rKTs


J5

(e-text produced by ADARSHA)

see text in transliteration
9.25b
རྒྱ་གར་སྐད་དུ། ་བྷིཀྵུ་ཎཱི་བི་ན་ཡ་བི་བྷང་ག ། ་བོད་སྐད་དུ། ་དགེ་སློང་མའི་འདུལ་བ་རྣམ་པར་འབྱེད་པ། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །རྒྱལ་པོ་དུལ་བ་རྗེ་ཡི་རིགས་སུ་འཁྲུངས། །སློབ་མ་དུལ་མཛད་ཉེས་པ་རབ་ཐུལ་བ། །སངས་རྒྱས་འདུལ་བའི་གཙོ་དང་ཆགས་བྲལ་ཆོས། །རྡུལ་དང་བྲལ་བའི་ཚོགས་ལ་ཕྱག་འཚལ་ཏེ། ། དགེ་སློང་མ་ཡི་སོ་སོར་ཐར། །རྣམ་འབྱེད་ཧ་ཅང་བསྡུས་པ་དང ། །རྒྱས་པ་མ་ཡིན་བརྗོད་པར་བྱ། །འདུལ་བ་དེ་ནི་ང་ལས་ཉོན། །བསྐལ་པ་བྱེ་བ་རྣམས་སུ་ཡང ། །འདུལ་བ་ཐོས་པར་འགྱུར་བ་དང ། །གཟུང་དང་འཛིན་པ་རྙེད་དཀའ་སྟེ། །སྒྲུབ་པའང་ཤིན་དུ་རྙེད་པར་དཀའ། །སངས་རྒྱས་རྣམས་ནི་འབྱུང་བ་བདེ། །ཆོས་བསྟན་པ་ཡང་བདེ་བ་ཡིན། །དགེ་འདུན་འཐུན་པ་བདེ་བ་སྟེ། །འཐུན་པ་རྣམས་ཀྱི་དཀའ་ཐུབ་བདེ། །ཆོས་ཐོས་པ་དང་མཐོང་བ་ཡི། །དབེན་པར་དགའ་བ་བདེ་བ་ཡིན། །འཇིག་རྟེན་སྲོག་ཆགས་འབྱུང་པོ་ལ། །མི་འཚེ་ཡང་དག་སྡོམ་པ་བདེ། །འཇིག་རྟེན་འདོད་ཆགས་བྲལ་བ་དང ། །འདོད་པ་རྣམས་ལས་རྒྱལ་བ་བདེ། །ང་འོ་ང་རྒྱལ་འདུལ་བ་གང ། །དེ་ནི་མཆོག་ཏུ་བདེ་བ་ཡིན། །ཚུལ་ཁྲིམས་ལྡན་པ་མཐོང་བ་བདེ། །མང་དུ་ཐོས་པ་མཐོང་བ་བདེ། །ཡང་སྲིད་རྣམ་པར་གྲོལ་བ་ཡི། །དགྲ་བཅོམ་པ་དག་མཐོང་བ་བདེ། །འཕགས་པ་རྣམས་ནི་མཐོང་བ་བདེ། །དམ་པ་རྣམས་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ངའོ་ང་རྒྱལ་ཟད་པ་བདེ། །འཇིག་རྟེན་དགེ་སྦྱོང་འཛིན་པ་བདེ། །དེ་བཞིན་བྲམ་ཟེ་འཛིན་པ་བདེ། །འཇིག་རྟེན་ན་ནི་ཕར་འཛིན་བདེ། །དེ་བཞིན་མར་འཛིན་ཉིད་ཀྱང་བདེ། །ངེས་པར་བྱས་ཤིང་དབང་པོ་ཐུལ་བ་དག་།དགོན་པ་ཞི་བ་རྣམས་སུ་རྒས་གྱུར་དང ། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱི་གནས་པ་བདེ། །བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན། གྲོང་ཁྱེར་ཤིང་ནྱ་གྲོ་དྷ
9.26a
ཅན་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ། ནྱ་གྲོ་དྷ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་སོ། །དེ་ལ་བྲན་གྲོང་བཅུ་དྲུག་དང ། ལས་ཀྱི་མཐའ་པའི་གྲོང་སུམ་བཅུ་དང ། སྐྱེད་སྒྱུར་བའི་གྲོང་དྲུག་བཅུ་དང ། རྨོན་པ་དོར་དགུ་བརྒྱ་དགུ་བཅུ་རྩ་དགུ་དང ། གསེར་བྱེ་བ་དྲུག་བཅུ་དང ། གང་དག་གིས་རྒྱལ་པོ་པདྨ་ཆེན་པོ་ཐུབ་པའི་གསེར་གྱི་ནས་སྦྱང་བརྒྱད་བཅུ་ཡོད་དོ། །དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་ཡང་མེད་བུ་མོ་ཡང་མེད་ནས། བུའི་ཕྱིར་ལྷ་བརྒྱ་སྟོང་དུ་མ་ལ་གསོལ་བ་འདེབས་ཏེ། འདི་ལྟ་སྟེ། ཚངས་པ་དང ། དབང་པོ་དང ། ཉེ་དབང་དང ། གཤིན་རྗེ་དང ། ཉི་མ་དང ། ཁྱབ་འཇུག་དང ། དབང་བདག་དང ། ས་ག་དང ། ལས་ཐམས་ཅད་པ་དང ། ཐ་སྐར་དང ། སའི་ལྷ་དང ། ཀླུ་དང ། ཆུ་ལྷ་དང ། མེ་ལྷ་དང ། རླུང་ལྷ་དང་ཡུལ་འཁོར་སྐྱོང་དང ། འཕགས་སྐྱེས་པོ་དང ། མིག་མི་བཟང་དང ། རྣམ་ཐོས་ཀྱི་བུ་དང ། ནོར་བུ་བཟང་པོ་དང ། གང་པོ་དང ། གང་བ་བཟང་པོ་དང ། ལྔས་རྩེན་དང ། ལྔ་ལེན་ལ་སོགས་པ་གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དང ། འཕྲོག་མ་བུ་ལྔ་བརྒྱའི་འཁོར་ཅན་དང ། ཀུན་དགའ་ར་བའི་ལྷ་དང ། ནགས་ཚལ་གྱི་ལྷ་དང ། བཞི་མདོའི་ལྷ་དང ། སུམ་མདོའི་ལྷ་དང ། གཏོར་མ་ལེན་པའི་ལྷ་དང ། ལུས་ཀྱི་ལྷ་དང ། ལྷན་ཅིག་སྐྱེས་པ་དང ། ཆོས་འཐུན་པ་དང ། རྟག་ཏུ་འབྲང་བའི་ལྷ་དེ་དག་དང ། གཞན་ཡང་ལྷ་བརྒྱ་སྟོང་དག་ལ་གསོལ་བ་འདེབས་པར་བྱེད་དོ། །འཇིག་རྟེན་ན་ཡང་ལྷ་ལ་གསོལ་བ་བཏབ་པའི་རྒྱུ་ལས་བུ་དང་བུ་མོ་དག་སྐྱེའོ་ཞེས་བྱ་བ་འཇིག་རྟེན་པའི་གཏམ་དེ་ལྟ་བུ་ཡོད་མོད་ཀྱི་དེ་ནི་དེ་ལྟ་མ་ཡིན་ཏེ། གལ་ཏེ་དེ་ལྟར་གྱུར་དུ་ཟིན་ན། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་རེ་རེ་ལ་ཡང་བུ་སྟོང་ཡོད་པར་འགྱུར་རོ། །འོན་ཀྱང་གནས་དྲུག་པོ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་ཏེ། དྲུག་པོ་གང་དག
9.26b
ཅེ་ན་ཕ་མ་གཉིས་ཀྱིས་བུ་རྙེད་པར་འགྱུར་བའི་ལས་དག་བྱས་ཤིང་བསགས་པ་དག་ཡིན་ཏེ། ་བུས་ཀྱང་ཕ་དང་མ་རྙེད་པར་འགྱུར་བའི་ལས་དག་བྱས་ཤིང་བསགས་པ་ཡིན། མ་ཡང་རུང་ཞིང་ཟླ་མཚན་དང་ལྡན་པ་ཡིན། ཕ་མ་གཉིས་ཆགས་པར་གྱུར་ཅིང་འདུས་པ་ཡིན། དྲི་ཟ་ཡང་ཉེ་བར་གནས་པ་ཡིན། དྲི་ཟས་ཀྱང་སེམས་གཉིས་པོ་རྗེས་སུ་ཆགས་པ་དང་ལྡན་པ་འམ་ཁོང་ཁྲོ་བ་དང་ལྡན་པ་གང་ཡང་རུང་བའི་སེམས་རབ་ཏུ་ཐོབ་པ་སྟེ། གནས་དྲུག་པོ་འདི་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བ་ཡིན་ནོ། །དེ་དེ་ལྟར་ལྷ་བརྒྱ་སྟོང་ལ་གསོལ་བ་འདེབས་པ་ལྷུར་ལེན་ཅིང་འདུག་པ་ལས་བུ་ཡང་མེད། བུ་མོ་ཡང་མེད་ནས་དེ་སྟེང་གི་ཁང་བཟངས་ཀྱི་སྟེང་དུ་སོང་སྟེ་ལག་པ་ལ་འགྲམ་པ་གཏད་ནས། བདག་གི་ཁྱིམ་གྱི་འབྱོར་པ་རྒྱ་ཆེན་པོ་འདི་ལྟ་བུ་ནི་བུ་མེད་པའི་ཕྱིར་བླར་བཞེས་པར་འོང་ངོ་ཞེས་སེམས་ཁོངས་སུ་ཆུད་ཅིང་འདུག་གོ། །དེ་ནས་དེའི་དྲུང་དུ་ཉེ་དུ་རྣམས་ལྷགས་ཏེ་འདི་སྐད་ཅེས་སྨྲས་སོ། །ནྱ་གྲོ་དྷ་ཁྱོད་ཅིའི་ཕྱིར་ཡིད་མི་བདེ་ཞིང་འདུག་།དེས་སྐབས་དེ་ཉེ་དུ་རྣམས་ལ་རྒྱ་ཆེར་སྨྲས་པ་དང ། དེ་དག་གིས་འདི་སྐད་ཅེས་སྨྲས་སོ། །ལྷ་རྣམས་དང ། འཇུག་ངོགས་དག་ལ་སྟེན་ཅིག་།དེས་འདི་སྐད་ཅེས་སྨྲས་སོ། །སྔར་ལྷ་འམ་འཇུག་ངོགས་གང་ལ་མ་བསྟེན་པ་དེ་ཡང་མེད་ན། འོན་ཀྱང་བདག་ལ་བུ་འམ་བུ་མོ་ཡང་མེད་དོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷའི་མ་འོངས་ནས་འདི་སྐད་ཅེས་སྨྲས་སོ། །བུ་ནྱ་གྲོ་དྷ་ཁྱོད་ཇི་སྟེ་ཡིད་མི་བདེ། དེས་འདི་སྐད་ཅེས་སྨྲས་སོ། །ཡུམ་ཅི་བདག་གི་ཡིད་མི་བདེ་བ་ཆུང་ངམ། བདག་གི་ཁྱིམ་གྱི་ཡོ་བྱད་རྒྱ་ཆེན་པོ་འདི་ལྟ་བུ་བུ་མེད་པའི་ཕྱིར་བླར་བཞེས་པར་འགྱུར་རོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷའི་བསྐྱེད་མོས་ཚལ་ན་ལྗོན་ཤིང་ནྱ་གྲོ་དྷ་ཆེན་པོ་ཡལ་ག་དང ། མགོ་ལྕོགས་དང ། འདབ་མ་དང ། ལོ་མ་ཕུན་སུམ་ཚོགས་ཤིང་འདབ་མ་རྒྱ་ཆེ་ལ་ཡལ་ག་གཡུར་ཟ་བ་ཞིག་ཡོད་དེ། དེའི་མིང་གིས་གྲོང་ཁྱེར་ནྱ་གྲོ་དྷ་ཅན་ཞེས་བྱ་བར་ཤེས་སོ། །མས་དེ་ལ་སྨྲས་པ། བུ་ཁྱོད་ཀྱི་ཕ་ཡང་བུ་མེད་པར་གྱུར་ནས་དེས་ཀྱང་ལྷ་བརྒྱ་སྟོང་དུ་མ་ལ་བུའི་ཕྱིར་གསོལ་བ་བཏབ་བོ་འོན་ཀྱང་དེ་ལ
9.27a
བུ་ཡང་མེད་ཅིང་བུ་མོ་ཡང་མེད་པར་གྱུར་ཏོ། །དེ་ནས་དེས་ནྱ་གྲོ་དྷའི་དྲུང་དུ་སོང་སྟེ་ནྱ་གྲོ་དྷ་ལ་གསོལ་བ་བཏབ་པ་དང་དེ་ནས་ཁྱོད་བྱུང་ངོ་དེའི་ཕྱིར་ཁྱོད་ནྱ་གྲོ་དྷ་ཞེས་བཏགས་སོ། །ཁྱོད་ཀྱང་བུ་མེད་ན་དེ་ཁོ་ན་ལྟར་གྱིས་ཤིག་།དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་ག་ལ་བ་དེར་སོང་སྟེ་ཕྱིན་ནས། ཤིང་ནྱ་གྲོ་དྷའི་དྲུང་དུ་ཆག་ཆག་དང་ཕྱག་དར་ལེགས་པར་བྱེད་དུ་བཅུག་སྟེ། སྤོས་དང་མེ་ཏོག་དང ། བདུག་པས་བཀང་ནས། རྒྱལ་མཚན་དང ། བ་དན་སྒྲེང་དུ་བཅུག་གོ། །དེ་ནས་བྲམ་ཟེ་བརྒྱད་བརྒྱ་ལ་ཟན་བྱིན་ཏེ། རས་ཡུག་ཆེན་བསྐོན་ནས། རྗེས་ལ་ཤིང་ལ་གནས་པའི་ལྷ་ལ་གསོལ་བ་བཏབ་པ། བདག་ལ་བུ་རྙེད་པར་སྤྲོ་བ་བསྐྱེད་དུ་གསོལ། གལ་ཏེ་བདག་ལ་བུ་མཆིས་ན་ལོ་གཅིག་བཞིན་འདི་འདྲ་བར་ཁྱོད་ལ་མཆོད་པ་དཔག་ཏུ་མེད་པ་བགྱིའོ། །གལ་ཏེ་མ་མཆིས་ན་ལྗོན་ཤིང་འདི་པུ་ཤེལ་རྩིའི་རྩ་བ་ཙམ་གྱི་བར་ལུས་པ་ཡང་གཤེགས་ནས་དུམ་བུ་དུམ་བུར་བྱས་ལ་ཞོགས་མ་ཞོགས་མར་བཞོགས་ཏེ་རླུང་དང་ཉི་མ་གཉིས་ལ་བསྐམས་ནས་མེས་བསྲེག་གོ། །བསྲེགས་ནས་ཐལ་བ་རླུང་ཆེན་པོ་ལ་ཕྱར་བ་འམ། ཆུ་ཀླུང་ཆེན་པོ་དྲག་པོར་གཏོར་རོ། །ལྷ་དེ་ཡང་དབང་ཆུང་བ་ཡིན་པས་གསོལ་བ་བཏབ་པ་ན་ནི་མགུ་བ་དང ། དགའ་བ་དང ། ཡིད་རབ་ཏུ་དགའ་བ་དང ། སྟོབས་དང་ལྡན་པ་ཡིན་ལ། བསྡིགས་པ་ན་ནི་བདག་གནས་ནས་བསྐྲད་པར་མི་འགྱུར་གྲང་ཞེས་འཇིགས་པར་གྱུར་ཏོ། །ལྷ་དེ་ཡང་རྒྱལ་པོ་ཆེན་པོ་བཞིས་ཀུན་དུ་ཟིན་པ་ཡིན་པས་དེ་རྒྱལ་པོ་ཆེན་པོ་ཡུལ་འཁོར་སྲུང་གི་དྲུང་དུ་སོང་སྟེ་ཕྱིན་ནས་ཡུལ་འཁོར་སྲུང་ལ་སྨྲས་པ། ཉེ་དབང་བདག་གནས་ནས་བསྐྲད་པར་འགྱུར་དུ་མཆིས། གྲོང་ཁྱེར་ཤིང་ནྱ་གྲོ་དྷ་ཅན་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷས་བུ་རྙེད་པར་འགྱུར་བར་སྤྲོ་བ་བསྐྱེད་དུ་གསོལ། དེ་འདི་སྙམ་དུ་སྔོན་གྱི་ལས་ཀྱི་རྒྱུའི་སྟོབས་བསྐྱེད་པས་བུ་དང་བུ་མོ་དག་ཡོད་པ་ཡིན་གྱི། འདི་ལ་བདག་ལ་ནི་དབང་མེད་དོ་སྙམ་དུ་བསམས་ནས་དེས་དེ་ལ་སྨྲས་པ་བདག་གིས་ནི་བུ་འམ་བུ་མོ་སྦྱིན་པར་མི་ནུས་སོ། །འོན་ཀྱང་ཚུར
9.27b
ཤོག་རྒྱལ་པོ་ཆེན་པོ་འཕགས་སྐྱེས་པོའི་དྲུང་དུ་འདོང་ངོ ། །དེ་གཉིས་འཕགས་སྐྱེས་པོའི་དྲུང་དུ་དོང་སྟེ་ཕྱིན་ནས་དོན་དེ་ཉིད་དེ་ལ་སྨྲས་སོ། །དེ་བཞིན་དུ་རྒྱལ་པོ་ཆེན་པོ་མིག་མི་བཟང་དང ། རྣམ་ཐོས་ཀྱི་བུའི་དྲུང་དུ་སོང་སྟེ་ཕྱིན་ནས་སྨྲས་ན། དེ་དག་གིས་ཀྱང་རང་གི་ལས་ཀྱིས་བུ་དང་བུ་མོ་དག་འབྱུང་གི། འདི་ལ་བདག་ཅག་ལ་ནི་དབང་མེད་དོ་ཞེས་སྨྲས་སོ། །དེ་ནས་རྒྱལ་པོ་ཆེན་པོ་སྡེ་བཞི་ལྷའི་དབང་པོ་བརྒྱ་བྱིན་གྱི་དྲུང་དུ་དོང་སྟེ་སྨྲས་པ། ཀཽ་ཤི་ཀ་བདག་ཅག་གི་འཁོར་དུ་གཏོགས་པ་ཞིག་རང་གི་གནས་ནས་བསྐྲད་པར་འགྱུར་གྱིས་གྲོང་ཁྱེར་ཤིང་ནྱ་གྲོ་དྷ་ཅན་དེར། བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷས་བུ་རྙེད་པར་འགྱུར་བར་སྤྲོ་བ་བསྐྱེད་དུ་གསོལ། བརྒྱ་བྱིན་གྱིས་སྨྲས་པ། ཉེ་དབང་དག་རང་གི་ལས་ཀྱིས་བུ་དང་བུ་མོ་དག་འབྱུང་གི། བདག་གིས་ནི་སུ་ལ་ཡང་བུ་འམ་བུ་མོ་སྦྱིན་པར་མི་ནུས་སོ། །དེ་ནས་ལྷའི་འཁོར་དེར་སྣང་བ་རྒྱ་ཆེན་པོ་ཞིག་བྱུང་བ་དང ། དེ་མཐོང་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་ཆེན་པོ་བཞི་ལ་ཉེ་དབང་དག་ཁྱེད་འདི་ནས་མ་འདོང་ཤིག་།ཇི་ལྟར་སྣང་བ་རྒྱ་ཆེན་པོ་འདི་ལས་གོར་མ་ཆགས་པར་འཁོར་འདིར་ཚངས་པ་ཆེན་པོ་འབྱུང་བར་འགྱུར་རོ་ཞེས་བསྒོ་བ་དང་དེ་དག་འཁོད་དོ། །འཁོར་དེར་ཡང་ཚངས་པ་ཆེན་པོ་དར་ལ་བབ་པ། གཞོན་པ། གཞོན་ནུ་མ་གཙུག་ཕུད་ལྔ་པ་བྱུང་ནས་དེ་ལྷའི་དབང་པོ་བརྒྱ་བྱིན་གྱི་པང་དུ་འདུག་གོ། །དེས་བསྒྲུབ་པ་གང་ཡིན་པ་དེ་ཡང་བསྒྲུབས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་ཚངས་པ་ཆེན་པོ་དེ་ལ་ཐལ་མོ་སྦྱར་ཏེ་གསོལ་བ་བཏབ་པ། ཚངས་པ་ཆེན་པོ་ཁྱོད་ཚངས་པ་དང ། ཚངས་པ་ཆེན་པོ་དང ། དབང་ཕྱུག་དང ། བྱེད་པ་པོ་དང ། འབྱིན་པ་པོ་དང ། སྤྲུལ་པ་པོ་དང ། གཙོ་བོ་དང ། ཁྱད་པར་དུ་འཕགས་པ་དང ། འཇིག་རྟེན་རྣམས་ཀྱི་ཕར་གྱུར་པ་ཁྱོད་ཀྱིས་འགྲོ་བ་ཕྱུང་བ་མ་ལགས་སམ། འོ་ན་བདག་ཅག་གི་འཁོར་དུ་གཏོགས་པ་ས་ལ་རྒྱུ་བ་ཞིག་མཆིས་ཏེ། དེ་ལྗོན་ཤིང་གི་གནས་ནས་བསྐྲད་པར་འགྱུར་གྱི། གྲོང་ཁྱེར་ཤིང་ནྱ་གྲོ་དྷ་ཅན་དེར་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷས་བུ་རྙེད་པར་འགྱུར
9.28a
བར་སྤྲོ་བ་བསྐྱེད་དུ་གསོལ། དེས་འདི་སྙམ་དུ་བདག་གིས་སུ་ཡང་བུ་འམ་བུ་མོ་སྦྱིན་པར་མི་ནུས་ན། གལ་ཏེ་བདག་གིས་བུ་དང་བུ་མོ་སྦྱིན་པར་མི་ནུས་སོ་ཞེས་སྨྲས་ན་ནི་བདག་གིས་མིང་གང་ཚངས་པ་དང ། ཚངས་པ་ཆེན་པོ་དང ། དབང་ཕྱུག་དང ། བྱེད་པ་པོ་དང ། འབྱིན་པ་པོ་དང ། སྤྲུལ་པ་པོ་ཞེས་བྱ་བའི་མིང་དེར་ཡང་མི་འགྱུར་རོ། །འོན་ཏེ་བུ་འམ་བུ་མོ་སྦྱིན་ནོ་ཞེས་སྨྲས་ན་ནི་གང་གི་ཚེ་བདག་ལ་དབང་མེད་ན་ཇི་ལྟར་སྦྱིན་པར་བྱ་སྙམ་དུ་དེ་ལྟར་བསམས་ཏེ། ལྷའི་དབང་པོ་བརྒྱ་བྱིན་ལ་གསང་སྟེ་སྨྲས་པ། ཀཽ་ཤི་ཀ་ཁོ་བོ་ནི་འཇིག་རྟེན་གྱིས་མ་ཕྱུང་ལ། ཁོ་བོས་ཀྱང་འཇིག་རྟེན་མ་ཕྱུང་ངོ ། །དེས་སྨྲས་པ་ཚངས་པ་ཆེན་པོ་གལ་ཏེ་དེ་ལྟ་ལགས་ན། འོན་ཀྱང་རང་གི་གནས་སུ་གཟིགས་ལ། གལ་ཏེ་འཆི་བའི་ཆོས་ཅན་འགའ་ཞིག་མཆིས་ན་དེ་བྲམ་ཟེ་ཤིང་སཱ་ལ་ཆེན་པོའི་ཁྱིམ་དེར་ཉིང་མཚམས་སྦྱོར་བ་ལེན་དུ་སྩོལ་ཅིག་།ཚངས་པས་སྨྲས་པ། ཀཽ་ཤི་ཀ་ཅིའི་ཕྱིར་ཁྱོད་རང་གི་གནས་སུ་མི་ལྟ། བརྒྱ་བྱིན་གྱིས་སྨྲས་པ། གནས་འདི་ན་ནི་ལྷ་རྣམས་དབང་ཆུང་བར་གྲགས་པ་ལགས་ལ། བྲམ་ཟེ་དེ་ནི་དབང་ཆེ་བར་གྲགས་པ་ལགས་པས། དེར་དབང་ཆུང་བར་གྲགས་པ་ཉིད་ཀྱིས་ཉིང་མཚམས་སྦྱོར་བ་ལེན་པར་མི་བཟོད་དོ། །དེ་ནས་ཚངས་པས་གནང་ནས་རང་གི་གནས་སུ་སོང་ན། དེ་ན་ཚངས་པ་ཞིག་ཚེ་ཟད་དེ་སྔ་ལྟས་བྱུང་བ་མཐོང་ནས་དེས་དེ་ལ་སྨྲས་པ་གྲོགས་པོ་གལ་ཏེ་ཁྱོད་སྡུག་པའི་གནས་ནས་འཆི་འཕོ་བར་བྱེད་ན་ཉིང་མཚམས་སྦྱོར་བར་འདྲས། དེའི་ཕྱིར་གྲོང་ཁྱེར་ཤིང་ནྱ་གྲོ་དྷ་ཅན་དུ་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷའི་ཁྱིམ་དུ་ཉིང་མཚམས་སྦྱོར་བ་ལོང་ཤིག་དང་ཁྱོད་ཡོ་བྱད་དག་གིས་མི་བྲེལ་བར་འགྱུར་རོ། །དེ་སྙིང་མི་དགའ་ནས་སླར་སྨྲས་པ། ཚངས་པ་ཆེན་པོ་ཐོང་ཤིག་ཐོང་ཤིག་།བརྩལ་བ་འདིས་ཅི་ཞིག་བྱ། བྲམ་ཟེ་ནི་ལོག་པར་ལྟ་བ་ཡིན་ལ། བྲམ་ཟེའི་ཁྱིམ་དུ་ཉིང་མཚམས་སྦྱོར་བ་བྱེད་པ་ཡང་དཔེར་ན་མི་འགའ་ཞིག་གསེར་གྱི་སྒྲོག་ལ་ཆགས་པའི་ཕྱིར་རང་གི་རྐང་པ་སྒྲོག་ཏུ་འཇུག་པར་བྱེད་པ་དེ་དང་འདྲའོ། །ད་ལྟར་བྱང་ཆུབ་སེམས་དཔའ་འདོད་པ་ན་སྤྱོད་པའི་ལྷ་དྲུག་ལ་ལན་གསུམ་གྱི་བར་དུ་ཡོངས་སུ་སྦྱང་བ་མཛད་ནས་དགའ་ལྡན་གྱི་ལྷའི་རིས་ནས་ཤི་འཕོས་ཏེ།
9.28b
མཚན་མོ་ནམ་ཕྱེད་ཀྱི་ཚེ་ས་སྲུང་གི་བུ་དང་འདྲ་བར་གླང་པོ་ཆེའི་ཕྲུག་གུ་དཀར་པོ་ཁ་བའི་མདོག་ཅན་མཆེ་བ་དྲུག་པ་ཡན་ལག་བདུན་ལེགས་པར་གནས་པ་ཅན་དུ་གྱུར་ཏེ། གངས་རིའི་ངོས་དང་ཉེ་བ་ཆུ་བོ་གངྒཱའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ན་ཤཱཀྱ་རྣམས་འཁོད་པ་དེ་ན་རྒྱལ་པོ་ཟས་གཙང་ཞེས་བྱ་བ་རྒྱལ་སྲིད་བྱེད་དུ་འཇུག་པ་དེའི་བཙུན་མོ་སྒྱུ་འཕྲུལ་ཆེན་མོ་ཞེས་བྱ་བ་དེའི་ལྷུམས་སུ་ཉིང་མཚམས་སྦྱོར་བ་བླངས་ནས་ཟླ་བ་བཅུ་ཐམ་པ་འདས་པ་དང་བལྟམ་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་ཞིང ། དེས་ཆོས་ཀྱི་མཆོད་སྡོང་སྒྲེང་བར་འགྱུར། ཆོས་ཀྱི་རྔ་རྡུང་བར་འགྱུར། ཆོས་ཀྱི་མཆོད་སྦྱིན་སྦྱིན་པའི་བར་དུ་འགྱུར་བས་བདག་ཀྱང་གནས་འདི་ནས་འཆི་འཕོས་ནས་དབང་ཆུང་བར་གྲགས་པའི་ཁྱིམ་དུ་ཉིང་མཚམས་སྦྱོར་བ་བླངས་ཏེ་ངེས་པར་བྱུང་ནས་བསྟན་པ་ལ་རབ་ཏུ་བྱུང་སྟེ་བདུད་རྩི་རྟོགས་པར་བྱ་དགོས་ལ། བྲམ་ཟེ་ཕྱུག་པོའི་ཁྱིམ་དུ་སྐྱེས་པ་ནི་བུ་གཅིག་པའི་ཕྱིར་དེ་དག་སུས་ཀྱང་རབ་ཏུ་འབྱུང་དུ་མི་སྟེར་རོ། །དེ་ལྟ་བས་ན་བདག་ལ་བྲམ་ཟེའི་ཁྱིམ་བུ་སྐྱེ་བ་དགོས་པ་མེད་དོ། །ཚངས་པ་ཆེན་པོས་འདི་སྐད་ཅེས་སྨྲས་སོ། །གལ་ཏེ་དེ་ལྟ་ཡིན་ན་ཡང་འོན་ཀྱང་ངས་གསོལ་བ་བཏབ་པ་བཞིན་དེར་ཉིང་མཚམས་སྦྱོར་བ་ལོང་ཤིག་དང ། དེའི་ཚེ་ངས་ཁྱོད་ཀྱི་ཕ་མ་གཉིས་ལ་དུས་དུས་སུ་བསྐུལ་བར་བྱའོ། །དེ་ནས་དེས་ཀྱང་གནང་ངོ ། །དེ་ནས་ལྷའི་བུ་བསོད་ནམས་ཀྱི་རྣམ་པར་སྨིན་པས་དབང་ཆེ་བར་གྲགས་པ། སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ། སྲིད་པ་ཐ་མ་པ། སྤྱོད་པ་ཚོལ་བ། འཆིང་བ་ཉམ་སྨད་པ་ཐར་པའི་ཚོགས་བཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང ། སྐྱེ་བ་དོན་དུ་མི་གཉེར་བ་ལུས་ཐ་མ་འཛིན་པ་དེ་ལྷའི་འཇིག་རྟེན་ནས་ཤི་འཕོས་ཏེ་ཆུང་མ་དེའི་མངལ་དུ་ཉིང་མཚམས་སྦྱོར་བ་བླངས་སོ་འདི་ན་བུད་མེད་མཁས་པའི་རང་བཞིན་ཅན་ཁ་ཅིག་ཤེས་པར་བྱ་བའི་གནས་ལྔ་རབ་ཏུ་ཤེས་ཏེ། སྐྱེས་པ་ཆགས་པར་གྱུར་པ་ཤེས་ཤིང་སྐྱེས་པ་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། མངལ་དུ་ཞུགས
9.29a
པ་ཤེས་པ་དང་གང་ལས་མངལ་དུ་ཞུགས་པ་དེ་ཡང་ཤེས་པ་དང ། ཁྱེའུར་ཤེས་ཤིང་བུ་མོར་ཤེས་པ་སྟེ། ་གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ་གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །བུད་མེད་དེས་ཀྱང་ཇི་ལྟར་བདག་གི་དཀུ་གཡས་རོལ་མི་བདེ་བས་ན་གོར་མ་ཆག་པར་བདག་གིས་བུ་རྙེད་དོ་སྙམ་དུ་རིག་ནས་དེ་དགའ་ཞིང་མགུ་ལ་ཡིད་རབ་ཏུ་དགའ་བས་ཁྱིམ་ཐབ་ལ་སྨྲས་པ། རྗེའི་སྲས་ཁྱོད་ལ་བཀའ་མཆིད་སྙན་པ་ཞིག་གསོལ་ལོ། །དེས་འདི་སྐད་ཅེས་སྨྲས་སོ། །བཟང་མོ་ལྷ་དང་མིའི་གཏམ་སྙན་པ་ཐོས་པར་གྱུར་ཅིག་།གཏམ་སྙན་པ་ཇི་ལྟ་བུ་ཞིག་ཇི་ལྟར་བདག་གི་དཀུ་གཡས་རོལ་མི་བདེ་བས་ན་གོར་མ་བཀུམ་པར་བདག་གིས་བུ་རྙེད་དོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་མགུ་ཞིང་དགའ་ལ་ཡིད་རབ་ཏུ་དགའ་སྟེ། བཞིན་པདྨ་རྒྱས་པ་ལྟ་བུས་དགའ་བའི་ཚིག་འདི་སྐད་ཅེས་སྨྲས་སོ། །བཟང་མོ་ཁྱོད་ཀྱི་བུ་དེ་བཞིན་དུ་སྐྱེ་བར་ཤོག་ཤིག་།ཁོ་བོས་ཀྱང་བུ་སྡུག་པའི་ངོ་མཐོང་བ་དང ། ཁོ་བོས་ཡུན་རིང་མོ་ཞིག་ནས་མངོན་པར་འདོད་པའི་བུ་ཡིད་ལ་བསམས་པ་བཞིན་དུ་འགྲུབ་པ་དང ། ཁོ་བོ་དང་འཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། ཁོ་བོས་ནོར་རྫས་ལ་སྤྱོད་པ་དང ། ཁོ་བོའི་རིགས་རྒྱུད་ཀྱང་ཡུན་རིང་དུ་གནས་པར་འགྱུར་བ་དང ། བདག་གི་དབང་ཕྱུག་ཀྱང་ཉམས་པར་མི་འགྱུར་བ་དང ། ་བདག་ཅག་ཤི་ཞིང་དུས་ལ་བབ་པ་ན་བདག་ཅག་གི་ཕྱིར་སྦྱིན་པ་ཆུང་ངམ། ཆེན་པོ་དག་སྦྱིན་ཞིང་བསོད་ནམས་དག་བྱས་ནས་འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་ཡོན་བསྔོ་བར་བྱེད་པར་ཤོག་ཤིག་།དེ་ལ་སེམས་ཅན་ཞུགས་པར་རིག་ནས་སྟེང་གི་ཁང་བཟངས་ཀྱི་གཞིར་གནོད་པ་མེད་པར་འདུག་ཏུ་བཅུག་སྟེ། གྲང་བ་ན་གྲང་བའི་ཡོ་བྱད་དག་དང ། དྲོ་བ་ན་དྲོ་བའི་ཡོ་བྱད་དག་དང ། སྨན་པས་བསྟན་པའི་ཁ་ཟས་དང་བཏུང་བའི་བྱེ་བྲག་ཧ་ཅང་མི་བསིལ་བ། ཧ་ཅང་མི་དྲོ་བ། ཧ་ཅང་མི་ཁ་བ། ཧ་ཅང་མི་ཚ་བ། ཧ་ཅང་ལན་ཚཝ་མི་ཆེ་བ། ཧ་ཅང་མི་སྐྱུར་བ། ཧ་ཅང་མི་མངར་བ། ཧ་ཅང་མི་བསྐ་བ། ཧ་ཅང་མི་སྣུམ་པ། ཧ་ཅང་མི་རྩུབ་པ།
9.29b
ཁ་བ་དང ། ཚ་བ་དང ། ལན་ཚཝ་དང ། སྐྱུར་བ་དང ། མངར་བ་དང ། ་བསྐ་བ་དང ། སྣུམ་པ་དང ། རྩུབ་པ་རྣམ་པར་སྤངས་པའི་ཁ་ཟས་དང་བཏུང་བ་དག་གིས་དེ་ལ་རིམ་གྲོར་བྱེད་དུ་འཇུག་གོ། །དེ་ནས་མངལ་ན་གནས་པ་ཡོངས་སུ་བསྐྱང་བའི་ཕྱིར་འདི་ལྟར་ཆུང་མ་དེ་གོས་ཚོན་སྣ་ཚོགས་སུ་སྤེལ་བ་ནི་བསྐོན། ལག་པ་ནི་གསེར་གྱི་གདུ་བུ་དང ། ནོར་བུ་དང ། མུ་ཏིག་གིས་གཏམས། དོ་ཤལ་དང ། སེ་མོ་དོ་རྣམ་པར་འཕྱང་བ་དང ། གདུ་བུ་དང ། དཔུང་རྒྱན་དང ། རྣ་ཆ་གདུབ་འཁོར་ནི་ཐོགས། མིག་ནི་མིག་སྨན་གྱིས་བྲིས། བཞིན་ནི་དམར་རྩིའི་ཐིག་ལེས་མཛེས་པར་བྱས། སོ་ནི་མེ་ཏོག་ཀུ་མུ་ད་དང ། དངུལ་དང ། ཁ་བ་དང ། མུ་ཏིག་གི་དོ་ཤལ་དང ། མེ་ཏོག་ཀུན་ད་དང ། ཟླ་བ་དང ། ངང་པ་དང ། བའི་འོ་མ་དང ། དུང་དང ། པདྨའི་རྩ་བ་ལྟར་དྲི་མ་ནི་མེད། རྐེད་པ་ནི་གསེར་གྱི་འོག་པག་གིས་བཅིངས། རྐང་པ་ནི་རྐང་རྒྱན་གྱིས་མཛེས་པར་བྱས་ནས་གསེར་གྱི་མཆོད་སྡོང་མེ་ཏོག་གིས་ཀླུབས་པ་ལྟ་བུ་དེ་ལྷའི་བུ་མོ་དགའ་བའི་ཚལ་ན་རྒྱུ་བ་བཞིན་དུ་གླུ་དང་རོལ་མོའི་སྒྲ་བྱེད་པའི་རོལ་མོ་མཁན་དང ། སྟེང་གི་ཁང་བཟངས་ཀྱི་ཐོག་ཏུ་བཞག་ནས། ཁྲི་བོ་ཆེ་ལེགས་པར་བཙུགས་པའི་སྟེང་ན་ཁྲི་ནས་ཁྲིར་དང ། ཁྲིའུ་ནས་ཁྲིའུར་རྒྱུ་ཞིང་ཤོད་ཀྱི་ས་གཞིར་མི་འབབ་ལ། དེ་ལ་འགའ་ཡང་སྒྲ་ཡིད་དུ་མི་འོང་བ་འབྱིན་པར་མི་བྱེད་དོ། །རེ་ཤིག་ན་ཁྱིམ་དེ་ནོར་དང ། འབྲུ་དང ། གསེར་དང ། དབྱིག་དང ། མཛོད་དང ། བང་བ་དང ། བྲན་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། རྐང་གཉིས་པ་དང ། རྐང་བཞི་པ་ལ་སོགས་པ་དག་གིས་རྒྱས་པར་འཕེལ་བར་གྱུར་ཏེ། ཇི་ལྟར་རྒྱ་མཚོ་ཆེན་པོ་ཆུ་ཀླུང་ལྔ་བརྒྱ་དག་གིས་ཉིན་གཅིག་བཞིན་འགེངས་པར་བྱེད་པ་དེ་བཞིན་དུ་ཁྱིམ་དེ་ཡང་རྒྱས་པར་གྱུར་ཏོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་འདི་སྙམ་དུ་གལ་ཏེ་བདག་ལ་བུ་ཞིག་ཡོད་ན། ཇི་དེས་ཇི་ལྟར་བྲམ་ཟེ་ཕལ་དག་ལྟར་ནས་ཐ་མལ་པ་ཐོགས་ནས་རྒྱལ་པོ་པད་མ་ཆེན་པོ་ལ་རྒྱལ་བ་སྤེལ་བ་བྱ་འམ། ་མ་ལ་བདག་གིས་དེའི་དོན་དུ་གསེར་གྱི་ནས་གཞན་བྱེད་དུ་གཞུག་གོ་སྙམ་དུ་བསམས་ནས་རེ་ཤིག་ན་གསེར་གྱི་ནས་བྱེད་དུ་བཅུག་གོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ།
9.30a
བལྟ་ན་སྡུག་པ། མཛེས་པ། པད་མའི་རྩ་བའི་མདོག་ལྟར་དཀར་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། པྲལ་བའི་དབྱེས་ཆེ་བ། སྨིན་མ་བཟང་བ། ཐོང་ཁ་སེང་གེའི་འདྲ་བ། རོ་སྟོད་སེང་གེའི་ལྟ་བུ། དཔུང་པ་རིང་བ་ཞིག་བཙས་སོ། །དེ་བཙས་པའི་བཙས་སྟོན་བྱ་བར་བརྩམས་ཏེ། ཤིང་ནྱ་གྲོ་དྷ་ཅན་དེ་ཐམས་ཅད་རྡོ་དང ། གསེག་མ་དང ། གྱོ་མོ་དག་སེལ་དུ་བཅུག་ཅིང ། ཙན་དན་གྱི་ཆུས་ཆག་ཆག་བཏབ། མེ་ཏོག་སྣ་ཚོགས་བཀྲམ། པོག་ཕོར་ནས་དྲི་དུ་མས་བདུགས། རྒྱལ་མཚན་དང ། བ་དན་བསྒྲེང ། དར་གྱི་ཆུན་པོ་དང ། ལྡ་ལྡི་ཡང་བརྐྱང ། ཟོང་དགྲམ་པའི་ཚོང་སྲང་དག་ཀྱང་བྱེད་དུ་བཅུག་ནས་སྒོ་བཞི་དང ། བཞི་མདོའི་དབུས་སུ་སྦྱིན་པ་དག་ནི་སྦྱིན། བསོད་ནམས་དག་ནི་བྱེད་དེ། ་ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། གོས་འདོད་པ་རྣམས་ལ་ནི་གོས། ཕྲེང་བ་དང ། སྤོས་དང ། བྱུག་པ་འདོད་པ་རྣམས་ལ་ནི་ཕྲེང་བ་དང ། སྤོས་དང ། བྱུག་པ་རྣམས་སོ། །ཉི་མ་བདུན་གསུམ་ཉི་ཤུ་རྩ་གཅིག་ཏུ་སྦྱིན་པ་རྣམ་པ་མང་པོ་དེ་ལྟ་བུ་དག་ནི་བྱིན། བསོད་ནམས་དག་ནི་བྱས་ནས་ཉེ་དུ་རྣམས་ཚོགས་ཤིང་འདུས་ཏེ། འདི་ལྟར་ཁྱེའུ་འདི་ལྗོན་ཤིང་ནྱ་གྲོ་དྷ་ལ་གསོལ་བ་བཏབ་སྟེ་རྙེད་པ་དེའི་ཕྱིར་ཁྱེའུའི་མིང་ནྱ་གྲོ་དྷ་སྐྱེས་ཞེས་གདགས་སོ་ཞེས་མིང་བཏགས་སོ། །བྲམ་ཟེ་རྣམས་ཀྱིས་ནི་འདི་སྐད་དུ། འདིའི་ཕ་ཡང་འོད་སྲུང་དང་རུས་གཅིག་པས་ཁྱེའུའི་མིང་འོད་སྲུང་དུ་གདགས་སོ་ཞེས་སྨྲས་སོ། །དེ་ལ་ཁ་གཅིག་གིས་ནི་འོད་སྲུང་ཞེས་བྱ་བར་ཤེས་སོ། །ཁ་ཅིག་གིས་ནི་ནྱ་གྲོ་དྷ་སྐྱེས་ཞེས་བྱ་བར་ཤེས་སོ། །དེ་ཡང་མ་མ་བརྒྱད་པོ་པང་ན་འཚོ་བའི་མ་མ་གཉིས་དང ། ནུ་མ་བསྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེན་གྲོགས་ཀྱི་མ་མ་གཉིས་ལ་གཏད་དེ་ལྕགས་ཀྱི་མདའ་ཐོགས་ཤིང ། བསྲུང་ཁུག་དང ། རྨ་བྱའི་མདོངས་མང་པོ་ཐོགས་ནས་འོ་མ་དང ། ཞོ་དང་མར་སར་དང ། ཞུན་མར་དང་མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་དོ། །དེ་ཡང་རྫིང་ན་གནས་པའི་པདྨ་བཞིན་དུ་སྐྱེད་དྲག་པར་གྱུར་ཏོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་སློབ་ཏུ་བཅུག་པ་ལས་དེ་ཉི་མ་ཉུང་ཤས་ཀྱིས
9.30b
ཡི་གེའི་ཕ་རོལ་དུ་སོན་ཅིང ། དེའི་ཚེ་ན་བྲམ་ཟེའི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ཀུན་དུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་བླང་བ་དང ། ས་བླང་བ་དང ། རབ་བསྔགས་བྱ་བ་དང ། འཐོར་འཐུང་བྱ་བ་དང ། བཟླས་བརྗོད་བྱ་བ་དང ། ཡང་དག་པར་སྡོམ་པ་དང ། ངེས་པར་བྱ་བ་དང ། དུས་མཚམས་སུ་ཉེ་བར་སྤྱད་པར་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུག་པ་དང ། ཀློག་པ་དང ། ཀློག་དུ་འཇུག་པ་དང ། སྦྱིན་པ་དང ། ལེན་པ་ལ་མཁས་པར་གྱུར་ཏོ། །རིག་པའི་གནས་བཅཝ་བརྒྱད་དག་ལ་མཁས་པར་གྱུར་ཏེ། འདི་ལྟ་སྟེ། གསང་སྔགས་དང ། རྒྱུད་དང ། ཆོ་ག་ཞིབ་མོ་དང ། གཏན་ཚིགས་ཀྱི་རིག་པ་དང ། རིག་བྱེད་དང ། བརྡ་སྤྲོད་པ་དང ། སྒྲ་ངེས་པར་སྦྱོར་བ་དང ། ཤེས་གསལ་དང ། ངེས་པའི་ཚིག་དང ། བསྡེབ་སྦྱོར་བསྡུས་པ་དང ། སྐར་མའི་རིག་པ་དང ། རྟོགས་བྱེད་ཀྱི་རིག་པ་དང ། ཆུར་ལྷུང་གི་རིག་པ་དང ། ཆེར་སྤྱོད་ཀྱི་རིག་པ་དང ། འཇིག་རྟེན་རྒྱང་ཕན་པའི་རིག་པ་དང ། བྱེ་བྲག་པའི་རིག་པ་དང ། བརྒྱུད་དྲུག་བཅུ་པ་དང ། ཁྱུར་མིད་ཀྱི་རིག་པ་དང ། གནས་འདུག་གི་རིག་པ་དང ། རིག་པའི་གནས་བཅཝ་བརྒྱད་པོ་འདི་དག་ཐམས་ཅད་ལ་བློ་ཤིན་དུ་རྣོ་བར་གྱུར་ཏོ། །རེ་ཤིག་ན་ཕས་དེ་ལ་བྲམ་ཟེའི་ཁྱེའུ་ལྔ་བརྒྱ་བྲམ་ཟེ་གཙང་སྦྲ་ཅན་གྱིས་ཇི་སྙེད་ཐོས་པ་འདོན་པ་བྱེད་དུ་གཏད་པ་དང ། དེས་དེ་ལྟར་བགྱིའོ་ཞེས་ཕའི་ཚིག་མཉན་ནས་དེ་བཞིན་དུ་བྱས་སོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་འདི་སྙམ་དུ་བདག་གི་རིགས་རྒྱུད་ནི་ཆེ། ་བདག་ནོར་རྒྱ་ཆེན་པོ་དང་ནི་ལྡན་པ་ཡིན་ཏེ། ཁྱིམ་འདི་ལྟ་བུར་རྒྱུ་མེད་པར་བུ་དག་ཉིང་མཚམས་སྦྱོར་བ་མི་ལེན་ལ། བྲམ་ཟེ་རྣམས་ཀྱི་ལུགས་ནི་ལོ་བཞི་བཅུ་རྩ་བརྒྱད་དུ་ཚངས་པར་སྤྱོད་པ་ཡོངས་སུ་བསྲུང་བ་བྱས་ཏེ། རྒས་པའི་གནས་སྐབས་ན་ཆུང་མ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ཡིན་ན། བདག་གིས་ནི་ཐོག་མ་ཉིད་ནས་བུ་བག་མ་བླང་བར་བྱའོ། །སྙམ་དུ་བསམས་ནས། དེས་ནྱ་གྲོ་དྷཱ་སྐྱེས་དེ་ལ་སྨྲས་པ།
9.31a
བུ་འཇིག་རྟེན་ན་འདི་ནི་ཆོས་ཉིད་ཡིན་པས་རིགས་རྒྱུད་ཀྱི་ཕྱིར་བག་མ་བླང་བར་བྱའོ། །དེས་སྨྲས་པ། ཡབ་བདག་ལ་མཆིས་བྲང་ཅིར་འཚལ་ཏེ། བདག་ནི་དཀའ་ཐུབ་ཀྱི་ནགས་སུ་གནས་པར་བགྱིའོ། །ཕ་དེས་དེ་ལ་རིགས་རྒྱུད་གཏན་པར་བྱ་མོད་ཅེས་ཡང་ནས་ཡང་དུ་བརྟུན་པ་དང ། དེ་འདི་སྙམ་དུ་སེམས་ཏེ། འོ་ན་གང་གིས་ན་བདག་གིས་ཡབ་ཡུམ་གྱི་བཀའ་ཡང་མ་བཅག་པར་འགྱུར་བ་དང ། བདག་ཀྱང་བུད་མེད་དང་བསྡུས་པར་མི་འགྱུར་བའི་ཐབས་ཅི་ཡོད་སྙམ་དུ་དེ་ལྟར་བསམས་ནས་ཕ་ལ་སྨྲས་པ། ཡབ་བདག་ལ་འཛམ་བུའི་ཆུ་བོའི་གསེར་ཞིག་འཚལ་ལོ། །དེས་དཀོར་བའི་མི་བོས་ནས་འདི་སྐད་ཅེས་སྨྲས་སོ། །ནྱ་གྲོ་དྷཱ་སྐྱེས་འདི་ལ་འཛམ་བུའི་ཆུ་བོའི་གསེར་ཇི་སྙེད་དགོས་པ་དེ་སྙེད་བྱིན་ཅིག་།དཀོར་བའི་མིས་འདི་སྐད་ཅེས་སྨྲས་སོ། །དེ་ལྟར་བགྱིའོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་ཕ་ལས་ལྐོག་ཏུ་མགར་བ་ལེགས་པར་བསླབས་པ་བོས་ནས་འཛམ་བུའི་ཆུ་བོའི་གསེར་གྱི་བུད་མེད་ཀྱི་གཟུགས་བརྙན་བྱེད་དུ་བཅུག་ནས་དེས་དེ་ཕ་ལ་ཕུལ་ཏེ་སྨྲས་པ། ཡབ་འདི་ལྟ་བུའི་གཟུགས་དང་འདྲ་བའི་བུ་མོ་ཞིག་གལ་ཏེ་རྙེད་ན་དེ་བདག་གི་མཆིས་བྲང་ལགས་ཀྱི་དེ་ལས་གཞན་པ་ནི་བདག་གི་མཆིས་བྲང་དུ་དགོས་པ་མ་མཆིས་སོ། །དེ་འདི་སྙམ་དུ་སེམས་ཏེ། བརྟགས་ན་བུ་འདིས་ནི་བདག་ཅག་ལ་མ་བསམས་པ་ལྟ་སྟེ། གསེར་ཐ་མལ་པའི་མདོག་ཅན་གྱི་བུ་མོ་ཡང་ག་ལ་ཡོད་ན། འཛམ་བུའི་ཆུ་བོའི་གསེར་ལས་བྱས་པ་ལྟ་བུ་ལྟ་སྨོས་ཀྱང་ཅི་དགོས་སྙམ་དུ་དེ་སེམས་ཁོངས་སུ་ཆུད་ཅིང་འདུག་པ་དང ། བྲམ་ཟེའི་ཁྱེའུ་དེ་རྣམས་ཀྱིས་མཐོང་ནས་དེ་རྣམས་དེའི་དྲུང་དུ་དོང་སྟེ་དྲིས་པ། མཁན་པོ་ཅིའི་སླད་དུ་ཐུགས་ཁོངས་སུ་ཆུད་ཅིང་བཞུགས། དེས་དེ་རྣམས་ལ་བུ་དེའི་བག་མ་བླང་བའི་སྦྱོར་བ་ཤིན་དུ་རྒྱ་ཆེར་སྨྲས་ནས་བརྟགས་ན་བུས་ནི་བདག་ལ་མ་བསམས་པ་ལྟ་སྟེ། རེ་ཤིག་གསེར་ཐ་མལ་པའི་མདོག་ཅན་གྱི་བུ་མོ་ཡང་རྙེད་པར་དཀའ་སྟེ་ག་ལ་ཡོད་ན་གཙོ་བོ་འཛམ་བུའི་ཆུ་བོའི་གསེར་ལས་བྱས་པའི་གཟུགས
9.31b
འདི་ལྟ་བུ་ལྟ་སྨོས་ཀྱང་ཅི་དགོས་ཏེ། ག་ལས་འབྱུང་བར་འགྱུར། དེ་རྣམས་ཀྱིས་དེ་ལ་སྨྲས་པ། མཁན་པོ་མི་དགྱེས་པར་མ་མཛད་ཅིག་།ཇི་ལྟ་བུའི་སྐྱེས་བུ་འབྱུང་བ་དེ་ལ་ནི་དེ་འདྲ་བ་ཁོ་ནའི་ཡོ་བྱད་ཕུན་སུམ་ཚོགས་པ་འབྱུང་བས་རེ་ཤིག་གཅིག་ནི་འདིས་བགྱི། གཟུགས་བརྙན་འདི་ལྟ་བུ་གཞན་གསུམ་ཞིག་བགྱིད་དུ་སྩོལ་ཅིག་དང ། བདག་ཅག་གིས་གང་གིས་ན་གདོན་མི་འཚལ་བར་བུ་མོ་རྙེད་པར་འགྱུར་བ་དེ་ལྟར་ཕྱོགས་བཞི་དག་ཏུ་ཡོངས་སུ་བཙལ་བར་བགྱིའོ། །དེས་སློབ་མ་རྣམས་ཀྱི་ཚིག་མཉན་ནས་གཟུགས་བརྙན་གཞན་གསུམ་བྱེད་དུ་བཅུག་གོ། །བྲམ་ཟེའི་ཁྱེའུ་དེ་རྣམས་ཀྱིས་གཟུགས་བརྙན་བཞི་བླང་ཏེ། གྲོང་དང་གྲོང་རྡལ་དང ། གྲོང་ཁྱེར་དང ། ལྗོངས་དག་ཏུ་རྒྱུ་བའི་ཕྱི་རོལ་མོའི་སྒྲའི་ཆ་བྱད་ཀྱི་བར་དང་ཆས་ནས་ཕྱོགས་ཕྱོགས་སུ་བརྒྱ་བརྒྱ་ཆས་པར་གྱུར་པ་དང ། ་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷས་དེ་རྣམས་ལ་བསྒོ་བ། ཁྱོད་ཀྱིས་རིགས་སམ། རུས་མི་དམའ་བར་གཟུགས་བརྙན་འདི་འདྲ་བའི་གཟུགས་འབའ་ཤིག་སྒྲུབས་ཤིག་།དེ་རྣམས་འདི་སྙམ་དུ་བདག་ཅག་གིས་ཁྱིམ་ནས་ཁྱིམ་ཀུན་དུ་རྒྱུ་བར་ག་ལ་ནུས་ཀྱིས་ཐབས་ཤིག་བསམ་པར་བྱའོ་སྙམ་མོ། །དེ་རྣམས་ཀྱིས་ཐབས་འཕྲིགས་ནས་དེ་རྣམས་ཀྱིས་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་གང་དུ་ཕྱིན་པ་དེར་ཞུགས་ནས་དབུས་སུ་གཟུགས་བརྙན་བཞག་སྟེ་སྤོས་དང ། མེ་ཏོག་དང ། བདུག་པ་ལ་སོགས་པ་དང ། རོལ་མོའི་སྒྲ་འབྱིན་པས་མཆོད་པ་དག་བྱེད་ཅིང་བུ་མོའི་ལྷ་མོ་ཕྱིན་པ་འདི་ལ་བུ་མོ་དག་བཀུར་སྟི་བྱེད་ན། དེ་ལ་དམ་པ་ལྔ་པོ་རིགས་མཐོན་པོར་སྐྱེ་བ་དང ། རིགས་མཐོན་པོའི་བག་མར་ལེན་པར་འགྱུར་བ་དང ། ཁྱིམ་ཤིན་དུ་ཕུན་སུམ་ཚོགས་པར་འདུག་པ་དང ། ཁྱིམ་ཐབ་ཀྱང་དེའི་དབང་དུ་འགྱུར་བ་དང ། བུ་དང་ལྡན་པར་འགྱུར་བ་སྦྱིན་པར་བྱེད་དོ་ཞེས་ཚིག་དག་ཀྱང་སྨྲ་བར་བྱེད་དོ། །ཚིག་དེ་ཐོས་ནས་བུ་མོའི་སྐྱེ་བོའི་ཚོགས་རྒན་མོ་དང ། གཞོན་ནུར་བཅས་པས་མཆོད་པ་དང ། བཀུར་སྟི་བྱེད་ཅིང་གསོལ་བ་ཡང་འདེབས་པར་བྱེད་དོ། །རེ་ཤིག་ན་ཤར་དང ། ལྷོ་དང ། བྱང་གི་ཕྱོགས་རྣམས་སུ་དོང་བ་དེ་དག་བསམ་པ་མ་གྲུབ་པར་ལྷགས་སོ། །དེ་དག་མཐོང་ནས་བྲམ་ཟེ་ཤིང་སཱ་ལ་ཆེན་པོ་ནྱ་གྲོ་དྷ
9.32a
ནི་སེམས་ཁོངས་སུ་ཆུད་ཅིང་འདུག་གོ། །བྲམ་ཟེའི་ཁྱེའུ་ནྱ་གྲོ་དྷ་སྐྱེས་ནི་མགུ་ཞིང་དགའ་ལ་ཡིད་རབ་ཏུ་དགའ་སྟེ། འདི་སྐད་དུ་གལ་ཏེ་མ་རྙེད་ན་ལེགས་སོ་ཞེས་སྨྲས་སོ། །བྲམ་ཟེའི་ཁྱེའུ་གང་དག་བུ་མོའི་ལྷ་མོ་ཐོགས་ཏེ་ནུབ་ཕྱོགས་སུ་དོང་བ་དེ་རྣམས་ནི་མཐར་གྱིས་གྲོང་དང ། གྲོང་རྡལ་དང ། ཡུལ་འཁོར་དང ། ་རྒྱལ་པོའི་ཕོ་བྲང་དུ་རྒྱུ་ཞིང་ཀ་པི་ལའི་ལྗོངས་ན་གྲོང་ཁྱེར་ཀ་པི་ལ་ཞེས་བྱ་བ་དེར་ཕྱིན་ནོ། །དེ་ན་ཡང་བྲམ་ཟེ་སེར་སྐྱ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་དེའི་ཆུང་མ་དེ་ལ་སེམས་ཅན་ཞིག་ཞུགས་པར་གྱུར་ཏོ། །ཇི་ཙམ་ན་ཟླ་བ་བརྒྱད་དམ། དགུ་འདས་ཏེ་བཙས་པ་ལས། བུ་མོ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་སྐྱེས་ནས་དེའི་ཉེ་དུ་རྣམས་ཚོགས་ཤིང་འདུས་ཏེ་ཉི་མ་བདུན་གསུམ་ཉི་ཤུ་གཅིག་ཏུ་སྦྱིན་པ་དག་ནི་སྦྱིན། ་བསོད་ནམས་དག་ནི་བྱས་ནས་མིང་འདོགས་པར་བྱེད་དོ། །ཡུལ་དབུས་ན་ཡང་ལུགས་ཀྱིས་གང་གཟུགས་བཟང་བ་དེ་ལ་བཟང་མོ་ཞེས་ཟེར་བས་འདི་སྐད་དུ་བུ་མོ་འདི་གཟུགས་བཟང་བ། ་བལྟ་ན་སྡུག་པ། མཛེས་པ་ཡིན་ལ། འདིའི་ཕ་ཡང་སེར་སྐྱ་ཞེས་བྱ་བ་ཡིན་པས་བུ་མོ་འདི་ཡང་སེར་སྐྱའི་བུ་མོ་བཟང་མོ་ཞེས་བྱ་བར་གདགས་སོ་ཞེས་མིང་བཏགས་སོ། །དེ་ནས་སེར་སྐྱའི་བུ་མོ་བཟང་མོ་མ་མ་བརྒྱད་ལ་རྗེས་སུ་བཏད་དེ། བརྒྱད་པོ་གང་ཞེ་ན། པང་ན་འཚོ་བའི་མ་མ་གཉིས་དང ། ནུ་མ་བསྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེན་གྲོགས་ཀྱི་མ་མ་གཉིས་དང ། ལྕགས་ཀྱི་མདའ་ཐོགས་ཤིང་རྨ་བྱའི་མདོངས་མང་པོའི་བསྲུང་ཁུག་བཅངས་ནས། འོ་མ་དང ། ཞོ་དང ། མར་དང་ཞུན་མར་དང ། མར་གྱི་སྙིང་ཁུ་དང ། གཞན་ཡང
9.32b
ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་དོ། །དེ་ཡང་རྫིང་ན་གནས་པའི་པདྨ་བཞིན་དུ་སྐྱེ་དྲག་པར་གྱུར་ཏེ། ཇི་ཙམ་ན་ཆེན་མོར་གྱུར་ཏོ། །དེ་རྣམས་སྲང་གི་དབུས་སུ་ཕྱིན་ནས་གཟུགས་བརྙན་བཞག་སྟེ། སྤོས་དང་མེ་ཏོག་དང ། བདུག་པ་ལ་སོགས་པ་དང ། རོལ་མོའི་སྒྲ་འབྱིན་པས་མཆོད་པ་དག་བྱེད་ཅིང ། བུ་མོའི་ལྷ་མོ་ཕྱིན་པ་འདི་ལ་བུ་མོ་དག་བཀུར་སྟི་བྱེད་ན། དེ་ལ་དམ་པ་ལྔ་པོ་རིགས་མཐོན་པོར་སྐྱེ་བ་དང ། རིགས་མཐོན་པོའི་བག་མར་ལེན་པར་འགྱུར་བ་དང ། ཁྱིམ་ཤིན་དུ་ཕུན་སུམ་ཚོགས་པར་འདུག་པ་དང ། ཁྱིམ་ཐབ་ཀྱང་དེའི་དབང་དུ་འགྱུར་བ་དང ། བུ་དང་ཡང་ལྡན་པར་འགྱུར་བར་སྦྱིན་པར་བྱེད་དོ། །ཞེས་ཚིག་དག་ཀྱང་སྨྲ་བར་བྱེད་དོ། །དེ་ནས་གྲོང་ཁྱེར་ཀ་པི་ལ་ན་འཁོད་པའི་གཞོན་ནུ་མ་རྣམས་བུ་མོའི་ལྷ་མོའི་དྲུང་དུ་དོང་སྟེ། མཆོད་པ་དག་བྱེད་ཅིང་གསོལ་བ་དག་འདེབས་པར་བྱེད་དོ། །དེ་ནས་བྲམ་ཟེ་སེར་སྐྱའི་ཆུང་མས་བུ་མོའི་ལྷ་མོ་དེ་ལྟ་བུ་འོངས་ཏེ་དམ་པ་ལྔ་སྦྱིན་པར་བྱེད་དོ་ཞེས་ཐོས་སོ། །དེས་གཏམ་དེ་ཐོས་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བུ་མོ་སོང་ལ་ཁྱོད་ཀྱང་བུ་མོའི་ལྷ་མོ་ལ་མཆོད་པ་བྱོས་ཤིག་།དེས་སྨྲས་པ། བུ་མོའི་ལྷ་མོ་མཆོད་པས་དེ་ལ་ཅིར་འགྱུར། དེས་སྨྲས་པ། གསོལ་བ་བཏབ་ན་དམ་པ་ལྔ་སྦྱིན་པར་བྱེད་དེ། ལྔ་གང་ཞེ་ན། རིགས་མཐོན་པོར་སྐྱེ་བ་དང ། རིགས་མཐོན་པོའི་བག་མར་ལེན་པར་འགྱུར་བ་དང ། ཁྱིམ་ཤིན་དུ་ཕུན་སུམ་ཚོགས་པར་འདུག་པ་དང ། ཁྱིམ་ཐབ་ཀྱང་དེའི་དབང་དུ་འགྱུར་བ་དང ། བུ་དང་ཡང་ལྡན་པར་འགྱུར་རོ། །དེ་ནས་སེར་སྐྱའི་བུ་མོ་བཟང་མོས་མ་དེ་ལ་འདི་སྐད་ཅེས་སྨྲས་སོ། །ཡུམ་བདག་ནི་རིགས་མཐོན་པོར་སྐྱེས་ཤིང་གཟུགས་བཟང་བ་དང ། ་བལྟ་ན་སྡུག་པའི་བར་དུ་གྱུར་ཀྱང་འདོད་པ་རྣམས་ནི་བདག་དོན་དུ་མི་གཉེར་ན་བདག་ལ་དམ་པ་ཅི་ཞིག་འཚལ། དེ་ལ་མས་ཡང་དང་ཡང་བསྐུལ་བ་དང ། དེ་ནས་སེར་སྐྱའི་བུ་མོ་བཟང་མོས་མའི་སེམས་བསྲུང་བའི་ཕྱིར་མེ་ཏོག་དང ། སྤོས་དང ། ཕྱེ་མ་དང ། གོས་ལ་སོགས་པ་ཁྱེར་ཏེ་བུ་མོའི་ལྷ་མོ
9.33a
ག་ལ་བ་དེར་སོང་ངོ ། །ཇི་ལྟ་ཇི་ལྟར་གཟུགས་བརྙན་དེ་དང་ཉེ་བར་ཕྲད་དུ་བྱེད་པ་དེ་ལྟ་དེ་ལྟར་གཟུགས་བརྙན་དེ་ཇེ་སྔོ་ཇེ་སྔོར་གྱུར་ཏོ། །དེ་དང་ཉེ་བར་ཕྲད་པ་དང ། བུ་མོའི་ལྷ་མོའི་དེ་ལྕགས་ལས་བྱས་པ་འདྲ་བར་གྱུར་ཏོ། །བྲམ་ཟེའི་ཁྱེའུ་དེ་རྣམས་འདི་སྙམ་དུ་ཆོ་འཕྲུལ་བྱུང་བར་གྱུར་པ་འདི་ཅི་ཞིག་ཡིན། འདི་སུའི་མཐུ་ཡིན་སྙམ་དུ་བསམས་པ་ལས་དེ་རྣམས་ཀྱིས་སྣང་བ་འདི་ལྟ་བུ་འདི་ནི་བུ་མོ་འདིའི་ཡིན་ནོ་སྙམ་དུ་འཕྲིགས་ནས་དེ་རྣམས་ཀྱིས་བུ་མོ་དེ་ལ་དྲིས་པ། ཁྱོད་སུའི་བུ་མོ་ཡིན། དེས་སྨྲས་པ། བྲམ་ཟེའི་སེར་སྐྱའི་བུ་མོ་བཟང་མོའོ། །དེ་ནས་བྲམ་ཟེའི་ཁྱེའུ་དེ་རྣམས་ཀྱིས་བུ་མོ་དེ་ལས་ཐོས་ནས་བྲམ་ཟེ་སེར་སྐྱའི་ཁྱིམ་ག་ལ་བ་དེར་དོང་སྟེ། ཕྱིན་ནས་ཁྱིམ་གྱི་སྒོ་དྲུང་དུ་འཁོད་དེ་སྨྲས་པ། ཤེས་ལྡན་སློངས་མོ་བྱིན་ཅིག་།བྲམ་ཟེ་སེར་སྐྱས་སློངས་མོ་ཞེས་ཐོས་པས་བྲམ་ཟེའི་ཁྱེའུ་སློངས་མོ་དོན་དུ་གཉེར་བ་ཡིན་སྙམ་སྟེ། ནང་མི་ལ་བསྒོ་བ་བྲམ་ཟེའི་ཁྱེའུ་རྣམས་ལ་ཤིང་མ་ལུ་ཏའི་མེ་ཏོག་གི་མདོག་འདྲ་བའི་ཕྱེ་དང ། མར་དང་བུ་རམ་དང ། དགུན་འབྲུམ་དང ། བལ་པོ་སེའུ་དང ། ཏིན་ཏི་ལི་ཀ་བྱིན་ཅིག་།ཡུལ་དབུས་ན་ཡང་ལུགས་ཀྱིས་བུ་མོ་རྣམས་ཀྱིས་ཕའི་ཁྱིམ་ནས་སློངས་མོ་སྦྱིན་པར་བྱེད་དོ། །དེ་ཅིའི་ཕྱིར་ཞེ་ན། ཕའི་ཁྱིམ་ནས་སློངས་མོ་བྱིན་པས་སྙིང་པོ་བླང་བ་བླངས་པར་འགྱུར་རོ། །དེ་ནས་སེར་སྐྱའི་བུ་མོ་བཟང་མོས་སློངས་མོ་ཁྱེར་ཏེ་བྲམ་ཟེའི་ཁྱེའུ་སློངས་མོ་བ་རྣམས་ག་ལ་བ་དེར་སོང་སྟེ་ཕྱིན་ནས་སློངས་མོ་དེ་བྱིན་པ་དང ། བྲམ་ཟེའི་ཁྱེའུ་དེ་རྣམས་སློངས་མོ་ལེན་པར་མི་བྱེད་དོ། །ཇི་ཙམ་ན་བྲམ་ཟེ་སེར་སྐྱས་ཐོས་སོ། །དེ་ནས་བྲམ་ཟེ་སེར་སྐྱས་བྲམ་ཟེའི་ཁྱེའུ་དེ་རྣམས་ལ་འདི་སྐད་ཅེས་སྨྲས་སོ། །ཅི་འདོད་དེ་རྣམས་ཀྱིས་འདི་སྐད་ཅེས་སྨྲས་སོ། །བུ་མོའི་སློངས་མོ་བདག་ལ་དགོས་ཀྱི། ཕྱེའི་སློངས་མོ་ནི་མ་ཡིན་ནོ། །དེ་ནས་བྲམ་ཟེ་སེར་སྐྱས་ཁྲོས་ནས་བྲམ་ཟེའི་ཁྱེའུ་དེ་རྣམས་ལ་འདི་སྐད་ཅེས་སྨྲས་སོ། །ངས་ཁྱོད་ལ་བུ་མོའི་སློངས་མོ་མི་སྦྱིན་ནོ། །དེ་དག་གིས་འདི་སྐད་ཅེས་སྨྲས་སོ། །བདག་ཅག་ནི་རང་གི་དོན་དུ་བུ་མོའི་སློངས་མོ་མི་ཚོལ་ལོ། །དེ་ནས་བྲམ་ཟེ་སེར་སྐྱས་བྲམ་ཟེའི་ཁྱེའུ་དེ་རྣམས་ལ
9.33b
འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་དག་ཁོ་བོས་ནི་དོན་དེ་བརྡ་མ་ཕྲད་དོ། །དེ་ནས་བྲམ་ཟེའི་ཁྱེའུ་དེ་རྣམས་ཀྱིས་བྲམ་ཟེ་སེར་སྐྱ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཅི་ཡུལ་མ་ག་དྷ་ན་གྲོང་ཁྱེར་ཤིང་ནྱ་གྲོ་དྷ་ཡ་ན་ཞེས་བྱ་བ་དེ་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་ལ་དེ་ལ་བྲན་གྲོང་བཅུ་དྲུག་དང ། ལས་ཀྱི་མཐའ་པའི་གྲོང་སུམ་བཅུ་དང ། སྐྱེད་སྒྱུར་བའི་གྲོང་དྲུག་བཅུ་དང ། རྨོན་པ་དོར་དགུ་བརྒྱ་དགུ་བཅུ་རྩ་དགུ་དང ། གསེར་བྱེ་བ་དྲུག་བཅུ་དང ། གང་དག་གིས་རྒྱལ་པོ་པདྨ་ཆེན་པོ་ཐོབ་པའི་གསེར་གྱི་ནས་སྦྱང་བརྒྱད་བཅུ་བདོག་པ་ཞེས་བྱ་བའི་བར་ནས་དེ་ལ་བུ་ནྱ་གྲོ་དྷ་སྐྱེས་ཞེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ། བྲམ་ཟེའི་ལས་དྲུག་ལ་མཁས་པ། རིག་བྱེད་དང ། རིག་བྱེད་ཀྱི་ཡན་ལག་གི་ཕ་རོལ་དུ་སོན་པ། རིག་པའི་གནས་བཅཝ་བརྒྱད་པོ་ཐམས་ཅད་ལ་ཤིན་དུ་བློ་རྣོ་བ་ཡོད་པར་ཐོས་སམ། བདག་ཅག་ནི་དེའི་ཆེད་དུ་བུ་མོའི་སློངས་མོ་སློང་ངོ ། །དེ་ནས་བྲམ་ཟེ་སེར་སྐྱས་བྲམ་ཟེའི་ཁྱེའུ་དེ་རྣམས་ལ་འདི་སྐད་ཅེས་སྨྲས་སོ། །ཁོ་བོས་བྲམ་ཟེ་ཤིང་སཱ་ལ་ཆེན་པོ་ལྟ་བུ་དེ་རིགས་དང ། ཚུལ་ཁྲིམས་དང ། གཙང་སྦྲ་དང ། ཀུན་དུ་སྤྱོད་པ་ཅི་འདྲ་བ་དང་ལྡན་པ་དེའི་ཡོན་ཏན་རྒྱ་ཆེར་ཐོས་ན། འོན་ཀྱང་ཡུལ་ཐག་རིང་པོ་ན་འདུག་པས་ཇི་ལྟར་དེ་དང་ལྷན་ཅིག་གཉེན་བྱ། དེ་དག་གིས་ཤེས་ལྡན། མེ་གང་ཡིན་དང་རླུང་གང་ཡིན། །ཁྲག་དང་ཕྲད་པའི་དུག་དང་ནི། །བྲམ་ཟེ་ངེས་པར་བྱས་པ་དང ། །རྟ་གང་ཡིན་པ་དེ་མི་ཐོགས། །ཞེས་བྱ་བའི་བར་དག་སྔོན་མ་ཐོས་སམ། བྲམ་ཟེ་དེ་ཡང་ཤིན་དུ་ཕྱུག་ཆེན་ཡིན་ལ། ཁྱོད་ཀྱང་དེ་ཁོ་ན་དང་འདྲ་བར་ཕྱུག་ཅིང་ནོར་ཆེ་བ་ཡིན་ཏེ། གང་གིས་དེ་དག་འགྲོ་བ་དང་འོང་བར་འགྱུར་བའི་བཞོན་པ་དང་མི་དག་ཀྱང་ཡོད་ལ། གཞན་ཡང་རིང་པོ་ན་འདུག་པ་ཁོ་ན་དང་བཤེས་གཉེན་བྱ་བ་དེ་ནི་བརྟན་པ་ཡིན་ནོ། །གང་གི་ཚེ་བྲམ་ཟེའི་ཁྱེའུ་དེ་དག་གིས་བྲམ་ཟེ་ཤིང་སཱ་ལ་ཆེན་པོ་ལྟ་བུ་སེར
9.34a
སྐྱ་ལ་སྙིང་སྡུད་པར་བྱེད་པའི་ཚིག་དག་གིས་གོ་བར་བྱས་པ་དང ། དེའི་ཚེ་དེས་ཁྲུས་ཀྱི་ཡོ་བྱད་འདི་ལྟ་སྟེ། ཁྲུས་རས་དང ། སོ་ཕག་དང ། ཕྱེ་མ་དང ། འབྲུ་མར་དང ། སོ་མངས་ལ་སོགས་པ་དག་བྱིན་ནོ། །དེ་ནས་བྲམ་ཟེའི་ཁྱེའུ་དེ་རྣམས་ཁྲུས་ཀྱི་ཡོ་བྱད་དེ་དག་བླངས་ནས་གྲོང་ཁྱེར་ཀ་པི་ལའི་ཕྱི་རོལ་དུ་སྟེང་ཀ་དག་ཏུ་ཁྲུས་བྱ་བའི་ཕྱིར་དོང་ངོ ། །དེ་ནས་བྲམ་ཟེ་སེར་སྐྱ་འདི་སྙམ་དུ་སེམས་ཏེ། ཇི་སྲིད་དུ་བྲམ་ཟེའི་ཁྱེའུ་རྣམས་ལྟེང་ཀར་ཁྲུས་ཀྱི་ཕྱིར་དོང་བ་དེ་སྲིད་དུ་བདག་ཀྱང་བཤེས་གཉེན་དང ། ཉེ་དུ་དང ། རྩ་ལག་རྣམས་དང་ལྷན་ཅིག་གྲོས་བྱའོ། །སྙམ་དུ་བསམས་ནས། བྲམ་ཟེ་སེར་སྐྱ་ཁྱིམ་གྱི་ནང་དུ་བཞུགས་ཏེ་ཆུང་མ་དང ། ཉེ་དུའི་ཚོགས་དང་ལྷན་ཅིག་དུ་འདུག་ནས་དེས་དེ་རྣམས་ལ་དོན་དེ་སྨྲས་པ་དང ། དེ་རྣམས་ཀྱིས་སྨྲས་པ། བྲམ་ཟེ་དེ་ཤིང་སཱ་ལ་ཆེན་པོ་ལྟ་བུ་ཞིག་ཡིན་པས་གལ་ཏེ་མི་འདོད་ན་ཡང་དེའི་ཕྱིར་བདག་ཅག་གིས་ཤིན་ཏུ་འབད་དེ་དེ་ལ་བུ་མོ་སྦྱིན་པར་བྱ་བ་ཡིན་ན། གང་གི་ཕྱིར་དེ་རང་ཉིད་དོན་དུ་གཉེར་ན་ལྟ་སྨོས་ཀྱང་ཅི་དགོས་ཏེ། མི་བཀྱིག་པར་སྦྱིན་པར་བྱའོ། །དེ་དང་བདག་ཅག་ཏུ་གཉེན་བྱ་བ་ནི་ཐབ་ཟླར་བབ་ཅིང་རུང་བ་ཡིན་ལ་བུ་མོ་ཡང་བདེ་བར་འགྱུར་རོ། །དེ་ནས་ཕྱིས་ཕ་མ་དེ་གཉིས་བུ་མོ་དེ་ཁྲུས་བྱས་ཏེ་གོས་དཀར་པོ་དག་བསྐོན་ནས་དགེ་མཚན་དང ། བཀྲ་ཤིས་དག་བྱས་ཤིང་བྲམ་ཟེ་རྣམས་ཀྱིས་བདག་བྱེད་དུ་འགྱུར་བ་དག་བླགས་ཏེ། བྲམ་ཟེའི་ཁྱེའུ་ནྱ་གྲོ་དྷ་སྐྱེས་ལ་ཆུང་མ་བྱ་བའི་ཕྱིར་བྱིན་ནོ། །དེའི་འོག་ཏུ་བུ་མོ་དེའི་ཕ་མ་དེ་གཉིས་ལ་བྲམ་ཟེའི་ཁྱེའུ་དེ་རྣམས་ཀྱིས་ཟླ་བ་དང ། ཉི་མ་དང ། རྒྱུ་སྐར་དང ། ཡུད་ཙམ་དག་བརྩིས་ཏེ་སྨྲས་པ། ་ཟླ་བ་ཆེ་གེ་མོ་ཞིག་དང ། ཉི་མ་དང་རྒྱུ་སྐར་དང ། ཡུད་ཙམ་ཆེ་གེ་མོ་ཞིག་ན་ཁྱེའུ་དང་ཉེ་བར་གནས་པར་འགྱུར་རོ། །དེ་ནས་བྲམ་ཟེའི་ཁྱེའུ་དེ་རྣམས་བརྣག་པ་ཡོངས་སུ་རྫོགས་ནས་མགུ་ཞིང་དགའ་ལ་ཡིད་རབ་ཏུ་དགའ་བས་གྲོང་ཁྱེར་ནྱ་གྲོ་དྷ་ཅན་ག་ལ་བ་དེར་ཆས་ནས་མཐར་གྱིས་གྲོང་ཁྱེར་ནྱ་གྲོ་དྷ་ཅན་དུ་ཕྱིན་ཏོ། །དེ་རྣམས་ཐག་རིང་པོ་ན་འདུག་པ་བྲམ་ཟེའི་ཁྱེའུ་ནྱ་གྲོ་དྷ་སྐྱེས་ཀྱིས་མཐོང་ངོ ། །མཐོང་ནས་ཀྱང་འདི
9.34b
སྙམ་དུ་ཇི་ལྟར་བྲམ་ཟེའི་ཁྱེའུ་དེ་རྣམས་མགུ་ཞིང་དགའ་ལ་ཡིད་རབ་ཏུ་དགའ་སྟེ་ལྷགས་པ་ལས་ན་གོར་མ་ཆག་པར་ཇི་ལྟར་བདག་གིས་བསམ་པ་བཞིན་རྙེད་དོ་སྙམ་དུ་སེམས་སོ། །དེ་ནས་བྲམ་ཟེའི་ཁྱེའུ་དེ་རྣམས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་ག་ལ་བ་དེར་དོང་སྟེ་ཕྱིན་ནས། བྲམ་ཟེ་ནྱ་གྲོ་དྷ་ལ་ཕྱག་བྱས་ནས་འཁོད་དོ། །དེས་ཀྱང་བྲམ་ཟེའི་ཁྱེའུ་དེ་རྣམས་ལ་སོ་སོར་ཀུན་དགའ་བར་བྱས་སོ། །སོ་སོར་ཀུན་དགའ་བར་བྱས་ནས་བྲམ་ཟེའི་ཁྱེའུ་དེ་རྣམས་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེའི་ཁྱེའུ་རྣམས་ཅི་བདག་ཅག་གིས་ཇི་ལྟར་བསམས་པ་དང ། ཡིད་ལ་རེ་བ་བཞིན་ཡོངས་སུ་རྫོགས་སམ། དེ་རྣམས་མགུ་ཞིང་དགའ་ལ་ཡིད་རབ་ཏུ་དགའ་བས་མཁན་པོ་ལ་འདི་སྐད་ཅེས་སྨྲས་སོ། །ཀྱེ་མཁན་པོ་དགྱེས་པ་བསྐྱེད་དུ་གསོལ། མཁན་པོས་ཇི་ལྟར་དགོངས་པ་དེ་བས་ཆེས་ཁྱད་པར་དུ་འཕགས་པ་ཞིག་རྙེད་དོ། །དེས་འདི་སྐད་ཅེས་སྨྲས་སོ། །དཔེར་ཇི་ལྟ་བུ་ཞིག་མཁན་པོས་རིགས་དང ། རུས་དང ། རྒྱུད་ཀྱིས་ནི་བུ་མོ་མི་བརྟག་གི། འོན་ཀྱང་གཟུགས་བཟང་བ་ཁོ་ན་བརྟག་པར་བྱའོ། །ཞེས་མ་གསུངས་སམ། བདག་ཅག་གིས་ནི་གཟུགས་བཟང་བ་དང ། རིགས་དང ། རུས་དང ། རྒྱུད་དང ། ནོར་དང་ལྡན་པ་རྙེད་དོ། །དཔེར་ཇི་ལྟ་བུ་ཞིག་བྲམ་ཟེའི་ཁྱེའུ་དེ་རྣམས་ཀྱིས་དྲིས་པ་རྣམས་ཐམས་ཅད་རྒྱ་ཆེར་བསྙད་དེ། ཟླ་བ་དང ། ཉི་མ་དང ། རྒྱུ་སྐར་དང ། ཡུད་ཙམ་ཡང་བརྗོད་དོ། །མཁན་པོ་བདག་ཅག་གིས་དེ་ལྟར་ངེས་པར་བགྱིས་ནས་མཆིས་ཀྱིས་མཁན་པོ་ད་དེའི་དུས་ལ་བབ་པར་མཁྱེན་པར་མཛོད་ཅིག་།དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷས་ལོ་རྒྱུས་དེ་དག་ཐོས་ནས་མགུ་ཞིང་དགའ་ལ་ཡིད་རབ་ཏུ་དགའ་སྟེ། བྲམ་ཟེའི་ཁྱེའུ་དེ་རྣམས་ལ་བཟའ་བ་དང ། བཅའ་བ་དང ། སྐོམ་དང ། གོས་དང ། བགོ་བ་དང ། རྒྱན་གྱི་ཁྱད་པར་སྣ་ཚོགས་ཀྱིས་མཆོད་དོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷ་སྐྱེས་ཀྱིས་བུ་མོ་དེ་གཟུགས་དང་ཁ་དོག་རྒྱས་པ་དེ་ལྟ་བུ་དེ་ཐོས་ནས་ཡིད་ཆད་པར་གྱུར་ཏེ། གཟུགས་དེ་འདྲ་བར་སྡུག་པར་ཐོས་པར་ལས་ན། གོར་མ་ཆག་པར་དེ་འདོད་ཆགས་ཤས་ཆེ་བ་ཡིན་གྱིས་མ་ལ་བདག་སོང་སྟེ་ཆེས་སྔར་བརྟག་པར་བྱའོ། །སྙམ་དུ་བསམས་ནས་བྲམ་ཟེའི་ཁྱེའུ་ནྱ་གྲོ་དྷ་སྐྱེས་ཀྱིས་ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ
9.35a
ཆེས་སྔར་འཇུག་ངོགས་སུ་ཉེ་རེག་བགྱིའོ། །སླད་ཀྱིས་བག་མ་བླང་ངོ ། །དེ་ལ་དེ་གཉིས་ཀྱིས་གནང་ངོ ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་བྲམ་ཟེའི་ཁྱེའུ་གཅིག་ཅིག་དང་ལྷན་ཅིག་ཏུ་གྲོང་ཁྱེར་ནྱ་གྲོ་དྷཱ་ཅན་ནས་བྱུང་སྟེ། གྲོང་ཁྱེར་ཀ་པི་ལ་ག་ལ་བ་དེར་ཆས་ནས་མཐར་གྱིས་གྲོང་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དུ་རྒྱུ་ཞིང་གྲོང་ཁྱེར་ཀ་པི་ལར་ཕྱིན་ནོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ལམ་གྱིས་དུབ་པ་ངལ་བསོས་ཏེ་ལོ་མའི་ཕུར་མ་ཐོགས་ནས་གྲོང་ཁྱེར་ཀ་པི་ལར་སློངས་མོའི་ཕྱིར་ཞུགས་སོ། །དེ་ཁྱིམ་ནས་ཁྱིམ་དུ་སློངས་མོ་ལ་རྒྱུ་ཞིང་བྲམ་ཟེ་ཤིང་སཱ་ལ་ཆེན་པོ་ལྟ་བུ་སེར་སྐྱའི་ཁྱིམ་གྱི་སྒོར་ཕྱིན་ཏོ། །དེ་ནས་སེར་སྐྱའི་བུ་མོ་བཟང་མོ་སློངས་མོ་ཐོགས་ནས་བྱུང་བ་དང ། བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་མཐོང་ངོ ། །མཐོང་ནས་ཀྱང་དེ་འདི་སྙམ་དུ་བུ་མོ་དེ་ནི་འདི་ཡིན་ནོ་སྙམ་དུ་བསམས་སོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་བུ་མོ་དེ་ལ་འདི་སྐད་ཅེས་སྨྲས་སོ། །ཁྱོད་སུའི་བུ་མོ་ཡིན། དེས་འདི་སྐད་ཅེས་སྨྲས་སོ། །སེར་སྐྱའི་ཡིན་ནོ། །ཁྱོད་གཞན་ལ་བྱིན་ནམ། དེས་འདི་སྐད་ཅེས་སྨྲས་སོ། །བདག་གིས་གྲོང་ཁྱེར་ནྱ་གྲོ་དྷཱ་ཅན་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷཱ་ཞེས་བྱ་བ་གནས་པ་དེའི་བུ་ནྱ་གྲོ་དྷཱའི་སྐྱེས་ཤེས་བྱ་བ་དེ་ལ་བདག་ཕ་མ་གཉིས་ཀྱིས་བྱིན་པར་ཐོས་སོ། །དེས་དེ་ལ་འདི་སྐད་ཅེས་སྨྲས་སོ། །བཟང་མོ་ཁྱོད་ལ་ཁྱིམ་ཐབ་དེ་འདྲ་བ་ཅིར་དགོས། གང་ལ་དེ་ཁྱིམ་ཐབ་ཏུ་གྱུར་པ་དེ་ནི་ཁྱིམ་ཐབ་མེད་པ་ཉིད་དུ་ཤེས་པར་གྱིས་ཤིག་།དཔེར་ཇི་ལྟ་བུ་ཞིག་།དེས་འདི་སྐད་ཅེས་སྨྲས་སོ། །དེ་ནི་འདོད་པ་རྣམས་ལ་དོན་དུ་གཉེར་བ་མ་ཡིན་ན་ཁྱིམ་ཐབ་དེ་ལྟ་བུ་དེས་ཅི་ཞིག་བྱ། རྗེའི་སྲས་ལེགས་སོ་ལེགས་སོ། །ཁྱོད་ཀྱིས་བདག་དབུགས་ཀུན་ཏུ་ཕྱུང་ངོ ། །ཁྱོད་ཀྱིས་ནི་བདག་ལ་བདུད་རྩི་ཁོ་ནས་དབང་བསྐུར་ཏོ་སྙམ་དུ་སེམས་སོ། །དེས་འདི་སྐད་ཅེས་སྨྲས་སོ། །ཅིའི་ཕྱིར་བྲམ་ཟེའི་ཁྱེའུ་བདག་ཀྱང་འདོད་པ་རྣམས་ལ་དོན་གཉེར་བ་མ་ཡིན་ནོ། །འདི་སྐད་ཅེས་ཀྱང་སྨྲས་སོ། །ཕྱུག་པོ་དང་ནི་དབུལ་པོ་ལ། །འདྲ་བར་ཁྱོད་མཐོང་བདེ་བ་འདི། །སྙིང་དང་འཐུན་པའི་བྱུག་པ་སྟེ། །ཙན་དན་པུ་ཤེལ་ཅི་དག་མིན། །
9.35b
འོན་ཀྱང་བདག་ལ་དབང་མེད་དེ་ཕ་མ་གཉིས་ཀྱིས་བདག་ཁྱིམ་ཐབ་ལ་བྱིན་ན་ཇི་ལྟར་བྱ། དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བཟང་མོ་བརྟན་པ་དང་སྤུངས་གྱིས་ཤིག་།བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་དེ་ཁོ་བོ་ཡིན་ནོ། །དེ་ནས་སེར་སྐྱའི་བུ་མོ་བཟང་མོས་བྲམ་ཟེའི་ཁྱེའུ་དེ་ལས་ཚིག་དེ་ཐོས་ནས་རྒྱས་པར་ཆེས་དབུགས་ཀུན་དུ་བྱུང་བར་གྱུར་ཏེ། ནྱ་གྲོ་དྷཱ་སྐྱེས་དེ་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་བཞུད་ལ་དམ་བཅས་པ་བརྟན་པར་བགྱིས་ཤིག་།དམ་པ་རྣམས་ནི་དམ་བཅས་པ་བརྟན་པ་ལགས་སོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་སེར་སྐྱའི་བུ་མོ་བཟང་མོ་དང་ལྷན་ཅིག་གྲོས་བྱས་ནས་ཡང་སླར་གྲོང་ཁྱེར་ནྱ་གྲོ་དྷཱ་ཅན་དུ་ཕྱིན་ཏོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷཱས་ཁྱིམ་པ་རྣམས་ཀྱི་ཁྱིམ་པའི་ཆོས་ཇི་ལྟ་བུ་ཡིན་པ་དེ་བྱས་ཏེ། བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཆུང་མ་བླངས་སོ། །གང་གི་ཚེ་གྲོང་ཁྱེར་ནྱ་གྲོ་དྷཱ་ཅན་དུ་བཟང་མོ་བླངས་པ་དེའི་ཚེ་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱི་ཕ་མ་གཉིས་ཀྱིས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་དང ། སེར་སྐྱའི་བུ་མོ་བཟང་མོ་གནས་གཅིག་ཏུ་བཀོད་དོ། །དེ་གཉིས་ཀྱི་ཆེད་དུ་མལ་གཉིས་བཅས་སོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བཟང་མོ་སྔོན་དམ་བཅས་པ་དྲན་པར་བྱོས་ཤིག་།སེར་སྐྱའི་བུ་མོ་བཟང་མོས་ཀྱང་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ལ་འདི་སྐད་ཅེས་སྨྲས་སོ། །རྗེའི་སྲས་ཁྱོད་ཀྱང་དགོངས་ཤིག་ཅེས་གཅིག་གིས་གཅིག་བསྐུལ་ཏེ་མ་དང་བུ་གཉིས་ཇི་ལྟ་བ་བཞིན་དུ་འཁོད་དོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷཱ་ཆུང་མ་དང་བཅས་པས་དེ་གཉིས་ཀྱི་རིམ་གྲོ་མ་རྣམས་ལ་སྨྲས་པ། བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཆུང་མ་དང་ལྷན་གཅིག་ཇི་ལྟར་འདུག་།དེ་རྣམས་ཀྱིས་འདི་སྐད་ཅེས་སྨྲས་སོ། །མ་དང་བུ་ལྷན་ཅིག་པ་འམ། བུ་དང་མ་ལྷན་ཅིག་པ་བཞིན་ནོ། །དེ་སྐད་ཅེས་ཐོས་ནས་ཀྱང་བྲམ་ཟེ་ཤིང་སཱ་ལ་ཆེན་པོ་ལྟ
9.36a
བུ་ནྱ་གྲོ་དྷཱ་ཆུང་མ་དང་ལྷན་ཅིག་འདི་སྐད་ཅེས་སྨྲས་སོ། །བདག་ཅག་ཁོ་ནའི་ཉེས་པ་ཡིན་གྱི། དེ་གཉིས་ཀྱི་མ་ཡིན་ཏེ། གང་གི་ཕྱིར་བདག་ཅག་གིས་དེ་གཉིས་ཀྱི་ཆེད་དུ་མལ་གཉིས་བཅས་པས་སོ་སྙམ་བསམས་ནས་མལ་དང་ཁྲིའུ་གཅིག་བཞག་གོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་འདི་སྙམ་དུ་ཀྱེ་མ་ཕ་མ་གཉིས་ཀྱིས་བདག་ཅག་ལ་དམ་པ་མ་ཡིན་པའི་ཆོས་ཀྱི་ཆེད་དུ་བརྩམ་པ་ཆེན་པོ་འདི་བླངས་སོ་སྙམ་དུ་སེམས་སོ། །སེར་སྐྱའི་བུ་མོ་བཟང་མོས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱི་ཕ་མའི་དགོངས་པ་ཁོང་དུ་ཆུད་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ལ་འདི་སྐད་ཅེས་སྨྲས་སོ། །རྗེའི་སྲས་ཁྱོད་དང་བདག་གི་ཆེད་དུ་སྦྱོར་བ་འདི་སྦྱར་ཏོ། །འོན་ཀྱང་སྔོན་གྱིས་དམ་བཅས་པ་དགོངས་ཤིག་།དེས་སྨྲས་པ་སྙིང་ལས་ཆུང་ངུར་གྱིས་ལ་བག་མ་ཚ་ཤིག་།དེ་ནས་ནམ་གྱི་ཆ་སྟོད་ལ་ནི་སེར་སྐྱའི་བུ་མོ་བཟང་མོ་མལ་དུ་ཉལ་ལོ། །ནྱ་གྲོ་དྷཱ་སྐྱེས་ནི་ཁྲིའུ་ལ་གནས་ཤིང་འདུག་།ནམ་གྱི་གུང་ཐུན་ལ་ནི་ནྱ་གྲོ་དྷཱ་སྐྱེས་ཉལ་ལོ། །བཟང་མོ་ནི་གནས་ཤིང་འདུག་གོ། །ནམ་གྱི་ཆ་སྨད་ལ་ནི་ཡང་བཟང་མོ་ཉལ་ལོ། །ནྱ་གྲོ་དྷཱ་སྐྱེས་ནི་ཁྲིའུ་ལ་འདུག་ཅིང་མི་ཉལ་ལོ། །དེ་བཞིན་དུ་ཁྲིའུའི་བར་ཡང་ཕྱུང་བ་དང་ཡང་སེར་སྐྱའི་བུ་མོ་བཟང་མོས་ནྱ་གྲོ་དྷཱ་སྐྱེས་ལ་སྨྲས་པ། རྗེའི་སྲས་འོ་སྐོལ་གྱི་ཆེད་དུ་སྦྱོར་བ་འདི་བརྩམས་ཀྱིས་སྔོན་གྱི་དམ་བཅས་པ་དགོངས་ཤིག་།དེས་སྨྲས་པ། ་རྟོག་པ་མེད་པ་དང ། དོགས་པ་མེད་པར་གྱིས་ལ་ཁྱོད་ཀྱང་སྔོན་གྱི་དམ་བཅས་པ་དྲན་པར་གྱིས་ཤིག་།དེ་ན་བཟང་མོ་ནི་ནམ་གྱི་ཆ་སྟོད་ལ་ཉལ་ལོ། །ནྱ་གྲོ་དྷཱ་སྐྱེས་ནི་འཆག་གོ། །ནམ་གྱི་གུང་ཐུན་ལ་ནི་ནྱ་གྲོ་དྷཱ་སྐྱེས་ཉལ་ལོ། །སེར་སྐྱའི་བུ་མོ་བཟང་མོ་ནི་འཆག་གོ། །ཡང་ནམ་གྱི་ཆ་སྨད་ལ་ནི་བཟང་མོ་ཉལ་ལོ། །ནྱ་གྲོ་དྷཱ་སྐྱེས་ནི་འཆག་སྟེ། དེ་དག་ཚུལ་འདིས་གནས་གཅིག་ན་མལ་གཅིག་ཏུ་ལོ་བཅུ་གཉིས་ཐལ་ཐལ་དུ་ལན་འགའ་ཡང་དེ་གཉིས་གཅིག་ལ་གཅིག་འདོད་ཆགས་ཀྱི་སེམས་མ་བསྐྱེད་དོ། ་་་་་་་།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་གཉིས་པ། དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་ཀྱེ་མ་འདོད
9.36b
ཆགས་དང་བྲལ་བར་མ་གྱུར་བཞིན་དུ་འདོད་ཆགས་དང་བྲལ་བའི་ཚུལ་ཉམས་སུ་མྱོང་བར་བྱེད་པ་ནི་ངོ་མཚར་ཏེ་མ་ལ་བདག་གིས་འདི་གཉིས་བགམ་པར་བྱའོ་སྙམ་དུ་བསམས་ནས་བདག་ཉིད་སྦྲུལ་གྱི་ཆ་བྱད་དུ་མངོན་པར་སྤྲུལ་ཏེ། དེ་གཉིས་ཀྱི་མལ་ག་ལ་བ་དེར་སོང་སྟེ་ཕྱིན་ནས་སྦྲུལ་ཆེན་པོ་བསྐྱིལ་བ་བྱས་ཏེ་མལ་གྱི་འོག་ཏུ་འདུག་པ་དང ། བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་སྦྲུལ་ནག་པོ་གདུག་པ་དྲག་པོ་སོ་གདུག་པ་དེ་མལ་གྱི་འོག་ན་འདུག་པ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་ཀྱེ་མ་གཟུགས་འདི་ལྟ་བུ་མ་རུང་བར་བྱས་པར་འགྱུར་རོ་སྙམ་དུ་སེམས་སོ། །ཉལ་བ་དེའི་ལག་པ་ཡང་ཕྱི་རོལ་དུ་འཕྱང་ངོ ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་ཅི་བདག་གིས་ད་ཇི་ལྟར་བྱ་སྙམ་དུ་བསམས་སོ། །དེ་ནས་རྔ་མའི་བསིལ་ཡབ་ཀྱི་ནོར་བུའི་ཡུ་བས་བཏེག་སྟེ་བཞག་གོ། །དེ་ནས་སེར་སྐྱའི་བུ་མོ་བཟང་མོ་རྔ་མའི་བསིལ་ཡབ་ཀྱི་ནོར་བུའི་ཡུ་བས་རེག་པས་སད་པ་དང ། སྐྲག་ཅིང་ཡིད་མི་དགའ་ནས་ནྱ་གྲོ་དྷཱ་སྐྱེས་ལ་འདི་སྐད་ཅེས་སྨྲས་སོ། །རྗེའི་སྲས་རེག་པར་བྱེད་པ་འདི་ཅི་ཞིག་ལགས། ཁྱོད་ཀྱིས་བདག་ལ་འདོད་ཆགས་དང་བཅས་པའི་སེམས་ཀྱིས་མ་རེག་གམ། དེས་སྨྲས་པ། བཟང་མོ་དེ་ལྟ་མ་ཡིན་ནོ། །འོན་ཀྱང་སྦྲུལ་གདུག་པ་འདིས་ཟིན་པར་གྱུར་ན་མི་རུང་ངོ་སྙམ་ནས་དེའི་ཕྱིར་ཁོ་བོས་ལག་པ་འཕྱང་བ་བཏེག་སྟེ་བཞག་གོ། །ཇི་ལྟ་བུ་ཞིག་གིས། དེས་སྨྲས་པ། རྔ་མའི་བསིལ་ཡབ་ཀྱི་ནོར་བུའི་ཡུ་བས་སོ། །དེས་འདི་སྐད་ཅེས་སྨྲས་སོ། །རྗེའི་སྲས་བདག་ནི་སྦྲུལ་གདུག་པས་ཟིན་ཀྱང་བླའི་ཁྱོད་ཀྱིས་རྔ་མའི་བསིལ་ཡབ་ཀྱི་ནོར་བུའི་ཡུ་བས་རེག་པ་ནི་མི་རུང་ངོ ། །ཅིའི་སླད་དུ་ཞེ་ན། མ་ལུ་ཏ་ཡི་འཁྲི་ཤིང་འཁྲིས་པས་ལྗོན་ཤིང་བཟང་པོ་ཉམས། །བུད་མེད་དག་ལ་རེག་པའི་རྒྱུ་ཡིས་འཇིག་རྟེན་ཕུང་བར་གྱུར། །དེ་ཡི་སླད་དུ་མགྱོགས་པར་འཆི་བའི་སྦྲུལ་གྱིས་ཟིན་བླའི། །སྐྱེས་པའི་ལག་པས་བུད་མེད་མཆོག་ལ་རེག་པར་མི་རུང་ངོ ། །གཞན་ཡང་མི་དབང་བུ་མོའི་ལུས་ཀྱིས་རེག་པ་ཡིས། །དཀའ་ཐུབ་ཆེན་པོ་རཝ་ཅན་དཀའ་ཐུབ་ཉམས། །ལྷག་སྤྱོད་རླུང་གི་ལམ་ན་མི་དབང་གི། །ཁྱིམ་དུ་འོངས་ནས་ནགས་སུ་རྐང་པས་སོང ། །དེ་ནས་དེ་དག་དེ་ལྟར་འཁོད་འཁོད་པ་ལས་དུས་གཞན་ཞིག་ན་ཕ་མ་གཉིས་ཤིའོ། །དེ་ནས་བྲམ་ཟེའི
9.37a
ཁྱེའུ་ནྱ་གྲོ་དྷཱ་སྐྱེས་ཀྱིས་བསམས་པ། གང་གི་ཚེ་ཕ་མ་གཉིས་གསོན་པ་དེའི་ཚེ་ནི་བདག་ཅག་སྙིང་ལས་ཆུང་ངུར་འཁོད་འཁོད་ན། ད་ནི་བདག་གི་ཕ་མ་གཉིས་ཤི་བས་དེའི་ཕྱིར་བདག་ཅག་གིས་རང་གི་ཁྱིམ་གྱི་འཚོ་ཚིས་བསྒྲུབ་པར་བྱ་བ་ཡིན་ནོ་སྙམ་དུ་བསམས་ནས། སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བཟང་མོ་གང་གི་ཚེ་བདག་གི་ཕ་མ་གཉིས་གསོན་པ་དེའི་ཚེ་ནི་བདག་ཅག་སྙིང་ལས་ཆུང་ངུར་འཁོད་འཁོད་ན་ད་ནི་བདག་ཅག་གིས་ཁྱིམ་གྱི་འཚོ་ཚིས་རྗེས་སུ་བསམས་དགོས་པས་བཟང་མོ་རེ་ཤིག་ཁྱོད་ཀྱིས་ནི་ཁྱིམ་གྱི་ལས་ཀྱི་མཐའ་ལ་ལྟོས་ཤིག་།ང་ཡང་གྲོང་གི་ཞིང་ལས་དག་ལ་འགྲོའོ་ཞེས་སྨྲས་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཞིང་ལས་ལ་སོང་ངོ ། །བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་ཕའི་ཞིང་ལས་ལ་བལྟས་ན་རྨོན་པ་དོར་དགུ་བརྒྱ་དགུ་བཅུ་རྩ་དགུ་རྨེད་ཅིང་དེ་ན་ཡང་སྲོག་ཆགས་ཕྲ་མོ་ཕྲ་མོ་དག་ཚུལ་མ་ཡིན་པས་ཉོན་མོངས་པར་འགྱུར་བ་དང ། གླང་རྣམས་ཀྱང་སྣ་ནི་ཕུག་།གཤུལ་ནི་ཞོམ། ལྕག་གིས་རྐུབ་གཙོས་ནི་རྡོལ། མི་རྣམས་ཀྱང་སྐྲ་དང་ཁ་སྤུ་ནི་རིང ། ལག་པ་དང ། རྐང་པ་ནི་སེར་ག་བྱུང ། གསོ་རས་དག་ནི་གྱོན། ལུས་ནི་སའི་རྡུལ་གྱིས་ཡོག་།སྡོང་དུམ་ཚིག་པ་ནི་འདྲ། འདྲེ་ལྟ་བུར་ནི་གྱུར་ཅིང་གཤོལ་དང ། ཐོང་ལྕགས་དང ། སྤྱད་དང ། གླང་ལྕག་གི་ཕྱིར་གཅིག་ལ་གཅིག་ཁ་ཟེར་བ་དང ། རྡེག་པ་ལ་ཞུགས་ནས་ལས་བྱེད་པ་མཐོང་ངོ ། །མཐོང་ནས་ཀྱང་དེ་དེ་རྣམས་ཀྱི་གན་དུ་སོང་སྟེ་འདི་སྐད་ཅེས་སྨྲས་སོ། །ཤེས་ལྡན་དག་སུ་ཡིན། བདག་ཅག་ནི་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱི་ལས་བྱེད་པ་ཡིན་ནོ། །དེས་འདི་སྐད་ཅེས་སྨྲས་སོ། །ཁྱེད་སུས་བསྐོས། དེ་རྣམས་ཀྱིས་འདི་སྐད་ཅེས་སྨྲས་སོ། །བདག་ཅག་དེས་བསྐོས་པ་ནི་མེད་ན་འོན་ཀྱང་ཕས་དེའི་ཁྱིམ་གྱི་འཚོ་ཚིས་འདི་བྱེད་དུ་བཅུག་གོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་ཞིང་པ་དེ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་གལ་ཏེ་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱི་ཕས་ཁྱིམ་གྱི་འཚོ་ཚིས་འདི་བྱེད་དུ་བཅུག་ན་ཤེས་ལྡན་དག་ཅིའི་ཕྱིར་ཁ་ཟེར་བ་དང ། ་རྡེག་པ་ལ་ཞུགས་ནས་ལས་བྱེད། ཤེས་ལྡན་དག་ཅིའི་ཕྱིར་འདི་ལྟ་བུའི
9.37b
ལུས་དང ། ངག་གི་སྤྱོད་པ་ཀུན་དུ་རྩོམ་པར་བྱེད། ཁྱེད་དེའི་རྣམ་པར་སྨིན་པས་འཁོར་བར་ཡུན་རིང་པོར་སྡུག་བསྔལ་ཉམས་སུ་མྱོང་བར་མི་འགྱུར་རམ། དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་འདི་སྙམ་དུ་བདག་གིས་ནི་ལུས་ཀྱིས་ཀྱང་ཅུང་ཟད་ཀྱང་ཀུན་དུ་མི་སྤྱོད་ལ། ངག་གིས་ཀྱང་མ་ཡིན། ཡིད་ཀྱིས་ཀྱང་མ་ཡིན་བཞིན་དུ་འདི་ལས་བདག་ལ་ཡང་བསོད་ནམས་མ་ཡིན་པ་ཉེ་བར་སྐྱེས་སོ་སྙམ་དུ་སེམས་སོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་རང་གི་ཁྱིམ་དུ་སོང་སྟེ་སེར་སྐྱའི་བུ་མོ་བཟང་མོ་ལ་སྨྲས་པ། བཟང་མོ་བག་ཡོད་པས་ཁྱིམ་སྒྲུབས་ཤིག་།སེར་སྐྱའི་བུ་མོ་བཟང་མོས་འདི་སྐད་ཅེས་སྨྲས་སོ། །རྗེའི་སྲས་ཁྱོད་ཅི་མཛད། དེས་འདི་སྐད་ཅེས་སྨྲས་སོ། །དཀའ་ཐུབ་ཀྱི་ནགས་སུ་འགྲོའོ། །ཇི་ཙམ་ན་ཚིགས་སུ་བཅད་པ་སྨྲས་པ། བྲེའུ་ཆུང་གང་གི་འབྲས་ཆན་རུང ། །མལ་གཅིག་གིས་ནི་བདེ་བ་སྐྱེད། །རས་བཅོས་ཟུང་གཅིག་བཅང་བར་བྱ། །ལྷག་མ་གཏི་མུག་ཡོངས་སུ་འཛིན། །རེ་ཤིག་ན་བཟང་མོས་ཀྱང་ཁྱིམ་ལ་བལྟ་བར་བརྩམས་སོ། །ཇི་ཙམ་ན་བྲན་མོ་རྣམས་ལག་པ་དང ། རྐང་པ་ནི་སེར་ག་བྱུང ། གསོ་རས་ནི་གྱོན། མགོ་ནི་ཡེགས། གཏུན་དང ། གཏུན་བུ་དང ། གླང་ཆེན་དང ། ཁྲི་དེ་ལ་སོགས་པའི་ཆེད་དུ་གཅིག་ལ་གཅིག་ཁའི་མདུང་ཐུང་གིས་ནི་འདེབས་པ་མཐོང་ནས་སོང་སྟེ། དེ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་མ་དག་ཁྱེད་སུའི་ཡིན། དེ་རྣམས་ཀྱིས་འདི་སྐད་ཅེས་སྨྲས་སོ། །སེར་སྐྱའི་བུ་མོ་བཟང་མོའི་ལགས་སོ། །དེས་འདི་སྐད་ཅེས་སྨྲས་སོ། །ཅི་ཁྱེད་ཅག་སེར་སྐྱའི་བུ་མོ་བཟང་མོས་བསྐོས་སམ། དེ་རྣམས་ཀྱིས་འདི་སྐད་ཅེས་སྨྲས་སོ། །འདི་ལྟར་བདག་ཅག་ནི་སེར་སྐྱའི་བུ་མོ་བཟང་མོས་མ་བསྐོས་མོད་ཀྱི། འོན་ཀྱང་སྒྱུག་མོས་དེའི་ཁྱིམ་གྱི་འཚོ་ཚིས་བྱེད་པར་བསྐོས་སོ། །རེ་ཤིག་ན་དེ་ཡང་ཡིད་བྱུང་སྟེ་ཚིགས་སུ་བཅད་པ་སྨྲས་པ། བྲེའུ་ཆུང་གང་གི་འབྲས་ཆན་རུང ། །མལ་གཅིག་གིས་ནི་བདེ་བ་སྐྱེད། །རས་བཅོས་ཟུང་གཅིག་བཅང་བར་བྱ། །ལྷག་མ་གཏི་མུག་ཡོངས་སུ་འཛིན། །དུས་དེའི་བར་དུ་ཡང་སངས་རྒྱས་ད་དུང་མ་བྱུང་བར་གྱུར་ཏེ། དེ་གཞན་མུ་སྟེགས་ཅན་སྤྱོད
9.38a
པ་པ་དང ། ཀུན་དུ་རྒྱུ་དང ། གཅེར་བུ་པ་དང ། ཀུན་དུ་འཚོ་བ་པ་དང ། ཐལ་བ་ཅན་ལ་སོགས་པ་རྣམས་དང ། བཀྲེན་པ་དང ། སྡུག་ཕོངས་པ་དང ། སློངས་མོ་པ་རྣམས་སྦྱིན་པ་གཏང་བ་བྱས་ནས་དབུལ་པོ་ནི་མི་དབུལ་བར་བྱས། བྲན་དང ། གླ་མི་དང ། མངག་གཞུག་པ་རྣམས་ནི་མི་བཀོལ་བར་བྱས། བཤེས་གཉེན་དང ། བློན་པོ་དང ། ་ཉེ་དུ་དང ། སྣག་གི་གཉེན་མཚམས་ལ་ནི་རྫས་ཀུན་བགོས་ནས་ཁྱིམ་གྱི་ནང་དུ་ཞུགས་ཏེ། གོས་ཐ་ཆད་འགའ་ཅི་ཡོད་བླང་ངོ་སྙམ་ནས་གོས་ཀྱི་རྫས་ཀྱི་མཛོད་དུ་བལྟས་པ་དང ། དེས་གོས་ཀྱི་ཕྱི་མ་ཚས་རས་ཡུག་ཆེན་ཐ་ཆད་སྟོང་ཕྲག་བརྒྱ་རི་བ་ཞིག་ནི་བདག་གིས་ཁྱེར། དེ་འདྲ་བ་གཅིག་ནི་བཟང་མོ་ལ་བྱིན་ནོ། །ཁྱིམ་ནི་ཉེ་དུ་རྣམས་ལ་གཏད་དོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བཟང་མོ་གང་དུ་འགྲོ་བར་འདོད། དེས་སྨྲས་པ། ཁྱོད་ཁོ་ན་དང་ལྷན་ཅིག་ཏུ་དཀའ་ཐུབ་ཀྱི་ནགས་སུ་མཆི་འོ། །དེས་སྨྲས་པ། གང་གི་ཕྱིར་བུད་མེད་དང་ལྷན་ཅིག་དཀའ་ཐུབ་ཀྱི་ནགས་སུ་འདུག་པར་བྱ་བ་དེ་ནི་ཆ་མ་ཡིན་ནོ། །བཟང་མོས་སྨྲས་པ། གལ་ཏེ་དེ་ལྟ་ན་བདག་ཇེ་སྔར་ཁྱིམ་ནས་ཐོང་ཤིག་།ཅིའི་ཕྱིར། བཟང་མོས་འདི་སྐད་ཅེས་སྨྲས་སོ། །གང་གི་ཕྱིར་ཁྱོད་སྔར་ཇེ་བཞུད་ན་བུད་མེད་ནི་འབྲས་ཆན་ཚོས་པ་དང་འདྲ་བར་སྐྱེ་བོ་མང་པོས་དོན་དུ་གཉེར་བར་བགྱི་བ་ལགས་ཏེ། ཁྱོད་བཞུད་ན་བདག་ཁ་ཅིག་གིས་དོན་དུ་གཉེར་བར་གྱུར་ན་མི་རུང་བ་དེ་སྲིད་དོ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་ཀྱིས་བསམས་པ། བུ་མོ་འདི་ནི་མཁས་ཤིང་བློ་ཤིན་དུ་གཏན་ལ་བབ་པ་ཡིན་ནོ་སྙམ་དུ་བསམས་ཏེ། སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བཟང་མོ་ཚུར་ཤོག་།ཁྱིམ་ནས་ལྷན་ཅིག་ཁོ་ནར་འདོང་བར་བྱའོ། །དེ་དག་ཁྱིམ་ནས་ལྷན་ཅིག་ཁོ་ནར་དོང་ངོ ། །དེ་ནས་བྲམ་ཟེའི་ཁྱེའུ་ནྱ་གྲོ་དྷཱ་སྐྱེས་དང་ཐེ་གི་ཙམ་གྱི་བར་དུ་ལྷན་ཅིག་ཁོ་ནར་དོང་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །བཟང་མོ་སོང་ལ་སྤྱོད་པ་ཇི་ལྟར་འདོད་པ་ལ་གནས་པར་གྱིས་ཤིག་།དེའི་ཚེ་ན་རྒྱལ་པོའི་ཁབ་ན་གཅེར་པུ་པ་རྫོགས་བྱེད་ཅེས་བྱ་བ་ཐམས་ཅད་མཁྱེན
9.38b
པ་མ་ཡིན་པ་ཐམས་ཅད་མཁྱེན་པར་ཁས་འཆེ་བ་ཞིག་གནས་ཏེ། དེ་ཡང་གཅེར་བུ་པ་དང ། གཅེར་བུ་པའི་སློབ་མ་དུ་མས་ཡོངས་སུ་བསྐོར་ཏོ། །དེ་ནས་སེར་སྐྱའི་བུ་མོ་བཟང་མོ་གཅེར་བུ་པ་རྫོགས་བྱེད་ག་ལ་དེར་སོང་སྟེ་ཕྱིན་ནས་གཅེར་བུ་པ་རྫོགས་བྱེད་ལ་འདི་སྐད་ཅེས་སྨྲས་སོ། །བཙུན་པ་བདག་ཁྱོད་ལས་རབ་ཏུ་འབྱུང་བར་འཚལ་ལོ། །དེས་དེར་རབ་ཏུ་ཕྱུང་ནས་གཅེར་བུ་མ་རྣམས་ཀྱི་ནང་དུ་བཞག་གོ། །དེ་ནས་གཅེར་པུ་པ་དེ་རྣམས་ཀྱིས་སེར་སྐྱའི་བུ་མོ་བཟང་མོ་གཟུགས་བཟང་བ། བལྟ་ན་སྡུག་པ། མཛེས་པ། ཁ་དོག་རྒྱས་པ། མཆོག་དང་ལྡན་པ་མཐོང་ནས་གཅིག་ལ་གཅིག་སྨྲས་པ། བདག་ཅག་རབ་ཏུ་བྱུང་བ་གང་ཅི་ཡང་རུང་བ་དེ་ཐམས་ཅད་ནི་ལྷའི་འདོད་པའི་ཡོན་ཏན་ལྔ་རྣམས་ཀྱི་ཕྱིར་ཡིན་ལ། སེར་སྐྱའི་བུ་མོ་བཟང་མོ་འདི་ཡང་ལྷའི་བུད་མེད་འདྲ་ན་རེ་ཤིག་ལྷའི་འདོད་པའི་ཡོན་ཏན་རྣམས་རྙེད་དམ་མི་རྙེད་གཏོལ་མེད་ཀྱི། ཇེ་སེར་སྐྱའི་བུ་མོ་བཟང་མོ་འདི་ལ་ལོངས་སྤྱོད་པར་བྱའོ་ཞེས་སྨྲས་ནས་གཅེར་པུ་པ་ལྔ་བརྒྱ་ཙམ་གཅེར་བུ་པ་རྫོགས་བྱེད་ག་ལ་བ་དེར་དོང་ངོ ། །རེ་ཤིག་ན་སྐབས་དེ་རྒྱས་པར་སྨྲས་ནས། དེ་ནས་དེ་རྣམས་ཀྱིས་སེར་སྐྱའི་བུ་མོ་བསླངས་པ་དང ། དེས་ཀྱང་སློབ་མ་ལ་བྱམས་པའི་ཕྱིར་གནང་ངོ ། །དེ་ནས་ལས་ཀྱི་རྣམ་པར་སྨིན་པའི་རྐྱེན་གྱིས་ཉི་མ་རེ་རེ་ཞིང་གཅེར་པུ་པ་ལྔ་བརྒྱ་པོ་རྣམས་ཀྱིས་དགའ་མགུར་སྤྱོད་པར་བྱེད་དོ། །ཇི་ཙམ་ན་དེ་ཡིད་བྱུང་བས་རྫོགས་བྱེད་ལ་གསོལ་པ་དང ། དེས་སྨྲས་པ། གང་ལ་རྒྱ་ཕོག་པ་དེ་དང་ཕྲད་པར་གྱིས་ཤིག་།དེའི་ཚེ་ན་བཅོམ་ལྡན་འདས་བྱང་ཆུབ་སེམས་དཔའ་སྐུ་ཚེ་ལོ་ཉི་ཤུ་རྩ་དགུར་འདོད་པ་རྣམས་ལ་རོལ་ནས་རྒན་པོ་དང ། ནད་པ་དང ། ཤི་བ་གཟིགས་པས་ཐུགས་བྱུང་སྟེ། ནམ་ཕྱེད་ཀྱི་དུས་སུ་རྟ་རིན་པོ་ཆེ་བསྔགས་ལྡན་ལ་བཅིབས་ནས་ནགས་སུ་གཤེགས་ཏེ་ལོ་དྲུག་ཏུ་ཅིར་ཡང་མི་ཕན་པའི་དཀའ་བ་སྤྱད་ནས་ཆུ་བོ་ནཻ་རཉྫ་ནཱར་ཁྲུས་མཛད་དེ། དགའ་མོ་དང ། དགའ་སྟོབས་མ་གཉིས་ལས་ལན་བཅུ་དྲུག་ཏུ་ཉིང་ཁུར་བྱས་པའི་འོ་མའི་ཐུག་པ་ནི་གསོལ། ་ཀླུའི་རྒྱལ་པོ་དུས་ཅན་གྱིས་ཚིགས་སུ་བཅད་པ་དག་གིས་ནི་མངོན་པར་བསྟོད་ཅིང ། རྩཝ་འཚོང་བཀྲ་ཤིས་ལྡན་ལས་རྩཝ་དག་བཞེས་ཏེ་བྱང་ཆུབ་ཀྱི་ཤིང་གི་དྲུང་དུ་བཞུད་ནས
9.39a
ཉིད་ཀྱིས་མ་འཁྲུགས་པ་དང ། མ་འཛིངས་པར་གདིང་བ་བཤམས་ཏེ། ཀླུའི་རྒྱལ་པོ་གཉིད་ལོག་པ་བསྐྱིལ་བ་བཞིན་དུ་སྐྱིལ་མོ་དཀྲུང་ཁྱིལ་ལེར་བཅས་ནས། ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་དཀྲུང་མི་གཞིག་གོ་ཞེས་ཐུགས་ཀྱང་བསྐྱེད། ཚིག་ཏུ་ཡང་གསུང་ངོ ། །རེ་ཤིག་ན་བདུད་འབྱུང་པོའི་རིགས་བྱེ་བ་ཕྲག་སུམ་བཅུ་རྩ་དྲུག་གི་འཁོར་ཅན་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཚངས་པས་བསྐུལ་བས་ཡུལ་བཱ་རཝ་ཎ་སཱིར་གཤེགས་ཏེ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ནས་ཀུན་ཤེས་ཀཽཎྜི་ནྱ་དང ། ་ལྷ་སྟོང་ཕྲག་བརྒྱད་བཅུ་བདེན་པ་རྣམས་ལ་བཀོད་དོ། །ལྔ་སྡེ་རྣམས་ཀྱང་བཏུལ། ཉེ་ལྔའི་སྡེ་རྣམས་ཀྱང་བཏུལ། གྲོང་གི་ཁྱེའུ་གཙོ་བོ་གཙོ་བོ་ལྔ་བཅུ་ཡང་བཏུལ་ཏོ། །ཤིང་བལ་ཅན་གྱི་ནགས་ཁྲོད་དུ་གཤེགས་ནས་བཟང་སྡེའི་ཚོགས་དྲུག་ཅུ་བཏུལ་ཏོ། །དམག་ལྡན་གྱི་གྲོང་དུ་གཤེགས་ནས་གྲོང་གི་བུ་མོ་དགའ་མོ་དང ། དགའ་སྟོབས་མ་གཉིས་བདེན་པ་རྣམས་ལ་བཀོད་དོ། །ཡུལ་ལྟེང་རྒྱས་སུ་གཤེགས་ནས་ལྟེང་རྒྱས་འོད་སྲུང་རྫུ་འཕྲུལ་གྱི་ཆོ་འཕྲུལ་བཅཝ་བརྒྱད་ལ་སོགས་པ་ལྔ་བརྒྱ་བཏུལ་ཏོ། །ཡུལ་ག་ཡར་གཤེགས་ནས་ཆུ་ཀླུང་འོད་སྲུང་དང ། རལ་པ་ཅན་སྟོང་ཕྲག་དེ་རྣམས་ལ་ཆོ་འཕྲུལ་གསུམ་པོ་དག་གིས་གདམས་པར་མཛད་དོ། །ཡུལ་འོད་མའི་ལྟང་བྲང་ཅན་དུ་གཤེགས་ནས་རྒྱལ་པོ་གཟུགས་ཅན་སྙིང་པོ་སྲས་དང་འཁོར་དུ་བཅས་པ་དང ། ལྷ་སྟོང་ཕྲག་བརྒྱད་ཅུ་དང ། ཡུལ་མ་ག་དྷཱའི་བྲམ་ཟེ་དང ། ཁྱིམ་བདག་བརྒྱ་སྟོང་ཕྲག་དུ་མ་བཏུལ་ཏེ། འོད་མའི་ཚལ་བཞེས་ནས་དེའི་ཚེ་བཅོམ་ལྡན་འདས་རྒྱལ་པོའི་ཁབ་བུ་མངས་ཀྱི་མཆོད་རྟེན་ན་བཞུགས་སོ། །འོད་སྲུང་གིས་ཤིང་ཞིག་གི་དྲུང་ན་བཅོམ་ལྡན་འདས་མཛེས་པ། དད་པར་འོས་པ། དབང་པོ་ཞི་བ། ཐུགས་ཞི་བ། ཐུགས་དུལ་བ་དང་ཉེ་བར་ཞི་བའི་མཆོག་དང་ལྡན་པ། གསེར་གྱི་མཆོད་སྡོང་ལྟར་དཔལ་འབར་བ་རྟེན་ཅིང་བཞུགས་པ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་ཀྱེ་མ་སྟོན་པ་མཐོང་ངོ ། །ཀྱེ་མ་དགྲ་བཅོམ་པ་མཐོང་ངོ ། །ཀྱེ་མ་བཅོམ་ལྡན་འདས་མཐོང་ངོ ། །ཀྱེ་མ་བདེ་བར་གཤེགས་པ་མཐོང་ངོ ། །ཀྱེ་མ་ཡང་དག་པར་རྫོགས
9.39b
པའི་སངས་རྒྱས་མཐོང་ངོ ། །སྙམ་དུ་སེམས་ཤིང་དེས་ཆེད་ཆེར་བྱས། བླ་མར་བྱས། ཡིད་ལ་བྱས། སེམས་ཐམས་ཅད་ཀྱིས་བསམས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ནི་བདག་གི་སྟོན་པ་ལགས་ཏེ། བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །བཙུན་པ་བཅོམ་ལྡན་འདས་ནི་བདག་གི་སྟོན་པ་ལགས་སོ། །སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །ཉན་ཐོས་ལགས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་འོད་སྲུང་ལ་འདི་སྐད་ཅེས་བཀའ་སྩལ་ཏོ། །འོད་སྲུང་དེ་དེ་བཞིན་ཏེ། དེ་དེ་བཞིན་ནོ། །འོད་སྲུང་ང་ནི་ཁྱོད་ཀྱི་སྟོན་པ་སྟེ། ཁྱོད་ནི་ངའི་ཉན་ཐོས་ཡིན་ནོ། །འོད་སྲུང་ང་ནི་ཁྱོད་ཀྱི་སྟོན་པ་ཡིན་ནོ། །སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །ཉན་ཐོས་ཡིན་ནོ། །འོད་སྲུང་གང་ལ་ལ་འདི་ལྟར་སེམས་ཐམས་ཅད་ཀྱིས་བསམས་ཏེ་མི་ཤེས་བཞིན་དུ་བདག་ནི་ཀུན་ཤེས་པ་ཡིན་ནོ་ཞེས་སྨྲ། མི་མཐོང་བཞིན་དུ་བདག་ནི་ཀུན་མཐོང་བ་ཡིན་ནོ་ཞེས་སྨྲ། དེ་བཞིན་གཤེགས་པ་མ་ཡིན་བཞིན་དུ་བདག་ནི་དེ་བཞིན་གཤེགས་པ་ཡིན་ནོ་ཞེས་སྨྲ། དགྲ་བཅོམ་པ་མ་ཡིན་བཞིན་དུ་བདག་ནི་དགྲ་བཅོམ་པ་ཡིན་ནོ་ཞེས་སྨྲ་ཞིང ། ཡང་དག་པར་རྫོགས་པའི་སངས་རྒྱས་མ་ཡིན་བཞིན་དུ་བདག་ནི་ཡང་དག་པར་རྫོགས་པའི་སངས་རྒྱས་ཡིན་ནོ་ཞེས་ཁས་འཆེ་བར་བྱེད་ན་འོད་སྲུང་སྟོན་པ་དེའི་མགོ་བོ་ཚལ་བ་བདུན་དུ་འགས་པར་འགྱུར་རོ། །འོད་སྲུང་ནི་ཤེས་པ་ཡིན་པས་ང་ནི་ཀུན་དུ་ཤེས་པ་ཡིན་ནོ་ཞེས་སྨྲའོ། །མཐོང་བ་ཡིན་པས་ང་ནི་ཀུན་དུ་མཐོང་བ་ཡིན་ནོ་ཞེས་སྨྲའོ། །དེ་བཞིན་གཤེགས་པ་ཡིན་པས་ང་ནི་དེ་བཞིན་གཤེགས་པ་ཡིན་ནོ་ཞེས་སྨྲ་ཞིང ། ཡང་དག་པར་རྫོགས་པའི་སངས་རྒྱས་ཡིན་པས་ང་ནི་ཡང་དག་པར་རྫོགས་པའི་སངས་རྒྱས་ཡིན་ནོ་ཞེས་ཞལ་གྱིས་འཆེའོ། །ང་ནི་ཉན་ཐོས་རྣམས་ལ་གླེང་གཞི་དང་བཅས་པ་ཁོ་ནའི་ཆོས་སྟོན་གྱི་གླེང་གཞི་མེད་པ་ནི་མ་ཡིན་ནོ། །ངེས་པར་འབྱུང་བ་དང་བཅས་པ་ཡིན་གྱི་ངེས་པར་འབྱུང་བ་མེད་པ་ནི་མ་ཡིན
9.40a
ནོ། །རྟོན་པ་དང་བཅས་པ་ཡིན་གྱི་རྟོན་པ་མེད་པ་ནི་མ་ཡིན་ནོ། །རྟུན་པ་དང་བཅས་པ་ཡིན་གྱི་རྟུན་པ་མེད་པ་ནི་མ་ཡིན་ནོ། །ཆོ་འཕྲུལ་དང་བཅས་པ་ཡིན་གྱི་ཆོ་འཕྲུལ་མེད་པ་ནི་མ་ཡིན་ནོ། །འོད་སྲུང་དེ་ལྟ་བས་ན་ཁྱོད་ཀྱིས་འདི་ལྟར་བསླབ་པར་བྱ་སྟེ། ཆོས་དགེ་བའི་ཆོས་དང་ལྡན་པ་གང་ཅི་ཡང་རུང་བ་མཉན་པར་བྱའོ། །དེ་ཐམས་ཅད་ལ་བཀུར་སྟི་བྱས། བླ་མར་བྱས། ཆེད་ཆེར་བྱས། སེམས་རྩེ་གཅིག་ཏུ་བྱས། རྣ་བླགས། སེམས་ཐམས་ཅད་ཀྱིས་བསམས་ནས་མཉན་པར་བྱའོ། །འོད་སྲུང་དེ་ལྟ་བས་ན་འདི་ལྟར་བསླབ་པར་བྱ་སྟེ། ཉེ་བར་ལེན་པའི་ཕུང་པོ་ལྔ་པོ་རྣམས་ལ་སྐྱེ་བ་དང་འཇིག་པར་རྗེས་སུ་ལྟ་བས་གནས་པར་བྱའོ། །སྐྱེ་མཆེད་དྲུག་པོ་དག་ལ་ཀུན་དུ་འབྱུང་བ་དང ། ནུབ་པར་རྗེས་སུ་ལྟ་བས་གནས་པར་བྱའོ། །དྲན་པ་ཉེ་བར་གཞག་པ་བཞི་དག་ལ་སེམས་ལེགས་པར་ཉེ་བར་གནས་པས་གནས་པར་བྱའོ། །དྲན་པ་ཉེ་བར་གཞག་པ་བཞི་དག་ལ་སེམས་ལེགས་པར་ཉེ་བར་གནས་པས་གནས་པ་ན་བྱང་ཆུབ་ཀྱི་ཡན་ལག་བདུན་པ་བསྒོམ་པར་བྱ། རྣམ་པར་ཐར་པ་བརྒྱད་ཀྱི་ལུས་ཀྱིས་མངོན་སུམ་དུ་བྱས་ཏེ་རྫོགས་པར་བྱས་ནས་གནས་པར་བྱའོ། །བདག་གི་སྟོན་པ་དང་ཚངས་པ་མཚུངས་པར་སྤྱོད་པ་མཁས་པ་རྣམས་ལ་ངོ་ཚ་ཤེས་པ་དང ། ཁྲེལ་ཡོད་པ་ཤས་ཆེར་ཉེ་བར་གནས་པར་འགྱུར་བ་དང ། རྟག་ཏུ་བདག་གི་ལུས་ལ་དྲན་པ་དང་ལྡན་ཞིང་མི་གཏོང་བ་དང ། བྲལ་བར་མ་གྱུར་པར་ལུས་ལ་གནས་པར་འགྱུར་བ་དེ་ལྟར་འོད་སྲུང་ཁྱོད་ཀྱིས་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་འོད་སྲུང་ལ་ཡང་དག་པར་བསྟན། ཡང་དག་པར་ལེན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་མགུ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་ཚེ་དང་ལྡན་པ་འོད་སྲུང་བཅོམ་ལྡན་འདས་ཀྱི་ཞབས་འབྲིང་དུ་འབྲང་ཞིང་བཅོམ་ལྡན་འདས་གནས་གང་དུ་བཞུགས་པ་དེར་བདག་གིས་རས་ཡུག་ཆེན་གྱི་སྣམ་སྦྱར་སྟོང་ཕྲག་བརྒྱ་རི་བ་བལྟ་བ་སྟེ། གདན་དུ་གདིང་བར་བྱའོ་སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་དགེ་སློང་འོད་སྲུང་གི་སེམས་ཀྱི་ཀུན་དུ་རྟོག་པ་ཐུགས་ཀྱིས་མཁྱེན
9.40b
ནས་ལམ་བོར་ཏེ་ཕྱོགས་གཅིག་ཏུ་བཞུགས་སོ། །དེ་ནས་ཚེ་དང་ལྡན་པ་འོད་སྲུང་གིས་མྱུར་བ་མྱུར་བ་ཁོ་ནར་རས་ཡུག་ཆེན་གྱི་སྣམ་སྦྱར་སྟོང་ཕྲག་བརྒྱ་རི་བ་བལྟབ་སྟེ་བཅོམ་ལྡན་འདས་ཀྱི་ཆེད་དུ་གདན་བཤམས་སོ། །འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་ཐུགས་བརྩེ་བའི་སླད་དུ་གདན་བཤམས་པ་ལ་བཞུགས་སུ་གསོལ། བདེ་བར་གཤེགས་པ་གདན་བཤམས་པ་ལ་བཞུགས་སུ་གསོལ། དེས་ན་བདག་ལ་ཡུན་རིང་པོའི་དོན་དང ། ཕན་པ་དང ། བདེ་བར་འགྱུར་ལགས་སོ། །བཅོམ་ལྡན་འདས་གདན་བཤམས་པ་ལ་བཞུགས་ཏེ། བཞུགས་ནས་ཚེ་དང་ལྡན་པ་འོད་སྲུང་ལ་བཀའ་སྩལ་པ། འོད་སྲུང་ཁྱོད་ཀྱི་རས་ཡུག་ཆེན་གྱི་སྣམ་སྦྱར་ཡང་ངོ ། །འོད་སྲུང་ཁྱོད་ཀྱི་རས་ཡུག་ཆེན་གྱི་སྣམ་སྦྱར་འཇམ་མོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། བཙུན་པ་བདག་གི་རས་ཡུག་ཆེན་གྱི་སྣམ་སྦྱར་ཡང་ལགས་སོ། །བཙུན་པ་བདག་གི་རས་ཡུག་ཆེན་གྱི་སྣམ་སྦྱར་འཇམ་ལགས་སོ། །བཅོམ་ལྡན་འདས་ཐུགས་བརྩེ་བའི་སླད་དུ་རས་ཡུག་ཆེན་གྱི་སྣམ་སྦྱར་བཞེས་པར་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ངའི་གསོ་རས་ཕྱག་དར་ཁྲོད་ཀྱི་གོས་ཟུང་ཤིག་།དེ་སྐད་ཅེས་བཀའ་སྩལ་པ་དང་བཅོམ་ལྡན་འདས་ལ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རས་ཡུག་ཆེན་གྱི་སྣམ་སྦྱར་བཞེས་པར་གསོལ། བདེ་བར་གཤེགས་པ་རས་ཡུག་ཆེན་གྱི་སྣམ་སྦྱར་བཞེས་པར་གསོལ། ་བཙུན་པ་བདག་གིས་བཅོམ་ལྡན་འདས་ཀྱི་གསོ་རས་ཕྱག་དར་ཁྲོད་ཀྱི་ན་བཟའ་གཟུང་བར་བགྱིའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་གི་རས་ཡུག་ཆེན་གྱི་སྣམ་སྦྱར་བཞེས་སོ། །བཅོམ་ལྡན་འདས་ཀྱིས་ཀྱང་ཉིད་ཀྱི་ཕྱག་ནས་གསོ་རས་ཕྱག་དར་ཁྲོད་པ་དེ་ལ་གནང་ངོ ། །དེ་ནས་ཚེ་དང་ལྡན་པ་འོད་སྲུང་གིས་གདམས་ངག་གཏམས་པ་དེས་ཉི་མ་བརྒྱད་དུ་སློབ་པས་བསོད་སྙོམས་ཡོངས་སུ་སྤྱད་དོ། །ཉི་མ་དགུ་པ་ལ་མི་སློབ་པས་སོ། །དེ་ནས་ཚེ་དང་ལྡན་པ་འོད་སྲུང་དགྲ་བཅོམ
9.41a
པ་ཁམས་གསུམ་གྱི་འདོད་ཆགས་དང་བྲལ་པ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་སྦངས་པ་ལྟ་བུ། མ་རིག་སྒོ་ངའི་སྦུབས་དྲལ་བ། རིག་པ་དང ། མངོན་པར་ཤེས་པ་དང ། སོ་སོར་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་ལ་ཆགས་པ་དང་བཀུར་སྟི་ལས་ཕྱིར་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་རི་མོར་བྱ་བ་དང ། མཆོད་པར་བྱ་བ་དང ། ཕྱག་བྱ་བར་གྱུར་ཏོ། །དེ་ན་ཁ་ཅིག་གིས་འདི་སྐད་ཅེས་སྨྲས་སོ། །ཀྱེ་མ་དགེ་སློང་འོད་སྲུང་གིས་ཁྱད་པར་ཆེན་པོ་འདི་རྟོགས་པས་མིང་འོད་སྲུང་ཆེན་པོ་འོད་སྲུང་ཆེན་པོ་ཞེས་བྱ་བ་བྱུང་ངོ ། །དེ་ནས་བཅོམ་ལྡན་འདས་མཐར་གྱིས་ལྗོངས་རྒྱུ་བ་རྒྱུ་ཞིང་རྒྱལ་པོའི་ཁབ་ཏུ་གཤེགས་ནས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་རྒྱལ་པོའི་ཁབ་ན་རི་བོ་དང ། མཛེས་པ་ཕྲད་པའི་དུས་སྟོན་བྱེད་དོ། །དེར་མུ་སྟེགས་པ་ཐམས་ཅད་གདོན་མི་ཟ་བར་འདུ་བ་ཡིན་པས་རེ་ཤིག་ན་གཅེར་པུ་པ་རྣམས་ཀྱང་རྒྱལ་པོའི་ཁབ་དུ་ཏུ་དོང་ངོ ། །དེ་ནས་སེར་སྐྱའི་བུ་མོ་བཟང་མོ་འདི་སྙམ་དུ་སུ་ཞིག་འདི་ལྟར་ཡུན་རིང་པོར་ཉོན་མོངས་པ་ཉམས་སུ་མྱོང་བར་བྱེད། རྒྱལ་པོའི་ཁབ་ཏུ་སློངས་མོའི་ཕྱིར་འཇུག་པ་འདི་ནི་བདག་གི་དུས་ལ་བབ་བོ་སྙམ་དུ་སེམས་སོ། །དེ་ནས་དེ་ཉོན་མོངས་པས་ཡིད་བྱུང་བས་སྐབས་རྙེད་དེ་རྒྱལ་པོའི་ཁབ་ཏུ་སློངས་མོ་ལ་སྙད་བཏགས་ཏེ་སོང་ངོ ། །ཚེ་དང་ལྡན་པ་འོད་སྲུང་ཆེན་པོ་ཡང་སྔ་དྲོ་ཤམས་ཐབས་བགོས་ཆོས་གོས་དང་ལྷུང་བཟེད་ཐོགས་ནས་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་སོ། །དེ་སེར་སྐྱའི་བུ་མོ་བཟང་མོ་ཁ་དོག་རྒྱས་པ་དང་ལྡན་པ་མ་ཡིན་པ་དེ་འདྲ་བར་གྱུར་པ་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །སྲིང་མོ་ཇི་ཡང་དག་པར་ཚངས་པར་སྤྱོད་པ་ལ་གནས་པ་ཡོངས་སུ་བསྐྱངས་སམ། དེས་འདི་སྐད་ཅེས་སྨྲས་སོ། །རྗེའི་སྲས་རང་གི་ཁྱིམ་ན་གནས་པ་དེ་ཁོ་ན་བདག་གི་ཚངས་པར་སྤྱོད་པར་གྱུར་གྱི། ད་ལྟར་ནི་མི་ཚངས
9.41b
པར་སྤྱོད་པ་ཁོ་ནར་བས་ཏེ། ཚངས་པར་སྤྱོད་པ་མ་མཆིས་སོ། །དེས་འདི་སྐད་ཅེས་སྨྲས་སོ། །སྲིང་མོ་ཚངས་པར་སྤྱོད་པ་ལ་གནས་པར་བྱ་བའི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངམ། དེ་སྐད་ཅེས་སྨྲས་པ་དང ། སེར་སྐྱའི་བུ་མོ་བཟང་མོས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །རྗེའི་སྲས་ཁྱེད་ལ་ཡང་རྒྱས་གཏོད་པ་མེད་གྲང ། རེ་ཤིག་ན་ཚེ་དང་ལྡན་པ་འོད་སྲུང་ཆེན་པོས་དགོངས་པར་བརྩམས་ན་ཉེས་པར་བཤད་པའི་ཆོས་ཅན། ཉེས་པའི་ཆོས་ཅན་དེ་རྣམས་ཀྱི་དམ་པ་མ་ཡིན་པའི་ཆོས་ལ་སྦྱར་བར་མཐོང་སྟེ། དེས་བྱུང་བ་དེ་ལྟ་བུ་རིག་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །སྲིང་མོ་མ་འཇིགས་ཤིག་།བཅོམ་ལྡན་འདས་ཀྱི་བསྟན་པ་ནི་དྲི་ང་བ་མེད་པ་དང ། སྡིག་པ་མེད་པ་ཡིན་ནོ། །དེའི་ཉན་ཐོས་རྣམས་ནི་ལྷའི་འདོད་པ་རྣམས་ཀྱང་དོན་དུ་མི་གཉེར་ན་མི་རྣམས་ཀྱི་ལྟ་སྨོས་ཀྱང་ཅི་དགོས་པ་ཡིན་ནོ། །དེས་དེ་སྐྱེ་དགུའི་བདག་མོ་ཆེན་མོ་ལ་ཡོངས་སུ་གཏད་ནས་དེས་དེ་རབ་ཏུ་ཕྱུང་བསྙེན་པར་རྫོགས་པར་བྱས་སོ། །དེ་བསོད་སྙོམས་ཀྱི་ཕྱིར་ཞུགས་པ་ན། གཡོན་ཅན་དང ། འཕྱོན་མ་དང ། ཟོལ་བ་དག་གཟུགས་འདི་ལྟ་བུར་སྡུག་པ་ཡོངས་སུ་ལོངས་སྤྱོད་པ་མེད་པར་དགའ་བར་བྱེད་དོ་ཞེས་ཁ་ཟེར་རོ། །དེ་ནས་དུས་གཞན་ཞིག་ན་ཚེ་དང་ལྡན་པ་འོད་སྲུང་ཆེན་པོ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་སོ། །སེར་སྐྱའི་བུ་མོ་བཟང་མོ་ཡང་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་པ་དང ། ཚེ་དང་ལྡན་པ་འོད་སྲུང་ཆེན་པོས་སེར་སྐྱའི་བུ་མོ་བཟང་མོ་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །སྲིང་མོ་ཅི་ཁྱོད་བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་འམ། དེས་སྨྲས་པ། བདག་ཅག་བཅོམ་ལྡན་འདས་ཀྱིས་བསྟན་པ་ལ་མངོན་པར་དགའ་སྟེ་མངོན་པར་མི་དགའ་བ་མ་མཆིས་སོ། །འོན་ཀྱང་བདག
9.42a
ནི་ལུག་ཚོན་པོ་དང་འདྲ་བར་གཟུགས་འདིས་གནོད་པ་བྱུང་སྟེ། གང་དང་གང་དུ་མཆི་བ་དེ་དང་དེ་ནས་སྐྱེ་བོ་དག་བདག་ལ་གཡར་མཆི་འོ། །ཚེ་དང་ལྡན་པ་འོད་སྲུང་ཆེན་པོས་སྨྲས་པ། བསོད་སྙོམས་ཀྱི་ཕྱིར་ཉོན་མོངས་པར་མ་བྱེད་ཅིག་།ངས་ཁྱོད་ལ་ཉི་མ་རེ་རེ་ཞིང་རང་གི་བསོད་སྙོམས་ལས་ཕྱེད་ཕྱེད་སྦྱིན་ནོ། །དེ་བསོད་སྙོམས་ལ་བརྒྱུས་ཏེ་ཕྱེད་ནི་བདག་ཉིད་ཀྱིས་སྤྱད། ཕྱེད་ནི་དེ་ལ་བྱིན་ནོ། །དེ་དེ་ལྟར་ཞུགས་པ་ན་དྲུག་སྡེ་རྣམས་འོད་སྲུང་ཆེན་པོ་འདི་ཁྱིམ་པར་གྱུར་པ་ན་བཟང་མོ་འདི་དང་ལྷན་ཅིག་ཁྱིམ་གཅིག་ན་ལོ་བཅུ་གཉིས་འདུག་ཀྱང་ལན་འགའ་ཡང་ཀུན་དུ་ཆགས་པའི་སེམས་ཀྱང་མ་བསྐྱེད་དོ་ཞེས་ཐོས་ན་ད་ལྟར་ནི་དེ་ལ་བསོད་སྙོམས་ཕྱེད་སྦྱིན་པར་བྱེད་དོ་ཞེས་འཕྱ་བར་གྱུར་ཏོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་སེར་སྐྱའི་བུ་མོ་བཟང་མོ་ལ་ཡིད་ལ་བྱ་བ་བསྒོ་བ་དང ། དེས་བརྩོན་པ་དང་འབད་པ་དང ། བརྩལ་བ་བྱས་པས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་སོ། །རེ་ཤིག་ན་ཚེ་དང་ལྡན་པ་འོད་སྲུང་ཆེན་པོས་དགེ་སློང་དག་འཕྱ་བར་ཐོས་སོ། །ཐོས་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །སྲིང་མོ་དགེ་བའི་བཤེས་གཉེན་གྱི་བྱ་བ་གང་ཡིན་པ་དེ་ངས་བྱས་ཟིན་ལ་རི་དགས་ཀྱིས་རི་དགས་མི་གསོས་ཀྱིས། ད་ནི་རང་གི་སྤྱོད་ཡུལ་སངས་རྒྱས་ཀྱིས་གནང་བ་ཕའི་ཡུལ་དུ་སྦྱངས་པའི་ཡོན་ཏན་བསོད་སྙོམས་རྗེས་སུ་སྤེལ་ཅིག་ཅེས་དེ་སྐད་རྗེས་སུ་བསྟན་ནས་ཚེ་དང་ལྡན་པ་འོད་སྲུང་ཆེན་པོ་གཏང་སྙོམས་སྒོམ་པར་བྱེད་དོ། །དེའི་ཚེ་མ་སྐྱེས་དགྲས་མི་དགེ་བའི་གྲོགས་པོ་ལྷ་སྦྱིན་ལ་བརྟེན་ནས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་སྲོག་དང་ཕྲལ་ཏེ་ཕའི་རྒྱལ་སྲིད་ཀྱི་དབང་ཕྱུག་ལ་དབང་བྱ་བའི་ཕྱིར་འདུག་གོ། །འདུག་མ་ཐག་ཏུ་ཡིད་ལ་གཅགས་པར་གྱུར་ནས་དེ་ཡང་མྱ་ངན་གྱི་ཁང་པར་ཞུགས་སོ། །དེའི་མྱ་ངན་ཐབས་དུ་མས་ཀྱང་བསང་བར་མ་ནུས་ནས་བློན་པོ་རྣམས་ཀྱིས་བསམས་པ། གྲོང་ཁྱེར་ཆེན་པོ་དྲུག་པོ་འདི་དག་ན་གར་མཁན་དང ། ཟློས་གར་མཁན་དང ། བཞད་གད་མཁན་དང ། ཤིང་འཛེགས་མཁན་དང ། རོལ་མོ་མཁན་གྱི་བྱེ་བྲག་ཇི་སྙེད་ཡོད་པ་ཐམས་ཅད་བསྡུ
9.42b
བར་བྱའོ་སྙམ་ནས་དེ་རྣམས་ཀྱིས་དེ་བཞིན་བྱས་སོ། །དེ་ནས་རྒྱལ་པོ་མ་སྐྱེས་དགྲའི་མདུན་དུ་རོལ་མོ་མཁན་གྱི་ཁྱད་པར་དུ་མས་པི་ཝང་དང་གླིང་བུ་དང ། རྫ་རྔ་དང ། ཁར་རྔ་དང ། ལྕགས་ཀྱི་སིལ་ཀྲོལ་དང ། སྒྲ་སྙན་ལ་སོགས་པ་རོལ་མོའི་སྒྲ་དག་བྱེད། གླུ་དག་ལེན། གར་དག་བྱེད། རྒྱུག་པར་བྱེད། མཆོང་བར་བྱེད་དོ། །དེ་ལྟར་བྱས་ཀྱང་རྒྱལ་པོ་མ་སྐྱེས་དགྲའི་མྱ་ངན་བསང་བར་མ་ནུས་སོ། །དེ་ནས་དུས་གཞན་ཞིག་ན་སེར་སྐྱའི་བུ་མོ་བཟང་མོ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ཏེ་སྤྱོད་ལམ་ཀུན་ནས་མཛེས་པས་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །བློན་པོ་ངན་སེམས་ཅན་ཞིག་གིས་སེར་སྐྱའི་བུ་མོ་བཟང་མོ་གཟུགས་བཟང་བ། བལྟ་ན་སྡུག་པ། མཛེས་པ། ལུས་གསེར་གྱི་ཁ་དོག་བས་ཀྱང་ལྷག་པར་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། འདིས་རྒྱལ་པོ་མྱ་ངན་སེལ་བར་བྱེད་དོ་སྙམ་དུ་བསམས་ནས་བློན་པོ་དེས་སེར་སྐྱའི་བུ་མོ་བཟང་མོ་བཟུང་སྟེ་རྒྱལ་པོ་ལ་འོས་པའི་ཁྲུས་རྣམས་ཀྱིས་ཁྲུས་བྱས་ནས་རྒྱལ་པོ་ལ་འོས་པའི་སྤོས་དང ། མེ་ཏོག་ཕྲེང་བ་དང ། གོས་དང ། རྒྱན་གྱི་ཁྱད་པར་རྣམས་ཀྱིས་བརྒྱན་ནས་རྒྱལ་པོ་མ་སྐྱེས་དགྲ་ལ་ཕུལ་ལོ། །དེ་ནས་སེར་སྐྱའི་བུ་མོ་བཟང་མོས་སྔོན་ལས་རྣམས་བྱས་ཤིང་བསགས་པ་གདོན་མི་ཟ་བར་འབྱུང་བ་མྱོང་བར་འགྱུར་བར་ངེས་པ་འོད་པ་བཞིན་དུ་རྣམ་པར་གནས་ཏེ། དཔེར་ན་རི་དག་གམ། རིའི་རྩེ་མོ་དག་གིས་གྲིབ་མ་ས་ལ་བབས་ཤིང་མངོན་པར་འབབ་པ་དེ་བཞིན་དུ་སེར་སྐྱའི་བུ་མོ་བཟང་མོ་ལ་ཡང་སྔོན་ལས་རྣམས་བྱས་ཤིང་བསགས་པ་གདོན་མི་ཟ་བ་འབྱུང་བ། མྱོང་བར་འགྱུར་བ་ངེས་པ། འོད་པ་བཞིན་དུ་རྣམས་པར་གནས་པ་ཡིན་པས་རེ་ཤིག་ན་རྒྱལ་པོ་མ་སྐྱེས་དགྲས་སེར་སྐྱའི་བུ་མོ་མཐོང་མ་ཐག་ཏུ་ཆགས་ནས་དེ་དང་ལྷན་ཅིག་དགའ་བ་ཉམས་སུ་མྱོང་བ་བརྩམས་སོ། །དེ་ནས་གསོ་སྦྱོང་བཅཝ་ལྔ་པ་དེ་ཉིད་ལ་དྲིས་ན་སེར་སྐྱའི་བུ་མོ་བཟང་མོ་ཚོགས་ཀྱི་ནང་ན་མི་སྣང་ངོ ། །དེ་ནས་སྐྱེ་དགུའི་བདག་མོ་ཆེན་མོས་བསམས་ན་རེ་ཤིག་ན་སེར་སྐྱའི་བུ་མོ་སྐོབས་སུ་ཆུད། ཉམ་ང་བར་གྱུར་པ་མཐོང་ངོ ། །སྐོབས་སུ་ཆུད་པ་དང ། ཉམ་ང་བ་དང ། མི་བདེ་བར་གྱུར་པར་རིག་ནས་སྐྱེ་དགུའི་བདག་མོ་ཆེན
9.43a
མོ་གཽ་ཏ་མཱིས་ཨུཏྤ་ལའི་མདོག་ལ་སྨྲས་པ། ་ཕུ་ནུ་མོ་སེར་སྐྱའི་བུ་མོ་བཟང་མོ་ལ་སོམས་ཤིག་།དེ་ནས་ཨུཏྤ་ལའི་མདོག་གསོ་སྦྱོང་བཅཝ་ལྔ་པ་དེ་ཉིད་ལ་རྫུ་འཕྲུལ་གྱིས་མ་སྐྱེས་དགྲའི་ཁྱིམ་ག་ལ་བ་དེར་སོང་ངོ ། །དེ་ནས་ཨུཏྤ་ལའི་མདོག་སྐར་ཁུང་གི་བུ་ག་ནས་ཞུགས་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་ཀྱིས་ཐོག་མ་མེད་པའི་དུས་ནས་གོམས་པ་ཁམས་གསུམ་པའི་ཉོན་མོངས་པ་རྣམས་དྲལ། སྤངས། བསལ། ་ཡོངས་སུ་བཏང་ན་ཅིའི་ཕྱིར་ཁྱོད་ཀྱིས་རྫུ་འཕྲུལ་རོ་དང་འདྲ་བ་མུ་སྟེགས་པ་ཐམས་ཅད་དང་ཐུན་མོང་པ་འདི་མངོན་དུ་མ་བྱས། དེ་སྐད་ཅེས་སྨྲས་པ་དང ། སེར་སྐྱའི་བུ་མོ་བཟང་མོ་ཨུཏྤ་ལའི་མདོག་ལ་འདི་སྐད་ཅེས་སྨྲས་སོ། །ཕུ་ནུ་མོ་རྫུ་འཕྲུལ་གྱི་ལམ་མི་ཤེས་སོ། །དེ་ནས་ཨུཏྤ་ལའི་མདོག་གིས་སེར་སྐྱའི་བུ་མོ་བཟང་མོ་ལ་རྫུ་འཕྲུལ་གྱི་ལམ་བསྟན་ཏོ། །དེ་ནས་སེར་སྐྱའི་བུ་མོ་བཟང་མོས་འཇིག་རྟེན་པའི་ལམ་གྱིས་བསམ་གཏན་བཞི་ལ་བརྟེན་ཏེ་རྫུ་འཕྲུལ་མངོན་པར་བསྒྲུབས་སོ། །དེ་ནས་སེར་སྐྱའི་བུ་མོ་བཟང་མོ་རྒྱན་ཐམས་ཅད་ཀྱིས་བརྒྱན་པ་དགེ་སློང་མའི་དབྱར་ཁང་ག་ལ་བ་དེར་སོང་ངོ ། །དགེ་སློང་མ་བཅུ་གཉིས་སྡེས་སེར་སྐྱའི་བུ་མོ་བཟང་མོ་རྒྱན་ཐམས་ཅད་ཀྱིས་བརྒྱན་པ་མཐོང་ངོ ། །མཐོང་ནས་ཀྱང་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །བདག་ཅག་ནི་རྒྱལ་པོའི་ཆུང་མ་དང་ལྷན་ཅིག་གསོ་སྦྱོང་ཉམས་སུ་མྱོང་བར་མི་བགྱིད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་སོང་ལ་རྒྱལ་པོའི་གན་དུ་སོང་སྟེ་གོས་དང་རྒྱན་སླར་བྱིན་ལ་རྒྱལ་པོས་གནང་བར་གྱིས་གོས་ངུར་སྨྲིག་གྱོན་ལ་སླར་བདག་ཅག་གི་དྲུང་དུ་ཤོག་ཤིག་།དེ་ནས་སེར་སྐྱའི་བུ་མོ་བཟང་མོས་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་ཚིག་མཉན་ནས་རྒྱལ་པོ་མ་སྐྱེས་དགྲའི་ཁྱིམ་ག་ལ་བ་དེར་སོང་ངོ ། །དེའི་ཚེ་རྒྱལ་པོ་མ་སྐྱེས་དགྲ་སད་ནས་སེར་སྐྱའི་བུ་མོ་བཟང་མོ་མཐོང་སྟེ་འཁྱུད་པར་བརྩམས་སོ། །དེ་ནས་སེར་སྐྱའི་བུ་མོ་བཟང་མོ་སྟེང་གི་ནམ་མཁའ་ལ་མངོན་པར་འཕགས་སོ། །དེ་ནས་རྒྱལ་པོ་མ་སྐྱེས་དགྲས་སེར་སྐྱའི་བུ་མོ་བཟང་མོ་ངང་པའི་རྒྱལ་པོ་འདབ་མ
9.43b
བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་པ་མཐོང་ངོ ། །མཐོང་ནས་ཀྱང་འཇིགས་ཤིང་སྐྲག་ལ་ཡིད་བྱུང་སྟེ་སྐྱི་བུང་ཞེས་བྱེད་ནས་བསམས་པ། ཅི་རེ་ཤིག་ལྷ་མོ་ཡིན་ནམ། འོན་ཏེ་ཀླུ་མོ་འམ། དྲི་ཟ་མོ་འམ། གནོད་སྦྱིན་མོ་འམ། སྲིན་མོ་ཡིན་སྙམ་དུ་སེམས་ཏེ། ཚིགས་སུ་བཅད་པ་ཡང་སྨྲས་པ། ཁྱོད་ཅི་ལྷ་མོ་འམ་ཀླུ་མོ་འམ། །གནོད་སྦྱིན་སྲིན་མོ་དྲི་ཟ་མོ། །བུད་མེད་འདྲེ་མོ་འམ་ཅི་ཡིན་པ། །དྲིས་པ་དེ་ནི་བདག་ལ་གསུངས། །དེ་སྐད་ཅེས་སྨྲས་པ་དང ། སེར་སྐྱའི་བུ་མོ་བཟང་མོས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །བདག་ནི་ལྷ་མོ་ཀླུ་མོ་མིན། །དྲི་ཟ་གནོད་སྦྱིན་སྲིན་མོ་མིན། །མི་དབང་བདག་ནི་བདེ་གཤེགས་ཀྱི། །བྱ་བ་བྱས་པའི་ཉན་ཐོས་མའོ། །དེ་ནས་རྒྱལ་པོ་མ་སྐྱེས་དགྲས་ཚིག་དེ་ཐོས་ནས་རི་དགས་དང་འདྲ་བར་ཟུག་རྔུ་གཉིས་པས་གནད་དུ་བསྣུན་ནས་ཀྱི་ཧུད་ཀྱེ་མ་ཨ་ལ་ལ་སྡིག་པ་ཆེན་པོ་བྱས་སོ་སྙམ་ནས་ཚིགས་སུ་བཅད་པ་ཡང་སྨྲས་པ། བདག་ནི་རྒྱ་མཚོའི་ཕ་མཐའ་འདྲ་བ་ཡི། །སྡུག་བསྔལ་གཅིག་མཐར་རེ་ཤིག་མི་ཕྱིན་ན། །ད་ནི་གཉིས་པ་ཉེ་བར་གནས་གྱུར་ཏེ། །གླགས་ཡོད་པས་ན་བདག་ལ་གནོད་མང་འབྱུང ། །དེ་དེ་ལྟར་སེམས་པ་ལས་བརྒྱལ་ནས་སའི་སྟེང་དུ་འགྱེལ་བ་ལས་རེ་ཤིག་ན་ཆུས་གཏོར་ནས་བསླང་ངོ ། །དེ་ནས་རྒྱལ་པོ་མ་སྐྱེས་དགྲས་རང་གི་སེམས་རྙེད་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །ཀྱེ་མ་ཨ་ལ་ལ་བདག་ནི་སྨྲས་ཤིང་སྣང་བས་འཁོར་བར་འཁོར་བ་ན་ཤིན་དུ་སྨས་པར་གྱུར་ན་མི་རུང་བས་འཕགས་མ་མར་གཤེགས་མར་གཤེགས། ཉེས་པར་སྤྱོད་པའི་འདམ་གྱི་ཆུ་བོར་བྱིང་བ་བདག་གིས་སུག་པ་ནས་དྲང་དུ་གསོལ། དེ་ནས་སེར་སྐྱའི་བུ་མོ་བཟང་མོས་དེ་རྗེས་སུ་གཟུང་བའི་ཕྱིར་བབས་སོ། །བབས་ནས་སྟན་བཤམས་པ་ལ་འདུག་གོ། །དེ་ནས་རྒྱལ་པོ་མ་སྐྱེས་དགྲས་ལྗོན་ཤིང་རྩ་བ་ནས་བཅད་པ་བཞིན་དུ་སེར་སྐྱའི་བུ་མོ་བཟང་མོའི་རྐང་པ་གཉིས་ལ་གཏུགས་ནས་སེར་སྐྱའི་བུ་མོ་བཟང་མོ་ལ་འདི་སྐད་ཅེས་སྨྲས་སོ། །འཕགས་མ་གདུལ་དཀའ་བ་རྣམས་ལ་བཟོད་པར་མཛད་དུ་གསོལ། སེར་སྐྱའི་བུ་མོ་བཟང་མོས་འདི་སྐད་ཅེས་སྨྲས་སོ། །རྒྱལ་པོ
9.44a
ཆེན་པོ་བདག་བཟོད་དོ། །རེ་ཤིག་ན་སེར་སྐྱའི་བུ་མོ་བཟང་མོས་གོས་དང་རྒྱན་རྣམས་རྒྱལ་པོ་ལ་བྱིན་ནོ། །རྒྱལ་པོས་ཀྱང་གོས་ངུར་སྨྲིག་དག་སེར་སྐྱའི་བུ་མོ་བཟང་མོ་ལ་བྱིན་ནས་རྐང་པ་གཉིས་ལ་ཕྱག་འཚལ་ཏེ་འདི་སྐད་ཅེས་ཀྱང་སྨྲས་སོ། །འཕགས་མ་ཁྱོད་ལ་ཇི་སྲིད་འཚོའི་བར་དུ་ཆོས་གོས་དང ། བསོད་སྙོམས་དང ། མལ་སྟན་དང ། ནད་ཀྱི་གསོས་སྨན་དང ། ཡོ་བྱད་རྣམས་ཀྱིས་བསྟབ་པར་བགྱིའོ། །དེ་ནས་སེར་སྐྱའི་བུ་མོ་བཟང་མོས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་ཕལ་ཆེར་བདག་གིས་ལས་ཀྱིས་ཉེས་པ་ལགས་ཀྱི། ཁྱོད་ཀྱིས་ཉེས་པ་ནི་མ་ཡིན་ནོ། །ཅིའི་སླད་དུ་ཞེ་ན། ལྷ་བཅོམ་ལྡན་འདས་ཀྱིས། གང་དུ་གནས་ན་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ན་མེད། །རི་རྣམས་ཀྱི་ནི་གསེབ་ཏུ་ཞུགས་ནའང་མེད་ཅེས་གསུངས་སོ། །ལྷ་གཞན་ཡང ། ་ཇི་ལྟར་གྲིབ་མ་མི་ཡི་རྗེས་འབྲང་བ། །འདུག་ན་འདུག་ལ་འགྲོ་ན་འགུལ་བ་ལྟར། །དེ་བཞིན་དགེ་དང་མི་དགེ་གྲིབ་མ་ལྟར། །སངས་རྒྱས་སྨྲ་བའི་བླ་ན་མེད་པ་གསུང ། །དེ་ནས་སེར་སྐྱའི་བུ་མོ་བཟང་མོས་རྒྱལ་པོ་མ་སྐྱེས་དགྲ་ལ་ཚིག་སྙིང་སྡུད་པར་བྱེད་པ་དེ་ལྟ་བུའི་ཆོས་ཀྱི་གཏམ་རྣམ་གྲངས་དུ་མས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས་ནས་སྟེང་གི་ནམ་མཁའ་ལ་མངོན་དུ་འཕགས་ཏེ་སླར་ཡང་དགེ་སློང་མའི་དབྱར་ཁང་དུ་སོང་ངོ ། །ཡང་བཅུ་གཉིས་སྡེ་རྣམས་ཀྱིས་འདི་སྐད་ཅེས་བདག་ཅག་ནི་དགེ་སློང་མ་ཉམས་པ་དང་ལྷན་ཅིག་གསོ་སྦྱོང་མི་བྱའོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ངའི་གཉི་གའི་དགེ་འདུན་གྱིས་དོན་ཤེས་པ་དང ། ངས་བསླབ་པའི་གཞི་ཡང་ལེགས་པར་བཅས་པར་འགྱུར་རོ་སྙམ་དུ་དགོངས་ནས་བྱུང་བ་འདི་དང ། གླེང་གཞི་འདི་དང ། དངོས་པོ་འདི་དང ། སྐབས་འདི་ལ་གཉི་གའི་དགེ་འདུན་བསྡུ་བ་མཛད་དེ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན
9.44b
བཞིན་དུ་རྨེད་ཀྱི་མི་མཁྱེན་པར་མ་ཡིན། དུས་སུ་ཡིན་གྱི་དུས་མ་ཡིན་པར་མ་ཡིན། དོན་དང་ལྡན་པ་ཡིན་གྱི་དོན་དང་མི་ལྡན་པར་མ་ཡིན་ཏེ། སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་མི་ལྡན་པར་རྨེད་པ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་སེར་སྐྱའི་བུ་མོ་བཟང་མོ་ལ་རྨས་པ། དགེ་སློང་མ་ཁྱོད་ཀྱིས་དེ་ལྟར་བྱས་པ་བདེན་ནམ། བཙུན་པ་མད་དོ། །དགེ་སློང་མ་ཁྱོད་ཀྱིས་བདག་གིར་མ་བྱས་སམ། དེས་འདི་སྐད་ཅེས་གསོལ་ཏོ། །བཙུན་པ་བདག་ནི་རང་བཞིན་གྱིས་འདོད་ཆགས་དང་བྲལ་བ་ལགས་ན་བདག་གིས་ཅིའི་སླད་དུ་བདག་གིར་བགྱིད། སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་འཐུན་པ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་གཉི་གའི་དགེ་འདུན་ལ་བཀའ་སྩལ་པ། དགེ་སློང་དང ། དགེ་སློང་མ་དག་དེ་ལྟ་བས་ན་ཕན་ཡོན་བཅུ་པོ་འདི་ལྟ་སྟེ། དགེ་འདུན་བསྡུ་བར་བྱ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར་དང ། དགེ་འདུན་འཐུན་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མ་དད་པ་རྣམས་དད་པར་བྱ་བའི་ཕྱིར་དང ། དད་པ་རྣམས་ཕྱིར་ཞིང་འཕེལ་ལ་རྒྱས་པར་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང ། ཚངས་པར་སྤྱོད་པར་རྗེས་སུ་གཟུང་བར་བྱ་བའི་ཕྱིར་དང ། ཚངས་པར་སྤྱོད་པ་ཡོངས་སུ་རྫོགས་པར་བྱ་བའི་ཕྱིར་དང ། བསྟན་པ་འཐུན་པར་བྱ་བའི་ཕྱིར་དང །
9.45a
ངའི་བསྟན་པ་ཡངས་པར་གྱུར་པ་སྐྱེ་བོ་མང་པོ་ལ་ཕན་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བ་ལ་གཟིགས་ནས་འདུལ་བ་ལ་ཉན་ཐོས་མ་རྣམས་ཀྱི་བསླབ་པའི་གཞི་བཅའ་བར་བྱའོ། །ངའི་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་དག་དགེ་སློང་མ་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། དགེ་སློང་མ་དེ་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཡང་དགེ་སློང་མ་གང་ཞེ་བྱ་བ་ནི་དགེ་སློང་མ་རྣམ་པ་བཞི་པོ་མིང་གི་དགེ་སློང་མ་དང ། ཁས་འཆེ་བའི་དགེ་སློང་མ་དང ། སློང་བའི་ཕྱིར་དགེ་སློང་མ་དང ། ཉོན་མོངས་པ་བཅོམ་པའི་ཕྱིར་དགེ་སློང་མའོ། །དེ་ལ་མིང་གི་དགེ་སློང་མ་གང་ཞེ་ན་གང་གི་མིང་དང ། མིང་དུ་བརྗོད་པ་དང ། ཚིག་གཉིས་པ་དང ། ་ཚིག་བླ་དགས་དང ། འདུ་ཤེས་དང ། བོད་པ་དང ། གདགས་པ་དང ། ཐ་སྙད་ཀྱིས་དགེ་སློང་མ་ཞེ་འམ། དགེ་སློང་མའི་རིགས་ཤེ་འམ། དགེ་སློང་མ་དང ། འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་མ་ཞེས་བྱའོ། །ཁས་འཆེ་བའི་དགེ་སློང་མ་གང་ཞེ་ན། གང་དགེ་སློང་མ་མ་ཡིན་བཞིན་དུ་བདག་ཉིད་དགེ་སློང་མའོ་ཞེས་ཁས་འཆེ་བར་བྱེད་པ་དང་རྐུ་ཐབས་སུ་གནས་ཤིང ། ཡང་དགེ་སློང་མ་ཡིན་ནོ་ཞེས་བདག་ཉིད་དགེ་སློང་མར་ཁས་ཆེས་པའི་དགེ་སློང་མ་ཞེས་བྱའོ། །སློང་བའི་ཕྱིར་དགེ་སློང་མ་གང་ཞེ་ན། གང་ཆོས་དང་ལྡན་པས་སློངས་མོ་ལ་སྤྱོད་པས་འཚོ་བར་བྱེད་པ་དེ་ནི་སློང་བའི་ཕྱིར་དགེ་སློང་མ་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་མ་གང་ཞེ་ན། གང་གི་ཟག་པ་ཀུན་ནས་ཉོན་མོངས་པར་བྱེད་པ་ཡང་སྲིད་པར་བྱེད་པ། རིམས་ནད་དང་བཅས་པ། རྣམ་པར་སྨིན་པར་སྡུག་བསྔལ་བ་ཕྱི་མ་ལ་སྐྱེ་བ་དང ། རྒ་བ་དང་འཆི
9.45b
བར་འགྱུར་བ་གང་དག་ཡིན་པ་དེ་དག་སྤངས་པ་དང ། ཡོངས་སུ་ཤེས་པ་དང ། རྩ་བ་ནས་བཅད་པ་དང་ཤིང་ཏ་ལའི་མགོ་བཞིན་དུ་གཞི་མི་སྣང་བ་དང ། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་མ་ཞེས་བྱའོ། །དོན་འདིར་ནི་གསོལ་བ་དང་བཞིའི་ལས་མི་གཡོ་བ་གཞག་པར་མི་འོས་པ་བསྙེན་པར་རྫོགས་པ་གང་ཡིན་པ་དེ་དགེ་སློང་མར་དགོངས་ཏེ། དེས་ན་ཡང་དགེ་སློང་མ་ཞེས་གསུངས་སོ། །དགེ་སློང་མ་རྣམས་དང་ལྷན་ཅིག་ཅེས་བྱ་བ་ནི་དེ་ལས་གཞན་པ་ཆོས་འཐུན་པ་ཚངས་པ་མཚུངས་པར་སྤྱོད་པ་རྣམས་དང་ངོ ། །བསླབ་པ་མཚུངས་པར་ཞེས་བྱ་བ་ནི་བསླབ་པ་གང་ལ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་མས་བསླབ་པར་བྱ་བ་དེ་ལ་དེང་བསྙེན་པར་རྫོགས་པས་དང ། དེང་བསྙེན་པར་རྫོགས་པས་གང་ཡིན་པ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་ངོ་ཞེས་འདི་ལ་ཚུལ་ཁྲིམས་ཉིད་ཀྱིས་མཉམ་པ་དང ། བསླབ་པ་ཉིད་ཀྱིས་མཉམ་པ་དང ། སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པ་གང་ཡིན་པ་དེ་ནི་བསླབ་པ་མཚུངས་པ་ཞེས་བྱ་སྟེ། དེས་ན་བསླབ་པ་མཚུངས་པ་ཞེས་གསུངས་སོ། །གྱུར་པས་ཤེས་བྱ་བ་ནི་སོང་བས་སོ། །བསླབ་པ་མ་ཕུལ་ཞེས་བྱ་བ་ལ་ཇི་ཙམ་གྱིས་ན་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་མ་ཁྲོས་ཤིང་ཁྲོ་བའི་ཟིལ་གྱིས་ནོན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སྨྱོས་པ་དང ། སེམས་འཁྲུགས་པ་དང ། ཚོར་བ་དག་གིས་ཉེན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །ཁྲོས་པ་འམ། ཁྲོ་བའི་ཟིལ་གྱི་ནོན་པའི་དྲུང་དུ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དགེ་སློང་མ་གླེན་མའི་དྲུང་དུ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གླེན་མ་ཇི་ལྟ་བ་བཞིན་དུ་ལྐུག་པ་དང ། འོན་མ་དང ། གཉིད་ཀྱིས་ལོག་པ་དང ། སྙོམས་པར་ཞུགས་པ་དང ། ལྷའི་གཟུགས་བརྙན་དང ། སངས་རྒྱས་ཀྱི་གཟུགས་བརྙན་དང ། མི་མ་ཡིན་པ་དང ། སྤྲུལ་པ་དང ། དུད་འགྲོར་གྱུར་པའི་དྲུང་དུ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པར་འབུལ་བར་བྱེད་ལ་དབུས་པས་གལ་ཏེ་མཐའ
9.46a
འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །དེ་བཞིན་དུ་མཐའ་འཁོབ་པ་དབུས་པའི་ཚིག་གི་མཐའ་འཁོབ་པ་ལ་བསླབ་པ་འབུལ་བར་བྱེད་ལ། གལ་ཏེ་མཐའ་འཁོབ་པས་དབུས་པའི་ཚིག་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པ་མཐའ་འཁོབ་བའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ། གལ་ཏེ་དབུས་པས་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པ་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་ལ། གལ་ཏེ་མཐའ་འཁོབ་པས་དབུས་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །དབེན་པར་མི་དབེན་པའི་འདུ་ཤེས་ཀྱིས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །མི་དབེན་པར་དབེན་པའི་འདུ་ཤེས་ཀྱིས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །ཅ་ཅོ་ཅན་གྱིས་ཅ་ཅོ་ཅན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །བསླབ་པ་འབུལ་བར་འདོད་པས་དགེ་སློང་མ་རྣལ་མར་གནས་པ་འགའ་ལ་ཡང་ཤེས་པར་མི་བྱེད་པར་བསླབ་པ་འབུལ་བར་བྱེད་ན་བསླབ་པ་མ་ཕུལ་བར་བརྗོད་པར་བྱའོ་ཞེས་གྲག་སྟེ། ་འདི་ནི་བསླབ་པ་མ་ཕུལ་བ་ཞེས་བྱའོ།། །།དགེ་སློང་མའི་རྣམ་པར་འབྱེད་པ། ། བམ་པོ་གསུམ་པ། བསླབ་པ་ཉམས་པར་མ་བྱས་པ་ཞེས་བྱ་བ་ལ། བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡང་ཡོད། བསླབ་པ་ཉམས་པར་མ་བྱས་ལ་བསླབ་པ་ཕུལ་བ་ཡང་ཡོད། བསླབ་པ་ཉམས་པར་བྱས་ལ་བསླབ་པ་ཕུལ་བ་ཡང་ཡོད། བསླབ་པ་ཉམས་པར་མ་བྱས་ལ་བསླབ་པ་མ་ཕུལ་བ་ཡང་ཡོད་དོ། །ཇི་ཙམ་གྱིས་ན་བསླབ་པ་ཉམས་པར་བྱས་ལ་བསླབ་པ་ཕུལ་བ་མ་ཡིན་ཞེ་ན། འདི་ལྟ་སྟེ། དགེ་སློང་མ་ཕྲད་པར་འདོད་པ་འམ། ་མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་དེ་དགེ་སློང་མའི་དྲུང་དུ་ཉེ་བར་འོངས་ནས་འདི
9.46b
སྐད་ཅེས། འཕགས་མ་དག་ཚངས་པར་སྤྱོད་པ་སྤྱད་དཀའ་བོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བ་དཀའོ། །གནས་མལ་དགོན་པ་དང ། ནགས་མདབ་དང ། བས་མཐའ་དག་ཏུ་གནས་པར་ཁོང་དུ་ཆུད་པར་དཀའོ། །བདག་ཇི་སྲིད་འཚོའི་བར་དུ་མི་རྣམས་ཀྱི་དགའ་བ་དང ། རྩེད་མོ་རྣམས་དང་བྲལ་བ་བྱས་པར་འགྱུར་རོ། །བདག་ཇི་སྲིད་འཚོའི་བར་དུ་རྩཝ་དང ། ལོ་མ་དང ། ཤིང་ལོ་བཏིང་བའི་མལ་བྱེད་པར་འགྱུར་རོ། །བདག་ཇི་སྲིད་འཚོའི་བར་དུ་གཞན་གྱི་ཁྱིམ་དུ་གཞན་གྱི་ངོར་བལྟ་དགོས་པར་འགྱུར་རོ། །བདག་ཇི་སྲིད་འཚོའི་བར་དུ་འདི་ལྟར་ཆོས་གོས་དང ། བསོད་སྙོམས་དང ། མལ་སྟན་དང ། ནད་གསོས་ཀྱི་སྨན་དང་ཡོ་བྱད་དག་གཞན་ལས་ཚོལ་གྲོ་བྱ་དགོས་སོ། །མ་དྲན་ནོ། །ཕ་དང ། མིང་པོ་དང ། ཕུ་ནུ་མོ་དྲན་ནོ། །བདག་ཁྱིམ་བཟང་པོ་དག་ཏུ་གཏད་པར་མཛོད་ཅིག་ཅེས་ཟེར་ཞིང་དེ་ལྟར་རྣམ་པར་འཁྱམ་འདོད་པའི་ངག་དང ། ཚིག་དང ། ཐ་སྙད་དང ། སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། སྨྲ་བའི་ཚིག་དང ། ངག་གི་ལས་དང ། ངག་གི་རྣམ་པར་རིག་བྱེད་དག་སྨྲ་ཞིང་འདི་སྐད་ཅེས་བདག་བསླབ་པ་ནི་གཏོང་ངོ་ཞེས་མི་སྨྲ་བ་འདི་ནི་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡིན་ནོ། །ཇི་ཙམ་གྱིས་ན་བསླབ་པ་ཉམས་པར་མ་བྱས་ལ་བསླབ་པ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་མ་ཕྲད་འདོད་པ་དང ། མངོན་པར་མི་དགའ་བ་དང ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་དོན་དུ་མི་གཉེར་བ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་དེ་དགེ་སློང་མའི་དྲུང་དུ་ཉེ་བར་འོངས་ནས་འདི་སྐད་ཅེས། འཕགས་མ་དག་དགོངས་སུ་གསོལ། ་བདག་མིང་འདི་ཞེས་བགྱི་བ་འདི་ལྟར་དགེ་སློང་མའི་བསླབ་པ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །སངས་རྒྱས་གཏོང་ངོ ། །ཆོས་གཏོང་ངོ ། །དགེ་འདུན་གཏོང་ངོ ། །མཁན་པོ་དང ། སློབ་དཔོན་གཏོང་ངོ་ཞེས་ཟེར་ཞིང ། ཐ་ན་འདི་སྐད་ཅེས་བདག་དགེ་སྦྱོང་མར་གཟུང་དུ་གསོལ། བདག་ཁྱིམ་པ་མོར་གཟུང་དུ་གསོལ། བདག་ཟ་མ་དང ། མ་ནིང་དང ། དགེ་སློང་སུན་ཕྱུང་བར་གཟུང་དུ་གསོལ། མ་བསད་པ་དང ། ཕ་བསད་པ་དང ། དགྲ་བཅོམ་པ་བསད
9.47a
པ་དང ། དགེ་འདུན་གྱི་དབྱེན་བྱས་པ་དང ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང ། རྐུ་ཐབས་སུ་གནས་པ་འམ། མུ་སྟེགས་ཅན་ནམ། མུ་སྟེགས་ཅན་ཞུགས་པ་ཡིན་ནོ་ཞེས་ཟེར་བ་འམ། འདི་སྐད་ཅེས་བདག་ཁྱེད་ལྟ་བུ་ཆོས་འཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ཟེར་ཞིང་དེ་ལྟར་རྣམ་པར་འཁྱམ་འདོད་པའི་ངག་དང ། ཚིག་དང ། སྐད་དང ། རྗོད་པ་དང ། ངེས་པའི་ཚིག་དང ། ཚིག་གི་ལམ་དང ། སྨྲ་བའི་ཚིག་དང ། ངག་གི་ལས་དང ། ངག་གི་རྣམ་པར་རིག་བྱེད་ཀྱིས་འདི་སྐད་ཅེས་བདག་བསླབ་པ་གཏོང་ངོ་ཞེས་སྨྲ་ན། བསླབ་པ་ཕུལ་བར་བརྗོད་པར་བྱ་སྟེ། འདི་ནི་བསླབ་པ་ཉམས་པར་མ་བྱས་ལ་བསླབ་པ་ཕུལ་བ་ཡིན་ནོ། །ཇི་ཙམ་གྱིས་ན་བསླབ་པ་ཉམས་པར་ཡང་བྱས་ལ་བསླབ་པ་ཕུལ་བ་ཡང་ཡིན་ཞེ་ན། འདི་ལྟ་སྟེ། དགེ་སློང་མ་ཕྲད་པར་འདོད་པ་འམ། མངོན་པར་མི་དགའ་བ་འམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པ་འམ། དགེ་སྦྱོང་གི་ཚུལ་གྱིས་སྒྱིད་ལུག་པ་འམ། མུས་བྱུང་བ་འམ། ཐེ་ཚོམ་ཟ་བ་འམ། སྨོད་པ་དེ་དགེ་སློང་མའི་དྲུང་དུ་ཉེ་བར་འོངས་ནས། འདི་སྐད་ཅེས། འཕགས་མ་དག་ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །བདག་ཉིད་གཅིག་པུ་ལ་མངོན་པར་དགའ་བ་དཀའོ། །གནས་མལ་དགོན་པ་དང ། ནགས་འདབ་དང ། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །བདག་ཇི་སྲིད་འཚོའི་བར་དུ་མི་རྣམས་ཀྱི་དགའ་བ་དང ། རྩེད་མོ་རྣམས་དང་བྲལ་བ་བྱས་པར་འགྱུར་རོ། །བདག་ཇི་སྲིད་འཚོའི་བར་དུ་རྩཝ་དང ། ལོ་མ་དང ། ཤིང་ལོ་བཏིང་བའི་མལ་བྱེད་པར་འགྱུར་རོ། །བདག་ཇི་སྲིད་འཚོའི་བར་དུ་གཞན་གྱི་ཁྱིམ་དུ་གཞན་གྱི་ངོར་བལྟ་དགོས་པར་འགྱུར་རོ། །བདག་ཇི་སྲིད་འཚོའི་བར་དུ་འདི་ལྟར་གཞན་ལས་ཆོས་གོས་དང ། བསོད་སྙོམས་དང ། མལ་སྟན་དང ། ནད་ཀྱི་གསོས་སྨན་དང ། ཡོ་བྱད་དག་ཚོལ་ཁྲོ་བྱ་དགོས་སོ། །མ་དྲན་ནོ། །ཕ་དང ། མིང་པོ་དང ། ཕུ་ནུ་མོ་དྲན་ནོ། །བདག་ཁྱིམ་བཟང་པོ་དག་ཏུ་གཏད་པར་མཛོད་ཅིག་ཅེས་ཟེར་ཞིང་འདི་སྐད་ཅེས། ཚེ་དང་ལྡན་པ་དག་དགོངས་སུ་གསོལ། བདག་མིང་འདི་ཞེས་བགྱི་བ
9.47b
འདི་ལྟར་བསླབ་པ་འབུལ་ལོ། །སངས་རྒྱས་དང ། ཆོས་དང ། དགེ་འདུན་དང ། མཁན་པོ་དང ། སློབ་དཔོན་གཏོང་ངོ་ཞེས་སྨྲས་པ་དང ། ཐ་ན་འདི་སྐད་ཅེས་བདག་དགེ་སྦྱོང་མར་གཟུང་དུ་གསོལ། བདག་ཁྱིམ་པ་མོར་གཟུང་དུ་གསོལ། བདག་ཟ་མ་དང ། མ་ནིང་དང ། དགེ་སློང་སུན་ཕྱུང་བར་གཟུང་དུ་གསོལ། མ་བསད་པ་དང ། ཕ་བསད་པ་དང ། དགྲ་བཅོམ་པ་བསད་པ་དང ། ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང ། རྐུ་ཐབས་སུ་གནས་པ་དང ། ཐ་དད་པར་གནས་པ་དང ། གནས་པར་བྱ་བ་མ་ཡིན་པ་དང ། མུ་སྟེགས་ཅན་དང ། མུ་སྟེགས་ཅན་ཞུགས་པ་ཡིན་ནོ་ཞེས་ཟེར་བ་འམ། འདི་སྐད་ཅེས་བདག་ཁྱེད་ལྟ་བུ་ཆོས་དང་འཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ཟེར་ཞིང ། འདི་ལྟར་རྣམ་པར་འཁྱམ་འདོད་པའི་ངག་དང་ཞེས་བྱ་བ་མུ་དང་པོ་ཇི་ལྟ་བ་བཞིན་དུ་རྒྱ་ཆེར་བརྗོད་པར་བྱའོ། །དེ་ལྟར་ཕྱོགས་གཉི་གའི་ཚིག་སྨྲས་པ་དེ་ནི་བསླབ་པ་ཉམས་པར་བྱས་པ་ཡང་ཡིན་ལ་བསླབ་པ་ཕུལ་བ་ཡང་ཡིན་ནོ། །ཇི་ཙམ་གྱིས་ན་བསླབ་པ་ཉམས་པར་མ་བྱས་ཤིང་བསླབ་པ་མ་ཕུལ་བ་ཡིན་ཞེ་ན། རྣམ་པ་དེ་དག་མ་གཏོགས་པ་ནི་བསླབ་པ་ཉམས་པར་མ་བྱས་ལ་བསླབ་པ་མ་ཕུལ་བ་ཡིན་ནོ། །མི་ཚངས་པར་སྤྱོད་པ་ཞེས་བྱ་བ་ནི་གཉིས་ཀྱིས་གཉིས་སྤྲོད་པའོ། །འཁྲིག་པ་ཞེས་བྱ་བ་ནི་མི་ཚངས་པར་སྤྱོད་པ་གང་ཡིན་པ་དེ་ཉིད་འཁྲིག་པ་ཡང་ཡིན་ནོ། །ཆོས་ཤེས་བྱ་བ་འདི་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པའོ། །བསྟེན་ན་ཞེས་བྱ་བ་ནི་ལྷག་པར་སྤྱད་ནའོ། །ཐ་ན་དུད་འགྲོའི་སྐྱེས་གནས་སུ་གྱུར་པ་དང་ལྷན་ཅིག་ཀྱང་རུང་སྟེ་ཞེས་བྱ་བ་ནི་དོམ་དང ། སྤྲེའུ་ལ་སོགས་པ་དང་ལྷན་ཅིག་ཏུའོ། །དགེ་སློང་མ་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པར་གྱུར་པའོ། །དགེ་སློང་མའི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས
9.48a
ཀྱིས་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་ཕྱིན་པར་བྱེད་པ་དང ། གང་ཟག་དེའི་ཁས་ལེན་པ་དང ། མངོན་པར་ཁས་ལེན་པ་དང ། ཕྱིར་མི་ཟློག་པ་དང ། ཕྱིར་མི་ལྡོག་པ་དང ། ཕྱིར་མི་འགོག་པ་ཉིད་དང ། ངག་དང ། ཚིག་དང ། ཐ་སྙད་དང ། སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་ཏུ་རྗོད་པ་དང ། ངག་གི་ལས་དང ། ངག་གི་རྣམ་པར་རིག་བྱེད་གང་ཡིན་པའོ། །འདི་ཞེས་བྱ་བ་དེ་ནི་ཉེ་བར་བསྟན་པ་དང ། ཀུན་དུ་བསྟན་པའི་ཚིག་བླ་དགས་སོ། །ཕས་ཕམ་པར་གྱུར་པ་ཡིན་གྱིས་ཤེས་བྱ་བ་ནི་དེ་ཐ་མ་དང ། ལྟུང་བ་དང ། དམན་པ་དང ། མཇུག་ན་འདུག་པ་དང ། ཐ་ཆད་དང ། ཡིད་དང་མི་མཐུན་པའོ། །ཡང་གང་གིས་ལྟུང་བ་དེ་བྱས་མ་ཐག་ཏུ་དགེ་སློང་མར་མི་རུང་བར་འགྱུར། དགེ་སྦྱོང་དུ་མི་རུང་བར་འགྱུར། ཤཱཀྱའི་སྲས་སུ་མི་རུང ། དགེ་སློང་མའི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པ་ཡིན། ཉམས་པ། བཅོམ་པ། ལྟུང་བ། ཕས་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང ། ཡངས་པར་འགྱུར་དུ་མི་རུང་བ་དེ་བཞིན་དུ། དགེ་སློང་མས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་མར་མི་རུང་ཞེས་བྱ་བའི་བར་དུ་སྔ་མ་བཞིན་ནོ། །གནས་པར་མི་བྱའོ་ཞེས་བྱ་བ་ནི་དགེ་སློང་མ་རྣམས་ཀྱིས་དེ་དང་གསོ་སྦྱོང་དང ། དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང ། བཞིའི་ལས་ཉམས་སུ་མྱོང་བར་མི་བྱ་ཞིང ། གང་ཟག་བཅུ་གཉིས་པོ་དག་ཏུ་བསྐོ་བས་སྐོ་བར་མི་བྱ་བ་སྟེ། དེས་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། ་་་་་་་་སྡོམ་ལ། འབའ་ཤིག་དང་ནི་གནས་གསུམ་གྱིས། །མི་ལ་སོགས་དང་ལྷན་ཅིག་དང ། །སྟེན་ལ་གཞོལ་དང་རྩོལ་བ་དང ། །མྱོས་པར་བྱས་དང་མཐུས་འཛིན་པའོ། །དགེ་སློང་མས་མི་ཚངས་པར་སྤྱོད་པ་འཁྲིག
9.48b
པའི་ཆོས་བསྟེན་ན་ཕས་ཕམ་པར་འགྱུར་རོ། །ཡང་དགེ་སློང་མ་གང་ཞིག་མི་དང་གནས་གསུམ་གྱིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕས་ཕམ་པར་འགྱུར་ཏེ། ཁ་འམ། བཤང་བའི་ལམ་འམ། མོ་མཚན་དུ་བཅུག་ན་དགེ་སློང་མ་དེ་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཇི་ལྟར་མི་དང་ལྷན་ཅིག་གནས་གསུམ་གྱིས་བསྟེན་པར་བྱེད་པ་དེ་བཞིན་དུ་མི་མ་ཡིན་པ་དང ། དུད་འགྲོའི་སྐྱེས་གནས་སུ་སྐྱེས་པ་དང་ལྷན་ཅིག་ཏུ་བསྟེན་ན་ཡང་ཐམས་ཅད་དུ་ཕས་ཕམ་པར་འགྱུར་བའོ། །ཡང་དགེ་སློང་མ་གང་ཞིག་སེམས་སྟེན་པ་ལ་གཞོལ་བ་དང ། སྟེན་པ་ལ་འབབ་པ་དང ། སྟེན་པ་ལ་བབ་པར་གྱུར་པས་མོ་མཚན་བར་ཆད་དང་བཅས་པས་བར་ཆད་དང་བཅས་པ་དང ། བར་ཆད་དང་བཅས་པས་བར་ཆད་མེད་པ་དང ། བར་ཆད་མེད་པས་བར་ཆད་དང་བཅས་པ་དང ། བར་ཆད་མེད་པས་བར་ཆད་མེད་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན། ཐམས་ཅད་དུ་ཕས་ཕམ་པར་འགྱུར་རོ། །དེ་ལྟར་འདིར་དགེ་སློང་གི་ཕས་ཕམ་པ་དང་པོའི་དངོས་པོ་ཇི་ལྟ་བ་བཞིན་དུ་དགེ་སློང་མ་ཞེས་བརྗེ་བ་བྱས་ཏེ་འདིར་རྒྱས་པར་བརྗོད་པར་བྱའོ། །བདག་གིས་ནི་ཧ་ཅང་སྤྲོས་པས་འཇིགས་པའི་ཕྱིར་མ་བྲིས་སོ། །ཕས་ཕམ་པར་གྱུར་པ་དང་པོ་མདོར་བསྡུས་པ་རྫོགས་ཏེ། རྒྱས་པར་ནི་དགེ་སློང་གི་སོ་སོར་ཐར་པ་དང ། རྣམ་པར་འབྱེད་པ་བཞིན་ནོ།། ་་་་་་་་་་་་།། སངས་རྒྱས་བཅོམ་ལྡན་འདས་འོད་མའི་ཚལ་བྱ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་སྔོན་རྫ་མཁན་དགེ་སློང་ནོར་ཅན་རྒྱལ་པོའི་ཁབ་ན་དགོན་པའི་སྤྱིལ་བུ་ན་གནས་སོ། །དེ་ནས་སྔོན་རྫ་མཁན་དགེ་སློང་ནོར་ཅན་རྒྱལ་པོའི་ཁབ་ཏུ་སྤྱོད་ཡུལ་དུ་ཞུགས་པ་དང ། རྒྱལ་པོའི་ཁབ་ཀྱི་མི་བ་ལང་རྫི་དང ། ཕྱུགས་རྫི་དག་དང ། རྩཝ་ཐུན་དག་དང ། ཤིང་ཐུན་དག་དང ། ལམ་གྱིས་འཚོ་བ་དག་དང ། ལམ་གོལ་བས་འཚོ་བའི་མི་དག་གིས་སྤྱིལ་བུ་བཅོམ་ཞིང་རྣམ་པར་དཀྲུགས་ཏེ་རྩཝ་དང ། ཤིང་ཐམས་ཅད་ཀྱང་ཁྱེར་རོ། །དེའི་འོག་ཏུ་སྔོན་རྫ་མཁན་དགེ་སློང་ནོར་ཅན་འོངས་པ་དང་ཞེས་བྱ་བ་ནས། དེ་བཞིན་དུ་སྔོན་རྫ་མཁན
9.49a
དགེ་སློང་ནོར་ཅན་ལས་གླེངས་ནས་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་ཞེས་བྱ་བའི་བར་དུའོ། །དེ་ནས་སངས་རྒྱས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། དངོས་པོ་འདི་དང ། སྐབས་འདི་ལ་གཉི་གའི་དགེ་འདུན་བསྡུ་བ་མཛད་དོ་ཞེས་བྱ་བ་ནས། གཉི་གའི་དགེ་འདུན་གྱིས་ཤེས་པ་དང ། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བ་ཞེས་བྱ་བའི་བར་དུའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་ཀྱི་མི་མཁྱེན་པར་མ་ཡིན་ཞེས་བྱ་བའི་བར་དུ་ཕས་ཕམ་པ་དང་པོ་སྔ་མ་ཇི་ལྟ་བ་བཞིན་དུ་ཐམས་ཅད་བརྗོད་པར་བྱའོ། །དེ་བཞིན་དུ་ཕན་ཡོན་བཅུ་ཞེས་བྱ་བའི་བར་དུ་ཕས་ཕམ་པ་དང་པོ་ཇི་ལྟ་བ་བཞིན་དུ་བརྗོད་པར་བྱའོ། །ཡང་དགེ་སློང་མ་གང་གཞན་དག་གིས་གྲོང་ན་འདུག་པ་འམ། དགོན་པ་ན་འདུག་པ་མ་བྱིན་པ་རྐུ་བའི་རྣམ་གྲངས་སུ་གཏོགས་པ་བླངས་ནས། ཇི་ཙམ་མ་བྱིན་པར་བླངས་པས་དེ་རྒྱལ་པོ་འམ་བློན་པོ་ཆེན་པོས་བཟུང་ནས། དེ་ལ་འདི་སྐད་ཅེས་ཀྱེ་དགེ་སློང་མ་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ། དགེ་སློང་མ་དེ་དེ་ལྟར་མ་བྱིན་པར་ལེན་ན། དགེ་སློང་མ་དེ་ཡང་ཕས་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་དགེ་སློང་མ་བཞི་པོ་མིང་གི་དགེ་སློང་མ་དང ། ཁས་འཆེ་བའི་དགེ་སློང་མ་དང ། སློང་བའི་ཕྱིར་དགེ་སློང་མ་དང ། ཉོན་མོངས་པ་བཅོམ་པའི་ཕྱིར་དགེ་སློང་མ་ལས་ཞེས་བྱ་བའི་བར་དུ་ཕས་ཕམ་པ་དང་པོ་སྔ་མ་ཇི་ལྟ་བ་དེ་བཞིན་དུ་བརྗོད་པར་བྱའོ། །གཞན་དག་གིས་ཞེས་བྱ་བ་ནི་སྐྱེས་པ་དང ། བུད་མེད་དང ། མ་ནིང་གིའོ། །གྲོང་ན་འདུག་པ་འམ་ཞེས་བྱ་བ་ནི་ར་བའི་ནང་ན་འདུག་པའོ། །དགོན་པ་ན་འདུག་པ་ཞེས་བྱ་བ་ནི་ར་བའི་ཕྱི་རོལ་ན་འདུག་པའོ། །མ་བྱིན་པ་ཞེས་བྱ་བ་ནི་དེ་ལ་སྐྱེས་པ་འམ་བུད་མེད་དམ་མ་ནིང་གང་གིས་ཀྱང་མ་བྱིན་པའོ། །རྐུ་བའི་གྲངས་སུ་གཏོགས་པ་ཞེས་བྱ་བ་ནི་མ་བྱིན་པ་གང་ཡིན་པ་དེ་རྐུ་བའི་གྲངས་སུ་གཏོགས་པ་ཡང་ཡིན་ནོ། །བླངས་ན་ཞེས་བྱ་བ་ནི་ལེན་ནའོ། །
9.49b
ཇི་ཙམ་མ་བྱིན་པར་བླངས་པས་ཞེས་བྱ་བ་ནི་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །དེ་རྒྱལ་པོ་འམ་ཞེས་བྱ་བ་ནི་སྐྱེས་པ་འམ། ་བུད་མེད་འམ། མ་ནིང་ཡང་རུང ། རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན། དེ་དག་ནི་རྒྱལ་པོ་ཡང་ཡིན་ལ། དེ་དག་རྒྱལ་རིགས་ཀྱང་ཡིན་དེ་དག་སྤྱི་བོ་ནས་དབང་བསྐུར་བ་ཡང་ཡིན་ནོ། །བློན་པོ་ཆེན་པོས་ཞེས་བྱ་བ་ནི་དེ་ལས་གཞན་པ་བློན་པོ་དང ། རྩིས་མཁན་དང ། སྣ་ཆེན་པོ་ལ་གཏོགས་པ་རྒྱལ་སྲིད་བྱེད་པ་གསང་ཚིག་འཐུན་པས་འཚོ་བ་གང་དག་དེ་ལ་བརྟེན་ནས་འཚོ་བར་བྱེད་པ་དག་གིས་སོ། །བཟུང་ནས་ཤེས་བྱ་བ་ནི་བཟུང་ནས་སོ། །དེ་ལ་འདི་སྐད་ཅེས་ཀྱེ་དགེ་སློང་མ་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་བྱ་བ་དེ་དག་ནི་སྤྱོ་བའི་ཚིག་གོ། །ཟེར་ཞིང་ཞེས་བྱ་བ་ནི་རྗོད་ཅིང་ངོ ། །གསོད་དམ་ཞེས་བྱ་བ་ནི་སྲོག་དང་བྲལ་བར་བྱེད་པའོ། །འཆིང་ངམ་ཞེས་བྱ་བ་ནི་ཆིངས་མ་གསུམ་པོ་ལྕགས་ལས་བྱས་པ་དང ། ཤིང་ལས་བྱས་པ་དང ། རྩཝ་ལས་བྱས་པ་དག་གིས་སོ། །སྤྱུག་ཀྱང་རུང་ཞེས་བྱ་བ་ནི་ཡུལ་མེད་པར་བྱས་ཀྱང་རུང་སྟེའོ། །དགེ་སློང་མ་གང་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པའོ་ཞེས་བྱ་བ་ནས་དེ་ཡང་ཞེས་བྱ་བ་འདི་ནི་ཉེ་བར་བསྟན་པ་དང ། ཀུན་དུ་བསྟན་པའི་ཚིག་བླ་དགས་སོ་ཞེས་བྱ་བ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཞེས་བྱ་བའི་བར་དུ་ཕས་ཕམ་པ་དང་པོ་ཇི་ལྟ་བ་དེ་བཞིན་དུ་རྒྱ་ཆེར་བརྗོད་པར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་སྤྱི་སྡོམ་ལ། བདག་ཉིད་ས་དང་ནམ་མཁའ་དང ། །ས་ཡི་གཅལ་དང་བཞོན་དང་གྲུ། །སྟོན་ཀ་འབྱུང་དང་ཆུ་དང་ནི། །རྐུ་དང་ས་གཞི་འཚོལ་བ་དང ། །རྐང་མེད་དང་ནི་གདོལ་པ་དང ། །འཕྱང་བར་གྱུར་པ་ཐ་མ་ཡིན། ་་་་་།སྡོམ་ལ། བདག་ཉིད་དང་ནི་མ་བྱིན་དང ། །སེམས་དང་ཡོངས་སུ་བཟུང་བ་དང ། །འདུ་ཤེས་དང་ནི་བཞི་པ་བཞི། །ལྔ་པ་གཉིས་སུ་བྱས་པ་ཡིན། །དགེ་སློང་མས་རྒྱུ་གསུམ་གྱིས་གཞན་གྱི་ཡོ་བྱད་ལྕི་བ་མ་བྱིན་པར་ལེན་ན་ཕས་ཕམ་པར་འགྱུར་ཏེ། གསུམ་གང་ཞེ་ན། བདག་ཉིད་ཀྱིས་དང ། ཞལ་ཏ་བྱས་པས་དང ། མངགས་པས་སོ། །ཇི་ལྟར
9.50a
བདག་ཉིད་ཀྱིས་ཤེ་ན། བདག་ཉིད་ཀྱིས་རྐུ་བ་དང ། བདག་ཉིད་ཀྱིས་རྐུར་འཇུག་པ་དང ། བདག་ཉིད་ཀྱིས་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་ན་བདག་ཉིད་ཀྱིས་སོ། །ཇི་ལྟར་ཞལ་ཏ་བྱས་པས་ཞེ་ན། ཞལ་ཏ་བྱས་ཏེ་རྐུ་བ་དང ། ཞལ་ཏ་བྱས་ཏེ་རྐུར་འཇུག་པ་དང ། ཞལ་ཏ་བྱས་ཏེ་གནས་ནས་གནས་སུ་སྦེད་པར་བྱེད་པ་སྟེ། དེ་ལྟར་ན་ཞལ་ཏ་བྱས་པས་སོ། །ཇི་ལྟར་མངགས་པས་ཤེ་ན། མངགས་ནས་རྐུ་བ་དང ། མངགས་ནས་རྐུར་འཇུག་པ་དང ། མངགས་ནས་གནས་སུ་སྦེད་པར་བྱེད་པ་སྟེ། དེ་ལྟར་ན་མངགས་པས་སོ། །དགེ་སློང་མས་རྒྱུ་གསུམ་པོ་དེ་དག་གིས་གཞན་གྱི་ཡོ་བྱད་ལྕི་བ་མ་བྱིན་པར་བླངས་ན་ཕས་ཕམ་པར་འགྱུར་རོ། །གཞན་ཡང་དགེ་སློང་མས་རྒྱུ་གསུམ་གྱིས་གཞན་དག་གི་ཡོ་བྱད་ལྕི་བ་བླངས་ན་ཕས་ཕམ་པར་འགྱུར་ཏེ། གསུམ་གང་ཞེ་ན། མ་བྱིན་པ་དང ། ་ལྕི་བ་དང ། གནས་ནས་གནས་སུ་སྦེད་པའོ། །ཇི་ལྟར་མ་བྱིན་པ་ཡིན་ཞེ་ན། སྐྱེས་པ་དང ། བུད་མེད་དང ། མ་ནིང་གང་གིས་ཀྱང་མ་བྱིན་པ་སྟེ། དེ་ལྟ་བུ་ནི་མ་བྱིན་པ་ཡིན་ནོ། །ཇི་ལྟར་ན་ལྕི་བ་ཡིན་ཞེ་ན། མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པ་སྟེ། དེ་ལྟར་ན་ལྕི་བ་ཡིན་ནོ། །ཇི་ལྟར་གནས་ནས་གནས་སུ་སྦེད་པ་ཡིན་ཞེ་ན། གནས་གང་དུ་བཞག་པའི་གནས་དེ་ནས་སྤོས་ནས་གནས་གཞན་དུ་འཇོག་པར་བྱེད་པ་སྟེ། དེ་ལྟར་ན་གནས་ནས་གནས་སུ་སྦེད་པ་ཡིན་ནོ། །དགེ་སློང་མས་རྒྱུ་དེ་གསུམ་གྱིས་གཞན་གྱི་ཡོ་བྱད་ལྕི་བ་མ་བྱིན་པར་བླངས་ན་ཕས་ཕམ་པའི་ལྟུང་བར་འགྱུར་རོ། །གཞན་ཡང་དགེ་སློང་མས་རྒྱུ་གསུམ་གྱིས་གཞན་གྱི་ཡོ་བྱད་ལྕི་བ་མ་བྱིན་པར་བླངས་ན་ཕས་ཕམ་པར་འགྱུར་ཏེ། གསུམ་གང་ཞེ་ན། སེམས་པར་བྱེད་པ་དང ། རྩོལ་བར་བྱེད་པ་དང ། གནས་ནས་གནས་སུ་སྦེད་པའོ། །དེ་ལྟར་སྡོམ་གྱི་ཚིགས་སུ་བཅད་པ་རྒྱས་པར་དགེ་སློང་གི་རྣམ་པར་འབྱེད་པ་ལས་ཇི་ལྟར་འབྱུང་བ་དེ་བཞིན་དུ་བརྗོད་པར་བྱ་ཞིང ། དེ་ལས་དགེ་སློང་ཞེས་འབྱུང་བ་ནི་དགེ་སློང་མའི་རྣམ་པར་འབྱེད་པ་འདིར་དགེ་སློང་མ་ཞེས་བསྒྱུར་བར་བྱའོ། །ཕས་ཕམ་པར་གྱུར་པ་གཉིས་པ་རྫོགས་སྷོ།། ་་་་་་་་་་་།། སྤྱི་སྡོམ་ལ། བྲན་ཅན
9.50b
དང་ནི་རི་དགས་ཟློག་།བདག་ཉིད་དང་ནི་དུག་དང་ནི། །རོ་ལངས་བསྲོ་ཁང་ཐ་མ་ཡིན། ་་་་་་་།སྡོམ་ལ། བྲན་ཅན་དང་ནི་སྐྱོང་བ་པ། །མཆུ་ཅན་དང་ནི་ཤི་རི་ཀ་།ལྷུང་བཟེད་དག་དང་ཆོས་གོས་དང ། །མངལ་ན་གནས་དང་ཚོང་དཔོན་ནོ། །སངས་རྒྱས་བཅོམ་ལྡན་འདས་སྤོང་བྱེད་ན་ཆུ་ཀླུང་ཡིད་འོང་ལྡན་གྱི་འགྲམ་ན་སྒྲོན་ཤིང་གི་ཚལ་གསེབ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་བསྒོམས་ཤིག་།མི་སྡུག་པ་སྟེན་ཅིང་བསྒོམས་ལ་ལན་མང་དུ་བྱ་བ་ན་འབྲས་བུ་ཆེན་པོ་དང ། ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང ། མི་སྡུག་པ་བསྒོམ་པའི་བསྔགས་པ་བརྗོད་པར་མཛད་པས་དགེ་སློང་དག་མི་སྡུག་པ་སྒོམ་པར་བྱེད་དོ། །དགེ་སློང་དག་མི་སྡུག་པ་སྒོམ་པ་ན་ལུས་རུལ་བ་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བྱེད་པ་ན་མཚོན་ཀྱང་འབྱིན་པར་བྱེད། དུག་ཀྱང་ཟ་བར་བྱེད། ཐག་པས་ཀྱང་འཆིང་བར་བྱེད། གཡང་སར་ཡང་མཆོད་པར་བྱེད་ཅིང ། འདི་ལྟར་དགེ་སློང་གིས་ཀྱང་དགེ་སློང་ལ་གསོད་པར་བྱེད་དོ། །དེ་ནས་དགེ་སློང་ཞིག་ལུས་རུལ་བ་འདིས་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པར་བྱེད་ཅིང ། རི་དགས་ཟློག་དགེ་སྦྱོང་སྦེད་ག་ལ་བ་དེར་སོང་སྟེ་ཕྱིན་ནས་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟངས་ཚུར་ཤོག་།ཁོ་བོ་སྲོག་དང་ཕྲོལ་ཅིག་དང ། ཁོ་བོའི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱི་ཡིན་པར་འགྱུར་རོ། །དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་ཁྱེར་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་སོང་སྟེ་ཕྱིན་པ་དང ། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་འདུག་སྟེ་རལ་གྲི་ཁྲག་གིས་གོས་པ་འཁྲུ་བར་བྱེད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་ཆུ་རྒྱུན་གྱི་སྟེང་ན་འདུག་ནས་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་ལེགས་སོ་ལེགས་སོ། །འདི་ལྟར་ཁྱོད་དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད།
9.51a
མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང ། དེ་དག་གི་ལྷུང་བཟེད་དང ། ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ། །དེ་ནས་རི་དགས་ཟློག་དགེ་སྦྱོང་སྦེད་འདི་སྙམ་དུ་གང་དག་དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་ཏེ། ་བདག་ལ་བསོད་ནམས་མང་དུ་སྐྱེ་ཞིང ། དེ་དག་གི་ལྷུང་བཟེད་དང ། ཆོས་གོས་གང་ཡིན་པ་དེ་བདག་གིར་འགྱུར་བ་དེ་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་དུ་བཅུག་སྟེ། ཀུན་དགའི་ར་བ་ནས་ཀུན་དགའི་ར་བ་དང ། གཙུག་ལག་ཁང་ནས་གཙུག་ལག་ཁང་དང ། ཁང་ཁྱིམ་ནས་ཁང་ཁྱིམ་དང ། འཆག་ས་ནས་འཆག་ས་དང ། ལམ་གོལ་བར་རྗེས་སུ་རྒྱུ་བ་ན་དགེ་སློང་དེ་དང་དེ་དག་མཐོང་ནས་འདི་སྐད་ཅེས་སྨྲས་སོ། །དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་རྒལ་བ་རྒལ་བར་བྱ་བ། མ་གྲོལ་བ་གྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན། དེ་ནས་དགེ་སློང་ཞིག་རྣག་གི་ལུས་འདིར་སྒྱིད་ལུག་པ་དང ། མུས་བྱུང་བ་དང ། ཐེ་ཚོམ་ཟ་བ་དང ། སྨོད་པ་ན་གནས་ནས་ཕྱིར་བྱུང་སྟེ་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་བདག་མ་རྒལ་བ་ཡིན་གྱི་སྒྲོལ་ཅིག་།བདག་མ་གྲོལ་བ་ཡིན་གྱི་ཁྲོལ་ཅིག་།བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཤིག་།བདག་ཡོངས་སུ་མྱ་ངན་ལས་མ་འདས
9.51b
པ་ཡིན་གྱི་ཡོངས་སུ་མྱ་ངན་ལས་ཟློས་ཤིག་།དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་བྲལ་བར་བྱས་ཏེ། དེ་བཞིན་དུ་གཉིས་དང་གསུམ་ནས་དགེ་སློང་དྲུག་བཅུའི་བར་དག་སྲོག་དང་བྲལ་བར་བྱས་སོ། །དེའི་ཚེ་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་ཏོ། །དེ་ནས་བཅོམ་ལྡན་འདས་དེ་ཉིད་ཀྱི་བཅཝ་ལྔའི་གསོ་སྦྱོང་ལ་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་རྣམ་པར་གཟིགས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་ད་ལྟར་བཅོམ་ལྡན་འདས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག་།མི་སྡུག་པ་བསྟེན་ཅིང་གོམས་པར་བྱས་ལན་མང་དུ་བྱས་ན་འབྲས་བུ་ཆེན་པོ་དང ། ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང ། མི་སྡུག་པ་བསྒོམ་པའི་བསྔགས་པ་བརྗོད་པར་ཡང་མཛད་དོ་ཞེས་བྱ་བ་ནས་གསད་པར་མི་བྱའོ། །བདག་ཉིད་དམ་གཞན་གསོད་དུ་འཇུག་ན་སྟེ། གསོ་སྦྱོང་བཅཝ་ལྔ་པ་དེ་ཉིད་ལ་བསླབ་པ་བཅས་སོ་ཞེས་བྱ་བའི་བར་དུ་རྒྱ་ཆེར་བརྗོད་པར་བྱ་སྟེ། དེ་ཉིད་ལས་གླེངས་ནས་ཇི་ལྟར་དགེ་སློང་གི་རྣམ་པར་འབྱེད་པ་བཞིན་དུ་རྒྱ་ཆེར་བྱའོ། །དེ་ནས་བཅོམ་ལྡན་འདས་ཀྱིས་བྱུང་བ་དེ་ཉིད་དང ། གླེང་གཞི་དེ་ཉིད་དང ། དངོས་པོ་དེ་ཉིད་དང ། སྐབས་དེ་ཉིད་ཀྱིས་གཉི་གའི་དགེ་འདུན་བསྡུ་བ་མཛད་དེ། ངའི་ཉན་ཐོས་རྣམས་ཀྱིས་དོན་དེ་ཤེས་པ་དང ། ངས་བསླབ་པའི་གཞི་ལེགས་པར་བཅས་པར་འགྱུར་བའི་བར་ཕས་ཕམ་པ་དང་པོ་ཇི་ལྟ་བ་བཞིན་དུ་རྒྱ་ཆེར་བརྗོད་པར་བྱའོ། །ཡང་དགེ་སློང་མ་གང་ཞིག་མི་འམ། མིར་ཆགས་པ་ལ་བསམ་བཞིན་དུ་རང་གི་ལག་དར་ཏེ་སྲོག་བཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག
9.52a
གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་སེམས་ཀྱི་འདོད་པ་དང ། སེམས་ཀྱི་ཀུན་དུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ལ། དེ་ཡང་རྩོམ་པ་དེས་ཤི་བར་གྱུར་ན་དགེ་སློང་མ་དེ་ཡང་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཡང་དགེ་སློང་མ་གང་ཞིག་ཅེས་བྱ་བ་ནི། དགེ་སློང་མ་རྣམ་པ་བཞི་པོ་མིང་གི་དགེ་སློང་མ་དང ། ཁས་འཆེ་བའི་དགེ་སློང་མ་དང ། སློང་བའི་ཕྱིར་དགེ་སློང་མ་དང ། ཉོན་མོངས་པ་བཅོམ་པའི་ཕྱིར་དགེ་སློང་མ་ཞེས་བྱ་བའི་བར་ཕས་ཕམ་པ་དང་པོ་སྔ་མ་ཇི་ལྟ་བར་སྔ་མ་བཞིན་དུ་བརྗོད་དོ། །མི་འམ་ཞེས་བྱ་བ་ནི་གང་གིས་མའི་ལྟོར་དབང་པོ་དྲུག་པོ་འདི་ལྟ་སྟེ། མིག་གི་དབང་པོ་དང ། རྣ་བའི་དབང་པོ་དང ། སྣའི་དབང་པོ་དང ། ལྕེའི་དབང་པོ་དང ། ལུས་ཀྱི་དབང་པོ་དང ། ཡིད་ཀྱི་དབང་པོ་ཐོབ་པར་གྱུར་པའོ། །མིར་ཆགས་པ་ལ་ཞེས་བྱ་བ་ནི་གང་གིས་མའི་ལྟོར་དབང་པོ་གསུམ་པོ་འདི་ལྟ་སྟེ། ལུས་ཀྱི་དབང་པོ་དང ། སྲོག་གི་དབང་པོ་དང ། ཡིད་ཀྱི་དབང་པོ་ཐོབ་པར་གྱུར་པ་ལའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་ནས་སོ། །རང་གི་ལག་དར་ནས་ཞེས་བྱ་བ་ནི་བདག་ཉིད་ཀྱི་ལག་གིས་སོ། །སྲོག་བཅད་དམ་ཞེས་བྱ་བ་ནི་སྲོག་བཅད་པར་གྱུར་ནའོ། །དེ་ལ་མཚོན་བྱིན་ནམ་ཞེས་བྱ་བ་ནི་རལ་གྲི་འམ། སྤུ་གྲི་འམ། ་ཆུ་གྲིའོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི་སྐྱེས་པ་འམ། བུད་མེད་དམ། མ་ནིང་ངོ ། །དེ་འཆིར་བཅུག་གམ་ཞེས་བྱ་བ་ནི་འཆིར་གཞུག་པའི་གང་ཟག་ནི་རྣམ་པ་གསུམ་སྟེ། ནད་པ་དང ། ཚུལ་ཁྲིམས་འཆལ་བ་དང ། ཚུལ་ཁྲིམས་དང་ལྡན་པའོ། །ནད་པ་ལ་ཇི་ལྟར་ཞེ་ན། འདི་ལྟར་དགེ་སློང་མ་དེ་དགེ་སློང་ངམ། དགེ་སློང་མ་ནད་པ་ལ་ཆོས་གོས་སམ། དྲ་བ་འམ། ་ཕོར་བུ་འམ། སྐ་རགས་སམ། དགེ་སློང་གི་འཚོ་བའི་ཡོ་བྱད་གང་ཡང་རུང་བ་འགའ་ཞིག་འདོད་པའི་ཕྱིར་དེ་འདི་སྙམ་དུ་སེམས་ཏེ། འདི་ཇི་སྲིད་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས་བདག་དེའི་དྲུང་དུ་སོང་ལ་འཆིར
9.52b
གཞུག་གོ་སྙམ་ནས། དེ་དེའི་དྲུང་དུ་སོང་སྟེ་འདི་སྐད་ཅེས་ཚེ་དང་ལྡན་པ་ནི་ན་བ། སྡུག་བསྔལ་བ། ན་ཚབས་ཆེ་བ་ཡིན་པས། ཚེ་དང་ལྡན་པ་ཇི་སྲིད་ཡུན་རིང་དུ་འཚོ་བ་དེ་སྲིད་དུ་སྡུག་བསྔལ་བ། མི་བཟད་པ། རྩུབ་པ། ཚ་བ། ཡིད་དུ་མི་འོང་བ་དག་ཉམས་སུ་མྱོང་བར་འགྱུར་རོ་ཞེས་སྨྲས་པ་ན། དེས་དེ་ལ་འདི་སྐད་ཅེས་འོ་ན་ཁོ་བོས་ཇི་ལྟར་བྱ་ཞེས་ཟེར་བ་དེའི་ཚེ་ཚུར་ཤོག་།ཁྱོད་ཀྱིས་བདག་ཉིད་ཐོང་ཤིག་།བདག་ཉིད་སོད་ཅིག་།བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་སྨྲས་ལ། གལ་ཏེ་ནད་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཇུག་ན་ཕས་ཕམ་པར་འགྱུར་རོ། །གལ་ཏེ་ནད་པ་དེ་འདི་སྙམ་དུ་དེ་དེ་སྐད་ཅེས་ཟེར་མོད་ཀྱི། འོན་ཀྱང་འཚོ་བ་ནི་རྙེད་པར་དཀའོ། །བདག་ཉིད་གསོད་པ་ནི་ནུས་པར་དཀའ་བས་བདག་གིས་བདག་ཉིད་མི་གཏང་ངོ ། །བདག་གིས་བདག་ཉིད་མི་གསད་དོ། །བདག་གིས་བདག་ཉིད་སྲོག་དང་བྲལ་བར་བྱེད་དུ་མི་གཞུག་གོ་སྙམ་བསམས་ནས། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ན། འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དེ་སྐད་སྨྲས་པས་བདག་ནི་འདི་ལྟ་སྟེ། བྱིས་པ། བླུན་པ། མི་གསལ་བ། མི་མཁས་པ་ཡིན་པས་བདག་གིས་གྱ་ཚོམ་དང ། བྱུང་རྒྱལ་དུ་སོ་སོར་མ་བརྟགས་པའི་ཚིག་སྨྲས་སོ་སྙམ་དུ་འགྱོད་པར་གྱུར་ནས་དེ་དེའི་གན་དུ་སོང་སྟེ་འདི་སྐད་ཅེས་བདག་གིས་ཁྱོད་ལ་བདག་ཉིད་སྲོག་དང་བྲལ་བར་གྱིས་ཤིག་ཅེས་སྨྲས་མོད་ཀྱི། འོན་ཀྱང་ཁྱོད་བདག་ཉིད་སྲོག་གཏོང་བར་མ་བྱེད་ཅིག་།དེ་ཅིའི་ཕྱིར་ཞེ་ན། གལ་ཏེ་ཁྱོད་ཀྱིས་རྗེས་སུ་འཐུན་པའི་སྨན་སོ་སོར་བསྟེན་པ་དང ། ཁ་ཟས་འཕྲོད་པ་དག་དང ། ནད་གཡོག་ཚུལ་བཞིན་དུ་བྱེད་པ་དག་གིས་བསྙེན་བཀུར་བྱས་པར་གྱུར་པ་དེ་ལྟར་ན་རིང་པོ་མི་ཐོགས་པར་བདེ་བ་དང ། ནད་མེད་པ་དང ། སྟོབས་དང་ལྡན་པར་གྱུར་ནས་གང་དུ་དགའ་བར་འགྲོ་བར་འགྱུར་བའི་གནས་སྐབས་དེ་ལྟ་བུ་ཡོད་དོ་ཞེས་སྨྲས་ལ། གལ་ཏེ་དེ་དེ་ལྟ་བུར
9.53a
བཟློག་པས་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ཀྱང་འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ནད་པ་དེ་འདི་སྙམ་དུ་དེ་སྐད་ཅེས་ཟེར་མོད་ཀྱི། འོན་ཀྱང་ཚོར་བ་རྣམ་པ་འདི་ལྟ་བུ་ཚོར་བ། སྡུག་བསྔལ་བ། མི་བཟད་པ། རྩུབ་པ། ཚ་བ། ཡིད་དུ་མི་འོང་བ་ཉམས་སུ་མྱོང་བ་སུས་བཟོད་ཀྱིས་བདག་ཉིད་ཀྱིས་བདག་ཉིད་སྲོག་དང་བྲལ་བར་བྱའོ་སྙམ་དུ་བསམས་ནས། གལ་ཏེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཇུག་ན། འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ནད་པ་ལ་ནི་དེ་ལྟ་བུར་རོ། །ཚུལ་ཁྲིམས་འཆལ་བ་ལ་ཇི་ལྟ་བུར་ཞེ་ན། འདི་ལྟར་དགེ་སློང་མ་དེ་དགེ་སློང་ངམ། དགེ་སློང་ཚུལ་ཁྲིམས་འཆལ་བའི་དགེ་སྦྱོང་གི་འཚོ་བའི་ཡོ་བྱད་འགའ་ཞིག་འདོད་པའི་ཕྱིར་དེ་འདི་སྙམ་དུ་སེམས་ཏེ། འདི་ཇི་སྲིད་གསོན་པ་དེ་སྲིད་ཀྱི་བར་དུ་བདག་གིས་ཐོབ་པར་མི་འགྱུར་བས་བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་ཞེས་བྱ་བའི་བར་དུ་སྔ་མ་བཞིན་ནོ། །དེ་དེའི་དྲུང་དུ་སོང་སྟེ་འདི་སྐད་ཅེས་ཁྱོད་ནི་ཚུལ་ཁྲིམས་འཆལ་བ་སྡིག་པའི་ཆོས་ཅན། ལུས་ཀྱི་ཉེས་པར་སྤྱད་པ་དང་ལྡན་པ། ་ངག་དང་ཡིད་ཀྱིས་ཉེས་པར་སྤྱོད་པ་དང་ལྡན་པ་དང ། ཁོང་རུལ་པ་ནས་འཛག་པ། རྩཝ་ལྟར་གསོག་ཏུ་གྱུར་པ། ལུང་བོང་ལྟར་ཀུན་ཏུ་སྤྱོད་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ། ཁྱོད་ཇི་སྲིད་དུ་ཡུན་རིང་དུ་གསོན་པ་དེ་སྲིད་ཀྱི་བར་དུ་བསོད་ནམས་མ་ཡིན་པ་མང་དུ་འཕེལ་བར་འགྱུར་ལ། དེའི་འོག་ཏུ་སེམས་ཅན་དམྱལ་བ་རྣམས་སུ་ཚོར་བ་ཤིན་དུ་སྡུག་བསྔལ་བ། ཤིན་དུ་མི་བཟད་པ། ཤིན་དུ་རྩུབ་པ། ལྷག་པར་ཚ་བ། ལྷག་པར་ཡིད་དུ་མི་འོང་བ་ཉམས་སུ་མྱོང་བར་འགྱུར་རོ་ཞེས་སྨྲས་པ་ན་དེས་དེ་ལ་འདི་སྐད་ཅེས་འོ་ན་ཁོ་བོས་ཇི་ལྟར་བྱ་ཞེས་ཟེར་བ་དེའི་ཚེ་དེས་དེ་ལ་ཚུར་ཤོག་།ཁྱོད་ཀྱིས་བདག་ཉིད་ཐོང་ཤིག་།བདག་ཉིད་སོད་ཅིག་།བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་།
9.53b
ཁྱོད་ཤི་དང་བསོད་ནམས་མ་ཡིན་པའི་རྣམ་པ་མང་པོ་འདི་ལྟ་བུ་འདི་འཕེལ་བར་མི་འགྱུར་ལ། ཚོར་བ་སྡུག་བསྔལ་བའི་རྣམ་པ་མི་བཟད་པ། རྩུབ་པ། ཚ་བ་ཡིད་དུ་མི་འོང་བ་དེ་ལྟ་བུ་ཉམས་སུ་མྱོང་བར་མི་འགྱུར་རོ་ཞེས་སྨྲས་ལ། དེས་དེ་སྐད་ཅེས་སྨྲས་པས་དེ་བདག་ཉིད་གཏོང་ངམ། བདག་ཉིད་གསོད་དམ། བདག་ཉིད་སྲོག་དང་བྲལ་བར་བྱེད་དུ་འཇུག་ན་འཆིར་བཅུག་པ་དེ་ཉིད་ཀྱིས་ཕམ་པར་འགྱུར་རོ། །གལ་ཏེ་དེ་འདི་སྙམ་དུ་འདི་ལྟར་དེ་འདི་སྐད་ཅེས་ཟེར་མོད་ཀྱི། འོན་ཀྱང་འཚོ་བ་ནི་རྙེད་པར་དཀའ་བའོ། །བདག་ཉིད་གསོད་པ་ནི་ནུས་པར་དཀའ་བ་ཡིན་པས་བདག་གིས་བདག་ཉིད་མི་གཏང་ངོ ། །བདག་གིས་བདག་ཉིད་མི་གསད་དོ། །བདག་གིས་བདག་ཉིད་སྲོག་དང་བྲལ་བར་བྱེད་དུ་མི་གཞུག་གོ་སྙམ་དུ་བསམས་ནས། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ན་ཡང་འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དེ་དེ་སྐད་སྨྲས་པས་བདག་ནི་འདི་ལྟར་བྱིས་པ་བླུན་པ། མི་གསལ་བ། མི་མཁས་པ་ཡིན་པས་བདག་གིས་གྱ་ཚོམ་དང་བྱུང་རྒྱལ་དུ་སྨྲས། བདག་གིས་མ་བརྟགས་པའི་ཚིག་སྨྲས་སོ་སྙམ་དུ་འགྱོད་པར་གྱུར་ནས། དེ་དེའི་གན་དུ་སོང་ནས་འདི་སྐད་ཅེས་བདག་གིས་ཁྱོད་ལ་བདག་ཉིད་སྲོག་དང་བྲལ་བར་གྱིས་ཤིག་ཅེས་སྨྲས་མོད་ཀྱི། འོན་ཀྱང་ཁྱོད་བདག་ཉིད་སྲོག་དང་བྲལ་བར་མ་བྱེད་ཅིག་།དེ་ཅིའི་ཕྱིར་ཞེ་ན། གལ་ཏེ་ཁྱོད་ཀྱིས་དགེ་བའི་བཤེས་གཉེན་འགའ་ཞིག་མགུ་བར་བྱས་ན་ཁྱོད་ཀྱི་ལུས་ཀྱི་ལས་ཀྱི་ཀུན་དུ་སྤྱོད་པ་ཡོངས་སུ་མ་དག་པ་གང་ཡིན་པ་ལས་བསླང་སྟེ་དགེ་བའི་ལས་ལ་འཇོག་པར་འགྱུར་རོ། །ངག་དང་ཡིད་ཀྱི་ལས་མི་དགེ་བ་ལས་བསླང་སྟེ་ངག་དང་ཡིད་ཀྱི་ལས་དགེ་བ་ལ་རབ་ཏུ་འཇོག་པར་འགྱུར་རོ། །དེ་ལྟར་ཁྱོད་ཀྱི་ལུས་དང ། ངག་དང ། ཡིད་ཀྱི་ལེགས་པར་སྤྱོད་པ་དང་ལྡན་ན་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་བ་དེ་ལྟ་བུའི་གནས་སྐབས་ཡོད་པར་འགྱུར་རོ་ཞེས་སྨྲས་ལ། གལ་ཏེ་དེ་སྐད་ཅེས་སྨྲས་པས་དེ་བདག་ཉིད་གཏོང་བར་མི་བྱེད།
9.54a
བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ཀྱང་འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དེ་འདི་སྙམ་དུ་འདི་ལྟར་དེ་ཡང་འདི་སྐད་ཅེས་ཟེར་ལ་བདག་ཇི་སྲིད་དུ་གསོན་པར་གྱུར་པ་དེ་སྲིད་ཀྱི་བར་དུ་བདག་ལས་བསོད་ནམས་མ་ཡིན་པ་མང་དུ་སྐྱེ་བར་འགྱུར་ལ། ཇི་སྲིད་དུ་བདག་ལས་བསོད་ནམས་མ་ཡིན་པ་མང་དུ་སྐྱེས་པ་དེ་སྲིད་དུ་སེམས་ཅན་དམྱལ་བ་རྣམས་སུ་སྡུག་བསྔལ་ལྷག་པར་རྒྱ་ཆེ་བ་དང ། ལྷག་པར་ཡུན་རིང་བ་མྱོང་བར་འགྱུར་བས་གདོན་མི་ཟ་བར་བདག་ཉིད་སྲོག་དང་བྲལ་བར་བྱའོ། །འདི་ལྟར་བདག་ཉིད་གཏང་བར་བྱའོ། །བདག་ཉིད་གསད་པར་བྱའོ། །བདག་ཉིད་སྲོག་དང་བྲལ་བར་བྱའོ་སྙམ་དུ་བསམས་ནས། གལ་ཏེ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་ན། འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ཚུལ་ཁྲིམས་འཆལ་བ་ལ་ནི་དེ་ལྟ་བུར་རོ། །ཚུལ་ཁྲིམས་དང་ལྡན་པ་ལ་ཇི་ལྟ་བུར་ཞེ་ན། ་འདི་ལྟར་ཡང་དགེ་སློང་མ་དེ་དགེ་སློང་ངམ་དགེ་སློང་མ་ཡོན་ཏན་དང་ལྡན་པ་ལ་དགེ་སྦྱོང་གི་འཚོ་བའི་ཡོ་བྱད་འགའ་ཞིག་འདོད་པའི་ཕྱིར་ཞེས་བྱ་བ་སྔ་མ་བཞིན་ནོ། །དེ་དེའི་དྲུང་དུ་སོང་ནས་འདི་སྐད་ཅེས་ཁྱོད་ནི་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཡོན་ཏན་ཕུན་སུམ་ཚོགས་པ་དུ་མ་དང་ལྡན་པས་ཁྱོད་ཡུལ་གཞན་དུ་སོང་ན་ཡང་ལོ་ལེགས་པ་ཡིན། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་ཏེ་ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཁྱོད་མཐོ་རིས་སུ་སྐྱེས་ནས་ཀྱང་ལྷའི་གོས་དང ། དོ་ཤལ་དང ། སེ་མོ་དོས་ལུས་བརྒྱན་པར་འགྱུར། ལྷའི་བདུད་རྩིས་ལུས་ཚིམ་པར་འགྱུར། ལྷའི་བདེ་བ་ཉམས་སུ་མྱོང་བར་འགྱུར་རོ། །ཞེས་སྨྲས་ལ། གལ་ཏེ་དེས་དེ་ལ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དེས་དེ་ལ་ཚུར་ཤོག་བདག་ཉིད་ཐོང་ཤིག་།བདག་ཉིད་སོད་ཅིག་།བདག་ཉིད་སྲོག་དང་བྲལ་བར་གྱིས་ཤིག་ཅེས་སྨྲས་ལ། གལ་ཏེ་དེ་དེ་སྐད་སྨྲས་པས་ཇི་སྟེ་བདག་ཉིད་སྲོག་དང་བྲལ་བར་བྱེད་ན་འཆིར་བཅུག་པའི་ཕྱིར་ཕས་ཕམ་པར་འགྱུར་རོ། །
9.54b
གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་འདི་ལྟར་དེ་ཡང་དེ་སྐད་ཅེས་ཟེར་མོད་ཀྱི་འོན་ཀྱང་གསོན་པ་ནི་རྙེད་པར་དཀའོ། །བདག་ཉིད་གསོད་ན་ནུས་པར་དཀའ་བས་བདག་གིས་བདག་ཉིད་མི་གཏོང་ངོ ། །བདག་གིས་བདག་ཉིད་མི་གསད་དོ། །བདག་གིས་བདག་ཉིད་སྲོག་དང་བྲལ་བར་མི་བྱའོ་སྙམ་དུ་བསམས་ནས། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བ་མི་བྱེད་ན་ཡང་འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དེ་དེ་སྐད་ཅེས་སྨྲས་པས་འགྱོད་པར་གྱུར་ནས། དེའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཤེས་པར་གྱིས་ཤིག་།འདི་ལྟར་བྱིས་པ། བླུན་པ། མི་གསལ་བ། བདག་གིས་གྱ་ཚོམ་དང་བྱུང་རྒྱལ་དུ་བདག་གིས་མ་ལེགས་པ་ཞིག་སྨྲས་ཀྱིས། ཁྱོད་བདག་ཉིད་མ་གཏོང་ཤིག་།བདག་ཉིད་མ་གསོད་ཅིག་།བདག་ཉིད་སྲོག་དང་བྲལ་བར་མ་བྱེད་ཅིག་།དེ་ཅིའི་ཕྱིར་ཞེ་ན། ཚེ་དང་ལྡན་པ་ནི་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཡོན་ཏན་དུ་མ་དང་ལྡན་པ། ཁྱོད་ཡུན་རིང་དུ་གསོན་དང ། ཁྱོད་ཡུན་རིང་དུ་གསོན་པས་བསོད་ནམས་མང་པོ་སྐྱེ་བར་འགྱུར་རོ། །འདི་ལྟར་ཁྱོད་ཀྱིས་དེ་ལྟར་བྱས་ན་ཡུན་རིང་དུ་ལྷ་རྣམས་ཀྱི་ནང་དུ་བདེ་བ་རྒྱ་ཆེ་བ་མྱོང་བར་འགྱུར་རོ་ཞེས་སྨྲས་ལ། གལ་ཏེ་དེས་དེ་ལྟར་བཟློག་པ་ན་ཇི་ལྟར་བདག་ཉིད་སྲོག་དང་བྲལ་བར་མི་བྱེད་ན། འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དེ་འདི་སྙམ་དུ་འདི་ལྟར་དེ་ཡང་དེ་སྐད་ཅེས་ཟེར་མོད་ཀྱི། འོན་ཀྱང་བདག་ནི་ཚུལ་ཁྲིམས་དང་ལྡན་པ་མང་དུ་ཐོས་པ། དགེ་བའི་ཆོས་ཅན། ཡོན་ཏན་དུ་མ་དང་ལྡན་པས་བདག་ཡུལ་གཞན་དུ་སོང་ན་ལོ་ལེགས་པ་ཡིན། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་སྙམ་དུ་བསམས་ནས། དེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བ་བྱེད་ན་འཆིར་བཅུག་པའི་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཚུལ་ཁྲིམས་དང་ལྡན་པ་ལ་ནི་དེ་ལྟར་རོ། །དེས་ན་འཆིར་བཅུག་གམ་ཞེས་གསུངས་སོ། །དེ་ལ་འཆི་བའི་བསྔགས་པ
9.55a
བརྗོད་ཀྱང་རུང་སྟེ་ཞེས་བྱ་བ་ནི་འཆི་བར་མངོན་པར་དགའ་བའི་མདུན་དུ་འཆི་བའི་བསྔགས་པ་བརྗོད་པའོ། །དེ་ལ་འདི་སྐད་ཅེས། ཀྱེ་མི་ཁྱོད་ཅེས་བྱ་བ་ནི་བོད་པའི་ཚིག་དག་ཡིན་ནོ། །འཚོ་བ་སྡིག་པ་མི་གཙང་བ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་བྱ་བ་དེ་དག་ནི་སྨད་པའི་ཚིག་ཡིན་ནོ། །ཟེར་ཞིང་ཞེས་བྱ་བ་ནི་རྗོད་ཅིང་ངོ ། །གཞན་ཡང་རྒྱས་པར་ཕས་ཕམ་པར་གྱུར་པ་དང་པོ་ཇི་ལྟ་བ་བཞིན་དུ་བརྗོད་པར་བྱའོ། །གནས་པར་མི་བྱའོ་ཞེས་བྱ་བ་ནི་དགེ་སློང་མ་རྣམས་ཀྱིས་དེ་དང་ལྷན་ཅིག་ཏུ་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་མི་བྱ། དགེ་སློང་མའི་ལས་བཅུ་གཉིས་དག་ཏུ་བསྐོ་བར་མི་བྱ་བ་སྟེ། དེས་ན་གནས་པར་མི་བྱའོ་ཞེས་གསུངས་སོ། །དེ་ལྟར་ན་འདི་ནི་ཕས་ཕམ་པར་གྱུར་པ་གསུམ་པ་ཡིན་པས་དགེ་སློང་མའི་འདུལ་བ་ལ་བརྗོད་པར་བྱའོ། །གཞན་ནི་དགེ་སློང་གི་འདུལ་བ་ཇི་ལྟ་བ་དེ་བཞིན་དུ་བརྗོད་དོ། །ཕས་ཕམ་པར་གྱུར་པ་གསུམ་པ་རྫོགས་སྷོ།། ་་་་་་་་་་།། སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ཉ་པ་ལྔ་བརྒྱ་འཚོ་བའི་དོན་ལ་ཆུ་ཀླུང་ཡིད་འོང་ལྡན་ལ་རྟེན་ཅིང་འཁོད་དོ། །དེ་དག་ལ་རྒྱ་མོ་སྤྱོད་པ་དང ། སྤྱོད་པ་ཆེན་པོ་ཞེས་བྱ་བ་གཉིས་ཤིག་ཡོད་པ་ལས་དེ་དག་ལན་འགའ་ནི་རྒྱ་མོ་སྤྱོད་པ་འཇུད་པར་བྱེད། ལན་འགའ་ནི་སྤྱོད་པ་ཆེན་པོ་འཇུད་པར་བྱེད་དོ། །གང་གི་ཚེ་ཉ་དག་ཉོ་བ་མེད་པ་དེའི་ཚེ་ནི་རྒྱ་མོ་སྤྱོད་པ་འཇུད་པར་བྱེད་ལ། གང་གི་ཚེ་ནི་ཉ་དག་ཉོ་བ་ཡོད་པ་དེའི་ཚེ་སྤྱོད་པ་ཆེན་པོ་འཇུད་པར་བྱེད་དོ། །ཇི་ཙམ་དུས་གཞན་ཞིག་ན་ཡངས་པ་ཅན་དུ་དུས་སྟོན་བྱུང་ནས་དེ་དག་གིས་རྒྱ་མོ་གཉིས་ཀ་བཅུག་སྟེ། ་ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་བཅུག་།ཉིས་བརྒྱ་ལྔ་བཅུས་ནི་སྤྱོད་པ་ཆེན་པོ་བཅུག་གོ། །གང་དག་གིས་རྒྱ་མོ་སྤྱོད་པ་བཅུག་པ་དེ་དག་གིས་ནི་ཉ་དང ། རུལ་སྦལ་དང ། སྦལ་པ་དང ། ཆུ་སྲིན་བྱིས་པ་གསོད་པ་དང ། ཉ་ཀྱི་བ་ལ་སོགས་པ་མང་པོ་དག་འདི་ལྟ་སྟེ། དཔེར་ན་ཏིལ་དང ། འབྲས
9.55b
དང ། འབྲས་བུ་ཐུག་པོ་ཆེ་དང ། རྒྱ་ཤུག་དང ། རྒྱ་སྲན་ལ་སོགས་པ་བཞིན་དུ་ཕུང་པོ་ཆེན་པོར་སྤུངས་སོ། །གང་དག་གིས་རྒྱ་མོ་སྤྱོད་པ་ཆེན་པོ་བཅུག་པ་དེ་དག་གིས་ནི་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པ་ཆུ་སྲིན་ཆེན་པོ་ཉའི་རིགས་བོང་ཚོད་ཆེན་པོ་ཉལ་བ་ཟིན་ནས་དེ་དག་གིས་དེ་དྲང་བར་བརྩམས་སོ། །དེ་དག་གིས་དྲངས་པ་ནས་དེ་སད་ནས་ཉ་པ་ཉིས་བརྒྱ་ལྔ་བཅུ་པོ་དེ་དག་དང་རྒྱ་མོ་སྤྱོད་པ་ཆེན་པོ་ཁྱེར་ཏེ་རྒྱུན་ཕྱོགས་སུ་ཞུགས་སོ། །ཉ་པ་དེ་དག་གིས་ཉ་པ་ཉིས་བརྒྱ་ལྔ་བཅུ་པོ་གཞན་དག་ལ། གྲོགས་པོ་དག་རྒྱ་མོ་སྤྱོད་པ་ཆེན་པོ་དང་བདག་ཅག་ཁྱེར་གྱི་ར་མདའ་ཟློག་ཅེས་བྱས་སོ། །དེ་དག་གིས་ཐོས་ནས་ཉ་པ་ཉིས་བརྒྱ་ལྔ་བཅུ་པོ་གཞན་དེ་དག་ཀྱང་ལྷགས་ཏེ་དེ་ཉིད་ལ་རུབ་པ་དང་དེ་དག་ཀྱང་ཁྱེར་རོ། །དེ་ནས་དེའི་འོག་ཏུ་ས་ཕྱོགས་མཐོན་པོར་འདུག་སྟེ་བོས་པ་དང ། དེ་ནས་ཕྱུགས་རྫི་དང ། བ་ལང་རྫི་ལ་སོགས་པ་འོངས་ནས་འབད་པ་ཆེན་པོས་ཕྱུང་བ་དང ། ཆུ་སྲིན་ཉའི་རིགས་རི་བོ་བརྩེགས་པ་འདྲ་བ། མགོ་བོ་བཅཝ་བརྒྱད་དང ། མིག་སུམ་བཅུ་རྩ་དྲུག་ཡོད་པ་ཕྱུང་ངོ ། །ཇི་ཙམ་ན་སྐྱེ་བོའི་ཚོགས་ཆེན་པོ་འོངས་ཏེ་ལྷགས་པ་དང ། ་སྟོན་པ་དྲུག་པོ་སྟོན་པ་མ་ཡིན་པར་སྟོན་པར་ཁས་འཆེ་བ། ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་ཁས་འཆེ་བ། དྲུག་པོ་གང་དག་ཡིན་ཞེ་ན། འདི་ལྟ་སྟེ། འོད་སྲུང་རྫོགས་བྱེད་དང ། ་ཀུན་དུ་རྒྱུ་གནག་ལྷས་ཀྱི་བུ་དང ། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང ། མི་ཕམ་སྐྲའི་ལ་བ་ཅན་དང ། ཀ་ཏྱའི་བུ་ནོག་ཅན་དང ། གཅེར་བུ་པ་གཉེན་གྱི་བུ་དག་སྟེ། སྟོན་པ་མ་ཡིན་པར་སྟོན་པར་ཁས་འཆེ་བ་དྲུག་པོ་འདི་དག་ཀྱང་དེའི་ཚེ་ལྟད་མོ་ལ་ལྷགས་སོ། །དེའི་བར་དུ་ཡང་སངས་རྒྱས་བཅོམ་ལྡན་འདས་ལ་ནི་མི་མཁྱེན་པ་དང ། མ་གཟིགས་པ་དང ། མ་རིག་པ་དང ། ་རྣམ་པར་མི་མཁྱེན་པ་ཅི་ཡང་མི་མངའ་བའི་སངས་རྒྱས་བཅོམ་ལྡན་འདས་ཆོས་ཉིད་ཀྱིས་འཚོ་ཞིང་གཞེས་ལ་བཞུགས་པ། ཐུགས་རྗེ་ཆེན་པོ་དང་ལྡན་པ། གཞན་ལ་ཕན་པར་བཞུགས་པ། ་དགེ་བའི་སྤྱོད་པ་ལ་མི་གཡོ་བ། ཕ་རོལ་གནོན་པའི
9.56a
བརྩོན་འགྲུས་བརྟན་པ། ཉག་ཅིག་དཔའ་བ། བསྲུང་བ་གཅིག་པུ་པ་གཉིས་སུ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་ལ་གནས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གཞི་གསུམ་ལ་མཁས་པ། ལམ་གསུམ་སྤངས་པ། ཁམས་གསུམ་གྱི་འདོད་ཆགས་དང་བྲལ་བ། མི་འཇིགས་པ་བཞིས་བསྙེངས་པ་མེད་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། ་བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། ཡན་ལག་དྲུག་དང་ལྡན་པ། རྟག་ཏུ་གནས་པར་བྱ་བ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། འཕགས་པའི་ལམ་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ཀྱིས་ཆོས་ཉིད་ནི་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་སུ་ནི་ཉམས་པར་གྱུར། སུ་ནི་འཕེལ་བར་གྱུར། སུ་ནི་གནོད་པར་གྱུར། སུ་ནི་ཉམ་ང་བར་གྱུར། སུ་ནི་གནོད་པ་དང ། ཉམ་ང་བ་དང་མི་བདེ་བར་གྱུར། གང་གིས་དགེ་བའི་རྩ་བ་མ་བསྐྱེད་པ་ནི་བསྐྱེད་པར་བྱ། གང་གིས་དགེ་བའི་རྩ་བ་བསྐྱེད་པ་རྣམས་ནི་ཡོངས་སུ་སྨིན་པར་བྱ། གང་གིས་དགེ་བའི་རྩ་བ་ཡོངས་སུ་སྨིན་པ་རྣམས་ནི་ཐར་བར་བྱ། གང་ཞིག་འཕགས་པ་རྣམས་ཀྱི་ནོར་གྱི་དབྱིག་དང་བྲལ་བ་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་ནི་མིའི་འབྲས་བུ་ལ་གནས། གང་ནི་སངས་རྒྱས་ཀྱིས་འདུལ། གང་ནི་ཉན་ཐོས་ཀྱིས་འདུལ། གང་ནི་སངས་རྒྱས་དང་ཉན་ཐོས་ཀྱིས་འདུལ། གང་ནི་འདོད་ཆགས་ལ་སྤྱོད། ་གང་ནི་ཞེ་སྡང་ལ་སྤྱོད། གང་ནི་གཏི་མུག་ལ་སྤྱོད། གང་ནི་འདོད་ཆགས་དང ། ཞེ་སྡང་དང ། གཏི་མུག་ལ་སྤྱོད། གང་ནི་ཉེས་པ་རྣམས་ཀྱིས་གནོད་པར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ།
9.56b
གང་ནི་ངན་སོང་ལ་བབ། ངས་གང་ནི་ངན་སོང་ལས་བསླང་སྟེ་མཐོ་རིས་དང ། འབྲས་བུ་ལ་རབ་ཏུ་གཞག་པར་བྱ། ཉེས་པར་སྤྱོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། གང་གིས་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ་ཞེས་མཁྱེན་པ་དང་གཟིགས་པ་འཇུག་གོ། །ཡང་སྨྲས་པ། རྒྱ་མཚོ་ཆུ་སྲིན་རྣམས་ཀྱི་གནས། །དུས་ལས་འདའ་བར་འགྱུར་སྲིད་ཀྱི། །གདུལ་བྱ་ལ་བྱམས་སངས་རྒྱས་ནི། །དུས་ལས་འདའ་བར་མི་མཛད་དོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བ་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བ་བཞོན་གདུལ་བྱའི་བུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །བེའུ་སྡུག་སྟོར་ལ་བྱམས་པའི་བ་བཞོན་བཞིན། །དེ་ནས་བཅོམ་ལྡན་འདས་ཀྱི་ཡེ་ཤེས་གཟིགས་པ་སྒྲིབ་པ་མི་མངའ་བའི་སྤྱན། སངས་རྒྱས་ཀྱི་སྤྱན་གྱིས་གཟིགས། ཀུན་དུ་གཟིགས་ནས་དགོངས་པ། ཆུ་སྲིན་ཉའི་རིགས་ངན་སོང་ལ་གཞོལ་བ། ངན་སོང་ལ་འབབ་པ། ངན་སོང་ལ་བབ་པ་སྔོན་གྱི་སངས་རྒྱས་དག་ལ་བྱ་བ་ལྷག་པར་བྱས་པ་ཡིན་ཡང ། ད་ལྟར་སངས་རྒྱས་འབྱུང་བ་དང་བྲལ་བར་གྱུར་པ། ལོ་སྟོང་ཕྲག་མང་པོར་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་གྱུར་པ་ཡིན་གྱིས། ངས་ཆུ་སྲིན་ཉའི་རིགས་འདི་ལ་བརྟེན་ཏེ་གདུལ་བྱའི་ཚོགས་ཆེན་པོ་དྲང་བར་བྱས། སེམས་ཅན་རྣམས་ཀྱང་ལས་བདག་གིར་བྱ་བ་མངོན་སུམ་དུ་བྱས། དེའི་ཕྱིར་ཆུ་ཀླུང་ཡིད་འོང་ལྡན་གྱི་འགྲམ་དུ་གཤེགས་སོ་སྙམ་དུ་དགོངས་སོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་གདུལ་བའི་སྐྱེ་བོ་རྣམས་ལ་ཐུགས་བརྩེ་བ་ཡིན་པས་དུས་དུས་སུ་སེམས་ཅན་དམྱལ་བར་རྒྱུར་གཤེགས་པ་དང ། དུད་འགྲོའི་ནང་དུ་རྒྱུ་བ་དང ། ཡི་དགས་ཀྱི་ནང་དུ་རྒྱུ་བ་དང ། ལྷའི་ནང་དུ་རྒྱུ་བ་དང ། ལྗོངས་རྒྱུར་གཤེགས་སོ། །དུས་དུས་སུ་རི་དང ། དུར་ཁྲོད་དང ། ཆུ་ཀླུང་དང ། གཙུག་ལག་ཁང་དུ་རྒྱུར་གཤེགས་སོ། །དོན་འདིར་ནི་སངས་རྒྱས་བཅོམ་ལྡན་འདས་ཆུ་ཀླུང་དུ་རྒྱུར་གཤེགས
9.57a
པར་བཞེད་དེ། འཛུམ་པ་མཛད་ནས་ཞེས་བྱ་བའི་བར་ནས། ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ཆུ་ཀླུང་དུ་རྒྱུར་གཤེགས་པར་བཞེད་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་གཅིག་ཏུ་ཆུ་ཀླུང་དུ་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག་ཅེས་བྱ་བ་ནས་སེར་སྐྱའི་གླེང་གཞི་འདིར་རྒྱས་པར་བརྗོད་པར་བྱའོ། །ཉ་པ་ལྔ་བརྒྱ་ཞེས་བྱ་བ་ནས་འཕགས་པ་ཤཱ་རིའི་བུས་ཚིགས་སུ་བཅད་པ་སྨྲས་པ། དེ་བཞིན་གཤེགས་རྣམས་རིགས་དང་ནི། །རུས་དང་ཁྱིམ་ལའང་རྟོག་མི་མཛད། །ཡུན་རིང་བྱས་པར་གྱུར་པ་ཡི། །ལས་རྣམས་ལ་ནི་ཡོངས་རྟོག་མཛད་ཅེས་བྱ་བའི་བར་དང ། བཅོམ་ལྡན་འདས་ལ་ཕུལ་བ་དང ། བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་བའི་བར་དང ། ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར་ཞེས་བྱ་བའི་བར་དུའོ།། ་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཞི་པ། སངས་རྒྱས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ཏུ་ཡངས་པ་ཅན་ན་འོད་མ་ཅན་གྱི་གྲོང་ཁྱེར་ན་བཞུགས་སོ། །དེའི་ཚེ་མུ་གེ་ཉམ་ང་བ། དགོན་པ། སློངས་མོ་བ་རྣམས་ཀྱིས་ཟས་རྙེད་པར་དཀའ་བ་ཞེས་བྱ་བ་ནས་སློངས་མོ་བ་དག་ལ་ལྟ་སྨོས་ཀྱང་ཅི་དགོས། ཞེས་བྱ་བའི་བར་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟར་མུ་གེ་ཞེས་བྱ་བ་ནས་སློངས་མོ་པ་རྣམས་ཀྱིས་ཟས་རྙེད་པར་དཀའ་བ་ཞེས་བྱ་བའི་བར་དང ། དགེ་སློང་དག་ཁྱེད་ཅག་ཚུར་ཤེག་།སྨོས་འདྲིན་ཇི་ལྟ་བ་དང ། ཕེབས་པར་སྨྲ་བ་ཇི་ལྟ་བ་དང ། འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་འདི་ཉིད་དུ་དབྱར་གནས་པར་ཁས་ལོང་ཤིག་།ང་ཡང་འོད་མ་ཅན་གྱི་ཉེན་ཀོར་དྲུང་འདི་ཉིད་དུ་ཞམ་འབྲིང་བ་དགེ་སློང་ཀུན་དགའ་བོ་དང་དབྱར་གནས་ཀྱིས་ཐམས་ཅད་དུ་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ་ཞེས
9.57b
བྱ་བ་ནས། དགེ་སློང་དག་ཆུ་ཀླུང་ཡིད་འོང་ལྡན་གྱི་འགྲམ་ན་ཉེ་དུ་ཡོད་པའི་གན་དུ་སོང་སྟེ། ཆུ་ཀླུང་ཡིད་འོང་ལྡན་གྱི་འགྲམ་དུ་བརྟེན་ནས་དབྱར་གནས་པར་ཁས་བླངས་སོ་ཞེས་བྱ་བ་ནས། ཉེ་དུ་རྣམས་ཀྱི་མདུན་དུ་ཡོན་ཏན་བསྒྲག་པར་བྱའོ་ཞེས་བྱ་བའི་བར་དུའོ། །འདུས་པ་དང ། འདུས་པ་ཆེན་པོ་གཉིས་ཏེ། གཅིག་ནི་དབྱར་ཟླ་འབྲིང་པོའི་ཉ་ལ་དབྱར་ཉེ་བར་བསྒྲུབ་པའི་ཚེའོ་ཞེས་བྱ་བའི་བར་དུའོ། །ཡངས་པ་ཅན་གྱི་གྲོང་ཁྱེར་གྱི་ཉེན་ཀོར་དང ། སྤོང་བྱེད་ཀྱི་གྲོང་ཁྱེར་དུ་དབྱར་གནས་པར་ཁས་བླངས་པའི་དགེ་སློང་རྣམས་དབྱར་འདས་ཏེ་འོངས་པ་དང་ཞེས་བྱ་བའི་བར་དང ། ཚེ་དང་ལྡན་པ་ཀུན་དགའ་བོས་ཚིག་གིས་བསུ་སྟེ་ཞེས་བྱ་བའི་བར་དུའོ། །ཆུ་ཀླུང་ཡིད་འོང་ལྡན་གྱི་འགྲམ་ནས་འོངས་པ་རྣམས་ལ་ཚིག་གིས་བསུ་སྟེ་ཞེས་བྱ་བ་ནས། ཚོ་བ་དང ། ལྤགས་པ་དང ། ཤ་དང ། ཁྲག་གིས་རྒྱས་པ་ཞེས་བྱ་བའི་བར་དང ། ཚེ་དང་ལྡན་པ་ཀུན་དགའ་བོས་དྲིས་པ་ཞེས་བྱ་བ་ནས། ཡང་དག་པ་མ་ཡིན་པས་སོ་ཞེས་བྱ་བའི་བར་དུའོ། །དེས་དགེ་སློང་རྣམས་ལ་སྨྲས་སོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་ནས། དགེ་སློང་དག་གསུམ་པོ་འདི་དག་ནི་འཇིག་རྟེན་ན་ཡོད་པའི་རྐུན་པོ་ཡིན། རྐུན་པོ་ཆེན་པོ་ཡིན་ཏེ། གསུམ་གང་ཞེ་ན། དགེ་སློང་དག་འདི་ན་རྐུན་པོ་འཁོར་བརྒྱ་དང་ལྡན་པ། འཁོར་སྟོང་དང་ལྡན་པ། འཁོར་བརྒྱ་འམ། སྟོང་གི་སྣང་ལ་སོང་སྟེ། ཁྱིམ་འབིགས་པར་བྱེད། མདུད་པ་འགྲོལ་བར་བྱེད། རིལ་གྱིས་འཕྲོག་པར་བྱེད། ལམ་སྒུགས་ཤིང་འདུག་པར་བྱེད། མི་གཏོང་བར་བྱེད། ལམ་འཇོམས་པར་བྱེད། རྒྱལ་པོའི་མཛོད་རྐུ་བར་བྱེད། གྲོང་འཇོམས་པར་བྱེད། གྲོང་ཁྱེར་འཇོམས་པར་བྱེད། ཡུལ་འཇོམས་པར་བྱེད་པ་འདི་ནི་དགེ་སློང་དག་འཇིག་རྟེན་ན་ཡོད་པའི་རྐུན་པོ་རྐུན་པོ་ཆེན་པོ་དང་པོ་ཡིན་ནོ། །གཞན་ཡང་རྐུན་པོ་རྐུན་པོ་ཆེན་པོ་འཁོར་བརྒྱ་དང་ལྡན་པ་ཡང་མ་ཡིན། འཁོར་སྟོང་དང་ལྡན་པ་ཡང་མ་ཡིན། འཁོར་བརྒྱ་འམ། སྟོང་གི་སྣ་ལ་སོང་སྟེ། ཁྱིམ་འབུགས་པ་མི་བྱེད། མདུད་པ་འགྲོལ་བར་མི་བྱེད་ཅེས་བྱ་བ་སྔ་མ་བཞིན་ནོ། །འོན་ཀྱང་དགེ་འདུན་གྱི་རྩཝ་འམ། ཤིང་ངམ། མེ་ཏོག་གམ། འབྲས་བུ་འམ། འོད་མ་འམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་བྱེད་པ་དང ། དེས་ཁྱིམ་མི་གསོ
9.58a
བར་བྱེད་པ་འཇིག་རྟེན་ན་ཡོད་པའི་རྐུན་པོ་རྐུན་པོ་ཆེན་པོ་གཉིས་པ་ཡིན་ནོ། །གཞན་ཡང་རྐུན་པོ་རྐུན་པོ་ཆེན་པོ་འཁོར་ལྔ་བརྒྱ་དང་ལྡན་པ་ཡང་མ་ཡིན། འཁོར་སྟོང་དང་ལྡན་པ་ཡང་མ་ཡིན་ཏེ། འཁོར་བརྒྱ་སྟོང་གི་སྣ་ལ་སོང་ནས་ཞེས་བྱ་བ་སྔ་མ་བཞིན་ནོ། །དགེ་འདུན་གྱི་རྩཝ་འམ། ཤིང་ངམ། མེ་ཏོག་གམ། འབྲས་བུ་འམ། འོད་མ་འམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་ཡང་མི་བྱེད་ལ། དེས་ཁྱིམ་གྱི་མི་གསོ་བར་ཡང་མི་བྱེད་མོད་ཀྱི་འོན་ཀྱང་མིའི་ཆོས་བླ་མ་མེད་ལ་མེད་བཞིན་དུ་སྨྲ་བར་བྱེད་པ་འདི་ནི་འཇིག་རྟེན་ན་ཡོད་པའི་རྐུན་པོ་རྐུན་པོ་ཆེན་པོ་གསུམ་པ་ཡིན་ནོ། །དགེ་སློང་དག་རྐུན་པོ་གང་འཁོར་བརྒྱ་དང་ལྡན་པ་འམ། འཁོར་སྟོང་དང་ལྡན་པ་འམ། འཁོར་བརྒྱ་འམ། སྟོང་གི་སྣ་ལ་སོང་སྟེ། ཁྱིམ་འབུགས་པར་བྱེད་པ་སྔ་མ་ལྟ་བུ་ནི་ཆུང་ངུ་ཡིན་ནོ། །རྐུན་པོ་རྣམས་ཀྱི་ནང་ན་གང་དགེ་འདུན་གྱི་རྩཝ་འམ། ཤིང་ངམ་ཞེས་བྱ་བ་སྔ་མ་ལྟ་བུ་འདི་ཡང་ཆུང་བ་ཡིན་ནོ། །གང་མིའི་ཆོས་བླ་མ་མེད་ལ་མེད་བཞིན་དུ་སྨྲ་བ་དེ་ནི་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང ། ལྷ་དང ། མིར་བཅས་པའི་ནང་ན་རྐུན་པོ་རྐུན་པོ་ཆེན་པོ་ཡིན་ནོ། །འདི་ན་གང་ཞིག་དགྲ་བཅོམ་མ་གྱུར་པར། །བདག་ཉིད་དགྲ་བཅོམ་ཡིན་པར་ཁས་འཆེ་བ། །དེ་ནི་ལྷ་བཅས་འཇིག་རྟེན་རྐུན་པོ་སྟེ། །ཚུལ་ཁྲིམས་འཆལ་བ་ཡིན་པར་བརྗོད་པར་བྱ། །ཤེས་རབ་འཆལ་བ་ལུས་ནི་ཞིག་གྱུར་ནས། །སེམས་ཅན་དམྱལ་བ་དག་ཏུ་སྐྱེ་བར་འགྱུར། །དེ་ནས་བཅོམ་ལྡན་འདས་ཀྱིས་བྱུང་བ་འདི་ཉིད་དང ། གླེང་གཞི་འདི་ཉིད་དང ། དངོས་པོ་འདི་ཉིད་དང ། སྐབས་འདི་ཉིད་ལ་གཉི་གའི་དགེ་འདུན་བསྡུ་བར་མཛད་དེ་ཉན་ཐོས་མ་རྣམས་ཀྱིས་ཀུན་ཤེས་པ་དང་ངས་བསླབ་པ་ལེགས་པར་བཅས་པར་འགྱུར་རོ་ཞེས་བྱ་བ་ཕས་ཕམ་པར་གྱུར་པ་དང་པོ་ཇི་ལྟ་བ་དེ་བཞིན་དུ་བསླབ་པ་བཅས་པའི་བར་རྒྱ་ཆེར་བརྗོད་པར་བྱའོ། །ཡང་དགེ་སློང་མ་གང་ཞིག་མངོན་པར་མི་ཤེས་ཤིང ། ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང ། འཕགས་པ་དང ། ཁྱད་པར་ཐོབ་པ་དང ། ཤེས་པ་དང ། མཐོང་བ་དང ། རེག་པར་གནས་པ་མེད་ལ་མེད་བཞིན་དུ་འདི་ཤེས་སོ། །འདི
9.58b
མཐོང་ངོ་ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས། དུས་གཞན་ཞིག་ན་དྲིས་ཀྱང་རུང ། མ་དྲིས་ཀྱང་རུང ། འདི་སྐད་ཅེས་ཚེ་དང་ལྡན་པ་བདག་གིས་ནི་མི་ཤེས་པ་ལས་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ། གསོག་།བརྫུན་དུ་སྨྲས་སོ་ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ། དགེ་སློང་མ་དེ་ཡང་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི། དགེ་སློང་མ་བཞི་པོ་དག་ལས་ཤེས་བྱ་བ་ནས་དོན་གྱི་སྐབས་འདིར་ནི་གསོལ་བ་དང་བཞིའི་ལས་མི་གཡོ་བ་བཞག་པར་འོས་པ་མ་ཡིན་པས་བསྙེན་པར་རྫོགས་པ་གང་ཡིན་པ་དེ་དགེ་སློང་མར་དགོངས་ཏེ་ཞེས་བྱ་བའི་བར་དུ་སྔ་མ་བཞིན་ནོ། །མངོན་པར་མི་ཤེས་ཤིང་ཞེས་བྱ་བ་ཅི་ཞིག་མངོན་པར་མི་ཤེས་པས་ཞེ་ན། གཟུགས་ལ་སོགས་པ་ཕུང་པོ་ལྔ་དག་གོ། །ཡོངས་སུ་མི་ཤེས་པ་ཞེས་བྱ་བ་ཅི་ཞིག་ཡོངས་སུ་མ་ཤེས་པས་ཞེ་ན་གཟུགས་ལ་སོགས་པ་ཕུང་པོ་ལྔ་པོ་དེ་ཉིད་དོ། །མིའི་ཆོས་ཤེས་བྱ་བ་ནི་སྒྲིབ་པ་ལྔ་པོ་དག་གོ། །བླ་མ་ཞེས་བྱ་བ་ནི་དེ་དག་སྤངས་པ་གང་ཡིན་པའོ། །མཐའ་ཞེས་བྱ་བ་ནི་མྱ་ངན་ལས་འདས་པའོ། །འཕགས་པ་ཞེས་བྱ་བ་ནི་སངས་རྒྱས་བཅོམ་ལྡན་འདས་རྣམས་དང ། སངས་རྒྱས་ཀྱི་ཉན་ཐོས་རྣམས་སོ། །ཁྱད་པར་ཐོབ་པ་ཞེས་བྱ་བ་ནི་དགེ་སྦྱོང་གི་འབྲས་བུ་བཞི་པོ་དག་སྟེ། གང་གིས་ཐོབ་པ་ནི་ཁྱད་པར་ཐོབ་པ་ཞེས་བརྗོད་དོ། །ཤེས་པ་ཞེས་བྱ་བ་ནི་སྡུག་བསྔལ་ཤེས་པ་དང ། ཀུན་འབྱུང་བ་དང ། འགོག་པ་དང ། ལམ་ཤེས་པའོ། །མཐོང་བ་ཞེས་བྱ་བ་ནི་སྡུག་བསྔལ་བ་མཐོང་བ་དང ། ཀུན་འབྱུང་དང ། འགོག་པ་དང ། ལམ་མཐོང་བའི་ཤེས་པའོ། །རེག་པར་གནས་ཤེས་བྱ་བ་ནི་བསམ་གཏན་བཞི་པོ་དག་སྟེ། འཕགས་པའི་ཆོས་འདུལ་བ་ལ་མཐོང་བའི་ཆོས་ཁོ་ན་ལ་རེག་པར་གནས་པ་ཞེས་བརྗོད་དོ། །མེད་ལ་ཞེས་བྱ་བ་ནི་གཞི་དེའོ། །མེད་བཞིན་དུ་ཞེས་བྱ་བ་ནི་གང་ཟག་དེ་ལའོ། །འདི་ཤེས་སོ་ཞེས་བྱ་བ་ཅི་ཞིག་ཤེས་སོ་ཞེ་ན། ་སྡུག་བསྔལ་ཤེས་སོ། །ཀུན་འབྱུང་དང ། འགོག་པ་དང ། ལམ་ཤེས་སོ། །མཐོང་ངོ་ཞེས་བྱ་བ་ཅི་ཞིག་མཐོང་བས་ཞེ་ན། ལྷ་རྣམས་མཐོང་ངོ ། །ཀླུ་རྣམས
9.59a
དང ། གནོད་སྦྱིན་རྣམས་དང ། ནམ་མཁའ་ལྡིང་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། གྲུལ་བུམ་རྣམས་དང ། སྲུལ་པོ་རྣམས་དང ། ལུས་སྲུལ་པོ་རྣམས་དང ། ཁས་འཆེས་པ་ཞེས་བྱ་བ་ནི་སྨྲས་པའོ། །དེ་ལྟུང་བ་བྱུང་བ་ཞེས་བྱ་བ་ནི་གཞི་དེའི་འོ། །རྣམ་པར་དག་པར་འདོད་ནས་ཞེས་བྱ་བ་ནི་རྣམ་པར་ལྡང་བར་འདོད་ནས་སོ། །དུས་གཞན་ཞིག་ན་ཞེས་བྱ་བ་ནི་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་གྱིས་སོ། །མ་དྲིས་ཀྱང་རུང་ཞེས་བྱ་བ་ནི་བདག་ཉིད་འགྱོད་པ་དང ། རྣམ་པར་འགྱོད་པ་དང ། ཡིད་ལ་གཅགས་པ་སྐྱེས་པས་སོ། །འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས་ཞེས་བྱ་བ་ནི་ཡིད་ཀྱི་རྣམ་པ་ཤེས་པས་སོ། །མ་མཐོང་བར་མཐོང་ངོ་ཞེས་སྨྲས་ཏེ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །གསོག་།གསོབ། བརྫུན་དུ་སྨྲས་སོ་ཞེས་བྱ་བ་ནི་སྨྲས་པའི་ཚིག་གི་རྣམ་གྲངས་སོ། །ཟེར་ན་ཞེས་བྱ་བ་ནི་བརྗོད་ནའོ། །མངོན་པའི་ང་རྒྱལ་མ་གཏོགས་ཏེ་ཞེས་བྱ་བ་ནི་མངོན་པའི་ང་རྒྱལ་བཞག་སྟེའོ། །དགེ་སློང་མ་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པ་སྟེ་སྔ་མ་བཞིན་ནོ། །དེ་ཡང་ཞེས་བྱ་བ་ནི་དེ་ཉེ་བར་བསྟན་པ་དང ། ཀུན་དུ་བསྟན་པའི་ཚིག་བླ་དགས་ཡིན་ནོ། །ཇི་ལྟར་ཕས་ཕམ་པར་གྱུར་པ་དང་པོར་དེར་ལྟུང་བ་བརྗོད་པ་དེ་བཞིན་དུ་བརྗོད་པར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་སྡོམ་ལ། འདུ་ཤེས་བསྒྱུར་དང་དགོན་པ་དང ། །ཁྱིམ་རྣམས་སུ་ནི་སྟན་བཀྲ་དང ། །རང་གི་མཚན་ཉིད་འཛིན་པ་དང ། །བདག་ཉིད་ཉེ་བར་སྟོན་པའོ། །ཡང་དགེ་སློང་མ་གང་ཞིག་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་མཐོང་ངོ་ཞེས་ཟེར་ན་ཕས་ཕམ་པར་འགྱུར་རོ། །དེ་བཞིན་དུ་ཀླུ་རྣམས་དང ། གནོད་སྦྱིན་རྣམས་དང ། སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་ངོ་ཞེས་ཟེར་ན་ཕས་ཕམ་པར་འགྱུར་རོ། །དེ་ལྟར་སྡོམ་གྱི་ཚིགས་བཅད་པ་འདི་ཡང་དགེ་སློང་གི
9.59b
འདུལ་བ་ལས་དགེ་སློང་ཞེས་འབྱུང་བ་དགེ་སློང་མ་ཞེས་བྱ་བར་བསྒྱུར་ཏེ་བརྗོད་པར་བྱའོ། །ཕས་ཕམ་པར་གྱུར་པ་བཞི་པ་རྫོགས་སྷོ།། ་་་་་་་་་་་་་་སྔོན་བྱུང་བའི་རབས་ཀྱི་བར་སྡོམ་ལ། འདོད་ཆགས་ཆུང་དང་གཉིས་ཀ་དང ། །མདོག་བཟངས་ཚངས་སྤྱོད་མངོན་ཤེས་དང ། །ཕྱུག་དང་རིགས་མཐོར་སྐྱེས་པ་དང ། །འདོད་པ་ཆུང་དང་འོད་སྲུང་ངོ ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་འོད་སྲུང་ཆེན་པོ་དང ། སེར་སྐྱ་བཟང་མོ་དང་གཉིས་འདོད་ཆགས་ཆུང་བ་ལ་གཟིགས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་ཏུ་མ་ཟད་དེ། འདས་པའི་དུས་ན་ཡང་ཞེས་བྱ་བའི་བར་དུའོ། །དགེ་སློང་དག་འདི་གཉིས་ཀྱིས་ལས་བྱས་ཤིང་ཉེ་བར་བསགས་པ་ཞེས་བྱ་བའི་བར་ནས་རྒྱས་པར་བྱའོ། །དགེ་སློང་དག་སྔོན་འདས་པའི་དུས་ན་རྒྱལ་པོའི་ཕོ་བྲང་ཞིག་ན་ཞིང་པ་ཞིག་འདུག་པ་དེ་ནང་པར་སྔར་ལངས་ནས། རྨོན་པ་དང ། གཤོལ་བླངས་ཏེ་ཞིང་རྨེད་དུ་འགྲོ་གར་ཆུང་མ་ལ་ཉི་མ་ཤར་བ་དང་གཡར་ཚུས་ཁྱེར་ལ་ཤོག་ཤིག་ཅེས་བསྒོའོ། །དེའི་ཆུང་མས་གཡར་ཚུས་ཁྱེར་ཏེ་འོངས་པ་དང ། དེ་མ་ཐག་ཏུ་རང་སངས་རྒྱས་བསེ་རུ་ལྟ་བུ་ཞིག་ཀྱང་འོངས་ནས། དེ་ན་དེས་དེའི་རྐང་པ་ལ་ཕྱག་འཚལ་ཏེ་ལངས་པ་དང ། དེས་སྨྲས་པ་ཞེས་བྱ་བའི་བར་དང ། རང་སངས་རྒྱས་ནམ་མཁའ་ལ་འདུག་གོ་ཞེས་བྱ་བ་ནས་བསོད་སྙོམས་ཕུལ་ཏེ་སྨོན་ལམ་དག་བཏབ་པ། འདི་ལྟར་ཉོན་མོངས་པ་ཀུན་གྱི་དབང་དུ་གྱུར་པས་ནོངས་པ་གང་བགྱིས་པ་དེ་ཞེས་བྱ་བའི་བར་ནས། བདག་ཅག་གཉིས་འདོད་ཆགས་ཆུང་བར་གྱུར་ཅིག་ཅེས་བྱ་བའི་བར་དུའོ། །དགེ་སློང་དག་དེའི་ཚེ་དེའི་དུས་ན་ཞིང་པར་གྱུར་པ་གང་ཡིན་པ་དེ་ནི་འོད་སྲུང་འདི་ཡིན་ནོ། །དེའི་ཚེ་དེའི་དུས་ན་ཞིང་པའི་ཆུང་མར་གྱུར་པ་གང་ཡིན་པ་དེ་ནི་སེར་སྐྱ་བཟང་མོ་འདི་ཡིན་ཏེ། དེ་གཉིས་ཀྱིས་དེའི་ཚེ་རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་བཏབ་པའི་ཕྱིར་འདི་གཉིས་འདོད་ཆགས་ཆུང་བར་གྱུར་ཏོ་ཞེས་བྱ་བའི་བར་དུ་འོ། །དེའི་ཕྱིར་དགེ་སློང་དག་འདོད་ཆགས་སྤང་བའི་ཕྱིར་འབད་པར་བྱའོ། །དེ་ལྟ་ན་ཁྱོད་ཀྱིས་ཡོན་ཏན་གྱི་ཚོགས
9.60a
རྣམས་བསྐྱེད་པར་འགྱུར་ཏེ། དགེ་སློང་དག་དེ་ལྟར་བསླབ་པར་བྱའོ་ཞེས་བྱ་བའི་བར་དུའོ། །ཡང་དགེ་སློང་རྣམས་ཞེས་བྱ་བ་ནས་ཚེ་དང་ལྡན་པ་འོད་སྲུང་ཆེན་པོ་དང ། སེར་སྐྱའི་བུ་མོ་བཟང་མོས་ལས་ཅི་ཞིག་བགྱིས་ན་གང་གི་སླད་དུ་གཉིས་ཀ་རབ་ཏུ་བྱུང་བར་གྱུར་ཅེས་གསོལ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །གང་དུ་ལགས། དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་ཆེན་པོའི་ཕྱི་རོལ་གྱི་གྲོང་ཁྱེར་ན་རྫ་མཁན་གྱི་དཔོང་སའི་ཁང་པ་ཞིག་ཡོད་པར་གྱུར་ཏོ། །སངས་རྒྱས་མི་བཞུགས་པའི་ཚེ་ན། རང་སངས་རྒྱས་ཕོངས་པ་དང་དམན་པ་ལ་སྙིང་རྗེ་བ། སེམས་ཅན་ལ་ཕན་འདོགས་པར་ཞུགས་པ་འབྱུང་ངོ ། །དེ་ནས་རང་སངས་རྒྱས་ཞིག་རྫ་མཁན་གྱི་དཔོང་སའི་ཁང་པ་གང་ན་བ་དེར་སོང་སྟེ་ཕྱིན་ནས་རྫ་མཁན་ལ་འདི་སྐད་ཅེས་སྨྲས་སོ། །བཞིན་བཟངས་གལ་ཏེ་ཁྱོད་ལ་མི་བདེ་བ་མེད་ན་དཔོང་སའི་ཁང་པའི་ཕྱོགས་གཅིག་ཏུ་གནས་བཅའོ། །དེ་སྐད་ཅེས་སྨྲས་པ་དང ། རྫ་མཁན་གྱིས་རང་སངས་རྒྱས་ལ་འདི་སྐད་ཅེས་སྨྲས་སོ། །འཕགས་པ་ཅི་བདེར་བཞུགས་ཤིག་།དེ་ནས་རང་སངས་རྒྱས་དེ་དཔོང་སའི་ཁང་པའི་ཕྱོགས་གཅིག་ཏུ་རྩཝའི་གདིང་བ་བཤམས་ནས། སྦྲུལ་གྱི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟ་བུར་སྐྱིལ་མོ་དཀྲུང་བཅས་ནས་འདུག་གོ། །དེ་ནས་རང་སངས་རྒྱས་གཉིས་པ་ཞིག་ཀྱང་འོངས་ཏེ་ཞེས་བྱ་བའི་བར་ནས་རྫ་མཁན་དེ་ལས་བརྙས་ཏེ་དཔོང་སའི་ཁང་པ་དེ་ཉིད་ཀྱི་གྲཝ་གཉིས་པར་འདུག་གོ་ཞེས་བྱ་བའི་བར་དུའོ། །གསུམ་པ་ཞིག་ཀྱང་འོངས་ནས་གྲཝ་གསུམ་པར་འདུག་གོ་ཞེས་བྱ་བའི་བར་དང ། དེ་བཞིན་དུ་བཞི་པ་ཞིག་ཀྱང་འོངས་ནས་གྲཝ་བཞི་པར་འདུག་གོ་ཞེས་བྱ་བའི་བར་དུའོ། །དེ་ནས་ཉི་མ་ནུབ་ནས་ནམ་སྲོས་པར་རིག་པ་དང ། རང་སངས་རྒྱས་བཞི་པོ་དེ་དག་ཉིད་མེའི་ཁམས་ལ་སྙོམས་པར་ཞུགས་པ་དང་རྫ་མཁན་གྱིས་སྒོ་གསེབ་ནས་དཔོང་སའི་ཁང་པ་དེ་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པར་མཐོང་ནས་དེས་བསམས་པ། ཡོན་གནས
9.60b
འདི་ལྟ་བུ་དག་བྱོན་ནས་བདག་གིས་དཔོང་སའི་ཁང་པ་གང་ཡིན་པར་གནས་པར་གྱུར་པ་དེ་ནི་བདག་དབང་ཐང་ཆེ་བ་དང་ཕན་འདོགས་པ་དང་ལྡན་པ་ཡིན་ནོ་སྙམ་མོ། །ཡང་སྨྲས་པ། ཀྱེ་མའོ་ཡོན་གནས་བྱོན་པ་དག་།རིང་མོ་ཞིག་ནས་མཐོང་གྱུར་པས། འཇིག་རྟེན་འདི་དང་ཕ་རོལ་དུ། །བདག་ནི་བདེ་བ་ཉིད་དུ་གྱུར། །རང་སངས་རྒྱས་དེ་དག་ཀྱང་ཡོན་བདག་གི་དགེ་བའི་རྩ་བ་བསྐྱེད་པའི་ཕྱིར་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དག་གིས་མཚན་མོ་འདས་པར་མཛད་ནས་གཅིག་ལ་གཅིག་ཀུན་དགའ་བར་འགྱུར་བ་རྩམ་མོ། །དེ་ནས་རང་སངས་རྒྱས་དེ་རྣམས་ཀྱིས་གཅིག་ལ་སྨྲས་པ། ཁྱོད་སུ་ཞིག་།གང་དུ། ཅིའི་ཕྱིར། ཇི་ལྟར་རབ་ཏུ་བྱུང ། དེ་རྣམས་ཀྱིས་དེ་སྐད་ཅེས་སྨྲས་པ་དང ། དེས་དེ་རྣམས་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རྣམས་ཀྱིས་ཡུལ་ཀ་ལིང་ཀ་ན་རྒྱལ་པོ་རྣ་ལག་ཅན་ཞེས་བྱ་བ་བྱུང་བ་ཐོས་སམ། དེ་དག་གིས་སྨྲས་པ། ཐོས་ཏེ་གཞན་ཡང་བདག་ཅག་གིས་རྒྱལ་པོ་རྣ་ལག་ཅན་དེ་ནི་འབྱོར་པ་དང ། ཡོངས་སུ་གཟུང་བ་རྒྱ་ཆེ་བ་བཞོན་པ་གླང་པོ་ཆེ་དུ་མ་ཡོད་དོ་ཞེས་ཀྱང་ཐོས་སོ། །དེས་འདི་སྐད་ཅེས་སྨྲས་སོ། །ཁྱེད་ཅག་གིས་ཇི་ལྟར་ཐོས་པ་དེ་བཞིན་མོད་ཀྱི། འོན་ཀྱང་བདག་གིས་ནི་རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ ། །དེ་དག་གིས་སྨྲས་པ། ཁྱོད་ཀྱིས་རྒྱལ་སྲིད་ཀྱི་ཉེས་དམིགས་ཅི་ཞིག་མཐོང་ནས་རབ་ཏུ་བྱུང ། དེས་སྨྲས་པ། ཉེས་དམིགས་ཡོད་ན་དེ་ཡང་མི་ཆེ་བ་ཞིག་གོ། །ཇི་ལྟ་བུ་ཞིག་བཙུན་པ་དག་ཉོན་ཅིག་།བདག་འདི་ན་སྟེང་གི་ཁང་བཟངས་གི་ཐོག་ན་འདུག་པའི་ཚེ་དེ་ན་བྱ་ཞིག་ཤའི་དུམ་བུ་ཞིག་ཁྱེར་ནས་ནམ་མཁའ་ལ་ཕུར་བ་ན་དོན་དེའི་ཕྱིར་དེ་གཞན་མང་པོ་ཞིག་གིས་གཙེས་སོ། །དེས་དེ་བོར་པ་དང་གཞན་གྱིས་བླངས་ཏེ། གང་གིས་དབོར་བ་དེ་ནི་བཏང་ལ་གང་གིས་བླངས་པ་དེ་ནི་ཀུན་ནས་བསྐོར་ཏེ། དེ་ལྟར་ཕན་ཚུན་དུ་འཕྲོག་པར་བྱེད་པ་ན་བདག་ཚུལ་བཞིན་ཡིད་ལ་བྱེད་པར་སྐྱེས་པར་གྱུར་ཏེ། ལེན་པ་གང་ཡིན་པ་དེ་ནི་བཅིངས་ལ་འདོར་བ་གང་ཡིན་པ་དེ་ནི་གཏོང་བར་བྱེད་ན། བདག་རྒྱལ་སྲིད་རྒྱས་པ་ཡོངས་སུ་ལོངས་སྤྱོད་པ་འདིའི་རྒྱུས་བདག་དང་ཉི་འོག་གི་རྒྱལ་པོ་དང་ལྷན་ཅིག་ཏུ་འཐབ་པ་དང །
9.61a
རྩོད་པ་དང ། འགྱེད་པར་འགྱུར་བར་གདོན་མ་ཟོས་ཏེ། བདག་ནི་རྒྱལ་སྲིད་ཀྱི་བདེ་བ་དེས་ཆོག་གོ་སྙམ་ནས་རྒྱུ་དེ་དང ། རྐྱེན་དེ་རྙེད་པས་བདག་ངེས་པར་བྱུང་སྟེ། དཀའ་ཐུབ་ཀྱི་ནགས་ཚལ་དུ་ཡང་དག་པར་བརྟེན་ནས། དེར་བདག་གིས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཡང་སྨྲས་པ། བྱ་ཡིས་ཤའི་དུམ་བུ་ཁྱེར་བ་ན། །བྱ་གཞན་ཀུན་ནས་བསྐོར་ཞིང་འབྲང་བ་མཐོང ། །དེ་ལྟར་འདོད་བའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་འགྱུར། དེ་རྣམས་ཀྱིས་སྨྲས་པ་དེའི་ཚིག་ཐོས་ནས་གཉིས་པ་ལ་ཇི་ལྟར་རབ་ཏུ་བྱུང་ཞེས་དྲིས་པའི་བར་ནས་ཚེ་དང་ལྡན་པ་རྣམས་ཀྱིས་ཡུལ་མི་ཐི་ལར་རྒྱལ་པོ་གདོང་མ་ལེགས་ཤེས་བྱ་བ་བྱུང་བ་ཐོས་སམ་ཞེས་བྱ་བའི་བར་ནས། སྟེང་གི་ཁང་བཟངས་ཀྱི་ཐོག་ན་འདུག་པའི་ཚེ་ཞེས་བྱ་བའི་བར་དུའོ། །ཇི་ཙམ་ན་གླང་ཁྱུ་བ་གཉིས་འདོད་པའི་རྒྱུས་ཕན་ཚུན་སྣད་ཅིང་སྨས་པ་མཐོང་བ་ན་བདག་ཚུལ་བཞིན་ཡིད་ལ་བྱེད་པ་སྐྱེས་པར་གྱུར་ཏེ། འདི་ལྟར་རེ་ཤིག་དུད་འགྲོའི་སྐྱེས་གནས་སུ་གྱུར་པ་འདི་གཉིས་ཀྱང་འདོད་པའི་རྒྱུས་ཕན་ཚུན་སྣད་པ་དང ། སྨས་པར་གྱུར་ན་ཞེས་བྱ་བའི་བར་ནས། བདག་ཉི་འོག་གི་རྒྱལ་པོ་དང་ལྷན་ཅིག་ཏུ་འཐབ་པ་དང ། རྩོད་པ་དང ། ་མཚང་འདྲུ་བ་དང ། འགྱེད་པ་ཞེས་བྱ་བའི་བར་དང ། རབ་ཏུ་བྱུང་སྟེ་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ་ཞེས་བྱ་བའི་བར་དུའོ། །ཡང་སྨྲས་པ། འདོད་པའི་གཞི་དང་རྒྱུ་ཡི་ནོག་གཡོ་ཞིང ། །སྣད་དང་གཅིག་ཤོས་སྨྲས་པར་གྱུར་མཐོང་བ། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་གྱུར། །དེའི་ཚིག་ཀྱང་ཐོས་པ་དང ། ་གསུམ་པ་ལ་ཁྱོད་ག་ལས། ཇི་ལྟར་རབ་ཏུ་བྱུང་ཞེས་དྲིས་སོ། །དེས་སྨྲས་པ། བདག་ཡུལ་བཱ་རཱ་ཎཱ་སིའི་གྲོང་ཁྱེར་གྱི་ཕོ་བྲང་འདི་ཉིད་དུ་རྒྱལ་པོ་ཚངས་སྦྱིན་ཞེས་བྱ་བ་ནས། བཞོན་པ་གླང་པོ་ཆེ་བརྒྱ་ཕྲག་དུ་མ་བདོག་པར་གྱུར་ཏོ་ཞེས་བྱ་བའི་བར་དུའོ། །དེ་དག་གིས་སྨྲས་པ། ཁྱོད་ཀྱིས་རྒྱལ་སྲིད་ཀྱི་ཉེས་དམིགས་ནི་ཅི་ཞིག་མཐོང ། འདོད་པ་ལ་སྐྱོན་ནི་ཅི་ཞིག་མཐོང ། དེས་སྨྲས་པ། ཁྱོད་ཉོན་ཅིག་བདག་འདི་ན་དགུན་གྱི་དུས་བུ་ཡུག་ལྡང་བ་འདས་ཏེ་སོ་ཀའི་དུས་ལ་བབ་པ་ན། ཤིང་རྣམས་ཀྱི་མེ་ཏོག་ནི་ལེགས་པར་རྒྱས། བུང་བ་རྣམས
9.61b
འཕུར་བའི་ལང་ལོང་གིས་མེ་ཏོག་གི་མགོ་ལྕོགས་སྔུག་གུ་རྣམས་ནི་ལྡེམ། ཙན་དན་བསྟེན་པ་དང་ནི་རྗེས་སུ་འཐུན། ཁུ་བྱུག་གི་སྒྲ་ནི་འབྱིན། ནགས་ཚལ་གྱི་ནང་ན་ངང་པ་དང ། ཁྲུང་ཁྲུང་དང ། རྨ་བྱ་དང ། ནེ་ཙོ་དང་རི་སྐེགས་རྣམས་ཀྱི་སྐད་འབྱིན་པ་ན་སླས་ཀྱི་བཙུན་མོ་དང་ལྷན་ཅིག་ཏུ་སྐྱེད་མོ་ཚལ་གྱི་སར་སོང་བ་ན། དེར་བདག་གིས་ཨ་མྲའི་ཤིང་གི་མེ་ཏོག་ཤིན་དུ་སྤ་བ་མཐོང་བ་དང ། སླས་ཀྱི་བཙུན་མོ་དེ་དག་མེ་ཏོག་ལ་ཆགས་པས། སྐད་ཅིག་ཏུ་དེ་དག་ཡལ་ག་རྣམས་བཅག་སྟེ་བཞག་གོ། །དེ་ལ་བདག་འདི་སྙམ་དུ་རེ་ཤིག་ཕྱི་རོལ་གྱི་དངོས་པོ་འདི་དག་ནི་ཕུན་སུམ་ཚོགས་པ་ན་མཛེས་པ་ཡིན་ལ། ཉམས་པ་ན་མི་མཛེས་པ་ཡིན་ན། བདག་གི་རྒྱལ་སྲིད་འབྱོར་པ་ཡོངས་སུ་ལོངས་སྤྱོད་པ་ཞེས་བྱ་བའི་བར་ལྟ་གདོན་མི་ཟ་བར་སྙམ་དུ་བསམས་ནས་རབ་ཏུ་བྱུང་སྟེ་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཡང་སྨྲས་པ། ཨ་མྲའི་ཤིང་རྩེ་མེ་ཏོག་ལེགས་རྒྱས་པ། །ཡིད་འོང་གཟུགས་ལྡན་ཆག་པ་མཐོང་བ་ན། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་གྱུར། །བཞི་པ་དེ་ལ་ཡང་དྲིས་པ། ཁྱོད་སུ་ཞིག་།ཇི་ལྟར་རབ་ཏུ་བྱུང ། དེས་སྨྲས་པ། ཡུལ་བྲང་གིས་ཉལ་ན་བདག་རྒྱལ་པོ་གཅེར་བུ་ཐུལ་ཅེས་བྱ་བར་གྱུར་ཏོ་ཞེས་བྱ་བའི་བར་ནས། སྟེང་གི་ཁང་བཟངས་ཀྱི་ཐོག་ཏུ་སོང་སྟེ་དགའ་བའི་རྩེད་མོ་ཉམས་སུ་མྱོང་བར་བྱེད་ཅིང་གནས་སོ། །དེ་ན་སླས་ཀྱི་བཙུན་མོ་ཞིག་གསེར་གྱི་གདུ་བུས་བརྒྱན་ནས་ཚོན་རྩི་འཐག་གོ། །དེ་འཐག་པ་ན་སྒྲ་བྱུང་བ་ལས་ཞེས་བྱ་བའི་བར་ནས། བདག་གིས་འདི་སྙམ་དུ་ཕྱི་རོལ་གྱི་དངོས་པོ་འདི་ནི་སེམས་མེད་པ་ཡིན་ཡང་ཡང་དག་པར་བརྡུངས་པ་ན་སྒྲ་འབྱུང་བར་འགྱུར་ན། བདག་གི་རྒྱལ་སྲིད་འབྱོར་བ་གང་ཡིན་པ་ལོངས་སྤྱོད་པ་ཞེས་བྱ་བའི་བར་ལྟ་སྨོས་ཀྱང་ཅི་དགོས་པས་རྒྱལ་སྲིད་ཀྱིས་ཆོག་གོ་སྙམ་དུ་བསམས་ཏེ། བདག་གིས་རྒྱལ་སྲིད་སྤངས་ནས་ཉེས་པ་དང་སྐྱོན་ཆུང་ངུ་མཐོང་བའི་རྐྱེན་རྙེད་པས་ངེས་པར་བྱུང་སྟེ་རབ་ཏུ་བྱུང་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཡང་སྨྲས་པ། གསེར་མགར་གྱིས་ནི་ལེགས་པར་བརྡུངས་པ་ཡི། །གསེར་གྱི་འོད་གསལ་ལག་པའི་ཁྲིག་མ་གཉིས། །རྡུང་བ་ཐོས་པ་དེ་ལྟར་བདག་དང་ནི། །གཞན་དང་ལྷན་ཅིག
9.62a
གཞི་ནི་འདི་ཡི་རྒྱུས། །ཚིག་ངན་སྣ་ཚོགས་འཐོན་ཅིང་སེམས་འཁྲུགས་པ། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་གྱུར། །དེ་ལྟར་དེ་དག་གཅིག་ལ་གཅིག་སྨྲས་ནས་འདུག་གོ། །དེ་ནས་རྫ་མཁན་དང་ཆུང་མ་ལྷན་ཅིག་ཏུ་འདི་སྙམ་དུ་བདག་ཉིད་ཆེན་པོ་འདི་དག་གིས་རིགས་རྒྱུད་རྒྱ་ཆེ་བའི་རྒྱལ་སྲིད་ཡངས་པ་ཡང་སྤངས་ནས་རབ་ཏུ་བྱུང་བར་གྱུར་ན། བདག་ཅག་གིས་ཅིའི་ཕྱིར་ཁྱིམ་དང་ཕྲུ་རྟོག་དང ། གཟར་བུ་དང ། བྲལ་བྲུལ་གྱིས་ཁྱིམ་གྱི་འཚོ་ཚིས་བྱས་པ་ལ་ལོངས་སྤྱོད་ཀྱི་འདུ་ཤེས་འབྱུང་བའི་རྣམ་པ་འདི་ལྟ་བུ་ཡོངས་སུ་སྤངས་ནས། བདག་ཅག་ཅིའི་ཕྱིར་རབ་ཏུ་འབྱུང་བར་མི་བྱ་སྙམ་དུ་བསམས་སོ། །ཡང་སྨྲས་པ། གྲོང་དང་ཡུལ་འཁོར་རིགས་རྒྱུད་འབྱོར་བའི་ས་སྤངས་ནས། །ཆགས་མེད་སེམས་ཀྱིས་མི་ཡི་འཇིག་རྟེན་རྒྱུ་བྱེད་ན། །བདག་ཅག་ཅི་ཕྱིར་བཀྲེན་པའི་ཚུལ་གྱིས་བསྒྲུབས་པའི་ཡུལ། །ཆུ་ཡིས་ཁྱེར་བ་ལྟ་བུ་མངོན་དུ་སྤྱོད་པར་བྱེད། །དེ་ལྟར་དེ་དག་ནམ་ནངས་ཏེ། མཚན་མོ་ཟད་ནས་ནམ་ནངས་པ་དང ། རྫ་མཁན་ཁྱོ་ཤུག་གིས་ཞེ་སའི་སེམས་བསྐྱེད་དེ། རང་སངས་རྒྱས་དེ་དག་སྤྱན་དྲངས་ནས་བསོད་སྙོམས་ཕུལ་ཏེ་ཞེས་བྱ་བའི་བར་དང ། དེ་དག་སྟེང་གི་ནམ་མཁའ་ལ་འཕགས་སོ་ཞེས་བྱ་བའི་བར་ནས་རྫ་མཁན་ཁྱོ་ཤུག་གིས་སྨོན་ལམ་བཏབ་པ། ཨ་ལ་ལ་བདག་ཅག་གིས་སྦྱིན་པར་བྱ་བའི་ཆོས་ཡོངས་སུ་བཏང་བ་དང ། སེམས་བསྐྱེད་པའི་དགེ་བའི་རྩ་བ་འདིས་ནམ་དུ་ཡང་དབུལ་པོའི་ཁྱིམ་དུ་སྐྱེས་པར་མ་གྱུར་ཅིག་།བདག་ཅག་ཀྱང་འདི་ལྟ་བུའི་ཆོས་དང་ལྡན་པའི་སྐལ་བ་ཅན་དུ་ཤོག་ཤིག་།བདག་ཅག་གིས་སྟོན་པ་ཁྱད་པར་དུ་འཕགས་པ་འདི་ལྟ་བུ་མཉེས་པར་བགྱིད་ཅིང ། མི་མཉེས་པར་མི་བགྱིད་པར་གྱུར་ཅིག་ཅེས་བྱས་ནས། དེ་གཉིས་རབ་ཏུ་འབྱུང་བ་ལ་མངོན་པར་དགའ་བར་གྱུར་ཏོ། །རེ་ཤིག་ན་རྫ་མཁན་བུམ་པ་ཐོགས་ནས་ཆུ་ཆུར་སོང་ངོ་ཞེས་བྱ་བའི་བར་དང ། ཆུང་མས་འཕྲིགས་ནས་སླར་བཟློག་སྟེ་ཞེས་བྱ་བའི་བར་ནས་ཆུང་མ་རབ་ཏུ་བྱུང་བ་དང ། དེས་བསམས་པ། བདག་ནི་བསླུས་ཀྱིས་མེད་ན་ད་ཇི་ལྟར་བྱ། བྱིས
9.62b
པ་ཁྱེའུ་འདི་གཉིས་སྐྱེད་པར་བྱ་ཞིང་བསྲིང་བར་བྱའོ་སྙམ་ནས། དེས་དེ་གཉིས་བསྐྱེད་བསྲིངས་ཏེ་ཆེན་པོར་གྱུར་པ་དེའི་ཚེ་རྫ་མཁན་གྱིས་སྨིན་པ་དང ། མ་སྨིན་པ་དང ། ལན་ཚཝ་བྲོ་བ་དང ། ལན་ཚཝ་མི་བྲོ་བ་དག་གིས་བརྟག་པར་བྱས་ཏེ། འདི་སྐད་ཅེས་ཀྱང་སྨྲས་སོ། །སྨིན་དང་མ་སྨིན་དེ་བཞིན་དུ། །ལན་ཚཝ་བྲོ་དང་མི་བྲོ་བ། །ཤེས་པར་བྱིས་པ་གཉིས་སྐྱེས་ན། །བདག་ནི་རབ་ཏུ་འབྱུང་བའི་དུས། །དེ་བྱིས་པ་དེ་གཉིས་ལས་ནི་འདི་ལྟར་བརྐོ་བར་བྱའོ། །སྣོད་སྤྱད་ནི་འདི་ལྟར་བཙོང་ངོ་ཞེས་བྱ་བའི་བར་དུ་བསླབས་ནས་རབ་ཏུ་བྱུང་ངོ་ཞེས་བྱ་བའི་བར་དུའོ། །རྫ་མཁན་བསོད་སྙོམས་བྱེད་པ་མཐོང་སྟེ་ཞེས་བྱ་བའི་བར་ནས་ཚིགས་སུ་བཅད་པ་སྨྲས་པ། སྨིན་དང་མ་སྨིན་དེ་བཞིན་དུ། །ལན་ཚཝ་བྲོ་དང་མི་བྲོ་བ། །ཤེས་པར་བྱིས་པ་གཉིས་སྐྱེས་ཀྱི། །བཟང་མོའང་སོང་ཞིག་བདག་ཀྱང་འགྲོ་ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཚེ་དེའི་དུས་ན་རྫ་མཁན་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ནོ། །རྫ་མཁན་གྱི་ཆུང་མ་གང་ཡིན་པ་དེ་ནི་སེར་སྐྱའི་བུ་མོ་བུ་མོ་བཟང་མོ་འདི་ཡིན་ནོ། །དེའི་ཚེ་ཡང་འདི་དག་ཡིད་བྱུང་བ་ཆུང་ངུས་རབ་ཏུ་བྱུང་ངོ། །ད་ལྟར་ཡང་ཆུང་ངུས་སོ། །དེ་ལྟ་བས་ན་ཅི་ཞིག་བྱ་ཞེ་ན། ངེས་པར་འབྱུང་བའི་རྒྱུ་བསྟན་པས་འདི་ལྟ་བུའི་ཡོན་ཏན་གྱི་ཚོགས་ཅན་དུ་འགྱུར་ཏེ། འོད་སྲུང་ཆེན་པོ་དང་སེར་སྐྱའི་བུ་མོ་བཟང་མོ་ཇི་ལྟ་བ་དེ་བཞིན་དུ་དགེ་སློང་རྣམས་ཀྱིས་བསླབ་པར་བྱའོ། ་་་་་་་་་་།བར་སྡོམ་ལ། ཀ་ལིང་ཀ་དང་ལག་རྣ་ཅན། །མི་ཐི་ལ་དང་བཞིན་མ་ལེགས། །ཀ་ཤི་དང་ནི་ཚངས་བྱིན་དང ། །བྲང་གིས་ཉལ་དང་གཅེར་བུ་ཐུལ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་གསོལ་པ། བཅོམ་ལྡན་འདས་སེར་སྐྱ་བཟང་མོས་ལས་ཅི་ཞིག་བགྱིས་ཤིང་བསགས་ན་འདི་ལྟར་རྣམ་པར་སྨིན་པས་གཟུགས་བཟང་ཞིང་མཛེས་ལ། བལྟ་བ་ན་སྡུག་པར་གྱུར་ཅེས་བྱ་བའི་བར་དུའོ། །དགེ་སློང་དག་སྔོན་བྱུང་བ་འདས་པའི་དུས་ན་རྒྱལ་པོའི་ཕོ་བྲང་ཞིག་ན་རྒྱལ་པོ་ཞིག་རྒྱལ་སྲིད་བྱེད་པ་ནས། ཚོང་དཔོན་ཕྱུག་པ། ནོར་མང་བ། ལོངས་སྤྱོད་ཆེ་བ་ཞེས་བྱ་བའི་བར་དུའོ། །དེ་ཡང་སྐྱེ་བོའི་ཚོགས་རྣམས་ལ་ལྟ་བ་ན་སེམས་ཅན་བརྒྱ་སྟོང་དུ་མ་རྐང་ལག་རྩུབ་པ། ལུས་སེར་ཀ་ཅན
9.63a
མགོ་ཡེགས་པ། རྡུལ་གྱིས་ཡོག་པ། ཁ་མིག་ཉམས་པ། ཚ་བ་དང་ལྷགས་པས་ཉམ་ཐག་པ། སྡུག་བསྔལ་དང་ལྡན་པ་མཐོང་ངོ ། །གཞན་དག་ནི་ལུས་ལ་གོས་བཟང་པོ་དང ། རྒྱན་གྱི་ཁྱད་པར་གྱིས་ཀླུབས་པ། རྟ་དང་གླང་པོ་དང་མི་དང ། ཤིང་རྟའི་བཞོན་པ་ཅན། འབྱོར་པ་མཆོག་དང་ལྡན་པ་ཡང་མཐོང་ནས། དེ་འདི་སྙམ་དུ་སེམས་ཅན་སྡུག་བསྔལ་བ་འདི་རྣམས་ཀྱིས་འདི་ལྟར་སྦྱིན་པ་མ་བྱིན་པའི་ལས་དེས་རྣམ་པ་འདི་ལྟ་བུར་གྱུར་ལ། ད་ལྟར་ཡང་འདི་དག་གིས་རབ་ཏུ་སྦྱིན་མི་ནུས་པའི་ཕྱིར་འདི་ནས་ཤི་འཕོས་ནས་འགྲོ་བ་ཤིན་དུ་དམན་པ་གང་ཡང་རུང་བར་སྐྱེ་བར་འགྱུར་བའི་གནས་སྐབས་དེ་ལྟ་བུ་དག་ཡོད་དོ། །སྦྱིན་པ་ཁྱད་པར་ཅན་གྱིས་ནི་ལོངས་སྤྱོད་ཅན་འདི་དག་ཏུ་གྱུར་ཏོ། །བདག་གིས་ཀྱང་གདོན་མི་ཟ་བར་སྐྱེ་བོ་གཞན་དག་ལ་སྦྱིན་པ་བྱིན་པ་དེས་ན། རྣམ་པ་འདི་ལྟ་བུའི་འབྱོར་པ་རྙེད་པར་གྱུར་ཏོ། །དེ་ཡང་བདག་གིས་བྱིན་ལ་ཚེ་རབས་གཞན་དུ་སྡུག་བསྔལ་བར་མི་འགྱུར་བར་བྱའོ་སྙམ་དུ་བསམས་སོ། །དེས་དེ་ལྟར་བསམས་ནས་ཁྱིམ་དུ་སོང་སྟེ་རང་གི་ཆུང་མ་ལ་འདི་སྐད་ཅེས་སྨྲས་སོ། །བཟང་མོ་འཇིག་རྟེན་ཕ་རོལ་དུ་ནོར་བསགས་པ་རྣམས་ཁྱེར་ལ་འདོང་ངོ ། །དེས་སྨྲས་པ། དེ་ལྟར་བགྱི་ཡི་བཞོན་པ་རྟ་དང ། ་རྔ་མོང་དང ། བོང་བུ་དག་སྟ་གོན་མཛོད་ཅིག་།དེས་སྨྲས་པ། བཞོན་པ་འདི་དག་གིས་ཅི་ཞིག་བྱ། ཐུན་མོང་གི་ནོར་དག་འཇིག་རྟེན་ཕ་རོལ་དུ་བཀུར་མི་ནུས་པ་ཉིད་དོ། །འོན་ཀྱང་ཕོངས་པ་དང ། བཀྲེན་པ་དང ། ལོང་བ་དང ། ཚོང་པ་རྣམས་ཁྱིམ་དུ་འོངས་པ་རྣམས་ཀྱི་རེ་ཐག་མི་ཆད་པ་ཇི་ལྟ་བར་སྦྱིན་པ་བྱིན་ཅིག་།དེས་སྨྲས་པ། དེ་བཞིན་དུ་བགྱིའོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་རང་སངས་རྒྱས་འཇིག་རྟེན་དུ་འབྱུང་བར་འགྱུར་བས་རང་སངས་རྒྱས་རྐེ་ཞིང་ཉམས་ཆུང་བ་ཆོས་གོས་ཧྲུལ་པོ་ཅན་ཞིག་རྒྱལ་པོའི་ཕོ་བྲང་འཁོར་དུ་བསོད་སྙོམས་ལ་ཞུགས་པ་ལས། དེ་ཚོང་དཔོན་དེའི་ཁྱིམ་སྒོ་ན་འདུག་པ་དང ། བྲན་དང ། བྲན་མོ་དག་ཆུ་བཅུ་བའི་ཕྱིར་ཁྱིམ་དེ་ནས་བྱུང་བ་དང ། དེ་དག་གིས་རྐེ་ཞིང་ཉམ་ཆུང་བ་ཆོས་གོས་ཧྲུལ་པོ་ཅན་དེ་མཐོང་ནས། དེ་དག་གིས་འདི་སྙམ་དུ་སྡུག་བསྔལ་བ་གང་ཡིན་པ་དེ་ལ་གང་འདོད་པ་དེ་བྱིན་ཅིག་ཅེས་ཇོ་བོས་བསྒོ་བས་འཕགས
9.63b
པ་སློངས་མོ་པ་འདི་ལ་ཡང་དེ་བསྟན་པར་བྱའོ་སྙམ་དུ་བསམས་ནས། དེ་དག་གིས་བཙུན་པ་དེ་ལ་འདི་སྐད་ཅེས་སྨྲས་སོ། །ཁྱིམ་འདིར་བཞུད་ཅིག་དང་སློངས་མོ་རྙེད་པར་འགྱུར་རོ། །དེ་སོང་བ་དང་ཚོང་དཔོན་གྱི་ཆུང་མས་དེ་མཐོང་ན་རྐེ་ཞིང་ཉམ་ཆུང་ལ་ཆོས་གོས་ཧྲུལ་པོ་ཅན་ཞིག་གོ་སྙམ་དུ་བསམས་ནས་སློངས་མོ་མ་བྱིན་པ་དང ། དེ་དེ་ནས་ཕྱིར་བྱུང་ངོ ། །བྲན་མོ་དེ་དག་ཀྱང་བུམ་པ་ཆུས་བཀང་ནས་སླར་འོངས་པ་དང ། དེ་དག་གིས་ལྷུང་བཟེད་སྟོང་པར་མཐོང་ནས་དེ་དག་གིས་དྲིས་པ། ཁྱོད་ཅི་ཁྱིམ་འདིར་མ་བྱོན་ནམ། དེས་སྨྲས་པ། འོངས་ཀྱང་སློངས་མོ་མ་རྙེད་དོ། །དེ་དག་གིས་དེ་ཕྱིར་བཟློག་སྟེ་ཁྲིད་ནས་དེ་དག་གིས་ཇོ་མོ་ལ་སྨྲས་པ། ཅིའི་སླད་དུ་འདི་ལ་བསོད་སྙོམས་མ་སྩལ། དེས་སྨྲས་པ། འདི་ལ་ང་མ་དད་པས་སོ། །དེ་དག་གིས་སྨྲས་པ། ཅི་ཇོ་བོས་ཁ་དོག་བཟང་བ་དང ། དད་ན་བྱིན་ཅིག་ཅེས་ཁྱོད་ལ་བསྒོ་འམ། དེས་སྨྲས་པ། འདི་ལ་ང་མ་དད་པ་ཕན་ཅད་མང་དུ་སྨྲས་ཀྱང་ཅི་ཕན། བྲན་མོས་འདི་སྙམ་དུ་བདག་གིས་དགེ་སློང་འདི་བཟུང་ནས་ལན་གཉིས་ཀྱི་བར་དུ་བཟློག་ན་ད་རེ་ཐག་བཅད་ནས་ཇི་ལྟར་བཏང་བར་བྱ་སྙམ་དུ་བསམས་ནས། དེས་ཇོ་མོ་ལ་སྨྲས་པ། བདག་གི་འཚལ་མ་ནར་མ་གང་ལགས་པ་དེ་བདག་ལ་སྩལ་ཏུ་གསོལ། དེས་ཀྱང་བྱིན་པ་དང ། བྲན་མོ་དེས་ཉིན་པར་གྱི་ཟན་ཕྱེ་བྲེའུ་ཆུང་གང་བླངས་ནས། དེ་ལ་ཕུལ་ཏེ་དེས་ཡང་འདི་སྙམ་དུ་འཕགས་པ་དེ་ནི་ཆོས་གོས་ཧྲུལ་པོར་འདུག་པས་ཁྱད་དུ་བསད་པ་ཡིན་གྱིས། བདག་གི་རས་ཡུག་དེ་ལ་དབུལ་ལོ་སྙམ་དུ་བསམས་ནས། དེས་དེ་ལ་རས་ཡུག་དཀར་པོ་ཡང་ཕུལ་ལོ། །རང་སངས་རྒྱས་དེས་ཀྱང་འདི་སྙམ་དུ། བུ་མོ་འདིས་བསོད་ནམས་མང་པོ་བསྒྲུབས་པར་འགྱུར་བར་བྱའོ་སྙམ་དུ་བསམས་ནས། དེ་ཉིད་ཀྱི་དད་པ་བསྐྱེད་པའི་ཕྱིར་ངང་པའི་རྒྱལ་པོ་འདབ་མ་བརྐྱང་པ་ལྟ་བུར་ནམ་མཁའི་དཀྱིལ་དུ་འཕགས་སོ། །དེས་དེ་མཐོང་མ་ཐག་ཏུ་སེམས་དད་པར་གྱུར་ནས་དགའ་བ་དང ། མགུ་བ་དང ། རངས་པའི་བསམ་པས་པུས་མོ་ས་ལ་བཙུགས་ཏེ། ཞབས་ལ་ཕྱག་འཚལ་ནས་ཇི་ལྟར་འཕགས་པ་འདི་ལ་ཅུང་ཟད་ཁྱད་དུ་བསད་པ་གང་ཡིན་པ་དེ་ཡང་ཁ་དོག་ངན་པ
9.64a
ལས་གྱུར་ཏོ་སྙམ་ནས་སྨོན་ལམ་བཏབ་པ། ཨ་ལ་ལ་བདག་གིས་སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས་གང་དང་གང་དུ་སྐྱེས་པའི་ཚེ་རབས་དེ་དང་དེར་གཟུགས་མཛེས་ཤིང་མདོག་བཟང་བ་ཤིན་དུ་བལྟ་ན་སྡུག་པར་གྱུར་ཅིག་།ནམ་དུ་ཡང་རྐེ་བ་དང ། ཁ་དོག་ངན་པར་མ་གྱུར་ཅིག་ཅེས་བྱས་སོ། །དེའི་ཚེ་རྒྱལ་པོ་ཞིག་བློན་པོའི་ཚོགས་ཀྱིས་བསྐོར་ནས་སྐྱེས་བུ་བརྒྱ་སྟོང་དུ་མས་བསྐོར་ཅིང་འདུག་པ་དེའི་སྟེང་དུ་རང་སངས་རྒྱས་དེའི་གྲིབ་མ་བབ་པ་དང ། དེས་སྟེང་དུ་བལྟས་ན་རང་སངས་རྒྱས་ཆོས་གོས་བགོས་པ་རས་ཡུག་ཐོགས་པ་རིལ་བ་སྤྱིའུ་བླུགས་དང ། ལྷུང་བཟེད་ནག་པོ་ཐོགས་པ། གཅིག་ཏུ་སྤ་ཞིང་མཛེས་པ་ཞིག་ནམ་མཁའ་ལ་འགྲོ་བ་མཐོང་ནས། དེས་འདི་སྙམ་དུ་རྣམ་པ་འདི་ལྟ་བུའི་བདག་ཉིད་ཆེན་པོ་ཡུལ་གྱི་བསོད་སྙོམས་སོ་སོར་ལེན་པ་གང་ཡིན་པ་དེ་ནི་བདག་དབང་ཐང་ཆེ་བ་དང ། ཕན་འདོགས་པ་དང་བཅས་པ་ཡིན་ནོ་སྙམ་དུ་བསམས་ནས་དེས་སྨྲས་པ། དེང་འདི་ལ་བསོད་སྙོམས་འབུལ་བར་བྱེད་པ་གང་ཡིན་པ་དེ་ལ་ནི་དེར་གྲོང་ཁྱེར་གྱི་མཆོག་སྦྱིན་པར་བྱའོ། །ཚོང་དཔོན་དེ་ཡང་འཁོར་དེ་ཉིད་དུ་འདུས་ཏེ་འདུག་པས་དེས་འདི་སྙམ་དུ། བདག་གིས་བསོད་སྙོམས་པ་ཐམས་ཅད་ལ་སྦྱིན་པ་བྱིན་ཅིག་ཅེས་ཁྱིམ་དུ་བསྒོ་བས་གདོན་མི་ཟ་བར་བདག་གི་ཁྱིམ་ནས་བསོད་སྙོམས་ཕུལ་བ་ཡིན་གྱིས། སོང་ལ་བརྟག་པར་བྱའོ་སྙམ་དུ་བསམས་ནས་དེ་ལངས་ནས་རིངས་པར་ཁྱིམ་དུ་སོང་ངོ ། །ཆུང་མ་དེས་ཀྱང་དེའི་རྫུ་འཕྲུལ་མཐོང་སྟེ་སེམས་དད་པར་གྱུར་ནས། བྲན་མོ་ལ་སྨྲས་པ། བྲན་མོ་བསོད་ནམས་ནི་ང་ཡིར་བྱའོ། །ཁྱོད་ལ་ནི་ངས་ཁ་ཟས་མཆོག་ཏུ་བསོད་པ་དག་སྦྱིན་ནོ། །དེས་དེ་ལ་སྨྲས་པ། ཁྱོད་ཇོ་མོ་ཡིན་པས་བདག་གི་སྲོག་ལ་དབང་གི། བསོད་ནམས་ལ་ནི་མ་ཡིན་པས་མི་སྦྱིན་ནོ། །དེ་ཁྲོས་ཤིང་འཁྲུགས་པས་ཀུན་ནས་དཀྲིས་ཤིང་འདུག་པས་ལག་པའི་ཁྲིག་མ་གདུ་བུ་དང་བཅས་པས་དེའི་མགོར་བརྒྱབ་པ་དང ། གདུ་བུས་ཕོག་པས་དེའི་མགོ་སྣད་ནས་ཁྲག་བྱུང་བར་གྱུར་པ་དང ། ཚོང་དཔོན་ཡང་འོངས་ཏེ་དེས་འདི་ཅི་ཉེས་ཤེས་དྲིས་སོ། །དེས་ཀྱང་ཇི་ལྟར་གྱུར་པ་དེ་ལ་རྒྱ་ཆེར་སྨྲས་པ་དང ། ཚོང་དཔོན་དེ་ཁྲོས་ནས་བྲན་མོ་དེ་རྒྱན་ཐམས་ཅད་ཀྱིས
9.64b
བརྒྱན་ཏེ་ཁྱིམ་དག་ཏུ་བཅུག་ནས། དེས་ཀྱང་ཇི་ལྟར་གྱུར་པ་རྒྱལ་པོ་ལ་གསོལ་པ་དང ། རྒྱལ་པོས་སྨྲས་པ། དེ་ནི་ཇོ་མོར་འོས་ཏེ། ཁྱོད་ཀྱིས་ལེགས་པ་ཞིག་བྱས་སོ། །གལ་ཏེ་ཁྱོད་ཀྱིས་དེ་ལྟར་མ་བྱས་སུ་ཟིན་ན་ངས་བྲན་མོ་མ་ཡིན་པར་བྱས་པར་འགྱུར་རོ། །འོན་ཀྱང་ངས་དེ་ལ་གྲོང་ཁྱེར་གྱི་མཆོག་སྦྱིན་ནོ། །དེ་དད་པ་ཐོབ་པ་དང ། རྐྱེན་རྙེད་པས་དགེ་སྦྱོང་དང ། བྲམ་ཟེ་དང ། ཚོང་པ་རྣམས་ལ་སྦྱིན་པ་ནི་བྱིན། བསོད་ནམས་ནི་བྱས། ཚུལ་ཁྲིམས་ཀྱང་བསྲུངས་ནས་འཆི་བའི་དུས་བྱས་ཏེ། སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་སོ། །དེ་གཟུགས་ཕུན་སུམ་ཚོགས་པ་འོད་དང ། གཟི་མདངས་དང ། སྣང་བ་རྒྱ་ཆེན་པོ་ཅན་དེ་ལྟ་བུར་གྱུར་པ་དང ། ་ལྷའི་ཚོགས་གང་ཡིན་པ་དེ་དག་ཐམས་ཅད་ཀྱང་ངོ་མཚར་དུ་གྱུར་ཏོ། །ཉེ་དབང་པོ་བཞི་དང ། བརྒྱ་བྱིན་ཡང་ཡ་ཡ་པོར་གྱུར་ཏེ། དེ་དག་ཕན་ཚུན་དུ་འདི་ནི་བདག་གི་ཡིན་ནོ། །འདི་ནི་བདག་གི་ཡིན་ནོ་ཞེས་སྨྲ་བར་གྱུར་ཏོ། །དེ་ནས་བརྒྱ་བྱིན་གྱིས་སྨྲས་པ། བདག་ཅག་འདོད་ཆགས་ཀྱི་སྐྱོན་གྱིས་སེམས་ལྷག་པར་གདུངས་པས་ཚིགས་སུ་བཅད་པ་སྨྲ་བར་བྱེད་པ་གང་ཡིན་པ་དེའི་ཡིན་པར་འགྱུར་རོ། །དེ་དག་ལས་གཅིག་གིས་སྨྲས་པ། བློང་ཞིང་རབ་ཏུ་བློང་གྱུར་པས། །བདག་ལ་ཕྱོགས་ནི་སྣང་བ་མེད། །དེ་ལ་སེམས་ནི་གནས་གྱུར་པ། །དེ་ཕྱིར་གྲོགས་དག་འདི་འདོད་དོ། །གཉིས་པས་སྨྲས་པ། ཀྱེ་མའོ་ལྷ་དབང་གང་ཞིག་ནི། །ཚིགས་བཅད་སྨྲ་བ་དེ་རེ་བདེ། །གཡུལ་ངོའི་སྣ་ལ་རྔ་བརྡུངས་པ། །དེ་ལྟར་བདག་ནི་འདོད་ཆགས་སྐྱེས། །གསུམ་པས་སྨྲས་པ། རྔ་ཆེན་བརྡུངས་པར་གྱུར་ཀྱང་ནི། །དེ་དང་དེར་ནི་ངལ་གསོར་ཡོད། །ཆུ་ཀླུང་ཆེན་པོ་མི་བཟད་ལྟར། །དེ་ལྟར་བདག་གི་འདོད་ཆགས་སྐྱེས། །བཞི་པས་སྨྲས་པ། མི་བཟད་པ་ཡིས་ཁྱེར་གྱུར་ཀྱང ། །དེ་དང་དེར་ནི་ཐོགས་གྱུར་ཀྱང ། །ཕྱེ་མ་ལེབ་ལྟར་བདག་གི་མིག་།རྟག་ཏུ་འཛུམས་པ་མེད་པར་གྱུར། །བརྒྱ་བྱིན་གྱིས་སྨྲས་པ། ཚིགས་བཅད་རབ་ཏུ་སྨྲ་བའི་ཕྱིར། །ཁྱེད་ཅག་ཐམས་ཅད་བདེ་བ་ཡིན། །བདག་ནི་ཇི་ག་འཆི་འགྱུར་བ་འམ། །གསོན་པར་འགྱུར་བ་འང་མི་ཤེས་སོ། །དེ་དག་གིས་འདི
9.65a
སྙམ་དུ་ཡུལ་འདི་ནི་བརྒྱ་བྱིན་འདོད་པས་གནས་འདི་ནས་ཤི་འཕོས་ན་མི་རུང་ངོ་སྙམ་དུ་བསམས་ནས། དེ་དག་གིས་བརྒྱ་བྱིན་ལ་བྱིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཚེ་དེའི་དུས་ན་བྲན་མོར་གྱུར་པ་གང་ཡིན་པ་དེ་ནི་སེར་སྐྱའི་བཟང་མོ་འདི་ཡིན་ཏེ། རང་སངས་རྒྱས་དེ་ལ་བསོད་སྙོམས་རབ་ཏུ་ཕུལ་བ་དང ། རས་ཡུག་ཕུལ་བར་གྱུར་པ་ཞེས་བྱ་བའི་བར་ནས་རྒྱུ་དེས་གཟུགས་བཟང་བ་དང་མཛེས་པར་གྱུར་ཏོ། །ཡང་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་རེ་ཤིག་ལྷའི་བུ་མོས་ཉེ་དབང་པོ་བཞི་དང ། བརྒྱ་བྱིན་ཡ་ཡ་བོར་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ན་དེས་གང་གི་ཕྱིར་ཉེ་དབང་པོ་བཞི་དང ། བརྒྱ་བྱིན་ཡ་ཡ་བོར་བྱས་པ་ངོ་མཚར་མི་ཆེའོ། །འོན་ཀྱང་དགེ་སློང་དག་སྔོན་འདས་པའི་དུས་ན་འདི་ཉིད་ཀྱི་གྲོང་གི་བཀྲབས་པ་བཞི་དང ། མཆོག་ཏུ་བཀྲབས་པ་རྣམས་ཡ་ཡ་བོར་བྱས་པ་དེ་བཤད་ཀྱིས་ཉོན་ཅིག་ཅེས་བྱ་བའི་བར་ནས་ལྷའི་བུ་མོ་འདི་ཉིད་ཅེས་བྱ་བའི་བར་ནས། འཛམ་བུའི་གླིང་དུ་རིགས་མཐོ་བ། ནོར་ཆེ་བ། རྫས་ཀྱི་ཚོགས་མང་པོ་ཞིག་ཏུ་སྐྱེས་ནས་འདོད་པ་སྤྱོད་པ་ཞིག་ཏུ་གྱུར་ཏོ་ཞེས་རྒྱ་ཆེར་བརྗོད་དོ། །ཚོང་དཔོན་ཞིག་གི་ཆུང་མར་བླངས་པ་དང ། དེ་ལ་གྲོང་གི་བཀྲབས་པ་བཞི་དང ། མཆོག་ཏུ་བཀྲབས་པ་དང་ལྔ་པོ་དེ་དག་གིས་དེ་མཐོང་བ་དང ། ་འདོད་ཆགས་ཀྱིས་ལྷག་པར་གདུངས་པར་གྱུར་ནས། དེ་ལ་ཡང་སོ་སོ་ནས་བར་མི་དག་བཏང་བ་དང ། དེས་ཀྱང་ཉན་ཏོ། །དེ་ནས་དེ་ཁྱོད་ལ་རག་ལས་པས་དེ་རིང་སོང་ཞེས་སྨྲ་ཞིང ། དེ་རྣམས་ཀྱི་སེམས་སྲུང་ཞིང་འདུག་གོ། །དེ་ནས་དེ་དག་ལ་གཅིག་གིས་འདི་སྙམ་དུ་བསམས་ཏེ་ཉི་མ་ཡང་མང་ཞིག་ཐལ་བས་དེའི་ཕྱིར་བདག་གིས་ཤེས་བྱ་བའི་བར་དུའོ། །དེས་ཀྱང་དེ་དག་ལ་བདག་དེ་རིང་འོང་ངོ་ཞེས་དུས་བཏབ་པ་དང ། དེ་དག་གིས་ཁྱོད་གང་འོང ། ཁོ་བོ་ཅག་གར་འོང་ཞེས་དྲིས་སོ། །དེས་ཀྱང་གྲོང་ཁྱེར་འདི་ནས་ཧ་ཅང་ཡང་མི་རིང་བ་ཞིག་ན་ཤིང་ནྱ་གྲོ་དྷཱ་གནམ་འཕང་དུ་མཐོ་བ། ཡལ་ག་རབ་ཏུ་འཕྱང་བ། ལོ་མ་སྟུག་པོ་ཡོད་པར་དེང་ལ། ཤིང་དེ་ལ
9.65b
འཛེགས་ཏེ་འདུག་ཤིག་དང ། བདག་དེའུ་རེ་འོང་ངོ་ཞེས་སོ་སོར་བསྟན་ནས། དེ་ཁྱོ་ལ་སྐབས་ཚོལ་ཞིང་འདུག་གོ། །དེས་ཀྱང་དེ་ལ་འདི་ནི་འདི་ལྟར་སེམས་སོ་ཞེས་བྱ་བར་འཕྲིགས་ནས། དེས་དེ་བརྡེགས་ནས་ཀ་བ་ལ་བཅིངས་སོ། །དེ་ན་གཅིག་ལ་སྨྲས་པ། ་སོང་ལ་ཤིང་དེ་ལ་འཛེགས་ཏེ། ཤར་ཕྱོགས་ཀྱི་ཤིང་གི་ཡལ་ག་ལ་འཛེགས་ལ་འདུག་ཤིག་དང ། བདག་དེའུ་རེ་འོང་ངོ་ཞེས་བྱས་པ་དང ། དེ་དགའ་མགུ་ནས་དེ་བཞིན་དུ་བྱས་སོ། །དེ་བཞིན་དུ་རྒྱས་པར་བརྗོད་དོ། །གཉིས་པ་ནི་ཤིང་དེའི་ལྷོ་ཕྱོགས་ཀྱི་ཡལ་ག་ལ་འཛེགས་ཏེ་འདུག་གོ། །གསུམ་པ་ནི་ནུབ་ཕྱོགས་ཀྱི་ཡལ་ག་ལ་འཛེགས་ཏེ་འདུག་གོ། །བཞི་པ་ནི་བྱང་ཕྱོགས་ཀྱི་ཡལ་ག་ལ་འཛེགས་ཏེ་འདུག་གོ། །མཆོག་ཏུ་བཀྲབས་པ་དེས་ཀྱང་དེ་བཞིན་དུ་བྱས་ཏེ། ཤིང་དེའི་དབུས་ཀྱི་ཡལ་ག་ལ་འཛེགས་ཏེ་འདུག་གོ། །དེ་ནས་དེ་རྣམས་དེ་ན་མཚན་གཅིག་ཏུ་ལྷགས་པར་བྲེད་བཞིན་དུ་དེ་འོང་ངོ་སྙམ་པ་ལས། ནམ་ནངས་ཀྱི་བར་དུ་བུད་མེད་དེ་ཡང་མ་འོངས་སོ། །མཚན་མོ་ཟད་དེ་ནམ་ནངས་པ་དང་ཤར་ཕྱོགས་ཀྱི་ཡལ་ག་ལ་འདུག་པ་དེས་ཚིགས་སུ་བཅད་དེ་སྨྲས་པ། འདི་ལྟར་ཉི་མ་ཤར་ཟིན་ལ། །ཞིང་པ་གྲོང་ནས་དོང་ཟིན་ཀྱང ། །བརྫུན་ཅན་མ་ནི་མ་འོངས་པར། །ནྱ་གྲོ་དྷཱ་ཡིས་ཤེས་པར་གྱིས། །ལྷོ་ཕྱོགས་ཀྱི་ཡལ་ག་ལ་འདུག་པས་སྨྲས་པ། བུད་མེད་དེ་ནི་འོངས་གྱུར་ཏེ། །དེ་ནི་བརྫུན་ཅན་མ་ཡིན་ཡང ། །ལེགས་ལྡན་ཉི་མ་འདི་ཉིད་ནི། །ཤིན་དུ་མྱུར་བར་ཤར་བར་གྱུར། །ཤར་ཕྱོགས་པས་སྨྲས་པ། རེམ་པ་འང་འོངས་སམ། སྨྲས་པ། ལོས་མོད། དེ་ནས་ནུབ་ཕྱོགས་ཀྱི་ཡལ་ག་ལ་འདུག་པས་ཚིགས་སུ་བཅད་དེ་སྨྲས་པ། ཉི་མ་དུས་སུ་ཤར་བས་ན། །ཞིང་པ་རྣམས་ཀྱང་གྲོང་ནས་དོང ། །བདག་གིས་དུས་ནི་མ་ཤེས་པས། །མཚན་གཅིག་མིག་གི་རྩེ་མ་སྦྱར། །རེ་ཤིག་ན་བྱང་ཕྱོགས་ཀྱི་ཡལ་ག་ལ་འདུག་པས་སྨྲས་པ། བདག་གིས་འདིར་ནི་དུས་ཤེས་མ་གྱུར་པས། །མཚན་གཅིག་ཐོག་ཐག་ལྷགས་པས་དོ་སོང་ངོ ། །གང་ཞིག་གཞན་གྱི་བུད་མེད་ལ་ཆགས་པ། །དེ་ནི་འདི་དང་གཞན་དག་ཐོབ་པར་འགྱུར། །དེ་ནས
9.66a
མཆོག་ཏུ་བཀྲབས་པས་སྨྲས་པ། ཁྱེད་ཅག་ལྷགས་པས་དོ་སོང་ལ། །ཁོ་བོ་མྱ་ངན་མི་བྱེད་ཀྱི། །ནྱ་གྲོ་དྷཱ་ནི་ཉེས་མེད་པར། །བཅག་པ་ལ་ནི་མྱ་ངན་བྱེད། །རེ་ཤིག་ན་ཤིང་ལ་གནས་པའི་ལྷས་དེ་དག་བསླུས་པ་མཐོང་ནས་སྔར་སྤྱོས་ཏེ་འདི་སྐད་ཅེས་སྨྲས་སོ། །བདག་ཉིད་དང་ནི་དེ་བཞིན་དུ། །མི་འདི་བཞི་ལ་མྱ་ངན་བྱོས། །དཔྱིད་ཟླ་ཐ་ཆུངས་བྱུང་བ་ན། །གང་དག་བཅད་པ་སྐྱེ་བར་འགྱུར། །དེ་དག་བུད་མེད་ལ་རེ་ཐག་ཆད་ནས་ཤོད་དུ་བབས་ཏེ་རང་རང་གི་ཁྱིམ་དུ་དོང་ངོ ། །བུད་མེད་དེ་ཡང་ཁྱིམ་ཐབ་ཀྱིས་བཀྲོལ་བ་དང ། དེ་མི་མངོན་པར་ཤིང་དེ་ག་ན་བ་དེར་སོང་བ་དང ། དེ་དག་གིས་མཐོང་ནས་སྨྲས་པ། ཅིའི་ཕྱིར་ཁྱོད་ཀྱིས་ངེད་ཅག་བསླུས། དེས་ཇི་ལྟར་གྱུར་པའི་ལོ་རྒྱུས་རྣམས་དེ་དག་ལ་སྨྲས་སོ། །དེ་ནས་དེ་དག་གིས་སྨྲས་པ། ཁྱོད་མིག་སྔར་འོངས་སོ། །དེས་འདི་སྙམ་དུ་བདག་སྐྱེས་པ་ལྔ་དང་འདི་ལྟར་ཁྱིའི་ཆོས་བྱ་བ་ག་ལ་ནུས་སྙམ་དུ་བསམས་ནས། དེས་དེ་དག་ལ་སྨྲས་པ། ཁྱེད་ཅག་ལས་གང་ཞིག་མེ་ཏོག་མཛེས་པ་ཐམས་ཅད་ཁྱེར་ཏེ་འོང་བ་དེ་དང་ལྷན་ཅིག་དགའ་བ་ཉམས་སུ་མྱོང་བར་བྱའོ། །རྒྱལ་པོའི་ཕོ་བྲང་འཁོར་དེ་ན་ཡང་རྒྱལ་པོའི་པད་མ་རྣམས་སྲུང་ཞིང་རམ་བྱེད་པ། རྣ་བ་དང ། སྣ་བཅད་པ་ཞིག་རམ་བྱེད་དོ། །དེ་དག་དེར་སོང་ནས་འདི་སྙམ་དུ་ཟོང་དག་ཁྱེར་ཏེ་མ་འོངས་མོད་ཀྱི། འོན་ཀྱང་མི་དེའི་བསྔགས་པ་བརྗོད་པ་དང ། དགའ་བར་གྱུར་ནས་བདག་ཅག་ལ་མེ་ཏོག་དག་སྟེར་ཏོ་སྙམ་དུ་བསམས་སོ། །དེ་ནས་དེ་དག་ལས་གཅིག་གིས་དེ་ལ་སྨྲས་པ། ཇི་ལྟར་སྨྱུག་མ་འདམ་བུ་དག་།བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཤིག་།མེ་ཏོག་སློང་གིས་སྩལ་བར་མཛོད། །གཉིས་པས་སྨྲས་པ། ཇི་ལྟར་ཀུ་ཤ་ཀ་ཤ་དག་།བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཤིག་།པད་མ་སློང་གིས་སྩལ་བར་མཛོད། །གསུམ་པས་སྨྲས་པ། ཇི་ལྟར་དུར་བ་འཇག་མ་དག་།བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཤིག་།མེ་ཏོག་སློང་གིས་སྩལ་བར་མཛོད། །བཞི་པས་སྨྲས་པས། ཇི་ལྟར་སྐྲ་དང་ཨག་ཙོམ་དག་།བྲེགས་ཤིང་ཕྱིར་ཡང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ
9.66b
ཤིག་།མེ་ཏོག་སློང་གིས་སྩལ་བར་མཛོད། །ལྔ་པས་སྨྲས་པ། མི་གང་པད་མ་སློང་བྱེད་པ། །དེ་ཀུན་ཁྱོད་ལ་ཀྱལ་པ་ཟེར། །པད་མ་བྱིན་རུང་མ་བྱིན་རུང ། །ཁྱོད་ཀྱི་སྣ་ནི་སྐྱེ་མི་འགྱུར། །མི་དེས་འདི་སྙམ་དུ་མི་བཞི་པོས་ནི་བདག་ལ་བྱིན་ཞིག་སྨྲས་ཀྱི། མི་ལྔ་པས་ནི་ཇི་ལྟ་བ་བཞིན་དུ་སྙིང་ནས་སྨྲས་ཀྱི། བདག་གིས་དེ་ལ་པད་མ་སྦྱིན་པར་བྱའོ་སྙམ་དུ་བསམས་ནས། དེས་དེ་ལ་པད་མ་ཇི་སྙེད་དགོས་པ་བྱིན་པ་དང ། དེ་དགའ་བ་དང ། མགུ་བ་དང ། རངས་པའི་བསམ་པས་པད་མ་བླངས་ཏེ། དེ་བུད་མེད་གང་ན་བར་སོང་ནས། དགའ་བ་ཉམས་སུ་མྱོང་བར་བྱས་སོ། །དེ་ནས་དེ་གཉིས་ཀྱིས་འདི་སྙམ་དུ་བདག་ཅག་འདོད་པའི་རྒྱུས་ཀུན་ནས་ཉོན་མོངས་པར་གྱུར་པ་གང་ཡིན་པ་ལ་ལྟོས། འདོད་ཆགས་ཀྱི་སྡུག་བསྔལ་མི་འབྱུང་བར་ཇི་ལྟར་བྱ་སྙམ་དུ་བསམས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་རང་སངས་རྒྱས་འཇིག་རྟེན་དུ་འབྱུང་བས་དེ་དང་ཧ་ཅང་མི་རིང་བ་ཞིག་ན་རང་སངས་རྒྱས་ཀྱི་མཆོད་རྟེན་ཞིག་ཡོད་པ་དེ་ལ་པད་མ་དེ་དག་ཕུལ་ནས་སྨོན་ལམ་བཏབ་པ། སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས་བདག་གང་དང་གང་དུ་སྐྱེས་པའི་ཚེ་རབས་དེ་དང་དེར་ཉོན་མོངས་པ་ཆུང་བར་གྱུར་ཅིག་ཅེས་བྱས་སོ། །དེའི་ཚེ་པད་མ་ལེན་པའི་མི་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ནོ། །དེའི་ཚེ་དེའི་དུས་ན་བུད་མེད་གང་ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཡིན་ནོ། །དེ་ལ་པད་མ་ཕུལ་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་འདོད་ཆགས་ཆུང་བར་གྱུར་ཏོ། །ཡང་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ། བཅོམ་ལྡན་འདས་སེར་སྐྱའི་བུ་མོ་བཟང་མོས་ལས་ཅི་ཞིག་བགྱིས་ཤིང་བསགས་ན། གང་གི་སླད་དུ་དེས་འཛམ་བུ་ཆུ་བོའི་གསེར་ལས་བགྱིས་པའི་གཟུགས་བརྙན་རང་གི་འོད་ཀྱིས་མོག་མོག་པོར་བགྱིས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ཉིད་ཀྱིས་ལས་གང་དག་བྱས་ཤིང་བསགས་པ་ཞེས་བྱ་བ་རྒྱས་པར་བྱའོ། །དགེ་སློང་དག་སྔོན་བྱུང་བ་འདས་པའི་དུས་བསྐལ་པ
9.67a
དགུ་བཅུ་རྩ་གཅིག་ན་སྐྱེ་དགུ་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཤེས་བྱ་བ་ནས། སངས་རྒྱས་བཅོམ་ལྡན་འདས་ཤེས་བྱ་བའི་བར་བྱུང་ངོ ། །དེ་གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེའི་ཚེ་རྒྱལ་པོའི་ཕོ་བྲང་གཉེན་ལྡན་དུ་བྱོན་ནས་ཞེས་བྱ་བ་ནས། རྒྱལ་པོའི་ཕོ་བྲང་དུ་ཞལ་ཟས་ཡོངས་སུ་ལོངས་སྤྱོད་པར་ཞུགས་སོ་ཞེས་བྱ་བའི་བར་དུའོ། །དེ་དེར་བྱོན་པ་དང་རེ་ཤིག་ན་བུ་མོ་ཞིག་རྔ་ཡབ་འཛམ་བུའི་ཆུ་བོའི་གསེར་གྱི་ཡུ་བ་ཅན་ཞིག་ཐོགས་ནས། སྣམ་ལོགས་སུ་འདུག་སྟེ་གཡོབ་པ་ན། སངས་རྒྱས་ཀྱི་འོད་ཀྱིས་འཛམ་བུའི་ཆུ་བོའི་གསེར་མོག་མོག་པོར་བྱས་སོ། །ཇི་ཙམ་ན་བུ་མོ་དེ་འདི་སྙམ་དུ་བདག་ལྕགས་ལས་བྱས་པའི་ཡུ་བ་ཅན་ཐོགས་སམ་ཇི་སྙམ་དུ་ཐེ་ཚོམ་སྐྱེས་སོ། །དེ་ནས་རྣམ་པར་གཟིགས་བཤོས་གསོལ་ནས་ཕྱིར་གཤེགས་པར་གྱུར་པ་དང ། དེས་ཡང་འཛམ་བུའི་ཆུ་བོའི་གསེར་མཆོག་ལས་བྱས་པའི་ཡུ་བར་མཐོང་ངོ ། །དེ་ནས་ཟླ་བ་གསུམ་འདས་ནས་ཞེས་བྱ་བ་ནས་ལྗོངས་རྒྱུར་གཤེགས་སོ་ཞེས་བྱ་བའི་བར་དུའོ། །དེ་ནས་རྒྱལ་པོ་གཉེན་ལྡན་གྱིས་འཛམ་བུའི་ཆུ་བོའི་གསེར་ལས་སྐུ་གཟུགས་ཤིག་བྱས་སོ། །རེ་ཤིག་ན་བུ་མོ་དེས་གསེར་ལས་བྱས་པའི་སྐུ་གཟུགས་དེ་ཁྱེར་ཏེ་འོངས་པ་དང ། རྣམ་པར་གཟིགས་ཀྱི་འོད་ཀྱིས་མོག་མོག་པོར་བྱས། ཁ་དོག་མི་འདྲ་བར་མཐོང་ནས་ཞེས་བྱ་བའི་བར་ནས་སྨོན་ལམ་བཏབ་པ། བདག་གིས་སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས་ཤེས་བྱ་བ་ནས། འདི་ལྟ་བུའི་ལུས་ཀྱི་འོད་ཅན་དུ་འགྱུར་བ་དང་ཞེས་བྱ་བར་ནས། རང་གི་འོད་ཀྱིས་མོག་མོག་པོར་བྱེད་པར་གྱུར་ཅིག་ཅེས་བྱ་བའི་བར་དུའོ། །འདིས་ཀྱང་སྨོན་ལམ་གྱི་དབང་གིས་ང་མཉེས་པར་བྱས་ཏེ་མི་མཉེས་པར་མ་བྱས་སོ། །དགེ་སློང་དག་དེ་ལྟ་བས་ན་སངས་རྒྱས་དང ། ཆོས་དང ། དགེ་འདུན་ལ་བྱ་བ་བྱས་པ་དང ། ཡང་དག་པའི་སྨོན་ལམ་ཡང་གདབ་པར་བྱ་སྟེ་ཞེས་བྱ་བ་ནས། སེར་སྐྱའི་བུ་མོ་བཟང་མོ་ལྟ་བུའོ་ཞེས་བྱ་བའི་བར་དུའོ།། །།
9.67b
དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ལྔ་པ། ་ཡང་ཞེས་བྱ་བའི་བར་ནས་དགེ་སློང་དག་སྔོན་བྱུང་བ་ཞེས་བྱ་བ་ནས། རྒྱལ་པོ་ཞིག་རྒྱལ་སྲིད་བྱེད་དོ་ཞེས་བྱ་བའི་བར་དང ། ཚོང་དཔོན་ཞིག་ཅེས་བྱ་བ་ནས། རེ་ཤིག་ན་གྲོང་ཁྱེར་གྱི་ཕྱི་རོལ་ན་དེའི་ཚེ་སྐྱེད་མོས་ཚལ་མཚེའུ་དང་མེ་ཏོག་མང་བ་ཤིང་གིས་ཡོངས་སུ་བསྐོར་བས་གཏིབས་པ། མེ་ཏོག་དང ། འབྲས་བུ་སྣ་ཚོགས་ཀྱི་ལྗོན་ཤིང་མཆོག་ཏུ་མཛེས་པ་དང་ལྡན་པ་ཞེས་བྱ་བའི་བར་དུའོ། །སངས་རྒྱས་བཅོམ་ལྡན་འདས་འཇིག་རྟེན་དུ་མི་འབྱུང་བའི་ཚེ་རང་སངས་རྒྱས་འཇིག་རྟེན་དུ་འབྱུང་བར་གྱུར་ཏེ་ཞེས་བྱ་བ་ནས། རང་སངས་རྒྱས་ནད་པ་ཞིག་ཅེས་བྱ་བའི་བར་ནས་སྨན་པའི་གན་དུ་སོང་སྟེ་ཞེས་བྱ་བའི་བར་ཏེ། སྨན་པས་སྨྲས་པ། གྲོང་དུ་བཞུད་ཅིག་ཅེས་བྱ་བ་ནས། ཚོང་དཔོན་གྱི་སྐྱེད་མོས་ཚལ་དུ་འདུག་གོ་ཞེས་བྱ་བའི་བར་དུའོ། །རེ་ཤིག་ན་ཚོང་དཔོན་གྱིས་མཐོང་ནས་ཡོ་བྱད་ཐམས་ཅད་སྦྱར་ཏེ་ཞེས་བྱ་བ་ནས་ནད་སོས་པར་གྱུར་ཏོ་ཞེས་བྱ་བའི་བར་དུའོ། །ཡོངས་སུ་མྱ་ངན་ལས་འདས་པར་གྱུར་ཅེས་བྱ་བ་ནས། སྐུ་གདུང་གི་མཆོད་རྟེན་བྱས་སོ་ཞེས་བྱ་བའི་བར་དུའོ། །རེ་ཤིག་ན་ཚོང་དཔོན་གྱིས་མཆོད་རྟེན་སྐྱ་བོར་མཐོང་སྟེ་ཞེས་བྱ་བ་ནས། ཆུང་མ་ལ་སྨྲས་པ་ཞེས་བྱ་བའི་བར་དུའོ། །དེས་དེ་ལ་ཡུང་གིས་བྱུགས་ནས་མེ་ཏོག་བཀྲམ་སྟེ་སྨོན་ལམ་བཏབ་པ། ཀྱེ་མའོ་ཨ་ལ་ལ་འཕགས་པ་ཇི་སྲིད་འཚོའི་བར་དུ་བསྙེན་བཀུར་བགྱིས་པ་དང ། ཡོངས་སུ་མྱ་ངན་ལས་འདས་ནས་ཀྱང་མཆོད་རྟེན་བརྩིགས་ཏེ་སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས་ཕྱུག་པ་དང ། ནོར་ཆེ་བ་དང ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག་།འདིས་ཇི་ལྟ་བུའི་ཆོས་རྙེད་པ་དེ་ལྟ་བུའི་ཆོས་ཁོང་དུ་ཆུད་པར་འགྱུར་བ་དང ། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བགྱིད་ཀྱི་མི་མཉེས་པར་བགྱིད་པར་མ་གྱུར་ཅིག་ཅེས་བྱས་སོ། །དགེ་སློང་དག་དེའི་ཚེ་ཚོང་དཔོན་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན
9.68a
ནོ། །དེའི་ཚེ་དེའི་དུས་ན་ཚོང་དཔོན་གྱི་ཆུང་མ་གང་ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཉིད་ཡིན་པར་གྱུར་ཏོ་ཞེས་བྱ་བ་ནས། ཡུང་གིས་བྱུགས་པས་གསེར་གྱི་མདོག་ཏུ་གྱུར་ཏོ་ཞེས་བྱ་བའི་བར་དང ། དགེ་སློང་དག་དེ་ལྟར་བསླབ་པར་བྱའོ་ཞེས་བྱ་བའི་བར་དུའོ། །ཡང་དགེ་སློང་དག་ཅེས་བྱ་བ་ནས། བཅོམ་ལྡན་འདས་བཟང་མོས་ལས་ཅི་ཞིག་བགྱིས་ན་འོད་སྲུང་ཆེན་པོ་དང་ལྷན་ཅིག་ལོ་བཅུ་གཉིས་ཀྱི་བར་དུ་མལ་གཅིག་ན་མཆིས་པའི་ཚེ་ཡང་འཁྲིག་པའི་སྦྱོར་བ་མ་བགྱིས་པར་གྱུར་ཅེས་བྱ་བའི་བར་དུའོ། །དགེ་སློང་དག་དེ་གཉིས་ཀྱིས་ལས་བྱས་ཤིང་ཞེས་བྱ་བ་ནས། གྲོང་ཁྱེར་བཱ་རཱ་ཎཱ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དོ་ཞེས་བྱ་བའི་བར་དུའོ། །རེ་ཤིག་ན་རྒྱལ་པོའི་ཕོ་བྲང་དེ་ན་གཟུགས་ཀྱིས་འཚོ་བ་བཟང་མོ་ཞེས་བྱ་བ་སྒྱུ་རྩལ་དྲུག་བཅུ་དང་ལྡན་པ། ཀར་ཤ་པ་ཎ་ལྔ་བརྒྱ་ལས་མི་ཉུང་བར་སྤྱོད་པ་ཞིག་གནས་སོ། །དེ་ནས་དུས་གཞན་ཞིག་ན་རྒྱལ་པོའི་ཕོ་བྲང་དེའི་དགའ་འདུན་པ་ལྔ་བརྒྱ་རྣམས་ཀྱིས་བཟའ་བ་དང ། བཏུང་བ་རབ་ཏུ་མང་པོ་ཁྱེར་ཏེ་ཞེས་བྱ་བ་ནས། རྒྱལ་པོའི་བུས་ཁྲིད་དེ་སོང་ངོ་ཞེས་བྱ་བའི་བར་དུའོ། །རེ་ཤིག་ན་དགའ་འདུན་པ་རྣམས་ཀྱིས་རང་སངས་རྒྱས་ལ་བསོད་སྙོམས་ཕུལ་ཏེ། སྨོན་ལམ་བཏབ་པ་ཞེས་བྱ་བ་ནས། དེའི་ཚེ་གཟུགས་ཀྱིས་འཚོ་མ་གང་ཡིན་པ་དེ་ནི་བཟང་མོ་འདི་ཡིན་ཏེ། དེའི་ཚེ་དེའི་དུས་ན་སེར་སྐྱའི་བུ་མོ་བཟང་མོ་འདི་ཉིད་དེར་གྱུར་ཏོ་ཞེས་བྱ་བ་དང ། དགའ་འདུན་པ་ལྔ་བརྒྱ་གང་ཡིན་པ་དེ་ནི་གཅེར་བུ་པ་ལྔ་བརྒྱ་འདི་ཡིན་ཏེ་ཞེས་བྱ་བའི་བར་དང ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན་ལ། ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན་པར་བལྟ་བར་བྱའོ་ཞེས་བྱ་བའི་བར་དུའོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་གསོལ་པ་ཞེས་བྱ་བ་ནས་དགྲ་བཅོམ་པ་ཉིད་ཐོབ་ནས་ཀྱང་རྒྱལ་པོ་མ་སྐྱེས་དགྲས་སུན་ཕྱུང་བར་གྱུར་ཅེས་བྱ་བའི་བར་དུའོ། །དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ
9.68b
པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ་བྱུང་སྟེ། ་བཱ་རཱ་ཎ་སཱི་ན་དྲང་སོང་སྨྲ་བ་རི་དགས་ཀྱི་ནགས་ན་བཞུགས་སོ། །དེའི་ཚེ་དེའི་དུས་ན་གྲོང་ཁྱེར་བཱ་རཱ་ཎ་སཱི་ན་ཚོང་དཔོན་ནོར་མང་བ་ལོངས་སྤྱོད་ཆེ་བ་ཞིག་ཅེས་བྱ་བ་ནས། བུ་མེད་པར་གྱུར་ཏོ་ཞེས་བྱ་བའི་བར་དང་བདག་ཤི་ནས་རྒྱལ་པོའི་ཕོ་བྲང་དུ་བསྡུས་པར་འགྱུར་རོ་སྙམ་ཞེས་བྱ་བའི་བར་དུའོ། །དེས་དེ་ལ་སྨྲས་པ། རྗེའི་སྲས་འདི་ལྟར་ཐུགས་མི་དགྱེས་པར་མ་བཞུགས་ཤིག་ཅེས་བྱ་བ་ནས། ཆུང་མ་གཉིས་བླངས་ན་བདེ་བ་ཉམས་སུ་མྱོང་བར་མི་འགྱུར་རོ་ཞེས་བྱ་བའི་བར་དུའོ། །ཆུན་མ་ལ་ནི་བུ་མོའི་འདུ་ཤེས་འཇོག་ལ་ཞེས་བྱ་བ་ནས། སྔ་མ་ཟིལ་གྱིས་གནོན་པ་ཡིན་པས་སྔ་མ་གང་ཡིན་པ་ལ་འདྲི་བར་ཡང་མི་བྱེད་དོ་ཞེས་བྱ་བའི་བར་དུའོ། །བདག་འདི་ལྟར་ཅིའི་ཕྱིར་འདུག་ཅེས་བྱ་བ་ནས། དེས་ཁྱོད་ལ་སྨྲས་པ། བདག་སྐྱབས་སུ་མཆི་ཞིང་བསླབ་པའི་གཞི་ལེན་དུ་མཆི་ཡིས་མཁྱེན་པར་མཛོད་ཅིག་ཅེས་སྨྲས་པ་དང ། དེས་ཀྱང་གནང་ངོ ། །དེ་ཡང་སྐྱབས་སུ་སོང་ནས་བསླབ་པའི་གཞི་བླང་བར་བྱས་སོ། །དེ་ནས་མི་དེ་སེམས་པ་ལ་ཞུགས་པ་ན་འདི་སྙམ་དུ། འདི་ལྟར་བདག་གིས་ཡོན་གནས་ནི་འདི་ཡིན་ནོ་ཞེས་བསམས་ཏེ་ཞེས་བྱ་བ་ནས་མེ་ཏོག་དང ། འབྲས་བུ་དང ། བཟའ་བ་ཆེས་སྔར་སྦྱིན་པར་བྱེད་ཅིང ། ཕྱིས་ནི་ཆུན་མ་དེ་ལའོ་ཞེས་བྱ་བའི་བར་དུའོ། །དེས་འདི་སྙམ་དུ། ཁྱིམ་གྱི་བྱ་བ་ཅུང་ཟད་གང་ཡིན་པ་དེ་དག་ཐམས་ཅད་ནི་བདག་བྱེད་ལ། འདི་ནི་ཉལ་ཞིང་ཟ་བ་ཡིན་པ་སྙམ་དུ་བསམས་ཏེ་ཞེས་བྱ་བ་ནས། མི་དེས་ཆུན་མ་ལ་ཀུན་དུ་སྦྱོར་བ་བྱ་བའི་ཕྱིར་བོས་པ་དང་ཞེས་བྱ་བ་ནས། དེས་སྨྲས་པ། ཆེན་མ་དང་ལྷན་ཅིག་མཛོད་ཅིག་ཅེས་སྨྲས་པའི་བར་དུའོ། །བསླབ་པའི་གཞི་བླངས་སོ་ཞེས་བྱ་བ་ནས། ཉོན་མོངས་པ་ནི་ཤིན་དུ་སྟོབས་ཆེ་བ་ཉིད་ཀྱི་ཕྱིར་ཆུང་མ་སྔ་མའི་གན་དུ་སོང་སྟེ་འཁྱུད་པ་དང ། དེས་སྨྲས་པ། རྗེའི་སྲས་ཁྱོད་ཀྱིས་བདག་འདི་ལྟར་བསླབ་པའི་གཞི་ལེན་པར་གནང་བར་བགྱིས་པ་ཉིད་མ་ལགས་སམ། ད་ལྟར་གྱི་འདི་ལྟ་བུ་ནི་རུང་བ་མ་ལགས་སོ། །དེས་དེ་ལ་ནན་གྱིས་དགའ་མགུར་སྤྱོད་དོ་ཞེས་བྱ་བའི་བར་དུའོ། །དེའི་ཚེ་ཆུན་མར་གྱུར་པ་གང
9.69a
ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཡིན་ཏེ། འདིས་དེའི་ཚེ་ཆེན་མའི་བརྟུལ་ཞུགས་གང་ཡིན་པ་ཉམས་པར་བྱས་པའི་ལས་དེའི་རྣམ་པར་སྨིན་པས་དགྲ་བཅོམ་པ་ཉིད་ཐོབ་ཀྱང་མ་སྐྱེས་དགྲས་ཞག་བདུན་དུ་སྤྱད་པར་གྱུར་ཏོ། །བཅོམ་ལྡན་འདས་ལས་ཅི་ཞིག་བགྱིས་ན་གང་གི་སླད་དུ་འདིས་དགྲ་བཅོམ་པ་ཉིད་ཐོབ་ཅིང་མངོན་པར་ཤེས་པ་མྱུར་བ་རྣམས་ཀྱི་མཆོག་ཏུ་བསྟན་ཅེས་བྱ་བ་ནས། འདིས་ལས་བྱས་ཤིང་ཤེས་བྱ་བ་དང ། ཆུང་མ་ཆུན་མར་གྱུར་ཅིང་ཁྱོ་ཤི་བར་གྱུར་ནས་ཁྱིམ་ནས་བྱུང་སྟེ། བཅོམ་ལྡན་འདས་འོད་སྲུང་གི་གསུང་རབ་ལ་ཁྱིམ་མེད་པར་རབ་ཏུ་བྱུང་ནས་དེར་འདིས་ལོ་སྟོང་ཕྲག་བཅུའི་བར་དུ་ཚངས་པར་སྤྱོད་པ་ལ་གནས་ཤིང་ཡོངས་སུ་བསྲུངས་ཏེ། ཕུང་པོ་དང ། ཁམས་དང ། སྐྱེ་མཆེད་ལ་མཁས་པ་དང ། གནས་དང་གནས་མ་ཡིན་པ་ལ་མཁས་པ་དང ། རྟེན་ཅིང་འབྲེལ་བར་འབྱུང་བ་ལ་མཁས་པར་གྱུར་ཀྱང་ཡེ་ཤེས་མཐར་ཐུག་པ་ཁོང་དུ་ཆུད་པར་མ་གྱུར་མོད་ཀྱི་འོན་ཀྱང་དེའི་ཚེ་སྨོན་ལམ་བཏབ་པ། བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་རྫོགས་པའི་བྱང་ཆུབ་ཏུ་ལུང་བསྟན་པ་དེ་བདག་གིས་མཉེས་པར་བྱེད་ཀྱི་མི་མཉེས་པར་བྱེད་པར་མ་གྱུར་ཅིག་ཅེས་བྱས་པས་འདིས་ང་མཉེས་པར་བྱས་ཏེ། མི་མཉེས་པར་མ་བྱས་ལ་ཚངས་པར་སྤྱོད་པ་གང་ཡིན་པ་ལ་གནས་ཤིང་དེ་ཡོངས་སུ་བསྐྱངས་པའི་ལས་དེའི་རྣམ་པར་སྨིན་པས་དགྲ་བཅོམ་པ་ཉིད་ཐོབ་པར་གྱུར་ཏོ། །གསུང་རབ་དེ་ལ་ཡང་དགེ་སློང་མ་གང་གི་དྲུང་དུ་རབ་ཏུ་འབྱུང་བར་བྱེད་པ་དེ། བཅོམ་ལྡན་འདས་འོད་སྲུང་གིས་དེ་མངོན་པར་ཤེས་པ་མྱུར་བ་རྣམས་ཀྱི་མཆོག་ཏུ་བསྟན་པ་དེའི་ཚེ་ཡང་འདིས་སྨོན་ལམ་བཏབ་པ། བཅོམ་ལྡན་འདས་འོད་སྲུང་གིས་བདག་གི་མཁན་པོ་མངོན་པར་ཤེས་པ་མྱུར་བའི་མཆོག་ཏུ་བསྟན་པ་ཇི་ལྟ་བ་བཞིན་དུ། བྲམ་ཟེའི་ཁྱེའུ་བླ་མ་རྫོགས་པར་བྱང་ཆུབ་པ་ཐོབ་པ་ན་བདག་ཀྱང་མངོན་པར་ཤེས་པ་མྱུར་བའི་མཆོག་ཏུ་བསྟན་པར་ཤོག་ཤིག་ཅེས་བྱ་བ་ནས། དགེ་སློང་དག་དེ་ལྟར་བསླབ་པར་བྱའོ། །ཞེས་བྱ་བའི་བར་དུའོ། །ཡང་དགེ་སློང་རྣམས་ཐེ་ཚོམ་སྐྱེས་ཏེ་ཞེས་བྱ་བ་ནས་ཚེ་དང་ལྡན་པ
9.69b
འོད་སྲུང་ཆེན་པོས་ལས་ཅི་ཞིག་བགྱིས་ཤིང་བསགས་ན། འདི་ལྟར་ལས་ཀྱི་རྣམ་པར་སྨིན་པས་ནོར་མང་བ་དང ། ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང ། དེའི་འབྱོར་པ་འདི་ལྟར་ལས་ཀྱི་མཐའ་བའི་གྲོང་སུམ་བཅུ་དང་ཞེས་བྱ་བ་ནས། གསེར་གྱི་ནས་ཀྱིས་གང་བའི་སྦྱང་བ་བརྒྱད་བཅུ་དང ། རྨོན་པ་དོར་དགུ་བརྒྱ་དགུ་བཅུ་རྩ་དགུ་ཞེས་བྱ་བའི་བར་དུའོ། །དགེ་སློང་དག་འདིས་ལས་བྱས་ཤིང་བསགས་པ་ཞེས་བྱ་བའི་བར་རྒྱས་པར་བྱའོ། །དགེ་སློང་དག་སྔོན་བྱུང་བ་འདས་པའི་དུས་ན། བསྟི་གནས་ཞིག་ན་དྲང་སྲོང་ལྔ་བརྒྱ་གནས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་རང་སངས་རྒྱས་ཕོངས་པ་དང་དམན་པ་ལ་ཕན་འདོགས་པ་འཇིག་རྟེན་དུ་བྱུང་སྟེ། བསྟི་གནས་དེ་དང་ཧ་ཅང་ཡང་མི་རིང་བ་ཞིག་ན་རང་སངས་རྒྱས་ཞིག་ཀྱང་གནས་སོ། །དེ་ནས་དྲང་སྲོང་དེ་དག་ཉིན་གཅིག་བཞིན་དུ་སྔར་ལངས་ཏེ། གནས་སྲུང་བའི་དྲང་སྲོང་བཞག་ནས། ཡམ་སྲེག་ཤིང་དང ། འབྲས་བུའི་ཕྱིར་ཕྱོགས་བཞིར་འགྲོ་བར་བྱེད་དོ། །དེ་ནས་དྲང་སྲོང་ཞིག་རང་སངས་རྒྱས་དེ་དང་ཉེ་བ་ན་ཡང་དང་ཡང་དུ་འགྲོ་བ་ན་རང་སངས་རྒྱས་དེ་སྐྱིལ་མོ་དཀྲུང་བཅས་ཏེ་འདུག་པ་མཐོང་ངོ ། །ལྡོག་པ་ན་ཡང་དེ་བཞིན་འདུག་པར་མཐོང་ནས་འདི་སྙམ་དུ། དགེ་སློང་འདི་ཉིན་པར་སྐྱིལ་མོ་དཀྲུང་འཇིག་པར་མི་བྱེད་ན། ཁ་ཟས་གང་ནས་ཇི་ལྟར་བྱེད། མ་ལ་བདག་གིས་དེ་ལ་དྲིའོ་སྙམ་དུ་བསམས་སོ། །དེས་ཡང་འདི་སྙམ་དུ་ད་ལྟར་ཉེ་བར་སོང་སྟེ་དྲིར་ནི་དྲང་སྲོང་དེ་དག་གིས་བདག་དགེ་སློང་དང་ལྷན་ཅིག་འགྲོགས་པ་མཐོང་བ་དང་འཕྱ་བར་འགྱུར་བས་གང་གི་ཚེ་བདག་བསྟི་གནས་སྲུང་བར་གྱུར་པ་དེའི་ཚེ་བག་ཚ་བ་མེད་པར་དྲིའོ་སྙམ་དུ་བསམས་སོ། །དེ་ནས་དུས་གཞན་ཞིག་ན་དེ་ལ་བསྟི་གནས་སྲུང་བ་བབ་སྟེ། དྲང་སྲོང་དེ་དག་དོང་བ་དང ། རང་སངས་རྒྱས་གང་ན་བ་དེར་སོང་སྟེ་ཕྱིན་ནས་དེ་ལ་དྲིས་པ། འཕགས་པ་བདག་ཉིན་ཅིག་བཞིན་དུ་ཁ་ཟས་དང་འབྲས་བུའི་དོན་དུ་ཕན་ཚུན་དུ་འགྲོ་བར་བྱེད་པ་ན། ཁྱོད་སྐྱིལ་མོ་དཀྲུང་བཤིག་པ་འམ། བསོད་སྙོམས་ཀྱི་དོན་དུ་འགྲོ་བར་བདག་གིས་ལན་འགའ་ཡང་མ་མཐོང་ན། ་ཁྱོད་དགའ་བ་ཟ་འམ་ཅི། དེས
9.70a
སྨྲས་པ། དགའ་བ་ཟ་བ་མ་ཡིན་ཏེ། གང་གི་ཚེ་ཟས་ཀྱི་དུས་ལ་བབ་པ་དེའི་ཚེ་བསོད་སྙོམས་ཀྱི་དོན་དུ་སོང་སྟེ། འདིར་ཁྱེར་ཏེ་འོངས་ནས་ཟ་བར་བྱེད་དོ། །དེས་དྲིས་པ། བསོད་སྙོམས་ཀྱི་ཕྱིར་གང་དུ་འགྲོ་བར་བྱེད། དེས་སྨྲས་པ། བྱང་གི་སྒྲ་མི་སྙན་དུའོ། །སྒྲ་མི་སྙན་ཅི་འདྲ། དེས་སྨྲས་པ། བདག་གིར་ཡོངས་སུ་འཛིན་པ་མེད་པ། ཚེ་ངེས་པ། ཁྱད་པར་ཅན་དུ་འགྲོ་ཞིང ། དེ་ནས་ཤི་འཕོས་ནས་ཀྱང་ཁྱད་པར་ཅན་དུ་འགྲོ་བར་འགྱུར་བའོ། །འོན་ཏེ་བྱང་གི་སྒྲ་མི་སྙན་དུ་མི་འགྲོ་བ་དེའི་ཚེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་ཁ་ཟས་བསོད་སྙོམས་བྱེད་དོ། །དེས་དྲིས་པ། སུམ་བཅུ་རྩ་གསུམ་གྱི་ལྷ་རྣམས་ཅི་འདྲ། དེས་སྨྲས་པ། ཁ་དོག་དང་ལྡན་པ། བདེ་བ་མང་བ། གཞལ་མེད་ཁང་མཐོན་པོ་ཅན། ཚེ་རིང་བ། ཡུན་རིང་དུ་གནས་པ། དུས་རིང་པོར་གནས་པ་ཡིན་ནོ། །དེས་འདི་སྙམ་དུ། འདི་ནི་བདག་ཉིད་ཆེན་པོ་ཞིག་ཡིན་པས་མ་ལ་དེ་རིང་གི་བསོད་སྙོམས་བདག་གིས་དབུལ་ལོ་སྙམ་དུ་བསམས་ནས། དེས་རང་སངས་རྒྱས་དེ་ལ་སྨྲས་པ། འཕགས་པ་དེང་བདག་གིས་བསོད་སྙོམས་འབུལ་གྱི་རྗེས་སུ་གཟུང་དུ་གསོལ། དེས་སྨྲས་པ། ཁྱོད་ཀྱང་ཁྱིམ་གྱི་གནས་ནས་ངེས་པར་བྱུང་བ་ཡིན་ན། ཁྱོད་ཀྱིས་ཇི་ལྟར་ང་ལ་བསོད་སྙོམས་སྦྱིན་པར་སེམས། དེས་སྨྲས་པ། དེ་ལྟ་ལགས་མོད་ཀྱི་འོན་ཀྱང་ངེས་པར་བདག་ལ་ཕན་གདགས་པར་མཛད་དུ་གསོལ། ཁྱོད་ནི་དཔལ་དང་བསོད་ནམས་ཡིན། །ཁྱོད་ནི་ཆོས་འཆད་རྣམས་ཀྱི་མཆོག་།ཁྱོད་ཀྱི་བརྩོན་པས་འཇིག་རྟེན་འདི། །ཀུན་ནས་བརྒྱན་པ་བཞིན་དུ་གྱུར། །དེས་ཀྱང་ཁས་བླངས་སོ། །དེ་ནས་དྲང་སྲོང་གིས་དེས་ཅང་མི་སྨྲ་བས་ཁས་བླངས་པར་རིག་ནས་རང་གི་བསྟི་གནས་སུ་སོང་ངོ ། །དེ་ན་ཡང་དེས་སྔ་ན་ཁྲེ་རྒོད་བྲེའུ་ཆུང་གང་ཞིག་དྲུས་ཏེ་བཞག་པ་དེ་དེས་དཀྲབས་ནས་བསྟི་གནས་དེ་དང་ཧ་ཅང་མི་རིང་བ་ན་ཕྱུགས་ལྷས་ཞིག་ཡོད་པ་དེར་སོང་སྟེ། དེ་ནས་འོ་མ་བླངས་ཏེ་འོ་མའི་ནང་དུ་བཙོས་ནས། བཙོས་ཟིན་པ་དང་རང་སངས་རྒྱས་དེ་ལ་བསོད་སྙོམས་ཕུལ་ལོ། །བཙུན་པ་དེས་ཀྱང་དེ་ལ་ཕན་གདགས་པའི་དོན་དུ་བསོད་སྙོམས་དེ་བླངས་ནས་ལུས་ཀྱིས་ཆོས་བསྟན་པའི་ཕྱིར་ངང་པའི་རྒྱལ་པོ་འདབ་མ་བརྐྱང་བ་ལྟ་བུར་ནམ་མཁའི་དཀྱིལ་དུ་འཕགས་སོ། །དེས
9.70b
དེ་མཐོང་ནས་མཆོག་ཏུ་དད་པར་གྱུར་ཏེ། དགའ་བ་དང་མགུ་བ་དང ། རངས་པའི་ཡིད་ཀྱིས་པུས་མོ་ས་ལ་བཙུགས་ཏེ་སྨོན་ལམ་བཏབ་པ། བསོད་སྙོམས་ཕུལ་ཏེ་སྦྱིན་པར་བྱ་བའི་ཆོས་ཡོངས་སུ་བཏང་བ་འདིས་བདག་ནམ་དུ་ཡང་སེམས་ཅན་དམྱལ་བ་དང ། དུད་འགྲོ་དང ། ཡི་དགས་སུ་སྐྱེ་བར་མ་གྱུར་ཅིག་།རྟག་ཏུ་ལྷ་རྣམས་ཀྱི་ནང་དུ་སྐྱེ་ཞིང ། དེ་ནས་ཤི་འཕོས་ན་ཡང་བྱང་གི་སྒྲ་མི་སྙན་དུ་སྐྱེ་བ་དང ། དེ་ནས་ཀྱང་སླར་ལྷ་རྣམས་ཀྱི་ནང་དུ་དང ། འདིས་ཡོན་ཏན་གྱི་ཚོགས་ཐུགས་སུ་ཆུད་པ་གང་ཡིན་པ་དེ་དག་ཀྱང་ཁོང་དུ་ཆུད་པར་འགྱུར་བ་དང ། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་མི་མཉེས་པར་བྱེད་པར་མ་གྱུར་ཅིག་ཅེས་བྱས་སོ། །དགེ་སློང་དག་དེའི་ཚེ་དེའི་དུས་ན་དྲང་སྲོང་དུ་གྱུར་པ་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ནོ། །དེའི་ཚེ་དེའི་དུས་ན་འདིས་ཁྲེ་རྒོད་བྲེའུ་ཆུང་གང་ཕུལ་བའི་ལས་དེའི་རྣམ་པར་སྨིན་པས་ལན་སྟོང་དུ་བྱང་གི་སྒྲ་མི་སྙན་དུ་སྐྱེས་སོ། །ལན་སྟོང་དུ་ལྷ་རྣམས་ཀྱི་ནང་དུ་སྐྱེས་སོ། །ལྷ་རྣམས་ནས་ཤི་འཕོས་ནས་ཀྱང་བྲམ་ཟེའི་རིགས་སུ་སྐྱེས་པར་གྱུར་ཏོ། །སྨོན་ལམ་གྱི་དབང་གིས་རང་སངས་རྒྱས་བྱེ་བ་བརྒྱ་སྟོང་ལས་ཆེས་ཁྱད་པར་དུ་འཕགས་པའི་སྟོན་པ་ང་ཡང་མཉེས་པར་བྱས་ཤིང ། འདིས་ཡོན་ཏན་གྱི་ཚོགས་དེ་ཡང་ཐོབ་པར་གྱུར་ཏོ། །དགེ་སློང་དག་དེ་ལྟ་བས་ན་སངས་རྒྱས་དང ། ཆོས་དང་དགེ་འདུན་ལ་བཀུར་སྟི་བྱས་ཤིང་སྦྱིན་པ་དབུལ་བ་དང ། བསོད་ནམས་ཀྱང་བྱའོ། །དེ་ལྟར་བྱས་ན་རྣམ་པ་འདི་ལྟ་བུའི་ཡོན་ཏན་གྱི་ཚོགས་ཅན་དུ་འགྱུར་ཏེ། འོད་སྲུང་ཇི་ལྟ་བ་དེ་བཞིན་དུ་དགེ་སློང་ཁྱེད་ཀྱིས་བསླབ་པར་བྱའོ། །ཡང་དགེ་སློང་རྣམས་ཐེ་ཚོམ་སྐྱེས་པ་དེ་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཚེ་དང་ལྡན་པ་འོད་སྲུང་ཆེན་པོས་ལས་ཅི་ཞིག་བགྱིས་ཤིང་བསགས་པའི་ལས་ཀྱི་རྣམ་པར་སྨིན་པས་འདི་ལྟར་རབ་ཏུ་བྱུང་ཞིང་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་ཐོབ་ཅིང ། བཅོམ་ལྡན་འདས་ཀྱིས་འདོད་པ་ཆུང་བ་དང ། ཆོག་ཤེས་པ་དང ། སྦྱངས་བའི་ཡོན་ཏན་སྨྲ་བ་རྣམས་ཀྱི་མཆོག་ཏུ་བསྟན། བཅོམ་ལྡན་འདས་ཀྱིས
9.71a
བཀའ་སྩལ་པ། དགེ་སློང་དག་འདིས་ལས་བྱས་ཤིང་བསགས་པ་ཞེས་རྒྱས་པར་བྱའོ། །དགེ་སློང་དག་སྔོན་བྱུང་བ་འདས་པའི་དུས་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བྱུང་ངོ ། །དེའི་གསུང་རབ་ལ་འདི་རབ་ཏུ་བྱུང་བར་གྱུར་ཏེ། དེར་འདིས་ལོ་སྟོང་ཕྲག་བཅུའི་བར་དུ་ཚངས་པར་སྤྱོད་པ་ལ་གནས་ཤིང ། ཡོངས་སུ་བསྲུངས་ཀྱང་མཐར་ཐུག་པའི་ཡེ་ཤེས་མ་བསྐྱེད་མོད་ཀྱི་འོན་ཀྱང་འཆི་བའི་དུས་ཀྱི་ཚེ་སྨོན་ལམ་བཏབ་པ། བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་ཁྱོད་མ་འོངས་པའི་དུས་ན་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་གང་ཡིན་པ་དེ་བདག་གིས་མཉེས་པར་བྱེད་ཀྱི་མི་མཉེས་པར་བྱེད་པར་མ་གྱུར་ཅིག་ཅེས་བྱས་སོ། །དེ་ན་ཡང་དགེ་སློང་གང་གི་དྲུང་དུ་རབ་ཏུ་འབྱུང་བར་བྱེད་པ་དེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་འདོད་པ་ཆུང་བ་དང ། ཆོག་ཤེས་པ་དང ། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་བསྟན་པ་དེ་ན་ཡང་འདིས་སྨོན་ལམ་བཏབ་པ། ཡང་དག་པར་རྫོགས་པའི་སངས་རྒྱས་འོད་སྲུང་གིས་བདག་གིས་མཁན་པོ་འདོད་ཆགས་ཆུང་བ་དང ། ཆོག་ཤེས་པ་དང ། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་བསྟན་པ་དེ་བཞིན་དུ། བྲམ་ཟེའི་ཁྱེའུ་བླ་མས་རྫོགས་པའི་བྱང་ཆུབ་ཐོབ་པ་ན་བདག་ཀྱང་ལུང་བསྟན་པ་ཐོབ་པར་ཤོག་ཤིག་ཅེས་བྱས་སོ། །དགེ་སློང་དག་དེར་ཚངས་པར་སྤྱོད་པ་ལ་གནས་པས་དེ་འདི་ལ་འབྲས་བུ་ཐོབ་པར་གྱུར་ཏོ། །དེར་དབང་པོ་ཡོངས་སུ་སྨིན་པར་བྱས་པས་དེ་འདི་ལ་རྣམ་པར་གྲོལ་ལོ། །དེར་སྨོན་ལམ་བཏབ་པ་གང་ཡིན་པ་དེས་དེ་འདི་ལ་ལུང་བསྟན་པར་གྱུར་ཏོ། །དགེ་སློང་དག་དེ་ལྟ་བས་ན་གུས་པར་ལུང་དབོག་པར་བྱ། ཀླག་པར་བྱ། ཕུང་པོ་དང ། ཁམས་དང ། སྐྱེ་མཆེད་དང་གནས་དང ། གནས་མ་ཡིན་པ་དང ། རྟེན་ཅིང་འབྲེལ་བར་འབྱུང་བ་ལ་མཁས་པར་བྱའོ། །དེ་བཞིན་དུ་ཡང
9.71b
དག་པའི་སྨོན་ལམ་གདབ་སྟེ། དེས་ན་ཁྱེད་ཅག་གི་ཡོན་ཏན་གྱི་ཚོགས་བསྐྱེད་པར་འགྱུར་བས་དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། ་་་་་་་་་།བར་སྡོམ་ལ། ཞིང་པ་དང་ནི་རྫ་མཁན་དང ། །ཚོང་དཔོན་རས་ཡུག་འཚོ་བ་དང ། །མཆོད་རྟེན་ཡུང་གི་བྱུག་པ་དང ། །སྨད་འཚོང་མ་དང་ཆེན་ཆུང་དང ། །ཕྱུག་དང་འདོད་པ་ཆུང་བ་ཡི། །སྡེ་ཚན་དུ་ནི་བསྟན་པ་ཡིན། །ཕས་ཕམ་པ་བརྒྱད་ཀྱི་སྡོམ་གྱི་ཚིགས་སུ་བཅད་པ་སྟེ། ་་་་་་་སྡོམ་ལ། མི་ཚངས་སྤྱོད་དང་རྐུ་བ་དང ། །མི་གསོད་པ་དང་བརྫུན་སྨྲ་དང ། །རི་དགས་འཛིན་དང་སྤོས་འཚོང་དང ། །མཛའ་ཅན་མ་དང་གྲེ་ལས་སྐྱེས། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་ཨུཏྤ་ལའི་མདོག་གྲོང་ཁྱེར་ཆེན་པོ་དྲུག་ན་སྨད་འཚོང་མ་བྱེད་པར་གྱུར་པ་དེའི་ཚེ་བྲམ་ཟེ་ཞིག་དེ་ལ་སེམས་ལྷག་པར་ཆགས་པར་གྱུར་ནས་དེར་སོང་སྟེ། མེ་ཏོག་དང ། འབྲས་བུ་དང ། སོ་ཤིང་རྣམས་ཀྱིས་བསྙེན་བཀུར་བྱེད་པར་གྱུར་ཏོ། །དེ་ནས་ཨུཏྤ་ལའི་མདོག་གིས་བྲམ་ཟེ་དེ་ལ་འདི་སྐད་ཅེས་སྨྲས་སོ། །ཁྱོད་ནི་རིགས་མཐོ་བ་ཡིན་ལ། བདག་ནི་རིགས་དམའ་བ་ཡིན་ན། ཅིའི་ཕྱིར་འདིར་འོངས། དེ་སྐད་ཅེས་སྨྲས་པ་དང ། བྲམ་ཟེས་ཨུཏྤ་ལའི་མདོག་ལ་འདི་སྐད་ཅེས་སྨྲས་སོ། །བདག་ཁྱོད་དང་ལྷན་ཅིག་ཕྲད་འདོད་པའི་ཕྱིར་རོ། །དེས་འདི་སྐད་ཅེས་སྨྲས་སོ། །གལ་ཏེ་ཁྱོད་ལ་ཀར་ཤ་པ་ཎ་དག་ཡོད་ན་ཕྱིས་ནས་ལྷན་ཅིག་ཕྲད་པར་བྱའོ། །དེ་ནས་བྲམ་ཟེ་དེས་ཨུཏྤ་ལའི་མདོག་ལས་ཚིག་དེ་ཐོས་ནས་ཀར་ཤ་པ་ཎའི་དོན་དུ་ལྗོངས་དག་ཏུ་སོང་ངོ ། །དེ་ནས་ཨུཏྤ་ལའི་མདོག་དུས་གཞན་ཞིག་ན། དགེ་བའི་བཤེས་གཉེན་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བརྟེན་ནས་སྨད་པའི་ལས་རྣམས་སྤངས་ཏེ་དགྲ་བཅོམ་པ་ཉིད་ཀྱང་ཐོབ་པར་གྱུར་ཏོ། །དེ་ཡང་ཉིན་པར་ནགས་ཚལ་ཐིབས་པོར་འདུག་པ་ལ་གོམས་པ་ཡིན་པས་དེ་ནས་ཨུཏྤ་ལའི་མདོག་ནགས་ཚལ་ཐིབས་པོར་ཉིན་པར་འདུག་ཏུ་སོང་ངོ ། །བྲམ་ཟེ་དེ་ཡང་ཀར་ཤ་པ་ཎ་ཁྱེར་ཏེ། གྲོང་དང ། གྲོང་ཁྱེར་དང ། ཡུལ་འཁོར་དང །
9.72a
རྒྱལ་པོའི་ཕོ་བྲང་འཁོར་དུ་སོང་ནས་འདྲི་ཞིང་འདྲི་ཞིང་མཉན་ཡོད་དུ་ཕྱིན་ཏོ། །དེ་ནས་བྲམ་ཟེ་དེ་ཨུཏྤ་ལའི་མདོག་གང་ན་བ་དེར་སོང་སྟེ་ཕྱིན་ནས་ཨུཏྤ་ལའི་མདོག་ལ་རྒྱལ་བ་སྤེལ་བ་བྱས་ཏེ་འདི་སྐད་ཅེས་སྨྲས་སོ། །ཀྱེ་ཀར་ཤ་པ་ཎ་དག་བཞེས་ཤིག་དེས་ཀྱང་བསམས་ནས་བྲམ་ཟེ་ལ་འདི་སྐད་ཅེས་སྨྲས་སོ། །བྲམ་ཟེ་བདག་གིས་ནི་དམ་པའི་ཆོས་མ་ཡིན་པ་དེ་སྤངས་སོ། །དེ་སྐད་ཅེས་སྨྲས་པ་དང ། བྲམ་ཟེས་ཨུཏྤ་ལའི་མདོག་ལ་འདི་སྐད་ཅེས་སྨྲས་སོ། །གལ་ཏེ་ཁྱོད་ཀྱིས་སྤངས་ཀྱང་བདག་གིས་ནི་མ་སྤངས་སོ། །དེ་ནས་ཨུཏྤ་ལའི་མདོག་གིས་བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཁྱོད་བདག་གི་ཡན་ལག་གི་ཆ་གང་ལ་སེམས་ལྷག་པར་ཆགས་པར་གྱུར། དེས་འདི་སྐད་ཅེས་སྨྲས་ཏེ། མིག་ལའོ། །དེས་མིག་དེ་རྫུ་འཕྲུལ་གྱིས་ལག་མཐིལ་དུ་བཞག་སྟེ། བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་གལ་ཏེ་འདོད་ན་ལོང་ཤིག་།དེ་ནས་བྲམ་ཟེས་མིག་དེ་མཐོང་བ་དང་ཁྲོས་འཁྲུགས་རྔམ་པར་གྱུར་ཏེ། དགེ་སློང་མ་ཨུཏྤ་ལའི་མདོག་གི་གླད་དུ་ཁུ་ཚུར་གཅིག་བསྣུན་ནས་སོང་ངོ ། །དེ་ནས་ཨུཏྤ་ལའི་མདོག་གིས་སྐབས་དེ་དགེ་སློང་མ་རྣམས་ལ་སྨྲས་སོ། །དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བུད་མེད་ནི་མཐུ་སྟོབས་ཆུང་བ། གཡོན་ཅན་དང ། འཕྱོན་མ་དང ། ཟོལ་བ་ལ་སོགས་པས་འདོད་པར་བྱ་བ་ཡིན་པས་དེའི་ཕྱིར་དེང་ཕྱིན་ཆད་དགེ་སློང་མས་དགོན་པར་གནས་པར་མི་བྱའོ། །བཅོམ་ལྡན་འདས་ཀྱིས་གང་གི་ཚེ་དགེ་སློང་མ་ལ་དགོན་པ་བཀག་པ་དེའི་ཚེ་སྲང་དང ། བཞི་མདོ་དང ། ་སུམ་མདོ་དག་ཏུ་གནས་པ་ན། གཡོན་ཅན་ལ་སོགས་པས་ཀྱང་བགྲོད་པར་གྱུར་ཏོ། །རེ་ཤིག་ན་དེ་དག་དེ་ན་གནས་པར་གྱུར་པ་དེའི་ཚེ་མཉན་ཡོད་ན་རི་དགས་འཛིན་གྱི་བུ་དགེ་བསྙེན་ས་ག་ཞེས་བྱ་བ་དད་པ་དང་ལྡན་པ་དགེ་བའི་བསམ་པ་བཟང་བ་བསླབ་པའི་གཞི་ལྔ་དང་ལྡན་པ་དེས་དགེ་སློང་མ་བབ་བབ་ཏུ་འདུག་པ་དེ་དག་མཐོང་ནས་དེས་དེ་དག་ལ་གནས་བཙལ་ཏེ་བྱིན་ནས། ་འཕགས་མ་དག་འདིར་ཅི་བདེར་བཞུགས་ཤིག་ཅེས་བྱས་པ་དང ། དེ་དག་ཀྱང་དེར
9.72b
འདུག་གོ། །དེའི་ཚེ་དགེ་སློང་མའི་དབྱར་ཁང་ན་དགེ་སློང་མ་སྦོམ་དགའ་མོ་ཞེས་བྱ་བ་གཟུགས་བཟང་བ། ་མཛེས་པ། བལྟ་ན་སྡུག་པ། འདོད་ཆགས་ཆེ་བ། སྐྱེས་པའི་ཡིད་དུ་འོང་བ་ཞིག་འདུག་གོ། །དེ་ནས་དུས་གཞན་ཞིག་ན་དགེ་སློང་མ་དགེ་བསྐོས་བཞགས་སྟེ། དགེ་སློང་མའི་དགེ་འདུན་སྔ་དྲོའི་དུས་ཀྱི་ཚེ་ཤམ་ཐབས་བགོས། ཆོས་གོས་དང ། ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །དེ་ནས་དགེ་སློང་མ་སྦོམ་དགའ་མོ་ཞེས་བྱས་ཏེ་དེ་ཉིད་ནས་སླར་ལོག་སྟེ་དེ་རི་དགས་འཛིན་གྱི་བུ་འདུག་པ་དེ་ལ་ཆགས་པ་ཡིན་པས་དེས་དེ་ལ་བརྡའ་བྱས་པ་དང ། དེ་མ་འདོད་ནས་དེས་འདི་སྐད་ཅེས་སྨྲས་སོ། །གང་འདོད་པ་ན་གང་མི་འདོད་པ་དེ་དག་ནི་དེ་བཞིན་དུ་འགྱུར་རོ། །དེ་ནས་རི་དགས་འཛིན་གྱི་བུས་སྦོམ་དགའ་མོ་ལ་འདི་སྐད་ཅེས་སྨྲས་སོ། །སྲིང་མོ་ཁྱོད་ནི་རབ་ཏུ་བྱུང་བ་ཡིན་ལ་བདག་ནི་དགེ་བསྙེན་ཡིན་པའི་སྟེང་དུ་ཁྱོད་ཀྱང་རྒྱལ་པོས་སླས་ཀྱི་བཙུན་མོའི་ཐབས་ཐོབ་པ་ཡིན་ལ། གལ་ཏེ་བདག་གིས་ཀྱང་ཉེས་པར་སྤྱོད་པ་འདི་ལྟ་བུ་སྤྱད་པ་རྒྱལ་པོས་ཤེས་པར་གྱུར་ན། དེས་བདག་མཚན་མོ་འདི་ཉིད་ནས་སྡུག་བསྔལ་གྱི་བསྐལ་པ་ཅན་དུ་འགྱུར་རོ། །དེ་ནས་སྦོམ་དགའ་མོས་རི་དགས་འཛིན་གྱི་བུ་དེ་ལ་འདི་སྐད་ཅེས་སྨྲས་སོ། །ཁྱིམ་བདག་གི་བུ་རྒྱལ་པོའི་རྟོག་ཆེན་པོ་བདག་ཅག་གི་ཕྱི་བཞིན་དུ་འབྲང་ངམ་ཅི། གལ་ཏེ་བདག་ཅག་ཀྱང་འདོད་ལ་ཁྱོད་ཀྱང་འདོད་པར་གྱུར་པ་དེ་ལྟར་འདུག་པ་ལ་སུ་ཞིག་བདག་ལ་འཕྲིགས་པར་འགྱུར། དེ་སྐད་ཅེས་སྨྲས་ཀྱང་རི་དགས་འཛིན་གྱི་བུ་མ་བཏུབ་བོ། །དེ་ནས་དགེ་སློང་སྦོམ་དགའ་མོས་འདི་སྙམ་དུ་ཅི་བདག་ལུས་ཞིག་ནས་འཆི་བར་བྱ་བ་འམ། མ་ལ་བདག་གི་ཡན་ལག་དང་སྤྲད་པ་ཙམ་བདག་གིར་བྱའོ་སྙམ་བསམས་ཤིང་བརྟགས་ནས་རི་དགས་འཛིན་གྱི་བུ་ལ་འདི་སྐད་ཅེས་གལ་ཏེ་ཁྱིམ་བདག་གི་བུ་མི་འདོད་ན་ཡན་ལག་དང་ཡན་ལག་ཙམ་རེག་པར་བྱའོ་ཞེས་སྨྲས་ནས་དེས་དེ་པང་དུ་བླངས་ཏེ་པུས་མོ་ཡན་ཅད་དང་མིག་མན་ཆད་སྤྲད་ཀུན་ཏུ་སྤྲད་པར་བྱས་པ་ལས་སྦྱོར་བ་དེ་ཡང་དགེ་སློང་མ་དགེ་བསྐོས་མས་ཚོར་བར་གྱུར་ཏོ། །དགེ་སློང་མའི་དགེ་འདུན་མ་ཡང་མཉན་ཡོད་དུ་བསོད་སྙོམས་བྱས་ནས་ཟས་ཀྱི་བྱ་བ་བྱས་ཏེ་ཟས་ཕྱི་མའི་བསོད་སྙོམས་སྤངས་ནས
9.73a
སླར་ལོག་པ་ན་རི་དགས་འཛིན་གྱི་བུའི་གནས་གང་ཡིན་པ་དེར་སོང་ངོ ། །དེ་ནས་དགེ་སློང་མ་དགེ་བསྐོས་མ་དེས་དེ་དག་ལ་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག་རི་དགས་འཛིན་གྱི་བུ་འདིས་བདག་ཅག་ལ་ཆོས་ཀྱི་དོན་དུ་གནས་དབེན་པ་རབ་ཏུ་བྱིན་སྙམ་ན་འདིས་ནི་མགོ་རེག་མོ་རྣམས་སླས་ཀྱི་བཙུན་མོ་ལྟ་བུར་བཞག་པར་བདག་གིས་འཕྲིགས་ཀྱིས། ཀྱེ་ཕུ་ནུ་མོ་དག་ཁྱེད་གང་ལ་ཚུལ་ཁྲིམས་དགོས་པ་དེ་དག་གཞན་དུ་དེང་ཤིག་།དེ་དག་གིས་དེ་ལ་དྲིས་པ། དེ་ཇི་ཞིག་།དེས་དགེ་སློང་མ་རྣམས་ལ་སྐབས་དེ་རྒྱས་པར་སྨྲས་སོ། །དགེ་སློང་མ་རྣམས་ཀྱིས་ཀྱང་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ངའི་གཉི་གའི་དགེ་འདུན་གྱིས་དོན་ཤེས་པ་དང ། ངས་བསླབ་པའི་གཞི་ཡང་ལེགས་པར་བཅས་པར་འགྱུར་རོ་སྙམ་ནས་བྱུང་བ་འདི་དང་གླེང་གཞི་འདི་དང ། དངོས་པོ་འདི་དང ། སྐབས་འདི་ལ་གཉི་གའི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་ཀྱི་མི་མཁྱེན་པར་མ་ཡིན། དུས་སུ་ཡིན་གྱི་དུས་སུ་མ་ཡིན་པར་མ་ཡིན་དོན་དང་ལྡན་པར་ཡིན་གྱི་དོན་དང་མི་ལྡན་པར་མ་ཡིན་ཏེ། སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་མི་ལྡན་པར་རྨེད་པ་ནི་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་དགེ་སློང་མ་སྦོམ་དགའ་མོ་ལ་རྨས་པ། དགེ་སློང་མ་ཁྱོད་ཀྱིས་འདི་ལྟར་ཚུལ་མ་ཡིན་པ། མི་མཛེས་པར་བྱས་པ་བདེན་ནམ། བཅོམ་ལྡན་འདས་བགྱིས་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱི་རྣམ་གྲངས་དུ་མས་རྣམ་པར་སྨད་ནས་དགེ་སློང་མའི་དགེ་འདུན་ལ་བཀའ་སྩལ་པ། དགེ་སློང་མ་དག་དེ་ལྟ་བས་ན་ཕན་ཡོན་བཅུ་པོ་འདི་ལྟ་སྟེ། དགེ་འདུན་བསྡུ་བར་བྱ་བའི་ཕྱིར་དང ། དགེ་འདུན་ལེགས་པར་བྱ་བའི་ཕྱིར། དགེ
9.73b
འདུན་འཐུན་པར་བྱ་བའི་ཕྱིར་དང ། དགེ་འདུན་བདེ་བར་གནས་པར་བྱ་བའི་ཕྱིར་དང ། གནོང་མི་བཀུར་བའི་གང་ཟག་ཚར་གཅད་པའི་ཕྱིར་དང ། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང ། མ་དད་པ་རྣམས་དད་པར་བྱ་བའི་ཕྱིར་དང ། དད་པ་རྣམས་ཕྱིར་ཞིང་རྒྱས་པར་བྱ་བའི་ཕྱིར་དང ། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང ། ཚེ་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང ། ཚངས་པར་སྤྱོད་པ་རྗེས་སུ་གཟུང་བར་བྱ་བའི་ཕྱིར་དང ། ཚངས་པར་སྤྱོད་པ་ཡོངས་སུ་རྫོགས་པར་བྱ་བའི་ཕྱིར་དང ། བསྟན་པ་འཐུན་པར་བྱ་བའི་ཕྱིར་དང ། ངའི་བསྟན་པ་ཡངས་པར་གྱུར་པ་སྐྱེ་བོ་མང་པོ་ལ་ཕན་པ། ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བ་ལ་ཡང་དག་པར་གཟིགས་ནས་འདུལ་བ་ལ་ཉན་ཐོས་མ་རྣམས་ཀྱི་བསླབ་པའི་གཞི་བཅའ་བར་བྱའོ། །ངའི་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་ཆགས་པར་གྱུར་པས་སྐྱེས་པ་ཆགས་པ་དང་ལྷན་ཅིག་པུས་མོ་ཡན་ཆད་མིག་མན་ཆད་སྤྲད་ཀུན་ཏུ་སྤྲད་པ་ཉམས་སུ་མྱོང་བར་བྱེད་ན་དགེ་སློང་མ་དེ་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཆགས་པར་གྱུར་པས་ཞེས་བྱ་བ་ནི་ཆགས་པས་དང ། ཡང་དག་པར་ཞེན་པས་དང ། ཀུན་ནས་དཀྲིས་པས་སོ། །སྐྱེས་པ་ཞེས་བྱ་བ་ནི་རི་དགས་འཛིན་གྱི་བུ་འམ། དེ་ལས་གཞན་པ་གང་ཡང་རུང་བའོ། །ཆགས་པ་ཞེས་བྱ་བ་ནི་ཆགས་པ་དང ། ཡང་དག་པར་ཞེན་པ་དང ། ཀུན་ནས་དཀྲིས་པའོ། །མིག་མན་ཆད་པུས་མོ་ཡན་ཆད་ཅེས་བྱ་བ་ནི་དེའི་བར་དུའོ། །སྤྲད་ཀུན་དུ་སྤྲད་པ་ཞེས་བྱ་བ་ནི་གཏུགས་ཤིང་ཀུན་དུ་གཏུགས་པའོ། །བདག་གིར་བྱེད་པ་ཞེས་བྱ་བ་ནི་ཀུན་ནས་ཉམས་སུ་མྱོང་བར་བྱེད་པའོ། །དགེ་སློང་མ་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པའོ། །དགེ་སློང་མའི་དངོས་པོ་གང་ཞེ་ན། བསྙེན་པར་རྫོགས་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། མཐར་ཕྱིན་པར་བྱེད་པ་ཉིད་དང ། དེའི་ཁས་ལེན་པ་དང ། མངོན་པར་ཁས་ལེན་པ་དང ། དེ་ཡང་བསྙེན་པར་རྫོགས་པའི་ཚེ་ངག
9.74a
དང ། ཚིག་དང ། ཐ་སྙད་དང ། ་སྐད་དང ། བརྗོད་པ་དང ། ངེས་པའི་ཚིག་དང ། ཚིག་གི་ལམ་དང ། ཚིག་ཏུ་བརྗོད་པ་དང ། ངག་གི་ལས་དང ། ངག་གི་རྣམ་པར་རིག་བྱེད་ཀྱིས་ཁས་ལེན་པ་གང་ཡིན་པ་འདི་ནི་བསྙེན་པར་རྫོགས་པ་ཞེས་བྱའོ། །དེ་ཞེས་བྱ་བ་འདི་ནི་ཉེ་བར་བསྟན་པ་དང ། ཀུན་དུ་བསྟན་པའི་ཚིགས་བླ་དགས་སོ། །ཕས་ཕམ་པར་གྱུར་པ་ཡིན་པས་ཤེས་བྱ་བ་ནི་དེ་ཐ་མ་དང་ལྟུང་བ་དང ། ་དམན་པ་དང ། ཐ་ཆད་དང ། བསྙིལ་བ་དང ། ཡིད་དང་མི་མཐུན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་མར་མི་རུང་བར་འགྱུར། ཤཱཀྱའི་སྲས་སུ་མི་རུང ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ། བཅོམ་པ། ལྟུང་བ། ཕམ་པ། རྒྱབ་ཀྱིས་ཕྱོགས་པར་བྱས་པ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་བྱས་པ་ཡིན་ནོ། །འདི་ལྟ་སྟེ། ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་དེ་བཞིན་དུ། དགེ་སློང་མ་གང་གིས་ལྟུང་བ་དེ་བྱས་ན་བྱས་མ་ཐག་ཏུ་ཞེས་བྱ་བ་སྔ་མ་བཞིན་ནོ། །གནས་པར་མི་བྱའོ་ཞེས་བྱ་བ་ནི་དགེ་སློང་མ་རྣམས་ཀྱིས་དེ་དང་གསོ་སྦྱོང་དང ། དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་མི་བྱ་བའོ། །ཡང་དགེ་སློང་མ་བཅུ་གཉིས་པོ་དག་ཏུ་དེ་བསྐོ་བར་མི་བྱའོ། །དེ་ལ་ལྟུང་བར་མི་ལྟར་འགྱུར་ཞེ་ན། ་་་་་་་་་སྡོམ་ལ། ཆགས་པ་སྐྱེས་པ་ཆགས་པ་ཡི། །ལུས་དང་མིག་ནི་མན་ཆད་དང ། །པུས་མོའི་གོང་ནི་ཡན་ཆད་ཀྱིས། །སྤྲད་ན་ཕས་ཕམ་འགྱུར་པ་ཡིན། །སྐྱེས་པ་ཆགས་པར་མ་གྱུར་པ། །དེ་ནི་སྦོམ་པོ་ཉིད་དུ་འགྱུར། །བྱིན་པ་དང་ནི་འཕྲལ་བ་རྣམས། །དེ་དག་ཉེས་བྱས་ཉིད་དུ་འགྱུར། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་དང་ལྷན་ཅིག་མིག་མན་ཅད་པུས་མོ་ཡན་ཆད་སྤྲད་ཀུན་དུ་སྤྲད་པ་ཉམས་སུ་མྱོང་བར་བྱེད་ན་ཕས་ཕམ་པར་འགྱུར་རོ། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་མེད་པ་དང་ལྷན་ཅིག་མིག་མན་ཆད་པུས་མོ་ཡན་ཆད་སྤྲད་ཀུན་ཏུ་སྤྲད་པ་ཉམས་སུ་མྱོང་བར་བྱེད་ན་སྦོམ་པོར་འགྱུར་རོ། །ཡང་དགེ་སློང་མ་གང་ཆགས་པ་མེད
9.74b
པས་སྐྱེས་པ་དང་ལྷན་ཅིག་མིག་མན་ཆད་པུས་མོ་ཡན་ཆད་སྤྲད་ཀུན་དུ་སྤྲད་པ། ཉམས་སུ་མྱོང་བར་བྱེད་ན་སྦོམ་པོར་འགྱུར་རོ། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་དང་ལྷན་ཅིག་འཕྲལ་བ་ཡན་ཆད་བྱིན་པ་མན་ཆད་སྤྲད་ཀུན་དུ་སྤྲད་པ་བདག་གིར་བྱེད་ན་སྦོམ་པོར་འགྱུར་རོ། །ཡང་དགེ་སློང་མ་གང་ཆགས་པ་མེད་པས་སྐྱེས་པ་ཆགས་པ་དང་ལྷན་ཅིག་འཕྲལ་བ་ཡན་ཆད་བྱིན་པ་མན་ཆད་སྤྲད་ཀུན་དུ་སྤྲད་པ་བདག་གིར་བྱེད་ན་ཉེས་བྱས་སུ་འགྱུར་རོ། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་མེད་པ་དང་ལྷན་ཅིག་འཕྲལ་བ་ཡན་ཆད་བྱིན་པ་མན་ཆད་སྤྲད་ཀུན་དུ་སྤྲད་པ་བདག་གིར་བྱེད་ན་ཉེས་བྱས་སུ་འགྱུར་རོ། །ཡང་དགེ་སློང་མ་གང་ཆགས་པ་མེད་པས་སྐྱེས་པ་ཆགས་པ་མེད་པ་དང་ལྷན་ཅིག་འཕྲལ་བ་ཡན་ཆད་བྱིན་པ་མན་ཆད་སྤྲད། ཀུན་དུ་སྤྲད་པ་བདག་གིར་བྱེད་ན་ཉེས་བྱས་སུ་འགྱུར་རོ། །ཕས་ཕམ་པར་གྱུར་པ་ལྔ་པ་རྫོགས་སྷོ།། ་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་སྤོས་འཚོང་གི་ཁྱེའུ་གཟུགས་བཟང་བ་མཛེས་པ། བལྟ་ན་སྡུག་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ་དེ་ཆུང་མ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་བླངས་ནས་རིང་པོ་མ་ལོན་པར་དེ་ནས་དགེ་སློང་མ་སྦོམ་དགའ་མོ་སྤོས་འཚོང་གི་ཁྱེའུ་དེ་ལ་ཆགས་པར་གྱུར་ཏོ། །དེ་སྤོས་འཚོང་གི་ཁྱེའུ་དེའི་གན་དུ་སོང་སྟེ། འདི་སྐད་ཅེས་སྨྲས་སོ། །བཞིན་བཟང་ཁྱོད་ཅིག་བག་མ་སར་པས་སེམས་མགུ་འམ། དེས་འདི་སྐད་ཅེས་སྨྲས་སོ། །འཕགས་མ་གལ་ཏེ་མགུ་བར་གྱུར་ན་ཡང་དོན་འདི་ཁྱོད་ལ་ཅི་དགོས། གལ་ཏེ་མ་མགུ་བར་གྱུར་ན་ཡང་དོན་འདི་ཁྱོད་ལ་ཅི་དགོས། དེ་སྐད་ཅེས་སྨྲས་པ་དང ། སྦོམ་དགའ་མོས་སྤོས་འཚོང་གི་ཁྱེའུ་ལ་འདི་སྐད་ཅེས་སྨྲས་སོ། །ངས་ཀོ་ཁྱོད་དང་ལྷན་ཅིག་དགོས་པ་ཅུང་ཟད་ཅིག་བྱ་བར་ནུས་སྙམ་ན་ཅུང་ཟད་ཀྱང་མི་བཟོད་ན་དེར་ཟད་དོ། །དེ་ནས་སྤོས་འཚོང་གི་ཁྱེའུ་དེས་དགེ་སློང་མ་འདི་ནི་སེམས་ཆགས་པར་གྱུར་ཏོ་སྙམ
9.75a
དུ་བསམས་སོ། །དེ་དེའི་དྲུང་དུ་ཡང་དང་ཡང་དུ་སོང་ནས་བརྡ་བྱེད། དུས་འདེབས། མཚན་མ་སྟོན་པར་བྱེད་ཅིང ། འཕྱར་གཡེང་དང ། གཞོག་སྟེགས་དང ། ཙབ་ཧྲལ་དག་ཀྱང་བྱེད་དོ། །དེ་ནས་སྤོས་འཚོང་གི་ཁྱེའུ་དེ་དུས་གཞན་ཞིག་ན་སྦོམ་དགའ་མོའི་དྲུང་དུ་འོངས་པ་དང ། དེས་དེ་གཡོགས་ཏེ་བཞག་གོ། །དེ་ནས་སྦོམ་དགའ་མོ་གཙུག་ལག་ཁང་གི་ཕྱི་རོལ་དུ་སོང་སྟེ་རྐང་ལག་བཀྲུས་ནས་སློབ་མ་དང་ཉེ་གནས་རྣམས་ལ་བསྒོ་བ་བྱས་ནས་སྤོས་འཚོང་གི་ཁྱེའུ་དེ་དང་དབེན་པར་སོང་སྟེ་འདུག་གོ། །རེ་ཤིག་ན་དེས་འཁྲིག་ཐབས་སུ་བཅུག་པ་དང ། དེའི་ཚེ་སྤོམ་དགའ་མོས་འདི་སྙམ་དུ་བདག་དགེ་སློང་མ་རྣམས་ཀྱི་གོང་དུ་འགྲོ་བ་གང་ཅི་ཡང་རུང་བ་དེ་དག་ཐམས་ཅད་ནི་ཚུལ་ཁྲིམས་དང ། བརྟུལ་ཞུགས་དང ། ཚངས་པར་སྤྱོད་པ་ལ་གནས་པའི་དྲིན་ཡིན་ན། གལ་ཏེ་ད་བདག་གིས་རྣམ་པ་འདི་ལྟ་བུའི་ཉེས་པར་སྤྱོད་པ་སྤྱད་པས་དགེ་སློང་མ་ཉམས་པར་བྱས་ན་སུ་ཞིག་བདག་ལ་དྲི་བར་བྱེད་སྙམ་དུ་སེམས་བསྐྱེད་ཅིང་བསམས་ནས་སྦོམ་དགའ་མོས་སྤོས་འཚོང་གི་ཁྱེའུ་དེ་ལ་འདི་སྐད་ཅེས་སྨྲས་སོ། །བཞིན་བཟང་ཐོང་ཐོང ། དེ་ནས་སྤོས་འཚོང་གི་ཁྱེའུ་དེས་འདི་སྙམ་དུ་གདོན་མི་ཟ་བར་འདི་ནི་མི་བདེ་བ་ཞིག་ཏུ་འདུག་གོ་སྙམ་དུ་བསམས་ནས་དེས་ཀྱང་བཏང་ངོ ། །དེ་ནས་སྦོམ་དགའ་མོས་རྒྱབ་བདེ་བར་བཞག་སྟེ་རྐང་པ་གཡས་པ་བསྐུམས་ནས་སྤོས་འཚོང་གི་ཁྱེའུ་དེ་ལ་རྡོག་པ་གཅིག་རྒྱབ་ནས་རྩིབ་མ་གཉིས་བཅག་གོ། །དེ་ནས་སྤོས་འཚོང་གི་ཁྱེའུ་དེ་ཁྲག་ཏུ་སྐྱུག་བཞིན་དུ་བྲོས་ཏེ་སོང་ངོ ། །དེ་ནས་སྦོམ་དགའ་མོས་དབྱར་ཁང་གི་དབུས་སུ་འདུག་ནས་བདུད་བཅོམ་མོ། །བདུད་བཅོམ་མོ་ཞེས་བོས་སོ། །དེ་ནས་དགེ་སློང་མ་དེ་དག་གིས་ཐོས་ནས་འདི་སྐད་ཅེས་སྨྲས་སོ། །ཅི་ཕུ་ནུ་མོ་ཁྱོད་ཀྱིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སམ། ལན་ཅིག་ཕྱིར་འོང་བའི་འབྲས་བུ་འམ། ཕྱིར་མི་འོང་བའི་འབྲས་བུ་འམ། འབྲས་བུའི་མཆོག་དགྲ་བཅོམ་པ་ཉིད་མངོན་སུམ་དུ་བྱས། ཆུང་ངུ་ན་གཞན་དག་སངས་རྒྱས་ཀྱི་བསྟན་པ་ལ་དགེ་བའི་རྩ་བ་བསྐྱེད། དེས་འདི་སྐད་ཅེས་སྨྲས་སོ། །ཅང་མ་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །འོ་ན་ཁྱོད་ཀྱིས
9.75b
བདུད་ཇི་ལྟ་བུ་ཞིག་བཅོམ། ་དེས་སྐབས་དེ་དག་ཕལ་མོ་ཆེའི་ནང་དུ་སྨྲས་སོ། །དེ་ནས་དགེ་སློང་མ་དེ་དག་གིས་སྦོམ་དགའ་མོ་ལ་འདི་སྐད་ཅེས་སྨྲས་སོ། །ཁྱོད་རེམ་པ་ཞིག་དང་མ་ཕྲད་དུ་ཟད་ཀྱི་དེ་ལྟ་བུ་ཞིག་ན་ཁྱོད་ཐག་བཅུག་པར་འགྱུར་རོ། །དེ་ནས་དགེ་སློང་མ་མང་པོ་རྣམས་ཀྱིས་སྦོམ་དགའ་མོས་སྨྲས་ཀྱང་དགའ་བར་ཡང་མི་བྱེད། ཁྲོ་བར་ཡང་མི་བྱེད་དོ། །དགའ་བར་ཡང་མི་བྱེད། ཁྲོ་བར་ཡང་མི་བྱེད་པ་དང་སྟན་ལས་ལངས་ཏེ་དོང་ངོ ། །དེ་ནས་དགེ་སློང་མ་མང་པོས་སྐབས་དེ་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། དངོས་པོ་འདི་དང ། སྐབས་འདི་ལ་ཞེས་བྱ་བ་ནས་སྐྱེ་བོ་མང་པོ་ལ་ཕན་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཞེས་བྱ་བའི་བར་དུ་སྔ་མ་ཇི་ལྟ་བ་དེ་བཞིན་དུ་བརྗོད་པར་བྱའོ། །ཡང་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་ཆགས་པར་གྱུར་པས་སྐྱེས་པ་ཆགས་པ་དང་ལྷན་ཅིག་བརྡའ་བྱེད་དམ། དུས་འདེབས་སམ། མཚན་མ་སྟོན་ཏམ། འཕྱར་གཡེང་དང ། གཞོག་སྟེགས་དང ། ཙབ་ཧྲལ་བྱས་པས་སྐྱེས་པ་འོངས་པ་བདག་གིར་བྱེད་ཅིང ། གང་དུ་བུད་མེད་སྐྱེས་པས་བགྲོད་པར་བྱར་རུང་བ་ཕྱིར་བཟློག་ཏུ་མེད་པའི་གནས་སུ་ལུས་བཀན་ཏེ་གནས་བརྒྱད་པོ་འདི་དག་ཏུ་དགེ་སློང་མས་ལྟུང་བ་བྱས་ན་བྱས་མ་ཐག་ཏུ་དགེ་སློང་མར་མི་རུང་བ་ཡིན་གྱིས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཆགས་པར་གྱུར་པས་ཤེས་བྱ་བ་ནི་ཆགས་པས་དང ། ཡང་དག་པར་ཞེན་པས་དང ། ཀུན་ནས་དཀྲིས་པས་སོ། །སྐྱེས་པ་ཞེས་བྱ་བ་ནི་སྤོས་འཚོང་གི་ཁྱེའུ་འམ། དེ་ལས་གཞན་པ་གང་ཡང་རུང་བའོ། །ཆགས་པ་ཞེས་བྱ་བ་ནི་ཆགས་པ་དང ། ཡང་དག་པར་ཞེན་པ་དང ། ཀུན་ནས་དཀྲིས་པའོ། །བརྡ་བྱེད་པ་ཞེས་བྱ་བ་ནི་གང་གི་ཚེ་བདག་དཔོང་ས་འམ། ལྷ་ཁང་ལ་སོགས་པ་ཆེ་གེ་མོ་ཞིག་ན་མཐོང་བ་ནའོ། །དུས་འདེབས་པ་ཞེས་བྱ་བ་ནི་སྔ་དྲོ་དང །
9.76a
ཉི་མའི་གུང་དང ། ཕྱི་དྲོ་གང་ཡིན་པ་དེའི་ཚེ་ཤོག་ཤིག་ཅེས་ཟེར་བའོ། །མཚན་མ་སྟོན་ཏམ་ཞེས་བྱ་བ་ནི་གང་གི་ཚེ་བདག་སྐྲ་བྲེགས་ནས་རིང་པོ་མ་ལོན་ཞིང་སྣམ་སྦྱར་དམར་སེར་གྱོན་པར་མཐོང་བ་དེའི་ཚེ་ནའོ། །འཕྱར་གཡེང་དང་ཞེས་བྱ་བ་ནི་ཕྱས་འདོགས་པའོ། །གཞོག་སྟེགས་ཞེས་བྱ་བ་ནི་ཀུན་དུ་རྩེ་བའོ། །ཙབ་ཧྲལ་ཞེས་བྱ་བ་ནི་ཀུན་དུ་ཅ་ཅོ་འདོན་པའོ། །སྐྱེས་པ་འོངས་པ་བདག་གིར་བྱེད་ཅེས་བྱ་བ་ནི་ཉམས་སུ་མྱོང་བར་བྱེད་པའོ། །གང་དུ་བུད་མེད་སྐྱེས་པས་བགྲོད་པར་བྱར་རུང་བ་ཕྱིར་བཟློག་ཏུ་མེད་པའི་གནས་སུ་ཞེས་བྱ་བ་ནི་དབང་དུ་འགྱུར་བའོ། །ལུས་བཀན་པ་ཞེས་བྱ་བ་ནི་ཁོག་པའོ། །གནས་བརྒྱད་པོ་འདི་དག་ཏུ་ཞེས་བྱ་བ་ནི་བསྟེན་པ་གང་ཡིན་པ་དེ་དག་ཏུའོ། །དགེ་སློང་མ་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པའོ། །དགེ་སློང་མའི་དངོས་པོ་གང་ཞེ་ན། བསྙེན་པར་རྫོགས་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང ། རྟོག་པ་ཉིད་དང ། ཡང་དག་པར་རྟོག་པ་ཉིད་དང ། ་མཐར་ཕྱིན་པར་བྱེད་པ་ཉིད་དང ། ཡང་དག་པར་མཐར་ཕྱིན་པར་བྱེད་པ་ཉིད་དང ། དེའི་ཁས་ལེན་པ་ཉིད་དང ། ཉེ་བར་ཁས་ལེན་པ་དང ། མངོན་པར་ཁས་ལེན་པ་ཞེས་བྱ་བ་སྔ་མ་བཞིན་ནོ། །ལྟུང་བ་བྱས་ན་ཞེས་བྱ་བ་ནི་ལྷག་པར་སྤྱད་ནའོ། །བྱས་མ་ཐག་ཏུ་ཞེས་བྱ་བ་ནི་དེའི་མོད་ཉིད་ལའོ། །དེ་ཞེས་བྱ་བ་ནི་ཉེ་བར་བསྟན་པ་དང ། ཀུན་དུ་བསྟན་པའི་ཚིག་བླ་དགས་སོ་ཞེས་བྱ་བ་ནས། དགེ་སློང་མ་བཅུ་གཉིས་པོ་དག་ཏུ་བསྐོ་བར་མི་བྱའོ་ཞེས་བྱ་བའི་བར་དུའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་གང་ཆགས་པས་སྐྱེས་པ་ཆགས་པ་དང་ལྷན་ཅིག་བརྡ་བྱེད་ན་ལྟུང་བ་སྦོམ་པོར་འགྱུར་རོ། །དུས་འདེབས་ནའང་སྦོམ་པོར་འགྱུར་རོ། །མཚན་མ་སྟོན་ན་སྦོམ་པོར་འགྱུར་རོ། །འཕྱར་གཡེང་བྱེད་ན་སྦོམ་པོར་འགྱུར་རོ། །གཞོག་སྟེགས་བྱེད་ན་སྦོམ་པོར་འགྱུར་རོ། །ཙབ་ཧྲལ་བྱེད་ན་སྦོམ་པོར་འགྱུར་རོ། །སྐྱེས་པ་འོངས་པ་བདག་གིར་བྱེད་ན་སྦོམ་པོར་འགྱུར་རོ། །གང་དུ་བུད་མེད་སྐྱེས་པས་བགྲོད་པར་བྱར་མི་རུང་བ
9.76b
སླར་བཟློག་ཏུ་རུང་བའི་གནས་སུ་ལུས་བཀན་ན་སྦོམ་པོར་འགྱུར་རོ། །གང་དུ་བུད་མེད་སྐྱེས་པས་བགྲོད་པར་བྱར་རུང་བ་ཕྱིར་བཟློག་ཏུ་མེད་པའི་གནས་སུ་ལུས་བཀན་ན་ཕས་ཕམ་པའི་ལྟུང་བར་འགྱུར་རོ། །ལས་དང་པོ་པ་ལ་སོགས་པ་ལ་ཉེས་པ་མེད་དོ། །དགེ་སློང་མའི་རྣམ་པར་འབྱེད་པ་ལས། ཕས་ཕམ་པར་གྱུར་པ་དྲུག་པ་རྫོགས་སྷོ།། ་་་་་་་་་་།།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་དགེ་སློང་མ་མཛའ་མོ་རང་གི་དམ་བཅས་པ་ལས་ཉམས་པར་གྱུར་པ་དེའི་ཚེ་དེ་ཉམས་པས་ཕུ་ནུ་མོ་མཛའ་ཅན་མ་ངུས་པར་གྱུར་ཏོ། །དགེ་སློང་མ་རྣམས་ཀྱིས་དེ་ལ་སྨྲས་པ། མཛའ་ཅན་མ་ཅི་བཅོམ་ལྡན་འདས་ཀྱིས་ཚོགས་པའི་མཐའ་འབྲལ་བར་འགྱུར་བའོ། །ཞེས་མ་གསུངས་སམ་ཅི་ན་ངུ་བར་བྱེད། དེས་འདི་སྐད་ཅེས་སྨྲས་སོ། །བདག་མཛའ་མོ་འདི་ཆོས་འདུལ་བ་འདི་ལས་ཉམས་པ་དེའི་ཕྱིར་ནི་མི་ངུ་མོད་ཀྱི། འོན་ཀྱང་གང་གི་ཕྱིར་སྔོན་ཅད་ཀྱང་དེ་འདི་ལྟ་བུ་དང་འདི་ལྟ་བུ་དག་བྱེད་པ་དེའི་ཕྱིར་ངུའོ། །དེ་དག་གིས་འདི་སྐད་ཅེས་སྨྲས་སོ། །དེ་ཁྱོད་ཀྱིས་ཤེས་སམ། དེས་འདི་སྐད་ཅེས་སྨྲས་སོ། །བདག་གིས་ཤེས་སོ། །ཅིའི་ཕྱིར་ཁྱོད་ཀྱིས་ངེད་ཅག་ལ་སྔར་མ་སྨྲས། དེས་འདི་སྐད་ཅེས་སྨྲས་སོ། །ཕུ་ནུ་མོ་སྡུག་པའི་ཕྱིར་མོད་དེ་ནས་དགེ་སློང་མ་མང་པོས་དགེ་སློང་མ་མཛའ་ཅན་མ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་ཀྱིས་ནི་ཁ་ན་མ་ཐོ་བ་བཅབ་པ་ཡིན་ནོ་ཞེས་བྱ་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱོད་ཀྱིས་འདི་ལྟར་ཚུལ་མ་ཡིན་པ་མི་མཛེས་པ་དེ་ལྟ་བུ་བྱས་པ་བདེན་ནམ། བཅོམ་ལྡན་འདས་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རུང་བ་མ་ཡིན་པ། ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །རྣམ་གྲངས་དུ་མས་རྣམ་པར་སྨད་ནས། དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་ངས་ཕན་ཡོན
9.77a
བཅུ་ཡང་དག་པར་གཟིགས་ནས་ཉན་ཐོས་མའི་འདུལ་བ་ལ་བསླབ་པའི་གཞི་བཅའ་བར་མཛད་དོ་ཞེས་བྱ་བ་ནས། ་བསླབ་པ་བཅས་པ་རྒྱས་པར་བརྗོད་པར་བྱའོ། །ཡང་དགེ་སློང་མ་གང་དགེ་སློང་མའི་ལྟུང་བ་ཤེས་བཞིན་དུ་འཆབ་པར་བྱེད་ཅིང་གང་གི་ཚེ་དགེ་སློང་མ་དེ་ཤི་བར་གྱུར་ཏམ། ཉམས་སམ། འཁྱམས་སམ། འཕོས་པར་གྱུར་པ་དེའི་ཚེ་དགེ་སློང་མ་དེས་འདི་སྐད་ཅེས་དགེ་སློང་མ་དེ་ལ་ལྟུང་བ་འདི་ལྟ་བུ་དང་འདི་ལྟ་བུ་དག་བྱུང་བར་སྔ་ནས་ཤེས་སོ་ཞེས་དེ་སྐད་ཟེར་ན་དགེ་སློང་མ་དེ་ཡང་ཁ་ན་མ་ཐོ་བ་བཅབས་པས་ཕས་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་མཛའ་ཅན་མ་འམ། ་དེ་ལྟ་བུ་དང་འཐུན་པ་དག་གོ། །དགེ་སློང་མ་ཞེས་བྱ་བ་ནི་མཛའ་མོ་འོ། །ལྟུང་བ་ཞེས་བྱ་བ་ནི་བརྒྱད་པོ་དག་ལས་གང་ཡང་རུང་བའོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་མཐོང་བ་འམ། ་དེ་ལས་གཞན་གྱིས་སྨྲས་པར་གྱུར་ནས་སོ། །བཅབས་ན་ཞེས་བྱ་བ་ནི་ཁྱུད་ནས་སོ། །གང་གི་ཚེ་དགེ་སློང་མ་དེ་ཤི་བར་གྱུར་ཏམ་ཞེས་བྱ་བ་ནི་དེའི་སྲོག་གི་དབང་པོ་འགགས་པར་གྱུར་པའོ། །ཉམས་སམ་ཞེས་བྱ་བ་ནི་བསླབ་པ་ཕུལ་བའོ། །འཁྱམས་སམ་ཞེས་བྱ་བ་ནི་ཡུལ་བཏང་བར་གྱུར་ནའོ། །འཕོས་པར་གྱུར་ཅེས་བྱ་བ་ནི་གཞན་མུ་སྟེགས་ཅན་གྱི་གནས་ལ་རྟེན་པའོ། །དེའི་ཚེ་དགེ་སློང་མ་དེ་ཞེས་བྱ་བ་ནི་མཛའ་ཅན་མའོ། །དགེ་སློང་མ་འདི་ཞེས་བྱ་བ་ནི་ཆོས་འདི་པ་རྣམས་ཀྱིའོ། །འདི་ལ་ལྟུང་བ་འདི་ལྟ་བུ་དང་འདི་ལྟ་བུ་དག་བྱུང་བར་སྔ་ནས་ཤེས་སོ། །ཞེས་བྱ་བ་ནི་བརྒྱད་པོ་དག་ལས་གང་ཡང་རུང་བ་དག་གོ། །དེ་སྐད་ཟེར་ན་ཞེས་བྱ་བ་ནི་སྨྲས་ནའོ། །དགེ་སློང་མ་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པ་དེའོ། །དགེ་སློང་མའི་དངོས་པོ་གང་ཞེ་ན། བསྙེན་པར་རྫོགས་པའོ། །བསྙེན་པར་རྫོགས་པ་གང་ཞེ་ན། གཞན་ཐམས་ཅད་རྒྱས་པར་བརྗོད་པར་བྱའོ། །དེ་ཞེས་བྱ་བ་ནི་བསྟན་པ་དང ། ཉེ་བར་བསྟན་པའི་ཚིག་བླ་དགས་སོ། །དགེ་སློང་མ་བཅུ་གཉིས་པོ་དག་ཏུ་དེ་བསྐོ་བར་མི་བྱའོ་ཞེས་བྱ་བའི་བར་དུའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མའི་ཁ་ན་མ་ཐོ་བ་ཤེས་བཞིན
9.77b
དུ་བཅབས་ན་ཇི་ལྟར་ཡང་རུང་སྟེ་ཐམས་ཅད་དུ་ཕས་ཕམ་པར་འགྱུར་རོ། །དགེ་སློང་མའི་རྣམ་པར་འབྱེད་པ་ལས་ཕས་ཕམ་པར་གྱུར་པ་བདུན་པ་རྫོགས་སྷོ།། ་་་་་་་་་་་་་་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་དགེ་སློང་གྲེ་སྐྱེས་ཤེས་བྱ་བ་ཞིག་གནས་པ་ཐབ་མོ་བྱེད་པ། མཚང་འདྲུ་བར་བྱེད་པ། འགྱེད་པར་བྱེད་པ། རྩོད་པར་བྱེད་པ། ཐབ་ཀྲོལ་བྱེད་པ་དེས་དགེ་འདུན་རྣམས་ཀྱིས་གནས་ནས་དབྱུང་བའི་ལས་བྱས་སོ། །དགེ་སློང་གྲེ་སྐྱེས་གནས་ནས་དབྱུང་བའི་ལས་བྱས་པར་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཐོས་སོ། །ཐོས་ནས་ཀྱང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་འདི་སྐད་ཅེས་གསོལ་ཏོ། །བཙུན་པ་དགེ་སློང་འགའ་ཞིག་དགེ་འདུན་གྱིས་གནས་ནས་དབྱུང་བའི་ལས་བགྱིས་པར་གྱུར་ན་དེ་ལ་བདག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། མཐོང་བར་གྱུར་ན་ཕྱག་མི་བྱ་བར་སྟན་ལས་ལྡང་བར་བྱའོ། །བཙུན་པ་དགེ་སློང་གྲེ་སྐྱེས་འདི་ཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ་འཐབ་ཀྲོལ་བགྱིད་པ། དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་གྱུར་ཏེ། དགེ་སློང་གི་དགེ་འདུན་རྣམས་ཀྱིས་དེ་གནས་ནས་དབྱུང་བའི་ལས་བགྱིས་པར་གྱུར་ན་དེ་ལ་བདག་ཅག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཕྱག་བྱ་བའི་འོས་མ་ཡིན་པའི་སྡོམ་པར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པར་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་མ་རྣམས་ལ་ཡང་དག་པར་བསྒོ་ནས། དགེ་འདུན་མ་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་མ་ཅིག་གིས་གསོལ་བ་བྱས་ཏེ་ལས་བྱའོ། །འདི་ལྟར་བྱ
9.78a
སྟེ། འཕགས་མའི་དགེ་འདུན་ཕུ་ནུ་མོ་བདག་ལ་གསན་དུ་གསོལ། ་དགེ་སློང་གྲེ་སྐྱེས་འདི་འཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། འཐབ་ཀྲོལ་བགྱིད་པ། དགེ་སློང་མ་རྣམས་དང ། ཤིན་དུ་འདྲེ་བས་ལྷན་ཅིག་གནས་པར་གྱུར་ཏེ། དེ་དགེ་སློང་གི་དགེ་འདུན་གྱིས་གནས་ནས་དབྱུང་བའི་ལས་བགྱིས་ཀྱིས། གལ་ཏེ་དགེ་སློང་མའི་དགེ་འདུན་མས་དུས་ལ་བབ་ཅིང་བཟོད་ན་དགེ་སློང་མའི་དགེ་འདུན་གྱིས་དགེ་སློང་གྲེ་སྐྱེས་ཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ཐབ་ཀྲོལ་བགྱིད་པ། དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་གྱུར་ནས་དགེ་སློང་གི་དགེ་འདུན་གྱིས་གནས་ནས་དབྱུང་བའི་ལས་བགྱིས་པ་དེ་ཕྱག་བགྱི་པའི་འོས་མ་ལགས་པའི་སྡོམ་པ་གང་ལགས་པ་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་གྲེ་སྐྱེས་འདི་འཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ཐབ་ཀྲོལ་བགྱིད་པ་དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་གྱུར་ནས་དགེ་སློང་གི་དགེ་འདུན་གྱིས་དེ་གནས་ནས་དབྱུང་བའི་ལས་བགྱིས་པར་གྱུར་པ་ལས། དགེ་སློང་མའི་དགེ་འདུན་མས་དགེ་སློང་གྲེ་སྐྱེས་ཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ཐབ་ཀྲོལ་བགྱིད་པ། དགེ་སློང་མ་རྣམས་དང ། ཤིན་དུ་འདྲེ་བས་ལྷན་ཅིག་གནས་པར་གྱུར་ཏེ། དགེ་སློང་གི་དགེ་འདུན་གྱིས་གནས་ནས་དབྱུང་བའི་ལས་བགྱིས་པ་དེ་ཕྱག་བགྱི་བའི་འོས་མ་ཡིན་པའི་སྡོམ་པ་དེ་བསྒོ་བ་མཛད་དོ། །དགེ་སློང་མ་གང་དག་དགེ་སློང་གྲེ་སྐྱེས་ལ་ཕྱག་བྱ་བའི་འོས་མ་ཡིན་པའི་སྡོམ་པ་སྩལ་བ་ལ་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འཕགས་མའི་དགེ་འདུན་མ་རྣམས་ཀྱིས་བཟོད་ཅིང་གནང་སྟེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་གི་ཚེ་དགེ་འདུན་རྣམས་ཀྱིས་དགེ་སློང
9.78b
གྲེ་སྐྱེས་གནས་ནས་དབྱུང་བའི་ལས་བྱས་ཤིང ། དགེ་སློང་མའི་དགེ་འདུན་རྣམས་ཀྱིས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བ་མཛད་པ་དེའི་ཚེ་དགེ་སློང་གྲེ་སྐྱེས་ཀྱིས་འདི་སྙམ་དུ་བདག་གིས་ཉེས་པ་བྱས་པས་དགེ་སློང་གི་དགེ་འདུན་གྱིས་གནས་ནས་དབྱུང་གྲང་ན། དགེ་སློང་མའི་དགེ་འདུན་ལ་བདག་གིས་ཉེས་པ་ཅི་ཞིག་བྱས་ནས་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བ་མཛད་པ་འདི་ལྟར་བདག་གིས་སྐྱེ་དགུའི་བདག་མོ་ཆེན་མོ་གཽ་ཏ་མི་གང་ན་བ་དེར་སོང་སྟེ་ཕྱིན་ནས་དོན་འདི་འདྲི་བར་བྱའོ་སྙམ་དུ་བསམས་ཏེ། དགེ་སློང་གྲེ་སྐྱེས་སྐྱེ་དགུའི་བདག་མོ་ཆེན་མོ་གཽ་ཏ་མི་གང་ན་བ་དེར་སོང་སྟེ་ཕྱིན་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །སྲིང་མོ་རེ་ཤིག་བདག་གིས་ཉེས་པ་བྱས་པས་དེའི་ཕྱིར་དགེ་སློང་གི་དགེ་འདུན་གྱིས་ནི་བདག་གནས་ནས་དབྱུང་གྲང་ན་དགེ་སློང་མའི་དགེ་འདུན་ལ་ཀོ་བདག་གིས་ཉེས་པ་ཅི་ཞིག་བྱས་ན། གང་གི་ཕྱིར་བདག་ལ་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བ་བྱས། དེ་ལྟ་མོད་ཀྱི་ཁ་ཅིག་དགེ་སློང་མ་ལ་ཁ་ཟེར་བ་ཡོད་པ་དེ་ལ་བདག་གིས་ཁྲོས་འཁྲུགས་རྔམ་པར་བྱས་ཏེ་ཞུམ་ཞུམ་པོར་གཞུག་པར་བྱ། ཁྲོ་བ་བསྐྱེད་པར་བྱའོ། །དེ་ལྟར་བདག་གིས་དགེ་སློང་མ་ཁྱེད་ཅག་གི་ཕྱོགས་བྱས་ན་ཁྱེད་ཅག་ཅིའི་ཕྱིར་བདག་ལ་ཕྱག་བྱ་བའི་འོས་མ་ཡིན་པའི་སྡོམ་པ་བསྐོ་བར་བྱེད། དེ་སྐད་ཅེས་སྨྲས་པ་དང ། སྐྱེ་དགུའི་བདག་མོ་ཆེན་མོ་གཽ་ཏ་མཱིས་དགེ་སློང་གྲེ་སྐྱེས་ལ་འདི་སྐད་ཅེས་སྨྲས་སོ། །བཙུན་པ་གྲེ་སྐྱེས་ཁྱོད་དགེ་སློང་མའི་ཕྱོགས་སུ་གནོད་པ་བྱེད་དུ་ལྟ་ཡོད་ཡང་སུས་བཅུག་།དེའི་སྟེང་དུ་དགེ་སློང་གིས་དགེ་འདུན་གྱིས་ཁྱོད་གནས་ནས་དབྱུང་བའི་ལས་བྱས་ལ། བཅོམ་ལྡན་འདས་ཀྱིས་ཀྱང་དགེ་སློང་མ་རྣམས་ལ་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་ཤིག་ཅེས་བཀའ་སྩལ་ཏོ། །དེའི་ཕྱིར་བདག་ཅག་གིས་ཕྱག་བྱ་བའི་འོས་མ་ཡིན་པའི་སྡོམ་པ་བསྒོའོ། །གཞན་ཡང་གྲེ་སྐྱེས་གསོན་ཅིག་།རེ་ཤིག་ཁྱོད་ཤཱཀྱའི་བུ་ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྨྲ་བར་བྱེད་པ་འདི་ལྟར་ཡང་ཁྱོད་ནི་མང་དུ་ཐོས་པ་ཡིན་ན་དགེ་འདུན་ལ་བཟོད་པར་མི་གསོལ་བར་ཕྱི་ལང་བྱེད་དམ་དེ་ནས་དགེ
9.79a
སློང་གྲེ་སྐྱེས་འདི་སྙམ་དུ་སྐྱེ་དགུའི་བདག་མོ་ཆེན་མོ་འདིས་ནི་ཕན་པར་སྨྲས་ཀྱི་མི་ཕན་པ་མ་ཡིན་པའི་སྟེང་དུ་མི་གང་ཞིག་སའི་སྟེང་དུ་འགྱེལ་ན་དེས་ས་དེ་ཉིད་ལ་བརྟེན་ནས་ལྡང་བ་དེ་བཞིན་དུ། བདག་གིས་ཀྱང་དགེ་འདུན་ལ་ཉེས་པ་བྱས་པས་དེ་ཉིད་དུ་སོང་ལ་དགེ་འདུན་ལ་སྤུ་བསྙལ་བར་བྱའོ། །འཐུན་པར་བྱེད་པ་བསྟན་པར་བྱའོ། །མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་བྱའོ་སྙམ་དུ་བསམས་སོ། །ཡང་གྲེ་སྐྱེས་འདི་སྙམ་དུ་མ་ལ་བདག་སྲིང་མོ་དག་གང་ན་བར་སོང་ལ་ཕྱིན་ནས་སྲིང་མོ་དག་ལ་ཡང་དྲིའོ། །སྙམ་དུ་བསམས་ནས། གྲེ་སྐྱེས་བཅུ་གཉིས་སྡེ་གང་ན་བ་དེར་སོང་སྟེ་ཕྱིན་ནས་སྐབས་དེ་དག་རྒྱས་པར་སྨྲས་སོ། །རེ་ཤིག་ན་བཅུ་གཉིས་སྡེ་དག་གིས་གྲེ་སྐྱེས་ལ་འདི་སྐད་ཅེས་སྨྲས་སོ། །འཕགས་པ་གྲེ་སྐྱེས་ཁྱོད་རིགས་སྣ་ཚོགས་དང ། རུས་སྣ་ཚོགས་དང ། ཁྱིམ་སྣ་ཚོགས་ནས་རབ་ཏུ་བྱུང་བ་རྣམས་ཀྱི་དྲུང་དུ་སྤུ་སྙོལ་བར་མ་བྱེད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།དེ་ཅིའི་ཕྱིར་ཞེ་ན། བདག་ཅག་གིས་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། ནད་གསོས་ཀྱི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། དྲན་པར་བྱ་བ་དང ། དྲི་བར་བྱ་བ་ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བགྱིའོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་དྲུག་པ། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། ་དགེ་སློང་མ་དག་བཅུ་གཉིས་སྡེ་ལ་བཞམས་ཏེ་བསྒོ་བར་བྱའོ། །འདི་ལྟར་བསྒོ་བར་བྱ་སྟེ། དགེ་སློང་མ་ཁྱེད་ཅག་དགེ་སློང་གང་ཞིག་དགེ་སློང་གི་དགེ་འདུན་གྱིས་གནས་ནས་དབྱུང་བའི་ལས་བྱས་པ་དང ། དགེ་སློང་མའི་དགེ་འདུན་རྣམས་ཀྱིས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་ལ། དགེ་སློང་དེ་ཡང་སྐྲ་འགྲེང་བར་གྱུར་སྤུ་ལངས་པར་གྱུར
9.79b
པ་ལས་དགེ་འདུན་ལ་སྤུ་སྙོལ་བར་འདོད། འབྱུང་བར་སྐྱོད་པར་བྱེད། འཐུན་པར་བྱེད་པ་སྟོན་པར་བྱེད་འདོད། མཚམས་ཀྱིས་ནང་དུ་འདུག་སྟེ་བཟོད་པ་གསོལ་བར་བྱེད་འདོད་ལ། དེའི་ཕྱིར་འཐབ་མོ་དང་མཚང་འདྲུ་བ་སྤོང་བར་འདོད་པར་ཤེས་བཞིན་དུ་ཁྱེད་ཅག་དེའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།བདག་ཅག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར་བྱ་བ་དང ། རྩ་བའི་སྨན་དང ། སྡོང་བུའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བགྱིའོ་ཞེས་མ་ཟེར་ཅིག་ཅེས་བྱའོ། །དེ་སྐད་ཅེས་བསྒོ་བ་དང ། དེ་དག་དགེ་སློང་མ་དེ་རྣམས་ལ་འདི་སྐད་ཅེས་ཕུ་ནུ་མོ་དག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅུང་ཟད་ཀྱང་མ་ཟེར་ཅིག་ཅེས་གཞི་དེ་ཉིད་ལ་ཕྱིར་ཞིང་ནན་གྱིས་མཆོག་ཏུ་བཟུང་སྟེ་ཞེན་ནས་འདི་ནི་བདེན་གྱི་གཞན་ནི་རྫུན་པའོ་ཞེས་རྗེས་སུ་ཐ་སྙད་འདོགས་སོ། །དེ་ནས་དགེ་སློང་མ་རབ་ཏུ་མང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་མ་རབ་ཏུ་མང་པོས་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་བཅུ་གཉིས་སྡེ་ལ་གསོལ་བ་དང་བཞིའི་ལས་ཀྱི་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། དགེ་སློང་མ་དེ་ལ་དགེ་སློང་མ་མང་པོས་བཞམས་ཏེ་བསྒོ་ཞིང ། དགེ་སློང་མ་མང་པོས་དེ་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་མ་རྣམས་ཀྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང །
9.80a
དགེ་འདུན་གྱིས་དགེ་སློང་མ་བཅུ་གཉིས་སྡེ་ལ་གསོལ་བ་དང་བཞིའི་ལས་ཀྱིས་བསྒོ་བ་གང་ལགས་པ་མཛད་དོ། །ཕུ་ནུ་མོ་ཁྱེད་ཅག་དགེ་སློང་ཐབ་མོ་བྱེད་པ་མཚང་འདྲུ་བར་བྱེད་པ། འགྱེད་པར་བྱེད་པ། རྩོད་པར་བྱེད་པ། ཐབ་ཀྲོལ་བྱེད་པ། དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་གྱུར་པ། དགེ་སློང་རྣམས་ཀྱིས་གནས་ནས་དབྱུང་བའི་ལས་བྱས་པ། དགེ་སློང་མ་རྣམས་ཀྱིས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བ། སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བྱེད། འབྱུང་བར་སྐྱོད་པར་བྱེད། འཐུན་པར་བྱེད་པ་སྟོན་པར་བྱེད། མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་བྱེད་འདོད་པར་ཤེས་བཞིན་དུ་དེའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།བདག་ཅག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར་བྱ་བ་དང ། རྩ་བའི་སྨན་དང ། སྡོང་བུའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་སྨྲ་བར་བྱེད་པའི་གཞི་འདི་ལྟ་བུ་ཕུ་ནུ་མོ་དག་གཏོང་དུ་སྩལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བཅུ་གཉིས་སྡེ་འདི་དག་དགེ་སློང་ཐབ་མོ་བགྱིད་པ། མཚང་འབྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ཐབ་ཀྲོལ་བགྱིད་པ། ་དགེ་སློང་མ་རྣམས་དང་ཤིན་ཏུ་འདྲེ་བས་ལྷན་ཅིག་གནས་པར་གྱུར་པ། དགེ་སློང་རྣམས་ཀྱིས་གནས་ནས་དབྱུང་བའི་ལས་བགྱིས་པ། དགེ་སློང་མ་རྣམས་ཀྱིས་ཀྱང་ཕྱག་བགྱི་བའི་འོས་མ་ལགས་པའི་སྡོམ་པ་བསྒོ་བ་སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བགྱིད། འབྱུང་བར་སྐྱོད་པར་བགྱིད།
9.80b
འཐུན་པར་བགྱིད་པ་སྟོན་པར་བགྱིད། མཚམས་ཀྱི་ནང་དུ་མཆིས་ཏེ། བཟོད་པ་གསོལ་བར་འཚལ་བཞིན་དུ་དེའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།བདག་ཅག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐེ་རགས་དང ། དྲན་པར་བྱ་བ་དང ། ་དྲི་བར་བྱ་བ་དང ། རྩ་བའི་སྨན་དང ། སྡོང་པོའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་སྨྲ་བའི་དགེ་སློང་མ་དེ་དག་ལ་དགེ་སློང་མ་མང་པོས་བཞམས་ཏེ་བསྒོ་ལ། དགེ་སློང་མ་མང་པོས་དེ་དག་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་འཛིན་ཅིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་ཏེ། དེའི་སླད་དུ་དགེ་སློང་མ་བཅུ་གཉིས་སྡེ་རྣམས་ལ་ཕུ་ནུ་མོ་ཁྱེད་ཅག་དགེ་སློང་གང་ཐབ་མོ་བྱེད་པ། མཚང་འདྲུ་བར་བྱེད་པ། འགྱེད་པར་བྱེད་པ། རྩོད་པར་བྱེད་པ། ཐབ་ཀྲོལ་བྱེད་པ། དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་འགྱུར་བ་དགེ་སློང་རྣམས་ཀྱིས་གནས་ནས་དབྱུང་བའི་ལས་བྱས་པ། དགེ་སློང་མ་རྣམས་ཀྱིས་ཕྱག་བྱ་བར་འོས་མ་ཡིན་པའི་སྡོམ་པ་བསྒོ་བ་སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བྱེད། འབྱུང་བར་སྐྱོད་པར་བྱེད། འཐུན་པར་བྱེད་པ་སྟོན་པར་བྱེད། མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་བྱེད་འདོད་པས་ཤེས་བཞིན་དུ་དེའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།བདག་ཅག་གིས་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར
9.81a
བྱ་བ་དང ། རྩ་བའི་སྨན་དང ། སྡོང་བུའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་ཟེར་བ་དེ་ལ་བསྒོ་བ་མཛད་དོ། །བཅུ་གཉིས་སྡེ་འདི་དག་ལས་གསོལ་བ་དང་བཞིའི་ལས་ཀྱིས་བསྒོ་བ་མཛད་པ་ལ་གང་དག་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་དང་པོ་བརྗོད་པའོ། །གཉིས་པ་ལ་ཡང་དོན་དེ་ཉིད་བརྗོད་པར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བཅུ་གཉིས་སྡེ་འདི་དག་དགེ་སློང་ཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ཐབ་ཀྲོལ་བགྱིད་པ། དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་གྱུར་པ། དགེ་སློང་རྣམས་ཀྱིས་གནས་ནས་དབྱུང་བའི་ལས་བགྱིད་པ། དགེ་སློང་མ་རྣམས་ཀྱིས་ཀྱང་ཕྱག་བགྱི་བའི་འོས་མ་ལགས་པའི་སྡོམ་པ་བསྒོ་བ་སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བགྱིད། འབྱུང་བར་སྐྱོད་པར་བགྱིད། འཐུན་པར་བགྱིད་པ་སྟོན་པར་བགྱིད། མཚམས་ཀྱི་ནང་དུ་མཆིས་ཏེ་བཟོད་པ་གསོལ་བར་འཚལ་བཞིན་དུ་དེའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།བདག་ཅག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར་བྱ་བ་དང ། རྩ་བའི་སྨན་དང ། སྡོང་པོའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང་འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་སྨྲ་བའི་དགེ་སློང་མ་དེ་དག་ལ་དགེ་སློང་མ་མང་པོས་བཞམས་ཏེ
9.81b
བསྒོ་ལ། དགེ་སློང་མ་མང་པོས་དེ་དག་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་འཛིན་ཅིང་མངོན་པར་ཞེན་ནས་འདི་ནི་བདེན་གྱི་གཞན་ནི་རྫུན་པའོ་ཞེས་རྗེས་སུ་ཐ་སྙད་འདོགས་ཏེ། དེའི་སླད་དུ་དགེ་འདུན་གྱིས་དགེ་སློང་མ་བཅུ་གཉིས་སྡེ་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །ཚེ་དང་ལྡན་པ་གང་དག་དགེ་སློང་མ་བཅུ་གཉིས་སྡེ་འདི་དག་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་གཉིས་པའོ། །གསུམ་པ་ལ་ཡང་ལས་དེ་ཉིད་བརྗོད་པར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བཅུ་གཉིས་སྡེ་འདི་དག་དགེ་སློང་ཐབ་མོ་བགྱིད་པ། མཚང་འདྲུ་བར་བགྱིད་པ། འགྱེད་པར་བགྱིད་པ། རྩོད་པར་བགྱིད་པ། ཐབ་ཀྲོལ་བགྱིད་པ་དགེ་སློང་མ་རྣམས་དང་ཤིན་དུ་འདྲེ་བས་ལྷན་ཅིག་གནས་པར་གྱུར་པ། དགེ་སློང་རྣམས་ཀྱིས་གནས་ནས་དབྱུང་བའི་ལས་བགྱིད་པ། དགེ་སློང་མ་རྣམས་ཀྱིས་ཀྱང་ཕྱག་བགྱི་བའི་འོས་མ་ལགས་པའི་སྡོམ་པ་བསྒོ་བ་སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་འཚལ། འབྱུང་བར་སྐྱོད་པར་བགྱིད། ་འཐུན་པར་བགྱིད་པ་སྟོན་པར་འཚལ། མཚམས་ཀྱི་ནང་དུ་མཆིས་ཏེ་བཟོད་པ་གསོལ་བར་འཚལ་བཞིན་དུ་དེའི་གན་དུ་སོང་སྟེ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱིས་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།བདག་ཅག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར་བྱ་བ་དང ། རྩ་བའི་སྨན་དང ། སྡོང་པོའི་སྨན་དང ། ལོ་མའི་སྨན་དང ། མེ་ཏོག་གི་སྨན་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ་ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་སྨྲ་བའི་དགེ་སློང་མ་དེ་དག་ལ་དགེ་སློང་མ་མང་པོས་བཞམས་ཏེ་བསྒོ་ལ་དགེ་སློང་མ་མང
9.82a
པོས་དེ་དག་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་འཛིན་ཅིང་མངོན་པར་ཞེན་ནས་འདི་ནི་བདེན་གྱི་གཞན་ནི་རྨོངས་པའོ་ཞེས་རྗེས་སུ་ཐ་སྙད་འདོགས་ཏེ། དེའི་སླད་དུ་དགེ་འདུན་གྱིས་དགེ་སློང་མ་བཅུ་གཉིས་སྡེ་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །ཚེ་དང་ལྡན་པ་གང་དག་དགེ་སློང་མ་བཅུ་གཉིས་སྡེ་འདི་དག་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་འདི་ལྟར་ཅང་མི་གསུངས་བས་དེ་དེ་བཞིན་དུ་འཛིན་ཏོ། །དེ་དག་ལ་གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་འཛིན་ཅིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་རྨོངས་པའོ་ཞེས་རྗེས་སུ་ཐ་སྙད་འདོགས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ངའི་ཉན་ཐོས་མ་རྣམས་ཀྱིས་དོན་ཤེས་པ་དང ། ངས་བསླབ་པའི་གཞི་ཡང་ལེགས་པར་བཅས་པར་འགྱུར་རོ་སྙམ་ནས་བྱུང་བ་འདི་དང ། གླེང་གཞི་འདི་དང ། དངོས་པོ་འདི་དང ། སྐབས་འདི་ལ་གཉི་གའི་དགེ་འདུན་བསྡུ་བ་མཛད་དོ་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་དགེ་སློང་གང་ཞིག་དགེ་འདུན་འཐུན་པས་གནས་ནས་དབྱུང་བའི་ལས་བྱས་པ་དགེ་སློང་མའི་དགེ་འདུན་གྱིས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བའི་དགེ་སློང་དེ་སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བྱེད། འབྱུང་བར་སྐྱོད་པར་བྱེད། འཐུན་པར་བྱེད་པ་སྟོན་པར་བྱེད། མཚམས་ཀྱིས་ནང་དུ་འདུག་སྟེ་བཟོད་པ་གསོལ་བར་བྱེད་པར་ཤེས་བཞིན་དུ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱིས་ནང་དུ་འདུག་སྟེ་བཟོད་པ་གསོལ་བར་མ་བྱེད་ཅིག་།དེ་ལྟ་བས་ན་ཐབ་མོ་བྱེད་པ་མ་གཏོང་ཤིག་།བདག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང །
9.82b
ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར་བྱ་བ་དང ། རྩ་བ་དང ། སྡོང་བུ་དང ། ལོ་མ་དང ། མེ་ཏོག་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང་ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་སྨྲ་ན། དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་ཕུ་ནུ་མོ་ཁྱོད་དགེ་སློང་གི་དགེ་འདུན་འཐུན་པ་རྣམས་ཀྱིས་གནས་ནས་དབྱུང་བའི་ལས་བྱས་པ་དགེ་སློང་མའི་དགེ་འདུན་མས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བའི་དགེ་སློང་དེ་སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བྱེད། འབྱུང་བར་སྐྱོད་པར་བྱེད། འཐུན་པར་བྱེད་པ་སྟོན་པར་བྱེད། མཚམས་ཀྱི་ནང་དུ་འདུག་སྟེ་བཟོད་པ་གསོལ་བར་བྱེད་པར་ཤེས་བཞིན་དུ་འདི་སྐད་ཅེས་འཕགས་པ་ཁྱོད་དགེ་འདུན་ལ་སྤུ་སྙོལ་བར་མ་བྱེད་ཅིག་།འབྱུང་བར་མ་སྐྱོད་ཅིག་།འཐུན་པར་བྱེད་པ་མ་སྟོན་ཅིག་།མཚམས་ཀྱི་ནང་དུ་འདུག་སྟེ་བཟོད་པར་གསོལ་བར་མ་བྱེད་ཅིག་།དེ་ལྟ་བས་ན་ཐབ་མོ་བྱེད་པ་མ་གཏོང་ཤིག་།བདག་ཅག་གིས་ཁྱོད་ལ་ལྷུང་བཟེད་དང ། ཆོས་གོས་དང ། དྲ་བ་དང ། ཕོར་བུ་དང ། སྐ་རགས་དང ། དྲན་པར་བྱ་བ་དང ། དྲི་བར་བྱ་བ་དང ། རྩ་བ་དང ། སྡོང་བུ་དང ། ལོ་མ་དང ། མེ་ཏོག་དང ། འབྲས་བུའི་སྨན་དུས་སུ་རུང་བ་དང ། ཐུན་ཚོད་དུ་རུང་བ་དང ། ཞག་བདུན་དུ་རུང་བ་དང ། ཇི་སྲིད་འཚོའི་བར་དུ་རུང་བ་རྣམས་དང ། ཅི་དང་ཅིས་བྲེལ་བ་དེ་དང་དེས་མི་བྲེལ་བར་བསྙེན་བཀུར་བྱའོ་ཞེས་སྨྲ་བ་ན། ཕུ་ནུ་མོ་གནས་ནས་ཕྱུང་བའི་རྗེས་སུ་ཕྱོགས་པ་དང ། མི་འཐུན་པར་བྱ་བའི་ཕྱིར་སྨྲ་བ་འདི་ལྟ་བུ་འདི་ཐོངས་ཤིག་ཅེས་དེ་སྐད་བསྒོ་བར་བྱའོ། །གལ་ཏེ་དགེ་སློང་མ་རྣམས་ཀྱིས་དགེ་སློང་མ་དེ་ལ་དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་གཏོང་བར་མི་བྱེད་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ། །ཡང་དག་པར་བསྟན་པ་ན
9.83a
གཞི་དེ་གཏོང་ན་དེ་ལྟ་ན་ལེགས། གལ་ཏེ་གཏོང་བར་མི་བྱེད་ན་དགེ་སློང་མ་དེ་ཡང་གནས་ནས་ཕྱུང་བའི་རྗེས་སུ་འཇུག་པའི་ཕྱིར་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེའོ། །དགེ་སློང་གང་ཞིག་ཅེས་བྱ་བ་ནི་ཐབ་མོ་བྱེད་པ། མི་བདེ་བར་བྱེད་པ་གྲེ་སྐྱེས་སོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །གནས་ནས་དབྱུང་བའི་ལས་བྱས་པ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །དགེ་སློང་མའི་དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མའོ། །ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །དགེ་སློང་དེ་ཞེས་བྱ་བ་ནི་གྲེ་སྐྱེས་སོ། །སྐྲ་འགྲེང་བར་གྱུར། སྤུ་ལངས་པར་གྱུར་པ་ལས་དགེ་འདུན་ལ་སྤུ་སྙོལ་བར་བྱེད་ཅེས་བྱ་བ་ནས། ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་མཐོང་བ་འམ། དེ་ལ་གཞན་གྱིས་སྨྲས་པར་གྱུར་ནས་སོ། །དེ་ལྟ་བས་ན་ཐབ་མོ་བྱེད་པ་མ་གཏོང་ཤིག་ཅེས་བྱ་བ་ནི་ཞི་བར་མ་བྱེད་ཅེས་བྱ་བའི་ཐ་ཚིག་གོ། །སྨྲས་ན་ཞེས་བྱ་བ་ནི་ཟེར་ནའོ། །འཕགས་པ་ཁྱོད་ཅེས་བྱ་བ་ནི་སྐྲ་འགྲེང་བ་སྤུ་ལངས་པ་གྲེ་སྐྱེས་སོ། །དགེ་འདུན་ལ་སྤུ་སྙོལ་བར་མ་བྱེད་ཅིག་ཅེས་བྱ་བ་ནས་ཐབ་མོ་བྱེད་པ་མ་གཏོང་ཤིག་ཅེས་བྱ་བའི་བར་ནི་དགེ་འདུན་ལ་བཟོད་པ་མ་གསོལ་ཅིག་ཅེས་བྱ་བའི་དོན་ཏོ། །བདག་གིས་ཁྱོད་ལ་ལྷུང་བཟེད་དང ། ཆོས་གོས་དང་ཞེས་བྱ་བ་ལ་སོགས་པ་བསྙེན་བཀུར་བགྱིའོ་ཞེས་བྱ་བའི་བར་ནས། དགེ་སློང་མ་དེ་ལ་ཞེས་བྱ་བ་ནི་བཅུ་གཉིས་སྡེའོ། །དགེ་སློང་མ་རྣམས་ཀྱིས་ཤེས་བྱ་བ་ནི་ཆོས་འདི་པའི་དགེ་སློང་མ་རྣམས་ཀྱིས་སོ། །དེ་སྐད་བསྒོ་བར་བྱའོ་ཞེས་བྱ་བ་ནི་འདི་སྐད་ཅེས་སྨྲ་བར་བྱ་སྟེ། བཞམས་ཏེ་བསྒོ་བ་སྔ་མ་ཇི་ལྟ་བ་བཞིན་དུ་བསྒོ་བར་བྱ་བའོ། །གལ་ཏེ་དགེ་སློང་མ་རྣམས་ཀྱིས་དགེ་སློང་མ་དེ་ལ་དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས་ཤེས་བྱ་བ་ནི་བཟང་བའོ། །གལ་ཏེ་གཏོང་བར་མ་བྱེད་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་གྱི་བར་དུ
9.83b
ཡང་དག་པར་བསྒོ་བར་བྱ། ཡང་དག་པར་བསྟན་པར་བྱ་ཞེས་བྱ་བ་ནི་སྔར་གསོལ་བ་དང་བཞིའི་ལས་ཀྱིས་ཇི་ལྟར་བསྒོ་བ་བཞིན་དུའོ། །ཡང་དག་པར་བསྒོ་བ་ན་ཞེས་བྱ་བ་ནི་ཡང་དག་པར་བསྟན་པ་ནའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དུ་དགེ་སློང་མས་དགེ་སློང་ཐབ་མོ་བྱེད་པ་ཞེས་བྱ་བ་ནས་ཐབ་ཁྲོལ་བྱེད་པ། དགེ་འདུན་གྱིས་གནས་ནས་དབྱུང་བའི་ལས་བྱས་པ། དགེ་སློང་མ་རྣམས་ཀྱིས་ཕྱག་བྱ་བའི་འོས་མ་ཡིན་པའི་སྡོམ་པ་བསྒོ་བ་ཞེས་བྱ་བའི་བར་དང ། ཤེས་བཞིན་དུ་འདི་སྐད་ཅེས་བདག་གིས་ཁྱོད་ལ་ལྷུང་བཟེད་ཀྱིས་བསྙེན་བཀུར་བགྱིའོ་ཞེས་སྨྲས་ན་ཉེས་བྱས་སུ་འགྱུར་རོ། །ཆོས་གོས་ཀྱིས་ཀྱང་ཉེས་བྱས་སུ་འགྱུར་རོ། །དྲ་བས་ཀྱང་ཉེས་བྱས་སུ་འགྱུར་རོ། །ཕོར་བུས་ཀྱང་ཉེས་བྱས་སུ་འགྱུར་རོ། །སྐ་རགས་ཀྱིས་ཀྱང་ཉེས་བྱས་སུ་འགྱུར་རོ། །ཅི་དང་ཅིས་བྲེལ་བ་དེ་དང་དེས་མི་བྲེལ་བར་བྱའོ་ཞེས་བྱ་བ་ཐམས་ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་བ་སྦོམ་པོར་འགྱུར་རོ། །ལས་དང་པོའི་ཚིག་བརྗོད་པ་མ་རྫོགས་པར་གལ་ཏེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ལ་ཚིག་རྫོགས་པར་གྱུར་པ་ན་ཉེས་པ་སྦོམ་པོར་འགྱུར་རོ། །ལས་གཉིས་པའི་ཚིག་བརྗོད་པ་མ་རྫོགས་པར་གལ་ཏེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ལ་ཚིག་རྫོགས་པར་གྱུར་ན་ཉེས་པ་སྦོམ་པོར་འགྱུར་རོ། །ལས་གསུམ་པའི་ཚིག་བརྗོད་པ་ཡང་མ་རྫོགས་ལ་མཐུན་པས་ཆོས་མ་ཡིན་པར་བྱས་པ་དང ། མི་མཐུན་པས་ཆོས་མ་ཡིན་པར་བྱས་པ་དང ། མི་མཐུན་པས་ཆོས་བཞིན་དུ་བྱས་པ་དང ། ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པས་སྟན་པ་ཇི་ལྟ་བ་དེ་བཞིན་དུ་མ་བྱས་ན་ལྟུང་བ་མེད་དོ། །ལས་གསུམ་པའི་ཚིག་བརྗོད་པ་ཡང་རྫོགས་ལ་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པས་བསྟན་པ་ཇི་ལྟ་བ་དེ་བཞིན་དུ་བྱས་ཀྱང་གཞི་དེ་གཏོང་བར་མི་བྱེད་ན་དགེ་སློང་མ་དེ་ལ་ཕས་ཕམ་པའི་ལྟུང་བར་བྱུང་བར་གྱུར་པ་ཡིན་ནོ། །ལས་དང་པོ་པ་ལ་སོགས་པ་ལ་ལྟུང་བ
9.84a
མེད་དོ། །དགེ་སློང་མའི་རྣམ་པར་འབྱེད་པ་ལས་ཕས་ཕམ་པར་གྱུར་པ་བརྒྱད་པ་རྫོགས་སྷོ།། ་་་་་་་་་་་་།།ཕམ་པའི་སྐབས་སུ་དགེ་སློང་མ་བཅུ་གཉིས་པོ་དག་བསྒོ་བར་མི་བྱའོ་ཞེས་གསུངས་པ་དེ་ལ་གལ་ཏེ་འགའ་ཞིག་བཅུ་གཉིས་པོ་གང་ཡིན་ཞེས་འདྲི་བར་བྱེད་ན་འདི་སྐད་ཅེས་བརྗོད་པར་བྱ་སྟེ། གནས་ཁང་བསྒོ་བ་དང ། ཁ་ཟས་བསྒོ་བ་དང ། ཐུག་པ་འདྲིམ་པ་དང ། སོ་ཤིང་འདྲིམ་པ་དང ། ཕྲན་ཚེགས་འདྲིམ་པ་དང་སྣོད་སྤྱད་འགྲུབ་པ་དང ། འགེད་པ་དང ། གོས་འགེད་པ་དང ། དབྱར་གྱི་རས་ཡུག་ཆེན་འབྲུབ་པ་དང ། དབྱར་གྱི་རས་ཆེན་འགེད་པ་དང ། མངག་གཞུག་པ་དང ། མཛེས་འཆོས་རྣམས་སོ། ་་་་་་་་ ། སྡོམ་ལ། སྨྱན་བྱེད་པ་དང་གཞི་མེད་དང ། གསུམ་པ་བག་ཙམ་ཆ་ལས་ལེན། །བཞི་པ་ཅི་ཡང་རུང་བར་བྱ། །ལྔ་པ་ཆགས་པ་མེད་པ་སྟེ། །ཉིན་མོ་མཚན་མོ་ལམ་འགྲོ་དང ། །ཆུ་ཀླུང་ཕ་རོལ་བསྐོས་པའོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རི་དགས་འཛིན་གྱི་བུ་ནག་པོ་ཞེས་བྱ་བ་མཉན་ཡོད་ཀྱི་བྲམ་ཟེ་དང ། ཁྱིམ་བདག་རྣམས་དང་གཏམ་འདྲེ་བ། ཕེབས་པར་སྨྲ་བ། སྨོས་འདྲིན། འགྲོགས་བཤེས། ཡིད་གཅུགས་པ། ཁྱིམ་དུ་འཇུག་པར་བྱེད་པ་ཡིན་པས་གང་ཡང་རུང་བ་དག་ལ་བུ་མོ་སྦྱིན་པར་བྱེད་པ་དེ་དག་ཀྱང་རི་དགས་འཛིན་གྱི་བུ་ནག་པོ་ལ་འདི་སྐད་ཅེས་ནག་པོ་མ་ལ་ཁྱེའུ་དེ་མཁས་པ་དང ། ལེ་ལོ་མེད་པ་དང ། སྒྲུབ་ཕོད་པ་དང ། བུ་མོ་ལ་བཟའ་བ་དང ། བགོ་བ་མང་པོ་སྦྱིན་ནུས་པ་དང ། ལས་ཆུང་ངུ་འབོག་པར་བྱེད་པ་ཡིན་ནམ་ཞེས་འདྲི་བར་བྱེད་དོ། །གལ་ཏེ་དེས་འདི་སྐད་ཅེས་ཀྱེ་ཁྱེའུ་དེ་ནི་སྙིང་ནས་མཁས་པ། ལེ་ལོ་མེད་པ། སྒྲུབ་ཕོད་པ། བུ་མོ་དེ་ལ་བཟའ་བ་དང ། བགོ་བ་མང་པོ་སྦྱིན་ནུས་པ། ལས་ཆུང་ངུ་འབོགས་པར་བྱེད་པ་ཡིན་ནོ་ཞེས་བསྟན་པར་གྱུར་ན། དེ་དེ་དག་ལ་སྦྱིན་པར་བྱེད་དོ། །གལ་ཏེ་འདི་སྐད་ཅེས་ཀྱེ་ཁྱེའུ་དེ་ནི་སྙིང་ནས་མི
9.84b
མཁས་པ། ལེ་ལོ་ཅན། སྒྲུབ་མི་ཕོད་པ། བུ་མོ་དེ་ལ་བཟའ་བ་དང ། བགོ་བ་མང་པོ་སྦྱིན་མི་ནུས་པ། ལས་ཆུང་ངུ་འབོག་པར་བྱེད་པ་མ་ཡིན་ནོ་ཞེས་བསྟན་པར་གྱུར་ན་དེ་དེ་དག་ལ་སྦྱིན་པར་མི་བྱེད་དོ། །དེ་བཞིན་དུ་བུ་མོ་སློང་བར་བྱེད་པ་དེ་དག་ཀྱང་རི་དགས་འཛིན་གྱི་བུ་ནག་པོ་ལ་འདི་སྐད་ཅེས་མ་ལ་བུ་མོ་དེ་མཁས་པ་དང ། སྒྲུབ་ཕོད་པ་དང ། བུ་མོ་དེ་བག་ཡོད་པར་ཁྱིམ་ན་གནས་པར་ནུས་སམ་ཞེས་འདྲི་བར་བྱེད་དོ་ཞེས་བྱ་བ་ནས་ལྷག་པ་རྣམས་ཀྱང་ཁྱེའུ་ལ་ཇི་ལྟ་བ་བཞིན་དུ་བརྗོད་པར་བྱའོ། །གང་ཡང་རུང་བ་དག་གིས་བུ་མོ་སྦྱིན་ལེགས་པར་གྱུར་པ་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་པའི་ཁྱེའུ་དེ་ཡང་མཁས་པ། ལེ་ལོ་མེད་པ་སྒྲུབ་ཕོད་པ། བུ་མོ་དེ་ལ་བཟའ་བ་དང ། བགོ་བ་མང་པོ་སྦྱིན་ནུས་པ། ལས་ཆུང་ངུ་འབོགས་པར་བྱེད་པ་ཡིན་པས། གང་དག་ལ་རི་དགས་འཛིན་གྱི་བུ་ནག་པོ་དང་གཏམ་འདྲེ་བ། ཕེབས་པར་སྨྲ་བ་ཞེས་བྱ་བ་ནས། ཁྱིམ་དུ་འཇུག་པར་བྱེད་པ་ཡོད་པ་དེ་དག་ལ་ཡང་འདི་ལྟ་བུར་འགྱུར་རོ་ཞེས་བསྔགས་པ་བརྗོད་པར་བྱེད་དོ། །དེ་བཞིན་དུ་གང་ཡང་རུང་བ་དག་གིས་བུ་མོ་སྦྱིན་ཉེས་པར་གྱུར་པ་ན་དེ་དག་འདི་སྐད་ཅེས་བདག་ཅག་གིས་རི་དགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་ཡང་མི་མཁས་པ། ལེ་ལོ་ཅན། སྒྲུབ་མི་ཕོད་པ། བུ་མོ་དེ་ལ་བཟའ་བ་དང་བགོ་བ་མང་པོ་སྦྱིན་མི་ནུས་པ། ལས་ཆུང་ངུ་འབོགས་པར་བྱེད་པ་མ་ཡིན་པས་གང་དག་ལ་རི་དགས་འཛིན་གྱི་བུ་ནག་པོ་དང་གཏམ་འདྲེ་བ་ཞེས་བྱ་བ་ནས། ཁྱིམ་དུ་འཇུག་པར་བྱེད་པ་ཡོད་པ་དེ་དག་ལ་ཡང་འདི་ལྟ་བུར་འགྱུར་རོ་ཞེས་བསྔགས་པ་མ་ཡིན་པ་རྗོད་པར་བྱེད་དོ། །ཁྱེའུ་ལ་ཇི་ལྟ་བ་བཞིན་དུ་བུ་མོ་ལ་ཡང་སྦྱར་བར་བྱའོ། །དེའི་ཚེ་རི་དགས་འཛིན་གྱི་བུ་ནག་པོ་ལ་དུས་གཅིག་ཏུ་བསྔགས་པ་དང ། བསྔགས་པ་མ་ཡིན་པ་བྱུང་བར་གྱུར་ཏོ། །དེ་ན་དགེ་སློང་མ་བཅུ་གཉིས་སྡེ་རྣམས་ཀྱིས་རི་དགས་འཛིན་གྱི་བུ་ནག་པོ་ལས་ཚིག་བླངས་ཏེ་སྨྱན་བྱེད་ཅིང་འཇུག་པ་མ་ཡིན་པའི་ཁྱིམ་དུ་འཇུག་པར་བྱེད་པ་དེ་དག་ལ་བྲལ་ཟེ་དང་ཁྱིམ་བདག་རྣམས་འཕྱ་བར་བྱེད་པའི་སྐབས་དེ་བཅོམ་ལྡན་འདས་ལ་དགེ
9.85a
སློང་རྣམས་ཀྱིས་གསོལ་ཏོ། །དེ་ནས་བཅོམ་ལྡན་འདས་ཀྱིས་ངའི་ཉན་ཐོས་མའི་དགེ་འདུན་རྣམས་ཀྱིས་དོན་ཤེས་པ་དང་ངས་བསླབ་པའི་གཞི་ཡང་ལེགས་པར་བཅས་པར་འགྱུར་རོ་སྙམ་ནས་བྱུང་བ་འདི་དང་གླེང་གཞི་འདི་དང་དངོས་པོ་འདི་དང་སྐབས་འདི་ལ་དགེ་སློང་མའི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་ཀྱི་མི་མཁྱེན་པར་མ་ཡིན་དུས་སུ་ཡིན་གྱི་དུས་མ་ཡིན་པར་མ་ཡིན་དོན་དང་ལྡན་པར་ཡིན་གྱི་དོན་དང་མི་ལྡན་པར་མ་ཡིན་ཏེ་སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་མི་ལྡན་པར་རྨེད་པ་ནི་ཆུ་ལོན་གྱིས་བཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་ལྡན་པར་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་དགེ་སློང་མ་བཅུ་གཉིས་སྡེ་དག་ལ་རྨས་པ། དགེ་སློང་མ་ཁྱེད་ཀྱིས་འདི་ལྟར་ཚུལ་མ་ཡིན་པ། མི་མཛེས་པ་དེ་ལྟ་བུ་བྱས་པ་བདེན་ནམ། བཅོམ་ལྡན་འདས་བགྱིས་མད་དོ། །སངས་རྒྱས་བཅོམ་ལྡན་འདས་ཀྱིས་བཅུ་གཉིས་སྡེ་ལ་དགེ་སྦྱོང་གི་ཚུལ་མ་ཡིན་པ་རུང་བ་མ་ཡིན་པ་ཚུལ་དང་འཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་པ་མཛད་ནས་དགེ་སློང་མའི་དགེ་འདུན་ལ་བཀའ་སྩལ་པ། དགེ་སློང་མ་དག་དེ་ལྟ་བས་ན་ངས་ཕན་ཡོན་བཅུ་པོ་འདི་ལྟ་སྟེ། དགེ་འདུན་བསྡུ་བར་བྱ་བའི་ཕྱིར་དང་ཞེས་བྱ་བ་ནས་ཡང་དག་པར་གཟིགས་ནས་འདུལ་བ་ལ་ཉན་ཐོས་མ་རྣམས་ཀྱི་བསླབ་པའི་གཞི་བཅའ་བར་བྱའོ་ཞེས་བྱ་བ་བསླབ་པ་བཅས་པའི་བར་དུ་བརྗོད་པར་བྱའོ། །ཡང་དགེ་སློང་མ་གང་བུད་མེད་ལ་སྐྱེས་པའི་ཚིག་གམ། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན། ཐ་ན་ཐང་འགའ་ཕྲད་པ་ཡང་རུང་སྟེ་ཆོས་ནི་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་དགེ་སློང་མ་བཅུ་གཉིས་སྡེའོ། །བུད་མེད་ལ་སྐྱེས་པའི་ཚིག་གམ།
9.85b
སྐྱེས་པ་ལ་བུད་མེད་ཀྱི་ཚིག་གིས་ཞེས་བྱ་བ་ནི་བུད་མེད་ཀྱི་ཚིག་སྐྱེས་པ་ལ་བརྗོད་ནས་སམ་སྐྱེས་པའི་ཚིག་བུད་མེད་ལ་བརྗོད་ནས་སོ། །ཆུང་མ་ཉིད་ཅེས་བྱ་བ་ནི་ཆུང་མ་བདུན་པོ་ཆུ་ཚིགས་ཀྱིས་བྱིན་པ་དང་རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་དང ། དང་སམ་དུ་འདུས་པ་དང ། གོས་ཟས་ཀྱིས་འཚོས་པ་དང ། ཁ་དུམ་པ་དང ། བདུན་པ་ནི་ཐང་འགའ་ཕྲད་པའོ། །དེ་ལ་ཆུ་ཚིགས་ཀྱིས་བྱིན་པ་གང་ཞིག་ན། བུད་མེད་དམ། གཞོན་ནུ་མ་གང་ཕ་མ་དག་གིས་སྐྱེས་པ་ལ་འདི་ནི་ཁྱོད་ཀྱི་ཆུང་མ་སྐྱེ་དགུའི་བདག་མོ་བྱོས་ཤིག་ཅེས་སྐྱོར་ཆུས་བྱིན་ཞིང ། དེ་དེའི་ཆུང་མ་སྐྱེ་དགུའི་བདག་མོར་གྱུར་ནས། དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ། ཤིན་ཏུ་བསྲུངས་པ། སྦས་པ། ཤིན་ཏུ་སྦས་པ་དེ་ནི་ཆུ་ཚིགས་ཀྱིས་བྱིན་པ་ཞེས་བྱའོ། །རིན་ཆས་ཉོས་པའི་ཆུང་མ་གང་ཞེ་ན། བུད་མེད་དམ། གཞོན་ནུ་མ་གང་སྐྱེས་པས་འདི་ནི་བདག་གི་ཆུང་མ་སྐྱེ་དགུའི་བདག་མོར་བྱའོ་ཞེས་ཕ་མ་ལས་རིན་ཆ་མང་ཡང་རུང་ཉུང་ཡང་རུང་བས་ཉོས་ཤིང་སྐྱེ་དགུའི་བདག་མོར་གྱུར་ནས་དེས་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ། ཤིན་དུ་བསྲུངས་པ། སྦས་པ། ཤིན་དུ་སྦས་པ། དེ་ནི་རིན་ཆས་ཉོས་པའི་ཆུང་མ་ཞེས་བྱའོ། །བཙན་ཕྲོགས་སུ་ཐོབ་པའི་ཆུང་མ་གང་ཞེ་ན། འདི་ལྟ་སྟེ། རྒྱལ་པོས་དཔུང་གི་ཚོགས་ཡན་ལག་བཞི་པོ་གླང་པོའི་ཚོགས་དང་རྟ་པའི་ཚོགས་དང ། ཤིང་རྟའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ཏེ་མ་ཕེབས་པ་ནི་ཕབ། ཕེབས་པ་ནི་ཆམ་དུ་ཕབ་ནས་སེ་མནངས་སུ་དབང་བར་བསྒོ་བ་དེའི་ཚེ་མིས་རྒྱལ་པོ་རྒྱལ་མཚན་དུ་བྱས་ནས་བུད་མེད་དམ། གཞོན་ནུ་མ་གང་ཡིན་པ་དེ་དག་གི་ཆུང་མ་འམ། སྐྱེ་དགུའི་བདག་མོར་བྱའོ་ཞེས་ཕྲོགས་ཤིང་ཞེས་བྱ་བ་ནས། བདག་གིས་འདི་ལ་གཞན་དག་འདོད་པའི་ཕྱིར་སྤྱོད་པར་མ་གྱུར་ཅིག་།ཅེས་བྱ་བའི་བར་གང་ཡིན་པ་ནི་བཙན་ཕྲོགས་ཐོབ་པ་ཞེས་བྱའོ། །གཞན་ཡང་བཙན་ཕྲོགས་སུ་ཐོབ་པ་ནི་འདི་ལྟ་སྟེ། ཆོམ་རྐུན་པ་གྲོང་ཁྱེར་འཇོམས་པ་དང་གྲོང་འཇོམས་པ་དང ། ལྗོངས་འཇོམས་པ་དེ་དག་གིས་རང་གི་སྲོག་དང་བསྡོས་ནས
9.86a
གྲོང་ཁྱེར་གཞོམ་པར་བྱས། གྲོང་དང་ལྗོངས་གཞོམ་པ་བྱས་ནས་བུད་མེད་དམ་གཞོན་ནུ་མ་གང་ཡིན་པ་འདི་བདག་གི་ཆུང་མ་སྐྱེ་དགུའི་བདག་མོར་བྱའོ་ཞེས་ཕྲོགས་ཤིང་ཞེས་བྱ་བ་ནས། བདག་གིས་འདི་ལ་གཞན་དག་འདོད་པའི་ཕྱིར་སྤྱོད་པར་མ་གྱུར་ཅིག་ཅེས་བྱ་བའི་བར་འདི་ཡང་བཙན་ཕྲོགས་སུ་ཐོབ་པ་ཞེས་བྱའོ། །དང་སམ་དུ་འདུས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་དང་རང་གི་དང་བ་དང ། གཅུགས་པ་དང ། དགའ་བས་སྐྱེས་པའི་གན་དུ་སོང་སྟེ་འདི་སྐད་ཅེས་རྗེའི་སྲས་བདག་གིས་ཁྱོད་ཀྱི་བཙུན་མོ་སྐྱེ་དགུའི་བདག་མོར་བགྱིའོ་ཞེས་སྨྲས་ལ། དེས་ཀྱང་དེ་ཆུང་མ་སྐྱེ་དགུའི་བདག་མོར་བྱས་ཏེ་ཞེས་བྱ་བ་ནས། བདག་གིས་འདི་ལ་གཞན་དག་འདོད་པའི་ཕྱིར་སྤྱོད་པར་མ་གྱུར་ཅིག་ཅེས་བྱ་བའི་བར་འདི་ནི་དང་སམ་དུ་འདུས་པའི་ཆུང་མ་ཞེས་བྱའོ། །གོས་ཟས་ཀྱིས་འཚོས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པའི་གན་དུ་སོང་སྟེ་འདི་སྐད་ཅེས་རྗེའི་སྲས་ཁྱོད་ཀྱིས་བདག་ལ་གོས་དང་ཟས་སྩོལ་ཅིག་དང ། བདག་གིས་རྗེའི་སྲས་ཁྱོད་ཀྱི་ཆུང་མ་སྐྱེ་དགུའི་བདག་མོར་བགྱིའོ་ཞེས་སྨྲས་ལ། ་དེས་ཀྱང་དེ་ལ་གོས་དག་བྱིན་ནས་དེས་དེ་ཆུང་མ་སྐྱེ་དགུའི་བདག་མོར་བྱས་ཏེ་ཞེས་བྱ་བ་ནས། བདག་གིས་འདི་ལ་གཞན་དག་འདོད་པའི་ཕྱིར་སྤྱོད་པར་མ་གྱུར་ཅིག་ཅེས་བྱ་བར་འདི་ནི་གོས་ཟས་ཀྱིས་འཚོས་པའི་ཆུང་མ་ཞེས་བྱའོ། །ཁ་དུམ་པའི་ཆུང་མ་གང་ཞེ་ན། འདི་ལྟ་སྟེ། བུད་མེད་དམ་གཞོན་ནུ་མ་གང་ནོར་མང་ཡང་རུང་ཉུང་ཡང་རུང་ཁྱེར་ཏེ་སྐྱེས་པའི་གན་དུ་སོང་ནས་འདི་སྐད་ཅེས་རྗེའི་སྲས་མཁྱེན་པར་མཛོད་ཅིག་།ཁྱོད་ཀྱི་ནོར་གྱི་ཕུང་པོ་དང ། བདག་གི་ནོར་གྱི་ཕུང་པོ་གང་ལགས་པ་དེ་གཅིག་ཏུ་བསྡུས་ནས་བདག་ཅག་མཉམ་དུ་འཚོ་ཞིང་འདོད་པ་ལ་ལོངས་སྤྱོད་པར་བགྱིས་ལ། གང་གི་ཚེ་བདག་ཅག་ལས་ཁྱེའུ་འམ་བུ་མོ་གང་དག་མཆིས་པར་གྱུར་པ་དེ་དག་ཀྱང་བདག་ཅག་དུས་ལ་བབ་ཅིང་ཤི་བ་ན་སྦྱིན་པ་དག་སྦྱིན་ཞིང་བསོད་ནམས་དག་བྱས་ནས། འདི་བདག་ཅག་གི་ཕ་མ་གང་དུ་སྐྱེས་པ་དེར་རྗེས་སུ་འགྲོ་བར་གྱུར་ཅིག་ཅེས་ཡོན་བསྔོ་བ་བགྱིད་པར་འགྱུར་བར་བགྱིའོ་ཞེས་སྨྲས་ལ་དེས་ཀྱང་དེའི
9.86b
ཆུང་མ་སྐྱེ་དགུའི་བདག་མོར་བྱས་ནས་བདག་གི་འདི་ལ་གཞན་དག་འདོད་པའི་ཕྱིར་སྤྱོད་པར་མ་གྱུར་ཅིག་ཅེས་བསྲུངས། ཤིན་དུ་བསྲུངས། སྦས་ཤིན་དུ་སྦས་པ་དེ་ནི་ཁ་དུམ་པའི་ཆུང་མ་ཞེས་བྱའོ། །ཐང་འགའ་ཕྲད་པའི་ཆུང་མ་གང་ཞེ་ན། འདི་ལྟ་སྟེ། བུད་མེད་དམ་གཞོན་ནུ་མ་གང་ལ་སྐྱེས་པས་དེའི་དུས་ཀྱི་གླ་བྱིན་ནས་འདི་དང་བདག་ཡུད་ཙམ་ཞིག་ལྷན་ཅིག་ཡོངས་སུ་སྤྱད་པར་བྱའོ་སྙམ་ནས་དེས་དེ་བསྲུངས་པ་ཞེས་བྱ་བའི་བར་འདི་ནི་ཐང་འགའ་ཕྲད་པའི་ཆུང་མ་ཞེས་བྱ་སྟེ། འདི་དག་ནི་ཆུང་མ་བདུན་ཞེས་བྱ་བ་ཡིན་ནོ། །མཛའ་ན་མོ་བཅུ་ཞེས་བྱ་བ་ལ་བཅུ་གང་ཞེ་ན། མས་བསྲུངས་པ་དང ། ཕས་བསྲུངས་པ་དང ། མིང་པོས་བསྲུངས་པ་དང ། ་ཕུ་ནུ་མོས་བསྲུངས་པ་དང ། སྒྱུག་མོས་བསྲུངས་པ་དང ། གྱོས་པོས་བསྲུངས་པ་དང ། ཉེ་དུས་བསྲུངས་པ་དང ། རིགས་ཀྱིས་བསྲུངས་པ་དང ། རུས་ཀྱིས་བསྲུངས་པ་དང ། རྣམ་པར་འཁྲུགས་པ་མེད་པ་ནི་བཅུ་པའོ། །མས་བསྲུངས་པའི་མཛའ་ན་མོ་གང་ཞེ་ན། འདི་ལྟ་སྟེ། བུད་མེད་དམ་པ་གཞོན་ནུ་མ་གང་ཞིག་གང་གི་ཚེ་ཁྱིམ་ཐབ་སྨྱོས་པར་གྱུར་པ་འམ། སེམས་འཁྲུགས་པ་འམ། ཚོར་བ་དག་གིས་ཉེན་པ་འམ། རྒྱལ་པོས་འཇིགས་ནས་ཡུལ་འཁོར་གཞན་དང ། ཡུལ་གཞན་དུ་བྲོས་པར་གྱུར་ཏམ། བསད་དམ། བཅིངས་སམ། སྤྱུགས་སམ། རབ་ཏུ་བྱུང་ངམ། ཤི་བར་གྱུར་པ་ན་དེ་ལ་མས་བདག་གི་འདི་ལ་འགའ་ཞིག་གིས་མ་བརྟགས་པར་ནན་གྱིས་བཙན་ཐབས་སུ་འདོད་པའི་ཕྱིར་སྤྱོད་པར་མི་འགྱུར་བར་བྱའོ་སྙམ་ནས་བསྲུངས། ཤིན་དུ་བསྲུངས། སྦས། ཤིན་དུ་སྦས་པར་གྱུར་པ་འདི་ནི་མས་བསྲུངས་པའི་མཛའ་ན་མོ་ཞེས་བྱའོ། །ཕས་བསྲུངས་པའི་མཛའ་ན་མོ་གང་ཞེ་ན། འདི་ལྟ་སྟེ། བུད་མེད་དམ་གཞོན་ནུ་མ་གང་ཞིག་གང་གི་ཚེ། ཁྱིམ་ཐབ་སྨྱོས་པར་གྱུར་ཏམ་ཞེས་བྱ་བ་ནས་རྒྱས་པར་མ་ཤི་བར་གྱུར་པ་ན་དེ་ལ་ཕས་བདག་གིས་འདི་ལ་འགའ་ཞིག་གིས་མ་བརྟགས་པར་ནན་གྱིས་བཙན་ཐབས་སུ་འདོད་པའི་ཕྱིར་སྤྱོད་པར་མི་འགྱུར་བར་བྱའོ་སྙམ་ནས། བསྲུངས་ཤིན་དུ་བསྲུངས། སྦས། ཤིན་དུ་སྦས་པར་གྱུར་པ་འདི་ནི་ཕས་བསྲུངས་པའི་མཛའ་ན་མོ
9.87a
ཞེས་བྱའོ། །མིང་པོས་བསྲུངས་པའི་མཛའ་ན་མོ་གང་ཞེ་ན། འདི་ལྟ་སྟེ། བུད་མེད་དམ། གཞོན་ནུ་མ་གང་ཞིག་གང་གི་ཚེ་ཁྱིམ་ཐབ་སྨྱོས་པར་གྱུར་ཏམ། སེམས་འཁྲུགས་པ་འམ་ཞེས་བྱ་བ་ནས། ཕ་མ་ཤི་བར་གྱུར་པ་ན་དེ་ལ་མིང་པོས་བདག་གིས་འདི་ལ་འགའ་ཞིག་གིས་ཞེས་བྱ་བ་ནས། འདོད་པའི་ཕྱིར་སྤྱོད་པར་མི་འགྱུར་བར་བྱའོ་སྙམ་ནས་བསྲུངས་ཤེས་བྱ་བའི་བར་འདི་ནི་མིང་པོས་བསྲུངས་པའི་མཛའ་ན་མོ་ཡིན་ནོ། །མིང་པོས་བསྲུངས་པ་ཇི་ལྟ་བ་བཞིན་དུ་ཕུ་ནུ་མོས་བསྲུངས་པ་ཡང་བརྗོད་པར་བྱའོ། །སྒྱུག་མོས་བསྲུངས་པའི་མཛའ་ན་མོ་གང་ཞེ་ན། འདི་ལྟ་སྟེ། བུད་མེད་དམ་གཞོན་ནུ་མ་གང་ཞིག་གང་གི་ཚེ་ཁྱིམ་ཐབ་སྨྱོས་པར་གྱུར་ཏམ། སེམས་འཁྲུགས་པར་གྱུར་ཅེས་བྱ་བ་ནས། ་ཕ་མ་ཤི་བར་གྱུར་ཏམ། མིང་པོ་དང་ཕུ་ནུ་མོ་ཤི་བར་གྱུར་པ་ན་དེ་ལ་སྒྱུག་མོས་འདི་སྐད་ཅེས་བདག་གི་བུ་ལ་ལྟ་བ་ཇི་ལྟ་བར་ཁྱོད་ལ་ཡང་དེ་ལྟ་བུ་ཡིན་པས་ཁྱོད་ཀྱི་བཟའ་བ་དང་བགོ་བ་བདག་གིས་སྦྱར་གྱིས་མནའ་མ་དགའ་བར་གྱིས་ཤིག་།མནའ་མ་འདུག་པར་གྱིས་ཤིག་ཅེས་སྨྲས་ནས། བདག་གིས་འདི་ལ་འགའ་ཞིག་གིས་མ་བརྟགས་པར་ནན་གྱིས་བཙན་ཐབས་སུ་འདོད་པའི་ཕྱིར་སྤྱོད་པར་མི་འགྱུར་བར་བྱའོ། །སྙམ་ནས་བསྲུངས་ཤིན་དུ་བསྲུངས། སྦས་ཤིན་དུ་སྦས་པར་གྱུར་པ་འདི་ནི་སྒྱུག་མོས་བསྲུངས་པ་ཞེས་བྱའོ། །སྒྱུག་མོས་བསྲུངས་པ་ཇི་ལྟ་བ་བཞིན་དུ་གྱོས་པོས་བསྲུངས་པ་ཡང་བརྗོད་པར་བྱའོ། །ཉེ་དུས་བསྲུངས་པའི་མཛའ་ན་མོ་གང་ཞེ་ན། འདི་ལྟ་སྟེ། བུད་མེད་དམ་གཞོན་ནུ་མ་གང་ཞིག་གང་གི་ཚེ་ཁྱིམ་ཐབ་སྨྱོས་པར་གྱུར་ཏམ། སེམས་འཁྲུགས་པར་གྱུར་ཅེས་བྱ་བ་ནས་ཕ་མ་ཤི་བར་གྱུར་ཏམ། མིང་པོ་དང ། ཕུ་ནུ་མོ་དང ། སྒྱུག་མོ་དང ། གྱོས་པོ་ཤི་བར་གྱུར་པ་ན་དེ་ཉེ་དུའི་དྲུང་དུ་གནས་ཤིང ། དེ་ལ་ཉེ་དུ་རྣམས་ཀྱིས་བདག་ཅག་གིས་འདི་ལ་འགའ་ཞིག་གིས་མ་བརྟགས་པར་ནན་གྱིས་བཙན་ཐབས་སུ་འདོད་པའི་ཕྱིར་སྤྱོད་པར་མི་འགྱུར་བར་བྱའོ་སྙམ་ནས་བསྲུངས། ཤིན་དུ་བསྲུངས། སྦས་ཤིན་དུ་སྦས་པར་གྱུར་པ་འདི་ནི་ཉེ་དུས་བསྲུངས་པའི་མཛའ་ན་མོ་ཞེས་བྱའོ། །ཉེ་དུ་ཞེས་བྱ་བ་ནི་ཕ་མེས་དང་མ་མེས་གཉི
9.87b
གའི་བདུན་བརྒྱུད་གཟུང་ངོ ། །རིགས་ཀྱིས་བསྲུངས་པའི་མཛའ་ན་མོ་གང་ཞེ་ན་འདི་ལྟ་སྟེ། བུད་མེད་དམ་གཞོན་ནུ་མ་གང་ཞིག་གང་གི་ཚེ་ཁྱིམ་ཐབ་སྨྱོས་པར་གྱུར་ཏམ། སེམས་འཁྲུགས་པར་གྱུར་ཅེས་བྱ་བའི་བར་ནས། ཕ་མ་ཤི་བར་གྱུར་ཏམ། མིང་པོ་དང་ཕུ་ནུ་མོ་དང་སྒྱུག་མོ་དང་གྱོས་པོ་དང་ཉེ་དུ་ཤི་བར་གྱུར་པ་ན་དེ་བདག་ཉིད་དང་རུས་གཅིག་པའི་དྲུང་ན་གནས་ཤིང ། དེ་ལ་དེ་དག་གིས་བདག་ཅག་གི་འདི་ལ་འགའ་ཞིག་གིས་མ་བརྟགས་པར་ནན་གྱིས་བཙན་ཐབས་སུ་འདོད་པའི་ཕྱིར་སྤྱོད་པར་མི་འགྱུར་བར་བྱའོ་སྙམ་ནས་བསྲུངས་ཤེས་བྱ་བའི་བར་འདི་ནི་རིགས་ཀྱིས་བསྲུངས་པའི་མཛའ་ན་མོ་ཞེས་བྱའོ། །རིགས་ཤེས་བྱ་བ་ནི་བྲམ་ཟེ་དང ། རྒྱལ་རིགས་དང ། རྗེའུ་རིགས་དང ། དམངས་རིགས་རྣམས་སོ། །རུས་ཀྱིས་བསྲུངས་པའི་མཛའ་ན་མོ་གང་ཞེ་ན་འདི་ལྟ་སྟེ། བུད་མེད་དམ་གཞོན་ནུ་མ་གང་ཞིག་གང་གི་ཚེ་ཁྱིམ་བདག་སྨྱོས་པར་གྱུར་ཏམ། སེམས་འཁྲུགས་པར་གྱུར་ཅེས་བྱ་བའི་བར་ནས། ་ཕ་མ་ཤི་བར་གྱུར་ཏམ། མིང་པོ་དང ། ཕུ་ནུ་མོ་དང ། སྒྱུག་མོ་དང ། གྱོས་པོ་དང ། ཉེ་དུ་རྣམས་ཤི་བར་གྱུར་པ་ན་དེ་བདག་ཉིད་དང ། རུས་གཅིག་པའི་དྲུང་ན་གནས་ཤིང་དེ་ལ་དེ་དག་གིས་བདག་ཅག་གི་འདི་ལ་འགའ་ཞིག་གིས་མ་བརྟགས་པར་ནན་གྱིས་བཙན་ཐབས་སུ་འདོད་པའི་ཕྱིར་སྤྱོད་པར་མི་འགྱུར་བར་བྱའོ་སྙམ་ནས་བསྲུངས་ཤེས་བྱ་བའི་བར་འདི་ནི་རུས་ཀྱི་བསྲུངས་པའི་མཛའ་ན་མོ་ཞེས་བྱའོ། །རུས་ཤེས་བྱ་བ་ནི་ཀུང་སའི་རུས་དང ། བང་སའི་རུས་དང ། ཤན་དི་ལའི་རུས་དང ། བྷ་ར་དྭ་ཛའི་རུས་དང ། མཽད་གལ་གྱི་རུས་དང ། ག་ར་གྷའི་རུས་དང ། གཽ་ཏ་མའི་རུས་རྣམས་སོ། །རྣམ་པར་འཁྲུག་པ་མེད་པའི་མཛའ་ན་མོ་གང་ཞེ་ན། དགེ་སློང་མ་དང ། དཔྱོད་པ་མ་དང ། ཀུན་དུ་རྒྱུ་མོ་དང ། ཁྱིམ་ཐབ་ལས་གཞན་དང་མི་ཉལ་བའི་བུད་མེད་དང ། བརྟུལ་ཞུགས་ཀྱི་གཞི་ཆོས་སྤྱོད་པར་བྱེད་མ་སྟེ། འདི་དག་ནི་མཛའ་ན་མོ་བཅུ་ཞེས་བྱའོ། །སྨྱན་བྱེད་ན་ཞེས་བྱ་བ་ནི་ཕྲིན་བྱེད་པའོ། །ཐ་ན་ཐང་འགའ་ཞེས་བྱ་བ་ནི་ཐ་ན་ཡུད་ཙམ་ཡང་ངོ ། །ཆོས་འདི་ནི་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲ་བསྟན་པ་འདིའོ། །དང་པོ་ཉིད་ཀྱིས་ལྟུང་བར་གྱུར་ལ་ཞེས་བྱ་བ་ནི་མོད་ལ་ལྟུང་བར་འགྱུར་བའོ། །
9.88a
ངེས་པར་འབྱུང་བ་དང་བཅས་པ་ཞེས་བྱ་བ་ནི་སྟོན་པ་དང་བཅས་པའོ། །དགེ་འདུན་ལྷག་མའོ་ཞེས་བྱ་བ་ནི་ལྟུང་བ་དེ་གཉི་གའི་དགེ་འདུན་ལ་རག་ལུས་པ་དང ། གཉི་གའི་དགེ་འདུན་དང་འབྲེལ་བ་དང ། གཉི་གའི་དགེ་འདུན་ལ་རྟོན་པ་ཡིན་ཏེ། ལྟུང་བ་དེ་གཉི་གའི་དགེ་འདུན་ལས་ལྡང་བར་འགྱུར་གྱི་གང་ཟག་ལས་ནི་མ་ཡིན་པའོ། །ཡང་ན་ཕམ་པར་གྱུར་པ་བརྒྱད་པོ་འདི་ནི་ལྷག་མ་མེད་པ་ཡིན་ལ། ལྟུང་བ་འདི་ནི་ལྷག་མ་དང་བཅས་པ་ཡིན་པ་དེའི་ཕྱིར་དགེ་འདུན་ལྷག་མ་ཞེས་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་་་་བར་སྡོམ་ལ། སྤྲིང་ཕྲིན་དགེ་སློང་མ་གཉིས་དང ། །སྤྱོད་ལམ་དང་ནི་སྔོན་འགྲོ་དང ། །བདག་དང་བདག་མིན་ཡུལ་ཕྱོགས་ཚིག་།སྤྲིན་ཡིག་ལག་ཡིག་ཆུང་མའོ། །དགེ་སློང་མས་བདག་ཉིད་ཀྱིས་སྤྲིང་པ་མནོས་ཏེ་བདག་ཉིད་ཀྱིས་ཕྲིན་ཕར་ཡང་སྐྱེལ། བདག་ཉིད་ཀྱིས་ཚུར་ཡང་སྐྱེལ་ན་དགེ་འདུན་ལྷག་མར་འགྱུར་རོ། །དགེ་སློང་མས་བདག་ཉིད་ཀྱིས་སྤྲིང་བ་མནོས་ཏེ་བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང ། མངགས་པས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་བདག་ཉིད་ཀྱིས་སྤྲིང་བ་མནོས་ཏེ་མངགས་པས་ཕྲིན་ཕར་སྐྱེལ་བར་བྱེད་ཅིང ། བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་བདག་ཉིད་ཀྱིས་སྤྲིང་བ་མནོས་ཏེ་མངགས་པས་ཕྲིན་ཕར་ཡང་སྐྱེལ་བར་བྱེད་ཅིང ། མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པ་ལས་བདག་ཉིད་ཀྱིས་སྤྲིན་ཕར་ཡང་སྐྱེལ་བར་བྱེད་ཅིང ། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། ་བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང ། མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པ་ལས་བདག་ཉིད་ཀྱིས་ཕྲིན་སྤྲིང་བ་མནོས་ཏེ་མངགས་པས་ཕྲིན་ཕར་སྐྱེལ་བར་བྱེད་ཅིང ། བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པ་ལས་བདག
9.88b
ཉིད་ཀྱིས་སྤྲིང་བ་མནོས་ཏེ་མངགས་པས་ཕྲིན་ཕར་ཡང་སྐྱེལ་བར་བྱེད་ཅིང ། མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ་བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང ། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ་བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང ། མངགས་པས་མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ་མངགས་པས་མངགས་པས་ཕྲིན་ཕར་ཡང་སྐྱེལ་བར་བྱེད་ཅིང ། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མ་མངགས་པས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ་མངགས་པས་མངགས་པས་ཕྲིན་ཕར་ཡང་སྐྱེལ་བར་བྱེད་ཅིང་མངགས་པས་མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མ་གཉིས་ཀྱིས་གཉི་གས་སྤྲིང་བ་མནོས་ཏེ་གཉི་གས་ཕྲིན་ཕར་ཡང་སྐྱེལ་བར་བྱེད་ཅིང ། གཉི་གས་ཕྲིན་ཚུར་ཡང་སྐྱེལ་བར་བྱེད་ན་གཉི་ག་ལ་དགེ་འདུན་ལྷག་མར་འགྱུར་རོ། །དགེ་སློང་མ་གཉི་ཀྱིས་གཉི་གས་སྤྲིང་བ་མནོས་ཏེ་དེ་ན་གཅིག་འདི་སྐད་ཅེས་རེ་ཤིག་ཁོ་མོའི་དོན་དུ་ཕྲིན་ཕར་སྐྱོལ་ལ་ཕྲིན་ཚུར་ཡང་སྐྱོལ་ཅིག་ཅེས་ཟེར་ནས་དེས་དེའི་དོན་དུ་ཕྲིན་ཕར་ཡང་སྐྱེལ་བར་བྱེད་ཅིང ། ཕྲིན་ཚུར་ཡང་སྐྱེལ་བར་བྱེད་ན་གཉི་ག་ལ་དགེ་འདུན་ལྷག་མར་འགྱུར་རོ། །དགེ་སློང་མ་གཉིས་ཀྱི་གཉི་གས་སྤྲིང་བ་མནོས་ཏེ་དེ་ན་གཅིག་འདི་སྐད་ཅེས་ཁོ་མོ་ནི་ཕྲིན་ཕར་ནི་སྐྱལ་ལོ། །ཕྲིན་ཚུར་ནི་མི་སྐྱེལ་ལོ་ཞེས་ཟེར་ན་དེ་གཉིས་ལས་གང་ཕྲིན་ཕར་ཡང་སྐྱེལ་བར་བྱེད་ཅིང ། ཕྲིན་ཚུར་ཡང་སྐྱེལ་བར་བྱེད་ན་དེ་ལ་ནི་དགེ་འདུན་ལྷག་མར་འགྱུར་ལ། གང་ཕྲིན་ཕར་ནི་སྐྱེལ་བར་བྱེད་ལ་ཕྲིན་ཚུར་ནི་སྐྱེལ་བར་མི་བྱེད་པ་དེ་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་མ་གཉིས་ཀྱིས་གཉི་གའི་སྤྲིང་བ་མནོས
9.89a
ཏེ་དེ་ན་གཅིག་འདི་སྐད་ཅེས་ཁོ་མོ་ནི་ཕྲིན་ཕར་ཡང་མི་སྐྱེལ་ལ། ཕྲིན་ཚུར་ཡང་མི་སྐྱེལ་ལོ་ཞེས་ཟེར་ན་དེ་གཉིས་ལས་གང་ཕྲིན་ཕར་ཡང་སྐྱེལ་བར་བྱེད་ཅིང ། ཕྲིན་ཚུར་ཡང་སྐྱེལ་བར་བྱེད་པ་དེ་ལ་དེ་དགེ་འདུན་ལྷག་མར་འགྱུར་ལ། གང་ཕྲིན་ཕར་ཡང་སྐྱེལ་བར་མི་བྱེད་ལ་ཕྲིན་ཚུར་ཡང་སྐྱེལ་བར་མི་བྱེད་པ་དེ་ལ་ཉེས་པ་སྦོམ་པོ་གཅིག་ཏུ་འགྱུར་རོ། །དགེ་སློང་མ་གཉིས་ཀྱིས་གཉི་གས་སྤྲིང་བ་མནོས་ཏེ་གཉི་གས་ཕྲིན་ཕར་ནི་སྐྱེལ་བར་བྱེད་ལ། ཕྲིན་ཚུར་ནི་སྐྱེལ་བར་མི་བྱེད་ན་གཉི་ག་ལ་ཉེས་པ་སྦོམ་པོ་གཉིས་གཉིས་སུ་འགྱུར་རོ། །དགེ་སློང་མ་གཉིས་ཀྱིས་གཉི་གས་སྤྲིང་བ་མནོས་ཏེ། དེ་ན་གཉི་གས་འདི་སྐད་ཅེས་བདག་ཅག་གཉི་ག་ཕྲིན་ཕར་སྐྱེལ་བར་ཡང་མི་བྱེད་ལ་ཕྲིན་ཚུར་སྐྱེལ་བར་ཡང་མི་བྱེད་དོ། །ཞེས་ཟེར་ན་གཉི་ག་ཉེས་པ་སྦོམ་པོ་རེ་རེར་འགྱུར་རོ། །དགེ་སློང་མ་གཅིག་སྐྱེས་པ་གཅིག་བུད་མེད་གཅིག་དང་འདྲོན་ལམ་དུ་འགྲོ་བ་ན་གལ་ཏེ་བུད་མེད་དེས་དགེ་སློང་མ་དེ་ལ་འདི་སྐད་ཅེས་འཕགས་མ་ཁྱོད་སྐྱེས་པ་འདི་ལ་འདི་སྐད་ཅེས་ཁྱོད་བུད་མེད་འདིའི་ཁྱོ་འམ། མཛའ་བོ་འམ། ་སྨོས་འདྲིན་གྱིས་ཤིག་ཅེས་པར་ནུས་སམ་ཞེས་སྨྲས་ལ། གལ་ཏེ་དགེ་སློང་མ་དེས་སྤྲིང་བ་རྣམ་པ་དེ་ལྟ་བུ་མནོས་ནས་ཕྲིན་ཕར་སྐྱེལ་བར་བྱེད་དམ། ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དེ་བཞིན་དུ་སྐྱེས་པ་དེས་དགེ་སློང་མ་དེ་ལ་འདི་སྐད་ཅེས་འཕགས་མ་ཁྱོད་བུད་མེད་འདི་ལ་འདི་སྐད་ཅེས་ཁྱོད་སྐྱེས་པ་འདིའི་ཆུང་མ་འམ། མཛའ་ན་མོ་འམ། སྨོས་འདྲིན་གྱིས་ཤིག་ཅེས་ཟེར་ནུས་སམ་ཞེས་སྨྲས་ལ། གལ་ཏེ་དགེ་སློང་མ་དེས་སྤྲིང་བ་རྣམ་པ་དེ་ལྟ་བུ་མནོས་ཏེ་ཕྲིན་ཕར་སྐྱེལ་བར་བྱེད་དམ། ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མ་གཅིག་དང ། བུད་མེད་གཅིག་དང ། སྐྱེས་པ་གཅིག་ལ་ཇི་ལྟ་བ་དེ་བཞིན་དུ་དགེ་སློང་མ་གཉིས་དང ། བུད་མེད་གཉིས་དང ། སྐྱེས་པ་གཉིས་དང ། དེ་བཞིན་དུ་དགེ་སློང་མ་རབ་ཏུ་མང་པོ་དང ། བུད་མེད་རབ་ཏུ་མང་པོ་དང ། སྐྱེས་པ་རབ་ཏུ་མང་པོ་ལ་ཡང་རྒྱས་པར་བརྗོད་པར་བྱའོ། །ལམ་དུ་འགྲོ་བ་ཇི་ལྟ་བ་བཞིན་དུ་སྡོད་པ་དང །
9.89b
འདུག་པ་དང ། ཉལ་བ་དག་ལ་ཡང་རྒྱས་པར་བརྗོད་པར་བྱའོ། །དགེ་སློང་མ་མདུན་དུ་འགྲོ་བའི་དགེ་སྦྱོང་མ་དང ། ཕྱི་བཞིན་འབྲང་བའི་དགེ་སྦྱོང་མ་གཉིས་ལས་མདུན་དུ་འགྲོ་བའི་དགེ་སྦྱོང་མས་སྤྲིང་བ་མནོས་ཏེ་མདུན་དུ་འགྲོ་བའི་དགེ་སྦྱོང་མས་ཕྲིན་ཕར་ཡང་སྐྱེལ་བར་བྱེད་ཅིང ། མདུན་དུ་འགྲོ་བའི་དགེ་སྦྱོང་མས་ཕྲིན་ཚུར་ཡང་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་མ་ལ་དགེ་འདུན་ལྷག་མར་འགྱུར་རོ། །མདུན་དུ་འགྲོ་བའི་དགེ་སྦྱོང་མས་སྤྲིང་བ་མནོས་ཏེ་མདུན་དུ་འགྲོ་བའི་དགེ་སྦྱོང་མས་ཕྲིན་ཕར་སྐྱེལ་བར་བྱེད་ཅིང ། ཕྱི་བཞིན་འབྲང་བའི་དགེ་སྦྱོང་མས་ཕྲིན་ཚུར་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་མ་ལ་ཉེས་པ་སྦོམ་པོ་གཉིས་སུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་མ་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །མདུན་དུ་འགྲོ་བའི་དགེ་སྦྱོང་མས་སྤྲིང་བ་མནོས་ཏེ་ཕྱི་བཞིན་འབྲང་བའི་དགེ་སྦྱོང་མས་ཕྲིན་ཕར་སྐྱེལ་བར་བྱེད་ཅིང ། མདུན་དུ་འགྲོ་བའི་དགེ་སྦྱོང་མས་ཕྲིན་ཚུར་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་མ་ལ་ཉེས་པ་སྦོམ་པོ་གཉིས་སུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་མ་ལ་ནི་ཉེས་པ་སྦོམ་པོ་གཅིག་དུ་འགྱུར་རོ། །མདུན་དུ་འགྲོ་བའི་དགེ་སྦྱོང་མས་སྤྲིང་བ་མནོས་ཏེ་ཕྱི་བཞིན་འབྲང་བའི་དགེ་སྦྱོང་མས་ཕྲིན་ཕར་ཡང་སྐྱེལ་བར་བྱེད་ཅིང ། ཕྱི་བཞིན་འབྲང་བའི་དགེ་སྦྱོང་མས་ཕྲིན་ཚུར་ཡང་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་མ་ལ་ཉེས་པ་སྦོམ་པོ་གཅིག་ཏུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་མ་ལ་ཉེས་པ་སྦོམ་པོ་གཉིས་སུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་མས་སྤྲིང་བ་མནོས་ཏེ་ཕྱི་བཞིན་འབྲང་བའི་དགེ་སྦྱོང་མས་ཕྲིན་ཕར་ཡང་སྐྱེལ་བར་བྱེད་ཅིང ། ཕྱི་བཞིན་འབྲང་བའི་དགེ་སློང་མས་ཕྲིན་ཚུར་ཡང་སྐྱེལ་བར་བྱེད་ན་ཕྱི་བཞིན་འབྲང་བའི་དགེ་སྦྱོང་མ་ལ་དགེ་འདུན་ལྷག་མར་འགྱུར་རོ། །ཕྱི་བཞིན་འབྲང་བའི་དགེ་སྦྱོང་མས་སྤྲིང་བ་མནོས་ཏེ་ཕྱི་བཞིན་འབྲང་བའི་དགེ་སྦྱོང་མས་ཕྲིན་ཕར་ཡང་སྐྱེལ་བར་བྱེད་ཅིང་མདུན་དུ་འགྲོ་བའི་དགེ་སྦྱོང་མས་ཕྲིན་ཚུར་སྐྱེལ་བར་བྱེད་ན་ཕྱི་བཞིན
9.90a
འབྲང་བའི་དགེ་སྦྱོང་མ་ལ་ཉེས་པ་སྦོམ་པོ་གཉིས་སུ་འགྱུར་ལ། མདུན་དུ་འགྲོ་བའི་དགེ་སྦྱོང་མ་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་མས་སྤྲིང་བ་མནོས་ཏེ་མདུན་དུ་འགྲོ་བའི་དགེ་སྦྱོང་མས་ཕྲིན་ཕར་སྐྱེལ་བར་བྱེད་ཅིང ། ཕྱི་བཞིན་འབྲང་བའི་དགེ་སྦྱོང་མས་ཕྲིན་ཚུར་སྐྱེལ་བར་བྱེད་ན་ཕྱི་བཞིན་འབྲང་བའི་དགེ་སྦྱོང་མ་ལ་ཉེས་པ་སྦོམ་པོ་གཉིས་སུ་འགྱུར་ལ། མདུན་དུ་འགྲོ་བའི་དགེ་སྦྱོང་མ་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་མས་སྤྲིང་བ་མནོས་ཏེ་མདུན་དུ་འགྲོ་བའི་དགེ་སྦྱོང་མས་ཕྲིན་ཕར་ཡང་སྐྱེལ་བར་བྱེད་ཅིང ། མདུན་དུ་འགྲོ་བའི་དགེ་སྦྱོང་མས་ཕྲིན་ཚུར་ཡང་སྐྱེལ་བར་བྱེད་ན་ཕྱི་བཞིན་འབྲང་བའི་དགེ་སྦྱོང་མ་ལ་ཉེས་པ་སྦོམ་པོ་གཅིག་ཏུ་འགྱུར་ལ། མདུན་དུ་འགྲོ་བའི་དགེ་སྦྱོང་མ་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །ཁྱིམ་བདག་ནི་གཉིས་ཏེ། བདག་པོ་དང ། བདག་པོ་མ་ཡིན་པའོ། །དེ་ལ་བདག་པོ་ཞེས་བྱ་བ་ནི་བུ་མོ་སྦྱིན་པ་དང ། ཕྲོག་པའི་བདག་པོར་གྱུར་ཅིང་དེ་རྒྱལ་པོའི་ཕོ་བྲང་འཁོར་གྱི་ནང་དུ་སོང་ཡང་རུང ། རིགས་པ་ཚོགས་པའི་ནང་དུ་སོང་ཡང་རུང་སྟེ། དེའི་ཚིག་ཡང་དག་པ་མ་ཡིན་པ་ཡང་གཟུང་བར་འོས་པར་གྱུར་པ་གང་ཡིན་པ་དེ་ནི་བདག་པོ་ཞེས་བྱའོ། །བདག་པོ་མ་ཡིན་པ་ཞེས་བྱ་བ་ནི་བུ་མོ་སྦྱིན་པ་དང ། འཕྲོག་པའི་བདག་པོར་གྱུར་པ་མ་ཡིན་ཞིང་དེ་རྒྱལ་པོའི་ཕོ་བྲང་འཁོར་གྱི་ནང་དུ་སོང་ཡང་རུང ། རིགས་པ་ཚོགས་པའི་ནང་དུ་སོང་ཡང་རུང་སྟེ། དེའི་ཚིག་ཡང་དག་པ་གཟུང་བར་འོས་པར་མི་འགྱུར་བ་གང་ཡིན་པ་དེ་ནི་བདག་པོ་མ་ཡིན་པ་ཞེས་བྱའོ། །དགེ་སློང་མས་བདག་པོ་ལ་སྤྲིང་མནོས་ཏེ་བདག་མོ་ལ་ཕྲིན་ཕར་ཡང་སྐྱེལ་བར་བྱེད་ཅིང ། བདག་པོ་ལ་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་བདག་པོ་ལས་སྤྲིང་བ་མནོས་ཏེ་བདག་པོ་ལ་ཕྲིན་ཕར་སྐྱེལ་བར་བྱེད་ཅིང ། བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང ། ཉེས་བྱས་གཅིག་ཏུ་འགྱུར་རོ། །དགེ་སློང་མས་བདག་པོ་ལས་སྤྲིང་བ་མནོས་ཏེ་བདག་པོ་མ་ཡིན་པ་ལ་ཕྲིན་ཕར་སྐྱེལ་བར་བྱེད་ཅིང་བདག་པོ་ལ
9.90b
ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང ། ཉེས་བྱས་གཅིག་ཏུ་འགྱུར་རོ། །དགེ་སློང་མས་བདག་པོ་ལས་སྤྲིང་བ་མནོས་ཏེ་བདག་པོ་མ་ཡིན་པ་ལ་ཕྲིན་ཕར་སྐྱེལ་བར་བྱེད་ཅིང ། བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང ། ཉེས་བྱས་གཉིས་སུ་འགྱུར་རོ། །དགེ་སློང་མས་བདག་པོ་མ་ཡིན་པ་ལས་སྤྲིང་བ་མནོས་ཏེ་བདག་པོ་མ་ཡིན་པ་ལ་ཕྲིན་ཕར་ཡང་སྐྱེལ་བར་བྱེད་ཅིང ། བདག་པོ་མ་ཡིན་པ་ལ་ཕྲིན་ཚུར་ཡང་སྐྱེལ་བར་བྱེད་ན་ཉེས་བྱས་གསུམ་དུ་འགྱུར་རོ། །དགེ་སློང་མས་བདག་པོ་མ་ཡིན་པ་ལས་སྤྲིང་བ་མནོས་ཏེ་བདག་པོ་ལ་ཕྲིན་ཕར་སྐྱེལ་བར་བྱེད་ཅིང ། བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང ། ཉེས་བྱས་གཉིས་སུ་འགྱུར་རོ། །དགེ་སློང་མས་བདག་པོ་མ་ཡིན་པ་ལས་སྤྲིང་བ་མནོས་ཏེ། བདག་པོ་མ་ཡིན་པ་ལ་ཕྲིན་ཕར་སྐྱེལ་བར་བྱེད་ཅིང ། བདག་པོ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང ། ཉེས་བྱས་གཉིས་སུ་འགྱུར་རོ། །དགེ་སློང་མས་བདག་པོ་མ་ཡིན་པ་ལས་སྤྲིང་བ་མནོས་ཏེ། བདག་པོ་ལ་ཕྲིན་ཕར་ཡང་སྐྱེལ་བར་བྱེད་ཅིང ། བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང ། ཉེས་བྱས་གཅིག་ཏུ་འགྱུར་རོ། །རྒྱུ་གསུམ་གྱིས་སྤྲིང་བའི་ཕྲིན་ཚུར་བསྐྱེལ་བར་འགྱུར་ལ་ཕར་བསྐྱེལ་བར་ནི་མི་འགྱུར་ཏེ། གསུམ་གང་ཞེ་ན། ཡུལ་ཕྱོགས་དང ། བརྡའ་དང ། མཚན་མས་སོ། །ཇི་ལྟར་ཡུལ་ཕྱོགས་ཀྱིས་ཤེ་ན། གང་གི་ཚེ་ཁོ་མོ་སྐྱེད་མོས་ཚལ་ལམ་འདུན་ས་འམ། ལྷའི་གནས་ག་གེ་མོ་ཞིག་ན་འདུག་པ་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་ཡུལ་ཕྱོགས་ཀྱིས་སོ། །ཇི་ལྟར་བརྡས་ཤེ་ན། གང་གི་ཚེ་ཁོ་མོ་སྔ་དྲོ་འམ། གུང་ཚིགས་སམ། ཕྱེམ་བྲེད་ན་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་བགྱིས་ཤིག་ཅེས་བྱ་བ་སྟེ། དེ་ལྟར་བརྡས་སོ། །ཇི་ལྟར་མཚན་མས་ཤེ་ན། གང་གི་ཚེ་ཁོ་མོ་སྐྲ་བྲེགས་ནས་རིང་པོར་མ་ལོན་པ་འམ། སྣམ་སྦྱར
9.91a
དམར་སེར་གྱོན་པ་འམ། ལྷུང་བཟེད་ཞ་ཉེའི་དབྱར་འདབ་ཅན་ནམ། ཁར་བ་ལྕགས་སྦུགས་ཅན་ནམ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དམ། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་བའི་ལྷུང་བཟེད་ཐོགས་པ་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་མཚན་མས་སོ།། ་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བདུན་པ། རྒྱུ་གསུམ་གྱིས་ནི་སྤྲིང་བའི་ཕྲིན་ཕར་བསྐྱལ་བར་ཡང་འགྱུར་ལ། ཕྲིན་ཚུར་བསྐྱལ་བར་ཡང་འགྱུར་ཏེ། གསུམ་གང་ཞེ་ན། ཚིག་དང ། སྤྲིང་ཡིག་དང ། ལག་ཡིག་གིས་སོ། །དགེ་སློང་མས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཚིག་གིས་ཕྲིན
9.91b
ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་ཡང་བྱེད་ཅིང ། ལག་ཡིག་གིས་ཕྲིན་ཚུར་སྐྱེལ་བར་ཡང་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ཚིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་སྐྱེལ་བར་བྱེད་ཅིང ། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང ། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་སྤྲིན་ཕར་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་སྤྲིང་ཡིག་གིས་སྤྲིང
9.92a
པ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡའ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གི་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་སྐྱེལ་བར་བྱེད་ཅིང ། ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་ཚིག་གིས་ཕྲིན་ཕར་སྐྱེལ་བར་བྱེད་ཅིང ། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ། ལག་ཡིག་གིས་སྤྲིན་ཕར་སྐྱེལ་བར་བྱེད་ཅིང ། ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་སྤྲིན་ཕར་སྐྱེལ་བར་བྱེད་ཅིང་སྤྲིང་ཡིག་གིས་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ལག་ཡིག་གིས་སྤྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མས་ལག་ཡིག་གིས་སྤྲིང་བ་མནོས་ཏེ་ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང ། ཡུལ་ཕྱོགས་དང ། བརྡ་དང ། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང
9.92b
མས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་འཐབས་པའི་མོད་ཉིད་ཡིན་ལ། འཐབས་པའི་འོག་མ་ཡིན་པ་དང ། རྩཝ་མ་བཅད་པ་དང ། རྡེའུ་གསུམ་གྱིས་མ་གཏོར་བ་དང ། བྱི་རྒྱ་བྱིན་ནས་མ་བཏང་བ་དང ། ཆུང་མ་མ་ཡིན་པར་དཔང་མ་བཙུགས་པ་དང ། དྲིལ་མ་བསྒྲགས་པ་དག་གི་སྡུམས་བྱས་ལ་འཐུན་པར་གྱུར་ན་ཉེས་བྱས་གཅིག་ཏུ་འགྱུར་རོ། །དགེ་སློང་མས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་འཐབས་པའི་འོག་ཡིན་ལ། འཐབས་པའི་མོད་མ་ཡིན་པ་དང ། རྩཝ་མ་བཅད་པ་དང ། རྡེའུ་གསུམ་གྱིས་མ་གཏོར་བ་དང ། བྱེ་རྒྱ་བྱིན་ནས་མ་བཏང་བ་དང ། ཆུང་མ་མ་ཡིན་པར་དཔང་མ་བཙུགས་པ་དང ། དྲིལ་མ་བསྒྲགས་པ་དག་གི་སྡུམས་བྱས་ལ། འཐུན་པར་གྱུར་ན་ཉེས་བྱས་གཉིས་སུ་འགྱུར་རོ། །དགེ་སློང་མས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་དང་འཐབས་པའི་མོད་དང ། འཐབས་པའི་འོག་དང ། རྩཝ་བཅད་པ་ཡིན་ལ་རྡེའུ་གསུམ་གྱིས་མ་གཏོར་བ་དང ། བྱེ་རྒྱ་བྱིན་ནས་མ་བཏང་བ་དང ། ཆུང་མ་མ་ཡིན་པར་དཔང་མ་བཙུགས་པ་དང ། དྲིལ་མ་བསྒྲགས་པ་དག་གི་སྡུམས་བྱས་ལ། འཐུན་པར་གྱུར་ན་ཉེས་བྱས་གསུམ་དུ་འགྱུར་རོ། །དགེ་སློང་མས་ཆུང་མ་དང་པོ་གསུམ་པོ་ཆུ་ཚིགས་ཀྱི་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་ཞེས་བྱ་བ་ནས་རྡེའུ་གསུམ་གཏོར་བའི་བར་ཡིན་ལ། བྱི་རྒྱ་བྱིན་ནས་མ་གཏང་བ་དང ། ཆུང་མ་མ་ཡིན་པར་དཔང་མ་བཙུགས་པ་དང ། དྲིལ་མ་བསྒྲགས་པ་དག་གི་སྡུམས་བྱས་ལ། འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་གཅིག་ཏུ་འགྱུར་རོ། །དགེ་སློང་མས་ཆུང་མ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་ཞེས་བྱ་བ་ནས་བྱེ་རྒྱ་བྱིན་ནས་བཏང་བ་ཞེས་བྱ་བའི་བར་ཡིན་ལ། ཆུང་མ་མ་ཡིན་པར་དཔང་མ་བཙུགས་པ་དང ། དྲིལ་མ་བསྒྲགས་པ་དག་གི་སྡུམས་བྱས་ལ། འཐུན་པར་གྱུར་ན་ཉེས་བྱས་གསུམ་དང ། ཉེས་པ
9.93a
སྦོམ་པོ་གཉིས་སུ་འགྱུར་རོ། །དགེ་སློང་མས་ཆུང་མ་གསུམ་པོ་ཆུ་ཚིགས་ཀྱིས་བྱིན་པ་དང ། ་རིན་ཆས་ཉོས་པ་དང ། བཙན་འཕྲོགས་སུ་ཐོབ་པ་ཞེས་བྱ་བ་ནས། ཆུང་མ་མ་ཡིན་པར་དཔང་བཙུགས་པའི་བར་ཡིན་ལ། དྲིལ་མ་བསྒྲགས་པ་དག་གིས་སྡུམས་བྱས་ཏེ་འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་གསུམ་དང ། དགེ་འདུན་ལྷག་མ་གཅིག་ཏུ་འགྱུར་རོ། །དགེ་སློང་མས་ཆུང་མ་གསུམ་པོ་ཆུ་ཚིགས་ཀྱིས་བྱིན་པ་དང ། རིན་ཆས་ཉོས་པ་དང ། བཙན་ཕྲོགས་སུ་ཐོབ་པ་ཞེས་བྱ་བ་ནས། དྲིལ་བསྒྲགས་པའི་བར་དག་གི་སྡུམས་བྱས་ལ། འཐུན་པར་གྱུར་ན་ཉེས་བྱས་གསུམ་དང ། ཉེས་པ་སྦོམ་པོ་བཞི་དང ། དགེ་འདུན་ལྷག་མ་གཉིས་སུ་འགྱུར་རོ། །དགེ་སློང་མས་ཆུང་མ་དེ་ལས་གཞན་པ་འཐབས་པའི་མོད་དང ། འཐབས་པའི་འོག་ཏུ་བསྡུམས་བྱས་ལ། འཐུན་པར་གྱུར་ན་ཐམས་ཅད་དུ་དགེ་འདུན་ལྷག་མར་འགྱུར་རོ། །དགེ་སློང་མ་ཁྱིམ་པའི་ཁྱིམ་དུ་སོང་ནས་འདི་སྐད་ཅེས་ཅིའི་ཕྱིར་ཁྱེའུ་འདི་མི་དབུབ་ཅེས་ཟེར་ན་ཉེས་པ་སྦོམ་པོར་འགྱུར་རོ། །ཅིའི་ཕྱིར་བུ་མོ་ཆེན་མོ་འདི་བག་མར་མི་གཏང་ཞེས་ཟེར་ན་ཉེས་པ་སྦོམ་པོར་འགྱུར་རོ། །ཅིའི་ཕྱིར་ཁྱེའུ་འདི་གྱོས་པོའི་ཐད་དུ་མི་གཏང་ཞེས་ཟེར་ན་ཉེས་པ་སྦོམ་པོར་འགྱུར་རོ། །ཅིའི་ཕྱིར་བུ་མོ་འདི་ཁྱིམ་བདག་གི་ཐད་དུ་མི་བཀྲི་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་མ་ཁྱིམ་བདག་གི་ཁྱིམ་དུ་སོང་ནས་ཐ་ན་འདི་སྐད་ཅེས་ཅིའི་ཕྱིར་ཁྱིམ་བདག་ཁྱོད་ཀྱིས་ཞལ་ཏ་བྱེད་པ་དག་གཞག་མི་བྱ་ཞེས་ཟེར་ན་ཉེས་བྱས་སུ་འགྱུར་རོ། །དེ་བཞིན་དུ་ཁྱིམ་བདག་མོ་ལ་ཡང་ཉེས་བྱས་སུ་འགྱུར་རོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་གྱི་ལྷག་མ་དང་པོ་རྫོགས་སྷོ།། ་་་་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་སྡིག་བྱུང་ན་གྱད་ཀྱི་སྣ་ཆེན་པོ་རྒྱལ་སྡེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ། གསེར་དང་ནོར་མང་པོ་འབྱོར་པ
9.93b
ཞིག་གནས་སོ། །དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱང་དེ་ལ་བུ་ཡང་མེད་བུ་མོ་ཡང་མེད་དོ། །བུ་མེད་པས་བུ་ལ་མངོན་པར་དགའ་སྟེ། དེ་བུའི་དོན་དུ་ལྷ་བརྒྱ་སྟོང་དུ་མ་ལ་གསོལ་བ་འདེབས་ཏེ། འདི་ལྟ་སྟེ། ཚངས་པ་དང ། དབང་པོ་དང ། ཉེ་དབང་དང ། གཤིན་རྗེ་དང ། ཉི་མ་དང ། ལུས་ངན་པོ་དང ། ཀུན་འགེད་གཞོན་ནུ་དང ། སྐྱེ་དགུའི་བདག་པོ་དང ། ཁྱབ་འཇུག་དང ། དབང་བདག་དང ། ས་ག་དང ། ལས་ཐམས་ཅད་པ་དང ། ཐ་སྐར་དང ། རླུང་མར་གྱི་ལྷ་དང ། སའི་ལྷ་དང ། ཆུ་ལྷ་དང ། མེ་ལྷ་དང ། རླུང་ལྷ་དང ། ཡུལ་འཁོར་སྲུང་དང ། འཕགས་སྐྱེས་པོ་དང ། མིག་མི་བཟང་དང ། རྣམ་ཐོས་ཀྱི་བུ་དང ། ནོར་བུ་བཟང་པོ་དང ། གང་བ་བཟང་པོ་དང ། ལྔས་རྩེན་དང ། ལྔ་ལེན་དང ། གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དང ། འཕྲོག་མ་བུ་ལྔ་བརྒྱའི་འཁོར་ཅན་དང ། ཀུན་དགའ་ར་བའི་ལྷ་དང ། ནགས་ཚལ་གྱི་ལྷ་དང ། བཞི་མདོའི་ལྷ་དང ། སུམ་མདོའི་ལྷ་དང ། གཏོར་མ་ལེན་པའི་ལྷ་དང ། ལྷན་ཅིག་སྐྱེས་པའི་ལྷ་དང ། ཆོས་འཐུན་པ་པ་དང་རྟག་ཏུ་རྗེས་སུ་འབྲང་བའི་ལྷ་དེ་དག་དང ། གཞན་ཡང་ལྷ་བརྒྱ་སྟོང་དག་ལ་གསོལ་བ་འདེབས་པར་བྱེད་དོ། །འཇིག་རྟེན་ན་ཡང་ལྷ་ལ་གསོལ་བ་བཏབ་པའི་རྒྱུ་ལས་བུ་དང་བུ་མོ་དག་སྐྱེའོ་ཞེས་བྱ་བ་འཇིག་རྟེན་པའི་གཏམ་དེ་ལྟ་བུ་ཡོད་མོད་ཀྱི་དེ་ནི་དེ་ལྟ་མ་ཡིན་ཏེ། གལ་ཏེ་དེ་ལྟར་གྱུར་དུ་ཟིན་ན་དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་རེ་རེ་ལ་ཡང་བུ་སྟོང་ཡོད་པར་འགྱུར་རོ། །འོན་ཀྱང་གནས་དྲུག་པོ་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་ཏེ། དྲུག་པོ་གང་དག་ཅེ་ན། ཕ་མ་གཉིས་ཀྱི་བུ་རྙེད་པར་འགྱུར་བའི་ལས་དག་བྱས་ཤིང་བསགས་པ་ཡིན། ་བུས་ཀྱང་ཕ་མ་རྙེད་པར་འགྱུར་བའི་ལས་བྱས་ཤིང་བསགས་པ་ཡིན། མ་ཡང་རུང་བར་གྱུར་ཅིང་ཟླ་མཚན་དང་ལྡན་པ་ཡིན། ཕ་མ་གཉིས་ཆགས་པར་གྱུར་ཅིང་འདུས་པ་ཡིན། དྲི་ཟ་ཡང་ཉེ་བར་གནས་པ་ཡིན། དྲི་ཟས་ཀྱང་སེམས་གཉིས་པོ་རྗེས་སུ་ཆགས་པ་དང་ལྡན་པ་འམ། ཁོང་ཁྲོ་བ་དང་ལྡན་པ་གང་ཡང་རུང་བའི
9.94a
སེམས་ཡོངས་སུ་ཐོབ་པ་སྟེ། གནས་དྲུག་པོ་འདི་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བ་ཡིན་ནོ། །དེ་དེ་ལྟར་ལྷ་བརྒྱ་སྟོང་ལ་གསོལ་བ་འདེབས་པ་ལྷུར་ལེན་ཅིང་འདུག་པ་ན་སེམས་ཅན་བསོད་ནམས་ཀྱི་རྣམ་པར་སྨིན་པས་དབང་ཆེ་བར་གྲགས་པ། སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ། སྲིད་པ་ཐ་མ་པ། སྤྱོད་པ་ཚོལ་བ། འཆིང་བ་ཉམས་སྨད་པ། ཐར་པའི་ཚོགས་བཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། ་སྲིད་པའི་འགྲོ་བ་ཐམས་ཅད་དུ་འཆི་འཕོ་དང་སྐྱེ་བ་དོན་དུ་མི་གཉེར་བ་ལུས་ཐ་མ་འཛིན་པ་ཞིག་ལྷའི་འཇིག་རྟེན་ནས་ཤི་འཕོས་ནས་ཆུང་མ་དེའི་མངལ་དུ་ཞུགས་སོ། །འདི་ན་བུད་མེད་མཁས་པའི་རང་བཞིན་ཅན་ཁ་ཅིག་ཤེས་པར་བྱ་བའི་གནས་ལྔ་རབ་ཏུ་ཤེས་ཏེ། སྐྱེས་པ་ཆགས་པར་གྱུར་པ་ཤེས་ཤིང་སྐྱེས་པ་ཆགས་པ་དང་བྲལ་བ་ཤེས་པ་དང ། དུས་ཤེས་ཤིང་ཟླ་མཚན་ཤེས་པ་དང ། ་མངལ་དུ་ཞུགས་པ་ཤེས་པ་དང ། གང་ལས་མངལ་དུ་ཞུགས་པ་དེ་ཡང་ཤེས་པ་དང ། ཁྱེའུར་ཤེས་ཤིང་བུ་མོར་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེས་ཀྱང་བདག་ལ་སེམས་ཅན་ཞུགས་པ་དེ་དཀུ་གཡས་པར་རྟེན་ཅིང་འདུག་པས་ན་ཁྱེའུར་འགྱུར་རོ་སྙམ་དུ་རིག་ནས་དགའ་ཞིང་མགུ་ལ་ཡིད་རབ་ཏུ་དགའ་བས་ཁྱིམ་ཐབ་ལ་སྨྲས་པ། རྗེའི་སྲས་ཁྱོད་ལ་བཀའ་མཆིད་སྙན་པ་ཞིག་གསོལ་ལོ། །དེས་སྨྲས་པ། བཟང་མོ་ལྷ་དང་མིའི་གཏམ་སྙན་ཐོབ་པར་གྱུར་ཅིག་།གཏམ་སྙན་པ་ཇི་ལྟ་བུ་ཞིག་།རྗེའི་སྲས་བདག་ལ་སེམས་ཅན་ཞུགས་པར་གྱུར་པ། ཇི་ལྟར་བདག་གི་དཀུ་གཡས་པ་མི་བདེ་བ་ལས་གོར་མ་བཀུམ་པར་བདག་གིས་བུ་རྙེད་དོ། །དེ་ནས་གྱད་ཀྱི་སྣ་ཆེན་པོ་ལ་གཏོགས་པ་རྒྱལ་སྡེས་དེ་ཐོས་མ་ཐག་ཏུ་དགའ་ཞིང་མགུ་ལ་ཡིད་རབ་ཏུ་དགའ་སྟེ། བཞིན་པད་མ་རྒྱས་པ་ལྟ་བུས་དགའ་བའི་ཚིག་འདི་སྐད་ཅེས་སྨྲས་སོ། །བཟང་མོ་ཁྱོད་ཀྱི་བུ་དེ་བཞིན་དུ་སྐྱེ་བར་ཤོག་ཤིག་།ཁོ་བོས་ཀྱང་བུ་སྡུག་པའི་ངོ་མཐོང་བ་དང ། ཁོ་བོས་ཡུན་རིང་མོ་ཞིག་ནས་བསམས་པའི་བུ་ཡིད་ལ་བསམས་པ་བཞིན་དུ་འགྲུབ་པ་དང །
9.94b
ཁོ་བོ་དང་འཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང ། ཁོ་བོའི་བྱ་བ་དག་བྱེད་པ་དང ། གསོས་པས་ཕྱིར་གསོ་བ་དང ། ཁོ་བོའི་ནོར་རྫས་ལ་སྤྱོད་པ་དང ། ཁོ་བོའི་རིགས་རྒྱུད་ཀྱང་ཡུན་རིང་དུ་གནས་པར་འགྱུར་བ་དང ། དེ་ཡང་ཕྱུག་པ་དང ། ནོར་མང་བ་དང་ལོངས་སྤྱོད་ཆེ་བ་དང ། ཡོངས་སུ་གཟུང་བ་ཡངས་ཤིང་རྒྱས་པར་གྱུར་ནས་བདག་གི་དབང་ཕྱུག་ཀྱང་ཉམས་པར་མི་འགྱུར་བ་དང ། བདག་ཅག་ཤི་ཞིང་དུས་ལས་འདས་པ་ན་བདག་ཅག་གི་ཕྱིར་སྦྱིན་པ་དག་སྦྱིན་ཞིང་བསོད་ནམས་དག་བྱས་ནས་འདི་དེ་གཉིས་གང་དུ་སྐྱེས་པ་དེར་རྗེས་སུ་འགྲོ་བར་གྱུར་ཅིག་ཅེས་ཡོན་སྔོ་བར་བྱེད་པར་ཤོག་ཤིག་དེ་ལ་སེམས་ཅན་ཞུགས་པར་རིག་ནས་དེ་ཚུན་ཆད་ཆུང་མ་ལ་ལྷག་པར་དགའ་བར་གྱུར། བཀུར་སྟི་ཆེ་བར་གྱུར། བྱམས་པར་གྱུར་ནས་སྟེང་གི་ཁང་བཟངས་ཀྱི་ཐོག་ཏུ་གནོད་པ་མེད་པར་འདུག་ཏུ་བཅུག་སྟེ། གྲང་བ་ན་གྲང་བའི་ཡོ་བྱད་དག་དང ། ་དྲོ་བ་ན་དྲོ་བའི་ཡོ་བྱད་དག་དང ། སྨན་པས་བསྟན་པའི་ཁ་ཟས་དང ། བཏུང་བའི་བྱེ་བྲག་ཧ་ཅང་མི་བསིལ་བ། ཧ་ཅང་མི་དྲོ་བ། ཧ་ཅང་མི་ཁ་བ། ཧ་ཅང་མི་ཚ་བ། ཧ་ཅང་ལན་ཚཝ་མི་ཆེ་བ། ཧ་ཅང་མི་སྐྱུར་བ། ཧ་ཅང་མི་མངར་བ། ཧ་ཅང་མི་བསྐ་བ། ཧ་ཅང་མི་སྣུམ་པ། ཧ་ཅང་མི་རྩུབ་པ། ཁ་བ་དང ། ཚ་བ་དང ། ལན་ཚཝ་དང ། སྐྱུར་བ་དང ། མངར་བ་དང ། བསྐ་བ་དང ། སྣུམ་པ་དང ། རྩུབ་པ་རྣམ་པར་སྤངས་པའི་ཁ་ཟས་དང ། བཏུང་བ་དག་གིས་དེ་ལ་རིམ་འགྲོ་བྱེད་དུ་འཇུག་གོ། །དེ་ནས་མངལ་ན་གནས་པ་ཡོངས་སུ་བསྐྱང་བའི་ཕྱིར་འདི་ལྟར་ཆུང་མ་དེ་གོས་ཚོན་སྣ་ཚོགས་སུ་སྤེལ་བ་ནི་བསྐོན། ལག་པ་ནི་གསེར་གྱི་གདུབ་བུ་དང ། ནོར་བུ་དང ། མུ་ཏིག་གིས་གཏམས། དོ་ཤལ་དང ། སེ་མོ་དོ་རྣམ་པར་འཕྱང་བ་དང ། གདུ་བུ་དང ། དཔུང་རྒྱན་དང ། རྣ་ཆ་གདུབ་ཀོར་ནི་ཐོགས། མིག་ནི་མིག་སྨན་གྱིས་བྲེས། བཞིན་ནི་དམར་རྩིའི་ཐིག་ལེས་མཛེས་པར་བྱས། སོ་ནི་མེ་ཏོག་ཀུ་མུ་ཏ་དང ། དངུལ་དང ། ཁ་བ་དང ། མུ་ཏིག་གི་དོ་ཤལ་དང ། མེ་ཏོག་ཀུན་ད་དང ། ཟླ་བ་དང ། ངང་པ་དང ། བའི་འོ་མ་དང ། དུང་དང ། པད་མའི་རྩ་བ་ལྟར་དྲི་མ་མེད་པ་རྐེད་པ་ནི་གསེར་གྱི་འོག་ལྤག་གིས་བཅིངས་རྐང་པ་ནི་རྐང་རྒྱན་གྱིས་མཛེས
9.95a
པར་བྱས་ནས་གསེར་གྱི་མཆོད་སྡོང་མེ་ཏོག་གིས་ཀླུབས་པ་ལྟ་བུ་དེ་འདི་ལྟར་མངལ་དུ་ཞུགས་པའི་སེམས་ཅན་གྱིས་བསོད་ནམས་བྱས་པ་དང་དགེ་བ་བྱས་པའི་རྒྱུས་སྟེང་གི་ཁང་བཟངས་ཀྱི་ཐོག་ན་འཐུན་ཞིང་རྗེས་སུ་འཐུན་པའི་འཁོར། གླིང་བུ་དང ། ་པི་བང་དང ། རྫ་རྔ་དང ། རྔ་བོ་ཆེ་དང ། རོལ་མོའི་སྒྲ་སྙན་པ་འབྱིན་པ་རྣམས་ཀྱིས་ལྷའི་བུ་མོ་དགའ་བའི་ཚལ་ན་རྒྱུ་བ་བཞིན་དུ་ཁང་བཟངས་ན་རྩེ་བར་བྱེད། དགའ་བར་བྱེད་ཅིང་དེ་ཁྲི་བོ་ཆེ་ལེགས་པར་བཙུགས་པའི་སྟེང་ན་ཁྲི་ནས་ཁྲིར་དང ། ཁྲིའུ་ནས་ཁྲིའུར་རྒྱུ་ཞིང་ཤོད་ཀྱི་ས་གཞིར་མི་འབབ་ལ་དེ་ལ་འགའ་ཡང་སྒྲ་ཡིད་དུ་མི་འོང་བ་འབྱིན་པར་མི་བྱེད་དོ། །ཁྱིམ་དེ་ཡང་ནོར་དང ། འབྲུ་དང ། དབྱིག་དང ། གསེར་དང ། མཛོད་དང ། བང་བ་དང ། བྲན་དང ། བྲན་མོ་དང་ལས་བྱེད་པ་དང ། ཞོ་ཤས་འཚོ་བ་དང ། རྐང་གཉིས་པ་དང ། རྐང་བཞི་པ་ལ་སོགས་པ་དག་གིས་རྒྱས་ཤིང་འཕེལ་བར་གྱུར་ཏེ། ཇི་ལྟར་རྒྱ་མཚོ་ཆན་པོ་ཆུ་ཀླུང་ལྔ་བརྒྱ་དག་གིས་ཉིན་གཅིག་བཞིན་འགེངས་པར་བྱེད་པ་དེ་བཞིན་དུ་ཁྱིམ་དེ་ཡང་རྒྱས་པར་གྱུར་ཏོ། །རེ་ཤིག་ན་གྱད་ཀྱི་སྣ་ཆེན་པོ་ལ་གཏོགས་པའི་བློན་པོ་ལྔ་བརྒྱ་རྣམས་ཀྱི་ཆུང་མ་ལ་ཡང་སེམས་ཅན་ཞུགས་པར་གྱུར་ཏོ། །དེ་ནས་དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པད་མའི་རྩ་བའི་མདོག་ལྟར་དཀར་བ། མགོ་གདུགས་ལྟ་བུ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་ཚུགས་ཀྱི་རྒྱུན་མ་ཆད་པ། སྣའི་གཟངས་མཐོ་བ། ཐོང་ཀ་སེང་གེའི་འདྲ་བ། རོ་སྟོད་སེང་གེ་ལྟ་བུ་དཔུང་པ་རིང་བ་ཞིག་བཙས་སོ། །ཉི་མ་དེ་ཉིད་ལ་གྱད་ཀྱི་སྣ་ཆེན་པོ་ལ་གཏོགས་པའི་བློན་པོ་ལྔ་བརྒྱའི་བུ་རྣམས་ཀྱང་བཙས་སོ། །རྒོད་མ་ལྔ་བརྒྱ་ཡང་རྟེའུ་འབྲངས་སོ། །དེ་བཞིན་དུ་རྫས་ཤེས་བྱ་བའི་བར་དུ་ཡང་རྒྱས་པར་བརྗོད་པར་བྱའོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་ཞེས་བྱ་བ་ནས། གྲོང་ཁྱེར་དུ་བཙས་སྟོན་བྱས་ཏེ་ཞེས་བྱ་བའི་བར་དང ། ཁྱེའུ་ཡི་མིང་ཅིར་གདགས་ཤེས་བྱ་བའི་བར་དུ་བརྗོད་པར་བྱའོ། །དེ་དག་ལས་ཁ་ཅིག་ན་རེ་ནོར་རྣམས་དང་ལྷན་ཅིག་སྐྱེས་ལ། གྱད་ཀྱི་སྣ་ཆེན་པོ་ལ་གཏོགས་པའི་བུ
9.95b
ཡང་ཡིན་པས་དེའི་ཕྱིར་མིང་གྱད་བུ་ནོར་དུ་གདགས་སོ་ཞེས་ཟེར་རོ། །གཞན་དག་ན་རེ་འདི་ནོར་དང་འདྲ་བར་སྐྱེས་ལ། འདིའི་ཕ་ཡང་གྱད་ཀྱི་སྣ་ཆེན་པོ་ལ་གཏོགས་པ་ཡིན་པས་ཁྱེའུ་ཡི་མིང་གྱད་བུ་ནོར་ཞེས་མིང་དུ་གདགས་སོ་ཞེས་ཟེར་ནས་མིང་གྱད་བུ་ནོར་དུ་བཏགས་ཏེ་ཞེས་བྱ་བ་ནས། མ་མ་བརྒྱད་ལ་གཏད་དོ་ཞེས་བྱ་བའི་བར་དང ། འོ་མ་དང ། ཞོ་དང ། མར་སར་དང་ཞེས་བྱ་བ་ནས་སྐྱེད་པར་བྱེད་དོ་ཞེས་བྱ་བའི་བར་དུའོ། །མངག་གཞུག་མ་བུ་མོ་ཞིག་གིས་དེ་ཕྲག་པ་ལ་བླངས་ཏེ་སྲང་དུ་ཞུགས་པ་དང ། དེ་ན་བྲམ་ཟེ་མཚན་མཁན་ཞིག་གིས་མཐོང་ནས་འདི་སྐད་ཅེས་སྨྲས་སོ། །རྐང་གཉིས་པ་བསོད་ནམས་ཀྱི་ཞིང་ཡིན་ནོ་ཞེས་བྱ་བ་ནས་ཕ་ལས་བླངས་ཏེ་ཞེས་བྱ་བའི་བར་དང ། ཏིལ་མར་དྲི་ཞིམ་པོས་བྱུགས་ནས་ཞེས་བྱ་བ་ནས་མཆོད་པ་བྱས་ནས་ཕྱིར་ཁྱིམ་དུ་བསྐྱལ་ཏོ་ཞེས་བྱ་བའི་བར་དུའོ། །གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང ། རྩིས་སློབ་ཏུ་བཅུག་གོ་ཞེས་བྱ་བ་ནས་རྩིས་དང ། གཞན་དག་ལ་དེ་བློ་རྣོ་བ་དང ། བྱང་བར་གྱུར་ཏོ། །རྒྱལ་རིགས་རྣམས་ཀྱིས་བཟོའི་གནས་དང ། ལས་ཀྱི་གནས་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉའ་བར་ཞོན་པ་དང ། རྟ་ལ་ཞོན་པ་དང ། ཤིང་རྟའི་ཐབས་དང ། རལ་གྲིའི་ཐབས་དང ། འཕོང་ཐབས་དང ། ཕྱིར་བསྣུར་བ་དང ། མདུན་དུ་བསྣུར་པ་དང ། ལྕགས་ཀྱོས་བསྒྱུར་བའི་ཐབས་དང ། ཞགས་པ་གདབ་པ་དང ། རྡོ་རྗེ་རྩེ་གཅིག་པ་འཕང་བ་དང ། འཁོར་ལོ་འཕང་བའི་ཐབས་དང ། མདའ་བོ་ཆེ་འཕང་བའི་ཐབས་དང ། འཛིན་སྟངས་དང ། གོམ་སྟངས་དང ། ཐོར་ཚུགས་བཅིང་བ་དང ། བཅད་པ་དང ། གཏུབ་པ་དང ། དབུག་པ་དང ། དྲལ་བ་དང ། གཤེགས་པ་དང ། རྒྱང་ནས་ཕོག་པ་དང ། སྒྲ་གྲགས་པར་ཕོག་པ་དང ། གནད་དུ་སྣུན་པ་དང ། མི་འཆོར་བར་ཕོག་པ་དང ། ཚབས་ཆེར་ཕོག་པར་བྱ་བ་ལ་ཕ་རོལ་ཏུ་ཕྱིན་པར་གྱུར་ཏོ། །གནས་བཞི་རྣམས་དང ། འཕེན་པ་ལྔ་རྣམས་དང ། རིག་པའི་གནས་བཅཝ་བརྒྱད་པོ་རྣམས་ལ་མཆོག་ཏུ་བློ་རྣོ་བ་དང་བྱང་བར་གྱུར་ཏོ། །ཕས་ཀྱང་དེའི་སྐྱེད་མོས་ཚལ་གསུམ་པོ་དགུན་གྱི་དང ། དཔྱིད་ཀྱི་དང ། དབྱར་གྱི་རྣམས་བྱེད་དུ་བཅུག་སྟེ། དགུན་གྱི་ནི་གཅིག་ཏུ་དྲོ་བའོ། །དཔྱིད་གྱི་ནི་གཅིག་ཏུ་བསིལ་བའོ། །དབྱར་གྱི་ནི་ཧ་ཅང་མི་དྲོ
9.96a
ཧ་ཅང་མི་གྲང་བའོ། །ཆུང་མའི་འཁོར་གསུམ་པོ་ཆེན་མ་དང ། བར་མ་དང ། ཆུན་མ་ཡང་བཞག་གོ། །དེ་ཡང་སྟེང་གི་ཁང་བཟངས་ཀྱི་ཐོག་ན་ནིའུ་ལྡངས་རྣམས་དང་ལྷན་ཅིག་ཏུ་གླིང་བུ་དང ། པི་བང་དང ། རྫ་རྔ་དང ། ཁར་རྔ་དང ། ལྕགས་ཀྱི་སིལ་ཁྲོལ་དང ། རོལ་མོའི་སྒྲ་སྙན་པ་འབྱིན་པ་རྣམས་ཀྱིས་ལོངས་སྤྱོད་བྱེད་དེ། དཔེར་ན་སེམས་ཅན་བསོད་ནམས་བྱས་ཤིང་དགེ་བ་བྱས་པ་དག་རང་གི་བསོད་ནམས་ཀྱི་འབྲས་བུ་ཉམས་སུ་མྱོང་བར་བྱེད་པ་བཞིན་ནོ། །དེ་ནས་དུས་གཞན་ཞིག་ན་དེའི་གྲོགས་པོ་རྣམས་རི་དགས་ཤོར་དུ་སོང་ངོ་ཞེས་བྱ་བ་ནས་དྲིས་པ། གྲོགས་པོ་དག་ག་ལས་འོངས། དེ་དག་གིས་སྨྲས་པ། རི་དགས་ཤོར་དུ་སོང་སོང་ངོ ། །རི་དགས་ཤོར་བ་ཞེས་བྱ་བ་ཇི་ལྟ་བུ་ཞིག་།དེ་དག་གིས་སྨྲས་པ། དགོན་པར་སོང་ནས་རི་དགས་དག་བསད་དེ་ཤ་ཁྱེར་ཏེ་འོངས་ནས་ཤས་དགོས་པའི་བྱ་བ་བྱེད་པའོ། །དེས་དེ་རྣམས་ལ་སྨྲས་པ། དགོན་པ་ན་གནས་ཤིང་རྩ་ཟ་ཤིང་ཆུ་འཐུང་བ་དེ་དག་གིས་ཁྱེད་ཅག་ལ་གནོད་པ་ཅི་ཞིག་བྱས་ནས་གསོད་པར་བྱེད། དེ་དག་གིས་སྨྲས་པ། འདི་ལྟར་ཁོ་བོ་ཅག་ལ་གནོད་པ་ཅུང་ཟད་ཀྱང་མ་བྱས་མོད་ཀྱི། འོན་ཀྱང་དགའ་བའི་སླད་དུ་འགུམས་པར་བགྱིད་དོ། །དེ་བས་ན་སྤྲོ་བར་མཛོད་ཅིག་དང་ལྷན་ཅིག་ཏུ་བཞུད་པར་བགྱིའོ། །དེས་སྨྲས་པ། འདི་ལྟར་རེ་ཤིག་བདག་ཁྱེད་ཅག་འགྲོ་བར་འདོད་པ་ཡང་མེད་ན། བདག་འགྲོ་བ་ལྟ་སྨོས་ཀྱང་ཅི་དགོས་ཏེ་སྤྱོད་པ་དེ་ནི་བཟང་པོ་མ་ཡིན་ནོ། །དེ་དག་འདི་སྙམ་དུ་གལ་ཏེ་བདག་གིས་མ་ཁྲིད་ན་བདག་ཅག་ཀྱང་འགྲོར་མི་སྟེར་བའི་གནས་སྐབས་དེ་ལྟ་བུ་ཡོད་པར་འོང་ངོ་སྙམ་དུ་བསམས་ནས་ཞེས་བྱ་བའི་བར་དུའོ། །དེ་དག་གྱད་བུ་ནོར་གྱི་ཕ་མ་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཡབ་ཡུམ་དག་གང་གི་ཕྱིར་གཞོན་ནུ་གཏུམ་པ་རྩལ་ཆེ་བ་དེ་ལྟ་བུའི་ཉི་འོག་གི་རྒྱལ་པོ་རྣམས་ཀྱིས་ཐོས་ན་བག་འཁུམ་པར་འགྱུར་ཞིང་ཞེས་བྱ་བ་ནས། སླས་ཀྱི་བཙུན་མོ་ཡང་འཕེལ་བར་འགྱུར་རོ། །ཞེས་བྱ་བའི་བར་འགྱུར་རོ། །ཞེས་བྱ་བའི་བར་དུའོ། །ཇི་ཙམ་ན་དེ་ལ་ཕ་དང་མས་སོང་ལ་གྲོགས་པོ་རྣམས་ཀྱིས
9.96b
བསྒོ་བ་བཞིན་དུ་གྱིས་ཤིག་ཅེས་སྨྲས་པ་དང་ཞེས་བྱ་བ་ནས་ལེགས་སོ་ཞེས་བྱ་བའི་བར་དུའོ། །དེ་ཕ་མ་ལ་གུས་པ་ཡིན་པས་དེས་འདི་སྙམ་དུ་འདི་ལྟར་བདག་གིས་དེ་དག་གི་ཚིག་བཟློག་པར་མི་ནུས་ཏེ། འདི་ལྟར་བླ་མས་བསྒོ་བ་བཞིན་དུ་བྱ་དགོས་པས་ཕ་མས་བསྒོ་བ་བཞིན་དུ་འགྲོ་བར་བྱའོ་སྙམ་དུ་བསམས་ནས་དེས་ཁས་བླངས་སོ། །དེ་ནས་ཕ་མས་ཀྱང་བུ་དེ་འགྲོ་བའི་བསམ་པ་རྟོགས་ནས་བདག་ཉིད་ཀྱི་གྲོང་ན་གནས་པའི་འབངས་དང ། ཞོ་ཤས་འཚོ་བ་རྣམས་ལ་གྱད་བུ་ནོར་རི་དགས་ཤོར་དུ་འགྲོ་ཡིས་ཁྱེད་ཅག་ཀྱང་སོང་ཤིག་ཅེས་བསྒོའོ། །དེ་དག་ཀྱང་བསྒོ་བ་བཞིན་དུ་འོངས་ནས་ཉི་མ་གཉིས་པ་ལ་གྱད་བུ་ནོར་གྱད་ཀྱི་སྣ་ལ་གཏོགས་པའི་བུ་ལྔ་བརྒྱས་བསྐོར་ཏེ་ཞོ་ཤས་འཚོ་བའི་མི་དང ། བྲན་གཡོག་མང་པོས་ཡོངས་སུ་བསྐོར་ནས་རི་དགས་ཤོར་དུ་སོང་ངོ ། །དེ་ནས་དེ་ལ་གྲོགས་པོ་རྣམས་ཀྱི་སྨྲས་པ། གྲོགས་པོ་ཁྱོད་ཅི་རི་དགས་སྐོང་དུ་འགྲོ་འམ། འོན་ཏེ་འཕན་ཀར་སྡོད་ཅེས་བྱས་པ་དང ། དེས་འདི་སྙམ་དུ་གལ་ཏེ་འདི་འཕན་ཀར་བཞག་སྟེ། བདག་གིས་རི་དགས་བཏབ་པར་འགྱུར་ན་དེ་དག་འཕོང་སྐྱེན་པས་རི་དགས་ཕལ་པོ་ཆེ་གསད་པར་འགྱུར་བར་བདག་གིས་འཕན་ཀར་བསྡད་ན་རུང་ངོ་སྙམ་དུ་བསམས་ནས། དེས་དེ་དག་ལིངས་ལ་སོང་ཤིག་ཅེས་བསྒོ་བ་དང ། དེ་དག་ཀྱང་ཡིད་རབ་ཏུ་དགའ་བར་གྱུར་ནས་གྲོགས་པོ་བདག་ཅག་ཀྱང་དེ་ཁོ་ན་ལྟར་དད་དོ། །དེ་དག་གིས་འདི་སྙམ་དུ་འདི་ནི་གནས་བཞི་དང ། འཕང་བ་ལྔ་རྣམས་ལ་བྱང་བ་ཡིན་པས་ཕལ་མོ་ཆེ་ཞིག་གསད་པར་འགྱུར་རོ། །སྙམ་དུ་བསམས་སོ། །དེ་ཡང་མདའ་སྟོང་གིས་བཀང་པའི་དོང་པ་ཐོགས་ནས་འཕན་ཀར་འདུག་གོ། །དེ་དག་གིས་ཀྱང་རི་དགས་ཕལ་མོ་ཆེ་ཀུན་ནས་བསྐོངས་པ་དང ། རི་དགས་དེ་དག་འཇིགས་སྐྲག་བཞིན་དུ་གཞོན་ནུའི་དྲུང་དུ་ལྷགས་པ་དང ། ་གཞོན་ནུ་ནི་སྙིང་རྗེ་ཅན་གྱིས་རྟབས་པར་གྱུར་པ་དེ་དག་མཐོང་ནས་ཡིད་མི་བདེ་བར་གྱུར་ནས་སྙིང་རྗེས་མངོན་པར་གདུངས་པར་གྱུར་ཏེ། དེའི་ཚེ་ཚིགས་སུ་བཅད་པ་སྨྲས
9.97a
པ། སེམས་ཅན་ཀུན་ལ་སྦྱིན་པ་དང ། །སེམས་ཅན་གཅིག་ལ་སྙིང་བརྩེ་གང ། །སེམས་ཅན་ཀུན་ལ་སྦྱིན་པ་བས། །སྙིང་བརྩེ་གཅིག་ཏུ་ཁྱད་པར་འཕགས། །དེ་དག་རླུང་ལྟར་འགྲོ་ཞིང་གཞན་གྱིས་སྡུག་བསྔལ་བར་བྱས་པ་དེ་དག་བྱེར་བར་གྱུར་ཀྱང་མདའ་མ་འཕངས་སོ། །འདི་ལྟར་སེམས་ཅན་ཐམས་ཅད་ནི་ཤེས་པ་གཅིག་པོ་ཀུན་རྫོབ་ཤེས་པ་དང་ལྡན་པ་ཡིན་པས་དེ་དག་གིས་འདི་སྙམ་དུ་བདག་ཉིད་ཆེན་པོ་འདི་ནི་སྙིང་རྗེ་ཅན་ཡིན་ནོ་སྙམ་དུ་བསམས་ཏེ། དེ་དག་དེ་ལ་ལེགས་པར་ཐུགས་ཀྱང་འཇིགས་པ་མེད་པར་བྱེར་རོ། །དེ་ནས་གྱད་བུ་ནོར་འདི་སྙམ་དུ་གལ་ཏེ་བདག་གིས་མདའ་མ་འཕངས་པ་གྲོགས་པོ་འགའ་ཞིག་གིས་ཐོས་ན་ཡིད་མི་དགའ་བར་འགྱུར་རོ། །སྙམ་དུ་བསམས་ཤིང ། དེ་ཡང་འདི་སྙམ་དུ་མ་ལ་དེ་དག་བདག་ལ་གཤེ་བར་འགྱུར་བ་ཡོངས་སུ་སྤང་བའི་ཕྱིར་དང ། བདག་སྦྱོར་བ་ལ་གོམས་པར་ཤེས་པར་བྱ་བའི་ཕྱིར་མདའ་འཕང་ངོ་སྙམ་དུ་བསམས་ནས་དེས་དེ་ལྟར་བསམས་ཏེ་འདི་ལྟར་སེམས་ཅན་འགའ་ལ་ཡང་གནོད་པ་སྐྱེད་པར་མི་འགྱུར་བར་མདའ་འཕངས་སོ། །དེས་ཀྱང་བསླེབས་པས་མདའ་རྣམས་རཝ་ཕྲག་དང་རྐང་ལག་གི་བར་དང་སྤུ་གསེབ་དང་རྣ་བར་དག་ཏུ་འཕངས་ཏེ་བཏང་ངོ ། །དེས་དེ་ལྟར་མདའ་སྟོང་པོ་དེ་དག་སེམས་ཅན་གཅིག་ལ་གནོད་པར་མི་འགྱུར་བ་དེ་ལྟར་འཕངས་སོ། །དེ་ནས་རི་དགས་དེ་དག་ཤིན་དུ་ཐལ་ནས་དོང་བ་དང ། དེའི་གྲོགས་པོ་རྣམས་འོངས་ནས་འཕན་ཀར་འདུག་སྟེ། ཕན་ཚུན་དུ་འདི་སྙམ་དུ་དེང་བདག་ཅག་གིས་རི་དགས་ཕལ་མོ་ཆེ་ཀུན་ནས་བསྐོངས་ལ་གྱད་བུ་ནོར་འདི་ཡང་གནས་བཞི་དང ། འཕང་བ་རྣམ་པ་ལྔ་ལ་བྱང་བ་ཡིན་པས་དེ་རིང་རི་དགས་མང་པོ་ཞིག་བསད་པར་གྱུར་ན། ཁུར་ཁལ་དག་ཁྱེར་ཏེ་མ་འོངས་པ་ནི་གཅིག་ཏུ་ཉེས་པ་བྱས་སོ། །སྙམ་དུ་བསམས་སོ། །ཇི་ཙམ་དྲུང་དུ་ཕྱིན་ན་དེ་དག་གིས་རི་དགས་གཅིག་ཀྱང་མ་བསད་པར་མཐོང་ངོ ། །མཐོང་ནས་ཀྱང་གྱད་བུ་ནོར་དེ་ལ་འདི་སྐད་ཅེས་སྨྲས་སོ། །གྲོགས་པོ་རི་དགས་དེ་དག་གར་སོང ། དེས་འདི་སྐད་ཅེས་སྨྲས་སོ། །བྲོས་ཏེ་སོང་ངོ ། །དེ་དག་གིས་སྨྲས་པ། ཅི་ཁྱོད་ཀྱིས་མདའ་མ་འཕངས་སམ། དེས་སྨྲས་པ།
9.97b
འཕངས་ཏེ་དོང་པ་སྟོང་པར་འདུག་པ་ལ་ལྟོས། དེ་དག་གིས་འདི་སྙམ་དུ་འདི་ལྟར་གྱད་བུ་ནོར་འཕང་བ་དེ་ལྟ་བུ་དག་ལ་དེ་ལྟར་བྱང་བར་གྱུར་ཏོ་ཞེས་བྱ་བ་དེའི་གྲགས་པ་བརྫུན་པ་ལྟ། རྣམ་པ་གཅིག་ཀྱང་མི་ཤེས་ན་བཞི་ཅར་ཤེས་པ་ལྟ་སྨོས་ཀྱང་ཅི་དགོས་སྙམ་དུ་བསམས་ཏེ། ཞེས་བྱ་བ་ནས་དེའི་གྲོགས་པོ་རྣམས་སྨོད་པར་བྱེད་དོ་ཞེས་བྱ་བའི་བར་དང ། རང་གི་ཁྱིམ་དུ་འོངས་ནས་སྟེང་གི་ཁང་བཟངས་ཀྱི་ཐོག་ན་ལག་པ་འགྲམ་པ་ལ་གཏད་ནས་སེམས་ཁོངས་སུ་ཆུད་དོ་ཞེས་བྱ་བའི་བར་ནས། ཕ་མ་འོངས་ནས་འདི་སྐད་ཅེས་སྨྲས་སོ། །ཞེས་བྱ་བའི་བར་དང ། བུ་ཅིའི་ཕྱིར་ཁྱོད་ཀྱིས་རི་དགས་མ་བསད་དེས་སྨྲས་པ། ཡབ་ཡུམ་ཁྱེད་ཅག་ལ་བདག་སྡུག་ལགས་སམ། བུ་ཤིན་དུ་སྡུག་གོ། །གལ་ཏེ་འགའ་ཞིག་གིས་བདག་སྲོག་དང་ཕྲལ་ན་ཁྱེད་ཅག་ཇི་ལྟ་བུར་འགྱུར། དེ་དག་གིས་སྨྲས་པ། ཤིན་དུ་སྡུག་བསྔལ་བ་དང ། ཡིད་མི་བདེ་བར་འགྱུར་མོད། དེས་སྨྲས་པ། ཁྱེད་ཅག་ལ་ཡང་སྲོག་མི་འཕངས་ལགས་སམ། དེ་དག་གིས་སྨྲས་པ་ཤིན་དུ་ཕངས་སོ། །འོ་ན་ཁྱེད་ཅག་ཅིའི་སླད་དུ་བདག་གཞན་གྱི་སྲོག་གཅོད་པ་ལ་སྦྱོར་བར་མཛད་གཞན་ཡང་ཡབ་ཡུམ་ཁྱེད་ཅག་གིས་འདི་ལྟར་འབྱུང་པོ་རྣམས་ལ་ཕན་འདོད་སྙིང་བརྩེ་བས། །སྲོག་གཅོད་པ་དང་གསོད་དང་འཆིང་བ་སྤོངས། །ཇི་ལྟར་རང་གི་སྲོག་ཕངས་སྲུང་བ་ལྟར། །དེ་བཞིན་གཞན་རྣམས་ཀྱི་ཡང་སྲོག་བསྲུང་ངོ ། །ཞེས་བགྱི་བ་ཅི་མ་གསན་ཏམ་ཞེས་བྱ་བའི་བར་དུའོ། །དེ་ནས་དེ་དག་གིས་བུ་དེའི་ངེས་པ་ཁོང་དུ་ཆུད་ནས་འདི་སྐད་ཅེས་སྨྲས་སོ། །བུ་དེ་ལྟ་ན་ཕྱིར་ཡང་སྟེང་གི་ཁང་བཟངས་ཀྱི་ཐོག་ཏུ་བཙུན་མོའི་འཁོར་རྣམས་དང་ལྷན་ཅིག་རྩེད་མོ་གྱིས་ཤིག་།དེ་ནས་གྱད་བུ་ནོར་གྱིས་སྟེང་གི་ཁང་བཟངས་ཀྱི་ཐོག་ནས་འདི་སྐད་ཅེས་རྐང་གཉིས་པ་དང ། རྐང་མེད་པ་དང ། སྨན་དང ། རིག་སྔགས་དང ། གསང་སྔགས་འཆང་བ་གང་གིས་བདག་འཁོར་བའི་དགོན་པ་ལས་ཡོངས་སུ་ཐར་བར་བྱེད་པ་སུ་ཡོད་ཅེས་སྨྲས་སོ། །དེའི་ཚེ་ཡུལ་སྡིག་བྱུང་ན་སྟོན་པ་དྲུག་པོ་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་མངོན་པའི་ང་རྒྱལ་བྱེད་པ་རྣམས་གནས་ཏེ་ཞེས་བྱ
9.98a
བ་ནས། འོད་སྲུང་གི་གན་དུ་སོང་སྟེ་འདི་སྐད་ཅེས་སྨྲས་སོ་ཁྱེད་ཀྱིས་ཆོས་ཀྱི་ཚུལ་ནི་གང་ཡིན་སློབ་མ་ལ་གདམས་པ་ནི་གང་ཡིན། ཁྱོད་ཀྱི་ཚངས་པར་སྤྱོད་པ་ལ་གནས་པའི་འབྲས་བུ་ནི་གང་ཕན་ཡོན་ནི་གང་ཡིན། དེས་སྨྲས་པ་གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་སྤྱད་པ་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་རྫུས་ཏེ་སྐྱེ་བ་མེད་དོ། །འཇིག་རྟེན་འདི་ན་ཡང་དག་པར་སོང་བ་དང ། ཡང་དག་པར་ཞུགས་པའི་དགྲ་བཅོམ་པ་གང་དག་རང་གི་མངོན་པར་ཤེས་པས་འཇིག་རྟེན་འདི་དང་འཇིག་རྟེན་ཕ་རོལ་མངོན་སུམ་དུ་བྱས་ཤིང་བསྒྲུབས་ནས་ཁོང་དུ་ཆུད་པར་བྱས་ཏེ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་པ་དག་མེད་དོ་ཞེས་བྱ་བ་ནས། སྟོན་པ་འདི་ཡང་ལམ་གོལ་བར་ཞུགས་པ། ལམ་ངན་པ་སྒྲུབ་པར་བྱེད་པ་ཡིན་ཏེ། མཁས་པ་རྣམས་ཀྱིས་ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་སྤང་བར་བྱ་བ་ཡིན་ནོ་ཞེས་བྱ་བའི་བར་དང་ཚིགས་སུ་བཅད་པ་སྨྲས་པ། ལྟ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་ནི་དེ་འདྲ་བ། །དེ་ཡི་ཆོས་མིན་ཅི་འདྲ་ཞིག་།ཅེས་བྱ་བ་ནས། དེ་བཞིན་དུ་སྟོན་པ་དྲུག་པོ་རྣམས་སྣོད་སྟོང་པ་བཞིན་དུ་བརྡབས་ཏེ་སོང་ངོ་ཞེས་བྱ་བའི་བར་དུའོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་ཉིན་ལན་གསུམ། མཚན་ལན་གསུམ། ཉིན་མཚན་ལན་དྲུག་ཏུ་སངས་རྒྱས་ཀྱི་སྤྱན་གྱིས་འཇིག་རྟེན་རྣམས་ལ་གང་ནི་ཉམས་པར་གྱུར། གང་ནི་སྡུག་བསྔལ་བར་གྱུར། གང་ནི་ཉམ་ང་བར་གྱུར། གང་ནི་ཡིད་མི་བདེ་བར་གྱུར། གང་ནི་སྡུག་བསྔལ་བ་དང ། ཉམ་ང་བར་དང ། མི་བདེ་བར་གྱུར། གང་གི་དགེ་བའི་རྩ་བ་མ་བསྐྱེད་པ་རྣམས་ནི་དགེ་བའི་རྩ་བ་བསྐྱེད་པར་བྱ། གང་གི་བསྐྱེད་པ་རྣམས་ནི་འཕེལ་བར་བྱ་གང་གི་དགེ
9.98b
བའི་རྩ་བ་ཡོངས་སུ་མ་སྨིན་པ་རྣམས་ནི་ཡོངས་སུ་སྨིན་པར་བྱ་གང་གི་དགེ་བའི་རྩ་བ་ཡོངས་སུ་སྨིན་པ་རྣམས་ཤེས་རབ་ཀྱི་མཚོན་གྱིས་དྲལ་བར་བྱ། གང་ནི་སངས་རྒྱས་ཀྱིས་འདུལ། གང་ནི་ཉན་ཐོས་ཀྱིས་འདུལ། གང་ནི་སངས་རྒྱས་དང་ཉན་ཐོས་ཀྱིས་འདུལ་གང་ནི་ཞེ་སྡང་ལ་སྤྱོད། གང་ནི་འདོད་ཆགས་ལ་སྤྱོད། གང་ནི་གཏི་མུག་ལ་སྤྱོད། གང་ནི་འདོད་ཆགས་དང་ཞེ་སྡང་དང་གཏི་མུག་ལ་སྤྱོད། གང་ནི་ཉེས་དམིགས་གང་གིས་གནོད་པར་གྱུར་འཕགས་པའི་ནོར་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་གི་བདག་པོ་ལ་རབ་ཏུ་གཞག་པར་བྱ། ཉེས་པར་སྤྱོད་པའི་འདམ་དུ་བྱིང་བ་གང་གི་ལག་ནས་དྲང་བར་བྱ། གང་ནི་ངན་སོང་ལས་བསླང་སྟེ། མཐོ་རིས་དང་ཐར་པའི་འབྲས་བུ་ལ་རབ་ཏུ་གཞག་པར་བྱ་ཞེས་གཟིགས་པ་འཇུག་གོ། །ཡང་སྨྲས་པ། རྒྱ་མཚོ་ཆུ་སྲིན་རྣམས་ཀྱི་གནས། །དུས་ལས་འདའ་བར་འགྱུར་སྲིད་ཀྱི། །གདུལ་བྱ་ལ་བྱམས་སངས་རྒྱས་ནི། །དུས་ལས་འདའ་བར་མི་འགྱུར་རོ། །དེ་ནས་བཅོམ་ལྡན་འདས་ཀྱི་ཡེ་ཤེས་སྒྲིབ་པ་མི་མངའ་བའི་སྤྱན་སངས་རྒྱས་ཀྱི་སྤྱན་གྱིས་ཀུན་དུ་གཟིགས་ནས་དགོངས་པ་གྱད་བུ་ནོར་དེ་སྔོན་གྱི་སངས་རྒྱས་རྣམས་ལ་དགེ་བའི་རྩ་བ་བསྐྱེད་པ། སྨོན་ལམ་བཏབ་པར་གྱུར་པ། འབྲས་སྨིན་པ་མཚོན་གྱིས་བརྟོལ་འདོད་པ་ལྟ་བུར་ཐུགས་སུ་ཆུད་ནས་བཅོམ་ལྡན་འདས་ཀྱིས་འདི་སྙམ་དུ་གང་གིས་འདུལ་བར་འགྱུར་ཅི་ཉན་ཐོས་ཀྱིས་འདུལ་ལམ། འོན་ཏེ་སངས་རྒྱས་ཀྱིས་འདུལ་ཅི་སྤྱོད་ལམ་གྱིས་འདུལ་ལམ། འོན་ཏེ་ཆོས་བཤད་པས་འདུལ་སྙམ་དུ་དགོངས་སོ། །བཅོམ་ལྡན་འདས་ཀྱིས་སྤྱོད་ལམ་གྱིས་འདུལ་ན་གང་གི་སྤྱོད་ལམ་གྱིས་འདུལ་སྙམ་དུ་དགོངས་ན་ཞེས་བྱ་བ་ནས་དེ་ནས་ཚེ་དང་ལྡན་པ་རྟ་ཐུལ་ཡུལ་སྡིག་བྱུང་དུ་ཕྱིན་ནས་ཡུལ་སྡིག་བྱུང་ན་སྲིན་བུ་པད་མའི་ནགས་ཁྲོད་ན་འདུག་གོ། །དེ་ནས་ཚེ་དང་ལྡན་པ་རྟ་ཐུལ་སྔ་དྲོ་ཤམ་ཐབས་བགོས་ཞེས་བྱ་བ་ནས། གྱད་བུ་ནོར་སྟེང་གི་ཁང་བཟངས་ཀྱི་ཐོག་ན་འདུག་པས་ཚེ་དང་ལྡན་པ་རྟ་ཐུལ་འགྲོ་བ་དང ། ལྡོག་པ་དང ། བསྐུམ་པ་དང ། བརྐྱང་བ་དང ། སྣམ་སྦྱར་དང ། ཆོས་གོས་དང ། ལྷུང་བཟེད་ཐོགས་པ་མཛེས་པ་དེ་མཐོང་ངོ ། །གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་མཐོང་བ་དེའི་ཚེ་ཚིགས་སུ་བཅད་པ་སྨྲས་པ། རྟགས་ཅན་ཆོས་ཀྱིས
9.99a
འཚོ་བྱེད་པ། །འདི་ན་ཕལ་ཆེར་བདག་གིས་མཐོང ། །ཞི་ཞིང་ཞི་བར་གནས་གྱུར་པ། །འདི་འདྲ་བདག་གིས་མ་མཐོང་ངོ ། ཞེས་བྱ་བའི་བར་དུའོ། །མི་ཞིག་བཏང་ནས་ཞེས་བྱ་བ་ནས་སྤྱོད་ལམ་པ་མཐོང་སྟེ་སླར་ལོག་ནས་གཞོན་ནུ་ལ་སྨྲས་སོ་ཞེས་བྱ་བའི་བར་དུའོ། །དེ་ནས་ཚེ་དང་ལྡན་པ་གྱད་བུ་ནོར་དགེ་བའི་རྩ་བས་བསྐུལ་ཏེ་ལྟ་འདོད་དོ་ཞེས་བྱ་བ་ནས། ཡང་དག་པར་དགའ་བར་འགྱུར་བའི་བར་དུ་བྱས་ནས་འདུག་སྟེ་དེ་ལ་སྨྲས་པ། ཅི་ཁྱོད་སྟོན་པ་ཡིན་ནམ། འོན་ཏེ་ཉན་ཐོས་ཡིན། ཚེ་དང་ལྡན་པ་རྟ་ཐུལ་གྱིས་ཞེས་བྱ་བ་ནས་ཚིགས་སུ་བཅད་པ་སྨྲས་པ། རི་དབང་གངས་ཅན་དང་ནི་ཡུངས་ཀར་ཉིད་ཀྱི་ཁྱད་པར་གང་ཡིན་དང ། །རྒྱ་མཚོ་དང་ནི་ཕྱུགས་རྗེས་ཆུ་ཆུང་ཉིད་ཀྱི་ཁྱད་པར་གང་ཡིན་དང ། །ཉི་མ་འོད་ཟེར་དྲ་བ་ཆེ་དང་སྲིན་བུ་མེ་ཁྱེར་ཁྱད་གང་ཡིན། །དེ་དག་རྫོགས་པའི་སངས་རྒྱས་ཡོན་ཏན་གཏེར་དང་ཉན་ཐོས་ཁྱད་པར་རོ། །ཞེས་བྱ་བའི་བར་དུའོ། །ཕ་མ་གཉིས་ཀྱི་གན་དུ་འོངས་ནས་གསོལ་བ་འདེབས་པར་བྱེད་དེ་ཞེས་བྱ་བ་ནས། མ་གནང་ངོ་ཞེས་བྱ་བའི་བར་དང ། ཉིན་ཞག་གཅིག་ཟན་བཅད་པའི་བར་དང ། ་ཕ་མ་འོངས་ནས་འདི་སྐད་ཅེས་སྨྲས་སོ། །ཁྱོད་ཀྱིས་སྡུག་བསྔལ་མི་ཤེས་ཏེ་ཚངས་པར་སྤྱོད་པ་སྤྱད་དཀའོ། །གཅིག་པུ་ཉིད་ལ་མངོན་པར་དགའ་བར་བྱ་དཀའོ། །གནས་མལ་དགོན་པ་དང ། ནགས་འདབ་དང ། བས་མཐའ་དག་ཏུ་གནས་དཀའོ། །ཁྱོད་ཀྱིས་ཇི་སྲིད་འཚོའི་བར་དུ་གཅན་གཟན་གདུག་པ་དག་དང་ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མི་རྣམས་ཀྱི་དགའ་བ་དང ། རྩེད་མོ་དག་ལས་མངོན་པར་དབེན་པར་བྱ་དགོས་སོ། །བུ་ཁྱོད་ཚུར་ཤོག་འདུག་ལ་སྦྱིན་པ་དག་བྱིན་ཅིག་།འདོད་པ་ལ་ཡང་ཡོངས་སུ་སྤྱོད་ཅིག་ཅེས་བྱ་བའི་བར་དུའོ། །རྗེས་སུ་གནང་ནས་ཞེས་བྱ་བ་ནས། ལུས་ཀྱི་སྟོབས་དང་མཐུ་ཡང་དག་པར་བསྐྱེད་ནས་ཞེས་བྱ་བའི་བར་དང ། ཕས་གྱད་བུ་ནོར་རབ་ཏུ་འབྱུང་བར་འདོད་ཀྱིས་གང་དག་རབ་ཏུ་འབྱུང་བར་འདོད་པ་དེ་དག་ཀྱང་དེང་ཤིག་ཅེས་དྲིལ་བསྒྲག་པར་བྱ་བའི་བར་དུའོ། །དེ་ནས་དེའི་ནེའུ་ལྡངས་གང་ཡིན་པ་དེ་དག་འདི་སྙམ་དུ་གྱད་བུ་ནོར་འདི་ནི་བདེ་བར་འདོད་པ་ཤིན་དུ
9.99b
གཞོན་པ་ཡིན་ཡང་ཁྱིམ་གྱི་བདེ་བ་སྤངས་ནས་ངེས་པར་བྱུང་སྟེ་རབ་ཏུ་བྱུང་བར་བྱེད་ན། བདག་ཅག་གིས་ཇི་ལྟར་བྱ་སྙམ་དུ་བསམས་པ་ལས། དེ་ལས་གཅིག་གིས་འདི་སྐད་ཅེས་ལེགས་སུ་ཟད་དེ་བདག་ཅག་ཀྱང་རབ་ཏུ་འབྱུང་བར་བྱའོ། །ཞེས་སྨྲས་སོ། །དེ་ནས་གྱད་བུ་ནོར་གཞོན་ནུ་ལྔ་བརྒྱ་དང་ལྷན་ཅིག་ཏུ་ཚེ་དང་ལྡན་པ་རྟ་ཐུལ་གང་ན་བ་དེར་སོང་སྟེ་ཕྱིན་ནས་རྟ་ཐུལ་གྱི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་སོ། །བཙུན་པས་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་མཛད་དུ་གསོལ། བདག་ཁྱོད་ཀྱི་ཐད་དུ་ཚངས་པར་སྤྱད་པར་སྤྱོད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་གྱད་བུ་ནོར་རིམ་གྱིས་རབ་ཏུ་ཕྱུང་སྟེ་བསྙེན་པར་རྫོགས་པར་བྱས་སོ། །དེས་ཀྱང་སྡེ་སྣོད་གསུམ་པོ་དག་ཁ་ཏོན་དུ་བཏོན་ཅིང་བསྒོམས་པས་དགྲ་བཅོམ་པར་གྱུར་ཏེ། ཁམས་གསུམ་གྱི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། སྟེའུ་དང་ཙན་དན་དུ་མཉམ་པ། མ་རིག་པའི་སྒོ་ངའི་སྦུབས་དྲལ་བ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དུ་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། མངོན་དུ་སྨྲ་བར་བྱ་བར་གྱུར་ཏོ། །སངས་རྒྱས་བཅོམ་ལྡན་འདས་ཀྱིས་ལུགས་ཀྱིས་འདི་ལྟར་འདུས་པ་ཆེན་པོ་གཉིས་ཡོད་དེ་དབྱར་ཟླ་འབྲིང་པོ་ལ་དབྱར་ཉེ་བར་བསྒྲུབ་པའི་ཚེ་དང ། སྟོན་ཟླ་འབྲིང་པོའི་ཉ་ལའོ། །གང་དག་དབྱར་ཟླ་འབྲིང་པོ་ལ་དབྱར་ཉེ་བར་བསྒྲུབ་པའི་ཚེ་གདམས་ངག་དང་རྗེས་སུ་བསྟན་པ་མནོས་པ་དེ་དག་གྲོང་དང ། གྲོང་རྡལ་དང ། ཡུལ་འཁོར་དང་རྒྱལ་པོའི་ཕོ་བྲང་དག་ཏུ་དབྱར་གནས་པར་བྱས་པ་དེ་དག་སྟོན་ཟླ་འབྲིང་པོའི་ཉ་ལ་འོངས་ནས་ཇི་ལྟར་ཁོང་དུ་ཆུད་པ་དག་ནི་རྗོད་པར་བྱེད།
9.100a
གོང་མར་གྱུར་པ་དག་ནི་འདྲི་བར་བྱེད་དོ། །སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟ་བ་དེ་བཞིན་དུ་ཉན་ཐོས་ཆེན་པོ་རྣམས་ཀྱི་ཡང་དེ་ལྟ་བུ་ཡིན་པས་ཚེ་དང་ལྡན་པ་རྟ་ཐུལ་གྱིས་ལྷན་ཅིག་གནས་པ་དང ། ཉེ་གནས་གང་དག་།གྲོང་དང ། གྲོང་རྡལ་དང ། ཡུལ་འཁོར་དང ། རྒྱལ་པོའི་ཕོ་བྲང་དུ་དབྱར་གནས་པར་བྱས་པ་དེ་དང ། དེ་དག་སྟོན་ཟླ་འབྲིང་པོ་ཉ་ལ་ཚེ་དང་ལྡན་པ་རྟ་ཐུལ་གང་ན་བ་དེར་ལྷགས་པ་དང ། ཚེ་དང་ལྡན་པ་གྱད་བུ་ནོར་གྱིས་མཐོང་ངོ ། །ཚངས་པར་སྤྱོད་པ་དེ་དག་མཐོང་ནས་ཀྱང་བསུ་སྟེ། གསོང་པོར་སྨྲ་བས་ཡང་དག་པར་དགའ་བར་བྱས་ཏེ། ཆོས་གོས་དང ། འཁར་གསིལ་དང ། རིལ་བ་སྤྱི་བླུགས་དང ། གཏུར་བུ་དང་ཞཝ་དང ། མཆིལ་ལྷམ་དང ། གདིང་བ་དག་བླངས་སོ། །དེ་དག་ཀྱང་མཁན་པོའི་དྲུང་དུ་སོང་ནས་བསྙེན་བཀུར་བྱས་ཏེ་ཇི་ལྟར་ཁོང་དུ་ཆུད་པ་ནི་རྗོད་པར་བྱེད། གོང་མར་གྱུར་པ་ནི་འདྲི་བར་བྱེད་ཅིང་རྒྱལ་པོའི་ཁབ་གང་ན་བ་དེར་བཅོམ་ལྡན་འདས་ལ་བལྟ་བ་དང ། བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར་འགྲོ་བར་བྱེད་པ་དག་གྱད་བུ་ནོར་གྱིས་མཐོང་ངོ ། །མཐོང་ནས་ཀྱང་སློབ་དཔོན་གཅིག་པ་དང་མཁན་པོ་གཅིག་པ་དེ་དག་གི་དྲུང་དུ་སོང་ནས་འདི་སྐད་ཅེས་སྨྲས་སོ། །ཁྱེད་ཅག་གང་དུ་དོང ། དེ་དག་གིས་སྨྲས་པ། བདག་ཅག་གིས་མཁན་པོ་ནི་མཐོང་ཟིན་པས་ད་ནི་སངས་རྒྱས་བཅོམ་ལྡན་འདས་ལྟར་འགྲོའོ། །དེ་ནས་ཚེ་དང་ལྡན་པ་གྱད་བུ་ནོར་གྱིས་འདི་སྙམ་དུ་བདག་གིས་མཁན་པོ་དང ། དགེ་བའི་བཤེས་གཉེན་ལ་བརྟེན་པས་བཅོམ་ལྡན་འདས་ཀྱི་ཆོས་ཀྱི་སྐུ་ནི་མཐོང་ན། གཟུགས་ཀྱི་སྐུ་མ་མཐོང་བས་བདག་བཅོམ་ལྡན་འདས་གང་ན་བ་དེར་འགྲོའོ་སྙམ་དུ་བསམས་སོ། །དེ་ལྟར་བསམས་ནས་ཀྱང་གྱད་བུ་ནོར་གྱིས་མཁན་པོ་ལ་འདི་སྐད་སྨྲས་སོ། །མཁན་པོ་བདག་གིས་མཁན་པོ་དང ། དགེ་བའི་བཤེས་གཉེན་ལ་བརྟེན་ནས་བཅོམ་ལྡན་འདས་ཀྱི་ཆོས་ཀྱི་སྐུ་ནི་མཐོང་ན་གཟུགས་ཀྱི་སྐུ་ནི་མ་མཐོང་བས་ད་ནི་གཟུགས་ཀྱི་སྐུ་བལྟ་བར་འཚལ་ལོ། །དེ་སྐད་ཅེས་སྨྲས་པ་དང ། རྟ་ཐུལ་གྱིས་གྱད་བུ་ནོར་ལ་འདི་སྐད་ཅེས་སྨྲས་སོ། །བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔེར་ན་ཨུ་དུམ་བ
9.100b
རའི་མེ་ཏོག་ལྟར་ཤིན་དུ་མཐོང་བར་དཀའ་བ་ཡིན་པས་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བལྟ་བར་གྱིས་ཤིག་།དེ་ནས་ཚེ་དང་ལྡན་པ་གྱད་བུ་ནོར་མཁན་པོས་རྗེས་སུ་གནང་བས་ནེའུ་ལྡངས་མཁན་པོ་གཅིག་པ་རྣམས་དང་ལྷན་ཅིག་ཏུ་བཅོམ་ལྡན་འདས་གང་ན་བ་དེར་དོང་ངོ ། །དེའི་ཚེ་ན་བཅོམ་ལྡན་འདས་འཁོར་བརྒྱ་ཕྲག་དུ་མ་ལ་ཆོས་སྟོན་ཏེ། བཅོམ་ལྡན་འདས་ཀྱིས་གྱད་བུ་ནོར་རྒྱང་རིང་པོ་ཁོ་ན་ནས་འོངས་བ་གཟིགས་སོ། །གཟིགས་ནས་ཀྱང་གྱད་བུ་ནོར་ལ་བཀའ་སྩལ་པ། གྱད་བུ་ནོར་ཚུར་ཤོག་།འོངས་པ་ལེགས་སོ། །ཁྱོད་དུས་སུ་ཕྱིན་ཏོ་ཞེས་བཀའ་སྩལ་ཏོ། །དེའི་ཚེ་ན་གནས་མལ་མི་མཐུན་པར་འབོག་པར་བྱེད་དོ། །མདོ་སྡེ་འཛིན་པ་རྣམས་དང་འདུལ་བ་འཛིན་པ་རྣམས་སུ་ལྷན་ཅིག་།མདོ་སྡེ་འཛིན་པ་དང ། མ་མོ་འཛིན་པ་རྣམས་སུ་ལྷན་ཅིག་།འདུལ་བ་འཛིན་པ་རྣམས་དང ། མདོ་སྡེ་འཛིན་པ་རྣམས་སུ་ལྷན་ཅིག་འདུལ་བ་འཛིན་པ་དང་མ་མོ་འཛིན་པ་རྣམས་སུ་ལྷན་ཅིག་ཅེས་བྱ་བ་ནས་དེ་བཞིན་དུ་མུ་གསུམ་ལ་ཡང་སྦྱར་བར་བྱའོ། །དེ་ནས་བཅོམ་ལྡན་འདས་ཀྱིས་འདི་སྙམ་དུ་གྱད་བུ་ནོར་འདི་ནི་སྔོན་གྱི་སངས་རྒྱས་རྣམས་ལ་ཀྱེ་མའོ་བདག་བཅོམ་ལྡན་འདས་ཀྱི་གནས་མལ་འགེད་པ་དང་ཁ་ཟས་ལ་བསྐོ་བའི་མཆོག་ཏུ་གྱུར་ཅིག་ཅེས་སྨོན་ལམ་བཏབ་པས་ཞེས་བྱ་བའི་བར་ནས་བཅོམ་ལྡན་འདས་ཀྱིས་བཀའ་སྩལ་པ། གནས་མལ་འབོག་པ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན་འདུན་པས་འགྲོ་བ་དང་ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང་འཇིགས་པས་འགྲོ་བ་དང ། གནས་མལ་ཕོག་པ་དང་མ་ཕོག་པར་མི་ཤེས་པའོ། །དཀར་པོའི་ཕྱོགས་ནི་དེ་ལས་བཟློག་པར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གྱད་བུ་ནོར་གནས་མལ་འབོགས་པར་བསྐོ་བར་བྱའོ་ཞེས་བྱ་བ་ནས། གནས་མལ་བཤམས་པ་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། གྱད་བུ་ནོར་འདི་དགེ་འདུན་གྱིས་གནས་མལ་འབོག་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་གྱད་བུ་ནོར་དགེ་འདུན་གྱི་གནས་མལ་འབོགས
9.101a
པར་བསྐོ་བར་བགྱིའོ་ཞེས་བྱ་བའི་བར་དུ་སྟེ་འདི་ནི་གསོལ་བའོ། །དེའི་འོག་ཏུ་ལས་ཇི་ལྟ་བ་བཞིན་དུ་བྱའོ་གང་གི་ཚེ་གྱད་བུ་ནོར་དགེ་འདུན་གྱི་གནས་མལ་འབོགས་པར་བསྐོས་པ་དེའི་ཚེ། གནས་མལ་གཞན་དུ་བསྐོ་བར་བརྩམས་ཏེ། དེས་མདོ་སྡེ་འཛིན་པ་རྣམས་དང ། མདོ་སྡེ་འཛིན་པ་རྣམས་སུ་ལྷན་ཅིག་།འདུལ་བ་འཛིན་པ་རྣམས་དང་འདུལ་བ་འཛིན་པ་རྣམས་སུ་ལྷན་ཅིག་།མ་མོ་འཛིན་པ་རྣམས་དང་མ་མོ་འཛིན་པ་རྣམས་སུ་ལྷན་ཅིག་།གློ་བུར་བ་རྣམས་དང་གློ་བུར་བ་རྣམས་སུ་ལྷན་ཅིག་རྣལ་འབྱོར་སྤྱོད་པ་རྣམས་དང་རྣལ་འབྱོར་སྤྱོད་པ་རྣམས་སུ་ལྷན་ཅིག་།གང་དག་རྒྱུན་དུ་ཞུགས་པའི་འབྲས་བུ་ཐོབ་པ་དེ་དག་ནི་ལན་ཅིག་ཕྱིར་འོང་བ་རྣམས་དང་ལྷན་ཅིག་ཏུ་བཀོད། གང་དག་ལན་ཅིག་ཕྱིར་འོང་བའི་འབྲས་བུ་ཐོབ་པ་དེ་དག་ནི་ཕྱིར་མི་འོང་བ་རྣམས་དང་ལྷན་ཅིག་།ཕྱིར་མི་འོང་བ་རྣམས་ནི་དགྲ་བཅོམ་པ་རྣམས་དང་ལྷན་ཅིག་སྟེ། ་དེ་ལྟར་དགེ་སློང་དེ་རྣམས་ལྷག་པར་ཕན་ཚུན་དུ་འབེལ་བའི་གཏམ་རྣམ་པར་གཏན་ལ་དབབ་པ་དང ། དགེ་བའི་ཕྱོགས་འཕེལ་བར་འགྱུར་པ་དེ་ལྟར་གནས་མལ་འཐུན་པ་གཞན་དང་གཞན་དུ་བསྐོས་སོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྫུ་འཕྲུལ་གྱིས་གནས་མལ་འབོགས་པར་བྱེད་དོ། །གང་དག་མཚན་མོ་སྔར་འོང་བ་དེ་དག་ལ་ནི་སོར་མོ་གཅིག་ལས་འོད་སྦར་ཏེ་གནས་མལ་འབོགས་པར་བྱེད་དོ། །གང་དག་མཚན་མོ་ཆེས་ཕྱིས་འོང་བ་དེ་དག་ལ་སོར་མོ་གཉིས་ལས་འོད་སྦར་ཏེ་འབོགས་པར་བྱེད་དོ། །དེ་བཞིན་དུ་གསུམ་པ་དང ། བཞི་པ་དང ། ལྔ་པ་ལས་འོད་སྦར་ཏེ་ཞེས་བྱ་བའི་བར་དུའོ། །དེ་ནས་དགེ་སློང་དེ་དག་འདི་སྙམ་དུ་འདི་ནི་ཆོས་དང་ལྡན་པས་ལས་བྱེད་པ་ཡིན་ཏེ་ཞེས་བྱ་བ་ནས། ཁོང་དུ་ཆུད་པ་ནི་ཁོང་དུ་མ་ཆུད་པར་འགྱུར། ཁོང་དུ་ཆུད་པ་ནི་ལྷག་པར་ཁྱད་པར་དུ་ཁོང་དུ་ཆུད་པར་གྱུར་ཏོ། །དེ་ལྟར་བྱས་པ་ན་འདི་ལྟར་ཚེ་དང་ལྡན་པ་གྱད་བུ་ནོར་གྱིས་རྫུ་འཕྲུལ་གྱི་ཆོ་འཕྲུལ་བསྟན་ཏེ་གནས་མལ་འབོགས་པར་བྱེད་ཅེས་ཕྱོགས་བཞི་དག་ཏུ་དེའི་སྒྲ་གྲགས་པར་གྱུར་ཏོ། །དེའི་ཚེ་གང་དག་ངོ་མཚར་དུ་གྱུར་པ་དེ་དག་གིས་ནི་མངོན་སུམ་དུ་བྱ་བའི་ཕྱིར་ཉིན་པར་འོངས་ནས་འོད་མའི་ཚལ་གྱི་ཉེན་ཀོར་དུ་འདུག་སྟེ་ཉི་མ་ནུབ་པ་དང་མཚན་མོ་འོང་བར་བྱེད་དོ། །དེ་རྣམས་ལ་ཡང་ཚེ་དང་ལྡན་པ་དེས་དེ་བཞིན་དུ་རྫུ་འཕྲུལ་གྱི་ཆོས་འཕྲུལ་བསྟན་ནས་གནས་མལ་འབོགས་པར་བྱེད་དོ། །
9.101b
རེ་ཤིག་ན་རྒྱལ་པོའི་ཁབ་དེ་ན་སྦྱིན་པ་པོ་དང ། སྦྱིན་བདག་དེ་དག་དགེ་འདུན་ལ་ཟས་རྣམ་པ་གསུམ་དུ་ཤོམ་པར་བྱེད་དེ། ཁ་ཅིག་ནི་བསོད་པ་སྦྱིན་པར་བྱེད་པའོ། །ཁ་ཅིག་ནི་འབྲིང་དག་སྦྱིན་པར་བྱེད་པའོ། །ཁ་ཅིག་ནི་ངན་པ་དག་སྦྱིན་པར་བྱེད་པའོ། །ཁྱིམ་གང་ན་བསོད་པ་དག་སྦྱོར་བ་དེ་དག་ནི་དྲུག་སྡེ་རྣམས་ཀྱིས་སྔོན་ངོ་ཤེས་པ་ཡིན་པས་དེར་ནི་རང་འབའ་ཤིག་འགྲོ་བར་བྱེད་དོ། །གང་ན་འབྲིང་སྦྱིན་པར་བྱེད་པ་དེར་ནི་གྲོགས་པོ་དང ། ཉེ་གནས་དག་གོ། །གང་ན་ངན་པ་དག་སྦྱིན་པ་དེར་ནི་དགེ་སློང་ཕལ་རྣམས་འགྲོ་བར་བཤམས་སོ། །དེའི་ཚེ་ཁྱིམ་བདག་དགེ་བཟང་ཞེས་བྱ་བ་བསོད་པ་སྦྱིན་པར་བྱེད་པའི་མཆོག་ཅེས་བྱ་བའི་བར་ནས། དྲུག་སྡེ་རྣམས་རེ་མོས་འགྲོ་བར་བྱེད་དེ། ཉི་མ་དང་པོ་ལ་ནི་དགའ་བོ་དང ། ཉེ་དགའ་ཟན་ཟ་བར་བྱེད་དོ། །ཉི་མ་གཉིས་པ་ལ་ནི་འདུན་པ་དང ། འཆར་ཀའོ། །ཉི་མ་གསུམ་པ་ལ་ནི་འགྲོ་མགྱོགས་དང ། ནབ་སོའོ། །ཁྱིམ་བདག་དེས་དེ་རྣམས་ལ་དྲིས་པ། འཕགས་པ་དག་འོད་མའི་ཚལ་ན་དགེ་སློང་གཞན་མི་བཞུགས་སམ་ཅི་ན། འགའ་ཙམ་ཡང་འདིར་བཤོས་གསོལ་བར་མི་མཛད་པར་ཡང་དང་ཡང་དུ་ཁྱེད་ཅག་ཁོ་ན་རེ་མོས་བྱོན། དེ་དག་གིས་སྨྲས་པ། ཁྱིམ་བདག་ཁྱོད་ཀྱིས་མི་ཤེས་སོ། །འོད་མའི་ཚལ་དེ་ན་དགེ་སློང་དག་ཡོད་ཀྱང་ཉིན་གཅིག་བཞིན་དུ་བཟའ་བ་དང ། བཅའ་བ་ལ་སོགས་པ་རྣམ་པ་སྣ་ཚོགས་སྤྱོད་པ་བྱེད་པ་དེ་དང་དེ་དག་ཁྱོད་འདྲ་བའི་ཁ་ཟས་ཕུལ་བ་དེ་ཇི་ལྟར་ཟ་བར་བྱེད། ངེད་ཅག་ནི་ཁྱོད་ཁོ་ན་ལ་ཕན་གདགས་པའི་ཕྱིར་འོང་བར་ཟད་དོ། །དེ་ནས་ཁྱིམ་བདག་གིས་སྨྲས་པ། འཕགས་པ་གལ་ཏེ་འཕགས་པ་ཁྱེད་ཅག་གིས་བདག་ལ་ཕན་གདགས་པར་མི་མཛད་ན་གཞན་སུ་ཞིག་གིས་བགྱིད་པར་འགྱུར་ཞེས་སྨྲས་སོ། །དེ་ནས་དུས་གཞན་ཞིག་ན་ལྷོ་ལམ་ནས་དགེ་སློང་ཞིག་བཅོམ་ལྡན་འདས་ཡང་དག་བར་བལྟ་བའི་ཕྱིར་ལྗོངས་རྒྱུ་ཞིང་རིམ་གྱིས་འོད་མའི་ཚལ་དུ་འོངས་སོ། །དེ་སྔ་དྲོ་ཆོས་གོས་བགོས་ལྷུང་བཟེད་ཐོགས་ཏེ་སྔ་དྲོ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས། ་དེ་སྲང་ན་རྒྱུ་བ་ཁྱིམ་བདག་དགེ་བཟང་གིས་མཐོང་ནས་སྔོན་མ་བྱུང་བ་ཞིག་གོ་སྙམ་དུ་བསམས་ཏེ་དེས་དེ་ལ་སྨྲས་པ། བཙུན་པ་ག་ལས་བྱོན། དེས་སྨྲས་པ། ལྷོ་ལམ་ནས་སོ། །ཅིའི་ཕྱིར་བཅོམ་ལྡན་འདས་བལྟ་བའི་ཕྱིར་རོ། །བསྟི་གནས་གང་དུ་བྱས་དེས་སྨྲས་པ། འོད
9.102a
མའི་ཚལ་དུའོ། །ཅིའི་ཕྱིར་བསོད་སྙོམས་ལ་རྒྱུ། དེས་སྨྲས་པ། ཅི་ཟན་གཅོད་ཕོད་དམ། བཙུན་པ་ཅི་འོད་མའི་ཚལ་ན་ད་ལྟར་དགེ་འདུན་ལ་སྦྱིན་བདག་རྣམས་བཟའ་བ་དང ། བཅའ་བ་དང ། བལྡག་པའི་རྣམ་པ་བསོད་པ་བསོད་པ་དག་འབུལ་བར་མི་བགྱིད་ལགས་སམ། ཁྱིམ་བདག་གལ་ཏེ་དེ་ལྟར་གྱུར་དུ་ཟིན་ན། ཁོ་བོ་ཁྱོད་ཀྱི་ཡུལ་དུ་བསོད་སྙོམས་ལ་འོང་རེ་སྐན། ཁྱིམ་བདག་གིས་དགེ་སློང་གི་ཚིག་ཐོས་ནས་དྲུག་སྡེ་རྣམས་ལ་དོགས་པ་སྐྱེས་ཏེ། དེ་དག་ནི་བདག་ལ་གཞན་དུ་སྨྲ་ལ། དགེ་སློང་འདི་ཡང་གཞན་དུ་སྨྲའོ། །སྙམ་མོ་དེས་དགེ་སློང་དེ་ལ་ཐུགས་ཁྲལ་སྐྱུངས་ཤིག་དང ། དེང་ཁྱོད་ཀྱིས་གདུགས་ཚོད་བདག་སྦྱོར་ན་བདག་རྗེས་སུ་གཟུང་དུ་གསོལ་ཞེས་བྱ་བའི་བར་ནས་དེས་དགེ་སློང་དེ་ཁྲིད་དེ་སོང་ངོ་།། ་་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བརྒྱད་པ། དྲུག་སྡེས་བསྐོས་པའི་དགེ་སློང་གཉིས་ཀྱང་འོངས་པ་དང ། ཁྱིམ་བདག་དེས་དེ་དག་བདེ་བར་འདུག་ཏུ་བཅུག་སྟེ། བཟའ་བ་དང ། བཅའ་བ་གཙང་ཞིང་བསོད་པ་རབ་ཏུ་མང་པོ་དག་ལེགས་པར་བྲིམས་ཤིང་བསྟབས་ཏེ་ཟན་ཟོས་ཟིན་པ་དང ། ཁྱིམ་བདག་གིས་དྲུག་སྡེ་གཉིས་ལ་འཕགས་པ་དག་གིས་ནི་བདག་ལ་གདུགས་གཅིག་བཞིན་དུ་ཆོས་བཤད་པས་དེ་རིང་ནི་བདག་སྔོན་ཆད་མ་བྱོན་པའི་དགེ་སློང་འདི་ལ་ཆོས་ཉན་ཏོ་ཞེས་སྨྲས་པ་དང ། དེ་གཉིས་ཀྱིས་ཡོན་བསྔོ་བ་བྱས་ནས་དོང་ངོ ། །དེ་ནས་ཁྱིམ་བདག་དགེ་བཟང་དགེ་སློང་དེའི་མདུན་དུ་འདུག་ནས་དེས་དགེ་སློང་དེ་ལ་སྨྲས་པ། འཕགས་པ་ཁྱོད་ལ་བདག་གིས་དེ་རིང་བཤོས་གསོལ་བ་འདི་ཅི་བསོད་པ་དག་ལགས་སམ། འོན་ཏེ་ངན་པ་དག་ལགས། དེས་སྨྲས་པ། སྦྱིན་བདག་བདག་ལྷོ་ལམ་ནས་འོང་བར་བརྩམས་པ་གང་ཡིན་པ་ཚུན་ཆད་ནས་དེའི་བར་དུ་བདག་གིས་འདི་ལྟ་བུའི་བསོད་པ་དག་ཟ་མ་མྱོང་ངོ ། །དེས་ཡང་སྨྲས་པ། འཕགས་པ་བདག་ལ་དགེ་སློང་འདི་དག་ཁ་ཟས་འདི་ངན་ནོ་ཞེས་རྟག་ཏུ་སྨྲ་ན་དེ་ཇི་ལྟ་བུ་ཞིག་ལགས། དེས་སྨྲས་པ། དེ་དག་གིས་གདོན་མི་ཟ་བར་ཁྱིམ་འདིར་གཞན་འགའ་ཡང་མི་འོང་བར་བྱ་བའི་ཕྱིར་བྱས་སོ། །བཙུན་པ་ཅིའི་སླད་དུ་དགེ་སློང་གཞན་ཁྱིམ་འདིར
9.102b
མི་བྱོན། ཁྱིམ་བདག་འདིར་གཞན་དག་འོང་དུ་གླང་པོ་ཆེས་བརྫིས་ན་ཇི་ལྟར་བྱ། དེས་འདི་སྙམ་དུ་དེ་ཁོ་ན་ལྟར་ཡིན་ནོ་སྙམ་དུ་བསམས་ནས། དེས་དེ་ལ་འདི་སྐད་ཅེས་སྨྲས་སོ། །བཙུན་པ་དོན་མཇལ་ལགས་ཀྱིས་ད་ཆོས་ཀྱི་བཀའ་མཆིད་གསུངས་ཤིག་ཅེས་བྱ་བ་ནས། དགེ་སློང་དེས་ཆོས་ཀྱི་གཏམ་གྱིས་ཡང་དག་པར་བསྟན་ནས་སོང་ངོ་ཞེས་བྱ་བའི་བར་དུའོ། །དེ་ནས་ཁྱིམ་བདག་དགེ་བཟང་གིས་སྐབས་དེ་དགེ་སློང་རྣམས་ལ་བརྗོད་ནས་འདི་སྐད་ཅེས་སྨྲས་སོ། །བདག་གིས་དགེ་འདུན་གྱི་གདུགས་ཚོད་ནར་མར་བཤམས་པ་དེ་ལ་གལ་ཏེ་དགེ་འདུན་གྱིས་བསྐོས་པའི་དགེ་སློང་མཆིས་པས་ལོངས་སྤྱོད་པར་བགྱིད་པ་ལྟ་ན་གཡར་དམ་དེ་མི་བཤིག་པར་བགྱིའོ། །དེ་ལྟ་མ་ལགས་ན་བདག་གིས་སྦྱིན་པར་བྱ་བའི་ཆོས་ཇི་ལྟར་བཤམས་པ་རྣམས་བཞག་སྟེ། བདག་གིས་གང་ཟག་སྒོ་སྒོར་སྩལ་བར་མི་བགྱིའོ། །དེ་ནས་དགེ་སློང་དེ་དག་གིས་འདི་སྙམ་དུ་རྣམ་པ་འདི་ལྟ་བུའི་ཉེས་པ་གང་ཡིན་པ་ནི་ཞེས་བྱ་བ་ནས། བཅོམ་ལྡན་འདས་ལ་གསོལ་ཏོ་ཞེས་བྱ་བའི་བར་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གྱད་བུ་ནོར་ཟས་ལ་བསྐོ་བ་བསྐོ་བར་བྱའོ། །གང་གི་ཚེ་དགེ་འདུན་རྣམས་ཀྱིས་གསོལ་བ་དང་གཉིས་ཀྱི་ལས་ཀྱིས་ཚེ་དང་ལྡན་པ་གྱད་བུ་ནོར་ཟས་ལ་བསྐོ་བར་བསྐོས་པ་དེའི་ཚེ་ཚེ་དང་ལྡན་པ་གྱད་བུ་ནོར་གྱིས་སྦྱིན་བདག་གི་ཁྱིམ་དེ་དག་ཐམས་ཅད་ལས་གང་དག་ནི་བསོད་པ་སྦྱིན་པར་བྱེད། གང་དག་ནི་འབྲིང་སྦྱིན་པར་བྱེད། གང་དག་ནི་ངན་པ་དག་སྦྱིན་པར་བྱེད་ཅེས་བརྟགས་སོ། །དེས་བརྟགས་ནས་ཀྱང་བསོད་པ་དག་སྦྱིན་པར་དགེ་སློང་གནས་བརྟན་གནས་བརྟན་དག་བསྐོས་སོ། །འབྲིང་དག་སྦྱིན་པར་དགེ་སློང་བར་མ་དག་བསྐོས་སོ། །ཐ་མ་དག་སྦྱིན་པར་དགེ་སློང་གཞོན་རབས་དག་བསྐོས་སོ། །ཉི་མ་གཉིས་པ་ལ་ནི་ངན་པ་དག་སྦྱིན་པར་གནས་བརྟན་གནས་བརྟན་རྣམས་སོ། །འབྲིང་དག་སྦྱིན་པར་གཞོན་རབས་རྣམས་སོ། །བསོད་པ་དག་སྦྱིན་པར་བར་མ་རྣམས་སོ། །ཉི་མ་གསུམ་པ་ལ་ནི་བར་མ་དག་སྦྱིན་པར་གནས་བརྟན་རྣམས་སོ། །ངན་པ་དག་སྦྱིན་པར་བར་མ་རྣམས་སོ། །
9.103a
བསོད་པ་དག་སྦྱིན་པར་གཞོན་རབས་རྣམས་ཏེ། དེ་ལྟར་ཚུལ་དེ་ལྟ་བུས་དགེ་སློང་རྣམས་ཟས་ལ་སྐོ་བར་བྱེད་དོ། །གང་དགེ་སློང་གློ་བུར་བ་གང་ཡིན་པ་དེ་དག་ཉི་མ་དང་པོ་ལ་ནི་བསོད་པ་སྦྱིན་པ་དག་ཏུའོ། །ཉི་མ་གཉིས་པ་ལ་ནི་འབྲིང་སྦྱིན་པ་དག་ཏུའོ། །ཉི་མ་གསུམ་པ་ལ་ནི་ངན་པ་སྦྱིན་པ་དག་ཏུ་སྐོ་བར་བྱེད་ཅིང ། ཉི་མ་བཞི་པ་ལ་ནི་ལམ་སྲང་གི་སྤྱོད་ཡུལ་ལ་མཁས་པར་བྱེད་དོ། །དེས་རིམ་པར་བླགས་པ་དེ་བཞིན་དུ་དགེ་འདུན་རྣམས་ཟས་ལ་བཀོད་པ་ན་རྒན་རིམས་ཇི་ལྟ་བ་བཞིན་དང་རིམ་པར་བླགས་པ་ཇི་ལྟ་བ་བཞིན་དུ་ཐོད་རྒལ་མེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་གནས་མལ་འབོགས་པ་རྣམས་དང ། ་ཟས་ལ་བསྐོ་བ་རྣམས་ཀྱི་ནང་ན་གྱད་བུ་ནོར་འདི་མཆོག་ཡིན་ནོ། །དེའི་ཚེ་དགེ་སློང་མཛའ་བོ་དང ། ས་ལས་སྐྱེས་གཉིས་ལྗོངས་རྒྱུ་ཞིང་འགྲོ་བ་ན་རིམ་གྱིས་རྒྱལ་པོའི་ཁབ་ཏུ་ཕྱིན་པ་དང ། ཚེ་དང་ལྡན་པ་གྱད་བུ་ནོར་གྱིས་དེ་གཉིས་ཀྱི་གནས་མལ་དང་གནས་ཁང་ཡང་བསྐོས་སོ། །དེ་ནས་ནམ་ནངས་པ་དང་མཛའ་བོ་དང ། ས་ལས་སྐྱེས་ཀྱིས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཟས་ལས་སྐོ་བ་སུ་ཡོད། དགེ་སློང་ཞིག་གིས་དེ་གཉིས་ལ་སྨྲས་པ། གྱད་བུ་ནོར་ཡིན་ནོ། །དེ་གཉིས་ཀྱིས་ཚེ་དང་ལྡན་པ་གྱད་བུ་ནོར་ལ་འདི་སྐད་ཅེས་སྨྲས་སོ། །གྱད་བུ་ནོར་བདག་ཅག་གི་ཟས་སྐོས་ཤིག་།དེ་ནས་ཚེ་དང་ལྡན་པ་གྱད་བུ་ནོར་གྱིས་དེ་གཉིས་ཉི་མ་དང་པོ་ལ་ཟས་བསོད་པ་སྦྱིན་པ་དག་ཏུ་བསྐོས་སོ། །དེ་ནས་མཛའ་བོ་དང ། ས་ལས་སྐྱེས་སྔ་དྲོ་ཆོས་གོས་བགོས། ལྷུང་བཟེད་ཐོགས་ནས་སྦྱིན་བདག་གི་ཁྱིམ་གང་ན་བར་དོང་ངོ ། །ཁྱིམ་བདག་དེ་ཡང་བུ་གཅིག་པ་སྡུག་པ། ཡིད་དུ་འོང་བ་ཤི་བས་དེ་བུ་ཤི་བའི་མྱ་ངན་གྱིས་གདུངས་པའི་ཕྱིར་དགེ་སློང་གི་ཟས་བཤམ་པ་མ་བྱས་སོ། །དེ་གཉིས་ཀྱིས་ཀྱང་མ་བརྟགས་པར་འོངས་པ་ཁྱིམ་བདག་གིས་མཐོང་ངོ ། །མཐོང་ནས་ཀྱང་ཁྱིམ་མི་རྣམས་ལ་སྨྲས་པ། དགེ་སློང་དག་གི་ཕྱིར་ཟས་བཤམས་པ་ཅུང་ཟས་ལྟ་ཡོད་དམ། དེ་དག་གིས་སྨྲས་པ། མ་མཆིས་སོ། །དེས་འདི་སྙམ་དུ་རེ་ཤིག་བུ་ཤི་བ་འདི་ཡང་ཕུང་བྱས་པ་གཅིག་ཡིན་ན། གཉིས་པ་གོ་ཅིའི་ཕྱིར་བྱས་སྙམ་དུ་བསམ
9.103b
སོ་དེ་ལྟར་བསམས་ནས་ཀྱང་དེས་ཁ་ཟས་ངན་པ་ཞིག་ཕུལ་ལོ། །དེ་གཉིས་ཀྱིས་ཀྱང་ཟོས་སོ། །ཟོས་ནས་ཀྱང་དེ་གཉིས་ཀྱིས་འདི་སྙམ་དུ་བདག་ཅག་གིས་ཐོས་པ་ཡང་གཞན་ལ། མྱོང་བ་ཡང་གཞན་དུ་གྱུར་ཏེ་ཟས་ངན་པ་དག་ཟོས་པར་གྱུར་མོད་ཀྱི། འོན་ཀྱང་སང་ནི་ཟས་བསོད་པ་དག་བཟའ་བར་བྱའོ་སྙམ་དུ་བསམས་སོ། །དེ་གཉིས་ཉི་མ་གཉིས་པ་ལ་སྦྱིན་བདག་འབྲིང་དག་སྦྱིན་པར་བསྐོས་དེ་དེར་དོང་བ་ལས་ཞེས་བྱ་བ་ནས། དེར་ཡང་ཉེས་པ་དེ་བཞིན་དུ་གྱུར་ཏོ་ཞེས་བྱ་བའི་བར་དུའོ། །ཉི་མ་གསུམ་པ་ལ་སྦྱིན་བདག་ངན་པ་དག་སྦྱིན་པ་དེར་བསྐོས་སོ། །དགྲ་བཅོམ་པ་རྣམས་ནི་མ་དགོངས་པར་ཡེ་ཤེས་གཟིགས་པ་མི་འཇུག་པ་ཡིན་ལ། དེ་གཉིས་ཀྱིས་ཀྱང་ཁ་ཟས་ངན་པ་དག་ཟོས་པས་དེ་དག་ལུས་ཤིན་དུ་རྗུད་པར་གྱུར་ཏོ། །དེ་ནས་དགེ་སློང་མཛའ་བོ་དང ། ས་ལས་སྐྱེས་གཉིས་ཀྱིས་འདི་སྙམ་དུ་ཀྱེ་མའོ་སྡུག་བསྔལ་ལོ། །ཀྱེ་མའོ་མི་བཟད་དེ། ཚེ་དང་ལྡན་པ་གྱད་བུ་ནོར་གྱིས་བསམས་བཞིན་དུ་བདག་ཅག་གཉིས་ལན་གསུམ་གྱི་བར་དུ་ཁ་ཟས་ངན་པ་ཟར་བཅུག་པས་མཐོ་བརྩམས་ཏེ་ལུས་ཤིན་དུ་རྗུད་པར་གྱུར་གྱིས། བརྐུ་ཐབས་འགའ་ཞིག་བྱའོ་སྙམ་དུ་བསམས་སོ། །དེའི་ཚེ་དགེ་སློང་མཛའ་བོ་དང ། ས་ལས་སྐྱེས་གཉིས་ཀྱི་སྲིང་མོ་དགེ་སློང་མ་མཛའ་མོ་ཞེས་བྱ་བ་རྒྱལ་པོའི་ཁབ་ན་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ན་འདུག་གོ། །དེ་ནས་དགེ་སློང་མ་མཛའ་མོས་དགེ་སློང་མཛའ་བོ་དང ། ས་ལས་སྐྱེས་གཉིས་ག་ལ་བ་དེར་སོང་སྟེ་ཕྱིན་ནས། དགེ་སློང་མཛའ་བོ་དང ། ས་ལས་སྐྱེས་གཉིས་ཀྱི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དགེ་སློང་མ་མཛའ་མོ་ཕྱོགས་གཅིག་ཏུ་འདུག་པ་ན་དགེ་སློང་མཛའ་བོ་དང ། ས་ལས་སྐྱེས་གཉིས་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ལྟ་བར་མི་བྱེད་རྣམ་པར་ལྟ་བར་མི་བྱེད་དོ། །དེ་ནས་དགེ་སློང་མ་མཛའ་མོས་དགེ་སློང་མཛའ་བོ་དང ། ས་ལས་སྐྱེས་གཉིས་ལ་འདི་སྐད་ཅེས་སྨྲས་སོ། །འཕགས་པ་དག་ཅིའི་སླད་དུ་བདག་ལ་གཏམ་འདྲེ་བར་མི་མཛད། ཕེབས་པར་སྨྲ་བར་མི་མཛད། ལྟ་བར་མི་མཛད་རྣམ་པར་ལྟ་བར་མི་མཛད་སྲིང་མོ་ཁོ་བོ་ཅག་གཉིས་ཚེ་དང་ལྡན་པ་གྱད་བུ་ནོར་གྱིས
9.104a
ལན་གསུམ་གྱི་བར་དུ་ཁ་ཟས་ངན་པས་མཐོ་བརྩམས་ཏེ། ལུས་ཤིན་དུ་རྫུད་པར་གྱུར་ན། དེ་ཁྱོད་ཀྱིས་ཡལ་བར་དོར་རམ། འཕགས་པ་དག་འོ་ན་དེ་ལ་བདག་གིས་ཅི་ཞིག་བགྱི་སྲིང་མོ་ཁྱོད་ཚུར་ཤོག་།བཅོམ་ལྡན་འདས་ག་ལ་བ་དེར་སོང་ལ་བཅོམ་ལྡན་འདས་ལ་འདི་སྐད་ཅེས་བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ་ཞེས་སྨྲོས་ཤིག་དང ། ཁོ་བོ་ཅག་གཉིས་ཀྱིས་ཀྱང་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་དུ་བདག་ཅག་གཉིས་ཀྱིས་ཀྱང་འཚལ་ཏོ་ཞེས་སྨྲ་བར་བྱའོ། །དེ་སྐད་ཅེས་སྨྲས་པ་དང ། དགེ་སློང་མ་མཛའ་མོས་དེ་གཉིས་ལ་འདི་སྐད་ཅེས་སྨྲས་སོ། །འཕགས་པ་དག་བདག་གིས་དགེ་སློང་དག་པ་ལྟུང་བ་མ་མཆིས་པ་ལ་གཞི་མ་མཆིས་པ་ཕས་ཕམ་པར་འགྱུར་བའི་ཆོས་ཀྱིས་ཇི་ལྟར་སྐུར་པ་གདབ། སྲིང་མོ་ཁྱོད་ཇི་སྲིད་དུ་དེ་སྐད་མི་ཟེར་བ་དེ་སྲིད་ཀྱི་བར་དུ་ཁོ་བོ་ཅག་གཉིས་ཁྱོད་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ལྟ་བར་མི་བྱེད། རྣམ་པར་ལྟ་བར་མི་བྱེད་དོ། །དེ་ནས་དགེ་སློང་མ་མཛའ་མོ་ཡུད་ཙམ་ཞིག་ཅང་མི་སྨྲ་བར་འདུག་ནས། དགེ་སློང་མཛའ་བོ་དང ། ས་ལས་སྐྱེས་གཉིས་ལ་འདི་སྐད་ཅེས་སྨྲས་སོ། །འཕགས་པ་དེ་ལྟ་ན་བདག་གིས་བགྱི་བ་གང་ལགས་པ་དེ་བགྱིའོ། །སྲིང་མོ་ཁྱོད་དེའི་ཕྱིར་ཇི་སྲིད་དུ་ཁོ་བོ་ཅག་གཉིས་བཅོམ་ལྡན་འདས་གང་ན་བ་དེར་མ་སོན་པ་དེ་སྲིད་དུ་སྡོད་ལ། དེའི་འོག་ཏུ་ཁྱོད་ཤོག་ཤིག་།དེ་ནས་དགེ་སློང་མཛའ་བོ་དང ། ས་ལས་སྐྱེས་གཉིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་དགེ་སློང་མ་མཛའ་མོ་དགེ་སློང་མཛའ་བོ་དང ། ས་ལས་སྐྱེས་གཉིས་དོང་ནས་རིང་པོར་མ་ལོན་པར་རིག་པ་དང ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས
9.104b
གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་མ་མཛའ་མོས་འདི་སྐད་ཅེས་གསོལ་ཏོ། །བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ། །དགེ་སློང་མཛའ་བོ་དང ། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་གསོལ་ཏོ། །བཙུན་པ་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་བ་དེ་ཁོ་ན་བཞིན་དུ་བདག་ཅག་གཉིས་ཀྱི་ཀྱང་འཚལ་ཏོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྱད་བུ་ནོར་ལ་བཀའ་སྩལ་པ། གྱད་བུ་ནོར་ཁྱོད་ཀྱིས་དེ་ཐོས་སམ། བཅོམ་ལྡན་འདས་བདག་གིས་ཐོས་ལགས་སོ། །གྱད་བུ་ནོར་ཁྱོད་ཀྱི་དེ་ཇི་ལྟ་བུ་ཡིན། བདག་ཇི་ལྟ་བུ་ལགས་པ་དེ་བཅོམ་ལྡན་འདས་ཀྱིས་མཁྱེན་ཏོ། །བདག་གི་ཇི་ལྟ་བུ་ལགས་པ་བདེ་བར་གཤེགས་པས་མཁྱེན་ཏོ། །བཅོམ་ལྡན་འདས་ཀྱིས་བཀའ་སྩལ་པ། གྱད་བུ་ནོར་ཁྱོད་ཀྱིས་དྲན་ན་དྲན་ནོ་ཞེས་སྨྲོས་ཤིག་།ཁྱོད་མི་དྲན་ན་མི་དྲན་ནོ་ཞེས་སྨྲོས་ཤིག་།བཅོམ་ལྡན་འདས་མི་དྲན་ལགས་སོ། །བདེ་བར་གཤེགས་པ་མི་དྲན་ལགས་སོ། །དེའི་ཚེ་ཚེ་དང་ལྡན་པ་སྒྲ་གཅན་ཟིན་བཅོམ་ལྡན་འདས་ཀྱིས་སྣམ་ལོགས་ན་རྔ་མའི་བསིལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་ཚེ་དང་ལྡན་པ་སྒྲ་གཅན་ཟིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ལྟར་དགེ་སློང་མ་མཛའ་མོ་བཅོམ་ལྡན་འདས་ག་ལ་བ་དེར་མཆིས་ཏེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ་ཞེས་མཆི་ལ། དགེ་སློང་མཛའ་བོ་དང ། ས་ལས་སྐྱེས་གཉིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་བདག་ཅག་གཉིས་ཀྱིས་ཀྱང་འཚལ་ཏོ
9.105a
ཞེས་མཆི་ན། ཚེ་དང་ལྡན་པ་གྱད་བུ་ནོར་ལ་སྨྲ་ཅི་འཚལ། སྒྲ་གཅན་ཟིན་དེའི་ཕྱིར་ན་དེ་ཁྱོད་ཉིད་ལ་དྲིས། ཁྱོད་ཀྱིས་ཇི་ལྟར་བཟོད་པ་དེ་ཁོ་ན་བཞིན་དུ་ལན་ཐོབ་ཤིག་།གལ་ཏེ་དགེ་སློང་མ་མཛའ་མོ་ང་གང་ན་བ་དེར་འོངས་ཏེ་ཕྱིན་ནས་འདི་སྐད་ཅེས་བཙུན་པ་འདི་ལྟར་འཕགས་པ་སྒྲ་གཅན་ཟིན་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་འཐུན་པ་མ་ལགས་སོ་ཞེས་ཟེར་ལ། དགེ་སློང་མཛའ་བོ་དང ། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱིས་ཀྱང་སྲིང་མོས་ཇི་སྐད་གསོལ་བ་དེ་ཁོ་ན་བཞིན་དུ་འཚལ་ཏོ་ཞེས་ཟེར་ན། དེ་ལ་སྒྲ་གཅན་ཟིན་ཁྱོད་ཀྱིས་ཇི་སྐད་ལན་གདབ་པར་བྱ། བཙུན་པ་བདག་གིས་འདི་སྐད་ཅེས་དྲན་ན་ཡང་དྲན་ནོ་ཞེས་གསོལ་ལོ། །མི་དྲན་ན་ཡང་མི་དྲན་ནོ་ཞེས་གསོལ་ལོ། །རེ་ཤིག་སྐྱེས་བུ་བླུན་པོ་ཁྱོད་ཀྱིས་ཀྱང་དོན་དེ་སྨྲ་བར་འགྱུར་ན། དགེ་སློང་གྱད་བུ་ནོར་དག་པ་ལྟུང་བ་མེད་པས་ཅིའི་ཕྱིར་སྨྲ་བར་མི་བྱ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་གྱད་བུ་ནོར་ནི་དྲན་པ་དང་ལྡན་པར་ཟུང་ཤིག་།དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ་བར་གྱིས་ཤིག་།དགེ་སློང་མཛའ་བོ་དང ། ས་ལས་སྐྱེས་གཉིས་ལ་ནི་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། གང་ན་མཐོང ། ཁྱེད་གཉིས་ཅིའི་ཕྱིར་དེར་སོན་ཅེས་ལེགས་པར་རབ་ཏུ་སྨྲ་ཞིང་བརྟག་པར་གྱིས་ཤིག་ཅེས་བཀའ་སྩལ་ནས། བཅོམ་ལྡན་འདས་གདན་ལས་བཞེངས་ཏེ་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་གཤེགས་སོ། །དེ་ནས་དགེ་སློང་རབ་ཏུ་མང་པོ་དག་གིས་བཅོམ་ལྡན་འདས་ནང་དུ་ཡང་དག་འཇོག་ལ་ཞུགས་ནས་རིང་པོ་མ་ལོན་པར་རིག་ནས། ཚེ་དང་ལྡན་པ་གྱད་བུ་ནོར་ནི་དྲན་པ་དང་ལྡན་པར་བཟུང ། དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ་དགེ་སློང་མཛའ་བོ་དང ། ས་ལས་སྐྱེས་གཉིས་ལ་ནི་ཅི་ཞིག་མཐོང ། ཇི་ལྟར་མཐོང ། གང་དུ་མཐོང ། གང་ན་མཐོང །
9.105b
ཁྱེད་གཉིས་ཅིའི་ཕྱིར་དེར་སོན་ཅེས་ལེགས་པར་རབ་ཏུ་སྨྲས་ཤིང་བརྟགས་སོ། །ལེགས་པར་རབ་ཏུ་སྨྲས་ཤིང་བརྟགས་པ་ན་དེ་གཉིས་ཀྱིས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱད་པའི་ཕས་ཕམ་པ་མ་བྱུང་མོད་ཀྱི། འོན་ཀྱང་བདག་ཅག་ཚེ་དང་ལྡན་པ་གྱད་བུ་ནོར་གྱིས་ལན་གསུམ་གྱི་བར་ཁ་ཟས་ངན་པ་ཟར་བཅུག་པས་མཐོ་བརྩམས་ཏེ། ལུས་ཤིན་དུ་རྗུད་པར་གྱུར་ཏེ་ཞེས་བྱ་བའི་བར་དང ། དེ་གཉིས་ཀྱིས་འདི་སྙམ་དུ་ཀྱེ་མའོ། །སྡུག་བསྔལ་ལོ། །ཀྱེ་མའོ་མི་བཟད་དོ། །ཚེ་དང་ལྡན་པ་གྱད་བུ་ནོར་གྱིས་བསམས་བཞིན་དུ་ཞེས་བྱ་བ་ནས་ལན་གསུམ་གྱི་བར་དུ་ཁ་ཟས་ངན་པ་ཟར་བཅུག་པས་ལུས་ཤིན་དུ་རྗུད་པར་གྱུར་པས་བརྐུ་ཐབས་འགའ་ཞིག་བྱའོ་ཞེས་བསམས་ཏེ། བདག་ཅག་གིས་ཚེ་དང་ལྡན་པ་གྱད་བུ་ནོར་ལ་འདུན་པས་སྨྲས་པ། ཞེ་སྡང་དང ། གཏི་མུག་དང ། འཇིགས་པས་སྨྲས་པར་ཟད་ཀྱི། ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱད་པའི་ཕས་ཕམ་པ་མ་བྱུང་སྟེ། འདི་ལྟར་ཚེ་དང་ལྡན་པ་གྱད་བུ་ནོར་དག་པ་ལྟུང་བ་མེད་པ་ཡིན་ནོ་ཞེས་བྱ་བའི་བར་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མི་གཏི་མུག་ཅན་དེ་དག་གཉིས་ཀྱི་འདི་ལྟར་ཟང་ཟིང་ཅུང་ཟད་ཙམ་གྱི་རྒྱུས་ཤེས་བཞིན་དུ་བརྫུན་གྱི་ཚིག་སྨྲས་པར་གྱུར་ཏོ། །དེ་ཡང་བཅོམ་ལྡན་འདས་ཀྱིས་བྱུང་བ་དེ་ཉིད་ལས་ཚིགས་སུ་བཅད་པ་གཉིས་བཀའ་སྩལ་པ། ལུས་ཅན་བརྫུན་དུ་སྨྲ་བ་ཡི། །ཆོས་གཅིག་ལས་ནི་འདས་གྱུར་ཅིང ། །འཇིག་རྟེན་ཕ་རོལ་བཤིག་པ་ཡིས། །འདི་ན་སྡིག་པ་མི་བྱ་མེད། །ལྕགས་སྒོང་མེ་ལྕེ་འདྲ་བ་དག་།ཟོས་པར་གྱུར་པ་ཆེས་བླ་ཡི། །ཚུལ་འཆལ་ཡང་དག་སྡོམ་མེད་པས། །ཡུལ་འཁོར་བསོད་སྙོམས་ཟ་བ་མིན། །དེ་ནས་ནམ་མཁའི་དཀྱིལ་ན་གནས་པའི་ལྷ་རྣམས་ཀྱིས་ཀྱེ་མའོ། ། ལ་ལ་རྙེད་པ་དང་བཀུར་སྟི་འདི་ནི་མི་བཟད་པའོ། །མཆོག་ཏུ་མི་བཟད་པའོ་ཞེས་བྱ་བ་ནས། ཟང་ཟིང་ཅུང་ཟད་ཙམ་གྱི་རྒྱུས་དགེ་སློང་ལ་སྐུར་བ་འདེབས་པར་བྱེད་པ་ནི་ངན་པའོ་ངན
9.106a
པའོ་ཞེས་སྨྲས་སོ། །དེ་ནས་དགེ་སློང་ཞིག་གིས་དེའི་ཚེ་ཚིགས་སུ་བཅད་པ་སྨྲས་པ། ཉེས་མེད་སྲིད་གསུམ་གྲོལ་བ་ཡི། །ནོར་ལའང་སྐུར་བ་བཏབ་པའི་ཕྱིར། །འཇིག་རྟེན་དག་ན་བློ་ལྡན་གང ། །འཁོར་བ་ལ་ནི་དགའ་བར་བྱེད། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་གསུམ་པོ་འདི་དག་ནི་འདི་དག་མ་སྤངས་ན་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་དག་ཡིན་ཏེ། གསུམ་གང་ཞེ་ན། དགེ་སློང་དག་འདི་ལ་གཅིག་ནི་འདོད་པ་རྣམས་ལ་རྟེན་ཅིང་སྡིག་པ་མི་དགེ་བ་དག་བྱེད་པ་སྟེ། དགེ་སློང་དག་དེ་མ་སྤངས་ན་གང་ཟག་འདི་ནི་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་དང་པོ་ཡིན་ནོ། །གཞན་ཡང་དགེ་སློང་དག་།འདི་ལ་གང་ཟག་གཅིག་ནི་འདོད་པ་རྣམས་ནི་གཙང་བའོ། །འདོད་པ་རྣམས་ནི་བསོད་པའོ། །འདོད་པ་རྣམས་ནི་ལོངས་སྤྱོད་པར་བྱ་བའོ། །འདོད་པ་རྣམས་ལ་ཉེས་པ་མེད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་སྟེ། དགེ་སློང་དག་དེ་མ་སྤངས་ན་གང་ཟག་འདི་ནི་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་གཉིས་པ་ཡིན་ནོ། །གཞན་ཡང་དགེ་སློང་དག་འདི་ལ་གང་ཟག་གཅིག་ནི་བདག་ཉིད་མི་ཚངས་པར་སྤྱོད་པ་བྱེད་ལ། གཞན་དག་ལ་ཡང་གཞི་མེད་པར་མི་ཚངས་པར་སྤྱོད་པའི་ཆོས་ཀྱི་སྐུར་བ་འདེབས་པར་བྱེད་པ་སྟེ། དགེ་སློང་དག་དེ་མ་སྤངས་ན་གང་ཟག་འདི་ནི་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་གསུམ་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །སྐྱེས་བུ་སྐྱེས་པའི་ཁ་ནས་ནི། །ངག་གིས་ཚིག་ངན་རྗོད་བྱེད་པའི། །སྟ་རེ་འབྱུང་ཞིང་དེ་ཡིས་ནི། །བདག་ཉིད་གཅོད་པར་བྱེད་པར་འགྱུར། །གང་ཞིག་སྨད་བྱ་སྟོད་བྱེད་ཅིང ། །བསྟོད་བྱ་རྣམས་ལ་སྨོད་བྱེད་པ། །དེ་ཡི་ཁ་ནས་ཕུང་ཁྲོལ་སྐྱེད། །ཕུང་ཁྲོལ་ཅན་གྱིས་བདེ་མི་མྱོང ། །གང་འདིར་ཆོ་ལོས་རང་ནོར་ཟད་བྱེད་པ། །དེ་ནི་ཕུང་ཁྲོལ་ཅུང་ཟད་ཙམ་དུ་ཟད། །གང་ཞིག་བདེ་བར་གཤེགས་ལ་ཡིད་རབ་འཁྲུག་།
9.106b
དེ་འདིར་ཕུང་ཀྲོལ་ཤིན་དུ་ཆེན་པོ་ཡིན། །གང་ཡིད་འཕགས་པས་སྨད་པའི་སྡིག་གནས་ན། །བྱེ་བ་བརྒྱ་ཕྲག་སྟོང་ཕྲག་དུང་ཕྱུར་ཕྲག་།སུམ་བཅུ་དྲུག་དང་ལྔ་པོ་ཇི་སྙེད་པར། །སེམས་དམྱལ་ཆུ་བུར་ཆུ་བུར་རྡོལ་བར་འགྲོ། །གང་གི་ཚེ་དགེ་འདུན་གྱིས་དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ། མཛའ་བོ་དང་ས་ལས་སྐྱེས་ལ་ནི་ལེགས་པར་རབ་ཏུ་དྲིས་པ་དེའི་ཚེ། དགེ་སློང་མ་རང་བཞིན་དུ་གནས་པ་རྣམས་ཚེ་དང་ལྡན་པ་གྱད་བུ་ནོར་གྱི་བསྔགས་པ་ནི་སྨྲ་བར་བྱེད། དགེ་སློང་མ་མཛའ་མོ་ལ་ནི་བསྔགས་པ་མ་ཡིན་པ་རྗོད་པར་བྱེད་དོ། །དེ་ནས་དགེ་སློང་མ་མཛའ་མོའི་ཕུ་ནུ་མོ་དགེ་སློང་མ་མཛའ་ཅན་མ་ཞེས་བྱ་བ་དགེ་སློང་མ་མཛའ་མོའི་བསྔགས་པ་མ་ཡིན་པ་རྗོད་པ་དེའི་ཚེ་དགེ་སློང་མ་རྣམས་ལ་ཁྲོས་འཁྲུགས་རྔམ་པས་དགེ་སློང་མ་རྣམས་ལ་ཡང་གཞི་མེད་པར་ཕས་ཕམ་པར་འགྱུར་བའི་ཆོས་ཀྱི་སྐུར་བ་འདེབས་ཤིང་དགེ་སློང་མ་རྣམས་སྤ་འགོང་བར་བྱེད་དོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་ཞེས་བྱ་བ་ནས་བསླབ་པ་བཅས་པའི་བར་དུ་རྒྱས་པར་བརྗོད་པར་བྱའོ། །ཡང་དགེ་སློང་མ་གང་ཞིག་ཁྲོས་ཤིང་ཞེ་སྡང་མ་སྤངས་པས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་མ་དག་པ་ལྟུང་བ་མེད་པ་ལ་གཞི་མེད་པར་ཕས་ཕམ་པར་འགྱུར་བའི་ཆོས་ཀྱིས་སྐུར་པ་ལས་དེ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཡང་གཞི་མེད་པ་ཡིན་ལ། དགེ་སློང་མ་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་ཡང་ཆོས་འདི་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་དགེ་འདུན་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་མཛའ་མོའོ། །ཁྲོས་ཤིང་ཞེས་བྱ་བ་ནི་འཁྲུགས་པ་དང ། རྔམ་པ་དང ། ་ངན་པ་དང ། ཡིད་མ་རངས་པའོ། །ཞེ་སྡང་མ་སྤངས་པ་ཞེས་བྱ་བ་ནི་འཁྲུགས་པ་མ་བསལ་བར་རོ། །ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་ཞེས་བྱ་བ
9.107a
ནི་ཅི་ནས་ཀྱང་འདི་དགེ་སྦྱོང་གི་ཚུལ་དང་དབྲལ་ལོ་སྙམ་ནས་སོ། །དགེ་སློང་མ་དག་པ་ལྟུང་བ་མེད་པ་ལ་ཞེས་བྱ་བ་ནི་གཞི་དེའི་ལྟུང་བ་མེད་པའོ། །གཞི་མེད་པར་ཞེས་བྱ་བ་ནི་གཞི་གསུམ་པོ་མཐོང་བའི་གཞི་དང ། ཐོས་པའི་གཞི་དང ། དོགས་པའི་གཞི་མེད་པར་རོ། །ཕས་ཕམ་པར་འགྱུར་བ་ཞེས་བྱ་བ་ནི་བརྒྱད་པོ་གང་ཡང་རུང་བས་སོ། །ཆོས་ཀྱིས་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པ་ཡིན་ནོ། །སྐུར་པ་ལས་ཞེས་བྱ་བ་ནི་སྐུར་བ་བཏབ་པ་ལས་སོ། །དེ་དུས་གཞན་ཞིག་ན་ཞེས་བྱ་བ་ནི་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་རང་ཉིད་འགྱོད་པ་དང ། ་ཅུང་ཟད་འགྱོད་པ་དང ། རྣམ་པར་འགྱོད་པ་དང ། ཡིད་ལ་གཅགས་པ་སྐྱེས་ནས་སོ་རྩོད་པ་དེ་ཡང་ཞེས་བྱ་བ་ནི་རྩོད་པ་བཞི་པོ་འགྱོད་པའི་ཕྱིར་རྩོད་པ་དང ། མི་གདམས་པའི་ཕྱིར་རྩོད་པ་དང ། ལྟུང་བའི་ཕྱིར་རྩོད་པ་དང ། བྱ་བའི་ཕྱིར་རྩོད་པའོ། །གཞི་མེད་པ་ཡིན་ལ་ཞེས་བྱ་བ་ནི་གཞི་གསུམ་པོ་དག་མེད་པ་ཡིན་པ་ལའོ། །དགེ་སློང་མ་ཞེ་སྡང་ལ་གནས་པས་ཞེས་བྱ་བ་ནི་དགེ་སྦྱོང་གི་ཚུལ་དང་དབྲལ་བར་འདོད་པས་སོ། །ཞེ་སྡང་གིས་སྨྲས་སོ་ཞེས་བྱ་བ་ནི་ལྷག་པར་ཡང་དགེ་སྦྱོང་གི་ཚུལ་དང་དབྲལ་བར་འདོད་པས་སོ། །ཆོས་འདི་ཡང་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་བསྟན་པའོ། །དང་པོ་ཉིད་ཀྱིས་ལྟུང་བར་འགྱུར་ལ་ཞེས་བྱ་བ་ནི་མོད་ལ་ལྟུང་བར་འགྱུར་བའོ། །ངེས་པར་འབྱུང་བ་དང་བཅས་པ་ཞེས་བྱ་བ་ནི་རྟོན་པ་དང་བཅས་པའོ། །དགེ་འདུན་ལྷག་མ་ཞེས་བྱ་བ་ནི་ལྟུང་བ་དེ་གཉིས་ཀའི་དགེ་འདུན་ལ་རག་ལས་པ་དང ། གཉི་གའི་དགེ་འདུན་དང་འབྲེལ་བ་དང ། གཉི་གའི་དགེ་འདུན་ལ་རྟོན་པ་ཡིན་ཏེ། ལྟུང་བ་དེ་གཉི་གའི་དགེ་འདུན་ལས་ལྡང་པར་འགྱུར་གྱི་གང་ཟག་ལས་ནི་མ་ཡིན་པའོ། །ཡང་ན་ཕས་ཕམ་པར་གྱུར་པ་བརྒྱད་པོ་ནི་ལྷག་མ་མེད་པ་ཡིན་ལ། ལྟུང་བ་འདི་ནི་ལྷག་མ་དང་བཅས་པ་ཡིན་པ་དེའི་ཕྱིར་ལྷག་མ་དང་བཅས་པ་ཞེས་བྱའོ། །དེ་ལ་ཇི་ལྟར་ལྟུང་བར་འགྱུར་ཞེ་ན། གང་ཟག་དག་པ་ལ་སྐུར་བ་འདེབས་པ་ལ་གཞི་བཅུས་ནི་ལྟུང་བར་འགྱུར་ལ། གཞི་ལྔས་ནི་ལྟུང་བར་མི་འགྱུར་རོ། །ཇི
9.107b
ལྟར་གཞི་བཅུས་ལྟུང་བར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པར་འདུ་ཤེས་བསྒྱུར་ཅིང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་བཞིན་དུ་དེས་འདུ་ཤེས་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང་ལྟ་བ་བསྒྱུར་ཏེ། འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། ་ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་ན། བརྗོད་དོ་ཅོག་དགེ་འདུན་ལྷག་མར་འགྱུར་ཏེ། དེ་ལྟར་གཞི་བཅུས་ལྟུང་བར་འགྱུར་རོ། །ཇི་ལྟར་གཞི་ལྔས་ལྟུང་བར་མི་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། ་རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ ། །ཐོས་སོ། །དོགས་སོ། །ཞེས་ཟེར་ན་ལྟུང་བར་མི་འགྱུར་རོ། །དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་ལྟུང་བར་མི་འགྱུར་རོ། །དེ་ལྟར་གཞི་ལྔས་ལྟུང་བར་མི་འགྱུར་རོ། །ཇི་ལྟར་གང་ཟག་དག་པ་ལ་སྐུར་པ་འདེབས་པ་ལ་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་བ་དེ་བཞིན་དུ་གང་ཟག་དག་པ་མ་དག་པ་ལྟར་བཅོས་པ་ལ་སྐུར་པ་འདེབས
9.108a
པ་ལ་ཡང་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་རོ། །གང་ཟག་མ་དག་པ་ལ་སྐུར་པ་འདེབས་པ་ལ་ནི་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གཞི་བཅུ་གཅིག་གིས་ལྟུང་བར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་བསྒྱུར་ཅིང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ ། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །དེས་མཐོང་ལ་དེ་ཡང་བརྗེད་པ་དང ། དེས་ཐོས་ལ་དེ་ཡང་བརྗེད་པ་དང ། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་བསྒྱུར་ཅིང ། བཟོད་པ་དང་འདོད་པ་དང ། བློ་གྲོས་དང ། རྟོག་པ་དང་ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང ། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་ཏེ། དེ་ལྟར་གཞི་བཅུ་གཅིག་གིས་ལྟུང་བར་འགྱུར་རོ། །ཇི་ལྟར་གཞི་དྲུག་གིས་ལྟུང་བ་མེད་པར་འགྱུར་ཞེ་ན། དེས་མ་མཐོང་བ་དང ། མ་ཐོས་པ་དང ། མི་དོགས་པ་ལ་དེས་འདུ་ཤེས་མ་བསྒྱུར་ཅིང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ ། །ཐོས་སོ། །དོགས་སོ་ཞེས་ཟེར་ན་ལྟུང་བར་མི་འགྱུར་རོ། །དེས་མཐོང་ལ་དེ་ཡང་མ་བརྗེད་པ་དང ། དེས་ཐོས་པ་དེ་ཡང་མ་བརྗེད་པ་དང ། དེ་དོགས་ལ་དེ་ཡང་མ་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང་འདོད་པ་དང་བློ་གྲོས་དང་རྟོག་པ་དང ། ལྟ་བ
9.108b
མ་བསྒྱུར་བར་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་ལྟུང་བར་མི་འགྱུར་ཏེ། དེ་ལྟར་གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གང་ཟག་མ་དག་པ་ལ་སྐུར་པ་འདེབས་པ་ལ་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་བ་དེ་བཞིན་དུ་གང་ཟག་མ་དག་པ་དག་པ་ལྟར་བཅོས་པ་ལ་སྐུར་པ་འདེབས་པ་ཡང་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། ལས་ཅི་ཞིག་བགྱིས་ན་ཞེས་བྱ་བའི་བར་ནས་སྔོན་གྱི་རབས་རྣམས་རྒྱ་ཆེར་བརྗོད་པར་བྱའོ། །ལས་ཅི་ཞིག་བགྱིས་ན་གནས་མལ་འབོག་པ་དང ། ཟས་ལ་བསྐོ་བ་གང་ལགས་པར་གྱུར་ཅིང་དགྲ་བཅོམ་པ་ཉིད་ཐོབ་ཀྱང་སྐུར་པ་བཏབ་པར་གྱུར་ཅེས་ཇི་ལྟར་དགེ་སློང་གི་རྣམ་པར་འབྱེད་པ་བཞིན་དུ་རྒྱ་ཆེར་བརྗོད་པར་བྱའོ། །དགེ་སློང་མའི་འདུལ་བ་རྣམ་པར་འབྱེད་པ་ལས་དགེ་འདུན་ལྷག་མ་གཉིས་པ་རྫོགས་སྷོ།། ་་་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་ཨུཏྤ་ལའི་མདོག་དགེ་བའི་བཤེས་གཉེན་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བརྟེན་ནས་སྨད་པའི་ལས་རྣམས་སྤངས་ནས་དགྲ་བཅོམ་པ་ཉིད་ཐོབ་པར་གྱུར་པ་དེའི་ཚེ་དེ་ཉིན་གཅིག་བཞིན་དུ་དུས་གསུམ་དུ་བཅོམ་ལྡན་འདས་ལ་བལྟ་བའི་ཕྱིར་འགྲོའོ། །དགེ་སློང་ཡིད་ཆེས་པ་རྣམས་ནི་དེ་ཚེ་དང་ལྡན་པ་གྱད་བུ་ནོར་ལ་བདག་ཉིད་ཆེན་པོ་འདི་ནི་རང་གི་ཏིང་ངེ་འཛིན་དང ། རྣམ་པར་ཐར་པ་དང ། སྙོམས་པར་འཇུག་པ་དག་སྤངས་ཏེ་དགེ་སློང་རྣམས་ལ་ཆོས་དང་ལྡན་པའི་ཞལ་ཏའི་ལས་ལ་བརྩོན་པར་བྱེད་པ་ལ་ལྟོས་ཤེས་ལྷག་པར་ཡང་དག་པ་སྐྱེས་པར་གྱུར་ཏོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་དང་ཧ་ཅང་ཡང་མི་རིང་བ་ན་རྫིང་བུ་རྡོ་རྩིགས་ཅན་ཞེས་བྱ་བའི་འགྲམ་ན་ཉིན་མོ་གནས་པར་བྱེད་དོ། །དེ་ནས་དགེ་སློང་མ་ཨུཏྤ
9.109a
ལའི་མདོག་ཚེ་དང་ལྡན་པ་གྱད་བུ་ནོར་ག་ལ་བ་དེར་སོང་སྟེ། ཕྱིན་ནས་ཚེ་དང་ལྡན་པ་གྱད་བུ་ནོར་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་གྱིས་ཆོས་གོས་སྣམ་སྦྱར་ཚོན་དམར་པོར་གསར་དུ་བཙོས་ཤིང་དགེ་སློང་མ་ཨུཏྤ་ལའི་མདོག་ཀྱང་སྐྲ་བྲེགས་ནས་རིང་པོར་མ་ལོན་པར་གྱུར་ཏོ། །དེ་ནས་ཆོས་གོས་སྣམ་སྦྱར་རླུང་གིས་ཁྱེར་ནས་དེའི་མགོ་ལ་འཁྲིས་སོ། །དེའི་ཚེ་ན་རི་དགས་ཤིག་ཀྱང་རི་དགས་མོ་དང་རུང་བའི་ཆོས་མ་ཡིན་པ་བྱེད་དོ། །དེ་ནས་མཛའ་བོ་དང་ས་ལས་སྐྱེས་ཀྱང་རྫིང་བུ་རྡོ་རྩིགས་ཅན་ན་ཕྱག་དར་ཁྲོད་པ་འཁྲུ་བར་བྱེད་དོ། །མཛའ་བོ་དང ། ས་ལ་སྐྱེས་ཀྱིས་དགེ་སློང་མ་ཨུཏྤ་ལའི་མདོག་ཚེ་དང་ལྡན་པ་གྱད་བུ་ནོར་གྱི་རྐང་པ་གཉིས་ལ་ཕྱག་འཚལ་བ་ན། ཆོས་གོས་ཀྱི་མཐའ་མ་རླུང་གིས་ཁྱེར་བས་མགོ་ལ་འཁྲིས་པ་དང ། རི་དགས་ཤིག་ཀྱང་རི་དགས་མོ་དང་རུང་བའི་ཆོས་མ་ཡིན་པ་བྱེད་པ་ཡང་མཐོང་ངོ ། །མཐོང་ནས་ཀྱང་མཛའ་བོས་ས་ལས་སྐྱེས་ལ་སྨྲས་པ། ས་ལས་སྐྱེས་ཨུཏྤ་ལའི་མདོག་དང་གྱད་བུ་ནོར་ལ་ལྟོས། དེའི་ཚེ་ནི་བདག་ཅག་གིས་ཆ་མེད་པ་ལས་བརྒལ་གྱི། ད་ནི་བདག་ཅག་གི་ཆ་རྙེད་དོ་ཞེས་སྨྲས་ནས། དེ་གཉིས་ཀྱིས་ཆ་དེས་ཚེ་དང་ལྡན་པ་གྱད་བུ་ནོར་ལ་བརྒལ་ཏོ། །དགེ་སློང་རྣམས་ཀྱིས་ཀྱང་འདི་སྐད་ཅེས་སྨྲས་སོ། །ཁྱེད་ཅག་གཅིག་ཏུ་ལྷ་དང་མི་རྣམས་ཡོངས་སུ་བཏང་ནས་གཅིག་ཁོ་ནར་སེམས་ཅན་དམྱལ་བར་གནས་པར་བྱེད་དམ་ཅི། དེ་གཉིས་ཀྱིས་སྨྲས་པ། བདག་ཅག་གིས་ནི་མ་ཉེས་ན་བདག་གི་མིག་གིས་ཉེས་གྲང་ཞེས་བྱ་བ་ནས་བཅོམ་ལྡན་འདས་ཀྱིས་དེ་གཉིས་ལ་ཅི་ཞིག་མཐོང་ངོ ། ཇི་ལྟར་མཐོང ། གང་དུ་མཐོང ། གང་ན་མཐོང ། ཁྱེད་གཉིས་ཅིའི་ཕྱིར་དེར་སོན་ཅེས་ལེགས་པར་རབ་ཏུ་སྨྲས་ཤིང་བརྟག་པར་གྱིས་ཤིག་ཅེས་བཀའ་སྩལ་ཏེ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་རྣམས་ཀྱིས་ཀྱང་དེ་གཉིས་ལ་ལེགས་པར་རབ་ཏུ་སྨྲས་སོ། །དེ་གཉིས་ལ་ལེགས་པར་རབ་ཏུ་སྨྲས་ཤིང་བརྟགས་པ་ན་དེ་གཉིས་ཀྱིས་འདི་སྐད་ཅེས། བདག་ཅག་གིས་རི་དགས་ཤིག་དང ། རི་དགས་མོ་ཞིག་ཀྱང་མཐོང ། བདག་ཅག་གིས་གྱད་བུ་ནོར་དང ། ུཏྤ་ལའི
9.109b
མདོག་ཀྱང་མཐོང་ནས་ཆ་འདིས་བརྒལ་ཏོ་ཞེས་སྨྲས་སོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས་གང་གི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བསླབ་པའི་གཞི་བཅའ་བར་མཛད་པ་དེའི་ཚེ་དགེ་སློང་མ་རྣམས་ཀྱིས་ཆ་དེས་ཨུཏྤ་ལའི་མདོག་ལ་བརྒལ་ཏོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་ཁྲོས་ཤིང་ཞེ་སྡང་མ་སྤངས་པས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་མ་དག་པ་ལྟུང་བ་མེད་པ་ལ་རྩོད་པ་གཞན་གྱི་ཆ་མ་ཡིན་པའི་ཆ་ཅུང་ཟད་ཙམ་གྱིས་ཆོས་འགའ་ཞིག་བླངས་ནས་དགེ་སློང་མ་ཕས་ཕམ་པ་མ་བྱུང་བ་ལ་ཕས་ཕམ་པའི་ཆོས་ཀྱིས་སྐུར་པ་ལས་དེ་ཡང་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཉིད་ཀྱང་གཞན་གྱི་ཆ་མ་ཡིན་ཞིང ། རྩོད་པ་དེ་ཡང་གཞན་གྱི་ཆ་མ་ཡིན་པའི་ཆ་ཅུང་ཟད་ཙམ་གྱི་ཆོས་འགའ་ཞིག་བླངས་པར་གྱུར་ལ་དགེ་སློང་མ་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན། ཆོས་འདི་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་མཛའ་མོའོ། །ཁྲོས་ཤིང་ཞེས་བྱ་བའི་བར་ནི་སྔ་མ་བཞིན་ནོ། །རྩོད་པ་ཞེས་བྱ་བ་ནི་རྩོད་པ་བཞི་པོ་རྣམས་ཏེ་སྔ་མ་བཞིན་ནོ། །གཞན་གྱི་ཆ་མ་ཡིན་པ་ཞེས་བྱ་བ་ལ། གཞན་ཞེས་བྱ་བ་ནི་མྱ་ངན་ལས་འདས་པའོ། །དེའི་ཆ་མ་ཡིན་པ་ནི་ཕས་ཕམ་པར་འགྱུར་བའི་ཆོས་བརྒྱད་པོ་དག་གོ། །ཆ་ཅུང་ཟད་ཙམ་ཞེས་བྱ་བ་ནི་རི་དགས་དང ། རི་དགས་མོ་དག་ལྟ་བུའོ། །ཆོས་ཤེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པའོ། །བླངས་ནས་ཞེས་བྱ་བ་ནི་བཟུང་ནས་སོ། །དགེ་སློང་མ་ཕས་ཕམ་པ་མ་བྱུང་བ་ལ་ཞེས་བྱ་བ་ནི་ཨུཏྤ་ལའི་མདོག་གོ། །ཕས་ཕམ་པའི་ཆོས་ཤེས་བྱ་བ་ནི་ཕས་ཕམ་པ་བརྒྱད་པོ་གང་ཡང་རུང་བས་སོ། །སྐུར་པ་ལས་ཞེས་བྱ་བ་ནི་སྐུར་པ་བཏབ་པ་ལས་སོ་ཞེས་བྱ་བ་ནས་གཞི་མེད་པའི་བསླབ་པའི་གཞི་ཇི་ལྟ་བ་བཞིན་དུ་ཐམས་ཅད་སྔ་མ་བཞིན
9.110a
དུ་བརྗོད་པར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་བྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས། དེས་འདུ་ཤེས་བསྒྱུར་ཅེས་བྱ་བའི་བར་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ། མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན
9.110b
པ་མཐོང་ཞིང་དེ་དེ་ལ་ཕས་ཕམ་པར་འགྱུར་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན། དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས། དེས་འདུ་ཤེས་བསྒྱུར་ཅིང་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་འགྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཕས་ཕམ་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱིས་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན
9.111a
ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཉིད་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེས་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ཕས་ཕམ་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ
9.111b
སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བ་ཉིད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་བྱ་བ་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། ་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པར་བྱེད་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཕས་ཕམ་པ་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །
9.112a
དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟུང་བ་ཉིད་ཀྱི་ལྟ་བ་ཐོབ་པར་གྱུར་ནས། དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་གསུམ་པ་རྫོགས་སྷོ།། ་་་་་་་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་སྦོམ་དགའ་མོ་སྤོས་འཚོང་གི་ཁྱེའུ་ཞིག་ལ་ཆགས་སོ། །དེ་ནས་སྦོམ་དགའ་མོ་སྤོས་འཚོང་གི་ཁྱེའུ་ག་ལ་བ་དེར་སོང་སྟེ་ཕྱིན་ནས་དེས་ཇི་ལྟར་དེ་ཡང་ཆགས་པར་འགྱུར་བ་དེ་ལྟ་བུར་བྱས་སོ། །དེ་ཆགས་པས་ཆགས་པ་ལས་ཅུང་ཟད་བདག་གིར་བྱེད་ཅིང་དེ་ཡང་དང་ཡང་དུ་སོང་ནས་ཟོང་ཅུང་ཟད་ཅིག་བྱིན་ནས་རིན་མང་དུ་ལེན་ཏོ། །དེ་ནས་སྤོས་འཚོང་གི་ཁྱེའུ་དེ་འདི་སྙམ་དུ་སེམས་ཏེ། བདག་གིས་ཇི་སྲིད་ཅིག་ན་ཉམས་སུ་མྱོང་བར་འགྱུར་ཞིག་གུ་སྙམ་མོ། །དེ་ནས་སྤོས་འཚོང་གི་ཁྱེའུ་དེས་དུས་གཞན་ཞིག་ན་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་བདག་དང་ནམ་ཞིག་མཇལ་བར་འགྱུར། དེས་འདི་སྐད་ཅེས་སྨྲས་སོ། །ཁྱོད་གླང་པོ་ཆེ་མོ་དང་ཕྲད་པར་འགྱུར་རོ། །དེ་ནས་ཕྱི་བཞིན་འབྲང་བའི་དགེ་སྦྱོང་མ་དེས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་མི་འདི་ཆགས་པར་མི་མཁྱེན་ཏམ། དེས་འདི་སྐད་ཅེས་སྨྲས་སོ། །ཤེས་སོ། །ཅིའི་སླད་དུ་ཁྱོད་སྐྱེས་པ་ཆགས་པ་ལས་ཅུང་ཟད་བདག་གིར་མཛད་པའི་སྐབས་དེ་དགེ་སློང་མ་རྣམས་ཀྱིས་ཐོས་སོ། །ཐོས་ནས་དགེ་སློང་དག་ལ་སྨྲས་སོ། །དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང
9.112b
བ་འདི་དང་ཞེས་བྱ་བ་ནས་བསླབ་པ་བཅས་སོ་ཞེས་བྱ་བའི་བར་དུ་སྟེ། ཡང་དགེ་སློང་མ་གང་ཆགས་ནས་སྐྱེས་པ་ཆགས་པ་ལས་ཅུང་ཟད་བདག་གིར་བྱེད་ན་ཆོས་འདི་ཡང་དང་པོ་ནས་ལྟུང་བར་འགྱུར་ཞིང་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཆགས་པ་ཞེས་བྱ་བ་ནི་འདོད་ཆགས་པ་དང ། ཀུན་དུ་འདོད་ཆགས་པ་དང ། ཀུན་ནས་དཀྲིས་པའོ། །སྐྱེས་པ་ཆགས་པ་ཞེས་བྱ་བ་ནི་འདོད་ཆགས་པ་དང ། ཀུན་དུ་འདོད་ཆགས་པ་དང ། ཀུན་ནས་དཀྲིས་པ་སྤོས་འཚོང་གི་ཁྱེའུ་འམ། གཞན་ཡང་དེ་ལྟ་བུ་གང་ཡིན་པའོ། །ལས་ཤེས་བྱ་བ་ནི་ཐད་ནས་སོ། །ཅུང་ཟད་ཅེས་བྱ་བ་ནི་བཟའ་བ་ལྔ་དང་བཅའ་བ་ལྔའོ། །བདག་གིར་བྱེད་ཅེས་བྱ་བ་ནི་བླངས་ནས་མགྲིན་པར་མིད་པའོ། །ཆོས་འདི་ཞེས་བྱ་བ་འདི་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པའོ། །དང་པོ་ནས་ལྟུང་བར་འགྱུར་བ་ཞེས་བྱ་བ་ནི་མོད་ལ་ལྟུང་བར་འགྱུར་བའོ། །ངེས་པར་འབྱུང་བ་ཞེས་བྱ་བ་ནི་རྟོན་པ་དང་བཅས་པས་བྱ་བའོ། །དགེ་འདུན་ལྷག་མ་ཞེས་བྱ་བ་ནི་ལྟུང་བ་འདི་གཉི་གའི་དགེ་འདུན་ལ་རག་ལས་པ་དང ། གཉི་གའི་དགེ་འདུན་དང་འབྲེལ་བ་དང ། གཉི་གའི་དགེ་འདུན་ལ་རྟོན་པ་དང ། ལྟུང་བ་འདི་གཉི་གའི་དགེ་འདུན་ལས་ལྡང་བར་འགྱུར་གྱི་གང་ཟག་ལས་མ་ཡིན་པ་དང ། གཞན་ཡང་ཕས་ཕམ་པར་འགྱུར་བ་བརྒྱད་ནི་ལྷག་མ་མེད་པ་ཡིན་གྱི། ལྟུང་བ་འདི་ནི་ལྷག་མ་དང་བཅས་པ་ཡིན་ཏེ། དེ་བས་ན་དགེ་འདུན་ལྷག་མ་ཞེས་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་གང་ཆགས་པས་སྐྱེས་པ་ཆགས་པ་ལས་ཅུང་ཟད་བདག་གིར་བྱེད་ན་དགེ་འདུན་ལྷག་མའོ། །ཆགས་པས་སྐྱེས་པ་མ་ཆགས་པ་ལས་ན་ཉེས་བྱས་སོ། །མ་ཆགས་པས་ཆགས་པ་ལས་ན་སྦོམ་པོའོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཞི་པ་རྫོགས་སྷོ།། ་་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད
9.113a
ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་བཅའ་བ་མཛད་པ་དང ། དེ་ཕྱིན་ཆད་ནམ་ཡང་དགེ་སློང་མ་རྣམས་ཉོ་ཚོང་མི་བྱེད་དོ། །དེ་དག་ཕོངས་པ་དང་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དྲན་པ་ཉེ་བར་བཞག་ལ་ཉོ་བར་བྱའོ། །དེ་ནས་སྦོམ་དགའ་མོས་གཙུག་དགའ་མོ་ལ་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་རེ་ཤིག་ཁྱོད་མ་ཆགས་པར་གྱིས་ལ་ཁྱོད་མ་ཆགས་པར་གྱུར་ནས་སྐྱེས་པ་ཆགས་པ་ལས་ཅུང་ཟད་ཅིག་ལོང་ཤིག་།དེས་སོང་ནས་ཇི་ལྟར་སྐྱེས་པ་ཆགས་པ་ལས་ཅུང་ཟད་བདག་གིར་བྱེད་པ་དེ་ལྟར་བྱས་སོ། །དེ་ནས་གཙུག་དགའ་མོས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་སྐྱེས་པ་འདི་ནི་ཆགས་སོ། །དེས་འདི་སྐད་ཅེས་སྨྲས་སོ། །ཅིའི་ཕྱིར་ཆགས། དེ་དེ་ལྟར་བདག་གིར་བྱེད་པ་ན་དགེ་སློང་མ་རྣམས་ཀྱིས་སྨྲས་པ། ཅིའི་ཕྱིར་དེ་ལྟར་བྱེད། དེས་འདི་སྐད་ཅེས་སྨྲས་སོ། །དེར་ཟད་མོད། སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་ནས་བསླབ་པ་བཅས་པའི་བར་དུ་སྟེ། ཡང་དགེ་སློང་མ་གང་དགེ་སློང་མ་ལ་འདི་སྐད་ཅེས་ཕུ་ནུ་མོ་རེ་ཤིག་ཁྱོད་མ་ཆགས་པར་གྱིས་ལ་ཁྱོད་མ་ཆགས་པར་གྱུར་ནས་སྐྱེས་པ་ཆགས་པ་ལས་ཅུང་ཟད་བདག་གིར་གྱིས་ཤིག་ཅེས་ཟེར་ན་ཆོས་འདི་ཡང་དང་པོ་ནས་ལྟུང་བར་འགྱུར་ཞིང་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་ལ་ཞེས་བྱ་བ་ནི་གཙུག་དགའ་མོ་ལའོ། །རེ་ཤིག་ཁྱོད་མ་ཆགས་པར་གྱིས་ལ་ཞེས་བྱ་བ་ནི་འདོད་མ་ཆགས་པ་དང ། ཀུན་དུ་འདོད་མ་ཆགས་པ་དང་ཀུན་ནས་མ་དཀྲིས་པར་གྱིས་ལའོ་སྐྱེས་པ་ཆགས་པ་ལས་ཤེས་བྱ་བ་ནི་འདོད་ཆགས་པ་དང ། ཀུན་དུ་འདོད་ཆགས་པ་དང ། ཀུན་ནས་དཀྲིས་པ་ལས་སོ། །ཅུང་ཟད་བདག་གིར་གྱིས་ཤེས་བྱ་བ་ནི་བཟའ་བ་ལྔ་དང ། བཅའ་བ་ལྔ་ལོང་ལ་བདག་གིར་གྱིས་ཤིག་པ་སྟེ་འདི་ནི་སྔ་མ་བཞིན་ནོ། །འདི་སྐད་དུ་ཟེར་ན་ཞེས་བྱ་བ་ནི་སྨྲ་ནའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གང་ཅུང་ཟད་ཇི་ཙམ་དུ་དགེ་སློང་མས
9.113b
དགེ་སློང་མ་ལ་འདི་སྐད་ཅེས་ཁྱོད་ཚུར་མ་ཆགས་པར་གྱུར་ནས་སྐྱེས་པ་ཆགས་པ་ལས་ཅུང་ཟད་ལོང་ལ་བདག་གིར་གྱིས་ཤིག་ཅེས་ཟེར་ན་ཐམས་ཅད་དུ་དགེ་འདུན་ལྷག་མར་འགྱུར་རོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་ལྔ་པ་རྫོགས་སྷོ།། ་་་་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་དགུ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་དགེ་སློང་མ་མཛའ་མོ་རང་གིས་ཁས་བླངས་པས་བསྙིལ་བ་དེའི་ཚེ་སྐྱེས་པས་བླངས་ནས་ཁྱིམ་གྱི་འཚོ་ཚིས་བྱེད་དུ་བཅུག་ཅིང་དེ་དང་རྩེ་བར་བྱེད་པ་ན་བུ་དང་བུ་མོ་དག་ཀྱང་སྐྱེས་སོ། །དེ་དུས་གཞན་ཞིག་ན་ནད་ཀྱིས་ཐེབས་པ་དང ། དེའི་ཕུ་ནུ་མོ་དགེ་སློང་མ་མཛའ་ཅན་མ་ཞེས་བྱ་བས་དེ་ནད་ཀྱིས་ཐེབས་པར་ཐོས་ནས་བལྟ་བའི་ཕྱིར་གཅིག་པུ་སོང་སྟེ་དེས་དེ་ལ་བལྟས་ནས་སླར་ལོག་གོ། །དེ་ནས་མཛའ་མོས་ཕུ་ནུ་མོ་ལ་འདི་སྐད་ཅེས་འཕགས་མ་གལ་ཏེ་ན་བདག་དོ་མོད་འགུམ་ཡང་གངས་མ་བཞུད་པར་འདིར་བཞུགས་ཤིག་ཅེས་སྨྲས་པ་དང ། དེ་ཡང་དེར་འདུག་གོ། །དེ་ནས་མཛའ་མོ་ཡང་དེ་ཉིད་ཀྱི་ནུབ་མོ་དུས་ལས་འདས་སོ། །དེ་ནས་མཛའ་མོའི་ཁྱོས་མྱ་ངན་བྱ་བར་བརྩམས་པ་དང ། དེའི་གྲོགས་པོ་ཞིག་གིས་སྨྲས་པ། འདི་ནི་དེའི་ཕུ་ནུ་མོ་མཛའ་ཅན་མ་ཞེས་བྱ་བ་ཡིན་གྱིས་དེ་ཉིད་བླངས་པར་གྱིས་ཤིག་།དེ་ནས་མཛའ་མོའི་ཁྱོས་མཛའ་ཅན་མ་ལ་འདི་སྐད་ཅེས་སྨྲས་སོ། །གལ་ཏེ་མཛའ་ཅན་མ་སྤྲོ་ན་ཁྱིམ་འདི་དང ། མཛའ་མོའི་བུ་དང ། བུ་མོ་དག་ཡོངས་སུ་སྐྱོངས་ཤིག་།མཛའ་ཅན་མ་འདི་སྙམ་དུ་གལ་ཏེ་འདིར་ཅུང་ཟད་ཅིག་སྨྲས་ན་དེ་ཉིད་དུ་བདག་བརྟུལ་ཞུགས་དང་ཕྲལ་བར་འགྱུར་བས་མི་སྨྲ་བར་བྱའོ་སྙམ་དུ་བསམས་ནས་ནམ་ནངས་པ་དང་དེ་འགྲོ་བར་བྱས་སོ། །དེ་ནས་སྐྱེས་པ་དེས་མཛའ་ཅན་མ་ལ་འདི་སྐད་ཅེས་སྨྲས་སོ། །འཕགས་མ་ཁྱིམ་འདི་ཁྱོད་ཀྱི་ལགས་ཀྱིས་མ་བཞུད་ཅིག་།དེས་འདི་སྐད་ཅེས་སྨྲས་སོ། །ཁྱོད་ཀྱི་ཁྱིམ་བཙོན་རར་གྱུར་ཅིག་།ཁྱོད་ཀྱི་ཁྱིམ་མེས་ཚིག་པར་གྱུར་ཅིག་སྨྲས་ནས་སོང་ངོ ། །དེ་ལ་དགེ་སློང་མ་རྣམས་ཀྱིས་ཁྱོད་མདང་གསུམ་ག་ལ་ཉལ་ཉལ་ཞེས་དྲིས་པ་དང ། དེས་སྨྲས་པ།
9.114a
བདག་གི་ཕུ་ནུ་མོ་དུས་ལས་འདས་པའི་དེ་ནའོ། །དེ་དག་གིས་སྨྲས་པ། གལ་ཏེ་འགའ་ཞིག་གིས་ཁྱོད་བརྟུལ་ཞུགས་དང་ཕྲལ་ན་ཁྱོད་ཀྱིས་ཅི་བྱར་ཡོད། དེས་འདི་སྐད་ཅེས་སྨྲས་སོ། །གལ་ཏེ་བདག་གིས་ཁ་རོག་པར་མ་འདུག་ན་དེང་ཉིད་དུ་བདག་བརྟུལ་ཞུགས་དང་བྲལ་བར་གྱུར་ཏོ་ཞེས་བྱ་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་མཚན་མོ་གཅིག་པུ་ཕྱི་རོལ་དུ་གནས་པར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་མཛའ་ཅན་མའོ་མཚན་མོ་ཞེས་བྱ་བ་ནི་ཉི་མ་ནུབ་ནས་སོ། །གཅིག་པུ་ཞེས་བྱ་བ་ནི་གཉིས་པ་མེད་པར་རོ། །ཕྱི་རོལ་དུ་གནས་པར་བྱེད་ན་ཞེས་བྱ་བ་ནི་དབྱར་ཁང་ལས་གཞན་དུ་སྐྱ་རེང་ཤར་བར་བྱེད་ནའོ། །གཞན་དག་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མ་མཚན་མོ་གཅིག་པུ་ཕྱི་རོལ་ཏུ་གནས་པར་བྱེད་ན་ཇི་ལྟར་གྱུར་ཀྱང་རུང་སྟེ་དགེ་འདུན་ལྷག་མར་འགྱུར་རོ། །དགེ་ཚུལ་མ་དང་ལྷན་ཅིག་ཕྱི་རོལ་དུ་གནས་པར་བྱེད་ན་ཉེས་པ་སྦོམ་པོར་འགྱུར་རོ། །དགེ་སློང་མ་དང་ལྷན་ཅིག་ཕྱི་རོལ་དུ་གནས་པར་བྱེད་ན་ཉེས་བྱས་སོ། །གལ་ཏེ་ཕྱི་བཞིན་འབྲང་བའི་དགེ་སློང་མ་ཤི་བར་གྱུར་ཏམ། ཉམས་པར་གྱུར་ཏམ། བྲོས་པར་གྱུར་ཏམ། བབས་པར་གྱུར་ན་ལྟུང་བ་མེད་དོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་དྲུག་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་བྲམ་ཟེ་དང་ཁྱིམ་བདག་གིས་ཁྱིམ་དག་ན་གཅིག་པུ་ཉི་མ་ནུབ་ནུབ་ཏུ་ཆོས་འཆད་པར་བྱེད་དོ། །ཉི་མ་ནུབ་པ་དང་དབྱར་ཁང་དུ་འོངས་ནས་དེས་དགེ་སློང་མ་དག་ལ་འདི་སྐད་ཅེས་སྨྲས་སོ། །ཁོ་མོའི་རྒྱབ་དང་རྐེད་པ་དག་རྫིས་ཤིག་།དེ་དག་གིས་དྲིས་པ། འཕགས་མ་ཁྱོད་གང་ནས་འོངས། དེས་འདི་སྐད་ཅེས་སྨྲས་སོ། །བྲམ་ཟེ་དང་ཁྱིམ་བདག་རྣམས་ལ་ཆོས་བསྟན་པ་ནས་སོ། །ཁྱོད་ཀྱི་ཕྱི་བཞིན་འབྲང་བའི་དགེ་སློང་མ་སུ་དང་ལྷན་ཅིག་སོན། དེས་སྨྲས་པ། ཁོ་མོ་གཅིག་པུ་སོན་ཏོ། །དེ་དག་གིས་སྨྲས་པ། གལ་ཏེ་འགའ་ཞིག་གིས་ཁྱོད་བརྟུལ་ཞུགས་དང་ཕྲལ་ན་ཁྱེད་ཀྱིས་ཅི་བྱར་ཡོད།
9.114b
དེས་སྨྲས་པ། སྤོས་འཚོང་གི་ཁྱེའུ་གང་ཡིན་པ་རྡོག་པ་གཅིག་བསྣུན་པས་རྩིབ་མ་གཉིས་བཅག་པ་ཁྱེད་ཅག་གིས་མ་མཐོང་ངམ། དེ་དག་གིས་སྨྲས་པ། ཆུ་རྫ་ཆུའི་དོན་དུ་ཁྲོན་པར་བཅུག་པ་རྟག་ཏུ་མཁྲང་པོར་མི་ལྡོག་གོ། །དེ་ནས་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་ཉིན་པར་གཅིག་པུ་ཕྱི་རོལ་དུ་གནས་པར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ། དགེ་འདུན་ལྷག་མར་འགྱུར་རོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཉིན་པར་ཞེས་བྱ་བ་ནི་ཉི་མ་ཤར་ནས་སོ། །གཅིག་པུ་ཞེས་བྱ་བ་ནི་གཉིས་པ་མེད་པར་རོ། །ཕྱི་རོལ་ཏུ་གནས་པར་བྱེད་ན་ཞེས་བྱ་བ་ནི་དབྱར་ཁང་ལས་གཞན་དུ་ཉི་མ་ནུབ་པར་བྱེད་ནའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཉིན་པར་གཅིག་པུ་ཕྱི་རོལ་དུ་གནས་པར་བྱེད་ན་ཇི་ལྟར་ཡང་རུང་སྟེ། ཐམས་ཅད་དུ་དགེ་འདུན་ལྷག་མར་འགྱུར་རོ། །དགེ་ཚུལ་མ་དང་ལྷན་ཅིག་ཕྱི་རོལ་དུ་གནས་པར་བྱེད་ན་ཉེས་པ་སྦོམ་པོར་འགྱུར་རོ། །དགེ་སློང་མ་དང་ཕྱི་རོལ་དུ་ལྷན་ཅིག་གནས་པར་བྱེད་ན་ཉེས་བྱས་སོ། །གལ་ཏེ་ཕྱི་བཞིན་འབྲང་བའི་དགེ་སྦྱོང་མ་ཤི་བར་གྱུར་ཏམ། ཉམས་པར་གྱུར་ཏམ། བྲོས་པར་གྱུར་ཏམ། བབས་པར་གྱུར་ན་ལྟུང་བ་མེད་དོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བདུན་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་གཅིག་པུ་ལམ་པོ་ཆེའི་བཞི་མདོ་དག་ཏུ་འདུག་ནས་དོན་འཐུན་ཐམས་ཅད་ཆས་ནས་ལམ་དུ་ཞུགས་ཏེ་གྲོང་ཁྱེར་ཆེན་པོ་གང་དང་གང་དུ་འགྲོ་བའི་གྲོང་ཁྱེར་ཆེན་པོ་དེ་དང་དེར་རྒྱང་གྲགས་དང་རྒྱང་གྲགས་ཕྱེད་ཙམ་དུ་འགྲོ་བར་བྱེད་ཅིང་ལྡོག་པར་ཡང་བྱེད་དོ། །དེ་བཞིན་དུ་ཇི་ཙམ་ན་ཉི་མ་ནུབ་པ་ན་དབྱར་ཁང་དུ་འོངས་ནས་གཞོན་རབས་དག་ལ་འདི་སྐད་ཅེས་སྨྲས་སོ། །ད་བདག་གི་རྒྱབ་རྫིས་ཤིག་།བདག་གི་རྐེད་པ་དང ། རྩིབ་ལོགས་རྫིས་ཤིག་།དེ་དག་གིས་འདི་སྐད་ཅེས་སྨྲས་སོ། །འཕགས་མ་གར
9.115a
བཞུད་བཞུད་དེས་སྨྲས་པ། དེང་ཁོ་མོ་གྲོང་ཁྱེར་ཆེན་པོ་དྲུག་པོ་དག་གིས་ལམ་དུ་སོན་ཏོ། །དེ་དག་གིས་སྨྲས་པ། ཁྱེད་ཀྱི་ཕྱི་བཞིན་འབྲང་བའི་དགེ་སྦྱོང་མ་སུ་དང་ལྷན་ཅིག་ཕྱིན། དེས་སྨྲས་པ། ཁོ་མོ་གཅིག་པུའོ། །དེ་དག་གིས་སྨྲས་པ། གལ་ཏེ་འགའ་ཞིག་གིས་ཁྱོད་བརྟུལ་ཞུགས་དང་ཕྲལ་ན་ཁྱོད་ཀྱིས་ཅི་བྱར་ཡོད། དེས་འདི་སྐད་ཅེས་གལ་ཏེ་བུ་ཟན་མོའི་བུ་དག་ང་ལ་རེག་ཏུ་འོང་ན་ངས་ལྷུང་བཟེད་ནག་པོས་སོ་བཅག་ཏུ་ཟད་མོད་ཅེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་གཅིག་པུ་འདྲོན་ལམ་དུ་ཞུགས་ཤིང་འགྲོ་བར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །གཅིག་པུ་ཞེས་བྱ་བ་ནི་གཉིས་པ་མེད་པར་རོ། །འདྲོན་ལམ་ཞེས་བྱ་བ་ནི་དགོན་པའི་ལམ་མོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་གཅིག་པུ་འདྲོན་ལམ་དུ་འགྲོ་བར་བྱེད་ན་ཇི་ལྟར་ཡང་རུང་སྟེ་དགེ་འདུན་ལྷག་མར་འགྱུར་རོ། །གཞན་ནི་སྔ་མ་བཞིན་ནོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བརྒྱད་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་མང་པོ་ལྗོངས་རྒྱུ་བ་རྒྱུ་ཞིང་ཆུ་འགྲམ་ཞིག་ཏུ་ཕྱིན་ཏོ། །དེ་དག་བྱ་བ་ཅུང་ཟད་ཙམ་གྱིས་ཕྱི་རོལ་དུ་འགྲོ་བར་འདོད་ནས་གྲུ་བཙལ་བ་དང ། མཉན་པས་ཕ་རོལ་གྱི་འགྲམ་དུ་ཕུར་པ་ལ་གྲུ་བཏགས་ཏེ་འདུག་གོ། །རེ་ཤིག་ན་དགེ་སློང་མ་རྣམས་ཀྱིས་མཐོང་ནས། དེ་དག་གིས་འདི་སྐད་ཅེས་སྨྲས་སོ། །གལ་ཏེ་བདག་ཅག་ལས་རྐྱལ་ཤེས་པ་འགའ་ཞིག་ཡོད་ན་དེ་སོང་ལ་གྲུ་བླང་བར་གྱིས་ཤིག་།དེའི་ཚེ་ན་སྔོན་མཉན་པ་མོ་བྱེད་བྱེད་པ་དགེ་སློང་མ་ནག་མོ་ཞེས་བྱ་བ་དེས་འདི་སྐད་ཅེས་སྨྲས་སོ། །འཕགས་མ་དག་བདག་སོང་ལ་གྲུ་བླང་བར་བགྱིའོ་ཞེས་སྨྲས་ནས་དེས་ཆོས་གོས་བརྟུལ་ཏེ་ཆུའི་ནང་དུ་ཞུགས་སོ། །དེ་ཡང་སྔོན་གྱི་གོམས
9.115b
པ་གང་ཡིན་པ་དེ་བྲི་ཞིང་ལུས་ཀྱང་ལྕི་བར་གྱུར་པས་དབུས་སུ་ཕྱིན་པ་དང་གཏིང་དུ་བྱིང་ལ་ཐུག་པར་གྱུར་ཏོ། །དེ་ནས་དགེ་སློང་མ་འགྲམ་ན་འདུག་པ་རྣམས་ཀྱིས་འདི་སྐད་ཅེས་སྨྲས་སོ། །ནག་མོ་རྐྱོལ་ཅིག་ནག་མོ་རྐྱོལ་ཅེས་སྨྲས་ནས། དེ་ཡང་ངལ་ཆད་དེ་འགྲམ་དུ་ཕྱིན་ཏེ་ཉི་མ་ནུབ་པ་དང་དབྱར་ཁང་དུ་འོངས་སོ། །དགེ་སློང་མ་རྣམས་ཀྱིས་ཅུང་ཟད་བདེ་བར་བསྒྱུས་སམ་ཞེས་དྲིས་པ་དང ། དེས་ཇི་ལྟར་གྱུར་པ་དེ་དག་རྒྱས་པར་སྨྲས་པ་ན། དེ་དག་གིས་འདི་སྐད་ཅེས་སྨྲས་སོ། །ཁྱད་གཅིག་པུ་ཆུར་ཞུགས་སམ། དེས་སྨྲས་པ། གཅིག་པུའོ། །དེ་དག་གིས་འདི་སྐད་ཅེས་གལ་ཏེ་འགའ་ཞིག་གིས་ཁྱོད་བརྟུལ་ཞུགས་དང་ཕྲལ་ན་ཁྱོད་ཀྱིས་ཅི་བྱར་ཡོད་ཅེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་གཅིག་པུ་ཆུ་ཀླུང་གི་ཕ་རོལ་དུ་རྐྱལ་བར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་དགེ་སློང་མ་ནག་མོའོ། །གཅིག་པུ་ཞེས་བྱ་བ་ནི་གཉིས་པ་མེད་པར་རོ། །ཆུ་ཀླུང་གི་ཕ་རོལ་དུ་རྐྱལ་བར་བྱེད་ན་ཞེས་བྱ་བ་ནི་ཆུ་བོ་རྒལ་བར་བྱེད་ནའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་གཅིག་པུ་ཆུ་ཀླུང་གི་ཕ་རོལ་དུ་རྐྱལ་བར་བྱེད་ན་དགེ་འདུན་ལྷག་མར་འགྱུར་རོ། །རྩང་ལག་རྒལ་བར་བྱེད་ན་ཉེས་པ་སྦོམ་པོར་འགྱུར་རོ། །ཆུ་བྲན་རྒལ་བར་བྱེད་ན་ཉེས་པ་སྦོམ་པོར་འགྱུར་རོ། །ཡུར་ཆུ་རྒལ་བར་བྱེད་ན་ཉེས་བྱས་སོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་དགུ་པ་རྫོགས་སྷོ།། ་་་་་་་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ན་རྒྱལ་པོ་གསལ་རྒྱལ་ལ་དམག་ཚོགས་མཐུ་སྟོབས་རྡུལ་དུ་ཀློག་པ་ཞེས་བྱ་བ་དང ། རིགས་བཟང་པོ་ཞེས་བྱ་བ་གཉིས་ཡོད་དེ་དེ་དག་རྒྱལ་པོ་གསལ་རྒྱལ་གྱི་མདུན་དུ་འགྲོ་ཞིང་རི་བྲགས་པ་གང་ཡང་རུང་བ་ལོག་པར་གྱུར་ན་དེ་དག་དེར་སོང་ནས་གཡུལ་འགྱེད་པར་བྱེད་དོ། །དེ་དག་དེར
9.116a
སོང་བ་ན་ཆུང་མ་རྣམས་གཡོན་ཅན་དང ། འཕྱོན་མ་དང ། ཟོལ་པ་རྣམས་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ནས་དེ་དག་གིས་འདི་སྙམ་དུ་བདག་ཅག་གིས་ནི་རི་བྲགས་པ་ལོག་པའི་རྣམས་འདུལ་བར་བྱེད་ན་རང་གི་ཆུང་མ་དག་གདུལ་བར་མི་ནུས་སམ་ཁྲིམས་བཅའ་གོར་མ་ཆག་སྙམ་དུ་བསམས་ནས། བདག་ཅག་གི་ཆུང་མ་གང་ཞིག་སྐྱེས་པ་གཞན་དང་ལྷན་ཅིག་མི་རིགས་པ་བྱེད་པར་གྱུར་པ་དེའི་མགོ་སྐེར་བཅད་ནས་དོར་བར་བྱའོ། །དེ་དག་ཁ་ཅིག་གིས་སྨྲས་པ། ཁྲིམས་འདི་ཧ་ཅང་བརླང་ཆེས་ཀྱིས་རྒྱལ་པོ་ལ་བདག་ཅག་གིས་ཞུ་བར་བྱའོ། །དེ་ནས་དམག་དཔོན་དཔོག་བྱེད་དམག་གི་ཚོགས་དང་ལྷན་ཅིག་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས་སྐབས་དེ་དག་རྒྱས་པར་རྒྱལ་པོ་ལ་བསྙད་པ་དང ། རྒྱལ་པོས་ཀྱང་མ་ཉེས་སོ་ཞེས་བྱས་སོ། །དེ་ནས་དམག་དཔོན་དཔོག་བྱེད་ཀྱི་བུ་མོ་སྡེ་ཅན་མ་ཞེས་བྱ་བ་དེས་ཁྲིམས་དང་འགལ་བར་བྱས་པ་ན་བུད་མེད་ཕལ་དག་གིས་འདི་སྐད་ཅེས་གལ་ཏེ་འདི་ཆད་པས་མ་བཅད་པར་གྱུར་ན་བདག་ཅག་གིས་ཀྱང་ཁྲིམས་བྲལ་བར་བྱའོ་ཞེས་སྨྲས་པ་དམག་མི་རྣམས་ཀྱིས་ཐོས་ནས་དེ་དག་གིས་དཔོག་བྱེད་ལ་སྨྲས་སོ། །དམག་དཔོན་དཔོག་བྱེད་ཀྱིས་འདི་སྙམ་དུ་བདག་གིས་ཁྲིམས་བཅས་ལ་བདག་གིས་དྲལ་དུ་ག་ལ་རུང་སྙམ་དུ་བསམས་ནས་དམག་དཔོན་དཔོག་བྱེད་ཀྱིས་སྡེ་ཅན་མ་ཡོངས་སུ་བཏང་ནས་དམག་མི་རྣམས་ལ་སོད་ཅིག་ཅེས་བསྒོའོ། །དེ་ན་སྡེ་ཅན་མས་ཐོས་ནས་རིངས་པ་རིངས་པར་སོང་སྟེ་དམག་མི་རྣམས་ཀྱི་རྐང་པ་ལ་གཏུགས་ནས་བཟོད་པ་གསོལ་ལོ། །དེ་དག་གིས་སྨྲས་པ། ཁོ་བོ་ཅག་གིས་འདི་ལྟ་བུའི་མི་རིགས་པ་བྱེད་པ་ལ་བཟོད་པར་མི་ནུས་མོད་ཀྱི། འོན་ཀྱང་དམག་མི་ལ་བལྟས་པ་དོན་མེད་པར་མི་འགྱུར་བར་བྱ་བའི་ཕྱིར་དེའི་ལན་ཞག་བདུན་ན་སྦྱིན་པར་བྱའོ། །དེས་ཀྱང་ཞག་བདུན་ན་ལན་ཐོབ་ནས་ངུ་ཞིང་སྦྱིན་པ་ནི་སྦྱིན། བསོད་ནམས་ནི་བྱེད་པ་ན་དགེ་སློང་མ་ཕྱར་མོས་སྡེ་ཅན་མ་ལ་ཅི་སྟེ་ངུ་ཞེས་དྲིས་སོ། །དེས་འདི་སྐད་ཅེས་སྨྲས་སོ། །ཁོ་མོ་ཕས་ཡོངས་སུ་བཏང་ངོ ། །ཁོ་མོ་མས་ཡོངས་སུ་བཏང་ངོ ། །ཁོ་མོ་ཁྱོས
9.116b
ཡོངས་སུ་བཏང་སྟེ་ཁོ་མོ་ནི་ཉི་མ་བདུན་ན་མེད་དོ། །དེས་འདི་སྐད་ཅེས་རེ་ཤིག་རབ་ཏུ་བྱུང་བར་མི་འདོད་དམ་ཞེས་སྨྲས་པ་དང ། དེ་དེ་ལས་རབ་ཏུ་བྱུང་སྟེ་དེས་དེ་དབྱར་ཁང་དུ་ཁྲིད་དེ་སོང་ངོ ། །དེ་ཡང་དམག་མི་རྣམས་ཀྱིས་ཐོས་ནས་དེ་དག་གིས་འདི་སྐད་ཅེས་གལ་ཏེ་བ་གླང་གི་རཝ་ཕྲག་ཏུ་ཞུགས་ཀྱང་དེ་ནི་གསོན་པོར་མི་བྱའོ་ཞེས་སྨྲས་སོ། །དེ་ཡང་སྡེ་ཅན་མས་ཐོས་ནས་དེ་སྐྲག་སྟེ་བཅུ་གཉིས་སྡེ་ལ་སྐྱབས་སུ་སོང་བ་དང ། དེ་དག་གིས་འདི་སྐད་ཅེས་ཕུ་ནུ་མོ་གལ་ཏེ་པུ་ཟན་མའི་བུ་རྣམས་འོངས་ན་ལྷུང་བཟེད་ནག་པོས་སོ་གཅག་གིས་རྟོན་ཤིག་ཅེས་སྨྲས་སོ། །དེས་འདི་སྙམ་དུ་བཅུ་གཉིས་སྡེ་ཁ་བྱ་འདི་དག་གིས་ནི་ནོན་མི་ནུས་སོ་སྙམ་དུ་བསམས་ནས་དེ་སྐྱེ་དགུའི་བདག་མོ་ཆེན་མོ་གཽ་ཏ་མ་ལ་སྐྱབས་སུ་སོང་བ་དང ། དེས་སྨྲས་པ། འདི་ལྟར་ཕས་ཡོངས་སུ་བཏང་བ། མས་ཡོངས་སུ་བཏབ་བ། དམག་མིས་ཡོངས་སུ་བཏང་བ། རྒྱལ་པོས་ཡོངས་སུ་བསྒོ་བ། ཁྱིམ་ཐབ་ཀྱིས་སྤངས་པ་ཁྱོད་སུས་རབ་ཏུ་ཕྱུང་ཞེས་བྱ་བ་ནས་བཙུན་མོ་ཕྲེང་ལྡན་མ་ལ་སྐྱབས་སུ་སོང་བའི་བར་དུའོ། །དེ་ནས་བཙུན་མོ་ཕྲེང་ལྡན་མས་དཔོག་བྱེད་ཀྱི་བུ་མོ་སྡེ་ཅན་མའི་ཕྱིར་རྒྱལ་པོ་ལ་གསོལ་བ་བཏབ་པ་དང ། རྒྱལ་པོས་ཀྱང་ཁས་བླངས་སོ། །དེ་ནས་རྒྱལ་པོ་དམག་མི་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །དཔོག་བྱེད་ཀྱི་བུ་མོ་སྡེ་ཅན་མ་འདི་ནི་སངས་རྒྱས་ལ་སྐྱབས་སུ་སོང་བ། ཆོས་ལ་སྐྱབས་སུ་སོང་བ། དགེ་འདུན་ལ་སྐྱབས་སུ་སོང་བ། ང་ལ་སྐྱབས་སུ་འོངས་པ། ཁྱེད་ཅག་ལ་སྐྱབས་སུ་སོང་བ་ཡིན་གྱིས་མ་གསད་ཅིག་དེ་དག་གིས་སྨྲས་པ། ལྷ་ཅི་ཁྲིམས་དྲལ་བར་བགྱི་འམ། དེས་འདི་སྐད་ཅེས་ག་ལ་དྲལ་གྱི་སྟེང་དུ་ལེགས་པར་རབ་ཏུ་བསྲུང་མོད་ཀྱིས་འོན་ཀྱང་འདིའི་ཕྱིར་མཆོག་ཞིག་སྦྱིན་པར་བྱའོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། དངོས་པོ་འདི་དང ། སྐབས་འདི་ལ་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་བུད་མེད་གང་ཞིག་རྒྱལ་པོས་བསྒོ་བ།
9.117a
ཁྱིམ་ཐབ་ཀྱིས་སྤངས་པ། ཕ་མས་ཡོངས་སུ་བཏང་བ། དམག་མི་རྣམས་ལ་སོད་ཅིག་ཅེས་བསྒོ་བར་ཤེས་བཞིན་དུ་འཁོར་དུ་འཇོག་པར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་ཕྱར་མོའོ། །བུད་མེད་གང་ཞིག་ཅེས་བྱ་བ་ནི་སྡེ་ཅན་མའོ། །རྒྱལ་པོས་བསྒོ་བ་ཞེས་བྱ་བ་ནི་གསལ་རྒྱལ་གྱིས་རང་གིས་རུང་བར་བྱས་པའོ། །ཁྱིམ་ཐབ་ཀྱིས་སྤངས་པ་ཞེས་བྱ་བ་ནི་ཁྱོས་སོ། །ཕ་མས་ཡོངས་སུ་བཏང་བ་ཞེས་བྱ་བ་ནི་དཔོག་བྱེད་དང་དཔོག་བྱེད་ཀྱི་ཆུང་མས་སོ། །དམག་མི་རྣམས་ལ་སོད་ཅིག་ཅེས་བསྒོ་བ་ཞེས་བྱ་བ་ནི་མཐུ་སྟོབས་རྡུལ་དུ་ཀློག་པ་དང ། རིགས་བཟང་པོ་ལའོ། །ཤེས་བཞིན་དུ་ཞེས་བྱ་བ་ནི་དེ་བདག་ཉིད་ཀྱིས་སམ། གཞན་གྱིས་སྨྲས་པ་ནས་སོ། །འཁོར་དུ་འཇོག་ན་ཞེས་བྱ་བ་ནི་ཆོས་འདུལ་བ་འདི་ལ་གསོལ་བ་དང་གཞིའི་ལས་ཀྱིས་རབ་ཏུ་འབྱིན་ཅིང་བསྙེན་པ་རྫོགས་བྱེད་ནའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་རྣམ་པ་འདི་ལྟ་བུའི་བུད་མེད་རབ་ཏུ་འབྱིན་པར་བྱེད་ན་ཇི་ལྟར་ཡང་རུང་སྟེ་དགེ་འདུན་ལྷག་མར་འགྱུར་རོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་པ་རྫོགས་སྷོ།། ་་་་་་་་་་།། སྡོམ་ལ། གང་གི་ཚེ་ན་ཆགས་རྒྱ་དང ། །བཟོད་པ་གསོལ་དུ་འཇུག་བྱེད་དང ། །སངས་རྒྱས་ཆོས་དང་དགེ་འདུན་གཏོང ། །འདུན་དང་ཞེ་སྡང་འཇིགས་སྨྲ་དང ། །གཉིས་པོ་ལྷན་ཅིག་གནས་བྱེད་དང ། །དེ་ཡི་རྗེས་སུ་ཕྱོགས་པ་དང ། །དགེ་འདུན་དབྱེན་དང་རྗེས་ཕྱོགས་དང ། །ཁྱིམ་སུན་བཀའ་བློ་མི་བདེ་བའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་ཁྱིམ་བདག་ཅིག་ནད་ཀྱིས་ཐེབས་ནས་དགེ་སྦྱོང་དང ། བྲམ་ཟེ་དང ། བཀྲེན་པ་དང ། ཕོངས་པ་རྣམས་ལ་སྦྱིན་པ་ནི་སྦྱིན། བསོད་ནམས་ནི་བྱེད་པ་དེ་སྦོམ་དགའ་མོས་ཐོས་སོ། །དེ་ནས་སྦོམ་དགའ་མོས་ཁྱིམ་བདག་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་དེ་ལ་ཆོས་བཤད་པ་བྱས་སོ། །ཆོས་བཤད་པ་བྱས་ནས་ཀྱང་ཁྱིམ་བདག་དེ་ལ
9.117b
འདི་སྐད་ཅེས་སྨྲས་སོ། །བཞིན་བཟངས་བུད་མེད་ནི་རྙེད་པ་ཆུང་བ་ཡིན་གྱིས་བདག་ལ་ཡང་ཅུང་ཟད་ཅིག་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་ཁྱོད་ཅིའི་སླད་དུ་ཆེས་སྔར་མ་བྱོན། བདག་འགུམ་པར་འགྱུར་བ་འདྲ་ནས་བདག་གིས་ཐམས་ཅད་འཇིག་རྟེན་ཕ་རོལ་དུ་བསྐྱལ་ལགས་སོ། །དེས་འདི་སྐད་ཅེས་སྨྲས་སོ། །མཚར་བྱས་ཏེ་ཅང་མི་ཉེས་པར་ལོ་བརྒྱར་འཚོ་བར་འགྱུར་རོ། །དེས་འདི་སྐད་ཅེས་སྨྲས་སོ། །འཕགས་མ་ཆགས་རྒྱ་བཞེད་དམ། དེས་འདི་སྐད་ཅེས་སྨྲས་སོ། །བཞིན་བཟངས་གལ་ཏེ་བྱིན་པར་གྱུར་ནའོ། །དེ་ནས་དེས་དེ་ལ་བྱིན་ནོ། །དེས་ཆགས་རྒྱ་བླངས་ནས་ཁྱིམ་བདག་གཞན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་དེ་ལ་འདི་སྐད་ཅེས་སྨྲས་སོ། །བཞིན་བཟངས་འདི་ཅུང་ཞིག་ལྷོགས། དེས་བླགས་སོ། །བླགས་ནས་ཀྱང་འདི་སྐད་ཅེས་འདི་འཕགས་མ་ཁྱོད་མངའ་འམ། དེས་སྨྲས་པ། བདག་དབང་ངོ ། །བདག་གིས་དབུལ་བར་བགྱིའོ། །དེ་ནས་སྦོམ་དགའ་མོས་ཁྱིམ་བདག་དེ་བཟུང་ནས་གལ་ཏེ་ཁྱོད་ཀྱིས་འདི་ང་ལ་མ་བྱིན་པར་འགྲོ་ན་རྒྱལ་པོའི་ཕོ་བྲང་དུ་དབུལ་ལོ་ཞེས་བྱས་པ་དང ། དེ་ཡང་དེར་འདུག་གོ། །དེའི་གྲོགས་པོ་ཞིག་འོངས་ནས་དེས་དེ་ལ་འདི་སྐད་ཅེས་སྨྲས་སོ། །འདི་ན་ཅི་བྱེད། དེས་སྨྲས་པ་ཁོ་བོ་བུ་ལོན་དེད་པས་བཟུང་ངོ ། །བུ་ལོན་དེད་པ་སུ་ཡིན། དེས་འདི་སྐད་ཅེས་སྨྲས་སོ། །དགེ་སློང་མའོ། །དེས་སྨྲས་པ། ཁྱོད་ཀྱིས་འཇིག་རྟེན་ན་གཞན་ལས་ཅི་ཡང་མི་རྙེད་དམ་ཅི་ན་དགེ་སློང་མ་ལས་ལེན། དེ་ནས་བྲམ་ཟེ་དང་ཁྱིམ་བདག་རྣམས་གང་གི་ཕྱིར་ཆགས་རྒྱ་ཡང་ལེན་པར་བྱེད་པས་ཤཱཀྱའི་བུའི་དགེ་སྦྱོང་མ་རྣམས་ཀྱི་དགེ་སྦྱོང་གི་ཚུལ་ནི་ཚིག་པའོ། །ཞེས་འཕྱ་བར་བྱེད། སྨོད་པར་བྱེད། ཕྱར་ཀ་གཏོང་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་ཆགས་རྒྱ་ལེན་པར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང
9.118a
ཞེས་བྱ་བ་ནི་སྦོམ་དགའ་མོའོ། །ཆགས་རྒྱ་ཞེས་བྱ་བ་ནི་བུ་ལོན་བདའ་བའི་དཔང་རྒྱའོ། །ལེན་པར་བྱེད་ན་ཞེས་བྱ་བ་ནི་ལེན་ནའོ། །ཆོས་འདི་ཡང་ཞེས་བྱ་བ་འདི་ནི་ཆོས་མ་ཡིན་པ་ལ་ཆོས་ཀྱི་སྒྲར་བསྟན་པའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཆགས་རྒྱ་ལེན་པར་བྱེད་ན་ཇི་ལྟར་ཡང་རུང་སྟེ་དགེ་འདུན་ལྷག་མར་འགྱུར་རོ། །ཚེགས་ཆུང་ངུས་ཁུགས་པ་དང ། ལས་དང་པོ་པ་ལ་སོགས་པ་ལ་ལྟུང་བ་མེད་དོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་གཅིག་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་དགེ་སློང་མ་འདུན་མ་ཞེས་བྱ་བ་ཐབ་མོ་བྱེད་པ། འགྱེད་པར་བྱེད་པ། ཐབ་ཀྲོལ་བྱེད་པ། རྩོད་པར་བྱེད་པ། དེའི་བུ་མོ་འདུན་མ་མོ་ཞེས་བྱ་བ་དེ་ཐོས་སོ་ཅོག་དེ་ཐམས་ཅད་མ་ལ་ཟློས་པར་བྱེད་དོ། །དེའི་རྒྱུས་དགེ་སློང་མའི་དགེ་འདུན་རྣམས་མཚང་ཀར་ལྷགས་ཏེ་འཐབ་པ་དང་རྩོད་པར་བྱེད་དོ། །དེ་ནས་དགེ་སློང་མའི་དགེ་འདུན་གྱིས་རྩད་ཆོད་ནས་འདུན་མ་བསོད་སྙོམས་ལ་སོང་བའི་འོག་ཏུ་དགེ་སློང་མའི་དགེ་འདུན་གྱི་དགེ་སློང་མ་འདུན་མ་མོ་མ་མཐོང་བའི་ཕྱིར་གནས་ནས་དབྱུང་བའི་ལས་བྱས་སོ། །དེ་ནས་འདུན་མ་མོ་ངུ་ཞིང་མ་ལ་དགེ་འདུན་མས་བདག་ལ་མ་མཐོང་བའི་ཕྱིར་གནས་ནས་དབྱུང་བའི་ལས་བྱས་སོ་ཞེས་སྨྲས་པ་དང ། དེས་འདི་སྐད་ཅེས་ཁམས་གསུམ་ནས་བསྐྲད་པའི་ལས་ཀྱང་བྱེད་ལ་རག་གོ་ཞེས་སྨྲས་ནས། དེ་ཡང་དཀྱིལ་འཁོར་གྱི་མཚམས་ཀྱི་ཕྱི་རོལ་དུ་སོང་སྟེ་བཟོད་པ་གསོལ་དུ་བཅུག་ནས་དེ་དང་ལྷན་ཅིག་གནས་པར་བྱེད། ལྷན་ཅིག་ཟ་བར་བྱེད། ལྷན་ཅིག་ཁྱིམ་ན་ཉལ་བར་བྱེད་པ་དང ། དགེ་སློང་མ་དེ་དག་གིས་འདུན་མ་ལ་འདི་སྐད་ཅེས་སྨྲས་སོ། །ཁྱོད་ཅི་བསྐྲད་པ་དང་ལྷན་ཅིག་གནས་པར་བྱེད་དམ། ཟ་བར་བྱེད་དམ། ཁྱིམ་ན་ལྷན་ཅིག་གནས་པར་བྱེད་དམ། དེས་འདི་སྐད་ཅེས་སྨྲས་སོ། །ཅི་བསྐྲད་ཅེས་ཏེ་ཕྱོགས་དང་ཡུལ་དུ་འདུག་ཏུ་མི་རུང་ངམ། དགེ་སློང་མ་དེ་དག་གིས་སྨྲས་པ། དགེ་སློང་མའི་དགེ་འདུན་མ་ལ་བཟོད་པ་གསོལ་ཅིག་།དེས་འདི་སྐད་ཅེས་སྨྲས་སོ། བཟོད་པ་ནི་ལེགས་ཀྱིས་གསོལ་བར་བྱ་སྟེ། འོན་ཀྱང་ཁྱེད་ཅག་ནི་འདུན་པས
9.118b
བྱེད་དོ། །ཞེ་སྡང་དང་གཏི་མུག་གིས་བྱེད་དོ་ཞེས་བྱ་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་དགེ་སློང་མ་ཁྱེད་ཅག་གིས་དགེ་སློང་མ་འདུན་མ་འམ། གཞན་ཡང་དེ་ལྟ་བུ་དང་འཐུན་པ་གང་ཡང་རུང་བ་དག་ལ་བཞམས་ཏེ་བསྒོ་བར་བྱའོ། །དགེ་སློང་མ་རྣམས་ཀྱིས་དགེ་སློང་མ་དེ་ལ་བཞམས་ཏེ་བསྒོའོ། །དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་དགེ་སློང་མ་འདུན་མ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། གནས་མལ་བཤམས་པ་བྱས་ཏེ་ཞེས་བྱ་བ་ནས་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་དགེ་སློང་མ་འདུན་མ་འདི་དགེ་སློང་མའི་དགེ་འདུན་མ་རྣམས་ཀྱིས་དགེ་སློང་མ་གང་ཞིག་མ་མཐོང་བའི་ཕྱིར་གནས་ནས་དབྱུང་བའི་ལས་བགྱིས་པར་འཚལ་བཞིན་དུ་གནས་ནས་དབྱུང་བའི་ལས་བགྱིས་པ་དེ་དང་ལྷན་ཅིག་གནས་པར་བགྱིད། ལྷན་ཅིག་ཟ་བར་བགྱིད། ལྷན་ཅིག་ཁྱིམ་ན་ཉལ་བར་བགྱིད་ནས་དགེ་སློང་མ་རྣམས་ཀྱིས་དེ་ལ་བཞམས་ཏེ་བསྒོ་ལ་དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱིས་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། ་དགེ་སློང་མ་འདུན་མ་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ
9.119a
དག་བདག་ལ་གསན་དུ་གསོལ། ་དགེ་སློང་མ་འདུན་མ་འདི་དགེ་སློང་མའི་དགེ་འདུན་མ་རྣམས་ཀྱིས་དགེ་སློང་མ་གང་ཞིག་མ་མཐོང་བའི་ཕྱིར་གནས་ནས་དབྱུང་བའི་ལས་བྱས་པར་ཤེས་བཞིན་དུ་གནས་ནས་དབྱུང་བའི་ལས་བྱས་པ་དེ་དང་ལྷན་ཅིག་གནས་པར་བྱེད། ལྷན་ཅིག་ཟ་བར་བྱེད། ལྷན་ཅིག་ཁྱིམ་ན་ཉལ་བར་བྱེད་ན་དགེ་སློང་རྣམས་ཀྱིས་དེ་ལ་བཞམས་ཏེ་བསྒོ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་པའི་སླད་དུ་འཕགས་མའི་དགེ་འདུན་གྱིས་དགེ་སློང་མ་འདུན་མ་དེ་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་པ་ལ་གང་དག་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། གཉིས་པ་དང་གསུམ་པ་ལ་ཡང་དེ་བཞིན་དུ་བརྗོད་པར་བྱ་སྟེ། དགེ་འདུན་གྱིས་བཟོད་ཅིང་གནང་ནས་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་འཛིན་ཅིང་ཞེས་བྱ་བའི་བར་དུ་སྔ་མ་བཞིན་ཏེ། སྐབས་དེ་དགེ་སློང་མ་རྣམས་ཀྱིས་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་དགེ་སློང་མའི་དགེ་འདུན་འཐུན་པས་དགེ་སློང་མ་གང་ཞིག་གནས་ནས་དབྱུང་བའི་ལས་བྱས་པར་ཤེས་བཞིན་དུ་དེ་གཅིག་པོ་མཚམས་ཀྱི་ཕྱི་རོལ་དུ་སོང་སྟེ་བཟོད་པ་གསོལ་དུ་འཇུག་པར་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འབྱུང་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་འདུན་མའོ། །དགེ་སློང་མའི་དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་ནོ། །དགེ་སློང་མ་གང་ཞིག་ཅེས་བྱ་བ་ནི་འདུན་མ་མོའོ། །གནས་ནས་དབྱུང་བའི་ལས་བྱས་པ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་སམ། དེ་ལ་གཞན་གྱིས་སྨྲས་པར་གྱུར་ནས་སོ་དེ་གཅིག་པོ་ཞེས་བྱ་བ་ནི་དེ་འབའ་ཞིག་གོ། །
9.119b
མཚམས་ཀྱི་ཕྱི་རོལ་དུ་སོང་སྟེ་ཞེས་བྱ་བ་ནི་མཚམས་ཀྱི་དཀྱིལ་འཁོར་གྱི་ཕྱི་རོལ་དུ་སོང་སྟེའོ། །བཟོད་པ་གསོལ་དུ་འཇུག་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་གང་ཞིག་གནས་ནས་དབྱུང་བའི་ལས་བྱས་པར་ཤེས་བཞིན་དུ་ཞེས་བྱ་བ་ནས་མཚམས་ཀྱི་ཕྱི་རོལ་དུ་སོང་སྟེ་བཟོད་པ་གསོལ་དུ་བཅུག་ནས་དེ་དང་ལྷན་ཅིག་འདུག་པར་བྱེད། ལྷན་ཅིག་ཟ་བར་བྱེད། ལྷན་ཅིག་ཁྱིམ་ན་ཉལ་བར་བྱེད་ན། ཇི་ལྟར་ཡང་རུང་སྟེ་ཐམས་ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གལ་ཏེ་གཞི་དེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ན་ཉེས་པ་སྦོམ་པོར་འགྱུར་རོ། །ལས་དང་པོའི་ཚིག་བརྗོད་པ་མ་རྫོགས་པར་གལ་ཏེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ལ་ཚིག་རྫོགས་པར་གྱུར་ན་ཉེས་པ་སྦོམ་པོར་འགྱུར་རོ། །ལས་གཉིས་པའི་ཚིག་བརྗོད་པར་མ་རྫོགས་པར་གལ་ཏེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ལ་ཚིག་རྫོགས་པར་གྱུར་ན་ཉེས་པ་སྦོམ་པོར་འགྱུར་རོ། །ལས་གསུམ་པའི་ཚིག་བརྗོད་པ་ཡང་མ་རྫོགས་ལ་འཐུན་པས་ཆོས་མ་ཡིན་པར་བྱས་པ་དང ། མི་མཐུན་པས་ཆོས་མ་ཡིན་པར་བྱས་པ་དང ། མི་མཐུན་པས་ཆོས་བཞིན་དུ་བྱས་པ་དང ། ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པས་བསྟན་པ་ཇི་ལྟ་བ་བཞིན་དུ་མ་བྱས་ན་ལྟུང་བ་མེད་དོ། །ལས་གསུམ་པའི་ཚིག་བརྗོད་པ་ཡང་རྫོགས་ལ་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། ་སྟོན་པས་བསྟན་པ་ཇི་ལྟ་བ་དེ་བཞིན་དུ་བྱས་ཀྱང་གཞི་དེ་གཏོང་བར་མི་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མ་དེས་སྟན་དེ་ཉིད་ལ་འདུག་བཞིན་དུ་འདི་སྐད་ཅེས་འཕགས་མ་དག་བདག་ལ་དགེ་འདུན་ལྷག་མ་འབྱུང་ངོ་ཞེས་བྱ་བའི་ཚིག་སྨྲ་བར་བྱེད་པ་དེ་ལྟ་ན་ལེགས། ཇི་སྟེ་སྨྲ་བར་མི་བྱེད་ན་ཉེས་བྱས་སུ་འགྱུར་རོ། །དེ་ལྟུང་བ་མ་མཐོལ་ཞིང་མ་བཤགས་བཞིན་དུ་དེའི་འོག་ཏུ་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །
9.120a
དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་གཉིས་པ་རྫོགས་སྷོ།། ་་་་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་ན་མཉན་ཡོད་ན་སྔོན་གཞན་མུ་སྟེགས་ཅན་དུ་གྱུར་པ་དགེ་སློང་མ་ནག་མོ་ཞེས་བྱ་བ་དེ་དགེ་སློང་མ་རྣམས་དང་འཐབས་པ་ན་ཁྲོས་ནས་འདི་སྐད་ཅེས། རེ་ཤིག་ཤཱཀྱའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི་དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང ། དགེ་འདུན་གཏོང་ངོ་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཅག་གིས་དགེ་སློང་མ་ནག་མོ་འམ། གཞན་ཡང་དེ་ལྟ་བུ་དང་འཐུན་པ་སུ་ཡང་རུང་བ་དག་ལ་བཞམས་ཏེ་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། ནག་མོ་ཁྱོད་འཐབས་པ་ན་ཁྲོས་ནས་འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི་དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང་དགེ་འདུན་གཏོང་ངོ་ཞེས་མ་ཟེར་ཅིག་།ནག་མོ་ཁྱོད་ཀྱིས་སྡིག་པ་ཅན་གྱི་ལྟ་བར་གྱུར་པའི་རྣམ་པ་འདི་ལྟ་བུ་ཐོང་ཤིག་ཅེས་བསྒོ་བར་བྱའོ། །དགེ་སློང་མ་རྣམས་ཀྱིས་དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་ན་བདེན་གྱི་གཞན་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་དགེ་སློང་མ་ནག་མོ་ལ་གསོལ་པ་དང་བཞིའི་ལས་ཀྱིས་བསྒོ་བར་བྱའོ། །
9.120b
བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པར་བྱ་སྟེ་ཞེས་བྱ་བ་ནས་དགེ་སློང་མ་གཅིག་གིས་གསོལ་བ་བྱ་སྟེ་ལས་བྱའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་ནག་མོ་འདི་དགེ་སློང་མ་རྣམས་དང་ལྷན་ཅིག་འཐབས་ནས་ཁྲོས་པ་ན་འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི། དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང་དགེ་འདུན་གཏོང་ངོ་ཞེས་མཆི་བ་དེ་ལ་དགེ་སློང་མ་མང་པོ་རྣམས་ཀྱིས་བཞམས་ཏེ་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་པའི་སླད་དུ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མ་ནག་མོ་དགེ་སློང་མ་རྣམས་དང་ཐབ་མོ་བགྱིད་པ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་ནག་མོ་འདི་དགེ་སློང་མ་རྣམས་དང་ལྷན་ཅིག་འཐབས་པ་ན་ཁྲོས་ནས་འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི། དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང་དགེ་འདུན་གཏོང་ངོ་ཞེས་མཆིས་པ་དེ་ལ་དགེ་སློང་མ་མང་པོ་རྣམས་ཀྱིས་བཞམས་ཏེ་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་པའི་སླད་དུ་འཕགས་མའི་དགེ་འདུན་གྱིས་དགེ་སློང་མ་ནག་མོ་དེ་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་དོ། །
9.121a
དགེ་འདུན་གྱིས་དགེ་སློང་མ་ནག་མོ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་གང་དག་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། གཉིས་པ་དང ། གསུམ་པ་ཡང་དེ་བཞིན་དུ་དོན་འདི་ཉིད་བརྗོད་པར་བྱ་སྟེ། ཞེས་བྱ་བ་ནས་དགེ་འདུན་གྱིས་བཟོད་ཅིང་གནང་སྟེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བའི་བར་དུའོ། །དེ་ལ་གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་འཛིན་ཅིང་ཞེས་བྱ་བའི་བར་དུ་སྔ་མ་བཞིན་ནོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ནས། བསླབ་པ་བཅས་པའི་བར་དུའོ། །ཡང་དགེ་སློང་མ་གང་དག་དགེ་སློང་མ་རྣམས་དང་ལྷན་ཅིག་འཐབས་པ་ན་ཁྲོས་ནས་འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི་དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང ། དགེ་འདུན་གཏོང་ངོ་ཞེས་ཟེར་བའི་དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་དགེ་སློང་མ་ཁྱོད་དགེ་སློང་མ་རྣམས་དང་ལྷན་ཅིག་འཐབས་པ་ན་ཁྲོས་ནས་འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི་དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ་ཆོས་དང་དགེ་འདུན་གཏོང་ངོ་ཞེས་མ་ཟེར་ཅིག་།དགེ་སློང་མ་ཁྱོད་ཀྱིས་སྡིག་པ་ཅན་གྱི་ལྟ་བར་འགྱུར་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་མ་རྣམས་ཀྱིས་དགེ་སློང་མ་དེ་ལ་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ན་ལན་གཉིས་ལན་གསུམ་གྱི་བར་དུ་དགེ་སློང་མ་དེ་ལ་དགེ་སློང་མ་རྣམས་ཀྱིས་འདི
9.121b
སྐད་ཅེས། དགེ་སློང་མ་ཁྱོད་དགེ་སློང་མ་རྣམས་དང་ལྷན་ཅིག་འཐབས་པ་ན་ཁྲོས་ནས་འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི་དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང་དགེ་འདུན་གཏོང་ངོ་ཞེས་མ་ཟེར་ཅིག་།དགེ་སློང་མ་ཁྱོད་ཀྱིས་སྡིག་པ་ཅན་གྱི་ལྟ་བར་གྱུར་པའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་མ་རྣམས་ཀྱིས་དགེ་སློང་མ་དེ་ལ་ལན་གཉིས་ལན་གསུམ་གྱི་བར་དུ་ཡང་དག་པར་བསྒོ། ཡང་དག་པར་བསྟན་པ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས་ཇི་སྟེ་གཏོང་བར་མི་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །ཡང་དགེ་སློང་མ་གང་ཞེས་བྱ་བ་ནི་ནག་མོའོ། །འཐབས་པ་ན་ཞེས་བྱ་བ་ནི་ཕྱོགས་གཉིས་སུ་གྱུར་པ་ནའོ། །ཁྲོས་ནས་ཞེས་བྱ་བ་ནི་ཡིད་མི་བདེ་ནས་སོ། །འདི་སྐད་ཅེས་རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཅེས་བྱ་བ་ནི་འདི་དག་ཁོ་ན་ལའོ། །ཚུལ་ཁྲིམས་དང་ལྡན་པ་ཞེས་བྱ་བ་ནི་ཇི་སྐད་གསུངས་པའི་ཚུལ་ཁྲིམས་དང་ལྡན་པའོ། །ཡོན་ཏན་དང་ལྡན་པ་ཞེས་བྱ་བ་ནི་ཐོས་པ་ལ་སོགས་པའི་ཡོན་ཏན་དང་ལྡན་པའོ། །དགེ་སྦྱོང་གཞན་ཡང་ཞེས་བྱ་བ་ནི་འདི་ལས་ཕྱི་རོལ་དུ་གྱུར་པའོ། །དེ་དག་གི་དྲུང་དུ་ཞེས་བྱ་བ་ནི་དེ་དག་གི་ཐད་དུའོ། །ཚངས་པར་སྤྱོད་པ་སྤྱད་པར་ཟད་ཀྱིས་ཞེས་བྱ་བ་ནི་རབ་ཏུ་འབྱུང་བར་ཟད་ཀྱིས་སོ། །སངས་རྒྱས་གཏོང་ངོ་ཞེས་བྱ་བ་ནི་རྐང་གཉིས་ཀྱི་མཆོག་གོ། །ཆོས་དང་དགེ་འདུན་གཏོང་ངོ་ཞེས་བྱ་བ་ནི་འདོད་ཆགས་དང་བྲལ་བའི་མཆོག་དང ། ཚོགས་རྣམས་ཀྱི་མཆོག་གོ། །ཟེར་བའི་དགེ་སློང་མ་དེ་ལ་ཞེས་བྱ་བ་ནི་ནག་མོ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་བྱ་བ་ནི་བཞམས་ཏེ་བསྒོ་བ་སྔ་མ་ཇི་ལྟ་བ་བཞིན་དུ་བསྒོ་བར་བྱ་བའོ། །བཞམས་ཏེ
9.122a
བསྒོ་བ་ན་གཞི་དེ་གཏོང་བ་དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །ཇི་སྟེ་གཏོང་བར་མི་བྱེད་ན་ཞེས་བྱ་བ་ནི་སྡིག་པ་ཅན་གྱི་ལྟ་བར་གྱུར་པ་དེའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་ཡང་དག་པར་བསྟན་པ་ཞེས་བྱ་བ་ནི་སྔར་གསོལ་བ་དང་བཞིའི་ལས་ཀྱིས་ཇི་སྐད་བསྒོ་བ་བཞིན་དུའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་གང་འཐབ་པ་ན་ཁྲོས་ནས་འདི་སྐད་ཅེས། རེ་ཤིག་ཤཱཀྱའི་བུའི་དགེ་སྦྱོང་འདི་དག་འབའ་ཤིག་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་མ་ཡིན་གྱི། དགེ་སྦྱོང་གཞན་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ཡོད་པས་དེ་དག་གི་དྲུང་དུ་ཚངས་པར་སྤྱོད་པ་སྤྱད་པར་ཟད་ཀྱིས་སངས་རྒྱས་གཏོང་ངོ ། །ཆོས་དང ། དགེ་འདུན་གཏོང་ངོ་ཞེས་ཟེར་ན་ཇི་ལྟར་ཡང་རུང་སྟེ་ཐམས་ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས་ཇི་སྟེ་གཏོང་བར་མི་བྱེད་ན་ཉེས་པ་སྦོམ་པོར་འགྱུར་རོ། །ལས་དང་པོའི་ཚིག་བརྗོད་པ་མ་རྫོགས་པར་གལ་ཏེ་གཏོང་ན་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ལ་ཚིག་རྫོགས་པར་བྱེད་ན་ཉེས་པ་སྦོམ་པོར་འགྱུར་རོ། །ལས་གཉིས་པའི་ཚིག་བརྗོད་པ་མ་རྫོགས་པར་གལ་ཏེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ལ་ཚིག་རྫོགས་པར་གྱུར་ན་ཉེས་པ་སྦོམ་པོར་འགྱུར་རོ། །ལས་གསུམ་པའི་ཚིག་བརྗོད་པ་ཡང་མ་རྫོགས་ལ་འཐུན་པས་ཆོས་མ་ཡིན་པར་བྱས་པ་དང ། མི་མཐུན་པས་ཆོས་མ་ཡིན་པར་བྱས་པ་དང ། མི་མཐུན་པས་ཆོས་བཞིན་དུ་བྱས་པ་དང ། ཆོས་ཇི་ལྟ་བ་དང་འདུལ་བ་ཇི་ལྟ་བ་དང ། སྟོན་པས་བསྟན་པ་ཇི་ལྟ་བ་བཞིན་དུ་མ་བྱས་ན་ལྟུང་བ་མེད་དོ། །ལས་གསུམ་པའི་ཚིག་བརྗོད་པ་ཡང་རྫོགས་ལ་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པས་བསྟན་པ་ཇི་ལྟ་བ་དེ་བཞིན་དུ་བྱས་ཀྱང་གཞི་དེ་གཏོང་བར་མི་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མ་དེས་སྟན་དེ་ཉིད་ལ་འདུག་བཞིན་དུ་འདི་སྐད་ཅེས་འཕགས་མ་དག་བདག་ལ་དགེ་འདུན་ལྷག་མ་བྱུང་ངོ་ཞེས་བྱ་བའི་ཚིག་སྨྲ་བར་བྱེད་པ་དེ་ལྟ་ན་ལེགས། ཇི་སྟེ་སྨྲ་བར་མི་བྱེད་ན
9.122b
ཉེས་བྱས་སུ་འགྱུར་རོ། །དེས་ལྟུང་བ་མ་འཐོལ་ཅིང་མ་བཤགས་བཞིན་དུ་དེ་ནས་མཇུག་ཐོགས་སུ་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་གསུམ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ན་སྦོམ་དགའ་མོ་དགེ་སློང་མ་ཞིག་དང་ལྷན་ཅིག་འཐབ་ཅིང་གནས་རྩོད་པ་འཛིན་པར་བྱེད། འགྱེད་པར་གྱུར་ནས། དེ་ལ་དགེ་སློང་མ་རྣམས་ཀྱིས་ཕུ་ནུ་མོ་ཁྱོད་ཐབ་མོ་མ་བྱེད་ཅིག་ཅེས་བསྒོ་བ་ན་དེ་དེ་དག་ལ་ཁྲོས་ནས་འདི་སྐད་ཅེས། གང་གི་ཕྱིར་ཁྱེད་ཅག་ཁོ་མོ་ལ་བསྒོ་བར་བྱེད་ལ་གཞན་ལ་ནི་མི་བྱེད་པས་དགེ་སློང་མ་ཁྱེད་ཅག་ནི་འདུན་པས་འགྲོ་བའོ། །ཞེས་སྡང་གིས་འགྲོ་བའོ། །གཏི་མུག་གིས་འགྲོ་བའོ། །འཇིགས་པས་འགྲོ་བའོ་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཅག་གིས་སྦོམ་དགའ་མོ་འམ་ཞེས་བྱ་བ་ནས། ཐབ་མོ་མ་བྱེད་ཅིག་ཅེས་བཞམས་ཏེ་བསྒོ་བར་བྱའོ། །དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས། གསོལ་བ་དང་བཞིའི་ལས་ཀྱིས་བསྒོ་བར་བྱའོ་ཞེས་བྱ་བའི་བར་དུའོ། །དེ་ལ་གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས། བསླབ་པ་བཅས་པའི་བར་དུའོ། །ཡང་དགེ་སློང་མ་གང་ཐབ་མོ་བྱེད་ཅིད་གནས་ལ་དགེ་སློང་མ་རྣམས་ཀྱིས་ཕུ་ནུ་མོ་ཁྱོད་ཐབ་མོ་མ་བྱེད་ཅིག་ཅེས་སྨྲས་པ་ན་དེ་ཁྲོས་ནས་འདི་སྐད་ཅེས། གང་གི་ཕྱིར་ཐབ་མོ་བྱེད་པ་ཁ་ཅིག་ལ་ནི་སྨྲ་བར་བྱེད་ལ། གཞན་ལ་ནི་སྨྲ་བར་མི་བྱེད་པས་འདི་ན་དགེ་སློང་མ་ཁ་ཅིག་འདུན་པས་འགྲོ་བའོ། །ཞེ་སྡང་གིས་འགྲོ་བའོ། །གཏི་མུག་གིས་འགྲོ་བའོ། །འཇིགས་པས་འགྲོ་བའོ་ཞེས་ཟེར་བའི་དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས། གང་གི་ཕྱིར་ཐབ་མོ་བྱེད་པ་ཁ་ཅིག་ལ་ནི་སྨྲ་བར་བྱེད་ལ། གཞན་ལ་ནི་སྨྲ་བར་མི་བྱེད་པས་འདི་ན་དགེ་སློང་མ་ཁ་ཅིག་འདུན
9.123a
པས་འགྲོ་བའོ། །ཞེ་སྡང་གིས་འགྲོ་བའོ། །གཏི་མུག་གིས་འགྲོ་བའོ། །འཇིགས་པས་འགྲོ་བའོ་ཞེས་མ་ཟེར་ཅིག་དགེ་སློང་མ་འདི་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་པས་ཁྱོད་ཀྱིས་འདི་སྐད་ཅེས་འདུན་པས་འགྲོ་བའོ་ཞེ་སྡང་གིས་འགྲོ་བའོ། །གཏི་མུག་གིས་འགྲོ་བའོ། །འཇིགས་པས་འགྲོ་བའོ་ཞེས་བྱ་བའི་ཚིག་གི་ལམ་དེ་ལྟ་བུ་འདི་ཐོང་ཤིག་ཅེས་བརྗོད་པར་བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་ཅེས་བརྗོད་པ་ན། གལ་ཏེ་གཞི་དེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ། ཡང་དག་པར་བསྟན་པ་ན། གལ་ཏེ་གཞི་དེ་གཏོང་བ་དེ་ལྟ་ན་ལེགས། ཇི་སྟེ་གཏོང་བར་མི་བྱེད་ན་ཆོས་འདི་ཡང་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ།། དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཐབ་མོ་བྱེད་ཅིང་གནས་ལ་ཞེས་བྱ་བ་ནི་ཕྱོགས་གཉིས་སུ་གྱུར་པ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །ཕུ་ནུ་མོ་ཁྱོད་ཐབ་མོ་མ་བྱེད་ཅིག་ཅེས་བྱ་བ་ནི་ཕྱོགས་གཉིས་སུ་མ་བྱེད་ཅིག་ཅེས་སོ། །ཁྲོས་ནས་ཞེས་བྱ་བ་ནི་ཡིད་མི་བདེ་ནས་སོ། །འདི་སྐད་ཅེས་གང་གི་ཕྱིར་ཐབ་མོ་བྱེད་པ་ཁ་ཅིག་ལ་ནི་སྨྲ་བར་བྱེད་ལ། ཁ་ཅིག་ལ་ནི་སྨྲ་བར་མ་བྱེད་པས་ཞེས་བྱ་བ་ནས་འཇིགས་པས་འགྲོ་བའོ་ཞེས་བྱ་བའི་བར་དུ་ཟེར་བའི་དགེ་སློང་མ་དེ་ལ་ཞེས་བྱ་བ་ནི་སྦོམ་དགའ་མོ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་བྱ་བ་ནི་བཞམས་ཏེ་བསྒོ་བ་སྔ་མ་ཇི་ལྟ་བ་བཞིན་དུ་བསྒོ་བར་བྱ་བའོ། །བཞམས་ཏེ་བསྒོ་བ་ན་གཞི་དེ་གཏོང་བ་དེ་ལྟ་ན་ལེགས་ཤེས་བྱ་བ་ནི་དེ་ལྟ་ན་བཟང་བའོ། །ཇི་སྟེ་གཏོང་བར་མི་བྱེད་ན་ཞེས་བྱ་བ་ནི་འདུན་པས་འགྲོ་བའོ་ཞེས་བྱ་བ་ལ་སོགས་པའི་ཚིག་དེའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ། ཡང་དག་པར་བསྟན་པ་ན་ཞེས་བྱ་བ་ནི་སྔར
9.123b
གསོལ་བ་དང་བཞིའི་ལས་ཀྱིས་ཇི་སྐད་བསྒོ་བ་བཞིན་དུ་བྱས་ནའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དུ་དགེ་སློང་མས་དགེ་སློང་མ་རྣམས་ལ་འདི་སྐད་ཅེས། འདུན་པས་འགྲོའོ་ཞེས་སྨྲས་ན་ཉེས་བྱས་སུ་འགྱུར་རོ། །ཞེ་སྡང་གིས་འགྲོའོ་ཞེས་བྱས་ན་ཉེས་བྱས་སུ་འགྱུར་རོ། །གཏི་མུག་གིས་འགྲོའོ་ཞེས་བྱས་ན་ཉེས་བྱས་སུ་འགྱུར་རོ། །འཇིགས་པས་འགྲོའོ་ཞེས་བྱས་ན་ཉེས་བྱས་སུ་འགྱུར་རོ། །གཞན་ནི་ལྷག་མ་བཅུ་གཉིས་པོ་སྔ་མ་ཇི་ལྟ་བ་བཞིན་དུ་བརྗོད་པར་བྱའོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་བཞི་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ན་དགེ་སློང་མ་འཆི་ལྟས་དང ། ཉེ་བའི་འཆི་ལྟས་གཉིས་འདྲེ་བས་གནས་པར་བྱེད་དོ། །དེ་དག་འདྲེ་བས་གནས་པ་ན་རྒོད་པ་དང ། རྩེ་བ་དང ། ལུས་ཀྱི་ཙབ་ཧྲལ་བྱེད་དོ། །དེ་གཉིས་ཤིན་དུ་འདྲེ་བས་གནས་པར་བྱེད་པ་ན་དོགས་པའི་གནས་སུ་གྱུར་ཏེ། དགེ་སློང་མ་རྣམས་དོགས་པ་སྐྱེས་ནས། དགེ་སློང་མ་རྣམས་ཀྱིས་དེ་གཉིས་ལ་ཕུ་ནུ་མོ་ཁྱོད་གཉིས་ཧ་ཅང་འདྲེ་བས་གནས་པར་མ་བྱེད་ཅིག་ཅེས་བསྒོ་བ་ན། དེ་གཉིས་དེ་ཁོ་ན་བཞིན་དུ་འདྲེ་བས་གནས་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་འདྲེ་བས་གནས་པར་མ་བྱེད་ཅིག་།དེ་ཅིའི་ཕྱིར་ཞེ་ན། ཁྱེད་འདྲེ་བས་གནས་པར་བྱེད་ན་དགེ་བའི་ཆོས་རྣམས་མི་འཕེལ་ཞིང་འགྲིབ་པ་ཉིད་དུ་འགྱུར་བར་རིག་པར་བྱའོ། །དགེ་སློང་མ་ཁྱོད་མི་འདྲེ་བས་གནས་པར་གྱིས་ཤིག་།དེ་ཅིའི་ཕྱིར་ཞེ་ན། ཁྱོད་ཅག་རྣམས་མི་འདྲེ་བས་གནས་པར་བྱེད་ན་དགེ་བའི་ཆོས་རྣམས་མི་འགྲིབ་ཅིང་འཕེལ་བ་ཉིད་དུ་འགྱུར་བར་རིག་པར་བྱའོ་ཞེས་བཀའ་སྩལ་པ་ན། དགེ་སློང་མ་རྣམས་ཀྱིས་དེ་གཉིས་ལ་འདྲེ་བར་མ་བྱེད་ཅིག་ཅེས་བསྒོ་ན་ཡང་དེ་ཁོ་ན་བཞིན་དུ་འདྲེ་ཞིང་གནས་པར་འགྱུར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ།
9.124a
དགེ་སློང་མ་ཁྱེད་ཅག་གིས་དགེ་སློང་མ་འཆི་ལྟས་དང ། ཉེ་བའི་འཆི་ལྟས་དང ། གཞན་ཡང་དེ་ལྟ་བུ་དང་འཐུན་པ་སུ་ཡང་རུང་བ་དག་ལ་བཞམས་ཏེ་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། དགེ་སློང་མ་རྣམས་ཀྱིས་དེ་གཉིས་ལ་ཁྱེད་ཅག་འདྲེ་བས་གནས་པར་མི་བྱེད་པར་མི་འདྲེ་བས་གནས་པར་གྱིས་ཤིག་།དེ་ཅིའི་ཕྱིར་ཞེ་ན། ཁྱེད་ཅག་མི་འདྲེ་བས་གནས་པར་བྱེད་ན་དགེ་བའི་ཆོས་རྣམས་མི་འགྲིབ་ཅིང་འཕེལ་བ་ཉིད་དུ་རིག་པར་བྱའོ་ཞེས་བསྒོ་བར་བྱའོ། །དེ་གཉིས་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་རྨོངས་པའོ་ཞེས་ཟེར་བའི་བར་གྱི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཅག་གིས་དགེ་སློང་མ་འཆི་ལྟས་དང ། ཉེ་བའི་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པར་བྱ་སྟེ་ཞེས་བྱ་བ་ནས་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་དང ། ཉེ་བའི་འཆི་ལྟས་འདི་ཧ་ཅང་འདྲེ་བས་གནས་པར་གྱུར་ཏེ། དེ་གཉིས་ལ་དགེ་སློང་མ་མང་པོ་རྣམས་ཀྱིས་ཕུ་ནུ་མོ་ཁྱོད་གཉིས་ཧ་ཅང་འདྲེ་བས་གནས་པར་མ་བྱེད་པར་ཕུ་ནུ་མོ་ཁྱོད་གཉིས་ལྷན་ཅིག་གནས་པར་མ་བྱེད་ཅིག་།ཕུ་ནུ་མོ་ཁྱེད་གཉིས་མི་འདྲེ་བར་གནས་པར་གྱིས་ཤིག་།དེ་ཅིའི་ཕྱིར་ཞེ་ན། ཁྱེད་གཉིས་མི་འདྲེ་བས་གནས་པར་བྱེད་ན་དགེ་བའི་ཆོས་རྣམས་མི་འགྲིབ་ཅིང་འཕེལ་བ་ཉིད་དུ་འགྱུར་བའི་ཕྱིར་རོ་ཞེས་དགེ་སློང་མ་དེ་རྣམས་ཀྱིས་དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་རྫུན་པའོ་ཞེས་བྱ་བའི་བར་གྱི་སླད་དུ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་དགེ་འདུན་གྱིས་དགེ་སློང་མ་འཆི་ལྟས་དང ། ཉེ་བའི་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བ་གང་ལགས་པ་དེ་མཛད་དོ། །འདི་ནི་གསོལ་བའོ།། ་་་་་་་་་་་།།དགེ་སློང་མའི་འདུལ་བ་རྣམ་པར
9.124b
འབྱེད་པ། བམ་པོ་བཅུ་པ། ལས་ནི་འདི་ལྟར་བྱ་སྟེ། ལན་གསུམ་དུ་བརྗོད་པར་རྒྱས་པར་བྱའོ། །དེ་ལྟར་དེ་དག་ལ་དགེ་སློང་མ་རྣམས་ཀྱིས་གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་འདི་ཁོ་ན་བདེན་གྱི་གཞན་ནི་རྨོངས་པའོ་ཞེས་བྱ་བའི་བར་གྱི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བ་མཛད་པའི་བར་དུ་སྟེ། ཡང་དགེ་སློང་མ་གང་དག་འདྲེས་པར་གནས་ཤིང ། དེ་དག་འདྲེས་པར་གནས་པ་ན་རྒོད་པ་དང ། རྩེ་བ་དང ། ལུས་ཀྱིས་རྩབ་ཧྲལ་བྱེད་ན། དགེ་སློང་མ་དེ་དག་ལ་དགེ་སློང་མ་རྣམས་ཀྱིས་འདི་སྐད་ཅེས་བརྗོད་པར་བྱ་སྟེ། ཕུ་ནུ་མོ་ཁྱེད་འདྲེས་པར་མ་གནས་ཤིག་།ཁྱེད་འདྲེས་པར་གནས་ན་དགེ་བའི་ཆོས་རྣམས་ཉམས་པ་ཁོ་ནར་འགྱུར་གྱི་འཕེལ་བ་ནི་མ་ཡིན་པར་རིག་པར་བྱའོ། །ཁྱེད་ཐ་དད་དུ་གནས་ན་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་ཉམས་པ་ནི་མ་ཡིན་པར་རིག་པར་བྱའོ། །གལ་ཏེ་དགེ་སློང་མ་རྣམས་ཀྱིས་དགེ་སློང་མ་དེ་དག་ལ་དེ་སྐད་ཅེས་བརྗོད་པ་ན་གཞི་དེ་གཏོང་ན་དེ་ལྟ་ན་ལེགས། ཇི་སྟེ་ཐ་དད་དུ་མི་གནས་ཀྱི་འདྲེས་པ་ཁོ་ནར་གནས་ན་གཞི་དེ་གཏོང་དུ་གཞུག་པའི་ཕྱིར་དགེ་སློང་མ་དེ་དག་ལ་དགེ་སློང་མ་རྣམས་ཀྱིས་ལན་གཉིས་ལན་གསུམ་གྱིས་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཆོས་འདི་ཡང་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མའོ། །ཡང་དགེ་སློང་མ་གང་དག་ཅེས་བྱ་བ་ནི་འཆི་ལྟས་དང་ཉེ་བའི་འཆི་ལྟས་སོ། །འདྲེས་པར་གནས་པ་ནི་ཚོལ་བ་སྟེ། སྟན་དང་མལ་དང་ཟས་ཀྱིས་འདྲེས་པར་གནས་པའོ། །རྒོད་པ་ནི་འཕྱར་བའོ། །རྩེ་བ་ནི་རྩེད་མའོ། །ལུས་ཀྱི་ཙབ་ཧྲལ་ནི་རྒོད་བྲོར་རུང་བའོ། །དགེ་སློང་མ་དེ་དག་ལ་ཞེས་བྱ་བ་ནི་འཆི་ལྟས་དང་ཉེ་བའི་འཆི་ལྟས་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད
9.125a
ཅེས་བརྗོད་པར་བྱ་སྟེ་ཞེས་བྱ་བ་ནི་འདི་སྐད་ཅེས་སྨྲ་བར་བྱ་བའོ། །ཕུ་ནུ་མོ་ཁྱོད་འདྲེས་པར་མ་གནས་ཤིག་།ཁྱེད་འདྲེས་པར་གནས་ན་དགེ་བའི་ཆོས་རྣམས་ཉམས་པ་ཁོ་ནར་འགྱུར་གྱི་འཕེལ་བ་ནི་མ་ཡིན་པར་རིག་པར་བྱའོ་ཞེས་བྱ་བ་ནི། ཁྱོད་འདྲེས་པར་གནས་ན་དགེ་བའི་ཕྱོགས་སུ་མི་འགྱུར་བས་ཁྱེད་སོ་སོ་ཐ་དད་དུ་གནས་པར་གྱིས་ཤིག་།ཁྱེད་ཐ་དད་དུ་གནས་ན་དགེ་བའི་ཕྱོགས་འཕེལ་བ་ཁོ་ནར་འགྱུར་བའོ། །གལ་ཏེ་དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །དགེ་སློང་མ་དེ་དག་ལ་དེ་སྐད་ཅེས་བརྗོད་པ་ན་ཞེས་བྱ་བ་ནི་འཆི་ལྟས་དང་ཉེ་བའི་འཆི་ལྟས་དག་ལ་ཇི་ལྟར་སྔར་བཞམས་ཏེ་བསྒོ་བ་བཞིན་དུ་བསྒོ་ནའོ། །གཞི་དེ་གཏོང་ན་དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །གལ་ཏེ་གཞི་དེ་མི་གཏོང་ན་གཞི་དེ་གཏོང་དུ་གཞུག་པའི་ཕྱིར་ལན་གཉིས་ལན་གསུམ་དུ་ཇི་ལྟར་སྔར་བསྒོ་བ་བཞིན་དུ་གསོལ་བ་དང་བཞིའི་ལས་ཀྱིས་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱ་སྟེ། ཡང་དག་པར་བསྒོ་བ་ནི་འདི་ཡིན། ཡང་དག་པར་བསྟན་པ་ནི་འདི་ཡིན་ནོ། །ཆོས་འདི་ཡང་ཞེས་བྱ་བ་འདི་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པའོ། །ངེས་པར་འབྱུང་བ་དང་བཅས་པ་ནི་རྟོན་པར་བྱ་བ་དང་བཅས་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དུ་ཅུང་ཟད་དགེ་སློང་མ་དག་ཐ་དད་དུ་གནས་པར་གྱིས་ཤིག་།ཅེས་བརྗོད་པ་ལས་འདྲེས་པར་གནས་ན་ཐམས་ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ལས་མ་མཉན་ན་སྦོམ་པོར་འགྱུར་རོ། །རིམ་པ་གཞན་ནི་དགེ་འདུན་ལྷག་མ་བཅུ་གཉིས་པ་ལས་བཤད་པ་བཞིན་ནོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅཝ་ལྔ་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་དེ་སྐད་ཅེས་བཀའ་སྩལ་པ་དང ། དགེ་སློང་མ་དེ་དག་ཐ་དད་དུ་གནས་སོ། །ཐ་དད་དུ་གནས་པ་དེ་དག་ལ་སྦོམ་དགའ་མོས་སྨྲས་པ། ཁྱེད་ཅིའི་ཕྱིར་ཐ་དད་དུ་གནས། ཁྱེད་ཚུར་འདྲེས་པར་གནོས་ཤིག་།བཅོམ་ལྡན་འདས་ཀྱིས་འབེལ་བའི་གཏམ་གཏན་ལ་འབེབས་པས་ཤེས་རབ་འཕེལ་བར་འགྱུར་བར་མ་གསུངས་སམ། དེ་ལྟར
9.125b
ཁྱེད་འདྲེས་པར་གནས་ན་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་ཉམས་པ་ནི་མ་ཡིན་པར་རིག་པར་བྱའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་སྦོམ་དགའ་མོ་ལ་བཞམས་ཏེ་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། སྦོམ་དགའ་མོ་ཁྱོད་དགེ་སློང་མ་རྣམས་ཐ་དད་དུ་གནས་ཤིང་ཐ་དད་དུ་གནས་པ་དེ་དག་གིས་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་ཉམས་པ་ནི་མ་ཡིན་པར་ཤེས་བཞིན་དུ་དེ་དག་ལ་འདི་སྐད་ཅེས། ཁྱེད་འདྲེས་པར་གནོས་ཤིག་།ཁྱེད་འདྲེས་པར་གནས་ན་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་ཉམས་པར་ནི་མ་ཡིན་ནོ་ཞེས་མ་སྨྲ་ཤིག་ཅེས་བྱ་བ་ནས། གཞན་ནི་གཏི་མུག་གོ་ཞེས་བྱ་བའི་བར་དུའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པ་བྱས་ནས་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ནས་ལས་བྱ་བའི་བར་དུའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། སྦོམ་དགའ་མོ་འདི་དགེ་སློང་མ་ཐ་དད་དུ་གནས་པ་རྣམས་ཀྱི་དྲུང་དུ་མཆིས་ནས་འདི་སྐད་ཅེས། དགེ་སློང་མ་ཁྱེད་ཐ་དད་དུ་མ་གནས་པར་ཁྱེད་འདྲེས་པར་གནོས་ཤིག་།ཁྱེད་འདྲེས་པར་གནས་ན་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་ཉམས་པ་ནི་མ་ཡིན་པར་རིག་པར་བྱའོ་ཞེས་མཆི་སྟེ། དེ་ལ་དགེ་སློང་མ་མང་པོས་བཞམས་ཏེ་བསྒོ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་རྨོངས་པའོ་ཞེས་བྱ་བའི་བར་དུ་སྟེ། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་གནང་བར་མཛོད་ཅིག་དང ། འཕགས་མའི་དགེ་འདུན་གྱིས་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་བ་གང་ལགས་པ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ་ཞེས་བྱ་བ་ནས། གསོལ་བ་དང་བཞིའི་ལས
9.126a
ཀྱིས་ལན་གསུམ་གྱི་བར་དུ་བསྒོ་ན་ནན་གྱིས་མཆོག་ཏུ་ཞེས་བྱ་བ་ནས་གཞན་ནི་རྨོངས་པའོ་ཞེས་བྱ་བའི་བར་དུའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བ་མཛད་པའི་བར་དུ་སྟེ། ཡང་དགེ་སློང་མ་གང་ཞིག་དགེ་སློང་མ་གང་དག་འདྲེས་པར་གནས་ཤིང ། རྒོད་པ་དང ། རྩེ་བ་དང ། ལུས་ཀྱི་ཙབ་ཧྲལ་བྱེད་པར་ཤེས་བཞིན་དུ་དེ་དག་ཐ་དད་དུ་གནས་པ་ལ་འདི་སྐད་ཅེས་ཕུ་ནུ་མོ་ཁྱོད་ཐ་དད་དུ་མ་གནས་པར་ཁྱེད་འདྲེས་པར་གནོས་ཤིག་།ཁྱེད་འདྲེས་པར་གནས་ན་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་འགྲིབ་པ་ནི་མ་ཡིན་པར་རིག་པར་བྱའོ་ཞེས་ཟེར་ན། དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་བརྗོད་པར་བྱ་སྟེ། དགེ་སློང་མ་འདྲེས་པར་གནས་ཤིང་རྒོད་པ་དང ། རྩེ་བ་དང ། ལུས་ཀྱིས་ཙབ་ཧྲལ་བྱེད་པ་ལས་ཐ་དད་དུ་གནས་པ་རྣམས་ལ་འདི་སྐད་ཅེས་ཁྱེད་འདྲེས་པར་གནོས་ལ་ཐ་དད་དུ་མ་གནས་ཤིག་ཅེས་མ་ཟེར་ཅིག་།དེ་ལ་དགེ་སློང་མ་རྣམས་ཀྱིས་འདི་སྐད་ཅེས་བརྗོད་པ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་ཏེ། གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གསུམ་ཞེས་བྱ་བ་ནས། ་ཆོས་འདི་ཡང་ངེས་པར་འབྱུང་བ་དང་བཅས་པ་དགེ་འདུན་ལྷག་མའོ། །ཡང་དགེ་སློང་མ་གང་ཞིག་ཅེས་བྱ་བ་ནི་སྦོམ་དགའ་མོའོ། །དགེ་སློང་མ་གང་དག་ཅེས་བྱ་བ་ནི་འཆི་ལྟས་དང ། ཉེ་བའི་འཆི་ལྟས་སོ། །རྒོད་པ་ནི་འཕྱར་བའོ། །རྩེ་བ་ནི་རྩེད་མོའོ། །ལུས་ཀྱི་ཙབ་ཧྲལ་ནི་རྒོད་བྲོར་རུང་བའོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་སམ། གཞན་གྱིས་དེ་ལ་བརྗོད་ནས་སོ། །ཐ་དད་དུ་གནས་པ་དེ་དག་ལ་ཞེས་བྱ་བ་ནི་སོ་སོར་གནས་པ་ལའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །ཕུ་ནུ་མོ་ཁྱེད་ཅེས་བྱ་བ་ནི་འཆི་ལྟས་དང་ཉེ་བའི་འཆི་ལྟས་སོ། །ཐ་དད་དུ་མ་གནས་པར་ཞེས་བྱ་བ་ནི
9.126b
སོ་སོར་རོ། །ཁྱེད་འདྲེས་པར་གནོས་ཤིག་ཅེས་བྱ་བ་ནི་ཆོལ་བར་རོ། །ཁྱེད་འདྲེས་པར་གནས་ན་ཞེས་བྱ་བ་ནི་ཆོལ་བར་རོ། །དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་ཉམས་པ་ནི་མ་ཡིན་པར་རིག་པར་བྱའོ་ཞེས་བྱ་བ་ནི་དགེ་བའི་ཕྱོགས་འཕེལ་བ་ཁོ་ནར་འགྱུར་གྱི་ཉམས་པ་ནི་མ་ཡིན་པའོ། །དགེ་སློང་མ་དེ་ལ་ཞེས་བྱ་བ་ནི་སྦོམ་དགའ་མོ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་བརྗོད་པར་བྱ་སྟེ་ཞེས་བྱ་བ་ནི་བཞམས་ཏེ་ཇི་སྐད་སྔར་བསྒོ་བ་བཞིན་དུ་བསྒོ་བར་བྱའོ། །གཞི་དེ་གཏོང་ན་དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་པོའོ། །གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་ཇི་ལྟར་སྔར་བསྒོ་བ་ལྟར་རོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དུ་ཅུང་ཟད་དགེ་སློང་མས་དགེ་སློང་མ་གང་དག་འདྲེས་པར་གནས་ཤིང ། རྒོད་པ་དང ། རྩེ་བ་དང ། ལུས་ཀྱི་ཙབ་ཧྲལ་བྱེད་པར་ཤེས་བཞིན་དུ་དེ་དག་ཐ་དད་དུ་གནས་པ་ལ་འདི་སྐད་ཅེས་ཁྱེད་ཐ་དད་དུ་མ་གནས་པར་ཁྱེད་འདྲེས་པར་གནོས་ཤིག་ཅེས་སྨྲ་ན་ཐམས་ཅད་དུ་ཉེས་བྱས་སུ་འགྱུར་རོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་དྲུག་པ་རྫོགས་སྷོ།། ་་་་་་་་་་་།། བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་མུ་གེ་མི་བཟད་པ་དགོན་པ་སློངས་མོ་པས་ཟས་རྙེད་པར་དཀའ་བར་བྱུང་སྟེ། དགེ་སློང་གང་ཞིག་རྫུ་འཕྲུལ་ཐོབ་པ་དེ་ནི་གང་གི་མིང་འཛམ་བུ་ཞེས་བྱ་བས་འཛམ་བུ་གླིང་དུ་ཤེས་པ་དེར་སོང་ནས་ཤིང་འཛམ་བུའི་སྙེ་མ་ཁ་དོག་དང་དྲི་དང ། རོ་དང་ལྡན་པ་རྣམས་ཀྱིས་ལྷུང་བཟེད་བཀང་སྟེ་ཁྱེར་ནས། བདག་ཉིད་ཀྱང་ཡོངས་སུ་ལོངས་སྤྱོད། ཚངས་པ་མཚུངས་པར་སྤྱོད་པ་མཁས་པ་ཡོད་པ་དག་ལ་ཡང་བགོ་བཤའ་བྱེད་དོ། །ཤིང་འཛམ་བུའི་སྙེ་མ་ཇི་ལྟ་བ་དེ་བཞིན་དུ་ཤིང་བིལ་བ་དང ། སྐྱུ་རུ་ར་དང ། ཀ་པིད་ཐའི་སྙེ་མ་རྣམས་ཀྱིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད། ཚངས་པ་མཚུངས་པར་སྤྱོད་པ་ཡོད་པ་དག་ལ་ཡང་བགོ་བཤའ་བྱེད
9.127a
དོ། །དེ་བཞིན་དུ་རྒྱལ་ཆེན་བཞིའི་རིས་ཀྱི་ལྷ་དག་གི་ནང་དུ་ཡང་སོང ། སུམ་བཅུ་རྩ་གསུམ་པའི་ལྷ་དག་གི་ནང་དུ་ཡང་སོང་ནས་བདུད་རྩི་དག་གིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད། ཚངས་པ་མཚུངས་པར་སྤྱོད་པ་མཁས་པ་ཡོད་པ་དག་ལ་ཡང་བགོ་བཤའ་བྱེད་དོ། །དེ་བཞིན་དུ་བྱང་གྱི་སྒྲ་མི་སྙན་གྱི་གླིང་དུ་སོང་ནས་མ་རྨོས་མ་བཏབ་པའི་འབྲས་ས་ལུའི་ཆན་གྱིས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད། ཚངས་པ་མཚུངས་པར་སྤྱོད་པ་ཡོད་པ་དག་ལ་ཡང་བགོ་བཤའ་བྱེད་དོ། །དེ་བཞིན་དུ་ཤར་གྱི་ལུས་འཕགས་དང ། ནུབ་ཀྱི་བ་ལང་སྤྱོད་དུ་ཡང་སོང་བ་ནས། ཡུལ་གང་དག་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང་མི་མང་པོས་གང་བ་དེ་དག་ཏུ་ཡང་སོང་ནས་བཟའ་བ་དང་བཅའ་བ་གཙང་ཞིང་བསོད་པ་ཁ་དོག་དང་དྲི་དང་རོ་དང་ལྡན་པས་ལྷུང་བཟེད་བཀང་སྟེ་ཁྱེར་ནས་བདག་ཉིད་ཀྱང་ཡོངས་སུ་ལོངས་སྤྱོད། ཚངས་པ་མཚུངས་པར་སྤྱོད་པ་ཡོད་པ་དག་ལ་ཡང་བགོ་བཤའ་བྱེད་དོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། ད་ལྟ་མུ་གེ་མི་བཟད་པ་དགོན་པ་སློངས་མོ་པས་ཟས་རྙེད་པར་དཀའ་བ་བྱུང་ངོ་སྙམ་མོ། །ཡང་ལྷ་སྦྱིན་འདི་སྙམ་དུ་སེམས་ཏེ། བདག་གིས་ཀྱང་རྫུ་འཕྲུལ་ཐོབ་པར་བྱས་ལ་བདག་ཀྱང་གང་གིས་མིང་འཛམ་བུ་ཞེས་བྱ་བས་འཛམ་བུའི་གླིང་དུ་ཤེས་པ་དེར་སོང་ལ་ཤིང་འཛམ་བུའི་སྙེ་མ་ཁ་དོག་དང་དྲི་དང་རོ་དང་ལྡན་པ་རྣམས་ཀྱིས་ལྷུང་བཟེད་བཀང་སྟེ་བླངས་ནས། བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ཚངས་པ་མཚུངས་པར་སྤྱོད་པ་མཁས་པ་ཡོད་པ་དག་ལ་ཡང་བགོ་བཤའ་བྱའོ། །དེ་བཞིན་དུ་ཡུལ་གང་དག་འབྱོར་པ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང ། མི་མང་པོས་གང་བ་དེ་དག་ཏུ་ཡང་སོང་ལ། བཟའ་བ་དང་བཅའ་བ་གཙང་ཞིང་བསོད་པ་ཁ་དོག་དང་དྲི་དང ། རོ་དང་ལྡན་པས་ལྷུང་བཟེད་བཀང་སྟེ་བླངས་ནས་བདག་ཉིད་ཀྱང་ཡོངས་སུ་ལོངས་སྤྱོད་པར་བྱ། ཚངས་པ་མཚུངས་པར་སྤྱོད་པ་མཁས་པ་ཡོད་པ་དག་ལ་ཡང་བགོ་བཤའ་བྱའོ་སྙམ་མོ། །ཡང་ལྷ་སྦྱིན་འདི་སྙམ་དུ་སེམས་ཏེ་མ་ལ་བདག་བཅོམ་ལྡན་འདས་ག་ལ་བ་དེར་འགྲོའོ་སྙམ་མོ། །དེ་ནས་ལྷ་སྦྱིན་བཅོམ
9.127b
ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ལྷ་སྦྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་རྫུ་འཕྲུལ་གྱི་ལམ་བསྟན་དུ་གསོལ། བདེ་བར་གཤེགས་པ་བདག་ལ་རྫུ་འཕྲུལ་གྱི་ལམ་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་ལྷ་སྦྱིན་གྱི་འདོད་པ་སྡིག་པ་ཅན་དུ་གྱུར་པ་ཐུགས་སུ་ཆུད་ནས་ལྷ་སྦྱིན་ལ་འདི་སྐད་ཅེས་བཀའ་སྩལ་ཏོ། །ལྷ་སྦྱིན་རེ་ཤིག་ལྷག་པའི་ཚུལ་ཁྲིམས་ལ་བརྩོན་པར་གྱིས་ཤིག་དང་ཁྱོད་ལ་རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །ལྷག་པའི་སེམས་དང ། ལྷག་པའི་ཤེས་རབ་ལ་བརྩོན་པར་གྱིས་ཤིག་དང་ཁྱོད་ལ་རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། བཅོམ་ལྡན་འདས་བདག་ལ་རྫུ་འཕྲུལ་གྱི་ལམ་མི་སྟོན་ཏོ་སྙམ་དུ་རིག་ནས་ལྷ་སྦྱིན་ཚེ་དང་ལྡན་པ་ཀུན་ཤེས་ཀཽཎྜི་ནྱ་ག་ལ་བ་དེར་སོང་སྟེ་ཕྱིན་ནས་ཀུན་ཤེས་ཀཽཎྜི་ནྱ་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་སྟོན་ཅིག་།དེ་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱས་བཅོམ་ལྡན་འདས་ཀྱིས་ཐུགས་ལ་རྣམ་པར་བལྟས་ཏེ་དེའི་འདོད་པ་སྡིག་པ་ཅན་དུ་གྱུར་པར་རིག་ནས་ལྷ་སྦྱིན་ལ་འདི་སྐད་ཅེས་སྨྲས་སོ། །ལྷ་སྦྱིན་གཟུགས་ཚུལ་བཞིན་ཡིད་ལ་གྱིས་ཤིག་དང་ཁྱོད་ལ་རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །རྣམ་པར་ཤེས་པའི་བར་ཚུལ་བཞིན་ཡིད་ལ་གྱིས་ཤིག་དང་ཁྱོད་ལ་རྫུ་འཕྲུལ་དང་གཞན་ཡང་འབྱུང་བར་འགྱུར་རོ་ཞེས་བྱ་བ་ནས་ལྷ་སྦྱིན་གྱིས་འོད་སྲུང་སྟོབས་བཅུ་པ་ལས་རྫུ་འཕྲུལ་བསྒྲུབས་ཏེ་དེ་གཅིག་ཏུ་གྱུར་ནས་དུ་མར་འགྱུར་ཞེས་བྱ་བའི་བར་དུའོ། །རེ་ཤིག་ན་སེམས་ཡོངས་སུ་གཏུགས་པ་དེ་ལ་འདོད་པ་སྡིག་པ་ཅན་དུ་གྱུར་པ་འདི་ལྟ་བུ་བྱུང་སྟེ། ད་ལྟར་བཅོམ་ལྡན་འདས་བགྲེས་འཁོགས་གཏུགས་པས་འཁོར་བཞི་པོ་ལ་གདམས་པར་མཉེལ་བས། ཀྱེ་མ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་གཏད་དེ། བདག་གིས་དགེ་སློང་གི་དགེ་འདུན་ཡོངས་སུ་དྲང་ཞིང་བཅོམ་ལྡན་འདས་ནི་མཐོང་བའི་ཆོས་ལ་བདེ་བར་གནས་པའི་རྣལ་འབྱོར་ལ་རྗེས་སུ་བརྩོན་ཞིང་ཐུགས་ལས་ཆུང་ངུར་བཞུགས་ཀྱང་ཅི་མ་རུང་སྙམ་མོ། །ཇི་ཙམ་ན་ལྷ་སྦྱིན་བཅོམ་ལྡན་འདས་ག་ལ་བ་དེར་ཕྱིན་ནས། བཅོམ་ལྡན་འདས
9.128a
ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་ད་ལྟར་བགྲེས་འཁོགས་ཞེས་བྱ་བ་ནས་མཐོང་བའི་ཆོས་ལ་བདེ་བར་གནས་པའི་རྣལ་འབྱོར་ལ་རྗེས་སུ་བརྩོན་ཞིང་ཞེས་བྱ་བའི་བར་དུའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལྷ་སྦྱིན་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་གཏི་མུག་ངས་རེ་ཤིག་ཚངས་པ་མཚུངས་པར་སྤྱོད་པ་དེས་པ་ཤཱ་རིའི་བུ་དང ། མཽད་གལ་གྱི་བུ་དག་ལ་ཡང་དགེ་སློང་གི་དགེ་འདུན་མི་གཏད་ན་མཆིལ་མ་འཐུང་བ་རོ་ཁྱོད་ལ་ལྟ་སྨོས་ཀྱང་ཅི་དགོས། དེ་སྐད་ཅེས་བཀའ་སྩལ་པ་དང་ལྷ་སྦྱིན་ཁྲོས་འཁྲུགས་ནས་མགོ་ལན་གསུམ་གཅོགས་ཏེ་མཇལ་ཏོ་ཞེས་བྱ་བ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། དེ་ནས་ལྷ་སྦྱིན་དེ་ཕྱིན་ཆད་དགེ་སློང་གི་དགེ་འདུན་གྱི་དབྱེན་བྱ་བར་བརྩམས་སོ། །དེའི་ཚེ་དགེ་སློང་མ་སྦོམ་དགའ་མོ་ཞེས་བྱ་བས་ཀྱང་དགེ་སློང་མའི་དགེ་འདུན་གྱི་དབྱེན་བྱ་བར་འབད་པ་བརྩམས་པ་དང ། དགེ་སློང་མ་རྣམས་ཀྱིས་དེ་འབད་པ་རྩོམ་པར་འཕྲིགས་སོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་སྦོམ་དགའ་མོ་ལ་བཞམས་ཏེ་བསྒོ་ཤིག་།བཞམས་ཏེ་བསྒོ་བ་ཡང་འདི་ལྟར་བྱ་སྟེ། སྦོམ་དགའ་མོ་ཁྱོད་དགེ་སློང་མའི་དགེ་འདུན་འཐུན་པ་དབྱེ་བའི་ཕྱིར་མ་འཇུག་ཤིག་།དབྱེ་བར་བྱ་བའི་ཕྱིར་རྩོད་པ་ཡང་དག་པར་བཟུང་ནས་རབ་ཏུ་འཛིན་ཅིང་མ་འདུག་ཤིག་སྦོམ་དགའ་མོ་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད། ཀུན་དུ་དགའ་མི་རྩོད་དེ། རྩེ་གཅིག་ལ་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས་སྦོམ་དགའ་མོ་ཁྱོད་ཀྱིས་དགེ་འདུན་གྱི་དབྱེན་བྱེད་པའི་གཞི་དེ་ལྟ་བུ་ཐོང་ཤིག་།དེ་ལ་དེ་སྐད་དུ་བཞམས་ཏེ་བསྒོ་ཡང་གཞི་དེ་ཉིད་ལ་ཕྱིར་ཞིང་ནན་གྱིས་མཆོག་ཏུ་བཟུང་ནས་འདི་ཁོ་ནར་བདེན་གྱི་གཞན་ནི་རྨོངས་པའོ་ཞེས་རྗེས་སུ་ཐ་སྙད་འདོགས་སོ། །དགེ་སློང་མ་དེའི
9.128b
གྲོགས་མོ་རྣམས་ཀྱང་དགེ་སློང་མ་དེ་དག་ལ་འདི་སྐད་ཅེས་ཟེར་ཏེ། ཕུ་ནུ་མོ་ཁྱོད་དགེ་སློང་མ་འདི་ལ་དགེ་ཡང་རུང་སྡིག་ཀྱང་རུང་ཅུང་ཟད་ཀྱང་མ་སྨྲ་ཤིག་།དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བ་འདུལ་བ་སྨྲ་བ་སྟེ་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་ཐ་སྙད་འདོགས་པས། དགེ་སློང་མ་འདི་ཤེས་བཞིན་དུ་སྨྲའི་མི་ཤེས་པར་ནི་མ་ཡིན་ནོ། །དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ངེད་ཀྱང་འདོད་ཅིང་བཟོད་དོ། །དེ་ནས་དགེ་སློང་མ་རབ་ཏུ་མང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སྦོམ་དགའ་མོ་ལ་བཞམས་ཏེ་བསྒོ་ལགས་ཏེ། དེ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་རྨོངས་པའོ་ཞེས་བྱ་བའི་བར་དུའོ། །དགེ་སློང་མ་དེའི་གྲོགས་མོ་རྣམས་ཀྱང་དགེ་སློང་མ་དེ་དག་ལ་འདི་སྐད་ཅེས་མཆི་སྟེ། ཕུ་ནུ་མོ་ཁྱོད་དགེ་སློང་མ་འདི་ལ་ཅུང་ཟད་ཀྱང་མ་སྨྲ་ཤིག་ཅེས་བྱ་བ་ནས་དེ་ལ་ངེད་ཀྱང་འདོད་ཅིང་བཟོད་དོ་ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་དགེ་སློང་མ་དེ་དག་དང ། གཞན་ཡང་དེ་ལྟ་བུ་དག་ལ་བཞམས་ཏེ་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། དགེ་སློང་མ་ཁྱེད་དགེ་སློང་མ་གང་ཞིག་དགེ་འདུན་འཐུན་པར་དབྱེ་བའི་ཕྱིར་ཞུགས་ཏེ། དབྱེ་བའི་ཕྱིར་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་འདུག་པར་ཤེས་བཞིན་དུ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་པར་ཕུ་ནུ་མོ་དག་དགེ་འདུན་འབྱེད་པའི་རྗེས་སུ་འབྲང་བར་མི་མཐུན་པར་སྨྲ་བ་འདི་ལྟ་བུ་ཐོང་ཤིག་།དགེ་སློང་མ་རྣམས་ཀྱིས་དེ་སྐད་དུ་སྨྲས་པ་ན་གལ་ཏེ་ཞེས་བྱ་བ་ནས་གཞི་དེ་ཉིད་ལ་ཞེས་བྱ་བ་དང ། གཞན་ནི་རྨོངས་པའོ་ཞེས་བྱ་བའི་བར་དུའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་སྦོམ་དགའ་མོ་ལ་གསོལ་བ
9.129a
དང་བཞིའི་ལས་ཀྱིས་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པ་བྱས་ལ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །འཕགས་མའི་དགེ་འདུན་ཕུ་ནུ་མོ་རྣམས་བདག་ལ་གསན་དུ་གསོལ། དགེ་སློང་མ་སྦོམ་དགའ་མོ་འདི་དགེ་འདུན་འཐུན་པ་དབྱེ་བའི་སླད་དུ་ཞུགས་ཏེ་དབྱེ་བའི་སླད་དུ་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་མཆིས་ནས། འདི་ལ་དགེ་སློང་མ་མང་པོས་བཞམས་ཏེ་བསྒོ་ན་འདི་ལ་དགེ་སློང་མ་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འཕགས་མའི་དགེ་འདུན་གྱིས་སྦོམ་དགའ་མོ་ལ་ཕུ་ནུ་མོ་སྦོམ་དགའ་མོ་ཁྱོད་དགེ་འདུན་འཐུན་པ་དབྱེ་བའི་ཕྱིར་མ་འཇུག་ཤིག་།དབྱེ་བར་བྱ་བའི་ཕྱིར་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་མ་འདུག་ཤིག་།ཕུ་ནུ་མོ་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་ཞིང་མི་ཕྱེད་ལ་ཀུན་ཏུ་དགའ་ཞིང་མི་རྩོད་དེ་རྩེ་གཅིག་ལ་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཕུ་ནུ་མོ་སྦོམ་དགའ་མོ་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་རྣམས་བདག་ལ་གསན་དུ་གསོལ། སྦོམ་དགའ་མོ་འདི་དགེ་འདུན་དབྱེ་བའི་སླད་དུ་ཞུགས་ཏེ། དབྱེ་བའི་སླད་དུ་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་སྒྲུབ་སྟེ། འདི་ལ་དགེ་སློང་མ་མང་པོས་བཞམས་ཏེ་བསྒོ་ན་འདི་ལ་དགེ་སློང་མ་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པ་དེའི་སླད་དུ་འཕགས་མའི་དགེ
9.129b
འདུན་གྱིས་སྦོམ་དགའ་མོ་ལ་སྦོམ་དགའ་མོ་ཁྱོད་དགེ་འདུན་འཐུན་པ་དབྱེ་བའི་ཕྱིར་མ་འཇུག་ཤིག་།དབྱེ་བར་བྱ་བའི་ཕྱིར་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་མ་འདུག་ཤིག་།སྦོམ་དགའ་མོ་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད་ལ། ཀུན་ཏུ་དགའ། མི་རྩོད་དེ་རྩེ་གཅིག་ལ། འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས་སྦོམ་དགའ་མོ་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་།ཅེས་དགེ་སློང་མ་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ན་ཚེ་དང་ལྡན་པ་གང་དག་དགེ་སློང་མ་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ་དེ་བཞིན་དུ་ལན་གཉིས་ལན་གསུམ་དུ་བརྗོད་པར་བྱའོ། །འཕགས་མའི་དགེ་འདུན་གྱིས་བཟོད་ཅིང་གནང་ནས་འཕགས་མའི་དགེ་འདུན་གྱིས་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ལ་དེ་ལྟར་གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་ཤེས་བྱ་བ་ནས། འདི་ཉིད་བདེན་གྱི་གཞན་ནི་བརྫུན་པའོ་ཞེས་བྱ་བའི་བར་དུ་རྗེས་སུ་སྒྲུབ་བོ། །དེའི་གྲོགས་མོ་དགེ་སློང་མ་དེ་དག་ཀྱང་དགེ་སློང་མ་དེ་རྣམས་ལ་དགེ་སློང་མ་ཁྱེད་དགེ་སློང་མ་འདི་ལ་དགེ་ཡང་རུང་སྡིག་ཀྱང་རུང་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བ་ཡིན་ལ། འདི་ནི་ཆོས་དང་འདུལ་བ་ཡང་དག་པར་བཟུང་ནས་རབ་ཏུ་འཛིན་ཅིང་རྗེས་སུ་སྒྲུབ་པའོ། །དགེ་སློང་མ་འདི་ནི་ཤེས་བཞིན་དུ་སྨྲ་བ་ཡིན་གྱི་མི་ཤེས་པར་ནི་མ་ཡིན་ནོ། །དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ངེད་ཀྱང་འདོད་ཅིང་བཟོད་དོ་ཞེས་དེ་སྐད་ཅེས་སྨྲས་སོ། །དེ་ནས་དགེ་སློང་མ་རབ་ཏུ་མང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན
9.130a
འདས་བདག་ཅག་གིས་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་ཞེས་བྱ་བ་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་བགྱི་བའི་བར་དུ་རྗེས་སུ་སྒྲུབ་ཅིང་དེའི་གྲོགས་མོ་དགེ་སློང་མ་དེ་དག་ཀྱང་དགེ་སློང་མ་རྣམས་ལ་དགེ་སློང་མ་ཁྱེད་དགེ་སློང་མ་འདི་ལ་དགེ་ཡང་རུང་སྡིག་ཀྱང་རུང་ཅི་ཡང་མ་སྨྲ་ཤིག་ཅེས་བགྱི་བ་ནས་ངེད་ཀྱང་འདོད་ཅིང་བཟོད་དོ་ཞེས་དེ་སྐད་ཅེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་དགེ་སློང་མ་དེ་དག་ལ་ཡང་བཞམས་ཏེ་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། དགེ་སློང་མ་ཁྱེད་དགེ་སློང་མ་གང་དགེ་འདུན་འཐུན་པ་དབྱེ་བའི་ཕྱིར་རྩོད་པ་ཡང་དག་པར་བླངས་ནས། ་རབ་ཏུ་འཛིན་ཅིང་རྗེས་སུ་སྒྲུབ་པར་ཤེས་བཞིན་དུ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་།དགེ་སློང་མ་རྣམས་ལ་དགེ་སློང་མ་ཁྱོད་དགེ་སློང་མ་འདི་ལ་དགེ་ཡང་རུང་སྡིག་ཀྱང་རུང་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་ཞིང་འདུལ་བ་སྨྲ་ལ་འདི་ནི་ཆོས་དང་འདུལ་བ་ཡང་དག་པར་བཟུང་ནས་རབ་ཏུ་འཛིན་ཅིང་རྗེས་སུ་སྒྲུབ་པའོ། །དགེ་སློང་མ་འདི་ནི་ཤེས་བཞིན་དུ་སྨྲའི་མི་ཤེས་པར་ནི་མ་ཡིན་ཏེ། དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ངེད་ཀྱང་འདོད་ཅིང་བཟོད་དོ་ཞེས་དེ་སྐད་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བ་མ་ཡིན་ཞིང་འདུལ་བ་སྨྲ་བ་མ་ཡིན་གྱི། དགེ་སློང་མ་འདི་ནི་ཆོས་མ་ཡིན་པ་སྨྲ་ཞིང ། འདུལ་བ་མ་ཡིན་པ་སྨྲ་བ་ཡིན་ལ། དགེ་སློང་མ་འདི་ནི་ཆོས་མ་ཡིན་པ་དང ། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་སྒྲུབ་པའོ། །དགེ་སློང་མ་འདི་ནི་མི་ཤེས་བཞིན་དུ་སྨྲའི་ཤེས་པར་ནི་མ་ཡིན་གྱིས། དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ཁྱོད་འདོད་པ་དང་བཟོད་པར་མ་བྱེད་ཅིག་།ཕུ་ནུ་མོ་ཁྱེད་དགེ་འདུན་འབྱེད་འདོད་པར་མ་བྱེད་པར་ཕུ་ནུ་མོ་དག་དགེ་འདུན་འཐུན་པ་ཉིད་དུ་འདོད་པར་གྱིས་ཤིག་།དགེ་འདུན་འཐུན་མི་ཕྱེད་ལ། ཀུན་དུ་དགའ་ཞིང་མི་རྩོད་དེ། རྩེ་གཅིག་ལ་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ་སྟོན་པའི
9.130b
བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཕུ་ནུ་མོ་དག་དགེ་འདུན་འབྱེད་པ་ལ་ཕྱོགས་པ་མི་མཐུན་པ་སྨྲ་བ་འདི་ལྟ་བུ་འདི་ཐོང་ཤིག་།གལ་ཏེ་དགེ་སློང་མ་དེ་དག་ལ་དེ་སྐད་ཅེས་བསྒོ་ཡང་གཞི་དེ་ཉིད་ལ་ནན་གྱིས་ཤེས་བྱ་བ་ནས། གཞན་ནི་བརྫུན་པའོ་ཞེས་བྱ་བའི་བར་དུ་རྗེས་སུ་སྒྲུབ་བོ། །སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ཅིང་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་གྲོགས་བྱེད་པ་དེ་དག་དང ། གཞན་ཡང་དེ་ལྟ་བུའི་རང་བཞིན་ཅན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་ཤིག་།བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པ་བྱས་པ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱ་བའི་བར་དུའོ། །འཕགས་མའི་དགེ་འདུན་ཕུ་ནུ་མོ་རྣམས་བདག་ལ་གསན་དུ་གསོལ། རྗེས་སུ་ཕྱོགས་པ་འདི་དག་དགེ་སློང་མ་གང་དགེ་འདུན་འཐུན་པ་དབྱེ་བའི་སླད་དུ་ཞུགས་ཏེ། དབྱེ་བའི་སླད་དུ་རྩོད་པ་ཡང་དག་པར་བླངས་ནས། རབ་ཏུ་འཛིན་ཅིང་རྗེས་སུ་སྒྲུབ་པར་འཚལ་བཞིན་དུ་དེའི་གྲོགས་བགྱིད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་བགྱིད་ནས། དེ་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ཞེས་བྱ་བ་ནས་གཞན་ནི་བརྫུན་པའོ་ཞེས་བྱ་བའི་བར་དུ་རྗེས་སུ་སྒྲུབ་ན་དེའི་སླད་དུ་འཕགས་མའི་དགེ་འདུན་གྱིས་དགེ་སློང་མ་གྲོགས་བགྱིད་པ་དག་ལ་དགེ་སློང་མ་ཁྱེད་དགེ་སློང་མ་གང་དགེ་འདུན་འཐུན་པ་དབྱེ་བའི་ཕྱིར་ཞུགས་ཏེ། ་དབྱེ་བའི་ཕྱིར་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་འདུག་པར་ཤེས་བཞིན་དུ་དེའི་གྲོགས་བྱེད་ཅིང་མི་མཐུན་པ་སྨྲ་བའི་རྗེས་སུ་ཕྱོགས་ནས་དེ་དག་ལ་དགེ་སློང་མ་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ཞེས་བྱ་བ་ནས་གཞན་ནི་བརྫུན་པའོ་ཞེས་བྱ་བའི་བར་དུ་རྗེས་སུ་སྒྲུབ་ན། གལ་ཏེ་འཕགས་མའི་དགེ་འདུན་གྱི་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། དགེ་སློང་མ་གྲོགས་བགྱིད་པ་འདི་དག་ལ་དགེ་སློང་མ་ཁྱོད་དགེ་སློང་མ་གང་དགེ་འདུན་དབྱེ་བའི་ཕྱིར་ཞུགས་ཏེ། དགེ་འདུན་དབྱེ་བའི་ཕྱིར་རྩོད་པ་ཡང
9.131a
དག་པར་བླངས་ནས་རབ་ཏུ་འཛིན་ཅིང་འདུག་པར་ཤེས་བཞིན་དུ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་།ཕུ་ནུ་མོ་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་།དགེ་འདུན་འཐུན་ཞིང་མི་ཕྱེད་ལ། ཀུན་དུ་དགའ་ཞིང་མི་རྩོད་དེ་རྩེ་གཅིག་ལ། འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་འགྱུར་རོ་ཞེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་རྣམས་བདག་ལ་གསན་དུ་གསོལ། དགེ་སློང་མ་རྗེས་སུ་ཕྱོགས་པ་འདི་དག་ནི་དགེ་སློང་མ་གང་དགེ་འདུན་འཐུན་པ་དབྱེ་བའི་སླད་དུ་ཞུགས་ཏེ། དབྱེ་བའི་སླད་དུ་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་མཆིས་པར་འཚལ་བཞིན་དུ་དེའི་གྲོགས་བགྱིད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་ནས་དེ་དག་ལ་དགེ་སློང་མ་མང་པོས་བཞམས་ཏེ་བསྒོ་ཡང ། གཞི་དེ་ཉིད་ལ་ཞེས་བྱ་བ་ནས་གཞན་ནི་བརྫུན་པའོ་ཞེས་བྱ་བའི་བར་དུ་རྗེས་སུ་སྒྲུབ་ན་དེའི་སླད་དུ་འཕགས་མའི་དགེ་འདུན་གྱིས་དགེ་སློང་མ་ཁྱེད་དགེ་སློང་མ་གང་དགེ་འདུན་འཐུན་པ་དབྱེ་བའི་ཕྱིར་ཞུགས་ཏེ། དབྱེ་བའི་ཕྱིར་རྩོད་པ་ཡང་དག་པར་བཟུང་ནས་རབ་ཏུ་འཛིན་ཅིང་འདུག་པར་ཤེས་བཞིན་དུ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་།ཕུ་ནུ་མོ་དགེ་འདུན་གྱི་དབྱེན་གྱི་མི་མཐུན་པར་སྨྲ་བའི་རྗེས་སུ་ཕྱོགས་པ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། འཕགས་མའི་དགེ་འདུན་གང་དག་དགེ་སློང་མ་འདི་དག་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བརྗོད་པར་བྱ་བ་ནས། འཕགས་མའི་དགེ་འདུན་གྱིས་བཟོད་ཅིང་གནང་ནས་འཕགས་མའི་དགེ་འདུན་གྱིས་དགེ་སློང་མ་གྲོགས་བགྱིས་པ་དག་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར
9.131b
ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བའི་བར་དུའོ། །དེ་དག་ལ་གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ཞེས་བྱ་བ་ནས་གཞན་ནི་བརྫུན་པའོ་ཞེས་བྱ་བའི་བར་དུ་རྗེས་སུ་སྒྲུབ་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དོ། །ཡང་དགེ་སློང་མ་གང་དགེ་འདུན་འཐུན་པ་དབྱེ་བའི་ཕྱིར་ཞུགས་ཏེ་དབྱེ་བའི་ཕྱིར་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་འདུག་ན་དགེ་སློང་མ་དེ་ལ་དགེ་སློང་མ་རྣམས་ཀྱིས་འཕགས་མ་ཁྱེད་དགེ་འདུན་འཐུན་པ་དབྱེ་བའི་ཕྱིར་མ་འཇུག་ཤིག་།དབྱེ་བའི་ཕྱིར་རྩོད་པ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་མ་སྒྲུབས་ཤིག་།འཕགས་མ་ཁྱོད་དགེ་འདུན་དང་འཐུན་པར་གྱིས་ཤིག་།དགེ་འདུན་འཐུན་མི་ཕྱེད། ཀུན་དུ་དགའ་མི་རྩོད་དེ་རྩེ་གཅིག་ལ། འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། འཕགས་མའི་དགེ་འདུན་གྱི་དབྱེན་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་ཅེས་བསྒོ་བ་ན། གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་དུ་གཞུག་པའི་ཕྱིར་ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ། ཡང་དག་པར་བསྟན་པ་ན། ་གཞི་དེ་གཏོང་ན་དེ་ལྟ་ན་ནི་ལེགས། གལ་ཏེ་མི་གཏོང་ན་ཆོས་འདི་ཡང་ལན་གསུམ་པ་ལ་ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོ་འམ། གཞན་ཡང་དེ་ལྟ་བུ་དང་འཐུན་པ་གང་ཡིན་པའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་ནོ། །འཐུན་པ་ཞེས་བྱ་བ་ནི་རོ་གཅིག་པའོ། །དབྱེ་བའི་ཕྱིར་ཞེས
9.132a
བྱ་བ་ནི་རྣམ་པ་གཉིས་སུ་བྱ་བའི་ཕྱིར་རོ། །ཞུགས་ཏེ་ཞེས་བྱ་བ་ནི་བརྩོན་པར་བྱེད་པའོ། །དབྱེན་བྱ་བའི་ཕྱིར་ཞེས་བྱ་བ་ནི་དབྱེན་བྱེད་པའི་གཞི་ནི་བཅུ་བཞི་སྟེ། ཆོས་སམ་ཆོས་མ་ཡིན་པ་འམ། འདུལ་བ་འམ། འདུལ་བ་མ་ཡིན་པ་འམ། ལྟུང་བ་འམ། ལྟུང་བ་མ་ཡིན་པ་འམ། ལྷག་མ་ཡོད་པ་འམ། ལྷག་མ་མེད་པ་འམ། ལྕི་བ་འམ། ཡང་བ་འམ། བཤགས་པར་བྱ་བ་འམ། བསྡམ་པར་བྱ་བ་འམ། འདུལ་བ་ལས་འགལ་བ་འམ། ཉེས་པར་བཤད་པར་འགྱུར་བ་སྟེ། འདི་དག་ལས་གང་ཡང་རུང་བའི་དངོས་པོ་ལེགས་པར་རབ་ཏུ་ཤིན་དུ་བཟུང་བ་ཡིན་ནོ། །རྩོད་པ་ཞེས་བྱ་བ་ནི་རྩོད་པ་བཞི་སྟེ་ཞེས་བྱ་བ་ནས་བྱ་བའི་ཕྱིར་རྩོད་པའི་བར་དག་གོ། །ཡང་དག་པར་བླངས་ནས་རབ་ཏུ་འཛིན་ཅིང་ཞེས་བྱ་བ་ནི་མངོན་པར་ཞེན་ནས་སོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །བཞམས་ཏེ་བསྒོ་བར་བྱའོ་ཞེས་བྱ་བ་ནི་སྔར་ཇི་སྐད་བསྒོ་བ་བཞིན་དུའོ། །གལ་ཏེ་དགེ་སློང་མ་རྣམས་ཀྱིས་བཞམས་ཏེ་བསྒོ་བ་ན་གཞི་དེ་གཏོང་ན་ཞེས་བྱ་བ་ནི་ལྟ་བ་དེའོ།། གཏོང་ན་དེ་ལྟ་ན་ནི་ལེགས་ཞེས་བྱ་བ་ནི་དེ་ལྟ་ན་བཟང་ངོ་ཞེས་བྱ་བའོ། །གལ་ཏེ་མི་གཏོང་ན་ཞེས་བྱ་བ་ནི་ལྟ་བ་དེའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱ་ཞེས་བྱ་བ་ནི་སྔར་གསོལ་བ་དང་བཞིའི་ལས་ཀྱིས་ཇི་སྐད་བསྒོ་བ་བཞིན་དུ་སྟེ། ་འདི་ནི་ཡང་དག་པར་གདམས་པ་ཡིན་ནོ། །འདི་ནི་ཡང་དག་པར་བསྟན་པ་ཡིན་ནོ། །ཆོས་འདི་ཡང་ཞེས་བྱ་བ་འདི་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པའོ། །ལན་གསུམ་པ་ལ་ངེས་པར་འབྱུང་བར་བྱ་བ་སྟེ་ཞེས་བྱ་བ་ནི་སྟོན་པ་དང་བཅས་པའོ། །གཞན་ནི་སྔ་མ་ཇི་ལྟ་བ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་དགེ་འདུན་དབྱེ་བའི་ཕྱིར་ཞུགས་པ་གང་ཅི་ཡང་རུང་སྟེ་ཐམས་ཅད་དུ་ཉེས་བྱས་ཀྱིས་ལྟུང་བར་འགྱུར་རོ། །བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོའོ། །གཞན་ནི་སྔ་མ་ཇི་ལྟ་བཞིན་དུ་བརྗོད་པར་བྱའོ། །དགེ་སློང་མའི་རྣམ་པར་འབྱེད་པ་ལས་དགེ་འདུན
9.132b
ལྷག་མ་བཅུ་བདུན་པ་རྫོགས་སྷོ།། ་་་་་་་་་་་་་་་་་་་་དེ་ནས་བཅོམ་ལྡན་འདས་གདན་དེ་ཉིད་ལ་བཞུགས་བཞིན་དུ་བསླབ་པའི་གཞི་གཉིས་པ་འཆའ་བར་མཛད་དེ། དགེ་སློང་མ་རྣམས་ལས་གཅིག་གམ། གཉིས་སམ། མང་པོ་ཡང་རུང་སྟེ། དགེ་སློང་མ་དེའི་གྲོགས་སུ་གྱུར་ལ། མི་མཐུན་པར་སྨྲ་བའི་རྗེས་སུ་ཕྱོགས་ནས་དགེ་སློང་མ་དེ་རྣམས་དགེ་སློང་མ་རྣམས་ལ་འཕགས་མ་ཁྱོད་དགེ་སློང་མ་འདི་ལ་དགེ་ཡང་རུང་སྡིག་ཀྱང་རུང་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བ་འདུལ་བ་སྨྲ་བ་ཡིན་ལ། དགེ་སློང་མ་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་སྒྲུབ་པའོ། །དགེ་སློང་མ་འདི་ནི་ཤེས་བཞིན་དུ་སྨྲའི། མི་ཤེས་པར་ནི་མ་ཡིན་ཏེ། དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ངེད་ཀྱང་འདོད་ཅིང་བཟོད་དོ་ཞེས་དེ་སྐད་ཅེས་ཟེར་ན། དགེ་སློང་མ་དེ་དག་ལ་དགེ་སློང་མ་རྣམས་ཀྱིས་འཕགས་མ་ཁྱེད་དགེ་སློང་མ་འདི་ནི་ཆོས་སྨྲ་བ། འདུལ་བ་སྨྲ་བ་ཡིན་ལ། དགེ་སློང་མ་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་སྒྲུབ་པའོ། །དགེ་སློང་མ་འདི་ནི་ཤེས་བཞིན་དུ་སྨྲའི། མི་ཤེས་པར་ནི་མ་ཡིན་ཏེ། དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ངེད་ཀྱང་འདོད་ཅིང་བཟོད་དོ་ཞེས་དེ་སྐད་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། དགེ་སློང་མ་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ་ཡིན་ལ། དགེ་སློང་མ་འདི་ནི་ཆོས་མ་ཡིན་པ་དང ། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་འཛིན་ཅིང་རྗེས་སུ་སྒྲུབ་པའོ། །དགེ་སློང་མ་འདི་ནི་མི་ཤེས་བཞིན་དུ་སྨྲའི། ཤེས་པར་མ་ཡིན་གྱིས། དགེ་སློང་མ་འདི་གང་ལ་འདོད་ཅིང་བཟོད་པ་དེ་ལ་ཁྱོད་འདོད་ཅིང་བཟོད་པར་མ་བྱེད་ཅིག་།ཁྱེད་དགེ་འདུན་འབྱེད་པར་མ་བྱེད་ཅིག་།ཁྱེད་དགེ་འདུན་འཐུན་པར་འདོད་པར་གྱིས་ཤིག་།དགེ་འདུན་དང་འཐུན་པར་གྱིས་ཤིག་།དགེ་འདུན
9.133a
འཐུན་མི་ཕྱེད་ཀུན་དུ་དགའ་ཞིང་མི་རྩོད་དེ་རྩེ་གཅིག་ལ་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན། བདེ་བ་ལ་རེག་པར་གནས་པར་འགྱུར་གྱིས། དགེ་སློང་མ་ཁྱེད་དགེ་འདུན་འབྱེད་པའི་ཕྱིར་མི་མཐུན་པར་སྨྲ་བའི་རྗེས་སུ་ཕྱོགས་པ་འདི་ལྟ་བུ་འདི་ཐོང་ཤིག་ཅེས་དེ་སྐད་ཅེས་བརྗོད་པར་བྱའོ། །དེ་ལྟར་དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དེ་སྐད་ཅེས་བརྗོད་པ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་དུ་འཇུག་པའི་ཕྱིར་ལན་གཉིས་ལན་གསུམ་གྱི་བར་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་གྱི་བར་དུ་ཡང་དག་པར་བསྒོ། ཡང་དག་པར་བསྟན་པ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཆོས་འདི་ཡང་ལན་གསུམ་པ་ལ་ངེས་པར་འབྱུང་བ་དང་བཅས་པ་སྟེ། དགེ་འདུན་ལྷག་མའོ། །དགེ་སློང་མ་དེའི་ཞེས་བྱ་བ་ནི་སྦོམ་དགའ་མོའི་འོ། །དགེ་སློང་མ་གྲོགས་སུ་གྱུར་ལ་ཞེས་བྱ་བ་ནི་བཅུ་གཉིས་སྡེ་རྣམས་སོ། །གཅིག་གམ་ཞེས་བྱ་བ་ནི་གཅིག་ཉིད་དོ། །གཉིས་སམ་ཞེས་བྱ་བ་ནི་གཉིས་ཉིད་དོ། །མང་པོ་ཡང་རུང་ཞེས་བྱ་བ་ནི་གཉིས་ལས་ལྷག་པ་ནི་མང་པོའོ། །དེ་དག་དགེ་སློང་མ་རྣམས་ལ་ཞེས་བྱ་བ་ནི་ཆོས་འདི་པ་རྣམས་ལའོ། །དེ་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །འཕགས་མ་ཁྱེད་ཅེས་བྱ་བ་ནི་ཁྱེད་ཅག་གོ། །དགེ་སློང་མ་འདི་ལ་ཞེས་བྱ་བ་ནི་སྦོམ་དགའ་མོ་ལའོ། །ཅི་ཡང་མ་སྨྲ་ཤིག་ཅེས་བྱ་བ་ནི་མང་ཡང་རུང་ཉུང་ཡང་རུང་ཅི་ཡང་མ་སྟོན་ཅིག་ཅེས་བྱ་བའོ། །དགེ་ཡང་རུང་ཞེས་བྱ་བ་ནི་དགེ་བ་འཛིན་དུ་མ་གཞུག་ཅིག་ཅེས་བྱ་བའོ། །སྡིག་ཀྱང་རུང་ཞེས་བྱ་བ་ནི་སྡིག་པ་ལས་མ་བསླང་ཤིག་ཅེས་བྱ་བའོ། །དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བ། འདུལ་བ་སྨྲ་བ་ཞེས་བྱ་བ་ནི་ཆོས་ཇི་ལྟ་བ་བཞིན་དང ། སྤྱོད་པ་ཇི་ལྟ་བ་བཞིན་དུའོ། །འདི་ནི་ཤེས་བཞིན་དུ་སྨྲ་བ་ཡིན་གྱི་མི་ཤེས་པར་ནི་མ་ཡིན་ནོ་ཞེས་བྱ་བ་ནི་ཇི་ལྟར་ཤེས་པ་དང་ཇི་ལྟར་མཐོང་བ་དེ་བཞིན་དུ་ཐ་སྙད་འདོགས
9.133b
པའོ། །འདི་གང་ལ་འདོད་པ་ཞེས་བྱ་བ་ནི་འདི་དང་བདག་ཅག་འཐུན་པར་བཟོད་པའོ། །དགེ་སློང་མ་དེ་དག་ལ་ཞེས་བྱ་བ་ནི་བཅུ་གཉིས་སྡེ་རྣམས་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །དེ་སྐད་ཅེས་བརྗོད་པར་བྱ་ཞེས་བྱ་བ་ནི་དེ་སྐད་ཅེས་བསྒོ་བར་བྱ་བའོ། །འཐུན་པ་ཞེས་བྱ་བ་ནི་རོ་གཅིག་པའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་ནོ། །འབྱེད་པ་ཞེས་བྱ་བ་ནི་རྣམ་པ་གཉིས་སུ་འགྱུར་བའོ། །འཇུག་ཅེས་བྱ་བ་ནི་བརྩོན་པའོ། །དེའི་ཞེས་བྱ་བ་ནི་སྦོམ་དགའ་མོའོ། །གྲོགས་སུ་གྱུར་ཅེས་བྱ་བ་ནི་མཇུག་རྫོགས་པར་བྱེད་པའོ། །རྗེས་སུ་ཕྱོགས་པ་ཞེས་བྱ་བ་ནི་བཟོད་པ་དང ། འདོད་པ་དང ། བློ་གྲོས་དང་བསམ་པའོ། །མི་མཐུན་པར་སྨྲ་བའི་ཞེས་བྱ་བ་ནི་འཐུན་པ་དང་འབྲལ་བར་བྱེད་པའོ། །དགེ་སློང་མ་དེ་དག་ལ་ཞེས་བྱ་བ་ནི་བཅུ་གཉིས་སྡེ་རྣམས་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །དེ་སྐད་ཅེས་བརྗོད་པར་བྱ་ཞེས་བྱ་བ་ནི། དེ་སྐད་བསྒོ་བར་བྱ་བའོ། །ཕུ་ནུ་མོ་དགེ་འདུན་གྱི་དབྱེན་མི་མཐུན་པར་སྨྲ་བའི་རྗེས་སུ་ཕྱོགས་པ་འདི་ལྟ་བུ་འདི་ཐོང་ཤིག་ཅེས་བྱ་བ་ནི་རྣམ་གྲངས་དུ་མས་དགེ་འདུན་དབྱེ་བར་འདོད་པར་མ་བྱེད་ཅེས་བྱ་བའོ། །གལ་ཏེ་དེ་སྐད་ཅེས་བརྗོད་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་བཞམས་ཏེ་བསྒོ་བར་བྱའོ་ཞེས་བྱ་བ་ནི་སྔར་ཇི་སྐད་བསྒོ་བ་བཞིན་ནོ། །དེ་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། ་གལ་ཏེ་མི་གཏོང་ན་གསོལ་བ་དང་བཞིའི་ལས་ཀྱིས་བསྒོ་བར་བྱའོ་ཞེས་བྱ་བ་ནི་སྔར་ཇི་སྐད་བསྒོ་བ་བཞིན་དུ་སྟེ། འདི་ནི་ཡང་དག་པར་བསྒོ་བ་ཡིན་ནོ། །འདི་ནི་ཡང་དག་པར་བསྟན་པ་ཡིན་ནོ། །ཆོས་འདི་ཡང་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་བསྟན་པའོ། །ལན་གསུམ་པ་ལ་ངེས་པར་འབྱུང་བ་དང་བཅས་པ་སྟེ་ཞེས་བྱ་བ་ནི་སྟོན་པ་དང་བཅས་པའོ། །གཞན་ནི་སྔ་མ་ཇི་ལྟ་བ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་འདུན་གྱི་དབྱེན་གྱི་རྗེས་སུ་ཕྱོགས་པར་ཞུགས་ནས་གང་ཅི་ཡང་རུང་སྟེ། ཐམས་ཅད་དུ་ཉེས་བྱས་ཀྱི་ལྟུང་བར་འགྱུར་རོ། །
9.134a
བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །གཞན་ནི་སྔ་མ་ཇི་ལྟ་བ་བཞིན་དུ་བརྗོད་པར་བྱའོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅཝ་བརྒྱད་པ་རྫོགས་སྷོ།། ་་་་་་་་་་་་་་་་།། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རེ་ལྡེ་རི་ལ་འགྲོ་མགྱོགས་དང་ནབ་སོ་གཉིས་དང ། དགེ་སློང་དམར་སེར་ཅན་རྣམས་ཁྱིམ་སུན་འབྱིན་པའི་སྡིག་པའི་ཆོས་ཀུན་དུ་སྤྱོད་ཅིང་འཁོད་དོ། །དེ་རྣམས་བུད་མེད་དང་ལྷན་ཅིག་ཏུ་ཅོ་འདྲི་བར་བྱེད། ཀུན་དུ་རྩེ་བར་བྱེད། ཅ་ཅོ་འདོན་པར་བྱེད། རྒོད་པ་དང ། རྩེ་བ་དང ། ལུས་ཀྱི་ཙབ་ཧྲལ་བྱེད་ཅིང ། དེ་རྣམས་བུད་མེད་དང་ལྷན་ཅིག་ཏུ་སྟན་ཅིག་དང་མལ་གཅིག་ལ་འཁོད་པར་བྱེད། སྣོད་གཅིག་ཏུ་བཟའ་བ་རྣམ་པ་དུ་མ་ཟ་བར་བྱེད། སྣོད་གཅིག་ནས་བཏུང་བ་དུ་མ་འཐུང་བར་བྱེད། མེ་ཏོག་དག་འཐོག་པར་བྱེད། འཐོག་ཏུ་འཇུག་པར་བྱེད། རྣ་རྒྱན་དུ་བྱེད། རྣ་རྒྱན་དུ་བྱེད་དུ་འཇུག་།མེ་ཏོག་ཕྲེང་བ་རྒྱུད་པར་བྱེད། རྒྱུད་དུ་འཇུག་པར་བྱེད། བྲོ་རྡུང་བར་བྱེད། གླུ་ལེན་པར་བྱེད། རོལ་མོའི་སྒྲ་ཡང་འབྱིན་ཅིང ། ཅི་བྲོ་ལེགས་པར་བརྡུངས་སམ། གླུ་ལེགས་པར་བླངས་སམ། རོལ་མོའི་སྒྲ་ལེགས་པར་ཕྱུང་ངམ་ཞེས་བྱ་བ་ནས་རྒྱུག་པར་བྱེད། སྡེག་པར་བྱེད། མཆོང་བར་བྱེད་པའི་བར་དང ། ཆོས་གོས་བཞག་སྟེ་བྲང་གིས་འགྲོ་བར་བྱེད། ཉ་འཕར་བ་དང ། རུ་རྦལ་འགྲེ་བ་དང ། འབུར་ལོག་ཀྱང་བྱེད་དོ། །ལག་པ་རྡོབ་པར་བྱེད། དཔུང་པ་རྡོབ་པར་བྱེད། བརླ་བསྒྱུར་བར་བྱེད། རྡོབ་པར་བྱེད་ཅིང་ཁ་ནས་རྔ་པ་ཏ་ཧའི་སྒྲ་དག་ཀྱང་འབྱིན་པར་བྱེད། ཁ་ནས་རྔ་མན་དུ་ཀ་དང ། ཁ་ནས་རྔའི་སྒྲ་དག་འབྱིན་པར་བྱེད་ལ། ཁྱུ་མཆོག་གི་ང་རོ་འབྱིན་པར་བྱེད། མ་ཧེའི་སྐད་འབྱིན་པར་བྱེད། གླང་པོ་ཆེ་བཞིན་དུ་སྐད་འདོན་པར་བྱེད། རྨ་བྱའི་སྐད་འབྱིན་པར་བྱེད། ཁུ་བྱུག་གི་སྐད་འདོན་པར་བྱེད་ཅིང ། གླང་པོ་ཆེ་དང ། རྟ་དང ། ཤིང་
9.134b
རྟ་དང ། དཔུང་བུ་ཆུང་གི་དམག་ཀྱང་འགྱེད་ཅིང ། འགྱེད་དུ་འཇུག་པར་བྱེད། བུད་མེད་ཀྱི་དམག་དང ། སྐྱེས་པའི་དམག་དང ། ཁྱེའུའི་དམག་དང ། བུ་མོའི་དམག་ཀྱང་འགྱེད་པར་བྱེད། འགྱེད་དུ་འཇུག་པར་བྱེད་ལ། སྐྱེས་པ་དང ། བུད་མེད་དང ། ཁྱེའུ་དང་བུ་མོའི་དམག་ཀྱང་འགྱེད་པར་བྱེད། འགྱེད་དུ་འཇུག་པར་བྱེད་ཅིང ། བྱ་གག་གི་ཐབ་མོ་དང ། ལུག་གི་ཐབ་མོ་དང ། བྱ་ལ་བ་ཀའི་ཐབ་མོ་དང ། ཐི་བའི་ཐབ་མོ་དང ། བྱ་གག་དང ། ལུག་དང ། བྱ་ལ་བ་ཀ་དང ། ཐི་བའི་ཐབ་མོ་དག་ཀྱང་འགྱེད་པར་བྱེད། འགྱེད་དུ་འཇུག་པར་བྱེད་དོ། །འདི་དག་དང་གཞན་ཡང་དགེ་སྦྱོང་གི་བྱ་བ་མ་ཡིན་པར་བྱེད་ཅིང་བྱེད་དུ་འཇུག་པར་བྱེད་དོ། །དེའི་ཚེ་གྲོགས་བྱེད་པ་བཅུ་གཉིས་སྡེ་ཡང་རྒོད་པ་དང ། རྩེ་བ་དང ། ལུས་ཀྱི་ཙབ་ཧྲལ་བྱེད་དེ། དེ་རྣམས་སྤྱོད་པ་དེ་དང ། སྤྱོད་ཚུལ་དེ་དང ། སྤྱོད་ལམ་དེས་གནས་པ་ན་དགེ་སློང་སྡིག་པ་ཅན་གནས་པའི་ཕྱིར་དགེ་སློང་མ་ལྷགས་པ་རྣམས་ཀྱང་མི་འོང་ཞིང ། ལྷགས་པའི་རྣམས་ཀྱང་སྔར་འདོང་བར་བྱེད། སྐྲ་འགྲེང་བ་དང ། སྐྲ་འཕྱར་བ་རྣམས་ཀྱང་མི་འཁོད་དོ། །དེ་རྣམས་ཀྱི་སྤྱོད་ལམ་དེས་རེ་ལྡེ་རི་ལ་འཁོད་པའི་བྲམ་ཟེ་དང ། ཁྱིམ་བདག་རྣམས་ཡིད་མ་རངས་ཤིང་མ་དད་པར་གྱུར་ནས་དགེ་སློང་གཉུག་མ་རྣམས་ལ་ཡང་བསོད་སྙོམས་མི་སྦྱིན་ཞིང་མི་བྱའོ་སྙམ་དུ་སེམས་ན་གློ་བུར་དུ་འོངས་པ་རྣམས་ལ་ལྟ་སྨོས་ཀྱང་ཅི་དགོས། དེའི་ཚེ་ཚེ་དང་ལྡན་པ་ཀུན་དགའ་བོ་དགེ་སློང་གནས་བརྟན་གནས་བརྟན་རྣམས་དང་རེ་ལྡེ་རི་ལ་དོང་སྟེ། དགེ་སློང་འགྲོ་མགྱོགས་དང་ནབ་སོ་གཉིས་བསྐྲད་པའི་ལས་བྱས་སོ། །དེ་ཉིད་ཀྱི་ཚེ་དགེ་སློང་མ་བཅུ་གཉིས་སྡེ་རྣམས་ཀྱང་ཁྱིམ་སུན་འབྱིན་པ་བྱས་པའི་ཕྱིར་བསྐྲད་པའི་ལས་བྱས་སོ། །དགེ་སློང་མ་བཅུ་གཉིས་སྡེ་རྣམས་ཀྱི་ལྷན་ཅིག་གནས་པ་དང ། ་ཉེ་གནས་རྣམས་ཀྱིས་ནི་མཉན་ཡོད་དུ་ལྷགས་ནས་བཤགས་པར་བྱ་བ་གང་ཡིན་པ་དེ་བཤགས་ཤིང ། བསྡམ་པར་བྱ་བ་གང་ཡིན་པ་དེ་བསྡམས་ཏེ། རང་བཞིན་དུ་གནས་པའི་དགེ་སློང་མ་རྣམས་དང་ལྷན་ཅིག་ཏུ་གསོ་སྦྱོང་དང་དགག་དབྱེ་དང ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་དག་ཉམས་སུ་མྱོང་བར་བྱེད་དོ། །དེ་ནས་བཅུ་གཉིས
9.135a
སྡེ་རྣམས་ཀྱིས་བསམས་པ། བཅོམ་ལྡན་འདས་དང་དགེ་སློང་གི་དགེ་འདུན་དང ། དགེ་སློང་མའི་དགེ་འདུན་ལ་བཟོད་པ་གསོལ་དུ་འདོང་ངོ་སྙམ་མོ། །དེ་ནས་བཅུ་གཉིས་སྡེ་རྣམས་མཉན་ཡོད་ག་ལ་བ་དེར་རྒྱུ་ཞིང་སོང་སྟེ། མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་པ་དང ། དགེ་སློང་མ་རྣམས་ཀྱིས་དགེ་སློང་མ་བཅུ་གཉིས་སྡེ་རྣམས་མཐོང་ངོ ། །མཐོང་ནས་ཀྱང་བཅོམ་ལྡན་འདས་ལ་གསོལ་པ། བཅོམ་ལྡན་འདས་བཅུ་གཉིས་སྡེ་འདི་རྣམས་བསྐྲད་པའི་ལས་བགྱིས་ན་བདག་ཅག་གིས་ཇི་ལྟར་བསྒྲུབ་པར་བགྱི། མི་སྨྲ་བར་བྱ་ཞིང་ལག་བརྡས་གཙུག་ལག་ཁང་ཐ་མ་བསྟན་པར་བྱའོ། །དེ་རྣམས་ཀྱིས་དེ་བཞིན་དུ་བྱས་སོ། །དེ་ནས་དེ་དག་གི་ལྷན་ཅིག་གནས་པ་དང ། ཉེ་གནས་དེ་རྣམས་ཀྱང་སྨྲ་བར་མི་བྱེད། ཀུན་དུ་སྨྲ་བར་མི་བྱེད། ཀུན་དུ་དགའ་བར་མི་བྱེད་པ་དང ། དེ་རྣམས་ཀྱིས་ལྷན་ཅིག་གནས་པ་དང ། ཉེ་གནས་རྣམས་ལ་འདི་སྐད་ཅེས་སྨྲས་སོ། །ཕུ་ནུ་མོ་དག་གང་ཁྱེད་ཀྱིས་མ་སྨྲས་མ་བརྗོད་མ་བསྐྱོད་པ་ལས་ངེད་ཀྱིས་སྨྲས། བརྗོད་བསྐྱོད་པ་ཅི་ཞིག་ཡོད་ཀྱེ་དགེ་སློང་མའི་གནས་བརྟན་གནས་བརྟན་རྣམས་མི་སྨྲ་ཞིང་ཀུན་དུ་མི་སྨྲ་བ་ནི་རུང་སྟེ། དེར་ཟད་ན་ཁྱེད་ཀོ་ཅིའི་ཕྱིར་མི་སྨྲ། དེ་རྣམས་ཀྱིས་དགེ་སློང་མ་དག་བར་དུ་བཞག་ནས་འདི་སྐད་ཅེས་སྨྲས་སོ། །ཇི་སྐད་ཟེར་བ་དེ་ནི་དེ་ལྟ་ཡང་ཡིན་ན་འོན་ཀྱང་བདག་ཅག་གིས་ནི་བཤགས་པར་བྱ་བ་གང་ཡིན་པ་དེ་ཡང་བཤགས། བསྡམ་པར་བྱ་བ་གང་ཡིན་པ་དེ་ཡང་བསྡམས་ནས་བདག་ཅག་གསོལ་བ་དང་བཞིའི་ལས་ཀྱི་བར་ཉམས་སུ་མྱོང་ངོ ། །དེ་ནས་དགེ་སློང་མ་བཅུ་གཉིས་སྡེ་དེ་དག་གིས་དགེ་སློང་མ་གནས་བརྟན་གནས་བརྟན་རྣམས་ལ་འདི་སྐད་ཅེས་སྨྲས་སོ། །འདི་ན་དགེ་སློང་མ་ཁ་ཅིག་འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དག་ཡོད་དེ། གང་དུ་ལྟུང་བ་འདྲ་བ་ཁོ་ན་ལས་དགེ་སློང་མ་ཁ་གཅིག་ནི་སྐྲོད་པར་བྱེད། ཁ་གཅིག་ནི་སྐྲོད་པར་མི་བྱེད་དོ། །དེ་ནས་དགེ་སློང་མ་རྣམས་ཀྱིས་དགེ་སློང་མ་བཅུ་གཉིས་སྡེ་ལ་སྨྲས་པ། སུ་ལ་འདུན་པས་འགྲོ་བའོ་ཞེས་གཤེ། ་དེ་དག་གིས་སྨྲས་པ།
9.135b
དགེ་སློང་མ་གནས་བརྟན་གནས་བརྟན་རྣམས་ལའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། ་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་དགེ་སློང་མ་བཅུ་གཉིས་སྡེ་ལ་བཞམས་ཏེ། དགེ་སློང་མ་ཁྱེད་དགེ་སློང་མ་གནས་བརྟན་གནས་བརྟན་རྣམས་ལ། འདི་སྐད་ཅེས་འདི་ན་དགེ་སློང་མ་ཁ་ཅིག་འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་ཡོད་དེ། གང་དུ་ལྟུང་བ་འདྲ་བ་ཁོ་ན་ལས་དགེ་སློང་མ་ཁ་ཅིག་ནི་སྐྲོད་པར་བྱེད་ལ། ཁ་ཅིག་ནི་སྐྲོད་པར་མི་བྱེད་དེ་ཞེས་མ་ཟེར་ཅིག་།དེ་ཅིའི་ཕྱིར་ཞེ་ན། དགེ་སློང་མ་འདི་དག་ནི་འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་མ་ཡིན་གྱི། འོན་ཀྱང་དགེ་སློང་མ་ཁྱེད་ཉིད་ཁྱིམ་སུན་འབྱིན་པ། སྡིག་པའི་ཆོས་ཀུན་ཏུ་སྤྱོད་པ་ཡིན་ཏེ། ཁྱེད་ཀྱིས་ཁྱིམ་སུན་ཕྱུང་བར་ཡང་མཐོང་ངམ། ཐོས་སམ། རབ་ཏུ་ཤེས། ཁྱེད་སྡིག་པའི་ཆོས་ཀུན་དུ་སྤྱོད་པར་ཡང་མཐོང་ངམ། ཐོས་སམ། རབ་ཏུ་ཤེས་ཀྱིས། ཕུ་ནུ་མོ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་ནས་འཇིགས་པས་འགྲོ་བ་ཞེས་བྱ་བའི་བར་གྱི་ཚིག་གི་ལམ་དེ་ལྟ་བུ་ཐོང་ཤིག་ཅེས་བྱའོ། །དེ་དག་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་གཏི་མུག་གོ་ཞེས་བྱ་བའི་བར་དུའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱེད་ཀྱིས་བཅུ་གཉིས་སྡེ་ལ་གསོལ་བ་དང ། བཞིའི་ལས་ཀྱིས་བསྒོ་ཤིག་བསྒོ་བ་ཡང་འདི་ལྟར་བྱ་སྟེ། གནས་མལ་བཤམས་པ་བྱས་ནས་དགེ་སློང་མ་གཅིག་གིས་གསོལ་བ་བྱས་ནས་ལས་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་བཅུ་གཉིས་སྡེ་འདི་དག་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་ལགས་ཏེ། འདི་དག་གིས་ཁྱིམ་སུན་ཕྱུང་བར་ཡང་མཐོང་ངམ། ཐོས་སམ།
9.136a
རབ་ཏུ་ཤེས། འདི་དག་སྡིག་པའི་ཆོས་ཀུན་དུ་སྤྱོད་པར་ཡང་རབ་ཏུ་ཤེས་པའི་བར་དུ་སྟེ། དགེ་སློང་གནས་བརྟན་གནས་བརྟན་རྣམས་ཀྱིས་རེ་ལྡེ་རི་ལ་དེ་དག་བསྐྲད་པའི་ལས་བྱས་པ་དང ། དེ་དག་དགེ་སློང་མ་རྣམས་ལ་འདུན་པས་འགྲོ་བ་ཞེས་བྱ་བ་ནས་འཇིགས་པས་འགྲོ་བ་ཞེས་བྱ་བའི་བར་གྱིས་གཤེ་བར་གྱིས་ནས་དེ་དག་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་བ་དང ། དེ་དག་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་གཏི་མུག་གོ་ཞེས་བྱ་བའི་བར་དུ་སྟེ། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་གནང་བར་མཛོད་ཅིག་དང ། འཕགས་མའི་དགེ་འདུན་གྱིས་དགེ་སློང་མ་བཅུ་གཉིས་སྡེ་ལ་གསོལ་བ་དང ། བཞིའི་ལས་ཀྱིས་བསྒོ་བ་མཛད་དེ། ཕུ་ནུ་མོ་ཁྱེད་འདི་སྐད་ཅེས་འདི་ན་དགེ་སློང་མ་ཁ་ཅིག་འདུན་པས་འགྲོ་བ་ནས། འཇིགས་པའི་བར་གྱིས་འགྲོ་བ་ཡོད་དོ་ཞེས་མ་ཟེར་ཅིག་།འོན་ཀྱང་ཁྱེད་ཉིད་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་ཡིན་ཏེ་ཞེས་བྱ་བ་ནས་ཁྱེད་སྡིག་པའི་ཆོས་ཀུན་དུ་སྤྱོད་པར་ཡང་མཐོང་ངམ། ཐོས་སམ། རབ་ཏུ་ཤེས་སོ་ཞེས་བྱ་བའི་བར་དུ་སྟེ། ཕུ་ནུ་མོ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་དེ་ལྟ་བུ་ཐོང་ཤིག་ཅེས་བྱ་སྟེ། འདི་ནི་གསོལ་བའོ། །ལས་ཀྱང་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་དགེ་སློང་མ་བཅུ་གཉིས་སྡེ་འདི་དག་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་ལགས་ཏེ། དེ་དག་གིས་ཁྱིམ་སུན་ཕྱུང་བར་ཡང་མཐོང་ངམ། ཐོས་སམ། རབ་ཏུ་ཤེས་ནས་དགེ་སློང་གནས་བརྟན་གནས་བརྟན་རྣམས་ཀྱིས་རེ་ལྡེ་རི་ལ་སོང་སྟེ། བསྐྲད་པའི་ལས་བགྱིས་པ་དང ། དེ་དག་དགེ་སློང་མ་རྣམས་ལ་འདུན་པས་འགྲོ་བ་ཞེས་བགྱི་བ་ནས་འཇིགས་པས་འགྲོ་བ་ཞེས་བགྱི་བའི་བར་གྱིས་གཤེ་བར་བགྱིད་ན་དེ་དག་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་བ་དང ། དེ་དག་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས་གཞན་ནི་གཏི་མུག་གོ་ཞེས་བྱ་བའི
9.136b
བར་དུའོ། །འཕགས་མའི་དགེ་འདུན་གྱིས་དགེ་སློང་མ་བཅུ་གཉིས་སྡེ་ལ་གསོལ་བ་དང ། བཞིའི་ལས་ཀྱིས་བསྒོ་བ་མཛད་དེ། ཕུ་ནུ་མོ་ཁྱོད་འདི་སྐད་ཅེས་འདི་ན་དགེ་སློང་མ་ཁ་ཅིག་འདུན་པས་འགྲོ་བ་ནས་འཇིགས་པའི་བར་གྱིས་འགྲོ་བ་ཡོད་དོ་ཞེས་མ་ཟེར་ཅིག་།འོན་ཀྱང་ཁྱེད་ཉིད་ཁྱིམ་སུན་འབྱིན་པ། སྡིག་པའི་ཆོས་ཀུན་དུ་སྤྱོད་པ་ཡིན་ཏེ་ཞེས་བྱ་བ་ནས། ཁྱེད་སྡིག་པའི་ཆོས་ཀུན་ཏུ་སྤྱོད་པར་མཐོང་ངམ། ཐོས་སམ། རབ་ཏུ་ཤེས་ཀྱིས། ཕུ་ནུ་མོ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་དེ་ལྟ་བུ་ཐོང་ཤིག་ཅེས་བྱ་བའི་བར་དུ་སྟེ། འཕགས་མའི་དགེ་འདུན་གང་དག་བཅུ་གཉིས་སྡེ་དག་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོའོ། །དེ་བཞིན་དུ་ལན་གཉིས་ལན་གསུམ་དུ་ཡང་དོན་དེ་ཉིད་བརྗོད་པར་བྱ་སྟེ། འཕགས་མའི་དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་བཅུ་གཉིས་སྡེ་འདི་དག་ལ་གསོལ་བ་དང ། བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ་ཞེས་བྱ་བའི་བར་དུའོ།། ་་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་གཅིག་པ། དེ་རྣམས་ལ་གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་ཞེས་བྱ་བ་ནས། གཞན་ནི་གཏི་མུག་གོ་ཞེས་བྱ་བའི་བར་གྱི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དོ། །དགེ་སློང་མ་རབ་ཏུ་མང་པོ་གྲོང་ངམ་གྲོང་རྡལ་ཞིག་ཏུ་ཉེ་བར་རྟེན་ཅིང་གནས་ལ་དེ་དག་ཀྱང་ཁྱིམ་སུན་འབྱིན་པ།
9.137a
སྡིག་པའི་ཆོས་ཀུན་ཏུ་སྤྱོད་པར་གྱུར་ཅིང ། དེ་དག་གིས་ཁྱིམ་སུན་ཕྱུང་བ་མཐོང་ངམ། ཐོས་སམ། རབ་ཏུ་ཤེས་སམ། སྡིག་པའི་ཆོས་ཀུན་དུ་སྤྱོད་པར་ཡང་མཐོང་ངམ། ཐོས་སམ། རབ་ཏུ་ཤེས་ན་དགེ་སློང་མ་དེ་དག་ལ་དགེ་སློང་མ་རྣམས་ཀྱིས་འདི་སྐད་ཅེས་འཕགས་མ་དག་ཁྱིམ་སུན་འབྱིན་པ། སྡིག་པའི་ཆོས་ཀུན་ཏུ་སྤྱོད་པ་ཡིན་ཏེ། ཁྱེད་ཀྱིས་ཁྱིམ་སུན་ཕྱུང་བར་མཐོང་ངམ། ཐོས་སམ། རབ་ཏུ་ཤེས། ཁྱེད་ཀྱིས་སྡིག་པའི་ཆོས་ཀུན་ཏུ་སྤྱོད་པར་ཡང་མཐོང་ངམ། ཐོས་སམ། རབ་ཏུ་ཤེས་ཀྱིས། འཕགས་མ་དག་གནས་འདི་ན་གནས་པས་ཆོག་གིས། གནས་འདི་ནས་དེང་ཤིག་ཅེས་བསྒོ་བར་བྱའོ། །དགེ་སློང་མ་དེ་དག་དགེ་སློང་མ་རྣམས་ལ་འདི་སྐད་ཅེས་འདི་ན་དགེ་སློང་མ་ཁ་ཅིག་འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དག་ཡོད་དོ། །གང་དུ་ལྟུང་བ་འདྲ་བ་ཁོ་ན་ལས་དགེ་སློང་མ་ཁ་ཅིག་ནི་སྐྲོད་པར་བྱེད་ལ། ཁ་ཅིག་ནི་སྐྲོད་པར་མི་བྱེད་དོ་ཞེས་ཟེར་ན་དགེ་སློང་མ་དེ་དག་ལ་དགེ་སློང་མ་རྣམས་ཀྱིས་ཚིག་འདི་སྐད་ཅེས་ཀྱེ་འཕགས་མ་དག་ཁྱེད་ཅག་འདི་སྐད་ཅེས་འདི་ནི་དགེ་སློང་མ་ཁ་ཅིག་འདུན་པས་འགྲོ་བ་ཡོད། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དག་ཡོད་དེ། གང་དུ་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད་ལ། ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག་།འོན་ཀྱང་ཕུ་ནུ་མོ་དག་ཁོ་ན་ཁྱིམ་སུན་འབྱིན་པ། སྡིག་པའི་ཆོས་ཀུན་ཏུ་སྤྱོད་པ་ཡིན་ཏེ། ཁྱེད་ཀྱིས་ཁྱིམ་སུན་ཕྱུང་བར་མཐོང་ངམ། ཐོས་སམ། རབ་ཏུ་ཤེས། ཁྱེད་སྡིག་པའི་ཆོས་ཀུན་ཏུ་སྤྱོད་པར་མཐོང་ངམ། ཐོས་སམ། རབ་ཏུ་ཤེས་ཀྱིས། འཕགས་མ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང ། ཞེ་སྡང་དང ། གཏི་མུག་དང ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་དགེ་སློང་མ་དེ་དག་ལ་དགེ་སློང་མ་རྣམས
9.137b
རྣམས་ཀྱིས་དེ་སྐད་བསྒོ་བ་ན། གཞི་དེ་གཏོང་ན་ལེགས། གལ་ཏེ་མི་གཏོང་ན་ཞེས་བྱ་བ་ནས། ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ་ཞེས་བྱ་བའི་བར་དུའོ། །གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཆོས་འདི་ཡང་ལན་གསུམ་གྱི་བར་གྱིས་ངེས་པར་འབྱུང་བ་དང་བཅས་པའི་དགེ་འདུན་ལྷག་མའོ། །དགེ་སློང་མ་ཞེས་བྱ་བ་ནི་ཆོས་འདི་པ་དག་གིའོ། །རབ་ཏུ་མང་པོ་ཞེས་བྱ་བ་ནི་གཉིས་ལས་ལྷག་པར་རབ་ཏུ་མང་པོ་དག་གོ། །གྲོང་ངམ། གྲོང་རྡལ་ཞིག་ན་ཞེས་བྱ་བ་ནི་རེ་ལྡེ་རི་ལའོ། །དེ་དག་ཁྱིམ་སུན་འབྱིན་ཅེས་བྱ་བ་ལ། ཁྱིམ་ཞེས་བྱ་བ་ནི་བྲམ་ཟེ་དང ། རྒྱལ་རིགས་དང ། ཁྱིམ་བདག་གི་ཁྱིམ་དག་གོ། །སུན་འབྱིན་པ་ཞེས་བྱ་བ་ནི་རྒྱུ་གཉིས་ཀྱིས་ཁྱིམ་དག་ཏུ་སུན་འབྱིན་པར་རབ་ཏུ་ཤེས་ཏེ། འགྲོགས་པ་དང ། ལོངས་སྤྱོད་པས་སོ། །ཇི་ལྟར་འགྲོགས་པས་ཤེ་ན། བུད་མེད་དང ། ཁྱེའུ་དང ། བུ་མོ་རྣམས་དང་ལྷན་ཅིག་རྒོད་པ་དང ། རྩེ་བ་དང ། ལུས་ཀྱི་ཙབ་ཧྲལ་བྱེད་ཅིང་དེ་ཉིད་ན་གནས་པ་སྟེ། དེ་ལྟར་འགྲོགས་པས་སོ། །ཇི་ལྟར་ལོངས་སྤྱོད་པས་ཤེ་ན། ཁྱིམ་དེ་དག་ཉིད་དུ་མེ་ཏོག་གམ། འབྲས་བུ་འམ། སོ་ཤིང་དག་སྟོབས་པར་བྱེད་པ་སྟེ། དེ་ལྟར་ལོངས་སྤྱོད་པས་སོ། །མཐོང་ངམ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །ཐོས་སམ་ཞེས་བྱ་བ་ནི་རྣ་བའི་རྣམ་པར་ཤེས་པས་སོ། །རབ་ཏུ་ཤེས་ཞེས་བྱ་བ་ནི་དེ་ལས་གཞན་པའི་རྣམ་པར་ཤེས་པའི་ཚོགས་དག་གིས་སོ། །དགེ་སློང་མ་དེ་དག་གིས་ཞེས་བྱ་བ་ནི་བཅུ་གཉིས་སྡེ་དག་གིས་སོ། །དགེ་སློང་མ་རྣམས་ཀྱིས་ཤེས་བྱ་བ་ནི་ཆོས་འདི་པ་རྣམས་ཀྱིས་སོ། །འདི་སྐད་ཅེས་བྱ་བ་ནི་འདི་སྐད་ཅེས་ཡང་དག་པར་བསྒོ་བ་ནའོ། །དགེ་སློང་མ་དག་འདི་སྐད་ཅེས་འདུན་པས་འགྲོ་བའོ་ཞེས་མ་སྨྲ་ཤིག་ཅེས་བྱ་བ་ནི་གཤེ་བའོ། །ལྟུང་བ་འདྲ་བ་ལས་ཤེས་བྱ་བ་ནི་ལྟུང་བ་མཚུངས་པ་ལགས་སོ། །དགེ་སློང་མ་ཁ་ཅིག་ནི་སྐྲོད་པར་བྱེད
9.138a
ལ་ཞེས་བྱ་བ་ནི་བཅུ་གཉིས་སྡེ་དག་གོ། །ཁ་ཅིག་ནི་སྐྲོད་པར་མི་བྱེད་ཅེས་བྱ་བ་ནི་དེ་དག་ཉིད་ཀྱིས་ལྷན་ཅིག་གནས་པ་དང ། ཉེ་གནས་དག་གོ། །དགེ་སློང་མ་རྣམས་ཀྱིས་ཚིག་འདི་སྐད་ཅེས་ཞེས་བྱ་བ་ནི་ཕུ་ནུ་མོ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་ཞེས་བྱ་བ་ནས། འཇིགས་པས་འགྲོ་བ་ཞེས་བྱ་བའི་བར་གྱི་ཚིག་གི་ལམ་འོར་ཅིག་ཅེས་བྱ་བའོ། །དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དེ་སྐད་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས་ཤེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་བཞམས་ཏེ་བསྒོ་བར་བྱའོ་ཞེས་བྱ་བ་ནི་ཇི་སྐད་སྔར་བསྒོ་བ་བཞིན་བྱ་བའོ། །དེ་དག་ལ་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གསོལ་བ་དང་བཞིའི་ལས་ཀྱིས་བསྒོ་བར་བྱའོ་ཞེས་བྱ་བ་ནི་ཇི་སྐད་སྔར་བསྒོ་བ་བཞིན་བྱ་བའོ། །ཡང་དག་པར་བསྒོ་བ་དེ་ནི་དེ་ཡིན། ཡང་དག་པར་བསྟན་པ་དེ་ནི་དེ་ཡིན་ནོ། །ཆོས་འདི་ཡང་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱིས་སྒྲར་གསུངས་པའོ། །ལན་གསུམ་གྱི་བར་གྱིས་འབྱུང་བར་འོས་པ་ཞེས་བྱ་བ་ནི་སྟོན་པ་དང་བཅས་པའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་ལ་འདི་སྐད་ཅེས་འདི་ན་དགེ་སློང་མ་ཁ་ཅིག་འདུན་པས་འགྲོ་བ་ཡོད། ཞེ་སྡང་དང ། གཏི་མུག་དང ། འཇིགས་པས་འགྲོ་བ་ཡོད་དོ་ཞེས་སྨྲ་ན་ཐམས་ཅད་དུ་ཉེས་བྱས་ཀྱི་ལྟུང་བར་འགྱུར་རོ། །བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་སྦོམ་པོར་འགྱུར་རོ། །གཞན་ནི་གོང་མ་ཇི་ལྟ་བ་དེ་བཞིན་དུ་བརྗོད་པར་བྱའོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་བཅུ་དགུ་པ་རྫོགས་སྷོ།། ་་་་་་་་་་་་་་།། སངས་རྒྱས་བཅོམ་ལྡན་འདས་ཀཽ་ཤམ་བིའི་གདངས་ཅན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཀཽ་ཤམ་བི་ན་ཤཱཀྱའི་བུ་མོ་དགེ་སློང་མ་འདུན་མ་ཞེས་བྱ་བ་ལ་ལྟུང་བ་བྱུང་ནས། དེ་ལ་ཚངས་པ་མཚུངས་པར་སྤྱོད་པ་དོན་འདོད་པ། ཕན་པར་འདོད་པ།
9.138b
བདེ་བར་འདོད་པ། རེག་པར་འདོད་པ། གྲུབ་པ་དང་བདེ་བར་འདོད་པ་རྣམས་ཀྱིས་སྨྲས་པ། འདུན་མ་ཁྱོད་ལ་ལྟུང་བ་བྱུང་གིས་ཤོགས་ཤིག་།དེས་དེ་དག་ལ་འདི་སྐད་ཅེས་ཁྱེད་ཅག་དགེ་ཡང་རུང་སྡིག་ཀྱང་རུང་ཁོ་མོ་ལ་ཅི་ཡང་མ་སྨྲ་ཤིག་།དེ་ཅིའི་ཕྱིར་ཞེ་ན། འདི་ལྟར་ཁྱེད་ཅག་ནི་རིགས་སྣ་ཚོགས་དང ། རུས་སྣ་ཚོགས་དང ། རྒྱུད་སྣ་ཚོགས་ལས་རབ་ཏུ་བྱུང་བ་དག་ཡིན་ཏེ། ཇི་ལྟར་སྟོན་ཀའི་དུས་ན་ཤིང་རྣམས་ཀྱི་ལོ་མ་སྐྱ་བོ་དག་རླུང་གིས་བསྡུས་ནས་གཅིག་ཏུ་སོགས་ཤིང་འཇོག་པ་དེ་བཞིན་དུ་ཁྱེད་ཅག་ཀྱང་རིགས་སྣ་ཚོགས་དང ། རུས་སྣ་ཚོགས་དང ། རྒྱུད་སྣ་ཚོགས་ལས་རབ་ཏུ་བྱུང་བ་དག་ཡིན་གྱི། ཁོ་མོའི་འཕགས་པས་ནི་བྱང་ཆུབ་མངོན་པར་སངས་རྒྱས་སོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་སློང་མ་འདུན་མ་ལ་བཞམས་ཏེ་བསྒོ་བར་བྱ་སྟེ། འདུན་མ་ཁྱོད་ལ་དགེ་སློང་མ་དོན་འདོད་པ། ་ཕན་པར་འདོད་པ་བདེ་བར་འདོད་པ། རེག་པར་འདོད་པ། གྲུབ་པ་དང་བདེ་བར་འདོད་པ་རྣམས་ཀྱིས་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་བདག་ཉིད་བརྗོད་པར་གྱིས་ཤིག་།དགེ་སློང་མ་རྣམས་ཀྱང་འདུན་མ་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས། ཁྱོད་ཀྱང་དགེ་སློང་མ་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲོས་ཤིག་།དེ་ཅིའི་ཕྱིར་ཞེ་ན། འདི་ལྟ་སྟེ། གཅིག་ལ་གཅིག་རྗོད་པར་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་དེ་ལྟ་བུས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འཕེལ་བར་འགྱུར་གྱིས། འདུན་མ་ཁྱོད་བདག་ཉིད་རྗོད་པར་བྱེད་པ་མ་ཡིན་པའི་ལས་ཀྱི་མཐའ་ཐོང་ཤིག་ཅེས་བསྒོ་བར་བྱའོ། །དེ་ལ་དགེ་སློང་མ་རྣམས་ཀྱིས་བསྒོ་བ་ན་གཞི་དེ་ཉིད་ཅེས་བྱ་བ་ནས།
9.139a
་ གཞན་ནི་བརྫུན་པའོ་ཞེས་བྱ་བའི་བར་གྱི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་མ་འདུན་མ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འདུན་མ་འདི་ལ་ཚངས་པ་མཚུངས་པར་སྤྱོད་པ་དོན་འཚལ་བ། ཕན་པར་འཚལ་བ། ་བདེ་བར་འཚལ་བ། རེག་པར་འཚལ་བ། གྲུབ་པ་དང་བདེ་བར་འཚལ་བ་རྣམས་ཀྱིས་ལྟུང་བ་ཤོགས་ཤིག་ཅེས་སྨྲས་ན། དེ་འདི་སྐད་ཅེས་ཕུ་ནུ་མོ་དག་དགེ་ཡང་རུང་སྡིག་ཀྱང་རུང་ཁོ་མོ་ལ་ཅི་ཡང་མ་སྨྲ་ཤིག་།ཁོ་མོ་ཡང་ཁྱེད་ཅག་ལ་དགེ་ཡང་རུང་སྡིག་ཀྱང་རུང་ཅི་ཡང་མི་སྨྲའོ་ཞེས་མཆི་ནས། དེ་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་ན། ་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། དགེ་སློང་མ་འདུན་མ་ལ་འདུན་མ་ཁྱོད་ལ་དགེ་སློང་མ་རྣམས་ཀྱིས་ཆོས་དང་འཐུན་པ་དང ། ་འདུལ་བ་དང་འཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་བདག་ཉིད་བརྗོད་པར་བྱ་བར་གྱིས་ཤིག་།དེ་ཅིའི་ཕྱིར་ཞེ་ན། དགེ་སློང་མ་རྣམས་ཀྱིས་ཁྱོད་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། ཁྱོད་ཀྱིས་དགེ་སློང་མ་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲ་བ་ཡིན་ནོ། །འདི་ལྟ་སྟེ། གཅིག་ལ་གཅིག་རྗོད
9.139b
པར་བྱེད་པ་དང ། གཅིག་ལ་གཅིག་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འཕེལ་བར་འགྱུར་རོ། །འདི་ནི་གསོལ་བའོ། །ལས་ནི་འདི་ལྟར་བྱས་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ་དགེ་སློང་མ་འདུན་མ་འདི་ལ་ཚངས་པ་མཚུངས་པར་སྤྱོད་པ། དོན་འཚལ་བ། ཕན་པར་འཚལ་བ། བདེ་བར་འཚལ་བ། རེག་པར་འཚལ་བ། གྲུབ་པ་དང་བདེ་བར་འཚལ་བ་རྣམས་ཀྱིས་ལྟུང་བ་ཤོགས་ཤིག་ཅེས་སྨྲས་ན། དེ་འདི་སྐད་ཅེས་ཕུ་ནུ་མོ་དག་དགེ་ཡང་རུང་སྡིག་ཀྱང་རུང་ཁོ་མོ་ལ་ཅི་ཡང་མ་སྨྲ་ཤིག་།ཁོ་མོ་ཡང་ཁྱེད་ཅག་ལ་དགེ་ཡང་རུང་སྡིག་ཀྱང་རུང་ཅི་ཡང་མི་སྨྲའོ་ཞེས་མཆི་ནས། དེ་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས། འདི་ཉིད་བདེན་གྱི། གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱིས། དེའི་སླད་དུ་འཕགས་མའི་དགེ་འདུན་གྱིས་དགེ་སློང་མ་འདུན་མ་ལ་འདུན་མ་ཁྱོད་ལ་དགེ་སློང་མ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་བདག་ཉིད་བརྗོད་པར་བྱ་བར་གྱིས་ཤིག་།དེ་ཅིའི་ཕྱིར་ཞེ་ན། དགེ་སློང་མ་རྣམས་ཀྱིས་ཁྱོད་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། ་ཁྱོད་ཀྱིས་དགེ་སློང་མ་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲ་བ་ཡིན་ནོ། །འདི་ལྟ་སྟེ་གཅིག་ལ་གཅིག་བརྗོད་པར་བྱེད་པ་དང ། གཅིག་ལ་གཅིག་རྗེས་སུ་སྟོན་པ་དང ། ་གཅིག་གིས་གཅིག་ལྟུང་བ་ལས་སློང་བ་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འཕེལ་བར་འགྱུར་རོ་ཞེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། དགེ་སློང་མ་གང་དགེ་སློང་མ་འདུན
9.140a
མ་འདི་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་དོན་འདི་ཉིད་ལན་གཉིས་ལན་གསུམ་གྱི་བར་དུ་བཟླས་སོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མ་འདུན་མ་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །དེ་ལ་གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་ཞེས་བྱ་བ་ནས། འདི་ཉིད་བདེན་གྱི་གཞན་ནི་བརྫུན་པའོ་ཞེས་བྱ་བའི་བར་གྱི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། ་བསླབ་པ་བཅའ་བའི་བར་དུ་མཛད་དེ། འདི་ན་དགེ་སློང་མ་ཁ་ཅིག་བཀའ་བློ་མི་བདེ་བའི་རང་བཞིན་དུ་གྱུར་ལ། དེ་ལ་གདོན་པར་གཏོགས་པ་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་དགེ་སློང་མ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་བྱེད་དེ། འཕགས་མ་དག་དགེ་ཡང་རུང་སྡིག་ཀྱང་རུང་ཁོ་མོ་ལ་ཅི་ཡང་མ་སྨྲ་ཤིག་།ཁོ་མོ་ཡང་དགེ་ཡང་རུང་སྡིག་ཀྱང་རུང་འཕགས་མ་དག་ལ་ཅི་ཡང་མི་སྨྲའོ། །འཕགས་མ་དག་གིས་བདག་ལ་ཚིག་གི་ལམ་ཐོང་ཤིག་།ཁྱེད་ཅག་ལ་ཡང་བདག་གིས་སྨྲས་པས་ཅི་ཞིག་བྱ་ཞེས་ཟེར་བ་ན། དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་འཕགས་མ་ཁྱོད་ལ་གདོན་པར་གཏོགས་པའི་བསླབ་པའི་གཞི་རྣམས་དང ། བདེ་བར་གཤེགས་པའི་མདོར་གཏོགས་པ་རྣམས་དགེ་སློང་མ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་འཕགས་མ་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག་།འཕགས་མ་ལ་དགེ་སློང་མ་རྣམས་ཆོས་དང་འཐུན
9.140b
པ་དང ། འདུལ་བ་དང་འཐུན་པར་སྨྲ་བ་ན། འཕགས་མས་ཀྱང་དགེ་སློང་མ་རྣམས་ལ་ཆོས་དང་འཐུན་པ་དང ། འདུལ་བ་དང་འཐུན་པར་སྨྲོས་ཤིག་།དེ་ཅིའི་ཕྱིར་ཞེ་ན། འདི་ལྟ་སྟེ། གཅིག་ལ་གཅིག་རྗོད་པར་བྱེད་པ་དང ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང ། གཅིག་གིས་གཅིག་ལྟུང་བ་ལས་སློང་བ་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འཕེལ་བར་འགྱུར་གྱིས། འཕགས་མ་ཁྱོད་ཀྱིས་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་དེ་ལྟ་བུ་ཐོང་ཤིག་ཅེས་གལ་ཏེ་དགེ་སློང་མ་དེ་ལ་དགེ་སློང་མ་རྣམས་ཀྱིས་སྨྲས་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཆོས་འདི་ཡང་ལན་གསུམ་གྱི་བར་གྱིས་འབྱུང་བར་འོས་པའི་དགེ་འདུན་ལྷག་མའོ། །དགེ་སློང་མ་ཞེས་བྱ་བ་ནི་འདུན་མའོ། །བཀའ་བློ་མི་བདེ་བ་ཞེས་བྱ་བ་ནི་ཚིག་གི་ལམ་འཐུན་པ་རྗེས་སུ་མཉན་པར་བྱ་བ་འཚམ་པ་དྲུང་པོར་འཇུག་པ་མི་འཛིན་པ་དང ། མི་མཐུན་པར་འཛིན་པའོ། །གདོན་པ་ཞེས་བྱ་བ་ནི་སོ་སོར་ཐར་པའི་མདོར་བསྟན་པའོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །མདོ་ཞེས་བྱ་བ་ནི་སངས་རྒྱས་ཀྱིས་གསུངས་པ་འམ། ཉན་ཐོས་ཀྱིས་སྨྲས་པ་སྟེ། བསླབ་པའི་གཞི་ཕས་ཕམ་པར་འགྱུར་བ་བརྒྱད་དང ། དགེ་འདུན་ལྷག་མ་ཉི་ཤུ་དང ། སྤང་བ་སུམ་ཅུ་རྩ་གསུམ་དང ། ལྟུང་བྱེད་བརྒྱ་བརྒྱད་བཅུ་དང ། སོ་སོར་བཤགས་པར་བྱ་བ་བཅུ་གཅིག་དང ། བསླབ་པ་མང་པོ་དང ། རྩོད་པ་ཞི་བར་བྱ་བའི་ཆོས་བདུན་དང ། འདུལ་བའི་གཞི་བཅུ་བདུན་དང ། ཕྲན་ཚེགས་དང ། སིལ་བུ་དང ། གླེང་གཞི་དང ། འདུལ་བ་མ་མོ་དང ། འདུལ་བ་གཅིག་ལས་འཕྲོས་པ་དང ། འདུལ་བ་ལྔ་པ་དང ། ་འདུལ་བ་བཅུ་དྲུག་པ་དང ། བྲམ་ཟེའི་བུ་མོ་དང ། ཉེ་བར་འཁོར་གྱིས་ཞུས་པར་གཏོགས་པ་དག་ལེགས་པར་སྦྱར་བའོ། །དགེ་སློང་མ་རྣམས་ཀྱིས་ཆོས་དང་འཐུན་པ་དང ། འདུལ་བ་དང་འཐུན་པས་ཤེས་བྱ་བ་ནི་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་དེ་ལྟ་བུའི་ལས་གང་ཡིན་པས་སོ། །
9.141a
སྨྲས་པ་ནི་ཞེས་བྱ་བ་ནི་བདེ་བ་ལ་སྦྱར་བ་ནའོ། །བདག་ཉིད་བརྗོད་པར་བྱ་བ་མ་ཡིན་པར་བྱེད་ན་ཞེས་བྱ་བ་ནི་དེའི་གདམས་ངག་དང ། བསྟན་པ་ལས་བདག་ཉིད་གཞན་དུ་སེལ་བའོ། །ཕུ་ནུ་མོ་དག་ཁོ་མོ་ལ་ཅི་ཡང་མ་སྨྲ་ཤིག་ཅེས་བྱ་བ་ནི་བདག་ཉིད་ཕྱིར་ཞིང་ལྷག་པར་བཀའ་བློ་མི་བདེ་བ་ལ་འཇོག་པའོ། །དགེ་ཡང་རུང་ཞེས་བྱ་བ་ནི་མི་དགེ་བ་ལ་འཇོག་པའོ། །སྡིག་ཀྱང་རུང་ཞེས་བྱ་བ་ནི་སྡིག་པའི་ལས་མི་སློང་བའོ། །ཁོ་མོ་ཡང་ཕུ་ནུ་མོ་རྣམས་ལ་ཅི་ཡང་མི་སྨྲའོ་ཞེས་བྱ་བ་ནི་བདག་ཉིད་ཕྱིར་ཞིང་ལྷག་པར་གཅིག་ལ་གཅིག་འདོམས་ཤིང་རྗེས་སུ་སྟོན་པ་སྤོང་བའོ། །དགེ་ཡང་རུང་བདག་ཀྱང་ཕུ་ནུ་མོ་དག་ལ་ཞེས་བྱ་བ་ནི་དགེ་བ་ལ་མི་འཇོག་པའོ། །སྡིག་ཀྱང་རུང་བདག་ཀྱང་ཕུ་ནུ་མོ་དག་ལ་ཞེས་བྱ་བ་ནི་སྡིག་པ་ལས་མི་སློང་བའོ། །འཕགས་མ་དག་ཐོང་ཤིག་ཅེས་བྱ་བ་ནི་རིང་དུ་འོར་ཅིག་ཅེས་བྱ་བ་སྟེ། ཅི་ཁྱོད་ཅག་ཅེས་བྱ་བ་ནི་རྒྱུ་འདི་དག་གིས་བདག་གི་རྗེས་སུ་སྟོན་པར་བསྐོས་སམ་ཞེས་བྱ་བའོ། །དགེ་སློང་མ་དེ་ལ་ཞེས་བྱ་བ་ནི་འདུན་མ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་དག་གིས་སོ། །གཞི་དེ་གཏོང་བར་བྱ་བའི་ཕྱིར་ཞེས་བྱ་བ་ནི་སྔ་མ་བཞིན་དུའོ། །དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་བཞམས་ཏེ་བསྒོ་བས་ཇི་ལྟར་སྔ་མ་བཞིན་དུ་བསྒོ་བ་ནའོ། །དེ་ལ་བཞམས་ཏེ་བསྒོ་བ་ན་གཞི་དེ་གཏོང་ན་ཞེས་བྱ་བའི་བར་སྔ་མ་བཞིན་ནོ། །དེ་ལྟ་ན་ལེགས་ཤེས་བྱ་བ་ནི་དེ་ལྟ་ན་བཟང་བའོ། །གལ་ཏེ་མི་གཏོང་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བས་ཇི་ལྟར་སྔ་མ་བཞིན་དུ་བསྒོ་བ་ནའོ། །ཡང་དག་པར་བསྒོ་བ་དེ་ནི་དེ་ཡིན་ནོ། །ཆོས་འདི་ཡང་ཞེས་བྱ་བ་ནི་ཆོས་མ་ཡིན་པ་འདི་ཆོས་ཀྱི་སྒྲར་གསུངས་པའོ། །ལན་གསུམ་གྱི་བར་གྱིས་འབྱུང་བ་དང་བཅས་པ་ཞེས་བྱ་བ་ནི་འབྱུང་བར་འོས་པའོ། །དགེ་འདུན་ལྷག་མ་ཞེས་བྱ་བ་ནི་ལྟུང་བ་འདི་དགེ་འདུན་སྡེ་གཉིས་ལ་རག་ལས་པ་ཡིན། དགེ་འདུན་སྡེ་གཉིས་ལ་རྟོན་པ་ཡིན། དགེ་འདུན་སྡེ་གཉིས་ཀྱིས་དེ་ལྟུང་བ་ལས་སློང་བར་འགྱུར་གྱིས་གང་ཟག་ལས་ནི་མ་ཡིན
9.141b
པའོ། །འདི་ལྟར་ཕས་ཕམ་པར་འགྱུར་བ་བརྒྱད་པོ་དག་ནི་ལྷག་མ་མེད་པ་ཡིན་ལ་འདི་ནི་ལྷག་མ་དང་བཅས་པ་ཡིན་པས་དེ་བས་ན་དགེ་འདུན་ལྷག་མ་ཞེས་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་རྣམས་ཀྱིས་སྨྲས་པ་ན་འདི་སྐད་ཅེས་ཕུ་ནུ་མོ་དག་ཁོ་མོ་ལ་ཅི་ཡང་མ་སྨྲ་ཤིག་ཅེས། སྨྲ་ན་ཐམས་ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གཞི་དེ་མི་གཏོང་ན་སྦོམ་པོའོ། །ལས་བརྗོད་པ་དང་པོ་བརྗོད་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་སྦོམ་པོའོ། །ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གལ་ཏེ་གཏོང་ན་ཏེ་ལྟ་ན་ལེགས། གལ་ཏེ་མི་གཏོང་ན་བརྗོད་པ་རྫོགས་ན་སྦོམ་པོའོ། །ལས་བརྗོད་པ་གསུམ་པ་བརྗོད་པ་ན་མ་རྫོགས་པར་ཆོས་མ་ཡིན་པས་འཐུན་པར་བྱེད་པ་དང ། ཆོས་ཀྱིས་མི་མཐུན་པར་བྱེད་དེ། ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་བཞིན་མི་བྱེད་ན་ལྟུང་བ་མེད་དོ། །ལས་བརྗོད་པ་བཞི་པ་བརྗོད་པ་ན་རྫོགས་ནས་ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་བཞིན་དུ་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་མ་དེས་སྟན་དེ་ཉིད་ལ་འདུག་བཞིན་དུ་འདི་སྐད་ཅེས་འཕགས་མ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱའོ། །བརྗོད་ན་དེ་ལྟ་ན་ལེགས། གལ་ཏེ་མ་རྗོད་ན་དེས་ལྟུང་བ་བཤགས་ཤིང་དེ་སོ་སོར་མ་བཤགས་པར་དེས་དེའི་འོག་ཏུ་གསོལ་བ་དང ། གསོལ་བ་དང་གཉིས་དང་གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །དགེ་འདུན་ལྷག་མ་ཉི་ཤུ་པ་རྫོགས་ཏེ། དགེ་སློང་མའི་འདུལ་བ་རྣམ་པར་འབྱེད་པ་ལས་དགེ་འདུན་ལྷག་མ་རྣམས་རྫོགས་སྷོ།། ་་་་་་་་་་་་་་།། སྡོམ་ལ། ཞག་བཅུ་བཅང་དང་འབྲལ་མི་བྱ། །ཟླ་བ་ཉེ་དུ་མིན་མི་བསླང ། །བླ་གོས་མཐང་གོས་བཅས་པ་དང ། །ལྤགས་པ་གཉིས་དང་ཕོ་ཉ་བསྐུར། །མོན་དར་སར་པ་གསེར་དངུལ་དང ། །སྣ་ཚོགས་ཉོ་ཚོང་བྱེད་པའོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན
9.142a
བཞུགས་སོ། །དེའི་ཚེ་དགེ་སློང་མ་རྣམས་ལ་ཆོས་གོས་མང་པོ་འདི་ལྟ་བུ་འདི་བྱུང་སྟེ། ཆོས་གོས་གཞན་གྱིས་ནི་མཁན་མོ་དང ། སློབ་དཔོན་དག་ལ་བལྟ་བའི་ཕྱིར་འགྲོ་བར་བྱེད། ཆོས་གོས་གཞན་གྱིས་ནི་གཙུག་ལག་ཁང་དུ་ཆག་ཆག་འདེབས་པར་བྱེད། ཕྱག་དར་འཕྱག་པར་བྱེད། ཆོས་གོས་གཞན་གྱིས་ནི་བའི་ལྕི་བ་སར་པའི་བྱུག་པས་སྐུད་པར་བྱེད། ཆོས་གོས་གཞན་གྱིས་ནི་བཤང་བའི་ས་དང ། གཅི་བའི་ས་དག་འཕྱག་པར་བྱེད། ཆོས་གོས་གཞན་གྱིས་ནི་སོ་ཤིང་འདོར་བར་བྱེད། ཆོས་གོས་གཞན་གྱིས་ནི་གནས་མལ་དང ། སྣོད་སྤྱད་འདྲིམ་པར་བྱེད། ཆོས་གོས་གཞན་གྱིས་ནི་གྲོང་དུ་བསོད་སྙོམས་ལ་འཇུག་པར་བྱེད། ཆོས་གོས་གཞན་གྱིས་ནི་ཟས་ཀྱི་གྲལ་དུ་བཀད་པར་བྱེད། ཆོས་གོས་གཞན་གྱིས་ནི་ཉིན་པར་ཆོས་ཉན་པར་བྱེད། ཆོས་གོས་གཞན་གྱིས་ནི་མཚན་མོ་ཆོས་ཉན་པར་བྱེད། ཆོས་གོས་གཞན་གྱིས་ནི་སྟོན་པའི་སྤྱན་སྔ་ནས། གདམས་ངག་དང ། རྗེས་སུ་བསྟན་པ་དག་སོ་སོར་ཉམས་སུ་མྱོང་བར་བྱེད་པ་ན། དགེ་སློང་མ་དོན་ཉུང་བ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། ་སྐབས་འདི་ལ་དགེ་སློང་མའི་དགེ་འདུན་བསྡུ་བ་མཛད་དེ། ངའི་ཉན་ཐོས་མ་རྣམས་རྣམ་པར་ཤེས་པར་འགྱུར་བ་དང ། བསླབ་པའི་གཞི་ཡང་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་ཀྱི་མི་མཁྱེན་པར་ནི་མ་ཡིན། དུས་སུ་ཡིན་གྱི་དུས་མ་ཡིན་པར་མ་ཡིན། དོན་དང་ལྡན་པར་ཡིན་གྱི་དོན་དང་མི་ལྡན་པ་ནི་སངས་རྒྱས་བཅོམ་ལྡན་འདས་རྣམས་ཆུ་ལོན་གྱིས་ཟློག་པར་མཛད་པ་ཡིན་པས་འདི་ལྟ་སྟེ། དོན་དང་ལྡན་པའི་ཕྱིར་སངས་རྒྱས་བཅོམ་ལྡན་འདས་ཀྱིས་དགེ་སློང་མ་རྣམས་ལ་རྨ་བ་རྨེད་པར་མཛད་དེ། དགེ་སློང་མ་དག་ཁྱེད་ཅག་ལ་ཆོས་གོས་མང་པོ་འདི་ལྟ་བུ་འདི་བྱུང་བ་བདེན་ནམ། བཅོམ་ལྡན་འདས་མད་ལགས་སོ། །སངས་རྒྱས་བཅོམ་ལྡན་འདས་ཀྱིས
9.142b
གསོ་དཀའ་བ་དང ། དགང་དཀའ་བ་དང ། འདོད་པ་ཆེ་བ་དང ། ཆོག་མི་ཤེས་པ་དང ། སྦྱངས་པའི་ཡོན་ཏན་ཅན་མ་ཡིན་པ་དང ། ཚོད་མི་ཤེས་པའི་རྣམ་པར་སྨད་པས་རྣམ་པར་སྨད་པ་མཛད་ནས། དགེ་སློང་མ་རྣམས་ལ་གསོ་སླ་བ་དང ། དགང་སླ་བ་དང ། འདོད་པ་ཆུང་བ་དང ། ཆོག་ཤེས་པ་དང ། སྦྱངས་པའི་ཡོན་ཏན་དང ། ཚོད་ཤེས་པའི་བསྔགས་པ་གསུངས་ཏེ། ་དགེ་སློང་མ་རྣམས་ཀྱི་བསླབ་པའི་གཞི་བཅའ་བ་མཛད་དེ། དགེ་སློང་མ་ཆོས་གོས་ཟིན་པས་སྲ་བརྐྱང་ཕྱུང་ན་ཞག་བཅུའི་བར་དུ་གོས་ལྷག་པ་རུང་བར་མ་བྱས་པ་བཅང་བར་བྱའོ། །དེ་ལས་ལྷག་པར་འཆང་ན་སྤང་བའི་ལྟུང་བྱེད་དོ། །ཆོས་གོས་ཟིན་པ་ཞེས་བྱ་བ་ལ་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡང་ཡོད། སྲ་བརྐྱང་ཕྱུང་ལ་ཆོས་གོས་མ་ཟིན་པ་ཡང་ཡོད། ཆོས་གོས་ཟིན་ལ་སྲ་བརྐྱང་ཕྱུང་བ་ཡང་ཡོད། ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཡང་ཡོད་དོ། །ཆོས་གོས་ཟིན་ལ་སྲ་བརྐྱང་མ་ཕྱུང་བ་ཇི་ལྟ་བུ་ཞེ་ན། འདི་ལྟ་སྟེ། ཡང་དགེ་སློང་མས་ཆོས་གོས་དག་བཀྲུ་བ་དང ། དྲ་བ་དང ། དྲུབ་པ་དང ། ཁ་བསྒྱུར་ཟིན་ལ། དགེ་འདུན་གྱིས་སྲ་བརྐྱང་མ་ཕྱུང་བ་ཡིན་ཏེ། དེ་ལྟ་བུ་ནི་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡིན་ནོ། །སྲ་བརྐྱང་ཕྱུང་ལ་ཆོས་གོས་མ་ཟིན་པ་ཇི་ལྟ་བུ་ཞེ་ན། འདི་ལྟ་སྟེ། ཡང་དགེ་སློང་མའི་དགེ་འདུན་གྱིས་སྲ་བརྐྱང་ཕྱུང་ཟིན་ལ། དགེ་སློང་མས་ཆོས་གོས་དག་བཀྲུ་བ་དང ། དྲ་བ་དང ། དྲུབ་པ་དང ། ཁ་བསྒྱུར་མ་ཟིན་པ་སྟེ། དེ་ལྟ་བུ་ནི་སྲ་བརྐྱང་ཕྱུང་ལ་ཆོས་གོས་མ་ཟིན་པ་ཡིན་ནོ། །ཆོས་གོས་ཟིན་ལ་སྲ་བརྐྱང་ཕྱུང་བ་ཇི་ལྟ་བུ་ཞེ་ན། འདི་ལྟ་སྟེ། ཡང་དགེ་སློང་མས་ཆོས་གོས་དག་བཀྲུ་བ་དང ། དྲ་བ་དང ། དྲུབ་པ་དང ། ཁ་བསྒྱུར་བ་ཟིན་ལ། དགེ་སློང་མའི་དགེ་འདུན་གྱིས་ཀྱང་སྲ་བརྐྱང་ཕྱུང་བ་ཡིན་ཏེ། དེ་ལྟ་བུ་ནི་ཆོས་གོས་ཟིན་ལ་སྲ་བརྐྱང་ཕྱུང་བ་ཡིན་ནོ། །ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཇི་ལྟ་བུ་ཞེ་ན། རྣམ་པ་དེ་དག་མ་གཏོགས་པའོ། །དགེ་སློང་མ་ཞེས་བྱ་བ་ནི་ཆོས་འདི་པ་དག་གིའོ། །ཞག་བཅུའི་བར་དུ་ཞེས་བྱ་བ་ནི་ཉིན་ཞག་བཅུའོ། །གོས་ལྷག་པ་ཞེས་བྱ་བ་ནི་བྱིན་གྱིས་བརླབས་པ་ལྔ་ལས་ལྷག་པའོ། །རུང་བར་མ་བྱས་པ
9.143a
ཞེས་བྱ་བ་ནི་གང་ཞིག་སུའི་མིང་གིས་ཀྱང་རུང་བར་མ་བྱས་ལ་བདག་ཉིད་ཀྱིའོ་ཞེས་བཅངས་པའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བ་ཞེས་བྱ་བ་ནི་དམྱལ་བ་དང ། དུད་འགྲོ་དང ། ཡི་དགས་དང ། ་ངན་སོང་དང ། ངན་འགྲོ་ལོག་པར་ལྟུང་བ་རྣམས་སུ་སྟེ། དེ་བས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། འདི་ལྟ་སྟེ། ཡང་དགེ་སློང་མས་ཚེས་ལ་གོས་རྙེད་ན་དགེ་སློང་མ་དེས་གོས་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། རུང་བར་བྱ་བ་འམ། གཏང་བར་བྱ་བ་འམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། རུང་བར་མི་བྱེད་དམ། གཏོང་བར་མི་བྱེད་དམ། གཞན་ལ་བྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །ཇི་ལྟར་ཚེས་ལ་གོས་རྙེད་ལ། དེ་བཞིན་དུ་ཚེས་གཉིས་དང ། གསུམ་དང་ཞེས་བྱ་བ་ནས་བཅུའི་ནང་དུ་ཞེས་བྱ་བའི་བར་དུ་སྟེ། དགེ་སློང་མ་དེས་གོས་དེ་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། རུང་བར་བྱ་བ་འམ། གཏང་བར་བྱའོ། །བྱིན་གྱིས་བརླབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དགེ་སློང་མས་ཚེས་ལ་གོས་གཅིག་རྙེད་ལ། ཕྱི་དེ་ཉིན་པར་གཅིག་རྙེད་ན་དགེ་སློང་མ་དེས་གོས་སྔ་མ་བྱིན་གྱིས་བརླབ་པར་བྱ་ཞིང ། ཕྱི་མ་ཤོས་རུང་བར་བྱ་བ་འམ། བྱིན་གྱིས་བརླབ་པར་བྱའོ། །ཡང་ན་གོས་ཕྱི་མ་ཤོས་བྱིན་གྱིས་བརླབ་པར་བྱ་ཞིང་སྔ་མ་རུང་བར་བྱའོ། །བྱིན་གྱིས་རློབ་པར་མི་བྱེད་དམ། རུང་བར་མི་བྱེད་དམ། གཏོང་བར་མི་བྱེད་ན། ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དེ་བཞིན་དུ་དགེ་སློང་མས་ཚེས་དགུ་ལ་གོས་ཤིག་རྙེད་ལ།
9.143b
ཚེས་བཅུ་ལ་གཅིག་རྙེད་ན་དགེ་སློང་མ་དེས་གོས་སྔ་མ་བྱིན་གྱིས་བརླབ་པར་བྱ་ཞིང ། ཕྱི་མ་ཤོས་རུང་བར་བྱ་བ་འམ། གཏང་བར་བྱའོ་ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་ཚེས་གཅིག་ལ་གོས་གཉིས་རྙེད་ལ། ཚེས་གཉིས་ལ་ཡང་གཉིས་རྙེད་ན་དགེ་སློང་མ་དེས་གོས་སྔ་མ་གཉིས་བྱིན་གྱིས་བརླབ་པར་བྱ་ཞིང ། གོས་ཕྱི་མ་ཤོས་གཉིས་རུང་བར་བྱ་བ་འམ། གཏང་བར་བྱའོ། །རུང་བར་མི་བྱེད་དམ། གཏོང་བར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དགེ་སློང་མས་ཚེས་དགུ་ལ་གོས་གཉིས་རྙེད་ལ། ཚེས་བཅུ་ལ་ཡང་གཉིས་རྙེད་ན་ཞེས་རྒྱས་པར་བརྗོད་པར་བྱའོ། །དགེ་སློང་མས་ཚེས་གཅིག་ལ་གོས་རབ་ཏུ་མང་པོ་རྙེད་ལ། ཚེས་གཉིས་ལ་ཡང་རབ་ཏུ་མང་པོ་རྙེད་ན་དགེ་སློང་མ་དེས་སྔ་མའི་གོས་རབ་ཏུ་མང་པོ་དག་བྱིན་གིས་བརླབ་པར་བྱ་ཞིང་ཕྱི་མ་ཤོས་ཀྱི་གོས་རབ་ཏུ་མང་པོ་དག་རུང་བར་བྱ་བ་འམ། གཏང་བར་བྱའོ། །ཡང་ན་ཕྱི་མ་ཤོས་ཀྱི་གོས་རབ་ཏུ་མང་པོ་དག་བྱིན་གྱིས་བརླབ་པར་བྱ་ཞིང་སྔ་མའི་གོས་རབ་ཏུ་མང་པོ་དག་རུང་བར་བྱ་བ་འམ། ་གཏང་བར་བྱའོ། །བྱིན་གྱིས་རློབ་པར་མི་བྱེད་དམ། རུང་བར་མི་བྱེད་དམ། གཏོང་བར་མི་བྱེད་ན། ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དགེ་སློང་མས་ཚེས་དགུ་ལ་གོས་རབ་ཏུ་མང་པོ་དག་རྙེད་ལ། ཚེས་བཅུ་ལ་ཡང་གོས་རབ་ཏུ་མང་པོ་རྙེད་ན་ཞེས་བྱ་བ་ནས་དེ་བཞིན་དུ་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མའི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གོས་གཞན་ཞིག་རྙེད་ན་དེ་ཡང་སྔ་མའི་ཤན་གྱིས་སྤང་བར་འགྱུར་རོ། །དགེ་སློང་མའི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ། ལྟུང་བ་མ་བཤགས་པར་གོས་གཞན་ཞིག་རྙེད་ན་དེ་ཡང་སྔ་མའི་ཤན་གྱིས་སྤང་བར
9.144a
འགྱུར་རོ། །དགེ་སློང་མའི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གོས་གཞན་ཞིག་རྙེད་ན་དེ་ཡང་སྔ་མའི་ཤན་གྱིས་སྤང་བར་འགྱུར་རོ། །དགེ་སློང་མའི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གོས་གཞན་ཞིག་རྙེད་ན་ལྟུང་བ་མེད་དོ། །ལས་དང་པོ་པ་དང ། སྨྱོས་པ་དང ། སེམས་འཁྲུགས་པ་དང ། ཚོར་བས་ཉེན་པ་ལ་ནི་ལྟུང་བ་མེད་དོ། །དགེ་སློང་མའི་འདུལ་བ་རྣམ་པར་འབྱེད་པ་ལས། སྤང་བའི་ལྟུང་བྱེད་དང་པོ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དགེ་སློང་མ་དབྱར་གནས་པར་ཁས་བླངས་པས་དབྱར་མཐར་ཕྱིན་པར་གནས་པ་འགའ་ཞིག་གིས་ཆོས་གོས་དག་རྙེད་པར་གྱུར་ནས། དེས་དེ་དག་བཀྲུས་ཤིང་ཁ་བསྒྱུར་ཏེ། གཏུར་བུ་བཀང་ནས་བམ་པོར་བསྒྲེས་ཏེ། བླ་གོས་དང ། མཐང་གོས་དང་བཅས་པས་ལྗོངས་རྒྱུ་ཞིང་སོང་ནས། དེ་ལྗོངས་རྒྱུ་ཞིང་སོང་བ་ན་མ་སྦས་ཤིང་སྦེད་དུ་མ་བཅུག་པར་གྱུར་ཏོ། །དགེ་སློང་མ་གནས་ན་གཉུག་མར་གནས་པ་དག་ཀྱང་ཆོས་གོས་དེ་དག་སྐེམས་པ་དང ། སྤྲུག་པས་བྱ་བ་མང་བ་དང ། བྱེད་པ་མང་བར་གྱུར་ཅིང་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱེད་པ་དང ། ནང་གི་སེམས་ཀྱི་ཞི་གནས་གཏོང་བར་བྱེད་པ་ནས་དགེ་སློང་མ་དོན་ཉུང་བ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མ་ཆོས་གོས་ཟིན་པས་སྲ་བརྐྱང་ཕྱུང་ནས་ཆོས་གོས་ལྔ་ལས་གང་ཡང་རུང་བ་ཞིག་དང ། མཚམས་ཀྱི་ཕྱི་རོལ་དུ་འབྲལ་བར་བྱེད་ན་སྤང་བའི་ལྟུང་བྱེད་དོ། །ཞེས་དེ་ལྟར་བསླབ་པའི་གཞི་བཅའ་བ་མཛད་དོ། །གང་གི་ཚེ་བཅོམ་ལྡན་འདས་ཀྱིས་རྒྱལ་པོའི་ཁབ་དུ་གནས་བརྟན་ཆེན་པོ་འོད་སྲུང་ལ་བརྟེན་ནས་སྣམ་སྦྱར་དང་འབྲལ་བར་མི་འགྱུར་བའི་གནང་བ་བྱིན་ནས། ཡང་བསླབ་པའི
9.144b
གཞི་བཅའ་བ་མཛད་པ་དེའི་ཚེ་དགེ་སློང་མ་གནས་བརྟན་གནས་བརྟན་དག་བཅོམ་ལྡན་འདས་ག་ན་བ་དེར་སོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་གིས་བསླབ་པའི་གཞི་འདི་ཇི་ལྟར་གདོན་པར་བགྱི། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་སྔ་མ་ནི་བཅས་པའོ། །འདི་ནི་གནང་བ་ཡིན་པས་ངའི་ཉན་ཐོས་མ་རྣམས་ཀྱིས་ཡང་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་མ་ཆོས་གོས་ཟིན་ཏེ་སྲ་བརྐྱང་ཕྱུང་ནས་ཆོས་གོས་ལྔ་ལས་གང་ཡང་རུང་བ་ཞིག་དང་ནུབ་གཅིག་མཚམས་ཀྱི་ཕྱི་རོལ་དུ་བྲལ་ན་དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བྱེད་དོ། །ཆོས་གོས་ཟིན་པ་ཞེས་བྱ་བ་ནི་གོང་མ་ཇི་ལྟ་བ་བཞིན་ནོ། །ཆོས་གོས་ལྔ་ཞེས་བྱ་བ་ནི་སྣམ་སྦྱར་དང ། ་བླ་གོས་ལ་སོགས་པ་ཆོས་གོས་བྱིན་གྱིས་བརླབས་པ་གང་ཡང་རུང་བ་དག་གོ། །མཚམས་ཀྱི་ཕྱི་རོལ་དུ་བྲལ་ན་ཞེས་བྱ་བ་ནི་སྐྱ་རེང་འཆར་བར་བྱེད་ནའོ། །དགེ་འདུན་གྱིས་གནང་བ་མ་གཏོགས་ཏེ་ཞེས་བྱ་བ་ནི་དགེ་འདུན་གྱིས་གནང་བ་བཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་ལྟུང་བའི་བར་སྡོམ་ལ། ་ཁྱིམ་གཅིག་པ་དང་ཁྱིམ་གཉིས་དང ། །ཚོགས་དང་སབ་ར་རྩིག་པ་དང ། །འོབས་ཀྱི་ཉེན་ཀོར་དག་དང་ནི། །ཁྱིམ་དང་ཚོང་ཁང་ཚོང་རྡལ་དང ། །ཡང་ཐོག་ཀུན་རྒྱུ་གཡུལ་དང་ནི། །གཡུལ་ཚོམས་མུ་སྟེགས་ཤིང་རྟ་དང ། །གྲུ་དང་ཀུན་དགའ་ར་བ་དང ། །ལྗོན་ཤིང་དང་ནི་ཞུས་པའོ། །ཁྱིམ་གཅིག་པའི་གྲོང་ནི་གང ། ཁྱིམ་གཉིས་པའི་གྲོང་ནི་གང ། ཁྱིམ་གྱི་ཚོགས་ནི་གང ། རིབ་མས་བསྐོར་བའི་གྲོང་ནི་གང ། རྩིག་པས་བསྐོར་བའི་གྲོང་ནི་གང ། དེ་བཞིན་དུ་འོབས་ཀྱིས་བསྐོར་བའི་གྲོང་དང ། གྲོང་ཉེན་ཀོར་གཅིག་པ་དང །
9.145a
གྲོང་ཉེན་ཀོར་ཐ་དད་པ་དང ། ་གྲོང་རབ་ཏུ་མང་པོ་ཉེན་ཀོར་གཅིག་པ་དང ། གྲོང་རབ་ཏུ་མང་པོ་ཉེན་ཀོར་ཐ་དད་པ་དང ། ཁྱིམ་ཉེན་ཀོར་གཅིག་པ་ནི་གང ། ཁྱིམ་ཉེན་ཀོར་ཐ་དད་པ་ནི་གང ། ཁྱིམ་རབ་ཏུ་མང་པོ་ཉེན་ཀོར་གཅིག་པ་དང ། ཁྱིམ་རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་ཚོང་ཁང་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ། དེ་བཞིན་དུ་ཚོང་རྡལ་ཉེན་ཀོར་གཅིག་པ་དང ། ཚོང་རྡལ་ཉེན་ཀོར་ཐ་དད་པ་ཡང་ཡོད། ཚོང་རྡལ་རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་ཡང་ཐོག་ཉེན་ཀོར་གཅིག་པ་དང ། ཡང་ཐོག་ཉེན་ཀོར་ཐ་དད་པ་ཡང་ཡོད། ཡང་ཐོག་རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། ་དེ་བཞིན་དུ་གཡུལ་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། གཡུལ་རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་གཡུལ་ཚོམས་ཉེན་ཀོར་གཅིག་པ་དང ། གཡུལ་ཚོམས་ཉེན་ཀོར་ཐ་དད་པ་དང ། གཡུལ་ཚོམས་རབ་ཏུ་མང་པོ་ཉེན་ཀོར་གཅིག་པ་ཡང་ཡོད། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་མུ་སྟེགས་ཅན་གྱི་ཁྱིམ་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་ཀུན་དུ་རྒྱུའི་ཁྱིམ་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་ཤིང་རྟ་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། ་རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་གྲུ་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་ཀུན་དགའ་ར་བ་ལ་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། རབ་ཏུ་མང་པོ་ཉེན་ཀོར་གཅིག
9.145b
པ་དང ། རབ་ཏུ་མང་པོ་ཉེན་ཀོར་ཐ་དད་པ་དང ། དེ་བཞིན་དུ་ལྗོན་ཤིང་ཉེན་ཀོར་གཅིག་པ་དང ། ཉེན་ཀོར་ཐ་དད་པ་ཡང་ཡོད། རབ་ཏུ་མང་པོ་ཉེན་ཀོར་གཅིག་པ་དང ། རབ་ཏུ་མང་པོ་ཉེན་ཀོར་ཐ་དད་པ་སྟེ། ལྟུང་བ་དེའི་བསྟན་པ་ནི་འདི་ཡིན་ནོ། །ད་ནི་བཤད་པ་སྨྲ་བར་བྱ་སྟེ། དེ་ལ་ཁྱིམ་གཅིག་པའི་གྲོང་གང་ཞེ་ན། བཅོམ་ལྡན་འདས་ཀྱིས་བཀའ་སྩལ་པ། བོད་དང ། རི་ཁྲོད་པ་དང ། ཀླ་ཀློ་བཟོ་ལ་རག་ལས་པ་རྣམས་ཀྱི་གྲོང་གང་ཡིན་པ་སྟེ། གྲོང་འདི་ནི་ཁྱིམ་གཅིག་པ་ཡིན་ནོ། །ཁྱིམ་གཅིག་པ་ཇི་ལྟ་བར་ཁྱིམ་གཉིས་པ་ཡང་དེ་བཞིན་ནོ། །ཁྱིམ་གྱི་ཚོགས་ཀྱི་གྲོང་གང་ཞེ་ན། མིའི་གཙོ་བོ་སྣ་ཚོགས་གནས་པར་གྱུར་པའི་གྲོང་གང་ཡིན་པ་སྟེ། འདི་ནི་ཁྱིམ་གྱི་ཚོགས་ཀྱི་གྲོང་ཞེས་བྱའོ། །སབ་རས་བསྐོར་བའི་གྲོང་གང་ཞེ་ན། སབ་རས་བསྐོར་བའི་གྲོང་གང་ཡིན་པའོ། །དེའི་ཉེན་ཀོར་གང་ཞེ་ན་ནང་ཐམས་ཅད་དང ། ཕྱི་རོལ་འདོམ་གང་ངམ་གང་དུ་སྐས་རྡང་བུ་བཅུ་གཉིས་པས་ཁྱབ་ཅིང་འདུག་པ་འམ། ཡུལ་མ་ག་དྷཱའི་ཤིང་རྟ་སྨྱིག་མས་བཀང་བར་གྱུར་པའོ། །དགེ་སློང་མས་ནང་དུ་ཆོས་གོས་དག་བཞག་ནས་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་བཞག་སྟེ་ནང་དུ་སྐྱ་རེང་འཆར་བར་བྱེད་ན་ཡང་ལྟུང་བ་མེད་དོ། །ནང་ངམ་ཕྱི་རོལ་དུ་ཆོས་གོས་དག་བཞག་སྟེ། གཞན་དུ་སྐྱ་རེང་འཆར་བར་བྱེད་ཅིང་སྐྱ་རེང་ཤར་ན་སྤང་བའི་ལྟུང་བྱེད་དོ། །རྩིག་པས་བསྐོར་བ་གང་ཞེ་ན། ར་བས་བསྐོར་བའི་གྲོང་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་ངམ། གང་དུ་རྡུང་བར་བྱེད་པ་དང ། རྔོ་བར་བྱེད་པ་དང ། ཟ་བར་བྱེད་པ་དང ། ཁྱེའུ་སུས་བྱེད་པ་འམ། གང་དུ་མི་རང་བཞིན་གྱིས་ངོ་ཚ་དང་ལྡན་པ་བཤང་བར་འགྲོ་བ་འམ། བྱ་གག་འཕུར་སྟབས་ཀྱིས་མཆོད་པ་སྟེ། དེའི་ཉེན་ཀོར་ནི་དེ་ཡིན་ནོ། །དགེ་སློང་མས་ནང་དུ་ཆོས་གོས་དག་བཞག་སྟེ་ཉེན་ཀོར་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ཉེན་ཀོར་དུ་ཆོས་གོས་དག་བཞག་སྟེ། ནང་དུ་སྐྱ་རེང་འཆར་བར་བྱེད་ན་ལྟུང་བ་མེད་དོ། །ནང་ངམ་ཉེན་ཀོར་དུ་ཆོས་གོས་དག་བཞག་སྟེ། ་གཞན་དུ་སྐྱ་རེང་འཆར་བར་བྱེད་ཅིང །
9.146a
སྐྱ་རེང་ཤར་ན་སྤང་བའི་ལྟུང་བྱེད་དོ། །འོབས་ཀྱིས་བསྐོར་བའི་གྲོང་གང་ཞེ་ན། འོབས་ཀྱིས་བསྐོར་བའི་གྲོང་གང་ཡིན་པའོ། །དེའི་ཉེན་བསྐོར་གང་ཞེ་ན། ་ནང་ཐམས་ཅད་དང་ཞེས་བྱ་བ་ནས། ཁྱེའུ་སུས་བྱེད་པ་ཞེས་བྱ་བའི་བར་རམ། གང་དུ་བ་ལང་དང ། ལུག་དང་འགྲོ་བའི་རྡུལ་ལངས་པ་རླུང་གིས་མ་བསྐྱོད་པ་འམ། ཕྱག་དར་བོར་བའི་བོང་བ་འདྲིལ་བས་སླེབས་པ་ཡིན་ཏེ། དགེ་སློང་མས་ནང་དུ་ཆོས་གོས་དག་ཅེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །གྲོང་ཉེན་ཀོར་གཅིག་པ་གང་ཞེ་ན། གྲོང་གང་ན་སྐྱེད་མོས་ཚལ་འམ། འདུན་ས་འམ། ལྷའི་གནས་གཅིག་ཡོད་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་ཞེས་བྱ་བ་ནས། ཁྱེའུ་སུས་བྱེད་པ་ཞེས་བྱ་བའི་བར་རོ། །དགེ་སློང་མས་ནང་དུ་ཆོས་གོས་དག་ཅེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །གྲོང་ཉེན་ཀོར་ཐ་དད་པ་གང་ཞེ་ན། གྲོང་གང་ན་སྐྱེད་མོས་ཚལ་ལམ། འདུན་ས་འམ། ལྷའི་གནས་མང་པོ་ཡོད་པའོ། །དེ་རྣམས་ཀྱི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན་སྒོའོ། །གལ་ཏེ་དགེ་སློང་མས་ནང་ངམ། ཕྱི་རོལ་དུ་ཆོས་གོས་དག་བཞག་ལ་སྐྱ་རེང་འཆར་ན་དགེ་སློང་མ་ཉེན་ཀོར་དང་བྲལ་བས་སྒོར་འདུག་ནས་སྐྱ་རེང་འཆར་བར་བྱེད་ནའོ། །གལ་ཏེ་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ། །གྲོང་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། གྲོང་རབ་ཏུ་མང་པོ་དག་ལ་སྐྱེད་མོས་ཚལ་འམ། འདུན་ས་འམ། ལྷའི་གནས་གཅིག་ཡོད་པའོ། །དེ་རྣམས་ཀྱི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་ཞེས་བྱ་བ་ནས་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །གྲོང་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། ་དེ་རྣམས་ཀྱི་སྐྱེད་མོས་ཚལ་མང་པོ་ཡོད་པའོ། །དེ་རྣམས་ཀྱི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཁྱིམ་ཉེན་ཀོར་གཅིག་པ་གང་ཞེ་ན་མི་གཅིག་གི་འམ། སྤུན་སྒོ་མ་བྱེ་བའི་ཁྱིམ་གང
9.146b
ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་ངོ་ཞེས་བྱ་བ་ནས་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཁྱིམ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་བྱེ་བ་དག་གི་ཁྱིམ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངོ་ཞེས་བྱ་བ་ནས་གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ། །ཞེས་བྱ་བའི་བར་རོ། །ཁྱིམ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། མི་ཐ་དད་པ་དག་གི་འམ། སྤུན་སྒོ་བྱེ་བའི་ཁྱིམ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་པའོ། །ཚོང་ཁང་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་ཚོང་ཁང་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་འམ། གང་དུ་འབྲུ་སྤུང་བར་བྱེད་པ་དང ། གླེ་བ་དང ། བྲེའུ་ཆུང་འཇོག་པར་བྱེད་པ་དང ། འཇལ་བར་བྱེད་པའི་སྣོད་དག་འཇོག་པར་བྱེད་པ་སྟེ། དེའི་ཉེན་ཀོར་ནི་དེ་ཡིན་ནོ། །དགེ་སློང་མས་ནང་དུ་ཆོས་གོས་དག་ཅེས་བྱ་བ་ནས། གཞན་དུ་སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ། །ཞེས་བྱ་བའི་བར་རོ། །ཚོང་ཁང་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བའི་ཚོང་ཁང་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ཟོང་གི་མཛོད་དོ། །ཚོང་ཁང་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བའི་ཚོང་ཁང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཚོང་ཁང་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བའི་ཚོང་ཁང་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཚོང་རྡལ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ
9.147a
དག་གི་ཚོང་རྡལ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་འམ། གང་དུ་དེ་དག་གི་སྤང་ལེབ་དག་འཇོག་པར་བྱེད་པ་དང ། དྲི་དག་འཐག་པར་བྱེད་པ་དང ། ཐུམ་བུ་དག་འཆིང་བར་བྱེད་པ་དང ། འདྲ་བར་བྱེད་པ་དང་ཞེས་བྱ་བ་ནས་ཁྱེའུ་སུས་བྱེད་པ་ཞེས་བྱ་བའི་བར་རོ། །དགེ་སློང་མས་ཉེན་ཀོར་དུ་ཆོས་གོས་དག་ཅེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཚོང་རྡལ་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བའི་ཚོང་རྡལ་གང་དག་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། འདུག་སྟེགས་སོ། །ཚོང་རྡལ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་ཚོང་རྡལ་གང་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཚོང་རྡལ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བ་དག་གི་ཚོང་རྡལ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཡང་ཐོག་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། མི་གཅིག་གི་འམ། སྤུན་སྒོ་མ་བྱེ་བ་དག་གི་ཡང་ཐོག་གོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངོ ། །གཞན་ནི་སྔ་མ་བཞིན་ནོ། །ཡང་ཐོག་ཉེན་ཀོར་ཐ་དད་པ་གང་ཞེ་ན། འདི་ལྟ་སྟེ། མི་ཐ་དད་པའི་འམ། སྤུན་སྒོ་བྱེ་བ་དག་གི་ཡང་ཐོག་གོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། སྐས་སོ། །ཡང་ཐོག་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། མི་གཅིག་གི་འམ། སྤུན་སྒོ་བྱེ་བ་དག་གི་ཡང་ཐོག་གོ། །དེ་དག་གི་ཉེན་ཀོར་གང་ཞེ་ན། ་སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ། །ཀུན་དུ་རྒྱུའི་ཁྱིམ་གྱི་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། མི་གཅིག་གི་འམ། སྤུན་སྒོ་མ་བྱེ་བ་དག་གི་ཀུན་ཏུ་རྒྱུའི་ཁྱིམ་མོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གནས
9.147b
གང་དུ་དེ་དག་གི་སྨྱིག་མ་གཤེགས་པར་བྱེད་པ་དང ། གླེ་བ་བྱེད་པ་དང ། ་གདུགས་ཀྱི་སྒོ་དག་ཅེས་བྱ་བ་ནས། སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཀུན་ཏུ་རྒྱུའི་ཁྱིམ་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བ་དག་གི་ཀུན་དུ་རྒྱུའི་ཁྱིམ་གང་ཡིན་པའོ། །དེའི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། རྒྱལ་མཚན་གྱི་ཤིང་ངོ ། །ཀུན་དུ་རྒྱུ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་ཀུན་དུ་རྒྱུའི་ཁྱིམ་རབ་ཏུ་མང་པོ་གང་ཡིན་པའོ། །དེ་དག་གི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་འདོམ་གང་ངམ། གནས་གང་དུ་སྨྱིག་མ་དག་གཤེགས་པར་བྱེད་པ་དང ། ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཀུན་དུ་རྒྱུ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། མི་ཐ་དད་པ་འམ། སྤུན་སྒོ་བྱེ་བ་དག་གི་ཀུན་ཏུ་རྒྱུ་རབ་ཏུ་མང་པོའི་ཁྱིམ་གང་དག་ཡིན་པའོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཞེ་ན། ཅི་ཡང་མ་ཡིན་པའོ། །གཡུལ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གནས་གང་དུ་སོག་མ་དག་འཇོག་པར་བྱེད་པ་དང ། བྲེ་བ་དང ། ཕྱགས་མ་དང ། གཞལ་སྣོད་དག་འཇོག་པར་བྱེད་པ་དང ། འཕྱར་བར་བྱེད་པ་དང ། འབྲུ་དག་ཕྱར་བ་ན་ཕུབ་མ་རགས་པ་དག་གང་དུ་རླུང་གིས་མ་བདས་པར་ཕྱིན་པ་སྟེ། དེའི་ཉེན་ཀོར་ནི་དེ་ཡིན་ནོ། །དགེ་སློང་མས་ཉེན་ཀོར་དུ་ཆོས་གོས་དག་ཅེས་བྱ་བ་ནས་གཞན་ནི་སྔ་མ་བཞིན་ནོ། །གཡུལ་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བ་དག་གི་གཡུལ་གང་ཡིན་པའོ་ཞེས་བྱ་བ་ནས་ཅི་ཞིག་ཐུན་མོང་ཡིན་ཞེ་ན། གཡུལ་གྱི་དབུས་སོ། །གཡུལ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་གང་ཡིན་པའོ། །གཞན་ནི་སྔ་མ་བཞིན་ནོ། །གཡུལ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། གཡུལ་གང
9.148a
ཞིག་མི་ཐ་དད་པ་འམ་ཞེས་བྱ་བ་ནས་ཅི་ཞིག་ཐུན་མོང་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ། །གཡུལ་ཚོགས་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་གཡུལ་ཚོགས་གང་ཡིན་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་གླང་དག་འདོགས་པར་བྱེད་པ་དང ། ལྕི་བ་དག་འདོར་བར་བྱེད་པའོ། །གཞན་ནི་སྔ་མ་བཞིན་ནོ། །གཡུལ་ཚོགས་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བ་དག་གི་གཡུལ་ཚོགས་གང་ཡིན་པའོ། །དེའི་ཉེན་ཀོར་གང་ཞེ་ན་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། སྒོ་ཞེས་བྱ་བའི་བར་རོ། །གཡུལ་ཚོགས་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། གཡུལ་གང་ཞིག་མི་གཅིག་གི་འམ། ཞེས་བྱ་བ་ནས་སྔ་མ་བཞིན་ནོ། །གཡུལ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། གཡུལ་ཚོགས་གང་ཞིག་མི་ཐ་དད་པའི་འམ་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ། །མུ་སྟེགས་ཅན་གྱི་ཁྱིམ་ཉེན་ཀོར་གཅིག་པ་གང་ཞེ་ན། མུ་སྟེགས་ཅན་ལྟ་བ་གཅིག་པ། བཟོད་པ་གཅིག་པ། འདོད་པ་གཅིག་པ་བསམ་པ་གཅིག་པ་དག་གི་གང་ཡིན་པའོ། །དེ་དག་གི་ཉེན་ཀོར་གང་ཞེ་ན། གནས་གང་དུ་དེ་དག་མེའི་སྦྱིན་སྲེག་སྲེག་པར་བྱེད་པ་དང ། རྩཝ་དང ། ལྕི་བ་དང ། ཡམ་སྲེག་ཤིང་དང ། བླུགས་གཟར་དག་འཇོག་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། གང་དུ་གཅོད་པར་བྱེད་པ་དང ། ཞེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །མུ་སྟེགས་ཅན་གྱི་ཁྱིམ་ཉེན་ཀོར་ཐ་དད་པ་གང་ཞེ་ན། མུ་སྟེགས་ཅན་ལྟ་བ་སྣ་ཚོགས་དང་ཞེས་བྱ་བ་ནས། བསམ་པ་སྣ་ཚོགས་གང་ཡིན་པའོ། །ཞེས་བྱ་བའི་བར་རོ། །དེ་དག་གི་ཉེན་ཀོར་གང་ཞེ་ན། སོ་སོ་བའོ། །ཅི་ཞིག་ཐུན་མོང་ཡིན་ཞེ་ན། ལྷའི་གནས་སོ། །མུ་སྟེགས་ཅན་གྱི་ཁྱིམ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། དང་པོ་པ་ཇི་ལྟ་བ
9.148b
དེ་བཞིན་དུ་བརྗོད་པར་བྱའོ། །མུ་སྟེགས་ཅན་གྱི་ཁྱིམ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། མུ་སྟེགས་ཅན་གྱི་ཁྱིམ་གང་དག་མི་ཐ་དད་པའི་འམ་ཞེས་བྱ་བ་ནས་ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ། །ཤིང་རྟ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། ཤིང་རྟ་མི་གཅིག་གི་འམ། སྤུན་སྒོ་མ་བྱེ་བ་དག་གིའོ། །དེའི་ཉེན་ཀོར་གང་ཞེ་ན། འགྲོ་བ་འམ། འདུག་ཀྱང་རུང་ཉེན་ཀོར་མདོམ་གང་ངམ། གནས་གང་དུ་གླང་འདོགས་པར་བྱེད་པ་དང ། རྩཝ་མུན་ཛ་དག་རྡུང་བར་བྱེད་པ་དང ། ཐག་གུ་དག་འཁལ་བར་བྱེད་པ་འམ། ཡང་ན་གང་དུ་གཅོད་པར་བྱེད་པ་དང་ཞེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཤིང་རྟ་ཉེན་ཀོར་ཐ་དད་པ་གང་ཞེ་ན། མི་ཐ་དད་པའི་འམ། སྤུན་སྒོ་བྱེ་བའི་ཤིང་རྟ་གང་ཡིན་པ་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། ཁ་ལོ་སྒྱུར་བའི་སྟན་ནོ་ཞེས་བྱ་བའི་བར་རོ། །ཤིང་རྟ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། དང་པོ་པ་ཇི་ལྟ་བ་དེ་བཞིན་དུ་བརྗོད་པར་བྱའོ། །ཤིང་རྟ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། ཤིང་རྟ་གང་དག་མི་ཐ་དད་པའི་འམ་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་གཉིས་པ། གྲུ་ཉེན་ཀོར་གཅིག་པ་གང་ཞེ་ན། མི་གཅིག་གི་འམ། སྤུན་སྒོ་མ་བྱེ་བ་དག་གི་གྲུ་གང་ཡིན་པའོ། །དེའི་ཉེན་ཀོར་གང་ཞེ་ན། འགྲོ་བའི་ཉེན་ཀོར་མདོམ་གང་ངམ། གནས་གང་དུ་ཕུར་པ་འདེབས་པར་བྱེད་པ་དང ། གྲུ་རྟོད་པར་བྱེད་པ། རྩཝ་མུན་ཛ་དག་རྡུང་བར་བྱེད་པ་དང ། ཐག་པ་དག་འཁལ་བར་བྱེད་པ་དང ། རུ་སྐྱ་དག་འཇོག་པར་བྱེད་པ་འམ། གང་དུ་གཅོད་པར་བྱེད་པ་དང་ཞེས་བྱ་བ་ནས། ཁྱེའུ་སུས་བྱེད་པ་ཞེས་བྱ་བའི་བར་རོ། །དགེ་སློང་མས་ནང་དུ་ཆོས་གོས་དག་ཅེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །གྲུ་ཉེན་ཀོར་ཐ་དད་པ་གང་ཞེ་ན། གྲུ་གང་དག་མི་ཐ་དད་པའི་འམ་ཞེས་བྱ་བ་ནས། ཅི
9.149a
ཞིག་ཐུན་མོང་ཡིན་ཞེ་ན་གྲུ་གདང་ངོ་ཞེས་བྱ་བའི་བར་རོ། །གྲུ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། དང་པོ་པ་ཇི་ལྟ་བ་དེ་བཞིན་དུ་བརྗོད་པར་བྱའོ། །གྲུ་རབ་ཏུ་མང་པོ་ཉེན་ཀོར་ཐ་དད་པ་གང་ཞེ་ན། གྲུ་གང་དག་མི་ཐ་དད་པའི་འམ་ཞེས་བྱ་བ་ནས་ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ། །ཀུན་དགའ་ར་བ་ཉེན་ཀོར་གཅིག་པ་གང་ཞེ་ན། ་མི་གཅིག་གི་འམ། སྤུན་སྒོ་བྱེ་བ་དག་གི་ཀུན་དགའ་ར་བ་གང་ཡིན་པའོ། །དེའི་ཉེན་ཀོར་གང་ཞེ་ན། གནས་གང་དུ་ལོ་མ་སྔོན་པོ་དག་འཁྲུ་བར་བྱེད་པ་དང ། ཐུམ་བུ་དག་འཕུར་བར་བྱེད་པ་དང ། ་མེ་ཏོག་དག་རྒྱུད་པར་བྱེད་པ་དང ། ཞེས་བྱ་བ་ནས་ཁྱེའུ་སུས་དག་བྱེད་པ་ཞེས་བྱ་བའི་བར་རོ། །དགེ་སློང་མས་ནང་དུ་ཆོས་གོས་དག་ཅེས་བྱ་བ་ནས། སྐྱ་རེང་འཆར་བར་བྱེད་ན་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཀུན་དགའ་ར་བ་ཉེན་ཀོར་ཐ་དད་པ་གང་ཞེ་ན། ཀུན་དགའ་ར་བ་གང་མི་ཐ་དད་པའི་འམ་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། ཁྲོན་པའོ་ཞེས་བྱ་བའི་བར་རོ། །ཀུན་དགའ་ར་བ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། ཀུན་དགའ་ར་བ་གང་དག་མི་གཅིག་གི་འམ་ཞེས་བྱ་བ་ནས་དང་པོ་ཇི་ལྟ་བ་དེ་བཞིན་དུ་བརྗོད་པར་བྱའོ། །ཀུན་དགའ་ར་བ་མང་པོ་ཉེན་ཀོར་ཐ་དད་པ་གང་ཞེ་ན། ཀུན་དགའ་ར་བ་མང་པོ་གང་དག་མི་ཐ་དད་པའི་འམ་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ། །ཤིང་ལྗོན་པའི་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། ཤིང་ལྗོན་པའི་ཡལ་གའི་ལོ་མདབ་འབྱོར་པས་གཅིག་ཏུ་སྟུག་པའོ། །དེའི་ཉེན་ཀོར་གང་ཞེ་ན། ནང་ཐམས་ཅད་དང ། ཕྱི་རོལ་མདོམ་གང་ངམ། སོ་ཀ་རྣམས་ཀྱི་ཟླ་བ་ཐ་མ་ལ་བབ་པའི་ཉི་མ་ཕྱེད་ཀྱི་གྲིབ་མས་ཁྱབ་ཅིང་འདུག་པ་འམ། ལོ་མ་སྐྱ་བོ་དག་རླུང་གིས་མ་བདས་པས་ལྷུང་བ་འམ། ཆར་འབབ་པ་ན་ཆུའི་ཐིགས་པ་དག་འབབ་པ་སྟེ་དེའི་ཉེན་ཀོར་ནི་དེ་ཡིན་ནོ། །དགེ་སློང་མས་ནང་དུ་ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཤིང་ལྗོན་པ་ཉེན་ཀོར
9.149b
ཐ་དད་པ་གང་ཞེ་ན། འདི་ལྟ་སྟེ། ཤིང་ལྗོན་པ་ཡལ་གའི་ལོ་མ་འདབ་མ་འབྱོར་པ་འམ་ཞེས་བྱ་བ་ནས། ཐུན་མོང་ཅི་ཞིག་ཡིན་ཞེ་ན། ཤིང་དྲུང་ངོ་ཞེས་བྱ་བའི་བར་རོ། །ཤིང་ལྗོན་པ་རབ་ཏུ་མང་པོ་ཉེན་ཀོར་གཅིག་པ་གང་ཞེ་ན། འདི་ལྟ་སྟེ། ཤིང་ལྗོན་པ་རབ་ཏུ་མང་པོ་ཡལ་གའི་ལོ་མ་མདབ་མ་འབྱོར་པ་གྲིབ་མ་ཐ་དད་པ་ཞེས་བྱ་བ་ནས། ཅི་ཞིག་ཐུན་མོང་ཡིན་ཞེ་ན། ཅི་ཡང་མ་ཡིན་ནོ་ཞེས་བྱ་བའི་བར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ་དགེ་སློང་མ་ཤུལ་དུ་ཞུགས་པའི་ཉེན་ཀོར་གང་ལགས། འགྲོ་བ་ན་མདོམ་གང ། འགྲེང་བ་ན་མདོམ་གང ། འདུག་པ་ན་མདོམ་གང ། ཁོ་ར་ཁོར་ཡུག་ཡིན་ནོ། །བཙུན་པ་གལ་ཏེ་དགེ་སློང་མ་དག་ཤུལ་དུ་ཞུགས་ནས་ལྷན་ཅིག་གནས་པ་དང ། ཉེ་གནས་དག་ལ་ཆོས་གོས་དག་གཏད་དེ་དེ་སླད་བཞིན་མཆིས་ན་དེ་དག་གི་ཉེན་ཀོར་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ངས་ཇི་སྐད་བྲམ་ཟེ་གྲོ་བཞིན་སྐྱེས་ཀྱི་རིགས་ལ་བར་མདོམ་བདུན་བདུན་གྱིས་བཅད་དེ་ཨ་མྲ་བསྐྱེད་ན། ཤིན་དུ་མེ་ཏོག་ཕུན་སུམ་ཚོགས་པ་དང ། འབྲས་བུ་ཕུན་སུམ་ཚོགས་པ་དང ། ཡལ་ག་ཕུན་སུམ་ཚོགས་པར་འགྱུར་བར་གསུངས་པའི་ཨ་མྲ་གང་དག་ཡིན་པ་དེ་དག་གི་བར་ནི་མདོམ་བཞི་བཅུ་རྩ་དགུར་འགྱུར་རོ། །བཙུན་པ་རེ་ཤིག་གཙུག་ལག་ཁང་གཉིས་ཀྱི་མཚམས་སུ་མཆིས་ཉལ་བར་བགྱིད་ན་མཚམས་གང་ལགས། ཇི་ཙམ་ཆོས་གོས་ཀྱི་གྲཝ་ལུས་དང་མ་བྲལ་བ་དེ་སྲིད་དུ་ཆོས་གོས་དང་བྲལ་བར་མི་འགྱུར་རོ། །གང་གི་ཚེ་དེའི་ཆོས་གོས་ཀྱི་གྲཝ་ལུས་དང་བྲལ་བ་དེའི་ཚེ་ཆོས་གོས་དང་བྲལ་བར་གྱུར་ཏེ། དགེ་སློང་མའི་ཆོས་གོས་སྤང་བར་གྱུར་ཏེ་དེ་མ་སྤངས་པར་ཞེས་བྱ་བ་ནས། དང་པོ་ཇི་ལྟ་བ་དེ་བཞིན་དུ་བརྗོད་པར་བྱའོ། །སྤང་བའི་ལྟུང་བྱེད་གཉིས་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་རྣམས་ལ་གོས་ཀྱི་རྙེད་པ་མང་པོ་འདི་ལྟ་བུ་འདི་བྱུང་སྟེ། གང་སུ་ཡང་རུང་བས་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཇུག་པར་གང་གི་ཚེ་འདི་འདྲ་བའི་གོས་བདག་གིས་རྙེད་པར་གྱུར་པ་དེའི་ཚེ་བདག་གིས་ལངས་པར་བྱས་ལ་བཅང་བར་བྱའོ། །
9.150a
སྙམ་དུ་རེ་བ་ཡོད་ཅིང་དེས་དེ་འཇོག་པར་བྱེད་དོ། །སྔོན་པོ་ལ་ཇི་ལྟ་བ་དེ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོ་ལ་ཡང་བརྗོད་པར་བྱའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མ་ཆོས་གོས་ཟིན་པས་སྲ་བརྐྱང་ཕྱུང་ན་དུས་མ་ཡིན་པར་གོས་ཤིག་རྙེད་ལ་འདོད་ན་དགེ་སློང་མ་དེས་གོས་དེ་བླང་བར་བྱའོ། །བླངས་ནས་གལ་ཏེ་ལངས་ན་མྱུར་བ་ཁོ་ནར་བྱས་ཏེ་བཅང་བར་བྱའོ། །གལ་ཏེ་ཆོས་གོས་ལ་རེ་བ་ཡོད་པ་འམ། ཁ་མ་ལངས་པ་ཁ་སྐོང་བར་བྱེད་ན་དགེ་སློང་མ་དེས་གོས་དེ་ཟླ་བ་གཅིག་གི་མཐའི་བར་དུ་བཅང་བར་བྱའོ། །དེ་ལས་འདས་པར་འཇོག་ན་སྤང་བའི་ལྟུང་བྱེད་དོ། །དགེ་སློང་མ་ཆོས་གོས་ཟིན་པས་ཞེས་བྱ་བ་ནི་སྔ་མ་བཞིན་ནོ། །རྙེད་ལ་ཞེས་བྱ་བ་ནི་གཞན་ལས་སོ། །དུས་མ་ཡིན་པའི་གོས་ཞེས་བྱ་བ་ལ། གོས་ཀྱི་དུས་ནི་གང་ཡིན། དུས་མ་ཡིན་པའི་གོས་ནི་གང་ཡིན་ཞེ་ན། སྲ་བརྐྱང་གཏིང་བའི་གནས་ན་ནི་སྟོན་ཟླ་འབྲིང་པོའི་ཉ་ནས་བཟུང་སྟེ། དཔྱིད་ཟླ་ར་བ་ཉའི་བར་གྱི་ཟླ་བ་ལྔ་པོ་དེ་དག་ནི་གོས་ཀྱི་དུས་ཡིན་ནོ། །ལྷག་མ་ཟླ་བ་བདུན་པོ་དག་ནི་དུས་མ་ཡིན་ནོ། །གོས་བདུན་པོ་གང་ཡང་རུང་བ་ཞེས་བྱ་བ་ལ། བདུན་པོ་དེ་དག་གང་ཞེ་ན། བལ་གྱི་དང ། རས་དང་རས་བལ་གྱི་དང ། མོན་དར་དང ། དུ་གུ་ལའི་རས་དང ། ཀོ་ཏམ་པའི་རས་དང ། ཉི་འོག་གི་གོས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །བླངས་ནས་གལ་ཏེ་བླངས་ན་མྱུར་བ་ཁོ་ནར་བྱས་ཏེ་བཅང་བར་བྱའོ། །གལ་ཏེ་མ་ལངས་ན་ཞེས་བྱ་བ་ནི་ལྔ་པོ་གང་ཡང་རུང་བའོ། །དགེ་སློང་མ་དེས་གོས་དེ་ཟླ་བ་གཅིག་གི་མཐར་བཅང་བར་བྱའོ་ཞེས་བྱ་བ་ནི་ཉིན་ཞག་སུམ་བཅུའི་མཐར་རོ། །གོས་དེའི་རེ་བ་ཞེས་བྱ་བ་ལ་གོས་ཀྱི་རེ་བ་གང་ཞེ་ན། ་བདག་ལ་མས་སྦྱིན་པར་འགྱུར་བ་འམ། བདག་ལ་ཕས་སྦྱིན་པར་འགྱུར་བ་འམ། བདག་ལ་མིང་པོ་དང་ཕུ་ནུ་མོས་སྦྱིན་པར་འགྱུར་བ་འམ།
9.150b
ལོ་ལྔའི་དུས་སྟོན་ཆེན་པོའི་ཚེ་འཐོབ་པའོ། །ཁ་མ་ལངས་པ་ཁ་སྐོང་བར་བྱེད་ན་ཞེས་བྱ་བ་ནི་གོས་དེའི་ཁ་སྐོང་བར་བྱེད་ནའོ། །དེ་ལས་འདས་པར་ཞེས་བྱ་བ་ནི་དེ་ལས་ཐལ་བར་རོ། །འཇོག་ན་ཞེས་བྱ་བ་ནི་འཆང་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ཞེས་བྱ་བ་ནས། ངན་འགྲོ་ལོག་པར་ལྟུང་བ་རྣམས་སུ་ཞེས་བྱ་བའི་བར་རོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་ལྟུང་བའི་བར་སྡོམ་ལ། རེ་བཅས་རེ་བ་མེད་པ་དང ། །ཉམས་པར་གྱུར་ལ་གསུམ་དག་དང ། །མ་གྲུབ་པ་ལ་རྒྱུན་ཆད་དང ། །གོས་ནི་གཉིས་པོ་ཉིད་དག་དང ། །དེ་ནས་གོས་ནི་ལྔ་དག་དང ། །ཕྱག་དར་ཁྲོད་ལ་གཉིས་དང་ཡང ། །སྣམ་ཕྲན་ཚད་དང་གླན་པ་དང ། །རྔུལ་ཟན་མཐང་གོས་ཉིད་དང་ཡང ། །འཁོར་གསུམ་ཁེབས་པ་དག་དང་ནི། །ཁོར་ཡུག་ཕྱི་མར་བྱས་པ་ཡིན། །དགེ་སློང་མས་ཚེས་ལ་གོས་སྔོན་པོ་ཞིག་རྙེད་ནས། དེས་དེ་བྱེད་དུ་མི་འཇུག་པར་གང་གི་ཚེ་བདག་གིས་འདི་འདྲ་བའི་གོས་རྙེད་པར་གྱུར་པ་དེའི་ཚེ་བྱའོ། །སྙམ་དུ་གོས་ཀྱི་རེ་བ་ཡོད་པས་དེས་དེ་འཇོག་པར་བྱེད་ཅིང་དེ་གོས་ཀྱི་རེ་བ་ཡོད་པ་ལས་དེས་ཚེས་དེ་ཉིད་ཀྱི་ཉིན་པར་རེ་བ་ཡོད་པ་རྙེད་ན་དགེ་སློང་མ་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། ་རུང་བར་བྱའོ། །བྱིན་གྱིས་རློབ་པར་མི་བྱེད་དམ། རུང་བར་མི་བྱེད་དམ། གཏོང་བར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དགེ་སློང་མས་ཚེས་ཉིད་ལ་གོས་མ་རྙེད་དམ། ཚེས་གཉིས་ལ་ཡང་མ་རྙེད་མོད་ཀྱི་ཚེས་དགུ་ལ་རེ་བ་དང་བཅས་པ་ཞིག་རྙེད་ན་དགེ་སློང་མ་དེས་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ། རུང་བར་བྱ་བ་འམ། བཏང་བར་བྱའོ། །བྱིན་གྱིས་རློབ་པར་མི་བྱེད་དམ། རུང་བར་མི་བྱེད་དམ། གཏོང་བར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །གཞན་ཡང་དགེ་སློང་མས་ཚེས་ཉིད་ལ་གོས་མ་རྙེད་ཅིང ། ཚེས་གཉིས་ལ་ཡང་མ་རྙེད་དེ། འོན་ཀྱང་ཞག་ཉི་ཤུ་རྩ་དགུའི་ཉིན་པར་རེ་བ་དང་བཅས་པ་ཞིག་རྙེད་ན་དགེ་སློང་མ་དེས་གོས་དེ་ཉི་མ་སུམ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བ་འམ།
9.151a
རུང་བར་བྱ་བ་འམ། གཏང་བར་བྱའོ། །བྱིན་གྱིས་རློབ་པར་མི་བྱེད་དམ། རུང་བར་མི་བྱེད་དམ། གཏོང་བར་མི་བྱེད་ན་ཉི་མ་སུམ་བཅུ་རྩ་གཅིག་པའི་སྐྱ་རེང་ཤར་ནས་སྤང་བའི་ལྟུང་བྱེད་དོ། །སྔོན་པོ་ལ་ཇི་ལྟ་བ་དེ་བཞིན་དུ་སེར་པོ་དང ། སྟུག་པོ་དང ། སྲབ་མོ་ཡང་དེ་བཞིན་ནོ། །དགེ་སློང་མས་ཚེས་ལ་གོས་སྔོན་པོ་ཞིག་རྙེད་ལ་དེས་དེ་བྱེད་དུ་མི་འཇུག་པར་གང་གི་ཚེ་བདག་གིས་འདི་འདྲ་བའི་གོས་རྙེད་པར་གྱུར་པ་དེའི་ཚེ་བྱའོ་སྙམ་དུ་གོས་ཀྱི་རེ་བ་ཡོད་པས་དེས་དེ་འཇོག་པར་བྱེད་ཅིང ། དེས་ཚེས་དེ་ཉིད་ལ་རེ་བ་མེད་པ་གཞན་ཞིག་རྙེད་ན་དགེ་སློང་མ་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་ཞེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་ཚེས་ཉིད་ལ་ཡང་མ་ཡིན། ཚེས་གཉིས་ལ་ཡང་མ་ཡིན་པ་ཞེས་བྱ་བ་ནས་ཚེས་དགུ་དང ། བཅུའི་ནང་དུ་ཡང་མ་ཡིན་ན་ཞེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །གཞན་ཡང་དགེ་སློང་མས་ཚེས་ཉིད་ལ་ཡང་མ་ཡིན་ཞེས་བྱ་བ་ནས། ་ཚེས་ཉི་ཤུ་དགུའི་ཉིན་པར་རེ་བ་མེད་པ་ཞིག་རྙེད་ན་ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །སྔོན་པོ་ལ་ཇི་ལྟ་བ་བཞིན་དུ་སྲབ་མོའི་བར་ལ་ཡང་དེ་བཞིན་ནོ། །དགེ་སློང་མས་ཚེས་ལ་གོས་སྔོན་པོ་ཞིག་རྙེད་ལ། དེས་དེ་བྱེད་དུ་མི་འཇུག་པར་གང་གི་ཚེ་བདག་གིས་འདི་འདྲ་བའི་གོས་རྙེད་པར་གྱུར་པ་དེའི་ཚེ་བྱའོ་སྙམ་དུ་གོས་ཀྱི་རེ་བ་ཡོད་པ་ལས། དེའི་གོས་ཀྱི་རེ་བ་དེ་ཉམས་པར་གྱུར། འགྱངས་པར་གྱུར། ཤས་ཆུང་བར་གྱུར་ལ། དེས་ཚེས་དེ་ཉིད་ལ་རེ་བ་མེད་པའི་གོས་གཞན་རྙེད་ན་ཞེས་བྱ་བ་ནས། དེ་བཞིན་དུ་ཚེས་དགུ་ལ་ཞེས་བྱ་བ་ནས། སྤང་བའི་ལྟུང་བྱེད་དོ་ཞེས་བྱ་བའི་བར་རོ། །གཞན་ཡང་དགེ་སློང་མས་ཚེས་ལ་གོས་གཞན་ཞིག་རྙེད་ན་ཞེས་བྱ་བ་ནས། ཚེས་ཉི་ཤུ་དགུའི་ཉིན་པར་ཞེས་བྱ་བ་ནས་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །སྔོན་པོ་ལ་ཇི་ལྟ་བ་བཞིན་དུ་སྲབ་མོའི་བར་ལ་ཡང་དེ་བཞིན་ནོ། །དགེ་སློང་མས་ཚེས་ལ་གོས་སྔོན་པོ་ཞིག་རྙེད་ལ། དེས་དེ་བྱེད་དུ་མི་འཇུག་པར་གང་གི་ཚེ་བདག་གིས་འདི
9.151b
འདྲ་བའི་གོས་རྙེད་པར་གྱུར་པ་དེའི་ཚེ་བྱའོ། །སྙམ་དུ་གོས་ཀྱི་རེ་བ་ཡོད་ཅིང་དེས་དེ་འཇོག་པར་བྱེད་པ་ན། དེའི་གོས་ཀྱི་རེ་བ་ཡོད་པ་དེ་གྲུབ་པར་མ་གྱུར། རྒྱུན་ཆད་པར་མ་གྱུར་པར་དེས་ཚེས་དེ་ཉིད་ལ་རེ་བ་མེད་པའི་གོས་གཞན་རྙེད་ན་ཞེས་བྱ་བ་དང ། དེ་བཞིན་དུ་ཚེས་ལ་མ་ཡིན་ཞེས་བྱ་བ་ནས་ཚེས་དགུའི་བར་དང ། ཚེས་ཉི་ཤུ་དགུའི་ཉིན་མོ་ཞེས་བྱ་བའི་བར་རྒྱས་པར་བརྗོད་པར་བྱའོ། །སྔོན་པོ་ལ་ཇི་ལྟ་བ་བཞིན་དུ་སྲབ་མོའི་བར་ལ་ཡང་དེ་བཞིན་ནོ། །དགེ་སློང་མས་ཚེས་ལ་གོས་སྔོན་པོ་ཞིག་རྙེད་ལ། དེས་དེ་བྱེད་དུ་མི་འཇུག་པར་གང་གི་ཚེ་བདག་གིས་འདི་འདྲ་བའི་གོས་རྙེད་པར་གྱུར་པ་དེའི་ཚེ་བྱའོ་སྙམ་དུ་གོས་ཀྱི་རེ་བ་ཡོད་པ་ལས་དེའི་གོས་ཀྱི་རེ་བ་དེ་ཐམས་ཅད་ཀྱི་ཐམས་ཅད་དུ་རྒྱུན་ཆད་པར་གྱུར་པ་དང ། དེས་ཚེས་དེ་ཉིད་ལ་རེ་བ་མེད་པའི་གོས་གཞན་ཞིག་རྙེད་ན་ཞེས་བྱ་བ་དང ། དེ་བཞིན་དུ་ཚེས་ལ་ཡང་མ་ཡིན་ཞེས་བྱ་བ་ནས། ཚེས་དགུའི་བར་དང ། ་དེ་བཞིན་དུ་ཚེས་ཉི་ཤུ་དགུའི་ཉི་མ་ལ་རེ་བ་མེད་པ་ཞེས་བྱ་བའི་བར་དུ་རྒྱས་པར་བརྗོད་པར་བྱའོ། །སྔོན་པོ་ལ་ཇི་ལྟ་བ་དེ་བཞིན་དུ་སྲབ་མོའི་བར་ལ་ཡང་དེ་བཞིན་ནོ། །གོས་ནི་གཉིས་ཏེ། ་སར་པ་དང ། དུས་ཚིགས་སུ་སྤྱད་པའོ། །དེ་ལ་སར་པ་ནི་ཐ་ག་པས་གསར་དུ་བཏགས་པའོ། །དུས་ཚིགས་པ་ནི་དུས་ཚིགས་གསུམ་པོ་གང་ཡང་རུང་བའི་དུས་ཚིགས་སུ་སྤྱད་པར་གྱུར་པའོ། །གོས་ལྔ་པོ་དག་ལ་ལྔ་གང་ཞེ་ན། གོས་བདག་པོ་ཡོད་པ་དང ། བདག་པོ་མེད་པ་དང ། བོར་བ་བླངས་པ་དང ། དུར་ཁྲོད་པ་དང ། ལྔ་པ་ནི་ཕྱག་དར་ཁྲོད་པའོ། །དེ་ལ་གོས་བདག་པོ་ཡོད་པ་ནི་སྐྱེས་པ་དང ། བུད་མེད་དང ། མ་ནིང་སྦྱིན་པ་པོར་བཏགས་པ་གང་ཡིན་པའོ། །བདག་པོ་མེད་པ་ནི་མ་ནིང་གི་བར་དུ་སྦྱིན་པ་པོ་མེད་པ་གང་ཡིན་པ་འམ། ཡང་ན་ལམ་ཀར་ལྷུང་བ་རྙེད་པའོ། །བོར་བ་བླངས་པ་ནི་ཤི་བའི་ཉེ་དུས་གོས་ཀྱི་གདུགས་དག་བསྒྲེང་སྟེ་དུར་ཁྲོད་དུ་བསྐྱལ་ནས། དེ་ནས་བླངས་པ་དག་དགེ་སློང་མ་རྣམས
9.152a
ལ་འབུལ་བར་བྱེད་པ་སྟེ། འདི་ནི་བོར་བ་བླངས་པའི་གོས་ཤེས་བྱའོ། །དུར་ཁྲོད་པ་ཞེས་བྱ་བ་ནི་ཡོངས་སུ་འཛིན་པ་མེད་པའི་དུར་ཁྲོད་ནས་བླངས་པ་གང་ཡིན་པའོ། །ལྔ་པ་ཉིད་ནི་ཕྱག་དར་ཁྲོད་པའོ། །གཞན་ཡང་ཕྱག་དར་ཁྲོད་པ་ནི་ལྔ་སྟེ། ལྔ་གང་ཞེ་ན། ཕྱག་དར་ཁྲོད་པ་ལམ་པོ་ཆེ་པ་དང ། ཆུ་འགྲམ་པ་དང ། དགོན་པར་བོར་བ་དང ། རལ་རུལ་དང ། ལྔ་པ་ཉིད་ནི་ཕྱག་དར་ཁྲོད་པའོ། །གཞན་ཡང་ཕྱག་དར་ཁྲོད་པ་ནི་ལྔ་སྟེ། བེའུ་ཡིས་ཟོས་པ་དང ། སྲིན་གྱིས་ཟོས་པ་དང ། བྱི་བས་ཟོས་པ་དང ། མེས་ཚིག་པ་དང ། ལྔ་པ་ཉིད་ནི་ས་ལ་ལྷུང་བའི་གོས་སོ། །དགེ་སློང་མས་གོས་སར་པ་རྙེད་ལ་གལ་ཏེ་ནུས་ན་དེས་གོས་དེ་ལས་སྣམ་སྦྱར་ནི་ཉི་རིམ་དུ་བྱ། གདིང་བ་ཡང་ཉི་རིམ་དུ་བྱ། བླ་གོས་ནི་ཆིག་རྐྱང་དུ་བྱ། མཐང་གོས་ཀྱང་ཆིག་རྐྱང་དུ་བྱའོ། །དེ་བཞིན་དུ་རྔུལ་ཟན་དང ། ཤིང་ང་དཔུང་ཆད་ཀྱང་ཆིག་རྐྱང་དུ་བྱའོ། །དགེ་སློང་མས་སར་པ་ལ་སྣམ་སྦྱར་ཉི་རིམ་ལ་རིམ་པ་གསུམ་པ་སློན་པར་བྱེད་ན་དེ་ཀློན་པར་བྱེད་པ་ན་ཉེས་བྱས་སོ། །ཞག་བཅུ་འདས་ན་སྤང་བའི་ལྟུང་བྱེད་དོ། །དགེ་སློང་མས་སར་པ་ལ་སྣམ་སྦྱར་ཉི་རིམ་བྱས་པ་ལས་གཞན་དུ་སླན་ནོ་སྙམ་ནས་རིམ་པ་གཅིག་འབོགས་པར་བྱེད་ན་དེ་འབོགས་པར་བྱེད་པ་ན་ཉེས་བྱས་སོ། །ཞག་བཅུ་འདས་ན་སྤང་བའི་ལྟུང་བྱེད་དོ། །གལ་ཏེ་འདི་སྙམ་དུ་སེམས་བསྐྱེད་དེ། བཀོགས་ལ་བཀྲུས་ཤིང་ཁ་བསྒྱུར་ཏེ། འདི་ཉིད་ལ་ཀླན་ནོ་སྙམ་པས་དེ་འབོགས་པར་བྱེད་ན་ལྟུང་བ་མེད་དོ། །ཞག་བཅུ་འདས་ན་སྤང་བའི་ལྟུང་བྱེད་དོ། །དེ་བཞིན་དུ་གདིང་བ་ལ་ཡང་བརྗོད་པར་བྱའོ། །བླ་གོས་ཆིག་རྐྱང་ལ་རིམ་པ་ཀློན་པར་བྱེད་ན་དེ་ཀློན་པ་ལ་ཉེས་བྱས་ལ། ཞག་བཅུ་འདས་ན་སྤང་བའི་ལྟུང་བྱེད་དོ། །བླ་གོས་ལ་ཇི་ལྟ་བ་བཞིན་དུ་མཐང་གོས་ལ་ཡང་དེ་བཞིན་དུ་བརྗོད་པར་བྱའོ། །ཆོས་གོས་ལྔའི་བར་དུ་ཡང་བརྗོད་པར་བྱ་སྟེ། ཐམས་ཅད་ལ་ཡང་སྤང་བའི་ལྟུང་བྱེད་དོ་ཞེས་བརྗོད་པར་བྱའོ། །དགེ་སློང་མས་དུས་ཚིགས་སུ་སྤྱད་པའི་གོས་ཤིག་རྙེད་ལ། གལ་ཏེ་ནུས་ན
9.152b
དེས་དེ་ལས་སྣམ་སྦྱར་ནི་བཞི་རིམ་བྱའོ། །གདིང་བ་དང ། བླ་གོས་དང ། མཐང་གོས་ནི་ཉི་རིམ་དུ་བྱའོ། །རྔུལ་ཟན་དང ། ཤིང་ང་དཔུང་ཆད་ཀྱང་དེ་བཞིན་ནོ། །དགེ་སློང་མས་སྣམ་སྦྱར་བཞི་རིམ་ལ་རིམ་པ་ལྔ་པ་ཀློན་པར་བྱེད་ན་དེ་ཀློན་པར་བྱེད་པ་ན་ཉེས་བྱས་ལ། ཞག་བཅུ་འདས་ན་སྤང་བའི་ལྟུང་བྱེད་དོ། །འབོགས་པར་བྱེད་ན་ཞེས་བྱ་བའི་བར་གོང་མ་ཇི་ལྟ་བ་བཞིན་ནོ། །དེ་བཞིན་དུ་གདིང་བ་ལ་ཡང་བརྗོད་པར་བྱའོ། །བླ་གོས་དང་མཐང་གོས་ཀྱང་དེ་བཞིན་ནོ། །རྔུལ་ཟན་དང་ཤིང་ང་དཔུང་ཆད་ལ་ཡང་དེ་བཞིན་དུ་བརྗོད་པར་བྱའོ། །རིམ་པ་གཉིས་པ་ལ་ཞེས་བྱ་བ་ནས། འབོགས་ཤིང་རིམ་པ་གསུམ་པ་ཀློན་པར་བྱེད་ན་དེ་ཀློན་པར་བྱེད་པ་ན་ཉེས་བྱས་ལ། ཞག་བཅུ་འདས་པ་ན་སྤང་བའི་ལྟུང་བྱེད་དོ། །ཞེས་བྱ་བའི་བར་རོ། །ཕོག་ལ་གཞན་དུ་གླན་ནོ་སྙམ་ནས་དེ་ཀློན་པར་བྱེད་ན་ཉེས་བྱས་ལ། ཞག་བཅུ་འདས་ན་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །བཀོགས་ལ་བཀྲུས་ཤིང་ཁ་བསྒྱུར་ཏེ་ཞེས་བྱ་བ་ནས། འདི་ཉིད་ལ་ཀླན་པར་བྱའོ་སྙམ་ན་ལྟུང་བ་མེད་ལ། ཞག་བཅུ་འདས་ན་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །ཕྱག་དར་ཁྲོད་པའི་ཚེམ་བུ་རྣམས་ལ་ནི་ཇི་ཙམ་འདོད་པ་ཀླན་པར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ་བཙུན་པ་སྣམ་སྦྱར་དག་གི་སྣམ་ཕྲན་དུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཉེ་བར་འཁོར་དགུ་སྟེ། དགུ་གང་ཞེ་ན། དགུ་པ་དང ། བཅུ་གཅིག་པ་དང ། བཅུ་གསུམ་པ་དང ། བཅཝ་ལྔ་པ་དང ། བཅུ་བདུན་པ་དང ། བཅུ་དགུ་པ་དང་ཉི་ཤུ་རྩ་གཅིག་པ་དང ། ཉི་ཤུ་རྩ་གསུམ་པ་དང ། ཉི་ཤུ་རྩ་ལྔ་པའོ། །ཉེ་བར་འཁོར་སྣམ་ཕྲན་ཅན་དགུ་པོ་འདི་དག་ནི་སྣམ་སྦྱར་ཞེས་བྱའོ། །ཉེ་བར་འཁོར་དེ་ལ་དགུ་པ་གང་ཡིན་པ་དང ། བཅུ་གཅིག་པ་གང་ཡིན་པ་དང ། བཅུ་གསུམ་པ་གང་ཡིན་པ་དེ་དག་ནི་གླེགས་བུ་ཕྱེད་དང་གསུམ་པར་བྱས་ཏེ་བཅང་བར་བྱའོ། །བཅཝ་ལྔ་པ་གང་ཡིན་པ་དང ། བཅུ་བདུན་པ་གང་ཡིན་པ་དང ། བཅུ་དགུ་པ་གང་ཡིན་པ་དེ་དག་ནི་གླེགས་བུ་ཕྱེད་དང་བཞི་པར་བྱས་སྟེ་བཅང་བར་བྱའོ། །ཉི་ཤུ་རྩ
9.153a
གཅིག་པ་གང་ཡིན་པ་དང ། ཉི་ཤུ་རྩ་གསུམ་པ་གང་ཡིན་པ་དང ། ཉི་ཤུ་རྩ་ལྔ་པ་གང་ཡིན་པ་དེ་དག་ནི་གླེགས་བུ་ཕྱེད་དང་ལྔ་པར་བྱས་ཏེ་བཅང་བར་བྱའོ། །དེ་བཞིན་དུ་གླན་པར་བྱའོ། །དེ་ཡན་ཆད་ནི་ཚེམ་བུའོ། །བཅོམ་ལྡན་འདས་ཆོས་གོས་ཀྱི་ཚད་ཇི་ཙམ་ལགས། ་ཉེ་བར་འཁོར་གསུམ་སྟེ། ཆོས་གོས་ཆེན་པོ་དང ། འབྲིང་དང ། ཆུང་ངུའོ། །དེ་ལ་སྣམ་སྦྱར་ཆེན་པོ་གང་ཡིན་པའི་སྲིད་དུ་ནི་ཁྲུ་ལྔའོ། །ཞེང་དུ་ནི་ཁྲུ་གསུམ་མོ། །སྣམ་སྦྱར་ཆུང་ངུ་གང་ཡིན་པའི་སྲིད་དུ་ནི་ཁྲུ་ཕྱེད་དང་ལྔའོ། །ཞེང་དུ་ནི་ཁྲུ་ཕྱེད་དང་གསུམ་མོ། །འབྲིང་ནི་དེའི་བར་མའོ། །དེ་བཞིན་དུ་བླ་གོས་ལ་ཡང་རྣམ་པ་གསུམ་མོ། །མཐང་གོས་ལ་ཡང་རྣམ་པ་གསུམ་མོ། །དེ་བཞིན་དུ་རྔུལ་ཟན་དང ། ཤིང་ང་དཔུང་ཆད་ལ་ཡང་རྣམ་པ་གསུམ་མོ། །གཞན་ཡང་མཐང་གོས་ཀྱི་སྲིད་དུ་ནི་ཁྲུ་ལྔའོ། །ཞེང་དུ་ནི་ཁྲུ་དོའོ། །གཞན་ཡང་མཐང་གོས་ཀྱི་སྲིད་དུ་ནི་ཁྲུ་བཞིའོ། །ཞེང་དུ་ནི་ཁྲུ་དོའོ། །མཐང་གོས་ཀྱི་ཐ་མ་ནི་ཁོར་གསུམ་ཁེབས་པའི་ཚད་དོ། །སྤང་བ་རྣམས་ཀྱི་ཐ་མ་ནི་ཁྲུ་གང་ཁོར་ཡུག་གོ། །དགེ་སློང་མས་གོས་སྤང་བར་གྱུར་པ་ཞེས་བྱ་བ་ནས། ་དང་པོ་ཇི་ལྟ་བ་བཞིན་དུ་སྤང་བའི་ལྟུང་བྱེད་དོ་ཞེས་བྱ་བའི་བར་རོ། །སྤང་བའི་ལྟུང་བྱེད་གསུམ་པ་རྫོགས་སོ།། ་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ཉེ་དགའ་ལ་བརྟེན་ཏེ་མགོན་མེད་ཟས་སྦྱིན་གྱིས་གསོལ་ནས་ཉེ་དུ་མ་ཡིན་པ་ལས་བསླབ་པའི་གཞི་བཅའ་བ་མཛད་པ་དང ། དགེ་སློང་མ་དག་ཆོམ་རྐུན་པས་བཏོགས་ནས། དགེ་སློང་མ་ཆོམ་རྐུན་པས་བཏོགས་པ་ལས་བརྟེན་ཏེ། བཅོམ་ལྡན་འདས་ཀྱིས་རྗེས་སུ་གནང་ངོ་ཞེས། དགེ་སློང་མ་གནས་བརྟན་གནས་བརྟན་རབ་ཏུ་མང་པོས་ཐོས་ནས་བཅོམ་ལྡན་འདས་གང་ན་བ་དེར་དོང་སྟེ་ལྷགས་པ་དང ། ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་མ་གནས
9.153b
བརྟན་གནས་བརྟན་རབ་ཏུ་མང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བསླབ་པའི་གཞི་འདི་ལ་བདག་ཅག་གིས་ཇི་ལྟར་བགྱི། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདོད་པ་དང ། བསླབ་པ་ལ་གུས་པ་དང་བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་མའི་དགེ་འདུན་ལ་བཀའ་སྩལ་པ། ཡང་དགེ་སློང་མ་གང་ཁྱིམ་བདག་འམ། ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་སྟེ་གོས་སློང་ན་དུས་མ་གཏོགས་ཏེ་དེ་ལ་འདས་ན་སྤང་བའི་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། དགེ་སློང་མ་གོས་ཕྲོགས་སམ། གོས་རླག་གམ། གོས་ཚིག་གམ། གོས་ཆུས་ཁྱེར་བར་གྱུར་ན་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་བསླང་བར་བྱ་སྟེ། དེ་ལ་དུས་ནི་དེ་ཡིན་ནོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པའི་འོ། །ཉེ་དུ་མ་ཡིན་པའི་ཞེས་བྱ་བ་ནི་ཕྱི་མོ་དང ། མེས་པོའི་ཕྲུགས་བདུན་ཚུན་ཆད་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ནོ། །ཁྱིམ་བདག་འམ་ཞེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །སོང་སྟེ་ཞེས་བྱ་བ་ནི་སོང་ནས་སོ། །སློང་ན་ཞེས་བྱ་བ་ནི་དུས་མ་གཏོགས་པར་བདག་ཉིད་དམ། གཞན་སློང་དུ་འཇུག་ནའོ། །དེ་ལ་དུས་ནི་འདི་ཡིན་ཏེ་ཞེས་བྱ་བ་ནི་དེ་ལ་འདི་ནི་ཆོས་དང་འཐུན་པ་ཡིན་པའོ། །གོས་ཕྲོགས་སམ་ཞེས་བྱ་བ་ནི་ཆོམ་རྐུན་ནམ། གཡོ་ཅན་གྱིས་དེའི་གོས་དག་ཕྲོགས་པར་གྱུར་པའོ། །གོས་རླག་གམ་ཞེས་བྱ་བ་ནི་དེའི་གོས་དག་རླག་པ་འམ། འཁྱམས་པར་གྱུར་པའོ། །གོས་ཆུས་ཁྱེར་རམ་ཞེས་བྱ་བ་ནི་དེའི་གོས་དག་ཆུས་ཁྱེར་བར་གྱུར་པའོ། །གོས་ཚིག་གམ་ཞེས་བྱ་བ་ནི་དེའི་གོས་དག་མེས་ཚིག་པར་གྱུར་པའོ། །སྤང་བའི་ལྟུང་བྱེད་དོ་ཞེས་བྱ་བ་ནས་རྒྱས་པར་སྦྱར་ཏེ། དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང ། ཁ་དོག་དང ། ཁྲུ་ཚད་ལས་ཏེ། ཇི་ལྟར་རིན་ཐང་ལས་ཞེ་ན། ཡང་དགེ་སློང་མ་གང་ཁྱིམ་བདག་འམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་
9.154a
དྲུང་དུ་སོང་ནས་གོས་ཀཱར་ཥཱ་པ་ཎ་ལྔ་རི་བ་བསླང་ན་སློང་བ་ན་དེ་ལ་ཉེས་བྱས་སོ། །ཐོབ་པ་ན་སྤང་བའི་ལྟུང་བྱེད་དོ། །གལ་ཏེ་ཆེས་ལྷག་པར་ཐོབ་ན་ལྟུང་བ་མེད་དོ། །དེ་བཞིན་དུ་ཀཱར་ཥཱ་པ་ཎ་བཅུ་དང་ཉི་ཤུ་རི་བ་ལ་ཡང་བརྗོད་པར་བྱ་སྟེ། དེ་ལྟ་བུ་ནི་རིན་ཐང་ལས་སོ། །ཇི་ལྟར་ཁ་དོག་ལས་ཞེ་ན། དགེ་སློང་མ་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་སྟེ་གོས་སྔོན་པོ་བསླངས་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། གལ་ཏེ་སེར་པོ་ཐོབ་ན་ལྟུང་བ་མེད་དོ། །དེ་བཞིན་དུ་སྔོན་པོ་དང ། དེ་བཞིན་དུ་དམར་པོ་ལ་སྔོན་པོ་དང ། དཀར་པོ་ཉིད་རྒྱས་པར་བརྗོད་པར་བྱའོ། །དགེ་སློང་མ་ཁྱིམ་བདག་འམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་སེར་པོ་བསླང་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །གལ་ཏེ་སྔོན་པོ་ཐོབ་ན་ལྟུང་བ་མེད་དོ། །དེ་བཞིན་དུ་སེར་པོ་དང ། དམར་པོ་དང ། དཀར་པོ་ལ་ཡང་བརྗོད་པར་བྱའོ། །དགེ་སློང་མ་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་དམར་པོ་བསླངས་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །གལ་ཏེ་སྔོན་པོ་ཐོབ་ན་ལྟུང་བ་མེད་དོ། །དེ་བཞིན་དུ་སེར་པོ་དང ། དམར་པོ་དང ། དཀར་པོ་ལ་ཡང་བརྗོད་པར་བྱའོ། །དགེ་སློང་མ་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་དཀར་པོ་བསླངས་ན་སློང་བ་ན་དེ་ལ་ཉེས་བྱས་སོ། །ཐོབ་པ་ན་སྤང་བའི་ལྟུང་བྱེད་དོ། །གལ་ཏེ་སྔོན་པོ་ཐོབ་ན་ལྟུང་བ་མེད་དོ། །དེ་བཞིན་དུ་དཀར་པོ་དང ། སེར་པོ་དང་དམར་པོ་ལ་ཡང་བརྗོད་པར་བྱ་སྟེ། དེ་ལྟ་བུ་ནི་ཁ་དོག་ལས་སོ། །ཇི་ལྟར་ཁྲུ་ཚད་ལས་ཤེ་ན། ཡང་དགེ་སློང་མ་གང་ཁྱིམ་བདག་འམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་སྟེ། གོས་ཁྲུ་ལྔ་པ་བསླངས་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །ཁྲུ་ལྔ་པའི་གོས་གང་ཡིན་པ་བསླངས་པ་ན་ཁྲུ་དྲུག་པ
9.154b
ཐོབ་ན་ལྟུང་བ་མེད་དོ། །དེ་བཞིན་དུ་ཁྲུ་བཅུ་པ་དང ། ཁྲུ་བཅུ་གཅིག་པ་དང ། དེ་བཞིན་དུ་ཁྲུ་ཉི་ཤུ་པ་དང ། ་ཁྲུ་ཉི་ཤུ་རྩ་གཅིག་པ་ཐོབ་པ་དང ། དེ་བཞིན་དུ་ཁྲུ་བཅུའི་བར་དུ་བསླངས་ལ། རས་མ་ཐོབ་པ་དང ། རས་མ་བསླངས་ལ། སྣམ་སྦྱར་གྱི་བར་དུ་ཐོབ་པ་ལ་ནི་ལྟུང་བ་མེད་དོ། །སྤང་བའི་ལྟུང་བྱེད་བཞི་པ་རྫོགས་སྷོ།། ་་་་་་་་་་་་་་།། གླེང་གཞི་མཉན་ཡོད་ནའོ། །དེའི་ཚེ་མཉན་ཡོད་དུ་དགེ་སློང་མ་ཆོམ་རྐུན་པས་བཅོམ་པ་དག་ལྷགས་སོ། །དེ་ནས་བཅུ་གཉིས་སྡེ་དགའ་མོ་དང་ཉེ་དགའ་མོ་དང ། སྦོམ་དགའ་མོ་རྣམས་ཀྱིས་དེ་དག་གི་ཆེད་དུ་བྲམ་ཟེ་དང ། ཁྱིམ་བདག་དག་གི་ཁྱིམ་རྣམས་སུ་དོང་ནས་གོས་རབ་ཏུ་མང་པོ་དག་བསྒྲུབས་ཏེ། བསྒྲུབས་ནས་འབུལ་དུ་འཇུག་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མ་གོས་ཕྲོགས་སམ། གོས་རླག་གམ། གོས་ཚིག་གམ། གོས་ཆུས་ཁྱེར་བར་གྱུར་ན་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་བསླང་བར་བྱའོ། །གལ་ཏེ་དེ་ལ་བྲམ་ཟེ་དང ། ཁྱིམ་བདག་དད་པ་ཅན་གྱིས་གོས་རབ་ཏུ་མང་པོ་སྟོབས་ལ། འདོད་ན་དགེ་སློང་མ་དེས་གོས་དེ་ལས་བླ་གོས་དང ། མཐང་གོས་དང་བཅས་པའི་མཐར་ཐུག་པ་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ། །གོས་ཕྲོགས་སམ་ཞེས་བྱ་བ་ནི་ཆོམ་རྐུན་ནམ། གཡོ་ཅན་གྱིས་དེའི་གོས་དག་ཕྲོགས་པར་གྱུར་པའོ། །སློང་ན་ཞེས་བྱ་བ་ནི་རང་ངམ་གཞན་གྱི་བར་གྱིས་སོ། །གལ་ཏེ་དེ་ལ་ཞེས་བྱ་བ་ནི་དགེ་སློང་མ་དེ་ལའོ། །དད་པ་ཅན་ཞེས་བྱ་བ་ནི་སངས་རྒྱས་ལ་མངོན་པར་དད་པ་དང ། ཆོས་དང་དགེ་འདུན་ལ་དད་པ་དང ། བདེན་པ་མཐོང་བ་དང ། ་འབྲས་བུ་ཐོབ་པ་གང་དག་ཡིན་པའོ། །བྲམ་ཟེ་ཞེས་བྱ་བ་ནི་བྲམ་ཟེ་གཙང་སྦྲ་ཅན་ལ་སོགས་པའོ། །ཁྱིམ་བདག་ཅེས་བྱ་བ་ནི་དེ་ལས་རིགས
9.155a
གཞན་པའོ། །ལྷག་པར་ཞེས་བྱ་བ་ནི་ཡང་དང་ཡང་དུའོ། །རབ་ཏུ་མང་པོ་ཞེས་བྱ་བ་ནི་གོས་བདུན་པོ་གང་ཡང་རུང་བ་ལས་ཇི་ཙམ་གྱིས་ཆོག་པའོ། །སྟོབས་ལ་ཞེས་བྱ་བ་ནི་མགྲོན་དུ་གཉེར་ནའོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་མ་དེས་ཞེས་བྱ་བ་ནི་དོན་དུ་གཉེར་བ་གང་ཡིན་པ་དེས་སོ། །བླ་གོས་དང་མཐང་གོས་དང་བཅས་པའི་མཐར་ཐུག་པ་ཞེས་བྱ་བ་ལ་བླ་གོས་དང་མཐང་གོས་དང་བཅས་པ་ནི་གཉིས་ཏེ། ཁྱིམ་པའི་བླ་གོས་དང ། མཐང་གོས་དང་བཅས་པ་དང ། དགེ་སློང་མའི་བླ་གོས་དང ། མཐང་གོས་དང་བཅས་པའོ། །ཁྱིམ་པའི་སྟོད་གཡོགས་དང ། སྨད་གཡོགས་དང་བཅས་པ་གང་ཞེ་ན། རས་ཡུག་ཆེན་ཁྲུ་བཅུ་གཉིས་པ་དང ། རས་ཡུག་ཕྲན་ཁྲུ་བདུན་པ་དང་དོ་པ་སྟེ། འདི་ནི་ཁྱིམ་པའི་སྟོད་གཡོགས་དང ། སྨད་གཡོགས་དང་བཅས་པ་ཞེས་བྱའོ། །དགེ་སློང་མའི་བླ་གོས་དང ། མཐང་གོས་དང་བཅས་པ་གང་ཞེ་ན། སར་པ་ལ་སྣམ་སྦྱར་ཉི་རིམ་དང ། རས་ཡུག་ཕྲན་ཁྲུ་ལྔ་པ་དང་དོ་པའོ། །གོས་དེ་ལས་བླང་བར་བྱའོ། །ཞེས་བྱ་བ་ནི་དེ་ལས་བླ་གོས་དང ། ་མཐང་གོས་དང་བཅས་པའོ། །དེ་ལས་ལྷག་ན་སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་ཇི་ལྟ་བ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཁྱིམ་པའི་སྟོད་གཡོགས་དང ། སྨད་གཡོགས་དང་བཅས་པ་ཐོབ་ལ། ཁྱིམ་པའི་སྟོད་གཡོགས་དང ། སྨད་གཡོགས་དང་བཅས་པ་བླངས་ནས། དེས་རས་ཡུག་ཆེན་ཁྲུ་བཅུ་གཉིས་པ་དེ་ལ་ནི་སྣམ་སྦྱར་ཉི་རིམ་པར་བྱའོ། །རས་ཡུག་ཕྲན་ཁྲུ་བདུན་པ་དང ། དོ་པ་ལ་ནི་མཐང་གོས་བྱའོ། །གལ་ཏེ་མི་ལྡང་ན་ཡང་བསླང་བར་མི་བྱ་ལ། ལྷག་པར་གྱུར་ན་ཡང་སྦྱིན་པར་མི་བྱའོ། །དགེ་སློང་མས་དགེ་སློང་མའི་བླ་གོས་དང ། མཐང་གོས་དང་བཅས་པར་ཐོབ་ལ། དགེ་སློང་མའི་བླ་གོས་དང ། མཐང་གོས་དང་བཅས་པ་བླངས་ན་དེས་སྣམ་སྦྱར་དེ་ལས་ནི་སྣམ་སྦྱར་ཉིད་དུ་བྱའོ། །རས་ཡུག་ཕྲན་ཁྲུ་ལྔ་པ་དང ། དོ་པ་ནི་མཐང་གོས་བྱའོ། །གལ་ཏེ་མི་ལྡང་ན་ཡང་བསླང་བར་བྱའོ། །ལྷག་པར་གྱུར
9.155b
ན་ཡང་སྦྱིན་པར་བྱའོ། །དགེ་སློང་མས་ཁྱིམ་པ་ལས་ཆུང་བ་སློང་ན་སློང་བ་དེ་ལ་ཉེས་བྱས་སོ། །ཐོབ་པ་ན་སྤང་བའི་ལྟུང་བྱེད་དོ། །དགེ་སློང་མས་ཆུང་བ་སློང་ན་ཉེས་བྱས་སོ། །ལྷག་སྟེ་མ་བྱིན་ན་སྤང་བའི་ལྟུང་བྱེད་དོ། །ལས་དང་པོ་པ་ལ་སོགས་པ་ནི་ལྟུང་བ་མེད་དོ། །སྤང་བའི་ལྟུང་བྱེད་ལྔ་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་ཁྱིམ་བདག་ཕྱུག་པ། ནོར་མང་བ་ལོངས་སྤྱོད་ཆེ་བ་ཞེས་བྱ་བ་ནས། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་སོ། །དེ་ཡང་ཇི་ཙམ་དུས་གཞན་ཞིག་ན་བུད་མེད་གཞན་ཞིག་དང ། ལྷན་ཅིག་འཇིག་རྟེན་པའི་འཕྱན་པོ་དག་ལ་ཞུགས་པ་དང ། དེ་ཆུང་མ་དེས་བཟློག་གོ། །དེ་བཟློག་པ་ན་མ་བཏུབ་ནས་དེའི་ཆུང་མ་དེ་སྙིང་ན་ནས་མི་གཞན་ཞིག་དང་ལྷན་ཅིག་དགའ་མགུར་སྤྱད་པ་ལ་ཞུགས་པས་ཁྱིམ་དེ་སྒོ་གཉིས་ཀྱིས་རྒུད་པར་གྱུར་ནས་དེ་གཉིས་ཀྱིས་བྲན་མོ་ཡང་རྒྱུན་དུ་བརྡེགས་སོ། །དེ་ནས་སྦོམ་དགའ་མོ་སྔ་དྲོ་ཆོས་གོས་དང ། ལྷུང་བཟེད་བླངས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཉན་ཡོད་དུ་བསོད་སྙོམས་སྤྱོད་ཅིང་ཁྱིམ་བདག་དེའི་ཁྱིམ་གང་ཡིན་པར་སོང་སྟེ། སོང་ནས་ཁྱིམ་བདག་དང ། ཁྱིམ་བདག་གི་ཆུང་མ་ལ་འདོད་ཆགས་ལ་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བར་འགྱུར་བའི་ཆོས་བཤད་པ་དང ། དེ་གཉིས་ཀྱིས་ཕན་ཚུན་དུ་བལྟས་ནས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་འདི་ནི་བདག་གིས་མ་ནོངས་ཏེ་ནོངས་པ་འདི་ནི་རྗེའི་སྲས་འདི་ལགས་སོ། །ཚོང་དཔོན་གྱིས་འདི་སྐད་ཅེས་འདི་བདག་གིས་ཡང་མ་ལགས་མོད་ཀྱི་ནོངས་པ་འདི་ནི་བཟང་མོའི་ལགས་སོ་ཞེས་སྨྲས་པ་དང ། དེ་ནས་སྦོམ་དགའ་མོས་ཁྱིམ་བདག་དེ་ཡང་གཞན་གྱི་བུད་མེད་དང ། ཁྱིམ་བདག་གི་ཆུང་མ་དེ་ཡང་གཞན་གྱི་སྐྱེས་པ་དང་བསླབ་པའི་གཞི་འཛིན་དུ་བཅུག་གོ། །དེ་གཉིས་ཀྱིས་དམ་པ་མ་ཡིན་པའི་ཆོས་དེ་ལས་ལོག་པས་ཁྱིམ་དེ་རྒྱས་པར་གྱུར་ནས་བྲན་མོ
9.156a
དེ་ཡང་ཁྱིམ་བདག་དེའི་དཔོན་མོར་བཅུག་གོ། །དེ་ནས་ཁྱིམ་བདག་དེ་དང ། ཁྱིམ་བདག་གི་ཆུང་མ་དེས་བསམས་པ། བདག་ཅག་གིས་ལེགས་པ་དང་སྐལ་པ་གང་ཅུང་ཟད་ཅི་བདོག་པ་ཐམས་ཅད་ནི་འཕགས་མ་སྦོམ་དགའ་མོ་ལས་བྱུང་བར་ཤེས་སོ། །བྲན་མོ་དེས་ཀྱང་བསམས་པ། ད་ལྟར་བདག་ལ་བདེ་བ་དང་ཡིད་བདེ་བ་ཅུང་ཟད་ཅི་བདོག་པ་གང་ཡིན་པ་དེ་ཐམས་ཅད་ནི་འཕགས་མ་སྦོམ་དགའ་མོ་ལས་བྱུང་བར་ཤེས་ཀྱིས། ཀྱེ་མའོ་བདག་གིས་འཕགས་མ་སྦོམ་དགའ་མོ་ལ་དབུལ་བར་བྱའོ་སྙམ་ནས་དེ་ཕྱི་རོལ་དུ་བྱུང་བ་དང ། སྦོམ་དགའ་མོ་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །འཕགས་མ་ཁྱོད་ལ་གཏམ་སྙན་སྦྲན་པར་བགྱི་སྟེ། འཕགས་མས་རྗེའི་སྲས་ལས་རས་ཡུག་ཆེན་གཅིག་ཐོབ་པར་འགྱུར་རོ། །དེ་ནས་སྦོམ་དགའ་མོ་ཁྱིམ་དེར་སོང་ནས། ་ཁྱིམ་བདག་དང་ཁྱིམ་བདག་གི་ཆུང་མ་ལ་འདི་སྐད་ཅེས་སྨྲས་སོ། །ཁྱིམ་བདག་ཁོ་མོ་ལ་སྦྱིན་པར་འདོད་པའི་རས་ཡུག་ཆེན་གང་ཡིན་པ་དེ་བལྟས་འོན་ཅིག་།དེ་ནས་ཁྱིམ་བདག་དེ་རས་ཡུག་ཆེན་དེ་བླངས་ནས་སྦོམ་དགའ་མོ་ལ་བྱིན་པ་ལས་སྦོམ་དགའ་མོས་རས་ཡུག་ཆེན་སྦོམ་པོ་དེ་མཐོང་ནས་བཞིན་སྒྱུར་བར་བྱེད། ལག་པ་འདྲིལ་བར་བྱེད་པ་དང ། དེ་གཉིས་ཀྱིས་འདི་སྐད་ཅེས་སྨྲས་སོ། །འཕགས་མ་འདི་ཅི་ནོངས། དེས་འདི་སྐད་ཅེས་སྨྲས་སོ། །བཞིན་བཟངས་འདི་ཅི་བཟང་པོ་ཡིན་སྙམ་འམ། ཁྱིམ་བདག་གལ་ཏེ་འདི་ཁོ་མོས་བགོས་ཏེ་ཁྱིམ་དག་ཏུ་སོན་ན་ཁོ་མོ་ལ་དེ་དག་སུ་ལས་ཐོབ་པའི་གོས་ཡིན་ཞེས་འདྲི་ན་ཁོ་མོ་ནི་ངོ་ཚ་ན་ཇི་སྐད་ལན་གདབ། དེ་གཉིས་ཀྱིས་འདི་སྐད་ཅེས་སྨྲས་སོ། །འཕགས་མ་བདག་ཅག་ལ་འདི་མཆིས་ཀྱི་གཞན་ནི་མ་མཆིས་སོ། །དེས་འདི་སྐད་ཅེས་སྨྲས་སོ། །ཁྱིམ་བདག་ཁོ་མོས་ཁྱོད་ལ་བསྟན་པར་བྱའོ། །ཇི་ལྟར་བགྱི་ལགས། དེས་འདི་སྐད་ཅེས་སྨྲས་སོ། །ཁྱིམ་བདག་རས་ཡུག་ཆེན་འདི་ཉིད་བཙོངས་པའི་སྟེང་དུ་ཅུང་ཟད་ཅིག་བསྣན་དང ། ལྷག་པར་བཟང་པོར་འགྱུར་རོ། །ཆུང་མས་ཀྱང་སྨྲས་པ། རྗེའི་སྲས་དེ་བཞིན་དུ་མཛོད་ཅིག་།དེ་ཚོང་འདུས་སུ་སོང་སྟེ། ཚོང་པ་ལ་ཞག་དུས་བཏབ་ནས་རས་ཡུག་ཆེན་སར་པ་ཞིག་སྐྱིན་པོར
9.156b
བླངས་ཏེ་བསྐོན་ནོ། །དེ་ནས་ཚོང་པ་དེས་དུས་ཚང་ནས་ཚོང་དཔོན་དེ་བཟུང་བ་གཞན་དག་གིས་མཐོང་བ་ནས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མའི་ཆེད་དུ་ཁྱིམ་བདག་འམ། ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་དག་སྤགས་པར་གྱུར་ལ། དེར་ཡང་དགེ་སློང་མ་དེ་ལ་སྔར་མ་བཏབས་བཞིན་དུ་རྣམ་པར་རྟོག་པ་འགའ་ཁོ་ན་སྐྱེས་ཏེ་སོང་ནས་ཁྱེད་ཀྱིས་ཁོ་མོའི་ཆེད་དུ་གོས་ཀྱི་རིན་དག་སྤགས་པར་གྱུར་པ་གང་ཡིན་པའི་གོས་ཀྱི་རིན་སྤགས་པ་དེ་དག་གིས་ཚེ་དང་ལྡན་པ་དག་གོས་འདི་ལྟ་བུ་དང་འདི་ལྟ་བུ་དག་ཉོས་ལ་བདག་ལ་གོས་རུང་བ་དུས་སུ་ལེགས་པར་སྐོན་ཅིག་ཅེས་སྨྲ་ན་བཟང་པོ་འདོད་པའི་ཕྱིར་གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་མ་ཞེས་བྱ་བ་ནི་སྦོམ་དགའ་མོའོ། །ཉེ་དུ་མ་ཡིན་པ་ཞེས་བྱ་བ་ནི་སྔ་མ་བཞིན་ནོ། །གོས་ཀྱི་རིན་དག་ཅེས་བྱ་བ་ནི་དངུལ་དང་གསེར་རོ། །སྤགས་ཏེ་ཞེས་བྱ་བ་ནི་བདག་གི་གོས་ཀྱི་རིན་དངུལ་དང་གསེར་འདི་དག་གིས་ཤེས་མངོན་པར་འདུས་བྱས་པའོ། །འདི་ལྟ་བུ་དང ། འདི་ལྟ་བུ་དག་ཅེས་བྱ་བ་ནི་གོས་བདུན་པོ་གང་ཡང་རུང་བ་ལས་གོས་འདི་འདྲ་བ་དག་ཉོས་ཤིག་ཅེས་བྱ་བའོ། །དགེ་སློང་མ་འདི་ཞེས་བྱ་བ་ནི་སྦོམ་དགའ་མོའོ། །འོངས་ན་ཞེས་བྱ་བ་ནི་འོངས་ནའོ། །སྐོན་ཅིག་ཅེས་བྱ་བ་ནི་ཕུལ་ཅིག་ཅེས་བྱ་བའོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །རུང་བ་དུས་སུ་ཞེས་བྱ་བ་ནི་ལོངས་སྤྱད་པར་འོས་པའོ། །དེར་དགེ་སློང་མ་དེས་ཞེས་བྱ་བ་ནི་སྦོམ་དགའ་མོའོ། །སྔར་མ་བསྟབས་པར་ཞེས་བྱ་བ་ནི་སྔར་མགྲོན་དུ་མ་གཉེར་བར་རོ། །རྣམ་པར་རྟོག་པ་འགའ་ཁོ་ན་སྐྱེས་ནས་ཞེས་བྱ་བ་ནི་རྟོག་པ་འགའ་ཁོ་ན་སྐྱེས་པའོ། །ཁྱེད་ཀྱིས་ཁོ་མོའི་ཆེད་དུ་ཞེས་བྱ་བ་ནི་བདག་ཉིད་ཉེ་བར་སྟོན་པའོ། །གོས་གྲུབ་ན་ཞེས་བྱ་བ་ནི་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང ། ཁ་དོག་དང ། ཁྲུ་ཚད་ལས་ཏེ། ཇི་ལྟར་རིན་ཐང་ལས་ཤེ་ན། དགེ་སློང་མ་ཁྱིམ་བདག་གམ།
9.157a
ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་ཀཱར་ཥཱ་པ་ཎ་ལྔ་རི་བ་བྱིན་ལ། གོས་ཀཱར་ཥཱ་པ་ཎ་ལྔ་རི་བ་བླངས་ན་ལྟུང་བ་མེད་དོ། །གལ་ཏེ་ལྷག་པར་སློང་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་པའི་ལྟུང་བྱེད་དོ། །དེ་བཞིན་དུ་ཀཱར་ཥཱ་པ་ཎ་ཉི་ཤུ་རི་བའི་བར་དུ་བརྗོད་པར་བྱ་སྟེ། དེ་ལྟ་བུ་ནི་རིན་ཐང་ལས་སོ། །ཇི་ལྟར་ཁ་དོག་ལས་ཤེ་ན། དགེ་སློང་མ་ཁྱིམ་བདག་འམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་གོས་སྔོན་པོ་གང་ཡིན་པ་བྱིན་ལ། གོས་སྔོན་པོ་བླངས་ན་ལྟུང་བ་མེད་དོ། །གལ་ཏེ་སེར་པོ་བླངས་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །སྔོན་པོ་ལ་ཇི་ལྟ་བ་བཞིན་དུ་སེར་པོ་དང ། དམར་པོ་དང ། སྟུག་པོ་དང ། སྲབ་མོའི་བར་དུ་སྔ་མ་བཞིན་ཏེ། དེ་ལྟ་བུ་ནི་ཁ་དོག་ལས་སོ། །ཇི་ལྟར་ཁྲུ་ཚད་ལས་ཞེ་ན། དགེ་སློང་མ་ཁྱིམ་བདག་གམ། ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་དྲུང་དུ་སོང་ནས་རས་ཡུག་ཆེན་ཁྲུ་ལྔ་པ་བྱིན་ལ། རས་ཡུག་ཆེན་ཁྲུ་ལྔ་པ་བླངས་ན་ལྟུང་བ་མེད་དོ། །གལ་ཏེ་ལྷག་པ་བསླངས་ན་སློང་བ་ན་དེ་ལ་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །ཁྲུ་ཉི་ཤུའི་བར་ལ་ཡང་དེ་བཞིན་ནོ། །སྤང་བའི་ལྟུང་བྱེད་དྲུག་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །བྱུང་བ་འདི་ཉིད་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མའི་ཆེད་དུ་ཁྱིམ་བདག་འམ། ཁྱིམ་བདག་གི་ཆུང་མ་ཉེ་དུ་མ་ཡིན་པས་སོ་སོ་ནས་གོས་ཀྱི་རིན་དག་བསྡོགས་པར་གྱུར་ལ། བདག་ཅག་སོ་སོ་ནས་གོས་ཀྱི་རིན་བསྡོགས་པ་འདི་དག་གིས་གོས་འདི་ལྟ་བུ་སོ་སོ་བ་དག་ཉོས་ལ་དགེ་སློང་མ་མིང་འདི་ཞེས་བྱ་བ་འོངས་དང ། དེ་ལ་སོ་སོ་ནས་གོས་བསྐོན་པར་བྱའོ་སྙམ་པ་ལས་དེར་གལ་ཏེ་དགེ་སློང་མ་དེ་སྔར་མ་བསྟབས་བཞིན་དུ་རྣམ་པར་རྟོག་པ་འགའ་ཁོ་ན་སྐྱེས་ཏེ། སོང་ནས་ཁྱེད་ཀྱིས་ཁོ་མོའི་ཆེད་དུ་སོ་སོ་ནས་གོས་ཀྱི་རིན་བསྡོགས་པར་གྱུར་པ་གང་ཡིན་པའི་གོས་ཀྱི་རིན་སོ་སོ་བ་དེ་དག་གིས་ཚེ་དང་ལྡན་པ་དག་སོ་སོ་ནས་གོས་འདི་ལྟ་བུ་དང ། འདི་ལྟ་བུ་དག་ཉོས་ལ་གཉི་ག་འདུས་ཏེ་གོས་རུང་བ་དུས་གཅིག་ཏུ་ལེགས་པར་སྐོན་ཅིག་ཅེས་སྨྲ་ན། ་བཟང་པོ་འདོད་པའི
9.157b
ཕྱིར་གོས་གྲུབ་ན་སྤང་བའི་ལྟུང་བྱེད་དོ། །ལྟུང་བའི་རིམ་པ་ནི་གོང་མ་ཇི་ལྟ་བ་བཞིན་དུ་བསླབ་པའི་གཞི་འདི་ལ་ཡང་རྗེས་སུ་འཐུན་པར་བརྗོད་པར་བྱའོ། །དེ་ལྟ་མོད་ཀྱི་ཁྱད་པར་ནི་འདི་ཡོད་དེ། སོ་སོ་ཞེས་བྱ་བ་ནི་རེ་རེའོ་ཞེས་བྱ་བ་ནས་བཟང་པོ་འདོད་པའི་ཕྱིར་ཞེས་བྱ་བའི་བར་འདི་ནི་ཐ་དད་དུ་བྱ་བ་ཡིན་ནོ། །སྤང་བའི་ལྟུང་བྱེད་བདུན་པ་རྫོགས་སྷོ།། ་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །བཅོམ་ལྡན་འདས་ཀྱིས་ཁ་ཅིག་དགེ་སློང་ཐུན་མོང་དག་ཁ་ཅིག་དགེ་སློང་མ་ཐུན་མོང་དང ། ཁ་ཅིག་གཉི་ག་ཐུན་མོང་པའི་བསླབ་པའི་གཞི་བཅའ་བ་མཛད་པ་ཡིན་པས། འདིར་ནི་བཅོམ་ལྡན་འདས་ཀྱིས་གཉི་ག་ཐུན་མོང་བ་མཛད་དེ། གང་གི་ཚེ་བཅོམ་ལྡན་འདས་ཀྱིས་རྒྱལ་པོའི་ཁབ་ཏུ་ཉེ་དགའ་ལས་བརྟེན་ཏེ་ཀར་ཤ་པ་ཎ་ལེན་པའི་བསླབ་པའི་གཞི་བཅའ་བར་མཛད་པ་དེའི་ཚེ་དགེ་སློང་མ་གང་དག་བསླབ་པ་འདོད་པ་དག་ནི་རྗེས་སུ་བྱེད་དོ། །དེ་ནས་དགེ་སློང་མ་ཉེ་དགའ་མོ་རྒྱལ་པོ་དང ། བློན་པོ་ཆེན་པོ་དང ། བྲམ་ཟེ་དང ། ཁྱིམ་བདག་རྣམས་ལས་ཀར་ཤ་པ་ཎ་སློང་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏེ། བཅོམ་ལྡན་འདས་ཀྱིས་བཀའ་སྩལ་པ། ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མའི་ཆེད་དུ་རྒྱལ་པོ་འམ། བློན་པོ་ཆེན་པོ་འམ། བྲམ་ཟེ་འམ། ཁྱིམ་བདག་འམ། གྲོང་རྡལ་གྱི་མི་འམ། ཡུལ་གྱི་མི་འམ། ནོར་ཅན་ནམ། ཚོང་དཔོན་ནམ། དེད་དཔོན་གྱི་ཕོ་ཉའི་ལག་ཏུ་གོས་ཀྱི་རིན་དག་བསྐུར་བར་གྱུར་ལ། དེ་ནས་ཕོ་ཉ་དེ་གོས་ཀྱི་རིན་འདི་དག་ཁྱེར་ནས་དགེ་སློང་མ་དེའི་དྲུང་དུ་སོང་སྟེ། སོན་ནས་དགེ་སློང་མ་དེ་ལ་འདི་སྐད་ཅེས་འཕགས་མ་མཁྱེན་པར་མཛོད་ཅིག་།ཁྱོད་ལ་གོས་ཀྱི་རིན་དག་རྒྱལ་པོ་འམ། བློན་པོ་ཆེན་པོ་འམ། བྲམ་ཟེ་འམ། ཁྱིམ་བདག་འམ། གྲོང་རྡལ་གྱི་མི་འམ། ཡུལ་མི་འམ།
9.158a
ནོར་ཅན་ནམ། ཚོང་དཔོན་ནམ། དེད་དཔོན་ཆེ་གེ་མོ་ཞིག་གིས་བསྐུར་བ་ལགས་ཀྱིས་འཕགས་མས་ཐུགས་བརྩེ་བས་ཉེ་བར་བཟུང་སྟེ། གོས་ཀྱི་རིན་འདི་དག་བཞེས་སུ་གསོལ་ཞེས་སྨྲ་ན། དགེ་སློང་མ་དེས་ཕོ་ཉ་དེ་ལ་ཚིག་འདི་སྐད་ཅེས། ཚེ་དང་ལྡན་པ་ཕོ་ཉ་དགེ་སློང་མ་རྣམས་ནི་གོས་ཀྱི་རིན་དག་ལེན་དུ་རུང་བ་མ་ཡིན་པས་ཁོ་མོ་ཅག་ནི་གོས་རུང་བ་དུས་སུ་རྙེད་ན་ནི་ལེན་ཏོ་ཞེས་བརྗོད་པར་བྱའོ། །གལ་ཏེ་ཕོ་ཉ་དེ་དགེ་སློང་མ་དེ་ལ་འདི་སྐད་ཅེས་འཕགས་མ་རྣམས་ཀྱི་ཞལ་ཏ་བགྱིད་པ། འཕགས་མ་རྣམས་ཀྱི་ཞལ་ཏ་ཉམས་སུ་ལེན་པ་གང་ལགས་པ་མཆིས་སམ་ཞེས་ཟེར་ན། དགེ་སློང་མ་གོས་འདོད་པས་ཕོ་ཉ་འདི་དག་ནི་དགེ་སློང་མ་རྣམས་ཀྱིས་ཞལ་ཏ་ཉམས་སུ་ལེན་པ་ཡིན་ནོ་ཞེས་ཀུན་དགའ་ར་བ་པ་འམ། དགེ་སྙེན་ཞལ་ཏ་བྱེད་པ་བསྟན་པར་བྱའོ། །དེ་ནས་ཕོ་ཉ་དེས་ཞལ་ཏ་བྱེད་པ་དེ་ག་ན་བ་དེར་འགྲོ་བར་བྱ་སྟེ། སོན་ནས་ཞལ་ཏ་བྱེད་པ་ལ་འདི་སྐད་ཅེས། ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག་།དགེ་སློང་མ་འདི་ལྟ་བུ་ཞིག་གི་ཆེད་དུ་གོས་ཀྱི་རིན་འདི་དག་རྒྱལ་པོ་འམ། ཞེས་བྱ་བ་ནས། དེད་དཔོན་ཞེས་བྱ་བའི་བར་གྱིས་བསྐུར་བ་ཡིན་གྱིས་ཞལ་ཏ་བྱེད་པ་ཁྱོད་ཀྱིས་གོས་ཀྱི་རིན་འདི་དག་གིས་གོས་འདི་ལྟ་བུ་དང ། འདི་ལྟ་བུ་དག་ཉོས་ལ་དགེ་སློང་མ་མིང་འདི་ཞེས་བྱ་བས་འོངས་དང ། དེ་ལ་གོས་རུང་བ་དུས་སུ་སྐོན་ཅིག་ཅེས་བརྗོད་པར་བྱའོ། །དེ་ནས་ཕོ་ཉ་དེས་ཞལ་ཏ་བྱེད་པ་དེ་ལ་ཤིན་ཏུ་ལེགས་པར་ཡང་དག་པར་བསྒོ། ཡང་དག་པར་བསྟན་ནས་དགེ་སློང་མ་དེ་གང་ན་དེར་འགྲོ་བར་བྱ་སྟེ། ཕྱིན་ནས་དགེ་སློང་མ་དེ་ལ་འདི་སྐད་ཅེས་འཕགས་མ་རྣམས་ཀྱི་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་ལགས་ཀྱིས་ཁྱོད་དེའི་དྲུང་དུ་བཞུད་ཅིག་དང ། དེས་ཁྱོད་ལ་གོས་རུང་བ་དུས་སུ་བསྐོན་པར་འགྱུར་རོ། །ཞེས་བརྗོད་པར་བྱའོ། །དགེ་སློང་མ་གོས་འདོད་པས་ཀྱང་ཞལ་ཏ་བྱེད་པ་དེ་ག་བ་ན་དེར་འགྲོ་བར་བྱ་སྟེ། སོང་ནས་ཚེ་དང་ལྡན་པ་ཞལ་ཏ་བྱེད་པ་ཁོ་མོ་གོས་འདོད་དོ། །
9.158b
ཚེ་དང་ལྡན་པ་ཞལ་ཏ་བྱེད་པ་ཁོ་མོ་གོས་འདོད་དོ་ཞེས་ལན་གཉིས་ལན་གསུམ་དུ་བསྐུལ་བར་བྱ་དྲན་པར་བྱའོ། །ལན་གཉིས་ལན་གསུམ་དུ་སོང་སྟེ་བསྐུལ་ཅིང་དྲན་པར་བྱས་པ་ལས་གལ་ཏེ་གོས་གྲུབ་ན་དེ་ལྟ་ན་ལེགས། ཇི་སྟེ་མ་གྲུབ་ན་ལན་བཞི་ལན་ལྔ་ལན་དྲུག་གི་མཐར་ཐུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པར་བྱའོ། །ལན་བཞི་ལན་ལྔ་ལན་དྲུག་གི་མཐར་ཐུག་གི་བར་དུ་ཕྱོགས་སུ་བསྡད་པར་བྱས་པ་ལས་གལ་ཏེ་གོས་གྲུབ་ན་དེ་ལྟ་ན་ལེགས། ཇི་སྟེ་མ་གྲུབ་ན་དེ་ལས་ལྷག་པར་གོས་བསྒྲུབ་པའི་ཕྱིར་བརྩལ་བ་བྱས་ཏེ་གོས་བསྒྲུབ་ན་སྤང་བའི་ལྟུང་བྱེད་དོ། །གལ་ཏེ་མ་གྲུབ་ན་དགེ་སློང་མ་དེས་ཕྱོགས་གང་ནས་གོས་ཀྱི་རིན་དེ་དག་འོངས་པ་དེར་བདག་ཉིད་འགྲོ་བར་བྱའོ། །ཡང་ན་ཡིད་གཅུགས་པའི་ཕོ་ཉ་ལས་ཁྱེད་ཀྱིས་དགེ་སློང་མ་མིང་འདི་ཞེས་བྱ་བའི་ཆེད་དུ་གོས་ཀྱི་རིན་གང་ཡིན་པ་དེ་དག་བསྐུར་བ་ལས་གོས་ཀྱི་རིན་དེ་དག་གིས་ནི་དགེ་སློང་མ་དེའི་དོན་ཅི་ཡང་མ་གྲུབ་ཀྱིས་ཤེས་པར་གྱིས་ཤིག་།ཚེ་དང་ལྡན་པ་དག་རང་གི་ནོར་ཆུད་མ་གཟེན་ཅིག་ཅེས་སྤྲིང་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །དགེ་སློང་མའི་ཆེད་དུ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའི་འོ། །རྒྱལ་པོ་ནི་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བ་སྟེ། བུད་མེད་དམ། སྐྱེས་པ་འམ། མ་ནིང་རྒྱལ་པོའི་དབང་བསྐུར་བས་དབང་བསྐུར་བ་གང་ཡང་ཡིན་པ་དེ་ནི་རྒྱལ་པོ་ཡང་ཡིན། དེ་ནི་རྒྱལ་རིགས་ཀྱང་ཡིན། དེ་ནི་སྤྱི་བོ་ནས་དབང་བསྐུར་བ་ཡང་ཡིན་ནོ། །བློན་པོ་ཆེན་པོ་འམ་ཞེས་བྱ་བ་ནི་རྒྱལ་པོའི་བྱ་བ་བྱེད་པ་སྟེ། གསང་ཚིག་འཐུན་པས་འཚོ་བའོ། །བྲམ་ཟེ་འམ་ཞེས་བྱ་བ་ནི་བྲམ་ཟེ་གཙང་སྒྲ་ཅན་ནོ། །ཁྱིམ་བདག་གམ་ཞེས་བྱ་བ་ནི་ཕྱུག་པོའོ། །གྲོང་རྡལ་གྱི་མི་ཞེས་བྱ་བ་ནི་གྲོང་གླིངས་པའོ། །ཡུལ་གྱི་མི་འམ་ཞེས་བྱ་བ་ནི་ཡུལ་ན་གནས་པའོ། །ནོར་ཅན་ནམ་ཞེས་བྱ་བ་ནི་ནོར་བྱེ་བས་ཕྱུག་པའོ། །ཚོང་དཔོན་ནམ་ཞེས་བྱ་བ་ནི་ཅོད་པན་བཅིངས་པའོ། །དེད་དཔོན་གྱིས་ཞེས་བྱ་བ་ནི་གང་གིས་ཡུལ་གཞན་དུ་
9.159a
དོན་འཐུན་དག་དེད་པའོ། །ཕོ་ཉའི་ལག་ཏུ་ཞེས་བྱ་བ་ནི་སྐྱེས་པ་དང ། བུད་མེད་དང ། མ་ནིང་གིའོ། །གོས་ཀྱི་རིན་དག་ཅེས་བྱ་བ་ནི་གསེར་དང་དངུལ་དག་གོ། །བསྐུར་ཏེ་ཞེས་བྱ་བ་ནི་བརྫངས་ཏེའོ། །དེ་ནས་ཕོ་ཉ་དེ་ཞེས་བྱ་བ་ནི་སྐྱེས་པ་དང ། བུད་མེད་དང ། མ་ནིང་ངོ ། །གོས་ཀྱི་རིན་དེ་དག་བླངས་ཏེ་ཞེས་བྱ་བ་ནི་ཁྱེར་ནས་སོ། །དགེ་སློང་མ་དེ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའོ། །སོང་སྟེ་ཞེས་བྱ་བ་ནི་སོང་ནས་སོ། །འདི་སྐད་ཅེས་སྨྲས་སོ་ཞེས་བྱ་བ་ནི་སྨྲས་པའོ། །འཕགས་མ་མཁྱེན་པར་མཛོད་ཅིག་ཅེས་བྱ་བ་ནི་གོས་ཀྱི་རིན་འདི་དག་ནི་རྒྱལ་པོས་བསྐུར་བའོ་ཞེས་རིག་པར་བྱ་བའོ། །སྣོམས་ཤིག་ཅེས་བྱ་བ་ནི་ལོང་ཤིག་པའོ། །ཐུགས་བརྩེ་བ་ཉེ་བར་བཟུང་སྟེ་ཞེས་བྱ་བ་ནི་ལེགས་པར་འདོད་པ་ཉེ་བར་བཟུང་སྟེའོ། །དགེ་སློང་མ་དེས་ཞེས་བྱ་བ་ནི་ཉེ་དགའ་མོས་སོ། །ཕོ་ཉ་བ་དེ་ཞེས་བྱ་བ་ནི་སྐྱེས་པ་དང ། བུད་མེད་དང ། མ་ནིང་ངོ ། །ཚིག་འདི་སྐད་ཅེས་བརྗོད་པར་བྱའོ་ཞེས་བྱ་བ་ནི་འདི་སྐད་ཅེས་ཡང་དག་པར་བསྒོ་བར་བྱའོ། །ཚེ་དང་ལྡན་པ་ཕོ་ཉ་དགེ་སློང་མ་རྣམས་ནི་གོས་ཀྱི་རིན་དག་ལེན་དུ་རུང་བ་མ་ཡིན་ཏེ། ཞེས་བྱ་བ་ནི་དེ་དག་ལེན་པ་བཅོམ་ལྡན་འདས་ཀྱིས་བཀག་གི། བཅོམ་ལྡན་འདས་ཀྱིས་ཁོ་མོ་ཅག་ལ་ནི་གོས་རུང་བ་རྗེས་སུ་གནང་བའོ། །གལ་ཏེ་ཕོ་ཉ་དེ་དགེ་སློང་མ་དེ་ལ་འདི་སྐད་ཅེས་ཟེར་ན་ཞེས་བྱ་བ་ནི་འདྲི་ནའོ། །འཕགས་མ་རྣམས་ཀྱི་ཞལ་ཏ་བགྱིད་པ་ཞེས་བྱ་བ་ནི་འཕགས་མ་རྣམས་ཀྱི་ཞལ་ཏ་ཉམས་སུ་ལེན་པ་གང་ལགས་པ་ཞེས་བྱའོ། །དགེ་སློང་མ་གོས་འདོད་པས་ཞལ་ཏ་བྱེད་པ་བསྟན་པར་བྱ་སྟེ་ཞེས་བྱ་བ་ལ། ཀུན་དགའ་ར་བ་པ་ཞེས་བྱ་བ་ནི་རུང་བར་བྱེད་པའོ། །དགེ་བསྙེན་ཞེས་བྱ་བ་ནི་བསླབ་པའི་གཞི་ལྔའོ། །འདི་དག་ནི་དགེ་སློང་མ་རྣམས་ཀྱིས་ཞལ་ཏ་བྱེད་པ་ཡིན་ནོ། །ཞེས་བྱ་བ་ནི་འདི་དག་གིས་དགེ་སློང་མ་དེ་རྣམས་ཀྱི་ཞལ་ཏ་བྱེད་པ་ཉམས་སུ་མྱོང་བའི་ཕྱིར་རོ། །གལ་ཏེ་ཕོ་ཉ་དེ་ཞལ་ཏ
9.159b
བྱེད་པ་གང་ན་བ་དེར་འགྲོ་བར་བྱ་སྟེ་ཕྱིན་ནས་ཞེས་བྱ་བ་ནི་དེ་ལ་དགོས་པར་རིག་པར་བྱ་བའི་ཕྱིར་ཕྱིན་པའོ། །ཞལ་ཏ་བྱེད་པ་ཤེས་པར་གྱིས་ཤིག་།གོས་ཀྱི་རིན་དག་ནི་ཞེས་བྱ་བ་ནི་གསེར་དང་དངུལ་དག་རྒྱལ་པོའི་བར་གྱིས་བསྐུར་བ་དག་གོ། །དགེ་སློང་མ་མིང་འདི་ཞེས་བྱ་བའི་ཆེད་དུ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའོ། །དེ་ནས་ཕོ་ཉ་དེ་ཞེས་བྱ་བ་ནི་སྐྱེས་པ་དང་བུད་མེད་དང ། མ་ནིང་ངོ ། །ཞལ་ཏ་བྱེད་པ་ཀུན་དགའ་ར་བ་འམ། དགེ་བསྙེན་ལ་ཤིན་ཏུ་ལེགས་པར་ཡང་དག་པར་བསྒོ་ནས་ཞེས་བྱ་བ་ནི་རྣམ་གྲངས་དུ་མས་སོ། །དགེ་སློང་མ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའོ། །གང་ན་བ་དེར་འགྲོ་བ་བྱ་སྟེ་ཕྱིན་ནས་ཞེས་བྱ་བ་ནི་སོན་ནས་སོ། །འདི་སྐད་ཅེས་སྨྲ་བར་བྱ་སྟེ། འཕགས་མ་རྣམས་ཀྱི་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་པ་ལགས་ཀྱིས་བཞུད་ཅིག་དང ། དེས་ཁྱོད་ལ་གོས་བསྐོན་པར་འགྱུར་རོ་ཞེས་བྱ་བ་ནི་བདུན་པོ་གང་ཡང་རུང་བའོ། །རུང་བ་ཞེས་བྱ་བ་ནི་ལོངས་སྤྱོད་པར་འོས་པའོ། །དགེ་སློང་མ་གོས་འདོད་པ་ཞེས་བྱ་བ་ནི་གལ་ཏེ་གོས་དོན་དུ་གཉེར་བར་གྱུར་ནའོ། །སོང་སྟེ་ཞེས་བྱ་བ་ནི་སོང་ནས་སོ། །ལན་གཉིས་ཞེས་བྱ་བ་ནི་ལན་གཉིས་ཀྱི་བར་དུའོ། །ལན་གསུམ་དུའོ་ཞེས་བྱ་བ་ནི་ལན་གསུམ་གྱི་བར་དུའོ། །བསྐུལ་བར་བྱ་དྲན་པར་བྱའོ། །དོན་དེ་གལ་ཏེ་གྲུབ་ན་དེ་ལྟ་ན་ལེགས་ཞེས་བྱ་བ་ནི་དེ་ལྟར་ན་བཟང་པོའོ། །ཇི་སྟེ་མ་གྲུབ་ན་ལན་བཞི་ལན་ལྔ་ལན་དྲུག་གི་མཐར་ཐུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པར་བྱའོ། །ཞེས་བྱ་བ་ནི་ཕྱོགས་སུ་བསྡད་པ་བཞི་དང ། བསྐུལ་བའི་སྒོ་དྲུག་པོ་དག་གིས་སོ། །ཕྱོགས་སུ་བསྡད་པ་བཞི་པོ་དག་གང་ཞེ་ན། ཀུན་གནས་དང ། འདུག་གནས་དང ། ཟོང་གནས་དང ། ལས་ཀྱི་མཐའི་གནས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་གསུམ་པ། དེ་ལ་ཀུན་གནས་ཞེས་བྱ་བ་ནི་འདྲེག་མཁན་དང ། རྫ་མཁན་གྱི་གནས་སོ། །འདུག་གནས་ཞེས་བྱ་བ་ནི་ཁྱིམ་སྟེ
9.160a
ལྷག་པར་གནས་པའོ། །ཟོང་གནས་ཞེས་བྱ་བ་ནི་ཚོང་ཁང་དང ། ཚོང་རྡལ་ལོ། །ལས་ཀྱི་མཐའི་གནས་ནི་གསུམ་སྟེ། ས་ལུའི་ལས་ཀྱི་མཐའ་དང ། ལན་ཚཝ་དང ། བུ་རམ་ཤིང་གི་ལས་ཀྱི་མཐའ་སྟེ། འདི་ནི་ཕྱོགས་སུ་བསྡད་པ་བཞི་ཞེས་བྱའོ། །བསྐུལ་བའི་སྒོ་དྲུག་པོ་དག་གང་ཞེ་ན། འོངས་སམ་ཞེ་ན། དེའི་ཕྱིར་རོ་ཞེས་བྱ་བ་དང ། འོངས་པ་ལེགས་སོ་ཞེ་ན། དེའི་ཕྱིར་རོ་ཞེས་བྱ་བ་དང ། སྟན་འདི་ལ་འདུག་ཤིག་ཅེ་ན། དེའི་ཕྱིར་རོ་ཞེས་བྱ་བ་དང ། བཅའ་བ་འདི་འཆོ་ཤིག་ཅེས་བྱ་བ་དང ། ཟས་འདི་ཟོ་ཤིག་ཅེས་བྱ་བ་དང ། བཏུང་བ་འདི་འཐུང་ཤིག་ཅེ་ན། དེའི་ཕྱིར་རོ་ཞེས་བྱ་བ་སྟེ། འདི་དག་ནི་བསྐུལ་བའི་སྒོ་དྲུག་གོ། །མ་ཐོགས་པར་བརྗོད་ཅིང་གང་དུ་སྐབས་མེད་པར་བསྐུལ་ན་བསྐུལ་བ་ཡོངས་སུ་མ་རྫོགས་པ་ཞེས་བརྗོད་པར་བྱའོ། །གལ་ཏེ་སྐབས་ཡོད་པ་ལ་བསྐུལ་ན་བསྐུལ་བ་ཡོངས་སུ་རྫོགས་པ་ཞེས་བརྗོད་པར་བྱའོ། །དེ་ལྟར་གནས་དེ་རྣམས་སུ་ཅང་མི་སྨྲ་བར་བསྡད་པ་ན་གོས་དེ་གྲུབ་ནའོ་ཞེས་བྱ་བ་ནི་རྙེད་ནའོ། །དེ་ལྟ་ན་ལེགས་ཞེས་བྱ་བ་ནི་དེ་ལྟར་ན་བཟང་བའོ། །ཇི་སྟེ་མ་གྲུབ་ན་ཞེས་བྱ་བ་ནི་མ་ཐོབ་ནའོ། །ལྷག་པར་བསྩལ་བར་བྱས་ནས་ཞེས་བྱ་བ་ནི་དེའི་འོག་རོལ་དུ་ལྷག་པར་རོ། །གོས་གྲུབ་ན་ཞེས་བྱ་བ་ནི་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ཞེས་བྱ་བ་སྔ་མ་བཞིན་ནོ། །ཇི་སྟེ་མ་གྲུབ་ན་ཞེས་བྱ་བ་ནི་མ་ཐོབ་ནའོ། །དགེ་སློང་མ་དེས་ཞེས་བྱ་བ་ནི་ཉེ་དགའ་མོའོ། །ཕྱོགས་གང་ནས་གོས་ཀྱི་རིན་དེ་དག་འོངས་པར་གྱུར་པ་ཞེས་བྱ་བ་ནི་གང་ལས་འོངས་པར་གྱུར་པའོ། །དེར་བདག་ཉིད་འགྲོ་བར་བྱ་བ་འམ། ཞེས་བྱ་བ་ནི་རང་ཉིད་དོ། །ཡིད་གཅུགས་པའི་ཕོ་ཉ་གཏང་བར་བྱའོ་ཞེས་བྱ་བ་ནི་གང་ཞིག་སོང་ན་དོན་དེ་བྱེད་པར་འགྱུར་བའོ། །ཁྱོད་ཀྱིས་དགེ་སློང་མ་མིང་འདི་ཞེས་བྱ་བའི་ཆེད་དུ་གོས་ཀྱི་རིན་བསྐུར་བ་གང་ཡིན་པ་དེ་དག་གིས་ནི་དེའི་དོན་ཅི་ཡང་མ་གྲུབ་ཅེས་བྱ་བ་ནི་དགོས་པ་ཅུང་ཟད་ཀྱང་མ་བྱས་པའོ། །ཤེས་པར་གྱིས་ཤིག་ཅེས་བྱ་བ་ནི་ཚེ་དང་ལྡན་པ་དག་རང་གི་ནོར་ཚུལ་མ་ཡིན་པར་ཆུད་མ་གཟན
9.160b
ཅིག་ཅེས་བྱ་བའོ། །དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་འཐུན་པའི་ཆོས་ཡིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གལ་ཏེ་ཞལ་ཏ་བྱེད་པ་དེ་དགེ་སློང་མའི་དྲུང་དུ་སོང་ནས་འདི་སྐད་ཅེས། འཕགས་མ་གོས་དག་སྣོམས་ཤིག་།ཅེས་ཟེར་ན་དགེ་སློང་མ་དེས་ཞལ་ཏ་བྱེད་པ་དེ་ལ་འདི་སྐད་ཅེས། འདི་དག་ཁོ་མོས་སྤངས་ཟིན་གྱིས་དེ་ཉིད་ལ་བྱིན་ཅིག་ཅེས་བརྗོད་པར་བྱའོ། །གལ་ཏེ་ཞལ་ཏ་བྱེད་པ་དེ་ཡང་འདི་སྐད་ཅེས་འཕགས་མ་གོས་འདི་དག་བཞེས་ཤིག་དང ། བདག་གིས་དེའི་སེམས་གཟུང་ལགས་ཀྱིས་ཞེས་ཟེར་ན་གལ་ཏེ་དགེ་སློང་མས་རིམ་པ་འདི་མ་བྱས་པར་ལེན་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །གལ་ཏེ་དགེ་སློང་མས་བརྟགས་པ་མ་ཡིན་པ་དེས་གང་ཅུང་ཟད་དུ་ན་ལྷུང་བཟེད་དམ། ཆོས་གོས་སམ། གཞན་ཡང་དགེ་སྦྱོང་གི་འཚོ་བའི་ཡོ་བྱད་ཅི་ཡང་རུང་བ་བདག་གིར་བྱེད་ན་དེ་ལ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་བརྒྱད་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་མོན་དར་གྱི་གདིང་བ་བཀག་པ་དེའི་ཚེ་བཅུ་གཉིས་སྡེ་དེ་དག་གིས་མོན་དར་གྱི་གདིང་བ་དག་ཀྱང་བྱེད། བྱེད་དུ་ཡང་འཇུག་པ་དང ། དོན་ཉུང་བའི་དགེ་སློང་མ་དག་སྨོད་པ་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མོན་དར་སར་པ་ལས་གདིང་བ་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པའི་འོ། །སར་པ་ཞེས་བྱ་བ་ལ། སར་པ་ནི་གཉིས་ཏེ། གསར་པས་སར་པ་དང ། རྙེད་པས་སར་པ་སྟེ། སྐབས་འདིར་ནི་གསར་པས་སར་པ་ཁོ་ན་ཡིན་པར་དགོངས་སོ། །མོན་དར་ཞེས་བྱ་བ་ནི་སྲིན་བལ་ལ་བྱའོ། །གདིང་བ་ཞེས་བྱ་བ་ལ་གདིང་བ་ནི་གཉིས་ཏེ། ནང་ཚངས་ཅན
9.161a
དང ། བླིངས་པ་སྟེ་སྐབས་འདིར་ནི་གཉི་ག་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་དམ་གཞན་གྱིས་སོ། །སྤང་བའི་ལྟུང་བྱེད་དོ་ཞེས་བྱ་བ་ནི། གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཆུན་པོ་དང ། འདའ་བ་དང ། ཕུང་པོ་སྟེ། དགེ་སློང་མས་སྲིན་བལ་གྱི་ཆུན་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང ། ཇི་སྲིད་དུ་གདིང་བར་མི་བྱེད་ན་ཉེས་བྱས་སོ། །བྱས་ན་སྤང་བའི་ལྟུང་བྱེད་དོ། །དགེ་སློང་མས་སྲིན་བལ་གྱི་འདའ་བ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང ། ཇི་སྲིད་དུ་གདིང་བར་མི་བྱེད་ན་ཉེས་བྱས་སོ། །བྱས་ན་སྤང་བའི་ལྟུང་བྱེད་དོ། །དགེ་སློང་མས་སྲིན་བལ་གྱི་ཕུང་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང ། ཇི་སྲིད་དུ་གདིང་བ་མི་བྱེད་ན་ཉེས་བྱས་སོ། །བྱས་ན་སྤང་བའི་ལྟུང་བྱེད་དོ། །དགེ་སློང་མས་སྲིན་བལ་གྱི་ཆུན་པོ་དང ། འདའ་བ་དང ། ཕུང་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང ། ཇི་སྲིད་དུ་གདིང་བར་མི་བྱེད་ན་ཉེས་བྱས་སོ། །བྱས་ན་སྤང་བའི་ལྟུང་བྱེད་དོ། །དགེ་སློང་མས་སྲིན་བལ་གྱི་འདའ་བ་དང ། ཕུང་པོ་དང ། ཆུན་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང་ཇི་སྲིད་དུ་གདིང་བ་མི་བྱེད་ན་ཉེས་བྱས་སོ། །བྱས་ན་སྤང་བའི་ལྟུང་བྱེད་དོ། །དགེ་སློང་མས་སྲིན་བལ་གྱི་ཕུང་པོ་དང ། འདའ་བ་དང ། ཆུན་པོ་འབྱེད་པར་བྱེད། འཇིག་པར་བྱེད། རྨེལ་བར་བྱེད་ཅིང ། ཇི་སྲིད་དུ་གདིང་བར་མི་བྱེད་ན་ཉེས་བྱས་སོ། །བྱས་ན་སྤང་བའི་ལྟུང་བྱེད་དོ། །གལ་ཏེ་བྱས་པ་རྙེད་ན་ལོངས་སྤྱོད་པ་ལ་ནི་ལྟུང་བ་མེད་དོ། །སྤང་བའི་ལྟུང་བྱེད་དགུ་པ་རྫོགས་སྷོ།། ་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་བཅོམ་ལྡན་འདས་ཀྱིས་གཙུག་ན་ནོར་བུའི་མདོ་ལས་འབྱུང་བའི་ངོ་བོ་ལ་བརྟེན་ནས། གསེར་དང་དངུལ་ལེན་པའི་བསླབ་པའི་གཞི་བཅའ་བ་མཛད་པ་དེའི་ཚེ་ཡང་བཅུ་གཉིས་སྡེ་རྣམས་ཀྱིས་དེའི་ཚེ་གསེར་དང ། དངུལ་རང་གི་ལག་གིས་ལེན་པར་བྱེད། ལེན་དུ་འཇུག་པར་བྱེད་པ་དང ། དགེ་སློང་མ་དོན་ཉུང་བ་དག་སྨོད་པར
9.161b
བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་གི་ལག་གིས་གསེར་དང ། དངུལ་ལེན་པར་བྱེད་དམ་ལེན་དུ་འཇུག་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྔ་མ་བཞིན་ནོ། །རང་གི་ལག་གིས་ཞེས་བྱ་བ་ནི་བདག་ཉིད་ཀྱིའོ། །གསེར་དང་དངུལ་ཞེས་བྱ་བ་ནི་དབྱིག་དང ། གསེར་རོ། །ལེན་པར་བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །ལེན་དུ་འཇུག་ན་ཞེས་བྱ་བ་ནི་གཞན་གྱིས་སོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གཞི་བཅཝ་བརྒྱད་ཀྱིས་ཏེ། འདི་ལོང་ཤིག་།འདི་ནས་ལོང་ཤིག་།འདི་ཙམ་ལོང་ཤིག་།ཅེས་བྱ་བ་དང ། འདི་ཁྱེར་ཏེ་ཤོག་།འདི་ནས་ཁྱེར་ཏེ་ཤོག་།འདི་ཙམ་ཁྱེར་ཏེ་ཤོག་ཅེས་བྱ་བ་དང་འདི་ཞོག་ཤིག་།འདིར་ཞོག་ཤིག་།འདི་ཙམ་ཞོག་ཤིག་ཅེས་བྱ་བ་དང ། དེ་ལོང་ཤིག་།དེ་ནས་ལོང་ཤིག་།དེ་ཙམ་ལོང་ཤིག་ཅེས་བྱ་བ་དང་དེ་ཁྱེར་ཤོག་དེ་ནས་ཁྱེར་ཏེ་ཤོག་།དེ་ཙམ་ཁྱེར་ཏེ་ཤོག་ཅེས་བྱ་བ་དང ། དེ་ཞོག་ཤིག་།དེར་ཞོག་ཤིག་།དེ་ཙམ་ཞོག་ཤིག་ཅེས་བྱ་བ་སྟེ། འདི་ལོང་ཤིག་ཅེས་བྱ་བ་ནི་དབྱིག་གམ། གསེར་རོ། །འདི་ནས་ལོང་ཤིག་ཅེས་བྱ་བ་ནི་ལྕགས་ཟངས་ནས་སམ། རྫ་བོ་ནས་སམ། ཟངས་ནས་སམ། བྱི་གྲེད་ནས་སམ། ་ཟ་མ་ཏོག་ནས་སོ། །འདི་ཙམ་ལོང་ཤིག་ཅེས་བྱ་བ་ནི་བརྒྱ་འམ། སྟོང་སྟེ། གང་ན་རུང་བ་བྱེད་པ་འམ། དགེ་སྦྱོང་ཡོད་པ་དེར་ལོང་ཤིག་ཅེས་བསྒོ་ན་ཉེས་བྱས་སོ། །བླངས་ན་སྤང་བའི་ལྟུང་བྱེད་དོ། །འདི་ལོང་ཤིག་།འདི་ནས་ལོང་ཤིག་།འདི་ཙམ་ན་ལོང་ཤིག་ཅེས་བྱ་བ་ནས་འཐོབ་པར་མི་འགྱུར་བའི་ཕྱོགས་གང་དུ་རུང་བ་བྱེད་པ་འམ། དགེ་ཚུལ་མ་མེད་པ་དེར་ལོང་ཤིག་ཅེས་བསྒོ་ན་ཉེས་བྱས་སོ། །བླངས་ན་ཡང་ཉེས་བྱས་སོ། །ཞེས་བྱ་བའི་བར་རོ། །གང་ཡང་ཡུལ་ཙམ་པའི་ཁྱིམ་བདག་ལ་བརྟེན་ནས་བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་སྟེ་བཤེས་པ་གཞན་གྱིས་བཅང་བར་བྱའོ། །
9.162a
བཅང་བ་ནི་འདི་ལྟར་བྱ་སྟེ། འཕགས་མ་དགོངས་སུ་གསོལ། བདག་མིང་འདི་ཞེས་བགྱི་བ་ལ་ཀར་ཤ་པ་ཎ་རུང་བ་མ་ལགས་པ་དག་བྱུང་སྟེ། བདག་མིང་འདི་ཞེས་བགྱི་བས་ཡོན་བདག་གམ། ཡོན་བདག་གི་མཆིས་བྲང་ཆེ་གེ་མོ་ཞེས་བགྱི་བའི་མིང་གིས་རུང་བར་བགྱི་སྟེ། རྐྱེན་དེ་ཁོ་ནས་བཅང་བར་བགྱིའོ། །ནམ་རུང་བར་མ་བགྱིས་པ་འདིས་རུང་བར་བགྱིས་པ་གྲུབ་པ་དེའི་ཚེ་བདག་གིས་རུང་བར་བགྱིས་སོ་ཞེས་བྱ་བ་ནས་བཅང་བར་བྱའོ། །སྤང་བའི་ལྟུང་བྱེད་བཅུ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ནས་མངོན་མཚན་ཅན་གྱིས་སྤྱོད་པ་རྣམ་པ་སྣ་ཚོགས་བྱེད་པའི་བསླབ་པའི་གཞི་བཅའ་བ་མཛད་པ་དེའི་ཚེ་ཡང་བཅུ་གཉིས་སྡེ་རྣམས་ཀྱིས་དེའི་ཚེ་མངོན་ཚན་ཅན་གྱིས་སྤྱོད་པ་སྣ་ཚོགས་བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མངོན་མཚན་གྱིས་སྤྱོད་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྔ་མ་བཞིན་ནོ། །སྣ་ཚོགས་ཤེས་བྱ་བ་ནི་རྣམ་པ་དུ་མའོ། །མངོན་མཚན་ཅན་ཞེས་བྱ་བ་ནི་དབྱིག་གམ། གསེར་རོ། །སྤྱོད་ན་ཞེས་བྱ་བ་ནི་ལྷག་པར་སྤྱོད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རྣམ་པ་བཞི་སྟེ། ཀུན་དུ་སྦྱོར་བར་བྱེད། རབ་ཏུ་སྦྱོར་བར་བྱེད། བུན་འགྱེད་པར་བྱེད། སྐྱེད་འགྱེད་པར་བྱེད་པའོ། །དེ་ལ་ཀུན་ཏུ་སྦྱོར་བར་བྱེད་པ་ནི་ཡུལ་གྱི་རྙེད་པའི་ཕྱིར་ཟོང་ལ་ཀུན་དུ་སྦྱོར་བར་བྱེད་པ་དང ། ཤིང་རྟ་ལ་ཀུན་དུ་སྦྱོར་བར་བྱེད་པ་དང ། མི་རྣམས་སྡུད་པར་བྱེད་པ་དང ། དེ་ནས་རྫས་འདི་ནི་ཁྱེད་ཀྱིའོ། །འདི་ནི་ཁོ་མོའི་འོ། །ཞེས་བྱ་བ་སྟེ། ཇི་སྲིད་དུ
9.162b
རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སོ། །རྙེད་པ་བདག་གིར་བྱེད་ན་སྤང་བའི་ལྟུང་བྱེད་དོ། །དེ་ལྟ་བུ་ནི་ཀུན་དུ་སྦྱོར་བར་བྱེད་པ་ཡིན་ནོ། །ཇི་ལྟར་རབ་ཏུ་སྦྱོར་བར་བྱེད་ཅེ་ན། གསེར་གྱི་རྙེད་པའི་ཟོང་གིས་བཅུ་ལས་བཅུ་གཅིག་ཏུ་བསྐྱེད་པའི་ཕྱིར་ཟོང་ལ་རབ་ཏུ་སྦྱོར་བར་བྱེད་ཅིང་དཔང་རྒྱའི་ཆེད་དུ་དེར་འགྲོ་བ་དང ། སྣག་ཚ་འམ། དཔང་པོ་འཚོལ་དུ་འགྲོ་བའོ། །ཇི་ཙམ་དུ་རྙེད་པ་བདག་གིར་མི་བྱེད་ན་ཉེས་བྱས་སོ། །བདག་གིར་བྱེད་ན་སྤང་བའི་ལྟུང་བྱེད་དོ། །དེ་ལྟ་བུ་ནི་རབ་ཏུ་སྦྱོར་བར་བྱེད་པ་ཡིན་ནོ། །ཇི་ལྟར་བུན་འགྱེད་པར་བྱེད་ཅེ་ན། ནས་དང་གྲོ་གསར་ཐོག་གི་ཕྱིར་བུན་དགྱེ་པར་གཞལ་བའི་སྣོད་ཀྱིས་གྲོ་དང་ནས་སྐྱེད་དུ་གཏོང་བ་སྟེ། དེར་དེ་དག་གཞལ་བའི་སྣོད་དང ། བྲེའུ་ཆུང་དང ། ཕུལ་དང ། འཇལ་བ་དང ། མི་དག་དོན་དུ་གཉེར་བར་འགྲོ་བ་ཡིན་ཏེ། ཇི་སྲིད་དུ་རྙེད་པ་བདག་གིར་མི་བྱེད་ན་ཉེས་བྱས་སོ། །བདག་གིར་བྱེད་ན་སྤང་བའི་ལྟུང་བྱེད་དོ། །དེ་ལྟ་བུ་ནི་བུན་འགྱེད་པར་བྱེད་པ་ཡིན་ནོ། །ཇི་ལྟར་སྐྱེད་འགྱེད་པར་བྱེད་ཅེ་ན། དེ་དག་མུ་ཏིག་གི་སྐྱེད་ཉིད་ཀྱིས་སྐྱེད་འགྱེད་པར་བྱེད། གསེར་གྱི་སྐྱེད་ཉིད་ཀྱིས་སྐྱེད་འགྱེད་པར་བྱེད་པ་ཡིན། དེར་དེ་དག་གྲོ་བ་དང ། སྣག་ཙ་དང ། དཔང་པོ་དོན་དུ་གཉེར་བར་བྱེད་པ་ཡིན་ཏེ། ཇི་སྲིད་དུ་རྙེད་པ་བདག་གིར་མི་བྱེད་ན་ཉེས་བྱས་སོ། །བདག་གིར་བྱེད་ན་སྤང་བའི་ལྟུང་བྱེད་དོ། །དེ་ལྟ་བུ་ནི་སྐྱེད་འགྱེད་པར་བྱེད་པ་ཡིན་ནོ། །དེ་ལྟར་བསླབ་པའི་གཞི་བཅས་པ་དང ། མཆོད་རྟེན་གྱི་དང ། དགེ་འདུན་གྱི་མི་ཟད་པར་བྱ་བ་དེ་དག་རབ་ཏུ་སྦྱོར་བར་མི་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་སྦྱར་བར་བྱའོ། །དེ་དག་གིས་སུ་ཡང་རུང་བ་དག་ལ་བཏང་བ་དང ། བཏང་བ་དེ་དག་འཁྱམས་པར་གྱུར་པ་ནས་བཅོམ་ལྡན་འདས་ཀྱིས་བཀའ་སྩལ་པ། བཀྲེན་པ་ལ་ཡང་ནོར་མི་གཏང ། །མཐའ་ཁོབ་གནས་ལ་འང་མ་ཡིན་ཞིང ། །གཏུམ་པོ་སྡིག་པའི་ལས་ཅན་དང ། །མཐུ་ཅན་ལ་ཡང་ནམ་ཡང་མིན། །སྤང་བའི་ལྟུང་བྱེད་བཅུ་གཅིག་པ་རྫོགས་སྷོ།། ་་་་་་་་་་་་་་།།
9.163a
གླེང་གཞི་ནི་མཉན་ཡོད་ནའོ། །དེའི་ཚེ་དྲུག་སྡེ་རྣམས་ཉོ་ཚོང་རྣམ་པ་སྣ་ཚོགས་དག་བྱེད་དེ། ལེན་པར་བྱེད། གཏོང་བར་བྱེད། ཉོ་བར་བྱེད། འཚོང་བར་བྱེད་དོ། །ཇི་ལྟར་ལེན་པར་བྱེད་ཅེ་ན། གང་གི་ཚེ་མཉན་ཡོད་ན་དཀོན་པར་གྱུར་ལ་ལྗོངས་རྣམས་སུ་མོད་པར་གྱུར་པ་དེའི་ཚེ་ལྗོངས་རྣམས་ནས་བླངས་ནས་མཉན་ཡོད་དུ་ལེན་པར་བྱེད་དེ། དེ་ལྟ་བུའི་ནི་ལེན་པར་བྱེད་པའོ། །ཇི་ལྟར་གཏོང་བར་བྱེད་ཅེ་ན། གང་གི་ཚེ་མཉན་ཡོད་དུ་ལོ་ལེགས་པར་གྱུར་ལ་ལྗོངས་རྣམས་སུ་ལོ་ཉེས་པར་གྱུར་པ་དེའི་ཚེ་མཉན་ཡོད་ནས་བླངས་ནས་ལྗོངས་རྣམས་སུ་གཏོང་བར་བྱེད་དེ། དེ་ལྟ་བུ་ནི་གཏོང་བར་བྱེད་པའོ། །ཇི་ལྟར་ཉོ་བར་བྱེད་ཅེ་ན། གང་གི་ཚེ་མོད་པར་གྱུར་པ་དེའི་ཚེ་ཉོ་བར་བྱེད་པ་སྟེ། དེ་ལྟ་བུ་ནི་ཉོ་བར་བྱེད་པའོ། །ཇི་ལྟར་འཚོང་བར་བྱེད་ཅེ་ན། གང་གི་ཚེ་དཀོན་པར་གྱུར་པ་དེའི་ཚེ་འཚོང་བར་བྱེད་པ་སྟེ་དེ་ལྟ་བུ་ནི་འཚོང་བར་བྱེད་པའོ། །ཉོ་ཚོང་བྱེད་པར་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཉོ་འཚོང་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རྙེད་པ་འདོད་པས་ཉོ་བར་བྱེད་ཅིང ། རྙེད་པ་འདོད་པས་འཚོང་བར་བྱེད་ན་ཉོ་བར་བྱེད་པ་ན་དེ་ལ་ཉེས་བྱས་སོ། །འཚོང་བར་བྱེད་པ་ན་སྤང་བའི་ལྟུང་བྱེད་དོ། །རྙེད་པ་འདོད་པས་ཉོ་བར་བྱེད་ལ། རྙེད་པ་མི་འདོད་པས་འཚོང་བར་བྱེད་ན་ཉོ་བར་བྱེད་པ་ན་དེ་ལ་ཉེས་བྱས་སོ། །འཚོང་བར་བྱེད་པ་ན་ལྟུང་བ་མེད་དོ། །རྙེད་པ་མི་འདོད་པས་ཉོ་བར་བྱེད་ལ་རྙེད་པ་འདོད་པས་འཚོང་བར་བྱེད་ན་ཉོ་བ་ན་དེ་ལ་ལྟུང་བ་མེད་དོ། །འཚོང་བར་བྱེད་ན་སྤང་བའི་ལྟུང་བྱེད་དོ། །རྙེད་པ་མི་འདོད་པས་ཉོ་བར་བྱེད་ཅིང ། རྙེད་པ་མི་འདོད་པས་འཚོང་བར་བྱེད་ན་གཉིས་ཀ་ལ་ལྟུང་བ་མེད་དོ། །ཡུལ་གཞན་གྱི་སྦྱོར་བས
9.163b
སྔ་མའི་རྒྱུད་སྦྱང་བར་བྱའོ། །དེ་ནས་དགེ་འདུན་གྱི་དག་ཡོད་ལ་སྦྱིན་པ་པོ་དག་ཀྱང་འོངས་ཏེ་ཟན་སྦྱར་བར་འདོད་ནས་དེ་དག་གིས་ཟོང་གིས་བཙལ་བ་དང ། བཟའ་བ་དང་བཏུང་བ་མ་རྙེད་ནས་བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ཉོས་པ་བཞིན་སྦྱིན་ནོ། །རེས་འགའ་མོད་པ་ན་ཉོས་ལ་དཀོན་པར་གྱུར། རེས་འགའ་དཀོན་པ་ན་ཉོས་ལ་མོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཚོང་དུས་ཀྱི་རིན་ཐང་གིས་སྦྱིན་པར་བྱའོ། །སྤང་བའི་ལྟུང་བྱེད་དང་པོའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།། སྡོམ་ལ། ལྷུང་བཟེད་སྐུད་པ་དེ་ཕྱིར་དང ། །ཕྱིར་འཕྲོག་དེ་བཞིན་བརྟད་པ་དང ། །རྙེད་དང་སྨན་དང་ཞག་གཅིག་དང ། །བརྗེས་དང་དུས་དང་དུས་མིན་པའོ། །གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ་ལྷུང་བཟེད་འབྲེལ་བ་མེད་པའི་བསླབ་པའི་གཞི་བཅའ་བ་མཛད་པ་དེའི་ཚེ། དགེ་སློང་མ་བཅུ་གཉིས་སྡེ་རྣམས་ལྷུང་བཟེད་འབྲེལ་བ་མེད་པ་ཡང་འཆང་བར་བྱེད། འབྲེལ་བ་མེད་པ་ལྷན་པ་མེད་པ་ཡང་འཆང་བར་བྱེད་དོ། །དེ་ནས་རང་བཞིན་དུ་གནས་པའི་དགེ་སློང་མ་དག་གིས་བཅུ་གཉིས་སྡེ་དེ་དག་ལ་འདི་སྐད་ཅེས་སྨྲས་སོ། །ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་མ་བཅས་སམ། དེ་ནས་བཅུ་གཉིས་སྡེ་དེ་དག་གིས་དགེ་སློང་མ་དེ་རྣམས་ལ་འདི་སྐད་ཅེས། བསླབ་པའི་གཞི་ནི་དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་དེ་མ་ཡིན་ནོ། །ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལྷུང་བཟེད་ལྷན་པ་ལྔ་མེད་པ་སྤྱད་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར་ལྷུང་བཟེད་སར་པ་གཞན་སྤོང་ཞིང ། ལྷུང་བཟེད་གྲུབ་ན་སྤང་བའི་ལྟུང་བྱེད་དོ། །དགེ་སློང་མ་དེས་ལྷུང་བཟེད་དེ་དགེ་སློང་མའི་འཁོར་ལ་དབུལ་བར་བྱའོ། །དགེ་སློང་མའི
9.164a
འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་མ་དེ་ལ། དགེ་སློང་མ་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་གི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ། དེ་ལ་ནི་ཆོ་ག་ཡིན་ནོ། །ཡང་དགེ་སློང་མ་གང་ཞེས་བྱ་བ་ནི་སྔ་མ་བཞིན་ནོ། །ལྷན་པ་ལྔ་མེད་པའི་ལྷུང་བཟེད་ཅེས་བྱ་བ་ནི་ལྷན་པ་ལྔར་མ་ཚང་བ་གང་ཡིན་པའོ། །ཡོད་བཞིན་དུ་ཞེས་བྱ་བ་ནི་སྤྱད་བཟོད་པའོ། །སར་པ་གཞན་སློང་ན་ཞེས་བྱ་བ་ནི་གཉིས་པ་ཤོས་སོ། །བཟང་པོ་འདོད་པའི་ཕྱིར་ཞེས་བྱ་བ་ནི་མཆོག་འདོད་པའི་ཕྱིར་རམ། ཡང་ན་གཞན་འདོད་པའི་ཕྱིར་རོ། །གྲུབ་ནའོ་ཞེས་བྱ་བ་ནི་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་སྔ་མ་བཞིན་ནོ། །དགེ་སློང་མ་དེས་ལྷུང་བཟེད་དེ་དགེ་སློང་མའི་དགེ་འདུན་ལ་འབུལ་བར་བྱའོ་ཞེས་བྱ་བ་ནི་སྦྱིན་པར་བྱའོ། །དགེ་སློང་མའི་འཁོར་གང་ཡིན་པ་དེའི་ཞེས་བྱ་བ་ནི་དགེ་སློང་མའི་ལྷུང་བཟེད་ཐ་མར་གྱུར་པའོ། །དེ་ནས་དགེ་སློང་མའི་དགེ་འདུན་དེས་ལྷུང་བཟེད་འབྲེལ་བ་མེད་པ་འབྲིམ་པའི་དགེ་སློང་མ་བསྐོ་བར་བྱའོ། །ལྷུང་བཟེད་འབྲེལ་བ་མེད་པ་འབྲིམ་པའི་དགེ་སློང་མ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱའོ། །ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། ་འཇིགས་པས་འགྲོ་བ་དང ། ལྷུང་བཟེད་བྲིམས་པ་དང་མ་བྲིམས་པ་མ་ཤེས་པའོ། །དེ་བཞིན་དུ་དཀར་པོའི་ཕྱོགས་ལ་ཡང་སྦྱར་བར་བྱའོ། །དེའི་འོག་ཏུ་གསོལ་བ་དང་གཉིས་ཀྱི་ལས་ཀྱིས་ལྷུང་བཟེད་འབྲལ་བ་མེད་པ་འབྲིམ་པའི་དགེ་སློང་མ་བསྐོ་བར་བྱ་སྟེ། གནས་མལ་བཤམས་པ་བྱས་ནས་ཞེས་བྱ་བ་ནས་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་མིང་འདི་ཞེས་བགྱི་བ་འདི་འཕགས་མའི་དགེ་འདུན་ལ་ལྷུང་བཟེད་འབྲེལ་བ་མེད་པར
9.164b
འདྲིམ་པར་སྤྲོ་ལགས་ན་གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་གནང་བར་མཛོད་ཅིག་དང ། འཕགས་མའི་དགེ་འདུན་མས་དགེ་སློང་མ་མིང་འདི་ཞེས་བགྱི་བ་ལྷུང་བཟེད་འབྲལ་བ་མེད་པ་འདྲིམ་པར་བསྐོ་བར་བགྱི་སྟེ་འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི་འཕགས་མའི་དགེ་འདུན་ལ་ལྷུང་བཟེད་འབྲེལ་པ་མེད་པ་འདྲིམ་པར་སྤྲོ་ལགས་ནས། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལྷུང་བཟེད་འབྲེལ་པ་མེད་པར་འདྲིམ་པར་བསྐོས་ཏེ། མིང་འདི་ཞེས་བགྱི་བ་འཕགས་མའི་དགེ་འདུན་ལ་ལྷུང་བཟེད་འབྲེལ་བ་མེད་པ་འདྲིམ་པར་བགྱིད་ན། ཕུ་ནུ་མོ་དག་མིང་འདི་ཞེས་བགྱི་བ་ལྷུང་བཟེད་འབྲལ་བ་མེད་པ་འདྲིམ་པར་བསྐོ་བར་བཟོད་པ་དེ་དག་ནི་ཅང་མ་གསུངས་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལྷུང་བཟེད་འབྲེལ་བ་མེད་པ་འདྲིམ་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེའི་འོག་ཏུ་ལྷུང་བཟེད་འབྲེལ་བ་མེད་པ་འདྲིམ་པའི་དགེ་སློང་མས་ཚོགས་པའི་དུས་སུ་དགེ་འདུན་ལས་སང་སྔ་དྲོ་འབྲེལ་བ་མེད་པའི་ལྷུང་བཟེད་འདྲིམ་གྱིས། རང་རང་གི་ལྷུང་བཟེད་སྣོམས་ལ་སྤྱོན་ཅིག་ཅེས་བརྗོད་པར་བྱའོ། །དེ་ནས་ནམ་ནངས་པ་དང་འདྲིམ་པར་བྱེད་པའི་དགེ་སློང་མས་གནས་མལ་བཤམ་པ་བྱས་ཏེ། དགེ་སློང་མའི་དགེ་འདུན་ཚོགས་ཤིང་འཐུན་པར་གྱུར་པ་དང ། ལྷུང་བཟེད་འབྲེལ་བ་མེད་པ་ཐོགས་ཏེ། དགེ་སློང་མའི་གནས་བརྟན་གྱི་མདུན་དུ་འདུག་ནས་ལྷུང་བཟེད་འབྲེལ་བ་མེད་པའི་བསྔགས་པ་ཇི་ལྟ་བ་བཞིན་བརྗོད་པར་བྱ་ཞིང ། འདི་སྐད་ཅེས་གནས་བརྟན་མ་ལྷུང་བཟེད་བཞེས་ཤིག་ཅེས་ཀྱང་བརྗོད་པར་བྱའོ། །གལ་ཏེ་དགེ་འདུན་གྱི་གནས་བརྟན་གྱི་ལྷུང་བཟེད་འབྲེལ་བ་མེད་པ་བླངས་ན། དགེ་འདུན་གྱིས་གནས་བརྟན་གྱི་ལྷུང་བཟེད་གནས་བརྟན་གཉིས་པ་ཤོས་ལ་སྦྱིན་པར་བྱའོ། །གནས་བརྟན་གཉིས་པ་ཤོས་ཀྱི་ལྷུང་བཟེད་གསུམ་པ་ཤོས་ལ་སྦྱིན་པར་བྱ་སྟེ།
9.165a
དེ་བཞིན་དུ་དགེ་འདུན་གསར་བུའི་བར་དུ་ཡང་ངོ ། །གལ་ཏེ་དགེ་འདུན་གྱི་གནས་བརྟན་གྱིས་ལྷུང་བཟེད་འབྲེལ་བ་མེད་པ་མ་བླངས་ལ། གནས་བརྟན་གསུམ་པའི་ཐད་དུ་ཕྱིན་པ་ལས། གལ་ཏེ་སླར་ཡང་དགེ་འདུན་གྱི་གནས་བརྟན་གྱིས་སློང་ན་སྦྱིན་པར་མི་བྱའོ། །ལན་གཉིས་སློང་ན་ཡང་སྦྱིན་པར་མི་བྱའོ། །གལ་ཏེ་ལན་གསུམ་དུ་སློང་ན་སྦྱིན་པར་བྱ་སྟེ། འདུལ་བ་དང་འགལ་བའི་ཉེས་བྱས་བཤགས་པར་བྱའོ། །དེ་བཞིན་དུ་དགེ་འདུན་གསར་བུའི་བར་དུ་སྟེ། གལ་ཏེ་སུས་ཀྱང་ལྷུང་བཟེད་འབྲེལ་བ་མེད་པ་མ་བླངས་སམ། གཞན་གྱི་ལྷག་པར་གྱུར་ན་དེ་ཉིད་ལ་སྦྱིན་པར་བྱའོ། །དེས་དེའི་འོག་ཏུ་ཀུན་དུ་སྤྱད་པར་བྱ་བ་བརྗོད་པར་བྱའོ། །ཞེས་བཅོམ་ལྡན་འདས་ཀྱིས་བཀའ་སྩལ་པ་ན་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་འབྲེལ་བ་མེད་པ་འཆང་བའི་དགེ་སློང་མའི་ཀུན་དུ་སྤྱད་པའི་ཆོས་བཅའ་བར་བྱ་སྟེ། དགེ་སློང་མ་ལྷུང་བཟེད་འབྲེལ་བ་མེད་པ་འཆང་བ་གལ་ཏེ་བསོད་སྙོམས་ལ་འགྲོ་ན་ལག་པ་གཡས་པར་ལྷུང་བཟེད་འབྲེལ་བ་མེད་པ་བཀུར་ཞིང་ལག་པ་གཡོན་པར་བྱིན་གྱིས་བརླབས་པའོ། །གལ་ཏེ་འབྲས་ཆན་གཤེར་བ་རྙེད་ན་བྱིན་གྱིས་བརླབས་པར་བླང་བར་བྱའོ། །གལ་ཏེ་འབྲས་ཆན་སྐམ་པོ་རྙེད་ན་ལྷུང་བཟེད་འབྲེལ་བ་མེད་པར་བླང་བར་བྱའོ། །གལ་ཏེ་ལྷུང་བཟེད་ཀྱི་སྣོད་དུ་འཇུག་པར་བྱེད་ན་ཞབས་སུ་ནི་བྱིན་གྱིས་བརླབས་པའོ། །སྟེང་དུ་ནི་ལྷུང་བཟེད་འབྲེལ་བ་མེད་པའོ། །གལ་ཏེ་བྱི་དོར་བྱེད་ན་དང་པོར་ལྷུང་བཟེད་འབྲེལ་བ་མེད་པའོ། །ཕྱི་ནས་བྱིན་གྱིས་བརླབས་པའོ། །གལ་ཏེ་ལྷུང་བཟེད་གདུ་བུའི་སྟེང་དུ་འཇོག་ན་བྱིན་གྱིས་བརླབས་པའི་སྟེང་དུ་ལྷུང་བཟེད་འབྲེལ་བ་མེད་པ་གཞག་པར་བྱའོ། །གལ་ཏེ་ལྷུང་བཟེད་ཀྱི་ལས་བྱེད་ན་རྫ་བོ་བཟང་པོ་གང་ཡིན་པ་དེར་ལྷུང་བཟེད་འབྲེལ་བ་མེད་པ་བསྲེག་པར་བྱའོ། །གལ་ཏེ་ལམ་དུ་འགྲོ་ན་ལྷན་ཅིག་གནས་པ་དང ། ཉེ་གནས་རྣམས་ལ་བྱིན་གྱིས་བརླབས་པ་བསྐུར་བར་བྱ་ཞིང ། ལྷུང་བཟེད་འབྲེལ་བ་མེད་པ་ནི་རང་གིས་སོ། །གལ་ཏེ་ཁྱེར་བ་འགའ་ཡང་མེད་ན་མཆན་ཁུང་གཡས་ཀྱིས་ནི་ལྷུང་བཟེད་འབྲེལ་བ་མེད་པའོ། །གཡོན་གྱིས་ནི་བྱིན་གྱིས་བརླབས་པའོ། །ལྷུང་བཟེད་འབྲེལ་བ
9.165b
མེད་པ་འཆང་བའི་དགེ་སློང་མས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་འདུན་གྱིས་ལྷུང་བཟེད་ཐ་མ་དེ་བྱིན་གྱིས་མི་བརླབ་སྟེ། བྱིན་གྱིས་བརླབ་པར་མི་བྱ་སུ་ལ་ཡང་སྦྱིན་པར་མི་བྱ་བར་ཁད་ཀྱིས་དལ་བུས་དལ་བུས་ཇི་སྲིད་འཚོའི་བར་ཆག་པའི་མཐར་ཐུག་པའི་བར་དུ་བཅང་བར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མའི་ལྷུང་བཟེད་ཆག་པར་གྱུར་ཀྱང་ལྷན་པ་གཅིག་གིས་ཀླན་པར་འོས་ཤིང་མ་གླན་པ་སྤྱད་བཟོད་བཞིན་དུ་གཞན་ཚོལ་བར་བྱེད་ན་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །དགེ་སློང་མའི་ལྷུང་བཟེད་ཆག་པར་གྱུར་ཀྱང་ལྷན་པ་གཉིས་ཀྱིས་ཀླན་པར་འོས་ཤིང ། མ་ཀླན་པ་སྤྱད་བཟོད་བཞིན་དུ་གཞན་ཡང་ཚོལ་བར་བྱེད་ན་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །དགེ་སློང་མ་ལྷུང་བཟེད་ཆག་པར་གྱུར་ཀྱང་ལྷན་པ་གསུམ་ཀླན་པར་འོས་ཤིང་མ་ཀླན་ལ་སྤྱད་བཟོད་བཞིན་དུ་གཞན་ཡང་ཚོལ་བ་བྱེད་ན་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །དགེ་སློང་མའི་ལྷུང་བཟེད་ཆག་པར་གྱུར་ཀྱང་ལྷན་པ་བཞིས་ཀླན་པར་འོས་ཤིང ། མ་ཀླན་ལ་སྤྱད་བཟོད་བཞིན་དུ་གཞན་ཡང་ཚོལ་བར་བྱེད་ན་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །དགེ་སློང་མའི་ལྷུང་བཟེད་ཆག་པར་གྱུར་ཀྱང ། ལྷན་པ་ལྔས་ཀླན་པར་འོས་ཤིང་མ་ཀླན་ལ་སྤྱད་བཟོད་བཞིན་དུ་གལ་ཏེ་གཞན་ཡང་ཚོལ་བར་བྱེད་ན་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །དགེ་སློང་མའི་ལྷུང་བཟེད་ཆག་པར་གྱུར་ཀྱང་ལྷན་པ་གཅིག་གིས་ཀླན་པར་འོས་པས་ཀླན་ཏེ་སྤྱད་བཟོད་བཞིན་དུ་གཞན་ཚོལ་བར་བྱེད་ན་ཉེས་བྱས་སོ། །ཐོབ་ན་སྤང་བའི་ལྟུང་བྱེད་དོ། །དགེ་སློང་མའི་ལྷུང་བཟེད་ཆག་པར་གྱུར་ཀྱང་ལྷན་པ་གཉིས་ཀྱིས་ཀླན་པར་འོས་པས་ཀླན་ཏེ་སྤྱད་བཟོད་བཞིན་དུ་ཞེས་བྱ་བ་ནས་ཉེས་བྱས་དང ། སྤང་བའི་ལྟུང་བྱེད་དོ་ཞེས་བྱ་བའི་བར་དུའོ། །དེ་བཞིན་དུ་ལྷན་པ་གསུམ་འོས་པ་དང ། དེ་བཞིན་དུ་ལྷན་པ་བཞིས་འོས་པ་ཡང་བརྗོད་པར་བྱའོ། །དགེ་སློང་མའི་ལྷུང་བཟེད་ཆག་པར་གྱུར་ཀྱང་ལྷན་པ་ལྔས་ཀླན་པར་འོས་པས་ཀླན་ཀྱང
9.166a
རུང་མ་ཀླན་ཀྱང་རུང ། ལྷུང་བཟེད་གཞན་ཚོལ་བ་ལ་ལྟུང་བ་མེད་དོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །སྤང་བའི་ལྟུང་བྱེད་བཅུ་གསུམ་པ་རྫོགས་སྷོ།། ་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་ཉེ་དགའ་ལ་བརྟེན་ཏེ་ཉེ་དུ་མ་ཡིན་པ་ལས་སྐུད་པའི་བསླབ་པའི་གཞི་བཅའ་བ་མཛད་པ་དེའི་ཚེ་དགེ་སློང་མ་སྦོམ་དགའ་མོས་ཉེ་དུ་མ་ཡིན་པ་དང ། ཉེ་དུ་ལས་ཀྱང་སྐུད་པ་བསླངས་ཤིང་ཐ་ག་པ་ཉེ་དུ་དང་ཉེ་དུ་མ་ཡིན་པ་ལ་ཡང་གོས་འཐག་ཏུ་འཇུག་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་ལས་སྐུད་པ་བསླངས་ཏེ། ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུག་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཉེ་དུ་མ་ཡིན་པ་ལ་ཞེས་བྱ་བ་ནི་མ་མེས་དང ། ཕ་མེས་ཕྲུག་བདུན་གྱི་བར་རོ། །སྐུད་པ་ཞེས་བྱ་བ་ནི་བདུན་པོ་གང་ཡང་རུང་བའིའོ། །ཐ་ག་པ་ཉེ་དུ་མ་ཡིན་ཞེས་བྱ་བ་ནི་ཐགས་འཐག་པའོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །འཐག་ཏུ་འཇུག་ན་ཞེས་བྱ་བ་ནི་འཐག་ཏུ་བཅུག་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཉེ་དུ་མ་ཡིན་པ་ལ་སྐུད་པ་བསླངས་ཏེ། ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུག་ནས་སློང་བ་ན་དེ་ལ་ཉེས་བྱས་སོ། །ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་བཅུག་ནས་གྲུབ་ན་སྤང་བའི་ལྟུང་བྱེད་དོ། །དགེ་སློང་མས་ཉེ་དུ་མ་ཡིན་པ་ལས་སྐུད་པ་བསླངས་ཏེ། བདག་ཉིད་དམ་ཐ་ག་པ་ཉེ་དུ་མ་ཡིན་པ་ལ་འཐག་ཏུ་འཇུག་ནས་སློང་བ་ན་དེ་ལ་ཉེས་བྱས་སོ། །བདག་ཉིད་འཐག་ན་ཡང་ཉེས་བྱས་སོ། །ཉེ་དུ་མ་ཡིན་པ་འཐག་ཏུ་བཅུག་སྟེ་གྲུབ་ན་སྤང་བའི
9.166b
ལྟུང་བྱེད་དོ། །དགེ་སློང་མས་ཉེ་དུ་མ་ཡིན་པ་ལས་སྐུད་པ་བསླངས་སྟེ། ཐ་ག་པ་ཉེ་དུ་ལ་འཐག་ཏུ་འཇུག་ན་སློང་བ་ན་དེ་ལ་ཉེས་བྱས་སོ། །ཐ་ག་པ་ཉེ་དུ་འཐག་ཏུ་བཅུག་ན་ལྟུང་བ་མེད་དོ། །དགེ་སློང་མས། ཉེ་དུ་མ་ཡིན་པ་ལས་སྐུད་པ་བསླངས་ཏེ་བདག་ཉིད་དམ། ཉེ་དུ་འཐག་ཏུ་འཇུག་ན་སློང་བ་ན་དེ་ལ་ཉེས་བྱས་སོ། །བདག་ཉིད་འཐག་ན་ཉེས་བྱས་སོ། །ཉེ་དུ་ཡིན་ན་ལྟུང་བ་མེད་དོ། །དགེ་སློང་མས་ཉེ་དུ་མ་ཡིན་པ་ལས་སྐུད་པ་བསླངས་ཏེ་བདག་ཉིད་འཐག་གམ་ཉེ་དུ་མ་ཡིན་པ་འཐག་ཏུ་འཇུག་ན་སློང་བ་ན་དེ་ལ་ཉེས་བྱས་སོ། །བདག་ཉིད་འཐག་ན་ཉེས་བྱས་སོ། །ཉེ་དུ་འཐག་ཏུ་འཇུག་ན་ལྟུང་བ་མེད་དོ། །ཉེ་དུ་མ་ཡིན་པ་འཐག་ཏུ་བཅུག་སྟེ་གྲུབ་ན་སྤང་བའི་ལྟུང་བྱེད་དོ། །དགེ་སློང་མས་ཉེ་དུ་ལས་སྐུད་པ་བསླངས་ཏེ་བདག་ཉིད་འཐག་ན་སློང་བ་ན་དེ་ལ་ལྟུང་བ་མེད་དོ། །བདག་ཉིད་འཐག་ན་ཉེས་བྱས་སོ། །དགེ་སློང་མས་ཉེ་དུ་ལས་སྐུད་པ་བསླངས་ཏེ་ཉེ་དུ་མ་ཡིན་པ་ལ་འཐག་ཏུ་འཇུག་ན་སློང་བ་ན་དེ་ལ་ལྟུང་བ་མེད་དོ། །གྲུབ་ན་སྤང་བའི་ལྟུང་བྱེད་དོ། །དགེ་སློང་མས་ཉེ་དུ་ལས་སྐུད་པ་བསླངས་ཏེ་བདག་ཉིད་དམ། ཉེ་དུ་འཐག་ཏུ་འཇུག་ན་དེ་སློང་བ་ན་དེ་ལ་ལྟུང་བ་མེད་དོ། །བདག་ཉིད་འཐག་ན་ཉེས་བྱས་སོ། །ཉེ་དུ་འཐག་ཏུ་བཅུག་ན་ལྟུང་བ་མེད་དོ། །དགེ་སློང་མས་ཉེ་དུ་ལས་སྐུད་པ་བསླངས་ཏེ་བདག་ཉིད་འཐག་གམ། ཉེ་དུ་མ་ཡིན་པ་འཐག་ཏུ་འཇུག་ན་སློང་བ་ན་དེ་ལ་ལྟུང་བ་མེད་དོ། །བདག་ཉིད་འཐག་ན་ཉེས་བྱས་སོ། །ཉེ་དུ་མ་ཡིན་པ་འཐག་ཏུ་བཅུག་སྟེ་གྲུབ་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞིག་ཉེ་དུ་ལས་སྐུད་པ་བསླངས་ཏེ་ཐ་ག་པ་ཉེ་དུ་ལ་འཐག་ཏུ་འཇུག་ན་སློང་བ་ན་དེ་ལ་ལྟུང་བ་མེད་དོ། །ཉེ་དུ་འཐག་ཏུ་བཅུག་པ་ལ་ཡང་ལྟུང་བ་མེད་དོ། །དགེ་སློང་མས་ཉེ་དུ་ལ་སྐུད་པ་བསླངས་ཏེ་བདག་ཉིད་འཐག་གམ། ཉེ་དུ་འཐག་ཏུ་འཇུག་ན་སློང་བ་ན་དེ་ལ་ལྟུང་བ་མེད་དོ། །བདག་ཉིད་འཐག་ན་ཉེས་བྱས་སོ། །ཉེ་དུ་འཐག་ཏུ་འཇུག་ན་ལྟུང་བ་མེད་དོ། །ཉེ་དུ་མ་ཡིན་པ་འཐག་ཏུ་བཅུག་སྟེ་གྲུབ་ན་སྤང་བའི་ལྟུང་བྱེད་དོ། །
9.167a
ལས་དང་པོ་ལ་སོགས་པ་ལ་ནི་ལྟུང་བ་མེད་དོ། །སྤང་བའི་ལྟུང་བྱེད་བཅུ་བཞི་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་དུ་སྦོམ་དགའ་མོས་ཁྱིམ་བདག་འཁོར་དང་བཅས་པ་མངོན་པར་དད་པར་བྱས་པས། ཁྱིམ་བདག་དེས་དགེ་སློང་མ་སྦོམ་དགའ་མོའི་ཕྱིར་སྐུད་པ་དག་ཐ་ག་པ་ལ་བྱིན་པ་སྦོམ་དགའ་མོས། བྲན་མོ་དེ་ལས་ཐོས་ཏེ་ཐོས་ནས་ཐ་ག་པ་གང་ན་བ་དེར་སོང་སྟེ་ཕྱིན་པ་དང ། འདི་སྐད་ཅེས་སྨྲས་སོ། །ཐ་ག་པ་བརྒྱངས་ཏེ་འཐག་པའི་རས་ཡུག་ཆེན་འདི་སུའི་ཕྱིར་ཡིན་ཞེས་སམ། དེས་འདི་སྐད་ཅེས་སྨྲས་སོ། །མ་འཚལ་ཏོ། །དེས་འདི་སྐད་ཅེས་ཁོ་མོའི་ཕྱིར་ཡིན་ནོ། །ཞེས་སྨྲས་ནས་ཇི་ཙམ་གྱི་བར་དུ་དེ་ལ་དེ་བཟའ་བ་འམ། བཟའ་བ་ཙམ་འམ། བཟའ་བའི་རྒྱུ་སྒྲུབ་པར་བྱེད་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མའི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མས་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་བཅུག་པ་ལ། དེ་ཡང་དགེ་སློང་མ་དེ་ལ་སྔར་མ་བསྟབས་བཞིན་དུ་རྣམ་པར་རྟོག་པ་འགའ་ཞིག་བྱུང་ནས། ཚེ་དང་ལྡན་པ་ཐ་ག་པ་ཤེས་པར་གྱིས་ཤིག་།གོས་འདི་ཁོ་མོའི་ཕྱིར་ཡིན་གྱིས། ཚེ་དང་ལྡན་པ་གོས་འདི་ཞེང་ཆེ་བ་དང ། ཁྲུན་རིང་བ་དང ། ཐར་གྱིས་ཞག་པ་དང ། ཐག་རན་བཟང་བར་ལེགས་པར་གྱིས་ཤིག་།དེ་ལྟར་བྱས་ན་ཁོ་མོས་ཚེ་དང་ལྡན་པ་ལ་འདི་ལྟ་སྟེ། བཟའ་བ་འམ། བཟའ་བ་ཙམ་འམ། བཟའ་བའི་རྒྱུ་ཅུང་ཟད་ཙམ་གྱིས་ཀྱང་བསྒྲུབ་པར་བྱའོ་ཞེས་བྱས་ནས། དེ་ལ་དགེ་སློང་མ་དེ་འདི་ལྟ་སྟེ། བཟའ་བ་འམ། བཟའ་བ་ཙམ་འམ། བཟའ་བའི་རྒྱུ་ཅུང་ཟད་ཙམ་བྱིན་ནས་གོས་བསྒྲུབས་ཏེ། གོས་གྲུབ་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཉེ་དུ་མ་ཡིན་པ
9.167b
ལས་ཞེས་བྱ་བ་ནི་མ་མེས་དང ། ཕ་མེས་ཕྲུགས་བདུན་གྱི་བར་དག་གོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཐ་ག་པ་ཉེ་དུ་མ་ཡིན་པ་ལ་ཞེས་བྱ་བ་ནི་ཐགས་འཐག་པའོ། །གོས་འཐག་ཏུ་བཅུག་པ་ལ་ཞེས་བྱ་བ་ནི་བདུན་པོ་གང་ཡང་རུང་བའོ། །དེ་ནས་དགེ་སློང་མ་དེ་ཞེས་བྱ་བ་ནི་སྦོམ་དགའ་མོའོ། །རྣམ་པར་རྟོག་པ་འགའ་ཞིག་བྱུང་ན་ཞེས་བྱ་བ་ནི་དོགས་པ་འགའ་ཞིག་སྐྱེས་ནས་སོ། །ཐ་ག་པའི་དྲུང་དུ་སོང་ནས་ཞེས་བྱ་བ་ནི་ཕྱིན་ནས་སོ། །འདི་སྐད་ཅེས་སྨྲས་སོ་ཞེས་བྱ་བ་ནི་སྨྲས་པའོ། །གོས་འདི་ཞེས་བྱ་བ་ནི་གོས་ཉེ་བར་སྟོན་པའོ། །ཁོ་མོའི་ཕྱིར་འཐག་ཏུ་བཅུག་གིས་ཞེས་བྱ་བ་ནི་བདག་ཉིད་ཉེ་བར་སྟོན་པར་བྱེད་པའོ། །ཚེ་དང་ལྡན་པ་ཐ་ག་པས་ལེགས་པར་ཞེས་བྱ་བ་ནི། ཚེ་དང་ལྡན་པ་ཐ་ག་པས་བཟང་པོར་རོ། །ཁྱོད་ཀྱིས་གོས་འདི་ཞེས་བྱ་བ་ནི་འཐག་ཏུ་བཅུག་པ་གང་ཡིན་པ་དེའོ། །ཞེང་ཆེ་བ་ཞེས་བྱ་བ་ནི་འདི་ལྟར་རྒྱ་ཆེ་བ་ཉིད་དོ། །ཁྲུན་རིང་བ་ཞེས་བྱ་བ་ནི་འདི་ལྟར་མཆུ་རིང་བ་ཉིད་དོ། །ཐར་གྱིས་ཞག་པ་ཞེས་བྱ་བ་ནི་འཇུར་མདུད་མེད་པའོ། །ཐག་རན་བཟང་བར་ཞེས་བྱ་བ་ནི་ཐགས་བཟང་བ་དང ། ཁ་ཚར་ཐུང་བར་རོ། །གལ་ཏེ་དེ་ལྟར་ན་ཁོ་མོ་ཁྱོད་ལ་བཟའ་བ་འམ། བཟའ་བ་ཙམ་འམ། བཟའ་བའི་རྒྱུ་ཅུང་ཟད་ཙམ་བསྒྲུབ་པར་བྱའོ། །ཞེས་བྱ་བ་ནི་བཟའ་བ་ལྔ་དང ། བཅའ་བ་ལྔ་པོ་དག་གོ། །དེ་ལ་གལ་ཏེ་དགེ་སློང་མ་ཞེས་བྱ་བ་ནི་སྦོམ་དགའ་མོའོ། །ཆུང་ཟད་སྒྲུབ་ན་ཞེས་བྱ་བ་ནི་འདི་ལྟ་སྟེ། བཟའ་བ་འམ། བཟའ་བ་ཙམ་འམ། བཟའ་བའི་རྒྱུ་ཅུང་ཟད་བྱིན་པའོ། །གོས་བསྒྲུབས་ཏེ་ཞེས་བྱ་བ་ནི་གོས་ཐོབ་པར་བྱ་བའི་ཕྱིར་རོ། །གོས་གྲུབ་ན་ཞེས་བྱ་བ་ནི་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་གོས་བསྒྲུབ་པའི་ཕྱིར་ཁྱིམ་བདག་གི་ཁྱིམ་རྣམས་སུ་བསོད་སྙོམས་ལ་འཇུག་ཅིང་བཅའ་བ་ལྔ་དང ། བཟའ་བ་ལྔ་པོ་དག་ཐ་ག་པ་ལ་སྦྱིན་པར་བྱེད་པ་ནས། ཇི་ཙམ་མ་གྲུབ་པ་དེ་སྲིད་དུ་ཉེས་བྱས་སོ། །གྲུབ་ན་སྤང་བའི་ལྟུང
9.168a
བྱེད་དོ། །སྤང་བའི་ལྟུང་བྱེད་བཅཝ་ལྔ་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱིས་ལྷན་ཅིག་གནས་པ་དང་ཉེ་གནས་རྣམས་ལ་ཆོས་གོས་དང་ལྷུང་བཟེད་དག་བགོ་བཤའ་བྱེད་ལ། བུད་མེད་ནི་ཁྲོ་བའི་དབང་དུ་འགྱུར་བ་ཡིན་པས་གང་གི་ཚེ་དེ་དག་དང་དེ་རྣམས་ཐབ་མོ་དང ། མཚང་འབྲུ་བར་གྱུར་པ་དེའི་ཚེ་དེ་དག་གིས་ལྷན་ཅིག་གནས་པ་དང ། ཉེ་གནས་ལ་ཕྱིར་ཡང་གོས་དག་འཕྲོག་པར་བྱེད། འཕྲོག་ཏུ་འཇུག་པར་བྱེད་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་དག་ལ་གོས་དག་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཅིང ། ཡིད་མ་རངས་པས་དགེ་སློང་མ་ཁྱོད་ལ་གོས་དག་མི་སྦྱིན་གྱིས་ཕྱིར་བྱིན་ཅིག་ཅེས་འཕྲོག་གམ། འཕྲོག་ཏུ་འཇུག་ན་དགེ་སློང་མ་དེས་གོས་ཀྱི་ལྷག་མ་ཡོད་པ་སླར་སྦྱིན་པར་བྱ་སྟེ། ་ལོངས་སྤྱད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །དགེ་སློང་མ་རྣམས་ཤེས་བྱ་བ་ནི་ལྷན་ཅིག་གནས་པ་དང ། ཉེ་གནས་རྣམས་སོ། །གོས་དག་བྱིན་ནས་ཞེས་བྱ་བ་ནི་བདུན་པོ་གང་ཡང་རུང་བ་དག་གོ། །དེའི་འོག་ཏུ་ཞེས་བྱ་བ་ནི་དུས་གཞན་ནོ། །ཁྲོས་འཁྲུགས་རྔམ་པར་གྱུར་ཅིང་ཡིད་མ་རངས་པས་ཞེས་བྱ་བ་ནི་འཁྲུག་པ་མ་སངས་པར་རོ། །འཕྲོག་གམ་ཞེས་བྱ་བ་ནི་བདག་ཉིད་ཀྱིས་སོ། །འཕྲོག་ཏུ་འཇུག་ན་ཞེས་བྱ་བ་ནི་གཞན་གྱིས་སོ། །དགེ་སློང་མ་ཁྱོད་ལ་གོས་དག་མི་སྦྱིན་གྱིས་ཕྱིར་བྱིན་ཅིག་ཅེས་ཟེར་ན་དགེ་སློང་མ་དེས་གོས་དེས་ཞེས་བྱ་བ་ནི་གོས་བདུན་པོ་གང་ཡང་རུང་བའི་ལྷག་མ་ཡོད་པའོ། །ཕྱིར་སྦྱིན་པར་བྱའོ་ཞེས་བྱ་བ་ནི་གཏང་བར་བྱའོ། །དེ་ལོངས་སྤྱད་ན་ཞེས་བྱ་བ་ནི་དེ་ཇི་ཙམ་གྱི་བར་ལོངས་སྤྱད་པར་གྱུར་ནའོ། །
9.168b
སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ལུས་གཡོ་བར་བྱེད་པ་དང ། ཚིག་རྗོད་པར་བྱེད་པ་དང ། དེ་གཉི་ག་དང་ལྡན་པའོ། །ཇི་ལྟར་ལུས་གཡོ་བར་བྱེད་པས་ཞེ་ན། ལག་པས་བཟུང་ཞིང་འཕྲོག་པ་སྟེ། ཇི་སྲིད་དུ་གོས་ཀྱི་གྲཝ་ལུས་དང་བྲལ་བར་བྱེད་ཀྱི་བར་དུ་ཉེས་བྱས་སོ། །ཕྲལ་བ་ན་སྤང་བའི་ལྟུང་བྱེད་དེ། དེ་ལྟ་བུ་ནི་ལུས་གཡོ་བར་བྱེད་པས་སོ། །ཇི་ལྟར་ཚིག་རྗོད་པས་ཞེ་ན། ཚིག་འདི་སྐད་ཅེས་དགེ་སློང་མ་གོས་ཕྱིར་བྱིན་ཅིག་ཅེས་སྨྲས་ནས་ཇི་སྲིད་དུ་གོས་ཀྱི་གྲཝ་ལུས་དང་བྲལ་བར་མི་བྱེད་ཀྱི་བར་དུ་ཉེས་བྱས་སོ། །ཕྲལ་བ་ན་སྤང་བའི་ལྟུང་བྱེད་དེ། དེ་ལྟ་བུ་ནི་ཚིག་རྗོད་པར་བྱེད་པས་སོ། །ཇི་ལྟར་དེ་གཉིས་དང་ལྡན་པས་ཞེ་ན། ཚིག་ཏུ་གོས་ཕྱིར་བྱིན་ཅིག་ཅེས་སྨྲ་ཞིང་ལག་པས་འཛིན་པ་སྟེ། ཇི་སྲིད་དུ་གོས་ཀྱི་གྲཝ་ལུས་དང་བྲལ་བར་མི་བྱེད་ཀྱི་བར་དུ་ཉེས་བྱས་སོ། །ཕྲལ་བ་ན་སྤང་བའི་ལྟུང་བྱེད་དེ། དེ་ལྟ་བུ་ནི་གཉི་ག་དང་ལྡན་པས་སོ། །དོན་གཞན་དང་འདུལ་བའི་ཡོ་བྱད་ཀྱིས་ནི་ལྟུང་བ་མེད་དོ། །ཇི་ལྟར་དོན་གཞན་གྱིས་ཞེ་ན། འདི་ལྟར་ཡང་དགེ་སློང་མ་རྣམས་ཀྱི་ལྷན་ཅིག་གནས་པ་དང ། ཉེ་གནས་དག་དུས་མ་ཡིན་པས་འཇིགས་པ་དང་བཅས་པའི་དུས་སུ་འགྲོ་བ་ན་དེ་དག་གི་མཁན་པོ་དང ། སློབ་དཔོན་དག་གིས་ཆོམ་རྐུན་པ་རྣམས་ཀྱིས་གོས་དག་ཕྲོགས་པར་གྱུར་ན་མི་རུང་ངོ་ཞེས་འཕྲོག་པར་བྱེད་པ་སྟེ། དེ་ལྟ་བུ་ནི་དོན་གཞན་གྱིས་ཡིན་ནོ། །ཇི་ལྟར་འདུལ་བའི་ཡོ་བྱད་ཀྱིས་ཞེ་ན། འདི་ལྟར་ཡང་དགེ་སློང་རྣམས་ཀྱིས་ལྷན་ཅིག་གནས་པ་དང ། ཉེ་གནས་རྣམས་མི་དགེ་བའི་བཤེས་གཉེན་དང་ལྷན་ཅིག་འགྲོགས་ཤིང་འགྲོ་བ་ན་དགེ་བའི་བཤེས་གཉེན་དང་ལྷན་ཅིག་འགྲོ་བར་གྱུར་ཅིག་ཅེས་དེ་དག་ལས་གོས་འཕྲོག་པར་བྱེད་པ་སྟེ། དེ་ལྟ་བུ་ནི་འདུལ་བའི་ཡོ་བྱད་ཀྱིས་ཡིན་ནོ། །སྤང་བའི་ལྟུང་བྱེད་བཅུ་དྲུག་པ་རྫོགས་སྷོ།། ་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་ཆོས་སྦྱིན་གྱིས་ཉམས་པའི་རྒྱལ་རིགས་འཁོར་དང་བཅས་པ་བདེན་པ་རྣམས
9.169a
ལ་རབ་ཏུ་བཀོད་པ་དང ། དེ་རྣམས་ཀྱི་རྒྱལ་པོ་གསལ་རྒྱལ་ལས་དཔྱ་རྒྱུ་དག་ཐོབ་བོ། །དེ་དག་འདི་སྙམ་དུ་བདག་ཅག་བདེན་པ་མཐོང་བར་བྱེད་པ་གང་ཡིན་པ་དེ་ཐམས་ཅད་ནི་དགེ་བའི་བཤེས་གཉེན་འཕགས་མ་ཆོས་སྦྱིན་ལས་བརྟེན་ཏེ་ཡིན་ན་དེ་ལ་བདག་ཅག་གིས་ཅི་ཞིག་བྱས་ན་ལན་ལོན་པར་འགྱུར། མ་ལ་བདག་གིས་རྒྱལ་པོ་ལས་རྙེད་པ་དང ། ་བཀུར་སྟི་ཐོབ་པ་དེ་བདག་ཅག་གིས་ཆོས་སྦྱིན་ལ་དབུལ་བར་བྱ་གོར་མ་ཆག་སྙམ་མོ། །དེ་ནས་ཉམས་པའི་རྒྱལ་རིགས་རྣམས་རྙེད་པ་དེ་ཁྱེར་ཏེ་ཆོས་སྦྱིན་ག་ན་བ་དེར་དོང་ནས་ལྷགས་པ་དང ། ཆོས་སྦྱིན་གྱི་རྐང་པ་ལ་མགོ་བོས་ཕྱག་བྱས་ཏེ་ཆོས་སྦྱིན་ལ་རྙེད་པ་དང་བཀུར་སྟི་དེ་ཕུལ་ལོ། །ཆོས་སྦྱིན་གྱིས་བསམས་པ། ཅི་བཅོམ་ལྡན་འདས་ལ་འགའ་ཞིག་གིས་ཟླ་བ་གསུམ་དུ་ན་བཟའ་དང་བསོད་སྙོམས་ཀྱིས་བསྟབས་སམ་སྙམ་མོ། །དེ་ནས་དེ་རྟོག་པ་ལ་ཞུགས་པ་ན་བཅོམ་ལྡན་འདས་དེ་དག་ཁོ་ན་ལ་གཞེས་པར་ཤེས་སོ། །དེ་ནས་ཆོས་སྦྱིན་གྱིས་ཉམས་པའི་རྒྱལ་རིགས་དེ་དག་ལ་འདི་སྐད་ཅེས་སྨྲས་སོ། །ཁྱིམ་བདག་དག་བཅོམ་ལྡན་འདས་ལ་ཟླ་བ་གསུམ་དུ་ན་བཟའ་དང་བསོད་སྙོམས་དང ། ཞེས་བྱ་བ་ནས་སྨན་དང ། མཁོ་བའི་ཡོ་བྱད་ཀྱི་བར་གྱིས་སྟོབས་ཤིག་།དེ་ནས་དེ་དག་དོང་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང ། ཆོས་སྦྱིན་འཁོར་དང་བཅས་པ་ལ་བསྟབས་སོ། །དེ་ནས་ཉམས་པའི་རྒྱལ་རིགས་ཀྱི་ཆུང་མ་དེ་དག་གིས་དགེ་སློང་མ་དེ་རྣམས་ལ་བསྙེན་བཀུར་བྱ་བར་བརྩམས་སོ། །ཉམས་པའི་རྒྱལ་རིགས་དེ་དག་གིས་ཀྱང་དགེ་སློང་དང ། དགེ་སློང་མ་རྣམས་ཀྱི་ཕྱིར་རིན་ཐང་ཆེན་པོའི་གོས་དང ། གོས་ཕལ་དག་འཇོག་ཏུ་བཅུག་གོ། །དེ་དག་དབྱར་གྱི་ནང་ལོགས་སུ་རྒྱལ་པོས་གཞན་དུ་མངགས་པ་ལས་མགོན་མེད་ཟས་སྦྱིན་གྱིས་དེ་དག་བཟློག་པ་དང ། དེ་དག་ལ་དགེ་སློང་མ་རྣམས་གྱིས་དབྱར་ཟད་ནས་གོས་འདོད་པའི་ཕྱིར་བརྡའ་བྱས་པ་དང ། དེ་དག་གིས་འདི
9.169b
སྐད་ཅེས་སྨྲས་སོ། །འཕགས་མ་དག་བདག་ཅག་གིས་གོས་ཀྱི་རིན་དེ་དག་ཕུལ་ལགས་སོ། །སྲིལ་རྣམས་ཀྱིས་ཟོས་སོ། །དགེ་སློང་མ་རྣམས་ཀྱིས་བཅོམ་ལྡན་འདས་ཀྱིས་དབྱར་གྱི་དུས་ཀྱི་རྙེད་པ་དབྱར་གྱི་ནང་ལོགས་སུ་བགོ་བར་མི་བྱའོ། །ཞེས་གསུངས་པས། བསླབ་པ་འདོད་པས་མ་བགོས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་སྟོན་ཟླ་ཐ་ཆུངས་ཉར་ཞག་བཅུས་མ་ཚང་བ་ཚུན་ཆད་དུ་བརྟད་པ་ལས་བྱུང་བའི་གོས་ཞིག་རྙེད་ལ། བརྟད་པ་ལས་བྱུང་བའི་གོས་འདོད་ན་དགེ་སློང་མ་དེས་བླང་བར་བྱའོ། །བླངས་ནས་གོས་སྦྱིན་པའི་དུས་ཀྱི་བར་དུ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །ཞག་བཅུ་ཞེས་བྱ་བ་ནི་ཞག་བཅུ་པ་ལ་དགག་དབྱེ་འབྱུང་བར་འགྱུར་བའོ། །དགེ་སློང་མ་ཞེས་བྱ་བ་ནི་ཆོས་འདི་པ་དག་གིའོ། །རྙེད་པ་ཞེས་བྱ་བ་ནི་གཞན་ལས་སོ། །བརྟད་པ་ལས་བྱུང་བའི་གོས་ཞེས་བྱ་བ་ལ་བརྟད་པ་ལས་བྱུང་བའི་གོས་ལྔ་སྟེ། ལྔ་གང་ཞེ་ན། འོངས་པ་དང ། འགྲོ་བར་ཆས་པ་དང ། ནད་པ་དང ། ནད་གཡོག་དང ། དགེ་བསྐོས་མའོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །གོས་སྦྱིན་པའི་དུས་སུ་བཅང་བར་བྱའོ་ཞེས་བྱ་བ་ནི་གོས་སྦྱིན་པའི་དུས་ཞག་བཅུའི་དགག་དབྱེ་གང་ཡིན་པའོ། །དེ་ལས་འདས་པར་ཞེས་བྱ་བ་ནི་དེ་ལས་ལྷག་པར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གང་ཡང་དགེ་སློང་མས་དབྱར་གྱི་རྙེད་པ་ཅི་ཡང་རུང་དབྱར་གྱི་ནང་ལོགས་སུ་འགེད་པ་དང ། དགག་དབྱེ་ལས་འདས་པར་འཆང་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །གལ་ཏེ་གོས་སྦེད་པའི་དགེ་སློང་མ་བསྐོས་ན་ལྟུང་བ་མེད་དོ། །སྤང་བའི་ལྟུང་བྱེད་བཅུ་བདུན་པ་རྫོགས་སྷོ།། ་་་་་་་་།། ་
9.170a
གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཉེ་དགའ་ལས་བརྟེན་ཏེ་དགེ་འདུན་གྱི་གང་ཟག་རང་གིར་སྒྱུར་བར་བྱེད་པའི་བསླབ་པའི་གཞི་བཅའ་བར་མཛད་པ་དེའི་ཚེ་དགེ་སློང་མ་བཅུ་གཉིས་སྡེ་རྣམས་ཀྱིས་དགེ་འདུན་གྱི་ཆེད་དུ་རྙེད་པ་བླངས་ནས་གང་ཟག་གིར་སྒྱུར་བར་བྱེད་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཞིག་ཤེས་བཞིན་དུ་དགེ་འདུན་ལ་བསྔོས་པའི་རྙེད་པ་གང་ཟག་བདག་གིར་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞིག་ཅེས་བྱ་བ་ནི་བཅུ་གཉིས་སྡེ་རྣམས་སོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །རྙེད་པ་ཞེས་བྱ་བ་ནི་རྙེད་པ་གཉིས་པོ་གོས་ཀྱི་རྙེད་པ་དང ། ཟས་ཀྱི་རྙེད་པ་སྟེ། སྐབས་འདིར་ནི་གོས་ཀྱི་རྙེད་པ་ཡིན་པར་དགོངས་སོ། །བསྔོས་པ་ཞེས་བྱ་བ་ནི་ཕུལ་བའོ། །གང་ཟག་བདག་གིར་བྱེད་ན་ཞེས་བྱ་བ་ནི་རང་གིར་བྱེད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཤེས་བཞིན་དུ་གང་ཟག་ལ་བསྔོས་པའི་རྙེད་པ་གཞན་དུ་གང་ཟག་ལ་སྒྱུར་བར་བྱེད་ན་ཇི་སྲིད་དུ་རྙེད་པ་རང་གིར་མི་བྱེད་པ་དེ་སྲིད་དུ་ཉེས་བྱས་སོ། །རང་གིར་བྱེད་ན་སྤང་བའི་ལྟུང་བྱེད་དོ། །དགེ་སློང་མས་དགེ་འདུན་སྡེ་གཞན་དུ་གནས་ལ་སྡེ་གཅིག་ལ་བསྔོས་པའི་རྙེད་པ་སྡེ་གཉིས་པ་ཤོས་ལ་སྒྱུར་བར་བྱེད་ན་ཇི་སྲིད་དུ་རྙེད་པ་རང་གིར་མི་བྱེད་པ་དེ་སྲིད་དུ་ཉེས་བྱས་སོ། །རང་གིར་བྱེད་ན་སྤང་བའི་ལྟུང་བྱེད་དོ། །དེ་བཞིན་དུ་དགེ་སློང་གི་དགེ་འདུན་ལ་བསྔོས་པ་དགེ་སློང་མའི་དགེ་འདུན་ལ་སྒྱུར་བར་བྱེད་ན་ཡང་
9.170b
སྔ་མ་བཞིན་ནོ། །དེ་བཞིན་དུ་གཉི་གའི་དགེ་འདུན་ལ་བསྔོས་པ་དགེ་འདུན་སྡེ་གཅིག་ལ་སྒྱུར་བར་བྱེད་ན་ཡང་སྤང་བའི་ལྟུང་བྱེད་དོ། །དེ་བཞིན་དུ་དགེ་འདུན་སྡེ་གཅིག་ལ་བསྔོས་པ་གཉི་གའི་དགེ་འདུན་ལ་སྒྱུར་བར་བྱེད་ན་ཡང་སྤང་བའི་ལྟུང་བྱེད་དོ། །དེ་བཞིན་དུ་མཆོད་རྟེན་རྣམས་ཀྱི་མེ་ཏོག་གི་གནས་ནས་བཟུང་སྟེ་བུམ་པའི་བར་མེ་ཏོག་གི་གནས་དང ། སྒོ་ཁང་ལ་སོགས་པ་དང ། དེ་བཞིན་དུ་རིམ་གྲོའི་ཁང་པར་བསྔོས་པ་དྲོད་ཁང་དུ་སྒྱུར་བར་བྱེད་པ་དང ། དེ་བཞིན་དུ་བསྲོ་ཁང་དང ། དགེ་འདུན་གྱི་ཀུན་དགའ་ར་བ་དང ། ཀ་བ་དང ། གདུང་དང ། ས་ལ་ཡང་བརྗོད་པར་བྱའོ། །ཐ་ན་མུ་ལྟོ་བ་གཅིག་ལ་བསྔོས་པ་གཉིས་པ་ཤོས་ལ་སྒྱུར་བར་བྱེད་ན་ཡང་ཉེས་བྱས་སོ། །གལ་ཏེ་བཙལ་བ་ལས་མ་རྙེད་དམ་གནང་བ་སྦྱིན་ན་ཉེས་པ་མེད་དོ། །སྤང་བའི་ལྟུང་བྱེད་བཅཝ་བརྒྱད་པ་རྫོགས་སྷོ།། ་་་་་་་་་།། དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་བཞི་པ། གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་བཅོམ་ལྡན་འདས་ཀྱིས་པི་ལིན་དའི་བུའི་ལྷན་ཅིག་གནས་པ་དང ། ཉེ་གནས་རྣམས་ལ་བརྟེན་ཏེ་གཉི་གའི་ཐུན་མོང་བའི་ནད་ཀྱི་སྨན་གྱི་བསླབ་པའི་གཞི་བཅའ་བ་མཛད་པ་དེའི་ཚེ། དགེ་སློང་མ་བཅུ་གཉིས་སྡེ་རྣམས་ཀྱིས་ནད་ཀྱི་སྨན་དེ་ལས་བྱིན་ལེན་བྱས་ཤིང་ཟ་བར་བྱེད་མྱུར་བར་བྱིན་ལེན་བྱས་ནས་དེ་ལས་བྱིན་ལན་བྱས་པ་དག་ཕན་ཚུན་དུ་སྲེ་བར་བྱེད། ཟས་ཀྱི་ཕྱེ་མ་དང་འདྲེས་ཤིང་ཤན་འབགས་པར་དབྱེར་ཡང་མི་མངོན་པ་དེ་དག་དུས་དང་དུས་མ་ཡིན་པར་ཟ་བར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་བཅོམ་ལྡན་འདས་ཀྱིས་དགེ་སློང་མ་ནད་པ་རྣམས་ལ་འཕྲོད་པ་སོ་སོར་བསྟེན་པར་བྱ་བའི་སྨན་རྗེས་སུ་གནང
9.171a
བ་གང་ཡིན་པ་འདི་ལྟ་སྟེ། མར་སར་དང ། ཏིལ་མར་དང ། སྦྲང་རྩི་དང ། བུ་རམ་གྱི་དབུ་བ་སྟེ། དེ་དག་དགེ་སློང་མ་ནད་པས་གསོག་འཇོག་གི་ལོངས་སྤྱོད་ཀྱིས་ཞག་བདུན་གྱི་མཐར་ཐུག་པར་ལོངས་སྤྱད་པར་བྱའོ། །དེ་ལས་འདས་པར་ལོངས་སྤྱོད་ན་སྤང་བའི་ལྟུང་བྱེད་དོ། །ཡང་བཅོམ་ལྡན་འདས་ཀྱིས་ཞེས་བྱ་བ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །དགེ་སློང་མ་ནད་པ་རྣམས་ལ་ཞེས་བྱ་བ་ནི་ན་བ་རྣམས་ལའོ། །འཕྲོད་པ་ཞེས་བྱ་བ་ནི་རྗེས་སུ་འཐུན་པའོ། །སོ་སོར་བསྟེན་པར་བྱ་བའི་ཞེས་བྱ་བའི་ནི་རུང་བའི་སྨན་རྣམས་ཞེས་བྱ་བ་ལ། མར་སར་ཞེས་བྱ་བ་ནི་མར་རོ། །ཏིལ་མར་ཞེས་བྱ་བ་ནི་ཏིལ་མར་ཉིད་དོ། །སྦྲང་རྩི་ཞེས་བྱ་བ་ནི་སྦྲང་བུའིའོ། །བུ་རམ་གྱི་དབུ་བ་ཞེས་བྱ་བ་ནི་བུ་རམ་མོ། །ཞག་བདུན་པའི་མཐར་ཐུག་པའི་ཞེས་བྱ་བ་ནི་ཉིན་ཞག་བདུན་དུའོ། །གསོག་འཇོག་གི་ལོངས་སྤྱོད་གྱིས་ཞེས་བྱ་བ་ནི་བྱིན་གྱིས་བརླབས་ནས་སོ། །སོ་སོར་བསྟེན་པར་ཞེས་བྱ་བ་ནི་བཟའ་བར་བྱའོ། །དེ་ལས་འདས་པར་ཞེས་བྱ་བ་ནི་དེ་ལས་ལྷག་པར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཚེས་ལ་ན་བའི་སྨན་ཞིག་རྙེད་ན་དེས་ན་བའི་སྨན་དེ་ཞག་བདུན་པའི་ནང་རོལ་དུ་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། ལོངས་སྤྱད་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། ལོངས་སྤྱོད་པར་མི་བྱེད་ན་ཞག་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དེ་བཞིན་དུ་ཚེས་ལ་ཞེས་བྱ་བ་ལྟར་ཞག་དྲུག་པའི་བར་དུ་དེ་ཁོ་ན་བཞིན་སྔ་མ་དང་འདྲ་བར་བརྗོད་དོ། །དགེ་སློང་མས་ཚེས་ལ་ན་བའི་སྨན་ཞིག་རྙེད་ལ། ཚེས་གཉིས་ལ་ཡང་གཞན་ཞིག་རྙེད་ན་དགེ་སློང་མ་དེས་སྔ་མ་ཤོས་བྱིན་གྱིས་བརླབ་པར་བྱ་བ་འམ། གཏང་བར་བྱ་བ་འམ། ཕྱི་མར་ཤོས་ལོངས་སྤྱད་པར་བྱ་བ་འམ། ཕྱི་མ་ཤོས་བྱིན་གྱིས་བརླབ་པར་བྱ་བ་འམ།
9.171b
སྔ་མ་ཤོས་ལོངས་སྤྱད་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། ལོངས་སྤྱོད་པར་མི་བྱེད་ན་ཞག་བརྒྱད་པའི་སྐྱ་རེང་ཤར་ན་སྤང་བའི་ལྟུང་བྱེད་དོ། །དེ་བཞིན་དུ་ཚེས་ལ་གཉིས་རྙེད་ལ། ཚེས་གཉིས་ལ་ཡང་གཉིས་རྙེད་ན་ཞེས་བྱ་བ་ནས་ཞག་དྲུག་དང ། བདུན་གྱི་བར་དུ་ཡང་རྒྱས་པར་བརྗོད་པར་བྱའོ། །དགེ་སློང་མས་ཚེས་ལ་ན་བའི་སྨན་རབ་ཏུ་མང་པོ་ཞེས་བྱ་བའི་བར་དུ་རྒྱས་པར་བརྗོད་པར་བྱའོ། །དེ་བཞིན་དུ་ཚེས་ལ་རབ་ཏུ་མང་པོ་རྙེད་ལ། ཚེས་གཉིས་ལ་ཡང་གཞན་དག་ཅེས་བྱ་བའི་བར་དུ་རྒྱས་པར་རོ། །དེ་ལ་ན་བའི་སྨན་གང་ཡིན་པ་དེ་ལས་བྱིན་ལེན་བྱས་པ་གང་དག་ཕན་ཚུན་དུ་འདྲེས་པ་དང ། ཟས་ཀྱི་ཕྱེ་མ་དང་འདྲེས་ཤིང་ཤན་འབགས་པ་དེ་དག་ནི་གཙུག་ལག་ཁང་གཞན་གྱིས་དགེ་ཚུལ་མ་རྣམས་ལ་སྦྱིན་པར་བྱའོ། །ན་བའི་སྨན་གང་ཡིན་པ་དེ་ལས་བྱིན་ལེན་བྱས་པ་གང་དག་ཕན་ཚུན་མ་འདྲེས་པ་དང ། ཟས་ཀྱི་ཕྱེ་མ་དང་མ་འདྲེས་ཤིང་ཤན་མ་འབགས་པ་དེ་དག་ནི་ཚངས་པ་མཚུངས་པར་སྤྱོད་པ་རྣམས་ལ་སྦྱིན་པར་བྱ་ཞིང་འདི་སྐད་ཅེས་ན་བའི་སྨན་འདི་ཉི་མ་གཅིག་ལོན་ལགས་ཀྱིས་ཉི་མ་དྲུག་དུ་ལོངས་སྤྱད་པར་བགྱིའོ་ཞེས་བརྗོད་པར་བྱའོ། །དེ་བཞིན་དུ་ཉི་མ་གཅིག་ལུས་པའི་བར་དུ་སྟེ། དགེ་སློང་མས་ན་བའི་སྨན་རྙེད་པར་གྱུར་ལ་དེ་མ་སྤངས་སམ། བྲལ་བར་མ་བྱས་སམ། ལྟུང་བ་མ་བཤགས་པར་གཞན་ཞིག་རྙེད་ན་དེ་ལ་ཡང་སྔ་མའི་ཤན་གྱིས་སྤང་བའི་ལྟུང་བྱེད་དོ། །དེ་བཞིན་དུ་སྤངས་ལ་བྲལ་བར་མ་བྱས་ཤིང་ལྟུང་བ་མ་བཤགས་ན་དེ་ཡང་སྤང་བའི་ལྟུང་བྱེད་དོ། །དེ་བཞིན་དུ་བྲལ་བ་བྱས་ལ་ལྟུང་བ་མ་བཤགས་ན་དེ་ཡང་སྤང་བའི་ལྟུང་བྱེད་དོ། །སྤངས་ཤིང་བྲལ་བར་བྱས་ལ་ལྟུང་བ་བཤགས་ཏེ་ལོངས་སྤྱད་ན་ལྟུང་བ་མེད་དོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །སྤང་བའི་ལྟུང་བྱེད་བཅུ་དགུ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ན་འོ། །དེའི་ཚེ་བཅུ་གཉིས་སྡེ་རྣམས་ཀྱིས་ལྷུང་བཟེད
9.172a
རྙེད་ཅིང་རྙེད་པ་རྣམས་སོགས་པར་བྱེད་ཅིང་བདག་ཉིད་ཀྱང་སྤྱོད་པར་མི་བྱེད། དགེ་སློང་མ་འཁོད་པ་ལ་ཡང་འགེད་པར་མི་བྱེད། ཐ་ན་སློང་བ་ལ་ཡང་སྦྱིན་པར་མི་བྱེད་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་ལྷུང་བཟེད་ལྷག་པ་ཞག་གཅིག་གི་མཐར་ཐུག་གི་བར་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །ཞག་གཅིག་ཅེས་བྱ་བ་ནི་ཉིན་ཞག་གཅིག་གོ། །དགེ་སློང་མ་ཞེས་བྱ་བ་ནི་བཅུ་གཉིས་སྡེ་འམ། གཞན་ཡང་དེ་ལྟ་བུ་དང་འཐུན་པའོ། །ལྷུང་བཟེད་ལྷག་པ་ཞེས་བྱ་བ་ནི་བྱིན་གྱིས་བརླབ་པ་ལས་ལྷག་པའོ། །དེ་ལས་འདས་པར་འཆང་ན་ཞེས་བྱ་བ་ནི་དེ་ལས་ལྷག་པར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཞག་གཅིག་ལས་འདས་པར་ལྷུང་བཟེད་ལྷག་པར་འཆང་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །གལ་ཏེ་ལྷུང་བཟེད་སྐྱའོ་འཆང་ན་ལྟུང་བ་མེད་དོ། །སྤང་བའི་ལྟུང་བྱེད་ཉི་ཤུ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་ཁྱིམ་བདག་ཅིག་གནས་པ་དེས་ཇི་ཙམ་ན་རིགས་མཉམ་པ་ལས་ཆུང་མ་བླངས་ཏེ་དེ་དེ་དང་རྩེ་བར་བྱེད་པ་ནས་ཁྱེའུ་ཞིག་བཙས་པའི་བར་དུ་སྟེ། དེའི་མིང་འདུན་པ་ཞེས་བྱ་བར་བཏགས་སོ། །འདོད་པ་རྣམས་ནི་ཚཝ་ཆུ་དང་འདྲ་བས་ཡང་རྩེ་བར་བྱེད་པ་ན་བུ་མོ་ཞིག་བཙས་ཏེ། དེའི་མིང་ནི་འདུན་མ་ཞེས་བྱ་བར་བཏགས་སོ། །དེ་ནས་དུས་གཞན་ཞིག་ན་ཁྱིམ་བདག་ཤི་བར་གྱུར་ཏོ། །གང་གི་ཚེ་ཁྱིམ་བདག་དེ་ཤི་བར་གྱུར་བ་དེའི་ཚེ་ཁྱིམ་བདག་དེའི་ཆུང་མ་མ་སྨད་གསུམ་རབ་ཏུ་བྱུང་ངོ ། །དེ་ནས་གཞོན་ནུ་འདུན་པ་དགེ་སློང་ཕའི་གཙུག་ལག་ཁང
9.172b
ནས། དགེ་སློང་མའི་གཙུག་ལག་ཁང་དུ་མ་ལ་བལྟ་བའི་ཕྱིར། དེས་སྣམ་སྦྱར་ཚོན་གསར་གྱིས་ཁ་བསྒྱུར་བ་དམར་སེར་ཞིག་བགོས་ཏེ། སོང་བ་དང་སྲིང་མོ་དེས་དྲིས་པ། མིང་པོ་ཆོས་གོས་འདི་སུའི་ལགས། དེས་འདི་སྐད་ཅེས་སྨྲས་སོ། །ཁོ་བོའི་ཡིན་ནོ། །དེས་འདི་སྐད་ཅེས་བདག་ལ་སྩོལ་ཅིག་ཅེས་སྨྲས་པ་ལས། དེས་མ་བྱིན་པ་དང་དེ་ངུ་བར་གྱུར་ཏོ། །དེ་ལ་མས་དྲིས་པ་བུ་མོ་ཅི་སྟེ་ངུ། དེས་འདི་སྐད་ཅེས་སྨྲས་སོ། །མིང་པོ་ལ་བདག་གིས་ཆོས་གོས་བསླངས་ནས་དེས་མ་སྩལ་ཏོ། །དེ་ནས་མས་གཞོན་ནུ་འདུན་པ་ལ་སྨྲས་པ། བུ་སྲིང་མོ་ལ་ཆོས་གོས་བྱིན་ཅིག་།དེས་སྨྲས་པ། ཉེས་པ་འགའ་ཞིག་ཏུ་མི་འགྱུར་ལགས་གྲང ། དེས་འདི་སྐད་ཅེས་སྨྲས་སོ། །དེ་ལ་ཉེས་པ་ཅི་ཡང་མེད་དོ། །དེ་ནས་འདུན་པས་ཆོས་གོས་དེ་འདུན་མ་ལ་བྱིན་ནོ། །འདུན་མས་ཀྱང་རང་གི་ཆོས་གོས་འདུན་པ་ལ་བྱིན་ནོ། །དེ་ནས་འདུན་མས་ཆོས་གོས་དེ་ཞག་མང་པོ་མ་ལོན་པར་དྲི་མ་ཅན་དུ་བྱས་སོ། །འདུན་པས་ཡང་ཆོས་གོས་དེ་ལེགས་པར་བཀྲུས་ཤིང་ལེགས་པར་ཁ་བསྒྱུར་བ་བྱས་ནས་ཡང་མ་བལྟ་བའི་ཕྱིར་སོང་བ་དང ། དེ་ནས་འདུན་མས་མིང་པོ་ལ་འདི་སྐད་ཅེས་སྨྲས་སོ། །མིང་པོ་ཆོས་གོས་འདི་སུའི་ལགས། དེས་འདི་སྐད་ཅེས་སྨྲས་སོ། །འདི་དེའི་ཚེ་ཁྱོད་ཀྱི་ཡིན་མོད་དེས་འདི་སྐད་ཅེས་སྨྲས་སོ། །རང་གི་ཆོས་གོས་འདི་སྣོམས་ལ་བདག་གི་ཆོས་གོས་ནི་ཚུར་སྩོལ་ཅིག་།དེས་མ་བྱིན་པ་དང ། དེས་ཡང་མ་ལ་གསོལ་བ་བཏབ་པ་དང ། བུ་བྱིན་ཅིག་།དེས་དེ་ལ་བྱིན་ནོ། །དེ་ནས་དགེ་སློང་མ་འདུན་མ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་ཀྱི་ཆོས་གོས་ལ་རྟག་པར་བཀྲུས་ཤིང་ལེགས་པར་ཁ་བསྒྱུར་བས་གནས་གཙང་མའི་བཞིན་དུ་གྱུར་ཏོ། །དེའི་སྐབས་དེ་དགེ་སློང་མ་རྣམས་ལ་སྨྲས་པ་དང ། དེ་ནས་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་འཁོར་གྱི་གཙོ་བོ་དང་ལྷན་ཅིག་ཆོས་གོས་བརྗེ་བ་ཉམས་སུ་མྱོང་བར་བྱེད།
9.173a
དེས་འདི་སྐད་ཅེས་གལ་ཏེ་བརྗེར་རུང་ཡང་རུང་བརྗེར་མི་རུང་ཡང་རུང་བདག་གིས་བརྗེས་ལགས་སོ། །ཞེས་སྨྲས་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་དང་ལྷན་ཅིག་ཆོས་གོས་བརྗེས་ནས་དེའི་འོག་ཏུ་འདི་སྐད་ཅེས་འཕགས་པ། འཕགས་པའི་ཆོས་གོས་གང་ལགས་པ་འདི་བཞེས་ལ་བདག་གིས་ཆོས་གོས་གང་ལགས་པ་དེ་སླར་སྩོལ་ཅིག་ཅེས་སྨྲ་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་འདུན་མ་དང ། དགེ་སློང་འདུན་པར་རོ། །ཆོས་གོས་བརྗེས་པ་ཞེས་བྱ་བ་ནི་བདུན་པོ་གང་ཡང་རུང་བའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་དང་ཆོས་གོས་བརྗེས་པ་ཉམས་སུ་མྱོང་བར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་ཉི་ཤུ་གཅིག་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་དགེ་སློང་མའི་དགེ་འདུན་དང་ལྷན་ཅིག་སྟོན་ཟླ་ཐ་ཆུངས་ཚེས་ལ་སྲ་བརྐྱང་བཏིང་མ་ཐག་ཏུ་དགེ་སློང་མ་རྣམས་ལ་འདི་སྐད་ཅེས་སྨྲས་སོ། །ཕུ་ནུ་མོ་དག་སྲ་བརྐྱང་དབྱུང་གིས་ཚུར་ཤེག་སྲ་བརྐྱང་ཕྱུང་ན་གྲུབ་པ་དང་བདེ་བ་མང་པོ་འབྱུང་ངོ ། །དེ་དག་གིས་འདི་སྐད་ཅེས་སྨྲས་སོ། །བདག་ཅག་དུས་མ་ཡིན་པར་སྲ་བརྐྱང་མི་འབྱིན་ཏོ། །དེས་འདི་སྐད་ཅེས་སྨྲས་སོ། །ཁོ་མོ་སྡེ་སྣོད་གསུམ་པ་ཡིན་ན་ཁོ་མོས་ཅི་སྲ་བརྐྱང་དབྱུང་བའི་དུས་གང་ཡིན་པ་མི་ཤེས་སམ། དེས་དགེ་སློང་མ་དེ་དག་གི་ཚིག་མ་མཉན་པར་དུས་མ་ཡིན་པར་སྲ་བརྐྱང་ཕྱུང་ནས་རྙེད་པ་བགོས་སོ། །དེ་ནས་དགེ་སློང་མ་དེ་དག་ཆོས་གོས་ལྔ་ཐོགས་ཏེ། ལྗོངས་རྒྱུ་ཞིང་དོང་བ་དང ། དེ་ནས་དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དྲིས་པ། ་འཕགས་མ་དག
9.173b
ཁྱེད་ཀྱིས་སྲ་བརྐྱང་བཏིང་བ་ཚང་ངམ། དེ་དག་གིས་འདི་སྐད་ཅེས་སྨྲས་སོ། །ཁོ་མོ་ཅག་ནི་མི་ཤེས་མོད་ཀྱི། འཕགས་མ་སྦོམ་དགའ་མོ་ན་རེ་འདི་སྐད་ཅེས་ཁོ་མོ་སྡེ་སྣོད་གསུམ་པ་ཡིན་པས་སྲ་བརྐྱང་དབྱུང་བའི་དུས་ཤེས་སོ་ཞེས་ཟེར་རོ། །དེ་རྣམས་ཀྱིས་འདི་སྐད་ཅེས་སྨྲས་སོ། །ཁྱེད་ཅག་གིས་སྲ་བརྐྱང་ཕྱུང་ངམ། དེ་དག་གིས་ཕྱུང་ངོ་ཞེས་སྨྲས་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །ཞེས་བྱ་བ་ནས། ་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དུས་མ་ཡིན་པར་སྲ་བརྐྱང་འབྱིན་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དུས་མ་ཡིན་པ་ཞེས་བྱ་བ་ནི་སྲ་བརྐྱང་གི་དུས་དང་དུས་མ་ཡིན་པ་གང་ཞེ་ན། སྟོན་ཟླ་ཐ་ཆུངས་ནས་བཟུང་སྟེ་དཔྱིད་ཟླ་ར་བའི་བར་དེ་ནི་སྲ་བརྐྱང་གདིང་བའི་དུས་ཡིན་ནོ། །གལ་ཏེ་ནང་དེར་སྲ་བརྐྱང་འབྱིན་ན་དུས་མ་ཡིན་པར་སྲ་བརྐྱང་ཕྱུང་བ་ཡིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གང་ཡང་དགེ་སློང་མས་དུས་མ་ཡིན་པར་སྲ་བརྐྱང་དེ་འབྱིན་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །གལ་ཏེ་ཆོམ་རྐུན་པས་བཏོགས་པའི་དགེ་སློང་མ་རྣམས་ཀྱི་ཕྱིར་ཡིན་ན་ལྟུང་བ་མེད་དོ། །སྤང་བའི་ལྟུང་བྱེད་ཉི་ཤུ་གཉིས་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་སྲ་བརྐྱང་དབྱུང་བའི་དུས་སུ་སྲ་བརྐྱང་མ་ཕྱུང་བ་དང ། དེ་ལ་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་སྲ་བརྐྱང་དབྱུང་བའི་དུས་ལ་བབ་ན་ཁྱོད་ཀྱིས་ཅིའི་སླད་དུ་སྲ་བརྐྱང་མི་དབྱུང ། དེས་འདི་སྐད་ཅེས་སྨྲས་སོ། །ཁོ་མོ་སྡེ་སྣོད་གསུམ་པ་ཡིན་པས་ཁོ་མོས་སྲ་བརྐྱང་དབྱུང་བའི་དུས་ཤེས་སོ། །དེ་ནས་དགེ་སློང་མ་དེ་རྣམས་སྲ་བརྐྱང་གི་དུས་ལས་འདས་ཏེ་བླ་གོས་མཐང་གོས་དང་བཅས་པས་ལྗོངས་རྒྱུ་ཞིང་དོང་བ་དང ། དགེ་སློང་མ
9.174a
དེ་དག་གིས་དྲིས་པ། ཕུ་ནུ་མོ་དག་ཁྱེད་ཅག་ཅིའི་ཕྱིར་སྲ་བརྐྱང་དབྱུང་བ་ལས་འདས་ཏེ་བླ་གོས་མཐང་གོས་དང་བཅས་པས་ལྗོངས་རྒྱུ་ཞིང་འདོང ། དེ་དག་གིས་འདི་སྐད་ཅེས་འཕགས་མ་སྦོམ་དགའ་མོ་ན་རེ་ཁོ་མོ་སྡེ་སྣོད་གསུམ་པ་ཡིན་ནོ་ཞེས་ཟེར་ནས་ད་དུང་སྲ་བརྐྱང་མ་ཕྱུང་ངོ་ཞེས་སྨྲས་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དུས་སུ་སྲ་བརྐྱང་མི་འབྱིན་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོ་འོ། །དུས་སུ་ཤེས་བྱ་བ་ནི་དཔྱིད་ཟླ་ར་བའི་ཉ་ལ་སྲ་བརྐྱང་འབྱིན་པའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དགེ་སློང་མས་སྲ་བརྐྱང་དུས་སུ་འབྱིན་པར་མི་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་པའི་ལྟུང་བྱེད་ཉི་ཤུ་གསུམ་པ་རྫོགས་སྷོ།། ་་་་་་་་་་་་་་།། སྡོམ་ལ། མངོན་མཚན་ཅན་དང་སོ་སོ་དང ། །དེ་ནི་ཡང་ཡང་འགྲོལ་བ་དང ། །གོས་ཕྱིར་དངོས་པོ་གཞན་རྙེད་དང ། །གནས་མལ་དང་ནི་དབྱར་ཁང་དང ། །སྐྱེ་བོ་མང་པོའི་ཕྱིར་རྙེད་དང ། །དགེ་འདུན་ཆེད་དུ་སློང་བ་དང ། །ལྕི་ལ་རིན་ཐང་ཆེ་བ་དང ། །ཡང་བ་དེ་ནི་ཐ་མ་ཡིན། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་གསེར་མགར་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་སོ། །དེ་ནས་དེ་ཁུ་འཕྲིག་ཅན་ཞིག་པས་ཆུང་མ་སར་པ་དེ་བགམ་པར་འདོད་ནས་གསེར་གྱི་རྣ་གདུབ་ཅིག་བཞག་སྟེ་དབེན་པར་བསྡད་དོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ཏེ་གསེར་མགར་གྱི་ཁྱིམ་གང་ན་བ་དེར་སོང་ནས་ཕྱིན་པ་དང ། བག་མ་སར་པ་དེ་ལ་ནད་མེད་པར་གྱུར་ཅིག་ཅེས་བྱས་ནས་འདི་སྐད་ཅེས་སྨྲས་སོ། །མཚན་བཟངས་མ་བསོད་སྙོམས་བྱིན་ཅིག་།དེས་ཟས་ཕྱེ་ཞིག་ཕྱུང་བ་དང ། དེས་ཟས་ཕྱེ་དེ་མཐོང་ནས་འདི་སྐད་ཅེས
9.174b
ཁོ་མོ་ཁྱོད་ལས་ཐོག་མར་ཟས་ཕྱེ་ལེན་པ་ནི་མི་བཟང་སྟེ། མི་ཤིས་ཀྱིས་གསེར་གྱི་རྣ་གདུབ་དེ་བསྟན་ནས་འོ་ནི་བྱིན་ཅིག་ཅེས་སྨྲས་པ་དང ། དེས་སྣོམས་ཤིག་ཅེས་ཀྱང་མ་སྨྲས། མ་བསྣམས་ཤིག་ཅེས་ཀྱང་མ་སྨྲས་པ་ལས་དེས་དེ་བླངས་ཏེ་སོང་ངོ ། །དེ་ནས་མི་དེས་གསེར་གྱི་རྣ་གདུབ་དེ་མ་མཐོང་ངོ ། །མ་མཐོང་ནས་བག་སར་དེ་ལ་བརྡེག་པར་ཞུགས་པ་དང ། ་གཡས་གཡོན་ན་འཁོད་པ་དག་གིས་འདི་སྐད་ཅེས་ཁྱོད་གནོང་མེད་ཅིང་མ་ཉེས་པ་འདི་ལ་དབྱུག་པས་རྡེག་གམ། ཅི་གསེར་གྱི་རྣ་གདུབ་ནི་དགེ་སློང་མ་ཕ་བིས་ཁྱེར་ཏེ་སོང་ངོ་ཞེས་སྨྲས་པ་དང ། དེ་ནས་གསེར་མགར་གྱིས་སྦོམ་དགའ་མོ་གང་ན་བ་དེར་བརྒྱུགས་པ་ལས། དེ་ཡང་སྐྱེས་པ་དང་བུད་མེད་ཀྱི་རྐང་པའི་སྒྲ་ལ་མཁས་པ་ཡིན་པས། དེས་འཕྲིགས་ནས་གསེར་གྱི་རྣ་གདུབ་ཁར་བཅུག་གོ། །ཇི་ཙམ་ན་མི་དེ་ཉེ་བ་དང ། མི་དེ་ལ་སྦོམ་དགའ་མོས་འདི་སྐད་ཅེས་སྨྲས་སོ། །བུ་ཟན་མོའི་བུ་ཁོ་མོ་ཅག་རྒྱལ་པོས་བཙུན་མོའི་ཐབས་གནང་བར་ཁྱོད་ཀྱིས་མི་ཤེས་སམ། ཁོ་མོ་ལ་ལག་པས་མ་རེག་ཤིག་།དེས་མགོ་རེག་མོ་ངན་པ་མོ་ཞེས་སྨྲས་ནས། དེས་དེ་ལ་ཁུ་ཚུར་གྱིས་བསྣུན་ནས་ཁ་ནས་ཁྲག་བྱུང་དུ་ཏེ་པོར་བརྡེགས་སོ། །དེ་ཡང་མིག་ཕུགས་སྐྲངས་ཤིང་དབྱར་ཁང་དུ་འོངས་པ་དང ། དགེ་སློང་མ་དེ་རྣམས་ཀྱིས་དྲིས་པ། འཕགས་མ་ཅི་ནོངས། དེ་ཁྲོས་ནས་འདི་སྐད་ཅེས་ཁྱེད་ཅག་ཕ་རོལ་མི་བདེ་བས་སྙིང་ཚིམ་འམ་ཞེས་སྨྲས་ནས། གཏམ་དེ་ཡང་དགེ་སློང་མ་རྣམས་ལ་རྒྱས་པར་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་ཞེས་བྱ་བ་ནས། བཅོམ་ལྡན་འདས་ལ་གསོལ་ཏོ་ཞེས་བྱ་བའི་བར་རོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མངོན་མཚན་ཅན་སློང་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོ་འམ། གཞན་ཡང་དེ་ལྟ་བུ་དང་འཐུན་པའོ། །མངོན་མཚན་ཅན
9.175a
སློང་ན་ཞེས་བྱ་བ་ནི་གསེར་རམ་དངུལ་ལོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་རང་གི་དོན་དུ་མངོན་མཚན་ཅན་སློང་ན་སྤང་བའི་ལྟུང་བྱེད་དོ། །གསེར་སློང་ན་སྤང་བའི་ལྟུང་བྱེད་དོ། །གང་ཡང་དགེ་སློང་མས་ཅི་ཡང་རུང་བ་མ་ཡིན་པ་སློང་ན་དེ་ཡང་སྤང་བའི་ལྟུང་བྱེད་དོ། །སྤང་བའི་ལྟུང་བྱེད་ཉི་ཤུ་བཞི་པ་རྫོགས་སྷོ།། ་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་སྦོམ་དགའ་མོ་ཁྱིམ་བདག་གི་ཆུང་མ་རབ་ཏུ་མང་པོ་ལ་ཆོས་སྙན་པ་དག་སྟོན་ཏོ། །དེའི་ཚེ་སྦོམ་དགའ་མོའི་ཆོས་གོས་ལྔ་ནི་རྙིངས། སྣམ་སྦྱར་ནི་དེངས་པ་དང ། དེ་ལ་ཁྱིམ་བདག་གི་ཆུང་མ་དེ་རྣམས་ཀྱིས་སྨྲས་པ། འཕགས་མ་ཁྱོད་གལ་ཏེ་འདི་འདྲ་བའི་ཆོས་འཆད་མཁྱེན་ན་ཁྱོད་ཅིའི་སླད་དུ་ཆོས་གོས་རྙིང་པ་ལྔས་འཁྱམ་པར་མཛད། དེས་འདི་སྐད་ཅེས་སྨྲས་སོ། །ཅི་ཁོ་མོ་ལ་ཡང་ཁྱོད་བཞིན་དུ་ཁྱོ་དང་བུ་ལས་བྱེད་པ་དག་ཡོད་དམ། ཁོ་མོ་དགེ་སློང་མ་ལ་སྟེར་བ་སུ་ཡོད། དེ་ལ་དེ་དག་གིས་སྐུད་པ་དག་བསྟན་ནས། བདག་ཅག་གིས་སྐུད་པ་འདི་འཕགས་མའི་སླད་དུ་གོས་སུ་འཐག་ཏུ་སྩལ་ནས་གསོལ་ལོ། །དེས་འདི་སྐད་ཅེས་སྨྲས་སོ། །ཁྱེད་ཀྱིས་དགེ་སློང་མའི་གོས་ཇི་ལྟར་བྱ་བ་མི་ཤེས་པས་ཁོ་མོ་རང་གིས་བཏག་གོ་ཞེས་དེ་སྐུད་པ་དེ་ཁྱེར་ནས་ཚོང་བའི་མི་གང་ན་བ་དེར་སོང་སྟེ་ཕྱིན་ནས། ཚོང་བའི་མི་ལ་འདི་སྐད་ཅེས་སྨྲས་སོ། །ཀྱེ་ནང་རྗེ་ཁྱོད་སྐུད་པ་འདི་ཇི་ཙམ་གྱིས་ཉོ། ཉོས་ནས་ཇི་ཙམ་དུ་འཚོང ། དེས་འདི་སྐད་ཅེས་སྨྲས་སོ། །ཁོ་བོ་ནི་འདི་ཙམ་གྱིས་ཉོས་ནས་ཁོ་བོ་ནི་འདི་ཙམ་དུ་འཚོང་ངོ ། །དེས་འདི་སྐད་ཅེས་སྨྲས་སོ། །སྐུད་པ་འདི་ཁྱེར་ལ་ཁོ་མོ་ལ་རིན་བྱིན་ཅིག་།ཚོང་བའི་མི་དེས་སྐུད་པ་རིན་ཀཱར་ཥཱ་པ་ཎ་དག་བྱིན་ནོ། །དེ་ནས་སྦོམ་དགའ་མོ་དབྱར་ཁང་དུ་སོང་ནས་ཀཱར་ཥཱ་པ་ཎ་དེ་དག་ལས
9.175b
ཁ་ཟས་དག་གཡོ་བར་བྱེད་དེ། ཀུན་དུ་གཡོས་པ་དང ། ལེགས་པར་གཡོས་པ་དང ། འབྲས་བུས་བརྒྱན་པ་དང ། ཚིལ་གྱི་བེ་རེག་དང ། འབྲས་བུའི་བེ་རེག་དང ། རིམ་པ་བརྒྱ་པ་དང ། ནང་ཚངས་ཅན་དག་སྟེ། དེ་ལྟར་ཁ་ཟས་ཀྱིས་གཡོས་ཀྱི་སྣ་གྲངས་བཅཝ་བརྒྱད་པ་དང ། ཉི་ཤུ་པ་དག་བྱས་ཏེ་ཀཱར་ཥཱ་པ་ཎ་དེ་དག་ཞག་མང་པོ་མ་ལོན་པར་ཟོས་སོ། །ཟོས་ནས་ཀྱང་ཡང་ཁྱིམ་བདག་གི་ཆུང་མ་རྣམས་ཀྱི་དྲུང་དུ་སོང་བ་དང ། དེ་ནས་ཁྱིམ་བདག་གི་ཆུང་མ་དེ་རྣམས་ཀྱིས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་གོས་དེ་བཏགས་ལགས་སམ། དེས་འདི་སྐད་ཅེས་སྨྲས་སོ། །དེ་ལ་གླ་ཡང་དགོས་སོ། །དེ་དག་གིས་གླ་ཡང་བྱིན་པ་དང ། དེ་ཡང་ཟོས་སོ། །དེ་བཞིན་དུ་འདྲུབ་པའི་དང ། ཚོན་རྩིའི་གླ་ཡང་ཟོས་སོ། །དེ་ནས་སྦོམ་དགའ་མོ་ལ་ཡང་ཁྱིམ་བདག་གི་ཆུང་མ་དེ་རྣམས་ཀྱིས་སྨྲས་པ། འཕགས་མ་ཁྱོད་ཅིའི་སླད་དུ་ན་བཟའ་མི་མནབས། ་དེས་འདི་སྐད་ཅེས་སྨྲས་སོ། །རྗེས་སུ་ཡི་རང་བ་གྱིས་ཤིག་།དེ་དག་གིས་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་ཅི་ཞིག་ཏུ་བགྱིས། དེས་འདི་སྐད་ཅེས་སྨྲས་སོ། །གཏེར་དུ་སྦས་སོ། །དེ་དག་གིས་འདི་སྐད་ཅེས་སྨྲས་སོ། །རེ་ཤིག་བདག་ཅག་ནི་བུ་དང་ཁྱོའི་ཆེད་དུ་གཏེར་དུ་སྦས་ན། ཁྱོད་མུན་དི་ཏ་དང་རྒྱ་ཤུག་ལྟར་གཅིག་པུ་ལགས་ན། སུའི་སླད་དུ་གཏེར་དུ་སྦས། དེས་འདི་སྐད་ཅེས་སྨྲས་སོ། །ཁྱེད་ཅག་ཅི་དོང་བརྐོས་ནས་གཏེར་དུ་སྦས་སྙམ། འོན་ཀྱང་ཁོ་མོས་ནི་ཁ་ཟས་ཀྱི་གཡོས་ཀྱི་སྣ་གྲངས་བཅཝ་བརྒྱད་པ་དང ། ཉི་ཤུ་པ་དག་བྱས་ཏེ་ལག་མཐིལ་ནས་ལྐོག་མར་བརྫངས་སོ། །ལྐོག་མ་ནས་སའི་འོག་ཏུ་བོར་རོ། །དེ་དག་གིས་འདི་སྐད་ཅེས་སྨྲས་སོ། །འཕགས་མ་རེ་ཤིག་བདག་ཅག་ལ་བུ་དང ། སྡུམ་ཐབ་ལས་བགྱིད་པ་མཆིས་ཀྱང་བདག་ཅག་འདི་འདྲ་བའི་ཁ་ཟས་མི་འཚལ་ན། ཅིའི་སླད་དུ་ཁྱོད་རབ་ཏུ་བྱུང་བར་གྱུར་པ་ཁ་ཟས་ཀྱི་རྣམ་པ་འདི་ལྟ་བུ་ལ་ལོངས་སྤྱོད་ལགས། དེས་འདི
9.176a
སྐད་ཅེས་ཁོ་མོ་ནི་ཤཱཀྱའི་བུ་མོ་ཤིན་དུ་གཞོན་པ་སྡེ་སྣོད་གསུམ་པ་ཡིན་ཏེ། ཁ་ཟས་ངན་པས་འཚོ་བར་མི་ནུས་སོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་ཐོས་ནས་དགེ་སློང་མ་རྣམས་སྨོད་པར་བྱེད་དོ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དོ། །ཡང་དགེ་སློང་མ་གང་གོས་ཀྱི་རྙེད་པ་སོ་སོ་བ་དག་བདག་གི་ཁའི་བཟའ་བར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོ་འམ། གཞན་ཡང་དེ་ལྟ་བུ་དང་འཐུན་པའོ། །སོ་སོ་བ་ཞེས་བྱ་བ་ནི་དངོས་པོ་གཞན་དག་གོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །བདག་རང་གི་ཁའི་སྒོར་ཞེས་བྱ་བ་ནི་ལྐོག་མར་མིད་པའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གོས་ཀྱི་རྙེད་པ་ཁའི་སྒོར་བྱིན་གྱིས་རློབ་པར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་ཉི་ཤུ་ལྔ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་སྤོས་འཚོང་གི་ཁྱེའུ་ཞིག་ལ་ཆགས་པས་དེ་དེའི་ཚོང་ཁང་དུ་སོང་སྟེ་འདི་སྐད་ཅེས་སྨྲས་སོ། །བཞིན་བཟངས་སྒེའུ་གཤེར་གྱི་ཐུམ་པོ་ཆིངས་ཤིག་།ཇི་ཙམ་ན་འཆིང་བ་ལ་ཞུགས་པ་དང ། དེས་ཡང་འདི་སྐད་ཅེས་སྨྲས་སོ། །མ་ཡིན་མ་ཡིན་པི་པི་ལིང་གི་ཐུམ་པོ་ཆིངས་ཤིག་།མ་ཡིན་མ་ཡིན་ན་ལེ་ཤམ་གྱི་ཐུམ་པོ་ཆིངས་ཤིག་།བུད་མེད་ནི་བརྗེད་ངས་པ་ཡིན་པས་བུ་རམ་གྱི་ཐུམ་པོ་ཆིངས་ཤིག་།མ་ཡིན་མ་ཡིན་ཤ་ཁ་རའི་ཐུམ་པོ་ཆིངས་ཤིག་།མ་ཡིན་མ་ཡིན་བཙག་ཡུག་སྣམ་གྱི་ཐུམ་པོ་ཆིངས་ཤིག་།གང་གི་ཚེ་དེ་གཞན་འགྲོལ་ཞིང་གཞན་འཆིང་བ་དེའི་ཚེ་སྤོས་འཚོང་གི་ཁྱེའུ་ཁྲོས་ནས་ཐུམ་པོ་དེ་བརྡབས་སོ། །བརྡབས་ནས་འདི་སྐད་ཅེས་མགོ་རེག་མོ་ངན་པ་མོ་ཞེས་སྨྲས་སོ། །དེ་ལ་ཕྱི་བཞིན་འབྲང་བའི་དགེ་སྦྱོང་མས་སྨྲས་པ། ཁྱོད་ནུས་པ་འདིས་སྡེ་སྣོད་གསུམ་པོ་དག་ལེགས་པར་སྟོན་ནམ། དེས་བླུན་མོ་ཁོ་མོ་བརྗེད་སྙམ་འམ། དེས་ལྟ་མོད་ཀྱི་ཁོ་མོ་ཚིག་ཙམ་རང
9.176b
གིར་བྱེད་དོ། །དེས་འདི་སྐད་ཅེས་སྨྲས་སོ། །ཁྱོད་འདོད་ཆགས་ཀྱིས་བརྡེགས་ན་མི་འགས་ཤིང ། ཤིང་ཤོགས་ཇི་ལྟ་བ་བཞིན་དུ་མེ་འབར་བ་ངོ་མཚར་ཆེའོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཐུམ་པོ་བཅིངས་ཤིང ། བཅིངས་ཤིང་ཡང་དང་ཡང་དུ་འགྲོལ་དུ་འཇུག་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཐུམ་པོ་བཅིངས་ཤིང་བཅིངས་ཤིང་ཞེས་བྱ་བ་ནི་ཟོང་ངོ ། །ཡང་དང་ཡང་དུ་འགྲོལ་དུ་འཇུག་ན་ཞེས་བྱ་བ་ནི་གཞན་དང་གཞན་ནོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཆགས་པས་ཐུམ་པོ་བཅིངས་ཤིང་བཅིངས་ཤིང་འགྲོལ་དུ་འཇུག་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་ཉི་ཤུ་དྲུག་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ཏེ་བཙུན་མོ་ཕྲེང་ལྡན་མའི་ཕོ་བྲང་གང་ན་བ་དེར་སོང་བ་དང ། བཙུན་མོ་ཕྲེང་ལྡན་མས་རྒྱང་རིང་པོ་ཁོ་ན་ནས་སྦོམ་དགའ་མོ་འོང་བ་མཐོང་ངོ ། །མཐོང་ནས་ཀྱང་སྟན་ཤོམ་དུ་བཅུག་གོ། །དེ་ནས་སྦོམ་དགའ་མོ་སྟན་བཤམས་པ་ཉིད་ལ་འདུག་སྟེ། འདུག་ནས་བཙུན་མོ་ཕྲེང་ལྡན་མ་ལ་ཆོས་སྙན་ཅིང་སྙན་པ་བཤད་དོ། །དེའི་ཚེ་སྦོམ་དགའ་མོའི་ཆོས་གོས་སྨད་ལྔ་རྙིངས། སྣམ་སྦྱར་ཡང་དེངས་སོ། །དེ་ནས་དགེ་སློང་མ་སྦོམ་དགའ་མོ་ལ་བཙུན་མོ་ཕྲེང་ལྡན་མས་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱི་ཆོས་གོས་རྣམས་རྙིངས་སོ། །དེས་འདི་སྐད་ཅེས་སྨྲས་སོ། །བཙུན་མོ་ཅི་བདག་ལ་གསུས་པོ་ཆེ་ཁང་བགྱིད་དམ། འོན་ཏེ་ཡུལ་ཀ་ཤི་དང ། ཀོ་ས་ལ་བདོག་།གཞན་ཡང་བཙུན་མོ་བུད་མེད་ནི་རྙེད་པ་ཆུང་བ་ལགས་སོ། །
9.177a
དེ་ནས་བཙུན་མོ་ཕྲེང་ལྡན་མས་དགེ་སློང་མ་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ལ་བདག་གིས་ཆོས་གོས་ལྔ་དབུལ་ལོ། །དེས་འདི་སྐད་ཅེས་སྨྲས་སོ། །ཁྱོད་ཀྱིས་དགེ་སློང་མའི་ཆོས་གོས་དག་འཚེམ་མི་མཁྱེན་ཏེ། དེ་ལྟར་མོད་ཀྱི་བདག་ཉིད་ཀྱིས་བཙེམ་མོ། །དེས་དེ་ལ་ཆོས་གོས་ལྔའི་རྒྱུར་རིན་ཆེ་བའི་རས་ཡུག་པོ་ཆེ་དག་བྱིན་ནོ། །དེས་དེ་བླངས་ཏེ་ཚོང་བའི་དྲུང་དུ་སོང་ནས་བཙོངས་ཏེ་ཞེས་བྱ་བ་ནས། ཁ་ཟས་ཀྱི་རྣམ་གྲངས་བཅཝ་བརྒྱད་པ་དང ། ཉི་ཤུ་པ་དག་བྱས་ནས་ཟོས་ཏེ་སླར་ཡང་སོང་བ་དང་ཞེས་བྱ་བ་ནས་འདྲུབ་པའི་དང ། ཚོན་རྩིའི་གླ་ཡང་ཟོས་སོ། །དེ་ནས་སྦོམ་དགའ་མོ་ལ་བཙུན་མོ་ཕྲེང་ལྡན་མས་འདི་སྐད་ཅེས་སྨྲས་སོ། །འཕགས་མ་ཁྱོད་ཅིའི་སླད་དུ་ཆོས་གོས་དེ་དག་མི་མནབས། དེས་འདི་སྐད་ཅེས་སྨྲས་སོ། །བཙུན་མོ་གཏེར་དུ་སྦས་ལགས་ཀྱིས། རྗེས་སུ་ཡི་རང་བར་མཛོད་ཅིག་།དེ་ནས་སྦོམ་དགའ་མོ་ལ་བཙུན་མོ་ཕྲེང་ལྡན་མས་འདི་སྐད་ཅེས་སྨྲས་སོ། །ཁོ་མོ་ཡུལ་ཀ་ཤི་དང ། ཀོ་ས་ལ་ཡོད་ཀྱང་གཏེར་མི་འཆའོ་ཞེས་བྱ་བ་ནས། རྣམ་གྲངས་བཅཝ་བརྒྱད་པ་དང ། ཉི་ཤུ་པ་དག་བགྱིས་ཏེ་ལག་མཐིལ་ནས་ལྐོག་མར་བརྫངས་སོ་ཞེས་བྱ་བ་ནས། བདག་ནི་སྡེ་སྣོད་གསུམ་པ་ལགས་སོ་ཞེས་བྱ་བའི་བར་རོ། །དོན་ཉུང་བའི་དགེ་སློང་མ་དག་སྨོད་པར་བྱེད་པའི་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གོས་ཀྱི་ཕྱིར་དངོས་པོ་གཞན་རྙེད་པ་རང་གི་ཁའི་སྒོར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དངོས་པོ་གཞན་ཞེས་བྱ་བ་ནི་གཞན་དུ་བསྔོས་པའོ། །གོས་ཀྱི་རྙེད་པ་ཞེས་བྱ་བ་ནི་བདུན་པོ་གང་ཡང་རུང་བ་འོ། །ཁའི་སྒོ་ཞེས་བྱ་བ་ནི་ལྐོག་མར་མིད་པའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དགེ་སློང་མས་དངོས་པོ་གཞན
9.177b
རྙེད་པ་དེ་ཁའི་སྒོར་བྱིན་གྱིས་རློབ་པར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་ཉི་ཤུ་རྩ་བདུན་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་རང་གི་དབྱར་ཁང་གི་གནས་མལ་གྲུགས་ཤིང་ཆག་པ་དང ། དེ་ལ་བྲམ་ཟེ་དང ། ཁྱིམ་བདག་གི་ཆུང་མ་རྣམས་ཀྱིས་སྨྲས་པ། ཁྱོད་ཀྱི་གནས་མལ་གྲུགས་ཤིང་ཆག་པ་དག་ཅིའི་སླད་དུ་མ་བཅོས། དེས་འདི་སྐད་ཅེས་སྨྲས་སོ། །ཅི་ཁོ་མོ་ལ་བུ་དང་ཁྱིམ་ཐབ་ལས་བྱེད་པ་ཡོད་སྙམ་འམ། དེ་དག་གིས་གནས་མལ་བཅོས་པའི་ཕྱིར་ཀཱར་ཥཱ་པ་ཎ་མང་པོ་བྱིན་ནོ། །ཞེས་བྱ་བ་ནས་དེས་ཁ་ཟས་ཀྱི་རྣམ་གྲངས་བཅཝ་བརྒྱད་པ་དང ། ཉི་ཤུ་པ་དག་བྱས་ཏེ་ཟོས་སོ་ཞེས་བྱ་བའི་བར་རོ། །ཡང་གྲུགས་ཤིང་ཆག་པ་མཐོང་ནས་ཞེས་བྱ་བ་ནས། འདི་སྐད་ཅེས་ཁོ་མོ་ནི་སྡེ་སྣོད་གསུམ་པ་ཡིན་ནོ་ཞེས་བྱ་བའི་བར་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་ཞེས་བྱ་བ་ནས། ་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་ཁང་གི་གནས་མལ་གྱི་རྙེད་པ་རང་གི་ཁའི་བཟའ་བར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །གནས་མལ་གྱི་རྙེད་པ་ཞེས་བྱ་བ་ནི་གདིང་བ་དང ། གཡོག་པ་བཏགས་པ་འམ་རིན་ནོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་ཡིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དབྱར་ཁང་གི་རྙེད་པ་ཁའི་སྒོར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །སྤང་བའི་ལྟུང་བྱེད་ཉི་ཤུ་བརྒྱད་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ཚེས་བརྒྱད་དང ། བཅཝ་ལྔ་དག་ལ་ཁྱིམ་བདག་གི་ཆུང་མ་རབ་ཏུ་མང་པོ་ཆོས་ཉན་པའི་ཕྱིར་དབྱར་ཁང་དུ་འོངས་པ་དང ། དེ་ནས་མཚན་མོ་ཆར་བབ་པས་དབྱར་ཁང་ཐམས་ཅད་ཐིགས་པ་འཛག་པར་གྱུར་ཏོ། །དེ་ནས་ཁྱིམ
9.178a
བདག་གི་ཆུང་མ་དེ་རྣམས་ཀྱིས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་ཅིའི་སླད་དུ་དབྱར་ཁང་མི་བཅོས། དེས་འདི་སྐད་ཅེས་ཅི་ཁོ་མོའི་ཁྱིམ་ན་ཡང་བུ་དང་ཁྱིམ་ཐབ་ཡོད་སྙམ་ཞེས་སྨྲས་པ་དང ། དེ་དག་གིས་དབྱར་ཁང་བཅོས་པའི་ཕྱིར་ཀར་ཤ་པ་ཎ་དག་བྱིན་ཏེ། དེས་ཁ་ཟས་ཀྱི་རྣམ་གྲངས་བཅཝ་བརྒྱད་པ་དང ། ཉི་ཤུ་པ་དག་བྱས་ནས་ཟོས་སོ་ཞེས་བྱ་བ་ནས། ཡང་ཐིགས་པ་འཛག་པ་མཐོང་ནས་ཞེས་བྱ་བའི་བར་རོ། །དེ་དག་གིས་སྨྲས་པ། ་འཕགས་མ་དབྱར་ཁང་མ་བཅོས་སམ་ཞེས་བྱ་བའི་བར་དུ་སྟེ། དེས་འདི་སྐད་ཅེས་ཁོ་མོ་ནི་སྡེ་སྣོད་གསུམ་པ་ཡིན་ནོ་ཞེས་བྱ་བའི་བར་དུ་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་ཁང་བཅོས་པའི་རྙེད་པ་བདག་ཉིད་ཀྱི་ཁའི་སྒོར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དབྱར་ཁང་ཞེས་བྱ་བ་ནི་གཙུག་ལག་ཁང་ངོ ། །རྙེད་པ་ཞེས་བྱ་བ་ནི་གསེར་དང་དངུལ་ལམ། གཞན་ཅི་ཡང་རུང་བའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དབྱར་ཁང་བཅོས་པའི་རྙེད་པ་ཁའི་སྒོར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །སྤང་བའི་ལྟུང་བྱེད་ཉི་ཤུ་དགུ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ལྗོངས་ཤིག་ནས་དགེ་སློང་མ་རབ་ཏུ་མང་པོ་མཉན་ཡོད་དུ་ལྷགས་པ་དང ། དེ་དག་གི་ཕྱིར་བྲམ་ཟེ་དང་ཁྱིམ་བདག་རྣམས་ཀྱི་ཆུང་མས་རྙེད་པ་མང་དུ་གཏད་ནས་དེ་དག་གིས་འདི་སྐད་ཅེས་སྨྲས་སོ། །འཕགས་མ་གདུགས་ཚོད་མཛོད་ཅིག་།དེས་འདི་སྐད་ཅེས་སྨྲས་སོ། །འདི་ལྟར་ཉུངས་ཀྱིས་ཡང་དང་ཡང་དུ་སྣོན་ཅིག་།དེ་དག་གིས་ཡང་དང་ཡང་དུ་བྱིན་ནས་ཀྱང་དེ་དག་གིས་འདི་སྐད་ཅེས་སྨྲས་སོ། །འཕགས་མ་གདུགས་ཚོད་བགྱི་བའི་དུས་ནི་འདི་ལགས་སོ། །དེས་འདི
9.178b
སྐད་ཅེས་སྨྲས་སོ། །ད་དུང་ཟན་བྱ་བའི་དུས་ལ་མ་བབ་བོ། །གང་གི་ཚེ་དགེ་སློང་མ་དེ་རྣམས་ལྗོངས་དག་ཏུ་དོང་བ་དེའི་ཚེ་དེས་རྙེད་པ་དེ་ལས་རྣམ་གྲངས་བཅཝ་བརྒྱད་པ་དང ། ཉི་ཤུ་པའི་བར་དག་བྱས་ནས་ཟོས་སོ་ཞེས་བྱ་བ་ནས། ཁོ་མོ་ནི་སྡེ་སྣོད་གསུམ་པ་ཡིན་ནོ་ཞེས་བྱ་བའི་བར་རོ། །དོན་ཉུང་བའི་དགེ་སློང་མ་དག་སྨོད་པར་བྱེད་པ་ནས། ་བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གློ་བུར་དུ་ལྷགས་པའི་དགེ་སློང་མ་རྣམས་ཀྱི་ཕྱིར་རྙེད་པ་བསླངས་ཏེ། གཅིག་པུ་ཟ་ན་སྤང་བའི་ལྟུང་བྱེད་དོ། །ཡང་དགེ་སློང་མ་ཞེས་བྱ་བ་ནི་སྦོམ་དགའ་མོའོ། །གློ་བུར་དུ་ལྷགས་པའི་དགེ་སློང་མ་རྣམས་ཀྱི་ཕྱིར་ཞེས་བྱ་བ་ནི་བཅོམ་ལྡན་འདས་ཀྱི་ཉན་ཐོས་མ་རྣམས་སོ། །རྙེད་པ་ཞེས་བྱ་བ་ལ་རྙེད་པ་ནི་གཉིས་ཏེ། ཟས་ཀྱི་རྙེད་པ་དང ། གོས་ཀྱི་རྙེད་པའོ། །དོན་འདི་ལ་ནི་ཟས་ཀྱི་རྙེད་པ་ཡིན་པར་དགོངས་སོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཇི་ཙམ་དགེ་སློང་མས་གློ་བུར་དུ་ལྷགས་པའི་དགེ་སློང་མ་རྣམས་ཀྱི་ཕྱིར་རྙེད་པ་ཡོད་པ་གཅིག་པུ་ཟ་བར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་སུམ་བཅུ་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་སྦོམ་དགའ་མོས་དགེ་འདུན་མའི་ཕྱིར་ཟས་དག་ཡང་དག་པར་སྐུལ་བར་བྱེད་པ་ན། དེ་ནས་བྲམ་ཟེ་དང་ཁྱིམ་བདག་གི་ཆུང་མ་དེ་རྣམས་ཀྱིས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ཅིའི་སླད་དུ་དགེ་འདུན་མའི་ཟས་ཀྱི་རྙེད་པ་མི་བགྱི། འདི་ལྟར་ཉུངས་སོ་ཞེས་ཡང་དང་ཡང་དུ་བསླངས་ནས་གཅིག་པུས་ཀུན་ཏུ་གཡོས་པ་དང ། ལེགས་པར་གཡོས་པ་ནས། རྣམ་གྲངས་བཅཝ་བརྒྱད་པ་དང ། ཉི་ཤུ་པ་དག་གི་བར་དག་བྱས་ཏེ་ཟོས་སོ་ཞེས་བྱ་བ་ནས། རྗེས་སུ་ཡི་རང་བར་གྱིས་ཤིག་ཅེས་བྱ་བ་དང ། ཁོ་མོ་ནི་སྡེ
9.179a
སྣོད་གསུམ་པ་ཡིན་ནོ་ཞེས་བྱ་བའི་བར་རོ། །དོན་ཉུང་བའི་དགེ་སློང་མ་དག་སྨོད་པར་བྱེད་པའི་ཞེས་བྱ་བ་ནས། དེ་ནས་བཅོམ་ལྡན་འདས་ཀྱིས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་གྱི་ཕྱིར་རྙེད་པ་བསླངས་ཏེ་བདག་ཉིད་ཀྱི་ཁའི་བཟའ་བར་བྱིན་གྱིས་རློབ་པར་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་འདུན་མའི་ཕྱིར་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མའི་འོ། །རྙེད་པ་ཞེས་བྱ་བ་ལ་རྙེད་པ་ནི་གཉིས་ཏེ། ཟས་ཀྱི་རྙེད་པ་དང ། གོས་ཀྱི་རྙེད་པའོ། །དོན་འདི་ལ་ནི་ཟས་ཀྱི་རྙེད་པ་ཡིན་པར་དགོངས་སོ། །བསླངས་ཏེ་ཞེས་བྱ་བ་ནི་ཕ་རོལ་ལས་སོ། །ཁའི་ཞེས་བྱ་བ་ནི་ཁའི་བཟའ་བར་རོ། །བྱིན་གྱིས་རློབ་པར་བྱེད་ན་ཞེས་བྱ་བ་ནི་ལྐོག་མར་མིད་པར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་མའི་རྙེད་པ་བདག་ཉིད་ཀྱི་ཁའི་སྒོར་བྱིན་གྱིས་རློབ་པར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་སུམ་བཅུ་གཅིག་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ཡུལ་ལུས་འཕགས་ཀྱི་རྒྱལ་པོས་ལ་བ་རིན་པོ་ཆེ་ཞིག་རྒྱལ་པོ་གསལ་རྒྱལ་ལ་སྐྱེས་སུ་བསྐུར་བ་ལས། དེས་རྒྱལ་རིགས་ཉམས་པའི་དམག་མི་རྣམས་ལ་བྱིན་ནོ། །དེ་རྣམས་ཀྱིས་ཀྱང་ཆོས་སྦྱིན་ནི་བདག་ཅག་གི་དགེ་བའི་བཤེས་གཉེན་ཡིན་ནོ་ཞེས་ལ་བ་རིན་པོ་ཆེ་དེ་དེ་ལ་བྱིན་ནོ། །དེས་ཀྱང་ལ་བ་རིན་པོ་ཆེ་ཆོས་གོས་ཀྱི་གདང་ལ་གཟར་ཏེ་བཞག་གོ། །གཙུག་དགའ་མོ་གནས་ཁང་དུ་ཞུགས་པས་མཐོང་ནས། དེས་ཆོས་སྦྱིན་ལ་དྲིས་པ། འཕགས་མ་ལ་བ་རིན་པོ་ཆེ་འདི་སུའི་ལགས། དེས་འདི་སྐད་ཅེས་སྨྲས་སོ། །ཁོ་མོའི་ཡིན་ནོ། །དེ་ནས་གཙུག་དགའ་མོས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བསོད་ནམས་དག་ནི་བྱ་བ་སྟེ། །བསོད་ནམས་མ་བྱས་སྡུག་བསྔལ
9.179b
འགྱུར། །འཇིག་རྟེན་འདི་དང་ཕ་རོལ་དུ། །བསོད་ནམས་བྱས་པ་དགའ་བར་འགྱུར། །ཞེས་གསུངས་པ་ནི་ཐོག་ཏུ་བབ་སྟེ། ཁྱོད་ནི་བསོད་ནམས་བགྱིས་པས་ལྷ་དང་མིས་མཆོད་པར་གྱུར་ཏོ། །དེ་ནས་ཆོས་སྦྱིན་གྱིས་གཙུག་དགའ་མོ་ལ་འདི་སྐད་ཅེས་སྨྲས་སོ། །གལ་ཏེ་འདོད་ན་ཁྱེར་ཅིག་།དེས་འདི་སྐད་ཅེས་སྨྲས་སོ། །འདི་ནི་ལྷའི་ཕམ་ཕབས་ལགས་སོ་ཞེས་བྱས་ནས་ལ་བ་རིན་པོ་ཆེ་དེ་བླངས་ཏེ་བགོས་ནས་ལག་པ་གཉིས་སྦྱར་བ་བྱས་ཏེ། ལམ་པོ་ཆེ་དང་སྲང་དུ་འཁྱམ་པ་ན། ་དེ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་འདི་སྐད་ཅེས་སྨྲས་སོ། །ཕ་བི་སུ་ཞིག་ཡིན་ཅི་ནོར་ཅན་གྱི་ཆུང་མ་འམ། ཚོང་དཔོན་གྱི་ཆུང་མ་འམ། དེད་དཔོན་གྱི་ཆུང་མ་ཞིག་ཡིན། གཞན་དག་གིས་འདི་སྐད་ཅེས་སྨྲས་སོ། །གཙུག་དགའ་མོ་ཡིན་ནོ། །བལྟས་ནས་ཤེས་ལྡན་དག་བྲམ་ཟེ་དང་ཁྱིམ་བདག་གི་ཆུང་མ་གང་ཡིན་པ་དེ་དག་ཀྱང་ལྕི་ལ་རིན་ཆེ་བའི་གོས་དག་གྱོན་ལ། ་ཤཱཀྱའི་སྲས་ཀྱི་དགེ་སྦྱོང་མ་འདི་དག་ཀྱང་ལྕི་ལ་རིན་ཆེ་བའི་གོས་དག་གྱོན་ན་ཁྱད་པར་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། ཅེས་སྨོད་པར་བྱེད། ཕྱར་ཀ་གཏོང་བར་བྱེད། ་ཁ་ཟེར་བར་བྱེད་དོ། །ཞེས་བྱ་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱིས་གཙུག་དགའ་མོ་ལ་རྨེད་པར་མཛད་དེ། དགེ་སློང་མ་ཁྱོད་ཀྱིས་འདི་ལྟ་བུ་མཛེས་པ་མ་ཡིན་པ་བྱས་པ་བདེན་ནམ། བཅོམ་ལྡན་འདས་མད་ལགས་སོ། །སངས་རྒྱས་བཅོམ་ལྡན་འདས་ཀྱིས་གཙུག་དགའ་མོ་ལ་དགེ་སྦྱོང་མའི་ཚུལ་མ་ཡིན་པ་དང ། རུང་བ་མ་ཡིན་པ་དང ། མཛེས་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས
9.180a
གཉིས་ཀའི་དགེ་འདུན་ལ་བཀའ་སྩལ་པ། དགེ་སློང་དག་བུད་མེད་ནི་ཁ་ཟས་དང་འདྲ་སྟེ། རེ་ཤིག་གོས་བཟང་པོ་མེད་ན་ཡང་འདོད་པར་བྱ་བ་ཡིན་ན། གོས་བཟང་པོ་བགོས་ན་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་ཐམས་ཅད་ནི་ལྕི་ལ་རིན་ཆེ་བའི་གོས་འཆང་བ་ལས་གྱུར་ཏོ་སྙམ་ནས་བཅོམ་ལྡན་འདས་ཀྱིས་བཀའ་སྩལ་པ། ཡང་དགེ་སློང་མ་གང་ལྕི་ལ་རིན་ཆེ་བའི་གོས་འཆང་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་གཙུག་དགའ་མོའོ། །ལྕི་ལ་ཞེས་བྱ་བ་ནི་དགུན་གྱི་བགོ་བའོ། །རིན་ཆེ་བའི་ཞེས་བྱ་བ་ནི་ཀར་ཤ་པ་ཎ་ཉི་ཤུ་འམ། ཉི་ཤུ་རྩ་ལྔ་རི་བའོ། །འཆང་ན་ཞེས་བྱ་བ་ནི་གྱོན་ནའོ། །སྤང་བའི་ལྟུང་བྱེད་དེ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལྕི་ལ་རིན་ཆེ་བའི་གོས་འཆང་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །སྤང་བའི་ལྟུང་བྱེད་སུམ་བཅུ་རྩ་གཉིས་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ན་འོ། །དེའི་ཚེ་ཡུལ་ཀ་ལིང་ཀའི་རྒྱལ་པོས་སེང་རས་རིན་ཆེ་བ་ཞིག་རྒྱལ་པོ་གསལ་རྒྱལ་ལ་སྐྱེས་སུ་བསྐུར་བ་ལས། དེ་རྒྱལ་རིགས་ཉམས་པའི་དམག་མི་རྣམས་ལ་བྱིན་ནོ། །དེ་རྣམས་ཀྱིས་ཀྱང་ཆོས་སྦྱིན་ནི་བདག་ཅག་གི་དགེ་བའི་བཤེས་གཉེན་ཡིན་ནོ་ཞེས་དེ་ལ་བྱིན་ནོ། །དེས་དེ་བླངས་ཏེ་ཆོས་གོས་ཀྱི་གདང་ལ་གཟར་ཏེ་བཞག་གོ། །གཙུག་དགའ་མོ་ཡང་གནས་ཁང་དུ་ཞུགས་པ་ན་མཐོང་ནས་འདི་སྐད་ཅེས་སྨྲས་སོ། །འཕགས་མ་སེང་རས་འདི་སུའི་ལགས། དེས་འདི་སྐད་ཅེས་སྨྲས་སོ། །ཁོ་མོའི་ཡིན་ནོ། །དེ་ནས་གཙུག་དགའ་མོས་ཆོས་སྦྱིན་ལ་འདི་སྐད་ཅེས་སྨྲས་སོ། །ཁྱོད་ནི་བསོད་ནམས་བགྱིད་པས་ལྷ་དང་མིས་མཆོད་པར་གྱུར་ཏེ། ཁྱོད་ལ་དཔྱིད་ཀའི་བགོ་བ་འདི་ལྟ་བུ་མངའ་འོ། །དེས་འདི་སྐད་ཅེས་སྨྲས་སོ། །གལ་ཏེ་འདོད་ན་ཁྱེར་ཅིག་།དེ་ནས་འདི་སྐད་ཅེས
9.180b
སྨྲས་སོ། །ལྷའི་ཕམ་ཕབས་སུ་མི་འཚལ། དེ་ནས་ཆོས་སྦྱིན་གྱི་སེང་རས་གཙུག་དགའ་མོ་ལ་བྱིན་ནོ། །དེས་དེ་བགོས་ནས་སྲང་དུ་ཞུགས་ན་དེའི་ལུས་གཡོགས་ཀྱང་སྒྲེན་མོ་འདྲ་བར་སྣང་ངོ ། །དེ་ནས་བྲམ་ཟེ་དང ། ཁྱིམ་བདག་རྣམས་ཀྱིས་གཙུག་དགའ་མོ་རྒྱང་རིང་པོ་ཁོ་ན་ནས་འོང་བ་མཐོང་ནས་འདི་སྐད་ཅེས་སྨྲས་སོ། །ཕ་བི་སུ་ཞིག་ཡིན། ནོར་ཅན་གྱི་འམ། ཚོང་དཔོན་གྱི་འམ། དེད་དཔོན་གྱི་བུ་མོ་ཞིག་འོངས་པར་གྱུར་ཏམ། གཞན་དག་གིས་འདི་སྐད་ཅེས་སྨྲས་སོ། །དགེ་སློང་མ་གཙུག་དགའ་མོ་ཡིན་ནོ། །དེ་རྣམས་ཀྱིས་བལྟས་ནས་འདི་སྐད་ཅེས་སྨྲས་སོ། །འདི་ལྟ་སྟེ། སེང་རས་གྱོན་པ་འདི་ནི་དགེ་སློང་མ་རྣམས་ལ་མཛེས་པ་མ་ཡིན་ནོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་རྒྱས་པར་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། གླེང་གཞི་འདི་དང ། སྐབས་འདི་ལ་ངའི་ཉན་ཐོས་མ་རྣམས་ཀྱིས་རྣམ་པར་ཤེས་པར་འགྱུར་བ་དང ། ངས་བསླབ་པའི་གཞི་ལེགས་པར་བཅས་པར་འགྱུར་བར་བྱ་བའི་ཕྱིར་གཉི་གའི་དགེ་འདུན་བསྡུ་བར་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ། མི་མཁྱེན་པ་མ་ཡིན་གྱི་མཁྱེན་བཞིན་དུ་རྨེད་པ་ཡིན་པས་ཞེས་བྱ་བ་ནས། དགེ་སློང་མ་ཁྱོད་ཀྱིས་མཛེས་པ་མ་ཡིན་པ་འདི་ལྟ་བུ་བྱས་པ་བདེན་ནམ་ཞེས་བྱ་བའི་བར་རོ། །བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་སྨད་པར་མཛད་དེ། དགེ་སློང་མ་དག་བུད་མེད་ནི་ལེགས་པར་སྦས་ཀྱང་མཛེས་པ་མ་ཡིན་ན། མ་སྦས་ན་ལྟ་སྨོས་ཀྱང་ཅི་དགོས་ཞེས་རྣམ་གྲངས་དུ་མར་རྣམ་པར་སྨད་ནས། དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་ངས་ཕན་ཡོན་བཅུ་ཡང་དག་པར་རྗེས་སུ་གཟིགས་ནས་འདུལ་བ་ལ་ཉན་ཐོས་མ་རྣམས་ཀྱིས་བསླབ་པའི་གཞི་བཅའ་བར་མཛད་དེ། འདི་ལྟ་སྟེ། དགེ་འདུན་ཡང་དག
9.181a
པར་བསྡུ་བའི་ཕྱིར་དང ། ཞེས་བྱ་བ་ནས་ལྷ་དང་མིའི་བར་ལ་ཡང་དག་པར་ལེགས་པར་རབ་ཏུ་བཤད་པར་འགྱུར་བའི་བར་རོ། །ཡང་ངའི་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་སྐད་ཅེས་གདོན་པར་བྱ་སྟེ། ཡང་དགེ་སློང་མ་གང་ཡང་ལ་རིན་ཆེ་བའི་གོས་གྱོན་ན་སྤང་བའི་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་གཙུག་དགའ་མོའོ། །གོས་ཡང་ལ་ཞེས་བྱ་བ་ནི་སེང་རས་སོ། །རིན་ཆེ་བ་ཞེས་བྱ་བ་ནི་ཀར་ཤ་པ་ཎ་ཉི་ཤུ་རི་བ་འམ། ཀར་ཤ་པ་ཎ་ཉི་ཤུ་རྩ་ལྔ་བའོ། །སྤང་བའི་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་སེང་རས་གྱོན་ན་སྤང་བའི་ལྟུང་བྱེད་དོ། །སྣ་ཚོགས་སུ་བཀྲ་བ་གྱོན་ནམ། སྲབ་མོ་གྱོན་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །སྤང་བའི་ལྟུང་བྱེད་སུམ་བཅུ་གསུམ་པ་རྫོགས་སྷོ།། ་་་་་་་།།དགེ་སློང་མའི་འདུལ་བ་རྣམ་པར་འབྱེད་པ་ལས་སྤང་བའི་ལྟུང་བྱེད་རྣམས་རྫོགས་སྷོ།། ་་་་་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅཝ་ལྔ་པ། ད་ནི་ལྟུང་བྱེད་རྣམས་སྨྲ་བར་བྱ་སྟེ། ་་་་་བསྡུས་པའི་སྡོམ་ནི། ཤེས་བཞིན་དང་ནི་ས་བོན་དང ། །དེ་བཞིན་ཁུར་བ་ཉིད་དང་ནི། །ཐལ་མོས་རྡེབས་དང་ཆེས་བསམས་དང ། །རྐུན་མ་བང་ཆེན་ཉིད་དང་ངོ ། ་་་་་་ ། སྡོམ་ནི། ཤེས་བཞིན་དང་ནི་སྐྱོན་ནས་འདྲུ། །ཕྲ་མ་དང་ནི་སྐྱོ་སྔོགས་དང ། །སྐྱེས་པ་ལ་སྟོན་ཆོས་དང་ནི། །ཡིད་འོང་བསླབ་པར་ཁྱད་གསོད་པའོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་ཀྱིས་ཤེས་བཞིན་དུ་དགེ་སློང་མ་རྣམས་ལ་བརྫུན་སྨྲས་པས་འཐོ་འཚམས་པར་བྱེད་པ་ན། དོན་ཉུང་བའི་དགེ་སློང་མ་རྣམས་སྨོད
9.181b
པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཤེས་བཞིན་དུ་བརྫུན་སྨྲ་ན་ལྟུང་བྱེད་དོ། །ཤེས་བཞིན་དུ་ཞེས་བྱ་བ་ནི་རྣམ་པར་དཔྱད་ནས་སོ། །བརྫུན་དུ་སྨྲ་ན་ཞེས་བྱ་བ་ལ། བརྫུན་དུ་སྨྲ་བ་རྣམ་པ་བརྒྱད་ཀྱང་ཡོད། བརྫུན་དུ་སྨྲ་བ་རྣམ་པ་བདུན་ཡང་ཡོད། བརྫུན་དུ་སྨྲ་བ་རྣམ་པ་དྲུག་ཀྱང་ཡོད། བརྫུན་དུ་སྨྲ་བ་རྣམ་པ་ལྔ་ཡང་ཡོད། བརྫུན་དུ་སྨྲ་བ་རྣམ་པ་བཞི་ཡང་ཡོད། བརྫུན་དུ་སྨྲ་བ་རྣམ་པ་གསུམ་ཡང་ཡོད། བརྫུན་དུ་སྨྲ་བ་རྣམ་པ་གཉིས་ཀྱང་ཡོད་དོ། །བརྫུན་དུ་སྨྲ་བ་རྣམ་པ་བརྒྱད་གང་ཞེ་ན། གཞི་མེད་པར་ཕས་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང ། སོ་སོར་བཤགས་པར་བྱ་བ་དང ། ཉེས་བྱས་དང ། གཞི་མེད་པར་མཐོང་བ་དང ། ཐོས་པ་དང ། དོགས་པ་སྟེ། འདི་ནི་བརྫུན་དུ་སྨྲ་བ་རྣམས་པ་བརྒྱད་ཡིན་ནོ། །བརྫུན་དུ་སྨྲ་བ་རྣམ་པ་བདུན་གང་ཞེ་ན། གཞི་མེད་པར་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། ཆོ་ག་ཉམས་པ་དང ། འཚོ་བ་ཉམས་པ་དང ། གཞི་མེད་པར་མཐོང་བ་དང ། ཐོས་པ་དང ། དོགས་པ་སྟེ། འདི་ནི་བརྫུན་དུ་སྨྲ་བ་རྣམས་པ་བདུན་ཡིན་ནོ། །བརྫུན་དུ་སྨྲ་བ་རྣམ་པ་དྲུག་གང་ཞེ་ན། དགེ་སློང་མ་རྣམས་བརྫུན་དུ་སྨྲ་བར་འདོད་པ་འདི་སྙམ་དུ་བརྫུན་དུ་སྨྲ་བར་བྱའོ་སྙམ་པ་དང ། བརྫུན་དུ་སྨྲའོ་སྙམ་པ་དང ། བརྫུན་སྨྲས་སོ་སྙམ་པ་དང ། གཞི་མེད་པར་མཐོང་བ་དང ། ཐོས་པ་དང ། དོགས་པ་སྟེ། འདི་ནི་བརྫུན་དུ་སྨྲ་བ་རྣམ་པ་དྲུག་ཡིན་ནོ། །བརྫུན་དུ་སྨྲ་བ་རྣམ་པ་ལྔ་གང་ཞེ་ན། གཞི་མེད་པར་ཕས་ཕམ་པར་འགྱུར་བ་དང ། དགེ་འདུན་ལྷག་མ་དང ། ལྟུང་བྱེད་དང །
9.182a
སོ་སོར་བཤགས་པར་བྱ་བ་དང ། ཉེས་བྱས་ཀྱིས་སྟེ། འདི་ནི་བརྫུན་དུ་སྨྲ་བ་རྣམ་པ་ལྔ་ཡིན་ནོ། །བརྫུན་དུ་སྨྲ་བ་རྣམ་པ་བཞི་གང་ཞེ་ན། གཞི་མེད་པར་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། ཆོ་ག་ཉམས་པ་དང ། འཚོ་བ་ཉམས་པ་སྟེ། འདི་ནི་བརྫུན་དུ་སྨྲ་བ་རྣམ་པ་བཞི་ཡིན་ནོ། །བརྫུན་དུ་སྨྲ་བ་རྣམ་པ་གསུམ་གང་ཞེ་ན། གཞི་མེད་པར་མཐོང་བ་དང ། ཐོས་པ་དང ། དོགས་པ་སྟེ། འདི་ནི་བརྫུན་དུ་སྨྲ་བ་རྣམ་པ་གསུམ་ཡིན་ནོ། །གཞན་ཡང་བརྫུན་དུ་སྨྲ་བ་རྣམ་པ་གསུམ་སྟེ། ་བརྫུན་སྨྲ་བར་འདོད་པ་ན་འདི་སྙམ་དུ་བདག་གིས་བརྫུན་སྨྲ་བར་བྱའོ་སྙམ་པ་དང ། སྨྲ་བ་ན་འདི་སྙམ་དུ་བདག་བརྫུན་སྨྲའོ་སྙམ་པ་དང ། བརྫུན་སྨྲས་པ་ན་འདི་སྙམ་དུ་བདག་གིས་བརྫུན་སྨྲས་སོ་སྙམ་པ་སྟེ། འདི་ནི་བརྫུན་དུ་སྨྲ་བ་རྣམ་པ་གསུམ་ཡིན་ནོ། །བརྫུན་དུ་སྨྲ་བ་རྣམ་པ་གཉིས་གང་ཞེ་ན། བརྫུན་སྨྲ་བ་ན་འདི་སྙམ་དུ་བརྫུན་སྨྲའོ་སྙམ་པ་དང ། བརྫུན་སྨྲས་པ་ན་དེ་འདི་སྙམ་དུ་བདག་གིས་བརྫུན་སྨྲས་སོ་སྙམ་པ་སྟེ། འདི་ནི་བརྫུན་དུ་སྨྲ་བ་རྣམ་པ་གཉིས་ཡིན་ནོ། །བརྫུན་དུ་སྨྲ་བ་ལ་རྣམ་པ་གཅིག་པུ་འབའ་ཤིག་ནི་མེད་དོ། །བརྫུན་དུ་སྨྲ་བ་ལས་ཕས་ཕམ་པར་འགྱུར་བ་ཡང་ཡོད། ་བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་ཡང་ཡོད། བརྫུན་དུ་སྨྲ་བ་སྦོམ་པོར་འགྱུར་བ་ཡང་ཡོད། བརྫུན་དུ་སྨྲ་བ་ལྟུང་བྱེད་དུ་འགྱུར་བ་ཡང་ཡོད། བརྫུན་དུ་སྨྲ་བ་ཉེས་བྱས་སུ་འགྱུར་བ་ཡང་ཡོད་དོ། །བརྫུན་དུ་སྨྲ་བ་ཕས་ཕམ་པར་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མས་མིའི་ཆོས་བླ་མ་མེད་བཞིན་དུ་སྨྲ་བ་སྟེ། འདི་ནི་བརྫུན་དུ་སྨྲ་བ་ཕས་ཕམ་པར་འགྱུར་བ་ཡིན་ནོ། །བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་གང་ཞེ་ན། འདི་ལྟ་སྟེ་ཡང་དགེ་སློང་མས་གཞི་མེད་པར་དགེ་སློང་མ་དག་པ་ལ་ཕས་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་པ་སྟེ། འདི་ནི་བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་ཡིན་ནོ། །བརྫུན་དུ་སྨྲ་བ་སྦོམ་པོར་འགྱུར་བ་གང་ཞེ་ན། འདི་ལྟ་སྟེ་ཡང་དགེ་སློང་མས་ཆེད་དུ་བསམས་ཏེ་དགེ་འདུན་གྱི་ནང་དུ་ཆོས་མ་ཡིན་པ་ལ་ཆོས་དང ། ཆོས་ལ་ཆོས་མ་ཡིན་པ་དང ། འདུལ་བ་མ་ཡིན་པ་ལ་འདུལ་བ་དང ། འདུལ་བ་ལ་འདུལ་བ་མ་ཡིན་པར་སྟོན་པ་སྟེ། འདི་ནི་བརྫུན་དུ
9.182b
སྨྲ་བ་སྦོམ་པོར་འགྱུར་བ་ཡིན་ནོ། །བརྫུན་དུ་སྨྲ་བ་ལྟུང་བྱེད་དུ་འགྱུར་བ་གང་ཞེ་ན། འདི་ལྟ་སྟེ་ཡང་དགེ་སློང་མ་བཅུ་གཉིས་སྡེ་རྣམས་ཀྱིས་ཤེས་བཞིན་དུ་བརྫུན་སྨྲ་བས་ཐོ་འཚམ་པར་བྱེད་པ་སྟེ། འདི་ནི་བརྫུན་དུ་སྨྲ་བ་ལྟུང་བྱེད་དུ་འགྱུར་བ་ཡིན་ནོ། །བརྫུན་དུ་སྨྲ་བ་ཉེས་བྱས་སུ་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མས་གསོ་སྦྱོང་བཅཝ་ལྔ་པ་དེ་ཉིད་ལ་སོ་སོར་ཐར་པའི་མདོ་འདོན་པས་ཅི་འདི་ན་ཡོངས་སུ་དག་གམ་ཞེས་དྲིས་པ་ན་དེ་ཡོངས་སུ་མ་དག་བཞིན་དུ་ཅང་མི་སྨྲ་བས་དང་དུ་ལེན་པ་སྟེ། འདི་ནི་བརྫུན་དུ་སྨྲ་བ་ཉེས་བྱས་སུ་འགྱུར་བ་ཡིན་ཏེ། དེ་ལ་རྣམ་པ་བཞི་མ་གཏོགས་པ་དེ་ལས་གཞན་པའི་བརྫུན་གང་ཡིན་པ་དེ་ཐམས་ཅད་དོ། །ལྟུང་བྱེད་དོ་ཞེས་བྱ་བ་ནི་དམྱལ་བ་དང ། དུད་འགྲོ་དང ། ཡི་དགས་དང ། ངན་སོང་ངན་འགྲོ་ལོག་པར་ལྟུང་བ་རྣམས་སུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་བར་སྡོམ་ནི། མ་བརྗེད་པ་དང་ཡིད་གཉིས་དང ། འདུ་ཤེས་མུ་བཞིར་སྦྱར་བའོ། །འདིས་མ་མཐོང་བ་དང ། མ་ཐོས་པ་དང ། མ་རྟོགས་པ་དང ། རྣམ་པར་མི་ཤེས་ལ། དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་ངོ་ཐོས་སོ། །རྟོགས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །མཐོང་ལ་བརྗེད་ཅིང་བདག་གིས་ཐོས་པ་དང ། རྟོགས་པ་དང ། རྣམ་པར་ཤེས་ལ་བརྗེད་ནས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ནས་འདི་སྐད་ཅེས་ངས་མཐོང་སྟེ་མ་བརྗེད་དོ། །ཐོས་རྟོགས། རྣམ་པར་ཤེས་ཏེ་མ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་ཟ་བ་དང ། བདག་གིས་མཐོང་བ་དང ། རྟོགས་པ་དང ། བདག་གིས་རྣམ་པར་ཤེས་ལ་ཡིད་གཉིས་ཟ་བ་ལས་དེས་འདུ་ཤེས་དང ། བཟོད་པ་དང ། ་འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ནས་འདི་སྐད་ཅེས་ངས་མཐོང་སྟེ་ཡིད་གཉིས་མི་ཟའོ། །ངས་རྟོགས། རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མཐོང་ལ་མ་མཐོང་བར་འདུ་ཤེས་ཤིང །
9.183a
ཐོས་རྟོགས། རྣམ་པར་ཤེས་ལ་རྣམ་པར་མ་ཤེས་པར་འདུ་ཤེས་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མ་མཐོང་ངོ ། །ཁོ་མོས་མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མ་མཐོང་མོད་ཀྱི། ཐོས་རྟོགས་རྣམ་པར་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས་ངས་མ་མཐོང་ངོ ། །མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མ་ཐོས་མོད་ཀྱི། མཐོང་རྟོགས། རྣམ་པར་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་ཐོས་ཀྱི་མ་མཐོང་ངོ ། །མ་རིག་གོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མ་རྟོགས་མོད་ཀྱི། མཐོང་ཐོས་རྣམ་པར་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཀྱི་མ་མཐོང་ངོ ། །ཐོས་སོ་རྣམ་པར་མི་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་རྣམ་པར་མ་ཤེས་མོད་ཀྱི། མཐོང་ཐོས་རྟོགས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས་ངས་རྣམ་པར་ཤེས་ཀྱི་མ་ཐོས་སོ། །མ་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་མ་བརྗེད་ཅིང་བདག་གིས་ཐོས་པ་དང ། རྟོགས་པ་དང ། རྣམ་པར་ཤེས་ལ་མ་བརྗེད་པ་ལས་དེས་འདུ་ཤེས་བསྒྱུར་ནས་ཤེས་བྱ་བ་ནས་ངས་མཐོང་སྟེ་བརྗེད་དོ། །ཁོ་མོས་ཐོས་རྟོགས། རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་ཐོས་ལ་བརྗེད་ཅིང་བདག་གིས་མཐོང་བ་དང ། རྟོགས་པ་དང ། རྣམ་པར་ཤེས་ལ་བརྗེད་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་ཐོས་ཏེ་མ་བརྗེད་དོ། །ངས་མཐོང་རྟོགས། རྣམ་པར་ཤེས་ཏེ་མ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་མ་བརྗེད་ཅིང་བདག་གིས་མཐོང་བ་དང ། ཐོས་པ་དང ། རྣམ་པར་ཤེས་ལ་མ་བརྗེད་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཏེ་བརྗེད་དོ། །ངས་མཐོང ། རྟོགས། རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ་མ་བརྗེད་ཅིང་བདག་གིས་མཐོང་བ་དང ། ཐོས་པ་དང ། རྟོགས་ལ་མ་བརྗེད་པ་ལས་དེས་འདུ་ཤེས་བསྒྱུར
9.183b
ཏེ་ཞེས་བྱ་བ་ནས། ངས་རྣམ་པར་ཤེས་ཏེ་བརྗེད་དོ། །ཁོ་མོས་མཐོང ། ཐོས། རྟོགས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་ཟ་ཞིང་བདག་གིས་ཐོས་པ་དང ། རྟོགས་པ་དང ། རྣམ་པར་ཤེས་ལ་ཡིད་གཉིས་ཟ་བ་ལས་ཞེས་བྱ་བ་ནས། ངས་མཐོང་སྟེ་ཡིད་གཉིས་མི་ཟའོ། །ཁོ་མོས་ཐོས། རྟོགས། རྣམ་པར་ཤེས་ཏེ་ཡིད་གཉིས་མི་ཟའོ། །ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་ཐོས་ལ་ཡིད་གཉིས་ཟ་ཞིང་བདག་གིས་མཐོང་བ་དང ། རྟོགས་པ་དང ། རྣམ་པར་ཤེས་ལ་ཡིད་གཉིས་ཟ་བ་ལས་ཞེས་བྱ་བ་ནས། ངས་ཐོས་ཏེ་ཡིད་གཉིས་མི་ཟའོ། །ཁོ་མོས་མཐོང ། རྟོགས་རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་ཡིད་གཉིས་ཟ་ཞིང་བདག་གིས་མཐོང་བ་དང ། ཐོས་པ་དང ། རྣམ་པར་ཤེས་ལ་ཡིད་གཉིས་ཟ་བ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཏེ་ཡིད་གཉིས་མི་ཟའོ་ཁོ་མོས་མཐོང་ཐོས་ལ། རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ་ཡིད་གཉིས་ཟ་ཞིང་བདག་གིས་མཐོང་བ་དང ། ཐོས་པ་དང ། རྟོགས་ལ་ཡིད་གཉིས་ཟ་བ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྣམ་པར་ཤེས་ཏེ་ཡིད་གཉིས་མི་ཟའོ། །ཁོ་མོས་མཐོང་ཐོས། ་རྟོགས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །དེས་མཐོང་ལ་མ་མཐོང་བར་འདུ་ཤེས་ཤིང་ཐོས་པ་དང ། རྟོགས་པ་དང ། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་མཐོང་གི་མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །དེས་ཐོས་ལ་མ་ཐོས་པར་འདུ་ཤེས་ཤིང་མཐོང་བ་དང ། རྟོགས་པ་དང ། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས་ངས་ཐོས་ཀྱིས། མ་མཐོང་ངོ ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །རྟོགས་ལ་མ་རྟོགས་པར་འདུ་ཤེས་ཤིང་མཐོང་བ་དང ། ཐོས་པ་དང ། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས། དེས་བསྒྱུར་ཏེ་ཞེས་བྱ་བ་ནས་ཁོ་མོས་རྟོགས་ཀྱི
9.184a
མཐོང་ངོ ། །མ་ཐོས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །རྣམ་པར་ཤེས་ལ་རྣམ་པར་མ་ཤེས་པར་འདུ་ཤེས་ཤིང་མཐོང་བ་དང ། ཐོས་པ་དང ། རྟོགས་པ་ལ་རྟོགས་པར་འདུ་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས་དེས་རྣམ་པར་ཤེས་ཀྱི། མ་མཐོང་ངོ ། །མ་ཐོས་སོ། །མ་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མཐོང་བར་གྱུར་ཅིང་ཐོས་པ་དང ། རྟོགས་པ་དང ། རྣམ་པར་ཤེས་པར་གྱུར་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མ་མཐོང་ངོ ། །མ་ཐོས་སོ། །མ་རིག་གོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མཐོང་བར་གྱུར་ལ་མ་བརྗེད་པ་དང ། ཐོས་པ་དང ། རྟོགས་པ་དང ། རྣམ་པར་ཤེས་ལ་མ་བརྗེད་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་བརྗེད་དོ། །ངས་ཐོས་ཏེ་བརྗེད་དོ། །ངས་རྟོགས་ཏེ་བརྗེད་དོ། །ངས་རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་མི་ཟ་ཞིང་བདག་གིས་ཐོས་པ་དང ། རྟོགས་པ་དང ། རྣམ་པར་ཤེས་ལ་ཡིད་གཉིས་མི་ཟ་བ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་ཡིད་གཉིས་ཟའོ། །ངས་ཐོས་རྟོགས། རྣམ་པར་ཤེས་ཏེ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མཐོང་ལ་མཐོང་བར་འདུ་ཤེས་ཤིང་ཐོས་པ་དང ། རྟོགས་པ་དང ། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད
9.184b
ཅེས་ངས་མཐོང་ངོ ། །མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མཐོང་མོད་ཀྱི་མ་ཐོས། མ་རྟོགས། རྣམ་པར་མ་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས་ངས་མ་མཐོང་སྟེ་འོན་ཀྱང་ཐོས་སོ། །རྟོགས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་ཐོས་མོད་ཀྱི་མ་མཐོང ། མ་རྟོགས། རྣམ་པར་མ་ཤེས་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མ་ཐོས་ཏེ་འོན་ཀྱང་མཐོང་ངོ ། །རྟོགས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་རྟོགས་མོད་ཀྱི་མ་མཐོང་བ་དང ། མ་ཐོས་པ་དང ། རྣམ་པར་མ་ཤེས་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མ་རྟོགས་ཏེ་འོན་ཀྱང་མཐོང་ངོ ། །ཐོས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་རྣམ་པར་ཤེས་མོད་ཀྱི་མ་མཐོང་མ་ཐོས། མ་རྟོགས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། འདི་སྐད་ཅེས་ངས་རྣམ་པར་མ་ཤེས་ཏེ་འོན་ཀྱང་ངས་མཐོང་ངོ ། །ངས་ཐོས་སོ། །ངས་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་མ་བརྗེད་ཅིང་བདག་གིས་ཐོས་པ་དང ། རྟོགས་པ་དང ། རྣམ་པར་ཤེས་ལ་བརྗེད་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མ་མཐོང་སྟེ། འོན་ཀྱང་ཐོས་སོ། །རྟོགས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་མ་བརྗེད། བདག་གིས་ཐོས་ལ་མ་བརྗེད། བདག་གིས་རྟོགས་ལ་མ་བརྗེད། བདག་གིས་རྣམ་པར་ཤེས་ལ་མ་བརྗེད་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་བརྗེད་དོ། །ངས་ཐོས་ཏེ་བརྗེད་དོ། །ངས་རྟོགས་ཏེ་བརྗེད་དོ། །ངས་རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་མ་བརྗེད། བདག་གིས་མཐོང་ལ་མ་བརྗེད། བདག་གིས་ཐོས་ལ་མ་བརྗེད།
9.185a
བདག་གིས་རྟོགས་ལ་མ་བརྗེད། བདག་གིས་རྣམ་པར་ཤེས་ལ་མ་བརྗེད་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་རྟོགས་ཏེ་བརྗེད་དོ། །ངས་མཐོང་ཏེ་བརྗེད་དོ། །ངས་ཐོས་ཏེ་བརྗེད་དོ། །ངས་རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ་མ་བརྗེད། བདག་གིས་མཐོང་ལ་མ་བརྗེད། བདག་གིས་ཐོས་ལ་མ་བརྗེད། བདག་གིས་རྟོགས་ལ་མ་བརྗེད་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ། འདི་སྐད་ཅེས་ངས་རྣམ་པར་ཤེས་ཏེ་བརྗེད་དོ། །ངས་མཐོང་སྟེ་བརྗེད་དོ། །ངས་ཐོས་ཏེ་བརྗེད་དོ། །ངས་རྟོགས་ཏེ་བརྗེད་དོ། །ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་མི་ཟ། བདག་གིས་ཐོས་ལ་ཡིད་གཉིས་མི་ཟ། བདག་གིས་རྟོགས་ལ་ཡིད་གཉིས་མི་ཟ། བདག་གིས་རྣམ་པར་ཤེས་ལ་ཡིད་གཉིས་མི་ཟ་བ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་ཡིད་གཉིས་མི་ཟའོ། །ངས་ཐོས་ཏེ་ཡིད་གཉིས་མི་ཟའོ། །ངས་རྟོགས་ཏེ་ཡིད་གཉིས་མི་ཟའོ། །ངས་རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་ཐོས་ལ་ཡིད་གཉིས་མི་ཟ། བདག་གིས་མཐོང་ལ་ཡིད་གཉིས་མི་ཟ། བདག་གིས་རྟོགས་ལ་ཡིད་གཉིས་མི་ཟ། བདག་གིས་རྣམ་པར་ཤེས་ལ་ཡིད་གཉིས་མི་ཟ་བ་ལས་དེས་འདུ་ཤེས་དང ། ་བཟོད་པ་དང ། འདོད་པ་དང་བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་ཐོས་ཏེ་ཡིད་གཉིས་མི་ཟའོ། །ངས་མཐོང་སྟེ་ཡིད་གཉིས་མི་ཟའོ། །ངས་རྟོགས་ཏེ་ཡིད་གཉིས་མི་ཟའོ། །ངས་རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་ཡིད་གཉིས་མི་ཟ། བདག་གིས་མཐོང་ལ་ཡིད་གཉིས་མི་ཟ། བདག་གིས་ཐོས་ལ་ཡིད་གཉིས་མི་ཟ། བདག་གིས་རྣམ་པར་ཤེས་ལ་ཡིད་གཉིས་མི་ཟ་བ་ལས་དེས་བསྒྱུར་ཏེ་ཞེས་བྱ་བ་ནས་ངས་རྟོགས་ཏེ་ཡིད་གཉིས་མི་ཟའོ། །ངས་མཐོང ། ཐོས་རྣམ་པར་ཤེས་ཏེ་ཡིད་གཉིས
9.185b
ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས། རྣམ་པར་ཤེས་ལ་ཡིད་གཉིས་མི་ཟ་ཞིང་མཐོང་བ་དང ། ཐོས་པ་དང ། རྟོགས་ལ་ཡིད་གཉིས་མི་ཟ་བ་ལས་དེས་ཞེས་བྱ་བ་ནས། ངས་རྣམ་པར་ཤེས་ཏེ་ཡིད་གཉིས་ཟའོ། །ངས་མཐོང་ཐོས་རིག་སྟེ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མ་མཐོང་ལ་མ་མཐོང་བར་འདུ་ཤེས་ཤིང་ཐོས་པ་དང ། རྟོགས་པ་དང ། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས་དེས་བསྒྱུར་ཏེ་ཞེས་བྱ་བ་ནས་ངས་མཐོང་གི། མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མ་ཐོས་ལ་ཐོས་པར་འདུ་ཤེས་ཤིང་མཐོང་བ་དང ། རྟོགས་པ་དང ། རྣམ་པར་ཤེས་པར་འདུ་ཤེས་པ་ལས་ངས་ཐོས་ཀྱི་མ་མཐོང་ངོ ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མ་རྟོགས་པ་ལ་རྟོགས་པར་འདུ་ཤེས་ཤིང་མཐོང་བ་ལ་མཐོང་བར་འདུ་ཤེས། ཐོས་པ་ལ་ཐོས་པར་འདུ་ཤེས་རྣམ་པར་ཤེས་པ་ལ་རྣམ་པར་ཤེས་པར་འདུ་ཤེས་པ་ལས་དེས་བསྒྱུར་ཏེ་ཞེས་བྱ་བ་ནས། ངས་རྟོགས་ཀྱི་མ་མཐོང་ངོ ། །མ་ཐོས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །རྣམ་པར་ཤེས་ལ་རྣམ་པར་ཤེས་པར་འདུ་ཤེས་ཤིང་བདག་གིས་མཐོང་བ་དང ། བདག་གིས་ཐོས་པ་དང ། བདག་གིས་རྟོགས་པ་ལས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོགས་པ་དང ། ལྟ་བ་བསྒྱུར་ཏེ་འདི་སྐད་ཅེས་ངས་རྣམ་པར་ཤེས་ཀྱི། མ་མཐོང་ངོ ། །མ་ཐོས་སོ། །མ་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །ལྟུང་བྱེད་དང་པོ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་ཀྱིས་འདི་སྐད་ཅེས་ཞར་མ། ཐེང་མོ། ་སྒུར་མོ། མིའུ་ཐུང་མོ། མཆུ་འཕྱངས་མོ། མགོ་མོ་ཆེ། ལག་ཞ་མོ་ཞེས་བུད་མེད་ཀྱིས་སྐྱོན་ནས་འདྲུ་ཞིང་སྨྲ་བའི་ཀུན་ཏུ་སྤྱོད་པས་ཀུན་དུ་སྤྱོད་པར་བྱེད་པ་ན། དེ་རྣམས་དེ་ལྟར་བུད་མེད་ཀྱི་སྐྱོན་ནས་འདྲུ་ཞིང་སྨྲ་བའི་ཀུན་ཏུ་སྤྱོད་པས་སྡུག་བསྔལ་ཞིང་ཡིད་མི་བདེ་བ་མང་བར་གྱུར་ཏེ། ལུང་མནོད་པ་དང ། བཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱེད
9.186a
པ་གཏོང་ཞིང་ཆོས་འདུལ་བ་འདི་ལ་ཆོས་དང་ལྡན་པའི་སྣུམ་བག་ཉུང་ངུ་དག་བྱུང་བ་ཡང་བར་ཆད་དུ་གྱུར་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་སྔོན་བྱུང་བ་ལྗོངས་ཤིག་ན་ཁྱིམ་བདག་ཞིང་པ་ཞིག་ཡོད་པའི་དྲུང་དུ་ཁྱེའུ་ཞིག་འོངས་ཏེ་ཞེས་བྱ་བ་ནས། དེས་དེའི་སེམས་མགུ་བར་བྱས་སོ་ཞེས་བྱ་བའི་བར་རོ། །དེས་ཁྱེའུ་དེ་ལ་བུ་མོ་བྱིན་ནོ་ཞེས་བྱ་བ་ནས། ཞིང་པ་དེས་ཆུང་མའི་ཚིག་མཉན་ནས་ཡང་མ་བྱིན་ནོ་ཞེས་བྱ་བའི་བར་རོ། །དེས་དེའི་གླང་དེ་དག་བརྡེགས་པ་ལས་གླང་དེ་གཉིས་ཀྱིས་ཁྱེའུ་དེ་ལ་དྲིས་པ་དང ། དེས་ཀྱང་སྨྲས་སོ། །དེ་ན་དེ་དག་ལས་གླང་གཉིས་ཤིག་གིས་རྒྱལ་པོའི་ཕོ་བྲང་དུ་སོང་ཤིག་དང ། ཁོ་བོ་ཅག་གིས་དབང་བྱའོ་ཞེས་སྨྲས་སོ་ཞེས་བྱ་བ་ནས། དེས་ཡང་དང་ཡང་དུ་རཝ་ཆག་མཇུག་རྡུམ། ཞར་བ་ཞེས་ཀུན་དུ་སྨྲས་པ་གཅིག་ཅིག་ཡོད་པ་དེ་ལ་མ་བཏུབ་བོ་ཞེས་བྱ་བའི་བར་དང་རྒྱལ་པོ་འཁོར་དང་བཅས་པའི་ཞེས་བྱ་བ་ནས། ་མོན་སྲན་གྲེའུའི་ཞིང་ཕུན་སུམ་ཚོགས་པ་ལ་ཉི་མ་བདུན་དུ་མ་གཟན་པར་སྐྱེ་ཡང་ཅུང་ཟད་ཀྱང་མ་ཟོས་སོ་ཞེས་བྱ་བའི་བར་རོ། །དགེ་སློང་མ་དག་རེ་ཤིག་དུད་འགྲོའི་སྐྱེ་གནས་སུ་སོང་བའི་སྲོག་ཆགས་དེ་དག་ཀྱང་མིའི་སྐྱོན་ནས་སྨྲ་བས་ཀུན་དུ་སྤྱོད་པ་ན་གནོད་པར་བྱ་བར་སེམས་པར་བྱེད་ན་མིར་གྱུར་པ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ནས། སྔོན་གྱི་སྦྱོར་བ་འདི་རྒྱས་པར་བརྗོད་པར་བྱའོ། །ཡང་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་སྔོན་བྱུང་བ་འདས་པ་ན་ཤིང་རྟས་སྤྱོད་པའི་མི་ཞིག་ལ་དགའ་བྱེད་མ་དང ། ས་རི་མོ་ཞེས་བྱ་བའི་བ་བཞོན་གཉིས་ཤིག་ཡོད་པ་ལས་ཞེས་བྱ་བ་ནས། བེའུ་གཉིས་ཡོད་པའི་བར་རོ། །དེ་གཉིས་འཐབས་པ་ལས་གཅིག་གི་རཝ་ནི་ཆག་པར་གྱུར་ཏོ། །གཅིག་ཤོས་ནི་གདེངས་བར་གྱུར་ནས་དེས་རུ་རྡུམ་དང ། རུ་འདེལ་ཞེས་བྱ་བའི་བར་རོ། །ཤིང་རྟ་སྤྱོད་པས་འདྲེན་པ་ན་ཞེས་བྱ་བ་ནས་སྐུགས་ཡལ་ལོ་ཞེས་བྱ་བའི་བར་རོ། །
9.186b
དགའ་བྱེད་དང ། ས་རི་ཞེས་སྨྲས་ནས་ཞེས་བྱ་བ་ནས། ཉིས་འགྱུར་ཐོབ་བོ་ཞེས་བྱ་བའི་བར་དང ། ཚིགས་སུ་བཅད་པས་སྨྲས་པ། གང་ཚེ་ལམ་ནི་ཆེས་དམའ་ལ། །གང་ཚེ་ཁལ་ནི་ཆེས་ལྕི་བ། །དེ་ཚེ་ཁལ་དག་ཁྱེར་བྱེད་ཅིང ། །དེ་ཚེ་སྣ་ལ་འདྲེན་པར་བྱེད། །ཡིད་དུ་འོང་བ་སྨྲས་པ་ན། །ཁུར་ལྕི་བ་ཡང་སྒྲོལ་བར་བྱེད། །ཅེས་བྱ་བའི་བར་དུའོ། །དུད་འགྲོའི་སྐྱེས་གནས་སུ་སོང་བའི་སྲོག་ཆགས་དག་ཀྱང་མིའི་སྐྱོན་ནས་སྨྲས་པ་ན་གནོད་པར་བྱ་བར་སེམས་པར་བྱེད་ན་མིར་གྱུར་པ་ལྟ་སྨོས་ཀྱང་ཅི་དགོས། དགེ་སློང་མ་དག་དེ་ལྟ་བས་ནས་བུད་མེད་ཀྱི་སྐྱོན་ནས་སྨྲ་ན་ལྟུང་བྱེད་དོ། །བུད་མེད་ཀྱི་སྐྱོན་ནས་སྨྲ་བའི་བསམ་པ་ཅན་གྱི་ངག་དང ། །ཚིག་དང ། ཐ་སྙད་དང ། བརྗོད་པ་དང ། སྐད་དང ། ངེས་པའི་ཚིག་དང ། ཚིག་གི་ལམ་དང ། ཚིག་གི་སྒྲ་དང ། རྗོད་བྱེད་དང ། རྗོད་པའི་ལས་དང་ངག་གི་རྣམ་པར་རིག་བྱེད་གང་ཡིན་པ་དག་གོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་་བར་སྡོམ་ནི། རིགས་དང་བཟོ་དང་ལས་དང་ནི། །རྟགས་ནས་ལྟུང་བ་སྡེ་ལྔ་དང ། །ཉེ་བའི་ཉོན་མོངས་རྣམས་དང་ནི། །སྤྱོ་བར་བྱེད་པ་ཐ་མ་ཡིན། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་འཕགས་མ་ཁྱོད་ནི་བྲམ་ཟེ་མོ་ལས་རབ་ཏུ་བྱུང་བ་ཡིན་ན་དགེ་སྦྱོང་གི་ཚུལ་གྱིས་ནི་ཅི་ཞིག་བྱ། ཚངས་པའི་ཚུལ་གྱིས་ནི་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང ། མ་གྱུར་ཀྱང་རུང་ཞེས་བྱ་བ་ནས། ལྟུང་བྱེད་དུ་འགྱུར་རོ་ཞེས་བྱ་བའི་བར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཁྱོད་ནི་རྒྱལ་རིགས་མོ་ལས་རབ་ཏུ་བྱུང་བ་ཡིན་ན་ཁྱོད་ལ་དགེ་སྦྱོང་གི་ཚུལ་ལམ་ཚངས་པའི་ཚུལ་གྱིས་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་རྗེའུ་རིགས་མོ་ལས་རབ་ཏུ་བྱུང་བ་ཡིན་ན། ཁྱོད་ལ་དགེ་སྦྱོང་གི་ཚུལ་ལམ། བྲམ་ཟེའི་ཚུལ་གྱིས་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་དམངས་རིགས་མོ་ལས་རབ་ཏུ་བྱུང་བ་ཡིན་ན། དགེ་སྦྱོང་གི་ཚུལ་ལམ། ཚངས
9.187a
པའི་ཚུལ་གྱིས་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་ཏེ། འདི་ནི་རིགས་ཤེས་བྱ་བ་ཡིན་ནོ། །དེ་ལ་བཟོ་ལས་བརྗོད་པ་ནི། ་་་་་་་་བར་སྡོམ་ལ། བྲམ་ཟེའི་རིགས་དང་རྒྱལ་རིགས་དང ། །རྗེའུ་རིགས་དམང་རིགས་བཟོ་དག་དང ། །ཐ་ག་པ་དང་སྐུད་རིས་མཁན། །བཟང་མཁན་མགར་བ་ལྕགས་མགར་དང ། །ལྷམ་མཁན་རྫ་མཁན་འདྲེག་མཁན་དང ། །ཤིང་མཁན་སྨིག་མཁན་བྲན་རིགས་སོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ་བྲམ་ཟེ་རྣམས་ཀྱི་སྤྱོད་ཚུལ་དང ། སྤྱོད་པ་དང ། གཙང་སྦྲ་དང ། ་ཀུན་ཏུ་སྤྱོད་པ་དང ། ཐལ་བ་བླང་བ་དང ། བྱ་མ་བུམ་བླང་བ་དང ། ས་བླང་བ་དང ། རབ་བསྔགས་བྱ་བ་དང ། ཀྱེ་ཞེས་བྱ་བ་དང ། རྒྱལ་བར་གྱུར་ཅིག་ཅེས་བྱ་བ་དང ། ཀུན་ཏུ་བཟླས་བརྗོད་དང ། བཟླས་བརྗོད་དང ། དུས་ཀྱི་བསྙེན་པ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུག་པ་དང ། ཀློག་པ་དང ། ཀློག་ཏུ་འཇུག་པ་དང ། སྦྱིན་པ་དང ། ལེན་པ་ཁོ་ན་བསླབ་དགོས་ཏེ། ལས་དྲུག་ལ་བརྩོན་པའི་བྲམ་ཟེ་མོ་ནི་ཚངས་པ་ཡིན་ནོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང ། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཁྱོད་ནི་རྒྱལ་རིགས་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ། བྲོ་དང་གླུ་དང ། པི་བང་དང ། པི་བང་རྒྱུད་གཅིག་པ་དང ། བ་བྷིས་ཀེ་ཞེས་བྱ་བ་དང ། མ་ནི་ཀ་པྲེ་བ་ནེ་ཞེས་བྱ་བ་དང ། དྲི་བཏག་པ་དང ། ་མགོའི་བྱི་དོར་དང ། གོས་བལྟབ་པ་དང ། བྱི་དོར་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང ། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་རྗེའུ་རིགས་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ་ཡི་གེ་དང ། རྩིས་དང ། གྲངས་དང ། ལག་རྩིས་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་རུང ། མ་གྱུར་ཀྱང་རུང་ལྟུང་བྱེད་དུ
9.187b
འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་དམང་རིགས་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ་འདྲུ་བ་དང ། འཐག་པ་དང ། རྟུན་དང ། རྟུན་ཤིང་དང་ཞེས་བྱ་བ་ནས། སེལ་བ་དང ། རྨེལ་བ་དང ། འཁལ་བའི་བར་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས། ཁྱོད་ནི་ཐ་ག་མ་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ་དར་དང ། རས་ཡུག་ཆེན་དང ། གོས་དང ། མོན་དར་དག་བསླབས་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་སྐུད་རིས་མཁན་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་འདི་ལྟ་སྟེ་ཀླམ་དང ། པར་ཏང་དང ། རྒྱབ་རྟེན་དང ། གོར་ཆེན་ནང་ཚངས་ཅན་དང ། ཞཝ་དྲུབ་པ་དང ། ལྒི་ཏོ་དག་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དེ་བཞིན་དུ་བཟང་མཁན་ལས་རབ་ཏུ་བྱུང་བ་ལ་བུས་པའི་གོས་དང ། ཞཝ་དང ། ་ཡན་ལག་ལྔ་ཁེབས་པ་དང ། འཐབ་བེར་དག་ཅེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་མགར་བ་ལས་རབ་ཏུ་བྱུང་བ་ལ་ལྷུང་བཟེད་དང ། ལྷུང་བཟེད་ཆུང་ངུ་དང ། ་མཚོན་ཆ་དང ། ཁབ་དང ། གསོར་བུ་དང ། ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ལྕགས་མགར་ལས་རབ་ཏུ་བྱུང་བ་ལ་ཞུགས་གླིང་དང ། གྲུ་གྲུ་དང ། ཕོར་བུ་དང ། ཁ་གཟར་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ལྷམ་མཁན་ལས་རབ་ཏུ་བྱུང་བ་ལ་ལྷམ་དང ། ལྷམ་ཡུ་ཆད་དང ། མཆིལ་ལྷམ་དང ། སྲབ་དང ། སྒ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་རྫ་མཁན་ལས་རབ་ཏུ་བྱུང་བ་ལ་རྫ་མ་དང ། རིལ་བ་དང ། བྱ་བོ་དང ། ཁམ་པོར་དང ། ལྷུང་བཟེད་དང ། ལྷུང་བཟེད་ཆུང་ངུ་དག་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་འདྲེག་མཁན་ལས་རབ་ཏུ
9.188a
བྱུང་བ་ལ་ཁ་སྤུ་བྲེག་པ་དང ། བྱིན་སྤུ་བྲེག་པ་དང ། སེན་མོ་བྲེག་པ་དང ། སྐྲ་བྲེག་པ་དང ། ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཤིང་མཁན་ལས་རབ་ཏུ་བྱུང་བ་ལ་ཁྲི་དང ། ཁྲིའུ་དང ། མལ་ཁྲི་དང ། འདུག་ཁྲི་དང ། སྒོ་ཆ་དང ། སྒོ་འཕར་དང་ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་སྨིག་མ་མཁན་ལས་རབ་ཏུ་བྱུང་བ་ལ་གདུགས་དང ། བསིལ་ཡབ་དང ། དིར་དང ། སྐོན་བུ་དང ། དུད་གཟེབ་དང ། སྤ་ཁྲིའུ་དང ། ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དགེ་སློང་མས་དགེ་སློང་མའི་དྲུང་དུ་སོང་ནས་འདི་སྐད་ཅེས་ཁྱོད་ནི་བྲན་མོ་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། བསྐུ་མཉེ་དང ། ཁྲུས་དང ། དྲིལ་ཕྱི་དང ། བང་ཆེན་དུ་འགྲོ་བ་དང ། འོང་བ་དང ། མངག་གཞུག་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་ཏེ། འདི་ནི་བཟོ་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་ནས་འདི་སྐད་ཅེས་ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་འདི་ལྟ་སྟེ་བླུགས་གཟར་དང ། ཟངས་བུ་དང ། སྦྱིན་སྲེག་དང ། ཡམ་སྲེག་ཤིང་དང ། རྩཝ་དང ། མེ་དང ། བའི་ལྕི་བ་དག་གི་ལས་བྱ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་ནས་འདི་སྐད་ཅེས། ཁྱོད་རྒྱལ་རིགས་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། པི་བང་དང ། པི་བང་རྒྱུད་གཅིག་པ་དང ། ་བབ་བྷི་ས་ཀེའི་ལས་བྱ་དགོས་སོ་ཞེས་སྨྲས་ན། དགེ་སློང་མ་སྤ་གོང
9.188b
བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ཡི་གེ་དང ། ་རྩིས་དང ། ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་སེལ་བ་དང ། རྨེལ་བ་དང ། འཁལ་བ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཐ་ག་པ་ལས་རབ་ཏུ་བྱུང་བ་ལ་ཞེས་བྱ་བ་ནས། འདི་ལྟ་སྟེ། ཐགས་བཟང་དང ། སོན་མ་དང ། དྲུ་བུ་དང ། སྣས་དང ། སྣས་གྲི་དང ། སྐུད་པ་དང ། འབྲས་ཐུག་ཏུ་གཞུག་པ་དང ། བརྒྱང་ཐག་གི་ལས་བྱ་དགོས་སོ་ཞེས་སྨྲས་ན་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་སྐུད་རིས་མཁན་ལས་རབ་ཏུ་བྱུང་བ་ལ་རྒྱང་ཤིང་དང ། ཐགས་བཟངས་དང ། སྤུན་གྱི་སྨྱིག་མ་དང ། སོ་མངས་དང་ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་བཟང་མཁན་ལས་རབ་ཏུ་བྱུང་བ་ལ་དྲ་གྲི་དང ། ཁབ་དང ། ་ལྕིབ་མོ་དང ། འཐེབ་ལྕིབ་དང ། ཞེས་བྱ་བ་ནས། ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་མགར་བ་ལས་རབ་ཏུ་བྱུང་བ་ལ་སྦུད་རུ་དང ། སོ་མལ་དང ། གྲི་དང ། ཐེའུ་དང ། ་ཐོ་ཆེན་དང ། སྦུད་པ་དང ། སྐམ་པ་དང་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་རྫ་མཁན་ལས་རབ་ཏུ་བྱུང་བ་ལ་འཁོར་ལོ་དང ། དབྱུག་གུ་དང ། འཁོར་ལོའི་རྟེན་མ་དང ། གཞག་པ་དང ། དྲ་བའི་ཐེ་གུ་དང ། ཆུ་སྣོད་དང་ཞེས་བྱ་བ་ནས། ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་འདྲེག་མཁན་ལས་རབ་ཏུ་བྱུང་བ་ལ་ཆན་པ་དང ། སྤུ་གྲི་དང ། སྨད་ཚེར་དང ། སེན་མོ་བྲེག་པ་དང ། གདར་དང་ཞེས་བྱ་བ་ནས། ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་ཤིང་མཁན་ལས་རབ་ཏུ་བྱུང་བ་ལ་སྟེའུ་དང ། གཞི་དང ། ་གཟོང་དང །
9.189a
སྟ་རེ་དང ། སོག་ལེ་དང ། སོག་ཆུང་དང ། གསོར་བུ་དང་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་སྨྱུག་མཁན་ལས་རབ་ཏུ་བྱུང་བ་ལ་སྨྱུག་མ་དང ། ་སྐུད་པ་དང ། གཤེག་གྲི་དང ། ཚོན་རྩི་དང ། ལྷང་ཚེར་དང་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་བྲན་མོའི་རིགས་ལས་རབ་ཏུ་བྱུང་བ་ལ་ཐག་པ་དང ། བུམ་པ་དང ། འབྲུ་མར་དང ། བསྐུ་མཉེ་དང ། ཁྲུས་དང་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་ཏེ། འདི་ནི་ལས་ཤེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས། ཐེང་མོ་ཞེས་སྨྲས་ན་ལྟུང་བྱེད་དོ། །སྒུར་མོ་དང ། མི་ཐུང་མོ་དང ། རྐང་ཞ་མོ་དང ། ལྦ་བ་ཅན་མོ་དང ། ལྐུག་མ་དང ། ཐེང་མོ་དང ། འོན་མ་དང ། རྟེན་འཕྱེ་མོ་དང ། རྐང་བམ་མོ་ཞེས་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་ཏེ། འདི་ནི་རྟགས་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས། མཛེ་ཅན་མ་ཞེས་སྨྲས་ན་ལྟུང་བྱེད་དོ། །ཤུ་བ་དང ། འབྲུམ་བུ་ཕྲ་མོ་དང ། ངལ་རྐྱེན་པ་དང ། གཡའ་བ་དང ། ཁྱི་རྔོ་དང ། གཡན་པ་དང་ཤུ་ཆག་བ་གཡའ་བ་དང ། རྐང་ཤུ་དང ། སྐྱིགས་བུ་དང ། སྐྱུག་བྲོ་བ་དང ། རིམས་དང ། ཁོང་སྐེམ་དང ། ་ལུ་བ་དང ། དབུག་མི་བདེ་བ་དང ། ཁ་སྐམ་པ་དང ། བརྗེད་བྱེད་དང ། བཀྲེས་ངབ་དང ། སྐྱ་རྦབ་ཆག་དང ། སྐྲན་དང ། ཁྲག་ནད་དང ། མཁྲིས་ནད་དང ། མཚན་པར་རྡོལ་མ་ཞེས་དེ་ལ་སོགས་པ་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་ཏེ། འདི་ནི་ནད་ལས་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་ཕས་ཕམ་པར་འགྱུར་བ་དང ། དགེ་འདུན་ལྷག་མ་ཅན་ཡིན་ནོ་ཞེས་སྨྲས་ན་ལྟུང་བྱེད་དོ། །སོ་སོར་བཤགས་པ་དང ། ཉེས་བྱས་ཅན་ཡིན་ནོ་ཞེས་སྨྲས་ན་ཐམས་ཅད་དུ་གཞི་ཇི་ལྟ་བ་བཞིན་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྲོ་བ་དང ། ཁོན་དུ་འཛིན་པ་དང ། འཆབ་པ་དང ། འཚིག་པ་དང ། ཕྲག་དོག་དང ། སེར་སྣ་དང ། གཡོ་དང ། སྒྱུ་མཁན་མ་ཞེས་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་ཏེ། འདི་ནི་ཉེ་བའི་ཉོན་མོངས་པ་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ། སྤྱོ་བ་ན་རྒྱ་ཞེས་བྱ་བ་དང །
9.189b
མངལ་ཞེས་བྱ་བ་དང ། བོང་བུ་དང་ལྡན་པ་དག་གིས་སྤྱོས་པ་ན་དགེ་སློང་མ་སྤ་གོང་པ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་མང་པོ་ཞིག་མིང་འཐུན་ན་ལྟུང་བ་མེད་དོ། །དེ་ལ་ཡང་དམིགས་ཀྱིས་བསལ་བ་མེད་པར་མི་བརྗོད་ཀྱི་རྒྱུའི་ཆེད་ཀྱིས་མིང་ནས་བརྗོད་པར་བྱའོ། །ལས་དང་པོ་ལ་སོགས་པ་ལ་ནི་ལྟུང་བ་མེད་དོ། །ལྟུང་བྱེད་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་ཕྲ་མས་ཀུན་དུ་སྤྱོད་པར་བྱེད་དེ། ཚུ་བི་ལས་ཐོས་ནས་ཕ་བི་དག་ལ་རྗོད་པར་བྱེད། ཕ་བི་ལས་ཐོས་ནས་ཚུ་བི་དག་ལ་བརྗོད་པར་བྱེད་པ་ན་དེ་དག་ཕྱེ་སྟེ་ཕྱོགས་གཉིས་སུ་གྱུར་པས་ཕན་ཚུན་སྡུག་བསྔལ་ཞིང་ཡིད་མི་བདེ་བ་སྐྱེས་ལ། ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱ་བ་དང ། ནང་གི་སེམས་ཀྱིས་ཞི་གནས་ཀྱང་སྟོང་བར་བྱེད་ཅིང་གནས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་ཁྱོད་གཅིག་ལ་གཅིག་ཕྲ་མས་ཀུན་དུ་སྤྱོད་པར་མ་བྱེད་ཅིག་།དེ་ཅིའི་ཕྱིར་ཞེ་ན། དགེ་སློང་མ་དག་སྔོན་བྱུང་བ་ན་ནགས་ཚང་ཚིང་ཞིག་ན་སེང་གེ་མོ་སྦྲུམ་མ་ཞིག་ཡོད་དེ། དེ་རྣམས་ཀྱི་རང་བཞིན་ནི་བདག་གི་ཕྲུག་གུས་ནུ་མ་ཟ་བ་འམ། ལྟོགས་པར་གྱུར་ན་མི་རུང་ངོ་ཞེས་དེ་ཉིད་ཁ་ཟས་སུ་བྱ་བའི་ཕྱིར་ཤ་ཁོ་ནའི་ཚོགས་བྱས་ཏེ་འབྲེང་བར་བྱེད་དོ་ཞེས་བྱ་བ་ནས་བ་ཞིག་བསད་དེ་འབྲངས་སོ། །བ་དེ་ལ་ཡང་བེའུ་ཞིག་ཡོད་པ་སེང་གེ་མོ་དེ་ཉིད་ཀྱི་ནུ་མ་ལ་འཐུང་ངོ་ཞེས་བྱ་བའི་བར་དུའོ། །ཇི་ཙམ་ན་གཉིས་ཀ་ཆེན་པོར་གྱུར་ནས་དེ་ཡང་འཆི་བའི་དུས་ཀྱི་ཚེ་ཞེས་བྱ་བ་ནས། མཛའ་བ་འབྱེད་པ་ནི་མང་དུ་ཡོད་དོ་ཞེས་ཡང་དག་པར་གཏམས་ནས་ཞེས་བྱ་བའི་བར་རོ། །ཝ་ཞིག་གིས་གཉིས་ཀ་ཕྱེ་ནས་ཞེས་བྱ་བ་ནས། དེ་གཉིས་ཀྱང་གཅིག
9.190a
གིས་གཅིག་སྲོག་དང་ཕྲལ་ལོ་ཞེས་བྱ་བའི་བར་རོ། །ཇི་ཙམ་ན་ལྷས་ཚིགས་སུ་བཅད་དེ་སྨྲས་པ། སྐྱེ་བོ་སྡིག་ཅན་འགྲོགས་པ་ལས། །མི་ཡིས་བཟང་པོ་མཐོང་མི་འགྱུར། །སེང་གེ་ཁྱུ་མཆོག་མཛའ་བ་ལས། །ཝ་ཡིས་ཐ་དད་ཕྱེ་ལ་ལྟོས། །དགེ་སློང་མ་དག་རེ་ཤིག་དུད་འགྲོའི་སྐྱེ་གནས་སུ་སོང་བའི་སྲོག་ཆགས་དེ་དག་ཀྱང་ཕྲ་མས་ཀུན་དུ་སྤྱད་པ་ན་ཇི་ཙམ་ན་གཅིག་ལ་གཅིག་བསོད་པར་བྱེད་ན་བུད་མེད་ལྷག་པར་ཁྲོ་བ་ལྟ་སྨོས་ཀྱང་ཅི་དགོས་ཤེས་སྔོན་གྱི་སྦྱོར་བ་འདི་རྒྱས་པར་བརྗོད་པར་བྱའོ། །གཞན་ཡང་སྔོན་གྱི་སྦྱོར་བ་ནི་དགེ་སློང་མ་དག་སྔོན་བྱུང་བ་སེང་གེ་ཕྲུ་གུ་བཙས་ནས་རིང་པོ་མ་ལོན་པ་ཞིག་མ་སྤྱོད་ཡུལ་དུ་སོང་བ་དང་ལྟོགས་ཤིང་འཕྱན་པ་ན། དེ་དང་ཧ་ཅང་ཡང་མི་རིང་བ་ཞིག་ན་སྟག་མོ་ཞིག་འབྲངས་སོ། །དེ་འཕྱན་པ་ན་སྟག་མོ་ཞིག་དང་ཕྲད་ནས་ནུ་མ་བསྣུན་པར་བརྩམས་སོ་ཞེས་བྱ་བ་ནས། གནས་གཅིག་ཏུ་འཁོད་དོ་ཞེས་བྱ་བའི་བར་རོ། །དེ་ལ་ཡང་སེང་གེའི་མིང་ནི་མཆེ་བཟངས་ཞེས་བྱའོ། །སྟག་གི་མིང་ནི་དཔུངས་བཟངས་ཞེས་བྱའོ་ཞེས་བྱ་བ་ནས། དེ་གཉིས་ལ་ཡང་ཝ་ཞིག་གིས་དབྱེན་བྱ་བར་བརྩམས་སོ་ཞེས་བྱ་བའི་བར་རོ། །ཇི་ཙམ་ན་སེང་གེས་ཚིགས་སུ་བཅད་དེ་སྨྲས་པ། ཆུ་ཞེང་ཕུན་སུམ་ཚོགས་པ་དང ། །རྩལ་དང་ཤུགས་དང་ལྡན་པ་ཡི། །མཆེ་བཟངས་ལ་ནི་རྒོལ་བྱེད་པ། །དཔུང་བཟངས་དེ་ནི་ལེགས་པ་མིན། །དཔུངས་བཟངས་ཀྱིས་སྨྲས་པ། ཆུ་ཞེང་ཕུན་སུམ་ཚོགས་པ་དང ། །རྩལ་དང་ཤུགས་སུ་ལྡན་པ་ཡི། །དཔུང་བཟངས་ལ་ནི་རྒོལ་བྱེད་པ། །མཆེ་བཟངས་དེ་ནི་ལེགས་པ་མིན། །དེ་གཉིས་ཀྱིས་གཅིག་ལ་གཅིག་དྲིས་ནས་ཞེས་བྱ་བ་ནས་ཝ་བསད་དོ་ཞེས་བྱ་བའི་བར་རོ། །ཇི་ཙམ་ན་ལྷས་ཚིགས་སུ་བཅད་དེ་སྨྲས་པ། གཞན་གྱི་ཚིག་གིས་གྲོགས་པོ་མི་སྤང་སྟེ། །གཞན་གྱིས་སྨྲས་པ་དག་ནི་བརྟག་པར་བྱ། །དབྱེ་བར་འདོད་པ་རྣམས་ནི་གླགས་ཚོལ་བྱེད། །དེ་བས་སྐྱེ་བོ་ཕྲ་མ་ཡིད་མ་རྟོན། །གྲོགས་པོ་འབྱེད་པའི་ཕྲ་མ་ཅན། །བརྫུན་དུ་སྨྲ་བའི་ཝ་སྐྱེས་པོ། །གྲོང་རྒྱུན
9.190b
སྐྱེས་ཏེ་རོ་འདི་ནི། །བསད་ནས་བདེ་བས་དགའ་བར་བྱེད། །དགེ་སློང་མ་དག་རེ་ཤིག་དུད་འགྲོའི་སྐྱེ་གནས་སུ་སོང་བའི་སྲོག་ཆགས་དེ་དག་ཀྱང་གཅིག་ལ་གཅིག་ཕྲ་མས་ཀུན་ཏུ་སྤྱད་པ་ན། སྡུག་བསྔལ་དང་ཡིད་མི་བདེ་བ་མང་པོ་གནས་པར་བྱེད་ན། བུད་མེད་ལྷག་པར་ཁྲོ་བ་ལྟ་སྨོས་ཀྱང་ཅི་དགོས། དགེ་སློང་མ་དག་དེ་ལྟ་བས་ན་ཕྲ་མས་ཀུན་དུ་སྤྱད་པར་མི་བྱའོ། །ཀུན་དུ་སྤྱོད་ན་ལྟུང་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་ཕྲ་མ་སྨྲས་ན་ལྟུང་བྱེད་དོ། །ཕྲ་མའི་བསམ་པ་ཅན་གྱི་གང་ཞེས་བྱ་བ་ནས་ངག་དང ། ཚིག་དང་ཞེས་བྱ་བའི་བར་སྔ་མ་བཞིན་ནོ། །ལྟུང་བྱེད་དོ་ཞེས་བྱ་བ་ནི་ལྟུང་བར་བྱེད་ཅེས་བྱ་བའི་བར་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་བྲམ་ཟེ་ལས་རབ་ཏུ་བྱུང་བའི་དྲུང་དུ་སོང་སྟེ་འདི་སྐད་ཅེས་འཕགས་མ་ཁྱོད་ལ་དགེ་སློང་མ་ཆེ་གེ་མོ་ཞིག་འདི་སྐད་ཅེས་ཁྱོད་ལ་དགེ་སྦྱོང་གི་ཚུལ་དང ། ཚངས་པའི་ཚུལ་གྱིས་ཅི་ཞིག་བྱ། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་ནོ་ཞེས་ཟེར་རོ། །ཞེས་སྨྲ་ཞིང་རིགས་སྒྲོགས་པར་བྱེད་ན་ཉེས་བྱས་སོ། །རུས་སྒྲོགས་པར་བྱེད་ན་ཡང་ཉེས་བྱས་སོ། །དེ་བཞིན་དུ་རྒྱལ་རིགས་ལས་རབ་ཏུ་བྱུང་བ་ཞེས་བྱ་བ་ནས། ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་ཏེ། འདི་ནི་རིགས་ཤེས་བྱ་བ་ཡིན་ནོ། །དགེ་སློང་མས་བྲམ་ཟེ་ལས་རབ་ཏུ་བྱུང་བའི་དྲུང་དུ་སོང་སྟེ་འདི་སྐད་ཅེས་འཕགས་མ་ཁྱོད་ལ་དགེ་སློང་མ་ཆེ་གེ་མོ་ཞིག་འདི་སྐད་ཅེས་ཁྱོད་ལ་དགེ་སྦྱོང་གི་ཚུལ་དང ། ་ཚངས་པའི་ཚུལ་གྱིས་ཅི་ཞིག་བྱ། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས་ཁྱོད་ནི་རང་གི་གཞུང་ལུགས་ལ་བསླབ་དགོས་སོ་ཞེས་ཟེར་རོ་ཞེས་སྨྲ་ཞིང་བཟོ་སྒྲོགས་པར་བྱེད་ན་ཉེས་བྱས་སོ། །དེ་བཞིན་དུ་རྒྱལ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ཉེས་བྱས་སོ་ཞེས་བྱ་བའི་བར་རོ། །
9.191a
དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་སྟེ། དེ་ལྟར་བར་སྡོམ་དེ་ཇི་ལྟར་གོང་དུ་བཤད་པ་བཞིན་དུ་རྒྱས་པར་བརྗོད་པར་བྱའོ། །དེ་ལ་སྐུད་རིས་མཁན་དང་བཟང་མཁན་དང ། །ལྕགས་མགར་དང་ནི་ལྷམ་མཁན་དང ། །རྫ་མཁན་འདྲེག་མཁན་ཤིང་མཁན་དང ། །སྨིག་མ་མཁན་དང་བྲན་མོའོ། །འདི་ནི་བཟོ་ཞེས་བྱ་བ་ཡིན་ནོ། །དགེ་སློང་མས་བྲམ་ཟེ་ལས་རབ་ཏུ་བྱུང་བའི་དགེ་སློང་མའི་དྲུང་དུ་སོང་སྟེ་འདི་སྐད་ཅེས། འཕགས་མ་ཁྱོད་ལ་དགེ་སློང་མ་ཆེ་གེ་མོ་ཞིག་འདི་སྐད་ཅེས་ཁྱོད་ལ་དགེ་སྦྱོང་གི་ཚུལ་དང ། ཚངས་པའི་ཚུལ་གྱི་ཅི་ཞིག་བྱ། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་ཀྱི་ལས་བྱ་དགོས་སོ་ཞེས་ཟེར་རོ་ཞེས་སྨྲ་ཤིང ། ལས་སྒྲོགས་པར་བྱེད་ན་ཉེས་བྱས་སོ། །དེ་བཞིན་དུ་རྒྱལ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་ཏེ། ཇི་ལྟར་གོང་དུ་བཤད་པ་བཞིན་བར་སྡོམ་དེ་རྒྱས་པར་བྱའོ། །རིགས་དང་བཟོ་དང་ལས་དང་ནི། །རྟགས་དང་ནད་ནི་ལྔ་པ་ཡིན། །ལྟུང་བ་དང་ནི་ཉེ་ཉོན་མོངས། །སྤྱོ་བར་བྱེད་པ་ཐ་མ་ཡིན། །ལྟུང་བྱེད་གསུམ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱི་རྩོད་པ་ཉེ་བར་ཞི་བར་བྱས་པ་རྣམས་རྩོད་པ་འདི་ནི་ཤད་ཀྱིས་མ་བྱང་སྟེ། ཡང་ཤད་ཀྱིས་སྦྱངས་པར་བྱའོ། །རྩོད་པ་འདི་ནི་ངེས་པར་མ་བརྟགས་ཏེ་ཡང་ངེས་པར་བརྟག་པར་བྱའོ། །རྩོད་པ་འདི་ནི་ལེགས་པར་གཏན་ལ་མ་ཕབ་སྟེ་ཡང་ལེགས་པར་གཏན་ལ་དབབ་པར་བྱའོ། །རྩོད་པ་འདི་ནི་ཉེ་བར་ཞི་བར་བྱས་སྟེ་ཡང་ཉེ་བར་ཞི་བར་བྱའོ་ཞེས་ཡང་དང་ཡང་དུ་སྐྱོ་སྔོག་བྱེད་དོ་དེ་ནས་དགེ་སློང་མ་དེ་རྣམས་ཐབ་མོ་དང ། མཚང་འབྲུ་བ
9.191b
དང ། རྩོད་པ་བྱུང་ཞིང་མཚང་འདྲུ་བར་གྱུར་པས་གནས་ཤིང་ལུང་མནོན་པ་དང ། ཀློག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱེད་པ་དང ། ནང་གི་སེམས་ཀྱི་ཞི་གནས་གཏོང་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་འཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་སོ། །ཆོས་བཞིན་དུ་ཞེས་བྱ་བ་ནི་འདུལ་བ་ཇི་ལྟ་བ་བཞིན་དང་སྟོན་པའི་བསྟན་པ་ཇི་ལྟ་བཞིན་དུའོ། །རྩོད་པ་ཞེས་བྱ་བ་ནི་རྩོད་པ་བཞི་པོ་འཐབ་པའི་ཕྱིར་རྩོད་པ་དང ། མི་གདམས་པའི་ཕྱིར་རྩོད་པ་དང ། ལྟུང་བའི་ཕྱིར་རྩོད་པ་དང ། བྱ་བའི་ཕྱིར་རྩོད་པའོ། །ཆོས་བཞིན་དུ་སྦྱངས་པ་ལས་ཞེས་བྱ་བ་ནི་གསོལ་བ་དང ། བཞིའི་ལས་ཀྱིས་སོ། །ཡང་ལས་ཀྱི་སྐྱོ་སྔོགས་བྱེད་ན་ཞེས་བྱ་བ་ནི་ཡང་བྱེད་འདོད་པའི་ཕྱིར་རོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་འཐབ་པའི་ཕྱིར་རྩོད་པ་ལ་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །དགེ་སློང་མས་ཤད་ཀྱིས་བྱང་བ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་འཐབ་པའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་འཐབ་པའི་ཕྱིར
9.192a
རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་མི་གདམས་པའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཤད་ཀྱིས་བྱང་བ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་མི་གདམས་པའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །མི་གདམས་པའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་ལྟུང་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་ལྟུང་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ།[་་]།ཡིད་གཉིས་ཟ་ན་ལྟུང་བྱེད་དོ། དགེ་སློང་མས་ལྟུང་བའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན
9.192b
ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་བྱ་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་བྱ་བའི་ཕྱིར་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མ་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་བྱ་བའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མ་ནི་ལྔ་སྟེ། ལྔ་གང་ཞེ་ན། དགེ་སློང་མ་གཉུག་མར་གནས་པ་དང ། ལས་བྱེད་པ་དང ། འདུན་པ་འབུལ་བ་དང ། ལྟ་བ་སྨྲ་བ་དང ། ལྔ་པ་ནི་གློ་བུར་དུ་འོངས་པའོ། །དགེ་སློང་མ་གཉུག་མར་གནས་པ་གང་ཞེ་ན། གང་གིས་རྩོད་པ་དེའི་ཐོག་མ་དང ། བར་དང ། ཐ་མ་དག་ཤེས་པའོ། །ལས་བྱེད་པ་གང་ཞེ་ན། གང་གིས་དེར་ལས་བྱས་པར་གྱུར་བའོ། །འདུན་པ་འབུལ་བ་གང་ཞེ་ན། གང་གིས་དེར་རང་གིས་འདུན་པ་འབུལ་བར་གྱུར་བའོ། །ལྟ་བ་སྨྲ་བ་གང་ཞེ་ན། གང་གིས་དེར་འདི་ནི་བདག་བཟོད་དོ། །འདི་མི་བཟོད་དོ། །འདི་ནི་བདག་འདོད་དོ། །འདི་ནི་བདག་མི་འདོད་དོ་ཞེས་རང་གི་ལྟ་བ་བརྗོད་པར་གྱུར་པའོ། །གློ་བུར་དུ་འོངས་པ་གང་ཞེ་ན། དེར་གང་གིས་ཐོག་མ་དང ། བར་དང ། ཐ་མ་དག་མི་ཤེས་པའོ། །དང་པོའི་གསུམ་པོ་གང་ཡིན་པ་གཉུག་མར་གནས་པ་དང ། ལས་བྱེད་པ་དང །
9.193a
འདུན་པ་འབུལ་བ་སྟེ། འདི་དག་གིས་ཆོས་བཞིན་དུ་རྩོད་པ་སྦྱངས་པ་ལས་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཐ་མ་གཉིས་ཀྱི་སྐྱོ་སྔོགས་བྱེད་ན་ཉེས་བྱས་སོ། །གལ་ཏེ་ཤད་ཀྱིས་ཉེས་པར་སྦྱངས་པ་ཡིན་ན་ལྟུང་བ་མེད་དོ། ་ལྟུང་བྱེད་བཞི་པ་རྫོགས་སྷོ།། ་་་་་་་་་་་་་་་།། དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་དྲུག་པ། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ཁྱིམ་བདག་གི་ཁྱིམ་དེ་དང་དེ་རྣམས་སུ་བསོད་སྙོམས་ཀྱི་ཕྱིར་ཞུགས་ཏེ་བྲམ་ཟེ་དང ། ཁྱིམ་བདག་དེ་དག་ལ་གཅིག་པུ་འདུག་ཅིང་ཆོས་སྟོན་པ་ན་དེས་བུད་མེད་རྣམས་ཀྱི་བུད་མེད་ཀྱི་གསང་བ་དང ། བུད་མེད་ཀྱི་གསང་ཆེན་གང་ཡིན་པ་ཐམས་ཅད་སྐྱེས་པ་དེ་དག་ལ་བསྟན་ཏོ། །སྐྱེས་པ་དེ་དག་གིས་ཀྱང་ཆུང་མ་དེ་དག་ལ་སྨྲས་སོ། །བུད་མེད་ནི་ཕྲག་དོག་ཅན་ཡིན་པས་དེ་ནས་དགེ་སློང་མ་གནས་བརྟན་གནས་བརྟན་དག་བསོད་སྙོམས་ལ་རྒྱུ་བ་ན་འཇིག་རྟེན་ལ་ཅོ་འདྲི་བར་བྱེད་པ་ཁྱོད་ཅག་ལ་སུ་ཞིག་བསོད་སྙོམས་སྦྱིན་པ་བྱེད་པར་སེམས་པར་འགྱུར་ཞེས་ཁ་ཟེར་བ་དང ། ེ་མའོ་ཕུ་ནུ་མོ་དག་འདི་ཅི་ཉེན་གཤེ་བར་གྱུར། དེ་དག་གིས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོས་བདག་ཅག་ཁྱིམ་ཐབ་དག་གི་མདུན་དུ་ཅོ་དྲིས་སོ། །དེ་རྣམས་ཀྱིས་བསོད་སྙོམས་མ་རྙེད་པ་ན་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགོངས་པ་ཉེས་དམིགས་གང་ཅུང་ཟད་ཅི་བྱུང་བ་དེ་ཐམས་ཅད་ནི་ཆོས་བསྟན་པ་ལས་གྱུར་གྱིས་དེ་ལྟ་བས་ན་ཆོས་བསྟན་པར་མི་བྱའོ། །དེ་དག་ཡང་བསོད་སྙོམས་ཀྱི་ཕྱིར་ཞུགས་པ་ན་བྲམ་ཟེ་དང ། ཁྱིམ་བདག་རྣམས་ཀྱིས་སྨྲས་པ། འཕགས་མ་དག་ཆོས་ཤོད་ཅིག་།དེ་རྣམས་ཀྱིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀག་གོ། །བྲམ་ཟེ་དང ། ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །བདག་ཅག་གི་སྡུམ་པའི
9.193b
བསོད་སྙོམས་ཀྱང་དགག་ལགས་མོད། དེ་རྣམས་ཡང་བསོད་སྙོམས་ཀྱིས་ཕོངས་པར་གྱུར་པ་ནས། བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཚིགས་ལྔ་པའི་ཆོས་བསྟན་པར་བྱའོ། །བཅོམ་ལྡན་འདས་ཀྱི་ཚིག་ལྔའི་ཆོས་བསྟན་པར་བཀའ་སྩལ་པ་ན་དེ་རྣམས་ཀྱིས་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གཟུགས་ནི་མི་རྟག་གོ། །ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ནི་མི་རྟག་གོ་ཞེས་བྱ་བའོ། །གང་གི་ཚེ་དེ་རྣམས་ཀྱིས་ཚིག་ལྔའི་ཆོས་བསྟན་པར་བརྩམས་པ་དང ། དེ་ནས་བྲམ་ཟེ་དང ། ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་དག་ཅིའི་སླད་དུ་ཁྱེད་ཀྱིས་ཆོས་མང་དུ་མི་བཤད། ཁྱིམ་བདག་བཅོམ་ལྡན་འདས་ཀྱིས་དེ་ཙམ་ཞིག་བཅའ་བ་མཛད་དོ། །འཕགས་མ་དག་ཅི་ཁྱེད་སྤྲིག་ཀའི་རིན་གྱི་ཆོས་ཤིག་བསྟན་པར་རྩོམ་མམ། དེ་ནས་བྲམ་ཟེ་དང ། ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །ཇི་ལྟར་བདག་ཅག་ལ་ཆོས་ཉུང་ངུ་བསྟན་པ་དེ་ལྟར་བདག་གིས་བསོད་སྙོམས་ཀྱང་ཉུང་ངུ་འབུལ་ལོ། །དེ་ལྟར་བསོད་སྙོམས་ཀྱིས་ཕོངས་པར་གྱུར་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཚིག་དྲུག་གི་ཆོས་བསྟན་པར་བྱའོ་ཞེས་བཅོམ་ལྡན་འདས་ཀྱིས་བཀའ་སྩལ་པ་ན་དེ་རྣམས་ཀྱིས་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་།མིག་ནི་མི་རྟག་གོ། །ཁྱིམ་བདག་རྣ་བ་དང ། སྣ་དང་ལྕེ་དང ། ལུས་དང ། ཡིད་ནི་མི་རྟག་གོ་ཞེས་བྱ་བའོ། །གང་གི་ཚེ་དགེ་སློང་མ་དེ་རྣམས་ཀྱིས་ཚིག་དྲུག་གི་ཆོས་བསྟན་པར་བརྩམས་པ་དང ། དེ་ནས་བཅུ་གཉིས་སྡེ་དེ་རྣམས་ཀྱིས་འདི་སྐད་ཅེས་སྨྲས་སོ། །ཚིགས་ལྔ་གང་ཡིན་པ་དེ་དྲུག་པར་བྱས་འདོད་ཅིག་།ཚིག་དྲུག་པས་ཆང་ནི་མ་འཐུངས་སྒོག་སྐྱ་ནི་མ་ཟོས་ན་ཉེས་པ་ཅི་ཡོད། དེ་བཞིན་དུ་ཆེད་དུ་བསམས་ཏེ་ཚིག་དྲུག་བྱས་པ་ལ་ཚིག
9.194a
བདུན་པར་འདས་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང་བཅོམ་ལྡན་འདས་ཀྱིས་བཀའ་སྩལ་པ་མི་བསྟན་ཏོ་ཞེས་བྱ་བ་ནས་བསོད་སྙོམས་ཀྱིས་ཕོངས་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྐྱེས་པ་ལ་བུད་མེད་དང་བཤད་པར་བྱའོ་ཞེས་བྱ་བའི་བར་རོ། །བཅུ་གཉིས་སྡེ་དེ་རྣམས་བསོད་སྙོམས་ལ་རྒྱུ་བ་ན་ཁྱིམ་བདག་གི་ཁྱིམ་དེ་དག་ཏུ་ཁྱིམ་བདག་རྣམས་ལ་འདི་སྐད་ཅེས་སྨྲས་སོ། །ཁྱིམ་བདག་ཆོས་ཉོན་ཅིག་།འཕགས་མ་རེ་ཤིག་བུད་མེད་དག་གྲོགས་སུ་དགུག་གིས་གཞེས་ཤིག་།བཅུ་གཉིས་སྡེ་དེ་དག་གིས་འདི་སྐད་ཅེས་སྨྲས་སོ། །བྱ་གག་མོ་འམ། སྤྲ་མོ་འམ། ལུག་མ་མོ་འམ། བྱི་ལ་མོ་འདི་དག་མོ་མ་ཡིན་ནམ། ཞེས་དེ་རྣམས་ཀྱིས་རུང་བར་བྱེད་པ་འདིས་སྐྱེས་པ་རྣམས་ལ་ཆོས་སྟོན་པར་བྱེད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ནས་སྤྱོད་ཡུལ་དུ་ཞུགས་ཏེ། དེ་ཁྱིམ་བདག་གི་ཁྱིམ་དེ་དག་ཏུ་བསོད་སྙོམས་ཀྱི་ཕྱིར་ཞུགས་པ་དང ། དེ་ནས་ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་ཆོས་བཤད་དུ་གསོལ། སོང་ལ་བུད་མེད་དག་གྲོགས་སུ་ཁྲིད་དེ་ཤོག་ཤིག་།ཁྱིམ་བདག་དེས་ཡང་འདི་སྐད་ཅེས་སྨྲས་སོ། །བྱ་གག་མོ་འདི་མོ་མ་ལགས་སམ། དེ་ནས་སྐྱེ་དགུའི་བདག་མོ་གཽ་ཏ་མཱིས་ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱེད་ལ་དེ་ལྟ་བུའི་ཆོས་སྟོན་པ་དེ་སུ་ཡིན། དེ་དག་གིས་འདི་སྐད་ཅེས་སྨྲས་སོ། །བཅུ་གཉིས་སྡེ་དག་གོ། །དེ་འདི་སྐད་ཅེས་དེས་ན་ཁོ་མོ་ཅག་ལ་ཡང་གནས་སྐབས་འདི་བྱུང་ངོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པ་ནས་ཞེས་བྱ་བ་ནས། བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ ། ་ཡང་དགེ་སློང་མ་གང་བུད་མེད་མེད་པར་སྐྱེས་པའི་མདུན་དུ་ཚིག་ལྔ་འམ། དྲུག་གི་ཆོས་སྟོན་ན་རིགས་པའི་བུད་མེད་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཚིག་ལྔ་ཞེས་བྱ་བ་ནི་གཟུགས་ལ་སོགས་པའོ། །ཚིག་དྲུག་གི་ཞེས་བྱ་བ
9.194b
ནི་མིག་ལ་སོགས་པའོ། །རིགས་པའི་བུད་མེད་མ་གཏོགས་ཏེ་ཞེས་བྱ་བ་ནི་རིག་པའི་བུད་མེད་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་ཆེད་དུ་བསམས་ཏེ་སྐྱེས་པ་ལ་ཚིགས་ལྔའི་ཆོས་སྟོན་པ་ན་ཚིག་དྲུག་པར་ཐལ་བར་བྱེད་ན་ལྟུང་བྱེད་དོ། །དེ་བཞིན་དུ་སྟེང་གི་སར་བཤད་ནས་ཞེས་བྱ་བ་ནས། ཁྱིམ་དུ་ཞེས་བྱ་བའི་བར་ཏེ་ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་ཆེད་དུ་བསམས་ཏེ་ཚིག་དྲུག་གི་ཆོས་སྟོན་པ་ནི་ཚིག་བདུན་པར་ཐལ་བར་བྱེད་ན་ལྟུང་བྱེད་དོ། །གལ་ཏེ་དྲི་བ་དྲི་ན་ལྟུང་བ་མེད་དོ། །ལས་དང་པོ་པ་ལ་སོགས་པ་ལ་ལྟུང་བ་མེད་དོ། །ལྟུང་བྱེད་ལྔ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་བསྙེན་པར་མ་རྫོགས་པའི་བུད་མེད་དང ། སྐྱེས་པ་དང ། ཁྱེའུ་དང ། བུ་མོ་ལས་སྩོགས་པ་ལ་ཁ་བསྟམས་ཏེ་ཆོས་འདོན་དུ་འཇུག་གོ། །དེ་ནས་དབྱར་ཁང་དེ་ན་དཔེར་ན་རྩིས་ས་ན་རྩིས་ཀྱི་སློབ་དཔོན་རྣམས་ཀྱིས་བཞིན་དུ་སྒྲ་མཐོན་པོ་དང ། སྒྲ་ཆེན་པོ་བྱུང་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གང་ཟག་བསྙེན་པར་མ་རྫོགས་པ་རྣམས་ལ་ཁ་བསྟམས་ཏེ་ཆོས་འདོན་དུ་འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །གང་ཟག་བསྙེན་པར་མ་རྫོགས་པ་ཞེས་བྱ་བ་ལ། བསྙེན་པར་རྫོགས་པ་ནི་གཉིས་ཏེ། དགེ་སློང་དང ། དགེ་སློང་མའོ། །ལྷག་མ་རྣམས་ནི་བསྙེན་པར་མ་རྫོགས་པའོ། །ཁ་བསྟམས་ཏེ་ཞེས་བྱ་བ་ནི་ཚིག་མཉམ་པ་དང ། ཚིག་ལྷག་པ་དང ། ཡི་གེ་མཉམ་པ་དང ། ཡི་གེ་ལྷག་པར་རོ། །དེ་ལ་ཚིག་མཉམ་པ་ཞེས་བྱ་བ་ནི་ཇི་སྲིད་དུ་སྡིག་པ་ཐམས་ཅད་མི་བྱ་སྟེ་ཞེས་སྨྲ་བ་དེ་སྲིད་དུ་དེ་ཡང་སྡིག་པ་ཐམས་ཅད་མི་བྱ་སྟེ་ཞེས་སྨྲ་བ་སྟེ། འདི་ནི་ཚིག་མཉམ་པ་ཞེས་བྱའོ། །ཚིག་ལྷག་པ་ཞེས་བྱ་བ་ནི་ཇི་སྲིད་དུ་སྡིག་པ་ཐམས་ཅད་མི་བྱ་སྟེ་ཞེས་མ་སྨྲས་པ་དེ་སྲིད་དུ་དེ
9.195a
དགེ་བ་ཕུན་སུམ་ཚོགས་པར་བྱའོ་ཞེས་སྨྲ་བ་སྟེ། འདི་ནི་ཚིག་ལྷག་པ་ཞེས་བྱའོ། །ཡི་གེ་མཉམ་པ་ཞེས་བྱ་བ་ནི་ཇི་སྲིད་དུ་ཨ་ཞེས་སྨྲས་པ་དེ་སྲིད་དུ་དེ་ཡང་ཨ་ཞེས་སྨྲ་བ་སྟེ། འདི་ནི་ཡི་གེ་མཉམ་པ་ཞེས་བྱའོ། །ཡི་གེ་ལྷག་པ་ཞེས་བྱ་བ་ནི་ཇི་སྲིད་དུ་ཨ་ཞེས་མ་སྨྲས་པ་དེ་སྲིད་དུ་དེ་ཡང་ཨ་ཞེས་སྨྲ་བའོ། །ཆོས་འདོན་དུ་འཇུག་ན་ཞེས་བྱ་བ་ནི་སངས་རྒྱས་ཀྱིས་གསུངས་པ་འམ། ཉན་ཐོས་ཀྱིས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གང་ཟག་བསྙེན་པར་མ་རྫོགས་པ་ལ་ཁ་བསྟམས་ཏེ་ཆོས་འདོན་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ལྡབ་ལྡིབ་ཅན་དང ། སྨྲ་མྱུར་བ་དང ། དྲན་པར་བྱ་བ་དང ། འདྲི་བ་གསོལ་བ་ལ་སྦྱིན་པ་ལ་ལྟུང་བ་མེད་དོ། །ལྟུང་བྱེད་དྲུག་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །ཉོན་མོངས་པ་རྣམས་མ་སྤངས་པའི་ཕྱིར་དང ། མི་ཤེས་པའི་ཕྱིར་ལྟུང་བ་དག་འབྱུང་ཞིང་སྔོན་གྱི་ལྟུང་བ་དག་འཆགས་པར་བྱེད་པས་དེ་རྣམས་བཀུར་སྟི་བྱ་བ་སྤྱོད་དེ། དེ་རྣམས་ནང་པར་སྔར་ལངས་ཤིང་སངས་རྒྱས་དང ། ཆོས་དང ། དགེ་འདུན་ལ་བསྙེན་བཀུར་བྱེད། ཆག་ཆག་དང ། ཕྱག་དར་དང ། ཕྱི་བདར་བྱེད་དོ། །བཅུ་གཉིས་སྡེ་དེ་དག་ནི་སེམས་ལས་ཆུང་ངུར་འདུག་ཅིང་འཁོད་དོ། །དེར་ཡང་ཁྱིམ་བདག་ལྷགས་ཏེ་དེ་རྣམས་ཀྱིས་དེ་དག་མཐོང་ནས་འདི་སྙམ་དུ་དགེ་སློང་མ་རྒན་མོ་འདི་དག་ནི་རིན་པོ་ཆེ་ཤེས་ཤིང་རིན་པོ་ཆེ་གསོག་པར་བྱེད་དོ། །བཅུ་གཉིས་སྡེ་འདི་དག་ནི་རིན་པོ་ཆེ་མི་ཤེས་ཤིང་རིན་པོ་ཆེ། སོགས་པར་མི་བྱེད་དོ་སྙམ་སེམས་སོ། །དེ་ནས་བཅུ་གཉིས་སྡེ་དག་གིས་ཁྱིམ་བདག་ལས་ཐོས་ནས་འདི་སྐད་ཅེས་སྨྲས་སོ། །ཁྱོད་འདི་ལྟ་བུ་རིན་པོ་ཆེ་སོགས་ཤིག་།དེ་དག་གིས་འདི་སྐད་ཅེས་སྨྲས་སོ། །ཅིའི་ཕྱིར་འདི་དག་སངས་རྒྱས་དང ། ཆོས་དང ། དགེ་འདུན་ལ་སོགས་པ་ལ་མཆོད་པའི་དོན་དུ་བརྩོན་པར་བྱེད། དེ་དག་གིས་འདི་སྐད་ཅེས་སྨྲས་སོ། །ལྟུང་བ་འདི་དང་འདི་དག
9.195b
བྱུང་ངོ ། །དེ་དག་གིས་ཐོས་ནས་གང་ལ་རྒན་མོ་རྣམས་ཀྱང་འདི་འདྲ་བའི་གནས་སྐབས་སུ་གྱུར་ན་གཞོན་ནུ་མ་རྣམས་ལ་ཇི་ལྟ་ཇི་ལྟ་བུ་ཞིག་ཏུ་འགྱུར། ཞེས་ཡིད་ལ་གཅགས་པར་གྱུར་ཏོ། །བཅུ་གཉིས་སྡེ་དག་གིས་དོན་དེ་རྟོགས་པར་བྱས་ནས་དེ་དག་གིས་དགེ་ཚུལ་གཞོན་ནུ་མ་རྣམས་ལ་དྲིས་པ། ཁྱེད་ཀྱི་མཁན་མོ་དང ། སློབ་དཔོན་དག་ཅི་བྱེད། དེ་རྣམས་ཀྱིས་འདི་སྐད་ཅེས་སྨྲས་སོ། །བསོད་ནམས་བགྱིད་དོ། །དེ་ནས་བཅུ་གཉིས་སྡེ་དེ་དག་གིས་འདི་སྐད་ཅེས་སྨྲས་སོ། །ཁྱེད་བསོད་ནམས་འདི་འདྲ་བ་བྱོས་ཤིག་།དགེ་ཚུལ་མ་དེ་རྣམས་ཀྱིས་འདི་སྐད་ཅེས་སྨྲས་སོ། །དེ་ཅི་ལགས། དེ་ནས་བཅུ་གཉིས་སྡེ་དེ་དག་གིས་དེ་དག་གི་དགེ་ཚུལ་མ་རྣམས་ལ་འདི་སྐད་ཅེས་སྨྲས་སོ། །ཅི་ཁྱོད་ཀྱི་སྙིང་ལམ་ན་ཁྱེད་ཀྱི་མཁན་མོ་དང ། སློབ་དཔོན་འདི་དག་འདི་ལ་ཆོས་བཟང་ངོ་ཞེས་སངས་རྒྱས་དང ། ཆོས་དང ། དགེ་འདུན་ལ་སོགས་པ་ལ་བསྙེན་བཀུར་བྱེད་སྙམ་འམ། དེ་ལྟ་མོད་ཀྱི་ལྟུང་བ་འདི་དང་འདི་དག་བྱུང་ངོ ། །གང་གི་ཚེ་དགེ་སློང་མ་དེ་དག་ལྟུང་བ་དེ་ལས་ལངས་པར་གྱུར་པ་དེའི་ཚེ་དེ་དག་གིས་དགེ་ཚུལ་གཞོན་ནུ་མ་དེ་དག་ལ་དགེ་ཚུལ་མ་དག་ལས་དག་གྱིས་ཤིག་ཅེས་བསྒོ་བ་ན། དེ་དག་གིས་སྨྲས་པ། ཁྱེད་ཅག་ཅིའི་ཕྱིར་མི་མཛད། གནས་བརྟན་མོ་དེ་དག་གིས་འདི་སྐད་ཅེས་སྨྲས་སོ། །ཁོ་མོ་ཅག་གིས་མི་རུང་ངོ ། །དགེ་ཚུལ་མ་རྣམས་ཀྱིས་ཡང་འདི་སྐད་ཅེས་སྨྲས་སོ། །ཁ་ཅིག་རུང་ན་ཁ་ཅིག་མི་རུང་ངམ། དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །ཁྱེད་ལ་སུས་སྨྲས། དེ་དག་གིས་འདི་སྐད་ཅེས་བཅུ་གཉིས་སྡེ་དག་གིས་སོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། བརྗོད་པར་མི་བྱའོ་ཞེས་དེ་ལྟར་དགག་པ་མཛད་དོ། །དེ་ནས་དགེ་སློང་མ་དྲང་མོ་ཞེས་བྱ་བ་ཅི་ནས་ཀྱང་སྐྱེ་བོའི་ཚོགས་ཆེན་པོ་མ་དད་པ
9.196a
རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་དུ་སོ་སོར་གོ་བར་བྱེད་པའི་དགེ་སློང་མ་བསྐོ་བར་བྱའོ། །བཅོམ་ལྡན་འདས་ཀྱིས་བཀའ་སྩལ་པ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཆོས་ལྔ་དང་ལྡན་པ་ཁྱིམ་དུ་སོ་སོར་གོ་བར་བྱེད་པ་བསྐོ་བར་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་པས་མི་འགྲོ་བ་དང ། སོ་སོར་གོ་བར་བྱ་བ་དང ། ་སོ་སོར་གོ་བར་མ་བྱས་པའི་ཁྱིམ་ཤེས་པའོ། །བསྐོ་བ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་དྲང་མོ་འདི་གང་གིས་ན་སྐྱེ་བོའི་ཚོགས་ཆེན་པོ་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད་དེ། མིང་འདི་ཞེས་བགྱི་བ་འདི་ཁྱིམ་རྣམས་སུ་སོ་སོར་གོ་བར་བགྱིད་པར་སྤྲོ་ན་གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། ་མིང་འདི་ཞེས་བགྱི་བ་གང་ལགས་པ་འདི་དགེ་སློང་མ་དྲང་མོའི་སླད་དུ་ཁྱིམ་དུ་སོ་སོར་གོ་བར་བགྱིད་པར་བསྐོ་བར་བགྱི་སྟེ། མིང་འདི་ཞེས་བགྱི་བ་གང་ལགས་པས་དགེ་སློང་མ་དྲང་མོའི་སླད་དུ་ཁྱིམ་རྣམས་སུ་ཕུ་ནུ་མོ་དག་ཁྱེད་ཅག་དགེ་སློང་མ་དྲང་མོ་ས་བོན་ཚིག་པ་ལྟ་བུ། ས་བོན་ཉམས་པ་ལྟ་བུ་འདིས་བསྟན་པ་ལ་ཚོད་མ་འཛིན་ཅིག་།འཕགས་མ་སྐྱེ་དགུའི་བདག་མོ་ཆེན་པོས་བསྟན་པའི་ཚད་ཟུང་ཤིག་།གཽ་ཏ་མའི་སྐེམ་མོ་དང ། ུཏྤ་ལའི་མདོག་དང ། ཆོས་སྦྱིན་དང ། འཕགས་མ་ཚུལ་ལྡན་གྱིས་ཚད་ཟུང་ཤིག་།ཅེས་སོ་སོར་གོ་བར་བགྱིད་པར་འགྱུར་རོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་ཞེས་བྱ་བ་ནས། འཕགས་མའི་དགེ་འདུན་གྱིས་བཟོད་ཅིང་གནང་ནས་འདི་ལྟར་ཅང་མི་གསུངས་པས་དེ་
9.196b
དེ་བཞིན་དུ་འཛིན་ཏོ་ཞེས་བྱ་བའི་བར་རོ། །དེ་ནས་དགེ་སློང་མ་དྲང་མོས་ཁྱོད་ཀྱི་ཕྱིར་ཁྱིམ་དུ་སོ་སོར་གོ་བར་བྱེད་པའི་དགེ་སློང་མ་སྤྲོ་བར་བྱས་སོ་ཞེས་ཐོས་སོ། །ཐོས་ནས་ཀྱང་དགེ་སློང་མ་དྲང་མོ་ཁྱིམ་དུ་སོ་སོ་གོ་བར་བྱེད་པའི་དགེ་སློང་མ་གང་ན་བ་དེར་སོང་སྟེ་ཕྱིན་ནས་དགེ་སློང་མ་དེ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་དགེ་འདུན་གྱིས་ཁོ་མོའི་ཕྱིར་ཁྱིམ་དུ་སོ་སོར་གོ་བར་བྱེད་པར་བསྐོས་སམ། དེས་འདི་སྐད་ཅེས་སྨྲས་སོ། །དེ་ཡིན་ནོ། །ཕུ་ནུ་མོ་ཁྱོད་ཀྱིས་ཁོ་མོ་འདི་ལྟར་ཁྱིམ་རྣམས་སུ་མ་དད་པ་མང་དུ་བྱས་པ་ཡིད་ཆེས་སམ། དེས་འདི་སྐད་ཅེས་སྨྲས་སོ། །ཡིད་ཆེས་སོ། །དྲང་མོས་འདི་སྐད་ཅེས་སྨྲས་སོ། །ཇི་ལྟར་གཅིག་ལ་ཡིད་ཆེས་པ་ལྟར་གཅིག་ཤོས་ལ་ཡང་དེ་དང་འདྲ་བས་ཁོ་མོས་ཁྱོད་ཀྱིས་ལྟོ་དྲལ་ལ་རྒྱུ་མས་དབྱར་ཁང་འཁོར་བར་བསྐོར་རོ། །དེ་ནས་དགེ་སློང་མ་དེ་སྐྲག་ནས་སྐབས་དེ་དགེ་སློང་མའི་དགེ་འདུན་ལ་རྒྱས་པར་སྨྲས་སོ། །དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་གསོལ་བ་འབའ་ཤིག་པ་བྱའོ། །བཅོམ་ལྡན་འདས་ཀྱིས་གསོལ་བ་འབའ་ཤིག་པ་བྱའོ་ཞེས་བཀའ་སྩལ་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམ་པ་བྱས་ནས་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་དྲང་མོ་འདི་ཅི་ནས་ཀྱང་སྐྱེ་བོའི་ཚོགས་ཆེན་པོ་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད་དེ། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། གསོལ་བ་འབའ་ཤིག་བགྱིས་ནས་དགེ་སློང་མ་དྲང་མོ་ཇི་ལྟར་སྣང་བ་དང ། གང་དུ་དེ་སྣང་བ་དེ་ཁོ་ནར་འདི་སྐད་ཅེས་ཕུ་ནུ་མོ་དག་ཁྱེད་དགེ་སློང་མ་སྡིག་ཅན་ས་བོན་ཚིགས་པ་བཞིན་དུ་སྐྱེ་བའི་མཐུ་མེད་པ་འདིས་བསྟན་པ་ལ་ཚོད་མ་འཛིན་ཅིག་།དེ་ལྟ་མོད་ཀྱི་དགེ་སློང་མ་གནས་བརྟན་གནས་བརྟན་དག་གིས་བསྟན་པ་འདི་ལ་ཚད་ཟུང་ཤིག་ཅེས་བསྒོ་བར་བགྱི་སྟེ་འདི་ནི་གསོལ
9.197a
བའོ། །དེ་ལྟར་གསོལ་བ་འབའ་ཤིག་པ་བྱས་ནས་དགེ་སློང་མ་དེ་རྣམས་ཀྱིས་གང་དུ་སྐྱེ་བོའི་ཚོགས་ཆེན་པོ་ཡོད་པ་དེར་སོ་སོར་གོ་བར་བྱའོ། །གང་དུ་མ་དད་པར་བྱས་པ་དེར་བརྗོད་པར་བྱའི་ལྟོགས་པ་ཁོ་ནས་ཤི་བར་གྱུར་ན་མི་རུང་བས་གཞན་དུ་ནི་བརྗོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གང་ཟག་བསྙེན་པར་མ་རྫོགས་པ་རྣམས་ལ་གནས་ངན་ལེན་གྱི་ལྟུང་བ་བརྗོད་ན་དགེ་འདུན་གྱིས་གནང་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པའོ། །བརྗོད་ན་ཞེས་བྱ་བ་ནི་སྨྲ་ནའོ། །དགེ་འདུན་གྱིས་གནང་བ་མ་གཏོགས་ཏེ་ཞེས་བྱ་བ་ནི་དགེ་འདུན་གྱིས་གནང་བ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ལ་མཐར་འགྱུར་བའི་ལྟུང་བ་མཐོང་ལ་དེས་མ་རིག་པ་ལ་མ་རིག་པའི་འདུ་ཤེས་ཀྱིས་བརྗོད་ན་ལྟུང་བྱེད་དོ། །དེ་བཞིན་དུ་མ་རིག་པ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་མཐར་འགྱུར་བའི་ལྟུང་བ་མཐོང་ལ་དེས་རིག་པ་ལ་མ་རིག་པར་འདུ་ཤེས་ན་ཉེས་བྱས་སོ། །དེ་བཞིན་དུ་རིག་པ་ལ་ཡིད་གཉིས་ཟ་ན་ཉེས་བྱས་སོ། །རས་ལ་རི་མོར་བྲིས་པ་ལྟར་ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས་ཅད་ཀྱིས་ཤེས་པ་ལ་ནི་ལྟུང་བ་མེད་དོ། །ལྟུང་བྱེད་བདུན་པ་རྫོགས་སྷོ།། ་་་་་་་་་་་་་་།། སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་མུ་གེ་མི་བཟད་པ་དགོན་པ་སློངས་མོ་བས་ཟས་རྙེད་པར་དཀའ་བ་བྱུང་ངོ ། །དེ་ནས་དགེ་སློང་མ་རབ་ཏུ་མང་པོ་ལྗོངས་ཤིག་ཏུ་དོང་བ་དང ། བསོད་སྙོམས་ཀྱིས་ཕོངས་པར་གྱུར་ཏོ། །དེ་ནས་དེ་རྣམས་ཕན་ཚུན་དུ་འགྲོས་པ། ་ཅིའི་ཕྱིར་བདག་ཅག་གི་ཡོན་ཏན་བསྒྲགས་པར་མི་བྱ། དེ་དག་གིས་འདི་སྐད་ཅེས་སྨྲས་སོ། །ཅི་ཡང་དག་པས་སམ། ཡང་དག་པ་མ་ཡིན་པས་དེ་དག་གིས་འདི་སྐད་ཅེས་སྨྲས་སོ། །ཡང་དག་པས་སོ། །དེ་དག་གིས་ཕན
9.197b
ཚུན་དུ་ཡོན་ཏན་ཡང་དག་པར་བསྒྲགས་པ་བྱས་པ་དང ། འཇིག་རྟེན་ནི་ཡོན་ཏན་ལ་དགའ་བ་ཡིན་པས་དེ་རྣམས་ཀྱིས་དེ་དག་བསོད་སྙོམས་ཀྱིས་མ་ཕོངས་པར་བྱས་སོ། །གང་གི་ཚེ་དགེ་སློང་མ་དེ་དག་ལྗོངས་རྒྱུ་ཞིང་དོང་ནས་ཡངས་པ་ཅན་དུ་ཕྱིན་ནོ། །དེ་ནས་གནས་པ་དང ། གཉུག་མར་གནས་པའི་དགེ་སློང་མ་རྣམས་ཀྱིས་མཐོང་ནས་འདི་སྐད་ཅེས་སྨྲས་སོ། །སངས་རྒྱས་ལྡན། ཆོས་ལྡན། དགེ་འདུན་ལྡན་དག་འོངས་པ་ལེགས་སོ། །འོངས་པ་ལེགས་སོ། །ཇི་ག་ལེགས་པར་སྤྱད་དམ། དེ་དག་གིས་འདི་སྐད་ཅེས་སྨྲས་སོ། །ལེགས་པར་སྤྱད་དོ། །ཚེ་དང་ལྡན་མ་དག་བསོད་སྙོམས་ཀྱིས་ཕོངས་པར་མ་གྱུར་གྲང ། དེ་དག་གིས་འདི་སྐད་ཅེས་སྨྲས་སོ། །མ་གྱུར་ཏོ། །གནས་བརྟན་གནས་བརྟན་འདི་དག་ནི་བསོད་སྙོམས་ཀྱིས་ཕོངས་པར་གྱུར་ན་ཁྱེད་ཀྱིས་ཐབ་ཅི་ཞིག་བྱས་ན་མ་གྱུར། དེ་དག་གིས་འདི་སྐད་ཅེས་སྨྲས་སོ། །ཕན་ཚུན་ཡོན་ཏན་བསྒྲགས་པ་བྱས་པས་སོ། །ཁྱེད་མིའི་ཆོས་བླ་མ་བརྗོད་དུ་རུང་ངམ། དེ་དག་གིས་འདི་སྐད་ཅེས་བདག་ཅག་གིས་བརྗོད་དོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གང་ཟག་བསྙེན་པར་མ་རྫོགས་པ་ལ་མིའི་ཆོས་བླ་མ་བདེན་པ་བརྗོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པའོ། །བསྙེན་པར་མ་རྫོགས་པ་ལ་ཞེས་བྱ་བ་ལ་བསྙེན་པར་རྫོགས་པ་ནི་གཉིས་སོ། །ལྷག་མ་རྣམས་ནི་བསྙེན་པར་མ་རྫོགས་པའོ། །བདེན་པ་ཞེས་བྱ་བ་ནི་ཡང་དག་པར་ཡོད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་་་་་་་་་བར་སྡོམ་ལ། མཐོང་དང་འདུ་ཤེས་དགོན་པ་དང ། ཁྱིམ་རྣམས་སུ་ནི་སྟན་བཀྲ་དང ། །རང་གི་མཚན་ཉིད་འཛིན་བྱེད་དང ། །བདག་ཉིད་ཉེ་བར་སྟོན་པའོ། །དགེ་སློང་མས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང །
9.198a
རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་ལྷ་མཐོང་ངོ་ཞེས་ཟེར་ལ། བདེན་པ་ཡིན་ན་ལྟུང་བྱེད་དོ། །དེ་བཞིན་དུ་གནོད་སྦྱིན་རྣམས་དང ། ཀླུ་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། གྲུལ་བུམ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། སྲུལ་པོ་རྣམས་ཀྱང་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དེ་བཞིན་དུ་ལྷ་རྣམས་ལ་བལྟ་བའི་ཕྱིར་འགྲོའོ་ཞེས་བྱ་བ་ནས་ལུས་སྲུལ་པོ་རྣམས་ལ་ཞེས་བྱ་བའི་བར་ཏེ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །ཁོ་མོའི་དྲུང་དུ་ལྷ་ལ་སོགས་པ་ཉེ་བར་འོང་བ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དེ་བཞིན་དུ་ལྷ་ལ་སོགས་པའི་སྒྲ་ཐོས་པ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། རྣམ་པར་གཏན་ལ་འབེབས་པར་བྱེད་པ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དེ་བཞིན་དུ་ལྷ་ཡང་ཁོ་མོ་དང་ལྷན་གཅིག་གཏམ་འདྲེ་བར་བྱེད། རྣམ་པར་གཏན་ལ་འབེབས་པར་བྱེད་པ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དགེ་སློང་མས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ་ལྟ་བ་མ་བསྒྱུར་བར་འདི་སྐད་ཅེས་མི་རྟག་པའི་འདུ་ཤེས་ཐོབ་བོ་ཞེས་ཟེར་ལ་བདེན་པ་ཡིན་ན་ལྟུང་བྱེད་དོ། །དེ་བཞིན་དུ་སྡུག་བསྔལ་ལ་མི་རྟག་པའི་འདུ་ཤེས་དང ། སྡུག་བསྔལ་ལ་བདག་མེད་པའི་འདུ་ཤེས་དང ། ཟས་ལ་མི་འཐུན་པའི་འདུ་ཤེས་དང ། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང ། ཉེས་དམིགས་ཀྱི་འདུ་ཤེས་དང ། འདོད་ཆགས་དང་བྲལ་བའི་འདུ་ཤེས་དང ། འགོག་པའི་འདུ་ཤེས་དང ། འཆི་བའི་འདུ་ཤེས་དང ། མི་གཙང་བའི་འདུ་ཤེས་དང་རྣམ་པར་སྔོས་པའི་འདུ་ཤེས་དང ། རྣམ་པར་རུལ་བའི་འདུ་ཤེས་དང ། རྣམ་པར་བམ་པའི་འདུ་ཤེས་དང ། རྣམ་པར
9.198b
ཟོས་པའི་འདུ་ཤེས་དང ། རྣམ་པར་ཞིགས་པའི་འདུ་ཤེས་དང ། རྣམ་པར་འཐོར་བའི་འདུ་ཤེས་དང ། རུས་པའི་འདུ་ཤེས་དང ། སྟོང་པ་ཉིད་དུ་སོ་སོར་རྟོགས་པའི་འདུ་ཤེས་དང ། ཁོ་མོས་བསམ་གཏན་དང་པོ་དང ། གཉིས་པ་དང ། གསུམ་པ་དང ། བཞི་པ་ཞེས་བྱ་བ་ནས། རྣམ་པར་ཐར་པ་བརྒྱད་ཀྱི་བསམ་གཏན་ཁོ་མོས་ཐོབ་བོ་ཞེས་ཟེར་ལ་བདེན་ན་ལྟུང་བྱེད་དོ། །དགེ་སློང་མས་འདུ་ཤེས་མ་བསྒྱུར་བར་ཞེས་བྱ་བ་ནས། འདི་སྐད་ཅེས་བྱ་བའི་བར་ཏེ། དགེ་སློང་མ་རབ་ཏུ་མང་པོ་དགོན་པ་ན་གནས་ན་དེ་དག་ལ་མི་མ་ཡིན་པ་རྣམས་ཀྱིས་རྣམ་པར་མི་འཚེ་ན་ཁོ་མོ་ཡང་དེ་ན་གནས་ན་རྣམ་པར་མི་འཚེའོ། །ཞེས་སྨྲས་ལ་བདེན་ན་ལྟུང་བྱེད་དོ། །དེ་བཞིན་དུ་ཁྱིམ་རྣམས་སུ་སྟན་བཀྲ་ཞིང་བཀྲ་བ་རྣམས་ལ་ཡང་བརྗོད་པར་བྱའོ། །དགེ་སློང་མས་འདུ་ཤེས་མ་བསྒྱུར་བར་ཞེས་བྱ་བ་ནས། འདི་སྐད་ཅེས་བྱ་བའི་བར་ཏེ། དགེ་སློང་མ་གང་གིས་རང་གི་མཚན་ཉིད་འཛིན་པ་ཞི་གནས་ཀྱི་མཚན་མ་ལ་བརྟེན་ནས། འཇིག་རྟེན་པའི་ཡིད་ལ་བྱེད་པའི་ཉོན་མོངས་པ་དག་རྣམ་པར་མནན་པས་འདོད་པའི་འདོད་ཆགས་དང ། གནོད་སེམས་ལ་སོགས་པ་ཀུན་དུ་མི་སྤྱོད་པ་དེ་ཡོད་དོ་ཞེས་བྱ་བ་ནས། ཁོ་མོས་ཀྱང་ཞེས་བྱ་བའི་བར་དུ་ཟེར་ན་ལྟུང་བྱེད་དོ། །དགེ་སློང་མས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་མ་བསྒྱུར་བར་འདི་སྐད་ཅེས་དགེ་སློང་མ་ལྷ་མཐོང་བ་གང་ཡིན་པ་དེ་ཡོད་དོ་ཞེས་སྨྲས་ཀྱིས་ཁོ་མོས་སོ་ཞེས་དེ་སྐད་མ་སྨྲས་ན་ཉེས་བྱས་སོ། །དེ་བཞིན་དུ་གནོད་སྦྱིན་རྣམས་དང ། ཀླུ་རྣམས་དང ། དྲི་ཟ་རྣམས་དང ། མི་འམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། གྲུལ་བུམ་རྣམས་དང ། ཡི་དགས་རྣམས་དང ། ཤ་ཟ་རྣམས་དང ། ལུས་སྲུལ་པོ་རྣམས་བདག་གིས་སོ་ཞེས་དེ་སྐད་མ་སྨྲས་ན་ཉེས་བྱས་སོ། །ཐ་ན་ཕྱག་དར་ཁྲོད་ཀྱི་ཤ་ཟ་ལ་ཡང་བདག་གིས་སོ་ཞེས་མ་སྨྲས་ན་ཉེས་བྱས་སོ། །དེ་བཞིན་དུ་རིམ་པ་འདིས་སྡོམ་གྱི་ཚིག་བཅད་འདི་བརྗོད་པར་བྱའོ། །ཡང་དགེ་སློང་མ་གང་ཞིག་འདུ་ཤེས་མ་བསྒྱུར་བར་ཞེས་བྱ་བ་ནས། འདི་སྐད་ཅེས་བྱ་བའི
9.199a
བར་ཏེ། དགེ་སློང་མ་རང་གི་མཚན་ཉིད་འཛིན་པ་ཞི་གནས་ཀྱི་མཚན་མ་ལ་བརྟེན་ནས་འཇིག་རྟེན་པའི་ཡིད་བྱེད་པས་ཉོན་མོངས་པ་རྣམས་རྣམ་པར་མནན་ནས་འདོད་པ་ལ་འདོད་ཆགས་དང ། གནོད་སེམས་ལ་སོགས་པ་ཀུན་དུ་མི་སྤྱོད་པ་གང་ཡིན་པ་དེ་ཡོད་དོ་ཞེས་ཟེར་གྱི་ཁོ་མོ་ཡིན་ནོ་ཞེས་དེ་སྐད་མ་སྨྲས་ན་ཉེས་བྱས་སོ། །ལྟུང་བྱེད་བརྒྱད་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་ཆོས་སྦྱིན་ཕོ་ཉས་བསྙེན་པར་རྫོགས་པ་ཐོབ་ཅིང་བདེན་པ་རྣམས་མཐོང་བ་དེའི་ཚེ་དེ་རང་གི་དབྱར་ཁང་ན་དགེ་སློང་མ་རྣམས་ཀྱི་ཆོས་དང་ལྡན་པའི་ཞལ་ཏ་བྱེད་པ་ལ་བརྩོན་པར་བྱེད་དོ། །དེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཡིན་པས་འདི་ལྟ་སྟེ། སངས་རྒྱས་སམ། ཆོས་སམ། དགེ་འདུན་ནམ། དགེ་སློང་མ་བཤེས་པ་རྣམས་ལ་མི་འབུལ་བ་འམ། ཡོངས་སུ་མི་གཏང་བ་ཅི་ཡང་མེད་དོ། །དེ་དེ་ལྟར་ཕུལ་ཞིང་དེ་ལྟར་ཡོངས་སུ་བཏང་བས་ཆོས་གོས་རྙིངས་ཤིང་སྣམ་སྦྱར་ཡང་དེངས་པར་གྱུར་ཏོ། །དེ་ནས་དགེ་སློང་མའི་དགེ་འདུན་འདི་སྙམ་དུ་དགེ་སློང་མ་ཆོས་སྦྱིན་འདི་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཡིན་པས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་སྤངས་ནས་དགེ་སློང་མ་རྣམས་ཀྱི་ཆོས་དང་ལྡན་པའི་ཞལ་ཏ་བྱེད་པ་ལ་བརྩོན་པར་བྱེད་ལ། དེ་མི་དབུལ་བ་འམ། ཡོངས་སུ་མི་གཏོང་བ་ཅི་ཡང་མེད་དོ་ཞེས་བྱ་བ་ནས། སྣམ་སྦྱར་དེངས་པར་གྱུར་གྱི་ཞེས་བྱ་བའི་བར་རོ། །བདག་ཅག་གིས་རས་ཡུག་ཆེན་ཞིག་གྲུབ་པ་དང ། དེ་བདག་ཅག་གིས་ཆོས་སྦྱིན་ལ་སྦྱིན་ནོ། །སྙམ་དུ་སེམས་སོ། །དེ་ནས་དུས་གཞན་ཞིག་ན་རས་ཡུག་ཆེན་ཞིག་རྙེད་ནས་དེ་རྣམས་ཀྱིས་ཆོས་སྦྱིན་ལ་བྱིན་ནོ། །དེས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གསོལ་བ་བྱས་ཏེ་སྦྱིན་ནོ། །འདི་ལྟར་བྱ་སྟེ། གནས་མལ་བཤམ་པ་བྱས་ལ་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་ཆོས་སྦྱིན་འདི་དད
9.199b
པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ལགས་པས་འདི་ལྟ་སྟེ། སངས་རྒྱས་སམ། ཆོས་སམ། དགེ་འདུན་ནམ། དགེ་སློང་མ་བཤེས་པ་རྣམས་ལ་མི་དབུལ་བ་འམ། ཡོངས་སུ་མི་གཏང་བ་ཅི་ཡང་མ་མཆིས་སོ། །དེ་དེ་ལྟར་ཡོངས་སུ་བཏང་བས་ཆོས་གོས་ལྔ་རྙིངས་ཤིང་སྣམ་སྦྱར་ཡང་དེངས་པར་གྱུར་ལགས་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འདི་ལྟར་འཕགས་མའི་དགེ་འདུན་གྱིས་ཆོས་སྦྱིན་ལ་རས་ཡུག་ཆེན་སྩོལ་བར་མཛད་དོ། །འདི་ནི་གསོལ་བའོ། །གང་གི་ཚེ་དེ་དག་གིས་གསོལ་བ་བྱས་ཏེ་ཆོས་སྦྱིན་ལ་རས་ཡུག་ཆེན་བྱིན་པ་དེའི་ཚེ་སྦོམ་དགའ་མོས་བཅུ་གཉིས་སྡེ་ལྷག་མ་རྣམས་ལ། ཀྱེ་ཕུ་ནུ་མོ་དག་གང་དུ་དགེ་འདུན་གྱི་རྙེད་པ་བཤེས་ངོར་སྔོ་བར་བྱེད་པས་དགེ་སློང་མའི་དགེ་འདུན་གྱི་རྙེད་པ་འགྲུབ་པར་ག་ལ་འགྱུར་ཞེས་སྨྲས་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྔར་ལེགས་པར་རུང་བར་བྱས་ནས་དེའི་འོག་ཏུ་དགེ་སློང་མ་རྣམས་ལ་འདི་སྐད་ཅེས་ཕུ་ནུ་མོ་དག་དགེ་སློང་མ་རྣམས་ཀྱིས་བཤེས་ངོར་བྱས་ཏེ་དགེ་འདུན་གྱི་རྙེད་པར་བསྔོས་པ་གང་ཟག་གིར་སྔོ་བར་བྱེད་དོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །སྔར་ལེགས་པར་རུང་བར་བྱས་ནས་ཞེས་བྱ་བ་ནི་བློ་གྲོས་འཐུན་པར་བྱས་པའོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །རྙེད་པ་ཞེས་བྱ་བ་ལ་རྙེད་པ་ནི་གཉིས་ཏེ། ཟང་ཟིང་གི་རྙེད་པ་དང ། གོས་ཀྱི་རྙེད་པ་སྟེ། དོན་འདི་ལ་ནི་གོས་ཀྱི་རྙེད་པ་ཡིན་པར་དགོངས་སོ། །བཤེས་ངོར་ཞེས་བྱ་བ་ལ་གང་གི་བཤེས་གང་ཡིན་ཞེ་ན། ལྷན་ཅིག་གནས་པའི་བཤེས
9.200a
པ་ནི་མཁན་མོ་ཡིན་ལ། ་མཁན་མོའི་ནི་ལྷན་ཅིག་གནས་པ་ཡིན་ནོ། །ཉེ་གནས་ཀྱི་ནི་སློབ་དཔོན་ཡིན་ལ། སློབ་དཔོན་གྱི་ཡང་ཉེ་གནས་ཡིན་ནོ། །འགྲོགས་བཤེས་ཀྱི་ཡང་འགྲོགས་བཤེས་ཡིན་ནོ། །སྨོས་འདྲིན་གྱི་ཡང་སྨོས་འདྲིན་ཡིན་ནོ། །གནས་གཅིག་པའི་ཡང་གནས་གཅིག་པ་ཡིན་ནོ། །སྔོན་ཞེས་བྱ་བ་ནི་སྒྱུར་ནའོ། །གང་ཟག་ལ་ཞེས་བྱ་བ་ནི་གང་ཟག་ལ་སྦྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་དུ་སྔར་ལེགས་པར་རུང་བར་བྱས་ནས་དེའི་འོག་ཏུ་དགེ་སློང་མ་རྣམས་ལ་འདི་སྐད་ཅེས་དགེ་སློང་མས་བཤེས་ངོར་དགེ་འདུན་གྱི་རྙེད་པར་བསྔོས་པ་གང་ཟག་གིར་སྒྱུར་བར་བྱེད་དོ། །ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་བདེན་པ་ཁོ་ན་ཡིན་ན་ལྟུང་བ་མེད་དོ། །ལྟུང་བྱེད་དགུ་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་སོ་སོར་ཐར་པའི་མདོ་གདོན་པར་འདོན་པ་ན་འདི་སྐད་ཅེས་ཕུ་ནུ་མོ་དག་ཇི་ཙམ་གྱིས་དགེ་སློང་མ་རྣམས་འགྱོད་པ་དང ། ཡིད་ལ་གཅགས་པ་དང ། ཡིད་མི་བདེ་བ་དང ། གནོད་པ་དང ། གདུང་བར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་གང་ལ་གཞི་ཡང་མངོན་ལ། གང་ཟག་དང ། གྲོང་དང ། ཞིང་ཡང་མངོན་པར་དེ་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལས་བཏོན་པས་ཅི་ཞིག་བྱ་ཞེས་སྨྲས་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས་འཕགས་མ་དག་ཇི་ཙམ་དགེ་སློང་མ་རྣམས་འགྱོད་པ་དང ། ་ཡིད་ལ་གཅགས་པ་དང ། ཡིད་མི་བདེ་བ་དང ། གནོད་པ་དང ། གདུང་བར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལས་བཏོན་པས་ཅི་ཞིག་བྱ་ཞེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས
9.200b
བྱ་བ་ནི་སྦོམ་དགའ་མོའོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཕྱེད་ཅིང་ངོ ། །སོ་སོ་ཐར་པ་ཞེས་བྱ་བ་ནི་ཕས་ཕམ་པར་འགྱུར་བ་བརྒྱད་དང ། དགེ་འདུན་ལྷག་མ་ཉི་ཤུ་དང་ཞེས་བྱ་བ་ནས། ལྟུང་བྱེད་བརྒྱ་བརྒྱད་བཅུ་དང ། སོ་སོར་བཤགས་པ་བྱ་བ་བཅུ་གཅིག་དང ། བསླབ་པ་མང་པོ་དང ། རྩོད་པ་ཞི་བར་བྱེད་པ་བདུན་དང ། འདུལ་བ་གཞི་བཅུ་བདུན་དང ། ཕྲན་ཚེགས་དང ། སིལ་བུ་དང ། གླེང་གཞི་དང ། འདུལ་བ་མ་མོ་དང ། འདུལ་བ་གཅིག་ལས་འཕྲོས་པ་དང ། འདུལ་བ་ལྔ་པ་དང ། འདུལ་བ་བཅུ་དྲུག་པ་དང ། ཉེ་བར་འཁོར་གྱིས་ཞུས་པ་ལས་འབྱུང་བའོ། །མདོ་ཞེས་བྱ་བ་ནི་ལེགས་པར་སྦྱར་བའོ། །འདོན་པ་ཞེས་བྱ་བ་ནི་རབ་ཏུ་སྟོན་པའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲས་ནའོ། །ཕུ་ནུ་མོ་དག་འདི་དག་ཅི་དགོས་ཞེས་བྱ་བ་ནི་གང་ལ་གང་ཟག་མངོན་ཞིང་གྲོང་དང ། ཞིང་དང ། གཞི་ཡང་མངོན་པ་ཇི་ཙམ་གྱི་དགེ་སློང་མ་རྣམས་འགྱོད་པ་དང ། ཡིད་ལ་གཅགས་པ་དང ། ཡིད་མི་བདེ་བ་དང ། གནོད་པ་དང ། གདུང་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ་དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་དགེ་སློང་མ་རྣམས་ལ་འདི་སྐད་ཅེས་ཕུ་ནུ་མོ་ཇི་ཙམ་གྱིས་དགེ་སློང་མ་རྣམས་འགྱོད་པར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་ཅི་དགོས་ཞེས་བྱ་བའི་བར་དུ་ཟེར་ན་ལྟུང་བྱེད་དོ། །ཡིད་ལ་གཅགས་པ་དང ། ཡིད་མི་བདེ་བ་ཞེས་ཟེར་ན་ལྟུང་བྱེད་དོ། །དེ་བཞིན་དུ་གདུང་བ་དང ། ཀུན་དུ་གདུང་བ་དང ། ཡོངས་སུ་གདུང་བ་དང ། དེ་བཞིན་དུ་བསླབ་པའི་གཞི་དང་ལྡན་པའི་མདོ་འདོན་པ་ན་ཁྱད་དུ་གསོད་ན་ལྟུང་བྱེད་དོ། །དེ་བཞིན་དུ་བསླབ་པའི་གཞི་དང་ལྡན་པའི་ཚིགས་སུ་བཅད་པ་འདོན་པ་ན་ཁྱད་དུ་གསོད་ན་ཐམས་ཅད་དུ་ཉེས་བྱས་སུ་འགྱུར་རོ། །གལ་ཏེ་ཉམས་པ་ཡིན་པ་དང ། གལ་ཏེ་དགེ་སློང་མའི་དགེ་འདུན་ན་བར་གྱུར་ན་ལྟུང་བ་མེད་དོ། །ལྟུང་བྱེད་དང་པོའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་་་།། སྡོམ་ནི་རྔ་ཞིང་རྔར་འཇུག་འཕྱ་བ་དང ། །རྣ་ལ་གཟོན་དང་གནས་མལ་དང ། །གདིང་བ
9.201a
དག་ནི་ལྔ་པ་ཡིན། །ཡང་ཐོག་ཁྲི་རྩ་འབྱུང་བ་དང ། །རྩཝ་དག་དང་ནི་ཁང་ཆེན་དང ། །གནས་གཅིག་དེ་བཞིན་འཁོད་པའོ། །གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་སྔོན་གྱི་ཤིང་མཁན་བྱེད་བྱེད་པའི་དགེ་སློང་ལས་བརྟེན་ནས་ས་བོན་གྱི་ཚོགས་དང ། འབྱུང་པོའི་གནས་འཇིག་པའི་བསླབ་པའི་གཞི་བཅའ་བ་མཛད་དོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་རང་གི་ལག་གིས་རྩཝ་སྔོན་པོ་རྔ་ཞིང་རྔར་འཇུག་པར་བྱེད་པ་དང ། དེ་རྣམས་ལ་རང་བཞིན་དུ་གནས་པའི་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས་འདི་ལྟ་བུའི་བསླབ་པའི་གཞི་བཅའ་བ་མཛད་ཀྱིས་ཁྱེད་རྩཝ་སྔོན་པོ་མ་གཅོད་གཅོད་དུ་མ་གཞུག་ཤིག་།དེ་ནས་བཅུ་གཉིས་སྡེ་དེ་རྣམས་ཀྱིས་དགེ་སློང་མ་དེ་དག་ལ་འདི་སྐད་ཅེས་བསླབ་པའི་གཞི་འདི་དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ས་བོན་གྱི་ཚོགས་དང ། འབྱུང་པོའི་གནས་འཇིག་གམ། འཇིག་ཏུ་འཇུག་ན་ལྟུང་བྱེད་དོ། །ས་བོན་གྱི་ཚོགས་ཞེས་བྱ་བ་ལ་ས་བོན་ནི་ལྔ་སྟེ། རྩ་བའི་ས་བོན་དང ། སྡོང་བུའི་ས་བོན་དང ། ཐོར་ཏོའི་ས་བོན་དང ། འགས་པའི་ས་བོན་དང ། ས་བོན་གྱི་ས་བོན་ནི་ལྔ་པའོ། །དེ་ལ་རྩ་བའི་ས་བོན་ནི་གླ་སྒང་དང ། ཤུ་དག་དང ། ཡུང་དང ། སྒེའུ་གཤེར་དང ། བོང་ང་དཀར་པོ་དང ། གཞན་ཡང་དེ་ལྟ་བུའི་རྩ་བ་སྟེ་རྩ་བ་ཉིད་ས་བོན་དུ་འགྱུར་བ་གང་ཡིན་པ་འདི་ནི་རྩ་བའི་ས་བོན་ཞེས་བྱའོ། །སྡོང་བུའི་ས་བོན་གང་ཞེ་ན། ཤིང་ཀན་ཙ་ན་དང ། པི་ཏ་ལ་དང ། ་ཤཝད་ཐ་དང ། ུ་དུམ་བ་ར་དང ། ནྱ་གྲོ་དྷ་དང ། གཞན་ཡང་དེ་ལྟ་བུའི་སྡོང་བུ་སྟེ། སྡོང་བུ་ཉིད
9.201b
ས་བོན་དུ་འགྱུར་བ་གང་ཡིན་པ་འདི་ནི་སྡོང་བུའི་ས་བོན་ཞེས་བྱའོ། །ཐོར་ཏོའི་ས་བོན་གང་ཞེ་ན། བུ་རམ་ཤིང་དང ། འདམ་བུ་དང ། སྨྱིག་མ་དང ། རྒྱ་མཚོ་བ་དང་རྩཝ་ཀ་ཤ་དང་གཞན་ཡང་དེ་ལྟ་བུའི་ཐོར་ཏོ་སྟེ་ཐོར་ཏོ་ཉིད་ས་བོན་དུ་འགྱུར་བ་གང་ཡིན་པ་ནི་ཐོར་ཏོའི་ས་བོན་ཞེས་བྱའོ། །འགས་པའི་ས་བོན་གང་ཞེ་ན། ཨརྫ་ཀ་དང ། སརྫ་ཀ་དང ། སེ་ཡབ་དང ། རྩཝ་མཁྲིས་དང ། བྷུ་དྲི་ན་ཀ་དང ། གཞན་ཡང་དེ་ལྟ་བུ་འགས་ཤིང་ས་བོན་དུ་འགྱུར་བ་གང་ཡིན་པ་འདི་ནི་འགས་པའི་ས་བོན་ཞེས་བྱའོ། །ས་བོན་གྱི་ས་བོན་གང་ཞེ་ན་ནས་དང་གྲོ་དང ། ས་ལུ་དང ། མོན་སྲན་སྡེའུ་ལ་སོགས་པ་དང ། གཞན་ཡང་ས་བོན་གྱི་ས་བོན་དུ་འགྱུར་བ་གང་ཡིན་པ་འདི་ནི་ས་བོན་གྱི་ས་བོན་ཞེས་བྱ་སྟེ་ལྔ་པ་ཉིད་ཡིན་ནོ། །འབྱུང་པོའི་གནས་ཤེས་བྱ་བ་ལ་འབྱུང་པོའི་ཞེས་བྱ་བ་ནི་སྦྲུལ་དང ། སྡིག་སྦྲུལ་དང ། ཏྲཻ་མ་བུ་ཀ་དང ། ཏྲཻ་ལ་ཏ་དང ། སྲིན་བུ་དང ། ཕྱེ་མ་ལེབ་དང ། ཏིལ་གྱི་ཕུབ་མ་ཟ་བ་སྟེ། དེ་དག་གི་ཤིང་གང་ཡིན་པ་ནི་འབྱུང་པོའི་གནས་ཤེས་བྱའོ། །གཅོད་དམ་ཞེས་བྱ་བ་ནི་རང་གིས་སོ། །གཅོད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྐམ་པོ་ལ་རློན་པར་འདུ་ཤེས་ན་ཉེས་བྱས་སོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྐམ་པོ་ལ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ན་ཉེས་བྱས
9.202a
སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་ཐོར་ཏོའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཐོར་ཏོའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་རྩ་བའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་རྩ་བའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །
9.202b
རྩ་བའི་ས་བོན་གྱི་ས་བོན་གྱི་ས་བོན་ལ་ཡང་དེ་བཞིན་དུ་སྦྱར་རོ། །དགེ་སློང་མས་སྡོང་བུའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྡོང་བུའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །སྡོང་བུའི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་དུ་སྦྱར་རོ། །སྡོང་བུའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་དུ་སྦྱར་རོ། །སྡོང་བུའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་ཐོར་ཏོའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཐོར་ཏོའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ཐོར་ཏོའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་བཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །རྩ་བའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །རྩ་བའི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། །རྩ་བའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་དུ་སྦྱར་རོ། །རྩ་བའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་དུ་སྦྱར་རོ། །དགེ་སློང་མས་སྡོང་བུའི་ས་བོན་ལ་ཡང་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར
9.203a
འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །སྡོང་བུའི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། །སྡོང་བུའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ། །སྡོང་བུའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ཐོར་ཏོའི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་སྦྱར་རོ། །ཐོར་ཏོའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །ཐོར་ཏོའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ། །ཐོར་ཏོའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །འགས་པའི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་སྦྱར་རོ། །འགས་པའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །འགས་པའི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། །འགས་པའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང་སྔོན་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ནས་གཅོད་དམ། གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ས་བོན་གྱི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། །
9.203b
ས་བོན་གྱི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ།། ་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། ་བམ་པོ་བཅུ་བདུན་པ། བར་སྡོམ་ལ། རྩ་བའི་ས་བོན་ལྔ་དག་དང ། །ལྗོན་ཤིང་རྩཝ་གཅོད་དེ་བཞིན་དུ། །འཆག་དང་རྩཝ་རྒྱུན་ཉ་ལྕིབས་དང ། །ཆུ་དྲེགས་མེ་ཏོག་རྒྱས་པའོ། །དགེ་སློང་མས་ས་བོན་རྣམས་ཉམས་པར་གྱུར་ཅིག་སྙམ་པའི་བསམ་པས། ས་བོན་གྱི་རིགས་ལྔ་གཏུན་སྐྱུར་བླུགས་ནས་གཏུན་མགོས་རྡུང་ཞིང་ས་བོན་ཉམས་པར་གྱུར་ཅིག་།རྣམ་པར་ཉམས་པར་གྱུར་ཅིག་ཅེས་དྲག་ཏུ་བརྡུངས་པ་ལས་ས་བོན་ཉམས་ན་ལྟུང་བྱེད་དུ་འགྱུར་རོ། །ས་བོན་མ་ཉམས་ཤིང་ས་བོན་རྣམ་པར་མ་ཉམས་ན་ཉེས་བྱས་སུ་འགྱུར་རོ། །དེ་བཞིན་དུ་མེ་དང ། ཐབ་དང ། ཞུགས་ལིང་དང ། སླ་ང་དང ། མེ་ཐབ་དང ། མེ་དོང་དང ། མེ་དོང་ཆེན་པོ་དང ། ས་དང ། ཐུག་པ་དང ། ཁུ་ཚན་དང ། འབྲས་ཁུར་ལྡུགས་པ་དང ། དེ་བཞིན་དུ་ས་བོན་ཉམས་པར་གྱུར་ཅིག་།རབ་ཏུ་ཉམས་པར་གྱུར་ཅིག་ཅེས་མཚོ་ཆེན་པོ་དང ། འབབ་ཆུ་ཆེན་པོ་དང་ཞེས་བྱ་བ་ནས་ཆུ་ཉུང་ངུ་དང ། ལྕི་བ་དང ། ཚ་རྒོད་དང ། འགྱུར་བྱེད་དང ། ས་དང་ལྷན་ཅིག་བསྲེས་པ་ལས་དེ་ཡང་ཉམས་ན་ལྟུང་བྱེད་དོ། །མ་ཉམས་ན་ཉེས་བྱས་སོ་ཞེས་བྱ་བའི་བར་རོ། །དགེ་སློང་མས་སྦྱོར་བ་གཅིག་གིས་ཤིང་ལྗོན་པ་གཅིག་གཅོད་དམ་གཅོད་དུ་འཇུག་ན་ཉེས་བྱས་གཅིག་དང ། ལྟུང་བྱེད་གཅིག་གོ། །དེ་བཞིན་དུ་སྦྱོར་བ་གཉིས་ཀྱིས་ཤིང་ལྗོན་པ་གཅིག་གཅོད་ན་དེ་ལ་ཉེས་བྱས་གཉིས་དང ། ལྟུང་བྱེད་གཅིག་གོ། །དེ་བཞིན་དུ་སྦྱོར་བ་མང་པོས་ཤིང་ལྗོན་པ་གཅིག་གཅོད་ན་དེ་ལ་ཉེས་བྱས་མང་པོ་དང ། ལྟུང་བྱེད་གཅིག་གོ། །དགེ་སློང་མས་སྦྱོར་བ་གཅིག་གིས་ཤིང་ལྗོན་པ་གཉིས་གཅོད་ན་དེ་ལ་ཉེས་བྱས་གཅིག་དང ། ལྟུང་བྱེད་གཉིས་སོ། །དེ་བཞིན་དུ་སྦྱོར་བ་གཉིས་ཀྱིས་ཤིང་ལྗོན་པ་གཉིས་གཅོད་ན་དེ་ལ་ཉེས་བྱས་གཉིས་དང ། ལྟུང་བྱེད་གཉིས་སོ། །དགེ་སློང་མས་སྦྱོར་བ་མང་པོས་ཤིང་ལྗོན་པ་གཉིས་གཅོད་ན་དེ་ལ་ཉེས་བྱས་མང་པོ་དང ། ལྟུང་བྱེད་གཉིས་སོ། །དགེ་སློང་མས་སྦྱོར་བ་གཅིག
9.204a
གིས་ཤིང་ལྗོན་པ་མང་པོ་གཅོད་ན་དེ་ལ་ཉེས་བྱས་གཅིག་དང ། ལྟུང་བྱེད་མང་པོར་འགྱུར་རོ། །དེ་བཞིན་དུ་སྦྱོར་བ་གཉིས་ཀྱིས་ཤིང་ལྗོན་པ་མང་པོ་གཅོད་ན་དེ་ལ་ཉེས་བྱས་གཉིས་དང ། ལྟུང་བྱེད་མང་པོར་འགྱུར་རོ། །དེ་བཞིན་དུ་སྦྱོར་བ་མང་པོས་ཤིང་ལྗོན་པ་མང་པོ་གཅོད་ན་དེ་ལ་ཉེས་བྱས་མང་པོ་དང ། ལྟུང་བྱེད་མང་པོར་འགྱུར་རོ། །དགེ་སློང་མས་རྩཝ་སྔོན་པོ་ལ་སྔོན་པོར་འདུ་ཤེས་པས་རྔ་ན་ལྟུང་བྱེད་དོ། །རྔར་འཇུག་ན་ལྟུང་བྱེད་དོ། །སྔོན་པོ་ལ་ཡིད་གཉིས་ཟ་བས་རྔ་ན་ལྟུང་བྱེད་དོ། །རྔར་འཇུག་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་པས་རྔ་ན་ཉེས་བྱས་སོ། །རྔར་འཇུག་ན་ཉེས་བྱས་སོ། །སྐམ་པོ་ལ་ཡིད་གཉིས་ཟ་ན་ཉེས་བྱས་སོ། །རྔར་འཇུག་ན་ཉེས་བྱས་སོ། །དགེ་སློང་མས་སྦྱོར་བ་གཅིག་གིས་རྩཝ་གཅིག་རྔ་ན་དེ་ལ་ཉེས་བྱས་གཅིག་དང ། ལྟུང་བྱེད་གཅིག་གོ། །དེ་བཞིན་དུ་གཉིས་ལ་ཡང་བརྗོད་པར་བྱའོ། །དེ་བཞིན་དུ་མང་པོས་རྩཝ་གཉིས་ལ་ཡང་བརྗོད་པར་བྱའོ། །ཇི་ལྟར་ཤིང་ལྗོན་པ་ལ་བརྗོད་པ་དེ་བཞིན་དུ་རྒྱས་པར་རྩཝ་མང་པོ་ལ་ཡང་བརྗོད་པར་བྱའོ། །དགེ་སློང་མས་ཤིང་ལྗོན་པའི་རྩཝ་རྒྱུན་འབྱིན་ན་ཉེས་བྱས་སོ། །ཕྱི་ཤུན་འཆུ་ན་ཉེས་བྱས་སོ། །ཕྲི་འཆུ་ན་ཉེས་བྱས་སོ། །ནང་ཤུན་འཆུ་ན་ཉེས་བྱས་སོ། །སྙིང་པོ་འབྱིན་ན་ལྟུང་བྱེད་དོ། །ལོ་མ་སྐྱ་བོ་ན་ཉེས་བྱས་སོ། །ལོ་མ་རློན་ན་ལྟུང་བྱེད་དོ། །མེ་ཏོག་ཁ་བྱེ་ན་ཉེས་བྱས་སོ། །ཁ་མ་ཕྱེ་ན་ལྟུང་བྱེད་དོ། །འབྲས་བུ་སྨིན་ན་ཉེས་བྱས་སོ། །འབྲས་བུ་མ་སྨིན་ན་ལྟུང་བྱེད་དོ། །རྩཝ་ཉམས་པར་གྱུར་ཅིག་།རྩཝ་རབ་ཏུ་ཉམས་པར་གྱུར་ཅིག་ཅེས་རྩཝ་སྔོན་པོའི་སྟེང་དུ་འཆག་པར་བྱེད་ན་ལྟུང་བྱེད་དོ། །དེ་བཞིན་དུ་ཁུ་ཚན་ལ་སོགས་པ་ལ་ཡང་ལྟུང་བྱེད་དོ། །ཉམས་པར་གྱུར་ཅིག་།རབ་ཏུ་ཉམས་པར་གྱུར་ཅིག་ཅེས་ཤིང་ངམ། ཡལ་ག་འདྲེན་ན་ལྟུང་བྱེད་དོ། །འདྲེན་པའི་བསམ་པ་དང ། འཆགས་པའི་བསམ་པ་ཡིན་ན་ལྟུང་བ་མེད་དོ། །ཆུ་དྲེག་ཉམས་པར་གྱུར་ཅིག་ཅེས་འཆག་ན་ཉེས་བྱས་སོ། །ཁུ་ཚན་དང་ཤིང་ལ་སོགས་པ་ལ་ཡང་ངོ ། །འཆག་པའི་བསམ་པས་ཡིན་ན་ལྟུང་བ་མེད་དོ། །ཉ་ལྕིབས་ཆུ
9.204b
ནས་ཇི་སྲིད་མ་བཏོན་པ་དེ་སྲིད་དུ་ཉེས་བྱས་སོ། །བཏོན་ན་ལྟུང་བྱེད་དོ། །རྩ་བ་མེད་པའི་ས་བོན་གྱི་ཁམས་འབྱིན་ན་ཉེས་བྱས་སོ། །ཉ་ཚང་དང ། ཕ་བ་ལྒོ་ལྒོ་དང ། ཤ་མོ་འབྱིན་ན་ཉེས་བྱས་སོ། །བུམ་པའི་མདམ་སྐྱ་བོ་འཕྱི་ན་ཉེས་བྱས་སོ། །ཁ་ཟས་འདམ་སྐྱ་བ་ཟ་ན་ཉེས་བྱས་སོ། །གལ་ཏེ་རུང་བར་བྱས་པ་ཡིན་ན་ལྟུང་བ་མེད་དོ། །ལྟུང་བྱེད་གཉིས་པའི་དང་པོ་རྫོགས་སྷོ།། ་་་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་མཛའ་བོ་དང ། ས་ལ་སྐྱེས་ཀྱིས་དྲུག་སྡེ་རྣམས་ཀྱི་མདུན་དུ་ཚེ་དང་ལྡན་པ་གྱད་བུ་ནོར་ལ་འཕྱ་བར་བྱེད་པ་ན་དེ་བཞིན་དུ་དགེ་སློང་མ་མཛའ་མོ་ཞེས་བྱ་བ་ཡང་བཅུ་གཉིས་སྡེ་རྣམས་ཀྱི་མདུན་དུ་གྱད་བུ་ནོར་ལ་འཕྱ་བར་བྱེད་དོ། །དེ་ནས་དགེ་སློང་མ་གནས་བརྟན་གནས་བརྟན་དག་གིས་འདི་སྐད་ཅེས་སྨྲས་སོ། །མཛའ་མོ་འཁོར་གྱིས་གཙོ་བོ་ལ་མ་འཕྱ་ཤིག་།དེ་ལ་དེ་སྐད་དུ་བསྒོ་བ་ན་འོན་ཀྱང་འཕྱ་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མས་དགེ་སློང་མ་མཛའ་མོ་ངོར་འཕྱ་བའི་གྲངས་སུ་ཆུག་ཤིག་།གྲངས་སུ་གཞུག་པ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ནས་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་མཛའ་མོ་འདི་ཚེ་དང་ལྡན་པ་གྱད་བུ་ནོར་ལ་ངོར་འཕྱ་ལགས་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། དགེ་སློང་མ་མཛའ་མོ་ངོར་འཕྱ་བའི་གྲངས་སུ་སྩལ་ཏོ། །འདི་ནི་གསོལ་བའོ། །དེ་བཞིན་དུ་ལས་ཀྱང་བརྗོད་པར་བྱའོ། །འོན་ཀྱང་གཞོག་འཕྱས་ཀྱིས་འཕྱ་བར་བྱེད་པ་ནས་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་མཛའ་མོ་གཞོག་འཕྱས་བྱེད་པའི་གྲངས་སུ་ཆུག་ཤིག་ཅེས་བྱ་བའི་བར་ཏེ། འདི་ནི་གསོལ་བའོ། །ལས་ཀྱང་བརྗོད་པར་བྱའོ། །ཕྱི་ནས་གཞོག་འཕྱས་དང ། ངོར་འཕྱ་བ་གཉིས་ཀ་བྱེད་ནས་ཞེས་བྱ་བ་ནས། བཅོམ
9.205a
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་མཛའ་མོ་གཉི་གར་འཕྱ་བའི་གྲངས་སུ་ཆུག་ཤིག་ཅེས་བྱ་བའི་བར་ཏེ། གསོལ་བ་དང་ལས་ཀྱང་བརྗོད་པར་བྱའོ། །དེ་དེ་ལྟར་བསྒོ་ཡང་འཕྱ་བར་བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། འཕྱ་འམ་གཞོག་འཕྱས་བྱེད་ན་ལྟུང་བྱེད་དོ། །འཕྱ་འམ་ཞེས་བྱ་བ་ནི་འཕྱ་བའི་བསམ་པ་ཅན་གྱི་གང་དག་དང་ཚིག་དང ། རྗོད་པ་ཞེས་བྱ་བའི་བར་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མ་གྲངས་སུ་བཅུག་པར་གྱུར་པས་ཡང་དགེ་འདུན་གྱིས་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་གྱུར་པས་ཡང་དགེ་འདུན་གྱིས་མ་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་གྱུར་པས་ཡང་དགེ་འདུན་གྱིས་མ་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་གྱུར་པས་ཡང་དགེ་འདུན་གྱིས་མ་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་མ་གྱུར་པས་ཀྱང་དགེ་འདུན་གྱིས་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ཉེས་བྱས་སོ། །གཞོག་འཕྱས་བྱས་ན་ཉེས་བྱས་སོ། །འཕྱ་བ་དང་གཞོག་འཕྱས་བྱེད་ན
9.205b
ཉེས་བྱས་སོ། །དེ་བཞིན་དུ་མུ་གཞན་གསུམ་རྒྱས་པར་བརྗོད་པར་བྱའོ། །ལྟུང་བྱེད་གཉིས་པའི་གཉིས་པ་རྫོགས་སྷོ།། ་་་་་་་་་་་་་་་་་་གླེང་གཞི་ནི་ཀཽ་ཤམ་བི་ནའོ། །དེ་ནས་དགེ་སློང་མ་འདུན་མ་ལ་ལྟུང་བ་བྱུང་བ་དང ། དེ་ལ་ཚངས་པ་མཚུངས་པར་སྤྱོད་པ་དོན་འདོད་པ། ཕན་པར་འདོད་པ། བདེ་བར་འདོད་པ། རེག་པར་འདོད་པ། གྲུབ་པ་དང་བདེ་བར་འདོད་པ་རྣམས་ཀྱིས་སྨྲས་པ། ཕུ་ནུ་མོ་ཁྱོད་ལ་ལྟུང་བ་བྱུང་གིས་དེ་ཤོགས་ཤིག་།དེ་དགེ་སློང་མ་དེ་རྣམས་ཀྱི་བསྒོ་བ་བཅག་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་འདུན་མ་བསྒོ་བ་གཅོག་པའི་གྲངས་སུ་ཆུག་ཤིག་གྲངས་སུ་གཞུག་པ་ནི་འདི་ལྟར་བྱ་སྟེ་གནས་མལ་བཤམས་པ་བྱས་ནས་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འདུན་མ་འདི་ལྟུང་བ་བྱུང་ནས་དེ་ལ་ཚངས་པ་མཚུངས་པར་སྤྱོད་པ་དོན་འཚལ་བ། སྨན་པར་འཚལ་བ། བདེ་བར་འཚལ་བ། རེག་པར་འཚལ་བ། གྲུབ་པ་དང་བདེ་བར་འཚལ་བ་རྣམས་ཀྱིས་སྨྲས་པ། འདུན་མ་ཁྱོད་ལ་ལྟུང་བ་བྱུང་གིས་དེ་ཤོགས་ཤིག་ཅེས་བགྱིས་ན། དེ་དགེ་སློང་མ་རྣམས་ཀྱི་བསྒོ་བ་གཅོག་པར་བགྱིད་པར་ལགས་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འདི་ལྟར་འཕགས་མའི་དགེ་འདུན་གྱིས་གནང་བ་མཛོད་ཅིག་དང ། དགེ་སློང་མ་འདུན་མ་བསྒོ་བ་གཅོག་པའི་གྲངས་སུ་སྩལ་ཏོ། །འདི་ནི་གསོལ་བའོ། །དེ་ཁོ་ན་བཞིན་ལས་ཀྱང་བྱའོ། །དེ་འདི་སྙམ་དུ་མ་ལ་བདག་གིས་ཁ་རོག་པ་འམ། བདག་གིས་མ་སྨྲས་པར་གྱུར་ན་བདག་གྲངས་སུ་བཅུག་པར་མི་འགྱུར་བ་ཞིག་སྟེ། འདི་ལྟར་ལ་ལས་ཀྱང ། སྐྱེས་བུ་མཁས་པར་ལྡན་པ་ཡིས། །ངག་རྣམ་བཞི་པོ་བསྲུང་བྱ་སྟེ། །ནགས་ཀྱི་ནང་ན་གོང་མ་སྲེག་།སྒྲ་འབྱིན་པས་ནི་ཟིན་ལ་ལྟོས། །ཞེས་སྨྲས་སོ་སྙམ་དུ་བསམས་ནས་དེ་ཅང་མི་སྨྲ་བས་དགེ་སློང་མ་རྣམས་ཀྱི་བསྒོ་བ་གཅོག་གོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། གཉི་གས་གཅོག་པའི
9.206a
གྲངས་སུ་གཞུག་པར་བྱ་སྟེ། གསོལ་བ་དང་ལས་བྱའོ། །དེ་ལ་བསྒོ་བ་ན་འོན་ཀྱང་གཅོག་པར་བྱེད་ནས་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། བསྒོ་བ་གཅོག་ན་ལྟུང་བྱེད་དོ། །བསྒོ་བ་གཅོག་པ་ཞེས་བྱ་བ་ནི་བསྒོ་བ་གཅོག་པའི་བསམ་པ་ཅན་གྱི་གང་ངག་དང ། ཚིག་དང ། བརྗོད་པ་ཞེས་བྱ་བའི་བར་གོང་མ་བཞིན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མ་དགེ་སློང་མའི་དྲུང་དུ་སོང་ནས་འདི་སྐད་ཅེས་ཁྱོད་ཀྱི་དགེ་སློང་མ་སྐྲ་བྲེགས་ནས་རིང་པོར་མ་ལོན་པ། སྣམ་སྦྱར་དམར་སེར་ཅན་ལྷུང་བཟེད་ཞ་ཉེའི་དབྱར་འདབ་ཅན། མར་གྱིས་ལྷུང་བཟེད་བཀང་བ་འམ། སྦྲང་རྩིས་ལྷུང་བཟེད་བཀང་བ་འམ། འོ་མས་ལྷུང་བཟེད་བཀང་བས་འགྲོ་བ་ཞིག་མཐོང་ངམ། ཞེས་ཟེར་བ་དེ་ལ་དེས་འདི་སྐད་ཅེས་དགེ་སློང་མ་རྐང་གིས་འགྲོ་བ་ཞིག་མཐོང་ངོ་ཞེས་ཟེར་ཏེ་གཞན་དྲིས་ན་ལན་གཞན་ལྡོན་པར་བྱེད་ཅིང་བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ། །དགེ་སློང་མ་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཁྱོད་ཀྱིས་དགེ་སློང་མ་སྐྲ་བྲེགས་ནས་རིང་པོ་མ་ལོན་པ། སྣམ་སྦྱར་དམར་སེར་ཅན་ལྷུང་བཟེད་ཞ་ཉེའི་དབྱར་འདབ་ཅན་ཁར་སིལ་ལྕགས་ཀྱིས་དཀྲིས་པས་བྱུང་བ་ཞིག་མཐོང་ངམ་ཞེས་ཟེར་བ་ན་ཞེས་བྱ་བ་ནས་གཞན་ཐམས་ཅད་བརྗོད་དེ་བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ་ཞེས་བྱ་བའི་བར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་ཁྱོད་ཀྱིས་ལམ་འདི་ནས་ཁྱིམ་པ་བུ་རམ་ཤིང་གི་ཁུར་རམ། འདམ་བུ་འམ། སྨིག་མ་འམ། མདའི་ཁུར་རམ། མར་གྱི་བུམ་པ་འམ། འབྲུ་མར་རམ། སྦྲང་རྩི་འམ། བུ་རམ་གྱི་དབུ་བའི་བུམ་པས་འགྲོ་བ་མཐོང་ངམ། ཞེས་ཟེར་བ་ན་དེ་འདི་སྐད་ཅེས་ཁོ་མོས་ཁྱིམ་པ་རྐང་པས་འོང་བ་ཞིག་མཐོང་གི་རྒྱུ་གཞན་དག་གིས་ནི་མ་ཡིན་ནོ་ཞེས་ཟེར་ཏེ། གཞན་དྲིས་ན་ལན་ལྡོན་པར
9.206b
བྱེད་ཅིང་བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ། །དགེ་སློང་མ་དགེ་སློང་མའི་དྲུང་དུ་སོང་ནས་འདི་སྐད་ཅེས་ཁྱོད་ཀྱིས་ལམ་འདི་ནས་ཁྱིམ་པ་མོ་ཐམས་ཅད་སྔོ་བ་འམ། ཐམས་ཅད་སེར་བ་འམ། ཐམས་ཅད་དམར་བ་འམ། ཐམས་ཅད་དཀར་བ་དགོས་པས་འགྲོ་བ་མཐོང་ངམ་ཞེས་འདྲི་བ་ན་དེ་འདི་སྐད་ཅེས་ཁོ་མོས་ཁྱིམ་པ་མོ་རྐང་གིས་འགྲོ་བ་ཞིག་མཐོང་ངོ་ཞེས་ཟེར་ཏེ། གཞན་དྲིས་ན་ལན་གཞན་ལྡོན་པར་བྱེད་ཅིང་བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ། །གལ་ཏེ་གཤེད་མའི་དྲུང་ནས་བྲོས་པ་ཞིག་གཤེད་མས་རྗེས་ཐོགས་ལ་དེ་དགེ་སློང་མའི་དྲུང་དུ་སོང་ནས་འདི་སྐད་ཅེས་འཕགས་མ་ཁྱོད་ཀྱིས་ལམ་འདི་ནས་གསད་པ་ཞིག་བྲོས་པ་གཟིགས་སམ་ཞེས་དྲིས་ན་དེས་དེ་ལ་གསོད་པའི་གཤེད་མ་ལ་རིགས་པས་བརྗོད་པར་བྱ་སྟེ། གལ་ཏེ་ཚ་བའི་དུས་ཡིན་ན་བཞིན་བཟངས་རེ་ཤིག་ཡུད་ཙམ་ཞིག་ངལ་སོ་ཤིག་།རེ་ཤིག་ཆུ་གྲང་མོ་དག་འཐུང་ཤིག་ཅེས་བསིལ་ཡབ་དག་གིས་གཡབ་པར་བྱའོ། །གལ་ཏེ་གྲང་བའི་དུས་ཡིན་ན། འདི་སྐད་ཅེས་བཞིན་བཟངས་རེ་ཤིག་བསྲོ་ཁང་དུ་ཞུགས་ཤིག་།ཡུད་ཙམ་ཞིག་གནས་དྲོན་པོར་ངལ་སོ་ཞིག་ཅེས་བརྗོད་པར་བྱའོ། །གལ་ཏེ་གཤེད་མ་དེ་འདི་སྐད་ཅེས་བདག་རིངས་ཀྱིས་ཐོང་ཤིག་ཅེས་ཟེར་ན་དེ་ལ་འདི་སྐད་ཅེས་ནམ་མཁའ་ལ་བལྟས་ཏེ། ནམ་མཁའ་མཐོང་ངོ་ཞེས་བརྗོད་པར་བྱའོ། །དེ་བཞིན་དུ་སེན་མོ་ལ་བལྟས་ཏེ་སེན་མོ་མཐོང་ངོ་ཞེས་བརྗོད་པར་བྱའོ། །གལ་ཏེ་གཤེད་མ་ཟིན་པོ་ཞིག་སྟེ། འདི་སྐད་ཅེས་བདག་རྣམ་པ་འདི་དག་མི་འདྲིའོ། །བདག་ནི་གསད་པ་འདྲིའོ་ཞེས་ཟེར་ན་དགེ་སློང་མ་དེས་འདུ་བྱེད་ཐམས་ཅད་སྟོང་པ་ཉིད་དུ་ལྷག་པར་མོས་པར་བྱས་ལ་ཅུང་ཟད་ཀྱང་མཐོང་བ་མེད་དོ་ཞེས་བརྗོད་པར་བྱའོ། །དགེ་སློང་མ་དགེ་སློང་མའི་དྲུང་དུ་སོང་སྟེ་དེ་སྐད་ཅེས་འདྲི་བ་ལ་གལ་ཏེ་དགེ་སློང་མས་ཅང་མི་སྨྲ་བས་གཅོག་ན་ལྟུང་བྱེད་དུ་འགྱུར་རོ། །གལ་ཏེ་ན་བའི་སྨན་ཁར་བཅུག་པར་གྱུར་པ་འམ། ཁའི་ནད་ཀྱིས་ཐེབས་པ་ལ་ལྟུང་བ་མེད་དོ། །ལྟུང་བྱེད་གཉིས་པའི་གསུམ
9.207a
པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་རྣམས་ཀྱིས་བླ་གབ་མེད་པའི་གནས་མལ་རབ་ཏུ་མང་པོ་གཟིགས་ནས་བསླབ་པའི་གཞི་བཅའ་བ་མཛད་པ་དང ། དེ་ན་རང་བཞིན་དུ་གནས་པའི་དགེ་སློང་མ་གང་དག་ཡིན་པ་དེ་དག་ནི་བསླབ་པའི་གཞི་དེའི་རྗེས་སུ་སྒྲུབ་པར་བྱེད་དོ། །དེ་ནས་དགེ་སློང་མ་བཅུ་གཉིས་སྡེ་རྣམས་ཀྱིས་བླ་གབ་མེད་པའི་གནས་མལ་རྣམས་མ་བརྟུལ་བར་མཚམས་ཀྱི་ཕྱི་རོལ་དུ་དོང་ངོ ། །དེ་ནས་དགེ་སློང་མ་གནས་བརྟན་གནས་བརྟན་དེ་དག་གིས་བཅུ་གཉིས་སྡེ་དེ་རྣམས་ལ་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་མ་བཅས་སམ། དེ་དག་གིས་འདི་སྐད་ཅེས་བསླབ་པའི་གཞི་བཅའ་བ་མཛད་པ་དེ་ནི་དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ། །ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ངས་བསླབ་པའི་གཞི་བཅའ་བ་མཛད་པ་དེ་ནི་གཉི་གའི་ཐུན་མོང་ཡིན་ནོ། །བཅོམ་ལྡན་འདས་ཀྱིས་དེ་ལྟར་བླ་གབ་མེད་པར་གནས་མལ་གཞག་པར་མི་བྱའོ་ཞེས་བཅའ་བ་མཛད་པ་དང ། དེ་ནས་དུས་གཞན་ཞིག་ན་དགེ་སློང་མ་རྣམས་དོན་འཐུན་དང་ལྷན་ཅིག་འགྲོགས་ཏེ་རི་བོར་ཞིག་ཏུ་ཕྱིན་པ་དང ། དེ་རྣམས་ཀྱིས་གཙུག་ལག་ཁང་དེར་གནས་མལ་རྙེད་ནས་ཕྱི་དེ་ཉིན་པར་གནས་མལ་གཏོད་པ་ན་དོན་འཐུན་དང་ཡང་བྲལ་ནས། དེ་དག་འབའ་ཞིག་དོང་བ་ལས་ཆོམ་རྐུན་པ་རྣམས་ཀྱིས་བཏོགས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བཅོལ་ཏེ་འདོང་བར་བྱའོ། །བཅོམ་ལྡན་འདས་ཀྱིས་གསུངས་པ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གཙུག་ལག་ཁང་ན་གནས་ན་དགེ་སློང་ལ་བཅོལ་བར་བྱའོ། །དབྱར་ཁང་ན་གནས་ན་དགེ་སློང་མ་ལ་བཅོལ་བར་བྱའོ། །དེ་དག་དེ་རྣམས་ལ་འཆོལ་བ་ན་ཡང་ཐོགས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ།
9.207b
གནས་མལ་བཅོལ་བ་ནི་ལྔ་སྟེ། ལྔ་གང་ཞེ་ན། གཙུག་ལག་ཁང་འདེ་རེ་ཞེས་བྱ་བ་དང ། གཙུག་ལག་ཁང་ལྟོས་ཤིག་ཅེས་བྱ་བ་དང ། གནས་མལ་འདེ་རེ་ཞེས་བྱ་བ་དང ། གནས་མལ་ལྟོས་ཤིག་ཅེས་བྱ་བ་དང ། སྒོ་ལྕགས་གཞུགས་པ་ཉིད་ནི་ལྔ་པ་ཡིན་ཏེ། དེ་ལྟར་བྱས་ནས་དེའི་འོག་ཏུ་འདོང་བར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབས་པ་འདོད་པ་དང ། བསླབ་པ་ལ་གུས་པའི་བསྔགས་པ་བརྗོད་ནས་འདི་སྐད་ཅེས་བཀའ་སྩལ་ཏོ། །ཡང་དགེ་སློང་མ་གང་ཤེས་བཞིན་དུ་དགེ་འདུན་གྱི་ཁྲི་འམ། ཁྲིའུ་འམ། སྟན་ནང་ཚངས་ཅན་ནམ་ལ་བ་འམ། སྔས་སམ། གོར་བུ་བཏིང་བ་མ་བསྡུས་སམ། སྡུས་སུ་མ་བཅུག་གམ། དགེ་སློང་མ་ཡོད་པ་ལ་མ་བཅོལ་བར་དེའི་འོག་ཏུ་དོང་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །གཙུག་ལག་ཁང་ཞེས་བྱ་བ་ནི་གང་དུ་སྤྱོད་ལམ་བཞི་ཤོང་བའོ། །ཁྲི་ཞེས་བྱ་བ་ནི་ཉལ་བའི་འོ། །ཁྲིའུ་ཞེས་བྱ་བ་ནི་འདུག་པའི་འོ། །སྟན་ནང་ཚངས་ཅན་ཞེས་བྱ་བ་ནི་ཤིང་བལ་ཅན་ནོ། །ལ་བ་ཞེས་བྱ་བ་ནི་ལ་བའོ། །སྔས་ཞེས་བྱ་བ་ནི་སྔས་སུ་གཞུག་པའོ། །གོར་བུ་ཞེས་བྱ་བ་ནི་གྲུ་བཞིའོ། །བླ་གབ་མེད་པར་ཞེས་བྱ་བ་ནི་བར་སྣང་ངོ ། །བཏིང་བ་ཞེས་བྱ་བ་ནི་རང་ཉིད་ཀྱིས་སོ། །འདིང་དུ་བཅུག་པ་ཞེས་བྱ་བ་ནི་གཞན་ནོ། །མ་བསྡུས་སམ་ཞེས་བྱ་བ་ནི་རང་གིས་སོ། །སྡུད་དུ་མ་བཅུག་པར་ཞེས་བྱ་བ་ནི་གཞན་ནོ། །དེའི་འོག་ཏུ་དོང་ན་ཞེས་བྱ་བ་ནི་ཉེས་ཀོར་སྤངས་ནས་སོ། །གནས་མལ་གྱི་ཉེན་ཀོར་གང་ཞེ་ན། བཅོམ་ལྡན་འདས་ཀྱིས་བཀའ་སྩལ་པ། མདོམ་བཞི་བཅུ་རྩ་དགུའོ། །ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ་གནས་མལ་ཕན་ཕུན་དུ་འགྱུར་བ་དུ་མཆིས། ཉེ་བར་འཁོར་གཉིས་ཏེ། གཉིས་གང་ཞེ་ན། ཆར་གྱིས་ཕན་ཕུན་དུ་འགྱུར་བ་དང ། རླུང་གིས་ཕན་ཕུན་དུ་འགྱུར་བའོ། །ཆར་གྱིས
9.208a
ཕན་ཕུན་དུ་འགྱུར་བ་གང་ཞེ་ན། ཉེ་བར་འཁོར་གལ་ཏེ་ཆར་གྱིས་ཆུས་གནས་མལ་རིམ་པ་གཉིས་རླན་པར་གྱུར་ན་ལྟུང་བྱེད་དུ་འགྱུར་རོ། །མ་བརླན་ན་ཉེས་བྱས་ཏེ་འདི་ནི་ཆར་གྱིས་ཕན་ཕུན་དུ་འགྱུར་བ་ཞེས་བྱའོ། །གལ་ཏེ་རླུང་གིས་རིམ་པ་གཉིས་བཟློག་པར་གྱུར་ན་ལྟུང་བྱེད་དུ་འགྱུར་རོ། །མ་བཟློག་ན་ཉེས་བྱས་སོ། །གལ་ཏེ་ལམ་དུ་ཞུགས་པ་ན་དྲན་ན་དེས་སེམས་བསྐྱེད་པར་བྱ་ཞིང་ཚིག་ཏུ་ཡང་བདག་གིས་གནས་འདི་འདྲ་བ་ཞིག་ཏུ་གནས་མལ་བཞག་པ་ཚངས་པ་མཚུངས་པར་སྤྱོད་པ་རྣམས་ཀྱིས་བརྟུལ་གྲང་ཞེས་བརྗོད་པར་བྱ་ལ། ལྟུང་བ་དེ་ཡང་སླར་ཆོས་བཞིན་བྱའོ། །ལམ་དུ་དགེ་སློང་མ་མཐོང་ན་ཐ་ན་བཏའ་བར་བྱ་ཞིང་གར་སོན་ཡང་ཐ་ན་བཏའ་བར་བྱ་བ་ལ། ལྟུང་བ་དེ་ཡང་སླར་ཆོས་བཞིན་དུ་བྱའོ། །དགེ་སློང་མ་ཡོད་པ་ལ་མ་བཅོལ་བར་ཞེས་བྱ་བ་ནི་དེ་ན་ཡོད་པའི་དགེ་སློང་མ་གང་ཡིན་པའོ། །དེ་ལྟ་བུ་མ་གཏོགས་ཏེ་ཞེས་བྱ་བ་ནི་དེའི་སྲོག་གི་བར་ཆད་དུ་འགྱུར་བ་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མས་ཇི་ཙམ་ཅུང་ཟད་དགེ་འདུན་གྱི་གཙུག་ལག་ཁང་དུ་དགེ་འདུན་གྱི་ཁྲི་དང ། ཁྲིའུ་དང ། སྟན་ནང་ཚངས་ཅན་དང་ཞེས་བྱ་བ་ནས། གནས་མལ་བླ་གབ་མེད་པར་བཏིང་ངམ། འདིང་དུ་བཅུག་པ་མ་བསྡུས་སམ། སྡུད་དུ་མ་བཅུག་པར་སོང་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་མས་དགེ་འདུན་གྱི་གཙུག་ལག་ཁང་དུ་གནས་མལ་བླ་གབ་མེད་པར་བཏིང་ངམ་འདིང་དུ་བཅུག་ལ། གཙུག་ལག་ཁང་དུ་ཞུགས་ནས་དྲན་པ་ཉེ་བར་མ་བཞག་པ་ཉེ་བར་གཞག་པ་འམ། སེམས་མཉམ་པར་མ་བཞག་པ་མཉམ་པར་གཞག་པ་འམ། སེམས་རྣམ་པར་མ་གྲོལ་བ་རྣམ་པར་གྲོལ་བར་བྱའོ་ཞེས་ནང་དུ་ཡང་དག་བཞག་ལ་ཐུན་དང་པོ་ཕྱེད་ཁོར་ན་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་དང་པོ་ལ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་དབུ་མ་ཕྱེད་ཁོར་ན་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ
9.208b
གྱུར་ན་ཉེས་བྱས་སོ། །དེ་བཞིན་དུ་ཐུན་དབུ་མ་ལ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་ཐ་མ་ལ་ཕྱེད་ཁོར་ན་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་ཐ་མ་ལ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་སྐྱ་རེང་ཤར་ཀའི་དུས་ཀྱི་ཚེ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་སྐྱ་རེང་ཐ་མ་དང ། དེ་བཞིན་དུ་གླང་པོ་ཆེ་འདོན་པའི་དུས་ཀྱི་ཚེ་དང ། དེ་བཞིན་དུ་གླང་པོ་ཆེ་བཏོན་པ་དང ། དེ་བཞིན་དུ་ནམ་ཕན་ཕུན་དང ། དེ་བཞིན་དུ་ནམ་ནངས་པ་དང ། དེ་བཞིན་དུ་ཉི་མ་འཆར་ཀའི་དུས་ཀྱི་ཚེ་དང ། དེ་བཞིན་དུ་ཉི་མ་རྩེ་དང ། དེ་བཞིན་དུ་དྲོས་བུ་ཆུང་དང ། ་དེ་བཞིན་དུ་ཕྱེད་ཡོལ་ན་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དགེ་སློང་མས་དགེ་འདུན་གྱི་གཙུག་ལག་ཁང་ཞེས་བྱ་བ་ནས། སེམས་རྣམ་པར་མ་གྲོལ་བ་རྣམ་པར་གྲོལ་བར་བྱའོ་ཞེས་ནང་དུ་ཡང་དག་པར་འཇོག་པའི་ཕྱིར་ཞུགས་ནས་ཞེས་བྱ་བའི་བར་རོ། །དུང་འབུད་པ་གསུམ་པ་ལ་བྱུང་ནས་ཞེས་བྱ་བ་ནས་ཉི་མ་ནུབ་ཀ་ན་བྱུང་ནས་ཞེས་བྱ་བའི་བར་ཏེ་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །གཞུང་བླ་མའི་བསྡུས་པའི་སྡོམ་ནི། ཆོས་མཉན་པ་དང་དེ་བཞིན་དུ། །ཟན་ཟ་བ་དང་དེ་བཞིན་གྲོང ། །གཙུག་ལག་ཁང་དུ་བཅོལ་བ་དང ། །ནད་པ་དང་ནི་གནས་མལ་དང ། །ལྔ་ལ་བཅོལ་བར་མི་བྱ་དང ། །ཁྲི་གཅིག་ལ་ནི་གཉིས་འདུག་པའོ། །དེ་ནས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དགེ་སློང་མའི་དབྱར་ཁང་དུ་ལྷགས་པ་དང ། དགེ་སློང་མ་དེ་རྣམས་ཀྱིས་ལྷན་ཅིག་འདུ་འཛིའི་གཏམ་གྱིས་དུས་འདའ་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་འདུ་འཛིའི་གཏམ་སྨྲ་བ་ནི་འཚམ་པ་མ་ཡིན་ནོ། །དེ་ལྟ་མོད་ཀྱི་ཆོས་ཤོད་ཅིག་།དེ་དག་ལངས་ཏེ་གུས་ཤིང་མདུན་དུ་འདུག་ནས་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ།
9.209a
འདུག་ལ་ཆོས་བཤད་པར་བྱ་སྟེ། ཁྱིམ་པ་མོ་དེ་རྣམས་ལ་ཡང་སྟན་བསྟབས་པར་བྱའོ། །གང་གི་ཚེ་བཅོམ་ལྡན་འདས་ཀྱིས་འདུག་ལ་ཆོས་བཤད་པར་བྱའོ་ཞེས་བཀའ་སྩལ་པ་དང ། དེ་ནས་དགེ་སློང་མ་དེ་རྣམས་ཀྱིས་གྲལ་རིམས་སུ་ཤོམ་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་རྣམ་པ་གཉིས་པོ་ཟླ་གམ་ལྟ་བུ་འམ། གྲུ་བཞི་པ་གདིང་བར་བྱའོ། །གང་གི་ཚེ་བཅོམ་ལྡན་འདས་ཀྱིས་ཆོས་བཤད་པར་བྱའོ་ཞེས་བཀའ་སྩལ་པ་ན་དེ་དག་གིས་གང་གིས་བཤད་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྤོབས་པའི་མཐུ་དང་ལྡན་པར་གྱུར་པ་གང་ཡིན་པ་དེས་བཤད་པར་བྱའོ། །དེ་ནས་རྒན་རིམ་མཐུ་དང་ལྡན་པ་མ་ཡིན་པར་གྱུར་ནས། འོག་མ་གཞོན་རིམས་དག་འཆད་པར་བྱེད་པ་ན་དེ་དག་རྒན་རིམས་ནས་གཞོན་རིམས་སུ་དོང་ནས་ཉན་པར་བྱེད་པས་རྒན་རིམས་དེ་དག་མི་བརྗེད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ་ཆོས་སྨྲ་བའི་སེང་གེའི་ཁྲི་བཤམ་པར་བྱ་ཞིང་སེང་གེའི་ཁྲི་ལས་སྨྲ་བར་བྱའོ། །གང་གི་ཚེ་བཅོམ་ལྡན་འདས་ཀྱིས་སེང་གེའི་ཁྲི་ལས་སྨྲ་བར་བྱའོ་ཞེས་བཀའ་སྩལ་པ་དེའི་ཚེ་མདོ་རིང་པོ་དག་རྒྱས་པར་སྨྲ་བར་བྱེད་པ་ན་ཁྱིམ་པ་མོ་རྣམས་སྐྱོ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཆ་གསུམ་པ་དང ། ལྔ་པ་ནས་ཆ་གསུམ་པ་དང ། སྟོན་པ་ཡོངས་སུ་བསྒྲགས་པ་ལ་ཚར་བསྲང་སྟེ་སྨྲ་བར་སྣང་ངོ་ཞེས་བྱ་བའི་བར་རོ། །ཇི་ཙམ་ན་ཁྱིམ་བདག་མོ་རྣམས་ཟས་དག་གཡོ་བར་བྱེད་པ་ན་དེ་རྣམས་སྣོད་སྤྱད་དག་རྙེད་པར་བྱེད་ནས། ་བཅོམ་ལྡན་འདས་ཀྱིས་བཀའ་སྩལ་པ། རྙོས་ཤིག་།སྟན་དག་རྙེན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། རྙོས་ཤིག་།དེ་ནས་དེ་དག་གྲོང་དུ་མགྲོན་དུ་འབོད་ནས། ་བཅོམ་ལྡན་འདས་ཀྱིས་བཀའ་སྩལ་པ། དེར་ཡང་དོང་ལ་ལོངས་ཀྱང་སྤྱད་པར་བྱའོ། །དེ་ནས་ཁྱིམ་བདག་མོ་རྣམས་ཀྱིས་དེ་དག་ལ་འདི་སྐད་ཅེས་འཕགས་མ་དག་ཁྱེད་ཅག་ཅིའི་སླད་དུ་ཆབ་སྣོད་དག་སྣོམས་ཏེ་མ་བྱོན་ཞེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་པ། དེར་ཡང་བུམ་པ་དང ། རིལ་བ་དང ། སྟན་དང ། སེང་གེའི་ཁྲི་དག་བཀུར་བར་བྱའོ། །
9.209b
ཇི་ཙམ་ན་དགེ་སློང་མ་ནད་པ་ཞིག་ཡོད་པ་དེས་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག་འཆི་བར་འགྱུར་རོ། །དེ་དག་གིས་འདི་སྐད་ཅེས་སྨྲས་སོ། །ཅི་སྟེ། དེས་འདི་སྐད་ཅེས་སྨྲས་སོ། །ཁོ་མོ་ནད་པ་ལ་འདྲི་བ་འགའ་ཡང་མེད་དོ་ཞེས་བྱས་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་བལྟ་བར་བྱའོ། །ལྟ་བར་མི་བྱེད་ན་འགལ་ཚབས་ཅན་དུ་འགྱུར་རོ། །གང་གི་ཚེ་བཅོམ་ལྡན་འདས་ཀྱིས་ནད་པ་ལ་བལྟ་བར་བྱའོ། །ཞེས་བཀའ་སྩལ་པ་དང ། དེ་ཕྱིན་ཆད་གཎྜི་བརྡུངས་ཏེ་དགེ་འདུན་ཐམས་ཅད་ནད་པ་ལ་ལྟ་བའི་ཕྱིར་འདོང་བ་ན། དེ་ནས་ནད་པས་མཐོང་ནས་གང་གི་ཕྱིར་དགེ་འདུན་ཐམས་ཅད་ལྷགས་པ་ལས་ན། བདག་ནི་འཆི་བར་འགྱུར་གོར་མ་ཆག་གོ་སྙམ་ནས་སྐྲག་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གཅིག་གམ། གཉིས་འགྲོ་བར་བྱའོ། །དེར་དོང་བ་ན་སྟན་དག་མེད་ནས། བཅོམ་ལྡན་འདས་ཀྱིས་བཀའ་སྩལ་པ། ནད་འདྲི་བའི་ཆེད་དུ་སྟན་དག་གདིང་བར་བྱའོ། །གང་གི་ཚེ་བཏིང་བ་དེའི་ཚེ་དེ་དག་འདི་སྙམ་དུ་བཅོམ་ལྡན་འདས་ཀྱིས་བླ་གབ་མེད་པར་གནས་མལ་དོར་བར་མི་བྱའོ་ཞེས་གསུངས་སོ་སྙམ་དུ་སེམས་ཤིང ། དེ་དེ་དག་དེ་ཉིད་ན་སྲུང་ཤིང་འཁོད་པ་ན་དེ་དག་གིས་སངས་རྒྱས་དང ། ཆོས་དང ། དགེ་འདུན་དང ། མཁན་པོ་དང ། སློབ་དཔོན་གྱི་བྱ་བ་གང་ཡིན་པ་དེ་དེས་ཉམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བཅོལ་ལ་འདོང་བར་བྱའོ། །དེ་དག་ནད་པ་ལ་འཆོལ་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ནས། རྐྱེན་ལྔས་གནས་མལ་བླ་གབ་མེད་པར་བོར་ཏེ་འདོང་བར་མི་བྱའོ་ཞེས་བྱ་བའི་བར་རོ། །ལྔ་པོ་དེ་དག་གང་ཞེ་ན་ཞེས་བྱ་བ་ནས་རྒས་པ་དང ། ངོ་ཚ་མེད་པ་དང ། བར་ཆད་དང་བཅས་པ་དང ། འགྱོད་པ་མེད་པ་དང ། བསྙེན་པར་མ་རྫོགས་པའོ་ཞེས་བྱ་བའི་བར་སྟེ། དེ་དག་རྐྱེན་དུ་བྱས་ནས་དོང་བར་མི་བྱའོ། །བྱེད་ན་འགལ་ཚབས་ཅན་དུ་འགྱུར་ཏོ། །གཉིས་ཁྲི་གཅིག་ལ་འདུག་ན་གང་གིས་ཁྲི་བརྟུལ་བར་བྱ། བཅོམ་ལྡན་འདས་ཀྱིས་བཀའ་སྩལ
9.210a
པ་གཞོན་པས་སོ། །གཉིས་ཀ་གཞོན་པར་གྱུར་ན་གལ་ཏེ་བཟོད་ན་གཅིག་གིས་སོ། །ལྟུང་བྱེད་གཉིས་པའི་བཞི་པ་རྫོགས་སྷོ།། ་་་་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ལྷོ་ལམ་ནས་འོངས་པའི་དགེ་སློང་ཞིག་ལ་བརྟེན་ནས་རྩཝའི་གདིང་བའི་བསླབ་པའི་གཞི་བཅའ་བར་མཛད་པ་དེའི་ཚེ་རང་བཞིན་དུ་གནས་པའི་དགེ་སློང་མ་དེ་རྣམས་ཀྱིས་ནི་ཐོས་ནས་རྗེས་སུ་སྒྲུབ་པར་བྱེད་དོ། །བཅུ་གཉིས་སྡེ་རྣམས་ཀྱིས་ནི་རྩཝའི་གདིང་བ་དག་བཏིང་ཞིང་འདིང་དུ་བཅུག་ནས། མི་སྡུད་ཅིང་སྡུད་དུ་མ་བཅུག་གོ། །དེ་ནས་བཅུ་གཉིས་སྡེ་རྣམས་ལ་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། ཅིའི་ཕྱིར་རྩཝའི་གདིང་བ་དག་མི་རྟུལ། དེ་དག་གིས་འདི་སྐད་ཅེས་བསླབ་པའི་གཞི་བཅའ་བ་མཛད་པ་དེ་ནི་དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ་ཡང་དགེ་སློང་མ་གང་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ། འདིང་དུ་གཅུག་ནས་མ་བསྡུས་སམ། སྡུད་དུ་མ་བཅུག་གམ། དགེ་སློང་མ་ཡོད་པ་ལ་མ་བཅོལ་བར་དེ་ནས་སོང་ན་དེ་ལྟ་བུ་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་གོང་མ་བཞིན་ནོ། །རྩཝའི་གདིང་བ་ཞེས་བྱ་བ་ལ། རྩཝ་ཞེས་བྱ་བ་ནི་རྩཝ་ཉིད་དོ། །ལོ་མ་ཞེས་བྱ་བ་ནི་ལོ་མ་དག་ཉིད་དོ། །བཏིང་ངམ་ཞེས་བྱ་བ་ནི་རང་ཉིད་ཀྱིས་སོ། །གདིང་དུ་བཅུག་པ་ཞེས་བྱ་བ་ནི་གཞན་གྱིས་སོ། །མ་བསྡུས་སམ་ཞེས་བྱ་བ་ནི་རང་གིས་སོ། །སྡུད་དུ་མ་བཅུག་གམ་ཞེས་བྱ་བ་ནི་གཞན་ནོ། །དེ་ནས་སོང་ན་ཞེས་བྱ་བ་ནི་ཉེན་ཀོར་སྤངས་ནའོ། །གདིང་བའི་ཉེན་ཀོར་གང་ལགས།
9.210b
བཅོམ་ལྡན་འདས་ཀྱིས་བཀའ་སྩལ་པ། མདོམ་བཞི་བཅུ་རྩ་དགུ་སྟེ། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །ཉེ་བར་འཁོར་གྱིས་ཞུས་པ། གདིང་བ་ལ་ཕན་ཕུན་དུ་འགྱུར་བ་དུ་མཆིས། ཉེ་བར་འཁོར་གཉིས་ཏེ། རླུང་གིས་ཕན་ཕུན་དུ་འགྱུར་བ་དང ། སྲིན་གྱིས་ཕན་ཕུན་དུ་འགྱུར་བའོ། །རླུང་གིས་ཕན་ཕུན་དུ་འགྱུར་བ་གང་ཞེ་ན། རླུང་གིས་གདིང་བ་རིམ་གཉིས་བཟློག་པར་གྱུར་པ་སྟེ་ལྟུང་བྱེད་དུ་འགྱུར་རོ། །མ་བཟློག་ན་ཉེས་བྱས་ཏེ་འདི་ནི་རླུང་གིས་ཕན་ཕུན་དུ་གྱུར་པ་ཞེས་བྱའོ། །སྲིན་གྱི་ཕན་ཕུན་དུ་གྱུར་པ་གང་ཞེ་ན། གལ་ཏེ་སྲིན་རྣམས་ཀྱིས་གདིང་བ་རིམ་གཉིས་གློངས་པར་གྱུར་པ་སྟེ་གློངས་ན་ལྟུང་བྱེད་དོ། །མ་གློངས་ན་ཉེས་བྱས་སོ། །ལམ་དུ་དོང་བ་ན་དྲན་ན་ཉེས་བྱས་ཞེས་བྱ་བ་ནས། གནས་མལ་ལ་ཇི་ལྟ་བ་བཞིན་དུ་རྒྱས་པར་སྦྱར་བར་བྱའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གང་ཡང་དགེ་སློང་མས་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བཏིང་ངམ། འདིང་དུ་བཅུག་ནས་མ་བསྡུས་སམ། སྡུད་དུ་མ་བཅུག་པར་དེ་ཇི་སྲིད་དུ་ཉེན་ཀོར་སྤངས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཡང་དགེ་སློང་མ་གང་ཞིག་དགེ་འདུན་གྱི་གཙུག་ལག་ཁང་དུ་རྩཝའི་གདིང་བ་འམ། ལོ་མའི་གདིང་བ་བླ་གབ་མེད་པར་བཏིང་ངམ། འདིང་དུ་བཅུག་ནས་གཙུག་ལག་ཁང་དུ་ཞུགས་ཏེ་དྲན་པ་ཉེ་བར་མ་བཞག་པ་ཉེ་བར་གཞག་པ་དང ། སེམས་མཉམ་པར་མ་བཞག་པ་མཉམ་པར་གཞག་པ་དང ། སེམས་རྣམ་པར་མ་གྲོལ་བ་རྣམ་པར་གྲོལ་བར་བྱའོ་ཞེས་ནང་དུ་ཡང་དག་གཞག་ལ་ཐུན་དང་པོ་ཕྱེད་ཁོར་ན་བྱུང་ལ་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །ཉི་མ་ནུབ་ཀ་ན་ཞེས་བྱ་བ་ནས་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ་ཞེས་བྱ་བའི་བར་གནས་མལ་ལ་ཇི་ལྟ་བ་བཞིན་དུ་རྒྱས་པར་སྦྱར་བར་བྱའོ། །ལམ་ཀར་གནས་མལ་བཏིང་བ་ལ་ཉལ་བ
9.211a
དེ་དག་འགྱོད་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། གློང་བར་བྱའོ། །གློང་བར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་ཕྱིས་དབྱར་ཁང་དུ་ཚོན་རྩིའི་ལས་དག་བྱེད་པ་ན་དགེ་སློང་མ་རྣམས་ཀྱིས་རྩཝ་དག་བཀྲམ་པར་གྱུར་པ་དང ། བསླབ་པ་འདོད་པ་དེ་དག་གིས་རྩཝ་དེ་དག་བསྡུས་ནས་དབྱར་ཁང་གི་ཕྱི་རོལ་དུ་བོར་བ་དང ། གཞན་དག་ཕོངས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་འགའ་ཞིག་སེམས་ལས་ཆུང་བར་གྱིས་ཤིག་ཅེས་ཟེར་ན་མི་དོར་རོ། །ལྟུང་བྱེད་གཉིས་པའི་ལྔ་པ་རྫོགས་སྷོ།། ་་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་དབྱར་གྱི་ཐལ་ནས་རྒྱུ་ཞིང་སོང་བ་དང ། དེ་ནས་དགེ་སློང་མ་གཞོན་ནུ་རྣམས་ཀྱིས་མཁན་མོ་དང་སློབ་དཔོན་མོ་དག་ལ་འདི་སྐད་ཅེས་སྨྲས་སོ། །འཕགས་མ་དག་བདག་ཅག་ཀྱང་རྒྱུ་ཞིང་མཆི་ལགས་སོ། །དེ་དག་གིས་དྲིས་པ་སུ་དང་ལྷན་ཅིག་།དེ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོ་དང་ངོ ། །དེ་དག་གིས་འདི་སྐད་ཅེས་སྨྲས་སོ། །མ་འདེང་ཤིག་།ཅིའི་སླད་དུ། དེ་དག་གིས་འདི་སྐད་ཅེས་སྨྲས་སོ། །སྦོམ་དགའ་མོ་ནི་གནས་ངན་ལེན་ཀུན་དུ་སྤྱོད་པ་ཡིན་ནོ། །ཞེས་དེ་དག་གིས་དེ་ལྟར་བཟློག་ཀྱང་དེ་དང་ལྷན་ཅིག་རྒྱུ་ཞིང་དོང་སྟེ། དེ་དག་རྒྱུ་ཞིང་དོང་བ་ན་རི་འོར་ཞིག་ཏུ་ཕྱིན་ཏོ། །དེ་ནས་གཞོན་ནུ་དེ་རྣམས་ཀྱིས་རྩཝ་དག་བསླངས་ཏེ་གདིང་བ་བཤམས་ནས་དེ་དག་ཉལ་བ་དང ། སྦོམ་དགའ་མོས་དབུས་སུ་མཆོངས་ནས་གནོད་པར་བྱས་ཤིང་ཕུལ་ཏེ་གོ་བཤུགས་ནས་འདི་སྐད་ཅེས་སུ་ལ་གནོད་པར་འགྱུར་བ་དེ་དག་འདོང་བར་འགྱུར་གྲང་ཞེས་སྨྲས་སོ། །དེ་ནས་དགེ་སློང་མ་དེ་རྣམས་ཕྱི་དེ་ཉིན་པར་སླར་ལོག་པ་དང ། དེ་ནས་དགེ་སློང་མ་སྦོམ་དགའ་མོས་དེ་དག་ལ་འདི་སྐད་ཅེས་སྨྲས་སོ། །ཁོ་མོས་ཁྱོད་ལ་ནད་ཀྱི་སྨན་ལ་སོགས་པ་སྦྱར་བར་བྱའོ། །ཞེས་བྱ་བ་ནས། གཞོན་ནུ་མ་དེ་དག་གིས་སྐབས་དེ་མཁན་མོ་དང ། སློབ་དཔོན་མ་དག་ལ་རྒྱས་པར་སྨྲས་སོ། །ཞེས་བྱ་བའི་བར་རོ། །དོན་ཉུང་བའི་དགེ་སློང་མ
9.211b
དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་སྔ་ནས་འཁོད་པར་ཤེས་བཞིན་དུ་དེའི་འོག་ཏུ་འོངས་ནས་སུ་ལ་གནོད་པར་འགྱུར་བ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་ཏེ་ཕྱིས་གནོན་བྱས་ནས་སྟན་ལ་འདུག་པར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་བདག་ཉིད་གྱིས་སམ་གཞན་གྱིས་སྨྲས་པར་གྱུར་པའོ། །སྔ་ནས་འཁོད་པར་ཞེས་བྱ་བ་ནི་སྔ་ནས་འདུག་པར་རོ། །ཕྱིས་གནོན་བྱས་ནས་ཞེས་བྱ་བ་ནི་འཕྲལ་དུ་མཐུས་སོ། །སྟན་ལས་ཞེས་བྱ་བ་ནི་གདིང་བ་ལའོ། །འདུག་པར་བྱེད་ན་ཞེས་བྱ་བ་ནི་འདུག་པར་བྱེད་པ་འམ། ལུས་སྙོལ་པར་བྱེད་པའོ། །སུ་ལ་གནོད་པར་འགྱུར་བ་ཞེས་བྱ་བ་ནི་གོ་མི་ཚུགས་པ་གང་ཡིན་པའོ། །དེ་འགྲོ་བར་འགྱུར་གྲང་ཞེས་བྱ་བ་ནི་དེ་ལངས་ཏེ་འགྲོ་བའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་དག་སྔ་ནས་འཁོད་པར་ཤེས་བཞིན་དུ་སུ་ལ་གནོད་པར་འགྱུར་བ་དེ་འགྲོ་བར་འགྱུར་གྲང་ཞེས་ཕྱིས་གནོན་བྱས་ནས་སྟན་ལ་འདུག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ནད་པ་ཡིན་ན་ལྟུང་བ་མེད་དོ། །གལ་ཏེ་སྐྲག་པ་ཡིན་ན་ལྟུང་བ་མེད་དོ། །ལྟུང་བྱེད་གཉིས་པའི་དྲུག་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་དང་བཅས་ཏེ་ལྗོངས་རྒྱུ་ཞིང་སོང་བ་ན་མཉན་ཡོད་དུ་ཕྱིན་ཏོ། །བཅོམ་ལྡན་འདས་ཀྱི་བསྟན་པ་ལ་དགེ་སློང་དང ། དགེ་སློང་མ་རྣམས་གནས་མལ་འགེད་པར་བྱེད་པ་འདི་ནི་ལུགས་ཡིན་པས་དེ་ནས་དགེ་སློང་མའི་དབྱར་ཁང་གི་གནས་མལ་འགེད་པ་ན་སྦོམ་དགའ་མོའི་སྐལ་པར་སྟེང་གི་ཡང་ཐོག་ཅིག་བབ་པ་ལས་དེ་ཤེས་བཞིན་དང་མི་ལྡན་པར་གནས་མལ་ལ་འདུག་སྟེ། དེ་འདུག་པ་ན་ཁྲིའི་རྐང་པས་ཁང་ཐོག
9.212a
རྡོལ་བར་བྱས་ཏེ། ཁྲིའི་རྐང་པ་ལྟུང་བས་དེའི་འོག་ན་དགེ་སློང་མ་ཞིག་ཡོད་པའི་མགོ་བོ་བརྟོལ་བ་དང ། དོན་ཉུང་བའི་དགེ་སློང་མ་དེ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ་ཡང་དགེ་སློང་མ་གང་སྟེང་གི་ཡང་ཐོག་ཏུ་ཁྲི་འམ། ཁྲིའུ་རྩ་བ་འབྱུང་བ་ལ་ལྗིད་ཀྱིས་མནན་ཏེ་ཉལ་ལམ་འདུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །གཙུག་ལག་ཁང་ཞེས་བྱ་བ་ནི་གང་དུ་སྤྱོད་ལམ་བཞི་ཤོང་བའོ། །སྟེང་གི་ཞེས་བྱ་བ་ནི་ཁང་ཐོག་གི་སྟེང་ངོ ། །ཡང་ཐོག་ཅེས་བྱ་བ་ནི་གནས་ཁང་ངོ ། །རྩ་བ་འབྱུང་བ་ལ་ཞེས་བྱ་བ་ནི་རྐང་པ་འབྱུང་བའོ། །འདུག་གམ་ཞེས་བྱ་བ་ནི་འདུག་པར་བྱེད་པའོ། །ཉལ་ལམ་ཞེས་བྱ་བ་ནི་ལུས་སྙོལ་བར་བྱེད་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྟེང་གི་ཁང་ཐོག་གི་ཡང་ཐོག་ཏུ་ཁྲི་འམ། ཁྲིའུ་འི་རྩ་བ་འབྱུང་བ་ལ་འདུག་གམ་ཉལ་ན་ཐམས་ཅད་དུ་ལྟུང་བྱེད་དུ་གྱུར་རོ། །གལ་ཏེ་སོ་ཕག་གིས་གཡོགས་པ་འམ། སྤང་ལེབ་ཀྱིས་གཡོགས་པ་འམ། དྲལ་བུ་འམ། ཤིང་ལེབ་བམ། ཤིང་ལེབ་ཆུང་དུས་གཡོག་པ་འམ། ཞལ་ཞལ་བྱས་པ་འམ། རྐང་རྟེན་བཅུག་པ་ལ་ནི་ལྟུང་བ་མེད་དོ། །ལྟུང་བྱེད་གཉིས་པའི་བདུན་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ཚེ་སྦོམ་དགའ་མོ་སྲོག་ཆགས་དང་བཅས་པའི་ཆུས་རྩཝ་ལ་འདེབས་པར་བྱེད་ས་དང་ལྕི་བ་ལ་ཡང་འདེབས་པར་བྱེད་ནས། དེ་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་སྲོག་ཆགས་དང་བཅས་པའི་ཆུས་རྩཝ་འམ་ལྕི་བ་ལ་མ་འདེབས་ཤིག་།དེས་འདི་སྐད་ཅེས་ཅི་ཁོ་མོ་ལ་བགྲངས་ཏེ། གཏད་དམ།
9.212b
ཤར་གྱི་རྒྱ་མཚོ་ཆེན་པོར་འདོང་ན་ཅི་ཉེས། ལྷོ་དང་ནུབ་ཀྱི་རྒྱ་མཚོ་ཆེན་པོར་འདོང་ན་ཅི་ཉེས་ཤེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྲོག་ཆགས་དང་བཅས་པའི་ཆུས་རྩཝ་འམ། ལྕི་བ་འམ། ས་ལ་འདེབས་སམ། འདེབས་སུ་འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །སྲོག་ཆགས་དང་བཅས་པས་ཞེས་བྱ་བ་ལ་སྲོག་ཆགས་ནི་གཉིས་ཏེ། གང་དག་མིག་ལམ་དུ་སྣང་བར་འགྱུར་བ་དང ། གང་དག་ཆུ་ཚགས་ཀྱིས་ཟིན་པར་འགྱུར་བའོ། །ཆུས་ཞེས་བྱ་བ་ནི་ཆུས་རྩཝ་འམ། ས་འམ། འཇི་བ་འམ། ལྕི་བ་འམ། ལུད་ལའོ། །འདེབས་སམ་ཞེས་བྱ་བ་ནི་བདག་ཉིད་ཀྱིས་སོ། །འདེབས་སུ་བཅུག་ན་ཞེས་བྱ་བ་ནི་གཞན་དག་གོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པའི་ཆུར་འདུ་ཤེས་ཏེ་འདེབས་སམ། འདེབས་སུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྲོག་ཆགས་མེད་པའི་ཆུ་ལ་སྲོག་ཆགས་དང་བཅས་པར་འདུ་ཤེས་ནས་འདེབས་སམ། འདེབས་སུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་ཡུར་བ་འདྲེན་པར་བྱེད་ན་དེར་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བྱེད་དུ་འགྱུར་རོ། །ཇི་སྙེད་མ་ཤི་བ་དེ་སྙེད་ཀྱི་ཉེས་བྱས་སུ་འགྱུར་རོ། །དེ་བཞིན་དུ་རྒྱུན་གཅོད་པར་བྱེད་པ་དང ། ཞིང་གི་དཀའ་གཅོད་པ་དང ། འགོག་ཅིང་གཏོང་བ་སྟེ། ཐམས་ཅད་དུ་གཞི་ཇི་ལྟ་བ་བཞིན་དུ་འགྱུར་རོ། །ལྟུང་བྱེད་གཉིས་པའི་བརྒྱད་པ་རྫོགས་སྷོ།། ་་་་་་་་་་་་་།། དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅཝ་བརྒྱད་པ།
9.213a
གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། བསོད་ནམས་དག་ནི་བྱ་བ་སྟེ། །བསོད་ནམས་མ་བྱས་སྡུག་བསྔལ་འགྱུར། །འཇིག་རྟེན་འདི་དང་ཕ་རོལ་དུ། །བསོད་ནམས་བྱས་པ་དགའ་བར་འགྱུར། །ཞེས་བཀའ་སྩལ་པ་དེའི་ཚེ། དགེ་སློང་མ་དེ་དག་གིས་གནས་ཁང་དང ། ར་བ་དང ། སྒོ་ཁང་ལ་སོགས་པ་བྱ་བར་བརྩམས་སོ། །དེ་ནས་སྦོམ་དགའ་མོས་བསམས་པ། བདག་གིས་འདི་ལྟ་བུའི་བསོད་ནམས་ཀྱི་ཕུང་པོ་ལས་ཡོངས་སུ་ཉམས་སོ་སྙམ་དུ་བསམས་ནས་སྔ་དྲོ་ཤམ་ཐབས་བགོས། ལྷུང་བཟེད་དང ། ཆོས་གོས་བླངས་ཏེ། ཚོང་དཔོན་གྱི་ཆུང་མ་ཞིག་གི་དྲུང་དུ་སོང་ནས་སོན་པ་དང་འདི་སྐད་ཅེས་སྨྲས་སོ། །མཚན་བཟངས་མ་ནད་མེད་པར་གྱུར་ཅིག་།དེ་ནས་ཁྱིམ་བདག་གི་ཆུང་མ་དེས་སྦོམ་དགའ་མོའི་ཕྱིར་སྟན་བཏིང་ངོ ། །དེ་ནས་སྦོམ་དགའ་མོ་སྟན་བཏིང་བ་ལ་འདུག་གོ། །འདུག་ནས་རྫས་ལས་བྱུང་བའི་བསོད་ནམས་བྱ་བའི་དངོས་པོ་བདུན་གྱི་མདོ་རྒྱས་པ་རྣམ་པར་ཕྱེ་བས་ཁྱིམ་བདག་གི་ཆུང་མ་དེ་དད་པར་བྱས་ནས་སྐབས་འབྱེད་དུ་བཅུག་གོ་ཞེས་བྱ་བ་ནས་དེས་སྨྲས་པ། གཙུག་ལག་གི་རྒྱུ་ཅུང་ཟད་ཅིག་བྱིན་ཅིག་ཅེས་བྱ་བའི་བར་རོ། །དེ་ནས་སྦོམ་དགའ་མོས་དབྱར་ཁང་དེ་ལ་སྟོར་ཁུང་ཡང་མེད། ཆུ་ཁུང་ཡང་མེད་པ་སྦྱང་གི་དབྱིབས་ལྟ་བུ་ཞིག་བརྩིག་པར་བརྩམས་པ་དང ། དེ་ནས་དགེ་སློང་མ་དེ་རྣམས་ཀྱིས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་བཅོམ་ལྡན་འདས་ཀྱི་སྒོ་ཁང་དང ། གཏན་པའི་གནས་ཇི་སྲིད་པར་འཇི་བའི་རིམ་པ་གཉིས་སམ་གསུམ་བརྩིག་པར་བྱའོ་ཞེས་བཀའ་སྩལ་པ་མ་ཡིན་ནམ། དེས་འདི་སྐད་ཅེས་དགེ་སློང་རྣམས་ལ་བཀའ་སྩལ་གྱི་དགེ་སློང་མ་རྣམས་ལ་ནི་མ་ཡིན་ནོ། །དེ་ལྟ་མོད་ཀྱི་བུ་ཟན་གྱི་བུ་མོ་དག་།ཀྱེ་ཁོ་མོ་སྡེ་སྣོད་གསུམ་པ་ཡིན་པས་གཙུག་ལག་ཁང་ཅི་འདྲ་བར་བརྩིག་པ་ཤེས་སོ་ཞེས་སྨྲས་པ་དང ། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང་དགེ་སློང་དག
9.213b
གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་གཙུག་ལག་ཁང་ཆེན་པོ་ཞིག་བརྩིག་ཏུ་འཇུག་ན་སྒོ་ཁང་དང ། གཏན་པ་དང་སྣང་བའི་གནས་ཇི་ཙམ་པའི་འདུ་ཤེས་ཀྱིས་ས་བརྟག་པ་ནས་བཟུང་སྟེ་འཇི་བའི་རིམ་པ་གཉིས་སམ་གསུམ་པ་བརྩིག་པར་བྱའོ། །དེ་ལས་ལྷག་པར་བརྩིག་ན་ལྟུང་བྱེད་དོ། །ཆེན་པོ་ཞེས་བྱ་བ་ལ་ཆེན་པོ་ནི་གཉིས་ཏེ། སྦྱིན་པར་བྱ་བ་ལས་དང ། ཚད་ལས་ཏེ། དོན་འདི་ལ་ནི་སྦྱིན་པར་བྱ་བ་ལས་ཡིན་པར་དགོངས་སོ། །གཙུག་ལག་ཁང་ཞེས་བྱ་བ་ནི་གང་དུ་སྤྱོད་ལམ་བཞི་ཤོང་བའོ། །རྩིག་ཏུ་འཇུག་ན་ཞེས་བྱ་བ་ནི་བདག་ཉིད་དམ་གཞན་ནོ། །སྒོ་ཁང་དང ། གཏན་པའི་གནས་ཤེས་བྱ་བ་ནི་སྒོ་ཁང་དང ། སྐར་ཁུང་གི་འདུ་ཤེས་དང ། ཆུ་ཁུང་གི་འདུ་ཤེས་སོ། །འཇི་བའི་རིམ་པ་གཉིས་སམ་གསུམ་ཞེས་བྱ་ལ། འཇི་བ་ཞེས་བྱ་བ་ནི་འཇིམ་པའོ། །རིམ་པ་ཞེས་བྱ་བ་ནི་རྩེག་མའོ། །བརྩིག་པར་བྱའོ་ཞེས་བྱ་བ་ནི་བསླང་བར་བྱའོ། །དེ་ལས་ལྷག་པར་ཞེས་བྱ་བ་ནི་དེ་ལས་གོང་དུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཇི་བའི་རིམ་པ་གཉིས་སམ་གསུམ་ལས་ལྷག་པར་རྩིག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་གཙུག་ལག་ཁང་རྡོ་བའི་རྒྱུ་ལས་རྩིག་གམ། གཙུག་ལག་ཁང་གི་བདག་པོ་རིངས་ན་ལྟུང་བ་མེད་དོ། །ལྟུང་བྱེད་གཉིས་པའི་དགུ་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་ཚེ་དང་ལྡན་པ་ཤཱ་རིའི་བུ་གཅེར་བུ་པའི་འདུག་གནས་སུ་འདུག་ནས་ཁྱིམ་བདག་ཆུང་མ་དང ། འཁོར་དང་བཅས་པ་རྒྱུན་དུ་ཞུགས་པའི་འབྲས་བུ་ལ་རབ་ཏུ་བཞག་གོ། །དེ་ཉིད་ལ་རབ་ཏུ་བརྟེན་ནས་སྲོག་ཆགས་ཁྲི་ཉིས་སྟོང་བདེན་པ་མཐོང་བར་བྱས་པ་ན་ཚེ་དང་ལྡན་པ་ཤཱ་རིའི་བུ་ལས་བརྟེན་ཏེ་ལེགས་པར་བརྟགས་ནས་བསླབས་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་རྣམས་འདུག་གནས་གཅིག་ཏུ་ཉལ་བར་བྱེད། འདུག་གནས་གཅིག་ཏུ་ཟོས་ནས་བསོད་སྙོམས་ཕྱི་མ་ཤོས་ཀྱང་ཟ་བར་བྱེད་པ་དང ། རང་བཞིན་དུ་གནས
9.214a
པའི་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག་བཅོམ་ལྡན་འདས་ཀྱིས་འདུག་གནས་ཀྱི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་བཅོམ་ལྡན་འདས་ཀྱིས་བཅས་པ་དེ་ནི་དགེ་སློང་རྣམས་ཀྱི་ཡིན་གྱི་དགེ་སློང་མ་རྣམས་ཀྱི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དོ། །དགེ་སློང་མ་གང་ཡིན་པར་འདུག་གནས་གཅིག་ན་འདུག་པས་བསོད་སྙོམས་ལན་ཅིག་བཟའ་བར་བྱ་སྟེ། དེ་ལས་ལྷག་པར་ཟ་ན་ལྟུང་བྱེད་དོ། །འདུག་གནས་གཅིག་ཏུ་ཉལ་ན་ཞེས་བྱ་བ་ནི་མུ་སྟེགས་ཅན་གྱི་གནས་སུ་ཉལ་ནའོ། །དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །མི་ན་བར་ཞེས་བྱ་བ་ནི་ན་བ་མ་གཏོགས་པའོ། །བསོད་སྙོམས་ལན་གཅིག་བཟའ་བར་བྱ་སྟེ། ཞེས་བྱ་བ་ནི་ཕྱི་མ་ཤོས་མ་ཡིན་པའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདུག་གནས་སུ་གནས་སམ། འདུག་གནས་སུ་ཟ་བ་ན་གནས་པ་དེ་ལ་ཉེས་བྱས་སོ། །ཟ་ན་ལྟུང་བྱེད་དོ། །འདུག་གནས་སུ་གནས་ཤིང་གཞན་དུ་ཟ་ན་འདུག་གནས་སུ་གནས་པ་ན་དེ་ལ་ཉེས་བྱས་སོ། །གཞན་དུ་ཟ་ན་ལྟུང་བ་མེད་དོ། །འདུག་གནས་སུ་ཟ་ལ་གཞན་དུ་གནས་པར་བྱེད་ན་འདུག་གནས་སུ་ཟ་བར་བྱེད་ན་དེ་ལ་ལྟུང་བྱེད་དོ། །གཞན་དུ་གནས་པར་བྱེད་པ་ལ་ལྟུང་བ་མེད་དོ། །གཞན་དུ་གནས་པར་བྱེད་ཅིང་གཞན་དུ་ཟ་ན་གཉི་ག་ལ་ལྟུང་བ་མེད་དོ། །ལྟུང་བྱེད་གཉིས་པའི་བཅུ་པ་རྫོགས་སྷོ།། ་་་་་་་་་་་་་།། སྡོམ་ནི། འཁུར་བ་འདུས་དང་དུས་མིན་དང ། །གསོག་འཇོག་མ་བྱིན་ལྔ་པ་ཡིན། །སྲོག་ཆགས་བཅས་པ་དག་དང་ནི། །ཉལ་པོ་བྱེད་པར་ཤོམ
9.214b
པ་གཉིས། །གཅེར་བུ་དམག་ལ་ཞག་གཉིས་ལྷག་།ཚོགས་ལ་ལྟ་བར་བྱེད་པའོ། །གླེང་གཞི་ནི་མཉན་ཡོད་ནའོ། །དེའི་ཚེ་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ཏེ། དེ་ཆུང་མ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། ཇི་ཙམ་ན་བུ་མོ་གཡས་ཞར་མ་ཞིག་བཙས་ཏེ་ཞེས་བྱ་བ་ནས། ཆུང་མ་གསོད་པ་ཞེས་བྱ་བས་བསླངས་ཏེ་ཞག་དུས་བཏབ་བོ་ཞེས་བྱ་བའི་བར་རོ། །ཇི་ཙམ་ན་དེའི་ཆེད་དུ་ཕལ་མོ་ཆེ་དག་སྟ་གོན་བྱེད་དོ། །ཇི་ཙམ་ན་ཁྱིམ་དེར་དགའ་བོ་དང ། ཉེ་དགའ་བོ་བསོད་སྙོམས་ཀྱི་ཕྱིར་ཞུགས་ནས་དེ་གཉིས་ཀྱིས་འདི་སྐད་ཅེས་སྨྲས་སོ། །མཚན་བཟངས་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །བདག་གློ་བ་བྲེལ་བ་ཞིག་མཆིས་སོ། །དེ་གཉིས་ཀྱིས་འདི་སྐད་ཅེས་སྨྲས་སོ། །ཁྱོད་ཅི་ཞིག་བྲེལ། དེས་འདི་སྐད་ཅེས་སྨྲས་སོ། ་གཡས་ཞར་མ་རྫོང་བ་ལ་བབ་ལགས་སོ། །དེ་གཉིས་ཀྱིས་འདི་སྐད་ཅེས་སྨྲས་སོ། །དེ་རིང་ཁོ་བོ་ཅག་གི་སྲིང་མོ་རྫོང་ན་ཁོ་བོ་ཅག་གིས་དེ་རིང་ཁོ་ན་བསོད་སྙོམས་མི་རྙེད་དམ། དེ་དགའ་བ་དང ། ་མགུ་བ་དང ། རབ་ཏུ་དགའ་བའི་ཡིད་ཀྱིས་བསོད་སྙོམས་མང་དུ་བྱིན་ནོ། །དེ་གཉིས་ཀྱིས་བསོད་སྙོམས་བླངས་ནས་དོང་ངོ ། །དེའི་འོག་ཏུ་སྦོམ་དགའ་མོ་དང ། གཙུག་དགའ་མོ་འོངས་ནས་དེ་གཉིས་ཀྱིས་ཀྱང་བསོད་སྙོམས་བླངས་ཏེ་འདོང་ངོ ། །ཇི་ཙམ་ན་རྒྱལ་དང ། ཉེ་རྒྱལ་གྱིས་སྦོམ་དགའ་མོ་དང ། གཙུག་དགའ་མོ་ལག་པ་གང་ཞིང་ལྷུང་བཟེད་གང་བ་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །ཕུ་ནུ་མོ་དག་གཡས་ཞར་མ་དེ་རིང་རྫོང་བ་ལ་བབ་ཀྱི་དེང་ཤིག་།དེ་ནས་རྒྱལ་དང ། ཉེ་རྒྱལ་ཡང་བསོད་སྙོམས་ཀྱི་ཕྱིར་དེ་ཉིད་དུ་དོང་ངོ ། །དེ་བཞིན་དུ་རྒྱལ་གྲོགས་མ་དང ། རྒྱལ་སྐྱོང་མ་དང ། དེ་བཞིན་དུ་བཟང་མོ་དང ། ཤིན་ཏུ་བཟང་མོ་དང ། དེ་བཞིན་དུ་མཛེས་དགའ་མོ་དང ། རྒྱལ་ལྡན་མ་ཡང་དོང་ནས་ཁྱིམ་དེ་ནས་གཡས་ཞར་མ་རྫོང་བའི་ཆེད་དུ་སྟ་གོན་བྱས་པ་ཅུང་ཟད་ཅི་ཡོད་པ་དེ་ཐམས་ཅད་བཅུ་གཉིས་སྡེ་རྣམས་ལ་བྱིན་ནོ། །
9.215a
ཇི་ཙམ་ན་ཡང་སྟ་གོན་བྱ་བར་བརྩམས་པ་དང ། དེ་ནས་ཆུང་མ་གསོད་པ་དེའི་ནེའུ་ཟླ་ཞིག་ཡོད་པ་དེས་སྨྲས་པ། གཡས་ཞར་མ་ནི་སྐྱོན་མང་པོ་ཅན་ཡིན་ཏེ། རྒྱ་སྐྱེགས་ཤིང་གི་སོ་ཤིང་དང ། །ནུབ་ཏུ་སྔས་བསྟན་ཉལ་བ་དང ། །རྒོངས་ཀའི་ཞོ་འཐུང་གཡས་ཞར་ལེན། །ཞི་བ་ཡང་ནི་གནས་ནས་འཕོ་ཞེས་སྨྲས་ཏེ། དེ་ལྟར་གཡས་ཞར་མ་དེ་ལེན་པའི་བར་ཆད་བྱས་པར་གྱུར་ཏོ། །བྲམ་ཟེ་དང ། ཁྱིམ་བདག་རྣམས་དགེ་སྦྱོང་ཤཱཀྱའི་སྲས་རྣམས་ཀྱི་དགེ་སྦྱོང་གི་ཚུལ་དང ། ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་བུ་མོ་ལེན་པའི་བར་ཆད་བྱེད་དོ་ཞེས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་རབ་ཏུ་མང་པོ་ཁྱིམ་རྣམས་སུ་དོང་བ་ན་དེ་དག་ལ་གལ་ཏེ་བྲམ་ཟེ་དང ། ཁྱིམ་བདག་དད་པ་ཅན་རྣམས་སྐྱོ་མ་འམ། སྣུམ་ཁུར་དག་གིས་ཤིན་དུ་སྟོབས་པ་བྱེད་ལ། འདོད་ན་དགེ་སློང་མ་དེས་ལྷུང་བཟེད་དོ་འམ། གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །ལྷུང་བཟེད་དོ་འམ། གསུམ་བླངས་ནས་ཁྱིམ་གྱི་ཕྱིར་རོལ་ཀུན་དགའ་ར་བར་སོང་ལ་དགེ་སློང་མ་འཁོད་པ་རྣམས་དང་བགོ་བར་བྱ་སྟེ། དེ་ལ་ཆོ་ག་ནི་དེ་ཡིན་ནོ། །ཡང་དགེ་སློང་མ་ཞེས་བྱ་བ་ནི་བཅུ་གཉིས་སྡེ་དག་གོ། །ཁྱིམས་རྣམས་སུ་དོང་བ་ན་ཞེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་རྣམས་སུའོ། །དེ་དག་ལ་གལ་ཏེ་བྲམ་ཟེ་དང ། ཁྱིམ་བདག་དད་པ་ཅན་དག་ཅེས་བྱ་བ་ལ། དད་པ་ཅན་ཞེས་བྱ་བ་ནི་སངས་རྒྱས་ལ་མངོན་པར་དད་པ་དང ། ཆོས་དང ། དགེ་འདུན་ལ་མངོན་པར་དད་པ་ཞེས་བྱ་བ་ནས། འབྲས་བུ་ཐོབ་པ་ཞེས་བྱ་བའི་བར་གང་ཡིན་པའོ། །ཤིན་ཏུ་ཞེས་བྱ་བ་ནི་ཆོག་པར་རོ། །སྟོབས་པར་བྱེད་ན་ཞེས་བྱ་བ་ནི་མགྲོན་དུ་གཉེར་ནའོ། །སྐྱོ་མ་ཞེས་བྱ་བ་ནི་ཕྱེའི་འོ། །སྣུམ་འཁུར་ཞེས་བྱ་བ་ནི་ཁུར་བའོ། །འདོད་ན་ཞེས་བྱ་བ་ནི་དོན་དུ་གཉེར་ནའོ། །དོ་འམ་གསུམ་ཞེས་བྱ་བ་ལ་དོ་ཞེས་བྱ་བ་ནི་ཆེན་པོའི་འོ། །
9.215b
གསུམ་ཞེས་བྱ་བ་ནི་ཆུང་ངུ་དང ། འབྲིང་དང ། ཆེན་པོའི་འོ། །དེ་ལ་ཆེན་པོ་ནི་ཡུལ་མ་ག་དྷའི་བྲེའུ་ཆུང་གང་ངོ ། །ཆུང་ངུ་ནི་བྲེའུ་ཆུང་ཕྱེད་དོ། །དེའི་བར་མ་ནི་བར་མའོ། །བླངས་ནས་ཁྱིམ་གྱི་ཕྱི་རོལ་ཀུན་དགའ་ར་བར་སོང་ནས་གཙུག་ལག་ཁང་ན་དགེ་སློང་མ་འཁོད་པ་རྣམས་དང་བགོ་བར་བྱ་སྟེ་ཞེས་བྱ་བ་ནི་དེ་ན་ཡོད་པའི་དགེ་སློང་མ་དག་དོང་ངོ ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ལྷུང་བཟེད་ཆེན་པོ་གསུམ་བླངས་ན་ལྟུང་བྱེད་དོ། །ཆེན་པོ་གཉིས་དང ། བར་མ་གཅིག་བླངས་ན་ལྟུང་བྱེད་དོ། །བར་མ་གཉིས་དང ། ཆེན་པོ་གཅིག་ལེན་ན་ལྟུང་བྱེད་དོ། །དགེ་སློང་མས་ཇི་ཙམ་ཅུང་ཟད་བྲེའུ་ཆུང་དོ་ལས་ལྷག་པར་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་དང་པོ་རྫོགས་སྷོ།། ་་་་་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་བཅོམ་ལྡན་འདས་ཀྱིས་ལྷ་སྦྱིན་ལས་བརྟེན་ཏེ་ཚོགས་ཤིང་ཟ་བ་བཀག་པ་དང ། དེ་ནས་དགེ་སློང་མ་དེ་དག་གིས་གཉི་གའི་ཐུན་མོང་ཡིན་ནོ་ཞེས་རྗེས་སྒྲུབ་པར་བྱེད་དོ། །དེ་ནས་ཕྱིས་ན་བ་དག་ཏུ་གྱུར་ཏེ་ཟས་གཅིག་གིས་འཚོ་བར་མ་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། ན་བ་དུས་ཡིན་ནོ་ཞེས་བྱས་ཏེ་བཟའ་བར་བྱའོ། །དེ་བཞིན་དུ་ལམ་དུ་ཞུགས་པ་བཀྲེས་ནས་དགེ་བའི་ཕྱོགས་བྱེད་མི་ནུས་པར་གྱུར་ནས་ཞེས་བྱ་བ་ནས། བཟའ་བར་བྱའོ་ཞེས་བྱ་བའི་བར་རོ། །དེ་བཞིན་དུ་ལས་བྱེད་པ་དང ། དེ་བཞིན་དུ་གྲུར་ཞུགས་པས་ཀྱང་བཟའ་བར་བྱའོ། །དེ་བཞིན་དུ་མང་པོ་འདུས་པའི་དུས་སུ་རྙེད་པ་བྱུང་བ་ནས་བཅོམ་ལྡན་འདས་ཀྱིས་བཀའ་སྩལ་པ། བཟའ་བར་བྱའོ། །དེ་བཞིན་དུ་ཀུན་དུ་རྒྱུ་འམ། ཀུན་དུ་རྒྱུ་མོ་སངས་རྒྱས་ཀྱི་བསྟན་པ་ལ་དད་པ་རྙེད་པ་དེ་ལས་ཀྱང་བཟའ་བར་བྱ་སྟེ། ་དགེ་སློང་མ་དག་ཀུན་དུ་རྒྱུ་སངས་རྒྱས་ཀྱི་བསྟན་པ་ལ་དད་པ་རྙེད་པ་ནི། །
9.216a
དཀོན་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདོད་པ་དང་བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་བའི་བསྔགས་པ་བརྗོད་ནས་འདི་སྐད་ཅེས་བཀའ་སྩལ་ཏོ། །དུས་མ་གཏོགས་ཏེ་འདུས་ཤིང་ཟ་ན་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་དང་ལས་དུས་དང ། ལམ་དུས་དང ། གྲུར་ཞུགས་པ་དང ། འདུས་པ་ཆེན་པོ་དང ། དགེ་སྦྱོང་གི་ཟས་དུས་སོ། །འདུས་ཤིང་ཟ་བ་ཞེས་བྱ་བ་ནི་མི་མཐུན་ཞིང་ཟ་བའོ། །དུས་མ་གཏོགས་ཏེ་ཞེས་བྱ་བ་ནི་འདི་ལྟར་ཡང་ན་བ་དག་ཏུ་གྱུར་ལ། ཟས་གཅིག་གིས་འཚོ་བར་མི་ནུས་པ་ལྟ་བུའོ། །ལམ་དུས་ཞེས་བྱ་བ་ནི་ལམ་དུ་ཞུགས་པ་ལ་སྦྱིན་བདག་གིས་བྱིན་པའོ། །གྲུར་ཞུགས་པ་ཞེས་བྱ་བ་ནི་གྲུར་འཇུག་པ་ན་སྦྱིན་བདག་གིས་བསོད་སྙོམས་བྱིན་པའོ། །འདུས་པ་ཆེན་པོ་ཞེས་བྱ་བ་ནི་མང་པོ་འདུས་པའི་ཟས་སོ། །དགེ་སྦྱོང་གི་ཟས་དུས་སོ་ཞེས་བྱ་བ་ནི་འདི་ལས་ཕྱི་རོལ་པའི་རབ་ཏུ་བྱུང་བ་ལ་དགེ་སྦྱོང་ཞེས་བྱའོ། །དེ་ལ་དུས་ནི་དེ་ཡིན་ནོ་ཞེས་བྱ་བ་ནི་དེ་ལ་དེ་ནི་འཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་པས་འདུས་ཤིང་ཟས་ཟ་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མ་མཚམས་ཀྱི་ཕྱི་རོལ་ལ་མཚམས་ཀྱི་ནང་དུ་འདུ་ཤེས་པས་འདུས་ཤིང་ཟས་ཟ་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མའི་དབྱར་ཁང་གི་ཁྱམས་དག་ཡོད་ལ། གལ་ཏེ་དགེ་སློང་མ་ཁ་ཅིག་དབྱར་ཁང་དུ་ཟ་ལ། ཁ་ཅིག་ཁྱམས་དག་ཏུ་ཟ་ན། དེ་ལ་དབྱར་ཁང་ན་ཟ་བ་གང་ཡིན་པ་དེ་དག་གིས་ཇི་ག་ཁ་ཟས་ཀྱིས་བསྲུལ་ཏམ་ཞེས་བྲི་བར་བྱའོ། །མ་དྲིས་པར་ཟ་ན་ལྟུང་བྱེད་དུ་འགྱུར་རོ། །ཁྱམས་རྣམས་ལ་ནི་ཉེས་བྱས་སུ་འགྱུར་རོ། །དེ་བཞིན་དུ་གནས་ཁང་དང ། སྒོ་ཁང་ལ་སོགས་པ་ལ་ཡང་བརྗོད་པར་བྱའོ། །གལ་ཏེ་ཁ་ཟས་ཀྱིས་བསྲུལ་ན་ཆུང་ངུ་ན་རིལ་བའི་ཆུ་འམ། ལན་ཚཝ་ཁ་གཟར་གང་ཙམ
9.216b
ཡང་བསྲུལ་ན་ལྟུང་བ་མེད་དོ། །ལྟུང་བྱེད་གསུམ་པའི་གཉིས་པ་རྫོགས་སྷོ།། ་་་་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅུ་བདུན་སྡེ་རྣམས་ལས་བརྟེན་ནས་ཏེ་དུས་མ་ཡིན་པའི་ཟས་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་རྣམས་དུས་སུ་ཡང་ཟ་བར་བྱེད། ་དུས་མ་ཡིན་པར་ཡང་ཟ་བར་བྱེད་པ་དང ། དགེ་སློང་མ་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་དུས་མ་ཡིན་པའི་ཟས་ཀྱི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་བཅའ་བ་མཛད་ཀྱི་དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དུས་མ་ཡིན་པར་བཟའ་བ་དང ། བཅའ་བ་འཆོས་སམ་ཟོས་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །དུས་མ་ཡིན་པ་ཞེས་བྱ་བ་ལ་དུས་མ་ཡིན་པ་ནི་གཉིས་ཏེ། དུས་མ་ཡིན་པ་ཕྱེད་ཡོལ་བ་དང ། ་དུས་མ་ཡིན་པ་སྐྱ་རེང་མ་ཤར་བའོ། །བཅའ་བ་དང ། བཟའ་བ་ཞེས་བྱ་བ་ནི་བཅའ་བ་ལྔ་དང ། བཟའ་བ་ལྔ་པོ་དག་གོ། །འཆོས་སམ། ཟོས་ན་ཞེས་བྱ་བ་ནི་ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དུས་མ་ཡིན་པ་ལ་དུས་མ་ཡིན་པར་འདུ་ཤེས་ནས་འཆོས་སམ། ཟོས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་དུས་ལ་དུས་མ་ཡིན་པར་འདུ་ཤེས་ནས་འཆོས་སམ། ཟོས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་གསུམ་པའི་གསུམ་པ་རྫོགས་སྷོ།། ་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ནག་པོ་འཆར་ཀ་ལས་བརྟེན་ཏེ་གསོག་འཇོག་བྱས་པའི་ཟས་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་རྣམས་ཀྱིས་བསོད་སྙོམས་ལ་བརྒྱུས་ནས་འབྲས་ཆན་སྐམ་པོ་ཡང་ལོག་ཤིག་ཏུ་ལེན
9.217a
པར་བྱེད། འབྲས་ཆན་གཤེར་བ་ཡང་ལོགས་ཤིག་ཏུ་ལེན་པར་བྱེད་ཅིང ། ཇི་སྙེད་ལོངས་སྤྱད་པའི་ལྷག་མ་དེ་དག་སྐེམས་པར་བྱེད་དེ། དེ་དག་བསྐམས་ནས་འཇོག་པར་བྱེད་དོ། །གང་གི་ཚེ་རླུང་ལངས་པར་གྱུར་པ་འམ། ཡུལ་ངན་བྱུང་བ་དེའི་ཚེ་དེ་དག་ཆུས་སྦངས་ནས་མེས་བཙོས་ཏེ་ལོངས་སྤྱོད་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གསོག་འཇོག་བྱས་པའི་བཅའ་བ་དང ། བཟའ་བ་འཆོས་སམ། ཟོས་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །གསོག་འཇོག་བྱས་པ་ཞེས་བྱ་བ་ལ། གསོག་འཇོག་བྱས་པ་ནི་གཉིས་ཏེ། སྔ་མའི་ཟས་བྱིན་ལེན་བྱས་ཤིང་ཕྱི་མའི་ཟས་གསོག་འཇོག་བྱས་པ་འམ། ཕྱི་མའི་ཟས་བྱིན་ལེན་བྱེད་ཅིང་དུས་ཚོད་ལས་འདས་པར་གསོག་འཇོག་བྱས་པའོ། །བཅའ་བ་དང ། བཟའ་བ་ཞེས་བྱ་བ་ནི་སྔ་མ་བཞིན་ནོ། །ལྟུང་བར་བྱེད་དོ་ཞེས་བྱ་བའི་བར་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་གསོག་འཇོག་བྱས་པ་ལ་གསོག་འཇོག་བྱས་པར་འདུ་ཤེས་ན་ལྟུང་བྱེད་དོ་གསོག་འཇོག་མ་བྱས་པ་ལ་གསོག་འཇོག་བྱས་པར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །གོས་ཀྱི་གསོག་འཇོག་བྱེད་ན་ལྟུང་བྱེད་དོ། །ལྷུང་བཟེད་ཀྱི་གསོག་འཇོག་བྱེད་ན་ལྟུང་བྱེད་དོ། །བྱ་མ་བུམ་གསོག་འཇོག་བྱེད་ན་ལྟུང་བྱེད་དོ། །སྒོ་ལྕགས་གསོག་འཇོག་བྱེད་ན་ཉེས་བྱས་སོ། །ལྡེ་མིག་ཀྱོག་པོ་གསོག་འཇོག་བྱེད་ན་ཉེས་བྱས་སོ། །སྒོ་ལྕགས་གཟེ་མ་གསོག་འཇོག་བྱས་ན་ཉེས་བྱས་སོ། །ལྟུང་བྱེད་གསུམ་པའི་བཞི་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དུར་ཁྲོད་ཐམས་ཅད་པའི་དགེ་སློང་ནག་པོ་ཆེན་པོ་ལ་བརྟེན་ནས་བྱིན་ལེན་བྱ་བའི་བསླབ་པའི་གཞི་བཅའ་བ་མཛད་པ་དེའི་ཚེ་དགེ་སློང
9.217b
མ་དེ་དག་གིས་བྱིན་ལེན་ཇི་ལྟ་བུ་ཡིན་པ་དང ། བྱིན་ལེན་དུ་ཡོད་པ་མ་ཤེས་པར་གྱུར་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་ནི་ལྔ་སྟེ། ལྔ་གང་ཞེ་ན་ལུས་ཀྱིས་ལུས་དང་འབྲེལ་བར་དང་ལུས་ལ་ལུས་ཀྱིས་དང་ལུས་དང་འབྲེལ་བ་ལ་ལུས་དང་འབྲེལ་བ་དང ། ལུས་ལ་ལུས་ཀྱིས་འབྲེལ་བ་དང ། བཞག་པའི་ཆོ་ག་ཉིད་ནི་ལྔ་པ་ཡིན་ནོ། །སྨད་པ་ཞེས་བྱ་བའི་ཡུལ་ཡོད་དེ། དེ་དག་མ་ལ་ཡང་ཉལ་བར་བྱེད་པ་ཡིན་ནོ་ཞེས་བྱ་བ་ནས། དེར་ས་ལ་དཀྱིལ་འཁོར་བྱས་ཏེ་བྱིན་ལེན་བྱའོ། །འབྲས་བུ་དག་རྙེད་ན་དེ་དག་གིས་ཇི་ལྟར་བྱིན་ལེན་བྱ་བ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་ནི་ལྔ་སྟེ། གཞོང་པ་དང ། ཁྲི་དང ། ཁྲིའུ་དང ། ཐུ་བ་དང ། ལྷུང་བཟེད་ཀྱི་སྣོད་དེ་ལག་པས་རེག་པས་བྱིན་ལེན་བྱའོ། །བྱིན་ལེན་བྱས་པ་དེ་དག་འདྲིལ་ན་གལ་ཏེ་མ་ལངས་པར་ཟིན་ན་དེ་ཉིད་བྱིན་ལེན་བྱས་པ་ཡིན་ནོ། །གལ་ཏེ་རྒྱང་རིང་པོར་གྱུར་ན་ཡང་བྱིན་ལེན་བྱའོ། །དེ་དག་རུང་བར་བྱ་དགོས་ན་རུང་བ་དུ་ཡོད་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རུང་བ་ནི་ལྔ་སྟེ། ལྔ་གང་ཞེ་ན། མེས་རུང་བ་དང ། མཚོན་གྱིས་རུང་བ་དང ། ནེ་ཙོས་རུང་བ་དང ། སེན་མོས་རུང་བ་དང ། རྙིས་པས་རུང་བ་ཉིད་ནི་ལྔ་པའོ། །ཡང་རུང་བ་ནི་ལྔ་སྟེ། ཕྱུང་བ་དང ། གཤེགས་པ་དང ། བཅད་པ་དང ། ཕུག་པ་དང ། ས་བོན་གྱི་ཆོས་མེད་པ་ནི་ལྔ་སྟེ། སྔོན་པོ་ལ་ཡང་དེ་ཉིད་ཀྱིས་རུང་བར་བྱས་པ་ཡིན་ནོ། །ཕྱིས་དེ་དག་ལ་བྲམ་ཟེ་དང ། ཁྱིམ་བདག་རྣམས་འབྲིམ་པར་འདོད་པ་ན་མ་བྱིན་ནས་བཅོམ་ལྡན་འདས་ཀྱིས་བཀའ་སྩལ་པ། སྦྱིན་པར་བྱའོ། །དགེ་སློང་མ་དག་ལམ་དུ་ཞུགས་ནས་དགོན་པའི་གནས་ཤིག་ཏུ་འཁོད་པ་ན་ནགས་ཀྱི་སེང་གེ་དང ། སྤྲེའུ་དང ། དོམ་ལ་སོགས་པ་ལས་བྱིན་ལེན་བྱས་ཏེ། གང་དག་ལ་འཛིན་པ་མངོན་པ། དེ་དག་ལ་བྱིན་ལེན་ཡང་མངོན་ནོ། །དེ་དག་ལམ་དུ་ཞུགས་པ་ན་ཆུ་དང་སོ་ཤིང་གིས་ཕོངས་པར་གྱུར་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས
9.218a
སོ། །དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཆུ་དང་སོ་ཤིང་མ་གཏོགས་སོ་ཞེས་རྗེས་སུ་གནང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་འདི་སྐད་ཅེས་བཀའ་སྩལ་ཏོ། །ཡང་དགེ་སློང་མ་གང་ཆུ་དང་སོ་ཤིང་མ་གཏོགས་ཏེ་མ་བྱིན་པར་ཁའི་སྒོ་ནས་མིད་པའི་ཟས་ཟ་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པ་དག་གོ། །མ་བྱིན་པར་ཞེས་བྱ་བ་ནི་དེ་ལ་སུས་ཀྱང་མ་བྱིན་པར་གྱུར་པའོ། །ཁའི་སྒོ་ཞེས་བྱ་བ་ནི་ཁར་ཟ་བའོ། །བཅའ་བ་ཞེས་བྱ་བ་ནི་སྔ་མ་བཞིན་ནོ། །ཆུ་དང་སོ་ཤིང་མ་གཏོགས་པར་ཞེས་བྱ་བ་ནི་ཆུ་དང་སོ་ཤིང་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་བྱིན་ལེན་མ་བྱས་པ་ལ་བྱིན་ལེན་བྱས་པར་འདུ་ཤེས་ནས་འཆོས་སམ་ཟོས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་བྱིན་ལེན་བྱས་པ་ལ་བྱིན་ལེན་མ་བྱས་པར་འདུ་ཤེས་ནས་ཟོས་སམ་འཆོས་ན་ཉེས་བྱས་སོ་དེ་བཞིན་དུ་ཡིད་གཉིས་ཟ་ན་ཉེས་བྱས་སོ། ་་་་་་་་་།བར་སྡོམ་ལ། བྱིན་ལེན་ལྔ་དང་འབྲས་བུ་དང ། དེ་བཞིན་རུང་བ་ལྔ་དང་ནི། །སེང་གེ་སྤྲེའུ་དང་དོམ་དག་གི། །དེ་བཞིན་གཤེགས་པས་རྗེས་གནང་སྟེ། །བར་གྱི་སྡོམ་དུ་བསྡུས་པ་ཡིན། །ལྟུང་བྱེད་གསུམ་པའི་ལྔ་པ་རྫོགས་སྷོ།། ་་་་་་་་་་་་་།། གླེང་གཞི་ནི་ཀཽ་ཤམ་བི་ནའོ། །དེའི་ཚེ་རྒྱལ་དང་ཉེ་རྒྱལ་སྲོག་ཆགས་དང་བཅས་པའི་ཆུ་ལ་སྤྱོད་པ་དང ། དགེ་སློང་མ་དེ་རྣམས་ཀྱིས་སྨྲས་པ། ཕུ་ནུ་མོ་དག་སྲོག་ཆགས་དང་བཅས་པའི་ཆུ་ལ་སྤྱོད་པར་མ་བྱེད་ཅིག་།དེ་དག་གིས་འདི་སྐད་ཅེས་ཅི་ཁོ་མོ་ཅག་ལ་བགྲངས་ཏེ་གཏད་དམ། ཤར་གྱི་རྒྱ་མཚོ་ཆེན་པོར་འདོང་ན་ཅི་ཉེས། ལྷོ་དང ། ནུབ་དང ། བྱང་གི་རྒྱ་མཚོ་ཆེན་པོར་འདོང་ན་ཅི་ཉེས་ཞེས་སྨྲས་པ་དང ། དོན་ཉུང
9.218b
བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་རྒྱལ་དང ། ཉེ་རྒྱལ་ལོ། །སྲོག་ཆགས་དང་བཅས་པའི་ཆུ་ལ་ཞེས་བྱ་བ་ལ། སྲོག་ཆགས་ནི་གཉིས་ཏེ། གང་དག་མིག་ལམ་དུ་སྣང་བ་དང ། གང་དག་ཆུ་ཚགས་ཀྱིས་ཟིན་པར་འགྱུར་བའོ། །སྤྱོད་ན་ཞེས་བྱ་བ་ལ་སྤྱོད་པ་ནི་གཉིས་ཏེ། ནང་གི་དང་ཕྱིའི་འོ། །ཕྱིའི་ནི་ཁྲུས་བྱེད་པ་དང་ཆག་ཆག་དང ། གོས་ལ་སོགས་པའི་བཀྲུ་བཤལ་དང ། སྲ་བ་དང ། འཚེད་པར་བྱེད་པ་དང ། བྱེད་དུ་འཇུག་པ་སྟེ། འདི་ནི་ཕྱིའི་སྤྱོད་པ་ཞེས་བྱའོ། །སོ་ཤིང་བཅའ་བ་དང ། བཏུང་བ་ཡང་ངོ ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པའི་ཆུར་འདུ་ཤེས་ནས་གཉིས་པོ་གང་ཡང་རུང་བར་སྤྱོད་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྲོག་ཆགས་མེད་པའི་ཆུ་ལ་སྲོག་ཆགས་དང་བཅས་པར་འདུ་ཤེས་ནས་གཉིས་པོ་གང་ཡང་རུང་བར་སྤྱོད་པར་བྱེད་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དེ་བཞིན་དུ་སྲོག་ཆགས་དང་བཅས་པའི་ཡལ་ག་དང ། ལོ་མ་དང ། འབྲས་བུ་ལ་སོགས་པ་ལ་ཡང་བརྗོད་པར་བྱའོ། །ལྟུང་བྱེད་གསུམ་པའི་དྲུག་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྤོས་འཚོང་གི་ཁྱེའུ་ཆུང་མ་བླངས་ནས་རིང་པོར་མ་ལོན་པ་ཞིག་ཡོད་པ་དེ་ནུབ་མོ་བསྲུང་བའི་ཕྱིར་ཚོང་ཁང་དུ་འདུག་ནས། དེ་ནང་པར་གྱི་དུས་སུ་ཚོང་ཁང་གི་སྒོ་བཅད་དེ་ཁྱིམ་དུ་ཆས་པ་དེ་སྦོམ་དགའ་མོ་སྤྱོད་ཡུལ་དུ་ཞུགས་པས་མཐོང་ངོ ། །མཐོང་ནས་ཀྱང་ཨེ་མའོ་ཁྱེའུ་དེ་ནི་འདོད་ཆགས་ཀྱི་སེམས་ཀྱིས་ཁྱིམ་དུ་སོང་ངོ་སྙམ་དུ་རིག་ནས་དེ་རིངས་པར་སོང་སྟེ་ཚོང་པའི་ཁྱེའུ་དེའི་ཁྱིམ་དུ་ཞུགས་སྟེ་སྟན་ལ་འདུག་ནས་བསྡད་དོ། །དེ་ནས་ཚོང་པའི་ཁྱེའུ་དེ་ཁྱིམ་དུ
9.219a
འོངས་ནས་ཆུང་མ་ལ་བལྟ་བར་བརྩམས་པ་དང ། དེས་འདི་སྐད་ཅེས་སྨྲས་སོ། །རྗེའི་སྲས་འཕགས་མ་སྡོད་ཅིང་བཞུགས་སོ། །དེ་ནས་ཁྱེའུ་དེས་སྦོམ་དགའ་མོ་མཐོང་ནས་ཤཱཀྱའི་སྲས་ཀྱི་དགེ་སྦྱོང་མ་རྣམས་ཀྱིས་དགེ་སྦྱོང་གི་ཚུལ་དང ། ཚངས་པའི་ཚུལ་ཚིག་པ་ཡིན་ཏེ། གང་གི་ཕྱིར་འདི་ལྟར་རང་གི་ཆུང་མ་དང་ལྷན་ཅིག་དབེན་པ་ན་འདུག་པའི་སྐབས་ཀྱང་མི་རྙེད་དོ། །ཞེས་འཕྱ་བར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ་སྟན་ལ་འདུག་པར་བྱེད་ན་ལྟུང་བྱེད་དོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཉལ་པོ་བྱེད་པར་ཤོམ་པའི་ཞེས་བྱ་བ་ནི་བུད་མེད་ནི་སྐྱེས་པའི་ཉལ་པོ་བྱ་བ་ཡིན་ནོ། །ཁྱིམ་དུ་ཞེས་བྱ་བ་ནི་ཁྱིམ་བདག་རྣམས་ཀྱི་ཁྱིམ་དུའོ། །ཕྱིས་གནོན་བྱས་ཏེ་ཞེས་བྱ་བ་ནི་འཕྲལ་ལའོ། །འདུག་པར་བྱེད་ན་ཞེས་བྱ་བ་ནི་འདུག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཅི་ཙམ་ཅུང་ཟད་ཉལ་པོ་བྱེད་པར་ཤོམ་པའི་ཁྱིམ་རྣམས་སུ་མཐུས་གནན་ཏེ་སྟན་ལ་འདུག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་བདུན་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ཆོས་གོས་དང་ལྟུང་བཟེད་ཐོགས་ཏེ་སྤྱོད་ཡུལ་དུ་ཞུགས་པ་དང ། སྦོམ་དགའ་མོས་ཡང་སྦོས་འཚོང་གི་ཁྱེའུ་དེ་ཁྱིམ་དུ་འགྲོ་བ་མཐོང་ངོ ། །དེ་ནས་སྦོམ་དགའ་མོས་བསམས་པ། བཅོམ་ལྡན་འདས་ཀྱིས་འདུག་པའི་བསླབ་པའི་གཞི་བཅའ་བ་མཛད་ཀྱིས་མ་ལ་བདག་གིས་སྒོ་རྒྱབ་ཏུ་འགྲེང་ལ་བསྡད་དོ་སྙམ་ནས་སྤོས་འཚོང་གི་ཁྱེའུ་ཡིས་མཐོང་སྟེ་སྨོད་པར་བྱེད་པ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབས
9.219b
ཡོད་པ་ན་འགྲེང་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབས་ཡོད་པ་ན་འགྲེང་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་སྐྲག་པར་གྱུར་པ་འམ། བར་ཆད་ཡོད་པ་ཡིན་ན་ལྟུང་བ་མེད་དོ། །ལྟུང་བྱེད་གསུམ་པའི་བརྒྱད་པ་རྫོགས་སྷོ།། ་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་བཅོམ་ལྡན་འདས་ཀྱིས་ཀུན་དགའ་བོ་ལ་བརྟེན་ནས་གཅེར་བུ་པ་དང ། གཅེར་བུ་མའི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་རྣམས་རང་གི་ལག་གིས་བཟའ་བ་དང ། བཅའ་བ་གཅེར་བུ་པ་དང ། གཅེར་བུ་མ་རྣམས་ལ་སྦྱིན་པར་བྱེད་པ་དང ། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་གི་ལག་གིས་བཟའ་བ་དང ། བཅའ་བ་གཅེར་བུ་པ་འམ། གཅེར་བུ་མ་འམ། ཀུན་ཏུ་རྒྱུ་འམ། ཀུན་ཏུ་རྒྱུ་མོ་ལ་སྦྱིན་པར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །གཅེར་བུ་པ་ཞེས་བྱ་བ་ནི་གོས་མེད་པའོ། །གཅེར་བུ་མ་ཞེས་བྱ་བ་ཡང་གོས་མེད་པའོ། །དེ་བཞིན་དུ་ཀུན་ཏུ་རྒྱུ་ཞེས་བྱ་བ་ནི་གྲངས་ཅན་ནོ། །ཀུན་དུ་རྒྱུ་མོ་ཡང་དེ་བཞིན་ནོ། །རང་གི་ལག་གིས་ཞེས་བྱ་བ་ནི་ལག་པས་ལག་པར་རོ། །བཟའ་བ་དང་བཅའ་བ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་གི་ལག་གིས་བཟའ་བ་དང ། བཅའ་བ་གཅེར་བུ་པ་འམ་ཞེས་བྱ་བ་ནས། ཀུན་ཏུ་རྒྱུ་མོའི་བར་ལ་སྦྱིན་པ་བྱེད་ན་ལྟུང་བྱེད་དོ། །གལ་ཏེ་ཕ་དང་མ་ཡིན་ན་ལྟུང་བ་མེད་དོ། །གལ་ཏེ་ལྟ་བར་སོང་བ་ཞིག་དབྲལ་བར་འདོད་ན་ལྟུང་བ་མེད་དོ། །གལ་ཏེ་སློང་ན་དེ་ལ་འདི་སྐད་ཅེས་སློང་ཕོར་ས་ལ་ཞོག་ཤིག་ཅེས་བརྗོད་པར་བྱའོ། ་གལ་ཏེ་བཞག་ན་སྦྱིན་པར་བྱའོ། །འོན་ཏེ་མ་བཞག་ན
9.220a
སྦྱིན་པར་བྱའོ། །ལྟུང་བྱེད་གསུམ་པའི་དགུ་པ་རྫོགས་སྷོ།། ་་་་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལས་བརྟེན་ནས་དམག་ཤོམ་པའི་བསླབ་པའི་གཞི་བཅའ་བ་མཛད་པ་དང ། དེ་ནས་བཅུ་གཉིས་སྡེ་དག་དམག་ཤོམ་པ་ལ་ལྟ་བའི་ཕྱིར་དོང་བ་དང་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དམག་ཤོམ་པ་ལ་བལྟ་བའི་ཕྱིར་འགྲོ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཤོམ་པ་ཞེས་བྱ་བ་ནི་དམག་ལ་མངོན་པར་དགའ་བའོ། །དམག་ཅེས་བྱ་བ་ལ་དམག་ནི་བཞི་སྟེ། དམག་ཡན་ལག་གཅིག་པ་ཡང་ཡོད། དམག་ཡན་ལག་གཉིས་པ་དང ། ཡན་ལག་གསུམ་པ་དང ། ཡན་ལག་བཞི་པ་ཡང་ཡོད་དོ། །དམག་ཡན་ལག་གཅིག་པ་ནི་གླང་པོ་ཆེ་བའི་འོ། །ཡན་ལག་གཉིས་པ་ནི་གླང་པོ་ཆེ་བ་དང་རྟ་པའི་འོ། །ཡན་ལག་གསུམ་པ་ནི་གླང་པོ་ཆེ་བ་དང ། རྟ་པ་དང ། ཤིང་རྟའི་འོ། །ཡན་ལག་བཞི་པ་ནི་གླང་པོ་ཆེ་པ་དང ། རྟ་པ་དང ། ཤིང་རྟ་པ་དང ། དཔུང་བུ་ཆུང་གི་དམག་གོ། །བལྟ་བའི་ཕྱིར་ཞེས་བྱ་བ་ནི་བལྟ་བའི་ཕྱིར་རོ། །འགྲོ་ན་ཞེས་བྱ་བ་ནི་འགྲོ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དམག་ཤོམ་པ་བལྟ་བའི་ཕྱིར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དབྱར་ཁང་ལམ་ཀ་ན་འདུག་ན་ལྟུང་བ་མེད་དོ། །ལྟུང་བྱེད་གསུམ་པའི་བཅུ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་རྒྱལ་པོ་གསལ་རྒྱལ་ལ་རི་འོར་པ་དག་ལོག་པ་དེའི་ཚེ་ཁྱིམ་བདག་མགོན་མེད་ཟས་སྦྱིན་ལ་སོགས་ཏེ་དགེ་བསྙེན་རྣམས་ཀྱང་རྒྱལ
9.220b
པོས་སྤྲིང་ནས་དེར་དོང་ངོ ། །དེའི་འོག་ཏུ་དགེ་འདུན་ལ་གསོལ་བ་བཏབ་ནས་དྲུག་སྡེ་རྣམས་དོང་ངོ ། །དེའི་ཚེ་དྲུག་སྡེ་དེ་རྣམས་ལ་ཞག་གཉིས་ཀྱི་མཐའི་བསླབ་པའི་གཞི་བཅའ་བ་མཛད་དོ། །དེ་ནས་དུས་གཞན་ཞིག་ན་བཅུ་གཉིས་སྡེ་རྣམས་དམག་ཤོམ་པར་ཞག་གཉིས་ཀྱི་མཐར་གནས་པར་བྱེད་དོ། །གང་གི་ཚེ་དེ་དག་མངོན་དུ་ལྷགས་པ་དེའི་ཚེ་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །དགའ་མོ་ཉེ་དགའ་མོ། སྦོམ་དགའ་མོ་དག་འོངས་པ་ལེགས་སོ་འོངས་པ་ལེགས་སོ། །ཁྱེད་ཅག་གང་ནས་འདིར་འོངས། གང་དུ་གནས། དེ་དག་གིས་འདི་སྐད་ཅེས་སྨྲས་སོ། །ཁོ་མོ་ཅག་དམག་ཤོམ་པ་ལ་ཆོས་འཆད་དུ་དོང་སྟེ་དེ་ཉིད་དུ་གནས་སོ། །དེ་ནས་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་ཞག་གཉིས་ཀྱི་མཐའི་བསླབ་པའི་གཞི་བཅའ་བ་མ་མཛད་དམ། དེ་རྣམས་ཀྱིས་འདི་སྐད་ཅེས་དགེ་སློང་རྣམས་ལ་བཅའ་བ་མཛད་ཀྱིས། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མས་དམག་ཤོམ་པ་ལ་བལྟ་དགོས་པའི་རྐྱེན་དེ་ལྟ་བུ་བྱུང་ན་ཞག་གཉིས་ཀྱི་མཐར་དམག་དེའི་ནང་དུ་དགེ་སློང་མ་དེས་གནས་པར་བྱའོ། །དེ་ལས་ལྷག་པར་གནས་ན་ལྟུང་བྱེད་དོ། །དགེ་སློང་མས་ཞེས་བྱ་བ་ནི་བཅུ་གཉིས་སྡེ་དག་གོ། །དེ་ལྟ་བུའི་རྐྱེན་བྱུང་ན་ཞེས་བྱ་བ་ནི་དེ་ལྟ་བུའི་རྐྱེན་བྱུང་བ་མ་གཏོགས་པའོ། །ཤོམ་པ་ཞེས་བྱ་བ་ནི་དམགས་ལ་མངོན་པར་དགའ་བའོ། །དམག་ཅེས་བྱ་བ་ནི་ཞེས་བྱ་བ་ནས་རྣམ་པ་བཞིའོ་ཞེས་བྱ་བའི་བར་རོ། །ཞག་གཉིས་ཀྱི་མཐར་ཞེས་བྱ་བ་ནི་ཉིན་ཞག་གཉིས་སུའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཞག་གཉིས་ལས་ལྷག་པར་དམག་གི་ནང་དུ་གནས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་བཅུ་གཅིག་པ་རྫོགས་སྷོ།། ་་་་་་་་་།། གླེང་གཞི་ནི
9.221a
མཉན་ཡོད་ནའོ། །གང་གི་ཚེ་ཡང་ཁྱིམ་བདག་མགོན་མེད་ཟས་སྦྱིན་ལ་སྤྲིང་ནས་ཞེས་བྱ་བ་ནས། ཞག་གཉིས་ཀྱི་མཐར་ཐུག་པར་དམག་དེའི་ནང་དུ་གནས་སོ་ཞེས་བྱ་བའི་བར་རོ། །དེའི་ཚེ་བཅོམ་ལྡན་འདས་ཀྱིས་དེ་རྣམས་ལ་གཡུལ་བཤམས་པ་དང ། རྒྱལ་མཚན་གྱི་མཆོག་གི་བསླབ་པའི་གཞི་བཅའ་བ་མཛད་དོ། །དེ་ནས་བཅུ་གཉིས་སྡེ་དེ་དག་ཡང་གཡུལ་བཤམས་པ་དང ། རྒྱལ་མཚན་གྱི་མཆོག་དང ། དཔུང་གི་མཆོག་གི་ནང་དུ་དོང་བ་དང ། དགེ་སློང་མ་དེ་རྣམས་ཀྱིས་སྨྲས་པ། ཀྱེ་ཕུ་ནུ་མོ་དག་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་བཅའ་བ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་གལ་ཏེ་དགེ་སློང་མ་དམག་དེའི་ནང་དུ་ཞག་གཉིས་གནས་པ་ན་གཡུལ་བཤམས་པ་དང ། རྒྱལ་མཚན་གྱི་མཆོག་དང ། དཔུང་གི་མཆོག་དང ། དཔུང་བཀོད་པའི་ཚོགས་ལ་ལྟ་བ་སོ་སོར་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །བཀོད་པའི་ཚོགས་ལ་བལྟ་བ་ཞེས་བྱ་བ་ལ། བཀོད་པ་ཞེས་བྱ་བ་ནི་ཤིང་རྟའི་དབྱིབས་ལྟ་བུ་དང ། ནམ་མཁའ་ལྡིང་གི་འདབ་མའི་དབྱིབས་ལྟ་བུ་དང ། འབྲུའི་ཁ་ལྟ་བུ་དང ། པད་མའི་དབྱིབས་ལྟ་བུ་དང ། ཟླ་བ་ཁམ་པའི་དབྱིབས་ལྟ་བུའོ། །ཚོགས་ཞེས་བྱ་བ་ནི་དཔུང་གི་མཆོག་དག་གོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཡུལ་བཤམས་པའི་ནང་དུ་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་བཅུ་གཉིས་པ་རྫོགས་སྷོ།། ་་་་་་་་་་་་།། སྡོམ་ནི། རྡེག་པ་དང་ནི་ཐལ་མོ་དང ། །འཁྲུ་དང་སྦེད་དང་བསོད་པ་སློང ། །གནས་ངན་ལེན་འཆབ་ཁྱིམ་དང་མེ། །འདུན་པ་དང་ནི
9.221b
ནུབ་གཉིས་དང ། །བར་ཆད་དང་ནི་ཤེས་བཞིན་དང ། །དགེ་ཚུལ་མ་གཉིས་ཁ་དོག་བསྒྱུར། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་ཐབ་མོ་དང་མཚང་འདྲུ་བར་བྱེད་དོ། །བུད་མེད་ནི་རང་བཞིན་གྱིས་ཁྲོ་བ་ཡིན་པས་དེ་རང་བཞིན་གྱིས་ཁྲོས་པས་ཁྲོས་འཁྲུགས་རྔམ་པར་གྱུར་ནས་དགེ་སློང་མ་རྣམས་ལ་ལྟག་དབྱུག་དང ། ཐལ་ལྕག་གིས་བརྡེགས་པ་དང ། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་མ་ལ་རྡེག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཁྲོས་ཞེས་བྱ་བ་ནི་ཀུན་ནས་དཀྲིས་པའོ། །འཁྲུགས་རྔམ་པར་གྱུར་ཏེ་ཞེས་བྱ་བ་ནི་ལྷག་པར་ཞེན་ནས་སོ། །ཡིད་མ་རངས་ནས་ཞེས་བྱ་བ་ནི་ཡིད་མི་བདེ་བ་སྐྱེས་པའོ། །དགེ་སློང་མ་ལ་ཞེས་བྱ་བ་ནི་ཆོས་འདི་པ་ལའོ། །རྡེག་ན་ཞེས་བྱ་བ་ནི་སོར་མོ་ལྔས་རྡེག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཁྲོས་ནས་དགེ་སློང་མ་རྣམས་ལ་སོར་མོ་གཅིག་གིས་བརྡེགས་ན་ལྟུང་བྱེད་དུ་འགྱུར་རོ། །དེ་བཞིན་སོར་མོ་ལྔས་བརྡེགས་ན་ལྟུང་བྱེད་ལྔའོ། །དེ་བཞིན་དུ་ལག་པ་དང ། མཛུབ་མོ་དང ། མགོ་བོ་དང ། ལྟག་པ་དང ། ལུས་དང ། གྲུ་མོ་དང ། བརླ་དང ། བྱིན་པ་དང ། རྐང་པ་དང ། རྐང་པའི་མཐེ་བོས་བརྡེགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་དབྱུག་པ་དང ། གསེག་མ་དང ། བོད་པ་ལ་སོགས་པས་བརྡེགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ཕྱགས་མས་བརྡེགས་ན་ཕྱགས་མའི་ཉག་མ་ཇི་སྙེད་ཕོག་པ་དེ་སྙེད་ཀྱི་ལྟུང་བྱེད་དོ། །ཇི་སྙེད་མ་ཕོག་པ་དེ་སྙེད་ནི་ཉེས་བྱས་སོ། །དེ་བཞིན་དུ་མོན་སྲན་སྡེའུའི་སྤར་བས་བརྡེགས་ན་མོན་སྲན་སྡེའུའི་འབྲུ་ཇི་སྙེད་ལུས་ལ་ཕོག་པ་དེ་སྙེད་ཀྱི་ལྟུང་བྱེད་དོ། །ཇི་སྙེད་མ་ཕོག་པ་དེ་སྙེད་ཀྱི་ཉེས་བྱས་སོ། །
9.222a
ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །ལྟུང་བྱེད་བཞི་པའི་དང་པོ་རྫོགས་སྷོ།། ་་་་་་་་་་གླེང་གཞི་ནི་མཉན་ཡོད་ནའོ། །བྱུང་བ་སྔ་མ་དེ་ཉིད་ལ་ཁྱད་པར་ནི་འདི་ཡོད་དེ་དགེ་སློང་མ་དེ་རྣམས་ཁོ་ན་ལ་ཞེས་བྱ་བ་ནས་ཐལ་མོ་གཟས་པ་དང ། ཞེས་བྱ་བའི་བར་རོ། །ཇི་ཙམ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་མ་ལ་རྡེག་པར་གཟས་ན་ཐ་ན་ཐལ་མོས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །གཞན་ནི་སྔ་མ་བཞིན་ནོ། །ཁྱད་པར་ནི་འདི་ཡོད་དེ། གཟས་ན་ཞེས་བྱ་བ་ནི་གདེངས་ནས་མ་བརྒྱབ་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེ་ཁོ་ན་བཞིན་དུ་ལྟུང་བའི་རིམ་པ་བརྗོད་པར་བྱ་སྟེ། དགེ་སློང་མས་ཇི་ཙམ་ཅུང་ཟད་དགེ་སློང་མ་ལ་གཟས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་གཉིས་པ་རྫོགས་སྷོ།། ་་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་དགུ་པ། གླེང་གཞི་ནི་མཉན་ཡོད་ནའོ། །དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབས་བགོས་ལྷུང་བཟེད་དང ། ཆོས་གོས་བླངས་ནས་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་ཏེ། མཉན་ཡོད་དུ་བསོད་སྙོམས་སྤྱད་ནས་སྦེད་མའི་ཁྱིམ་གང་ན་བ་དེར་སོང་བ་དང ། སྦེད་མས་འཆར་ཀ་རྒྱང་རིང་པོ་ཁོ་ན་ནས་འོང་བ་མཐོང་ངོ ། །མཐོང་ནས་ཀྱང་འདི་སྐད་ཅེས་སྨྲས་སོ། །འཆར་ཀ་རབ་ཏུ་བྱུང་ན་ད་བདག་གིས་ཅི་དག་བགྱི། དེ་ནས་འཆར་ཀས་སྦེད་མ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔས་བཙུན་མོ་དྲུག་ཁྲི་སྤངས་ཏེ་རབ་ཏུ་བྱུང་ན་ཁྱོད་ཀྱིས་དེ་དག་གི་རྐང་པ་འཁྲུ་བར་ཡང་མི་ལོན་ན་དེ་དག་ཅི་བྱེད། དེས་འདི་སྐད་ཅེས་སྨྲས་སོ། །བདག་ཀྱང་རབ་ཏུ་བྱུང་ལགས་གྲང ། དེ་ནས་འཆར་ཀས་སྦེད་མ་ལ་འདི་སྐད་ཅེས
9.222b
སྨྲས་སོ། །ཁྱིམ་གྱི་བྱ་བ་དག་ལེགས་པར་སྦོས་ཤིག་།དེས་ལེགས་པར་སྦས་ནས་འཆར་ཀ་དང་རྒྱལ་པོའི་ཁབ་ཏུ་སོང་སྟེ་དབྱར་གནས་སོ། །དེ་ནས་སྦེད་མ་རྒྱལ་བྱེད་ཀྱི་ཚལ་དུ་སོང་བ་དང་ཉེ་དགས་འདི་སྐད་ཅེས་སྨྲས་སོ། །དགོས་པ་ཅི་ཞིག་ལ་འོངས། དེ་ནས་སྦེད་མས་འདི་སྐད་ཅེས་སྨྲས་སོ། །རབ་ཏུ་བྱུང་ངོ ། །ཉེ་དགས་འདི་སྐད་ཅེས་སྨྲས་སོ། །འཆར་ཀ་ནི་ཡུལ་ཀོ་ས་ལའི་སྤུ་གྲི་རྟུལ་བས་ཡུལ་མ་ག་དྷར་སྤུ་གྲིའི་ཕྱིར་སོང་ངོ ། །དེ་ནས་སྦེད་མ་དེ་བདག་རབ་ཏུ་ཡང་མ་བྱུང་ལ་ཁྱིམ་ན་གནས་པར་ཡང་མ་གྱུར་ཏོ་སྙམ་དུ་སེམས་ཁོངས་སུ་ཆུད་ཅིང་འདུག་པ་དང ། དགེ་སློང་མ་འཆག་པ་གཞན་ཞིག་གིས་སྦེད་མ་སྐྱེ་དགུའི་བདག་མོ་ལ་གཏད་ནས་ཞེས་བྱ་བ་ནས། རབ་ཏུ་ཕྱུང་ངོ་ཞེས་བྱ་བའི་བར་རོ། །དེ་ནས་འཆར་ཀ་དབྱར་གྱི་ཟླ་བ་གསུམ་པོ་དག་འདས་ནས་མཉན་ཡོད་དུ་ཕྱིན་པ་དང ། ་སྦེད་མས་འཆར་ཀ་འོངས་སོ་ཞེས་ཐོས་ནས། དེ་ནས་དགེ་སློང་མ་སྦེད་མ་འཆར་ཀ་གང་ན་བ་དེར་སོང་སྟེ་སོན་པ་དང་གནས་ཁང་གི་སྒོ་ལ་བརྡེགས་སོ། །དེ་ནས་འཆར་ཀས་འདི་སུ་ཞིག་ཅེས་དྲིས་སོ། །དེས་འདི་སྐད་ཅེས་སྨྲས་སོ། །བདག་སྦེད་མ་ལགས་སོ། །དེ་ནས་འཆར་ཀས་འདི་སྐད་ཅེས་སྨྲས་སོ། །ཁྱིམ་བདག་གི་ཆུང་མ་ནང་དུ་ཞུགས་ཤིག་།དེས་འདི་སྐད་ཅེས་སྨྲས་སོ། །བདག་ཁྱིམ་བདག་གི་མཆིས་བྲང་མ་ལགས་ཏེ། བདག་རབ་ཏུ་བྱུང་བ་ལགས་སོ། །དེས་ཁྱོད་སུས་གནང་ན་འདི་ལྟར་ཁྱེད་རབ་ཏུ་བྱུང་ཞེས་སྤྱོས་པ་དང ། དེ་ནས་སྦེད་མས་འཆར་ཀ་ལ་བཟོད་པ་གསོལ་ཏོ། །དེ་ནས་དེའི་འོག་ཏུ་འཆར་ཀས་སྦེད་མ་ལ་ཆོས་བཤད་པར་བརྩམས་པ་དང ། ཇི་ཙམ་ན་ཀུན་དུ་ཆགས་པར་གྱུར་ཏོ། །བཅོམ་ལྡན་འདས་ཀྱིས་བུད་མེད་མཁས་པའི་རང་བཞིན་ཅན་ནི་སྐྱེས་པ་ཆགས་པ་ཤེས་སོ་ཞེས་གསུངས་པ་ཡིན་པས་ཇི་ཙམ་ན་འཕྲིགས་ནས་གཅི་བའི་བརྡའ་བྱས་ཏེ་བྲོས་སོ། །འཆར་ཀ་ཡང་རྐང་པའི་སྒྲ་ལ་མཁས་པ་ཡིན་པས་རིག་ནས་ཕྱི་བཞིན་བརྒྱུགས་པ་དང ། དེའི་བརླ་ལ་རེག་པས་སྨད་གཡོགས་གཤེར་ཏོ། །སྦེད་མས
9.223a
འདོད་ཆགས་དང་བྲལ་བར་རིག་ནས་འཆར་ཀ་གང་ན་བ་དེར་སོང་སྟེ་ཕྱིན་ནས་སྦེད་མས་འཆར་ཀ་ལ་འདི་སྐད་ཅེས་སྨྲས་སོ། །འཕགས་པ་འཆར་ཀ་གལ་ཏེ་བདག་གིས་དེ་ལྟར་མ་བགྱིས་ན་ངེས་པར་འོ་སྐོལ་གཉིས་ཀ་དགེ་སྦྱོང་གི་ཚུལ་ལས་ཉམས་པར་འགྱུར་རོ། །ཞེས་དེ་སྐད་སྨྲས་པ་དང ། འཆར་ཀས་སྦེད་མ་ལ་འདི་སྐད་ཅེས་སྨྲས་སོ། །སྦེད་མ་ལེགས་སོ་ལེགས་སོ། །བཅོམ་ལྡན་འདས་ཀྱིས་གང་བདག་བསྲུང་བ་དེ་ནི་གཞན་སྲུང་བ་ཡིན་ལ་གང་གཞན་སྲུང་བ་དེ་ནི་བདག་སྲུང་བ་ཡིན་ནོ་ཞེས་གསུངས་པ་ནི་ཐོག་ཏུ་བབ་སྟེ་འདི་ལྟར་ཡང་སྦེད་མ་ཁྱོད་ཀྱིས་རང་ཡང་བསྲུངས། ཁོ་བོ་ཡང་བསྲུངས་སོ། །དེ་ནས་སྦེད་མས་འཆར་ཀ་ལ་འདི་སྐད་ཅེས་སྨྲས་སོ། །ཁྱོད་ལམ་གྱིས་དུབ་སྟེ་བྱོན་གྱིས་གོས་དག་བདག་ལ་གཏོད་ཅིག་བཀྲུའོ། །དེ་ནས་བྱིན་པ་དང་སྦེད་མས་མཐོང་ནས་འགྱོད་པ་སྐྱེས་ཏེ་བདག་གིས་ནི་བུད་མེད་ཀྱི་མི་བརྟན་པ་བྱས། བདག་གིས་ནི་དགེ་སྦྱོང་གི་མི་བརྟན་པ་དང ། བྲམ་ཟེའི་མི་བརྟན་པ་བྱས་ཏེ། བདག་གི་ལུས་ཀྱི་ཡན་ལག་དེ་འདི་ལྟ་སྟེ། འཆར་ཀས་མ་མཐོང་བ་འམ། ་མ་རེག་པ་འམ། སུས་ཀྱང་མི་ཤེས་པ་དེ་གང་ཞིག་ཡོད་ཅེས་དེ་ལྟར་སྨྲེ་སྔགས་མང་དུ་བཏོན་ནས་མི་གཙང་བ་རྨའི་ནང་དུ་བླུགས་སོ། །དེ་ནས་སྦེད་མས་འཆར་ཀའི་གོས་དག་བཀྲུས་ནས་དགེ་སློང་མའི་དབྱར་ཁང་གང་ན་བ་དེར་སོང་ངོ ། །དེ་ནས་སྦེད་མ་དུས་གཞན་ཞིག་ན་སེམས་ཅན་དང་ལྡན་པར་གྱུར་ཏོ། །དེ་ནས་དགེ་སློང་མ་རྣམས་ཀྱིས་སྦེད་མའི་ལུས་ཀྱི་གྱུར་པ་དག་མཐོང་ནས་ཞེས་བྱ་བ་ནས་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་མ་དག་དགེ་སློང་ཉེ་དུ་མ་ཡིན་པའི་གོས་དག་འཁྲུ་བ་དང ། ཁ་དོག་སྒྱུར་བ་དང ། འཆག་པ་ལས་གྱུར་ཏོ་སྙམ་མོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་ཉེ་དུ་མ་ཡིན་པའི་གོས་རྙིང་པ་འཁྲུ
9.223b
འམ། ཁ་དོག་སྒྱུར་རམ་འཆག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦེད་མ་འམ་ཉེ་དུ་མ་ཡིན་པ་ཞེས་བྱ་བ་ནི་མ་མེས་དང ། ཕ་མེས་བདུན་རྒྱུད་ཚུན་ཆད་ནི་ཉེ་དུ་ཡིན་ནོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །རྙིང་པ་དག་ཅེས་བྱ་བ་ནི་དུས་ཚིགས་གསུམ་པོ་དགུན་དང ། དཔྱིད་དང ། དབྱར་གང་ཡང་རུང་བའི་དུས་ཚིགས་སུ་ལོངས་སྤྱད་པར་གྱུར་པའོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །འཁྲུ་འམ་ཞེས་བྱ་བ་ནི་ཐ་ན་ཆུ་ལན་གཅིག་ལྡུགས་པ་ཡང་ངོ ། །ཁ་བསྒྱུར་རམ་ཞེས་བྱ་བ་ནི་ཐ་ན་ཚོན་གྱི་ནང་དུ་ལན་ཅིག་འཇུག་པ་ཡང་ངོ ། །འཆག་ན་ཞེས་བྱ་བ་ནི་ཐ་ན་ལག་མཐིལ་གྱིས་ལན་ཅིག་རྡེབས་ན་ཡང་ངོ ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཉེ་དུ་མ་ཡིན་པའི་འདུ་ཤེས་ཀྱིས་དགེ་སློང་ཉེ་དུ་མ་ཡིན་པའི་འཁྲུ་ན་ལྟུང་བྱེད་དོ། །ཁ་སྒྱུར་ན་ལྟུང་བྱེད་དོ། །འཆག་ན་ལྟུང་བྱེད་དོ། །དེ་བཞིན་དུ་ཉེ་དུ་མ་ཡིན་པ་ལ་ཡིད་གཉིས་ཀྱིས་ཁྲུ་ན་ལྟུང་བྱེད་དོ། །ཁ་སྒྱུར་ན་ལྟུང་བྱེད་དོ། །འཆག་ན་ལྟུང་བྱེད་དོ། །དགེ་སློང་མས་དགེ་སློང་ཉེ་དུ་ལ་ཉེ་དུ་མ་ཡིན་པའི་འདུ་ཤེས་ཀྱིས་འཁྲུ་ན་ཉེས་བྱས་སོ། །ཁ་སྒྱུར་ན་ཉེས་བྱས་སོ། །འཆག་ན་ཉེས་བྱས་སོ། །དེ་བཞིན་དུ་ཉེ་དུ་ལ་ཡིད་གཉིས་ཀྱིས་འཁྲུ་ན་ཉེས་བྱས་སོ། །ཁ་སྒྱུར་ན་ཉེས་བྱས་སོ། །འཆག་ན་ཉེས་བྱས་སོ། །ཕ་དང་བུ་དང་མིང་པོ་དག་གི་ལ་ལྟུང་བ་མེད་དོ། །ལྟུང་བྱེད་བཞི་པའི་གསུམ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅུ་བདུན་སྡེ་རྣམས་ལ་བརྟེན་ནས་བཅོམ་ལྡན་འདས་ཀྱིས་དགེ་སློང་རྣམས་ལ་སྦེད་པའི་བསླབ་པའི་གཞི་བཅའ་བ་མཛད་པ་དང་དེ་ནས་བཅུ་གཉིས་སྡེ་རྣམས་རྒོད་པའི་བསམ་པས་དགེ་སློང་མ་རྣམས་ཀྱི་གོས་དག་སྦེད་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་གི་འམ། དགེ་སློང་མའི་འམ། དགེ་སློབ་མའི་འམ། དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། ཆོས་གོས་སམ། དྲ་བ་འམ། ཚཝ་ཁུག་གམ། སྐ་རགས་སྦེད་དམ། ་སྦེད་དུ་འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ
9.224a
གཉིས་སྡེ་དག་གོ། །དགེ་སློང་ངམ་ཞེས་བྱ་བ་ནི་ཆོས་འདི་པའོ། །དགེ་སློང་མ་འམ་ཞེས་བྱ་བ་ནི་བཅོམ་ལྡན་འདས་ཀྱིས་ཉན་ཐོས་མའོ། །དགེ་སློང་མ་ཞེས་བྱ་བ་ནི་དགེ་སློང་མའི་བསླབ་པ་ལ་སློབ་པ་གང་ཡིན་པའོ། །དགེ་ཚུལ་དང་ཞེས་བྱ་བ་ནི་གཞོན་ནུའོ། །དགེ་ཚུལ་མ་ཞེས་བྱ་བ་ནི་གཞོན་ནུ་མའོ། །ལྷུང་བཟེད་དམ་ཞེས་བྱ་བ་ནི་བྱིན་གྱིས་བརླབས་པ་ལ་སོགས་སྟེ། ཐ་ན་སྣོད་ཅིག་ཤོས་ཀྱང་ཡིན་ནོ། །ཆོས་གོས་སམ་ཞེས་བྱ་བ་ནི་བདུན་པོ་གང་ཡང་རུང་བའོ། །དྲ་བ་འམ་ཞེས་བྱ་བ་ནི་དྲ་བ་ཉིད་དོ། །ཚཝ་ཁུག་གམ་ཞེས་བྱ་བ་ནི་ལན་ཚའི་སྣོད་དོ། །སྐ་རགས་ཤེས་བྱ་བ་ནི་ལྕག་པོད་དམ། རྒྱ་ཅང་གང་ཡང་རུང་བ་སྟེ། དགེ་སློང་མའི་འཚོ་བའི་ཡོ་བྱད་ཅི་གང་ཡང་རུང་བ་སྦས་ན་རྐྱེན་དེ་ལྟ་བུ་མ་གཏོགས་ཏེ་ལྟུང་བྱེད་དོ། །རྐྱེན་དེ་ལྟ་བུ་མ་གཏོགས་ཏེ་ཞེས་བྱ་བ་ནི་རྐྱེན་དེ་ལྟ་བུ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མས་ཇི་ཙམ་ཅུང་ཟད་དགེ་སྦྱོང་གི་འཚོ་བའི་ཡོ་བྱད་སྦེད་ན་རྐྱེན་མ་གཏོགས་ཏེ་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་བཞི་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ནས་ཁ་ཟས་བསོད་པའི་དགག་པ་མཛད་ནས་ནད་པ་ལ་ནི་རྗེས་སུ་གནང་ངོ ། །དེ་ནས་བཅུ་གཉིས་སྡེ་དག་བྲམ་ཟེ་དང་ཁྱིམ་བདག་གི་ཁྱིམ་རྣམས་སུ་ཁ་ཟས་བསོད་པ་བསླངས་ནས་ན་བ་ཡང་ལོངས་སྤྱོད་པར་བྱེད། མི་ན་བ་ཡང་ལོངས་སྤྱོད་པར་བྱེད་པ་དང ། དགེ་སློང་མ་རྣམས་ཀྱིས་བསྒོ་བ་ན་དེ་དག་གིས་འདི་སྐད་ཅེས་བསླབ་པའི་གཞི་དེ་ནི་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མ་ན་བ་རྣམས་ལ་ཁ་ཟས་བསོད་པ་རྗེས་སུ་གནང་བ་གང་ཡིན་པ་དེ་དག་ནི་འདི་ལྟ་སྟེ། འོ་མ་དང ། ཞོ་དང ། མར་སར་དང ། ཉ་དང ། ཤ་དང ། ཤ་སྐམ་མོ། །ཡང་དགེ་སློང་མ་གང་མི་ན་བར་བདག་ཉིད་ཀྱི་ཆེད་དུ་བཅའ་བ་དང་བཟའ་བ་དེ་ལྟ་བུ་གཞན་གྱི་ཁྱིམ་དག
9.224b
ནས་བསླངས་ཏེ་འཆའ་འམ་ཟ་ན་ལྟུང་བྱེད་དོ། །གང་ཡིན་པ་དེ་དག་ནི་ཞེས་བྱ་བ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །ནད་པ་རྣམས་ཀྱི་ཞེས་བྱ་བ་ནི་ནད་ཀྱིས་ཐེབས་པ་རྣམས་ཀྱིའོ། །དགེ་སློང་མ་རྣམས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མ་རྣམས་སོ། །བསོད་པ་ཞེས་བྱ་བ་ནི་ཞིམ་པོའོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །འོ་མ་ཞེས་བྱ་བ་ནི་འོ་མ་ཉིད་དོ། །ཞོ་ཞེས་བྱ་བ་ནི་ཞོ་ཉིད་དོ། །མར་སར་ཞེས་བྱ་བ་ནི་མར་རོ། །ཤ་ཞེས་བྱ་བ་ནི་ཤ་ཉིད་དོ། །ཉ་ཞེས་བྱ་བ་ནི་ཉ་ཉིད་དོ། །ཤ་སྐམ་ཞེས་བྱ་བ་ནི་ཤ་སྐམ་པའོ། །འདི་ལྟར་ཁྱིམ་དག་ནས་སློང་ན་ཞེས་བྱ་བ་ནི་རང་གིས་སོ། །སློང་དུ་འཇུག་ན་ཞེས་བྱ་བ་ནི་གཞན་ནོ། །ཟོས་སམ་འཆོས་ན་ཞེས་བྱ་བ་ནི་ལྐོག་མར་ཁམ་གྱིས་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །མི་ན་བར་སློང་ཞིང་མི་ན་བར་ཟ་ན་སློང་བ་ན་དེ་ལ་ཉེས་བྱས་སོ། །ཟ་བ་ན་ལྟུང་བྱེད་དོ། །མི་ན་བར་སློང་ཞིང་ན་བ་ན་ཟ་ན་སློང་བ་ན་དེ་ལ་ཉེས་བྱས་སོ། །ཟ་བ་ན་ལྟུང་བ་མེད་དོ། །དེ་བཞིན་དུ་ན་བ་ན་བསླངས་ལ་མི་ན་བ་ན་ཟ་ན་སློང་བ་དེ་ལ་ལྟུང་བ་མེད་དོ། །ཟ་བ་ན་ལྟུང་བྱེད་དོ། །དེ་བཞིན་དུ་ན་བ་ན་སློང་ཞིང་ན་བ་ན་ཟ་ན་གཉི་ག་ལ་ལྟུང་བ་མེད་དོ། །ལྟུང་བྱེད་བཞི་པའི་ལྔ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་གནས་ངན་ལེན་གྱི་ལྟུང་བ་བྱུང་ནས་ཕན་ཚུན་འཆབ་པར་བྱེད་ཅིང ། དེ་དག་འཐབ་པ་དང་མཚང་འདྲུ་བར་བྱེད་ཅིང ། ཕན་ཚུན་དུ་གཞི་དེས་གླེང་བར་བྱེད་པ་དེ་དག་དོན་ཉུང་བའི་དགེ་སློང་མ་རྣམས་ཀྱིས་ཐོས་ནས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་དགེ་སློང་མའི་གནས་ངན་ལེན་གྱི་ལྟུང་བ་འཆབ་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །གནས་ངན་ལེན་ཞེས་བྱ་བ་ནི་གནས་ངན་ལེན
9.225a
གཉིས་ཏེ། ཕས་ཕམ་པར་འགྱུར་བས་ཀུན་ནས་བསླང་བ་དང ། དགེ་འདུན་ལྷག་མས་ཀུན་ནས་བསླང་བའོ། །འཆབ་ན་ཞེས་བྱ་བ་ནི་གཞན་ལ་མི་སྨྲ་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ལ་ཕས་ཕམ་པར་འགྱུར་བས་ཀུན་ནས་བསླང་བའི་ལྟུང་བ་བྱུང་བ་མཐོང་ལ་དེས་དེ་བཅབ་པར་སེམས་བསྐྱེད་ན་ལྟུང་བྱེད་དོ། །དེ་བཞིན་དུ་དགེ་འདུན་ལྷག་མ་དང ། དེ་བཞིན་དུ་ལྟུང་བྱེད་དང ། སོ་སོར་བཤགས་པར་བྱ་བ་དང་།[་""]་ཉེས་བྱས་ལ་ནི་ཉེས་བྱས་སོ། །གལ་ཏེ་ཐབ་མོར་གྱུར་ན་ལྟུང་བ་མེད་དོ། །ལྟུང་བྱེད་བཞི་པའི་དྲུག་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་ཀྱིས་བསམས་པ། ཚེམ་བུ་བ་ལྷུང་བཟེད་ནག་པོ་ཅན་འདི་དག་གིས་ཁོ་བོ་ཅག་དགེ་སློང་མ་རྣམས་ཀྱིས་མདུན་དུ་ཐོ་བརྩམས་ན། ཁོ་མོ་ཅག་གིས་འདི་དག་ལ་གནོད་པ་ཅི་ཞིག་བྱ་སྙམ་མོ། །དེ་ནས་སྦོམ་དགའ་མོ་དང ། གཙུག་དགའ་མོས་འདི་སྐད་ཅེས་སྨྲས་སོ། །ལན་དུ་མཐོ་བརྩམ་པར་བྱ་བ་ལྟ་བླའོ་ཞེས་དེ་དག་གིས་དགེ་སློང་མ་རྒན་མོ་རྒན་མོ་རྣམས་སྲང་དང ། སུམ་མདོ་དང ། བཞི་མདོ་རྣམས་སུ་མགྲོན་དུ་བོས་ནས། ཇི་སྲིད་ཀྱིས་ཟན་འཆད་པ་དེ་སྲིད་འཁྱམ་དུ་བཅུག་གོ། །བཅུ་གཉིས་སྡེ་རྣམས་ཀྱིས་ནི་གཉིས་ཤིང་གཉིས་ཤིང་གསང་ནས་བྲམ་ཟེ་དང་ཁྱིམ་བདག་གི་ཁྱིམ་རྣམས་སུ་སོང་སྟེ། བསོད་སྙོམས་ཟོས་སོ། །དེ་ནས་དགེ་སློང་མ་རྒན་མོ་རྒན་མོ་དེ་དག་དབྱར་ཁང་དུ་འོངས་ནས་འཕྲེས་ཏེ་འདུག་པ་དང ། དེ་དག་གི་ལྷན་ཅིག་གནས་པ་དང ། ཉེ་གནས་རྣམས་ཀྱིས་སྨྲས་པ། འཕགས་མ་དག་གལ་ཏེ་ཟས་གཞན་གྱི་ལགས་ཤེས་ཏེ། ལྟོ་ཡང་གཞན་གྱི་ལགས་སམ་ཅི། དེ་དག་གིས་འདི་སྐད་ཅེས་སྨྲས་སོ། །དེ་རིང་སུས་ཟོས་པ་ཡིན་གྲང ། དེ་དག་གིས་འདི་སྐད་ཅེས་བཤོས་མ་བཀུམ་གྲང་ཞེས་སྨྲས་པ་དང ། དེ་དག་གིས་སྐབས་དེ་དག་དགེ་སློང་མ་རྣམས་ལ་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས
9.225b
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཀླན་ཀ་ཚོལ་བས་ཅི་ནས་ཀྱང་དགེ་སློང་མ་འདི་ལ་ཀླན་ཀ་ཚོལ་བར་ཅི་ནས་ཀྱང་དགེ་སློང་མ་འདི་ལ་ཀླན་ཀ་བཙལ་བར་འགྱུར་རོ་སྙམ་པ་དེ་ཉིད་རྐྱེན་དུ་བྱས་ཏེ། དགེ་སློང་མ་ལ་འདི་སྐད་ཅེས་འཕགས་མ་ཁྱོད་ཚུར་ཁྱིམ་དག་ཏུ་བཞུད་དོ། །དེར་ཁྱོད་ལ་བཟའ་བ་དང་བཅའ་བ་བསོད་པ་དག་ཇི་ཙམ་འདོད་པ་སྦྱིན་དུ་གཞུག་གོ། །ཞེས་སྨྲས་ནས་དེས་དེ་ལ་བཟའ་བ་དང ། བཅའ་བ་བསོད་པ་དག་ཇི་ཙམ་འདོད་པར་སྦྱིན་དུ་མ་བཅུག་པར་དེའི་འོག་ཏུ་འདི་སྐད་ཅེས་འཕགས་མ་ཁྱོད་དང་ཁོ་མོ་ལྷན་ཅིག་སྨྲ་བ་འམ་འདུག་པ་བདེ་བ་མ་ཡིན་ནོ། །དེ་ལྟ་མོད་ཀྱི་ཁོ་མོ་གཅིག་པུ་སྨྲ་འམ་འདུག་ན་བདེས། ་ཁྱོད་སོང་ཤིག་ཅེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །དགེ་སློང་མ་ལ་ཞེས་བྱ་བ་ནི་བཅོམ་ལྡན་འདས་ཀྱི་ཉན་ཐོས་མ་ལའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །ཚུར་ཁྱིམ་དག་ཏུ་བཞུད་དང་ཞེས་བྱ་བ་ནི་བྲམ་ཟེ་དང ། ཁྱིམ་བདག་གི་ཁྱིམ་རྣམས་སུའོ། །དེར་ཁྱོད་ལ་བཟའ་བ་དང་བཅའ་བ་བསོད་པ་དག་སྦྱིན་དུ་གཞུག་གོ། །ཞེས་བྱ་བ་ནི་བཅའ་བ་ལྔ་དང ། བཟའ་བ་ལྔའོ། །ཇི་ཙམ་འདོད་པར་ཞེས་བྱ་བ་ནི་ཇི་ཙམ་ཟ་འདོད་པའོ། །དེས་དེ་ལ་སྦྱིན་དུ་མ་བཅུག་པར་འདི་སྐད་ཅེས་ཁྱོད་དང་ཁོ་མོ་ལྷན་ཅིག་བདེ་བ་མ་ཡིན་ནོ་ཞེས་བྱ་བ་ནི་ཁྱོད་དང་ལྷན་ཅིག་དགའ་བ་མ་ཡིན་པའོ། །སྨྲ་འམ་ཞེས་བྱ་བ་ནི་ཚིག་གོ། །འདུག་པ་འམ་ཞེས་བྱ་བ་ནི་འཁོད་པའོ། །ཀླན་ཀ་ཚོལ་བ་ཞེས་བྱ་བ་ནི་མཐོ་བཙམ་པའི་གླགས་ཚོལ་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཀླན་ཀ་ཚོལ་བས་དེ་སྐད་ཅེས་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་སྨན་པའི་ལུང་ཡོད་པ་འམ། དེ་ལ་བརྟེན་ནས་དགེ་འདུན་གྱི་ཟན་བཅད་པར་གྱུར་ན་མི་རུང་བ་ཞིག་ཡིན་ན་ལྟུང་བ་མེད་དོ། །ལྟུང་བྱེད་བཞི་པའི་བདུན་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ་བླ་གབ་མེད་པར་མེ་འབུད་བའི་བསླབ་པའི་གཞི་བཅའ་བ་མཛད
9.226a
ལ་དེ་ཡང་ནད་པ་རྣམས་ལ་བརྟེན་ནས་ནི་རྗེས་སུ་གནང་བ་དེའི་ཚེ་བཅུ་གཉིས་སྡེ་རྣམས་རང་གི་ལག་གིས་མེ་སྤོར་བར་བྱེད། སྤོར་དུ་འཇུག་པར་བྱེད་པ་དང ། ཇི་ཙམ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ་དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་བདག་ཉིད་ཀྱི་ཕྱིར་བདེ་བར་འདོད་ནས་མེ་སྤོར་རམ། སྤོར་དུ་འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །མི་ན་བར་ཞེས་བྱ་བ་ནི་ནད་པ་མ་གཏོགས་པའོ། །བདག་ཉིད་ཀྱི་ཕྱིར་ཞེས་བྱ་བ་ནི་རང་གི་ཆེད་དུའོ། །མེ་སྤོར་རམ་ཞེས་བྱ་བ་ནི་མེ་འབུད་པའོ། །བདག་ཉིད་ཀྱིས་ཞེས་བྱ་བ་ནི་རང་གིས་སོ། །སྤོར་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་མདག་མ་ལེན་ཏམ། དྲིའི་ཆེད་དུ་མེས་འགེངས་པར་བྱེད་ན་དེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ལྟུང་བྱེད་དོ། །དེ་བཞིན་དུ་དྲི་དག་དེའི་ཆེད་དུ་ལྡུགས་ན་ཡང་སངས་རྒྱས་ཀྱི་ཆེད་དུ་ཡིན་ནོ་ཞེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ལྟུང་བྱེད་དོ། །དེ་བཞིན་དུ་མཁན་པོའི་ཕྱིར་ཡང་བྱིན་གྱིས་མ་བརླབས་ན་ལྟུང་བྱེད་དོ། །དེ་བཞིན་དུ་དགེ་འདུན་གྱི་ཕྱིར་མེ་སྤོར་ན་ཅི་ཙམ་དགོས་པ་མ་རྫོགས་ཀྱི་བར་དུ་དུས་རིང་པོར་བྱིན་གྱིས་བརླབ་པར་བྱའོ། །བྱིན་གྱིས་རློབ་ན་དེ་ལྟ་ན་ལེགས། གལ་ཏེ་བྱིན་གྱིས་མི་རློབ་ན་ལྟུང་བྱེད་དོ། །ཤིང་རེ་རེ་ནས་འཇུག་ན་ཡང་དུས་བྱིན་གྱིས་བརླབ་པར་བྱའོ། །བྱིན་གྱིས་རློབ་ན་དེ་ལྟ་ན་ལེགས། གལ་ཏེ་བྱིན་གྱིས་མ་རློབ་ན་ལྟུང་བྱེད་དོ། །དེ་བཞིན་དུ་མེ་འཐོར་བར་བྱེད་དམ་སྦུད་པར་བྱེད་ན་ཡང་ལྟུང་བྱེད་དོ། །དགེ་སློང་མས་མགལ་མེ་བླངས་ཏེ་མགལ་མེའི་འཁོར་ལོ་བསྐོར་བར་བྱེད་ན་ལྟུང་བྱེད་དོ། །ཞེས་བྱ་བ་ནས་དེ་བཞིན་དུ་མདག་མ་ལ་རི་མོར་འདྲི་བར་བྱེད་ན་ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་མདག་མ་ལེན་ན་གལ་ཏེ་དུས་བྱིན་གྱིས་རློབ་ན་དེ་ལྟ་ན་ལེགས་གལ་ཏེ་མི་བྱེད་ན་ཉེས་བྱས་སོ། །གལ་ཏེ་ནད་པའི་ཕྱིར་བླ་གབ
9.226b
མེད་པར་སྣོད་དུ་བཙོ་བ་འཚེད་དམ། དེ་བཞིན་དུ་ཚོན་རྩིའི་ལས་དང ། ལྷུང་བཟེད་ཀྱི་ལས་བྱེད་པ་སྟེ། ཐམས་ཅད་དུ་དུས་བྱིན་གྱིས་བརླབས་ན་ལྟུང་བ་མེད་དོ། །ལྟུང་བྱེད་བཞི་པའི་བརྒྱད་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅུ་བདུན་སྡེ་རྣམས་ལ་བརྟེན་ནས་དགེ་འདུན་གྱི་བྱ་བ་ཆོས་དང་ལྡན་པའི་བསླབ་པའི་གཞི་བཅའ་བ་མཛད་པ། དེའི་ཚེ་རང་བཞིན་དུ་གནས་པའི་དགེ་སློང་མ་རྣམས་དགེ་འདུན་གྱི་བྱ་བ་ཆོས་དང་ལྡན་པས་དགེ་འདུན་གྱི་བྱ་བ་བྱེད་དོ། །དེའི་ཚེ་བཅུ་གཉིས་སྡེ་དེ་རྣམས་ཀྱིས་དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་བྱིན་ཟིན་ནས་མི་སྦྱིན་ནོ། །ཉེས་པར་བྱིན་ནོ། །མི་མཐུན་པས་བྱས་ཀྱི། འཐུན་པས་མ་ཡིན་ནོ་ཞེས་སྨྲ་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་བྱིན་ནས་དེའི་འོག་ཏུ་སྤོང་བའི་ཆོས་སུ་བྱེད་ཅིང ། དགེ་སློང་མ་འདུན་པ་ཕྱིར་བྱིན་ཅིག་ཁྱོད་ལ་མི་སྦྱིན་ནོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །དགེ་འདུན་གྱི་བྱ་བ་ཆོས་དང་ལྡན་པ་ལ་ཞེས་བྱ་བ་ནི་དགེ་འདུན་གྱི་ཆོས་དང་ལྡན་པའི་དགེ་འདུན་གྱི་བྱ་བ་ལ་གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་དག་གོ། །འདུན་པ་བྱིན་ནས་ཞེས་བྱ་བ་ནི་བློ་གྲོས་བྱིན་ནས་སོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །སྤོང་བའི་ཆོས་སུ་བྱེད་ཅིང་ཞེས་བྱ་བ་ནི་འདི་སྐད་ཅེས་ཁོ་མོས་འདུན་པ་མ་བྱིན་ནོ་ཞེས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་བྱིན་ནས་སྤོང་བའི་ཆོས་སུ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་བདེན་པ་ཉིད་དམ། ཉེས་པར་བྱིན་པ་ཡིན་ན་ལྟུང་བ་མེད་དོ། །ལྟུང་བྱེད་བཞི་པའི་དགུ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་རྒན་ཞུགས་ཤིག་ལ་བརྟེན་ནས
9.227a
བསྙེན་པར་མ་རྫོགས་པ་དང་ལྷན་ཅིག་ཐམས་ཅད་དུ་གནས་པར་མི་བྱའོ། །གནས་ན་ལྟུང་བྱེད་དོ། །ཡང་དགེ་ཚུལ་སྒྲ་གཅན་ཟིན་ལ་བརྟེན་ནས་ནུབ་གཉིས་ཚུན་ཆད་རྗེས་སུ་གནང་ངོ ། །དེ་ནས་བཅུ་གཉིས་སྡེ་རྣམས་ཀྱིས་འདི་སྐད་ཅེས་གང་དུ་ནུབ་གཉིས་ཡིན་པ་དེ་ལ་ནི་གསུམ་དུ་འགྱུར་འདད་ཅིག་།གང་དུ་གསུམ་ཡིན་པ་དེ་ལ་ནི་བཞིར་འགྱུར་འདད་ཅིག་ཅེས་སྨྲ་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། གནས་པར་མི་བྱའོ། །གནས་ན་ལྟུང་བྱེད་དོ། །དེ་ནས་དགེ་སློང་མ་དེ་རྣམས་ཀྱིས་དགེ་ཚུལ་མ་དག་དགེ་ཚུལ་གྱི་ཀུན་དགའ་ར་བའི་ཕྱི་རོལ་དུ་བྱུང་བ་ན་དེ་དག་མི་སྦེད་ཅིང་མ་བསྲུངས་པར་གྱུར་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཀུན་དགའ་ར་བའི་ཕྱི་རོལ་དུ་དབྱུང་བར་མི་བྱའོ། །དེ་ལྟ་མོད་ཀྱི་གཞི་སྤང་བར་བྱའོ། །དེ་ལྟར་བྱས་པ་དང ། དགེ་སློང་མ་ཞིག་གིས་དགེ་ཚུལ་མ་ནད་པ་ཞིག་ཡོད་པ་དེ་ལ་ཁ་ཟས་ཙམ་བྱིན་ནས་བདག་གི་ལག་པས་བྱིན་ལེན་མ་བྱས་པར་མ་གྱུར་གྲང་ཞེས་སླར་ཡང་རེག་པར་མི་བྱེད་པ་དང་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ་རང་གི་ལག་གིས་བསྙོད་པར་བྱ་སྟེ་དེ་ལ་འགྱོད་པར་མི་བྱའོ། །དེ་ནས་དགེ་ཚུལ་མ་ནད་པ་དེ་དག་ཟས་ཀྱི་དུས་སུ་འདུག་པར་གྱུར་པ་ན་དགེ་སློང་མ་དེ་དག་རྟེན་པར་མི་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་གཅིག་ཏུ་འདུག་ལ་བརྟེན་པར་བྱ་སྟེ་དེ་ལ་འགྱོད་པར་མི་བྱའོ། །དེ་ནས་ཡང་ནུབ་མོར་གྱུར་པ་ན་དགེ་ཚུལ་མ་དེ་དག་བོར་ཏེ་དོང་བ་དང ། ནད་པ་དེ་ཡང་ནུབ་མོ་སྐོམ་སློང་བ་དང་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ཁོ་ནར་ལྷན་ཅིག་གནས་པར་བྱ་སྟེ་དེ་ལ་འགྱོད་པར་མི་བྱའོ། །དེ་བཞིན་དུ་དགེ་སློང་མ་ན་ན་ཡང་དེར་དགེ་ཚུལ་མ་འམ། ནད་གཡོག་དག་གནས་པར་བྱ་ཞིང་སྣང་བ་དང་བཅས་པར་ཡང་གནས་པར་བྱ་སྟེ་དེ་ལ་འགྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་བསླབ་པ་འདོད་པ་དང ། བསླབ་པ་ལ་གུས་པ་དང །
9.227b
བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་སྔ་མ་ནི་བཅས་པའོ། །འདི་ནི་རྗེས་སུ་གནང་བ་སྟེ། ཉན་ཐོས་མ་རྣམས་ཀྱིས་ཡང་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་བསྙེན་པར་མ་རྫོགས་པ་དང ། ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །བསྙེན་པར་མ་རྫོགས་པ་དང་ཞེས་བྱ་བ་ལ་བསྙེན་པར་རྫོགས་པ་ནི་གཉིས་ཏེ། དགེ་སློང་དང་དགེ་སློང་མའོ། །ལྷག་མ་ནི་བསྙེན་པར་མ་རྫོགས་པའོ། །ནུབ་གཉིས་ལས་ལྷག་པར་ཞེས་བྱ་བ་ནི་ནུབ་གཉིས་འདས་པར་རོ། །གནས་གཅིག་ཏུ་ཉལ་བར་བྱེད་ན་ཞེས་བྱ་བ་ལ་གནས་བཞི་པོ་དག་ཏུ་ཉལ་བར་བྱེད་པ་སྟེ། ཐམས་ཅད་གཡོགས་ཤིང་ཐམས་ཅད་བསྐོར་བ་དང ། ཐམས་ཅད་གཡོགས་ཤིང་ཕལ་ཆེར་མ་བསྐོར་བ་དང ། ཐམས་ཅད་ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་དང ། ཐམས་ཅད་ཕལ་ཆེར་གཡོགས་ཤིང་ཕལ་ཆེར་བསྐོར་བའོ། །ཐམས་ཅད་གཡོགས་ཤིང་ཐམས་ཅད་བསྐོར་བ་ནི་གནས་ཁང་ངམ། འཁོར་གྱི་ཁྱམས་སམ། ་ཁང་པ་རྩེག་མ་དག་གོ། །ཐམས་ཅད་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ཟླུམ་པོ་འམ། རིམ་གྲོའི་གནས་དག་གོ། །ཐམས་ཅད་ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ངོས་གསུམ་པའོ། །ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ངོས་བཞི་པའོ། །སྐྱ་རེང་ཤར་ན་ཞེས་བྱ་བ་ནི་སྐྱ་རེང་གསུམ་པོ་སྐྱ་རེང་དང་པོ་འམ། བར་མ་འམ། ཐ་མ་གང་ཡང་རུང་བ་ཤར་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་འདས་ཏེ་ནུབ་གསུམ་པར་གནས་གཅིག་ཏུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་བཅུ་པ་རྫོགས་སྷོ།། ་་་་་་་་་་།། གླེང་གཞི་ནི་རྒྱལ་པོའི་ཁབ
9.228a
ནའོ། །དེའི་ཚེ་དགེ་སློང་མ་འཆི་ལྟས་ལ་སྡིག་པ་ཅན་གྱི་ལྟ་བར་སོང་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་སློང་མ་འཆི་ལྟས་ལ་བཞམས་ཏེ་བསྒོ་ཤིག་།དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་ནི་བདེན་གྱི། གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་སློང་མ་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ནི་འདི་ལྟར་བྱ་སྟེ་གནས་མལ་བཤམས་པ་བྱས་ཏེ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ་ཞེས་བྱ་བའི་བར་རོ། །ཞེས་བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱི་ཆོས་བསྟན་པ་ཤེས་སོ་ཞེས་མཆི་བ་དེ་ལ་དགེ་སློང་མ་མང་པོས་བཞམས་ཏེ་བསྒོ་སྟེ། དེ་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། ་འདི་ལྟར་འཕགས་མའི་དགེ་འདུན་གྱིས་དགེ་སློང
9.228b
མ་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །དེ་བཞིན་དུ་ལས་ཀྱང་ལན་གསུམ་གྱི་བར་དུ་བྱའོ། །དེ་ལ་གསོལ་བ་དང་བཞིའི་ལས་ཀྱིས་བསྒོ་བ་ན་འདི་སྐད་ཅེས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་སྨྲ་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་དང ། གཞན་ཡང་དེ་ལྟ་བུ་དང་འཐུན་པ་སུ་ཡང་རུང་བ་ལ་གནས་ནས་དབྱུང་བའི་ལས་བྱོས་ཤིག་།ལས་ནི་འདི་ལྟར་བྱ་སྟེ་གནས་མལ་བཤམས་པ་བྱས་ལ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱི་ཆོས་བསྟན་པ་ཤེས་སོ་མཆི་ལགས་ཀྱིས་གལ་ཏེ། འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འདི་ལྟར་འཕགས་མའི་དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་ལ་གནས་ནས་དབྱུང་བའི་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་དེ་སྲིད་དུ་དེ་ལ་དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོ་ཡང་དག་པར་དགའ་བར་མི་བགྱི་ཞིང་དཔེར་ན་གདོལ་བའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱིའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི
9.229a
ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དང ། དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་གཏོང་དུ་མི་བཏུབ་པ་ལ་གནས་ནས་དབྱུང་བའི་ཕྲིན་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་གཏོང་དུ་མི་བཏུབ་པ་དེ་སྲིད་དུ། འདི་ལ་དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོ་ཡང་དག་པར་དགའ་བར་མི་བགྱི་ཞིང་དཔེར་ན་གདོལ་པའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱི་ན། ཕུ་ནུ་མོ་གང་དག་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་འདོར་དུ་མི་བཏུབ་པ་ལ་གནས་ནས་དབྱུང་བའི་ལས་བགྱི་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། ལན་གཉིས་སུ་ཡང་དོན་འདི་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དང ། དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་གཏོང་དུ་མི་བཏུབ་པ་ལ་གནས་ནས་དབྱུང་བའི་ཕྲིན་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་གཏོང་དུ་མི་བཏུབ་པ་དེ་སྲིད་དུ་འདི་ལ་དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོ་ཡང་དག་པར་དགའ་བར་མི་བགྱི་ཞིང་གདོལ་པའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱི་ན། ་ཕུ་ནུ་མོ་གང་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་འདོར་དུ་མི་བཏུབ་པ་ལ་གནས་ནས་དབྱུང་བའི་ལས
9.229b
བགྱི་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་གཉིས་པ་སྟེ། ལན་གསུམ་དུ་ཡང་དོན་དེ་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དང ། དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་གཏོང་དུ་མི་བཏུབ་པ་ལ་གནས་ནས་དབྱུང་བའི་ཕྲིན་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་གཏོང་དུ་མི་བཏུབ་པ་དེ་སྲིད་དུ་འདི་ལ་དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོར་ཡང་དག་པར་དགའ་བར་མི་བགྱི་ཞིང་གདོལ་པའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱིའོ། །འདི་ནི་ལས་བརྗོད་པ་གསུམ་པ་སྟེ། འཕགས་མའི་དགེ་འདུན་གྱིས་བཟོད་ཅིང་གནང་ནས་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་དེ་ལྟར་གནས་ནས་དབྱུང་བའི་ལས་བྱས་ཀྱང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་ཟེར་ན་དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་ཕུ་ནུ་མོ་ཁྱོད་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ
9.230a
གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་བརྗོད་པར་མ་སྨྲ་ཤིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པ་བཏབ་པ་ནི་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་ཀྱང་མི་གསུང་ངོ ། །བར་དུ་གཅོད་པའི་ཆོས་ཡིན་པ་ལས་བཅོམ་ལྡན་འདས་ཀྱིས་རྣམ་གྲངས་དུ་མར་བར་དུ་གཅོད་པའི་ཆོས་སུ་གསུངས་ཏེ། དེ་དག་སོ་སོར་བསྟེན་ན་བར་དུ་གཅོད་པར་ཡང་འགྱུར་གྱིས། ཕུ་ནུ་མོ་ཁྱོད་སྡིག་པ་ཅན་གྱིས་ལྟ་བའི་རྣམ་པར་སོང་བ་འདི་ལྟ་བུ་འདི་ཐོང་ཤིག་ཅེས་བརྗོད་པར་བྱའོ། །གལ་ཏེ་དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་སྨྲས་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གཉིས་ལན་གསུམ་དུ་ཡང་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་འཆི་ལྟས་སོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ། །ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །དེ་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་ཞེས་བྱ་བ་ནི་དགེ་སྦྱོང་གི་ཚུལ་གྱི་བར་དུ་གཅོད་པ་འདི་ལྟ་སྟེ། ཕས་ཕམ་པར་འགྱུར་བའི་ཆོས་བརྒྱད་དང ། དགེ་འདུན་ལྷག་མ་ཉི་ཤུ་དང ། སྤང་བའི་ལྟུང་བྱེད་སུམ་བཅུ་རྩ་གསུམ་དང ། ལྟུང་བྱེད་བརྒྱ་བརྒྱད་བཅུ་དང ། སོ་སོར་བཤགས་པར་བྱ་བ་བཅུ་གཅིག་དང ། བསླབ་པ་མང་པོ་དང ། རྩོད་པ་ཞི་བར་བྱ་བའི་ཆོས་བདུན་ཏེ། ཆོས་མ་ཡིན་པ་འདི་ལ་ཆོས་ཀྱི་སྒྲར་གསུངས་སོ། །དེ་ལ་སོ་སོར་བསྟེན་ཀྱང་ཞེས་བྱ་བ་ནི་ལྷག་པར་སྤྱད་ནའོ། །བར་དུ་གཅོད་པར་མི་འགྱུར་ཞེས་བྱ་བ་ནི་དགེ་སྦྱོང་གི་ཚུལ་གྱི་བར་དུ་གཅོད་པར་མི་འགྱུར་བའོ། །དགེ
9.230b
སློང་མ་དེ་ལ་ཞེས་བྱ་བ་ནི་འཆི་ལྟས་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་དག་གིས་སོ། །འདི་སྐད་ཅེས་བརྗོད་པར་བྱའོ་ཞེས་བྱ་བ་ནི་འདི་སྐད་ཅེས་སྨྲ་བར་བྱ་བའོ། །ཕུ་ནུ་མོ་ཁྱོད་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་བརྗོད་པར་མ་སྨྲ་ཤིག་ཞེས་བྱ་བ་ནས། བཞམས་ཏེ་བསྒོ་བ་ནི་ཞེས་བྱ་བའི་བར་རོ། །གལ་ཏེ་གཞི་དེ་གཏོང་ན་དེ་ལྟ་ན་ལེགས་གལ་ཏེ་མི་གཏོང་ན་ལན་གཉིས་ལན་གསུམ་དུ་ཡང་དག་པར་བསྟན་པར་བྱ། ཡང་དག་པར་བསྒོ་བར་བྱའོ་ཞེས་བྱ་བ་ནས། གསོལ་པ་དང་བཞིའི་ལས་ཀྱིས་བསྒོ་བར་བྱའོ་ཞེས་བྱ་བའི་བར་རོ་ཞེས་བྱ་བ་ནི་བསྒོ་བ་སྔ་མ་ཇི་ལྟ་བ་བཞིན་དུའོ། །ཡང་དག་པར་བསྒོ་བ་ནི་དེ་ཡིན་ནོ། །ཡང་དག་པར་བསྟན་པ་ནི་དེ་ཡིན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདི་སྐད་ཅེས་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་སྨྲས་ན་ཐམས་ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་བྱས་སོ། །ལས་དང་པོ་བརྗོད་པ་སྨྲས་པ་ན། གལ་ཏེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་བྱས་སོ། །ལས་བརྗོད་པ་གཉིས་པ་སྨྲས་པ་མ་རྫོགས་པར་གལ་ཏེ་གཏོང་ན་དེ་ལྟ་ན་ལེགས། གལ་ཏེ་སྨྲས་པ་རྫོགས་ཀྱང་མི་གཏོང་ན་ཉེས་བྱས་སོ། །ལས་བརྗོད་པ་གསུམ་པ་སྨྲས་པ་མ་རྫོགས་པར་མི་མཐུན་པ་དག་ཆོས་མ་ཡིན་པར་བྱེད་པ་དང ། མི་མཐུན་པ་དག་ཆོས་མ་ཡིན་པ་ལྟར་བཅོས་པ་དང་འཐུན་པ་དག་ཆོས་མ་ཡིན་པ་ལྟར་བཅོས་པ་དང ། ཆོས་ཇི་ལྟ་བ་བཞིན་མ་ཡིན་པ་དང ། འདུལ་བ་ཇི་ལྟ་བ་བཞིན་མ་ཡིན་པ་དང ། སྟོན་པའི་བསྟན་པ་ཇི་ལྟ་བ་བཞིན་མ་ཡིན་པས་དེ་ལྟར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང ། འདུལ་བ་ཇི་ལྟ་བ་དང ། སྟོན་པའི་བསྟན་པ་ཇི་ལྟ་བ་ལས་བརྗོད་པ་བཞི་པ་སྨྲས་པ་རྫོགས་ན་ལྟུང་བྱེད་དུ་འགྱུར་རོ། །ལྟུང་བྱེད
9.231a
བཞི་པའི་བཅུ་གཅིག་པ་རྫོགས་སྷོ།། ་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དེའི་ཚེ་བཅུ་གཉིས་སྡེ་རྣམས་ཀྱིས་འཆི་ལྟས་དེ་དང་ལྷན་ཅིག་གཏམ་འདྲེ་[]་བར་བྱེད། ཕེབས་པར་སྨྲ་བར་བྱེད། ཀུན་ཏུ་ལོངས་སྤྱོད་པར་བྱེད། །གནས་གཅིག་ཏུ་ཉལ་བར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་དེ་སྐད་ཟེར་བའི་དགེ་སློང་མ་ཆོས་བཞིན་མ་བྱས་པ་སྡིག་པ་ཅན་གྱི་ལྟ་བར་སོང་བ་དེ་མ་སྤངས་པ་དང་གཏམ་འདྲེ་བར་བྱེད། ཕེབས་པར་སྨྲ་བར་བྱེད་ཀུན་དུ་ལོངས་སྤྱོད་པར་བྱེད། ཀུན་དུ་གནས་པར་བྱེད། གནས་གཅིག་ཏུ་ལྷན་ཅིག་ཉལ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཆོས་བཞིན་མ་བྱས་པ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་མ་ཕྱུང་བའོ། །གཏམ་འདྲེ་བར་བྱེད་ཅེས་བྱ་བ་ནི་ལུང་དབོག་པ་སྦྱིན་པར་བྱེད་པའོ། །ཕེབས་པར་སྨྲ་བར་བྱེད་ཅེས་བྱ་བ་ནི་བརྗེད་པ་དྲན་པ་སྦྱིན་པར་བྱེད་པའོ། །ཀུན་དུ་ལོངས་སྤྱོད་པར་བྱེད་ཅེས་བྱ་བ་ནི་བསྙེན་བཀུར་རང་གི་བྱེད་པའོ། །ཀུན་ཏུ་གནས་པར་བྱེད། གནས་གཅིག་ཏུ་ཉལ་བར་བྱེད་ཅེས་བྱ་བ་ནི་གནས་བཞི་པོ་དག་ཏུ་སྐྱ་རེང་འཆར་བ་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལྷན་ཅིག་གནས་གཅིག་ཏུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ལྟ་བར་སོང་བ་དེ་དང་དབྲལ་བར་འདོད་པར་གྱུར་ན་ལྟུང་བ་མེད་དོ། །ལྟུང་བྱེད་བཞི་པའི་བཅུ་གཉིས་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །སྦོམ་དགའ་མོ་ལ་དགེ་ཚུལ་མ་མཛེས་མ་དང ། རྒྱལ་མ་གཉིས་ཡོད་དེ། དེ་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་པ་གང་ཡིན་པ་དེ་ལ
9.231b
སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་སྨྲ་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་ཚུལ་མ་མཛེས་མ་དང ། རྒྱལ་མ་གཉིས་ལ་བཞམས་ཏེ་བསྒོ་བ་བྱོས་ཤིག་།དེ་གཉིས་ལ་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་ཚུལ་མ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་བྱོས་ཤིག་།བསྒོ་བ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ནས་ཞེས་བྱ་བ་ནི་དགེ་སློང་མ་རྣམས་ལ་དྲིས་པའི་ལན་ཡང་དག་པར་བསྒོ་ལ། དགེ་ཚུལ་མ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་འདུག་ཏུ་བཅུག་ནས་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་དགེ་ཚུལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ། །ཞེས་གསུངས་པ་གང་ཡིན་པ་དེ་ལ་སོ་སོ་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་ན་དེ་གཉིས་ལ་དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ། དེ་གཉིས་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། དགེ་ཚུལ་མ་མཛེས
9.232a
མ་དང་རྒྱལ་མ་འདི་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་ཚུལ་མ་མཛེས་མ་དང ། རྒྱལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་ན། དེ་གཉིས་ལ་དགེ་སློང་མ་རབ་ཏུ་མང་པོས་བཞམས་ནས་བསྒོ་བ་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱིས། འཕགས་མའི་དགེ་འདུན་གྱིས་མཛེས་མ་དང ། རྒྱལ་མ་འདི་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་ཕུ་ནུ་མོ་གང་དག་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་སྟེ། དེ་བཞིན་དུ་གཉིས་པ་དང ། གསུམ་པ་ཡང་བརྗོད་པར་བྱའོ། །འཕགས་མའི་དགེ་འདུན་གྱིས་བཟོད་ཅིང་གནང་ནས་ཞེས་བྱ་བ་ནས། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བའི་བར་རོ། །དེ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་ཚུལ་མ་མཛེས་མ་དང ། རྒྱལ་མ་ལ་བསྙིལ་བའི་ལས་བྱོས་ཤིག་།བྱ་བ་ནི་འདི་ལྟ་བུ་ཡིན་ཏེ། གནས་མལ་བཤམས་པ་བྱས་ལ་ཞེས་བྱ་བ་ནས། དགེ་ཚུལ་མ་མཛེས་མ་དང ། རྒྱལ་མ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་འདུག་ཏུ་བཅུག་ནས་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག
9.232b
བདག་ལ་གསན་དུ་གསོལ། དགེ་ཚུལ་མ་མཛེས་མ་དང ། རྒྱལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་པ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་ནས། དགེ་ཚུལ་མ་མཛེས་མ་དང ། རྒྱལ་མ་དེ་གཉིས་ལ་དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ། དེ་གཉིས་ལ་བཞམས་ནས་བསྒོ་བ་ན་ཞེས་བྱ་བ་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་བྱ་བའི་བར་རོ། །དེ་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་སྟེ། དེ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་ན་ཞེས་བྱ་བ་ནས། འདི་ཉིད་བདེན་གྱི་གཞན་ནི་གཏི་མུག་གོ་ཞེས་བྱ་བའི་བར་དུ་མཆིས་ལགས་ཀྱིས། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འདི་ལྟར་འཕགས་མའི་དགེ་འདུན་གྱིས་དགེ་ཚུལ་མ་མཛེས་མ་དང ། རྒྱལ་མ་འདི་གཉིས་ལ་ཕུ་ནུ་མོ་དག་ཁྱེད་ཅག་དེང་ཕན་ཆད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག་།ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་དུ་ཡང་མ་འགྲོ་ཤིག་།དགེ་ཚུལ་མ་གཞན་དག་དགེ་སློང་མ་རྣམས་དང་ལྷན་ཅིག་ནུབ་གཉིས་ཚུན་ཆད་གནས་གཅིག་ཏུ་ཉལ་བར་གནང་བ་གང་ཡིན་པ་དེ་ཡང་དེང་ཕྱིན་ཆད་ཁྱེད་ལ་མེད་ཀྱིས། བུད་མེད་གཏི་མུག་ཅན་ཁྱེད་གཉིས་གཞན་དུ་དེང་ཤིག་ཅེས་བསྙིལ་བའི་ལས་མཛད་དོ། །འདི་ནི་གསོལ་བའོ། །དེའི་འོག་ཏུ་དེ་གཉིས་ལ་བསྙིལ་བའི་གསོལ་བ་མཛད་ཟིན་གྱིས་སྡིག་པ་ཅན་གྱི་ལྟ་བ་དེ་ཐོང་ཤིག་ཅེས་བསྒོ་བར་བྱའོ། །གལ་ཏེ་གཏོང་ན་དེ་ལྟ་ན་ལགས། གལ་ཏེ་མི་གཏོང་ན་དེའི་འོག་ཏུ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་ཚུལ་མ་མཛེས
9.233a
མ་དང ། རྒྱལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་ནས། དགེ་ཚུལ་མ་མཛེས་མ་དང ། རྒྱལ་མ་གཉིས་ལ་དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ་དེ་གཉིས་ལ་བཞམས་ནས་བསྒོ་བ་ན་ཞེས་བྱ་བ་ནས་འདི་ཉིད་བདེན་གྱི་གཞན་ནི་གཏི་མུག་གོ་ཞེས་བྱ་བའི་བར་རོ། །དེ་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱི་བསྒོ་སྟེ། དེ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་ན། འདི་ཉིད་བདེན་གྱི་གཞན་ནི་གཏི་མུག་གོ་ཞེས་བྱ་བའི་བར་དུ་མཆི་ནས་འཕགས་མའི་དགེ་འདུན་གྱིས་དགེ་ཚུལ་མ་མཛེས་མ་དང ། རྒྱལ་མ་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་དེ་གཉིས་ལ་བསྙིལ་བའི་ཕྲིན་ལས་མཛད་པ་གང་དག་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འདི་ནི་ལས་བརྗོད་པ་དང་པོ་ཡིན་ནོ། །དེའི་འོག་ཏུ་དེ་གཉིས་ལ་བསྒོ་བར་བྱ་སྟེ། གལ་ཏེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གཉིས་སུ་ཡང་དོན་དེ་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་ཞེས་བྱ་བ་ནས་ལན་གཉིས་པ་ཉིད་བརྗོད་པར་བྱས་ནས་ཡང་བསྒོ་བར་བྱ་སྟེ། གལ་ཏེ་གཏོང་ན་དེ་ལྟ་ན་ལེགས་གལ་ཏེ་མི་གཏོང་ན་ལན་གསུམ་དུ་ཡང་དོན་དེ་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ་ཞེས་བྱ་བ་ནས། འཕགས་མའི་དགེ་འདུན་གྱིས་དགེ་ཚུལ་མ་མཛེས་མ་དང ། རྒྱལ་མ་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་ལ་བསྙིལ་བའི་ཕྲིན་ལས་མཛད་པར་འཕགས་མའི་དགེ་འདུན་གྱིས་བཟོད་ཅིང་གནང་ནས། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །དེ་ནས་དགེ་ཚུལ་མ་དེ་གཉིས་ངུ་ཞིང་མཁན་མོའི་དྲུང་དུ་དོང་སྟེ་ཕྱིན་ནས་མཁན་མོ་ལ་འདི་སྐད་ཅེས་སྨྲས་སོ། །
9.233b
མཁན་མོ་བདག་ཅག་ལ་དགེ་སློང་མའི་དགེ་འདུན་གྱིས་བསྙིལ་བའི་ཕྲིན་ལས་མཛད་ལགས་སོ། །དེ་ནས་སྦོམ་དགའ་མོས་དགེ་ཚུལ་མ་དེ་གཉིས་ལ་འདི་སྐད་ཅེས་སྨྲས་སོ། །བསྙིལ་བའི་ལས་བྱས་པ་རྣམས་ལ་ཅི་ཁམས་གསུམ་ཡང་མ་ལུས་སམ། གྲོང་དང་ལྗོངས་དག་ཀྱང་མེད་དམ་ཅི་ཞེས་དེ་བསྙིལ་བའི་ལས་བྱས་པ་དེ་གཉིས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་དུ་ལོངས་སྤྱོད་པར་བྱེད། གནས་གཅིག་ཏུ་ཉལ་བར་བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་ཚུལ་མ་ལ་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་ཟེར་བའི་དགེ་ཚུལ་མ་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་དགེ་ཚུལ་མ་ཁྱོད་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟན་ཀྱང་བར་དུ་གཅོད་པར་མི་འགྱུར་བ་དེ་ལྟར། ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མ་སྨྲ་ཤིག་།བཅོམ་ལྡན་འདས་ལ་སྐུར་པ་མ་འདེབས་ཤིག་།བཅོམ་ལྡན་འདས་ལ་སྐུར་པ་བཏབ་པས་ནི་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་ཀྱང་མི་གསུང་ངོ ། །དགེ་ཚུལ་མ་དག་འདོད་པ་རྣམས་ནི་བར་དུ་གཅོད་པར་བྱེད་པ་ཁོ་ན་ཡིན་པ་ལས། བཅོམ་ལྡན་འདས་ཀྱིས་རྣམ་གྲངས་དུ་མར་བར་དུ་གཅོད་པར་བྱེད་པར་གསུངས་ཏེ། དེ་དག་སོ་སོར་བསྟེན་ན་བར་དུ་གཅོད་པར་ཡང་འགྱུར་བས་དགེ་ཚུལ་མ་དག་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་ཐོང་ཤིག་།ཅེས་དེ་སྐད་དུ། དགེ་ཚུལ་མ་དེ་ལ་དགེ་སློང་མ་རྣམས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་ཚུལ་མ་དེ་ལ་དགེ་སློང
9.234a
མ་རྣམས་ཀྱིས་འདི་སྐད་ཅེས། དགེ་ཚུལ་མ་ཁྱོད་དེང་ཕན་ཆད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་དེ་ལ་སྟོན་པ་ཞེས་ཀྱང་མ་ཟེར་ཅིག་།ཚངས་པ་མཚུངས་པར་སྤྱོད་པ་མཁས་པ་གང་ཡང་རུང་བ་དག་གི་རྗེས་བཞིན་དུ་ཡང་མ་འགྲོ་ཤིག་།དགེ་ཚུལ་མ་གཞན་དག་དགེ་སློང་མ་རྣམས་དང ། ནུབ་གཉིས་ཚུན་ཆད་གནས་གཅིག་ཏུ་ཉལ་བར་གནང་བ་གང་ཡིན་པ་དེ་ཡང་ཁྱོད་ལ་དེང་ཕན་ཆད་མེད་ཀྱིས་དགེ་ཚུལ་མ་དག་ཕར་སོང་ཤིག་ཅེས་བརྗོད་པར་བྱའོ། །ཡང་དགེ་སློང་མ་གང་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་ཉེ་བར་འཇོག་པར་བྱེད་དམ། ཉེ་བར་སྟོན་པར་བྱེད་དམ། ཀུན་ཏུ་ལོངས་སྤྱོད་པར་བྱེད་དམ། གནས་གཅིག་ཏུ་ལྷན་ཅིག་ཉལ་བར་བྱེད་ན་ལྟུང་བྱེད་དོ། །དགེ་ཚུལ་མ་ཞེས་བྱ་བ་ནི་མཛེས་མ་དང ། རྒྱལ་མའོ། །དགེ་སློང་མ་རྣམས་ཤེས་བྱ་བ་ནི་ཆོས་འདི་པ་དག་གོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ། །ཞེས་བྱ་བ་ནི་ལྷག་པར་སྤྱད་ཀྱང་དགེ་སློང་གི་ཚུལ་གྱི་བར་ཆད་དུ་མི་འགྱུར་བའོ། །དེ་དག་ལ་ཞེས་བྱ་བ་ནི་དགེ་ཚུལ་མ་མཛེས་མ་དང ། རྒྱལ་མ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་དག་གིས་སོ། །འདི་སྐད་ཅེས་བརྗོད་པར་བྱའོ་ཞེས་བྱ་བ་ནི་བཞམས་ཏེ་བསྒོ་བས་སྔ་མ་ཇི་ལྟ་བ་བཞིན་དུ་བསྒོ་བའོ། །ཡང་དག་པར་བསྟན་པ་ནི་དེ་ཡིན། ཡང་དག་པར་བསྒོ་བ་ནི་དེ་ཡིན་ནོ། །དེ་གཉིས་ལ་དེ་ལྟར་རྗེས་སུ་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་བསྙིལ་བའི་ལས་བྱོས་ཤིག་ཅེས་བྱ་བ་ནི་གོང་མ་ཇི་ལྟ་བ་བཞིན་དུ་བྱ་བའོ། །ཡང་དགེ་སློང་མ་གང་ཞིག་ཅེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་བདག་ཉིད་དམ། གཞན་གྱིས་སྨྲས་པར་གྱུར་པའོ། །དེ་ལྟར་བསྙིལ་བ་ཞེས་བྱ་བ་ནི་བསྙིལ་བའི་ལས་བྱས
9.234b
པའོ། །དགེ་ཚུལ་མ་ཞེས་བྱ་བ་ནི་མཛེས་མ་དང ། རྒྱལ་མའོ། །ཉེ་བར་འཇོག་པར་བྱེད་དམ་ཞེས་བྱ་བ་ནི་གནས་སྦྱིན་པར་བྱེད་པའོ། །ཉེ་བར་སྟོན་པར་བྱེད་དམ་ཞེས་བྱ་བ་ནི་འདྲི་བ་སྦྱིན་པར་བྱེད་པའོ། །ཀུན་དུ་ལོངས་སྤྱོད་པར་བྱེད་དམ། ཞེས་བྱ་བ་ནི་བཀུར་སྟི་རང་གིར་བྱེད་པའོ། །ཀུན་དུ་གནས་པར་བྱེད་གནས་གཅིག་ཏུ་ཉལ་བར་བྱེད་ཅེས་བྱ་བ་ནས་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་དུ་ཅུང་ཟད་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་མ་ཉེ་བར་འཇོག་པར་བྱེད་དམ། ཉེ་བར་སྟོན་པར་བྱེད་དམ་ཞེས་བྱ་བ་ནས། གནས་གཅིག་ཏུ་ཉལ་བར་བྱེད་དམ་ཞེས་བྱ་བའི་བར་ཏེ། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་།། སྡོམ་ལ། ཁ་དོག་ལེན་དང་ཟླ་ཕྱེད་དང ། །ཆེད་དུ་བསམས་དང་འགྱོད་པ་དང ། ག་ག་ཚིལ་དང་ཆུར་རྩེ་དང ། །སྐྱེས་པ་ཉལ་དང་སྔངས་མི་བྱ། །གོས་སྦྱིན་གཞི་མེད་ལམ་དུ་ནི། །སྐྱེས་པར་འགྲོགས་ཏེ་འགྲོ་མི་བྱ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་རྒྱལ་པོ་གཟུགས་ཅན་སྙིང་པོས་ཀླུའི་རྒྱལ་པོ་རི་བོ་དང ། ཡིད་འོང་ལྡན་གཉིས་ཀྱི་དུས་མཆོད་བཙུགས་པ་དང ། དེ་ནས་དུས་གཞན་ཞིག་ན་ལྷོ་ལམ་ནས་གར་མཁན་གྱི་སློབ་དཔོན་ཆེན་པོ་ཞིག་འོངས་ཏེ། དེས་སངས་རྒྱས་ཀྱི་སྤྱོད་པ་ཞེས་བྱ་བའི་གར་ཐབས་བྱས་པ་དང ། དད་པ་ཅན་རྣམས་ལས་བྱ་དགའ་ཆེར་ཐོབ་བོ་ཞེས་བྱ་བ་ནས། དྲུག་སྡེ་རྣམས་སུན་ཕྱུང་ངོ་ཞེས་བྱ་བའི་བར་རོ། །དེ་ནས་དེའི་འོག་ཏུ་དྲུག་སྡེ་རྣམས་དང ། དགེ་སློང་མ་བཅུ་གཉིས་སྡེ་རྣམས་ཀྱིས་གར་གྱི་བརྡ་ཐབས་དག་སྦྱར་ནས་གར་བྱས་པ་དང་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ཐམས་ཅད་ནི་དགེ་སློང་མ་གང་དག་ཁྱིམ་པ་གོན་པའི་གོས་དཀར་པོ་གྱོན་པ་ལས་གྱུར་ཏོ་སྙམ་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། ་བསླབ་པ་བཅའ་བའི་བར
9.235a
དུ་མཛད་དེ། དགེ་སློང་མས་གོས་སར་པ་རྙེད་ན་ཁ་དོག་བསྒྱུར་བ་གསུམ་པོ་སྔོན་པོ་འམ། འདམ་ཁ་འམ། ངུར་སྨྲིག་གང་ཡང་རུང་བའི་ཁ་དོག་ཏུ་བསྒྱུར་བར་བྱའོ། །གལ་ཏེ་དགེ་སློང་མས་ཁ་དོག་བསྒྱུར་བ་གསུམ་པོ་གང་ཡང་རུང་བའི་ཁ་དོག་མ་བསྒྱུར་བའི་གོས་སར་པ་གྱོན་ན་ལྟུང་བྱེད་དོ། །སར་པ་ཞེས་བྱ་བ་ལ་སར་པ་ནི་གཉིས་ཏེ། གསར་པ་དང ། གསར་དུ་རྙེད་པ་སྟེ། དོན་འདི་ལ་ནི་གསར་དུ་རྙེད་པ་ལ་བྱ་བར་དགོངས་སོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །དགེ་སློང་མ་ཞེས་བྱ་བ་ནི་ཆོས་འདི་པ་དག་གོ། །ཁ་དོག་བསྒྱུར་བ་གསུམ་པོ་གང་ཡང་རུང་བར་མ་བསྒྱུར་ན་ཞེས་བྱ་བ་ནི་ཁ་དོག་མ་བསྒྱུར་ནའོ། །གོས་སར་པ་གྱོན་ན་ཞེས་བྱ་བ་ནི་བགོས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁ་དོག་བསྒྱུར་བ་གསུམ་པོ་གང་ཡང་རུང་བའི་ཁ་དོག་མ་བསྒྱུར་བའི་གོས་སར་པ་གྱོན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཐ་ན་ལྷུང་བཟེད་ཀྱི་སྣོད་ཙམ་མ་བསྒྱུར་ན་ཡང་ཉེས་བྱས་སོ། །ལྟུང་བྱེད་ལྔ་པའི་དང་པོ་རྫོགས་སྷོ།། ་་་་་་་་་་་་་།། སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ཡངས་པ་ཅན་དུ་དྲུག་སྡེ་རྣམས་ལ་བརྟེན་ནས་ལེན་པའི་བསླབ་པའི་གཞི་བཅའ་བ་མཛད་ལ། མཉན་ཡོད་དུ་ནི་ཀུན་དགའ་བོ་ལ་བརྟེན་ནས་རྗེས་སུ་གནང་ངོ ། །དེ་ནས་བཅུ་གཉིས་སྡེ་དེ་དག་གིས་ཀུན་དགའ་ར་བར་གཏོགས་པ་འམ། ཀུན་དགའི་ར་བར་མ་གཏོགས་པ་ན་རིན་པོ་ཆེ་འམ། རིན་པོ་ཆེར་སྨོས་པ་དག་འདུག་པ་རང་གི་ལག་གིས་ལེན་པར་བྱེད། ལེན་དུ་འཇུག་པར་བྱེད་ཅིང་གང་གི་ཡིན་པ་དེ་ལ་ཡང་སྦྱིན་པར་མི་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རིན་པོ་ཆེ་འམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ། ལེན་དུ
9.235b
འཇུག་ན་ཀུན་དགའི་ར་བར་གཏོགས་པ་ན་འདུག་པ་འམ། གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ལྟུང་བྱེད་དོ། །དགེ་སློང་མ་གང་ཞིག་གིས་ཀུན་དགའི་ར་བར་གཏོགས་པ་འམ། གནས་ཁང་དུ་གཏོགས་པ་ན་རིན་པོ་ཆེ་འམ། རིན་པོ་ཆེར་སྨོས་པ་འདུག་ན་འདི་སྙམ་དུ། འདི་སུའི་ཡིན་པ་དེ་ཉིད་ལེན་པར་འགྱུར་གྲང་ཞེས་བསམས་ནས་བླང་བར་བྱ་སྟེ། དེ་ལ་ཆོ་ག་ནི་དེ་ཡིན་ནོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །རིན་པོ་ཆེ་འམ་རིན་པོ་ཆེར་སྨོས་པ་ནི་གཡུལ་ངོར་སྤྱད་པའི་ཡོ་བྱད་ཐམས་ཅད་དང ། བསྐྱེད་མོས་ཚལ་གྱི་ཡོ་བྱད་ཐམས་ཅད་དོ། །ལེན་ན་ཞེས་བྱ་བ་ནི་རང་གིས་སོ། །ལེན་དུ་འཇུག་ན་ཞེས་བྱ་བ་ནི་གཞན་ནོ། །ཀུན་དགའ་ར་བར་གཏོགས་པ་ན་འདུག་པ་ནི་སྐྱེད་མོས་ཚལ་ན་འདུག་པའོ། །གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ཞེས་བྱ་བ་ནི་གཙུག་ལག་ཁང་གི་ནང་ནའོ། །དེས་འདི་སྙམ་དུ་འདི་སུའི་ཡིན་པ་དེ་ཉིད་ལེན་པར་འགྱུར་གྲང་ཞེས་དེ་ཉིད་རྐྱེན་དུ་བྱས་ནས་བླང་བར་བྱའོ། །ཞེས་བྱ་བ་ནི་དེ་ཉིད་རྗེས་སུ་འཐུན་པར་བྱས་པའི་ཆོས་ཡིན་ནོ། །དུས་མ་གཏོགས་ཏེ་ཞེས་བྱ་བ་ནི་གཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ནོར་བུ་ལེན་པར་བྱེད་ན་མིག་ཕུག་པ་ལེན་ན་ལྟུང་བྱེད་དོ། །མིག་མ་ཕུག་པ་ལེན་ན་ཉེས་བྱས་སོ། །ནོར་བུ་ལ་ཇི་ལྟ་བ་དེ་བཞིན་དུ་མུ་ཏིག་དང ། རྡོ་རྗེ་དང ། བཻ་དཱུརྱ་དང ། དུང་དང ། མན་ཤེལ་དང ། བྱི་རུ་དང ། དངུལ་དང ། ་རིན་པོ་ཆེ་དང ། དམར་པོ་དང ། དུང་གཡས་སུ་འཁྱིལ་བ་ཕུག་པ་ལེན་ན་ལྟུང་བྱེད་དོ། །མ་ཕུག་པ་ལེན་ན་ཉེས་བྱས་སོ། །ཐ་ན་ནོར་བུ་མཆིང་བུ་ལེན་ན་ཡང་ཉེས་བྱས་སོ། །མགུལ་གདུབ་ལེན་ན་ལྟུང་བྱེད་དོ། །དེ་བཞིན་དུ་གདུབ་བུ་རྒྱན་ཅན་དང་དཔུང་རྒྱན་དང ། དོ་ཤལ་དང ། སེ་མོ་དོ་ལ་སོགས་པ་ལ་ཡང་ལྟུང་བྱེད་དོ། །ཐ་ན་ནོར་བུ་དོ་ཟན་ལེན་ན་ཡང་ཉེས་བྱས་སོ་ཞེས་བྱ་བའི་བར་རོ། །དགེ་སློང་མས་དངུལ་གྱི་ནོར་བུ་ལེན་ན་མངོན་མཚན་ཅན་ཡིན་ན་ལྟུང་བྱེད་དོ། །
9.236a
མངོན་མཚན་ཅན་མ་ཡིན་ན་ཉེས་བྱས་སོ། །ཐ་ན་ཀོ་ལྷམ་བཅོས་བུ་ལེན་ན་ཡང་ཉེས་བྱས་སོ། །དགེ་སློང་མས་པི་བང་རྒྱུད་དང་བཅས་པ་ལེན་ན་ལྟུང་བྱེད་དོ། །རྒྱུད་མེད་པ་ལེན་ན་ཉེས་བྱས་སོ། །དེ་བཞིན་དུ་བཱ་བ་བྷི་ས་ཀ་དང ། པི་བང་རྒྱུད་གཅིག་པ་དང ། ཁར་རྔ་དང ། རྔ་བོ་ཆེ་དང ། རྫ་རྔ་དང ། རྔ་པ་ཏ་ཧ་ལ་སོགས་པ་རྒྱུད་དང་བཅས་པ་ལེན་ན་ལྟུང་བྱེད་དོ། །རྒྱུད་མེད་པ་ལེན་ན་ཉེས་བྱས་སོ། །ཐ་ན་རྩཝ་ལས་བྱས་པའི་པི་བང་རྒྱུད་དང་ཆས་པ་ལེན་ན་ལྟུང་བྱེད་དོ། །རྒྱུད་མེད་པ་ལེན་ན་ཉེས་བྱས་སོ། །དེ་བཞིན་དུ་རྡོ་རྗེ་རྩེ་གཅིག་པ་དང ། འཁོར་ལོ་དང ། མཚོན་རྩེ་གཅིག་པ་དང ། རལ་གྲི་དང ། མདུང་ཐུང་དང ། མདའ་བོ་ཆེ་དང ། མདུང་དང ། མདུང་ཕྱེད་ལྕགས་ལས་བྱས་པ་དང ། ལྕགས་མདའ་དང ། མདའ་ཕྱེད་ལྕགས་ལས་བྱས་པ་འཕང་དུ་རུང་བ་ལེན་ན་ལྟུང་བྱེད་དོ། །འཕང་དུ་མི་རུང་བ་ལེན་ན་ཉེས་བྱས་སོ། །དགེ་སློང་མས་མདའ་མདེའུ་དང་བཅས་པ་ལེན་ན་ལྟུང་བྱེད་དོ། །མདེའུ་མེད་པ་ལེན་ན་ཉེས་བྱས་སོ། །ཐ་ན་རྩཝའི་གཞུ་ལེན་ན་ཡང་ཉེས་བྱས་སོ། །དགེ་སློང་མས་སངས་རྒྱས་ཀྱི་སྐུ་གཟུགས་བརྙན་རིང་བསྲེལ་དང་བཅས་པ་ལེན་ན་ལྟུང་བྱེད་དོ། །རིང་བསྲེལ་མེད་པ་ཡིན་ན་ཉེས་བྱས་སོ། །གལ་ཏེ་སྟོན་པ་ལ་མཆོད་པའི་འདུ་ཤེས་ཀྱིས་ལེན་པར་བྱེད་ཅིང ། དགེ་ཚུལ་མ་འམ་རུང་བར་བྱེད་པའི་ལག་ཏུ་བཞག་པ་ལ་ནི་ལྟུང་བ་མེད་དོ། ་་་་་་།བར་སྡོམ་ནི། ནོར་བུ་མགུལ་གདུབ་པི་བང་དང ། །མདུང་དང་གཞུ་དང་མདའ་དག་དང ། །རིང་བསྲེལ་བཅས་པའི་སྐུ་གཟུགས་ཏེ། །འདིར་ནི་ཡང་དག་བསྡུས་པ་ཡིན། །ལྟུང་བྱེད་ལྔ་པའི་གཉིས་པ་རྫོགས་སྷོ།། ་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་རྒྱལ་པོ་གཟུགས་ཅན་སྙིང་པོ་ལ་དཀའ་ཐུབ་ཀྱི་ཆུ་གྲང་བ་ན་དྲོ་བར་ཚོར་བ་དང ། དྲོ་བ་ན་བསིལ་བར་ཚོར་བ་གསུམ་ཡོད་པ་དེ། གཅིག་ལ་ནི་རྒྱལ་པོ་རང་ཉིད་ཁྲུས་བྱེད་དོ། །གཉིས་པར་ནི་བཙུན་མོའོ། །གསུམ་པར་ནི་འཇིག་རྟེན་ཐམས་ཅད་ཀྱི་ཐུན་མོང་ངོ ། །དེ་ནས་རྒྱལ་པོ་གཟུགས་ཅན་སྙིང་པོས
9.236b
བསམས་པ། བདག་གིས་བཅོམ་ལྡན་འདས་དང ། ཉན་ཐོས་ཀྱི་དགེ་འདུན་ལ་ཐམས་ཅད་དུ་ཡོ་བྱད་ཐམས་ཅད་ཀྱིས་བཀུར་སྟི་མང་དུ་ནི་བྱས་ན་དཀའ་ཐུབ་ཀྱི་ཆུའི་ཁྲུས་ཀྱིས་མ་བྱས་ཀྱིས། མ་ལ་བདག་གིས་བཅོམ་ལྡན་འདས་དང ། དགེ་སློང་དང ། དགེ་སློང་མ་རྣམས་ལ་དཀའ་ཐུབ་ཀྱི་ཆུ་གཉིས་ཅི་བདེར་དབུལ་ལོ་སྙམ་དུ་བསམས་ནས། རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་རྒྱལ་པོ་གཟུགས་ཅན་གྱི་སྙིང་པོ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད་ཅེས་བྱ་བ་ནས། སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཉན་ཐོས་མའི་དགེ་འདུན་དང་ཐབས་གཅིག་ལ་བདག་དཀའ་ཐུབ་ཀྱི་ཆབ་ཉིད་དབུལ་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཁྲུས་བགྱིད་པ་གང་ལགས་པ་དེར་ནི། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཁྲུས་མཛད་དུ་གསོལ། གང་དུ་མཆིས་བྲང་འཁོར་དང་བཅས་པ་ཁྲུས་བགྱིད་པ་དེར་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་ཅི་བདེར་ཁྲུས་བགྱི་ཞིང་བཞེས་སུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་རྒྱལ་པོ་གཟུགས་ཅན་སྙིང་པོ་ལས་འདི་ལྟ་སྟེ། དཀའ་ཐུབ་ཀྱི་ཆུའི་ཁྲུས་བཞེས་པར་གནང་ངོ ། །དེ་ནས་ཇི་ཙམ་ན་རྒྱལ་པོ་ཞེས་བྱ་བ་ནས་སོང་ངོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་རྣམས་ཀྱིས་བཅོམ་ལྡན་འདས་རྒྱལ་པོ་གཟུགས་ཅན་སྙིང་པོས་དཀའ་ཐུབ་ཀྱི་ཆུའི་ཁྲུས་ལ་སྤྱན་དྲངས་པ་ལས། བཅོམ་ལྡན་འདས་ཀྱིས་ཀྱང་གནང་ངོ་ཞེས་ཐོས་སོ། །ཐོས་ནས་བཅུ་གཉིས་སྡེ་དེ་རྣམས་རྒྱལ་པོ་གཟུགས་ཅན་སྙིང་པོའི་བཙུན་མོའི་ཁྲུས་བྱེད་པའི་དཀའ་ཐུབ་ཀྱི་ཆུ་གང་ན་བ་དེར་ཁྲུས་ཀྱི་ཕྱིར་དོང་ངོ ། །
9.237a
དེའི་ཚེ་རྒྱལ་པོ་གཟུགས་ཅན་སྙིང་པོའི་བཙུན་མོ་ཁྲུས་བྱེད་པར་འདོད་ནས་དེ་དཀའ་ཐུབ་ཀྱི་ཆུ་གང་ན་བ་དེར་སོང་བ་ན་ཞེས་བྱ་བ་ནས། བཅུ་གཉིས་སྡེ་རྣམས་ལས་སྐབས་མ་རྙེད་དོ་ཞེས་བྱ་བའི་བར་རོ། །དེ་ནས་དགེ་སློང་མ་རྣམས་ཀྱི་མདུན་དུ་སྨོད་པར་བྱེད་པ་ན་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྲུས་མི་བྱའོ། །དེ་ནས་ཁྲུས་མ་བྱས་པས་ལུས་ཤིན་དུ་དྲི་མི་ཞིམ་ཞིང་བསོད་སྙོམས་ལ་ཞུགས་པ་ན་ཁྱིམ་པ་མོ་རྣམས་ཀྱིས་འདི་སྐད་ཅེས་སྨྲས་སོ། །དྲི་ངན་པ་ཞིག་མནམ་ལགས་སོ། །དགེ་སློང་མ་དྲང་པོ་དྲང་བའི་རང་བཞིན་ཅན་དེ་རྣམས་ཀྱིས་འདི་སྐད་ཅེས་སྨྲས་སོ། །དྲི་ངན་པ་དེ་ནི་ཁོ་མོ་ཅག་གི་ལུས་ཀྱི་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །ཁྱེད་ཅག་གིས་ཁྲུས་མ་བགྱིས་སམ། དེ་དག་གིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་ཁྲུས་མི་བྱའོ་ཞེས་དགག་པ་མཛད་དོ། །ཞེས་བྱ་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། ཟླ་བ་ཕྱེད་ཕྱེད་ཅིང་ཁྲུས་བྱའོ། །དེ་ནས་ཚ་བས་གདུངས་ནས་ཞེས་བྱ་བ་ནས། ཟླ་བ་ཕྱེད་དང་གསུམ་ནི་ཚ་བའི་དུས་སོ་ཞེས་བྱ་སྟེ། ཁྲུས་བྱའོ་ཞེས་བྱ་བའི་བར་རོ། །དེ་བཞིན་དུ་ན་བ་དུས་སོ་ཞེས་བྱིན་གྱིས་བརླབས་ཏེ་ཁྲུས་བྱའོ། །དེ་བཞིན་དུ་ལས་དུས་སོ། །ལམ་དུས་སོ། །རླུང་དང་ཆར་པ་དུས་སོ་ཞེས་བྱིན་གྱིས་བརླབས་ཏེ་ཁྲུས་བྱའོ། །དེ་ནས་བཅུ་གཉིས་སྡེ་དེ་རྣམས་ཚ་བ་དུས་སོ། །ཞེས་བྱས་ནས་དུས་ཐམས་ཅད་དུ་ཁྲུས་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་བྱའོ་ཞེས་གསུངས་པ་དེ་ལས་འདུམས་པར་བྱེད་པ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། སོ་ཀ་རྣམས་ཀྱིས་ཟླ་བ་ཕྱེད་དང་གཉིས་དང ། དབྱར་རྣམས་ཀྱི
9.237b
ཟླ་བ་དང་པོ་དང ། ཟླ་བ་ཕྱེད་དང་གསུམ་པོ་དེ་དག་ནི་ཚ་བའི་དུས་སོ། །ལྷག་མ་ནི་ན་བ་དུས་སོ། །ལས་དུས་སོ། །ལམ་དུས་སོ། །རླུང་དུས་སོ། །ཆར་དུས་སོ། །རྫི་ཆར་དུས་ཏེ། དེ་ལ་དེ་ནི་དུས་ཡིན་ནོ། །ཟླ་བ་ཕྱེད་ཅིང་ཞེས་བྱ་བ་ནི་ཟླ་བའི་ངོ་ཕྱེད་ཅིང་ངོ། །ཁྲུས་ཤེས་བྱ་བ་ལ་ཁྲུས་ནི་རྣམ་པ་གཉིས་ཏེ། དབང་བསྐུར་བའི་ཁྲུས་དང ། འཇུག་པའི་ཁྲུས་སོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་སོ་ཀ་རྣམས་ཀྱི་ལྷག་མ་ཟླ་བ་ཕྱེད་དང་གཉིས་དང ། དབྱར་རྣམས་ཀྱི་དང་པོ་ཞེས་བྱ་བ་ནི་ཐོག་མའི་ཟླ་བ་སྟེ་དབྱར་ཟླ་ར་བ་དང ། ཟླ་བ་ཕྱེད་དང་གསུམ་པོ་འདི་དག་ནི་ཚ་བའི་དུས་སོ། །ལྷག་མ་ནི་ན་བ་དུས་སོ། །ཞེས་བྱ་བ་ནི་ཁྲུས་མ་བྱས་ན་ན་བར་འགྱུར་བའོ། །ལས་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི་ལས་དག་བྱས་པས་དེ་དག་དུབ་པར་གྱུར་པའོ། །ལམ་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི་དཔག་ཚད་ཕྱེད་དམ་དཔག་ཚད་གཅིག་གི་ལམ་ནས་འོངས་པས་དེ་དག་དུབ་པར་གྱུར་པའོ། །རླུང་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི་རླུང་གིས་དཀྲུགས་པར་གྱུར་པ་སྟེ། ཐ་ན་ཆོས་གོས་ཀྱི་གྲ་ཙམ་རླུང་གིས་བསྒུལ་བར་གྱུར་པའོ། །ཆར་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི་ཆར་གྱི་ཐིགས་པ་གཉིས་སམ། གསུམ་ལུས་ལ་བབ་པར་གྱུར་པ་ནི་ཆར་གྱི་དུས་ཡིན་ནོ། །རྫི་ཆར་དུས་སོ་ཞེས་བྱས་ཏེ། ཁྲུས་བྱའོ་ཞེས་བྱ་བ་ནི་དེ་རླུང་གིས་ཀྱང་བསྒུལ་ལ་ཆར་གྱི་ཐིགས་པ་གཉིས་སམ་གསུམ་ཡང་ལུས་ལ་བབ་པར་གྱུར་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མས་དབང་བསྐུར་བའི་ཁྲུས་ཀྱིས་ཁྲུས་བྱེད་ན། དེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ཇི་སྲིད་དུ་ཆུས་ལྟེ་བར་སོན་གྱི་བར་དུ་ནི་ཉེས་བྱས་སོ། །ཆུ་ལྟེ་བ་ལས་འདས་ན་ལྟུང་བྱེད་དོ། །དགེ་སློང་མས་འཇུག་པའི་ཁྲུས་ཀྱིས་ཁྲུས་བྱེད་ན་དེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ཇི་སྲིད་དུ་ཆུ་ལྟེ་བར་སོན་གྱི་བར་དུ་ཉེས་བྱས་སོ། །ཆུ་ལྟེ་བ་ལས
9.238a
འདས་ན་ལྟུང་བྱེད་དོ། །དེ་བཞིན་དུ་དབང་བསྐུར་བའི་ཁྲུས་ཀྱིས་ཁྲུས་བྱས་ནས་འཇུག་པའི་ཁྲུས་འདོད་ན་དུས་གཞན་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ཇི་སྲིད་དུ་ཆུ་ལྟེ་བར་སོན་གྱི་བར་དུ་ནི་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་འཇུག་པའི་ཁྲུས་ཀྱིས་ཁྲུས་བྱས་ནས་དབང་བསྐུར་བའི་ཁྲུས་ཀྱིས་ཁྲུས་བྱེད་པར་འདོད་ན། དེ་ཡང་ཞེས་བྱ་བ་ནས་ཇི་སྲིད་དུ་ཆུས་ལྟེ་བར་སོན་གྱི་བར་དུ་ནི་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་དྲོན་མོའི་ཁྲུས་བྱས་ནས་བསིལ་བའི་ཁྲུས་འདོད་ན། དེ་ཡང་ཞེས་བྱ་བ་ནས་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་བསིལ་བའི་ཁྲུས་བྱས་ནས་དྲོན་མོའི་ཁྲུས་འདོད་ན། དེ་ཡང་ཞེས་བྱ་བ་ནས་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་གལ་ཏེ་ཁྲུས་དེ་ཉིད་ཀྱིས་ཡང་བྱེད་པར་འདོད་ན་དེ་སྲིད་དུ་དུས་གཞན་བྱིན་གྱིས་བརླབ་པར་བྱའོ། །གལ་ཏེ་བརྒྱལ་བ་ལ་ཆུས་གཏོར་བ་དང ། རྒལ་ཏེ་འགྲོ་བ་དང ། མཆོངས་པ་ན་ཆུར་ལྟུང་བ་དང ། ཆུ་བོ་རྒལ་བ་འམ། མཚོ་ཆེན་པོ་རྒལ་བ་ན་ཆུར་ནུབ་པ་ལ་ནི་ལྟུང་བ་མེད་དོ། །ལྟུང་བྱེད་ལྔ་པའི་གསུམ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་འཆར་ཀ་ལས་བརྟེན་ཏེ་ཆེད་དུ་བསམས་པའི་དུད་འགྲོའི་སྐྱེ་གནས་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་དེ་དག་གིས་ཆེད་དུ་བསམས་པ་དང ། ཆེད་དུ་མ་བསམས་པར་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་རྣམས་ཀྱི་སྲོག་གཅོད་པར་བྱེད་པ་དང་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆེད་དུ་བསམས་ཏེ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ཀྱི་སྲོག་གཅོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཆེད་དུ་བསམས་ནས་ཞེས་བྱ་བ་ནི་རྣམ་པར་བརྟགས
9.238b
ནས་སོ་དུད་འགྲོའི་སྐྱེ་གནས་སུ་གཏོགས་པ་ཞེས་བྱ་བ་ནི་ཐ་ན་གྲོག་སྦུར་ཙམ་ཡང་ངོ ། །སྲོག་གཅོད་ན་ཞེས་བྱ་བ་ནི་དེའི་སྲོག་ལ་གནོད་པ་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཆེད་དུ་བསམ་སྟེ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ཀྱི་སྲོག་བཅད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ལྔ་པའི་བཞི་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱིས་ཆེད་དུ་བསམ་བཞིན་དུ་དགེ་སློང་མ་རྣམས་ལ་འགྱོད་པ་སྐྱེད་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆེད་དུ་བསམ་སྟེ་དགེ་སློང་མ་ལ་ཅི་ནས་ཀྱང་འདི་ཡུད་ཙམ་ཞིག་ཀྱང་རེག་པར་མི་འགྱུར་བར་བྱའོ་ཞེས་དེ་ཉིད་རྐྱེན་དུ་བྱས་ཏེ་དགེ་སློང་མ་ལ་འགྱོད་པ་སྐྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཆེད་དུ་བསམ་སྟེ་ཞེས་བྱ་བ་ནི་རྣམ་པར་བརྟགས་ནས་སོ། །འགྱོད་པ་བསྐྱེད་ན་ཞེས་བྱ་བ་ནི་འགྱོད་པ་བསྐྱེད་པའི་བསམ་བསམ་པ་ཅན་གྱི་ངག་དང ། ཚིག་དང ། རྗོད་པ་དང་ཞེས་བྱ་བ་ནས། ངག་གི་རྣམ་པར་རིག་བྱེད་ཅེས་བྱ་བའི་བར་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཆེད་དུ་བསམ་སྟེ་འགྱོད་པ་བསྐྱེད་པའི་བསམ་པས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཕུ་ནུ་མོ་རྒྱལ་པོ་ཆེ་གེ་མོ་འམ། ཚོང་དཔོན་ཆེ་གེ་མོ་འམ། ས་གཡོས་པ་འམ། ཟླ་བ་གཟས་ཟིན་པ་འམ། ཉི་མ་གཟས་ཟིན་པ་འམ། ཕྱོགས་ཚིག་པ་དྲན་ནམ་ཞེས་དྲིས་པ་ན། དེ་འདི་སྐད་ཅེས་མི་དྲན་ནོ་ཞེས་ཟེར་བ་དང ། དེ་འདི་སྐད་ཅེས་དུས་སྔར་བྱུང་བ་ཡིན་པས་ཕུ་ནུ་མོ་ཁྱོད་ནི་ལོ་ཉི་ཤུ་མ་ལོན་པར་བསྙེན་པར་རྫོགས
9.239a
པར་གྱུར་ཏེ། ཕུ་ནུ་མོ་ཁྱོད་བསྙེན་པར་རྫོགས་པ་མ་ཡིན་པས་སླར་ཡང་བསྙེན་པར་རྫོགས་དགོས་སོ་ཞེས་སྨྲས་ནས། དགེ་སློང་མ་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་འགྱོད་པ་སྐྱེད་པ་གང་ཡིན་པ་དེ་ལ་ལྟུང་བྱེད་དུ་འགྱུར་རོ། །དེ་བཞིན་དུ་ཕུ་ནུ་མོ་ཁྱོད་ཀྱི་མཁན་མོ་སུ་ཡིན། དེ་འདི་སྐད་ཅེས་ཆེ་གེ་མོ་ཡིན་ནོ་ཞེས་ཟེར་བ་ན་དེ་འདི་སྐད་ཅེས་དགེ་སློང་མ་ཆེ་གེ་མོ་ཞེས་བྱ་བ་དེ་ནི་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་པ་ཡིན་ནོ། །ཞེས་སྨྲས་པ་ན། དགེ་སློང་མ་དེ་འགྱོད་པ་སྐྱེས་ཀྱང་རུང ། མ་སྐྱེས་ཀྱང་རུང་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཚུལ་ཁྲིམས་འཆལ་བ་ཡིན་ནོ་ཞེས་ཟེར་ན་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ་གནས་གང་དུ་བསྙེན་པར་རྫོགས། དེ་འདི་སྐད་ཅེས་གནས་ནི་ག་གེ་མོ་ཞིག་ཏུ་བསྙེན་པར་རྫོགས་སོ་ཞེས་ཟེར་བ་ན། དེ་འདི་སྐད་ཅེས་གནས་དེ་ནི་མཚམས་མ་བཅད་པ། དེ་ནི་དཀྱིལ་འཁོར་བར་མི་མངོན་པ། མི་མཐུན་པ་འཁྲུགས་པས་ཁྱོད་བསྙེན་པར་རྫོགས་ཀྱི་འཐུན་པས་མ་ཡིན་པས་ཕུ་ནུ་མོ་ཁྱོད་ནི་བསྙེན་པར་མ་རྫོགས་པ་ཡིན་གྱི་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ་མཁན་མོ་དང་སློབ་དཔོན་གྱི་གོས་དག་ལེན་ནམ། དེ་འདི་སྐད་ཅེས་ལེན་ནོ་ཞེས་ཟེར་བ་ན་དེ་འདི་སྐད་ཅེས་ཁྱོད་ནི་ཕས་ཕམ་པར་འགྱུར་བའི་ལྟུང་བ་བྱུང་བ་ཡིན་ནོ་ཞེས་སྨྲས་ན་ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ་འདུ་བྱེད་ཐམས་ཅད་མི་རྟག་པ་དང ། ཆོས་ཐམས་ཅད་བདག་མེད་པ་དང ། མྱ་ངན་ལས་འདས་པ་ནི་ཞི་བའོ་ཞེས་རབ་ཏུ་སྟོན་ཏམ་དེ་འདི་སྐད་ཅེས་རབ་ཏུ་སྟོན་ཏོ་ཞེས་ཟེར་བ་ན། དེ་འདི་སྐད་ཅེས་ཁྱོད་ཀྱིས་མིའི་ཆོས་བླ་མ་སྨྲས་པས་ཁྱོད་ཕས་ཕམ་པར་འགྱུར་བའི་ལྟུང་བ་བྱུང་བ་ཡིན་ནོ། །ཞེས་ཟེར་བ་ཡང་ངོ ། །དེ་བཞིན་དུ་ཕུ་ནུ་མོ་ཕྱོགས་ག་གེ་མོ་ཞིག་ཏུ་འགྲོ་འམ། དེ་འདི་སྐད་ཅེས་འགྲོའོ་ཞེས་ཟེར་བ་ན་དེ་འདི་སྐད་ཅེས་གཏུམ་པོ་རྣམས་ཀྱིས་གནས་བཏབ་པའི་ཕྱོགས་ཡིན་པས། ཁྱོད་ཕས་ཕམ་པར
9.239b
འགྱུར་བའི་ལྟུང་བ་བྱུང་བར་འགྱུར་དུ་འོང་ངོ ། །ཞེས་སྨྲས་ནས་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ་ཤ་དང ། ཉ་དང ། ཤ་སྐམ་དང ། ཆུར་བ་དང ། འོ་མ་དང ། ཞོ་དང ། མར་སར་ཟ་འམ། དེས་འདི་སྐད་ཅེས་ཟའོ་ཞེས་སྨྲས་པ་ན། དེ་འདི་སྐད་ཅེས་ཁྱོད་ཁ་ཟས་དེ་ལྟ་བུ་ཟ་ན་མཛེ་དང ། འབྲུམ་བུ་ཕྲ་མོ་དང ། ཤ་བཀྲ་དང ། ཤ་གཟིག་གུ་དང ། ཤུ་བ་དང ། གཡའ་བ་དང ། ཁྱི་རྔོ་དང ། སྐྱུག་བྲོ་བ་དང ། སྐྱ་རྦབ་དང ། སྐེམ་ནད་དང་ལུད་པ་དང་དབུགས་མི་བདེ་བ་དང ། སྐེམ་པ་སྟེ། ནད་ཀྱི་རྣམ་པ་དེ་ལྟ་བུ་དག་ཁྱོད་ལ་འབྱུང་བར་འགྱུར་རོ་ཞེས་སྨྲས་ན་དགེ་སློང་མ་འགྱོད་པར་གྱུར་ཀྱང་རུང ། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དོན་གཞན་དང་འདུལ་བའི་ཡོ་བྱད་ཀྱིས་ནི་ལྟུང་བ་མེད་དོ། །དེ་ལ་དོན་གཞན་ཞེས་བྱ་བ་ནི་ཕུ་ནུ་མོ་རྒྱལ་པོ་ཆེ་གེ་མོ་དྲན་ནམ། དེ་འདི་སྐད་ཅེས་དྲན་ནོ་ཞེས་ཟེར་ན། དེ་འདི་སྐད་ཅེས་རྒྱལ་པོ་དེ་ནི་ཡུན་རིང་མོ་ཞིག་ལོན་པས་ཕུ་ནུ་མོ་ཁྱོད་ལོ་ཉི་ཤུ་ཚང་ཞིང ། ལེགས་པར་བསྙེན་པར་རྫོགས་པ་ཡིན་གྱིས་ཁྱོད་ལ་སུས་ཅི་སྨྲས་ཀྱང་འགྱོད་པར་མ་བྱེད་ཅིག་ཅེས་བྱ་བ་དང ། དེ་བཞིན་དུ་ཕྱོགས་ཚིག་པ་དང་ཞེས་བྱ་བ་ནས། དེ་བཞིན་དུ་ཁྱོད་ཀྱིས་མཁན་མོ་ནི་ཚུལ་ཁྲིམས་དང་ལྡན་པ་མང་དུ་ཐོས་པ་ཡིན་ནོ་ཞེས་བྱ་བ་དང ། ཁྱོད་བསྙེན་པར་རྫོགས་པའི་གནས་ནི་མཚམས་བཅད་པ་དེ་ནི་དཀྱིལ་འཁོར་བར་མངོན་པ་ཡིན་ནོ་ཞེས་བྱ་བ་དང ། ཁྱོད་ཀྱིས་ལྷག་པར་ཉ་འམ། ཤ་འམ་ཞེས་བྱ་བ་ནས། མར་སར་གྱི་བར་དག་མ་ཟོས་གྲང ། ཁྱོད་ན་བར་འགྱུར་དུ་འོང་ཞེས་བྱ་བ་སྟེ། དེ་ལྟ་བུ་ནི་དོན་གཞན་ཡིན་ནོ། །འདུལ་བའི་ཡོ་བྱད་ཇི་ལྟ་བུ་ཞེ་ན། ཕུ་ནུ་མོ་ཁྱོད་ཀྱིས་རྐུ་སེམས་ཀྱིས་མཁན་མོ་དང ། སློབ་དཔོན་དག་གི་གོས་བླངས་པར་མ་གྱུར་གྲང་ཞེས་བྱ་བ་དང ། ལྟུང་བ་དང་བཅས་པར་མ་གྱུར་གྲང་ཞེས་བྱ་བ་དང ། ཁྱོད་མིའི་ཆོས་བླ་མའི་གཏམ་སྨྲ་བའི་བསམ་པས་གཏམ་མ་སྨྲས་གྲང་ཞེས་བྱ་བ་
9.240a
དང ། ཁྱོད་གནས་དེར་མ་སོང་ངམ། ཁྱོད་ཚངས་པ་མཚུངས་པར་སྤྱོད་པ་རྣམས་དང་མི་མཐུན་པར་མ་གྱུར་གྲང་ཞེས་བྱ་བ་སྟེ་དེ་ལྟ་བུ་ནི་འདུལ་བའི་ཡོ་བྱད་ཡིན་ནོ། ་་་་་་་་།བར་སྡོམ་ནི། རིགས་དང་བསྙེན་པར་རྫོགས་པ་དང ། །མཁན་མོ་ཉིད་དང་དེ་འཕྲོགས་དང ། །འགྲོ་བ་དང་ནི་སྨྲ་བ་དང ། །དོན་ཉིད་དང་ནི་འདུལ་བའོ། །ལྟུང་བྱེད་ལྔ་བའི་ལྔ་པ་རྫོགས་སྷོ།། ་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་དགོད་པའི་བསམ་པས་སོར་མོས་དགེ་སློང་མ་རྣམས་ཀྱི་མཆན་ཁུང་དག་ཏུ་འཛུགས་ཤིང་ག་ག་ཚིལ་བྱེད་པ་དང་དོན་ཉུང་བའི་དགེ་སློང་མ་དག་།སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། སོར་མོས་ག་ག་ཚིལ་བྱེད་ན་ལྟུང་བྱེད་དོ། །སོར་མོས་ཞེས་བྱ་བ་ནི་ག་ག་ཚིལ་བྱ་བའི་བསམ་པ་ཅན་གྱི་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སོར་མོ་གཅིག་གིས་ག་ག་ཚིལ་བྱེད་ན་ལྟུང་བྱེད་དོ། །དེ་བཞིན་དུ་གཉིས་དང ། ལྔའི་བར་གྱིས་བྱེད་ན་ལྟུང་བྱེད་ལྔའོ། །གལ་ཏེ་སྨེ་བ་འམ་ནག་ནོག་སྟོན་ན་ལྟུང་བ་མེད་དོ། །ལྟུང་བྱེད་ལྔ་པའི་དྲུག་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅུ་བདུན་སྡེ་རྣམས་ལས་བརྟེན་ཏེ་ཆུ་ལ་རྩེ་བའི་བསླབ་པའི་གཞི་བཅའ་བ་མཛད་པ་དང ། དེ་ནས་བཅུ་གཉིས་སྡེ་དེ་དག་ཆུར་ཞུགས་ནས་རྩེ་བར་བྱེད། རྩེར་འཇུག་པར་བྱེད་པ་དང ། དེ་དག་ལ་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་དག་ལ་ཡིན་གྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར
9.240b
བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཆུ་ལ་རྩེ་ན་ལྟུང་བྱེད་དོ། །ཆུ་ལ་ཞེས་བྱ་བ་ནི་དགེ་སློང་མས་རྩེ་བའི་བསམ་པ་ཅན་གྱི་ངག་དང ། ཚིག་དང་ཞེས་བྱ་བ་ནས་ངག་གི་རྣམ་པར་རིག་བྱེད་ཅེས་བྱ་བའི་བར་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གཞི་དགུ་ལས་ཏེ། དགེ་སློང་མས་ཆུར་རྩེ་བའི་བསམ་པས་ཆུར་འཇུག་པར་འདོད་པ་དང ། རས་ཀྱིས་འཆིང་བ་དང ། ཆུར་འཇུག་པ་དང ། བྱིའུ་ཟུལ་བྱེད་ན་ལྟུང་བྱེད་དོ། །དེ་བཞིན་དུ་སྟེང་དུ་འབྱུང་བར་བྱེད་པ་དང ། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བ་དང ། རྒྱུན་ཕྱོགས་ནས་བཟློག་ཕྱོགས་སུ་རྩོལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཆུ་ལ་རྔའི་སྒྲ་འབྱིན་ན་ལྟུང་བྱེད་དོ། །དེ་བཞིན་དུ་ཆུ་ལ་རྫ་རྔ། ཁ་གཅིག་པའི་བར་གྱི་སྒྲ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་མས་ཆུ་ཕན་ཚུན་དུ་འཐོར་བར་བྱེད་ན་ལྟུང་བྱེད་དོ། །དགེ་སློང་མས་ཆུ་ལ་དགའ་བར་བྱེད་ན་ལྟུང་བྱེད་དོ། །དགའ་བར་བྱེད་དུ་འཇུག་ན་ལྟུང་བྱེད་དོ། །དེ་བཞིན་དུ་རྩེ་བ་དང ། རྩེར་འཇུག་པ་དང ། མགུ་བར་བྱེད་པ་དང ། མགུ་བར་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་རྒོད་པ་དང ། འཕྱར་གཡེང་གིས་ལུས་ཀྱིས་སྙོམས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཐ་ན་བུམ་པའི་ཆུ་ལ་སོར་མོའི་བམ་ཏོལ་གྱིས་རྡེག་ན་ཡང་ཉེས་བྱས་སོ། །དེ་བཞིན་དུ་ཆུ་སྣོད་དང ། ཤ་ཁུ་དང ། འབྲས་ཁུ་དང ། ཐུག་པ་ཡང་ངོ ། །ནད་པས་རྩེ་བའི་བསམ་པས་ཐུག་པ་འམ། ཤ་ཁུ་ལ་བམ་ཏོལ་གྱིས་རྡེག་པ་ལ་ནི་ལྟུང་བ་མེད་དོ། །ལྟུང་བྱེད་ལྔ་པའི་བདུན་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་མ་འགགས་པ་ལ་བརྟེན་ཏེ་བུད་མེད་དང་གནས་གཅིག་ཏུ་ཉལ་བའི་བསླབ་པའི་གཞི་བཅའ་བ་མཛད
9.241a
པ་དེའི་ཚེ་བཅུ་གཉིས་སྡེ་རྣམས་སྐྱེས་པ་དག་དང་གནས་གཅིག་ཏུ་ཉལ་བར་བྱེད་དོ། །དེ་ནས་དགེ་སློང་མ་དེ་རྣམས་ཀྱིས་བཅུ་གཉིས་སྡེ་དག་ལ་འདི་སྐད་ཅེས་སྨྲས་སོ། །ཕུ་ནུ་མོ་དག་བཅོམ་ལྡན་འདས་ཀྱིས་གནས་གཅིག་ཏུ་ལྷན་ཅིག་ཉལ་བའི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་ཡིན་གྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྱེས་པ་དང ། གནས་གཅིག་ཏུ་ཉལ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །སྐྱེས་པ་དང་ལྷན་ཅིག་ཅེས་བྱ་བ་ནི་སྐྱེས་པའི་དབང་པོ་དང་ལྡན་པ་དང་ངོ ། །གནས་གཅིག་ཏུ་ཉལ་ན་ཞེས་བྱ་བ་ནི་གནས་བཞི་པོ་དག་ཏུ་སྐྱ་རེང་འཆར་བར་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་སྟེང་ཁང་གི་གཞི་ན་ཉལ་བར་བྱེད་ལ། སྐྱེས་པ་ནི་ཤོད་ན་ཉལ་ན་དགེ་སློང་མ་དེས་སྐས་བརྟུལ་བར་བྱའོ། །གལ་ཏེ་ཐེམ་སྐས་ཡིན་ན་དེར་ཡང་གཏན་པས་སྒོ་བཅད་ལ་དེའི་འོག་ཏུ་ཉལ་བར་བྱའོ། །གལ་ཏེ་སྐས་མ་བརྟུལ་ཏམ། གཏན་པས་སྒོ་མ་བཅད་པར་གློས་ཕབ་སྟེ་ཉལ་བར་བྱེད་ན་ལྟུང་བྱེད་དུ་འགྱུར་རོ། །དེ་བཞིན་དུ་བར་ཁང་ན་སྐྱེས་པ་ཉལ་ལ་ཤོད་ན་དགེ་སློང་མ་ཉལ་བར་བྱེད་ན་ཡང་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་སྟེང་ཁང་ན་སྐྱེས་པ་ཉལ་ལ་ཤོད་དུ་དགེ་སློང་མ་ཉལ་བར་བྱེད་ན་སྐས་བརྟུལ་བར་བྱ་བ་འམ། གཏན་པས་སྒོ་གཅད་པར་བྱའོ། །མ་བྱས་པར་ཉལ་བར་བྱེད་ན་ལྟུང་བྱེད་དོ། །དེ་བཞིན་དུ་བར་ཁང་ན་སྐྱེས་པ་ཉལ་ལ། ཤོད་ན་དགེ་སློང་མ་ཉལ་བར་བྱེད་ན་ཡང་ལྟུང་བྱེད་དོ། །དེ་བཞིན་དུ་ཕྱུགས་ར་ལ་སོགས་པ་དག་ཏུ་ཡང་ཞེས་བྱ་བ་ནས། དེར་ཡང་ཤིང་དང ། ་སབ་མ་དང ། རེ་ལྡེ་དག་གིས་འཁོར་བར་བསྐོར་བར་བྱའོ་ཞེས་བྱ་བ་ནས་མ་བྱས་ན
9.241b
ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་ཇི་ཙམ་ཅུང་ཟད་སྐྱེས་པ་དང་ལྷན་ཅིག་གནས་གཅིག་ཏུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ལྔ་པའི་བརྒྱད་པ་རྫོགས་སྷོ།། ་་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་གཅིག་པ། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་དགོད་པའི་བསམ་པས་མི་སྡུག་ཅིང་མི་སྡུག་པ་དག་གིས། དགེ་སློང་མ་གཞོན་ནུ་རྣམས་ལ་སྔངས་པར་བྱེད། སྔངས་སུ་འཇུག་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་ལ་སྔངས་པར་བྱེད་དམ། སྔངས་པར་བྱེད་དུ་འཇུག་ན་ཐ་ན་བཞད་བགད་ཀྱི་བསམ་པས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །སྔངས་པར་བྱེད་དམ་ཞེས་བྱ་བ་ནི་རང་གིས་སོ། །སྔངས་པར་བྱེད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་དགེ་སློང་མ་རྣམས་ལ་སྔངས་པར་བྱ་བའི་བསམ་པས་མི་སྡུག་ཅིང་མི་སྡུག་པ་དག་ཉེ་བར་དོང་ཞིང ། གནག་ཅིང་གནག་པ་སོལ་བའི་ཁ་དོག་འདྲ་བ་ཡིད་དུ་མི་འོང་བ་འདི་ལྟ་སྟེ། སྡོང་དུམ་ཚིག་པ་འདྲ་བ་དག་ཉེ་བར་དོང་ནས་འདི་སྐད་ཅེས་གཟུགས་འདི་འདྲ་བ་དག་གི་གནོད་སྦྱིན་དང ། ཡི་དགས་དང ། ཤ་ཟ་དང ། འབྱུང་པོ་དང ། གྲུལ་བུམ་དང ། ལུས་སྲུལ་པོ་དང ། སྲུལ་པོ་རྣམས་ཁྱོད་ཀྱི་དྲུང་དུ་འོངས་ནས་དེ་དག་གིས་གསོད་པར་འགྱུར། སྲོག་དང་ཕྲལ་བར་འགྱུར་རོ་ཞེས་སྨྲས་ན། དགེ་སློང་མ་སྔངས་པར་གྱུར་ཀྱང་རུང་མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དེ་བཞིན་དུ་སྒྲ་འབྱིན་པར་བྱེད་པ་འདི་ལྟ་སྟེ། སེངྒེ་དང་སྟག་དང ། སྤྱང་ཀི་རྣམས་ཀྱི་དང ། དེ་བཞིན་དུ་ཡི་དགས་དང ། ཤ་ཟ་རྣམས་ཀྱི་སྒྲ་སྣ་ཚོགས་དག་ཅེས་བྱ་བ་ནས
9.242a
ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དྲི་འབྱིན་པར་བྱེད་པ་འདི་ལྟ་སྟེ། ངན་སྐྱུགས་དང ། གཅིན་གྱི་དང ། རའི་དང ། ར་རལ་པ་ཅན་རྣམས་ཀྱི་དང ། དེ་བཞིན་དུ་ཡི་དགས་ལ་སོགས་པའི་དྲི་སྣ་ཚོགས་དག་ཅེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་རེག་པ་སྣ་ཚོགས་འབྱིན་པར་བྱེད་པ་འདི་ལྟ་སྟེ། ཤིང་དང ། སབ་མ་དང ། རེ་ལྡེ་དང ། ཕྱར་བ་རྣམས་ཀྱི་དང ། དེ་བཞིན་དུ་ཡི་དགས་ལ་སོགས་པའི་རེག་པ་སྣ་ཚོགས་དག་ཅེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་དགེ་སློང་མ་ལ་སྔངས་པར་བྱ་བའི་བསམ་པས་ཡིད་དུ་འོང་བའི་གཟུགས་དག་སྟོན་པར་བྱེད་པ་འདི་ལྟ་སྟེ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དང ། བྲམ་ཟེ་ཤིང་སཱ་ལ་ཆེན་པོ་ལྟ་བུ་དང ། ཁྱིམ་བདག་ཤིང་སཱ་ལ་ཆེན་པོ་ལྟ་བུ་རྣམས་ཏེ། གཟུགས་འདི་འདྲ་བའི་ལྷ་དང ། དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཏེ། དགེ་སློང་མ་སྔངས་པར་གྱུར་ཀྱང་རུང་མ་གྱུར་ཀྱང་རུང་ཉེས་བྱས་སུ་འགྱུར་རོ། །དེ་བཞིན་དུ་སྒྲ་ཡིད་དུ་འོང་བ་འབྱིན་པར་བྱེད་པ་འདི་ལྟ་སྟེ། པི་བང་དང ། ལྕགས་ཀྱི་སིལ་ཀྲོལ་དང ། ཁར་རྔ་དང ། ཤིན་དུ་དབྱངས་སྙན་རྣམས་ཀྱི་སྟེ། སྒྲ་འདི་ལྟ་བུའི་ལྷ་ལ་སོགས་པ་ཞེས་བྱ་བ་ནས་ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་དྲི་ཡིད་དུ་འོང་བ་འབྱིན་པར་བྱེད་པ་འདི་ལྟ་སྟེ། ཨ་ག་རུ་དང ། ཙན་དན་དང ། དུ་རུས་ཀ་དང ། ག་པུར་ལ་སོགས་པའི་སྟེ། དྲི་འདི་ལྟ་བུའི་ལྷ་ལ་སོགས་པ་ཞེས་བྱ་བ་ནས། ་ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་རེག་པ་ཡིད་དུ་འོང་བ་འབྱིན་པར་བྱེད་པ་འདི་ལྟ་སྟེ། དར་དང ། རས་དང ། གོས་དང ། དར་ལ་དང ། དུ་གུ་ལའི་གོས་རྣམས་ཀྱི་སྟེ། རེག་པ་འདི་ལྟ་བུའི་ལྷ་ལ་སོགས་པ་ཞེས་བྱ་བ་ནས། ཉེས་བྱས་སོ་ཞེས་བྱ་བའི་བར་རོ། །ལྟུང་བྱེད་ལྔ་པའི་དགུ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་མང་དུ་ཡོད་པས། དེ་ཡང་མང་དུ་ཟ་ཞིང ། མང་དུ་འཐུང་བས། རྡུལ་གྱིས་དེའི
9.242b
གོས་དག་མ་རུང་བར་གྱུར་པ་ན། དེས་གོས་དེ་དག་འཁྲུ་ཞིང་ཁ་བསྒྱུར་མ་ནུས་ནས་དེས་ལྷན་ཅིག་གནས་པ་དང ། ཉེ་གནས་དེ་དག་ལ་གཏན་བྱིན་ནོ། །དེ་དག་གིས་ཆོས་གོས་དེ་དག་བཀྲུས་ཤིང་ཁ་བསྒྱུར་ཏེ་གཏུར་བུ་དག་གི་ནང་དུ་བཅུག་ནས་དེ་ཉིད་ཀྱི་ལག་ཏུ་བཅོལ་ཏེ་ལྗོངས་རྒྱུ་ཞིང་དོང་ངོ ། །དེ་དག་ལྗོངས་རྒྱུ་ཞིང་དོང་བ་དང ། དེས་ཕྱིར་བླང་ངོ་སྙམ་ནས་གོས་དག་སྤྱད་དོ། །དེས་དེ་དག་ཡང་སླར་དྲི་མས་གོས་པར་བྱས་ནས་གཏུར་བུ་དེ་དག་ཉིད་ཀྱི་ནང་དུ་བཅུག་གོ། །འདི་དག་ལྷགས་ནས་གོས་དེ་དག་དྲི་མ་ཅན་དུ་བྱས་པ་མཐོང་ནས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་ལ་གོས་དག་བྱིན་ནས་དེའི་འོག་ཏུ་ཕྱིར་མ་བླངས་པར་སྤྱོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །གོས་ཞེས་བྱ་བ་ནི་བདུན་པོ་གང་ཡང་རུང་བའི་བར་དག་གོ། །ཕྱིར་མ་བླངས་པར་ཞེས་བྱ་བ་ནི་རྡེང་མ་བཅང་བར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གོས་བྱིན་ནས་དེའི་འོག་ཏུ་ཕྱིར་མ་བླངས་པར་སྤྱོད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་འགྲོགས་བཤེས་ཡིན་པ་དང ། ཐོས་ནས་དགའ་བར་འགྱུར་བ་ཡིན་ན་ལྟུང་བ་མེད་དོ། ་ལྟུང་བྱེད་ལྔ་པའི་བཅུ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་དང ། དགེ་སློང་མ་རྣམས་འཐབ་ཅིང་མཚང་འདྲུ་བར་བྱེད་དེ། ཁྲོས་ཤིང་ཞེ་སྡང་བའི་ཟིལ་གྱིས་ནོན་ནས་གཞི་མེད་པར་དགེ་སློང་མ་རྣམས་ལ་དགེ་འདུན་ལྷག་མས་གླེང་བར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ
9.243a
བའི་བར་དུ་མཛད་དེ། ཡང་དགེ་སློང་མ་གང་ཁྲོས་ཤིང་ཞེ་སྡང་ལ་མི་དགའ་བར་གྱུར་ནས་དགེ་སློང་མ་དག་པ་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་ཀྱིས་སྐུར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་དག་ནི་བཅུ་གཉིས་སྡེ་དག་གོ། །ཁྲོས་ནས་ཞེས་བྱ་བ་ནི་སྔ་མ་བཞིན་ནོ། །དགེ་འདུན་ལྷག་མས་ཞེས་བྱ་བ་ནི་ཉི་ཤུ་པོ་གང་ཡང་རུང་བས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེས་དེ་ལ་ལྟུང་བ་མ་བྱུང་བའི་ལྟ་བ་ཐོབ་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ་ཞེས་སྨྲས་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེས་དེ་ལ་ལྟུང་བྱེད་ཀྱི་ལྟ་བ་ཐོབ་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ་ཞེས་སྨྲས་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པ་ལས། དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ནས་འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ་ཞེས་སྨྲས་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེ་དེ་ལ་ཉེས་བྱས་ཀྱི་ལྟ་བ་ཐོབ་པ་ལས་དེས་འདུ་ཤེས་དང ། བཟོད་པ་དང ། འདོད་པ་དང ། བློ་གྲོས་དང ། རྟོག་པ་དང ། ལྟ་བ་བསྒྱུར་ཏེ་འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ་ཞེས་སྨྲས་ན་ལྟུང་བྱེད་དོ། །དེ་བཞིན་དུ་རིམ་པ་འདིས་དགེ་འདུན་གྱི་ལྷག་མའི་བག་ཙམ་གྱི་བསླབ་པའི་གཞི་ལ་དེ་བཞིན་དུ་རྒྱས་པར་བརྗོད་པར་བྱའོ། །དེ་ལྟ་མོད་ཀྱི་དགེ་སློང་མས་ཇི་ཙམ་ཅུང་ཟད་ཁྲོས
9.243b
ཤིང་ཞེ་སྡང་ལ་མི་དགའ་བས་གཞི་མེད་པར་དགེ་འདུན་ལྷག་མས་སྐུར་པ་འདེབས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ལྔ་པའི་བཅུ་གཅིག་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་ཡུལ་ཙམ་པའི་ཐ་ག་པའི་ཁྱེའུ་ཞིག་ཆུང་མ་བླངས་ནས་རིང་པོ་མ་ལོན་པར་དེ་རང་གི་ཆུང་མ་ལ་ཁྲོས་ནས་སླར་ཡང་ཙམ་པར་ཆས་པ་ན་དེའི་ཚེ་སྦོམ་དགའ་མོ་ལམ་ཁ་ན་འདུག་པ་དེས་ཁྱེའུ་དེ་མཐོང་ནས་འདི་སྐད་ཅེས་སྨྲས་སོ། །བཞིན་བཟངས་གར་འགྲོ་དེས་འདི་སྐད་ཅེས་སྨྲས་སོ། །ཙམ་པར་མཆིའོ། །དེ་ནས་སྦོམ་དགའ་མོ་དེ་དང་ལྷན་ཅིག་ཆས་པ་དང ། ཐ་ག་པའི་ཆུང་མ་ཁང་ཐོག་ན་འདུག་པ་དེས་ཁྱིམ་ཐབ་དགེ་སློང་མ་ཞིག་དང་འགྲོགས་ཏེ་འགྲོན་ལམ་དུ་ཞུགས་ཏེ་སོང་བ་མཐོང་ངོ ། །མཐོང་ནས་ཀྱང་སྐད་ཆེན་པོར་ཁོ་མོའི་ཁྱིམ་ཐབ་ཀྱིས་དགེ་སློང་མ་ཞིག་ཁྲིད་ནས་བྲོས་སོ་ཞེས་བསྒྲགས་པ་དང ། ་དེ་ནས་ཐ་ག་པ་རབ་ཏུ་མང་པོས་སྦོམ་དགའ་མོ་བརྡེགས་སོ། །དེ་ནས་མིག་ཕུབས་སྐྲངས་ཤིང་དབྱར་ཁང་དུ་སོང་བ་དང ། དགེ་སློང་མ་རྣམས་ཀྱིས་དྲིས་པ་ལས་དེས་སྐབས་དེ་རྒྱས་པར་སྨྲས་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུད་མེད་མེད་པར་སྐྱེས་པ་དང་ལྷན་ཅིག་འགྲོན་ལམ་དུ་ཞུགས་ཏེ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བུད་མེད་མེད་པར་སྐྱེས་པ་དང་ལྷན་ཅིག་ཅེས་བྱ་བ་ནི་གང་དུ་བུད་མེད་མེད་པར་རོ། །འགྲོན་ལམ་དུ་ཞུགས་ཏེ་འགྲོ་ན་ཞེས་བྱ་བ་ནི་དགོན་པའི་ལམ་དུ་འགྲོ་ནའོ། །ཐ་ན་གྲོང་བར་དུ་ཡང་རུང་སྟེ་ཞེས་བྱ་བ་ནི་གྲོང་ནས་གྲོང་དུ་འགྲོ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་མེད་པར་སྐྱེས་པ་དང་ལྷན་ཅིག་གྲོང་ནས་གྲོང་བར་དུ་འགྲོ་ན་རྒྱང་གྲགས་ཕྱེད་ཕྱེད་དུ་སོང་ན་དེ་ལ་ཉེས་བྱས་སོ། །རྒྱང་གྲངས་རྒྱང་གྲགས་སུ
9.244a
ནི་ལྟུང་བྱེད་དོ། །ལྟུང་བྱེད་ལྔ་པའི་བཅུ་གཉིས་པ་རྫོགས་སྷོ།། ་་་་་་་་་་་་་་སྡོམ་ལ། རྐུན་མ་ལྷན་ཅིག་ཉི་ཤུ་མིན། །མི་བརྐོ་འགྲོན་པོས་བསླབ་པ་དང ། །ཉན་རྣ་ལྡང་དང་མ་གུས་དང ། །ཆང་འཐུང་དུས་མིན་རྒྱུ་བའོ། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་རྒྱལ་པོའི་ཁབ་ནས་ཤོ་གམ་འདྲལ་བའི་ཚོང་པ་རྣམས་དང་ལྷན་ཅིག་མཉན་ཡོད་དུ་ཆས་ཏེ། དེ་ནས་ཤོ་གམ་འདྲལ་བའི་ཚོང་པ་དང ། ལམ་གོལ་བ་ནས་དོང་བ་ན་ཤོ་གམ་པ་དག་གིས་སླེབས་ནས། དེར་སྦོམ་དགའ་མོ་ཡང་བརྡེགས་སོ། །དེ་རིམ་གྱིས་མཉན་ཡོད་དུ་ཕྱིན་པ་དང ། དེ་ལ་དགེ་སློང་མ་རྣམས་ཀྱིས་འཕགས་མ་བྱོན་པ་ལེགས་སོ། །ཤོ་གམ་པ་དག་གིས་མ་གཙེས་གྲང་ཞེས་དྲིས་པ་དང་དེས་སྐབས་དེ་རྒྱས་པར་སྨྲས་པ་ལས་དགེ་སློང་མ་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ཐམས་ཅད་ནི་དགེ་སློང་མ་གང་རྐུན་པོའི་དོན་འཐུན་དང་ལྷན་ཅིག་འགྲོན་ལམ་དུ་འགྲོ་བ་ལས་གྱུར་ཏོ་སྙམ་ནས་དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྐུན་པོའི་དོན་འཐུན་དང་ལྷན་ཅིག་འགྲོན་ལམ་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རྐུན་པོའི་དོན་འཐུན་དང་ཞེས་བྱ་བ་ནི་ཤོ་གམ་འདྲལ་བའི་ཚོང་པ་འམ་རྐུན་པོ་དང ། འགྲོན་ལམ་དུ་ཞེས་བྱ་བ་ནི་དགོན་པའི་ལམ་དུ་ཞུགས་ཏེ་འདོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྐུན་པོའི་དོན་འཐུན་དང་འགྲོན་ལམ་དུ་འཇུག་ན་ལྟུང་བྱེད་དོ། །རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་རོ། །རྒྱང་གྲགས་རྒྱང་གྲགས་སུ་ནི་ལྟུང་བྱེད་དོ། །ལྟུང་བྱེད་དྲུག་པའི་དང་པོ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་འདོད་པས་དེས་ལོ་ཉི་ཤུ་མ་ལོན་པ་དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ན་དེ་ལ་དགེ་སློང་མ་རྣམས་ཀྱིས་སྨྲས་པ།
9.244b
ཕུ་ནུ་མོ་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། དེས་འདི་སྐད་ཅེས་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལོ་ཉི་ཤུ་མ་ལོན་པ་གསོལ་བ་དང་བཞིའི་ལས་ཀྱིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དེ་ནི་བསྙེན་པར་མ་རྫོགས་པ་ཡིན་ལ་དེ་དག་ཀྱང་ལྟུང་བ་དང་བཅས་པས་སྨད་པར་འགྱུར་རོ། །དེ་ལ་དེ་ནི་ངེས་པ་ཡིན་ནོ། །དེ་ལ་དེ་ནི་རྗེས་སུ་འཐུན་པའི་ཆོས་ཡིན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གལ་ཏེ་ལོ་ཉི་ཤུ་མ་ལོན་པར་གྱུར་ཅིང ། ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་དང ། དེ་འདི་སྐད་ཅེས་ཁོ་མོ་ཉི་ཤུ་མ་ལོན་ནོ་ཞེས་སྨྲས་པ་ན་དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དག་དགེ་སློང་མ་དེ་ཡང་དང་པོ་ཉིད་ནས་བསྙེན་པར་མ་རྫོགས་པ་ཡིན་ལ་འགྲོགས་པ་དང ། ལོངས་སྤྱད་པས་ལྟུང་བར་ཡང་འགྱུར། དགེ་སློང་མའི་དགེ་འདུན་ཡང་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ཅིང ། ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་དང ། དེ་འདི་སྐད་ཅེས་ཁོ་མོས་ཇི་ལྟར་ཡང་ལོ་ཉི་ཤུ་ལོན་པར་མི་ཤེས་ཤིང་མི་དྲན་ཏེ། ཁོ་མོ་ནི་ཡིད་གཉིས་ཟའོ་ཞེས་སྨྲས་པ་ན། དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེ་ཡང་དང་པོ་ཉིད་ནས་བསྙེན་པར་མ་རྫོགས་པ་ཡིན་ལ་འགྲོགས་པ་དང ། ལོངས་སྤྱད་པས་ལྟུང་བ་ཡང་འགྱུར། དགེ་སློང་མའི་དགེ་འདུན་ཡང་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ཅིང་ལོ་ཉི་ཤུ་མ་ལོན་པར་འདུ་ཤེས་པ་ལ་དེ་ཡང་མི
9.245a
ཤེས་པ་དང ། མི་དྲན་པ་དང ། ཡིད་གཉིས་ཟ་བར་གྱུར་ཀྱང་རུང ། དེ་ལ་དགེ་སློང་མས་ཅི་ཡང་མ་དྲིས་པ་འམ། ལན་མ་བྱིན་པར་དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་དེ་དེའི་འོག་ཏུ་བསྙེན་པར་རྫོགས་པ་ནི་འཆགས་ཏེ། དགེ་འདུན་དང་འགྲོགས་པ་དང་ལོངས་སྤྱོད་པས་ལྟུང་བར་ཡང་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ལ་ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་དང་དེ་འདི་སྐད་ཅེས་ལོ་ཉི་ཤུ་ལོན་ནོ་ཞེས་སྨྲས་པ་ན་དེ་ལ་དགེ་སློང་མ་དག་གིས། དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེ་དེའི་འོག་ཏུ་བསྙེན་པར་རྫོགས་པ་འཆགས་ཤིང་འགྲོགས་ཤིང་ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ཅིང་ལོ་ཉི་ཤུ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་ཁོ་མོས་ཇི་ལྟར་ཡང་ལོ་ཉི་ཤུ་ལོན་པ་ཤེས་ཤིང ། དྲན་ཏེ་ཁོ་མོ་ནི་ཡིད་གཉིས་མི་ཟའོ་ཞེས་སྨྲས་པ་ན་དེ་ལ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེའི་འོག་ཏུ་བསྙེན་པར་རྫོགས་པར་འཆགས་ཤིང་འགྲོགས་པ་དང་ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །གལ་ཏེ་ལོ་ཉི་ཤུ་ལོན་པར་གྱུར་ཅིང་ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་ཁོ་མོས་ལོ་ཉི་ཤུར་མ་ལོན་ནོ་ཞེས་སྨྲས་པ་ན་དེ་ལ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེ་དང་པོ་ཉིད་ལེགས་པར་བསྙེན་པར་རྫོགས་པ་ཡིན
9.245b
ཞིང་འགྲོགས་པ་དང་ལོངས་སྤྱོད་པས་ལྟུང་བར་ཡང་མི་འགྱུར་ལ། དགེ་འདུན་ནི་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་ལོན་པར་གྱུར་ཅིང་ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་ཁོ་མོས་ཇི་ལྟར་ཡང་ལོ་ཉི་ཤུ་མ་ལོན་པར་ཤེས་ཤིང་དྲན་ཏེ་ཁོ་མོ་ཡིད་གཉིས་ཟའོ་ཞེས་སྨྲས་པ་ན། དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང་འགྲོགས་པ་དང་ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ནི་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་ལོན་ལ་དེ་མ་ཤེས་ཤིང་མི་དྲན་ནམ་ཡིད་གཉིས་ཟ་བར་གྱུར་ཀྱང་རུང་དེ་ལ་དགེ་སློང་མས་མ་དྲིས་སམ་དྲིས་པའི་ལན་མ་བྱིན་པར་དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང་འགྲོགས་པ་དང ། ལོངས་སྤྱད་པས་ལྟུང་བར་མི་འགྱུར་ལ་དགེ་འདུན་ནི་དེས་འགལ་ཚབས་ཅན་དུ་འགྱུར་ཏོ། །གལ་ཏེ་ལོ་ཉི་ཤུ་ཚང་བར་གྱུར་ཅིང་ལོ་ཉི་ཤུ་ཚང་བར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་དང་དེ་འདི་སྐད་ཅེས་ལོ་ཉི་ཤུ་ལོན་ནོ་ཞེས་སྨྲས་པ་ན། དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ན་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང་འགྲོགས་པ་དང་ལོངས་སྤྱོད་པས་ལྟུང་བར་ཡང་མི་འགྱུར་ཞིང་དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །གལ་ཏེ་ལོ་ཉི་ཤུ་ལོན་པར་གྱུར་ཅིང་ལོ་ཉི་ཤུ་ལོན་པར་འདུ་ཤེས་པ་དང་ཤེས་ཤིང་དྲན་ཏེ་ཡིད་གཉིས་མི་ཟ་བ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་ཇི་ལྟར་ཁོ་མོས་ལོ་ཉི་ཤུ་ལོན་པར་ཤེས་ཤིང་དྲན་ཏེ་ཁོ་མོ་ཡིད་གཉིས་མི་ཟའོ་ཞེས་སྨྲས་པ་ན། དེ་དགེ་སློང་མ་དག་གིས་དགེ
9.246a
སློང་མའི་དངོས་པོར་བསྙེན་པར་རྫོགས་པར་བྱེད་པ་ན་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང་འགྲོགས་པ་དང་ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །དགེ་སློང་མ་དག་དེ་ལ་དགེ་སློང་མ་བཞི་པོ་གང་ཡིན་པ་དེ་དག་ནི་དང་པོ་འཁྲུགས་པ་ཡིན་ཏེ་དེ་དག་དང་པོ་ཉིད་ནས་བསྙེན་པར་མ་རྫོགས་པས་བསྙིལ་བར་འོས་པ་ཡིན་ནོ། །དགེ་སློང་མ་དེ་ལ་དགེ་སློང་མ་མི་ཤེས་ཤིང་མི་དྲན་ལ་ཡིད་གཉིས་ཟ་བ་གང་ཡིན་པ་དེ་ལ་ནི་ཤེས་པར་བྱ་དྲན་པར་བྱ། སོམ་ཉི་དང་ཡིད་གཉིས་སྤང་བར་བྱ་སྟེ། གང་གི་ཚེ་ཤེས་པར་གྱུར་ཏམ། དྲན་པར་གྱུར་ཏམ། སོམ་ཉི་དང ། ཡིད་གཉིས་སྤངས་པར་གྱུར་ལ་གལ་ཏེ་རེ་ཤིག་ཚང་ན་ཇི་ལྟར་བསྙེན་པར་རྫོགས་པ་དེ་བཞིན་དུ་བསྙེན་པར་རྫོགས་པ་ཡིན་ནོ། །གལ་ཏེ་མ་ཚང་ནས་སྤོ་བར་བྱ་བ་འམ། སླར་ཡང་བསྙེན་པར་རྫོགས་པར་བྱའོ། །ས་སྤོ་བར་མི་བྱེད་དམ། སླར་ཡང་བསྙེན་པར་རྫོགས་པར་མི་བྱེད་ལ། གལ་ཏེ་རང་བཞིན་དུ་གནས་པའི་དགེ་སློང་མ་རྣམས་དང་ལྷན་ཅིག་ལན་གཉིས་སམ་གསུམ་གསོ་སྦྱོང་གི་ལས་དག་ཉམས་སུ་མྱོང་བར་བྱེད་ན་དགེ་སློང་མ་དག་རྐུ་ཐབས་སུ་གནས་པ་ཡིན་ཏེ་དགེ་སློང་མ་དེ་བསྙིལ་བར་འོས་པ་ཡིན་ནོ། །སློང་མ་དག་དེ་ལ་དགེ་སློང་མ་ལོ་ཉི་ཤུ་མ་ལོན་པར་གྱུར་པ་ལོ་ཉི་ཤུ་ལོན་པའི་འདུ་ཤེས་ཀྱིས་བསྙེན་པར་རྫོགས་པ་དང་དེའི་གཉེན་དག་ལྷགས་ཏེ་འདི་སྐད་ཅེས་སྨྲས་སོ། །མིང་འདི་ཞེས་བྱ་བ་ཡོད་དམ་དེ་དག་གིས་འདི་སྐད་ཅེས་སྨྲས་སོ། །དེ་ནི་བསྙེན་པར་རྫོགས་སྷོ། །དེ་དག་གིས་འདི་སྐད་ཅེས་སྨྲས་སོ། །དེ་ནི་ལོ་ཉི་ཤུ་མ་ལོན་ནོ་ཞེས་དེ་སྐད་སྨྲས་པ་ན་བཅོམ་ལྡན་འདས་ཀྱིས་བཀའ་སྩལ་པ་དེའི་ཤོལ་གྱི་ཟླ་བ་དང ། མངལ་གྱི་ཟླ་བ་ཡང་བརྩི་བར་བྱའོ། །གལ་ཏེ་ཚང་ན་དེ་ལྟ་ན་ལེགས། དེ་སྟེ་མ་ཚང་ན་ས་སྤོ་བར་བྱ་བ་འམ། སླར་ཡང་བསྙེན་པར་རྫོགས་པར་བྱའོ། །ས་སྤོ་བར་མི་བྱེད་དམ། སླར་ཡང་བསྙེན་པར་རྫོགས་པར་མི་བྱེད་ན་ཞེས་བྱ་བ་ནས་བསྙིལ་བར་འོས་པ་ཡིན་ནོ་ཞེས་བྱ་བའི་བར་རོ། །དགེ་སློང་མ
9.246b
དག་དེ་ལ་དགེ་སློང་མ་ལོ་བཅཝ་བརྒྱད་ལོན་པ་གང་ཡིན་པ་དེ་ལོ་ཉི་ཤུའི་འདུ་ཤེས་ཀྱིས་བསྙེན་པར་རྫོགས་པར་གྱུར་ལ། གལ་ཏེ་ལོ་གཉིས་ཀྱི་དྲན་པ་རྙེད་ན་ཇི་ལྟར་བསྙེན་པར་རྫོགས་པ་དེ་བཞིན་དུ་བསྙེན་པར་རྫོགས་པ་ཡིན་ཏེ། དགེ་སློང་མ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་རྙེད་པར་དཀའ་བའི་ཕྱིར་རོ། །གལ་ཏེ་ལོ་གཅིག་གི་དྲན་པ་རྙེད་ན་མངལ་གྱི་ཟླ་བ་དང་ཤོལ་གྱི་ཟླ་བ་བརྩི་བར་བྱའོ། །གལ་ཏེ་ཚང་ན་དེ་ལྟ་ན་ལེགས། དེ་སྟེ་མ་ཚང་ན་ཞེས་བྱ་བ་ནས་བསྙིལ་བར་འོས་པ་ཡིན་ནོ་ཞེས་བྱ་བའི་བར་རོ། །དགེ་སློང་མ་དག་དེ་ལ་དགེ་སློང་མ་ལོ་བཅུ་དགུ་ལོན་པ་གང་ཡིན་པ་དེ་ལོ་ཉི་ཤུའི་འདུ་ཤེས་ཀྱིས་བསྙེན་པར་རྫོགས་པར་གྱུར་ལ། གལ་ཏེ་ལོ་གཅིག་གི་དྲན་པ་རྙེད་ན་ཇི་ལྟར་བསྙེན་པར་རྫོགས་པ་དེ་བཞིན་དུ་བསྙེན་པར་རྫོགས་པ་ཡིན་ཏེ། དགེ་སློང་མ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་རྙེད་པར་དཀའ་བའི་ཕྱིར་རོ། །གལ་ཏེ་ལོ་མ་ཚང་བར་དྲན་པ་རྙེད་ན་མངལ་གྱི་ཟླ་བ་དང་ཤོལ་གྱི་ཟླ་བ་བརྩི་བར་བྱའོ། །གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བ་འམ། སླར་ཡང་བསྙེན་པར་རྫོགས་པར་བྱའོ་ཞེས་བྱ་བ་ནས་བསྙིལ་བར་འོས་པ་ཡིན་ནོ་ཞེས་བྱ་བའི་བར་རོ། །ལྟུང་བྱེད་དྲུག་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ་རང་གི་ལག་གིས་ས་རྐོ་བའི་བསླབ་པའི་གཞི་བཅའ་བ་མཛད་པ་དང ། དེ་ནས་བཅུ་གཉིས་སྡེ་དེ་དག་རང་གི་ལག་གིས་ས་རྐོ་བར་བྱེད། རྐོར་འཇུག་པར་བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ས་རྐོ་འམ་རྐོར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ས་ཞེས་བྱ་བ་ལས་ནི་གཉིས་ཏེ། རང་བཞིན་ཅན་དང ། རང་བཞིན་ཅན་མ་ཡིན
9.247a
པའོ། །དེ་ལ་རང་བཞིན་ཅན་ཞེས་བྱ་བ་ནི་ཆར་ཆུ་ཞོད་པའི་དུས་སུ་ཟླ་བ་གསུམ་གྱིས་ས་ལྟས་པར་གྱུར་པ་སྟེ་འདི་ནི་རང་བཞིན་ཅན་གྱི་ས་ཞེས་བྱའོ། །རང་བཞིན་ཅན་མ་ཡིན་པའི་ས་གང་ཞེ་ན། གང་གི་ཚེ་ཆར་མ་བབ་པ་དེའི་ཚེ་ས་མ་རྟས་པར་གྱུར་པ་སྟེ་འདི་ནི་ས་རང་བཞིན་ཅན་མ་ཡིན་པ་ཞེས་བྱའོ། །རྐོ་ན་ཞེས་བྱ་བ་ནི་རང་གིས་སོ། །རྐོར་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་རང་བཞིན་ཅན་གྱི་ས་རྐོ་ན་རྐོ་བ་ན་དེ་ལ་ལྟུང་བྱེད་དོ། །རང་བཞིན་ཅན་མ་ཡིན་པ་རྐོ་ན་ཉེས་བྱས་སོ། །དགེ་སློང་མས་ས་ལ་ཕུར་པ་འདེབས་ན་ལྟུང་བྱེད་དོ། །འབྱིན་ན་ཉེས་བྱས་སོ། །དགེ་སློང་མས་ས་ཞག་འགོགས་པར་བྱེད་ན་གལ་ཏེ་སའི་ཁམས་ནི་ཆེས་མང་ལ་སའི་ཞག་ནི་ཆེས་སྲབ་པར་གྱུར་ན་ལྟུང་བྱེད་དོ་ས་ཞག་གི་ཁམས་ནི་ཆེས་སྟུག་ལ་སའི་ཁམས་ནི་ཆེས་སྲབ་པར་གྱུར་ན་ཉེས་བྱས་སོ། །དེ་བཞིན་དུ་ལྕི་བ་ནི་ཆེས་མང་ལ་སའི་ཁམས་ནི་ཆེས་ཉུང་ན་ཉེས་བྱས་སོ། །དགེ་སློང་མས་ས་ལ་བྱེ་ཞག་འགོགས་པར་བྱེད་ན་སའི་ཁམས་ནི་ཆེས་སྟུག་ལ་བྱེ་མའི་ཁམས་ནི་ཆེས་སྲབ་ན་ལྟུང་བྱེད་དོ། །བྱེ་མའི་ཁམས་ཆེས་མང་ལ་སའི་ཁམས་ནི་ཆེས་སྲབ་ན་ཉེས་བྱས་སོ། །དོག་ས་མ་གྲུམ་པ་རྟིབ་པར་བྱེད་ན་ལྟུང་བྱེད་དོ། །གྲུམ་པ་ལ་ནི་ཉེས་བྱས་སོ། །རྩིག་པ་མ་གྲུམ་པ་འཇིག་པར་བྱེད་ན་ལྟུང་བྱེད་དོ། །གྲུམ་པ་ལ་ནི་ཉེས་བྱས་སོ། །རྩིག་པ་ལ་ཕུར་པས་འདེབས་ན་ལྟུང་བྱེད་དོ། །འབྱིན་ན་ཉེས་བྱས་སོ། །ཞལ་ཞལ་མ་གྲུམ་པ་འགོགས་ན་ལྟུང་བྱེད་དོ། །གྲུམ་པ་ལ་ནི་ཉེས་བྱས་སོ། །ཐ་ན་རླམས་འདྲལ་བར་བྱེད་ན་ཡང་ཉེས་བྱས་སོ། །འདམ་རྫབ་ལ་ཕུར་པས་སམ། ཕུར་བུས་འདེབས་ན་ཉེས་བྱས་སོ། །འཁྲུག་ན་ཉེས་བྱས་སོ། །ཕུར་པ་རྙིང་པའི་མཆན་དུ་ཕུར་པ་འདེབས་ན་ཉེས་བྱས་སོ། །ས་ལ་རི་མོ་འདྲི་ན་ཉེས་བྱས་སོ། །གལ་ཏེ་ལག་གི་གླ་ཞིག་རྩིས་བྱེད་ན་ལྟུང་བ་མེད་དོ། །ལྟུང་བྱེད་དྲུག་པའི་གསུམ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ་ཟླ་བ་བཞིར་མགྲོན་དུ་བོས་པའི་བསླབ་པའི་གཞི་བཅའ་བ་མཛད་པ་དེའི་ཚེ
9.247b
བཅུ་གཉིས་སྡེ་དེ་དག་གིས་ཟླ་བ་ལྔ་དང ། ཟླ་བ་དྲུག་ཏུ་མགྲོན་དུ་བོས་པ་ཡང་བདག་གིར་བྱེད་པ་དང ། དེ་ནས་དེ་དག་ལ་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་ཟླ་བ་བཞིའི་བསླབ་པའི་གཞི་བཅའ་བ་མ་མཛད་དམ་དེ་དག་གིས་འདི་སྐད་ཅེས་དེ་ནི་དགེ་སློང་རྣམས་ལ་མཛད་ཀྱི་དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་འདས་པར་བྱེད་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་འདི་ནི་དུས་ཡིན་ཏེ། སོ་སོར་མགྲོན་དུ་བོས་པ་དང ། ཡང་དང་ཡང་མགྲོན་དུ་བོས་པ་དང་ལྷག་པར་མགྲོན་དུ་བོས་པ་དང ། རྟག་ཏུ་མགྲོན་དུ་བོས་པའོ། །ཟླ་བ་བཞི་ཞེས་བྱ་བ་ནི་ཟླ་བ་བཞིའོ། །དེ་ལས་ལྷག་པར་མགྲོན་དུ་བོས་པ་ཞེས་བྱ་བ་ནི་མགྲོན་དུ་གཉེར་བའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །སོ་སོར་ཞེས་བྱ་བ་ནི་ཐ་དད་པར་རོ། །ཡང་དང་ཡང་ཞེས་བྱ་བ་ནི་ཕྱིར་ཞིང་ཕྱིར་ཞིང་ངོ ། །ལྷག་པར་ཞེས་བྱ་བ་ནི་ཆོག་པར་རོ། །རྟག་ཏུ་ཞེས་བྱ་བ་ནི་རྒྱུན་དུའོ། །དེ་ལ་འདི་ནི་དུས་ཡིན་ཏེ། ཞེས་བྱ་བ་ནི་དེ་ལ་འདི་ནི་རྗེས་སུ་འཐུན་པའི་ཆོས་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཁྱིམ་བདག་གི་ཁྱིམ་རྣམས་སུ་ཚོད་མ་ལ་མགྲོན་དུ་བོས་ལ་ཁུ་བ་སློང་ན་ལྟུང་བྱེད་དོ། །དེ་བཞིན་དུ་ཕལ་པ་ལ་མགྲོན་དུ་བོས་ལ་བསོད་པ་སློང་ན་ཞེས་བྱ་བ་ནས་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་བྱ་བའི་བར་རོ། །བསོད་པ་ལ་ཞེས་བྱ་བ་ནས་ཕལ་པ་སློང་ན་ཉེས་བྱས་སོ། །གལ་ཏེ་ནད་པ་ཡིན་ནམ་བསོད་པ་རྙེད་ལ་ཕལ་པ་སློང་ངམ། བསྟབས་པ་ཡིན་ན་ལྟུང་བ་མེད་དོ། །ལྟུང་བྱེད་དྲུག་པའི་བཞི་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །བཅོམ་ལྡན་འདས་ཀྱིས་ཁ་ཅིག་ནི་དགེ་སློང་མ་ཐུན་མོང་པའི་བསླབ་པའི་གཞི་བཅའ་བ
9.248a
མཛད་པ་ཡང་ཡོད། ཁ་ཅིག་ནི་དགེ་སློང་མ་དང་ཐུན་མོང་བ་ཡང་ཡོད། ་ཁ་ཅིག་ནི་གཉི་གའི་ཐུན་མོང་བ་ཡང་ཡོད་པས་གང་གི་ཚེ་བཅོམ་ལྡན་འདས་ཀྱིས་གཉི་གའི་ཐུན་མོང་གི་བསླབ་པའི་གཞི་བཅའ་བ་མཛད་པ་དེའི་ཚེ་དགེ་སློང་མའི་དབྱར་ཁང་དུ་དགེ་སློང་སྒོར་བཏང་ངོ ། །གང་གི་ཚེ་དགེ་སློང་གིས་དགེ་སློང་མ་རྣམས་ལ་བསྒོ་བ་དེའི་ཚེ་དགེ་སློང་མ་དག་གིས་དགེ་སློང་མ་གཞན་དང་གཞན་དག་ལ་ཡང་བསྒོའོ། །དེ་ནས་ཡང་དགེ་སློང་མ་དེ་རྣམས་ཀྱིས་བཅུ་གཉིས་སྡེ་རྣམས་ལ་བསྒོ་བ་དང ། དེ་དག་གིས་འདི་སྐད་ཅེས། ཁོ་མོ་ཅག་བྱིས་པ། རྨོངས་པ། མི་གསལ་བ། མི་མཁས་པ། ཁྱེད་ཅག་ལ་བསླབ་པ་མི་སློབ་ཀྱི་ཞེས་བྱ་བ་ནས་ཁོ་མོ་ཅག་ནི་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ་གཞན་དག་ལ་འདྲིའོ་ཞེས་སྨྲས་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་ཀྱིས་འདི་སྐད་ཅེས་འཕགས་མ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དེ་དག་ལ་འདི་སྐད་ཅེས་ཁོ་མོ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་ལ་མི་སློབ་ཀྱི་ཞེས་བྱ་བ་ནས་དགེ་སློང་མ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ། གཞན་དག་ལ་འདྲིའོ་ཞེས་སྨྲས་ན་ལྟུང་བྱེད་དོ། །དགེ་སློང་མ་ཀུན་ཤེས་པར་འདོད་པས་བསླབ་པ་དེ་ལ་ཡང་བསླབ་པར་བྱ་ཞིང་དགེ་སློང་མ་མདོ་སྡེ་འཛིན་པ། འདུལ་བ་འཛིན་པ་དང ། མ་མོ་འཛིན་པ་ལ་ཡང་དྲི་བར་བྱ་སྟེ། དེ་ནི་དེ་ལ་ཆོ་ག་ཡིན་ནོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་ལའོ་དགེ་སློང་མ་རྣམས་ཀྱིས་བསྒོ་བ་ན་ཞེས་བྱ་བ་ནི་ཆོས་འདི་པ་དག་གིས་སོ། །བསླབ་པ་དེ་ལ་ཁྱོད་ཀྱིས་བསླབ་པར་བྱའོ་ཞེས་བྱ་བ་ནི་ཕས་ཕམ་པར་འགྱུར་བ་བརྒྱད་ཅེས་བྱ་བ་ནས། རྩོད་པ་ཞི་བར་བྱ་བའི་ཆོས་བདུན་ཞེས་བྱ་བའི་བར་རོ། །བུས་པ་ཞེས་བྱ་བ
9.248b
ནི་མདོ་སྡེ་མི་འཛིན་འདུལ་བ་མི་འཛིན་མ་མོ་མི་འཛིན་པ་ནི་བུས་པ་ཞེས་བྱའོ། །མི་མཁས་པ་ཞེས་བྱ་བ་ནི་མདོ་སྡེ་ལ་མི་མཁས། ་འདུལ་བ་ལ་མི་མཁས། མ་མོ་ལ་མི་མཁས་པ་ནི་མི་མཁས་པ་ཞེས་བྱའོ། །མི་གསལ་བ་ཞེས་བྱ་བ་ནི་མདོ་སྡེ་ལ་མི་གསལ། འདུལ་བ་ལ་མི་གསལ། མ་མོ་ལ་མི་གསལ་བ་ནི་མི་གསལ་བ་ཞེས་བྱའོ། །འདི་ལྟར་དགེ་སློང་མ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ་གཞན་ལ་འདྲིའོ་ཞེས་བྱ་བ་ནས་མདོ་སྡེ་ལ་གསལ་བ། འདུལ་བ་ལ་གསལ་བ་མ་མོ་ལ་གསལ་བ་ཞེས་བྱ་བའི་བར་རོ་དགེ་སློང་མ་ཀུན་ཤེས་པར་འདོད་པ་ཞེས་བྱ་བ་ནི་བསླབ་པ་འདོད་པས་སོ། །བསླབ་པ་དེ་ལ་ཡང་བསླབ་པར་བྱའོ་ཞེས་བྱ་བ་ནི་དགེ་སློང་མ་དག་གང་ལ་སློབ་པ་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མས་ཇི་ཙམ་ཅུང་ཟད་དགེ་སློང་མ་རྣམས་ཀྱིས་བསྒོ་བ་ན་འདི་སྐད་ཅེས་བུས་པ་ཞེས་ཟེར་ན་ལྟུང་བྱེད་དོ། །རྨོངས་པ་ཞེས་ཟེར་ན་ལྟུང་བྱེད་དོ། །མི་གསལ་བ་ཞེས་ཟེར་ན་ལྟུང་བྱེད་དོ། །མི་མཁས་པ་ཞེས་ཟེར་ན་ལྟུང་བྱེད་དོ། །ལྟུང་བྱེད་དྲུག་པའི་ལྔ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱིས་དགེ་སློང་མ་དག་ཐབ་མོ་བྱུང་བ་ལ་ཉན་རྣ་བར་སྒོར་བསྡད་ནས་དེ་དག་གིས་ཅུང་ཟད་ཅི་ཐོས་པ་ཚུ་བི་ལས་ཐོས་པ་དེ་ཕ་བི་དག་ལ་སྦྲོན་པར་བྱེད་ཅིང ། ཕ་བི་དག་ལས་ཐོས་པ་དེ་ཚུ་བི་དག་ལ་སྦྲོན་པར་བྱེད་པས་དེས་ན་དགེ་འདུན་འཐབ་པ་དང ། འཚང་འདྲུ་བ་དང ། རྩོད་པ་དང ། འགྱེད་པ་བྱུང་བ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་དགེ་སློང་མ་རྣམས་ཐབ་མོ་བྱུང་བར་གྱུར་ལ། ཚང་འདྲུ་བ་དང ། འགྱེད་པ་དང ། རྩོད་པ་བྱུང་ཞིང་འཁོད་པ་ལ་དགེ་སློང་མ་དེ་དག་ཅི་སྨྲ་བ་དེ་བདག་གིས་མཉན་ལ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་ཞེས་ཅང་མི་སྨྲ་བས་ཉན་རྣ་བྱེད་ཅིང་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཉན་རྣ་བྱེད་ཅིང་འདུག་ན་ཞེས་བྱ
9.249a
བ་ནི་ཐོས་པར་འདོད་པས་སྒོ་ན་སྡོད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ནང་ན་འདུག་པར་གྱུར་ལ་གཞན་ཕྱི་ལོག་ནས་ནང་དུ་འཇུག་ན་དེས་སྐད་གསལ་བ་འམ། རྟིང་སྒྲ་འམ། སེ་གོལ་བྱའོ། །མི་བྱེད་དམ་གལ་ཏེ་སྒྲ་ཡང་མ་གོ། །དོན་ཀྱང་མ་གོ་ན་ཉེས་བྱས་སོ། །སྒྲ་ཡང་གོ་དོན་ཀྱང་གོ་བར་གྱུར་ན་ལྟུང་བྱེད་དོ། །དེ་བཞིན་དུ་གང་ན་འདུག་པ་ལ་ཡང་རུང་སྟེ་ལྟུང་བྱེད་དོ། །གལ་ཏེ་ཐོས་ན་ཉེ་བར་ཞི་བར་བྱའོ་སྙམ་ན་ལྟུང་བ་མེད་དོ། །ལྟུང་བྱེད་དྲུག་པའི་དྲུག་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་དག་དགེ་སློང་མའི་དགེ་འདུན་ཆོས་ཀྱི་གཏམ་རྣམ་པར་གཏན་ལ་འབེབས་པ་ན་ཅང་མི་སྨྲ་བར་ལངས་ཏེ་དོང་བའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། འདོང་བར་མི་བྱའོ། །དེ་དག་ན་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ལ་གོ་བར་བྱས་ཏེ་འདོང་བར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་བསླབ་པ་འདོད་པ་དང་ཞེས་བྱ་བ་ནས་ཡོ་བྱད་བསྙུངས་པ་ཞེས་བྱ་བའི་བར་རོ། །ཡང་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་ན་ཅང་མི་སྨྲ་བར་སྟན་ལས་ལངས་ཏེ་དགེ་སློང་མ་འཁོད་པ་ལ་གོ་བར་མ་བྱས་པར་འགྲོ་ན་རྐྱེན་དེ་ལྟ་བུ་མ་གཏོགས་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཆོས་ཀྱི་གཏམ་རྣམ་པར་གཏན་ལ་འབེབས་པ་ཞེས་བྱ་བ་ནི་ཆོས་ཀྱི་གཏམ་རྣམ་པར་གཏན་ལ་འབེབས་པ་འདི་ལྟ་སྟེ། གསོལ་བ་དང ། གསོལ་བ་དང་གཉིས་དང ། གསོལ་བ་དང་བཞིའི་ལས་དག་གོ། །ཅང་མི་སྨྲ་བར་ལངས་ཏེ་ཞེས་བྱ་བ་ནི་ཁ་རོག་སྟེའོ། །དགེ་སློང་མ་འཁོད་པ་ལ་གོ་བར་མ་བྱས་པར་ཞེས་བྱ་བ་ནི་འདུན་པ་མ་འབྱིན་པར་རོ། །རྐྱེན་དེ་ལྟ་བུ་མ་གཏོགས་ཏེ་ཞེས་བྱ་བ་ནི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཆོས་ཀྱི་གཏམ་རྣམ་པར་གཏན་ལ་འབེབས་པ་ན་ཅང་མི་སྨྲ་བས་ལངས་ཏེ་འགྲོ་ན་ཞེས
9.249b
བྱ་བ་ནས་དོན་མ་གོ་ན་ཉེས་བྱས་སོ། །སྒྲ་མ་གོ་ལ་དོན་གོ་ན་ལྟུང་བྱེད་དོ། །ལྟུང་བྱེད་དྲུག་པའི་བདུན་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་དང་བཅས་པ་སངས་རྒྱས་ལ་མ་གུས་ཆོས་དང་དགེ་འདུན་ལ་མ་གུས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། གུས་པར་མི་བྱེད་ན་ལྟུང་བྱེད་དོ། །གུས་པར་མི་བྱེད་ན་ཞེས་བྱ་བ་ལ། གུས་པར་མི་བྱེད་པ་ནི་གཉིས་ཏེ། དགེ་འདུན་དང་གང་ཟག་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ལ་ཁང་སྐྱོང་གིས་གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དོ། །གལ་ཏེ་ཆོས་དང་ལྡན་པའི་འདུ་ཤེས་ཀྱིས་གསོལ་བ་འདེབས་ཤིང་དེ་མ་བླངས་པ་ལ་ལྟུང་བ་མེད་དོ། །དེ་བཞིན་དུ་སོང་ཤིག་སྨྲོས་ཤིག་ཅེས་བྱ་བ་དེ་ལྟ་བུ་ལ་སོགས་པ་ཐམས་ཅད་ལ་ལྟུང་བྱེད་དུ་འགྱུར་ཏེ། འདི་ནི་དགེ་འདུན་ལ་ཡིན་ནོ། །གང་ཟག་གི་ནི་མཁན་མོ་དང་སློབ་དཔོན་གྱིས་གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སོ། །མ་སོང་ན་ཉེས་བྱས་སོ། །སྨྲས་ན་ཉེས་བྱས་སོ། །མ་སྨྲས་ན་ཉེས་བྱས་ཏེ་དེ་བཞིན་དུ་ཐམས་ཅད་ལ་ཉེས་བྱས་སོ། །གལ་ཏེ་ཆོས་དང་ལྡན་པའི་འདུ་ཤེས་ཀྱིས་གསོལ་བ་འདེབས་པ་ལ་ནི་ལྟུང་བ་མེད་དོ། །ལྟུང་བྱེད་དྲུག་པའི་བརྒྱད་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ལེགས་འོངས་ལ་བརྟེན་ཏེ་བག་མེད་པའི་གནས་མྱོས་པར་འགྱུར་བ་འབྲུའི་ཆང་དང་བཅོས་པའི་ཆང་གི་བསླབ་པའི་གཞི་བཅའ་བ་མཛད་པ་དེའི་ཚེ་དགེ་སློང་མའི་དགེ་འདུན་དག་འདི་སྙམ་དུ་སེམས་ཏེ། བདག་ཅག་གིས་བསླབ་པའི་གཞི་འདི་ཇི་ལྟར་གདོན་པར་བྱ་སྙམ་དུ་བསམས་ནས་དགེ་སློང་མའི་དགེ་འདུན་བཅོམ་ལྡན་འདས་གང་ན་བ་དེར་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་ཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་མ་རབ་ཏུ་མང་པོས་འདི་སྐད་ཅེས་གསོལ་ཏོ། །
9.250a
བཅོམ་ལྡན་འདས་དགེ་སློང་མ་རྣམས་ཀྱིས་འབྲུའི་སྐྱེམས་དང ། བཅོས་པའི་སྐྱེམས་ཀྱི་བསླབ་པའི་གཞི་ལ་ཇི་ལྟར་གཟུང་བར་བགྱི། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང ། བསླབ་པ་ལ་གུས་པ་དང ། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་འདི་སྐད་ཅེས་བཀའ་སྩལ་ཏོ། །འབྲུའི་ཆང་དང ། བཅོས་པའི་ཆང་འཐུང་ན་ལྟུང་བྱེད་དོ། །འབྲུའི་ཆང་ཞེས་བྱ་བ་ནི་ཕབས་དང་སྦྱར་བ་དང ། ཟས་དང་སྦྱར་བའོ། །བཅོས་པའི་ཆང་ཞེས་བྱ་བ་ནི་དགུན་ཆང་དང ། བུ་རམ་ཆང་དང ། རྫས་གཞན་དག་སྦྱར་བའི་འོ། །འཐུང་ན་ཞེས་བྱ་བ་ནི་ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཆང་གི་ཁ་དོག་དང ། ཆང་གི་དྲི་དང ། ཆང་གི་རོ་འཐུང་ངམ། འཐུང་དུ་འཇུག་ན་ལྟུང་བྱེད་དོ། །བཅོས་པའི་ཆང་འཐུང་ན་ལྟུང་བྱེད་དོ། །བསྲེས་པའི་ཆང་འཐུང་ན་ལྟུང་བྱེད་དོ། །ཆང་གི་ཁ་དོག་ན་ཉེས་བྱས་སོ། ཆང་གི་དྲི་ན་ཉེས་བྱས་སོ། །ཆང་གི་རོ་ན་ཉེས་བྱས་སོ། །གླུམ་ཟ་ན་ཉེས་བྱས་སོ། །གལ་ཏེ་མཛེ་བྱུང་ནས་ཡན་ལག་བསྐུད་པ་དང ། ཁ་ནད་ཀྱི་ཕྱིར་ཁར་བླུགས་ཏེ་འཛིན་པ་དང ། བསྐོལ་བ་ལ་ནི་ལྟུང་བ་མེད་དོ། །ལྟུང་བྱེད་དྲུག་པའི་དགུ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་བརྟེན་ནས་དུས་མ་ཡིན་པར་རྒྱུ་བའི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་རྣམས་གྲོང་དུ་དུས་སུ་ཡང་རྒྱུ་བར་བྱེད། དུས་མ་ཡིན་པར་ཡང་རྒྱུ་བར་བྱེད་པ་དང ། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས་དུས་མ་ཡིན་པར་རྒྱུ་བའི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་གོ་བར་བྱ་སྟེ་འགྲོ་བར་བྱའོ། །
9.250b
དེ་ནས་དགེ་སློང་མ་ཞིག་གིས་ཁྱིམ་བདག་གཅིག་གི་ཁྱིམ་དུ་ལྷུང་བཟེད་དང ། ཆོས་གོས་བཞག་པ་ལས་ཁྱིམ་བདག་གི་ཁྱིམ་དེ་མེ་ཤོར་ཏོ་ཞེས་དགེ་སློང་མ་དེས་ཐོས་ནས་དེ་འདི་སྙམ་དུ་བཅོམ་ལྡན་འདས་ཀྱིས་དགེ་སློང་མ་འཁོད་པ་ལ་གོ་བར་བྱ་སྟེ་འགྲོ་བར་བྱའོ་ཞེས་གསུངས་སོ་སྙམ་ནས་ཇི་སྲིད་དུ་དགེ་སློང་མ་ལ་གོ་བར་བྱེད་པ་དེ་སྲིད་དུ་ལྷུང་བཟེད་དང ། ཆོས་གོས་ཚིག་པར་གྱུར་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང་ཞེས་བྱ་བ་ནས་བསླབ་པ་ལ་ཡོ་བྱད་བསྙུངས་པ་ཞེས་བྱ་བའི་བར་ཏེ། སྔ་མ་ནི་བཅས་པ་ཡིན་ལ་འདི་ནི་རྗེས་སུ་གནང་བ་ཡིན་ཏེ། ཡང་ཉན་ཐོས་མ་རྣམས་ཀྱིས་འདུལ་བའི་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་དུས་མ་ཡིན་པར་དགེ་སློང་མ་འཁོད་པ་ལ་གོ་བར་མ་བྱས་པར་གྲོང་དུ་འགྲོ་ན་རྐྱེན་དེ་ལྟ་བུ་མ་གཏོགས་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའི་དགེ་སློང་མའོ། །དུས་མ་ཡིན་པར་ཞེས་བྱ་བ་ལ་དུས་མ་ཡིན་པ་ནི་གང ། དུས་ནི་གང་ཞེ་ན། ཕྱེད་ཡོལ་ཕན་ཆད་ནས་སྐྱ་རེང་མ་ཤར་བའི་བར་འདི་ནི་དུས་མ་ཡིན་པའོ། །ལྷག་མ་ནི་དུས་སོ། །གྲོང་དུ་འགྲོ་ན་ཞེས་བྱ་བ་ནི་ཁྱིམ་བདག་གི་ཁྱིམ་རྣམས་སུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་དུས་མ་ཡིན་པ་ལ་དུས་མ་ཡིན་པར་འདུ་ཤེས་པས་འགྲོ་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དུས་ལ་དུས་མ་ཡིན་པའི་འདུ་ཤེས་ཀྱིས་འགྲོ་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་དྲུག་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་་།། དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་གཉིས་པ། སྡོམ་ལ། རྒྱུ་དང་རྒྱལ་པོའི་ཕོ་བྲང་དང ། །ད་གདོད་རུས་པ་སོར་བརྒྱད་དང ། །ཁྲིའུ་བདལ་གདིང་དང་གཡན་པ་དང ། །བདེ་བར་གཤེགས་པའི་ཆོས་གོས་སོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་དགའ་མོ་སྔ་དྲོ་ཤམ་ཐབས་བགོས་ཆོས་གོས་དང །
9.251a
ལྷུང་བཟེད་བླངས་ཏེ་ཕྱི་བཞིན་འབྲང་བའི་དགེ་སློང་མ་ཞིག་དང་ལྷན་ཅིག་སྦྱིན་བདག་གཅིག་གི་ཁྱིམ་དུ་སོང་ནས་དེས་རྗེས་སུ་འཐུན་པའི་ཆོས་བསྟན་པས་མངོན་པར་དད་པར་བྱས་ནས་དེས་དགེ་སློང་མའི་དགེ་འདུན་གྱི་ཆེད་དུ་ཟས་དག་སྦྱོར་དུ་བཅུག་གོ། །དེ་ནས་ཕྱི་དེ་ཉིན་པར་དགེ་སློང་མའི་དགེ་འདུན་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ཏེ་ཁྱིམ་བདག་དེའི་བཀད་ས་གང་ན་བ་དེར་སོང་ནས་ཞེས་བྱ་བ་ནས། སྟན་བཤམས་པ་ཁོ་ན་ལ་འདུག་གོ་ཞེས་བྱ་བའི་བར་རོ། །དགེ་སློང་མ་དགའ་མོ་ནི་བྱ་བ་མང་ཞིང་བསྒྲུབ་པ་མང་བས་གཎ་ཌཱིའི་དུས་ལས་ཡོལ་བར་གྱུར་ཏོ། །དགེ་སློང་མ་དེ་རྣམས་ཀྱིས་ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་དགེ་སློང་མའི་དགེ་འདུན་གྱི་དུས་ལ་བབ་ཀྱིས་རིམས་ཤིག་།དེས་འདི་སྐད་ཅེས་སྨྲས་སོ། །འཕགས་མ་དག་བདག་ནི་མ་འཚལ་མོད་ཀྱི་ཟས་ལ་སྐོ་བར་བགྱིད་པ་དགའ་མོ་མཁྱེན་ཏོ་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཟས་སྔ་མ་དང་ཟས་ཕྱི་མ་ལ་ཁྱིམ་དག་ཏུ་རྒྱུ་བར་མི་བྱའོ། །དེ་ནས་ཞལ་ཏ་བྱེད་པ་དག་གམ་ཟས་བསྒྲུབ་པ་དེ་དག་གི་དགེ་འདུན་གྱི་བྱ་བ་དང་དགེ་འདུན་གྱི་བསྒྲུབ་པ་དེ་དག་ཉམས་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཟས་སྔ་མ་ལ་ཁྱིམ་གཉིས་གཉིས་སུ་ཟས་ཕྱི་མ་ལ་ཁྱིམ་གསུམ་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང་ཞེས་བྱ་བ་ནས། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་འདི་སྐད་ཅེས་བཀའ་སྩལ་ཏོ། །ཡང་དགེ་སློང་མ་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ལ་ཟས་སྔ་མ་དང་ཟས་ཕྱི་མ་ལ་ཁྱིམ་དག་ཏུ་ཁྱིམ་བདག་འཁོད་པ་ལ་གོ་བར་མ་བྱས་པར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་དགའ་མོའོ་ཟས་དང་བཅས་པ་ཞེས་བྱ་བ་ནི་སྟོན་མོ་ཅན་གྱི་ཁྱིམ་དུ་འོ། །ཁྱིམ་དག་ཏུ་ཞེས་བྱ་བ་ནི་ཁྱིམ་བདག་གི་ཁྱིམ་དག་ཏུ་མགྲོན་དུ་བོས་པའོ། །ཟས་སྔ་མ་ཞེས་བྱ་བ་ནི་སྔ་དྲོའི
9.251b
དུས་སོ། །ཕྱི་མ་ཞེས་བྱ་བ་ནི་ཕྱི་དྲོའི་དུས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་མ་ལ་ཁྱིམ་གཉིས་སུ་སོང་ལ་ཆེད་དུ་བསམས་ཏེ་ཁྱིམ་གསུམ་པར་འགྲོ་ན་ལྟུང་བྱེད་དོ། །ཟས་ཕྱི་མ་ལ་ཁྱིམ་གསུམ་དུ་སོང་ལ་ཆེད་དུ་བསམས་ཏེ་ཁྱིམ་བཞི་པར་འགྲོ་ན་ལྟུང་བྱེད་དོ། །ཁྱིམ་བདག་གི་མི་ལ་གོ་བར་བྱས་ན་ལྟུང་བ་མེད་དོ། །ལྟུང་བྱེད་བདུན་པའི་དང་པོ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ་སྒོ་གཏན་གྱི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་དེ་དག་གིས་དགེ་སློང་གི་བསླབ་པའི་གཞི་ཡིན་ནོ་ཞེས་བྱ་བ་ནས་བསླབ་པའི་གཞི་དེ་ལ་རྗེས་སུ་སྒྲུབ་པར་མི་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། ་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མ་རྣམས་ཀྱིས་ཀྱང་ནམ་མ་ནངས་ཤིང་སྐྱ་རེང་མ་ཤར་གྱི་བར་དུའོ། །གང་གི་ཚེ་རྒྱལ་པོ་འཆར་ཀས་དཔལ་ལྡན་མའི་ཕྱིར་ཁྱིམ་བདག་གདངས་ཅན་ལ་ཁྱོད་ཀྱི་བུ་མོ་དགེ་སློང་རྣམས་ལྟ་བར་འདོད་དོ་ཞེས་རྒྱལ་པོས་བསྒོ་བ་དེའི་ཚེ་ཁྱིམ་བདག་གདངས་ཅན་གྱིས་དགེ་སློང་ཤཱ་རིའི་བུ་ལ་དཔལ་ལྡན་མ་གདུལ་བའི་ཆེད་དུ་གསོལ་བ་བཏབ་ནས་རྒྱལ་པོའི་ཕོ་བྲང་དུ་བཏང་བ་དང ། བཅོམ་ལྡན་འདས་ཀྱིས་ཀྱང་གནང་ངོ ། །དེས་དུས་གཞན་ཞིག་ན་གདངས་ཅན་གྱི་བུ་མོ་ཡང་དགེ་སློང་མ་རྣམས་ལྟ་བར་འདོད་པ་དེའི་ཚེ་ཁྱིམ་བདག་གདངས་ཅན་གྱིས་སྐྱེ་དགུའི་བདག་མོ་ཆེན་མོ་ལ་གསོལ་བ་བཏབ་པ་དང ། དེས་རྒྱལ་པོའི་ཕོ་བྲང་དུ་འཇུག་པ་ནི་ཉེས་དམིགས་བཅུ་ཡོད་དོ་ཞེས་བྱ་བ་ནས་མ་བཏུབ་པ་དང ། དེའི་འོག་ཏུ་རྒྱལ་པོ་འཆར་ཀས་གསོལ་བ་བཏབ་བོ། །དེ་ནས་སྐྱེ་དགུའི་བདག་མོ་ཆེན་མོས་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ
9.252a
ལྡན་འདས་ཀྱིས་བཀའ་སྩལ་པ། གཽ་ཏ་མི་དྲུག་པོ་དག་གི་ཚིག་ནི་གཅག་ཏུ་མི་རུང་སྟེ། དྲུག་པོ་གང་གི་ཞེ་ན། སློབ་དཔོན་དང ། མཁན་པོ་དང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དང ། དགེ་འདུན་དང ། དགེ་འདུན་གྱི་གནས་བརྟན་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིའོ་ཞེས་བཅོམ་ལྡན་འདས་ཀྱིས་དེ་ལ་ཡང་བཀས་བསྒོ་ནས་རྒྱལ་པོའི་ཕོ་བྲང་དུ་ཞུགས་སོ། །གང་གི་ཚེ་སྐྱེ་དགུའི་བདག་མོ་ཆེན་མོ་རྒྱལ་པོའི་ཕོ་བྲང་དུ་ཞུགས་པ་དེའི་ཚེ་བཅུ་གཉིས་སྡེ་རྣམས་གལ་ཏེ་བདག་ཅག་དོང་བར་གྱུར་ན་དེ་རིང་ཉིད་དུ་དགེ་སྦྱོང་གི་ཚུལ་མ་ཡིན་པ་དང་རུང་བ་མ་ཡིན་པའི་ཁུར་ཁྱེར་བར་འགྱུར་བ་ཞིག་ཅེས་ཁ་ཟེར་བར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ནམ་མ་ནངས་སྐྱ་རེང་མ་ཤར་བར་རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བརྟུལ་བར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་ཞིང་འདུག་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ་ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །རྒྱལ་པོ་རྒྱལ་རིགས་སྤྱི་བོས་ནས་དབང་བསྐུར་བ་ཞེས་བྱ་བ་ནི་བུད་མེད་དམ། སྐྱེས་པ་འམ། མ་ནིང་རྒྱལ་པོར་དབང་བསྐུར་ན་དེ་ནི་རྒྱལ་པོ་ཡང་ཡིན། རྒྱལ་རིགས་ཀྱང་ཡིན། དེ་ནི་སྤྱི་བོ་ནས་དབང་བསྐུར་བ་ཡང་ཡིན་ནོ། །ནམ་མ་ནངས་པ་ཞེས་བྱ་བ་ནི་ནམ་ནངས་པར་མ་གྱུར་བའོ། །སྐྱ་རེང་མ་ཤར་བར་ཞེས་བྱ་བ་ནི་སྐྱ་རེང་གསུམ་པོ་ཞེས་བྱ་བ་སྔ་མ་བཞིན་ནོ། །རིན་པོ་ཆེ་དག་གམ་རིན་པོ་ཆེར་སྨོས་པ་མ་བརྟུལ་པར་ཞེས་བྱ་བ་ནི་མ་བསྡུས་པར་རོ། །སྒོ་གཏན་ཞེས་བྱ་བ་ལ་སྒོ་གཏན་ནི་གསུམ་སྟེ། ་གསུམ་གང་ཞེ་ན། གྲོང་ཁྱེར་གྱི་སྒོ་གཏན་དང ། རྒྱལ་པོའི་ཕོ་བྲང་གི་སྒོ་གཏན་དང ། བཙུན་མོའི་གཉེན་རིས་ཀྱི་སྒོ་གཏན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་སྐྱ་རེང་མ་ཤར་བ་ལ་སྐྱ་རེང་མ་ཤར་བའི་འདུ་ཤེས་ཀྱིས་སྒོ་གཏན་ལས་འདའ་བར་བྱེད་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །ཡང་དགེ་སློང་མ་གང་ཞིག
9.252b
སྐྱ་རེང་ཤར་བ་ལ་སྐྱ་རེང་མ་ཤར་བར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །གལ་ཏེ་རྒྱལ་པོ་དང ། བཙུན་མོ་དང ། བློན་པོའི་བར་ཆད་དུ་འགྱུར་བ་ཞིག་ཡིན་ན་ལྟུང་བ་མེད་དོ། །ལྟུང་བྱེད་བདུན་པའི་གཉིས་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སོ་སོར་ཐར་པའི་མདོ་གདོན་པ་འདོན་པའི་ཚེ་བཅུ་གཉིས་སྡེ་རྣམས་ཀྱིས་འདི་སྐད་ཅེས་ཀྱེ་འཕགས་མ་དག་ཁོ་མོ་ཅག་གིས་འདི་ལྟར་ཆོས་འདི་ཡང་མདོར་གཏོགས་ཤིང་མདོར་འདུས་པར་ད་གདོད་ཤེས་སོ་ཞེས་ཟེར་བ་ན་དེ་ལ་དགེ་སློང་མ་རྣམས་ཀྱིས་སྔོན་དགེ་སློང་མ་དེ་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ན་ལན་མང་དུ་ལྟ་ཅི་སྨོས་ན་དེ་ལ་དགེ་སློང་མ་རྣམས་ཀྱིས་ཕུ་ནུ་མོ་དེ་སྐད་མ་སྨྲ་ཞིག་ཅེས་བསྒོ་བ་དང ། དེ་དག་ལ་འདི་སྐད་ཅེས་ཁོ་མོ་ཅག་ཇི་སྐད་སྨྲ་བ་དེ་ནི་དེ་བཞིན་ནོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས་ཀྱེ་འཕགས་མ་དག་ཁོ་མོ་ཅག་གིས་འདི་ལྟར་ཆོས་འདི་ཡང་མདོར་གཏོགས་ཤིག་མདོར་འདུས་པར་ད་གདོད་ཤེས་སོ་ཞེས་ཟེར་བ་ན། གལ་ཏེ་དགེ་སློང་མ་རྣམས་ཀྱིས་སྔོན་གསོ་སྦྱོང་གི་ལས་གཉིས་སམ་གསུམ་གྱི་ཚེ་འདུག་པར་ཤེས་ན་ལན་མང་དུ་ལྟ་ཅི་སྨོས་ན། དེ་ལ་འཕགས་མ་མི་ཤེས་པས་མི་འགྲོལ་བས་དེ་ལྟུང་བ་གང་བྱུང་བ་དེ་ཆོས་བཞིན་དུ་བྱེད་དུ་གཞུག་པའི་སྟེང་དུ་འཕགས་མ་ཁྱོད་ཀྱིས་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་པ་ཡིན་ཏེ། ཁྱོད་ཀྱིས་གང་གི་ཕྱིར་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། རྩེ་གཅིག་ཏུ་རྣ་བླགས་ཏེ་ཉན་པར་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་དོ་ཞེས་སྤྱོ་བར་བྱའོ། །དེའི་སྤྱོ་བར་བྱ་བ་ནི་འདི་ཡིན་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས
9.253a
སྡེ་དག་གོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཕྱེད་ཅིང་ངོ ། །སོ་སོར་ཐར་པའི་མདོ་གདོན་པ་འདོན་པའི་ཚེ་ཞེས་བྱ་བ་ནི་ཕས་ཕམ་པར་འགྱུར་བ་བརྒྱད་ཅེས་བྱ་བ་ནས། རྩོད་པ་ཞི་བར་བྱ་བའི་ཆོས་བདུན་ཞེས་བྱ་བའི་བར་རོ། །སྔ་མ་བཞིན་དུ་བརྗོད་པར་བྱའོ་ཞེས་བྱ་བ་ནི་རིམ་པ་བཞིན་དུ་བརྗོད་པར་བྱའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་འདི་སྐད་ཅེས་ཆོས་འདི་ཡང་མདོར་གཏོགས་པར་ཞེས་ཟེར་ན་ལྟུང་བྱེད་དོ། །མདོར་འདུས་པར་ཞེས་ཟེར་ན་ལྟུང་བྱེད་དོ། །གཞི་ན་མ་འདུག་པ་དང ། ཚོགས་ལས་གར་བ་ལ་ནི་ལྟུང་བ་མེད་དོ། །ལྟུང་བྱེད་བདུན་པའི་གསུམ་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་གཅེར་བུ་པའི་ཉན་ཐོས་ཆོས་ཤེས་བྱ་བ་བ་སོ་མཁན་ཞིག་གནས་པ་དེ་བསོད་སྙོམས་པ་ཞིག་གིས་སངས་རྒྱས་ཀྱི་བསྟན་པ་ལ་མངོན་པར་དད་པར་བྱས་ནས་དེ་གཉི་གའི་དགེ་འདུན་ལ་ཁབ་རལ་དག་དབུལ་དུ་བཅུག་གོ། །དེ་ནས་བཅུ་གཉིས་སྡེ་རྣམས་ཀྱིས་བ་སོ་དང ། རུས་པ་དང ། རཝ་ལས་བྱས་པའི་ཁབ་རལ་དབྱིབས་སྣ་ཚོགས་དག་བྱེད་དུ་བཅུག་གོ། །དེ་རང་གི་ཟན་ཟོས་ཤིང་གཞན་གྱི་ལས་བྱས་པས་དེ་རིང་པོ་མ་ལོན་པར་དབུལ་པོར་གྱུར་ཏོ། །དེ་ནས་མུ་སྟེགས་པ་རྣམས་ཀྱིས་ལག་བཟོ་ཆོས་མཐོང་ནས་འདི་སྐད་ཅེས། ལག་གཟོ་ཆོས་གང་གི་ཚེ་ཁོ་བོ་ཅག་ལ་མངོན་པར་དད་པར་གྱུར་པ་དེའི་ཚེ་འབྱོར་པར་གྱུར་ལ། གང་གི་ཚེ་ཤཱཀྱའི་སྲས་ཀྱི་དགེ་སྦྱོང་མ་རྣམས་ལ་མངོན་པར་དད་པར་གྱུར་པ་དེའི་ཚེ་བཀྲེན་པར་གྱུར་ཏོ་ཞེས་སྨྲས་པ་དགེ་སློང་མ་རྣམས་ཀྱིས་ཐོས་སོ། །ཐོས་ནས་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བ་སོ་འམ། རུས་པ་འམ། རཝའི་ཁབ་རལ་ལས་སར་པ་བྱེད་དུ་འཇུག་ན་བཅག་ནས་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །བ་སོ་འམ་ཞེས་བྱ་བ་ནི་བ་སོ་ཉིད་དོ། །རུས་པ་འམ་ཞེས་བྱ་བ་ནི་རུས་པ་ཉིད་དོ། །རཝ་ལས་བྱས་པ་ཞེས་བྱ་བ་ནི་རཝ
9.253b
ཉིད་དོ། །ཁབ་རལ་ཞེས་བྱ་བ་ལ་ཁབ་རལ་ནི་གཉིས་ཏེ། སྦུ་བུ་ཅན་དང ། ཆང་བ་ལྟ་བུའོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བ་སོ་འམ་ཞེས་བྱ་བ་ནས། རཝའི་བར་གྱི་ཁབ་རལ་སར་པ་བྱེད་དམ། བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་དེ་འཆགས་པར་བྱེད་པ་དེས་ཅི་ག་བཅག་གམ་ཞེས་དྲི་བར་བྱའོ། །མ་དྲིས་པར་འཆགས་པར་བྱེད་ན་ལྟུང་བ་དེ་ཡང་མ་བཤགས་ཤིང་གང་གི་མདུན་དུ་འཆགས་པར་བྱེད་པ་དེ་ལ་ཡང་ཉེས་བྱས་སུ་འགྱུར་རོ། །ལྟུང་བྱེད་བདུན་པའི་བཞི་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ནས་ཁྲི་དང ། ཁྲིའུ་འི་ཚད་བདེ་བར་གཤེགས་པའི་སོར་བརྒྱད་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་དེ་དག་གིས་ཚད་ལས་འདས་པའི་ཁྲི་དང ། ཁྲིའུ་དག་བྱེད་དུ་འཇུག་པ་དང ། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མས་དགེ་འདུན་གྱི་ཁྲི་འམ། ཁྲིའུ་བྱེད་དུ་འཇུག་ན་རྩ་བ་བུ་གར་གཞུག་པ་མ་གཏོགས་བར་བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ། །དེ་ལས་ལྷག་པར་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །དགེ་སློང་མ་ཞེས་བྱ་བ་ནི་བཅུ་གཉིས་སྡེ་དག་གོ། །ཁྲི་འམ་ཞེས་བྱ་བ་ནི་ཉལ་བའི་འོ། །ཁྲིའུ་འམ་ཞེས་བྱ་བ་ནི་ཁྲིའུ་ཉིད་དོ། །བདེ་བར་གཤེགས་པའི་ཞེས་བྱ་བ་ནི་སྟོན་པའི་འོ། །བདེ་བར་གཤེགས་པའི་སོར་བརྒྱད་གང་ཡིན་པ་དེ་ལ་ནི་ཚད་དང་ལྡན་པའི་ལག་པའི
9.254a
ཁྲུ་གང་ངོ ། །བུ་གར་གཞུག་པ་མ་གཏོགས་ཏེ་ཞེས་བྱ་བ་ནི་བཞག་སྟེའོ། །དེ་ལས་ལྷག་པར་བྱེད་པ་ཞེས་བྱ་བ་ནི་དེ་ལས་འདས་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་དུ་ཟད་པ་བདེ་བར་གཤེགས་པའི་སོར་བརྒྱད་ཀྱི་ཚད་ཀྱི་ཚད་ལས་ལྷག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་ན་ཞེས་བྱ་བ་ནི་སྔ་མ་བཞིན་ནོ། །ལྟུང་བྱེད་བདུན་པའི་ལྔ་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་དང ། དགེ་སློང་མ་རྣམས་ཀྱིས་གནས་མལ་བསྐོ་བར་བྱའོ་ཞེས་བསྒོ་བ་མཛད་པ་ན། དེ་ནས་དུས་གཞན་ཞིག་གི་ཚེ་དགེ་སློང་མ་རྣམས་གནས་མལ་སྐོ་བར་བྱེད་པ་དང ། དེའི་འོག་ཏུ་བཅུ་གཉིས་སྡེ་རྣམས་ཀྱིས་དགེ་འདུན་གྱི་ཁྲི་དང ། ཁྲིའུ་ལ་ཤིང་བལ་དག་གཏིང་བ་དེའི་ཚེ་གཞན་གྱིས་བསྡུས་ནས་བླངས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་གྱི་ཁྲི་འམ། ཁྲིའུ་ལ་ཤིང་བལ་འདིང་ངམ། འདིང་དུ་འཇུག་ན་བསྡུས་ནས་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །ཁྲི་ཞེས་བྱ་བ་ཉལ་བའི་འོ། །ཁྲིའུ་ཞེས་བྱ་བ་ནི་ཁྲིའུ་ཉིད་དོ། །ཤིང་བལ་ཞེས་བྱ་བ་ལ་ཤིང་བལ་ནི་ལྔ་སྟེ། ལྔ་གང་ཞེ་ན། ཨར་ཀའི་ཤིང་བལ་དང་ཤལ་མ་ལའི་ཤིང་བལ་དང ། ཀ་སའི་ཤིང་བལ་དང ། ལུག་གི་བལ་དང ། ་ལྔ་པ་ཉིད་ནི་ཤ་ནའི་ཤིང་བལ་ལོ། །འདིང་འམ། འདིང་དུ་འཇུག་ན་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་གྱི་ཁྲི་འམ་ཁྲིའུ་ཞེས་བྱ་བ་ནས། འདིང་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་ལྟ་མོད་ཀྱི་གང་གི་མདུན་དུ་འཆགས་པར་བྱེད་པ་དེས་བསྡུས་སམ། མ་བསྡུས་ཞེས་དྲི་བར་བྱ་སྟེ།
9.254b
གཞན་ནི་སྔ་མ་བཞིན་ནོ། །ལྟུང་བྱེད་བདུན་པའི་དྲུག་པ་རྫོགས་སྷོ།། ་་་་་་་་་་་་་་་གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་རྣམས་ལ་འདི་ལྟ་བུའི་གདིང་བ་མང་པོ་བྱུང་སྟེ། གདིང་བ་འདི་ནི་ཧ་ཅང་རིང་ཆེས་སོ་ཞེས་དེ་བོར་ནས་གཞན་བྱེད་དུ་འཇུག་།གདིང་བ་འདི་ནི་ཧ་ཅང་ཐུང་ཆེས་སོ་ཞེས་དེ་བོར་ཏེ་གཞན་བྱེད་དུ་འཇུག་།དེ་བཞིན་དུ་ཧ་ཅང་རྒྱ་ཆེ་བ་དང ། ཧ་ཅང་ཆུང་བ་སྟེ། དེ་དག་དེ་ལྟ་བུ་བྱེད་པས་བྱ་བ་མང་ཞིང ། བྱེད་པ་མང་བས་ལུང་མནོད་པ་དང ། ཀླག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱེད་པ་དང ། ནང་གི་སེམས་ཀྱི་ཞི་གནས་དག་གཏོང་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མས་གདིང་བ་བྱེད་ན་ཚད་བཞིན་དུ་བྱེད་དུ་གཞུག་གོ། །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོའོ་ཞེང་དུ་ཕྱེད་དང་དོའོ། །སྲིད་དུ་མཐོ་གང་གིས་སྲིངས་ཤིག་།དེ་ལས་ལྷག་པར་བྱེད་ན་བཅད་ནས་ལྟུང་བྱེད་དོ། །གདིང་བ་ཞེས་བྱ་བ་ནི་གདིང་བའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །སྲིད་དུ་ཞེས་བྱ་བ་ནི་དེའི་ཆུ་གང་ཡིན་པའོ། །བདེ་བར་གཤེགས་པའི་མཐོ་གང་གིས་ཤེས་བྱ་བ་ལ། བདེ་བར་གཤེགས་པ་ཞེས་བྱ་བ་ནི་སྟོན་པའོ། །བདེ་བར་གཤེགས་པའི་མཐོ་གང་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་ཕྱེད་དང་དོ་སྟེ། བདེ་བར་གཤེགས་པའི་མཐོ་གསུམ་གང་ཡིན་པ་དེ་ལ་ཚད་དང་ལྡན་པའི་ཁྲུའི་ཁྲུ་ཕྱེད་དང་ལྔའོ། །ཞེང་དུ་མཐོ་བྱེད་དང་དོའོ་ཞེས་བྱ་བ་ནི་ཚད་དང་ལྡན་པའི་ཁྲུ་དོ་དང་སོར་དྲུག་གོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གདིང་བ་ཁྲུ་ཕྱེད་དང་ལྔ་ལས་ལྷག་པར་བྱེད་དམ། བྱེད་དུ་འཇུག་ན་ཐམས་ཅད་དུ་བཅད
9.255a
ནས་ལྟུང་བྱེད་དོ། །གང་གི་མདུན་དུ་ལྟུང་བ་འཆགས་པར་བྱེད་ན་ཞེས་བྱ་བ་ནས་ལྟུང་བའི་རིམ་པ་སྔ་མ་བཞིན་ནོ། །གལ་ཏེ་བྱས་ཟིན་པ་རྙེད་ན་བྱས་ཟིན་པ་ཉིད་ལོངས་སྤྱད་པར་བྱའོ། །ལྟུང་བྱེད་བདུན་པའི་བདུན་པ་རྫོགས་སྷོ།། ་་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་དང ། དགེ་སློང་མ་རྣམས་ཀྱིས་གཡན་པ་དགབ་པའི་གོས་བཅང་བར་བྱའོ་ཞེས་བཀའ་སྩལ་པ་དེའི་ཚེ་དགེ་སློང་མ་དེ་དག་གིས་ཅི་འདྲ་བ་དེ་ཚད་ཅི་ཙམ་པ་བཅང་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྲིད་དུ་བདེ་བར་གཤེགས་པའི་མཐོ་བཞིའོ། །ཞེང་དུ་མཐོ་དོའོ། །གང་གི་ཚེ་བཅོམ་ལྡན་འདས་ཀྱིས་ཚད་བཀའ་སྩལ་པ་དེའི་ཚེ་བཅུ་གཉིས་སྡེ་དེ་དག་ཚད་ལས་ལྷག་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མ་གཡན་པ་དགབ་པའི་གོས་བྱེད་པས་ཚད་བཞིན་བྱེད་དུ་གཞུག་གོ། །དེ་ལ་གཡན་པ་དགབ་པའི་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི་འོ། །ཞེང་དུ་མཐོ་དོའོ། །དེ་ལས་ལྷག་པར་བྱེད་ན་བཅད་ནས་ལྟུང་བྱེད་དོ། །གཡན་པ་དགབ་པའི་གོས་ཞེས་བྱ་བ་ནི་ན་བའི་གོས་སོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །སྲིད་དུ་བདེ་བར་གཤེགས་པའི་མཐོའི་མཐོ་བཞི་ཞེས་བྱ་བ་ནི་དེའི་ཆུ་གང་ཡིན་པ་ཚད་དང་ལྡན་པའི་ཁྲུའི་ཁྲུ་དྲུག་གོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །ཞེང་དུ་མཐོ་དོའོ་ཞེས་བྱ་བ་ནི་ཚད་དང་ལྡན་པའི་ཁྲུ་གསུམ་མོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །བཅད་ནས་ཞེས་བྱ་བ་ནི་མཉམ་པོར་བྱས་ནས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར
9.255b
འགྱུར་ཞེ་ན། དགེ་སློང་མས་ཇི་ཙམ་སྤྱད་ཅུང་ཟད་གཡན་པ་དགབ་པའི་གོས་ཁྲུ་དྲུག་ལས་ལྷག་པར་བྱེད་དུ་འཇུག་ན་ཐམས་ཅད་དུ་བཅད་ནས་ལྟུང་བྱེད་དོ། །གང་གི་མདུན་དུ་འཆགས་པར་བྱེད་ན་ཞེས་བྱ་བའི་བར་གོང་ནས་འབྱུང་བ་བཞིན་ནོ། །ལྟུང་བྱེད་བདུན་པའི་བརྒྱད་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་ཉེ་དགས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཚད་བྱེད་དུ་བཅུག་ལ། བཅོམ་ལྡན་འདས་ཀྱིས་ནི་བཀག་པ་དེའི་ཚེ་སྦོམ་དགའ་མོས་ཀྱང་ཉེ་དགའ་མཐོང་ནས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་བཅུག་ནས་བགོས་ཏེ་དགེ་སློང་མའི་དབྱར་ཁང་དུ་སོང་ནས་དེས་བདེ་བར་གཤེགས་པའི་ཆོས་གོས་ཀྱི་ཚད་ཁ་ཅིག་ནི་མཆན་ཁུང་དུ་བརྟུལ། ཁ་ཅིག་ནི་ཕྲག་པ་ལ་གཟར། ཁ་ཅིག་ནི་ལུས་ལ་བགོས། ཁ་ཅིག་ནི་འཇོལ་ཞིང་འདུག་པ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ལྷུང་བཟེད་དང་ཆོས་གོས་བླངས་ཏེ་གང་དུ་འགྲོ། དེས་འདི་སྐད་ཅེས་སྨྲས་སོ། །ཁོ་མོ་ལྷུང་བཟེད་དང་ཆོས་གོས་བླངས་ཏེ་གང་དུ་ཡང་མི་འགྲོ་འོ། །དེ་ལྟ་མོད་ཀྱི་ཁོ་མོས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་བཅུག་པ་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །ཕུ་ནུ་མོ་བཅོམ་ལྡན་འདས་ཀྱིས་དགག་པ་མ་མཛད་དམ། དེས་འདི་སྐད་ཅེས་དགེ་སློང་རྣམས་ལ་དགག་པ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་གམ་བདེ་བར་གཤེགས་པའི་ཆོས་གོས་ལས་ལྷག་པར་བྱེད་དུ་འཇུག་ན་བཅད་ནས་ལྟུང་བྱེད་དོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཅུའོ། །ཞེང་དུ་མཐོ་དྲུག་སྟེ། དེ་ལ་འདི
9.256a
ནི་བདེ་བར་གཤེགས་པའི་ཆོས་གོས་ཀྱི་ཚད་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་གམ་ཞེས་བྱ་བ་ནི་སངས་རྒྱས་ཀྱི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་པའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་ཡིན་ནོ་ཞེས་བྱ་བ་ནི་གྲངས་རྣམ་པར་བཤད་པ་ཡིན་ནོ། །སྲིད་དུ་ཞེས་བྱ་བ་ནི་དེའི་ཆུ་གང་ཡིན་པའོ། །མཐོ་བཅུ་ཞེས་བྱ་བ་ནི་བདེ་བར་གཤེགས་པའི་མཐོ་བཅུ་གང་ཡིན་པ་སྟེ། དེ་ནི་ཚད་དང་ལྡན་པའི་ཁྲུའི་ཁྲུ་བཅོ་ལྔ་པའོ། །ཞེང་དུ་མཐོ་དྲུག་གོ་ཞེས་བྱ་བ་གང་ཡིན་པ་དེ་ནི་ཚད་དང་ལྡན་པའི་ཁྲུའི་ཁྲུ་དགུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དམ། བདེ་བར་གཤེགས་པའི་ཆོས་གོས་ལས་ལྷག་པ་དག་བྱེད་དུ་འཇུག་ན་ཐམས་ཅད་དུ་བཅད་ནས་ལྟུང་བྱེད་དོ། །གང་གི་མདུན་དུ་འཆགས་པར་བྱེད་ན་ཞེས་བྱ་བའི་བར་གོང་ནས་འབྱུང་བ་བཞིན་ནོ། །ལྟུང་བྱེད་བདུན་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་།། བསྡུས་པའི་སྡོམ་ལ། སྒོག་སྐྱ་རྗེན་པ་སྐྱབས་ཡོད་དང ། །རྣར་གཤུབ་མུན་ཁུང་སྔ་ནས་འདུག་།དབྱར་ནང་ལོ་ནི་བཅུ་གཉིས་དང ། །འདོད་ཆེན་སྡོམ་པ་གཞོན་ནུ་མའོ། ་་་་་་་།སྡོམ་ལ། སྒོག་སྐྱ་མདོམས་སྤུ་འདྲེག་པ་དང ། །སོར་མོའི་ཚིགས་གཉིས་འཇུག་པ་དང ། །ཐལ་མོས་བརྡེག་པར་མི་བྱའོ། །གླེང་གཞི་ནི་མཉན་ཡོད་ནའོ། །དེའི་ཚེ་མུ་གེ་མི་བཟད་པ་དགོན་པ་སློངས་མོ་པས་ཟས་རྙེད་པར་དཀའ་བ་བྱུང་ནས་ཞེས་བྱ་བ་ནས། མི་ཞིག་ལ་སྒོག་སྐྱའི་ལྡུམ་ར་ཞིག་ཡོད་དོ་ཞེས་བྱ་བའི་བར་ཏེ། དེ་ན་ཚོད་སྔོན་དག་མང་དུ་སྐྱེའོ། །དེ་ནས་མི་དེ་ལ་དགེ་སློང་མ་རྣམས་ཀྱིས་ཚོད་སྔོན་བསླངས་པ་དང ། དེས་སྨྲས་པ། ཅི་བདེ་བ་ཁོ་ནར་མཛོད་ཅིག་།དེ་ལྟ་མོད་ཀྱི་སྒོག་སྐྱ་དེ་དག་ནི་མ་གདོན་ཅིག་ཅེས་དེ་དག་ཉི་མ་རེ་རེ་ཞིང་ཚོད་སྔོན་དག་བླངས་ནས་དགེ་སློང་མའི་དབྱར་ཁང་དུ་འདོང་ངོ ། །དེ་ནས་སྦོམ་དགའ
9.256b
མོས་དགེ་སློང་མ་དེ་རྣམས་ལ་དྲིས་པ། ཕུ་ནུ་མོ་དག་ཁྱོད་ཀྱིས་ཚོད་སྔོན་གང་ནས་བླངས་ཞེས་བྱ་བ་ནས་སྦོམ་དགའ་མོ་ཡང་སྒོག་སྐྱའི་ལྡུམ་རར་སོང་ནས། དེས་ཚོད་སྔོན་དང་སྒོག་སྐྱ་ལྷན་ཅིག་བཏོན་ཏོ། །དེ་ནས་སྒོག་སྐྱའི་བདག་པོ་དེས་འཕྲིགས་ནས་ཀྱང་སྒོག་སྐྱའི་ལྡུམ་ར་གཞན་ཞིག་གི་ལག་ཏུ་བཙོངས་ཏེ་བཙོངས་ནས་དགེ་སློང་མ་རྣམས་ལ་སྨྲས་པ། ཀྱེ་འཕགས་མ་དག་བདག་གིས་གཞན་ཞིག་གི་སུག་པར་བཙོངས་ལགས་ཀྱིས་དེ་ལས་ཚོད་སྔོན་སློངས་ཤིག་ཅེས་བྱ་བ་ནས། དེས་ཀྱང་སྲུངས་མའི་ཁྱེའུ་ཞིག་བཞག་སྟེ། ཅི་བདེར་བྱེད་དུ་བཅུག་ནས་དགེ་སློང་མ་དེ་དག་ཚོད་སྔོན་རྔ་བ་ན། སྦོམ་དགའ་མོ་སྒོག་སྐྱ་འབའ་ཤིག་འབྱིན་པར་བྱེད་དོ། །དེ་ནས་ཁྱེའུ་ཡིས་སྦོམ་དགའ་མོ་ལ་སྒོག་སྐྱ་འབྱིན་པ་བཟློག་པ་དང ། དེ་ནས་སྦོམ་དགའ་མོས་ཁྱེའུ་དེ་བརྡེགས་སོ། །དེ་ནས་ཁྱེའུ་དེས་ཕ་ལ་སྨྲས་པ་དང ། དེའི་ཕྱིར་དེ་ཉིན་པར་སྒོག་སྐྱའི་ནང་ཞིག་ཏུ་གབ་ནས་བསྡད་དོ། །དེ་ནས་སྦོམ་དགའ་མོ་ཡང་འོངས་ནས་སྒོག་སྐྱ་འབྱིན་པ་ལས་ཁྱེའུ་དེས་བཟློག་པ་དང་ཞེས་བྱ་བ་ནས་ཁྱིམ་བདག་དེས་ཀྱང་སྦོམ་དགའ་མོ་བརྡེགས་སོ་ཞེས་བྱ་བའི་བར་རོ། །དེ་ཡང་མིག་ཕུབས་སྐྲངས་ཤིང་དབྱར་ཁང་དུ་འོངས་པ་དང ། དགེ་སློང་མ་རྣམས་ཀྱིས་དྲིས་པ་ལས་དེས་སྐབས་དེ་རྒྱས་པར་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྒོག་སྐྱ་ཟ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྒོག་སྐྱ་ཞེས་བྱ་བ་ནི་བྱི་སྐུའོ། །ཟ་ན་ཞེས་བྱ་བ་ནི་ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྒོག་སྐྱ་ཟ་ན་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་དེ་ལྟར་བསླབ་པའི་གཞི་བཅའ་བ་མཛད་པ་དང ། དགེ་སློང་མ་ནད་པ་ཞིག་ཡོད་པ་དེས་སྨན་པ་ལ་དྲིས་པ་དང ། སྨན་པས་སྒོག་སྐྱ་བསྟན་ཏོ། །དེས་འདི་སྐད་ཅེས་སྨྲས་སོ། །བཞིན་བཟངས་སྨན་པ་ཁོ་མོ་ད་ནི་ཤི་ཟིན་ནོ། །སྨན་པས་སྨྲས་པ། ཅི་ཉེས། དེས་འདི་སྐད་ཅེས་སྨྲས་སོ། །བཅོམ་ལྡན་འདས
9.257a
ཀྱིས་བཀག་གོ། །དེས་འདི་སྐད་ཅེས་སྨྲས་སོ། །ཁྱོད་ཀྱི་སྟོན་པ་ཐུགས་རྗེ་ཅན་ཡིན་པས་རྗེས་སུ་གནང་བར་འགྱུར་རོ་ཞེས་བྱ་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྨན་པའི་ལུང་གིས་ནད་པ་ལ་ནི་ལྟུང་བ་མེད་དོ་ཞེས་བྱ་བ་ནས་སྒོག་སྐྱ་དང ། ཀིའུ་ལ་སོགས་པ་ཀུན་ཏུ་སྤྱད་པར་བྱའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྦོམ་དགའ་མོ་ལྷག་པར་ཆགས་པའི་ཟིལ་གྱིས་ནོན་པས་སྒོག་སྐྱའི་ཕྱིར་བརྡེག་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཤིག་མ་ཡིན་གྱི་འོན་ཀྱང་འདས་པའི་དུས་ན་ཡང་ལྷག་པར་ཆགས་པས་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག་ཅེས་བྱ་བ་ནས་གྲོང་ཁྱེར་བཱ་རཱ་ཎ་སིར་རྒྱལ་པོ་ཚངས་བྱིན་ཞེས་བྱ་བ་ཞིག་བྱུང་ངོ་ཞེས་བྱ་བའི་བར་རོ། །ཇི་ཙམ་ན་རྐུན་པོ་ཞིག་རྒྱལ་པོའི་ཕོ་བྲང་ཕུག་པ་དང་ཞེས་བྱ་བ་ནས། བུ་ཀུའི་སྒོར་དངུལ་སྐྱོགས་ཤིག་བརྗེད་དེ་ལུས་པ་དང ། རྐུན་པོ་དེས་སླར་ཡང་སོང་སྟེ་བླང་ངོ་སྙམ་ནས་ཞེས་བྱ་བ་ནས་རྒྱལ་པོའི་བཀྲབས་པ་དག་གིས་བཟུང་ནས་ཚུལ་མ་ཡིན་པས་སྡུག་བསྔལ་བར་བྱས་སོ། །དེ་ནས་ལྷ་ཞིག་གིས་དེའི་ཚེ་ཚིགས་སུ་བཅད་དེ་སྨྲས་པ། ལྷག་པར་ཆགས་པས་ཟིལ་ནོན་ན། །དོན་གྲུབ་པ་ཡང་ཉམས་གྱུར་ཏེ། །ཕྱིར་དོན་གཉེར་བར་བྱེད་པ་ཡིན། །རྐུན་མའི་སྐྱོགས་ནི་ཇི་བཞིན་ནོ། །དགེ་སློང་དག་གཞན་ཡང་ལྷག་པར་ཆགས་པ་ཁོ་ནས་རིན་པོ་ཆེ་དག་ལས་ཡོངས་སུ་ཉམས་པར་གྱུར་པ་དེ་ཉོན་ཅིག་།དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་ཁྱིམ་བདག་ཅིག་ཡོད་པ་དེ་ཞེས་བྱ་བ་ནས་དེ་ལ་བུ་མོ་ཞིག་བཙས་པ་དང ། ་ཤི་ནས་ངང་པའི་རྒྱལ་པོ་རང་བཞིན་གྱིས་སྐྱེ་བ་དྲན་པ་ཞིག་ཏུ་སྐྱེས་སོ་ཞེས་བྱ་བའི་བར་རོ། །ཇི་ཙམ་ན་དེ་བུ་མོའི་དོན་དུ་ཉི་མ་རེ་རེ་ཞིང་རིན་པོ་ཆེ་དག་སྐྱེལ་བར་བྱེད་དོ། །དེ་ནས་བུ་མོས་བསམས་པ། ངང་པའི་རྒྱལ་པོ་ཡང་བཟུང་ལ་རིན་པོ་ཆེ་ཡང་བླང་ངོ་སྙམ་པ་དང ། དེ་བྲོས་ནས་ཕྱིན་ཆད་མི་འོང་བར་གྱུར་ཏོ། །ཇི་ཙམ་ན་ལྷ་ཞིག་གིས་ཚིགས་སུ་བཅད་དེ་སྨྲས་པ། ལྷག་པར་ཆགས་པར་མི
9.257b
བྱ་སྟེ། །ཆོས་མིན་ཆགས་པ་སྡིག་པ་ཅན། །ངང་པའི་རྒྱལ་པོ་གཟུང་སྙམ་པས། །རིན་ཆེན་རྣམས་ལས་ཡོངས་སུ་ཉམས། །དགེ་སློང་དག་ཇི་སྙམ་དུ་སེམས། དེའི་ཚེ་རྐུན་པོ་དང ། བུ་མོ་གང་ཡིན་པ་དེ་ནི་སྦོམ་དགའ་མོ་འདི་ཉིད་ཡིན་ཏེ། དེ་ནས་ཡང་ལྷག་པར་ཆགས་པ་ཁོ་ནར་གྱུར་ཏོ། །ད་ལྟར་ཡང་ལྷག་པར་ཆགས་པ་ཁོ་ནར་གྱུར་ཏོ། །དེ་ལྟ་བས་ན་ལྷག་པར་ཆགས་པར་མི་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །ལྟུང་བྱེད་བརྒྱད་པའི་དང་པོ་རྫོགས་སྷོ།། ་་་་་་་་་;་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་མདོམས་ཀྱི་ཕྱོགས་ཀྱི་སྤུའི་ལས་བྱེད་ཅིང་དེ་ཁྲུས་བྱེད་པ་ན་བྲམ་ཟེ་དང ། ཁྱིམ་བདག་གི་ཆུང་མ་རྣམས་ལ་བསྟན་ཏེ། ཏིལ་འབྲུས་ཁྲ་བོར་བྱས་པའི་ཕན་ཙི་ལྟར་འདུག་པ་འདི་ལ་ལྟོས། དེ་དག་གིས་འདི་སྐད་ཅེས་སྨྲས་སོ། །འཕགས་མ་རེ་ཤིག་ཁོ་མོ་ཅག་ནི་སྡུམ་ཐབ་ཀྱི་སེམས་མགུ་བར་བགྱིད་པའི་ཕྱིར་བགྱིད་ན་ཁྱོད་ཀྱིས་འདི་ཅིར་འཚལ། ་ཁྱོད་ཀྱི་སུ་ཞིག་མགུ་བར་བགྱི། འདི་ནི་རབ་ཏུ་བྱུང་བ་དང་འཚམ་པ་མ་ལགས་སོ་ཞེས་བྱ་བ་ནས་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མདོམས་ཀྱི་ཕྱོགས་ཀྱི་སྤུའི་ལས་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མདོམས་ཀྱི་ཕྱོགས་ཤེས་བྱ་བ་ནི་གསང་བའི་གནས་སོ། །སྤུའི་ལས་བྱེད་དམ་ཞེས་བྱ་བ་ནི་སྨོངས་འདྲེག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེ་དགེ་སློང་མས་ཇི་ཙམ་ཅུང་ཟད་འདོམས་ཀྱི་ཕྱོགས་ཀྱི་སྤུའི་ལས་བྱེད་ན་ཡང་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་རྨ་བྱུང་བའི་ཕྱིར་བྱེད་ན་ལྟུང་བ་མེད་དོ། །ལྟུང་བྱེད་བརྒྱད་པའི་གཉིས་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་གསང་བའི་གནས་སུ་ལག་པ་བཅུག་ནས་ཇི་ཙམ་ཉོན་མོངས་པ་ཞི་བར་གྱུར་གྱི་བར་དུ་བཀྲུས་པས་དེའི་གསང་བའི་གནས་སྐྲངས་པར་གྱུར་ཏོ། །དེས་པུ
9.258a
ཤེལ་ཙི་དང ། ཙན་དན་ལ་སོགས་པའི་བྱུག་པ་ལྷན་ཅིག་གནས་པ་དང ། ཉེ་གནས་རྣམས་ལ་བསླངས་པ་དང ། དེ་དག་གིས་འདི་སྐད་ཅེས་སྨྲས་སོ། །ཁྱོད་ཅི་བསྙུང ། དེས་སྐབས་དེ་རྒྱས་པར་སྨྲས་པ་དང་ཞེས་བྱ་བ་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་ཁྲུས་མི་བྱའོ། །དེ་དག་ཁྲུས་མ་བྱས་པས་དྲི་ངན་པ་སྐྱེས་པར་གྱུར་ཏོ། །དེ་ནས་དུས་གཞན་ཞིག་ན་སྐྱེ་དགུའི་བདག་མོ་ཆེན་པོ་གཽ་ཏ་མི་ཁྱིམ་བདག་གི་ཆུང་མ་རབ་ཏུ་མང་པོ་ལ་ཆོས་འཆད་པ་ན། དེ་དག་ཕན་ཚུན་དུ་འདི་སྐད་ཅེས་དྲི་ངན་པ་མནམ་མོ་ཞེས་ཟེར་རོ། །དེ་ནས་སྐྱེ་དགུའི་བདག་མོ་ཆེན་པོ་གཽ་ཏ་མི་རང་བཞིན་གྱིས་དྲང་བ་ཡིན་པས་འདི་སྐད་ཅེས་སྨྲས་སོ། །ཕུ་ནུ་མོ་དག་དྲི་ངན་པ་དེ་ནི་ཁོ་མོའི་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །ཁྱོད་ཅིའི་སླད་དུ་ཁྲུས་མི་མཛད། སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀག་གོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སོར་མོའི་ཚིགས་གཉིས་ཀྱིས་ཁྲུས་བྱའོ། །ཇི་ཙམ་ན་དེ་ཉིད་ཉེས་དམིགས་སུ་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པར་བཅའ་བའི་བར་དུ་མཛད་དེ། ་ཡང་དགེ་སློང་མ་གང་ཁྲུས་བྱེད་པ་ན་སོར་མོའི་ཚིགས་གཉིས་ལས་འདའ་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྲུས་བྱེད་ན་ཞེས་བྱ་བ་ནི་ཆུ་བླངས་ནས་སོ། །སོར་མོའི་ཚིགས་གཉིས་ལས་འདས་པར་འཇུག་ན་ཞེས་བྱ་བ་ནི་དེ་ལས་ལྷག་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྲུས་བྱེད་པ་ན་སོར་མོའི་ཚིགས་གཉིས་ལས་འདས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བརྒྱད་པའི་གསུམ་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་ཉོན་མོངས་པས་ཉེན་ནས་ཇི་སྲིད་ཚིམ་གྱི་བར་དུ་གསང་བའི་
9.258b
ཕྱོགས་སུ་ཐལ་མོས་བརྒྱབ་པས་ཇི་ཙམ་ན་སྐྲངས་པར་གྱུར་ཏོ། །གང་གི་ཚེ་འདོད་ཆགས་ཞི་བར་གྱུར་པ་དེའི་ཚེ་ན་ཆོ་ངེས་འདེབས་སོ། །དེ་ནས་ལྷན་ཅིག་གནས་པ་དང་ཉེ་གནས་རྣམས་ཀྱིས་དྲིས་པ་ལས་དེས་སྐབས་དེ་རྒྱས་པར་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུད་མེད་ཀྱི་ཡུལ་ལ་ཐལ་མོས་རྡེག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །བུད་མེད་ཀྱི་ཡུལ་ལ་ཐལ་མོས་རྡེག་ན་ཞེས་བྱ་བ་ནི་མོ་མཚན་ལ་ཐལ་ལྕག་གིས་བརྡེགས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་ཀྱི་ཡུལ་ལ་ཐལ་མོས་རྡེག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བརྒྱད་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་།། སྡོམ་ནི། རྗེན་པ་བཙོ་བར་མི་བྱ་དང ། །ཆུས་ནི་གཏོར་བར་མི་བྱ་དང ། །སྔོན་པོར་བཤང་བ་མི་དོར་དང ། །རྩིག་པའི་རྒྱབ་ཏུ་མི་དོར་བའོ། །གླེང་གཞི་ནི་མཉན་ཡོད་ནའོ། །གྲོང་ཁྱེར་བ་དག་ལྡུམ་ར་དང ། སྐྱེད་མོས་ཚལ་ལ་དགའ་བས་དེ་དག་གི་ཀུན་ཏུ་སྤྱོད་པ་ནི་གང་གི་ཚེ་སྐྱེད་མོས་ཚལ་དག་ཏུ་འདོང་བ་ན་གཡོས་མཁན་གྱིས་བཅའ་བ་འཚེད་པར་བྱེད་པ་ཡིན་པས་དེ་དག་གིས་ཡང་གཡོས་མཁན་ལ་སང་ནང་པར་སྔར་ཤོག་ཤིག་ཅེས་བསྒོ་བ་ལས། དེ་མ་འོངས་པར་སྦོམ་དགའ་མོ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་བླངས་ཏེ་བསོད་སྙོམས་ཀྱི་ཕྱིར་སྤྱོད་ཡུལ་དུ་ཞུགས་ནས་ཁྱིམ་བདག་གཅིག་གི་ཁྱིམ་དུ་ཞུགས་ཏེ་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་གློ་བ་མི་དགའ་ལགས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཁྱོད་ཅི་སྟེ་མི་དགའ། དེས་སྐབས་དེ་རྒྱས་པར་སྨྲས་པ་དང ། དེས་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་རང་ཉིད་མི་འཚེད། དེས་འདི་སྐད་ཅེས་སྨྲས་སོ། །བདག་གིས་རྔོ་མི་ཐོག་ལགས་སོ། །དེ་ནས
9.259a
སྦོམ་དགའ་མོས་ཁྱིམ་བདག་གི་ཆུང་མ་ལ་འདི་སྐད་ཅེས་སྨྲས་སོ། །ཅི་ཁྱོད་ཀྱང་ཁབ་བཞིན་དུ་ལས་སྣ་གཅིག་པ་ཞིག་ཡིན་ནམ། དེས་འདི་སྐད་ཅེས་སྨྲས་སོ། །འཕགས་མ་དེ་ལ་མཁྱེན་པ་མངའ་འམ། སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང ། ལས་ཀྱི་གནས་གང་ལ་མཁས་པར་མ་བྱས་པ་གང་ཞིག་ཡོད། དེ་ནས་ཁྱིམ་བདག་གི་ཆུང་མ་དེས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ད་ནི་ཁྱོད་ལ་བདག་གསོལ་བ་འདེབས་ཀྱིས་བཅའ་བ་སྒྲོལ་ལ་བདག་ལ་སྩོལ་ཅིག་།དེས་འདི་སྐད་ཅེས་སྨྲས་སོ། །ཁོ་མོ་ལ་སུ་བསོད་སྙོམས་སྟེར་བར་འགྱུར། ཁྱིམ་བདག་གི་ཆུང་མས་འདི་སྐད་ཅེས་སླད་ཀྱིས་བདག་གིས་ཕྱི་བཞིན་འབྲང་བའི་དགེ་སྦྱོང་མ་ལ་བདག་གིས་སློབ་དཔོན་ལ། བདག་གིས་མཁན་མོ་ལ། བདག་གིས་ཁང་སྐྱོང་མའི་བར་ལ་སླད་ཀྱིས་དབུལ་ལོ་ཞེས་སྨྲས་པ་དང ། དེས་ལྷུང་བཟེད་དང ། ཆོས་གོས་མཐའ་གཅིག་ཏུ་བཞག་།གོས་གཞན་དག་བརྫེས་ཏེ་ཞེས་བྱ་བ་ནས་དེས་དོག་ལེ་བཀྲུས་བཤལ་བ་བསྲེགས་ཏེ། མར་ཁུས་བཀང་ནས་ཇི་ཙམ་ན་རིམ་བཞིན་དུ་ཀུན་ཏུ་གཡོས་པ་དང ། ལེགས་པར་གཡོས་པ་དང ། འབྲས་བུ་ལས་གཡོས་པ་དང ། ལ་ཐུ་དང ། ཁོང་ཚངས་ཅན་དང ། ཅེ་ཀུན་དང ། རིམ་བརྒྱ་པ་དང ། སྲིན་བུའི་དབྱིབས་ལྟ་བུ་སྟེ། དེ་ལྟ་བུ་དག་བཙོས་ཏེ་དེས་གྲོང་རྡལ་དེའི་ཕྱེད་དྲི་ཡིས་ཁྱབ་པར་བྱས་སོ། །ཇི་ཙམ་ན་དེས་གྲོང་རྡལ་གྱི་ཕྱེད་ན་འདུག་པ་དག་འོངས་ནས་དྲིས་པ། ་ཅི་ཁྱོད་ཀྱི་ཁྱིམ་དུ་གཡོས་མཁན་འོངས་སམ། དེས་འདི་སྐད་ཅེས་སྨྲས་སོ། །མ་འོངས་ཏེ། དེ་ལྟ་མོད་ཀྱི་འཕགས་མ་སྦོམ་དགའ་མོ་འཚེད་དོ། །དེ་དག་ཀྱང་འོངས་ནས་གསོལ་བ་བཏབ་པ་དང ། དེས་འདི་སྐད་ཅེས་སྨྲས་སོ། །ཁོ་མོ་ལ་སུ་བསོད་སྙོམས་སྟེར་བར་འགྱུར། དེ་དག་གིས་འདི་སྐད་ཅེས། བདག་ཅག་གིས་ཁང་སྐྱོང་གི་བར་ལ་དབུལ་ལོ་ཞེས་སྨྲས་པ་དང ། དེ་བཞིན་དུ་སྦོམ་དགའ་མོས་གྲོང་ཁྱེར་ཕྱེད་ཀྱི་བཅའ་བ་ཐམས་ཅད་བཙོས་ཏེ། དེ་ནས་བཙོས་ནས་བསོད་སྙོམས་ཀྱིས་ཁུར་བསླང་ནས་དབྱར་ཁང་དུ་སོང་ངོ ། །དེའི་འོག་ཏུ་གཡོས་མཁན་འོངས་ཏེ་འོངས་
9.259b
ནས་སྒོ་སྒོར་འདི་སྐད་ཅེས་སྨྲས་སོ་ཁྱིམ་བདག་མོ་དག་བཙུན་མོ་དག་བཅའ་བ་དག་བཙོས་སྣོམས་ཏེ་སྤྱོན་ཅིག་།དེ་དག་གིས་འདི་སྐད་ཅེས་སྨྲས་སོ། །ཁོ་མོ་དག་གིས་བཙོས་ཟིན་ནོ། །རྒྱ་ཚོས་མཁན་གྱིས་འདི་སྐད་ཅེས་སྨྲས་སོ། །སུ་ཞིག་གིས། དེ་དག་གིས་འདི་སྐད་ཅེས་སྨྲས་སོ། །སྦོམ་དགའ་མོས་སོ་ཞེས་གྲོང་རྡལ་ཕྱེད་པོ་ཐམས་ཅད་ཀྱི་བར་གྱིས་གོ་བར་བྱས་པ་དང ། དེ་འདི་སྐད་ཅེས་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ཚུལ་དང ། ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་འདི་ལྟར་འཚོ་བ་ཡང་བཅད་དོ་ཞེས་འཕྱ་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྗེན་པ་འཚེད་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རྗེན་པ་འཚེད་ན་ཞེས་བྱ་བ་ནི་བཅའ་བ་འཚེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྗེན་པ་འཚེད་པར་བྱེད་ན་ཐམས་ཅད་དུ་ལྟུང་བྱེད་དོ། །དེ་ནས་དགེ་འདུན་གྱི་བྲེལ་བ་བྱུང་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་དབེན་པར་འདུག་ནས་བཙོ་བར་བྱ་སྟེ་ལྟུང་བ་མེད་དོ། །ལྟུང་བྱེད་དགུ་པའི་དང་པོ་རྫོགས་སྷོ།། ་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ཁྱིམ་བདག་ཅིག་ཆུང་མ་དང་ལྷན་ཅིག་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཞེས་བྱ་བ་ནས། དགེ་སྦྱོང་མ་རྣམས་ལ་བལྟ་བའི་ཕྱིར་དབྱར་ཁང་དུ་དོང་ངོ ། །ཇི་ཙམ་ན་དེ་དེ་ན་ནང་པར་ཐུག་པ་ཞིག་འཐུང་བ་དང ། དགེ་སློང་མ་དེ་ཡང་ཆུ་སྣོད་ཅིག་ཐོགས་ཏེ། མདུན་ན་སྡོད་ཅིང་འདུག་གོ། །དེ་ནས་དགེ་སློང་དེ་རྒས་ནས་འདི་སྐད་ཅེས། ཁོ་བོ་ཁྱིམ་པར་གྱུར་པ་ན་ཁྱོད་དེ་ལྟར་མདུན་ན་སྡོད་དོ་ཞེས་སྨྲས་པ་དང ། དེས་ཆུ་སྣོད་དེ་ནས་མགོར་གཏོར་ནས་འདི་སྐད་ཅེས་སྨྲས་སོ། །ཁོ་མོ་ཁྱོད་ཀྱི་ཡོན་ཏན་ཡང་དག་པར་སྒྲོགས་ན་ཁྱོད་ཁོ་མོའི་སྐྱོན་རྣམས་ལ་འཇུག་པར་བྱེད་དམ་ཞེས་སྨྲས་ནས་བྲོས་པ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་ཀྱིས་ཅིའི་ཕྱིར་འཁོར་གྱི་གཙོ་བོའི་མགོ་ལ་ཆུས
9.260a
གཏོར་ཞེས་བྱ་བ་ནས་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ་ཡང་དགེ་སློང་མ་གང་ཆུས་འཐོར་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའོ། །འཁོར་གྱི་གཙོ་བོ་ཞེས་བྱ་བ་ནི་འཁོར་གྱི་མཆོག་གོ། །ཆུས་འཐོར་ན་ཞེས་བྱ་བ་ནི་ཆུས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་གྱི་གཙོ་བོ་ལ་ཆུས་གཏོར་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་བརྒྱལ་བ་ལ་གདོང་དུ་ཆུ་ལྕག་གིས་འཐོར་བ་ལ་ནི་ལྟུང་བ་མེད་དོ། །ལྟུང་བྱེད་དགུ་པའི་གཉིས་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་དབྱར་ཁང་དང་མི་རིང་བ་ཞིག་ན་ནེའུ་བསིང་སྔོན་པོ་ཞིག་ཡོད་པ་དེ་ན་བྲམ་ཟེ་ཞིག་བྲམ་ཟེའི་ཁྱེའུ་ལྔ་བརྒྱ་ལ་བྲམ་ཟེའི་གསང་ཚིག་ཀློག་ཏུ་འཇུག་གོ། །དེ་ནས་བྲམ་ཟེའི་ཁྱེའུ་དེ་རྣམས་ཀྱིས་སྦོམ་དགའ་མོ་སྤྱོད་ཡུལ་དུ་འཇུག་པ་མཐོང་ནས་ཐོ་བརྩམས་སོ། །ཇི་ཙམ་ན་སྦོམ་དགའ་མོས་འཁྲུ་བར་འགྱུར་བའི་སྨན་ཟོས་པས་དེ་མང་དུ་འཁྲུས་ནས་འཁྲུས་པ་དེ་ཕྱགས་ཏེ་ནེའུ་བསིང་སྔོན་པོའི་སྟེང་དུ་སོང་ནས་དེས་འཁྲུ་བས་ནེའུ་བསིང་སྔོན་པོ་ཐམས་ཅད་སྦགས་སོ། །དེ་ནས་ཡང་བྲམ་ཟེའི་ཁྱེའུ་རྣམས་ལྷགས་ནས་འདུག་སྟེ། དེ་དག་འདི་སྐད་ཅེས་ཀུད་སའི་བུ་དག་།བད་སའི་བུ་དག་།བྷ་ར་དྭ་ཛའི་བུ་དག་ངན་སྐྱུགས་ཀྱི་དྲི་མནམ་མོ་ཞེས་སྨྲས་པ་ལས། ཇི་ཙམ་ན་དེ་དག་གི་ལག་པ་དང ། རྐང་པ་དང ། གོས་རྣམས་ངན་སྐྱུགས་ཀྱིས་འབགས་པར་གྱུར་ཏོ། །བྲམ་ཟེ་རྣམས་ནི་གཙང་སྦྲ་འདོད་པ་ཡིན་པས་དེ་ནས་བྲམ་ཟེའི་བུ་དེ་རྣམས་ཡིད་མི་བདེ་ཞིང་འདུག་གོ། །དེ་ནས་ཡང་སྦོམ་དགའ་མོ་བསོད་སྙོམས་ལས་སླར་ལོག་པ་ན་བྲམ་ཟེའི་ཁྱེའུ་དེ་རྣམས་ཡིད་མི་བདེ་ཞིང་འདུག་པ་མཐོང་ནས་འདི་སྐད་ཅེས་སྨྲས་སོ། །ཀྱེ་བྲམ་ཟེའི་ཁྱེའུ་དག་ཅི་མང་དུ་གདོན་པར་བྱས་སམ། ཇི་ཙམ་ན་རྒོད་ནས་འདི་སྐད་ཅེས
9.260b
ཁྱེད་དེ་ལྟར་བཅོས་སོ་ཞེས་བྱ་བ་ནས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ནེའུ་བསིང་སྔོན་པོ་ལ་བཤང་བ་འདོར་ན་ལྟུང་བྱེད་དོ། །ཡང་གང་ཤེས་བྱ་བ་ནི་སྦོམ་དགའ་མོའོ། །ནེའུ་བསིང་སྔོན་པོ་ལ་ཞེས་བྱ་བ་ནི་རྩཝ་སྔོན་པོ་ལ་འོ། །བཤང་བ་འདོར་ན་ཞེས་བྱ་བ་ནི་མི་གཙང་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདི་སྙམ་དུ་ནེའུ་བསིང་སྔོན་པོ་ལ་དོར་རོ་སྙམ་ནས་བཤང་བ་འདོར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་དགུ་པའི་གསུམ་པ་རྫོགས་སྷོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་གསུམ་པ། གླེང་གཞི་ནི་མཉན་ཡོད་ནའོ། །སྦོམ་དགའ་མོ་མང་དུ་ཟོས་ཤིང་མང་དུ་འཐུངས་པས་དེ་མཚན་མོ་གཅི་བས་ཐེབས་ནས་དེས་ཤོལ་ཟངས་བཞག་སྟེ་གཅིས་སོ། །དེ་ནས་ཡང་གླང་པོའི་སྣ་ཆེན་པོ་ལ་གཏོགས་པ་དཔལ་སྐྱེད་ཅེས་བྱ་བ། རྒྱལ་པོ་གསལ་རྒྱལ་གྱིས་ཆད་པས་བཅད་པ་ཞིག་ཡོད་པ་དེ་ནང་པར་གྱི་དུས་སུ་དབྱར་ཁང་དང་ཉེ་བ་ཞིག་ནས་རྒྱལ་པོའི་ཕོ་བྲང་དུ་སོང་བ་ལས། སྦོམ་དགའ་མོ་དེས་ཤོལ་ཟངས་གཅིན་གྱིས་བཀང་པ་མ་བརྟགས་པར་གཏོར་བས་མགོ་ལ་ཕོག་པར་གྱུར་ཏོ་ཞེས་བྱ་བ་ནས་དེ་རིང་བདག་ལ་བཀྲ་ཤིས་པར་འགྱུར་རམ། འོན་ཏེ་བཀྲ་མི་ཤིས་པར་འགྱུར་སྙམ་པ་ལས། ཇི་ཙམ་ན་རི་དགས་འཛིན་གྱིས་རྒྱལ་པོ་དཔལ་སྐྱེད་ལ་བཟོད་པ་བྱེད་དུ་བཅུག་ནས། ་འདི་ལྟར་རྒྱལ་པོས་གླང་པོ་ཆེ་པད་མ་དཀར་པོ་ཞེས་བྱ་བ་ཅིག་དང ། དེའི་དབང་ཐང་ཉིད་ཀྱང་སླར་བྱིན་ནོ། །དེ་ནས་དཔལ་སྐྱེད་ཀྱིས་རས་ཡུག་པོ་ཆེ་ཞིག་ཁྱེར་ཏེ་དགེ་སློང་མའི་དབྱར་ཁང་དུ་ཕྱིན་པ་ཇི་ཙམ་ན་སྦོམ་དགའ་མོས་ཐོས་ནས་སྐྲག་པར་གྱུར་པ་དང་ཞེས་བྱ་བ་ནས་དཔལ་སྐྱེད་ཀྱིས་འདི་སྐད་ཅེས་སྨྲས་སོ། །གང་གིས་ནང་པར་གྱི་དུས་སུ་ཁོ་བོ་ལ་གཅིན་གཏོར་བའི་དེའི་གཅིན་ནི་བཀྲ
9.261a
ཤིས་པ་དགའ་བར་བྱེད་པ་ཡིན་པས། དེ་ལ་ཁོ་བོ་དེ་རིང་བསྐོན་པ་རས་ཡུག་པོ་ཆེ་འབུལ་ན་དགེ་སློང་མ་དེ་གང་ལགས། དེ་ནས་སྦོམ་དགའ་མོས་འདི་སྐད་ཅེས། ཁོ་མོ་ཡིན་ནོ་ཞེས་སྨྲས་པ་དང ། དེས་དེ་ལ་རས་ཡུག་པོ་ཆེ་ཅིག་བསྐོན་ནོ། །ཇི་ཙམ་ན་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་ཐབ་མོ་བྱུང་བ་དེའི་ཚེ་དེ་ན་རེ་ངན་སྐྱུགས་ཀྱང་ཁྱེད་དང་མི་མཚུངས་སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མ་བརྟགས་པར་དོར་བར་མི་བྱའོ། །འདོར་ན་ད་ལྟུང་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མ་བརྟགས་པར་བཤང་བ་དང ། གཅི་བ་འདོར་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མ་བརྟགས་པར་ཞེས་བྱ་བ་ནི་བརྟགས་པ་མ་བྱས་པར་རོ། །བཤང་བ་འམ། གཅི་བ་འདོར་ན་ཞེས་བྱ་བ་ནི་འདོར་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མ་བརྟགས་པར་བཤང་བ་འམ། གཅི་བ་འདོར་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ཁང་སྟོང་ངམ་རྩིག་པ་རལ་པ་ཡིན་ན་ལྟུང་བ་མེད་དོ། །ལྟུང་བྱེད་དགུ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་་་།། སྡོམ་ནི། སྐྱབས་ཡོད་པར་ནི་སྐྱེས་པ་དང ། དགེ་སློང་མ་དང་འདུག་མི་བྱ། །བླ་གབ་མེད་པར་སྐྱེས་པ་དང ། །དགེ་སློང་གཉིས་ནི་མ་ཡིན་དང ། །འབའ་ཤིག་གནས་པར་མི་བྱའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྐྱེས་པ་དང་ལྷན་ཅིག་སྐྱབས་ཡོད་པ་ན་གཏམ་བྱེད་པ་དང་བྲམ་ཟེ་དང ། ཁྱིམ་བདག་གི་ཆུང་མ་རྣམས་ཀྱིས་འདི་སྐད་ཅེས་དེ་ལྟར་བརྡ་བྱས་ནས་མཚན་མོ་ཉེས་པར་སྤྱད་པ་སྤྱོད་པར་འགྱུར་རོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་སྐྱེས་པ་དང་ལྷན་ཅིག་དབེན་པ་སྐྱབས་ཡོད་པ་ན་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །
9.261b
སྐྱེས་པ་དང་ལྷན་ཅིག་ཅེས་བྱ་བ་ནི་ཕོ་དང་ངོ ། །གཅིག་པུ་ཞེས་བྱ་བ་ནི་གང་ན་གསུམ་པ་སྐྱེས་པ་འམ། བུད་མེད་དམ། མ་ནིང་མེད་པར་རོ། །དབེན་པ་སྐྱབས་ཡོད་པ་ཞེས་བྱ་བ་ལ། སྐྱབས་ཡོད་པ་ནི་གསུམ་སྟེ། རྩིག་པའི་སྐྱབས་ཡོད་པ་དང ། སབ་མའི་སྐྱབས་ཡོད་པ་དང ། ཡོལ་བའི་སྐྱབས་ཡོད་པའོ། །འདུག་ན་ཞེས་བྱ་བ་ནི་གཏམ་ཟེར་ཞིང་ངོ ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་སྐྱེས་པ་དང་ལྷན་ཅིག་སྐྱབས་ཡོད་པ་ན་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་པའི་དང་པོ་རྫོགས་སྷོ།། ་་་་་་་་་་་་་་་་་་།། གླེང་གཞི་ནི་མཉན་ཡོད་ན་འོ། །གང་གི་ཚེ་འཆར་ཀ་དང ། སྦེད་མ་རབ་ཏུ་བྱུང་བ་དེའི་ཚེ་འཆར་ཀ་དགེ་སློང་མའི་དབྱར་ཁང་གང་ན་བ་དེར་སོང་སྟེ་ཕྱིན་ནས་སྦེད་མ་དང་ལྷན་ཅིག་དབེན་པ་སྐྱབས་ཡོད་པ་ན་འདུག་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་དགེ་སློང་གཅིག་དང་ལྷན་ཅིག་དབེན་པ་སྐྱབས་ཡོད་པ་ན་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦེད་མའོ། །གཅིག་པུ་དགེ་སློང་ཅིག་དང་ལྷན་ཅིག་ཅེས་བྱ་བ་ནི་གང་ན་གསུམ་པ་སྐྱེས་པ་དང ། བུད་མེད་དང ། མ་ནིང་མེད་པར་འཆར་ཀ་དང་ངོ ། །དབེན་པ་སྐྱབས་ཡོད་པ་ན་ཞེས་བྱ་བའི་བར་གོང་མ་བཞིན་ནོ། །འདུག་ན་ཞེས་བྱ་བ་ནི་གཏམ་སྨྲ་ཞིང་ངོ ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་དང་ལྷན་ཅིག་དབེན་པ་སྐྱབས་ཡོད་པ་ན་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་གྲོགས་གཉིས་པ་ཡོད་ན་ལྟུང་བ་མེད་དོ། །ལྟུང་བྱེད་བཅུ་པའི་གཉིས་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་སྐྱེས་པ་ཞིག་དང་ལྷན་ཅིག་བླ་གབ་མེད་པར་འདུག་ནས་རྐུན་ལ་རྩེད་མོ་ཞེས་བརྡའི་ཚིག་སྨྲའོ་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དོ། །ཡང་དགེ་སློང་མ་གང
9.262a
གཅིག་པུ་སྐྱེས་པ་ཅིག་དང་ལྷན་ཅིག་བླ་གབ་མེད་པར་དབེན་པར་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཞན་ནི་སྔ་མ་བཞིན་ནོ། །བླ་གབ་མེད་པར་ཞེས་བྱ་བ་ནི་ཐང་ལའོ། །དབེན་པར་འདུག་ན་ཞེས་བྱ་བ་ནི་གཏམ་ཟེར་ཞིང་སྟེ། ཁྱད་པར་ནི་འདི་ཡོད་དོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་སྐྱེས་པ་དང་ལྷན་ཅིག་བླ་གབ་མེད་པར་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གྲོགས་ཡོད་ན་ལྟུང་བ་མེད་དོ། །ལྟུང་བྱེད་བཅུ་པའི་གསུམ་པ་རྫོགས་སྷོ།། ་་་་་་་་་་་་་།། དེ་བཞིན་དུ་སྦེད་མ་དང ། འཆར་ཀ་དབེན་པ་བླ་གབ་མེད་པ་ན་འདུག་ནས་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་དགེ་སློང་གཅིག་དང་ལྷན་ཅིག་བླ་གབ་མེད་པར་དབེན་པར་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦེད་མའོ། །དགེ་སློང་ནི་འཆར་ཀའོ། །གཞན་ནི་གོང་ནས་འབྱུང་བ་བཞིན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཅེས་བྱ་བ་སྔ་མ་བཞིན་ནོ། །གྲོགས་ཡོད་ན་ལྟུང་བ་མེད་དོ། །ལྟུང་བྱེད་བཅུ་པའི་བཞི་པ་རྫོགས་སྷོ།། ་་་་་་་་་།། གླེང་གཞི་ནི་མཉན་ཡོད་ནའོ། །སྦོམ་དགའ་མོས་སྐྱེས་པ་ཞིག་ལ་བརྡ་བྱས་པ་དང ། དེས་འདི་སྐད་ཅེས་སྨྲས་སོ། །འཕགས་མ་ཁྱོད་ནི་རབ་ཏུ་བྱུང་བ་ལགས་ལ། བདག་ཀྱང་ཁྱིམ་པའི་ནང་དུ་དགེ་བསྙེན་ལགས་ཏེ་གལ་ཏེ་འགའ་ཞིག་གིས་ཤེས་པར་གྱུར་ན་གཉིས་ཀ་སྨོད་པར་འགྱུར་རོ། །དེས་འདི་སྐད་ཅེས་སྨྲས་སོ། །ཁྱོད་ཇི་སྙམ་དུ་སེམས། དུང་དང ། རྔ་པ་ཏ་ཧ་འབུད་ཅིང་འོང་དགོས་སམ། དེ་ལྟ་མོད་ཀྱི་དབྱར་ཁང་གི་གནས་ཁང་དུ་ཤོག་ཤིག་།ཅི་ཙམ་ན་སྐྱེས་པ་དེ་གནས་ཁང་དུ་འོངས་སོ། །དེ་ནས་སྦོམ་དགའ་མོས་སྐྱེས་པ་དེ་སྐྱབས་ཡོད་པར་ཁྲི་སྟེང་དུ་འདུག་ཏུ་བཅུག་ནས་འདི་སྐད་ཅེས་སྨྲས་སོ། །ཁོ་མོ་མཁན་མོའི་ཞབས་བཀྲུ་བའི་ཆེད་དུ་ལྟ་ཞིང་འགྲོའོ་ཞེས་སྨྲས་ནས་སོང་ངོ ། །དེས་ཀྱང་མཁན་མོ་ལ་ཞུས་ནས། ལུང་ཡང་མནོས། གཞོན
9.262b
ནུ་མ་རྣམས་ལ་ཡང་ལུང་ཕོག་གཏམ་དག་གླེང་བ་ཡང་བྱས་ཏེ། དེ་ལྟར་བྱ་བ་མང་ཞིང་བསྒྲུབ་པ་མངས་པས་ཇི་ཙམ་ན་སྐྱེས་པ་དེ་བརྗེད་དོ། །དེ་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ནས། གནས་ཁང་གི་ནང་དུ་ཞུགས་ཏེ་ཁྲི་སྟེང་དུ་འདུག་པ་དང ། སྐྱེས་པ་དེ་ཡང་འགུལ་བར་བརྩམས་སོ། །དེས་འགུལ་བས་ཁྲི་ལྡེགས་པ་དང ། དེས་རྐུན་པོ་བྱུང་ངོ་རྐུན་པོ་བྱུང་ངོ་ཞེས་ཁུས་བཏབ་པ་དང ། དེ་ནས་སྐྱེས་པ་དེ་ཡང་ཁ་ཟེར་ཞིང་བྲོས་སོ། །དགེ་སློང་མ་རྣམས་ཀྱིས་འཕྲིགས་ཏེ། འཕྲིགས་ནས་ཀྱང་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མས་གང་གཅིག་པུ་གཉིས་སུ་མེད་པས་དགེ་སློང་མ་མེད་པའི་གནས་ཁང་དུ་མཚན་མོ་གནས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཅིག་པུ་གཉིས་སུ་མེད་པར་དགེ་སློང་མའི་གནས་ཁང་དུ་གནས་པར་བྱེད་ན་ཞེས་བྱ་བ་ནི་ཉལ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་གཅིག་པུ་གཉིས་སུ་མེད་པར་གནས་ཁང་དུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་།། སྡོམ་ལ། རྣ་བར་གཤུབ་པ་གཉིས་དང་ནི། བདག་ཉིད་ལ་ནི་ཐོ་འཚམ་དང ། །ཚངས་པར་སྤྱོད་ལ་མནའ་མིན་དང ། །ཉེས་པར་མཐོང་བ་མི་གླེང་བའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་སྐྱེས་པ་ཞིག་གི་རྣ་བར་གཤུབས་པ་དང ། བྲམ་ཟེ་དང ། ཁྱིམ་བདག་དག་ན་རེ། གང་གི་ཕྱིར་རབ་ཏུ་བྱུང་བ་ཡང་ཁྱིམ་ན་གནས་པའི་རྣ་བར་གཤུབ་ལ། ཁྱིམ་ན་གནས་པ་ཡང་གཤུབ་པར་བྱེད་ན་འདི་གཉིས་ལ་ཁྱད་པར་ནི་ཅི་ཞིག་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད་ཅེས་འཕྱ་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྱེས་པའི་རྣ་བར་གཤུབ་པར་བྱེད་ན་ལྟུང
9.263a
བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རྣ་བར་གཤུབ་པར་བྱེད་ན་ཞེས་བྱ་བ་ནི་རྣ་བར་གཏམ་སྨྲ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྐྱེས་པའི་རྣ་བར་གཤུབ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་དང་པོ་རྫོགས་སྷོ།། ་་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་བཞིན་དུ་སྦེད་མ་འཆར་ཀའི་རྣ་བར་གཤུབ་པར་བྱེད་པ་ནས། དོན་ཉུང་བའི་དགེ་སློང་མ་རྣམས་འཕྱ་བར་བྱེད་པའི་བར་གྱི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་དང་ལྷན་ཅིག་རྣ་བར་གཤུབ་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦེད་མའོ། །དགེ་སློང་ཞེས་བྱ་བ་ནི་འཆར་ཀའོ། །ལྷན་ཅིག་རྣ་བར་གཤུབ་པར་བྱེད་ན་ཞེས་བྱ་བ་ནི་རྣ་བར་གཏམ་སྨྲ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་གི་རྣ་བར་གཤུབ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་གཉིས་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་ཐབ་མོ་བྱུང་བ་ན་དེ་ལ་དགེ་སློང་མ་རྣམས་ཀྱིས་རྩོད་པ་འགའ་ཞིག་ལ་གླེང་བར་བྱེད་དེ། དེ་གླེངས་པ་ན་རང་ལ་འཚོག་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འཁྲུགས་ནས་རང་ལ་རྡེག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རང་ལ་རྡེག་ན་ཞེས་བྱ་བ་ནི་རང་ལ་འཚོག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི
9.263b
ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་གི་ལུས་ལ་རྡེག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་གསུམ་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་གང་དུ་ཁ་མི་འདུམ་པ་ཅི་བྱུང་བ་ཡང་རུང་ཐམས་ཅད་དུ་སངས་རྒྱས་ལ་མནའ་འདོར་བར་བྱེད། ཆོས་དང ། དགེ་འདུན་དང ། ཚངས་པར་སྤྱོད་པ་ལ་གནས་པ་དང ། མཁན་པོ་དང ། སློབ་དཔོན་ལ་མནའ་འདོར་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཚངས་པར་སྤྱོད་པ་ལ་མནའ་འདོར་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཚངས་པར་སྤྱོད་པར་ཞེས་བྱ་བ་ནི་ཚུལ་ཁྲིམས་ལ་མནའ་འདོར་བའོ། །མནའ་འདོར་བར་བྱེད་ན་ཞེས་བྱ་བ་ནི་ཡིད་ཆེས་པར་བྱ་བའི་ཕྱིར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སངས་རྒྱས་ལ་མནའ་འདོར་བར་བྱེད་ན་ལྟུང་བྱེད་དོ། །ཆོས་ལ་ནི་ལྟུང་བྱེད་དོ། །དགེ་འདུན་ལ་ནི་ལྟུང་བྱེད་དོ། །ཚངས་པར་སྤྱོད་པ་ལ་གནས་པ་ལ་ནི་ལྟུང་བྱེད་དོ། །མཁན་མོ་དང ། སློབ་དཔོན་ལ་ནི་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་བཞི་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་དགེ་སློང་མ་རྣམས་དང་ལྷན་ཅིག་ཐབ་མོ་བྱུང་སྟེ། དེ་དག་ཐབ་མོ་བྱུང་བ་ན་དགེ་སློང་མ་རྣམས་ལ་གླེང་བར་བྱེད་དོ། །གང་གི་ཚེ་ལྕོགས་པར་མི་ནུས་པ་དེའི་ཚེ་དེ་དག་དགེ་སློང་མ་རྣམས་ལ་ཉེས་པར་མཐོང་བས་གླེང་བར་བྱེད། ཉེས་པར་ཐོས་པ་དང ། ཉེས་པར་དོགས་པས་གླེང་བར་བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ
9.264a
མཛད་དེ་ཡང་དགེ་སློང་མ་གང་དགེ་སློང་མ་རྣམས་ལ་ཉེས་པར་མཐོང་བ་དང ། ཉེས་པར་ཐོས་པ་དང ། ཉེས་པར་དོགས་པས་གླེང་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །དགེ་སློང་མ་རྣམས་ལ་ཞེས་བྱ་བ་ནི་ཆོས་འདི་པ་རྣམས་ལའོ། །ཉེས་པར་མཐོང་བས་གླེང་ན་ལྟུང་བྱེད་དོ། །ཉེས་པར་ཐོས་པ་དང ། ཉེས་པར་དོགས་པས་མ་བརྟགས་པར་གླེང་བར་བྱེད་ན་ཞེས་བྱ་བ་ནི་གཤེ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉེས་པར་མཐོང་བས་གླེང་ན་ལྟུང་བྱེད་དོ། །ཉེས་པར་ཐོས་པས་ན་ལྟུང་བྱེད་དོ། །ཉེས་པར་དོགས་པས་ན་ལྟུང་བྱེད་དོ། །ལྟུང་བྱེད་བཅུ་གཅིག་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།། སྡོམ་ལ། མུན་པར་རྒྱ་སྐྱེགས་བཅངས་པ་དང ། །མ་གཏད་པར་ནི་འགྲོ་བ་དང ། །ཁྱིམ་པའི་སྟན་ནི་བཤམས་པ་དང ། །དེས་ནི་ཉལ་བར་མི་བྱའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ལྗོངས་རྒྱུ་བ་ན་རི་འོར་ཞིག་ཏུ་ཕྱིན་ནས་དེ་དག་གིས་དེར་ཁྱིམ་བདག་ཅིག་ལ་གནས་ཞིག་བརྙེས་ཏེ། དེ་དག་ནུབ་མོ་དེ་ན་རྟེན་ཅིང་འཁོད་པ་ལས་ཇི་ཙམ་ན་མཚན་མོ་ནམ་སྲོས་པ་ན་ཆར་ཕབ་ནས་དེ་དག་ཕུགས་ལོགས་སུ་ནུར་ཏེ་ཞུགས་པ་དང ། དེ་ན་ཡང་སྐྱེས་པ་ཞིག་སྔར་ཞུགས་པ་ཞིག་ཡོད་པ་དེས་དགེ་སློང་མ་བཟུང་བ་དང་དེས་ཁུས་བཏབ་བོ། །ཇི་ཙམ་ན་དགེ་སློང་མ་རྣམས་ཀྱིས་གསོལ་བ་བྱས་ཏེ་བཏང་བ་ནས་མཉན་ཡོད་དུ་ལྷགས་པ་དང ། སྐབས་དེ་དགེ་སློང་མ་རྣམས་ལ་རྒྱས་པར་སྨྲས་པའི་བར་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་བྱུང་བ་དེ་ནི་དགེ་སློང་མ་དག་ཁྱིམ་དུ་མ་བརྟགས་པར་གནས་འཆའ་བ་ལས་གྱུར་ཏོ་སྙམ་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ
9.264b
གང་གནས་མ་བརྟགས་པར་གནས་སུ་གནས་འཆའ་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པ་དག་གིའོ། །གནས་མ་བརྟགས་པར་ཞེས་བྱ་བ་ནི་བརྟག་པ་མ་བྱས་པར་རོ། །གནས་པར་བྱེད་ན་ཞེས་བྱ་བ་ནི་ཁྱིམ་པའི་ཁྱིམ་དུ་ཉལ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མུན་ཁུང་དུ་ཁྱིམ་མ་བརྟག་པའི་ཁྱིམ་དུ་མ་བརྟགས་པར་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་དང་པོ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ཁྱིམ་ཐབ་བྱེས་སུ་སོང་བའི་ཆུང་མ་ཞིག་གི་དྲུང་དུ་སོང་ནས་དྲིས་པ། ཁྱོད་དེའི་བར་དུ་ཇི་ལྟ་བུ་ཞིག་གིས་ཉོན་མོངས་པ་སེལ་བར་བྱེད། ཁྱོད་ནི་རབ་ཏུ་བྱུང་བ་ལགས་ན་འདྲི་ཅིར་འཚལ་ཞེས་བྱ་བ་ནས། རྒྱ་སྐྱེགས་བཅངས་པས་ལགས་སོ་ཞེས་བྱ་བའི་བར་རོ། །དེ་ནས་སྦོམ་དགའ་མོས་ཇི་ཙམ་ན་བཙུན་མོ་ཕྲེང་ལྡན་མའི་དྲུང་དུ་སོང་ནས་དྲིས་པ། བཙུན་མོ་གལ་ཏེ་གསུས་པོ་ཆེ་ཡུལ་གཞན་དུ་གཤེགས་ན་དེའི་བར་དུ་ཇི་ལྟ་བུ་ཞིག་གིས་ཉོན་མོངས་པ་སེལ་བར་མཛད་དེ། དེས་འདི་སྐད་ཅེས་ཁྱོད་ནི་རབ་ཏུ་བྱུང་བ་ཡིན་ན་འདྲི་ཅི་དགོས་ཞེས་བྱ་བ་ནས། རྒྱ་སྐྱེགས་བཅངས་པས་ཡིན་ནོ་ཞེས་བྱ་བའི་བར་རོ། །དེ་ནས་སྦོམ་དགའ་མོ་རྒྱ་སྐྱེགས་ཀྱི་ཚིགས་མ་མཁན་གྱི་དྲུང་དུ་སོང་སྟེ་ཞེས་བྱ་བ་ན། རྒྱ་སྐྱེགས་བཅངས་པ་ཞིག་ཉོས་ཏེ། ཇི་ཙམ་ན་དབྱར་ཁང་དུ་འོངས་ནས་མཚན་མོ་རྐང་པའི་རྟིང་པ་ལ་བཅིངས་ནས་ཉོན་མོངས་པ་སེལ་བར་བྱེད་པ་དང ། ཅི་ཙམ་ན་དབྱར་ཁང་དུ་མེ་ཤོར་བར་གྱུར་ཏོ། །དེ་ནས་སྦོམ་དགའ་མོ་སྔངས་ཤིང་བརྟགས་པས་གཅེར་བུ་སྒྲེན་མོར་སྐས་ལས་བབས་པ་དང ། ཀྲོལ་ཀྲོལ་ཟེར་བའི་སྒྲ་བྱུང་བ་ན་སྐྱེ་བོའི་ཚོགས་ཆེན་པོས་བགད་དོ་ཞེས་བྱ་བ་ནས། དེས་འདི་སྐད་ཅེས་མ་ལ་དྲིས་ཤིག་།སྲིང་མོ་ལ་དྲིས་ཤིག་།བུ་མོ་ལ་དྲིས་ཤིག་ཅེས་སྨྲས་སོ་ཞེས་བྱ་བའི་བར་རོ། །ཇི་ཙམ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །
9.265a
དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྒྱ་སྐྱེགས་བཅངས་པ་འཆང་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བཅངས་པ་ཞེས་བྱ་བ་ནི་རྒྱ་སྐྱེགས་ལས་བཅོས་པའོ། །འཆང་ན་ཞེས་བྱ་བ་ནི་རང་གིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྒྱ་སྐྱེགས་བཅངས་པ་འཆང་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཞེས་བྱ་བ་ནས། བཙུན་པ་སྦོམ་དགའ་མོས་སྐྱེ་བོའི་ཚོགས་ཆེན་པོ་གད་མོ་བཏོན་པ་ལ་གཟིགས་ཞེས་བྱ་བའི་བར་རོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདིར་མ་ཟད་ཀྱིས་འདས་པའི་དུས་ན་ཡང་སྦོམ་དགའ་མོས་སྐྱེ་བོའི་ཚོགས་ཆེན་པོ་གད་མོ་བཏོན་པ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པ་ན་གྲོང་ཁྱེར་བཱ་རཱ་ཎ་སིར་རྒྱལ་པོ་ཚངས་བྱིན་ཞེས་བྱ་བ་རྒྱལ་སྲིད་བྱེད་དུ་འཇུག་གོ། །ཇི་ཙམ་ན་བྲམ་ཟེ་གཅིག་གིས་ལྗོངས་ཀྱི་བྲམ་ཟེ་ཞིག་གི་བུ་མོ་ཆུང་མར་བླངས་པ་དང་ཞེས་བྱ་བ་ནས། བྲམ་ཟེའི་བུ་མོ་དེ་བྲམ་ཟེ་དེ་ལ་འཇར་དུ་མ་བཏུབ་ནས་ཞེས་བྱ་བའི་བར་ཏེ། གྱོས་པོའི་ཁྱིམ་དུ་བསྐྱལ་བའི་ཕྱིར་བུ་མོ་དེ་བོང་བུ་ཞིག་ལ་ཞོན་ཏེ། བུ་མོ་དེའི་ཕའི་ཁྱིམ་གང་ན་བ་དེར་ཆས་པ་དང ། ་ཇི་ཙམ་ན་བུ་མོ་དེས་དྲིས་པ་ལས་དེས་ཀྱང་སྨྲས་སོ་ཞེས་བྱ་བ་ནས། བུ་མོ་དེས་དྲིས་པ་ན་ཐ་སྙད་ཇི་ལྟ་བ་བཞིན་དུ་བྲམ་ཟེ་དེས་ཉལ་བར་བརྩམས་སོ་ཞེས་བྱ་བ་ནས། བྲམ་ཟེ་ནི་གཙང་སྒྲ་འདོད་པ་ཡིན་པས་ཆུ་ལེན་པར་བྱེད་པ་ན་ཇི་ཙམ་ན་བྱ་མ་བུམ་འཁྲོགས་པའི་སྒྲས་བོང་བུ་འདྲོགས་ཏེ། དེ་འདྲོགས་པས་བུ་མོ་དེ་ཆ་བྱད་དེ་ཉིད་ཀྱིས་གྲོང་ཁྱེར་དུ་སོང་བ་ན་སྐྱེ་བོའི་ཚོགས་ཆེན་པོས་གད་མོས་བཏབ་པའི་བར་རོ། །དེ་ནས་བྲམ་ཟེ་དེས་དེའི་ཚེ་ཚིགས་སུ་བཅད་དེ་སྨྲས་པ། བྱ་མ་བུམ་ནི་འཁྲོགས་པ་ཡིས། །བུང་བུ་རབ་ཏུ་འདྲོགས་གྱུར་ཏེ། །བུད་མེད་འདི་ཡི་ལས་དག་གིས། །བདག་ཀྱང་འདིར་ནི་ངོ་ཚའོ། །དགེ་སློང
9.265b
དག་ཇི་སྙམ་དུ་སེམས། བྲམ་ཟེའི་བུ་མོ་གང་ཡིན་པ་དེ་ནི་སྦོམ་དགའ་མོ་འདི་ཉིད་ཡིན་ཏེ་ཞེས་བྱ་བ་ནས། སྔོན་དང་ད་ལྟར་ཡང་ཞེས་བྱ་བའི་བར་རོ། །ལྟུང་བྱེད་བཅུ་གཉིས་པའི་གཉིས་པ་རྫོགས་སྷོ།། ་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་ཁྱིམ་བདག་གི་ཆུང་མ་རབ་ཏུ་མང་པོས་སྦོམ་དགའ་མོ་ལ་འཕགས་མ་ཆོས་བཤད་དུ་གསོལ་ཞེས་གསོལ་བ་བཏབ་པ་དང ། དེས་འདི་སྐད་ཅེས་སྟན་ཤོམས་ཤིག་ཅེས་སྨྲས་སོ། །དེ་དག་གིས་དེའི་ཆེད་དུ་སྟན་བཤམས་པ་དང ། དེ་སྟན་བཤམས་པ་ཉིད་ལ་འདུག་ནས་ཁ་རྩིག་པ་ལ་བལྟས་ཏེ་མདོ་རིང་པོ་བཟུང་སྟེ་འཆད་པ་ལ་ཞུགས་སོ། །དེ་ནས་བྲམ་ཟེ་དང ། ཁྱིམ་བདག་གི་ཆུང་མ་དེ་དག་འདི་སྙམ་དུ་སེམས་ཏེ། དགེ་སློང་མ་རྣམས་ཀྱིས་ལས་ནི་ཀླག་པར་བྱ་བ་དང ། ་དྲན་པར་བྱ་བ་འདི་ཁོ་ནར་ཟད་ཀྱི། བདག་ཅག་ནི་ཁྱིམ་གྱི་བྱ་བ་དག་ཉམས་པར་འགྱུར་རོ་སྙམ་དུ་བསམས་ནས་དོང་ངོ ། །ཕྱི་བཞིན་འབྲང་བའི་དགེ་སྦྱོང་མ་དེས་སྨྲས་པ། འཕགས་མ་སུ་ལ་ཆོས་འཆད། དེས་འདི་སྐད་ཅེས་སྨྲས་སོ། །བྲམ་ཟེ་དང ། ཁྱིམ་བདག་གི་ཆུང་མ་རྣམས་ལའོ། །དེ་དག་ནི་སྐྱོ་ནས་དོང་ལགས་སོ་ཞེས་བྱ་བ་ནས། སྦོམ་དགའ་མོས་ཀྱང་སྟན་བོར་ཏེ་སོང་ངོ་ཞེས་བྱ་བའི་བར་རོ། །སྟན་དེ་མ་བྱིན་པར་ལེན་པ་དག་གིས་བརྐུས་སོ་ཞེས་བྱ་བ་ནས། བྲམ་ཟེ་དང ། ཁྱིམ་བདག་གི་ཆུང་མ་རྣམས་ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆོས་འཆད་པ་ན་ཁྱིམ་པ་ལ་སྟན་མ་གཏད་པར་བོར་ཏེ་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྟན་མ་གཏད་པར་ཞེས་བྱ་བ་ནི་བདག་པོ་ལ་མ་གཏད་པར་རོ། །འགྲོ་ན་ཞེས་བྱ་བ་ནི་སོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྟན་བདག་པོ་ལ་མ་གཏད་པར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །
9.266a
ལྟུང་བྱེད་བཅུ་གཉིས་པའི་གསུམ་པ་རྫོགས་སྷོ།། ་་་་་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་ཡུལ་དབུས་པའི་ཡུལ་ཆོས་ཀྱིས་བྲམ་ཟེ་དང ། ཁྱིམ་བདག་རྣམས་ཀྱི་ཁྱིམ་ན་སྟན་བཤམས་པ་དག་མི་རྟུལ་བ་ཡིན་པས་བྲམ་ཟེ་ཞིག་གིས་སྟན་བཤམས་ནས་དེར་སྲུངས་མ་ཞིག་བཞག་གོ། །སྦོམ་དགའ་མོ་ཡང་ཁྱིམ་དེར་བསོད་སྙོམས་ཀྱི་ཕྱིར་ཞུགས་ཏེ་དེས་འདི་སྐད་ཅེས་སྨྲས་སོ། །མཚན་བཟངས་མ་བསོད་སྙོམས་བྱིན་ཅིག་།དེ་ནས་བུད་མེད་དེས་འདི་སྐད་ཅེས་སྨྲས་སོ། །འཕགས་མ་སྟན་སྲུང་ལགས་སོ། །ཁོ་མོས་སྲུང་གིས་ཁྱོད་སོང་ལ་བསོད་སྙོམས་ཁྱེར་ཏེ་ཤོག་ཤིག་།བུད་མེད་དེ་ཡང་བསོད་སྙོམས་ཀྱི་ཕྱིར་ནང་དུ་ཞུགས་པ་དང ། སྦོམ་དགའ་མོས་ཀྱང་བྲམ་ཟེའི་སྟན་ལ་འདུག་གོ། །བྲམ་ཟེ་དེ་འོངས་ནས་སྦོམ་དགའ་མོ་སྟན་དེའི་སྟེང་ན་འདུག་པ་མཐོང་ནས་སྨོད་པར་བྱེད་དོ་ཞེས་བྱ་བའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མ་གནང་བར་ཁྱིམ་གྱི་ནང་དུ་སྟན་ལ་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མ་གནང་བར་ཞེས་བྱ་བ་ནི་ཁྱིམ་གྱི་བདག་པོ་ལ་མ་བརྟག་པར་རོ། །ཁྱིམ་གྱི་ནང་དུ་ཁྱིམ་པའི་སྟན་ལ་འདུག་ན་ཞེས་བྱ་བ་ནི་བསྡད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མ་གནང་བར་ཁྱིམ་པའི་སྟན་ལ་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་བཞི་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རབ་ཏུ་མང་པོ་ལྗོངས་རྒྱུ་ཞིང་དོང་བ་དང ། ཐ་ག་པ་ཞིག་གི་ཁྱིམ་དུ་ནུབ་མོ་བྲང་བཏབ་སྟེ་འདུག་གོ། །དེའི་འོག་ཏུ་མུན་སྲོས་པ་དང་ཁྱིམ་བདག་འོངས་ན་དེས་དགེ་སློང་མ་དེ་དག་མ་མཐོང་མ་ཐོས་སོ། །དེ་ནས་ཁྱིམ་བདག་དེ་ཆུང་མ་དང་ལྷན་ཅིག་ཀུན་དུ་སྤྱོད་པ་ལ་ཞུགས་པ་ན་དེས་སྐད་ངན་ཤོར་བ་གཞོན
9.266b
ནུ་རབ་ཏུ་བྱུང་བའི་དགེ་སློང་མ་ཞིག་ཡོད་པ་དེས་ཐོས་ནས་བགད་དོ། །དེ་ནས་ཁྱིམ་བདག་གིས་ཁྱིམ་བདག་གི་ཆུང་མ་དེ་ལ་འདི་སྐད་ཅེས་སྨྲས་སོ། །དེ་སུ་ཞིག་དེས་སྨྲས་པ། དགེ་སློང་མའོ། །ཁྱིམ་བདག་དེས་ཐོས་ནས་ཁྲོས་ཏེ་འདི་སྐད་ཅེས་ཅིའི་ཕྱིར་ཁྱོད་ཀྱིས་འཇིག་རྟེན་ལ་ཅོ་འདྲི་བ་རྣམས་ཀྱི་གནས་སྦྱིན་ཞེས་སྨྲས་ནས། དེ་ཁྲོས་ཏེ་ནམ་ཕྱེད་ན་སྒོར་བཏོན་པ་དང ། དེ་དག་གིས་གསོལ་བ་བཏབ་པ་དང་ཞེས་བྱ་བ་ནས། སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་གྱི་བདག་པོ་ལ་མ་བརྟགས་པར་ཁྱིམ་གྱི་ནང་དུ་ནུབ་མོ་གནས་བཅས་ཏེ་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའོ། །ཐ་ག་པའི་ཁྱིམ་གྱི་བདག་པོ་ལ་མ་བརྟགས་པར་ཁྱིམ་གྱི་ནང་དུ་ཞེས་བྱ་བ་ནི་ཐ་ག་པའི་ཁྱིམ་དུའོ། །ནུབ་མོ་གནས་བཅས་ཏེ་འདུག་ན་ཞེས་བྱ་བ་ནི་ཉལ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་གྱི་བདག་པོ་ལ་མ་བརྟགས་པར་ཁྱིམ་གྱི་ནང་དུ་ནུབ་མོ་གནས་འཆའ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་་་་།།སྡོམ་ལ། སྔ་ནས་འདུག་པར་ཤེས་པ་དང ། །ནད་པའི་རིམ་གྲོ་བྱ་བ་དང ། །དབྱར་ཁང་ནས་ནི་མི་བསྐྲད་དང ། །ཁྲི་དང་གདིང་བ་གཅིག་ལ་མིན། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་ལྗོངས་རྒྱུ་ཞིང་ཁྱིམ་བདག་གཅིག་གི་ཁྱིམ་དུ་ཞུགས་པ་དང ། དེ་ན་ཡང་དགེ་སློང་མ་སྔ་ནས་འཁོད་པ་དག་ཡོད་པ་དེ་དག་གིས་དེ་ལ་འཇིག་རྟེན་པའི་ཚུལ་དག་མ་བྱས་པ་དང ། དེས་དེ་དག་ཐབས་ཀྱིས་ཁྱིམ་དེ་ནས་བསྐྲད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང
9.267a
དགེ་སློང་མ་གང་དགེ་སློང་མ་དག་སྔ་མ་ནས་འདུག་པར་ཤེས་བཞིན་དུ་དེའི་འོག་ཏུ་འོངས་ནས་ཁྱིམ་ནས་སྐྲོད་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྔ་ནས་འདུག་པར་ཞེས་བྱ་བ་ནི་ཐོག་མ་ནས་གནས་པར་རོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །དགེ་སློང་མ་རྣམས་ཤེས་བྱ་བ་ནི་ཆོས་འདི་པ་དག་གོ། །དེའི་འོག་ཏུ་འོངས་ནས་ཞེས་བྱ་བ་ནི་དུས་གཞན་ནའོ། །ཁྱིམ་ནས་སྐྲོད་ན་ཞེས་བྱ་བ་ནི་གནས་ནས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཅི་ཙམ་ཅུང་ཟད་དགེ་སློང་མ་སྔ་ནས་འཁོད་པ་དག་ཁྱིམ་ནས་སྐྲོད་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གསུམ་པའི་དང་པོ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་ལྷན་ཅིག་གནས་པ་དང ། ཉེ་གནས་དག་ཉེ་བར་བཞག་ནས་ན་བ་ན་རིམ་གྲོ་མི་བྱེད་དོ། །དེ་དག་མགོན་མེད་པས་ཚུལ་མ་ཡིན་པར་སྡུག་བསྔལ་བར་གྱུར་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལྷན་ཅིག་གནས་པ་དང ། ཉེ་གནས་དག་ཉེ་བར་གཞག་ནས་ན་བ་ན་རིམ་གྲོ་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྷན་ཅིག་གནས་པ་དང ། ཉེ་གནས་དག་ཉེ་བར་བཞག་ནས་ཞེས་བྱ་བ་ནི་རབ་ཏུ་ཕྱུང་སྟེ་བཞག་ནས་སོ། །ན་བ་ན་ཞེས་བྱ་བ་ནི་ནད་ཀྱིས་ཐེབས་ནའོ། །རིམ་གྲོ་མི་བྱེད་ན་ཞེས་བྱ་བ་ནི་རྩ་བའི་སྨན་ལ་སོགས་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མས་ཇི་ཙམ་ཅུང་ཟད་འཁོར་ཉེ་བར་བཞག་ནས་ན་བ་ན་རིམ་གྲོ་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གསུམ་པའི་གཉིས་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ
9.267b
བསམས་པ། ་བདག་གིས་དགེ་སློང་མ་གང་ཞིག་དབྱར་ཁང་འདི་ནས་བསྐྲད་པར་བྱ་སྙམ་པ་ལས་འདི་སྙམ་དུ་སྐྱེ་དགུའི་བདག་མོ་ཆེན་མོ་འདི་ནི་སྤོང་བ་པ་འཁོར་རྒྱ་ཆེན་པོ་ཅན་ཡིན་ནོ། །ཆོས་སྦྱིན་མ་འདི་ཡང་ལུང་འབོགས་པ་པ་འཁོར་རྒྱ་ཆེན་པོ་ཅན་ཡིན་ནོ། །གཽ་ཏ་མི་སྐེམ་མོ་འདི་ནི་དོན་ཉུང་བ། འཁོར་དོན་ཉུང་བ་ཅན་ཡིན་གྱིས། གཽ་ཏ་མི་ཆུང་ངུ་བསྐྲད་པར་བྱའོ་སྙམ་དུ་དེས་བསམས་སོ། །དེ་ནས་སྦོམ་དགའ་མོ་སྔ་དྲོའི་ཚེ་ལྟོའི་གཏམ་དག་གླེངས་ནས་སྔ་དྲོ་ཤམ་ཐབས་བགོས་ཏེ་མ་ལུས་པར་ཆས་ཏེ་དོང་ངོ ། །ཇི་ཙམ་ན་གཽ་ཏ་མི་སྐེམ་མོས་དགེ་སློང་མ་དེ་དག་དགེ་བའི་ཕྱོགས་ལ་སྦྱར་ནས། དེ་ནས་གཽ་ཏ་མི་སྐེམ་མོ་འདི་སྙམ་དུ་མ་ལ་བདག་གིས་སྦོམ་དགའ་མོ་ལ་ཡང་ཆོས་བཤད་པར་བྱའོ་སྙམ་དུ་བསམས་སོ། །དེ་ནས་གཽ་ཏ་མི་སྐེམ་མོས་སྦོམ་དགའ་མོ་ལ་ཕུ་ནུ་མོ་ཅི་ཁྱོད་ལྟོ་ཁོ་ན་སེམས་ཤིང་འདུག་གི། དགེ་བའི་ཕྱོགས་ལ་མ་ཡིན་ནམ་ཞེས་ཆོས་བཤད་པ་བརྩམས་པ་དང ། དེ་ནས་སྦོམ་དགའ་མོ་འདི་སྙམ་དུ་བདག་གིས་ཡུན་རིང་མོ་ཞིག་ལོན་ནས་གླགས་རྙེད་དོ་སྙམ་དུ་བསམས་ཏེ། དེས་དེ་ལ་བུའི་ཤ་ཟན་མོ། སེམས་འཁྲུགས་མ། དུར་དུ་བཅུག་མ་ཞེས་བཅོས་ནས་དབྱར་གྱི་ནང་ལོགས་སུ་དབྱར་ཁང་ནས་བསྐྲད་པ་དང་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་འཁྲུགས་རྔམ་ཡིད་མ་རངས་པར་གྱུར་ནས། དགེ་སློང་མ་དབྱར་ཁང་ནས་སྐྲོད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། ཁྲོས་འཁྲུགས་རྔམ་ཞེས་བྱ་བ་ནི་ཁྲོ་བའི་ཀུན་ནས་དཀྲིས་པར་གནས་ནས་སོ། །དགེ་སློང་མ་ཞེས་བྱ་བ་ནི་གཽ་ཏ་མི་སྐེམ་མོའོ། །དབྱར་ཁང་ནས་ཞེས་བྱ་བ་ནི་གནས་ནས་སོ། །སྐྲོད་ན་ཞེས་བྱ་བ་ནི་འབྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ལུས་སྐྱོད་པར་བྱེད་པ་འམ། ཚིག་ཏུ་སྨྲ་བར་བྱེད་པ་འམ་གཉི་ག་ལྡན་པས་ཏེ། སྤང་བའི་ལྟུང་བྱེད་ལས་ཇི་སྐད་འབྱུང་བ་བཞིན་ནོ། །ལྟུང་བྱེད་བཅུ་གསུམ་པའི་གསུམ་པ་རྫོགས་སྷོ།། ་་་་་་་་་་་་།།
9.268a
གླེང་གཞི་ནི་མཉན་ཡོད་ནའོ། །དེའི་ཚེ་འཆི་ལྟས་མ་དང ། ཉེ་བའི་འཆི་ལྟས་མ་ཁྲི་གཅིག་ལ་ཉལ་བར་བྱེད་དོ། །དེ་གཉིས་ཁྲི་གཅིག་ལ་ཉལ་བ་ན་དཔེར་ན་སྐྱེས་པ་དང ། བུད་མེད་ལྷན་ཅིག་འཁོད་པ་བཞིན་དུ་རྒོད་པ་དང ། འཕྱར་གཡེང་དང ། ལུས་ཀྱི་ཙབ་ཧྲལ་བྱེད་པ་ན་དོན་ཉུང་བའི་དགེ་སློང་མ་རྣམས་འཕྱ་བར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་དང་ལྷན་ཅིག་ཁྲི་གཅིག་ལ་ཉལ་ན་ལྟུང་བྱེད་དོ། །ཡང་གང་ཞེས་བྱ་བ་ནི་འཆི་ལྟས་མ་དང ། ཉེ་བའི་འཆི་ལྟས་མའོ། །ཁྲི་གཅིག་ལ་ཞེས་བྱ་བ་ནི་མལ་གཅིག་ཏུའོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་དང་ལྷན་ཅིག་ཁྲི་གཅིག་ལ་ཉལ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་ནས་ཡང་དགེ་སློང་མ་དག་རྒྱུ་ཞིང་དོང་བ་ན་ཁྲི་ཆེན་པོ་དག་རྙེད་ནས་དེ་དག་རེ་རེ་བཟུང་སྟེ་ཉལ་བ་ན་ལྷག་མ་དག་སྡུག་བསྔལ་བར་གྱུར་པ་དང ། ཁྱིམ་པ་མོ་དག་གིས་འདི་སྐད་ཅེས་སྨྲས་སོ། །འཕགས་མ་དག་ཁྱེད་ཅག་གི་ཁྲི་འདི་ཐམས་ཅད་ཞུགས་ཤིང་ལགས་ན། ཅིའི་སླད་དུ་ཁྱེད་ཅག་རེ་རེ་གཟིམས། དེ་དག་གིས་འདི་སྐད་ཅེས་བཅོམ་ལྡན་འདས་ཀྱིས་བཀག་གོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལྷག་པར་ངོ་ཚ་བ་དང ། འཛེམ་པ་ཉེ་བར་བཞག་སྟེ་གཏུར་བུ་དང་ལྷུང་བཟེད་ཀྱི་གདུ་བུ་ལ་སོགས་པ་བར་དུ་བཞག་ནས་རང་རང་གི་ལུས་གོས་ཀྱིས་དཀྲིས་ཤིང་ཉལ་བར་བྱ་སྟེ། དེ་ལ་འགྱོད་པར་མི་བྱའོ། །ལྟུང་བྱེད་བཅུ་གསུམ་པའི་བཞི་པ་རྫོགས་སྷོ།། ་་་་་་་་་་་་་།། དེ་བཞིན་དུ་གདིང་བ་ལ་ཡང་རྒྱས་པར་བརྗོད་པར་བྱའོ། །བསླབ་པ་བཅའ་བའི་བར་དུ་མཛད་དེ། ་ཡང་དགེ་སློང་མ་གང་དགེ་སློང་མ་དང་ལྷན་ཅིག་གདིང་བ་གཅིག་ལ་བར་དུ་མ་བཅད་པར་ཉལ་ན་ལྟུང་བྱེད་
9.268b
དོ། །ཡང་གང་ཞེས་བྱ་བ་ནི་འཆི་ལྟས་མ་དང ། ཉེ་བའི་འཆི་ལྟས་མའོ། །གདིང་བ་ཞེས་བྱ་བ་ནི་སྟེང་རིམ་དུ་གདིང་བའོ། །བར་དུ་མ་བཅད་པར་ཞེས་བྱ་བ་ནི་ལུས་ཀྱིས་ལུས་ཀྱི་རེག་པ་རང་གིར་བྱེད་པའོ། །ཉལ་ན་ཞེས་བྱ་བ་ནི་མཚན་མོ་གནས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་དང་ལྷན་ཅིག་གདིང་བ་ལ་བར་དུ་མ་བཅད་པར་ཉལ་ན་ཐམས་ཅད་དུ་ལྟུང་བྱེད་དུ་འགྱུར་ཏེ་གཞུང་བླ་མ་ལས་ཇི་སྐད་འབྱུང་བ་བཞིན་ནོ། །ལྟུང་བྱེད་བཅུ་གསུམ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་།། སྡོམ་ལ། དབྱར་གྱི་ནང་དུ་འགྲོ་མི་བྱ། །དབྱར་རྫོགས་ནས་ནི་འགྲོ་བ་དང ། །དོགས་དང་བཅས་པའི་ཡུལ་འཁོར་གཉིས། །ལྷ་ཁང་དག་ནི་ཕྱི་མ་ཡིན། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་དང་བཅས་པ་དབྱར་གྱི་ནང་ལོགས་སུ་རྒྱུ་ཞིང་འདོང་བ་ན་དགེ་སློང་མ་དེ་རྣམས་ལ་དགེ་སློང་མ་རྣམས་ཀྱིས་དྲིས་པ། ཕུ་ནུ་མོ་དག་ཁྱེད་ཅིའི་ཕྱིར་དབྱར་གྱི་ནང་ལོགས་སུ་རྒྱུ་ཞིང་འདོང ། དེ་དག་གིས་འདི་སྐད་ཅེས་འཕགས་མ་སྦོམ་དགའ་མོ་ན་རེ་ཁོ་མོ་སྡེ་སྣོད་གསུམ་ཤེས་ཀྱིས་འདོང་ངོ་ཞེས་ཟེར་རོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་གྱི་ནང་ལོགས་སུ་རྒྱུ་ཞིང་འདོང་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དབྱར་གྱི་ནང་ལོགས་སུ་ཞེས་བྱ་བ་ནི་དགག་དབྱེ་མ་བྱས་པར་རོ། །འདོང་ན་ཞེས་བྱ་བ་ནི་གྲོང་རྡལ་ལམ། གྲོང་ཁྱེར་རམ། ཡུལ་འཁོར་རམ། རྒྱལ་པོའི་ཕོ་བྲང་དག་ཏུ་འདོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དབྱར་གྱི་ནང་ལོགས་སུ་རྒྱུ་ཞིང་འདོང་ན་ལྟུང་བྱེད་དོ། །ལྟུང་བྱེད་བཅུ
9.269a
བཞི་པའི་དང་པོ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་དགག་དབྱེ་བགྱིས་ལགས་ཀྱིས་རྒྱུ་ཞིང་བཞུད་དོ། །དེས་འདི་སྐད་ཅེས་སྨྲས་སོ། །ཁོ་མོ་སྡེ་སྣོད་གསུམ་པ་ཡིན་ཏེ། ད་དུང་རྒྱུ་བའི་དུས་ལ་མ་བབ་བོ། །དགེ་སློང་མ་དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་ཁྱེད་ཅག་དགག་དབྱེ་བྱས་ཟིན་ན་ཅིའི་ཕྱིར་རྒྱུ་ཞིང་མི་འདོང ། དེ་དག་གིས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོ་ན་རེ་ཁོ་མོས་སྡེ་སྣོད་གསུམ་ཤེས་ཏེ་ད་དུང་རྒྱུ་བའི་དུས་ལ་མ་བབ་བོ་ཞེས་ཟེར་རོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་གནས་ནས་རྒྱུ་ཞིང་མི་འདོང་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དབྱར་གནས་ནས་རྒྱུ་ཞིང་མི་འདོང་ན་ཞེས་བྱ་བ་ནི་དགག་དབྱེ་བྱས་ནས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགག་དབྱེ་བྱས་ནས་རྒྱུ་ཞིང་མི་འདོང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཐ་ན་དབྱར་ཁང་གཅིག་ནས་གཅིག་ཤོས་སུ་ཡང་འདོང་བར་བྱའོ། །ལྟུང་བྱེད་བཅུ་བཞི་པའི་གཉིས་པ་རྫོགས་སྷོ།། ་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་མ་སྐྱེས་དགྲས་སུ་ཡང་ཡངས་པ་ཅན་དུ་མ་འགྲོ་ཤིག་ཅེས་དྲིལ་བསྒྲགས་པ་བྱས་སོ། །དེ་ནས་དགེ་སློང་མ་རྣམས་རྒྱལ་པོའི་ཁབ་ནས་ཡངས་པ་ཅན་གང་ན་བ་དེར་རྒྱུ་ཞིང་འདོང་ངོ ། །དེ་དག་དོང་བ་ན་ལམ་ཁར་ཆོམ་རྐུན་པ་དག་གིས་སུན་ཕྱུང་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་དོགས
9.269b
པ་དང་བཅས་པའི་ཡུལ་འཁོར་དུ་འདོང་བར་མི་བྱའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དོགས་པ་དང་བཅས་པའི་ལམ་ནས་ནང་གི་ཡུལ་འཁོར་དུ་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའོ། །དོགས་པ་དང་བཅས་པའི་ལམ་ཞེས་བྱ་བ་ནི་འཇིགས་པ་དང་བཅས་པར་གྲགས་པའོ། །ནང་གི་ཡུལ་འཁོར་ཞེས་བྱ་བ་ནི་ཕན་ཚུན་མི་མཐུན་པའི་འོ། །འགྲོ་ན་ཞེས་བྱ་བ་ནི་རྒྱུ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཕན་ཚུན་མི་མཐུན་པའི་ཡུལ་འཁོར་གཉིས་སུ་རྒྱུ་ཞིང་འགྲོ་ན་ལྟུང་བྱེད་དོ། །ལྟུང་བྱེད་བཅུ་བཞི་པའི་གསུམ་པ་རྫོགས་སྷོ།། ་་་་་་་་་་་་།། གླེང་གཞི་ནི་ཡངས་པ་ཅན་ནའོ། །ཡངས་པ་ཅན་པ་དག་གིས་སུ་ཡང་རྒྱལ་པོའི་ཁབ་ཏུ་མ་འགྲོ་ཤིག་ཅེས་དྲིལ་བསྒྲགས་པ་བྱས་སོ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དོགས་པ་དང་བཅས་པའི་ལམ་ནས་ཕྱི་རོལ་གྱི་ཡུལ་འཁོར་དུ་རྒྱུ་ཞིང་འགྲོ་ན་ལྟུང་བྱེད་དོ། །གཞུང་གོང་མ་ཇི་ལྟ་བ་བཞིན་དུ་ལྟུང་བ་ནི་རྗེས་སུ་འཐུན་པར་བྱའོ། །ལྟུང་བྱེད་བཅུ་བཞི་པའི་བཞི་པ་རྫོགས་སྷོ།། ་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །དེ་ནས་སྦོམ་དགའ་མོ་ལྷ་ཁང་དུ་སོང་ནས་ལྷ་ཁང་པ་དག་དང ། གཞན་ཡང་རྩོད་པ་དག་དང་ལྷན་ཅིག་ཏུ་རྩོད་པ་བྱེད་ཅིང ། དེའི་འོག་ཏུ་ཉི་མ་ཡོལ་ནས་དབྱར་ཁང་དུ་འོངས་ཏེ་རྒྱབ་དང་རྐེད་པར་ཚིར་ཅིག་ཅེས་ཟེར་བ་དང ། དེ་དག་གིས་འདི་སྐད་ཅེས་སྨྲས་སོ། །ཁྱོད་གང་དུ་སོང ། དེས་འདི་སྐད་ཅེས་སྨྲས་སོ། །ཁོ་མོས་ལྷ་ཁང་དུ་རྩོད་པ་རྣམས་ཚར་བཅད་དོ། །དེ་དག་གིས་འདི་སྐད་ཅེས་སྨྲས་སོ། །ཁྱོད་ཀྱི་ཕྱི་བཞིན་འབྲང་བའི་དགེ་སྦྱོང་མ་གང་ཞིག་།དེས་འདི་སྐད་ཅེས་ཁོ་མོ་འབའ་ཞིག་སོང་ངོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས
9.270a
ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལྷ་ཁང་དུ་སོང་ནས་རྩོད་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྷ་ཁང་དུ་ཞེས་བྱ་བ་ནི་གཞན་མུ་སྟེགས་ཅན་གྱི་ལྷ་ཁང་ངོ ། །སོང་ནས་ཞེས་བྱ་བ་ནི་ཞུགས་ནས་སོ། །རྩོད་པར་བྱེད་ན་ཞེས་བྱ་བ་ནི་འཐབ་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལྷ་ཁང་དུ་སོང་ནས་མུ་སྟེགས་ཅན་དག་དང་རྩོད་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བཞི་པའི་ལྔ་པ་རྫོགས་སྷོ།། ་་་་་་་་་་་གླེང་གཞི་ནི་མཉན་ཡོད་ནའོ། །གང་གི་ཚེ་ལྷ་ཁང་བལྟ་བ་དགག་པ་མཛད་པ་དེའི་ཚེ་རི་མོ་མཁན་གྱི་ཁང་པ་བལྟ་བའི་ཕྱིར་འགྲོ་བ་དང ། གར་མཁན་གྱི་ཁང་པ་བལྟ་བའི་ཕྱིར་འགྲོ་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རི་མོ་མཁན་གྱི་ཁང་པ་འམ། གར་མཁན་གྱི་ཁང་པ་བལྟ་བའི་ཕྱིར་འགྲོ་ན་ལྟུང་བྱེད་དོ། །གང་ཞེས་བྱ་བ་ནི་སྦོམ་དགའ་མོའོ། །རི་མོ་མཁན་གྱི་ཁང་པ་འམ། གར་མཁན་གྱི་ཁང་པ་ཞེས་བྱ་བ་ནི་དགེ་སློང་མ་རྣམས་འཇུག་པར་བྱ་བ་མ་ཡིན་པའི་ཁྱིམ་གང་དག་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རི་མོ་མཁན་གྱི་ཁང་པ་འམ། གར་མཁན་གྱི་ཁང་པ་བལྟ་བའི་ཕྱིར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བཞི་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་བཞི་པ། ་་་་་་་་སྡོམ་ལ། ལོ་ནི་བཅུ་གཉིས་མ་ལོན་དང ། །ལོན་ཡང་བསྒོ་བ་མ་བྱས་དང ། །
9.270b
ཁྱིམ་སོ་བཟུང་བ་ལོ་བཅུ་གཉིས། །དེ་ཡང་དགེ་འདུན་མ་བསྐོས་ནའོ། །གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་གིས་དགེ་སློང་རྣམས་ལ་དྲིས་པ། ཁྱེད་ཅག་ལོ་དུ་ལོན་ན་བསྙེན་པར་རྫོགས་པར་བྱེད། དེ་དག་གིས་འདི་སྐད་ཅེས་སྨྲས་སོ། །ལོ་བཅུ་ལོན་ནའོ། །དེ་ནས་བཅུ་གཉིས་སྡེ་རྣམས་ཀྱིས་དགེ་སློང་རྣམས་ལ་འདི་སྐད་ཅེས་ཁོ་མོ་ཅག་ཀྱང་ལོ་བཅུ་ལོན་ན་བསྙེན་པར་རྫོགས་པར་བྱེད་ལ། ཁྱེད་ཀྱང་ལོ་བཅུ་ལོན་ན་བསྙེན་པར་རྫོགས་པར་བྱེད་ན། འདི་ལ་ཁྱེད་ཅག་དང་ཁོ་མོ་ཅག་ཏུ་ཁྱད་པར་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད་ཅེས་སྨྲ་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་མ་ལོ་བཅུ་གཉིས་ལོན་ནས་བསྙེན་པར་རྫོགས་པར་བྱའོ། །དེ་ནས་སྦོམ་དགའ་མོ་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་པ་ན་དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལོ་བཅུ་གཉིས་མ་ལོན་པར་ཞེས་བྱ་བ་ནི་བསྙེན་པར་རྫོགས་པར་བྱ་བ་ལོ་བཅུ་གཉིས་མ་ལོན་པ་གང་ཡིན་པའོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་འཁོར་དུ་འཇོག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལོ་བཅུ་གཉིས་མ་ལོན་པར་འཁོར་དུ་འཇོག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅཝ་ལྔ་པའི་དང་པོ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ལོ་བཅུ་གཉིས་མ་ལོན་པ་འཁོར་དུ་གཞག་པར་མི་བྱའོ་ཞེས་གསུངས་པ་དེའི་ཚེ་དེ་དག་ཁྱད་པར་མེད་པ་ཁོ
9.271a
ནར་འཁོར་དུ་འཇོག་ཅིང་རྨོངས་པ། མི་གསལ་བ་མི་མཁས་པ་གང་དག་ཡིན་པ་དེ་དག་ཀྱང་འཁོར་དུ་འཇོག་པས་དེ་རྣམས་ཀྱང་མ་དུལ་བ། མ་བྱང་བར་གྱུར་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། འཁོར་འཇོག་པར་འདོད་པ་གང་ཡིན་པ་དེས་དགེ་འདུན་ལས་འཁོར་གཞག་པའི་སྡོམ་པ་གསོལ་བར་བྱའོ། །གསོལ་བ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། གཎ་ཌཱི་བརྡུངས་ཏེ་དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། དགེ་སློང་མ་དེས་རྒན་པའི་མཐར་འདུག་ནས་དགེ་སློང་མའི་དགེ་འདུན་ལ་འདུད་པ་དང་བཅས་པས་ཐལ་མོ་སྦྱར་བ་བྱས་ནས་ཚིག་འདི་སྐད་ཅེས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་དགེ་སློང་མ་མིང་འདི་ཞེས་བགྱི་བ་འཕགས་མའི་དགེ་འདུན་ལས་འཁོར་གཞག་པའི་སྡོམ་པ་གསོལ་ཏེ། བདག་དགེ་སློང་མ་མིང་འདི་ཞེས་བགྱི་བ་འཕགས་མའི་དགེ་འདུན་གྱི་སྤྱན་སྔར་མཆིས་ནས་འཁོར་གཞག་པའི་སྡོམ་པ་གསོལ་ལགས་ན། འཕགས་མའི་དགེ་འདུན་གྱིས་ཐུགས་བརྩེ་བ་ཉེར་བར་བཟུང་སྟེ། བདག་དགེ་སློང་མ་མིང་འདི་ཞེས་བགྱི་བ་ལ་འཁོར་གཞག་པའི་སྡོམ་པ་སྩལ་དུ་གསོལ་ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །གསོལ་བ་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། །དགེ་སློང་མ་མིང་འདི་ཞེས་བགྱི་བ་འདི་འཕགས་མའི་དགེ་འདུན་གྱི་སྤྱན་སྔར་མཆིས་ནས་འཁོར་གཞག་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱི་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འདི་ལྟར་འཕགས་མའི་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བ་ལ་འཁོར་འཇོག་པའི་སྡོམ་པ་སྩོལ་བར་མཛད་དོ། །འདི་ནི
9.271b
གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་མིང་འདི་ཞེས་བགྱི་བ་འདི་འཕགས་མའི་དགེ་འདུན་གྱི་སྤྱན་སྔར་མཆིས་ནས་འཁོར་གཞག་པའི་སྡོམ་པ་གསོལ་ནས། འཕགས་མའི་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བ་ལ་འཁོར་གཞག་པའི་སྡོམ་པ་སྩོལ་བར་མཛད་ན། འཕགས་མའི་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བ་ལ་འཁོར་གཞག་པའི་སྡོམ་པ་སྩོལ་པར་བཟོད་པ་གང་དག་ལགས་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བ་ལ་འཁོར་གཞག་པའི་སྡོམ་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནས་སྦོམ་དགའ་མོ་དགེ་འདུན་གྱིས་མ་གནང་བཞིན་དུ་འཁོར་འཇོག་པར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་ལས་དགེ་སློང་མའི་འཁོར་གཞག་པའི་སྡོམ་པ་མ་གསོལ་བར་འཁོར་འཇོག་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིས་སོ། །འཁོར་འཇོག་པའི་སྡོམ་པ་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །མ་གསོལ་བར་ཞེས་བྱ་བ་ནི་མ་བླངས་པར་རོ། །འཁོར་འཇོག་པར་བྱེད་ན་ཞེས་བྱ་བ་ནི་རབ་ཏུ་དབྱུང་བ་འམ། བསྙེན་པར་རྫོགས་པ་འམ། གནས་སྦྱིན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་གཞག་པའི་སྡོམ་པ་མ་གསོལ་པར་འཁོར་འཇོག་པར་བྱེད་ན་ཐམས
9.272a
ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅཝ་ལྔ་པའི་གཉིས་པ་རྫོགས་སྷོ།། ་་་་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་ཁྱིམ་སོ་བཟུང་བ་ལོ་བཅུ་གཉིས་ལོན་པ་དག་འོངས་པ་དང་རབ་ཏུ་བྱུང་ནས་དེ་དག་ལོ་ཉི་ཤུའི་པར་དུ་བཞག་པ་ལས། དེ་དག་གིས་འདི་སྐད་ཅེས་སྨྲས་སོ། །བདག་ཅག་ཅིའི་སླད་དུ་བསྙེན་པར་རྫོགས་པར་མི་བགྱི། དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ད་དུང་ཁྱོད་ཀྱིས་མ་གོམས་སོ། །དེ་དག་གིས་འདི་སྐད་ཅེས་འཕགས་མ་དག་བདག་ཅག་སྡུམ་པ་ན་མཆིས་པ་ན་སྡུམ་ཐབ་ཀྱི་སེམས་གཟུང་བ་དང ། ཁྱིམ་གྱི་ནང་མིའི་སེམས་གཟུང་བ་དང ། དེ་བཞིན་དུ་ཁྱིམ་གྱི་བགྱི་བ་མང་པོ་དག་བགྱིས་ན་ད་བདག་ཅག་གིས་དགེ་སློང་མའི་དགེ་འདུན་གྱི་ཐུགས་མཉེས་པར་མི་འགྱུར་རམ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ་ཁྱིམ་སོ་བཟུང་བ་ལོ་བཅུ་གཉིས་ལོན་པ་ཡིན་ན་དེ་བསྙེན་པར་རྫོགས་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཁྱིམ་སོ་བཟུང་བ་ལོ་བཅུ་གཉིས་ལོན་པ་ཡིན་ན་བསྙེན་པར་རྫོགས་པར་བྱའོ་ཞེས་བཀའ་སྩལ་པ་དེའི་ཚེ་སྦོམ་དགའ་མོས་ལོ་བཅུ་གཉིས་མ་ལོན་པ་དག་བསྙེན་པར་རྫོགས་པར་བྱེད་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ཁྱིམ་སོ་བཟུང་བ་ལོ་བཅུ་གཉིས་སུ་མ་ལོན་པ་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །ཁྱིམ་སོ་བཟུང་བ་ཞེས་བྱ་བ་ནི་ཁྱིམ་གྱི་ཆོས་ལ་ལོ་བཅུ་གཉིས་སུ་གནས་པའོ། །ལོ་བཅུ་གཉིས་མ་ལོན་པ་ཞེས་བྱ་བ་ནི་ལོ་བཅུ་གཅིག་ལོན་པའོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་དགེ་སློང
9.272b
མའི་དངོས་པོར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མས་ཇི་ཙམ་ཅུང་ཟད་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ལྟུང་བྱེད་བཅཝ་ལྔ་པའི་གསུམ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་སྐྱེས་བུ་གཏི་མུག་ཅན་འཕགས་སྐྱེས་པོ་མི་དགེ་བའི་བཤེས་གཉེན་སྡུག་བསྔལ་གྱི་མ་མོ་ལ་བརྟེན་ནས་ཤཱཀྱ་རྣམས་ཁ་བཏག་པ་དེའི་ཚེ་ཤཱཀྱ་མོ་རབ་ཏུ་མང་པོ་དག་ཁྱིམ་ཐབ་དང་བུའི་མྱ་ངན་གྱིས་གདུངས་ནས་རབ་ཏུ་བྱུང་ངོ ། །གང་གི་ཚེ་ཁྱིམ་ཐབ་དང་བུའི་མྱ་ངན་གྱིས་གདུངས་ནས་རབ་ཏུ་བྱུང་བ་དེའི་ཚེ་དེ་དག་ཉོན་མོངས་པས་མ་གདུངས་སོ། །གང་གི་ཚེ་དེ་དག་མྱ་ངན་སངས་པ་དེའི་ཚེ་དེ་དག་ཉོན་མོངས་པས་གདུངས་པར་གྱུར་ཏོ། །དེ་ནས་ཤཱཀྱ་མོ་རྣམས་ཀྱིས་སྐབས་དེ་སྦོམ་དགའ་མོ་ལ་སྨྲས་པ་དང ། སྦོམ་དགའ་མོས་འདི་སྐད་ཅེས་ཁོ་མོ་ནི་ད་རྒས་པའི་གནས་སྐབས་ལ་བབ་པས་ཅི་བྱར་ཡོད། ཁྱེད་ཅག་ནི་གཟུགས་བཟང་བ། བལྟ་ན་སྡུག་པ། མཛེས་པ་ཡིན་གྱིས་ད་སོ་སོར་ཤེས་པར་གྱིས་ལ་ནོར་ཅན་ནམ། ཚོང་དཔོན་ནམ། དེད་དཔོན་དག་དང་ལྷན་ཅིག་རྩེ་བར་གྱིས་ཤིག་།དགའ་བར་གྱིས་ཤིག་།དགའ་མགུར་སྤྱོད་པར་གྱིས་ཤིག་ཅེས་སྨྲས་སོ། །ཇི་ཙམ་ན་གཽ་ཏ་མི་སྐེམ་མོའི་དྲུང་དུ་སོང་ནས། དེ་དག་གིས་གཽ་ཏ་མི་སྐེམ་མོ་ལ་སྦོམ་དགའ་མོས་བསྟན་པ་དག་རྒྱས་པར་སྨྲས་པ་དང ། དེས་འདི་སྐད་ཅེས་སྨྲས་སོ། །ཕུ་ནུ་མོ་དག་རེ་ཤིག་འཇིག་རྟེན་ཕ་རོལ་གྱི་སྡུག་བསྔལ་ལྟ་ཞོག་གི། ཁོ་མོས་འཇིག་རྟེན་འདིར་སྡུག་བསྔལ་ཉམས་སུ་མྱོང་བ་གང་ཡིན་པ་དེ་ཉོན་ཅིག་།ཁྱིམ་ཐབ་ཤི་བ་དང ། བུ་དང་བྲལ་བ་དང ། ཕ་དང་མ་ཐོག་གིས་བསད་པ་དང ། བུའི་ཤ་ཟོས་པ་དང ། དུར་དུ་བཅུག་པ་དང ། སེམས་འཁྲུགས་པ་དང ། སྒྲེན་མོར་འཕྱན་པ་སྟེ། འདི་དག་དང་གཞན་ཡང་འཇིག་རྟེན་འདི་ཁོ་ན་ལ་སྡུག་བསྔལ་ཁོ་ན་ཉམས་སུ་མྱོང་ན་འཇིག་རྟེན་ཕ་རོལ་ལྟ་སྨོས་ཀྱང་ཅི་དགོས། ཕུ་ནུ་མོ་དག་དེ་ལྟ་བུ་མ་བྱེད་ཅིག་ཅེས་གཽ་ཏ་མི
9.273a
སྐེམ་མོས་ཤཱཀྱའི་བུ་མོ་རབ་ཏུ་མང་པོ་དེ་དག་མི་དགེ་བ་ལས་སེམས་བཟློག་སྟེ་དགེ་བ་ལ་སེམས་བཀོད་པ་དང ། དེ་དག་གིས་འདི་སྐད་ཅེས་བདག་ཅག་སྦོམ་དགའ་མོས་ཕྱིར་མི་གཙང་བའི་དོང་དུ་བཅུག་གོ་ཞེས་སྨྲས་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྦྱིན་ཅིག་།དེ་དག་ལོ་གཉིས་སུ་བསླབས་པ་དང་མངོན་པར་དགའ་བར་འགྱུར་རོ། །གང་གི་ཚེ་བཅོམ་ལྡན་འདས་ཀྱིས་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྦྱིན་ཅིག་ཅེས་གསུངས་པ་ན་དེ་དག་གིས་ཇི་ལྟར་བྱིན་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ལ་གཎ་ཌཱི་བརྡུངས་ཏེ་ཞེས་བྱ་བ་ནས། དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་དེས་རྒན་པའི་མཐར་འདུག་སྟེ་འདུད་པ་དང་བཅས་པས་ཐལ་མོ་སྦྱར་བ་བྱས་ཏེ། ཚིག་འདི་སྐད་ཅེས་འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་གསོལ་ལགས་ན་འཕགས་མའི་དགེ་འདུན་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་དུ་གསོལ་ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་ཐོས་པའི་ཉེན་ཀོར་ནས་བཀར་ཏེ། མཐོང་བའི་ཉེན་ཀོར་དུ
9.273b
འདུག་ཏུ་བཅུག་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ་འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འདི་ལྟར་འཕགས་མའི་དགེ་འདུན་གྱིས་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་གསོལ་ཏེ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་འདི་ལ་མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྩོལ་བར་མཛད་ན། འཕགས་མའི་དགེ་འདུན་ལས་གང་དག་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང་རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་རྗེས་སུ་སྩལ་ལགས་ཏེ། འདི་ལྟར
9.274a
ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་གི་ཚེ་དེ་དག་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་པ་དེའི་ཚེ་དེ་དག་བསླབས་པས་མངོན་པར་དགའ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེའི་འོག་ཏུ་ཚངས་པར་སྤྱད་པ་ཉེ་བར་གནས་པའི་སྡོམ་པ་སྦྱིན་ཅིག་།བཅོམ་ལྡན་འདས་ཀྱིས་ཚངས་པར་སྤྱད་པ་ཉེ་བར་གནས་པའི་སྡོམ་པ་བྱིན་ཅིག་ཅེས་གསུངས་ན། དེ་དག་གིས་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམ་པ་བྱ་སྟེ་ཞེས་བྱ་བ་ནས་དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་སྒོ་ལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་དེས་རྒན་པའི་མཐར་འདུག་སྟེ་འདུད་པ་དང་བཅས་པས་དགེ་སློང་མའི་དགེ་འདུན་ལ་ཐལ་མོ་སྦྱར་བ་བྱས་ཏེ། ཚིག་འདི་སྐད་ཅེས་འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བས་མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ཚངས་པར་སྤྱོད་པ་ཉེ་བར་གནས་པའི་སྡོམ་པ་གསོལ་ན། འཕགས་མའི་དགེ་འདུན་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་དུ་གསོལ་ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ཚངས་པར་སྤྱད་པ་ཉེ་བར་གནས་པའི་སྡོམ་པ་གསོལ་ན། གལ
9.274b
ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ཚངས་པར་སྤྱད་པར་ཉེ་བར་གནས་པའི་སྡོམ་པ་གསོལ་ཏེ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་འདི་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་བར་མཛད་ན། འཕགས་མའི་དགེ་འདུན་ལས་གང་དག་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་བར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ་མཁན་མོ་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་ལགས་ཏེ། འདི་ལྟར་ཅང་མ་གསུང་བས་དེ་དེ་བཞིན་དུ་འཛིན་ཏོ། །དེ་ལྟར་དགེ་སློང་མའི་དགེ་འདུན་གྱིས་སུ་ཡང་རུང་བ་འགའ་ཞིག་ལ་ཚངས་པར་སྤྱད་པ་ཉེ་བར་གནས་པའི་སྡོམ་པ་ཕོག་ན་དགེ་སློང་མ་དེས་ཅི་བདེར་བསྙེན་པར་རྫོགས་པར་བྱ་སྟེ། འདི་ལ་འགྱོད་པར་མི་བྱའོ། །དེ་ནས་ཡང་སྦོམ་དགའ་མོས་ཁྱིམ་སོ་བཟུང་བ་ལོ་བཅུ་གཉིས་ལོན་པ་དག་མ་གསོལ་བར་ཚངས་པར་སྤྱད་པ་ཉེ་བར་གནས་པའི་སྡོམ་པ་དང ། བསྙེན་པར་རྫོགས་པར་བྱེད་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས
9.275a
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་སོ་བཟུང་བ་ལོ་བཅུ་གཉིས་ལོན་པ་མ་གསོལ་བར་ཚངས་པར་སྤྱད་པ་ཉེ་བར་གནས་པའི་སྡོམ་པ་དང ། བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་སོ་བཟུང་བ་ལོ་བཅུ་གཉིས་ལོན་པ་ཞེས་བྱ་བ་ནི་བཅུ་གཉིས་སུ་ཁྱིམ་ན་གནས་པར་གྱུར་པ་གང་ཡིན་པའོ། །ཚངས་པར་སྤྱད་པ་ཉེ་བར་གནས་པའི་སྡོམ་པ་ཞེས་བྱ་བ་ནི་གསོལ་བ་དང ། གཉིས་ཀྱི་ལས་ཀྱིས་སོ། །མ་གསོལ་བར་ཞེས་བྱ་བ་ནི་མ་བླངས་པར་རོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་སོ་བཟུང་བ་ལོ་བཅུ་གཉིས་ལོན་པ་མ་གསོལ་བར་ཚངས་པར་སྤྱོད་པ་ཉེ་བར་གནས་པའི་སྡོམ་པ་དང ། བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅཝ་ལྔ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།། སྡོམ་ལ། འདོད་ཆེན་སྡོམ་པ་བྱིན་པ་དང ། །སྦྲུམ་པ་དང་ནི་བསླབ་པ་དང ། །བཞག་ནས་ཕན་མི་འདོགས་པ་དང ། །བཀར་བར་བྱ་བ་ཐ་མ་ཡིན། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་འདོད་ཆེན་གྱི་འཁོར་བཞག་ནས་མི་འཛིན། མི་སྟོན་གདམས་ངག་མི་སྟེར་བས་དེ་དག་མ་དུལ་བ་དང ། མ་ཞི་བ་དང ། མ་སྦས་པ་དང ། མ་བསྲུངས་པར་གྱུར་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འདོད་ཆེན་གྱི་འཁོར་བཞག་ནས་རྗེས་སུ་སྐྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །འདོད་ཆེན་ཞེས་བྱ་བ་ནི་ཆོག་མི་ཤེས་པའོ། །འཁོར་ཞེས་བྱ་བ་ནི་ལྷན་ཅིག་གནས་པ་དང ། ཉེ་གནས་སོ། །བཞག་ནས་ཞེས་བྱ་བ་ནི་བཟུང
9.275b
ནས་སོ། །རྗེས་སུ་སྐྱོང་བར་མི་བྱེད་ན་ཞེས་བྱ་བ་ནི་རྗེས་སུ་འཛིན་པར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདོད་ཆེན་གྱི་འཁོར་འཇོག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་དང་པོ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །རང་བཞིན་དུ་གནས་པའི་དགེ་སློང་མ་གང་ཡིན་པ་དེ་དག་འདོད་ཆེན་གྱི་འཁོར་འཇོག་པར་སྤྲོ་བའི་སྐབས་དེ་དགེ་སློང་མ་དེ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དེས་དགེ་སློང་མའི་དགེ་འདུན་ལ་འདོད་ཆེན་གྱི་འཁོར་འཇོག་པའི་སྡོམ་པ་གསོལ་བར་བྱའོ་ཞེས་བཅོམ་ལྡན་འདས་ཀྱིས་གསུངས་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ཏེ་ཞེས་བྱ་བ་ནས། དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། དགེ་སློང་མ་དེས་རྒན་རིམས་ཀྱི་མཐར་འདུད་པ་དང་བཅས་པར་བྱས་ཏེ། དགེ་སློང་མའི་དགེ་འདུན་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚིག་འདི་སྐད་ཅེས་འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་དགེ་སློང་མ་མིང་འདི་ཞེས་བགྱི་བ་འཕགས་མའི་དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་གསོལ་ན། འཕགས་མའི་དགེ་འདུན་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་མིང་འདི་ཞེས་བགྱི་བ་ལ་འདོད་ཆེན་གྱི་འཁོར་འཇོག་པའི་སྡོམ་པ་སྩལ་དུ་གསོལ། དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་ཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི་འཕགས་མའི་དགེ་འདུན
9.276a
ལས་འདོད་ཆེན་གྱི་འཁོར་འཇོག་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། ་འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ་འདོད་ཆེན་གྱི་འཁོར་འཇོག་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི་འཕགས་མའི་དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་གསོལ་ཏེ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ་འདོད་ཆེན་གྱི་འཁོར་འཇོག་པའི་སྡོམ་པ་སྩོལ་པར་མཛད་ན། གང་དག་མིང་འདི་ཞེས་བགྱི་བ་ལ་འདོད་ཆེན་གྱི་འཁོར་འཇོག་པའི་སྡོམ་པ་སྩལ་པར་བཟོད་པ་དེ་དག་ནི་ཅང་མ་གསུང་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ་འདོད་ཆེན་གྱི་འཁོར་འཇོག་པའི་སྡོམ་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ལྟར་དགེ་སློང་མ་གང་སུ་ཡང་རུང་བ་འདོད་ཆེན་གྱི་འཁོར་འཇོག་པའི་སྡོམ་པ་ཕོག་པར་གྱུར་པ་དེས་ཅི་བདེ་བ་ཁོ་ནར་འདོད་ཆེན་གྱི་འཁོར་གཞག་པར་བྱ་སྟེ། འདི་ལ་འགྱོད་པར་མི་བྱའོ། །དེ་ནས་སྦོམ་དགའ་མོས་དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་མ་གསོལ་བར་འདོད་ཆེན་གྱི་འཁོར་བཞག་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་མ་གསོལ་བར་འདོད་ཆེན་གྱི་འཁོར་འཇོག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །
9.276b
འདོད་ཆེན་གྱི་སྡོམ་པ་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །དགེ་འདུན་ལས་འདོད་ཆེན་གྱི་འཁོར་འཇོག་པ་མ་གསོལ་བར་རབ་ཏུ་འབྱིན་པ་འམ། བསྙེན་པར་རྫོགས་པ་འམ། གནས་སྦྱིན་པ་ཅི་འདོད་པར་བྱེད་ན་སྟེ། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདོད་ཆེན་གྱི་སྡོམ་པ་མ་གསོལ་བར་འདོད་ཆེན་གྱི་འཁོར་འཇོག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བུད་མེད་སྦྲུམ་མ་ཞིག་རབ་ཏུ་ཕྱུང་བ་དེ་བྲམ་ཟེ་དང ། ཁྱིམ་བདག་གི་ཆུང་མ་རྣམས་ཀྱིས་མཐོང་ནས་དགེ་སློང་མ་འདི་དག་ནི་འདྲེན་མ་འདྲེན་མར་ཚངས་པར་སྤྱད་པ་ལ་སྤྱོད་དོ་ཞེས་ཁ་ཟེར་བའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་སྦྲུམ་མ་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྦྲུམ་མ་ཞེས་བྱ་བ་ནི་སེམས་ཅན་དང་ལྡན་པའོ། །བུད་མེད་ཅེས་བྱ་བ་ནི་བུད་མེད་དོ། །རབ་ཏུ་འབྱིན་ན་ཞེས་བྱ་བ་ནི་ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་སྦྲུམ་མ་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་གསུམ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་རབ་ཏུ་ཕྱུང་ནས་སློབ་པར་མི་བྱེད་པ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་ཀྱིས་འཁོར་དུ་བཞག་ནས་ཅིའི་ཕྱིར་མི་བསླབ། དེས་སྨྲས་པ། འདི་ཉིད་དུ་སློབ་གྲང ། གལ་ཏེ་མི་སློབ་ན་འདི་ཉིད་དུ་སློབ་གྲང་ཞེས་ཟེར་བའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས
9.277a
བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རབ་ཏུ་ཕྱུང་ནས་མི་སློབ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རབ་ཏུ་ཕྱུང་ནས་ཞེས་བྱ་བ་ནི་ཆོས་འདུལ་བ་འདི་ལའོ། །མི་སློབ་ན་ཞེས་བྱ་བ་ནི་དགེ་སློང་མའི་བསླབ་པ་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རབ་ཏུ་ཕྱུང་ནས་མི་སློབ་ན་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་བཞི་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་རབ་ཏུ་ཕྱུང་ནས་གདམས་ངག་མི་འབོགས། མི་སྟོན་ཕན་མི་འདོགས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། ་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རབ་ཏུ་ཕྱུང་ནས་ཕན་མི་འདོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རབ་ཏུ་ཕྱུང་ནས་ཞེས་བྱ་བ་ནི་ཆོས་འདུལ་བ་འདི་ལའོ། །ཕན་མི་འདོགས་ན་ཞེས་བྱ་བ་ནི་ལྷུང་བཟེད་དང ། ཆོས་གོས་དང ། ལྷུང་བཟེད་ཀྱི་སྣོད་དང ། རྒྱ་ཆང་དང ། སྐ་རགས་དང ། ལུང་དབོག་པ་དང ། ་ཀློག་པ་དང ། ཁ་ཏོན་དང ། རྣལ་འབྱོར་དང ། ཡིད་ལ་བྱེད་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རབ་ཏུ་བྱུང་ནས་འཁོར་ལ་ཕན་མི་འདོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་ལྔ་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ཁྱིམ་ཐབ་བྱེས་སུ་སོང་བའི་ཆུང་མ་ཞིག་རབ་ཏུ་ཕྱུང་བ་ལས་དུས་གཞན་ཞིག་ན་དེའི་ཁྱིམ་ཐབ་འོངས་པ་དང་བུད་མེད་དེས་ཀྱང་བདག་གི་ཁྱིམ་ཐབ་འོངས་སོ་ཞེས་ཐོས་སོ། །ཐོས་ནས་ཀྱང་བུད་མེད་དེ་སྦོམ་དགའ་མོ་གང་ན་བ་དེར་སོང་སྟེ་ཕྱིན་ནས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ
9.277b
བདག་གི་སྡུམ་ཐབ་མཆིས་ཀྱིས་རེ་ཤིག་བདག་ཕྱོགས་གཞན་ཞིག་ཏུ་བཀར་དུ་གསོལ། དེས་མ་བཀར་བ་དང ། དེ་ནས་ཁྱིམ་ཐབ་དེ་འོངས་ནས་བཟུང་སྟེ་འདི་སྐད་ཅེས་སྨྲས་སོ། །འདི་སུས་གནང་སྟེ་རབ་ཏུ་ཕྱུང་དེས་དེ་ཉིད་དུ་འཕགས་མ་ཁྱོད་ཀྱིས་བདག་བཀར་བར་གྱུར་ན་སྡུམ་ཐབ་ཀྱིས་བདག་ཟིན་པར་མི་འགྱུར་བ་ཞིག་ཅེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རབ་ཏུ་ཕྱུང་ནས་མ་བཀར་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རབ་ཏུ་བྱུང་ནས་ཤེས་བྱ་བ་ནི་ཆོས་འདུལ་བ་འདི་ལའོ། །མ་བཀར་ན་ཞེས་བྱ་བ་ནི་གནས་གཞན་དུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་དུ་བཞག་སྟེ་མ་བཀར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།། སྡོམ་ལ། ལོ་ནི་ཉི་ཤུར་མ་ལོན་དང ། །ལོན་ཡང་གསོལ་བ་མ་བྱས་དང ། །གཏུམ་མོ་མྱ་ངན་གྱིས་གདུངས་དང ། །ཆོས་དྲུག་དག་ལ་མ་བསླབས་པའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ཀྱིས་གཞོན་ནུ་མ་ལོ་ཉི་ཤུ་མ་ལོན་པ་དག་བསྙེན་པར་རྫོགས་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ་གཞོན་ནུ་མ་ལོ་ཉི་ཤུ་མ་ལོན་པ་བསྙེན་པར་རྫོགས་པར་མི་བྱའོ། །དེ་ནས་སྦོམ་དགའ་མོས་ལོ་ཉི་ཤུ་མ་ལོན་པ་དག་བསྙེན་པར་རྫོགས་པར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཞོན་ནུ་མ་ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས
9.278a
བྱ་བ་ནི་སྦོམ་དགའ་མོའོ། །ལོ་ཉི་ཤུ་མ་ལོན་པར་ཞེས་བྱ་བར་ནི་གང་གི་ལོ་ཉི་ཤུར་མ་ཚང་བའོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཞོན་ནུ་མ་ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་དང་པོ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་དེ་དག་གིས་དགེ་སློང་དེ་དག་ལ་འདི་སྐད་ཅེས་ཁྱེད་ཀྱང་ལོ་ཉི་ཤུ་ལོན་ནས་བསྙེན་པར་རྫོགས་པར་མཛད་ན། བདག་ཅག་ཀྱང་ལོ་ཉི་ཤུ་ལོན་ནས་བསྙེན་པར་རྫོགས་པར་བགྱིད་པ་མ་ལགས་སམ། འདི་ལ་ཁྱེད་དང་བདག་ཅག་ཁྱད་པར་ནི་ཅི་མཆིས། བསམ་པ་ནི་ཅི་མཆིས། ཐ་དད་དུ་བགྱི་བ་ནི་ཅི་མཆིས་ཤེས་སྨྲ་བའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། གཞོན་ནུ་མ་ལོ་ཉི་ཤུ་ལོན་ན་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག་།གང་གི་ཚེ་བཅོམ་ལྡན་འདས་ཀྱིས་གཞོན་ནུ་མ་ལོ་ཉི་ཤུ་ལོན་ན་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག་ཅེས་གསུངས་པ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཐོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང ། བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད་ཅེས་བྱ་བ་ནས། ཅང་མི་གསུང་ངོ་ཞེས་བྱ་བའི་བར་རོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པའི་རྗེས་ཆད་པར་རིག་ནས་སྟན་ལས་ལངས་ཏེ། བླ་གོས་ཕྲག་པ
9.278b
གཅིག་ཏུ་བགོས་ནས་བཅོམ་ལྡན་འདས་གང་ན་བ་དེར་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་དམ་པ་གནང་བའི་རིགས་སོ། །བདེ་བར་གཤེགས་པ་བདག་ལ་དམ་པ་གནང་བའི་རིགས་སོ། །གཽ་ཏ་མཱི་ཁྱོད་དམ་པ་ཅི་གསོལ། དེས་འདི་སྐད་ཅེས་གསོལ་ཏོ། །བཙུན་པ་ཁྱིམ་སོ་བཟུང་བ་ལོ་བཅུ་གཉིས་ལོན་པ་འདི་དག་དང ། གཞོན་ནུ་མ་ལོ་ཉི་ཤུ་ལོན་པ་འདི་དག་གིས་རབ་ཏུ་བྱུང་བ་ནི་ལེགས་པར་རྙེད་ལགས་ན། ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་ལགས་ན་ཧ་ཅང་ཐོགས་པར་གྱུར་ན། གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་ཁྱིམ་སོ་བཟུང་བ་ལོ་བཅུ་ལོན་པ་དང ། གཞོན་ནུ་མ་ལོ་བཅཝ་བརྒྱད་ལོན་པ་ན་དེ་དག་ལ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་བར་གསོལ། དེ་ལྟར་མཛད་ན་འདི་གཉི་གས་ཀྱང་ཚངས་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ཁྱིམ་སོ་བཟུང་བ་ལོ་བཅུ་ལོན་པ་དང ། གཞོན་ནུ་མ་ལོ་བཅཝ་བརྒྱད་ལོན་པ་ལ་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག་།དེ་ལྟ་མོད་ཀྱི་ཁྱིམ་སོ་བཟུང་བ་ལོ་བཅུ་ལོན་པ་དང ། གཞོན་ནུ་མ་ལོ་བཅཝ་བརྒྱད་ལོན་པས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་སྤྱད་ཟིན་པ་དང་དེའི་འོག་ཏུ་ཚངས་པར་སྤྱད་པ་ཉེ་བར་གནས་པའི་སྡོམ་པ་སྦྱིན་པར་བྱའོ། །གང་གི་ཚེ་བཅོམ་ལྡན་འདས་ཀྱིས་གཞོན་ནུ་མ་ལོ་ཉི་ཤུ་ལོན་པ་ལ་ཚངས་པར་སྤྱད་པ་ཉེ་བར་གནས་པའི་སྡོམ་པ་བྱིན་ཅིག་ཅེས་བཀའ་སྩལ་པ་ན་དེ་དག་གིས་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ཏེ་ཞེས་བྱ་བ་ནས། གཞོན་ནུ་མ་ལོ་ཉི་ཤུ་ལོན་པ་དེས་རྒན་པའི་མཐའ་ནས་འདུད་པ་དང་བཅས་པར་བྱས་ཏེ།
9.279a
དགེ་སློང་མའི་དགེ་འདུན་ལ་ཐལ་མོ་སྦྱར་བ་བཏུད་ནས་ཚིག་འདི་སྐད་ཅེས་འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས་དགེ་འདུན་ལས་ཚངས་པར་སྤྱད་པ་ཉེ་བར་གནས་པའི་སྡོམ་པ་གསོལ་ན། འཕགས་མའི་དགེ་འདུན་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་དུ་གསོལ་ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བ་འདིས་དགེ་འདུན་ལས་ཚངས་པར་སྤྱད་པ་ཉེ་བར་གནས་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འཕགས་མའི་དགེ་འདུན་གྱིས་གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩོལ་པར་མཛད་དོ། །འདི་ནི་གསོལ་བའོ། །དེ་བཞིན་དུ་ལས་ཀྱང་རྒྱས་པར་བརྗོད་པར་བྱའོ། །དེ་ནས་སྦོམ་དགའ་མོས་ཚངས་པར་སྤྱད་པ་ཉེ་བར་གནས་པའི་སྡོམ་པ་མ་གསོལ་བར་བསྙེན་པར་རྫོགས་པར་བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཞོན་ནུ་མ་ལོ་ཉི་ཤུ་ལོན་པ་ཚངས་པར་སྤྱད་པ་ཉེ་བར་གནས
9.279b
པའི་སྡོམ་པ་མ་གསོལ་བར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཞོན་ནུ་མ་ཞེས་བྱ་བ་ནི་གཞོན་ནུ་མ་རབ་ཏུ་བྱུང་བའོ། །ལོ་ཉི་ཤུ་ལོན་པ་ཞེས་བྱ་བ་ནི་གང་གིས་ལོ་ཉི་ཤུར་ཚང་བར་གྱུར་པའོ། །ཚངས་པར་སྤྱད་པ་ཉེ་བར་གནས་པའི་སྡོམ་པ་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །མ་གསོལ་བར་ཞེས་བྱ་བ་ནི་དགེ་འདུན་ལས་སོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཞོན་ནུ་མ་ལོ་ཉི་ཤུ་ལོན་པ་ཚངས་པར་སྤྱད་པ་ཉེ་བར་གནས་པའི་སྡོམ་པ་མ་གསོལ་བར་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ནས་སྤྱོད་ཡུལ་དུ་ཞུགས་པ་ན་སྦོམ་དགའ་མོས་ལམ་པོ་ཆེ་ཞིག་ན་བུད་མེད་གཅིག་བུད་མེད་དག་གཅིག་དང་ལྷན་ཅིག་ཐབ་མོ་བྱུང་བ་མཐོང་ཞིང ། སྦོམ་དགའ་མོས་བུད་མེད་དེ་ཁྲོས་པས་སྐྲ་འགྲེང་བར་གྱུར་པ་མཐོང་ངོ ། །དེ་ནས་སྦོམ་དགའ་མོས་འདི་སྙམ་དུ་བསམས་ཏེ། གང་གི་ཚེ་བདག་ཐབ་མོ་འགྱེད་པའི་གྲོགས་སུ་འགྱུར་བའི་གྲོགས་མོ་ཞིག་བདག་གིས་རྙེད་དོ་སྙམ་དུ་བསམས་ནས། སྦོམ་དགའ་མོས་བུད་མེད་དེ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་ཅིའི་ཕྱིར་རབ་ཏུ་མི་འབྱུང ། དེས་འདི་སྐད་ཅེས་སྨྲས་སོ། །བདག་ནི་ཤིན་དུ་གཏུམ་མོ་ལགས་ན་སུ་ཞིག་གིས་བདག་རབ་ཏུ་འབྱིན་པར་འགྱུར། དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་ཁྱོད་རབ་ཏུ་དབྱུང་ངོ་ཞེས་དེས་དེ་རབ་ཏུ་ཕྱུང་བསྙེན་པར་རྫོགས་པར་བྱས་སོ། །དེ་ནས་སྦོམ་དགའ་མོ་དུས་གཞན་ཞིག་ན་དགེ་སློང་མ་རྣམས་དང་ལྷན་ཅིག་ཐབ་མོ་བྱུང་བ་ནི་དེའི་གྲོགས་མོ་དེ་ཡང
9.280a
སེམས་ལས་བསྟུངས་ཏེ་ཅང་མི་སྨྲའོ། །དེ་ནས་སྦོམ་དགའ་མོས་དགེ་སློང་མ་དེ་ལ་འདི་སྐད་ཅེས་སྨྲས་སོ། །ཁོ་མོས་ཁྱོད་དོན་འདིའི་ཕྱིར་རབ་ཏུ་ཕྱུང་བསྙེན་པར་རྫོགས་པར་བྱས་ན། ད་ལྟར་ཁྱོད་བསམ་གཏན་བཞི་པ་ལ་སྙོམས་པར་ཞུགས་པ་བཞིན་དུ་འདུག་གམ། ཁྱོད་ཁོ་མོ་ཐབ་མོ་བྱུང་བའི་གྲོགས་གྱིས་ཤིག་།དེས་འདི་སྐད་ཅེས་སྨྲས་སོ། །བདག་གིས་ཁྱིམ་པ་མོ་དེ་དག་གི་ཁ་ན་མ་ཐོ་བ་ནི་ཤེས་ཀྱི། བདག་གིས་དགེ་སློང་མ་འདི་དག་གི་ཁ་ན་མ་ཐོ་བ་ནི་མི་ཤེས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་ཁྱོད་ལ་དེ་དག་གི་མཚང་བསྟན་གྱིས་རེ་ཤིག་སྐྱེ་དགུའི་བདག་མོ་ཆེན་མོ་འདི་ནི་རང་ཞུགས་ཡིན་ནོ། །ུཏྤ་ལའི་མདོག་འདི་ནི་གྲོང་ཁྱེར་ཆེན་པོ་དྲུག་དག་ཏུ་སྨད་འཚོང་བྱས་པ་ཡིན་ནོ། །གཽ་ཏ་མཱི་སྐེམ་མོ་འདི་ནི་བུའི་ཤ་ཟོས་པ་དང ། དུར་དུ་བཅུག་པ་སེམས་འཁྲུགས་པ་ཡིན་ནོ། །དེ་ནས་དུས་གཞན་ཞིག་ན་དགེ་སློང་མ་རྣམས་དང་ཐབ་མོ་བྱུང་བ་ན་དགེ་སློང་མ་ཤིན་ཏུ་གཏུམ་མོ་དེས་དགེ་སློང་མ་རྣམས་ལ་ཁ་ན་མ་ཐོ་བ་རབ་ཏུ་བསྒྲགས་པས་སྤྱོ་བར་བརྩམས་སོ། །དེ་ནས་སྐྱེ་དགུའི་བདག་མོ་ཆེན་མོས་དགེ་སློང་མ་ཤིན་ཏུ་གཏུམ་མོ་དེ་མཐོང་ནས་འདི་སྐད་ཅེས་སྨྲས་སོ། །ཤིན་ཏུ་གཏུམ་མོ་འདི་སུས་རབ་ཏུ་ཕྱུང ། དེ་དག་གིས་འདི་སྐད་ཅེས་སྦོམ་དགའ་མོ་ལགས་སོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་གཏུམ་མོ་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་གིས་སམ། གཞན་གྱིས་སྨྲས་པར་གྱུར་པའོ། །བུད་མེད་གཏུམ་མོ་ཞེས་བྱ་བ་ནི་ཁྲོ་བ་ཐབ་ཁྲོལ་ཅན་ནོ། །རབ་ཏུ་འབྱིན་ན་ཞེས་བྱ་བ་ནི་ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན།
9.280b
དགེ་སློང་མས་ཇི་ཙམ་ཅུང་ཟད་བུད་མེད་གཏུམ་མོ་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་གསུམ་པ་རྫོགས་སྷོ།། ་་་་་་་་་་་དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་ལྔ་པ། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ཏེ་སྤྱོད་ཡུལ་དུ་ཞུགས་པ་དང་ཞེས་བྱ་བ་ནས། སྦོམ་དགའ་མོས་བུད་མེད་མྱ་ངན་གྱིས་གདུངས་པ་ཞིག་རབ་ཏུ་ཕྱུང་ངོ་ཞེས་བྱ་བའི་བར་རོ། །དེ་ཐོ་རངས་སྔར་ལངས་ཏེ་ངུ་ཞིང་འདི་སྐད་ཅེས་ཀྱི་ཧུད་བུ། ཀྱི་ཧུད་བུ་མོ། རེ་ཤིག་རྨི་ལམ་ཙམ་དུ་ཡང་སྟོན་ཅིག་ཅེས་སྨྲ་ཞིང་སྨྲེ་སྔགས་འདོན་ལ་བྲང་རྡུང་ཞིང་ཆོ་ངེས་འདེབས་སོ། །དེ་ནས་སྐྱེ་དགུའི་བདག་མོ་ཆེན་མོས་སྒྲ་དེ་ཐོས་ནས་འདི་སྐད་ཅེས་སྨྲས་སོ། །མྱ་ངན་གྱིས་ནོན་པ་ཕ་བི་སུས་རབ་ཏུ་ཕྱུང ། དེ་དག་གིས་འདི་སྐད་ཅེས་སྦོམ་དགའ་མོས་སོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་མྱ་ངན་གྱིས་གདུངས་པ་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །མྱ་ངན་གྱིས་གདུངས་པ་ཞེས་བྱ་བ་ནི་སྡུག་པ་ཉེ་དུ་དང་རང་གི་སྐྱེ་བོ་དང་བྲལ་བའོ། །རབ་ཏུ་འབྱིན་ན་ཞེས་བྱ་བ་ནི་ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཤེས་བཞིན་དུ་བུད་མེད་མྱ་ངན་གྱིས་གདུངས་པ་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་བཞི་པ་རྫོགས་སྷོ།། ་་་་་་་་་་་་།།
9.281a
གླེང་གཞི་ནི་མཉན་ཡོད་ནའོ། །གང་གི་ཚེ་དགེ་སློང་མ་རྣམས་ཀྱིས་དེ་དག་དེ་བཞིན་དུ་རབ་ཏུ་ཕྱུང་བར་གྱུར་པ་དེའི་ཚེ། དེ་དག་བདག་ཅག་གིས་ལྷན་ཅིག་གནས་པ་དང ། ཉེ་གནས་དག་ཇི་ཙམ་ན་ཇི་ལྟར་བསྙེན་པར་རྫོགས་པར་བྱ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་སོ་བཟུང་བ་ལོ་བཅུ་ལོན་པ་དང ། གཞོན་ནུ་མ་ལོ་བཅཝ་བརྒྱད་ལོན་པ་ལ་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག་།དེ་དག་གིས་ཆོས་དྲུག་པོ་གང་དག་ཡིན་པ་དང ། ་རྗེས་སུ་འཐུན་པའི་ཆོས་དྲུག་པོ་གང་དག་ཡིན་པ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གཅིག་པུ་ལམ་དུ་འགྲོ་མི་བྱ། །ཆུ་བོའི་ཕ་རོལ་རྒལ་མི་བྱ། །སྐྱེས་པ་ལ་ནི་རེག་མི་བྱ། །སྐྱེས་པ་དང་ནི་འདུག་མི་བྱ། །སྨྱན་དུ་འགྱུར་བ་མི་བྱ་ཞིང ། །ཁ་ན་མ་ཐོ་བཅབ་མི་བྱ། །འདི་དག་ནི་ཆོས་དྲུག་ཅེས་བྱའོ། །རྗེས་སུ་འཐུན་པའི་ཆོས་དྲུག་གང་ཞེ་ན། གསེར་ལ་གཟུང་བར་མི་བྱ་སྟེ། །སྤུ་ཡི་ལས་ནི་མི་བྱའོ། །ས་ཡང་རྐོ་བར་མི་བྱ་སྟེ། །རྩཝ་སྔོན་དག་ཀྱང་གཅད་མི་བྱ། །བྱིན་ལེན་མ་བྱས་མི་བཟའ་སྟེ། །བཞག་པ་བཟའ་བར་མི་བྱའོ། །ཆོས་དྲུག་པོ་འདི་དག་ནི་རྗེས་སུ་འཐུན་པའི་ཆོས་དྲུག་ཅེས་བྱ་སྟེ། ལོ་གཉིས་སུ་བསླབས་ནས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྦྱིན་ཏེ། དེའི་འོག་ཏུ་བསྙེན་པར་རྫོགས་པར་བྱའོ། །དེ་ནས་སྦོམ་དགའ་མོས་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་མ་གསོལ་བར་བསྙེན་པར་རྫོགས་པར་བྱེད་ནས་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་ལ་མ་བསླབས་པར་བསྙེན་པར་རྫོགས་པར་བྱེད་ན་ལྟུང
9.281b
བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་གིས་སམ། གཞན་གྱིས་སྨྲས་པར་གྱུར་པའོ། །ཆོས་དྲུག་དང་རྗེས་སུ་འཐུན་པའི་ཆོས་དྲུག་ཅེས་བྱ་བ་ནི་ཇི་སྐད་བསྟན་པ་ཡིན་ནོ། །ལོ་གཉིས་སུ་མ་བསླབས་པར་ཞེས་བྱ་བ་ནི་དགེ་སློབ་མར་འགྱུར་བའི་བསླབ་པ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལོ་གཉིས་སུ་ཆོས་དྲུག་དང ། ་རྗེས་སུ་འཐུན་པའི་ཆོས་དྲུག་གི་བསླབ་པའི་སྡོམ་པ་མ་གསོལ་བར་བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་།། བསྡུས་པའི་སྡོམ་ལ། བསླབ་པ་དང་ནི་ལོ་རེ་དང ། །ཚོགས་དང་སྨེ་གབ་ཀྱི་ལྔ་དང ། །ཉེར་ཞི་ཁྱིམ་གྱི་གོ་རེ་ལོང ། །དཔུང་པ་དང་ནི་ཁྱིམ་པ་མོ། །སྐབས་མ་ཕྱེ་བར་འདྲི་བ་དང ། །བཤང་བར་གཅིག་པུ་འགྲོ་མི་བྱ། ་་་་་་་།སྡོམ་ལ། ཆོས་དྲུག་དང་ནི་བསླབས་པ་དང ། །ཁྱིམ་ཐབ་ཀྱིས་ནི་མ་གནང་དང ། །གལ་ཏེ་བདག་ལ་གོས་བྱིན་དང ། །ཕྱི་ནས་ཁྱོད་དགའ་མ་ཡིན་ནོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ལྷན་ཅིག་གནས་པ་དང ། ཉེ་གནས་དག་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་ལ་བསླབས་ནས་དེས་དེ་དག་བསྙེན་པར་རྫོགས་པར་མི་བྱེད་པ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཀྱིས་བསླབས་ནས་ཅིའི་ཕྱིར་བསྙེན་པར་རྫོགས་པར་མི་བྱེད། དེས་འདི་སྐད་ཅེས་འདི་དག་ཁོ་མོ་ལ་འདི་སྐད་ཅེས་སྦོམ་དགའ་མོ་ནི་མ་བསླབས་པར་བསྙེན་པར་རྫོགས་པར་བྱེད་དོ་ཞེས་ཟེར་བས་ཁོ་མོ་འདི་སྙམ་དུ་རེ་ཤིག་ཤིན་ཏུ་སློབ་པ་ལ་རག་གོ་སྙམ་དུ་སེམས་སོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང
9.282a
ཤེས་བཞིན་དུ་འཁོར་ལོ་གཉིས་སུ་ཆོས་དྲུག་དང ། རྗེས་སུ་འཐུན་པའི་ཆོས་དྲུག་ལ་བསླབས་ནས་བསྙེན་པར་རྫོགས་པར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་གིས་སམ། གཞན་གྱིས་སྨྲས་པར་གྱུར་པའོ། །བསླབས་ནས་ཤེས་བྱ་བ་ནི་དགེ་སློབ་མར་འགྱུར་བའི་བསླབ་པ་ལའོ། །བསྙེན་པར་རྫོགས་པར་མི་བྱེད་ན་ཞེས་བྱ་བ་ནི་གསོལ་པ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཤེས་བཞིན་དུ་ལོ་གཉིས་ཀྱི་བར་དུ་བསླབས་ཏེ། དེ་ལས་ལྷག་པར་འཇོག་ཅིང་བསྙེན་པར་རྫོགས་པར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅཝ་བརྒྱད་པའི་དང་པོ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ཏེ་ཁྱིམ་བདག་གཅིག་གི་ཁྱིམ་དུ་ཞུགས་པ་ལས། དེ་ན་བུད་མེད་ཅིག་ཁྱིམ་ཐབ་དང་ལྷན་ཅིག་རྩོད་ཅིང་འདུག་པ་དང ། དེས་འདི་སྐད་ཅེས་སྨྲས་སོ། །ཅི་ཞིག་ཡིད་མི་བདེ་ཞིང་འདུག་།དེས་སྐབས་དེ་རྒྱས་པར་སྨྲས་པ་དང ། དེ་ནས་སྦོམ་དགའ་མོས་བུད་མེད་དེ་ལ་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་རབ་ཏུ་མི་འབྱུང ། དེས་འདི་སྐད་ཅེས་སྨྲས་སོ། །བདག་སུ་ཞིག་གིས་རབ་ཏུ་འབྱིན་པར་འགྱུར། དེས་འདི་སྐད་ཅེས་ཁོ་མོས་བྱའོ་ཞེས་སྨྲས་པ་ནས་ཇི་ཙམ་ན་དེས་རབ་ཏུ་ཕྱུང་ངོ ། །དེའི་འོག་ཏུ་ཁྱིམ་ཐབ་འོངས་ནས་དེས་ཁྱིམ་ཚེས་ལ་དྲིས་པ། ཁོ་བོའི་ཆུང་མ་གང་དུ་སོང ། དེས་འདི་སྐད་ཅེས་སྨྲས་སོ། །སྦོམ་དགའ་མོས་རབ་ཏུ་ཕྱུང་ངོ ། །དེ་ནས་ཁྱིམ་བདག་དེ་སྦོམ་དགའ་མོ་གང་ན་བ་དེར་སོང་སྟེ་ཕྱིན་ནས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་བདག་གི་མཆིས་བྲང་འདི་སུས་རབ་ཏུ་ཕྱུང ། སྦོམ་དགའ་མོས་འདི་སྐད་ཅེས་སྨྲས་ཏེ། ཁོ་མོས་སོ། །དེ་ནས་ཁྱིམ་བདག་དེས་འདི་སྐད་ཅེས་འཕགས་མ་ཁྱོད་ཁྱིམ་ཐབ་ཀྱིས་མ་གནང་བ་རབ་ཏུ་འབྱིན་པར་མཛད་པར་རིགས
9.282b
སམ་ཞེས་སྨྲས་ནས་ཞེས་བྱ་བ་ནས། ཁྱིམ་བདག་དེས་ཁ་བྱས་ཏེ་སོང་བ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ཁྱིམ་ཐབ་ཀྱིས་མ་གནང་བར་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་སམ་གཞན་གྱིས་སྨྲས་པར་གྱུར་པའོ། །ཁྱིམ་ཐབ་ཀྱིས་ཤེས་བྱ་བ་ནི་ཁྱོས་སོ། །མ་གནང་བ་ཞེས་བྱ་བ་ནི་མ་བཏང་བའོ། །རབ་ཏུ་འབྱིན་ན་ཞེས་བྱ་བ་ནི་ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་ཐབ་ཀྱིས་མ་གནང་བ་རབ་ཏུ་འབྱིན་ན་ལྟུང་བྱེད་དོ། །ལྟུང་བྱེད་བཅཝ་བརྒྱད་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ལ་དགེ་སློང་མས་སྨྲས་པ། འཕགས་མ་བདག་བསྙེན་པར་རྫོགས་པར་མཛད་དུ་གསོལ། དེས་འདི་སྐད་ཅེས་གལ་ཏེ་ཁོ་མོ་ལ་གོས་བྱིན་ན་དེའི་འོག་ཏུ་ཁྱོད་བསྙེན་པར་རྫོགས་པར་བྱའོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མས་དེ་སྐད་ཅེས་སྨྲས་པ་ན། ་གལ་ཏེ་ཁོ་མོ་ལ་གོས་བྱིན་ན་དེའི་འོག་ཏུ་བསྙེན་པར་རྫོགས་པར་བྱའོ་ཞེས་ཟེར་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མས་དེ་སྐད་ཅེས་སྨྲས་པ་ན་ཞེས་བྱ་བ་ནི་ཟེར་ནའོ། །གལ་ཏེ་ཁོ་མོ་ལ་གོས་ཤེས་བྱ་བ་ནི་བདུན་པོ་གང་ཡང་རུང་བའི་འོ། །བྱིན་ན་ཞེས་བྱ་བ་ནི་ཕུལ་ནའོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །བསྙེན་པར་རྫོགས་པར་བྱའོ་ཞེས་བྱ་བ་ནི་དགེ་སློང་མའི་དངོས་པོར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང
9.283a
མས་ཇི་ཙམ་ཅུང་ཟད་དགེ་སློང་མས་དེ་སྐད་ཅེས་སྨྲས་པ་ན། གལ་ཏེ་ཁོ་མོ་ལ་གོས་བྱིན་ན་དེའི་འོག་ཏུ་ཁྱོད་བསྙེན་པར་རྫོགས་པར་བྱའོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅཝ་བརྒྱད་པའི་གསུམ་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བུད་མེད་ཅིག་གཽ་ཏ་མཱི་སྐེམ་མོ་ག་ན་བ་དེར་སོང་སྟེ་ཕྱིན་ནས། གཽ་ཏ་མཱི་སྐེམ་མོ་ལ་འདི་སྐད་ཅེས་སྨྲས་སོ། །འཕགས་མ་གལ་ཏེ་ཁྱོད་ཀྱིས་བདག་རབ་ཏུ་བྱུང་ན་བདག་རབ་ཏུ་འབྱུང་བར་འཚལ་ལོ། །དེས་འདི་སྐད་ཅེས་སྨྲས་སོ། །ཁྱོད་ཀྱིས་ཁྱིམ་གྱི་བྱ་བ་མངོན་པར་སྤངས་དང་དེའི་འོག་ཏུ་དཀའ་བར་མི་འགྱུར་རོ། །དེ་ནས་ཁྱིམ་བདག་གི་ཆུང་མ་དེས་ཁྱིམ་གྱི་བྱ་བ་མངོན་པར་སྤངས་ཏེ་འོངས་པ་ན། གཽ་ཏ་མཱི་སྐེམ་མོ་དེས་ཀྱང་རབ་ཏུ་མ་ཕྱུང་ངོ ། །དེ་བདག་ནི་ཁྱིམ་ན་གནས་པ་ཡང་མ་ཡིན་ལ། རབ་ཏུ་བྱུང་བ་ཡང་མ་ཡིན་ནོ་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་མོས་དེ་སྐད་སྨྲས་པ་ན། ཁྱོད་ཀྱིས་ཁྱིམ་ཀྱི་བྱ་བ་མངོན་པར་སྤངས་དང་དེའི་འོག་ཏུ་དཀའ་བར་མི་འགྱུར་རོ་ཞེས་སྨྲས་ལ། འོངས་ནས་རབ་ཏུ་མི་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི་གཽ་ཏ་མཱི་སྐེམ་མོའོ། །ཁྱིམ་པ་མོ་ཞེས་བྱ་བ་ནི་ཁྱིམ་བདག་གི་ཆུང་མའོ། །ཁྱོད་ཀྱིས་ཁྱིམ་གྱི་བྱ་བ་མངོན་པར་སྤངས་དང་དེའི་འོག་ཏུ་ཁྱོད་ལ་དཀའ་བར་མི་འགྱུར་རོ་ཞེས་བྱ་བ་ནི་རབ་ཏུ་འབྱུང་བར་འགྱུར་བ་ལའོ། །དེའི་འོག་ཏུ་རབ་ཏུ་མི་འབྱིན་ན་ཞེས་བྱ་བ་ནི་ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདི་སྐད་ཅེས་ཁྱིམ་གྱི་བྱ་བ་མངོན་པར་སྤངས་དང་དེའི་འོག་ཏུ་དཀའ་བར་མི་འགྱུར་རོ་ཞེས་སྨྲས་ལ། འོངས་ནས་རབ་ཏུ་མི་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅཝ་བརྒྱད་པའི་ཚིགས་སུ་བཅད
9.283b
པའི་སྡོམ་རྫོགས་སྷོ།། ་་་་་་་་་་་་སྡོམ་ལ། ལོ་རེ་རེ་ནི་བཀག་པ་དང ། །ཞག་ལོན་བདུན་པ་མ་ཡིན་དང ། །ཟླ་བ་ཕྱེད་ཕྱེད་གདམས་པ་དང ། །དགེ་སློང་མེད་པའི་གསོ་སྦྱོང་དང ། །དགེ་སློང་མེད་པར་དབྱར་གནས་མིན། །དབྱར་གནས་པས་ནི་དགག་དབྱེ་བྱའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ལོ་རེ་རེ་ཞིང་རབ་ཏུ་ཕྱུང་ནས་ཕྱིས་གང་གི་ཚེ་དེ་དག་ལ་འབོད་པ་དེའི་ཚེ་འདི་སྐད་ཅེས་ལོ་གཅིག་པ། ལོ་གཉིས་པ་ཞེས་བྱ་བ་ནས་ལོ་ལྔ་པ་ཞེས་བྱ་བའི་བར་དག་ཏུ་འབོད་པ་དང ། དེ་ནས་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་ཅི་ཁྱོད་ཀྱིས་འདི་རྣམས་ཀྱི་མིང་མི་ཤེས་སམ། ་དེས་འདི་སྐད་ཅེས་འདི་སྙེད་ཀྱི་མིང་སུས་ཤེས་པར་འགྱུར་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དེ་ཡང་དགེ་སློང་མ་གང་ལོ་རེ་རེ་ཞིང་འཁོར་འཇོག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལོ་རེ་རེ་ཞིང་ཞེས་བྱ་བ་ནི་ལོ་རེ་རེའོ། །འཁོར་འཇོག་ན་ཞེས་བྱ་བ་ནི་རབ་ཏུ་འབྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལོ་རེ་ཞིང་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་དང་པོ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བཅཝ་ལྔ་པ་སྔ་མའི་འདུན་པ་བླངས་པས་བཅཝ་ལྔ་པ་ཕྱི་མའི་གསོ་སྦྱོང་ཡང་ཉམས་སུ་མྱོང་བར་བྱེད་པ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཅིའི་ཕྱིར་དེ་ལྟར་བྱེད། དེ་ན་འདི་སྐད་ཅེས་ཁོ་མོ་སྡེ་སྣོད་གསུམ་པ་ཡིན་པས་ཇི་ལྟར་འགྱུར་བ་ཤེས་སོ་ཞེས་སྨྲས་པ་ན། དོན་ཉུང
9.284a
བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འདུན་པ་ཞག་ལོན་པས་གསོ་སྦྱོང་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཞག་ལོན་པས་ཞེས་བྱ་བ་ནི་སྤྱད་ཟིན་པའོ། །འདུན་པ་ཞེས་བྱ་བ་ནི་བློ་གྲོས་སོ། །གསོ་སྦྱོང་ཉམས་སུ་མྱོང་བར་བྱེད་ན་ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདུན་པ་ཞག་ལོན་པས་སོ་སོར་ཐར་པ་ཉམས་སུ་མྱོང་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་གཉིས་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅཝ་ལྔ་པའི་འདུན་པ་ལེན་པའི་དགེ་སློང་མས་དགེ་སློང་མ་རྣམས་ཀྱི་དྲུང་དུ་འགྲོ་བར་བྱ་ཞིང་དགེ་སློང་རྣམས་ལས་ཚེས་ཤིང་གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་བྱའོ་ཞེས་གསུངས་པ་དང ། འོན་ཀྱང་བཅུ་གཉིས་སྡེ་དེ་དག་གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་མི་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གི་བར་རོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཅིང་ངོ ། །གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་མི་བྱེད་ན་དགེ་སློང་མ་རྣམས་དང་ལྷན་ཅིག་རྗེས་སུ་སྒྲུབ་པར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་དགེ་སློང་མས་ཇི་ཙམ་ཅུང་ཟད་ཟླ་བ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང
9.284b
བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་གསུམ་པ་རྫོགས་སྷོ།། ་་་་་་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ལྗོངས་རྒྱུ་ཞིང་དོང་བ་ན་དགེ་སློང་མ་ཞིག་གི་དབྱར་ཁང་དུ་ཕྱིན་ནས་དེར་དེ་དག་གིས་དགེ་སློང་མེད་པའི་གནས་སུ་གསོ་སྦྱོང་བྱས་ཏེ། དེ་དག་རིམ་གྱིས་རྒྱུ་ཞིང་མཉན་ཡོད་དུ་ཕྱིན་ནས་དེ་དག་གང་གི་ཚེ་དབྱར་ཁང་དུ་འོངས་པ་དེའི་ཚེ་དགེ་སློང་མ་རྣམས་ཀྱིས་སྨྲས་པ་སངས་རྒྱས་ལྡན། ཆོས་ལྡན་དགེ་འདུན་ལྡན་འོངས་པ་ལེགས་སོ། །ཁྱེད་ཅག་གིས་གང་དུ་གསོ་སྦྱོང་བྱས། དེ་དག་གིས་འདི་སྐད་ཅེས་སྨྲས་སོ། །གནས་ག་གེ་མོ་ཞིག་ཏུའོ། །དེ་ནས་དགེ་སློང་མ་དེ་རྣམས་ཀྱིས་དགེ་སློང་མ་དེ་དག་ལ་འདི་སྐད་ཅེས་ཁྱེད་ཅག་གིས་ཅིའི་ཕྱིར་དགེ་སློང་མེད་པའི་གནས་སུ་གསོ་སྦྱོང་བྱས་ཤེས་སྨྲས་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མེད་པའི་གནས་སུ་གསོ་སྦྱོང་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པ་དག་གིའོ། །དགེ་སློང་མེད་པའི་གནས་སུ་ཞེས་བྱ་བ་ནི་གང་ན་དགེ་སློང་མེད་པར་གྱུར་པའོ། གསོ་སྦྱོང་ཞེས་བྱ་བ་ནི་སོ་སོར་ཐར་པ་ཉམས་སུ་མྱོང་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མེད་པའི་གནས་སུ་གསོ་སྦྱོང་ཉམས་སུ་མྱོང་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་བཞི་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མས་དགེ་སློང་མེད་པའི་གནས་སུ་དབྱར་གནས་པར་ཁས་བླང་བར་མི་བྱའོ་ཞེས་གསུངས་པ་དང ། དེ་ནས་ཡང་དགེ་སློང་མ་རྣམས་ལྗོངས་ཤིག་ནས་ལྷགས་ནས་དགེ་སློང་མེད་པའི་གནས་སུ་དབྱར་གནས་པར་ཁས་བླངས་ཏེ། ་དེ་ནས་དེ་དག་གིས་དབྱར་གནས་ནས་མཉན་ཡོད་དུ་ཕྱིན་པ་དང ། ཇི་ཙམ་ན་དགེ་སློང་མ་རྣམས་ཀྱིས་སྨྲས་པ། ཁྱེད་ཅག་གང་དུ་དབྱར་གནས། དེ་དག་གིས་འདི་སྐད་ཅེས་སྨྲས་སོ། །
9.285a
གནས་ག་གེ་མོ་ཞིག་ཏུའོ། །དེ་དག་ལ་དགེ་སློང་མ་རྣམས་ཀྱིས་དྲིས་པ། ཅི་རེ་ཤིག་དགེ་སློང་དང་བཅས་པ་ཡིན་ནམ་འོན་ཏེ་དགེ་སློང་མེད་པ་ཡིན། དེ་དག་གིས་འདི་སྐད་ཅེས་དགེ་སློང་མེད་པ་ཡིན་ནོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པ་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མེད་པའི་གནས་སུ་དབྱར་གནས་པར་ཁས་ལེན་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པ་དག་གིའོ། །དགེ་སློང་མེད་པའི་ཞེས་བྱ་བ་ནི་གང་ན་དགེ་སློང་མེད་པར་གྱུར་པའོ། །གནས་ཤེས་བྱ་བ་ནི་གང་ན་ལས་ཐམས་ཅད་མངོན་པའོ། །དབྱར་གནས་པར་ཁས་ལེན་ན་ཞེས་བྱ་བ་ནི་ཟླ་བ་གསུམ་དམ་འཆའ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མེད་པའི་གནས་སུ་དབྱར་གནས་པར་ཁས་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་ལྔ་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དབྱར་གནས་པའི་དགེ་སློང་མ་རྣམས་ཀྱིས་གཉི་གའི་དགེ་འདུན་ལ་དགག་དབྱེ་བྱའོ་ཞེས་གསུངས་པ་དང ། དེ་ནས་དགེ་སློང་མ་དེ་རྣམས་ཀྱིས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་གཉི་གའི་དགེ་འདུན་ལ་དགག་དབྱེ་བྱས་ཚུར་སྤྱོན། དེས་འདི་སྐད་ཅེས་སྨྲས་སོ། །ཁོ་མོ་དེར་མི་འགྲོའོ། །ཅིའི་ཕྱིར། རེ་ཤིག་ཁོ་མོ་ནི་སྡེ་སྣོད་གསུམ་པ་ཡིན་པས་ཁོ་མོས་དགག་དབྱེ་ཇི་ལྟར་བྱ་བ་ཤེས་ཏེ། དགེ་སློང་གི་དགེ་འདུན་ལ་ལྕག་ཕོད་དང ། ཤུར་བུ་དང ། ཤུར་བུ་ཕྲེའུ་ཕལ་མོ་ཆེ་དབུལ་དགོས་པས་ཁྱེད་ཅག་དེང་ཤིག་།ཁོ་མོ་ནི་དེར་མི་འགྲོའོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང
9.285b
མ་གང་དབྱར་གནས་ནས་གཉི་གའི་དགེ་འདུན་ལ་དགག་དབྱེ་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དབྱར་གནས་ནས་ཞེས་བྱ་བ་ནི་ཟླ་བ་གསུམ་གྱི་མཐར་ཕྱིན་ནས་སོ། །གཉི་གའི་དགེ་འདུན་ལ་ཞེས་བྱ་བ་ནི་དགེ་སློང་དང་དགེ་སློང་མའི་དགེ་འདུན་ལའོ། །དགག་དབྱེ་མི་བྱེད་ན་ཞེས་བྱ་བ་ནི་མཐོང་བ་དང་ཐོས་པ་དང་དོགས་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་དབྱར་གནས་ནས་གཉིས་ཀའི་དགེ་འདུན་ལ་དགག་དབྱེ་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་།། སྡོམ་ལ། ཚོགས་ལ་སྤྱོ་བར་མི་བྱ་དང ། །མི་སྙན་པ་དང་སེར་སྣ་ལྔ། །སྤངས་ནས་བཟའ་བར་མི་བྱ་དང ། །བཙས་པ་བླང་བར་མི་བྱའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ཚོགས་ལ་སྤྱོས་པ་དང ། དེ་ལ་ལྷན་ཅིག་གནས་པ་དང ། ཉེ་གནས་རྣམས་ཀྱིས་སྨྲས་པ། འཕགས་མ་དགེ་སློང་མའི་ཚོགས་ལ་སྤྱོ་བ་མི་རིགས་སོ། །དེས་འདི་སྐད་ཅེས་རིགས་ཀྱང་རུང ། མི་རིགས་ཀྱང་རུང་ཁོ་མོས་ནི་སྤྱོས་སོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཚོགས་ལ་སྤྱོས་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཚོགས་ལ་ཞེས་བྱ་བ་ནི་དགེ་སློང་མའི་དགེ་འདུན་ལའོ། །སྤྱོས་ན་ཞེས་བྱ་བ་ནི་ཚར་བཅད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཚོགས་ལ་སྤྱོས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་དང་པོ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ན་འོ། །
9.286a
དེ་ནས་སྦོམ་དགའ་མོས་དགེ་སློང་མའི་ཚོགས་ལ་མི་སྙན་པ་ཁྱིམ་ཞེས་བྱ་བ་དང ། ནལ་ཞེས་བྱ་བ་དང ། བོང་བུ་དག་དང་ལྡན་པའི་གཤེ་བ་དག་གིས་གཤེ་བའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཚོགས་ལ་གཤེ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཚོགས་ལ་ཞེས་བྱ་བ་ནི་དགེ་སློང་མའི་དགེ་འདུན་ལའོ། །གཤེ་ན་ཞེས་བྱ་བ་ནི་ཁྱིམ་པ་མོའི་ཚིག་དང་ལྡན་པའི་གཤེ་བས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཚོགས་ན་གཤེ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དགེ་སློང་མ་གློ་བུར་བ་རྣམས་ཀྱིས་དབྱར་ཁང་དུ་གནས་བྱིན་ནས་དེ་དག་ལ་རྙེད་པ་དང ། བཀུར་སྟི་རབ་ཏུ་མང་པོ་དང་ལྡན་པ་དང ། དེས་སེར་སྣས་དེ་དག་བསྐྲད་པ་ན། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཅི་སེར་སྣས་གནོད་པར་མ་གྱུར་གྲང ། དེས་འདི་སྐད་ཅེས་ཁོ་མོ་གྲང་བའི་ཚེ་ན་གྲང་བས་ཉེན། ཚ་བའི་ཚེ་ན་ཚ་བས་ཉེན་བཞིན་དུ་སྡུག་བསྔལ་ཆེན་པོས་བསྒྲུབས་པའི་དབྱར་ཁང་ཁོ་མོས་ཁ་འཇམ་ཅན་འདི་རྣམས་ལ་སྐབས་དབྱེ་འམ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གནས་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ་གནས་ལ་ཞེས་བྱ་བ་ནི་གཡར་ཁང་ལའོ་སེར་སྣ་ཞེས་བྱ་བ་ནི་དེ་དང་ལྷན་ཅིག་ཏུ་མངོན་པར་མི་དགའ་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར
9.286b
་ འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གནས་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་གསུམ་པ་རྫོགས་སྷོ།། ་་་་་་་་་་་་་་་གླེང་གཞི་ནི་མཉན་ཡོད་ནའོ། དེ་ནས་དགེ་སློང་མ་རྣམས་ཀྱིས་བྲམ་ཟེ་དང ། ཁྱིམ་བདག་གི་ཁྱིམ་དག་ཏུ་སྐྱེ་དགུའི་བདག་མོ་ཆེན་མོའི་བསྔགས་པ་དག་བརྗོད་པར་བྱེད་དེ། སྐྱེ་དགུའི་བདག་མོ་ཆེན་མོ་ནི་བསོད་ནམས་དང་ལྡན་པ་སངས་རྒྱས་ཀྱི་ཡུམ། བཅོམ་ལྡན་འདས་ཀྱིས་ཀྱང་གནས་བརྟན་མའི་རྒྱལ་མོ་རྣམས་ཀྱི་ནང་ན་མཆོག་ཏུ་བསྟན་པ་ཡིན་ནོ། །ུཏྤ་ལའི་མདོག་ཀྱང་རྫུ་འཕྲུལ་དང་ལྡན་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །གཽ་ཏ་མཱི་སྐེམ་མོ་ཡང་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །ཆོས་སྦྱིན་ཡང་མདོ་སྡེ་རྣམ་པར་འབྱེད་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །དེ་ནས་སྦོམ་དགའ་མོས་ཚིག་དེ་ཐོས་ནས་ཀྱེ་བུ་ཟན་མོའི་བུ་མོ་དག་རེ་ཤིག་སྐྱེ་དགུའི་བདག་མོ་ཆེན་མོ་འདི་ནི་རང་ཞུགས་ཡིན་ཏེ། འདི་ལ་མཁན་མོ་དང ། སློབ་དཔོན་ཡང་མེད་དོ། །ུཏྤ་ལའི་མདོག་འདི་ནི་སྨད་འཚོང་མ་ཡིན་ནོ། །གཽ་ཏ་མཱི་སྐེམ་མོ་འདི་ནི་བུའི་ཤ་ཟོས་པ་ཡིན་ན། ་ཁྱེད་ཅག་དེ་དག་གི་བསྔགས་པ་རྗོད་པ་ལྟ་ཞེས་སྨོད་པར་བྱེད་པ་དང ། དེ་དག་གིས་འདི་སྐད་ཅེས་སྨྲས་སོ། །འཕགས་མ་བསྔགས་པའི་སེར་སྣས་གནོད་པར་མ་གྱུར་གྲང ། དེས་འདི་སྐད་ཅེས་ཁོ་མོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་པ་ཡིན་ན་བསྔགས་པར་མི་འོས་པ་དེ་དག་གི་བསྔགས་པ་བརྗོད་ཀྱིས་ཁོ་མོའི་མིང་མི་བརྗོད་ན་ཅིའི་ཕྱིར་ཁོ་མོ་ལ་གནོད་པར་མི་འགྱུར་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས།
9.287a
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བསྔགས་པ་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བསྔགས་པ་ཞེས་བྱ་བ་ནི་ལུང་དང་རྟོགས་པ་དག་བརྗོད་པ་ན་སེར་སྣ་དང ། ཕྲག་དོག་བྱེད་པའོ་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཡང་དག་པའི་བསྔགས་པ་ཇི་ལྟ་བ་བཞིན་སྨྲས་པ་ན་བསྔགས་པ་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་བཞི་པ་རྫོགས་སྷོ།། ་་་་་་་་་་་་་་་་་་།། གླེང་བཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དགེ་སློང་མ་རྣམས་ལ་འདི་སྐད་ཅེས་སྨྲས་སོ།[་]།ཀྱེ་ཕུ་ནུ་མོ་དག་ཁྱིམ་ག་གེ་མོར་ནི་མ་དེང་ཤིག་་།དེ་དག་གིས་འདི་སྐད་ཅེས་སྨྲས་སོ། ཅིའི་ཕྱིར་དེས་འདི་སྐད་ཅེས་སྨྲས་སོ། །ཁོ་མོས་ཁྱིམ་དེ་ངལ་བ་ཆེན་པོས་ཆོས་བཤད་ནས་དད་པར་བྱས་པ་ཡིན་ནོ། །དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཁྱིམ་གྱི་སེར་སྣས་གནོད་པར་མ་གྱུར་གྲང ། དེས་འདི་སྐད་ཅེས་གྱུར་ཏོ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ཁྱིམ་ལ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་ལའོ། །སེར་སྣ་བྱེད་ན་ཞེས་བྱ་བ་ནི་ཕྲག་དོག་སྐྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་ལྔ་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དགེ་སློང་མ་རྣམས་ལ་གདམས་ངག་འབོགས་པ་ན་ཕུ་ནུ་མོ་དག་བྲམ་ཟེ་ཡ་མཚན་དུ་འཛིན་པ་རྣམས་ཀྱིས་ཁུ་ཚུར་དང ། ཐལ་ལྕག་གིས་བརྒྱབ་ནས་གླད་པ་གས་པར་གྱུར་ན་མི་རུང་གིས་ཧ་ཅང་སྔར་བསོད་སྙོམས་ལ
9.287b
མ་འདོང་ཤིག་ཅེས་དེས་གཞན་དག་བཟློག་ནས་རང་ཉིད་ནང་པར་ཆེས་སྔ་བ་ཞིག་ཏུ་ཤམ་ཐབས་བགོས། ་ལྷུང་བཟེད་དང་ཆོས་གོས་བླངས་ཏེ་སྤྱོད་ཡུལ་དུ་ཞུགས་པ་དང་བྲམ་ཟེ་ཡ་མཚན་དུ་འཛིན་པ་ཞིག་གིས་མཐོང་ནས། དེས་དེ་བཟུང་སྟེ་ཁུ་ཚུར་དང་ཐལ་ལྕག་གིས་ཏེ་པོར་བརྡེགས་པས་དེ་མིག་ཕུབས་སྣད་ཅིང་དབྱར་ཁང་དུ་སོང་བ་དང་དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་སུས་བརྡེགས། དེས་སྐབས་དེ་རྒྱས་པར་སྨྲས་པ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་རྙེད་པའི་སེར་སྣས་གནོད་པར་མ་གྱུར་གྲང ། དེས་འདི་སྐད་ཅེས་གྱུར་ཏོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྙེད་པ་ལ་སེར་སྣ་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །རྙེད་པ་ལ་སེར་སྣ་བྱེད་ན་ཞེས་བྱ་བ་ལ་རྙེད་པ་ནི་གཉིས་ཏེ། ཟས་ཀྱི་རྙེད་པ་དང ། ཆོས་ཀྱི་རྙེད་པ་ཡིན་ཏེ། དོན་འདི་ལ་ནི་ཟས་ཀྱི་རྙེད་པ་ཡིན་པར་དགོངས་སོ། །སེར་སྣ་བསྐྱེད་ན་ཞེས་བྱ་བ་ནི་ཕྲག་དོག་སྐྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྙེད་པ་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་ནས་སྔོན་གྱི་སྦྱོར་བ་ནི་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྦོམ་དགའ་མོ་གཞན་དག་ལ་རྗེས་སུ་སྟོན་ཅིང་རང་མི་བསྒྲུབ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་འདས་པའི་དུས་ན་ཡང་སྦོམ་དགའ་མོ་གཞན་ལ་རྗེས་སུ་སྟོན་ཅིང ། རང་མི་སྒྲུབ་པས་ཚུལ་མ་ཡིན་པས་སྡུག་བསྔལ་དུ་གྱུར་པ་ཡིན་ཏེ། དགེ་སློང་དག་སྔོན་བྱུང་བ་འདས་པའི་དུས་ན་ལམ་པོ་ཆེ་ཞིག་ནས། རི་སྐེགས་མོ་རབ་ཏུ་མང་པོ་རྒྱུས་པ་དང །
9.288a
དེ་ན་རི་སྐེགས་མོ་རྣམས་ལ་ཕུ་ནུ་མོ་དག་ཁྱེད་མཁྲིས་པའི་ནད་ཀྱིས་སྨྱོས་པར་གྱུར་དང་མི་རུང་གིས་ཁྱེད་ཅག་གཏིལ་ལ་མ་ཟ་ཤིག་ཅེས་རྗེས་སུ་བསྟན་ནས། དེ་རང་ཉིད་ཤིང་རྟ་འོང་བའི་ལམ་ཁ་ན་ཏིལ་ཟ་ཟ་བ་ལས་ཤིང་རྟའི་འཁོར་ལོས་མགོ་བཅད་པར་གྱུར་ཏོ། །དེ་ནས་ལྷ་ཞིག་གིས་དེའི་ཚེ་ཚིགས་སུ་བཅད་དེ་སྨྲས་པ། གཞན་ལ་རྗེས་སུ་སྟོན་བྱེད་ཅིང ། །རང་ཉིད་སྒྲུབ་པར་མི་བྱེད་པ། །བརྐམ་ཆགས་པ་ཡི་རང་བཞིན་ཅན། །རི་སྐེགས་མོ་འདི་འཁོར་ལོས་བཅོམ། །དགེ་སློང་དག་ཇི་སྙམ་དུ་སེམས། རི་སྐེགས་མོ་གང་ཡིན་པ་དེ་ནི་སྦོམ་དགའ་མོ་འདི་ཉིད་ཡིན་ཏེ། དེ་ན་ཡང་འདི་གཞན་དག་ལ་རྗེས་སུ་སྟོན་ཅིང་བདག་ཉིད་མི་སྒྲུབ་པས་ཚུལ་བཞིན་མ་ཡིན་པས་སྡུག་བསྔལ་བར་གྱུར་ལ། ད་ལྟར་ཡང་གཞན་དག་ལ་རྗེས་སུ་སྟོན་ཅིང་བདག་ཉིད་མི་སྒྲུབ་པས་ཚུལ་བཞིན་མ་ཡིན་པས་སྡུག་བསྔལ་བར་གྱུར་ཏོ། །དེ་ལྟ་བས་ན་དགེ་སློང་དག་འདི་ལྟར་བསླབ་པར་བྱ་སྟེ། འཐུན་པ་གང་ལ་བདག་ཉིད་སྒྲུབ་པ་ལ་གཞན་དག་ཀྱང་རྗེས་སུ་བསྟན་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །ལྟུང་བྱེད་ཉི་ཤུ་པའི་དྲུག་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ན་སྦོམ་དགའ་མོ་ལ་ལྷན་ཅིག་གནས་པ་དང ། ཉེ་གནས་རྣམས་ཀྱིས་ལུང་བསླངས་པ་དང ། དེས་འདི་སྐད་ཅེས་དེང་ལ་རེ་ཤིག་ཁོ་མོའི་སྣོད་དུ་ཚོས་ཤིག་།བུ་རམ་དང་སེ་འབྲུ་དག་ཉེས་ཤིག་ཅེས་སྨྲས་ནས་དེ་ཕན་ཚུན་བསྒྱངས་ཏེ། དེ་དག་ལ་ལུང་མ་བྱིན་པ་དང ། དེ་དག་གིས་འདི་སྐད་ཅེས་སྨྲས་སོ། །འཕགས་མ་ཁྱོད་ཆོས་ལ་སེར་སྣ་མི་བྱེད་གྲང ། དེས་འདི་སྐད་ཅེས་ཀྱེ་བུ་ཟན་མོའི་བུ་མོ་དག་ཁོ་མོ་དྲུག་སྡེ་རྣམས་ལ་ལུང་གི་ཆེད་དུ་སེའུ་འབྲུའི་མཉེས་པས་ནི་ལག་པ་ལ་སེར་ཀ་བྱུང ། བཟོད་པ་གསོལ་བས་ནི་མགོ་བོ་བྱི། པུས་མོ་བཙུགས་ནས་ལུང་གསོལ་བས་ནི་ལྕེ་གས་ན་ཁོ་མོ་ཅིའི་ཕྱིར་སེར་སྣ་མི་བྱེད་ཅེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས།
9.288b
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆོས་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཆོས་ལ་སེར་སྣ་བྱེད་ན་ཞེས་བྱ་བ་ལ་ཆོས་ཞེས་བྱ་བ་ནི་སངས་རྒྱས་ཀྱིས་གསུངས་པ་འམ། ཉན་ཐོས་ཀྱིས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་དགེ་སློང་མས་ཇི་ཙམ་ཅུང་ཟད་ཆོས་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། ་་།སེར་སྣ་ལྔའི་བར་སྡོམ་ནི། གནས་དང་བསྔགས་དང་ཁྱིམ་དང་ནི། །རྙེད་པ་ཉིད་དང་ཆོས་ལ་འོ། །ལྟུང་བྱེད་ཉི་ཤུ་པའི་བདུན་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་རྙེད་པ་གནས་གཅིག་ཏུ་ཟོས་ནས་གཅིག་ཤོས་སུ་ཡང་ཟ་བར་བྱེད་དེ། དེ་ལྟར་སྤངས་པ་དང ། མ་སྤངས་པ་ཟ་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟོས་ཏེ་སྤངས་ཟིན་ནས་བཅའ་བ་དང ། བཟའ་བ་འཆོས་སམ་ཟོས་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ཟོས་ཟིན་ནས་ཤེས་བྱ་བ་ནི་གནས་གཅིག་ཏུ་སྤངས་ནས་སྤྱོད་ལམ་བཤིག་པའོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང ། བཟའ་བ་ལྔའོ། །འཆོས་སམ་ཟོས་ན་ཞེས་བྱ་བ་ནི་ལྐོག་མར་ཁམ་གྱིས་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སྤངས་པ་ལ་སྤངས་པའི་འདུ་ཤེས་ཀྱིས་འཆོས་སམ་ཟོས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་མ་སྤངས་པ་ལ་སྤངས་པའི་འདུ་ཤེས་ཀྱིས་འཆོས་སམ་ཟོས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་ཉི་ཤུ་པའི་བརྒྱད་པ་རྫོགས་སྷོ།། ་་་་་་་་་་་་།།
9.289a
གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ནས་བསོད་སྙོམས་ཀྱི་ཕྱིར་བྱུང་སྟེ་ཁྱིམ་བདག་གཅིག་གིས་ཁྱིམ་དུ་ཞུགས་པ་དང ། ཁྱིམ་བདག་དེའི་ཆུང་མ་བུ་ཐོན་བུ་བཙས་པས་རང་གིས་ཁྱེའུ་བཀྲུ་བ་མ་ཤེས་སོ། །དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །མཚན་བཟངས་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་གློ་བ་མི་དགའ་ལགས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅིའི་ཕྱིར། བདག་གིས་ཁྱེའུ་སུས་ཀྱང་མ་བཀྲུས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་མི་འཁྲུ་མ་འཚལ་ཏོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅི་ཁྱོད་ཀྱང་ཁབ་བཞིན་དུ་ལས་སྣ་གཅིག་པ་ཡིན་ནམ། དེས་འདི་སྐད་ཅེས་སྨྲས་སོ། །འཕགས་མ་འདི་ལ་བྱང་བ་ཅུང་ཟད་མངའ་འམ། སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང ། ལས་ཀྱི་གནས་གང་ལ་མ་བྱང་བ་ཅུང་ཟད་ཡོད་དམ། དེས་འདི་སྐད་ཅེས་སྨྲས་སོ། །འཕགས་མ་བདག་གི་ཁྱིའུ་ཁྲུས་གྱིས་ལ་སྩོལ་ཅིག་།དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོ་ལ་སུས་བསོད་སྙོམས་སྦྱིན་པར་འགྱུར། །དེས་འདི་སྐད་ཅེས་སྨྲས་སོ། །བདག་གིས་ཕྱི་བཞིན་འབྲང་བའི་དགེ་སྦྱོང་མ་དང ། བདག་གིས་མཁན་མོ་དང ། ཁང་སྐྱོང་མ་ལ་དབུལ་ལོ། །དེ་ནས་སྦོམ་དགའ་མོས་ལྷུང་བཟེད་བཞག་།གོས་དག་བརྫེས་ནས་ཁྱེའུ་བླངས་ཏེ། ཡུད་ཙམ་ཞིག་བསྐྱོད་ནས་དེའི་འོག་ཏུ་འདག་རྫས་དག་གིས་བཀྲུས་དྲིལ་ཏེ། དེ་ནས་ཆུ་དྲོན་གྱིས་བཀྲུས། མིག་ཏུ་མིག་སྨན་བླུགས། ས་ཞག་གིས་ཐིག་ལེ་བྲིས་སྐྲའི་བྱི་དོར་བྱས། སྦྲང་རྩི་དང་མར་སར་གྱིས་བསྙོད་ནས་ཁུལ་ཞོར་བཅུག་སྟེ་བསྙལ་ནས་འདི་སྐད་ཅེས་ཁྱོད་ཀྱིས་འདི་བཞིན་དུ་ཉི་མ་རེ་རེ་ཞིང་ཁྲུས་བྱོས་ཤིག་ཅེས་བསྒོ་ནས། དེ་ནས་བསོད་སྙོམས་ཀྱིས་ཁུར་བསླང་སྟེ་དབྱར་ཁང་དུ་སོང་ངོ ། །དེ་ནས་ཁྱིམ་བདག་དེ་འོངས་ནས། ཆུང་མ་དེ་ལ་འདི་སྐད་ཅེས་སྨྲས་སོ། །བཟང་མོ་ཁྱོད་ཀྱིས་དེ་རིང་ཁྱེའུ
9.289b
ཁྲུས་བྱས་པ་ལེགས་སོ། །འོར་ཆེའོ་ཞེས་བྱ་བ་ནས། སྦོམ་དགའ་མོས་བཀྲུས་སོ་ཞེས་བྱ་བ་དང ། བསོད་སྙོམས་རབ་ཏུ་མང་དུ་ཕུལ་ལོ་ཞེས་བྱ་བའི་བར་རོ། །དེ་ནས་དུས་གཞན་ཞིག་ན་སྐྱེ་དགུའི་བདག་མོ་ཆེན་མོ་གཽ་ཏ་མཱི་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ་ཁྱིམ་བདག་གི་ཁྱིམ་དེར་བསོད་སྙོམས་ཀྱི་ཕྱིར་ཞུགས་ནས་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་གི་ཁྱིའུ་ཁྲུས་གྱིས་ལ་སྩོལ་ཅིག་།དེ་ནས་སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །ཕུ་ནུ་མོ་ཁོ་མོས་བྱང་ཆུབ་སེམས་དཔའ་བཀྲུས་ཏེ། དེ་ལས་ཁྱེའུ་གཞན་ནི་མ་བཀྲུས་སོ། །ཕུ་ནུ་མོ་ཁྱོད་དགེ་སློང་མ་ཚུལ་ཁྲིམས་དང་ལྡན་པ་ལ་མཆིད་སྩོལ་བའི་ཕྱིར་ཡང་བྲན་མོར་འགྱུར་བའི་ལས་གསོག་གམ། དེ་ལྟ་མོད་ཀྱི་ཕུ་ནུ་ཁྱོད་ཀྱིས་འདི་ལྟར་དགེ་སློང་མ་ཁྱིའུ་འཁྲུ་བ་ག་ལས་མཐོང་ངམ་ཐོས། དེས་འདི་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོས་བཀྲུས་སོ། །སྐྱེ་དགུའི་བདག་མོ་ཆེན་མོས་འདི་སྐད་ཅེས་དེ་ཁོ་ནས་ཁོ་མོ་ཅག་ལ་ཡང་གནས་སྐབས་འདི་བྱུང་ངོ ། །ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུ་ལེན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བུ་ཞེས་བྱ་བ་ནི་བུ་ཆུང་ངུའོ། །ལེན་ན་ཞེས་བྱ་བ་ནི་རྩེ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ་དགེ་སློང་མས་ཅི་ཡང་རུང་བུ་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།། སྡོམ་ནི། ཁྲུས་རས་དག་ནི་བྱ་བ་དང ། །གོས་དང་བཀྲུ་བར་བྱ་བ་དང ། །སྣམ་སྦྱར་དག་ནི་རྗེ་བ་དང ། །དགེ་ཚུལ་ཆོས་གོས་སྦྱིན་པའོ། །གླེང་གཞི་ནི་མཉན་ཡོད་ནའོ། །
9.290a
དེ་ནས་བཅུ་གཉིས་སྡེ་དག་ཁྱིམ་བདག་གི་ཆུང་མ་རབ་ཏུ་མང་པོ་དང་ལྷན་ཅིག་སྒྲེན་མོར་བྱུང་ནས་ཁྲུས་བྱེད་པ་དང ། དེ་ནས་སྦོམ་དགའ་མོས་ཁོ་མོའི་རྨོངས་ཀྱི་ཚོགས་ཤིན་ཏུ་གནག་ལ་ལེགས་པར་འཁྱིལ་པ་དཔེར་ན་སྲན་མ་ཤའི་འབྲས་བུ་ལྟར་འདུག་པ་ལ་ལྟོས་ཞེས་སྟོན་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་མས་ཁྲུས་རས་བཅང་བར་བྱའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་ཀྱིས་ཁྲུས་རས་བཅང་བར་བྱའོ། །ཞེས་བཀའ་སྩལ་པ་དེའི་ཚེ་སྦོམ་དགའ་མོ་མི་ཐོགས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲུས་རས་མེད་པར་ཁྲུས་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྲུས་རས་ཞེས་བྱ་བ་ནི་ཁྲུས་ཀྱི་རས་ཏེ་དེ་མེད་པར་རོ། །ཁྲུས་བྱེད་ན་ཞེས་བྱ་བ་ལ་ཁྲུས་ནི་གཉིས་ཏེ། འཇུག་པའི་ཁྲུས་དང་དབང་བསྐུར་བའི་ཁྲུས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟ་ལྟུང་བར་ཇི་ལྟར་འགྱུར་ཞེ་ན། ་དགེ་སློང་མས་ཇི་ཙམ་ཅུང་ཟད་ཁྲུས་གཉིས་བྱེད་ན་ཁྲུས་ཀྱི་ཁྲུས་རས་མི་འཆང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་དང་པོ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་མི་གཙང་བས་གོས་པའི་གོས་དག་བཙོ་བླག་མཁན་འཁྲུར་བཅུག་པ་དང ། བྲམ་ཟེ་དང་ཁྱིམ་བདག་དག་བདག་ཅག་གི་གོས་ཀྱང་འདིས་ནི་མི་གཙང་བར་འགྱུར་རོ་ཞེས་ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས།
9.290b
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བཙོ་བླག་མཁན་ལ་གོས་འཁྲུར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཙོ་བླག་མཁན་ཞེས་བྱ་བ་ནི་ཁྱིམ་པ་མོའོ། །གོས་ཤེས་བྱ་བ་ནི། བདུན་པོ་གང་ཡང་རུང་བའོ། །འཁྲུར་འཇུག་ན་ཞེས་བྱ་བ་ནི་བཀྲུ་བཤལ་བྱེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མི་གཙང་བས་གོས་པའི་གོས་འཁྲུར་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་གཉིས་པ་རྫོགས་སྷོ།། ་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་དྲུག་པ། གླེང་གཞི་ནི་མཉན་ཡོད་ནའོ། །བུད་མེད་ནི་བརྗེད་ངས་པ་ཡིན་པས་དགེ་སློང་མ་རྣམས་ཀྱིས་ཆོས་གོས་བྱིན་གྱིས་བརླབས་པ་བརྗེད་ནས་དེ་དག་གིས་བདག་ཅག་གི་གང་དག་ནི་བྱིན་གྱིས་བརླབས། གང་དག་ནི་བྱིན་གྱིས་མ་བརླབས་པ་མ་ཤེས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེང་ཕྱིན་ཆད་དགེ་སློང་མ་རྣམས་ཀྱིས། ཚེས་བཅཝ་ལྔ་བཅཝ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་བྱའོ། །དེ་ནས་སྦོམ་དགའ་མོས་ཚེས་བཅཝ་ལྔ་བཅཝ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད་ནས། དེ་ལ་དགེ་སློང་མ་རྣམས་ཀྱིས་སྨྲས་པ། ་འཕགས་མ་ཁྱོད་ཅིའི་ཕྱིར། ཚེས་བཅཝ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད། དེས་འདི་སྐད་ཅེས་ཁོ་མོས་སྡེ་སྣོད་གསུམ་དྲན་ན་ཅིའི་ཕྱིར་ཁོ་མོས་ཆོས་གོས་བྱིན་གྱིས་བརླབ་པ་མི་དྲན་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང ། ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ།
9.291a
ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཟླ་བ་ཕྱེད་ཅིང་ཅེས་བྱ་བ་ནི་ཟླ་བ་ཕྱེད་ཅིང་ངོ ། །ཆོས་གོས་ཤེས་བྱ་བ་ནི་ལྔ་པོ་གང་ཡང་རུང་བའོ། །བྱིན་གྱིས་བརླབ་པ་ཞེས་བྱ་བ་ནི་བྱིན་གྱིས་བརླབ་པར་བྱ་བ་དྲན་པར་བྱའོ། །ཉམས་སུ་མྱོང་བར་མི་བྱེད་ན་ཞེས་བྱ་བ་ནི་སྟོན་པའི་བསླབ་པ་ཉམས་སུ་མྱོང་བར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཚེས་བཅཝ་ལྔ་བཅཝ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་གསུམ་པ་རྫོགས་སྷོ།། ་་་་་་་་་་་་་་།། གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་སྦོམ་དགའ་མོས་གར་མཁན་མོ་ལས་གླར་བཅའ་བ་བླངས་ཏེ་ཆོས་གོས་བྱིན་པ་དང ། དེས་བགོས་ནས་གར་བྱས་ཏེ་དེ་ཉིད་དུ་དྲུག་སྡེ་དག་སུན་ཕྱུང་ངོ ། །དེ་ནས་དྲུག་སྡེ་རྣམས་ཀྱིས་ཐོས་ནས་སྦོམ་དགའ་མོའི་དྲུང་དུ་སོང་སྟེ། སྦོམ་དགའ་མོ་དང་གཏུགས་ནས་སྣད་པར་བརྡེགས་སོ། །དེ་ཡང་མིག་ཕུབས་སྐྲངས་ཤིང་དབྱར་ཁང་དུ་སོང་བ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་སུས་བརྡེགས། དེས་འདི་སྐད་ཅེས་སྨྲས་སོ། །ཁོ་མོ་མིང་པོ་དག་གིས་བརྡེགས་ཀྱིས་མི་དགར་མ་བྱེད་ཅིག་།དེ་དག་གིས་འདི་སྐད་ཅེས་སྨྲས་སོ། །ཅིའི་ཕྱིར་དེས་སྐབས་དེ་རྒྱས་པར་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་མོ་ལ་དགེ་སྦྱོང་གིས་ཆོས་གོས་བྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་པ་མོ་ཞེས་བྱ་བ་ནི་ཁྱིམ་ན་གནས་པའོ། །དགེ་སྦྱོང
9.291b
གི་ཆོས་གོས་ཤེས་བྱ་བ་ནི་ངུར་སྨྲིག་གོ། །སྦྱིན་ན་ཞེས་བྱ་བ་ནི་གཏོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སྦྱོང་གི་ཆོས་གོས་ཁྱིམ་པ་མོ་ལ་བྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་།། སྡོམ་ནི། སྨེ་གབ་ཚོགས་ཀྱི་སྨེ་གབ་དང ། །བཀྲེན་པ་ཡིད་རང་འཇུག་པ་དང ། །སྲ་བརྐྱང་འབྱུང་བར་བྱ་བ་དང ། །གོས་དག་བགོ་བར་བྱ་བའོ། །གླེང་གཞི་ནི་མཉན་ཡོད་ནའོ། །དེ་ནས་བུད་མེད་ནི་སྔོན་གྱི་ལས་ཀྱིས་འཕངས་པའི་ཤུགས་ཡོད་པས་དགེ་སློང་མ་རྣམས་ཟླ་བ་ངོ་རེ་ཞིང་ཟླ་མཚན་འཛག་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྨེ་གབ་བཅང་བར་བྱའོ། །གང་གི་ཚེ་བཅོམ་ལྡན་འདས་ཀྱིས་སྨེ་གབ་བཅང་བར་བྱའོ། །ཞེས་གསུངས་པ་དེའི་ཚེ་དེ་དག་ཐོགས་ཤིང་རྒྱུ་བ་ན་ལྷུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྲད་བུས་བསྡམ་པར་བྱའོ། །ཡང་སྦོམ་དགའ་མོ་མི་ཐོགས་པས་དེ་བྱིན་པ་ལ་ཁྲག་འཛག་ཅིང་བསོད་སྙོམས་ལ་སོང་བ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་དྲིས་པ། འཕགས་མ་བྱིན་པ་ལ་ཁྲག་འཛག་པ་འོ་ནི་ཅི་ལགས། དེས་འདི་སྐད་ཅེས་མ་ལ་དྲིས་ཤིག་།སྲིང་མོ་ལ་དྲིས་ཤིག་།བུ་མོ་ལ་དྲིས་ཤིག་ཅེས་སྨྲས་པ་ན། དེ་དག་བདག་ཅག་གི་ཁྱིམ་ཐམས་ཅད་ཀྱང་བཙོག་པར་འགྱུར་རོ་ཞེས་ཕྱར་ཀ་གཏོང་བར་བྱེད། ཁ་ཟེར་བར་བྱེད། སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་སྨེ་གབ་མི་འཆང་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྨྱེ་གབ་ཅེས་བྱ་བ་ནི་བུད་མེད་ཀྱི་མི་བདེ་བ་དགག་པའོ། །མི་འཆང་ན་ཞེས་བྱ་བ་ནི་རང་གིར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །
9.292a
དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྨྱེ་གབ་མི་འཆང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་དང་པོ་རྫོགས་སྷོ།། ་་་་་་་་་་་གླེང་གཞི་ནི་མཉན་ཡོད་ནའོ། །དེ་ནས་ཕྲེང་ལྡན་མས་བཅོམ་ལྡན་འདས་ཀྱིས་དགེ་སློང་མ་རྣམས་ལ་སྨྱེ་གབ་རྗེས་སུ་གནང་ངོ་ཞེས་ཐོས་ནས་དེ་འདི་སྙམ་དུ་ཀྱེ་མའོ་བདག་གིས་དགེ་སློང་མའི་དགེ་འདུན་ཐམས་ཅད་ལ་སྨྱེ་གབ་དབུལ་ལོ་སྙམ་དུ་བསམས་སོ། །དེ་ནས་སྦོམ་དགའ་མོ་བཙུན་མོ་ཕྲེང་ལྡན་མ་གང་ན་བ་དེར་སོང་སྟེ་ཕྱིན་ནས། བཙུན་མོ་ཕྲེང་ལྡན་མ་ལ་འདི་སྐད་ཅེས་སྨྲས་སོ། །བཙུན་མོ་བཅོམ་ལྡན་འདས་ཀྱིས་དགེ་སློང་མ་རྣམས་ལ་སྨྱེ་གབ་རྗེས་སུ་གནང་ངོ ། །དེ་ནས་བཙུན་མོ་ཕྲེང་ལྡན་མས་ནང་མི་ལ་བསྒོ་བ་དང ། དེ་དག་གིས་གོས་སྣ་ཚོགས་ཀྱིས་སྒྲོམ་དག་མདུན་དུ་བཞག་གོ། །དེ་ནས་བཙུན་མོ་ཕྲེང་ལྡན་མས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་གོས་འདི་དགེ་སློང་མའི་ཚོགས་ཐམས་ཅད་ལ་སྨྱེ་གབ་དུ་རིམས་ཤིག་།དེ་ནས་སྦོམ་དགའ་མོས་གོས་འདི་དག་ཐམས་ཅད་རང་གིར་བྱས་པ་དང ། དགེ་སློང་མ་གཞན་ཞིག་བཙུན་མོ་ཕྲེང་ལྡན་མ་གང་ན་བ་དེར་སོང་སྟེ་ཕྱིན་ནས་བཙུན་མོ་ཕྲེང་ལྡན་མ་ལ་འདི་སྐད་ཅེས་སྨྲས་སོ། །བཙུན་མོ་བདག་ལ་ཡང་སྨྱེ་གབ་སྩོལ་ཅིག་།དེ་ནས་བཙུན་མོ་ཕྲེང་ལྡན་མས་དགེ་སློང་མ་དེ་ལ་འདི་སྐད་ཅེས་སྨྲས་སོ། །འཕགས་མ་བདག་གིས་དགེ་སློང་མའི་ཚོགས་ཐམས་ཅད་ཀྱི་སྨྱེ་གབ་སྦོམ་དགའ་མོའི་ལག་ཏུ་གཏད་ལགས་སོ། །ཇི་ཙམ་ན་སྦོམ་དགའ་མོ་ལ་བསླངས་པ་ལས་མ་བྱིན་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྨྱེ་གབ་ཅན་གྱི་ཚོགས་ཀྱི་སྨེ་གབ་གང་ཟག་རང་གིར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྨྱེ་གབ་ཅན་ཞེས་བྱ་བ་ནི་བུད་མེད་ན་བའོ། །ཚོགས་ཀྱི
9.292b
སྨྱེ་གབ་ཅེས་བྱ་བ་ནི་དགེ་སློང་མའི་དགེ་འདུན་དང་ཐུན་མོང་པའོ། །གང་ཟག་ཅེས་བྱ་བ་ནི་གཅིག་པུའོ། །རང་གིར་བྱེད་ན་ཞེས་བྱ་བ་ནི་བདག་གིར་རྣོན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྨྱེ་གབ་ཅན་གྱི་ཚོགས་ཀྱི་སྨྱེ་གབ་གང་ཟག་རང་གིར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་གཉིས་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་ཁྱིམ་བདག་ནད་པ་སྦྱོར་མི་བཟོད་པ་ཞིག་ཡོད་དོ། །དེ་ནས་སྦོམ་དགའ་མོ་ཁྱིམ་བདག་དེ་གང་ན་བ་དེར་སོང་སྟེ་ཕྱིན་ནས་ཁྱིམ་བདག་ལ་འདི་སྐད་ཅེས་སྨྲས་སོ། །བཞིན་བཟངས་སྲ་བརྐྱང་གི་དུས་ལ་བབ་ཀྱིས་སྲ་བརྐྱང་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་ནི་བྲོ་འཚལ་བ་ཞིག་སྟེ་ཅི་ཡང་མ་མཆིས་སོ། །དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་ཁྱོད་ལ་བསྟན་གྱིས་བཞིན་བཟངས་ཚོང་ཁང་ནས་སྐྱིན་པོ་ལོང་ལ་ཕྱིས་སྐྱིན་པ་བྱིན་ཅིག་།དེ་ནས་སྦོམ་དགའ་མོས་ཉམ་ཆུང་ངུ་སྲ་བརྐྱང་ལ་རྗེས་སུ་ཡི་རང་བར་བྱེད་དུ་བཅུག་ནས་བླངས་ཏེ་དབྱར་ཁང་དུ་སོང་ངོ ། །དེ་ནས་ཁྱིམ་བདག་དེ་དུས་གཞན་ཞིག་ན་ཚོང་པ་དེས་བཟུངས་ནས་ཀཱར་ཥ་པ་ཎ་དག་མ་བྱིན་གྱི་བར་དུ་གང་ཡང་མ་འགྲོ་ཤིག་ཅེས་བཟུང་ངོ ། །དེ་ནས་ནེའུ་ཟླ་དག་གིས་ཁྱིམ་བདག་དེ་ལ་སྨྲས་པ། གནས་འདི་ན་ཅི་བྱེད། དེས་འདི་སྐད་ཅེས་བུ་ལོན་པ་དག་གིས་བཟུང་ངོ ། །ཞེས་སྨྲས་སོ། །དེ་དག་གིས་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་བུ་ལོན་པ་དག་གིས་བཟུང ། དེས་སྐབས་དེ་རྒྱས་པར་སྨྲས་པ་དང ། དེ་དག་འདི་སྐད་ཅེས་ཤཱཀྱའི་སྲས་ཀྱི་དགེ་སྦྱོང་རྣམས་ཀྱིས་དགེ་སྦྱོང་གི་ཚུལ་དང་ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་ནད་པ་ལ་ཡང་རྗེས་སུ་ཡི་རང་བར་བྱེད་དུ་འཇུག་གོ་ཞེས་ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཉམ་ཆུང་ངུ་ལ་སྲ་བརྐྱང་འབུལ་དུ་འཇུག་གམ། རྗེས་སུ
9.293a
ཡི་རང་བར་བྱེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཉམ་ཆུང་ངུ་ཞེས་བྱ་བ་ནི་ནད་པའོ། །སྲ་བརྐྱང་འབུལ་དུ་འཇུག་གམ་ཞེས་བྱ་བ་ནི་དགེ་འདུན་གྱི་ཆོས་གོས་སོ། །རྗེས་སུ་ཡི་རང་བར་བྱེད་དུ་འཇུག་ན་ཞེས་བྱ་བ་ནི་སྐྱིན་པོ་ལེན་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉམ་ཆུང་ངུ་ལ་སྲ་བརྐྱང་རྗེས་སུ་ཡི་རང་བར་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་གསུམ་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་གནས་སུ་སྲ་བརྐྱང་བཏིང་བ་ལས་དགེ་སློང་མ་ཆོམ་རྐུན་པས་བཏོག་པ་རབ་ཏུ་མང་བ་དག་ལྷགས་ཏེ་དེ་དག་གིས་འདི་སྐད་ཅེས་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་སྲ་བརྐྱང་དབྱུང་བར་བྱའོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་སྟེ་སྲ་བརྐྱང་དབྱུང་བར་བྱའོ། །བཅོམ་ལྡན་འདས་ཀྱིས་གསུངས་པ་མ་ཤེས་ནས། ་བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ཏེ་ཞེས་བྱ་བ་ནས། དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ་དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། གནས་འདིར་དགེ་སློང་མ་ཆོམ་རྐུན་པས་བཏོགས་པ་རབ་ཏུ་མང་པོ་དག་མཆིས་ལགས་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང ། འདི་ལྟར་འཕགས་མའི་དགེ་འདུན་གྱིས་དགེ་སློང་མ་ཆོམ་རྐུན་པས་བཏོགས་པ་རབ་ཏུ་མང་པོའི་སླད་དུ་སྲ་བརྐྱང་དབྱུང་བར་མཛད་དོ། །འདི་ནི་གསོལ་བའོ། །དེ་བཞིན་དུ་ལས་ཀྱང་རྒྱས་པར་བརྗོད་པར་བྱའོ། །དེ་ནས་སྦོམ་དགའ་མོ་སྲ་བརྐྱང་འབྱིན་པ་ཉམས་སུ་མྱོང་བར་མི་བྱེད་པ་ནས་དགེ་སློང་མ་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་ཏོ། །
9.293b
དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྲ་བརྐྱང་འབྱིན་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྲ་བརྐྱང་འབྱིན་པ་ཞེས་བྱ་བ་ནི་དགེ་འདུན་གྱི་ཆོས་གོས་སོ། །འབྱིན་པ་ཉམས་སུ་མྱོང་བར་མི་བྱེད་ན་ཞེས་བྱ་བ་ནི་འཐུན་པ་མི་སྦྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་དང་ལྷན་ཅིག་སྲ་བརྐྱང་འབྱིན་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་བཞི་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་སྲ་བརྐྱང་ཕྱུང་ནས་དེར་གོས་ཀྱི་རྙེད་པ་གང་ཡིན་པ་དེ་བགོ་བར་བྱའོ་ཞེས་གསུངས་པ་དང ། དེ་ནས་སྦོམ་དགའ་མོ་གོས་ཀྱི་རྙེད་པ་འགེད་པ་ཉམས་སུ་མྱོང་བར་མི་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། །ཡང་དགེ་སློང་མ་གང་སྲ་བརྐྱང་གི་རྙེད་པ་འགེད་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །སྲ་བརྐྱང་གི་རྙེད་པ་འགེད་པ་ཞེས་བྱ་བ་ནི་གོས་འགེད་པའོ། །ཉམས་སུ་མྱོང་བར་མི་བྱེད་ན་ཞེས་བྱ་བ་ནི་མི་འདུན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གོས་ཀྱི་རྙེད་པར་འགེད་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ལེན་འདོད་པ་ཉིད་མ་ཡིན་ན་ལྟུང་བ་མེད་དོ། །ལྟུང་བྱེད་ཉི་ཤུ་གཉིས་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་།། སྡོམ་ནི། ཚུར་ཤོག་ཉེ་བར་ཞི་བྱ་དང ། །བཅོལ་ནས་འགྲོ་བར་བྱ་བ་དང ། །
9.294a
རིག་པ་མི་བླང་མི་གཞུག་དང ། །ཁ་ཟས་བཙོང་བར་མི་བྱ་བའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ཀྱི་ལྷན་ཅིག་གནས་པ་དང ། ཉེ་གནས་དག་ཕན་ཚུན་འཐབ་པ་ན་སྦོམ་དགའ་མོས་དེ་ལ་རྐྱེན་དག་ཉེ་བར་བསྒྲུབས་པས། དེས་ན་འཐབ་མོ་ཆེ་ཐང་དུ་བྱུང་ནས་དགེ་སློང་མ་རྣམས་ཀྱིས་འདི་སྐད་ཅེས་འཕགས་མ་ཚུར་སྤྱོན་ཐབ་མོ་ཉེ་བར་ཞི་བར་བགྱིའོ་ཞེས་སྨྲས་པ་དང ། སྦོམ་དགའ་མོས་འདི་སྐད་ཅེས་མགོས་མགོ་ཅིའི་ཕྱིར་མ་བཙལ། རེ་ཤིག་ཁོ་མོ་ནི་ཐབ་མོ་བྱེད་ཀྱི་ཉེ་བར་ཞི་བར་མི་བྱེད་དོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ་ཡང་དགེ་སློང་མ་གང་ཐབ་མོ་ཉེ་བར་ཞི་བར་བྱ་བའི་མཐུ་ཡོད་པར་གྱུར་ལ་ཉེ་བར་ཞི་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མཐུ་ཡོད་པར་གྱུར་ལ་ཞེས་བྱ་བ་ནི་མཐུ་དང་ལྡན་པའོ། །ཐབ་མོ་ཞེས་བྱ་བ་ནི་མཚང་འདྲུ་བའོ། །ཉེ་བར་ཞི་བ་ཞེས་བྱ་བ་ནི་རབ་ཏུ་ཞི་བའོ། །ཉེ་བར་ཞི་བར་མི་བྱེད་ན་ཞེས་བྱ་བ་ནི་མི་ཟློག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཐབ་མོ་དང་འཚང་འདྲུ་བ་ཉེ་བར་ཞི་བར་བྱ་བར་ནུས་ཤིང་མཐུ་ཡོད་པར་གྱུར་ལ་ཉེ་བར་ཞི་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གསུམ་པའི་དང་པོ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དབྱར་ཁང་སྒོ་བཅད་ནས་ལྡེ་མིག་ཁྱེར་ཏེ་ལྗོངས་རྒྱུ་ཞིང་སོང་བ་ལས་དབྱར་ཁང་དེར་མེ་ཤོར་ཏེ། །དགེ་སློང་མ་རྣམས་ཀྱིས་གསད་པར་འདོད་ན་སྒོ་དབྱེར་ལྡེ་མིག་མ་རྙེད་ནས་མེས་ཚིག་པར་གྱུར་པ་དེའི་ཚེ་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས
9.294b
བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་ཁང་མ་བཅོལ་བར་ལྗོངས་རྒྱུ་ཞིང་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དབྱར་ཁང་ཞེས་བྱ་བ་ནི་གཙུག་ལག་ཁང་ངོ ། །མ་བཅོལ་བར་ཞེས་བྱ་བ་ནི་དགེ་སློང་མ་རྣམས་ལ་ལྡེ་མིག་མ་གཏད་པར་རོ། །ལྗོངས་རྒྱུ་ཞིང་འགྲོ་ན་ཞེས་བྱ་བ་ནི་མཚམས་ཀྱི་ཕྱི་རོལ་ཏུ་འགྲོ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་པས་དགེ་སློང་མ་རྣམས་ལ་ལྡེ་མིག་མ་གཏད་པར་མཚམས་ཀྱི་ཕྱི་རོལ་དུ་བྱུང་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་མཚམས་ཀྱི་ཕྱི་རོལ་ལ་མཚམས་ཀྱི་ནང་དུ་འདུ་ཤེས་པས། དགེ་སློང་མ་རྣམས་ལ་ལྡེ་མིག་མ་གཏད་པར་མཚམས་ཀྱི་ཕྱི་རོལ་ཏུ་བྱུང་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་ཉི་ཤུ་གསུམ་པའི་གཉིས་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ཆགས་པས་སྐྱེས་པ་འདོད་ནས་དེ་སྤོས་འཚོང་གི་ཁྱེའུ་ཞིག་གི་དྲུང་དུ་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །བཞིན་བཟངས་རིག་པ་ཅུང་ཟད་ཀློག་གམ། དེས་འདི་སྐད་ཅེས་སྨྲས་ཏེ་ཀློག་གོ། །སྦོམ་དགའ་མོས་འདི་སྐད་ཅེས་སྨྲས་ཏེ། ཐོན་ཅིག་དང་ཀླག་གོ། །དེས་འདི་སྐད་ཅེས་ས་རི་ཕུ། བི་སི་རི་ཕུ། ་སི་རི་བི་སཝཱཧཱ། ཞེས་སྨྲས་སོ། །སྦོམ་དགའ་མོས་འདི་སྐད་ཡང་དང་ཡང་དུ་བརྗོད་ཅིག་ཅེས་སྨྲས་པ་དང ། ཇི་ཙམ་ན་ཁྲོས་ནས་མགོ་རེག་མོ་ངན་པ་ཞེས་སྤྱོས་སོ། །ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས་སྨྲས་སོ། །འདི་ལྟར་ཁྱོད་ཀྱིས་ཚིག་གཉིས་ཀྱང་མི་ཟིན་ན་ཇི་ལྟར་ཁྱོད་ཀྱིས་སྡེ་སྣོད་གསུམ་བཟུང ། དེས་འདི་སྐད་ཅེས་སྨྲས་སོ། །ཁོ་མོས་བརྗོད་པ་དང་པོ་ལ་བཟུང་ཟིན་མོད་ཀྱི་ཚིག་ཙམ་རང་གིར་བྱེད་དོ། །ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས།
9.295a
འཕགས་མ་ཁྱོད་འདོད་ཆགས་ཀྱིས་རབ་ཏུ་མེ་འབར་བ་ངོ་མཚར་ཏོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་ལས་རིག་པ་ཀློག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་པ་ལས་ཞེས་བྱ་བ་ནི་ཁྱིམ་ན་གནས་པ་ལས་སོ། །རིག་པ་ཞེས་བྱ་བ་ནི་སེལ་བར་བྱེད་པའོ། །ཀློག་ན་ཞེས་བྱ་བ་ནི་ཀུན་ཆུབ་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་པ་ལས་རིག་པ་ཀློག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གསུམ་པའི་གསུམ་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་སྐྱེས་པ་ཞིག་རིག་པ་ཀློག་ཏུ་བཅུག་ནས་ཀྱེ་ནང་རྗེ་སི་རི་ཕུ། བི་སི་རི་ཕུ། སི་རི་བི་སི་རི་ཕུ་སཝཱཧཱ། ཟུང་ཤིག་ཅེས་དེ་ལྟར་ལན་གཉིས་ལན་གསུམ་གྱི་བར་དུ་བཏོན་པ་དང ། དེ་ནས་མི་དེས་འདི་སྐད་ཅེས་སྨྲས་སོ། །འཕགས་མ་བདག་གིས་ཀུན་ཆུབ་པར་བཟུང་ལགས་སོ། །སྦོམ་དགའ་མོས་ཡང་དང་ཡང་དུ་ཟུང་ཤིག་ཅེས་སྨྲས་པ་དང ། དེ་ནས་མི་དེ་ཁྲོས་ནས་འདི་སྐད་ཅེས་མགོ་རེག་མོ་ངན་པ་ཁྱོད་ཀྱང་མ་མཐོང་ཡང་བླ། རིག་པ་ཡང་མེད་དུ་ཟད་དོ་ཞེས་སྨྲས་པ་དང ། ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས་སྨྲས་སོ། །འཕགས་མ་ཁྱོད་ཅིའི་ཕྱིར་དེ་ལྟར་བྱེད། སྦོམ་དགའ་མོས་འདི་སྐད་ཅེས་སྨྲས་སོ། །ཚིག་ཙམ་རང་གིར་བྱེད་དོ། །ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས་འཕགས་མ་ཁྱོད་ཉོན་མོངས་པས་མ་གོས་པ་ངོ་མཚར་ཆེའོ་ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ།
9.295b
ཡང་དགེ་སློང་མ་གང་སྐྱེས་པ་ལ་རིག་པ་ཀློག་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྐྱེས་པ་ལ་ཞེས་བྱ་བ་ནི་མི་ལའོ། །རིག་པ་ཞེས་བྱ་བ་ནི་རིག་པ་མ་ཡིན་པ་ལ་རིག་པའི་སྒྲར་གསུངས་པའོ། །ཀློག་ཏུ་འཇུག་ན་ཞེས་བྱ་བ་ནི་འདོན་དུ་འཇུག་པའོ། །ལྟུང་བྱེད་དེ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྐྱེས་པ་ལ་རིག་པ་ཀློག་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གསུམ་པའི་བཞི་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསོད་སྙོམས་མང་དུ་རྙེད་པ་དང ། དེས་བསོད་པ་གང་ཡིན་པ་དེ་ནི་ཟོས། ཕྱེ་དང་འབྲས་ཆན་ལ་སོགས་པ་ངན་པ་གང་ཡིན་པ་དེ་ནི་བཙོངས་སོ། །དེ་ནས་དུས་གཞན་ཞིག་ན་སྦོམ་དགའ་མོ་དགོས་པ་འགའ་ཞིག་གི་ཕྱིར་ཕྱི་རོལ་དུ་སོང་བ་དང ། ཕྱེ་ཉོ་བ་ཞིག་འོངས་པ་ནས། དེ་སྐྱེ་དགུའི་བདག་མོ་ཆེན་མོའི་དྲུང་དུ་སོང་སྟེ། སོང་ནས་འདི་སྐད་ཅེས་སྨྲས་སོ། །འཕགས་མ་ཇི་ག་ཕྱེ་དག་མངའ་འམ། སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །བཞིན་བཟངས་ཅི་ཁོ་མོ་ཕྱེའི་ཚོང་ཁང་གིས་བསྐོར་ཏམ། དེ་ནས་མི་དེས་འདི་སྐད་ཅེས་སྨྲས་སོ། །འཕགས་མ་དགེ་སློང་མ་དག་ཕྱེ་འཚོང་ལགས་སོ། །དེས་འདི་སྐད་ཅེས་སྨྲས་སོ། །བཞིན་བཟངས་ཕྱེ་འཚོང་བའི་དགེ་སློང་མ་དེ་གང་ཡིན། དེ་ནས་མི་དེས་འདི་སྐད་ཅེས་སྨྲས་སོ། །སྦོམ་དགའ་མོ་ལགས་སོ། །སྐྱེ་དགུའི་བདག་མོ་ཆེན་མོ་གཽ་ཏ་མཱིས་འདི་སྐད་ཅེས་དེ་ཁོ་ནས་ཁོ་མོ་ཅག་ལ་ཡང་གནས་སྐབས་འདི་བྱུང་ངོ་ཞེས་སྨྲས་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁ་ཟས་འཚོང་ན་ལྟུང་བྱེད་དོ། ཡང་གང་ཞེས་བྱ་བ་ནི་སྦོམ་དགའ་མོ་འོ། །
9.296a
ཁ་ཟས་ཤེས་བྱ་བ་ནི་ཕྱེ་ལ་སོགས་པའོ། །འཚོང་ན་ཞེས་བྱ་བ་ནི་རིན་ལེན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁ་ཟས་འཚོང་ན་ཇི་སྲིད་དུ་རིན་རང་གིར་མ་བྱས་པ་དེ་སྲིད་དུ་ཉེས་བྱས་སོ། །རང་གིར་བྱས་ན་ལྟུང་བྱེད་དོ། །ལྟུང་བྱེད་ཉི་ཤུ་གསུམ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།། སྡོམ་ནི། ཁྱིམ་གྱི་གོ་རེ་ལོང་མི་བྱ། །སྟན་ནི་སྐྱེད་དུ་མི་གཞུག་ཅིང ། །སྐུད་པ་འང་བཀལ་བར་མི་བྱ་སྟེ། །གདུགས་དང་མཆིལ་ལྷམ་མི་བཅང་བའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ཏེ། ཁྱིམ་བདག་གཅིག་གི་ཁྱིམ་དུ་བསོད་སྙོམས་ལ་ཞུགས་ནས། དེ་ནས་ཁྱིམ་བདག་གི་ཆུང་མ་དེ་ལ་འདི་སྐད་ཅེས་སྨྲས་སོ། །མཚན་བཟངས་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་གློ་བ་མི་དགའ་ལགས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅི་དེ་རིང་ཁྱོད་ཀྱིས་བེའུ་ཐམས་ཅད་འོ་མ་འཐུངས་སམ། དེས་འདི་སྐད་ཅེས་སྨྲས་སོ། །འཕགས་མ་ཁྱིམ་གྱི་གོ་རེ་ལོང་གི་རྔོ་མི་ཐོགས་ལགས་མོད། སྦོམ་དགའ་མོས་ཡང་འདི་སྐད་ཅེས་སྨྲས་སོ། །ཅི་ཁྱོད་ཀྱང་ཁབ་ཇི་ལྟ་བར་ལས་སྣ་གཅིག་པ་ཡིན་ནམ། ཁྱིམ་བདག་གི་ཆུང་མས་ཀྱང་འདི་སྐད་ཅེས་སྨྲས་སོ། །འཕགས་མ་ཁྱོད་འདི་ལ་བྱང་བ་ཅུང་ཟད་མངའ་འམ། སྦོམ་དགའ་མོས་ཀྱང་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང ། ལས་ཀྱི་གནས་གང་ལ་མ་བྱང་བ་ནི་གང་ཞིག་ཡོད། དེ་ནས་ཁྱིམ་བདག་གི་ཆུང་མ་དེས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་བདག་གི་གོ་རེ་ལོང་མཛོད་ཅིག་།དེས་འདི་སྐད་ཅེས་སྨྲས་སོ། །ཁོ་མོ་ལ་སུས་བསོད་སྙོམས་སྦྱིན་པར་འགྱུར། ཁྱིམ་བདག་གི་ཆུང་མས་འདི་སྐད་ཅེས་སྨྲས་ཏེ་བྱ་བ་ནས། ཁང་སྐྱོང་ལ་ཡང་དབུལ་ལོ་ཞེས་བྱ་བའི་བར་རོ། །
9.296b
དེ་ནས་སྦོམ་དགའ་མོས་ལྷུང་བཟེད་མཐའ་གཅིག་ཏུ་བཞག་ནས་གོས་དག་བརྫེས་ཏེ་ཁྱིམ་དེ་ཐམས་ཅད་ཆག་ཆག་ལེགས་པར་བཏབ། ཕྱག་དར་ལེགས་པར་བྱས་ནས་མལ་བཅས། ལྕགས་ཀྱི་སྣོད་དང ། དངུལ་གྱི་སྣོད་དང ། གསེར་གྱི་སྣོད་དག་བྱི་དོར་བྱས་ནས་བཞག་སྟེ། ཁྱིམ་དེ་ཐམས་ཅད་ཤིན་ཏུ་མཛེས་པར་བྱས་སོ། །དེ་ཡང་བསོད་སྙོམས་ཀྱི་ཁུར་བླངས་ནས་དབྱར་ཁང་དུ་སོང་ངོ ། །དེ་ནས་ཁྱིམ་བདག་དེས་མཐོང་ནས་འདི་སྐད་ཅེས་སྨྲས་སོ། །བཟང་མོ་ཁྱོད་ཀྱིས་དེ་རིང་ཁྱིམ་གྱི་བྱི་དོར་གཙང་ལྟར་བྱས་སོ། །དེས་འདི་སྐད་ཅེས་སྨྲས་ཏེ་འཕགས་མ་སྦོམ་དགའ་མོས་བགྱིས་ཀྱི་བདག་གིས་མ་བགྱིས་སོ། །དེས་འདི་སྐད་ཅེས་སྨྲས་སོ། །ཁྱོད་ཀྱིས་དེ་ལ་ཉི་མ་རེ་རེ་ཞིང་བསོད་སྙོམས་བྱིན་ཅིག་དང ། ཁྱོད་ཀྱི་ཁྱིམ་གྱི་གོ་རེ་ལོང་བྱེད་པར་འགྱུར་རོ། །དེ་ནས་དུས་གཞན་ཞིག་ན་སྐྱེ་དགུའི་བདག་མོ་ཆེན་མོ་གཽ་ཏ་མཱི་ཁྱིམ་དེར་བསོད་སྙོམས་ལ་ཞུགས་པ་དང ། དེ་ནས་ཁྱིམ་བདག་གི་ཆུང་མ་དེས་སྐྱེ་དགུའི་བདག་མོ་ཆེན་མོ་ལ་འདི་སྐད་ཅེས་སྨྲས་སོ། །འཕགས་མ་བདག་གི་ཁྱིམ་གྱི་གོ་རེ་ལོང་མཛོད་དེ་སྩོལ། དེས་འདི་སྐད་ཅེས་སྨྲས་སོ། །ཕུ་ནུ་མོ་ཁོ་མོས་ཟས་གཙང་གི་ཁྱིམ་གྱི་གོ་རེ་ལོང་ཡང་མ་བྱས་ན་ད་རབ་དུ་བྱུང་ནས་བྱ་འམ། དེ་ལྟ་མོད་ཀྱི་ཕུ་ནུ་མོ་ཁྱོད་ཚུལ་ཁྲིམས་དང་ལྡན་པ་ལ་མཆིད་སྩལ་བ་ནི་བསོད་ནམས་མ་ཡིན་པ་མང་དུ་བསགས་ནས་བྲན་མོར་འགྱུར་བའི་ས་བོན་བསྐྱེད་དམ། གཞན་ཡང་ཁྱོད་ཀྱིས་རབ་ཏུ་བྱུང་བ་ཁྱིམ་གྱི་གོ་རེ་ལོང་བྱེད་པ་མཐོང་བ་འམ་ཐོས་པ་སུ་ཡོད། དེས་འདི་སྐད་ཅེས་སྨྲས་སོ། །སྦོམ་དགའ་མོ་ལགས་སོ། །སྐྱེ་དགུའི་བདག་མོ་ཆེན་མོས་ཀྱང་འདི་སྐད་ཅེས་དེ་ཁོ་ནས་བདག་ཅག་ལ་ཡང་གནས་སྐབས་འདི་བྱུང་ངོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་གྱི་གོ་རེ
9.297a
ལོང་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་གྱི་གོ་རེ་ལོང་ཞེས་བྱ་བ་ནི་རང་གི་ཁྱིམ་གྱི་བྱ་བ་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་གྱི་གོ་རེ་ལོང་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བཞི་པའི་དང་པོ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། ་དེ་ནས་སྦོམ་དགའ་མོ་དགེ་སློང་མ་རྣམས་ལ་ལུང་ཀློག་དུ་འཇུག་པ་ན་དེའི་ཕྱི་བཞིན་དགེ་སློང་མ་སྟན་སྐྱེད་དུ་བཅུག་ཅིང་འདི་སྐད་ཅེས་ཁྱེར་ལ་གནས་ག་གེ་མོ་ཞིག་ཏུ་ཐོང་ཤིག་ཅེས་བསྒོ་བར་བྱེད་པ་དང ། དགེ་སློང་མ་རྣམས་ཀྱིས་ཁྱེད་དགེ་སློང་མ་རྣམས་སྟན་སྐྱེད་དུ་བཅུག་ཅིང་ཉམས་སུ་མྱོང་བར་བྱེད་པ་ན་བསོད་ནམས་མ་ཡིན་པ་མང་དུ་སྐྱེད་དོ། །ཞེས་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་ལས་སྟན་སྐྱེད་པ་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །དགེ་སློང་མ་རྣམས་ཤེས་བྱ་བ་ནི་ཆོས་འདི་པའོ་ལས་ཤེས་བྱ་བ་ནི་ལས་སོ། །སྟན་ཞེས་བྱ་བ་ནི་ཁྲིའུ་དག་གོ། །སྟན་སྐྱེད་དུ་བཅུག་ཅིང་ཞེས་བྱ་བ་ནི་ཕྱི་བཞིན་ཁྱེར་དུ་བཅུག་ཅིང་ངོ ། །ཉམས་སུ་མྱོང་བར་བྱེད་ན་ཤེས་བྱ་བ་ནི་རང་གིར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་རྣམས་ལས་སྟན་སྐྱེད་པ་ཉམས་སུ་མྱོང་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་རྒས་པ་སྦྱོར་མི་བཟོད་པ་འམ། ནད་པ་ཞིག་ཆོས་འཆད་པ་ཡིན་ན་ལྟུང་བ་མེད་དོ། ལྟུང་བྱེད་ཉི་ཤུ་བཞི་པའི་གཉིས་པ་རྫོགས་སྷོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོས་སྔ་དྲོ་ཤམ་ཐབས
9.297b
བགོས་ལྷུང་བཟེད་དང་ཆོས་གོས་བླངས་ཏེ་ཁྱིམ་བདག་གཅིག་གི་ཁྱིམ་དུ་བསོད་སྙོམས་ལ་ཞུགས་ནས་ཁྱིམ་བདག་གི་ཆུང་མ་དེ་ལ་འདི་སྐད་ཅེས་སྨྲས་སོ། །མཚན་བཟངས་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་སྐུད་པ་འཁལ་བས་གློ་བ་བྲེལ་ལོ། །གཙུག་དགའ་མོས་འདི་སྐད་ཅེས་སྨྲས་སོ། །ཁྱོད་སོང་ལ་བསོད་སྙོམས་ཁྱེར་ཏེ་ཤོག་ཤིག་དང ། ཁོ་མོས་བཀལ་ལོ་ཞེས་བསོད་སྙོམས་ཀྱི་ཕྱིར་བཀལ་ཏོ། །དེ་ནས་དུས་གཞན་ཞིག་ན་སྐྱེ་དགུའི་བདག་མོ་ཁྱིམ་དེར་བསོད་སྙོམས་ལ་ཞུགས་ཏེ་འདི་སྐད་ཅེས་སྨྲས་སོ། །ཕུ་ནུ་མོ་བསོད་སྙོམས་བྱིན་ཅིག་།ཁྱིམ་བདག་གི་ཆུང་མས་འདི་སྐད་ཅེས་སྨྲས་སོ། །འཕགས་མ་སྐད་ཅིག་གཅིག་ཁོལ་མཛོད་ཅིག་དང ། དེའི་བར་དུ་བསོད་སྙོམས་འཚལ་ཏེ་མཆི་འོ། །སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །ཕུ་ནུ་མོ་ཁོ་མོ་ཁྱིམ་པར་གྱུར་པ་ན་ཡང་འཁལ་མ་མྱོང་ན། ད་རབ་ཏུ་བྱུང་ནས་འཁལ་ལམ་དེ་ལྟ་མོད་ཀྱི་ཞེས་བྱ་བ་དང ། བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐུད་པ་འཁལ་ན་ལྟུང་བྱེད་དོ། །ཡང་གང་ཞེས་བྱ་བ་ནི་གཙུག་དགའ་མོའོ། །སྐུད་པ་ཞེས་བྱ་བ་ནི་བདུན་པོ་གང་ཡང་རུང་བའོ། །འཁལ་ན་ཞེས་བྱ་བ་ནི་ཕུང་བུར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་སྐུད་པ་འཁལ་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་སོ་སོའི་གནས་དབེན་པར་ཤུར་བུ་དང ། ལྕག་ཕོད་དང ། རྒྱ་ཅང་གི་ཕྱིར་ནི་ལྟུང་བ་མེད་དོ། །ལྟུང་བྱེད་ཉི་ཤུ་བཞི་པའི་གསུམ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོ་མཆིལ་ལྷམ་བགོས། གདུགས་ཐོགས་ཏེ་བསོད་སྙོམས་ལ་རྒྱུ་བ་དང་དེ་སྐྱེ་བོ་མང་པོ་དགོད་ཅིང་བྲམ་ཟེ་དང ། ཁྱིམ་བདག་རྣམས་འཕྱ་བའི་སྐབས་དེ
9.298a
བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གདུགས་དང ། མཆིལ་ལྷམ་ཐོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི་གཙུག་དགའ་མོའོ། །གདུགས་ཞེས་བྱ་བ་ནི་ཚ་བའི་སྐྱབས་སོ། །མཆིལ་ལྷམ་ཞེས་བྱ་བ་ནི་ལྷམ་མོ། །ཐོགས་ན་ཞེས་བྱ་བ་ནི་བདག་ཉིད་དོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གདུགས་དང ། མཆིལ་ལྷམ་ཐོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །དབྱར་ཁང་དུ་གནས་མལ་བསྲུང་བའི་ཕྱིར་མཆིལ་ལྷམ་འཆང་བ་ལ་ནི་ལྟུང་བ་མེད་དོ། །ལྟུང་བྱེད་ཉི་ཤུ་བཞི་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་་།། སྡོམ་ནི། དཔུང་པར་ཕོལ་མིག་བྱུང་བ་དང ། །སྨད་འཚོང་མ་ཡི་དགེ་སློང་མ། །དགེ་སློང་མ་དང་དགེ་སློབ་མ། །དགེ་ཚུལ་མ་ཡིས་མཉེ་མི་བྱ། །གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོའི་དཔུང་པར་ཕོལ་མིག་བྱུང་ནས་དེ་སྨན་པས་བཅིངས་ཏེ། དེ་ལྟར་བཅིངས་ཟིན་པ་དང ། དེའི་འོག་ཏུ་འདི་སྐད་ཅེས་བཞིན་བཟངས་བཅིང་བ་ཧ་ཅང་དམ་ཆེས་སོ་ཞེས་སྨྲས་སོ། །ལྷོད་པར་བྱས་པ་དང ། ཧ་ཅང་ལྷོད་ཆེས་སོ་ཞེས་དེ་ལྟར་འཆིང་དུ་འཇུག་ཅིང་འགྲོལ་དུ་འཇུག་པ་དང ། དེ་ནས་སྨན་པ་དེས་འདི་སྐད་ཅེས་སྨྲས་སོ། །ཁྱོད་འོན་ཀྱང་མ་མཐོང་ཡང་བླ། ཕོལ་མིག་ཀྱང་མ་སོས་སུ་ཟད་མོད་ཅེས་སྨྲས་ནས་སོང་ངོ ། །དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཅིའི་ཕྱིར་ཁྱོད་དེ་ལྟར་བྱེད། དེས་འདི་སྐད་ཅེས་སྨྲས་སོ། །ཁོ་མོས་དམ་པ་དང ། ལྷོད་པ་ཤེས་མོད་ཀྱི་རེག་པ་ཙམ་རང་གིར་བྱའོ། །དགེ་སློང་མ་རྣམས་ཀྱིས་འདི་སྐད་ཅེས་གང་གི་ཕྱིར་གནས་སྐབས་དེར་ཡང་ཁྱོད་འདོད་ཆགས་ཀྱི་བློ་སྐྱེས་ན་ཁྱོད་ཤིང་སྐམ་ཇི་ལྟ་བ་བཞིན་དུ་འདོད་ཆགས་ཀྱིས་རབ་ཏུ་མི་འབར་བ་ངོ་མཚར་ཆེའོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས
9.298b
བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དཔུང་པར་ཕོལ་མིག་བྱུང་བ་སྐྱེས་པ་ཡང་དང་ཡང་དུ་འཆིང་ཞིང་འགྲོལ་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་གཙུག་དགའ་མོའོ། །དཔུང་པར་ཕོལ་མིག་བྱུང་བ་ཞེས་བྱ་བ་ནི་རྨ་ཞིག་གོ། །ཡང་དང་ཡང་དུ་ཞེས་བྱ་བ་ནི་ལན་དུ་མར་རོ། །སྐྱེས་པས་འཆིང་ཞིང་འགྲོལ་དུ་འཇུག་ན་ཞེས་བྱ་བ་ནི་ཁྱིམ་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྨ་བྱུང་བ་སྐྱེས་པ་འཆིང་དུ་འཇུག་གམ། འགྲོལ་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་རྨ་ཉིད་ཡིན་ཏེ་བུ་འམ། མིང་པོ་འམ། ཕའི་དྲན་པ་བཞག་སྟེ་འཆིང་ན་ལྟུང་བ་མེད་དོ། །ལྟུང་བྱེད་ཉི་ཤུ་ལྔ་པའི་དང་པོ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ན་འོ། །དེ་ནས་སྦོམ་དགའ་མོས་བུད་མེད་སྨད་འཚོང་མ་ཞིག་རབ་ཏུ་ཕྱུང་ངོ ། །དེ་ནས་གཡོན་ཅན་དང ། ནལ་ཕྲུག་དང ། རྒྱན་པོ་དག་སྨད་འཚོང་མ་དེ་ཚོལ་བ་ན། དེ་དག་གིས་སྦོམ་དགའ་མོས་རབ་ཏུ་ཕྱུང་ངོ་ཞེས་ཐོས་ནས་དེ་དག་གིས་བློ་སྐྱེས་པ། ད་ནི་ལེགས་པ་ཞིག་བྱས་ཀྱི་བདག་ཅག་གིས་དེའི་ཟན་དང་གོས་སྦྱིན་མི་དགོས་ཏེ། དེ་ལྟ་མོད་ཀྱི་དགའ་མགུར་ནི་སྤྱད་པར་བྱའོ་སྙམ་ནས་དེ་དག་གནས་དེར་དོང་ཞིང་ཆ་མ་ཡིན་པའི་ཚིག་དག་འབྱིན་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་སྨད་འཚོང་མ་རབ་ཏུ་འབྱིན་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་གིས་སམ། གཞན་གྱིས་སྨྲས་པར་གྱུར་པའོ། །
9.299a
བུད་མེད་སྨད་འཚོང་མ་ཞེས་བྱ་བ་ནི་ཀུན་གྱིས་སྤྱད་པར་བྱ་བའོ། །རབ་ཏུ་འབྱིན་ན་ཞེས་བྱ་བ་ནི་ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་སྨད་འཚོང་མ་ཞེས་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ཡུལ་གཞན་དུ་བཀར་ནས་རབ་ཏུ་འབྱིན་ན་ལྟུང་བ་མེད་དོ། །ལྟུང་བྱེད་ཉི་ཤུ་ལྔ་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་རང་ལ་དགེ་སློང་མ་དག་མཉེད་དུ་བཅུག་པ་དང ། དེ་ལ་དགེ་སློང་མ་དག་གིས་སྨྲས་པ། དུར་ཁྲོད་སྟེན་པ་འདི་མཉེས་ཏེ་ཅི་ཞིག་བྱ། དེས་འདི་སྐད་ཅེས་ལྤགས་པའི་མདོག་འདི་འཚེར་ཞིང་གསལ་བར་བྱེད་བྱས་པ་དང ། རྒྱན་པ་པོ་དང ། ནལ་ཕྲུག་རྣམས་ཀྱི་སྙིང་འགས་པར་འགྱུར་རོ་ཞེས་བྱ་བའི་བར་དུ་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་ལ་དགེ་སློང་མ་དག་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །རང་ལ་མཉེད་དུ་འཇུག་ན་ཞེས་བྱ་བ་ནི་ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་ལྔ་པའི་གསུམ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམས་པ། བཅོམ་ལྡན་འདས་ཀྱིས་དགེ་སློང་མ་དག་གིས་མཉེ་བར་མི་བྱའོ། །ཞེས་གསུངས་པས་མ་ལ་བདག་གིས་དགེ་སློབ་མ་མཉེད་དུ་གཞུག་གོ་སྙམ་ནས་དེས་རང་ལ་དགེ་སློབ་མ་མཉེད་དུ་བཅུག་པ་དང ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ།
9.299b
བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློབ་མ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་སློབ་མ་ཞེས་བྱ་བ་ནི་ཆོས་འདུལ་བ་འདི་ལ་དགེ་སློབ་མར་འགྱུར་བའི་བསླབ་པ་ལ་སློབ་པར་འགྱུར་བའོ། །རང་ལ་མཉེད་དུ་འཇུག་ན་ཞེས་བྱ་བ་ནི་ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་དགེ་སློབ་མ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་ལྔ་པའི་བཞི་པ་རྫོགས་སྷོ།། ་་་་་་་་་་་།། གླེང་གཞི་ནི་མཉན་ཡོད་ན་འོ། །དེ་བཞིན་དུ་གཞོན་ནུ་མ་ལ་ཡང་རྒྱས་པར་བརྗོད་པར་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་ལ་གཞོན་ནུ་མ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཞོན་ནུ་མ་ཞེས་བྱ་བ་ནི་དགེ་ཚུལ་མའོ། །རང་ལ་མཉེད་དུ་འཇུག་ན་ཞེས་བྱ་བ་ནི་ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་དགེ་ཚུལ་མ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་ལྔ་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་།། སྡོམ་ནི། ཁྱིམ་པ་མོ་ཡང་མཉེད་མི་གཞུག་།ཀུན་དུ་རྒྱུ་མོ་འང་དེ་བཞིན་ནོ། །དྲི་དང་ཏིལ་གྱི་ཚིགས་མ་དང ། །གནག་པའི་རྫས་ཀྱིས་ཕྱི་བ་འོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམ་པ། བཅོམ་ལྡན་འདས་ཀྱིས་གཞོན་ནུ་མའི་བར་གྱིས་མཉེད་དུ་གཞུག་པ་བཀག་གིས་མ་ལ་བདག་གིས་ཁྱིམ་པ་མོ་མཉེད་དུ་གཞུག་གོ་སྙམ་ནས་དེས་ཁྱིམ་པ་མོ་མཉེད་དུ་བཅུག་པ་དང ། ཞེས་བྱ་བ་ནས། སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །
9.300a
དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་མོ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་པ་མོ་ཞེས་བྱ་བ་ནི་ཁྱིམ་ན་གནས་པའོ། །མཉེད་དུ་འཇུག་ན་ཞེས་བྱ་བ་ནི་བསྐུ་མཉེ་བྱེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་པ་མོ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ནད་པ་སྦྱོར་མི་བཟོད་པ་འམ། མ་འམ། བུ་འམ། བུ་མོ་འམ། མིང་པོས་མཉེད་ན་ལྟུང་བ་མེད་དོ། །ལྟུང་བྱེད་ཉི་ཤུ་དྲུག་པའི་དང་པོ་རྫོགས་སྷོ།། ་་་་་་་་་་།། གླེང་གཞི་ནི་མཉན་ཡོད་ནའོ། །དེ་བཞིན་དུ་ཀུན་དུ་རྒྱུ་མོ་ལ་ཡང་རྒྱས་པར་བརྗོད་པར་བྱ་སྟེ་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་ལ་ཀུན་ཏུ་རྒྱུ་མོ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ཀུན་ཏུ་རྒྱུ་མོ་ཞེས་བྱ་བ་ནི་གྲངས་ཅན་གྱི་རབ་ཏུ་བྱུང་བའོ། །རང་ལ་མཉེད་དུ་འཇུག་ན་ཞེས་བྱ་བ་ནི་ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་ཀུན་ཏུ་རྒྱུ་མོ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་གཉིས་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་དྲིས་སྐུད་པར་བྱེད་པ་དང ། དགེ་སློང་མ་རྣམས་ཀྱིས་སྨྲས་པ། འཕགས་མ་འདི་ཅི་བྱ། དེས་འདི་སྐད་ཅེས་སྨྲས་སོ། །ལུས་དྲིས་ཞིམ་པར་བྱའོ། །དེ་དག་གིས་འདི་སྐད་ཅེས་སྨྲས་སོ། །རང་བཞིན་གྱིས་དྲི་མི་ཞིམ་པའི་ལུས་འདི་ཁྱོད་སུའི་ཆེད་དུ་དྲི་ཞིམ་པར་བྱེད་ཅེས་བྱ་བ་ནས། འདོད་ཆགས་ཅན་གྱིས་མཐོང་ན་འདོད་ཆགས་ཀྱིས
9.300b
གོས་པར་འགྱུར་རོ། །ཞེས་བྱ་བའི་བར་དུ་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དྲིས་སྐུད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དྲིས་སྐུད་ན་ཞེས་བྱ་བ་ནི་ཙན་དན་དང ། དུ་རུ་ཀ་ལ་སོགས་ཏེ་དྲི་ཞིམ་པོས་སོ། །སྐུད་ན་ཞེས་བྱ་བ་ནི་རང་ངམ་གཞན་སྐུད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དྲིས་སྐུད་དམ། སྐུད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་གསུམ་པ་རྫོགས་སྷོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲིས་སྐུད་པ་བཀག་པ་དང་ཞེས་བྱ་བ་ནས། དེ་བཞིན་དུ་ཏིལ་གྱི་ཚིགས་མས་འཕྱི་བ་ལ་ཡང་བརྗོད་པར་བྱ་སྟེ་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཏིལ་གྱི་ཚིགས་མས་འཕྱིར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ཏིལ་གྱི་ཚིགས་མས་འཕྱི་བར་བྱེད་ན་ཐམས་ཅད་དུ་ཞེས་བྱ་བ་ནི་ཏིལ་མར་ཕྱུང་བའི་ཚིགས་མས་ལུས་འཕྱིར་འཇུག་ན་འོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཏིལ་གྱི་ཚིགས་མས་འཕྱིར་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་བཞི་པ་རྫོགས་སྷོ།། ་་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་གནག་པའི་རྫས་ཀྱིས་ལུས་ཀྱི་དྲི་མ་འཕྱི་བ་ན་དེ་ཉིད་ཉེས་དམིགས་སུ་གྱུར་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས།
9.301a
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གནག་པའི་རྫས་ཀྱིས་འཕྱིར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །གནག་པའི་རྫས་ཞེས་བྱ་བ་ནི་ལུས་ཀྱི་དྲི་མ་འཕྱི་ཞིང་གནག་པར་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གནག་པའི་རྫས་ཀྱིས་འཕྱིར་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་བདུན་པ། ་་་་་་་་སྡོམ་ནི། སྐབས་མ་ཕྱེ་བར་འདྲི་བ་དང ། །ཁྱིམ་པའི་རྒྱན་ནི་ཐོགས་པ་དང ། །སྦྲེལ་ཅིང་ཁྲུས་ནི་བྱེད་པ་དང ། །གར་དང་གླུ་དང་རོལ་མོ་མིན། །གླེང་གཞི་ནི་མཉན་ཡོད་ན་འོ། །དེ་ནས་སྦོམ་དགའ་མོ་གཙུག་ལག་ཁང་དུ་སོང་ནས་དགེ་སློང་ལ་སྐབས་མ་ཕྱེ་བར་དྲི་བ་དྲིས་པ་དང ། དགེ་སློང་དེས་དྲི་བ་དེས་དགྲོལ་བར་མ་ནུས་ནས་ཞུམ་ཞུམ་པོར་གྱུར་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་ལ་སྐབས་མ་ཕྱེ་བར་དྲི་བ་འདྲི་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་ལ་ཞེས་བྱ་བ་ནི་འཁོར་གྱི་གཙོ་བོ་ལ་འོ། །སྐབས་མ་ཕྱེ་བར་ཞེས་བྱ་བ་ནི་གསོལ་བ་མ་བྱས་པར་རོ། །དྲི་བ་འདྲི་ན་ཞེས་བྱ་བ་ནི་སངས་རྒྱས་ཀྱིས་གསུངས་པ་འམ། ཉན་ཐོས་ཀྱིས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་ལ་སྐབས་མི་ཕྱེ་བར་དྲི་བ་འདྲི་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་དང་པོ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ན་འོ། །
9.301b
དེ་ནས་སྦོམ་དགའ་མོས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་བླངས་ཏེ་ཕྱུག་པོ་ཞིག་གི་ཁྱིམ་དུ་བསོད་སྙོམས་ལ་ཞུགས་པ་དང ། དེ་དག་གི་ལུས་ཀྱི་རྒྱན་གྱི་སྣོད་སྤྲོག་མ་དག་ཏུ་རྒྱན་རྣམས་བཞག་ནས། སྐྲའི་བྱི་དོར་བྱེད་པ་ཡིན་པས་དེ་ནས་སྦོམ་དགའ་མོས་མགུལ་གདུབ་དང ། གདུ་བུ་རྒྱན་ཅན་དང ། དཔུང་རྒྱན་ལ་སོགས་པ་མཐོང་ནས་བླངས་ཏེ་ཐོགས་པ་དང ། བུད་མེད་དེ་དག་གིས་སྨྲས་པ། འཕགས་མ་འདི་ཅི་མཛད། དེས་འདི་སྐད་ཅེས་སྨྲས་སོ། །ཁོ་མོའི་ལུས་རྒྱན་གྱིས་མཛེས་སམ་ཅི་བལྟ་མོད། དེ་དག་གིས་སྨྲས་པ། མགོ་རེག་ཚུལ་གཞན་དུ་ཁས་བླངས་པ་ཁྱོད་ལ་མཛེས་སུ་ཅི་ཡོད་ཅེས་བུད་མེད་དེ་དག་དེ་ལྟར་ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པའི་རྒྱན་ཐོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ཁྱིམ་པའི་རྒྱན་ཞེས་བྱ་བ་ནི་མགུལ་གདུབ་དང ། གདུ་བུ་རྒྱན་ཅན་དང ། དཔུང་རྒྱན་ལ་སོགས་པའོ། །ཐོགས་ན་ཞེས་བྱ་བ་ནི་རྒྱན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་པའི་རྒྱན་ཐོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་གཉིས་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་མཉན་ཡོད་ཀྱི་བྲམ་ཟེ་དང ། ཁྱིམ་བདག་གི་ཆུང་མ་རབ་ཏུ་མང་པོ་དང ། ལག་པ་སྦྲེལ་ནས་འབབ་ཆུ་ཨ་ཛི་ར་བ་ཏིར་ལུས་ཁྲུས་བྱེད་པ་ན་དེ་དག་གཅིག་ལ་གཅིག་འཛུབ་མོས་འཛུགས་ཤིང་དེ་དག་དགའ་བར་བྱེད་དགའ་བར་བྱེད་དུ་འཇུག་།རྩེ་བར་བྱེད། རྩེར་འཇུག་པར་བྱེད་ཅིང་རྒོད་པ་དང ། འཕྱར་གཡེང་དང ། ལུས་ཀྱི་ཙབ་ཧྲལ་བྱེད་པ་ཉེ་བར་སྟོན་པར
9.302a
བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལག་པ་སྦྲེལ་ནས་ཁྲུས་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ལག་པ་སྦྲེལ་ནས་ཞེས་བྱ་བ་ནི་ལག་པ་སྦྲེལ་ཏེ་འོ། །ཁྲུས་བྱེད་ན་ཞེས་བྱ་བ་ལ་ཁྲུས་ནི་གཉིས་ཏེ། དབང་བསྐུར་བའི་ཁྲུས་དང ། འཇུག་པའི་ཁྲུས་ལས་དོན་འདི་ལ་ནི་འཇུག་པའི་ཁྲུས་ལ་བྱ་བར་དགོངས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཇུག་པའི་ཁྲུས་ལ་ལག་པ་སྦྲེལ་ནས་ཁྲུས་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་གསུམ་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་དགའ་སྡེའི་ཚོགས་གཉིས་པོ་གཅིག་ནི་རྒྱལ་རིགས་ཀྱི་དགའ་སྡེའོ། །གཅིག་ཤོས་ནི་བྲམ་ཟེའི་དགའ་སྡེ་འོ། །དེ་ལ་རྒྱལ་རིགས་ཀྱི་དགའ་སྡེ་ནི་གཡུལ་ལ་བྱང་བ་ཡིན་ནོ། །བྲམ་ཟེའི་དགའ་སྡེ་ནི་གར་ལ་བྱང་བ་ཡིན་ནོ། །གང་གི་ཚེ་དགའ་སྡེའི་ཚོགས་གཉིས་ལས་གཡུལ་འགྱེད་པས་འགྲན་པ་དེའི་ཚེ་རྒྱལ་རིགས་ཀྱི་དགའ་སྡེ་རྒྱལ་བར་འགྱུར་ལ། གང་གི་ཚེ་གར་གྱི་ཚེ་ནི་བྲམ་ཟེའི་དགའ་སྡེ་རྒྱལ་བར་འགྱུར་རོ། །དེ་ནས་རྒྱལ་རིགས་ཀྱི་དགའ་སྡེ་རྣམས་འདི་སྙམ་དུ་སེམས་ཏེ། བདག་ཅག་གིས་སུ་ཞིག་ལ་གར་བསླབ་སྙམ་པ་ལས་དེ་དག་འདི་སྙམ་དུ་སེམས་ཏེ། འཕགས་མ་སྦོམ་དགའ་མོ་འདི་ནི་ཤཱཀྱའི་རིགས་ལས་རབ་ཏུ་བྱུང་བ་བཟོའི་གནས་ཐམས་ཅད་དང ། ལས་ཀྱི་གནས་ཐམས་ཅད་ལ་བྱང་བ་ཡིན་ནོ་སྙམ་དུ་བསམས་ནས། སྦོམ་དགའ་མོ་གང་ན་བ་དེར་དོང་སྟེ་ཕྱིན་པ་དང ། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་གར་ལ་བྱང་བ་ཅུང་ཟད་མངའ་འམ། དེས་འདི་སྐད་ཅེས་སྨྲས་སོ། །
9.302b
ཁོ་མོས་བཟོའི་གནས་དང ། ལས་ཀྱི་གནས་གང་ལ་མ་བྱང་བ་དེ་གང་ཞིག་ཡོད། དེ་དག་གིས་འདི་སྐད་ཅེས་སྨྲས་སོ། །རེ་ཤིགས་བདག་ཅག་གིས་སླར་བཅའ་བ་སྦྱིན་གྱིས་བདག་ཅག་ལ་གར་སློབས་ཤིག་།དེས་སྨྲས་པ། འདི་ལྟར་ལག་པ་སྒྱུར་ཅིག་།འདི་ལྟར་རྐེད་པ་སྒྱུར་ཅིག་།འདི་ལྟར་རྐང་བ་ཞོག་ཤིག་ཅེས་བྱ་བ་ནས། རྒྱལ་རིགས་ཀྱི་དགའ་སྡེ་རྣམས་གར་སློབ་དུ་བཅུག་གོ་ཞེས་བྱ་བའི་བར་རོ། །དེ་ནས་རྒྱལ་རིགས་ཀྱི་དགའ་སྡེ་དེ་དག་གིས་བྲམ་ཟེའི་དགའ་སྡེ་རྣམས་གར་གྱིས་ཕམ་པར་བྱས་སོ། །དེ་ནས་བྲམ་ཟེའི་དགའ་སྡེ་རྣམས་ཀྱིས་འདི་སྐད་ཅེས་སྨྲས་སོ། །ཁྱེད་ཅག་ལ་སུས་བསླབས། དེ་དག་གིས་འདི་སྐད་ཅེས་སྦོམ་དགའ་མོས་སོ་ཞེས་སྨྲས་པ་ན། དེ་དག་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་དང ། ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་འདི་ལྟར་གར་ཡང་སློབ་ཏུ་འཇུག་གོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གར་སློབ་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གར་ཞེས་བྱ་བ་ནི་ལག་པ་དང ། རྐང་པ་སྒྱུར་བའོ། །སློབ་ཏུ་འཇུག་ན་ཞེས་བྱ་བ་ནི་སྟོན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གར་སློབ་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་བཞི་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་གར་སློབ་ཏུ་གཞུག་པར་མི་བྱའོ། །ཞེས་དགག་པར་མཛད་པ་དང ། ་དེའི་འོག་ཏུ་སྦོམ་དགའ་མོ་དགའ་སྡེའི་དྲུང་དུ་སོང་ནས་གར་སྟོན་པར་བྱེད་དོ་ཞེས་བྱ་བ་ནས།
9.303a
བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གར་སྟོན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །དེ་བཞིན་དུ་གར་སྟོན་ན་ཞེས་བྱ་བ་ནི་ཉེ་བར་སྟོན་ན་འོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གར་སྟོན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་ལྔ་པ་རྫོགས་སྷོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་བཞིན་དུ་གར་ལ་ལྟར་འགྲོ་བའི་བར་དུ་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གར་ལ་ལྟར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གར་ལ་ལྟར་འགྲོ་ན་ཞེས་བྱ་བ་ནི་ལྟད་མོ་འདོད་དེ་འགྲོ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གར་ལ་ལྟར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་དྲུག་པ་རྫོགས་སྷོ།། ་་་་་་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་དགའ་སྡེ་གཉིས་ལས་གླེངས་ནས་དེ་ནས་བྲམ་ཟེའི་དགའ་སྡེ་རྣམས་གླུའི་ཆེད་དུ་སྦོམ་དགའ་མོ་གང་ན་བ་དེར་དོང་སྟེ་ཞེས་བྱ་བ་ནས། འཕགས་མ་བདག་ཅག་ལ་ཡང་གླུ་སློབས་ཤིག་ཅེས་བྱ་བའི་བར་རོ། །དེས་ཡང་དྲུག་ལྡན་དང་ཞེས་བྱ་བ་ནས། ཤེས་གསལ་ཞེས་བྱ་བ་དང ། ཀེའི་ཤི་ཀེ་ཞེས་བྱ་བ་དང ། ས་འཛིན་པ་དག་གི་བར་དེ་ལྟ་བུ་རོལ་མོའི་དབྱངས་བདུན་རྒྱས་པར་བསླབས་པ་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གླུ་སློབ་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །གླུ་ཞེས་བྱ་བ་ནི་ཁར་འབྱིན་པའོ། །སློབ་དུ་འཇུག་ན་ཞེས་བྱ་བ་ནི་སྟོན་པར་བྱེད་ན་འོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེ་དགེ་སློང་མས་ཇི་ཙམ་ཅུང་ཟད་གླུ་སློབ་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །
9.303b
ལྟུང་བྱེད་ཉི་ཤུ་བདུན་པའི་བདུན་པ་རྫོགས་སྷོ།། ་་་་་་་་་་་་་།། གླེང་གཞི་ནི་མཉན་ཡོད་ན་འོ། །དེ་བཞིན་དུ་གླུ་སྟོན་པ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གླུ་སྟོན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ལྟུང་བའི་རིམ་པ་ནི་གོང་མ་ཇི་ལྟ་བ་དེ་བཞིན་དུ་རྗེས་སུ་འཐུན་པར་བྱའོ། །ལྟུང་བྱེད་ཉི་ཤུ་བདུན་པའི་བརྒྱད་པ་འོ།། ་་་་་་་་་་་་།། གླེང་གཞི་ནི་མཉན་ཡོད་ན་འོ། །དེ་བཞིན་དུ་གླུ་ལ་ལྟར་འགྲོ་བ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གླུ་ལ་ལྟར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ལྟུང་བའི་རིམ་པ་ནི་གོང་མ་ཇི་ལྟ་བ་དེ་བཞིན་དུ་རྗེས་སུ་འཐུན་པར་བྱའོ། །ལྟུང་བྱེད་ཉི་ཤུ་བདུན་པའི་དགུ་པའོ།། ་་་་་་་་་་་་་།། གླེང་གཞི་ནི་མཉན་ཡོད་ན་འོ། །ཞེས་བྱ་བ་ནས་རྒྱལ་རིགས་ཀྱི་དགའ་སྡེ་དག་རོལ་མོའི་ཆེད་དུ་སྦོམ་དགའ་མོ་གང་ན་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །འཕགས་མ་བདག་ཅག་ལ་རོལ་མོ་དག་སློབས་ཤིག་།དེས་པི་བང་དང ། གླིང་བུ་དང ། རྫ་རྔ་དང ། པི་བང་རྒྱུད་གཅིག་པ་དང ། བབ་བྷི་ས་ཀེ་དང ། ལྕགས་ཀྱི་སིལ་ཀྲོལ་དང ། ཤིན་ཏུ་དབྱངས་སྙན་ལ་སོགས་པ་དབྱངས་བདུན་པོ་དག་བསླབས་ནས་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རོལ་མོ་སློབ་ཏུ་འཇུག་ན་ལྟུང་བྱེད་དོ། །
9.304a
ཡང་གང་ཞེས་བྱ་བ་ནི་སྦོམ་དགའ་མོའོ། །སློབ་དུ་འཇུག་ན་ཞེས་བྱ་བ་ནི་འདོད་པའི་ཡོན་ཏན་དང་ལྡན་པའི་སྒྲ་ལ་འོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རོལ་མོ་སློབ་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་བཅུ་པའོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་བཞིན་དུ་རོལ་མོ་སྟོན་པ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རོལ་མོ་སྟོན་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྟུང་བའི་རིམ་པ་ནི་གོང་མ་ཇི་ལྟ་བ་དེ་བཞིན་དུ་རྗེས་སུ་འཐུན་པར་བྱའོ། །ལྟུང་བྱེད་ཉི་ཤུ་བདུན་པའི་བཅུ་གཅིག་པའོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་བཞིན་དུ་རོལ་མོ་ལ་ལྟར་འགྲོ་བ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རོལ་མོ་ལ་ལྟར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྟུང་བའི་རིམ་པ་ནི་གོང་མ་ཇི་ལྟ་བ་དེ་བཞིན་དུ་རྗེས་སུ་འཐུན་པར་བྱའོ། །ལྟུང་བྱེད་ཉི་ཤུ་བདུན་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་་་་་་་།། སྡོམ་ནི། དགེ་སློང་བཅས་པའི་གནས་དག་ནས། །འབའ་ཞིག་བཤང་བར་འགྲོ་མི་བྱ། །པུ་ཤེལ་ཙི་དང་སོ་མངས་དང ། །རྩཝ་ཐུམ་སྐྲ་བརྙང་བཅང་མི་བྱ། །གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོས་སྐྱེས་པ་ཞིག་ལ་འདི་སྐད་ཅེས་ཚུར་ཤོག་འདི་དང་འདི་དག་བྱའོ། །ཞེས་སྨྲས་ཏེ། ཇི་ཙམ་ན་དབྱར་ཁང་དུ་ཤོག་ཤིག་པའི་བརྡ་བྱས་སོ། །དེ་ནས་སྐྱེས་པ་དེ་ནུབ་མོ་དབྱར་ཁང་དུ་འོངས་པ་དང ། དེས་དེ་ཆབ་ཀུང་སར་བཞག་ནས་བྱ་བ་མང་པོ་དང ། སྒྲུབ་པ་མང་པོ་གང་ཡིན་པ་དེ་དག་བྱས་ནས། ཆབ་ཀུང་སར་སོང་སྟེ་སོན་ནས་སྐྱེས་པ་དེ་ལ་འདི་སྐད་ཅེས་སྨྲས་སོ། །གནས་འདི་ནི་མི་གཙང་གི་གནས་གཞན་དུ་དོང་ངོ ། །
9.304b
དེས་འདི་སྐད་ཅེས་སྨྲས་སོ། །གང་དུ་གཙུག་དགའ་མོས་འདི་སྐད་ཅེས་སྨྲས་ཏེ། ཁྱོད་ཀྱི་ཁྱིམ་དུའོ། །དེ་ནས་སྐྱེས་པ་དེས་འདི་སྐད་ཅེས་སྨྲས་སོ། །ཇི་ལྟར་འདོང་གཙུག་དགའ་མོས་འདི་སྐད་ཅེས་སྨྲས་ཏེ། ཀྱེ་རེ་ཤིག་ཁོ་མོའི་ཕྲག་པ་ལ་ཞོན་ཅིག་ཅེས་དེས་སྐྱེས་པ་དེ་ཕྲག་པ་ལ་ཞོན་པ་དང ། དེ་ནས་གཙུག་དགའ་མོ་འདི་སྙམ་དུ་སེམས་ཏེ། བདག་དགེ་སློང་མ་རྣམས་ཀྱི་སྣ་ལ་འགྲོ་བ་གང་ཅི་ཡང་རུང་བ་དེ་ཐམས་ཅད་ནི་ཚུལ་ཁྲིམས་ཙམ་གྱིས་ཡིན་ན། གལ་ཏེ་བདག་དགེ་སློང་མའི་དངོས་པོ་ཞིག་པར་གྱུར་ན་བདག་གིས་ཚིག་ཙམ་ཡང་སྨྲ་བར་ག་ལ་ནུས་ཏེ་ཇི་སྐད་དུ་གཙང་མས་འཇིག་རྟེན་ཟིལ་གནོན་ཏེ། །བརྩོག་པས་འཇིག་རྟེན་ཟིལ་མི་གནོན། །ཅེས་ཟེར་བ་ལྟ་བུའོ་སྙམ་དུ་བསམ་ནས། གཙུག་དགའ་མོས་ཁྲོས་ཏེ་འཕགས་མ་ཆོམ་རྐུན་པས་ཁྲིད་དོ་ཞེས་སྨྲས་པ་དང ། སྐྱེས་པ་དེས་ཕྲག་པ་ལས་ས་ལ་མཆོངས་ཏེ། འདི་སྐད་ཅེས་མགོ་རེག་མོ་ངན་པ་རང་གིས་བརྡ་བྱས་ལ་འདི་སྐད་ཅེས་ཆོམ་རྐུན་པས་ཁྲིད་དོ་ཞེས་སྨྲ་འམ་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་ཆབ་ཀུང་སར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་གཙུག་དགའ་མོ་འོ། །གཅིག་པུ་ཞེས་བྱ་བ་ནི་གཉིས་པ་ཤོས་མེད་པར་རོ། །ཆབ་ཀུང་སར་འགྲོ་ན་ཞེས་བྱ་བ་ནི་བཤང་བའི་སར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་གཅིག་ཏུ་ཆབ་ཁུང་སར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བརྒྱད་པའི་དང་པོའོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་པུ་ཤེལ་ཙེས་སྐྲ་འཆོས་ཤིང་མཉམ་པར་འཆང་བ་ན་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ཕུ་ནུ་མོ་དག་འདི་ཅི་བྱེད།
9.305a
དེ་དག་གིས་འདི་སྐད་ཅེས་སྨྲས་སོ། །སྐྲ་མ་འཛིངས་པར་བསྐྱེད་མོད། དགེ་སློང་མ་རྣམས་ཀྱིས་འདི་སྐད་ཅེས་ཁྱེད་ཅག་དེ་ལྟར་བྱེད་པ་ནི་སྐྲ་མ་ཡིན་གྱི་ཉོན་མོངས་པ་བསྐྱེད་དོ། །ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་པུ་ཤེལ་ཙིས་སྐྲ་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །པུ་ཤེལ་ཙིས་ཞེས་བྱ་བ་ནི་བི་ར་ཎའི་རྩ་བས་སོ། །སྐྲའི་བྱི་དོར་བྱེད་ན་ཞེས་བྱ་བ་ནི་མགོའི་སྐྲ་འཆོས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་པུ་ཤེལ་ཙིས་སྐྲའི་བྱི་དོར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བརྒྱད་པའི་གཉིས་པའོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་པུ་ཤེལ་ཙིས་སྐྲའི་བྱི་དོར་མི་བྱའོ། །ཞེས་དགག་པ་མཛད་པ་དེའི་ཚེ་སོ་མངས་ཀྱིས་བྱི་དོར་བྱེད་པ་དང ། ཞེས་བྱ་བ་ནི་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སོ་མངས་ཀྱིས་སྐྲའི་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །སོ་མངས་ཀྱིས་ཞེས་བྱ་བ་ནི་སོ་མངས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཞེས་བྱ་བའི་བར་གོང་ནས་འབྱུང་བ་བཞིན་ནོ།། ལྟུང་བྱེད་ཉི་ཤུ་བརྒྱད་པའི་གསུམ་པའོ།། ་་་་་་་་་་་་་་་་།། གླེང་གཞི་ནི་མཉན་ཡོད་ནའོ། །ཡང་རྩཝའི་ཐུམ་པོས་སྐྲའི་བྱི་དོར་བྱེད་པ་དང ། ཞེས་བྱ་བའི་བར་གྱི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྩཝའི་ཐུམ་པོས་སྐྲའི་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །རྩཝའི་ཐུམ་པོས་ཞེས་བྱ་བ
9.305b
ནི་སྡོང་བུ་གཤིབས་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཞེས་བྱ་བའི་བར་གོང་ནས་འབྱུང་བ་བཞིན་ནོ། །ལྟུང་བྱེད་ཉི་ཤུ་བརྒྱད་པའི་བཞི་པའོ།། ་་་་་་་་་་།། གླེང་གཞི་ནི་མཉན་ཡོད་ནའོ། །ཡང་སོ་མངས་དང ། རྩཝའི་ཐུམ་པོས་སྐྲའི་བྱི་དོར་བྱེད་པའི་བར་དུ་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སོ་མངས་དང་རྩཝའི་ཐུམ་པོས་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །སོ་མངས་དང་རྩཝའི་ཐུམ་པོས་ཞེས་བྱ་བ་ནི་གཉིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཞེས་བྱ་བའི་བང་གོང་ནས་འབྱུང་བ་བཞིན་ནོ། །ལྟུང་བྱེད་ཉི་ཤུ་བརྒྱད་པའི་ལྔ་པའོ།། ་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམ་པ། བདག་གིས་བྱས་སོ་ཅོག་ཐམས་ཅད་ནི་ཕུལ་ཕྱིན་པར་བྱས་ཀྱིས་མ་ལ་རེ་ཤིག་བདག་གིས་སྐྲ་བརྙེད་ཡང་ཐོགས་པར་བྱའོ། །སྙམ་དུ་བསམ་ནས། རོལ་མོ་མཁན་གྱི་རྒྱན་དང ། རོལ་མོ་མཁན་གྱི་གོས་དང ། རོལ་མོ་མཁན་གྱི་ལྷམ་ཟུང་ཅིག་བརྙས། གར་མཁན་ཞིག་ལས་སྐྲ་བརྙན་བརྙས་ཏེ། དེ་ནས་སྦོམ་དགའ་མོས་རྒྱན་ཐམས་ཅད་བགོས་ནས་སྨད་འཚོང་མ་ཡོད་པའི་རྟགས་བཙུགས་ཏེ་གནས་གཅིག་ཏུ་བསྡད་པ་དང ། དེ་ནས་སྐྱེས་པ་ཞིག་འོངས་ནས་དེས་དྲིས་པ། ཉི་མ་གཅིག་ལ་གླ་ཅི་ཙམ། དེས་འདི་སྐད་ཅེས་སྨྲས་ཏེ། ཀཱར་ཥཱ་པ་ཎ་ལྔ་བརྒྱ་འོ། །སྐྱེས་པ་དེས་འདི་སྐད་ཅེས་སྨྲས་སོ། །ཧ་ཅང་མང་ཆེས་སོ། །དེས་འདི་སྐད་ཅེས་རེ་ཤིག་གཟུགས་བཟང་བ་ལ་ལྟོས་ཤིག་།གང་གི་ཚེ་བྱེད་ཚུལ་དག་མཐོང་ནས་མགུ་བར་གྱུར་ནས་ལྷག་པར་གཞལ་དགོས་པའི་གནས་འདི་ཡོད་ཅེས་སྨྲས་པ་དང ། དེ་ནས་སྐྱེས་པ་དེས་ཀཱར་ཥ་པ་ཎ་ལྔ་བརྒྱ་བྱིན་ནོ། །དེས་སྨྲས་པ། ནང་དུ་ཞུགས་ཤིག་།དེ་ནས་སྦོམ་དགའ་མོས་བསམས་པ། བདག་དགེ་སློང་མའི་སྣ་ལ་འགྲོ་བ་གང་ཅི་ཡང་རུང་བ་དེ
9.306a
ཐམས་ཅད་ནི་ཚུལ་ཁྲིམས་དང་བརྟུལ་ཞུགས་ཙམ་གྱིས་ཡིན་ན། གལ་ཏེ་བདག་དགེ་སློང་མའི་དངོས་པོ་ཞིག་ན་ཚུལ་ཁྲིམས་རལ་པ་ཡིན་ནོ་ཞེས་བྱ་བ་ནས་སྣོད་ཆག་པ་ཇི་ལྟ་བ་བཞིན་དུ་བདག་ལ་སུ་ཞིག་འདྲི་བར་འགྱུར་སྙམ་དུ་བསམས་ནས། སྦོམ་དགའ་མོས་རོལ་མོ་མཁན་གྱི་རྒྱན་ཕུད་ནས་བྲོས་སོ། །སྐྱེས་པ་དེས་ཀྱང་འཕྲིགས་ནས་སྦོམ་དགའ་མོ་གང་ན་བ་དེར་བརྒྱུག་ཏེ་དེས་སྐྲ་བརྙེད་ནས་བཟུང་བ་དང ། སྐྲ་བརྙན་བུད་ནས་སྐྲ་བརྙན་དེ་ཡང་སྐྱེས་པའི་ལག་ཏུ་འོངས་ནས་འདི་སྐད་ཅེས་མགོ་རེག་མོ་ངན་པ་མོ་ཞེས་སྨྲས་སོ། །དེ་ནས་སྦོམ་དགའ་མོས་སྐྱེས་པ་དེ་ལ་འདི་སྐད་ཅེས་སྨྲས་སོ། །བུ་ཟན་མོའི་བུ་རྒྱལ་པོ་གསལ་རྒྱལ་གྱིས་དགེ་སློང་མ་རྣམས་བཙུན་མོའི་ཐབས་སུ་གནང་བར་ཁྱོད་ཀྱིས་མ་ཤེས་སམ། གལ་ཏེ་ཁོ་མོ་ལ་ལག་པས་རེག་པར་གྱུར་ན་ལག་པ་འཁྲིག་མའི་དྲུང་དུ་གཅོད་དུ་གཞུག་གོ། །དེས་འདི་སྐད་མགོ་རེག་མོ་ངན་པ་མོ་ཁྱོད་འདྲ་བ་ནི་གནང་བ་མ་ཡིན་ཏེ། གནང་བ་ནི་སྐྱེ་དགུའི་བདག་མོ་ཆེན་མོ་དང ། གཽ་ཏ་མཱི་སྐེམ་མོ་དང ། ུཏྤ་ལའི་མདོག་དང ། ཆོས་སྦྱིན་དང ། བཟང་ལྡན་མ་དང ། སེར་སྐྱ་མོ་དག་ཡིན་གྱིས་མགོ་རེག་མོ་ཁྱོད་འདྲ་བ་མ་ཡིན་ནོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྲ་བརྙན་ཐོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །སྐྲ་བརྙན་ཐོགས་ན་ཞེས་བྱ་བ་ནི་གར་མཁན་གྱི་སྐྲ་བརྙན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྐྲ་བརྙན་ཐོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བརྒྱད་པའི་ཚིགས་སུ་བཅད་པའི་སྡོམ་རྫོགས་སྷོ།། ་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ་ལས་ལྟུང་བྱེད་རྣམས་རྫོགས་སྷོ།། ་་་་་་་་་་་།། ད་ནི་སོ་སོར་བཤགས་པར་བྱ་བ་རྣམས
9.306b
སྨྲ་བར་བྱ་སྟེ། དེ་ལ་སོ་སོར་བཤགས་པར་བྱ་བ་རྣམས་ཀྱི་སྡོམ་གྱི་ཚིགས་སུ་བཅད་པ་ནི་འདི་ཡིན་ཏེ། སྡོམ་ལ། འོ་མ་ཞོ་དང་མར་དང་ནི། །ཞུན་མར་འབྲུ་མར་ཧཝགས་དག་དང ། །སྦྲང་རྩི་ཉ་ཤ་ཤ་དག་དང ། །ཤ་སྐམ་སློབ་པ་བསྐོས་པའོ།། ་་་་་་་་་།།གླེང་གཞི་ནི་མཉན་ཡོད་ན་འོ། །དེའི་ཚེ་བཅུ་གཉིས་སྡེ་དག་བུད་མེད་ཀྱི་བརྐམ་ཆགས་ཀྱིས་གཞན་གྱི་ཁྱིམ་དག་ནས་འོ་མ་བླངས་ཤིང་ལོངས་སྤྱོད་པར་བྱེད་དོ། །དེ་དག་འོ་མ་ཚོལ་བའི་རྒྱུས་ལུང་ནོད་པ་དང ། ཀློག་པ་དང ། ཁ་ཏོན་བྱེད་པ་དང ། རྣལ་འབྱོར་དང ། ཡིད་ལ་བྱེད་པ་དང ། ནང་གི་སེམས་ཀྱི་ཞི་གནས་ཤོར་བ་དང་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བསླང་བར་མི་བྱའོ། །ཕྱིས་ཉོ་བར་བྱེད་པ་ན་ཉེས་པ་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཉོ་བར་མི་བྱའོ། །ཉེ་དུ་དག་ལས་སློང་བ་ན་ཉེས་དམིགས་དེ་ཉིད་དུ་གྱུར་ནས། ་བཅོམ་ལྡན་འདས་ཀྱིས་བཀའ་སྩལ་པ། བསླང་བར་མི་བྱའོ། །ཇི་ཙམ་ན་དགེ་སློང་མ་ནད་པ་ཞིག་ཡོད་པ་དེ་ལ་སྨན་པས་འོ་མ་སྟེན་ཅིག་ཅེས་བསྟན་པ་དང ། དེས་འདི་སྐད་ཅེས་སྨྲས་སོ། །བཞིན་བཟངས་ཁོ་མོ་ཤི་ཟིན་ནོ། །སྨན་པས་སྨྲས་པ། ཅིའི་ཕྱིར། དེས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀག་གོ། །སྨན་པས་སྨྲས་པ། ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་པས་རྗེས་སུ་གནང་བར་འགྱུར་རོ། །ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྨན་པས་བསྟན་ན་ནད་ཀྱི་སྨན་དུ་ལོངས་སྤྱད་པར་བྱའོ། །དེ་ནས་སྦོམ་དགའ་མོ་ན་ཡང་རུང་མི་ན་ཡང་རུང་གཞན་གྱི་ཁྱིམ་དག་ནས་འོ་མ་བསླངས་ནས་ལོངས་སྤྱོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱི་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག
9.307a
ཏུ་འོ་མ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ནི་སོ་སོར་བཤགས་པར་བྱ་བའོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རང་གི་དོན་དུ་ཞེས་བྱ་བ་ནི་རང་གི་ལུས་ཀྱིའོ། །མི་ན་བར་ཞེས་བྱ་བ་ནི་ནད་ཀྱིས་མ་ཐེབས་པར་རོ། །ཁྱིམ་དག་ཏུ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་དག་ཏུ་འོ། །འོ་མ་ཞེས་བྱ་བ་ལ་འོ་མ་ནི་ལྔ་སྟེ། ་བའི་འོ་མ་དང ། མ་ཧེའི་འོ་མ་དང ། རྔ་མོའི་འོ་མ་དང ། རའི་འོ་མ་དང ། ལྔ་པ་ནི་ལུག་གི་འོ་མ་འོ། བསླང་ནས་ཞེས་བྱ་བ་ནི་གསོལ་བ་བཏབས་ནས་སོ། །འཆའ་འམ་ཟ་ན་ཞེས་བྱ་བ་ནི་ལྐོག་མར་ཁམ་གྱིས་མིད་པའོ། །དགེ་སློང་མ་དེས་ཞེས་བྱ་བ་ནི་གང་ཡིན་པའི་དགེ་སློང་མ་དེས་སོ། །དབྱར་ཁང་དུ་སོང་ནས་ཞེས་བྱ་བ་ནི་གཙུག་ལག་ཁང་དུའོ། །དགེ་སློང་མ་རྣམས་ལ་ཞེས་བྱ་བ་ནི་ཆོས་འདི་པ་དག་ལའོ། །སོ་སོར་བཤགས་པར་བྱའོ་ཞེས་བྱ་བ་ནི་འཐོལ་བར་བྱ་བའོ། །འཕགས་མ་སྨད་པའི་གནས་ཞེས་བྱ་བ་ནི་དགེ་སློང་མས་དེ་བྱ་བ་མ་ཡིན་པའོ། །མི་རིགས་པ་ཞེས་བྱ་བ་ནི་འཆགས་པར་འགྱུར་བ་འོ། །སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ། །ཞེས་བྱ་བ་ནི་ངེས་པར་འཐོལ་བའོ། །ཆོས་འདི་ནི་སོ་སོར་བཤགས་པར་བྱ་བ་ཡིན་ནོ་ཞེས་བྱ་བ་ནི་གདོན་མི་ཟ་བར་འཐོལ་བར་བྱ་བའོ། །དེ་ལ་ལྟུང་བར་ཇི་ལྟར་ཞེ་ན། དགེ་སློང་མས་ཇི་ཙམ་ཅུང་ཟད་འོ་མ་སློང་ན་ཐམས་ཅད་དུ་ཉེས་བྱས་སུ་འགྱུར་རོ། །ཐོབ་ན་ཉེས་བྱས་སོ། །ལོངས་སྤྱོད་ན་སོ་སོར་བཤགས་པར་འགྱུར་རོ། །ལས་དང་པོ་དང ། མྱོས་པ་དང ། སེམས་འཁྲུགས་པ་དང ། ཚོར་བས་ཉེན་པ་ལ་ལྟུང་བ་མེད་དོ། །དགེ་སློང་མའི་འདུལ་བ་རྣམ་པར་འབྱེད་པ་ལས། སོ་སོར་བཤགས་པར་བྱ་བ་དང་པོའོ།། ་་་་་་་་་་་།། གླེང་གཞི་ནི་མཉན་ཡོད་ན་འོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་ལ་འོ་མ་དགག་པ་མཛད་པ་དང ། དེ་ནས་ཞོ་སློང་བ་དང་ཞེས་བྱ་བ་ནས། བསླབ་པ་བཅའ
9.307b
བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཞོ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས། དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱ་སྟེ། དེར་འོ་མ་ལྔ་ཞེས་འབྱུང་བ་འདིར་ཞོ་ལྔ་ཞེས་རྒྱས་པར་བརྗོད་པར་བྱའོ། །སོ་སོར་བཤགས་པར་བྱ་བ་གཉིས་པའོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་བཞིན་དུ་མར་སར་སློང་བ་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་མར་སར་བསླངས་ནས། འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས། དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ་འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཞེས་བྱ་བ་ནས་མར་སར་ནི་ལྔའོ། །ཞེས་བྱ་བའི་བར་རོ། །ལྟུང་བའི་རིམ་པ་ལྷག་མ་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་གསུམ་པའོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་ཞུན་མར་སློང་བ་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཞུན་མར་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ། །ཞེས་སོ་སོར་བཤགས་པར་བྱ་སྟེ།
9.308a
འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ་ཞེས་བྱ་བ་ནས། ཞུན་མར་ཞེས་བྱ་བ་ནི་མར་ལྔའོ་ཞེས་བྱ་བའི་བར་རོ། །ལྟུང་བའི་རིམ་པ་ལྷག་མ་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་བཞི་པའོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་ཏིལ་མར་སློང་བ་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་དུ་ཏིལ་མར་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས། དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ་ཞེས་བྱ་བ་ནས་ཏིལ་མར་ཞེས་བྱ་བ་ནི་ཏིལ་འབྲུའི་སྙིང་ཁུའོ་ཞེས་བྱ་བའི་བར་རོ། །ལྟུང་བའི་རིམ་པ་ལྷག་མ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་ལྔ་པའོ།། ་་་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་བུ་རམ་གྱི་དབུ་བ་སློང་བ་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་བུ་རམ་གྱི་དབུ་བ་བསླངས་ནས་འཆའ་འམ་ཟ་ན། དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པ་བྱ་བ་བྱུང་གིས་ཆོས་དེ་སོ་སོར་འཆགས་སོ། །སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོ་འོ་ཞེས་བྱ་བ་ནས་བུ་རམ་གྱི་དབུ་བ་ཞེས་བྱ་བ་ནི་བུ་རམ་གྱི་འོ། །ཞེས་བྱ་བའི་བར་རོ། །ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་དྲུག་པ་འོ།། ་་་་་་་་་་་་་།། གླེང་གཞི་ནི་མཉན་ཡོད་ན་འོ། །དེ་ནས་སྦྲང་རྩི་སློང་བ
9.308b
དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་སྦྲང་རྩི་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ། །ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཞེས་བྱ་བ་ནས་སྦྲང་རྩི་ཞེས་བྱ་བ་ནི་སྦྲང་བུའི་འོ་ཞེས་བྱ་བའི་བར་རོ། །ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་བདུན་པའོ།། ་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་ཉ་ཤ་དག་སློང་བ་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཉ་ཤ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་བ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཞེས་བྱ་བ་ནས་ཉ་ཤ་ཞེས་བྱ་བ་ནི་ཆུ་ན་རྒྱུ་བ་ལ་སོགས་པའི་འོ་ཞེས་བྱ་བའི་བར་རོ། །ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་བརྒྱད་པའོ།། ་་་་་་་་་་་་།། གླེང་གཞི་ནི་མཉན་ཡོད་ནའོ། །དེ་ནས་ཤ་སློང་བ་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཤ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས། དགེ་སློང་མ་རྣམས་ལ་འཕགས་མ་སྨད་པའི་གནས། མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ། །ཞེས་སོ་སོར་བཤགས་པར་བྱ་སྟེ།
9.309a
འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ་ཡང་གང་ཞེས་བྱ་བ་ནི་སྦོམ་དགའ་མོ་འོ། །ཞེས་བྱ་བ་ནས་ཤ་ཞེས་བྱ་བ་ནི་ཕྱུགས་ལ་སོགས་པའི་འོ་ཞེས་བྱ་བའི་བར་རོ། །ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་དགུ་པའོ།། ་་་་་་་་་་་་་།། གླེང་གཞི་ནི་མཉན་ཡོད་ན་འོ། །དེ་ནས་ཤ་སྐམ་སློང་བ་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཤ་སྐམ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ། །ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །ཞེས་བྱ་ནས་ཤ་སྐམ་ཞེས་བྱ་བ་ནི་ཤ་སྐམ་པའོ་ཞེས་བྱ་བའི་བར་རོ། །ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་འཐུན་པར་བྱའོ། །སོ་སོར་བཤགས་པར་བྱ་བ་བཅུ་པའོ།། ་་་་་་་་་་་་།། གླེང་གཞི་ནི་མཉན་ཡོད་ན་འོ། །གང་གི་ཚེ་སྡེ་དཔོན་སེང་གེས་བདེན་པ་རྣམས་མཐོང་བ་དང་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་ནས། དགེ་འདུན་གྱིས་བསླབ་པའི་སྡོམ་པ་བྱིན་པ་དང་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཁྱིམ་དེར་ཞུགས་ནས་བསོད་སྙོམས་བླངས་པ་དང ། དེ་ནས་དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས་ཁྱིམ་དེར་བསླབ་པའི་སྡོམ་པ་མ་བྱིན་ནམ། དེ་དག་གིས་འདི་སྐད་ཅེས་དགེ་སློང་རྣམས་ལ་བྱིན་གྱི་དགེ་སློང་མ་རྣམས་ལ་ནི་མ་ཡིན་ནོ། །ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ་དགེ་སློང་མ་དག་དགེ་འདུན་གྱིས་བསླབ་པ་བཅས
9.309b
པའི་ཁྱིམ་གང་དག་ཡིན་པ་ནི་བསླབ་པའི་སྡོམ་པ་བཅས་པ་ཡིན་ཏེ། ཡང་དགེ་སློང་མ་གང་སློབ་པར་གྲགས་པའི་ཁྱིམ་བསླབ་པའི་སྡོམ་པ་བཅས་པ་དེ་ལྟ་བུ་དག་ཏུ་སྔར་མ་བོས་བཞིན་དུ་སོང་ནས། རང་གི་ལག་གིས་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས། ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །སློབ་པར་གྲགས་པའི་ཁྱིམ་གང་དག་ཡིན་པ་ཞེས་བྱ་བ་ནི། བདེན་པ་མཐོང་བ་དག་གིའོ། །བསླབ་པའི་སྡོམ་པ་བཅས་པ་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །སྔར་མ་བོས་བཞིན་དུ་ཞེས་བྱ་བ་ནི་འགྲོན་དུ་མ་གཉེར་བར་རོ། །སོང་སྟེ་ཞེས་བྱ་བ་ནི་སོང་ནས་སོ། །རང་གི་ལག་གིས་ཞེས་བྱ་བ་ནི་བདག་ཉིད་ཀྱིས་སོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །བླངས་ཏེ་འཆའ་འམ་ཟ་ན་ཞེས་བྱ་བ་ནི་ལྐོག་མར་ཁམ་གྱིས་མིད་པའོ། །དགེ་སློང་མ་དེས་ཞེས་བྱ་བ་ནི་གང་ཡིན་པའི་དགེ་སློང་མ་དེས་སོ། །དབྱར་ཁང་དུ་ཞེས་བྱ་བ་ནི་གཙུག་ལག་ཁང་དུ་འོ། །དགེ་སློང་མ་རྣམས་ལ་ཞེས་བྱ་བ་ནི་ཆོས་འདི་པ་དག་ལའོ། །སོ་སོར་བཤགས་པར་བྱའོ་ཞེས་བྱ་བ་ནི་འཐོལ་བར་བྱ་བའོ། །འཕགས་མ་སྨད་པའི་གནས་ཞེས་བྱ་བ་ནི་དགེ་སློང་མས་དེ་བྱ་བ་མ་ཡིན་པའོ། །མི་རིགས་པ་ཞེས་བྱ་བ་ནི་ཆགས་པར་འགྱུར་བའོ། །སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་བྱ་བ་ནི་ངེས་པར་འཐོལ་བའོ། །ཆོས་འདི་ནི་སོ་སོར་བཤགས་པར་བྱ་བ་ཡིན་ནོ་ཞེས་བྱ་བ་ནི་གདོན་མི་ཟ་བར་འཐོལ་བར་བྱ་བའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སློབ་པར་གྲགས་པའི་ཁྱིམ་བསླབ་པའི་སྡོམ་པ་བཅས
9.310a
པ་དག་ཏུ་སྔར་མ་བོས་བཞིན་དུ་ཞེས་བྱ་བ་ནས། འཆོས་སམ་ཟོས་ན་ཐམས་ཅད་དུ་སོ་སོར་བཤགས་པར་བྱ་བར་འགྱུར་རོ། །ཞེས་བྱ་བའི་བར་རོ་གལ་ཏེ་ཐོག་མ་ཉིད་ནས་བོས་པ་འམ། བསླབ་པའི་སྡོམ་པ་བག་ཡངས་སུ་གནང་བ་བྱིན་པ་ལ་ནི་ལྟུང་བ་མེད་དོ། །སོ་སོར་བཤགས་པར་བྱ་བ་བཅུ་གཅིག་པ་རྫོགས་སོ། །དགེ་སློང་མའི་འདུལ་བ་རྣམ་པར་འབྱེད་པ་ལས་སོ་སོར་བཤགས་པར་བྱ་བ་རྣམས་རྫོགས་སྷོ།། ་་་་་་་་་་་་་།། ད་ནི་བསླབ་པ་རྣམས་སྨྲ་བར་བྱ་སྟེ། དེ་ལ་བསླབ་པ་རྣམས་ཀྱི་སྔོན་གྱི་ཚིགས་སུ་བཅད་པ་ནི་འདི་ཡིན་ཏེ། ་་་་་་་སྡོམ་ལ། ཆོས་གོས་ལེགས་བགོ་མགོ་མི་གཡོག་།མཆོང་དང་ལུས་ནི་བསྒྱུར་བ་དང ། །འདུག་པ་དང་ནི་རྐང་པ་དག་།ཚོགས་སུ་ཡང་དག་བསྡུས་པ་ཡིན། །སངས་རྒྱས་བཅོམ་ལྡན་འདས་སྒྲ་ཅན་གྱི་དྲང་སྲོང་ཀུན་འཛི་ཀའི་འདུག་གནས་ན་བཞུགས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ཤཱཀྱ་མོ་སྐྲ་བྲེགས་ཤིང་གོས་ངུར་སྨྲིག་བགོས་པ་ལྔ་བརྒྱ་ཙམ་དང་ལྷན་ཅིག་སྒྲ་ཅན་གང་ན་བ་དེར་རྒྱུ་ཞིང་དོང་སྟེ། རིམ་གྱིས་རྒྱུ་ཞིང་དོང་བ་ན་སྒྲ་ཅན་གྱི་དྲང་སྲོང་ཀུན་འཛི་ཀའི་འདུག་གནས་སུ་ལྷགས་སོ། །གང་གི་ཚེ་བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་བརྟེན་ནས་ཆོས་འདུལ་བ་འདི་ལ་དགེ་སློང་མ་རྣམས་རབ་ཏུ་འབྱུང་བ་དང ། བསྙེན་པར་རྫོགས་པར་རྗེས་སུ་གནང་བར་མཛད་པ་དེའི་ཚེ་དེ་དག་བདག་ཅག་གིས་ཇི་ལྟར་ཆོས་གོས་དག་བགོ་བར་བྱ་ཞེས་མ་ཤེས་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང ། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་གོས་ཧ་ཅང་རྩེངས་པ་མ་ཡིན་པ་དང ། ཧ་ཅང་འཇོལ་བ་མ་ཡིན་པ་ཟླུམ་པོར་བགོ་བར་བྱའོ། །གང་གི་ཚེ་བཅོམ་ལྡན་འདས་ཀྱིས་ཆོས་གོས་དེ་ལྟར་བགོ་བར་བྱའོ་ཞེས་གསུངས་པ་དེའི་ཚེ། སྐྱེ་དགུའི་བདག་མོ་ཆེན་མོ་ལ་སོགས་ཏེ་རང་བཞིན་དུ་གནས་པའི་དགེ་སློང་མ་དེ་རྣམས་ཀྱིས་ཆོས་གོས་དང་ཤམ་ཐབས་བགོས་སོ། །དེ་ནས་དུས་གཞན་ཞིག་ན་དགེ་སློང་མ་བཅུ་གཉིས་སྡེ་དག་ཤམ་ཐབས
9.310b
ཧ་ཅང་རྩེངས་པར་གྱོན་པ་དང ། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཁྱེད་ཅག་ཅིའི་ཕྱིར་ཤམ་ཐབས་ཧ་ཅང་རྩེངས་པར་གྱོན། དེ་དག་གིས་འདི་སྐད་ཅེས་ཁོ་མོ་ཅག་ཁྱིམ་པ་ན་འདི་ལྟར་གོམས་སོ་ཞེས་སྨྲས་པ་ནས་བཅོམ་ལྡན་འདས་ཀྱིས་བཀའ་སྩལ་པ། ཆོས་གོས་དང་ཤམ་ཐབས་ཧ་ཅང་རྩེངས་པར་བགོ་བར་མི་བྱའོ། །དེ་བཞིན་དུ་ཤམ་ཐབས་ཧ་ཅང་འཇོལ་བར་ཡང་བགོ་བར་མི་བྱའོ། །ཞེས་དེ་ལྟར་བསླབ་པའི་གཞི་བཅའ་བ་མཛད་པ་དང ། དེ་དག་ཤམ་ཐབས་གྱོན་པ་ན་གློ་དག་ཏུ་ལྟེབས་པར་བྱེད་ནས་དེ་དག་ལ་དགེ་སློང་མ་རྣམས་ཀྱིས་སྨྲས་པ། ཁྱེད་ཅག་ཅིའི་ཕྱིར་ཤམ་ཐབས་གྱོན་པ་ན་གློ་དག་ཏུ་ལྟེབས་པར་བྱེད། དེ་དག་གིས་འདི་སྐད་ཅེས་སྨྲས་སོ། །ཁྱིམ་པ་མོ་དག་འདི་ལྟར་གྱོན་ནོ། །དེ་དག་ལ་དགེ་སློང་མ་རྣམས་ཀྱིས་ཁྱེད་ཅག་ཁྱིམ་པ་མོ་ཡིན་ནམ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང་བཅོམ་ལྡན་འདས་ཀྱིས་བཀའ་སྩལ་པ། ཤམ་ཐབས་ཧ་ཅང་རྩེངས་པ་མ་ཡིན་པ་དང ། ཧ་ཅང་འཇོལ་བ་མ་ཡིན་པ་དང ། ཤམ་ཐབས་དང་ཆོས་གོས་ཟླུམ་པོར་བགོ་བར་བསླབ་པར་བྱའོ།། ་་་་་་་་་་་་་།།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་ཆོས་གོས་གླང་པོ་ཆེའི་སྣ་ལྟར་གྱོན་པ་དང ། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་ཁྱེད་ཅིའི་ཕྱིར་ཆོས་གོས་གླང་པོ་ཆེའི་སྣ་ལྟར་གྱོན། དེ་དག་གིས་འདི་སྐད་ཅེས་ནོར་ཅན་དང ། ་ཚོང་དཔོན་དང ། དེད་དཔོན་དག་འདི་ལྟར་གྱོན་ནོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཆོས་གོས་དང་ཤམ་ཐབས་གླང་པོ་ཆེའི་སྣ་ལྟར་མ་ཡིན་པ་དང ། ལྟ་ལའི་ལོ་མ་ལྟར་བལྟབ་པ་མ་ཡིན་པ་དང ། འབྲུའི་ཕུར་མ་ལྟར་མ་ཡིན་པ་དང ། སྦྲུལ་མགོའི་གདེངས་ཀ་ལྟར་མ་ཡིན་པ་དང ། སྦྲུལ་མགོའི་གདེངས་ཀ་དགུ་པོ་ལྟར་མ་ཡིན་པར་བགོ་བར་བྱའོ།། ་་་་་་་་་་།།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་ཕྲག་པ་ཕྱུང་ནས་ཁྱིམ་དག་ཏུ་འདོང་བ་ན་དེ་དག་ལ་དགེ་སློང་མ
9.311a
རྣམས་ཀྱིས་སྨྲས་པ། ཕུ་ནུ་མོ་དག་ཁྱེད་ཅག་ཅིའི་ཕྱིར་ཕྲག་པ་ཕྱུང་ཞིང་འདོང ། དེ་དག་གིས་འདི་སྐད་ཅེས་རེ་ཤིག་གཡོན་ཅན་དག་གིས་མཐོང་ན་དེ་དག་གི་སྙིང་འགས་པར་འགྱུར་བར་བྱའོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བསྡམས་པ་དང ། ལེགས་པར་བགོས་པས་ཁྱིམ་གྱི་ནང་དུ་འཇུག་པར་བྱའོ། །ཁྱིམ་དག་ཏུ་འཇུག་པ་ན་སྒྲ་མཐོན་པོ་དང ། སྒྲ་ཆེན་པོས་འདོང་བ་ན། བཅོམ་ལྡན་འདས་ཀྱིས་བཀའ་སྩལ་པ། གཅོམ་སྐྱུང་ཞིང་འཇུག་པར་བྱའོ། །དེ་ནས་ཕན་ཚུན་དུ་ལྟ་ཞིང་འདོང་བ་ནས། བཅོམ་ལྡན་འདས་ཀྱིས་བཀའ་སྩལ་པ། མིག་མི་གཡེང་བར་ཁྱིམ་གྱི་ནང་དུ་འཇུག་པར་བྱའོ། །དེ་དག་མདུན་དུ་མི་ལྟ་བར་འདོང་བ་ནས། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བསྡམས་པ་དང ། ལེགས་པར་བགོས་པ་དང ། གཅོམ་སྐྱུངས་པ་དང ། ་མིག་མི་གཡེང་ཞིང་གཉའ་ཤིང་གང་ཙམ་དུ་ལྟ་བས་ཁྱིམ་གྱིས་ནང་དུ་འཇུག་པ་དང ། འདུག་པར་བསླབ་པར་བྱའོ། །དེ་ནས་བཅུ་གཉིས་སྡེ་དག་མགོ་གཡོགས་ནས་འདོང་བ་ན་དེ་དག་ལ་ཁྱེད་ཅིའི་ཕྱིར་དེ་ལྟར་བྱེད་ཅིང་འདོང་ཞེས་དྲིས་པ་དང ། དེ་དག་གིས་འདི་སྐད་ཅེས་སྨྲས་སོ། །ཁོ་མོ་ཅག་སྔོན་དྲ་མ་དག་གི་མནའ་མར་གྱུར་པ་ན་ཁྱིམ་དག་ན་འདི་ལྟར་བྱེད་དོ། །དེ་རྣམས་ཀྱིས་འདི་སྐད་ཅེས་སྨྲས་སོ། །ཅི་ཁྱེད་ད་དུང་ཡང་དྲ་མ་དག་གི་མནའ་མ་ཡིན་ནམ། དེ་དག་འདི་སྐད་ཅེས་མི་ཤེས་པ་གང་ཡིན་པ་དེ་སྤངས་པར་འགྱུར་ཞིང ། ཁྱེད་ཅག་ཀྱང་བསླབ་པ་ལ་བསླབ་པར་འགྱུར་རོ། །ཞེས་སྨྲས་པ་ནས་བཅོམ་ལྡན་འདས་ཀྱིས་བཀའ་སྩལ་པ། མགོ་གཡོགས་ཏེ་ཁྱིམ་གྱི་ནང་དུ་འདོང་བར་མི་བྱའོ།། ་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་བརྒྱད་པ་སྟེ་ཐ་མའོ། །དེ་ནས་བཅུ་གཉིས་སྡེ་དག་ལག་པ་གཉིས་ཀྱིས་ཤིང་ང་དཔུང་ཆད་བརྫེས་ནས་འདོང་བ་ན། དེ་རྣམས་ཀྱིས་ཁྱེད་ཅག་ཅིའི་ཕྱིར་དེ་ལྟར་བྱེད་ཅིང་འདོང་ཞེས་དྲིས་པ་དང ། དེ་དག་གིས་འདི་སྐད་ཅེས་སྨྲས་སོ། །
9.311b
དྲ་མའི་མནའ་མ་དག་འདོང་ན་དེ་ལྟར་བྱེད་དོ། །དེ་རྣམས་ཀྱིས་འདི་སྐད་ཅེས་སྨྲས་སོ། །ཅི་ཁྱེད་ཅག་དྲ་མའི་མནའ་མ་ཡིན་ནམ། བཅུ་གཉིས་སྡེ་དག་གིས་འདི་སྐད་ཅེས་མི་ཤེས་པ་གང་ཡིན་པ་དེ་སྤངས་པར་འགྱུར་ཞིང ། ཁྱོད་ཅག་ཀྱང་བསླབ་པ་ལ་བསླབ་པར་འགྱུར་རོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་བརྫེ་བར་ཁྱིམ་དེར་འཇུག་པར་བྱའོ། །དེ་ནས་བཅུ་གཉིས་སྡེ་དག་ཇི་ལྟར་ཕྱུགས་རྫི་དག་འདོང་བ་བཞིན་དུ་ཆོས་གོས་དག་ཕྲག་པ་ལ་གཟར་ཏེ་འདོང་བ་ནས། བཅོམ་ལྡན་འདས་ཀྱིས་བཀའ་སྩལ་པ། མི་གཟར་བར་ཁྱིམ་གྱི་ནང་དུ་འཇུག་པར་བྱའོ། །དེ་ནས་བཅུ་གཉིས་སྡེ་དག་ཁྱེའུ་དག་བྱིས་པའི་གྲཝ་གང་དུ་འདི་ལྟར་འདོང་ངོ་ཞེས་གཉའ་གོང་དུ་བསྣོལ་ཏེ་ཁྱིམ་གྱི་ནང་དུ་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། གཉའ་གོང་དུ་མི་བསྣོལ་བར་ཁྱིམ་གྱི་ནང་དུ་འཇུག་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཕྲག་པ་གཉིས་ལ་གཟར་ནས་ཁྱིམ་གྱི་ནང་དུ་འདོང་བ་ནས། ཞེས་བྱ་བ་ནས། འདི་སྐད་ཅེས་གཡོག་དག་འགྲོ་བ་ལྟར་འདོང་ངོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མགོ་མི་གཡོག་པ་དང ། མི་བརྫེ་བ་དང་མི་གཟར་བ་དང ། གཉའ་གོང་དུ་མི་བསྣོལ་བ་དང ། ཕྲག་པ་གཉིས་ལ་མི་གཟར་བར་ཁྱིམ་གྱི་ནང་དུ་འཇུག་པ་དང ། འདུག་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་གཡོན་ཅན་དག་འདི་ལྟར་འདོང་ངོ་ཞེས་ཁྱིམ་གྱི་ནང་དུ་གད་རྒྱངས་དག་བྱེད་ཅིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་བཅོས་མ་འདི་ལྟར་འདོང་ངོ་ཞེས་ཁྱིམ་གྱི་ནང་དུ་འགྲུམ་ཞིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་རྐང་པའི་བྲང་བ་དྲས་པ་དག་འདི་ལྟར་འདོང་ངོ་ཞེས་ཁྱིམ་གྱི་ནང་དུ་རྐང་པ་བྲང་བས་འཛུགས་ཤིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་བྱ་བའི
9.312a
བར་རོ། །དེ་ནས་བཅུ་གཉིས་སྡེ་དག་ཁྱིམ་འབིགས་པ་དག་འདི་ལྟར་འདོང་ངོ ། །ཞེས་ཁྱིམ་གྱི་ནང་དུ་འཕྱེ་ཞིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ནོར་ཅན་དང ། ཚོང་དཔོན་དག་འདི་ལྟར་འདོང་ངོ་ཞེས་ཁྱིམ་གྱི་ནང་དུ་དཀུར་བརྟེན་ཅིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། མི་བགད་པ་དང་མི་མཆོང་བ་དང ། བྲང་བས་མི་གཟུག་པ་དང ། མི་འཕྱེ་བ་དང ། དཀུར་མི་བརྟེན་པར་ཁྱིམ་གྱི་ནང་དུ་འཇུག་པ་དང ། འདུག་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་གླང་པོ་ཆེ་དག་འདི་ལྟར་འགྲོའོ་ཞེས་ལུས་སྒྱུར་ཞིང་འགྲོ་ཞེས་བྱ་བ་ནས་བཅོམ་ལྡན་འདས་ཀྱིས་བཀའ་སྩལ་པ། ལུས་སྒྱུར་ཞིང་ཁྱིམ་གྱི་ནང་དུ་འཇུག་པར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ནོར་ཅན་དང་ཚོང་དཔོན་དག་འདི་ལྟར་འདོང་ངོ་ཞེས་ཁྱིམ་གྱི་ནང་དུ་ལག་པ་དཀྱོགས་ཀ་བྱེད་ཅིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་འགྲོ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་སྲོག་ཆགས་རྩངས་པ་དག་འདི་ལྟར་འགྲོའོ་ཞེས་ཁྱིམ་གྱི་ནང་དུ་མགོ་སྒྱུར་ཞིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་འགྲོ་བ་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་གཡོན་ཅན་དག་འདི་ལྟར་འདོང་ངོ་ཞེས་ཁྱིམ་གྱི་ནང་དུ་ལག་པ་སྦྲེལ་ཏེ་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཤེད་འཐུན་དག་འདི་ལྟར་འདོང་ངོ་ཞེས་ཁྱིམ་གྱི་ནང་དུ་ཕྲག་པ་སྤྲད་ཅིང་འགྲོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ལུས་མི་སྒྱུར་བ་དང ། ལག་པ་མི་བཀྱོག་པ་དང ། མགོ་མི་བསྒྱུར་པ་དང ། ལག་པ་མི་སྦྲེལ་བ་དང ། ཕྲག་པ་མི་སྤྲད་པར་ཁྱིམ་གྱི་ནང་དུ་འཇུག་པ་དང ། འདུག་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་བྲམ་ཟེ་དང ། ཁྱིམ་བདག་དག་གི་ཁྱིམ་དུ་མ་བསྒོ་བར་སྟན་དག་ལ་འདུག་པ་དང །
9.312b
དེ་དག་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འདུག་པར་མི་བྱའོ། །གང་གི་ཚེ་བཅོམ་ལྡན་འདས་ཀྱིས་འཆར་ཀ་ལས་བརྟེན་ཏེ་སྟན་ལ་སོ་སོར་བརྟགས་ཏེ་འདུག་པར་བྱའོ་ཞེས་བསླབ་པའི་གཞི་བཅའ་བ་མཛད་པ་དང ། དེ་ནས་ཡང་བཅུ་གཉིས་སྡེ་དག་ཁྱིམ་གྱི་ནང་དུ་སྟན་ལ་མ་བརྟགས་པར་འདུག་པ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་འདུག་པར་མི་བྱའོ། །གང་གི་ཚེ་བཅོམ་ལྡན་འདས་ཀྱིས་སེར་སྐྱའི་གཞིར་འཆར་ཀ་ལས་བརྟེན་ཏེ་ལུས་ཐམས་ཅད་ཀྱིས་ལྗིད་ཀྱིས་མནན་ཏེ་འདུག་པར་མི་བྱའོ་ཞེས་བསླབ་པའི་གཞི་བཅའ་བ་མཛད་པ་དང ། དེ་ནས་བཅུ་གཉིས་སྡེ་དག་ཁྱིམ་གྱི་ནང་དུ་ལུས་ཐམས་ཅད་ཀྱི་ལྗིད་ཀྱིས་མནན་ཏེ་འདུག་པ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་འདུག་པར་མི་བྱའོ། །དེ་ནས་བཅུ་གཉིས་སྡེ་དག་གཡོན་ཅན་དག་འདི་ལྟར་འདུག་གོ་ཞེས་ཁང་པའི་ནང་དུ་རྐང་པ་བསྣོལ་ནས་འདུག་ཅེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འདུག་པར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ནོར་ཅན་དང ། ཚོང་དཔོན་དག་འདི་ལྟར་འདུག་གོ་ཞེས་ཁྱིམ་གྱི་ནང་དུ་བརླ་བསྣོལ་ཏེ་འདུག་ཅེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་གྱི་ནང་དུ་མ་བགོ་བར་སྟན་ལ་འདུག་པར་མི་བྱ་བ་དང ། སོ་སོར་མ་བརྟགས་པ་མ་ཡིན་པ་དང ། ལུས་ཐམས་ཅད་ཀྱིས་ལྗིད་ཀྱིས་མི་མནན་པ་དང ། རྐང་པ་མི་བསྣོལ་བ་དང ། བརླ་མི་བསྣོལ་བར་ཁྱིམ་གྱི་ནང་དུ་འདུག་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་གར་ལ་ལྟ་བ་དག་འདི་ལྟར་འཁོད་དོ་ཞེས་སྟན་ཅིག་ལ་དཀུ་དང་དཀུར་སྤྲད་ནས་འདུག་ཅེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འདུག་པར་མི་བྱའོ། །ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་སེམས་ཁོངས་སུ་ཆུད་པ་དག་འདི་ལྟར་འཁོད་དོ་ཞེས་ལོང་བུའི་སྟེང་དུ་ལོང་བུ་བཞག་སྟེ་འདུག་ཅེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འདུག་པར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་རྐང་པ་བཀུག་སྟེ་འདུག་པ་དང ། དེ་ནས་བྲམ་ཟེ་དང །
9.313a
ཁྱིམ་བདག་གི་ཆུང་མ་དག་འོངས་ནས་རྐང་པ་ལ་ཕྱག་བྱེད་པ་ན་དེ་དག་གིས་རྐང་པ་ཕྱེ་བ་དང ། དེ་དག་གི་མགོ་བོ་ས་ལ་ཐུག་ནས་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། རྐང་པ་བཀུག་སྟེ་འདུག་པར་མི་བྱའོ། །དེ་ནས་བཅུ་གཉིས་སྡེ་དག་ཁྱིམ་གྱི་ནང་དུ་རྐང་པ་གདངས་ནས་འདུག་པ་དང ། བྲམ་ཟེ་དང་ཁྱིམ་བདག་གི་ཆུང་མ་དེ་དག་འོངས་ནས་རྐང་པ་ལ་ཕྱག་བྱས་པ་དང ། དེ་ནས་བཅུ་གཉིས་སྡེ་དག་གིས་དེ་དག་ལ་ནད་མེད་པར་གྱུར་ཅིག་ཅེས་བྱ་བའི་ཚིག་ཕྱེད་སྨྲས་པ་ན། འདི་སྐད་ཅེས་ཅིའི་ཕྱིར་ནད་མེད་པར་གྱུར་ཅིག་ཅེས་རྫོགས་པར་མི་གསུང་ཞེས་སྨྲས་པ་དང ། བཅུ་གཉིས་སྡེ་དག་གིས་འདི་སྐད་ཅེས་འདི་ལྟར་ཁྱེད་ཀྱིས་རྐང་པ་ཡ་གཅིག་ལ་ཕྱག་བྱས་ཀྱིས་རྐང་པ་ཡ་གཅིག་ལ་ཡང་ཕྱག་བྱོས་ཤིག་དང་བྱའོ་ཞེས་སྨྲས་པ་ན་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། རྐང་པ་གདངས་ཏེ་འདུག་པར་མི་བྱའོ། །དེ་ནས་བཅུ་གཉིས་སྡེ་དག་ཁྱིམ་གྱི་ནང་དུ་རྐང་པ་ཧ་ཅང་བཀུག་ཏེ་སྟེ་འདུག་པ་དང ། ཇི་ཙམ་ན་བྲམ་ཟེ་དང་ཁྱིམ་བདག་གི་ཆུང་མ་དག་ཕྱག་བྱེད་པ་ན་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། དཀུ་དང་དཀུར་མི་སྤྲད་པ་དང ། ལོང་བུའི་སྟེང་དུ་ལོང་བུ་མི་བཞག་པ་དང ། རྐང་པ་མི་དགུག་པ་དང ། རྐང་པ་མི་གདངས་པར་ཁྱིམ་གྱི་ནང་དུ་འདུག་པར་བསླབ་པར་བྱའོ། ་་་་་་་་་།སྡོམ་ལ། ལེགས་པར་བླང་དང་མ་འོངས་དང ། །ཙུག་ཙུག་འབྲུ་ནི་འབྱེད་པ་དང ། །ལག་པ་དང་ནི་ཁ་ཟེར་དང ། །མ་བཏིང་བ་དང་འགྲེང་སྟེ་མིན། །སངས་རྒྱས་བཅོམ་ལྡན་འདས་ཡུལ་བྷར་གའི་ཆུ་སྲིན་བྱིས་པ་གསོད་ཀྱི་རི་འཇིགས་རུང་གི་ཚལ་རི་དགས་ཀྱི་ནགས་ན་བཞུགས་སོ། །དེའི་ཚེ་རྒྱལ་བུ་རྟོགས་ལྡན་གྱིས་ཆུ་སྲིན་བྱིས་པ་གསོད་ཀྱི་རི་ལ་ཁང་བཟངས་པདྨ་དཀར་པོ་སར་པ་ཅན་ཞེས་བྱ་བ་ཞིག་རྩིག་ཏུ་བཅུག་ནས་དེར་སངས་རྒྱས་བཅོམ་ལྡན་འདས་དགེ་སློང་དང་དགེ་སློང་མ་རྣམས་དང་ཐབས་ཅིག་དུ་སྤྱན་དྲངས་སོ། །དེ་ནས་རྒྱལ་བུ་གཞོན་ནུ་རྟོགས་ལྡན་གྱི་འཁོར་ནི་མ་དད་པ་ཡིན་པས་དེ་དག་གིས་ཁ་ཟས་ཀྱི་གོང་བུ་དྲག་ཏུ་བོར་བས་དགེ་སློང་མ་རྣམས་ཀྱི་ལག་པ་དང་ལྷུང་བཟེད་གཅོག་པར་བྱེད་དོ། །དེ་ནས་ཡང་ཕྱོགས་གཅིག་ན་བཅུ་གཉིས་སྡེ་དག་འཁོད་པས་དེ་དག་གིས་གཅིག་ལ་གཅིག་འདི་སྐད་ཅེས་གཙུག་དགའ་མོ། ཉེ་དགའ་མོ། །སྦོམ་དགའ་མོ། །བདག་ཅག་གིས་བུ་གསོད
9.313b
མོའི་བུ་འདི་དག་བསླབ་པར་བྱའོ་ཞེས་སྨྲས་ནས་གང་གི་ཚེ་ཁ་ཟས་འོང་བ་དེའི་ཚེ་ལྷུང་བཟེད་བཟེད་ནས་ཕྱིར་བཀྱེད་པ་དང་འབྲས་ཆན་དེ་དག་ས་ལ་བོ་བ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཁ་ཟས་བླང་བར་བྱའོ། །དེ་བཞིན་དུ་ཁྱིམ་ཞིག་ཏུ་སྤྱན་དྲངས་པ་དང་ཞེས་བྱ་བའི་བར་དུ་སྟེ། འབྲས་ཆན་དང་ཚོད་མ་ཇི་སྙེད་ཀྱིས་ལྷུང་བཟེད་ནས་ས་ལ་འབོ་བ་དེ་སྙེད་བླངས་ནས། བཅོམ་ལྡན་འདས་ཀྱིས་བཀའ་སྩལ་པ། མུ་དང་ཁ་ད་ཆད་མ་ཡིན་པར་ཁ་ཟས་བླང་བར་བྱའོ། །མཉན་ཡོད་དུ་ཁྱིམ་བདག་གཅིག་གིས་ཞེས་བྱ་བ་ནས་ཁྱིམ་དུ་སྤྱན་དྲངས་སོ་ཞེས་བྱ་བའི་བར་ཏེ། བཅུ་གཉིས་སྡེ་དག་ལ་འབྲས་ཆན་དང་ཚོད་མ་མཉམ་པར་བྲིམས་པ་ན་ལྷག་པར་སློང་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཟན་འབྲས་ཆན་དང་མཉམ་པར་བཟའ་བར་བྱའོ། །དེ་བཞིན་དུ་ཡང་ཁྱིམ་བདག་ཅིག་གིས་ཁྱིམ་དུ་སྤྱན་དྲངས་པ་དང་ཞེས་བྱ་བའི་བར་ཏེ། དེ་ན་ཡང་འབྲས་ཆན་ནི་མང་ལ་ཚོད་མ་ནི་ཆེས་ཉུང་བ་དང ། དེ་དག་འབྲས་ཆན་གྱིས་ཚོད་མ་བཀབ་ནས་ཡང་སློང་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འབྲས་ཆན་གྱིས་ཚོད་མ་དགབ་པར་མི་བྱའོ། །དེ་བཞིན་དུ་གཞན་དུ་ཡང་ཞེས་བྱ་བའི་བར་ཏེ། ཚོད་མ་ནི་མང་ལ་འབྲས་ཆན་ནི་ཉུང་བ་དང ། དེ་དག་མང་དུ་འདོད་པའི་ཕྱིར་ཚོད་མས་འབྲས་ཆན་བཀབ་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཁ་ཟས་བླངས་ཏེ་བཟའ་བ་དང ། ་ཁ་ད་ཆད་དུ་མ་ཡིན་པ་དང ། ཚོད་མ་དང་མཉམ་པ་དང ། མང་དུ་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ་པ་དང ། ཚོད་མས་འབྲས་ཆན་མི་དགབ་པར་བསླབ་པར་བྱའོ། །དེ་ནས་བཅུ་གཉིས་སྡེ་དག་བཅའ་བ་རྣམས་མ་འོངས་པར་ལྷུང་བཟེད་བཟེད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཟེད་པར་མི་བྱའོ། །དེ་ནས་སྦོམ་དགའ་མོའི་མདུན་ན་གྲལ་གྱི་སྣ་ལ་དགེ་སློང་མ་རབ་ཏུ་ཕྱུང་བ་རྒན་མོ་ཞིག་ཁ་གདངས་ཏེ་འདུག་པ་དང ། དེ་ནས་སྦོམ་དགའ་མོས་དེའི་ཁར་ལ་ཐུ་ཞིག་བཙངས་པ་ནས། བཅོམ་ལྡན་འདས་ཀྱིས་བཀའ་སྩལ་པ།
9.314a
ཁམ་མ་གཟས་པར་ཁ་གདང་བར་མི་བྱའོ། །དེ་ནས་བཅུ་གཉིས་སྡེ་དག་ཁ་ཟས་ཟ་བ་ན་སྒྲ་འབྱིན་པར་བྱེད་པ་དང ། དགེ་སློང་མ་རྣམས་ཀྱིས་སྨྲས་པ། ཀྱེ་ཕུ་ནུ་མོ་དག་དེ་ལྟར་བྱེད་པ་ཅི་ཐ་ཚིག་།དེ་དག་གིས་འདི་སྐད་ཅེས་མིང་བརྗེད་ན་མི་རུང་ངོ་ཞེས་སྨྲས་པ་ན། བཅོམ་ལྡན་འདས་ཀྱིས་བཀའ་སྩལ་པ། ཁ་ཁམ་གྱིས་བཀང་བ་དང་བཅས་པས་སྨྲ་བར་མི་བྱའོ། །དེ་ནས་བཅུ་གཉིས་སྡེ་དག་འབྲས་ཆན་འབྲུ་གཉིས་སམ་གསུམ་ཞིག་ཁར་འཇུག་པ་དང ། ཞེས་བྱ་བ་ནས་འདི་སྐད་ཅེས་ཡི་གར་མི་འོང་བ་ལ་བྱིན་པ་དང་འདི་ལྟར་ཟའོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཁམ་ཧ་ཅང་ཆུང་བར་མ་ཡིན་པར་བྱའོ། །དེ་ནས་བཅུ་གཉིས་སྡེ་དག་ཁམ་ཧ་ཅང་ཆེ་བར་ཁར་འཇུག་པར་བྱེད་པ་དང་ཞེས་བྱ་བ་ནས་འདི་སྐད་ཅེས་ལྟོག་པ་དག་འདི་ལྟར་ཟ་འོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཅའ་བ་དང་བཟའ་བ་མ་འོངས་པར་ལྷུང་བཟེད་བཟེད་པར་མི་བྱ་བ་དང ། ཁམ་མ་བཟས་པར་ཁ་གདངས་པར་མི་བྱ་བ་དང ། ཁ་ཁམ་གྱིས་བཀང་བ་དང་བཅས་པས་སྨྲ་བར་མི་བྱ་བ་དང ། ཁམ་ཧ་ཅང་ཆུང་བ་མ་ཡིན་པ་དང ། ཁམ་ཧ་ཅང་ཆེ་བ་མ་ཡིན་པར་ཁམ་རན་པར་བྱ་བ་ལ་བསླབ་པར་བྱའོ། །ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཁ་ཟས་ཙུག་ཙུག་བྱེད་ཅིང་ཟ་བ་ན་དེ་དག་ལ་དགེ་སློང་མ་རྣམས་ཀྱིས་སྨྲས་པ་དེ་ལྟར་བྱེད་པ་ཅི་ཐ་ཚིག་།དེ་དག་གིས་འདི་སྐད་ཅེས་བྱིས་པ་དག་ཟ་བ་འདི་ལྟར་བྱེད་དོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཙུག་ཙུག་མི་བྱ་བར་ཁ་ཟས་བཟའ་བར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཧུ་ཧུ་བྱེད་ཅིང་ཁ་ཟས་ཟ་བ་ན་ཞེས་བྱ་བ་ནས་འདི་སྐད་ཅེས་ནད་པ་ཡི་གར་མི་འོང་བ་དག་འདི་ལྟར་ཟ་འོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཟའ་བར་མི་བྱའོ་ཞེས་བྱ་བའི་བར་རོ། །ཇི་ཙམ་ན་ཁྱིམ་བདག་གཅིག་གི་ཁྱིམ་དུ་དགེ་སློང་མའི་དགེ་འདུན་འགྲོན་དུ་བོས་པ་ན་དེས་འབྲས་ཆན་ནི་མང་ལ་ཚོད་མ་ཉུང་དུ་བྲིམས་པ་དང ། དེ་དག་དགོད་པའི་བསམ་པས་བལྕག་བལྕག་བྱེད་ཅིང་ཟ་བ་དང ། དེ་ནས་ཁྱིམ་བདག་དེ་ཞུམ་ཞུམ་པོར་གྱུར་ནས་འདི་སྐད་ཅེས།
9.314b
འཕགས་མ་དག་འབྲས་ཆན་སྐམ་པར་བདག་གིས་འཚལ་མོད་ཀྱི། ཚོད་མའི་རྫིའུ་ཆགས་ལགས་སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལྕག་ལྕག་མི་བྱ་བར་ཁ་ཟས་བཟའ་བར་བྱའོ་ཞེས་བྱ་བའི་བར་རོ། །དེ་བཞིན་དུ་ཁྱིམ་བདག་ཅིག་གིས་འགྲོན་དུ་བོས་པ་ན་ཁྱིམ་བདག་དེ་ཡང་དབུལ་པོ་ཞིག་ཡིན་པས་དེས་དགུན་ཁའི་དུས་ན་ཁ་ཟས་གྲང་མོ་དག་བྲིམས་པ་དང ། དེ་དག་དགོད་པའི་བསམ་པས་ཕུ་ཕུ་ཞེས་བྱས་ཏེ་ཟ་བར་བྱེད་དོ། །དེ་ནས་ཁྱིམ་བདག་དེ་ཞུམ་ཞུམ་པོར་གྱུར་ནས་འདི་སྐད་ཅེས་འཕགས་མ་བདག་གིས་འཚལ་མོད་ཀྱི། བདག་གཞི་ངན་པས་ཅི་བགྱིར་ཡང་མ་མཆིས་སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཕུ་ཕུ་མི་བྱ་བར་ཁ་ཟས་བཟའ་བར་བྱའོ། །ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ལྗོངས་རྒྱུ་ཞིང་དོང་བ་ན་ཞིང་པའི་ཁྱིམ་ཞིག་ཏུ་ཕྱིན་པ་དང་དེ་དག་གིས་གནས་དེར་ཆོས་གོས་དག་སྤྲུགས། རྐང་པ་དང་ལག་པ་དག་བཀྲུས་ནས་ཟས་ཀྱི་བྱ་བ་ལ་ཞུགས་པ་དང ། དེ་ནས་ཁྱིམ་གཅིག་ཤོས་སུ་ཡང་གཅེར་བུ་པ་དག་ལྷགས་ནས་ཇི་ཙམ་ན་དེ་དག་ཀྱང་ཟས་ཀྱི་བྱ་བ་ལ་ཞུགས་སོ། །དེ་ནས་བཅུ་གཉིས་སྡེ་དག་དགོད་པའི་བསམ་པ་ཅན་དག་གིས་ཁ་ཟས་ལ་རྫོགས་བྱེད་ཅེས་བྱ་བའི་མཆོད་རྟེན་བྱས་ནས་ལ་ཕུག་གི་སྲོག་ཤིང་བཙུགས་ཏེ་གཅེར་བུ་པ་དེ་དག་ལ་འདི་སྐད་ཅེས་འདི་ནི་ཁྱོད་ཀྱི་སྟོན་པའི་མཆོད་རྟེན་ཡིན་ནོ་ཞེས་སྨྲས་ནས། དེ་ནས་མཆོད་རྟེན་དེ་ལས་ཁམ་གྱིས་བཅད་དེ་ཟ་ཞིང་སྒྲ་གཅིག་ཏུ་འདི་སྐད་ཅེས་རྫོགས་བྱེད་ཀྱི་མཆོད་རྟེན་ཞིག་གོ་ཞེས་སྨྲས་པ་དང་དེ་ནས་གཅེར་བུ་པ་དེ་དག་སྡུག་བསྔལ་ཞིང་ཡིད་མི་བདེ་བ་སྐྱེས་ནས་ངུ་ཞིང་འདི་སྐད་ཅེས་དེ་རིང་བདག་ཅག་གི་སྟོན་པ་དུས་ལས་འདས་པ་ལྟ་ཞེས་ཟེར་རོ། །བཅོམ་ལྡན་འདས་ཀྱིས་བཀའ་སྩལ་པ། ཙུག་ཙུག་མི་བྱ་བ་དང ། ་ཧུ་ཧུ་མི་བྱ་བ་དང ། བལྕག་བལྕག་མི་བྱ་བ་དང ། ཕུ་ཕུ་མི་བྱ་བ་དང ། མཆོད་རྟེན་འདྲ་བར་སྦྲུས་ཏེ་ཟས་བཟའ་བར་མི་བྱ་བར་བསླབ་པར་བྱའོ། །དེ་ནས་བཅུ་གཉིས་སྡེ་དག་སྤང་ལེབ་ཀྱི་སྟེང་དུ་ཁ་ཟས་བཀྲམ་ནས་འབྲུ་རེ་ནས་བླངས་ཏེ་ཁར་འཇུག་པར
9.315a
བྱེད་པ་ནས། དེ་དག་ལ་དགེ་སློང་མ་རྣམས་ཀྱིས་སྨྲས་པ། དེ་ལྟར་བྱེད་ན་ཅི་ཐ་ཚིག་།དེ་དག་གིས་འདི་སྐད་ཅེས་བྱ་གག་དག་གཏོར་མ་ཐུ་ན་འདི་ལྟར་བྱེད་དོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཟས་ལ་འབྲུ་རེ་ནས་བསལ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཁྱིམ་ཞིག་ཏུ་འགྲོན་དུ་བོས་ནས་དེས་དེ་དག་ལ་ཁ་ཟས་ཕལ་པ་དག་བྲིམས་པ་དང ། དེ་དག་གིས་ཁ་ཟས་དེ་ལ་བསྔགས་པ་དག་བརྗོད་དོ། །གཞན་གྱིས་ཡང་ཁ་ཟས་བསོད་པ་དག་བྲིམས་པ་ན་དེ་དག་ལ་སྐྱོན་དག་བརྗོད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཟས་ལ་བསྔགས་པ་དང་སྐྱོན་གདགས་པར་མི་བྱའོ། །དེ་ནས་བཅུ་གཉིས་སྡེ་དག་ཟས་ཀྱི་ཁམ་མཁུར་བ་ནས་མཁུར་བར་སྦེད་ཅིང་ཟ་བ་ན་ཞེས་བྱ་བ་ནས། འདི་སྐད་ཅེས་ནད་པ་དག་འདི་ལྟར་ཟའོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཟས་མཁུར་བ་སྤོ་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཁམ་ཕྱེད་བཅད་ཅིང་ལྕེའི་གྲཝར་བཞག་སྟེ། ཕན་ཚུན་དུ་སྟོན་ཅིང་སླར་ཡང་མིད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཁ་ཟས་ལ་ལྕེ་ཕྱིར་དབྱུང་བར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཟས་ཀྱི་ཁམ་སོས་བཅད་ནས་དེ་དག་ལས་ཁམ་གཅིག་ནི་ཁར། གཉིས་པ་ནི་ལག་པར་གསུམ་པ་ནི་ལྷུང་བཟེད་དུ་འཇོག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འབྲུ་རེ་ནས་བསལ་བར་མི་བྱ་བ་དང ། བསྔགས་པ་དང་སྐྱོན་མི་གདགས་པ་དང ། མཁུར་བར་མི་སྤོ་བ་དང ། ལྕེ་མི་དབྱུང་བ་དང ། ཁམ་འཕྲོ་མི་བཅད་པར་ཟས་བཟའ་བར་བསླབ་པར་བྱའོ། །ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཁ་ཟས་ཡོད་བཞིན་དུ་ལག་པ་ལ་ལྡག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་ལ་བལྡག་པར་མི་བྱའོ། །ཞེས་བྱ་བའི་བར་རོ། །དེ་བཞིན་དུ་ལྷུང་བཟེད་འཇོག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་བྱོག་པར་མི་བྱའོ་ཞེས་བྱ་བའི་བར་རོ། །
9.315b
དེ་ནས་སྦོམ་དགའ་མོ། །ཁ་ཟས་ཁར་བཅུག་ནས་ལག་པ་སྤྲུག་པར་བྱེད་པ་ནས། ་བཅོམ་ལྡན་འདས་ཀྱིས་བཀའ་སྩལ་པ། ལག་པ་སྤྲུག་པར་མི་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ཁྱིམ་ཞིག་ཏུ་འགྲོན་དུ་བོས་པ་ན། དེ་ནས་སྦོམ་དགའ་མོས་ཕྱེ་དག་རྙེད་པ་དང ། ལྷུང་བཟེད་བསྐྱམས་ནས་འདི་སྐད་ཅེས་ཁོ་མོའི་ལྷུང་བཟེད་འདི་བླངས་པ་ཡིན་གྱིས་ལུགས་ཤིག་ལུགས་ཤིག་ཅེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་བསྐྱམ་པར་མི་བྱའོ་ཞེས་བྱ་བའི་བར་རོ། །དེ་ནས་ཡང་ཁྱིམ་བདག་གཅིག་གིས་ཁྱིམ་དུ་དགེ་སློང་མའི་དགེ་འདུན་འགྲོན་དུ་བོས་ནས་དེས་བཅའ་བ་དང་བཟའ་བ་བསོད་པ་རབ་ཏུ་མང་པོ་དག་སྟ་གོན་བྱས་སོ། །ཡང་བཅུ་གཉིས་སྡེ་དག་གི་ནང་ན་དགེ་སློང་མ་རབ་ཏུ་བྱུང་བ་རྒན་མོ་ཞིག་འདུག་གོ། །ཁྱིམ་བདག་དེས་ཀྱང་ཐོག་མར་དགེ་སློང་མའི་དགེ་འདུན་ལ་ཞུན་མར་དང་ཕྱེ་དག་བྲིམས་པ་ལས་དེ་ནས་བཅུ་གཉིས་སྡེ་དག་གིས་ཕྱེ་རབ་ཏུ་མང་དུ་བླངས་སོ། །ཁྱིམ་བདག་དེས་ཡང་གཡོས་ཀྱི་རྣམ་གྲངས་ཉི་ཤུ་རྩ་བརྒྱད་རྒན་པའི་མཐའ་ནས་བྲིམས་པ་དང ། དེ་ནས་རབ་ཏུ་བྱུང་བ་རྒན་མོ་དེ་རྒན་རིམས་གང་ན་བ་དེ་ལོགས་སུ་ལྟ་བར་བྱེད་པ་ན་བཅུ་གཉིས་སྡེ་དེ་དག་གིས་ཡང་རྒན་མོ་རབ་ཏུ་བྱུང་བ་དེའི་མདུན་དུ་ཁ་ཟས་ཀྱི་གོང་བུ་དག་།གཏོར་ནས་འདི་སྐད་ཅེས་རྒྱལ་པོ་ང་ལས་ནུ་ལ་རིན་པོ་ཆེའི་ཆར་དག་བབ་བོ་ཞེས་དེ་སྐད་གྲག་ན་ཁྱོད་ཀྱང་བསོད་ནམས་དང་ལྡན་ནས་ཁ་ཟས་ཀྱི་ཆར་བབ་བོ་ཅེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་མི་ལྡག་པ་དང ། ལྷུང་བཟེད་མི་བྱོག་པ་དང ། ལག་པ་མི་སྤྲུག་པ་དང ། ལྷུང་བཟེད་མི་བསྐྱམ་པ་དང ། ལྷུང་བཟེད་ཀྱི་འདུ་ཤེས་ཀྱིས་ཟས་བཟའ་བར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་གྲལ་ཟླའི་དགེ་སློང་མ་རྣམས་ཀྱི་ལྷུང་བཟེད་ལ་ལྟས་ནས་འདིར་ནི་མང་དུ་བྲིམས་ལ་ཁོ་མོ་ཉུང་ངུ་བྲིམས་སོ་ཞེས་ཁ་ཟེར་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཁ་ཟེར་བར་འདོད་པས་དགེ་སློང་མ་གྲལ་ཟླ་རྣམས་ཀྱི་ལྷུང་བཟེད་བལྟ་བར་མི་བྱའོ། །
9.316a
ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་།ལག་པ་ཁ་ཟས་ཀྱིས་འབགས་པས་བྱ་མ་བུམ་ལེན་པ་ན་དེ་ཁ་ཟས་ཀྱིས་འབགས་པས་སྦྲང་བུ་དག་གིས་ཟི་ཟི་སྟོན་པ་དང ། ཁྱིམ་བདག་རྣམས་ཀྱིས་མཐོང་ནས་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་ཟས་ཀྱིས་འབགས་པས་ཆུ་སྣོད་ལ་གཟུང་བར་མི་བྱའོ་ཞེས་བྱ་བའི་བར་རོ། །དེ་ནས་ཡང་ཁྱིམ་བདག་གཅིག་གིས་དགེ་སློང་མའི་དགེ་འདུན་འགྲོན་དུ་བོས་པ་དང ། དེ་ནས་འདུན་མ་དང ། ཉེ་དགའ་མོའི་བར་ན་དགེ་སློང་མ་སྣམ་སྦྱར་དམར་སེར་གྱོན་པ་ཞིག་འདུག་པ་དང ། དེས་དེ་ལ་ལྷུང་བཟེད་པ་ཤལ་བའི་ཆུས་གཏོར་ནས་དེ་དག་འདི་སྐད་ཅེས་བཀྲེན་མ་ངན་པ་མོ་ཁྱོད་འབའ་ཤིག་ལ་སྣམ་སྦྱར་ཡོད་དམ་ཞེས་ཁ་ཟེར་བར་བྱེད་པ་ནས་བཅོམ་ལྡན་འདས་ཀྱིས་བཀའ་སྩལ་པ། ཟས་ཀྱིས་འབགས་པའི་ཆུས་གཏོར་བར་མི་བྱའོ་ཞེས་བྱ་བའི་བར་རོ། །གང་གི་ཚེ་ཆུ་སྲིན་བྱིས་པ་གསོད་ཀྱི་རི་ལ་ཁང་བཟངས་པད་མ་དཀར་པོ་ཅན་ལ་བརྟེན་ནས་ཁྱིམ་གྱི་ནང་དུ་ཟས་ཀྱིས་འབགས་པའི་ཆུ་དབོ་བར་མི་བྱའོ་ཞེས་དགག་པ་མཛད་པ་ཁྱིམ་བདག་གཞན་ཞིག་ལ་བརྟེན་ནས་རྗེས་སུ་གནང་སྟེ་ཁྱིམ་བདག་ཡོད་པ་ལ་དྲིས་ནས་དབོ་བར་བྱའོ། །དེ་ནས་བཅུ་གཉིས་སྡེ་དག་གིས་མ་དྲིས་པར་ཁྱིམ་གྱི་ནང་དུ་འབོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཡོད་པ་ལ་མ་དྲིས་པར་ཟས་དང་འབགས་པའི་ཆུ་ཁྱིམ་གྱི་ནང་དུ་དབོ་བར་མི་བྱའོ། །ཞེས་བྱ་བའི་བར་རོ། །མཉན་ཡོད་ན་བྲམ་ཟེ་ཞིག་གི་བུ་སེམས་འཁྲུགས་ནས། དེ་མཉན་ཡོད་དུ་སོང་བ་ལས་དགེ་སློང་ཞིག་གི་ལྷུང་བཟེད་ཀྱི་ཆུས་རེག་པར་བྱས་པ་དང ། རང་གི་སེམས་སླར་རྙེད་པར་གྱུར་ཏོ། །དེ་ནས་ཡང་བྲམ་ཟེ་ཞིག་གིས་བུ་སེམས་འཁྲུགས་པ་དང ། དེ་ནས་བྲམ་ཟེ་དེས་བྲམ་ཟེ་དེ་ལས་ཐོས་ནས་དགེ་སློང་མའི་དབྱར་ཁང་དུ་སོང་སྟེ། ཇི་ཙམ་ན་སྦོམ་དགའ་མོ་ལས་ལྷུང་བཟེད་ཀྱི་ཆུ་བསླངས་པ་དང ། ཞེས་བྱ་བ་ནས་དེས་དགེ་འདུན་གྱི་ཟས་ཀྱི་ལྷག་མས་ལྷུང་བཟེད་བཀང་ནས་བྱིན་པ་དང ། བྲམ་ཟེ་དེས་བདག་གི་བུ་ཤི་བ་ནི་བླ་མནོལ་བར་ནི་མི་བྱའོ། །ཞེས་བྱས་ཏེ
9.316b
མ་བླངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། གྲལ་ཟླའི་དགེ་སློང་མ་རྣམས་ལ་ཁ་ཟེར་བར་འདོད་པས་བལྟ་བར་མི་བྱ་བ་དང ། ལག་པ་ཟས་ཀྱིས་འབགས་པས་ཆུ་སྣོད་མི་གཟུང་བ་དང ། ཟས་ཀྱིས་འབགས་པའི་ཆུས་དགེ་སློང་མ་གྲལ་ཟླ་ལ་མི་གཏོར་བ་དང ། ཁྱིམ་བདག་ཡོད་པ་ལ་མ་དྲིས་པར་ཟས་དང་འབགས་པའི་ཆུས་ཁང་པའི་ནང་དུ་མི་དབོ་བ་དང ། ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་འོག་གཞི་མེད་པའི་སར་ལྷུང་བཟེད་འཇོག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཞག་པར་མི་བྱའོ། །དེ་ནས་བཅུ་གཉིས་སྡེ་དག་གིས་གཡང་སར་ལྷུང་བཟེད་བཞག་པ་དང ། དེ་ནས་ལྷུང་བཟེད་ལྷུང་ནས་དུམ་བུར་ཆག་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་གཡང་སར་གཞག་པར་མི་བྱའོ་ཞེས་བྱ་བའི་བར་རོ། །དེ་དག་འབབ་ཆུའི་འགྲམ་དུ་འཇོག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འབབ་ཆུའི་འགྲམ་དུ་གཞག་པར་མི་བྱའོ་ཞེས་བྱ་བའི་བར་རོ། །དེ་དག་ལམ་ཀར་འཇོག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལམ་ཀར་གཞག་པར་མི་བྱའོ་ཞེས་བྱ་བའི་བར་རོ། །དེ་དག་ལྷུང་བཟེད་བྱེ་མ་དང་བཅས་པའི་ལྕི་བས་རུང་བར་བྱེད་པ་ན་དེ་དག་རིང་པོ་མ་ལོན་པར་སྐྱ་སྐྱ་བོར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། འོག་གཞི་མ་གཏིང་བའི་ས་ལ་ལྷུང་བཟེད་གཞག་པར་མི་བྱ་བ་དང ། གཡང་སར་མི་གཞག་པ་དང ། འབབ་ཆུའི་འགྲམ་དུ་མི་གཞག་པ་དང ། ལམ་ཀར་མི་གཞག་པ་དང ། བྱེ་མ་དང་བཅས་པའི་ལྕི་བས་ལྷུང་བཟེད་མི་ཕྱི་བར་བསླབ་པར་བྱའོ་ཞེས་བྱ་བའི་བར་རོ། །ཇི་ཙམ་ན་གཞོན་ནུ་མ་ཞིག་འགྲེང་སྟེ་ལྷུང་བཟེད་འཁྲུ་བ་དང ། དེ་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་འགྲེང་སྟེ་ལྷུང་བཟེད་མ་འཁྲུ་ཤིག་།
9.317a
དེས་འདི་སྐད་ཅེས་ཅིར་འགྱུར་ཞེས་སྨྲས་པ་ན་དེའི་ལྷུང་བཟེད་དེ་ལག་ནས་ལྷུང་ནས་ཆག་པ་དང ། དེ་ལ་འདི་སྐད་ཅེས་འདིར་འགྱུར་རོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲེང་སྟེ་ལྷུང་བཟེད་བཀྲུ་བར་མི་བྱའོ་ཞེས་བྱ་བའི་བར་རོ། །དེ་བཞིན་དུ་སྐེམས་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲེང་སྟེ་བསྐམ་པར་མི་བྱའོ་ཞེས་བྱ་བའི་བར་རོ། །དེ་བཞིན་དུ་འཕྱི་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲེང་སྟེ་ཕྱི་བར་མི་བྱའོ་ཞེས་བྱ་བའི་བར་རོ། །དེ་བཞིན་དུ་ལྷུང་བཟེད་ཀྱི་སྣོད་དུ་འཇུག་པ་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ་འགྲེང་སྟེ་ལྷུང་བཟེད་ཀྱི་སྣོད་དུ་གཞུག་པར་མི་བྱའོ། །ཞེས་བྱ་བའི་བར་རོ། །དེ་བཞིན་དུ་ལྷུང་བཟེད་ཀྱི་སྣོད་ནས་འབྱིན་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲེང་སྟེ་ལྷུང་བཟེད་བཀྲུ་བ་དང ། བསྐམ་པ་དང ། འཕྱི་བ་དང ། ལྷུང་བཟེད་ཀྱི་སྣོད་དུ་གཞུག་པ་དང ། དབྱུང་བ་མི་བྱ་བར་བསླབ་པར་བྱའོ་ཞེས་བྱ་བའི་བར་རོ། ་་་་་་་་་་་་་་།སྡོམ་ལ། འགྲེང་སྟེ་མ་ཡིན་མགོ་གཡོགས་མིན། །གླང་ཆེན་དོ་ཀེར་ལག་ན་མིན། །རྩཝ་དང་ཆུ་ལ་བཤང་མི་བྱ། །ཤིང་ལ་མི་གང་ཙམ་མ་ཡིན། །དེ་ནས་བཅུ་གཉིས་སྡེ་དག་འགྲེང་ནས་འདུག་པ་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་མི་བྱའོ་ཞེས་བྱ་བའི་བར་རོ། །ཇི་ཙམ་ན་ནད་པ་དག་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་ཆོས་བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་འདུག་པ་དང་ཉལ་བ་ལ་ཡང་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བ་ལ་ཆོས་བཤད་པར་མི་བྱའོ་ཞེས་བྱ་བའི་བར་རོ། །དེ་བཞིན་དུ་སྟན་དམའ་བ་ལ་འདུག་ནས་སྟན་མཐོན་པོ་ལ་འདུག་པ་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བ་ལ་ཆོས་བཤད་པར་མི་བྱའོ། །ཞེས་བྱ་བའི་བར་རོ། །དེ་དག་གི་མདུན་དུ
9.317b
འགྲོ་བ་ལ་དེའི་ཕྱི་བཞིན་དུ་འབྲང་ཞིང་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བ་ལ་ཆོས་བཤད་པར་མི་བྱའོ་ཞེས་བྱ་བའི་བར་རོ། །དེ་བཞིན་དུ་ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲེང་ནས་མི་ན་བར་འདུག་པ་ལ་འཆོས་བཤད་པར་མི་བྱ་སྟེ། ཉལ་བར་མ་ཡིན་པ་དང ། སྟན་དམའ་བ་ལ་འདུག་སྟེ་སྟན་མཐོན་པོ་ལ་འདུག་པ་ལ་མ་ཡིན་པ་དང ། མདུན་དུ་འགྲོ་བ་ལ་དེའི་ཕྱིར་བཞིན་འབྲང་ཞིང་མ་ཡིན་པ་དང ། མི་ན་བར་ལམ་དུ་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་མགོ་གཡོགས་པ་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ་བཤད་པར་མི་བྱའོ་ཞེས་བྱ་བའི་བར་རོ། །ཇི་ཙམ་ན་མིག་ནད་ཅན་དག་འོངས་པ་ནས་བཅོམ་ལྡན་འདས་ཀྱིས་བཀའ་སྩལ་པ། མིག་ནད་ཅན་ལ་ཆོས་བཤད་པར་བྱའོ། །དེ་བཞིན་དུ་བརྫེས་པ་ལ་ཆོས་བཤད་པར་མི་བྱའོ་ཞེས་བྱ་བའི་བར་རོ། །ཇི་ཙམ་ན་ལས་མི་དག་འོངས་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་གཟར་བའི་བར་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བ་ལ་ཆོས་བཤད་པར་མི་བྱའོ་ཞེས་བྱ་བའི་བར་རོ། །རྟ་གད་བྱེད་བྱེད་པའི་བར་དག་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བ་ལ་ཆོས་བཤད་པར་མི་བྱའོ་ཞེས་བྱ་བའི་བར་རོ། །གཉའ་གོང་དུ་བསྣོལ་བའི་བར་དག་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ་བཤད་པར་མི་བྱའོ། །ཞེས་བྱ་བའི་བར་རོ། །ཇི་ཙམ་ན་གཉའ་གོང་དུ་བསྣོལ་བའི་བར་དག་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བར་མགོ་གཡོགས་པ་ལ་ཆོས་བཤད་པར་མི་བྱ་སྟེ། བརྫེས་པ་ལ་མ་ཡིན་པ་དང ། གཟར་བ་ལ་མ་ཡིན་པ་དང ། ཕྲག་པ་གཉིས་ཀ་ལ་གཟར་བ་མ་ཡིན་པ་དང ། མི་ན་བར་གཉའ་གོང་དུ་བསྣོལ་བ་ལ
9.318a
ཆོས་མི་བཤད་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་གླང་པོ་ཆེ་ཞོན་པ་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་མི་བྱའོ་ཞེས་བྱ་བའི་བར་རོ། །དེ་ནས་གླང་པོ་ཆེ་ཞོན་པ་དག་གཡུལ་དུ་ཆས་ནས་དེ་དག་ལ་འདི་སྐད་ཅེས་སྨྲས་སོ། །འཕགས་མ་ཆོས་བཤད་དུ་གསོལ། དེ་དག་གིས་འདི་སྐད་ཅེས་སྨྲས་སོ། །བོབས་ཤིག་དང་ཆོས་བཤད་དོ། །དེ་དག་གིས་འདི་སྐད་ཅེས་བདག་ཅག་འགུམས་པར་བགྱིད་པ་ཕས་ཀྱིས་རྒོལ་བ་དག་རྟིང་ལ་ཐུག་ལགས་སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ཡིན་ནོ་ཞེས་བྱ་སྟེ་བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་རྟ་ཞོན་པ་དང ། ཤིང་རྟར་ཞུགས་པ་ལ་ཡང་བརྗོད་པར་བྱའོ། །དེ་ནས་མི་ཕྲག་པ་དང ། མགོ་ལ་ཞོན་ཞིང་འགྲོ་བ་ནས་ཆོས་བཤད་པར་མི་བྱའོ་ཞེས་པའི་བར་རོ། །ཇི་ཙམ་ན་ནད་པར་གྱུར་པ་ནས་བཅོམ་ལྡན་འདས་ཀྱིས་བཀའ་སྩལ་པ། བཤད་པར་བྱའོ་ཞེས་བྱ་བའི་བར་རོ། །ལྷམ་མཐོན་པོ་གྱོན་པའི་བར་དག་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བར་གླང་པོ་ཆེ་ཞོན་པ་ལ་ཆོས་བཤད་པར་མི་བྱ་སྟེ། རྟ་ཞོན་པ་ལ་མ་ཡིན་པ་དང ། ཤིང་རྟར་ཞུགས་པ་ལ་མ་ཡིན་པ་དང ། མི་ལ་ཞོན་པ་མ་ཡིན་པ་དང ། མི་ན་བར་ལྷམ་མཐོན་པོ་གྱོན་པ་ལ་ཆོས་མི་བཤད་པར་བསླབ་པར་བྱའོ། །ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་སྐྲ་དོ་ཀེར་ཅན་ལ་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་མི་བྱའོ་ཞེས་བྱ་བའི་བར་རོ། །རྒྱལ་པོ་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་མགོ་དཀྲིས་པ་དག་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་མི་བྱའོ། །ཞེས་བྱ་བའི་བར་རོ། །ཇི་ཙམ་ན་བློན་པོ་ཆེན་པོ་འམ་ནད་པ་དག་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར
9.318b
བྱའོ་ཞེས་བྱ་བའི་བར་རོ། །དེ་བཞིན་དུ་མགོ་ཕྲེང་བས་བཅིངས་པ་དག་འོངས་པ་ནས་བཤད་པར་མི་བྱའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་མགོ་ཅོད་པན་གྱིས་བཅིངས་པ་དག་འོངས་པ་ནས་བཤད་པར་མི་བྱའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ཚོང་དཔོན་ནམ་ནད་པ་ལ་བཤད་པར་བྱའོ་ཞེས་བྱ་བའི་བར་རོ། །དེ་དག་ཡང་ཞཝ་གྱོན་པ་དག་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་མི་བྱའོ་ཞེས་བྱ་བའི་བར་རོ། །ནད་པ་དག་འོངས་པ་ནས་བཅོམ་ལྡན་འདས་ཀྱིས་བཀའ་སྩལ་པ། མི་ན་བར་སྐྲ་དོ་ཀེར་ཅན་ལ་ཆོས་བཤད་པར་མི་བྱ་སྟེ། ་མགོ་དཀྲིས་པ་ལ་མ་ཡིན་པ་དང ། མགོ་ཕྲེང་བས་བཅིངས་པ་ལ་མ་ཡིན་པ་དང ། མགོ་ཅོད་པན་གྱིས་བཅིངས་པ་ལ་མ་ཡིན་པ་དང ། མི་ན་བར་ཞཝ་གྱོན་པ་ལ་ཆོས་མི་བཤད་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་ལག་པ་ན་མཚོན་ཐོགས་པ་ལ་ཆོས་འཆད་པར་བྱེད་པ་ནས། བཤད་པར་མི་བྱའོ་ཞེས་བྱ་བའི་བར་རོ། །ཇི་ཙམ་ན་གཡུལ་དུ་ཆས་པ་འམ། ནད་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་གདུགས་ཐོགས་པའི་བར་དག་འོངས་ནས་བཤད་པར་མི་བྱའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་ལག་ན་ཁར་བ་ཐོགས་པ་འོངས་ནས། བཤད་པར་མི་བྱའོ་ཞེས་བྱ་བ་ནས། ཡང་ནད་པ་འམ་རྒས་པ་འཁར་བ་མེད་པར་འཚོ་བར་མི་ནུས་པ་ཞིག་ཡིན་ན་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་ཆོས་བཤད་པར་བྱའོ་ཞེས་བྱ་བའི་བར་རོ། །དེ་བཞིན་དུ་ལག་ན་རལ་གྲི་ཐོགས་པ་འོངས་པ་དང་ཞེས་བྱ་བ་ནས། བཤད་པར་མི་བྱའོ་ཞེས་བྱ་བའི་བར་གོང་མ་ཇི་ལྟ་བ་བཞིན་དུའོ། །དེ་བཞིན་དུ་གོ་ཆ་སྣ་ལྔ་གྱོན་པ་དག་འོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བར་ལག་ན་མཚོན་ཆ་ཐོགས་པ
9.319a
ལ་ཆོས་བཤད་པར་མི་བྱ་སྟེ། ལག་ན་གདུགས་ཐོགས་པ་ལ་མ་ཡིན་པ་དང ། ལག་ན་ཁར་བ་ཐོགས་པ་ལ་མ་ཡིན་པ་དང ། ལག་ན་རལ་གྲི་ཐོགས་པ་ལ་མ་ཡིན་པ་དང ། ལག་ན་དགྲ་ཆ་ཐོགས་པ་ལ་མ་ཡིན་པ་དང ། མི་ན་བར་གོ་ཆ་སྣ་ལྔ་གྱོན་པ་ལ་ཆོས་མི་བཤད་པར་བསླབ་པར་བྱའོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་དག་འགྲེང་སྟེ་བཤང་གཅི་བྱེད་པ་དང་ཞེས་བྱ་བ་ནས་མི་བྱའོ་ཞེས་བྱ་བའི་བར་རོ། །ནད་པར་གྱུར་ཏེ་འདུག་མི་ནུས་པ་ནས་བཅོམ་ལྡན་འདས་ཀྱིས་བཀའ་སྩལ་པ། ནད་པ་ཡིན་ན་རྗེས་སུ་གནང་ངོ ། །དེ་ནས་སྦོམ་དགའ་མོ་སེར་སྐྱའི་གཞིར་འོངས་པ་ན་རང་གི་ཀུན་དགའ་ར་བ་སྲུང་བ་མཐོང་ནས། དེ་ནས་འདི་སྐད་ཅེས་སྨྲས་སོ། །གང་གི་ཚེ་ཁོ་མོ་རབ་ཏུ་བྱུང་བར་མ་གྱུར་ན་ཁོ་མོ་ཁྱོད་ཀྱི་ཅིར་འགྱུར། དེས་འདི་སྐད་ཅེས་སྨྲས་སོ་ཇོ་མོར་འགྱུར་རོ་སྦོམ་དགའ་མོས་འདི་སྐད་ཅེས་སྨྲས་སོ། །ད་ཁྱོད་ཅིའི་ཕྱིར་ཁོ་མོ་ལ་ཚོད་སྔོན་དང་མེ་ཏོག་གི་མཁོ་བས་མི་སྟོབས། ཀུན་དགའ་ར་བ་སྲུང་བས་ཀྱང་འདི་སྐད་ཅེས་སྨྲས་སོ། །དེའི་ཚེ་ཁྱོད་ཀྱིས་བདག་ལ་ཟས་དང་གོས་ཀྱི་མཁོ་བར་སྦྱར་བ་ན་ནི་ཁོ་བོས་ཀྱང་ཁྱོད་ལ་བསྙེན་བཀུར་བྱས་སོ། །ད་ནི་ཁྱོད་རབ་ཏུ་བྱུང་ལ་ཁོ་བོ་ནི་ཁྱིམ་པ་ཡིན་ན་ཁྱོད་ལ་ཁོ་བོས་ཇི་ལྟར་བསྙེན་བཀུར་བྱ། དེ་ནས་སྦོམ་དགའ་མོས་བཀྲུ་སྨན་ཟོས་ནས། དེས་གྱོ་མོ་ཞིག་བཞག་ནས་བཤང་བ་དང་གཅི་བ་ཕལ་མོ་ཆེ་བླུགས་ནས། ཇི་ཙམ་ན་ངན་སྐྱུགས་ཀྱིས་བཀང་བའི་གྱོ་མོ་དང་ཕྱགས་མ་ཁྱེར་ཏེ། ཀུན་དགའ་ར་བར་སོང་ནས་ཚོད་སྔོན་ཐམས་ཅད་དང ། མེ་ཏོག་གི་ཤིང་རྣམས་མི་གཙང་བས་གཏོར་ཏོ། །མི་གཙང་བའི་དྲི་དེས་དེར་ཝ་དང་ཁྱི་དག་གིས་བཅགས་སོ། །ཕྱི་དེ་ཉིན་པར་ཀུན་དགའ་ར་བ་སྲུང་བས་ཚོད་སྔོན་དེ་མཐོང་ནས་ཡིད་མི་བདེ་བར་གྱུར་པ་དང ། སྦོམ་དགའ་མོས་འདི་སྐད་ཅེས་སྨྲས་སོ། །ཀུན་དགའ་ར་བ་སྲུང་བ་ཇི་ལྟར་ཁྱོད་ཀྱི་ཀུན་དགའ་ར་བ་དྲི་ཞིམ་པ་དང ། ཚོད་སྔོན་མང་ངམ། དེས་འདི་སྐད་ཅེས་འཕགས་མ་འདི་ནི་ཁྱོད་ཀྱིས་བྱས་མོད་ཅེས་སྨྲས་པ་དང ། དེས་བགད་ནས་འདི་སྐད་ཅེས
9.319b
ཁྱོད་དེ་ལྟར་བཅོས་སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། རྩཝ་སྔོན་པོ་ལ་བཤང་བ་དང་གཅི་བ་དོར་བར་མི་བྱའོ་ཞེས་བྱ་བ་ནས་ནད་པ་ཡིན་ན་རྗེས་སུ་གནང་ངོ་ཞེས་བྱ་བའི་བར་རོ། །དེ་བཞིན་དུ་མཆིལ་མ་འདོར་བར་བྱེད་པ་དང ། འདོར་བར་མི་བྱའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ཡིན་ན་རྗེས་སུ་གནང་ངོ་ཞེས་བྱ་བའི་བར་རོ། །དེ་བཞིན་དུ་སྣབས་ལ་ཡང་བརྗོད་པར་བྱའོ། །ཇི་ཙམ་ན་སྐྱུགས་པ་དང ། རླུགས་པ་དག་འདོར་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བར་བགྲེང་སྟེ་བཤང་བ་དང་གཅི་བ་མི་བྱ་བ་དང ། མི་ན་བར་རྩཝ་སྔོན་པོ་ཡོད་པའི་ས་ཕྱོགས་སུ་བཤང་བ་དང་གཅི་བ་དང ། མཆིལ་མ་དང ། སྣབས་དང ། སྐྱུགས་པ་དང ། རླུགས་པ་མི་འདོར་བར་བསླབ་པར་བྱའོ་ཞེས་བྱ་བའི་བར་རོ། །དེ་བཞིན་དུ་གོང་དུ་སེར་སྐྱའི་གཞིར་ཀུན་དགའ་ར་བའི་སྲུངས་མ་དང ། སྦོམ་དགའ་མོ་ཇི་ལྟ་བ་དེ་བཞིན་དུ་གཙོ་བླག་མཁན་ལ་ཡང་བརྗོད་པར་བྱ་སྟེ། ཇི་ཙམ་ན་བཀྲུ་སྨན་ཟོས་ནས་ཞེས་བྱ་བ་ནས། མི་གཙང་བས་བཀང་བའི་སྣོད་དང ། བརྡབ་པའི་གཞི་དང་གོས་བཤལ་བའི་ཆུ་སྣོད་མ་རུང་བར་བྱས་སོ། །དེ་ནས་གཙོ་བླག་མཁན་དེ་གོས་འཁྲུ་བ་ན་གོས་དེ་ཚོན་ཁྲ་བོ་སྣ་ཚོགས་ཀྱིས་ཚོན་གྱིས་བཀྲ་བ་དང ། མནམ་པ་མཐོང་ངོ་ཞེས་བྱ་བའི་བར་རོ། །དེ་ནས་སྦོམ་དགའ་མོ་འོངས་ནས་འདི་སྐད་ཅེས་སྨྲས་སོ། །ཀྱེ་ནང་རྗེ་གོས་དག་ཅི་སྟེ་སྐྱ་བོར་གྱུར། དེས་འདི་སྐད་ཅེས་འཕགས་མ་ཁྱོད་ཀྱིས་མ་བྱས་གྲང་ཞེས་སྨྲས་པ་དང ། སྦོམ་དགའ་མོས་འདི་སྐད་ཅེས་ཁྱོད་དེ་ལྟར་བཅོས་སོ་ཞེས་སྨྲས་པ་ན་སྨོད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཆུའི་ནང་དུ་བཤང་གཅི་དོར་བར་མི་བྱའོ་ཞེས་བྱ་བའི་བར་རོ། །ན་བ་དག་དེ་ཉིད་དུ་འདོར་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་ངོ ། །དེ་བཞིན་དུ་མཆིལ་མ་དང ། སྣབས་དང ། སྐྱུགས་པ་དང ། རླུགས་པ་ཞེས་བྱ་བ་ནས། ནད་པ་ཡིན་ན། རྗེས་སུ་གནང་ངོ་ཞེས་བྱ་བའི་བར་རོ། །གང་གི་ཚེ་བཅོམ་ལྡན་འདས་ཀྱིས་མཉན་ཡོད་དུ་དགེ་བསྐོས་ལས་བརྟེན་ནས་ཤིང་ལ་འཛེག་པའི་བསླབ་པའི
9.320a
གཞི་བཅའ་བ་མཛད་པ་དེའི་ཚེ་སྦོམ་དགའ་མོ་བྱ་བ་འགའ་ཞིག་གི་ཕྱིར་ཤིང་ཁར་འཛེག་པ་ན། དེ་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། དེས་འདི་སྐད་ཅེས་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མི་ན་བར་ཆུའི་ནང་དུ་བཤང་བ་དང ། གཅི་བ་དང་མཆིལ་མ་དང ། སྣབས་དང་སྐྱུགས་པ་དང ། རླུགས་པ་དོར་བར་མི་བྱ་བ་དང ། གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱའོ་ཞེས་བྱ་བའི་བར་རོ། །བསླབ་པ་མང་པོ་རྫོགས་སྷོ།། ་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ་ལས་བསླབ་པ་མང་པོ་རྫོགས་སྷོ།། ་་་་་་་་།། ད་ནི་རྩོད་པ་ཞི་བར་བྱེད་པ་རྣམས་སྨྲ་བར་བྱ་སྟེ། སྡོམ་ལ། མངོན་སུམ་དང་ནི་དྲན་པ་དང ། །མ་མྱོས་འདུལ་དང་དེའི་ངོ་བོ། །ཚུལ་ཤིང་མང་པོ་བྲིམ་པ་དང ། །ཁས་བླང་བ་དང་རྩཝ་བཀྲམ་པའོ། །མངོན་སུམ་གྱིས་འདུལ་བར་འོས་པ་ལ་ནི་མངོན་སུམ་གྱིས་འདུལ་བ་སྦྱིན་ནོ། །དྲན་པས་འདུལ་བར་འོས་པ་ལ་ནི་དྲན་པས་འདུལ་བ་སྦྱིན་ནོ། །མ་མྱོས་པས་འདུལ་བར་འོས་པ་ལ་ནི་མ་མྱོས་པས་འདུལ་བ་སྦྱིན་ནོ། །དེའི་ངོ་བོ་ཉིད་ཚོལ་དུ་གཞུག་པར་འོས་པ་ལ་ནི་དེའི་ངོ་བོ་ཉིད་དུ་ཚོལ་དུ་གཞུག་པ་སྦྱིན་ནོ། །གང་ཚུལ་ཤིང་མང་པོ་བྲིམ་པར་འོས་པ་ལ་ནི་གང་ཚུལ་ཤིང་མང་པོ་བྲིམ་པ་སྦྱིན་ནོ། །ཁས་བླང་བར་འོས་པ་ལ་ནི་ཁས་བླང་བ་སྦྱིན་ནོ། །རྩཝ་བཀྲམ་པ་ལྟ་བུར་འོས་པ་ལ་ནི་རྩཝ་བཀྲམ་པ་ལྟ་བུ་སྦྱིན་ཏེ། རྩོད་པ་ཞི་བར་བྱེད་པའི་ཆོས་བདུན་པོ་འདི་དག་གིས་རྩོད་པ་བྱུང་བར་གྱུར་པ་རྣམས་ཆོས་དང ། འདུལ་བ་དང ། སྟོན་པའི་བསྟན་པ་བཞིན་དུ་དུལ་བར་བྱ། ཞི་བར་བྱ། རྣམ་པར་ཞི་བར་བྱ་བར་བསླབ་པར་བྱའོ། །རྩོད་པ་ཞི་བར་བྱེད་པའི་ཆོས་བདུན་རྫོགས་སྷོ།། ་་་་་་་་་་་་་།།དགེ་སློང་མའི་འདུལ་བ་རྣམ་པར་འབྱེད་པ་ལས་རྩོད་པ་ཞི་བར་བྱེད་པའི་ཆོས་བདུན་རྫོགས་སྷོ།། ་་་་་་་་་་།།མཐའ་བརྒྱད་དགེ་འདུན་ལྷག་མ་ཉི་ཤུ
9.320b
དང ། །དེ་བཞིན་སྤང་བ་སུམ་བཅུ་རྩ་གསུམ་དང ། །གཞན་ཡང་ལྟུང་བྱེད་བརྒྱ་ནི་བརྒྱད་བཅུ་དང ། །སོ་སོར་བཤགས་པར་བྱ་བ་བཅུ་གཅིག་ནི། །བསླབ་པ་ཡི་ནི་ཕྲེང་བ་ལྷག་པ་སྟེ། །ཞི་བར་བྱེད་པ་དགེ་སློང་ཕ་དང་འཐུན། །བཟོད་པ་དཀའ་ཐུབ་དམ་པ་བཟོད་པ་ཡི། །མྱ་ངན་འདས་པ་མཆོག་ཅེས་སངས་རྒྱས་གསུང ། །རབ་ཏུ་བྱུང་བ་གཞན་ལ་གནོད་པ་དང ། །གཞན་ལ་འཚེ་བ་དགེ་སྦྱོང་མ་ཡིན་ནོ། །མིག་ལྡན་ཕ་རོལ་གནོན་ཡོད་ན། །ཉམ་ང་བ་དག་ཇི་བཞིན་དུ། །མཁས་པ་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤོང ། །སྐུར་པ་མི་གདབ་གནོད་མི་བྱ། །སོ་སོར་ཐར་པའང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །བས་མཐའི་གནས་སུ་གནས་པར་བྱ། ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཇི་ལྟར་བུང་བ་མེ་ཏོག་ལས། །ཁ་དོག་དྲི་ལས་མི་གནོད་པར། །ཁུ་བ་བཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །བདག་གི་རིགས་དང་མི་རིགས་ལ། །བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དང་གཞན་རྣམས་ཀྱི། །བྱས་དང་མ་བྱས་རྣམས་ལ་མིན། །ལྷག་པའི་སེམས་ལ་བག་བྱ་སྟེ། །ཐུབ་པའི་ཐུབ་གཞི་རྣམས་ལ་བསླབ། །ཉེར་ཞི་རྟག་ཏུ་དྲན་ལྡན་པ། །སྐྱོབ་པ་མྱ་ངན་མེད་པ་ཡིན། །སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སོགས་མི་འགྱུར་རོ། །དགེ་དང་ལྡན་པས་སྡིག་པ་སྤོང ། །ཉོན་མོངས་ཟད་པས་མྱ་ངན་འདའ། །སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པའང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་དུ་གདམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང ། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི
9.321a
ཐོབ་པར་འགྱུར། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུང་དང ། །ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །མི་འདུལ་ཁ་ལོ་སྒྱུར་བ་བླ་ན་མེད། །འཇིག་རྟེན་མགོན་པོ་སྐྱོབ་པ་མཆོག་།སངས་རྒྱས་དཔའ་བོ་བདུན་པོ་དག་།གྲགས་ལྡན་རྣམས་ཀྱི་སོ་སོར་ཐར། །འདི་ནི་རབ་ཏུ་རྒྱས་པར་བཏོན། །འདི་ལ་སངས་རྒྱས་རྣམས་དང་གང ། །སངས་རྒྱས་ཉན་ཐོས་རྣམས་ཀྱང་གུས། །འདི་ལ་གུས་པར་བཅས་གྱུར་པས། །འདུས་མ་བྱས་པ་ཐོབ་པར་གྱིས། །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །དགེ་སློང་མའི་འདུལ་བ་རྣམ་པར་འབྱེད་པ་སོ་སོར་ཐར་པ་དང་བཅས་པ་རྫོགས་སྷོ།། །།ཁ་ཆེའི་མཁན་པོ་སརྦ་ཛྙཱ་དེ་བ་དང ། དྷརྨཱ་ཀ་ར་དང ། རྒྱ་གར་གྱི་མཁན་པོ་བིདྱ་ཀ་ར་པྲ་བྷ་དང ། ལོཙྪ་བ་བན་དྷེ་དཔལ་གྱི་ལྷུན་པོས་བསྒྱུར། རྒྱ་གར་གྱི་མཁན་པོ་བིདྱ་ཀ་ར་པྲ་བྷ་དང ། ཞུ་ཆེན་གྱི་ལོ་ཙྪ་བ་བན་དྷེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པའོ། །སྔ་ཞུས་ཀུན་དགའོ་ཤཱཀྱ་དཔལ། །གཉིས་ཀྱིས་མ་དག་དྲི་མ་བསལ། །གསུམ་ཞུས་མཁས་པ་སྣར་ཐང་དཔོན་སློབ་པས། །ས་ཡི་སྟེང་འདིར་ལེགས་པར་དག་བགྱིས་སོ།། ་་།།གཉིས་ཞུས་སྔགས།། །། #