(ན)་༄#། !་།མདོ་སྡེ་སྣ་ཚོགས་ཀྱི་སྐོར་བཞུགས་སོ། །[(黃)་經藏第十二部] 51.1b ༄##། ་་།རྒྱ་གར་སྐད་དུ། ་ཨཱརྱ་པྲ་ཏྱུཏ་པན་ནེ་བུད་དྷ་སམ་མུ་ས་མཱ་དྷི་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། སྨིག་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ 51.2a སོན་པ། རྣམ་པར་ཐར་པ་བརྒྱད་ཐོབ་པ་ཤ་སྟག་སྟེ། གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཞེས་བྱ་བ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ། བྱང་ཆུབ་སེམས་དཔའ་ལྔ་བརྒྱ་ཙམ་ཐམས་ཅད་ཀྱང་ཁྱིམ་པར་གྱུར་ཅིང་བསླབ་པའི་གཞི་ལྔ་ཡོངས་སུ་བཟུང་བ་ཤ་སྟག་དང་ལྷན་ཅིག་ཏུ་ཆོས་ཉན་པའི་ཕྱིར་བཅོམ་ལྡན་འདས་ཀྱི་ཞབས་འབྲིང་བྱེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཕྱེམ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འདུག་གོ། །བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་ཀྱང་ཕྱེམ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །དགེ་སློང་ལྔ་བརྒྱ་ཙམ་པོ་དེ་དག་ཀྱང་ཕྱེམ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །ཡང་དེའི་ཚེ་ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་མཉན་ཡོད་ཀྱི་གྲོང་ཁྱེར་ཆེན་པོར་དབྱར་གནས་ནས་དགེ་སློང་ལྔ་བརྒྱ་ཙམ་དང་ལྷན་ཅིག་ཏུ་རིམ་གྱིས་ཡུལ་རྒྱུ་ཞིང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་གང་ན་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག 51.2b འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་པས་དགེ་སློང་དག་ཡུལ་སོ་སོ་ན་རྟེན་ཅིང་གནས་པ་དེ་དག་ཐམས་ཅད་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་དོ། །ཡང་དེའི་ཚེ་སྨིག་མའི་ཚལ་བྱ་ཀ་ལན་ད་ཀ་གནས་པར་དགེ་སློང་འབུམ་ལྷན་ཅིག་ཏུ་འདུས་ཏེ་འཁོད་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་པས་སྐྱེ་དགུའི་བདག་མོ་ཆེན་མོ་གཽ་ཏ་མི་ལ་སོགས་པ་དགེ་སློང་མ་སུམ་ཁྲི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཀོན་མཆོག་འབྱུང་གནས་ཤེས་བྱ་བ་ཡངས་པའི་གྲོང་ཁྱེར་ཆེན་པོ་ནས་བྱུང་སྟེ། ལི་ཙ་བི་གཞོན་ནུ་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། 51.3a བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕུག་སྦས་ཀྱང་གྲོང་ཁྱེར་ཆེན་པོ་ཙམ་པ་ཡ་ནས་བྱུང་སྟེ། སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འདམ་བུས་བྱིན་ཡང་གྲོང་ཁྱེར་ཆེན་པོ་བཱ་རཱ་ཎ་སཱི་ནས་བྱུང་སྟེ། སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་བཟངས་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་སྟེ། སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེད་དཔོན་ཆེན་པོ་དང ། ཁྱིམ་བདག་མགོན་མེད་ཟས་སྦྱིན་ཡང་མཉན་ཡོད་ཀྱི་གྲོང་ཁྱེར་ཆེན་པོ་ནས་བྱུང་སྟེ། སྲོག་ཆགས་ཉི་ཁྲི་བརྒྱད་སྟོང་གིས 51.3b ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་ཡང་ཀོའུ་ཤམ་བིའི་གྲོང་ཁྱེར་ཆེན་པོ་ནས་བྱུང་སྟེ། སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་ཡང་གནས་བཅས་ཀྱི་གྲོང་ཁྱེར་ཆེན་པོ་ནས་བྱུང་སྟེ། སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། རྒྱལ་པོ་མ་སྐྱེས་དགྲ་ཡང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ། སྲོག་ཆགས་སུམ་ཁྲི་ཙམ་གྱིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་སྨིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། 51.4a ལྷའི་བུ་དཔལ་བཟངས་ཀྱང་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་ནས་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། ལྷའི་བུ་དབང་ཕྱུག་ཆེན་པོ་ཡང་གནས་གཙང་མའི་རིས་ཀྱི་ལྷའི་བུ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། ལྷ་མ་ཡིན་གྱི་དབང་པོ་བཞི་ཡང་ལྷ་མ་ཡིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་དགའ་བོ་དང་ཉེ་དགའ་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་མ་དྲོས་ཀྱང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་གཟི་ཅན་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་ཨེ་ལའི་འདབ་མ་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་དོ། །ཡང་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི། འདི་ནས་སྟེང་དུ་ཚངས་པའི་འཇིག་རྟེན་མན་ཆད་ཐ་ན་འཁར་བའི་རྩེ་མོ་གཟུགས་པའི་ས་ཁྱོན་ཙམ་ཡང་དབང་ཆེ་བ་དབང་ཆེ་བར་གྲགས་པའི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཀྱིས་མ་གང་བ་གང་ཡང་མེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་སྟན་ལས་ལངས་ནས་བླ་གོས་ཕྲག་པ་གཅིག་ཏུ་བཟར་ནས 51.4b པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་ཅི་དང་ཅི་འདོད་པ་དྲིས་ཤིག་དང ། དྲིས་པ་དེ་དང་དེ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་གང་ལ་གནས་ན་ཐོས་པ་རྒྱ་མཚོ་འདྲ་བ་དང ། ཐོས་པ་བསྩགས་པ་རྣམས་སུ་གྱུར་པ་དང ། ནེམ་ནུར་མ་མཆིས་པ་དང ། ཐེ་ཚོམ་མ་མཆིས་པ་དང ། ཡིད་གཉིས་མ་མཆིས་པ་རྣམས་སུ་འགྱུར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་མི་ཉམས་ཤིང་ཡོངས་སུ་མི་ཉམས་པ་རྣམས་སུ་འགྱུར་བ་དང ། མི་ངལ་བ་རྣམས་སུ་མི་སྐྱེ་བ་དང ། སྐྱེ་བ་དྲན་པ་རྣམས་སུ་འགྱུར་བ་དང ། ཐ་ན་རྨི་ལམ་དུ་ཡང་དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་སུ་འགྱུར་བ་དང ། གཟུགས་བཟང་ཞིང་མཛེས་ལ་ལྟ་ན་སྡུག་ཅིང་ཁ་དོག་བཟང་པོ་རྒྱས་པ་མཆོག་དང་ལྡན་པ་རྣམས་སུ་འགྱུར་བ་དང ། རིགས་མཐོ་བ་དང་རིགས་ཆེ་བ་རྣམས་སུ་འགྱུར་བ་དང ། གཡོག་འཁོར་མང་ཞིང་གཡོག་འཁོར་མི་ཕྱེད་པ་རྣམས་སུ་འགྱུར་བ་དང ། རྟོགས་པ་དང་ལྡན་པ་རྣམས་སུ་འགྱུར་བ་དང ། དྲན་པ་དང་ལྡན་པ་རྣམས་སུ་འགྱུར་བ་དང ། བློ་གྲོས་དང་ལྡན་པ་རྣམས་སུ་འགྱུར་བ་དང ། དཔལ་དང་ལྡན་པ་རྣམས་སུ་འགྱུར་བ་དང ། 51.5a བརྟན་པ་དང་ལྡན་པ་རྣམས་སུ་འགྱུར་བ་དང ། རྫུ་འཕྲུལ་དང་ལྡན་པ་རྣམས་སུ་འགྱུར་བ་དང ། ཤེས་རབ་དང་ལྡན་པ་རྣམས་སུ་འགྱུར་བ་དང ། བསོད་ནམས་དང་ལྡན་པ་རྣམས་སུ་འགྱུར་བ་དང ། ངོ་ཚ་ཤེས་ཤིང་ཁྲེལ་ཡོད་པ་དང་ལྡན་པ་རྣམས་སུ་འགྱུར་བ་དང ། ང་རྒྱལ་བཅག་པ་རྣམས་སུ་འགྱུར་བ་དང ། བྱམས་པ་ལ་གནས་པ་རྣམས་སུ་འགྱུར་བ་དང ། ཡེ་ཤེས་དང་ལྡན་པ་རྣམས་སུ་འགྱུར་བ་དང ། བློ་དང་ལྡན་པ་རྣམས་སུ་འགྱུར་བ་དང ། བརྩོན་འགྲུས་དང་ལྡན་པ་རྣམས་སུ་འགྱུར་བ་དང ། མ་ཞུམ་པ་རྣམས་སུ་འགྱུར་བ་དང ། དོན་གྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཆོས་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཞི་གནས་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང ། ལྷག་མཐོང་གི་རྗེས་སུ་འགྲོ་བ་རྣམས་སུ་འགྱུར་བ་དང ། བསམ་གཏན་གྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཏིང་ངེ་འཛིན་གྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཤེས་རབ་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་རྣམས་ཀྱིས་མི་སྐྲག་མི་དངང་དངང་བར་མི་འགྱུར་བ་རྣམས་སུ་འགྱུར་བ་དང ། གཡང་ས་ཆེན་པོར་མི་ལྟུང་བའི་སྟེང་དུ་ཆོས་རབ་ཏུ་འཛིན་པ་དང ། ཆོས་སྨྲ་བ་ཆེན་པོ་རྣམས་སུ་འགྱུར་བ་དང ། སངས་རྒྱས་ཀྱི་ཞིང་གང་དང་གང་དུ་སྐྱེ་བར་སེམས་ཀྱི་སྨོན་པ་དེ་དང་དེར་སྐྱེ་བ་དང ། མུ་སྟེགས་ཅན་གྱི་གནས་ཐམས་ཅད་ཀྱིས་ཡོངས་སུ་མི་ཟིན་པ་རྣམས་སུ་འགྱུར་བ་དང ། རྒྱུའི་སྟོབས་ཅན་རྣམས་སུ་འགྱུར་གྱི་རྐྱེན་ཀྱི་སྟོབས་ཅན་རྣམས་སུ་མི་འགྱུར་བ་དང ། བསམ་པའི་སྟོབས་ཅན་རྣམས་སུ་འགྱུར་བ་དང ། སྦྱོར་བའི་སྟོབས་ཅན་རྣམས་སུ་འགྱུར་བ་དང ། དབང་པོའི་སྟོབས་ཅན་རྣམས་སུ་འགྱུར་བ་དང ། དམིགས་པའི་སྟོབས་ཅན་རྣམས་སུ་འགྱུར་བ་དང ། ངེས་པར་སེམས་པའི་སྟོབས་ཅན་རྣམས་སུ་འགྱུར་བ་དང ། ཞི་གནས་ཀྱི་སྟོབས་ཅན་རྣམས་སུ་འགྱུར་བ་དང ། རྣམ་པར་ལྟ་བའི་སྟོབས་ཅན་རྣམས་སུ་འགྱུར་བ་དང ། མོས་པའི་སྟོབས་ཅན་རྣམས་སུ་འགྱུར་བ་དང ། སྨོན་ལམ་གྱི་སྟོབས་ཅན་རྣམས་སུ་འགྱུར་བ་དང ། བསམ་པ 51.5b ཡོངས་སུ་མི་ཟད་པ་རྣམས་སུ་འགྱུར་བ་དང ། ཐོས་པ་རྒྱ་མཚོ་དང་མཚུངས་པས་རྒྱ་མཚོ་ཆུ་གཏེར་ལྟ་བུ་རྣམས་སུ་འགྱུར་བ་དང ། དཀར་པོའི་ཆོས་ཡོངས་སུ་རྫོགས་པས་ཟླ་བ་ལྟ་བུ་རྣམས་སུ་འགྱུར་བ་དང ། མི་ཤེས་པའི་མུན་པ་བསལ་བས་ཉི་མ་ལྟ་བུ་རྣམས་སུ་འགྱུར་བ་དང ། སྣང་བར་བྱེད་པས་མར་མེ་ལྟ་བུ་རྣམས་སུ་འགྱུར་བ་དང ། ཤིན་ཏུ་མི་གོས་པས་བར་སྣང་ལྟ་བུ་རྣམས་སུ་འགྱུར་བ་དང ། སེམས་ནམ་མཁའ་དང་མཚུངས་པས་མི་གནས་པ་རྣམས་སུ་འགྱུར་བ་དང ། ཆོས་ཐམས་ཅད་ངེས་པར་རྟོགས་པས་རྡོ་རྗེ་ལྟ་བུ་རྣམས་སུ་འགྱུར་བ་དང ། མཐུ་བརྟན་པས་རི་ལྟ་བུ་རྣམས་སུ་འགྱུར་བ་དང ། མི་གཡོ་བས་བརྟན་པའི་ཆོས་རྣམས་སུ་འགྱུར་བ་དང ། ལེགས་པར་གནས་པས་སྒོའི་ཐེམ་པ་ལྟ་བུ་རྣམས་སུ་འགྱུར་བ་དང ། སེམས་ལས་སུ་རུང་བས་བྱི་ལའི་ལྤགས་པ་ལྟ་བུ་རྣམས་སུ་འགྱུར་བ་དང ། བྱ་ལྟར་གང་དང་གང་དུ་འདོད་པར་འགྲོ་བས་ཡོངས་སུ་འཛིན་པ་མ་མཆིས་པ་རྣམས་སུ་འགྱུར་བ་དང ། གདོལ་བུ་ལྟ་བུར་ང་རྒྱལ་བཅག་པ་རྣམས་སུ་འགྱུར་བ་དང ། གྲོང་དང་གྲོང་ཁྱེར་དང་གྲོང་རྡལ་དང ། ཡུལ་འཁོར་དང ། ཕོ་བྲང་འཁོར་ལ་མངོན་པར་དགའ་བ་མི་སྐྱེད་པ་དང ། རི་དགས་དང ། སྤྲེའུ་དང ། མཚུངས་པས་དགོན་པ་ལ་མངོན་པར་དགའ་བ་རྣམས་སུ་འགྱུར་བ་དང ། ཁྱིམ་པ་དང་རབ་ཏུ་བྱུང་བ་རྣམས་དང ། ལྷན་ཅིག་ཏུ་མི་སྟེན་པས་མ་འདྲེས་པ་རྣམས་སུ་འགྱུར་བ་དང ། ཚོགས་ཡོངས་སུ་སྡུད་པས་ཚོགས་ཀྱི་སྟོན་པ་རྣམས་སུ་འགྱུར་བ་དང ། སེམས་ཅན་ཐམས་ཅད་ཀྱིས་མི་བསྐྱོད་པ་རྣམས་སུ་འགྱུར་བ་དང ། བདུད་ཐམས་ཅད་ཀྱིས་གདུལ་དཀའ་བ་རྣམས་སུ་འགྱུར་བ་དང ། ཆོས་ཐམས་ཅད་ཤིན་ཏུ་ངེས་པར་ཤེས་པས་སོ་སོ་ཡང་དག་པར་རིག་པ་ཐོབ་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་མི་འཇོག་པ་རྣམས་སུ་འགྱུར་བ་དང ། བྱམས་པ་ཆེན་པོ་རབ་ཏུ་མི་གཡོ་བས་ཟིལ་ཀྱིས་གནན་པར་དཀའ་ཞིང་བསམ་པ་བརྟན་པ་རྣམས་སུ་འགྱུར་བ་དང ། དམིགས་སུ་མེད་པ་ལ་སྤྱད་ཅིང་བརྗོད་དུ་མེད་པའི་སྤྱོད་ཡུལ་དང་ལྡན་པས་ལྷག་པའི་བསམ་པ་ཟབ་པ་རྣམས་སུ་འགྱུར་བ་དང ། ཆོས་ཀྱི་ཤུགས་ཀྱིས 51.6a དགའ་བས་བག་ཡོད་པ་མང་ཞིང་བསམ་པ་མཉེན་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་ལ་མཆོད་པ་དང་རིམ་གྲོའི་ལས་བགྱིད་པས་ལྷག་པའི་བསམ་པ་རྒྱ་ཆེ་བ་རྣམས་སུ་འགྱུར་བ་དང ། དགེ་བའི་རྩ་བ་སྣ་ཚོགས་ཡང་དག་པར་བསྒྲུབས་པས་ལྷག་པའི་བསམ་པ་སྣ་ཚོགས་རྣམས་སུ་འགྱུར་བ་དང ། རྒྱན་ཀྱིས་བརྒྱན་པ་རྣམ་པར་དག་པས་ལྷག་པའི་བསམ་པ་དགེ་བ་རྣམས་སུ་འགྱུར་བ་དང ། བརྫུན་དང་ཁོང་ཁྲོ་བའི་སྐྱོན་སྤངས་པས་ལྷག་པའི་བསམ་པ་བཟང་པོ་རྣམས་སུ་འགྱུར་བ་དང ། ཐམས་ཅད་མཁྱེན་པའི་ཡེ་ཤེས་ཀྱི་སྣང་བ་ཐོབ་པས་ལྷག་པའི་བསམ་པ་ཡོངས་སུ་དག་པ་རྣམས་སུ་འགྱུར་བ་དང ། སེམས་དང་ཞིང་ཐ་བ་མེད་ལ་ཤེས་རབ་རྒྱས་པ་ཡོངས་སུ་བཟུང་བས་ཡིད་བདེ་བའི་ལྷག་པའི་བསམ་པ་རྣམས་སུ་འགྱུར་བ་དང ། འཇིག་རྟེན་གྱི་ཁམས་ཐམས་ཅད་རྒྱན་གྱིས་བརྒྱན་པ་རྣམ་པར་དག་པས་བཀོད་པ་ཆེན་པོ་ལ་སྤྱད་པའི་ལྷག་པའི་བསམ་པ་རྣམས་སུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་སེམས་ཡིད་ལ་བགྱི་བ་དང་བྲལ་བས། ཚུལ་ཁྲིམས་ཡོངས་སུ་དག་པ་རྣམས་སུ་འགྱུར་བ་དང ། བརྩམས་པ་ཐམས་ཅད་ཉམས་སུ་ལོན་པས་ཡི་དམ་ལ་བརྟན་པ་རྣམས་སུ་འགྱུར་བ་དང ། སེམས་ཅན་ཐམས་ཅད་དགེ་བའི་ཆོས་རྗེས་སུ་སྤྱོད་པའི་སྔོན་དུ་འགྲོ་བ་རྣམས་སུ་འགྱུར་བ་དང ། བྱང་ཆུབ་སེམས་དཔའ་ཐམས་ཅད་ཀྱི་བསླབ་པ་རྣམས་དང་ཕ་རོལ་ཏུ་ཕྱིན་པ་རྣམས་ལ་ཡོངས་སུ་མི་འཇིགས་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ལ་ཕྱིར་མི་ལྡོག་པ་རྣམས་སུ་འགྱུར་བ་དང ། བདུད་དང་མུ་སྟེགས་ཅན་གཞན་དང་ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པ་རྣམས་སུ་འགྱུར་བ་དང ། ཡིད་ལ་བྱེད་པ་རྣམས་སངས་རྒྱས་ཀྱི་ཆོས་རྣམས་ལ་གཞོག་པས་ཆོས་ཐམས་ཅད་ལ་མོས་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་ལ་ཕར་འདུ་ཤེས་པ་རྣམས་སུ་འགྱུར་བ་དང ། ཆོས་ཐམས་ཅད་ལ་སྣང་བ་སྐྱེས་པས་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་རྣམས་སུ 51.6b འགྱུར་བ་དང ། སངས་རྒྱས་ཀྱི་ཆོས་ཐམས་ཅད་མངོན་དུ་གྱུར་པས་ཤེས་པ་སྒྲིབ་པ་མེད་པ་རྣམས་སུ་འགྱུར་བ་དང ། ཆོས་ཐམས་ཅད་ལ་རློམ་སེམས་མེད་པས་སྒྱུ་མའི་སྐྱེས་བུ་རྣམས་སུ་འགྱུར་བ་དང ། མ་སྐྱེས་མ་འོངས་ཤིང་འགྲོ་བ་མེད་པའི་ཆོས་དང་ལྡན་པས་སྤྲུལ་པ་ལྟ་བུ་རྣམས་སུ་འགྱུར་བ་དང ། དུས་གསུམ་ལ་རྟོག་པས་རྨི་ལམ་ལྟ་བུ་རྣམས་སུ་འགྱུར་བ་དང ། འཇིག་རྟེན་གྱི་ཁམས་ཐམས་ཅད་དུ་རང་གི་ལུས་ཡང་དག་པར་སྟོན་པས་གཟུགས་བརྙན་ལྟ་བུ་རྣམས་སུ་འགྱུར་བ་དང ། འཕོ་བ་མེད་ཅིང་མི་གནས་ལ་རྟེན་པ་མེད་པའི་ཆོས་ཅན་པས་བྲག་ཆ་ལྟ་བུ་རྣམས་སུ་འགྱུར་བ་དང ། འཆི་འཕོ་དང ། སྐྱེ་བ་ཐམས་ཅད་ལ་གྲིབ་མ་ལྟ་བུ་རྣམས་སུ་འགྱུར་བ་དང ། དངོས་པོའི་འདུ་ཤེས་སྤངས་པས་དངོས་པོ་མེད་པར་ཤེས་པ་ལ་གནས་པ་རྣམས་སུ་འགྱུར་བ་དང ། གཉིས་ལ་ཀུན་ཏུ་སྤྱོད་པ་མེད་པས་མཚན་ཉིད་མེད་པའི་ཆོས་ལ་གཞོལ་བ་རྣམས་སུ་འགྱུར་བ་དང ། བྱང་ཆུབ་ཀྱི་སེམས་ཚད་མེད་པས། ཆོས་ཀྱི་དབྱིངས་ཀྱི་མཐས་གཏུགས་པ་རྣམས་སུ་འགྱུར་བ་དང ། སེམས་ཀྱི་རྒྱུད་མི་གཡོ་བས་འཇིག་རྟེན་གྱི་ཁམས་ཐམས་ཅད་དུ་མི་གཡོ་བ་རྣམས་སུ་འགྱུར་བ་དང ། སངས་རྒྱས་ཀྱི་ཞིང་ཐམས་ཅད་ལ་མི་ཆགས་པའི་སྤྱོད་ཡུལ་དང་ལྡན་པ་རྣམས་སུ་འགྱུར་བ་དང ། ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་ལ་མཁས་པས། གཟུངས་ཀྱི་སྒོ་རྣམས་སུ་ཞུགས་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་གྱུར་པས་ཆོས་ཀྱི་སྣོད་རྣམས་སུ་འགྱུར་བ་དང ། སངས་རྒྱས་ཀྱི་གཟི་བརྗིད་ཀྱིས་བརྟན་པས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་རྣམས་སུ་འགྱུར་བ་དང ། ཁྱུ་མཆོག་དང་སེང་གེའི་སྒྲ་སྒྲོགས་པས་བག་ཚ་བ་མེད་པ་རྣམས་སུ་འགྱུར་བ་དང ། འཇིག་རྟེན་པ་ཐམས་ཅད་ཡང་དག་པར་དགའ་བར་བྱེད་པས་འཇིགས་པ་མེད་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་དང་མཉམ་པས་རྨོངས་པ་མེད་པ་རྣམས་སུ་འགྱུར་བ་དང ། ཆོས་ཐམས་ཅད་ལ་གཞན་གྱི་དྲིང་མི་འཇོག 51.7a ཅིང་ཐེ་ཙོམ་དང་བྲལ་བས་དེ་བཞིན་ཉིད་རབ་ཏུ་རྟོགས་པ་རྣམས་སུ་འགྱུར་བ་དང ། དྲིས་པ་ཐམས་ཅད་ལུང་བསྟན་པ་ལ་སྲིད་པ་དང་དུས་གསུམ་སྟོན་ནུས་པ་རྣམས་སུ་འགྱུར་བ་དང ། སྙིང་རྗེ་ཆེན་པོ་ཐོབ་པས་ཕན་པ་འདོད་པ་རྣམས་སུ་འགྱུར་བ་དང ། ཆོས་སྟོན་པ་ལ་ངལ་བ་མེད་པ་རྣམས་སུ་འགྱུར་བ་དང ། སེམས་ཅན་ཐམས་ཅད་ཡོངས་སུ་མི་གཏོང་བ་ལ་གནས་པ་རྣམས་སུ་འགྱུར་བ་དང ། སྒྱུ་མེད་པས་གཡོ་མེད་པ་རྣམས་སུ་འགྱུར་བ་དང ། འཇིག་རྟེན་ཐམས་ཅད་ཀྱི་སྒྲོན་མར་གྱུར་པས་དྲང་པོ་རྣམས་སུ་འགྱུར་བ་དང ། ཁམས་གསུམ་ཐམས་ཅད་ན་ཚད་མེད་པ་རྣམས་སུ་འགྱུར་བ་དང ། ཐ་སྙད་ཙམ་དུ་རྣམ་པར་དཔྱོད་པས་ཉོན་མོངས་པ་མེད་པ་ལ་གནས་པ་རྣམས་སུ་འགྱུར་བ་དང ། གཞི་མེད་པ་ལ་དགའ་བས་མ་འདྲེས་པར་གནས་པ་རྣམས་སུ་འགྱུར་བ་དང ། རྣམ་པར་མི་རྟོག་པའི་ཆོས་ཅན་པས་ཡང་དག་པའི་མཐའ་ལ་གནས་པ་རྣམས་སུ་འགྱུར་བ་དང ། ཐེག་པ་ཆེན་པོ་ལ་སེམས་ཅན་ཐམས་ཅད་གཞོག་པས་ཐམས་ཅད་མཁྱེན་པའི་གཏམ་ཡང་དག་པར་སྟོན་པ་རྣམས་སུ་འགྱུར་བ་དང ། འཇིགས་ཤིང་སྤུ་ཟིང་ཞེས་བྱེད་པ་ཐམས་ཅད་དང་བྲལ་བས་མི་འཇིགས་པ་ཐོབ་པ་རྣམས་སུ་འགྱུར་བ་དང ། མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་དེ་བཞིན་གཤེགས་པའི་དགོངས་ཏེ་གསུངས་པ་ལ་མཁས་པ་རྣམས་སུ་འགྱུར་བ་དང ། འཁོར་ཐམས་ཅད་ཀྱི་ནང་དུ་ཉེ་བར་འགྲོ་བས་བཞིན་ཀུན་ཏུ་སྟོན་པ་རྣམས་སུ་འགྱུར་བ་དང ། ཐེག་པ་ཆེན་པོ་ལ་འཇིག་རྟེན་པ་ཐམས་ཅད་ཀྱིས་མཆོད་ཅིང་ཐམས་ཅད་མཁྱེན་པ་ལྟར་བསོད་ནམས་གྱི་བདག་པོ་རྣམས་སུ་འགྱུར་བ་དང ། འཇིག་རྟེན་པ་ཐམས་ཅད་ཀྱི་སྦྱིན་གནས་སུ་གྱུར་པས་ཡོན་ཏན་ཟད་མི་ཤེས་པ་རྣམས་སུ་འགྱུར་བ་དང ། དེ་བཞིན་གཤེགས་པའི་ཞབས་ཀྱི་དྲུང་དུ་དགའ་བ་དང ། དད་པ་ཆེན་པོ་རབ་ཏུ་རྙེད་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་དྲི་བ་ལ་དགེ་བའི་སྤོབས་པ་ཅན་རྣམས་སུ་འགྱུར་བ་དང ། འཁོར་གྱི་ནང་དུ་འཇིགས་ཤིང་བག་ཚ་བ་སྤངས་པས་ཡིད་སྤ་མི་འགོང་བ་རྣམས་སུ་འགྱུར་བ་དང ། ཕས་ཀྱི 51.7b རྒོལ་བ་ཐམས་ཅད་ཚར་གཅོད་པས་སྨྲ་བའི་སྟག་ལྟ་བུ་རྣམས་སུ་འགྱུར་བ་དང ། ཕ་རོལ་གྱི་ཕྱོགས་ཐམས་ཅད་འཇོམས་པས་དམ་བཅས་པ་མ་ཉམས་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་ཀྱིས་གནང་བས་ཆོས་ཀྱི་འཕེལ་བའི་གཏམ་གཏན་ལ་འབེབས་པའི་ཕྱིར། སེང་གེའི་སྒྲ་སྒྲོག་ཅིང་སེང་གེའི་ཁྲི་ལ་འདུག་པ་མང་བ་རྣམས་སུ་འགྱུར་བ་དང ། ཡང་དག་པར་བརྗོད་པ་ལ་འཇུག་པ་ཐམས་ཅད་རབ་ཏུ་རྟོགས་པས། འཇིག་རྟེན་རྒྱང་ཕན་པ་ཐམས་ཅད་མ་བསྟན་པ་རྣམས་སུ་འགྱུར་བ་དང ། སངས་རྒྱས་སུ་འགྱུར་བའི་རྒྱུ་ལ་གནས་པས་དམ་པའི་ཆོས་སྨྲ་བ་རྣམས་སུ་འགྱུར་བ་དང ། དེ་བཞིན་གཤེགས་པའི་ཞབས་འབྲིང་བགྱིད་པས་ཆོས་འདོད་པ་རྣམས་སུ་འགྱུར་བ་དང ། དགེ་བའི་བཤེས་གཉེན་ལ་བསྙེན་བཀུར་བགྱིད་པ་ལ་མི་སྐྱོ་བ་རྣམས་སུ་འགྱུར་བ་དང ། ཕྱོགས་བཅུར་རྣམ་པར་རྒྱུ་བས་གནས་མ་མཆིས་པ་རྣམས་སུ་འགྱུར་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བགྱིད་པས་སྨོན་ལམ་འདེབས་པ་རྣམས་སུ་འགྱུར་བ་དང ། རིན་པོ་ཆེའི་མཆོག་ལ་ངལ་སོས་པར་བགྱིད་པ་ལ་མཁས་པས། ཆོས་ཀྱི་རྒྱ་མཚོར་ཞུགས་པ་རྣམས་སུ་འགྱུར་བ་དང ། འཇིག་རྟེན་གྱི་ཁམས་ཐམས་ཅད་རྣམ་པ་སྣ་ཚོགས་ཀྱིས་བརྒྱན་པས། འཇིག་རྟེན་གྱི་ཁམས་ཐམས་ཅད་མི་གཡོ་བ་རྣམས་སུ་འགྱུར་བ་དང ། སངས་རྒྱས་ཀྱི་ཆོ་འཕྲུལ་གྱིས་རྣམ་པར་འཕྲུལ་གྱིས། རྣམ་པར་རོལ་པ་སྤྱོད་པས་ཆོ་འཕྲུལ་ཆེན་པོ་མྱོང་བ་རྣམས་སུ་འགྱུར་བ་དང ། སངས་རྒྱས་བལྟ་བ་སེམས་ཀྱི་སྐད་ཅིག་གཅིག་ལ་རག་ལས་པ་རྣམས་སུ་འགྱུར་བ་དང ། ཆོས་ལ་གུས་པ་རྙེད་པས། ཡེ་ཤེས་ཀྱིས་བསྐོར་བ་རྣམས་སུ་འགྱུར་བ་དང ། ཆོས་ཀྱི་སྐུ་དང་འདྲ་བར་རྟོགས་པས། ནམ་མཁའ་ལྟ་བུ་རྣམས་སུ་འགྱུར་བ་དང ། སངས་རྒྱས་ཀྱི་གདུང་མི་འཆད་པར་བགྱིད་པས། བྱང་ཆུབ་སེམས་དཔའ་རྣམས་ཡང་དག་པར་འཛིན་ཏུ་འཇུག་པ་རྣམས་སུ་འགྱུར་བ་དང ། བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་གཅོད་པ་རྣམས་སུ་འགྱུར་བ་དང ། ལེགས་པར་གནས 51.8a ཤིང་མྱུར་བའི་ཅང་ཤེས་པས། གོ་ཅ་ཆེན་པོ་བགོས་པ་རྣམས་སུ་འགྱུར་བ་དང ། དེ་བཞིན་གཤེགས་པའི་སྟོབས་བཅུའི་ས་ལ་ཐམས་ཅད་མཁྱེན་པ་ཉིད་དུ་དབང་བསྐུར་བས་དབང་བསྐུར་བ་རྣམས་སུ་འགྱུར་བ་དང ། བགྲང་བའི་ཚུལ་གྱི་ཆོག་ཤེས་པས་འདུ་ཤེས་ཀྱི་རྣམ་པ་ཐམས་ཅད་རབ་ཏུ་རྟོགས་པ་རྣམས་སུ་འགྱུར་བ་དང ། གྲངས་ཀྱི་རྣམ་པ་ཐམས་ཅད་ཉེ་བར་རྟོགས་པས་འཇིག་པ་དང ། ཆགས་པ་ཐམས་ཅད་ལ་མཁས་པ་རྣམས་སུ་འགྱུར་བ་དང ། གཏོང་བ་ཐམས་ཅད་ལ་ནན་ཏན་བགྱིད་པས་མི་གནས་ཤིང་ལེན་པ་མ་མཆིས་པ་རྣམས་སུ་འགྱུར་བ་དང ། འགྱོད་པ་མེད་པའི་སྦྱིན་བདག་ཆེན་པོར་གྱུར་པས་གཏོང་བ་ལ་མཁས་པ་རྣམས་སུ་འགྱུར་བ་དང ། སྲིད་པའི་འགྲོ་བ་ཐམས་ཅད་ཀྱི་སྐྱེ་བའི་གནས་རྣམས་དོན་དུ་མི་གཉེར་བ་རྣམས་སུ་འགྱུར་བ་དང ། འཇིག་རྟེན་གྱི་ཁམས་གཞན་ན་བཞུགས་པའི། སངས་རྒྱས་བཅོམ་ལྡན་འདས་རྣམས་ཀྱི། སངས་རྒྱས་ཀྱི་ཞིང་དག་མཐོང་ཞིང ། ཆོས་ཀྱང་ཉན་ལ་དེ་ཡང་འཛིན་ཅིང་མི་བསྐྱུད་ལ་ལྔ་མངོན་པར་ཤེས་པ་ཡང་མ་ལགས་ཤིང ། དྲུག་མངོན་པར་ཤེས་པ་ཡང་མ་ལགས་ཤིང ། བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་ནས་ཤི་འཕོས་ཏེ། སངས་རྒྱས་ཀྱི་ཞིང་དེ་དག་ན་གནས་པ་ཡང་མ་ལགས་ལ། བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་ཉིད་ན་གནས་བཞིན་དུ། སངས་རྒྱས་རྣམས་ཀྱང་མཐོང་ལ་ཆོས་ཀྱང་ཉན་ཅིང ། དེ་ཐམས་ཅད་ཀྱང་ཀུན་ཏུ་འཛིན་ཏེ། ཇི་ལྟར་བདག་ད་ལྟར་བཅོམ་ལྡན་འདས་ཀྱི་སྤྱན་སྔ་ན་མཆིས་བཞིན་དུ་ཐེ་ཙོམ་དང་ནེམ་ནུར་མ་མཆིས་པ་དེ་བཞིན་དུ། བྱང་ཆུབ་སེམས་དཔའ་དེ་རྣམས་ཀྱང་ཐ་ན་རྨི་ལམ་ན་ཡང་སངས་རྒྱས་མཐོང་ཞིང ། ཆོས་ཉན་པ་དང་མི་འབྲལ་བ་རྣམས་སུ་འགྱུར་བའི་ཏིང་ངེ་འཛིན་གང་ལགས། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་དང་པོའོ།། །། དེ་སྐད་ཅེས་གསོལ་པ་དང ། 51.8b བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ལེགས་སོ་ལེགས་སོ། །ཡང་བཟང་སྐྱོང་ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་ཞུགས་ཤིང ། བཟང་སྐྱོང་ཁྱོད་དེ་ལྟར་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ལེགས་སོ། །བཟང་སྐྱོང་ཁྱོད་ནི་སྔོན་གྱི་རྒྱལ་བ་ལ་བྱ་བ་བྱས་ཤིང་དགེ་བའི་རྩ་བ་བསྐྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ། ཆོས་དོན་དུ་གཉེར་བ། ཆོས་འདོད་པ། མི་དམིགས་པ། ཚངས་པར་སྤྱོད་པ། བྱང་ཆུབ་སེམས་དཔའ་རྣམས་ཡང་དག་པར་སློབ་པར་བྱེད་པ། བྱང་ཆུབ་སེམས་དཔའ་རྣམས་ཡང་དག་པར་དགའ་བར་བྱེད་པ། བྱང་ཆུབ་སེམས་དཔའ་རྣམས་ལ་སྟོན་པ། བྱང་ཆུབ་སེམས་དཔའ་རྣམས་ལ་ཡང་དག་པར་འཛིན་དུ་འཇུག་པ། བྱང་ཆུབ་སེམས་དཔའ་རྣམས་ལ་ཡང་དག་པར་གཟེང་བསྟོད་པ། བྱང་ཆུབ་སེམས་དཔའ་རྣམས་ལ་ལུང་འབོག་པ། བྱང་ཆུབ་སེམས་དཔའ་རྣམས་ལ་སྒྲུབ་པར་བྱེད་པ། བྱང་ཆུབ་སེམས་དཔའ་རྣམས་ལ་ཕན་པར་འདོད་པ། སྙིང་རྗེ་ཆེ་བ། སེམས་ཅན་ཐམས་ཅད་ལ་སེམས་མཉམ་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། སངས་རྒྱས་མཐོང་བ་སྨོན་ལམ་རྒྱ་ཆེ་བ། སྤྱོད་ཡུལ་ཟབ་པ། ཐམས་ཅད་མཁྱེན་པ་སེམས་པ། བྱང་ཆུབ་ཡང་དག་པར་འཛིན་པ། དེ་བཞིན་གཤེགས་པའི་གདུང་སྟོན་པ། བྱང་ཆུབ་ཀྱི་སེམས་རྡོ་རྗེ་ལྟ་བུ་དང་མཉམ་ཞིང་མཚུངས་པ། སེམས་ཅན་ཐམས་ཅད་ཀྱི་བསམ་པ་ཀུན་ཏུ་སྤྱོད་པ་ལ་མཁས་པ། སངས་རྒྱས་ཐམས་ཅད་དང་མངོན་སུམ་དུ་གནས་པ་སྟེ། བཟང་སྐྱོང་ཁྱོད་ཀྱི་ཡོན་ཏན་བརྗོད་ན་ལྟ་མཐར་མི་ཕྱིན་ཏོ། །བཟང་སྐྱོང་ད་ལྟར་གྱི 51.9a སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་བཟུང་ཞིང་མ་བརྗེད་ལ། རྣ་བླགས་ཏེ་ཉན་ཅིང་སེམས་མི་གཡེང་བ་རྙེད་ན། ཡོན་ཏན་གྱི་ཁྱད་པར་དེ་དག་རྙེད་པ་མི་དཀའ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བས་ན་དེ་བཞིན་གཤེགས་པས་ཏིང་ངེ་འཛིན་དེ་བཤད་པར་གསོལ། དེ་ནི་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མིའི་དོན་དང ། སྨན་པ་དང་བདེ་བར་འགྱུར་ཞིང ། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཡང་སྣང་བ་ཆེན་པོ་བགྱིས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དེ་བཞིན་ནོ། །ཞེས་གསོལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཆོས་གཅིག་ལ་ཀུན་ཏུ་བསྟེན་ངེས་པར་བསྟེན་ཅིང་བསྒོམ་པ་ལ་ལན་མང་དུ་བྱས། ལམ་དུ་བྱས། གཞིར་བྱས། ཡང་དག་པར་བསླང ། ལེགས་པར་བྱང་བར་བྱས། ཤིན་ཏུ་ཡོངས་སུ་སྦྱངས། ཤིན་ཏུ་མཉམ་པར་བཞག་།ཤིན་ཏུ་ཡང་དག་པར་བརྩམས་ན་ཡོན་ཏན་ཐམས་ཅད་ཁྱད་པར་དུ་འཕགས་པར་འགྱུར་རོ། །ཆོས་གཅིག་པོ་གང་ཞེ་ན། འདི་ལྟ་སྟེ། ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཏེ། མང་དུ་ཐོས་པ་སྔོན་དུ་འགྲོ་བའི་ཆོས་རྣམས་ཡོངས་སུ་རྫོགས་པར་འགྱུར་རོ། །བཟང་སྐྱོང་དེ་ལ 51.9b ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་དེ་གང་ཞེ་ན། འདི་ལྟ་སྟེ། སངས་རྒྱས་ལ་དམིགས་པའི་སེམས་ཡིད་ལ་བྱེད་པ། སེམས་མི་གཡེང་བ། དྲན་པ་ཉེ་བར་གནས་པ། ཤེས་རབ་ཐོབ་པ། བརྩོན་འགྲུས་མི་གཏོང་བ། དགེ་བའི་བཤེས་གཉེན་རྣམས་ལ་བསྙེན་བཀུར་བྱེད་པ། སྟོང་པ་ཉིད་ཀུན་ཏུ་སྟེན་པ། སྒོམ་པ་མང་དུ་བྱེད་པ། སྒྲིབ་པ་རྣམས་སྤོང་བ། རྨུགས་པ་དང་གཉིད་རྣམ་པར་སྤོང་བ། གཏམ་ཡོངས་སུ་སྤོང་བ། སྡིག་པའི་གྲོགས་པོ་རྣམས་རྣམ་པར་སྤོང་བ། དགེ་བའི་བཤེས་གཉེན་རྣམས་ལ་ངེས་པར་སྟེན་པ། དབང་པོ་རྣམས་མི་གཡེང་བ། ཟས་ཀྱི་ཚོད་ཤེས་པ། ནམ་གྱི་ཆ་སྟོད་དང ། ཆ་སྨད་ལ་མི་ཉལ་བའི་བརྩོན་འགྲུས་དང་ལྡན་པ། གོས་དང ། ཟས་དང ། མལ་སྟན་དང ། ན་བའི་གསོས་སྨན་དང ། ཡོ་བྱད་རྣམས་ལ་མི་ཆགས་པ། དགོན་པ་ལ་གནས་པ་མི་གཏོང་བ། ལུས་ལ་ཆེད་ཆེ་བར་མི་བྱེད་པ། སྲོག་ལ་མི་ལྟ་བ། ལུས་གཏོང་བ། སེམས་ཅན་ལ་ཕན་འདོགས་པ། གཉེན་རྣམས་ཡོངས་སུ་སྤོང་བ། སྐྱེས་པའི་ས་རིང་དུ་བྱེད་པ། བྱམས་པ་ལ་ཀུན་ཏུ་སྟེན་པ། སྙིང་རྗེ་ཐོབ་པ། དགའ་བ་ལ་གནས་པ། བཏང་སྙོམས་སྒོམ་པ། ཉེ་བའི་ཉོན་མོངས་པ་རྣམས་ཡོངས་སུ་གཏོང་བ། བསམ་གཏན་རྣམས་སྒྲུབ་ཅིང་དེ་དག་གི་རོ་མྱོང་བར་མི་བྱེད་པ། གཟུགས་ཀྱི་འདུ་ཤེས་རྣམ་པར་འཇིག་པ། མི་སྡུག་པའི་འདུ་ཤེས་རྙེད་པ། དྲན་པ་མི་གཡེང་བ་ཕུང་པོ་རྣམས་ཡོངས་སུ་མི་འཛིན་པ། ཁམས་རྣམས་ལ་རློམ་སེམས་མེད་པ། སྐྱེ་མཆེད་རྣམས་ལ་མངོན་པར་མི་ཆགས་པ། རིགས་སྨྲ་བས་སྙེམས་པར་མི་བྱེད་པ། ང་རྒྱལ་ཚར་གཅོད་པ། གཞན་གྱི་རྙེད་པ་ལ་ཕྲག་དོག་མེད་པ། སེམས་ཅན་ལ་ཕན་པའི་གཞིར་གྱུར་པ། སེམས་ཅན་ཐམས་ཅད་ལ་སེམས་མཉམ་པ། སེམས་ཅན་ཐམས་ཅད་མི་གཏོང་བ། སེམས་ཅན་ཐམས་ཅད་ཡོངས་སུ་གྲོལ་བར་བྱེད་པ། སེམས་ཅན་ཐམས་ཅད་ལ་བདག་ཏུ་འདུ་ཤེས་པ། སེམས་ཅན 51.10a ཐམས་ཅད་ལ་མར་འདུ་ཤེས་པ། ཕར་འདུ་ཤེས་པ། བུར་འདུ་ཤེས་པ། གཉེན་དུ་འདུ་ཤེས་པ། སེམས་ཅན་ཐམས་ཅད་ལ་ཉོན་མོངས་པ་མེད་པར་འདུ་ཤེས་པ། དངོས་པོ་ཐམས་ཅད་ཡོངས་སུ་མི་འཛིན་པ། ཚུལ་ཁྲིམས་མཆོག་ཏུ་མི་འཛིན་པ། ཏིང་ངེ་འཛིན་ལ་ངེས་པར་སྟེན་པ། མང་དུ་ཐོས་པ་འདོད་ཅིང་དེས་ཀྱང་རློམ་སེམས་སུ་མི་བྱེད་པ། ཚུལ་ཁྲིམས་ཀྱི་ཕུང་པོ་ལ་སྐྱོན་མེད་པ། ཏིང་ངེ་འཛིན་གྱི་ཕུང་པོ་ལ་གཡོ་བ་མེད་པ། ཆོས་རྣམས་ལ་ཐེ་ཙོམ་མེད་པ། སངས་རྒྱས་དང་འཐུན་པ། ཆོས་མི་སྤོང་བ། དགེ་འདུན་མི་འབྱེད་པ། ཕྲ་མའི་ཚིག་སྤོང་བ། འཕགས་པ་རྣམས་ཀྱི་དྲུང་དུ་ཉེ་བར་འགྲོ་ཞིང་དེ་དག་ལ་བསྙེན་བཀུར་བྱེད་པ། བྱིས་པ་རྣམས་རྣམ་པར་སྤོང་བ། འཇིག་རྟེན་པའི་གཏམ་ལ་མངོན་པར་མི་དགའ་ཞིང་མི་འདོད་ལ་རིང་དུ་བྱེད་པ། འཇིག་རྟེན་ལས་འདས་པའི་གཏམ་ལ་མངོན་པར་དགའ་ཞིང་འདོད་ལ་འདུན་ཅིང་སྟེན་པ། གཏམ་རྒྱུད་མ་ཡིན་པ་རྣམ་པར་སྤོང་བ། དགའ་བར་བྱེད་པའི་ཆོས་དྲུག་ལ་སྟེན་པ། སྙེན་པ་རྣམས་སྨྲ་བ། སྒྲིབ་པ་ལྔ་སྤོང་བ། རྣམ་པར་གྲོལ་བའི་སྐྱེ་མཆེད་ལྔ་ལ་སྟེན་པ། ཕུང་པོ་ལྔ་ཡོངས་སུ་ཤེས་པ། མི་དགེ་བ་བཅུའི་ལས་ཀྱི་ལམ་རྣམ་པར་སྤོང་བ། དགེ་བ་བཅུའི་ལས་ཀྱི་ལམ་སྒོམ་པ་སྟོབས་བཅུ་སྒྲུབ་པ། ཀུན་ནས་མནར་སེམས་ཀྱི་དངོས་པོ་དགུ་རྣམ་པར་སྦྱོང་བ། འདུ་ཤེས་དགུ་རྣམ་པར་འཇིག་པ། ལེ་ལོའི་དངོས་པོ་བརྒྱད་རྣམ་པར་སྤོང་བ། བརྩམ་པའི་དངོས་པོ་བརྒྱད་ལ་ངེས་པར་སྟེན་པ། ཟིལ་གྱིས་གནོན་པའི་སྐྱེ་མཆེད་བརྒྱད་ལ་ཀུན་ཏུ་སྟེན་པ། རྣམ་པར་གྲོལ་བ་བརྒྱད་སྒོམ་པ། སྐྱེས་བུ་ཆེན་པོའི་རྣམ་པར་རྟོག་པ་བརྒྱད་ཐོབ་པ། འཕགས་པའི་ལམ་ཡན་ལག་བརྒྱད་པ་དང་འཐུན་པ། བསམ་གཏན་ལ་མི་ཆགས་པ། ཐོས་པས་རློམ་སེམས་མི་བྱེད་པ། ང་རྒྱལ་བཅོམ་པ། ཆོས་ཉན་པར་འདོད་པ། ཆོས་འདོད་པ། ཆོས་དོན་དུ་གཉེར་བ། ཆོས་ལ་འདུན་པ། ཆོས་ལ་ཕྱོགས་པ། ཆོས་ལ་འབབ 51.10b པ་ཆོས་ལ་གཞོལ་བ། ཆོས་ལ་བརྩོན་པ། བདག་ཏུ་འདུ་ཤེས་པས་རློམ་སེམས་སུ་མི་བྱེད་པ། སེམས་ཅན་དུ་འདུ་ཤེས་པ་སྤོང་བ། སྲོག་ཏུ་འདུ་ཤེས་པ་མི་དམིགས་པ། གང་ཟག་ཏུ་འདུ་ཤེས་པ་ཡོངས་སུ་སྤོང་བ། ཕུང་པོར་འདུ་ཤེས་པ་རྣམས་སེལ་བ། དངོས་པོར་འདུ་ཤེས་པ་ལ་མི་གནས་པ། མྱ་ངན་ལས་འདའ་བ་མི་འདོད་པ། ཕུང་པོ་རྣམས་མི་འདོད་པ། འཁོར་བ་ལ་མི་ཟད་པའི་འཇིགས་པར་འདུ་ཤེས་པ། ཕུང་པོ་རྣམས་ལ་གཤེད་མར་འདུ་ཤེས་པ། ཁམས་རྣམས་ལ་སྦྲུལ་གདུག་པར་འདུ་ཤེས་པ། སྐྱེ་མཆེད་རྣམས་ལ་གྲོང་སྟོང་པར་འདུ་ཤེས་པ། ཁམས་གསུམ་ལ་མི་བདེ་བར་འདུ་ཤེས་པ། མྱ་ངན་ལས་འདས་པ་ལ་ཕན་ཡོན་དུ་ལྟ་བ། འདོད་པ་རྣམས་ལ་མཆིལ་མའི་ཐལ་བ་ལྟར་སྤོང་བར་འདུ་ཤེས་པ། ཟས་ལ་མི་མཐུན་པར་འདུ་ཤེས་པ། མངོན་པར་འབྱུང་བ་ལ་གཞོལ་བ། ཁྱིམ་ན་གནས་པ་ལ་མངོན་པར་མི་དགའ་བ། བུ་དང་བུ་མོ་རྣམས་ལ་དགྲར་འདུ་ཤེས་པ། ཆུང་མ་ལ་སྲིང་མོར་འདུ་ཤེས་པ། སངས་རྒྱས་ཀྱི་བསྟན་པ་ལ་མི་ཕྱེད་པར་དད་པ། སེམས་ཅན་ཐམས་ཅད་དང་མི་མཐུན་པ་མེད་པ། འཇིག་རྟེན་གྱི་ཁམས་ཐམས་ཅད་དུ་གནས་པ་མེད་པ། སངས་རྒྱས་ཐམས་ཅད་མངོན་སུམ་དུ་གྱུར་པ། ལེགས་པར་བསྙེན་པར་རྫོགས་ཤིང་ཚངས་པ་ལེགས་པར་སྤྱད་པ། ལུས་ཐམས་ཅད་རྟོགས་པ། མོས་པ་ཡོངས་སུ་དག་པ། ལྷག་པའི་བསམ་པ་དགེ་བ། སེམས་ལས་སུ་རུང་བ། མི་རིགས་པ་ལ་བརྩོན་པ་རྣམས་རྣམ་པར་སྤོང་བ། རིགས་པར་བརྩོན་པ་རྣམ་པར་སྟོན་པ། མཚན་མ་ཐམས་ཅད་རྣམ་པར་སེལ་བ། དུས་གསུམ་མཉམ་པ། སངས་རྒྱས་ཐམས་ཅད་རྗེས་སུ་དྲན་པ། དགེ་བའི་རྩ་བ་ཐམས་ཅད་སྐྱེད་པ། སངས་རྒྱས་ཐམས་ཅད་ཀྱི་བྱིན་གྱིས་བརླབས་པ། ཏིང་ངེ་འཛིན་ཐམས་ཅད་ལ་དབང་བ། སངས་རྒྱས་ཀྱི་སྐུའི་མཚན་ལ་མངོན་པར་མི་ཆགས་པ། ཆོས 51.11a ཐམས་ཅད་ལ་མཉམ་པ། འཇིག་རྟེན་དང་མི་རྩོད་པ། བྱ་བ་རྣམས་ལ་མི་མཐུན་པ་མེད་པ། རྟེན་ཅིང་འབྲེལ་པར་འབྱུང་བ་རྟོགས་པ། ངེས་པར་འབྱུང་བའི་ལམ་དེ་བཞིན་གཤེགས་པའི་ས་ལ་བཟོད་པ་ཐོབ་པ། ཆོས་ཀྱི་དབྱིངས་ལ་འཇུག་པ། ནམ་མཁའི་ཁམས་ཡོངས་སུ་ཤེས་པ། སེམས་ཅན་གྱི་ཁམས་ལ་མངོན་པར་མི་ཆགས་པ། མི་སྐྱེ་བ། མི་འགག་པ། གནས་པ་མེད་པ། མྱ་ངན་ལས་འདས་པའི་དབྱིངས་མངོན་སུམ་དུ་གྱུར་པ། ཤེས་རབ་ཀྱི་མིག་རྣམ་པར་སྦྱོང་བ། ཆོས་ཐམས་ཅད་ལ་གཉིས་སུ་མེད་པ། བྱང་ཆུབ་ཀྱི་སེམས་ལ་མཐའ་དང་དབུང་མེད་པ། སེམས་ཀྱི་རྒྱུད་གཅིག་ཏུ་གྱུར་པ། སངས་རྒྱས་ཐམས་ཅད་དང་ཐོགས་པ་མེད་པའི་ཡེ་ཤེས་ལ་འཇུག་པ། ཡེ་ཤེས་ལ་སྒྲིབ་པ་མེད་པ། བྱང་ཆུབ་ཀྱི་ཕྱིར་སེམས་ཡོངས་སུ་སྨིན་པ། སངས་རྒྱས་ཀྱི་ཡེ་ཤེས་གཞན་ལ་རག་མ་ལས་པ། དགེ་བའི་བཤེས་གཉེན་རྣམས་ལ་སྟོན་པར་འདུ་ཤེས་པ། བྱང་ཆུབ་སེམས་དཔའ་རྣམས་ལ་མི་འབྱེད་པ། བདུད་ཀྱི་ལས་རྣམས་རྣམ་པར་སྤོང་བ། འགྲོ་བ་ཐམས་ཅད་སྤྲུལ་པ་དང་མཚུངས་པ། དེ་བཞིན་གཤེགས་པ་བལྟ་བ་ལ་མིག་ཡོར་དང་མཚུངས་པ། བྱང་ཆུབ་ཀྱི་སེམས་ཡོངས་སུ་ཚོལ་བ། ཕ་རོལ་ཏུ་ཕྱིན་པ་རྣམས་ལ་སེམས་མཉམ་པ། དེ་བཞིན་གཤེགས་པ་རྣམས་བལྟ་བ་ལ་ཡང་དག་པའི་མཐའ་དང་མཉམ་པ། སངས་རྒྱས་ཐམས་ཅད་ལ་ཡོན་ཏན་གྱི་ཆོས་ཐམས་ཅད་མཉམ་པ་འདི་ནི་བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཅེས་བྱའོ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་གཉིས་པའོ།། །།བཟང་སྐྱོང་ཆོས་དེ་རྣམས་ནི་ཏིང་ངེ་འཛིན་དེ་ཡོངས་སུ་སྐྱེད་པར་འགྱུར་ཏེ། བཟང་སྐྱོང་དེ་ལ་ཏིང་ངེ་འཛིན་གང་ཆོས་དེ་རྣམས་ཀྱིས་ཡོངས་སུ་སྐྱེད་པར་འགྱུར་བའི་ཏིང་ངེ་འཛིན་དེ་གང་ཞེ་ན། འདི་ལྟ་སྟེ། ད་ལྟར་གྱི་སངས་རྒྱས 51.11b མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཏོ། །བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་དེ་ཡང་གང་ཞེ་ན། བཟང་སྐྱོང་དེ་ལ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་ཚུལ་ཁྲིམས་ཡོངས་སུ་རྫོགས་པར་སྤྱོད་པར་འགྱུར་ལ། དེས་གཅིག་པུ་དབེན་པར་སོང་སྟེ་འདུག་ནས་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཕྱོགས་གང་རོལ་ན་གནས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཅིང་བཞུགས་སྙམ་དུ་སེམས་བསྐྱེད་པར་བྱའོ། །དེས་ཇི་སྐད་དུ་ཐོས་པའི་རྣམ་པས་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་བདེ་བ་ཅན་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ། ད་ལྟར་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ་བཞུགས་སོ། །འཚོའོ། གཞེས་སོ། །ཆོས་ཀྱང་སྟོན་ཏོ། སྙམ་དུ་ཡིད་ལ་བྱེད་དེ། དེས་ཀྱང་སེམས་མ་གཡེངས་པས། དེ་བཞིན་གཤེགས་པ་ཡིད་ལ་བྱེད་དོ། །བཟང་སྐྱོང་འདི་ལྟ་སྟེ་དཔེར་ན་སྐྱེས་པ་འམ། བུད་མེད་གང་ལ་ལ་ཞིག་ཉལ་བའི་རྨི་ལམ་དུ་གཟུགས་ཀྱི་རྣམ་པ་མཐོང་སྟེ། དངུལ་ལམ། གསེར་རམ། མཛའ་བཤེས་སམ། ཉེ་དུ་འམ། སྣག་གི་གཉེན་མཆམས་སམ། མཛའ་བོ་དང ། ཡིད་དུ་འོང་བ་དང ། སྡུག་པ་དང་མི་མཐུན་པ་མེད་པ་དག་མཐོང་ལ། དེ་རྨི་ལམ་ན་དེ་དག་དང་ལྷན་གཅིག་ཏུ་རྩེ་ཞིང་དགའ་ལ་དགའ་དགུར་སྤྱོད་ཅིང ། སྨྲ་ཀུན་ཏུ་སྨྲ་བར་རྨིས་པ་ལས་དེ་སད་ནས་ཇི་ལྟར་མཐོང་བ་དང ། ཐོས་པ་དང་བྱེ་བྲག་ཕྱེད་པ་དང ། རྣམ་པར་ཤེས་པ་དང ། སྨྲས་པ་དང ། ཀུན་ཏུ་སྨྲས་པ། དེ་ཐམས་ཅད་གཞན་ལ་ཡང་བརྗོད་ཅིང ། དེ་རྨི་ལམ་གྱི་མཚན་མ་རྗེས་སུ་དྲན་པས་མཆི་མ་ཀློག 51.12a པར་བྱེད་པ་དེ་བཞིན་དུ། བཟང་སྐྱོང་བྱང་ཆུབ་སེམས་དཔའ་འམ། ཁྱིམ་པ་འམ། རབ་ཏུ་བྱུང་བ་ཡང་རུང་གཅིག་པུ་དབེན་པར་སོང་སྟེ་འདུག་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཇི་སྐད་དུ་ཐོས་པའི་རྣམ་པས་ཡིད་ལ་བྱས་ཏེ། ཚུལ་ཁྲིམས་ཀྱི་ཕུང་པོ་ལ་སྐྱོན་མེད་ཅིང་དྲན་པ་གཡིང་བ་མེད་པར་ཉིན་ཞག་གཅིག་གམ། གཉིས་སམ། གསུམ་འམ། བཞི་འམ། ལྔ་འམ། དྲུག་གམ། ཉིན་ཞག་བདུན་དུ་ཡིད་ལ་བྱའོ། །དེ་གལ་ཏེ་ཉིན་ཞག་བདུན་དུ་སེམས་མི་གཡིང་བར་དེ་བཞིན་གཤེགས་པ་ཚེ་དཔག་མེད་ཡིད་ལ་བྱེད་པ་དེ་ཉིན་ཞག་བདུན་ཡོངས་སུ་ཚང་སྟེ་འདས་ནས། བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་མཐོང་ངོ ། །དེ་གལ་ཏེ་ཉིན་མོ་བཅོམ་ལྡན་འདས་དེ་མཐོང་ན། དེ་ཉལ་བའི་རྨི་ལམ་དུ་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེའི་ཞལ་སྟོན་ཏོ། །བཟང་སྐྱོང་འདི་ལྟ་སྟེ་དཔེར་ན་བུད་མེད་དམ་སྐྱེས་པ་ཉལ་བའི་རྨི་ལམ་ན་བདག་ཉིད་ཁྱིམ་ན་འདུག་པར་ཡང་མི་ཤེས། ཕྱོགས་ན་འདུག་པར་ཡང་མི་ཤེས་ཤིང ། དེའི་མིག་གི་དབང་པོ་ལ་བརྩིག་པས་སྒྲིབ་པར་ཡང་མི་བྱེད། མུན་པ་དང་རབ་རིབ་ཏུ་ཡང་མི་བྱེད་པ་དེ་བཞིན་དུ། བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་ཇི་ལྟར་འཇིག་རྟེན་གྱི་བར་དག་གིས་སྒྲིབ་པར་ཡང་མི་བྱེད། རིའི་རྒྱལ་པོ་རི་རབ་དང ། རིའི་རྒྱལ་པོ་ཁོར་ཡུག་དང ། ཁོར་ཡུག་ཆེན་པོ་དང ། དེ་བཞིན་དུ་གཞན་ཡང་རི་ནག་པོ་རྣམས་ཀྱིས་མིག་གི་དབང་པོ་ལ་སྒྲིབ་པར་མི་བྱེད་པ་དེ་ལྟ་དེ་ལྟར་སེམས་བསྐྱེད་དེ། བྱང་ཆུབ་སེམས་དཔའ་དེ་ལྷའི་མིག་ཐོབ་པས། དེ་བཞིན་གཤེགས་པ་མཐོང་བ་ཡང་མ་ཡིན། ལྷའི་རྣ་བའི་ཁམས་ཐོབ་པས། དམ་པའི་ཆོས་ཉན་པ་ཡང་མ་ཡིན། རྫུ་འཕྲུལ་གྱི་སྟོབས་ཐོབ་པས། འཇིག་རྟེན་གྱི་ཁམས་དེར་སྐད་ཅིག་ཏུ་འགྲོ་བ་ཡང་མ་ཡིན་གྱི། བཟང་སྐྱོང་བྱང་ཆུབ་སེམས་དཔའ་དེ་འཇིག་རྟེན་གྱི་ཁམས 51.12b འདི་ཉིད་ན་གནས་བཞིན་དུ། བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེ་མཐོང་ཞིང་བདག་ཉིད་འཇིག་རྟེན་གྱི་ཁམས་དེ་ན་འདུག་པ་སྙམ་དུ་ཤེས་ལ། ཆོས་ཀྱང་ཉན་ཏོ། །འཆད་པ་ཐོས་ནས་ཀྱང་ཆོས་དེ་དག་ཀུན་འཛིན་ཏོ། །ཀུན་ཆུབ་པར་བྱེད་དོ། །འཛིན་པར་བྱེད་དོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ལ་བཀུར་སྟིར་བྱེད་དོ། །བླ་མར་བྱེད་དོ། །རི་མོར་བྱེད་དོ། །མཆོད་པར་བྱེད་དོ། །བྱང་ཆུབ་སེམས་དཔའ་དེ་ཏིང་ངེ་འཛིན་དེ་ལས་ལངས་ནས་ཀྱང་ཇི་སྐད་དུ་ཐོས་པ་དང ། ཇི་ལྟར་བཟུང་བ་དང ། ཇི་ལྟར་ཀུན་ཆུབ་པར་བྱས་པའི་ཆོས་དེ་དག་གཞན་ལ་ཡང་རྒྱ་ཆེར་ཡང་དག་པར་འཆད་དོ།། །། བམ་པོ་གཉིས་པ། བཟང་སྐྱོང་འདི་ལྟ་སྟེ་དཔེར་ན། སྐྱེས་བུ་ཞིག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་འདུག་པ་ལས་ཡངས་པ་ཅན་གྱི་གྲོང་ཁྱེར་ན་སྨད་ཚོང་མ་ཡིད་བཟངས་ཤེས་བྱ་བ་ཞིག་ཡོད་པར་ཐོས་སོ། །སྐྱེས་བུ་གཉིས་པས་ནི་སྨད་འཚོང་མ་ཨ་མྲ་སྐྱོང་ཞེས་བྱ་བ་ཞིག་ཡོད་པར་ཐོས་སོ། །སྐྱེས་བུ་གསུམ་པས་ནི་སྔོན་གྱི་སྨད་འཚོང་མ་ཨུད་པ་ལའི་མདོག་ཅེས་བྱ་བ་ཡོད་པར་ཐོས་སོ། །དེ་རྣམས་ཀྱིས་དེ་དག་ཐོས་ནས་སོ་སོར་སོ་སོ་ལ་སེམས་ཆགས་པར་གྱུར་མོད་ཀྱི། སྐྱེས་བུ་དེ་རྣམས་ཀྱིས་སྨད་འཚོང་མ་དེ་རྣམས་མཐོང་བ་ནི་མ་ཡིན་ཏེ། མིང་དང་གཟུགས་དང་ཁ་དོག་ཙམ་ཞིག་ཐོས་པས། འདོད་ཆགས་ཀྱི་སེམས་བསྐྱེད་པར་གྱུར་ཏོ། །དེ་དག་ཕྱི་ཕྱིར་ཞིང་དེ་ཡིད་ལ་བྱེད་བཞིན་དུ་ཉལ་བ་དང་རྨི་ལམ་དུ་ཡང་སྨད་འཚོང་མ་དེ་དག་གི་དྲུང་དུ་བདག་ཅག་དོང་བ་སྙམ་དུ་ཤེས་ཏེ། ཇི་ལྟར་སྐྱེས་བུ་དེ་དག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་འཁོད་ཅིང་སྔོན་མ་ཉལ་བར། དེ་ལྟ་དེ་ལྟར་འདོད་ཆགས་དང་ལྡན་པའི་སེམས་སྐྱེད་པ་དེ་བཞིན་དུ། སྐྱེས་བུ་དེ་དག་ཉལ་ནས་ཀྱང་རྨི་ལམ་ན་སྨད་འཚོང་མ་དེ་དག་མཐོང་ཞིང་ཕན་ཚུན་སྤྲད་དེ། 51.13a འཁྲིག་པའི་ཆོས་ལ་བརྟེན་ནས། འཁྲིག་པ་ལ་དད་པ་དེ་དང་ཡང་བྲལ་བར་གྱུར་པར་རྨིས་སོ། །དེ་དག་སད་ནས་ཇི་ལྟར་མཐོང་བ་དང ། ཐོས་པ་དང ། ཤེས་པ་དང ། རྟོགས་པའི་རྨི་ལམ་ན་མྱོང་བ་རྗེས་སུ་དྲན་ནས། བཟང་སྐྱོང་ཁྱོད་གང་ན་བ་དེར་དོང་སྟེ་ཕྱིན་ནས་ཁྱོད་ལ་དོན་དེ་དག་བརྗོད་དོ། །ཁྱོད་ཀྱིས་དོན་དེ་དག་ཐོས་ནས་ལུང་འདི་ཉིད་ཀྱིས་ཅི་ནས་ཀྱང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །ངས་ཀྱང་སྐྱེས་བུ་དེ་དག་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལེགས་པར་སད་པ་ཞེས་བྱ་བ་རྣམས་སུ་འགྱུར་རོ་ཞེས་ལུང་སྟོན་ཏོ། །སྐྱེས་བུ་དེ་དག་བཟོད་པ་རྙེད་ཀྱང་ད་དུང་སྔོན་གྱི་མཚན་མ་དེ་དག་མཐོང་ཞིང་རྗེས་སུ་དྲན་ནོ། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་དང་ལྡན་པ་དེ་ནི་འཇིག་རྟེན་གྱི་ཁམས་འདི་ཉིད་ན་འདུག་བཞིན་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཐོས་སོ། །དེས་དེ་བཞིན་གཤེགས་པ་དེའི་མཚན་དང་གཟུགས་དང ། ཡོན་ཏན་ཙམ་ཞིག་ཐོས་ནས་སེམས་མི་གཡེང་བར། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་ཡང་དག་པར་རྗེས་སུ་དྲན་པར་བྱེད་དོ། །དེ་ཕྱི་ཕྱིར་ཞིང་ཡིད་ལ་བྱེད་པས་དེ་བཞིན་གཤེགས་པ་དེ་མཐོང་ངོ ། །ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་ལ་གནས་ཏེ། དེས་དེ་བཞིན་གཤེགས་པ་དེ་མཐོང་ནས། བཅོམ་ལྡན་འདས་ཆོས་གང་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་འདིར་སྐྱེ་བར་འགྱུར་ཞེས་ཞུ་བ་ཞུའོ། །དེ་བཞིན་དུ་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འདོད་པ་དེའི་ཚེ་དེ་བཞིན་གཤེགས་པ་ལ་ཞུའོ། །དེ་སྐད 51.13b ཞུས་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སངས་རྒྱས་རྗེས་སུ་དྲན་པ་ཀུན་ཏུ་བསྟེན། ངེས་པར་བསྟེན་ཅིང ། བསྒོམས་ལ་མང་དུ་བྱས་ན་འཇིག་རྟེན་གྱི་ཁམས་འདིར་སྐྱེ་བར་བྱེད་དོ། །སངས་རྒྱས་རྗེས་སུ་དྲན་པ་ཀུན་ཏུ་བསྟེན། ངེས་པར་བསྟེན་ཅིང་བསྒོམས་ལ་མང་དུ་བྱས་ན་སངས་རྒྱས་ཀྱི་ཞིང་འདིར་སྐྱེ་བར་འགྱུར་རོ། །རིགས་ཀྱི་བུ་དེ་ལ་སངས་རྒྱས་རྗེས་སུ་དྲན་པ་དེ་གང་ཞེ་ན། འདི་ལྟ་སྟེ། གང་དེ་བཞིན་གཤེགས་པ་ཡིད་ལ་བྱེད་པ་སྟེ། འདི་ལྟར་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པོར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་གསེར་གྱི་མདོག་ལྟ་བུའི་སྐུ་དང་ལྡན་པ། གསེར་གྱི་གཟུགས་འཚེར་ཞིང་གསལ་ལ་ལེགས་པར་གནས་པ་དང་འདྲ་བ། རིན་པོ་ཆེའི་མཆོད་སྡོང་ལྟར་ཤིན་ཏུ་བརྒྱན་པ། ཉན་ཐོས་ཀྱི་དགེ་འདུན་གྱི་ནང་ན་ཆོས་ཀྱང་སྟོན་ཏེ་ཅི་ནས་ཀྱང་ཆུད་མི་ཟ་བ་དེ་ལྟར་སྟོན་ཏོ། །ཅི་ཞིག་ཆུད་མི་ཟ་ཞེ་ན། ས་ཆུད་མི་གཟོན་ནོ། །ཆུ་དང་མེ་དང་རླུང་དང ། འབྱུང་པོ་དང ། ལྷ་དང ། བྲམ་ཟེ་དང ། སྐྱེ་དགུའི་བདག་པོ་ཆུད་མི་གཟོན་ཏོ། །གཟུགས་ཆུད་མི་གཟོན་ཏོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ཆུད་མི་གཟོན་ཏོ། །དེ་བཞིན་གཤེགས་པ་རློམ་སེམས་སུ་མི་བྱེད། མི་དམིག་།མངོན་པར་མི་ཆགས། ཡང་དག་པར་མི་ཤེས། མི་རྟོག་།རྣམ་པར་མི་རྟོག་།ཡང་དག་པར་རྗེས་སུ་མི་མཐོང་སྟེ། གང་དེ་ལྟར་དེ་བཞིན་གཤེགས་པ་མི་དམིགས་པར་ཡིད་ལ་བྱེད་པས་སྟོང་པ་ཉིད་ཀྱི་ཏིང་ངེ་འཛིན་ཐོབ་པ་དེ་ནི་སངས་རྒྱས་རྗེས་སུ་དྲན་པ་ཞེས་བྱ་སྟེ། 51.14a བྱང་ཆུབ་སེམས་དཔའ་དེ་ཏིང་ངེ་འཛིན་དེ་བསྒོམས་ཤིང་ཏིང་ངེ་འཛིན་དེ་ལ་མཉམ་པར་བཞག་ནས། ཏིང་ངེ་འཛིན་དེ་ལས་ལངས་ཏེ། བཟང་སྐྱོང་ཁྱོད་གང་ན་བ་དེར་སོང་ནས་ཕྱིན་པ་དང་ཏིང་ངེ་འཛིན་དེ་རྗོད་དོ། །བཟང་སྐྱོང་དེ་ལ་ཁྱོད་ཀྱིས་ཅི་ནས་ཀྱང་བྱང་ཆུབ་སེམས་དཔའ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་ལྟར་ཆོས་སྟོན་ཏོ། །དེ་ལ་ངས་ཀྱང་སྐྱེས་བུ་དེ་ནི་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་རྙེད་པ་ཞེས་བྱ་བར་འགྱུར་རོ་ཞེས་ལུང་སྟོན་ཏོ། །བཟང་སྐྱོང་ཁྱོད་ཉིད་དང་གནས་བརྟན་འོད་སྲུང་ཆེན་པོ་དང ། བྱང་ཆུབ་སེམས་དཔའ་དབང་པོས་བྱིན་དང ། བྱང་ཆུབ་སེམས་དཔའ་མཚམས་བཟངས་དང ། གཞན་ཡང་བྱང་ཆུབ་སེམས་དཔའ་གང་གིས་ཏིང་ངེ་འཛིན་འདི་ཐོབ་པ་རྣམས་ཏིང་ངེ་འཛིན་འདི་ལས་དབང་དུ་གྱུར་པ་ཡིན་ཏེ། བཟང་སྐྱོང་སྔོན་བྱུང་བ་འདས་པའི་དུས་ན་སྐྱེས་བུ་གཅིག་ཅིག་དགོན་པའི་མྱ་ངམ་ཞིག་ཏུ་སོང་བ་དང ། དེ་བཀྲེས་ཤིང་སྐོམ་ནས་རྨུགས་པ་དང་གཉིད་ཀྱིས་ནོན་ཏེ། ཉལ་བ་དང ། རྨི་ལམ་ན་བཟའ་བ་དང ། བཏུང་བ་མང་པོ་ཞིག་རྙེད་དོ། །རྙེད་ནས་ཀྱང་ཇི་ཙམ་ཆོག་པར་ཟོས་ཏེ། བཀྲེས་པ་དང ། སྐོམ་པ་དེ་དག་ཀྱང་མེད་པར་གྱུར་ཏོ། །དེ་སད་པ་དང ། ལུས་དང་ལྟོ་མ་རྒྱས་པར་གྱུར་ནས། དེ་འདི་སྙམ་དུ་འདི་ལྟ་སྟེ། རྨི་ལམ་དང་འདྲ་བ་དེ་ལྟ་བུའི་ཆོས་ཤིག་ཡོད་དོ། སྙམ་སྟེ་དེ་དེ་ལྟར་རྟོགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་གྱུར་ཏོ། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་ཁྱིམ་པ་འམ་རབ་ཏུ་བྱུང་བ་ཡང་རུང ། ཕྱོགས་གང་དང་གང་ན་དེ་བཞིན་གཤེགས་པ་བཞུགས་པར་ཐོས་པའི་ཕྱོགས་དེ་དང་དེ་ལོགས་སུ་དེ་བཞིན་གཤེགས་པ་དེ་ཡིད་ལ་བྱས་ན། དེས་སངས་རྒྱས་མཐོང་བ་ཐོབ་བོ། །དེས་དངོས་པོའི་འདུ་ཤེས་སུ་མི་བྱའི་ནམ་མཁའི་འདུ་ཤེས་སུ་བྱ་སྟེ། 51.14b དེ་ནམ་མཁའི་འདུ་ཤེས་ལ་ཤིན་ཏུ་གནས་ཤིང་སངས་རྒྱས་ཀྱི་འདུ་ཤེས་ཤིན་ཏུ་ཡིད་ལ་བྱས་པས། དེ་བཞིན་གཤེགས་པ་བཻ་དཱུརྱའི་སྐུ་གཟུགས་ལྟ་བུ་བཟང་པོ་བྱང་ཆུབ་སེམས་དཔའ་དེས་མངོན་སུམ་དུ་མཐོང་བར་འགྱུར་ཏེ། བྱང་ཆུབ་སེམས་དཔའ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལྟ་བུ་དེ་མཐོང་བར་འགྱུར་རོ། །བཟང་སྐྱོངས་འདི་ལྟ་སྟེ་དཔེར་ན་སྐྱེས་བུ་ལ་ལ་ཞིག་རང་སྐྱེས་པའི་ཡུལ་ནས་ལྗོངས་ཀྱི་ཕྱོགས་གཞན་ཞིག་ཏུ་སོང་སྟེ་ཕྱིན་པ་དང ། རང་སྐྱེས་པའི་ཡུལ་དེ་རྗེས་སུ་དྲན་ནས་ཇི་ལྟར་མཐོང་བ་དང ། ཐོས་པ་དང ། ཤེས་པ་དང ། རྟོགས་པའི་ཆོས་རྣམས་ཡིད་ལ་བྱེད་པ་ལས་རྨུགས་པ་དང་གཉིད་ཀྱིས་ནོན་ཏེ། དེ་ཉལ་བ་དང་རྨི་ལམ་ན་རང་སྐྱེས་པའི་ཡུལ་དུ་སོང་ནས་དེ་ན་བདག་ཉིད་འདུག་པ་སྙམ་དུ་ཤེས་ཤིང ། ཇི་ལྟར་སྔོན་མཐོང་བ་དང ། ཐོས་པ་དང ། བྱེ་བྲག་ཕྱེད་པ་དང ། རྣམ་པར་ཤེས་པ་དེ་དག་ཀྱང་མཐོང་ངོ ། །དེ་ན་འགྲོ་ཞིང་ལྡོག་པ་དག་ཀྱང་བྱེད་དོ། །དེ་སད་པ་དང་གཉེན་འདབ་དང ། མཛའ་བཤེས་དང ། ཉེ་དུ་དང ། སྣག་གི་གཉེན་མཚམས་རྣམས་ཀྱི་ནང་དུ་ང་ནི་འདི་ལྟར་སོང་སོང་ངོ ། །ངས་ནི་འདི་དག་མཐོང་ངོ ། །དེར་ངས་ནི་འདི་དག་མྱོང་ངོ ། ཞེས་དོན་དེ་དག་ཀྱང་རྗོད་དོ། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་པའམ་རབ་ཏུ་བྱུང་བ་ཡང་རུང ། ཕྱོགས་གང་དང་གང་ན་དེ་བཞིན་གཤེགས་པ་བཞུགས་པར་ཐོས་པའི་ཕྱོགས་དང་དེ་ལོགས་སུ་དྲན་པ་དང་ལྡན་ཞིང ། སེམས་གཡིང་བ་མེད་པས་སངས་རྒྱས་མཐོང་བ་ཐོབ་པར་བྱ་བའི་ཕྱིར་དེ་བཞིན་གཤེགས་པ་དེ་ཡིད་ལ་བྱའོ། །དེ་ལྟར་ན་བྱང་ཆུབ་སེམས་དཔའ་དེས་དེ་བཞིན་གཤེགས་པ་བཻ་དཱུརྱའི་སྐུ་གཟུགས་བཟང་པོར་གནས་པར་མཐོང་བར་འགྱུར་རོ། །བཟང་སྐྱོང་འདི་ལྟ་སྟེ་དཔེར་ན་དགེ་སློང་མི་སྡུག་པ་སྒོམ་པ་ཞིག་གིས་མདུན་ན་རྣམ་པར་བམ་པའི་གཟུགས་རྣམས་མཐོང་ཞིང་རྣམ་པར་སྔོས་པ་དང ། རྣམ་པར་བརྣགས་པ་དང ། རྣམ་པར་དམར་བ་དང ། རྣམ་པར་ཟོས་པ་དང ། 51.15a ཤ་རྣམས་ལྤགས་པ་འམ། ཤ་དང་ཁྲག་མེད་པ་འམ། དཀར་པོ་འམ། ཁ་དོག་དུང་དང་འདྲ་བ་འམ། ཀེང་རུས་ཤིག་མདུན་དུ་མཐོང་ན། རྣམ་པར་སྔོས་པ་ནས། ཀེང་རུས་ཀྱི་བར་དུ་དེ་དག་གང་ནས་ཀྱང་མ་འོངས། གང་དུ་ཡང་མ་སོང་ངོ ། །དེ་དག་སུས་ཀྱང་མ་བྱས། སུས་ཀྱང་མ་བགགས་ཏེ། བཟང་སྐྱོངས་འོན་ཀྱང་དགེ་སློང་དེའི་སེམས་རྩེ་གཅིག་པའི་དབང་གིས་མདུན་ན་ཀེང་རུས་འདུག་པ་མཐོང་ངོ ། །བཟང་སྐྱོང་དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་ཏིང་ངེ་འཛིན་འདི་ལ་གནས་པ་རྣམས་ཕྱོགས་གང་དང་གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་པའི་ཕྱོགས་དེ་དང་དེ་ལོགས་སུ་སངས་རྒྱས་མཐོང་བ་འཐོབ་པར་བྱ་བའི་ཕྱིར་ཡིད་ལ་བྱེད་དོ། །ཕྱོགས་དེ་དང་དེ་ལོགས་སུ་ཡིད་ལ་བྱས་པས་དེས་ཕྱོགས་དེ་དང་དེ་ལོགས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ངོ ། །དེ་ཅིའི་ཕྱིར་ཞེ་ན། བཟང་སྐྱོང་འདི་ལྟ་སྟེ། སངས་རྒྱས་མཐོང་བ་འཐོབ་པར་འགྱུར་བ་འདི་ནི་ཏིང་ངེ་འཛིན་འདིའི་རྒྱུ་འཐུན་པ་ཡིན་ནོ། །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་ཀྱི་མཐུ་དང ། རང་གིས་དགེ་བའི་རྩ་བའི་སྟོབས་བསྐྱེད་པ་དང ། ཏིང་ངེ་འཛིན་ཐོབ་པའི་ཕྱིར་དང ། འདི་དག་གསུམ་ཚོགས་ཤིང་འདུས་པས་དེས་དེ་བཞིན་གཤེགས་པ་རྣམས་མཐོང་ཞིང་སྣང་བར་འགྱུར་རོ་བཟང་སྐྱོང་འདི་ལྟ་སྟེ་དཔེར་ན་བུད་མེད་དམ་སྐྱེས་པ་གང་ལ་ལ་མགོ་འཁྲུ་ཞིང་རྒྱན་འདོགས་པའི་རང་བཞིན་ཅན་ཞིག་ཡོད་ལ། དེ་འབྲུ་མར་དང་བའི་སྣོད་དམ། ཆུ་དང་བའི་སྣོད་དམ། ཡོངས་སུ་ཕྱིས་པའི་མེ་ལོང་གི་དཀྱིལ་འཁོར་རམ། མཐིང་བུས་བསྐུས་པའི་ས་ཕྱོགས་ལ། བདག་ཉིད་བལྟ་བར་བསམས་ནས་དེས་དེར་བདག་ཉིད་ཀྱི་གཟུགས་མཐོང་ན། བཟང་སྐྱོང་དེ་ལ་ཇི་སྙམ་དུ་སེམས་འབྲུ་མར་དང་བའི་སྣོད་དམ་ཆུ་དང་བའི་སྣོད་དམ་ཡོངས་སུ་ཕྱིས་པའི 51.15b མེ་ལོང་གི་དཀྱིལ་འཁོར་རམ། མཐིང་བུས་བསྐུས་པའི་སའི་ཕྱོགས་དེ་ལ། གང་སྐྱེས་པ་འམ་བུད་མེད་ཀྱི་གཟུགས་སྣང་བ་དེ་སྐྱེས་པ་འམ། བུད་མེད་གང་ཡང་དེའི་ནང་དུ་སོང་བ་འམ། དེའི་ནང་དུ་ཞུགས་པ་ཡོད་དམ། བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས་དེ་ནི་མ་མཆིས་མོད་ཀྱི། བཙུན་པ་བཅོམ་ལྡན་འདས་འབྲུ་མར་དང ། ཆབ་དེ་དང་ཞིང་རྙོག་པ་མ་མཆིས་པ་འམ། མེ་ལོང་གི་དཀྱིལ་འཁོར་དེ་ལེགས་པར་ཡོངས་སུ་ཕྱིས་པ་འམ། མཐིང་བུས་བསྐུས་པའི་ས་ཆེན་པོ་དེ་དག་པའི་སླད་དུ་གཟུགས་བརྙན་མདུན་ན་མཆིས་ཏེ། ཆབ་དང ། འབྲུ་མར་དང ། མེ་ལོང་དང ། ས་ཆེན་པོ་དེ་ལས་སྐྱེས་པ་འམ། བུད་མེད་ཀྱི་ལུས་དེ་བྱུང་བའང་མ་ལགས། གང་ནས་ཀྱང་མ་མཆིས། གང་དུ་ཡང་མ་མཆིས། གང་ནས་ཀྱང་མ་སྐྱེས། གང་དུ་ཡང་མ་འགགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་ལེགས་སོ་ལེགས་སོ། །བཟང་སྐྱོང་ཁྱོད་ཡང་ལེགས་སོ། །བཟང་སྐྱོང་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། གཟུགས་རྣམས་ཤིན་ཏུ་ཡོངས་སུ་དག་པ་ལས་གཟུགས་བརྙན་རྣམས་སྣང་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་དེ་ཡང་ཏིང་ངེ་འཛིན་འདི་ཤིན་ཏུ་བསྒོམས་པས་ཚེགས་ཆུང་ངུས་དེ་བཞིན་གཤེགས་པ་དེ་རྣམས་བྱང་ཆུབ་སེམས་དཔའ་དེས་མཐོང་ངོ ། །མཐོང་ནས་ཀྱང་ཞུ་བ་ཞུ་ཞིང་ཞུས་པ་ལུང་བསྟན་པས་ཡིད་རངས་པར་འགྱུར་རོ། །དེ་འདི་སྙམ་དུ་དེ་བཞིན་གཤེགས་པ་འདི་ག་ཞིག་ནས་བྱོན་ཏམ། བདག་ག་ཞིག་ཏུ་སོན་ཏམ། སྙམ་པ་ལས། དེས་དེ་བཞིན་གཤེགས་པ་དེ་གང་ནས་ཀྱང་མ་བྱོན་པར་རབ་ཏུ་ཤེས་སོ། །བདག་གི་ལུས་ཀྱང་གང་དུ་ཡང་མ་སོང་བར་རབ་ཏུ་འདུ་ཤེས་ནས། དེ་འདི་སྙམ་དུ་ཁམས་གསུམ་པ་འདི་དག་ནི་སེམས་ཙམ་མོ། །དེ་ཅིའི་ཕྱིར་ཞེ་ན། འདི་ལྟར་བདག་ཇི་ལྟ་ཇི་ལྟར་རྣམ་པར་རྟོགས་པ། དེ་ལྟ་དེ་ལྟར་སྣང་ངོ ། །སེམས་དེ་ཡང་ནང་ན་ཡང་མེད། ཕྱི་རོལ་ན་ཡང་མེད། གཉི་ག་མེད་པར་ཡང་མི་དམིགས་ཏེ། །གཞན་དུ་ན་དམིགས་པ་ལ་བརྟེན་ནས་སྐྱེའོ། ། 51.16a གང་རྟེན་ཅིང་འབྲེལ་པར་བྱུང་བ་དེ་ནི་དངོས་པོ་མེད་པའོ། །གང་དངོས་པོ་མེད་པ་དེ་ནི་མ་སྐྱེས་པའོ། །གང་མ་སྐྱེས་པ་དེ་ནི་དམིགས་སུ་མེད་པའོ། །གང་དམིགས་སུ་མེད་པ་དེ་ནི་རང་བཞིན་སྟོང་པའོ། །གང་རང་བཞིན་སྟོང་པ་དེ་ནི་གདགས་སུ་མེད་པའོ། །གང་གདགས་སུ་མེད་པ་དེ་ནི་བལྟ་བ་འམ། རྣམ་པར་ཤེས་པ་འམ། ཆགས་པར་བྱ་བ་འམ། བསྟན་པ་འམ། ཆུད་གཟན་པར་བྱ་བ་འམ། རབ་ཏུ་གཞག་པར་བྱ་བ་མི་ནུས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སེམས་ཀྱིས་སངས་རྒྱས་བྱེད་པ་སྟེ། །སེམས་ཉིད་ཀྱིས་ཀྱང་མཐོང་བའོ། །སེམས་ཉིད་ང་ཡི་སངས་རྒྱས་ཏེ། །སེམས་ཉིད་དེ་བཞིན་གཤེགས་པའོ། །སེམས་ཉིད་ང་ཡི་ལུས་ཡིན་ཏེ། །སངས་རྒྱས་སེམས་ཀྱིས་མཐོང་བའོ། །སེམས་ཉིད་ང་ཡི་བྱང་ཆུབ་སྟེ། །སེམས་ཉིད་རང་བཞིན་མེད་པའོ། །སེམས་ཀྱིས་སེམས་ནི་མི་ཤེས་ཤིང ། །སེམས་ཀྱིས་སེམས་ནི་མི་མཐོང་ངོ ། །སེམས་སུ་འདུ་ཤེས་མི་ཤེས་ཡིན། །སེམས་སུ་མི་ཤེས་མྱ་ངན་འདའ། །ཆོས་འདི་དག་ནི་སྙིང་པོ་མེད། །རློམ་སེམས་ལས་ནི་ཀུན་འབྱུང་སྟེ། །སྟོང་པ་ཉིད་ལས་གང་རློམ་པའི། །རློམ་སེམས་དེ་འདིར་སྟོང་པ་ཡིན། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ། ་་གསུམ་པའོ།། །།བཟང་སྐྱོང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་དེའི་ཡེ་ཤེས་ནི་དེ་ལྟ་བུ་ཡིན་ནོ། །བཟང་སྐྱོང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོབ་བོ། །བཞི་གང་ཞེ་ན། འདི་ལྟ་སྟེ། མི་འཕྲོགས་པའི་དད་པ་དང ། ཕྱིར་མི་ལྡོག་པའི་བརྩོན་འགྲུས་དང ། གཞན་གྱི་དྲིང་ལ་མི་འཇོག་པའི་ཤེས་རབ་དང ། དགེ་བའི་བཤེས་གཉེན་ལ་བསྙེན 51.16b བཀུར་བྱེད་པ་སྟེ། བཟང་སྐྱོང་ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན། འདི་ལྟ་སྟེ། ཟླ་བ་གསུམ་གྱི་བར་དུ་སེ་གོལ་བརྡབས་པ་ཙམ་ཡང་བདག་གི་འདུ་ཤེས་མི་སྐྱེད་པ་དང ། ཟླ་བ་གསུམ་གྱི་བར་དུ་སེ་གོལ་བརྡབས་པ་ཙམ་ཡང་རྨུགས་པ་དང ། གཉིད་ཀྱིས་མི་ནོན་པ་དང ། བཤང་བ་དང ། གཅི་བ་བྱེད་པ་མ་གཏོགས་པར་ཟླ་བ་གསུམ་གྱི་བར་དུ་བརྩོན་འགྲུས་བརྩམས་ཏེ་འཆག་པ་ལ་ཞུགས་ནས་ས་ལ་མི་འདུག་པ་དང ། གཞན་དག་ལ་ཡང་ཆོས་ཀྱི་སྦྱིན་པ་རྒྱ་ཆེར་གཏོང་བའི་སྟེང་དུ་རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་མི་རེ་བ་སྟེ། བཟང་སྐྱོང་ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན། འདི་ལྟ་སྟེ། སངས་རྒྱས་བལྟ་བར་སེམས་ཅན་རྣམས་ལ་སྐུལ་བ་དང ། ཆོས་མཉན་པར་སེམས་ཅན་རྣམས་ལ་སྐུལ་བ་དང ། བྱང་ཆུབ་ཀྱི་སེམས་སྐྱེད་པར་སེམས་ཅན་རྣམས་ལ་སྐུལ་བ་དང ། ཕྲག་དོག་མེད་པ་སྟེ། བཟང་སྐྱོང་ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན། འདི་ལྟ་སྟེ། ཏིང་ངེ་འཛིན་འདི་འདོད་པས། དེ་བཞིན་གཤེགས་པའི་སྐུ་གཟུགས་བྱེད་དུ་བཅུག་སྟེ། ཐ་ན་རི་མོར་ཡང་འདྲིར་འཇུག་པ་དང ། ཏིང་ངེ་འཛིན་འདི་འདོད་པས། ཏིང་ངེ་འཛིན་འདི་ཡུན་རིང་དུ་གནས་པར་བྱ་བའི་ཕྱིར་ཅི་ནས་ཀྱང 51.17a ཏིང་ངེ་འཛིན་འདི་འཛིན་པར་ལེགས་པར་བྲིས་ཤིང ། གླེགས་བམ་སྦྱིན་པ་དང ། མངོན་པའི་ང་རྒྱལ་ཅན་གྱི་གང་ཟག་རྣམས་མངོན་པའི་ང་རྒྱལ་མེད་པའི་ཆོས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇོག་པ་དང ། དེ་བཞིན་གཤེགས་པའི་བསྟན་པ་བསྲུང་བ་དང ། སྦ་བ་དང ། ཡང་དག་པར་གཟུང་བའི་ཕྱིར་གནས་པ་སྟེ། བཟང་སྐྱོང་ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བདེ་གཤེགས་བསྟན་པ་ལ་ནི་དད་པ་སྐྱེད། །སྟོང་པ་ཉིད་ཀྱི་ཆོས་བཤད་མ་སྨོད་ཅིག་།བརྩོན་འགྲུས་བརྩམས་ཤིང་གཉིད་ནི་སྤངས་བྱས་ཏེ། །ཟླ་གསུམ་ཚང་བར་ནམ་ཡང་མ་འདུག་ཤིག་།རྙེད་དང་བཀུར་སྟི་ཚིགས་བཅད་མི་རྟེན་པར། །བདེ་གཤེགས་གསུངས་པའི་ཆོས་ནི་བཤད་བྱ་ཞིང ། །མཚུངས་པ་མེད་པའི་བསྟན་པ་རྒྱས་པར་བྱ། །རྟེན་པ་མེད་ན་ཆོས་འདི་ཐོབ་པར་འགྱུར། །ཕྲག་དོག་མེད་ཅིང་ཁྲོ་བ་བསྐྱེད་མི་བྱ། །འདོད་ཆགས་སྤངས་ཤིང་སེམས་ནི་རྣམ་གྲོལ་ལ། །མཉམ་པར་གཞག་ཅིང་བསམ་གཏན་དགའ་བྱས་ཏེ། །སྦྱོར་བར་བྱེད་ན་ཆོས་འདི་འཐོབ་པར་འགྱུར། །གསེར་མདོག་བསོད་ནམས་བརྒྱ་པའི་མཚན་མངའ་ལ། །མཛེས་ཤིང་ཀུན་ནས་ཡོངས་སུ་རྒྱས་གྱུར་པ། །གསེར་གྱི་གཟུགས་བཞིན་དུ་ནི་ལྟ་སྡུག་པའི། །བསོད་ནམས་མཆོག་མཚན་སངས་རྒྱས་དྲན་པར་བྱོས། །སངས་རྒྱས་འདས་པ་འམ་ཡང་ན་མ་བྱོན་པ། །ཐལ་མོ་སྦྱར་ཏེ་རྗེས་སུ་དྲན་པར་བྱོས། །མི་མཆོག་གང་དག་ད་ལྟར་བཞུགས་པ་ཡང ། །དེ་དག་མཆོད་ཕྱིར་བདེ་གཤེགས་དྲན་པར་བྱོས། །དང་བའི་སེམས་ཀྱིས་མེ་ཏོག་ཕྲེང་བ་དང ། །བྱུག་པ་དག་དང་བཟའ་དང་བཅའ་བ་ཡིས། །བདེ་བར་གཤེགས་པ་ལ་ནི་མཆོད་པ་བྱོས། །ཏིང་འཛིན་འདི་ནི་རྙེད་པར་དཀའ་མི་འགྱུར། །ཏིང་ངེ་འཛིན་གྱི་མཆོག་འདི་འདོད་པས་ན། །སེམས་ནི་རངས་ཤིང་དགའ་བ་འདྲ་མེད་པས། ། 51.17b རྔ་དུང་རྫ་རྔ་དག་གི་སིལ་སྙན་དང ། །དཔེ་མེད་རིང་བསྲེལ་ལ་ནི་རོལ་མོ་བྱེད། །ཏིང་ངེ་འཛིན་གྱི་མཆོག་ནི་འདོད་པས་ན། །རི་མོ་ལེགས་པར་བྲིས་ཤིང་མཚན་རྫོགས་ལ། །གསེར་གྱི་མདོག་འདྲ་རྒྱ་ཆེ་སྐྱོན་མེད་པའི། །མཚུངས་པ་མེད་པའི་སྐུ་གཟུགས་བྱེད་པ་དང ། །དགའ་བར་བྱེད་པའི་ཆོས་ནི་མདུན་བཞག་ནས། །ཚུལ་ཁྲིམས་ཡོངས་དག་ཐོས་པ་ཚོལ་བྱེད་ལ། །ལེ་ལོའི་དངོས་པོ་ཡོངས་སུ་སྤངས་བྱས་ན། །ཏིང་འཛིན་འདི་ནི་རིང་པོར་མི་ཐོགས་རྙེད། །ཀུན་ནས་མནར་སེམས་སུ་ལ་འང་མ་བྱེད་ཅིག་།བྱམས་ལ་གནས་དང་སྙིང་རྗེ་གནས་པ་དང ། །འདོད་པའི་ཡོན་ཏན་བཏང་སྙོམས་བྱས་ན་ནི། །ཏིང་འཛིན་འདི་ནི་རིང་པོར་མི་ཐོགས་རྙེད། །ཆོས་སྨྲ་བ་ལ་འང་དེ་བཞིན་བྱམས་པ་སྐྱེད། །སྟོན་པར་འདུ་ཤེས་རྟག་ཏུ་ཉེ་བར་ཞོག་།ང་རྒྱལ་མ་བྱེད་ཆགས་པ་སྤང་བར་བྱོས། །ཆོས་སྦྱིན་པ་ལ་ནམས་ཀྱང་འཇུངས་མ་གྱུར། ཕན་ཡོན་བཟང་པོ་འདི་དག་བླང་བར་བྱོས། །གདམས་ངག་གནས་ནི་བདེ་བར་གཤེགས་པས་བསྟན། །འདི་ནི་སངས་རྒྱས་མང་པོའི་བསྟན་པ་སྟེ། །ཏིང་འཛིན་འདི་ནི་རྙེད་པར་དཀའ་མི་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ། བཞི་པའོ།། །། བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པས་ཆོས་སྨྲ་བའི་དགེ་སློང་ལ་གུས་པ་དང་བཅས་ཤིང་ཞེ་ས་དང་བཅས་པར་བྱ་སྟེ། གླན་ཀ་བཙལ་བ་མེད་པའི་སེམས་ཀྱིས་སྟོན་པར་འདུ་ཤེས་བསྐྱེད་ལ། ཏིང་ངེ་འཛིན་འདི་ལ་སྦྱར་བར་བྱའོ། །བཟང་སྐྱོང་གལ་ཏེ་བྱང་ཆུབ་སེམས་དཔའ་དེས་ཆོས་སྨྲ་བའི་དགེ་སློང་དེ་ལ་ཀུན་ནས་མནར་སེམས་ཀྱི་སེམས་ཀྱིས་གནས་སམ། ཐ་བའི་སེམས་ཀྱིས་གནས་སམ། སེམས་མ་དད་པས་གནས་ན། བཟང་སྐྱོང་བྱང་ཆུབ་སེམས་དཔའ་དེས་ཏིང་ངེ་འཛིན་འདི་ཐོབ་པ་ནི་གནས་མ 51.18a ཡིན་ཏེ་སྐབས་མེད་དོ། །གལ་ཏེ་ཆོས་སྨྲ་བའི་དགེ་སློང་དེ་ལ་སྟོན་པའི་འདུ་ཤེས་མི་སྐྱེད་ན་ཡང་གནས་དེ་མེད་དོ། །བཟང་སྐྱོང་དེ་ཅིའི་ཕྱིར་ཞེ་ན། དེ་ལྟར་མ་གུས་པས་ནི་དམ་པའི་ཆོས་ནུབ་པར་འགྱུར་རོ། །བཟང་སྐྱོང་འདི་ལྟ་སྟེ་དཔེར་ན་མིག་དང་ལྡན་པའི་སྐྱེས་བུ་ཞིག་གིས་ནམ་ཐང་ཞིང ། སྤྲིན་མེད་པའི་མཚན་མོ་ནམ་གྱི་གུང་ཐུན་ལ་གདོང་གྱེན་དུ་བར་སྣང་ལ་བལྟས་ན། དེས་དེར་སྐར་མའི་གཟུགས་མང་པོ་རྣམས་མཐོང་ངོ ། །བཟང་སྐྱོང་དེ་བཞིན་དུ། སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ། ཏིང་ངེ་འཛིན་འདི་ལ་གནས་པ་ནི་ནམ་མཁའི་འདུ་ཤེས་ཤིན་ཏུ་ཉེ་བར་གནས་ཤིང ། སངས་རྒྱས་ཀྱི་འདུ་ཤེས་ཤིན་ཏུ་བྱིན་གྱིས་བརླབས་པའི་ཕྱིར། སངས་རྒྱས་ཀྱི་མཐུ་དང ། ཏིང་ངེ་འཛིན་འདི་བསྒོམས་པས། འཇིག་རྟེན་གྱི་ཁམས་གཞན་དུ་ཤར་ཕྱོགས་སུ་བལྟས་ན། ཚེགས་ཆུང་ངུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ། །ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང ། སངས་རྒྱས་སྟོང་ཕྲག་མང་པོ་དང ། སངས་རྒྱས་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཕྲག་མང་པོ་དང ། སངས་རྒྱས་བྱེ་བ་བརྒྱ་ཕྲག་མང་པོ་དང ། སངས་རྒྱས་བྱེ་བ་སྟོང་ཕྲག་མང་པོ་དང ། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ཚེགས་ཆུང་ངུས་མིག་གི་དབང་པོ་ལ་སྣང་བར་འགྱུར་རོ། །དེ་བཞིན་དུ་ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། ཕྱོགས་མཚམས་བཞི་དང ། འོག་གི་ཕྱོགས་དང ། སྟེང་གི་ཕྱོགས་རྒྱས་པར་བྱ་སྟེ། དེ་ལྟར་ཕྱོགས་བཅུར་བལྟས་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཚེགས་ཆུང་ངུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ། །ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང ། སངས་རྒྱས་སྟོང་ཕྲག་མང་པོ་དང ། སངས་རྒྱས 51.18b བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཕྲག་མང་པོ་དང ། སངས་རྒྱས་བྱེ་བ་བརྒྱ་ཕྲག་མང་པོ་དང ། སངས་རྒྱས་བྱེ་བ་སྟོང་ཕྲག་མང་པོ་དང ། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ། ཚེགས་ཆུང་ངུས་མིག་གི་དབང་པོ་ལ་སྣང་བར་གྱུར་ཏོ། །བཟང་སྐྱོང་དེ་ལྟར་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པ་རྣམས་ནི་ཚེགས་ཆུང་ངུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ། །ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང ། སངས་རྒྱས་སྟོང་ཕྲག་མང་པོ་དང ། སངས་རྒྱས་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཕྲག་མང་པོ་དང ། སངས་རྒྱས་བྱེ་བ་བརྒྱ་ཕྲག་མང་པོ་དང ། སངས་རྒྱས་བྱེ་བ་སྟོང་ཕྲག་མང་པོ་དང ། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རྣམས་ཚེགས་ཆུང་ངུས་མིག་གི་དབང་པོ་ལ་སྣང་བར་འགྱུར་རོ། །བཟང་སྐྱོང་འདི་ལྟ་སྟེ་དཔེར་ན། སངས་རྒྱས་ཀྱི་སྤྱན་གང་དང་ལྡན་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། ཐམས་ཅད་ཐུགས་སུ་ཆུད་པ་དང ། ཐམས་ཅད་གཟིགས་པར་འགྱུར་བའི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སངས་རྒྱས་ཀྱི་སྤྱན་ཡོད་དོ། །བཟང་སྐྱོང་དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ལ་གནས་པ་རྣམས་ནི། ཚེགས་ཆུང་ངུས་མང་དུ་ཐོས་པ་ཡོངས་སུ་རྫོགས་པར་འགྱུར་རོ། །སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། 51.19a ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བ་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའི་ཡོན་ཏན་ཐམས་ཅད་ཡོངས་སུ་རྫོགས་པར་འགྱུར་རོ། །བླ་ན་མེད་པའི་ཤེས་རབ་ཀྱི་དབང་པོ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་རྫོགས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དཔེར་ན་མིག་ལྡན་མི་ཞིག་མཚན་མོ་དབེན་པའི་དུས། །ནམ་གྱི་གུང་ཐུན་ལྡང་བྱས་ནམ་མཁའ་རྣམ་དག་ལ། །དེས་ནི་སྐར་མ་མང་པོ་བརྒྱ་སྟོང་མཐོང་གྱུར་ཏེ། །དྲན་ལྡན་བསམས་ན་ཉིན་བར་དུ་འང་དྲན་པར་འགྱུར། །དེ་ལྟར་བྱང་ཆུབ་སེམས་དཔས་ཏིང་འཛིན་འདི་ཐོབ་ནས། །སངས་རྒྱས་དཔའ་བོ་མང་པོ་བརྒྱ་སྟོང་མཐོང་བར་འགྱུར། །དེ་ལས་ལངས་པའི་དུས་ན་འང་དྲན་འགྱུར་ཞིང ། །འཁོར་ལ་འཇིག་རྟེན་མགོན་པོ་འདི་འདྲའོ་ཞེས་ཀྱང་སྨྲ། །ཇི་ལྟར་ངའི་མིག་སངས་རྒྱས་སྤྱན་དེ་རྣམ་དག་ལ། །རབ་རིབ་མེད་ཅིང་ཡོངས་དག་དེས་ནི་འཇིག་རྟེན་ལྟ་བ་ལྟར། །དེ་ལྟར་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་སྤྱན། །རྡུལ་མེད་ཏིང་འཛིན་འདི་ཡིན་དེས་ནི་མི་དབང་མཐོང ། །སྟོབས་བཅུ་རྐང་གཉིས་དབང་པོ་འཇིག་རྟེན་གཙོ་ལྟའི་ཚེ། །ཐུབ་རྣམས་དངོས་པོའི་འདུ་ཤེས་ནམ་ཡང་མི་སྐྱེད་དོ། །དུག་བཅོམ་ཡོངས་དག་དངོས་པོའི་འདུ་ཤེས་མེད་པ་ཡི། །བྱང་ཆུབ་སེམས་དཔའ་གཙོ་བོའི་ཡོན་ཏན་ཁྱད་པར་ཉོན། ཆོས་མཆོག་བསིལ་བ་དེ་དག་ཀྱང་ནི་མཉན་པར་བྱོས། །སྟོང་པ་ཉིད་ཆོས་བདེ་བ་མྱུར་དུ་དྲན་པར་བྱོས། །ངས་ཀྱང་རྒྱལ་བའི་བྱང་ཆུབ་རྙེད་ནས་སྐྱེ་དགུ་ལ། །སྐྱེ་བོ་མང་ལ་བདེ་བའི་ཆོས་འདི་བཤད་པར་བྱ། །ཇི་ལྟར་བྱང་ཆུབ་སེམས་དཔའ་ཚེ་དཔག་མེད་སྐྱེས་ནས། །འཇིག་རྟེན་མགོན་པོ་བརྒྱ་སྟོང་མང་པོ་མཐོང་གྱུར་པ། ། 51.19b དེ་ལྟར་བྱང་ཆུབ་སེམས་དཔའི་ཏིང་འཛིན་འདི་ཐོབ་ན། །སངས་རྒྱས་དཔའ་བོ་མང་པོ་བརྒྱ་སྟོང་མཐོང་བར་འགྱུར། །ཇི་ལྟར་དྲན་ལྡན་དགེ་སློང་བཟང་པོ་ཀུན་དགའ་བོས། །ང་ལས་ཐོས་པ་རབ་བཟུང་དེ་ཡང་ཀུན་འཛིན་པ། །དེ་ལྟར་བྱང་ཆུབ་སེམས་དཔས་ཏིང་འཛིན་འདི་ཐོབ་ན། །ཆོས་མང་ཐོས་ཤིང་དེ་ཡང་ཐམས་ཅད་འཛིན་པར་འགྱུར། །ཏིང་ངེ་འཛིན་འདི་ཐོས་ནས་ཡང་དག་དགའ་བསྐྱེད་ལ། །འཇིག་རྟེན་གསང་ཚིག་སྣ་ཚོགས་ཐམས་ཅད་སྤང་བྱོས་ཏེ། །མྱུར་ཏུ་དད་པར་བྱོས་ལ་ཆོས་ཀྱི་སྦྱིན་པ་བྱིན། །དེ་ལྟར་ཡོངས་དག་ཞི་བའི་ས་འདི་ཐོབ་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། །།བཟང་སྐྱོང་དེ་ལ་བྱང་ཆུབ་སེམས་དཔས་ཏིང་ངེ་འཛིན་འདི་ཐོབ་པར་བྱ་བ་དང ། འདི་ལྟ་སྟེ། ཡོངས་སུ་བསྒྲུབ་པར་བྱ་བའི་ཕྱིར་སྤྲོ་བ་དང་བརྩོན་འགྲུས་ཆེན་པོ་བསྐྱེད་པར་བྱའོ། །བཟང་སྐྱོང་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་གྲུ་རིན་པོ་ཆེས་ཡོངས་སུ་གང་བ་ཞིག་རྒྱ་མཚོ་ཆེན་པོ་རྒལ་ཏེ་འཇིགས་པ་ཐམས་ཅད་སྤངས་པ་ལས། ཚུ་རོལ་གྱི་འགྲམ་དུ་ཆག་ན། དེ་ལ་འཛམ་བུའི་གླིང་པའི་མི་རྣམས་ཀྱིས་སྒྲ་ཆེན་པོ་དང ། སྐད་ཆེན་པོ་དང ། འོ་དོད་བོད་པར་བྱའོ། །བདག་ཅག་ནི་རིན་པོ་ཆེ་འདི་དག་ལས་ཉམས་སོ། །ཞེས་མྱ་ངན་ཆེན་པོས་སྨྲེ་སྔགས་ཀྱང་གདོན་པར་བྱའོ། །བཟང་སྐྱོང་དེ་བཞིན་དུ་རིགས་ཀྱི་བུ་འམ། རིགས་ཀྱི་བུ་མོ་འམ། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ལ་ལ་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་རྣ་ལམ་དུ་གྲག་པར་གྱུར་ལ། ཐོས་ནས་ཀྱང་གླེགས་བམ་དུ་འདྲི་བར་མི་བྱེད། སྟོན་པར་མི་བྱེད། འདོན་པར་མི་བྱེད། འཛིན་པར་མི་བྱེད། ཀློག་པར་མི་བྱེད། འཆད་པར་མི་བྱེད། སྒོམ་པར་མི་བྱེད། ནན་ཏན་གྱིས་སྒྲུབ་པར་མི་བྱེད་ན། བཟང་སྐྱོང་དེ་ལ་ལྷ་དང་བཅས་པའི་འཇིག་རྟེན་གྱིས་སྒྲ་ཆེན་པོ་དང ། སྐད་ཆེན་པོ་དང ། 51.20a འོ་དོད་བོད་པར་བྱའོ། །འདི་ལྟར་ཏིང་ངེ་འཛིན་ཟབ་མོ་རིན་པོ་ཆེ་འདི་ལྟ་བུ་སངས་རྒྱས་ཀྱིས་བསྔགས་པ། སངས་རྒྱས་ཀྱིས་བསྟོད་པ། སངས་རྒྱས་ཀྱིས་བསྟོད་དུ་བཅུག་པ། སངས་རྒྱས་ཀྱི་ཡོན་ཏན་ཐམས་ཅད་ཐོབ་པར་འགྱུར་བ་གང་ཡིན་པ་དེ་ཐོས་ནས་ཡི་གེར་འདྲི་བར་མི་བྱེད། སྟོན་པར་མི་བྱེད། འདོན་པར་མི་བྱེད། འཛིན་པར་མི་བྱེད། ཀློག་པར་མི་བྱེད། འཆད་པར་མི་བྱེད། སྒོམ་པར་མི་བྱེད། ནན་ཏན་གྱིས་སྒྲུབ་པར་མི་བྱེད་ཅིང ། ང་རྒྱལ་གྱིས་ནོན་ལ་མི་ཤེས་ཏེ། མང་དུ་ཐོས་པ་ཡོངས་སུ་རྫོགས་པ་མི་འཛིན་པའི་སེམས་ཅན་དེ་དག་ནི་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ལས་ཡོངས་སུ་ཉམས་སོ་ཞེས་མྱ་ངན་ཆེན་པོས་སྨྲེ་སྔགས་ཀྱང་གདོན་པར་བྱའོ། །བཟང་སྐྱོང་ཏིང་ངེ་འཛིན་འདི་ཉན་མི་འདོད་པར་འགྱུར་བ་དང ། ཏིང་ངེ་འཛིན་འདི་འཛིན་པར་མི་འགྱུར་བའི་སེམས་ཅན་དེ་དག་ནི་བཟང་སྐྱོང་ཡོངས་སུ་ཉམས་པའི་ཆོས་ཅན་ཡིན་པར་ངས་བཤད་དོ། །བཟང་སྐྱོང་གང་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ཐོས་ནས་ཡི་གེར་འདྲི་བར་མི་བྱེད། སྟོན་པར་མི་བྱེད། འདོན་པར་མི་བྱེད། འཛིན་པར་མི་བྱེད། ཀློག་པར་མི་བྱེད། འཆད་པར་མི་བྱེད། སྒོམ་པར་མི་བྱེད། ནན་ཏན་གྱིས་སྒྲུབ་པར་མི་བྱེད་པའི་སེམས་ཅན་དེ་དག་ནི་ཡོངས་སུ་ཉམས་པ་ཇི་ཙམ་དུ་འགྱུར་བ་ལྟོས་ཤིག་།བཟང་སྐྱོང་སེམས་ཅན་དེ་ལྟ་བུ་དེ་རྣམས་ལ་ནི་ཆོས་དེ་ལྟ་བུ་དག་ཆེད་མི་ཆེ་བར་ངས་བཤད་དོ། །བཟང་སྐྱོང་འདི་ལྟ་སྟེ་དཔེར་ན། སྐྱེས་བུ་གང་ལ་ལ་ཞིག་བྱིས་པའི་རང་བཞིན་ཅན་ཤེས་རབ་འཆལ་པའི་རང་བཞིན་ཅན་ཞིག་ལ་ཙན་དན་དམར་པོ་སར་པ་ཞིག་བྱིན་པ་དང ། དེ་དེ་ལ་མི་གཙང་བའི་འདུ་ཤེས་སྐྱེད་དོ། །བཙོག་པའི་འདུ་ཤེས་བསྐྱེད་དོ། །དེ་ལ་སྐྱེས་བུ་མཁས་པའི་རང་བཞིན་ཅན་ཙན་དན་གྱི་ཚོང་པ་ཞིག་གིས་འདི་སྐད་དུ་ཀྱེ་སྐྱེས་བུ་ཁྱོད་ཙན་དན་སར་པ་འདི་ལ་མི་གཙང་བའི་འདུ་ཤེས་མ་སྐྱེད་ཅིག་།བཙོག་པའི་འདུ་ཤེས་མ་སྐྱེད་ཅིག་།ཀྱེ་སྐྱེས་བུ་འདིའི་དྲི་ཇི་ཙམ་དུ་དགའ་བར་བྱེད་པ་རེ་ཤིག་སྣོམས་ཤིག་། 51.20b ཀྱེ་སྐྱེས་བུ་འདིའི་ཁ་དོག་ཅི་ཙམ་དུ་ལྟ་ན་སྡུག་པ་ཡང་ལྟོས་ཤིག་སྨྲས་པ་དང ། བྱིས་པའི་རང་བཞིན་ཅན་ཤེས་རབ་འཆལ་པའི་རང་བཞིན་ཅན་གྱི་སྐྱེས་བུ་དེས་ཙན་དན་དམར་པོ་དེ་མཐོང་ནས་སྣོམ་མི་འདོད་པའི་ཕྱིར་རང་གིས་མ་བླངས། ལྟ་མི་འདོད་པའི་ཕྱིར་མིག་ཀྱང་འཛུམ་པར་བྱེད་པ་དེ་བཞིན་དུ། བཟང་སྐྱོང་མ་འོངས་པའི་དུས་ན། དགེ་སློང་བྱང་ཆུབ་སེམས་དཔའ་རློམ་སེམས་ཅན་ལུས་མ་བསྒོམས་པ། སེམས་མ་བསྒོམས་པ། ཚུལ་ཁྲིམས་མ་བསྒོམས་པ། ཤེས་རབ་མ་བསྒོམས་པ། ཚུལ་ཁྲིམས་འཆལ་པ། དམ་པའི་ཆོས་ངེས་པའི་དོན་རིན་པོ་ཆེ་མི་ལེན་པ། དམ་པའི་ཆོས་ངེས་པའི་དོན་རིན་པོ་ཆེ་ཡོངས་སུ་སྤོང་བར་བྱེད་པ། ཤེས་རབ་འཆལ་པ། ཤེས་རབ་ལས་ཡོངས་སུ་ཉམས་པ། བསམ་གཏན་རྙེད་པས་ལྷག་པའི་ང་རྒྱལ་ཅན། གང་ཟག་ལ་རྟེན་པ། གང་ཟག་ཏུ་ལྟ་བ། གང་ཟག་ཏུ་གནས་པ། ཆོས་སུ་དམིགས་པ་ལ་མངོན་པར་ཞེན་པ། སྟོང་པ་ཉིད་བཤད་པས་སྐྲག་པ་དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་བཤད་པ་ཐོས་ན། རྣ་བླགས་ཏེ་ཉན་པར་མི་བྱེད། མངོན་པར་དད་པར་མི་བྱེད། འཛིན་པར་མི་བྱེད། ཀུན་ཆུབ་པར་མི་བྱེད། འཆང་བར་མི་བྱེད། ཀློག་པར་ཡང་མི་བྱེད་ན། གཞན་དག་ལ་རྒྱ་ཆེར་འཆད་པ་ལྟ་ཅི་སྨོས། དེ་དག་དེའི་ཕྱིར་བྱམས་པ་དང ། དགའ་བ་རྒྱ་ཆེན་པོ་ཡང་མི་འཐོབ་ན། དེ་བཞིན་ཉིད་དུ་སྒྲུབ་པ་ལྟ་ཅི་སྨོས་པའི་སྟེང་དུ་ཐོས་ནས་ཀྱང་སྤོང་བར་བྱེད་དོ། །མངོན་པར་མ་དད་དོ། །མི་ལེན་ཏོ། །མོས་པར་མི་བྱེད་དོ། །དཔྱ་བའི་བསམ་པ་དང ། བསྟིང་བའི་བསམ་པ་དང ། སྨད་པའི་བསམ་པས་ཚིག་ཀྱང་འདི་སྐད་དུ་གསུང་རབ་འདི་དག་འབར་བ་དང ། འདི་ལྟར་དགེ་སློང་ཀུན་དགའ་བོ་འདྲ་བ་འཇིག་རྟེན་དུ་འབྱུང་བ་དང ། འདི་ལྟ་བུའི་མདོ་སྡེ་འབྱུང་བ་ནི་ངོ་མཚར་ཏོ་ཞེས་ཟེར་ཞིང ། ལྐོག་ཏུ་དོང་ནས་ཀྱང་ཕན་ཚུན་དུ་མདོ 51.21a འདི་ལྟ་བུ་དག་ནི་རང་གིས་བྱས་པ། རང་བཟོ་བྱས་པ་སྟེ། འདི་ནི་སངས་རྒྱས་ཀྱིས་གསུངས་པ་མ་ཡིན། སངས་རྒྱས་ཀྱིས་གནང་བ་མ་ཡིན་ནོ་ཞེས་དེ་སྐད་ཀྱང་རྗོད་ཅིང་སྨོད་པར་བྱེད་དེ། སྐྱེས་བུ་བླུན་པོ་དེ་ལྟ་བུ་དག་ནི་དམ་པའི་ཆོས་རིན་པོ་ཆེ་ལས་ཡོངས་སུ་ཉམས་པ་དང ། དམ་པའི་ཆོས་རིན་པོ་ཆེ་ཡོངས་སུ་སྤངས་པར་རིག་པར་བྱའོ། །བཟང་སྐྱོང་འདི་ལྟ་སྟེ་དཔེར་ན། སྐྱེས་བུ་བྱིས་པའི་རང་བཞིན་ཅན་དེ་ཙན་དན་དམར་པོ་དེ་མཐོང་ནས་ཡི་མི་བསྣམ་པའི་ཕྱིར་སྣ་ཡང་འགོག་པ་དང ། མི་མཐོང་བར་བྱ་བའི་ཕྱིར་མིག་ཀྱང་འཛུམས་པ་དེ་བཞིན་དུ། བཟང་སྐྱོང་སྐྱེས་བུ་བླུན་པོ་དེ་དག་ཀྱང་ཏིང་ངེ་འཛིན་རིན་པོ་ཆེ་འདི་ལྟ་བུ་ཐོས་ནས། ཕྱི་ཕྱིར་ཞིང་མཉན་པར་མི་སེམས། གཟུང་བ་དང ། ཀུན་ཆུབ་པར་བྱ་བ་དང ། བཅང་བར་བྱ་བ་དང ། བཀླག་པར་བྱ་བར་མི་སེམས་པའི་སྟེང་དུ་ཐོས་ནས་ཀྱང་འདི་ལྟ་སྟེ། ཉན་མི་འདོད་པའི་ཕྱིར་གནས་དེ་ནས་འགྲོ་བར་འགྱུར་རོ། །བཟང་སྐྱོང་འདི་ལྟ་སྟེ་དཔེར་ན། སྐྱེས་བུ་རིན་པོ་ཆེ་འཚོང་བ་ལ་ལ་ཞིག་གིས་སྐྱེས་བུ་བླུན་པོའི་རང་བཞིན་ཅན་དེ་རྣམས་ལ་ནོར་བུ་རིན་པོ་ཆེ་བཻ་དཱུརྱ་རིན་ཐང་མེད་པ་ཞིག་བསྟན་པར་བསམས་པ་དང ། དེ་ལ་སྐྱེས་བུ་བླུན་པོའི་རང་བཞིན་ཅན་དེ་དག་གིས་ནོར་བུ་རིན་པོ་ཆེ་དེ་མཐོང་ནས། དེ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ནོར་བུ་རིན་པོ་ཆེ་འདིའི་རིན་ཇི་ཙམ། རིན་པོ་ཆེ་འཚོང་བ་དེས་དེ་དག་ལ་འདི་སྐད་ཅེས་སྨྲས་སོ། །ནོར་བུ་རིན་པོ་ཆེ་འདིའི་འོད་ཀྱིས་ཕྱོགས་ཇི་ཙམ་ཁྱབ་པ་དེ་ཙམ་གྱི་ཕྱོགས་བཞིར་རིན་པོ་ཆེ་སྣ་བདུན་གྱིས་ཡོངས་སུ་གང་བར་བྱས་པ་དེ་བྱིན་ཅིག་།དེ་ཅིའི་ཕྱིར་ཞེ་ན། ནོར་བུ་རིན་པོ་ཆེ་འདིའི་རིན་ཐང་ཚང་བ་ནི་དེ་ཡིན་ནོ། །སེམས་ཅན་བླུན་པའི་རང་བཞིན་ཅན་དེ་དག་གིས་དེ་ལས་ནོར་བུ་རིན་པོ་ཆེའི་རིན་ཐང་ཐོས་པ་དང ། གད་མོས་འདེབས་ཤིང་དཔྱ་བར་བྱེད་སྟིང་བར་བྱེད་ལ་ནོར་བུ་རིན་པོ་ཆེ་དེ་ཡང་ལག་པ་གཉིས་ཀྱིས་དཔོག་པར་བྱེད་དོ། །བཟང་སྐྱོང་དེ་བཞིན་དུ་མ་འོངས 51.21b པའི་དུས་ན་དགེ་སློང་རྟོག་པ་མང་བ། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ་དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས། འདི་ལྟ་སྟེ་རྒྱས་པར་བྱ་བའི་ཕྱིར་འཛིན་པར་འགྱུར། ཀུན་ཆུབ་པར་བྱེད་པར་འགྱུར། ཡི་གེར་འདྲི་བར་འགྱུར། ཡི་གེར་འདྲིར་འཇུག་པར་འགྱུར། འཆད་པར་འགྱུར། ཀློག་པར་འགྱུར། གཞན་དག་ལ་ཡང་རྒྱ་ཆེར་ཡང་དག་པར་འཆད་པར་འགྱུར། ལྷག་པར་དད་པར་འགྱུར། རྟོག་པ་མང་བར་འགྱུར། མོས་པ་མང་བར་འགྱུར། སྤྱོད་ལམ་དང་བར་འགྱུར། ངོ་ཚ་ཤེས་པ་དང་འགྱོད་པ་དང་ལྡན་པར་འགྱུར། བསླབ་པ་འདོད་པར་འགྱུར། ཟབ་མོ་ལ་མོས་པར་འགྱུར། ཤེས་རབ་དང་ལྡན་པར་འགྱུར། མང་དུ་ཐོས་པར་འགྱུར། བྱམས་པ་ལ་གནས་པ་དང་སྙིང་རྗེ་ཐོབ་པར་འགྱུར། དེ་དག་ཏིང་ངེ་འཛིན་འདི་མཉན་པའི་ཕྱིར་གང་ལ་ལར་སོང་བ་དེར་སྟོན་པར་འགྱུར། ཡང་དག་པར་སྟོན་པར་འགྱུར་རོ། །དེ་འདི་སྙམ་དུ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱིས་གསུངས་པ། འདི་འདྲ་བ་འདི་ཅི་ནས་ཀྱང་ཡུན་རིང་དུ་གནས་པར་གྱུར་ཅིག་།རྒྱས་པར་གྱུར་ཅིག་།སྙམ་དུ་སེམས་སྐྱེད་པར་འགྱུར་རོ། །བཟང་སྐྱོང་དེ་ན་ཡང ། སེམས་ཅན་གཞན་ཁ་ཅིག་བསོད་ནམས་ཆུང་བ། དགེ་བའི་རྩ་བ་མ་སྐྱེད་པ། སྔོན་གྱི་རྒྱལ་བ་ལ་བྱ་བ་མ་བྱས་པ། ང་རྒྱལ་ཀྱིས་གཟིར་བ། ཕྲག་དོག་གིས་གཟིར་བ། རྙེད་པ་དང་བཀུར་སྟི་དང ། ཚིགས་སུ་བཅད་པས་གཟིར་བ། ཚུལ་ཁྲིམས་རྣམས་ཡོངས་སུ་མ་དག་པ། ཏིང་ངེ་འཛིན་རྣམས་མ་ཐོབ་པ། ཤེས་རབ་རྣམས་མ་ཐོབ་པ། ཐོས་པ་ཉུང་བ། སློབ་དཔོན་དང་མ་འགྲོགས་པ། གང་ཟག་ཏུ་ལྟ་བ་དང ། གང་ཟག་ཏུ་རྟེན་པ། གང་ཟག་ལ་གནས་པ། ཆོས་སུ་དམིགས་པ་ལ་མངོན་པར་ཞེན་པ་རྣམས་ནི་སྟོང་པ་ཉིད་བཤད་པས་སྐྲག་པར་འགྱུར་ཏེ། དེ་དག་ད་ལྟར་གྱི་སངས་རྒྱས་མངོན་སུམ་དུ 51.22a བཞུགས་པའི་ཏིང་ངེ་འཛིན་འདི་ཐོས་ནས་རྟོག་པར་མི་འགྱུར། མངོན་པར་དད་པར་མི་འགྱུར། ཡིད་ཆེས་པར་མི་འགྱུར། མོས་པར་མི་འགྱུར་བའི་སྟེང་དུ་ཐོས་ནས་ཀྱང་གད་མོས་འདེབས་པར་འགྱུར། འཕྱ་བར་འགྱུར། སྟིང་བར་འགྱུར ། ལྐོག་ཏུ་དོང་ནས་ཀྱང་ཕན་ཚུན་ནས་སྨོད་པར་བྱེད། སྤོང་བར་བྱེད་ཅིང ། ཚིག་ཀྱང་འདི་སྐད་དུ་དགེ་སློང་འདི་དག་ནི་སྤྱི་རྟོལ་ཅན་ནོ། །དགེ་སློང་འདི་དག་ནི་མུ་ཆོར་སྨྲ་བ་སྟེ། འདི་ལྟར་འདི་དག་ནི་སངས་རྒྱས་ཀྱིས་མ་གསུངས་པ། རང་གིས་བྱས་ཤིང་རང་བཟོ་བྱས་པ། ཚིག་དང་ཡི་གེ་སྣ་ཚོགས་པ། གཏམ་ཙམ་དུ་བཤད་པ་ལ་མདོ་སྡེའི་མིང་གིས་འཆད་པ་ངོ་མཚར་ཏོ་ཞེས་ཟེར་ཞིང ། མདོ་སྡེ་འདི་དག་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་ཟེར་བ་དེ་དག་སྐྱེ་བོ་རྣམས་ལ་ཡང་དེ་ལྟར་ཤེས་པར་བྱེད་དོ། །དེ་ལྟར་སྐྱེས་བུ་བླུན་པོ་བསོད་ནམས་ཆུང་བ་དགེ་བའི་རྩ་བ་རྣམས་མ་སྐྱེད་པ། སྔོན་གྱི་རྒྱལ་བ་ལ་བྱ་བ་མ་བྱས་པ། བླ་ན་མེད་པའི་ཆོས་རིན་པོ་ཆེ་ཡོངསུ་སྤངས་པས་ཆོས་རིན་པོ་ཆེ་ལས་ཕྱི་རོལ་ཏུ་གྱུར་པ་དེ་དག་བསོད་ནམས་ཆུང་བ་ཉིད་ལ་བསྟེན་པར་འགྱུར། སྒོམ་པར་འགྱུར། མང་དུ་བྱེད་པར་འགྱུར་རོ། ། བཟང་སྐྱོང་ལྷ་དང་མི་དང་ལྷ་མ་ཡིན་དུ་བཅས་པའི་འཁོར་འདི་རྣམས་ཀྱི་མདུན་དུ་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕུལ་བ་བས། རིགས་ཀྱི་བུ་འམ་རིགས་ཀྱི་བུ་མོ་གང་གིས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཉན་ཅིང་ཐོས་ནས་ཀྱང་རྟོག་པར་བྱེད། མངོན་པར་དད་པར་བྱེད། ཡིད་ཆེས་པར་བྱེད་ལ་འདི་ནི་བདེན་པ་ཉིད་དོ་ཞེས་མོས་པར་བྱེད་ཅིང ། སངས་རྒྱས་ཀྱིས་གསུངས་པ་ཡིན་ནོ་ཞེས་ཚིག་ཏུ་ཡང་བརྗོད་ན། རིགས་ཀྱི་བུའམ་རིགས་ཀྱི་བུ་མོ་དེའི་བསོད་ནམས་ཆེས་མང་དུ་འཕེལ་བར་འགྱུར་རོ། ། 51.22b དེ་ནས་དེའི་ཚེ་དོན་དེ་ཉིད་བསྟན་པར་བྱ་བའི་ཕྱིར་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་གིས་སྟོང་གསུམ་ཐམས་ཅད་དུ། །རིན་པོ་ཆེས་ནི་བཀང་བྱས་ཏེ། །བྱང་ཆུབ་བཙལ་བར་བྱ་བའི་ཕྱིར། །འཇིག་རྟེན་མགོན་ལ་ཕུལ་བ་བས། །གང་གིས་སངས་རྒྱས་ཀྱིས་སྔགས་པའི། །མདོ་སྡེ་ཏིང་འཛིན་འདི་ལྟ་བུ། །ཐོས་ནས་མོས་པར་བྱེད་ན་ནི། །དེའི་བསོད་ནམས་ཁྱད་པར་འཕགས། །སྒྱུ་དང་གྱ་གྱུ་གཡོ་དང་ལྡན། །རྒོད་ཅིང་དབང་པོ་མ་བསྡུས་ལ། །སྡིག་པའི་གྲོགས་པོས་ཟིན་གྱུར་པ། །བློ་ངན་རྣམས་ནི་དད་མི་འགྱུར། །ཚུལ་ཁྲིམས་འཆལ་ཅིང་སྡིག་ཆོས་ཅན། །ང་ཞེས་ང་རྒྱལ་དམ་དུ་གནས། །ཕན་ཚུན་དག་ནས་འདུས་ནས་ཀྱང ། །རྒྱལ་བའི་སྟན་ལ་གད་མོས་འདེབས། །མདོ་སྡེ་དེ་དག་ཆོས་ཀྱི་རྒྱལ། །སངས་རྒྱས་ཀྱིས་ནི་མ་གསུངས་ཤེས། །མ་བསྡམས་དེ་དག་དེ་འདྲ་བའི། །ཚིག་དག་ཀྱང་ནི་བརྗོད་པར་འགྱུར། །གང་ཞིག་ཏིང་འཛིན་མདོ་འདི་ལ། །ཐོས་ནས་རྟོག་པར་མི་འགྱུར་བ། །མ་རུངས་ཆུད་ཟོས་མི་ཤེས་ཤིང ། །ལྟ་བ་ངན་ལ་དམིགས་ཅན་ནོ། །སངས་རྒྱས་ཀྱིས་ནི་གསུངས་པ་ཡི། །མདོ་སྡེ་འདི་འདྲ་འདི་དག་ལ། །བསོད་ནམས་ཆུང་ཞིང་དམིགས་གནས་པས། །དད་པར་བྱ་བ་མི་ནུས་སོ། །གང་ཞིག་མདོ་སྡེ་འདི་འདྲ་བ། །ཐོས་ནས་དགའ་བར་འགྱུར་བ་ནི། །མི་མཆོག་ཏུ་ནི་མི་འགྱུར་སྙམ། །དེ་ལ་ཐེ་ཙོམ་མ་བྱེད་ཅིག་།གང་ཞིག་ཚུལ་ཁྲིམས་ཡོངས་དག་ཅིང ། །ལྟ་བ་འང་རྟག་ཏུ་དྲང་བ་དང ། །ཆོས་འདི་ལ་ནི་གུས་བཅས་པ། །ངས་ནི་དེ་ལ་ཆོས་བཤད་དོ། །གང་གིས་དཔའ་ཆེན་འཇིག་རྟེན་མགོན། །འོད་བྱེད་པ་ནི་མཐོང་གྱུར་པ། །དེ་དག་དོན་དུ་བཤད་པར་བྱས། །དེ་དག་ཀྱང་ནི་ཆོས་འཛིན་ཤོག་།བཟང་སྐྱོང་གིས་ཞུས་པའི་ཏིང་ངེ་འཛིན་ལས་ལྷག་པའི་ང་རྒྱལ་ཅན་གྱི་ལེའུ་སྟེ་དྲུག་པའོ།། །། 51.23a བམ་པོ་གསུམ་པ།། །།བཟང་སྐྱོང་ད་ལྟར་ང་ཏིང་ངེ་འཛིན་འདི་འཆད་པའི་ཚེ་གང་གིས་ང་ལ་མཉེས་པར་བྱེད་པ་དེ་དག་ནི་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་སྡིག་པའི་གྲོགས་པོའི་ལག་ཏུ་སོང་བ་འམ། དགེ་བའི་བཤེས་གཉེན་དང་བྲལ་བ་མ་གཏོགས་པར་ཏིང་ངེ་འཛིན་འདི་ཐོས་ནས་སྤོང་བ་འམ། སྨོད་པར་འགྱུར་བ་དེ་ནི་གནས་མེད་དེ་གནས་མ་ཡིན་ཏེ་སྐབས་མེད་དོ། །བཟང་སྐྱོང་འདི་ན་དགེ་བའི་བཤེས་གཉེན་གྱི་ལག་ཏུ་སོང་བ་ལས་ཀྱང་སྐྱེས་བུ་བླུན་པོ་ཁ་ཅིག་ཏིང་ངེ་འཛིན་འདི་ཐོས་ནས་མངོན་པར་དད་པར་མི་བྱེད། ཡིད་ཆེས་པར་མི་བྱེད། མོས་པར་མི་བྱེད་ན། གང་དག་སྡིག་པའི་གྲོགས་པོའི་ལག་ཏུ་སོང་བ་རྣམས་ལྟ་སྨོས་ཀྱང་ཅི་དགོས། བཟང་སྐྱོང་དེ་ཅིའི་ཕྱིར་ཞེ་ན། མང་དུ་ཐོས་པ་དེ་ནི་དེ་ལྟར་བསྒྲུབ་པར་དཀའོ། །སངས་རྒྱས་བལྟ་བ་དེ་ནི་དེ་ལྟར་རྙེད་པར་དཀའོ། །བཟང་སྐྱོང་སངས་རྒྱས་ཀྱི་ཆོས་རྣམས་ལ་མོས་པར་བྱ་བ་ནི་དེ་ལྟར་དཀའོ། །བཟང་སྐྱོང་སངས་རྒྱས་ཀྱིས་ཆོས་ཐམས་ཅད་སྐྱེད་པར་བྱེད་པ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཡང་དེ་ལྟར་བསྒྲུབ་པར་དཀའོ། །བཟང་སྐྱོང་བྱང་ཆུབ་སེམས་དཔའ་ཁྱིམ་པ་འམ། རབ་ཏུ་བྱུང་བ་གང་ལ་ལ་ཞིག་ཏིང་ངེ་འཛིན་འདི་ལྟ་བུ་འདི་ཐོས་ནས་མི་སྐྲག་མི་དངང་དངང་བར་མི་འགྱུར། གད་མོས་མི་འདེབས། འཕྱ་བར་མི་བྱེད། སྟིང་བར་མི་བྱེད། སྤོང་བར་མི་བྱེད་པའི་སྟེང་དུ་ཐོས་ནས་ཀྱང་རྗེས་སུ་ཡི་རང་བར་བྱེད། མངོན་པར་དད་པར་བྱེད། ཡིད་ཆེས་པར་བྱེད། འདུན་པར་བྱེད་ཅིང་ཏིང་ངེ་འཛིན་འདི་བསྟན་པ་དང ། གཟུང་བ་དང ། ཀུན་ཆུབ་པར་བྱ་བ་དང ། བཅང་བ་དང ། བཀླག་པ་དང ། ཡི་གེར་བྲི་བ་དང ། བཤད་པ་དང ། བསྒོམ་པའི་ཕྱིར་འདོད་པ་སྐྱེད་པ་ནི་བཟང་སྐྱོང་རིགས་ཀྱི་བུ་འམ། རིགས་ཀྱི་བུ་མོ་དེ་ལྟ་བུ་དེ་དག་ཐམས་ཅད་དེ་བཞིན་གཤེགས་པས་གཟིགས་སོ། །དེ་དག་ནི་དེ་བཞིན་གཤེགས་པས་མཁྱེན་ཏོ། ། 51.23b བཟང་སྐྱོང་སྐྱེས་བུ་དམ་པ་དེ་ལྟ་བུ་དེ་དག་ཇི་ལྟར་དེ་བཞིན་གཤེགས་པས་གཟིགས་ཤིང ། ཇི་ལྟར་དེ་བཞིན་གཤེགས་པས་མཁྱེན་ཅེས་ན། གང་དག་ཏིང་ངེ་འཛིན་འདི་འཛིན་པར་འགྱུར་བ་དང ། ཀུན་ཆུབ་པར་བྱེད་པར་འགྱུར་བ་དང ། འཆང་བར་འགྱུར་བ་དང ། ཀློག་པར་འགྱུར་བ་དང ། ཡི་གེར་འདྲི་བར་འགྱུར་བ་དང ། སྟོན་པར་འགྱུར་བ་དང ། བསྒོམ་པར་འགྱུར་བའི་སྐྱེས་བུ་དམ་པ་དེ་ལྟ་བུ་དེ་དག་ནི་བཟང་སྐྱོང་ཚུལ་ཁྲིམས་འཆལ་པར་མི་འགྱུར། དད་པ་མེད་པར་མི་འགྱུར། ཆོས་མི་འདོད་པར་མི་འགྱུར། ལོག་པར་ལྟ་བར་མི་འགྱུར། དམིགས་པ་ལ་མངོན་པར་ཞེན་པར་མི་འགྱུར་གྱིས། བཟང་སྐྱོང་རིགས་ཀྱི་བུ་འམ། རིགས་ཀྱི་བུ་མོ་དེ་ལྟ་བུ་དེ་དག་ནི་དད་པ་ཅན་དུ་འགྱུར་རོ། །འདི་ལྟ་སྟེ་ཆོས་འདི་ལྟ་བུ་འདི་དག་ལེན་པར་བྱེད་པའི་རིགས་ཀྱི་བུ་དང་རིགས་ཀྱི་བུ་མོ་དེ་ལྟ་བུ་དེ་དག་ནི་རྟོག་པ་མང་བ་དང ། མོས་པ་མང་བ་དང ། ཡིད་ཆེས་པ་དང ། ཆོས་འདོད་པ་དང ། ཟབ་མོ་ལ་མོས་པ་རྣམས་སུ་འགྱུར་རོ། །བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་དེ་ལྟ་བུ་དེ་དག་ནི་བསོད་ནམས་ཆུང་བ་དང ། དགེ་བའི་རྩ་བ་ཆུང་བར་མི་འགྱུར་གྱི། བཟང་སྐྱོང་རིགས་ཀྱི་བུ་འམ། རིགས་ཀྱི་བུ་མོ་དེ་ལྟ་བུ་དེ་དག་ནི་སྔོན་གྱི་རྒྱལ་བ་ལ་བྱ་བ་བྱས་ཤིང ། དགེ་བའི་རྩ་བ་རྣམས་འབར་བ་ཡིན་ནོ། །བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་དེ་ལྟ་བུ་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན། སངས་རྒྱས་གཅིག་དང ། གཉིས་དང ། གསུམ་ལ་དགེ་བའི་རྩ་བ་རྣམས་བསྐྱེད་པ་མ་ཡིན་གྱི། བཟང་སྐྱོང་རིགས་ཀྱི་བུ་དེ་ལྟ་བུ་དེ་དག་ནི་སངས་རྒྱས་བརྒྱ་ལ་བསྙེན་བཀུར་བྱས་པར་འགྱུར་རོ། །རིགས་ཀྱི་བུ་དེ་ལྟ་བུ་དེ་དག་ནི་སངས་རྒྱས་བརྒྱ་ལ་དགེ་བའི་རྩ་བ་བསྐྱེད་པར་འགྱུར་རོ། །དེ་བཞིན་གཤེགས་པ་དེ་དག་ལས་རིགས་ཀྱི་བུ་འམ་རིགས་ཀྱི་བུ་མོ་དེ་དག་གིས་ཏིང་ངེ་འཛིན་འདི་ཐོས་ཤིང་རྗེས་སུ་ཡིད་རང་བ་དང་མོས་པར་འགྱུར་རོ། །དེ་དག་ཕྱི་མའི་དུས་ཀྱི་ཚེ་ལྔ་བརྒྱ་པ་ཐ་མ་ལ་ཡང་ཏིང་ངེ་འཛིན་འདི་ཐོས་ནས་མི་སྤོང་བར་འགྱུར་བའི་སྟེང་དུ་ཐོས་ནས་ཀྱང ། རྗེས་སུ་ཡིད་རང་བར་འགྱུར། ལེགས་སོ། ། 51.24a ཞེས་བྱ་བ་འབུལ་བར་འགྱུར། འཆང་བར་འགྱུར། ཀློག་པར་འགྱུར། ལུང་ནོད་པར་འགྱུར། འཆད་པར་འགྱུར། བསྒོམ་པའི་སྦྱོར་བ་ལ་བརྩོན་པར་འགྱུར་རོ། །བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ད་ལྟར་གྱིས་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཐོས་ནས་མི་སྐྲག་མི་དངང་དངང་བར་མི་འགྱུར་ཞིང ། མི་སྤོང་བའི་སྟེང་དུ་ཐོས་ནས་ཀྱང་རྗེས་སུ་ཡིད་རང་བར་བྱེད། མངོན་པར་དད་པར་བྱེད། མངོན་པར་ཡིད་ཆེས་པར་བྱེད་མོས་པར་བྱེད། ལེགས་སོ་ཞེས་བྱ་བ་འབུལ་བར་བྱེད་ཅིང ། ཐོས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། འཆང་བར་བྱེད། ཀློག་པར་བྱེད། ཡི་གེར་འདྲི་བར་བྱེད། ཡི་གེར་འདྲིར་འཇུག་པར་བྱེད། སྟོན་པར་བྱེད་ཅིང་ཐ་ན་ཉིན་ཞག་འགའ་ཡང་ཏིང་ངེ་འཛིན་འདི་བསྒོམ་པའི་ཕྱིར་བསྒོམ་པའི་སྦྱོར་བ་ལ་བརྩོན་པར་བྱེད་ན་བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་དེ་དག་དེའི་གཞི་ལས་བསོད་ནམས་མང་པོ་སྐྱེད་པར་འགྱུར་རོ། །བསོད་ནམས་ཀྱི་ཕུང་པོ་ཚད་མེད་པ་དང་གྲངས་མེད་པ་བསྐྱེད་པར་འགྱུར་རོ། །རིགས་ཀྱི་བུ་དང་རིགས་ཀྱི་བུ་མོ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །བསམ་པ་བཞིན་དུ་ཡོངས་སུ་རྫོགས་པའང་འཐོབ་པར་འགྱུར་རོ། །བཟང་སྐྱོང་འོན་ཀྱང་ཡང་དོན་དེ་ཉིད་ལྷག་པར་ཡོངས་སུ་རྫོགས་པར་བྱ་བའི་ཕྱིར་ཁྱོད་ལ་དཔེ་བསྟན་ཏོ། །བཟང་སྐྱོང་འདི་ལྟ་སྟེ་དཔེར་ན། མི་ལ་ལ་ཞིག་བྱུང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྡུལ་ཕྲ་རབ་ཀྱི་རྡུལ་དུ་བླགས། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་རྩཝ་དང ། ཡལ་ག་དང ། ལོ་མ་དང ། འདབ་མ་ཐ་ན་སོར་བཞི་ཙམ་པ་དེ་དག་ཐམས་ཅད་ཀྱང་རྡུལ་ཕྲ་རབ་ཀྱི་རྡུལ་དུ་བླགས་ལ། དེ་ནས་མི་དེས་རྡུལ་ཕྲ་རབ་ཀྱི་རྡུལ་གཅིག་བླངས་ཏེ་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་ཇི་སྙེད་ཡོད་པ་དེ་སྙེད་ཀྱི་ཆར་བཅད་དེ། ཚུལ་དེ་ལྟ་བུར་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་ཆ་དེ་སྙེད་དུ་བཅད་ན། བཟང་སྐྱོང་ཁྱོད་ཇི་སྙམ་དུ་སེམས། རྡུལ་ཕྲ་རབ་ཀྱི་རྡུལ་མང་བ 51.24b ཡིན་ནམ། བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས་མང་ལགས་སོ། །བཙུན་པ་བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་རྡུལ་ཕྲ་རབ་ཀྱི་རྡུལ་དེ་དག་གི་ཆ་ཇི་སྙེད་ཡོད་པ་དེ་སྙེད་ཀྱི་སངས་རྒྱས་ཀྱི་ཞིང་རྣམས་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དབུལ་བར་ཕུལ་ན། གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ་བཙུན་པ་བཅོམ་ལྡན་འདས་མང་ལགས་སོ། །བཙུན་པ་བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བཟང་སྐྱོང་ཡང་རིགས་ཀྱི་བུ་འམ། རིགས་ཀྱི་བུ་མོ་གང་གིས་དེ་སྙེད་ཀྱི་སངས་རྒྱས་ཀྱི་ཞིང་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་ལ་དབུལ་བར་ཕུལ་བ་བས། བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་གང་གིས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཐོས་ནས་རྟོག་པར་བྱེད། མངོན་པར་དད་པར་བྱེད། ཡིད་ཆེས་པར་བྱེད། མོས་པར་བྱེད་ལ་བརྟགས་ཤིང་མངོན་པར་དད་དེ། ཡིད་ཆེས་ཤིང་མོས་པར་བྱས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། འཆང་བར་བྱེད། ཀློག་པར་བྱེད། ཡི་གེར་འདྲི་བར་བྱེད་ཅིང་གཞན་དག་ལ་ཡང་རྒྱ་ཆེར་འཆད་པར་བྱེད། སྟོན་པར་བྱེད། ཡང་དག་པར་འཆད་པར་བྱེད་ན། དགེ་བའི་རྩ་བ་སྔ་མ་བས་རིགས་ཀྱི་བུ་འམ་རིགས་ཀྱི་བུ་དེའི་བསོད་ནམས་ཀྱི་ཕུང་པོ་ཆེས་མང་དུ་སྐྱེད་ན། གང་ཞིག་ཐ་ན་བ་འཇོས་ཙམ་ཞིག་བསྒོམ་པའི་སྦྱོར་བ་ལ་བརྩོན་པར་གནས་པ་ལྟ་ཅི་སྨོས། བཟང་སྐྱོང་གང་ཞིག་ཏིང་ངེ་འཛིན་འདི་ཐོས་ནས་འཛིན་པར་འགྱུར། ཀུན་ཆུབ་པར་བྱེད་པར་འགྱུར། འཆང་བར་འགྱུར། ཀློག་པར་འགྱུར། ཡི་གེར་འདྲི་བར 51.25a འགྱུར་ཞིང ། གཞན་དག་ལ་ཡང་རྒྱ་ཆེར་གོ་བར་བྱེད། སྟོན་པར་བྱེད། ཡང་དག་པར་འཆད་པར་བྱེད་པའི་རིགས་ཀྱི་བུ་འམ། རིགས་ཀྱི་བུ་མོ་དེ་དག་གི་བསོད་ནམས་ཀྱི་ཕུང་པོ་དེའི་ཚད་ཀྱང་ང་མི་སྨྲ་ན། བཟང་སྐྱོང་རིགས་ཀྱི་བུ་འམ། རིགས་ཀྱི་བུ་མོ་གང་ཏིང་ངེ་འཛིན་འདི་བསྒྲུབས་ཏེ་དེ་བཞིན་ཉིད་དུ་སློབ་ཅིང ། དེ་བཞིན་ཉིད་དུ་ནན་ཏན་བྱེད་པ་ལྟ་ཅི་སྨོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སྟོང་ཆེན་པོ་ཡི་འཇིག་རྟེན་ཁམས་འདི་དག་།རིན་ཆེན་བཀང་སྟེ་སྦྱིན་པ་བྱིན་པ་ནི། །དེ་ཡི་འབྲས་བུ་ཆུང་བར་ང་སྨྲའོ། །གང་གིས་ཆོས་འདི་འདྲ་བ་ཐོས་པ་དང ། །བསོད་ནམས་མང་འདོད་བྱང་ཆུབ་སེམས་དཔའ་གང ། །ཏིང་འཛིན་འདི་ནི་འཆང་ཞིང་ཀློག་བྱེད་ལ། །ཐོས་ནས་སྙོམ་པ་མེད་པར་སྟོན་པ་ནི། །བསོད་ནམས་ཕུང་པོ་མཐའ་མེད་ལྡན་པར་འགྱུར། །གང་གིས་འཇིག་རྟེན་ཁམས་འདི་རྡུལ་ཕྲན་ལྟར། །བཅད་ཅིང་གཤེགས་ཏེ་རྡུལ་དུ་བྱས་གྱུར་པ། །དེ་སྙེད་ཀྱི་ནི་འཇིག་རྟེན་ཁམས་ཀྱི་རྣམས། །རིན་ཆེན་བཀང་སྟེ་སྦྱིན་པ་བྱིན་པ་བས། །གང་གིས་ཏིང་འཛིན་སངས་རྒྱས་རྣམས་ཀྱིས་གནང ། །བདེ་གཤེགས་བསྔགས་པ་འདི་ལ་ཚིག་བཞི་པའི། །ཚིགས་བཅད་འགའ་ཞིག་ཀུན་དུ་ཆུབ་བྱེད་ན། །དེ་ཡི་བསོད་ནམས་དཔེ་ཡོད་མི་འགྱུར་ན། །གང་ཞིག་སྐད་ཅིག་ཙམ་འམ་བ་འཇོས་ཙམ། །ཀུན་ཆུབ་བྱེད་དམ་འཛིན་དང་ཀློག་པ་ལྟ། །སྨོས་ཀྱང་མི་དགོས་དེ་ཡི་སྟེང་དུ་ཡང ། །དེ་ཡི་བསོད་ནམས་ལ་ནི་ཚད་མི་རྙེད། །སེམས་ཅན་ཐམས་ཅད་བདེ་བར་གཤེགས་གྱུར་ཏེ། །ཡེ་ཤེས་རྣམ་དག་དོན་དམ་ཐུགས་སུ་ཆུད། །དེ་དག་བསྐལ་པ་བྱེ་བ་རབ་མང་ངམ། །དེ་བས་ཚིགས་བཅད་གཅིག་བཤད་བསོད་ནམས་འཕགས། །དེ་སྲིད་བར་དུ་ཆོས་མང་བྱེ་བ་རྣམས། །བསྟན་ནས་དེ་དག་མྱ་ངན་འདས་པ་བས། །ཏིང་འཛིན་འདི་ལས་ཚིགས་བཅད་གང་འཛིན་པ། །དེ་ཡི་བསོད་ནམས་ཚད་གཟུང་སླ་བ་མིན། །ཇི་ཙམ་རྒྱ་ཆེ་འཇིག་རྟེན་ཁམས་ཡོད་པ། །ཕྱོགས་བཞི་དང་ནི་འོག་དང་དེ་བཞིན་སྟེང ། །རིན་ཆེན་བཀང་སྟེ་བསོད་ནམས་འདོད་པའི 51.25b ཕྱིར། །འཇིག་རྟེན་མཁྱེན་ལ་དབུལ་བར་ཕུལ་བས་ནི། །གང་ཞིག་ཏིང་འཛིན་ཞི་བ་རྡུལ་མེད་འདི། །རབ་ཏུ་བསྒོམས་ཤིང་གཞན་ལ་སྟོན་བྱེད་པའི། །བསོད་ནམས་དེ་ལ་འཇིག་རྟེན་ཁམས་ཡངས་པས། །དེའི་ཆ་དང་དཔེར་ཡང་མི་འགྱུར་རོ། །གང་ཞིག་ཏིང་འཛིན་ཞི་བ་འདི་སྒོམ་པ། །དེ་ནི་ནམས་ཀྱང་ཡིད་གཉིས་ཐེ་ཙོམ་མེད། །དེ་ལ་ནམས་ཀྱང་ལོག་ལྟུང་འཇིགས་པ་མེད། །དེ་ནི་ཆོས་ལའང་ནེམ་ནུར་མི་འབྱུང་ངོ ། །སངས་རྒྱས་བཤད་པའི་ཏིང་འཛིན་འདི་བསྒོམས་པས། །དེ་ནི་ང་ལའང་བསྙེན་བཀུར་བྱས་པར་འགྱུར། །བསོད་ནམས་རྒྱ་ཆེ་བསམ་མི་ཁྱབ་པའང་བཟུང ། །བྱང་ཆུབ་སེམས་དཔའ་ཐོས་པས་འཕགས་པར་འགྱུར། །གང་ཞིག་ཕྱི་དུས་འཇིགས་བྱེད་ཆེན་པོའི་ཚེ། །ཏིང་འཛིན་འདི་ནི་ཐོས་ནས་འཛིན་བྱེད་པ། །དེས་ནི་ང་དང་འདས་པའི་སངས་རྒྱས་སམ། །མ་བྱོན་དག་ལའང་བསྙེན་བཀུར་བྱས་པར་འགྱུར། །མོས་པར་བྱ་ཞིང་ཁོང་དུ་ཆུད་པར་བྱ། །བག་ཡོད་པ་ལས་བརྩོན་འགྲུས་བརྩམ་པར་བྱོས། །དགའ་བའི་སེམས་ཀྱིས་བརྟན་པར་སྦྱོར་བར་བྱོས། །ཏིང་འཛིན་འདི་ནི་རྙེད་པར་དཀའ་མི་འགྱུར། །ཏིང་འཛིན་འདི་ནི་ཡོངས་སུ་འདྲི་བྱེད་ན། །དེས་ནི་རྒྱལ་བ་བརྒྱ་ཡང་མཉེས་པར་བྱས། །གང་ཞིག་ཕྱི་དུས་འཇིགས་བྱེད་ཆེན་པོའི་ཚེ། །ཏིང་འཛིན་ཐོས་ནས་མངོན་པར་དད་བྱེད་པ། །དེས་ནི་ང་དང་དགེ་སློང་འདི་དག་དང ། །ཁྱིམ་བདག་བཟང་སྐྱོང་ཁྱོད་ཀྱང་མཐོང་བ་ཡིན། །གང་ཞིག་ཏིང་འཛིན་ཞི་བ་འཕགས་པ་འདི། །དང་བའི་སེམས་ཀྱིས་གཞན་ལ་རྗོད་བྱེད་ཅིང ། །ཏིང་འཛིན་ཆེན་པོ་འདི་ནི་ཐོབ་གྱུར་ན། །བྱང་ཆུབ་སེམས་དཔའ་མང་དུ་ཐོས་ཤེས་བྱ། །འདི་ནི་སངས་རྒྱས་ཀུན་གྱིས་འཐུན་པར་བསྔགས། །ཐོས་ཀུན་སངས་རྒྱས་བྱང་ཆུབ་ཏུ་ཡང་བསྐྱེད། །སངས་རྒྱས་ཀྱིས་གནང་མཁས་པས་བསྔགས་པ་ཡི། །ཏིང་འཛིན་འདི་ནི་ཤིན་ཏུ་གོམས་བྱས་ན། །ཇི་ལྟར་གནང་ཞིང་བདེ་གཤེགས་ཀྱིས་བསྔགས་པའི། །ཐོས་པའི་རིགས་ནི་རབ་ཏུ་ཐོས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི། ལེའུ་སྟེ་བདུན་པའོ།། །། བཟང་སྐྱོང 51.26a དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་འདི་ཇི་ལྟར་བསྒོམ་པར་བྱ་ཞེ་ན། བཟང་སྐྱོང་འདི་ལྟ་སྟེ་དཔེར་ན་ང་ད་ལྟར་ཁྱོད་ཀྱི་མདུན་ན་འདུག་ཅིང་ཆོས་སྟོན་པ་དེ་བཞིན་དུ་བཟང་སྐྱོང་བྱང་ཆུབ་སེམས་དཔའས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སངས་རྒྱས་ཀྱི་གདན་ལ་བཞུགས་ཤིང་ཆོས་སྟོན་པར་ཡང་ཡིད་ལ་བྱའོ། །དེས་རྣམ་པ་ཐམས་ཅད་ཀྱི་མཆོག་དང་ལྡན་པ། གཟུགས་བཟང་བ། མཛེས་པ། བལྟ་ན་སྡུག་པ་སྐུ་ཡོངས་སུ་གྲུབ་པ་དང་ལྡན་པར་དེ་བཞིན་གཤེགས་པ་རྣམས་ཡིད་ལ་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐུ་སྐྱེས་བུ་ཆེན་པོའི་མཚན་རེ་རེ་ཡང་བསོད་ནམས་བརྒྱས་བསྐྱེད་པར་བལྟའོ། །མཚན་མ་རྣམས་ཀྱང་གཟུང་བར་བྱའོ། །སྤྱི་གཙུག་བལྟར་མི་མཐོང་བ་ཡང་ཡོངས་སུ་ཞུ་བར་བྱའོ། །ཞུས་ནས་ཀྱང་སྐྱེས་བུ་ཆེན་པོའི་མཚན་རྣམས་ཀྱི་མཚན་མ་རྣམས་ཀྱང་གཟུང་བར་བྱའོ། །བཟུང་ནས་ཀྱང་འདི་ལྟར་བསླབ་པར་བྱ་སྟེ། ཨ་ལ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཛེས་པ་ནི་ངོ་མཚར་ཏེ། བདག་ཀྱང་མ་འོངས་པའི་དུས་ན་ལུས་ཡོངས་སུ་གྲུབ་པ་འདི་ལྟ་བུ་དང་ལྡན་པར་འགྱུར་རོ། །མཚན་འདི་ལྟ་བུ་དག་ཡོངས་སུ་རྫོགས་པར་འགྱུར་རོ། །བདག་ཀྱང་ཚུལ་ཁྲིམས་འདི་ལྟ་བུ་དང་ལྡན་པར་འགྱུར་རོ། །དེ་བཞིན་དུ་ཏིང་ངེ་འཛིན་དང ། དེ་བཞིན་དུ་ཤེས་རབ་དང ། དེ་བཞིན་དུ་རྣམ་པར་གྲོལ་བ་དང ། དེ་བཞིན་དུ་རྣམ་པར་གྲོལ་བའི་ཡེ་ཤེས་མཐོང་བ་དང ། ལྡན་པར་འགྱུར་རོ། །བདག་ཀྱང་དེ་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་འཁོར་བཞི་དང་ལྷ་དང་བཅས་པའི་འཇིག་རྟེན་ལ་ཆོས་འཆད་པར་འགྱུར་རོ། །སྙམ་དུ་བསླབ་པར་བྱའོ། །དེས་དེ་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པར་ཡིད་ལ་བྱས་ནས་ཡང་འདི་ལྟར་བསླབ་པར་བྱ་སྟེ། ང་ཞེས་བྱ་བའི་ཆོས་དེ་ནི་གང་ཡིན་ངའི 51.26b ཞེས་བྱ་བའི་ཆོས་དེ་ཡང་གང་ཡིན། བྱང་ཆུབ་དེ་ཡང་གང་ཡིན། བྱང་ཆུབ་མངོན་པར་རྫོགས་པར་འཚང་རྒྱ་བ་དེ་ཡང་སུ་ཡིན། ཅི་ལུས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་འམ། འོན་ཏེ་སེམས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ། གལ་ཏེ་ལུས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་ཞེས་བྱར་ནི་ལུས་ནི་བེམས་པོ་གཡོ་བ་མེད་པ། བྱེད་པ་མེད་པ། སེམས་པ་མེད་པ། རྩཝ་དང ། ཤིང་དང ། རྡོ་དང ། བརྩིག་པ་དང ། མིག་ཡོར་དང་འདྲ་བ་ཡིན་ལ། བྱང་ཆུབ་ནི་གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་ན། བེམས་པོ་གཡོ་བ་མེད་པ། བྱེད་པ་མེད་པ། སེམས་པ་མེད་པའི་ལུས་ཀྱིས་གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་མི་བྱེད་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར། ཅི་སྟེ་སེམས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་ཞེས་བྱར་ནི་སེམས་ནི་གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་པ། སྒྱུ་མ་ལྟ་བུ་ཡིན་ལ། བྱང་ཆུབ་ནི་གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་ན། གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་ལ། སྒྱུ་མ་ལྟ་བུའི་སེམས་ཀྱིས་གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར་སྙམ་དུ་བསླབ་པར་བྱའོ། །བཟང་སྐྱོང་དེ་ལ་བྱང་ཆུབ་སེམས་དཔའས། འདི་ལྟར་བསླབ་པར་བྱ་སྟེ། ལུས་ཀྱིས་བྱང་ཆུབ་མངོན་པར་རྫོགས་པར་འཚང་མི་རྒྱའོ། །སེམས་ཀྱིས་བྱང་ཆུབ་མངོན་པར་རྫོགས་པར་འཚང་མི་རྒྱའོ། །སེམས་ཀྱིས་སེམས་མེད་པ་ཡང་བྱང་ཆུབ་མངོན་པར་རྫོགས་པར་འཚང་མི་རྒྱའོ། །གཟུགས་ཀྱིས་གཟུགས་མེད་པ་ཡང་བྱང་ཆུབ་མངོན་པར་རྫོགས་པར་འཚང་མི་རྒྱའོ། ། 51.27a སེམས་ཀྱིས་སེམས་ཀྱང་བྱང་ཆུབ་མངོན་པར་རྫོགས་པར་འཚང་མི་རྒྱའོ། །གཟུགས་ཀྱིས་གཟུགས་ཀྱང་བྱང་ཆུབ་མངོན་པར་རྫོགས་པར་འཚང་མི་རྒྱའོ་སྙམ་དུ་བསླབ་པར་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ནི་མཐར་འཛིན་པ་ཐམས་ཅད་རྣམ་པར་སྤངས་ཏེ། དེས་ན་དེ་བཞིན་གཤེགས་པ་ལུས་ལ་ལུས་ཀྱི་རྗེས་སུ་གཟིགས་ཤིང་སྤྱོད་དོ། །སེམས་ལ་སེམས་ཀྱི་རྗེས་སུ་གཟིགས་ཤིང་སྤྱོད་དོ། །བཟང་སྐྱོང་ཤེས་རབ་གང་ཆོས་ཐམས་ཅད་རབ་ཏུ་ཤེས་པར་བྱེད་པའི་ཤེས་རབ་གཟུགས་མེད་པ། བསྟན་ཏུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་པ། ཟག་པ་མེད་པ་དེ་ཡང་མངོན་པར་རྫོགས་པར་འཚང་རྒྱ་བར་ཡང་མི་འགྱུར་རོ། །མངོན་པར་རྫོགས་པར་འཚང་མི་རྒྱ་བར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པ། རྣམས་ཀྱི་སྐུ་ཟག་པ་མེད་པ། དེ་བཞིན་གཤེགས་པ་རྣམས་ཀྱི་ཐུགས་ཟག་པ་མེད་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རྣམས་ཀྱི་གཟུགས་ཀྱང་ཟག་པ་མེད་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྣམས་ཀྱང་ཟག་པ་མེད་པ་ཡིན་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཚུལ་ཁྲིམས་སམ། ཏིང་ངེ་འཛིན་ཏམ། ཤེས་རབ་བམ། རྣམ་པར་གྲོལ་བ་འམ། རྣམ་པར་གྲོལ་བའི་ཡེ་ཤེས་མཐོང་བ་ཟག་པ་མེད་པ་ཡིན་པར་ལྟ་སྨོས་ཀྱང་ཅི་དགོས། བཟང་སྐྱོང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི། སངས་རྒྱས་རྣམས་ཀྱི་ཆོས་ཐམས་ཅད་ཀྱང ། ཟག་པ་མེད་པའོ། །དེ་བཞིན་གཤེགས་པ་དགྲ་བཅོམ 51.27b པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་དམ་པའི་ཆོས་གང་བཤད་པ་འམ། འཆད་པ་འམ། འཆད་པར་འགྱུར་བའི་ཆོས་དེ་ཡང་ཟག་པ་མེད་པ་སྟེ། བྱིས་པའ་མི་མཁས་པ་རྣམས་ཀྱིས་མི་ཤེས་ཀྱི། མཁས་པ་རྣམས་ཀྱིས་ཡང་དག་པར་རྟོགས་སོ། །བཟང་སྐྱོང་དེའི་ཚེ་ན་བྱང་ཆུབ་སེམས་དཔས་འདི་ལྟར་བསླབ་པར་བྱ་སྟེ། ཅི་ལུས་ཀྱིས་བྱང་ཆུབ་མངོན་པར་འཚང་རྒྱ་འམ། འོན་ཏེ་ཤེས་རབ་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་སྙམ་དུ་བསླབ་པར་བྱའོ། །བཟང་སྐྱོང་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་ལུས་ཀྱིས་ཀྱང་བྱང་ཆུབ་མངོན་པར་འཚང་མི་རྒྱ། ཤེས་རབ་ཀྱིས་ཀྱང་མ་ཡིན་ནོ། །སྙམ་དུ་བསླབ་པར་བྱའོ། །དེ་ཅིའི་ཕྱིར་ཞེ་ན། ཤེས་རབ་དེ་ནི་ཟག་པ་མེད་ཅིང་རྣམ་པ་ཐམས་ཅད་དུ་ཡོངས་སུ་བཙལ་ཀྱང་མི་དམིགས་ཏེ། དེ་དེའི་རྒྱུས་བྱང་ཆུབ་བཙལ་བ་ལ་བཏང་སྙོམས་སུ་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་དེ་ཡང་ཟག་པ་མེད་ཅིང་རྣམ་པ་ཐམས་ཅད་དུ་ཡོངས་སུ་བཙལ་ཀྱང་མི་དམིགས་སོ། །དེས་རང་གིས་ལུས་དང ། རང་གིས་སེམས་ཡོངས་སུ་བཙལ་ཀྱང་མི་དམིགས་སོ། །དེས་དེ་ལྟར་ཆོས་ཐམས་ཅད་ཡོངས་སུ་བཙལ་ཀྱང་མི་དམིགས་སོ། །སུ་ཞིག་བྱང་ཆུབ་མངོན་པར་རྫོགས་པར་འཚང་རྒྱ་ཞེས་ཀྱང་མི་དམིགས་སོ། །གང་གིས་བྱང་ཆུབ་མངོན་པར་འཚང་རྒྱ་ཞེས་ཀྱང་མི་དམིགས་སོ། །ཅི་ཞིག་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་ཞེས་ཀྱང་མི་དམིགས་ཤིང་མི་མཐོང་ངོ ། །དེ་ཆོས་ཐམས་ཅད་ལ་དེ་ལྟར་རྣམ་པར་ལྟ་བ་ན་ཡང་དག་པར་མི་མཐོང་ངོ ། །དེ་ཆོས་ཐམས་ཅད་རང་བཞིན་གྱིས་ཞི་བར་ཡང་དག་པར་རྗེས་སུ་མི་མཐོང་ཡང་དེ་དག་རང་བཞིན་གྱིས་ཞི་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། གང་མ་སྐྱེས་པ་དེ་ནི་མ་ཞི་བའི་ཕྱིར་རོ། །དེ་མ་ཞི་བའི་ཆོས་ཐམས་ཅད་ལ་ཞི་བའི་ཆོས་རྣམས་སུ་རྟོག་གོ། །ཞི་བའི་ཆོས་ཐམས་ཅད་ལ་ཞི་བ་དང་བྲལ་བར་རྟོག་གོ། །དེས་དེ་ལྟར་བརྟགས་ནས་ཆོས་རྣམས་ཞི་བ་ཞེས་ཀྱང་བརྟག་པར་མི་བྱའོ། །མ་ཞི་བར 51.28a ཡང་བརྟག་པར་མི་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། ཆོས་ཐམས་ཅད་ནི་མ་སྐྱེས་པ་དང ། ཡོངས་སུ་མ་གྲུབ་པའི་ཕྱིར་རོ། །བཟང་སྐྱོང་འདི་ལྟ་སྟེ་དཔེར་ན་སྐྱེས་བུ་ལ་ལ་ཞིག་མེ་མ་བུས་མ་འབར་བར་འདི་སྐད་དུ་བདག་གིས་མེ་འདི་ཞི་བར་བྱའོ་ཞེས་ཟེར་ན། བཟང་སྐྱོང་དེ་ཇི་སྙམ་དུ་སེམས། སྐྱེས་བུ་དེ་ཡང་དག་པར་སྨྲ་བས་སྨྲ་བ་ཡིན་ནམ། བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེ་བཞིན་ཏེ། ཆོས་ཐམས་ཅད་མི་དམིགས་པའི་ཕྱིར་རོ། །གང་ཞིག་འདི་སྐད་དུ་འཇིག་རྟེན་གྱི་ཀུན་རྫོབ་མ་གཏོགས་པར་ང་ནི་ཆོས་ཐམས་ཅད་ཡོངས་སུ་ཤེས་པར་འགྱུར་རོ། །ང་ནི་ཆོས་ཐམས་ཅད་སྤོང་བར་འགྱུར་རོ། །ང་ནི་ཆོས་ཐམས་ཅད་མངོན་སུམ་དུ་བྱེད་པར་འགྱུར་རོ། །ང་ནི་ཆོས་ཐམས་ཅད་བསྒོམ་པར་འགྱུར་རོ། །ང་ནི་ཆོས་ཐམས་ཅད་ཞི་བར་བྱེད་པར་འགྱུར་རོ། །ང་ནི་ཆོས་ཐམས་ཅད་ཐོབ་པར་འགྱུར་རོ། །ང་ནི་རྒྱུན་ཏུ་ཞུགས་པའི་འབྲས་བུ་ཐོབ་པར་འགྱུར་རོ། །ང་ནི་ལན་ཅིག་ཕྱིར་འོང་བའི་འབྲས་བུ་ཐོབ་པར་འགྱུར་རོ། །ང་ནི་ཕྱིར་མི་འོང་བའི་འབྲས་བུ་ཐོབ་པར་འགྱུར་རོ། །ང་ནི་དགྲ་བཅོམ་པ་ཉིད་ཐོབ་པར་འགྱུར་རོ། །ང་ནི་རང་བྱང་ཆུབ་ཐོབ་པར་འགྱུར་རོ། །ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་སྟོན་པར་འགྱུར་རོ། །ང་ནི་སེམས་ཅན་རྣམས་འཁོར་བ་ལས་ཡོངས་སུ་ཐར་བར་བྱེད་པར་འགྱུར་རོ་ཞེས་ཟེར་ན་དེ་ཡང་དག་པར་སྨྲ་བས་སྨྲ་བ་ཡིན་ནམ། བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེ་ལྟ་བས་ན་རིགས་ཀྱི་བུ་འམ། རིགས་ཀྱི་བུ་མོ་དག་ཡང་དག་པར་རྫོགས་པའི་བྱང་ཆུབ་འདོད་པ་དང ། རིགས་ཀྱི་བུ་འམ། རིགས་ཀྱི་བུ་མོ་རང་བྱང་ཆུབ་འདོད་པ་དང ། དགྲ་བཅོམ་པ་ཉིད་འདོད་པས 51.28b ཆོས་དེ་དག་ལ་དེ་ལྟར་བརྟག་པར་བྱའོ། །ཆོས་དེ་དག་ལ་དེ་ལྟར་བརྟགས་ནས་ཆོས་རྣམས་ཞི་བ་ཞེས་བརྟག་པར་མི་བྱའོ། །ཆོས་རྣམས་མ་ཞི་བ་ཞེས་ཀྱང་བརྟག་པར་མི་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་གང་ལ་ལ་ཞིག་ཅི་ཡང་མེད་ཅིང་མ་སྐྱེས་ཏེ། ཡོངས་སུ་མ་གྲུབ་པའི་ཆོས་ཐམས་ཅད་ལ་ཆོས་ཐམས་ཅད་ཞི་བའོ་ཞེས་རྟོག་ན་འདི་ནི་མཐའ་གཅིག་གོ། །ཆོས་ཐམས་ཅད་མ་ཞི་བའོ་ཞེས་རྟོག་ན་འདི་ནི་མཐའ་གཉིས་པའོ། །བཟང་སྐྱོང་གང་ཞི་བ་དང་མ་ཞི་བའི་མཐའ་འདི་གཉིས་མི་དམིགས་པ་དང ། མི་རྟོག་པ་དང ། རྣམ་པར་མི་སྒྲུབ་པ་དང ། ཡིད་ལ་མི་བྱེད་པ་དང ། ཀུན་ཏུ་མི་སྤྱོད་པ་འདི་ནི་བགྲང་བའི་ཚུལ་དུ་འཇིག་རྟེན་གྱི་ཀུན་རྫོབ་ཀྱི་བསྟན་པས་དབུ་མའི་ལམ་ཞེས་བྱ་སྟེ། དོན་དམ་པར་ནི་འདི་ལ་མཐའ་དང་དབུང་དམིགས་སུ་མེད་དོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་ནམ་མཁའ་དང་འདྲ་བ་མྱ་ངན་ལས་འདས་པ་དང་མཉམ་པ་སྟེ། དེ་དག་ནི་ཆད་པ་མེད་པ། མ་ཞིག་པ། མི་རྟག་པ། ཐེར་ཟུག་ཏུ་གནས་པ་མ་ཡིན་པ། ཡུལ་ན་མི་གནས་པ། ཕྱོགས་ན་མི་གནས་པ། མཚན་མ་མེད་པ། གྲངས་མེད་པ་སྟེ། མཁས་པ་རྣམས་ཀྱིས་ཀྱང་དེ་ལ་གྲངས་ཀྱིས་ཉེ་བར་མི་འགྲོ་ཞིང་མི་དམིགས་པས་ན་ཆོས་ཐམས་ཅད་ནི་གྲང་མེད་པ་ཞེས་བྱའོ། །བཟང་སྐྱོང་དེ་ལྟར་བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་མངོན་པར་ཞེན་པར་མི་བྱའོ། །དེ་ཅིའི་ཕྱིར་ཞེ་ན། བཟང་སྐྱོང་ཆོས་ཐམས་ཅད་ནི་མངོན་པར་ཞེན་པར་བྱ་བ་མ་ཡིན་ཞིང ། དེ་དག་ལ་ནི་མངོན་པར་ཞེན་པ་མེད་པ་སྟེ། རྩ་བ་ཆད་པ། རྩ་བ་དང་བྲལ་བ། རྟེན་པ་མེད་པ་ཞེས་བྱའོ། །བཟང་སྐྱོང་བྱང་ཆུབ་སེམས་དཔས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཅི་ནས་ཀྱང་སངས་རྒྱས་བཅོམ་ལྡན་འདས་དེ་དག་མཐོང་ན་མཆོག་ཏུ་འཛིན་པ་མེད་ཅིང་མི་དམིགས་པ་དང ། ལོག་པར་འཛིན་པ་མེད་པ་དེ་ལྟར་བསྒོམ་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང 51.29a ཆོས་ཐམས་ཅད་ནི་གཟུང་བ་མེད་པ་སྟེ། ཤིན་ཏུ་ཞི་བ་ནམ་མཁའ་དང་འདྲ་བ་མྱ་ངན་ལས་འདས་པ་དང་མཉམ་པའོ་ཞེས་དེ་བཞིན་གཤེགས་པས་བཀའ་སྩལ་པའི་ཕྱིར་རོ། །བཟང་སྐྱོང་འདི་ལྟ་སྟེ་དཔེར་ན་གསེར་གྱི་གར་བུ་ཤིན་ཏུ་བསྲེགས་པ། ཤིན་ཏུ་བཙོས་པ་ལྕགས་ཀྱི་ཐུ་ལུམ་དང་འདྲ་བ་ནི་མཁས་པ་རྣམས་ཀྱིས་འཛིན་པར་མི་བྱེད་དོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་དེ་ནི་ཚ་བའི་བདག་ཉིད་དེ། བཟང་སྐྱོང་དེ་ནི་རིན་པོ་ཆེའི་མཆོག་གསེར་ཡིན་མོད་ཀྱི། འོན་ཀྱང་བཟང་སྐྱོང་འདི་ལྟ་སྟེ། ཤིན་ཏུ་ཚ་བའི་ཕྱིར་འཛིན་པར་མི་བྱེད་དོ། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ན་མངོན་པར་ཞེན་པར་མི་བྱའོ། །གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྣམས་སུ་ཡང་མངོན་པར་ཞེན་པར་མི་བྱའོ། །ཚུལ་ཁྲིམ་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བར་ཡང་མངོན་པར་ཞེན་པར་མི་བྱའོ། །སངས་རྒྱས་ཀྱི་ཆོས་ཐམས་ཅད་དུའང་མངོན་པར་ཞེན་པར་མི་བྱའོ། །རྣམ་པ་ཐམས་ཅད་དུའང་མངོན་པར་ཞེན་པར་མི་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་མངོན་པར་ཞེན་པ་ནི་འཁོར་བའི་བདག་ཉིད་ཅན་སྡུག་བསྔལ་གྱི་ཆོས་ཐམས་ཅད་སྐྱེད་པའོ། །བཟང་སྐྱོང་འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ན། འདི་ལྟར་ཡོན་ཏན་གྱི་ཆོས་རྨད་དུ་བྱུང་བ་དང་ལྡན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་འདི་ལྟ་སྟེ། ཡེ་ཤེས་ཆེན་པོ་དང ། སངས་རྒྱས་ཀྱི་ཡེ་ཤེས་དང ། དེ་བཞིན་གཤེགས་པའི་ཡེ་ཤེས་དང ། རང་བྱུང་གི་ཡེ་ཤེས་དང ། མི་མཉམ་པ་དང་མཉམ་པའི་ཡེ་ཤེས་དང ། འཇིག་རྟེན་གསུམ་པོ་ཐམས་ཅད་ལས 51.29b ཁྱད་པར་དུ་འཕགས་པའི་ཡེ་ཤེས་ནི་ངོ་མཚར་ཆེའོ་ཞེས་དེ་ལྟར་ཡོན་ཏན་གྱི་ཆོས་ཁྱད་པར་དུ་འཕགས་པ་ལ་འདོད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལ་འདོད་པར་བྱའི་ཡེ་ཤེས་དེ་ལ་མངོན་པར་ཞེན་པར་མི་བྱའོ། །བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་ལ་ཡང་མངོན་པར་ཞེན་པར་མི་བྱའོ། །དེ་ཅིའི་ཕྱིར་ཞེ་ན། བཟང་སྐྱོང་ཆོས་འདི་དག་ནི་མངོན་པར་ཞེན་པ་མེད་པ་རྣམས་ཀྱི་མངོན་སུམ་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །མེ་ལོང་ཕྱིས་པ་འམ་འབྲུ་མར་སྣོད་དག་ལ། །བུད་མེད་བརྒྱན་པས་བཞིན་ནི་བལྟས་བྱས་ཏེ། །དེ་ལ་དེ་ནི་འདོད་ཆགས་སྐྱེས་གྱུར་ནས། །འདོད་པ་ཚོལ་ཞིང་ཀུན་ཏུ་རྒྱུག་པར་བྱེད། །མེད་པའི་ཆོས་ལ་བུད་མེད་ཕྱིན་ཅི་ལོག་།མི་བཟད་གདུངས་ཤིང་འདོད་པས་གཟིར་གྱུར་པ། །བུད་མེད་རང་གི་ལུས་ཀྱིས་བསླུས་གྱུར་པ། །ཆོས་འདི་རྣམས་ནི་གསོག་ཏུ་མི་ཤེས་ལྟར། །བྱང་ཆུབ་འཚང་རྒྱ་བདུད་རྩི་རིག་འགྱུར་ཞིང ། །སྡུག་བསྔལ་གཟིར་བའི་སེམས་ཅན་དགྲོལ་འགྱུར་སྙམ། །བྱང་ཆུབ་སེམས་དཔའ་སེམས་ནི་དེ་བཞིན་ཏེ། །མི་ཤེས་པས་ནི་སེམས་ཅན་ཞེས་ཀྱང་བྱ། །དོན་དམ་ལ་ནི་གང་ཞིག་སྐྱེ་འཆི་དང ། །མྱ་ངན་འདའ་བའི་སེམས་ཅན་འགའ་མི་དམིགས། །ཆོས་རྣམས་གཟུང་མེད་ནམ་མཁའི་ཟླ་བ་འདྲ། །བྱང་ཆུབ་བཙལ་ཀྱང་རྙེད་པར་མི་འགྱུར་ཏེ། །གཟུགས་བརྙན་ལྟ་བུ་ནམ་མཁའི་ཟླ་བ་འདྲ། །སྒྱུ་མ་ལྟ་བུ་སྟོང་པ་སྨིག་རྒྱུ་འདྲ། །ཆོས་རྣམས་དངོས་པོ་མེད་ཅིང་རང་བཞིན་སྟོང ། །དེ་ལ་བྱིས་པ་རྟག་ཏུ་ཡོད་འདུ་ཤེས། །འདི་ལ་མི་ནི་ཉོན་མོངས་འགའ་མེད་པར། །བྱང་ཆུབ་མཁས་པ་གང་གིས་ཤེས་གྱུར་ཅིང ། །འཇིག་རྟེན་འཁྲུལ་བར་དོན་དམ་ཤེས་གྱུར་ན། །དེ་ནི་འཇིག་རྟེན་གཙོ་བོ་སངས་རྒྱས་འགྱུར། །སངས་རྒྱས་བྱང་ཆུབ་སེམས་ཀྱིས་བརྟགས་པ་ཡིན། །སེམས་ཀྱང་རྣམས་དག་རང་བཞིན་འོད་གསལ་ཞིང ། །རྙོག 51.30a མེད་འགྲོ་བ་ཀུན་དང་མ་འདྲེས་པར། །གང་གིས་ཤེས་པ་བྱང་ཆུབ་མཆོག་འཚང་རྒྱ། །ཆོས་ཀུན་ཟག་པ་མེད་ཅིང་གཟུགས་མེད་ལ། །དབེན་ཞིང་སྟོང་པར་རྣམ་པར་མི་རྟོག་པར། །འདོད་ཆགས་བྲལ་ཞིང་སེམས་ནི་རྣམས་གྲོལ་ཏེ། །གང་གིས་ཤེས་པས་ཏིང་འཛིན་འདི་ཐོབ་བོ། །རྒྱལ་བའི་སྐུ་ལ་དམིགས་པར་བྱས་ནས་སུ། །རང་བཞིན་རྣམ་དག་ཆོས་ནི་མཉན་པར་བྱོས། །སྒོམ་དང་རྣམ་སྒོམ་ཆུང་ཟད་འདིར་མ་བྱེད། །ཏིང་འཛིན་འདི་ནི་རྙེད་པར་དཀའ་མི་འགྱུར། །ནམ་མཁའི་འདུ་ཤེས་ལ་ནི་གནས་བྱས་ན། །ཕྲ་རབ་རྡུལ་གྱི་འདུ་ཤེས་འགག་པར་འགྱུར། །རྟོག་པ་མེད་ཅིང་མ་བྱས་ཞིག་མེད་པར། །གང་གིས་ཤེས་པས་ཏིང་འཛིན་འདི་ཐོབ་པོ། །གཟུགས་ཀུན་རྟོག་པ་མེད་པར་ཤེས་བྱས་ནས། །མིག་གིས་གང་དུ་བལྟས་ཀྱང་མི་ཆགས་ཤིང ། །འཇིག་རྟེན་འདིར་ནི་ཉི་མ་བདུན་ཤར་བ། །དེ་ལྟར་དེས་ནི་སངས་རྒྱས་མཐོང་བར་འགྱུར། །མིག་ཀྱང་རྣམས་དག་རྣ་བའང་ཡོངས་དག་ཅིང ། །བརྩོན་འགྲུས་བརྩམས་ལ་དྲན་ལྡན་ཤེས་བཞིན་གྱིས། །ཏིང་འཛིན་འདི་ནི་ལེགས་པར་བསྒོམ་བྱས་ཏེ། །མང་དུ་ཐོས་པ་བསམ་གྱིས་མི་ཁྱབ་འཛིན། །མི་མཐོང་ཏིང་འཛིན་དེ་ནི་གང་ཡིན་དང ། །སེམས་ཅན་ཀུན་གྱི་ཏིང་འཛིན་གང་ཡིན་དེ། །གང་གིས་མི་མཐོང་གང་གིས་རྣམ་མི་མཐོང ། །འདིར་ནི་མུ་སྟེགས་མང་པོ་གཞན་བརླག་འགྱུར། །མཚན་མའི་འདུ་ཤེས་དག་ནི་བསལ་བྱས་ན། །དེ་ནི་སེམས་ཀྱང་རྣམས་དག་སངས་རྒྱས་མཐོང ། །མཐོང་བར་གྱུར་ནས་ཕྱིར་ཡང་མི་མཐོང་ལ། །དེ་ནི་འཇིག་རྟེན་དུའང་གཙོ་བོ་སངས་རྒྱས་འགྱུར། །དེ་ཡི་མདུན་ན་སའང་མེད་ཅིང་ཆུའང་མེད། །མེའང་མེད་ཅིང་རླུང་མེད་ནམ་མཁའ་འང་མེད། །དེས་ཀྱང་སངས་རྒྱས་རྣམས་ནི་བཞུགས་གྱུར་ཅིང ། །དམ་པའི་ཆོས་འཆད་པ་ནི་དམིགས་པར་འགྱུར། །ཇི་ལྟར་ང་ནི་ཆོས་འཆད་འདུག་པ་ལ། །གང་དག་ཆོས་འདོད་པ་རྣམས་ལྟ་བ་བཞིན། ། 51.30b སངས་རྒྱས་དེ་བཞིན་ཆོས་མཆོག་མ་གཏོགས་པར། །དེ་ལ་དམིགས་པ་གཞན་ནི་མི་འབྱུང་ངོ ། །དེ་ལྟ་བུ་དང་ལྡན་པ་དག་ལ་ནི། །ཏིང་འཛིན་རྡུལ་བྲལ་འདི་ནི་ལེགས་བཟུང་བའི། །སངས་རྒྱས་མང་པོ་འཆད་པ་མ་གཏོགས་པར། །ཉན་སྟོན་གཞན་ནི་གང་ཡང་མི་དམིགས་སོ། །གང་ཞིག་ཏིང་འཛིན་ཞི་བ་འཕགས་པ་འདི། །མ་བཤད་པ་དང་འཆད་པར་མི་འགྱུར་བའི། །སངས་རྒྱས་སྔར་འདས་གང་ཡང་མ་བྱུང་ཞིང ། །མ་བྱོན་པ་ཡང་གང་ཡང་མི་བཞུགས་སོ། །སྲོག་ཆགས་དག་ལ་ཕན་ཕྱིར་འཇིག་རྟེན་དུ། །ད་ལྟར་མིའི་མཆོག་ཏུ་ང་བྱུང་བའང ། །སངས་རྒྱས་འདྲེན་འདི་རྗེས་སུ་དྲན་གྱུར་ཏེ། །ཏིང་འཛིན་ཞི་བ་ལྟ་དཀའ་འདི་འཆད་དོ། །ལུས་དང་དེ་བཞིན་སྲོག་ལ་མི་ལྟ་ཞིང ། །སངས་རྒྱས་ཡོན་ཏན་རྣམས་ནི་ཚོལ་འདོད་པས། །ཏིང་འཛིན་འདི་ལ་གནས་པར་བྱས་ནས་ནི། །སངས་རྒྱས་བྱང་ཆུབ་རྙེད་པར་མི་དཀའོ། །རང་བཞིན་གཅིག་པའི་མི་མཆོག་མང་པོ་དག་།མཁས་པ་གང་གིས་མཐོང་ན་ཞུ་འདོད་པ། །དེས་ནི་རིངས་ཤིང་རིངས་པར་མྱུར་ཚུལ་དུ། །རྡུལ་མེད་དག་པའི་ཏིང་འཛིན་བསྒོམ་པར་བྱ། །གང་ཞིག་སེམས་ཅན་དག་ལ་ཕན་ཕྱིར་ཞུགས། །ཐོས་མང་རྒྱ་ཆེ་བསམ་གྱིས་མི་ཁྱབ་ཚོལ། །དེས་ནི་རིངས་ཤིང་རིངས་པར་མྱུར་ཚོལ་དུ། །རྡུལ་མེད་དག་པའི་ཏིང་འཛིན་བསྒོམ་པར་བྱ། །འདི་ལ་འདོད་ཆགས་མེད་ཅིང་ཞེ་སྡང་མེད། །འདི་ལ་གཏི་མུག་མེད་ཅིང་ཕྲག་དོག་མེད། །འདི་ལ་ཤེས་དང་མི་ཤེས་པའང་མེད། །དེ་བས་ཏིང་འཛིན་ཞི་བ་འདི་ཤེས་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བརྒྱད་པའོ།། །།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་ཏིང་ངེ་འཛིན་ཟབ་མོ་འདི་བཅོམ་ལྡན་འདས་ཀྱིས 51.31a བཤད་པ་ངོ་མཚར་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་གྱི་གནས་ནས་མངོན་པར་བྱུང་བ་རྣམས་ཏིང་ངེ་འཛིན་འདི་ཐོས་ནས་ལུང་ནོད་པ་འམ་བསྒོམ་པར་འཚལ་ན། བཅོམ་ལྡན་འདས་བྱང་ཆུབ་སེམས་དཔའ་དེས་ཆོས་གང་དག་ལ་གནས་ཏེ། ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འདོད་པ་དེས་ཚུལ་ཁྲིམས་ཡོངས་སུ་དག་པར་བྱའོ། །ཚུལ་ཁྲིམས་ལ་སྐྱོན་མེད་པར་བྱའོ། །བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཚུལ་ཁྲིམས་ཡོངས་སུ་དག་པ་དང ། ཚུལ་ཁྲིམས་ལ་སྐྱོན་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་གང་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འདོད་པའི་བྱང་ཆུབ་སེམས་དཔའ་དེས་སོ་སོར་ཐར་པའི་སྡོམ་པས་བསྡམ་པར་བྱའོ། །ཆོ་ག་དང་སྤྱོད་ཡུལ་ཕུན་སུམ་ཚོགས་པ་དང ། ཁ་ན་མ་ཐོ་བ་ཆུང་རབ་ལ་ཡང་འཇིགས་པར་ལྟ་བ་དང ། སྤྱོད་ལམ་ཡོངས་སུ་དག་པར་བྱའོ། །ཡང་དག་པར་བླངས་ཏེ་བསླབ་པའི་གཞི་རྣམས་ལ་བསླབ་པར་བྱའོ། །ཟབ་མོ་ལ་མོས་པ་དང ། དམིགས་སུ་མེད་པ་ལ་བཟོད་པར་བྱའོ། །སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་ཐོས་ནས། མི་སྐྲག་པར་བྱའོ། །མི་དངང་བར་བྱའོ། །དངང་བར་མི་འགྱུར་བར་བྱའོ། །བཟང་སྐྱོང་དེ་ལྟར་ན་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཚུལ་ཁྲིམས་ཡོངས་སུ་དག་པ་དང ། ཚུལ་ཁྲིམས་ལ་སྐྱོན་མེད་པ་ཡིན་ནོ། །བྱང་ཆུབ་སེམས་དཔའ་བཟང་སྐྱོང་གིས་གསོལ་པ།། 51.31b བཙུན་པ་བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཚུལ་ཁྲིམས་ཡོངས་སུ་མ་དག་པ་དང ། ཚུལ་ཁྲིམས་ལ་སྐྱོན་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་གང་ལ་ལ་གཟུགས་ལ་གནས་ཏེ་ཚངས་པར་སྤྱད་པ་སྤྱོད་པ་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ལ་གནས་ཏེ་ཚངས་པར་སྤྱད་པ་སྤྱོད་ཅིང་བདག་གི་ཚུལ་ཁྲིམས་དང ། དཀའ་ཐུབ་དང ། ཚངས་པར་སྤྱོད་པ་འདིས་ལྷ་འམ་ལྷ་ལ་ལ་ཞིག་ཏུ་གྱུར་ཅིག་ཅེས་ཟེར་བ་འདི་ནི་བཟང་སྐྱོང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བའི་ཚུལ་ཁྲིམས་ཡོངས་སུ་མ་དག་པ་ཡིན་ཚུལ་ཁྲིམས་ལ་སྐྱོན་ཡོད་པ་ཡིན། །འདི་ལྟ་སྟེ་སྲིད་པའི་འདུ་ཤེས་མཆོག་ཏུ་བཟུང་ནས་དེ་འདོད་པ་ལ་བསྟེན་པར་འདོད་ཅིང་སྲིད་པར་སྐྱེ་བའི་གནས་གཟུང་བར་འདོད་པས་ཚུལ་ཁྲིམས་ཡོངས་སུ་མ་དག་པ་ཡིན་ནོ། །བཟང་སྐྱོང་དེ་བས་ན་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་གང་ཏིང་ངེ་འཛིན་འདི་ཐོས་ནས་འཆད་པ་འམ་བསྒོམ་པར་འདོད་པ་དེས་ཚུལ་ཁྲིམས་ཡོངས་སུ་དག་པར་བྱའོ། །ཚུལ་ཁྲིམས་ལ་སྐྱོན་མེད་པར་བྱའོ། །ཚུལ་ཁྲིམས་འདྲེན་མ་མ་ཡིན་པར་བྱའོ། །ཚུལ་ཁྲིམས་མ་ཉམས་པར་བྱའོ། །ཚུལ་ཁྲིམས་སྲ་སྲེར་མ་གྱུར་པར་བྱའོ། །རྟེན་པ་མེད་པའི་ཚུལ་ཁྲིམས་དང ། མཆོག་ཏུ་འཛིན་པ་མེད་པའི་ཚུལ་ཁྲིམས་དང ། དམིགས་པ་མེད་པའི་ཚུལ་ཁྲིམས་དང ། མ་ཞིག་པའི་ཚུལ་ཁྲིམས་དང ། མཁས་པས་བསྔགས་པའི་ཚུལ་ཁྲིམས་དང ། འཕགས་པས་བསྔགས་པའི་ཚུལ་ཁྲིམས་རྣམས་སུ་བྱའོ། །དེས་སྦྱིན་པ་འགྱེད་པ་ལ་དགའ་བར་བྱའོ། །འདི་ལྟ་སྟེ་སྦྱིན་པའི་མཆོག་སྦྱིན་པ་བླ་ན་མེད་པ། ཆོས་ཀྱི་སྦྱིན་པ་ལ་བརྩོན་འགྲུས་བརྩམ་པར་བྱའོ། །དྲན་པ་ཉེ་བར་གནས་པར་བྱའོ། །དད་པ་དང་ལྡན་པར་བྱའོ། ། དེས་པ་དང་ངོ་ཚ་ཤེས་པ་དང་ལྡན་པ་དང ། 51.32a ཁྲེལ་ཡོད་པ་ཕུན་སུམ་ཚོགས་པར་བྱའོ། །རྙེད་པ་དང་བཀུར་སྟི་དང་ཚིགས་སུ་བཅད་པ་ལ་ལྷག་པར་མ་ཞེན་པར་བྱའོ། །སེར་སྣ་མེད་ཅིང་ཕྲག་དོག་མེད་པ་དང་སྦྱངས་པའི་ཡོན་ཏན་དང་ཡོ་བྱད་བསྙུངས་པར་བྱའོ། །འཇིག་རྟེན་པའི་གཏམ་དོན་དུ་མི་གཉེར་གྱི་གཏམ་ཡོངས་སུ་སྤང་ཞིང ། འཇིག་རྟེན་ལས་འདས་པའི་གཏམ་དོན་དུ་གཉེར་བར་བྱའོ། །བྱས་པ་ཤེས་པ་དང་བྱས་པ་གཟོ་བར་བྱའོ། །སྒྲ་ཆུང་བ་དང་སྨྲ་བ་ཉུང་བར་བྱའོ། །གུས་པ་དང་བཅས་པ་དང་ཞེ་ས་དང་བཅས་པར་བྱའོ། །འདི་ལྟ་སྟེ་དགེ་བའི་བཤེས་གཉེན་ནི་རྙེད་པར་དཀའ་བས་སློབ་དཔོན་དང་མཁན་པོ་ལ་བསྙེན་བཀུར་བྱ་བར་སྤྲོ་བར་བྱའོ། །དེས་སུ་ལས་ཆོས་འདི་ལྟ་བུ་འདི་རྣམས་ཐོས་པར་འགྱུར་བ་དང ། བླངས་པ་དང ། གླེགས་བམ་དུ་བྲིས་པར་འགྱུར་བ་དང ། ཚིག་གིས་སྟོན་པའི་རག་ལས་པར་འགྱུར་བ་དེ་དང ། གང་ལས་མདོ་སྡེ་འདི་ལྟ་བུ་ཀུན་ཆུབ་པར་བྱེད་པ་འམ། ཀུན་ཆུབ་པར་བྱེད་པར་འགྱུར་བ་འམ། གླེགས་བམ་དུ་འདྲི་བ་འམ། བྲིས་པར་འགྱུར་བ་དེ་ལ་དེས་ཕར་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་དུ་འདུ་ཤེས་བསྐྱེད་པར་བྱའོ། །སྟོན་པར་འདུ་ཤེས་བསྐྱེད་པར་བྱའོ། །ཆོས་དེ་ལྟ་བུ་འདི་རྣམས་ཀྱི་དོན་དང་བྱང་ཆུབ་ཡོངས་སུ་སྨིན་པར་བྱ་བའི་ཕྱིར་དེས་དེ་ལ་ལྷག་པར་ཡང་དགའ་བ་དང་དང་བ་དང་གུས་པ་བསྐྱེད་པར་བྱའོ། །བཟང་སྐྱོང་གལ་ཏེ་བྱང་ཆུབ་སེམས་དཔའི་ཐེག་པ་པ་འམ། ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་དག་ཆོས་འདི་ལྟ་བུ་རྣམས་ཀྱི་ཆོས་འཆད་པའི་དགེ་སློང་ལ་དགའ་བ་དང ། དང་བ་དང ། གུས་པ་མི་སྐྱེད་ཅིང་དགེ་བའི་བཤེས་གཉེན་གྱི་འདུ་ཤེས་དང ། སྟོན་པའི་འདུ་ཤེས་ཀྱང་མི་སྐྱེད་ན། བཟང་སྐྱོང་བྱང་ཆུབ་སེམས་དཔའི་ཐེག་པ་པ་འམ། ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་ཆོས་འདི་ལྟ་བུ་ཀུན་ཆུབ་པར་མ་བྱས་པའི་ཆོས་རྣམས་ཀུན་ཆུབ་པར་འགྱུར་བ་དང ། ཀུན་ཆུབ་པར་བྱས་པའི་ཆོས་རྣམས་གནས་པ་དང ། 51.32b ཆུད་མི་ཟ་བ་དང་མེད་པར་མི་འགྱུར་བ་ནི་གནས་མ་ཡིན་ཏེ་སྐབས་མེད་དོ། །བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དེས་ཏིང་ངེ་འཛིན་འདི་འཐོབ་པ་དེ་ཡང་གནས་མེད་དོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་མ་གུས་པས་ནི་དམ་པའི་ཆོས་ནུབ་པར་འགྱུར་བའི་ཕྱིར་རོ། །བཟང་སྐྱོང་གལ་ཏེ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་འམ། ཉན་ཐོས་དང ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུ་དང ། རིགས་ཀྱི་བུ་མོ་དེ་དག་ཆོས་འདི་ལྟ་བུ་འདི་དག་སྟོན་པར་བྱེད་པའི་དགེ་སློང་དང ། གང་ལ་ལས་ཆོས་ཀྱི་རྣམ་གྲངས་འདི་ལྟ་བུ་འདི་ཀུན་ཆུབ་པར་བྱེད་པར་འགྱུར་བ་དང ། ཀུན་ཆུབ་པར་བྱས་པ་དང ། གླེགས་བམ་དུ་བྲིས་པར་གྱུར་པ་དེ་དག་ལ་དགའ་བ་དང ། དང་བ་དང་གུས་པའང་སྐྱེད་ཅིང ། དགེ་བའི་བཤེས་གཉེན་གྱི་འདུ་ཤེས་དང ། སྟོན་པའི་འདུ་ཤེས་ཀྱང་ཉེ་བར་གཞོག་ན། བཟང་སྐྱོང་བྱང་ཆུབ་སེམས་དཔའི་ཐེག་པ་པ་འམ། ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་ཀུན་ཆུབ་པར་མ་བྱས་པའི་ཆོས་རྣམས་ཀུན་ཆུབ་པར་འགྱུར་བ་དང ། ཀུན་ཆུབ་པར་བྱས་པའི་ཆོས་རྣམས་གནས་པ་དང ། ཆུད་མི་ཟ་བ་དང ། མེད་པར་མི་འགྱུར་བའི་གནས་ཡིན་ཏེ། དེ་ནི་གནས་ཡོད་དོ། །བཟང་སྐྱོང་དེ་བས་ན་ཁྱོད་མོས་པར་བྱའོ། །ཁྱོད་ཀྱི་ཁོང་དུ་ཆུད་པར་བྱའོ། །འདི་ལྟར་ཆོས་འདི་ལྟ་བུ་སྟོན་པའི་དགེ་སློང་རྣམས་ལ། དགའ་བ་དང ། དང་བ་དང་གུས་པ་བསྐྱེད་པར་བྱའོ། །དགེ་བའི་བཤེས་གཉེན་དུ་འདུ་ཤེས་པ་དང ། སྟོན་པར་འདུ་ཤེས་བསྐྱེད་པར་བྱ་སྟེ། འདི་ནི་ངའི་རྗེས་སུ་བསྟན་པ་ཡིན་ནོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཏིང་ངེ་འཛིན་འདི་ལུང་ནོད་པར་འདོད་པ་དང ། བསྒོམ་པར་འདོད་པ་དེས་འགྱོད་པ་དང་བྲལ་བར་བྱའོ། །དགོན་པ་ལ་དགའ་བ་དང ། དགོན་པ་ལ་གཞོལ་བ་དང ། དགོན་པ་ལ་འབབ་པ་དང ། དགོན་པ་ལ་བབ་པར་བྱའོ། །ལྗོངས་ཀྱི་ཕྱོགས་ལ་མངོན་པར་མི་དགའ་བར་བྱའོ། ། 51.33a མཛའ་བོའི་ཁྱིམ་དང་ཟས་སྦྱིན་པའི་ཁྱིམ་མི་འདོད་པས་སྲོག་ལ་མི་ལྟ་བར་བྱའོ། །ལུས་གཏོང་བས་ལུས་ལ་མི་ཆགས་པ་དང ། དགོན་པའི་འདུ་ཤེས་ཐོབ་པར་བྱའོ། །རྙེད་པ་དང་བཀུར་སྟི་དང་ཚིགས་སུ་བཅད་པ་ལ་མི་བརྟེན་པ་དང ། དམ་པའི་ཆོས་རབ་ཏུ་གཟུང་བར་བྱའོ། །ལྷུང་བཟེད་དང་ཆོས་གོས་ལ་མི་ཆགས་པ་དང་མི་སྩོགས་པར་བྱའོ། །མགྲོན་དུ་གཉེར་མི་དགོས་པར་བསོད་སྙོམས་སྤྱད་པར་བྱའོ། །མཛེམ་ཞིང་འགྱོད་པ་དང་ལྡན་པར་བྱའོ། །གསེར་བདག་གིར་མི་བྱེད་པར་བྱའོ། །ཀུན་ནས་ལྡང་བ་མེད་པས་འགྱོད་པ་དང་བྲལ་བར་བྱའོ། །ཁོང་ཁྲོ་བ་སྤངས་པས་བྱམས་པ་ལ་གནས་པར་བྱའོ། །འཚེ་བ་སྤངས་པས་སྙིང་རྗེ་ལ་གནས་པར་བྱའོ། །མངོན་པར་མི་དགའ་བ་སྤངས་པས་དགའ་བ་ལ་གནས་པར་བྱའོ། །མཚན་མ་ཐམས་ཅད་སྤངས་པས་བཏང་སྙོམས་ལ་གནས་པར་བྱའོ། །བརྩོན་འགྲུས་བརྩམས་པས་བསླབ་པ་འདོད་པར་བྱའོ། །རྨུགས་པ་དང་གཉིད་ཀྱིས་མི་ནོན་པར་འཆག་པ་ལ་ཞུགས་པར་བྱའོ། །བཟང་སྐྱོང་དེ་བས་ན་བྱང་ཆུབ་སེམས་དཔའ་ཁྱིམ་གྱི་གནས་ནས་བྱུང་བ་ཏིང་ངེ་འཛིན་འདི་ཐོས་ནས་ལུང་མནོད་པ་དང ། བསྒོམ་པར་འདོད་པ་དེས་ཆོས་དེ་དག་ལ་གནས་ཏེ། ཏིང་ངེ་འཛིན་འདི་ལུང་མནོད་པར་བྱའོ། །བསྒོམ་པར་བྱའོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་རྒྱ་ཆེ་ཞིང་བཟང་བའི་ཆོས་འདི་དག་དེ་བཞིན་གཤེགས་པས་བསྟན་ཅིང་གསུངས་པ་ནི་ངོ་མཚར་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་ལེ་ལོ་ཅན་གང་དག་འབྱུང་བ་དེ་དག་ནི་ཏིང་ངེ་འཛིན་འདི་ཐོས་ནས། སྐྲག་པར་འགྱུར། དངང་བར་འགྱུར། དངང་བར་བགྱིད་པར་འགྱུར་རོ། །ཆོས་དེ་ལྟ་བུར་བཟང་བ་དེ་དག་འཆད་པ་ལ་ཡང་དགའ་བ་དང ། མགུ་བ་དང ། དང་བ་རྒྱ་ཆེན་པོ་མི་འཐོབ་ཅིང 51.33b དེ་དག་འདི་སྙམ་དུ་བདག་ཅག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཞན་ལས་ཏིང་ངེ་འཛིན་འདི་བསྒྲུབ་པར་བྱའོ། །ད་ལྟར་ནི་བདག་ཅག་ལུས་སྐེམ་ཞིང་ནད་མང་ངོ་སྙམ་དུ་སེམས་པར་འགྱུར་ཏེ། དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་ཞུམ་པར་འགྱུར། ཀུན་ཏུ་ཞུམ་པར་འགྱུར་ཞིང ། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་བསྒྲུབ་པར་བརྩོན་འགྲུས་ཀྱང་མི་རྩོམ་པར་འགྱུར་རོ། །བཙུན་པ་བཅོམ་ལྡན་འདས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དང ། དྲན་པ་ལ་གནས་པའི་ཆོས་འཚལ་བ། ཆོས་ལ་གུས་པ། ཆོས་འཛིན་པ། ཆོས་སྟོན་པ། ཆོས་སྨྲ་བ། ཆོས་ཡོངས་སུ་ལེན་པ། ཆོས་ཀྱི་རྗེས་སུ་འཐུན་པའི་ཆོས་ལ་སྤྱོད་པ། ལུས་དང་སྲོག་ཡོངས་སུ་གཏོང་བ། རྙེད་པ་དང་བཀུར་སྟི་དང་ཚིགས་སུ་བཅད་པ་ལ་མི་རྟེན་པ། ཡོན་ཏན་གྲགས་པ་མི་འཚལ་བ། ལྷུང་བཟེད་དང ། ཆོས་གོས་ལ་མི་ཆགས་པ། གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། རྒྱལ་སྲིད་དང ། ཡུལ་འཁོར་དང ། ཕོ་བྲང་འཁོར་ལ་མངོན་པར་མི་དགའ་བ། དབེན་པ་ལ་གཞོལ་བ། དབེན་པ་ལ་འབབ་པ། དབེན་པ་ལ་བབ་པ་གང་དག་འབྱུང་བ་དེ་དག་ནི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཐོས་ནས་ཞུམ་པར་མི་འགྱུར། ཀུན་དུ་ཞུམ་པར་མི་འགྱུར། སྐྲག་པར་མི་འགྱུར། དངང་བར་མི་འགྱུར། དངང་བར་བགྱིད་པར་མི་འགྱུར་བའི་སྟེང་དུ་དགའ་བ་དང ། མགུ་བ་དང ། དང་བ་རྒྱ་ཆེན་པོ་ཡང་འཐོབ་བོ། །དེ་དག་ཏིང་ངེ་འཛིན་འདི་གཟུང་བ་དང ། ཀུན་ཆུབ་པར་བྱ་བ་དང ། བཅང་བ་དང ། བཀླག་པ་དང ། ཡི་གེར་བྲི་བ་དང ། བསྟན་པ་དང ། བསྒོམ་པའི་སླད་དུ་བརྩོན་འགྲུས་རྒྱ་ཆེན་པོ་ཡང་རྩོམ་མོ། །བཙུན་པ་བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་འདི་དག་ནི་མ་བྱོན་པའི་སངས་རྒྱས་ལས་མང 51.34a དུ་ཐོས་པ་འཚལ་བར་མི་འགྱུར་རོ། །སྔགས་དང་ཡོན་ཏན་དང་ཆོས་ཀྱི་ཁྱད་པར་བསྒྲུབ་པའི་སླད་དུ་སྦྱོར་བར་ཡང་མི་འགྱུར་རོ། །དེ་ལྟ་ལགས་ཀྱིས་ཀྱང་བཙུན་པ་བཅོམ་ལྡན་འདས་མ་འོངས་པའི་དུས་ན་རིགས་ཀྱི་བུ་འམ་རིགས་ཀྱི་བུ་མོ་སྔོན་གྱི་རྒྱལ་བ་ལ་བགྱི་བ་བགྱིས་པ། བརྩོན་འགྲུས་བརྩམས་པ་གང་དག་འབྱུང་བ་དེ་དག་ནི་དེ་བཞིན་གཤེགས་པས་གསུངས་པའི་ཏིང་ངེ་འཛིན་འདི་ལྟ་བུ་འདི་ཐོས་ནས། འདི་སྙམ་དུ་བདག་ཅག་ནི་འདི་ཉིད་དུ་ལུས་དང ། ལྤགས་པ་དང ། ཤ་དང ། ཁྲག་དང ། རུས་པ་དང ། ཆུ་བ་དང ། རྐང་རྣམས་སྐམས་ཤིང ། ཡོངས་སུ་སྐམས་ཀྱང་བླ་ཡི། འདི་ལྟར་བདག་ཅག་ལེ་ལོ་ཅན་དུ་གྱུར་ཏེ་འཆི་བའི་དུས་བྱེད་པར་ནི་མི་བྱའོ། །བདག་ཅག་གིས་ཆོས་རྒྱ་ཆེ་ཞིང་བཟང་བ་འདི་ལྟ་བུ་འདི་དག་ཀུན་ཆུབ་པ་དང ། བཤད་པ་དང ། བསྒོམ་པ་མ་བྱས་པར་བརྩོན་འགྲུས་གཏང་བར་ནི་མི་བྱའོ་སྙམ་སྟེ། དེ་ལྟར་བརྩོན་འགྲུས་རྩོམ་པར་འགྱུར་རོ། །སྐྱེས་བུ་དམ་པ་བརྩོན་འགྲུས་རྟག་ཏུ་བརྩམས་པ་དེ་ལྟ་བུ་དེ་དག་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ཐོས་ནས་ཐོས་མ་ཐག་ཏུ་དགའ་བ་དང ། མགུ་བ་དང ། དང་བ་ཤིན་ཏུ་རྒྱ་ཆེ་བའང་འཐོབ་བོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ལེགས་སོ་ལེགས་སོ། །ཡང་བཟང་སྐྱོང་ཁྱོད་ཀྱིས་རྗེས་སུ་འཐུན་པའི་ཆོས་བཤད་པ་ནི་ཕྱིན་ཅི་མ་ལོག་ཅིང་དེ་ལྟར་དེ་བཞིན་ཡིན་ཏེ། ལེགས་སོ། །ང་ཡང་དེ་ལ་རྗེས་སུ་ཡི་རང་སྟེ། ངས་གང་ལ་རྗེས་སུ་ཡི་རང་བ་དེ་ལ་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་བཅོམ་ལྡན་འདས་རྣམས་ཀྱང་རྗེས་སུ་ཡི་རང་བར་མཛད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སོ་སོར་ཐར་པར་བསླབ་པ་ངས་བཤད་གང ། །དེ་ཀུན་སློབ་པར་བྱེད་ཅིང་དགོན་པར་སྟེན། །སྦྱངས་པའི་ཡོན་ཏན་དག་ལ་རྟག་སྤྱོད་ན། །ཏིང་འཛིན་འདི་ནི་རྙེད་པར་དཀའ་མི་འགྱུར། ། 51.34b མགྲོན་དུ་གཉེར་བ་ཐམས་ཅད་སྤང་བྱས་ཤིང ། །རོ་ལ་ཆགས་པའང་ཡོངས་སུ་སྤང་བྱས་ཏེ། །གང་ལས་མཉན་ལ་སྟོན་པར་འདུ་ཤེས་ཤིང ། །མཉམ་ཞིང་མཚུངས་པའི་འདུ་ཤེས་ཉེ་བར་གཞོག་།ཕྲག་དོག་འདོད་པ་ང་རྒྱལ་སྤང་བྱས་ལ། །འདོད་ཆགས་ཞེ་སྡང་གཏི་མུག་སྤང་བྱས་ཏེ། །བསམ་གཏན་སྦྱོར་སེམས་ཡང་དག་བསྐྱེད་བྱས་ཏེ། །ཏིང་ངེ་འཛིན་འདི་ལ་ནི་འཇུག་པར་བྱ། །ཕྲག་དོག་མེད་ཅིང་འདོད་ཆགས་སྤང་བྱས་ལ། །རབ་ཏུ་བསྡམས་ཤིང་ཁྲོ་བ་སྤང་བྱས་ཏེ། །རྒྱལ་བའི་སྐུ་ལ་དམིགས་པ་དག་བྱས་ནས། །ཏིང་ངེ་འཛིན་འདི་ལ་ནི་འཇུག་པར་བྱ། །བརྩོན་འགྲུས་མི་གཏོང་གཉིད་ཀྱིས་མི་ནོན་ཅིང ། །གཉེན་དང་མཛའ་དང་ལྷན་ཅིག་མི་འགྲོགས་ལ། །འཆག་དང་ལྡན་ཞིང་མང་དང་གྲོགས་སྤོངས་ཏེ། །ཏིང་འཛིན་རྡུལ་མེད་དེ་ནི་བསྒོམ་པར་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་དགུ་པའོ།། །། བམ་པོ་བཞི་པ། དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་སློང་མ་གང་ལ་ལ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འཚལ་ན། བཙུན་པ་བཅོམ་ལྡན་འདས་དེས་ཆོས་གང་ལ་གནས་ཏེ། ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་སློང་མ་གང་ལ་ལས་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འདོད་པ་དེས་རྟག་ཏུ་གུས་པ་དང་བཅས་པར་བྱའོ། །རྟག་ཏུ་ཕྲག་དོག་མེད་པ་དང་མི་ཁྲོ་བར་བྱའོ། །ང་རྒྱལ་བཅོམ་པ་དང ། ཁེངས་པ་མེད་པ་དང ། 51.35a བརྩོན་འགྲུས་བརྩམ་པར་བྱའོ། །ལེ་ལོ་མེད་པ་དང་རྨུགས་པ་དང་གཉིད་སྤང་བར་བྱའོ། །མི་ཉལ་བར་སྦྱོར་བ་ལ་བརྩོན་པ་དང ། རྙེད་པ་དང ། བཀུར་སྟི་དང ། ཚིགས་སུ་བཅད་པ་དང ། ཆོས་གོས་དང ། ཟས་དང ། མལ་སྟན་དང ། ན་བའི་གསོས་སྨན་དང ། ཡོ་བྱད་བཙལ་བ་ཐམས་ཅད་སྤང་བར་བྱའོ། །འཚོ་བ་ཡོངས་སུ་དག་པ་དང ། ལུས་དང་སྲོག་ལའང་མི་རྟེན་པར་བྱའོ། །རྟག་ཏུ་ཆོས་འདོད་པ་དང ། མང་དུ་ཐོས་པ་ཚོལ་བ་ལ་བརྩོན་པར་བྱའོ། །མ་ཆགས་པ་དང་ཞེ་མི་སྡང་བ་དང ། རྨུགས་པ་མེད་པའི་སེམས་སུ་བྱའོ། །བདུད་ཀྱི་ཕྱོགས་སྤང་བར་བྱའོ། །མཉེ་བ་དང ། བརྒྱན་པ་དང ། ལུས་ལ་ཀླུབས་པ་རྣམས་སྤང་བར་བྱའོ། །ལྷུང་བཟེད་དང་ཆོས་གོས་ལ་མ་ཆགས་པར་བྱའོ། །གྲགས་པ་ལ་མི་ཆགས་པ་དང ། ཕྲ་མ་མེད་པ་དང ། ངོ་མི་རྟག་པ་རྣམས་སྤང་བར་བྱའོ། །བཟང་སྐྱོང་དེ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་སློང་མ་གང་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འདོད་པ་དེས་སློབ་དཔོན་ལ་སྟོན་པའི་འདུ་ཤེས་བཞག་སྟེ་ཏིང་ངེ་འཛིན་འདི་ལུང་མནོད་པར་བྱའོ། །ཆོས་དེ་དག་ལ་གནས་ཏེ་ཏིང་ངེ་འཛིན་འདི་བསྒོམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དགེ་སློང་མ་གང་ཏིང་འཛིན་འདི་འདོད་པས། །རྟག་ཏུ་གུས་བྱས་ཕྲག་དོག་ཁྲོ་བ་དང ། །ང་རྒྱལ་དེ་བཞིན་ཁེངས་པ་སྤང་བྱས་ན། །ཏིང་འཛིན་འདི་ནི་རྙེད་པར་དཀའ་མི་འགྱུར། །ཏིང་ངེ་འཛིན་འདི་ཚོལ་བར་གྱུར་ན་ནི། །བརྩོན་འགྲུས་བརྩམས་ཤིང་གཉིད་ནི་སྤང་བྱས་ལ། །ཚོལ་བ་ཐམས་ཅད་རྣམ་པར་སྤང་བྱས་ཏེ། །སྲོག་ལའང་མི་རྟེན་པར་ནི་ཆོས་འདོད་བྱོས། །གང་ཞིག་ཏིང་འཛིན་འདི་ནི་གཟུང་འདོད་པས། །ཉོན་མོངས་གཟིར་བས་འདོད་ཆགས་ཞེ་སྡང་དང ། །ལྡན་པའི་སེམས་དང་གནས་པར་མི་བྱ་ཞིང ། །ནམ་ཡང་བདུད་ཀྱི་ཞགས་པས་མི་ཟིན་བྱོས། །གང་ཞིག་ཏིང་འཛིན་འདི་ནི་གཟུང་འདོད་པས། །སྒྱུ་དང་ལྡན་པར་སྤྱད་པར་མི་བྱ་ཞིང ། །མཉེ་བ་དང་ནི་རྒྱན་དང་ཕྲ་མ་དང ། །ངོ་མི 51.35b རྟག་པ་ཐམས་ཅད་སྤང་བར་བྱ། །ལྷུང་བཟེད་ཕྱིར་དང་བསྔགས་པ་དག་གི་ཕྱིར། །སྐད་ཅིག་ཙམ་ཡང་རྣམ་པར་མི་རྟོག་གོ། །གང་ལས་ཉན་ལ་སྟོན་པར་འདུ་ཤེས་ཤིང ། །མཉམ་ཞིང་མཚུངས་པའི་འདུ་ཤེས་ཉེ་བར་ཞོག་།བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་པའོ།། །། དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་ཁྱིམ་པར་གྱུར་པ་གོས་དཀར་པོ་འཚལ་ཞིང་ཁྱིམ་ན་གནས་པ་གང་ཏིང་ངེ་འཛིན་འདི་ཐོས་ནས་ཐ་ན་ཞག་གཅིག་གམ་ཞག་གཉིས་སུ་ལུང་མནོད་པ་འམ་བསྒོམ་པར་འཚལ་ན། བཙུན་པ་བཅོམ་ལྡན་འདས་དེས་ཆོས་གང་ལ་གནས་ཏེ་ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེ་བས་ན་བྱང་ཆུབ་སེམས་དཔའ་ཁྱིམ་པར་གྱུར་པ་གོས་དཀར་པོ་གྱོན་ཞིང་ཁྱིམ་ན་གནས་པ་ནི་གང་ཏིང་ངེ་འཛིན་འདི་ཐོས་ནས་ཐ་ན་ཞག་གཅིག་གམ། ཞག་གཉིས་སམ། ཐ་ན་བ་འཇོས་ཙམ་ཡང་ལུང་མནོད་པ་འམ། བསྒོམ་པར་འདོད་ན། བྱང་ཆུབ་སེམས་དཔའ་ཁྱིམ་པར་གྱུར་པ་གོས་དཀར་པོ་གྱོན་ཞིང་ཁྱིམ་ན་གནས་པ་དེས་དད་པ་དང་ལྡན་པར་བྱའོ། །འཇུངས་པ་མེད་པ་དང ། ལྷུག་པར་གཏོང་བར་བྱའོ། །སྦྱིན་པ་བགེད་པ་ལ་དགའ་བ་དང ། རྣམ་པར་སྨིན་པ་ལ་རེ་བ་མེད་པར་བདོག་པ་ཐམས་ཅད་ཡོངས་སུ་གཏོང་བར་བྱའོ། །དེས་སངས་རྒྱས་ལ་སྐྱབས་སུ་འགྲོ་བར་བྱའོ། །ཆོས་ལ་སྐྱབས་སུ་འགྲོ་བར་བྱའོ། །དགེ་འདུན་ལ་སྐྱབས་སུ་འགྲོ་བར་བྱའོ། །ཚུལ་ཁྲིམས་ཡོངས་སུ་དག་པར་བྱའོ། །བསླབ་པའི་གཞི་ལྔ་ཡོངས་སུ་གཟུང་བར་བྱའོ། །ལྷ་གཞན་མེད་པར་བྱ་ཞིང་བསམ་པ་སངས་རྒྱས་ཀྱིས་རྗེས་སུ་སོང་བར་བྱའོ། །ཚུལ་ཁྲིམས་ལ་སྐྱོན་མེད་པ་དང ། དགེ་བ་བཅུའི་ལས་ཀྱི་ལམ་ཡང་དག་པར་གཟུང་ཞིང་སྒྲུབ་ལ་གཞན་ལ་ཡང་དེ་ཡང་དག་པར་འཛིན་དུ་འཇུག་པ་དང ། ཆང་འཐུང་བ་ལས་ཕྱིར་ལྡོག་པར་བྱའོ། །མ་འཕྱར 51.36a བར་བྱའོ། །གཞན་དག་ལ་ཆང་གི་མི་སྙན་པ་བརྗོད་ཅིང་གཞན་ལ་ཡང་ཆང་མི་སྦྱིན་པ་དང ། གཞན་དག་ལ་ཡང་འདོད་པ་སྨད་ཅིང་ཚངས་པར་སྤྱད་པར་བྱའོ། །ཕྲག་དོག་མེད་པར་བྱའོ། །འཚོ་བ་ཡོངས་སུ་དག་པར་བྱའོ། །བུ་ལ་སྲེད་པར་མི་བྱའོ། །བུ་མོ་ལ་སྲེད་པ་མི་བསྐྱེད་དོ། །ཆུང་མ་ལ་སྲེད་པ་མ་སྐྱེད་ཅིག་།ནོར་ལ་སྲེད་པར་མི་བྱའོ། །ཁྱིམ་ལ་སྲེད་པར་མི་བྱའོ། །དེས་རབ་ཏུ་བྱུང་བ་ལ་མངོན་པར་དགའ་བ་དང ། རབ་ཏུ་བྱུང་བ་ལ་སེམས་གཞོལ་བར་བྱའོ། །ཡན་ལག་བརྒྱད་དང་ལྡན་པའི་ཉེ་བར་གནས་པའི་ཏིང་ངེ་འཛིན་འདི་ལ་གཞོལ་བ་དང ། གཙུག་ལག་ཁང་ལ་གནས་པར་བྱའོ། །ངོ་ཚ་ཤེས་ཤིང་ཁྲེལ་ཡོད་པ་དང་ལྡན་པ་དང ། སེམས་བྱང་ཆུབ་ལ་གཞོལ་ཞིང་ཐེག་པ་གཞན་མི་འདོད་པར་བྱའོ། །ཚུལ་ཁྲིམས་དང་ལྡན་པའི་དགེ་སློང་རྣམས་ལ་འཕྱ་བར་མི་བྱའོ། །ཚངས་པར་སྤྱོད་པ་རྣམས་ལ་གུས་པ་དང་བཅས་པ་དང ། ཞེ་ས་དང་བཅས་པར་བྱའོ། །སློབ་དཔོན་གང་ལས་ཏིང་ངེ་འཛིན་འདི་ལུང་མནོས་པ་དེ་ལ་ཤིན་ཏུ་ཕངས་པར་བསམ་པ་དང ། དང་བ་དང ། གུས་པར་བྱའོ། །དགེ་བའི་བཤེས་གཉེན་དུའང་འདུ་ཤེས་ཉེ་བར་གཞག་པར་བྱའོ། །སྟོན་པར་ཡང་འདུ་ཤེས་ཉེ་བར་གཞག་པར་བྱའོ། །དེ་ལ་བདེ་བའི་ཡོ་བྱད་ཐམས་ཅད་དབུལ་བར་བྱའོ། །བྱས་པ་ཤེས་པ་དང ། བྱས་པ་གཟོ་བ་དང ། གུས་པ་དང་བཅས་པས་གནས་པར་བྱ་སྟེ། བཟང་སྐྱོང་དེ་ལྟར་བྱང་ཆུབ་སེམས་དཔའ་ཁྱིམ་པར་གྱུར་པ་ཁྱིམ་ན་གནས་པས་ཏིང་ངེ་འཛིན་འདི་ལ་སྦྱོར་བར་བྱའོ། །ཆོས་དག་ལ་ཡང་གནས་ཏེ་ཏིང་ངེ་འཛིན་འདི་བསྒོམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་ཁྱིམ་ན་གནས་པ་གང ། །ཏིང་འཛིན་འདི་ནི་གཟུང་བར་འདོད་གྱུར་པས། །རྟག་ཏུ་ཚུལ་ཁྲིམས་ཡོངས་སུ་དག་གྱུར་ཅིང ། །མངོན་འབྱུང་སེམས་བརྟན་ཡང་དག་བསྐྱེད་བྱས་ཏེ། །བསླབ་གཞི་ལྔ་ནི་ཡོངས་སུ་བཟུང་བྱས་ལ། །ཡན་ལག་བརྒྱད་པའི་གསོ་སྦྱོང་བསྙེན་བྱས་ཤིང ། །ཁྱིམ་མ 51.36b སྤངས་པར་གཙུག་ལག་ཁང་གནས་ཏེ། །ཏིང་ངེ་འཛིན་འདི་ལ་ནི་འཇུག་པར་བྱ། །སུ་ལའང་ཆང་ནི་བླུད་པར་མི་བྱ་ཞིང ། །སངས་རྒྱས་མ་བསྔགས་བཏུང་བ་རྣམས་སྤངས་ལ། །བསླབ་པ་འདི་དག་ལ་ནི་གནས་བྱས་ཏེ། །ཏིང་ངེ་འཛིན་འདི་ལུང་ནི་མནོད་པར་བྱ། །བུ་ལ་མི་སྲེད་བུ་མོ་མི་སྲེད་ལ། །ཆུང་མ་མི་སྲེད་ཁྱིམ་ལ་འང་མི་སྲེད་ཅིང ། །དགེ་བསྙེན་ངོ་ཚ་ཤེས་དང་ལྡན་བྱས་ཏེ། །དེས་ནི་ཏིང་འཛིན་འདི་ལ་འཇུག་པར་བྱ། །ནད་མེད་བྱ་ཞིང་སུ་དག་ལ་ཡང་ནི། །མི་བསྙེན་མི་བརྗོད་མང་པོ་ཐམས་ཅད་སྤང ། །སྐྱོན་མེད་བཟོད་པ་དག་ལ་གནས་ནས་སུ། །ཏིང་ངེ་འཛིན་འདི་ལ་ནི་འཇུག་པར་བྱ། །ཏིང་འཛིན་འཕགས་པ་འདི་ལ་འཇུག་པ་ན། །སངས་རྒྱས་ཆོས་ལ་རྟག་ཏུ་གུས་བཅས་ཤིང ། །སེམས་ནི་དང་ལ་གཡོ་མེད་ཕྲག་དོག་མེད། །དགེ་འདུན་བསྙེན་བཀུར་བྱ་བར་སྤྲོ་བར་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་གཅིག་པའོ།། །།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འཚལ་ན། བཙུན་པ་བཅོམ་ལྡན་འདས་དེས་ཆོས་གང་ལ་གནས་ཏེ། ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་དེ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འདོད་པ་དེས་བསླབ་པའི་གཞི་ལྔ་ཡོངས་སུ་གཟུང་བར་བྱའོ། །བཟང་སྐྱོང་དགེ་བསྙེན་མས་གསུམ་ལ་སྐྱབས་སུ་སོང་ཞིང་ལྷ་གཞན་མེད་པར་བྱའོ། །བཟང་སྐྱོང་དགེ་བསྙེན་མས 51.37a དགེ་མཚན་དང་ལྟས་ཡོངས་སུ་སྤང་བ་དང་སྒྱུ་མེད་པར་བྱའོ། བཟང་སྐྱོང་དགེ་བསྙེན་མས་སྤྱོད་ལམ་མི་བཅོས་པ་དང ། འཇུངས་པ་མེད་པར་བྱའོ། །བཟང་སྐྱོང་དགེ་བསྙེན་མས་སྦྱིན་པ་བགེད་པ་ལ་དགའ་བ་དང ། ཆོས་འདོད་པར་བྱའོ། བཟང་སྐྱོང་དགེ་བསྙེན་མས་ཡོངས་སུ་འདྲི་བའི་རང་བཞིན་ཅན་དང ། གུས་པ་དང་བཅས་པ་དང ། ཞེ་ས་དང་བཅས་པར་བྱའོ། །དགེ་སློང་དང་དགེ་སློང་མ་དག་མཐོང་ན་སྟན་ལ་བདར་བར་བྱའོ། །བཟང་སྐྱོང་དེ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་མནོད་པ་འམ། བསྒོམ་པར་འདོད་ན། དགེ་བསྙེན་མ་དེས་ཆོས་དེ་ལྟ་བུ་དེ་དག་ལ་གནས་ཏེ་ཏིང་ངེ་འཛིན་འདི་ལུང་ནོད་པར་བྱའོ། །བསྒོམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་གནང་ཞིང་བདེ་གཤེགས་བསྔགས་པ་ཡི། །དགེ་བསྙེན་མ་གང་ཏིང་འཛིན་འདི་ཚོལ་བ། །བསླབ་གཞི་ལྔ་པོ་དག་ནི་ཡོངས་བཟུང་སྟེ། །ཏིང་ངེ་འཛིན་འདི་ལ་ནི་འཇུག་པར་བྱ། །སངས་རྒྱས་ཆོས་དང་དེ་བཞིན་དགེ་འདུན་ལས། །ལྷ་གཞན་མེད་ཅིང་གུས་དང་བཅས་བྱས་ཏེ། །ལོག་པའི་ལམ་ནི་ཐམས་ཅད་སྤང་བྱས་ལ། །ཏིང་ངེ་འཛིན་འདི་ལ་ནི་འཇུག་པར་བྱ། །སྲོག་ཆགས་མི་གསོད་མ་བྱིན་མི་ལེན་ཅིང ། །བརྫུན་དུ་སྨྲ་བ་རྣམས་ཀྱང་མི་ཟེར་ལ། ནམ་ཡང་འདོད་ལ་ལོག་པར་མི་གཡེམ་པར། །དེས་ནི་ཏིང་ངེ་འཛིན་འདི་ལུང་མནོད་བྱ། །འཇུངས་པ་མེད་ལ་རྣམ་སྨིན་མི་རེ་ཞིང ། །སྤྱོད་ལམ་བཅོས་མ་དག་ཀྱང་མེད་བྱས་ལ། །ཕྲག་དོག་དང་ནི་ང་རྒྱལ་ཁྲོ་སྤངས་ཏེ། །དེས་ནི་ཏིང་ངེ་འཛིན་འདི་ལུང་ནོད་བྱ། །དགེ་སློང་དེ་བཞིན་དགེ་སློང་མ་མཐོང་ན། །གུས་དང་བཅས་པས་ལངས་ཤིང་སྟན་འབུལ་ལ། །ཆོས་འདོད་དགེ་བ་གང་ཞེས་ཚོལ་བྱེད་ཅིང ། །དེས་ནི་ཏིང་ངེ་འཛིན་འདི་ལུང་མནོད་བྱ། །བཟང་སྐྱོང་གིས་ཞུས་པའི་ཏིང་ངེ་འཛིན་ལས་དགེ་བསྙེན་མའི་ལེའུ་སྟེ་བཅུ་གཉིས་པའོ།། །། དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ 51.37b འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་རྣམས་ཀྱི་ཆེད་དང ། བྱང་ཆུབ་སེམས་དཔའ་འདོད་ཆེན་པ་རྣམས་དང ། ལྷག་པའི་བསམ་པ་ཕུན་སུམ་ཚོགས་པ་རྣམས་དང ། བརྩོན་འགྲུས་བརྩམས་པ་རྣམས་དང ། བརྩོན་པ་མི་འདོར་བ་རྣམས་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་རྣམས་ཀྱི་ཆེད་དུ་ཆོས་གང་ལ་གནས་ན། ཏིང་ངེ་འཛིན་འདི་ལུང་མནོད་པར་བགྱི་བ་འམ། བསྒོམ་པར་བགྱི་བའི་ཆོས་རྒྱ་ཆེ་ཞིང་བཟང་བ་གསུངས་པ་ངོ་མཚར་ཏོ། །བཙུན་པ་བཅོམ་ལྡན་འདས་མ་འོངས་པའི་དུས་ན་དེ་བཞིན་གཤེགས་པ་མྱ་ངན་ལས་འདས་པ་དེའི་ཚེ། ཅི་ཏིང་ངེ་འཛིན་འདི་འཛམ་བུའི་གླིང་འདིར་སྤྱོད་པར་འགྱུར་ལགས་སམ། རྒྱས་པར་བགྱིད་པར་འགྱུར་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་ང་ཡོངས་སུ་མྱ་ངན་ལས་འདས་ནས་ལོ་བཞི་སྟོང་དུ་ཏིང་ངེ་འཛིན་འདི་འཛམ་བུའི་གླིང་ན་སྤྱོད་པར་འགྱུར་རོ། །རྒྱས་པར་བྱེད་པར་འགྱུར་རོ། །དེའི་འོག་ཏུ་སའི་ཁུང་དུ་སོང་བར་འགྱུར་རོ། །ཡང་དེ་ལོ་ལྔ་བརྒྱ་པ་ཐ་མ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ། དམ་པའི་ཆོས་འཇིག་པར་གྱུར་པ། དགེ་སྦྱོང་འཇིག་པར་གྱུར་པ། དམ་པའི་ཆོས་སྤོང་བར་གྱུར་པ། སེམས་ཅན་འཇིག་པར་གྱུར་པ། རྒྱལ་སྲིད་འཁྲུག་པར་གྱུར་པ། ཚུལ་ཁྲིམས་དང་ལྡན་པའི་ཕྱོགས་དམས་པའི་དུས་ལ་བབ་པ། ཚུལ་ཁྲིམས་འཆལ་པའི་ཕྱོགས་འཕེལ་བའི་དུས་ལ་བབ་པ། དམ་པའི་ཆོས་ཀྱི་ཕྱོགས་དམས་པའི་དུས་ལ་བབ་པ། དམ་པ་མ་ཡིན་པའི་ཕྱོགས་ཀྱི་ཆོས་འཕེལ་བའི་དུས་ལ་བབ་པ། ཟད་པའི་དུས་ལ་བབ་པ་ན། སེམས་ཅན་གང་མདོ་སྡེ་འདི་ལྟ་བུ་ཐོབ་པར་འགྱུར་བའི་ཕྱིར་དགེ་བའི་རྩ་བ་འབར་བ། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་སྐྱེད་པ། དགེ་བའི 51.38a རྩ་བ་སྨིན་པ། ས་བོན་བཏབ་པའི་སེམས་ཅན་རྣམས་ནི་ཉུང་ཟད་ཅིག་འབྱུང་སྟེ། སེམས་ཅན་དེ་ལྟ་བུ་དེ་དག་གི་དོན་དུ་འདི་ལྟ་སྟེ་སངས་རྒྱས་ཀྱི་མཐུས་ཏིང་ངེ་འཛིན་འདི་འཛམ་བུའི་གླིང་དུ་སྤྱོད་པར་འགྱུར་རོ། །རྒྱས་པར་བྱེད་པར་འགྱུར་རོ། །དེ་དག་གིས་ཀྱང་ཏིང་ངེ་འཛིན་འདི་ཐོས་ནས་དགའ་བ་དང ། མགུ་བ་དང ། དང་བ་རྒྱ་ཆེན་པོ་འཐོབ་བོ། །ཐོས་ནས་ཀྱང་འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། ཡི་གེར་འདྲི་བར་འགྱུར། འཆད་པར་འགྱུར། རྒྱས་པར་བྱེད་པར་འགྱུར། བསྒོམ་པའི་སྦྱོར་བ་ལ་བརྩོན་པར་འགྱུར། ཐ་ན་གླེགས་བམ་དུ་བྲིས་ཤིང་འཆང་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང ། ལི་ཙ་བྱི་གཞོན་ནུས་བཅོམ་ལྡན་འདས་ལ་ཕྱི་མའི་དུས་ན་དམ་པའི་ཆོས་འདི་འགྱུར་བ་དང ། རྣམ་པར་འཇིག་པ་ཐོས་ནས་ཆོས་ཀྱི་ཤུགས་ཀྱིས་ངུ་ཞིང་མཆི་མ་ཀློག་པར་བྱེད་དེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང ། ལི་ཙ་བྱི་གཞོན་ནུ་མཆི་མ་ཕྱིས་ཏེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་མྱ་ངན་ལས་འདས་ནས་ལོ་ལྔ་བརྒྱ་པའི་ཐ་མར་གྱུར་པ། ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ། དམ་པའི་ཆོས་སྤོང་བར་གྱུར་པ་ན་ཡང ། མདོ་སྡེ་འདི་ལྟ་བུ་དག་གཟུང་བར་བགྱིའོ། །ཀུན་ཆུབ་པར་བགྱིའོ། །ཡི་གེར་བྲི་བར་བགྱིའོ། །བཅང་བར་བགྱིའོ། །བཀླག་པར་བགྱིའོ། །རྒྱས་པར་བགྱིའོ། །བསྒོམ་པའི་སྦྱོར་བ་ལ་བརྩོན་པར་བགྱིའོ། །དེ་ཅིའི་སླད་དུ་ཞེ་ན། བཙུན་པ 51.38b བཅོམ་ལྡན་འདས་བདག་ཅག་ནི་དེ་བཞིན་གཤེགས་པས་གསུངས་པའི་མདོ་སྡེ་ཟབ་མོ་འདི་ལྟ་བུ་འདི་ཉན་པ་དང ། འདྲི་བ་དང ། འཛིན་པ་དང ། ཀུན་ཆུབ་པར་བགྱིད་པ་དང ། འཆང་བ་དང ། ཀློག་པ་དང ། འཆད་པ་དང ། རྒྱས་པར་བགྱིད་པ་དང ། བསྒོམ་པས་ཆོག་མ་འཚལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་ཆེ་བཟང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཚོང་དཔོན་གྱི་བུ་ཕུག་སྦས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱེའུ་འདམ་བུས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་བཟང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་བཅོམ་ལྡན་འདས་ལས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ། ལྔ་བརྒྱ་པ་ཐ་མ་ལ་དམ་པའི་ཆོས་འདི་འགྱུར་བ་དང ། རྣམ་པར་འཇིག་པ་ཐོས་ནས་ཆོས་ཀྱི་ཤུགས་ཀྱིས་ངུ་ཞིང་མཆི་མ་ཀློག་པར་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྦས་དང ། ཁྱེའུ་འདམ་བུས་བྱིན་དང ། རིགས་ཀྱི་བུ་མཚམས་བཟང་དང ། དབང་པོས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་མཆི་མ་ཕྱིས་ནས་སྟན་ལས་ལངས་ཏེ། གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཀྱང་མ་འོངས་པའི་དུས་ན། དེ་བཞིན་གཤེགས་པ་མྱ་ངན་ལས་འདས་ནས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ། ལྔ་བརྒྱ་པ་ཐ་མར་གྱུར་པ། དམ་པའི་ཆོས་སྤོང་བར་གྱུར་པ་ན་ཡང་མདོ་སྡེ་འདི་ལྟ་བུ་དག་།གཟུང་བར་བགྱིའོ། །ཀུན་ཆུབ་པར་བགྱིའོ། །ཡི་གེར་བྲི་བར་བགྱིའོ། །བཅང་བར་བགྱིའོ། །བཀླག་པར་བགྱིའོ། །གཞན་དག་ལ་ཡང 51.39a རྒྱ་ཆེར་བཤད་པར་བགྱིའོ། །བསྒོམ་པར་བགྱིའོ། །བཙུན་པ་བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་རིང་དུ་གནས་པར་བགྱིའོ། །རྒྱ་ཆེ་བ་དང ། རྒྱས་པར་བགྱིའོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་བདག་ཅག་ནི་སྔོན་མ་ཐོས་པའི་ཆོས་རྣམས་ཡང་དག་པར་ལེན་པར་བགྱིད་པ་དང ། ཡང་དག་པར་སྒྲོགས་པར་བགྱིད་དོ། །བཙུན་པ་བཅོམ་ལྡན་འདས་བདག་ཅག་ནི་ཆོས་ཟབ་མོ་འཇིག་རྟེན་པ་ཐམས་ཅད་ཡིད་ཆེས་པར་མི་འགྱུར་བ་བསྒོམ་པར་བགྱིའོ། །བསྟན་པར་བགྱིའོ། །དེ་ནས་འཁོར་དེ་དག་ནས་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་སྲོག་ཆགས་ལྔ་བརྒྱ་ཙམ་སྟན་ལས་ལངས་ཏེ། གུས་པ་དང་བཅས། ཞེ་ས་དང་བཅས་པས། བཅོམ་ལྡན་འདས་ལས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ་ན་དམ་པའི་ཆོས་རྣམས་འཇིག་པ་དང ། དམ་པའི་ཆོས་མི་ལེན་པའི་དུས་ཐོས་ནས་དམ་པའི་ཆོས་འགྱུར་བའི་ཤུགས་ཀྱིས་ངུ་ཞིང་མཆི་མ་ཀློག་པར་གྱུར་ཏོ། །དེ་ནས་སྲོག་ཆགས་ལྔ་བརྒྱ་ཙམ་པོ་དེ་དག་གིས། མཆི་མ་ཕྱིས་ནས་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ། ཡོངས་སུ་མྱ་ངན་ལས་འདས་ནས། ལོ་ལྔ་བརྒྱ་པ་ཐ་མར་གྱུར་པ། ཕྱི་མའི་དུས། ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ་ན་མདོ་སྡེ་འདི་ལྟ་བུ་འདི་དག་།གཟུང་བར་བགྱིའོ། །བསྒོམ་པར་བགྱིའོ། །གཞན་དག་ལ་ཡང་རྒྱ་ཆེར་བསྒྲག་པར་བགྱིའོ། །སྐྱེས་བུ་དམ་པ་འདི་དག་ལ་ཡང་ལུས་ཀྱིས་ཞལ་ཏ་བགྱི་བ 51.39b བགྱིའོ། །དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ཡང་དེའི་ཚེ་མཉན་པར་བགྱིའོ། །དེར་ཡང་དམ་པའི་ཆོས་ཡོངས་སུ་གཟུང་བར་བགྱིའོ། །དམ་པའི་ཆོས་ཀྱི་སྣོད་དུ་གྱུར་པ་གཞན་དག་ཀྱང་དམ་པའི་ཆོས་དཀོན་མཆོག་འདིས་ཕན་གདགས་པར་བགྱིའོ། །བཅོམ་ལྡན་འདས་ཏིང་ངེ་འཛིན་འདི་སྐྱེས་བུ་དམ་པ་འདི་དག་ལ་གཏད་པར་གསོལ། བཅོམ་ལྡན་འདས་ཏིང་ངེ་འཛིན་འདི་སྐྱེས་བུ་དམ་པ་འདི་དག་ལ་གདམས་པར་གསོལ། དེ་ནས་དེའི་ཚེ་བཅོམ་ལྡན་འདས་ཀྱིས་གསེར་གྱི་ཁ་དོག་ལྟ་བུའི་འཛུམ་པ་མཛད་དེ། དེས་འཇིག་རྟེན་གྱི་ཁམས་མཐའ་ཐུག་པ་མེད་པ་རྣམས་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་མངོན་པར་བྱུང་ནས་ཉི་མ་དང་ཟླ་བའི་འོད་ཀྱང་ཟིལ་ཀྱིས་མནན་ཏེ་སླར་ལྷགས་ནས། བཅོམ་ལྡན་འདས་ལ་གཡས་ཕྱོགས་ནས་ལན་གསུམ་དུ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་གི་མཚམས་སུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི། ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འཐུན་པའི་ཚིགས་སུ་བཅད་པ་འདི་ལྟ་བུ་དག་གིས་མངོན་པར་བསྟོད་དོ། །ཚུལ་ཁྲིམས་རྣམ་དག་སྤྱོད་ཡུལ་ཡོངས་སུ་དག་།མཐུ་ཆེ་བ་ཡི་ནང་ནའང་རྫུ་འཕྲུལ་ཆེ། །སྐྱེ་དགུ་ཀུན་ལས་མཆོག་ཏུ་འཕགས་གྱུར་པ། །དྲི་མ་བྲལ་བའི་ཉི་མ་བཞིན་དུ་མཛེས། །མ་ཆགས་མཁྱེན་ལྡན་ཤིན་ཏུ་རྣམ་གྲོལ་ཐུགས། །ཀ་ལ་པིང་ཀའི་གསུངས་ལྡན་ལྷ་ཡི་ལྷ། །ཕས་ཀྱི་རྒོལ་བ་ཀུན་གྱིས་མི་བསྐྱོད་པ། །འཛུམ་པ་འདི་མཛད་རྒྱུ་རྐྱེན་ཅི་ཞིག་ལགས། །ཕན་ཕྱིར་ཐུགས་བརྩེ་རྐང་གཉིས་ནང་ན་གཙོ། །དོན་དམ་གསལ་བས་ལུང་ནི་བསྟན་པར་གསོལ། །ཁྱོད་ཀྱི 51.40a གསུང་སྒྲ་ཡིད་དུ་འོང་ཐོས་ན། །འཕགས་པའི་དགའ་བ་ཟང་ཟིང་མེད་པ་འཐོབ། །རྒྱལ་མཆོག་རྣམ་པར་འདྲེན་པ་རྒྱུ་མེད་པར། །གང་ཟག་མཆོག་ནི་འཛུམ་པ་མི་མཛད་ན། །འཛུམ་པ་འདི་མཛད་རྒྱུ་རྐྱེན་ཅི་ཞིག་ལགས། །འཇིག་རྟེན་ཕན་ཕྱིར་ཐུགས་བརྩེ་ཁྱོད་ལ་ཞུའོ། །འཇིག་རྟེན་མགོན་པོ་འཛུམ་པ་མཛད་པ་ལས། །དེ་རིང་སུའི་དགོས་པ་རྒྱ་ཆེར་འབྱུང ། །སུ་ཞིག་སངས་རྒྱས་ཡེ་ཤེས་བརྟན་པར་གནས། །སུ་ཞིག་དེ་རིང་རྒྱལ་སྲིད་མཆོག་ཐོབ་འགྱུར། །སུ་ཞིག་དེ་རིང་བསོད་ནམས་བརྟན་པར་གནས། །སུ་ཞིག་ཆོས་མཛོད་འདི་ནི་འཛིན་པར་འགྱུར། །སུ་ཞིག་དེ་རིང་ཅོད་པན་ཆེ་ཐོགས་ཏེ། །རང་གི་ལག་གིས་རང་གི་མགོ་ལ་འདོགས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སླར་ཚིགས་སུ་བཅད་དེ་གསུངས་པ། ཀུན་དགའ་གྲོགས་པོ་ལྔ་བརྒྱ་ཚོགས་པ་དག་།དགའ་བའི་སེམས་ཀྱིས་མདུན་དུ་འཁོད་གྱུར་ཅིང ། །བདག་ཅག་ཆོས་འདི་ཐོབ་པར་ཤོག་ཤིག་ཅེས། །ཚིག་ཏུ་རྗོད་པར་བྱེད་པ་འདི་དག་ལྟོས། །ནམ་ཞིག་བདག་ཅག་འདི་འདྲར་འགྱུར་ཞེས་ཏེ། །དེ་དག་ང་ལ་ཡང་ནི་ལྟ་བར་བྱེད། །བདག་ཅག་བྱང་ཆུབ་མཆོག་འདི་འཛིན་ཏོ་ཞེས། །ངའི་མདུན་དུ་འདུག་ནས་ཚིག་ཏུ་བརྗོད། །མ་འོངས་ཕྱི་དུས་དེ་འདྲར་གྱུར་པའི་ཚེ། །མདོ་སྡེ་འདི་དག་བསྒྲགས་པར་བྱ་བའི་ཕྱིར། །མཁས་པ་བརྒྱད་པོ་འདི་དག་ལ་སོགས་པ། །ལྔ་བརྒྱ་འདི་དག་རྣམས་ཀྱང་ལངས་པར་གྱུར། །མོས་པར་བྱ་ཞིང་ཁོང་དུ་ཆུད་པར་བྱ། །འདིར་ནི་ང་ཡི་ཡེ་ཤེས་ཆགས་པ་མེད། །འདི་དག་གིས་ནི་རྒྱལ་བ་གཅིག་པུ་ལ། །ཐལ་མོ་སྦྱར་བ་བྱས་ནས་ལངས་པ་མིན། །སྔོན་དག་དྲན་ཏེ་སྐྱེ་བ་སྔ་མ་ལ། །སངས་རྒྱས་སྟོང་ཕྲག་བརྒྱད་ཅུ་ཚང་བར་བྱུང ། །ཆོས་འདི་དག་ནི་བསྒྲགས་པར་བྱ་བའི་ཕྱིར། །དེ་ལ་འང་འདི་དག་བརྒྱད་ལ་སོགས་པའང་ལངས། །དེ་བས་ཀྱང་ནི་ཤིན་ཏུ་སྔ་བ་ན། །ཚུལ་ཁྲིམས་རྣམ་དག་གྲགས་པ་ཆེན་པོ་པ། །བྱེ་བ་ཁྲག 51.40b ཁྲིག་སྟོང་ཕྲག་བརྒྱད་བཅུ་བྱུང ། །དེ་དག་ལས་ཀྱང་རྒྱ་ཆེ་ཆོས་འདི་བླངས། །ང་ཡི་གསུངས་རབ་རྒྱ་ཆེ་བ་དག་ཀྱང ། །དོན་ཏུ་གཉེར་ཅིང་ཡོངས་སུ་འཛིན་པར་བྱེད། །སེམས་ནི་དགའ་ཞིང་མགུ་བ་དཔེ་མེད་པས། །མང་པོ་བྱང་ཆུབ་སེམས་ལ་སྐུལ་བར་བྱེད། །དེ་ནི་ཕྱི་དུས་མྱ་ངན་ང་འདས་ཚེ། །སྐུ་གདུང་ཐམས་ཅད་རྒྱས་པར་བྱས་གྱུར་ནས། །སངས་རྒྱས་བྱང་ཆུབ་འདི་དག་ལེགས་བཟུང་སྟེ། །ཡི་གེ་བྲིས་ནས་སྒོམ་དུ་བཅུག་ནས་ཀྱང ། མཆོད་རྟེན་ས་དང་བྲག་དང་རི་དག་དང ། །ལྷ་དང་དེ་བཞིན་ཀླུ་ཡི་ལག་དག་ཏུ། །མདོ་སྡེ་གཞག་པ་བྱས་ནས་དེ་དག་རྣམས། །ལྷའི་བརྟུལ་ཞུགས་འདྲ་བར་བྱ་ཕྱིར་འགྲོ། །དེ་དག་ཕྱི་མའི་དུས་ཚེ་སོ་སོའི་རིགས། །ཐམས་ཅད་བོར་ཏེ་སླད་དུ་བབས་གྱུར་ནས། །སངས་རྒྱས་བྱང་ཆུབ་འདི་དག་ལེགས་བཟུང་སྟེ། །བསམ་པ་ཇི་བཞིན་དུ་ནི་བྱེད་པར་འགྱུར། །དེ་དག་ཆོས་འདི་འདོད་པས་ཡུལ་ཡུལ་དུ། །དོང་ཞིང་མདོ་སྡེ་བཟང་པོ་འདི་རྙེད་འགྱུར། །རྙེད་ནས་ཡིད་ནི་མཆོག་ཏུ་དགའ་གྱུར་པས། །རྟེན་པ་མེད་པར་སྐྱེ་བོ་མང་ལ་གཏོང ། །ལུས་དང་དེ་བཞིན་སྲོག་ཀྱང་སྤང་བྱས་ཏེ། །མཁས་པ་དེ་དག་ཆོས་འདོད་ཆོག་མི་ཤེས། །ཕས་ཀྱི་རྒོལ་བ་ཀུན་དང་མི་མཐུན་ཞིང ། །གྱ་ནོམ་རྒྱ་ཆེ་ཆོས་ནི་སྦྱིན་པར་བྱེད། །གང་དག་ང་ཡི་མདུན་ན་ལངས་གྱུར་པ། །ལྔ་བརྒྱ་འདི་དག་ཐམས་ཅད་མ་གཏོགས་པར། །མདོ་སྡེ་འདི་ལ་འཛིན་པར་བྱེད་པ་དང ། །འཆང་དང་ཀློག་པར་བྱེད་པ་སུ་ཡང་མེད། །དགེ་སློང་བརྒྱད་དང་དེ་བཞིན་བྱང་ཕྱོགས་སུ། །ཡོངས་སུ་ལེན་ཅིང་ཆོས་འཛིན་དགའ་བ་དག་།ཆོས་འདོད་འཇིག་རྟེན་ཕན་ཞིང་བརྩེ་བ་དག་།ལེན་པའི་ཕྱིར་ནི་མང་པོ་འབྱུང་བར་འགྱུར། །གང་དག་དེར་ནི་ཤིན་ཏུ་རྒྱས་འཛིན་ཅིང ། །སྙན་ཚིག་རྙེད་ལ་མ་རྟེན་འབྱུང་བ་ནི། །བརྒྱད་ལ་སོགས་པ་དགེ་སློང་ལྔ་བརྒྱ་པོ། །འདི་དག་ཐམས་ཅད་རྣམས་ནི་ཚང་བའོ། །དགེ་སློང་དགེ་སློང་མ་དང་དགེ་བསྙེན་དང ། །དགེ་བསྙེན་མ་ནི་མཁས་ཤིང་འཇུངས་བྲལ་འདི། །གང་དག 51.41a ལངས་ཤིང་ཕྱི་དུས་ཆོས་འཛིན་པ། །དེ་དག་ཐམས་ཅད་མི་མཆོག་རྒྱལ་བར་འགྱུར། །ཡོན་ཏན་བསམ་གྱིས་མི་ཁྱབ་ཀུན་དང་ལྡན། །གསེར་གྱི་ཁ་དོག་བསོད་ནམས་བརྒྱ་ཡི་མཚན། །ཕན་ཕྱིར་ཐུགས་བརྩེ་སེམས་ཅན་མང་པོ་འགྲོལ། །བདེ་བ་སྦྱིན་ཞིང་ཉོན་མོངས་ཐམས་ཅད་སེལ། །དེ་དག་འདི་ནས་འཆི་འཕོས་ཕྱི་ནས་ཡང ། །ལོག་ལྟུང་སར་ནི་ནམས་ཀྱང་འགྲོ་མི་འགྱུར། །སྐྱེ་བ་ཐམས་ཅད་དུ་ནི་འདུས་གྱུར་ཅིང ། །མི་མཆོག་རྣམས་ནི་མཉེས་པ་བྱེད་པར་འགྱུར། །དེ་དག་གིས་ནི་མི་ཁོམ་བརྒྱད་ཀྱང་སྤངས། །དེས་ནི་ངན་སོང་ཐམས་ཅད་སྤངས་པའོ། །དེས་ནི་བསོད་ནམས་ཚད་མེད་ཇི་སྙེད་བཟུང ། །ཡོན་ཏན་མཐའ་ནི་བཤད་པར་མི་ནུས་སོ། །སངས་རྒྱས་ཞིང་འདིར་མཉེས་པར་བྱེད་པར་འགྱུར། །འདུས་པར་གྱུར་ནས་སངས་རྒྱས་གང་འགྱུར་བ། །དེ་དག་ཕན་པའི་ཕྱིར་ནི་སྙིང་བརྩེ་ལ། །བླ་མེད་ཞི་ལམ་ཚོལ་ཞིང་གུས་པར་བྱེད། །དེ་དག་བསྐལ་པ་གཅིག་ལ་འདུས་གྱུར་ཏེ། །རྐང་གཉིས་གཙོ་ལ་མཆོད་པ་དག་བྱས་ནས། །བླ་ན་མེད་པའི་རྡུལ་མེད་བྱང་ཆུབ་ཕྱིར། །འཕགས་པ་ཟང་ཟིང་མེད་པའི་བཟོད་འཐོབ་འགྱུར། །དེ་དག་ན་ཡང་དེ་བཞིན་ཆོས་འཛིན་པ། །ཕྱི་མའི་དུས་དང་དེ་བཞིན་བར་མའི་དུས། །དེ་ན་ཚངས་པར་སྤྱོད་པ་འདི་སྤྱད་ནས། །ཚེ་དཔག་མེད་པའི་སངས་རྒྱས་མཉེས་པར་བྱེད། །བསྐལ་པ་བཟང་པོ་འདི་ལ་ཇི་སྙེད་ཀྱི། །འཇིག་རྟེན་དོན་མཛད་འོད་མཛད་འབྱུང་བ་དག་།དེ་དག་གི་ཡང་ཆོས་ཀྱི་ཚུལ་འཛིན་པ། །དུས་གསུམ་ལ་ནི་གནས་པའི་དཔའ་བོའོ། །མ་འོངས་སངས་རྒྱས་བྱེ་བ་ཕྲག་མང་པོ། །བསམ་གྱིས་མི་ཁྱབ་གང་དག་ཚད་མེད་པ། །དེ་ལ་དེས་ནི་རྒྱ་ཆེ་མཆོད་བྱས་ནས། །སངས་རྒྱས་བྱང་ཆུབ་ལ་ནི་མཉེས་བྱེད་འགྱུར། །བྱང་ཆུབ་ཞི་ལ་དེ་དག་རེག་པར་འགྱུར། །དེ་ལ་འདུས་ནས་གུས་པར་བྱེད་པར་འགྱུར། །བསྐལ་པ་ཁྲག་ཁྲིག་མང་པོ་འདས་གྱུར་པ། །དེ་སྲིད་ན་ནི་ས་བོན་དངོས་པོར་འགྱུར། །ཁྱིམ་གྱི་བདག་པོ་བཟང་སྐྱོང་འདི་དང་ནི། །རིན་ཆེན་འབྱུང་བའི་རིན་ཆེན་འབྱུང་གནས་དང ། །དེད་དཔོན་བཟང་དང 51.41b ཕུག་སྦས་བྲམ་ཟེའི་ཁྱེའུ། །སངས་རྒྱས་གང་གཱའི་བྱེ་སྙེད་མཐོང་བར་འགྱུར། །དེ་དག་དེ་རྣམས་དང་ནི་དེ་བས་ཀྱང ། །སངས་རྒྱས་བྱེ་བ་མང་པོའི་ཆོས་འཛིན་པ། །བསྐལ་པ་བྱེ་བ་མང་པོ་དེ་ཡི་ཚད། །བརྗོད་པར་བྱ་ཞིང་མཐའ་རྟོགས་མི་ནུས་སོ། །སེམས་ཅན་ཆེན་པོ་གང་གིས་རྨི་ལམ་ནའང ། །དཔའ་བོ་འདི་དག་གི་ནི་མིང་དང་ཐབས། །ཐོས་པ་དེ་དག་རྒྱལ་བ་ཆེན་པོར་འགྱུར། །གང་དག་མཐོང་ངམ་ཡང་ན་ཐོས་ནས་ཀྱང ། །འདོད་པར་བྱེད་དམ་ཡང་ན་དང་བྱེད་ན། །ཐམས་ཅད་བྱང་ཆུབ་འགྱུར་བར་ཐེ་ཚོམ་མེད། །དེ་ལ་བསྙེན་བཀུར་བྱེད་པ་སྨོས་ཅི་དགོས། །བསམ་གྱིས་མི་ཁྱབ་ཆོས་འདི་ཡོངས་སུ་འཛིན། །མིང་དང་དེ་བཞིན་ཚེ་ཡང་བསམ་མི་ཁྱབ། །སྣང་བ་བསམ་མེད་ཡོན་ཏན་བསམ་མི་ཁྱབ། །ཤེས་རབ་ཡེ་ཤེས་དེ་བཞིན་བསམ་མི་ཁྱབ། །བླ་ན་མེད་པའི་བྱང་ཆུབ་ཚོལ་བྱེད་ཅིང ། །སྔོན་གྱི་སངས་རྒྱས་ཚུལ་ཁྲིམས་རྣམ་དག་པ། །གང་གཱའི་བྱེ་སྙེད་བསམ་མི་ཁྱབ་བྱུང་བ། །དེ་ལའང་སྦྱིན་པ་རྒྱ་ཆེན་དག་ནི་ཕུལ། །སངས་རྒྱས་བྱེ་བ་མང་པོ་བཤད་གྱུར་ཀྱང ། །དེ་ཡི་བསོད་ནམས་ཚད་ནི་ཅུང་ཟད་མེད། །འདྲ་བའི་སྲས་དང་གྲོགས་པོ་དེ་དག་ཀྱང ། །བྱང་ཆུབ་འགྱུར་བར་ཐེ་ཚོམ་འགའ་ཡང་མེད། །ཀུན་དགའ་ལ་ལ་གང་ཞིག་མདོ་སྡེ་འདི། །ལེན་ཏམ་འཛིན་ཏམ་ཀློག་པར་བྱེད་པ་དང ། །ལྔ་བརྒྱ་ཚང་བ་པོ་ནི་དེ་དག་ལ། །ཐེ་ཙོམ་མེད་པར་དེ་ལ་དགའ་བ་སྐྱེད། །ཀུན་དགའ་ལ་ལ་གང་ཞིག་མདོ་སྡེ་འདི། །བཙལ་བའི་ཕྱིར་ནི་འདུན་པ་བརྟན་བྱེད་ཅིང ། །གཉིད་ནི་སྤངས་ལ་བརྩོན་འགྲུས་རྩོམ་བྱེད་ན། །དེ་དག་ཏིང་ངེ་འཛིན་འདི་རྙེད་མི་དཀའ། །མདོ་སྡེ་འདི་འདྲ་བ་དག་བཟུང་བྱས་ནས། །རྙེད་པ་རབ་རྙེད་ངན་འགྲོ་དག་ཀྱང་སྤངས། །བདེ་གཤེགས་བསྟན་པ་ལ་ནི་དོན་ཡོད་དང ། །མི་ཁོམ་ཐམས་ཅད་རྣམ་པར་སྤངས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་ལས་སྤྲོ་བ་སྐྱེད་པའི་ལེའུ་སྟེ། བཅུ་གསུམ་པའོ།། །། 51.42a དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལིད་ཙ་བྱི་གཞོན་ནུ་རིན་ཆེན་འབྱུང་གནས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཚོང་དཔོན་གྱི་བུ་ཕུག་སྦས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་ཁྱེའུ་འདམ་བུས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་ཀྱི་བུ་མཚམས་བཟང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་དང་ལྷན་ཅིག་ཏུ་ལེགས་པར་གསུངས་པའི་ཕྱིར་རས་བཅོས་བུ་ཟུང་ལྔ་བརྒྱ་བཅོམ་ལྡན་འདས་ཀྱི་སྐུ་ལ་གསོལ་ཏོ། །བཅོམ་ལྡན་འདས་ལ་རིན་པོ་ཆེ་འགྲེམས་པར་ཡང་བྱེད་དོ། །བཅོམ་ལྡན་འདས་ལ་བསྙེན་བཀུར་ཡོངས་སུ་སྤྱོད་པར་བྱེད་པར་གསོལ་བའང་འདེབས་སོ། །དེ་ནས་བཅོམ་ལྡན་འདས་ཀྱིས་བཟང་སྐྱོང་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་ཙམ་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་རབ་ཏུ་དགའ་བར་མཛད། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་མགུ་བར་མཛད་དོ། །དེ་དག་དགའ་བའི་སེམས་དང ། སྐྱོན་མེད་པའི་སེམས་དང ། འཇམ་པའི་སེམས་དང ། འདོད་པར་བྱ་བའི་སེམས་དང ། དང་བའི་སེམས་དང ། སྒྲིབ་པ་དང་བྲལ་བའི་སེམས་ཀྱིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་པར་འགྱུར། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ 51.42b ཏིང་ངེ་འཛིན་འདི་འཐོབ་པོ། །བཞི་གང་ཞེ་ན། འདི་ལྟ་སྟེ། གཞན་མུ་སྟེགས་ཅན་གྱི་གསང་ཚིག་ལ་མི་རྟེན་པ་དང ། འདོད་པའི་ཡོན་ཏན་ལ་མི་ཆགས་པ་དང ། སྦྱངས་པའི་ཡོན་ཏན་དང་ཡོ་བྱད་བསྙུངས་པ་རྣམས་ཀྱིས་མ་ཕམ་པ་དང ། སྲིད་པའི་འགྲོ་བའི་སྐྱེ་བའི་གནས་རྣམས་ལ་སྨོད་པ་སྟེ། བཟང་སྐྱོང་ཆོས་བཞི་པོ་དེ་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་པོ། །བཟང་སྐྱོང་བྱང་ཆུབ་སེམས་དཔའ་གང་ལ་ལ་ཞིག་ཏིང་ངེ་འཛིན་འདི་འཆང་བར་བྱེད། ཀློག་པར་བྱེད། ཡི་གེར་འདྲི་བར་བྱེད། འཛིན་པར་བྱེད། ཀུན་ཆུབ་པར་བྱེད། གཞན་དག་ལ་ཡང་རྒྱ་ཆེར་ཡང་དག་པར་སྟོན་པར་བྱེད་ན། བཟང་སྐྱོང་བྱང་ཆུབ་སེམས་དཔའ་དེའི་ཡོན་ཏན་གང་ཚེ་འདི་ཉིད་ལ་འཐོབ་པར་འགྱུར་བ་ལྔ་བརྒྱ་ཡོད་པར་རིག་པར་བྱའོ། །ལྔ་བརྒྱ་གང་ཞེ་ན། བཟང་སྐྱོང་འདི་ལྟ་སྟེ་དཔེར་ན། བྱམས་པ་ལ་གནས་པའི་ལུས་ལ་དུག་གིས་མི་ཚུགས། མཚོན་གྱིས་མི་ཚུགས། ཆུར་མི་འཆི། མེས་མི་འཚིག་།རྒྱལ་པོ་གླགས་ལྟ་བ་དག་གིས་གླགས་མི་རྙེད་པ་དེ་བཞིན་དུ་བཟང་སྐྱོང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེའང་དུག་གིས་མི་ཚུགས། མཚོན་གྱིས་མི་ཚུགས། ཆུས་འཆི་བར་མི་བྱེད། མེས་མི་འཚིག་།རྒྱལ་པོ་གླགས་ལྟ་བ་དག་གིས་གླགས་མི་རྙེད་དོ། །བཟང་སྐྱོང་གཞན་ཡང་གལ་ཏེ་བསྐལ་པས་སྲེག་པ་བྱུང་བར་གྱུར་ཏེ། ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ཡང་མེའི་ཕུང་པོ་དེའི་ནང་དུ་མཆོང་ན། མེའི་ཕུང་པོ་དེ་ཞི་བར་འགྱུར་རོ། །འདི་ལྟ་སྟེ་དཔེར་ན་ཆུའི་བུམ་པ་ཆེན་པོས་ནི་མེའི་ཕུང་པོ་ཞི་བར་བྱེད་དོ། །བཟང་སྐྱོང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ནི་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་རྒྱལ་པོ་འམ། ཆོམ་རྐུན་ནམ། མེ་འམ། ཆུ་འམ། སྐྱེ་བོ་འམ། ཀླུ་འམ། རོ་ལངས་སམ། གནོད་སྦྱིན་ནམ། སྲིན་པོ་འམ། སེང་གེ་འམ། སྟག་གམ། ཁྱི་འམ། ཝ་འམ། སྤྱང་ཀི་འམ། མི་འམ། མི་མ་ཡིན་པ་འམ། ཡི་དགས་སམ། གྲུལ་བུམ་གྱིས་བར་ཆད་བྱེད་ན་ལུས་སམ། སྲོག་གམ། ལྷུང་བཟེད་དམ། གོས་སམ། ཚངས 51.43a པར་སྤྱོད་པ་འམ། འཆད་པ་འམ། ཁ་ཏོན་བྱེད་པ་འམ། བསམ་གཏན་ནམ། ཚུལ་བཞིན་ཡིད་ལ་བྱེད་པའི་བར་ཆད་བྱེད་པ་དེ་ནི་གནས་མ་ཡིན། སྐབས་མ་ཡིན་ཏེ་དེ་ནི་གནས་མེད་དོ། །བཟང་སྐྱོང་ཏིང་ངེ་འཛིན་འདི་འཛིན་པའི་དགེ་སློང་དེ་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་མིག་ནད་ཀྱིས་འདེབས་པ་འམ། རྣ་ནད་ཀྱིས་འདེབས་པ་འམ། སྣ་ནད་ཀྱིས་འདེབས་པ་འམ། ལྕེ་ནད་ཀྱིས་འདེབས་པ་འམ། ལུས་ནད་ཀྱིས་འདེབས་པ་འམ། སེམས་ནད་ཀྱིས་འདེབས་པ་འམ། དེ་དག་ལས་གཞན་པའི་ནད་ཀྱི་རྣམ་པས་བྱང་ཆུབ་སེམས་དཔའ་དེའི་འཚོ་བ་འགོག་པར་བྱེད་པ་ནི་གནས་མ་ཡིན་སྐབས་མ་ཡིན་ཏེ་དེ་ནི་གནས་མེད་དོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་སྲུང་ངོ ། །ཀླུ་རྣམས་ཀྱང་སྲུང་ངོ ། །གནོད་སྦྱིན་རྣམས་ཀྱང་སྲུང་ངོ ། །དྲི་ཟ་རྣམས་ཀྱང་སྲུང་ངོ ། །མི་རྣམས་ཀྱང་སྲུང་ངོ ། །མི་མ་ཡིན་པ་རྣམས་ཀྱང་སྲུང་ངོ ། །ལྷ་མ་ཡིན་རྣམས་ཀྱང་སྲུང་ངོ ། །ནམ་མཁའ་ལྡིང་རྣམས་ཀྱང་སྲུང་ངོ ། །མི་འམ་ཅི་རྣམས་ཀྱང་སྲུང་ངོ ། །ལྟོ་འཕྱེ་ཆེན་པོ་རྣམས་ཀྱང་སྲུང་ངོ ། །རྒྱལ་པོ་ཆེན་པོ་བཞི་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་མཚམས་བཟངས་རྣམས་ཀྱང་སྲུང་ངོ ། །དེ་དག་ལས་གཞན་པ་ལྷའི་བུ་གཟི་བརྗིད་ཆེ་བ་གཟི་བརྗིད་ཆེ་བ་དག་ཀྱང་སྲུང་ངོ ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་སྲུང་ངོ ། །སངས་རྒྱས་བཅོམ་ལྡན་འདས་རྣམས་ཀྱང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་སྲུང་ངོ ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་ལྷ་རྣམས་དང ། ཀླུ་རྣམས་དང ། གནོད་སྦྱིན་རྣམས་དང ། ལྷ་མ་ཡིན་རྣམས་དང ། ནམ་མཁའ་ལྡིང་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། བརྒྱ་བྱིན་དང ། ཚངས་པ་རྣམས་དང ། རྒྱལ་པོ་ཆེན་པོ་རྣམས་དང ། བྱང་ཆུབ་སེམས་དཔའ་རྣམས་དང ། སངས་རྒྱས་བཅོམ་ལྡན་འདས་རྣམས་ལ་སྡུག་པར་འགྱུར་རོ། བཟང་སྐྱོང་གཞན་ཡང 51.43b བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་ལྷ་རྣམས་ཀྱང་སྙན་པར་སྒྲོགས་སོ། །ཀླུ་རྣམས་ཀྱང་སྙན་པར་སྒྲོགས་སོ། །གནོད་སྦྱིན་རྣམས་ཀྱང་སྙན་པར་སྒྲོགས་སོ། །མི་རྣམས་ཀྱང་སྙེན་པར་སྒྲོགས་སོ། །མི་མ་ཡིན་པ་རྣམས་ཀྱང་སྙན་པར་སྒྲོགས་སོ། །ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཀྱང་སྙན་པར་སྒྲོགས་སོ། །བརྒྱ་བྱིན་དང ། ཚངས་པ་དང ། རྒྱལ་པོ་ཆེན་པོ་རྣམས་ཀྱང་སྙེན་པར་སྒྲོགས་སོ། །བྱང་ཆུབ་སེམས་དཔའ་རྣམས་དང ། སངས་རྒྱས་བཅོམ་ལྡན་འདས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་སྙན་པར་སྒྲོགས་སོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་ལྟ་བར་འདོད་དོ། །ཀླུ་རྣམས་ཀྱང་ལྟ་བར་འདོད་དོ། །གནོད་སྦྱིན་རྣམས་ཀྱང་ལྟ་བར་འདོད་དོ། །དྲི་ཟ་རྣམས་ཀྱང་ལྟ་བར་འདོད་དོ། །མི་འམ་ཅི་རྣམས་ཀྱང་ལྟ་བར་འདོད་དོ། །མི་རྣམས་ཀྱང་ལྟ་བར་འདོད་དོ། །མི་མ་ཡིན་པ་རྣམས་ཀྱང་ལྟ་བར་འདོད་དོ། །ལྷ་མ་ཡིན་དང ། ནམ་མཁའ་ལྡིང་དང ། ལྟོ་འཕྱེ་ཆེན་པོ་རྣམས་ཀྱང་ལྟ་བར་འདོད་དོ། །བྱང་ཆུབ་སེམས་དཔའ་རྣམས་དང ། སངས་རྒྱས་བཅོམ་ལྡན་འདས་དག་ཀྱང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ཐ་ན་རྨི་ལམ་དུའང་ཞལ་སྟོན་པར་མཛད་དོ། །མིང་ནས་བརྗོད་པར་ཡང་མཛད་དོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ། བྱང་ཆུབ་སེམས་དཔའ་རྣམས་ཀྱང་ལྟ་བར་འདོད་དོ། །སངས་རྒྱས་བཅོམ་ལྡན་འདས་རྣམས་ཀྱང་གཟིགས་པར་བཞེད་དོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་ལྟར་འོང་ངོ ། །ཀླུ་རྣམས་ཀྱང་ལྟར་འོང་ངོ ། །གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་རྣམས་ཀྱང་ལྟར་འོང་ངོ ། །ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་མཚམས་བཟང་ཀྱང་ལྟར་འོང་ངོ ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ 51.44a དེ་ལ་མ་བཤད་ཅིང་མ་ཐོས་པའི་མདོ་སྡེ་དག་ཀྱང་ཐ་ན་རྨི་ལམ་དུ་ཡང་སྒྲ་གྲག་ཅིང་དབྱངས་ཐོས་པར་འགྱུར་རོ། །བཟང་སྐྱོང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་གང་ཏིང་ངེ་འཛིན་འདི་འཛིན་ཏམ། ཀུན་ཆུབ་པར་བྱེད་དམ། འཆང་ངམ། ཀློག་གམ། ཡི་གེར་འདྲི་འམ། འཆད་པར་བྱེད་པ་དེ་ལ་བསྐལ་པ་འམ། བསྐལ་པ་ལས་ལྷག་པར་ཡང་ང་སྙན་པ་བརྗོད་ཅིང་ཡོན་ཏན་སྒྲོགས་པར་བྱེད་ན། གང་སྒྲུབ་པར་བྱེད་པ་ལྟ་ལ་སྨོས་ཀྱང་ཅི་དགོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་གང་ཞིག་ཏིང་ངེ་འཛིན། །བདེ་བར་གཤེགས་པས་གསུངས་པ་འདི་འཆད་པའི། །ཡོན་ཏན་ཡོངས་སུ་བཤད་པར་བྱ་བ་ནི། །གང་གཱའི་བྱེ་མ་སྙེད་ལས་གཅིག་བླངས་བཞིན། །གང་ཞིག་ཏིང་ངེ་འཛིན་འདི་འཆང་བྱེད་པ། །དེ་ལ་མེ་དང་མཚོན་གྱིས་མི་ཚུགས་ཤིང ། །དེ་ལ་རྐུན་པོས་གནོད་པ་བྱེད་མི་འགྱུར། །དེ་ལ་རྒྱལ་པོ་མི་བྱམས་མི་བྱེད་དོ། །གདུག་པའི་སྦྲུལ་དག་འཁྲུགས་ཤིང་འཇིགས་བྱེད་པས། །གདུག་པའི་ཡིད་ཀྱིས་མི་ལ་འཚེ་བྱེད་ན། །གང་ཞིག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་ཀྱིས་དེ་དག་དུག་མེད་འགྱུར། །མི་དང་ཀླུ་དང་གནོད་སྦྱིན་སྲིན་པོ་དག་།ཕས་ཀྱི་རྒོལ་བ་འཁྲུགས་ཤིང་འཇིགས་བྱེད་པས། །གང་དག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་ལ་ནམས་ཀྱང་མི་བཟོད་དོ། །དགོན་པའི་གཅན་ཟན་མི་སྲུན་གང་འཁོད་པ། །སྤྱང་གི་ཝ་དང་དེ་བཞིན་སེང་གེ་སྟག་།དེ་དག་དགོན་པའི་གནས་སུ་གནས་པ་དེའི། །གྲོགས་བྱེད་པ་དང་གཡོག་བྱེད་པར་ཡང་འགྱུར། །གནོད་སྦྱིན་ཤ་ཟ་མདངས་འཕྲོགས་འཇིགས་བྱེད་པ། །གདུག་པའི་ཡིད་ཀྱིས་མི་ལ་འཚེ་བྱེད་ན། །གང་ཞིག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་གྱིས་དེ་དག་སྤ་ཡང་འགོང ། །གང་ཞིག་ཏིང་འཛིན་འདི་ནི་འཆད་བྱེད་པ། །དེ་ནི་རྣ་ནད་མེད་ཅིང་ལུས་ནད་མེད། །མིག་གི་དབང་པོ་རྣམས་ཀྱང་ཉམས་མི་འགྱུར། །ཚིག་ཀྱང་གསལ་ཞིང་སྤོབས་པས་སྨྲ་བར་འགྱུར། ། 51.44b གང་ཞིག་ཏིང་འཛིན་འདི་ལ་འཇུག་པ་དེ། །དེ་ལ་ནམས་ཀྱང་སེམས་དམྱལ་ངན་འགྲོ་མེད། །དེ་ཡི་ལུས་ལ་ནད་ཀྱིས་མི་འདེབས་ཤིང ། །དེ་ལ་ནམས་ཀྱང་ལོག་ལྟུང་འཇིགས་པ་མེད། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ལ་ལྷ་དང་ཀླུ་དང་གྲུལ་བུམ་དང ། །ལྷ་མ་ཡིན་དང་ལྟོ་འཕྱེ་ཆེ་རྣམས་སྲུང ། །དེ་ལ་གདུག་པར་སེམས་པའང་དང་བར་འགྱུར། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ལ་ལྷ་མི་ཀླུ་དང་ལྷ་མ་ཡིན། །གནོད་སྦྱིན་མི་འམ་ཅི་དག་ཆེར་སྙེན་སྒྲོགས། །སངས་རྒྱས་རྣམས་ཀྱང་བུ་གཅིག་བཞིན་དུ་སྟོད། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ནི་ཆོས་ལ་ཐེ་ཙོམ་འབྱུང་མི་འགྱུར། །དེ་ནི་བྱང་ཆུབ་ཐེ་ཙོམ་ཡོང་མི་འབྱུང ། །དེ་ཡི་གཟུགས་དང་མཉམ་པའང་མི་འབྱུང་ངོ ། །ཏིང་འཛིན་འདི་ནི་ཁ་ཏོན་བྱེད་པ་དེ། །རྒྱལ་པོ་འཁྲུག་དང་དེ་བཞིན་སེམས་ཅན་འཁྲུགས། །མུ་གེའི་དགོན་པ་བྱུང་བར་གྱུར་ནའང ། །དེ་ལ་གནོད་དང་བཀྲེས་པར་མི་འགྱུར་རོ། །ཏིང་འཛིན་འདི་ནི་ཁ་ཏོན་བྱེད་པ་དེ། །སེམས་ཅན་དག་ལ་བདུད་ནི་ཉེར་གནས་ཀྱང ། །དེ་ནི་མི་སྐྲག་བ་སྤུ་མི་གཡོ་སྟེ། །དེའི་ཡོན་ཏན་བསམ་གྱིས་མི་ཁྱབ་འགྱུར། །ཚེ་བ་དང་ནི་ཉེས་དང་ཉོན་མོངས་པ། །ཇི་སྙེད་གང་དག་ངས་ནི་བཤད་གྱུར་པ། །སྔོན་གྱི་ལས་ཀྱི་རྣམ་སྨིན་མ་གཏོགས་པར། །དེ་དག་དེ་ཡི་ལུས་ལ་མི་ཚུགས་སོ། །ཟད་པ་ཕྱི་མའི་དུས་ན་གང་ལག་ཏུ། །མདོ་སྡེ་རྒྱ་ཆེ་འདི་དག་འོངས་པ་ནི། །སྲས་ཀྱི་ཐུ་བོ་བཞིན་དུ་མདུན་བཞག་སྟེ། །བསྟོད་ཅིང་བསླང་ལ་སྙན་པ་དག་ཀྱང་གསུང ། །བག་ཡོད་པར་ཡང་བརྩོན་འགྲུས་བརྩམས་པར་བྱོས། །འཐུན་པར་བྱས་ཏེ་ཆོས་ཀྱང་སྤྱད་པར་བྱོས། །གང་ཞིག་འཛིན་ཅིང་ཀློག་ལ་སྟོན་བྱེད་པ། །ཁྱེད་ཀྱི་དོན་ཏུ་འདི་དག་འཆད་པར་བྱེད། །བཟང་སྐྱོང་གིས་ཞུས་པའི་ཏིང་ངེ་འཛིན་ལས་ཆོས་སྨྲ་བ་བསྔགས་པའི་ལེའུ་སྟེ། བཅུ་བཞི་པའོ།། །། 51.45a བམ་པོ་ལྔ་པ། ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་བཀའ་སྩལ་པ། བཟང་སྐྱོང་ངས་མངོན་པར་ཤེས་ཏེ། འདས་པའི་དུས་བསྐལ་པ་གྲངས་མེད་པ། རྒྱས་པ། ཚད་མེད་པ། བསམ་གྱིས་མི་ཁྱབ་པ། གཞལ་དུ་མེད་པར་གྱུར་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ ། །བཟང་སྐྱོང་དེའི་ཚེ་ཚོང་དཔོན་གྱི་བུ་བཟང་བྱིན་ཞེས་བྱ་བ་ཞིག་ཡོད་པར་བར་གྱུར་ཏེ། དེ་སྲོག་ཆགས་ཉི་ཁྲིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ག་ལ་བར་དོང་སྟེ་ལྷགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང ། ཚོང་དཔོན་གྱི་བུ་བཟང་སྦྱིན་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལ་ཏིང་ངེ་འཛིན་འདི་ཡོངས་སུ་ཞུས་སོ། །བཟང་སྐྱོང་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེས་ཀྱང་ཚོང་དཔོན་གྱི་བུ་བཟང་སྦྱིན་དེའི་ལྷག་པའི་བསམ་པ་མཁྱེན་ནས། ཏིང་ངེ་འཛིན་འདི་རྒྱ་ཆེར་བསྟན་ཏོ། །ཡང་དག་པར་བཤད་དོ། །བཟང་སྐྱོང་དེ་ནས་ཚོང་དཔོན་གྱི་བུ་བཟང་སྦྱིན་དེས་ཏིང་ངེ་འཛིན་འདི་ཐོས་ནས་འཛིན་པར་བྱེད་དོ། །བཟུང་ནས་སྒོམ་པར་བྱེད་དོ། །བསྒོམས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལས་སྐྲ་དང་ཁ་སྤུ་བྲེགས་ཏེ་གོས་ཚོན 51.45b ཅན་གྱོན་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། ཚངས་པར་སྤྱད་དོ། །ལོ་བརྒྱད་ཁྲིར་ཏིང་ངེ་འཛིན་འདི་བསྒོམ་ཞིང་གནས་པར་གྱུར་ཏོ། །དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལས་ཐོས་པ་ཐམས་ཅད་བཟུང་ཞིང ། འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལས་ཀྱང་ཐོས་པ་ཐམས་ཅད་གཟུང་སྟེ། དེ་མང་དུ་ཐོས་པ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེ་དུས་གཞན་ཞིག་ན་ཚེ་བརྗེས་ནས་ལུས་ཞིག་སྟེ་ཤི་བ་དང ། བདེ་འགྲོ་མཐོ་རིས་ཀྱི་འཇིག་རྟེན་དུ་སུམ་བཅུ་རྩ་གསུམ་པའི་ལྷ་རྣམས་དང་སྐལ་བ་མཉམ་པར་སྐྱེས་སོ། །སྐྱེས་ནས་ཀྱང་དེས་འཇིག་རྟེན་གྱིས་ཁམས་དེ་ཉིད་དུ་དེ་བཞིན་གཤེགས་པ་གཉིས་པ་གློག་གི་ལྷ་ཞེས་བྱ་བ་མཉེས་པར་བྱས་སོ། །བསྐལ་པ་དེ་ཉིད་ལ་རྒྱལ་རིགས་ཤིང་ས་ལ་ཆེན་པོ་ལྟ་བུར་སྐྱེས་ཏེ། རྒྱལ་རིགས་ཤིང་ས་ལ་ཆེན་པོ་ལྟ་བུ་དེ་ལས་མངོན་པར་བྱུང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གློག་གི་ལྷ་དེ་ལས་རབ་ཏུ་བྱུང་སྟེ། ལོ་བརྒྱད་ཁྲིར་ཏིང་ངེ་འཛིན་འདི་སྒོམ་ཞིང་ཚངས་པར་སྤྱད་པ་སྤྱོད་དོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསུམ་པ་འོད་ཟེར་གྱི་རྒྱལ་པོ་ཞེས་བྱ་བ་མཉེས་པར་བྱས་སོ། །བསྐལ་པ་དེ་ཉིད་ལ་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུར་སྐྱེས་ཏེ། བྲམ་ཟེའི་རིགས་ས་ལ་ཆེན་པོ་ལྟ་བུ་དེ་ལས་མངོན་པར་བྱུང་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་རྒྱལ་པོ་དེ་ལས་རབ་ཏུ་བྱུང་སྟེ། ལོ་བརྒྱད་ཁྲི་བཞི་སྟོང་དུ་ཏིང་ངེ་འཛིན་འདི་བསྒོམ་ཞིང་ཚངས་པར་སྤྱད་པ་སྤྱོད་དོ། །ཚོང་དཔོན་གྱི་བུ་བཟང་སྦྱིན་དེ་ཡང་དེ་ནས་ཕྱིས་བསྐལ་པ་བརྒྱད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །བཟང་སྐྱོང་དེའི་ཚེ་དེའི་དུས་ན་ཚོང་དཔོན་གྱི་བུ་བཟང་སྦྱིན་ཞེས་བྱ་བ་བྱུང་བ། དེ་གཞན་ཞིག 51.46a ཡིན་སྙམ་དུ་དེ་ལྟར་ཐེ་ཙོམ་འམ། ཡིད་གཉིས་སམ། སོམ་ཉི་ཟ་བར་གྱུར་ན་བཟང་སྐྱོང་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དེ། དེའི་ཚེ་དེའི་དུས་ན་ཚོང་དཔོན་གྱི་བུ་བཟང་སྦྱིན་ཞེས་བྱ་བར་གྱུར་ཏོ། །བཟང་སྐྱོང་ཚོང་དཔོན་གྱི་བུ་བཟང་སྦྱིན་དེ་ཆོས་དོན་དུ་གཉེར་ཞིང་ཆོས་འདོད་ལ་ཆོས་ལ་འདུན་པ་དང་ལྡན་ཏེ། དེའི་ཕྱིར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལ་ལྟོས། བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཡེ་ཤེས་སྐྱེད་པ་དང ། །ཐོས་པ་རྒྱ་མཚོ་ལྟ་བུར་འགྱུར་བ་ལ་ཇི་ཙམ་དུ་ཕན་པ་མང་པོར་གྱུར་པ་ལ་ལྟོས། བཟང་སྐྱོང་དེ་བས་ན་ཁྱོད་ཀྱིས་ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །ཡི་གེར་བྲི་བར་བྱའོ། །བཅང་བར་བྱའོ། །བཀླག་པར་བྱའོ། །བཟུང་ཞིང་ཀུན་ཆུབ་པར་བྱས་ནས་གཞན་དག་ལ་ཡང་རྒྱ་ཆེར་ཡང་དག་པར་བཤད་པར་བྱའོ། །བསྟན་པར་བྱའོ། །བརྗོད་པར་བྱའོ། །བསྒོམ་པའི་སྦྱོར་བ་ལའང་བརྩོན་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང་དེ་ནི་འདི་ལྟར་ཏིང་ངེ་འཛིན་འདི་ཕྱི་ཕྱིར་བསྟེན་ཅིང་བསྒོམས་ལ་མང་དུ་བྱས་ན་སངས་རྒྱས་ཀྱི་ཡེ་ཤེས་འཐོབ་པར་འགྱུར་བ་དང ། དེ་བཞིན་གཤེགས་པའི་ཡེ་ཤེས་དང ། རང་བྱུང་གི་ཡེ་ཤེས་དང ། ཐམས་ཅད་མཁྱེན་པའི་ཡེ་ཤེས་དང ། བསམ་གྱིས་མི་ཁྱབ་པའི་ཡེ་ཤེས་དང ། མི་མཉམ་པ་དང་མཉམ་པའི་ཡེ་ཤེས་དང ། བླ་ན་མེད་པའི་ཡེ་ཤེས་དང ། ལྟག་ན་མེད་པའི་ཡེ་ཤེས་འཐོབ་པར་འགྱུར་བ་མ་གཏོགས་པར་ཆོས་གཞན་འཐོབ་པར་མི་འགྱུར་རོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་མིག་ཏུ་གྱུར་པ་བྱང་ཆུབ་སེམས་དཔའ་རྣམས་སྐྱེད་པ། སངས་རྒྱས་ཀྱི་ཆོས་རྣམས་སྐྱེད་པར་བྱེད་པ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་ 51.46b འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་སངས་རྒྱས་ཀྱི་རིགས་སོ། །ཆོས་ཀྱི་རིགས་སོ། །དགེ་འདུན་གྱི་རིགས་སོ། །སངས་རྒྱས་ཀྱི་སའོ། །ཐོས་པའི་རིགས་སོ། །ཐོས་པ་རྒྱ་མཚོ་ལྟ་བུའོ། །ཐོས་པ་བསགས་པའོ། །ཐོས་པའི་གཞིའོ། །ཡོན་ཏན་བསགས་པའོ། །བཟོད་པ་སྐྱེད་པའོ། །བྱམས་པ་སྐྱེད་པའོ། །སྙིང་རྗེ་ཐོབ་པའོ། །བྱང་ཆུབ་སྐྱེད་པའི་ཆོས་སོ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་མུན་པ་སེལ་བར་བྱེད་པའི་ཆོས་སོ། །སྣང་བ་ཆེན་པོ་བྱེད་པའི་ཆོས་སོ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་དེ་བཞིན་གཤེགས་པའི་སྟོབས་བཅུ་དང ། དེ་བཞིན་གཤེགས་པའི་མི་འཇིགས་པ་བཞི་དང ། སོ་སོ་ཡང་དག་པར་རིག་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་སྐྱེད་པར་བྱེད་པའི་ཆོས་སོ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །བཟང་སྐྱོང་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདི་ཉིད་ན་འདུག་བཞིན་དུ། འཇིག་རྟེན་གྱི་ཁམས་གཞན་དག་གི་སངས་རྒྱས་ཀྱང་ལྟ། ཆོས་ཀྱང་ཉན། དགེ་འདུན་ཡང་ལྟ་བར་བྱེད་པའི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཇི་ཙམ་དུ་རྒྱ་ཆེ་བ་ལ་ལྟོས། བཟང་སྐྱོང་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་རིན་པོ་ཆེ་འདི་སྒྲུབ་པར་འདོད་པས། དྲན་པ་ཉེ་བར་གཞག་པ་བཞི་ལ་བརྟུལ་བ་བརྟན་པར་བྱའོ། །བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་དྲན་པ་ཉེ་བར་གཞག་པ་བཞི་ལ་བརྟུལ་བ་བརྟེན་པར་བྱ་ཞེ་ན། བཟང་སྐྱོང་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ལུས་ལ་ལུས་ཀྱི་རྗེས་སུ་བལྟ་བར་བྱ་སྟེ། ལུས་དང་ལྡན་པའི་རྣམ་པར་རྟོག་པ 51.47a རྣམ་པར་བརྟག་པར་ནི་མི་བྱའོ། །ཚོར་བ་ལ་ཚོར་བའི་རྗེས་སུ་བལྟ་བར་བྱ་སྟེ། ཚོར་བ་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །སེམས་ལ་སེམས་ཀྱིས་རྗེས་སུ་བལྟ་བར་བྱ་སྟེ། སེམས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །ཆོས་ལ་ཆོས་ཀྱི་རྗེས་སུ་བལྟ་བར་བྱ་སྟེ། ཆོས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །བཟང་སྐྱོང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་དང ། ཉན་ཐོས་ལུས་མངོན་སུམ་དུ་བྱེད་པ་རྣམས་མ་གཏོགས་པར་ཏིང་ངེ་འཛིན་འདི་ལ་སུ་ཞིག་མངོན་པར་དད་པར་འགྱུར། བཟང་སྐྱོང་དེ་ཅིའི་ཕྱིར་ཞེ་ན། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལ་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་ནི་འཁྲུལ་ཏོ། །བཟང་སྐྱོང་དེ་ཅིའི་ཕྱིར་ཞེ་ན། ཆོས་དེ་དག་ཉིད་ཡིད་ལ་བྱ། ཆོས་དེ་དག་ཉིད་ལ་བལྟ་བར་བྱ། སངས་རྒྱས་བཅོམ་ལྡན་འདས་དག་ཀྱང་ཡིད་ལ་བྱ། དེ་བཞིན་གཤེགས་པ་རྣམས་ཀྱང་བལྟ་བར་བྱ། ཆོས་ཀྱང་མཉན་པར་བྱ་སྟེ་མངོན་པར་ཞེན་པར་ནི་མི་བྱའོ། །བཟང་སྐྱོང་དེ་ཅིའི་ཕྱིར་ན། ཆོས་འདི་དག་ཐམས་ཅད་ནི་རང་བཞིན་གྱིས་སྟོང་པ། རང་བཞིན་གྱིས་ཡོངས་སུ་དག་པ་སྟེ། ཐོག་མ་ཉིད་ནས་ཉེ་བར་ཞི་བའོ། །བཟང་སྐྱོང་ཆོས་འདི་དག་ཐམས་ཅད་ནི་དམིགས་པའི་དབང་དུ་གྱུར་པས་དམིགས་སུ་མེད་པའོ། །ཆོས་འདི་དག་ཐམས་ཅད་ནི་ཡིད་ལ་བྱ་བ་དེ་ཉིད་ཀྱིས་དབེན་པའོ། །ཆོས་འདི་དག་ཐམས་ཅད་ནི་རང་བཞིན་གྱིས་དམིགས་སུ་མེད་པས་གཟུང་དུ་མེད་པའོ། །ཆོས་འདི་དག་ཐམས་ཅད་ནི་ནམ་མཁའ་དང་འདྲ་བས་མི་ཆགས་པའོ། །ཆོས་འདི་དག་ཐམས་ཅད་ནི་བདག་དང་སེམས་ཅན་གྱི་འདུ་ཤེས་དང་བྲལ་བའི་ཕྱིར་ཤིན་ཏུ་རྣམ་པར་དག་པའོ། །ཆོས་འདི་དག་ཐམས་ཅད་ནི་རྒྱུའི་དབང་ལས་གྱུར་པས་ཉོན་མོངས་པ་མེད་པའོ། །ཆོས་འདི་དག་ཐམས་ཅད་ནི་སྲོག་དང་གང་ཟག་མི་དམིགས་པའི་ཕྱིར 51.47b བགྲང་དུ་མེད་པའོ། །ཆོས་འདི་དག་ཐམས་ཅད་ནི་རང་བཞིན་གྱིས་འོད་གསལ་བས་མྱ་ངན་ལས་འདས་པ་དང་མཉམ་པའོ། །ཆོས་འདི་དག་ཐམས་ཅད་ནི་དངོས་པོ་མི་དམིགས་པའི་ཕྱིར་ཉེ་བར་གྱུར་པའོ། །བཟང་སྐྱོང་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་བསྒོམ་པར་འདོད་པར་གྱུར་ན། དེས་ཅི་ནས་ཀྱང་སངས་རྒྱས་བཅོམ་ལྡན་འདས་རྣམས་ཀྱང་མཐོང་ཞིང་སངས་རྒྱས་རྗེས་སུ་དྲན་པ་དང་ལྡན་པའི་དྲན་པ་ཡང་དག་བྱང་ཆུབ་ཀྱི་ཡན་ལག་ཀྱང་སྒོམ་པར་བྱེད། ཆོས་ཀྱང་ཉན་ཅིང་ཆོས་ལ་ཆོས་འབྱེད་པ་ཡང་དག་བྱང་ཆུབ་ཀྱི་ཡན་ལག་ཀྱང་སྒོམ་པར་བྱེད་ལ། བདག་ཀྱང་མི་དམིགས་ཤིང་ཆོས་ཀྱང་མི་སྙེམས་པ་དེ་ལྟར་མཚན་མ་རྣམས་ནི་འཇུག་པས་མཚན་མ་མེད་པའི་འཇུག་པ་ལ་འཇུག་པར་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་དངོས་པོའི་འདུ་ཤེས་ཅན་གྱིས་ནི་སངས་རྒྱས་མཐོང་བར་མི་འགྱུར་རོ། །ཆོས་ཀྱི་འདུ་ཤེས་ཅན་གྱིས་ཆོས་མཐོང་བར་མི་འགྱུར་རོ། །རྣམ་པར་སྨིན་པ་ལ་རེ་བས་ནི་གཏོང་བ་ཕུན་སུམ་ཚོགས་པར་མི་འགྱུར་རོ། །བསྒོམ་པ་ལ་མངོན་པར་དགའ་བས་ནི་ཚུལ་ཁྲིམས་རྣམ་པར་དག་པར་མི་འགྱུར་རོ། །ཆོས་ལ་སེར་སྣ་བྱེད་པས་ནི་མང་དུ་ཐོས་པར་མི་འགྱུར་རོ། །གང་ཟག་ལ་རྟེན་པས་ནི་ཡོངས་སུ་མྱ་ངན་ལས་འདའ་བར་མི་འགྱུར་རོ། །བྲེ་མོ་གཏམ་ལ་མངོན་པར་དགའ་བས་ནི་དབེན་པ་མཐོང་བར་མི་འགྱུར་རོ། །གནས་ལ་དགའ་བས་ནི་འབྲས་བུ་ཐོབ་པར་མི་འགྱུར་རོ། །རྗེས་སུ་ཆགས་པས་ནི་སྐྱོན་མཐོང་བར་མི་འགྱུར་རོ། །གནོད་སེམས་ལ་མངོན་པར་དགའ་བས་ནི་བཟོད་པ་དང་ངེས་པར་མི་འགྱུར་རོ། །ཞེ་སྡང་ཞིང་ཞེ་འགྲས་པས་ནི། ཕན་ཡོན་མཐོང་བར་མི་འགྱུར་རོ། །ཉན་ཐོས་ཀྱི་ཐེག་པ་པའི་རིགས་ཀྱི་བུ་འམ། རིགས་ཀྱི་བུ་མོས་གང་གི་ཕྱིར་བཟོད་པ་ཐོབ་པར་འགྱུར་བའི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་མངོན་སུམ་དུ་མི་འགྱུར་རོ། །བྱང་ཆུབ་སེམས་དཔའ་ལ་ནི་སེར་སྣ་མི་འབྱུང་ངོ ། །དམིགས་པ་ཅན་གྱི་སྟོང་པ་ཉིད་སྒོམ་པར་མི 51.48a འགྱུར་རོ། །ལེ་ལོ་ཅན་ནི་མངོན་པར་རྟོགས་པ་ཐོབ་པར་མི་འགྱུར་རོ། །འདོད་པ་ལ་སྟེན་པ་ནི་ཞི་གནས་སུ་མི་འགྱུར་རོ། །རྟེན་པ་ནི་བསྒོམ་པ་འགྲུབ་པར་མི་འགྱུར་རོ། །བཟང་སྐྱོང་དེ་བས་ན་ཏིང་ངེ་འཛིན་འདི་ཅི་ནས་ཀྱང་ནུབ་པར་མི་འགྱུར་བར། ལྷ་དང་བཅས་པའི་འཇིག་རྟེན་ལ་གཏད་དོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པའི་ཚེ་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་ཁྲག་ཁྲིག་ཕྲག་བཅཝ་བརྒྱད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྲོག་ཆགས་ལྷ་དང་མི་དང་ལྷ་མ་ཡིན་དུ་བཅས་པའི་སྐྱེ་དགུ་བརྒྱད་སྟོང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་དག་ཐམས་ཅད་ཀྱང་དེ་བཞིན་གཤེགས་པ་གང་གའི་ཀླུང་གི་བྱེ་མ་སྙེད་ལ་སེམས་རྣམ་པར་གྲོལ་བར་གྱུར་ནས། གང་བླ་ན་མེད་པའི་བྱང་ཆུབ་ཏུ་སེམས་དང་པོ་བསྐྱེད་པ་དེ་དག་མིང་ཐ་དད་ཀྱིས་ཀྱང་ཚེའི་ཚད་གཅིག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ན། བཟང་སྐྱོང་ཡང་གང་གིས་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ང་ལ་མཉེས་པར་བྱས་པ་ལྟ་ཅི་སྨོས། གང་གིས་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གྲོགས་པོར་གྱུར་པ་ལྟ་སྨོས་ཀྱང་ཅི་དགོས་ཏེ། དེ་དག་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བཟང་སྐྱོང་ཆོས་འདི་བཤད་པའི་ཚེ་སེམས་ཅན་ཚད་མེད་པ་རྣམས་ཀྱང་ཡེ་ཤེས་མཐོང་བ་སྐྱེས་སོ། །དགེ་སློང་བརྒྱད་བརྒྱ་ཡང་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་དག་ཏིང་འཛིན་འདི་ནི་འཛིན་གྱུར་པ། །དེ་དག་ཤེས་རབ་ཚད་ནི་ཆུང་ཟད་མེད། །ཚུལ་ཁྲིམས་ཚད་དང་རྡུལ་དང་དྲི་མ་མེད། །ཚུལ་ཁྲིམས་རྣམ་དག་སེམས་ཀྱང་ཡོངས་སུ་དག་།གང་དག་ཏིང་འཛིན་འདི་ནི་འཛིན་གྱུར་པ། །དེ་དག་ཤེས་རབ་ནམས་ཀྱང་ཉམས་པ 51.48b མེད། །ཏིང་འཛིན་ཐོས་ནས་ནམས་ཀྱང་ཉམས་པ་མེད། །ཟླ་བ་བཞིན་དུ་ཡོན་ཏན་ཐམས་ཅད་སྟོན། །གང་དག་ཏིང་འཛིན་འདི་ནི་འཛིན་གྱུར་པ། །དེས་ནི་སངས་རྒྱས་བསམ་མི་ཁྱབ་པ་བསྟོད། །དེས་ནི་ཆོས་ཀྱང་བསམ་མི་ཁྱབ་པ་མཐོང ། དེ་ལ་བསམ་མི་ཁྱབ་པའི་ལྷ་རྣམས་བསྲུང ། །སྔོན་གྱི་སངས་རྒྱས་བསམ་གྱིས་མི་ཁྱབ་བྱུང ། །དེས་ནི་བསམ་གྱིས་མི་ཁྱབ་ཆོས་བཤད་པ། །གང་ཞིག་ཏིང་འཛིན་འདི་ནི་འཛིན་གྱུར་པ། །དེས་ནི་ཐམས་ཅད་མཐོང་ཞིང་བསྙེན་བཀུར་བྱས། །གང་ཞིག་ཏིང་འཛིན་འདི་ནི་འཛིན་གྱུར་པ། །རྒྱལ་བ་གང་དག་སྡུག་བསྔལ་ཀུན་སྒྲོལ་བ། །འཇིག་རྟེན་དོན་དུ་བྱུང་སྟེ་བཞུགས་པ་ཡི། །རྒྱལ་བ་དེ་དག་དེ་ཡིས་གུས་བྱས་འགྱུར། །མ་བྱོན་སངས་རྒྱས་མང་པོ་བསམ་མི་ཁྱབ། །དང་བའི་སེམས་ཀྱིས་བསྙེན་བཀུར་བྱ་བའི་ཕྱིར། །བྱང་ཆུབ་སེམས་དཔའ་གང་ཞིག་ལྟ་འདོད་པས། །ཏིང་ངེ་འཛིན་མཆོག་འདི་ནི་གཟུང་བར་བྱོས། །གང་ཞིག་ཏིང་འཛིན་འདི་ནི་འཛིན་འགྱུར་བ། །མི་དེ་དག་ནི་རྙེད་པ་བསམ་མི་ཁྱབ། །དེ་དག་མིའི་འཇིག་རྟེན་ལེགས་པར་འོངས། །རབ་བྱུང་ལེགས་སྤྱད་བསོད་སྙོམས་ལེགས་པར་ཟོས། །ཕྱི་མའི་དུས་ན་ཏིང་འཛིན་མཆོག་འདི་ནི། །གང་གི་ལག་ཏུ་གནས་པར་གྱུར་པ་དེ། །རྙེད་པ་དམ་པ་ཤིན་ཏུ་ལེགས་པར་རྙེད། །དེས་ནི་བསམ་གྱིས་མི་ཁྱབ་ཆོས་ཀྱང་བཟུང ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅཝ་ལྔ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས། པུས་མོ་གཡས་པའི་ལྷ་ང་ས་ལ་བཙུག་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཐུགས་བརྩེ་བའི་སླད་དུ་སང་དགེ་སློང་གི་དགེ་འདུན་དང་ཐབས་གཅིག་ཏུ་བདག་གི་བཤོས། 51.49a གསོལ་བར་ཅི་གནང ། བཅོམ་ལྡན་འདས་ཀྱིས་ཐུགས་བརྩེ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་ཅང་མི་གསུང་བས་གནང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་ཤེས་ནས། བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དྲུང་ནས་སོང་སྟེ། དགེ་སློང་མ་སྐྱེ་དགུའི་བདག་མོ་ཆེན་མོ་ག་ལ་བ་དེར་སོང་ནས་ཕྱིན་པ་དང ། དགེ་སློང་མ་སྐྱེ་དགུའི་བདག་མོ་ཆེན་མོ་གོའུ་ཏ་མའི་རྐང་པ་ལ་མགོ་བོས་ཕྱག་འཚལ་ནས། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མ་ལ་འདི་སྐད་ཅེས་སྨྲས་སོ། །འཕགས་མ་ཐུགས་བརྩེ་བའི་སླད་དུ་སང་དགེ་སློང་མའི་དགེ་འདུན་དང ། ཐབས་གཅིག་བདག་གི་བཤོས་གསོལ་བར་ཅི་གནང ། དགེ་སློང་མ་སྐྱེ་དགུའི་བདག་མོ་ཆེན་མོ་གོའུ་ཏ་མས་སྙིང་བརྩེ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་ཅང་མི་སྨྲ་བས་གནང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་དགེ་སློང་མ་སྐྱེ་དགུའི་བདག་མོ་ཆེན་མོ་གོའུ་ཏ་མས་ཅང་མི་སྨྲ་བས་གནང་བར་རིག་ནས། དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མའི་རྐང་པ་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་སོང་ངོ ། །སོང་ནས་ཀྱང་ལི་ཙ་བི་གཞོན་ནུ་རིན་ཆེན་འབྱུང་གནས་ག་ལ་བ་དེར་སོང་སྟེ་ཕྱིན་པ་དང ། ལི་ཙ་བི་གཞོན་ནུ་རིན་ཆེན་འབྱུང་གནས་ལ་འདི་སྐད་ཅེས་སྨྲས་སོ། །ཉེ་དུ་བོ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་འདིར་རྒྱལ་པོའི་ཁབ་འདི་འམ། ལྗོངས་ཀྱི་ཕྱོགས་གཞན་དག་ནས་དགེ་བསྙེན་ཇི་སྙེད་ཅིག་འདུས་ལ་ཐམས་ཅད་འཁོར་དང་བཅས་ཏེ། ཁོ་བོའི་ཚིག་གིས་སང་གི་གདུགས་ཚོད་ལ་མགྲོན་དུ་བོས་ཤིག་།དེ་ནས་ལི་ཙ་བྱི་གཞོན་ནུ་རིན་ཆེན་འབྱུང་གནས་ཀྱི་འཁོར་དེར་དགེ་བསྙེན་ཇི་སྙེད 51.49b ཅིག་འདུས་པ་དེ་དག་ཐམས་ཅད་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས། ཁྱེད་ཅག་འཁོར་དང་བཅས་པར་སང་མགྲོན་ཏུ་བོས་སོ་ཞེས་བསྒོའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས་བྱིན་དང ། ཁྱིམ་བདག་ཆུ་ལྷ་དང ། ཁྱིམ་བདག་དབང་པོས་བྱིན་དང ། ཁྱིམ་བདག་གཞན་དག་ཀྱང་རང་རང་གི་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། དགེ་སློང་གི་དགེ་འདུན་གྱི་ཞབས་ལ་ཡང་མགོ་བོས་ཕྱག་འཚལ་ཏེ། འོད་མའི་ཚལ་ནས་བྱུང་ནས། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། བཟང་སྐྱོང་གི་ཁྱིམ་ག་ལ་བ་དེར་དོང་སྟེ་ལྷགས་པ་དང ། དེ་ཉིད་ཀྱི་ནུབ་མོ་དེ་དག་ཐམས་ཅད་དང་ཐ་ན་སློང་བ་རྣམས་ཀྱི་ཕྱིར་ཡང་བཅའ་བར་བྱ་བ་དང ། བཟའ་བར་བྱ་བ་དང ། མྱང་བར་བྱ་བ་དང ། བལྡག་པར་བྱ་བ་བསོད་པ་མང་དུ་སྦྱར་རོ། །ཟས་རོ་བརྒྱ་པ་ཡང་བཤམས་ཤིང་གཡོས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་པ་རླབས་པོ་ཆེ་དང ། བརྙས་པ་མེད་པ་ལ་གནས་ཤིང ། སེམས་ཅན་ཐམས་ཅད་ལ་སེམས་མཉམ་པར་ཞུགས་པ་ཡིན་ནོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་མཚམས་བཟངས་དང ། རྒྱལ་པོ་ཆེན་པོ་བཞི་རྣམས་ཀྱིས་མི་མང་པོ་ཡང་སྤྲུལ་ཏེ། སྐྱོ་བ་སྐྱེ་བའི་ཚུལ་དུ་ཁྱིམ་བདག་དེ་རྣམས་ལ་བྱང་ཆུབ་ཀྱི་ཕན་གདགས་པ་དང ། ཡོངས་སུ་སྨིན་པར་བྱ་བའི་ཕྱིར་བརྩོན་པར་བྱེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་བཟང་སྐྱོང་དང ། ལི་ཙ་བི་གཞོན་ནུ་རིན་ཆེན་འབྱུང་གནས་དེ་དག་དང ། ཁྱིམ་བདག་གཞན་དག་ཀྱང་རང་རང་གི་གཉེན་རྣམས་དང་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཐམས་ཅད་དང་ལྡན་པར་ཕྱག་དར་བྱ་བ་རྣམས་ཀྱང 51.50a ཕྱག་དར་ལེགས་པར་བྱས། དར་གྱི་ལྡ་ལྡི་ནི་བྲེས། སྤོས་ཀྱི་སྣོད་ཀྱིས་ནི་བདུགས། མེ་ཏོག་གི་སིལ་མས་ནི་འཐོར་དུ་བཙུད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་རང་གི་གཉེན་དང་བཅས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའང་བརྒྱན། རོ་བརྒྱ་དང་ལྡན་པའི་བཤོས་ཀྱང་སྦྱར་ཏེ། དེའི་མཚན་མོ་འདས་ནས་གཉེན་ཀྱིས་བསྐོར་ཅིང་མདུན་དུ་བདར་ཏེ་ལྷན་ཅིག་ཏུ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཙུན་པ་བཅོམ་ལྡན་འདས་བཤོས་ཀྱི་དུས་ལ་བབ་བོ། །བཙུན་པ་བཅོམ་ལྡན་འདས་བཤོས་ཀྱི་ཚོད་ལ་བབ་བོ། །བཤོས་ནི་སྦྱར་ལགས་ཏེ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། ཞེས་གདུགས་ཚོད་ལ་བབ་པར་གསོལ་ཏོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་བནབས། ལྷུང་བཟེད་བསྣམས་ནས། དགེ་སློང་གི་དགེ་འདུན་དང་ཐབས་གཅིག་དགེ་སློང་མའི་དགེ་འདུན་དང་ཐབས་གཅིག་།དགེ་བསྙེན་དང ། དགེ་བསྙེན་མའི་འཁོར་རྣམས་དང་ཡང་ཐབས་གཅིག་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་ག་ལ་བ་དེར་གཤེགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་མཛད་པས། བདག་གི་ཁྱིམ་འདི་ཡངས་ཤིང་རྒྱ་ཆེ་ལ་བཻ་དུརྱ་སྔོན་པོ་ལྟ་བུར་གྱུར་ཏེ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་མཐོང་ཞིང་འཁོར་མང་པོ་འདི་དག་ཀྱང ། བག་ཡངས་སུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་མཛད་ན་ལེགས་སོ། །སྙམ་དུ་བསམས་སོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་སེམས་ཀྱི་རྟོག་པ་མཁྱེན་ནས། ཇི་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་དེ་ཡངས་ཤིང་རྒྱ་ཆེ་ལ་བཻ་དཱུརྱ་སྔོན་པོ་ལྟ་བུར 51.50b གྱུར་ཏེ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་ཅི་ནས་ཀྱང་མཐོང་ཞིང་འཁོར་དེ་དག་ཐམས་ཅད་ཀྱང ། བག་ཡངས་སུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་དུ་མཛད་པ་མངོན་པར་མཛད་དོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་དུ་གཤེགས་སོ། །གཤེགས་ནས་ཀྱང་དགེ་སློང་དང ། དགེ་སློང་མའི་དགེ་འདུན་དང ། དགེ་བསྙེན་དང ། དགེ་བསྙེན་མའི་འཁོར་རྣམས་དང ། ཐབས་གཅིག་ཏུ་གདན་བཤམས་པ་ལ་བཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལིད་ཙ་བྱི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟངས་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས་བྱིན་དང ། ཁྱིམ་བདག་དབང་པོས་བྱིན་དང ། ཁྱིམ་བདག་ཆུ་ལྷ་རྣམས་ཀྱིས་བཅོམ་ལྡན་འདས་བཞུགས་པར་རིག་།དགེ་སློང་གི་དགེ་འདུན་དང ། དགེ་སློང་མའི་དགེ་འདུན་དང ། དགེ་བསྙེན་དང ། དགེ་བསྙེན་མའི་འཁོར་རྣམས་ཀྱང་འཁོད་པར་རིག་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་དང ། དགེ་སློང་མའི་དགེ་འདུན་དང ། དགེ་བསྙེན་དང ། དགེ་བསྙེན་མའི་འཁོར་རྣམས་ལ་རང་གི་ལག་གིས་བཅའ་བར་བྱ་བ་དང ། བཟའ་བར་བྱ་བ་དང ། མྱང་བར་བྱ་བ་དང ། རོ་རྣམ་པ་བརྒྱ་དང་ལྡན་པའི་ཟས་བསོད་པ་མང་པོས་ཚིམ་པར་བྱས་སོ། །བསྟབས་སོ། །རང་གི་ལག་གིས་བཟའ་བར་བྱ་བ་དང ། བཅའ་བར་བྱ་བ་དང ། མྱང་བར་བྱ་བ་དང ། རོ་སྣ་བརྒྱ་དང་ལྡན་པའི་ཟས་བསོད་པ་མང་པོས་ཚིམ་པར་བྱས་ཤིང་བསྟབས་ནས། བཅོམ་ལྡན་འདས་བཤོས་གསོལ་ཕྱག་བཅས། ལྷུང་བཟེད་གྱུ་བར་རིག་པ་དང ། ཅི་རིགས་པའི་སྟན་ཞིག་བླངས་ནས། བཅོམ་ལྡན་འདས་ལ་མདུན་གྱིས་བལྟས་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས 51.51a བྱིན་དང ། ཁྱིམ་བདག་དབང་པོས་བྱིན་དང ། ཁྱིམ་བདག་ཆུ་ལྷ་རྣམས་དང་འཁོར་བཞི་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་དགའ་བར་མཛད་དོ། །ཡང་དག་པར་འཛིན་དུ་བཅུག་གོ། །ཡང་དག་པར་གཟེང་བསྟོད་དོ། །ཡང་དག་པར་མགུ་བར་མཛད་དོ། །ཆོས་ཀྱི་གཏམ་གྱིས་ཡང་དག་པར་དགའ་བར་མཛད། ཡང་དག་པར་འཛིན་ཏུ་བཅུག་།ཡང་དག་པར་གཟེང་བསྟོད། ཡང་དག་པར་མགུ་བར་མཛད་ནས་བཞེངས་ཏེ། དགེ་སློང་གི་དགེ་འདུན་དང་ཐབས་གཅིག་ཏུ་སླར་གཤེགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཟས་ཀྱི་བྱ་བ་བྱས་ནས་རང་གི་མཛའ་བོ་དང ། གཉན་དང ། སྣག་གི་གཉེན་མཚམས་རྣམས་དང ། ལྷན་ཅིག་ཏུ་སྲོག་ཆགས་འབུམ་དུ་ཚང་བས་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་བཅོམ་ལྡན་འདས་ག་ལ་བ་དེ་ལོགས་སུ་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ལན་གསུམ་བསྐོར་བ་བྱས་ཏེ། ཕྱོགས་གཅིག་ཏུ་འཁོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང ། དེད་དཔོན་ཆེ་བཟང་དང ། ཕུག་སྦས་དང ། འདམ་བུས་བྱིན་དང ། མཚམས་བཟངས་དང ། དབང་པོས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་ལྷན་ཅིག་ཏུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ལན་གསུམ་བསྐོར་བ་བྱས་ཏེ། ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་འཁོར་ཐམས་ཅད་འཁོད་པར་རིག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཆོས་དུ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་པར་འགྱུར། རྣ་བླགས་ཏེ་ཉན་པ་དང ། སེམས་མི་གཡེང་བའི་སླད་དུ་ཀུན་ཏུ་འཛིན་པ་དང་མི་བསྐྱུད་པར་འགྱུར། ཀུན་ཏུ་བཟུང་ནས་ཀྱང་འཐོབ་པར་འགྱུར། དེ་སྐད་ཅེས་གསོལ་པ 51.51b དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཆོས་ལྔ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་པར་འགྱུར་རོ། །རྣ་བླགས་ཏེ་ཉན་པ་དང ། སེམས་མི་གཡེང་བའི་ཕྱིར་ཀུན་ཏུ་འཛིན་པ་དང ། མི་བརྗེད་པར་འགྱུར། ཀུན་ཏུ་བཟུང་ནས་ཀྱང་འཐོབ་པར་འགྱུར་རོ། །བཟང་སྐྱོང་ལྔ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཟབ་མོ་ལ་བཟོད་པ་དང་ལྡན་པ་ཡིན་ཏེ། ཟད་མི་ཤེས་པ་ཟད་པ་དང་བྲལ་བ། མི་ཟད་པ་རྣམ་པར་མི་ཟད་པ། རྙོག་པ་མེད་པ་རྙོག་པ་ལས་ཡང་དག་པར་འདས་པ། དྲི་མ་མེད་པ། དྲི་མ་དང་བྲལ་བ། རྡུལ་མེད་པ་རྡུལ་དང་བྲལ་བ། རྡུལ་ལས་འདས་པ། རྡུལ་ཐམས་ཅད་དང་བྲལ་བ་མི་སྐྱེ་བའི་ཆོས་ལ་བཟོད་པ་དང་ལྡན་པ་སྟེ། བཟང་སྐྱོང་ཆོས་དང་པོ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདུ་བྱེད་ཐམས་ཅད་ལ་སྨོད་ཅིང ། བྱང་ཆུབ་ལ་རྟེན་པ་མ་གཏོགས་པར་སྐྱེ་བའི་གནས་ཐམས་ཅད་མི་འདོད་པ་དང ། སངས་རྒྱས་བཅོམ་ལྡན་འདས་ལ་བལྟ་བར་འདོད་ཅིང ། མུ་སྟེགས་ཅན་གྱི་སྐྱེ་མཆེད་ཐམས་ཅད་དང ། མུ་སྟེགས་ཅན་གྱི་སྔགས་ཐམས་ཅད་ལ་མི་རྟེན་པ་དང ། འདོད་པའི་ལོངས་སྤྱོད་མི་འདོད་པ་དང ། ཚངས་པར་སྤྱོད་པ་ལ་མངོན་པར་དགའ་སྟེ་འཁྲིག་པའི་ཆོས་སྤངས་ནས་དེ་རྟོག་པ་ཙམ་གྱིས་ཀྱང་འདོད་པ་ལ་མི་རྟེན་ན་དབང་པོ་གཉིས་སྤྲོད་པ་ལྟ་ཅི་སྨོས་ཏེ། བཟང་སྐྱོང་ཆོས་གཉིས་པ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཚད་མེད་པ་རྣམས 51.52a བསྒོམས་ཤིང ། སེམས་ཤིན་ཏུ་ལེགས་པར་བསྡུས་ལ་གནོད་པ་མེད་པའི་སེམས་སུ་གྱུར་པ་དང ། སེམས་ཅན་ཐམས་ཅད་ལ་སེམས་མཉམ་པར་གྱུར་ཅིང་སེམས་ཅན་ཐམས་ཅད་ལ་བསྡུ་བའི་དངོས་པོ་བཞིས་སྡུད་པ་སྟེ། བཞི་གང་ཞེ་ན། སྦྱིན་པ་དང ། སྙེན་པར་སྨྲ་བ་དང ། དོན་སྤྱོད་པ་དང ། དོན་འཐུན་པ་སྟེ་བཞིའོ། །བཟང་སྐྱོང་ཆོས་གསུམ་པོ་དེ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཆེན་པོ་དང་ལྡན་པར་གྱུར་པ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང ། བཏང་སྙོམས་ཆེན་པོ་ལ་སྤྱོད་པ་ཡིན་ཏེ། དེ་དགེ་སློང་ངམ། དགེ་སློང་མ་ལྟུང་བ་བྱུང་བ་མི་གླེང་ཞིང་དང་དུ་ལེན་པའི་རང་བཞིན་ཅན་ཡིན་པས་བཟོད་པ་ཡིན། དེ་མཁན་པོ་དང་སློབ་དཔོན་ལ་གུས་པ་དང་བཅས། ཞེས་ས་དང་བཅས་ཤིང་སྟོན་པར་འདུ་ཤེས་པ་ཡིན། བདག་ཀྱང་བདག་ཏུ་སྨྲ་བ་མ་ཡིན། སེམས་ཅན་དུ་སྨྲ་བ་མ་ཡིན། སྲོག་ཏུ་སྨྲ་བ་མ་ཡིན། གང་ཟག་ཏུ་སྨྲ་བ་མ་ཡིན། གསོ་བར་སྨྲ་བ་མ་ཡིན། སྐྱེས་བུར་སྨྲ་བ་མ་ཡིན། ཤེད་ཅན་ལས་སྐྱེས་སུ་སྨྲ་བ་མ་ཡིན། ཤེད་བུར་སྨྲ་བ་མ་ཡིན་ཞིང་གཞན་དག་ཀྱང་ཆོས་འདི་ལ་སྐུལ་བ་སྟེ། བཟང་སྐྱོང་ཆོས་བཞི་པ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྗེས་སུ་འཐུན་པའི་ཆོས་ལ་ནན་ཏན་བྱེད་པ་ཡིན། ལུས་ཀྱི་སྤྱོད་པ་ཡོངས་སུ་དག་པ་དང ། ངག་གི་སྤྱོད་པ་ཡོངས་སུ་དག་པ་དང ། ཡིད་ཀྱི་སྤྱོད་པ་ཡོངས་སུ་དག་པ་དང ། ལྟ་བ་ཡོངས་སུ་དག་པ་དང ། འཚོ་བ་ཡོངས་སུ་དག་ཅིང་མང་དུ་ཐོས་པ་ཡིན། སངས་རྒྱས་བཅོམ་ལྡན་འདས་རྣམས་དང་ཐབས་གཅིག་ཏུ་དགོངས་པའི་ཚིགས་ལ་མཁས་པ་ཡིན་ཏེ། བཟང་སྐྱོང་ཆོས་ལྔ་པོ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་ཏིང་ངེ་འཛིན་འདི་འཐོབ་བོ། ། 51.52b བཟང་སྐྱོང་ཆོས་ལྔ་པོ་དེ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཞན་ལྔ་དང་ལྡན་ན་ཏིང་ངེ་འཛིན་འདི་འཐོབ་སྟེ། ལྔ་གང་ཞེ་ན། བཟང་སྐྱོང་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་སྦྱིན་པ་བྱེད་པ་ཡིན་ཏེ། སེམས་ལ་བསྲི་བ་མེད་པ། འཇུངས་པ་མེད་པ། ལྷུག་པར་གཏོང་བ། ལག་པ་བརྐྱང་བ། སྦྱིན་པ་བགེད་པར་དགའ་བ། རྣམ་པར་སྨིན་པ་ལ་རེ་བ་མེད་པར་བདོག་པ་ཐམས་ཅད་ཡོངས་སུ་གཏོང་བ། སེམས་ཅན་རྣམས་ལ་སྙིང་བརྩེ་བ། འགྱོད་པ་དང་བྲལ་བ། སྦྱིན་པ་བྱིན་ནས་འགྱོད་པར་མི་བྱེད་པ་ཡིན་ཏེ། བཟང་སྐྱོང་ཆོས་དང་པོ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐ་ན་ཐོས་པ་ཙམ་ཡང་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་སྦྱིན་པ་བྱེད་པ་ཡིན་ཏེ། འདི་ལྟར་བླ་ན་མེད་པའི་ཆོས་སྦྱིན་པར་བྱེད་པ། ཤིན་ཏུ་ངེས་པར་གསུངས་པའི་ཚིག་དང ། ཡི་གེ་དང ། ཐོགས་པ་མེད་པའི་ཚིག་དང ། ཡི་གེ་དང ། འཆབ་པ་མེད་པའི་ངེས་པའི་ཚིགས་དང ། ཟབ་མོ་དོན་དམ་པའི་ཚུལ་བསྟན་པ་དེ་བཞིན་གཤེགས་པས་གསུངས་པའི་བླ་ན་མེད་པའི་ཆོས་ཀྱི་སྦྱིན་པ་གཏོང་ཞིང་དེ་ལ་གནས་པར་གྱུར་པ་བཟོད་པ་ཕུན་སུམ་ཚོགས་པ་དང ། དེས་པ་ཕུན་སུམ་ཚོགས་པར་གྱུར་པ་དང ། དེ་གཞན་གྱིས་ཁ་བྱས་ཤིང་སྤྱོས་ཀྱང་མི་ཁྲོ། མི་གཤེ། གནོད་པར་མི་བྱེད། རྨོངས་པར་མི་བྱེད། ཡི་ཆད་པར་མི་འགྱུར་ཞིང ། ཁྲོ་བ་མང་བར་མི་འགྱུར་ཞིང ། འཇིགས་པ་མེད་པ་ཡིན་ཏེ། བཟང་སྐྱོང་ཆོས་གཉིས་པ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ཐོས་ནས་དམ་པའི་ཆོས། 51.53a ཡུན་རིང་དུ་གནས་པར་བྱ་བ་དང ། རྒྱས་པར་བྱེད་པར་བྱ་བའི་ཕྱིར་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་བཤད་པར་བྱ། གླེགས་བམ་དུའང་བྲིས་ཏེ་བཅང་བར་བྱ་ཞིང་ཆོས་ལ་འཇུངས་པ་མེད་པར་བྱ་སྟེ། བཟང་སྐྱོང་ཆོས་གསུམ་པོ་དེ་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྲག་དོག་མེད་པ། གདུང་བ་མེད་པ། རྨུགས་པ་དང་གཉིད་དང་བྲལ་བ། སྒྲིབ་པ་རྣམས་དང་བྲལ་བ། བདག་ལ་མི་སྟོད་པ་གཞན་ལ་མི་སྨོད་པ་ཡིན་ཏེ། བཟང་སྐྱོང་ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དད་པ་དང་ལྡན་པ་དང ། དང་བ་མང་བ་ཡིན། རྒན་པ་དང ། བར་མ་དང ། གཞོན་པ་རྣམས་ལ་གུས་པ་དང་བཅས། རྗེ་ས་དང་བཅས་པ་ཡིན། བྱས་པ་ཤེས་པ་དང་བྱས་པ་གཟོ་བ་ཡིན། དེ་བྱས་པ་ཆུང་ཟད་ལའང་དྲིན་དུ་གཟོ་ན་མང་པོ་ལྟ་ཅི་སྨོས། བདེན་པའི་ཚིག་ལ་གནས་ཤིང་གཞན་དུ་མི་སྨྲ་བ་ཡིན་ཏེ། བཟང་སྐྱོང་ཆོས་དེ་ལྔ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཟབ་མོའི་ཆོས་ལ་བཟོད་པ་སྐྱེད་བྱེད་ཅིང ། །འགྲོ་བ་ཐམས་ཅད་ལ་ནི་སྨོད་བྱེད་པ། །འགྲོ་བ་དྲུག་པོ་ཀུན་ཀྱང་མི་འདོད་པ། །དེ་འདྲ་དེས་ནི་ཏིང་འཛིན་མྱུར་དུ་འཐོབ། །ཕས་ཀྱི་རྒོལ་བ་ཀུན་ལ་མི་རྟེན་ཅིང ། །གསང་ཚིག་ཉན་པར་མི་བྱེད་ག་ལ་འཛིན། །འདོད་པའི་ཡོན་ཏན་ལྔས་ནི་སྐྱོ་བར་གྱུར། །དེ་འདྲ་དེས་ནི་ཏིང་འཛིན་མྱུར་དུ་ཐོབ། །ཚུལ་ཁྲིམས་རྣམ་དག་ཚངས་པར་སྤྱོད་གནས་ཏེ། །བུད་མེད་ལ་ནི་ནམས་ཀྱང་རྟོག་མི་སྐྱེད། །འདོད་ཆགས་སྤངས་ཤིང་བདེ་གཤེགས་སྲས་གྱུར་པ། །དེ་འདྲ་དེས་ནི་ཏིང་འཛིན་མྱུར་དུ་ཐོབ། །རྣམ་སྨིན་མི་རེ་བར་ནི་སྦྱིན་པ་སྦྱིན། །རྟེན་པ 51.53b མེད་པར་བྱིན་ནས་མི་གདུང་ཞིང ། །སངས་རྒྱས་ཡེ་ཤེས་རེག་བྱ་མ་གཏོགས་པར། །སྦྱིན་པ་སྦྱིན་ནས་སྨོན་པ་ཆུང་ཟད་མེད། །སེམས་ཅན་སྙིང་བརྩེའི་ཕྱིར་ནི་སྦྱིན་བྱིན་ནས། །མྱ་ངན་བྱེད་པ་མེད་ཅིང་འགྱོད་པ་མེད། །སྦྱིན་དང་དུལ་དང་བསྡམས་ལ་རྟག་ཏུ་གནས། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །གང་ཞིག་འཇུངས་མེད་སྦྱིན་བདག་སྦྱིན་བྱེད་པ། །གྱ་ནོམ་པ་དང་ཡིད་འོང་སྦྱིན་པ་བྱིན། །བྱིན་ནས་དེ་ནི་ཡིད་ཀྱང་དགའ་བར་འགྱུར། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །བདེ་གཤེགས་གསུངས་པ་ཟབ་ཅིང་ཞི་བའི། །གྱ་ནོམ་མདོ་སྡེ་དག་ནི་འཆང་བྱེད་ཅིང ། །གང་དག་ཆོས་ཀྱི་སྦྱིན་བདག་གྱུར་པ་ནི། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །ཆོས་ལ་རྟག་ཏུ་གནས་པར་གྱུར་བྱས་ནས། །བཟོད་དང་དེས་ལ་གནས་ཤིང་ཕྲག་དོག་མེད། །གཞན་དག་འཁྲོས་ན་ཁྲོ་བར་མི་བྱེད་པ། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །གང་དག་ལ་ལ་ཏིང་འཛིན་འདི་འདོད་ཅིང ། །ཆོས་འདི་རིང་དུ་གནས་པར་བྱ་བའི་ཕྱིར། །གཞན་ལའང་སྟོན་ཅིང་བྲིས་ནས་འཇོག་བྱེད་པ། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །ནམས་ཀྱང་ཆོས་ལ་འཇུངས་པར་མི་འགྱུར་ཞིང ། །བདེ་གཤེགས་སྲས་འགྱུར་ཕྱིར་ནི་མ་གཏོགས་པར། །རྙེད་དང་བཀུར་སྟིའི་ཕྱིར་ནི་མི་འཆད་པ། །དེ་འདྲ་དེས་ནི་ཆོས་འདི་རྙེད་པར་འགྱུར། །ཕྲག་དོག་མེད་ཅིང་སྒྲིབ་པ་རྣམ་པར་སྤངས། །གཉིད་དང་བྲལ་ལ་ཀུན་ཏུ་གདུང་བ་མེད། །བདག་ལ་མི་སྟོད་གཞན་ལ་མི་སྨོད་པ། །དེས་ནི་བདག་མེད་འདུ་ཤེས་རྙེད་མི་དཀའ། །དད་དང་ལྡན་ལ་སྒྱུ་མེད་གཡོ་མེད་ཅིང ། །སངས་རྒྱས་ཆོས་དང་དགེ་འདུན་རྣམས་ལ་དད། །དེས་ནི་བྱས་པ་ཤེས་ཤིང་བྱས་པ་སྲུང ། །དེས་ནི་ཅུང་ཟད་ཙམ་ཡང་རྙེད་མི་དཀའ། །རྟག་ཏུ་བདེན་པའི་ཚིག་ནི་སྨྲ་བྱེད་ཅིང ། །ཆུང་ངམ་ཉུང་ངམ་མང་ངམ་བཟང་ཡང་རུང ། །ནམས་ཀྱང་ལེགས་སྤྱད་ཆུད་མི་གསོན་པ་ཡི། །ཆོས་འདོད་དེ་ནི་རྙེད་པར་དཀའ་མི་འགྱུར། །ཚུལ 51.54a ཁྲིམས་རྣམ་དག་བྱས་པ་བསྲུང་བ་ཡི། །མི་གང་ལ་ལ་ཆོས་འདི་འཆང་བྱེད་པ། །དེས་ནི་བྱང་ཆུབ་རྙེད་པར་མི་དཀའ་ན། །ཏིང་འཛིན་ཞི་བ་འདི་ལྟ་སྨོས་ཅི་དགོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་དྲུག་པའོ།། །། བཟང་སྐྱོང་ངས་མངོན་པར་ཤེས་ཏེ་འདས་པའི་དུས་ན་དེ་བཞིན་གཤེགས་པ་མར་མེ་མཛད་མཐོང་མ་ཐག་ཏུ། དེ་ལས་ངས་ཏིང་ངེ་འཛིན་འདི་ཐོབ་བོ། །ངས་ཏིང་ངེ་འཛིན་འདི་ཐོབ་མ་ཐག་ཏུ་དེའི་མདོ་ལ་ངས་ཚད་མེད་གྲངས་མེད་པའི་སངས་རྒྱས་བཅོམ་ལྡན་འདས། ངའི་མིག་ལམ་དུ་སྣང་བར་གྱུར། དམ་པའི་ཆོས་འཆད་པ་ཡང་ཐོས་ཤིང་དེ་ཐམས་ཅད་ཀྱང་ཇི་སྐད་དུ་ཐོས་པ་བཞིན་དུ་འཛིན་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་ཀྱང་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ་ཞེས་ལུང་བསྟན་ཏོ། །བཟང་སྐྱོང་དེ་བས་ན་ཁྱེད་ཀྱིས་འཕགས་པ་བྱིས་པ་རྣམས་སྤངས་པ་མཚན་མ་ཐམས་ཅད་དང་བྲལ་བའི་ཆོས་འདི་ལ་བསླབ་པར་བྱའོ། །དེས་ནས་ཁྱེད་ཏིང་ངེ་འཛིན་འདི་ལ་གནས་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་དཀའ་བར་རྙེད་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་མར་མེ་མཛད་མཐོང་ནས། །ངས་ནི་ཏིང་ངེ་འཛིན་ཀྱང་བསྒོམ། །སངས་རྒྱས་མང་པོ་མཐོང་ནས་ཀྱང ། །མཆོག་གི་ཆོས་ཀྱང་ཐོབ་པར་གྱུར། །ཇི་ལྟར་བསོད་ནམས་བྱས་པ་དག་།བསམ་པ་བཟང་པོ་འགྲུབ་པ་བཞིན། །ཁྱེད་ཀྱང་ཆོས་ལ་སྤྱོད་ཅིག་དང ། །བྱང་ཆུབ་མཆོག་ནི་ཐོབ་པར་འགྱུར། །སངས་རྒྱས་བྱེ་བ་བསམ་མི་ཁྱབ། །མཐའ་མེད་ཅིང 51.54b ནི་མུ་མེད་པ། །བྱང་ཆུབ་ཞི་བ་ཚོལ་བྱེད་ཅིང ། །གང་དག་ངས་ནི་སྔོན་བཀུར་བ། །བྱང་ཆུབ་དེ་ནི་ངས་རྙེད་དེ། །ཆོས་ཀྱི་འཁོར་ལོ་རབ་ཏུ་བསྐོར། །གང་དག་བྱང་ཆུབ་བཞག་པ་ནི། །སེམས་ཅན་བྱེ་བ་དུ་མའོ། །ལྷ་དང་ཀླུ་དང་གནོད་སྦྱིན་དང ། །དྲི་ཟ་མི་འམ་ཅི་ཡི་རྣམས། །ེ་མའོ་སངས་རྒྱས་བསམ་ཡས་ཤེས། །མཆོད་པས་ང་ལ་མཆོད་པ་བྱེད། །མཁས་པའི་མི་ནི་གང་དག་ཀྱང ། །སངས་རྒྱས་ཆོས་ལ་སྟོན་འདོད་པས། །མང་དུ་ཐོས་པར་བྱ་བའི་ཕྱིར། །འདུན་པ་ཉིད་ནི་བསྟན་པར་བྱ། །སངས་རྒྱས་བྱེ་བ་ཕྲག་སུམ་ཅུ། །ཤཱཀྱ་སེང་གེ་མི་ཡི་མཆོག་།བྱང་ཆུབ་ཞི་བ་ཚོལ་བྱེད་ཅིང ། །གང་དག་ངས་ནི་སྔོན་བཀུར་བ། །སངས་རྒྱས་བསམ་ཡས་དེ་དག་གིས། །དེར་ནི་ང་ལ་ལུང་མ་བསྟན། །དམིགས་སུ་མེད་པའི་ཡེ་ཤེས་ལ། །ང་ནི་གནས་པར་མ་གྱུར་ཏོ། །སངས་རྒྱས་གཙོ་བོ་སྐྱོབ་པའི་རྣམས། །དེ་བཞིན་བསྡུས་པར་ཤེས་པར་བྱ། །བྱེ་བ་ཁྲག་ཁྲིག་དུ་མའི་རྣམས། །གང་དག་ངས་ནི་སྔོན་བཀུར་བ། །དེས་ནི་ང་ཡི་བསམ་མཁྱེན་ནས། །དེ་བཞིན་གཤེགས་པས་ལུང་བསྟན་ཀྱང ། །སངས་རྒྱས་ཡེ་ཤེས་བསམ་ཡས་ལ། །ང་ནི་གནས་པར་མ་གྱུར་ཏོ། །དེ་ཡི་ཕྱིར་ནི་དོན་དམ་ལ། །བརྩོན་པ་བཟང་པོ་དག་ཀྱང་བྱོས། །སངས་རྒྱས་བསམ་གྱིས་མི་ཁྱབ་པའི། །ཡེ་ཤེས་མཆོག་ལའང་བསླབ་པར་བྱོས། །མདོ་སྡེ་འདི་ལ་བསླབ་བྱས་ནས། །འཇིག་རྟེན་མགོན་པོའི་སྤྱོད་ཡུལ་ལ། །བླ་ན་མེད་པའི་ཡེ་ཤེས་མཆོག་།བསམ་གྱིས་མི་ཁྱབ་རྟོགས་པར་འགྱུར། །ེ་མའོ་བླ་མེད་ཡེ་ཤེས་དང ། །སངས་རྒྱས་ཡེ་ཤེས་བསམ་ཡས་ཤེས། །བཟང་སྐྱོང་སེམས་ནི་དགའ་མགུ་ཞིང ། །གུས་པ་དང་ཡང་བཅས་པར་འགྱུར། །མ་འོངས་དུས་ན་བདག་ཅག་ཀྱང ། །ཆོས་འཛིན་ཕྱི་མར་འགྱུར་ཞེས་ཏེ། །ལྔ་བརྒྱར་ཚང་བ་དེ་དག་ཀྱང ། །སེམས་དགའ་གུས་དང་བཅས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་བདུན་པའོ།། །། 51.55a བམ་པོ་དྲུག་པ། དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔས་ཏིང་ངེ་འཛིན་འདི་ཇི་ལྟར་བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་བསྒོམ་འདོད་པར་གྱུར་ན། དེས་གཟུགས་ལ་གནས་པར་མི་བྱའོ། །ཚོར་བ་དང ། སེམས་དང ། ཆོས་ལ་གནས་པར་མི་བྱའོ། །སྐྱེ་བ་ལ་གནས་པར་མི་བྱའོ། །ཆོས་ཐམས་ཅད་ལ་གནས་པར་མི་བྱའོ། །སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ལ་གནས་པར་མི་བྱའོ། །བྱམས་པ་ལ་གནས་པར་མི་བྱའོ། །བཟང་སྐྱོང་དེ་ལ་ཏིང་ངེ་འཛིན་གང་ཞེ་ན། གང་ཆོས་དེ་དག་ལ་ནན་ཏན་དུ་བྱེད་ཀྱི་ལོག་པའི་ནན་ཏན་དུ་བྱེད་པ་མ་ཡིན་པའོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་གང་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཀྱི་ལུས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག་པ་དང ། ཚོར་བ་དང ། སེམས་དང ། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཀྱི་ཆོས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག་པའི། བྱང་ཆུབ་སེམས་དཔའ་དེ་ནི་ཏིང་ངེ་འཛིན་འདི་འཐོབ་བོ། །དེ་ཅིའི་ཕྱིར་ཞེ་ན། བཟང་སྐྱོང་དེ་ནི་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ལུས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག་།ཚོར་བ་དང ། སེམས་དང ། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ། ཆོས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག་ན། ཆོས་ཐམས་ཅད་མི་དམིགས་པར་འགྱུར་རོ། །ཆོས་ཐམས་ཅད་མི་དམིགས་པས་དེ་མི་རྟོག་རྣམ་པར་མི་རྟོག་གོ། །བཟང་སྐྱོང་གང་མི་རྟོག་རྣམ་པར་མི་རྟོག་པ་དེ་ནི། ཆོས་གང་ཡང་མི་མཐོང་ངོ ། །བཟང་སྐྱོང་གང་ལ་ཆོས་གང་ཡང་མི་མཐོང་བ་དེ་ནི་སྒྲིབ་པ་མེད་པའི་ཡེ་ཤེས་ཤེས་བྱའོ། །བཟང་སྐྱོང་གང་སྒྲིབ་པ་མེད་པའི་ཡེ་ཤེས་དེ་ནི་བཟང་སྐྱོང་ཏིང་ངེ་འཛིན་ཅེས་བྱའོ། །བཟང་སྐྱོང་བྱང་ཆུབ་སེམས་དཔའ་གང་ཏིང་ངེ 51.55b འཛིན་འདི་དང་ལྡན་པ་དེ་ནི། སངས་རྒྱས་ཚད་མེད་གྲངས་མེད་པ་རྣམས་མཐོང་ངོ ། །དམ་པའི་ཆོས་ཀྱང་ཐོས་སོ། །ཐོས་ནས་ཀྱང་ཀུན་ཆུབ་པར་བྱེད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་གང་སྒྲིབ་པ་མེད་པའི་རྣམ་པར་གྲོལ་བའི་ཡེ་ཤེས་མཐོང་བ་དང ། ཐོགས་པ་མེད་པའི་ཡེ་ཤེས་ཀྱང་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གནས་ནས་ཀྱང་ཆོས་གང་ཡང་མི་མཐོང་ངོ ། །མ་མཐོང་ནས་ཀྱང་མི་རྟོག་རྣམ་པར་མི་རྟོག་ཅིང ། དམུས་ལོང་ཡང་མ་ཡིན། འོན་པ་ཡང་མ་ཡིན་ནོ། །དེ་བཞིན་དུ་ཚོར་བ་དང ། སེམས་དང ། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ་གནས་ནས་ཀྱང ། ཆོས་གང་ཡང་མི་མཐོང་ངོ ། །མ་མཐོང་ནས་ཀྱང་མི་རྟེན་པར་འགྱུར། མི་རྟེན་ནས་ཀྱང་ལམ་སྒོམ་པར་བྱེད། ལམ་རྣམ་པར་བསྒོམས་པའི་ཕྱིར། དེ་ཆོས་རྣམས་ལ་ཐེ་ཙོམ་དུ་མི་འགྱུར། ཐེ་ཙོམ་མེད་པས་སངས་རྒྱས་མཐོང་བར་འགྱུར་རོ། །སངས་རྒྱས་མཐོང་ནས་ཀྱང་ཆོས་ཐམས་ཅད་འབྱུང་བ་མེད་པའི་ཕྱིར་རྣམ་པར་གྲོལ་བ་འབྱུང་ངོ ། །དེ་ཅིའི་ཕྱིར་ཞེ་ན། བཟང་སྐྱོང་གལ་ཏེ་བྱང་ཆུབ་སེམས་དཔའ་ཆོས་ཀྱི་འདུ་ཤེས་འཇུག་ན། དེ་ཉིད་དེའི་དམིགས་པར་ལྟ་བར་འགྱུར་རོ། །དེ་ཉིད་ཡོད་པར་ལྟ་བ་དང ། བདག་ཏུ་ལྟ་བ་དང ། སེམས་ཅན་དུ་ལྟ་བ་དང ། སྲོག་ཏུ་ལྟ་བ་དང ། གང་ཟག་ཏུ་ལྟ་བར་འགྱུར་རོ། །དེ་ཉིད་ཕུང་པོར་ལྟ་བ་དང ། ཁམས་སུ་ལྟ་བ་དང ། སྐྱེ་མཆེད་དུ་ལྟ་བ་དང ། མཚན་མར་ལྟ་བ་དང ། དངོས་པོར་ལྟ་བ་དང ། རྒྱུར་ལྟ་བ་དང ། རྐྱེན་ཏུ་ལྟ་བ་དང ། དམིགས་པ་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། བཟང་སྐྱོང་ཆོས་ཐམས་ཅད་ནི་རང་བཞིན་གྱིས་སྟོང་པ་དང ། ཆོས་ཐམས་ཅད་ནི་མཚན་མ་མེད་པ། མི་གཟུང་བ། གཟུང་བ་མེད་པར་བྱང་ཆུབ་སེམས་དཔས་མཐོང་སྟེ། དེ་དག་ཆོས་ཐམས་ཅད་མི་དམིགས་སོ། །རློམ་སེམས་སུ་མི་བྱེད་དོ། །མི་མཐོང་ངོ ། །ཇི་ལྟར་མི་དམིགས་ཤིང་རློམ་སེམས་སུ་མི་བྱེད་ལ་མི་མཐོང་ཞེ་ན། 51.56a བཟང་སྐྱོང་འདི་ལྟ་སྟེ། དཔེར་ན་གཞན་མུ་སྟེགས་ཅན་ནམ། གཞན་མུ་སྟེགས་ཅན་གྱི་ཉན་ཐོས་བདག་ཏུ་འདུ་ཤེས་པ་ལ་གནས་པ། སེམས་ཅེན་དང ། སྲོག་དང ། གང་ཟག་ཏུ་འདུ་ཤེས་པ་ལ་གནས་པ། ཆོས་ཐམས་ཅད་དུ་འདུ་ཤེས་པ་ལ་གནས་པ། ཆོས་རྣམས་ལ་དམིགས་ཤིང ། རློམ་སེམས་སུ་བྱེད་པ། མཐོང་བར་བྱེད་པ་དེ་ལྟར་བཟང་སྐྱོང་བྱང་ཆུབ་སེམས་དཔས་མི་མཐོང་ངོ ། །བཟང་སྐྱོང་ཡང་བྱང་ཆུབ་སེམས་དཔས་ཇི་ལྟར་མཐོང་ཞེ་ན། བཟང་སྐྱོང་འདི་ལྟ་སྟེ་དཔེར་ན། དེ་བཞིན་གཤེགས་པ་དང ། ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་དང ། རང་སངས་རྒྱས་རྣམས་དང ། ཉན་ཐོས་དགྲ་བཅོམ་པ་རྣམས་ཀྱིས་ཆོས་ཐམས་ཅད་མཐོང་བ་དེ་བཞིན་དུ། བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་བལྟ་བར་བྱའོ། །དེ་མཐོང་ནས་མངོན་པར་དགའ་བར་མི་བྱའོ། །མངོན་པར་དགའ་བ་མེད་པས་དགའ་བ་ཅན་དུ་མི་འགྱུར་ཞིང་དགའ་བ་དང་བྲལ་ཏེ་དགའ་བ་ཡང་དག་པར་བཅོམ་པའི་བྱང་ཆུབ་སེམས་དཔའ་ནི་ཏིང་ངེ་འཛིན་འདི་སྒོམ་མོ། །བཟང་སྐྱོང་འདི་ལྟ་སྟེ་དཔེར་ན། ནམ་མཁའ་གཟུགས་མེད་པ། བསྟན་ཏུ་མེད་པ། གནས་པ་མེད་པ། ཤིན་ཏུ་རྣམ་པར་དག་པ། ཉོན་མོངས་པ་མེད་པ་དེ་བཞིན་དུ། བྱང་ཆུབ་སེམས་དཔས་ཆོས་ཐམས་ཅད་ལ་བལྟ་སྟེ། འདུས་བྱས་དང ། འདུས་མ་བྱས་ཀྱི་ཆོས་རྣམས་ལ་དེའི་མིག་ཐོགས་པ་མེད་པར་འགྱུར་རོ། །བྱང་ཆུབ་སེམས་དཔའ་མིག་ཐོགས་པ་མེད་པ་དེ་ལ་ཆོས་རྣམས་མངོན་སུམ་དུ་འགྱུར་ཏེ། དེ་ཡིད་ལ་བྱས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་ཀ་བ་བརྒྱན་པ་ལྟ་བུ། འོད་ཟེར་གྱི་རྒྱལ་པོ་མངོན་པར་འཕགས་པ་ལྟ་བུ། ཟླ་བ་ཉ་བ་སྐར་མས་བསྐོར་བ་ལྟ་བུ། འཁོར་ལོས་སྒྱུར་བའི་རྒྱལ་པོ་སྟོབས་ཀྱི་ཚོགས་ཀྱིས་སྐོར་བ་ལྟ་བུ། ཚངས་པ་ཚངས་པའི་འཇིག་རྟེན་ན་ཚངས་པའི་བསྟན་ལ་འདུག་པ་ལྟ་བུ། ལྷའི་རྒྱལ་པོ་བརྒྱ་བྱིན་སུམ་བཅུ་རྩ་གསུམ་པའི་ལྷས་སྐོར་བ་ལྟ་བུ། རིའི་རྩེ་མོ་ལ་མེ་འབར་བ་ལྟ་བུ། སྨན་པའི་རྒྱལ་པོ་སྨན་གཏོང་བ་ལྟ་བུ། རི་དགས་ཀྱི་རྒྱལ་པོ་སེང་གེ་རལ་པ་ཅན 51.56b འཇིགས་པ་མེད་པར་ཝ་ཐམས་ཅད་སྐྲག་པར་བྱེད་པ་ལྟ་བུ། ངང་པའི་མཆོག་བར་སྣང་ལ་འཕུར་བ་ལྟ་བུ། རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་འཕགས་པ་ལྟ་བུ། རིའི་རྒྱལ་པོ་གངས་རི་མེ་ཏོག་དང་སྨན་ཐམས་ཅད་ཡོངས་སུ་རྒྱས་པ་ལྟ་བུ། རི་ཁོར་ཡུག་རླུང་གི་བུ་ལས་སྐྱེས་པས་འཛིན་ཅིང་འགྲེང་བ་ལྟ་བུ། རླུང་གི་ཕུང་པོས་ཆུའི་ཕུང་པོ་འཛིན་པ་ལྟ་བུ། ཆུའི་ཕུང་པོས་སའི་ཕུང་པོ་འཛིན་པ་ལྟ་བུར་མཐོང་ངོ ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །རི་རབ་ཀྱི་ནི་རྩེ་མཛེས་པ། །དྲི་མེད་དྲི་མ་བྲལ་ཞིང་དག་།ནམ་མཁའ་དང་ནི་མཉམ་ཞིང་འདྲ། །ལྷ་རྣམས་ཀྱིས་ནི་རབ་ཏུ་བརྒྱན། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གཟི་བརྗིད་དང ། དཔལ་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ། ལྷམ་མེ་ལྷན་ནེ་ལྷང་ངེར་དམིགས་པར་བྱས་ཏེ། མཐོང་ཞིང་ཆོས་འཆད་པའང་ཐོས་པར་འགྱུར་རོ། །ཐོས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། །འཆང་བར་བྱེད་དེ། །བྱང་ཆུབ་སེམས་དཔའ་དེའི་ཏིང་ངེ་འཛིན་འདི་ལས་ལངས་ནས་ཀྱང ། ཆོས་ཇི་སྐད་དུ་ཐོས་པ་དང ། ཇི་ལྟར་བཟུང་བ་དང ། ཇི་ལྟར་ཀུན་ཆུབ་པར་བྱས་པ་བཞིན་དུ་གཞན་དག་ལའང་རྒྱ་ཆེར་སྟོན་པར་འགྱུར། འཆད་པར་འགྱུར་རོ། །བཟང་སྐྱོང་དེ་ལྟར་ཏིང་ངེ་འཛིན་འདི་ནི། བྱང་ཆུབ་སེམས་དཔའ་རྣམས་ལ་ཕན་འདོགས་པ་མང་དུ་བྱེད་པའོ། །འདི་ལྟ་སྟེ་འཇིག་རྟེན་དང ། འཇིག་རྟེན་ལས་འདས་པའི་ཆོས་རྣམས་ཀྱི་ཡོན་ཏན་མང་པོ་སྐྱེད་པར་བྱེད་པའོ། །བཟང་སྐྱོང་དེ་བས་ན་བྱང་ཆུབ་འདོད་པའི་རིགས་ཀྱི་བུ་འམ་རིགས་ཀྱི་བུ་མོས་ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །བཅང་བར་བྱའོ། །བཀླག་པར་བྱའོ། །བྲི་བར་བྱའོ། །གཞན་དག་ལ་ཡང་རྒྱ་ཆེར་བཤད་པར་བྱའོ། །བསྟན་པར་བྱའོ། །བསྒྲགས་པར་བྱའོ། །བསྒོམ་པའི་སྦྱོར་བ་ལའང་བརྩོན་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ 51.57a འདི་དག་གསུངས་སོ། །དྲི་བྲལ་རྡུལ་བྲལ་དྲི་མེད་སངས་རྒྱས་ཏེ། །ཆགས་པ་མེད་ཅིང་སྐྱེ་བོ་མང་པོས་མཆོད། །རྔ་རྡུང་འཁར་རྔ་ལྷ་ཡི་རོལ་མོའི་སྒྲ། །རོལ་མོ་ཕྲག་བརྒྱས་ཕན་མཛད་ཕྱག་བྱ་བ། །མེ་ཏོག་སིལ་མ་དག་གིས་གཏོར་བྱས་ཤིང ། །སྐྱེ་བོ་མང་པོས་རིང་བསྲེལ་མཆོད་རྟེན་མཆོད། །ལྷ་ཡི་ཕྲེང་བ་དྲི་དང་གདུགས་སྣ་ཚོགས། །ཏིང་འཛིན་འདི་ནི་ཚོལ་ཞིང་འདོགས་པར་བྱེད། །གང་ཞིག་ཀུན་རྫོབ་ལ་ནི་གནས་བྱས་ནས། །ཤིན་ཏུ་རྒྱས་ཆོས་བལྟ་དཀའ་གྱ་ནོམ་འབྱེད། །མ་ཆགས་ཡེ་ཤེས་རྒྱལ་བ་དྲན་བྱེད་ཅིང ། །སྟོང་པ་ཉིད་ལས་ནམས་ཀྱང་ཉམས་མི་འགྱུར། །ཟླ་བ་དྲི་མེད་ཉི་མ་ཤར་བ་འམ། །ཚངས་པའི་འཇིག་རྟེན་ཚངས་པ་འདུག་པ་བཞིན། །རྣམ་དག་སེམས་ཀྱིས་རྒྱལ་བ་དྲན་བྱེད་ཅིང ། །སྟོང་པ་ཉིད་ནི་ནམས་ཀྱང་མི་འདོར་རོ། །ཇི་ལྟར་སུམ་བཅུ་རྩ་གསུམ་ལྷ་ཡི་རྒྱལ། །སུམ་བཅུ་རྩ་གསུམ་ལྟ་བས་ཟིལ་གྱིས་གནོན། །དེ་ལྟར་རྒྱལ་བས་འཇིག་རྟེན་ཟིལ་མནན་ཏེ། །དཔལ་གྱི་ལྷམ་མེ་ལྷན་ནེ་ལྷང་ངེའོ། །ཚལ་གྱི་མཆོག་ལ་མེ་དག་མཆེད་གྱུར་ཏེ། །མར་གྱི་མེ་བསྲེགས་མེ་ལྕེ་རབ་འབར་བ། །འོད་ཟེར་བརྒྱ་སྟོང་དག་ནི་འབྱུང་བ་ལྟར། །དེ་བཞིན་རྒྱལ་བ་མཚན་གྱིས་རྒྱས་པར་ལྟོས། །ཇི་ལྟར་སྨན་པ་ཟུག་རྔུ་འབྱིན་བྱེད་པ། །ནད་པ་རྣམས་ལ་ནད་མེད་བྱེད་པ་ལྟར། །རྒྱལ་བ་མི་ཡི་སེང་གེ་སྨན་པ་མཆོག་།ཇི་ལྟར་འཐུན་པ་བདེ་གཤེགས་གཏམ་ཡང་གསུང ། །འཁོར་ལ་སེང་གེའི་སྒྲ་ནི་སྒྲོགས་མཛད་ཅིང ། །ཁྱུ་མཆོག་སངས་རྒྱས་འཇིག་རྟེན་ཀུན་མི་བསྙེངས། །ནགས་གནས་སེངྒེ་ཝ་ལ་ཇི་བཞིན་དུ། །ཕས་ཀྱི་རྒོལ་བ་ཐམས་ཅད་ཟིལ་གྱིས་གནོན། །ཇི་ལྟར་ངང་པའི་རྒྱལ་པོ་མཆོག་དག་ནི། །མཁའ་ལ་འཕུར་ན་དཀར་ཞིང་རྣམ་དག་མཛེས། །དེ་ལྟར་བདེ་བར་གཤེགས་པ་གསེར་གྱི་མདོག་།བདེ་གཤེགས་སྲས་ཀྱི་ཐུ་བོ་རྣམས་ཀྱང་དྲན། །ཇི་ལྟར་རི་རྒྱལ་གངས་ཅན་ལྷམ་མེ་ཞིང ། །ལྷག་གེ་བ་དང་རྒྱལ་རིགས་རྒྱལ་པོ་འམ། །ཇི་ལྟར་ཀ་བ་རིན་ཆེན་སྣ་ཚོགས་བརྒྱན། །དེ་ལྟར་རྒྱལ་བ་མཚན་གྱིས་བརྒྱན་པར་བལྟ། །མི་གཡོ་མ་རལ་ཇི་ལྟར་རྡོ་རྗེ་ 51.57b འདྲ། །ཁོར་ཡུག་རི་ནི་རླུང་གི་བུ་སྐྱེས་འཛིན། །དེ་ལྟར་བདེ་གཤེགས་བསྐལ་པ་ཕྱོགས་འཛིན་ཅིང ། །ཕན་དང་ལྡན་ཞིང་བྱམས་ལྡན་ཆོས་ཀྱང་ཆེ། །ཇི་ལྟར་ཆུ་ལ་ས་དག་རྟེན་པ་དང ། །ཇི་ལྟར་རླུང་ལ་ཆུ་ཡང་རྟེན་པ་དང ། །ཇི་ལྟར་ནམ་མཁའ་ལ་ནི་རླུང་རྟེན་པ། །དེ་ལྟར་རྒྱལ་བ་ཡོན་ཏན་ཀུན་ལ་བཞུགས། །ཇི་ལྟར་སུམ་བཅུ་རྩ་གསུམ་རི་རབ་རྒྱལ། །ལྷན་ནེ་ལྷག་གེ་ཐམས་ཅད་ཡོངས་སུ་རྒྱས། །དེ་ལྟར་བདེ་གཤེགས་རི་རབ་ལྟ་བུ་ཡང ། །རིན་ཆེན་ཚོགས་ཀྱི་ནང་ན་བཞུགས་པ་མཛེས། །མ་ཆགས་སེམས་ལྡན་རྒྱལ་བ་དྲན་བྱེད་ན། །མུན་དང་བྲལ་ཞིང་མི་སྣང་མེད་པ་ཡི། །ཏིང་འཛིན་རྡུལ་བྲལ་རྣམ་དག་དེ་མིག་འགྱུར། །དེ་ནི་དངོས་པོའི་འདུ་ཤེས་ཀུན་དང་བྲལ། །རྒྱལ་བ་རྣམ་དག་སེམས་ནི་དྲན་བྱེད་ན། །རྡུལ་དང་དྲི་མ་བྲལ་ཞིང་ཁྲོ་བ་སྤངས། །མ་རིག་བྲལ་ཞིང་དེ་ཡི་ཡེ་ཤེས་དག་།དེ་ཡི་ཡེ་ཤེས་རྡུལ་བྲལ་འབྱུང་བར་འགྱུར། །རྒྱལ་བ་ཚུལ་ཁྲིམས་རྣམ་དག་དྲན་བྱེད་ན། །དེ་ཡི་ཡེ་ཤེས་རབ་རིབ་བྲལ་ཞིང་དག་།ང་དང་བདག་ལྟ་དེ་ལ་ཕྱིས་ཀྱང་མེད། །དངོས་པོའི་འདུ་ཤེས་ནམས་ཀྱང་འབྱུང་མི་འགྱུར། །དེ་ནི་སྲིད་པའི་རྒྱུད་ལ་ལྟ་དང་བྲལ། །ཐེ་ཚོམ་ལམ་བྲལ་ཡེ་ཤེས་རྣམ་པར་དག་།ནམས་ཀྱང་གཟུགས་ཀྱི་འདུ་ཤེས་མི་འགྱུར་ཞིང ། །ཞི་ལམ་བསིལ་བའི་དངོས་པོའི་ཆོས་ཀྱང་ཉན། །ས་དང་ཆུ་དང་མེ་དང་རླུང་དག་ནི། །རང་གི་དངོས་པོ་མེད་ཅིང་ཐམས་ཅད་སྟོང ། །རྒྱལ་བ་མཆོག་རབ་བསྟན་པ་ཐོས་ནས་ཀྱང ། །དེ་ནི་དངོས་པོའི་འདུ་ཤེས་མི་འབྱུང་ངོ ། །དངོས་སུ་ཤེས་པ་ཐམས་ཅད་ཚར་བཅད་ཅིང ། །འགྲོ་བ་ཐམས་ཅད་སྟོང་པར་རིག་ནས་ཀྱང ། །ཇི་ལྟར་འདབ་ཆགས་ནམ་མཁར་མི་ཆགས་བཞིན། །ནམས་ཀྱང་ཡིད་ནི་ཆགས་པར་མི་འགྱུར་རོ། །མཆོག་རབ་རྒྱལ་ལ་རི་མོ་བྱས་པས་ནི། །རྫུ་འཕྲུལ་སྟོབས་ལ་གནས་ཤིང་ཡིད་རྣོ་བས། །འཇིག་རྟེན་ཀུན་ན་ཕྱོགས་བཅུར་རྣམ་པར་སྣང ། །ཡོན་ཏན་ཚད་མེད་པ་ནི་ཀུན་དང་ལྡན། །ལག་པ་རྐང་པ་དེ་བཞིན་མགོ་བོ་མིག་།རྒྱལ་སྲིད་རྟ་དང་བ་གླང་ཐམས 51.58a ཅད་དང ། །འཇིག་རྟེན་པ་ཡི་རིན་ཆེན་ཀུན་གཏོང་ཡང ། །ཚུལ་ཁྲིམས་ཕུང་པོ་ཡོངས་སུ་གཏོང་མི་བྱེད། །སྙིང་རྗེ་བསྐྱེད་ནས་འཇིག་རྟེན་ཀུན་ཕན་ཕྱིར། །ཆོས་ཀྱི་གཙོ་བོ་རིན་ཆེན་སྟོན་པར་བྱེད། །འདུས་བྱས་མ་ལུས་ཐམས་ཅད་སྤོང་བྱེད་ཀྱང ། །བྱང་ཆུབ་སེམས་ནི་ཡོངས་སུ་གཏོང་མི་བྱེད། །དགེ་སློང་དང་ནི་རྒྱལ་སྲས་ལེགས་ཞུགས་དང ། །དེ་བཞིན་དགེ་སློང་མ་དང་དགེ་བསྙེན་དང ། །དད་ལྡན་ཆགས་དང་བྲལ་བའི་དགེ་བསྙེན་མས། །རྗེས་སུ་དྲན་པར་བྱས་ན་གནས་འདི་འཐོབ། །ཏིང་འཛིན་ཞི་བ་འདི་ནི་སུ་འཆང་བའི། །བདེ་གཤེགས་སྲས་པོ་ཏིང་ངེ་འཛིན་མཁས་པ། །དེ་ལ་ཡོན་ཏན་མང་པོ་དེ་དག་འབྱུང ། །བླ་མེད་རྣམ་པ་མང་པོའི་གནས་འབྱུང་ངོ ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅཝ་བརྒྱད་པའོ།། །། བཟང་སྐྱོང་དེ་ལྟ་བས་ན། བྱང་ཆུབ་སེམས་དཔའ་གང་ཏིང་ངེ་འཛིན་འདི་འཆད་པའམ་འཐོབ་པར་འདོད་པ་དེས་དང་པོ་ཉིད་ནས་མཚན་མའི་འདུ་ཤེས་རྣམས་བསལ་བར་བྱའོ། །མཚན་མའི་འདུ་ཤེས་རྣམས་བསལ་ནས་ལྷག་པའི་ང་རྒྱལ་དུ་མི་བྱ་སྟེ། བྱང་ཆུབ་སེམས་དཔའ་ལྷག་པའི་ང་རྒྱལ་སྤངས་ཤིང ། ཡིད་ལ་མཚན་མ་དང་བྲལ་བས། ཏིང་ངེ་འཛིན་འདི་ལུང་མནོད་པར་བྱ་སྟེ། བརྩད་པར་མི་བྱའོ། །དེ་ལ་ཇི་ལྟར་ན་རྩོད་པ་མེད་པར་འགྱུར་ཞེ་ན། གང་སྟོང་པ་ཉིད་མི་སྤོང་བ་སྟེ། འདི་ནི་རྩོད་པ་མེད་པའོ། །བཟང་སྐྱོང་རྩོད་པ་མེད་པ་གཙོ་བོར་བྱེད་པའི་བྱང་ཆུབ་སེམས་དཔས་ཏིང་ངེ་འཛིན་འདི་ལུང་མནོད་པར་བྱའོ། །བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་།ཏིང་ངེ་འཛིན་འདི་ལུང་ནོད་པར་འདོད་པར་གྱུར་ན། དེས་ཆོས་བཅུ་དང་ལྡན་པར་བྱ་སྟེ། ཏིང་ངེ་འཛིན་འདི་ལུང་མནོད་པར་བྱའོ། །བཅུ་གང་ཞེ་ན། འདི་ལྟ་སྟེ། བཟང་སྐྱོང་ང་རྒྱལ་བཅོམ་པའི་རིགས་ཀྱི་བུ་དང ། གཞན་གྱི་རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་ཕྲག་དོག་མེད་པ་དང ། གུས་པ་དང་བཅས་ཤིང་རྗེ་ས་དང་བཅས་པ་དང ། བྱས་པ་ཤེས་ཤིང་བྱས་པ་གཟོ་བ་དང ། 51.58b འཇུངས་པ་མེད་ཅིང་འགྱོད་པ་དང་བྲལ་བ་དང ། དད་པ་དང་ལྡན་ཞིང་བརྟག་པ་མང་བ་དང ། བརྩོན་འགྲུས་བརྩམས་ཤིང་འཆག་པ་ལ་ཞུགས་པ་དང ། མགྲོན་དུ་གཉེར་བ་ལ་མི་ལྟོས་པར་བསོད་སྙོམས་བྱེད་པ་དང ། ཟབ་མོ་ལ་མོས་པས་ཏིང་ངེ་འཛིན་འདི་ལུང་མནོད་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་གང་ལ་ལས་ཏིང་ངེ་འཛིན་འདི་ལུང་མནོད་པར་འདོད་པ་དེ་ལ་སྟོན་པའི་འདུ་ཤེས་ཉེ་བར་གཞག་སྟེ། ཏིང་ངེ་འཛིན་འདི་ལུང་མནོད་པར་བྱ། གདོན་པར་བྱ། བཅང་བར་བྱ་སྟེ། བཟང་སྐྱོང་ཆོས་བཅུ་པོ་དེ་དག་དང་ལྡན་ན་རིགས་ཀྱི་བུ་འམ་རིགས་ཀྱི་བུ་མོ་དེས་ཏིང་ངེ་འཛིན་འདི་མནོད་པར་བྱའོ། །དེ་ལྟར་ཞུགས་པ་དེ་ནི་ཆོས་བརྒྱད་འཛིན་ཏོ། །བརྒྱད་གང་ཞེ་ན་འདི་ལྟ་སྟེ་ཤིན་ཏུ་བྱ་བའི་ཕྱིར་ཚུལ་ཁྲིམས་རྣམ་པར་དག་པ་དང ། ཤེས་རབ་དང་ལྡན་པས་ལྟ་བ་རྣམ་པར་དག་པ་དང ། ཡང་འབྱུང་བ་མེད་པས། ཤེས་རབ་རྣམ་པར་དག་པ་དང ། འཁོར་ཐམས་ཅད་ལ་དོན་ལ་མི་གཉེར་བས་གཏོང་བ་ཡོངས་སུ་དག་པ་དང ། ཤིན་ཏུ་བརྗོད་པ་མེད་པས་ཐོས་པ་རྣམ་པར་དག་པ་དང ། བྱང་ཆུབ་འཐོབ་པས་བརྩོན་འགྲུས་རྣམ་པར་དག་པ་དང ། རྟེན་པ་མེད་པས་བཀུར་སྟི་ཐོབ་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སེམས་ཅན་ཐམས་ཅད་ཀྱིས་མི་བསྐྱོད་པ་སྟེ། བཟང་སྐྱོང་བྱང་ཆུབ་སེམས་དཔའ་ནི་ཆོས་བརྒྱད་པོ་འདི་དག་རབ་ཏུ་འཛིན་ཏོ། །དེ་ནས་དེའི་ཚེ། བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །མཁས་པས་མཚན་མའི་འདུ་ཤེས་མི་བསྐྱེད་ཅིང ། །ང་རྒྱལ་ངའོ་སྙམ་པའི་ང་རྒྱལ་སྤང ། །བཟོད་པ་རྡུལ་བྲལ་འདུས་མ་བྱས་བསྐྱེད་ནས། །དེས་ནི་ཏིང་འཛིན་འདི་ཡང་ལུང་མནོད་བྱ། །མཁས་པས་སྟོང་པ་ཉིད་དང་མཚན་མེད་དང ། །ཞི་བ་མྱ་ངན་འདས་ལ་བརྩད་མི་བྱ། །མི་བསྐྱོད་ཆོས་ཅན་སྟོན་པ་དང་ཡང་འཐུན། །དེ་འདྲ་དེས་ནི་ཏིང་འཛིན་འདི་ལུང་མནོས། །མཁས་པ་ང་རྒྱལ་ཕྲག་དོག་མི་བྱེད་ཅིང ། །བྱས་གཟོ་སངས་རྒྱས་ཆོས་དང་དགེ་འདུན་ལ། །དང་བ་སྐྱེས་པར་གྱུར་ཅིང་མི་བསྐྱོད་པ། །དེས་ནི་ཏིང་འཛིན་འདི་ཡང་མྱུར་ལུང་ནོས། །འཇུངས་པ་མེད་ཅིང་མུན་བྲལ་མི་རྩུབ་ལ། །བརྟག་དང་ལྡན་ལ་ཤིན་ཏུ་དད་པ་ཅན། །འཆག་སར་ཞུགས 51.59a ཤིང་བརྩོན་འགྲུས་རྩོམ་བྱེད་པས། །ཏིང་འཛིན་འདི་ནི་རབ་ཏུ་འདོད་པར་བྱ། །དགེ་སློང་རྟག་ཏུ་བསོད་སྙོམས་སྤྱད་བྱ་སྟེ། །མགྲོན་དུ་བོས་པའང་སྤང་ན་སོགས་ཅི་སྨོས། །དོན་དམ་དམིགས་སུ་མེད་ལ་རབ་ཏུ་མཁས། །དེ་འདྲ་དེས་ནི་ཏིང་འཛིན་འདི་ཟུང་ཤིག་།གང་ལས་ཏིང་འཛིན་འཕགས་པ་འདི་བྲིས་སམ། །བཅངས་སམ་གཞན་དག་ལ་ཡང་བསྟན་བྱས་ན། །དེ་ལས་དེས་ནི་དང་པོར་འདི་ཐོབ་ནས། །མཁས་པས་དེ་ལ་སྟོན་པར་འདུ་ཤེས་བསྐྱེད། །ཡོན་ཏན་ཕུན་སུམ་ཚོགས་པར་འདིར་གནས་ཏེ། །གང་ཞིག་ཏིང་འཛིན་འདི་ལུང་ནོད་བྱེད་པ། །དེ་ནི་རྒྱལ་བས་གནང་ཞིང་རྡུལ་བྲལ་ལ། །རྣམ་པར་དག་པའི་ཆོས་བརྒྱད་མྱུར་དུ་འཛིན། །མཁས་པ་གང་ལ་ཡོན་ཏན་འདི་སྣང་བ། །ཚུལ་ཁྲིམས་ཀྱང་ནི་རྣམ་པར་དག་པར་འགྱུར། །ཏིང་འཛིན་དག་ཅིང་དེ་བཞིན་ལྟ་བ་དག་།དེས་ནི་སྲིད་པར་སྲིད་པ་དག་ཀྱང་སྦྱངས། །མཁས་པ་གང་ལ་ཡོན་ཏན་འདི་སྣང་བ། །ཡང་སྲིད་མེད་པས་ཤེས་རབ་རྣམ་པར་དག་།རྟེན་པ་དག་ཀྱང་མེད་ཅིང་གཏོང་བ་དག་།མང་དུ་ཐོས་ཤིང་ཉམས་པར་མི་འགྱུར་རོ། །མཁས་པ་གང་ལ་ཡོན་ཏན་འདི་སྣང་བ། །བརྩོན་འགྲུས་བརྩམས་ཤིང་བྱང་ཆུབ་ལས་མི་ཉམས། །རྙེད་དང་བཀུར་སྟི་ཅུང་ཟད་མི་རྟེན་ཏེ། །དེ་ནི་བླ་ན་མེད་པའི་བྱང་ཆུབ་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ། བཅུ་དགུ་པའོ།། །། བཟང་སྐྱོང་ཆོས་བརྒྱད་པོ་འདི་དག་དང་ལྡན་ན། བྱང་ཆུབ་སེམས་དཔའ་དེ་བཞིན་གཤེགས་པའི་སྟོབས་བཅུ་འཐོབ་བོ། །བཅུ་གང་ཞེ་ན། བཟང་སྐྱོང་འདི་ལ་དེ་བཞིན་གཤེགས་པ་གནས་ལ་གནས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། གནས་མ་ཡིན་པ་ལ་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་གནས་ལ་གནས་དང ། གནས་མ་ཡིན་པ་ལ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དང་པོ་སྟེ། 51.59b སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་འདི་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་འདས་པ་དང ། མ་འོངས་པ་དང ། ད་ལྟར་བྱུང་བའི་ལས་རྣམས་དང ། ལས་ཡང་དག་པར་འཛིན་པ་རྣམས་ཀྱི་གནས་དང ། རྒྱུ་དང ། རྣམ་པར་སྨིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་གཉིས་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང ། འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་མཁྱེན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང ། དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་གསུམ་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ཁམས་དུ་མ་དང ། ཁམས་སྣ་ཚོགས་པའི་འཇིག་རྟེན་མཁྱེན་པ 51.60a ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་དེ་བཞིན་གཤེགས་པས་ཁམས་དུ་མ་དང ། ཁམས་སྣ་ཚོགས་པའི་འཇིག་རྟེན་མཁྱེན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་བཞི་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང ། འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་སེམས་ཅན་གཞན་དག་དང ། གང་ཟག་གཞན་རྣམས་ཀྱི་མོས་པ་དུ་མ་མཁྱེན་པ། ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་སེམས་ཅན་གཞན་དང ། གང་ཟག་གཞན་མོས་པ་དུ་མ་དང ། མོས་པ་སྣ་ཚོགས་རྣམས་ཀྱི་མོས་པ་མཁྱེན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་ལྔ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང ། འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས། སེམས་ཅན་གཞན་དག་དང ། གང་ཟག་གཞན་རྣམས་ཀྱི་དབང་པོ་མཆོག་དང ། །མཆོག་མ་ཡིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས། སེམས་ཅན་གཞན་དག་དང ། གང་ཟག་གཞན་རྣམས་ཀྱི་དབང་པོ་མཆོག་དང ། མཆོག་མ་ཡིན་པ་མཁྱེན 51.60b པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང ། དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་དྲུག་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། རྣམ་པར་གཞག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། རྣམ་པར་གཞག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང ། དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་བདུན་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ། འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང ། འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་སྔོན་གྱི་གནས་རྗེས་སུ་དྲན་པ་མཁྱེན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་སྔོན་གྱི་གནས་རྗེས་སུ་དྲན་པ་མཁྱེན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་བརྒྱད་པ་སྟེ། སྟོབས 51.61a དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་བསྒྲོགས་ཤིང་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ལྷའི་མིག་མཁྱེན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས། ལྷའི་མིག་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དགུ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་ན། དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ཟག་པ་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་ཟག་པ་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་བཅུ་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ། འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་དེ་བཞིན་གཤེགས་པའི་སྟོབས་བཅུ་པོ་འདི་དག་བྱང་ཆུབ་སེམས་དཔས་ཡོངས 51.61b སུ་འཛིན་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་མགོན་པོ་སྐྱོབ་པ་ཡིས། །སྟོབས་རྣམས་ཀྱི་ནི་ས་བཤད་པ། །ཏིང་འཛིན་འདི་ལ་གནས་ན་ནི། །བྱང་ཆུབ་སེམས་དཔས་ཐོབ་པར་འགྱུར། །གནས་དང་དེ་བཞིན་གནས་མ་ཡིན། །ཡང་དག་ཇི་བཞིན་མཁྱེན་པ་ནི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ཀྱི་སྟོབས་དང་པོ། །འཇིག་རྟེན་མགོན་པོ་སྐྱོབ་མཛད་པ། རང་བྱུང་རྣམས་ཀྱི་སྟོབས་དང་པོ། །དེ་ལ་གནས་ནས་རྫོགས་སངས་རྒྱས། །སྲོག་ཆགས་རྣམས་ལ་ཆོས་སྟོན་ཏོ། །འདས་དང་མ་འོངས་ད་ལྟར་གྱི། །ལས་རྣམས་རབ་ཏུ་མཁྱེན་པ་ནི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ཀྱི་སྟོབས་གཉིས་པའོ། །མོས་པ་ཆུང་དང་མཆོག་རྣམས་དང ། །འབྲིང་དག་རབ་ཏུ་མཁྱེན་པ་ནི། །དཔལ་ལྡན་རྫོགས་པར་སངས་རྒྱས་པའི། །སྟོབས་གསུམ་པ་ནི་དེ་ཡིན་ནོ། །དབང་པོ་རྣོ་དང་བར་མ་དང ། །ཐ་མའི་ཁྱད་པར་མཁས་པ་ནི། །དྲང་སྲོང་ཆེན་པོ་རྫོགས་སངས་རྒྱས། །སངས་རྒྱས་རྣམས་ཀྱི་སྟོབས་བཞི་པའོ། །ཁམས་རྣམས་སྣ་ཚོགས་རབ་མཁྱེན་ཅིང ། །ཁམས་རྣམས་ཀྱི་ནི་ཕ་རོལ་ཕྱིན། །གནས་འདི་དག་ནི་རང་བྱུང་གི། །སྟོབས་ནི་ལྔ་པ་ཉིད་ཡིན་ནོ། །ཐམས་ཅད་དུ་ནི་འགྲོ་བའི་ལམ། །དེ་དང་དེར་ནི་བགྲོད་པ་སྟེ། །དེ་དག་ཐམས་ཅད་རབ་མཁྱེན་པ། །བསམ་གྱིས་མི་ཁྱབ་སྟོབས་དྲུག་པའོ། །བསམ་གཏན་རྣམ་ཐར་སྙོམས་པར་འཇུག་།ཀུན་ནས་ཉོན་མོངས་རབ་མཁྱེན་ཅིང ། །གནས་དང་གནས་མིན་མཁྱེན་པ་ནི། །སྟོབས་བདུན་པ་ཞེས་བྱ་བའོ། །སྔོན་གྱི་བྱེ་བ་ཚུན་ཆད་ཀྱི། །བདག་ནི་སྔོན་ན་གར་གནས་པའི། །སྔོན་གྱི་གནས་རྣམས་རབ་མཁྱེན་པ། །དེ་ཡི་སྟོབས་ཀྱང་བརྒྱད་པའོ། །འཆི་འཕོ་དང་ནི་སྐྱེ་བ་མཁྱེན། །མཐོ་རིས་དང་ནི་ངན་སོང་གཟིགས། །མིག་གི་ཕ་རོལ་ཕྱིན་ཐོབ་པ། །འདི་ནི་སྟོབས་ཀྱང་དགུ་པའོ། ། 51.62a གང་དག་ལྷ་འམ་གང་དག་མི། །ཟག་པ་ཐམས་ཅད་ང་ལ་ཟད། །ང་ལ་ཡང་སྲིད་ཟད་པ་ནི། །བསམ་གྱིས་མི་ཁྱབ་སྟོབས་བཅུ་པའོ། །འཇིག་རྟེན་མགོན་པོ་སྐྱོབ་མཛད་པ། །རང་བྱུང་རྣམས་ཀྱི་སྟོབས་འདི་དག་།ཏིང་འཛིན་འདི་ལ་གནས་ན་ནི། །དེ་དག་ཐམས་ཅད་རྙེད་མི་དཀའ། །བཟང་སྐྱོང་གིས་ཞུས་པའི་ཏིང་ངེ་འཛིན་ཀྱི་ལེའུ་སྟེ། ཉི་ཤུ་པའོ།། །། བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན། དེ་བཞིན་གཤེགས་པའི་མི་འཇིགས་པ་གང་དག་ཐོབ་པར་འགྱུར་བ་དེ་གང་ཞེ་ན། བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི་དེ་བཞིན་གཤེགས་པའི་མི་འཇིགས་པ་ནི་འདི་བཞིའོ། །བཞི་གང་ཞེ་ན། འདི་ལྟ་སྟེ། ང་ཡང་དག་པར་རྫོགས་པར་སངས་རྒྱས་པ་ལ་འདི་ལ་ཆོས་འདི་མངོན་པར་སངས་མ་རྒྱས་སོ་ཞེས་ང་ལ་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས། དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ། སིང་གེའི་སྒྲ་ཡང་དག་པར་སྒྲོགས་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེ་འམ་ལྷ་འམ་བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི། བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་མི་འཇིགས་པ་དང་པོའོ། །བཟང་སྐྱོང་གཞན་ཡང་ང་ཟག་པ་ཟད་པ་ལ་དེ་ལ་ཟག་པ་འདི་རྣམས་ཡོངས་སུ་ཟད་པར་མ་གྱུར་ཏོ། །ཞེས་འཇིག་རྟེན་ན། དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། 51.62b སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས། དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ་སེང་གེའི་སྒྲ་ཡང་དག་པར་སྒྲོགས་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི་བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི། དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་མི་འཇིགས་པ་གཉིས་པའོ། །བཟང་སྐྱོང་གཞན་ཡང་གང་ངས་བར་དུ་གཅོད་པའི་ཆོས་སུ་བསྟན་པ་དེ་དག་ལ་བསྟེན་ན་བར་དུ་གཅོད་པའི་ཆོས་སུ་མི་འགྱུར་རོ་ཞེས་ང་ལ་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི་བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་གསུམ་པའོ། །བཟང་སྐྱོང་གཞན་ཡང་གང་ངས་འཕགས་པའི་ངེས་པར་འབྱུང་བར་འགྱུར་བ་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་བའི 51.63a ཆོས་བཤད་པ་དེ་ལ་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ་སེང་གེའི་སྒྲ་ཡང་དག་པར་བསྒྲོགས་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི་བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བཞི་པའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་མི་འཇིགས་གང་ཡིན་པ། །མི་འཇིགས་རྣམས་ནི་བཤད་པར་བྱ། །སེང་གེའི་སྒྲ་ནི་བསྒྲགས་བྱས་ཏེ། །འཁོར་རྣམས་ལ་ནི་ཆོས་ཀྱང་སྟོན། །ཡང་དག་རྫོགས་སངས་རྒྱས་སྨྲ་ལ། །ཆོས་འདི་སངས་རྒྱས་མ་གྱུར་ཅེས། །རྒོལ་བ་དེ་ནི་མ་མཐོང་སྟེ། །དེ་ཕྱིར་སངས་རྒྱས་མི་འཇིགས་པའོ། །ཟག་པ་ཟད་པར་སྨྲས་པ་ལ། །ཟག་པ་འདི་དག་མ་ཟད་ཅེས། །ལྷ་དང་བཅས་པའི་འཇིག་རྟེན་ན། །རྒོལ་བ་དེ་ནི་མ་མཐོང་ངོ ། །གང་དག་བར་དུ་གཅོད་པའི་ཆོས། །དེ་དག་གང་གིས་བསྟེན་བྱས་ཀྱང ། །བར་དུ་གཅོད་པར་མི་འགྱུར་ཞེས། །ང་ལ་རྒོལ་བ་དེ་མ་མཐོང ། །མྱ་ངན་འདས་པ་ཐོབ་པའི་ཕྱིར། །ངས་ནི་ཆོས་མཆོག་གང་བཤད་པ། །མྱ་ངན་འདའ་བའི་ཚིག་གི་མཆོག་།དེས་ནི་ང་ལ་རྒོལ་བ་མེད། །འཇིག་རྟེན་མགོན་པོ་སྐྱོབ་མཛད་པས། །མི་འཇིགས་གསུངས་པ་འདི་དག་ནི། །ཏིང་འཛིན་འདི་ལ་གནས་པ་ཡི། །བྱང་ཆུབ་སེམས་དཔས་འཐོབ་པར་འགྱུར། །བཟང་སྐྱོང་གིས་ཞུས 51.63b པའི་ཏིང་ངེ་འཛིན་གྱི་ལེའུ་སྟེ། ཉི་ཤུ་རྩ་གཅིག་པའོ།། །། བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་པོ་དེ་དག་གང་ཞེ་ན། བཟང་སྐྱོང་འདི་ལྟ་སྟེ། ནམ་གྱི་ནུབ་མོ་དེ་བཞིན་གཤེགས་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནས། ནམ་གྱི་ནུབ་མོ་ཕུང་པོ་ལྷག་མ་མ་ལུས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དེའི་བར་དུ་དེ་བཞིན་གཤེགས་པ་ལ་འཁྲུལ་པ་མི་མངའོ། །ཅ་ཅོ་མི་མངའོ། །བསྙེལ་བ་མི་མངའོ། །སེམས་མཉམ་པར་མ་བཞག་པ་མི་མངའོ། ཐ་དད་པའི་འདུ་ཤེས་མི་མངའོ། །སོ་སོར་མ་བརྟགས་པའི་བཏང་སྙོམས་མི་མངའོ། །འདུན་པ་ཉམས་པ་མི་མངའོ། །བརྩོན་འགྲུས་ཉམས་པ་མི་མངའོ། །དྲན་པ་ཉམས་པ་མི་མངའོ། །ཏིང་ངེ་འཛིན་ཉམས་པ་མི་མངའོ། །ཤེས་རབ་ཉམས་པ་མི་མངའོ། །རྣམ་པར་གྲོལ་བ་ཉམས་པ་མི་མངའོ། །རྣམ་པར་གྲོལ་བའི་ཡེ་ཤེས་གཟིགས་པ་ཉམས་པའི་ཕུང་པོ་མི་མངའོ། །འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ། །མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ། །ད་ལྟར་གྱི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ། །དེ་བཞིན་གཤེགས་པའི་སྐུའི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ ། །དེ་བཞིན་གཤེགས་པའི་གསུང་གི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ ། །དེ་བཞིན་གཤེགས་པའི་ཐུགས་ཀྱི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ ། །བཟང་སྐྱོང་འདི་དག་ནི་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་གནས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ 51.64a འདི་དག་གསུངས་སོ། །གང་ལ་གནས་ནས་དེ་བཞིན་གཤེགས། །ཆོས་ཀྱི་འཁོར་ལོ་བསྐོར་མཛད་པའི། །སངས་རྒྱས་ཀྱི་ནི་མ་འདྲེས་ཆོས། །བཤད་ཀྱིས་ང་ལ་མཉན་པར་བྱོས། །ནམ་གྱི་ནུབ་མོ་རྫོགས་སངས་རྒྱས། །དེ་བཞིན་གཤེགས་པས་བྱང་ཆུབ་བརྙེས། །ནམ་གྱི་ནུབ་མོ་ལེན་མེད་པར། །མྱ་ངན་ལས་ནི་འདས་པར་གྱུར། །དེ་ཡི་བར་དུ་གང་གསུངས་དང ། །གསུང་དང་གསུང་བར་འགྱུར་བའི་རྣམས། །དེ་ཀུན་ཡང་དག་ཇི་བཞིན་ཏེ། །དེ་ནི་མ་འདྲེས་དང་པོའོ། །ང་ལ་འཁྲུལ་པ་ཅུང་ཟད་མེད། །ཅ་ཅོ་ང་ལ་མི་མངའོ། །གསུང་ལ་ཉམས་པ་མི་མངའ་སྟེ། །ང་ལ་ཞུམ་པ་མི་མངའོ། །ང་ལ་བསྙེལ་བ་ཡོད་མ་ཡིན། །ང་ལ་མ་བརྟགས་བཏང་སྙོམས་མེད། །ཆོས་ལ་སྣ་ཚོགས་བྱེད་པ་མེད། །རྟག་ཏུ་མཉམ་པར་བཞག་པ་ཉིད། །ང་ཡི་འདུན་པ་མ་ཉམས་ཤིང ། །བརྩོན་འགྲུས་ཀྱང་ནི་མ་ཉམས་སོ། །ཏིང་འཛིན་ལས་ནི་མི་གཡེང་ཞིང ། །ང་ལ་ཉམས་པ་མི་མངའོ། །ང་ཡི་ཤེས་རབ་ཉམས་པ་མེད། །རྣམ་པར་གྲོལ་བའང་ཉམས་པ་མེད། །ང་ཡི་རྣམ་གྲོལ་ཡེ་ཤེས་མཐོང ། །ང་ལའང་ཉམས་པ་མི་མངའོ། །ང་ནི་འདས་པའི་དུས་ལ་ཡང ། །ཡེ་ཤེས་ཐོགས་པ་མི་མངའོ། །མ་འོངས་པའི་དུས་ལ་ཡང ། །ང་ལ་སྒྲིབ་པ་མི་མངའོ། །ད་ལྟར་བྱུང་བའི་དུས་ལ་ཡང ། །ང་ལ་ཆགས་པ་མི་མངའོ། །སྐྱོབ་པ་ང་ནི་ཆོས་ཀུན་ལ། །ཡེ་ཤེས་བསྒྲིབས་པ་མེད་པའོ། །ང་ཡི་སྐུ་ཡི་ཕྲིན་ལས་ཀུན། །ཡེ་ཤེས་ཀྱི་ནི་རྗེས་སུ་འབྲང ། །ང་ཡི་གསུང་ཐུགས་ཕྲིན་ལས་ཀུན། །ཡེ་ཤེས་སྔོན་དུ་འགྲོ་བ་ཡིན། །གང་ལ་གནས་ནས་དེ་བཞིན་གཤེགས། །ཆོས་ཀྱི་འཁོར་ལོ་བསྐོར་མཛད་པའི། །རྫོགས་སངས་རྒྱས་ཀྱི་མ་འདྲེས་ཆོས། །བཅཝ་བརྒྱད་པོ་ནི་དེ་དག་གོ། །ཏིང་འཛིན་འདི་ལ་བསྒོམ་བྱས་ན། །སངས་རྒྱས་ཆོས་ནི་བཅཝ་བརྒྱད་དང ། །སྟོན་པ་ཡི་ནི་སྟོབས་བཅུ་དང ། །མི་འཇིགས་རྣམས་ནི་རྙེད་མི་དཀའ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གཉིས་པའོ།། །། 51.64b བཟང་སྐྱོང་གཞན་ཡང་བྱང་ཆུབ་སེམས་དཔས་ཏིང་ངེ་འཛིན་འདི་ལ་རྗེས་སུ་ཡི་རང་བ་བཞིས་རྗེས་སུ་ཡི་རང་བར་བྱའོ། །བཞི་གང་ཞེ་ན། འདི་ལྟ་སྟེ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཏིང་ངེ་འཛིན་འདི་ལ་གནས་ནས་ལུང་མནོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་བ་དེ་བཞིན་དུ་བདག་ཀྱང་ཏིང་ངེ་འཛིན་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་ངོ ། །བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་དང་པོའོ། །བཟང་སྐྱོང་གཞན་ཡང་ཇི་ལྟར་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བྱང་ཆུབ་སེམས་དཔའི་སྤྱད་པ་སྤྱོད་པར་འགྱུར་བ་ན་ཏིང་ངེ་འཛིན་འདི་ལ་གནས་ནས་ལུང་མནོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཐོབ་པར་བྱ་བ་དང ། མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་བར་འགྱུར་བ་དེ་བཞིན་དུ་བདག་ཀྱང་རྗེས་སུ་ཡི་རང་ངོ ། །བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་གཉིས་པའོ། །བཟང་སྐྱོང་གཞན་ཡང་བྱང་ཆུབ་སེམས་དཔས་འདི་སྐད་དུ་ཇི་ལྟར་ད་ལྟར་བྱུང་བའི་དུས་ན་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཏིང་ངེ་འཛིན་འདི་ལ་གནས་ནས་ལུང་མནོས་ཏེ། རྗེས་སུ་ཡི་རང་ནས། མང་དུ་ཐོས་པ་ཡོངས་སུ་རྫོགས་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང ། ད་ལྟར་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ལ་ཇི་ལྟར་རྗེས་སུ་ཡི་རང་བ་དེ་བཞིན་དུ་བདག་ཀྱང ། ད་ལྟར་གྱི་ཏིང་ངེ་འཛིན་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ 51.65a ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་ངོ་ཞེས་བརྗོད་པར་བྱ་སྟེ། བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་གསུམ་པའོ། །བཟང་སྐྱོང་གཞན་ཡང་བྱང་ཆུབ་སེམས་དཔས་འདི་སྐད་དུ་བདག་གིས་རྗེས་སུ་ཡི་རང་བ་དང་ལྡན་པའི་བསོད་ནམས་འདི་ཐམས་ཅད་སེམས་ཅན་ཐམས་ཅད་དང ། ལྷན་ཅིག་ཏུ་ཐུན་མོང་དུ་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གྱུར་ཅིག་།ཏིང་ངེ་འཛིན་འདི་ཡང་ཐོབ་པར་གྱུར་ཅིག་།མང་དུ་ཐོས་པ་ཡོངས་སུ་རྫོགས་པར་གྱུར་ཅིག་ཅེས་བརྗོད་པར་བྱ་སྟེ། བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་བསོད་ནམས་བཞི་པའོ། །བཟང་སྐྱོང་རྗེས་སུ་ཡི་རང་བ་དང་ལྡན་པའི་བསོད་ནམས་དང ། ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་དག་ནི། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་རྗེས་སུ་ཡི་རང་བ་དེ་དག་གིས་རྗེས་སུ་ཡི་རང་ཞིང་བསྔོས་ནས་བསོད་ནམས་ཀྱི་ཕུང་པོ་ཇི་སྙེད་ཅིག་འཛིན་པར་འགྱུར་བའི་དཔེ་ཙམ་ཞིག་བསྟན་ཏོ། །བཟང་སྐྱོང་འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་ཚེ་ལོ་བརྒྱ་ཕྲག་དུ་མ་ཐུབ་པ། ལོ་བརྒྱ་ཕྲག་དུ་མར་འཚོ་བ། མགྱོགས་པའི་མཐུ་རླུང་དང་འདྲ་བ་ཞིག་ཡོད་ལ་དེ་མི་འདུག་པར་ལོ་བརྒྱ་ཚང་བར་ཤར་ཕྱོགས་སུ་ཡང་སོང ། དེ་བཞིན་དུ་ལྷོ་དང ། ནུབ་དང ། བྱང་དང ། འོག་དང ། སྟེང་གི་ཕྱོགས་སུ་ཡང་སོང་ན། བཟང་སྐྱོང་དེ་ཅི་སྙམ་དུ་སེམས། ཚེ་ལོ་བརྒྱ་ཐུབ་ཅིང་ལོ་བརྒྱར་འཚོ་བ། མགྱོགས་པའི་མཐུ་རླུང་དང་འདྲ་བའི་སྐྱེས་བུ་དེས་མི་འདུག་པར་ཕྱོགས་དྲུག་ཏུ་ཕྱོགས་གཅིག་ཅིང་ཡང་ལོ་བརྒྱ་བརྒྱ་སོང་བའི་སྐྱེས་བུ་དེས་དཔག་ཚད་ཏུ་ཞིག་ཏུ་སོང་བར་གྱུར་པ་བགྲང་བ་འམ། གཞལ་བ་འམ། བསམ་པ་འམ། དཔག་པར་སྐྱེས་བུ་ལ་ལ 51.65b སྤྲོ་འམ། བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང ། གནས་བརྟན་ཤཝ་ར་དྭ་ཏིའི་བུ་དང ། ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་མ་གཏོགས་པར་དེ་ནི་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་བུད་མེད་དམ་སྐྱེས་པ་གང་ལ་ལ་ཞིག་གིས། སྐྱེས་བུ་ལོ་བརྒྱར་གནས་པ་རླུང་གི་མགྱོགས་པ་བཞིན་དུ་མགྱོགས་པར་འགྲོ་བ་དེའི་སྤྱོད་ཡུལ་རྣམས་གསེར་དང་དངུལ་གྱིས་གང་བར་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཕུལ་ལ་ཏིང་ངེ་འཛིན་འདི་མི་ཉན་པ་དང ། བྱང་ཆུབ་སེམས་དཔའ་གང་ཡང་ཏིང་ངེ་འཛིན་འདི་ཐོས་ནས་རྗེས་སུ་ཡི་རང་བ་བཞི་པོ་དེ་དག་གིས་རྗེས་སུ་ཡི་རང་ཞིང་རྗེས་སུ་ཡི་རང་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་འདོད་པས་སྔོ་བར་ཡང་བྱེད་ན། བཟང་སྐྱོང་བསོད་ནམས་ཀྱི་ཕུང་པོ་འདི་ལ། བསོད་ནམས་ཀྱི་ཕུང་པོ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོའོ། །སྟོང་དང ། སྟོང་ཕྲག་བརྒྱ་དང ། བྱེ་བ་ཕྲག་བརྒྱ་དང ། བྱེ་བ་ཁྲག་ཁྲིག་ཕྲག་བརྒྱ་སྟོང་དང ། གྲངས་དང ། ཆ་དང ། བགྲང་བ་དང ། དཔེ་དང ། རྒྱུར་ཡང་ཉེ་བར་མི་འགྲོའོ།། །། བམ་པོ་བདུན་པ་སྟེ་ཐ་མ། བཟང་སྐྱོང་ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་བྱང་ཆུབ་སེམས་དཔའ་རྣམས་ལ་ཇི་ཙམ་དུ་དོན་ཆེ་བ་ལ་ལྟོས། བཟང་སྐྱོང་དེ་བས་ན་རྣམ་གྲངས་འདིས་ཀྱང ། ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི། བསོད་ནམས་ཀྱི་ཕུང་པོ་བྱང་ཆུབ་སེམས་དཔའ་རྣམས་ཀྱི་དོན་ཆེན་པོ་ཡིན་པར་རིག་པར་བྱའོ། །བཟང་སྐྱོང་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཤིན་ཏུ་རྒྱས་པ། ཚད་མེད་པ། བསམ་གྱིས་མི་ཁྱབ་པ་བྱུང་བ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས 51.66a སེང་གེའི་བློ་གྲོས་ཤེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ ། །བཟང་སྐྱོང་དེའི་ཚེ་འཛམ་བུའི་གླིང་འདི་ཡང་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། ཉམས་དགའ་བ་དང ། སྐྱེ་བོ་མང་པོ་དང ། མིས་གང་བར་གྱུར་ཏོ། །བཟང་སྐྱོང་དེའི་ཚེ་འཛམ་བུའི་གླིང་འདི་ན་གྲོང་ཁྱེར་ཆེན་པོ་ཐམས་ཅད་ཀྱང་རིན་པོ་ཆེ་སྣ་བདུན་ལས་གྲུབ་པ་ཁྱིམ་བྱེ་བ་ཕྲག་དགུ་ཡོད་པ་དཔག་ཚད་བཅུ་གཉིས་པ་སྟོང་ཕྲག་དྲུག་བཅུ་རྩ་བརྒྱད་ཡོད་པར་གྱུར་ཏོ། །བཟང་སྐྱོང་དེའི་ཚེ་འཛམ་བུའི་གླིང་འདི་ཡང་འདི་ལྟ་སྟེ། དཔག་ཚད་སྟོང་ཕྲག་དྲུག་བཅུ་རྩ་བརྒྱད་ཡོད་དེ་ཡངས་ཤིང་རྒྱ་ཆེ་བར་གྱུར་ཏོ། །བཟང་སྐྱོང་དེའི་ཚེ་འཛམ་བུའི་གླིང་འདི་ན་གང་དུ་དེ་བཞིན་གཤེགས་པ་དེ་སྐྱེ་བའི་སར་གྱུར་པ་འདི་ལྟ་སྟེ། བཟང་པོ་བྱུང་བ་ཞེས་བྱ་བའི་གྲོང་ཁྱེར་ཆེན་པོ་གཅིག་གཅིག་ཡོད་དེ། གྲོང་ཁྱེར་ཆེན་པོ་དེ་ན་སྲོག་ཆགས་བྱེ་བ་ཕྲག་དྲུག་བཅུ་གནས་སོ། །བཟང་སྐྱོང་ཡང་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་བློ་གྲོས་དེའི་ཉན་ཐོས་འདུས་པ་དང་པོ་ནི་དགྲ་བཅོམ་པ་བྱེ་བ་ཕྲག་དགུ་བཅུ་འདུས་པར་གྱུར་ཏོ། །ཞག་བདུན་འདས་ནས་ཉན་ཐོས་འདུས་པ་གཉིས་པ་ནི་ཉན་ཐོས་བྱེ་བ་ཕྲག་དགུ་བཅུ་འདུས་པར་གྱུར་ཏོ། །ཞག་བདུན་པ་གཉིས་འདས་ནས་ཉན་ཐོས་འདུས་པ་གསུམ་པ་ནི་བྱེ་བ་ཕྲག་དགུ་བཅུ་འདུས་པར་གྱུར་ཏོ། །དག་པའི་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་ཡང་འདུས་པར་གྱུར་ཏོ། །དེ་ནས་ཕྱིས་ནི། བཅོམ་ལྡན་འདས་དེའི་ཉན་ཐོས་གྲངས་ཀྱིས་མི་ཆོད་པ་ཞིག་བྱུང་ངོ ། །བཟང་སྐྱོང་དེའི་ཚེ་དེའི་དུས་ན་མི་དེ་དག་དགེ་བ་བཅུའི་ལས་ཀྱི་ལམ་ཡང་དག་པར་ལེན་པར་གྱུར་ཏེ། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་གསུང་རབ་ལ་སེམས་ཅན་རྣམས་དགེ་བ་བཅུའི་ལས་ཀྱི་ལམ་དང་ལྡན་པར་འགྱུར་བ་བཞིན་ནོ། ། 51.66b བཟང་སྐྱོང་དེའི་ཚེ་སེམས་ཅན་རྣམས་ཀྱི་ཚེའི་ཚད་ནི་ལོ་བརྒྱད་ཁྲི་བཞི་སྟོང་ཐུབ་པར་གྱུར་ཏོ། །བཟང་སྐྱོང་དེའི་ཚེ་གྲོང་ཁྱེར་ཆེན་པོ་དེ་ན་འཁོར་ལོས་བསྒྱུར་བའི་རྒྱལ་པོ་ཁྱད་པར་དུ་འགྲོ་བ་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ་བུ་སྟོང་དུ་ཚང་བ་ཞིག་ཡོད་དེ། དེ་བཅོམ་ལྡན་འདས་དེ་བཞིན་གཤེགས་པ་སེང་གེའི་བློ་གྲོས་དེའི་དྲུང་དུ་སོང་ཞིང་བསྙེན་བཀུར་བྱེད་དོ། །བཟང་སྐྱོང་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་བློ་གྲོས་དེས་རྒྱལ་པོ་ཁྱད་པར་དུ་འགྲོ་བ་དེའི་བསམ་པ་ཐུགས་སུ་ཆུད་ནས་ཏིང་ངེ་འཛིན་འདི་བསྟན་ཏོ། །ཡང་དག་པར་བཤད་དོ། །བཟང་སྐྱོང་དེ་ནས་རྒྱལ་པོ་ཁྱེད་པར་དུ་འགྲོ་བ་དེས་ཏིང་ངེ་འཛིན་འདི་ཐོས་ནས་རྗེས་སུ་ཡིད་རང་ངོ ། །རྗེས་སུ་ཡིད་རང་ནས་ཀྱང ། བཅོམ་ལྡན་འདས་དེ་ལ་རིན་པོ་ཆེ་སྤར་གང་གིས་གཏོར་ཏོ། །དེ་དེ་ནས་ཤི་འཕོས་པ་དང ། དགེ་བའི་རྩ་བ་དེས་དེ་བཞིན་གཤེགས་པ་དེ་མྱ་ངན་ལས་འདས་པའི་འོག་ཏུ་ཡང ། འཛམ་བུའི་གླིང་འདིར་རྒྱལ་པོའི་ཁྱིམ་དེ་ཉིད་དུ་སྐྱེས་སོ། །བཟང་སྐྱོང་དེའི་ཚེ་དེ་བཞིན་གཤེགས་པ་དེའི་གསུང་རབ་ལ་དགེ་སློང་ཆོས་སྨྲ་བ་རིན་ཆེན་མཆོག་ཅེས་བྱ་བ་ཞིག་བྱུང་སྟེ། དེས་འཁོར་བཞི་ལ་ཏིང་ངེ་འཛིན་འདི་རྒྱ་ཆེར་སྟོན་ཏོ། །ཡང་དག་པར་བསྒྲོགས་སོ། །བཟང་སྐྱོང་དེའི་ཚེ་རྒྱལ་པོ་ཁྱད་པར་ཏུ་འགྲོ་བ་ཞེས་བྱ་བ་དེ་རྒྱལ་པོའི་བུ་ཚངས་པས་བྱིན་ཞེས་བྱ་བར་གྱུར་ཏེ། དེས་དགེ་སློང་དེ་ཏིང་ངེ་འཛིན་འདི་འཆད་པ་ཐོས་སོ། །ཐོས་ནས་ཀྱང་ཐོས་མ་ཐག་ཏུ་དང་བ་རྙེད་པར་གྱུར་ཏེ། དང་བའི་སེམས་ཀྱིས་གསེར་སྟོང་ཕྲག་བརྒྱ་དང ། རས་བཅོས་བུ་ཟུང་གཅིག་གིས་དགེ་སློང་དེ་ལ་གཡོགས་སོ། །བཟང་སྐྱོང་དེ་ནས་རྒྱལ་པོའི་བུ་ཚངས་པས་བྱིན་དེས་དགེ་སློང་དེ་ལས་ཏིང་ངེ་འཛིན་འདི་ཐོས་ནས། དགེ་སློང་དེས་ལེགས་པར་བཤད་པའི་ཕྱིར་དགབ་པ་བྱས་ནས 51.67a བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཏིང་ངེ་འཛིན་འདི་འདོད་པའི་ཕྱིར་ཆོས་སྨྲ་བའི་དགེ་སློང་དེ་ལས་སྲོག་ཆགས་སྟོང་དུ་ཚང་བ་དང་ལྷན་ཅིག་ཆོས་འདོད་པས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་རབ་ཏུ་བྱུང་ནས་ལོ་བརྒྱད་སྟོང་དུ་རང་གི་འཁོར་སྲོག་ཆགས་སྟོང་པོ་དེ་དག་དང་ལྷན་ཅིག་ཏུ་དགེ་སློང་དེ་ལ་བསྙེན་བཀུར་བྱེད་ཅིང་རྗེས་སུ་འབྲངས་ཀྱང་མཉན་པ་ཙམ་ཞིག་ཐོབ་པ་མ་གཏོགས་པར་དགེ་སློང་དེ་ལས་ཏིང་ངེ་འཛིན་འདི་མ་ཐོབ་བོ། །དེ་ཡང་ལན་གཉིས་མ་ཡིན་གྱི། ལན་ཅིག་ཁོ་ན་ཞིག་ཐོས་ནས་རྗེས་སུ་ཡིད་རང་བ་བཞི་པོ་འདི་དག་གིས་རྗེས་སུ་ཡི་རང་ངོ ། །དེས་སྲོག་ཆགས་སྟོང་དུ་ཚང་བ་དེ་དག་དང་ལྷན་ཅིག་ཏུ་དགེ་བའི་རྩ་བ་དེས་སངས་རྒྱས་སྟོང་ཕྲག་དྲུག་བཅུ་རྩ་བརྒྱད་མཉེས་པར་བྱས་སོ། །སྐྱེ་བ་ཐམས་ཅད་དུའང་ཏིང་ངེ་འཛིན་འདི་བཤད་ཅིང་གཞན་དག་ལའང་རྒྱ་ཆེར་ཡང་དག་པར་བསྒྲགས་ཏེ། དེས་རིམ་གྱིས་སངས་རྒྱས་གཞན་སྟོང་ཕྲག་དྲུག་བཅུ་རྩ་བརྒྱད་ཀྱང་མཉེས་པར་བྱས་སོ། །དེ་རྗེས་སུ་ཡིད་རང་བ་དང་ལྡན་པའི་དགེ་བའི་རྩ་བ་དེ་ཉིད་དང ། ཏིང་ངེ་འཛིན་འདི་ཐོབ་པས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་བརྟན་པ་ཞེས་བྱ་བར་གྱུར་ཏེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་གོ། །སྲོག་ཆགས་སྟོང་པོ་དེ་དག་ཀྱང་ཏིང་ངེ་འཛིན་གྱིས་ཡོངས་སུ་སྨིན་པར་བྱས་པའི་དགེ་བའི་རྩ་བ་འདི་ཉིད་ཀྱིས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ཏེ། བླ་ན་མེད་པ་ཡང་དག་པར 51.67b རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཐམས་ཅད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བརྟན་པ་ཞེས་བྱ་བར་གྱུར་ཏེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་གོ། །བཟང་སྐྱོང་ཏིང་ངེ་འཛིན་འདི་ལ་རྗེས་སུ་ཡིད་རང་བ་དང་ལྡན་པའི་བསོད་ནམས་ཀྱི་ཕུང་པོ་ཇི་ཙམ་དུ་དོན་ཆེ་བ་ལ་ལྟོས། འདི་ལྟར་རྗེས་སུ་ཡིད་རང་བ་དང་ལྡན་པའི་ཚིག་ཏུ་བརྗོད་པས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པར་བྱེད་ན། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་ཐོས་ནས་འཛིན་པ་དང ། ཀུན་ཆུབ་པར་བྱེད་པ་དང ། འཆང་བ་དང ། ཀློག་པ་དང ། གཞན་དག་ལ་ཡང་རྒྱ་ཆེར་ཡང་དག་པར་སྒྲོགས་པ་དང ། སྒོམ་པའི་སྦྱོར་བ་ལ་བརྩོན་པར་གནས་པ་ལྟ་ཅི་སྨོས་ཏེ། བཟང་སྐྱོང་ཏིང་ངེ་འཛིན་འདི་ཐོས་ནས། རྗེས་སུ་ཡིད་རང་བར་མི་བྱེད། ལུང་ནོད་པར་མི་བྱེད། ཀུན་ཆུབ་པར་མི་བྱེད་འཆང་བར་མི་བྱེད་གཞན་དག་ལ་ཡང་རྒྱ་ཆེར་ཡང་དག་པར་སྒྲོག་པར་མི་བྱེད། བསྒོམ་པའི་སྦྱོར་བ་ལ་བརྩོན་པར་མི་གནས་པ་ལྟ་སུ་ཞིག་ཡོད། དེ་ཅིའི་ཕྱིར་ཞེ་ན། བཟང་སྐྱོང་འདི་ལྟར་ཏིང་ངེ་འཛིན་འདི་ཐོས་པས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་བའི་ཕྱིར་རོ། །བཟང་སྐྱོང་དེ་བས་ན་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་རྣམས་ཀྱིས། གལ་ཏེ་ཏིང་ངེ་འཛིན་འདི་དཔག་ཚད་ཙམ་ན་ཡོད་པར་ཐོས་ན། བཟང་སྐྱོང་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེས་ཏིང་ངེ་འཛིན་འདི་མཉན་པའི་ཕྱིར་དཔག་ཚད་ཙམ་གྱི་བར་དེར་འགྲོ་བར་བྱའོ། །ཐོས་ནས་ཀྱང་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། གཞན་དག་ལ་ཡང་རྒྱ 51.68a ཆེར་བསྟན་པར་བྱ། བཤད་པར་བྱ། བསྒྲག་པར་བྱའོ། །བསྒོམ་པ་ལ་ཡང་མངོན་པར་དགའ་བར་བྱའོ། །བཟང་སྐྱོང་དཔག་ཚད་ཙམ་ལྟ་ཞོག་གི། དཔག་ཚད་གཉིས་ཙམ་འམ། དཔག་ཚད་གསུམ་ཙམ་འམ། དཔག་ཚད་བཞི་ཙམ་འམ། དཔག་ཚད་ལྔ་ཙམ་ནས་དཔག་ཚད་བཅུའི་བར་ཙམ་འམ། བཟང་སྐྱོང་དཔག་ཚད་བཅུ་ཙམ་ལྟའང་ཞོག་གི། གལ་ཏེ་བྱང་ཆུབ་སེམས་དཔས་དཔག་ཚད་བརྒྱ་ན་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལྗོངས་ཀྱི་ཕྱོགས་ཆེ་གེ་མོ་ཞིག་ན་སྤྱོད་དོ་ཞེས་ཏིང་ངེ་འཛིན་འདི་དཔག་ཚད་བརྒྱའི་བར་ཙམ་ན་ཡོད་པར་ཐོས་ན་ཡང ། བཟང་སྐྱོང་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེས་ཞུམ་པ་མེད་པ་དང ། སྙོམ་ལས་མེད་པ་དང ། འཇིགས་པ་མེད་པ་དང ། སྒྱིད་ལུག་པ་མེད་པ་དང ། གདུང་བ་མེད་པའི་སེམས་དང ། བརྩོན་འགྲུས་བརྩམས་པ་མི་ལྷོད་པས་ཏིང་ངེ་འཛིན་འདི་ཐ་ན་མཉན་པ་ཉི་ཙེ་ཙམ་གྱི་ཕྱིར་ཡང་དཔག་ཚད་བརྒྱ་པོ་དེར་འགྲོ་བར་བྱ་ན་ལུང་མནོད་པ་དང ། ཀུན་ཆུབ་པར་བྱ་བ་དང ། བསྒྲགས་པར་བྱ་བ་དང ། བསྒོམ་པར་བྱ་བའི་ཕྱིར་ལྟ་སྨོས་ཀྱང་ཅི་དགོས་ཏེ། དེ་ཅིའི་ཕྱིར་ཞེ་ན། བཟང་སྐྱོང་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནི་ཏིང་ངེ་འཛིན་འདི་ལ་རག་ལས་པའི་ཕྱིར་རོ། །བཟང་སྐྱོང་དེ་ལ་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེ་དག་གིས་དཔག་ཚད་བརྒྱ་པོ་དེར་སོང་ནས། གང་ལས་ཏིང་ངེ་འཛིན་འདི་ཐོས་པར་གྱུར་པའི་སློབ་དཔོན་དེ་ལ་དེས་སྟོན་པའི་འདུ་ཤེས་བསྐྱེད་པར་བྱའོ། །ཆོས་སྨྲ་བའི་རིགས་ཀྱི་བུ་དེ་ལ་བསྙེན་བཀུར་ཐམས་ཅད་ཀྱིས་བསྙེན་བཀུར་བྱེད་ཅིང་ཕྱི་བཞིན་འབྲང་བར་བྱའོ། །ཐ་ན་ཏིང་ངེ་འཛིན་འདི་མཉན་པ་ཙམ་གྱི་ཕྱིར་ཡང་ལོ་གཅིག་གམ། གཉིས་སམ། གསུམ་འམ། བཞི་འམ། ལྔ་འམ། ལོ་བཅུ་འམ། བརྒྱ་འམ། ཇི་སྲིད་འཚོ་བའི་བར་དུ་ཕྱི་བཞིན་འབྲང་བར་བྱ་ན་ལུང་མནོད་པ་འམ། ཀུན་ཆུབ་པར་བྱ་བ་འམ། བྲི་བ་འམ། བཅང་བ 51.68b འམ། བསྒྲགས་པ་འམ། བསྒོམ་པའི་ཕྱིར་ལྟ་སྨོས་ཀྱང་ཅི་དགོས། བཟང་སྐྱོང་རིགས་ཀྱི་བུ་འམ་རིགས་ཀྱི་བུ་མོ་དེས་རང་ཉམ་གཏང་བར་བྱ་སྟེ། བཏང་ནས་ཀྱང་སློབ་དཔོན་དེའི་བློ་བཞིན་དུ་འཇུག་པར་བྱའོ། །གུས་པ་དང་བཅས་པ་དང ། ཞེ་ས་དང་བཅས་པས་སློབ་དཔོན་གྱི་ཕྱིར་འབྲང་བར་བྱའོ། །བཀའ་བཞིན་དུ་བྱེད་པས་ཕྱི་བཞིན་འབྲང་བར་བྱའོ། །བཀའ་མི་གཅོག་པ་དང ། མཛའ་བ་བརྟག་པ་དང ། ངོ་མི་རྟག་པ་སྤངས་པ་དང ། ཉེས་པར་ལྟ་བ་མེད་པས་ཕྱི་བཞིན་འབྲང་བར་བྱའོ། །དགེ་བའི་བཤེས་གཉེན་གྱི་འདུ་ཤེས་ཀྱང་བསྐྱེད་པར་བྱའོ། །དེ་ལ་སྟོན་པའི་འདུ་ཤེས་ཀྱང་ཉེ་བར་གཞག་པར་བྱའོ། །བཟང་སྐྱོང་བྱང་ཆུབ་སེམས་དཔའ་དེས་སློབ་དཔོན་དེ་ལ་དེ་ལྟར་ནན་ཏན་བྱེད་ན་སྔོན་ཆོས་ཀྱིས་ཕོངས་པར་འགྱུར་བའི་ལས་བྱས་ཤིང་བསགས་པ་མ་གཏོགས་པར་ཐ་ན་ཏིང་ངེ་འཛིན་འདི་ཉན་པ་ཙམ་ཡང་མི་ཐོབ་པ་ནི་གནས་མ་ཡིན་སྐབས་མ་ཡིན་ཏེ་དེ་ནི་གནས་མེད་དོ། །བྱང་ཆུབ་སེམས་དཔའ་དེས་སློབ་དཔོན་དེ་ལ་ཁྲེལ་ཡོད་པ་དང ། བྱས་པ་གཟོ་བ་དང ། བྱས་པ་ཤེས་པར་བྱའོ། །དེ་ལྟར་ན་དེའི་ཏིང་ངེ་འཛིན་དེའི་ཚིག་དང་ཡི་གེ་དེ་ཡུན་རིང་དུ་གནས་པ་དང ། རྨོངས་པ་མེད་པར་འགྱུར་ན། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་གྲོང་གཞན་ན་ཡོད་པར་ཐོས་སམ་གྲོང་གི་ཞིང་གཞན་ན་ཡོད་པར་ཐོས་ལ། ཐོས་ནས་ཀྱང་ཐ་ན་མཉན་པ་ཙམ་གྱི་ཕྱིར་ཡང་འགྲོ་བར་བྱ་བ་ལྟ་ཅི་སྨོས། ལུང་མནོད་པར་བྱ་བ་དང ། ཀུན་ཆུབ་པར་བྱ་བ་དང ། བཅང་བར་བྱ་བ་དང ། བཀླག་པར་བྱ་བ་དང ། བྲི་བར་བྱ་བ་དང ། བསྒོམ་པར་བྱ་བ་དང ། གཞན་དག་ལ་ཡང་ཡང་དག་པར་བསྒྲགས་པར་བྱ་བའི་ཕྱིར་ལྟའང་སྨོས་ཀྱང་ཅི་དགོས། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་ཚོལ་བས་ཐ་ན་ཏིང་ངེ་འཛིན་འདི་ཐོས་པ་ཙམ་ཡང་ཐོབ་པ་ནི་བཟང་སྐྱོང་ཁྱོད་མོས་པར་བྱ་ཁྱོད་ཀྱིས་ཁོང་དུ་ཆུད་པར་བྱ་སྟེ། བྱང་ཆུབ་སེམས་དཔའ་དེ་ནི་ཏིང་ངེ་འཛིན་འདི་ཉིད་ཚོལ་བའི་དགེ་བའི་རྩ་བ་དང ། ཆོས་དོན་དུ་གཉེར་བའི 51.69a དགེ་བའི་རྩ་བ་དང་ཆོས་འདོད་པའི་དགེ་བའི་རྩ་བ་དང ། བརྩོན་འགྲུས་བརྩམས་པའི་དགེ་བའི་རྩ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་པར་རིག་པར་བྱ་ན། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་ལུང་ནོད་པར་བྱེད། ཀུན་ཆུབ་པར་བྱེད། འཆང་བར་བྱེད། ཀློག་པར་བྱེད་ལ། ལུང་མནོད་པ་དང ། ཀུན་ཆུབ་པར་བྱ་བ་དང ། བཅང་བར་བྱ་བ་དང ། བཀླག་པར་བྱས་ནས་ཀྱང་གཞན་དག་ལ་སྟོན་པར་བྱེད། སྒྲོགས་པར་བྱེད། ཡང་དག་པར་སྒྲོགས་པར་བྱེད་ཅིང་བསྒོམ་པའི་སྦྱོར་བ་ལ་བརྩོན་པར་གནས་པ་ལྟ་སྨོས་ཀྱང་ཅི་དགོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སྔོན་གྱི་དེ་བཞིན་གཤེགས་པ་མི་ཡི་མཆོག་།སེང་གེ་བློ་གྲོས་ཤེས་བྱ་རྗེས་དྲན་ཏེ། །དེར་ནི་མི་ཡི་དབང་པོ་རྒྱལ་པོ་དེས། །ཏིང་འཛིན་འདི་ནི་དེ་ཚེ་ཐོས་པར་གྱུར། །རྒྱལ་པོས་ཏིང་འཛིན་འདི་ནི་ཐོས་ནས་ཀྱང ། །སེམས་མགུ་དགའ་བ་དཔེ་མེད་པས་བཟུང་སྟེ། །མི་མཆོག་སངས་རྒྱས་སེང་གེའི་བློ་གྲོས་ལ། །སྤར་གང་གི་ནི་རིན་པོ་ཆེས་ཀྱང་གཏོར། །བཅོམ་ལྡན་འདས་ཀྱིས་ལེགས་གསུངས་ཏིང་འཛིན་འདི། །སེམས་ཅན་ཐམས་ཅད་ལ་ནི་ཕན་པར་ཤོག་།ཁྱོད་ལ་སྐྱབས་སུ་དེ་རིང་མཆིའོ་ཞེས། །དེ་སྙམ་བསམས་ནས་ཚིག་ཏུའང་བརྗོད་པར་གྱུར། །རྒྱལ་པོ་དེ་ནི་དེ་ཡི་ལས་ཀྱིས་ནི། །ཤི་ནས་དེ་ཉིད་དུ་ནི་ཡང་སྐྱེས་ཏེ། །དེས་ནི་དགེ་སློང་རིན་ཆེན་ཞེས་བྱ་བར། །ཕྱོགས་སུ་གྲགས་པ་མཐུ་ཆེན་མཐོང་བར་གྱུར། །དེ་ལས་དེ་ཉིད་ཀྱང་ནི་ཐོས་གྱུར་ཏེ། །ཐོས་ནས་དགའ་བ་ཤིན་ཏུ་རྒྱས་པ་སྐྱེད། །བསྐྱེད་ནས་བྱང་ཆུབ་ཞུགས་པ་དགའ་གྱུར་ཏེ། །གསེར་དང་གོས་ཀྱིས་དགེ་སློང་དགབ་བྱས་ནས། །དེ་ནི་ཏིང་འཛིན་འདི་ཡང་འདོད་པའི་ཕྱིར། །སྲོག་ཆགས་སྟོང་དང་ལྷན་ཅིག་རབ་ཏུ་བྱུང ། །ལོ་ནི་སྟོང་ཕྲག་བརྒྱ་སྙེད་ཚང་བར་ཡང ། །དེ་དག་ཀུན་གྱི་དགེ་སློང་དེ་ཕྱིར་འབྲངས། །ཐོས་པ་རྒྱ་མཚོ་ལྟ་བུའི་ཏིང་འཛིན་འདི། །ལན་གཉིས 51.69b མ་ཡིན་ལན་གཅིག་ཁོ་ན་ཐོས། །དེ་ཡི་དྲན་པ་སྐྱོ་བ་མ་སྐྱེས་ཤིང ། །ཏིང་འཛིན་ཞི་བ་འདི་ནི་ཡོངས་སུ་ཚོལ། །དེ་དག་ཀུན་གྱིས་ལས་འདི་བྱས་པའི་ཕྱིར། །སྟོང་ཕྲག་དྲུག་བཅུ་རྩ་བརྒྱད་ཚང་བ་ཡི། །སངས་རྒྱས་མཐུ་ཆེན་རྣམས་ནི་མཉེས་པར་བྱས། །དེ་ལས་ཏིང་འཛིན་འདི་ནི་ཐོས་པར་གྱུར། །དེ་བས་བདེ་བར་གཤེགས་པ་གཞན་དག་ཀྱང ། །སྟོང་ཕྲག་དྲུག་བཅུ་རྩ་བརྒྱད་ཚང་བར་བརྗོད། །བདེ་བར་གཤེགས་པ་སེང་གེའི་བློ་གྲོས་ལ། །བདག་ནི་རྗེས་སུ་ཡི་རང་བགྱིད་ཅེས་བརྗོད། །བསོད་ནམས་བྱས་པ་དེ་ཡིས་རྒྱལ་པོ་དེ། །བརྩོན་འགྲུས་བརྟན་པ་ཞེས་བྱའི་སངས་རྒྱས་གྱུར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཐམས་ཅད་དེ་ཡིས་སྐྱེ་ཞིང་འཆི་ལས་བཀྲོལ། །སྟོང་དུ་ཚང་བའང་རྗེས་སུ་བསློབ་སློབ་ནས། །སངས་རྒྱས་འགྱུར་ཏེ་དཔའ་བརྟན་ཞེས་བྱ་བར། །ལྷར་བཅས་འཇིག་རྟེན་ལ་ནི་གྲགས་པར་གྱུར། །ཏིང་འཛིན་སྒྲས་ཀྱང་བྱང་ཆུབ་རེག་གྱུར་ན། །སྲིད་པ་ཐམས་ཅད་ལ་ནི་མི་བརྟེན་པར། །གང་ཞིག་ཏིང་འཛིན་འདི་ནི་རྒྱ་ཆེ་བར། །སྟོན་པ་དེ་དག་བྱང་ཆུབ་འགྱུར་བར་ནི། །སྨོས་ཅི་དགོས་ཏེ་ནམ་ཡང་ཐེ་ཙོམ་མེད། །སངས་རྒྱས་ཀྱིས་གསུངས་ཏིང་འཛིན་ཞི་བ་འདི། །དཔག་ཚད་བརྒྱ་ན་གལ་ཏེ་ཡོད་གྱུར་ཀྱང ། །བྱང་ཆུབ་དོན་དུ་གཉེར་བ་ཉིན་མཚན་དུ། །ནམ་ཡང་མི་འདུག་སོང་སྟེ་མཉན་པར་བྱ། །གལ་ཏེ་སོང་ནས་འདི་ནི་མ་རྙེད་ན། །འོན་ཀྱང་དེ་ཡི་བསོད་ནམས་ཚད་མེད་དེ། །དེ་ནི་དེ་ཡི་བྱང་ཆུབ་བསྐྱེད་ཡིན་ན། །གང་གིས་སོང་སྟེ་འདི་ཐོས་སྨོས་མི་དགོས། །དེ་ཕྱིར་གང་ཞིག་ཏིང་འཛིན་འདི་འདོད་པས། །དང་པོར་ཚངས་པས་བྱིན་དེ་དྲན་པར་བྱོས། །དགེ་སློང་གང་ལ་ཏིང་འཛིན་འདི་ཡོད་ལ། །སྐྱོ་བའི་སེམས་ནི་མེད་པར་བསྟེན་པར་བྱ། །རྗེས་སུ་དྲན་ཏེ་སྐྱེ་བ་སྔ་མ་ལ། །སྟོང་ཕྲག་སུམ་བཅུ་རྩ་དྲུག་ལོ་ཚང་བར། །ངས་ནི་ཆོས་སྨྲ་བ་ལ་རྟག་བརྟེན་ཀྱང ། །ཏིང་འཛིན་འདི་ནི 51.70a ནམ་ཡང་ཐོས་མ་གྱུར། །སྔོན་གྱི་སངས་རྒྱས་བདེན་པ་ཞེས་བྱ་བྱུང ། །དེ་ན་དགེ་སློང་གཞོན་ནུ་ཐོས་མང་ཞིང ། །བདེ་བར་གཤེགས་པའི་བསྟན་པ་ནུབ་འོག་ཏུ། །དེ་ཚེ་དེས་ནི་ཏིང་འཛིན་འདི་ཉིད་བཟུང ། །ང་ནི་དེ་ན་རྒྱལ་རིགས་རྒྱལ་པོ་སྟེ། །དགེ་སློང་ཆེ་གེ་མོ་ཞིག་ཏིང་འཛིན་འདི། །འཛིན་གྱིས་དྲུང་དུ་ལེགས་པར་ཉོན་ཅིག་ཅེས། །རྨི་ལམ་དུ་ནི་ཏིང་འཛིན་འདི་ཐོས་ནས། །མྱུར་དུ་ལངས་ཏེ་རིངས་པའི་ཚུལ་གྱིས་ནི། །འདི་འཛིན་པའི་དགེ་སློང་དེ་བཙལ་ཏེ། །མཐོང་ནས་རབ་ཏུ་བྱུང་བ་དེ་ལས་ནི། །འདི་ཉིད་ལན་འགའ་ཐོས་ལྟ་སྲིད་དམ་ཞེས། །སྟོང་ཕྲག་དྲུག་བཅུ་རྩ་དྲུག་ལོ་ཚང་བར། །ངས་ནི་དགེ་སློང་དེ་ལ་དགའ་བས་བཀུར། །བདུད་ཀྱིས་བྱིན་གྱིས་བརླབས་པར་གྱུར་པའི་ཕྱིར། །ལན་འགའ་ཙམ་ཡང་ཐོས་པར་མ་གྱུར་ཏེ། །དེ་ཕྱིར་དགེ་སློང་རྣམས་དང་དགེ་སློང་མ། །དགེ་བསྙེན་དག་དང་དགེ་བསྙེན་མ་རྣམས་ལ། །ཏིང་འཛིན་ཐོས་ནས་མྱུར་དུ་ཟུང་ཤིག་ཅེས། །མོས་པར་བྱེད་ཅིང་ཁོང་དུ་ཆུད་པར་བྱེད། །དེར་ནི་བསྐལ་པ་ཚང་བར་འདུག་ནས་ཀྱང ། །ཏིང་འཛིན་འཛིན་པ་དེ་ནི་བསྙེན་ཅིང་བསྟེན། །བསྐལ་པ་སྟོང་དུ་ལེགས་པར་བསྙེན་བཀུར་བྱས། །དེས་ནི་ཏིང་འཛིན་འདི་ཡང་བཤད་པར་གྱུར། །ཏིང་འཛིན་རྡུལ་མེད་འདི་ལ་རབ་སྤྱོད་པའི། །དགེ་སློང་གྲོང་དུ་སློང་བ་དེ་ཉིད་ལ། །བཟའ་བ་དང་ནི་བཅའ་དང་མལ་ཆ་དང ། །དེ་བཞིན་གོས་ཀྱང་བྱེ་བ་བྱིན་པར་གྱུར། །བཅའ་དང་བཟའ་དང་མལ་སྟན་དེ་བཞིན་གོས། །མང་པོ་བྱ་བ་ཐམས་ཅད་ལྟ་འང་ཞོག་།གལ་ཏེ་རང་གི་ཤ་བྱིན་ཐོབ་ན་ནི། །ལེགས་སྤྱད་ཡིན་ན་ཟས་སྐོམ་སྨོས་ཅི་དགོས། །རྟག་ཏུ་བྲན་གྱུར་བསྙེན་བཀུར་བྱེད་ཅིང་ནི། །ཏིང་འཛིན་ཞི་བ་འདི་འང་ཚོལ་བྱེད་ལ། །མཁས་པས་རྙེད་ནས་དེ་འང་མྱུར་བྱེད་ཀྱང ། །དེ་ལ་བྱས་པ་གཟོ་བ་མ་ཡིན་ནོ། །བསྐལ་པ་མང་པོ་བྱེ་བར་བཙལ་ཀྱང་ནི། །ཏིང་འཛིན་འདི་ནི་ཤིན་དུ་རྙེད་པར་དཀའ། །འདི་ཡི་སྒྲ་ཡང་བརྒྱ་ལམ་ཐོས་གྱུར་ན། །ཁ་ཏོན་བྱས་ནས་སྟོན་པ་སྨོས 51.70b ཅི་དགོས། །གང་གིས་གང་གཱའི་བྱེ་སྙེད་འཇིག་རྟེན་ཁམས། །རིན་པོ་ཆེས་ནི་བཀང་སྟེ་བྱིན་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གང་གཱའི་བྱེ་སྙེད་དུ། །གང་རྟག་བརྩོན་འགྲུས་བརྩམས་ཏེ་གནས་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གང་གཱའི་བྱེ་སྙེད་དུ། གང་རྟག་མི་རྟེན་བསམ་གཏན་སྒོམ་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གང་གཱའི་བྱེ་སྙེད་དུ། །གང་རྟག་ཤེས་རབ་གནས་པར་གྱུར་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གསུམ་པའོ།། །། བཟང་སྐྱོང་དེ་བས་ན་དད་པའི་རིགས་ཀྱི་བུ་འམ། རིགས་ཀྱི་བུ་མོས་ཏིང་ངེ་འཛིན་འདི་གུས་པར་བྱས་ཏེ་མཉན་པར་བྱའོ། །ཐོས་ནས་ཀྱང་གཟུང་བར་བྱ། ཀུན་ཆུབ་པར་བྱ། ཡི་གེར་བྲི་བར་བྱ། བཅང་བར་བྱ། བཀླག་པར་བྱའོ། །བཟུང་ཞིང་ཀུན་ཆུབ་པར་བྱས་ནས་ཀྱང་གཞན་དག་ལ་ཡང་རྒྱ་ཆེར་ཡང་དག་པར་བསྒྲགས་པར་བྱའོ། །ལེགས་པར་བྲིས་ཏེ་གཞག་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང་ང་འདས་པའི་འོག་ཏུ་མ་འོངས་པའི་དུས་ན། བྱང་ཆུབ་སེམས་དཔའ་དད་པ་ཅན་དང་བ། བརྟག་པ་མང་བ། མང་པོ་འབྱུང་བར་འགྱུར་ཏེ། དེ་དག་སེམས་ཅན་རྣམས་ལ་ཕན་པ་དང་བདེ་བའི་ཕྱིར་མང་དུ་ཐོས་པ་ཚོལ་བར་འགྱུར་རོ། །དེ་དག་མང་དུ་ཐོས་པ་ཚོལ་བས་དམ་པའི་ཕྱིར་ཕྱོགས་དང་ཕྱོགས་མཚམས་དག་ཏུ་རྒྱུ་བར་འགྱུར་ཏེ། བཟང་སྐྱོང་སེམས་ཅན་དེ་ལྟ་བུ་ཆོས་དོན་ཏུ་གཉེར་བ། ཆོས་ལ་མོས་པ། ཆོས་འདོད་པ། ཆོས་ཡོངས་སུ་འཛིན་པ། ཤིན་ཏུ་རྒྱས་པ་འཛིན་པའི་སེམས་ཅན་རྣམས་ཀྱི་དོན་དང་ཆེད་དུ 51.71a ཏིང་ངེ་འཛིན་འདི་ལུང་མནོས་ཤིང་བསྟན་ལ། དེ་བཞིན་གཤེགས་པ་རྣམས་ཀྱི་བྱིན་གྱིས་བརླབས་ཀྱིས་བྱིན་གྱིས་བརླབས་ཏེ། གླེགས་བམ་ཆེན་པོར་ལེགས་པར་བྲིས་ནས་དེ་བཞིན་གཤེགས་པ་རྣམས་ཀྱི་ཕྱག་རྒྱས་བཏབ་ལ་གཞག་པར་བྱའོ། །བཟང་སྐྱོང་དེ་ལ་དེ་བཞིན་གཤེགས་པ་རྣམས་ཀྱི་ཕྱག་རྒྱ་གང་ཞེ་ན། འདི་ལྟ་སྟེ། ཆོས་ཐམས་ཅད་བྱེད་པ་མེད་པ། བྱ་བ་མེད་པ། མངོན་པར་འདུས་མ་བྱས་པ། ཆགས་པ་མེད་པ། དམིགས་སུ་མེད་པ། སྟོང་པ་ཉིད། མཚན་མ་མེད་པ། སྨོན་པ་མེད་པ། མཚན་ཉིད་མེད་པ། གཉིས་སུ་མེད་པ། འཇུག་པ་མེད་པ། བརྟེན་པ་མེད་པ། བགྲང་དུ་མེད་པ། རྣམ་པར་གཞག་ཏུ་མེད་པ། གཟུང་བ་མེད་པ། དོར་བ་མེད་པ། གནས་པ་མེད་པ། ཆོས་ཐམས་ཅད་རྟག་པ་མེད་པ། ཆད་པ་མེད་པ། རྒྱུ་ཟད་པ། སྡུག་བསྔལ་ཟད་པ། དངོས་པོ་ཟད་པ། མི་སྐྱེ་བ། མི་འགག་པ། མི་གནས་པ། མི་འཇིག་པ། ལམ་མེད་པ། ལམ་གྱི་འབྲས་བུ་མེད་པ། འཕགས་པ་ཐམས་ཅད་ཀྱིས་མ་དཀྲུགས་པ། བྱིས་པ་ཐམས་ཅད་ཀྱིས་སྤངས་པ། མི་ཤེས་པ་རྣམས་ཀྱིས་བོར་བ། མཁས་པ་རྣམས་ཀྱིས་ཡོངས་སུ་བཟུང་བ་སྟེ། བཟང་སྐྱོང་འདི་ནི་དེ་བཞིན་གཤེགས་པ་རྣམས་ཀྱིས་ཕྱག་རྒྱ་གང་གིས་དེ་བཞིན་གཤེགས་པས་གསུངས་པ་རྣམས་ལ་བཏབ་པའི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའོ། །བཟང་སྐྱོང་དེ་བས་ན་བྱང་ཆུབ་དོན་དུ་གཉེར་བའི་རིགས་ཀྱི་བུ་འམ། རིགས་ཀྱི་བུ་མོས་ཕྱི་མའི་ཚེ་ཕྱི་མའི་དུས་དེར་ཏིང་ངེ་འཛིན་འདི་ལུང་མནོད་པར་འདོད་པས། ལུང་མནོས་ཤིང་ཁ་ཏོན་དུ་བྱས་ནས་གཞན་དག་ལ་ཡང་རྒྱ་ཆེར་ཡང་དག་པར་བསྒྲགས་པར་བྱའོ། །བཟང་སྐྱོང་དེ་ལ་ཆོས་བཞི་དང་ལྡན་ན་བྱང་ཆུབ་སེམས་དཔའ་ཐ་ན་ཏིང་ངེ་འཛིན་འདི་མཉན་པའི་ཕྱིར་ཡང་བརྩོན་པར་འགྱུར་ན་ལུང་མནོད་པ་དང ། ཁ་ཏོན་བྱ་བའི་ཕྱིར་ལྟ་སྨོས་ཀྱང་ཅི་དགོས། བཞི་གང་ཞེ་ན། སྔོན་ལྷག་པའི་བསམ་པ་ཡོངས་སུ་སྦྱངས་པ་དང ། སྔོན་སྨོན་ལམ་བཏབ་པ་དང ། ཐམས་ཅད་མཁྱེན་པའི་ཡེ་ཤེས་ལ་མོས 51.71b པ་དང ། ཇི་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཡང་དག་པར་བསྒྲུབས་པའི་ཆོས་དཀོན་མཆོག་གི་མཛོད་འདི་འཆང་བར་འགྱུར། སྟོན་པར་འགྱུར་སྙམ་ནས་ཆོས་ཀྱི་ཚུལ་ཐམས་ཅད་ལེན་པ་སྟེ། བཟང་སྐྱོང་ཆོས་བཞི་པོ་འདི་དག་དང་ལྡན་ན་བྱང་ཆུབ་སེམས་དཔའི་ཏིང་ངེ་འཛིན་འདི་མཉན་པ་དང ། གཟུང་བ་དང ། བཅང་བའི་ཕྱིར་བརྩོན་པར་འགྱུར་རོ། །བཟང་སྐྱོང་གཞན་ཡང་ཆོས་བཞི་དང་ལྡན་ན་བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་བ་ལ་ཐ་ན་ཡི་གེར་བྲི་བ་ཙམ་གྱི་ཕྱིར་ཡང་བརྩོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། སངས་རྒྱས་ཡིད་ལ་བྱེད་པ་དང ། ཕྱི་ཕྱིར་ཞིང་ཆོས་རྗེས་སུ་དྲན་པ་ལ་མཁས་པ་དང ། ཆོས་ཐམས་ཅད་དམིགས་པ་ཡོངས་སུ་གཅོད་པ་ཡིད་ལ་བྱེད་པ་དང ། མཚན་མ་ཐམས་ཅད་རྣམ་པར་འཇིག་པ་ལ་མཁས་པ་སྟེ། བཟང་སྐྱོང་ཆོས་དེ་བཞི་དང་ལྡན་ན་བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་བ་ལ་ཐ་ན་བྲི་བ་ཙམ་གྱི་ཕྱིར་ཡང་བརྩོན་པར་འགྱུར་རོ། །བཟང་སྐྱོང་དེ་ལ་ཆོས་བཞི་དང་ལྡན་ན། བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་བ་ལ་བརྩོན་པར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། ཆོས་ཐམས་ཅད་གཟུང་དུ་མེད་པའི་དངོས་པོར་ཡོངས་སུ་གཅོད་པའི་ཤེས་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱའོ། །སངས་རྒྱས་ཀྱི་སྐུ་དམིགས་པ་རྣམ་པར་སྒོམ་པ་ལ་མཁས་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱའོ། །དམིགས་པ་ཐམས་ཅད་དུ་སངས་རྒྱས་དམིགས་པ་ཡིད་ལ་བྱེད་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱའོ། །ཆོས་ཐམས་ཅད་དངོས་པོ་དང་བྲལ་བར་མོས་པ་ལ་མཁས་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱ་སྟེ། བཟང་སྐྱོང་ཆོས་དེ་བཞི་དང་ལྡན་ན། བྱང་ཆུབ་སེམས་དཔའ་ཏིང་ངེ་འཛིན་འདི་བཙལ 51.72a བ་ལ་མངོན་པར་བརྩོན་པར་རིག་པར་བྱའོ། །བཟང་སྐྱོང་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་དམ་པའི་ཆོས་ཀུན་ཏུ་འཁྲུག་པའི་ཚེ་སེམས་ཅན་ཐམས་ཅད་ལ་ཕན་གདགས་པ་དང ། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་གང་ལ་ལ་ཞིག་ཏིང་ངེ་འཛིན་འདི་བཙལ་བ་ལ་བརྩོན་པར་གྱུར་ཅིང ། དེ་འདི་སྙམ་དུ་ཏིང་ངེ་འཛིན་འདི་ཇི་ལྟར་ན་ཤིན་ཏུ་རྒྱས་པ་དང ། རྒྱ་ཆེ་བ་དང ། ཡུན་རིང་དུ་གནས་པར་འགྱུར་སྙམ་དུ་སེམས་བསྐྱེད་པར་གྱུར་ན། རིགས་ཀྱི་བུ་དེའི་བསོད་ནམས་མང་དུ་བསྐྱེད་དེ། བསོད་ནམས་ཀྱི་ཕུང་པོ་དེ་ཐམས་ཅད་མཁྱེན་པ་ཉིད་དུ་གཞོལ་བར་རིག་པར་བྱ་བ་མ་གཏོགས་པར་བསོད་ནམས་ཀྱི་ཕུང་པོ་དེའི་མཐའ་རྟོགས་པར་མི་ནུས་སོ། །དེ་དག་གི་བསོད་ནམས་ཀྱི་ཕུང་པོ་དེ་སྨོན་ལམ་གྱི་དབང་གིས་མྱུར་དུ་ཐམས་ཅད་མཁྱེན་པ་ཉིད་དུ་གཞོལ་བར་འགྱུར་ཏེ། དགེ་བའི་རྩ་བའི་ཚོགས་ཆེན་པོ་དང་ལྡན་པ། བདག་མེད་པར་གནས་པ་ལས་ངེས་པར་བྱུང་བ། གང་དག་གིས་བསྐལ་པ་ཚད་མེད་གྲངས་མེད་གཞལ་དུ་མེད་བསམ་གྱིས་མི་ཁྱབ་པ་འམ། དེ་བས་ཀྱང་ལྷག་པར་གོ་ཆ་ཆེན་པོ་བགོས་པ་རྣམས་ནི་མ་གཏོགས་ཏེ། དེ་དག་ཐམས་ཅད་ནི་བསམ་པ་ཇི་ལྟ་བ་བཞིན་དུ་ཐམས་ཅད་ཡོངས་སུ་རྫོགས་པར་འགྱུར། དེ་དག་ཐམས་ཅད་ནི་སྤྱོད་པའི་ཁྱད་པར་ཇི་ལྟ་བ་དང ། ཚོགས་ཇི་ལྟ་བ་བཞིན་དུ་ངེས་པར་འབྱུང་ངོ ། །བཟང་སྐྱོང་བྱང་ཆུབ་སེམས་དཔའི་ཐེག་པ་ལ་ཞུགས་པའི་རིགས་ཀྱི་བུ་འམ། རིགས་ཀྱི་བུ་མོ་ཆོས་ཐམས་ཅད་ཀྱི་ཕ་རོལ་ཏུ་ཕྱིན་པ་དང ། ཐམས་ཅད་མཁྱེན་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ཐོབ་པར་འདོད་པ་དང ། དགེ་བའི་རྩ་བ་རྣམ་པར་དག་པ་ཐོབ་པར་འདོད་པས་ཕྱི་མའི་དུས་ཕྱི་མའི་ཚེ་འཇིགས་པ་ཆེན་པོ་འབྱུང་བ་དམ་པའི་ཆོས་རྣམ་པར་འཇིག་པའི་དུས་དེར་ཏིང་ངེ་འཛིན་འདི་ཡི་གེར་བྲི་བ་དང ། ལུང་མནོད་པ་དང ། ཁ་ཏོན་བྱ་བ་དང ། གཞན་དག་ལ་ཡང་རྒྱ་ཆེར་ཡང་དག་པར་བསྒྲགས་པར་བྱ་བའི་ཕྱིར་སྦྱོར་བར་བྱའོ། །དེ་ཅིའི་ཕྱིར་ཞེ་ན། ཆོས 51.72b ཐམས་ཅད་ཀྱི་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ནི་བཟང་སྐྱོང་ཏིང་ངེ་འཛིན་འདིའི་ནང་དུ་འདུས་སོ། །སངས་རྒྱས་རྗེས་སུ་དྲན་པ་ལ་མཁས་པ་བསྒྲུབས་པས་ཆོས་ཐམས་ཅད་དངོས་པོ་མེད་པའི་རང་བཞིན་དུ་རྟོགས་པ་འདི་ནི་སངས་རྒྱས་རྗེས་སུ་དྲན་པ་སྟེ། དེ་ལ་གནས་པའི་བྱང་ཆུབ་སེམས་དཔའ་རྣམས་དམིགས་པ་ཐམས་ཅད་སངས་རྒྱས་ལ་དམིགས་པར་མོས་སོ། །དམིགས་པ་ཐམས་ཅད་དེ་བཞིན་གཤེགས་པའི་མཐར་འཇུག་པར་བྱེད་དོ། །དམིགས་པ་དངོས་པོ་ཐམས་ཅད་རང་བཞིན་གྱིས་ཡ་མ་བརླར་ཤེས་སོ། །དེ་དག་ཇི་ལྟ་ཇི་ལྟར་དེ་བཞིན་གཤེགས་པ་རྣམས་དམིགས་པར་བྱེད་པ་དང ། ཡིད་ལ་བྱེད་པ་དེ་ལྟ་དེ་ལྟར་དེ་དག་དེ་བཞིན་གཤེགས་པ་མཐོང་བ་རྣམ་པར་དག་སྟེ། དེ་ལྟ་བུ་ལ་གནས་པ་དེ་དག་ནི་ཕྱོགས་གང་དུ་ཡང་དེ་བཞིན་གཤེགས་པ་མངོན་སུམ་དུ་མི་འགྱུར་བ་མེད་དེ། དེ་དག་ནི་ཕྱོགས་ཐམས་ཅད་དུ་དེ་བཞིན་གཤེགས་པ་མཐོང་བ་རྣམ་པར་སྦྱོང་ངོ ། །དེ་བཞིན་གཤེགས་པ་མཐོང་བ་རྣམ་པར་དག་ནས་ཚེགས་ཆུང་ངུས་འཇིག་རྟེན་གྱི་ཁམས་འདི་ཉིད་དུ་དམིགས་པ་བྱས་ན་འདི་ཉིད་དུ་དེ་བཞིན་གཤེགས་པ་དེ་དག་མངོན་སུམ་དུ་མཐོང་བར་འགྱུར་རོ། །ཚད་མེད་པས་དེ་དག་གི་དེ་བཞིན་གཤེགས་པ་མངོན་སུམ་དུ་མཐོང་བ་ཡོངས་སུ་དག་པར་འགྱུར་ཏེ། དེ་བཞིན་གཤེགས་པ་ཚད་མེད་པ་རྣམས་དེའི་མིག་ལམ་དུ་སྣང་བར་འགྱུར་རོ། །དམིགས་པ་ཐམས་ཅད་ཀྱི་རང་བཞིན་ནི་གཟུང་བ་མེད་པའི་ཕྱིར། དམིགས་པ་གཅིག་གིས་དམིགས་པ་ཐམས་ཅད་འཛིན་པ་ཡང་མ་ཡིན། དམིགས་པ་ཐམས་ཅད་ཀྱིས་དམིགས་པ་གཅིག་འཛིན་པ་ཡང་མ་ཡིན་ནོ། །ཆོས་ཐམས་ཅད་ཀྱི་རང་བཞིན་ཉེ་བར་བརྟགས་ན་ཤིན་ཏུ་ཉེ་བར་ཞི་བའི་ཕྱིར་དངོས་པོ་མེད་པ་ཉིད་དུ་གྲུབ་པའོ། །བཟང་སྐྱོང་དེ་ལྟ་བུ་ལ་གནས་པ་དེ་དག་ནི་དེ་བཞིན་གཤེགས་པ་ཐམས་ཅད་མཐོང་བ་རྣམ་པར་དག་པར་འགྱུར་ལ། རྣམ་པར་དག་ནས་ཀྱང་རློམ་སེམས་སུ་མི་བྱེད། སྤྲོས་པར་མི་བྱེད་དེ། 51.73a དེ་དག་ནི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་བསྒོམ་པ་ཡོངས་སུ་རྫོགས་པར་འགྱུར་རོ། །བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱང་ཡོངས་སུ་རྫོགས་པ་ལ་གནས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དེ་བཞིན་གཤེགས་པས་གང་དག་གསུངས་པ་ནི། །ཇི་ལྟ་བཞིན་དུ་ཡེ་ཤེས་འཇུག་པ་ཡིན། །དེ་ནི་འཇིག་རྟེན་གཙོ་བོ་སྟོན་པའི་སྲས། །ཏིང་ངེ་འཛིན་འདི་ལ་ནི་ཡིད་ཀྱང་བརྩོན། །གང་གིས་སངས་རྒྱས་དམིགས་པ་རྗེས་དྲན་པ། །དམིགས་པའི་དོན་ནི་དུ་མ་མཐོང་བར་འགྱུར། །དེ་ལ་ཏིང་འཛིན་ཞི་བ་བལྟ་དཀའ་འདི། །ཕྱི་མའི་དུས་ན་མངོན་སུམ་དུ་འང་འགྱུར། །མཁས་པ་གང་ཞིག་ཆོས་ཀུན་མི་རྟེན་ཅིང ། །སེམས་ཅན་དག་ལ་ཕན་ཕྱིར་ཡིད་བརྩོན་པ། །དེ་དག་ཕྱི་དུས་འཇིགས་པ་ཆེན་པོའི་ཚེ། །ཏིང་ངེ་འཛིན་འདི་ལ་ནི་སྦྱོར་བར་འགྱུར། །སེམས་ཅན་རྣམས་ལ་ཕན་ཞིང་གཟུང་བའི་ཕྱིར། །གང་ཞིག་རྟག་ཏུ་བལྟ་དཀའ་ཆོས་འདི་ལ། །དྲན་པ་བརྟན་པར་འཇོག་ཅིང་བརྩོན་བྱེད་པ། །དེ་ཡི་ལག་ཏུ་ཏིང་འཛིན་འདི་འགྲོ་འགྱུར། །གང་ཞིག་དྲན་དང་བློ་གྲོས་རྟོགས་པ་དག་།སངས་རྒྱས་དམིགས་པར་རྟག་ཏུ་འཇོག་བྱེད་ཅིང ། །གཞན་དྲིང་མི་འཇོག་རྣལ་འབྱོར་བརྩོན་པ་དེ། །ཏིང་འཛིན་ཆེན་པོ་འདི་ལ་གནས་པར་འགྱུར། །རྗེས་སུ་གཟུང་ཕྱིར་བལྟ་དཀའ་ཚིག་ལ་གནས། །འཇིག་རྟེན་ཐམས་ཅད་ལ་ནི་ཡིད་སྐྱོ་ཞིང ། །མཁས་པ་སྲིད་པ་ཐམས་ཅད་མི་འདོད་པ། །དེ་དག་ཏིང་འཛིན་ཆེན་པོ་འདི་ལ་བརྩོན། །བྱང་ཆུབ་འདོད་ཅིང་ཕན་ཕྱིར་སྙིང་བརྩེ་གང ། །དེ་བཞིན་གཤེགས་པ་རྣམས་ཀྱི་སྐུ་ལ་རྟོག་།ཞི་བའི་ཆོས་ལ་སྨོན་ལམ་འདེབས་བྱེད་པ། །དེ་དག་ཏིང་འཛིན་འདི་ལ་བརྟེན་པར་བརྩོན། །འཐབ་པ་མེད་ཅིང་རྩོད་པ་མེད་ལ་ཞི། ། 51.73b བདེ་བར་གཤེགས་པས་བསྟོད་པའི་ཆོས་ཚོལ་ཞིང ། །སངས་རྒྱས་དམིགས་པ་ལ་ནི་རྟག་གནས་པ། །དེ་དག་ཏིང་འཛིན་འདི་ལ་བརྟག་བརྩོན་ཡིན། །གང་དག་ཕྱི་མའི་སྡིག་པའི་དུས་དེ་ན། །ཏིང་ངེ་འཛིན་འདི་ལ་ནི་བརྩོན་བྱེད་པ། །སྤྱོད་པའི་ཡོན་ཏན་མཐའ་ཡས་ལ་གནས་པ། །དེ་ཡི་ཡོན་ཏན་འཇིག་རྟེན་མགོན་པོས་མཁྱེན། །གང་དག་ཟག་པ་མེད་པའི་ཆོས་ཤེས་ཤིང ། །ཤིན་ཏུ་ཚུལ་བཞིན་ཟག་པ་རྣམས་ཀྱང་ཤེས། །རྟོག་པ་མེད་སྤྱོད་མཉམ་པ་ཉིད་གནས་པ། དེ་དག་ཏིང་འཛིན་འདི་ལ་བརྟག་བརྩོན་ཡིན། །གང་དག་བདེ་གཤེགས་ཆོས་ནི་ཚད་མེད་ལ། །ཤེས་བཞིན་དུ་ཡང་ཀུན་སྨོན་པ་འདེབས་ཤིང ། །ཀུན་མཁྱིན་ཡེ་ཤེས་ལ་ནི་བརྟན་གནས་པ། །དེ་ལ་ཏིང་འཛིན་ཞི་བ་འདི་སྟོན་ཏོ། །མཚན་ཉིད་མེད་ཅིང་མཚན་ཉིད་ལས་ཀྱང་འདས། །ཉོན་མོངས་པ་དང་རྣམ་དག་གང་ཡང་མེད། །རང་བཞིན་སྟོང་པའི་ཆོས་རྣམས་གང་ཤེས་པ། །དེ་དག་བདེ་བར་གཤེགས་པ་ཚད་མེད་མཐོང ། །གང་ཞིག་དམིགས་པ་མཐའ་མེད་བརྩོན་བྱེད་ཀྱང ། །དམིགས་པ་ཐམས་ཅད་སྟོང་པ་ཉིད་དུ་ཤེས། །བལྟ་བར་དཀའ་དག་མཐོང་ནས་རློམ་སེམས་མེད། །དེས་ནི་བདེ་བར་གཤེགས་པ་ཚད་མེད་མཐོང ། །གང་ཞིག་དོན་མཐོང་ཡིད་ཀྱང་རྣམ་པར་དག་།ཉོན་མོངས་མེད་ཅིང་ཞི་བའི་གོ་འཕང་གནས། །རྡུལ་དང་བྲལ་ཞིང་མཉམ་དོན་ཆོས་སྟོན་པ། །དེ་ལ་ཏིང་འཛིན་ཞི་བ་འདི་བཤད་དོ། །བདེ་གཤེགས་སྲས་པོ་ཟུག་རྔུ་ཕྱུང་བ་གང ། །བདེན་པ་མ་ཉམས་ཐེ་ཙོམ་རྣམས་དང་བྲལ། །སྲོག་ཆགས་ཕན་ཕྱིར་བྱམས་པ་སྒོམ་བྱེད་པ། །དེ་དག་ལ་ནི་དོན་མཆོག་འདི་བཤད་དོ། །གང་ཞིག་རང་བཞིན་གྱིས་ནི་མ་རིག་བྲལ། །རིག་པས་མ་རིག་གནས་ནི་སེལ་བྱེད་ཅིང ། །དོན་མཆོག་འདི་ལ་བརྩོན་པར་སྦྱོར་བྱེད་པ། །དེ་ལ་ཏིང་འཛིན་ཞི་བ་འདི་བཤད་དོ། །རྣམ་དག་གནས་ཤིང་ཀུན་ནས་ཉོན་མོངས་མེད། །ཡེ་ཤེས་མཐའ་ཡས་མངོན་པར་འདོད་བྱེད་ཅིང ། །ངེས་དོན་འདི་ལ་མཆོག་ཏུ་དགའ་ཐོབ་པ། །དེ་ལ་རྣམ་ཐར་ཞི་བ་འདི་བཤད་དོ། ། 51.74a གང་ཞིག་ཀུན་ཏུ་སྦྱོར་བ་ཀུན་ལས་གྲོལ། །བརྟན་ཞིང་སྲོག་ཆགས་ཀུན་ལ་སྙིང་བརྩེ་ཞིང ། །གནོད་སེམས་མེད་ཅིང་ཞི་ལམ་དགའ་བརྟེན་པ། །དེ་ལ་ཏིང་འཛིན་འདི་ནི་ཡང་དག་བསྒྲགས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་བཞི་པའོ།། །། བཟང་སྐྱོང་ཆོས་འདི་བཞི་ནི་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའོ། །གཞི་གང་ཞེ་ན། འདི་ལྟ་སྟེ། སངས་རྒྱས་ལ་གུས་པ་དང ། མི་ཕྱེད་པའི་དང་བ་ཡིད་ལ་བྱེད་པ་དང ། ཆོས་ལ་གུས་པ་ཉན་འདོད་པ་དང ། ཆོས་ཀྱི་རྗེས་སུ་འཐུན་པའི་ཚིག་བསྒྲུབ་པ་སྟེ། བཟང་སྐྱོང་ཆོས་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའི་ཆོས་བཞིའོ། །བཞི་གང་ཞེ་ན། འདི་ལྟ་སྟེ། ཡིད་ལ་ཕྱིན་ཅི་ལོག་མེད་པས་སངས་རྒྱས་ལ་དམིགས་པའི་སེམས་པ་དང ། ཆོས་ལ་ཐེ་ཚོམ་མེད་པས་དམིགས་པའི་ངོ་བོ་ཉིད་རང་བཞིན་གྱིས་དགེ་བ་ལ་རྟོག་པ་དང ། དངོས་པོ་ལ་མཁས་པ་ལ་རྟོག་པས་ངོ་བོ་ཉིད་ཀྱིས་སྟོང་པ། རང་བཞིན་གྱིས་སྟོང་པ། ཤིན་ཏུ་སྟོང་པའི་ཆོས་ཐམས་ཅད་ལ་ཡང་དག་པར་གཞོལ་བ་དང ། འདུ་ཤེས་རྣམ་པར་འཇིག་པ་ལ་མཁས་པ། ཡོངས་སུ་གཅོད་པ་ཤེས་པ་ལ་རྟོག་པས་དངོས་པོ་ཡ་མ་བརླ་རྣམ་པར་འཇིག་པ་སྟེ། བཟང་སྐྱོང་ཆོས་དེ་བཞི་ནི་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་འཐོབ་པར་འགྱུར་བའོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་འཐོབ་པར་འགྱུར་བའི་ཆོས་བཞིའོ། །བཞི་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ཀྱིས་རྗེས་སུ་བཟུང་བ་དང ། དམ་པའི་ཆོས་འཛིན་པ་ལ་མཁས་ལ་དམ་པའི་ཆོས་བསྲུང་ཞིང་སྦེད་པ་དང ། སེམས་ཅན་ཐམས་ཅད་ལ་བདེ་བར་སྦྱོར་ཞིང་སེམས་ཅན་ཐམས་ཅད་ལ་སྙིང་བརྩེ་བའི 51.74b སེམས་དང ། སེམས་ཅན་གྱི་འདུ་ཤེས་རྣམ་པར་འཇིག་པ་ལ་མཁས་པ་སྟེ། བཟང་སྐྱོང་ཆོས་དེ་བཞི་ནི་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའོ། །བཟང་སྐྱོང་དེ་བས་ན་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དམ་པའི་ཆོས་ཆེར་འཁྲུག་པའི་ཚེ། དེར་བྱང་ཆུབ་སེམས་དཔས་ལུས་དང་སྲོག་ཀྱང་ཡོངས་སུ་བཏང་བ་ལ་གནས་ཏེ། ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །བཅང་བར་བྱའོ། །བཟང་སྐྱོང་ཆོས་ཐམས་ཅད་གཟུང་བ་ལ་མཁས་པའ་ལ་བརྩོན་པའི་བྱང་ཆུབ་སེམས་དཔའ་རྣམས་ནི་དེ་བཞིན་གཤེགས་པ་རྣམས་ཀྱིས་བསྐལ་པ་བྱེ་བ་མཐའ་ཡས་པར་ཡང་དག་པར་བསྒྲུབས་པའི་ཆོས་རིན་པོ་ཆེའི་མཛོད་འདི་ཡུན་རིང་དུ་གནས་པར་བྱ་བའི་ཕྱིར་འཇོག་པར་འགྱུར། ཆོས་འདི་ལྟ་བུ་འདི་ཡང་དག་པར་བསྟན་པ་དང ། རྣམ་པར་དབྱེ་བ་དང ། ཡང་དག་པར་བསྒྲགས་པར་བྱ་བ་ཡང་ནུས་པར་འགྱུར་རོ། །བཟང་སྐྱོང་བྱང་ཆུབ་སེམས་དཔའ་རྣམས་ལ་བརྩོན་འགྲུས་ཀྱིས་གནས་འདི་དག་ནི་ཡོད་དེ། བྱང་ཆུབ་སེམས་དཔའ་རྣམས་བརྩོན་འགྲུས་ཀྱི་བྱིན་གྱི་བརླབས་ཀྱིས། སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་ཕྱིར། སྨོན་ལམ་འཇུག་པར་འགྱུར་རོ། །བཟང་སྐྱོང་གང་ཞིག་ཕྱི་མའི་ཚེ་ཕྱི་མའི་དུས་དེར་ཆོས་འདི་དག་འཇོག་པར་བྱེད། ཡང་དག་པར་འཛིན་པར་འགྱུར་བའི་རིགས་ཀྱི་བུ་འམ། རིགས་ཀྱི་བུ་མོ་དེ་དག་ནི། སེམས་ཅན་ཐམས་ཅད་ལ་ཕན་པ་དང ། སེམས་ཅན་ཐམས་ཅད་ཡོངས་སུ་གཟུང་བ་དང ། སེམས་ཅན་ཐམས་ཅད་ཡང་དག་པར་གཟུང་བའི་ཕྱིར་ཞུགས་པ་ཡིན་ཏེ། དེ་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡོངས་སུ་བཟུང་བར་འགྱུར་རོ། །བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་གཞན་ན་འདུག་ཀྱང་འཇིག་རྟེན་གྱི་ཁམས 51.75a གཞན་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་དགོངས་པར་འགྱུར་རོ། །དེ་ནི་ཆོས་འདོད་པ་དང ། ཆོས་དོན་ཏུ་གཉེར་བ་དང ། ཆོས་བསྒྲུབ་པའི་ཕྱིར་ཕྱི་མའི་ཚེ་ཕྱི་མའི་དུས་ན་ཏིང་ངེ་འཛིན་འདིའི་ཕྱིར་བརྩོན་པར་འགྱུར་རོ། །གང་དག་ཕྱི་མའི་ཚེ་ཕྱི་མའི་དུས་ན་ཆོས་ཀྱི་རྣམ་གྲངས་འདི་ལྟ་བུ་འདི་འཛིན་པར་འགྱུར་བ་དེ་དག་ནི་བྱང་ཆུབ་སེམས་དཔའི་ཆོས་རྣམས་དང ། བྱང་ཆུབ་སེམས་དཔའི་ནོར་རྣམས་ཀྱིས་ཡང་དག་པར་བཟུང་བར་འགྱུར་རོ། །གང་དག་ཕྱི་མའི་ཚེ་ཕྱི་མིའི་དུས་ན་ཆོས་འདི་ལྟ་བུ་འདི་དག་ཡོངས་སུ་གཟུང་བའི་ཕྱིར་གནས་པར་འགྱུར་བ་དེ་དག་ནི་དེ་བཞིན་གཤེགས་པའི་སྟོབས་བཅུ་དང ། མི་འཇིགས་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་དང ། སངས་རྒྱས་ཀྱི་ཆོས་ཐམས་ཅད་ཀྱང་མྱུར་དུ་འཛིན་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་ཞིག་བརྟན་པ་ཆོས་སེམས་པ། །ཕྱི་མའི་དུས་སུ་གྱུར་པ་ན། །དམ་ཆོས་གཟུང་ཕྱིར་གནས་གྱུར་པ། །དེ་དག་ལ་ནི་གཟུངས་འདི་བཤད། །གང་དག་དམ་ཆོས་རིན་ཆེན་ཕྱིར། །འཇིགས་པ་མེད་པ་བརྩོན་བྱེད་ཅིང ། །སྙིང་ཡང་བརྩེ་ལ་སྙིང་རྗེ་ཅན། །དེ་དག་ཆོས་ཀྱང་འཛིན་པར་གནས། །བརྟན་ཅིང་བག་ཡོད་དགའ་བ་དང ། །ཐུབ་པའི་ཆོས་ཀྱི་མཛོད་འཛིན་པ། །དེ་དག་དོན་དུ་ཏིང་ངེ་འཛིན། །སངས་རྒྱས་བསྔགས་པ་བསྔགས་པ་ཡིན། །གང་ཞིག་ཆོས་རྒྱལ་སྐྱོབ་པ་ཡིས། །གང་དག་བྱིན་གྱིས་བརླབས་གྱུར་པ། །དེ་དག་ཕྱི་དུས་འཇིགས་བཅས་ཚེ། །ཆོས་ཉིད་འདི་ནི་འཛིན་པར་འགྱུར། །ཤིན་དུ་ངོ་བོ་ཉིད་ཀྱིས་ནི། །ཆོས་རྣམས་སྟོང་ཞིང་སྤྲོས་མེད་པར། །དྲན་དང་ལྡན་པ་གང་གིས་ཤེས། །དེ་དག་ཆོས་ཀྱང་འཛིན་པར་འགྱུར། །ཐམས་ཅད་ཆོས་ཀྱི་ངོ་བོ་ཉིད། །དེ་ལ་བསམ་ཡས་ཚིགས་སུ་བཅད། །ངེས་པ་ཉིད་དུ་ཤེས་འགྱུར་བ། །དེ་དག་ཆོས་ཀྱང་འཛིན་པར་འགྱུར། །ཟད་པ་ཤེས་ལ་གནས་གྱུར་ཅིང ། །མི་སྐྱེ་བ་ལའང་རབ་གནས་ལ། །སེམས 51.75b ནི་དུལ་ཞིང་ངོ་ཚ་ལྡན། །དེ་དག་ཆོས་ཀྱང་འཛིན་པར་འགྱུར། །བདེ་བའི་ལམ་ནི་བླ་ན་མེད། །ཅང་ཤེས་ལམ་ལ་ཞུགས་གྱུར་པ། །བརྩོན་འགྲུས་བྱིན་གྱིས་བརླབས་དང་ལྡན། །དེ་དག་ཆོས་འཛིན་གནས་པ་ཡིན། །དེ་བཞིན་ཉིད་དང་མི་རྟོག་དོན། །གང་གིས་ཆོས་ཉིད་རབ་ཏུ་ཤེས། །དེ་ལ་སྤྲོས་པ་ཅི་ཡང་མེད། །དེ་དག་ཆོས་ཀྱང་འཛིན་པར་འགྱུར། ཐམས་ཅད་ཆོས་ནི་བྱེད་མེད་པར། །དེས་པ་གང་གིས་ཤེས་པ་དེ། །ཅི་ཡང་མེད་ཅིང་ལེན་མེད་པའི། །ཆོས་ཉིད་དེ་ནི་སྒྲོགས་པར་འགྱུར། །འཛིན་པ་མེད་ཅིང་འཛིན་དང་བྲལ། །ཆོས་ཀུན་སྔོན་ནས་ཡོངས་དག་པར། །གང་གིས་ཤེས་པ་དེ་དག་ནི། །ཆོས་ཀྱི་སྤྱོད་ཡུལ་གནས་པ་ཡིན། །ཆོས་ཀུན་ངོ་བོ་མེད་པར་ནི། །དེ་ལྟར་ཆོས་ལ་གང་གིས་ཤེས། །དེ་དག་ཆོས་ཉིད་འདི་སྟོན་འགྱུར། །དེ་ནི་འཇུག་པ་ཡིན་པར་བཤད། །མིང་མེད་མིང་དང་བྲལ་གྱུར་ཅིང ། །སྤྲོས་པ་མེད་ཅིང་མི་སྐྱེ་བར། །གང་གིས་ཆོས་ཉིད་རབ་ཤེས་པ། །དེ་དག་སྟོང་པ་ཉིད་ཀྱང་སྒྲོགས། །གནས་པ་མེད་ཅིང་འགྲོ་བ་མེད། །ནམ་མཁའི་གནས་བཞིན་དག་པར་ནི། །གང་གིས་ཆོས་འདི་ཤེས་གྱུར་པ། །དེ་ལ་ཏིང་འཛིན་སྐྱེ་བར་འགྱུར། །གང་དག་འདུ་ཤེས་དོན་རྟོག་བྲལ། །ངོ་བོ་ཉིད་དུ་མ་སྐྱེས་ཤིང ། །དངོས་པོའི་འདུ་ཤེས་བྲལ་གྱུར་པ། །དེ་དག་ཆོས་ཉིད་སྟོན་པར་འགྱུར། །རྒྱས་གདབ་དེ་ནི་རྒྱ་མེད་དེ། །དགོངས་པའི་ཚིག་ཏུ་གསུངས་པ་ཡིན། །གང་གིས་དེ་ལྟར་ཤེས་གྱུར་པ། །དེ་དག་ཆོས་ཉིད་འདི་འཛིན་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་ཀྱི་ལེའུ་སྟེ་ཉི་ཤུ་རྩ་ལྔ་པའོ།། །།བཟང་སྐྱོང་དེ་ལྟ་བས་ན་རིགས་ཀྱི་བུ་འམ། རིགས་ཀྱི་བུ་མོ་དག་གིས་བག་ཡོད་པ་ལྷུར་བླངས་ཏེ། ཆོས་འདི་དག་ཡང་དག་པར་བསྡུ་བར་བྱའོ། །འདིའི་ཕན་ཡོན་ལ་ཡང་སྦྱར་བར་བྱའོ། །ཚུལ་བཞིན་དང་ཡང་ལྡན་པར་བྱའོ། །ཚུལ་བཞིན་མ་ཡིན་པ་ཡང་ཡོངས་སུ་སྤང་བར་བྱ་སྟེ། དེ་ལྟར་ན་ཆོས་ཟབ་མོ་བལྟ་བར་དཀའ་བ། རྟོགས་པར་དཀའ་བ། གང་སངས་རྒྱས་ཀྱི་ཆོས་ཐམས་ཅད་སྐྱེད་པར་བྱེད་པ། རང་བྱུང་རྣམས་ཀྱི་ཡེ་ཤེས་དང ། 51.76a ཐོགས་པ་མེད་པའི་ཡེ་ཤེས་ཐོབ་པར་བྱེད་པ་འདི་རྙེད་མི་དཀའ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་དང ། ཚེ་དང་ལྡན་པ་འོད་སྲུང་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟངས་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས་བྱིན་དང ། བྱང་ཆུབ་སེམས་དཔའ་དབང་པོས་བྱིན་དང ། ཁྱིམ་བདག་ཆུ་ལྷ་དང ། བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་དང ། འཁོར་བཞི་པོ་ལས་ཇི་སྙེད་ཅིག་འདུས་པ་དེ་དག་ཐམས་ཅད་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་རྣམས་ལ་བཀའ་སྩལ་པ། རིགས་ཀྱི་བུ་རྣམས་ངས་བསྐལ་པ་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པའི་ཆོས་རིན་པོ་ཆེ་འདིའི་མཛོད་དང ། འཇིག་རྟེན་ཐམས་ཅད་ཡིད་ཆེས་པར་མི་འགྱུར་བ་ཟབ་མོ། །དོན་ཟབ་པ། རྣམ་པར་ཐར་པ་སྒོ་གསུམ་གྱི་ཚུལ་བཤད་པ། ཟབ་མོ་བྱང་བ། མཐོང་བར་དཀའ་བ། རྟོགས་པར་དཀའ་བ། མཁས་ཤིང་ཤེས་པས་རིག་པ། རྒྱ་ཆེ་བ། གྱ་ནོམ་པ། དོན་ཕུན་སུམ་ཚོགས་པའི་མདོ་སྡེ་འདི་ལྟ་བུ་འདི་ཡང་ཁྱེད་ལ་གཏད་དོ། །རྗེས་སུ་གཏད་དོ། །གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བརྟེན་དུ་གྱུར་པ་དེ་དག་ཀྱང ། ཁྱེད་ལ་ཉིས་གྱུར་ཏུ་རྗེས་སུ་གཏད་གྱིས། ཁྱེད་ཀྱིས་ཀྱང་ཅི་ནས་ཀྱང་བྲི་བར་བྱའོ། །མཉན་པར་བྱའོ། །གཟུང་བར་བྱའོ། །ཀུན་ཆུབ་པར་བྱའོ། །བཅང་བར་བྱའོ། །བཀླག་པར་བྱའོ། །ཤིན་ཏུ་རྒྱས་པ་དང ། རྒྱ་ཆེར་བྱ་བའི་ཕྱིར་གཞན་དག་ལ་ཡང་རྒྱ་ཆེར་བཤད་པར་བྱའོ། །བསྟན་པར་བྱའོ། །ཡང་དག་པར་བསྒྲགས་པར་བྱའོ། །སེམས་ཅན་ཐམས་ཅད་རྗེས་སུ་གཟུང་བའི་ཕྱིར་བསྒོམ་པའི་སྦྱོར་བ་ལ་བརྩོན་པར་བྱའོ། །ཇི་སྐད་བསྟན་པ་བཞིན་དུ་ཆོས་ཀྱི་རྗེས་སུ་འཐུན་པའི་ཆོས་བསྒྲུབ་པར་བྱ་སྟེ། དེ་ཅི་ནས་ཀྱང་སྐྱེས་བུ་ཐ་མ་པར་མ་གྱུར་པར་བྱའོ། །བཟང་སྐྱོང་རིགས་ཀྱི་བུ་འམ། 51.76b རིགས་ཀྱི་བུ་མོ་གང་ལ་ལ་ཞིག་ཏིང་ངེ་འཛིན་འདི་ཐོས་ལ་ཐོས་ནས་ཀྱང་ལུང་ནོད་པར་བྱེད། ཁ་ཏོན་དུ་བྱེད། ཀུན་ཆུབ་པར་བྱེད་ན་དེས་ལྷག་པའི་བསམ་པས་གུས་པར་བྱ་སྟེ་མཉན་པར་བྱའོ། །ལུང་མནོད་པར་བྱའོ། །བཤད་པར་བྱའོ། གང་དག་གཞན་དག་ལ་སྟོན་ཏམ། ཀློག་ཏུ་འཇུག་ན་དེས་ཀྱང་ལྷག་པའི་བསམ་པས་རྒྱ་ཆེར་བྱ་བའི་ཕྱིར་ཅི་ནས་ཀྱང་ཏིང་ངེ་འཛིན་འདི་ཡུན་རིང་དུ་གནས་པ་དང ། ཤིན་ཏུ་རྒྱས་པ་དང ། ཤིན་ཏུ་རྒྱ་ཆེར་གཞན་དག་ལ་བསྟན་པར་བྱ། ཀློག་ཏུ་གཞུག་པར་བྱ་སྟེ། འདི་ནི་ཁྱེད་ལ་རྗེས་སུ་བསྟན་པ་ཡིན་ནོ། །ཆོས་ཀྱི་རྣམ་གྲངས་འདི་བཤད་པའི་ཚེ་སེམས་ཅན་གྲངས་མེད་ཚད་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་བསྐྱེད་དོ། །བྱང་ཆུབ་སེམས་དཔའ་གང་སངས་རྒྱས་ཀྱི་ཞིང་དཔག་ཏུ་མེད་པ་ནས་འདུས་པ་གང་གཱའི་ཀླུང་གི་བྱེ་མ་སྙེད་ཀྱིས་ཏིང་ངེ་འཛིན་འདི་ཉིད་ཐོབ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་སོ། །ལྷ་རྣམས་ཀྱིས་ཀྱང་བར་སྣང་ལས་མེ་ཏོག་གི་ཆར་ཕབ་པོ། །རྔ་བོ་ཆེ་དག་ཀྱང་མ་བརྡུངས་པར་སྒྲ་བྱུང་ངོ ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ། རྫོགས་སོ།། །། རྒྱ་གར་གྱི་མཁན་པོ་ཤཱཀྱ་པྲ་བྷ་དང ། ཞུ་ཆེན་གྱི་ལོཙྪ་བ་བན་དེ་རད་ན་རཀྵི་ཏས་ཞུས་ཏེ་གཏན་ལ་ཕབ་པ། སྐད་གསར་ཆད་ཀྱིས་ཀྱང་བཅོས་ལགས།། །། |