rKTs


J45

(e-text produced by ADARSHA)

see text in transliteration
42.290a
། རྒྱ་གར་སྐད་དུ། ཨཱརྱ་སརྦ་བུད་དྷ་བི་ཥ་ཡ་ཨ་བ་ཏཱ་ར་ཛྙཱ་ན་ཨཱ་ལོ་ཀ་ཨ་ལཾ་ཀ་ར་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་སངས་རྒྱས་ཐམས་ཅད་ཀྱི་ཡུལ་ལ་འཇུག་པའི
42.290b
ཡེ་ཤེས་སྣང་བའི་རྒྱན་ཅེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རིའི་རྩེ་མོ་བཞིའི་ཤིང་དྲུང་ཆོས་ཀྱི་དབྱིངས་ཀྱི་སྙིང་པོའི་ཁང་བཟངས་ན། འདི་ལྟ་སྟེ། ཉན་ཐོས་ཆེན་པོ་བརྒྱད་དང་ཀུན་ཤེས་ཀཽཎྜི་ནྱ་ལ་སོགས་པ་དགེ་སློང་ཉི་ཁྲི་ལྔ་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ་དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ་གླང་པོ་ཆེན་པོ་བྱ་བ་བྱས་པ། བྱེད་པ་བྱས་པ། ཁུར་བོར་བ་བདག་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ་ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཅན་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་སོན་པ་ཤ་སྟག་དང་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། ནོར་དཔལ་དང་སངས་རྒྱས་དཔལ་དང ། སྨན་གྱི་རྒྱལ་པོ་དང ། སྨན་ཡང་དག་འཕགས་ལ་སོགས་པ་འཇིག་རྟེན་གྱི་ཁམས་གཞན་དང་གཞན་དག་གི་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་དག་གིས་ཀུན་ནས་བཀྱེ་བའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་ཕྲག་བདུན་བཅུ་རྩ་གཉིས་ཐམས་ཅད་ཀྱང་ཕྱིར་མི་ལྡོག་པའི་ཆོས་ཀྱི་འཁོར་ལོ་རབ་ཏུ་བསྐོར་བ། ཐམས་ཅད་ཀྱང་ཤིན་ཏུ་རྒྱས་པའི་སྡེ་དཀོན་མཆོག་བརྩེགས་པའི་མདོ་ཡོངས་སུ་ཞུ་བ་ལ་མཁས་པ། ཐམས་ཅད་ཀྱང་ས་བཅུ་པ་ཆོས་ཀྱི་སྤྲིན་ཐོབ་པ། ཐམས་ཅད་ཀྱང་ཤེས་རབ་ཀྱིས་རི་རབ་ལྟར་གྱུར་པ། ཐམས་ཅད་ཀྱང་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང ། སྐྱེ་བ་མེད་པ་དང ། འབྱུང་བ་མེད་པ་དང ། དངོས་པོ་མེད་པའི་སེམས་སུ་བསྒོམས་པའི་སེམས་དང་ལྡན་པ། ཐམས་ཅད་ཀྱང་ཆོས་ཟབ་མོའི་སྣང་བ་ཆེན་པོ་ཐོབ་པ། ཐམས
42.291a
ཅད་ཀྱང་དེ་བཞིན་གཤེགས་པའི་སྤྱོད་ལམ་དང་ལྡན་པ། ཐམས་ཅད་ཀྱང་མངོན་པར་ཤེས་པ་ཡོངས་སུ་སྦྱངས་པས་ངེས་པར་འབྱུང་བ་ཐམས་ཅད་ཀྱི་ངོ་བོ་ཉིད་ཀྱི་རང་བཞིན་ལ་གནས་པ་ཤ་སྟག་དང་ཐབས་གཅིག་ཏུ་བཞུགས་སོ། །དེའི་ཚེ་ན་བཅོམ་ལྡན་འདས་འདི་སྙམ་དུ་བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མྱུར་བ་དང ། སྟོབས་དང་ཤུགས་ཆེན་པོ་ཡང་དག་པར་བསྐྱེད་པར་བྱ་བའི་ཕྱིར། ཆོས་ཀྱི་གཏམ་བརྗོད་པར་བྱ་ཞིང ། འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ནས། བྱང་ཆུབ་སེམས་དཔའ་སེམས་དཔའ་ཆེན་པོ་གཟི་བརྗིད་ཆེ་བ་གཟི་བརྗིད་ཆེ་བ་དག་བསྡུ་བར་ཡང་བྱ། བདག་གིས་ཆོས་བསྟན་པ་ཆེན་པོའི་ཆོས་ཀྱི་རྣམ་གྲངས་བཤད་པའི་ལྟས་སྣང་བ་ཆེན་པོའང་བསྟན་པར་བྱ། བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལྷགས་ནས་བདག་ལ་ཆོས་བསྟན་པ་ཆེན་པོ་ཡོངས་སུ་ཞུ་བར་འགྱུར་བར་ཡང་བྱའོ་སྙམ་དུ་དགོངས་སོ་དེ་ནས་བཅོམ་ལྡན་འདས་ཀྱིས་དེའི་ཚེ་ཕྱོགས་བཅུའི་འཇིག་རྟེན་གྱི་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲངས་མེད་ཅིང་བསམ་གྱི་མི་ཁྱབ་པ་དག་གི་རྡུལ་ཕྲ་རབ་ཀྱི་རྡུལ་སྙེད་དག་འོད་ཟེར་ཆེན་པོའི་སྤྲིན་དག་གིས་སྣང་བར་མཛད་དོ། །དེའི་ཚེ་ན་ཕྱོགས་བཅུའི་ཕྱོགས་རེ་རེ་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ཕྲག་འབུམ་ཕྲག་བརྗོད་དུ་མེད་པ་བཅུའི་རྡུལ་ཕྲ་རབ་ཀྱི་རྡུལ་སྙེད་དག་ལྷགས་སོ། །དེ་དག་ལ་བྱང་ཆུབ་སེམས་དཔའ་རེ་རེ་ཡང་བྱང་ཆུབ་སེམས་དཔའི་རྣམ་པར་འཕྲུལ་པ་བསམ་གྱིས་མི་ཁྱབ་པ་དག་གིས་འོངས་ཏེ་ལྷགས་ནས་ཀྱང ། བཅོམ་ལྡན་འདས་ལ་ཚུལ་དང་མཐུན་པའི་མཆོད་པ་བསམ་གྱིས་མི་ཁྱབ་པ་དག་བྱས་ནས། བཅོམ་ལྡན་འདས་ཀྱི་སྤྱན་སྔར་རང་རང་གི་སྨོན་ལམ་གྱི་སྟོབས་ལས་བྱུང་བའི་པད་མའི་སྟན་དག་ལ་འཁོད་དེ། བཅོམ་ལྡན་འདས་ལ་མིག་མི་འཛུམས་པར་ལྟ་ཞིང་སྡོད་པར་གྱུར་ཏོ། །དེའི་ཚེ་ན་ཆོས་ཀྱི
42.291b
དབྱིངས་ཀྱི་སྙིང་པོའི་ཁང་བཟང་དེའི་དབུས་སུ་སེང་གེའི་ཁྲི་ནོར་བུ་རིན་པོ་ཆེ་ཆེན་པོའི་པད་མའི་སྙིང་པོ་ཅན་རྒྱར་དཔག་ཚད་བྱེ་བ་ཕྲག་གྲངས་མེད་པ་ཡོད་པ། རིམ་གྱིས་མཐོ་བ་ནོར་བུ་རིན་པོ་ཆེ་ཀུན་ཏུ་སྣང་བ་ལས་གྲུབ་པ། ནོར་བུ་རིན་པོ་ཆེ་གློག་གི་སྒྲོན་མའི་ཁ་ཁྱེར་གྱིས་ཡོངས་སུ་བསྐོར་བ། ནོར་བུ་རིན་པོ་ཆེ་འོད་བསམ་གྱིས་མི་ཁྱབ་པའི་ལན་ཀན་གྱིས་ཡོངས་སུ་བསྐོར་བ། ནོར་བུ་རིན་པོ་ཆེ་དཔེ་མེད་པས་ཡོངས་སུ་བསྐོར་བ། ནོར་བུ་རིན་པོ་ཆེ་སྣང་བ་དཔེ་ལས་འདས་པའི་ཕྲེང་བས་མཛེས་པར་བྱས་པ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་ཀུན་ནས་གཡོགས་པ། ནོར་བུ་རིན་པོ་ཆེ་རྣམ་པ་སྣ་ཚོགས་སྤྲས་པ། གདུགས་དང་རྒྱལ་མཚན་དང ། བ་དན་བསྒྲེང་བ་དང་ལྡན་པ་ཞིག་བྱུང་བར་གྱུར་ཏོ། །སེང་གེའི་ཁྲི་ནོར་བུ་རིན་པོ་ཆེ་ཆེན་པོའི་སྙིང་པོ་ཅན་དེའི་ཁོ་ར་ཁོར་ཡུག་ནས་འོད་ཟེར་གྲངས་མེད་པ་བྱེ་བ་ཁྲག་ཁྲིག་འབུམ་ཕྲག་བཅུ་བྱུང་སྟེ། འོད་ཟེར་དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་གཞན་དང་གཞན་དག་སྣང་བ་ཆེན་པོས་ཁྱབ་པར་གྱུར་ཏོ། །ཡང་དེའི་ཚེ་ན་ཕྱོགས་བཅུའི་ཕྱོགས་རེ་རེ་ནས་ལྷ་དང ། ཀླུ་དང་གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་བརྗོད་དུ་མེད་པ་བཅུའི་རྡུལ་ཕྲ་རབ་ཀྱི་རྡུལ་སྙེད་དག་ཀྱང་ལྷགས་པར་གྱུར་ཏེ། དེ་དག་ལས་ཁ་ཅིག་ནི་རིན་པོ་ཆེའི་ཁང་པ་བརྩེགས་པ་དག་ན་འཁོད་ལ། ལྷའི་བུ་མོ་བྱེ་བ་ཁྲག་ཁྲིག་འབུམ་ཕྲག་གྲངས་མེད་ཅིང་བསམ་གྱིས་མི་ཁྱབ་པ་གླུ་དབྱངས་དང ། རོལ་མོའི་སྒྲ་འབྱིན་པ་དག་དང་ལྷགས་སོ། །ཁ་ཅིག་ནི་མེ་ཏོག་ལས་བྱས་པ་དག་དང ། ཁ་ཅིག་ནི་ཙན་དན་སྦྲུལ་གྱི་སྙིང་པོ་ལས་བྱས་པ་དག་དང ། ཁ་ཅིག་ནི་མུ་ཏིག་ལས་བྱས་པ་དག་དང ། ཁ་ཅིག་ནི་རྡོ་རྗེ་ལས་བྱས་པ་དག་དང ། ཁ་ཅིག་ནི་ནོར་བུ་རིན་པོ་ཆེ་རྡོ་རྗེ་ལྟར་སྣང་བ་
42.292a
ལས་བྱས་པ་དག་དང ། ཁ་ཅིག་ནི་འཛམ་བུའི་ཆུ་བོའི་གསེར་ལས་བྱས་པ་དག་དང ། ཁ་ཅིག་ནི་ནོར་བུ་རིན་པོ་ཆེ་འོད་ཐམས་ཅད་ཡང་དག་པར་འདུས་པ་ལས་བྱས་པ་དག་དང ། ཁ་ཅིག་ནི་ནོར་བུ་རིན་པོ་ཆེ་དབང་གི་རྒྱལ་པོ་ལས་བྱས་པ་དག་དང ། ཁ་ཅིག་ནི་ནོར་བུ་རིན་པོ་ཆེ་ཡིད་བཞིན་གྱི་ནོར་བུ་ལས་བྱས་པ་དག་དང ། ཁ་ཅིག་ནི་ནོར་བུ་རིན་པོ་ཆེ་བརྒྱ་བྱིན་ཐོགས་པ་ལས་བྱས་པ་དག་དང ། ཁ་ཅིག་ནི་རྒྱ་མཚོའི་རྟེན་རྣམ་པར་དག་པའི་རིན་པོ་ཆེའི་བཀོད་པ་སྟོང་ལྟ་བུ་ནོར་བུ་རིན་པོ་ཆེ་ཆེན་པོ་ཀུན་ནས་འོད་ཟེར་སྣང་བ་ལས་བྱས་པའི་ཁང་པ་བརྩེགས་པ་དག་ལ་འཁོད་ལ། ལྷའི་བུ་མོ་བྱེ་བ་ཁྲག་ཁྲིག་འབུམ་ཕྲག་གྲངས་མེད་ཅིང་བསམ་གྱིས་མི་ཁྱབ་པའི་གླུ་དབྱངས་དང་རོལ་མོའི་སྒྲ་འབྱིན་པ་དག་ལྷགས་སོ། །ལྷགས་ནས་ཀྱང་བཅོམ་ལྡན་འདས་ལ་བསམ་གྱིས་མི་ཁྱབ་པ་དང ། མཚུངས་པ་མེད་པ་དང ། གཞལ་དུ་མེད་པ་དང ། དཔག་ཏུ་མེད་པ་ལས་ཀྱང་ཤིན་ཏུ་འདས་པའི་མཆོད་པ་བྱས་ཏེ། བཅོམ་ལྡན་འདས་ཀྱི་སྤྱན་སྔར་རང་རང་གི་སྨོན་ལམ་གྱི་སྟོབས་ལས་བྱུང་བའི་སྟན་དག་ལ་འཁོད་ནས། བཅོམ་ལྡན་འདས་ལ་མིག་མི་འཛུམས་པས་ལྟ་ཞིང་སྡོད་པར་གྱུར་ཏོ། །དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འཛམ་བུ་ཆུ་བོའི་གསེར་ལས་གྲུབ་པར་ཀུན་ཏུ་གནས་པར་གྱུར་ཅིང ། ནོར་བུ་རིན་པོ་ཆེ་ཆེན་པོ་སྣ་ཚོགས་ཀྱི་ཤིང་ལྗོན་པ་དག་གིས་ལེགས་པར་བརྒྱན་པ་དང ། ལྷའི་མེ་ཏོག་གི་ཤིང་ལྗོན་པ་དག་དང ། གོས་ཀྱི་ཤིང་ལྗོན་པ་དག་དང ། ཙན་དན་སྦྲུལ་གྱི་སྙིང་པོའི་ཤིང་ལྗོན་པ་དག་དང ། སྤོས་ཀྱི་ཤིང་ལྗོན་པ་དག་དང ། ་ག་རུའི་ཤིང་ལྗོན་པ་དག་གིས་ཀྱང་ལེགས་པར་བརྒྱན་ཅིང ། ནོར་བུ་རིན་པོ་ཆེ་ཉི་མ་དང་ཟླ་བ་དང ། གློག་གི་སྒྲོན་མའི་དྲ་བས་ཀུན་ནས་ཁེབས་པ་དང ། གདུགས་དང་རྒྱལ་མཚན་དང ། བ་དན་བསྒྲེང་བ་དང་ལྡན་ལ། ཤིང་ལྗོན་པ་ཐམས
42.292b
ཅད་ལ་ཡང་ལྷའི་བུ་མོ་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་མུ་ཏིག་གི་དོ་ཤལ་ལུས་ཕྱེད་ལ་ཐོགས་པ་དང ། རིན་པོ་ཆེའི་ཕྲེང་བ་ཐོགས་པ་དག་འཁོད་པར་གྱུར་ཏོ། །དེའི་ཚེ་ན་སེང་གེའི་ཁྲི་ནོར་བུ་རིན་པོ་ཆེ་ཆེན་པོའི་སྙིང་པོ་ཅན་དེ་ལས་ཚིགས་སུ་བཅད་པ་འདི་དག་བྱུང་ངོ ། །ཁྱོད་ཀྱི་བསོད་ནམས་སྟོབས་ཀྱིས་བདག་བྱུང་སྟེ། །མི་དབང་རྒྱལ་པོ་ཚུར་གཤེགས་བཞུགས་སུ་གསོལ། །རྒྱལ་བ་རྐང་གཉིས་དམ་པ་འདེགས་བགྱི་སྟེ། །དེ་རིང་བདག་གིས་རྣམ་པ་འདི་རྫོགས་འགྱུར། །བདག་གི་ལུས་འདི་རིན་ཆེན་རྒྱུས་གྲུབ་སྟེ། །འདྲེན་པ་ཁྱོད་ཕྱིར་བདག་གིས་དཀྱིལ་ན་ནི། །རིན་ཆེན་པད་མ་ཡིད་འོང་གཅིག་མཆིས་ཏེ། །སྐྱོབ་པ་བདག་གི་བརྣག་པ་དེ་རྫོགས་མཛོད། །རིན་ཆེན་པད་མ་འདི་ལ་བཞུགས་ནས་ནི། །བདག་དང་འཇིག་རྟེན་འདི་ཀུན་མཛེས་པར་མཛོད། །གང་ཐོས་སེང་གེའི་ཁྲི་འདི་འདྲ་ཐོབ་པ། །ཆོས་དེ་སྲོག་ཆགས་བྱེ་མང་བསྟན་དུ་གསོལ། །ཁྱོད་ཀྱི་སྐུ་ལ་འོད་ཟེར་སྟོང་བྱུང་སྟེ། །འཇིག་རྟེན་ཁམས་མང་རབ་ཏུ་སྣང་བྱེད་པ། །དེ་ནི་བདག་གིས་དགའ་མཆོག་སྐྱེས་པའི་མཚན། །འདྲེན་པ་བདག་གི་སླད་དུ་བཞུགས་སུ་གསོལ། །སྔོན་ཡང་བདག་གིས་ཕྱོགས་འདིར་རང་བྱུང་བའི། །ཐུབ་པ་བྱེ་བ་ཕྲག་བརྒྱད་བཏེག་གྱུར་པས། །མྱུར་དུ་བཞུགས་ཏེ་ཕན་བཏགས་མཛད། དུ་གསོལ། །བཅོམ་ལྡན་དེང་འདིར་ཕན་གདགས་མཛད་དུ་གསོལ། །དེ་ནས་བཅོམ་ལྡན་འདས་གདན་སྔ་མ་ལས་བཞེངས་ཏེ། སེང་གེའི་ཁྲི་ནོར་བུ་རིན་པོ་ཆེ་ཆེན་པོ་པད་མོའི་སྙིང་པོ་ཅན་དེ་ལ་སྐྱིལ་མོ་ཀྲུང་བཅས་ཏེ་བཞུགས་ནས། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་རྣམ་པར་གཟིགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་ཡང་དག་ཕུལ་གྱི་ཆོས་བསྟན་པའི་ལྟས་མཛད་དོ། །དེའི་ཚེ་ན་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་རྣམས་འདི་སྙམ
42.293a
དུ་སེམས་ཏེ། འཇམ་དཔལ་གཞོན་ནུར་གྱུར་པ་འདིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཅག་གིས་ཐོས་ནས། ཡུན་རིང་དུ་ལོན་པ་སྐྱེ་བ་མེད་པ་དང ། འགག་པ་མེད་པའི་ཆོས་ཀྱི་རྣམ་གྲངས་དེ་ཡོངས་སུ་ཞུས་ན་ཅི་མ་རུང་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས། བཅོམ་ལྡན་འདས་ཀྱིས་ལྷས་མཛད་པ་ཡང་རིག་།བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་སེམས་ཀྱི་ཡོངས་སུ་རྟོགས་པ་ཡང་སེམས་ཀྱིས་ཤེས་ནས། སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་པད་མའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེ་བ་མ་མཆིས་པ་དང ། འགག་པ་མ་མཆིས་པ་ཞེས་བགྱི་ན། བཅོམ་ལྡན་འདས་སྐྱེ་བ་མ་མཆིས་པ་དང ། འགག་པ་མ་མཆིས་པ་ཞེས་བགྱི་བ་དེ་ཆོས་གང་གི་ཚིག་བླ་དགས་ལགས། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །མི་སྐྱེ་འགག་པ་མ་མཆིས་པ། །རྣམ་འདྲེན་ཁྱོད་ཀྱིས་བཤད་དུ་གསོལ། །དེ་ཡི་ངེས་ཚིག་མཚན་ཉིད་དེ། །ཅི་འདྲ་ཤེས་རབ་ཆེན་པོ་པ། །མི་སྐྱེ་འགག་པ་མ་མཆིས་པ། །དེ་ནི་ཇི་ལྟར་བརྗོད་པར་བགྱི། །དཔེ་རྣམས་དང་ནི་གཏན་ཚིགས་ཀྱིས། །ཐུབ་ཆེན་བཤད་པ་མཛད་དུ་གསོལ། །བྱང་ཆུབ་སེམས་དཔའ་མང་པོ་འདུས་པ་འདི་དག་ནི། །འཇིག་རྟེན་རྣམ་པར་འདྲེན་པ་རྣམས་ཀྱིས་བཀྱེ་ལགས་ཏེ། །ཡེ་ཤེས་འཚལ་ཞིང་ཁྱོད་ལ་ཕྱག་འཚལ་མཆིས་ལགས་ན། །དམ་ཆོས་རྒྱ་ཆེན་དམ་པ་བཤད་པར་མཛད་དུ་གསོལ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས
42.293b
བཀའ་སྩལ་ཏོ། །ལེགས་སོ་ལེགས་སོ། །འཇམ་དཔལ་ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང་མི་རྣམས་ཀྱི་སྐྱེ་བོ་ཕལ་པོ་ཆེའི་དོན་དང ། ཕན་པ་དང་བདེ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐོབ་པར་བྱ་བའི་ཕྱིར་ཞུགས་ཏེ། ཁྱོད་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་སུ་ཞུ་བར་སེམས་པ་ནི་འཇམ་དཔལ་ཡང་ཁྱོད་ལེགས་སོ། །འཇམ་དཔལ་དེ་བཞིན་གཤེགས་པ་དོན་དེ་བསྟན་པ་ན་གནས་དེ་ལ་ཁྱོད་སྐྲག་པ་དང་འཇིགས་པ་དང ། སྔང་བར་མི་བྱ་ཞིང་འཇམ་དཔལ་ཁྱོད་ཀྱིས་ཡེ་ཤེས་ལ་བསྟེན་པར་ཡང་བྱའོ། །འཇམ་དཔལ་སྐྱེ་བ་མེད་པ་དང་འགག་པ་མེད་པ་ཞེས་བྱ་བ་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཚིག་བླ་དགས་ཡིན་ཏེ། འཇམ་དཔལ་འདི་ལྟ་སྟེ་དཔེར་ན། ས་གཞི་ཆེན་པོ་འདི་བཻ་དཱུརྱ་རིན་པོ་ཆེའི་རང་བཞིན་དུ་ཀུན་ནས་གནས་པར་གྱུར་ཅིང ། དེ་ཡང་ཇི་ལྟར་བཻ་དཱུརྱ་ཆེན་པོའི་རང་བཞིན་གྱི་ས་གཞི་ཆེན་པོ་དེ་ལ་སུམ་བཅུ་རྩ་གསུམ་པའི་གནས་དང ། ལྷའི་དབང་པོ་བརྒྱ་བྱིན་དང ། ཁང་བཟངས་རྣམ་པར་རྒྱལ་བྱེད་ཀྱི་གཟུགས་བརྙན་ཀུན་ཏུ་སྣང་བར་འགྱུར་བ་དེ་ལྟར་ཀུན་ནས་གནས་པར་གྱུར་ལ། དེ་ན་ལྷའི་དབང་པོ་བརྒྱ་བྱིན་ལྷའི་འདོད་པའི་ཡོན་ཏན་ལྔ་པོ་དག་གིས་རྩེ་བ་དང ། དགའ་བ་དང ། དགའ་མགུར་སྤྱོད་པ་ཡང་ཀུན་ཏུ་སྣང་བར་གྱུར་ཅིང ། དེ་ནས་དེའི་ཚེ་ལྷ་རྣམས་ཀྱིས་འཛམ་བུའི་གླིང་གི་སྐྱེས་པ་དང ། བུད་མེད་དང་ཁྱེའུ་དང་བུ་མོ་ཐམས་ཅད་ལ་ཚིག་འདི་སྐད་ཅེས། ཀྱེ་སྐྱེས་པ་དང་བུད་མེད་དག་ཚུར་ཤོག་།སྦྱིན་པ་དག་བྱིན་ཅིག་།བསོད་ནམས་དག་གྱིས་ཤིག་།ཚུལ་ཁྲིམས་ཡང་དག་པར་ལོང་སྟེ་འདུག་ཤིག་དང ། ཁང་བཟངས་རྣམ་པར་རྒྱལ་བྱེད་འདི་ལྟ་བུ་དག་གི་ནང་ན་རྩེ་བར་འགྱུར། དགའ་བར་འགྱུར།
42.294a
དགའ་མགུར་སྤྱོད་པར་འགྱུར་ཞིང ། བརྒྱ་བྱིན་ཉིད་ཐོབ་པར་ཡང་འགྱུར་ལ་ལྷའི་དབང་པོ་བརྒྱ་བྱིན་ལྷའི་ལོངས་སྤྱོད་དག་གིས་འབྱོར་ཅིང་ལྡན་པར་གྱུར་པ་ཅི་འདྲ་བ་དེ་འདྲ་བའི་འབྱོར་པ་དག་དང་ལྡན་པར་ཡང་དག་པར་བསྐུལ་བར་ཡང་བྱེད་ལ། འཇམ་དཔལ་དེ་ནས་སྐྱེས་པ་དང ། བུད་མེད་དང་ཁྱེའུ་དང་བུ་མོ་དེ་དག་གིས་བཻ་དཱུརྱ་ཆེན་པོའི་རང་བཞིན་གྱི་ས་གཞི་ཆེན་པོ་དེ་ལ་སུམ་བཅུ་རྩ་གསུམ་པའི་གནས་དང ། ཁང་བཟངས་རྣམ་པར་རྒྱལ་བྱེད་དང ། ལྷའི་དབང་པོ་བརྒྱ་བྱིན་གྱི་གཟུགས་བརྙན་མཐོང་ནས། ཐལ་མོ་སྦྱོར་ཞིང་མེ་ཏོག་དག་ཀྱང་འཐོར་བར་བྱེད། སྤོས་དག་ཀྱང་འཐོར་བར་བྱེད་ལ། ཚིག་འདི་སྐད་ཅེས་བདག་ཅག་ཀྱང་ལྷའི་དབང་པོ་བརྒྱ་བྱིན་ཅི་འདྲ་བ་དེ་འདྲ་བའི་ལུས་ཐོབ་པར་གྱུར་ཅིག་།བདག་ཅག་ཀྱང་ཇི་ལྟར་ལྷའི་དབང་པོ་བརྒྱ་བྱིན་འདི་ཁང་བཟངས་རྣམ་པར་རྒྱལ་བྱེད་ཀྱི་ནང་ན་ལྷའི་འདོད་པའི་ཡོན་ཏན་ལྔ་པོ་དག་གིས་རྩེ་བ་དང ། དགའ་བ་དང ། དགའ་མགུར་སྤྱོད་པར་བྱེད་པ་དེ་ལྟར་གྱུར་ཅིག་ཅེས་རྗོད་པར་བྱེད་ཀྱང ། སེམས་ཅན་དེ་དག་གིས་ནི་འདི་ལྟར་བཻ་དཱུརྱ་ཆེན་པོའི་རང་བཞིན་གྱི་ས་གཞི་ཆེན་པོ་ལ་སུམ་བཅུ་རྩ་གསུམ་པའི་གནས་དང ། ཁང་བཟངས་རྣམ་པར་རྒྱལ་བྱེད་དང ། ལྷའི་དབང་པོ་བརྒྱ་བྱིན་སྣང་བ་འདི་ནི་བཻ་དཱུརྱ་ཆེན་པོའི་རང་བཞིན་ཡོངས་སུ་དག་པའི་ཕྱིར། གཟུགས་བརྙན་ཀུན་ཏུ་སྣང་བ་ཡིན་ནོ་ཞེས་དེ་ལྟར་ཡོངས་སུ་མི་ཤེས་ཏེ། དེ་དག་བརྒྱ་བྱིན་ཉིད་འདོད་པས་སྦྱིན་པ་དག་ཀྱང་སྦྱིན། བསོད་ནམས་དག་ཀྱང་བྱེད་ཚུལ་ཁྲིམས་ཡང་དག་པར་བླངས་ཏེ་གནས་ཤིང་དགེ་བའི་རྩ་བ་དག་ཀྱང་སུམ་བཅུ་རྩ་གསུམ་པའི་གནས་སྣང་བ་དེར་སྐྱེ་བར་བྱ་བའི་ཕྱིར་ཡོངས་སུ་སྔོ་བར་བྱེད་ན། འཇམ་དཔལ་ཇི་ལྟར། བཻ་དཱུརྱ་ཆེན་པོ་རང་བཞིན་གྱི་ས་གཞི་ཆེན་པོ་དེ་ལ་སུམ་བཅུ་རྩ་གསུམ་པའི་གནས་ཀྱང་མེད། ཁང་བཟངས་རྣམ་པར་རྒྱལ་བྱེད་ཀྱང་མེད། ལྷའི་དབང་པོ་བརྒྱ་བྱིན་ཡང་མེད་མོད་ཀྱི། འོན་ཀྱང
42.294b
བཻ་དཱུརྱ་ཆེན་པོ་ཡོངས་སུ་དག་པའི་ཕྱིར། དེ་ལ་སུམ་བཅུ་རྩ་གསུམ་པའི་གནས་དང ། ཁང་བཟང་རྣམ་པར་རྒྱལ་བྱེད་དང ། ལྷའི་དབང་པོ་བརྒྱ་བྱིན་གྱི་གཟུགས་བརྙན་ཀུན་ཏུ་སྣང་སྟེ། དེ་དག་ཀྱང་ཡོད་པ་མ་ཡིན་ཞིང་སྐྱེ་བ་མེད་པ་དང ། འགག་པ་མེད་པ་མ་ཡིན་བཞིན་དུ་བཻ་དཱུརྱ་ཆེན་པོ་ཡོངས་སུ་དག་པའི་ཕྱིར། གཟུགས་བརྙན་ཀྱང་ཀུན་ཏུ་སྣང་བ་དེ་བཞིན་དུ། འཇམ་དཔལ་སེམས་ཡོངས་སུ་དག་པ་དང་བསྒོམ་པ་ཤིན་ཏུ་གོམས་པར་བྱས་པའི་སེམས་ཅན་ལ་དེ་བཞིན་གཤེགས་པའི་སྐུ་སྣང་བར་གྱུར། འཇམ་དཔལ་དེ་བཞིན་གཤེགས་པའི་མཐུས་སེམས་ཅན་རྣམས་ཀྱིས། དེ་བཞིན་གཤེགས་པའི་སྐུ་མཐོང་བ་དེ་ཡང་མ་བྱུང་བ། མ་སྐྱེས་པ་མ་འགགས་པ་དངོས་པོ་མ་ཡིན་དངོས་པོ་མེད་པ་མ་ཡིན། བལྟར་སྣང་བ་མ་ཡིན་བལྟར་མི་སྣང་བ་མ་ཡིན། འཇིག་རྟེན་མ་ཡིན་འཇིག་རྟེན་མེད་པ་མ་ཡིན། སེམས་པ་ཡོད་པ་མ་ཡིན་སེམས་པ་མེད་པ་མ་ཡིན། བསམ་དུ་ཡོད་པ་མ་ཡིན། བསམ་དུ་མེད་པ་མ་ཡིན། ཡོད་པ་མ་ཡིན་མེད་པ་མ་ཡིན་མོད་ཀྱི། འཇམ་དཔལ་འོན་ཀྱང་སེམས་ཅན་རྣམས་ནི་དེ་བཞིན་གཤེགས་པའི་གཟུགས་བརྙན་ལ་དམིགས་ནས་མེ་ཏོག་ཀྱང་འཐོར་བར་བྱེད། སྤོས་དང་ནམ་བཟའ་དང་རིན་པོ་ཆེ་དག་ཀྱང་དབུལ་བར་བྱེད་ཅིང ། ཚིག་འདི་སྐད་ཅེས་བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཅི་འདྲ་བ་དེ་འདྲ་བར་གྱུར་ཅིག་ཅེས་རྗོད་པར་བྱེད་དེ། སངས་རྒྱས་ཀྱི་ཡེ་ཤེས་འདོད་པ་དེ་དག་བདག་ཀྱང་སྦྱིན་པ་དག་ཀྱང་སྦྱིན་བསོད་ནམས་དག་ཀྱང་བྱེད། ཚུལ་ཁྲིམས་ཡང་དག་པར་བླངས་ཏེ་གནས་ཤིང་དེ་དག་ཀྱང་དེ་བཞིན་གཤེགས་པའི་ཡེ་ཤེས་ཐོབ་པར་བྱ་བའི་ཕྱིར། ཡོངས་སུ་སྔོ་བར་བྱེད་དོ། །འཇམ་དཔལ་འདི་ལྟ་སྟེ། བཻ་དཱུརྱ་ཆེན་པོའི་རང་བཞིན་གྱི་ས་གཞི་ཆེན་པོ་དེ་ལ་ལྷའི་དབང་པོ་བརྒྱ་བྱིན་གྱི་གཟུགས་བརྙན་སྣང་བ་དེ་གཡོ་བར་མི་བྱེད་སེམས་པར་མི་བྱེད། སྤོང་བར་མི་བྱེད་རྟོག་པར་མི་བྱེད་རྣམ་པར
42.295a
རྟོག་པར་མི་བྱེད་ཅིང ། རྟོག་པ་མེད་པ་རྣམ་པར་རྟོག་པ་མེད་པ། སེམས་པ་མེད་པ་ཡིད་ལ་བྱེད་པ་མེད་པ་ཞི་བ་བསིལ་བར་གྱུར་པ། སྐྱེ་བ་མེད་པ་འགག་པ་མེད་པ། མཐོང་བ་མེད་པ་ཐོས་པ་མེད་པ། བསྣམས་པ་མེད་པ་མྱངས་པ་མེད་པ། རེག་པ་མེད་པ། མཚན་མ་མེད་པ་རྣམ་པར་རིག་པ་མེད་པ་རྣམ་པར་རིག་པ་མ་ཡིན་པ། དེ་བཞིན་དུ་འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང ། གཡོ་བར་མི་བྱེད་སེམས་པར་མི་བྱེད། སྤྲོ་བར་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད་ཅིང ། རྟོག་པ་མེད་པ་རྣམ་པར་རྟོག་པ་མེད་པ། སེམས་པ་མེད་པ། ཡིད་ལ་བྱེད་པ་མེད་པ། ཞི་བ་བསིལ་བར་གྱུར་པ། སྐྱེ་བ་མེད་པ་འགག་པ་མེད་པ་མཐོང་བ་མེད་པ། ཐོས་པ་མེད་པ་བསྣམས་པ་མེད་པ། མྱངས་པ་མེད་པ་རེག་པ་མེད་པ་མཚན་མ་མེད་པ། རྣམ་པར་རིག་པ་མེད་པ་རྣམ་པར་རིག་པར་བྱ་བ་མ་ཡིན་པ་སྟེ། འཇམ་དཔལ་དེ་བཞིན་གཤེགས་པ་ནི་སྐྱེ་བ་མེད་པའི་གནས་ཡིན་མོད་ཀྱི། འོན་ཀྱང་འཇིག་རྟེན་ན་གཟུགས་བརྙན་བཞིན་དུ་སྣང་ཞིང་སེམས་ཅན་རྣམས་ཀྱི་མོས་པ་ཇི་ལྟ་བ་བཞིན་དུ་མཐོང་བའི་བྱེ་བྲག་གིས་ཚེའི་བྱེ་བྲག་སྟོན་པར་ཡང་བྱེད་ལ། ཡོངས་སུ་སྨིན་པ་དང་མོས་པའི་སྟོབས་བསྐྱེད་པས། བྱང་ཆུབ་ཀྱི་སྣོད་དུ་གྱུར་པའི་སེམས་ཅན་རྣམས་ལ་གཟུགས་བརྙན་སྣང་བར་ཡང་འགྱུར་ཏེ། སེམས་ཅན་རྣམས་ཀྱི་བསམ་པ་དང་མོས་པ་ཇི་ལྟ་བ་བཞིན་དུ་ཆོས་ཐོས་པར་ཡང་འགྱུར། བསམ་པ་ཇི་ལྟ་བ་བཞིན་དུ་ཐེག་པ་གསུམ་དུ་ཤེས་པར་ཡང་འགྱུར། བསམ་པ་ཇི་ལྟ་བ་བཞིན་དུ་རྣམ་པར་གྲོལ་བར་ཡང་འགྱུར་རོ། །འཇམ་དཔལ་འདི་ལྟ་སྟེ་དཔེར་ན། སུམ་བཅུ་རྩ་གསུམ་པའི་ལྷ་རྣམས་ཀྱི་བསོད་ནམས་ཀྱི་སྟོབས་ཀྱིས་གྲུབ་པའི་ཆོས་ཀྱི་རྔ་བོ་ཆེ་ཆོས་ཀྱི་སྒྲ་ཞེས་བྱ་བ་ཞིག་ཁང་བཟངས་རྣམ་པར་རྒྱལ་བྱེད་ཀྱི་སྟེང་གི་བར་སྣང་ལ་འདུག་ཅིང ། ལྷའི་བུ་ཐམས་ཅད་ཀྱི་མིག་ལམ་ལས་ཡང་དག་པར་འདས་ཏེ།
42.295b
བལྟར་མི་སྣང་བར་མཐོང་མོད་ཀྱི་འཇམ་དཔལ་འོན་ཀྱང་ཆོས་ཀྱི་རྔ་བོ་ཆེ་དེ་གང་གི་ཚེ་སུམ་བཅུ་རྩ་གསུམ་པའི་རིས་ཀྱི་ལྷ་རྣམས་ལྷའི་འདོད་པའི་རྩེད་མོ་དང ། དགའ་བ་དང་ལོངས་སྤྱོད་དག་གིས་རྟག་པར་རྒྱུན་ཏུ་ཤས་ཆེར་བག་མེད་པར་གྱུར་ཅིང ། ཡང་དང་ཡང་དུ་ལྷའི་འདུན་ས་ཆོས་བཟང་གི་ནང་དུ་ཞུགས་ཏེ། ཆོས་ཡང་དག་པར་བགྲོ་བར་མི་བྱེད་པ་དང ། འཇམ་དཔལ་གང་གི་ཚེ་ལྷའི་དབང་པོ་བརྒྱ་བྱིན་ཡང་ལྷའི་འདོད་པའི་རྩེད་མོ་དང ། དགའ་བ་དང ། ལོངས་སྤྱོད་དག་གིས་རྟག་པར་རྒྱུན་ཏུ་ཤས་ཆེར་བག་མེད་པར་གྱུར་ཅིང ། ཡང་དང་ཡང་དུ་ལྷའི་འདུན་ས་ཆོས་བཟང་གི་ནང་དུ་ཞུགས་ཏེ། ཆོས་ཀྱི་ཁྲི་སྟན་ལ་འདུག་ནས་ཆོས་སྨྲ་བར་མི་བྱེད་པ་དེའི་ཚེ། ཆོས་ཀྱི་རྔ་བོ་ཆེ་བར་སྣང་ལ་འདུག་ཅིང ། མིག་གི་ལམ་ལས་ཡང་དག་པར་འདས་ཏེ། བལྟར་མི་སྣང་ཞིང་མི་མཐོང་བ་དེ་ལས་ཆོས་ཀྱི་སྒྲ་འདི་ལྟ་བུ་འབྱུང་བར་འགྱུར་ཏེ། ཆོས་ཀྱི་སྒྲ་དེས་སུམ་བཅུ་རྩ་གསུམ་པའི་རིས་ཀྱི་ལྷ་ཐམས་ཅད་ལ་འདི་སྐད་དུ། གྲོགས་པོ་དག་གཟུགས་དང་སྒྲ་དང་དྲི་དང ། རོ་དང་རེག་བྱ་དག་ནི་མི་རྟག་པ་ཡིན་གྱིས། བག་མེད་པར་མ་སྤྱོད་ཅིག་།གནས་འདི་ནས་མྱུར་དུ་ཤི་འཕོས་པར་གྱུར་ཏ་རེ་གྲོགས་པོ་དག་འདུ་བྱེད་ཐམས་ཅད་ནི་སྡུག་བསྔལ་བ་ཡིན་ནོ། །གྲོགས་པོ་དག་འདུ་བྱེད་ཐམས་ཅད་ནི་སྟོང་པ་ཡིན་ནོ། །གྲོགས་པོ་དག་འདུ་བྱེད་ཐམས་ཅད་ནི་བདག་མེད་པ་ཡིན་ནོ། །གྲོགས་པོ་དག་འདི་ནས་ཤི་འཕོས་པ་རྣམས་ནི་ཡང་འདིར་སྐྱེ་བར་འགྱུར་བ་དཀའ་བ་ཡིན་གྱིས་བག་མེད་པར་མ་བྱེད་པར་གྲོགས་པོ་དག་ཆོས་ཡང་དག་པར་བགྲོ་བར་གྱིས་ཤིག་།ཆོས་ཀྱི་ཀུན་དགའ་ལ་དགའ་བས་དགའ་བར་གྱིས་ཤིག་།ཆོས་གཅེས་པར་བྱ་བ་དང ། ཆོས་ལ་གཞོལ་བ་དང ། ཆོས་རྗེས་སུ་དྲན་པ་ཡིད་ལ་བྱེད་པ་ལ་གནས་པར་གྱིས་ཤིག་།ལྷའི་འདོད་པའི་རྩེད་མོ་དང་དགའ་བ་དང ། ལོངས་སྤྱོད་འདི་དག་དང་ཡང་མི་འབྲལ་བར་གྱིས་ཤིག་།ཅེས་སྒྲས་གོ་བར་བྱེད་དོ། །འཇམ་དཔལ་དེའི་ཚེ་ན་ཆོས་ཀྱི་རྔ་བོ་ཆེ་དེ་བལྟར་མི་སྣང་བ།
42.296a
གཟུགས་མེད་པ་རྟོག་པ་མེད་པ། རྣམ་པར་རྟོག་པ་མེད་པ། མིག་གི་ལམ་ལས་ཡང་དག་པར་འདས་པ། མ་སྐྱེས་པ་མ་འགགས་པ་ཚིག་གི་ལམ་ལས་ཡང་དག་པར་འདས་པ། སེམས་དང་ཡིད་དང ། རྣམ་པར་ཤེས་པ་དང་བྲལ་བ་དེ་ལྟ་བུ་དེའི་སྒྲ་དེས་སུམ་བཅུ་རྩ་གསུམ་པའི་རིས་ཀྱི་ལྷ་ཐམས་ཅད་ལ་ཡང་དག་པར་བསྐུལ་བས་དེ་དག་འཇིགས་པ་དང ། སྐྲག་པ་དང་སྐྱོ་བ་དང ། ཡིད་བྱུང་བར་གྱུར་ནས་ལྷའི་འདུན་ས་ཆོས་བཟང་གི་ནང་དུ་ཞུགས་ཏེ། ཆོས་ཀྱི་ཀུན་དགའ་ལ་དགའ་བས་དགའ་བར་གནས་ཤིང ། ཆོས་གཅེས་པར་བྱ་བ་དང ། ཆོས་རྗེས་སུ་དྲན་པ་ཡིད་ལ་བྱེད་པ་ལ་གནས་པར་ཡང་བྱེད་དེ། དེ་དག་དེ་ནས་ཤི་འཕོས་ནས་ཁྱད་པར་དུ་འགྲོ་བར་ཡང་ཤེས་སོ། །དེའི་ཚེ་ན་ལྷའི་དབང་པོ་བརྒྱ་བྱིན་ཡང་ལྷའི་འདུན་ས་ཆོས་བཟང་གི་ནང་ན་ཞུགས་ཏེ། ཆོས་ཀྱི་ཁྲི་སྟན་ལ་འདུག་ནས་ཆོས་སྟོན་པར་བྱེད་དོ། །འཇམ་དཔལ་གང་གི་ཚེ་ལྷ་མ་ཡིན་རྣམས་ལྷ་རྣམས་དང་ལྷན་ཅིག་གཡུལ་སྤྲོད་པར་བྱེད་ཅིང ། དེར་ཡང་གང་གི་ཚེ་སུམ་བཅུ་རྩ་གསུམ་པའི་ལྷ་རྣམས་ཕམ་པར་གྱུར་པ་དེའི་ཚེ་ན། ཆོས་ཀྱི་རྔ་བོ་ཆེ་དེ་སྒྲ་འདི་ལྟ་བུ་འབྱིན་པར་བྱེད་དེ། སྒྲ་དེས་ལྷ་མ་ཡིན་རྣམས་འཇིགས་པ་དང ། སྐྲག་པ་དང་སྐྱོ་བ་དང ། ཡིད་བྱུང་བར་གྱུར་ནས་འབྲོས་པར་བྱེད་དོ། །འཇམ་དཔལ་ཆོས་ཀྱི་རྔ་བོ་ཆེ་དེ་ལ་ནི་སྒྲུབ་པར་བྱེད་པ་དང ། ལུས་གཟུགས་ཅུང་ཟད་མེད་དེ། འཇམ་དཔལ་ཆོས་ཀྱི་རྔ་བོ་ཆེ་དེ་ནི་བལྟར་མི་མཐོང་བ། མི་སྣང་བ་ཡོད་པ་མ་ཡིན་པ། མ་བྱུང་བ་བསམ་དུ་མེད་པ་སེམས་པ་མེད་པ། མཚན་མ་མེད་པ་གཟུགས་ཅན་མ་ཡིན་པ། སྒྲ་མེད་པ་དངོས་པོ་མེད་པ་གཉིས་སུ་མེད་པ་སྟེ། མིག་གི་ལམ་ལས་ཡང་དག་པར་འདས་པ་ཡིན་མོད་ཀྱི། འཇམ་དཔལ་འོན་ཀྱང་སུམ་བཅུ་རྩ་གསུམ་གྱི་རིས་ཀྱི་ལྷའི་བུ་སྔོན་ཡོངས་སུ་སྦྱང་བ་བྱས་པ་རྣམས་ལ། ཆོས་ཀྱི་རྔ་བོ་ཆེ་དེ་སྒྲ་དེ་ལྟ་བུ་འབྱིན་ཅིང་སུམ་བཅུ་རྩ
42.296b
གསུམ་པའི་རིས་ཀྱི་ལྷའི་བུ་རྣམས་ཀྱི་གནོད་པ་དང ། འཁྲུག་པ་དང་ཉེ་བའི་ཉོན་མོངས་པ་ཐམས་ཅད་ཉེ་བར་ཞི་བར་བྱེད་དོ། །འཇམ་དཔལ་ཇི་ལྟར་ཆོས་ཀྱི་རྔ་བོ་ཆེ་དེ་བལྟར་མི་སྣང་བ། མི་མཐོང་བ་ཡོད་པ་མ་ཡིན་པ། མ་བྱུང་བ་བསམ་དུ་མེད་པ་སེམས་པ་མེད་པ། མཚན་མ་མེད་པ། གཟུགས་ཅན་མ་ཡིན་པ། སྒྲ་མེད་པ་དངོས་པོ་མེད་པ་གཉིས་སུ་མེད་པ་སྟེ། མིག་གི་ལམ་ལས་ཡང་དག་པར་འདས་པ་ཡིན་མོད་ཀྱི། འཇམ་དཔལ་འོན་ཀྱང་སུམ་བཅུ་རྩ་གསུམ་པའི་རིས་ཀྱི་ལྷའི་བུ་སྔོན་ཡོངས་སུ་སྦྱང་བ་བྱས་པ་རྣམས་ལ་ཆོས་ཀྱི་རྔ་བོ་ཆེ་དེ་སྒྲ་དེ་ལྟ་བུ་འབྱིན་ཅིང་སུམ་བཅུ་རྩ་གསུམ་པའི་རིས་ཀྱི་ལྷའི་བུ་རྣམས་ཀྱི་གནོད་པ་དང ། འཁྲུག་པ་དང་ཉེ་བའི་ཉོན་མོངས་པ་ཐམས་ཅད་ཉེ་བར་ཞི་བར་བྱ་བའི་ཕྱིར། སྒྲ་འབྱིན་པར་བྱེད་ཅིང་ལྷའི་བུ་བག་མེད་པ་རྣམས་ལ་ཡང་ཆོས་ཀྱི་སྒྲས་ཡང་དག་པར་སྐུལ་བར་བྱེད་ལ། ཆོས་ཀྱི་སྒྲ་དེ་ཡང་སུམ་བཅུ་རྩ་གསུམ་པའི་རིས་ཀྱི་ལྷའི་བུ་རྣམས་ཀྱི་གནོད་པ་དང ། འཁྲུག་པ་དང་ཉེ་བའི་ཉོན་མོངས་པ་ཐམས་ཅད་ཉེ་བར་ཞི་བར་བྱེད་དོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་བལྟར་མི་སྣང ། མི་མཐོང་བ་ཡོད་པ་མ་ཡིན་པ་མ་བྱུང་བ་བསམ་དུ་མེད་པ། སེམས་པ་མེད་པ་མཚན་མ་མེད་པ། གཟུགས་ཅན་མ་ཡིན་པ། སྒྲ་མེད་པ་དངོས་པོ་མེད་པ་གཉིས་སུ་མེད་པ་སྟེ། མིག་གི་ལམ་ལས་ཡང་དག་པར་འདས་པ་ཡིན་མོད་ཀྱི། འཇམ་དཔལ་འོན་ཀྱང་སེམས་ཅན་རྣམས་སྔོན་གྱི་ལས་ཀྱི་རྣམ་པར་སྨིན་པས་བསམ་པ་དང ། མོས་པ་ཇི་ལྟ་བ་བཞིན་དུ། ཆོས་ཀྱི་སྒྲ་འབྱུང་བར་ཀུན་ཏུ་ཤེས་ཤིང ། ཆོས་ཀྱི་སྒྲ་དེ་ཡང་སེམས་ཅན་ཐམས་ཅད་ཀྱི་གནོད་པ་དང ། འཁྲུག་པ་དང་ཉེ་བའི་ཉོན་མོངས་པ་ཐམས་ཅད་ཉེ་བར་ཞི་བར་བྱ་བའི་ཕྱིར། འཇུག་པར་འགྱུར་ཏེ། ཆོས་ཀྱི་སྒྲ་སྐད་ཀྱིས་འཇིག་རྟེན་ན་དེ་བཞིན་གཤེགས་པའི་གསུང་ཞེས་བྱ་བའི
42.297a
གྲངས་སུ་འགྲོའོ། །འཇམ་དཔལ་དེ་བཞིན་གཤེགས་པ་ནི་ཡོད་པ་མ་ཡིན་མོད་ཀྱི། འོན་ཀྱང་འཇིག་རྟེན་ནི་ཆོས་ཀྱི་སྒྲ་སྐད་ཀྱིས་དེ་བཞིན་གཤེགས་པ་ཞེས་བྱ་བ་གདགས་པ་འབྱུང་སྟེ། སེམས་ཅན་རྣམས་ཁོ་ནའི་སྔོན་གྱི་དགེ་བའི་རྩ་བའི་ལས་ཀྱི་རྣམ་པར་སྨིན་པས་སེམས་ཅན་ཐམས་ཅད་ཀྱིས། དེ་བཞིན་གཤེགས་པ་ལས་སྒྲ་འབྱུང་བར་ཀུན་ཏུ་ཤེས་སོ། །སྒྲ་དེ་ཡང་སེམས་ཅན་ཐམས་ཅད་ཀྱི་བདེ་བ་ཐམས་ཅད་ཡང་དག་པར་བསྐྱེད་པར་བྱ་བ་དང ། བག་མེད་པ་རྣམས་ལ་ཡང་དག་པར་བསྐུལ་བར་བྱ་བའི་ཕྱིར་བྱུང་སྟེ། འཇམ་དཔལ་སེམས་ཅན་དེ་དག་གིས་སྒྲ་དེ་ཐོས་ནས། འདི་ནི་དེ་བཞིན་གཤེགས་པའི་སྐུ་ཡིན་ནོ་སྙམ་དུ་དེ་བཞིན་གཤེགས་པ་ལ་རྟོག་པར་ཡང་བྱེད་དོ། །བྱང་ཆུབ་སེམས་དཔའ་ལས་དང་པོ་པ་རྣམས་དང ། བྱིས་པ་སོ་སོའི་སྐྱེ་བོ་ཐམས་ཅད་དེ་བཞིན་གཤེགས་པ་ལ་དམིགས་པའི་དགེ་བའི་རྩ་བ་ཡང་དག་པར་བསྐྱེད་པར་བྱ་བའི་ཕྱིར། དེ་བཞིན་གཤེགས་པའི་གསུང་ཡང་ཐོས་མོད་ཀྱི། འཇམ་དཔལ་འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་སྐྱེ་བ་མེད་པ་དང ། འགག་པ་མེད་པ་ཡིན་པར་རིག་པར་བྱའོ། །འཇམ་དཔལ་འདི་ལྟ་སྟེ་དཔེར་ན། སོས་ཀའི་དུས་ཀྱི་མཐར་ཐུག་ནས་དབྱར་ཟླ་ར་བ་བྱུང་བར་གྱུར་པ་ན། སེམས་ཅན་རྣམས་ཀྱི་སྔོན་གྱི་ལས་ཀྱི་རྣམ་པར་སྨིན་པས་ས་ལ་གནས་པའི་ས་བོན་གྱི་ཚོགས་དང ། ལོ་ཏོག་གི་ཚོགས་དང་རྩཝ་དང་ཤིང་གེལ་པ་དང ། རྩི་དང་ནགས་ཚལ་ཐམས་ཅད་ཀུན་ཏུ་བསྐྱེད་པར་བྱ་བའི་ཕྱིར། སྟེང་གི་ནམ་མཁའ་བར་སྣང་གི་གནས་ལ་འདི་འདྲ་བའི་རླུང་དག་ལྡང་སྟེ། དེས་ཆར་པ་སྡུད་པར་བྱེད་ཅིང་བསྡུས་ནས་ཀྱང་ས་གཞི་ཆེན་པོ་ལ་འབབ་པར་བྱེད་དོ། །དེས་ས་གཞི་ཆེན་པོ་ཐམས་ཅད་ཀུན་ཏུ་ཚིམ་པར་བྱེད་ཅིང ། དེའི་ཚེ་ན་འཛམ་བུ་གླིང་པའི་མི་ཐམས་ཅད་ཀྱང་རབ་ཏུ
42.297b
དགའ་བ་དང ། ཡིད་བདེ་བར་བྱེད་དེ། དེ་ལ་འཇིག་རྟེན་ན་སྤྲིན་ཅེས་བྱ་བའི་མིང་དུ་འགྱུར་རོ། །འཇམ་དཔལ་གང་གི་ཚེ་སྟེང་གི་བར་སྣང་ལས་ཆར་པའི་ཚོགས་ཆེན་པོ་མི་འབབ་པ་དེའི་ཚེ་ན་འཛམ་བུ་གླིང་པའི་མི་ཐམས་ཅད་འདི་སྐད་ཅེས་འདིར་སྤྲིན་མི་འཁོར་རོ་ཞེས་བརྗོད་པར་བྱེད་དོ། །འཇམ་དཔལ་གང་གི་ཚེ་སྟེང་གི་བར་སྣང་ལས་ཆར་པའི་ཚོགས་ཆེན་པོ་ས་གཞི་ལ་འབབ་པ་དེའི་ཚེ་ན་ནི། འཛམ་བུ་གླིང་པའི་མི་ཐམས་ཅད་འདི་སྐད་ཅེས། ཨ་ལ་ལ་སྤྲིན་ཆེན་པོ་ནི་ཆར་གྱི་རྒྱུན་འབེབས་པར་བྱེད་ཅིང ། ས་གཞི་ཆེན་པོ་ཡང་ཀུན་ཏུ་ཚིམ་པར་བྱེད་དོ། །འཇམ་དཔལ་དེ་ན་ནི་སྤྲིན་ཡང་མེད་ལ་སྤྲིན་དུ་གདགས་པ་ཡང་མེད་དེ། འཇམ་དཔལ་སེམས་ཅན་རྣམས་ཀྱི་སྔོན་གྱི་ལས་ཀྱི་རྣམ་པར་སྨིན་པས་ཆར་པའི་ཚོགས་ཆེན་པོ་རླུང་གིས་ཀུན་ནས་བསྐྱོད་ན་ནི། སྟེང་གི་བར་སྣང་ལས་འབབ་པར་ཡང་འགྱུར། འཇམ་དཔལ་ཆར་པའི་ཚོགས་ཆེན་པོ་དེ་རླུང་གིས་ཀུན་ནས་དཀྲུགས་པ་ནི། སྟེང་གི་བར་སྣང་དེ་ཉིད་དུ་བག་ལ་ཞ་བར་ཡང་འགྱུར་རོ། །འཇམ་དཔལ་དེ་ལྟར་སེམས་ཅན་རྣམས་ཀྱི་སྔོན་གྱི་ལས་ཀྱི་རྣམ་པར་སྨིན་པས་སྟེང་གི་བར་སྣང་ལ་ཆར་པའི་ཚོགས་ཆེན་པོ་དེ་ཀུན་ནས་འདུས་པ་དང ། རླུང་ཀུན་ཏུ་འཁྲུག་པ་དག་གི་ཆར་པའི་རྒྱུན་ཀུན་ཏུ་འཛིན་པ་འམ། འབེབས་པར་བྱེད་པ་དེ་ལ་སྤྲིན་ཅེས་འདོགས་པར་འབྱུང་མོད་ཀྱི། འཇམ་དཔལ་དེ་ལ་ནི་སྤྲིན་ཡང་མེད། འཇམ་དཔལ་སྤྲིན་དེ་ནི་མ་སྐྱེས་པ། མ་འགགས་པ། སེམས་ཀྱི་ཡུལ་དུ་མི་འཇུག་པ། འོང་བ་དང་འགྲོ་བ་དང་བྲལ་བ་ཡིན་ནོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་དགེ་བའི་རྩ་བའི་ཚོགས་བསགས་པ་དག་དང ། སེམས་ཅན་ཉན་ཐོས་དང ། རང་སངས་རྒྱས་ཀྱི་ཤེས་པ་འདོད་པ་གཞན་དག་དང ། སེམས་ཅན་དགེ་བའི་རྩ་བ་བསྐྱེད་པ། མྱ་ངན་ལས་འདས་པ་ཡང་དག་པར་བསྟན་པའི་རྒྱུ་ཅན་རྣམས་ལ། དེ་བཞིན་གཤེགས་པ་དགྲ
42.298a
བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་ཐོགས་པ་མི་མངའ་བ་དང་ལྡན་པ་འཇིག་རྟེན་དུ་བྱུང་ངོ ། །འཇིག་རྟེན་དུ་བྱུང་ངོ་ཞེས་བྱ་བའི་གྲངས་སུ་འགྲོ་སྟེ། དེ་གང་ཅི་གསུང་བ་དེ་དག་ཐམས་ཅད་ཀྱང་དེ་བཞིན་པ་མ་ནོར་བ་དེ་བཞིན་པ་གཞན་མ་ཡིན་པ་དེ་བཞིན་པ་ཡིན་པས། དེ་ལ་ལྷ་དང་མི་རྣམས་ཀྱི་ནང་ན་དེ་བཞིན་གཤེགས་པ་ཞེས་བྱ་བའི་མཚན་དུ་བཏགས་པ་ཡིན་ཏེ། འཇམ་དཔལ་དེ་ལས་ལྷ་དང་མི་རྣམས་ཀྱི་ནང་དུ་དེ་བཞིན་གཤེགས་པ་ཞེས་བྱ་བའི་སྒྲ་འབྱུང་བར་ཡང་འགྱུར་རོ། །འཇམ་དཔལ་དེ་བཞིན་གཤེགས་པ་ནི་ཡོད་པ་མ་ཡིན་པ་སྟེ། འཇམ་དཔལ་དེ་བཞིན་གཤེགས་པ་ནི་མཚན་མ་མེད་པ། མཚན་མ་དང་བྲལ་བ་ཡུལ་ན་མི་གནས་པ་ཕྱོགས་ན་མི་གནས་པ། མ་བྱུང་བ་མ་སྐྱེས་པ། མ་འགགས་པ་ཡིན་ནོ། །འཇམ་དཔལ་དེ་བཞིན་གཤེགས་པའི་སྤོབས་པ་དེས་ལྷ་དང་བཅས་པའི་འཇིག་རྟེན་ཆོས་ཀྱིས་ཡང་དག་པར་ཚིམ་པར་མཛད་ཅིང ། ཡང་དག་པར་འཛིན་དུ་བཙུད་ནས། བྱང་ཆུབ་སེམས་དཔའ་ལས་དང་པོ་པ་རྣམས་དང ། བྱིས་པ་སོ་སོའི་སྐྱེ་བོ་ཡོངས་སུ་མྱ་ངན་ལས་འདའ་བས་འདུལ་བ་གཞན་དག་གི་སྔོན་གྱི་ལས་ཀྱི་རྣམ་པར་སྨིན་པས་མི་སྣང་བར་གྱུར་པ་ན། བདག་འདི་སྙམ་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ་སྙམ་དུ་ཡང་སེམས་ཏེ། འཇམ་དཔལ་དེ་བཞིན་གཤེགས་པ་ནི་སྐྱེ་བ་ཡང་མེད་འགག་པ་ཡང་མེད་དོ། །འཇམ་དཔལ་དེ་བཞིན་གཤེགས་པ་ནི་མ་སྐྱེས་པ་མ་འགགས་པ་སྟེ། འཇམ་དཔལ་དེ་བཞིན་གཤེགས་པ་ནི་གཟོད་མ་ནས་ཡོངས་སུ་མྱ་ངན་ལས་འདས་པ་ཡིན་ནོ། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡོད་པ་མ་ཡིན་པ་སྟེ། འཇམ་དཔལ་ཇི་ལྟར་ཆར་པ་དམིགས་པ་ལས་སྤྲིན་མ་བྱུང་བ། མ་སྐྱེས་པ་མ་འགགས་པ། ཡོད་པ་མ་ཡིན་པ། དེ་ལ་འཇིག་རྟེན་ན་སྤྲིན་སྤྲིན་ཅེས་བྱ་བར། འདོགས་པ་བྱུང་བ་དེ་བཞིན་དུ། འཇམ་དཔལ
42.298b
ཆོས་སྟོན་པར་དམིགས་པ་ལས། དེ་བཞིན་གཤེགས་པ་མ་བྱུང་བ། མ་སྐྱེས་པ་མ་འགགས་པ། ཡོད་པ་མ་ཡིན་པ་གཟོད་མ་ཉིད་ནས་མ་སྐྱེས་པ་དེ་ལ་འཇིག་རྟེན་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤེས་བྱ་བར་འདོགས་པ་འབྱུང་ངོ ། །འཇམ་དཔལ་འདི་ལྟ་སྟེ་དཔེར་ན། སྟོང་གསུམ་འབུམ་ཕྲག་བཅུ་ལ་དབང་སྒྱུར་བའི་ཚངས་པ་ཆེན་པོ་ཟིལ་གྱིས་མི་ནོན་ཅིང་ཟིལ་གྱིས་གནོན་པར་བྱེད་པ་ནི་ཉིན་གཅིག་བཞིན་དུ་རྒྱལ་ཆེན་བཞིའི་ལྷའི་རིས་ཀྱི་མཐར་ཐུག་པའི་བར་གྱི་ལྷའི་རིས། ཐམས་ཅད་ལ་རྣམ་པར་ལྟ་བར་བྱེད་དེ། འཇམ་དཔལ་སྟོང་གསུམ་འབུམ་ཕྲག་བཅུ་ལ་དབང་སྒྱུར་བའི་ཚངས་པ་ཆེན་པོ་ཟིལ་གྱིས་མི་ནོན་ཅིང ། ཟིལ་གྱིས་གནོན་པར་བྱེད་པ་སྟེ། ལྷའི་རིས་ཐམས་ཅད་ལ་རྣམ་པར་ལྟ་བར་བྱེད་པ་དེའི་ཚེ་ན། ལྷའི་རིས་ཐམས་ཅད་ཀྱི་ནང་ན། ལྷའི་བུ་ཐམས་ཅད་རང་རང་གི་འདོད་པའི་རྩེད་མོ་དང ། དགའ་བ་དང་ལོངས་སྤྱོད་དག་སྤངས་ཏེ། སིལ་སྙན་དང་ཕེག་རྡོབ་དང ། གླུ་དབྱངས་ཀྱི་སྒྲ་ཐམས་ཅད་ཞི་བར་བྱས་ནས། འདོད་པའི་རྩེད་མོ་དང ། དགའ་བ་དང ། ལོངས་སྤྱོད་ཡིད་ལ་བྱེད་པ་བཏང་སྟེ། གུས་པ་དང་བཅས་པས་ཐལ་མོ་སྦྱར་ནས། ཚངས་པ་ཆེན་པོ་དེ་ལ་མིག་མི་འཛུམས་པར་ལྟ་བར་བྱེད་དོ། །ཚངས་པ་ཆེན་པོ་དེ་ཡང་གནས་ནས་མི་གཡོ་བར་ལྷའི་བུ་ཐམས་ཅད་ཡུད་ཙམ་ཞིག་བདག་ལྟར་འཇུག་པར་བྱེད་དེ། དེའི་ཚེ་ན་ལྷའི་བུ་དེ་དག་ཚངས་པའི་འཇིག་རྟེན་དུ་སྐྱེ་བར་འདོད་ཅིང ། དགེ་བའི་རྩ་བ་རྣམས་ཀྱང་ཚངས་པའི་འཇིག་རྟེན་དུ་སྐྱེ་བར་བྱ་བའི་ཕྱིར་ཡོངས་སུ་སྔོ་བར་བྱེད་དོ། །འཇམ་དཔལ་ཚངས་པ་ཆེན་པོ་དེ་ཡང་ཚངས་པའི་གཞལ་མེད་ཁང་དེ་ནས་འཆི་འཕོ་བར་མི་བྱེད་བཞིན་དུ། སྔོན་གྱི་སྨོན་ལམ་གྱི་བྱིན་གྱིས་བརླབས་དང ། ལྷའི་བུ་དེ་དག་གི་སྔོན་གྱི་དགེ་བའི་རྩ་བ་བསགས་པའི་མཐུས།
42.299a
སྟོང་གསུམ་འབུམ་ཕྲག་བཅུ་ལ་དབང་སྒྱུར་བའི་ཚངས་པ་ཆེན་པོ་ཟིལ་གྱིས་མི་ནོན་ཅིང་ཟིལ་གྱིས་གནོན་པར་བྱེད་པ་གཞན་ཞིག་བྱིན་གྱིས་རློབ་པར་བྱེད་དོ། །འཇམ་དཔལ་སྤྲུལ་པའི་ཚངས་པ་ཆེན་པོ་དེ་ཡང་ཉིན་གཅིག་བཞིན་དུ་རྒྱལ་ཆེན་བཞིའི་རིས་ཀྱི་མཐར་ཐུགས་པའི་བར་གྱི་ལྷའི་རིས་ཐམས་ཅད་ལ་རྣམ་པར་ལྟ་བར་བྱེད་དེ། འཇམ་དཔལ་དེའི་ཚེ་ན། ལྷའི་རིས་ཐམས་ཅད་ཀྱི་ནང་ན་ལྷའི་བུ་ཐམས་ཅད་རང་རང་གི་འདོད་པའི་རྩེད་མོ་དང ། དགའ་བ་དང ། ལོངས་སྤྱོད་དག་སྤངས་ཏེ། སིལ་སྙན་དང་ཕེག་རྡོབ་པ་དང ། གླུ་དབྱངས་ཀྱི་སྒྲ་ཐམས་ཅད་ཞི་བར་བྱས་ནས། འདོད་པའི་རྩེད་མོ་དང ། དགའ་བ་དང་ལོངས་སྤྱོད་ཡིད་ལ་བྱེད་པ་བཏང་སྟེ། གུས་པ་དང་བཅས་པས་ཐལ་མོ་སྦྱར་ནས། ཚངས་པ་ཆེན་པོ་དེ་ལ་མིག་མི་འཛུམས་པར་ལྟ་བར་བྱེད་དོ། །སྤྲུལ་པའི་ཚངས་པ་ཆེན་པོ་དེ་ཡང་གནས་ནས་མི་གཡོ་བར་ལྷའི་བུ་ཐམས་ཅད་ཡུད་ཙམ་ཞིག་བདག་ལ་བལྟར་འཇུག་པར་ཡང་བྱེད་དེ། དེའི་ཚེ་ན་ལྷའི་བུ་དེ་དག་ཀྱང་ཚངས་པའི་འཇིག་རྟེན་དུ་སྐྱེ་བར་འདོད་ཅིང་དགེ་བའི་རྩ་བ་རྣམས་ཀྱང་ཚངས་པའི་འཇིག་རྟེན་དུ་སྐྱེ་བར་བྱ་བའི་ཕྱིར་ཡོངས་སུ་སྔོ་བར་ཡང་བྱེད་དོ། །འཇམ་དཔལ་དེ་ལ་ནི་ཚངས་པ་ཡོད་པ་མ་ཡིན་ཏེ། འཇམ་དཔལ་ཚངས་པ་དེ་ནི་སྟོང་པ་ཡ་མ་རླ། མ་བྱུང་བ་ཡི་གེ་མེད་པ། སྒྲ་མེད་པ་ཡུལ་མེད་པ། དངོས་པོ་མེད་པ་བསམ་དུ་མེད་པ། མཚན་མ་མེད་པ། སེམས་དང་ཡིད་དང ། རྣམ་པར་ཤེས་པ་དང་བྲལ་བ། མ་སྐྱེས་པ་མ་འགགས་པ་ཡིན་མོད་ཀྱི། འཇམ་དཔལ་འོན་ཀྱང་ཚངས་པ་ཆེན་པོ་དེ་ཉིད་ཀྱི་སྔོན་གྱི་དགེ་བའི་རྩ་བ་དང ། སྨོན་ལམ་གྱི་བྱིན་གྱིས་བརླབས་དང ། ལྷའི་བུ་དེ་དག་གིས་སྔོན་གྱི་དགེ་བའི་རྩ་བ་བསགས་པའི་མཐུས་ལྷའི་རིས་ཐམས་ཅད་ལ་བལྟར་སྣང་བར་ཡང་འགྱུར་རོ། །འཇམ་དཔལ་འོན་ཀྱང་ལྷའི་བུ་དེ་དག་འདི་སྙམ་དུ་ཚངས་པ་ཆེན
42.299b
པོ་དེ་ནི་སྤྲུལ་པ། སྟོང་པ་ཡ་མ་རླ། མ་བྱུང་བ་ཡི་གེ་མེད་པ། སྒྲ་མེད་པ་ཡུལ་མེད་པ། དངོས་པོ་མེད་པ་བསམ་དུ་མེད་པ། མཚན་མ་མེད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ། སྐྱེ་བ་མེད་པ་འགག་པ་མེད་པ་ཡིན་ནོ་སྙམ་དུ་མི་སེམས་སོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྟོང་པ། ཡ་མ་རླ་མ་བྱུང་བ། ཡི་གེ་མེད་པ་སྒྲ་མེད་པ་ཡུལ་མེད་པ། དངོས་པོ་མེད་པ་བསམ་དུ་མེད་པ། མཚན་མ་མེད་པ་སེམས་དང་ཡིད་དང ། རྣམ་པར་ཤེས་པ་དང་བྲལ་བ་མ་སྐྱེས་པ་མ་འགགས་པ་ཡིན་མོད་ཀྱི། འཇམ་དཔལ་འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་བྱིན་གྱིས་བརླབས་དང ། བྱང་ཆུབ་སེམས་དཔའ་ལས་དང་པོ་པ་རྣམས་དང ། ཉན་ཐོས་དང་རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་རྣམས་དང ། བྱིས་པ་སོ་སོའི་སྐྱེ་བོ་ཐམས་ཅད་ཀྱི་དགེ་བའི་རྩ་བ་བསགས་པའི་མཐུས། དེ་བཞིན་གཤེགས་པ་གནས་ནས་མི་གཡོ་བཞིན་དུ་མཚན་བརྒྱ་སྟོང་གིས་ལེགས་པར་བརྒྱན་པ། འཇིག་རྟེན་ན་གཟུགས་བརྙན་བཞིན་དུ་ཀུན་ཏུ་སྣང་ངོ ། །འཇམ་དཔལ་བྱང་ཆུབ་སེམས་དཔའ་ལས་དང་པོ་པ་རྣམས་དང ། ཉན་ཐོས་དང་རང་སངས་རྒྱས་ཀྱི་ཐེག་པ་པ་ཐམས་ཅད་དང ། བྱིས་པ་སོ་སོའི་སྐྱེ་བོ་ཐམས་ཅད་ནི་འདི་སྙམ་དུ་དེ་བཞིན་གཤེགས་པ་ནི་སྟོང་པ་ཡ་མ་རླ་མ་བྱུང་བ། ཡི་གེ་མེད་པ་སྒྲ་མེད་པ། ཡུལ་མེད་པ་དངོས་པོ་མེད་པ། བསམ་དུ་མེད་པ་མཚན་མ་མེད་པ། སེམས་དང་ཡིད་དང ། རྣམ་པར་ཤེས་པ་དང་བྲལ་བ་མ་སྐྱེས་པ། མ་འགགས་པ་ཡིན་པར་མི་སེམས་མོད་ཀྱི། འཇམ་དཔལ་འོན་ཀྱང་དེ་བཞིན་གཤེགས་པ་ནི་སྤྱོད་ལམ་ཐམས་ཅད་དུ་དེ་བཞིན་གཤེགས་པའི་སྐུ་མཚན་བརྒྱ་སྟོང་གིས་ལེགས་པར་བརྒྱན་པ་ལས་སེམས་ཅན་མོས་པ་རྣམ་པ་སྣ་ཚོགས་ཐ་དད་པ་རྣམས་ལ་ཆོས་སྟོན་པ་ཆེན་པོ་ཡང
42.300a
འབྱུང་བར་ཡང་བྱེད་དོ། །ཆོས་བསྟན་པ་དེ་ཡང་སེམས་ཅན་ཐམས་ཅད་ཀྱི་གནོད་པ་དང ། འཁྲུག་པ་དང་ཉེ་བའི་ཉོན་མོངས་པ་ཐམས་ཅད་ཉེ་བར་ཞི་བར་བྱེད་པ་འགྱུར་ཏེ། དེ་བཞིན་གཤེགས་པ་ནི་དེ་ལ་ཡང་ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་དེ། འཇམ་དཔལ་རྣམ་གྲངས་དེས་ཀྱང་འདི་ལྟར་སྐྱེ་བ་མེད་པ་དང ། འགག་པ་མེད་པ་ཞེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དགས་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཀུན་ཀྱང་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་རྣམས། །འཇིག་རྟེན་དག་ན་མེད་པའི་ཆོས་ལ་སྤྱོད། །དེ་བཞིན་གཤེགས་པ་ཟག་མེད་དགེ་བ་ཡི། །ཆོས་ཀྱི་གཟུགས་བརྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་མེད། །འཇིག་རྟེན་ཀུན་ཏུ་གཟུགས་བརྙན་ཀུན་ཏུ་སྣང ། །འཇམ་དཔལ་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་གྱི་འོད་ཟེར་དག་ནི་འཛམ་བུའི་གླིང་དུ་དང་པོ་ཁོ་ནར་རིའི་དབང་པོ་ཆེན་པོ་རྣམས་སྣང་བར་བྱེད་དོ། །དེའི་འོག་དུ་རིའི་ཁོར་ཡུག་དང་ཁོར་ཡུག་ཆེན་པོ་རྣམས་སྣང་བར་བྱེད་དོ། །དེའི་འོག་ཏུ་རི་ཆེན་པོ་གཞན་དག་ཀྱང་སྣང་བར་བྱེད་དོ། །དེའི་འོག་ཏུ་རི་ནག་པོ་རྣམས་སྣང་བར་བྱེད་དོ། །དེའི་འོག་ཏུ་ས་ཕྱོགས་མཐོན་པོ་མཐོན་པོ་དག་སྣང་བར་བྱེད་དོ། །དེའི་འོག་ཏུ་འཛམ་བུའི་གླིང་འདིའི་ས་ཕྱོགས་དམའ་བ་དམའ་བ་དག་ཀྱང་སྣང་བར་བྱེད་དོ། །འཇམ་དཔལ་འོན་ཀྱང་ཉི་མའི་འོད་ཟེར་དེ་དག་ནི་རྟོག་པར་མི་བྱེད་རྣམ་པར་རྟོག་པར་མི་བྱེད་སེམས་པར་མི་བྱེད། རྣམ་པར་སེམས་པར་མི་བྱེད་དེ། འཇམ་དཔལ་ཉི་མའི་འོད་ཟེར་རྣམས་ནི་སེམས་དང་ཡིད་དང ། རྣམ་པར་ཤེས་པ་དང་བྲལ་བ། མ་སྐྱེས་པ་མ་འགག་པ་མཚན
42.300b
ཉིད་མེད་པ། མཚན་ཉིད་དང་བྲལ་བ། ཡིད་ལ་བྱེད་པ་མེད་པ་ཡིད་ལ་བྱེད་པ་དང་བྲལ་བ། སྤྲོས་པ་མེད་པ་སྤྲོས་པ་དང་བྲལ་བ་ཡོངས་སུ་གདུང་བ་མེད་པ། ཡོངས་སུ་གདུང་བ་དང་བྲལ་བ། ཚུ་རོལ་ན་གནས་པ་མ་ཡིན་པ། ཕ་རོལ་ན་གནས་པ་མ་ཡིན། མཐོ་བ་མ་ཡིན་དམའ་བ་མ་ཡིན། བཅིངས་པ་མ་ཡིན། ཤེས་པ་དང་ལྡན་པ་མ་ཡིན། ཤེས་པ་དང་མི་ལྡན་པ་མ་ཡིན། ཉོན་མོངས་པ་དང་བཅས་པ་མ་ཡིན། བདེན་པར་སྨྲ་བ་མ་ཡིན། བརྫུན་དུ་སྨྲ་བ་མ་ཡིན། ཕ་རོལ་མ་ཡིན། ཚུལ་རོལ་མ་ཡིན། འགྲམ་ན་མ་ཡིན། གཤོང་ན་མ་ཡིན་ཐང་ལ་མ་ཡིན། ཆུ་བོ་ན་མ་ཡིན་རྟོག་གེའི་སྤྱོད་ཡུལ་མ་ཡིན། རྟོག་གེ་མ་ཡིན་པའི་སྤྱོད་ཡུལ་མ་ཡིན། གཟུགས་ཅན་མ་ཡིན། གཟུགས་མེད་པ་མ་ཡིན་མོད་ཀྱི། འཇམ་དཔལ་འོན་ཀྱང་ས་གཞི་མཐོ་བ་དང་དམའ་བ་དང་བར་མའི་བྱེ་བྲག་གིས་སྣང་བ་ཆེན་པོ་དང ། ཆུང་ངུ་དང་བར་མའི་འོད་ཟེར་སྣ་ཚོགས་སྣང་བར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་རྟོག་པར་མི་བྱེད། རྣམ་པར་རྟོག་པར་མི་བྱེད་སེམས་པར་མི་བྱེད། རྣམ་པར་སེམས་པར་མི་བྱེད་དེ། འཇམ་དཔལ་དེ་བཞིན་གཤེགས་པ་ནི་སེམས་དང་ཡིད་དང་རྣམ་པར་ཤེས་པ་དང་བྲལ་བ། མ་སྐྱེས་པ་མ་འགག་པ། མཚན་ཉིད་མེད་པ་མཚན་ཉིད་དང་བྲལ་བ། ཡིད་ལ་བྱེད་པ་མེད་པ། ཡིད་ལ་བྱེད་པ་དང་བྲལ་བ། སྤྲོས་པ་མེད་པ་སྤྲོས་པ་དང་བྲལ་བ། ཡོངས་སུ་གདུང་བ་མེད་པ། ཡོངས་སུ་གདུང་བ་དང་བྲལ་བ། ཚུལ་རོལ་ན་གནས་པ་མ་ཡིན། ཕ་རོལ་ན་གནས་པ་མ་ཡིན། མཐོ་བ་མ་ཡིན། དམའ་བ་མ་ཡིན། བཅིངས་པ་མ་ཡིན་གྲོལ་བ་མ་ཡིན། ཤེས་པ་དང་ལྡན་པ་མ་ཡིན། ཤེས་པ་དང་མི་ལྡན་པ་མ་ཡིན། ཉོན་མོངས་པ་དང་བཅས་པ་མ་ཡིན། ཉོན་མོངས་པ་མེད་པ་མ་ཡིན། བདེན་པར་གསུང་བ་མ་ཡིན། བརྫུན
42.301a
པར་གསུང་བ་མ་ཡིན། ཚུལ་རོལ་མ་ཡིན་ཕ་རོལ་མ་ཡིན། འགྲམ་ན་མ་ཡིན། གཤོང་ན་མ་ཡིན། ཐང་ལ་མ་ཡིན་ཆུ་བོ་ན་མ་ཡིན། ཐམས་ཅད་མཁྱེན་པ་མ་ཡིན། ཐམས་ཅད་མི་མཁྱེན་པ་མ་ཡིན། རྟོག་གེ་མ་ཡིན་རྟོག་གེ་མེད་པ་མ་ཡིན། སྤྱོད་པ་མ་ཡིན་སྤྱོད་པ་མེད་པ་མ་ཡིན། ཀུན་ཏུ་འབྱུང་བ་མ་ཡིན་ཀུན་ཏུ་མི་འབྱུང་བ་མ་ཡིན། དྲན་པ་དང་ལྡན་པ་མ་ཡིན། དྲན་པ་དང་མི་ལྡན་པ་མ་ཡིན། སེམས་པ་མ་ཡིན། སེམས་པ་མེད་པ་མ་ཡིན། ཡིད་མ་ཡིན་ཡིད་མེད་པ་མ་ཡིན། སྒྲ་སྐད་མ་ཡིན། སྒྲ་སྐད་མེད་པ་མ་ཡིན། མིང་མ་ཡིན་མིང་མེད་པ་མ་ཡིན། གཟུགས་མ་ཡིན་གཟུགས་མེད་པ་མ་ཡིན། བརྗོད་པ་མ་ཡིན་བརྗོད་དུ་མེད་པ་མ་ཡིན། གདགས་པ་མ་ཡིན་གདགས་སུ་མེད་པ་མ་ཡིན། བལྟར་སྣང་བ་མ་ཡིན། བལྟར་མི་སྣང་བ་མ་ཡིན། ཚུལ་མ་ཡིན་ཚུལ་མེད་པ་མ་ཡིན། ལམ་སྟོན་པ་མ་ཡིན། ལམ་མི་སྟོན་པ་མ་ཡིན། འབྲས་བུ་ཐོབ་པ་མ་ཡིན། འབྲས་བུ་མ་ཐོབ་པ་མ་ཡིན། རྟོག་པ་མ་ཡིན། རྟོག་པ་མེད་པ་མ་ཡིན། རྟོག་པ་དང་བྲལ་བ་མ་ཡིན། རྟོག་པ་དང་མ་བྲལ་བ་མ་ཡིན་མོད་ཀྱི། འཇམ་དཔལ་འོན་ཀྱང་དེ་བཞིན་གཤེགས་པ་ཉི་མའི་དཀྱིལ་འཁོར་གྱིས་ཡེ་ཤེས་ཀྱི་འོད་ཟེར་དག་ནི་ཁམས་གསུམ་པོ་དེ་དག་ཏུ་ཆོས་ཀྱི་དབྱིངས་མཐའ་དང་དབུས་མེད་པ་དག་ལ་ཐོགས་པ་མེད་པའི་འོད་ཟེར་གྱི་སྣང་བ་དག་གཏོང་བར་མཛད་ཅིང ། ཡེ་ཤེས་ཀྱི་འོད་ཟེར་བཏང་བ་དག་གིས་ཀྱང་དང་པོ་ཁོ་ནར་བྱང་ཆུབ་སེམས་དཔའ་ལྷག་པའི་བསམ་པའི་རིའི་དབང་པོའི་རྒྱལ་པོ་ཆེན་པོ་ལྟ་བུ་དང་ལྡན་པ་རྣམས་ཀྱི་ལུས་ལ་འབབ་པར་འགྱུར་རོ། །དེའི་འོག་ཏུ་རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ཀྱི་ལུས་ལ་འབབ་པར་འགྱུར་རོ། །དེའི་འོག་ཏུ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ཀྱི་ལུས་ལ་འབབ་པར་འགྱུར་རོ། །དེའི་འོག་ཏུ་སེམས་ཅན་ལྷག་པའི་བསམ་པ་དགེ་བ་དང ། མོས་པ
42.301b
ཇི་ལྟ་བ་དང་ལྡན་པ་རྣམས་ཀྱི་ལུས་ལ་འབབ་པར་འགྱུར་རོ། །དེའི་འོག་ཏུ་དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་དག་ཐ་ན་སེམས་ཅན་ལོག་པ་ཉིད་དུ་ངེས་པའི་སེམས་ཀྱི་རྒྱུད་དང་ལྡན་པ་རྣམས་ཀྱི་ལུས་ལ་འབབ་པར་འགྱུར་ཞིང ། དེ་དག་ལ་མ་འོངས་པའི་རྒྱུ་ཡང་དག་པར་སྐྱེད་པས་ཕན་འདོགས་པ་དང ། དགེ་བའི་ཆོས་རྣམས་ཀྱིས་ཡང་དག་པར་འཕེལ་བར་ཡང་བྱེད་དོ། །འཇམ་དཔལ་དེ་བཞིན་གཤེགས་པ་ནི་དེ་དག་ལ་ཡང་ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་དེ། འཇམ་དཔལ་དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་ནི་འདི་སྙམ་དུ་བདག་གིས་སེམས་ཅན་འདི་ལ་ནི་ཆོས་རྒྱ་ཆེན་པོ་བསྟན་པར་བྱའོ། །འདི་ལ་ནི་བསྟན་པར་མི་བྱའོ་སྙམ་དུ་ཡང་མི་སེམས་ལ། འདི་སྙམ་དུ་སེམས་ཅན་འདི་ནི་རྒྱ་ཆེན་པོ་ལ་མོས་པ་ཡིན་ནོ། །འདི་ནི་བར་མ་ལ་མོས་པ་ཡིན་ནོ། །འདི་ནི་ཉན་ཐོས་ཀྱི་ཐེག་པ་ལ་མོས་པ་ཡིན་ནོ། །འདི་ནི་བསམ་པ་དགེ་བ་ཡིན་ནོ། །འདི་ནི་དམན་པ་དང་ལོག་པ་ལ་མོས་པ་ཡིན་ནོ་སྙམ་དུ་རྣམ་པར་རྟོགས་པར་ཡང་མི་བྱེད་དེ། འཇམ་དཔལ་དེ་བཞིན་གཤེགས་པ་ནི་འདི་སྙམ་དུ། སེམས་ཅན་འདི་ནི་རྒྱ་ཆེན་པོ་ལ་མོས་པ་ཡིན་གྱིས་འདི་ལ་ནི་ཐེག་པ་ཆེན་པོ་བསྟན་པར་བྱའོ། །འདི་ནི་ལྷག་པའི་བསམ་པ་བར་མ་ལ་མོས་པ་ཡིན་གྱིས། འདི་ལ་ནི་རང་སངས་རྒྱས་ཀྱི་ཐེག་པ་བསྟན་པར་བྱའོ། །འདི་ནི་ཉན་ཐོས་ཀྱི་ཐེག་པ་ལ་མོས་པ་ཡིན་གྱིས། འདི་ལ་ནི་ཉན་ཐོས་ཀྱི་ཐེག་པ་བསྟན་པར་བྱའོ། །སེམས་ཅན་བསམ་པ་དགེ་བ་རྣམས་ཀྱི་བསམ་པ་རྟོགས་པར་བྱས་ནས། བསམ་པ་རྣམ་པར་སྦྱང་བར་བྱའོ། །སེམས་ཅན་ལོག་པ་ཉིད་དུ་མོས་པའི་བར་དག་ནི་ལྟ་བ་དྲང་པོ་བྱ་ཞིང ། ཇི་ལྟར་རྗེས་སུ་མཐུན་པའི་ཆོས་བསྟན་པར་བྱའོ། །སྙམ་དུ་ཡང་མི་སེམས་ཏེ། དེ་བཞིན
42.302a
གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་སྣང་བ་ནི་དེ་ལྟར་རྣམ་པར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་སྣང་བ་ནི་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་དང ། སྤྲོས་པ་ཐམས་ཅད་ཡང་དག་པར་རྒྱུན་ཆད་པ་ཡིན་པའི་ཕྱིར་རོ། །འཇམ་དཔལ་འོན་ཀྱང་སེམས་ཅན་རྣམས་ཀྱི་དགེ་བའི་བསམ་པའི་རྒྱུད་སྣ་ཚོགས་དག་ལ་དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་གྱི་སྣང་བ་སྣ་ཚོགས་དག་འབྱུང་བར་ཡང་འགྱུར་རོ།། །། བམ་པོ་གཉིས་པ། འཇམ་དཔལ་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བ་ཞིག་ཡོད་དེ། དེ་རྒྱལ་མཚན་གྱི་རྩེ་མོ་ལ་བཏགས་ན་དེ་ལས་སེམས་ཅན་གང་གིས་བསམ་པ་ཅི་འདྲ་བ་དེ་ལྟ་བུའི་སྒྲ་འབྱུང་བར་སེམས་ཅན་རྣམས་ཀྱིས་ཀུན་ཏུ་ཤེས་ཀྱང་ནོར་བུ་རིན་པོ་ཆེ་ཆེན་པོ་དེ་ནི་རྟོག་པར་མི་བྱེད། རྣམ་པར་རྟོག་པར་མི་བྱེད། སེམས་པར་མི་བྱེད་རྣམ་པར་སེམས་པར་མི་བྱེད་ཅིང ། སེམས་པ་མེད་པ་སེམས་མེད་པ་སེམས་དང་ཡིད་དང་རྣམ་པར་ཤེས་པ་དང་བྲལ་བ་ཡིན་ནོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་རྟོག་པར་མི་བྱེད། རྣམ་པར་རྟོག་པར་མི་བྱེད། སེམས་པར་མི་བྱེད། རྣམ་པར་སེམས་པར་མི་བྱེད་ཅིང ། སེམས་པ་མེད་པ། སེམས་དང་ཡིད་དང ། རྣམ་པར་ཤེས་པ་དང་བྲལ་བ། མ་བཟུང་བ། ཡོངས་སུ་གཟུང་བར་བྱ་བ་མ་ཡིན་པ། མ་ཐོབ་པ་ཐོབ་པར་བྱ་བ་མ་ཡིན། སོ་སོའི་བདེན་པ་བསལ་བ། འདོད་ཆགས་བསལ་བ། ཞེ་སྡང་བསལ་བ། གཏི་མུག་བསལ་བ། བདེན་པ་མ་ཡིན། བརྫུན་པ་མ་ཡིན། རྟག་པ་མ་ཡིན། མི་རྟག་པ་མ་ཡིན། འོད་མ་ཡིན་འོད་མེད་པ་མ་ཡིན། འཇིག་རྟེན
42.302b
མ་ཡིན། འཇིག་རྟེན་མེད་པ་མ་ཡིན། རྟོག་པ་མེད་པ་དཔྱོད་པ་མེད་པ་མ་སྐྱེས་པ་མ་འགགས་པ། བསམ་དུ་མེད་པ་རབ་ཏུ་བསམ་དུ་མེད་པ། རང་བཞིན་མེད་པ་རང་བཞིན་གྱི་གཞི་མེད་པ། རང་བཞིན་སྟོང་པ་བླང་བ་མེད་པ། དོར་བ་མེད་པ་མངོན་པར་ཞེན་པར་བྱ་བ་མེད་པ། བརྗོད་དུ་མེད་པ་བརྗོད་པ་ཡང་དག་པར་རྒྱུན་ཆད་པ། ཀུན་ཏུ་དགའ་བ་མེད་པ། ཀུན་ཏུ་དགའ་བ་དང་བྲལ་བ། ཀུན་ཏུ་དགའ་བས་ངེས་པར་བཅོམ་པ། གྲངས་སུ་བགྲང་བ་མ་ཡིན་པ་དང ། གྲངས་སུ་བགྲང་བ་དང ། འགྲོ་བ་མེད་པ་འགྲོ་བར་འགྲོ་བ་མེད་པ། འགྲོ་བ་ཐམས་ཅད་ཡང་དག་པར་རྒྱུན་ཆད་པ། བརྗོད་པ་ཐམས་ཅད་ཡང་དག་པར་རྒྱུན་ཆད་པ། བལྟར་མི་སྣང་བ། མི་མཐོང་བ་གཟུང་དུ་མེད་པ། ཐ་སྙད་མེད་པ། ནམ་མཁའ་མ་ཡིན། བླ་གབ་མེད་པ་མ་ཡིན། གཟུང་བར་མི་བྱ་བ་མ་ཡིན། ལྟར་སྣང་བ་མ་ཡིན། བསྟན་པར་བྱ་བ་མ་ཡིན། ཚོགས་པ་མེད་པ་མ་ཡིན། བརྟགས་པ་མ་ཡིན་རྣམ་པར་བརྟགས་པ་མ་ཡིན། རྣམ་པར་བསྒྲུབས་པ་མ་ཡིན། ཀུན་ཏུ་བསྟན་པ་མ་ཡིན། ཀུན་ནས་ཉོན་མོངས་པ་ཅན་མ་ཡིན། ཡོངས་སུ་སྦྱང་བར་འོས་པ་མ་ཡིན། མིང་མེད་པ། གཟུགས་མེད་པ་མཚན་མ་མེད་པ། ལས་མེད་པ། ལས་ཀྱི་རྣམ་པར་སྨིན་པ་མེད་པ། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན། ཅི་ཡང་མ་ཡིན་ཉོན་མོངས་པ་མེད་པ། ཡི་གེ་མེད་པ། སྒྲ་སྐད་ཐམས་ཅད་ལས་ཡང་དག་པར་འདས་པ། སྒྲ་མེད་པ་མཚན་ཉིད་མེད་པ། མཚན་ཉིད་ཐམས་ཅད་དང་བྲལ་བ། ནང་ན་མི་དམིགས། ཕྱི་རོལ་ན་མི་དམིགས། གཉི་ག་མེད་པར་ཡང་མི་དམིགས་པ་ཡིན་མོད་ཀྱི། འཇམ་དཔལ་འོན་ཀྱང་དེ་བཞིན་གཤེགས་པའི་ལྷག་པའི་བསམ་པ་ཡོངས་སུ་དག་པའི་ཡེ་ཤེས་རིན་པོ་ཆེ་སྙིང་རྗེ་ཆེན་པོའི་རྒྱལ་མཚན་གྱི་རྩེ་མོ་ལ་བཏགས་ན། དེ་ལས་སེམས་ཅན་གང་ཡིན་པ་དེའི་བསམ་པ་དང་མོས་པ
42.303a
ཇི་ལྟ་བ་དེ་ལྟ་བུའི་ཆོས་བསྟན་པ་འབྱུང་བར་སེམས་ཅན་རྣམས་ཀྱིས་ཀུན་ཏུ་ཤེས་ཀྱང ། དེ་བཞིན་གཤེགས་པ་ནི་དེ་དག་ལ་ཡང་ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་དོ། །འཇམ་དཔལ་འདི་ལྟ་སྟེ་དཔེར་ན། བྲག་ཅ་ནི་གཞན་གྱི་རྣམ་པར་རིག་པ་ལས་འབྱུང་བར་སེམས་ཅན་རྣམས་ཀྱིས་ཀུན་ཏུ་ཤེས་ཀྱང་དེ་ནི་འདས་པ་མ་ཡིན། མ་འོངས་པ་མ་ཡིན་ད་ལྟར་བྱུང་བ་མ་ཡིན། ནང་ན་མ་ཡིན་ཕྱི་རོལ་མ་ཡིན། གཉི་ག་མེད་པར་ཡང་མི་དམིགས་ཏེ། མ་སྐྱེས་པ་མ་འགགས་པ་ཆད་པ་མ་ཡིན་རྟག་པ་མ་ཡིན་ཤེས་པ་དང་ལྡན་པ་མ་ཡིན། ཤེས་རབ་མ་ཡིན། ཤེས་རབ་མེད་པ་མ་ཡིན། རིག་པ་མ་ཡིན། རིག་པ་མེད་པ་མ་ཡིན། རྣམ་པར་གྲོལ་བ་མ་ཡིན། རྣམ་པར་གྲོལ་བ་མེད་པ་མ་ཡིན། ཁ་ན་མ་ཐོ་བ་དང་བཅས་པ་མ་ཡིན། ཁ་ན་མ་ཐོ་བ་མེད་པ་མ་ཡིན། དྲན་པ་དང་ལྡན་པ་མ་ཡིན་དྲན་པ་དང་མི་ལྡན་པ་མ་ཡིན། གནས་པ་དང་ལྡན་པ་མ་ཡིན་གནས་པ་དང་མི་ལྡན་པ་མ་ཡིན། འདུག་པ་མ་ཡིན་མི་འདུག་པ་མ་ཡིན། སའི་ཁམས་མ་ཡིན། ཆུའི་ཁམས་མ་ཡིན། མེའི་ཁམས་མ་ཡིན། རླུང་གི་ཁམས་མ་ཡིན། འདུས་བྱས་མ་ཡིན་འདུས་མ་བྱས་མ་ཡིན། སྤྲོས་པ་ཡོད་པ་མ་ཡིན། སྤྲོས་པ་མེད་པ་མ་ཡིན། སྒྲ་མ་ཡིན་སྒྲ་མེད་པ་མ་ཡིན། བལྟར་སྣང་བ་མ་ཡིན། བལྟར་མི་སྣང་བ་མ་ཡིན། ཡི་གེ་མེད་པ་སྒྲ་མེད་པ་སྒྲ་ལས་ཡང་དག་པར་འདས་པ། གཞལ་དུ་མེད་པ། གཞལ་བ་ལས་ཡང་དག་པར་འདས་པ། མཚན་ཉིད་མེད་པ། མཚན་ཉིད་དང་བྲལ་བ། ཞི་བ་མ་ཡིན་མ་ཞི་བ་མ་ཡིན། རིང་པོ་མ་ཡིན། ཐུང་ངུ་མ་ཡིན། སེམས་པ་ཡོད་པ་མ་ཡིན། སེམས་པ་མེད་པ་མ་ཡིན། སྣང་བ་མ་ཡིན། མི་སྣང་བ་མ་ཡིན། བསྟན་དུ་ཡོད་པ་མ་ཡིན་བསྟན་དུ་མེད་པ་མ་ཡིན། རང་བཞིན་སྟོང་པ་མ་ཡིན། དྲན་པ་མེད་པ། ཡིད་ལ་བྱེད་པ་མེད་པ་རྟོག་པ་མེད་པ། དཔྱོད་པ་མེད་པ་སེམས་དང་ཡིད་དང ། རྣམ་པར
42.303b
ཤེས་པ་དང་བྲལ་བ། ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་པ། དུས་གསུམ་ལས་ཡང་དག་པར་འདས་པ་ཡིན་མོད་ཀྱི། འཇམ་དཔལ་འོན་ཀྱང་སེམས་ཅན་ལྷག་པའི་བསམ་པ་ཐ་དད་པ་རྣམས་ཀྱི་སྒྲ་སྐད་དང་རྣམ་པར་རིག་པ་སྣ་ཚོགས་དག་ལས་བྲག་ཅའི་སྒྲ་སྐད་སྣ་ཚོགས་དག་འབྱུང་བར་འགྱུར་ཞིང ། དེ་དག་ནི་བྱང་ཆུབ་སེམས་དཔའ་རྣམས་ཀྱིས་དེ་ཁོ་ན་བཞིན་དུ་ཀུན་ཏུ་ཤེས་པར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན། ནང་ན་མ་ཡིན་ཕྱི་རོལ་ན་མ་ཡིན་ཞིང ། གཉི་ག་མེད་པར་ཡང་མི་དམིགས་ཏེ། མ་སྐྱེས་པ་མ་འགགས་པ། ཆད་པ་མ་ཡིན་རྟག་པ་མ་ཡིན། ཤེས་པ་དང་མི་ལྡན་པ་མ་ཡིན་ཤེས་རབ་མ་ཡིན་ཤེས་རབ་མེད་པ་མ་ཡིན། རིག་པ་མ་ཡིན་རིག་པ་མེད་པ་མ་ཡིན། རྣམ་པར་གྲོལ་བ་མ་ཡིན། རྣམ་པར་གྲོལ་བ་མེད་པ་མ་ཡིན། ཁ་ན་མ་ཐོ་བ་དང་བཅས་པ་མ་ཡིན། ཁ་ན་མ་ཐོ་བ་མེད་པ་མ་ཡིན། དྲན་པ་དང་ལྡན་པ་མ་ཡིན། དྲན་པ་དང་མི་ལྡན་པ་མ་ཡིན། གནས་དང་ལྡན་པ་མ་ཡིན། གནས་དང་མི་ལྡན་པ་མ་ཡིན། འདུག་པ་མ་ཡིན། མི་འདུག་པ་མ་ཡིན་སའི་ཁམས་མ་ཡིན། ཆུའི་ཁམས་མ་ཡིན། མེའི་ཁམས་མ་ཡིན། རླུང་གི་ཁམས་མ་ཡིན། འདུས་བྱས་མ་ཡིན་འདུས་མ་བྱས་མ་ཡིན། སྤྲོས་པ་ཡོད་པ་མ་ཡིན། སྤྲོས་པ་མེད་པ་མ་ཡིན། སྒྲ་མ་ཡིན་སྒྲ་མེད་པ་མ་ཡིན། བལྟར་སྣང་བ་མ་ཡིན། བལྟར་མི་སྣང་བ་མ་ཡིན། ཡི་གེ་མེད་པ་སྒྲ་མེད་པ་སྒྲ་ལས་ཡང་དག་པར་འདས་པ། གཞལ་དུ་མེད་པ་གཞལ་བ་ལས་ཡང་དག་པར་འདས་པ། མཚན་ཉིད་མེད་པ། མཚན་ཉིད་དང་བྲལ་བ། ཞི་བ་མ་ཡིན་མ་ཞི་བ་མ་ཡིན། རིང་པོ་མ་ཡིན་ཐུང་ངུ་མ་ཡིན། སེམས་པ་ཡོད་པ་མ་ཡིན། སེམས་པ་མེད་པ་མ་ཡིན། སྣང་བ་མ་ཡིན།
42.304a
མི་སྣང་བ་མ་ཡིན། བསྟན་དུ་ཡོད་པ་མ་ཡིན། བསྟན་དུ་མེད་པ་མ་ཡིན། རང་བཞིན་སྟོང་པ། དྲན་པ་མེད་པ་ཡིད་ལ་བྱེད་པ་མེད་པ། རྟོག་པ་མེད་པ་དཔྱོད་པ་མེད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ། ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་ལ། དུས་གསུམ་ལས་ཡང་དག་པར་འདས་པ་ཡིན་མོད་ཀྱི། འཇམ་དཔལ་འོན་ཀྱང་སེམས་ཅན་མོས་པ་ཐ་དད་པ་རྣམས་ཀྱིས་ལྷག་པའི་བསམ་པ་དང ། རྣམ་པར་རིག་པ་སྣ་ཚོགས་དག་ལས་དེ་བཞིན་གཤེགས་པའི་གསུང་འབྱུང་བར་ཀུན་ཏུ་ཤེས་པར་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་ས་ལ་བསྟེན་ཅིང་ས་ལ་གནས་ནས་རྩཝ་དང་ཤིང་གེལ་པ་དང ། རྩི་དང་ནགས་ཚལ་ཐམས་ཅད་འཕེལ་ཞིང་རྒྱས་པ་དང ། ཡངས་པར་འགྱུར་ཡང་འཇམ་དཔལ་ས་ནི་རྟོག་པར་མི་བྱེད། རྣམ་པར་རྟོག་པར་མི་བྱེད་དེ། ཐམས་ཅད་དུ་མཉམ་ཞིང་རྣམ་པར་མི་རྟོག་པ། བྱེ་བྲག་མི་འབྱེད་ཅིང་སེམས་པར་མི་བྱེད་དེ། སེམས་དང་ཡིད་དང ། རྣམ་པར་ཤེས་པ་དང་བྲལ་བ་ཡིན་ནོ་འཇམ་དཔལ་དེ་བཞིན་དུ་དེ་བཞིན་གཤེགས་པ་ལ་བརྟེན་ཅིང་དེ་བཞིན་གཤེགས་པ་ལ་གནས་ནས་སེམས་ཅན་ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པ་འམ། ཐེག་པ་ཆེན་པོ་པ་ཐམས་ཅད་ཀྱི་དགེ་བའི་རྩ་བ་ཐམས་ཅད་ཀྱང་འཕེལ་ཞིང་རྒྱས་པ་དང་ཡངས་པར་འགྱུར་ལ། དེ་བཞིན་གཤེགས་པ་ལ་བརྟེན་ཅིང་དེ་བཞིན་གཤེགས་པ་ལ་གནས་ནས་སྤྱོད་པ་པ་དང ། ཀུན་ཏུ་རྒྱུ་དང ། གཅེར་བུ་པ་ལ་སོགས་པ་མུ་སྟེགས་ཀྱི་གནས་གཞན་ཐམས་ཅད་ཀྱི་དགེ་བའི་རྩ་བ་ཐམས་ཅད་དང ། ཐ་ན་ལོག་པ་ཉིད་དུ་ངེས་པ་རྣམས་ཀྱི་དགེ་བའི་རྩ་བ་གཞན་གང་དག་ཡིན་པ་དེ་དག་ཐམས་ཅད་ཀྱང་འཕེལ་ཞིང་རྒྱས་པ་དང་ཡངས་པར་འགྱུར་མོད་ཀྱི། འཇམ་དཔལ་འོན་ཀྱང་དེ་བཞིན་གཤེགས་པ་ནི་རྟོག་པར་མི་བྱེད། རྣམ་པར་རྟོག་པར་མི་བྱེད་དེ། འཇམ་དཔལ་དེ་བཞིན་གཤེགས་པ་དགྲ
42.304b
བཅོམ་པ་ཡང་དག་པར་རྫོགས་པའི་སངས་རྒྱས་ནི་རྟོག་པ་དང ། རྣམ་པར་རྟོག་པ་དང ། དམིགས་པ་དང་ཡིད་ལ་བྱེད་པ་ཐམས་ཅད་རྒྱུན་ཆད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ། རྟོག་གེ་མ་ཡིན་རྟོག་གེའི་སྤྱོད་ཡུལ་མ་ཡིན། མི་སྣང་བ། མི་མཐོང་བ། བསམ་དུ་མེད་པ། བསམ་པར་བྱ་བ་མ་ཡིན་པ། ཡིད་ལ་བྱེད་པ་མེད་པ། སེམས་པ་མེད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ། ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་དོ། །འཇམ་དཔལ་འདི་ལྟ་སྟེ་དཔེར་ན། ནམ་མཁའ་ནི་ཐམས་ཅད་དུ་མཉམ་ཞིང་རྣམ་པར་མི་རྟོག་ལ། བྱེ་བྲག་མི་འབྱེད་དེ། མ་སྐྱེས་པ་མ་འགགས་པ། འདས་པ་མ་ཡིན་མ་འོངས་པ་མ་ཡིན། ད་ལྟར་བྱུང་བ་མ་ཡིན། མཚན་གཞི་མེད་པ། སྤྲོས་པ་མེད་པ། གཟུགས་མེད་པ། བསྟན་དུ་མེད་པ་རྣམ་པར་རིག་པ་མེད་པ། རེག་པ་མེད་པ། གནས་མེད་པ། གཞལ་དུ་མེད་པ། གཞལ་བ་ལས་ཡང་དག་པར་འདས་པ། དཔེ་མེད་པ། དཔེ་ལས་ཡང་དག་པར་འདས་པ། མི་གནས་པ་གཟུང་བ་མེད་པ། མིག་གི་ལམ་ལས་ཡང་དག་པར་འདས་པ་སེམས་དང་ཡིད་དང་རྣམ་པར་ཤེས་པ་དང་བྲལ་བ། མཚན་ཉིད་མེད་པ། ཡི་གེ་མེད་པ་སྒྲ་མེད་པ་ཡིད་ལ་བྱེད་པ་མེད་པ། བླང་བ་མེད་པ། དོར་བ་མེད་པ། འདེགས་པ་མེད་པ། གཞག་པ་མེད་པ། ཚིག་གི་ལམ་ལས་ཡང་དག་པར་འདས་པ། ཐམས་ཅད་ཀྱི་རྗེས་སུ་སོང་ཞིང་རྗེས་སུ་ཞུགས་པ་ཡིན་མོད་ཀྱི། འཇམ་དཔལ་འོན་ཀྱང་སེམས་ཅན་རྣམས་ཀྱིས་དབྱིབས་ཆུང་ངུ་དང་འབྲིང་དང ། ཆེན་པོ་དག་གིས་ནམ་མཁའ་ཡང་ཆུང་ངུ་དང ། འབྲིང་དང་ཆེན་པོར་ཀུན་ཏུ་ཤེས་པར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཐམས་ཅད་དུ་མཉམ་ཞིང་རྣམ་པར་མི་རྟོག་ལ། བྱེ་བྲག་མི་འབྱེད། མ་སྐྱེས་པ་མ་འགགས་པ། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན། མཚན་གཞི་མེད་པ། སྤྲོས་པ་མེད་པ།
42.305a
གཟུགས་མེད་པ། བསྟན་དུ་མེད་པ། རྣམ་པར་རིག་པ་མེད་པ། རེག་པ་མེད་པ་གནས་མེད་པ། གཞལ་དུ་མེད་པ། གཞལ་བ་ལས་ཡང་དག་པར་འདས་པ་དཔེ་མེད་པ་དཔེ་ལས་ཡང་དག་པར་འདས་པ། མི་གནས་པ་གཟུང་བ་མེད་པ། མིག་གི་ལམ་ལས་ཡང་དག་པར་འདས་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ་མཚན་ཉིད་མེད་པ། ཡི་གེ་མེད་པ་སྒྲ་མེད་པ། ཡིད་ལ་བྱེད་པ་མེད་པ། བླང་བ་མེད་པ་དོར་བ་མེད་པ། གདེག་པ་མེད་པ། གཞག་པ་མེད་པ་ཚིག་གི་ལམ་ལས་ཡང་དག་པར་འདས་པ། ཐམས་ཅད་ཀྱི་རྗེས་སུ་སོང་ཞིང་རྗེས་སུ་ཞུགས་པ་ཡིན་མོད་ཀྱི། འཇམ་དཔལ་འོན་ཀྱང་སེམས་ཅན་དམན་པ་དང ། འབྲིང་དང་མཆོག་གང་དག་ཡིན་པ་དེ་དག་གིས་དེ་བཞིན་གཤེགས་པ་ཡང་དམན་པ་དང་འབྲིང་དང་མཆོག་ཏུ་མཐོང་ངོ ། །འཇམ་དཔལ་དེ་བཞིན་གཤེགས་པ་ནི་འདི་སྙམ་དུ་སེམས་ཅན་འདི་ནི་བསམ་པ་དང ། མོས་པ་དམན་པ་ཡིན་གྱིས་སེམས་ཅན་འདི་ལ་ནི་གཟུགས་ཀྱི་སྐུའི་ཁ་དོག་ཡོངས་སུ་འགྲུབ་པ་དམན་པ་བསྟན་པར་བྱའོ། །སེམས་ཅན་འདི་ནི་བསམ་པ་དང་མོས་པ་འབྲིང་ཡིན་གྱིས་སེམས་ཅན་འདི་ལ་ནི་གཟུགས་ཀྱི་སྐུའི་ཁ་དོག་ཡོངས་སུ་འགྲུབ་པ་འབྲིང་བསྟན་པར་བྱའོ། །སེམས་ཅན་འདི་ནི་བསམ་པ་དང་མོས་པ་རྒྱ་ཆེ་བ་ཡིན་གྱིས། སེམས་ཅན་འདི་ལ་ནི་གཟུགས་ཀྱི་སྐུའི་ཁ་དོག་ཡོངས་སུ་འགྲུབ་པ་རྒྱ་ཆེན་པོ་བསྟན་པར་བྱའོ་སྙམ་དུ་མི་སེམས་སོ། །འཇམ་དཔལ་ཆོས་སྟོན་པ་ཡང་དེ་བཞིན་དུ་རྟོགས་པར་བྱ་སྟེ། འཇམ་དཔལ་དེ་བཞིན་གཤེགས་པ་ནི་འདི་སྙམ་དུ་སེམས་ཅན་འདི་ནི་དམན་པ་ལ་མོས་པ་ཡིན་གྱིས། སེམས་ཅན་འདི་ལ་ནི་ཉན་ཐོས་ཀྱི་ཐེག་པའི་གཏམ་དམན་པ་བརྗོད་པར་བྱའོ། །སེམས་ཅན་འདི་ནི་བར་མ་ལ་མོས་པ་ཡིན་གྱིས། སེམས་ཅན་འདི་ལ་ནི་རང་སངས་རྒྱས་ཀྱི་ཐེག་པའི་གཏམ་བར་མ་བརྗོད་པར་བྱའོ། །སེམས་ཅན་འདི་ནི་རྒྱ་ཆེན་པོ་ལ་མོས་པ་ཡིན་གྱིས། སེམས་ཅན་འདི་ལ་ནི་ཐེག་པ་ཆེན་པོའི་གཏམ་རྒྱ་ཆེན་པོ་བརྗོད་པར་བྱའོ། །སྙམ་དུ་མི
42.305b
སེམས་སོ། །འཇམ་དཔལ་དེ་བཞིན་གཤེགས་པ་ནི་འདི་སྙམ་དུ་སེམས་ཅན་འདི་ནི་སྦྱིན་པ་ལ་མོས་པ་ཡིན་གྱིས། སེམས་ཅན་འདི་ལ་ནི་སྦྱིན་པའི་གཏམ་བརྗོད་པར་བྱའོ། །སེམས་ཅན་འདི་ནི་ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་ལ་མོས་པ་ཡིན་གྱིས། སེམས་ཅན་འདི་ལ་ནི་བསམ་གཏན་གྱི་གཏམ་བརྗོད་པར་བྱའོ། །སྙམ་དུ་ཡང་མི་སེམས་སོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་ནི་འདི་སྙམ་དུ་སེམས་ཅན་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མོས་པ་ཡིན་གྱིས། སེམས་ཅན་འདི་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གཏམ་བརྗོད་པར་བྱའོ་སྙམ་དུ་ཡང་མི་སེམས་ཏེ། འཇམ་དཔལ་དེ་བཞིན་གཤེགས་པ་ལ་ནི་རྣམ་པར་རྟོགས་པ་དེ་ལྟ་བུ་དག་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་ནི་ཆོས་ཀྱི་སྐུ་ཡིན་པའི་ཕྱིར་ཏེ། འཇམ་དཔལ་དེ་བཞིན་གཤེགས་པ་ནི་ཤིན་ཏུ་མ་སྐྱེས་པ་དང ། མ་འགགས་པ་ཡིན་ནོ། །འཇམ་དཔལ་དེ་བཞིན་གཤེགས་པའི་རྣམ་པར་ཤེས་པ་ནི་མིང་དང་གཟུགས་དང་ངེས་པའི་ཚིག་གི་རྗེས་སུ་འབྲང་ཞིང་འབྱུང་བ་མ་ཡིན་ཏེ། འཇམ་དཔལ་དེ་བཞིན་གཤེགས་པ་ནི་རྟོག་པར་མི་བྱེད། རྣམ་པར་རྟོག་པར་མི་བྱེད་པ་ཡིན་ནོ། །འཇམ་དཔལ་དེ་བཞིན་གཤེགས་པ་ནི་སྐད་ཅིག་པ་ཡིན་ཏེ། མི་ཟད་པའི་མཚན་ཉིད་དང ། མི་ཟད་པའི་མཐའ་དང ། ཡང་དག་པའི་མཐར་ངེས་པ་ཡིན་ནོ། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཆོས་ཐམས་ཅད་ཀྱི་མཉམ་པ་ཉིད་ཀྱི་མཐའ་དང་གཉིས་སུ་མེད་པའི་མཐའ་དང ། ཤིན་ཏུ་འབྱུང་བ་མེད་པའི་མཐའ་ཡིན་ཏེ། ཐམས་ཅད་དུ་མཉམ་ཞིང་རྣམ་པར་མི་རྟོག་ལ་བྱེ་བྲག་མི་འབྱེད་དེ། དམན་པ་མ་ཡིན་བར་མ་མ་ཡིན། མཆོག་མ་ཡིན་ནོ། །འཇམ་དཔལ། དེ་བཞིན་དུ་ཆོས་ཐམས་ཅད་ཀྱང་མཉམ་ཞིང་རྣམ་པར་མི་རྟོག་ལ་བྱེ་བྲག་མི་འབྱེད་དེ། དམན་པ་མ་ཡིན་བར་མ་མ་ཡིན་མཆོག་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་ནི
42.306a
དམིགས་སུ་མེད་པའི་ཕྱིར་ཏེ། འཇམ་དཔལ་ཆོས་ཐམས་ཅད་ནི་དམིགས་སུ་མེད་པ་གང་ཡིན་པ་དེ་ནི་མཉམ་པ་ཉིད་ཡིན་ནོ། །མཉམ་པ་ཉིད་གང་ཡིན་པ་དེ་ནི་གནས་པ་ཉིད་ཡིན་ནོ། །གནས་པ་ཉིད་གང་ཡིན་པ་དེ་ནི་མི་གཡོ་བ་ཉིད་ཡིན་ནོ། །མི་གཡོ་བ་ཉིད་གང་ཡིན་པ་དེ་ནི་མི་རྟེན་པ་ཉིད་ཡིན་ནོ། །ཆོས་ཐམས་ཅད་ལ་མི་རྟེན་པའི་སེམས་ཀྱི་གནས་མེད་དོ། །སེམས་མི་གནས་པ་ནི་སྐྱེ་བ་མེད་པར་གྱུར་ཏེ། དེ་ལྟར་མཐོང་བའི་སེམས་དང་སེམས་ལས་བྱུང་བ་རྣམས་ནི་ཕྱིན་ཅི་མ་ལོག་པར་འཇུག་པར་འགྱུར་རོ། །གང་གི་སེམས་ཕྱིན་ཅི་མ་ལོག་པ་དེས་ནི་ཇི་ལྟ་བ་བཞིན་ཐོབ་པར་འགྱུར་རོ། །ཇི་ལྟ་བ་བཞིན་ཐོབ་པ་ནི་འཕྲོ་བར་མི་བྱེད་དོ། །སྤྲོས་པ་མེད་པ་ལ་ནི་སྤྱོད་པ་ཡང་མེད་དོ། །གང་གི་ཚེ་མི་འཁོར་བ་དེའི་ཚེ་རྣམ་པར་མི་འཕྲོ་སྟེ། རྣམ་པར་འཕྲོ་བ་མེད་པ་ནི་ཆོས་ཉིད་དང་འགལ་བར་མི་བྱེད་དོ། །ཆོས་ཉིད་དང་མི་འགལ་བ་ནི་ཐམས་ཅད་དང་རྗེས་སུ་མཐུན་པར་འགྱུར་རོ། །ཐམས་ཅད་དང་རྗེས་སུ་མཐུན་པ་ནི་ཆོས་ཀྱི་རང་བཞིན་ལས་མི་གཡོའོ། །ཆོས་ཀྱི་རང་བཞིན་ལ་ནི་ཆོས་ཀྱི་རང་བཞིན་ཐོབ་པར་འགྱུར་རོ། །ཆོས་ཀྱི་རང་བཞིན་ཐོབ་པ་ནི་ཅུང་ཟད་ཀྱང་འཕྲོ་བར་མི་བྱེད་དོ། །དེ་ཅིའི་ཕྱིར་ཞེ་ན། འཇམ་དཔལ་རྒྱུ་དང་རྐྱེན་གྱིས་བསྐྱེད་པའི་ཕྱིར་ཏེ། རྒྱུ་དང་རྐྱེན་གྱིས་བསྐྱེད་པ་གང་ཡིན་པ་དེ་ནི་ཤིན་ཏུ་མ་སྐྱེས་པ་ཡིན་ནོ། །ཤིན་ཏུ་མ་སྐྱེས་པ་གང་ཡིན་པ་དེས་ནི་ངེས་པ་འཐོབ་པོ། །ངེས་པ་ཐོབ་པ་གང་ཡིན་པ་དེ་ནི་ཆོས་ཐམས་ཅད་ཡིད་ལ་བྱེད་པ་དང་ལྷན་ཅིག་མི་གནས་ཏེ། གང་གི་ཆོས་ཐམས་ཅད་ཡིད་ལ་བྱེད་པ་དང་ལྷན་ཅིག་མི་གནས་པ་དེའི་ཚེ་གནས་པར་བྱ་བ་མེད་པ་ཡིན་ནོ། །གང་གི་ཚེ་གནས་པར་བྱ་བ་མེད་པ་དེའི་ཚེ་མི་འབྱུང་མི་འཇིག་གོ། །གང་གི་ཚེ་མི་འབྱུང་མི་འཇིག་པ་དེའི་ཚེ་གནས་ཤིང་ཆོས་ཐོབ་པར་འགྱུར་རོ། །གང་གི་ཚེ་གནས་ཤིང་ཆོས་ཐོབ་པ་དེའི་ཚེ་ཚུལ་བཞིན་གྱི་ཆོས་ལ་ཞུགས་པར་འགྱུར་རོ། །ཚུལ་བཞིན་གྱི་ཆོས་ལ་ཞུགས་པ་ལ་ནི་གང་སངས་རྒྱས་ཀྱི་ཆོས་མ་ཡིན་པའི་ཆོས་དེ་འགའ་ཡང་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་སྟོང་པ་ཉིད་རྗེས་སུ
42.306b
རྟོགས་པ་གང་ཡིན་པ་དེ་ནི་བྱང་ཆུབ་པོ། །དེས་དེ་ལྟར་སྟོང་པ་ཉིད་དང ། མཚན་མ་མེད་པ་དང་སྨོན་པ་མེད་པ་དང ། མངོན་པར་འདུ་བྱ་བ་མེད་པ་དང ། གནས་མེད་པ་དང ། འབྱུང་བ་མེད་པ་དང ། གཟུང་བ་མེད་པ་དང ། གཞི་མེད་པ་རྗེས་སུ་རྟོགས་པའི་ཕྱིར་བྱང་ཆུབ་སྟེ། བྱང་ཆུབ་ནི་ཚུལ་བཞིན་ལ་སྦྱོར་བའོ། །ཚུལ་བཞིན་དུ་སྦྱོར་བ་ནི་འདེགས་པ་མེད་པ་དང་གཞག་པ་མེད་པ་དང ། བྱ་བ་མེད་པ་དང ། རྣམ་པར་བྱུང་བ་མེད་པ་དང ། ལ་སྦྱོར་བ་དང ། ཆགས་པ་མེད་པ་དང ། གྲོལ་བ་མེད་པ་ལ་སྦྱོར་བ་དང ། གཅིག་པ་ཉིད་མ་ཡིན་པ་དང ། ཐ་དད་པ་ཉིད་མ་ཡིན་པ་ལ་སྦྱོར་བ་དང ། འོངས་པ་མ་ཡིན་པ་ལ་སྦྱོར་བ་དང ། ཚུལ་བཞིན་ལ་སྦྱོར་བ་ཡིན་ནོ། །ཚུལ་བཞིན་གང་ཡིན་པ་ལ་སྦྱོར་བ་ཡང་མེད། སྤོངས་པ་ཡང་མེད། འབྲས་བུ་མངོན་སུམ་དུ་བྱ་བ་ཡང་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་སེམས་ནི་རང་བཞིན་གྱིས་འོད་གསལ་བའི་ཕྱིར་ཏེ། དེ་ནི་གློ་བུར་གྱི་ཉེ་བའི་ཉོན་མོངས་པ་ཐམས་ཅད་ཀྱིས་ཉེ་བར་ཉོན་མོངས་པར་ཟད་ཀྱི། རང་བཞིན་གྱིས་ཀུན་ནས་ཉོན་མོངས་པ་ཉིད་མ་ཡིན་ནོ། །རང་བཞིན་གྱིས་འོད་གསལ་བ་ཉིད་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ་ཉིད་ཡིན་ནོ། །ཀུན་ནས་ཉོན་མོངས་པ་མེད་པ་གང་ཡིན་པ་དེ་ལ་ནི་གཉེན་པོ་གང་གིས་ཉོན་མོངས་པ་སྤོང་བར་འགྱུར་བའི་གཉེན་པོ་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་དེ་ནི་དག་པ་ཉིད་ཡིན་པས་དག་པ་ནི་དག་པར་མི་འགྱུར་བའི་ཕྱིར་ཏེ། དག་པ་གང་ཡིན་པ་དེ་ནི་སྐྱེ་བ་མེད་པའོ། །སྐྱེ་བ་མེད་པ་གང་ཡིན་པ་དེ་ནི་མ་སྨད་པའོ། །མ་སྨད་པ་གང་ཡིན་པ་དེ་ནི་འདོད་པ་སྤངས་པའོ། །འདོད་པ་སྤངས་པ་གང་ཡིན་པ་དེ་ལ་ནི་སྲེད་པ་ཐམས་ཅད་འགག་གོ། །གང་ལ་སྲེད་པ་ཐམས་ཅད་འགགས་པ་དེ་ནི་མི་སྐྱེའོ། །མི་སྐྱེ་བ་གང་ཡིན་པ་དེ་ནི་བྱང་ཆུབ་པོ། །བྱང་ཆུབ་གང་ཡིན་པ་དེ་ནི་མཉམ་པ་ཉིད་དོ། །མཉམ་པ་ཉིད་གང་ཡིན་པ་དེ་ནི་དེ་བཞིན་ཉིད་དོ། །དེ་བཞིན་ཉིད་ལ་ནི་འདུས་བྱས་དང ། འདུས་མ་བྱས་ཀྱི་ཆོས་ཐམས་ཅད་གནས་སོ། །དེ་བཞིན
42.307a
ཉིད་གང་ཡིན་པ་དེ་ལ་ནི་འདུས་བྱས་ཀྱང་མེད། འདུས་མ་བྱས་ཀྱང་མེད། གཉིས་སུ་གདགས་པ་ཡང་མེད་དོ། །གང་ལ་འདུས་བྱས་ཀྱང་མེད་འདུས་མ་བྱས་ཀྱང་མེད། གཉིས་སུ་གདགས་པ་ཡང་མེད་པ་དེ་ནི་དེ་བཞིན་ཉིད་དོ། །དེ་བཞིན་ཉིད་གང་ཡིན་པ་དེ་ནི་གཞན་མ་ཡིན་པ་དེ་བཞིན་ཉིད་དོ། །གཞན་མ་ཡིན་པ་དེ་བཞིན་ཉིད་གང་ཡིན་པ་དེ་ནི་འགྱུར་བ་མེད་པ་དེ་བཞིན་ཉིད་དོ། །འགྱུར་བ་མེད་པ་དེ་བཞིན་ཉིད་གང་ཡིན་པ་དེ་ནི་འོང་བ་མེད་པ་དེ་བཞིན་ཉིད་དོ། །འོང་བ་མེད་པ་དེ་བཞིན་ཉིད་གང་ཡིན་པ་དེ་ནི་འགྲོ་བ་མེད་པ་དེ་བཞིན་ཉིད་དོ། །འགྲོ་བ་མེད་པ་དེ་བཞིན་ཉིད་གང་ཡིན་པ་དེ་ནི་ཇི་ལྟ་བ་བཞིན་དེ་བཞིན་ཉིད་དོ། །ཇི་ལྟ་བ་དེ་བཞིན་ཉིད་གང་ཡིན་པ་དེ་ནི་ནམ་ཡང་དེ་བཞིན་ཉིད་མ་ཡིན་པ་མ་ཡིན་ནོ། །ནམ་ཡང་དེ་བཞིན་ཉིད་མ་ཡིན་པ་མ་ཡིན་པ་གང་ཡིན་པ་དེ་ནི་ཀུན་ནས་ཉོན་མོངས་པར་མི་འགྱུར། རྣམ་པར་བྱང་བར་མི་འགྱུར་རོ། །གང་ཀུན་ནས་ཉོན་མོངས་པར་མི་འགྱུར། རྣམ་པར་བྱང་བར་མི་འགྱུར་བ་དེ་ནི་སྐྱེ་བར་མི་འགྱུར། འགག་པར་མི་འགྱུར་རོ། །གང་སྐྱེ་བར་མི་འགྱུར། འགག་པར་མི་འགྱུར་བ་དེ་ནི་མྱ་ངན་ལས་འདས་པ་དང་མཉམ་མོ། །གང་མྱ་ངན་ལས་འདས་པ་དང་མཉམ་པ་དེ་ནི་འཁོར་བར་མི་འགྱུར། ཡོངས་སུ་མྱ་ངན་ལས་འདའ་བར་མི་འགྱུར་རོ། །གང་འཁོར་བར་མི་འགྱུར་ཡོངས་སུ་མྱ་ངན་ལས་འདའ་བར་མི་འགྱུར་བ་དེ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ནོ། །གང་འདས་པ་མ་ཡིན་མ་འོངས་པ་མ་ཡིན། ད་ལྟར་བྱུང་བ་མ་ཡིན་པ་དེ་ནི་དམན་པ་མ་ཡིན། བར་མ་མ་ཡིན། མཆོག་མ་ཡིན་ནོ། །གང་དམན་པ་མ་ཡིན། བར་མ་མ་ཡིན། མཆོག་མ་ཡིན་པ་དེ་ནི་དེ་བཞིན་ཉིད་དེ། དེ་བཞིན་ཉིད་ཅེས་བྱ་བ་དེ་ནི་དེ་ཁོ་ནའི་དོན་གྱི་ཚིག་བླ་དགས་ཡིན་ནོ། །དེ་ཁོ་ན་ཞེས་བྱ་བ་དེ་བཞིན་ཉིད་ཁོ་ནའོ། །དེ་བཞིན་ཉིད་དེ་ཁོ་ན་ནི་དེ་བཞིན་ཉིད་དོ། །དེ་བཞིན་ཉིད་དང་བདག་ནི་གཉིས་སུ་མེད་དེ་གཉིས་སུ་བྱར་མེད་དོ། །གཉིས་སུ་བྱར་མེད་པའི་དོན་གང་ཡིན་པ་དེ་ནི་བྱང་ཆུབ་སྟེ། བྱང་ཆུབ་ནི་དོན་རྟོགས་པའོ། །དོན་ཅེས་བྱ་བ
42.307b
ནི་ཆོས་བསྟན་པ་ཐམས་ཅད་ལ་རྣམ་པར་ཐར་པའི་སྒོ་གསུམ་དུ་འཇུག་པ་ཤེས་པའོ། །ཤེས་པ་ཞེས་བྱ་བ་ནི་ཆོས་ཐམས་ཅད་ལ་དུས་གསུམ་མཉམ་པ་ཉིད་དུ་འཇུག་པའོ། །ཆོས་ཐམས་ཅད་ཀྱི་དབྱེར་མེད་པའི་དོན་དེ་ནི་དོན་ཅེས་བྱ་སྟེ། དོན་ནི་སྒྲ་མེད་པ། བརྗོད་དུ་མེད་པ། ཐ་སྙད་མེད་པ་ཐ་སྙད་ཡང་དག་པར་ཆད་པ་ཡིན་ནོ། །ཤེས་པ་ཞེས་བྱ་བ་ནི་དོན་རྗེས་སུ་རྟོགས་པའི་ཤེས་པ་དང ། རྣམ་པར་ཤེས་པ་རྗེས་སུ་རྟོགས་པའི་ཤེས་པ་གང་ཡིན་པ་སྟེ། དེ་ནི་ཤེས་པ་ཞེས་བྱའོ། །དོན་ཅེས་བྱ་བ་ནི་དེ་ཁོ་ནའི་དོན་ཤེས་པ་དང ། རྣམ་པར་ཤེས་པ་རྗེས་སུ་རྟོགས་པའི་ཤེས་པས་ངེས་པར་རྟོགས་པ་གང་ཡིན་པ་སྟེ། དེ་ཉིད་ཆོས་ཉིད་ཡིན་ནོ། །ཆོས་ཉིད་གང་ཡིན་པ་དེ་ནི་དོན་ཡིན་ནོ། །དོན་རྗེས་སུ་རྟོགས་པའི་ཤེས་པ་དང ། རྣམ་པར་ཤེས་པ་རྗེས་སུ་རྟོགས་པའི་ཤེས་པ་དང ། ངེས་པའི་དོན་རྗེས་སུ་རྟོགས་པའི་ཤེས་པས་རྗེས་སུ་རྟོགས་པ་གང་ཡིན་པ་དེ་ནི་ཆོས་ཉིད་དོ། །ཆོས་ཉིད་གང་ཡིན་པ་དེ་ནི་དོན་ཡིན་ནོ། །དོན་གང་ཡིན་པ་དེ་ནི་ཆོས་ཉིད་དང ། ཆོས་གནས་པ་ཉིད་དང ། ཆོས་ངེས་པ་ཉིད་དེ་དེ་ནི་ཆོས་ལ་འཇུག་པར་མི་འགྱུར་རོ། །ཆོས་ལ་མ་ཞུགས་པ་གང་ཡིན་པ་དང ། དོན་དང་ཚིག་འབྲུ་མཉམ་པ་ཉིད་གང་ཡིན་པ་དེ་ནི་གཉིས་མེད་པའི་དོན་གྱིས་མཉམ་པ་ཉིད་ཡིན་ཏེ། མཉམ་པ་ཉིད་གང་ཡིན་པ་དེ་ནི་དོན་ཡིན་ནོ། །དོན་ཤེས་པ་དང ། རྣམ་པར་ཤེས་པ་ལ་མཉམ་པ་ཉིད་གང་ཡིན་པ་དེ་ནི་གཉིས་སུ་མེད་པའི་སྒོར་འཇུག་པས་ན། ཤེས་པ་ཡིན་ནོ། །ངེས་པའི་དོན་དང་དྲང་བའི་དོན་མཉམ་པ་ཉིད་ཀྱིས་དོན་མཉམ་པ་དེ་ནི་སྟོང་པ་ཉིད་དོ། །སྟོང་པ་ཉིད་དུ་དོན་མཉམ་པས་གང་ཟག་མཉམ་པ་ཉིད་མཉམ་མོ། །གང་ཟག་མཉམ་པ་ཉིད་ཀྱིས་ཆོས་མཉམ་པ་ཉིད་མཉམ་མོ། །ཆོས་མཉམ་པ་ཉིད་ཀྱིས་རྣམ་པར་གྲོལ་བ་མཉམ་པ་ཉིད་མཉམ་སྟེ། རྣམ་པར་གྲོལ་བ་མཉམ་པ་ཉིད་རྗེས་སུ་རྟོགས་པ་ནི་བྱང་ཆུབ་པོ། །འཇམ་དཔལ་གཟུགས་ལ་ཆགས་པས་ཆགས་པར་གྱུར་པ་རྣམས་ཀྱིས་མིག་ནི
42.308a
ཆགས་པ་ཡིན་ནོ། །གཟུགས་དང་མིག་གི་རང་བཞིན་ཤེས་པ་ནི་ཆགས་པ་མེད་པ་ཡིན་ནོ། །ལྟ་བ་ལ་ཆགས་པར་གྱུར་པ་རྣམས་ཀྱི་རང་གི་ལུས་ནི་ཆགས་པ་ཡིན་ནོ། །ལྟ་བར་གྱུར་པ་ཐམས་ཅད་ཀྱི་རང་གི་ལུས་ཀྱི་རང་བཞིན་སྟོང་པ་ཉིད་དུ་ཤེས་པ་ནི་ཆགས་པ་མེད་པ་ཡིན་ནོ། །ཚུལ་བཞིན་མ་ཡིན་པ་ཡིད་ལ་བྱེད་པ་ལ་ཆགས་པས་ཆགས་པར་གྱུར་པ་རྣམས་ཀྱི་ཆོས་ཀྱི་སྣང་བ་ནི་ཆགས་པ་ཡིན་ནོ། །ཚུལ་བཞིན་ཡིད་ལ་བྱེད་པའི་ཆོས་ལ་སོ་སོར་རྟོག་ཅིང་ངོ་བོ་ཉིད་ཀྱིས་རང་བཞིན་སྟོང་པ་ཉིད་དུ་ཤེས་པ་ནི་ཆགས་པ་མེད་པ་ཡིན་ནོ། །ཐེ་ཚོམ་གྱི་དྲི་མ་ལ་ཆགས་པས་ཆགས་པར་གྱུར་པ་རྣམས་ཀྱི་ཐར་པ་ནི་ཆགས་པ་ཡིན་ནོ། །མོས་པ་དང་རྣམ་པར་གྲོལ་བ་ཡང་དག་པ་ཇི་ལྟ་བ་བཞིན་དུ་ཤེས་པ་ནི་ཆགས་པ་མེད་པ་ཡིན་ནོ། །ལེ་ལོའི་དྲི་མ་ལ་ཆགས་པས་ཆགས་པར་གྱུར་པ་རྣམས་ཀྱི་རྟོགས་པར་བྱ་བ་ལ་བརྩོན་འགྲུས་བརྟན་པ་ཉིད་ནི་ཆགས་པ་ཡིན་ནོ། །ཆོས་ཇི་ལྟ་བ་བཞིན་དུ་རྟོགས་པ་ནི་ཆགས་པ་མེད་པ་ཡིན་ནོ། །སྒྲིབ་པ་ལ་ཆགས་པས་ཆགས་པར་གྱུར་པ་རྣམས་ཀྱི་བྱང་ཆུབ་ཀྱི་ཡན་ལག་རྣམས་ནི་ཆགས་པ་ཡིན་ནོ། །སྒྲིབ་པ་མེད་པའི་རྣམ་པར་ཐར་པ་ཤེས་པ་ནི་ཆགས་པ་མེད་པ་ཡིན་ནོ། །རང་བཞིན་གྱིས་ཡོངས་སུ་དག་པའི་ཆོས་ཐམས་ཅད་ནི་རྒྱུ་དང་རྐྱེན་ཚོགས་པ་ལས་འབྱུང་སྟེ། དེ་ལ་བྱང་ཆུབ་སེམས་དཔས་ཀུན་ནས་ཉོན་མོངས་པའི་རྒྱུ་དང ། རྣམ་པར་བྱང་བའི་རྒྱུ་ཡང་ཡོངས་སུ་ཤེས་པར་བྱ་ཞིང ། ཀུན་ནས་ཉོན་མོངས་པའི་རྒྱུ་རྣམ་པར་དག་པ་དང ། རྣམ་པར་བྱང་བའི་རྒྱུ་རྣམ་པར་དག་པས་ཀྱང་གནས་པར་མི་བྱའོ། །བདག་ཀུན་ནས་སློང་བ་དང ། ལྟ་བ་ཀུན་ནས་སློང་བ་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །ཆོས་བདག་མེད་པ་ལ་འཇུག་པའི་བཟོད་པ་ནི་རྣམ་པར་བྱང་བའི་རྒྱུ་ཡིན་ནོ། །ངར་འཛིན་པ་དང ། ང་རྒྱལ་གྱི་ལྟ་བ་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །ནང་ཉེ་བར་ཞི་བ་དང་ཕྱི་རོལ་ཏུ་རྒྱུ་བ་མེད་པ་ནི་རྣམ་པར་བྱང་བའི་རྒྱུ་ཡིན་ནོ། །
42.308b
འདོད་པ་དང་གནོད་སེམས་དང ། རྣམ་པར་འཚེ་བ་དང ། རྟོག་པ་དག་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །མི་སྡུག་པ་དང་བྱམས་པ་དང ། སྙིང་རྗེ་དང་དགའ་བ་དང ། བཏང་སྙོམས་དང ། བརྟེན་པའི་ཆོས་ལ་འཇུག་པའི་བཟོད་པ་ནི་རྣམ་པར་བྱང་བའི་རྒྱུ་ཡིན་ནོ། །ཕྱིན་ཅི་ལོག་བཞི་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །ཡང་དག་པའི་དྲན་པ་ཉེ་བར་གཞག་པ་བཞི་ནི་རྣམ་པར་བྱང་བའི་རྒྱུ་ཡིན་ནོ། །སྒྲིབ་པ་ལྔ་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །དབང་པོ་ལྔ་ནི་རྣམ་པར་བྱང་བའི་རྒྱུ་ཡིན་ནོ། །སྐྱེ་མཆེད་དྲུག་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །རྗེས་སུ་དྲན་པ་དྲུག་ནི་རྣམ་པར་བྱང་བའི་རྒྱུ་ཡིན་ནོ། །དམ་པ་མ་ཡིན་པའི་ཆོས་བདུན་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །བྱང་ཆུབ་ཀྱི་ཡན་ལག་བདུན་ནི་རྣམ་པར་བྱང་བའི་རྒྱུ་ཡིན་ནོ། །ལོག་པ་ཉིད་བརྒྱད་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །ཡང་དག་པ་ཉིད་བརྒྱད་ནི་རྣམ་པར་བྱང་བའི་རྒྱུ་ཡིན་ནོ། །ཀུན་ནས་མནར་སེམས་ཀྱི་དངོས་པོ་དགུ་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །མཐར་གྱིས་གནས་པའི་སྙོམས་པར་འཇུག་པ་དགུ་ནི་རྣམ་པར་བྱང་བའི་རྒྱུ་ཡིན་ནོ། །མི་དགེ་བ་བཅུའི་ལས་ཀྱི་ལམ་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །དགེ་བ་བཅུའི་ལས་ཀྱི་ལམ་ནི་རྣམ་པར་བྱང་བའི་རྒྱུ་ཡིན་ཏེ། མདོར་མི་དགེ་བ་ཡིད་ལ་བྱེད་པ་ཐམས་ཅད་ནི་ཀུན་ནས་ཉོན་མོངས་པའི་རྒྱུ་ཡིན་ནོ། །དགེ་བ་ཡིད་ལ་བྱེད་པ་ཐམས་ཅད་ནི་རྣམ་པར་བྱང་བའི་རྒྱུ་ཡིན་ནོ། །དེ་ལ་ཀུན་ནས་ཉོན་མོངས་པའི་རྒྱུ་གང་ཡིན་པ་དང ། རྣམ་པར་བྱང་བའི་རྒྱུ་གང་ཡིན་པའི་ཆོས་དེ་དག་ཐམས་ཅད་ནི་རང་བཞིན་གྱིས་སྟོང་པ་དང ། སེམས་ཅན་མེད་པ་དང ། སྲོག་མེད་པ་དང ། གང་ཟག་མེད་པ་དང ། བདག་པོ་མེད་པ་དང ། ཡོངས་སུ་འཛིན་པ་མེད་པ་དང ། བྱེད་པ་མེད་པ་དང ། སྒྱུ་མ་ལྟ་བུ་དང་མཚན་ཉིད་མེད་པ་དང ། ནང་ཉེ་བར་ཞི་བ་ཡིན་ནོ། །ནང་ཉེ་བར་ཞི་བ་གང་ཡིན་པ་དེ་ནི
42.309a
རབ་ཏུ་ཞི་བའོ། །རབ་ཏུ་ཞི་བ་གང་ཡིན་པ་དེ་ནི་རང་བཞིན་ནོ། །རང་བཞིན་གང་ཡིན་པ་དེ་ནི་དམིགས་སུ་མེད་པའོ། །དམིགས་སུ་མེད་པ་གང་ཡིན་པ་དེ་ནི་གནས་མེད་པའོ། །གནས་མེད་པ་གང་ཡིན་པ་དེ་ནི་དེ་ཁོ་ནའོ། །དེ་ཁོ་ན་ནི་ནམ་མཁའ་སྟེ། དེས་ཆོས་ཐམས་ཅད་ནམ་མཁའ་ལྟ་བུར་རབ་ཏུ་ཤེས་ན་ཀུན་ནས་ཉོན་མོངས་པ་དང་རྣམ་པར་སྤྱོད་ཀྱང་ནམ་མཁའི་ཆོས་ཉིད་དག་མི་སྤོང་ངོ ། །དེ་ཅིའི་ཕྱིར་ཞེ་ན། འཇམ་དཔལ་གང་ལ་སྐྱེ་བ་འམ། འགག་པར་འགྱུར་བའི་ཆོས་དེ་གང་ཡང་མེད་པའི་ཕྱིར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་འོ་ན་དེ་བཞིན་གཤེགས་པས་བྱང་ཆུབ་ཇི་ལྟར་བརྙེས་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་གཤེགས་པས་ནི་རྩ་བ་མེད་པ་དང ། གནས་མེད་པར་བྱང་ཆུབ་ཐོབ་བོ། །འཇམ་དཔལ་གྱིས་གསོལ་པ། བཅོམ་ལྡན་འདས་དེ་ལ་རྩ་བ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འཇིག་ཚོགས་ནི་རྩ་བ་ཡིན་ནོ། །ཡང་དག་པ་མ་ཡིན་པའི་ཀུན་ཏུ་རྟོག་པ་ནི་གནས་ཡིན་ནོ། །འཇམ་དཔལ་དེ་ལ་དེ་བཞིན་གཤེགས་པས་བྱང་ཆུབ་མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་ཤེས་ཏེ། འཇམ་དཔལ་དེའི་ཕྱིར་དེ་བཞིན་གཤེགས་པས་རྩ་བ་མེད་པ་དང ། གནས་མེད་པར་བྱང་ཆུབ་མངོན་པར་རྫོགས་པར་སངས་རྒྱས་ཤེས་བྱའོ། །འཇམ་དཔལ་བྱང་ཆུབ་ནི་ཞི་བ་དང་ཉེ་བར་ཞི་བ་ཡིན་ཏེ། དེ་ལ་ཞི་བ་ནི་གང ། ཉེ་བར་ཞི་བ་ནི་གང་ཞེ་ན། ནང་ནི་ཞི་བ་ཡིན་ནོ། །ཕྱི་རོལ་ནི་ཉེ་བར་ཞི་བ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་མིག་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་མིག་སྟོང་པ་ཞེས་བྱ་བར་ཡོངས་སུ་ཤེས་ནས་གཟུགས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །དེ་བཞིན་དུ་རྣ་བ་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་རྣ་བ་སྟོང་པ་ཞེས
42.309b
བྱ་བར་ཡོངས་སུ་ཤེས་ནས་སྒྲ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །སྣ་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་སྣ་སྟོང་པ་ཞེས་བྱ་བར་ཡོངས་སུ་ཤེས་ནས། དྲི་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ལྕེ་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་ལྕེ་སྟོང་པ་ཞེས་བྱ་བར་ཡོངས་སུ་ཤེས་ནས་རོ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ལུས་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་ལུས་སྟོང་པ་ཞེས་བྱ་བར་ཡོངས་སུ་ཤེས་ནས། རེག་བྱ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །འཇམ་དཔལ་ཡིད་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་ཡིད་སྟོང་པ་ཞེས་བྱ་བར་ཡོངས་སུ་ཤེས་ནས་ཆོས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །འཇམ་དཔལ་བྱང་ཆུབ་ནི་སེམས་ཀྱི་རང་བཞིན་འོད་གསལ་བ་ཉིད་ཀྱིས་རང་བཞིན་འོད་གསལ་བ་ཡིན་ཏེ། ཅིའི་ཕྱིར་འོད་གསལ་བ་ཞེས་བྱ་ཞེ་ན། རང་བཞིན་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ། ནམ་མཁའ་དང་མཉམ་པ། ནམ་མཁའི་རང་བཞིན་ཅན། ནམ་མཁར་ཡང་དག་པར་འདུ་བ། ནམ་མཁའ་ལྟ་བུ་སྟེ། རང་བཞིན་གྱིས་ཤིན་དུ་འོད་གསལ་བ་ཡིན་པའི་ཕྱིར་རོ། །འཇམ་དཔལ་བྱང་ཆུབ་ནི་བླང་བ་མེད་པ་ཉིད་དང ། དོར་བ་མེད་པ་ཉིད་ཡིན་ཏེ། དེ་ལ་བླང་བ་མེད་པ་ཉིད་ནི་གང ། དོར་བ་མེད་པ་ཉིད་ནི་གང་ཞེ་ན། བླང་བ་མེད་པ་ཉིད་ཅེས་བྱ་བ་ནི་ཆོས་ཐམས་ཅད་གཟུང་དུ་མེད་པ་ཉིད་ཡིན་ནོ། །དོར་བ་མེད་པ་ཉིད་ཅེས་བྱ་བ་ནི་ཆོས་ཐམས་ཅད་སྤང་དུ་མེད་པ་ཉིད་ཡིན་ནོ། །འཇམ་དཔལ་དེ་ལ་དེ་བཞིན་གཤེགས་པ་ནི་བླང་བ་མེད་པ་ཉིད་དང ། དོར་བ་མེད་པ་ཉིད་ཀྱིས་ཆུ་བོ་ལས་རྒལ་བར་གྱུར་ཏེ། ཇི་ལྟར་དེ་བཞིན་ཉིད་ཀྱི་ཚུ་རོལ་ཡང
42.310a
དག་པར་རྗེས་སུ་མི་མཐོང ། ཕ་རོལ་ཡང་ཡང་དག་པར་རྗེས་སུ་མི་མཐོང་བ་དེ་ལྟར་ཆུ་བོ་ལས་རྒལ་ཏོ། །དེ་ལྟར་དེ་བཞིན་གཤེགས་པས་ཚུ་རོལ་དང་ཕ་རོལ་དང་བྲལ་བའི་ཆོས་ཐམས་ཅད་མངོན་པར་རྫོགས་པར་བྱང་ཆུབ་སྟེ། དེའི་ཕྱིར་དེ་བཞིན་གཤེགས་པ་ཞེས་བྱའོ། །འཇམ་དཔལ་བྱང་ཆུབ་ནི་མཚན་མ་མེད་པ་ཉིད་དང ། དམིགས་པ་མེད་པ་ཉིད་ཡིན་ཏེ། དེ་ལ་མཚན་མ་མེད་པ་ཉིད་ནི་གང ། དམིགས་པ་མེད་པ་ཉིད་ནི་གང་ཞེ་ན། འཇམ་དཔལ་མིག་གི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །གཟུགས་ཡང་དག་པར་རྗེས་སུ་མི་མཐོང་བ་ནི་དམིགས་པ་མེད་པ་ཉིད་ཡིན་ནོ། །རྣ་བའི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །སྒྲ་མཉན་དུ་མེད་པ་ནི་དམིགས་པ་མེད་པ་ཉིད་ཡིན་ནོ། །སྣའི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །དྲི་བསྣམ་དུ་མེད་པ་ནི་དམིགས་སུ་མེད་པ་ཉིད་ཡིན་ནོ། །ལྕེའི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །རོ་མྱང་དུ་མེད་པ་ནི་དམིགས་པ་མེད་པ་ཉིད་ཡིན་ནོ། །ལུས་ཀྱི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །རེག་བྱ་རེག་པར་བྱ་བ་མེད་པ་ནི་དམིགས་པ་མེད་པ་ཉིད་ཡིན་ནོ། །ཡིད་ཀྱི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །ཆོས་རྣམས་རྣམ་པར་ཤེས་པར་བྱར་མེད་པ་ནི་དམིགས་པ་མེད་པ་ཉིད་ཡིན་ནོ། །འཇམ་དཔལ་དེ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ཏེ། འཇམ་དཔལ་གང་ཁམས་གསུམ་པའི་སྤྱོད་ཡུལ་མ་ཡིན་པ་དེ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ནོ། །འཇམ་དཔལ་བྱང་ཆུབ་ནི་འདས་པ་མ་ཡིན་མ་འོངས་པ་མ་ཡིན་ད་ལྟར་བྱུང་བ་མ་ཡིན་ཏེ། དུས་གསུམ་མཉམ་པ་འཁོར་གསུམ་ཡོངས་སུ་ཆད་པ་ཡིན་ནོ། །འཇམ་དཔལ་དེ་ལ་འཁོར་གསུམ་ཡོངས་སུ་ཆད་པ་གང་ཞེ་ན། འདས་པ་ལ་སེམས་མི་འཇུག་པ་དང ། མ་འོངས་པ་ལ་རྣམ་པར་ཤེས་པ
42.310b
མི་རྒྱུག་པ་དང ། ད་ལྟར་བྱུང་བ་ལ་ཡིད་ལ་བྱེད་པ་མི་འབྱུང་བ་གང་ཡིན་པ་སྟེ། དེ་ནི་སེམས་དང་ཡིད་དང ། རྣམ་པར་ཤེས་པ་ལ་མི་གནས་ཤིང་རྟོག་པར་མི་བྱེད་རྣམ་པར་རྟོག་པར་མི་བྱེད་དོ། །རྟོག་པར་མི་བྱེད་རྣམ་པར་རྟོག་པར་མི་བྱེད་པ་ནི་འདས་པ་ཡིད་ལ་མི་བྱེད། མ་འོངས་པ་ལ་རློམ་སེམས་སུ་མི་བྱེད། ད་ལྟར་བྱུང་བ་ལ་འཕྲོ་བར་མི་བྱེད་དོ། །འཇམ་དཔལ་བྱང་ཆུབ་ནི་ལུས་མེད་པ་ཉིད་དང ། འདུས་མ་བྱས་པ་ཉིད་ཡིན་ཏེ། འཇམ་དཔལ་དེ་ལ་ལུས་མེད་པ་ཉིད་ནི་མིག་གི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་དང ། རྣ་བ་དང་སྣ་དང་ལྕེ་དང་ལུས་དང ། ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་གང་ཡིན་པའོ། །འཇམ་དཔལ་སེམས་དང་ཡིད་དང་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་གང་ཡིན་པ་དེ་ཉིད་འདུས་མ་བྱས་པ་ཉིད་ཡིན་ཏེ། འདུས་མ་བྱས་པ་ཉིད་ཅེས་བྱ་བ་ནི་གང་ལ་སྐྱེ་བ་མེད་པ་དང ། གནས་པ་མེད་པ་དང ། འཇིག་པ་མེད་པའོ། །དེ་ནི་འཁོར་གསུམ་ཡོངས་སུ་དག་པ་འདུས་མ་བྱས་པ་ཡིན་ཏེ། འདུས་མ་བྱས་པ་ཇི་ལྟ་བ་ཁོ་ན་བཞིན་དུ་འདུས་བྱས་ཀྱང་དེ་ལྟ་བུ་ཁོ་ན་ཡིན་པར་རྟོགས་པར་བྱའོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་ཀྱི་ངོ་བོ་ཉིད་གང་ཡིན་པ་དེ་ནི་ངོ་བོ་ཉིད་མེད་པ་སྟེ། ངོ་བོ་ཉིད་མེད་པ་གང་ཡིན་པ་དེ་ལ་ནི་གཉིས་མེད་པའི་ཕྱིར་རོ། །འཇམ་དཔལ་བྱང་ཆུབ་དེ་ནི་དབྱེར་མེད་པའི་གཞི་ཡིན་ཏེ། དེ་ལ་དབྱེར་མེད་པ་ནི་གང ། གཞི་ནི་གང་ཞེ་ན། མིང་མེད་པ་ནི་དབྱེར་མེད་པའོ། །དེ་བཞིན་ཉིད་ནི་གཞིའོ། །གནས་མེད་པ་ནི་དབྱེར་མེད་པའོ། །ཆོས་ཀྱི་དབྱིངས་ནི་གཞིའོ། །ཐ་དད་པ་ཉིད་མེད་པ་ནི་དབྱེར་མེད་པའོ། །ཡང་དག་པའི་མཐའ་ནི་གཞིའོ། །དམིགས་པ་མེད་པ་ནི་དབྱེར་མེད་པའོ། །གཡོ་བ་མེད་པ་ནི་གཞིའོ། །སྟོང་པ་ཉིད་ནི་དབྱེར་མེད་པའོ། །མཚན་མ་མེད་པ་ནི་གཞིའོ། །རྣམ་པར་རྟོག་པ་མེད་པ་ནི་དབྱེར་མེད་པའོ། །སྨོན་པ་མེད་པ་ནི་གཞིའོ། །
42.311a
སྒྲུབ་པ་མེད་པ་ནི་དབྱེར་མེད་པའོ། །སེམས་ཅན་མེད་པ་ནི་གཞིའོ། །སེམས་ཅན་གྱི་ངོ་བོ་ཉིད་མེད་པ་ནི་དབྱེར་མེད་པའོ། །ནམ་མཁའ་ནི་གཞིའོ། །དམིགས་སུ་མེད་པ་ནི་དབྱེར་མེད་པའོ། །སྐྱེ་བ་མེད་པ་ནི་གཞིའོ། །འགག་པ་མེད་པ་ནི་དབྱེར་མེད་པའོ། །འདུས་མ་བྱས་ནི་གཞིའོ། །སྤྱོད་པ་མེད་པ་ནི་དབྱེར་མེད་པའོ། །བྱང་ཆུབ་ནི་གཞིའོ། །ཉེ་བར་ཞི་བ་ནི་དབྱེར་མེད་པའོ། །མྱ་ངན་ལས་འདས་པ་ནི་གཞིའོ། །མངོན་པར་འགྲུབ་པ་མེད་པ་ནི་དབྱེར་མེད་པའོ། །སྐྱེ་བ་མེད་པ་ནི་གཞིའོ། །འཇམ་དཔལ་བྱང་ཆུབ་ནི་ལུས་ཀྱིས་མངོན་པར་རྫོགས་པར་བྱང་ཆུབ་པར་མི་འགྱུར་ཏེ། སེམས་ཀྱིས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་ལུས་ནི་བེམས་པོ་གཡོ་བ་མེད་པ་སེམས་པ་མེད་པ་སྟེ། རྩཝ་དང་རྩིག་པ་དང ། ཤིང་དང་བོང་བ་དང ། གཟུགས་བརྙན་ལྟ་བུ་ཡིན་ལ། སེམས་ཀྱང་སྒྱུ་མ་ལྟ་བུ་སྟེ། གསོག་དང་གསོབ་དང ། ཡང་དག་པ་མ་ཡིན་པ་དང ། འདུས་མ་བྱས་པ་ཡིན་པའི་ཕྱིར་རོ། །འཇམ་དཔལ་གང་གིས་ལུས་དང་སེམས་དེ་ལྟར་རྟོགས་པ་དེ་ནི་བྱང་ཆུབ་ཅེས་བྱ་སྟེ། འཇམ་དཔལ་དེ་ཡང་ཐ་སྙད་ལ་བརྟེན་པ་ཡིན་གྱི་དོན་དམ་པར་ནི་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་བྱང་ཆུབ་ནི་ལུས་དང་སེམས་དང་ཆོས་དང་ཆོས་མ་ཡིན་པ་དང ། ཡང་དག་པ་དང་ཡང་དག་པ་མ་ཡིན་པ་དང ། བདེན་པ་དང་བརྫུན་པས་བརྗོད་པར་བྱ་བ་མ་ཡིན་པའི་ཕྱིར་རོ། །འཇམ་དཔལ་བྱང་ཆུབ་ནི་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་པ་སྟེ། དེ་ཅིའི་ཕྱིར་ཞེ་ན། འཇམ་དཔལ་བྱང་ཆུབ་ལ་ནི་གང་གིས་ཚིག་དང་ཐ་སྙད་འཇུག་པར་འགྱུར་བའི་གནས་ཅུང་ཟད་ཀྱང་མེད་པའི་ཕྱིར་རོ། །འཇམ་དཔལ་འདི་ལྟ་སྟེ་དཔེར་ན། ནམ་མཁའ་ནི་གནས་མེད་པ། འདུས་མ་བྱས་པ། མ་སྐྱེས་པ་མ་འགགས་པ། བརྗོད་པར་བྱ་བ་མ་ཡིན་པའོ། །འཇམ་དཔལ་དེ་བཞིན་དུ་བྱང་ཆུབ་ཀྱང་གནས་མེད་པ། འདུས་མ་བྱས་པ་མ་སྐྱེས་པ།
42.311b
མ་འགགས་པ། བརྗོད་པར་བྱ་བ་མ་ཡིན་པའོ། །འཇམ་དཔལ་འདི་ལྟ་སྟེ་དཔེར་ན། ཡང་དག་པར་ཡོངས་སུ་ཚོལ་བ་ན་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་པ་དེ་བཞིན་དུ། འཇམ་དཔལ་ཡང་དག་པར་བྱང་ཆུབ་ཡོངས་སུ་ཚོལ་བ་ན་ཡང་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་ཡང་དག་པར་ནི་ཚིག་ནི་མ་སྐྱེས་པ་དང ། མ་འགགས་པ་ཡིན་པས་ཡོད་པ་མ་ཡིན་པའི་ཕྱིར་རོ། །འཇམ་དཔལ་བྱང་ཆུབ་ནི་གཟུང་བ་མེད་པ་ཉིད་དང ། གནས་མེད་པ་ཉིད་ཡིན་ཏེ། འཇམ་དཔལ་དེ་ལ་གཟུང་བ་མེད་པ་ནི་གང ། གནས་མེད་པ་ནི་གང་ཞེ་ན། འཇམ་དཔལ་མིག་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །གཟུགས་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །རྣ་བ་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །སྒྲ་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །སྣ་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །དྲི་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །ལྕེ་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །རོ་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །ལུས་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །རེག་བྱ་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །ཡིད་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །ཆོས་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །དེ་བཞིན་གཤེགས་པས་ནི་དེ་ལྟར་གཟུང་བ་མེད་པ་ཉིད་དང ། གནས་མེད་པ་ཉིད་དུ་བྱང་ཆུབ་མངོན་པར་རྫོགས་པར་སངས་རྒྱས་ཏེ། མངོན་པར་རྫོགས་པར་སངས་རྒྱས་ནས་ཀྱང ། མིག་གཟུང་དུ་མེད་པ་དང ། གཟུགས་དམིགས་སུ་མེད་པའི་ཕྱིར། མིག་གི་རྣམ་པར་ཤེས་པ་ལ་མི་གནས་སོ། །རྣ་བ་གཟུང་དུ་མེད་པ་དང ། སྒྲ་དམིགས་སུ་མེད་པའི་ཕྱིར་རྣ་བའི་རྣམ་པར་ཤེས་པ་ལ་མི་གནས་སོ། །སྣ་གཟུང་དུ
42.312a
མེད་པ་དང ། དྲི་དམིགས་སུ་མེད་པའི་ཕྱིར་སྣའི་རྣམ་པར་ཤེས་པ་ལ་མི་གནས་སོ། །ལྕེ་གཟུང་དུ་མེད་པ་དང་རོ་དམིགས་སུ་མེད་པའི་ཕྱིར། ལྕེའི་རྣམ་པར་ཤེས་པ་ལ་མི་གནས་སོ། །ལུས་གཟུང་དུ་མེད་པ་དང ། རེག་བྱ་དམིགས་སུ་མེད་པའི་ཕྱིར་ལུས་ཀྱི་རྣམ་པར་ཤེས་པ་ལ་མི་གནས་སོ། །ཡིད་གཟུང་དུ་མེད་པ་དང ། ཆོས་དམིགས་སུ་མེད་པའི་ཕྱིར་ཡིད་ཀྱི་རྣམ་པར་ཤེས་པ་ལ་མི་གནས་ཏེ། དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྣམ་པར་ཤེས་པ་ལ་མི་གནས་པ་དང་ལྡན་པ་ཞེས་བྱ་བའི་གྲངས་སུ་འགྲོའོ། །འཇམ་དཔལ་བཞི་པོ་འདི་དག་ནི་སེམས་ཅན་རྣམས་ཀྱི་སེམས་ཀྱི་གནས་ཡིན་ཏེ། བཞི་གང་ཞེ་ན། འདི་ལྟ་སྟེ། གཟུགས་ནི་སེམས་ཅན་རྣམས་ཀྱི་སེམས་ཀྱི་གནས་ཡིན་ནོ། །འཇམ་དཔལ་དེ་བཞིན་དུ་ཚོར་བ་དང ། འདུ་ཤེས་དང་འདུ་བྱེད་རྣམས་ནི་སེམས་ཅན་རྣམས་ཀྱི་སེམས་ཀྱི་གནས་ཡིན་ཏེ། འཇམ་དཔལ་དེ་བཞིན་གཤེགས་པས་ནི་སེམས་ཅན་རྣམས་ཀྱི་སེམས་ཀྱི་གནས་བཞི་པོ་དེ་དག་མ་སྐྱེས་པ་དང ། མ་འགགས་པར་ཤེས་སོ། །འཇམ་དཔལ་བྱང་ཆུབ་ཅེས་བྱ་བ་དེ་ནི་སྟོང་པ་ཉིད་ཀྱི་ཚིག་བླ་དགས་ཡིན་ཏེ། འཇམ་དཔལ་སྟོང་པ་ཉིད་གང་གིས་བྱང་ཆུབ་སྟོང་པའི་སྟོང་པ་ཉིད་དེས་ཆོས་ཐམས་ཅད་ཀྱང་སྟོང་སྟེ། འཇམ་དཔལ་དེ་བཞིན་གཤེགས་པས་ནི་དེ་དག་ཇི་ལྟར་སྟོང་པ་དེ་ལྟ་བུ་ཁོ་ནར་མངོན་པར་རྫོགས་པར་སངས་རྒྱས་སོ། །འཇམ་དཔལ་སྟོང་པ་ཉིད་ཀྱིས་སྟོང་པ་ཉིད་མངོན་པར་རྫོགས་པར་སངས་རྒྱས་པ་ཡང་མ་ཡིན་ཏེ། འཇམ་དཔལ་འདི་ལྟ་སྟེ། སྟོང་པ་ཉིད་དམ་བྱང་ཆུབ་དེ་ནི་ཤེས་པའི་ཚུལ་གཅིག་པ་ཡིན་ནོ། །འཇམ་དཔལ་གང་ལ་སྟོང་པ་ཉིད་ཀྱང་མེད། བྱང་ཆུབ་ཀྱང་མེད་པ་དེ་ལ་ནི་འཇམ་དཔལ་གང་གིས་སྟོང་པ་ཉིད་དང ། བྱང་ཆུབ་ཅེས་གཉིས་སུ་དབྱེ་བའི་གཉིས་ནི་ཅུང་ཟད་ཀྱང་མེད་དོ། །དེ་ཅིའི་ཕྱིར་ཞེ་ན། འཇམ་དཔལ
42.312b
ཆོས་ཐམས་ཅད་ནི་གཉིས་སུ་མེད་པ། མཚན་ཉིད་མེད་པ་གཉིས་སུ་དབྱེར་མེད་པ། མིང་མེད་པ་མཚན་མ་མེད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ། མ་སྐྱེས་པ་མ་འགགས་པ། རྒྱུ་བ་མེད་པ་སྤྱོད་པ་མེད་པ། ཀུན་འབྱུང་བ་མེད་པ། ཡི་གེ་མེད་པ་སྒྲ་མེད་པ་ཡིན་པའི་ཕྱིར་རོ།། །། འཕགས་པ་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བའི་རྒྱན་ཅེས་བྱ་བ་ཐེག་པ་ཆེན་པོའི་མདོ། བམ་པོ་གསུམ་པ་སྟེ་ཐ་མ། འཇམ་དཔལ་སྟོང་པ་ཉིད་ཅེས་བྱ་བ་གང་ཡིན་པ་དེ་ནི་མངོན་པར་ཞེན་པ་མེད་པ་དང ། འཛིན་པ་མེད་པའི་ཚིག་བླ་དགས་ཡིན་ཏེ། འཇམ་དཔལ་དེ་ལ་ནི་དོན་དམ་པར་ན་གང་སྟོང་པ་ཞེས་བྱ་བའི་ཆོས་གང་ཡང་དམིགས་སུ་མེད་དོ། །འཇམ་དཔལ་འདི་ལྟ་སྟེ་དཔེར་ན། ནམ་མཁའ་ནམ་མཁའ་ཞེས་བརྗོད་ཀྱང་ནམ་མཁའ་ནི་བརྗོད་པར་བྱ་བ་མ་ཡིན་ནོ། །འཇམ་དཔལ་དེ་བཞིན་དུ་སྟོང་པ་སྟོང་པ་ཞེས་བརྗོད་ཀྱང་སྟོང་བ་པ་ནི་བརྗོད་པར་བྱ་བ་མ་ཡིན་ཏེ། ཆོས་ཐམས་ཅད་ཀྱིས་འཇུག་པ་ནི་དེ་ལྟ་བུ་ཡིན་ནོ། །འཇམ་དཔལ་ཆོས་ཐམས་ཅད་ནི་མིང་མེད་པ་ཡིན་ན། དེ་དག་ལ་མིང་གིས་བརྗོད་པར་བྱེད་དེ། འཇམ་དཔལ་མིང་ནི་ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན་ནོ། །འཇམ་དཔལ་ཇི་ལྟར་མིང་ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན་པ་དེ་བཞིན་དུ་གང་གིས་ཆོས་གང་བརྗོད་པར་བྱེད་པའི་ཆོས་དེ་ཡང་ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན་ནོ། །འཇམ་དཔལ་དེ་བཞིན་གཤེགས་པས་ནི་ཆོས་དེ་དག་ཐམས་ཅད་དེ་ལྟར་གཟོད་མ་ནས་མ་སྐྱེས་པ་མ་འགགས་པ་མཚན་ཉིད་མེད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ། ཡི་གེ་མེད་པ་སྒྲ་མེད་པར་ཤེས་སོ། །འཇམ་དཔལ་ཇི་ལྟར་ཤེས་པ་དེ་ཁོ་ན་བཞིན་དུ་རྣམ་པར་གྲོལ་ཏེ། བཅིངས་པ་ལས་གྲོལ་བར་གྱུར་པ་མ་ཡིན
42.313a
ནོ། །འཇམ་དཔལ་བྱང་ཆུབ་ནི་ནམ་མཁའ་དང་མཉམ་པ་སྟེ། ནམ་མཁའ་ནི་མཉམ་པ་མ་ཡིན། མི་མཉམ་པ་མ་ཡིན་ལ་བྱང་ཆུབ་ཀྱང་མཉམ་པ་མ་ཡིན། མི་མཉམ་པ་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་གང་ལ་ཡང་དག་པར་ཡོངས་སུ་འགྲུབ་པ་མེད་པ་དེ་ནི་མཉམ་པ་དང ། མི་མཉམ་པར་རྗོད་པར་བྱ་བ་མ་ཡིན་པའི་ཕྱིར་རོ། །འཇམ་དཔལ་དེ་བཞིན་གཤེགས་པས་ནི་དེ་ལྟར་ཆོས་ཐམས་ཅད་མཉམ་པ་མེད་པ་དང ། མི་མཉམ་པ་མེད་པར་མངོན་པར་རྫོགས་པར་སངས་རྒྱས་ཏེ། ཇི་ལྟར་ཆོས་ཕྲ་རབ་ཙམ་ཡང་མཉམ་པར་མ་བྱས། མི་མཉམ་པར་མ་བྱས་པ་དེ་ལྟར་མངོན་པར་རྫོགས་པར་སངས་རྒྱས་ཤིང ། ཡང་དག་པའི་ཤེས་པས་དེ་དག་ཇི་ལྟ་བུ་ཁོ་ནར་ཤེས་སོ། །འཇམ་དཔལ་ཡང་དག་པའི་ཤེས་པ་ཡང་གང་ཞེ་ན། འཇམ་དཔལ་ཆོས་ཐམས་ཅད་རྩ་བ་མེད་པ་དང ། མ་སྐྱེས་པ་དང་མ་འགགས་པ་དང ། མ་བྱུང་བ་ལས་འབྱུང་བ་དང ། བྱུང་ནས་ཀྱང་འཇིག་པར་འགྱུར་ཏེ། འཇམ་དཔལ་དེ་དག་ཀྱང་བདག་པོ་མེད་པ་དང ། ཡོངས་སུ་འཛིན་པ་མེད་པར་འབྱུང་ཞིང་བདག་པོ་མེད་པ་དང ། ཡོངས་སུ་འཛིན་པ་མེད་པར་འཇིག་པར་ཤེས་པའོ། །འཇམ་དཔལ་དེ་ལྟར་བྱུང་བ་དང ། འཇིག་པ་ལ་བརྟེན་ནས་ཆོས་རྣམས་འཇུག་པར་འགྱུར་ཡང་འདི་ལ་འཇུག་པར་འགྱུར་བ་གང་ཡང་མེད་དེ། དེ་ནི་ལམ་གྱི་རྒྱུན་བཅད་པའི་ཕྱིར་དེ་བཞིན་གཤེགས་པ་ཆོས་སྟོན་པ་ཞེས་བྱའོ། །འཇམ་དཔལ་བྱང་ཆུབ་ཅེས་བྱ་བ་དེ་ནི་ཇི་ལྟ་བ་བཞིན་གྱི་གནས་ཡིན་ཏེ། འཇམ་དཔལ་དེ་ལ་ཇི་ལྟ་བ་བཞིན་གྱི་གནས་གང་ཞེ་ན། འཇམ་དཔལ་ཇི་ལྟ་བ་བཞིན་གྱི་གནས་ཤེས་བྱ་བ་ནི་བྱང་ཆུབ་སྟེ། བྱང་ཆུབ་ཇི་ལྟ་བ་དེ་བཞིན་དུ་གཟུགས་ཀྱང་དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བ་དེ་བཞིན་དུ་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཡང་དེ་བཞིན་ཉིད་ལས་མི་འདའོ། །
42.313b
བྱང་ཆུབ་ཇི་ལྟ་བ་དེ་བཞིན་དུ་སའི་ཁམས་ཀྱང་དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བ་དེ་བཞིན་དུ་ཆུའི་ཁམས་དང ། མེའི་ཁམས་དང ། རླུང་གི་ཁམས་ཀྱང་དེ་བཞིན་ཉིད་ལས་མི་འདའོ། །འཇམ་དཔལ་བྱང་ཆུབ་ཇི་ལྟ་བ་དེ་བཞིན་དུ་མིག་གི་ཁམས་དང ། གཟུགས་ཀྱི་ཁམས་དང་མིག་གི་རྣམ་པར་ཤེས་པའི་ཁམས་ཀྱང་དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བ་དེ་བཞིན་དུ་རྣ་བའི་ཁམས་དང་སྒྲའི་ཁམས་དང་རྣ་བའི་རྣམ་པར་ཤེས་པའི་ཁམས་དང ། སྣའི་ཁམས་དང ། དྲིའི་ཁམས་དང ། སྣའི་རྣམ་པར་ཤེས་པའི་ཁམས་དང ། ལྕེའི་ཁམས་དང་རོའི་ཁམས་དང ། ལྕེའི་རྣམ་པར་ཤེས་པའི་ཁམས་དང ། ལུས་ཀྱི་ཁམས་དང་རེག་བྱའི་ཁམས་དང ། ལུས་ཀྱི་རྣམ་པར་ཤེས་པའི་ཁམས་དང ། ཡིད་ཀྱི་ཁམས་དང་ཆོས་ཀྱི་ཁམས་དང ། ཡིད་ཀྱི་རྣམ་པར་ཤེས་པའི་ཁམས་ཀྱང་དེ་བཞིན་ཉིད་ལས་མི་འདའོ། །ཆོས་གདགས་པ་དེ་ནི་འདི་ཙམ་དུ་ཟད་དེ། འདི་ལྟ་སྟེ་ཕུང་པོ་དང ། ཁམས་དང་སྐྱེ་མཆེད་དུ་གདགས་པའོ། །དེ་བཞིན་གཤེགས་པས་ནི་དེ་དག་ཡང་དག་པ་ཇི་ལྟ་བ་བཞིན་དུ་མངོན་པར་རྫོགས་པར་སངས་རྒྱས་ཤིང་ཕྱིན་ཅི་མ་ལོག་པར་མངོན་པར་རྫོགས་པར་སངས་རྒྱས་སོ། །དེ་དག་ནི་སྔོན་ཇི་ལྟ་བ་བཞིན་དུ་ཕྱིས་ཀྱང་དེ་བཞིན་བར་དུ་ཡང་དེ་བཞིན་ཏེ། སྔོན་གྱི་མཐར་མ་སྐྱེས་པ་དང ། ཕྱི་མའི་མཐར་མི་འཕོ་བ་དང ། དབུས་སུ་བདེན་པ་ཡིན་ནོ། །དེ་ལྟར་དེ་དག་ཇི་ལྟ་བ་བཞིན་གྱི་གནས་ཡིན་ཏེ། གཅིག་ཇི་ལྟ་བ་བཞིན་དུ་ཐམས་ཅད་དེ་བཞིན་ལ། ཐམས་ཅད་ཇི་ལྟ་བ་བཞིན་དུ་གཅིག་ཀྱང་དེ་བཞིན་ཏེ། འཇམ་དཔལ་འདི་ལ་ནི་གཅིག་པ་ཉིད་དམ། མང་པོ་ཉིད་དུ་དམིགས་སུ་མེད་དོ། །འཇམ་དཔལ་བྱང་ཆུབ་ནི་རྣམ་པའི་འཇུག་པས་རྣམ་པ་མེད་པར་ཞུགས་པ་ཡིན་ཏེ། འཇམ་དཔལ་དེ་ལ་རྣམ་པ་ནི་གང ། རྣམ་པ་མེད་པ་ནི་གང་ཞེ་ན། འཇམ་དཔལ་རྣམ་པ་ཞེས་བྱ་བ་ནི་དགེ་བའི་ཆོས་ཐམས་ཅད་ལ་རྩོམ་པའོ། །རྣམ་པ་མེད་པ་ཞེས་བྱ་བ་ནི་ཆོས་ཐམས་ཅད་དམིགས
42.314a
སུ་མེད་པའོ་རྣམ་པ་ཞེས་བྱ་བ་ནི་སེམས་མི་གནས་པའི་གནས་སྐབས་སོ། །རྣམ་པ་མེད་པ་ཞེས་བྱ་བ་ནི་རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་ཏོ། །རྣམ་པ་ཞེས་བྱ་བ་ནི་ཆོས་ཐམས་ཅད་ལ་སེམས་པ་དང་འཇལ་བ་དང ། བགྲང་བ་དང ། སོ་སོར་རྟོག་པའོ། །རྣམ་པ་མེད་པ་ཞེས་བྱ་བ་ནི་གཞལ་བ་ལས་ཡང་དག་པར་འདས་པ་སྟེ། གཞལ་བ་ལས་ཡང་དག་པར་འདས་པ་ཡང་གང་ཞེ་ན། གང་ལ་རྣམ་པར་ཤེས་པའི་ལས་མེད་པའོ། །རྣམ་པ་ཞེས་བྱ་བ་ནི་འདུས་བྱས་ལ་སོ་སོར་རྟོག་པའོ་རྣམ་པ་མེད་པ་ཞེས་བྱ་བ་ནི་འདུས་མ་བྱས་ལ་སོ་སོར་རྟོག་པའོ། །འཇམ་དཔལ་བྱང་ཆུབ་ནི་ཟག་པ་མེད་པ་ཉིད་དང ། ལེན་པ་མེད་པ་ཉིད་ཡིན་ཏེ། འཇམ་དཔལ་དེ་ལ་ཟག་པ་མེད་པ་གང་ལེན་པ་མེད་པ་ཉིད་གང་ཞེ་ན། འཇམ་དཔལ་ཟག་པ་མེད་པ་ཉིད་ཅེས་བྱ་བ་ནི་ཟག་པ་བཞི་དང་བྲལ་བ་སྟེ། བཞི་པོ་དེ་དག་ཀྱང་གང་ཞེ་ན། འདི་ལྟ་སྟེ་འདོད་པའི་ཟག་པ་དང ། སྲིད་པའི་ཟག་པ་དང ། མ་རིག་པའི་ཟག་པ་དང ། ལྟ་བའི་ཟག་པ་སྟེ། ཟག་པ་བཞི་པོ་དེ་དང་བྲལ་བའོ། །ལེན་པ་མེད་པ་ཉིད་ཅེས་བྱ་བ་ནི་ལེན་པ་བཞི་དང་བྲལ་བ་སྟེ། བཞི་པོ་དེ་དག་ཀྱང་གང་ཞེ་ན། འདི་ལྟ་སྟེ་འདོད་པའི་ལེན་པ་དང་ལྟ་བའི་ལེན་པ་དང ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལེན་པ་དང ། བདག་ཏུ་སྨྲ་བའི་ལེན་པ་སྟེ། ལེན་པ་བཞི་པོ་དེ་དག་དང་བྲལ་བའོ། །འཇམ་དཔལ་དེ་ལ་སེམས་ཅན་མ་རིག་པས་ལྡོངས་པར་བྱས་པ། སྲེད་པས་དཀྲུགས་པར་གྱུར་པ་དག་ནི་ཕན་ཚུན་མངོན་པར་ཞེན་པར་གྱུར་ནས་ལེན་པར་བྱེད་ཀྱི་དེ་བཞིན་གཤེགས་པས་ནི་བདག་ཏུ་སྨྲ་བའི་ལེན་པ་རྩ་བ་ཡིན་པར་ཡོངས་སུ་ཤེས་ནས། བདག་རྣམ་པར་དག་པས་སེམས་ཅན་ཐམས་ཅད་རྣམ་པར་དག་པ་རྗེས་སུ་རྟོགས་པར་གྱུར་ཏེ། བདག་རྣམ་པར་དག་པ་གང་ཡིན་པ་དང ། སེམས་ཅན་ཐམས་ཅད་རྣམ་པར་དག་པ་གང་ཡིན་པ་དེ་ནི་གཉིས་སུ་མེད་དེ་གཉིས་སུ་དབྱེར་མེད་ལ། གཉིས་སུ་མེད་པའི་དོན་གང་ཡིན་པ་དེ་ནི་སྐྱེ་བ་མེད་པ་དང ། འགག་པ་མེད་པ་ཡིན་ནོ། །འཇམ་དཔལ་སྐྱེ་བ་མེད་པ་དང ། འགག
42.314b
པ་མེད་པ་ལ་ནི་སེམས་དང་ཡིད་དང ། རྣམ་པར་ཤེས་པ་འཇུག་པར་མི་འགྱུར་ཏེ། འཇམ་དཔལ་གང་ལ་སེམས་དང་ཡིད་དང ། རྣམ་པར་ཤེས་པ་མི་འཇུག་པ་དེ་ལ་ནི་ཡོངས་སུ་རྟོགས་པ་གང་གིས་ཚུལ་བཞིན་མ་ཡིན་པ་ཡིད་ལ་བྱེད་པར་འགྱུར་བའི་ཡོངས་སུ་རྟོག་པ་གང་ཡང་མེད་དོ། །ཚུལ་བཞིན་ཡིད་ལ་བྱེད་པ་ལ་རབ་ཏུ་བརྩོན་པ་དེ་ནི་མ་རིག་པ་ཀུན་ནས་སློང་བ་མི་བྱེད་དོ། །མ་རིག་པ་ཀུན་ནས་ལྡང་བ་མེད་པ་གང་ཡིན་པ་དེ་ནི་སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་སློང་བ་མེད་པ་ཡིན་ནོ། །སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་ལྡང་བ་མེད་པ་གང་ཡིན་པ་དེ་ནི་སྐྱེ་བ་མེད་པ་ཡིན་ནོ། །སྐྱེ་བ་མེད་པ་གང་ཡིན་པ་དེ་ནི་སྐྱོན་མེད་པ་ཡིན་ནོ། །སྐྱོན་མེད་པ་གང་ཡིན་པ་དེ་ནི་ངེས་པའི་དོན་ཡིན་ནོ། །ངེས་པའི་དོན་གང་ཡིན་པ་དེ་ནི་དོན་དམ་པ་ཡིན་ནོ། །དོན་དམ་པ་གང་ཡིན་པ་དེ་ནི་གང་ཟག་མེད་པའི་དོན་ཡིན་ནོ། །གང་ཟག་མེད་པའི་དོན་གང་ཡིན་པ་དེ་ནི་བརྗོད་དུ་མེད་པའི་དོན་ཡིན་ནོ། །བརྗོད་དུ་མེད་པའི་དོན་གང་ཡིན་པ་དེ་ནི་རྟེན་ཅིང་འབྲེལ་པར་འབྱུང་བའི་དོན་ཡིན་ནོ། །རྟེན་ཅིང་འབྲེལ་པར་འབྱུང་བའི་དོན་གང་ཡིན་པ་དེ་ནི་ཆོས་ཀྱི་དོན་ཡིན་ནོ། །ཆོས་ཀྱི་དོན་གང་ཡིན་པ་དེ་ནི་དེ་བཞིན་གཤེགས་པའི་དོན་ཡིན་ཏེ། དེའི་ཕྱིར་གང་གིས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ ། །གང་གིས་ཆོས་མཐོང་བ་དེས་དེ་བཞིན་གཤེགས་པ་མཐོང་ངོ་ཞེས་གསུངས་ཏེ། ཇི་ལྟར་ཡོངས་སུ་ཚོལ་བ་ན་ཅི་ཡང་མི་མཐོང་བ་དེ་ལྟར་མཐོང་ངོ ། །འཇམ་དཔལ་དེ་ལ་ཅི་ཡང་ཞེས་བྱ་བ་གང་ཞེ་ན། འདི་ལྟ་སྟེ་སེམས་དང་དམིགས་པ་སྟེ། དེས་གང་གི་ཚེ་སེམས་དང་དམིགས་པ་ཡང་དག་པར་རྗེས་སུ་མི་མཐོང་བ་དེའི་ཚེ་ན་ཡང་དག་པར་མཐོང་བ་ཡིན་པས། དེ་བཞིན་གཤེགས་པས་ནི་ཆོས་དེ་དག་དེ་ལྟར་མཉམ་པ་ཉིད་ཀྱིས་མཉམ་པར་མངོན་པར་རྫོགས་པར་སངས་རྒྱས་སོ། །འཇམ་དཔལ་བྱང་ཆུབ་ནི་དག་པ་དང་དྲི་མ་མེད་པ་དང ། ཉོན་མོངས་པ་མེད་པ་ཡིན་ཏེ། འཇམ་དཔལ་དེ་ལ་དག་པ་ནི་གང་དྲི་མ་མེད་པ་ནི་གང་ཉོན་མོངས་པ་མེད
42.315a
པ་ནི་གང་ཞེ་ན། འཇམ་དཔལ་སྟོང་པ་ཉིད་ནི་དག་པའོ། །མཚན་མ་མེད་པ་ནི་དྲི་མ་མེད་པའོ། །སྨོན་པ་མེད་པ་ནི་ཉོན་མོངས་པ་མེད་པའོ། །སྐྱེ་བ་མེད་པ་ནི་དག་པའོ། །མངོན་པར་འདུ་བྱ་བ་མེད་པ་ནི་དྲི་མ་མེད་པའོ། །འབྱུང་བ་མེད་པ་ནི་ཉོན་མོངས་པ་མེད་པའོ། །རང་བཞིན་ནི་དག་པའོ། །ཡོངས་སུ་དག་པ་ནི་དྲི་མ་མེད་པའོ། །འོད་གསལ་བ་ནི་ཉོན་མོངས་པ་མེད་པའོ། །སྤྲོས་པ་མེད་པ་ནི་དག་པའོ། །སྤྲོས་པ་དང་བྲལ་བ་ནི་དྲི་མ་མེད་པའོ། །སྤྲོས་པ་ཉེ་བར་ཞི་བ་ནི་ཉོན་མོངས་པ་མེད་པའོ། །དེ་བཞིན་ཉིད་ནི་དག་པའོ། །ཆོས་ཀྱི་དབྱིངས་ནི་དྲི་མ་མེད་པའོ། །ཡང་དག་པའི་མཐའ་ནི་ཉོན་མོངས་པ་མེད་པའོ། །ནམ་མཁའ་ནི་དག་པའོ། །བར་སྣང་ནི་དྲི་མ་མེད་པའོ། །ནམ་མཁའ་ནི་ཉོན་མོངས་པ་མེད་པའོ། །ནང་ཡོངས་སུ་ཤེས་པ་ནི་དག་པའོ། །ཕྱི་རོལ་ཏུ་རྒྱུ་བ་མེད་པ་ནི་དྲི་མ་མེད་པའོ། །ཕྱི་ནང་དམིགས་སུ་མེད་པ་ནི་ཉོན་མོངས་པ་མེད་པའོ། །ཕུང་པོ་ཡོངས་སུ་ཤེས་པ་ནི་དག་པའོ། །ཁམས་རང་བཞིན་མེད་པ་ནི་དྲི་མ་མེད་པའོ། །སྐྱེ་མཆེད་རྣམས་སྤོང་བ་ནི་ཉོན་མོངས་པ་མེད་པའོ། །འདས་པ་ལ་ཟད་པར་ཤེས་པ་ནི་དག་པའོ། །མ་འོངས་པ་ལ་མི་སྐྱེ་བར་ཤེས་པ་ནི་དྲི་མ་མེད་པའོ། །ད་ལྟར་བྱུང་བ་ལ་ཆོས་གནས་པར་ཤེས་པ་ནི་ཉོན་མོངས་པ་མེད་པའོ། །འཇམ་དཔལ་དེ་ལྟར་དག་པ་དང་དྲི་མ་མེད་པ་དང ། ཉོན་མོངས་པ་མེད་པ་ནི་གནས་གཅིག་ཏུ་ཡང་དག་པར་འདུསེ། འདི་ལྟ་སྟེ་ཞི་བའི་གནས་སུའོ། །ཞི་བ་གང་ཡིན་པ་དེ་ནི་རབ་ཏུ་ཞི་བ་ཡིན་ནོ། །རབ་ཏུ་ཞི་བ་གང་ཡིན་པ་དེ་ནི་ཉེ་བར་ཞི་བ་ཡིན་ནོ། །ཉེ་བར་ཞི་བ་གང་ཡིན་པ་དེ་ནི་ཉེ་བར་ཞི་བར་གྱུར་པ་ཡིན་ནོ། །ཉེ་བར་ཞི་བར་གྱུར་པ་གང་ཡིན་པ་དེ་ནི་ཐུབ་པ་ཞེས་བྱའོ། །འཇམ་དཔལ་དེ་ལྟར་ན་ནམ་མཁའ་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་ཇི་ལྟ་བར་ཆོས་རྣམས་ཀྱང་དེ་བཞིན་ནོ། །ཆོས་རྣམས་ཇི་ལྟ་བར་སེམས་ཅན་རྣམས་ཀྱང་དེ་བཞིན་ནོ། །སེམས་ཅན་རྣམས་ཇི་ལྟ་བར་ཞིང་རྣམས་ཀྱང་དེ་བཞིན་ནོ། །ཞིང་རྣམས་ཇི་ལྟ་བར་མྱ་ངན་ལས་འདས་པ་ཡང་དེ་བཞིན་ནོ། །འཇམ་དཔལ་དེའི་ཕྱིར་ཆོས་ཐམས་ཅད་ནི་མྱ་ངན་ལས་འདས་པ་དང་མཉམ་པ་ཞེས་བྱ་སྟེ།
42.315b
མཐར་ཐུག་པར་གྱུར་པའི་ཕྱིར་གཉེན་པོ་མེད་པ་ཡིན་ལ། གཉེན་པོ་མེད་པའི་ཕྱིར་གཟོད་མ་ནས་དག་པ་དང ། གཟོད་མ་ནས་དྲི་མ་མེད་པ་དང ། གཟོད་མ་ནས་ཉོན་མོངས་པ་མེད་པ་ཡིན་ནོ། །འཇམ་དཔལ་དེ་ལ་དེ་བཞིན་གཤེགས་པ་ཆོས་ཐམས་ཅད་དེ་ལྟར་མངོན་པར་རྫོགས་པར་སངས་རྒྱས་པ་སེམས་ཅན་རྣམས་ཀྱི་ཁམས་ལ་གཟིགས་པ་ནི་སེམས་ཅན་རྣམས་ལ་དག་པ་དྲི་མ་མེད་པ་ཉོན་མོངས་པ་མེད་པས་རྣམ་པར་རོལ་བ་ཞེས་བྱ་བའི་ཐུགས་རྗེ་ཆེན་པོ་སྐྱེ་བར་འགྱུར་རོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ཞེ་ན། འཇམ་དཔལ་གང་གི་བྱང་ཆུབ་སེམས་དཔའ་ཟད་པའི་ཕྱིར་རློམ་སེམས་སུ་མི་བྱེད་ཅིང་མ་ཟད་པའི་ཕྱིར་ཡང་མ་ཡིན། སྐྱེ་བའི་ཕྱིར་ཡང་མ་ཡིན། གཏན་ཟད་པ་ཟད་པར་བྱ་བའི་ཕྱིར་ཡང་མ་ཡིན། གཏན་མི་སྐྱེ་བ་རྣམ་པར་འཁྲུགས་པར་ཡང་མི་བྱེད་པ་དེ་ལྟར་སྤྱོད་ན། འཇམ་དཔལ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ནོ། །འཇམ་དཔལ་གཞན་ཡང་བྱང་ཆུབ་སེམས་དཔའ་འདས་པའི་སེམས་ལ་ཟད་པ་ཞེས་བྱ་བར་མི་སྤྱོད། མ་འོངས་པའི་སེམས་ལ་མ་ཐོབ་པ་ཞེས་བྱ་བར་མི་སྤྱོད། ད་ལྟར་བྱུང་བའི་སེམས་ལ་ཡོད་ཅེས་བྱ་བར་མི་སྤྱོད་ཅིང་འདས་པ་དང་མ་འོངས་པ་དང ། ད་ལྟར་བྱུང་བའི་སེམས་ལ་ཆགས་པར་མི་འགྱུར་བ་དེ་ལྟར་སྤྱོད་ན། འཇམ་དཔལ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ནོ། །འཇམ་དཔལ་གཞན་ཡང་བྱང་ཆུབ་སེམས་དཔའ་སྦྱིན་པ་དང ། བྱང་ཆུབ་དང ། སེམས་ཅན་རྣམས་དང ། དེ་བཞིན་གཤེགས་པ་དེ་ལ་གཉིས་སུ་མེད་དེ། གཉིས་སུ་བྱར་མེད་པ་དེ་ལྟར་སྤྱོད་ན། བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ནོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཚུལ་ཁྲིམས་དང ། བྱང་ཆུབ་དང ། སེམས་ཅན་རྣམས་དང ། དེ་བཞིན་གཤེགས་པ་དེ་ལ་གཉིས་སུ་མེད་དེ
42.316a
གཉིས་སུ་བྱར་མེད་པ་དེ་ལྟར་སྤྱོད་ན་བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ནོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་བཟོད་པ་དང ། བྱང་ཆུབ་དང ། སེམས་ཅན་རྣམས་དང ། དེ་བཞིན་གཤེགས་པ་དང ། བརྩོན་འགྲུས་དང་བྱང་ཆུབ་དང ། སེམས་ཅན་རྣམས་དང ། དེ་བཞིན་གཤེགས་པ་དང ། བསམ་གཏན་དང ། བྱང་ཆུབ་དང ། སེམས་ཅན་རྣམས་དང ། དེ་བཞིན་གཤེགས་པ་དང ། དེ་བཞིན་དུ་ཤེས་རབ་དང ། བྱང་ཆུབ་དང ། སེམས་ཅན་རྣམས་དང ། དེ་བཞིན་གཤེགས་པ་དེ་ལ་གཉིས་སུ་མེད་དེ་གཉིས་སུ་དབྱེར་མེད་པ་དེ་ལྟར་སྤྱོད་ན། བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ། །འཇམ་དཔལ་གལ་ཏེ་བྱང་ཆུབ་སེམས་དཔའ་གཟུགས་སྟོང་ཞེས་བྱ་བར་མི་སྤྱོད། མི་སྟོང་ཞེས་བྱ་བར་མི་སྤྱོད་པ་དེ་ལྟར་སྤྱོད་ན། འཇམ་དཔལ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་གཟུགས་ནི་གཟུགས་ཀྱི་ངོ་བོ་ཉིད་ཀྱིས་སྟོང་པའི་ཕྱིར་རོ། །འཇམ་དཔལ་དེ་བཞིན་དུ་གལ་ཏེ་བྱང་ཆུབ་སེམས་དཔའ་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་སྟོང་ཞེས་བྱ་བར་མི་སྤྱོད་མི་སྟོང་ཞེས་བྱ་བར་མི་སྤྱོད་པ་དེ་ལྟར་སྤྱོད་ན། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་སེམས་དང ། ཡིད་དང་རྣམ་པར་ཤེས་པ་དམིགས་སུ་མེད་པའི་ཕྱིར་གང་ཡོངས་སུ་ཤེས་པ་འམ། སྤང་བ་འམ་བསྒོམ་པ་འམ། མངོན་སུམ་དུ་བྱ་བའི་ཆོས་དེ་དག་གང་ཡོད་པ་མ་ཡིན་པའི་ཕྱིར་རོ། །འཇམ་དཔལ་ཟད་པ་ཞེས་བྱ་བ་གང་ཡིན་པ་དེ་ནི་གཏན་ཟད་པ་ཁོ་ན་ཡིན་ནོ། །གཏན་ཟད་པ་གང་ཡིན་པ་དེ་ནི་ཟད་པར་བྱ་བ་མ་ཡིན་ནོ། །ཟད་པར་བྱ་བ་མ་ཡིན་པའི་ཕྱིར་མི་ཟད་པ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་དེ་ནི་ཇི་ལྟ་བ་བཞིན་དུ་ཟད་པ་ཡིན་ལ། ཇི་ལྟ་བ་བཞིན་དུ་ཟད་པ་གང་ཡིན་པ་དེ་ལ་ནི་ཟད་པ་ཆུང་ཟད་ཀྱང་མེད་ལ་གང་ལ་ཟད་པ་ཆུང་ཟད་ཀྱང་མེད་པ་དེ་ནི་འདུས་མ་བྱས་པ
42.316b
སྟེ། འདུས་མ་བྱས་པ་གང་ཡིན་པ་དེ་ལ་ནི་སྐྱེ་བ་ཡང་མེད། འགག་པ་ཡང་མེད་པའི་ཕྱིར་རོ། །དེའི་ཕྱིར་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་ཉིད་དང་ཆོས་གནས་པ་ཉིད་དང་ཆོས་ཀྱི་དབྱིངས་འདི་ནི་གནས་པ་ཁོ་ན་ཞེས་བྱ་སྟེ། ཇི་ལྟར་ཆོས་ཀྱི་དབྱིངས་ལ་གནས་པ་དེ་བཞིན་དུ་ཤེས་པ་དེ་ཡང་འཇུག་པར་མི་བྱེད་ལྡོག་པར་མི་བྱེད་དོ། །ཇི་ལྟར་ཤེས་པ་དེ་འཇུག་པར་མི་བྱེད། ལྡོག་པར་མི་བྱེད་པ་དེ་ལྟ་བུའི་ཆོས་ཀྱི་ཚུལ་ལ་འཇུག་པས་ཟག་པ་སྐྱེད་པར་མི་བྱེད། འགག་པར་མི་བྱེད་དོ། །འཇམ་དཔལ་ཟག་པ་ཟད་པ་ཞེས་བྱ་བ་དེ་ནི་ཐ་སྙད་དང ། སྒྲ་དང་ཡི་གེ་དང ། བརྡར་གདགས་པ་ཡིན་ཏེ། འདི་ལ་ནི་སྐྱེ་བ་འམ། འགག་པར་འགྱུར་བའི་ཆོས་གང་ཡང་མེད་དོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁ་དོག་རྟགས་དང་དབྱིབས་མི་མངའ། །རྩ་བ་མི་མངའ་གནས་མི་མངའ། །མི་འགག་འབྱུང་བ་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །མི་གནས་གནས་པ་མི་མངའ་བ། །བླང་བ་མི་མངའ་དོར་མི་མངའ། །སྐྱེ་མཆེད་དྲུག་ལས་རྣམ་གྲོལ་བ། །མི་རྟེན་ཁྱོད་ལ་ཕྱག་འཚལ་ལོ། །ཆོས་རྣམས་ཀུན་ལ་མི་གནས་ཤིང ། །དངོས་དང་དངོས་མེད་རྣམ་པར་སྤོངས། །འདུ་བྱེད་མཉམ་པ་ཉིད་བརྙེས་པ། །མི་རྟེན་ཁྱོད་ལ་ཕྱག་འཚལ་ལོ། །ཁམས་གསུམ་དག་ལས་རྣམ་པར་གྲོལ། །མཁའ་ལྟར་མཉམ་ཉིད་ཐུགས་སུ་ཆུད། །འདོད་པ
42.317a
རྣམས་ཀྱིས་མི་གོས་པ། །མི་རྟེན་ཁྱོད་ལ་ཕྱག་འཚལ་ལོ། །གཤེགས་དང་བཞུགས་དང་གཟིམས་པ་ཡི། །སྤྱོད་ལམ་རྣམ་པ་ཐམས་ཅད་དུ། །རྟག་ཏུ་མཉམ་པར་བཞག་མཛད་པ། །མི་རྟེན་ཁྱོད་ལ་ཕྱག་འཚལ་ལོ། །མཉམ་པར་བྱོན་ཅིང་མཉམ་པར་གཤེགས། །མཉམ་པ་ཉིད་ལ་གནས་པ་པོ། །མཉམ་ཞིང་འཁྲུགས་པར་མི་མཛད་པ། །མི་རྟེན་ཁྱོད་ལ་ཕྱག་འཚལ་ལོ། །མཉམ་པ་ཉིད་ལ་ཞུགས་གྱུར་ཅིང ། །ཆོས་རྣམས་ཀུན་ལ་མཉམ་པར་བཞག་།མཚན་མ་མེད་ལ་ཞུགས་གྱུར་པ། །མི་རྟེན་ཁྱོད་ལ་ཕྱག་འཚལ་ལོ། །མི་གནས་དམིགས་པ་མི་མངའ་བ། །ཤེས་རབ་བསགས་ཤིང་མཉམ་པར་བཞག་།ཆོས་ལ་མངའ་དབང་བརྙེས་གྱུར་པ། །མི་རྟེན་ཁྱོད་ལ་ཕྱག་འཚལ་ལོ། །སེམས་ཅན་ཀུན་གྱི་སྒྲ་སྐད་དང ། །དེ་བཞིན་གཟུགས་དང་སྤྱོད་ལམ་དག་།སྐད་ཅིག་གཅིག་གིས་གཟིགས་མཛད་པ། །མི་རྟེན་ཁྱོད་ལ་ཕྱག་འཚལ་ལོ། །མིང་དང་གཟུགས་ལས་རྣམ་པར་གྲོལ། །རྒྱུ་དང་ཕུང་པོ་ཐམས་ཅད་བཅད། །རྣམ་པ་མེད་ལ་འཇུག་མཛད་པ། །མི་རྟེན་ཁྱོད་ལ་ཕྱག་འཚལ་ལོ། །མཚན་མ་དག་དང་རྣམ་བྲལ་ཞིང ། །མཚན་མའི་རྣམ་པ་རྣམ་པར་སྤངས། །མཚན་མ་མེད་ལ་འཇུག་མཛད་པ། །མི་རྟེན་ཁྱོད་ལ་ཕྱག་འཚལ་ལོ། །ཡང་དག་རྟོག་པ་རྣམ་མ་བརྟགས། །ཐུགས་ཡིད་རབ་ཏུ་མི་གནས་ཤིང ། །ཡིད་མཛད་མི་མངའ་མི་དགོངས་པ། །མི་རྟེན་ཁྱོད་ལ་ཕྱག་འཚལ་ལོ། །ནམ་མཁའ་འདྲ་བར་གནས་མི་མངའ། །ཐོགས་པ་མི་མངའ་སྤྲོས་མི་མངའ། །ནམ་མཁའ་མཉམ་པའི་ཐུགས་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །ནམ་མཁའ་དབུས་མཐའ་མ་མཆིས་པ། །སངས་རྒྱས་ཆོས་ཉིད་དེ་དང་འདྲ། །དུས་གསུམ་ཡང་དག་འདས་གྱུར་པ། །མི་རྟེན་ཁྱོད་ལ་ཕྱག་འཚལ་ལོ། །ནམ་མཁའི་མཚན་ཉིད་སངས་རྒྱས་ཏེ། །ནམ་མཁའང་མཚན་ཉིད་མཆིས་མ་ལགས། །རྒྱུ་དང་འབྲས་བུ་རྣམ་གྲོལ་བ། །མི་རྟེན་ཁྱོད་ལ་ཕྱག་འཚལ་ལོ། །ངར་འཛིན་མི་མངའ
42.317b
སྒྲ་མི་མངའ། །གཟུང་བ་མ་མཆིས་ཆུ་ཟླ་འདྲ། །ཆོས་རྣམས་ཀུན་ལ་མི་གནས་པ། །མི་རྟེན་ཁྱོད་ལ་ཕྱག་འཚལ་ལོ། །ཕུང་པོ་རྣམས་དང་སྐྱེ་མཆེད་དང ། །ཁམས་རྣམས་དག་ལ་མི་གནས་ལ། །ཕྱིན་ཅི་ལོག་ལས་རྣམ་པར་གྲོལ། །མི་རྟེན་ཁྱོད་ལ་ཕྱག་འཚལ་ལོ། །མཐའ་གཉིས་དག་ལས་རྣམ་གྲོལ་ཞིང ། །བདག་ཏུ་ལྟ་བ་ཡང་དག་བཅད། །ཆོས་དབྱིངས་མཉམ་པ་ཉིད་བརྙེས་པ། །མི་རྟེན་ཁྱོད་ལ་ཕྱག་འཚལ་ལོ། །གཟུགས་ཀྱི་གྲངས་ལས་རྣམ་གྲོལ་ཞིང ། །དམ་ཆོས་མ་ལགས་རྣམ་པར་སྤངས། །ལེན་དང་གཏོང་བ་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །བདུད་ཀྱི་མིང་ལས་རབ་འདས་ཤིང ། །ཆོས་ཀུན་རྟོགས་པར་ཐུགས་སུ་ཆུད། །སྒྲིབ་པ་མི་མངའ་ཆོས་གྱུར་པ། །མི་རྟེན་ཁྱོད་ལ་ཕྱག་འཚལ་ལོ། །དོན་འཚལ་རྣམས་ཀྱིས་མཆིས་མི་བརྗོད། །མ་མཆིས་ཤེས་ཀྱང་བརྗོད་མི་བགྱི། །ལན་མེད་ཚིག་ལམ་མ་མཆིས་པ། །མི་རྟེན་ཁྱོད་ལ་ཕྱག་འཚལ་ལོ། །གཉིས་ཀྱི་ཆོས་ལ་མི་རྟེན་པར། །ཐེག་པའི་རྒྱལ་མཚན་ཀུན་ཏུ་བཙུགས། །གཉིས་དང་གཉིས་མེད་རྣམ་གྲོལ་བ། །མི་རྟེན་ཁྱོད་ལ་ཕྱག་འཚལ་ལོ། །ཁྱོད་ཀྱིས་ཡིད་ཀྱི་ཉེས་པ་དང ། །ལུས་ཀྱི་ནད་བཞི་ཕམ་པར་མཛད། །བསམ་ཡས་དཔེ་དང་རྣམ་བྲལ་བ། །མི་རྟེན་ཁྱོད་ལ་ཕྱག་འཚལ་ལོ། །ལྷུན་གྱིས་གྲུབ་པར་འཇུག་མཛད་ཅིང ། །ཉེས་པ་ཐམས་ཅད་རྣམ་པར་སྤངས། །སྤྱོད་པ་མཁྱེན་པས་ཐོག་དྲངས་པ། །མི་རྟེན་ཁྱོད་ལ་ཕྱག་འཚལ་ལོ། །ཁྱོད་དགོངས་ཞི་ཞིང་ཟག་མི་མངའ། །འབྱུང་མིན་འབྱུང་བའི་བདག་ཉིད་ཅན། །གནས་དང་རྟོག་པ་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །དམིགས་པ་མི་མངའ་ཐུགས་ཀྱིས་སུ། །ཀུན་གྱི་སེམས་ནི་རབ་ཏུ་མཁྱེན། །བདག་གཞན་འདུ་ཤེས་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །དམིགས་དང་དམིགས་པ་རྣམས་ཀྱིས་ནི། །ཀུན་གྱི་སེམས་ནི་རྨོངས་པར་བགྱིད། །སྒྲིབ་པ་མེད་པའི་ཆོས་གྱུར་པ། །མི་རྟེན་ཁྱོད་ལ་ཕྱག་འཚལ་ལོ། །དམིགས་པ་དག་དང་སེམས་རྣམས་ནི། །ངོ་བོ་ཉིད་ཀྱི་མཆིས
42.318a
མ་ལགས། །བསམ་ཡས་མཉམ་པ་ཉིད་བརྙེས་པ། །མི་རྟེན་ཁྱོད་ལ་ཕྱག་འཚལ་ལོ། །གནས་པ་མི་མངའ་མཁྱེན་པ་ཡིས། །ཞིང་རྣམས་ཀུན་དང་དེ་བཞིན་དུ། །སེམས་ཅན་ཀུན་གྱི་སྤྱོད་གཟིགས་པ། །མི་རྟེན་ཁྱོད་ལ་ཕྱག་འཚལ་ལོ། །སངས་རྒྱས་རྣམས་ཀྱིས་ལན་འགའ་ཡང ། །སེམས་དང་ཆོས་ཀུན་གཏན་མ་དམིགས། །ཆོས་རྣམས་ཐམས་ཅད་ཀུན་མཁྱེན་པ། །མི་རྟེན་ཁྱོད་ལ་ཕྱག་འཚལ་ལོ། །ཆོས་ཀུན་སྒྱུ་མ་ལྟ་བུ་སྟེ། །སྒྱུ་མ་ཉིད་ཀྱང་མཆིས་མ་ལགས། །སྒྱུ་མའི་ཆོས་ལས་རྣམ་གྲོལ་བ། །མི་རྟེན་ཁྱོད་ལ་ཕྱག་འཚལ་ལོ། །རྫོགས་སངས་འཇིག་རྟེན་སྤྱོད་མཛད་ཀྱང ། །འཇིག་རྟེན་ཆོས་ལ་རྟེན་མི་མཛད། །འཇིག་རྟེན་རྣམ་རྟོག་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །སྟོང་ཕྱིར་སྟོང་ལ་སྤྱོད་མཛད་ཅིང ། །ཁྱོད་ཉིད་སྟོང་ཞིང་སྤྱོད་ཡུལ་སྟོང ། །སྟོང་པ་སྟོང་པར་སྟོན་མཛད་པ། །མི་རྟེན་ཁྱོད་ལ་ཕྱག་འཚལ་ལོ། །སྒྱུ་མ་ལྟ་བུའི་ཏིང་འཛིན་དང ། །སྒྱུ་འཕྲུལ་ཆེན་པོས་རྣམ་འཕྲུལ་ཞིང ། །ཐ་དད་མ་མཆིས་སྙོམས་ཞུགས་པ། །མི་རྟེན་ཁྱོད་ལ་ཕྱག་འཚལ་ལོ། །དུ་མ་མ་ལགས་གཅིག་མ་ལགས། །རིང་དང་ཉེ་ལ་མི་འཇུག་ཅིང ། །གདེག་དང་གཞག་པ་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །རྡོ་རྗེ་ལྟ་བུའི་ཏིང་འཛིན་གྱིས། །སྐད་ཅིག་གཅིག་ལ་མངོན་སངས་རྒྱས། །དངོས་མ་མཆིས་པར་མཉམ་གཞག་པ། །མི་རྟེན་ཁྱོད་ལ་ཕྱག་འཚལ་ལོ། །འདྲེན་པ་དུས་རྣམས་ཐམས་ཅད་དུ། །མི་གཡོ་མྱ་ངན་འདས་པ་རྟོགས། །སྣ་ཚོགས་ཐབས་དང་ལྡན་པ་པོ། །མི་རྟེན་ཁྱོད་ལ་ཕྱག་འཚལ་ལོ། །སེམས་ཅན་རྣམས་ཀྱི་བརྒྱུད་པའི་ཐབས། །མཁྱེན་པས་མཁས་པར་གྱུར་པ་ལགས། །དེ་ཕྱིར་མི་གཡོ་མྱ་ངན་འདས། །མི་རྟེན་ཁྱོད་ལ་ཕྱག་འཚལ་ལོ། །མཚན་མ་མི་མངའ་ལྷུན་གྱིས་གྲུབ། །སྤྲོས་པ་མི་མངའ་སྐྱོན་མི་མངའ། །སྣང་མེད་བདག་གི་མི་མངའ་བ། །མི་རྟེན་ཁྱོད་ལ་ཕྱག་འཚལ་ལོ། །རྣམ་རྟོག་མི་མངའ་སྐྱོན་མི་མངའ། །བདག་གིས་བདག་ཉིད་ཇི་བཞིན་པར། །ཀུན་ཏུ་མཁྱེན་པ་ཐམས་ཅད་མཁྱེན། །མི་རྟེན་ཁྱོད་ལ་ཕྱག་འཚལ་ལོ། །སྟོབས་བཅུ་ཆུ་བོ་རྒལ་བ་ཁྱོད
42.318b
ལ་ཕྱག་འཚལ་ལོ། །འཇིགས་བྲལ་འཇིགས་མེད་སྩོལ་བ་ཁྱོད་ལ་ཕྱག་འཚལ་ལོ། །མ་འདྲེས་ཆོས་རྣམས་ངེས་པར་ཐུགས་སུ་ཆུད་གྱུར་པ། །འགྲོ་བ་ཀུན་གྱི་འདྲེན་པ་ཁྱོད་ལ་ཕྱག་འཚལ་ལོ། །ཀུན་སྦྱོར་འཆིང་བ་བཅད་པ་ཁྱོད་ལ་ཕྱག་འཚལ་ལོ། །ཕ་རོལ་བྱོན་ཏེ་ཐང་ལ་བཞུགས་ལ་ཕྱག་འཚལ་ལོ། །སྐྱེ་བོ་ངལ་བའི་རྣམ་འདྲེན་ཁྱོད་ལ་ཕྱག་འཚལ་ལོ། །འཁོར་བར་གཤེགས་ཤིང་མི་གནས་པ་ལ་ཕྱག་འཚལ་ལོ། །འགྲོ་བ་ཐམས་ཅད་དག་ན་སེམས་ཅན་རྣམས་དང་ནི། །ཐབས་གཅིག་བཞུགས་ཀྱང་ཐུགས་ཡིད་རབ་དབེན་པ། །ཇི་ལྟར་པད་མ་ཆབ་ཀྱིས་གོས་པར་མི་འགྱུར་ཞིང ། །སངས་རྒྱས་ཐུབ་པ་ཁྱོད་ཀྱིས་སྟོང་ཉིད་ཤིན་ཏུ་བསྟེན། །མཚན་མ་ཐམས་ཅད་རྣམ་པ་ཀུན་ཏུ་རྣམ་པར་བཤིག་།ཁྱོད་ལ་གར་ཡང་སྨོན་པར་མཛད་པ་མཆིས་མ་ལགས། །སྟོན་པའི་གོ་འཕང་བླ་མེད་དབེན་པ་ཉིད་ལགས་ཏེ། །དམིགས་མེད་ཆུ་བོ་རྒལ་བ་ཁྱོད་ལ་ཕྱག་འཚལ་ལོ། །སངས་རྒྱས་མཐུས་ཆེན་བསམ་གྱིས་ཁྱབ་པ་མ་ལགས་ཏེ། །མི་གནས་ནམ་མཁའ་མཉམ་པ་ཉིད་ལ་ཕྱག་འཚལ་ལོ། །ཡོན་ཏན་ཀུན་གྱི་མཆོག་མངའ་ཁྱོད་ལ་ཕྱག་འཚལ་ལོ། །དཔལ་འཕགས་ལྷུན་པོ་འདྲ་བ་ཁྱོད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་ལེགས་པར་སྨྲས་སོ། །འཇམ་དཔལ་དེ་དེ་བཞིན་ཏེ། འཇམ་དཔལ་སངས་རྒྱས་རྣམས་ནི་གཟུགས་ལས་བལྟ་བར་མི་བྱ་སྟེ། ཆོས་ལས་མ་ཡིན། མཚན་མ་ལས་མ་ཡིན། ཆོས་ཀྱི་དབྱིངས་ལས་ཀྱང་མ་ཡིན་ནོ། །སངས་རྒྱས་རྣམས་ནི་ཉག་གཅིག་བཞུགས་པ་མ་ཡིན། སྐྱེ་བོ་མང་པོའི་ནང་ན་བཞུགས་པ་མ་ཡིན་ནོ། །སངས་རྒྱས་རྣམས་ནི་སུས་ཀྱང་མཐོང་བ་མ་ཡིན། ཐོས་པ་མ་ཡིན་མཆོད་པ་མ་ཡིན་ཏེ། མཆོད་པར་བྱེད་པ་ཡང་མ་ཡིན་ནོ། །སངས་རྒྱས་རྣམས་ནི་ཆོས་འགའ་ཡང་གཅིག་པ་ཉིད་དམ། མང་པོ་ཉིད་དུ་མི་མཛད་པ་ཡིན་ནོ། །སངས་རྒྱས་རྣམས་ཀྱི་བྱང་ཆུབ་བརྙེས་པ་མེད་དོ། །སངས་རྒྱས་རྣམས་ནི
42.319a
ཆོས་གང་གིས་ཀྱང་རབ་ཏུ་འབྱེད་པར་མི་བྱེད་དོ། །སངས་རྒྱས་རྣམས་ཀྱིས་ནི་ཆོས་འགའ་ཡང་མ་གཟིགས། མ་གསན་མ་དགོངས། རྣམ་པར་མི་མཁྱེན། ཀུན་ཏུ་མི་མཁྱེན་ཏོ། །སངས་རྒྱས་རྣམས་ཀྱིས་ནི་མ་གསུངས། མ་བརྗོད་དོ། །སངས་རྒྱས་རྣམས་ཀྱིས་ནི་མི་གསུང་མི་བརྗོད་དོ། །སངས་རྒྱས་རྣམས་ནི་གསུང་བར་མི་འགྱུར་རྗོད་པར་མི་འགྱུར་རོ། །སངས་རྒྱས་རྣམས་ནི་མངོན་པར་རྫོགས་པར་འཚང་རྒྱ་བར་མི་མཛད་དོ། །སངས་རྒྱས་རྣམས་ཀྱིས་ནི་ཆོས་གང་ཡང་མངོན་པར་རྫོགས་པར་འཚང་མ་རྒྱས་སོ། །སངས་རྒྱས་རྣམས་ནི་ཉོན་མོངས་པ་མ་སྤངས་སོ། །སངས་རྒྱས་རྣམས་ཀྱིས་ནི་རྣམ་པར་བྱང་བ་མངོན་སུམ་དུ་མ་མཛད་དོ། །སངས་རྒྱས་རྣམས་ཀྱིས་ནི་ཆོས་གང་ཡང་མ་གཟིགས། མ་གསན། མ་མྱངས། མ་མནམས། མ་རེག་མི་མཁྱེན་ཏོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་ནི་གཟོད་མ་ནས་ཡོངས་སུ་དག་པ་ཡིན་པའི་ཕྱིར་རོ། །འཇམ་དཔལ་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མོས་པ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་རང་རྒྱལ་བ་ཉིད་ལ་བཀོད་པ་བས་ནི་འཇམ་དཔལ་བྱང་ཆུབ་སེམས་དཔའ་གཞན་གང་ཞིག་ཆོས་ཀྱི་རྣམ་གྲངས་འདི་ལ་མོས་པར་གྱུར་ན། དེ་ནི་དེ་བས་ཆེས་བསོད་ནམས་མང་དུ་སྐྱེད་པར་གྱུར་ན་གང་ཆོས་ཀྱི་རྣམས་གྲངས་འདི་ཡི་གེར་འདྲི་འམ། ཡི་གེར་འདྲིར་འཇུག་པ་ལྟ་སྨོས་ཀྱང་ཅི་དགོས་ཏེ། དེ་ནི་དེ་བས་ཆེས་བསོད་ནམས་མང་དུ་བསྐྱེད་པར་འགྱུར་རོ། །འཇམ་དཔལ་ཡོངས་སུ་བརྟག་པ་ཉེ་བར་བཟུང་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་སྒོ་ང་ལས་སྐྱེས་པ་དང་མངལ་ནས་སྐྱེས་པ་དང ། དྲོད་གཤེར་ལས་སྐྱེས་པ་དང ། རྫུས་ཏེ་སྐྱེས་པ་དང ། གཟུགས་ཅན་དང ། གཟུགས་མེད་པ་དང་འདུ་ཤེས་ཅན་དང ། འདུ་ཤེས་མེད་པ་དང ། རྐང་པ་མེད་པ་དང ། རྐང་གཉིས་པ་དང ། རྐང་བཞི་པ་དང
42.319b
རྐང་མངས་གང་ཇི་སྙེད་ཡོད་པ་དེ་དག་ཐམས་ཅད་སྔ་ཕྱི་མེད་པར་མིའི་ལུས་ཐོབ་པར་གྱུར་ལ། མིའི་ལུས་ཐོབ་ནས་ཀྱང་བྱང་ཆུབ་ཏུ་སེམས་བསྐྱེད་པར་གྱུར་ལ། བྱང་ཆུབ་ཏུ་སེམས་བསྐྱེད་ནས་ཀྱང ། བྱང་ཆུབ་སེམས་དཔའ་རེ་རེས་ཀྱང་སངས་རྒྱས་བྱང་ཆུབ་སེམས་དཔའ་དང་བཅས། ཉན་ཐོས་དང་བཅས་པ། སངས་རྒྱས་ཀྱི་ཞིང་གང་གཱའི་བྱེ་མ་ལྟར་གྲངས་མེད་པའི་རྡུལ་ཕྲ་རབ་ཀྱི་རྡུལ་སྙེད་དག་ལ། བསྐལ་པ་གང་གཱའི་བྱེ་མ་ལྟར་གྲངས་མེད་པ་སྙེད་དུ་ན་བཟའ་དང ། ཞལ་ཟས་དང ། གཟིམས་ཆ་དང ། གདན་དང་སྙུན་གྱི་གསོས་སྨན་དང ། ཡོ་བྱད་རྣམས་ཀྱིས་བསྙེན་བཀུར་བྱེད་ཅིང ། བདེ་བའི་ཡོ་བྱད་ཐམས་ཅད་ཀྱང་ཉེ་བར་སྒྲུབ་པར་བྱེད་ལ། དེ་དག་ཡོངས་སུ་མྱ་ངན་ལས་འདས་པའི་མཆོད་རྟེན་རིན་པོ་ཆེ་ལས་བྱས་པའི་འཕང་དུ་དཔག་ཚད་བརྒྱ་ཡོད་པ། རིན་པོ་ཆེའི་ལན་ཀན་གྱིས་ཡོངས་སུ་བསྐོར་བ། ནོར་བུ་དང ། མུ་ཏིག་དང ། རིན་པོ་ཆེའི་ཆུན་པོས་མཛེས་པར་བྱས་པ། གདུགས་དང་རྒྱལ་མཚན་དང ། བ་དན་སྒྲེང་བ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་ཀུན་ནས་གཡོགས་པ་ཤ་སྟག་ཀྱང་བྱེད་དུ་བཅུག་པ་བས་ནི་འཇམ་དཔལ་བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་གཞན་གང་ཞིག་གིས་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བའི་རྒྱན་ཞེས་བྱ་བའི་ཆོས་ཀྱི་རྣམ་གྲངས་འདི་ཐོས་ནས་མོས་པར་བྱེད། འཇུག་པར་བྱེད། ཡིད་ཆེས་པར་བྱེད་ཅིང ། ཡོངས་སུ་རྟོགས་པར་བྱས་ནས་ཀྱང་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཞིག་ལུང་འབོག་པར་བྱེད་ན་དེ་ནི་དེ་བས་ཆེས་སངས་རྒྱས་ཀྱི་ཡེ་ཤེས་རྗེས་སུ་རྟོགས་པར་འགྱུར་བའི་བསོད་ནམས་གྲངས་མེད་པ་བསྐྱེད་པར་འགྱུར་ཏེ། བསོད་ནམས་མངོན་པར་འདུ་བྱེད་པ་དེ་ལ་བྱང་ཆུབ་སེམས་དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་བྱ་བ་སྔ་མ་དེས་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང ། འབུམ་གྱི་ཆ་དང ། བྱེ་བ་ཕྲག་འབུམ་གྱི་ཆ་དང ། གྲངས་དང་ཆ་དང་བགྲང་བ་དང་དཔེ་དང ། རྒྱུར་ཡང་ཉེ་བར
42.320a
མི་འགྲོའོ། །འཇམ་དཔལ་བྱང་ཆུབ་སེམས་དཔའ་ཁྱིམ་པ་གང་ལ་ལ་ཞིག་གིས་སངས་རྒྱས་དང་བྱང་ཆུབ་སེམས་དཔའ་དང་བཅས་པ། ཉན་ཐོས་ཀྱི་དགེ་འདུན་དང་བཅས་པ་གང་གཱའི་བྱེ་མ་ལྟར་གྲངས་མེད་པ་སྙེད་ཅིག་ལ་བསྐལ་པ་གང་གཱའི་བྱེ་མ་ལྟར་གྲངས་མེད་པ་སྙེད་དུས་ན་བཟའ་དང ། ཞལ་ཟས་དང ། གཟིམས་ཆ་དང ། གདན་དང་སྙུན་གྱི་གསོས་སྨན་དང ། ཡོ་བྱད་རྣམས་ཀྱིས་བསྙེན་བཀུར་བྱེད་པ་བས་ནི། བྱང་ཆུབ་སེམས་དཔའ་རབ་ཏུ་བྱུང་བ་ཚུལ་ཁྲིམས་དང་ལྡན་པ། བསམ་པ་ཕུན་སུམ་ཚོགས་པ་གཞན་གང་གིས་ཐ་ན་དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་ལ་སྦྱིན་པ་ཁམ་གཅིག་ཙམ་ཞིག་བྱིན་པར་གྱུར་ན། བསོད་ནམས་མངོན་པར་འདུ་བྱ་བ་དེ་ལ་བསོད་ནམས་མངོན་པར་འདུ་བྱ་བ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང ། འབུམ་གྱི་ཆ་དང ། བྱེ་བ་ཕྲག་འབུམ་གྱི་ཆ་དང ། གྲངས་དང་ཆ་དང་བགྲངས་བ་དང ། དཔེ་དང་རྒྱུར་ཡང་ཉེ་བར་མི་འགྲོའོ། །འཇམ་དཔལ་གལ་ཏེ་བྱང་ཆུབ་སེམས་དཔའ་རབ་ཏུ་བྱུང་བ་ཚུལ་ཁྲིམས་དང་ལྡན་པ་སྟོང་གསུམ་གྱི་སྟོང་ཆེན་པོའི་རྡུལ་ཕྲ་རབ་ཀྱི་རྡུལ་སྙེད་དག་ལས་བྱང་ཆུབ་སེམས་དཔའ་རེ་རེས་ཀྱང་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་བཅས། ཉན་ཐོས་དང་བཅས་པ་གང་གཱའི་བྱེ་མ་ལྟར་གྲངས་མེད་པ་སྙེད་དག་ལ་བསྐལ་པ་གང་གཱའི་བྱེ་མ་ལྟར་གྲངས་མེད་པ་སྙེད་དུ་ན་བཟའ་དང ། ཞལ་ཟས་དང་གཟིམས་ཆ་དང ། གདན་དང་སྙུན་གྱི་གསོས་སྨན་དང ། ཡོ་བྱད་རྣམས་ཀྱིས་བསྙེན་བཀུར་བྱེད་པར་གྱུར་ན། བྱང་ཆུབ་སེམས་དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་བྱ་བ་གང་ཡིན་པ་དེ་ལ་ནི་བྱང་ཆུབ་སེམས་དཔའ་ཁྱིམ་པ་འམ། རབ་ཏུ་བྱུང་བ་བསམ་པ་དག་པ། ཚུལ་ཁྲིམས་དང་ལྡན་པ་གཞན་གང་ཞིག་གི་ཆོས་ཀྱི་རྣམ་གྲངས་འདི་ཐོས་ནས་མོས་པར་བྱེད། འཇུག་པར་བྱེད། ཡིད་ཆེས་པར་བྱེད། ཡི་གེར་འདྲི་བར་བྱེད། ཡི་གེར་འདྲིར་འཇུག་པར་བྱེད་ན་བསོད་ནམས་མངོན་པར་འདུ་བྱ་བ་དེ་ལ་བྱང་ཆུབ་སེམས
42.320b
དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་བྱ་བ་སྔ་མ་དེས་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང ། འབུམ་གྱི་ཆ་དང ། བྱེ་བ་ཕྲག་འབུམ་གྱི་ཆ་དང ། གྲངས་དང་ཆ་དང་བགྲངས་བ་དང ། དཔེ་དང་རྒྱུར་ཡང་ཉེ་བར་མི་འགྲོའོ། །འཇམ་དཔལ་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། སངས་རྒྱས་རྣམས་ལ་འབུལ་བ་འབུལ་ཞིང ། དེ་ལྟར་ཕུལ་བས་བསྐལ་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དུ་འབུལ་བར་ཕུལ་བ་བས་ནི། བྱང་ཆུབ་སེམས་དཔའ་གཞན་གང་ཞིག་གི་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཞིག་བྱང་ཆུབ་སེམས་དཔའ་གཞན་ལ་བསྟན་པར་གྱུར་ན། བསོད་ནམས་མངོན་པར་འདུ་བྱ་བ་དེ་ལ་བསོད་ནམས་མངོན་པར་འདུ་བྱ་བ་སྔ་མ་དེས་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་འབུམ་གྱི་ཆ་དང ། བྱེ་བ་ཕྲག་འབུམ་གྱི་ཆ་དང ། གྲངས་དང་ཆ་དང་བགྲངས་བ་དང ། དཔེ་དང་རྒྱུར་ཡང་ཉེ་བར་མི་འགྲོའོ། །འཇམ་དཔལ་བསྐལ་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དུ་སྦྱིན་པའི་བསོད་ནམས་མངོན་པར་འདུ་བྱ་བ་ལྟ་ཞོག་གི། འཇམ་དཔལ་གལ་ཏེ་བྱང་ཆུབ་སེམས་དཔའ་གང་གཱའི་བྱེ་མ་ལྟར་གྲངས་མེད་པ་སྙེད་ཅིག་བྱུང་བར་གྱུར་ལ། དེ་དག་ལས་བྱང་ཆུབ་སེམས་དཔའ་རེ་རེས་ཀྱང ། སངས་རྒྱས་ཀྱི་ཞིང་འཛམ་བུ་ཆུ་བོའི་གསེར་ལས་བྱས་པ། ཤིང་ལྗོན་པ་ཐམས་ཅད་ཀྱང་ལྷའི་གོས་རྣམས་ཀྱིས་ཡོངས་སུ་དཀྲིས་པ་ནོར་བུ་རིན་པོ་ཆེ་འོད་ཐམས་ཅད་ཡང་དག་པར་འདུས་པའི་དྲ་བས་ཀུན་ནས་གཡོགས་པ། ནོར་བུ་རིན་པོ་ཆེ་དབང་གི་རྒྱལ་པོ་ལས་བྱས་པའི་ཁང་པ་བརྩེགས་པ། ནོར་བུ་རིན་པོ་ཆེ་གློག་གི་སྒྲོན་མའི་ལན་ཀན་གྱིས་ཡོངས་སུ་བསྐོར་བ་དག་གིས་ཡོངས་སུ་གང་བར་བྱས་པ་གདུགས་དང ། རྒྱལ་མཚན་དང་བ་དན་བསྒྲེང་བ། གང་གཱའི་བྱེ་མ་ལྟར་གྲངས་མེད་པ
42.321a
ཇི་སྙེད་ཅིག་སངས་རྒྱས་གང་གཱའི་བྱེ་མ་ལྟར་གྲངས་མེད་པ་སྙེད་དག་ལ་ཉིན་གཅིག་བཞིན་དུ་དབུལ་བར་འབུལ་ཞིང ། དེ་ལྟར་ཕུར་བས་བསྐལ་པ་གང་གཱའི་བྱེ་མ་ལྟར་གྲངས་མེད་པ་སྙེད་དུ་འབུལ་བར་ཕུལ་བ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་ཆོས་ཀྱི་རྣམ་གྲངས་འདི་ལ་མོས་པར་བྱས་ན། ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཞིག་བྱང་ཆུབ་སེམས་དཔའ་གཞན་ལ་བསྟན་ཏམ། འཇུག་པར་བྱས་ན་བསོད་ནམས་མངོན་པར་འདུ་བྱ་བ་དེ་ལ་བྱང་ཆུབ་སེམས་དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་བྱ་བ་སྔ་མ་དེས་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་འབུམ་གྱི་ཆ་དང ། བྱེ་བ་ཕྲག་འབུམ་གྱི་ཆ་དང ། གྲངས་དང་ཆ་དང་བགྲང་བ་དང་དཔེ་དང ། རྒྱུར་ཡང་ཉེ་བར་མི་འགྲོའོ། །འཇམ་དཔལ་འདི་ལྟ་སྟེ་དཔེར་ན། ཁམས་གསུམ་དུ་གཏོགས་པའི་སེམས་ཅན་ཐམས་ཅད་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། གཤིན་རྗེའི་འཇིག་རྟེན་དུ་སྐྱེས་པར་འགྱུར་ལ། དེ་ནས་བྱང་ཆུབ་སེམས་དཔའ་ཁྱིམ་པ་ཞིག་གིས་སེམས་ཅན་དེ་དག་ཐམས་ཅད་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། གཤིན་རྗེའི་འཇིག་རྟེན་ནས་བཏོན་ཏེ། རང་སངས་རྒྱས་ཉིད་ལ་བཀོད་པ་བས་ནི་བྱང་ཆུབ་སེམས་དཔའ་རབ་ཏུ་བྱུང་བ་གཞན་གང་ཞིག་གིས་ཐ་ན་དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་ལ་སྦྱིན་པ་ཁམ་གཅིག་ཙམ་ཞིག་བྱིན་པར་གྱུར་ན། དེ་ནི་དེ་བས་ཆེས་བསོད་ནམས་མང་བ་དང ། ཆེས་བསོད་ནམས་གྲངས་མེད་པ་སྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་རབ་ཏུ་བྱུང་བ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་ཅིག་བྱུང་བར་གྱུར་ལ། དེ་དག་ལས་བྱང་ཆུབ་སེམས་དཔའ་རེ་རེས་ཀྱང་ཕྱོགས་བཅུའི་ཕྱོགས་ཆ་རེ་རེར་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དག་མཐོང་བར་གྱུར་ཅིང ། དེ་བཞིན་གཤེགས་པ་བྱང་ཆུབ་སེམས
42.321b
དཔའ་དང་བཅས། ཉན་ཐོས་དང་བཅས་པ་རེ་རེ་ལ་ཡང་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དུ་ན་བཟའ་དང ། ཞལ་ཟས་དང ། གཟིམས་ཆ་དང ། གདན་དང་བསྙུན་གྱི་གསོས་སྨན་དང ། ཡོ་བྱད་རྣམས་ཀྱིས་ཀྱང་བསྙེན་བཀུར་བྱེད་ལ། དེ་བཞིན་གཤེགས་པ་རེ་རེ་ལ་ཡང་ཉིན་གཅིག་བཞིན་དུ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དག་ནོར་བུ་རིན་པོ་ཆེ་དབང་གི་རྒྱལ་པོས་ཡོངས་སུ་བཀང་སྟེ། དབུལ་བར་ཕུལ་བ་བས་ནི་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མོས་པར་གྱུར་པ་གཞན་ཞིག་གིས་ཐ་ན་དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་ལ་སྦྱིན་པ་ཁམ་གཅིག་ཙམ་ཞིག་བྱིན་པར་གྱུར་ནས། བསོད་ནམས་མངོན་པར་འདུ་བྱ་བ་དེ་ལ་བྱང་ཆུབ་སེམས་དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་བྱ་བ་སྔ་མ་དེས་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་འབུམ་གྱི་ཆ་དང ། བྱེ་བ་ཕྲག་འབུམ་གྱི་ཆ་དང ། གྲངས་དང་ཆ་དང ། བགྲང་བ་དང་དཔེ་དང ། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། འཇམ་དཔལ་འདི་ལྟ་སྟེ། ཆོས་ཀྱི་རྣམ་གྲངས་འདི་ཐོས་པ་ནི་བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཀྱི་ཕྱག་རྒྱ་ཡིན་པའི་ཕྱིར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དད་པས་རྗེས་སུ་འབྲང་བ་ཉིད་ལ་བཀོད་པ་བས། བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་དོན་གྱི་རྗེས་སུ་འབྲང་བ་ཉིད་ལ་བཀོད་པར་གྱུར་ན། དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དོན་གྱི་རྗེས་སུ་འབྲང་བ་ཉིད་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག
42.322a
ཅིག་ཆོས་ཀྱི་རྗེས་སུ་འབྲང་བ་ཉིད་ལ་བཀོད་པར་གྱུར་ན་དེ་ནི་དེ་བས་ཆེས་བསོད་ནམས་གྲངས་མེད་པ་སྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཆོས་ཀྱི་རྗེས་སུ་འབྲང་བ་ཉིད་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་རྒྱུན་དུ་ཞུགས་པའི་འབྲས་བུ་ལ་བཀོད་པར་གྱུར་ན། དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་ལན་ཅིག་ཕྱིར་འོང་བའི་འབྲས་བུ་ལ་བཀོད་པར་གྱུར་པ་དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་ཕྱིར་མི་འོང་བའི་འབྲས་བུ་ལ་བཀོད་པར་གྱུར་ན། དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་འོང་བའི་འབྲས་བུ་ལ་བཀོད་པ་བས་ནི། བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་དགྲ་བཅོམ་པ་ཉིད་ལ་བཀོད་པར་གྱུར་ན་དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་རང་སངས་རྒྱས་ཉིད་ལ་བཀོད་པར་གྱུར་ན་དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད
42.322b
པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་བྱང་ཆུབ་ཀྱི་སེམས་ལ་བཀོད་པར་གྱུར་ན་དེ་ནི་དེ་བས་ཆེས་བསོད་ནམས་གྲངས་མེད་པ་སྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་བྱང་ཆུབ་ཀྱི་སེམས་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་སེམས་ཅན་གཅིག་ཅིག་ཕྱིར་མི་ལྡོག་པ་ཉིད་ལ་བཀོད་པར་གྱུར་ན་དེ་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་པར་འགྱུར་རོ། །འཇམ་དཔལ་གལ་ཏེ་བྱང་ཆུབ་སེམས་དཔའ་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་ལྡོག་པ་ཉིད་ལ་བཀོད་པ་བས་ནི་བྱང་ཆུབ་སེམས་དཔའ་གཞན་གང་ཞིག་གིས་ཆོས་ཀྱི་རྣམ་གྲངས་འདི་ལ་མོས་ཤིང་ཡི་གེར་འདྲིར་བཅུག་ནས་གཞན་དག་ལ་རྒྱ་ཆེར་ཡང་དག་པར་སྟོན་པ་དང ། ཐ་ན་སེམས་ཅན་གཅིག་ཅིག་ཆོས་ཀྱི་རྣམ་གྲངས་འདི་ལ་འཇུག་པར་བྱས་ན་དེ་ནི་དེ་བས་ཆེས་བསོད་ནམས་གྲངས་མེད་པ་སྐྱེད་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་གང་ཞིག་ཟད་པའི་དུས་མཐའི་ཚེ། །སངས་རྒྱས་བྱེ་བ་ཕྲག་བཅུའི་དམ་ཆོས་འཛིན་པ་བས། །གང་ཞིག་མདོ་སྡེ་འདི་ནི་ཉན་པར་བྱེད་གྱུར་ན། །དེ་ནི་དེ་བས་བསོད་ནམས་ཆེན་པོ་ཁྱད་པར་འཕགས། །གང་ཞིག་རྫུ་འཕྲུལ་སྟོབས་ཀྱིས་ཕྱོགས་བཅུར་སོང་ནས་ནི། །སངས་རྒྱས་བྱེ་བ་ཕྲག་བཅུ་དག་ལ་མཆོད་བྱེད་ཅིང ། །སྙིང་རྗེ་བསྐྱེད་དེ་བདེ་བ་ཀུན་ལ་ཆགས་མེད་པར། །སྐྱེས་བུ་དམ་པ་ཐམས་ཅད་ཕྱག་འཚལ་བཙུད་པ་བས། །གང་ཞིག་བདེར་གཤེགས་བསྟན་ལ་སེམས་རབ་དད་གྱུར་ཅིང ། །རྒྱལ་བའི་ཆོས་རྣམས་སྨོན་པར་བྱེད་པའི་མདོ་སྡེ་འདི། །གཞན་ལ་ཡུད་ཙམ་གཅིག་ཅིག་སྟོན་པར་བྱེད་གྱུར་ན། །དེ་ནི་དེ་བས་བསོད་ནམས་འབྲས་བུ་ཁྱད་པར་འཕགས། །བདེ་གཤེགས་བསྟན་པའི་མདོ་སྡེ་སྒྲོན་མར་གྱུར་པ་འདི། །གང་གིས་ལྷ་དང་མི་ལ་ཡང་དག་བསྟན
42.323a
བྱས་པ། །དེ་ནི་ཤེས་རབ་རྣོ་ཞིང་མཐུ་ཆེན་ལྡན་གྱུར་ལ། །སངས་རྒྱས་རྣམས་ཀྱི་ས་ཡང་མྱུར་དུ་འཐོབ་པར་འགྱུར། །གང་གིས་བདེ་གཤེགས་སངས་རྒྱས་མི་མཆོག་དེ་དག་ནི། །ཕུང་པོ་ལྷག་མ་མེད་པར་ཡོངས་སུ་མྱ་ངན་ལས། །འདས་པར་གྱུར་པ་དག་གི་དེ་འདྲའི་སྒྲ་ཐོས་ནས། །སེམས་ཅན་གཞན་ལའང་ཡང་དག་སྒྲོགས་པར་བྱེད་གྱུར་ཅིང ། །མཆོད་རྟེན་གནམ་འཕང་འཐོ་བ་སྲིད་རྩེའི་མཐར་ཐུག་པ། །ཁྱོན་དང་ལྡན་པར་གྱུར་པའང་སྲིད་རྩེ་ཇི་བཞིན་པ། །རིན་ཆེན་མཛེས་པས་སྤྲས་ཤིང་གདུགས་དང་བ་དན་དང ། །དེ་བཞིན་དྲིལ་སྒྲས་མཛེས་པར་བྱེད་དུ་གཅག་གྱུར་པས། །འདི་ན་བྱང་ཆུབ་སེམས་དཔའ་གང་ཞིག་འདི་འདྲ་བའི། །མདོ་སྡེ་འདི་ཐོས་ལུས་ལ་གནས་པར་འགྱུར་བ་འམ། །གླེགས་བམ་བྲི་བ་བྱས་ཏེ་གཞག་པར་བྱེད་འདོད་ན། །དེ་ནི་དེ་ཡི་བསོད་ནམས་འབྲས་བུ་ཁྱད་པར་འཕགས། །སེར་སྣའི་དྲི་མ་བསལ་བར་གྱུར་ཅིང་འཇིགས་མེད་པའི། །བྱང་ཆུབ་སེམས་དཔའ་གང་ཞིག་ཆོས་འདི་འཛིན་བྱེད་ན། །དེ་ཡི་བསོད་ནམས་དཔག་ཏུ་ཡོད་པར་མི་འགྱུར་ཏེ། །ཇི་ལྟར་འདོད་པ་བཞིན་དུ་བྱང་ཆུབ་ཐོབ་པར་འགྱུར། །མདོ་འདི་བདེ་བར་གཤེགས་པ་རྣམས་ཀྱིས་རབ་སྔགས་ཤིང ། །བྱང་ཆུབ་སེམས་དཔའ་མང་པོས་ཡོངས་སུ་བཟུང་བ་ཡིན། །དེ་བཞིན་གཤེགས་པ་རྣམས་ཀྱི་སྐུ་ལུས་ནམ་མཁའ་ཡི། །ཁམས་དང་འདྲ་བ་ཐམས་ཅད་འདིར་ནི་བསྟན་པ་ཡིན། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་དང ། ཉན་ཐོས་ཆེན་པོ་གྲངས་མེད་པ་བསམ་གྱིས་མི་ཁྱབ་བརྗོད་དུ་མེད་པ་དག་དང ། ལྷ་དང་མི་དང་ལྷ་མ་ཡིན་དང ། ནམ་མཁའ་ལྡིང་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བའི་རྒྱན་ཅེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་སུ་རེན་དྲ་བོ་དྷི་དང ། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེ་ལ་སོགས་པས་ཞུས་ཏེ་གཏན་ལ་ཕབ་པ།། །། ཞུས་སོ་དག་གོ།། ་#