༄། ་།རྒྱ་གར་སྐད་དུ། ་ཀུལ་པཉྩ་བུདྡྷ་ན་མ:། བོད་སྐད་དུ། ་རིགས་ལྔ་བདེ་བར་གཤེགས་པ་ལ་ཕྱག་འཚལ་ལོ། །མ་ཧཱ་ཡོ་གའི་དོན་དུ་བསྒྲུབ་པའི་ཐབས་འདི་བསྟན་ཏོ། །རི་ནི་ཉམས་དགའ་མདངས་བཟང་བའི། །ཡིད་འོང་གནས་སུ་འདུག་ནས་ནི། །བྱིན་བརླབས་མཚམས་བཅད་བརྟན་བྱས་ནས། །དཀྱིལ་འཁོར་འདོམ་གང་གྲུ་བཞི་པ། །དྲི་སྣ་ལྔ་ཡིས་མཎྜལ་བྱའོ། །ཐིག་བཞི་བཏབ་པས་དཀྱིལ་འཁོར་བརྒྱད། །མཎྜལ་བརྒྱད་པའི་གཞུང་བཞིན་བྲི། །དེ་ཡི་རྩེ་མོ་བརྒྱད་ལ་ཡང ། །ཡིད་བཞིན་ནོར་བུ་འབར་བ་བྲི། །དེ་ཡི་དབུས་སུ་བསམ་པ་ཡང ། །སྲིད་གསུམ་བྷནྡྷ་བཟང་ཀོང་ཡུག་།ཡེ་ནས་མ་བཅོས་རང་འབྱུང་སྣོད། །དཔལ་དང་ལྡན་པའི་སྣོད་བཞག་ལ། །དེ་ཡི་ནང་དུ་བླུགས་པའི་སྨན། །ཡེ་ནས་རང་བྱུང་བདུད་རྩི་ལྔ། །ཤ་ཆེན་བཤང་གཅི་ཁུ་བ་ཁྲག་།དག་པའི་རྒྱུ་སྟེ་བདུད་རྩིའི་དངོས། །སྟོང་ལས་སྦྱར་བས་ཡེ་ནས་དག་།བཏག་དང་བཙག་དང་གཞལ་བ་ཡི། །ཉི་ཟླ་གསལ་བའི་དཀྱིལ་འཁོར་དུ། །འབྲུ་ལྔ་ཡེ་ཤེས་འཕྲོ་འདུ་ལས། །སྟོང་ཁམས་ཁྱབ་པར་དོན་བྱས་ཏེ། །བཅུད་ཀྱི་དམ་པ་ཀུན་བསྡུས་ནས། །དུས་གསུམ་སངས་རྒྱས་མཆོད་པའི་ཕྱིར། །བཀའ་བཞིན་བསྟན་པའི་དངོས་གྲུབ་བླང ། །མུ་ཏིག་དཀར་པོ་དྲི་མེད་ལྟར། །སྒྲུབ་པ་པོས་ནི་ནན་ཏན་བྱའོ། །འགུ་ཡ་ལག་པའི་ཕྱག་རྒྱ་ཡིས། །གཞུང་བཞིན་བརྟན་ནས་འཕྲོ་འདུ་བྱ། །དེ་དབུས་ཀླུ་བདག་ས་བོན་གྱིས། །དངོས་གྲུབ་དམ་པ་བླང་བར་བྱ། །དགུ་པའི་སྔགས་ཀྱིས་བཏབ་ནས་ནི། །ལེ་ལོ་མེད་པའི 104.196b བརྩོན་འགྲུས་ཀྱིས། །བར་ཆད་མེད་པའི་འཕྲོ་འདུ་བྱའོ། །ོཾ་གྱིས་ཡེ་ཤེས་འོད་ཕྱུང་ཞིང ། །ཱཿ ཡིས་མེས་བསྲེགས་ཐལ་བར་འགྱུར། །ཧཱུཾ་གིས་བདུད་རྩི་རྣམ་པར་དག་།གསལ་ལ་འབྱུང་འཇུག་ལྷ་ནེ་བོས། །རྟགས་དང་མཚན་མ་བདུན་གྱིས་འབྱུང ། །འོད་དང་དུ་བ་དྲི་དང་སྒྲ། །ལྷ་མོའི་གཟུགས་ཀྱང་སྟོན་པར་འགྱུར། །མང་དུ་འཕེལ་ན་བསྒྲུབ་རྫས་ཡིན། །དེ་ལ་ཡ་མཚན་བསྐྱེད་མི་བྱ། །མཚན་མའི་རྟགས་དག་མ་བྱུང་ན། །བཀང་སོའི་ཆོ་ག་རྒྱ་བསྐྱེད་ཅིག་།སྤོགས་ཐགས་བསྐྱར་ལ་རྩལ་ཤུགས་དབྱུང ། །དམ་ཚིག་ཆེན་པོ་བཀང་བའི་ཕྱིར། །བསྒྲུབ་རྫས་རྣམས་ཀྱང་བསྟར་ནས་གཞག་།དེ་ནས་མཆོད་ཅིང་དངོས་གྲུབ་བླང ། །སློབ་མ་ལ་ཡང་དབང་བསྐུར་རོ། །བླ་མ་ལུང་ལྡན་དེས་ཀྱང་ནི། །ཚིགས་སུ་བཅད་པ་འདི་དག་བརྗོད་དོ། །གདོད་ནས་མ་སྐྱེས་རྣམ་དག་ཆོས་ཀྱི་དབྱིངས། །དག་དང་མ་དག་མི་རྟོག་རྟོག་ལས་འདས། །སྔ་མ་འདས་དང་ད་ལྟར་ཕྱིས་འབྱུང་བ། །དུས་གསུམ་གཅིག་ལ་སྐུ་བསྟན་ཕྱི་བཤོལ་མེད། །དངོས་གྲུབ་སྣ་ཚོགས་རླབས་ཆེན་འབར་བ་ཅན། །སུ་འདོད་སྦྱིན་གྱིས་ད་ལྟ་འདི་ལ་ལོང ། །སྐལ་པར་སྦྲེབས་དང་གཏི་མུག་མུན་ནག་ལ། །སྤྲིན་མཐོངས་ཉི་ཤར་ཁུད་པར་དྲོ་བ་བཞིན། །བདུད་རྩི་རྒྱལ་པོ་དབང་ཆེན་འདི་བྱིན་པས། །རིག་འཛིན་རྒྱལ་པོ་གཙོ་བོའི་གོ་འཕང་ཐོབ། །ཚེ་དང་སྐོངས་དང་ཡིད་དུ་འོང ། །བགེགས་རྣམས་ཞི་བ་ལ་སོགས་ཏེ། །ནད་དང་བྲལ་ནས་ཅི་འདོད་པའི། །ཡོན་ཏན་རྩ་བརྒྱད་འདི་ཡིས་ཐོབ། །ཞེས་བཀའ་སྩལ་ནས། དེ་ནས་ཡང་བཅོམ་ལྡན་འདས་རིགས་ལྔ་བདེ་བར་གཤེགས་པས་བཀའ་སྩལ་ཏོ། །བཅོམ་ལྡན་འདས་ཀྱིས་ལུང་འདི་ལས། །དབང་བསྐུར་གནང་བ་གང་ཡིན་པ། །འཁོར་རྣམས་ཀུན་གྱིས་ཐོབ་པར་ཤོག་།ཞེས་བཀའ་སྩལ་ཏོ། །ཡང་འཁོར་ཉེ་བའི་སྲས་མཆོག་དམ་པ་འཇམ་དཔལ་ལ་སོགས་པས་དབང་མནོས་ནས། ཡང་རིག་ལྔ་དང་རིགས་རྒྱ་མཚོའི་གཙོ་བོ་ལ་ལུང་གི་དོན་ཞུས་པ། རྟོག་པ་དང་མི་རྟོག་པའི་དོན་ཇི་ལྟར་བལྟ། དོན་གྱི་འབྲས་བུ་གང་ལགས་ཞེས་གསོལ་པ་ལས། ཀུན་ཏུ་བཟང་པོ་དང་རིགས་ལྔ་བདེ་བར་གཤེགས་པས་བཀའ་སྩལ་པ། ཚངས་དང་དྲང་སྲོང་གཙང་མ་ཟ། །དེ་དག་གྲོལ་བར་ངས་མ་བཤད། །ཀླུ་དང་བྲམ་ཟེ་གཙང་མ་ཟ། །དེ་དག་གྲོལ་བར་ངས་མ་བཤད། །བྱོལ་སོང་རྩཝ་མཆོག་ཟ་བ་ཡང ། །ཇི་སྲིད 104.197a འཚོ་བའི་བར་དུ་ཟ། །དེ་དག་གྲོལ་བར་ངས་མ་བཤད། །ཡང་དག་དོན་གྱི་ལུང་འདི་ཉོན། །རྣལ་འབྱོར་ཐབས་དང་ལྡན་པས་ནི། །ཆོས་སྐུ་གཅིག་ལས་ཐ་དད་པའི། །རིགས་ལྔའི་ཁ་དོག་འདི་བཤད་དོ། །འདི་ལྟར་རྟོགས་ན་གྲོལ་ཞེས་བཤད། །རང་བཞིན་ཡེ་ནས་དག་པའི་རྫས། །མཉམ་པའི་དབྱིངས་སུ་རབ་རྟོགས་ན། །གཉིས་མེད་དོན་གྱིས་ཟིན་པ་ཡིན། །ཇི་ལྟར་དམིགས་པ་བཞིན་དུ་འགྲུབ། །དངོས་དང་དངོས་མེད་རྟོག་པའི་མཚན། །གཙང་དང་མི་གཙང་རྟོག་པའི་མཚན། །མཁས་པས་དབུས་ལ་གནས་མི་འགྱུར། །ཡེ་ཤེས་སྐུ་ལྔ་བསྟན་པའི་ཕྱིར། །བྱང་ཆུབ་སེམས་ནི་དཀར་བས་ན། །དྲི་མེད་དཀར་བས་ཡེ་ཤེས་སྐུའོ། །རཀྟ་ཆགས་མེད་དམར་བས་ན། །ཆགས་མེད་རྣམ་དག་ཆོས་ཀྱི་སྐུའོ། །མང་ས་ཡིད་བཞིན་རིན་ཆེན་སྔོ། །སྣ་ཚོགས་འབྱུང་གནས་མཉམ་ཉིད་སྐུའོ། །རིན་ཆེན་གསེར་མདོག་སྣང་མཛད་དེ། །མངོན་འབྱུང་སྤྲུལ་པ་ཆོས་ཀྱི་སྐུའོ། །དྲི་ཆུ་དག་བྱེད་ལྗང་གུའི་མདོག ། ་ཀུན་དུ་དོན་གྲུབ་ལས་རབ་སྐུའོ། །སྐུ་ལྔ་ལྷུན་གྲུབ་བདུད་རྩི་འདི། །སོ་སོའི་ལུས་ལ་གནས་པ་ཡིན། །དྲི་ཆེན་དྲི་ཆུ་རཀྟ་དང ། །མངས་སེམས་ཆུ་འདི་རྣམས་ཀུན། །སེམས་ཅན་རྟོག་པ་བཟློག་པའི་ཕྱིར། །གཙོ་རུ་དང་དུ་བླང་བར་བྱའོ། །གཙང་སྨེ་མེད་པར་ཀུན་གྱིས་སྤྱོད། །འདི་དག་གྲོལ་བར་ངས་བཤད་དོ། །ཐེ་ཚོམ་མེད་པས་དངོས་གྲུབ་ཐོབ། །སྤྱོད་པའི་སྐྱེས་བུ་རྣལ་འབྱོར་པས། །ཚེ་འདི་ཉིད་ལ་གྲུབ་པར་འགྱུར། །ཅེས་བཅོམ་ལྡན་འདས་རིགས་ལྔ་བདེ་བར་གཤེགས་པས་བཀའ་སྩལ་ཏོ། །འདི་ཡན་ཆད་མ་ཧཱ་ཡོ་གའི་དོན་གྱི་ལུང་དང་བསྒྲུབ་ཐབས་བདུད་རྩི་ཆེན་པོ་འབུམ་སྡེ་ལས་བཏུས་པའི། བམ་པོ་ཆེན་པོ་ལྔ་པ།། །། |