༄། །རྒྱ་གར་སྐད་དུ། ་་ཤྲཱི་བཛྲ་རཱ་ཛ་མ་ཧཱ་ཏནྟྲ། ་་བོད་སྐད་དུ། ་་དཔལ་རྡོ་རྗེ་རྒྱལ་པོ་ཆེན་པོའྀ་རྒྱུད། ་དཔལ་སྡོམ་པའི་རྒྱལ་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན 87.57a འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་རྡོ་རྗེ་བཙུན་མོའི་བྷ་ག་ལ་རྡོ་རྗེ་སྙིང་པོ་ལ་སོགས་པའི་དཔའ་བོ་མཁའ་འགྲོ་གྲངས་མེད་པ་དང་ཐབས་ཅིག་ཏུ་བཞུགས་པའི་དུས་སུ་ཕྱི་ནང་གསང་བ་བླ་ན་མེད་པའི་མཆོད་པས་མཆོད་ནས། བཅོམ་ལྡན་འདས་ལ་མངོན་དུ་ཕྱོགས་པ་དང ། བཅོམ་ལྡན་འདས་ཞལ་འཛུམ་པ་མཛད་དེ། རྡོ་རྗེ་སྙིང་པོ་ལ་སོགས་པས་གསོལ་པ། རྡོ་རྗེ་གང་ལགས་ཆེན་པོ་གང ། །རྒྱུད་ནི་གང་ལགས་རྒྱལ་པོ་གང ། །བཅོམ་ལྡན་འདས་ཀྱིས་བཀའ་སྩལ་པ། །དོན་གྱི་རྡོ་རྗེ་རྣམ་པ་བཞི། །དབང་བཞིའི་གྲངས་སུ་ཤེས་པར་བྱ། །རྣམ་རྟོག་འཇོམས་ཕྱིར་རྡོ་རྗེ་སྟེ། །དེ་ལ་རྣམ་པ་བཞི་ཡིན་ཏེ། །ཕྱི་ནང་གསང་བ་རབ་གསང་གཉིས། །རྩེ་གསུམ་རྩེ་གཅིག་རྩེ་ལྔ་པ། །རྩེ་དགུ་པ་ནི་ཉིད་ཡིན་ནོ། །བཅུ་གཉིས་དེ་ཉིད་རྡོ་རྗེ་སྟེ། །རྟགས་ཀྱི་རྡོ་རྗེ་བཞི་ཡིན་ནོ། །གཉིས་སུ་མེད་པ་རྩེ་གཅིག་པས། །རྣམ་རྟོག་ཐམས་ཅད་སྤངས་པ་ཡིན། །རྩེ་གསུམ་སྐུ་གསུང་ཐུགས་ཡིན་ཏེ། །འདོད་ཆགས་ཞེ་སྡང་གཏི་མུག་གསུམ། །འཇོམས་པའི་ཕྱྀར་ན་བཤད་པ་ཡིན། །རྩེ་ལྔ་ཡེ་ཤེས་ལྔ་ཡི་རྟགས། །མེ་ལོང་མཉམ་ཉིད་སོ་སོར་རྟོག་།བྱ་བ་ནན་ཏན་ཆོས་དབྱིངས་ཤེས། །ཉོན་མོངས་ལྔ་ནི་སྤངས་པ་སྟེ། །ཞེ་སྡང་ང་རྒྱལ་འདོད་ཆགས་དང ། །ཕྲག་དོག་གཏི་མུག་འཇོམས་པར་བྱེད། །རྡོ་རྗེ་རྩེ་དགུ་གང་ཡིན་པ། །ཡེ་ཤེས་རྩེ་དགུ་བཤད་པ་སྟེ། །ཁམས་གསུམ་ས་དགུ་འཇོམས་པར་བྱེད། །འདོད་ཁམས་གཟུགས་ཁམས་གཟུགས་མེད་ཁམས། །ཉན་ཐོས་རང་རྒྱལ་བྱང་ཆུབ་སེམས། །རིག་འཛིན་སངས་རྒྱས་ཡེ་ཤེས་ཆེ། །ས་དགུ་ལ་ནི་གང་སྒྲིབ་པའི། །སྒྲིབ་པ་སྦྱོང་བར་བྱེད་པ་ཡི། །རྡོ་རྗེ་རྩེ་དགུར་བསྟན་པ་ཡིན། །རྡོ་རྗེ་རྩེ་མོ་བཅུ་གཉིས་པ། །འཁོར་བའི་རྟེན་འབྲེལ་བཅུ་གཉིས་ཀྱི། །སྤོང་བའི་ཡེ་ཤེས་བཅུ་གཉིས་ཡིན། ། 87.57b མ་རིག་པ་ལས་འདུ་བྱེད་དེ། །འདུ་བྱེད་རྐྱེན་གྱིས་རྣམ་པར་ཤེས། །མིང་དང་གཟུགས་དང་སྐྱེ་མཆེད་དྲུག་།རེག་དང་ཚོར་དང་སྲེད་དང་ལེན། །སྲིད་པ་སྐྱེ་དང་རྒ་ཤི་སྟེ། །དེ་རྣམས་སྤོང་བའི་གཉེན་པོ་སྟེ། །ཆོས་ཀྱི་ཡེ་ཤེས་མངོན་དུ་བྱ། །དེ་ལས་ཡེ་ཤེས་དྲུག་རང་བཞིན། །དེ་ལས་སྐུ་གསུང་ཐུགས་ངོ་བོ། །དེ་ལས་སྐྱེ་མཆེད་དྲུག་སངས་རྒྱས། །དེ་ལས་གཉིས་མེད་རེག་པ་ནི། །དེ་ལས་ཉམས་མྱོང་བདེ་ཆེན་པོ། །རང་རིག་དེ་ཉིད་སྲེད་པ་སྟེ། །ཆོས་ཀུན་སྟོན་བྱེད་ལེན་པ་སྟེ། །སྲིད་པ་ལོངས་སྤྱོད་རྫོགས་སྐུ་ཡིན། །སྐྱེ་བ་སྤྲུལ་པའི་སྐུ་རུ་བཤད། །རྒ་ཤི་རྒྱུན་དང་མྱ་ངན་འདས། །འོད་གསལ་སྟོང་ཆེན་ངང་དུ་ཐིམ། །དེ་ཕྱིར་རྡོ་རྗེ་བཅུ་གཉིས་པ། །རྫས་ཀྱི་རྡོ་རྗེ་བཞི་ཡིན་ཏེ། །འབིགས་ཤིང་རྣོ་བ་ཟུར་གསུམ་སྟེ། །གྲུ་བཞིས་རྫས་རྣམས་བརྡར་བྱས་པས། །འཇམ་ཞིང་དང་ལ་འཇོམས་པར་བྱེད། །ཕ་ལམ་ཟླུམ་པོས་རྩུབ་པ་འཇོམས། །ཟུར་ལྔས་ཐམས་ཅད་ཅི་དགར་བྱེད། །དེ་ནས་ཆེན་པོའི་དོན་བཤད་དེ། །དམྱིགས་དང་བསམ་པ་སྤྱོད་པ་དང ། །བརྟུལ་ཞུགས་བརྩོན་འགྲུས་སྨོན་ལམ་དང ། །དེ་བཞིན་ཡེ་ཤེས་ཆེན་པོ་སྟེ། །རེ་རེ་ལ་ཡང་བདུན་བདུན་སྦྱར། །དེ་ཕྱིར་ཆེན་པོ་ཞེས་ནི་བསྟན། །རྒྱུད་ནི་རྣམ་པ་ལྔ་ཡིན་ཏེ། །ཕྱི་དང་ནང་དང་གསང་བ་དང ། །རབ་ཏུ་གསང་དང་གསང་བ་ཆེ། །དེ་རྣམས་རྒྱུན་དུ་གནས་པ་ལ། །རྒྱུ་ཡི་རྒྱུད་དུ་བསྟན་པ་ཡི། །དེ་རྣམས་དོན་ནི་ཇི་བཞིན་རྟོགས། །འབྲས་བུའི་རྒྱུད་དུ་བསྟན་པ་ཡིན། །རྒྱུ་དང་འབྲས་བུ་གཉིས་མེད་པ། །རྒྱུ་ནི་གཉིས་སུ་མེད་པ་ཡི། །རང་རིག་ཡེ་ཤེས་མཐར་ཐུག་པ། །མཐར་ཐུག་བླ་ན་མེད་པའི་རྒྱུད། །རྒྱལ་པོ་ལ་ཡང་ལྔ་ཡིན་ཏེ། །ཕྱི་ནང་གསང་དང་རབ་ཏུ་གསང ། །ཤིན་དུ་གསང་བ་ཆེན་པོ་སྟེ། །དེ་རྣམས་དོན་ལ་དབང་བསྐུར་དང ། །དེ་ཡི་མི་མཐུན་ཕྱོགས་འཇོམས་ཕྱིར། །དེ་ཕྱིར་རྒྱལ་པོ་ལྔ་རུ་བསྟན། །རྡོ་རྗེ་སྙིང་པོས་ཡང་གསོལ་པ། །བཅོམ་ལྡན་འདས 87.58a ནི་ཇི་ལྟར་ལགས། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ནི་ཇི་ལྟར་ལགས། །བཙུན་མོའི་བྷ་ག་ཇི་ལྟར་ལགས། །རྡོ་རྗེ་གང་ལགས་སྙིང་པོ་གང ། །དཔའ་བོ་གང་ལགས་མཁའ་འགྲོ་གང ། །དཔག་ཏུ་མེད་པ་ཇི་ལྟར་ལགས། །ཐབས་གཅིག་བཞུགས་པ་ཇི་ལྟར་ལགས། །ཕྱི་ནང་གསང་བ་བླ་མེད་པའི། །མཆོད་ནས་ཞེས་པ་ཇི་ལྟར་ལགས། །མངོན་ཕྱོགས་འཁོད་པ་ཇི་ལྟར་ལགས། །ཞལ་འཛུམ་མཛད་པ་ཇི་ལྟར་ལགས། །གཟིགས་པ་ཞེས་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཉོན་མོངས་དང་ནི་འཆི་བདག་བདུད། །ཕུང་པོའྀ་བདུད་དང་ལྷ་ཡི་བདུད། །བདུད་བཞི་བཅོམ་པས་བཅོམ་པའོ། །ལྡན་པ་ཡོན་ཏན་དྲུག་ལྡན་ཕྱིར། །དབང་ཕྱུག་དང་ནི་གཟུགས་བཟང་དང ། །དཔལ་དང་གྲགས་དང་སྐལ་བ་བཟང ། །ཡེ་ཤེས་ཕུན་སུམ་ཚོགས་པ་ལ། །དྲུག་པོ་དེ་ལྡན་ཞེས་བྱ་བ། །འཁོར་བའི་ཆོས་ནི་མྱ་ངན་ཏེ། །དེ་ལྟར་བྲལ་ཕྱིར་འདས་པའོ། །འདས་པའི་དེ་བཞིན་གཤེགས་པ་ཀུན། །འགྲོ་བའི་དོན་མཛད་དེ་བཞིན་གཤེགས། །ཐམས་ཅད་དུས་གསུམ་སངས་རྒྱས་ཀྱི། །སྐུ་གསུང་ཐུགས་ཀྱི་ངོ་བོར་བཅས། །བཙུན་མོ་ཞེས་བྱ་ཆོས་ཀྱི་དབྱིངས། །དེ་ལས་བྱུང་ཕྱིར་བྷ་ག་སྟེ། །དབྱེར་མི་ཕྱེད་པས་བཞུགས་པར་བཤད། །རྡོ་རྗེ་ཆོས་རྣམས་འཇིགས་པ་ཆེ། །སྙིང་པོ་ཡེ་ཤེས་ཆེན་པོ་སྟེ། །སོགས་པ་མང་པོའྀ་དོན་ཡིན་ཡིན་ཏེ། །དཔའ་བོ་ཞེས་པ་རྣམ་པ་ལྔ། །ཕྱི་ནང་གསང་བ་ལ་སོགས་ཀྱི། །རྣམ་པར་རྟོག་པ་འཇོམས་ཕྱིར་ཡིན། །མཁའ་ལ་འགྲོ་བས་མཁའ་འགྲོ་སྟེ། །རྩ་སོགས་ལ་ཡང་ཤེས་པར་བྱ། །ཐམས་ཅད་དེ་ལས་བྱུང་བའི་ཕྱིར། །མ་ཞེས་ང་ཡིས་གསུངས་པ་ཡིན། །དེ་ཡི་དོན་ལ་མི་དཔོགས་པས། །དེ་ཡི་ཕྱིར་ན་དཔག་ཏུ་མེད། །ཐབས་གཅིག་བཞུགས་ཞེས་བྱ་བ་འདི། །དེ་ཉིད་དོན་དང་དབྱེར་མེད་ཕྱིར། །གཅིག་གི་དོན་དུ་བཤད་པའོ། ། 87.58b གཉིས་པ་མ་ཡིན་དེ་དུས་སུ། །ཕྱི་ནང་མ་ཡིན་མཆོད་པ་ནི། །ཕྱི་ཡི་མཆོད་པ་བཤད་པར་བྱ། །མེ་ཏོག་བདུག་པ་མར་མེ་དང ། །དྲི་དང་ལྷ་བཤོས་བཏུང་བ་དང ། །རོལ་མོ་སིལ་སྙན་དབྱངས་ཉིད་དང ། །སྒེག་དང་རྒོད་དང་གར་ཉིད་དང ། །རྟ་དང་གླང་པོ་རིན་ཆེན་སོགས། །དེ་ནས་ནང་གི་མཆོད་པ་ནི། །བྷ་ག་བཙུམས་ལ་ཀུ་ཙ་བཙིར། །བདུད་རྩྀ་ལྔ་དང་བཏུང་བ་ལྔ། །བྱང་ཆུབ་སེམས་དང་ལྡན་བྱས་ཏེ། །ཕུང་པོ་ཁམས་དང་སྐྱེ་མཆེད་རྣམས། །དེ་ལ་སོགས་པས་མཆོད་པར་བྱ། །དེ་ནས་གསང་བའི་མཆོད་པ་ནི། །རྩ་དང་རླུང་དང་ཐིག་ལེ་སྟེ། །དེ་ཉིད་གཉིས་མེད་བདེ་བ་ཡིས། །རྩ་དང་རླུང་སོགས་ཐིག་ལེས་མཆོད། །དེ་ནས་རབ་གསང་མཆོད་པ་ནི། །དང་པོ་དགའ་དང་མཆོག་དགའ་དང ། །དགའ་བྲལ་དེ་བཞིན་ལྷན་སྐྱེས་དགའ། །བདེ་བའི་ཁྱད་པར་དེ་ཉིད་ཀྱིས། །རང་བཞིན་དགའ་སོགས་ཐམས་ཅད་མཆོད། །དེ་ནས་བླ་མེད་མཆོད་པས་ནི། །རང་རིག་སྟོང་པར་རྟོགས་པ་ཡིས། །འོད་གསལ་དེ་ཉིད་ཆོས་ཀྱི་སྐུ། །དེ་ཉིད་བླ་མེད་མཆོད་པ་མཆོག ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། རྡོ་རྗེ་སྙིང་པོ་ལ་སོགས་པའི་འཁོར་རྣམས་དགའ་ཞིང་མགུ་ནས་རྗེས་སུ་ཡི་རངས་པར་གྱུར་ཏེ། གཡོན་ཕྱོགས་ནས་བསྐོར་བ་བྱས་ནས་སོ་སོའྀ་རྫུ་འཕྲུལ་གྱིས་མི་སྣང་བར་གྱུར་ཏོ། །དཔལ་འཁོར་ལོ་སྡོམ་པ་རྡོ་རྗེ་རྒྱལ་པོའྀ་རྒྱུད་རྫོགས་སྷོ།། །། རྣལ་འབྱོར་མ་ཙནྡྲ་མཱ་ལེ་དང ། ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། |