅོམ་ལྡན་འདས་ཞམ་རིང་བ་ཆེན་པོ་དང་རྫིང་བུ་དེར་བྱོན་པ་དང ། དེ་ན་ཉ་དང ། ཆུ་སྲིན་དང ། ཆུ་སྲིན་བྱིས་པ་གསོད་དང ། བུང་བ་བརྒྱ་སྟོང་དུ་མ་སྲོག་འགགས་ལ་ཐུག་།སྲོག་འཆད་ལ་ཐུག་སྟེ་ཕྱོགས་བཅུར་རྒྱུག་ཅིང་སྙིང་རྗེ་རྗེ་ལྟར་གཟིགས་ནས། བཅོམ་ལྡན་འདས་ཀྱིས་བྱམས་པའི་དམིགས་པ་སྙིང་རྗེས་དབུགས་ཕྱུང་སྟེ་སེ་གོལ་གྱི་སྒྲས་ཀླུ་རྣམས་འབོད་ཅིང་ལན་གཉིས་ལན་གསུམ་དུ་སེ་གོལ་རྡོབ་ཅིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྒྲ་གྲག་པར་མཛད་དོ། །སྔོན་ལས་ཀྱི་རྐྱེན 107.58b འགའ་ཞིག་གིས་སྲོག་ཆགས་དེ་དག་ཀྱང་སྲོག་མ་ཆད་དོ། །ཀླུ་ཆེན་པོ་དེ་དག་གིས་སྒྲ་དེ་ཡང་མ་ཐོས། བཅོམ་ལྡན་འདས་ཀྱང་རྗེས་སུ་མ་དྲན་ནོ། །དེ་ནས་བདུད་ཀྱི་རིགས་ཀྱི་གནོད་སྦྱིན་རྣམ་པར་འཐོར་རླུང་ཞེས་བྱ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྒྲ་བསྒྲགས་པ་ཞག་བདུན་གྱི་ཉིན་པར་སྲེག་པའི་བསྐལ་པ་འབྱུང་སྟེ། འདི་ནི་སྲིད་པའི་རྩེ་མོ་ནས་མནར་མེད་པའི་སེམས་ཅན་དམྱལ་བ་མནར་མེད་པ་ལ་ཐུག་པའི་བར་དག་ལས་གང་ཚིག་པར་མི་འགྱུར་བ་ཅུང་ཟད་ཀྱང་མི་སྲིད་དོ། །འཇིག་རྟེན་དུ་འཇིགས་པ་ཆེན་པོ་བྱུང་ཞེས་སྒྲ་གྲག་གོ་།དེ་ནས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་དེ་དག་ཐམས་ཅད་ཀྱིས་སྒྲ་དེ་ཐོས་ནས་ཀྱི་ཧུད་ཀྱི་ཧུད་འཇིག་རྟེན་མ་རུང་པར་གྱུར་ཏོ་ཞེས་ངུའོ། །དེ་ནས་བཅོམ་ལྡན་འདས་ཀྱིས་ལས་ཀྱི་རྐྱེན་གྱིས་འདི་མྱོང་བར་མཁྱེན་མོད་ཀྱི། འོན་ཀྱང་དགོངས་པ་མཛད་དེ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་འོད་ཟེར་བྱུང་ནས། འོད་ཟེར་དེས་ཀླུའི་ཁྱིམ་ཐམས་ཅད་སྣང་བར་བྱས་ནས་ཀྱང་སླར་ལོག་སྟེ་སྤྱི་བོའི་གཙུག་ཏུ་ནུབ་པར་གྱུར་ཏོ། །དེ་ནས་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་ཞེས་བྱ་བས་ཀླུ་ཐམས་ཅད་བསྡུས་ནས་འདི་སྐད་ཅེས་སྨྲས་སོ། །ཀྱེ་ཀླུ་དང་ཀླུ་ཆེན་པོ་དག་ཅིའི་ཕྱིར་འོད་ཟེར་བྱུང་ཞིང་རྐྱེན་གང་གིས་འཇིག་རྟེན་དུ་བྱུང ། དེ་ནས་ཀླུའི་རྒྱལ་པོ་ཆེན་པོ་རྒྱ་མཚོས་བསམས་ནས། བཅོམ་ལྡན་འདས་ཀྱི་མཐུས་འོད་ཟེར་བྱུང་བར་མཐོང་ངོ ། །དེ་ནས་ཀླུའི་རྒྱལ་པོ་རྒྱ་མཚོ་དང ། གཞན་ཡང་ཀླུའི་རྒྱལ་པོ་མཐུ་ཆེ་བ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་ཟེར་རབ་ཏུ་བཀྱེ་བའི་རྒྱུ་གང་ལགས། རྐྱེན་གང་ལགས། འོད་ཟེར་རབ་ཏུ་བཀྱེ་སྟེ་ཁང་པ་ཐམས་ཅད་སྣང་བར་བགྱིས་ཏེ། སླར་ལྡོག་པར་བྱེད་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ཀླུའི་བདག་པོ་དག་སྲོག་ཆགས་བརྒྱ་སྟོང་ཕྲག་མང་པོ་སྲོག་འགགས་པས་འགག་པར་འགྱུར་བའོ། །དེ་ནས་ཀླུའི་རྒྱལ་པོ་རྒྱ་མཚོས་སྐད 107.59a ཅིག་ཐང་ཅིག་ཡུད་ཙམ་དེ་ལ་རྫིང་བུ་ཆར་གྱི་རྒྱུན་གྱི་ཆུས་བཀང་ནས་བདེ་བས་ཚིམ་པར་བྱས་སོ། །དེ་ནས་ཕྱོགས་དེར་གོ་སྐབས་ཆེན་པོ་བྱུང་བར་གྱུར་ནས་ས་ཕྱོགས་དེར་བཅོམ་ལྡན་འདས་འཁོར་ཆེན་པོས་ཀུན་ནས་བསྐོར་ཏེ་མདུན་དུ་བདར་བའི་དབུས་ན་བཞུགས་སོ། །ཀླུའི་འཁོར་ཆེན་པོ་འདུས་པ་ནི་འདི་ལྟ་སྟེ། ཀླུའི་རྒྱལ་པོ་སྟོང་ཕྲག་བརྒྱད་བཅུ་སྟེ། ཀླུའི་རྒྱལ་པོ་རྒྱ་མཚོ་ལ་སོགས་པ་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་དེ་སྟན་ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་ཏེ་ཕྱག་འཚལ་ནས་ལན་གསུམ་བསྐོར་བ་བྱས་ནས་མེ་ཏོག་དང ། གདུག་པ་དང ། ཕྲེང་བ་དང ། སྤོས་དང ། བྱུག་པ་དང ། རྒྱན་དང ། ལྷབ་ལྷུབ་དང ། ན་བཟའ་སྣ་ཚོགས་ཀྱིས་བཅོམ་ལྡན་འདས་ལ་མཆོད་དེ་བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་རྒྱལ་པོ་བཞིས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིགས་པ་ཆེན་པོ་མི་བཟད་པ་འཇིག་རྟེན་དུ་བྱུང་སྟེ། འདི་ལྟར་ཐན་པ་བྱུང་ཞིང་མུ་གེའི་དགོན་པར་གྱུར་པ་ལགས་སོ། །བཅོམ་ལྡན་འདས་སྡུག་བསྔལ་འདིས་སེམས་ཅན་ཐམས་ཅད་མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས་པར་གྱུར་ན། བཅོམ་ལྡན་འདས་ཀྱིས་དེ་ལྟ་བུ་དང་འཐུན་པའི་སྔགས་ཀྱི་ཚིག་བཤད་དུ་གསོལ། གང་གིས་སླད་མའི་ཚེ་སླད་མའི་དུས་ན་སྡུག་བསྔལ་སྣ་ཚོགས་སུ་ལྟུང་བའི་འཇིག་རྟེན་ཀུན་ཏུ་སྒྲོལ་བ་དང ། ཧ་ཅང་ཆར་ཆེ་བ་དང ། ཆར་མ་མཆིས་པ་དང ། དུས་མ་ལགས་པའི་ཆར་དང ། སེར་བ་དང་སད་དང ། ཚ་བ་མ་མཆིས་པར་བགྱིད་པ་དང ། མུ་གེའི་དགོན་པ་རབ་ཏུ་མ་མཆིས་པར་བགྱིད་པ་དང ། བཟློག་པ་དང ། ཡོངས་སུ་བསྐྱང་བའི་སླད་དུ་གཟུངས་ཀྱི་སྔགས་ཀྱི་ཚིག་བཤད་དུ་གསོལ། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་དང ། རྒྱལ་པོ་ཆེན་པོ་ཡུལ་འཁོར་སྲུང་དང ། རྒྱལ་པོ་ཆེན་པོ་འཕགས་སྐྱེས་པོ་དང ། རྒྱལ་པོ་ཆེན་པོ་མིག་མི་བཟང་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག 107.59b ཀླུའི་སྙིང་པོའི་གཟུངས་ཀྱི་སྔགས་ཀྱི་ཚིག་སྐུལ་མ་འདེབས་པ་ཀུན་ནས་འབར་བའི་གློག་ཅེས་བྱ་བ་ཡོད་དེ། དེ་དྲན་པ་ཙམ་གྱིས་ཀླུ་ཐམས་ཅད་ཀྱི་ཁྱིམ་དང ། ཀླུ་ཐམས་ཅད་ཀྱི་ལུས་འབར་བར་འགྱུར་རོ། །ཀླུ་མི་བགྲུངས་པ་ཐམས་ཅད་ཀྱི་སྙིང་འཕར་བར་འགྱུར་རོ། །ཀླུ་ཐམས་ཅད་ཀྱི་མགོ་ཚལ་པ་བདུན་དུ་འགས་པར་འགྱུར་རོ། །མིག་དང་མགོ་རྣམས་གས་ནས་དུམ་བུ་དུམ་བུར་ཆད་ཅིང་འབྲུལ་བར་འགྱུར་རོ། །རྒྱལ་པོ་ཆེན་པོ་དག་ཀླུ་གནོད་པར་སེམས་པ་དང ། རབ་ཏུ་གནོད་པར་སེམས་པ་རྣམས་ཀྱི་དོན་དང ། སེམས་ཅན་ཐམས་ཅད་ཀྱི་ཕྱིར་ཟུང་ཤིག་།དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀླུའི་སྙིང་པོའི་སྔགས་ཀྱི་ཚིག་སྐུལ་མ་འདེབས་པ་ཀུན་ནས་འབར་བའི་གློག་ཅེས་བགྱི་བ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ཀླུའི་ལྟ་སྟངས་དང ། དེ་བཞིན་གཤེགས་པའི་གཟིགས་སྟངས་ཀྱིས་རྣམ་པར་གཟིགས་ནས་ཀླུའི་འཁོར་འདུས་པ་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་དག་ང་ལས་གཟུངས་ཀྱི་ཚིག་གི་སྔགས་ཀྱི་ཚིག་ཉོན་ཅིག་།ཏདྱ་ཐཱ། ཨོཾ་བི་པུ་ལེ། པྲ་ཕ་རེ། ནཱ་གེ་མ་ཧཱ་ནཱ་གྲ་ཧྲི་ད་ཡ། ཨ་པར་ཏེ། ཛྭ་ལ་ཛྭ་ལ། སརྦ་ནཱ་ག་ཧྲི་ད་ཡ་ནི། ཀི་མི་ཀི་མི། ནཱ་ག་ཀུ་ལ་བི་དྷྭན་ས་ནི། ཧ་ན་ཧ་ན། སརྦ་ནཱ་ག་དུཥྚ་ན་ཧྲི་ད་ཡ་ནི། ཧ་ན་ཧ་ན། སརྦ་དུཥྚན་ནཱ་ག་བ་བ་ན་ནི། པ་ཙ་པ་ཙ་པ་ཙ་ཡ། སརྦ་དུཥྚན་ནཱ་ག་ནན། ཨ་ཀྲི་མ། ཨ་ཀྲི་མ། ས་མུ་དྲཱ་སཱ་ག་ར། བི་མ་ལེ། བི་ཀྲ་མ། མ་ཧཱ་ནཱ་ག་ག་ཏེ། ཛ་བ་རེ་སཝཱ་ཧཱ། བཅོམ་ལྡན་འདས་ཀྱིས་ཀླུའི་སྙིང་པོའི་གཟུངས་ཀྱི་སྔགས་ཀྱི་ཚིག་འདི་གསུངས་པ་ཙམ་གྱིས་ཀླུ་དེ་དག་ཐམས་ཅད་འདར་ཞིང་ལུས་རུལ་ཏེ་དྲི་མི་ཞིམ་པར་གྱུར་ཏོ། །མེ་འབར་བ་བཞིན་དུ་ལུས་ལ་དུ་བར་འཐུལ་ཞིང་འགྲེ་ལྡོག་གོ་།ཐམས་ཅད་སྐད་ཆེར་བཅོམ་ལྡན་འདས་ལ་ངུ་ཞིང་ཐམས་ཅད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཀྱི་ཚིག་ཤིན་དུ་མི་བཟད་པ་དག་བཀའ་སྩལ་ཏོ། །བཅོམ་ལྡན་འདས་བདག་ཅག་ཐམས་ཅད་ཀྱི་སྙིང་ལ་གཡོ་མ་མཆིས་པར་འགྱུར་རོ། །བཅོམ་ལྡན་འདས་བདག་ཅག་ཐམས་ཅད་ཚིག་སྟེ་མ 107.60a རུང་པར་གྱུར་ཏོ། །བཅོམ་ལྡན་འདས་དེང་སླན་ཆད་འཐུན་པར་བགྱིད་དོ། །བཅོམ་ལྡན་འདས་ཀྱི་སྤྱན་སྔར་ཡི་དམ་བགྱིད་དོ། །བཅོམ་ལྡན་འདས་བདག་ཅག་ཀླུའི་སྐྱེ་གནས་ན་གནས་ཀྱི་བར་དུ་བཅོམ་ལྡན་འདས་ཡང་བདག་ཅག་འཛམ་བུའི་གླིང་དུ་འཚེ་བ་མི་བགྱིད་དོ། །མ་རུངས་པར་མི་བགྱིད་དོ། །མེ་ཏོག་དང་ཡལ་ག་དང ། འབྲས་བུ་དང ། ལོ་ཏོག་ཐམས་ཅད་ཡོངས་སུ་རྒྱས་པར་བགྱིད་དོ། །དུས་དུས་སུ་ཆར་གྱི་རྒྱུན་འབབ་པར་བགྱིད་དོ། །བདེ་བ་དང་ཡིད་བདེ་བར་བགྱིད་དོ། །ལོ་ཏོག་དང ། མེ་ཏོག་དང ། འབྲས་བུ་ཐམས་ཅད་འགྲུབ་པར་བགྱིད་དོ། །དེ་བཞིན་གཤེགས་པའི་བཀའ་རྗེས་སུ་བསྐྱང་བར་བགྱིད་དོ། །བདེན་པའི་དམ་ཚིག་ལ་གནས་པར་བགྱིད་དོ། །བུ་གཅིག་པ་ལ་བགྱི་བ་བཞིན་དུ་སེམས་ཅན་ཐམས་ཅད་རྗེས་སུ་བསྐྱང་བར་བགྱིད་དོ། །བཅོམ་ལྡན་འདས་ཕྱོགས་གང་དང་གང་ན་རིག་པའི་རྒྱལ་མོ་འདི་སྤྱོད་པ་དེར་བཅོམ་ལྡན་འདས་བདག་ཅག་འཐུན་པར་བགྱིད་དོ། །བཅོམ་ལྡན་འདས་རིག་པའི་རྒྱལ་མོ་འདི་དྲན་པ་ཙམ་གྱིས་ཀྱང་བདག་ཅག་ཐམས་ཅད་ཀྱིས་ཆར་གྱི་རྒྱུན་འབབ་པར་བགྱིད་དོ། །དྲན་པ་ཙམ་གྱིས་ཀྱང་ཧ་ཅང་ཆར་ཆེ་བ་ཟློག་པར་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ་ལས་ལོག་པར་མི་བགྱིད་དོ། །བཅོམ་ལྡན་འདས་ཡང་མནས་བསྒག་པའི་སྔགས་ཀྱི་ཚིག་སྩལ་ཏོ། །དེ་ནས་ཀླུའི་རྒྱལ་པོ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་སྨྲས་སོ། །ཏདྱ་ཐཱ། ཨོཾ་ཙ་ཏ་ཙ་ཏ། བི་ཙ་ཏ། ཤ་ཏ་ཤ་ཏ། པ་ཙ་ར་ཏི་སཝཱ་ཧཱ། བཅོམ་ལྡན་འདས་གལ་ཏེ་རིག་པ་འཛིན་པས་གདུགས་ཞགས་གཅིག་ཆོ་ག་བགྱིས་ལ། བདག་ཅག་གིས་སེམས་ཅན་ཐམས་ཅད་ཡོངས་སུ་བསྐྱང་བའི་དོན་དུ་འཛམ་བུའི་གླིང་ཐམས་ཅད་དུ་ཆར་གྱི་རྒྱུན་མ་ཕབ་ན། བཅོམ་ལྡན་འདས་བདག་ཅག་ཡང་དག་པར་རྫོགས་པའི་སངས་རྒྱས་ལ་འཁུས་པར་འགྱུར་རོ། །བདག་ཅག་ཀླུའི་སྐྱེ་གནས་ནས་འཆི་འཕོ་བར་གྱུར་དུ་ཡང་མཆི་སྟེ། བཅོམ་ལྡན་འདས་དེའི་ཚེ་རིག་པ་འཛིན་པས་མནས་བསྒག་པའི་གཟུངས་ཀྱི་སྔགས་ཀྱི་ཚིག་འདི་ཐོག་མ་ཉིད་དུ་ལན་བདུན་དུ་བརྗོད་པར་བགྱིའོ། །དེའི་འོག་ཏུ་སྐེ་ཚེའི་ས་བོན་བརྒྱ་རྩ་བརྒྱད་ཀླུའི་ས་བོན་དུ་མཚེ་འུར་དོར་རོ། །བཅོམ 107.60b ལྡན་འདས་དེའི་ཚེ་བདག་ཅག་ཐམས་ཅད་ཀྱི་ཁང་ཁྱིམ་མཐའ་དག་ཞུགས་འབར་བར་གྱུར། བདག་ཤི་ཀེང་རུས་ཀྱི་ལྷག་མ་ཙམ་ཞིག་ལུས་ནས་ཡོངས་སུ་ཐར་བར་གྱུར་གྱི་བར་དུ་དུམ་བུ་དུམ་བུར་འཆད་པར་འགྱུར་རོ། །དེའི་ཚེ་བདག་ཅག་ཐམས་ཅད་ཀྱིས་མྱུར་བར་ཆར་གྱི་རྒྱུན་འབབ་པར་བགྱིད་དོ། །གལ་ཏེ་མྱུར་དུ་ཆར་གྱི་རྒྱུན་མ་ཕབ་ན། བཅོམ་ལྡན་འདས་དེའི་ཚེ་བདག་ཅག་ཐམས་ཅད་འགུམ་པའི་དུས་ཀྱི་དབང་དུ་མཆིའོ། །བུ་དང་ཚ་བོར་བཅས་ཏེ་འགུམ་པར་མཆིའོ། །དེ་ནས་རྣམ་ཐོས་ཀྱི་བུ་ལ་སོགས་པ་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀླུ་མནས་བསྒག་པའི་སྔགས་ཀྱི་ཚིག་ཤིན་དུ་མི་བཟད་པ་དག་བཤད་དོ། །སྙིང་རྗེ་མ་མཆིས་པའི་མནས་བསྒག་པ་དག་བཤད་དོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དག་ཕྱི་མའི་ཚེ་ཕྱི་མའི་དུས་ན་ཀླུ་མི་བགྲུངས་པ་མ་རུངས་པ་གཏུམ་པ་གནོད་པར་བྱེད་པ་དག་འབྱུང་སྟེ། དེའི་ཚེ་མནའ་འདིས་འཇིགས་པར་འགྱུར། སྐྲག་པར་འགྱུར། དུས་དུས་སུ་ཆར་གྱི་རྒྱུན་ནི་ལེགས་པར་འབེབས་སོ། །དུས་དུས་སུ་ལོ་ཏོག་དང ། མེ་ཏོག་དང ། འབྲས་བུ་རྣམས་སྒྲུབ་བོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་རྣམ་ཐོས་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོ་ག་རྒྱ་ཆེར་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་ཆོ་ག་བཀའ་སྩལ་པ། ཆར་མི་འབབ་པའི་དུས་ན་དེས་རི་འམ། དགོན་པའི་གནས་སམ། གཙུག་ལག་ཁང་ངམ། ཆུ་མིག་གམ། མཚེའུ་འམ། མཚོ་འམ། ལྟེང་ཀ་འམ། ཁྲོན་པ་འམ། ཀླུའི་གནས་ཀྱི་མཚེའུ་འམ། འཇིམ་པ་དང ། ལྕི་བར་བསྲེས་པའི་དཀྱིལ་འཁོར་གྲུ་གསུམ་དུ་བྱ་སྟེ། དཀྱིལ་འཁོར་དབུས་ཟབས་ཁྲུ་གང་བརྐོས་ལ། ཁ་ཁྱེར་ཡང་ཁྲུ་གང་བར་བྱའོ། །ཤིན་ཏུ་འཇམ་པ་དང ། ཤིན་ཏུ་ཕྱི་བར་བྱའོ། །སྤོས་ཆུས་ཁོར་ཡུག་ཏུ་གཏོར་རོ། །དེའི་དབུས་སུ་རྒྱལ་པོ་ཆེན་པོ་བཞི་བྱ་སྟེ། བ་སེར་སྐྱའི་ལྕི་བ་དང ། འཇིམ་པར་བསྲེས་པས་ཀླུའི་རྒྱལ་པོ་མགོ་དགུ་གདེངས་ཀ་ཅན་ལུས་དབྱིབས་རྒུ་བར་བྱས་ཏེ། ཐམས་ཅད་ཀྱི་མགོ་ལ་ཡང་ཡིད་བཞིན་གྱི་ནོར་བུ་བྱའོ། །ཤར་ཕྱོགས་སུ་ཀླུའི་རྒྱལ་པོ་རྒྱ་མཚོ 107.61a བྱའོ། །ལྷོ་ཕྱོགས་སུ་ཀླུའི་རྒྱལ་པོ་གདུགས་བྱའོ། །ནུབ་ཕྱོགས་སུ་ཀླུའི་རྒྱལ་པོ་ཆུ་ལྷ་བྱའོ། །བྱང་ཕྱོགས་སུ་ཀླུའི་རྒྱལ་པོ་ལམ་བུ་ཀ་ར་བྱའོ། །དེའི་གཡོག་འཁོར་བདུན་བདུན་མགོ་གསུམ་པ། མགོ་གཉིས་པ། མགོ་ལྔ་པར་བྱའོ། །ལུས་དག་ལ་སྤོས་སྣ་ཚོགས་ཀྱིས་བྱུག་པར་བྱའོ། །ཙན་དན་དཀར་དམར་དང ། སུ་ར་བིན་ཙན་དན་དང ། ཤུག་པ་དང ། གུར་གུམ་རྣམས་ཕྱེ་མར་བྱས་ཏེ་གཏོར་བར་བྱའོ། །མེ་ཏོག་དང་མེ་ཏོག་ཕྲེང་བ་གདགས་སོ། །གནས་དེའི་དབུས་སུ་འབྲས་ཡོས་དང ། ཡུངས་དཀར་གྱིས་གཏོར་བར་བྱའོ། །གྲཝ་བཞིར་རྒྱལ་པོ་ཆེན་པོ་བཞི་གཞག་པར་བྱའོ། །ཕྱོགས་ཆེན་པོ་བཞིར་སངས་རྒྱས་ཤཱཀྱ་ཐུབ་པའི་སྐུ་གཟུགས་རིང་བསྲེལ་དང་བཅས་པ་དང ། མཆོད་རྟེན་རིང་བསྲེལ་དང་བཅས་པ་དག་གཞག་གོ་།དར་དང་བ་དན་གྱིས་བརྒྱན་པར་བྱའོ། །མཆོད་པ་ལྔས་མཆོད་དོ། ། ག་རུ་དང ། ཙན་དན་དང ། དུ་རུ་སྐས་བདུག་གོ་།རྒྱ་སྤོས་དང ། ན་ལ་དང ། ཀུན་དུ་རུ་དང ། ཡུངས་དཀར་དང ། གན་དྷ་ར་ས་དང ། སྲ་རྩིའི་པོག་དཀར་པོ་རྣམས་དང་སྦྲང་རྩི་དང་བསྲེས་ཏེ་སྔགས་ལན་ཉི་ཤུ་རྩ་གཅིག་བཟླས་ཏེ་ཀླུ་རྣམས་ལ་བདུག་པར་བྱའོ། །དཀྱིལ་འཁོར་གྱི་མཐའ་ཀུན་དུ་ནས་ཕྱེས་པད་མ་བྲི་བར་བྱའོ། །སྒོ་བཞི་བཏོད་ལ་ངོས་བཞི་རེ་རེར་ཡང་གཏོར་མས་གཞོང་པ་བཀང་བ་བདུན་བདུན་གཞག་པར་བྱའོ། །གཏོར་མ་དཀར་པོ་དང ། ཅི་འབྱོར་པའི་རོ་རྣམ་པ་མང་པོ་གཞག་གོ་།མེ་ཏོག་སིལ་མ་གཏོར་བར་བྱའོ། །བུམ་པ་བཀང་བ་བཞི་གཞག་གོ་།བུམ་པ་གཏོར་མས་བཀང་བ་བཞི་གཞག་གོ་།པོག་པོར་བཞི་ནས་གུ་གུལ་གྱི་བདུག་པས་བདུག་གོ་།མར་མེ་ཁ་བརྒྱད་དུ་བུད་དོ། །རིག་པ་འཛིན་པས་ཤར་གྱི་སྒོ་རུ་སྦྱིན་བསྲེག་བྱ་སྟེ། ཤིང་ཀ་ར་བི་ར་དང ། ཡུངས་དཀར་དང་ལྕེ་ཚ་དམར་པོ་བསྲེས་ཏེ་ལན་བརྒྱ་རྩ་བརྒྱད་དོར་ཏོ། །དོར་བ་བརྒྱ་རྩ་བརྒྱད་ཚང་བ་དང་ཀླུ་ཐམས་ཅད་ཆར་གྱི་རྒྱུན་འབེབས་ཏེ། འཛམ་བུའི་གླིང་ཐམས་ཅད་དུ་ཕྱོགས་བཞི་ཀུན་ནས་ཆར་གྱི་རྒྱུན་འབེབས་སོ། །ཀླུ་དེ་དག་ཐམས་ཅད་འདིར་ཆར་འབེབས་སོ། །འདི་ནི་ཆོ་ག་དང་པོའོ།། །།ཡུངས་དཀར་དང་མར་དང ། སྦྲང་རྩི་དང ། ཤིང་ཀ་ར་བི་རའི་མེ་ཏོག་དང ། ན་ག་གེ་སར་དང་བཏགས་པའི་རི་ལུ་བྱས་ལ། 107.61b དེ་ནས་རི་ལུ་ལ་སྔགས་ལན་བརྒྱ་རྩ་བརྒྱད་བཟླས་པ་བྱས་ཏེ། ཀླུའི་མཚོར་བོར་ན་བོར་མ་ཐག་ཏུ་ཀླུ་ཐམས་ཅད་དགའ་བར་གྱུར་ཏེ། ཆར་གྱི་རྒྱུན་ཆེན་པོ་འབེབས་སོ། །གལ་ཏེ་དེ་མ་ཐག་མ་ཕབ་ན་ཀླུ་དེ་དག་ཐམས་ཅད་ལུས་ཞིག་པར་འགྱུར་རོ། །ཀླད་པ་ན་བར་འགྱུར། སྡུག་བསྔལ་ཆེན་པོ་འབྱུང་བར་འགྱུར་རོ། །འདི་ནི་ཆོ་ག་གཉིས་པའོ།། །།སྦྱིན་སྲེག་བྱས་པའི་ཐལ་བ་དང ། རྩབ་མོ་དཀྲུགས་ལ་སྔགས་ལན་དྲུག་བཅུ་བཟླས་པ་བྱས་ཏེ་ཁྱིམ་གྱི་ནང་དུ་ཕོ་ན་ཕོ་མ་ཐག་ཏུ་ཀླུ་ཐམས་ཅད་འཁྲུགས་པར་གྱུར་ཏེ། དེའི་ཕྱིར་ཆར་གྱི་རྒྱུན་འབེབས་སོ། །གལ་ཏེ་དེ་མ་ཐག་ཏུ་མ་ཕབ་ན་ཀླུ་ཐམས་ཅད་ཀྱི་ལུས་ལ་ཤ་བཀྲ་འབྱུང་ཞིང་མཛེས་བཏབ་པར་འགྱུར་ལོང་བར་འགྱུར་རོ། །འདི་ནི་ཆོ་ག་གསུམ་པའོ།། །།ཤུག་པ་དང་ཨུད་པ་ལ་སྔོན་པོ་དང ། བབ་ལ་དང་ཟངས་ཕྱེ་དང ། ཡུངས་དཀར་དང ། ིན་དྲ་ཧསྟ་དང ། བ་ལ་ཤ་བསྲེགས་ཏེ་བུ་རམ་གྱི་ཁུ་བས་སྦྲུས་ལ་ཤེས་རབ་ཅན་གྱི་སྔགས་ལན་བརྒྱད་བཅུ་བཟླས་ཏེ། རི་ལུ་རྒྱ་ཤུག་གི་འབྲུ་ཙམ་དུ་བྱས་ལ་ཆར་མི་འབབ་པའི་དུས་ན་རི་ལུ་བདུན་ཀླུའི་ཁྱིམ་དུ་བོར་ན་ཉིན་མཚན་བདུན་ཆར་འབེབས་སོ། །གལ་ཏེ་འཕྲལ་དུ་མ་ཕབ་ན་དེའི་ཕྱིར་ཀླུའི་ཁྱིམ་ཆུ་ཐམས་ཅད་སྐམས་པར་འགྱུར་རོ། །ཀླུའི་ཁྱིམ་ན་གནས་པ་ཐམས་ཅད་གཅེར་བུར་འགྱུར་རོ། །རི་ལུ་གཅིག་རྒྱལ་མཚན་གྱི་རྩེ་མོ་ལ་བཏགས་ཏེ་ཀླུའི་མཚོར་གཟུགས་སོ། །བ་དན་སྔོན་པོ་གདགས་སོ། །སྔགས་འདི་བྲིས་ཏེ་དེར་གདགས་པ་བྱས་ན་ཇི་སྲིད་དུ་རྒྱལ་མཚན་མ་བསྡུས་པ་དེ་སྲིད་དུ་ཀླུ་ཐམས་ཅད་ཆར་འབེབས་སོ། །ཡང་རྒྱལ་མཚན་གྱི་རྩེ་མོ་ལ་བཏགས་ཏེ་ཁང་ཐོག་མཐོན་པོར་གཟུགས་སོ། །སེར་བ་བབ་པའི་དུས་ན་ཡང་ཀླུ་རྣམས་སེར་བ་འབེབས་ཀྱང་མི་ནུས་སོ། །ཀླུ་རྣམས་ཀྱིས་གསེར་གྱི་ཁ་དོག་འདྲ་བ་དེ་འདྲ་བར་མཐོང་སྟེ། ཀླུ་ཐམས་ཅད་དངངས་སྐྲག་ཅིང་གནས་དེར་འདོད་པ་བཞིན་ཆར་འབེབས་སོ། །ོཾ་སུ་པྲ་ཏེ་བཛྲ་དུན་དེ་མི་མི་ལི་སཝཱ་ཧཱ་འདི་ནི་སྔགས་སོ། །བག་ཕྱེ་ལས་ཀླུ་མགོ་དགུ་པའི་གཟུགས་བྱས་ལ་ལས་མཚལ་གྱིས་བསྐུ་བར་བྱའོ། །མགུལ་དུ་བ་དན་གདགས་སོ། །དཀྱིལ་འཁོར་གྲུ་བཞི་པ་བྱས་ཏེ་དབུས་སུ་ཀླུའི་གཟུགས་བཞག་ལ་མེ་ཏོག་སིལ་མས་གཏོར་ཏོ། །གཏོར 107.62a མ་དཀར་པོ་ཅི་འབྱོར་ཚད་སྦྱིན་ནོ། །མེ་ཏོག་དང ། བདུག་སྤོས་ཀྱང་སྦྱིན་ནོ། །བལ་པོ་སེའུ་ཤིང་གི་ལྕུག་མ་ལ་ལན་ཉི་ཤུ་རྩ་གཅིག་ཡོངས་སུ་བཟླས་པ་བྱས་ཏེ། སྔགས་དང་བལ་པོ་སེའུ་ཤིང་གི་ལྕུག་མ་ལ་ཀླུའི་གཟུགས་ལ་ལན་བརྒྱ་རྩ་བརྒྱད་དུ་བྱབ་པ་བྱས་ན་ཀླུ་གང་གི་མིང་བྲིས་པའི་ཀླུ་དེ་བཀུག་པར་འགྱུར་ཏེ། ཀླུ་དེ་ཡང་རང་གི་ཁྱིམ་ལ་དགའ་བར་མི་འགྱུར་རོ། །གལ་ཏེ་ཆར་གྱི་རྒྱུན་ལེགས་པར་མ་ཕབ་ན་འཕྲལ་དུ་སྲོག་མ་རུང་བར་འགྱུར་རོ། །ཡུངས་དཀར་ལ་ལན་སྟོང་རྩ་བརྒྱད་རེ་རེ་ལ་ཡོངས་སུ་བཟླས་པ་བྱས་ཏེ། སྟོང་རྩ་བརྒྱད་དུ་ཚང་ན་ཀླུའི་གཟུགས་ཐམས་ཅད་འགྲོ་ཞིང་མགོ་གདེངས་ཀ་བྱེད་དོ། །དེའི་འོག་ཏུ་བལ་པོ་སེའུའི་ལྕུག་མས་བསྡིགས་ན་ལྡང་ཞིང་ལྕེ་སྟོན་པར་འགྱུར། ལུས་ཀྱི་བར་དུ་སྟོན་པར་འགྱུར། ཀླུ་ཐམས་ཅད་དབང་དུ་འགྱུར་ཏེ། གང་བསྒོ་བ་དེ་བཞིན་བྱེད་དོ། །འོ་མ་དང་ཡུངས་དཀར་ལ་སྔགས་བརྒྱ་རྩ་བརྒྱད་ཡོངས་སུ་བཟླས་པ་བྱས་ཏེ། གནས་ཐམས་ཅད་ཏུ་གཏོར་ན་ཐམས་ཅད་ལ་ཕྱིར་ལེགས་པར་བྱས་པར་འགྱུར་རོ། །འདི་ནི་ཆོ་ག་བཞི་པའོ།། །།དེ་ནས་ཀླུའི་རྒྱལ་པོ་རྒྱ་མཚོ་དང ། གཞན་ཡང་ཀླུའི་རྒྱལ་པོ་མཐུ་ཆེ་བ་ཀླུའི་རྒྱལ་པོ་བརྒྱ་སྟོང་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཀྱི་ཚིག་ཤིན་ཏུ་མི་བཟད་པ་དག་བཀའ་སྩལ་ཏོ། །ལས་སྒྲུབ་པ་ཤིན་ཏུ་མི་བཟད་པ་དག་བཀའ་སྩལ་ཏོ། །བཅོམ་ལྡན་འདས་བདག་ཅག་གིས་ཀྱང་དེ་དང་འདྲ་བར་བཤད་པར་བགྱིའོ། །དུས་དུས་སུ་ཆར་གྱི་རྒྱུན་འབེབས་སོ། །སླན་ཆད་སེམས་ཅན་དག་ལ་རྣམ་པར་འཚེ་བར་མི་བགྱིད་དོ། །བཅོམ་ལྡན་འདས་བདག་ཅག་གིས་ཀླུ་མི་བགྲུངས་པ་རྣམ་པར་འཚེ་བར་བགྱིད་པ་རྣམས་ཀྱི་དོན་དུ་དམ་ཚིག་མ་འཚལ་བ་རྣམས་བཟློག་པའི་སྔགས་ཀྱི་ཚིག་བཤད་པར་འཚལ་ན། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ཀླུའི་བདག་པོ་དག་ངས་དམ་ཚིག་གི་སྔགས་བྱིན་གྱིས་བརླབ་ཀྱིས་དེ་ཤོད་ཅིག་།ན་མོ་བྷ་ག་བཱ་ཏེ་ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཏདྱ་ཐཱ། བྷུ་ཛེ་བྷུ་ཛེ། ས་མ་ཡ་བྷུ་ཛེ། ཏད་ཏྭ་བྷུ་ཛེ། པྲ་བྷ་ར་བྷུ་ཛེ། ས 107.62b མན་ཏ་ཨ་ཀ་ར་བྷུ་ཛེ། དུ་རུ་དུ་རུ་སཝཱ་ཧཱ། ས་མ་ཡ་བ་ལ་ནེ་སཝཱ་ཧཱ། ནཱ་ག་མ་ར་སབ་ཙོ་ཏ་ནི་སཝཱ་ཧཱ། བཅོམ་ལྡན་འདས་སླད་མའི་ཚེ་སླད་མའི་དུས་ན་ཀླུ་མི་བགྲུངས་པ་ཐམས་ཅད་སླར་བཟློག་པའི་སླད་དུ་བདག་ཅག་གིས་ཀླུའི་དམ་ཚིག་གི་སྔགས་འདི་བཤད་དོ། །ཧ་ཆང་ཆར་ཆེ་བའི་ཚེ་དང ། ཆར་དཀོན་པའི་ཚེ་དང ། སད་དང ། སེར་བ་དང ། སེར་བ་བབ་པའི་ཚེ་སྔགས་འདི་དྲན་པར་བྱའོ། །བརྗོད་པར་བགྱིའོ། །དེ་ནས་ཀླུ་ཐམས་ཅད་བསྐུལ་བར་བགྱིའོ། །རིག་པ་འཛིན་པ་དེས་ཤིན་ཏུ་ཁྲུས་བགྱིས་ཏེ་གཙང་མར་བགྱིས་ལ། གོས་སར་པ་བགོས་ཏེ་ཀླུའི་གནས་སུ་མཆི་བར་བགྱིའོ། །ཀླུའི་གནས་སུ་ཅི་འབྱོར་པའི་སྤོས་ཀྱི་དཀྱིལ་འཁོར་བགྱི་སྟེ། བཅོམ་ལྡན་འདས་ཤཱཀྱ་ཐུབ་པའི་སྐུ་གཟུགས་སམ། སྐུ་གདུང་དང་བཅས་པའི་མཆོད་རྟེན་དཀྱིལ་འཁོར་དེའི་སྟེང་དུ་བཞག་སྟེ་སྤོས་ཆབ་ཀྱིས་བཀྲུ་བར་བགྱི། མེ་ཏོག་དང ། བདུག་པས་མཆོད་པར་བགྱི། ཀླུ་ཀུན་ཡང་བཀྲུ་བར་བགྱིའོ། །སྐུ་བསིལ་བའི་ཆབ་དེ་ལ་ལན་བརྒྱད་ཡོངས་སུ་བཟླས་པ་བགྱིས་ཏེ། དེའི་ནང་དུ་ཡུངས་དཀར་སྩལ་ནས་མཚེའུ་དེའི་ནང་དུ་དབོ་ཞིང་ཕྱོགས་བཞི་ནས་བདུག་པས་བདུགས་ནས་དེ་ཕོ་མ་ཐག་ཏུ་སྐད་ཅིག་དེ་ལ་ཀླུའི་གནས་འགུལ་ཞིང་དུ་བ་ལྟ་བུ་བྱུང་ནས་སྤྲིན་གྱི་དཀྱིལ་འཁོར་ཆེན་པོར་གྱུར་ཏེ། ནམ་མཁའི་དཀྱིལ་དེ་ཁེབས་པར་ཆར་གྱི་རྒྱུན་འབེབས་སོ། །སེར་བ་འབབ་པའི་དུས་སུ་ཡུངས་དཀར་དང ། ཏིལ་བསྲེས་པ་ལ་ལན་ཉི་ཤུ་རྩ་གཅིག་བཟླས་པ་བགྱིས་ཏེ་ཕྱོགས་བཞིར་བཅིང་བར་བྱའོ། །ཀླུའི་ཕྱོགས་སུ་གཏོར་བར་བགྱིའོ། །སེར་བ་མི་འབབ་པ་དང ། ཀླུ་ཐམས་ཅད་ཀྱང་གཅོད་པར་འགྱུར་རོ། །སད་དང་སེར་བ་དང ། དུས་མ་ཡིན་པའི་རླུང་རབ་ཏུ་ཞི་བར་འགྱུར་རོ། །ཀླུའི་མཚོ་འགྲམ་འམ་ཁྲོན་པ་འམ། ལྟེང་ཀ་འམ། རྫིང་བུའི་འགྲམ་འམ། རིའི་རྩེ་མོར་ཤིང་ཨརྒ་དང ། ཞུན་མར་དང ། ཡུངས་མར་དང ། ཤིང་ཀ་ར་བི་རའི་མེ་ཏོག་གིས་སྟོང་རྩ་བརྒྱད་སྦྱིན་བསྲེག་བྱས་ན་ཐམས་ཅད་འགྲུབ་པར་འགྱུར་རོ། །སྦྱིན་བསྲེག་བྱས་མ་ཐག་ཏུ་ཆར་གྱི་རྒྱུན་ཆེན་པོ་འབབ་པར་འགྱུར་རོ། །ཧ་ཅང་ཡང་ཆར་ཆེ་བའི་དུས་ན། འབྲས་ཡོས་དང ། ཡུངས 107.63a དཀར་ལ་ལན་བརྒྱ་རྩ་བརྒྱད་བཟླས་པ་བྱས་ཏེ་ནམ་མཁའ་ལ་གཏོར་ན་ཆར་ཆེན་པོ་ཟློག་པར་འགྱུར་རོ། །བཅོམ་ལྡན་འདས་གལ་ཏེ་བདག་ཅག་གིས་དགུང་གསུམ་གྱིས་ཆར་གྱི་རྒྱུན་མ་ཕབ་ན། བཅོམ་ལྡན་འདས་དེའི་ཚེ་ཤ་བཀྲ་འབྱུང་བར་འགྱུར་ལགས་སོ། །ལོང་བ་དང་ལུས་དྲི་མི་ཞིམ་པར་འགྱུར་ལགས་སོ། །སངས་རྒྱས་དང ། ཆོས་དང ། དགེ་འདུན་སླུ་བར་བགྱིད་པ་ལགས་སོ། །འཇིག་རྟེན་གསུམ་སླུ་བར་བགྱིད་པ་ལགས་སོ། །བདག་ཅག་ཀླུའི་སྐྱེ་གནས་འཕོ་བར་གྱུར་ཅིག་།བཅོམ་ལྡན་འདས་གཞན་ཐམས་ཅད་ལ་ཡང་སྦྱོར་བར་བགྱིད་ན་ཐམས་ཅད་རུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་དེ་དག་དབུགས་ཕྱུང ། དམ་ཚིག་ལ་བཀོད་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་ལ་ཡོངས་སུ་གཏད་དེ། རྗེས་སུ་གཏད་ནས་ས་ཕྱོགས་དེ་ནས་གཤེགས་སོ། །རྣམ་ཐོས་ཀྱི་བུ་ནི་གཞི་ལ་བཞུགས་སོ། །ཀླུའི་དམ་ཚིག་ཅེས་བྱ་བ་ཆར་འབེབས་པའི་སྐབས་རྫོགས་སྷོ།། །།དེ་ནས་བཅོམ་ལྡན་འདས་ཚངས་པའི་ཁང་པ་བརྩེགས་པར་བཞུགས་པ་དང ། ལྷའི་ཚོགས་དུ་མ་ལྷགས། བྱང་ཆུབ་སེམས་དཔའི་འཁོར་ཆེན་པོ་ཡང་ལྷགས། ལྷ་རྣམས་ཀྱི་དབང་པོ་བརྒྱ་བྱིན་དང ། ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོ་དང ། ཀླུའི་དབང་པོ་མཐུ་ཆེ་བ་ཐམས་ཅད་ཀྱང་ལྷགས། ནམ་མཁའ་ལྡིང་གི་དབང་པོ་དང ། རྒྱལ་པོ་ཆེན་པོ་གསེར་མིག་གི་འདབ་མ་ཅན། རྡོ་རྗེའི་མཆུ་ཅན། བདག་ཉིད་ཆེན་པོ་ལུས་འབར་ཞིང་ཁྲོ་བ། འཇིགས་སུ་རུང་བའི་རྩལ་ཅན། རིན་པོ་ཆེ་ཐ་དད་པ་སྣ་ཚོགས་དང ། མུ་ཏིག་དང ། གསེར་གྱིས་སྤྲས་པའི་ཅོད་པན་མགོ་ལ་ཐོགས་པ་གསེར་གྱིས་ཀླུབས་པ། དྲག་པོའི་གཟུགས་ཅན། འགྱིང་བར་ལྟ་བ། ཀླུའི་དབང་པོ་གདན་དུ་གཏིང་བ། གཡོག་འཁོར་མང་པོ་ཐམས་ཅད་དང་ལྷགས་སོ། །གནོད་སྦྱིན་གྱི་དབང་པོ་ལག་ན་རྡོ་རྗེ་གནོད་སྦྱིན་བྱེ་བ་དང ། རྡོ་རྗེ་འཛིན་གཡོག་འཁོར་རིག་འཛིན་སྟོང་ལྷགས་ཏེ། བཅོམ་ལྡན་འདས་ནི་ནོར་བུ་རིན་པོ་ཆེ་སྣ་ཚོགས་ཀྱིས་སྤྲས་པ། མུ་ཏིག་དམར་པོ་ཐ་དད་པ་མང་པོས་བརྒྱན་པའི་སེང་གེའི་ཁྲི་ལ་བཞུགས་པ། ཁང་པ་བརྩེགས་པ་ན་ཞམ་རིང་ཆེན་པོ་དང ། དེ 107.63b བཞིན་གཤེགས་པའི་བྱིན་གྱི་བརླབས་ཆེན་པོས་བྱིན་གྱིས་བརླབས་པ་དང་ལྡན་པས་བཞུགས་ཏེ། བཅོམ་ལྡན་འདས་ནི་འོད་ཟེར་སྣ་ཚོགས་བྱེ་བ་ཁྲག་ཁྲིག་བརྒྱ་སྟོང་གིས་སྐུ་ནི་ཤིན་དུ་བརྒྱན། གསེར་གྱི་མཆོད་སྡོང་ལྟར་ནི་འབར། ཉི་མ་ལྟར་ནི་སྣང ། མཚན་སུམ་བཅུ་རྩ་གཉིས་དང་དཔེ་བྱད་བཟང་པོ་བརྒྱད་བཅུ་མངའ་བ། འོད་འདོམ་གང་བས་ནི་སྐུ་ལེགས་པར་བརྒྱན། དེ་བཞིན་གཤེགས་པའི་སྐུ་ནི་ཤིན་དུ་རྣམ་པར་དག་ཅིང་ཤིན་དུ་དྲི་མ་དང་སྐྱོན་མེད་པའི་འོད་ནི་གསལ། དེ་ནས་བཅོམ་ལྡན་འདས་ཀྱིས་འཁོར་ཆེན་པོ་འདུས་པར་མཁྱེན་ནས་སྐུ་ལས་འོད་ཟེར་སྣ་ཚོགས་ཕྱུང་སྟེ། འོད་ཟེར་གྱི་སྣང་བ་དེས་ཕྱོགས་བཅུ་ཀུན་ཏུ་ཁྱབ་པར་མཛད་དོ། །དེ་ནས་ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོས། དེ་བཞིན་གཤེགས་པའི་འོད་ཟེར་ལ་བལྟས་ནས་འཛམ་བུའི་གླིང་ན་ཀླུ་མི་བགྲུངས་པས་སད་དང་སེར་བ་དང ། རླུང་དང་སེར་སྤྲིན་ཕབ་སྟེ། མེ་ཏོག་དང ། འབྲས་བུ་ཐམས་ཅད་དང ། ལོ་ཏོག་ཐམས་ཅད་དང ། ཤིང་དང ། རྩཝ་དང ། ཤིང་གེལ་པ་དང་སྨན་དང་ནགས་ཚལ་དང ། སྨན་གྱི་བར་བསྲེགས་ཏེ་མ་རུང་བར་བྱས་ནས། ཡལ་ག་ཡང་འཛམ་བུའི་གླིང་ན་མེད་པར་བྱས་ཏེ་མ་རུང་པར་བྱས་ན། དེ་ན་སེམས་ཅན་དེ་དག་སྡུག་བསྔལ་ཆེན་པོས་གཟིར་ཅིང་ཉམ་ཐག་པའི་སྐད་བྱུང་བ་ཐོས་སོ། །དེ་ནས་ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀླུ་གནོད་པར་སེམས་པ་གཏུམ་པོ་རྣམས་ཀྱིས་འཛམ་བུའི་གླིང་རྣམ་པར་བཤིག་སྟེ། ཐམས་ཅད་མ་རུངས་པར་བགྱིས་ནས་སེམས་ཅན་རྣམས་སྡུག་བསྔལ་མི་བཟད་པ་ཆེན་པོ་མྱོང་ངོ ། །བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལྷའི་དབང་པོ་དག་འདི་ནི་མངོན་སུམ་དུ་གྱུར་པ་ཡིན་ཏེ། དེ་བཞིན་གཤེགས་པའི་བྱིན་བརླབས་དང ། སངས་རྒྱས་ཀྱི་ཡེ་ཤེས་ཟབ་མོ་དང ། དེ་བཞིན་གཤེགས་པའི་ཡོན་ཏན་གྱི་ཁྱད་པར་གྱི་བྱིན་གྱི་བརླབས་ལ་ལྟོས་ཤིག་།དེ་ནས་བཅོམ་ལྡན་འདས་ནམ་མཁའ་ལྡིང་བསྒྱིངས་པས་རྣམ་པར་བལྟས་པ་ཞེས་བྱ་བ་ཀུན་ནས་མེ་ལྕེ་འབར་བའི་ཕྲེང་བ་ཅན་རྣམ་པར་འཕྲུལ་པའི 107.64a ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་སྐུ་ཕྲག་པ་གཉིས་རབ་ཏུ་འབར་ཏེ། འབར་མ་ཐག་ཏུ་ཀླུ་ཐམས་ཅད་ཀྱི་ལུས་རབ་ཏུ་འབར་བར་གྱུར་ཏོ། །དེ་ནས་ཀླུའི་རྒྱལ་པོ་ཆེན་པོ་ཀུན་ནས་གདུགས་ཀྱིས་རྣམ་པར་བསྐོར་བས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིག་ལགས་སོ། །བདེ་བར་གཤེགས་པ་ཚིག་ལགས་སོ། །དེ་ནས་བཅོམ་ལྡན་འདས་ཀྱིས་ཅང་མི་གསུང་བར་གནང་ནས་སྟེང་དུ་རྣམ་པར་གཟིགས་ཏེ་ཕྱོགས་བཅུ་ཀུན་དུ་ཡང་གཟིགས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བཞེས་ཏེ་ནམ་མཁའ་ལྡིང་གི་ཤུགས་ཆེན་པོས་ཀུན་དུ་འབར་བ་ནམ་མཁའ་ལྡིང་གི་གཟི་བརྗིད་ཀྱི་སྙིང་པོའི་དཀྱིལ་འཁོར་འདི་རྗེས་སུ་དགོངས་སོ། །བཛྲ་བ་ཏི་ག་རུ་ཌ་བེ་ཀེ་ཧཱུཾ་ཧཱུཾ། ཙ་རི་སྲི་ཛ་ཧཱུཾ་ཕཊ། དེ་ནས་ཀླུ་མི་སྲུན་པ་དེ་དག་ཡུར་ཡུར་པོར་གྱུར་ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ་འདར་ཡེད་ཡེད་དོ། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པའི་ནམ་མཁའ་ལྡིང་མེ་ལྕེ་འབར་བ་ཞེས་བྱ་བའི་སྙིང་པོ་ཆེན་པོ་བཀའ་སྩལ་པ། ན་མོ་བྷ་ག་བཱ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨོཾ་བཛྲ་ཛྭ་ལ་ཛྭ་ལ། པྲ་ཛྭ་ལ། ཧ་ན་ཧ་ན། སརྦ་ནཱ་ག་ཧྲི་ད་ཡ་དྷཱ་ར་ཎཱི། ཧ་ར་ཧ་ར། སརྦ་ཀན་ནན་བ་ལ་བཱིརྱ་པྲ་ར་ཀྲ་མན། ད་ཧ་ད་ཧ། སརྦ་ནཱ་ག་ཧཱ། ཤྲཱི་ར་ནི། པ་ཙ་པ་ཙ། སརྦ་ནཱ་གརྨ་ནི། ག་རུ་ཌ་བེ་ག་བག་ཤི་ནི་པ་ཏེ། ནད་པ་ཏ་ཡ་པ་ཏ་ཡ། སརྦ་ནཱ་ག་བ་བ་ན་ནི། ཨོཾ་མ་ཏ་མ་ཏ། མ་ཧཱ་བི་རྩི་དྲ་མ་ནི་མོ་ཧུ་ལི་ད་ར་ཧ་མ་ཧཱ་རུ་ཏ་བེ་ག་ད་ར་པི་ཙི་དྲ། ཨ་བ་ར་ཎ་བི་བུ་ཧུ་ཤི་ཏ་ཀཱ་ཡ། སརྦ་ནཱ་ག་ནན། ཀ་ར་ཀ་ར། སྨྲ་ར་སྨྲ་ར། བོ་གྷ་རུ་ཌེ་ན་པར་ཐ་གན་བན་ཏྲ་ན་ཤཱཀྱ་མུ་ནེ་པྲ་ཙ་ན་མ་ནུ་པཱ་ལ་ཡ། ཏརྫ་ཡཱ། ནཱ་ག་ནན། པ་ག་ཤཱ་ཡ། དུཥྚན་པྲ་མ་ཏཱ་ཡ། བ་ཡུ་བེ་ཛ་ག་བན། སྥོ་ཏ་ཡ། མུརྟ་ནན་ཤོ་ཤཱ་ཡ། བི་དུ་ཛྭ་ལ་ན། ཧཱུཾ་ཧཱུཾ། ཕཊ་ཕཊ། པྲ་མ་ཏ་སརྦ་བ་ཏ་ཨ་ཤིན་ནེ་མེ་ཀན། ནཱ་ཤ་ཡ་ནཱ་ཤ་ཡ། སརྦ་ག་ན་བ་ལན་པ་ཧ་ར། པ་ཙ་དུན་ཏེ་ན། ཨཱ་གར་པཱ་ཡ། སུ་ཤ་ནཱ་ག་ན། གརྫ་གརྫ་མ་ཧཱ་ག་རུ་ཌ་བྷེ་ག་ན། ཧཱུཾ་ཧཱུཾ། ཕཊ་ཕཊ། སྟམ་བྷ་ཡ་ནི 107.64b ཤི་ཏ་པ་ལ་ཧ་ཀན། སམ་བཀྵ་ཡ། ཧཱུཾ་ཧཱུཾ། ཕཊ་ཕཊ་སྟམ་བྷ་ཡ། ཤི་ཏ་པ་ཡུ། མེ་གྷ་ན། སརྦ་ནཱ་ག་བྷི་ཧ་རི་ནི། ཧཱུཾ་ཧཱུཾ། ཕཊ་ཕཊ། བྷོ་ནཱ་ག་པི་ཏི་པི་ཏི། མུན་ཙ་ཧྲི་བཀྵ་བུ་ཡུན་ག་རུ་ཌ་གྲོ་ཏ་མ་ཧཱ་བེ་ག་བྷན་དྷཱ་ཡ། བུ་ཡུ་བ་ལ་ཧ་ཀན་ཏི་ཏི། ཊི་ཊི་ཊི། ཧཱུཾ་ཧཱུཾ། ཕཊ་ཕཊ། བྷ་ཤ་ཡ། པ་ཏ་ཤི་ཏ་ཨ་ཤི་ནི་ན། ན་ཤ་ཡ། ཙི་ཏི་ཙི་ཏི། ཕཊ་ཕཊ། སཝཱ་ཧཱ། ཨ་ཤ་ཡཱ། ནཱ་ག་ནན། བན་དྷཱ་ཡ། བཛྲ་བྷིན་དེ་ན་ཏ་ཐཱ་ག་ཏ་ས་མན་ཏ་ན། ས་ཏི་ན། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་སཝཱ་ཧཱ། ཏི་ཏི་ཏི་ཏི། ཧཱུཾ་ཧཱུཾ། ཕཊ་ཕཊ་སཝཱ་ཧཱ། ཛ་ལམ་བ་དུཿ སརྦ་ཨ་ཤན་ཏ་ཐཱ་ག་ཏ་ཨ་དྷིཥྛ་ནེ་ན་ཧཱུཾ་ཕཊ། ཨ་མྲྀ་ཏེ་མ་བྷ་བ་ཏུ། སརྦ་ཤི་ཏ་བ་ཡུ་ནེ་ག་ཡ་ཤ་ནི། ཧཱུཾ་ཧཱུཾ། ཕཊ་ཕཊ། མ་ཏྲི་ཀྲ་མ་སྥོ་ཏ་ཡ། ནཱ་ག་མི་ཏྲི་ཀྲ་མ་མ་ཏེ་མུར་ཏ་ནན། ཡ་ཏི་ཤི་ཏི། ཧུ་རུ་ཧུ་རུ། ཧཱུཾ་ཧཱུཾ། ཕཊ་ཕཊ་སཝཱ་ཧཱ། བར་ཏཱ་ཡ་སཝཱ་ཧཱ། ནཱ་ག་སྤོ་ཏཱ་ཡ་སཝཱ་ཧཱ། ནཱ་ག་བི་ཏེ་རཱ་ཡ་སཝཱ་ཧཱ། ཨོཾ་སཝཱ་ཧཱ། སརྦ་སཝཱ་ཧཱ། བུ་བ་སཝཱ་ཧཱ། ཏ་ཐཱ་ག་ཏ་ས་མ་ཡ་སཝཱ་ཧཱ། ཏྲཻ་ལོ་ཀྱ་པཱུ་ཙི་ཏ་ཏཱ་ཡ་སཝཱ་ཧཱ། ཨོཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཀླུའི་བདག་པོ་དག་དེ་བཞིན་གཤེགས་པའི་ནམ་མཁའ་ལྡིང་གི་འབར་བའི་སྙིང་པོ་ཞེས་བྱ་བའི་གཟུངས་ཆེན་པོ་འདི་ཀླུ་མི་སྲུན་པ་ཐམས་ཅད་བཟློག་པར་བྱེད་དོ། །སྤྲིན་དང ། ལྷགས་པ་དང ། རླུང་དང་སེར་བ་ཐམས་ཅད་འཇིག་པའོ། །ཟློག་པའོ། །ལོ་ཏོག་ཡོངས་སུ་སྐྱོང་བའོ། །མེ་ཏོག་དང ། འབྲས་བུ་དང ། ནགས་ཚལ་ཡོངས་སུ་སྐྱོང་བའོ། །བདུད་རྩིའི་འབྲས་བུ་ཡོངས་སུ་འགྲུབ་པར་བྱེད་པའོ། །དེ་བས་བསྟབས་པ་འཕེལ་བར་བྱེད་པའོ། །ཀྱེ་ཀླུའི་བདག་པོ་དག་འདི་དྲན་མ་ཐག་པ་ཙམ་གྱིས་ཀླུའི་དཀྱིལ་འཁོར་བྱེད་པ། བུ་དང་ཆུང་མར་བཅས་པ་དང ། བློན་པོར་བཅས་པ་དང ། མངག་གཞུག་པར་བཅས་པ་དང ། འཁོར་དང་བཅས་པ་ལྷགས་པའི་སྟོབས་བྱེད་པ། རླུང་གི་སྟོབས་བྱེད་པ། སྡུད་ལ་སྟོབས་བྱེད་པ་ཀུན་ཐམས་ཅད་འཐུན་པ་དེ་བཞིན་གཤེགས་པའི་བཀའ་གནང་བ་དང ། དེ་བཞིན་གཤེགས་པའི་དམ་ཚིག་གི་བྱིན་གྱི་བརླབས་ཀྱིས་ཕྱི་མའི་ཚེ་ཕྱི་མའི་དུས་ན་འཛམ་བུའི་གླིང་འདིར་ལོ་ཏོག་ཐམས་ཅད་དང ། མེ་ཏོག་དང ། འབྲས་བུ་ཐམས་ཅད་དང ། རྫས་དང ། ཤིང་དང ། སྨན་ཐམས་ཅད་ཀུན་དུ་བསྲུང་བར་གྱིས་ཤིག་།དུས་དུས 107.65a སུ་ཆར་གྱི་རྒྱུན་ཕོབ་ཤིག་།བདག་གི་སྲོག་ཇི་ལྟ་བ་དེ་བཞིན་དུ་འཛམ་བུའི་གླིང་གི་སེམས་ཅན་ཐམས་ཅད་རྟས་པར་བྱེད་པ། མེ་ཏོག་དང ། འབྲས་བུ་དང ། ལོ་ཏོག་རྣམས་ཡོངས་སུ་སྐྱོངས་ཤིག་།གལ་ཏེ་གཞན་དུ་འགྱུར་ཏེ་དེ་བཞིན་གཤེགས་པའི་བཀའ་ལུང་དགེ་བ་ལྟར་མ་བྱས་ན་དེའི་ཚེ་ཀླུ་ཐམས་ཅད་ཀྱི་ཁྱིམ་ཀུན་དུ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་འབར་བར་གྱུར་ཅིག་།ཀླུ་ལ་མུ་གེ་ཆེན་པོ་འབྱུང་བར་གྱུར་ཅིག་།སྟོབས་བྲི་ཞིང་བརྩོན་འགྲུས་མ་རུངས་པར་གྱུར་ཅིག་།ཆུ་སྐམས་པར་གྱུར་ཅིག་།ཁྱིམ་སྐམས་པར་གྱུར་ཅིག་།ལུས་རྩུབ་པར་གྱུར་ཅིག་།འདབ་བཟངས་ཀྱི་འཇིགས་པ་དང ། མེ་དང་བྱེ་མ་ཡིས་འཇིགས་པ་དང ། རྟག་ཏུ་བཀྲེས་པ་དང ། སྐོམ་པ་ཡིས་འཇིགས་པ་ཅན་དུ་གྱུར་ཅིག་།ཕར་རྒྱུག་ཚུར་རྒྱུག་ཅིང་ལུས་ཀུན་དུ་ཚིག་པ་དང ། ཉི་མའི་དུགས་ཀྱིས་ཡོངས་སུ་གདུངས་པས་ལུས་ཚིག་པར་གྱུར་ཅིག་།ནད་དང ། ན་བ་དང ། གནོད་པ་དང ། ནད་འགོ་བ་སྣ་ཚོགས་པ་འདུས་པར་གྱུར་ཅིག་།དེ་ལྟར་ཕྱི་མའི་ཚེ་ཕྱི་མའི་དུས་ན་ཀླུ་མི་སྲུན་པ། ཀླུ་གཏུམ་པ། རབ་ཏུ་གཏུམ་པ་རྣམས་གལ་ཏེ་དེ་བཞིན་གཤེགས་པའི་ནམ་མཁའ་ལྡིང་འབར་བ་ཞེས་བྱ་བའི་སྙིང་པོའི་གཟུངས་འདི་ལས་འགལ་བར་བྱེད་ན་སྡུག་བསྔལ་འདི་ལྟ་བུ་མྱོང་བར་འགྱུར་ཏེ། ཀླུའི་བདག་པོ་དག་དེའི་ཕྱིར་བདེན་པའི་ཡི་དམ་གྱིས་དེ་བཞིན་གཤེགས་པའི་དམ་ཚིག་གི་རྗེས་སུ་བསྲུང་བར་བྱའོ། །འཛམ་བུའི་གླིང་གི་སེམས་ཅན་ཐམས་ཅད་ཡོངས་སུ་བསྐྱང་བར་བྱའོ། །བསྲུང་བར་བྱའོ། །བསྒྲུབ་པར་བྱའོ། །དེ་ནས་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་ཀླུའི་རྒྱལ་པོ་ཆེན་པོ་རྒྱ་མཚོ་དང ། ཀླུའི་རྒྱལ་པོ་ཆེན་པོ་དགའ་བོ་དང ། བསྙེན་དགའ་བོ་དང ། ཀླུའི་རྒྱལ་པོ་ཆེན་པོ་གཟི་ཅན་དང ། ཀླུའི་རྒྱལ་པོ་ཆེན་པོ་ཧུ་ལུ་པ་དང ། ཀླུའི་རྒྱལ་པོ་ཆེན་པོ་ཆུ་ལྷ་དང ། ཀླུའི་རྒྱལ་པོ་ཆེན་པོ་འབར་བ་ཀུན་དུ་འཛིན་པ་ཁ་བྱེ་རབ་ཏུ་དགའ་བའི་གཙུག་ཞེས་བྱ་བ་དང ། ཀླུའི་རྒྱལ་པོ་ཆེན་པོ་ཚངས་པའི་མགོ་དང ། ཀླུའི་རྒྱལ་པོ་ཆེན་པོ་འཇིག་རྟེན་གསུམ་དུ་གྲགས་པའི་རྒྱལ་མཚན་དང ། ཀླུའི་རྒྱལ་པོ་ཆེན་པོ་དབང་ཕྱུག་འོད་དང ། ཀླུའི་རྒྱལ་པོ་ཆེན་པོ་འོད་རྣམ་པར་གྲགས་པ་ཞེས་བྱ་བ་དང ། ཀླུའི་རྒྱལ་པོ་ཆེན་པོ་ཀུན་ནས་རྒྱལ་མཚན་གྱི་རྣམ་པ 107.65b ཞེས་བྱ་བ་དང ། ཀླུའི་རྒྱལ་པོ་ཆེན་པོ་ནོར་བུ་མགོ་དང ། ཀླུའི་རྒྱལ་པོ་ཆེན་པོ་རབ་ཏུ་གནས་པ་ཚངས་པའི་གཙུག་དང ། ཀླུའི་རྒྱལ་པོ་ཆེན་པོ་གཙུག་གི་ནོར་བུ་འབར་དང ། ཀླུའི་རྒྱལ་པོ་ཆེན་པོ་མཚོ་ཆེན་པོ་གནོན་དང ། ཀླུའི་རྒྱལ་པོ་ཆེན་པོ་ཀུན་དུ་ལྟ་བའི་མིག་དང ། ཀླུའི་རྒྱལ་པོ་ཆེན་པོ་ཁྱབ་འཇུག་འཁོར་ཡུག་དང ། ཀླུའི་རྒྱལ་པོ་ཆེན་པོ་ཀུན་ནས་རྣམ་པར་བྲལ་དང ། ཀླུའི་རྒྱལ་པོ་ཆེན་པོ་རབ་ཏུ་དགའ་བས་ཆར་འབེབས་དང ། ཀླུའི་རྒྱལ་པོ་ཆེན་པོ་རྣམ་དག་རབ་དགའ་དང ། ཀླུའི་རྒྱལ་པོ་ཆེན་པོ་རབ་ཏུ་གཏོར་བ་དང ། ཀླུའི་རྒྱལ་པོ་ཆེན་པོ་གློག་འབར་དང ། ཀླུའི་རྒྱལ་པོ་ཆེན་པོ་ས་སྲུང་གི་བུ་དང ། ཀླུའི་རྒྱལ་པོ་ཆེན་པོ་ཆུ་འབེབས་སྣ་ཚོགས་དང ། ཀླུའི་རྒྱལ་པོ་ཆེན་པོ་བཏང་བཟུང་སྟོབས་དང ། ཀླུའི་རྒྱལ་པོ་ཆེན་པོ་འཇིག་རྟེན་གསུམ་དུ་རབ་ཏུ་ཆར་འབེབས་དང ། ཀླུའི་རྒྱལ་པོ་ཆེན་པོ་རྣམ་ཐོས་བུ་སྣ་ཚོགས་དང ། དེ་ལ་སོགས་པ་ཀླུའི་རྒྱལ་པོ་ཆེན་པོ་བརྒྱད་ཁྲི་བཞི་སྟོང་ཀླུའི་རྒྱལ་པོ་ཆེན་པོ་རེ་རེ་ཡང་གཡོག་འཁོར་ཀླུའི་རིགས་སྟོང་ཕྲག་བདུན་བཅུ་རྩ་བདུན་ཡོད་པ་དེ་དག་བཅོམ་ལྡན་འདས་ག་ལ་བ་དེར་སོང་ནས། བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ། མཆོད་པ་ཆེན་པོས་མཆོད་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྔགས་ཀྱི་ཚིག་ཤིན་དུ་མི་བཟད་པ་དྲག་པོ་ཆེན་པོ་ལྟ་དཀའ་བ་ཆེན་པོ་དག་བཀའ་སྩལ་པས། བཅོམ་ལྡན་འདས་བདག་ཅག་ནི་ཕུང་ངོ ། །ཚིག་གོ་།ལུས་རབ་ཏུ་འདར་རོ། །སྤུ་ཟིང་ཞེས་བགྱིད་དོ། །བཅོམ་ལྡན་འདས་བདག་ཅག་བས་པར་བཅོམ་ལྡན་འདས་ཀྱི་སྤྱན་སྔ་ན་མངོན་སུམ་དུ་གྱུར་པར་གནས་པ་ལགས་ཏེ། འདི་ལྟར་འཇིགས་སྐྲག་བ་སྤུའི་བུ་ག་ནས་སྐྱི་བུང་ཞེས་བགྱིད་ཅིང ། འཇིགས་པ་མི་བཟད་པ་ཆེན་པོ་སྐྱེས་ཏེ། བས་པར་ཡང་སྒྱིད་ལུག་ཅིང་མཆིས་སོ། །བཅོམ་ལྡན་འདས་སླད་མའི་ཚེ་སླད་མའི་དུས་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་སླད་ན་དགེ་སློང་དྲག་ཤུལ་བགྱིད་པ་ནོར་ལ་བརྐམ་པ་དག་མཆིས་པ་ལ། སད་དང ། རླུང་དང ། སེར་བ་ཟློག་པའི་སླད་དུ་གསོལ་བ་བཏབ་པར་གྱུར་ནས། བཅོམ་ལྡན་འདས་དེ་ལ་ཀླུ་མི་བགྲུངས་པ་དེ་དག་གིས་ཇི་ལྟར་ནན་ཏན་དུ་བགྱི། 107.66a དེ་དག་གི་སྲོག་སླར་ཞིང་ཇི་ལྟར་འགྱུར། བཅོམ་ལྡན་འདས་བདག་ཅག་གི་བུ་དང་ཚ་བོ་ཇི་ལྟ་བུ་མང་བར་འགྱུར། དེ་ནས་བཅོམ་ལྡན་འདས་ཀྱིས་ཀླུའི་བདག་པོ་ཆེན་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་དག་ཕྱི་མའི་ཚེ་ཕྱི་མའི་དུས་ན་བྱམས་པ་ལ་གནས་པར་བྱའོ། །དེ་བཞིན་གཤེགས་པའི་དམ་ཚིག་དང་འཐུན་པར་བྱའོ། །དུས་དུས་སུ་ཆར་གྱི་རྒྱུན་ཕོབ་ཅིག་།དུས་དུས་སུ་མེ་ཏོག་དང ། འབྲས་བུ་དང ། ལོ་ཏོག་བསྒྲུབས་ཤིག་།རླུང་དང ། སྤྲིན་དང ། སེར་བ་ཐམས་ཅད་བློག་ཤིག་།ཆུད་ཟ་བར་མ་བྱེད་ཅིག་།ཀླུའི་བདག་པོ་དག་དེའི་ཕྱིར་ཁྱེད་ཕྱི་མའི་ཚེ་ཕྱི་མའི་དུས་ན་གནོད་པ་མེད་པར་གནས་པར་གྱིས་ཤིག་།ཀླུའི་བདག་པོ་དག་གལ་ཏེ་ཡང་དག་པར་དམ་ཚིག་མ་བསྲུངས་ན་དེའི་ཕྱིར་ཀླུའི་བདག་པོ་དག་ཁྱེད་ལ་ཉེས་པ་ཆེན་པོར་འགྱུར་རོ་ཞེས་སྨྲའོ། །ཐོག་མར་ཀླུ་བསྐུལ་བའི་རིག་པ་རྫོགས་སྷོ།། །།དེ་ནས་དེའི་འོག་ཏུ་རྩ་བའི་རིག་པའི་ཆོ་ག་ཀླུ་རྣམས་ཀྱི་ཁྲོས་པ་ཞི་བར་བྱེད་པ་ནམ་མཁའ་ལྡིང་འབར་བའི་གཟི་བརྗིད་ཀྱི་སྙིང་པོའི་དཀྱིལ་འཁོར་འདི་བརྗོད་པར་བྱའོ། །ཐོག་མ་ཁོ་ནར་གནམ་དུ་བལྟས་ཏེ། ཡུངས་དཀར་དང་ཆུ་བསྲེས་པ་ཕྱོགས་བཞིར་གཏོར་ན། སད་དང ། རླུང་དང ། སྤྲིན་དང ། སེར་བ་ཐམས་ཅད་ཐུབ་པར་འགྱུར་རོ། །བཅིངས་པར་འགྱུར་རོ། །ཀླུ་ཐམས་ཅད་འདར་ཡེད་ཡེད་ཅིང་འཁོད་པར་འགྱུར་རོ། །ཐལ་བ་དང་ཆུར་བསྲེས་ལ་ལན་ཉི་ཤུ་རྩ་གཅིག་བཟླས་པ་བྱས་ཏེ། དབང་བསྐུར་ན་བདག་བསྲུང་བ་བྱས་པར་འགྱུར་རོ། །འབྲུག་ཟེར་བའི་ཚེ་ཡུངས་དཀར་ལ་ལན་ཉི་ཤུ་རྩ་བདུན་ཡོངས་སུ་བཟླས་པ་བྱས་ལ། ཆུ་ལ་ལན་བདུན་དུ་ཡོངས་སུ་བཟླས་པ་བྱས་ཏེ། གནམ་ལ་སྤྲིན་བཅིང་བར་བྱའོ། །དེ་ནས་སྤྲིན་ལ་བལྟས་ཏེ། ཡུངས་དཀར་གནམ་དུ་གཏོར་ན་མེ་ཏོག་དང ། འབྲས་བུ་ཐམས་ཅད་བསྡུས་ནས་སའི་སྟེང་དུ་ལྟུང་ངོ ། །སྔགས་ཀྱང་བརྗོད་ཅིང་ཁྲོས་པས་ཕཊ་ཅེས་བྱ་བ་བརྗོད་པར་བྱ་སྟེ། ཕཊ་ཅེས་བྱ་བ་ལ་ལན་གསུམ་གྱིས་ཀླུ་ཕྲུ་གུ་རྣམས་ཀྱང་ལྷུང་བར་འགྱུར། ཀླུ་རྣམས་ཀྱི་ལུས་ཀྱང་ཞིག་ཏེ་ཐང་ལ་ལྷུང་བར་འགྱུར་རོ།། ་།།བལ་པོ་སེའུའི་ལྕུག་མ་ལ་ལན་ཉི་ཤུ་རྩ་གཅིག་ཡོངས་སུ་བཟླས 107.66b པ་བྱས་ཏེ། འཁོར་ལོའི་ཚུལ་དུ་ལན་བདུན་བསྐོར་ན་ཀླུ་མི་བགྲུངས་པ་ཐམས་ཅད་སད་དང ། སྤྲིན་དང ། རླུང་དང ། སེར་བ་ཐམས་ཅད་ས་ལ་མི་འབེབས་སོ། །མགོ་ཚལ་པ་བདུན་དུ་འགས་སོ། །མིག་འབྱུང་ངོ ། །ཁྲོས་པས་བརྒྱ་རྩ་བརྒྱད་ཡོངས་སུ་བཟླས་པ་བྱས་ན། ཀླུ་རྣམས་རིགས་དང ། སྤྲིན་དང ། གཡོག་འཁོར་ཀུན་དང་བཅས་ཏེ་སའི་སྟེང་དུ་ལྟུང་ངོ ། །ཀླུའི་ཁྱིམ་དང ། གཞལ་ཡས་ཁང་དང ། མཐའ་དག་དང ། ཆུ་དང ། ཤིང་དང ། ནགས་ཚལ་དུ་བཅས་པ་མེ་ལྕེ་འབར་བ་གཅིག་ཏུ་འགྱུར་རོ། །ཀླུའི་རྒྱལ་པོ་ཆེན་པོ་གཟི་བརྗིད་ཆེ་བ་མཐུ་ཆེ་བ་ཐམས་ཅད་ཀྱང་ཀླད་ནད་དྲག་པོས་བཏབ་པར་འགྱུར་རོ། །གལ་ཏེ་རིག་པ་འཛིན་པས་མྱུར་དུ་མ་བསྐྱབས་ན་རིགས་ཐམས་ཅད་ཕུང་བར་འགྱུར་རོ། །བུ་དང ། ཚ་བོ་དང ། འཁོར་དུ་བཅས་པ་དང ། བཞོན་པར་བཅས་ཏེ་རྣམ་པར་མེད་པར་འགྱུར། མིག་མེད་པར་འགྱུར་རོ། །ཆར་མེད་པའི་དུས་ན་ཡུངས་དཀར་ལ་ལན་སྟོང་བཟླས་ཏེ། ཁྱིམ་ལ་གཏོར་ན། ཀླུ་ཐམས་ཅད་འདར་ཡེད་ཡེད་ཅིང ། ཁྱིམ་དང་མཚོ་མེ་ལྕེ་འབར་བ་གཅིག་ཏུ་གྱུར་ཏེ། འདོད་པ་བཞིན་དུ་མྱུར་དུ་ཆར་གྱི་རྒྱུན་འབེབས་སོ། །ཡང་དང་ཡང་ཆར་གྱི་རྒྱུན་འབེབས་སོ། །གང་གི་ཚེ་ཆར་དགོས་པ་དེའི་ཚེ་རིག་པ་འཛིན་པས་ཆུ་དང་ཡུངས་དཀར་ལ་ལན་བརྒྱ་རྩ་བརྒྱད་ཡོངས་སུ་བཟླས་པ་བྱས་ཏེ། གནས་མཐོན་པོར་སོང་ལ་ཤར་ཕྱོགས་སུ་བལྟས་ཏེ་འདུག་ནས་ཆུ་སྙིམ་པ་བདུན་ལ་སྔགས་ལན་བདུན་བདུན་དུ་ཡོངས་སུ་བཟླས་སྟེ། ཤར་ཕྱོགས་སུ་གཏོར་ན་ཀླུའི་རྒྱལ་པོ་ཐམས་ཅད་འཕྲལ་དུ་གཅིག་ཏུ་འདུས་ཏེ་ཆར་གྱི་རྒྱུན་འབེབས་སོ། །སྐྱ་རེང་ཤར་བའི་དུས་ན་ཡུངས་དཀར་དང ། གུར་གུམ་དང་ཆུར་བསྲེས་ལ་ལན་བདུན་བཟླས་པ་བྱས་ཏེ་ཕྱོགས་བཞིར་གཏོར་ཞིང་སྟེང་དང་འོག་ཏུ་ཡང་གཏོར་ན་སད་དང ། རླུང་དང ། སྤྲིན་དང ། སེར་བ་ཐམས་ཅད་ལ་ཀུན་ནས་དཔག་ཚད་ཚུན་ཆད་དུ་མཚམས་བཅད་པར་འགྱུར་རོ། །ཀླུ་མི་སྲུན་པ་ཐམས་ཅད་བཅིངས་པར་འགྱུར་རོ། །ཀླུ་ཐམས་ཅད་མི་འདའ་བར་འགྱུར་རོ། །བསེར་སྐྱའི་ལྕི་བ་ས་ལ་མ་ལྷུང་བར་བླངས་པ་དང ། དེ་ཉིད་ཀྱི་མར་དང ། འོ་མ་དང ། གཅིན་བླངས་ལ་སབ་ཏ་བྱི་ས་ཀ་དང ། བག་ཕྱེ་དང ། ཐམས་ཅད་བསྲེས་ལ་ལན་དགུ་བཅུ་རྩ་གཉིས་བཟླས་པ་བྱས་ཏེ། དེ་ནས་ཀླུ་མགོ་ལྔ་པ་བྱའོ། །མགོ་གདེངས་ཀ་ཅན་གྱི་དཀྱིལ་མོ་དཀྲུང་བྱས་པ་ལུས་བཅུས་པ་བྱས་ཏེ། ཙན་དན 107.67a དཀར་པོ་དང ། གུར་གུམ་གྱིས་ལུས་བཀྲུ་བར་བྱའོ། །བསྟན་གཙང་མའི་སྟེང་དུ་གཞག་གོ་།དར་གྱི་ཅོད་པན་གྱིས་དབང་བསྐུར་རོ། །མེ་ཏོག་ཕྲེང་བ་གདགས་སོ། །དཀྱིལ་འཁོར་གྲུ་བཞི་པ་བྱས་ཏེ། མེ་ཏོག་སིལ་མ་གཏོར། བུམ་པ་གང་བ་བཞི་གཞག་གོ་།མདའ་བཞི་བཙུགས་ཏེ། དར་གྱི་བ་དན་དཀར་པོ་བཞི་གདགས་སོ། །དཀྱིལ་འཁོར་གྱི་དབུས་སུ་གཏོར་མ་གཞག་གོ་།དཀྱིལ་འཁོར་གྱི་གྲཝ་བཞིར་སེང་ལྡེང་གི་ཕུར་བུ་བཞི་གཟུགས་སོ། །ཚོན་སྣ་ལྔའི་སྐུད་པས་ལན་ལྔ་བསྐོར་རོ། །ཀུན་ལ་ཡང་ལན་ཉི་ཤུ་རྩ་གཅིག་བཟླས་ཏེ་ལས་བྱའོ། །བུམ་པའི་མགུལ་དར་གྱིས་བཅིང་ངོ ། །ན་ལ་དང ། སྲ་རྩི་པོག་དང ། རྒྱ་སྤོས་དང ། ཀུན་དུར་དང ། སེན་མོ་དང ། ནཱ་ག་སྤུས་པ་དང ། ཡུངས་དཀར་དཀར་པོ་དང ། ཤ་ཀ་ར་དང་བསྲེས་ལ་ལན་བརྒྱ་རྩ་བརྒྱད་བཟླས་ལ་བདུག་པར་བྱའོ། །བདུག་པ་འདི་སྦྱར་ལ། དེ་ནས་རིག་པ་འཛིན་པས་ཤིན་ཏུ་ཁྲུས་བྱས་ཏེ། གོས་གཙང་མ་གྱོན་ལ་སྔགས་འདི་ཉིད་ཀྱིས་ཉེ་རེག་དང ། བྲག་བཅིང་བ་དང ། མཚམས་བཅིང་བ་དང ། ཕྱོགས་བཅིང་བ་དང ། དཀྱིལ་འཁོར་བཅིང་བ་དང ། གོས་གདེག་པ་དང ། བདག་བསྲུང་བ་དང ། ཁྲུས་བྱ་བ་རྣམས་བྱའོ། །ཀླུ་ཁ་ཤར་ཕྱོགས་སུ་བསྟན་ཏེ་བཞག་ལ། རིག་པ་འཛིན་པ་ཀླུ་ལ་བལྟས་ཏེ་དཀྱིལ་མོ་དཀྲུང་དུ་འདུག་ལ། སྔགས་འདི་ཉིད་ཀྱིས་དགུག་པ་དང ། གཏོར་མ་དང ། བདུག་པས་སླར་གཏང་བར་བྱའོ། །དེ་ནས་རིག་པ་འཛིན་པས་སྟོང་རྩ་བརྒྱད་བཟླས་ཏེ། ཡུངས་དཀར་རེ་རེ་ལ་བཟླས་ལ་ཀླུའི་གཟུགས་ལ་བསྣུན་པར་བྱའོ། །མར་མེ་ཁ་བཞི་བུད་དོ། །ཀླུའི་མིང་དྲིའོ། །གང་བོས་པ་དེ་འགྲེང་བར་འགྱུར་རོ། །བཟླས་པ་སྟོང་རྩ་བརྒྱད་ཚང་བར་བྱས་ན་ཀླུའི་རྒྱལ་པོ་ཆེན་པོ་ཐམས་ཅད་དབང་དུ་འགྱུར་རོ། །ཐམས་ཅད་སྟོན་པར་འགྱུར་རོ། །ཅི་བསམས་པ་དེ་ཐམས་ཅད་སྦྱིན་པར་འགྱུར་རོ། །དབང་ཐམས་ཅད་བཟློག་པར་འགྱུར་རོ། །རང་གི་སྐྱེ་བོ་དང ། འཁོར་དུ་བཅས་པ་དང ། བུ་དང་ཚ་བོར་བཅས་པ་ཐམས་ཅད་དབང་དུ་འགྱུར་རོ། །ལས་ཐམས་ཅད་བྱེད་པར་འགྱུར་རོ། །རང་གི་ཁྱིམ་བཞིན་དུ་ཡོངས་སུ་སྐྱོང་བར་འགྱུར་རོ། །ཀླུའི་གཟུགས་དེ་གནས་དབེན་པར་བཞག་ལ་མེ་ཏོག་དང་བདུག་པ་སྦྱིན་ནོ། །ལང་ལོང་མེད་པར་བཞག་ཅིང་མི་མཐོང་བར་བྱ་སྟེ། སུ་ལ་ཡང་མི་བསྟན་ནོ། །གོས་གཙང 107.67b མས་དགབ་བོ། །ནམ་དགོས་པ་ཡོད་པ་དེའི་ཚེ་ཡུངས་དཀར་ལ་ལན་བརྒྱ་རྩ་བརྒྱད་བཟླས་པ་བྱས་ཏེ་བསྣུན་ན་དགོས་པ་ཐམས་ཅད་བྱེད་པར་འགྱུར་རོ། །གར་བཏང་བ་དེར་འགྲོ་ཞིང་སླར་ཡང་འོང་ངོ ། །རྨྱི་ལམ་དུ་དགོས་པ་ཐམས་ཅད་སྟོན་ཅིང་ལས་ཐམས་ཅད་བྱེད་པར་འགྱུར་རོ། །ཀླུའི་མངག་གཞུག་པ་ཞེས་བྱའོ། །གང་གི་ཚེ་དུས་མ་ཡིན་པའི་སྤྲིན་དང ། རླུང་དང་སེར་བ་དང་སད་བྱུང་བ་དེའི་ཚེ་སྐྱེ་ཚེའི་འབྲུ་དང་ཡུངས་དཀར་དུ་བསྲེས་ལ་ལན་བརྒྱ་རྩ་གཅིག་བཟླས་པ་བྱས་ཏེ་ཁྲོས་པས་ཀླུའི་གཟུགས་ལ་བསྣུན་ན་སྐད་ཅིག་དེ་ལ་རླུང་དང་སེར་བ་དང ། སྤྲིན་མེད་པར་འགྱུར་ཏེ་ཐམས་ཅད་བཅིང་བར་འགྱུར་རོ། །ཐན་པ་བྱུང་བ་དེའི་ཚེ་ཡི་གེར་བྲིས་ལ་སྐུད་པ་དམར་པོས་དཀྲིས་ལ་སྐུད་པ་ལ་མདུད་པ་ཉི་ཤུ་རྩ་གཅིག་བོར་ཏེ། ཀླུའི་མགུལ་དུ་བཏགས་ལ་ཀླུའི་སྤྱི་བོར་ལན་ཉི་ཤུ་རྩ་གཅིག་བཟླས་པ་བྱས་ན་སྐད་ཅིག་དེ་ལ་ཆར་གྱི་རྒྱུན་འབེབས་ཏེ་བསྒྲུབ་པ་པོ་ཇི་ལྟར་འདོད་པ་བཞིན་ཆར་འབེབས་སོ། །ཧ་ཅང་ཆར་ཆེ་ན་སྐུད་པ་སྔོན་པོ་ལ་ལན་བདུན་བཟླས་པ་བྱས་ཏེ་མདུད་པ་བདུན་བོར་ན་ཆར་ཆེན་པོ་འཆད་པར་འགྱུར་རོ། །ཆོ་ག་དང་རིག་པ་སྒྲུབ་པ་གཞན་ཐམས་ཅད་ལ་ཡང་སྔགས་འདི་ཐོག་མ་ཁོ་ནར་ལན་བདུན་བརྗོད་དོ། །འདི་ཀུན་དུ་སྦྱོར་བ་སྟེ་བརྗོད་པ་བསྒྲུབ་པ་འགྲུབ་བོ། །ནམ་མཁའ་ལྡིང་ཆེན་པོ་རྡོ་རྗེ་ཤུགས་འབར་བ་ནམ་མཁའ་ལྡིང་གི་སྙིང་པོ་དཀྱིལ་འཁོར་ཞེས་བྱ་བའི་གཟུངས་རྫོགས་སྷོ།། །།དེ་ནས་དེའི་འོག་ཏུ་རྩ་བའི་སྙིང་པོའི་ཆོ་ག་བསྟན་ཏོ། །གཟུངས་གཏོན་མ་ཐག་པ་ཙམ་གྱིས་ཀླུ་ཐམས་ཅད་འདར་ཡེད་ཡེད་དོ། །བལ་པོ་སེའུ་ཤིང་གི་ལྕུག་མ་དང ། ཤིང་ཀ་ར་བི་རའི་ལྕུག་མས་རླུང་དང་སྤྲིན་བཟློག་པར་བྱའོ། །བའི་ལྕི་བ་ས་ལ་མ་ལྷུང་བས་ཁང་སྟེང་དུ་དཀྱིལ་འཁོར་གྲཝ་བཞི་པ་ཤིན་དུ་རྣམ་པར་ཕྱེ་བ་རིའུ་ཆ་ལེགས་པར་བྱས་པ་བྱ་སྟེ། སེང་ལྡེང་གི་ཕུར་བུ་སོར་བརྒྱད་པ་བརྒྱད་ཕྱོགས་མཚམས་སུ་གཟུགས་སོ། །མདའ་ལྔ་གཟུགས་སོ། །རྩེ་གསུམ་པ་གཟུགས་སོ། །མདའ་བཞི་ལ་ཚོན་སྣ་ལྔའི་སྐུད་པ་བཞི་འཁོར་བར་བསྐོར་རོ། །བུམ་པ་གང་བ་བཞི་དང ། པོག་ཕོར་དང ། གཏོར་མའི་བུམ་པ་བཞི་བཞག་གོ་།གཏོར་མ་དཀར་པོས་བཀང་བ་བཞི་དཀྱིལ་འཁོར་གྱི་དབུས་སུ་གཞག་།མེ་ཏོག 107.68a སིལ་མས་གང་བར་གཏོར། འབྲས་ཡོས་དང་ཡུངས་དཀར་གྱིས་གཏོར་རོ། །ཐམས་ཅད་ལ་ལན་བདུན་བདུན་གྱིས་བཟླས་པ་བྱས་ཏེ་གཟུགས་སོ། །ཡུངས་དཀར་དང་ཆུ་བསྲེས་ལ་བཟླས་པ་བྱས་པས་ཕྱོགས་བཞིར་མཚམས་གཅད་དོ། །དེ་ནས་དཔག་ཚད་ཚུན་ཆད་ཀུན་དུ་མཚམས་ཆེན་པོ་བཅད་པར་འགྱུར་རོ། །དེ་ཀླུ་མི་བསྲུན་པ་རྣམས་འཕྲོག་མི་ནུས་སོ། །ཀླུ་ཆེན་པོ་རྣམས་ཀྱང་རྟག་ཏུ་དུས་མ་ཡིན་པའི་རླུང་དང ། སྤྲིན་དང་སེར་བ་འབེབས་མི་ནུས་སོ། །མེ་ཏོག་དང་འབྲས་བུ་ཐམས་ཅད་འཚེ་ཡང་མི་ནུས། ལན་འགའ་ཡང་རྩཝའི་ལོ་མ་ཡང་འཚེ་མི་ནུས། བཅིང་བ་ལྔས་བསྡམས་ཏེ་ཐམས་ཅད་བཅིངས་པར་འགྱུར་རོ། །འདི་ཟླ་བ་བརྒྱད་དུ་མཚམས་བཅིངས་པར་འགྱུར། གནོད་སྦྱིན་དང ། འབྱུང་པོ་དང ། སྲིན་པོ་དང ། ཡི་དགས་དང ། གྲུལ་བུམ་དང ། གསང་བ་འོད་ཟེར་གྱི་སྣང་བ་དེ་རྣམས་གནས་འདི་ལས་མི་འདའོ། །དེ་ནས་རིག་པ་འཛིན་པ་དཀྱིལ་འཁོར་གྱི་དབུས་སུ་འདུག་སྟེ། བལ་པོ་སེའུ་ཡི་ཤིང་གི་ལྕུག་མ་ལ་ལན་བདུན་བཟླས་པས་ཀླུ་བཟློག་པར་བྱའོ། །ཤིན་དུ་ཁྲོ་བས་བཟློག་པར་བྱ་བ་ནི་མ་ཡིན་ནོ། །ཀླུའི་དཀྱིལ་མོ་དཀྲུང་གི་ཕྱག་རྒྱ་བཅིང་བར་བྱ་སྟེ། འཛུབ་མོ་གཉིས་མགོ་བོ་གདེངས་ཀ་ལྟར་བྱས་ལ་མཐེའུ་ཆུང་གཉིས་བརྐྱང་ངོ ། །འདི་ནི་ཀླུ་ཐམས་ཅད་ཀྱི་ཕྱག་རྒྱའོ། །བརྗོད་མ་ཐག་ཙམ་གྱིས་ཀླུ་ཐམས་ཅད་ཀྱི་སྙིང་དག་ལ་གནོད་པར་འགྱུར་རོ། །གལ་ཏེ་ཀླུ་དག་ཕྱོགས་དེ་མ་རུང་བར་བྱ་བར་འདོད་ན་དེའི་ཚེ་བྱེ་ཚན་མགོ་ལ་དབབ་བོ། །མགོ་དང ། མཇུག་མ་དང ། ཁོག་པ་ཇི་ཙམ་བར་དེ་ཙམ་དུ་ལུས་ལ་རལ་གྲིའི་ཆར་གྱི་རྒྱུན་དབབ་པར་འགྱུར་རོ། །དེ་ནས་ཀླུ་ཐམས་ཅད་དངངས་སྐྲག་པར་གནས་པར་འགྱུར་ཏེ། དེའི་ཚེ་འཛམ་བུའི་གླིང་དུ་དུས་དུས་སུ་ཆར་གྱི་རྒྱུན་འབེབས་སོ། །ཀླུ་མི་བགྲུངས་པ་ཐམས་ཅད་དབང་དུ་འགྱུར་རོ། །ཁང་སྟེང་དུ་དཀྱིལ་འཁོར་གྲུ་བཞི་པ་བྱས་ཏེ། མེ་ཏོག་སིལ་མས་གང་བར་གཏོར་ལ་བདུག་པས་བདུགས་ཏེ། བུམ་པ་ཆུས་གང་བ་ཐམས་ཅད་ལ་ལན་བདུན་དུ་བཟླས་པར་བྱའོ། །གཏོར་མ་གཞག་གོ་།སེང་ལྡེང་གི་ཕུར་བུ་ལ་ལན་ཉི་ཤུ་རྩ་གཅིག་བཟླས་ཏེ། སེང་ལྡེང་གི་ཕུར་བུ་དཀྱིལ་འཁོར་གྱི་དབུས་སུ་བཙུགས་ན་རླུང་དང ། སྤྲིན་དང་སེར་བ་དང་སད་ཀྱི་ཉེས་པ་ཐམས་ཅད་བཅིངས་པར་འགྱུར་ཏེ། ཕུར་བུ་མ་ཕྱུང་གི་བར་དུ་ཐུབ་པར 107.68b འགྱུར་རོ། །ཡུངས་དཀར་ལ་ལན་བདུན་བཟླས་ལ་སྤྲིན་ལ་བལྟས་ཏེ་གཏོར་ན་སེར་བ་ཐམས་ཅད་འཆད་པར་འགྱུར་རོ། །ཤིང་ཀ་ར་བི་རའི་ལྕུག་མ་ལ་ལན་ཉི་ཤུ་རྩ་གཅིག་བཟླས་ཏེ་གདུ་བུར་བྱས་ན་ཐམས་ཅད་དུ་སེར་བ་ཆོད་པར་འགྱུར་རོ། །ཤིང་ཀ་ར་བི་ར་དམར་པོའི་མེ་ཏོག་ལ་ལན་ཉི་ཤུ་རྩ་གཅིག་བཟླས་ཏེ་གློག་འབྱུང་བའི་ཚེ་ན་ནམ་མཁའ་ལ་འཕངས་ན་ནམ་མཁའ་ཉིད་དུ་འདུག་སྟེ་བཅིངས་པར་འགྱུར་རོ། །ཆུ་ལ་ལན་བདུན་བཟླས་ཏེ་གཏོར་ན་གྲོལ་བར་འགྱུར་རོ། །འབྲུག་ཟེར་བའི་ཚེ་རྩེ་གསུམ་པ་ལ་ལན་ཉི་ཤུ་རྩ་གཅིག་བཟླས་ཏེ། དཀྱིལ་འཁོར་ཀྱི་དབུས་སུ་བཙུགས་ན་རྩེ་གསུམ་པ་མ་ཕྱུང་གི་བར་དུ་འབྲུག་ཟེར་ཏེ་སྤྲིན་བཅིངས་པར་འགྱུར་རོ། །ཕྱུང་ནས་གྲོལ་བར་འགྱུར་རོ། །རལ་གྲི་ལ་ལན་བདུན་བཟླས་ཏེ་ཀླུའི་ཕྱག་རྒྱ་དཀྱིལ་མོ་དཀྲུང་གིས་བཟུང་ལ་སྤྲིན་ལ་བལྟས་ཏེ་འདུག་ན་གཟུང་མ་ཐག་ཏུ་མཐའ་དག་འབར་བར་འགྱུར་ཏེ་ཀླུ་ཐམས་ཅད་ལྐུག་པར་འགྱུར་རོ། །རལ་གྲི་ཐོགས་ལ་ལན་བརྒྱ་རྩ་བརྒྱད་བཟླས་ཏེ། གུར་གུམ་གྱིས་དེའི་སྟེང་དུ་ནམ་མཁའ་ལྡིང་བྲིས་ནས་ཇི་ལྟ་ཇི་ལྟ་བུར་བསྐོར་བ་དེ་ལྟ་བུར་ནམ་མཁའ་ལྡིང་གི་འདབ་གཤོག་ཀླུའི་ལུས་ལ་འབབ་པར་འགྱུར་ཏེ། ཀླུ་ཐམས་ཅད་སྐྲག་ཅིང་ཕྱོགས་བཅུར་འབྲོས་པར་འགྱུར་ཏེ་ཕྱིས་རླུང་དང་སེར་བ་འབེབས་མི་ནུས་སོ། །ཤིང་ཀ་ར་བི་རའི་མེ་ཏོག་དང་ཡུངས་དཀར་བསྲེས་ཏེ་དཀྱིལ་འཁོར་དུ་ལན་དྲུག་བཅུ་སྦྱིན་སྲེག་བྱས་ན་ཀླུ་ཐམས་ཅད་གྲང་བའི་སྟོབས་བྱེད་པ་དང ། སེར་བ་དང་ཁ་བའི་བར་ལ་སོགས་པ་ཐུབ་པར་འགྱུར་རོ། །གང་གི་ཚེ་ཆར་དགོས་པར་འགྱུར་བ་དེའི་ཚེ་ཆར་འབེབས་སོ། །སྤྲ་ཚིལ་ལ་ཀླུའི་གཟུགས་ཚད་སོར་བཞི་པ་མགོ་ལྔ་པ་བྱས་ཏེ། གསེར་གྱིས་གཡོགས་ལ་སྟེང་གོས་དཀར་པོས་གཡོགས་ཏེ། རྩ་བའི་སྔགས་ལན་སྟོང་བཟླས་པ་བྱས་ལ། བུམ་པ་སར་པ་མ་སྤྱད་པའི་ནང་དུ་བཅུག་སྟེ་ལུས་གོས་ཀྱིས་དཀྲིའོ། །རྒྱས་གདབ་བོ། །བའི་ལྕི་བས་དཀྱིལ་འཁོར་གྲུ་བཞི་པ་བྱས་ལ་བྲ་ཡོས་དང་ཡུངས་དཀར་གྱིས་གཏོར་ལ་བདུག་པས་བདུག་སྟེ་སྔགས་འདི་བརྗོད་པར་བྱའོ། །བལ་པོ་སེའུ་ཤིང་གི་ལྕུག་མ་ལ་ལན་བདུན་བཟླས་ཏེ། བུམ་པ་ལ་དལ་བུ་དལ་བུས་གཞུས་ན་སེར་བ་ཐམས་ཅད་བུམ་པའི་ནང་དུ་འཕོའོ། །ཀླུ་ཐམས་ཅད་དབང་དུ་འགྱུར་རོ། །ཀླུའི་རྒྱལ་པོའི་གཟུགས་སྤྲ་ཚིལ་ལ་བྱས་པ 107.69a ལ་ཀླུ་ཐམས་ཅད་ཀྱི་མིང་བྲིས་ན་གང་གི་མིང་གིས་རིགས་བརྗོད་པས་ཀླུ་དེ་དབང་དུ་འགྱུར་ཏེ། འཁོར་དང་བཅས་པ་བྲམ་ཟེའི་གཟུགས་ཀྱིས་མདུན་ན་འདུག་ཅིང་ཅི་བསྒོ་བ་དེ་ཐམས་ཅད་བྱེད་དོ། །ཀླུའི་རྒྱལ་པོ་ཆོས་ཅན་མ་ཡིན་པ་ཡུལ་ཡོངས་སུ་མི་སྐྱོང་བ་ལོ་ཏོག་དང་འབྲས་བུ་ཆུད་གཟོན་པའི་ཀླུའི་ཁྱིམ་དུ་སོང་སྟེ། ཤིན་ཏུ་ཁྲུས་བྱས་ལ་གོས་དཀར་པོ་གཙང་མ་བགོས་ཏེ་རིག་པ་ལན་ཉི་ཤུ་རྩ་གཅིག་བརྗོད་ན་ཀླུའི་ཁྱིམ་དེ་ནས་བུད་མེད་རྒན་མོ་དག་འབྱུང་ཞིང ། རིག་པ་འཛིན་པ་ཅི་ཚོལ་ཞེས་ཟེར་བ་དང ། ལན་མི་གདབ་པར་རྡོ་རྗེ་ས་ལ་བརྡབ་པར་བྱའོ། །ཕཊ་ཞེས་བྱ་བ་བརྗོད་པར་བྱའོ། །ཀླུ་རྒན་མོ་དེ་ངུས་ནས་ཤིའོ་ཤིའོ་ཞེས་ཟེར་ཞིང་ཁྱིམ་དུ་འཇུག་གོ་།དེ་ནས་ཀླུ་རྣམས་འདུས་ཏེ་སྔངས་སྐྲག་སྟེ། ཁྱེའུ་ཡི་གཟུགས་སུ་བསྒྱུར་ནས་རིག་པ་འཛིན་པའི་མདུན་དུ་འདུག་སྟེ། ཀྱེ་རིག་པ་འཛིན་པ་ཅི་ཞིག་ཚོལ། རིག་པ་འཛིན་པས་སྔར་སྔགས་བརྗོད་ལ། ཁྲོས་པས་བལ་པོ་སེའུ་ཤིང་གི་ལྕུག་མ་ས་ལ་བརྡབས་པ་དང ། ཁྱེའུ་ཡི་གཟུགས་ཅན་དེ་ས་ལ་འགྲེ་ལྡོག་ཅིང ། ཀྱེ་རིག་པ་འཛིན་པ་ཅི་ཞིག་ཚོལ་ཞེས་སྨྲའོ། །རིག་པ་འཛིན་པས་སྙིང་རྗེ་མེད་པར་བྱ་སྟེ། བསྒྱེལ་བའི་ཚུལ་གྱིས་བསྒྱེལ་བ་དང ། འདི་སྐད་ཅེས་ཀྱེ་རིག་པ་འཛིན་པ་བསྒོ་བ་ཐམས་ཅད་བགྱིད་དོ་ཞེས་སྨྲའོ། །དེ་ནས་རིག་པ་འཛིན་པས་འདི་སྐད་ཅེས་བརྗོད་དོ། །དེ་བཞིན་གཤེགས་པའི་དམ་ཚིག་བསྲུངས་ཤིག་།བསྲུང་ངོ ། །རིག་པ་འཛིན་པས་ཡང་འདི་སྐད་ཅེས་བརྗོད་དོ། །དགེ་བ་བཅུ་བཟུང་ཤིག་འཛིན་ཏོ། །རིག་པ་འཛིན་པས་ཡང་གསུམ་ལ་སྐྱབས་སུ་གསོལ་གཏང་ངོ ། །རྗེས་སུ་འཛིན་ཏོ། །རིག་པ་འཛིན་པ་ཕུར་བུ་དབྱུང་དུ་གསོལ་མི་དབྱུང་ངོ ། །འདི་སྐད་ཅེས་བརྗོད་དེ། དེ་བཞིན་གཤེགས་པའི་དམ་ཚིག་བཟླས་པ་རྗེས་སུ་ཟུང་ཤིག་།གདོད་ཕུར་བུ་དབྱུང་ངོ་ཞེས་བྱའོ། །འོན་ཏང་ཀླུ་དེ་འཁོར་དང་བཅས་ཏེ་རྐང་པ་གཉིས་ལ་གཏུག་གོ། །གསུམ་ལ་སྐྱབས་སུ་འགྲོ་བར་བྱ་བ་དང ། དགེ་བ་བཅུའི་ལས་ཀྱི་ལམ་རྗེས་སུ་སྦྱིན་པར་བྱའོ། །དམ་ཚིག་རྗེས་སུ་འཛིན་དུ་གཞུག་གོ་།དེ་ནས་གདོད་ཕུར་བུ་ཕྱུང་ལ་དེ་ཉིད་དུ་ཁ་ཟས་ཀྱང་བྱིན་དང་ཀླུ་ཐམས་ཅད་དབང་དུ་འགྱུར་རོ། །རང་གི་ཁྱིམ་དུ་འཇུག་པ་བཞིན་དུ་ཞུགས་ཤིག་།ལས་སུ་བྱ་བ་རྣམས་ཅི་འདོད་པ་བཞིན་དུ་བྱ་བ་ཐམས་ཅད་བསྒོ་བ་བཞིན་བྱེད་པར་འགྱུར་རོ། །གང་དུ་བཏང་བ 107.69b དེར་འགྲོའོ། །བྱ་བ་ཐམས་ཅད་བྱེད་པར་འགྱུར་རོ། །ཀླུའི་ཁྱིམ་དེར་ཕྱིས་ཀླུ་མི་སྲུན་པ་མི་འབྱུང་ངོ ། །དུས་དུས་སུ་ཆར་གྱི་རྒྱུན་འབེབས་སོ། །དུས་དུས་སུ་ལོ་ཏོག་སྒྲུབ་བོ། །དེར་མེ་ཏོག་དང་འབྲས་བུ་དང་ལོ་མ་རྣམས་སྒྲུབ་བོ། །ཕྱིས་གནོད་པ་བྱེད་པར་མི་འགྱུར་རོ། །བཀླགས་པས་འགྲུབ་པའི་གཟུངས་ཆེན་པོ་ལས་ཐམས་ཅད་ལ་སྦྱར་བར་བྱའོ། །ལས་ཐམས་ཅད་འགྲུབ། མཆོག་འགྲུབ་པ། བླ་ན་མེད་པའོ། །རྩ་བའི་སྔགས་ཀྱི་བྱ་བའི་ཆོ་ག་དང་བཅས་པ། རྫོགས་སྷོ།། །།དེ་ནས་ནམ་མཁའ་ལྡིང་གི་རྒྱལ་པོ་དེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀླུ་ཐམས་ཅད་ཀྱི་སྙིང་འབར་བར་བགྱིད་པ། དུས་མ་ལགས་པའི་རླུང་དང ། སྤྲིན་དང ། སེར་བ་ཐམས་ཅད་བཟློག་པ། མེ་ཏོག་དང ། འབྲས་བུ་དང ། ལོ་ཏོག་ཐམས་ཅད་སྒྲུབ་པ། སའི་རྡུལ་དང ། སྙིང་པོ་དང ། བྱིན་འཕེལ་བར་བགྱིད་པ། རྡོ་རྗེའི་མཆུ་གློག་འབར་བ་ཞེས་བྱ་བའི་གཟུངས་བརྗོད་པར་བགྱི་ན། སེམས་ཅན་ཐམས་ཅད་ཀྱི་རེ་བ་ཐམས་ཅད་ཡོངས་སུ་བཀང་བའི་སླད་དུ། བཅོམ་ལྡན་འདས་དེ་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་ནམ་མཁའ་ལྡིང་གི་དབང་པོ་ལ་འདི་སྐད་ཅེས་བཀའ་སྩལ་ཏོ། །ནམ་མཁའ་ལྡིང་གི་བདག་པོ་རྡོ་རྗེ་མཆུ་ཞེས་བྱ་བའི་གཟུངས་བྱིན་གྱིས་བརླབས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་དག་གིས་ཀྱང་བྱིན་གྱིས་བརླབས་ཀྱིས་ནམ་མཁའ་ལྡིང་གི་བདག་པོ་ཀླུ་མི་སྲུན་པ་རྣམས་ཚར་གཅད་པའི་ཕྱིར་སྨྲོས་ཤིག་།དེ་ནས་ནམ་མཁའ་ལྡིང་གི་བདག་པོས་རྡོ་རྗེ་མཆུ་ཞེས་བྱ་བའི་གཟུངས་འདི་སྨྲས་སོ། །ན་མོ་རད་ན་ཏྲ་ཡཱ་ཡ། ན་མཤྩཎ་ཌ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མ་སྟྲཻ་ལོཀྱ་ཨ་དྷི་པ་ཏ་ཡེ། ན་མཿ ཙ་ཏུར་ནཱ་མ་མ་ཧཱ་རཱ་ཛ་ནཱན།[་\ུ0f00]་བཛྲ་དུན་ཏེ་དུན་ཏེ། མ་ཧཱ་དུན་ཏ། དུ་ཏི་དུ་ཏི། བཛྲ་ཤི་ཁ་ར་དུན་ཏེ། མ་ནི་ཀ་ན་ཀ་བི་ཙི་ཏ། ཨཱ་བ་ར་ཎ་བི་བ་ཤི་ཏ་ཤ་རི་རེ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ། ནཱ་ག་རཱ་ཛ་བི་དྲ་པ་ནི་ཧྲི་ད་ཡན། སྥོ་ཊ་ཡ་བཛྲ་དུན་ཏ་ན། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཛྭ་ལ་ཏི་བཛྲ་དུན་ཏེ་ན། ཧ་ན་ཧ་ན། ག་རུ་ཌ་བཀྵ་ནི་པ་ཏེ་ན་བསྨི། ཀུ་རུ་ཀུ་རུ་ཀུ་རུ་ཀུ་རུ་ཀུ་རུ་དུཥྚ 107.70a ནཱ་ག་ནཱན། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ། བྷོ་བྷོ་པན་ནཱ་གེན་དྲ་སྤུ་ཏ་སྤུ་ཏ་སྤུ་དན་ཏུ་ནཱ་ག་སསྨ་ནི་ཀྲོ་དྷ་རཱ་ཛ་མ་ཧཱ་བ་ལ་པ་ར་ཀྲ་མ། ཛྭ་ལ་ཛྭ་ལ། པྲ་ཛྭ་ལ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ། བྷོ་ག་རུ་ཌ་རཱ་ཛ་བཛྲ་དུན་ཏེ། སུ་བར་ན་བཀྵ་མ་ཧཱ་བ་ལ། མ་ཧཱ་ཀ་ན་ཀ་བི་ཙི་ཏྲི་མ་ཧཱུཾ་ད་ར། བཀྵ་ཡ་དུཥྚ་ནཱ་གན་བི་བ་དུ་བྷོ་བ་ཡུ་བ་ལ་ཧ་ཀན་ཧཱུཾ་ཧཱུཾ། ཕཊ་ཕཊ། ཤོ་ཤ་ཡ་ཤི་ཏ་བ་ལ་ཧ་ག་ག་རུ་ཌ་ཨུསྨེ་ན། ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ། བྷོ་བྷོ་བཛྲ་དུན་ཏ་བི་ཙུ་ཧུ་ན། བིད་དུ་ཛྭ་ལ་ན། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། བན་ཛ་ཡ། སརྦ་ཤ་ར་ནི་མ་ཏི་ཀྲ་མ་སི་མན། བྷོ་བན་ནཱ་གེན་དྲ་མ་ཏེ། བཛྲ་དུན་ཏེ། ན་མཱུར་ནན་སྦ་ཏ་ཡཱ་མི། ཧ་ར་ཧ་ར། པྲ་ཧ་ར་ཧཱུཾ་ཕཊ། མ་ཏ་མ་ཏ། སརྦ་ནཱ་ག་ནན་ཧཱུཾ་ཧཱུཾ་ཕཊ། ཏ་ཐཱ་ག་ཏ་པ་ཙ་ན་མ་ནུ་སྨ་ར་ཧཱུཾ་ཧཱུཾ་ཕཊ། བཛྲ་པཱ་ཎི་ས་མ་ཡ། མ་ནུ་པཱ་ལ་ཡ། ཧཱུཾ་ཧཱུཾ་ཕཊ། ཏྲཻ་ལོཀྱ་ཨ་དྷི་པ་དེར་བཱ་ཙ་ན་མ་ནུ་པཱ་ལཱ་ཡ་ཧཱུཾ་ཧཱུཾ་ཕཊ། ས་རཱ་ས་རཱ། སྨ་རཱ་སྨ་རཱ། ས་མ་ཡ། མ་ནུ་པཱ་ལ་ཡ། ཏྲི་རད་ན་ས་ཏྱེ་ན། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཧྲི་བཛྲ་དུན་ཏ་སརྦ་ནཱ་ག་བི་དྲ་ན་ཀ་ར་ཧཱུཾ་ཧཱུཾ་ཧཱུཾ་ཕཊ་སཝཱ་ཧཱ། ཏྲི་རད་ན་མ་ནུ་པཱ་ལཱ་ཡ། ཧཱུཾ་ཧཱུཾ་ཧཱུཾ་ཕཊ། པྲ་མ་དན་ཏ་ཧ་ད་ས་ཧཱུཾ་ཧཱུཾ་ཧཱུཾ་ཕཊ་སཝཱ་ཧཱ། བི་ནི་ཙཀྲ་ཧ་ཏ། ཧཱུཾ་ཧཱུཾ་ཧཱུཾ་ཕཊ་སཝཱ་ཧཱ། མ་ཧེ་ཤཝཱ་ར་ཏྲི་ཤཱུ་ལ་ཧསྟཱ་ཡ། ཧཱུཾ་ཧཱུཾ་ཧཱུཾ་ཕཊ་སཝཱ་ཧཱ། ག་རུ་ཌ་ཏེ་ཛ་ཧ་ཏཱ་ཡ་ཧཱུཾ་ཧཱུཾ་ཕཊ་སཝཱ་ཧཱ། ག་རུ་ཌ་བི་ཀྲ་མཱ་ཡ་ཧཱུཾ་ཧཱུཾ་ཧཱུཾ་ཕཊ་སཝཱ་ཧཱ། ནཱ་ག་ཀུ་ལ་ན་ཤ་ནཱ་ཡ་ཧཱུཾ་ཧཱུཾ་ཕཊ་སཝཱ་ཧཱ། ག་རུ་ཌ་སརྦ་ཨ་ཤ་ནི་བ་པཱ་ན་ཡ་ཧཱུཾ་ཧཱུཾ་ཕཊ་སཝཱ་ཧཱ། སརྦ་པཱ་བ་བ་ཡུ་སཾ་བཀྵ་ནཱ་ཡ་ཧཱུཾ་ཧཱུཾ་ཕཊ་སཝཱ་ཧཱ། ཨརྦ་ཨ་ཀ་ལ་བ་ཏ་མེ་གྷ་ཨ་ཤ་ནི་བ་ར་ནཱ་ཡ་ཧཱུཾ་ཧཱུཾ་ཕཊ་ཕཊ་སཝཱ་ཧཱ། མ་ཧཱ་བཛྲ་ཛྭ་ལ་སཝཱ་ཧཱ། སརྦ་དུཥྚན་ནཱ་ག་བི་ན་ཤ་ཀཱ་ཡ་སཝཱ་ཧཱ། ག་རུ་ཌ་ཧྲི་ད་ཡ་སཝཱ་ཧཱ། ག་རུ་ཌ་དུན་ཏཱ་ཡ་སཝཱ་ཧཱ། སརྦ་ན་ཤ་ནཱ་ཡ་སཝཱ་ཧཱ། ཨོཾ་དུ་རུ་དུ་རུ་སཝཱ་ཧཱ། མུ་རུ་མུ་རུ་སཝཱ་ཧཱ། ཏུ་རུ་ཏུ་རུ་སཝཱ་ཧཱ། དི་རི་དི་རི། དུ་རུ་རུ་རུ་རུ་རུ་རུ་རུ་རུ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ་སཝཱ་ཧཱ། ནམ་མཁའ་ལྡིང་གི་དབང་པོས་རྡོ་རྗེ་མཆུའི་གཟུངས་འདི་བརྗོད་མ་ཐག་ཏུ་ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་ཁས་བུབ་ཏུ་འགྱེལ་ནས་ལུས་རྔུལ་བྱུང་ཞིང་ལུས་རབ་ཏུ་འདར་ཏེ་བརྒྱལ་ནས་ས་ལ་འགྲེ་ལྡོག་གོ་།ཀྱེ་མའོ་གཟུངས་ཆེན་པོ་སྔགས་ཀྱི་ཚིག་མི་བཟད་པ་དག་སྨྲས་སོ་ཞེས་འཛེར་ཞིང ། ཐམས་ཅད་ལུས་འདར་ཡེད་ཡེད་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས 107.70b གསོལ་ཏོ། །བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ། བཅོམ་ལྡན་འདས་བདག་ཅག་སླན་ཆད་འཛམ་བུའི་གླིང་དུ་མ་རུང་བར་མི་བགྱིད་དོ། །མེ་ཏོག་དང་འབྲས་བུ་དང ། ལོ་ཏོག་མ་རུང་བར་མི་བགྱིད་དོ། །བཅོམ་ལྡན་འདས་ས་ཕྱོགས་འདི་མཆོད་རྟེན་དང་འདྲ་བར་འཛིན་ཏེ། གང་ན་ཆོ་གའི་རྒྱལ་པོ་ཆེན་པོ་འདི་སྤྱོད་པ་དང ། གང་ན་གནས་པས་སྤྱོད་པ་དེར་བཅོམ་ལྡན་འདས་བདག་ཅག་གིས་རྒྱུན་དུ་དེ་བཞིན་གཤེགས་པའི་མཆོད་རྟེན་དང་འདྲ་བར་འཛིན་ཏོ། །ཡུལ་ལམ། གྲོང་ཁྱེར་རམ། ལྗོངས་སམ། རི་བྲགས་སམ། གྲོང་ངམ། གཙུག་ལག་ཁང་སྟེ་རྟག་པར་རྒྱུན་དུ་བསྲུང་བ་དང ། བསྐྱང་བ་དང ། སྦ་བར་བགྱིའོ། །སད་དང ། རླུང་དང ། སེར་བ་དང ། དུས་མ་ལགས་པའི་སྤྲིན་ཐམས་ཅད་སྣུམ་པ་དང ། མངར་བ་དང ། ཡིད་དུ་འོང་བ་དང ། རོ་ཞིམ་པ་དང ། སྙི་བ་དང ། རོ་བྲོ་བའི་མེ་ཏོག་དང ། འབྲས་བུ་དང ། ལོ་ཏོག་ཐམས་ཅད་བསྒྲུབ་པར་བགྱིའོ། །འཐབ་པ་དང ། སྡིག་པ་ཐམས་ཅད་བྱང་བ་དང ། ལྟས་ངན་པ་ཐམས་ཅད་བསལ་བར་བགྱིའོ། །དུས་དུས་སུ་ཆར་གྱི་རྒྱུན་དབབ་པར་བགྱིའོ། །མེ་ཏོག་དང ། འབྲས་བུ་དང ། ལོ་ཏོག་རྣམས་ཡང་དག་པར་འགྲུབ་པར་བགྱི། ཤ་སྦྲང་དང ། སྦྲང་བུ་མཆུ་རིངས་དང ། བྱི་བ་དང ། སྦྲུལ་དང ། སྦལ་པ་དང ། ཏྲེ་མ་བུ་ཀ་དང ། མཀྵི་ཀ་དང ། ཏྲེ་ལ་ཏ་དང ། ཤ་ཏ་པ་ད་དང ། བུང་བ་དང ། ནེ་ཙོ་དང ། རི་སྐེགས་ཀྱིས་འཇིགས་པ་ཐམས་ཅད་མེད་པར་བགྱི། རྣམ་པར་འཇིག་པར་བགྱི། ཡམས་ཀྱི་ནད་དང་འགྲོ་བ་ཐམས་ཅད་རབ་ཏུ་ཞི་བར་བགྱིའོ། །བཟློག་པར་བགྱིའོ། །བཅོམ་ལྡན་འདས་སླན་ཆད་སྡིག་པའི་ལས་ཀུན་དུ་སྤྱོད་པའི་ཚུལ་མི་སྤྱོད་པར་བགྱི། ཆར་གནོད་པར་འབབ་པ་དང ། དུས་མ་ལགས་པའི་ཆར་ཐམས་ཅད་མ་མཆིས་པར་བགྱིའོ། །བཅོམ་ལྡན་འདས་རང་གི་མནའི་ཡི་དམ་གྱིས་གནས་པར་བགྱིའོ། །བཅོམ་ལྡན་འདས་དཀོན་མཆོག་གསུམ་གྱི་དགོངས་པ་བསླབ་པའི་སྡོམ་པ་ཡོངས་སུ་བསྐྱང་བར་བགྱིའོ། །བཅོམ་ལྡན་འདས་སླན་ཆད་འཛམ་བུའི་གླིང་གི་སེམས་ཅན་རྣམས་ལ་འཚེ་བར་མི་བགྱིད། བུ་གཅིག་པ་བཞིན་དུ་ཡོངས་སུ་བསྐྱང་བར་བགྱིད་དོ། །བཅོམ་ལྡན་འདས་དེ་བཞིན་གཤེགས་པའི་བཀའ་ལུང་བཞིན་དུ་སླད་མའི་ཚེ་སླད་མའི་དུས་ན་སེམས་ཅན་ཐམས་ཅད་ཡོངས་སུ་བསྐྱང་བར་བགྱིའོ། །ཀུན་དུ་འཛིན་པར་བགྱིའོ། །དགེ་བ་དང ། བདེ་བ་དང ། ལོ་ལེགས་པ་ཀུན་དུ་བསྒྲུབ་པར་བགྱིའོ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་ལ་དབུགས་ཕྱུང་ནས་འདི་སྐད་ཅེས་བཀའ 107.71a སྩལ་ཏོ། །ཀླུའི་རྒྱལ་པོ་དག་དེ་ལྟར་གྱིས་ཤིག་།ཡལ་བར་མ་གཏང་ཤིག་།དེ་ནས་དེའི་འོག་ཏུ་ཆོ་ག་བྱ་བ་བརྗོད་པར་བྱ་སྟེ། སྔགས་འདི་དཔའ་བ་གཅིག་པུ་ནི། །ལས་ཀུན་བྱེད་པ་དགེ་བ་སྟེ། །ཤེས་རབ་ཅན་གྱིས་ལན་ཅིག་དྲན། །དགོས་པ་ཐམས་ཅད་བྱེད་པར་འགྱུར། །མཐོན་པོའི་གནས་སུ་མཁས་པ་ཡིས། །སྒྲ་སྐད་ཆེན་པོ་བརྗོད་པར་བྱའོ། །གནས་གང་དང་གང་དུ་སྒྲ་བསྒྲགས་པ་དེ་དང་དེར་དུས་མ་ཡིན་པའི་རླུང་དང ། སད་དང ། སྤྲིན་དང ། སེར་བ་དང ། གློག་ཐམས་ཅད་ཀྱིས་མི་ཚུགས་སོ། །སུས་ཀྱང་བྱིན་འཕྲོག་པར་མི་ནུས་སོ། །གཙེ་བར་མི་ནུས་སོ། །གནས་མཐོན་པོའི་རི་འམ། དགོན་པའི་གནས་སམ། གྲོང་ངམ། གཙུག་ལག་ཁང་ངམ། གནས་ཁང་ཤིན་དུ་མཐོ་བ་དེར་རིག་པ་འཛིན་པ་གཙང་མར་བྱས་ཏེ། གོས་གཙང་མ་དཀར་པོ་བགོས་ལ་ཁ་ཤར་ཕྱོགས་སུ་བལྟས་ཏེ། བའི་ལྕི་བ་དང་འཇིམ་པ་བསྲེས་པས་དཀྱིལ་འཁོར་ཁྲུ་གང་གྲུ་བཞི་པ་བྱས་ལ། དཀྱིལ་འཁོར་གྱི་དབུས་སུ་མདའ་གང་ཙམ་པ་ཅིག་བཙུགས་ཏེ། སྔགས་ལན་ཉི་ཤུ་རྩ་གཅིག་བཟླས་སོ། །དཀྱིལ་འཁོར་གྱི་གྲཝ་བཞིར་སེང་ལྡེང་གི་ཕུར་བུ་སོར་བརྒྱད་པ་བཙུགས་ཏེ། སྔགས་ལན་ཉི་ཤུ་རྩ་གཅིག་བཟླས་པ་བྱས་ལ། ཚོན་སྣ་ལྔ་པའི་སྐུད་པས་ལན་གསུམ་འཁྲིས་པར་བསྐོར་རོ། །དཀྱིལ་འཁོར་གྱི་དབུས་སུ་པོག་པོར་བཞག་ལ་ལན་བདུན་བཟླས་པའི་བདུག་པས་བདུག་གོ་།ལན་ཉི་ཤུ་རྩ་གཅིག་བཟླས་པ་བྱས་ལ་ཡུངས་དཀར་གྱིས་གཏོར་རོ། །མེ་ཏོག་སིལ་མས་གང་བར་གཏོར་རོ། །ཕྱོགས་བཞིར་གཏོར་མའི་བུམ་པ་བཞི་གཞག་གོ་།དཀྱིལ་འཁོར་གྱི་དབུས་སུ་གཏོར་མ་གཞག་པར་བྱ་སྟེ། ཞོ་དང ། འོ་མ་དང ། འབྲས་བཙོས་པ་དང ། བུ་རམ་དང ། ཤ་ཀ་རས་གདབ་བོ། །ཆུ་དང་ཡུངས་དཀར་ལ་སྔགས་ལན་ལྔ་བརྗོད་དེ། ཕྱོགས་བཞིར་མཚམས་གཅད་པར་བགྱི་ཟླ་བ་ཉ་ལ་སྦྱོར་བ་བྱའོ། །སྐད་ཆེར་བཀླགས་ལ་ཕྱོགས་བཞི་དང ། སྟེང་དང་འོག་ཏུ་ཡུངས་དཀར་གཏོར་ཞིང་ཀླུ་ཐམས་ཅད་ཀྱི་སོ་སོའི་མིང་ནས་བརྗོད་ན། ཆོ་ག་འདི་བྱས་མ་ཐག་ཏུ་དུས་མ་ཡིན་པའི་རླུང་དང ། སྤྲིན་དང་སེར་བ་དང་ཀླུ་མི་སྲུན་པ་ཐམས་ཅད་བཅིངས་པར་འགྱུར་ཐུབ་པར་འགྱུར་རོ། །ལྟས་ངན་པ་དང་ཡམས་ཀྱི་ནད་དང་གནོད་པ་དང་ནད་འགོ་བ་དང་གདོན་འབྱུང་པོ་དང ། ཤ་ཟ་དང་གནོད་སྦྱིན་དང་སྲིན་པོ་ཐམས་ཅད་རྒྱང་རིང་དུ་སྤངས་པར་འགྱུར་རོ། །དཔག་ཚད་གཅིག་ཁོ་ར་ཁོར་ཡུག་ཏུ་མཚམས་བཅད་པར་འགྱུར་རོ། །ནད་ཐམས་ཅད་དང་ན་བ་ཐམས་ཅད་དང 107.71b གནོད་པར་སེམས་པ་དང་རབ་ཏུ་གནོད་པར་སེམས་པ་དང་ཕྱིར་རྒོལ་བ་དང་ཕྱིར་གནོད་པར་བྱེད་པ་ཐམས་ཅད་ཀྱིས་མི་ཚུགས་པར་འགྱུར་རོ། །མེ་ཏོག་དང་འབྲས་བུ་དང་ལོ་ཏོག་ཐམས་ཅད་ལེགས་པར་ཡོངས་སུ་འགྲུབ་པར་འགྱུར། ལེགས་པར་ཡོངས་སུ་སྨིན་པ་དང་རོ་ཞིམ་པར་འགྱུར་རོ། །ས་བོན་ལེགས་པར་བཏབ་པ་ཐམས་ཅད་ལེགས་པར་འཁྲུངས་པར་འགྱུར་རོ། །གཤེད་བྱེད་དང་ལས་དང་བྱད་སྟེམ་ཐམས་ཅད་རྣམ་པར་འཇིག་པར་འགྱུར་མི་ཚུགས་པར་འགྱུར་རོ། །ཇི་སྲིད་དུ་ཕུར་བུ་མ་ཕྱུང་བ་དེ་སྲིད་དུ་མཚམས་ཆེན་པོ་བཅད་པར་འགྱུར་རོ། །དེ་སྲིད་དུ་ཀླུ་ཐམས་ཅད་ཆར་གྱི་རྒྱུན་འབེབས་སོ། །མེ་ཏོག་དང་འབྲས་བུ་དང་ལོ་ཏོག་ཐམས་ཅད་ལེགས་པར་ཡོངས་སུ་རྒྱས་པར་འགྲུབ་པར་འགྱུར་རོ། །གང་དང་གང་དུ་དགོས་པར་འགྱུར་བ་ཐམས་ཅད་ལན་ཅིག་དྲན་པར་བྱས་ན་འགྲུབ་པར་འགྱུར། སྤྲ་ཚིལ་ལས་ནམ་མཁའ་ལྡིང་གི་གཟུགས་སོར་བརྒྱད་པ་དཀྱིལ་མོ་དཀྲུང་བཅས་པ། མདབ་མ་བརྐྱང་བ། ཀླུ་རྒྱལ་གདན་དུ་བཏིང་བ། མགོ་དགུ་པ་མགོ་རྒྱན་དུ་ཐོགས་པ། ཀླུ་མགོ་གསུམ་པ་ལག་པ་གཡས་ན་ཐོགས་པ། ནོར་བུ་རིན་པོ་ཆེ་འབར་བ་ལག་པ་གཡོན་ན་ཐོགས་པ། གསེར་གྱི་གཡོགས་པ་བྱས་ཏེ་ཆོ་ག་བཞིན་དུ་ཚོན་གྱིས་རི་མོ་བྲིས་ལ། སྟན་སྣ་ཚོགས་ཀྱི་སྟེང་དུ་བཞག་ལ། ཉིན་ཞག་གཅིག་ལ་སྔགས་སྟོང་བརྗོད་དོ། །ནམ་ལུས་ཀྱིས་མི་ཐུབ་པའི་ཚེ་ཁ་ཟས་དཀར་པོ་བཟའ་བར་བྱ་སྟེ། ཡང་ཁྲུས་བྱས་ལ་བསྒྲུབ་པར་བྱའོ། །གུ་གུལ་གྱིས་བདུག་གོ་།མེ་ཏོག་དང་བདུག་པ་དང་གཏོར་མ་ཅི་འབྱོར་པ་སྦྱར་རོ། །མར་མེ་གཏང་ལ་དེའི་མདུན་དུ་ཉལ་ན་སྟོན་པར་འགྱུར་ཞིང་ལས་ཐམས་ཅད་བརྗོད་པར་འགྱུར་རོ། །མཆོག་ཐམས་ཅད་སྦྱིན་པར་འགྱུར། ལས་ཐམས་ཅད་བྱེད་པར་འགྱུར་རོ། །ཅི་བསྒོ་བ་བྱེད་པར་འགྱུར་རོ། །ལང་ལོང་མེད་པའི་གནས་སུ་བཞག་ལ། ནམ་ཐན་པ་བྱུང་བའི་ཚེ་རིག་པ་འཛིན་པས་བླངས་ཏེ། ཀླུའི་གནས་སུ་བཀུར་བར་བྱ་ཀླུའི་གནས་མཚོར་བཞག་ལ་མེ་ཏོག་དང་བདུག་པ་བྱིན་ལ་ཡུངས་དཀར་ལ་སྔགས་ལན་གསུམ་བཟླས་ཏེ་གནས་སུ་གཏོར་ན་འཕྲལ་དུ་ཀླུ་ཐམས་ཅད་ཆར་གྱི་རྒྱུན་འབེབས་སོ། །གལ་ཏེ་འཕྲལ་དུ་ཆར་གྱི་རྒྱུན་མི་འབེབས་ན། དེའི་ཕྱིར་ཀླུ་གནས་ཀུན་དུ་ནམ་མཁའ་ལྡིང་གིས་གང་བར་མཐོང་བར་འགྱུར། གནས་མེ་ལྕེ་གཅིག་ཏུ་འབར་བར་འགྱུར། བྱེ་ཚན་མགོ་ལ་འབབ་པར་འགྱུར་ཆུ་སྐམས་པར་འགྱུར་རོ། །ཐན་པ་བྱུང་བའི་ཚེ་སྤྲིན་ལ་བསྟན་ན་ཆར་འབེབས་པར་འགྱུར་རོ། །རླུང་དང་སྤྲིན་དང་སེར་བ་དང་སད་དང ། 107.72a ཆར་སྤྲིན་ལ་བསྟན་ན་སྐད་ཅིག་ཏུ་མེད་པར་འགྱུར་རོ། །དཔག་ཚད་བདུན་གྱི་ནང་དུ་ཕྱོགས་བཞི་ཀུན་དུ་སེར་བ་མི་འབབ་ཅིང་སད་དང་དུས་མ་ཡིན་པའི་རླུང་གིས་མི་ཚུགས་པར་འགྱུར་ཏེ་ཐམས་ཅད་ཐུབ་པར་འགྱུར་རླུང་འཁྲུགས་པའི་ཚེ་ལམ་གྱི་བཞི་མདོར་གཞག་གོ་།ཡང་ན་གྲོང་ཁྱེར་གྱི་སྒོར་རོ། །ཡང་ན་རྒྱལ་པོའི་སྒོར་བཞག་གོ་།དེས་རླུང་ཐམས་ཅད་ཆོད་པར་འགྱུར་རོ། །རླུང་ཆེན་པོ་རྣམ་པར་འཐོར་ཡང་ཆོད་པར་འགྱུར་རོ། །ཕྱིས་ལྡང་མི་ནུས་སོ། །བསྟན་མ་ཐག་ཏུ་ཀླུ་ཐམས་ཅད་འབྲོས་པར་འགྱུར་རོ། །རྡོ་རྗེ་མཆུའི་གཟུངས་ལས་ཐམས་ཅད་བྱེད་པ་ནམ་མཁའ་ལྡིང་ཀླགས་པས་གྲུབ་པ་མཆོག་ཏུ་འགྲུབ་བོ། །དེ་ནས་ཚངས་པ་དང ། དབང་ཕྱུག་ཆེན་པོ་དང ། རྒྱལ་པོ་ཆེན་པོ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཐམས་ཅད་ཚོགས་པས་ཀྱང་རྡོ་རྗེ་འབར་བའི་ལྕེ་འབབ་པའི་མཆུ་ཞེས་བགྱི་བའི་གཟུངས་བརྗོད་པར་བྱ་སྟེ། ཀླུ་ཐམས་ཅད་ཀྱི་སྙིང་འཕྲོག་པ། སྙིང་འགེམས་པ། ཀླུ་མི་སྲུན་པའི་རིགས་ཕུང་བར་བགྱིད་པ། རླུང་དང ། སྤྲིན་དང ། སེར་བ་ཐམས་ཅད་སེལ་བ། ལོ་ཏོག་དང ། མེ་ཏོག་དང ། འབྲས་བུ་ཐམས་ཅད་སྒྲུབ་པ་འབུལ་ན། སེམས་ཅན་ཐམས་ཅད་ལ་སྨན་པར་བགྱི་བའི་སླད་དུ། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོ་དང ། རྒྱལ་པོ་ཆེན་པོ་བཞི་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་སེམས་ཅན་ཐམས་ཅད་ཀྱི་དོན་དང ། ཕན་པ་དང ། བདེ་བའི་ཕྱིར་ངས་བྱིན་གྱིས་བརླབ་ཀྱིས་བརྗོད་ཅིག་།དེ་ནས་ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོ་དང ། རྒྱལ་པོ་ཆེན་པོ་བཞི་པོ་དག་གིས་གཟུངས་འདི་སྨྲས་སོ། །ན་མོ་རད་ན་ཏྲ་ཡཱ་ཡ། ན་མོ་བྷ་ག་བཱ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨར་ཧ་ཏེ་སམྱཀ་སཾ་བུད་དྷཱ་ཡ། ན་མཤྩཎ་ཌ་བཛྲ་དྷ་རཱ་ཡ། མ་ཧཱ་བ་ལ་བ་ར་ཀྲ་མ་ཡ། ན་མ་སྟྲཻ་ལོཀྱ་མཱུར་ཏ་ཡེ། ན་མཤྩ་ཏུ་ར་ནཱན། ་མ་ཧཱ་རཱ་ཛ་ནཱན། ན་མོ་བཛྲ་ཤ་ནི་ཛྭ་ལི་ཏ་རཽ་ཏད་ཏ་ཧ་སཱ་ཡ། ཛ་ཡ་མ་ཧཱ་བ་ལ་བཱིརྱ་པ་ར་ཀྲ་མ་ཀྲོ་དྷ་རཱ་ཛ་བྲཧྨེ་སུ་བྲཧྨེ་བྲཧྨ་སཝ་ར་བྷོ་བྷོ་ནཱ་ག་ཨ་དྷི་པ་ཏི་བི་ས་ར་ད་བི་ས་ར། མ་རེ་བྲཧྨེ་དན་ཏེ་ན་མཱུར་དྷ་ནཱན། པྲ་ཏ་ཡ་ཧཱུཾ་ཧཱུཾ་ཕཊ། བྷ་ར་བྷ་ར། བཀྵུ་ཙཀྲ་ཧ་ཏ་ན་བོཤྣན་གེན 107.72b དུ་མ་ཏི་བིཥྚ་ཙཀྲེ་ཤྲཱི་ཙྪིན་ད་མི། ཏུ་ཏི་ཏུ་ཏི། ལི་ལི་ལི་ལི། ཧཱུཾ་ཧཱུཾ་ཕཊ། མུ་ཧུ་མུ་ཧུ་མུ་ཧྱན་ཏུ་སརྦ་དུཥྚ་ནཱ་གན། སྥོ་ཊ་ཡ་ཧྲི་ད་ཡན་མ་ཧེ་ཤཝཱ་ར་ཛྭ་ལི་ཏ་ཏྲི་ཤཱུ་ལ་དྷ་ར། ཧ་ན་ཧ་ན་ཧཱུཾ་ཧཱུཾ་ཕཊ། མུ་ཙི་མུ་ཙི། ཏུ་ཏི་ཏུ་ཏི། བྷ་བ་བྷ་བ། ཀྵི་ནི་ཀྵི་ནི་ཀྵི་ནི། ཙ་ཏུར་ནན། མ་ར་ཙི་ནན། ཛྭ་ལི་ཏ་ཤཀ་ཏི་དྷ་ར་དྷ་ར། ཧཱུཾ་ཧཱུཾ་ཕཊ། སྤུ་ར་སྤུ་ར། བི་སྤུ་ར་བི་སྤུ་ར། ཙ་རཝ་ཙ་རཝ། ན་ཤ་ཡ། དུཥྚ་ན་ནཱ་ག་ཧྲི་ད་ཡན། སྥོ་ཊ་ཡ་ཧཱུཾ་ཧཱུཾ་ཕཊ། སཾ་ཧ་ར་སཾ་ཧ་ར། དུཥྚ་ན་ཡ་ཤ་ནི། བ་ཏི་ནཱ་གན་ཤི་ཏ་བི་བྱུ་ཛྭ་ལ་བྷསྨི་ཀུ་རུ་ཧཱུཾ་ཧཱུཾ་ཕཊ་ཕཊ་སཝཱ་ཧཱ། ས་མ་ཡ་མ་ནུ་སྨ་ར་བྷོ་ནཱ་ག་ཨ་དྷི་པ་ཏེ་བཛྲི་བཱ་ཡ་བྷོ་བྷོ་ཏུ་ཏི་ཏུ་ཏི་ཧཱུཾ་ཧཱུཾ་ཕཊ་ཕཊ་སཝཱ་ཧཱ། བཛྲ་ཨ་ཤ་ནིན་ན་ཤཱ་ཡ་ཧཱུཾ་ཕཊ་སཝཱ་ཧཱ། སརྦ་ནཱ་ག་ཧྲི་ད་ཡ་ནི། བི་སྥོ་ཊ་ཡ་ཧཱུཾ་ཕཊ་སཝཱ་ཧཱ། བུད་དྷ་བི་ལོ་ཀི་ཏཱ་ཡ་སཝཱ་ཧཱ། བྲཧྨཱ་ཡ་སཝཱ་ཧཱ། བིཀྵུ་མུ་རད་ཏི་སཝཱ་ཧཱ། མ་ཧེ་ཤཝཱ་ར་ཛྭ་ལི་ཏི་ཏྲི་ཤཱུ་ལཱ་ཡ་སཝཱ་ཧཱ། ཙ་ཏུ་ར་མ་ཧཱ་རཱ་ཛཱ་ས་མ་ཡ་དྷ་ར་ཡ་སཝཱ་ཧཱ། བྷུ་ཛ་གཱ་ཡ་སཝཱ་ཧཱ། ནཱ་གཱ་ཨ་དྷི་པ་ཏ་ཡེ་སཝཱ་ཧཱ། ཨོཾ་དྷི་རི་དྷི་རི་སཝཱ་ཧཱ། ཛྭ་ལ་ཏ་བག་ཏྲཱ་ཡ་སཝཱ་ཧཱ། རོ་མ་ཧཱ་ར་ན་ཤཱ་ཡ་སཝཱ་ཧཱ། ཛུ་ཏི་ཛུ་ཏི་ཛུ་ཏི་སཝཱ་ཧཱ། ཕཊ་ཕཊ་ཕཊ་ཕཊ་ཕཊ་སཝཱ་ཧཱ། དེ་ནས་རྡོ་རྗེ་འབར་བའི་ལྕེ་འབབ་པའི་མཆུ་ཞེས་བྱ་བའི་གཟུངས་འདི་བརྗོད་མ་ཐག་ཏུ་ཀླུ་མི་སྲུན་པ་ཐམས་ཅད་ལུས་རུལ་ཏེ་དྲི་མི་ཞིམ་པར་གྱུར་ཏོ། །ལུས་ཤིག་ཤིག་པོར་གྱུར་ཅིང ། ཤ་བཀྲས་བཏབ་པར་གྱུར་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བསྐྱབ་ཏུ་གསོལ། བཅོམ་ལྡན་འདས་ལྷ་དང་བཅས་པའི་འཇིག་རྟེན་གྱིས་དམད་པར་གྱུར་ཏོ། །བཅོམ་ལྡན་འདས་བདག་ཅག་ནི་བརླག་གོ་།བཅོམ་ལྡན་འདས་སླན་ཆད་འཛམ་བུའི་གླིང་གི་སེམས་ཅན་རྣམས་ལ་འཚེ་བར་མི་བགྱིད་དོ། །གནོད་པར་མི་བགྱིད་དོ། །བཅོམ་ལྡན་འདས་རྡོ་རྗེ་འབར་བའི་ལྕེ་འབབ་པའི་མཆུའི་གཟུངས་འདི་བརྗོད་པ་དེར། བཅོམ་ལྡན་འདས་ཀླུ་ཐམས་ཅད་གནོད་པར་སེམས་ཤིང་མི་མཆི་སྟེ། ཐ་ན་ལྟ་བར་ཡང་མི་བགྱིད་ན་འཇུག་པ་ལྟ་སྨོས་ཀྱང་མི་འཚལ། དེ་ནས་འདིའི་ཆོ་ག་བརྗོད་དེ་གཟུངས་འདི་དྲན་པ་ཙམ་གྱིས་ཀླུ་ཐམས་ཅད་ཀྱི་ལུས་དུམ་བུ་དུམ་བུར་འབྲུལ་ལོ། །ལུས་དྲི་མི་ཞིམ་པར་འགྱུར་རོ། །ཡུངས་དཀར་ལ་ལན་ཉི་ཤུ་རྩ་གཅིག་བཟླས་ཏེ་ཕྱོགས་བཞིར་གཏོར་ན་ཀླུ་ཐམས་ཅད་བཅིངས་པར་འགྱུར་རོ། །དཔག་ཚད་བདུན་ཁོ་ར་ཁོར་ཡུག་ཏུ་མཚམས 107.73a བཅད་པར་འགྱུར་རོ། །རྡོ་རྗེ་ལ་ལན་བརྒྱ་རྩ་བརྒྱད་བཟླས་པ་བྱས་ཏེ་ཀླུ་བཟློག་པར་བྱའོ། །ལན་ཅིག་བརྗོད་ན་རླུང་དང་སྤྲིན་དང་སེར་བ་ཐམས་ཅད་བཟློག་གོ་།ཐམས་ཅད་མེད་པར་འགྱུར་རོ། །དྲན་པ་ཙམ་གྱིས་སེར་བ་ཐམས་ཅད་སྐད་ཅིག་ཏུ་མེད་པར་འགྱུར་རོ། །གལ་ཏེ་འབབ་ན་ཡང་ཡུད་ཙམ་གྱིས་ཆུར་འགྱུར་རོ། །སེར་བ་འབབ་པའི་དུས་ན་རྡོ་རྗེ་བསྐོར་ན་ཕྱོགས་གང་དུ་བསྐོར་བ་དེར་སེར་བ་འདྲིས་པར་འགྱུར་ཏེ། ཕྱོགས་དེར་སེར་བ་མི་འབབ་པར་འགྱུར་རོ། །ནང་པར་དབེན་པར་སོང་སྟེ། ནང་དུ་ཡང་དག་འཇོག་ཏུ་ཞུགས་ལ། དཀྱིལ་མོ་དཀྲུང་གི་ཕྱག་རྒྱ་བཅིངས་ཏེ་སྔགས་འདི་ལན་སུམ་བཅུ་རྩ་གཉིས་བརྗོད་དེ་བརྗོད་མ་ཐག་ཏུ་རླུང་དང ། སྤྲིན་དང ། སེར་བ་ཐམས་ཅད་མེད་པར་འགྱུར་རོ། །རླུང་ཐམས་ཅད་རྣམ་པར་འཇིག་པར་འགྱུར་རོ། །མི་འབྱུང་བར་འགྱུར་རོ། །ཡུངས་དཀར་ཕྱོགས་བཞིར་གཏོར་ན་ལོ་གཅིག་ཁྱུད་ཀོར་དུ་མཚམས་བཅད་པར་འགྱུར་རོ། །རླུང་དང་སྤྲིན་དང་སེར་བ་ཐམས་ཅད་བཅིངས་པར་འགྱུར་རོ། །ཀླུ་ཐམས་ཅད་དབང་དུ་འགྱུར་རོ། །བུ་དང་ཚ་བོ་འཁོར་དང་བཅས་པ་རྒྱུན་དུ་རྒྱུན་མི་འཆད་པར་ཕྱི་བཞིན་འབྲང་བར་འགྱུར་རོ། །ལས་ཐམས་ཅད་བྱེད་པར་འགྱུར་རོ། །དྲིལ་བུ་ལ་ལན་ཉི་ཤུ་རྩ་གཅིག་བཟླས་ཏེ། སེར་བ་འབབ་པའི་དུས་ན་དཀྲོལ་ན་ཀླུ་མི་སྲུན་པ་ཐམས་ཅད་ཀྱི་ཀླད་པ་འགས་པར་འགྱུར་རོ། །ནམ་མཁའ་ལས་ས་ལ་ལྷུང་བར་འགྱུར་ཏེ། ལས་ཐམས་ཅད་བྱེད་པར་འགྱུར་རོ། །གཟུང་འདི་ནི་ཐམས་ཅད་དུ་ཐོག་པ་མེད་པར་འགྱུར། དེ་ནས་བཅོམ་ལྡན་འདས་ཀྱིས་ནམ་མཁའ་ལྡིང་གི་དབང་པོ་ཆེན་པོ་དང་ཚངས་པ་དང་ཁྱབ་འཇུག་དང་དབང་ཕྱུག་ཆེན་པོ་ལ་ལེགས་སོ་ཞེས་བྱ་བ་གནང་སྟེ། ཚངས་པ་ཆེན་པོ་སེམས་ཅན་ཐམས་ཅད་ལ་ཕན་པ་དང ། བདེ་བ་དང་ཀླུ་མི་སྲུན་པ་སྙིང་རྗེ་མེད་པ་འཚེ་བ་རྣམས་གདུལ་བ་དང་ཚར་གཅད་པ་དང་ཆད་པས་གཅད་པའི་ཕྱིར་ཁྱོད་ཀྱིས་རིག་པ་ཆེན་པོའི་གཟུངས་སྔགས་ཀྱི་ཚིག་འདི་བརྗོད་ནས་འཛམ་བུའི་གླིང་དུ་བཞག་པ་ལེགས་སོ་ལེགས་སོ། །དེ་ནས་ཀླུའི་རྒྱལ་པོ་ཆེན་པོ་རྒྱ་མཚོ་དང ། ཀླུའི་རྒྱལ་པོ་ཆེན་པོ་རྣམ་པར་ཀུན་ནས་བསྐོར་བ་དང ། གཞན་ཡང་ཀླུའི་རྒྱལ་པོ་ཆེན་པོ་གཟི་བརྗིད་ཆེ་ཞིང་རྫུ་འཕྲུལ་ཆེ་བ་དང ། གཞན་ཡང་ཀླུ་མི་སྲུན་པ་བྱེ་བ་ཕྲག་དུ་མ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག 107.73b འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་འཁོར་དང་བཅས་པས་སླད་མའི་ཚེ་སླད་མའི་དུས་ན་འཛམ་བུའི་གླིང་ཐམས་ཅད་ཀྱི་མེ་ཏོག་དང ། འབྲས་བུ་དང་ལོ་ཏོག་དང་ལོ་མ་དང་ཡལ་ག་རྣམས་བསྲུང་བར་བགྱིའོ། །ཡོངས་སུ་བསྐྱང་བར་བགྱིད་དོ། །རླུང་དང་སྤྲིན་དང་སེར་བ་དང་སད་དང་ཚད་པ་ཐམས་ཅད་བཟློག་པར་བགྱིད་དོ། །དུས་དུས་སུ་ཆར་གྱི་རྒྱུན་འབེབས་པར་འཚལ་ལོ། །རང་གི་མནའི་ཡི་དམ་གྱིས་དེ་བཞིན་གཤེགས་པའི་དམ་ཚིག་བསྐྱང་བར་འཚལ་ལོ། །སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་ཤིང་བསམ་པ་གྲུབ་པར་འཚལ་ལོ་མི་འཚེ་བར་འཚལ་ལོ། །བཅོམ་ལྡན་འདས་གལ་ཏེ་ཆོ་གའི་རྒྱལ་པོ་འདི་ལས་གོང་དུ་སྔགས་དང་གཟུངས་ཇི་སྐད་བཤད་པའི་ཡོན་ཏན་གྱི་ཁྱད་པར་རྣམས་དང་འགལ་བར་བགྱིད་ན་བདག་ཅག་བྱང་ཆུབ་ཏུ་མངོན་པར་འཚང་རྒྱ་བར་མ་གྱུར་ཅིག་།འདི་ནི་བྲོ་བོར་བ་སྟེ། ཏདྱ་ཐཱ། པ་ཀི་ཙ་ཏི། ཤུ་ལི་ཤུ་མུ་ལི། ཤ་ཤ་ཤུ་ཤུ་།ཏི་ཏི་བི་རི་ཏི། ཧུ་ཡུ་ཧུ་ཡུ། ཧུ་རི་ཏི་སཝཱ་ཧཱ། བཅོམ་ལྡན་འདས་འདི་ནི་ཀླུའི་མནའ་ལགས་ཏེ་སླད་མའི་ཚེ་སླད་མའི་དུས་ན་ཀླུ་མི་སྲུན་པ་རྣམས་འཇིག་པར་བགྱིད་དོ། །ཐན་པ་དང་ཐན་པ་ཆེ་བ་དང་དུས་མ་ལགས་པའི་ཆར་དང་རླུང་དང་སྤྲིན་དང་སེར་བ་དང་སད་དང་དུས་མ་ལགས་པའི་རླུང་དང་གློག་བྱུང་ན་རི་འམ་ཁང་པ་མཐོན་པོའི་སྟེང་དུ་རིག་པ་འཛིན་པ་ཁ་ཤར་ཕྱོགས་སུ་བལྟས་ཏེ། མནའ་འདི་དག་གིས་བསྟོད་དེ་ལན་བདུན་བརྗོད་ལ། ཆུ་དང་ཡུངས་དཀར་བསྲེས་པས་ཕྱོགས་བཞིར་གཏོར་བར་བྱའོ། །གཏོར་ཅིང་དྲན་མ་ཐག་ཏུ་ཀླུ་ཐམས་ཅད་ཀྱི་ལུས་རྣམས་དུམ་བུ་བརྒྱར་འཆད་པར་འགྱུར་རོ། །གྱེས་པར་འགྱུར་རོ། །འགུགས་པར་འགྱུར་ཏེ། དེའི་སླད་དུ་ཆར་གྱི་རྒྱུན་འབེབས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀླུའི་རྒྱལ་པོ་ཁྱོད་ཀྱིས་དེ་ལྟར་བྱོས་ཤིག་།རྡོ་རྗེ་མཆུའི་ཆོ་ག་རྫོགས་སོ།། |