༄#། །རྒྱ་གར་སྐད་དུ། ་་ཤྲཱི་བུད་དྷ་ཀ་པཱ་ལ་ནཱ་མ་ཡོ་གི་ཏན་ཏྲ་རཱ་ཛ། ་་བོད་སྐད་དུ། ་་་་དཔལ་སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ། ་དཔལ་སངས་རྒྱས་ཐོད་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་རྡོ་རྗེའི་དཀྱིལ་འཁོར་ཆེན་པོ་རྒྱན་དང་ལྡན་པའི་དབུས་སུ་དེ་བཞིན་གཤེགས་པ་ཐམས་ཅད་དང ། རྣལ་འབྱོར་མ་རྣམས་དང་ལྷན་ཅིག་ཏུ་བཞུགས་ཏེ། འཕགས་པ་ཀུན་དགའ་བོ་ལ་སོགས་པ་འདོད་ཆགས་དང་བྲལ 87.126b བའི་གཙོ་བོ་རྣམས་དང ། འཕགས་པ་སྤྱན་རས་གཟིགས་དབང་ཕྱུག་ལ་སོགས་པའི་བྱང་ཆུབ་སེམས་དཔའ་བྱེ་བ་ཕྲག་བརྒྱད་བཅུ་དང་ཡང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་རྡོ་རྗེའི་ཚིག་གིས་རྡོ་རྗེ་ཆེན་པོའི་གནས་སུ་རྒྱུད་ཐམས་ཅད་དང་སྔགས་ཡང་དག་པར་བཤད་ནས། དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་དང་པད་མོའི་ཡང་དག་པར་སྦྱར་བས་བཙུན་མོའི་བྷ་གར་ཡོངས་སུ་མྱ་ངན་ལས་འདས་སོ། །དེ་ཡོངས་སུ་མྱ་ངན་ལས་འདས་པ་མཐོང་ནས། བྱང་ཆུབ་སེམས་དཔའ་ཐམས་ཅད་དང ། རྣལ་འབྱོར་མ་ཐམས་ཅད་རྨད་དུ་གྱུར་ཏེ་གཅིག་ལ་གཅིག་ལྟ་ཞིང ། ེ་མའོ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དཀྱིལ་འཁོར་ཆེན་པོ་རྒྱན་དང་ལྡན་པའི་དབུས་སུ་ཇི་ལྟར་ཡོངས་སུ་མྱ་ངན་ལས་འདས། །དེ་ནས་རྣལ་འབྱོར་མ་སྣ་ཚོགས་སྡེ་མ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །ལྷ་མོ་སེམས་ཅན་བསོད་ནམས་དམན་པ་རྣམས་ནུས་པ་ལ་ཞོན་པར་འགྱུར་བའི་ཐབས་ཅུང་ཟད་མཆིས་སམ། གསུངས་པ། རྣལ་འབྱོར་གྱི་རྒྱུད་ལ་བྱེ་བ་ཕྲག་དྲུག་ཉིད་དོ། །རྣལ་འབྱོར་མའི་རྒྱུད་ལ་ནི་བྱེ་བ་ཕྲག་བཅུ་དྲུག་ཉིད་དོ། །མདོ་སྡེ་སོ་སོ་ལ་ནི་བྱེ་བ་ཕྲག་བརྒྱད་བཅུའོ། །དེ་བཞིན་དུ་ཕ་རོལ་དུ་ཕྱིན་པའི་ཐེག་པ་ལ་ནི་བྱེ་བ་ལ་བསྒྲེས་པའི་འབུམ་ཕྲག་ལྔའོ། །འདི་དག་ཐམས་ཅད 87.127a ནི་ཐུབ་པའི་དབང་པོས་གསུངས་སོ། །སྔགས་དང་བྲལ་ན་ནི་རྒྱུད་ཀྱི་ནུས་པ་མི་སྣང་སྟེ། རྒྱུད་ལ་ལར་ནི་ཅི་ནས་སྔགས་བྱེ་བ་བཟླས་པར་གསུངས་སོ། །བསོད་ནམས་འབྲིང་པོ་རྣམས་ཀྱིས་ནི་སྔགས་འབུམ་བཟླས་པས་མྱུར་བར་འགྲུབ་པར་གསུངས་སོ། །བསོད་ནམས་ཆེ་བས་ཁྲི་བཟླས་པས་ཤིན་ཏུ་མྱུར་བར་འགྲུབ་བོ། །དེ་ལྟར་རྡོ་རྗེ་ཅན་ཆེན་པོ་རྒྱུད་ཀྱི་བདག་པོའི་གཙོ་བོས་གསུངས་སོ། །བསོད་ནམས་ཆུང་བའི་སེམས་ཅན་རྣམས་ཀྱིས་ནི་བྱེ་བ་བཟླས་པར་གསུངས་སོ། །སེམས་ཅན་འབད་རྩོལ་ཆུང་བ་རྣམས་ཀྱིས་ནི་འབུམ་བཟླས་པར་བདག་སྨྲའོ། །སེམས་ཅན་སྒོམ་པ་ལ་ཞེན་པ་རྣམས་ཀྱིས་ནི་ཁྲི་ཁོ་ན་བཟླས་པར་བྱའོ། །སེམས་ཅན་འདོད་ཆགས་ལ་ཞུགས་པ་རྣམས་ཀྱི་བཟླས་པ་ཇི་ལྟར་ལགས། བླུན་པོ་དང་ལྐུགས་པའི་རིགས་ཅན་རྣམས་ཀྱི་སྔགས་ཀྱི་གྲངས་ཇི་ལྟར་ལགས། ཤིན་ཏུ་དམིགས་པའི་སྔགས་ཀྱི་བཟླས་པ་ཇི་ལྟར་ལགས། འདི་ལྟར་ཕན་ཚུན་སྨྲ་བས་བཟླས་ན་དངོས་གྲུབ་གཞན་དུ་ཡང་འགྱུར་རོ། །གལ་ཏེ་དམན་པའི་སེམས་ཀྱིས་ཉོན་མོངས་བཞིན་པས་བཟླས་པ་དེའི་ཚེ་བསྐལ་པ་སྐར་མ་ལྟ་བུ་བྱེ་བར་ཡང་དེ་ལ་དངོས་གྲུབ་མེད་དོ། །དེ་ལྟར་ཐོས་ནས་རྣལ་འབྱོར་མ་སྣ་ཚོགས་སྡེ་མ་བཅོམ་ལྡན་འདས་ཀྱི་ཞལ་ལ་བལྟ་བར་བྱེད་ཅིང་ཟུར་མིག་དང་བཅས་པའི་ཆགས་པས་བལྟས་ཏེ། ཤིན་ཏུ་ཁྲོ་བས་འཇིགས་པར་བྱེད་ཅིང་སྙིང་རྗེའི་ཐུགས་འཁྲུགས་པས་བདུད་ཀྱི་དཔུང་རབ་ཏུ་བཅོམ་མོ། །དེ་ལྟར་བཞུགས་པའི་ལྷ་མོ་ཆེན་མོ་རྒྱུད་ཐམས་ཅད་ཀྱི་བདག་པོའི་དབང་ཕྱུག་ལ་དེ་ནས་དེས་གཟིགས་པ་ཙམ་གྱིས་བཅོམ་ལྡན་འདས་ཀྱི་དབུ་ལས་སྔགས་ཕྱུང་ངོ ། །ོཾ་བུད་དྷེ་སིད་དྷེ་སིད་དྷི། ཨ་མྲི་ཏ་ཨ་ར་ཛེ་བུད་དྷ་ཀ་པཱ་ལ་སྥོ་ཊ་ནེ་པ་ཏེ་ཡ་ཏྲ་སྥ་ཡཾ་ཧཱུཾ་ཧོ་ཕཊ། དེ་ལྟར་སྔགས་ཀྱི་མཆོག་གསན་པས་ས་རིམ་པ་བདུན་གྱི་འོག་ཏུ་ཆུད་པའི་ཀླུ་རྣམས་བཅོམ་པར་བྱས་ཤིང་ཕྱེ་མར་བྱས་ནས་སླར་འོངས་ཏེ་སྣ་ཚོགས་སྡེ་མའི་ཞལ་དུ་ཞུགས་ཏེ། པད་མའི་ནང་ནས་བྱུང་ནས་སླར་ཐོད་པར་ཞུགས་སོ། ། 87.127b སྔགས་འདིའི་མཐུས་ཀླུ་རྣམས་ཞིག་སྟེ། སྐྲག་ཅིང་རྔུལ་འབྱུང་བར་འགྱུར་རོ། །ནོར་རྒྱས་ལ་སོགས་པའི་རྫུ་འཕྲུལ་ཆེན་པོའི་ཀླུ་ཐམས་ཅད་ལྷགས་ཏེ། སྟོབས་ཀྱིས་རྒྱུ་དང ། དུང་སྐྱོང་དང ། འཇོག་པོ་དང ། མཐའ་ཡས་དང ། པད་མ་དང ། པད་མ་ཆེན་པོ་ལ་སོགས་པ་ཀླུ་ཆེན་པོ་རྣམས་དང ། གཞན་གང་ཡང་རུང་བ་དུག་ལས་བྱུང་བ་ཐམས་ཅད་ཀྱང་ལྷགས་སོ། །རྣལ་འབྱོར་མ་སྣ་ཚོགས་སྡེ་མ་ལ་ཁ་ཕྱོགས་ཏེ་ཀླུ་ཐམས་ཅད་ཀྱིས་ཞུས་པ། ལྷ་མོ་བཀའ་ཅི་སྩོལ་ཅི་ཞིག་བགྱི་ཞེས་སྨྲའོ། །གསུངས་པ་གང་ཡང་སངས་རྒྱས་ཉམས་སུ་མྱོང་བ་དེ་ལྟར་གྱིས་ཤིག་།དེ་ལྟར་ཐོས་པ་ཙམ་གྱིས་དཀྱིལ་འཁོར་ཆེན་པོ་རྒྱན་དང་ལྡན་པའི་དབུས་སུ་བཅོམ་ལྡན་འདས་ཀྱི་ཐོད་པ་ཁ་ཕྱེ་སྟེ་གླེགས་བམ་བྱུང་ངོ ། །ནམ་མཁའ་ལ་སྒྲ་བྱུང་ངོ ། །ལྷ་མོ་ལྷ་ཚོགས་སྡེ་མ་ཟུང ། །སེམས་ཅན་ཀུན་ལ་ཕན་འདོགས་མ། །རྒྱུད་འདི་རྒྱལ་པོ་ཆེན་པོ་སྟེ། །རྣལ་འབྱོར་མ་ཡི་གོང་ན་མེད། །སངས་རྒྱས་ཐོད་པ་ཞེས་བྱ་བ། །སེམས་ཅན་ཀུན་ལ་ཕན་བྱེད་པའོ། །དེ་ལྟར་ཐོས་ནས་སྣ་ཚོགས་སྡེ་མས་གླེགས་བམ་ཡང་དག་པར་བཟུང་སྟེ། ཕྱག་ན་རྡོ་རྗེ་ལ་ཉེ་བར་གཏད་དོ། །ཕྱག་ན་རྡོ་རྗེས་རྒྱུད་འདི་ཟུང ། །སེམས་ཅན་ཀུན་ལ་བདེ་འབབ་པ། །རྣལ་འབྱོར་མ་ཡི་དངོས་གྲུབ་ཀུན། །འབྲས་བུ་མྱུར་དུ་སྟེར་བྱེད་པའོ། །མནན་དང་སྤར་བ་ཡེ་ཤེས་ཆེ། །གོང་ན་མེད་པ་རྙེད་དཀའ་བ། །གསང་བ་མཆོག་གི་ཉམས་དགའ་བ། །ལུས་ཀུན་ལ་ནི་རྣམ་པར་གནས། །ནམ་མཁའ་ལྡིང་དང་ཆར་དབབ་དང ། །དངུལ་ཆུ་བཅུད་ཀྱིས་ལེན་པ་དང ། །བསྐྲད་དང་དབང་དུ་བྱ་ཉིད་དང ། །རྨོངས་དང་མངོན་སྤྱོད་ཉིད་དང་ནི། །དཔུང་ལ་སོགས་པ་རེངས་ཉིད་དང ། །དུས་སུ་ཟིན་པ་བཟློག་པ་དང ། །ཕུར་བུས་གདབ་དང་གསད་པ་དང ། །རྟག་ཏུ་སྒྲུབ་པ་བྱེད་པ་དང ། །སྣ་ཚོགས་སྔགས་རིམ་ཇི་བཞིན་དང ། །ཇི་བཞིན་རྣལ་འབྱོར་མ་བསྐྱེད་དང ། །དཔལ་ཆེན་ཧེ་རུ་ཀ་ཡི་ནི། །བསྐྱེད་པ་དང་ནི་གནས་རྒྱུ་དང ། །དངོས་དང་དངོས་མེད་སྤྲོས་མེད་དང ། །སྲིད་པར་སྤྱོད་ཅིང་གོས་མེད་དང ། །དགོངས་པས 87.128a བཤད་པ་མཆོག་ཆེན་དང ། །རྣལ་འབྱོར་མ་ཡི་མཆོག་ཆེན་དང ། །རྣལ་འབྱོར་མ་ཡི་འདུས་པ་དང ། །ནུས་པ་རྣམ་པ་མང་གསུངས་པ། །ཐོས་པ་ཙམ་གྱིས་འགྲུབ་པར་འགྱུར། །གཟུགས་བརྙན་དག་པ་ཉིད་དང་ནི། །དེ་བཞིན་བརྟན་པ་བསྐྱོད་པ་དང ། །དུར་ཁྲོད་འཇིགས་པ་ཆེ་བཟང་དང ། །རོ་ལངས་བསྒྲུབ་ལ་སོགས་པ་དང ། །སྟོབས་པོ་ཆེ་རྣམས་དགུག་པ་དང ། །དེ་བཞིན་འཇིག་རྟེན་གསུམ་དགུག་དང ། །རིམས་ཀྱིས་གདུང་བ་འཇིགས་ཆེན་དང ། །དགྲ་ཡི་ཁ་སོགས་བཅིང་བ་དང ། །དེ་བཞིན་གསད་དང་བསླུ་བ་དང ། །མི་སྣང་བྱེད་པ་མཆོག་དང་ནི། །མིག་སྨན་དང་ནི་རི་ལུ་ཉིད། །བཅུད་ལེན་རལ་གྲི་ཉིད་དང་ནི། །སངས་རྒྱས་ཐོད་པའི་སྦྱོར་བ་ཡིས། །ཐོས་པ་ཙམ་གྱིས་འགྲུབ་པར་འགྱུར། །མི་སྣང་བ་ནི་མཆོག་ཆེན་དང ། །སྣ་ཚོགས་སྒྱུ་འཕྲུལ་རྣམ་འཕྲུལ་དང ། །རང་གི་གཟུགས་ནི་སྒྱུར་བ་དང ། །གཞན་གྱི་ལུས་ལ་གཞུགས་སོགས་དང ། །སངས་རྒྱས་བྱེ་བས་རབ་བསྲུངས་པའི། །སངས་རྒྱས་བུ་མོ་མཆོག་ཆེན་རྣམས། །ཁྲོས་པ་ཙམ་གྱིས་འགུགས་བྱེད་ན། །གཞན་དག་སྨོས་ལྟ་ཅི་ཞིག་དགོས། །མིག་འཕྲུལ་བྱེད་པ་ཉིད་དང་ནི། །དགེ་མཚན་རྣམ་པ་མང་ཤེས་པ། །འདོད་པ་ལྔ་ནི་བསྟེན་བཞིན་པས། །འདི་རུ་འགྲུབ་པར་གདོན་མི་ཟ། །འཇིགས་ཤིང་འཇོམས་པའི་རྩོད་ཆེན་པོ། །གཅིག་གིས་འབུམ་ལས་རྒྱལ་བར་བྱེད། །སྐྱེས་པ་གཅིག་གི་འདོད་ཆེན་གྱིས། །བུད་མེད་འབུམ་ཕྲག་འཛག་བྱེད་ཅིང ། །རྡོ་རྗེར་བྱེད་པ་རྙེད་དཀའ་བ། །གཅིག་གིས་ཐམས་ཅད་འདོད་པ་སྤྱད། །དེ་ནས་གཞན་ཡང་རབ་བཤད་པ། །མཁའ་ལྡིང་སྦྱོར་བ་རིམ་ཇི་བཞིན། །རྒྱུད་ཀུན་དུ་ཡང་རྙེད་དཀའ་བ། །མུ་སྟེགས་རྣམས་ཀྱི་ཡུལ་མིན་པ། །རྒྱུད་ཀུན་དུ་ཡང་མ་གསུངསོ། །སངས་རྒྱས་ཐོད་པའི་གཞུང་ཇི་བཞིན། །རྡོ་རྗེ་མགོན་པོས་གསུངས་པ་ཡི། །མཁའ་ལྡིང་ཤིན་དུ་རྨད་བྱུང་བ། །འཇིག་རྟེན་གསུམ་ན་རྙེད་དཀའ་བའི། །སྦྱོར་བ་རྣམ་པ་བཅཝ་བརྒྱད་གསུངས། །ཤ་ཡི་ཀི་ཡི་སྦྱོར་བ 87.128b དང ། །རིག་པ་འཛིན་དང་རྒྱལ་པོ་འགྱེད། །རྔ་རྡུང་བུད་མེད་འཕྲོག་པ་དང ། །ཤིང་སྣུན་ཞགས་པས་འཆིང་བ་དང ། །ཁུ་བྱུག་པདྨས་འབྱེད་པ་དང ། །སྟག་བྱེད་ཆུ་བླུགས་དུང་འབུད་དང ། །ཐོད་ལོ་ཀོར་འཕྲོག་སྐྱུག་པ་དང ། །རས་གཡོགས་ཐལ་ལྕག་བརྡབ་པ་དང ། །ཡིག་གསུམ་བསམ་གཏན་གྱིས་ནི་གཏམ། །འདི་རྣམས་ཀྱིས་ནི་དགུག་པར་བྱ། །མཁའ་ལྡིང་སྦྱོར་བ་བཅཝ་བརྒྱད་པོ། །འཇིག་རྟེན་གསུམ་ན་རབ་རྙེད་དཀའ། །སེམས་ཅན་རྣམས་ལ་ཕན་བྱེད་པ། །རྡོ་རྗེ་མགོན་པོ་ཉིད་ཀྱིས་གསུངས། །དེ་ནས་གཞན་ཡང་རབ་བཤད་པ། །མཆོག་གི་ཡེ་ཤེས་ཇི་བཞིན་པ། །བྷ་གའི་དབུས་སུ་རྣམ་པར་བཞུགས། །བདེ་བ་ཆེན་པོ་སྟེར་བྱེད་པ། །འདི་ཉིད་དུ་ནི་ཀུན་གནས་ཀྱང ། །བྱིས་པ་རྨོངས་པས་མི་ཤེས་སོ། །དེར་ནི་བཅུད་དང་བཅུད་ལེན་ཏེ། །དེ་ཉིད་དུ་ནི་སངས་རྒྱས་བཞུགས། །དེར་ནི་དཀྱིལ་འཁོར་བཟང་པོའོ། །དེར་ནི་སློབ་མ་དབང་བསྐུར་བའོ། །དེར་ནི་ཧེ་རུ་ཀ་དཔའ་བོ། །ཉི་ཤུ་རྩ་བཞིའི་དབང་གཙོའོ། །དེར་ནི་ནམ་མཁའ་ལྡིང་འཇིགས་པ། །དེ་ཉིད་དུ་ནི་རོ་ལངས་བསྒྲུབ། །དེར་ནི་དུར་ཁྲོད་བརྒྱད་པོ་རྣམས། །སྐད་ཅིག་ཙམ་གྱིས་སྐྱེད་པའི་རྒྱུ། །དེར་ནི་སངས་རྒྱས་བདག་ཉྀད་ཆེ། །སྟོང་ཕྲག་གསུམ་ནི་རྣམ་པར་བཞུགས། །དེར་ནི་འཇིག་རྟེན་ཁམས་ཀུན་ཏེ། །དེ་ཉིད་བཅོམ་ལྡན་འདས་ལྷ་མོ། །སངས་རྒྱས་ལ་སོགས་སྐྱེད་པའི་ཡུཾ། །བྱང་ཆུབ་སེམས་དཔའ་དཔལ་ཆེན་པོ། །ཤེས་རབ་ཕ་རོལ་ཕྱིན་དཔུང་གཉེན། །དེ་ཉིད་བསོད་ནམས་ཀུན་སྟེར་མ། །དེ་ཉིད་ཐར་པ་སྟེར་བྱེད་ན། །ཕྱག་རྒྱ་ཆེན་པོ་གྲགས་ཆེན་པོ། །དངོས་གྲུབ་ཀུན་ནི་འདོད་བྱེད་མ། །མ་དང་ཚ་མོ་སྲིང་མོ་དང ། །བུ་མོ་བུད་མེད་རབ་བརྟེན་མ། །ཤེས་རབ་མཉེས་ཤིང་འཇིགས་བྱེད་མ། །འགྲོ་དྲུག་བདེ་སྡུག་བག་ཆགས་བཅས། །འཁོར་བ་མྱ་ངན་འདས་ཉིད་དང ། །བདག་ཉིད་ཆེན་པོ་དེ་ཉིད་དེ། །རྣམ་རྟོག་ཀུན་དུ་རྟོག་པ་ཉིད། །དེ་བཞིན་འཆར་དང་ནུབ་པ་དང ། །ཉིན་མཚན་མལ་སྟན་བཟའ་བ་དང ། །ངེས་པའི་བརྟུལ་ཞུགས་རྩིས་དང་གྲངས། །རྣམ་པར་མི་རྟོག་ཡང་དག་རྟོག་།དམན་དང་མཆོག་དང་བར་མ་དང ། །གཞན་དང་གང་དང་དེ་དང་ནི། ། 87.129a དེ་ཉིད་བདག་ཉིད་ཆེན་པོ་གཅིག་།སེམས་ཅན་ཀུན་ལ་བདེ་བ་འབབ། །དེ་ལྟར་ཐོས་ནས་ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་དང ། འདོད་ཅན་མ་ལ་སོགས་པ་རི་རབ་ཀྱི་རྡུལ་ཕྲ་རབ་སྙེད་ཀྱི་རྣལ་འབྱོར་མ་རྣམས་དགའ་བའི་སྤྱན་གདངས་ནས་སྣ་ཚོགས་སྡེ་མ་ལ་ཡང་དང་ཡང་དུ་བཏུད་དེ། འདི་ལྟར་གསོལ་ཏོ། །ེ་མའོ། །སྣ་ཚོགས་སྡེ་མ་རྣལ་འབྱོར་མ། །སེམས་ཅན་ཀུན་ལ་བདེ་འབབ་མ། །གླེགས་བམ་དོན་དང་ལྡན་གང་ཞིག་།དེ་ཀུན་སངས་རྒྱས་བྱིན་བརླབས་བཤད། །དེ་ནས་ཕྱག་ན་རྡོ་རྗེའི་ཕྱག་གཉིས་གླང་པོ་ཆེའི་ལག་པ་ལྟར་རབ་ཏུ་བརྐྱང་སྟེ་གླེགས་བམ་ཡང་དག་པར་བླངས་སོ། །དེ་ནས་སངས་རྒྱས་ཀྱི་བྱིན་གྱི་བརླབས་ཀྱིས་ཕྱག་རྒྱ་ཆེན་པོའི་རྡོ་རྗེའི་གནས་སུ་དོན་དང་བཅས་པའི་གཞུང་ཞུ་བར་གྱུར་ཏོ། །ཕྱག་ན་རྡོ་རྗེའི་སྙིང་ག་ནས་བྱུང་སྟེ། སྣ་ཚོགས་སྡེ་མའི་ཐུགས་སུ་ངལ་སོས་སོ། །དེ་ནས་ཕྱག་ན་རྡོ་རྗེ་གནོད་སྦྱིན་གྱི་བདག་པོ་ཆེན་པོས་རྣལ་འབྱོར་མ་ཆེན་མོ་ལ་འདི་ལྟར་གསོལ་ཏོ། །སྔགས་ཀྱི་བཟླས་པ་གང་ཞིག་ལགས། །ལས་ཀྱི་ཚོགས་རྣམས་ཇི་ལྟར་འགྲུབ། །སྔོན་དུ་བསྙེན་པ་གང་ཞིག་ལགས། །མཁའ་ལྡིང་འགྲུབ་པའི་ངེས་པ་གང ། །དངུལ་ཆུ་བཅུད་ལེན་སྣ་ཚོགས་པ། །དངོས་གྲུབ་སྟེར་བྱེད་གང་ཞིག་ལགས། །སྤར་དང་མནན་པ་གང་གསུངས་དང ། །དུས་དང་བྱ་བའི་ངེས་བཅས་དང ། །དངོས་གྲུབ་ཐོབ་དུས་གང་ཞིག་ལགས། །སངས་རྒྱས་ཇི་ལྟ་བུ་རུ་བརྗོད། །དེ་བཞིན་ཐོད་པ་ཇི་ལྟ་བུ། །སྦྱོར་དང་ལྡན་པའི་ཇི་ལྟ་བུ། །སྣ་ཚོགས་སྡེ་མའང་ཇི་ལྟ་བུ། །ཐེག་པ་ཆེན་པོ་ཇི་ལྟ་བུ། །རྣལ་འབྱོར་མ་ཡི་རྣམ་ངེས་ཅི། །གསུངས་པ། རྒྱུད་འདིར་སྔོན་དུ་བསྙེན་པ་མེད། །དེ་བཞིན་ཡུལ་དང་དུས་ཚེས་དང ། །གཟའ་དང་རྒྱུ་སྐར་སྦྱོར་མེད་པ། །བློ་དང་ལྡན་པས་རྟག་ཏུ་བསྟེན། །དུས་དང་བྱ་བའི་ངེས་མི་བྱ། །སངས་རྒྱས་ཐོད་པའི་སྦྱོར་བ་ཡིས། །ཐོས་པ་ཙམ་གྱིས་འགྲུབ་པར་འགྱུར། །སངས་རྒྱས་རྡོ་རྗེ་ཞེས་སུ་གསུངས། །ཐོད་པ་གྲུ་གསུམ་ཡང་དག་འབྱུང ། །སྦྱོར་བ་གསང་བར་གནས 87.129b པའི་རྩ། །དེ་ཡི་སྣ་ཚོགས་ངོ་མཚར་བྱེད། །སྡེ་ནི་བདེ་ཆེན་ཡེ་ཤེས་སོ། །འདི་ཉིད་ཐེག་པ་ཆེན་པོ་སྟེ། །རྣལ་འབྱོར་མ་ཡི་རྩ་ལས་བྱུང ། །དེ་ནི་རྨད་བྱུང་ཆེ་མཆོག་སྟེ། །སངས་རྒྱས་ཐོད་པའི་སྦྱོར་བ་ཉིད། །དེ་ཉིད་ཧེ་རུ་ཀ་དཔའ་བོ། །འཁོར་བའི་འཇིགས་ལས་སྒྲོལ་བྱེད་པ། །སངས་རྒྱས་ཐོད་པའི་སྦྱོར་བ་ཡིས། །སངས་རྒྱས་ཀུན་གྱི་བདེ་བ་འབབ། །རྣལ་འབྱོར་ཆེན་མོ་སྣ་ཚོགས་བདེ། །དཔའ་དབང་བདག་མོ་དབང་ཕྱུག་མ། །དེ་ཡི་ཐོད་པའི་དཀྱིལ་འཁོར་ལ། །སྔགས་དང་རྒྱུད་ནི་རྣམ་པར་གནས། །དེ་ཡི་ཡེ་ཤེས་བཟང་པོ་ནི། །ལྷན་ཅིག་སྐྱེས་པ་དག་ལས་འབྱུང ། །དེ་ནི་རིག་པའི་དབང་ལྔ་དང ། །སངས་རྒྱས་བདུན་གྱི་མཚན་ཅན་ཏེ། །སྣ་ཚོགས་སྦྱོར་དང་ཚེ་འཕེལ་དང ། །དངོས་གྲུབ་ཐམས་ཅད་སྒྲུབ་པ་ནི། །སངས་རྒྱས་ཐོད་པའི་སྦྱོར་བ་ཡིས། །འགྲུབ་པར་འདིར་ནི་གདོན་མི་ཟ། །མན་ངག་ལམ་ལས་གང་ཤེས་པ། །བླ་མའི་དྲིན་ལས་ཤེས་པར་བྱ། །སངས་རྒྱས་ཐོད་པའི་རྒྱུད་ཆེན་པོ་རྣལ་འབྱོར་མ་རྣམས་ཀྱི་གོང་ན་མེད་པ་གསང་བའི་ཡང་ཤིན་དུ་གསང་བ་ཞེས་བྱ་བ་ལས་དངོས་གྲུབ་ཐམས་ཅད་དང་ཡེ་ཤེས་གཏན་ལ་དབབ་པ་དང ། ཐོད་པ་ཁ་ཕྱེ་བ་ལས་གླེགས་བམ་བྱུང་བའི་ལེའུ་སྟེ་དང་པོའོ།། །། དེ་ནས་ཡང་དག་རབ་བཤད་པ། །སྔགས་ལེའུ་ཇི་བཞིན་གསུངས་པ་སྟེ། །མཁའ་འགྲོ་མ་མོ་འབྱུང་པོ་རྣམས། །སྔགས་གང་གིས་ནི་འགྲུབ་འགྱུར་བ། །དེ་ནི་བདག་གིས་རབ་བཤད་ཀྱིས། །ཁྱོད་ཀྱིས་དད་པ་བརྟན་པས་ཉོན། །ོཾ་བུད་དྷ་ཀ་པཱ་ལི་ནི་ཏ་ཊ་སྥོ་ཊ་ཡ་སརྦྦ་ཤུ་བྷ་པྲ་དཱ་ཡི་ནི་ཧཱུཾ་ཕཊ། སྤོས་དབུལ་བའི་སྔགས་སོ། །ོཾ་བུད་དྷ་ཀ་པཱ་ལི་ནི་མ་ཊ་མ་ཊ་ཨ་སཝཱ་ཧཱ། མེ་ཏོག་དབུལ་བའི་སྔགས་སོ། །ོཾ་མ་ཧཱ་ཀ་པཱ་ལ་བཛྲི་བ་ར་བ་ཏ་ཊ་སྟ་ཊ་ཡ་སྟ་ཊ་ཡ་མ་ན་མ་ཊ་ཧཱུཾ་ཧེ་སཝཱ་ཧཱ། དྲི་འབུལ་བའི་སྔགས་སོ། །ོཾ་བུད་དྷ་ཀ་པཱ་ལི་ནི། ་་གྲིཧྞ་གྲིཧྞ། ་་གྲིཧྞཱ་པ་ཡ་གྲིཧྞཱ་པ་ཡ་བ་ར་བ་ར་ཏ་ཊ་ཏ་ཊ། སྟ་ཊ་ཡ་སྟ་ཊ 87.130a ཡ་མ་ཊ་ཧཱུཾ་ཧཱུཾ་ཧཱུཾ་སཝཱ་ཧཱ། མར་མེ་དབུལ་བའི་སྔགས་སོ། །ོཾ་བུདྡྷ་ཀ་པཱ་ལི་ནི། གྲྀཧྞ་གྲྀཧྞ་གྲྀཧྞཱ་པ་ཡ་གྲྀཧྞཱ་པ་ཡ་ཁ་ཁ་ཧཱུཾ། ལྷ་བཤོས་དབུལ་བའི་སྔགས་སོ། །ོཾ་མ་ཧཱ་ཀ་པཱ་ལི་བཛྲ་དྷརྨྨ་དྷརྨྨ་མེ་གེ་བ་རེ་པྲ་བ་རེ་བ་ར་བ་ར་ཀ་ར་ཀ་ར་ཏ་ཊ་ཏ་ཊ་ཧ་ཧེ་སཝཱ་ཧཱ། གོས་དབུལ་བའི་སྔགས་སོ། །ོཾ་ཧཱཾ་ཧཻཾ་ཧཽཾ་ཧཻཾ་ཧོཾ་ཧཱཾ་ཧཱ། གོ་ཆའི་སྔགས་སོ། །ོཾ་བུད་དྷ་ཀ་པཱ་ལི་ནི་ཨ་ཁཾ་ཀྲོཾ་ཨཿ ་ཨཱ་ཧཱུཾ་ཧཱུཾ་ཧཱུཾ་ཕཊ། སྤྱན་དྲང་བའི་སྔགས་སོ། །ོཾ་མ་ཧཱ་ཀ་པཱ་ལ་བཛྲི་ཎི་གཙྪ་གཙྪ་ཨུཏ་ཏིཥྛ་ཨུཏ་ཏིཥྛ་ཛ་ཛ་ཛ་ཧ་ཛཾ་ཛཾ་ཛཾ། ཏྲཻ་ལོཀྱ་བི་ཊ་པ་ཎི་ཧཱུཾ་ཕཊ། གཤེགས་སུ་གསོལ་བའི་སྔགས་སོ། །ོཾ་མ་ཧཱ་ཀ་པཱ་ལ་བཛྲེ་ཙི་ཏྲེ་སུ་ཙི་ཏྲེ་ཨ་ལཱམ་བ་ནེ་ཕྲིན་ཡཱ། སརྦྦ་བྷཱུ་ཏ་ན་མཱ་ར་ཎ་ཀཱི་ལ་ཡ་སརྦྦ་དུཥྚཱན་ཨུཙྩཱ་ཊ་ཡ་སརྦྦ་བི་གྷཱ་ནྦི་ཏྲཱ་བ་ཡ་བྷ་ག་བ་ཏི་ཡཀྵ་རཀྵ་ས་པི་ཤཱ་ཙཱ་ན་ཤོ་ཥ་ཡ་ཏ་ཊ་ཡ་སཔྟ་པཱ་ཏཱ་ལ་ག་ཏཱ་ན། ས་ར་ས་ར། པྲ་ས་ར་པྲ་ས་ར། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། འབྱུང་པོ་ཐམས་ཅད་པའི་གཏོར་མའི་སྔགས་སོ། །འབྲས་སཱ་ལུ་བླངས་ཏེ་འོ་མས་བཀྲུས་ལ་བུ་མོ་གཞོན་ནུ་མས་དེ་ཤིན་དུ་ཞིབ་པར་བཏགས་ལ། དེ་ཡང་ཤེས་རབ་ཅན་གྱིས་གཟུགས་བརྙན་བྱས་ཏེ། ཞལ་གཅིག་ཕྱག་བཞི་གཞུང་བཞིན་ཅང་ཏེའུ་དང ། ཁ་ཊྭཱཾ་ག་དང ། རལ་གྲི་དང ། ཐོད་པ་འཛིན་པའོ། །དེ་ནས་རོ་བསྲེགས་པའི་སོལ་བ་ཕྱེ་མར་བྱས་ལ་རྡོ་རྗེ་གཙུག་གིས་མཉེ་བར་བྱའོ། །དེ་ནས་དེས་གཟུགས་བརྙན་ལ་བྱུག་པར་བྱའོ། །མེ་ཏོག་དཀར་པོས་མཆོད་པ་བྱས་ཏེ། སངས་རྒྱས་ཐོད་པའི་རྣལ་འབྱོར་པས་ཧེ་རུ་ཀའི་རྣམ་པའི་སྦྱོར་བས་སྔགས་བརྒྱ་རྩ་བརྒྱད་བཟླས་པར་བྱའོ། །ོཾ་མ་ཧཱ་བཛྲ་ཧེ་རུ་ཀ་བཛྲེ། དྷ་ར་དྷ་ར། དྷུ་རུ་དྷུ་རུ། མ་ཧཱ་ཛྙཱ་ན་པོ་ཊ་ཎེ། ཤཱི་གྷྲཾ་སཱ་ད་ཡ་སྟཾ་བྷ་ཡ་ཀཱི་ལ་ཡ་ཧཱུཾ་ཕཊ། སྔགས་འདིས་ཆུ་ལ་ལན་བདུན་དུ་མངོན་པར་བཟླས་ཏེ། གཟུགས་བརྙན་དེ་བཀྲུ་བར་བྱའོ། །ཆུ་དེས་རང་གི་གདོང་བཀྲུས་ན་མི་སྣང་བར་བྱེད་དེ། ལྷ་རྣམས་ཀྱིས་ཀྱང་རྙེད་པར་དཀའོ། །ནགས་ཀྱི་ནང་དུ་སྟག་གིས་ཀྱང་མི་མཐོང་ངོ ། །གཞན་དག་གིས་ཀྱང་དེ 87.130b མཐོང་བར་མི་འགྱུར་རོ། །སྲོག་ཆགས་འབུམ་གྱི་ནང་དུ་སོང་ན་ངོ་མཚར་སྣ་ཚོགས་བྱེད་དོ། །གང་གིས་ཀྱང་མི་མཐོང་ངོ ། །ལྷའི་བུ་མོ་འཕྲོག་ཅིང་ལྷ་རྣམས་ཀྱིས་ཀྱང་མི་མཐོང་ངོ ། །འོ་མས་གདོང་བཀྲུས་པ་ཙམ་གྱིས་ནི་མཐོང་བར་འགྱུར་རོ། །གཟུགས་བརྙན་དེའི་སྙིང་གར་འབའ་བོ་ལས་ཕུག་སྟེ། དུར་ཁྲོད་ཀྱི་མེ་ལ་འབའ་བོ་ལ་དང་ཚངས་པ་རྡོ་རྗེས་རབ་ཏུ་སྦར་ལ། དེའི་ཐལ་བ་ཡང་དག་པར་བླངས་ཏེ། ཁམ་ཕོར་དུ་གཞག་པར་བྱའོ། །ཡང་ན་པད་མའི་སྣོད་དུའོ། །སྔགས་འདི་བརྒྱ་རྩ་བརྒྱད་དུ་མངོན་པར་བཟླས་པར་བྱའོ། །ོཾ་བུདྡྷ་ཀ་པཱ་ལི་ནི་ཏྲཱཾ་ཧཱུཾ། ་་ཨོཾ་བཛྲ་བི་ལི་སི་ནཱི་ཧྲཱིཿ ཧཱུཾ། ཨོཾ་ཀཱ་མི་ནཱི་ཁཾ་ཧཱུཾ། ཨོཾ་པཱ་ཏཱ་ལ་བ་སཱི་ནཱ་ཨཱཿ ཧཱུཾ། ཨོཾ་ཙི་ཏྲཿ སེ་ནཱ་ས་མ་ཡཱ་དྷིཥྛ་ཡ་ཧྲཱིཿ ཧཱུཾ། སྔགས་འདི་དག་ནི་སངས་རྒྱས་རྣམས་ཀྱིས་ཀྱང་ཤིན་ཏུ་རྙེད་པར་དཀའོ། །ཐལ་བ་དེ་དང་རྡོ་རྗེ་གཙུག་གིས་ལུས་བྱུག་པར་བྱས་ན་ཇི་སྲིད་དུ་ལུས་ལ་མཚོན་ཆས་ཕོག་པ་དེ་སྲིད་དུ་མི་ཚུགས་སོ། །སླར་ཞིང་དགྲ་ཐམས་ཅད་ཀྱི་མགོ་བོ་འཆད་པར་འགྱུར་རོ། །གང་སྡང་བ་ལ་བལྟས་ན་དེ་ལོང་བར་འགྱུར་རོ། །གང་ཞིག་སྡང་བའི་སེམས་འཛིན་པ་ན་དེ་སྨྱོ་བར་འགྱུར་རོ། །ཐལ་བ་དེ་ཉིད་དང་མར་ཁུ་བཟང་པོས་མིག་བྱུགས་ན་དཔག་ཚད་སྟོང་མཐོང་བར་འགྱུར་རོ། །གང་ཅི་ཡང་རུང་བའི་སའི་འོག་ན་གནས་པའི་གཏེར་དཔག་ཚད་སྟོང་གི་འོག་ཏུ་སོན་པའི་དངུལ་དང་གསེར་དང ། རིན་པོ་ཆེ་གང་ན་ཡོད་པ་དེ་ཐམས་ཅད་ལ་སྲིན་ལག་གིས་སྡིགས་མཛུབ་བྱས་པ་ཙམ་གྱིས་ཐམས་ཅད་མདུན་དུ་ལྷགས་ཏེ་གསོལ་བ་འདེབས་སོ། །ཀྱཻ་སངས་རྒྱས་ཐོད་པའི་རྣལ་འབྱོར་པ་གཏེར་ལོང་ལ་སེམས་ཅན་གྱི་དོན་གྱིས་ཤིག་།དེས་གཏེར་བླངས་ན་གང་འདོད་པ་དེ་བྱེད་དེ། ཐལ་བ་དེས་བྱེད་དོ། །ཐལ་བ་དེ་དང་གོ་རོ་ཙ་ན་ལྷན་ཅིག་བསྣོས་ཏེ། མཛུབ་མོས་མཉེས་པས་དཔུང་གི་ཚོགས་ལངས་པ་མཛུབ་མོ་བསྐོར་བ་ཙམ་གྱིས་འབུམ་ཕྲག་སྟོང་གི་དཔུང་རྣམས 87.131a ཁ་ཕུབ་ཏུ་ལྷུང་བར་འགྱུར་རོ། །གང་འདོད་པ་དེ་བྱེད་དོ། །བཀྲུས་པ་ཙམ་གྱིས་ལངས་པར་འདི་ཐེ་ཚོམ་མེད་དོ། །ཐལ་བ་དེ་དང་ཞ་ཉེའི་ཕྱེ་མ་དང་བསྣོས་ཏེ་གཅིག་ཏུ་བྱས་ལ། །རྡོ་རྗེའི་གཙུག་རྗེས་སུ་བྱིན་ཏེ་ཁབ་ལེན་གྱི་ལྕགས་ཀྱི་ཕྱེ་མ་བསྲེ་ཞིང་གསེར་གྱི་ཕྱེ་མ་ཡང་ཅུང་ཟད་བསྲེ་བར་བྱའོ། །རྡོ་རྗེའི་ཆུའི་ཁུ་བ་དང་ལྷན་ཅིག་ཏུ་བསྣོས་ཏེ་ཟངས་མའི་སྣོད་དུ་ཉི་མ་བདུན་གྱི་བར་དུ་གཞག་གོ། །དེ་ནས་མཁྲིས་པ་ཆེན་པོ་མཉེས་ཏེ་རྟའི་ཁྲག་དང་ལྷན་ཅིག་ཏུ་བསྣོས་ལ་ཡང་སྣོད་དེ་ཉིད་དུ་ཉི་མ་གསུམ་གཞག་པར་བྱའོ། །དེ་ནས་བཏོན་ཏེ་ལྕགས་ཀྱི་སྣོད་དུ་གཞག་པར་བྱའོ། །ཟངས་མའི་སྣོད་དུ་བཞག་པ་དེ་མེའི་ནང་དུ་བཅུག་ན་གསེར་དང་དངུལ་དུ་འགྱུར་བར་སོམ་ཉི་མེད་དོ། །སྲང་གཅིག་ཀྱང་སྲང་སྟོང་གི་རིན་ཐང་དུ་འགྱུར་ཏེ་རིན་པོ་ཆེ་དང་འདྲ་བར་འགྱུར་རོ། །གསེར་དེ་མ་ཤ་གཅིག་དང་དངུལ་སྲང་གཅིག་བསྲེས་ཏེ་མེ་ལ་བཞུ་ན་སྲང་སུམ་བརྒྱའི་རིན་ཐང་གི་ཚད་དུ་འགྱུར་བར་འདི་ལ་ཐེ་ཚོམ་མེད་དོ། །འདི་ལྟ་བུའི་སྦྱོར་བ་ནི་སངས་རྒྱས་རྣམས་ཀྱིས་ཀྱང་རྙེད་པར་དཀའོ། །འཇིག་རྟེན་དབང་ཕྱུག་ལ་སོགས་པའི་བྱང་ཆུབ་སེམས་དཔའ་གྲགས་པ་ཆེན་པོ་སྙིང་རྗེ་དང་ལྡན་པའི་བདག་ཉིད་ཆེན་པོ་སྟོབས་ཆེ་བ་དེ་རྣམས་ཀྱང་སྦྱིན་པར་མི་ནུས་སོ། །འདི་ཡི་སྦྱོར་བ་རྙེད་དཀའ་བ། །སངས་རྒྱས་ཐོད་པའི་རྒྱུད་དུ་གསུངས། །རྒྱུད་གཞན་རྣམས་སུ་སྦས་པ་ཡིན། །འདུས་སོགས་རྣལ་འབྱོར་རྒྱུད་དུ་ནི། །སྦྱོར་བ་རྣམ་པ་མ་གསུངས་པ། །གང་ཚེ་སྔོན་དུ་བསྙེན་དེའི་ཚེ། །དེ་ཡི་སྦྱོར་བས་ཅི་ཞིག་བྱ། །བསོད་ནམས་དམན་པའི་སེམས་ཅན་གང ། །མཚམས་མེད་ལྔ་ནི་བྱེད་པ་ཡང ། །སངས་རྒྱས་ཐོད་པའི་སྦྱོར་བ་ཡིས། །འདི་ལྟའི་སྦྱོར་བ་འགྲུབ་པར་འགྱུར། །དངོས་པོ་དེ་ཡིས་བློ་ཆེན་རྣམས། །སེམས་ཅན་དོན་ལ་གཅིག་ཏུ་བརྩོན། །སྲང་གཅིག་གིས་ནི་བསྲེས་བྱའི་རིན། །སྦྱོར་བ་ཀུན་ཏུ་རྙེད་པར་དཀའོ། །སྦྱོར་བ་གླེགས་བམ་ལ་མ་བྲིས། །བླ་མའི་དྲིན་ལས་ཤེས་པར་བྱ། །བླ་མས་དངོས་གྲུབ་བླ་མས་ཐར། །བླ་མ་སྟོན་པ་རྣམ་ཀུན་པ། །དེས་ན་སློབ་མ་བློ་ཆེན 87.131b གྱིས། །འབད་པས་བླ་མ་མཉེས་པར་བྱ། །ཐལ་བ་དེ་ཉིད་ཀྱིས་ལུས་བལྟ་བའི་དོན་དུ་བུ་མོའི་མགོ་ལ་བླུགས་ཏེ་རྡོ་རྗེ་གཙུག་གིས་བུ་མོ་བཀྲུའོ། །ཡང་ཐལ་བས་ཐིག་ལེ་བྱས་ལ། ཚངས་པས་རྡོ་རྗེས་མཎ་ཌལ་གྲུ་བཞི་བྱས་ཏེ། དེའི་དབུས་སུ་བུ་མོ་བཞག་པར་བྱའོ། །བདུག་སྤོས་ལྔས་བདུགས་ཤིང་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ན་བུ་མོ་ལ་འབབ་པར་འགྱུར་ཏེ། འདས་པ་དང ། མ་འོངས་པ་དང་ད་ལྟར་བྱུང་བ་སྟོན་ཏོ། །བུ་དོན་གྱིས་འབྲས་བུ་ལ་སྔགས་འདི་ལན་བདུན་དུ་མངོན་པར་བསྔག་སོ། །ོཾ་བུདྡྷ་ཀ་པཱ་ལི་ནི་དེ་ཧི། དེ་ཧཱི་ད་དཱ་པ་ཡ་ད་དཱ་པ་ཡ་ཧེ་ཧེ་བྷ་ག་བ་ཏི་ཤཱི་གྷྲཾ་ཁཌྒཾ་ད་ར་ཧི་བུདྡྷ་ཀ་པཱ་ལ་བཛྲ་སྱ་ཡ་ཛྙ་མ་ལཾ་གྷ་ཡ་ཧཱུཾ་སྟཾ་ཧྲཱི་ཕཊ་ཨ་ཕཊ། ཡུངས་ཀར་བསྣུན་པ་ཙམ་གྱིས་ནི། །བུ་མོ་གྲགས་ཆེན་མ་ནི་རྒོད། །དེ་ཡི་ཁ་ནས་རལ་གྲི་བདུན། །འབྱུང་བ་ལ་ནི་ཐེ་ཚོམ་མེད། །སངས་རྒྱས་ཐོད་པའི་རྣལ་འབྱོར་པས་སྐད་ཅིག་མ་དེ་ཉིད་ལ་འགྲུབ་པར་འདིར་སོམ་ཉི་མེད་དོ། །དེ་ལྟར་རལ་གྲི་གཅིག་གྲུབ་པས་བྱེ་བ་བརྒྱ་སྟོང་གི་རིག་འཛིན་གྲུབ་པས་བསྐོར་བར་འགྱུར་རོ། །འདི་ལྟ་བུའི་སྦྱོར་བ་ནི་འཇིག་རྟེན་གསུམ་ན་ཡང་རྙེད་པར་དཀའོ། །བུ་མོ་བཀྲུས་པ་ཙམ་གྱིས་རྣལ་མར་འགྱུར་རོ། །དེའི་ཐལ་བ་ལྕགས་གསུམ་གྱིས་བཀྲིས་ཏེ་རི་ལུ་བྱས་ནས་ཁར་བཅུག་པ་ཙམ་གྱིས་ནི་མི་སྣང་བར་འགྱུར་རོ། །ཤེས་རབ་ཅན་གྱིས་སུམ་བཅུ་པ་ཡང་བསྐོར་རོ། །སངས་རྒྱས་ཐམས་ཅད་ཀྱིས་ཀྱང་མི་གཟིགས་སོ། །རི་ལུ་ལག་པར་བླངས་པས་དངོས་པོ་གང་དང་གང་ལ་རེག་པ་ཙམ་གྱིས་དེ་དབང་དུ་འགྱུར་རོ། །ཐལ་བའི་སྦྱོར་བ་འདི་དག་ནི། །སངས་རྒྱས་ཀྱིས་ཀྱང་རྙེད་པར་དཀའ། །ོཾ་བུདྡྷ་ཀ་པཱ་ལ་ཛཿ ཧཱུཾ་ཁཾ་རཾ་ཨ། འཇིག་རྟེན་གསུམ། བསྒྲུབ་པའི་སྔགས་སོ། །ོཾ་བུདྡྷ་ཀ་པཱ་ལི་ནི་ཧྲཱིཿ ཧཱུཾ། དགྲ་རླག་པའི་སྔགས་སོ། །ོཾ་མ་ཧཱ་ཀ་པཱ་ལ་བཛྲི་ཁ་ཁ་ཁཱ་ཧི་ཁཱ་ཧི་སརྦ་དུཥྚན་གྷ་གྷ་གྷཱ་ཏ་ཡ་གྷཱ་ཏ་ཡ་སརྦྦ་ཤ་ཏྲུཾ་ཨོཾ་ཧི་ཏྲཱཾ་ཧཱུཾ་ཕཊ། བསྐྲད་པའི་སྔགས་སོ། །སངས་རྒྱས་ 87.132a ཐོད་པའི་རྒྱུད་ཆེན་པོ། རྣལ་འབྱོར་མ་རྣམས་ཀྱི་གོང་ན་མེད་པ་གསང་བའི་ཡང་ཤིན་དུ་གསང་བ་ཞེས་བྱ་བ་ལས་ཐལ་བའི་སྦྱོར་བ་དང་ལས་སྣ་ཚོགས་གཏན་ལ་དབབ་པ་དང ། སྔགས་ཀྱི་ལེའུ་སྟེ་གཉིས་པའོ།། །། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སྣ་ཚོགས་སྡེ་མ་ལ་བཏུད་དེ་འདི་སྐད་ཅེས་གསོལ་ཏོ། །སེམས་ཅན་དོན་ལ་གཅིག་བརྩོན་པ། །ལེགས་སོ་བཅོམ་ལྡན་འདས་ལྷ་མོ། །འདི་ལྟའི་རབ་ཏུ་སྦྱོར་ཞེས་པ། །རྒྱུད་གཞན་དག་ཏུ་མ་གསུངས་ཤིང ། །སངས་རྒྱས་ཀུན་གྱིས་རབ་སྦས་པ། །དེ་ནི་འབད་དེ་གསལ་བར་མཛོད། །ལྷ་མོ་ཆེན་མོ་ཁྱོད་ཀྱིས་གསུངས། །ལྷ་ཡི་ལེའུ་ནི་ཇི་ལྟ་བུ། །སངས་རྒྱས་ཐོད་པའི་རྣལ་འབྱོར་མའི། །རྒྱུད་དུ་ལྷ་རྣམས་དུ་ཞིག་གསུངས། །དེ་རུ་གཟུགས་ནི་ཇི་ལྟ་བུ། །གུས་པ་ཡིས་ནི་ཉན་པར་འཚལ། །གསུངས་པ། རཾ་ལས་ཉི་མ་བསམ་པར་བྱ། །ཉི་མའི་སྟེང་དུ་ཧཱུཾ་བྱུང་བའི། །རྡོ་རྗེ་ནག་པོ་བསྲེག་པའི་བདག་།རྡོ་རྗེ་དེ་ཉིད་འོད་ཟེར་གྱིས། །ར་བ་དྲ་བས་མཚམས་བཅིང་ངོ ། །དེ་བཞིན་རྡོ་རྗེ་ནག་གྱུར་པའི། །རྡོ་རྗེའི་ས་གཞི་བསམ་པར་བྱ། །རྡོ་རྗེའི་ས་གཞིའི་དབུས་ཆུད་པར། །ེ་ཡི་རྣམ་པ་བདག་ཉིད་ཆེ། །གྲུ་གསུམ་ཁམས་གསུམ་བདག་ཉིད་ཅན། །ཡི་གེ་ལཾ་གྱུར་ས་ཡི་ནི། །དཀྱིལ་འཁོར་གྲུ་བཞི་རབ་སེར་པོའོ། །དེ་ཡི་དབུས་ནས་ས་བོན་ནི། །ཡི་གེ་ཨོཾ་སྟེ་ཆོས་བདག་ཉིད། །ོཾ་ལས་བྱུང་བའི་འཁོར་ལོ་ནི། །རྩ་རྣམས་ཀུན་གྱི་རང་བཞིན་ཅན། །རྣལ་འབྱོར་མ་ནི་རྣམ་པར་བཞུགས། །རྩ་ནི་བཅུ་དྲུག་བཅུ་ལ་རྒྱན་དང ། །སྤྲུལ་པ་དྲུག་བཅུ་རྩ་བཞི་འདབ། །དེས་ན་རྩ་བརྒྱ་ཉི་ཤུའོ། །རྡོ་རྗེ་སྐུ་ཡི་བདག་ཉིད་ཆེ། །ཤེས་རབ་ཅན་གྱིས་དེ་ལྟར་བསམ། །དེ་ཡི་དབུས་གནས་ས་བོན་ནི། །ལྦཾ་དཀར་ཡི་གེ་ལས་བྱུང་བ། །ཆུ་ཡི་དཀྱིལ་འཁོར་ཟླུམ་པོའོ། །རྩ་རྣམས་ཐམས་ཅད་ཆུ་ཡི་ནི། །དཀྱིལ་འཁོར་ལ་ནི་ཐིམ་པར་འགྱུར། །སླར་ཡང་བསམ་པར་བྱ་བ་ནི། །རཾ་དམར་ལས་བྱུང་མེ་དཀྱིལ 87.132b འཁོར། །གྲུ་གསུམ་འབར་བའི་བདག་ཉིད་ཅན། །རབ་ཏུ་འབར་བཞིན་པ་ཡི་ནི། །རྩ་བའི་འཁོར་ལོ་ཡང་དག་བལྟ། །དེ་ནས་བསམ་པར་བྱ་བ་ནི། །ཡཾ་གྱུར་རླུང་གི་དཀྱིལ་འཁོར་ནི། །ཟླ་བ་ཕྱེད་པའི་རྣམ་འདྲ་སྔོ། །རྩ་རྣམས་རབ་ཏུ་གཡོ་བའི་གཟུགས། །ཐིམ་གྱུར་འཁོར་ལོའི་རིག་པར་གསུངས། །དེ་དག་ཐམས་ཅད་ཐིམ་འགྱུར་བ། །དེ་ཡི་དབུས་གནས་རྣལ་འབྱོར་པ། །དེ་ལྟར་ཤེས་པར་བྱེད་གང་ཞིག་།སངས་རྒྱས་ཐོད་པའི་རྣལ་འབྱོར་པས། །དེ་ནས་ཟླ་བ་བསམ་པར་བྱ། །ཟླ་བའི་སྟེང་དུ་ཉི་མའོ། །དེ་ཡི་དབུས་ཆུད་ས་བོན་ནི། །ཧཱུཾ་དང་ཨ་ཡི་རང་བཞིན་ནོ། །ཡི་གེ་ཀ་ཡིས་ཧ་བརྒྱན་ཏེ། །ཀ་ནི་ཧ་ལ་ཐིམ་པར་འགྱུར། །མི་ཕྱེད་པ་ཡི་ཧ་དང་ཧཱུཾ། །གཉི་གའི་བདག་ཉིད་ཅན་བལྟའོ། །ཧ་ནི་མི་ཤིགས་ཤེས་རབ་ཀྱི། །བདག་ཉིད་དང་ནི་ཐིག་ལེ་དག་།གཉི་ག་གཅིག་ཏུ་གྱུར་པ་ནི། །ཡི་གེ་ཧཱུཾ་གི་མཆོག་བལྟའོ། །ཧཱུཾ་ལས་བྱུང་བའི་འོད་ཟེར་རྣམས། །དེ་ཡིས་བདེ་བ་ཆེ་བསྐུལ་ཏེ། །བ་མོ་ལྟ་བུའི་རི་བོང་ཅན། །ཉི་མར་ལྷན་ཅིག་ཞུ་གྱུར་ཅིང ། །དཀྱིལ་འཁོར་གཉི་ག་གཅིག་གྱུར་པ། །ཉི་མའི་མཆོག་ཏུ་བལྟ་བར་བྱ། །ཡང་ནི་ཧཱུཾ་བྱུང་འོད་ཟེར་དང ། །རྩ་བའི་འཁོར་ལོ་ཐམས་ཅད་ལ། །རེག་མ་ཐག་པའི་མོད་ལ་ནི། །རྩ་བའི་འཁོར་ལོ་ལས་འབབ་འགྱུར། །ཞུ་བ་དེ་ཡིས་ས་བོན་བཀྲུ། །ཧཱུཾ་གྱུར་པ་ལས་རྡོ་རྗེ་སྟེ། །དབུས་སུ་དེ་ཉིད་ཀྱིས་བྱིན་བརླབས། །ས་བོན་རྡོ་རྗེ་ལས་བྱུང་བ། །དཔའ་བོ་ཁྲག་འཐུང་མདོག་སྔོན་པོ། །ཞལ་གཅིག་པ་ལ་ཕྱག་བཞི་པ། །གཙོ་བོ་ཧཱུཾ་ཞེས་འདོན་པ་སྟེ། །སྐྱིལ་དཀྲུང་ཕྱེད་པའི་གར་གྱིས་གནས། །གཉི་གའང་ཁྲོ་བའི་བདག་ཉིད་ཅན། །སྟག་གི་ལྤགས་པའི་ན་བཟའ་མནབས། །མགོ་བོ་རློན་པའི་འཕྲེང་བ་འཆང ། །བསྲེགས་སུ་མཆོད་ཕྱིར་ཐོགས་པ་ཡི། །ཤིན་དུ་བཞད་པས་འཇིགས་ཆེ་བའི། །གཙོ་བོ་སྙིང་རྗེའི་བདག་ཉིད་བལྟ། །དཔུང་རྒྱན་མགུལ་དོ་འཁོར་གདུབ་དང ། །གཅེར་བུ་རུས་པའི་སྐ་རགས་འཆང ། །གཡེར་ཀར་བཅས་པའི 87.133a རྐང་གདུབ་ཅན། །མ་ལུས་བདུད་རྣམས་འཇོམས་པར་བྱེད། །རལ་པའི་ཅོད་པན་ཡང་དག་ལྡན། །སངས་རྒྱས་རྣམ་པ་ལྔ་ཡིས་བརྒྱན། །ཟླ་བ་ཕྱེད་པ་འཛིན་པའི་ལྷ། །དབུ་ལ་སྣ་ཚོགས་རྡོ་རྗེས་མཚན། །འཁོར་ལོ་རྣ་ཆ་གདུ་བུ་དང ། །ཕྱག་རྒྱ་རྣམ་པ་ལྔ་ཡིས་མཚན། །ཐལ་བའི་རྡུལ་ཅན་འཇིགས་པར་བྱེད། །ཐོད་པ་གཏི་མུག་གིས་བརྒྱན་པའི། །དཔའ་བོ་འཁོར་བ་སྒྲོལ་བྱེད་པ། །བྱང་ཆུབ་ས་བོན་རང་བཞིན་ནོ། །གཙོ་ཆེན་དེ་ཡི་ཤེས་རབ་མ། །སྣ་ཚོགས་སྡེ་མ་རྣལ་འབྱོར་མ། །གཅེར་བུ་མགོ་བོའི་ཕྲེང་བ་སྤངས། །རྒྱན་མེད་མཆོད་ཕྱིར་ཐོགས་མེད་མ། །བདེ་བ་ཀུན་གྱི་གཟུགས་ཅན་མ། །ཕྱག་གཉིས་སྐྲ་ནི་གྲོལ་བའོ། །ཧེ་རུ་ཀ་ལ་འཁྱུད་གནས་མ། །དེ་ལྟར་ཕ་རོལ་ཕྱིན་ལྷ་མོ། །ཁ་དོག་དམར་པོ་རྣམ་གསལ་མ། །ཞལ་ནི་ཤིན་དུ་རྣམ་འགྱུར་བ། །ཅུང་ཟད་མཆེ་བ་གཙིགས་འཇིགས་མ། །གཡས་ན་ཅང་ཏེའུ་གྲི་གུག་སྟེ། །གཡོན་ན་ཁ་ཊྭཱཾ་ཐོད་པའོ། །རང་གི་ལུས་སྐྱེས་འོད་ཟེར་གྱིས། །རྩ་ཡི་འཁོར་ལོ་བསྐུལ་བར་བྱ། །དེ་ཡིས་བསྐུལ་བ་ཙམ་གྱིས་ནི། །རྩ་ཡི་འཁོར་ལོའི་རང་བཞིན་ལས། །འཛག་འགྱུར་འདིར་ནི་ཐེ་ཚོམ་མེད། །འཛག་པ་དེ་ལས་རྣལ་འབྱོར་མ། །བརྒྱད་པོ་བུ་མོ་རྣམས་ཀྱི་མཆོག་།མཆོད་པ་སྣ་ཚོགས་འཛིན་པ་ཡིས། །མགོན་པོ་ཧེ་རུ་ཀ་མཆོད་དོ། །རྡོ་རྗེ་མགོན་པོའི་ཤར་གནས་པ། །རྡོ་རྗེ་མཆེ་བ་མ་ཡིས་ནི། །ཐོད་པ་ཁྲག་གིས་བཀང་གཟུང་སྟེ། །གཟི་བརྗིད་ཆེན་པོ་གསོལ་བར་མཛད། །རྡོ་རྗེ་ཕོ་ཉ་བདག་ཉིད་ཆེ། །དབང་ལྡན་དུ་ནི་ཅང་ཏེའུ་བརྡུང ། །རྡོ་རྗེ་གདོང་མ་དྲི་སྣོད་དང ། །མེ་ཡི་ཕྱོགས་སུ་རྣམ་པར་གནས། །རྡོ་རྗེ་ཅན་མ་གྲགས་ཆེན་མོ། །མཆོད་ཡོན་སྣོད་བཅས་བདེན་བྲལ་ན། །རྡོ་རྗེ་གཙིགས་མ་ལྷོ་ཡི་ནི། །ཕྱོགས་ན་རྔ་བོ་ཆེ་འཛིན་གསུངས། །རླུང་དུ་རྡོ་རྗེ་ལྟེ་བ་མ། །རི་བོང་ཅན་གྱི་སྣོད་འཛིན་ནོ། །ནུབ་དུ་རྡོ་རྗེ་འཇིགས་མ་ནི། །ལྕེ་སྤྱང་ཕྱག་ན་འཛིན་པར་གསུངས། །བྱང་དུ་འདོད་ཆགས་རྡོ་རྗེ་མ། །ལྷ་མོའི་ཆགས་པས་གཙོ་བོ་མཆོད། །དེ་ལྟར་ཧེ་རུ་ཀ་བསམས་ནས། །རྣལ་འབྱོར 87.133b མ་ནི་བརྒྱད་ཀྱིས་མཆོད། །སྣ་ཚོགས་ཟས་དང་སྣ་ཚོགས་སྐོམ། །སྣ་ཚོགས་རོལ་མོ་མཆོག་གསུངས་དང ། །དྲི་ཞིམ་ལྔ་དང་མེ་ཏོག་སྤོས། །འདི་དག་གིས་ནི་གཙོ་བོ་མཆོད། །མཆོད་ཡོན་ཞལ་བསིལ་དེ་བཞིན་ཁྲུས། །གླུ་ཡི་མཆོག་ནི་རྣམ་མང་པོས། །མགོན་པོ་ཁྲག་འཐུང་བདག་ཉིད་ཆེ། །འདི་དག་གིས་ནི་མཆོད་པར་བྱ། །དཔའ་བོ་རྫོགས་པར་མཐོང་ནས་ནི། །རྩ་ཡི་འཁོར་ལོ་ལས་ནི་འཛག་།འཛག་པ་དེ་ལས་རྣལ་འབྱོར་མ། །རྣམ་མང་བརྩེ་བ་ཆེར་ལྡན་པ། །བདེར་གཤེགས་ཀུན་གྱིས་བྱིན་བརླབས་མ། །སྣ་ཚོགས་རྒྱན་གྱིས་རྣམ་པར་ཀླུབས། །སྣ་ཚོགས་པ་ཡི་ན་བཟའ་མནབས། །གཟུགས་ནི་ལང་ཚོ་གཞོན་པས་བརྒྱན། །ལོ་ནི་བཅུ་དང་གཉིས་ལོན་པ། །ཕྱག་གཡས་བྱང་ཆུབ་སེམས་བཀང་བའི། །བུམ་པ་ཨ་མྲའི་ལྕུག་བཅས་བསྣམས། །ཞལ་ནི་རབ་བཞད་དང་བ་ཡིས། །ཧེ་རུ་ཀ་ནི་རྒྱལ་གྱུར་ཅིག་།རྒྱལ་གྱུར་ཅིག་ཅེས་འདི་ལྟར་སྨྲ། །མགོན་པོས་མདུན་དུ་བལྟས་ནས་ནི། །དབང་བསྐུར་མཆོག་སྟེ་གསོལ་བ་གདབ། །བརྩེ་དང་ལྡན་པའི་གྲགས་ཆེན་མོ། །འཁོར་བའི་འདམ་དུ་བྱིང་བ་བདག་།དབང་བསྐུར་བ་ཡིས་བདག་བསྒྲལ་ཕྱིར། །རྡོ་རྗེ་རྣལ་འབྱོར་མས་ཁྲུས་ཤིག་།དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དཔེར་ན་པིད་བང་སྦྱོར་ཀུན་ཚོགས། །རྒྱུད་དང་བྲལ་ན་བརྡུང་མི་རུང ། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །དེ་ལྟར་ཤེས་བྱ་རྣལ་འབྱོར་མས། །སླར་ཡང་བདག་ལ་དབང་བསྐུར་ཅིག་།ཡང་དང་ཡང་དུ་ཕྱག་འཚལ་ཏེ། །ཐལ་མོ་སྦྱར་ནས་གསོལ་བ་གདབ། །གལ་ཏེ་དབང་བསྐུར་མེད་ན་ནི། །ཧེ་རུ་ཀ་ཡི་བདག་གྱུར་ཅིང ། །དེ་ནས་རྣལ་འབྱོར་མ་དེ་རྣམས། །རྒྱལ་གྱུར་རྒྱལ 87.134a གྱུར་ཞེས་སྨྲ་ཞིང ། །བཅོམ་ལྡན་དབང་བསྐུར་ཁྲུས་གསོལ་ལོ། །ཕྱི་ནང་གསང་བར་བཅས་པ་ཡི། །དབང་ཙམ་གྱིས་ནི་ནམ་མཁའ་ཡི། །ཁམས་ནས་རྔ་ཡི་སྒྲ་གྲག་ཅིང ། །མེ་ཏོག་ཙན་དན་ཆར་འབབ་འགྱུར། །དེ་ནས་རྣལ་འབྱོར་མ་དེ་རྣམས། །རྩ་བའི་འཁོར་ལོ་ལ་ནི་ཐིམ། །སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་དུ་གསང་བ་ཞེས་བྱ་བ་ལས་ལྷ་བསྐྱེད་པ་དང ། དབང་བསྐུར་བའི་ལེའུ་སྟེ་གསུམ་པའོ།། །། དེ་ནོར་ལ་པའི་རྣམས་ཕྱག་ན་རྡོ་རྗེ་ལ་ཕྱག་བྱས་ནས་འདི་སྐད་ཅེས་གསོལ་ཏོ། །ཅི་ཡི་ཕྱིར་ན་བདག་ཅག་རྣམས། །འོད་ཟེར་གྱིས་ནི་འཚལ་ཏེ་མཆིས། །བཅོམ་ལྡན་བདག་ལ་བཤད་དུ་གསོལ། །དེ་ནས་ཕྱག་ན་རྡོ་རྗེ་གནོད་སྦྱིན་གྱི་བདག་པོ་ཆེན་པོས་རྣལ་འབྱོར་མ་སྣ་ཚོགས་སྡེ་མ་ལ་འདི་སྐད་ཅེས་གསོལ་ཏོ། །ནོར་རྒྱས་ལ་སོགས་བདག་ཉིད་ཆེ། །ཀླུ་རྣམས་ཅི་ཕྱིར་དགུག་པ་ལགས། །རྣལ་འབྱོར་ཆེན་པོ་བདག་ལ་གསུངས། །དེ་ནས་སྣ་ཚོགས་སྡེ་མའི་སྙིང་གི་འོད་ཟེར་གྱིས་ཀླུ་ཐམས་ཅད་ཀྱི་སྙིང་ཀ་དང་སྤྱི་བོའི་མཐར་ཐུག་པར་ཞུགས་ཏེ། ཚིམ་པར་བྱས་ནས་སླར་ལོག་གོ། །དེ་ནས་ཀླུ་དེ་རྣམས་ཐམས་ཅད་ཀྱིས་ཕྱག་འཚལ་ཏེ། འདི་སྐད་ཅེས་གསོལ་ཏོ། །ལྷ་མོ་བཀའ་ནི་ཅི་ཞིག་གསོལ། །ཀྱཻ་ལགས་ཇི་ལྟ་བུ་ཞིག་བགྱི། །གསུངས་པ། མུ་སྟེགས་ལ་སོགས་མཁའ་ལྡིང་སྔགས། །ཡེ་ཤེས་ལས་བྱུང་ཇི་ལྟ་བུ། །དུས་སུ་ཟིན་པ་ཇི་ལྟར་ཡིན། །ཇི་ལྟར་དུག་ནི་སྐྱེ་བར་འགྱུར། །སྦྲུལ་གྱིས་ཟིན་པ་ཙམ་གྱིས་ནི། །སླར་ཡང་སེམས་ཅན་འཆི་འགྱུར་ཞིང ། །ཞུས་པ། ཁྱབ་འཇུག་དབང་ཕྱུག་སོགས་ལྷ་དང ། །ཚངས་པ་ཚངས་པ་མདུན་ན་འདོན། །དེ་རྣམས་ལ་ནི་འཆི་འཕོ་མཆིས། །དུག་གི་ཉེས་པས་གནོད་པར་འགྱུར། །དེ་ལྟར་དུས་སུ་ཟིན་ཅེས་སྨྲ། །སྦྲུལ་གྱི་དུས་སུ་ཟིན་ཅེས་སྨྲ། །སྦྲུལ་གྱི་དུག་ནི་སེལ་བ་མེད། །དེ་བཞིན་སྦྲུལ་ལ་དུག་ནི་ཡོད། །སྦྲུལ་ཟིན་འཚོའམ་མི་འཚོ་བ། །བདེ་བྱེད་ལ་སོགས་རྫུ་འཕྲུལ་ཆེའི། །ལྷ་དེ་རྣམས་ནི་དེ་ལྟར་སྨྲ། །སྟོན 87.134b པ་སྟོང་ཉིད་ངེས་གསུང་བ། །བཅོམ་ལྡན་རྡོ་རྗེ་འཆང་བས་གསུངས། །ཆོས་རྣམས་ཐམས་ཅད་སྟོང་པ་ལ། །སྦྲུལ་གྱི་དུག་ནི་ཇི་ལྟར་ཡོད། །གང་གིས་འཛིན་ཅིང་གང་ཞིག་འཛིན། །དུས་དང་དུས་མིན་ཇི་ལྟར་འགྱུར། །ཇི་ལྟར་སྤྱོད་ཅིང་ཇི་ལྟར་བསྡུ། །གང་ཕྱིར་འཛིན་ཅིང་གང་དུ་འཛིན། །སེམས་ཅན་དུག་ཟིན་མི་འཆི་བ། །སྟོང་ཉིད་སྨྲ་བའི་ངེས་པ་ཡིན། །འདོད་ཆགས་གཏི་མུག་སྟོང་པ་ཉིད། །གྲགས་ཆེན་ཡུལ་ནི་སྟོང་པ་ཉིད། །ཡུལ་གྱི་རང་བཞིན་དྲི་མ་མེད། །དྲི་མ་དང་བྲལ་ཇི་ལྟར་དུག་།སྦྲུལ་གྱིས་ཀྱང་ནི་ཅི་ཞིག་བྱེད། །ཐ་མལ་པ་ཡི་ཡུལ་ནི་སྦྲུལ། །ཡུལ་གྱི་ཉེས་པ་དུག་ཉིད་དོ། །ལྷ་རྣམས་ཡུལ་རྣམས་ཀྱིས་ནི་བསྒྲིབས། །ཐམས་ཅད་དུས་སུ་ཟིན་པ་ཡིན། །ཡུལ་གྱི་ཉེས་པ་སྦྱངས་པ་ཉིད། །སྟོན་པ་ལོངས་སྤྱོད་གོས་མི་འགྱུར། །སངས་རྒྱས་ཐོད་པའི་རྣལ་འབྱོར་པས། །འདོད་ཀུན་ཉེ་བར་ལོངས་སྤྱོད་བྱ། །རི་སྐེགས་སྦྱོར་བ་རྙེད་དཀའ་དང ། །སངས་རྒྱས་ཐོད་པའི་སྦྱོར་ལྡན་པས། །འདིར་ནི་ཀླུ་རྣམས་ཐམས་ཅད་བླགས། །དེ་ཕྱིར་རབ་ངེས་ལྷ་མོ་ཀྱཻ། །དུས་ཟིན་ཐེ་ཚོམ་མེད་པ་རུ། །བློ་མེད་མུ་སྟེགས་ཅན་དེ་སྨྲ། །འདི་ལྟར་སྨྲས་ཏེ་ཀླུ་རྣམས་ཀྱིས། །སྣ་ཚོགས་སྡེ་ལ་ཕྱག་འཚལ་ཏེ། །རང་རང་གི་ནི་གནས་སུ་དོང ། །དེ་ནས་བཅོམ་ལྡན་འདས་མས་ཡུལ་གྱི་ཉེས་པ་སྤོང་བའི་སྔགས་གསུངས་པ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སཝ་བྷཱ་བ་ཨཱཏྨ་ཀོ\ུ0f85ཧཾ། སྟོང་དང་སྟོང་མིན་མཐའ་དག་བཅས། །སྒྱུ་མ་རྨི་ལམ་ལྟ་བུར་གཅིག་།འཇིག་རྟེན་མཐའ་དག་བརྫུན་གྱིས་བཅིངས། །ཀྱཻ་ལགས་བཤེས་མོ་འདི་ལྟར་ལྟོས། །དེ་ནས་ཕྱག་ན་རྡོ་རྗེ་གནོད་སྦྱིན་གྱི་བདག་པོ་ཆེན་པོས་བཅོམ་ལྡན་འདས་མའི་ཞབས་ལ་སྤྱི་བོས་གཏུགས་ཏེ། འདི་སྐད་ཅེས་གསོལ་ཏོ། །རི་སྐེགས་སྦྱོར་བ་རྙེད་དཀའ་བ། །ལྷ་མོ་ཡིས་ནི་བཤད་དུ་གསོལ། །སེམས་ཅན་དོན་ལ་གཅིག་ཏུ་འབད། །དེ་རུ་བདག་ལ་ལྟད་མོ་མཆིས། །གསུངས་པ། །དཀྱིལ་འཁོར་མེད་པར་སྦྱིན་མི་བྱ། །སློབ་མ་བསྡུ་བར་མི་བྱའོ། །གཙོ་བོས་ཇི་ལྟར 87.135a གསུངས་པ་ཡི། །དཀྱིལ་འཁོར་ལས་ནི་སྨྲ་བར་བྱ། །མཐོ་ལྔ་པ་ཡི་ས་བཟུང་སྟེ། །ཁོར་ཡུག་དུ་ནི་གྲུ་བཞིའོ། །དེ་ཡི་ཕྱེད་ཀྱི་ཟླུམ་པོ་ལ། །བརྒྱད་ལས་འདམ་སྐྱེས་འདབ་མ་བརྒྱད། ། ོཾ་ཧཱུཾ་ཧྲཱིཿ ཧཱུཾ་ཁཾ་ཧཱུཾ་ཨ་ཧཱུཾ་ཏིཥྛ་ཏིཥྛ་བཛྲ་ས་མ་ཡ་ཨ་དྷིཥྛ་ཡེད། ས་སྦྱང་བའི་སྔགས་སོ། །བཛྲ་ཧེ་རུ་ཀ་བཛྲ་ས་མ་ཡ་ཧྲི་སརྦྦ་དུཥྚ་ས་མ་ཡ་མུ་ཏྲ་པྲ་བན་ཛ་ཧ་ཧཱུཾ་རུ་ལུ་རུ་ལུ་བྷྱོ་ཧཱུཾ་ཧཱུཾ་ཕཊ། ས་སྦྱང་བའི་དུས་སུ་གཏོར་མ་གཏང་བའི་སྔགས་སོ། །ོཾ་སརྦྦ་ཏ་ཐཱ་ག་ཏ་ཨ་དྷིཥྛ་ན་ཨི་དམ་སཱུ་ཏྲ་ཏིཥྛ་མཱ་ཙ་ལ་ཧེ་ཧེ་བུད་དྷ་ཀ་པཱ་ལ་བཛྲ་ཧེ་རུ་ཀ་ཧཱུཾ་ཧཱུཾ་ཋ་ཋ། སྔགས་འདིས་ལན་བདུན་དུ་སྲད་བུ་ལ་མངོན་པར་བསྔགས་པར་བྱའོ། །ཐིག་སྐུད་ཀྱི་སྔགས་སོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །ཁ་ཁྱེར་སྣམ་བུ་སྤངས་པ་ལ། །བ་དན་རྣམ་པ་བརྒྱད་ཀྱིས་བརྒྱན། །སངས་རྒྱས་ཐོད་པའི་སྦྱོར་བ་ཡིས། །རྡུལ་ཚོན་གཞན་དང་འདྲེས་མེད་པའི། །རྡུལ་ཚོན་དམར་པོར་རྫོགས་པར་བྱ། །དེ་རུ་བུམ་པ་བཞི་པོ་རྣམས། །གྲཝ་དང་གྲཝ་རུ་རྣམ་པར་བཞག་།བུམ་པར་མཚན་མ་བྲི་བྱ་བ། །ཐོད་པ་དང་ནི་ཁ་ཊྭཱཾ་ག་།གྲི་གུག་དང་ནི་ཅང་ཏེའུ་དང ། །ཅང་ཏེའུ་གནས་སུ་རྡོ་རྗེ་བྲི། །རྡོ་རྗེའི་སྟེང་དུ་འདམ་སྐྱེས་ཏེ། །དེ་ལྟར་བུམ་པར་བྲི་བྱས་ནས། །ཆུ་ཡིས་ཡོངས་སུ་དགང་བར་བྱ། །བུམ་པ་ལ་ནི་རས་ཀྱིས་བརྒྱན། །རིན་ཆེན་རྣམ་པ་ལྔ་གཞུག་ཅིང ། །བུམ་པར་ཀུན་ནས་འབྲུ་ལྔ་དང ། ། མྲའི་ལྕུག་མས་དགབ་པར་བྱ། །དེ་ནས་འོ་མའི་སྣོད་བཞག་སྟེ། །རྡོ་རྗེ་སློབ་དཔོན་བློ་ཆེན་གྱིས། །སངས་རྒྱས་ཐོད་པའི་སྦྱོར་དང་ལྡན། །པད་མའི་སྟེང་དུ་ཉི་མ་སྟེ། །ཉི་མའི་སྟེང་དུ་ཧཱུཾ་ཡིག་བསམ། །ཧཱུཾ་གྱུར་པ་ལས་རྡོ་རྗེ་ནི། །སྔོན་པོ་ཧཱུཾ་གི་བདག་ཉིད་སྐྱེས། །ཧཱུཾ་དང་རྡོ་རྗེ་གྱུར་དཔའ་བོ། །ཧེ་རུ་ཀ་ནི་བདག་ཉིད་ཆེ། །སྐུ་མདོག་སྔོན་པོ་ཕྱག་བཞི་པ། །གཙོ་བོ་ཆེན་པོ་ཞལ་གཅིག་པ། །གཡས་ན་གྲི་གུག་ཐོད་པ་སྟེ། ། 87.135b གཡོན་ན་ཁ་ཊྭཱཾ་རྡོ་རྗེའོ། །སྐུ་ལ་མི་ཡི་རུས་པས་བརྒྱན། །ཀླུ་རྣམས་སྐྲག་པར་བྱེད་པ་པོ། །སྐྱིལ་དཀྲུང་ཕྱེད་པའི་གར་གྱིས་བཞུགས། །གཅེར་བུ་འཇིགས་བྱེད་རང་བཞིན་ཏེ། །ཞལ་གྱི་མཆེ་བ་ཅུང་ཟད་གཙིགས། །དབུ་སྐྲ་སེར་ཞིང་གྱེན་དུ་འབར། །ཐོད་པས་སྤྱི་བོ་བརྒྱན་བྱས་པ། །ས་འོག་བདུན་ནི་འཁྲུག་པར་བྱེད། །དཔའ་བོ་དེ་ལྟར་བསམ་པར་བྱ། །ཕྱིས་ནི་ཕྱོགས་ཀྱི་འདབ་མ་ལ། །ོཾ་དང་ཧཱུཾ་དང་ཁཾ་དང་སཝ། །ཡི་གེ་ཡོངས་སུ་གྱུར་པ་ལས། །རྣལ་འབྱོར་མ་ནི་རྣམ་པ་བཞི། །སྣ་ཚོགས་སྡེ་མ་འདོད་ཅན་མ། །ས་འོག་གནས་མ་རབ་བཟང་མ། །ལྷ་མོ་དེ་དག་མདོག་སྔོན་མོ། །གྲགས་ཆེན་ཞལ་གཅིག་ཕྱག་བཞི་མ། །ཉི་མའི་དཀྱིལ་འཁོར་རྣམ་པར་བཞུགས། །གཡོན་བརྐྱང་བ་ཡི་ཞབས་ཀྱིས་བཞུགས། །གཡས་ན་གྲི་གུག་ཐོད་པ་འཛིན། །གཡོན་ན་ཁ་ཊྭཱཾ་ཅང་ཏེའུ། །རུས་རྒྱན་ལྷ་མོ་ཀུན་འཇིགས་མ། །ཞལ་གྱི་མཆེ་བ་ཅུང་ཟད་གཙིགས། །སྟག་གི་ལྤགས་པའི་ན་བཟའ་མནབས། །སྐྲ་ནི་སེར་པོ་གྱེན་དུ་འབར། །ཐོད་པའི་ཕྲེང་བས་སྤྱི་བོར་བརྒྱན། །དེ་རྣམས་མགོ་རྒྱུས་ཕྲེང་བ་ཅན། །ལྷ་མོའི་འོད་ཟེར་སྤྲོས་གྱུར་པས། །ཀླུ་རྣམས་སྐྲག་པར་མཛད་པ་མོ། །ཕྱོགས་ཀྱི་འདབ་བཞུགས་ཆེར་བཞད་མའོ། །བློ་ལྡན་མཚམས་ཀྱི་འདབ་བཟང་ལ། །ཉི་མ་བཞི་ལ་ཧཱུཾ་ཡིག་བཞི། །ཧཱུཾ་ཡིག་སོ་སོར་གྱུར་པ་ལས། །ཆང་འཚོང་མ་དང་འབྱུང་པོ་མ། །བཞིན་བཟང་ནམ་མཁར་འགྲོ་མ་སྟེ། །མཚམས་ཀྱི་འདབ་མར་གནས་ལྷ་མོ། །ཁ་དོག་སེར་མོ་གྲགས་ཆེན་མོ། །ཐམས་ཅད་ན་བཟའ་སེར་མོ་མནབས། །གཡས་བརྐྱང་བ་ཡི་ཞབས་ཀྱིས་གནས། །ཞལ་གཅིག་མ་ལ་ཕྱག་བཞི་མ། །ཀླུ་བརྒྱད་བརྒྱན་བྱས་ལྷ་མོ་ནི། །གཡས་ན་གྲི་གུག་ཅང་ཏེའུ་འཛིན། །གཡོན་ན་ཁ་ཊྭཱཾ་ཐོད་པའོ། །སྐུ་ལས་འོད་ཟེར་སེར་པོ་འཕྲོ། །ཤིན་དུ་སྒེག་པའི་ཉམས་དང་ལྡན། །ཅུང་ཟད་མཆེ་བ་གཙིགས་པའི་ཞལ། །ཐམས་ཅད་གར་བྱེད་སྐྲ་སེར་མ། །ཀླུ་རྣམས་སྐྲག་པར་སྐྱེད་བྱེད་མ། །མཚམས་ཀྱི་ཆ་རུ 87.136a རྣམ་པར་གནས། །དེ་ནས་བསམ་པར་བྱ་བ་ནི། །སློབ་དཔོན་ཧེ་རུ་ཀས་རང་གི་ལུས་ལས་སྐྱེས་པའི་འོད་ཀྱིས་ཕྱོགས་བཅུར་བཞུགས་པའི་དེ་བཞིན་གཤེགས་པ་རྣམས་ལ་ཡང་དག་པར་རེག་པར་བྱས་ནས་སླར་ལོག་སྟེ། དེ་བཞིན་གཤེགས་པ་རྣམས་ལ་ཡང་དག་པར་རེག་པའི་འོད་ཟེར་ལས་ལྷ་མོའི་ཚོགས་ཡང་དག་པར་སྤྲོས་པས་ཧེ་རུ་ཀ་དང་རྣལ་འབྱོར་བརྒྱད་ལྷན་ཅིག་ཏུ་བཀྲུས་སོ། །བཀྲུས་པ་ཙམ་གྱིས་དེ་བཞིན་གཤེགས་པ་རྣམས་ཅོད་པན་དུ་གྱུར་ཏོ། །དཀྱིལ་འཁོར་རྫོགས་པར་མཐོང་ནས་ནི། །སློབ་དཔོན་བདག་ཉིད་ཆེན་པོ་ཡིས། །ཕྱིས་ནི་གཏོར་མ་བཏང་བར་བྱ། །ཁྱད་པར་དུ་ནི་འོ་མའོ། །སངས་རྒྱས་ཐོད་པའི་སྦྱོར་ལྡན་པའི། །ཤེས་རབ་ཅན་གྱིས་ཆང་བཏུང་ཞིང ། །མར་མེ་བཞི་ནི་དབུལ་བར་བྱ། །འབྲས་བུ་བཞི་ཡང་དབུལ་བྱ་ཞིང ། །དེ་ནས་སློབ་མ་བློ་ཆེན་གྱིས། །རས་ཟུང་གསུམ་ནི་དབུལ་བར་བྱ། །དེར་ནི་གདན་ཡང་བསྟབ་པར་བྱ། །སློབ་དཔོན་བདག་ཉིད་ཆེན་པོ་ཡིས། །དེ་རུ་རྣལ་འབྱོར་མ་མཆོད་དོ། །བློ་གྲོས་ཆེན་པོ་ཐུགས་དགྱེས་པས། །སྣ་ཚོགས་ཟས་དང་སྣ་ཚོགས་སྐོམ། །དཔའ་བོ་རྣལ་འབྱོར་མ་ཚིམ་བྱ། །མགུ་བར་སེམས་པའི་ཡིད་ཀྱིས་ནི། །འཁོར་ལོ་ཁྱད་པར་ཆེ་བྱ་སྟེ། །ཕྱིས་ནི་སློབ་དཔོན་བརྩེ་ཆེན་བདག་།ཕྱི་རོལ་ས་རུ་བྱུང་ནས་ནི། །བདེ་བ་ཡི་ནི་གདན་བཞུགས་ཏེ། །སློབ་མས་མཎ་ཌལ་གསུམ་བྱས་ལ། །ཞབས་ལ་སྤྱིས་གཏུགས་འདི་སྐད་གསོལ། །སྟོན་པ་བཅོམ་ལྡན་བླ་མ་ཀྱཻ། །སེམས་ཅན་དོན་ལ་གཅིག་བརྩོན་པ། །ནམ་མཁའ་ལྡིང་བཟང་སྦྱོར་བ་དང ། ཤ་རི་ཀ་ཡི་སྦྱོར་བ་འཚལ། །དུས་སུ་ཟིན་པ་བཟློག་པ་ཡིན། །སེམས་ཅན་དོན་ནི་བཟང་པོ་འཚལ། །སངས་རྒྱས་ཐོད་པའི་རྣལ་འབྱོར་པས། །སྟོན་པ་ཆེན་པོས་དེ་དག་གསུངས། །བདག་གི་ཐེ་ཚོམ་བཟློག་པ་དང ། །སེམས་ཅན་དོན་ནི་མཐར་ཐུག་བགྱི། །བརྟན་པ་དང་ནི་རྒྱུ་བ་དང ། །ཡན་ལག་སྐྱེས་དང་བཅོས་མ་ཡི། །དུག་རྣམས 87.136b དུག་མེད་པར་བགྱི་ཞིང ། །སེམས་ཅན་ཐམས་ཅད་འཚོ་བགྱི་བ། །བླ་མ་ཆེན་པོ་དེ་དག་གསུངས། །དེ་ནས་སློབ་དཔོན་བརྩེ་བ་ཡིས། །བྱིན་གྱིས་བརླབ་པའི་ཐུགས་ཀྱིས་ནི། །ཁྲག་འཐུང་གོ་འཕང་གནས་པ་ཡི། །སློབ་མ་ལ་ནི་སོ་ཤིང་སྦྱིན། །སོ་ཤིང་སྔགས་ནི་སྦྱིན་པར་བྱ། །ོཾ་ཧཱུཾ་ཧེ་བྷ་ག་བ་ཏི་མུ་ཁཾ་པ་རི་ཤུད་དྷཾ་ཀུ་རུ་སཝཱ་ཧཱ། ལན་བདུན་མངོན་པར་བསྔགས་བྱས་ལ། །སོ་བྲུད་ནས་ནི་ཁ་བཤལ་ཏེ། །སློབ་མ་ལྷག་པར་གནས་པར་བྱ། །རང་གི་ལག་པ་བྱུག་བྱ་ཞིང ། །མེ་ཏོག་གིས་ཀྱང་དཀྲི་བར་བྱ། །མགྲིན་པ་ལག་པར་ཟླ་བ་བསམ། །ཟླ་བའི་ཟེར་གྱིས་ཕྱོགས་བཅུ་ཡི། །སངས་རྒྱས་སྤྱན་དྲངས་གདོན་མི་ཟ། །སངས་རྒྱས་ཚོགས་ཀུན་ཟླ་བར་བལྟ། །གྲགས་ཆེན་ཐམས་ཅད་རབ་ཞུགས་ཤིང ། །ཟླ་བ་ཞུ་བར་གདོན་མི་ཟ། །སློབ་དཔོན་བསྒོམས་པའི་ནུས་པ་ཡིས། །སློབ་མའི་མགོ་རུ་ལག་བཞག་སྟེ། །ལྷག་པར་གནས་པའི་གསང་སྔགས་བཟླས། །ོཾ་སརྦྦ་བུདྡྷ་ཨ་ཏྲ་ཨ་མུ་ཀ་སྱ་ཀཱ་ཡ་མ་དྷིཥྛ་ན། ཡན་དུ་མཱ་ཙ་ལ་མཱ་ཙ་ལ་ཏིཥྛ་ཏིཥྛ་ཧ་ར་ཧ་ར། བི་དྷ་ར་བི་དྷ་ར། དྷ་ར་ཏྲ་བ་ཏྲ་བ་བྷོ་བྷ་ག་ཝཱན་ཏ་སརྦྦ་བུདྡྷ་ཀ་པཱ་ལི་བཛྲ་སྱ་ཀ་ཏཾ་མ་ལ་ཡ་ཤཱི་གྷྲཾ་ཀུ་རུ་ཀུ་རུ་ཧཱུཾ་ཧཱུཾ་ཧ་ཧ། སྔགས་འདིས་ལན་བདུན་དུ་བཟླས་པས་ལྷག་པར་གནས་པར་བྱའོ། །སངས་རྒྱས་དེ་དག་ཐམས་ཅད་ཀྱིས་དེའི་ལུས་ལ་ཡང་དག་པར་བྱིན་གྱིས་རློབ་པར་འགྱུར་རོ། །ལྷག་པར་གནས་པ་ཙམ་གྱིས་རྫུ་འཕྲུལ་ཆེན་པོའི་ཀླུ་རྣམས་སྐྲག་ཅིང་དུག་གི་བུམ་པ་ཡང་འདོར་རོ། །ནོར་རྒྱས་ལ་སོགས་པའི་ཀླུ་སྟོབས་པོ་ཆེ་རྣམས་དཔྱོད་པར་འགྱུར་རོ། །ེ་མའོ་སངས་རྒྱས་ཀྱིས་གསུངས་པའི། །ལྷག་པར་གནས་པ་ཙམ་གྱིས་ནི། །འདི་ལྟའི་སྡུག་བསྔལ་ཐོབ་འགྱུར་ན། །མཁའ་ལྡིང་རྟོགས་པའི་སེམས་ཅན་གྱིས། །བདག་ནི་ཇི་ལྟར་འགྲོ་བར་འགྱུར། །དེ་མ་ཐག་ཏུ་སློབ་དཔོན་གྱིས། །དཀྱིལ་འཁོར་ནང་དུ་མེ་ཏོག་ནི། །རྣམ་པ་སྣ་ཚོགས་དབུལ་བར་བྱ། །སྣ་ཚོགས་སྤོས་དང་ལྷ་བཤོས་དབུལ། །དུང་ཆོས་ཟངས་ཆོས་སྣོད་དག་ནི། ། 87.137a མན་ཇིའི་སྟེང་དུ་གཞག་པར་བྱའོ། །མཆོད་ཡོན་གྱིས་ནི་དོན་ཆེད་དུ། །བུམ་པ་རྣམས་ལ་ལྷག་གནས་བྱ། །ཁྲག་འཐུང་གོ་འཕང་གནས་པ་ཡིས། །རྣལ་འབྱོར་མ་བརྒྱད་བསྐོར་བ་ཡི། །ཁྲག་འཐུང་རྣམ་པར་སྤྱན་དྲངས་ཏེ། །དཀྱིལ་འཁོར་ཇི་བཞིན་ཡང་དག་ལྡན། །མདོག་དང་མཚན་མར་ལྡན་པ་ཡི། །དེ་བཞིན་གཤེགས་རྣམས་ས་བོན་གྱི། །འོད་ཟེར་གྱིས་ནི་རྣམ་པར་བསམ། །བདག་ཉིད་ཆེན་པོ་གྲགས་ཆེན་པོ། །བུམ་པ་རུ་ནི་ཞུགས་ཙམ་གྱིས། །དམ་ཚིག་དཀྱིལ་འཁོར་ཞུ་བར་འགྱུར། །རྣལ་འབྱོར་ལྡན་པའི་སེམས་དང་ནི། །སློབ་དཔོན་གྱིས་ནི་འདི་ལྟར་བལྟ། །དེ་ནས་ཟངས་མའི་སྣོད་དུ་ཆུ་བླུགས་ཤིང་དུང་ཕོར་ཆུས་བཀང་སྟེ། མན་ཇའི་སྟེང་དུ་གཞག་པར་བྱའོ། །ཡང་ཕྱིར་བྱུང་ནས་སློབ་མའི་དོན་དུ་བདག་ཉིད་ཀྱིས་རས་ཀྱིས་མིག་དགབ་པར་བྱའོ། །རས་གསུམ་གོན་པར་གྱུར་པའི་སློབ་མ་ཕྱིས་དཀྱིལ་འཁོར་གྱི་སྒོར་བཞག་ལ་ཆུས་གཏོར་ཏེ་སྔགས་བཟླའོ། ། བྷི་ཥིཉྩནྟུ་མཱཾ་སརྦ་ཡོ་གི་ནི་མ་ཀུ་ཏོ་ཨ་ཏྲ་ཨ་ཏིཥྛ་ཡནྟུ་ཨ་ཙནྟུ་ཧཱུཾ་སཝཱ་ཧཱ། ཅོད་པན་བྱིན་གྱིས་བརླབ་པའི་སྔགས་སོ། །དེ་ནས་སློབ་དཔོན་གྱིས་ཀྱཻ་ཁྱོད་སུ་ཞེས་སྨྲའོ། །སློབ་མས་བདག་ནི་རྒྱལ་བའི་སྲས་ཞེས་སྨྲའོ། །དེའི་རྗེས་སུ་དཀྱིལ་འཁོར་གྱི་དབུས་སུ་མེ་ཏོག་ལན་གསུམ་དུ་གཏོར་ལ། མིག་རས་བསལ་ཏེ། དཀྱིལ་འཁོར་མཆོད་པར་བྱའོ། །ོཾ་ཧེ་རུ་ཀ་བཛྲ་པུཥྤ་ཡཾ་པྲ་ཏཱིཙྪ་ཧཱུཾ། ་དབུས་སུའོ། །ོཾ་ཙི་ཏྲ་སེ་ནཱ་པུཥྤ་ཡཾ་པྲ་ཏཱིཙྪ་ཧཱུཾ། ཤར་དུའོ། །ོཾ་ཀཱ་མི་ནཱི་པུཥྤ་ཡཾ་པྲ་ཏཱིཙྪ་ཧཱུཾ། ལྷོའིའོ། །ོཾ་པ་ཏཱ་ལ་བཱ་སི་ནི་པུཥྤ་ཡཾ་པྲ་ཏཱིཙྪ་ཧཱུཾ། ་ནུབ་དུའོ། །ོཾ་སུ་བྷ་དྲེ་པུཥྤ་ཡཾ་པྲ་ཏཱིཙྪ་ཧཱུཾ། བྱང་དུའོ། །ོཾ་ཤོཎྜི་ནི་པུཥྤ་ཡཾ་པྲ་ཏཱིཙྪ་ཧཱུཾ། ་་མེར་རོ། །ོཾ་བུདྡྷཱི་ནི་པུཥྤ་པྲ་ཏཱིཙྪ་ཧཱུཾ། བདེན་བྲལ་དུའོ། །ོཾ་ཙ་ཏུ་ར་བྷ་དྲ་པུཥྤ་པྲ་ཏཱིཙྪ་ཧཱུཾ། ་་རླུང་ངོ ། །ོཾ་ཨཱ་ཀཱ་ཤ་བྷ་སི་ནི་པུཥྤ་པྲ་ཏཱིཙྪ་ཧཱུཾ། ་དབང་ལྡན་དུའོ། །དེ་ནས་དཀྱིལ་འཁོར་གྱི་ལྷའི་སྐུ་མདོག 87.137b ཇི་ལྟ་བ་དང ། མཚན་མ་ལ་སོགས་པ་དེ་བཞིན་དུ་སློབ་མ་ལ་བསྟན་པར་བྱའོ། །ཡང་དུང་ཕོར་བླངས་ཏེ་ཆུ་བཏུང་བར་བྱའོ། །དེ་འཐུངས་པ་ཙམ་གྱིས་ཀླུ་ཐམས་ཅད་སྐྲག་ཅིང་སྐྱོ་བས་དུག་སྐྱུགས་པར་འགྱུར་རོ། །བརྟན་པ་དང་གཡོ་བའི་དུག་གང་ཡིན་པ་དང ། གཞན་ཡང་སྦྱར་བ་དང ། ཉེ་བར་སྦྱར་བའི་དུག་གང་ཡིན་པ་དང ། མདའ་དུག་དང ། བྱུག་པའི་དུག་དང ། དགྲ་རྣམས་ཀྱིས་གང་སྦྱར་བ་དང ། བུད་མེད་རྣམས་ཀྱིས་གང་སྦྱར་བའི་དུག་དེ་རྣམས་ཉེ་བར་འཕོ་བར་འགྱུར་རོ། །གལ་ཏེ་ཀླུ་ཡིས་ཟིན་པ་ཡང ། །དེ་རུ་དེ་ནི་ངེས་པར་འགྲོ། །གཞན་ཡང་སྦྲུལ་གྱི་དུག་ཀྱང་རུང ། །ཆུ་ནི་འཐུངས་པ་ཙམ་གྱིས་ཀྱང ། །དེ་དག་ཐམས་ཅད་འཆི་བར་འགྱུར། །དེ་ཡི་ཕྱིར་ན་དུག་གི་ཆུ། །འདི་རུ་བཏུང་བར་ཐེ་ཚོམ་མེད། །དེ་ནས་སློབ་མ་དྲི་བར་བྱ། །འདིར་ནི་ཤ་ལི་ཀར་བྱེད་ཅིང ། །མཁའ་ལྡིང་ཤེས་པའི་སློབ་དཔོན་འགྱུར། །བསམ་པ་རྣམ་པར་དག་ཤེས་ནས། །ཕྱིས་ནི་བཀས་གནང་སྦྱིན་པར་བྱ། །སྟོང་ངམ་བརྒྱ་རུ་གསོལ་བ་གདབ། །དེ་ནས་སྔགས་ཀྱི་མན་ངག་སྦྱིན། །ཇི་སྲིད་སྦྲུལ་གྱིས་ཟིན་དུས་དང ། །ཇི་སྲིད་མཁའ་ལྡིང་རིགས་ཡོད་པར། །དེ་སྲིད་དེ་དང་དེ་ལས་ཀྱང ། །ཇི་སྲིད་དུས་སུ་ཟིན་མེད་པར། །སངས་རྒྱས་ཐོད་པའི་རྣལ་འབྱོར་པས། །དེ་སྲིད་འབད་རྩོལ་བྱ་བ་མིན། །དུས་ཟིན་འཆི་བའང་ཤེས་བྱ་སྟེ། །ནམ་མཁའ་ལྡིང་གི་བྱ་བ་བྱ། །དུས་སུ་ཟིན་ནོ་ཞེས་སྨྲ་བ། །དེ་སྲིད་རྣལ་འབྱོར་ཆེ་འདི་ཡིས། །དེ་རུ་ལས་ནི་བརྩམ་པར་བྱ། །བདག་ཉིད་ཧེ་རུ་ཀར་གྱུར་ཅིང ། །རྣལ་འབྱོར་མ་བརྒྱད་ཡང་དག་ལྡན། །བློ་ལྡན་སྔོན་གསུངས་གསང་སྔགས་ཀྱིས། །ཕྱིས་ནི་གཏོར་མ་སྦྱིན་པར་བྱ། །དེར་རྗེས་དཀྱིལ་འཁོར་བྱས་ནས་ནི། །སྔོན་དུ་གསུངས་པའི་གསང་སྔགས་ཀྱིས། །གནས་དགུ་རུ་ནི་མཆོད་པར་བྱ། །མཁས་པ་ཡིས་ནི་མཆོད་བྱས་རྗེས། །མཉམ་པར 87.138a བཞག་པས་ལས་རྣམས་བརྩམ། །གང་དུ་རྫུ་འཕྲུལ་ཆེ་ཀླུ་ཡང ། །དེ་རུ་སེམས་བཟང་འོད་ཟེར་སྤྲོ། །ཀླུ་རྣམས་ཀྱི་ནི་སྙིང་སྐམས་པས། །ཅི་ཞིག་བགྱིའོ་ཞེས་ནི་སྨྲ། །གསུངས་པ། ལྷ་མོ་སྣ་ཚོགས་སྡེ་མ་ཡིས། །སངས་རྒྱས་ཐོད་པར་སྔོན་དུ་གསུངས། །ཀྱེ་ཀྱེ་གྲགས་པ་ཆེ་བའི་ཀླུ། །སོང་སྟེ་འདིར་དུས་ཟིན་གྱུར་པའི། །དུས་ཟིན་འཛིན་པ་བཟུང་བ་མེད། །དུག་མེད་སྦྲུལ་ཡང་མེད་པའོ། །གང་ཕྱིར་དོགས་པས་རྨོངས་གྱུར་པ། །དེ་ཕྱིར་སྐྱེ་བོ་རྣམས་འཆིར་འགྱུར། །དེ་ནས་འོད་ཟེར་སླར་ལོག་སྟེ། །སྙིང་ག་རུ་ནི་ཐིམ་པར་འགྱུར། །ཡང་ནི་སེམས་ནི་མཉམ་བཞག་པའི། །སློབ་དཔོན་གྱིས་ནི་ངོ་མཚར་བསྟན། །དེ་ནས་ས་ལ་མ་ལྷུང་བའི་ལྕི་བ་བླངས་ཏེ་འདབ་ཆགས་རི་སྐེགས་གཉིས་བྱ་ཞིང་སྣོད་དཀར་པོ་བྱས་ཏེ། རོ་བསྲེགས་པའི་སོལ་བ་ལ་གཞག་པར་བྱའོ། །རོ་བསྲེགས་པའི་སོལ་བ་ལས་སྣག་ཚ་བྱས་ཏེ། སེམས་ཅན་གྱི་དོན་རིག་པས་དབེན་པར་སྔགས་བྲི་བར་བྱའོ། །ོཾ་བུདྡྷ་ཀ་པཱ་ལི་ནི་ཧྲི་ཏཊྛ་བ་ཡ་བྷོ་ཤ་ལི་ཀ་ན་ཨ་ན་ཡ་ནཱ་བུདྡྷ་ཀ་པཱ་ལ་བཛྲ་སྱ་ཨཱ་ཛྙཱ་མ་ལཾ་གྷ་ཡ་ཧཱུཾ་ཧཱུཾ་ས་རནྟུ་སརྦྦ་ད་ཌཱི་ཀ་ཕ་ཏི་ཀ་ཙེ་ཏེ། མནྡྷྱ་གྷི་དི་སརྦྦ་ཛི་ཨི་ན་སུ་ནནྟི་བ་ཡ་ག་རེ་རེ་ཀར་ཀོ་ཊ་ཀ་པྲ་བྷི་ཏ་ཡ་ནཱ་ག་རཱ་ཛ་ན་་སྤུ་ཏནྟི་མུརྡ་ན་རེ་རེ་ས་སྤྱ། ཨ་བ་ས་སྤྱ་མ་ཙ་ལ་ཧ་མ་བུ་ལ་ཧ་ཛ་ཨི་ཙ་ལ་ཧ་བུ་ལ་ཧ་རེ་རེ་བྷ་རུ་ཀྲི་པྲ་བྷི་ཏ་ཡ་ནཱ་ག་རཱ་ཛ་ན་ཨུ་ཧ་པུ་ཊ་ཊ་མུ་དྷི་པྲ་ན་ཛ་ཨི་ཞེས་པ་ནི་ཤ་ལི་ཀའི་སྙིང་པོའི་སྔགས་སོ། །དེ་ནས་བློ་ཆེན་རྣལ་འབྱོར་པས། །སེམས་ནི་ཤིན་དུ་མཉམ་བཞག་པས། །ཡོངས་རྫོགས་ཤ་ལི་ཀ་བྱས་ལ། །ཕོ་དང་མོ་རུ་བརྟག་པར་བྱ། །སྣག་ཚ་ཡིས་ནི་བྲི་བར་བྱ། །མིག་གི་སྔོན་དུ་མི་གཞག་ཅིང ། །ཤ་ལི་ཀ་བཟང་ཕྱོགས་བལྟ། །དེ་ནས་ལྕུག་མ་སྔགས་ཀྱིས་བསྔགས། །ོཾ་ཧཾ་ཧ་ལ་ཁྱབ་འཇུག་གི་ས་བོན་ནོ། །ོཾ་བཾ་ཚངས་པའི་ས་བོན་ནོ། །ོཾ་སཾ་ཞེས་པ་ནི་ཞི་བྱེད་ཀྱི་ས་བོན་ནོ། །ོཾ་ཧ་ཧ་ཧ་ཧ་ཧ་ཧ་ཧཾ། མངག་པའི་སྔགས་སོ། །འདི་ལྟ་བུ་ཡི 87.138b སྔགས་ཀྱི་མཆོག་།སྟོང་གསུམ་ན་ཡང་རྙེད་པར་དཀའ། །ལན་བདུན་བསྔགས་པ་ཙམ་གྱིས་ནི། །འགྲོ་བར་འདིར་ནི་ཐེ་ཚོམ་མེད། །ཀླུ་རྣམས་སྐྲག་པར་བྱེད་པ་ཡི། །མཁའ་ལྡིང་ཉམས་དགའ་སོང་ནས་ནི། །ཀླུ་ཡི་གནས་སུ་ཞུགས་དེའི་ཚེ། །མཁའ་ལྡིང་བྱེ་བའི་སྟོབས་དང་ལྡན། །རིངས་ནས་ཀྱང་ནི་གཤོག་རླུང་གིས། །སྟོབས་པོ་ཆེ་ཡི་ཀླུ་རྣམས་སྐྲག་།མཐོ་རིས་མི་ཡུལ་ས་འོག་དང ། །གང་ཡང་གཞན་ན་གནས་པ་དང ། །གཞན་ཡང་རུང་སྟེ་དེ་ཐམས་ཅད། །སྐྲག་ནས་ཅི་བགྱི་ཞེས་ནི་སྨྲ། །ཀླུ་གང་གིས་ཟིན་པ་དེ་གལ་ཏེ་ཡང་ཤི་ན། བདག་ཉིད་ཆེན་པོ་ཤ་ལི་ཀ་མཐོང་མ་ཐག་ལོང་བར་འགྱུར་རོ། །ཀླུ་དང་སྦྲུལ་དེ་དག་གིས་ཤ་ལི་ཀ་ལ་འདི་སྐད་གསོལ་ཏོ། །ཀྱཻ་ཤ་ལི་ཀ་གཞན་དུ་གསུང་བར་མ་མཛད་ཅིག་།དེ་ལྟར་ཐོས་ནས་ཤ་ལི་ཀ་མགུ་བའི་སེམས་ཀྱིས་དུག་གིས་ཟིན་པའི་མདུན་དུ་སྦྲུལ་ལོང་བ་ཁྱེར་ཏེ་འཇོག་གོ། །དེ་ནས་སློབ་དཔོན་གྱིས་བལྟས་ཏེ། སའི་གོང་བུ་བླངས་ལ་ཤ་ལི་ཀ་མངག་པའི་སྔགས་ཀྱིས་སྦྲུལ་ལོང་བ་ལ་བསྣུན་ན། །སྐད་ཅིག་དེ་ཉིད་ལ་དེའི་མིག་འབྱེ་བར་འདིར་སོམ་ཉི་མེད་དོ། །དུས་སུ་ཟིན་པ་འགྱེལ་ཏེ་ཤི་བ་སྦྲུལ་གྱིས་མཐོང་ནས་དེའི་ལུས་ལ་འགྲོ་བ་དང་འོང་བར་བྱེད་པས་དུས་སུ་ཟིན་པ་དུག་མེད་པར་འགྱུར་ཞིང ། དགའ་བའི་སེམས་ཀྱིས་ལྡང་ངོ ། །ཟིན་པ་ལངས་པ་ཙམ་ཉིད་ན་ཤ་ལི་ཀས་སྦྲུལ་བཟུང་སྟེ་མི་སྣང་བར་འགྱུར་རོ། །སྐོད་ཅིག་མ་དེ་ཉིད་ལ་སློབ་དཔོན་གྱིས་སྟོང་པ་ཉིད་ཀྱི་ཡེ་ཤེས་སྒོམ་པར་བྱའོ། །སྟོང་པ་དྲི་མེད་ཀུན་རང་བཞིན། །ཆོས་རྣམས་སྟོང་པའི་རང་བཞིན་ཀྱཻ། །གང་གིས་འཛིན་ཅིང་གང་ཞིག་འཛིན། །མཐའ་དག་སྒྱུ་མའི་རང་བཞིན་ཀྱཻ། །དངོས་པོ་མ་ལུས་པ་མཐའ་དག་དང་དུག་ཀྱང་སྟོང་པ་ཉིད་དུ་སངས་རྒྱས་ཐོད་པའི་རྒྱུད་ལས་གསུངས་ཏེ། ཞག་ཉི་ཤུ་རྩ་གཅིག་གི་མཐར་ཐུག་པར་ཇི་སྲིད་དུ་ལུས་མ་ཞིག་པ་དེ་སྲིད་དུ་སློབ་དཔོན་གྱིས་ཡང་དག་པར་བརྩམ་པར་བྱའོ། །དེ་ལྟར་སློབ་མ་ལ་རྗེས་སུ་གནང་བ་བྱིན་ནས་ཕྱིས་ལུང་བསྟན་པར་བྱའོ། །དེས་ལན་བརྒྱའམ་སྟོང་དུ་གསོལ་བ་བཏབ་ནས། དུག་འཇོམས་པའི་སྔགས་བསྟན་པར་བྱའོ། ། ོཾ 87.139a བུདྡྷ་ཀ་པཱ་ལི་ནི་ཨ་ཧཱུཾ། ་དུག་བཟའ་བའི་སྔགས་སོ། །དེ་ནས་གཞན་ཡང་དོན་དུ་གཉེར་བའི་སེམས་ཅན་དེ་རྣམས་ཐམས་ཅད་ལ་དཀྱིལ་འཁོར་བསྟན་ཏེ། དུང་ཕོར་གྱི་ཆུ་འཐུངས་པ་དེས་ན་དུག་མེད་པར་འགྱུར་ཏེ། སྦྲུལ་གྱིས་མ་འཛིན་ནོ། །གལ་ཏེ་འཛིན་ན་དེའི་ཚེ་ཀླུ་འཆི་བར་འདིར་ཐེ་ཚོམ་མེད་དོ། །དེ་ལྟར་སློབ་མ་ཤ་ལི་ཀའི་སྦྱོར་བ་ལ་མངོན་པར་བརྩོན་པ་ལ་བཀས་གནང་བ་བྱིན་ཏེ། གྲོང་གང་དུ་གནས་པ་དེར་དུག་གིས་འཛིན་པ་མེད་དོ། །གལ་ཏེ་ཡོད་ན་དེའི་ཚེ་ཀླུ་འཆི་བར་འགྱུར་རོ། །དེ་ལྟར་ཐོས་ནས་སློབ་མ་རྡོ་རྗེའི་སྦྱོར་བ་དང ། ་་ལྡན་པའི་སེམས་ཀྱིས་གང་ཅི་ཡང་རུང་བའི་ཡོན་དེར་དབུལ་བར་བྱའོ། །དེ་ནས་ཕྱི་རོལ་གྱི་སར་བྱུང་སྟེ་གཏོར་མ་བཏང་བར་བྱའོ། །དེ་ནས་སློབ་དཔོན་གྱིས་དཀྱིལ་འཁོར་གྱི་སྔགས་ཀྱིས་གཤེགས་སུ་གསོལ་ཏེ། ཨོཾ་བུདྡྷ་ཀ་པཱ་ལི་ནི་ཧྲཱྀ་ཨུ་ཏཥྛ་གཙྪ་ཧཱུཾ་གཙྪ་ཧཱུཾ་ཕཊ། དཀྱིལ་འཁོར་གཤེགས་སུ་གསོལ་བའི་སྔགས་སོ། །དེ་ནས་ཡང་དག་བཤད་པར་བྱ། །ཆུ་ཡི་སྦྱོར་བ་བླ་མེད་པ། །གང་གིས་བྱིན་པ་ཙམ་གྱིས་ནི། །དུག་གིས་ཟིན་པ་འཚོ་བར་འགྱུར། །ཉི་མ་བདུན་ན་འཆི་བ་དང ། །གཞན་ཡང་དུག་གིས་ཉམས་པ་རྣམས། །ཆུ་ནི་བྱིན་པ་ཙམ་གྱིས་ནི། །འདི་རུ་འཚོ་བར་ཐེ་ཚོམ་མེད། །སྔགས་འདིས་དཀྱིལ་འཁོར་བྱས་ནས་ནི། །གནས་དགུ་རྣམས་སུ་མཆོད་པར་བྱ། །དུང་ཕོར་ཆུ་ཡིས་བཀང་བྱས་པ། །དཀྱིལ་འཁོར་དབུས་སུ་གཞག་པར་བྱ། །དེ་ནས་བརྩེ་བ་ཆེན་པོ་ཡི། །བདག་ཉིད་རྣལ་འབྱོར་པ་ཡིས་ནི། །རང་གི་ལག་པ་གཡོན་པ་ལ། །ཟླ་བ་ཡི་ནི་ཁྱད་པར་བསམ། །བཅུ་དྲུག་ཆ་ལས་ཡོངས་རྫོགས་པའི། །དྲི་མེད་དགེ་བའི་ལུས་ཅན་ཏེ། །དེའི་དབུས་ས་བོན་མི་ཤིགས་དགེ་།ཁ་དོག་དཀར་པོའི་ལུས་ཅན་ནོ། །ལག་དེས་སྣོད་ཀྱི་ཁ་བཅད་དེ། །དེ་ནས་གསང་སྔགས་བཟླ་བར་བྱ། །ོཾ་སརྦྦ་བི་ཥ་ཧ་ར་ཧ་ར་ཧཱུཾ་ཧཱུཾ་ཕཊ་ཕཊ་སཝཱ་ཧཱ། སྔགས་འདིས་ལན་བདུན་གྱི་བར་དུ་མངོན་པར་བསྔགས་ཏེ། མི་ཤིགས་པ་དང་ལྷན་ཅིག་ཟླ་བ་ཞུ་བར་གྱུར་ནས་ཆུའི་ནང་དུ་ཐིམ་སྟེ། ཆུ་དང་ཟླ་བ་གཅིག་ཏུ 87.139b འདྲེས་པས་ཤིན་དུ་དཀར་པོར་འགྱུར་རོ། །གལ་ཏེ་དུག་གིས་ཟིན་པ་མ་ཤི་ན་དེའི་ཆེ་ཆུ་བླུད་དོ། །ཡང་ན་ཤི་བ་ཡིན་ན་མགོ་ནས་རྐང་པའི་མཐར་ཐུག་པར་ལན་གསུམ་གསུམ་དུ་ཆུ་རྒྱུན་མི་ཆད་པར་བླུགས་ན་ལངས་པར་འདིར་ཐེ་ཚོམ་མེད་དོ། །དེ་ནས་ཆུ་བླུད་ན་རྣལ་མར་འགྱུར་རོ། །སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་ཏུ་གསང་བ་ཞེས་བྱ་བ་ལས་ཤ་ལི་ཀའི་སྦྱོར་བ་དང ། ཆུའི་སྦྱོར་བའི་ལེའུ་སྟེ་བཞི་པའོ།། །། དེ་ནས་ཡང་དག་རབ་བཤད་པ། །ཤིན་དུ་རྙེད་དཀའི་བཅུད་ལེན་ལེའུ། །དེ་བཞིན་གཤེགས་པའི་སྙིང་པོ་མཆོག་།རྣལ་འབྱོར་མ་ཡི་གོང་ན་མེད། །གཞོན་ནུ་མ་དང་ཤ་རི་ཀ་།གྲུབ་མ་བྱིས་པ་ཅན་མ་དང ། །དེ་བཞིན་ཐོད་བཟངས་ཅན་མའོ། །འདི་དག་སྨན་ནི་ཆེན་པོ་ལྔ། །སངས་རྒྱས་ལས་ཀྱང་རྙེད་པར་དཀའ། །འདི་དག་ཟོས་པ་ཙམ་གྱིས་ནི། །བསྐལ་པ་བྱེ་བར་དེ་འཚོའོ། །གཞོན་ནུ་མ་ནི་ཟླ་དྲུག་ཏུ། །དེ་བཞིན་ཤ་རི་ཀ་ཟླ་གསུམ། །གྲུབ་མ་ཟླ་བ་གཅིག་ཏུའོ། །བྱིས་ཅན་མ་ནི་ཟླ་ཕྱེད་གཉིས། །ཐོད་པ་ཅན་ཡང་ཟླ་བར་ཏེ། །ཚེ་འཕེལ་བ་ཡི་མཆོག་ཡིན་ནོ། །བྱ་རོག་མ་ནི་བྱ་རོག་གཟུགས། །གླང་པོ་མ་ནི་ངང་པའི་གཟུགས། །དྲོད་མ་དྲོད་ཀྱི་གཟུགས་ཅན་ཏེ། །སྔོ་བསངས་དཀར་མོ་སྔོན་མོའི་མིག་།ཁ་སྦྱར་སྦྱོར་བའི་དུས་སུ་ནི། །མིག་ལས་བྱུང་བའི་རྫས་གང་ཡིན། །སྨན་དེའི་མིང་ནི་གཞོན་ནུ་མ། །འདི་རུ་བསྟན་པར་སོམ་ཉེ་མེད། །དེ་ཡི་པད་མ་ལས་བྱུང་རྫས། །རྩ་ཡི་ནང་ན་རྣམ་པར་གནས། །གེ་སར་སྦས་པའི་སྤྱོད་ཡུལ་ཏེ། །སྨན་ནི་ཤ་རི་ཀ་རུ་གསུངས། །མེ་ཏོག་ལྡན་པའི་བུ་མོ་གང ། །ཁ་དོག་ནག་མོས་རབ་མཛེས་མ། །གང་དུ་ཐབས་ཤེས་གཉིས་འདུས་པ། །དེ་ཡི་ཁ་སྦྱོར་སྦྱོར་ལས་བྱུང ། །སྨན་དེའི་མིང་ནི་གྲུབ་མར་བཤད། །སངས་རྒྱས་ཐོད་པའི་སྦྱོར་བ་ཡིས། །བུད་མེད་རབ་མཛེས་མ་ཉམས་དང ། །དབང་པོ་གཉིས་ཀྱི་སྦྱོར་བ་ཡིས། །མི་ཕྱེད་ཉེ་བར་སྤྱད་པ་ཡི། ། 87.140a དེ་ལས་དང་པོར་བྱུང་བའི་རྫས། །སྨན་དེ་བྱིས་པ་ཅན་ནོ་ཞེས། །བདག་ཉིད་ཆེན་པོའི་ལྷ་མོས་གསུངས། །ལྷན་གཅིག་སྐྱེས་དག་བྱུང་བའི་རྫས། །མཆོག་ཆེན་མར་ཁུ་དག་དང་ནི། །བསྲེ་འགྱུར་འདིར་ནི་ཐེ་ཚོམ་མེད། །སྨན་དེའི་མིང་ནི་ཐོད་ཅན་མོའོ། །ཟླ་བ་ཉི་མའི་སྦྱོར་བ་ཡིས། །བྱ་བར་འདིར་ནི་ཐེ་ཚོམ་མེད། །ཟླ་བས་ཟླ་བར་ཉི་མས་ཉིར། །དེ་ལུས་སྐྲ་དཀར་གཉེར་མ་ཞི། །ཇི་སྲིད་སངས་རྒྱས་བཞུགས་ཀྱི་བར། །དེ་ཡི་ཚེ་ནི་རྒྱས་པར་འགྱུར། །སྨན་འདི་གྲུབ་པ་ཙམ་གྱིས་ནི། །དག་པའི་ལུས་སུ་འབྱུང་བར་འགྱུར། །དངོས་པོ་གང་དང་གང་ཡང་རུང ། །ལྕགས་དང་ཟངས་མའི་སྣོད་དག་ལ། །དངུལ་ནི་བྱུགས་པ་ཙམ་གྱིས་ནི། །དངུལ་དང་གསེར་དུ་འགྱུར་བ་ཡིན། །དེ་ནས་ཡང་དག་རབ་བཤད་པ། །དགོངས་བཤད་ཤིན་དུ་རྙེད་དཀའ་བ། །རྒྱུད་གཞན་དུ་ནི་རབ་སྦས་པ། །འབད་པས་དེ་འདིར་རབ་གསལ་བྱ། །དྲི་ཆུ་ཡེ་ཤེས་རྡོ་རྗེ་སྟེ། །དྲི་ཆེན་རྡོ་རྗེ་བཟང་པོ་ཉིད། །ཁྲག་ནི་མར་མེ་རྡོ་རྗེ་ཡིན། །ཁུ་བ་རྡོ་རྗེའི་ཐབས་བྱུང་ཉིད། །ཤ་ནི་ཆོས་ཀྱི་རྡོ་རྗེ་ཡིན། །དེ་ལྔ་རྣལ་འབྱོར་མ་ཡི་མཆོག་།གང་གི་དམ་ཚིག་རྙེད་དཀའ་བའི། །ཐབས་འདིར་བདག་གིས་བཤད་པར་བྱ། །བ་ལང་ཤ་ནི་འབར་བ་སྟེ། །ཁྱི་ཡི་ཤ་ལ་སྤྲོ་བར་གསུངས། །རྟ་ཡི་ཤ་ལ་བཟའ་བར་བཤད། །གླང་པོའི་ཤ་ལ་ཞུ་བར་གསུངས། །ཤ་ཆེན་ལ་ནི་བཟང་པོར་བཤད། །དེ་ལྔ་རྣལ་འབྱོར་མཆོག་ཏུ་གསུངས། །རྣལ་འབྱོར་རྣལ་འབྱོར་མ་ལྡན་པར། །གལ་ཏེ་གཅིག་ཏུ་བྱེད་ནུས་པ། །དེ་ཚེ་རྣམ་རྟོག་དེ་ཐམས་ཅད། །འཇིག་འགྱུར་འདིར་ནི་ཐེ་ཚོམ་མེད། །ཟན་ལ་བསོད་ནམས་ཞེས་བྱ་སྟེ། །ཚོད་མ་ལ་ནི་སྡིག་པ་ཉིད། །རོ་ལ་ཤིན་ཏུ་རྙེད་དཀའ་གསུངས། །བྱིས་པ་ལ་ནི་འགལ་བ་ཉིད། །གཡུང་མོ་ལ་ནི་བཟང་མོར་གསུངས། །རུས་པའི་ཕྲེང་ལ་རྫས་ཞེས་བྱ། །སྐྱེས་བུ་ལ་ནི་རྡོ་རྗེར་གསུངས། །བུད་མེད་ལ་ནི་སྣོད་བཟང་ཉིད། །དབང་པོ་གཉིས་ཀྱི་རབ་སྦྱོར་ལ། །གཟི 87.140b བརྗིད་ཕྲེང་ཆེན་དེ་བཤད་དོ། །རབ་ཆགས་ཤིན་ཏུ་མཐོང་བ་ཉིད། །འཁྱུད་པ་ལ་ནི་ཆོས་ཞེས་བརྗོད། །འདྲི་བ་ལ་ནི་མར་མེའོ། །ཤིན་དུ་འདྲི་ལ་མེ་ཞེས་བྱ། །འགྲོ་བ་ལ་ནི་ཕྲེང་ཅན་མ། །འོང་ལ་ཤིན་ཏུ་ཕྲེང་ཅན་མ། །མྱུར་བ་ལ་ནི་བྱུག་ཅེས་བྱ། །དཔའ་བ་ལ་ནི་བཟང་དེ་བརྗོད། །པད་མ་རྩེ་འཇོ་ཕྲེང་ཅན་མ། །སྔགས་ཀྱིས་མཚན་མ་རབ་ངེས་ཞེའོ། །ལྗག་ལ་ལྕེ་འོག་ཅེས་བྱ་སྟེ། །སོ་ལ་བཟའ་བ་སྣ་ལ་བདེ། །མིག་ལ་རོལ་རྩེད་མུ་ཏིག་རྣ། །གསང་བའི་ཡུལ་ལ་རྙེད་དཀའ་ཞེའོ། །འདི་དག་བཤད་དོ་ལག་ཆེན་པོ། །འཇིག་རྟེན་གསུམ་ན་རབ་རྙེད་དཀའ། །སངས་རྒྱས་ཐོད་པའི་རྣལ་འབྱོར་པ། །མེད་པར་ཕན་ཚུན་སྨྲ་མི་བྱ། །འོན་ཀྱང་བཤད་ཆེན་དེ་ཉིད་འདི། །གཅིག་ལ་གཅིག་གིས་སྨྲ་བར་བྱ། །རྒྱུད་རྣམས་ཐམས་ཅད་དུ་སྦས་པ། །རྒྱུད་འདི་རུ་ནི་གསལ་བར་བྱས། །ཉེ་འདུན་གྲོང་མཐའ་ལྷན་ཅིག་ཞེའོ། །འདུས་པ་ཕྱི་རོལ་ཞེས་སུ་གསུངས། །ཉེ་བའི་འདུས་པ་ནང་དེ་བཞིན། །གནས་ལ་འབྲས་བུ་ཞེས་སུ་གསུངས། །ཉེ་བའི་གནས་ལ་ཤིང་ཉིད་དོ། །གྲོང་མཐའ་ལ་ནི་ས་བོན་གསུངས། །ཉེ་བའི་གྲོང་མཐའ་མྱུ་གུའོ། །ཚོགས་པ་ལ་ནི་སྡོང་བུར་གསུངས། །གཅིག་པུ་ལ་ནི་འདབ་མ་སྟེ། །སྟོང་པ་ལ་ནི་རྩ་བཞིའོ། །དེ་ལྟར་དགོངས་པས་བཤད་པ་ནི། །བདེ་གཤེགས་རྣམས་ཀྱིས་མི་མཁྱེན་ནོ། །སྤྱན་མ་ལ་སོགས་རྣལ་འབྱོར་མ། །རྣམས་ཀྱི་ཁོང་དུ་མི་ཆུད་ཅིང ། །བྱང་ཆུབ་སེམས་དཔའི་ཡུལ་མིན་ཞིང ། །བླ་མ་གུས་པའི་རྣལ་འབྱོར་པས། །སྤྲོས་པ་ཐམས་ཅད་སྤངས་ནས་ནི། །རྫས་ལ་ཆགས་པར་མི་བྱའོ། །ཤིན་དུ་སྟོང་སྒོམ་རྣལ་འབྱོར་པ། །འདོད་ཆགས་ཞེ་སྡང་ཕྲག་དོག་མེད། །གཏི་མུག་དང་ནི་ང་རྒྱལ་སྤངས། །ཉོན་མོངས་ཐམས་ཅད་རྣམ་པར་སྤངས། །ཟ་འཐུང་དེ་བཞིན་གླུ་ལེན་ན། །ཤིན་དུ་སྤྲོས་པ་སྤངས་བར་བྱ། །བདེ་བས་དགའ་བ་ཉིད་དང་ནི། །ཤེས་རབ་ཐབས་ཀྱིས་བདག་ཉིད་གསུངས། །བླ་མེད་དེ་ཉིད་ཟླ་ཕྱེད་ཀྱིས། །འགྲུབ་པར་ཐེ་ཚོམ་མེད་པའོ། །ཀྱཻ་ལགས་གྲོགས་མོ་འགྲོ་ཀུན 87.141a གང ། །མཐའ་དག་དྲི་མ་མེད་པ་ཡི། །བལྟ་དང་བྲལ་ལ་སྐྱེ་བོ་ལྟོས། །གསོག་གསོབ་རང་བཞིན་བརྫུན་བསླུ་བ། །པད་རྩའི་གྲིབ་མ་ལྟ་བུར་ལྟོས། །དབང་པོ་ལྔ་ནི་སྒྱུ་འདྲ་ཞིང ། །ལྔ་ཕུང་དག་པའི་རང་བཞིན་གྱིས། །རྣལ་འབྱོར་འདི་ནི་བསྒོམས་པས་འགྲུབ། །སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་དུ་གསང་བ་ཞེས་བྱ་བ་ལས་སྨན་བཟང་པོ་དང ། དགོངས་པ་བཤད་པའི་ལེའུ་སྟེ་ལྔ་པའོ།། །། དེ་ནས་ཡང་དག་རབ་བཤད་པ། །དཀྱིལ་འཁོར་འཇིགས་པ་མཆོག་གསང་བར། །ཐབས་དང་ཤེས་རབ་སྒྲུབ་པ་ཡིས། །གང་གིས་སློབ་མ་དབང་བསྐུར་བ། །ཤེས་རབ་པད་མའི་ནང་དབུས་སུ། །དཔག་ཚད་བྱེ་བའི་དཀྱིལ་འཁོར་ལ། །གསུམ་རྩེགས་དག་པའི་བདག་ཉིད་ལུས། །འཁོར་བའི་འཇིགས་པ་ལས་སྐྱོབ་པ། །དཀྱིལ་འཁོར་དེ་ཡི་དབུས་གནས་པར། །མཁས་པས་སློབ་མ་བཟང་དབང་བསྐུར། །གལ་ཏེ་བྱང་ཆུབ་བླ་མེད་འདོད། །ཕྱི་ཡི་དཀྱིལ་འཁོར་བྱ་བ་མིན། །ལྷ་རྣམས་བཤིག་པ་ཙམ་གྱིས་ནི། །སྡིག་པ་ཆེན་པོ་སྐྱེ་བར་འགྱུར། །དེས་ན་རྡུལ་ཚོན་ཙམ་གྱིས་ནི། །དེ་བཞིན་ལྷ་རྣམས་དག་མི་འགྱུར། །རྡོ་རྗེ་འཁོར་ལོ་རིན་ཆེན་དང ། །དེ་བཞིན་པད་མ་རལ་གྲི་ཉིད། །བྱས་ནས་སླར་ཡང་འཇིག་བྱེད་པ། །སྐྱེས་བུ་ཐ་ཤལ་དམྱལ་བར་འགྲོ། །གང་གིས་སངས་རྒྱས་སྤྱན་དྲངས་ཤིང ། །གང་གིས་གཤེགས་སུ་གསོལ་བ་ཡིས། །རྡོ་རྗེ་སེམས་དཔའ་བྱོན་པ་དང ། །དེ་བཞིན་གཤེགས་པ་བྱོན་པ་རྣམས། །གང་ནའང་བྱོན་པ་མ་ཡིན་ནོ། །དྲི་མ་མེད་ཅིང་དག་པའི་ལུས། །གང་གིས་སྤྱན་དྲངས་གཤེགས་སུ་གསོལ། །དེ་ཉིད་ཀྱིས་ན་བརྟག་མེད་པར། །དེ་བཞིན་གཤེགས་པ་རྣམས་ཕྱག་བྱ། །ལོ་བཅུ་གཉིས་པའི་བུ་མོ་ནི། །ཚུལ་ཁྲིམས་མ་ཉམས་ཆགས་ཆུང་བའི། །ཐོས་དང་ལྡན་ཞིང་གྲགས་ཆེན་མོ། །ནད་མེད་སྙིང་རྗེ་དང་ལྡན་མ། །སེམས་ཅན་དོན་ལ་གཅིག་ནན་ཏན། ། 87.141b དགོད་ཅིང་པད་མའི་སྤྱན་དང་ལྡན། །ཟླ་བའི་ཆ་འདྲ་གདོང་མཛེས་མ། །མུ་ཅོར་མི་སྨྲ་བརྟན་ཞིང་དུལ། །དེས་ན་སློབ་མ་བློ་ཆེན་པོ། །ཤིན་དུ་དད་པའི་སེམས་དང་ལྡན། །འདོད་མེད་དབང་པོ་དུལ་བ་དང ། །ཆགས་དང་ཆགས་བྲལ་རྣམ་པར་སྤངས། །སེམས་ཅན་དོན་ལ་ཤིན་ཏུ་སྦྱོར། །གཏི་མུག་ཞེ་སྡང་ཕྲག་དོག་སྤངས། །སངས་རྒྱས་ཀུན་གྱིས་བྱིན་གྱིས་བརླབས། །དེ་རྣམས་ལ་ནི་དེ་ཉིད་བཤད། །གསང་བ་ཕྱི་ཡི་ལྔ་དང་ནི། །བདུན་དང་བཅུ་བཞིར་བཤད་པ་དང ། །གཉི་ག་གཅིག་ཏུ་འདུས་པའོ། །གསང་བའི་དེ་ཉིད་བཤད་པར་བྱ། །སློབ་མ་ལེགས་དང་ལྡན་པ་དང ། །བརྩེ་ལྡན་སེམས་གཞན་མེད་པ་ཡིས། །གསེར་ནི་འབུམ་ཕྲག་བཅུ་དྲུག་དང ། །ས་གཞི་ཡུལ་འཁོར་ལྡན་པ་དང ། །གླང་པོ་བུད་མེད་དམ་པ་དང ། །རལ་གྲི་འཁོར་ལོ་རྟ་དང་ནི། །ཡོངས་འདྲེན་སྐྱེས་བུ་རིན་ཆེན་རྣམས། །སྦྱོར་དང་ལྡན་པའི་སེམས་ཀྱིས་ནི། །དེར་ནི་བླ་མ་དབུལ་བར་བྱ། །ཤིན་ཏུ་དྲི་མེད་སེམས་ཀྱིས་ནི། །དེ་ནས་འདིར་ནི་གསོལ་བ་གདབ། །འཁོར་བའི་འདམ་དུ་བྱིང་བ་བདག་།དཔུང་གཉེན་ཁྱོད་ཀྱིས་བསྒྲལ་དུ་གསོལ། །བདག་ནི་རྩོལ་ཆུང་སྐལ་དམན་ཞིང ། །སངས་རྒྱས་ཆོས་ནི་རྣམ་པར་སྤངས། །ཀྱེ་ཀྱེ་སྟོན་པ་བླ་མ་ཆེ། །མགོན་པོ་ཁྱོད་ཀྱིས་བརྩེ་བར་མཛོད། །དེ་ལྟར་གསོལ་འདེབས་ཚིག་གསན་ནས། །དེ་རུ་བླ་མ་མི་གསུངས་བཞུགས། །མན་ངག་འདི་ཡི་ཆ་དག་ནི། །གླེགས་བམ་རྣམས་ལས་སྤྱོད་ཡུལ་མིན། །དཀྱིལ་འཁོར་གང་ལ་གང་གིས་བརྒྱན། །མཚན་མའི་དོན་གཞན་གར་བཀོད་ཀྱེ། །སུ་ཡིས་སངས་རྒྱས་སྤྱན་དྲངས་ཀྱེ། །འགྲོ་བ་བརྫུན་འདྲའི་སོམ་ཉིར་ལྷུང ། །མཐའ་དག་སྟོང་པ་གོས་མེད་ཀྱེ། །ཆུ་ནང་ཟླ་བ་ཅི་འདྲ་བ། །དེ་འདྲའི་དཀྱིལ་འཁོར་པད་དབུས་གནས། །ཀྱེ་ལགས་རྣལ་འབྱོར་མ་ཚོགས་ལྟོས། །དེར་ནི་ཧེ་རུ་ཀ་གཅིག་དང ། །ཐམས་ཅད་སྐྱེད་པར་བྱེད་པ་ཡིན། །འགྲོ་ཀུན་རྨི་ལམ་བསླུ་བས་ན། །གཏི་མུག་ལས་ནི་བསྐྱེད་པ་ལྟོས། །སངས་རྒྱས་ཐོད་པའི་རྒྱུད་རྣལ 87.142a འབྱོར་མའི་གོང་ན་མེད་པ་གསང་བའི་ཡང་ཤིན་དུ་གསང་བ་ལས་དཀྱིལ་འཁོར་འཇིགས་པ་བྲི་བ་དང ། སློབ་མ་དབང་བསྐུར་བའི་ལེའུ་སྟེ་དྲུག་པའོ།། །། དེ་ནས་ཡང་དག་རབ་བཤད་པ། །རི་དང་ཕུག་དང་ཚང་ཚིང་ངམ། །ཡང་ན་དུར་ཁྲོད་དག་ན་ནི། །གདོད་ནས་གྲུབ་པའི་གནས་སུ་འམ། །འོན་ཏེ་རྒྱ་མཚོའི་འགྲམ་དག་ཏུ། །ཕྱིའི་དཀྱིལ་འཁོར་བླ་མེད་བྲི། །རྡུལ་ཚོན་སྔོན་པོ་ནི་རོ་སྲེགས་པའི་སོལ་བ་ལས་བྱའོ། །རྡུལ་མཚོན་དམར་པོ་ནི་དུར་ཁྲོད་ཀྱི་སོ་ཕག་ལས་བྱའོ། །རྡུལ་ཚོན་ལྗང་ཁུ་ནི་ནིམ་པའི་མདབ་མ་ལས་བྱའོ། །རྡུལ་ཚོན་དཀར་པོ་ནི་མིའི་རུས་པའི་ཕྱེ་མ་ལས་བྱའོ། །རྡུལ་ཚོན་སེར་པོ་ནི་ཡུང་བའི་ཕྱེ་མ་ལས་བྱའོ། །དེ་ལྟར་རྡུལ་ཚོན་ལྔ་རྣམས་ཀྱིས། །མཁས་པས་དཀྱིལ་འཁོར་བྲི་བར་བྱ། །ཕོ་བྲང་རིགས་གསུམ་ཟླུམ་པོ་ལ། །རྡོ་རྗེ་གསུམ་གྱིས་ཡོངས་སུ་བསྐོར། །ཕྱི་རོལ་གྲུ་བཞི་ལྷམ་པ་ཡི། །སྒོ་བཞིར་རྟ་བབས་རྣམས་ཀྱིས་བརྒྱན། །བ་དན་རྣམ་པ་བཞི་ཡིས་བརྒྱན། །དྲ་བ་དྲ་བ་ཕྱེད་པས་སྤྲས། །ཕྱི་རོལ་ཁ་ཁྱེར་དག་པ་དང ། །རིན་ཆེན་ཕ་གུར་ཡང་དག་ལྡན། །པད་མ་ཉི་ཤུ་ཉི་ཤུ་ལྔའི། །གདན་རྣམས་ཀྱིས་ནི་ཤིན་ཏུ་མཛེས། །དེ་ཡི་དབུས་ཆུད་ས་བོན་ནི། །ཡིག་གེ་ཧཱུཾ་གི་རང་བཞིན་སྔོ། །སྐད་ཅིག་ཙམ་གྱིས་ཧེ་རུ་ཀ་།སྐུ་མདོག་སྔོན་པོ་གྲགས་ཆེན་པོ། །གཡས་ན་ཅང་ཏེའུ་གྲི་གུག་སྟེ། །གཡོན་ན་ཁ་ཊྭཱཾ་ཐོད་པའོ། །དཀྱིལ་དཀྲུང་ཕྱེད་པས་འཇིགས་ཆེན་པོ། །ཞལ་གྱིས་མཆེ་བ་ཅུང་ཟད་གཙིགས། །རལ་པའི་ཅོད་པན་གྱིས་བརྒྱན་ཅིང ། །སངས་རྒྱས་ལྔ་ཡི་ཅོད་པན་ཅན། །དབུ་ལ་སྣ་ཚོགས་རྡོ་རྗེ་མནན། །ཟླ་བ་ཕྱེད་པ་འཛིན་པའི་ལྷ། །སྐུ་ལ་ཐལ་བའི་རྡུལ་གྱིས་བྱུགས། །དཔའ་བོ་ཕྱག་བཞི་ཕྱག་མཚན་འཆང ། །ཤིན་དུ་ཧཱུཾ་སྒྲོགས་འཇིགས་བྱེད་པ། །གར་གྱི་སྟབས་ཀྱིས་རྣམ་པར་བཞུགས། །མགོ་བོ་རློན་པའི་ཕྲེང་བ་ཅན། །མཆོད་ཕྱིར་ཐོད་པ་འཆང་བ་པོ། །ཐོད་པ་གཏི་མུག་རྣམ་དག་པ། ། 87.142b ཕྲེང་བ་བརྒྱུད་པས་བརྒྱན་པའི་ལྷ། །མགུལ་དོ་དང་ནི་འཁོར་ལོ་དང ། །རྐང་རྡུབ་དང་ནི་དཔུང་བརྒྱན་དང ། །གདུབ་བུ་སྐེད་པའི་སྐ་རགས་དང ། །དཔའ་བོ་རྣ་ཆ་མཆོག་གིས་བརྒྱན། །འདི་འདྲའི་གཟུགས་ཅན་གཙོ་བོ་ནི། །ཧཱུཾ་ཞེས་ཟློས་པར་བྱེད་པའོ། །དེ་ལས་བྱུང་བའི་རྣལ་འབྱོར་མ། །ཉི་ཤུ་རྩ་བཞིའི་བདག་ཉིད་རྣམས། །སྐུ་མདོག་སྔོན་མོ་གྲགས་ཆེན་མོ། །ཤིན་ཏུ་འཇིགས་པའི་གཟུགས་ཅན་མ། །ཞལ་གཅིག་ཕྱག་གཉིས་ཐོད་པ་འཆང ། །སོ་སོ་ཡི་ནི་མིང་ཇི་བཞིན། །དེ་རྣམས་མིང་ནི་རབ་ཏུ་བཤད། ཕྲེང་བཟངས་མ། འདོད་ཅན་མ། འཇིགས་མ། ཐུབ་དཀའ་མ། དགེ་བའི་སྐ་རགས་ཅན་མ། གཟུགས་ཅན་མ། རྣམ་རྒྱལ་མ། འབྱུང་གནས་མ། ཐོད་ཅན་མ། མཚོ་ཆེན་མ། བྱེད་མ། གསོད་མ། སྒྲོལ་མ། འཇིགས་མ། མཐོང་མ། མི་ཕམ་མ། དགེ་མ། འཛུར་བྱེད་མ། དུས་མཚན་མ། གྲགས་ཆེན་མ། མཛེས་སྡུག་མ། ནོར་འཛིན་མ། སྐལ་བཟང་མ། གྲགས་མཐོང་མའོ། །འདི་ལྟ་བུའི་དཀྱིལ་འཁོར་མཆོག་།ཁ་དོག་རྣམ་པ་ལྔ་ཡིས་བརྒྱན། །དེའི་དབུས་གནས་ལྷ་མོ་ནི། །ཧེ་རུ་ཀ་ལ་བདེ་སྟེར་མ། །དཀྱིལ་དཀྲུང་ཕྱེད་པའི་གར་བྱེད་མ། །མི་ཡི་རུས་པའི་ཕྲེང་བས་བརྒྱན། །ལྷ་མོ་འོད་ཟེར་དཔག་དཀའ་ཞིང ། །སྐྲ་སེར་གྱེན་དུ་འབར་བ་སྟེ། །ཧཱུཾ་གི་བདག་ཉིད་ལས་སྐྱེས་འཇིགས། །ཞལ་ནས་ཁྲག་ནི་མཐོར་བྱེད་མ། །དཀར་མོ་ནག་མོ་ལྗང་ཁུ་མ། །ཐམས་ཅད་ཁུ་བ་ལྡན་གྱུར་མ། །ལྷའི་དཀྱིལ་འཁོར་བསྐྱེད་པ་ནི། །ཉི་ཤུ་རྩ་བཞིའི་བདག་ཉིད་གསུངས། །བདག་ཉིད་ཧེ་རུ་ཀ་གཟུགས་ལ། །ཉི་ཤུ་རྩ་བཞིའྀ་ལྷ་མོས་མཆོད། །ཐོད་པ་བདུད་རྩི་ལྔས་བཀང་བ། །ཧེ་རུ་ཀ་ཡིས་བཏུང་བར་བྱ། །དེ་ཡིས་འཐུངས་པ་ཙམ་གྱིས་ནི། །འགྲོ་བའི་བླ་མ་བདག་ཉིད་ཆེ། །གཙོ་བོ་ལས་གཞན་ཐ་དད་གཟུགས། །རྣལ་འབྱོར་མ་ཀུན་དེ་དང་འདྲ། །དེ་ལྟར 87.143a ཧེ་རུ་ཀ་མགོན་པོས། །རྣལ་འབྱོར་མ་ཀུན་སྤྱད་པར་བྱ། །ཐམས་ཅད་སྤྱད་པས་ཞུ་གྱུར་ཏེ། །ཉི་མའི་དཀྱིལ་འཁོར་རྣམ་པར་གནས། །དེ་ནི་ཞུ་བར་མཐོང་ནས་ནི། །ཤིན་ཏུ་སྲིད་པ་བསྒྲུབ་པའི་ཕྱིར། །སྒོ་ཡི་རྣལ་འབྱོར་མ་ཡིས་བསྐུལ། །ཅི་སྟེ་འཇིག་རྟེན་སྙན་མནན་ན། །ཅི་ཕྱིར་ཁྱོད་ནི་མི་དགྱེས་གྱུར། །གལ་ཏེ་ཁྱོད་བདག་ཚིག་གསན་ན། །མི་དགྱེས་གྱུར་པ་མཐའ་དག་ཐོང ། །སྲིད་འཇིགས་སྐྱེ་བོ་ཀུན་ལྷུང་བས། །སྟོང་པའི་ཐུགས་ནི་མ་མཛད་པར། །ཉིད་ཀྱི་དགོངས་པ་ཀུན་བསྒྲུབས་ཀྱེ། །རྣལ་འབྱོར་མ་ཡི་གྲོགས་པོ་བཞེངས། །གལ་ཏེ་སྤྱོད་གཙོ་ཚིག་གསན་ན། །འབྲས་བུ་ཡལ་བར་མ་དོར་ཅིག་།ཁྱོད་མི་སྣང་ན་འགྲོ་བ་ཡི། །སྐྱེ་བོ་མཐའ་དག་གདུང་བས་ནོན། །ལོག་པའི་ང་རྒྱལ་མ་མཛད་པར། །སྟོང་པའི་རང་བཞིན་སྤངས་ནས་ནི། །ཁྱོད་ཀྱིས་དངོས་མེད་ཀུན་ཐོང་ལ། །རྣལ་འབྱོར་མ་ཡི་ཚོགས་ལ་སྤྱོད། །རྣལ་འབྱོར་མ་ནི་བཞི་པོ་ཡིས། །འདི་ལྟ་བུ་ཡི་གླུ་ཡིས་བསྐུལ། །སྔོན་བཞིན་མདོག་དང་མཚན་སོགས་ལྡན། །ཀུན་ནས་རྣལ་འབྱོར་མ་རྣམས་བསྐོར། །འཇིགས་པ་འཁོར་བ་སྒྲོལ་བྱེད་པའི། །དཔའ་བོ་ཆེན་པོ་འདི་བཞེངས་སོ། །སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་དུ་གསང་བ་ལས། དཀྱིལ་འཁོར་དང་ཧེ་རུ་ཀ་བསྐྱེད་པ་དང་བསྒོམ་པའི་ལེའུ་སྟེ་བདུན་པའོ།། །། དེ་ནས་ཡང་དག་རབ་བཤད་བྱ། །སྦྱིན་སྲེག་དཀྱིལ་འཁོར་མཆོག་བཟང་པོ། །ཞི་བ་དང་ནི་རྒྱས་པ་དང ། །དེ་བཞིན་དབང་དང་མངོན་སྤྱོད་དེ། །སྦྱིན་སྲེགས་རྣམ་པ་བཞི་རུ་གསུངས། །ཤིང་གི་སྦྱིན་སྲེག་མི་བྱ་ཞིང ། །འབྲས་དང་འབྲུ་རྣམས་ཀྱིས་ཀྱང་མིན། །བློ་ལྡན་གལ་ཏེ་ཞི་འདོད་ན། །མེ་ཏོག་གིས་ནི་སྦྱིན་སྲེག་བྱ། །མེ་ཏོག་ལྔ་པོ་མཆོག་ཆེན་དང ། །འོ་མར་ཡང་དག་ལྡན་པས་བྱ། །གལ་ཏེ་ཞི་བའི་སྦྱིན་སྲེག་འདོད། །ཞི་བའི་གཟུགས་སོགས་ལྡན་པ་ཡིས། །ཞི་བའི་ཐབ་ཁུང་གྲུ་བཞི་པ། ། 87.143b ཟབ་དང་རྒྱར་ནི་མཐོ་གང་བ། །ཁ་ལ་རྡོ་རྗེ་རྩེ་ལྔ་པ། །དཀར་པོ་རྩེ་མོ་འདུས་པ་བྲི། །རྡོ་རྗེ་རྩེ་གསུམ་སྔོན་པོ་ནི། །ཞི་བ་ཧཱུཾ་བདག་འཁོར་བར་ནི། །དེ་ཡི་དབུས་སུ་འཁོར་ལོ་ལ། །གྲུ་གསུམ་པ་ཡི་ཡི་གེས་བརྒྱན། །ེ་བཾ་མ་ཡ་མཆོག་ཆེན་གྱི། །ལྟེ་བ་རུ་ནི་བསྐྱེད་པར་གསུངས། །རྩེ་གསུམ་འཇིགས་པའི་རྡོ་རྗེས་བསྐོར། །རྡོ་རྗེའི་ནང་དུ་པད་མ་སྟེ། །པད་མའི་དབུས་སུ་ཉི་མ་བསམ། །ཉི་མའི་དབུས་སུ་ཡི་གེ་ཧཱུཾ། །ཁ་དོག་དམར་པོའི་འོད་ཆེན་པོ། །མཚམས་དང་མཚམས་སུ་རྡོ་རྗེ་ནི། །རྩེ་དགུ་སེར་པོ་བྲི་བར་བྱ། །བདག་ཉིད་ཧེ་རུ་ཀར་བལྟ་སྟེ། །ཕྱིས་ནི་སྦྱིན་སྲེག་ཡང་དག་བརྩམ། །ཤེས་རབ་ཅན་གྱིས་མེ་ཡི་ལྷ། །སྔགས་འདི་ཡིས་ནི་སྤྱན་དྲང་ངོ ། །ོཾ་སརྦྦ་དེ་བ་ཧུ་ཏ་པྲ་དྷེ་ནི་ཨཾ་བི་ཀལ་སུ་ད་ཧ་ད་ཧ་ནེ་ད་ཧ་ད་ཧ་ཛྭ་ལ་ཛྭ་ལ། པྲ་ས་ར་པྲ་ས་ར། ཨཱ་གཙྪ་ཨཱ་གཙྪ། ཡ་ཏྲི་ཀུནྣེ་ཨ་དྷིཥྛ་ཡ། ཨ་དྷིཥྛ་ཡ། ཏིཥྛ་ཏིཥྛ། ཀི་ལི་ཀི་ལི། ཧ་ཧེ་ཧོ་ཧཾ་ཧྲཿ ཧྲིཿ ཧཱུཾ་སཝཱ་ཧཱ། མེ་ལྷ་སྤྱན་དྲང་བའི་སྔགས་སོ། །སངས་རྒྱས་ཐོད་པའི་སྦྱོར་བ་ཡིས། །ཤེས་རབ་ཅན་སྔགས་ལན་བདུན་བཟླས། །སངས་རྒྱས་ཀུན་གྱིས་བྱིན་བརླབས་ཤིང ། །མདོག་དཀར་དུ་བ་དང་བྲལ་བའི། །མེ་ལྷ་རྒྱལ་དབང་བྱོན་ནས་ཀྱང ། །ཐབ་ཁུང་གི་ནི་དབུས་སུ་བཞུག་།དེ་ནས་བློ་ལྡན་སྦྱིན་སྲེག་བྱ། །དེ་རུ་སོལ་བ་བཞུག་བྱ་བ། ། ཤཝཏྠ་དང་ནྱ་གྲོ་དང ། །ུ་དུམ་བ་ར་ར་ཀ་ཏི། པ་ལ་ཤ་སྟེ་ཤིང་ལྔ་ལས། སོལ་བྱས་དུ་མེད་འབར་བའི་མེ། བློ་ལྡན་ཐབ་ཁུང་དབུས་སུ་གཞུག་།གལ་ཏེ་དངོས་གྲུབ་མཆོག་འདོད་ན། །པད་མ་བརྒྱ་ནི་རྩ་བརྒྱད་དང ། །དེ་བཞིན་ཨུཏྤ་ལ་ཉིད་དང ། །ཀུ་མུ་ད་དམར་དྲི་ཞིམ་འདྲ། །ཀ་ར་བི་ར་གཞན་ཉིས་འགྱུར། །བྱས་ཏེ་བསྲེགས་པས་ཞི་བར་གསུངས། །སྦྱིན་བདག་མདུན་ན་འདུག་པ་ལ། །དེ་ཚེ་དུ་བ་དབབ་པར་བྱ། །མཁས་པས་གསང་སྔགས་འདི་བཏོན་ཞིང ། །པད་མ་མར་སྦགས་སྲེག་པར་བྱ། །ོཾ་པདྨ་ར་ཛེ་ཨགྣི་པྲ་ཎི་ཡ་ཨ་མུ་ཀ་སྱ་ཤཱིནྟཾ་ཀུ་རུ་སཝཱ་ཧཱ། མཁས་པ་ཡིས་ནི་སྔགས་བཟླས་ཏེ། །ུཏྤལ་འོ་མས་སྦྱིན་བསྲེག་བྱ། །ོཾ་གྷ་གྷ་གྷཱ་ཏ་ཡ་གྷཱ 87.144a ཏ་ཡ་ཏེ་ཛོ་རཱ་ཛ་བི་ན་ཡ་ཤཱིནྟཾ་ཀུ་རུ་སཝཱ་ཧཱ། མཁས་པ་བདེ་གཤེགས་ཀུན་བདག་གིས། །གུར་གུམ་ཀུ་མུ་ད་སྔགས་བསྲེག་།ོཾ་སུ་པུཥྤེ་སུ་ཀ་ར་ཙ་ལེ་ཛྭ་ལ་ནཱི་ཡེ་ཤཱིནྟཾ་ཀུ་རུ་སཝཱ་ཧཱ། གསང་སྔགས་རྒྱལ་པོ་འདི་ཡིས་ནི། །དྲི་ཞིམ་ཙན་དན་སྦྱིན་བསྲེག་བྱ། །ོཾ་དྷ་མེ་མ་ཧཱ་མེ་རཱ་ཛེ་ད་ཧ་ད་ཧ་སརྦ་བི་གྷཱ་ཤཱིནྟཾ་ཀུ་རུ་སཝཱ་ཧཱ། ཀ་ར་བཱི་ར་དྲི་ཞིམ་མར། །མཁས་པས་སྔགས་རྒྱལ་བཟླས་ཏེ་བསྲེག་།ོཾ་ཀཱ་ལི་སུ་ཀཱ་ལི་ཀ་རཱ་ལ་རཱ་ཏྲི་སརྦྦ་པཱ་པཾ་ད་ཧ་ད་ཧ་ཤཱིནྟཾ་ཀུ་རུ་སཝཱ་ཧཱ། མེ་ཏོག་རེ་རེ་རེ་རེ་ལ། །གསང་སྔགས་རྒྱལ་པོ་ལན་རེ་བཟླ། །ཞི་བའི་སྦྱིན་བསྲེག་བླ་མེད་པ། །འཇིག་རྟེན་གསུམ་ན་རྙེད་པར་དཀའ། །མེ་ནི་འོ་མས་ཞི་བར་བྱ། །དེ་ནས་གཞན་ཡང་རྒྱས་པ་ཡི། །སྦྱིན་སྲེག་ཁྱད་པར་བཤད་པར་བྱ། །རྒྱས་ལ་ཐབ་ཁུང་ཟླུམ་པོ་སྟེ། །ཆུ་ཡི་དཀྱིལ་འཁོར་ལྟར་སྣང་བ། །ཟབས་དང་རྒྱར་ནི་མཐོ་གསུམ་སྟེ། །ཁ་དོག་སེར་པོར་རྣམ་པར་བསམ། །དེ་དབུས་རྡོ་རྗེ་རྩེ་དགུ་པ། །སྔོ་བྲི་དེ་སྟེང་པད་འདབ་བརྒྱད། །བདག་ཉིད་ཧེ་རུ་ཀ་རྣམ་པ། །ཁྲོ་བའི་སེམས་ཀྱི་བདག་ཉིད་ཀྱིས། །ཤིང་བསྲེག་པ་ཡི་སྦྱིན་བསྲེག་བྱ། །གལ་ཏེ་རྒྱས་པ་མཆོག་འདོད་ན། ། མ་ཀན་ཐ་པ་ལ་དང ། །རྒ་བིལ་བ་དུ་དུ་ར། །ཤིང་དུ་རྙེད་དཀའི་ཤིང་ལྔ་ལས། །སོར་བཅུ་གཉིས་ཀྱི་ཚད་ཙམ་དུ། །སློབ་དཔོན་གྱིས་ནི་གཟུང་བར་བྱ། །མ་གས་མ་སྐམས་མ་བཅད་ཅིང ། །བུ་ག་ཅན་གྱི་ཤིང་སྤང་ངོ ། །དེ་ཡི་དབུས་སུ་སངས་རྒྱས་དང ། །བྱང་ཆུབ་སེམས་དཔའ་ཐམས་ཅད་བསམ། །རེ་རེ་ལ་ནི་བརྒྱ་རྩ་བརྒྱད། །བགྲངས་ཏེ་དེ་ནས་སྦྱིན་བསྲེག་བྱ། །བདག་ཉིད་ཧེ་རུ་ཀ་ཡི་ཚུལ། །སྐུ་མདོག་ནག་པོ་འོད་ཆེན་པོས། །མར་དང་ཡམ་ཤིང་ཐམས་ཅད་ནི། །སྔགས་བསྲེགས་འདིར་ནི་ཐེ་ཚོམ་མེད། ཨོཾ་ག་ག་ནི་ག་ག་ན་བི་ལོ་ཀ་ནེ་ཧཱུཾ་ཕཊ། ཏེ་ཛོ་རཱ་ཛ་པུཥྚཾ་ཀུ་རུ་སཝཱ་ཧཱ། ཤིང་རྣམས་ཀུན་གྱིས་སྔགས་འདི་ཡིས། །རེ་རེ་བཞིན་དུ་སྦྱིན་བསྲེག་བྱ། །ཕྱིས་ནི་སེར་པོའི་ཆུས་ཞི་བྱ། །འདི་ལྟའི་རྒྱས་པའི་སྦྱིན་བསྲེག་ནི། །འཇིག་རྟེན་གསུམ་ན་རྙེད་པར་དཀའ། །རྒྱུད་གཞན་རྣམས་སུ 87.144b སྦས་པ་ནི། །རྒྱུད་འདི་རུ་ནི་གསལ་བར་བྱས། །དེ་ནས་ཡང་དག་རབ་བཤད་པ། །དབང་དུ་བྱ་བའི་སྦྱིན་བསྲེག་མཆོག་།ཐབ་ཁུང་གྲུ་གསུམ་དམར་པོ་ལ། །ཟབས་དང་རྒྱར་ནི་སོར་མོ་བརྒྱད། །དེ་དབུས་པད་མ་འདབ་བརྒྱད་དམར། །ཟླ་བ་དམར་ལ་སོགས་པས་བརྒྱན། །གྲཝ་གྲཝ་རུ་ནི་རྡོ་རྗེ་དམར། །བདག་ཉིད་ཧེ་རུ་ཀར་བསམ་པ། །དམར་པོ་ལྟར་སྣང་ཆགས་པའི་བདག་།རྡོ་རྗེ་དམར་པོ་ཐོད་པ་བསྣམས། །ཡོངས་སུ་གང་བའི་ཁྲག་ཉིད་ཀྱིས། །ཁམས་གསུམ་པ་ལ་རྗེས་སུ་ཆགས། ། ཤོ་ཀ་ཡི་ཡམ་ཤིང་དང ། །གོ་རོ་ཙ་ནར་ལྡན་པ་ནི། །བློ་ལྡན་བརྒྱ་རྩ་བརྒྱད་བསྲེགས་ཏེ། །ཤིན་དུ་མཉམ་གཞག་སྔགས་ནི་གདོན། །ོཾ་ཨ་ཤོ་ཀི་ནི་སུ་ར་ཀེ་ཨ་ནུ་རཱ་ག་ཡ་ཏྲེ་ལོཀྱ་བ་ཤཾ་ཀ་རཱི་ཏྲཻ་ལོ་ཀྱཾ་བཱ་ཤཱ་མཱ་ནཱ་ཡཱ་ཧྲཱི་སཝཱ་ཧཱ། ཉིན་བདུན་སྦྱིན་བསྲེག་བྱས་ཙམ་གྱིས། །ཁམས་གསུམ་དབང་དུ་འགྱུར་བ་ཡིན། །ཆུ་ནི་དམར་པོར་མེ་ཞི་བྱ། །དེ་ནས་ཡང་དག་རབ་བཤད་པ། །མངོན་སྤྱོད་དང་ནི་བསད་པ་མཆོག་།ཟླ་བ་ཕྱེད་པའི་ཆ་འདྲའི་ཐབ། །ཟབས་དང་རྒྱར་ནི་ཁྲུ་གང་ཚད། །འཇིགས་ཆེན་མདོག་ནི་ལྗང་ཁུའོ། །གྲཝ་གྲཝ་རུ་ནི་རྡོ་རྗེ་བྲི། །དབུས་ཀྱི་ས་གཞི་སྟོང་པ་རུ། །བློ་ལྡན་ཤ་ལྔས་སྦྱིན་བསྲེག་བྱ། །གསོད་པ་ཡི་ནི་སྦྱིན་བསྲེག་མཆོག་།མངོན་སྤྱོད་གསོད་པ་རུ་ནི་གསུངས། །དགྲ་ཀུན་བསྣུན་ཅིང་ཟློག་པར་བྱེད། །དགྲ་བོ་མཐུར་དུ་ཁ་བལྟས་ཤིང ། །ཁ་ནས་ཁྲག་ནི་སྐྱུག་པ་ཉིད། །ཤ་ཡི་དབུས་སུ་བསམ་པར་བྱ། །སེང་ལྡེང་སོལ་བས་མེ་བྱ་སྟེ། །མེད་ན་འབའ་འབོ་ལ་ཉིད་ཀྱི། །འབའ་འབོ་ཚེར་མས་ཤ་ཕུག་སྟེ། །བརྒྱ་རྩ་བརྒྱད་དུ་སྔགས་ཀྱིས་བསྲེག་།ོཾ་མཱ་ར་ཡ་མཱ་ར་ཡ་ཀཱི་ལ་ཡ་ཀཱི་ལ་ཡ་སརྦྦ་ཤ་ཏྲུཾ་ནཱ་ཤ་ཡ་ཧཱུཾ་ཕཊ། བདག་ཉིད་ཧེ་རུ་ཀར་གྱུར་ཅིང ། །སྐུ་མདོག་སྔོན་པོ་ཐུགས་འཁྲུགས་པས། །དགྲ་རྣམས་ཐམས་ཅད་བརླག་པར་ནི། །སྐད་ཅིག་དེ་ལ་ཐེ་ཚོམ་མེད། །ཕེང་མཛད་འཇིགས་ཤིང་འཇིགས་པར་བྱེད། །ཧ་ཧ་ཞེས་མཛད་འཇིགས་པར་མཛད། ། 87.145a གདུག་པ་ཐམས་ཅད་གསོད་པར་ནི། །སྦྱིན་བསྲེག་ཙམ་གྱིས་ཐེ་ཚོམ་མེད། །འདི་ལྟའི་བསད་པའི་སྦྱིན་བསྲེག་དང ། །མངོན་སྤྱོད་ཀྱང་ནི་རྙེད་དཀའ་བ། །རྣལ་འབྱོར་ལྷ་མོས་རྟོགས་མིན་ན། །སྔགས་སྐྱེས་ཕལ་ལྟ་སྨོས་ཅི་དགོས། །དེ་ཕྱིར་སངས་རྒྱས་ཐོད་པ་ཡི། །རྣལ་འབྱོར་ང་རྒྱལ་དང་བྲལ་བས། །ཤིན་དུ་མཉམ་པར་གཞག་པའི་སེམས། །ལྷ་རྣམས་ཀྱིས་ཀྱང་རྙེད་པར་དཀའ། །ལྗང་ཁུའི་ཆུ་ཡིས་མེ་ཞི་བྱ། །གང་གིས་བསྲེགས་ཤིང་གང་ཞིག་བསྲེགས། །གང་གི་ཞིང་གང་ཞི་བ། །གང་གིས་རྣམ་རྟོག་ཀུན་བཅོམ་པ། །དེ་ཡིས་སེམས་ནི་མགུ་བར་བྱེད། །སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་དུ་གསང་བ་ལས་སྦྱིན་བསྲེག་གི་ཆོ་གའི་ལེའུ་སྟེ་བརྒྱད་པའོ།། །། དེ་ནས་ཡང་དག་རབ་བཤད་པ། །སྤྱོད་ལེའུ་ཤིན་དུ་རྙེད་དཀའ་བ། །བུད་མེད་ཤིན་དུ་མཆོག་གྱུར་དང ། །རྣལ་འབྱོར་གང་གིས་སྤྱོད་ཀུན་བྱེད། །དངོས་གྲུབ་བརྒྱད་དང་ཡང་དག་ལྡན། །དེ་ནས་སྤྱོད་པ་ཡང་དག་བརྩམ། །སེམས་ཅན་དངོས་གྲུབ་གང་གང་འདོད། །དེ་དེའི་དངོས་གྲུབ་རྟག་ཏུ་སྟེར། །ལག་པས་ཐོད་པ་གཟུང་བྱས་ཏེ། །གཅེར་བུ་སྐྲ་གྲོལ་གྱུར་པ་ཡི། །བརྟུལ་ཞུགས་ཅན་གྱིས་སྤྱོད་པས་འཁྱམ། །གང་དང་གང་ཚེ་དེ་ཚེ་དེར། །རྟག་ཏུ་སྤྱོད་པ་ཐམས་ཅད་བྱ། །རྒྱན་རྣམས་ཀུན་ལས་རྣམ་གྲོལ་ཞིང ། །ནམ་མཁའ་དང་མཚུངས་གྱུར་པ་ཡི། །ཤེས་རབ་ཅན་གྱིས་ཁྱིམ་ཁྱིམ་དུ། །སློངས་མོ་བྱ་བར་ཐེ་ཚོམ་མེད། །ཡིད་དང་འཐུན་པ་ཀུན་བླངས་ན། །བསམ་གཏན་གནས་སུ་ཐེ་ཚོམ་མེད། །དགའ་བའི་སེམས་ཀྱིས་བསམས་ནས་ནི། །རྣལ་འབྱོར་པ་ཡི་སློངས་མོ་བླང ། །ཆོས་ལ་གཞོལ་བའི་རྣལ་འབྱོར་པས། །ཐོད་པའི་སྟེང་དུ་གཞག་པ་ཡི། །རྫས་ནི་དེ་ནས་བཟའ་བར་བྱ། །རྫས་ནི་ཟོས་མ་ཐག་ཏུ་ཡང ། །ཁྱིམ་ཁྱིམ་ཐལ་ཕུང་ཤིང་དྲུང་དང ། །གང་དུ་གང་ཚེ་དེར་དེའི་ཚེ། །གང་གིས་དགའ་བའི་སེམས་དེ་ཡིས། །བློ་གྲོས་ཆེན་པོ་གཉིད་ལོག་འཕྲེང ། །འདི་ལྟའི་སྤྱོད་པའི་སྦྱོར་བ་ཡིས། །ཕྱག་རྒྱ་ཆེན་པོ་ངས་པར་ཐོབ། ། 87.145b དེ་ལྟར་ཡང་རྒྱུད་ལས་གསུངས་པ། །གང་དུ་ཇི་ལྟར་དེར་དེ་ལྟར། །གང་གིས་དེ་ཡིས་སངས་རྒྱས་ཏེ། །རང་གི་རྣམ་རྟོག་དག་གིས་ཉམས། །མཐའ་དག་རང་བཞིན་རྣམ་པར་དག་།སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་དུ་གསང་བ་ལས་སྤྱོད་པའི་ལེའུ་སྟེ་དགུ་པའོ།། །། དེ་ནས་ཡང་དག་རབ་བཤད་པ། །གཅིག་ཏུ་སེམས་ཅན་དོན་རབ་ངེས། །གསེར་དུ་ངེས་པར་བྱེད་པའི་ལེའུ། །སློབ་དཔོན་ལ་ནི་རབ་དང་བས། །མུ་ཏིག་དང་ནི་ཉ་ཕྱིས་དང ། །དངུལ་ཆུ་དང་ནི་བྱི་རུ་ཡིས། །གང་གིས་སེམས་ཅན་ནོར་ལྡན་འགྱུར། །འདི་ནི་ཕྱི་ཡི་སྨན་མིན་ཏེ། །ཤུན་ལྤགས་ལོ་མ་མ་ཡིན་ཞིང ། །དངུལ་ཆུ་བཅུད་ལེན་མ་ཡིན་ཏེ། །མུ་ཟི་ལྷང་ཚེར་མ་ཡིན་ཞིང ། །ལྕགས་དང་ཞ་ཉི་ཟངས་མ་ཡིན། །ལྕགས་གཞན་དག་ནི་མ་ཡིན་ཏེ། །གྲུབ་པའི་སྨན་གྱི་མཆོག་ཡིན་ནོ། །འདི་ལྟ་བུ་ཡི་ཚིག་ཐོས་ནས། །ཕྱག་ན་རྡོ་རྗེ་སྟོབས་པོ་ཆེས། །ཞབས་ཀྱི་རྡུལ་གྱི་ཆ་བཏུད་ནས། །སེམས་དཔའ་གཅིག་ཏུ་དད་བརྟེན་པས། །ལྷ་མོ་ལེགས་སོ་ཞེས་ནི་སྨྲ། །སྨན་གྱི་མཆོག་ནི་གང་ཡིན་ཞིང ། །དངོས་གྲུབ་ཀྱང་ནི་ཇི་ལྟ་བུ། །གུས་པ་ཡིས་ནི་ཉན་པར་འཚལ། །ལྷ་མོ་ཆེན་མོ་ཁྱོད་ཀྱིས་གསུངས། །གྲུབ་པའི་སྨན་གྱི་མཆོག་གང་ལགས། །གང་གིས་སེམས་ཅན་ནོར་ལྡན་འགྱུར། །ཚེ་འཕེལ་བ་ལ་བརྩོན་པ་གང ། །སྔོན་བསྙེན་ལྟོས་པ་མེད་པ་ཡིས། །སྨན་ཆེན་གྲགས་པས་འགྲུབ་པ་གང ། །གང་གིས་རྫས་རྣམས་མང་པོར་འགྱུར། །མོ་ཤམ་བུ་དང་ལྡན་འགྱུར་གང ། །ཡང་དང་ཡང་དུ་མི་འཆི་ཞིང ། །ཤི་ནས་ཡང་དག་འཚོར་འགྱུར་བ། །ལྷ་མོ་ཆེན་མོ་ཁྱོད་ཀྱིས་གསུངས། །བཀའ་སྩལ་པ། ཁྱིམ་འདི་ཉིད་དུ་གནས་པ་ཡི། །སྨན་ཆེན་པོ་ཡིས་འགྲུབ་པ་སྟེ། །དེ་ཡང་སྣོད་བཟང་མཆོག་ལ་འགྲུབ། །བྱིས་པ་རྨོངས་པས་མི་ཤེས་སོ། །བདག་དོན་གཅིག་པུ་ལ་འབབ་ཅིང ། །ཀྱེ་མ་གཅིག་ཏུ་དཀའ་འབད་པས། །ཇི་ལྟར་སེམས་ཅན་དོན་འགྲུབ་འགྱུར། །སྣོད་བཟང་ལ 87.146a ནི་གནས་པའི་བཅུད། །ཟེའུ་འབྲུ་གསང་བའི་སྤྱོད་ཡུལ་ཏེ། །རོ་བཅུད་རྩ་ཡི་ནང་གནས་པའི། །སྨན་ཆེན་རོ་བཅུད་མ་རུ་བརྗོད། །གང་གིས་ལྕགས་ནི་གསེར་འགྱུར་བ། །གཅིག་གིས་ཀྱང་ནི་གྲངས་མེད་འགྱུར། །འདི་ལྟ་བུ་ཡི་སྨན་ཆེན་མཆོག་།རོ་བཅུད་མ་ནི་དེ་བཞིན་གནས། །རབ་འབྱོར་ཆོ་ག་སྔོན་འགྲོ་བས། །སྨན་གྱི་མཆོག་ནི་འགྲུབ་པར་འགྱུར། །དེར་ནི་ཡང་དག་སྦྱོར་བ་བཤད། །དད་པ་བརྟེན་པ་ཡིས་ནི་ཉོན། །མེ་ཏོག་ལྡན་པའི་བུད་མེད་གང ། །གཞོན་ནུ་ཁ་དོག་ནག་པོ་སྟེ། །རྒྱུད་འདི་ཐོས་པ་དང་ལྡན་ཞིང ། །ངོ་ཚ་མེད་ཅིང་ལྟོས་མེད་མ། །འདོད་པ་ཆུང་ཞིང་སེམས་ཅན་བརྩེ། །དེ་བཞིན་གཤེགས་པ་རྣམས་བསྟེན་ཅིང ། །རྟག་ཏུ་རབ་སྦས་བཙོག་མེད་མ། །འདི་ལྟའི་བུད་མེད་རབ་བླངས་ཏེ། །སྨན་ཆེན་མཆོག་ནི་ཡང་དག་བརྩམ། །སྐྱེས་བུ་ཤིན་ཏུ་ཆགས་ཆེ་ཞིང ། །མྱུར་དུ་བྱང་ཆུབ་སེམས་འབབ་པ། །གང་ཡིན་དེ་ལ་དངོས་གྲུབ་མེད། །འདི་ལྟ་བུ་ཡི་སྨན་ཆེན་པོ། །སངས་རྒྱས་ཀྱིས་ཀྱང་རབ་རྙེད་དཀའ། །ཤིན་དུ་བརྟན་པའི་སེམས་ཀྱིས་ནི། །བློ་ལྡན་བུད་མེད་དེ་རྣམས་བསྟན། །དེ་ལྟར་ཡང་ཞེས་གསུངས་པ། རབ་ཏུ་བརྟན་པ་གཙོ་བོའི་གནས། །ཞེས་ནི་སྒྲུབ་པ་པོ་རྣམས་སྨྲ། །དེ་ཕྱིར་བརྟེན་པའི་སེམས་ཀྱིས་ནི། །སྣོད་བཟང་འབྲས་བུ་བསྐུལ་བར་བྱ། །དེར་ནི་མེ་ཏོག་ལྡན་བུད་མེད། །གསེར་གྱི་སྦྱོར་བ་རྙེད་དཀའ་བརྩམ། །གྲུབ་པའི་བཅུད་ཀྱིས་བྱུགས་པ་ཡི། །ཟླ་བ་རང་གི་སྙིང་ཁར་བསམ། །སྔོན་དུ་རི་ཡི་རྒྱལ་པོས་བརྒྱན། །དེར་ནི་ཡི་གེ་ཧྲཱིཿ ས་བོན། །སེམས་ཅན་དོན་ལ་གཅིག་དུ་འབད། །བློ་ལྡན་དགོས་པ་ཡང་དག་བརྩམ། །ཟངས་མའི་དངོས་པོ་སྲང་གཅིག་བཅས། །ཟླུམ་པོ་སྣོད་བཟང་ལ་བཅུག་སྟེ། །གཡོན་པ་བསྐུམ་པའི་གཡས་ཟུར་གཞག་།མེད་ན་ལྕགས་ཀྱང་བྱ་བ་ཡིན། །བརྟན་པའི་སྦྱོར་བའི་སེམས་ཀྱིས་ནི། །དེ་ནས་བློ་ལྡན་ལས་རྣམས་བརྩམ། །རི་རབ་ཟླ་བ་ས་བོན་རྒྱལ། །ཞུ་འགྱུར་ཐེ་ཚོམ་མེད་པ་ཡིན། ། 87.146b སྣོད་བཟང་དེར་ནི་ངལ་བསོས་པས། །འབོ་བའི་སྦྱོར་བས་འཛག་པ་ཉིད། །བཟང་པོས་མྱུར་དུ་རབ་བླངས་ཏེ། །མཁས་པ་ཡིས་ནི་བྱུག་པར་བྱ། །རྡོག་པོ་བྱུགས་པ་ཙམ་གྱིས་ནི། །མེ་ཡི་ནང་དུ་གཞུག་བྱ་ཞིང ། །དེ་ནས་ཤེས་རབ་ཅན་བལྟས་ན། །གསེར་དུ་འགྱུར་བ་ཐེ་ཚོམ་མེད། །དེ་ཡི་མ་ཤ་གཅིག་གིས་ནི། །སྲང་བརྒྱ་རུ་ནི་འགྱུར་བ་ཡིན། །དེ་ལྟར་གསེར་གྱི་སྦྱོར་བ་མཆོག་།འཇིག་རྟེན་གསུམ་ནའང་རྙེད་པར་དཀའ། །གལ་ཏེ་སྨན་ཆེན་ཚད་མིན་ན། །དེ་ཚེ་སངས་རྒྱས་ཚད་མ་ཡིན། །རྒྱུད་ཀྱི་རྒྱལ་པོ་ཆེན་པོ་འདིར། །དངོས་པོ་གང་དང་གང་གསུངས་པ། །སངས་རྒྱས་ཐོད་པའི་སྦྱོར་བ་ཡིས། །དེ་དག་ཐམས་ཅད་བདེན་པར་འགྱུར། །གང་ཞིག་འདི་ཚད་མིན་སྨྲ་བའི། །བློ་གྲོས་ཆེན་པོ་ཐོས་ལྡན་པ། །ཇི་སྲིད་སངས་རྒྱས་བཞུགས་ཀྱི་བར། །དེ་དག་ཐམས་ཅད་དམྱལ་བར་འགྲོ། །སྨན་འདི་ཙམ་གྱིས་མ་གྲུབ་ན། །ཆོས་ཕུང་བརྒྱད་ཁྲི་བཞི་སྟོང་དང ། །བླ་མེད་རྣལ་འབྱོར་མ་རྣམས་ཀྱི། །དེ་དག་ཐམས་ཅད་བརྫུན་པར་འགྱུར། །མཚམས་མེད་ལྔ་ནི་བྱེད་པ་དང ། །སེམས་ཅན་སངས་རྒྱས་ཆོས་ལ་འཚེ། །སྨན་གྱིས་མཆོག་ནི་འགྲུབ་འགྱུར་བ། །སྐད་ཅིག་དེ་ལ་ཐེ་ཚོམ་མེད། །སེམས་ཅན་དོན་ལ་གཅིག་ཏུ་འབད། །སྒོམ་ལྡན་འགྲུབ་པ་ལྟ་ཅི་སྨོས། །སྨན་མཆོག་གསེར་དང་དངུལ་དུ་འགྱུར། །ཇི་སྲིད་སངས་རྒྱས་ཡེ་ཤེས་ཡོད། །མི་ནི་བསྐལ་པ་བྱེ་བར་འཚོ། །དེ་ནས་ཡང་དག་རབ་བཤད་པ། །མོ་ཤམ་རྣམས་ཀྱི་བུ་མེད་པ། །ཡང་དག་སྦྱོར་བས་བཀྲུས་ཙམ་གྱིས། །སྐད་ཅིག་དེ་ལ་བུ་ལྡན་འགྱུར། །སྔོན་གྱི་གཙོ་བོས་ཇི་སྐད་གསུངས། །ཁྲུས་ཀྱི་ཆོ་ག་རབ་ཏུ་བཤད། །ཁ་དོག་ལྔ་ཡི་རྡུལ་ཚོན་ནམ། །ཡང་ན་རྡུལ་ཚོན་དཀར་པོ་ཡིས། །དཔག་དཀའ་སྐྲག་པར་བྱེད་པ་ཡི། །དཀྱིལ་འཁོར་འཇིགས་པ་བྲི་བར་བྱ། །དེར་ནི་བུམ་པ་ལྟོ་ཆེ་བ། །ཟླུམ་པོ་བཞི་ནི་གཞག་པར་བྱ། །ཤེས་རབ་ཅན་གྱིས་ཆུ་ཡིས་དགང ། །རས་ཀྱིས་ཀྱང་ནི་དཀྲི་བར་བྱ། །རང་གི་ཁྲག་གིས་མཚན་མ་བྲི། །བུད་མེད་མོ 87.147a ཤམ་དེ་ཡི་ནི། །ཁམས་ཀྱི་གཙོ་བོ་བླངས་ནས་ནི། །མཁས་པས་བུམ་པའི་ཁ་ལ་བྱུག་།དེ་ནས་ཁྲག་འཐུང་གོ་འཕང་ལ། །གནས་པ་བསྒོམ་པའི་མཆོག་ལྡན་པས། །ནག་པོ་དམར་མོ་འཇིགས་ཆེན་པོ། །རྡོ་རྗེ་ཧཱུཾ་ལས་ཡང་དག་བྱུང ། །འཇིགས་པའི་མེ་ལྟར་འཇིགས་བྱེད་པ། །ཞལ་གཅིག་པ་ལ་ཕྱག་བཞི་པ། །བླ་མ་འཇིགས་པའི་གར་བྱེད་ཅིང ། །མཁས་པས་ཧཱུཾ་ནི་སྒྲོགས་བཞིན་པ། །བློ་ལྡན་བུམ་པའི་ནང་དུ་བསམ། །དེ་ནས་རལ་གྲི་འཛིན་པ་ཡི། །སྐྱེས་པ་བཞི་པོ་གྲགས་ཆེན་པོ། །ཁྲོ་བོ་གཞན་གྱི་སེམས་དང་ལྡན། །འཇིགས་ཆེན་སྐྱེས་བུ་དེ་རྣམས་ཀྱིས། །རལ་གྲིས་ནམ་མཁར་བསྣུན་ཅིང་གསོད། །སངས་རྒྱས་ཐོད་པའི་སྦྱོར་བ་དང ། །འདི་ལྟ་བུ་ཡི་སྦྱོར་ལྡན་པས། །དེ་བཞིན་དུ་ནི་བུད་མེད་བཀྲུ། །སྐད་ཅིག་དེ་ལ་བཀྲུས་ཙམ་གྱིས། །བུད་མེད་བུ་དང་ལྡན་པར་འགྱུར། །སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་དུ་གསང་བ་ལས་སྨན་ཆེན་པོ་ཁྱད་པར་ཅན་དང ། མོ་ཤམ་གྱི་ཁྲུས་ཀྱི་ཆོ་གའི་ལེའུ་སྟེ་བཅུ་པའོ།། །། དེ་ནས་ཡང་དག་རབ་བཤད་པ། །མཁའ་ལྡིང་སྦྱོར་ལས་བྱུང་བའི་ལེའུ། །སྔོན་དུ་གསུངས་པའི་ཆོ་ག་ཡིས། །མཁས་པས་དཀྱིལ་འཁོར་བྲི་བར་བྱ། །བློ་ལྡན་ཧེ་རུ་ཀ་དང་ནི། །ཀུན་ནས་རྣལ་འབྱོར་མ་བརྒྱད་བསྐྱེད། །མཚན་མ་ཕྱག་སོགས་སྔོན་གསུངས་བཞིན། །ཁ་དོག་དཀར་པོ་འབའ་ཞིག་ཉིད། །ཕྱོགས་ཀྱི་རྣལ་འབྱོར་མ་དཀར་ཞིང ། །མཚམས་ཀྱི་དམར་པོ་ཉིད་ཡིན་ནོ། །སྔོན་དུ་གསུངས་པའི་ཆོ་ག་ཡིས། །མཁས་པས་དཀྱིལ་འཁོར་བྱིན་གྱིས་བརླབ། །བུམ་པ་རྣམ་པ་བཞི་པོ་ལ། །སྔོན་གསུངས་ཕྱག་མཚན་བྲི་བར་བྱ། །རིག་པ་འཛིན་པའི་སྦྱོར་བ་ཡིས། །ཕྱིས་ནི་སློབ་མ་རྗེས་སུ་གཟུང ། །སྔོན་གྱི་ཆོ་གས་གསོལ་བཏབ་སྟེ། །སྦྱིན་དང་ཚོགས་ཀྱི་འཁོར་ལོ་དང ། །དེ་ནས་དཀྱིལ་འཁོར་མཆོད་པར་བྱ། །སླར་ཡང་གསང་སྔགས་འདི་ཡིས་ནི། །སློབ་མ་རྗེས་སུ 87.147b གཟུང་བར་བྱ། །ས་སྟེངས་ན་ནི་དུས་ཟིན་ལ། །ཅུང་ཟད་གསོ་བར་མི་ནུས་ཏེ། །ནམ་མཁའ་ལྡིང་ཅན་གྱིས་བཏང་ཞིང ། །དུས་སུ་ཟིན་ཅེས་སྨྲ་བ་ནི། །སངས་རྒྱས་ཐོད་པའི་རྣལ་འབྱོར་པ། །བློ་ལྡན་དེ་ནས་ལས་བརྩམ་མོ། །བདག་ཉིད་ཧེ་རུ་ཀར་གྱུར་ཅིང ། །ཀུན་ནས་རྣལ་འབྱོར་མ་བརྒྱད་དེ། །དེ་ཀུན་སྐུ་ནི་དཀར་པོ་རུ། །ཆོ་ག་བཞིན་དུ་སྦྱར་བར་བྱ། །འབྲས་བཏགས་རང་བཞིན་བླངས་ནས་ནི། །རིག་པ་འཛིན་པ་གཉིས་བྱའོ། །ཤིན་དུ་མཉམ་པར་གཞག་པ་ཡིས། །དེ་ཡི་ལག་པར་རལ་གྲི་སྦྱིན། །དེ་ཡི་སྙིང་ཀར་སྔགས་བཞུགས་པ། །འདབ་མ་གང་དང་གང་དེ་ལ། །མར་ཁུ་ཆེ་བྱས་སྣག་ཚ་དང ། །མཁས་པས་སྔགས་ནི་བྲི་བར་བྱ། །ོཾ་བུདྡྷ་ཀ་པཱ་ལེ་ནི་ཧྲཱིཿ ་ཨོཾ་ཀ་པཱ་ལ་ནི་བཛྲི་ཎི་ཨ། བི་དྷྭན་ས་ཡ་སརྦྦ་ནཱ་ག་ན་ཨུ་ད་པ་ཡ་དྱ་དྷ་ར་ནི། བི་བྷ་བ་ཡ་ཀ་ལ་ད་ཤ་ན། བྷོ་བྷོ་བྷ་ག་བ་ཏི། བུདྷ་ཀ་པཱ་ལ་ནི། ་སརྦྦཱ་ན་ཎ་ཀྵ་ཡཾ་ཀ་རཱི་ཧ་ཧ་ཧ་སཝཱ་ཧཱ། རིག་པ་འཛིན་པའི་སྔགས་སོ། །དེ་ལྟར་ཡོངས་སུ་རྫོགས་ནས་ནི། །འདབ་མ་སྙིང་ཁར་གཞུག་པར་བྱ། །གསང་སྔགས་འདི་དང་ལྕུག་མ་ཡིས། །ལན་བདུན་བར་དུ་སྤྱན་དྲང་ངོ ། །ོཾ་བུདྡྷ་ཀ་པཱ་ལ་ནི་གྷ་ཊ་གྷ་ཊ། གྷ་ཌ་གྷ་ཌ་ཧྲི་ཧྲི་ཧཿ ཧཿ ་ཧེ་ཧེཿ ཧཾ། ལན་བདུན་བསྔགས་པ་ཙམ་གྱིས་ནི། །རིག་པ་འཛིན་པ་རྣམ་པ་གཉིས། །བར་སྣང་དུ་ནི་ལྡིང་འགྱུར་ཏེ། །གཅིག་ནི་དུམ་བུ་དུམ་བུ་རུ། །ས་ལ་ལྟུང་བ་རུ་ནི་འགྱུར། །དུས་ཟིན་འདིར་ལངས་ཐེ་ཚོམ་མེད། །གཞན་ཡང་སྦྱོར་བ་རྙེད་དཀའ་གང ། །པད་སྟེགས་ལ་སོགས་བཅཝ་ལྔ་པོ། །གླེགས་བམ་ལ་ནི་བྲི་མ་བྱས། །བླ་མའི་དྲིན་ལས་ཤེས་པར་བྱ། །སངས་རྒྱས་ཐོད་པ་ཞེས་བྱ་བའི་རྒྱུད་རྣལ་འབྱོར་མའི་བླ་ན་མེད་པ་གསང་བའི་ཡང་ཤིན་དུ་གསང་བ་ལས་རིག་པ་འཛིན་པའི་སྦྱོར་བའི་མན་ངག་ངེས་པའི་ལེའུ་སྟེ། ་བཅུ་གཅིག་པའོ།། །། དེ་ནས་ཕྱག་ན་རྡོ་རྗེས་རྣལ་འབྱོར་མ་སྣ་ཚོགས་སྡེ་མ་ལ་ཡང་དང་ཡང་དུ་ཕྱག་འཚལ་ཏེ། འདི་སྐད་ཅེས་གསོལ་ཏོ། །རྣལ་འབྱོར་མ་ཡི་གཙོར་གྱུར་པ། །ཤེས་རབ་ཆེན་པོའི་ལྷ་མོ་ལེགས། །ཁྱོད་ཀྱིས་གསུངས་པའི་སྦྱོར་བ་གང ། །འཇིག་རྟེན་ནའང 87.148a རྙེད་པར་དཀའ། །བདག་གིས་རྒྱུད་ཀུན་མཐོང་མོད་ཀྱི། །སྦྱོར་བ་འདི་དག་རྙེད་པར་དཀའ། །རྒྱུད་འདིར་ཁྱོད་ཀྱིས་གང་གསུངས་པ། །སངས་རྒྱས་ཀུན་གྱིས་མ་བཤད་དོ། །ེ་མའོ་སེམས་ཅན་དོན་ལ་བརྩོན། །ེ་མའོ་སངས་རྒྱས་ཀུན་སྐྱེད་མ། །ེ་མའོ་ཕྱག་རྒྱ་ཆེ་ལ་བརྩོན། །སྔགས་རྣམས་ཀུན་གྱི་རབ་འབྱོར་མ། །ཤིན་དུ་རྙེད་དཀའ་གང་ཡིན་དེས། །རྣལ་འབྱོར་པ་གང་ངོ་མཚར་བ། །སྣ་ཚོགས་བྱེད་འགྱུར་ལྷ་མོ་གསུངས། །དང་པོའི་ལེའུ་གང་གང་གསུངས། །སྦྱོར་དེ་ལྷ་མོས་བདག་ལ་ཤོད། །འདི་ལྟ་བུ་ཡི་ཚིག་གསན་ནས། །རྣལ་འབྱོར་མ་ནི་སྣ་ཚོགས་སྡེ། །བཞད་ཅིང་ཤིན་དུ་བཞད་པ་ཡིས། །ལྷ་རྣམས་ཐམས་ཅད་སྐྲག་པ་དང ། །བདུད་སྡེ་ཐམས་ཅད་འབྲོས་པ་དང ། །བགེགས་རྣམས་ཐམས་ཅད་འཇིག་པར་འགྱུར། །ེ་མའོ་བཞད་པའི་ངེས་པ་ཡིས། །རྒྱལ་བའི་མཆོག་ཀུན་ངོ་མཚར་རོ། །གསུངས་པ། རྒྱལ་མཚན་འཕྱང་བ་བླང་བྱས་ལ། །དེ་ཡི་ཤ་ཡང་བླང་བྱ་ཞིང ། །དེ་ཡི་སྐད་ཆའི་རུས་པ་ནི། །བླངས་ནས་ཐབ་ཁུང་དུ་ནི་བྱ། །དེ་ཡི་ཐོད་པའི་རྗེས་བཟུང་སྟེ། །རྒྱུས་པ་སྡོང་བུར་བྱས་ཏེ་གཞག་།དེ་ཡི་མར་ཁུས་དགང་བྱ་ཞིང ། །ཐབ་ཁུང་གྲུ་གསུམ་སྟེང་དུ་གཞག་།གཞན་ཡང་དུད་པ་འབེབས་པ་དང ། །ཇི་སྲིད་དུད་པ་ཆགས་ཀྱི་བར། །སངས་རྒྱས་ཐོད་པའི་རྣལ་འབྱོར་པས། །གསང་སྔགས་འདི་ནི་བཟླས་པར་བྱ། །ོཾ་བུདྡྷ་ཀ་པཱ་ལི་ནི་བྷ་ར་བྷ་ར། དྷ་དྷ་ར། དྷ་དྷ་ར། དྷ་ར་པ་ཡ་དྷ་ར་པ་ཡ། ཤོ་ཥ་ཡ། ཤོ་ཥ་ཡ། ཏ་པ་ཡ་ཏ་པ་ཡ། ཏྲཱཾ་ཏྲཱཾ་མཾ་སཾ་ར་དྷཱཾ་ཀུ་རུ་ཀུ་རུ་བྷོ་བྷ་ག་བ་ཏེ་བུདྡྷ་ཀ་པཱ་ལ་སྱ་ཛྙཱ་མ་ལཾ་གྷཡ་ཤཱི་གྷྲཾ་ཀ་ཛ་ལ་པ་ཏཾ། པ་ཏ་ཡ་པ་ཏ་ཡ། ཏྲཱཾ་ཏྲཱཾ་ཨ་ཧཱུཾ་སྟམ་བྷ་ཡ་བྷ་བ། ་བ་ཏི་ཧཱུཾ་ཕཊ། འདི་ལྟར་སྔགས་ཀྱི་རྒྱལ་པོ་ཡིས། །འཇིག་རྟེན་གསུམ་ཡང་སྐེམས་པར་བྱེད། །འབྱུང་པོ་རོ་ལངས་མཁའ་འགྲོ་མ། །སྲིན་པོ་ཤ་ཟ་ལ་སོགས་དང ། །གཞན་ཡང་རུང་སྟེ་བགེགས་དེ་རྣམས། །ཐོས་པ་ཙམ་གྱིས་འབྲོས་པར་འགྱུར། །ཇི་སྲིད་དུད་པ་མ་བབས་པ། །དེ་སྲིད་སྔགས་ནི་བཟླ 87.148b བར་བྱ། །དུད་པ་བབས་མ་ཐག་ཏུ་ནི། །ལག་པ་གཉི་གས་བཟུང་བར་བྱ། །དེ་ནས་བློ་ཆེན་རྣལ་འབྱོར་པས། །རོལ་རྩེད་ཕྲེང་བ་བཏུང་བར་བྱ། །བུ་མོ་ལོ་ནི་བཅུ་དྲུག་མ། །ལང་ཚོའི་གཟུགས་ལ་བརྩེ་བ་ཅན། །འདི་ནི་རྣལ་འབྱོར་པ་ཡིས་སྤྱད། །གཅིག་ཏུ་སེམས་ཅན་དོན་འབད་པ། །གཅེར་བུ་སྐྲ་གྲོལ་གྱུར་པ་ཡི། །མཁས་པས་ཧེ་ཧའི་སྔགས་བཏོན་ཏེ། །རོལ་རྩེད་ཕྲེང་མ་བཏུང་བར་བྱ། །དེ་ཡི་རྗེས་ལ་རྩེ་འཇོ་བརྩམ། །ཤིན་དུ་བཞད་གྱུར་ཕེད་མཛད་པའི། །བརྩེ་བ་ཆེན་པོའི་ལག་གཡོན་དུ། །དུད་ཆེན་མཆོག་ནི་གཞག་པར་བྱ། །སྦྱོར་བ་ལ་ནི་མཁས་པ་ཡིས། །ཕྱིས་ནི་བགས་ཀྱིས་བྱ་བ་བྱ། །པད་མ་ལས་བྱུང་རྫས་གང་ཞིག་།དེ་ཉིད་ཀྱིས་ནི་དུད་པ་མཉེ། །མིང་མེད་མཐེ་བོས་མེ་ཏོག་སྦྱིན། །རིལ་བུ་བརྒྱ་དང་རྩ་བརྒྱད་བྱ། །རིལ་བུ་རེ་རེ་རེ་རེ་ལ། །གསང་སྔགས་བརྒྱ་དང་རྩ་བརྒྱད་བཟླ། །ོཾ་བུདྡྷ་ཀ་པཱ་ལི་ནི་ཏྲཱཾ་ཧྲཱིཿ ཧཱུཾ་ཕཊ། འཇིག་རྟེན་གསུམ་ན་རྙེད་དཀའ་ཞིང ། །རྒྱུད་རྣམས་ཀུན་དུ་རྙེད་དཀའ་བ། །རྣལ་འབྱོར་མས་ཀྱང་རྙེད་དཀའ་བའི། །སྔགས་འདི་ཡིས་ནི་དུད་པ་བསྒྲུབ། །སྲིན་ལག་གི་ནི་སོར་མོ་ཡིས། །མིག་ལ་དུད་པ་བྱུགས་ཙམ་གྱིས། །སྟོང་གསུམ་རྡུལ་ཕྲན་ལྟ་བུ་ཡི། །སངས་རྒྱས་ཐམས་ཅད་མཐོང་བར་འགྱུར། །དཔག་ཚད་འབུམ་ཕྲག་བརྒྱད་བཅུ་ཡི། །སྟེང་དང་འོག་ནི་མཐོང་བར་འགྱུར། །ལག་པ་གཡོན་པས་མཉེས་ཙམ་གྱིས། །སྐད་ཅིག་དེ་ལ་རྣལ་མར་འགྱུར། །མཛུབ་མོས་བྱུགས་པ་ཙམ་གྱིས་ནི། །རྒྱུ་དང་མི་རྒྱུ་མཐོང་འགྱུར་ཏེ། །འབྱུང་པོ་ཡི་དགས་ཤ་ཟ་དང ། །གཞན་ཡང་གྲུབ་པ་རྣམས་དང་ནི། །དཔག་ཚད་བྱེ་བ་སྟོང་ཕྲག་གི་།སྟེང་དང་འོག་ནི་མཐོང་བར་འགྱུར། །ལག་པ་གཡོན་པས་མཉེས་ཙམ་གྱིས། །རྣལ་མར་འགྱུར་བར་ཐེ་ཚོམ་མེད། །གུང་མོས་བྱུགས་པ་ཙམ་གྱིས་ནི། །ཤིན་དུ་ངོ་མཚར་བྱེད་འགྱུར་ཏེ། །ཕེག་བརྡབས་བདུན་གྱི་སྒྲ་ཚད་དུ། །ནག་པོ་འབར་བྱེད་རྩེ་མོ་ཡིས། །སྤྲིན་རྣམས་ཐམས་ཅད་འཐོར་བར་འགྱུར། །འདི་ལྟའི་དུད་པ 87.149a རྙེད་པར་དཀའ། །ལག་པ་གཡོན་པས་མཉེས་ཙམ་གྱིས། །སྐད་ཅིག་དེ་ལ་མི་རུ་འགྱུར། །མཐེ་བོང་གིས་ནི་དུད་པ་ཡི། །བདག་ཉིད་ཆེན་པོ་བྱུགས་ཙམ་གྱིས། །གཟུགས་བརྙེན་མཚན་མ་རི་དང་ཤིང ། །གཞན་དག་གང་ཡང་རུང་བ་རྣམས། །ཁྲོ་བོའི་ལྟ་བས་བལྟས་ཙམ་གྱིས། །དུམ་བུ་སྟོང་དུ་འགྱུར་བ་ཡིན། །གཡོན་པས་མཉེས་པ་ཙམ་གྱིས་ནི། །རྣལ་མར་འགྱུར་བར་ཐེ་ཚོམ་མེད། །མཐེའུ་ཆུང་གིས་ནི་མིག་བྱུགས་ན། །སྐད་ཅིག་དེ་ལ་མི་སྣང་འགྱུར། །སངས་རྒྱས་ཀྱིས་ཀྱང་གཟིགས་མི་འགྱུར། །སྐད་ཅིག་སུམ་བཅུ་གསུམ་དུ་འཁོར། །མཛོད་དང་བུད་མེད་རྫས་ཉིད་དང ། །དངོས་པོ་གང་དང་གང་འདོད་པ། །དུད་པའི་བདག་ཉིད་ཆེན་པོ་ཡིས། །སྐད་ཅིག་དེ་ལ་འཕྲོག་པར་འགྱུར། །འདི་ལྟ་བུ་ཡི་དུད་མཆོག་གི་།སྦྱོར་བ་སྣ་ཚོགས་ལེགས་པར་བཤད། །དེ་ནི་མིག་ལ་བྱུགས་ཙམ་གྱིས། །རང་གི་གཟུགས་ནི་བསྒྱུར་བར་བྱེད། །དུད་པ་འདི་ནི་བྱུགས་ཙམ་གྱིས། །རིག་པ་འཛིན་པའི་གཙོ་བོར་འགྱུར། །བྱ་རོག་འུག་པ་བྱ་རྒོད་དང ། །སྦྲུལ་དང་ཁྱི་དང་ལྕེ་སྤྱང་དང ། །སྟག་དང་གུང་དང་བྱི་ལ་དང ། །སྦྲང་བུ་གླང་པོ་བོང་བུ་རུ། །དེ་ལྟར་དུད་པ་ཆེན་པོ་ཡིས། །སྣ་ཚོགས་པ་ཡི་ལས་བྱེད་པའོ། །ཀུན་ལ་ལས་ཀུན་ཡོད་མོད་ཀྱི། །སྦྱོར་བ་འབའ་ཤིག་རྙེད་པར་དཀའ། །སྦྱོར་བ་གླེགས་བམ་ལ་མ་བྲིས། །བླ་མའི་ཞལ་ནས་ཤེས་པར་བྱ། །དེ་ནས་ཡང་དག་རབ་བཤད་དེ། །སྦྱོར་བ་ཤིན་དུ་རྙེད་དཀའ་བ། །སྔགས་དང་རུས་པའི་སྦྱོར་བ་ཡིས། །རྟག་ཏུ་སྣ་ཚོགས་ལས་བྱེད་དོ། །གླང་པོའི་རུས་པས་བསད་པའི་སྦྱོར་བ་བྱའོ། །ོཾ་བུདྡྷ་ཀ་པཱ་ལི་ནཱི་ཧྲཱིཿ ཧཱུཾ། རྟ་ཡི་རུས་པས་བསྐྲད་པ་རྙེད་པར་དཀའ་བ་བྱའོ། །ོཾ་བུདྡྷ་ཀ་པཱ་ལི་ནཱི་ཁཾ་ཧྲཱིཿ ཧཱུཾ་ཕཊ། བ་ལང་གི་རུས་པས་དགྲའི་སྙིང་ཀར་ཕུར་བུ་གདབ་པར་བྱའོ། །ོཾ་བུདྡྷ་ཀ་པཱ་ལི་ནཱི་ཏྲཱཾ་ཧྲཱིཿ ་ཁྱིའི་རུས་པས་རེངས་པ་ཆེན་པོ་བྱ་བར་གསུངས་སོ། །ོཾ་བུདྡྷ་ཀ་པཱ་ལི་ནཱི་ཨཱཿ ཧཱུཾ་ཕཊ། རུས་པ་ཆེན་པོས་ནི 87.149b དགུག་པར་བྱའོ། །ོཾ་བུདྡྷ་ཀ་པཱ་ལ་ནཱི་ཧྲཱི་བཽ་ཥཊ། བོང་བུའི་རུས་པས་རྨོངས་པར་བྱའོ། །ོཾ་བུདྡྷ་ཀ་པཱ་ལི་ནཱི་བྲུཾ་ཧཱུཾ། འུག་པའི་རུས་པས་དབང་དུ་བྱའོ། །ོཾ་བུདྡྷ་ཀ་པཱ་ལི་ནཱི་ཏྲཱཾ་ཧྲཱིཿ ཿ ཧཱུཾ། བྱ་རྒོད་ཀྱི་རུས་པས་དབྱེ་བར་བྱའོ། །ོཾ་བུདྡྷ་ཀ་པཱ་ལི་ནཱི་ཧཱཿ ཕཊ་ཧཱུཾ། བོང་བུའི་རུས་པས་རེངས་པར་བྱའོ། །ོཾ་བུདྡྷ་ཀ་པཱ་ལི་ནཱི་བཛྲི་ལྕེ་སྤྱང་གི་རུས་པས་གཡུལ་ལས་རྒྱལ་བར་བྱེད་དོ། །ོཾ་བུདྡྷ་ཀ་པཱ་ལི་ནཱི་བྷ་ག་བ་ཏི་དྷ་ར་དྷ་ར་ཧ་ཧེ་ཧོ་ཧ་ཧ། མ་ཧེའི་རུས་པས་དགའ་ཞིང་རྩེ་བས་ལོ་བཅུ་གཉིས་སུ་ཉིན་དང་མཚན་དུ་དེའི་བྱང་ཆུབ་སེམས་མི་ལྟུང་ངོ ། །ོཾ་བུདྡྷ་ཀ་པཱ་ལི་ནཱི་ར་མ་ར་མ་ཀྲི་ཊ་ཀྲི་ཊ་ཧ་ཧ། སྦྲུལ་གྱི་རུས་པས་ཤིང་རྩད་ནས་འདོན་ནོ། །ོཾ་བུདྡྷ་ཀ་པཱ་ལི་ནཱི་ཏ་ཊ་ཏ་ཊ། ཏྲ་ཏ་ཡ་ཏྲ་ཏ་ཡ། མ་ཏ་སྥོ་ཊ་ཡ་སྤོ་ཊ་ཡ་ཨུདྤ་ཊ་ཡ་ཧཱུཾ་ཕཊ། སྟག་གི་རུས་པས་རི་འདེགས་པར་བྱེད་དོ། །ོཾ་བུདྡྷ་ཀ་པཱ་ལི་ནཱི། གྷ་ར་གྷ་ར། མ་ཊ་མ་ཊ་ཏྲ་ཊ་ཡ་ཏྲ་ཊ་ཡ། གྷ་ཊཱ་པ་ཡ་གྷ་ཊཱ་པ་ཡ། སྥོ་ཊ་སྥོ་ཊ་མོ་ཊ་མོ་ཊ་ཡ་སཾ་ཀྲ་མ་ཡ་ཧྲཱིཿ ་་ཧཱུཾ་ཏྲཾ་ཕཊ། ལྕགས་ཀྱུས་ནི་ནགས་སྟུག་པོ་སྟོང་པར་བྱེད་དོ། །ོཾ་བུདྡྷ་ཀ་པཱ་ལི་ནཱི་བཛྲེ་ནཱ་ཤ་ཡ་མཱ་ར་ཡ་གྷུ་ཊ་གྷུ་ཊི་ནི་སརྦྦ་བི་ན་ཡ་ཏི་ན་ཧྲི་ཡེ་ཡཾ་ཏ་ཌ་ཡ་བྷི་ཏྲཱ་པ་ཡ་ཙ་མཾ་ཙ་མཾ། བྷྲ་མ་ཡ་བྷྲ་མ་ཡ། བྷོ་བྷ་ག་བ་ཏི་ཨཾ་ཨཾ་ཏཊ་ཧཱུཾ་ཕཊ། སེམས་གཅིག་དྲི་མེད་མེ་ལོང་བཞིན། །གང་བསམས་དེ་ཡང་གཟུགས་བརྙན་དང ། །རྨྱི་ལམ་ལྟ་བུར་ཤེས་མོད་ཀྱི། །འོན་ཀྱང་རྣམ་པར་རྟོག་པས་བཟུང ། །སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པའི་གསང་བའི་ཡང་ཤིན་དུ་གསང་བ་ལས་སྔགས་སྣ་ཚོགས་ཀྱི་རབ་ཏུ་སྦྱོར་བའི་ལེའུ་སྟེ། ་་བཅུ་གཉིས་པའོ།། །། དེ་ནས་ཡང་དག་རབ་བཤད་པ། །རྣམ་དག་ལེའུ་རབ་རྙེད་དཀའ། །ནེ་ནེ་མོ་དང་ཚ་མོ་དང ། །མ་དང་བུ་མོ་ཆུང་མ་ཉིད། །གལ་ཏེ་ཕྱག་རྒྱ་ཆེ་འདོད་ན། །ཤེས་རབ་ཅན་གྱིས་འདི་དག་སྤྱད། །གཡུང་མོ་དང་ནི་གར་མཁན་མ། །ཁྲུས་མཁན་མ་དང་གཏུམ་མོ་ཡི། །བུ་མོ 87.150a ཀོ་བ་བྱེད་པར་གསུངས། །བློ་དང་ལྡན་པས་འདི་དག་སྤྱད། །དེ་ལྔ་རྣལ་འབྱོར་མ་ཡི་མཆོག་།དེ་ནས་ཡང་དག་རབ་བཤད་པ། །མ་དག་པ་ཡི་སེམས་སྦྱང་ཕྱིར། །མིག་ནི་སྲིང་མོར་གྱུར་པ་སྟེ། །རྣ་བ་ཚ་མོ་ཉིད་ཡིན་ནོ། །སྣ་ནི་མ་རུ་འགྱུར་བ་སྟེ། །ལྕེ་ནི་བུ་མོ་ཉིད་ཡིན་ནོ། །ཡིད་ནི་ཆུང་མར་འགྱུར་བ་སྟེ། །ལྔ་པོ་དེ་རྣམས་མཆོག་ལྷ་མོ། །ཕྱག་རྒྱ་ཆེན་པོ་རབ་སྟེར་མའོ། །གཏི་མུག་གར་མཁན་མ་རུ་འགྱུར། །ཞེ་སྡང་གཡུང་མོ་ཉིད་ཡིན་ནོ། །འདོད་ཆགས་ཁྲུས་མཁན་མ་ཡིན་ཏེ། །ང་རྒྱལ་གཏུམ་མོ་ཉིད་ཡིན་ནོ། །ཕྲག་དོག་ཀོ་བ་བྱེད་མའོ། །ལྔ་པོ་དེ་རྣམས་བུད་མེད་མཆོག་།གཟུགས་ལས་གཏི་མུག་སྐྱེ་བ་སྟེ། །སྒྲ་ལས་ཞེ་སྡང་སྐྱེ་བ་ཡིན། །དྲི་ལ་ལོངས་སྤྱད་པས་འདོད་ཆགས། །རོ་ལས་ང་རྒྱལ་ཉིད་ཡིན་ཏེ། །རེག་བྱ་ལས་ནི་ཕྲག་དོག་སྐྱེ། །སེམས་ཀྱི་དག་པ་ཉིད་ཡིན་ནོ། །དེ་ཕྱིར་རྣལ་འབྱོར་བློ་ཆེན་གྱིས། །ཤིན་དུ་སྦྱོར་བའི་སེམས་ཀྱིས་ནི། །སྐྱེས་འདིར་དངོས་གྲུབ་མ་ཐོབ་ཀྱང ། །སྐྱེ་གཞན་སྲིད་པར་དངོས་གྲུབ་འཐོབ། །ཇི་ལྟར་དངོས་པོ་མེད་པར་བསྒོམ། །ཇི་ལྟར་དངོས་པོ་བསྒོམ་པར་བྱ། །དངོས་པོ་སྒོམ་བྱ་ཇི་ལྟར་འགྱུར། །སྲིང་མོའི་གཟུགས་ནི་ཇི་ལྟར་ཡིན། །དཀར་མོ་ལྗང་ཁུ་སྔོན་མོའི་མདོག་།འདི་ལྟའི་གཟུགས་དང་ལྡན་པར་ནི། །དག་པའི་སེམས་ཀྱིས་བལྟ་མི་བྱ། །ཚ་མོས་ཇི་ལྟར་སྒྲ་ཐོས་པའི། །སྒྲ་གྲག་པ་ནི་རྣམ་གསུམ་ཉིད། །འདི་ལྟའི་སྦྱོར་དང་ལྡན་པར་ནི། །དག་པའི་སེམས་ཀྱིས་མཉན་མི་བྱ། །རབ་སྦས་སྐྱེད་མ་གང་ཡིན་དེས། །དྲི་ནི་རྣམ་པ་གསུམ་བལྟས་པ། །ལྟ་མིན་ཡིད་དང་ལྡན་པ་ལ། །ཇི་ལྟར་འདོད་ཆགས་སྐྱེ་བར་འགྱུར། །ལྕེ་དང་ལྷན་ཅིག་ལོངས་སྤྱོད་རྫས། །རོ་དྲུག་མྱངས་བ་ཅི་འདྲ་བ། །མྱངས་བས་ལོངས་སྤྱོད་ལྡན་པ་ཡི། །མྱངས་པའི་གཟུགས་ནི་ཇི་ལྟ་བུ། །ཡིད་ཀྱིས་ལོངས་སྤྱོད་དགའ་བདེ་ཉིད། །ཡིད་ཀྱིས་གཉི་ག་སྤྱད་པས་བདེ། །དེར་ནི་རྟག་པ་ཡོད་མ་ཡིན། །དངོས་པོ་ལས་ནི་དངོས་མེད་ཡོད། །དངོས་མེད་ལ་ཡང་དངོས་པོ་ཉིད། །དངོས 87.150b དང་དངོས་མེད་གཉི་ག་སྟོང ། །འདི་དག་སེམས་ཀྱི་དག་པ་ཉིད། །དེ་ནས་གཞན་ཡང་རབ་བཤད་པ། །ཕྱི་ཡི་ལུས་ནི་སྦྱང་ཕྱར་རོ། །ལྟ་དང་ལྡན་པ་སྙིང་རྗེ་སྟེ། །འཁྱུད་པ་བྱམས་པར་འགྱུར་བའོ། །དྲུད་པའི་སྦྱོར་བའི་བདག་ཉིད་ནི། །དགའ་བ་ཡན་ལག་མ་ཡི་མཆོག་།གཉི་ག་འདུས་ལས་གང་འཛག་པ། །དེ་ནི་བདག་གིས་བཏང་སྙོམས་གསུངས། །དེ་ལྟར་དངོས་པོའི་སྦྱོར་ལྡན་པ། །ཇི་ལྟར་འདོད་ཆགས་ཀྱིས་འཆིང་འགྱུར། །མཐོང་བ་ལས་ནི་འདོད་ཆགས་སྐྱེ། །འཁྱུད་ལས་འབྲས་བུ་ཅུང་ཟད་ཙམ། །དྲུད་པ་ལས་ནི་དགའ་བ་སྐྱེ། །ཀུན་གྱི་མཐའ་མར་དགའ་བྲལ་ལོ། །དེ་ལྟར་དགའ་དང་དགའ་བྲལ་འབྲས། །ཁམས་གསུམ་པ་ལས་སྐྱེ་བར་འགྱུར། །རབ་དགའ་སེམས་ཀྱི་སྦྱོར་བ་ཡིས། །དངོས་པོ་གསུམ་གྱིས་འཆིང་མི་འགྱུར། །བཟའ་དང་བཏུང་བ་གང་ཅིའང་རུང ། །བདེ་བ་འབབ་པའི་ཁ་ཟས་རྣམས། །དེ་ཀུན་བཤང་དང་གཅི་སོགས་སུ། །རྣལ་འབྱོར་རིག་པས་རྟག་ཏུ་བརྟག་།གང་ཅི་རུང་བའི་དགའ་རྩེ་འཇོ། །འཁྱུད་པ་དང་ནི་འོ་བྱེད་དང ། །ཉེད་དང་འཚིར་བ་ཉིད་ཀྱིས་ནི། །ཕྱག་རྒྱ་ཆེན་པོའང་མཐོང་བར་འགྱུར། །འདི་ལྟའི་བསྒོམ་དང་ལྡན་པས་ནི། །འདི་རུ་འགྲུབ་པར་ཐེ་ཚོམ་མེད། །རྣལ་འབྱོར་མ་ལྔས་སངས་རྒྱས་ཀྱི། །དཔལ་དང་ཕྱག་རྒྱ་ཆེར་སྟེར་བྱེད། །རྣལ་འབྱོར་པ་ཡིས་དེ་མཆོད་ན། །འདོད་པ་རྣམས་ཀྱིས་གོས་མི་འགྱུར། །ཕྲག་དོག་ལ་སོགས་ཀྱིས་སྦགས་ཀྱང ། །དེ་ལ་ཉེས་པས་གནོད་པ་མེད། །རྣལ་འབྱོར་པ་ཡི་མཆོག་དེ་ཉིད། །སྲིད་པའི་ཉེས་པས་གོས་མི་འགྱུར། །ཇི་སྲིད་ཁམས་ནི་ཕྱི་མི་གསོར། །སངས་རྒྱས་སྐུ་སྲིད་སྡིག་དང་བྲལ། །བྱང་ཆུབ་སེམས་ནི་འཛག་མེད་པ། །གང་ཚེ་ཕུན་སུམ་ཚོགས་པའི་ཤིང ། །སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་དུ་གསང་བ་ལས་སེམས་རྣམ་པར་དག་པའི་ལེའུ་སྟེ། ་བཅུ་གསུམ་པའོ།། །། དེ་ནས་ཡང་དག་རབ་བཤད་པ། །སྣ་ཚོགས་སྡེ་མས་བསྔགས་པའི་ལེའུ། །དེ་ལྟར 87.151a ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་དང ། རི་རབ་ཀྱི་རྡུལ་ཕྲ་རབ་སྙེད་དང་མཚུངས་པའི་རྣལ་འབྱོར་མ་རྣམས་སྤྱན་དྲངས་ཤིང་མགུ་བའི་སེམས་ཀྱིས་སྣ་ཚོགས་སྡེ་མ་ལ་བཏུད་དེ་བསྟོད་པ། །ེ་མ་འོ་བཅོམ་ལྡན་འདས་ལྷ་མོ། །སངས་རྒྱས་ཐམས་ཅད་སྐྱེད་བྱེད་མ། །དཔལ་དང་གྲགས་པ་ཆེ་ཞིང་འཇིགས། །སེམས་ཅན་ཀུན་ལ་ཕན་མཛད་མ། །ལྷ་མོ་སྙིང་རྗེ་ཆེ་ལྡན་མ། །ཕྱག་རྒྱ་ཆེན་པོ་བློ་ཆེན་མ། །དོན་ཆེན་འབྲས་བུ་སྟོན་མཛད་མ། །སངས་རྒྱས་ཐོད་པ་ཡི་ནི་རྒྱུད། །རྡོ་རྗེ་འཆང་གིས་སྦས་པ་དང ། །སངས་རྒྱས་རྣམས་ཀྱིས་མ་གསུངས་ཤིང ། །བྱང་ཆུབ་སེམས་དཔའི་ཡུལ་མིན་པ། །གསུང་གཅིག་གིས་ནི་གསལ་མཛད་དེ། །དེ་ནི་ལྷ་མོ་ཁྱོད་ཀྱིས་གསུངས། །ེ་མའོ་སྣོད་ཆེན་ལྷ་མོ་ཁྱོད། །རྣལ་འབྱོར་མ་ཀུན་བསྡུས་བྱས་པ། །དེ་བཞིན་གཤེགས་ཀུན་ཡུལ་མིན་པ། །རྙེད་དཀའ་དངོས་གྲུབ་གང་ཡིན་པ། །དེ་ནི་ལྷ་མོས་གསལ་བར་མཛོད། །གསུངས་པ། རྣལ་འབྱོར་མ་ནི་ཐམས་ཅད་ཉོན། །བྱང་ཆུབ་སེམས་དཔའ་ཐམས་ཅད་དང ། །འདོད་ཆགས་བྲལ་དང་བདག་ཆེན་ཉོན། །སངས་རྒྱས་དེ་བཞིན་གཤེགས་པ་ཉོན། །ཀླུ་དང་ལྷར་བཅས་མི་རྣམས་ཉོན། །རྒྱུད་རྒྱལ་འདི་ནི་བཀླགས་ཙམ་གྱིས། །བསོད་ནམས་གང་ཡིན་དེ་ཀུན་གྱི། །བསོད་ནམས་རྗེས་རང་ཡོངས་སུ་བསྔོ། །ཕྱག་རྒྱ་ཆེན་པོའི་དོན་དུ་ནི། །སངས་རྒྱས་ཡོན་ཏན་རྣམ་པ་དབུལ། །སྔགས་དོན་ཟབ་མོ་རྣམས་དང་ནི། །སྦྱོར་བ་ཤིན་དུ་རྙེད་དཀའ་བ། །གང་ཞིག་གསལ་བྱས་བདག་བཟོད་མཛོད། །ཤིན་དུ་སྦས་པའི་ཡུལ་དེ་ཡང ། །སེམས་ཅན་དོན་དུ་གསལ་བྱས་པས། །རྒྱལ་བའི་མཆོག་རྣམས་བདག་བཟོད་མཛོད། །དེ་ནས་ཡང་དག་རབ་བཤད་པ། །སྔགས་ཀྱི་བཟླས་པ་སྟོབས་པོ་ཆེ། །གལ་ཏེ་དངོས་གྲུབ་མཆོག་འདོད་ན། །སངས་རྒྱས་ཐོད་སྦྱོར་བཟང་པོ་བཟླ། །ོཾ་ཧྲཱིཿ བུདྡྷ་ཧཱུཾ་ཀ་པཱ་ལི་ནཱི་ཨཱཿ ་འཇུག་པ་ལ་ཨོཾ། འབྱུང་བ་ལ་ཧྲཱིཿ ་་གནས་པ་ལ་བུདྡྷ། བདེ་བ་ལ་ཧཱུཾ། ནུབ་པ་ལ་ཀ་པཱ་ལི་ནཱི། ལྡང་བ་ལ་ཨཱཿ འོ། །དེ་ལྟར་བཟླས་པ་རབ་རྙེད་དཀའ། །སངས 87.151b རྒྱས་ཐོད་པའི་སྦྱོར་ཆུད་བཟླ། །དེ་ལྟར་ཡིད་ཀྱི་བཟླས་ལྡན་པས། །དངོས་གྲུབ་འཐོབ་པར་ཐེ་ཚོམ་མེད། །ོཾ་བུདྡྷ་ཀ་པཱ་ལི་ནཱི་ཨཱཿ ཧྲཱིཿ ཧེཿ ཧཱུཾ་ཕཊ། སྙིང་པོའི་སྔགས་སོ། །བུདྡྷ་ཀ་པཱ་ལི་ནཱི་བཛྲི་ནི་ཧོ་ཧཱུཾ། ཨ་དུར་ལ་ཀྵེ་ཧཱུཾ་ཕཊ། ཉེ་བའི་སྙིང་པོའི་སྔགས་སོ། །དེ་ནས་ཡང་དག་རབ་བཤད་པ། །དབང་དུས་ཆོ་ག་ཇི་བཞིན་དུ། །སློབ་མ་དད་བརྟན་གང་ཞིག་གིས། །ཤེས་རབ་མ་ལ་གསོལ་བ་གདབ། །དྲི་ཞིམ་པ་ཡི་དངོས་པོ་ཡིས། །མཎ་ཌལ་རྣམ་པ་ལྔ་བྱས་ཏེ། །སངས་རྒྱས་ཀུན་གྱིས་བརྒྱན་བྱས་པ། །ལྷ་མོ་ཆེ་ལ་གསོལ་བ་གདབ། །ཞལ་དུ་བཟའ་བའི་རྫས་མཆོག་བསྟབ། །རྫས་དེ་རྣམས་ནི་གསོལ་བ་དང ། །ཡིད་ནི་ཚིམ་ཞིང་ཐུགས་དགྱེས་སོ། །ལྷ་མོ་དགྱེས་པར་མཐོང་ནས་ནི། །ཚིག་འདི་དག་གིས་སྨྲ་བར་བྱེད། །རྣམ་པར་རྟོག་པ་མང་པོ་ཡིས། །གཡོགས་པའི་བག་ཆགས་རབ་ལྡན་པ། །འཁོར་བའི་འདམ་དུ་བྱིང་བ་བདག་།མཛེས་མ་ཁྱོད་ཀྱིས་སྐྱོབ་པར་མཛོད། །གྲགས་ཆེན་སྙིང་རྗེ་ལྡན་པ་ཡི། །ལྷ་མོ་དེ་ནི་ཞི་བར་མཛོད། །དེར་ནི་རྒྱན་རྣམས་ཐམས་ཅད་དང ། །ལྷབ་ལྷུབ་རྒྱན་རྣམས་དབུལ་བར་བྱ། །དད་པ་བརྟན་པའི་སེམས་ཀྱིས་ནི། །དེ་ནས་བདག་ཉིད་དབུལ་བར་བྱ། །སྣ་ཚོགས་ཟས་དང་སྣ་ཚོགས་བཏུང ། །དེ་ཡི་མདུན་དུ་དབུལ་བར་བྱ། །གང་གིས་ཤེས་རབ་མ་མཉེས་པ། །སངས་རྒྱས་ཐམས་ཅད་ཀྱིས་ནི་མཆོད། །འདི་ཉིད་ལ་ནི་སངས་རྒྱས་བཞུགས། །གཞན་ཡང་དངོས་གྲུབ་གཙོ་བོ་དང ། །སྙིང་རྗེ་ལྡན་པ་གཞན་གང་ཞིག་།མཁའ་འགྲོ་མ་ཀུན་འདི་ལ་བཞུགས། །གང་དུ་དབང་པོ་འགགས་གྱུར་པ། །བདག་རྟོག་རང་བཞིན་ཉམས་པ་སྟེ། །ཀྱེ་དེ་ལྷན་ཅིག་སྐྱེས་དགར་འགྱུར། །བླ་མའི་ཞལ་སྔར་གསལ་བར་ཞུས། །གང་ཞིག་འཆར་དུས་ཚེ་ན་དབང་པོ་དང ། །ཡུལ་མཉམ་ནུབ་གྱུར་དེ་ལ་ཕྱག་འཚལ་ལོ། །མཁས་པ་རྣམས་ཀྱི་སྙིང་སྦས་སུ་སད་པ། །ཕྱིས་ནི་མངོན་དགའ་རྒྱལ་བའི་མཛེས་སྐུ་གཅིག་།སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་དུ་གསང་བ་ལས་སྔགས་ཀྱི་བཟླས་པ་དང ། ཤེས་རབ་མ་ལ་གསོལ 87.152a བ་གདབ་པ་དང ། རྒྱུད་ཐམས་ཅད་ཀྱི་གླེང་གཞིའི་ལེའུ་སྟེ་བཅུ་བཞི་པའོ། །འདི་གསུངས་ནས་སྣ་ཚོགས་སྡེ་མ་ལ་སོགས་པའི་རྣལ་འབྱོར་མ་ཐམས་ཅད་དང ། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་རང་རང་གི་གནས་ན་འདུག་སྟེ། ཅིའང་མི་གསུང་བར་བཞུགས་སོ། །སངས་རྒྱས་ཐོད་པ་ཞེས་བྱ་བའི་རྒྱུད་རྣལ་འབྱོར་མ་ཆེན་མོས་གསུངས་པ་མཆོག་ཏུ་གསང་བ་རྫོགས་སྷོ།། །། རྒྱ་གར་གྱི་མཁན་པོ་ཤྲཱི་ག་ཡ་དྷ་ར་དང ། བོད་ཀྱི་ལོཙྪ་བ་གྱི་ཇོ་ཟླ་བའི་འོད་ཟེར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། །ཡེ་དྷ་རྨཱ་ཧེ་ཏུ་པྲ་བྷ་བཱ་ཧེ་ཏུན་ཏོ་ཥཱན་ཏ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎཿ །། |