༄#། །རྒྱ་གར་སྐད་དུ། ་་ཤྲཱི་མ་ཧཱ་བཱ་ལ་ཛྙཱ་ན་རཱ་ཛ་ཏནྟྲ་རཱ་ཛ། ་་བོད་སྐད་དུ། ་་དཔལ་སྟོབས་ཆེན་ཡེ་ཤེས་རྒྱལ་པོའི་རྒྱུད་ཀྱི་རྒྱལ་པོ། ་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། །བཅོམ་ལྡན་འདས་དེ་ཁོ་ན་ཉིད་བཙུན་མོའི་བྷ་ག་ལ་འཁོར་དཔའ་བོ་རྡོ་རྗེ་ལ་སོགས་པ་མཁའ་འགྲོ་མ་དང ། མ་མོའི་ཚོགས་ཀྱིས་བསྐོར་ཏེ་བཞུགས་པའི་དུས་སུ། དཔའ་བོ་རྡོ་རྗེ་མཁའ་འགྲོ་མ་ལ་སོགས་པས་གཡོན་ཕྱོགས་སུ་བསྐོར་བ་ལན་གསུམ་བྱས་ནས་ཕྱོགས་གཅིག་ཏུ་འཁོད་དོ། །དཔའ་བོ་རྡོ་རྗེས་བཅོམ་ལྡན་འདས་ལ་སྤྱི་བོས་གཏུགས་ཏེ། ཧ་ཧ་ཞེས་པ་གསུམ་བརྗོད་ནས་བཅོམ་ལྡན་འདས་ལ་གསོལ་པ། རྩ་ནི་གང་ལགས་རླུང་གང་ལགས། །ཐིག་ལ་གང་ལགས་གྲངས་ནི་དུ། །དེ་ལ་སེམས་གཟུང་ཇི་ལྟར་ལགས། །འཁོར་ལོ་ཇི་ལྟར་ལགས་པ་དང ། །དེ་ཡི་གྲངས་ནི་དུ་ཞིག་མཆིས། །རྩ་རྣམས་རང་བཞིན་ཇི་ལྟར་ལགས། །ཡི་གེ་དགོད་ཐབས་ཇི་ལྟར་ལགས། །དེ་རྣམས་དབུས་ཀྱི་ལྟེ་བར་ནི། །ཡི་གེ་དགོད་པ་གང་དང་གང ། །གཏུམ་མོ་སྦར་བ་ཇི་ལྟར་ལགས། །ཟླ་བ་ཉི་མ་ཇི་ལྟར་ལགས། །གནས་ནི་གང་དུ་གཟུང་བར་བགྱི། །རྐྱེན་གཉིས་འཁོར་ལོ་ཇི་ལྟར་ལགས། །གོ་བཟློག་ཚུལ་ནི་ཇི་ལྟར་ལགས། །གསང་བའི་འཁོར་ལོ་བཞི་གང་ལགས། །དེ་རྣམས་ཀྱི་ནི་དགོངས་པ་དང ། །དེ་ལ་དགའ་སོགས་ཇི་ལྟར་འབྱུང ། །སྟོང་པ་བཅུ་དྲུག་ཇི་ལྟར་ལགས། །ས་ཡི་རིམ་པ་ཇི་ལྟར་ལགས། །དེ་རྣམས་ཀྱི་ནི་དགོངས་པ་དང ། །དགོས་པའི་དགོངས་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་དཔའ་བོ་རྡོ་རྗེ་ཁྱོད། །ཁྱོད་ལ་བཤད་ཀྱིས་ལེགས་པར་ཟུང ། །རྩ་རྣམས་ཀྱི་ནི་རང་བཞིན་ནི། །ནམ་མཁའ་གཉིས་མེད་ཐམས་ཅད་བསྐྱེད། །དེར་གནས་རླུང་གི་རང་བཞིན་ནི། །གཡོ་བ་རྣམ་ཤེས་གཡོ་བ་ཡིན། །ཐིག་ལེ་སྟོང་ཉིད་ངོ་བོ་སྟེ། །སྟོང་ཉིད་བསམ་དུ་མེད་པའོ། །ཐིག་ལེ་གྲངས་ནི་བཅུ་དྲུག་སྟེ། །རྩ་དང་རླུང་ཡང་དེ་བཞིན་ནོ། །དེ་ནས་སེམས་གཟུང་བསྟན་པ་ནི། །རྩ་རླུང་དང་ནི་ཐིག་ལེ་ལ། །གཉིས་མེད་རྩེ་གཅིག་སེམས་དང་པོ། །འཁོར་ལོའི 87.71b གྲངས་ནི་བཞི་ཡིན་ཏེ། །བདེ་ཆེན་འཁོར་ལོ་ལོངས་སྤྱོད་ཆོས། །དེ་འོག་སྤྲུལ་པའི་འཁོར་ལོ་སྟེ། །དེ་རེ་ལ་ཡང་བཞི་བཞི་སྟེ། །བཅུ་དྲུག་གྲངས་སུ་ཤེས་པར་བྱ། །མེ་རླུང་གཉིས་ནི་རྐྱེན་ཡིན་ཏེ། །རོ་མའི་འཁོར་ལོ་ཉིད་དང་ནི། །སྤྱི་གཙུག་འཁོར་ལོ་དབང་བསྐུར་གནས། །གསང་བའི་འཁོར་ལོ་བཞི་ཡིན་ཏེ། །བདེ་སྐྱོང་འཁོར་ལོ་དང་པོ་སྟེ། །རྟ་མགྲིན་ལོངས་སྤྱོད་འཁོར་ལོ་ཡིན། །རིག་པའི་འཁོར་ལོ་གསུམ་པའོ། །གསང་བའི་འཁོར་ལོ་བཞི་ཡིན་ནོ། །ཉི་ཤུ་རྩ་བཞི་གྲངས་སུ་བསྟན། །རྩ་རྣམས་རང་བཞིན་ང་ཡིས་བཤད། །རྩ་ནི་ས་ཡི་རང་བཞིན་ཏེ། །རླུང་དང་ཐིག་ལེའི་རང་བཞིན་ནོ། །དེ་ནས་ཡི་གེ་དགོད་པ་ནི། །བདེ་ཆེན་འཁོར་ལོ་སུམ་བཅུ་གཉིས། །གསལ་བྱེད་སུམ་བཅུ་རྩ་གཉིས་ནི། །གཡས་ནས་བསྐོར་ཏེ་དགོད་པར་བྱ། །ལོངས་སྤྱོད་འཁོར་ལོའི་རྩིབས་བཅུ་དྲུག་།དབྱངས་ཡིག་བཅུ་དྲུག་གཡོན་ནས་དགོད། །ཆོས་ཀྱི་འཁོར་ལོ་འདབ་མ་བརྒྱད། །ཡུམ་བཞིའི་ས་བོན་གཡོན་ནས་དགོད། །ཐབས་ནི་མཚམས་ཏེ་གཡས་ནས་བསྐོར། །སྤྲུལ་པའི་འཁོར་ལོའི་འདབ་མ་ནི། །དྲུག་བཅུ་རྩ་བཞི་གང་ཡིན་ལ། །གསལ་བྱེད་གཡས་བསྐོར་དགོད་པར་བྱ། །དབྱངས་ཡིག་གཉིས་ལྡན་གཡོན་ནས་བསྐོར། །བདེ་ཆེན་འཁོར་ལོའི་ལྟེ་དབུས་སུ། །ཧཾ་ནི་དཀར་པོ་ཐུར་བལྟས་བསམ། །ལོངས་སྤྱོད་འཁོར་ལོའི་ལྟེ་དབུས་སུ། །ོཾ་ནི་དཀར་པོ་གྱེན་བལྟས་བསམ། །ཆོས་ཀྱི་འཁོར་ལོའི་ལྟེ་དབུས་སུ། །ཧཱུཾ་ནི་སྔོན་པོ་ཐུར་བལྟས་བསམ། །སྤྲུལ་པའི་འཁོར་ལོའི་ལྟེ་དབུས་སུ། ། ནི་དམར་པོ་གྱེན་བལྟས་བསམ། །རྐྱེན་གྱི་འཁོར་ལོ་གཉིས་ཡིན་ཏེ། །དང་པོའི་གནས་སུ་ཡི་གེ་ཡཾ། །གཏུམ་མོ་འབར་བའི་ཡཾ་ཡིན་ཏེ། །ནག་པོ་ཡོངས་སུ་གྱུར་བ་ལས། །རླུང་འཁོར་མདོག་གནག་གཞུ་ཡི་དབྱིབས། །དབུས་སུ་དྷ་ལྔ་དགོད་བྱས་ནས། །བ་དན་ལྔ་ནི་མཛེས་པའོ། །གྲུ་གསུམ་གནས་སུ་ཡི་གེ་རཾ། །མེ་ཡི་འཁོར་ལོ་གྲུ་གསུམ་དམར། །དབུས་སུ་ཨོཾ་ཨཱཿ ཧཱུཾ་ནི་དགོད། །ཟུར་ལ་རྡོ་རྗེ་གསུམ་གྱིས་མཚན། །རྐྱེན་གྱི་འཁོར་ལོ་དེ་ལྟར་ཡིན། །རླུང་གིས་བསྐྱོད་པས་དམ་ཚིག་མེས། ། 87.72a ཡེ་ཤེས་མེ་ནི་བསྐུལ་བ་མཁས། །འཁོར་ལོ་བཞི་འམ་བརྒྱད་གཉིས་བཤད། །བདེ་ཆེན་མ་རྟོགས་གཉིས་ཙམ་བསྲེགས། །བདེ་ཆེན་ཧཾ་ནི་བསྲོས་བྱས་ནས། །ཞུ་བ་འཆི་མེད་བདུད་རྩི་ནི། །ཟླ་བ་ཞུ་བའི་བདུད་རྩི་ཡིས། །སྲོག་གི་རྩ་ཡི་ནང་ནས་འབབ། །རྒྱུན་དུ་འབབ་པར་གྱུར་པ་ཡིས། །འཆི་མེད་ཐིགས་པ་གཉིས་ཡིན་ཏེ། །གཟུང་བ་མདུད་པའི་ནང་དུ་གཟུང ། །གོ་བཟློག་ལུགས་སུ་བཟློག་པ་སྟེ། །མཐར་ཐུག་གནས་སུ་གཟུང་བའོ། །གསང་བའི་འཁོར་ལོ་བཞི་པ་ནི། །གསང་བ་བདེ་སྐྱོང་འཁོར་ལོ་སྟེ། །ཧཱུཾ་ནི་ལྟེ་བར་དགོད་བྱས་ནས། །འདབ་མ་ལྔ་བཅུ་བརྒྱད་ཀྱི་གྲངས། །གསལ་བྱེད་ལུགས་བཞིན་དགོད་པར་བྱ། །དབྱངས་ཡིག་རིམ་གཉིས་དག་བཀོད་ནས། །ཐ་མ་བཟུང་སྟེ་སྤངས་པའོ། །སྡིག་པ་སྤོང་ཕྱིར་བདེ་སྐྱོང་སྟེ། །དེ་ཕྱིར་བདེ་སྐྱོང་ཞེས་ནི་བཤད། །རྟ་མགྲིན་འཁོར་ལོའི་འདབ་བཟུང་ལ། །དབྱངས་ཡིག་ལུགས་དང་ལུགས་མིན་དགོད། །ལྟེ་བར་ཨུ་ནི་དགོད་པར་བྱ། །བདེ་བའི་ལོངས་སྤྱོད་མྱོང་བའི་ཕྱིར། །རྟ་མགྲིན་འཁོར་ལོ་རུ་ནི་བཤད། །རིག་པའི་འཁོར་ལོ་འདབ་མ་ལྔ། །ལྟེ་བར་ཧཾ་ནི་དགོད་བྱས་ནས། །འདབ་མ་ལྔ་ལ་ཨོཾ་ཧཱུཾ་ཏྲཾ་ཨ། །གཡས་ནས་རིམས་གྱིས་དགོད་པར་བྱ། །བཞི་པའི་དོན་ནི་རིག་པའི་ཕྱིར། །རིག་པའི་འཁོར་ལོ་ཞེས་ནི་བཤད། །གསང་བའི་འཁོར་ལོ་རིམ་པ་དྲུག་།ལྟེ་བ་འདབ་བཞི་འདབ་མ་བརྒྱད། །བཅུ་དྲུག་སུམ་བཅུ་རྩ་གཉིས་ཏེ། །དྲུག་བཅུ་རྩ་བཞི་བཤད་པ་ཡིན། །ལྟེ་བར་ཨ་ནི་དགོད་པ་སྟེ། །ེ་བཾ་མ་ཡ་དེ་རྣམས་ནི། །འདབ་མ་བཞི་ལ་གཡོན་ནས་དགོད། །འདབ་མ་བརྒྱད་ལ་དགོད་བྱ་བ། །སྡེ་བརྒྱད་ཀྱི་ནི་དང་པོ་བརྒྱད། །གཡོན་གྱི་རིམ་པས་དགོད་པར་བྱ། །འདབ་མ་བཅུ་དྲུག་གང་ཡིན་ལ། །མ་མོ་བཅུ་དྲུག་གཡོན་ནས་དགོད། །འདབ་མ་སུམ་བཅུ་གཉིས་སོགས་ལ། །དབྱངས་ཡིག་ཡི་གེ་བཅུ་དྲུག་ནི། །གཡས་དང་གཡོན་གྱི་རིམ་པས་དགོད། །འདབ་མ་དྲུག་བཅུ་རྩ་བཞི་ལ། །གཡས་ནས་ཀཱ་ལི་ལུགས་བཞིན་དགོད། །ཱ་ལི་རིམ 87.72b གཉིས་གཡོན་ནས་དགོད། །གསང་བའི་དབང་བསྐུར་བའི་ཕྱིར། །གསང་བའི་འཁོར་ལོ་ཞེས་ནི་བཤད། །དེ་ནས་རོ་མའི་འཁོར་ལོ་ནི། །འདབ་མ་གཉིས་ལ་ལྟེ་བར་བཅས། །མ་ནིང་བཞི་ཡི་འདབ་གཉིས་ལ། །ལྟེ་བར་དེ་ཉིད་ཐུར་ལ་དགོད། །རིན་ཆེན་རྩེ་མོ་བསམ་བྱ་བ། །བྷྱ་ནི་གྱེན་ལ་དགོད་པར་བྱ། །ཡི་གེ་གཉིས་ཀྱི་དབུས་སུ་ནི། །བྱང་ཆུབ་སེམས་ཀྱི་བདེ་བའི་རོ། །ཉམས་སུ་མྱོང་བར་བྱ་བའི་ཕྱིར། །ཉམས་མྱོང་རོ་མའི་འཁོར་ལོར་བཤད། །དེ་ནས་དབང་བསྐུར་འཁོར་ལོ་ནི། །སྟེང་གི་ཚངས་སྒོའི་འདབ་མ་བརྒྱད། །ལྟེ་བར་ཨཾ་ནི་དགོད་པ་སྟེ། །དཾ་ལཾ་ཁཾ་རུཾ། ་གཡོན་ནས་བརྩམས་ཏེ་ཕྱོགས་བཞིར་དགོད། །ཧཱུཾ་ཏྲཱཾ་ཧྲཱི་ཨ། གཡས་ནས་མཚམས་སུ་རིམ་པར་དགོད། །བྱང་ཆུབ་སེམས་ཀྱི་ཆུ་རྒྱུན་གྱིས། །ལུས་ངག་ཡིད་གསུམ་སྒྲིབ་པ་དག་།འཁྲུད་པའི་ཕྱིར་ན་དབང་བསྐུར་ཏེ། །དེ་ཕྱིར་དབང་བསྐུར་འཁོར་ལོར་བཤད། །དེ་ནས་ཡང་ནི་བཤད་བྱ་བ། །མདོར་བསྡུས་བསྒོམ་པ་བཤད་པར་བྱ། །གོང་དུ་བསྟན་པ་གང་ཡིན་པ། །སྒྱུ་མ་ཙམ་དུ་ཤེས་པར་བྱ། །རང་རིག་སེམས་ལས་གཞན་མིན་ཏེ། །རང་གི་སེམས་ཀྱི་སྟོང་པ་ཉིད། །འོད་གསལ་བ་ཡི་རང་བཞིན་དུ། །ཅི་ཡང་མི་རྟོག་ཤེས་འགྱུར་ན། །མ་བསྒོམས་ན་ཡང་བསྒོམ་པ་ཉིད། །དེ་ལྟར་སེམས་ལ་ལེགས་པར་ཟུང ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དཔའ་བོ་རྡོ་རྗེ་ལ་སོགས་པའི་དཔའ་བོ་དང ། མཁའ་འགྲོ་མ་དང ། མ་མོ་ལ་སོགས་པའི་འཁོར་དཔག་ཏུ་མེད་པ་རྗེས་སུ་ཡི་རང་བར་གྱུར་ཏེ། ཕྱི་ནང་གསང་བའི་མཆོད་པས་མཆོད་ནས་མི་སྣང་བར་གྱུར་ཏོ། །དཔལ་སྟོབས་ཆེན་ཡེ་ཤེས་རྒྱལ་པོའི་རྒྱུད་ཀྱི་རྒྱལ་པོ་རྨད་དུ་བྱུང་བ་རྫོགས་སྷོ།། །།རྒྱ་གར་གྱི་མཁན་པོ་གཱ་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། |