༄#། །རྒྱ་གར་སྐད་དུ། ཤྲཱི་ཛྙཱ་ནཱ་ཛྭ་ལ་ཏནྟྲ་རཱ་ཛ། བོད་སྐད་དུ། དཔལ་ཡེ་ཤེས་འབར་བའི་རྒྱུད་ཀྱི་རྒྱལ་པོ་དཔལ་ཀུན་དུ་བཟང་པོ་ལ་ཕྱག་འཚལ་ལོ། ་།ཀྱེ་མ་སངས་རྒྱས་ཀྱེ་སངས་རྒྱས། །ངོ་མཚར་རྨད་དུ་བྱུང་བ་ཡི། །རྒྱུད་ནི་གང་ལགས་རྒྱལ་པོ་གང ། །ཡེ་ཤེས་གང་ལགས་འབར་བ་གང ། །དཔལ་ནི་གང་ལགས་བདག་ལ་གསུངས། །འཇིགས་བྱེད་ཆེན་པོས་བཀའ་སྩལ་པ། །དཔལ་ནི་གཉིས་མེད་ཡེ་ཤེས་ཏེ། །གཉིས་མེད་བདེ་ཆེན་རོ་ལས་བྱུང ། །གཟུང་འཛིན་མཐའ་སྤངས་རང་རིག་གོ་།སྣ་ཚོགས་མདུད་པ་ཡེ་ཤེས་ཆེ། །རང་བྱིན་བརླབ་པ་ལྟེ་བར་ཏེ། །དཀྱིལ་འཁོར་འཁོར་ལོ་གསང་བར་རོ། །སྨིན་མཚམས་ཀྱི་ནི་མཛོད་སྤུ་ལྟར། །ཐུང་ངུ་གནས་ཤིང་རིང་དུ་འགྱུར། །དེ་ཉིད་དྲང་དང་ཁ་དབྱེ་དང ། །རྒྱས་པར་བྱ་བ་གསུམ་ཡོད་དེ། །དང་པོར་དྲང་བའི་རྣམ་པ་ཡང ། །འདྲོངས་པའི་ཚད་ནི་གསུམ་ཡོད་དེ། །སྒོ་གསུམ་ཡོན་ཏན་གསུམ་ལྡན་ན། །སོར་བཞི་ཕྱི་རུ་འབྱུང་བར་ངེས། །འབྲྀང་ལ་སོར་གཉིས་ཐ་མ་ལ། །སོར་དང་ནས་ཀྱི་ཚད་ཀྱིས་འབྱུང ། །སྦོམ་ཕྲ་གཞན་སྐྱེས་ཕྲ་མོ་ཙམ། །དང་པོ་བྱ་གདོང་ཉིད་ན་གནས། །རྣམ་ཐར་སོར་གཉིས་སྐྱེ་མཆེད་བཞི། །སྟོང་པ་བཅུ་དྲུག་ཁམས་བཅཝ་བརྒྱད། །ཉི་ཤུ་ལྟེ་བར་ཉི་ཤུ་ལྔ། །སྙིང་ཁ་རུ་ནི་གནས་པའོ། །སྨན་ལ་སོགས་པ་ཀུན་ལྡང་བས། །དང་བའི་སྦྱོར་བ་བརྩམ་པར་བྱ། །རྣམ་སྣང་སྐུ་རགས་བཅིང་བ་དང ། །རྒྱབ་ཡོལ་དབུལ་དང་མཆོད་པ་དབུལ། །གདན་ཁྲི་དབུལ་དང་སྐུ་ཁྲུས་དབུལ། །སྨན་མཆོད་དབུལ་དང་མེ་མཆོད་དབུལ། །དེ་ནས་རེག་བྱའི 87.40a མཆོད་པ་དབུལ། །ཀུན་རྫོབ་ལྕེ་ཡི་རྩེ་མོ་འམ། །ཁྲོ་བོ་མཛུབ་མོའི་རྩེ་མོ་ལ། །བདུད་རྩི་རི་ལུ་ལེགས་བྱས་ཏེ། །མཁས་པས་རེག་བྱའི་མཆོད་པ་དབུལ། །མངོན་དུ་ཤེས་པ་དོན་མི་ཟ། །བདེ་བ་ཆེན་པོའི་མཆོད་པ་ཡིས། །ཁམས་གསུམ་མཆོད་པ་གདོན་མི་ཟ། །དར་རམ་མེན་ཏྲི་སོར་བཞིའི་ཚད། །རྐེད་པར་སྐ་རགས་དབུལ་བར་བྱ། །སྤྲུལ་པའི་གཡས་དང་གཡོན་གཉིས་སུ། །རས་བལ་ལ་སོགས་རྒྱབ་ཡོལ་དབུལ། །ཤིང་བུ་རིགས་དང་འཐུན་པ་ཡིན། །སྦོམ་བྲ་རིགས་ཀྱི་བདག་པོ་ཙམ། །དྲི་མེད་སྨན་དང་སྣུམ་ལྡན་པའི། །ཟུག་རྔུ་མི་སྐྱེད་མཆོད་རྫས་ཀྱིས། །བཻ་རོ་ཙ་ནའི་ལམ་དུ་མཆོད། །དྲི་ཞིམ་ཆུ་ཡིས་ཁྲུས་བྱས་ཏེ། །ཁྲུས་ཀྱིས་ལུས་ལ་མཆོད་པ་དབུལ། །སྨན་དང་སྣུམ་གྱི་ཕྱེ་མ་ཡིས། །སྒོ་གཉིས་དག་ཏུ་མཆོད་པ་དབུལ། །ཤིན་དུ་དྲོ་བའི་མེ་དག་གིས། །གཏུམ་མོའི་མེ་ལ་མཆོད་པ་དབུལ། །རྐེད་པའི་ཚད་མཉམ་ཀ་ཏི་ཀ་།གདན་ཁྲི་བསྟབ་པའི་མཆོད་པ་དབུལ། །དེ་ཡིས་འདྲོངས་པར་གདོན་མི་ཟ། །དེ་ནས་རྒྱས་པར་བྱ་བ་ཡང ། །གཞན་ནི་གོང་དང་འདྲ་བ་སྟེ། །ཕྱི་ནང་འདོད་པའི་མཚན་མ་ཀུན། །རྒྱས་པར་བྱེད་པའི་ལས་ཡིན་ཏེ། །རྒྱས་པའི་སྦྱོར་བ་གསུམ་བྱས་ན། །དཔེར་ན་མེ་ཏོག་པདྨ་བཞིན། །དེ་ནས་དབྱེ་བའི་རིམ་པ་ཡང ། །གོང་དུ་གསུངས་པ་ཐུན་མོང་སྟེ། །དུས་གསུམ་ལྕེ་ཡི་རྩེ་མོས་ཀྱང ། །བསྐྱེད་ན་ངེས་པར་ཁ་འབྱེད་དོ། །དེ་ཉིད་གསུམ་ནི་མེ་རང་བཞིན། །མེ་འབར་བ་ཡི་རྐྱེན་གྱུར་པ། །རླུང་ཉིད་ཡིན་པར་གསུངས་པ་སྟེ། །རྐྱེན་དེས་མེ་ཉིད་འབར་བར་བཤད། །གཞན་ཡང་རྐྱེན་གྱི་བྱེ་བྲག་དང ། །སྲོག་རྩོལ་རླུང་ནི་དབུ་མར་དགག་།བུམ་པ་ཞབས་མེད་རླུང་ཕུལ་ནས། །སྒོ་དགུ་ཕྱི་རོལ་དྲག་ཏུ་བུད། །ལུས་ཀྱི་ངལ་དུབ་ཆ་མཉམས་སྟེ། །སྦྱོར་བ་རྫོགས་ན་བདེ་བའི་རྐྱེན། །བདེ་བ་ལས་ནི་རྡོ་རྗེ་འཆང ། །བདེ་བ་ཡིས་ནི་བདེ་བ་འགྲུབ། །རྒྱུ་བདེ་བ་ལས་འབྲས་བུ་བདེ། །རྒྱུ་ཡི་ནང་ན་འདི་མཆོག་ལ། ། 87.40b འབྲས་བུའི་ནང་ན་འདི་མཆོག་གོ་།དེ་ནས་བདེ་བའི་རྐྱེན་གྱུར་པ། །སྲིད་པ་དགག་དང་རླུང་དགག་པ། །གནས་ནས་གནས་སུ་རྟེན་གཟུང་སྟེ། །གཡས་བརྐྱང་བས་ནི་རོ་མ་དགག་།དཔའ་བོ་གཡས་ནས་མཁའ་འགྲོ་གཡོན། །གཡོན་བརྐྱང་བས་ནི་རྐྱང་མ་སྟེ། །ས་གས་ཀུན་དར་མ་རུ་གཟུང ། །དེ་བཞིན་ཟླུམ་པོས་དབུ་མར་གཟུང ། །དེ་དག་ཀུན་གྱི་བྱེ་བྲག་ཀྱང ། །དཔའ་བོས་གཡས་དང་གཞན་གྱིས་གཡོན། །དེ་བཞིན་ཀུན་ལ་སྦྱར་བར་བྱ། །གཞན་ཡང་གཟུང་བའི་བྱེ་བྲག་ཀྱང ། །དྲིལ་ཅན་བུ་གུ་དགུ་ལམ་གྱིས། །རླུང་རྒྱུ་ཕྱི་རུ་བུས་བྱས་ཏེ། །རྐང་ལག་དྲག་ཏུ་བསྒྲིམས་བྱས་ན། །ཟིན་པར་འདི་ལ་ཐེ་ཙོམ་མེད། །དཔའ་བོ་མཁའ་འགྲོ་མ་གཉིས་ཀྱིས། །ཐུན་མོང་དུ་ནི་བྱ་བར་གསུངས། །བཻ་རོ་ཙ་ན་ལས་ཀྱི་རླུང ། །གཞན་ཡང་ལམ་བརྒྱད་རླུང་རྣམས་དག་།དང་པོ་ཉིད་དུ་བསྡམ་བྱས་ན། །ཟིན་པར་འདི་ལ་ཐེ་ཙོམ་མེད། །དབྱེ་བ་བསྡམ་པའི་མན་ངག་གོ་།བྱེད་པ་སྤེལ་མར་སོང་གྱུར་ན། །མི་ཟིན་པ་ལ་ཐེ་ཙོམ་མེད། །གནས་གསུམ་དག་ཏུ་ཀྵ་བསམས་ཏེ། །དབུགས་གསུམ་པ་ཡིས་ཡར་དྲངས་ཏེ། །ལྟེ་བའི་གྱེན་ལ་དྲངས་ཀྱང་ཟིན། །འདི་ནི་གང་ཟག་མཆོག་གིས་ཡིན། །མཛེས་པའི་སྤྱི་བོ་དེ་ཉིད་ལ། །གྱེན་དུ་བཀན་དང་ཐུར་དུ་བཀན། །དྲང་པོར་གཡས་གཡོན་བཙན་ཐབས་ལ། །ཀ་ཏིའི་གཟེར་ནི་བཙན་ཐབས་གཅིག་།སྦོམ་པོ་ཁྲོ་མོས་མནན་པ་སྟེ། །བླ་མའི་ཞལ་ནས་མ་བླངས་ན། །ལུས་ཀྱི་ནད་བཞི་ཀུན་ནས་སྐྱེ། །ཆུ་འགགས་ཆུ་སོ་སྐྲངས་ལ་སོགས། །ལུས་སྨད་ནད་སྣ་ཉི་ཤུ་འབྱུང ། །གཞན་ཡང་བཙན་ཐབས་བཅུ་གཉིས་ནི། །བླ་མའི་ཞལ་ནས་ཤེས་པར་བྱ། །བླ་མ་མཉེས་པར་བྱ་བའི་ཕྱིར། །ལུས་སྲོག་ལོངས་སྤྱོད་ཐམས་ཅད་ཀྱིས། །དུས་གསུམ་མཎྜལ་དང་བཅས་མཆོད། །ལུས་སྲོག་བཏང་བར་ཕངས་པ་བས། །མན་ངག་དམ་པ་དེ་བས་ཕངས། །དེ་བས་བཙན་ཐབས་ལེགས 87.41a པར་སྦ། །མན་ངག་ཆུ་བོའི་རྒྱུན་འདྲ་བས། །དེ་ཉིད་རྒྱུད་དུ་ཤེས་པར་བྱ། །ཟབ་མོའི་དོན་སྟོན་རྒྱལ་པོར་གསུངས། །རྡོ་རྗེ་ཕག་མོ་ལ་སོགས་རྣམས། །གསང་བའི་གསང་བ་རྨད་བྱུང་འདི། །ཁྱོད་ལ་གཏད་དོ་དམ་དུ་སྦོས། །ཀུན་ལ་སྤེལ་ན་དམ་ཚིག་ཉམས། །ཀྱེ་མ་རྒྱུད་ཀྱྀ་དོན་འདི་ལ། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་མཁའ་འགྲོ་མ་ཡི་ཚོགས། །ཐམས་ཅད་ངོ་མཚར་ཆེར་སྐྱེས་ཏེ། །དགའ་ཞིང་མགུ་ནས་ཡི་རང་ངོ ། །དཔལ་ཡེ་ཤེས་འབར་བའི་རྒྱུད་ཀྱི་རྒྱལ་པོ་མཁའ་འགྲོ་མའི་གསང་བ་ལས་ཀྱང་གསང་བ་རྨད་དུ་བྱུང་བ་རྫོགས་སྷོ།། །། སིང་ག་ལའི་གླིང་གི་རྣལ་འབྱོར་མ་ཙནྡྲ་མཱ་ལེ་དང ། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། |