།། དུར་ཁྲོད་བདག་མོས་གསོལ་པ། ལྷ་མོ་རྣམས་ཀྱི་སྐུ་མདོག་ནི། །ཇི་ལྟར་ཤེས་ན་གྲོལ་བར་འགྱུར། །ཕག་མོ་ཞེས་བྱ་གང་ལ་བྱ། །ཡི་གེའི་དོན་ནི་གང་ལ་བསྐྱལ། །བསྐྱེད་རྫོགས་ངོ་བོ་གང་ལ་བྱ། །དཔའ་བོ་ཧེ་རུ་ཀས་བཀའ་སྩལ་པ། ཉོན་ཅིག 87.93b དུར་ཁྲོད་ཕག་མོ་ཁྱོད། །ཉེས་པའི་སྐྱོན་གྱིས་མ་གོས་པ། །དཀར་ཞིང་སྤྲོས་བྲལ་ཞི་བར་བྱེད། །མ་ཆགས་སྐྱོན་གྱིས་མ་གོས་པ། །དམར་ལ་གདང་བ་སྒྲ་སྒྲོགས་ཡུམ། །སྐྱོན་མེད་སེམས་ཉིད་རང་དབང་འདུས། །གཉན་པོ་གཅིག་ཀྱང་མི་འགྱུར་བས། །ཁྲོས་མ་ནམ་མཁའི་ཁ་དོག་བཞིན། །མི་འགྱུར་རང་སེམས་དབྱིངས་སུ་གྲོལ། །ཆེ་བ་ཡེ་ཤེས་ལྔ་རྒྱས་པ། །སེར་མོ་སྐྱོན་མེད་དོན་གྲུབ་མ། །ངོ་བོ་རྒྱལ་ལ་གཡོ་དང་བྲལ། །སྣ་ཚོགས་སྐྱོན་གྱིས་མ་གོས་པས། །ིན་དྲ་ནཱི་ལའི་མཐར་བྱིན་མ། །སྣ་ཚོགས་ངོ་བོ་གཅིག་ཏུ་འདུས། །རྣམ་པ་གང་ཡང་འགྱུར་བ་མེད། །ཆོས་ཀྱི་དབྱིངས་ལས་འགྱུར་བ་མེད། །རྣམ་རྟོག་ཅིས་ཀྱང་མ་གོས་པས། །པག་ཅེས་བྱ་བ་རྟོག་མེད་ཡིན། །དབྱིངས་ཉིད་རྟོག་པ་སྤྲོས་བྲལ་བས། །མོ་ཞེས་བྱ་བ་དབྱིངས་སུ་ཐིམ། །དེ་ལ་ཕྱེ་ན་རྣམ་པ་གསུམ། །དམ་ཆོས་སྐྱེ་མེད་ཕག་མོ་ནི། །སྐྱེ་འགག་མེད་པས་ཆོས་སྐུ་ཡིན། །བརྗོད་པ་སྒྲ་ཡི་ཕག་མོ་ནི། །ཕག་ནི་ཀཱ་ལི་ཐབས་ཡིན་ལ། །མོ་ནི་ཨཱ་ལི་ལོངས་སྐུར་འདོད། །མཚོན་པ་དབྱིངས་ཀྱི་ཕག་མོ་ནི། །སྟོང་ཉིད་མཚོན་པའི་སྐུ་མདོག་ལ། །རྟོག་མེད་སྙིང་རྗེ་ཕག་གི་གདོང ། །ཐབས་དང་ཤེས་རབ་ཕག་མོ་ལ། །བདེ་སྟོང་སྐྱོན་བྲལ་གཅེར་བུ་ནི། །རྟོག་པ་མེད་པས་སྤྲུལ་སྐུའོ། །ཡིག་འབྲུ་གསལ་ལ་མི་རྟོག་པས། །ཐིམ་པ་ན་ཡང་ཅང་ཏེའུ། །སྣང་སྟོང་མཐའ་དང་བྲལ་བའོ། །བསྐྱེད་རྫོགས་ངོ་བོ་དབྱེར་མེད་པས། །མཚོན་པ་སྣང་བ་སྟོང་པའི་ངང ། །དེ་ཉིད་སྣང་བའི་ངོ་བོ་ཉིད། །དབྱེར་མེད་གཟུང་འཇུག་ཁས་ལེན་བྲལ། །གཅིག་ལ་གཅིག་རྒྱས་གདབ་པར་བྱ། །གྲོལ་འགྱུར་འདི་ལ་ཐེ་ཚོམ་མེད་ཅེས་གསུངས་སོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་རྒྱུད་ཕྱི་མ་བསྐྱེད་རིམས་བསྟན་པའི་ལེའུ་སྟེ་དང་པོའོ།། །། དེ་ནས་དུར་ཁྲོད་བདག་མོ་དེས་དཔའ་བོ་ཆེན 87.94a པོ་ལ་འཛུམ་པ་དང་བཅས་ནས་ཞུས་པ། གསང་སྔགས་རྣམས་ཀྱི་སྔགས་ནི་གང ། །བཟླས་པར་བྱ་བའི་ཡི་གེ་གང ། །འཁོར་ལོ་རྣམ་བཞི་དགོད་པ་གང་ཞེས་ཞུས་པས། ཧེ་རུ་ཀས་བཀའ་སྩལ་པ། དུར་ཁྲོད་བདག་མོས་གུས་པར་གྱིས། །གསང་སྔགས་རྣམས་ཀྱི་ཡི་གེ་ནི། །ཐམས་ཅད་བྱེད་པ་ཡི་གེ་ཨོཾ། །དགྱེས་པ་སྐུ་ཡི་ཡི་གེ་ནི། །བཛྲ་བཱ་ར་ཧི་ཞེས་འབྱུང ། །ནུས་པ་འབྱུང་བ་གསུང་གི་ཀྲོ་ཏཱ་ཀཱ་ལི། །རྟོགས་པ་ཐུགས་ནི་ཧ་རི་ས། །ཡོན་ཏན་འབྱུང་བ་ཨ་བེ་ཤ་ཡ། །ཕྲིན་ལས་མཛད་པ་ཨེ་བཾ་མ་ཡ། །དེ་ལས་གཞན་ཡང་འདི་ལྟ་སྟེ། །འཁོར་ལོ་ལྔ་ཡི་དབུས་ཉིད་དུ། །ཡི་གེ་བཞི་པས་རྒྱས་བཏབ་ནས། །བཟླས་པ་ཕྱི་ནང་གསང་བ་གསུམ། །ཞི་བ་ཕྱི་ཡི་བཟླས་པ་ནི། །ཡིག་འབྲུ་རྣམས་ནི་ཁ་དོག་དཀར། །དེ་ལས་འོད་ཟེར་དཀར་པོ་འཕྲོས། །ཉོན་མོངས་ཤེས་བྱའི་སྒྲིབ་པ་ཀུན། །བ་སྤུའི་སྒོ་ནས་བསྟན་པ་ཡིས། །སེམས་ཅན་ཀུན་ལ་ཕོག་པས་ཀྱང ། །སྒྲིབ་པ་ཐམས་ཅད་དག་པར་བསམ། །དེ་བཞིན་གཤེགས་ལ་ཕོག་པས་ཀྱང ། །མཉེས་པའི་མཆོད་པ་ཕུལ་བས་སོ། །བདག་ལ་སླར་ཐིམ་ཞི་བ་འགྲུབ། །རྒྱས་པ་སེར་པོ་འཕྲོ་འདུ་ཡིས། །གོང་བཞིན་སྤྲོ་བསྡུ་ཤེས་པར་བྱ། །དམར་པོ་དབང་གི་འཕྲོ་འདུ་བྱ། །དྲག་པོ་ནག་པོའི་འཕྲོ་འདུ་བྱ། །སྣ་ཚོགས་འཕྲོས་པས་ཕྲིན་ལས་བཞིའི། །དངོས་གྲུབ་ཐམས་ཅད་འགྲུབ་པ་ཡིན། །ནང་དང་གསང་བའི་བཟླས་པ་ཡང ། །གོང་བཞིན་སྤྲོ་བསྡུ་ཤེས་པར་བྱ། །དུར་ཁྲོད་ཕག་མོས་ཡང་གསོལ་པ། །ཟད་ཅིང་འཕེལ་བར་བྱེད་པ་གང ། །མཐར་ཐུག་པའི་ཡི་གེ་གང ། །ཞེས་ཞུས་སོ། །དཔའ་བོ་ཆེན་པོས་ཡང་གསུངས་པ། །གཏི་མུག་ཟད་བྱེད་ཨ་ཡིན་ཏེ། །ཧས་ནི་ཞེ་སྡང་ཟད་པར་བྱེད། །ང་རྒྱལ་ཟད་བྱེད་རི་ཡིན་ཏེ། །ནི་ཡིས་འདོད་ཆགས་ཟད་པར་བྱེད། །ཕྲག་དོག་ཟད་བྱེད་ས་ཡིན་ནོ། ། ནི་ཆོས་དབྱིངས་ཡེ་ཤེས་འཕེལ། །ཧ་ནི་མེ་ལོང་ཡེ 87.94b ཤེས་འཕེལ། །རི་ཡིས་མཉམ་ཉིད་ཡེ་ཤེས་འཕེལ། །ནི་ཡིས་སོ་སོར་རྟོག་བྱེད་འཕེལ། །ས་ཡི་བྱ་གྲུབ་ཡེ་ཤེས་འཕེལ། ། ནི་སངས་རྒྱས་མཁའ་འགྲོར་སྣང ། །ཧ་ནི་རྡོ་རྗེ་མཁའ་འགྲོར་སྣང ། །རི་ནི་རིན་ཆེན་མཁའ་འགྲོར་སྣང ། །ནི་ཡིས་པད་མ་མཁའ་འགྲོར་སྣང ། །ས་ཡིས་ལས་ཀྱི་མཁའ་འགྲོར་སྣང ། །ས་ནི་དེ་བཞིན་རིགས་ཐོབ་སྟེ། །ཧས་ནི་རྡོ་རྗེའི་རིགས་ཆེན་ཐོབ། །རི་ནི་རིན་ཆེན་རིགས་ཐོབ་སྟེ། །ནི་ཡིས་པད་མའི་རིགས་ཐོབ་བོ། །ས་ནི་ལས་ཀྱི་རིགས་ཆེན་ཐོབ། །ཆོས་སྐུའི་མཐར་ཐུག་ཨ་ཡིན་ཏེ། །ལོངས་སྐུའི་རྣམ་པ་ཡི་གེ་ཧ། །སྤྲུལ་པ་སྐུ་ནི་རི་ཡིན་ནོ། །ངོ་བོ་ཉིད་སྐུའི་ཡི་གེ་ནི། །རྡོ་རྗེའི་སྐུ་ནི་ཡི་གེ་ས་ཞེས་གསུངས་སོ། །དུར་ཁྲོད་བདག་མོས་ཡང་ཞུས་པ། །དབང་པོ་རབ་འབྲིང་རིམ་པ་ཡིས། །ཇི་ལྟར་ཤེས་ན་གྲོལ་བར་འགྱུར། །དཔའ་བོ་ཆེན་པོས་ཡང་གསུངས་པ། །དབང་པོ་རབ་འབྲིང་གསུམ་ཡིན་ཏེ། །དབང་པོ་རབ་ཀྱི་གང་ཟག་ལ། །སྐད་ཅིག་དྲུག་གི་གདམས་ངག་བསྟན། །ཡེ་ཤེས་སྐད་ཅིག་དང་པོ་ཡིས། །གཟུང་བའི་རྣམ་པར་རྟོག་པ་གཅད། །སྐད་ཅིག་གཉིས་པའི་ཡེ་ཤེས་ཀྱིས། །འཛིན་པའི་རྣམ་པར་རྟོག་པ་གཅད། །སྐད་ཅིག་གསུམ་པའི་ཡེ་ཤེས་ཀྱིས། །གཟུང་འཛིན་གཉིས་ཀྱི་རྟོག་པ་གཅད། །སྐད་ཅིག་བཞི་པའི་ཡེ་ཤེས་ཀྱིས། །ཉམས་ལ་ཞེན་པའི་རྣམ་རྟོག་གཅད། །སྐད་ཅིག་ལྔ་པའི་ཡེ་ཤེས་ཀྱིས། །ཉམས་མྱོང་བདེ་བའི་རྣམ་རྟོག་གཅད། །སྐད་ཅིག་དྲུག་པའི་ཡེ་ཤེས་ཀྱིས། །ཡིད་ལ་བྱེད་པའི་རྣམ་རྟོག་གཅད། །གྲོལ་འགྱུར་རབ་ལ་ཐེ་ཚོམ་མེད། །དབང་པོ་འབྲིང་པོའི་གང་ཟག་ལ། །རླུང་དྲུག་མན་ངག་བསྟན་པ་ནི། །ལྷན་ཅིག་སྐྱེས་པའི་རླུང་གོམས་པས། །རང་བཞིན་སྒྲིབ་པ་སེལ་བར་བྱེད། །ཐད་ཀར་འབྱུང་བའི་རླུང་གོམས་པས། །མཚན་མོ་ལྟ་བུའི་སྒྲིབ་པ་སེལ། །རང་ལས་སྐྱེས་པའི་རླུང་གོམས་པས། །ཆོད་པའི་སྒྲིབ་པ་སེལ་བར་བྱེད། །སྤོང་བྱེད་རླུང་ལ་གོམས་པ་ཡིས། །སྔོན་དུ་རྒྱུ་བའི་སྒྲིབ་པ་སེལ། །སྦྱོང་བྱེད་རླུང་ལ་གོམས་པ་ཡིས། །ཤེས 87.95a བྱའི་སྒྲིབ་པ་སེལ་བར་བྱེད། །རྫོགས་བྱེད་རླུང་ལ་གོམས་པ་ཡིས། །ས་རྣམས་རིམས་ཀྱིས་གནོན་པར་བྱེད། །ཡེ་ཤེས་རྣམས་ནི་དུས་གཅིག་འཆར། །ཤེས་བྱ་ཐམས་ཅད་དུས་གཅིག་ཆོད། །རླུང་དྲུག་མ་ཡིན་ཡེ་ཤེས་ཡིན། །མུན་པ་རྣམས་ནི་བསྒྲིབས་པ་ཡིས། །ཡེ་ཤེས་རིམས་ཀྱིས་སྐྱེ་བ་དང ། །སྒྲིབ་པ་རིམས་ཀྱིས་སེལ་བར་བྱེད། །གྲོལ་འགྱུར་འདི་ལ་ཐེ་ཚོམ་མེད། །དབང་པོ་ཐ་མའི་གང་ཟག་ལ། །ཡུལ་ནི་དག་པའི་སངས་རྒྱས་ཞིང ། །ལུས་དག་པ་ནི་དཀྱིལ་འཁོར་ཡིན། །རང་སེམས་དག་པ་ཕག་མོའི་སྐུ། །ངག་དག་པ་ནི་སྔགས་སུ་གསུངས། །ལྟ་བསྒོམ་དག་པ་དངོས་གྲུབ་ཡིན། །དཔེ་དོན་གཉིས་སུ་མེད་པ་གང ། །སྐལ་མེད་དངོས་གྲུབ་མི་འབྱུང་བས། །ལོ་དྲུག་བསྒོམས་ན་ཐེ་ཚོམ་མེད་ཅེས་གསུངས་སོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་རྒྱུད་ཕྱི་མ་རྫོགས་རིམ་བསྟན་པའི་ལེའུ་སྟེ་གཉིས་པ་རྫོགས་སྷོ།། །། པཎ་ཌི་ཏ་གཱ་ཡ་དྷ་རའི་ཞལ་སྔ་ནས། ་ལོཙྪ་བ་གྱི་ཇོ་ཟླ་བ་འོད་ཟེར་གྱིས་བསྒྱུར་བའོ། ། |