༄##། །རྒྱ་གར་སྐད་དུ། ཨཱརྱ་སན་དྷི་མཱ་ལ་མ་ཧཱ་ཏནྟྲ་བོདྷི་སཏྭ་མ་ཧཱ་བི་ནིཤྩ་ཡ་ནིརྡེ་ཤཱད་མ་ཧཱ་མ་ཎི་རཏྣ་ཀཽ་ཤལ་ལྱ་ནིརྡེ་ཤ་མ་ཧཱ་པ་རི་ཎཱ་མཾ་ནཱ་མ་རཱ་ཛཱ། ་བོད་སྐད་དུ། འཕགས་པ་དགོངས་པའི་རྒྱུད་ཀྱི་ཕྲེང་བ་ཆེན་པོ་བྱང་ཆུབ་སེམས་དཔའི་རྣམ་པར་ངེས་པ་ཆེན་པོ་བསྟན་པ་ལས་ནོར་བུ་ཆེན་པོ་རིན་པོ་ཆེ་ལ་མཁས་པ་བསྟན་པ་ཡོངས་སུ་བསྔོ་བ་ཆེན་པོའི་རྒྱལ་པོ་ཞེས་བྱ་བ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ནོར་བུ་རིན་པོ་ཆེ་རྡོ་རྗེ་རིན་པོ་ཆེའི་རྩེ་མོ་ལ་བཞུགས་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་བའི་སྲས་འདི་ལ་བྱང་ཆུབ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་སྐྱབས་བྱེད་པར་འདོད་པ། བྱང་ཆུབ་སེམས་དཔའི་བསླབ་བའི་སྡོམ་པ་བླངས་བ། བྱང་ཆུབ་ཏུ་སེམས་བསྐྱེད་པ། སྙིང་རྗེའི་བདག་ཉིད་ཅན། དེ་བཞིན་གཤེགས་པ་ཐམས་ཅད་མཉེས་པར་བྱེད་འདོད་པ། བྱང་ཆུབ་སེམས་དཔའ་ཆེན་པོའྀ་སྤྱོད་པའི་ཚོགས་ཉེ་བར་སོགས་པར་འདོད་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རབ་ཏུ་ཐོབ་པར་འདོད་པ། སྒྲིབ་པ་མེད་པའི་ཏིང་ངེ་འཛིན་དང ། གཟུངས་དང ། རྣམ་པར་ཐར་པའི་སྒོ་རྣམས་ཀྱིས་རྣམ་པར་རྩེ་བར་འདོད་པ། ནམ་མཁའ་མཛོད་ཉིད་དང ། ལག་ན་རིན་ཆེན་ཉིད་ཐོབ་པར་འདོད་བས་འདི་ལྟར་བསྔོ་བར་བྱ་སྟེ། སངས་རྒྱས་བཅོམ་ལྡན་འདས་རྣམས་དང ། ས་བཅུ་ལ་རབ་ཏུ་གནས་བའི་བྱང་ཆུབ་སེམས་དཔའ་རྣམས་དང ། རྡོ་རྗེ་འཆང་རྣམས་བདག་ལ་དགོངས་སུ་གསོལ། བདག་བྱང་ཆུབ་ཏུ་སེམས་བསྐྱེད་པ། ལམ་ལ་རབ་ཏུ་གནས་པ་མིང་འདི 101.303b ཞེས་བགྱི་བ། དེ་བཞིན་གཤེགས་པ་ཐམས་ཅད་དང ། བྱང་ཆུབ་སེམས་དཔའ་ཐམས་ཅད་ལ་དུས་ཐམས་ཅད་དུ་ཡོང་ཡེ་འབུལ་ཞིང་མཆི་ན། དེ་བཞིན་གཤེགས་པ་མངའ་ཆེན་པོ་ཅན་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ས་ཆེན་པོ་བརྙེས་པ་རྣམས་ཀྱིས་བཞེས་ཤིང་བདག་ལ་རྟག་ཏུ་བསོད་ནམས་ཀྱི་སྟོབས་ཆེན་པོ་དང ། ཡེ་ཤེས་ཀྱིས་ཉེ་བར་བརྟན་པ་དང ། བརྩོན་འགྲུས་དང ། བརྩོན་པའི་བདག་ཉིད་དང ། ཞི་བ་དང ། དུལ་བ་དང ། ཉེ་བར་ཞི་བའི་གནས་དང ། མངོན་པར་ཤེས་པ་དང ། ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པར་མཛད་དུ་གསོལ། དེའི་འོག་ཏུ་ཡང་འདི་སྐད་ཅེས་བརྗོད་པར་བྱ་སྟེ། ཐུགས་རྗེ་ཆེན་པོ་དང་ལྡན་པ་དག་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། འཁོར་བར་ལྷུང་བ། འཆིང་བས་བཅིངས་པ། བཙོན་རར་ཆུད་པ། ཆོས་ཀྱི་ལམ་སྟོར་བ། ཉོན་མོངས་པའི་དགྲ་བདོ་བས་མངོན་བར་གཙེས་པ། མགོན་མ་མཆིས་པ། སྐྱབས་མ་མཆིས་པ། སྐྱོབ་པ་མ་མཆིས་པ། གནས་མ་མཆིས་པ། དཔུང་གཉེན་མ་མཆིས་པ། སྟོན་པ་མ་མཆིས་པ། ལམ་གོལ་བར་ཞུགས་པ། འཁོར་བ་ལ་མངོན་དུ་ཕྱོགས་པ། མྱ་ངན་ལས་འདས་པ་ལ་རྒྱབ་ཀྱིས་བལྟས་པ། ངན་སོང་ལ་གཞོལ་བ། ངན་སོང་ལ་འབབ་པ། ངན་སོང་ལ་བབ་པ། མི་དགེ་བའི་བཤེས་གཉེན་དང་འགྲོགས་པར་ལྷུང་བ། དགེ་བའི་བཤེས་གཉེན་དང་བྲལ་བ། སྨན་པ་ལ་མི་དམན་པ་དང ། འཐུན་པ་ལ་མི་མཐུན་པ་དང ། དགེ་བ་ལ་མི་དགེ་བར་བཟུང་བ། སློབ་དཔོན་མ་མཆིས་པ། དེ་བཞིན་གཤེགས་བ་དང ། བྱང་ཆུབ་སེམས་དཔའ་ལྟ་བ་ལ་རྒྱབ་ཀྱིས་ཕྱོགས་པ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངམ་གྱིས་འཚེ་བས་གཙེས་པ། བདེ་བ་མ་ཐོབ་པ། མི་སྐྲག་པ་མ་ཐོབ་པ། མི་འཇིགས་པ་མ་ཐོབ་པ། རྟག་ཏུ་མཉམ་བར་མ་བཞག་པ། ཞི་བ་དང ། དུལ་བ་དང ། སྦྱིན་བ་དང ། དེས་པ་དང ། ཡང་དག་པར་སྡོམ་པ་དང ། བག་ཡོད་པ་དང་བྲལ་བ། ཏིང་ངེ་འཛིན་དང ། གཟུངས་དང ། ས་དང ། 101.304a བཟོད་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་ལ་གནས་པ་དང་བྲལ་བ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ལ་གནས་པ་དང་བྲལ་བ། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་རྣམ་གསུམ་ལ་རྒྱབ་ཀྱི་ཕྱོགས་པ། སྒྲིབ་པ་མེད་པའི་ཡེ་ཤེས་ཆེན་པོ་དང་བྲལ་བ། ཤིན་ཏུ་གནས་པའི་ཆོས་ཀུན་ཏུ་འབྱུང་བའི་རྒྱུ་ཉིད་ལ་མི་གནས་པ། མངོན་བར་ཤེས་པ་དང་བྲལ་བ། སྟོབས་རྣམས་མ་ཐོབ་པ། མི་འཇིགས་པ་དང་མི་ལྡན་ཞིང་མི་གནས་པ། མི་བརྗེད་པའི་ཆོས་ཀྱི་རྗེས་སུ་འགྲོ་བའི་སྐབས་དང་མི་ལྡན་བ། ཡོན་ཏན་གྱིས་སྟོང་པ། བྱང་ཆུབ་ཀྱི་ཡན་ལག་བདུན་གྱི་གོས་ཀྱི་མ་གཡོགས་པ། འཕགས་པའི་ལམ་ཡན་ལག་བརྒྱད་ཀྱིས་བགྲོད་བ་དང་བྲལ་བ། སྡུག་བསྔལ་བརྒྱ་སྟོང་ཕྲག་དུ་མས་མངོན་པར་གཙེས་པ། རྟག་ཏུ་གདུངས་པ། རྟག་ཏུ་དམན་བ། རྟག་ཏུ་རྨོངས་པ། རྟག་ཏུ་མཉམ་བར་མ་བཞག་པ། རྟག་ཏུ་ཉོན་མོངས་པའི་རྗེསུ་ཞུགས་པ་ལགས་ན། ཐུགས་རྗེ་ཆེན་པོས་དགོངས་ཏེ་བདག་གི་སྐྱབས་མཛད་དུ་གསོལ། བདག་གིས་དཔུང་གཉེན་མཛད་དུ་གསོལ། བདག་གིས་བྱང་ཆུབ་ཆེན་པོའི་ལམ་དང ། བྱང་ཆུབ་ཀྱི་ལམ་དང ། བྱང་ཆུབ་ཀྱི་ཚོགས་ཡོངས་སུ་རྫོགས་པར་མཛད་དུ་གསོལ། དེ་བཞིན་གཤེགས་པའི་སྟོབས་བཅུ་དང ། མི་འཇིགས་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་དང ། སོ་སོ་ཡང་དག་པར་རིག་པ་བཞི་དང ། ཏིང་ངེ་འཛིན་དང ། རྣམ་པར་གྲོལ་བ་དང ། གཟུངས་རྣམས་སྐྱབས་མཛད་དུ་གསོལ། བདག་གི་ཕུན་སུམ་ཚོགས་པ་ཐམས་ཅད་ཡོངས་སུ་རྫོགས་པར་མཛད་དུ་གསོལ། ཡོན་ཏན་ཐམས་ཅད་ཡོངས་སུ་རྫོགས་པར་མཛད་དུ་གསོལ། སངས་རྒྱས་བཅོམ་ལྡན་འདས་དང ། མཐུ་ཆེན་པོ་བརྙེས་པའི་བྱང་ཆུབ་སེམས་དཔའ་རྣམས་བདག་ལ་དགོངས་སུ་གསོལ། བདག་གིས་སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་མཆོད་པ་དང ། བཀུར་སྟི་ཆེན་པོ་བགྱིས་ནས་བདག་འབུལ་ལོ། །ཕྱོགས་བཅུའི་འཇིག་རྟེན་གྱི་ཁམས་ན་བཀོད་པ་ཆེན་པོ་རྣམས་ཀུན་ཏུ་གནས་པའི་རིན་པོ་ཆེ་སྣ་ཚོགས་ཀྱི་རིན་པོ་ཆེའི་གཞལ་མེད་ཁང་རྣམས་དང་རིན་པོ་ཆེའི་ཤིང་ལྗོན་པ་རྣམས་དང ། རིན་པོ་ཆེའི་རི་རྣམས་དང ། རིན་པོ་ཆེའི་གདན་རྣམས་དང ། རིན་པོ་ཆེའི་ལན་ཀན་རྣམས་དང ། 101.304b རིན་པོ་ཆེའི་ཕྲེང་བ་རྣམས་དང ། རིན་པོ་ཆེའི་གདུགས་རྣམས་དང ། རིན་པོ་ཆེའི་རྒྱལ་མཚན་རྣམས་དང ། རིན་པོ་ཆེའི་ཆུན་པོ་རྣམས་དང ། རིན་པོ་ཆེའི་མུ་ཏིག་གི་དྲ་བ་རྣམས་དང ། རིན་པོ་ཆེའི་སྣོད་རྣམས་དང ། རིན་པོ་ཆེའི་ཕྲེང་བ་རྣམས་དང ། རིན་པོ་ཆེ་འབར་བའི་ཚོགས་རྣམས་དང ། རིན་པོ་ཆེའི་གླིང་བརྒྱ་དང ། ནོར་བུ་ཆེན་པོ་རྣམས་དང ། མར་མེའི་སྡོང་བུ་གཙང་བ། ནོར་བུ་དང ། རིན་པོ་ཆེ་སྣ་ཚོགས་ཀྱིས་སྤྲས་པས་འཚེར་བ་གསེར་གྱི་གཙོང་གཙོང་མང་པོས་བཏགས་པ་རྣམས་དང ། པད་མ་འཛམ་བུ་ཆུ་བོའི་གསེར་གྱི་གེ་སར་ཆེན་པོ་ཅན་རྣམས་དང ། གསེར་གྱི་ཕྲེང་བ་རྣམས་དང ། གསེར་གྱི་གཞལ་མེད་ཁང་རྣམས་དང ། རིན་པོ་ཆེའི་སྤྲིན་རྣམས་དང ། རིན་པོ་ཆེའི་འབྲུའི་ཆར་རྣམས་དང ། རིན་པོ་ཆེའི་སྙིང་པོ་ཅན་ཀྱི་ཁང་བཟངས་རྩིག་པ་ནོར་བུ་རབ་མཆོག་སྣ་ཚོགས་ཀྱིས་སྤྲས་པ་རིན་པོ་ཆེའི་ལན་ཀན་ཅན་རྣམས་དང་རིག་སྔགས་འཆང་ཆེན་པོའི་བསྐྱེད་མོས་ཚལ་ཉམས་དགའ་བ་རྣམས་དང ། གནས་ཉམས་དགའ་བ་རྣམས་དང ། གཞལ་མེད་ཁང་ཉམས་དགའ་བ་རྣམས་དང ། བསྐྱེད་མོས་ཚལ་ཉམས་དགའ་བ་རྣམས་དང ། ལྷའི་ཉེ་བར་སྤྱད་པ་ཉམས་དགའ་བ་ཡོངསུ་མ་སྤྱད་པ་ཇི་སྙེད་མཆིས་པ་དེ་དག་ཐམས་ཅད་སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་འབུལ་ལོ། །གང་དག་འཛམ་བུའི་གླིང་ན་མཆིས་པའི་སྨན་རྣམ་པ་སྣ་ཚོགས་པ་རྣམས་དང ། བཅུད་ཀྱིས་ལེན་ཀྱི་རིགས་རྣམས་དང ། གང་དག་དུས་ཐམས་ཅད་པའི་ནོར་བུ་དང ། གང་དག་ཞལ་ཟས་རོ་ཞིམ་པོ་ཕུན་སུམ་ཚོགས་པ་ཁྱད་པར་དུ་འཕགས་པ་རྣམས་དང ། གང་དག་དྲི་གདའ་བའི་ལྗོན་ཤིང་རྣམས་དང ། ཙན་དན་གྱི་ལྗོན་ཤིང་རྣམ་པ་སྣ་ཚོགས་དུས་ཀྱི་རྗེས་སུ་འབྲང་བ་དང ། ཙན་དན་དམར་པོ་རྣམས་དང ། རྟག་ཏུ་མེ་ཏོག་དང་ལྡན་བའི་ནགས་ཚལ་ཆེན་པོ་རྣམས་དང ། སྤོས་ཀྱི་ངད་རྒྱས་པ་ཡིད་དུ་མཆི་བའི་དྲི་གདའ་བའི་ལྗོན་ཤིང་གི་རིགས་རྣམས་དང ། གང་དག་དཔག་བསམ་གྱི་ཤིང་བདག་གི་མ་མཆིས་ཤིང་ཡོངསུ་འཛིན་པ་མ་མཆིས་པ་རྣམས་དང ། གང་དག་རྒྱ་མཚོའི་ནོར་བུ་རྣམ་པ་སྣ་ཚོགས་དང ། ཡིད་བཞིན་གྱི་ནོར་བུ་རྣམས་དང ། གང་དག་རི་ལྷུན་པོ་དང ། ཏི་སེ་དང ། སྤོས་ཀྱི་ངད་ལྡང་དང ། མ་ལ་ཡ་དང ། འབིགས་བྱེད་དང ། མན་དཱ་ར་དང ། རྡོ་རྗེའི་རི་ལ་སོགས་པའི་རིན་པོ་ཆེ་སྣ་ཚོགས་ཀྱི་ཟོམ་རྣམས་ལ། རིན་པོ་ཆེ་སྣ་ཚོགས་ཀྱི་ཁང་པ་རྩེག་མ་རྣམས་དང ། རིན་པོ་ཆེ་སྣ་ཚོགས་ཀྱི་ཕུག་རྣམས་དང ། རིན་པོ་ཆེ་སྣ་ཚོགས་ཀྱི 101.305a བྲག་རྣམས་དང ། རིན་པོ་ཆེ་སྣ་ཚོགས་ཀྱི་ས་གཞི་བརྟན་པ་རྣམས་དང ། རིན་པོ་ཆེ་སྣ་ཚོགས་ཀྱི་གཞལ་མེད་ཁང་རྣམས་དང ། རིན་པོ་ཆེ་སྣ་ཚོགས་ཀྱི་ཕུང་བོ་རྣམས་དང ། རིན་པོ་ཆེ་སྣ་ཚོགས་ཀྱི་ཐེམ་སྐས་རྣམས་དང ། ནོར་བུ་རིན་པོ་ཆེ་སྣ་ཚོགས་ཀྱི་ཀ་བ་རྣམས་དང ། རིན་པོ་ཆེ་སྣ་ཚོགས་ཀྱི་ཁང་པའི་ཚར་རྣམས་དང ། ནོར་བུ་བཻ་དཱུརྱ་སྣ་ཚོགས་ཀྱི་སྒྲོན་མ་རྣམས་དང ། གང་དག་ལྷ་ཡུལ་གྱི་གཞལ་མེད་ཁང་ན་བལྟ་ན་སྡུག་པ་རྣམས་དང ། གང་དག་ལྷ་ཡུལ་གྱི་ལྷའི་གྲོང་ཁྱེར་གྱི་གཞལ་མེད་ཁང་ཡོངས་སུ་བཟུང་བ་མ་མཆིས་པ་རྣཾས་དང ། གང་དག་ལྷ་ཡུལ་གྱི་མེ་ཏོག་བལྟ་ན་སྡུག་པ་རྣམས་དང ། གང་དག་ལྷ་ཡུལ་གྱི་གླུ་དབྱངས་ཀྱི་ཆ་སྤྱད་རྣམས་དང ། གཞལ་མེད་ཁང་སྟོང་བ་རྣམས་ཀྱི་ཆར་རླུང་གིས་བསྐྱོད་པ་ན་སྒྲ་སྙན་པ་འབྱིན་པ་རྣམས་དང ། རོལ་མོའི་ཆ་སྤྱད་ཀྱི་རྣམ་པ་མ་དཀྲོལ་བར་རང་སྒྲ་སྙན་པར་འབྱིན་བ་རྣམས་དང ། གང་དག་ལྷ་ཡུལ་གྱི་བྱའི་ཚོགས་གཞལ་མེད་ཁང་སྟོང་པ་རྣམས་ན་གནས་ཤིང་སྐད་སྙན་པ་འབྱིན་བ་རྣམས་དང ། གང་དག་རིན་པོ་ཆེའི་སྤྲིན་སྒྲ་དབྱངས་ཆེན་པོ་སྙན་པར་འབྱིན་བ་རྣམས་དང ། གང་དག་ལྷའི་ནོར་བུ་རྣམས་དང ། གང་དག་གླུ་དབྱངས་རྣམས་དང ། གང་དག་དྲི་གདའ་བའི་མེ་ཏོག་གི་ལྗོན་ཤིང་རྣམས་དང ། ཕྲེང་བའི་ལྗོན་ཤིང་རྣམས་དང ། སྤོས་ཀྱི་ལྗོན་ཤིང་རྣམས་དང ། རྒྱལ་མཚན་གྱི་ལྗོན་ཤིང་རྣམས་དང ། བ་དན་གྱི་ལྗོན་ཤིང་རྣམས་དང ། རིན་པོ་ཆེའི་ལྗོན་ཤིང་ཡོངས་སུ་ལོངས་མ་སྤྱད་པ་དེ་དག་ཐམས་ཅད་སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་འབུལ་ལོ། །གང་དག་སངས་རྒྱས་ཀྱི་སྤྱན་གྱིས་གཟིགས་པའི་འཇིག་རྟེན་གྱི་ཁམས་ཐམས་ཅད་ན་མཆོད་པ་ཆེན་པོའི་སྤྲིན་མེ་ཏོག་གི་སྤྲིན་རྣམས་དང ། དྲིའི་སྤྲིན་རྣམས་དང ། ཕྲེང་བའི་སྤྲིན་རྣམས་དང ། བདུག་པའི་སྤྲིན་རྣམས་དང ། ལྷབ་ལྷུབ་ཀྱི་སྤྲིན་རྣམས་དང ། བྱུག་པའི་སྤྲིན་རྣམས་དང ། རིན་པོ་ཆེའི་གདུགས་ཀྱི་སྤྲིན་རྣམས་དང ། རིན་པོ་ཆེའི་རྒྱལ་མཚན་གྱི་སྤྲིན་རྣམས་དང ། རིན་པོ་ཆེའི་བ་དན་གྱི་སྤྲིན་རྣམས་དང ། རིན་པོ་ཆེའི་གོས་ཀྱི་སྤྲིན་རྣམས་དང ། རིན་པོ་ཆེའི་ལྗོན་ཤིང་གི་སྤྲིན་རྣམས་དང ། རིན་པོ་ཆེས་བཀང་བའི་སྣོད་ཀྱི་སྤྲིན་རྣམས་དང ། རིན་པོ་ཆེ་ནོར་བུ་ཆེན་པོ་སྤུངས་པའི་སྤྲིན་རྣམས་དང ། རིན་པོ་ཆེ་རྣམ་པ་སྣ་ཚོགས་ཀྱི་སྤྲིན་རྣམས་དང ། མར་མེའི་སྣོད་སྟོང 101.305b གི་འཇིག་རྟེན་གྱི་ཁམས་ཀྱི་ཚད་ཙམ་ལ་དྲི་ཞིམ་པོའི་འབྲུ་མར་གྱིས་ཡོངས་སུ་བཀང་ཞིང་སྙིང་པོའི་རས་རི་རབ་བརྒྱ་ཙམ་རབ་ཏུ་འབར་བ་རྣམས་སངས་རྒྱས་བཅོམ་ལྡན་འདས་ཐམས་ཅད་དང ། བྱང་ཆུབ་སེམས་དཔའ་ཐམས་ཅད་ལ་འབུལ་ལོ། །དེ་དག་ཐམས་ཅད་ལ་གསོལ་བ་ནི་བྱང་ཆུབ་ཀྱི་སྙིང་པོར་གཤེགས་པ་དང ། བདུད་འདུལ་བ་དང ། མངོན་པར་བྱང་ཆུབ་པ་དང ། ཆོས་ཀྱི་འཁོར་ལོ་བསྐོར་བ་དང ། ཡོངས་སུ་མྱ་ངན་ལས་འདའ་བར་བཞེད་པ་དེ་དག་རྣམས་ལ་སེམས་ཅན་རྣམས་ཀྱི་དོན་དུ་བསྐལ་པ་མང་པོར་བཞུགས་པར་གསོལ་ལོ། །ཅི་ལྟར་དེ་བཞིན་གཤེགས་པ་རྣམས་ཀྱིས་མི་དམིགས་པར་བཞུགས་ཏེ་བསྔོས་པ་ལྟར་བདག་གི་བསོད་ནམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །དེ་བཞིན་གཤེགས་པ་ཐམས་ཅད་དང ། བྱང་ཆུབ་སེམས་དཔའ་ཐམས་ཅད་དང ། སེམས་ཅན་ཐམས་ཅད་ཀྱི་བསོད་ནམས་ལ་རྗེས་སུ་ཡི་རང་ངོ ། །སྡིག་པ་ཐམས་ཅད་ཀྱང་སོ་སོར་བཤགས་སོ། །ོཾ་སྨ་ར་སྨ་ར། བི་མཱ་ན་སྐ་ར་མ་ཧཱ་ཛ་བ་ཧཱུཾ།། །།དེའི་འོག་ཏུ་ཅི་ལྟར་འདོད་པ་བཞིན་ལྷ་རྫས་ཀྱི་མཆོད་པ་ཆེན་པོའི་སྤྲིན་རྣམས་དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་འབྱུང་བར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་སངས་རྒྱས་དམིགས་བ་ཡིད་ལ་བྱེད་བས་ཡོངས་སུ་བསྔོ་བ་ཆེན་པོའི་འཁོར་ལོ་འདི་ཉིན་པར་རམ། མཚན་མོ་འདོན་ན། དེའི་སྡིག་པ་རྣམས་ཡོངས་སུ་ཟད་པར་འགྱུར་ཞིང་ཉོན་མོངས་པ་ཐམས་ཅད་ཀྱང་བསྲབས་པར་འགྱུར་རོ། །གོང་དུ་སྨོས་པའི་ཡོན་ཏན་རྣམས་ཀྱང་འཐོབ་པར་འགྱུར་རོ། །ལན་ཅིག་བཟླས་བརྗོད་པར་བྱས་ན་ཚངས་བ་བརྒྱའི་བསོད་ནམས་འཐོབ་པར་འགྱུར་རོ། །རྨི་ལམ་ན་ཡང་རྟག་ཏུ་དེ་བཞིན་གཤེགས་པ་རྣམས་ཆོས་སྟོན་བ་མཐོང་བར་འགྱུར་རོ། །རིག་སྔགས་རྣམས་ཀྱང་ཡང་དག་པར་གྲུབ་པར་འགྱུར་རོ། །རྡོ་རྗེ་འཆང་གིས་ཡོངས་སུ་བཟུང་བར་ཡང་འགྱུར་རོ། །ཇི་ལྟར་འདོད་པའི་སངས་རྒྱས་ཀྱི་ཞིང་རྣམས་སུ་ཡང་སྐྱེ་བར་འགྱུར་རོ། །འཕགས་པ་དགོངས་པའི་རྒྱུད་ཀྱི་ཕྲེང་བ་ཆེན་བོ་བྱང་ཆུབ་སེམས་དཔའི་རྣམ་བར་ངེས་པ་ཆེན་པོ་བསྟན་པ་ལས་ནོར་བུ་ཆེན་པོ་རིན་པོ་ཆེ་ལ་མཁས་པ་བསྟན་པ་ཡོངས་སུ་བསྔོ་བ་ཆེན་པོའི་རྒྱལ་པོ་རྫོགས་སྷོ། ། 101.306a ཁ་ཆེའི་མཁན་པོ་དྷརྨཱ་ཀ་ར་དང ། ལོཙྪ་བ་བན་དེ་དཔལ་འབྱོར་གྱིས་བསྒྱུར། ལས། རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང ། ཞུ་ཆེན་གྱི་ལོཙྪ་བ་བན་དེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ཞུས་དག་། |