༄#། །རྒྱ་གར་སྐད་དུ། ཨཱརྱ་བུདྡྷ་ཧྲི་དཱ 106.71a ཡ་ནཱ་མ་དྷཱ་ར་ཎཱི་དྷརྨ་པ་རྱཱ་ཡ། བོད་སྐད་དུ། འཕགས་པ་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས་ཀྱི་ཆོས་ཀྱི་རྣམ་གྲངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པའི་སྤྱོད་ཡུལ་ཆོས་ཀྱི་དབྱེ་དགོན་པ་རིན་པོ་ཆེ་བཀོད་པའི་འཁོར་གྱི་ཁྱམས། ཡེ་ཤེས་ཀྱི་རྣམ་པར་དཔྱད་པ། སྔོན་སངས་རྒྱས་ཀྱིས་བྱིན་གྱིས་བརླབས་པ། སེམས་ཅན་ཐམས་ཅད་ཀྱིས་མངོན་བར་བསྟོད་པ། བྱང་ཆུབ་སེམས་དཔའ་ཆེན་པོའི་གནས་རྣམ་པ་ཐམས་ཅད་ཀྱི་མཆོག་དང་ལྡན་པ། ཆོས་ཐམས་ཅད་མཉམ་པ་ཉིད་ཀྱི་རྗེས་སུ་སྤྱོད་པ། ཀུན་ནས་འོད་ཀྱི་ཁང་བཟངས་ཀྱི་དབུས་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མ་ཐམས་ཅད་ཀྱང་ལུང་བསྟན་པ། ཐམས་ཅད་ཀྱང་འཇིག་རྟེན་གྱི་ཁམས་ཐ་དད་པ་ནས་འདུས་པ། ཐམས་ཅད་ཀྱང་དེ་བཞིན་གཤེགས་པ་ཆོས་ཀྱི་རྒྱལ་པོའི་སྲས། ཐམས་ཅད་ཀྱང་གཟུངས་དང་ཏིང་ངེ་འཛིན་སྣ་ཚོགས་ཐོབ་པ་ཤ་སྟག་གིས་ཡོངས་སུ་བསྐོར་ཅིང་མདུན་གྱིས་བལྟས་ནས་ཐབས་གཅིག་ཏུ་བཞུགས་ཏེ་ཆོས་སྟོན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་འཁོར་རྒྱ་ཆེན་པོ་ལ་བཀའ་སྩལ་པ། རིགས་ཀྱི་བུ་དག་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། ལྷ་དང་མིའི་སྐྱེ་བོ་ཕལ་པོ་ཆེའི་དོན་དང ། ཕན་པ་དང ། བདེ་བའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་པ་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས་ཀྱི་ཆོས་ཀྱི་རྣམ་གྲངས་ཡོད་དོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས་ཀྱི་ཆོས་ཀྱི་རྣམ་གྲངས་འདི་འཆང་ངམ། འཛིན་ཏམ། ཀློག་གམ། ཀུན་ཆུབ་པར་བྱེད་དམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཏམ། དད་དམ། ལྷག་པའི་བསམ 106.71b པས་མོས་པར་བྱེད་ན། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། ཆོས་ཐམས་ཅད་འཛིན་པ་དང་མི་འབྲལ་བར་འགྱུར། སངས་རྒྱས་བཅོམ་ལྡན་འདས་རྣམས་དང་མི་འབྲལ་བར་འགྱུར། དེ་བཞིན་གཤེགས་པ་ལ་བལྟ་བ་དང ། བསྙེན་བཀུར་བྱེད་པ་དང་མི་འབྲལ་བར་འགྱུར། ཆོས་ཉན་པ་དང་མི་འབྲལ་བར་འགྱུར། དགེ་འདུན་ལ་རིམ་གྲོ་བྱེད་པ་དང་མི་འབྲལ་བར་འགྱུར། བསྐལ་པ་སྟོང་དུ་འཁོར་བའི་སྲིད་པའི་རྒྱ་མཚོ་ཕྱིར་བསྙིལ་བར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་བར་རྫོགས་པར་སངས་རྒྱས་ཀྱི་བར་དུ་ཚེ་རབས་དྲན་པར་འགྱུར། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་བར་རྫོགས་པར་འཚང་རྒྱ་བར་འགྱུར། དེ་ལ་འབྱུང་པོའི་ཚོགས་ཐམས་ཅད་སྲུང་བར་འགྱུར། ལྷ་དང་ཀླུ་དང་གནོད་སྦྱིན་དང་དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་ཐམས་ཅད་དགའ་བར་འགྱུར། དེའི་ལུས་ལ་ནད་ཀྱིས་མི་ཚུགས་པར་འགྱུར། ཕ་རོལ་གྱི་གནོད་པས་འཆི་བའི་དུས་བྱེད་པར་མི་འགྱུར། ཆད་པ་སྤང་བ་དང ། མཚོན་ཆ་སྤང་བ་དང ། དུག་བཅིལ་ནས་འཆི་བའི་དུས་བྱེད་པར་མི་འགྱུར། དེ་ལ་བདུད་སྡིག་ཅན་གྱིས་གླགས་རྙེད་པར་མི་འགྱུར། བདུད་ཀྱི་རིས་ཀྱི་ལྷ་རྣམས་ཀྱིས་སྐབས་རྙེད་པར་མི་འགྱུར་ཏེ། གང་དུ་ཡིད་ལ་བྱས་པ་དེར་བདུད་ཀྱི་རིས་ཀྱི་ལྷ་དེ་དག་ཐམས་ཅད་སྐྲག་ཅིང་དངང་བར་འགྱུར་ཞིང་ཕྱོགས་བཅུར་འབྲོས་པར་འགྱུར་རོ། །དེ་ལ་འདི་དག་ནི་སངས་རྒྱས་ཀྱི་ཚིག་གོ། །སངས་རྒྱས་ཀྱི་ཚིག་ཆེན་པོའོ། །སངས་རྒྱས་ཀྱིས་གནང་བའི་ཚིག་ཆེན་པོའོ། །སངས་རྒྱས་ཐམས་ཅད་ཀྱི་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་ཚིག་ཡིན་ནོ། །ཏདྱ་ཐཱ། བུདྡྷེ་སུ་བུདྡྷེ། མ་ཧཱ་བུདྡྷེ། ཨི་ཧཱ་བུདྡྷེ། ཏད་ཏྲ་བུདྡྷེ། བུདྡྷེ། ་བུདྡྷེ། ་་མ་ཏི། བུདྡྷེ། སརྦ་བུདྡྷ། ཨ་ནུ་མ་ཏི། སརྦ་བུདྡྷ། ཨ་ནུ་ཛྙཱ་ན་ཏེ། བུདྡྷ། བུདྡྷ། བུདྡྷ། བུདྡྷ། བུདྡྷ། 106.72a བུདྡྷ། བུདྡྷ། བུདྡྷ། བུདྡྷ། བུདྡྷ། སངས་རྒྱས་ཀྱི་ཡུལ་མཐའ་ཡས་ཏེ། ཆོས་བསྟན་པ་ཡང་མཐའ་ཡས་མོད་ཀྱི། གཅིག་ཏུ་ཡིད་ལ་བྱ་བ་ནི་མདོར་ན་བསྒོམ་པའོ། །གཟུངས་འདི་ནི་སེམས་ཅན་རྣམས་ལ་ཐུགས་བརྩེ་བའི་ཕྱིར། སངས་རྒྱས་ཐམས་ཅད་ཀྱིས་གསུངས་པ་སྟེ། ཆོས་ཐམས་ཅད་ཀྱི་ཕྱག་རྒྱ་ཡིན་ནོ། །ཏདྱ་ཐཱ། ཤུདྡྷེ། སུ་ཤུདྡྷེ། སུ་ཤུདྡྷེ། ཤོ་དྷ་ནི། སཾ་ནི་རྨ་ལེ། མ་ལ་ཨ་པ་ག་ཏེ། ག་ཏི་ས་མ་དྷི་དྷི་ཏྲན་ཏི། ཀྲ་མེ་ས་མ་ས་རེ། ས་རཱ་ས་ར་པ་རི་ཨ་ཤོ་ཀེ་།བི་ཤོ་ཀ་།ཤོ་ཀ་ཤ་མ་ནི། ཤན་ཏེ། ཨུ་པ་ཤན་ཏེ། ་་པྲ་ཤན་ཏེ། ་་ཨ་བ་བྷཱ་སེ། སརྦ་པུ་ཎྱེ་པ་རི་མཎ་ཏི་ཏེ། སརྦ་དྷརྨ་པྲ་ཏི་མཎ་ཏི་ཏེ། ཧ་ར་ཧ་ར། མ་ལ་ཧ་ར། ཙ་ར་ཙ་ར། སཾ་ཙ་ར། ཙ་ལ་ཙ་ལ་སཾ་ཙ་ལ། ཏ་ལ་ཏ་ལ། མ་ཏ་ལ་ས་མ་ཏ་ལ། རི་ནེ་རི་ནེ། སུ་མི་ནི། ་ནི་ནེ། ས་མ་རི་ནེ། རི་ན་མ་ཏི། ་་ལོ་ཀ་དྷ་རེ། ལོ་ཀ་དྷ་རི་ཎེ། དྷ་ར་དྷ་ར། ཌ་ར་ཌ་ར། རོ་དྷ་རོ་དྷ། མ་ཧཱ་བི་ཛ་ཡ། བཱ་ཧི་ནི། ཧ་ན་ཧ་ན། སརྦ་བུདྡྷེ། ཧྲི་ཕྲེ་ཤི། ཏྲ་སི། སརྦ་ཛྙཱ་པ་ཐེ། སརྦ་ཛྙཱ་པ་ར་མི་ཏེ། མ་ཧཱ་པྲ་ཏི་བྷ་ན་སཾ། ཕན་ནེ། ས་མན་ཏ། ཨ་ལོ་ཀེ་བུདྡྷ། བི་ཤ་ཡེ། བུདྡྷ། པྲ་ཏི་མཎ་ཌི་ཏེ། བྷ་ག་བ་ཏེ་ས་ར་ས་ར། པྲ་ས་ར་པྲ་ས་ར། བི་ས་ར་བི་ས་ར། པྲ་ས་ར་སརྦ་ཤོ་ཤ་ཨ་པ་ག་ཏེ་སཝཱ་ཧཱ། བཅོམ་ལྡན་འདས་ཀྱིས་སངས་རྒྱས་ཀྱི་སྙིང་པོའི་གཟུངས་ཀྱི་ཆོས་ཀྱི་རྣམ་གྲངས་འདི་བཤད་མ་ཐག་ཏུ་རི་དང་གནས་སུ་བཅས་པ་དང ། ཚལ་རྣམ་པ་དྲུག་ཏུ་གཡོས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ས་ཡང་གཡོས་སོ། རབ་ཏུ་གཡོས་སོ། ཀུན་དུ་རབ་ཏུ་གཡོས་སོ། །རྒྱ་མཚོ་ཆེན་པོ་ཡང་འཁྲུགས། རབ་ཏུ་འཁྲུགས། ཀུན་དུ་རབ་ཏུ་འཁྲུགས་སོ། །རིའི་རྒྱལ་པོ་རི་རབ་ཀྱང་ལྡེག་ཅིང་འགུལ་ཏོ། །བདུད་ཀྱི་གནས་ཐམས་ཅད་སྐྲག་ནས། བདུད་ཀྱི་རིས་ཀྱི་ལྷ་རྣམས་དང ། བདུད་སྡིག་ཅན་རྣམས་ཤིན་དུ་སྡུག་བསྔལ་ཞིང་ཡིད་མི་བདེ་བར་གྱུར་ནས་ཉམས་ཐག་གོ། །སེམས་ཅན་གང་དག་ས་ཆེན་པོ་གཡོས་པར་མཐོང་བ་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ 106.72b ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །ཞེས་ཆེད་དུ་བརྗོད་པ་ལན་གསུམ་ཆེད་དུ་བརྗོད་དོ། །ལྷ་གང་དག་སངས་རྒྱས་ལ་མངོན་བར་དད་པ་དེ་དག་གིས་ལྷའི་མ་ཏོག་མན་དཱ་ར་བ་དང ། མན་དཱ་ར་བ་ཆེན་པོས་བཅོམ་ལྡན་འདས་ལ་གཏོར། མངོན་བར་གཏོར་ནས། གང་དག་སངས་རྒྱས་ལ་སྐྱབས་སུ་དོང་བ་དེ་དག་ཐམས་ཅད་རབ་ཏུ་དགའ་བ་སྐྱེས་སོ། །དེ་ལ་འདི་སྐད་ཅེས་བྱ་སྟེ། ཤཱཀྱ་སེང་གེ་ཡང་དག་རྫོགས་པ་ཡི། །སངས་རྒྱས་སྐྱོབ་པས་སྐད་ཅིག་ཡུད་གང་ལ། །སངས་རྒྱས་ཐམས་ཅད་ཀྱི་ནི་སྙིང་པོ་ཡི། །གཟུངས་འདི་དག་ནི་རབ་ཏུ་བཤད་པ་ཡི། །སྐད་ཅིག་ཡུད་དེར་ས་ཡང་རྣམ་དྲུག་གཡོས། །རྒྱ་མཚོ་འཁྲུགས་ཤིང་བདུད་ཀྱི་གནས་ཀུན་ཀྱང ། རབ་ཏུ་གཡོས་ནས་བདུད་ཀྱི་རིས་རྣམས་ཀྱི། །ལྷ་དག་རབ་ཏུ་དངངས་ཤིང་འཁྲུགས་པར་འགྱུར། །བདུད་ཡིད་མི་བདེ་སྡུག་བསྔལ་མྱ་ངན་ནོན། །དེ་ཚེ་ལྷ་རྣམས་ངོ་མཚར་རབ་ཐོས་ནས། །འཇིག་རྟེན་མགོན་ལ་མཆོད་པ་བྱ་བའི་ཕྱིར། །ནམ་མཁར་གནས་ནས་མེ་ཏོག་མན་དཱ་འཐོར། །གང་དག་སངས་རྒྱས་མངོན་དད་གཞན་རྣམས་ཀྱི། །སེ་མོ་དོ་དང་དོ་ཤལ་སྤོས་རྣམས་དང ། །ཕྱེ་མ་དག་དང་བྱུག་པ་གོས་རྣམས་དང ། །རྒྱན་དང་དཔུང་རྒྱན་དག་ཀྱང་རབ་ཏུ་འབུལ། །བརྒྱད་པོ་འདི་དག་ནི་དེའི་ཡོན་ཏན་གྱི་ཕན་ཡོན་གྱི་རྒྱན་དུ་འགྱུར་བའོ། །བརྒྱད་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་བརྗེད་པའི་རྒྱན་དང ། ཐོས་པ་ཐམས་ཅད་ཡོངས་སུ་ཚོལ་བས་མི་ངོམས་པའི་རྒྱན་དང ། ཆོས་ཟབ་མོ་རྣམ་པར་ངེས་པ་རྟེན་ཅིང་འབྲེལ་པར་འབྱུང་བའི་རྒྱན་དང ། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པའི་རྒྱན་དང ། ཇི་ལྟར་ཐོས་པ་དང་ཇི་ལྟར་ཁོང་དུ་ཆུད་པའི་ཆོས་རྣམས་ལ་ཚུལ་བཞིན་སོ་སོར་རྟོག་ཅིང་དཔྱོད་པའི་རྒྱན་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་ཆོས་ཐམས་ཅད་མི་དམིགས་པའི་རྒྱན་དང ། རྒྱན་དེ་ཡང་སངས་རྒྱས་ཀྱིས་བྱིན་གྱི་བརླབས་ཀྱིས་ཐབས་ལ་མཁས་པའི 106.73a རྒྱན་དང ། གཟུངས་ཐོབ་པའི་རྒྱན་ཏེ། བརྒྱད་པོ་དེ་དག་ནི་དེའི་ཡོན་ཏན་གྱི་ཕན་ཡོན་གྱི་རྒྱན་དུ་འགྱུར་རོ། །གཟུངས་འདི་རྟག་པར་རྒྱུན་དུ་ཡིད་ལ་བྱའོ། །སངས་རྒྱས་རྗེས་སུ་དྲན་པ་བསྒོམ་པར་བྱའོ། །གཟུངས་ཀྱི་གཞི་འདི་དག་རྣམས་ཡིད་ལ་བྱས་ན་ལས་ཀྱི་སྒྲིབ་པ་ཐམས་ཅད་ཡོངས་སུ་བྱང་བར་འགྱུར་རོ། །པད་མ་རྣམ་པར་བཀོད་པ་ཞེས་བྱ་བའི་ཏིང་ངེ་འཛིན་ཀྱང་ཐོབ་བོ། །ནད་ཐམས་ཅད་དང ། ན་བ་ཐམས་ཅད་ལ་ལག་པས་བྱབ་པར་བྱའོ། །བཟླས་བརྗོད་ཀྱང་དཔག་ཏུ་མེད་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང ། ཉན་ཐོས་ཆེན་པོ་དེ་དག་དང ། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་བར་བསྟོད་དོ། །འཕགས་པ་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས་ཀྱི་ཆོས་ཀྱི་རྣམ་གྲངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། སྐར་ཞུས།། |