༄#། །རྒྱ་གར་སྐད་དུ། ་་ཤྲཱི་ཨགྣི་མཱ་ལེ་ཏནྟྲ་རཱ་ཛཱ། ་་བོད་སྐད་དུ། ་་དཔལ་མེའི་ཕྲེང་བའི་རྒྱུད་ཀྱི་རྒྱལ་པོ། ་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཧ་ཧ་ཧི་ཧི་ཧེ་ཧེ་ཀྱེ། །བདག་ལ་ཁྱེད་ལ་ཞུ་བ་མཆིས། །ཤྲཱི་ནི་གང་ལགས་ཧེ་གང་ལགས། །རུ་ནི་གང་ལགས་ཀ་གང་ལགས། །དབང་བཞི་ཧེ་རུ་ཀ་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་རྣམ་པར་སྤངས། །རུ་ནི་ཚོགས་དང་བྲལ་བ་ཉིད། །ཀ་ནི་གང་དུའང་མི་གནས་སོ། །དེ་ལྟའི་དཔལ་ལྡན་ཧེ་རུ་ཀ་ ། རྟག་ཏུ་ལུས་དང་སེམས་ལ་གནས། །དེ་ཉིད་ལ་ཡང་རྣམ་པ་བཞི། །དབང་བཞི་གྲངས་ཀྱིས་ངེས་པ་སྟེ། །དང་པོ་བུམ་དབང་ཧེ་རུ་ཀ་ ། སྐུ་དང་ཕྱག་མཚན་སྣང་བའི་ཚེ། །རང་སེམས་ལས་སུ་རུང་བ་སྟེ། །དེ་ཚེ་འཇིག་རྟེན་ཐ་མལ་པའི། །རྒྱུ་དྲུག་རྐྱེན་བཞི་འབྲས་བུ་བཞི། །སྤངས་པའི་ཕྱིར་ན་ཧེ་ཞེས་བརྗོད། །ལས་དང་ཉོན་མོངས་ཚོགས་དང་བྲལ། །དེ་ཡི་ཕྱིར་ན་རུ་ཞེས་བརྗོད། །འཇིག་རྟེན་ཐ་མལ་རྣམ་རྟོག་གི། །གཟུང་འཛིན་གང་ཡང་མི་གནས་པའི། །ཕྱིར་ན་ཀ་ཞེས་གསུངས་པའོ། །ཐབས་དང་ཤེས་རབ་ཟུང་འཇུག་པས། །གཟུང་འཛིན་གཉིས་བགགས་གཉིས་སུ་མེད། །དེ་ཡི་ཕྱིར་ན་ཤྲཱི་རུ་བརྗོད། །བསྐྱེད་པའི་རིམ་པ་ཧེ་རུ་ཀ ། ཕག་མོ་ལ་གནས་ཚོགས་དང་ལྡན། །ཟག་མེད་རྒྱུ་རྐྱེན་ཀུན་དང་ལྡན། །ཐབས་དང་ཤེས་རབ་གཉིས་ཀྱི་ཚུལ། །དེ་ནས་གསང་དབང་ཧེ་རུ་ཀ ། ཉི་ཟླ་ཕྱག་མཚན་ཡིག་འབྲུའི་ཚོགས། །བསྐྱེད་རིམ་རྒྱུ་རྐྱེན་ཀུན 87.68a སྤངས་ཏེ། །རླུང་སོགས་ལས་སུ་རུང་བས་ན། །དེ་ཡི་ཕྱིར་ན་ཧེ་ཞེས་བརྗོད། །ཕྱི་ཡི་སྦྱིན་སྲེག་གཏོར་མ་དང ། །མཆོད་པ་དཀྱིལ་འཁོར་ལ་སོགས་པའི། །ཚོགས་དང་བྲལ་བའི་ཕྱིར་ན་རུ། །བསྐྱེད་པའི་རྡོ་རྗེ་ཕག་མོ་དང ། །དམིགས་དང་ལྟ་སྤྱོད་གང་ལ་ཡང ། །མི་གནས་ཕྱིར་ན་ཀ་ཞེས་བརྗོད། །བསྐྱེད་པའི་གཟུང་འཛིན་གཉིས་མེད་མའོ། །ཕྱིར་ན་ཤྲཱི་ཞེས་གསུངས་པ་སྟེ། །རྒྱུ་རྣམས་ལམ་ལ་སོགས་དང་ལྡན། །རླུང་སོགས་ཐབས་དང་ཤེས་རབ་ཚུལ། །རླུང་སོགས་སྒྱུ་མའི་ངོ་བོར་གནས། །རྩ་རླུང་རང་བཞིན་གནས་ལ་སོགས། །ནང་གི་རྒྱུ་དང་རྐྱེན་སོགས་ལྡན། །ནང་གི་དཔལ་ལྡན་ཧེ་རུ་ཀ་ ། དེ་ནས་གསུམ་པའི་ཧེ་རུ་ཀ་ ། རླུང་སོགས་རང་བཞིན་གནས་པ་ཡི། །རྒྱུ་སྤངས་ཕྱིར་ནི་ཧེ་ཞེས་བརྗོད། །རླུང་སོགས་ལམ་ལ་བརྟེན་པ་ཡི། །ཚོགས་དང་བྲལ་ཕྱིར་རུ་ཞེས་བརྗོད། །རླུང་དང་རྩ་དང་ཐིག་ལེ་དང ། །ཙཎྜཱ་ལི་ཡི་ཁ་དོག་དང ། །དབྱིབས་ལ་མི་གནས་ཕྱིར་ན་ཀ ། སེམས་ཉིད་བདེ་བར་གནས་པས་སོ། །ནང་གི་ཐབས་དང་ཤེས་རབ་མེད། །དེའི་ཕྱིར་ན་ཤྲཱི་རུ་གསུངས། །མིག་སེར་ནད་ཀྱིས་བཏབ་པ་ལྟར། །རང་སེམས་བདེ་བར་གནས་པས་སོ། །སེམས་ཉིད་བདེ་བར་གནས་པ་དང ། །བདེ་བ་ལ་བསྟེན་ཚོགས་དང་ལྡན། །ལྷན་ཅིག་སྐྱེས་པའི་རྒྱུ་རྐྱེན་ལྡན། །སེམས་དང་བདེ་བ་ཐ་དད་མེད། །སེམས་དང་བདེ་བ་གང་གནས་པ། །མཆོག་དང་ཆད་པའི་དབུས་གནས་པ། །གསུམ་པའི་དཔལ་ལྡན་ཧེ་རུ་ཀ་ ། དེ་ནས་བཞི་པའི་ཧེ་རུ་ཀ ། རང་རིག་སྟོང་པར་གནས་པའི་ཚེ། །ལྷན་ཅིག་སྐྱེས་པའི་རྒྱུ་རྐྱེན་བྲལ། །དེ་ཡི་ཕྱིར་ན་ཧེ་ཞེས་བརྗོད། །ཕ་རོལ་ཕྱིན་དྲུག་བདེ་བའི་ལམ། །ཐམས་ཅད་སྟོང་པར་རོ་གཅིག་པས། །ཚོགས་གཉིས་བྲལ་ཕྱིར་རུ་ཞེས་བརྗོད། །བདེ་བ་ཙམ་ལ་འང་མི་གནས་ཕྱིར། །ཀ་ཞེས་ངེས་པར་བརྗོད་པ་ཡིན། །སེམས་ཉིད་རང་རིག་སྟོང་པར་གནས། །སྟོབས་སོགས་ཕུན་སུམ་ཚོགས་པས་ན། །རང་བཞིན་ལྷན་ཅིག་སྐྱེས་པ་དང ། །གཟུགས་སྐུའི་རྒྱུ་རྐྱེན་ལ་སོགས་ལྡན། །ཤྲཱི་ཞེས་བྱ་བ་མངོན་པར་བརྗོད། །དབྱིངས་དང་ཡེ་ཤེས་གཉིས་སུ་མེད། །དངོས་པོར་རོ་མཉམ་མཐའ་ཡས་པའི། །སེམས་ཀྱི་དེ 87.68b ཉིད་ལ་གནས་པ། །བཞི་པའི་དཔལ་ལྡན་ཧེ་རུ་ཀ ། བདུད་རྣམས་ཀུན་ལ་ཐོ་འཚམ་ཞིང ། །ལྷན་ཅིག་སྐྱེས་པའི་དུར་ཁྲོད་རོལ། །མི་གསལ་གསལ་བའི་རང་བཞིན་མེད། །སྣང་ཞིང་གསལ་ལ་རང་བཞིན་མེད། །མེ་ལོང་བཞིན་འདྲ་ཆུ་ཟླ་བཞིན། །མཁས་པས་འབད་དེ་འཁྲུལ་པ་སྤང ། །དེ་ལྟར་དོན་ནི་མ་རྟོགས་པར། །ཁ་ཅིག་སྐུ་མདོག་ཕྱག་མཚན་ལ། །ཧེ་རུ་ཀ་ཡི་རྣམ་པར་རྟོག་།ཁ་ཅིག་གཟུགས་བརྙན་རྣམ་པར་རྟོག་།ཁ་ཅིག་རང་གི་ངོ་བོར་འདོད། །དེ་བཞིན་རྩ་དང་རླུང་འདོད་སོགས། །དེ་བཞིན་རང་རིག་ཧེ་རུ་ཀ ། བླ་མ་མ་བསྟེན་བརྩོན་འགྲུས་མེད། །ཤེས་རབ་མི་ལྡན་བཟོད་སོགས་མེད། །རིགས་དང་རིག་པའི་ང་རྒྱལ་ཅན། །ཁེ་དང་གྲགས་པ་རྙེད་དང་དགའ། །རྒྱུ་དེས་ལོག་རྟོག་སྣ་ཚོགས་བསྐྱེད། །དེ་བས་ཧེ་རུ་ཀར་གྲགས་པའི། །དངོས་གྲུབ་འདོད་པའི་རྣལ་འབྱོར་པས། །དད་ལྡན་གུས་བཅས་ཕ་རོལ་ཕྱིན། །རྫོགས་བྱས་བླ་མ་དམ་པ་ལས། །མན་ངག་ཡང་དག་བླང་བར་བྱ། །མ་མོའི་ཚོགས་ཀྱིས་ཡང་ཞུས་པ། །ཧེ་རུ་ཀ་དཔལ་དེ་ལྟར་ན། །རྡོ་རྗེ་ཕག་མོ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །རྡོ་རྗེ་གསུམ་སྟེ་ཕག་ནི་གཉིས། །དོན་གྱི་རྡོ་རྗེ་དེ་ནས་རྟགས། །ཐ་མ་རྫས་ཀྱི་རྡོ་རྗེ་སྟེ། །དོན་གྱི་རྡོ་རྗེ་བཞི་པ་སྟེ། །གཟུང་འཛིན་རྣམ་པར་རྟོག་པ་ཡིས། །མི་ཕྱེད་ཕྱིར་ན་རྡོ་རྗེ་སྟེ། །དབང་བཞིས་རྡོ་རྗེ་རེ་རེའོ། །རྟགས་ཀྱི་རྡོ་རྗེ་གསུམ་ཡིན་ཏེ། །རྩེ་གསུམ་རྩེ་ལྔ་རྩེ་དགུ་སྟེ། །རྩེ་གསུམ་སྐུ་གསུང་ཐུགས་ཀྱི་རྟགས། །རྩེ་ལྔ་ཡེ་ཤེས་ལྔ་ཡིན་ཏེ། །ཁམས་གསུམ་ས་དགུ་འཇོམས་པ་ཡི། །རྟགས་སུ་རྡོ་རྗེ་རྩེ་དགུའོ། །རྫས་ཀྱི་རྡོ་རྗེ་བཞི་ཡིན་ཏེ། །ཟླུམ་པོ་ལ་སོགས་རྣམ་པ་བཞི། །མི་ཤེས་དྲི་མས་ཆེས་གོས་པའི། །དུད་འགྲོར་སྐྱེས་པའི་ཕག་མོ་དང ། །ཤེས་རབ་ཆར་བྱུང་ཕག་མོ་སྟེ། །དེ་ཉིད་རྣམ་པ་བཞི་རུ་ངེས། །བུམ་དབང་ཞེ་སྡང་གཏི་མུག་ཕག་།གསང་དབང་རླུང་གི་གཏི་མུག་ཕག་།གསུམ་པ་ཆགས་དགའ་གཏི་མུག་ཕག་།བཞི་པ་ཆོས་དབྱིངས་གཏི་མུག་ཕག་།འདི་ཉིད་ཁྱོད་ལ་ལེགས་པར་གཏད། །ཐམས་ཅད་རྗེས་སུ་ཡི་རང་ངོ ། །དཔལ་མེའི 87.69a ཕྲེང་བའི་རྒྱུད་ཀྱི་རྒྱལ་པོ་ཤྲཱི་ཧེ་རུ་ཀའི་ངེས་པར་འབྱུང་བ་རྫོགས་སྷོ།། །། རྒྱ་གར་གྱི་མཁན་པོ་གཱ་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་པའོ། ། |