༄། ། རྒྱ་གར་སྐད་དུ། ཤྲཱི་ཛྙཱ་ན་མཱ་ལ་ཏནྟྲ་རཱ་ཛ། ་བོད་སྐད་དུ། དཔལ་ཡེ་ཤེས་ཕྲེང་བའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཀྱེ་ལགས་གསང་བདག་རྡོ་རྗེ་འཛིན། །གསང་བ་བླ་ན་མེད་པ་ཡི། །ལྟ་བ་ཞེས་པ་གང་གང་ལགས། །སྤྱོད་པ་གང་དང་གང་ལགས་པ། །གཙོ་བོས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ལྟ་བ་ཤེས་རབ་ཕ་རོལ་ཕྱིན། །གདོད་ནས་སྤྲོས་བྲལ་ལྷུན་གྱིས་གྲུབ། །རང་རིག་ཡེ་ཤེས་དབྱིངས་ན་གསལ། །མ་རིག་མུན་པས་སྒྲིབས་པ་མེད། །ཤེས་རབ་སྙིང་པོ་རྩེར་བྱུང་བ། །ལྟ་བ་ཀུན་གྱི་ཡང་རྩེ་ཡིན། །དོན་དམ་རང་རིག་ཡེ་ཤེས་ལ། །བླང་བ་མེད་ཅིང་དོར་བ་མེད། །དམན་དང་གྱ་ནོམ་གཉིས་ཀ་མེད། །བསྒོམ་པ་པོ་མེད་བསྒོམ་བྱ་མེད། །དམིགས་མེད་གནས་སུ་སྙིང་རྗེ་དང ། །དམིགས་མེད་གནསུ་ཤེས་རབ་གཉིས། །བློ་དང་ལྷན་ཅིག་གཅིག་གྱུར་པ། །ནམ་མཁར་ནམཁའི་རང་བཞིན་ནོ། །རང་རིག་ཡེ་ཤེས་གང་འདོད་པས། །མཚན་མའི་རྣམ་རྟོག་བསྒོམ་པ་མིན། །དམན་པ་རྣམས་ལ་སྐུར་མི་གདབ། །དེ་ཉིད་ལ་ཡང་སྒྲོ་མྀ་གདགས། །དང་པོར་བསྐལ་པར་བསྒོམས་པ་དང ། །རང་རིག་སྐད་ཅིག་ཐོབ་པ་གཉིས། །བརྒྱ་སྟོང་ལ་སོགས་ཆར་མི་ཕོད། །དཔེ་དང་བགྲང་བར་མི་ནུས་ཏེ། །དཔེར་ན་མཚོ་དང་རླབས་རྗེས་བཞིན། །དངོས་པོ་སྒོམ་པ་བསྒོམ་པ་མིན། །དངོས་མེད་སྒོམ་པ་སྒོམ་པ་མིན། །དངོས་དང་དངོས་མེད་རོ་མཉམ་ན། །མ་བསྒོམས་ན་ཡང་བསྒོམས་པ་ཉིད། །བསྒོམ་དང་མི་བསྒོམ་གཉིས་ཀ་མེད། །འོད་གསལ་དེ་ལ་སེམས་ཟིན་ན། །གཟུང་འཛིན་དགྲ་ཡི་དཔུང་རྣམས་འཇོམས། །ཕྱོགས་བཅུ་འཇིག་རྟེན་ཁམས་བཅས་པའི། །དཔའ་བོ་མཁའ་འགྲོ་མཆོད་པའི་གནས། །རབ་ཀྱིས་མཉམ་གཞག་རྗེས་ཐོབ་སྤངས། །འབྲིང་གིས་རྗེས་ཐོབ་སྟོང་པར་ལྟ། ། 87.38b ཐ་མས་རྗེས་ཐོབ་སྒྱུ་མར་ལྟ། །སེང་གེ་ལྟ་བུའི་ལྟ་སྤྱོད་ནི། །བཞི་པ་ཡིན་པར་ང་ཡིས་གསུངས། །དེ་ནས་སྤྱོད་པའི་རྒྱལ་པོ་བཤད། །སྤྱོད་པ་རྣམ་པ་གསུམ་ཡིན་ཏེ། །ཀུན་དུ་བཟང་པོ་བྷུ་སུ་ཀུ། ། བ་དྷཱུ་ཏཱི་གསུམ་ཡིན་ནོ། །སྤྱོད་པའི་དུས་དང་གནས་དང་ཟས། །གང་ཟག་དང་ནི་དབྱེ་བ་དང ། །ངོ་བོ་དང་ནི་ཚད་དང་ཡང ། །ཐབས་དང་དགོངས་པ་དགོས་པ་དང ། །མཁས་པས་ཀུན་ལ་སྦྱར་བར་བྱ། །སངས་རྒྱས་རིག་དང་རྡོ་རྗེའི་རིགས། །རིན་ཆེན་རིགས་དང་པདྨའི་རིགས། །ལས་ཀྱི་རིགས་དང་སྤྱོད་པ་ལྔ། །ཀུན་དུ་བཟང་པོའི་སྤྱོད་པ་ཡིན། །སྡོམ་པ་གསུམ་ལ་གནས་པ་དང ། །དཀོན་མཆོག་གསུམ་ནི་འཛིན་པ་དག་།སངས་རྒྱས་ཀྱི་ནི་མཆོག་གི་སྤྱོད། །རྡོ་རྗེ་དྲིལ་བུ་ཕྱག་རྒྱ་འཛིན། །བླ་མ་འཛིན་པ་རྡོ་རྗེའི་སྤྱོད། །དམ་ཚིག་ཡིད་འོང་དུས་བཞི་རུ། །སྦྱིན་པ་རྣམ་བཞི་རིན་ཆེན་སྤྱོད། །ཐེག་པ་གསུམ་དང་དམ་ཆོས་འཛིན། །པདྨ་གར་གྱི་སྤྱོད་པ་ཡིན། །དམ་ཚིག་ཐམས་ཅད་ལྡན་པ་དང ། །མ་གྲོལ་ལ་སོགས་དགྲོལ་བ་ནི། །རྟ་ཡི་རྒྱལ་པོའི་སྤྱོད་པ་ཡིན། །ཟ་བ་ཉལ་བ་འཆག་པ་གསུམ། །རྣལ་འབྱོར་ཆེན་པོས་གནས་བྱ་སྟེ། །གཡེང་བས་གཡེང་བ་སྤོང་བ་ནི། །བྷུ་སུ་ཀུ་ཡི་སྤྱོད་པའོ། །རྒྱན་འཆང་བ་དང་བདུད་རྩི་མྱང ། །ཕྱག་རྒྱ་བསྟེན་དང་རྣམ་པ་གསུམ། ། བ་དྷཱུ་ཏཱིའྀ་སྤྱོད་པ་སྟེ། །རྒྱན་ལ་དྲུག་སྟེ་ཕྱག་རྒྱ་ལྔ། །བདུད་རྩི་བཅུ་སྟེ་མི་གཙང་བས། །མི་གཙང་འཁྲུད་པའི་སྤྱོད་པའོ། །གནས་ནི་ཁ་ན་མ་ཐོ་མེད། །ཕྱི་ནང་གཡེང་མེད་གནས་ཡིན་ནོ། །རྟོག་པ་འཇོམས་པ་སློབ་པའི་དུས། །གྲུབ་ན་རྫུ་འཕྲུལ་སྟོན་པའི་དུས། །ཐབས་ནི་གཞན་གྱིས་མཐོང་བ་དང ། །སྒྲོ་དང་སྐུར་པ་མེད་པའོ། །དགོངས་པ་གཉེན་པོའི་སྟོབས་ཡིན་ཏེ། །རྙེད་དང་བཀུར་སྟི་གྲགས་པ་དང ། །ཟུག་རྔུའི་ཁ་ཟས་མ་ཡིན་ཏེ། །བླ་མའི་དུས་ཐབས་ལེགས་བསྟེན་བླང ། །ཁ་ཟས་རྣམ་རྟོག་ཆུང་བ་ཡི། །ལས་དང་པོ་ཡིས་བྱ་བར་གསུངས། །དབྱེ་བ་གསུམ་དང་བྱེ་བྲག་ནི། །གོང་དུ་གསུངས་པ་ཁོ་ནའོ། །ངོ་བོ་རྟོག་མེད་སེམས་དེ་ཉིད། ། 87.39a གཙང་སྨེ་འགགས་དང་སྤྲུལ་པ་སྟོན། །འདི་ཉིད་འགྲུབ་པའི་ཚད་ཡིན་ནོ། །དགོངས་པ་ལ་ཡང་གཉིས་ཡོད་དེ། །གཙང་སྨེ་སྤང་བ་དགོངས་པའི་དོན། །དགོངས་པ་དངོས་ལ་རྣམ་པ་བཞི། །རང་སེམས་བརྟན་གཡོ་བརྟག་པ་དང ། །ཕྱག་རྒྱ་ཁྱད་པར་ཚོལ་བ་དང ། །དེས་འདུལ་གང་ཟག་གཞུག་པ་དང ། །མི་མོས་སྐུར་པ་དགག་པའོ། །གསང་སྔགས་རྒྱལ་པོའྀ་ལྟ་སྤྱོད་ཀྱིས། །འཁོར་གྱི་དཔའ་བོ་མཁའ་འགྲོ་ཚོགས། །འདུས་དང་བརྒྱལ་དང་འགྱེལ་གྱུར་པས། །དབུགས་དབྱུང་བ་ཡི་ཏིང་འཛིན་གྱིས། །ཐམས་ཅད་དྲན་པ་སླར་རྙེད་ནས། །ཐམས་ཅད་མགྲིན་གཅིག་འདི་སྐད་གསོལ། །དངོས་པོ་རོ་མཉམ་གྱུར་པ་ཡི། །ལྟ་བ་འདི་ཡང་ངོ་མཚར་ཆེ། །གཡེང་བས་གཡེང་བ་སྤང་བ་ཡི། །སྤྱོད་པ་འདི་ཡང་ངོ་མཚར་ཆེ། །ཆོས་རྣམས་སྟོང་པར་རོ་མཉམ་ན། །ལྟ་དང་མི་ལྟ་ག་ལ་ཡོད། །གཙང་སྨེ་བདུད་རྩི་རོ་གཅིག་ལ། །སྤྱོད་དང་མི་སྤྱོད་ག་ལ་ཡོད། །དབང་བསྐུར་བ་དང་རྡོ་རྗེ་འཛིན། །མཉམ་གཞག་རྗེས་ཐོབ་ག་ལ་ཡོད། །ཐམས་ཅད་སེམས་ཀྱི་ངོ་བོ་ལ། །གཟུང་དང་འཛིན་པ་ག་ལ་ཡོད། །འཇིགས་བྱེད་ཆེན་པོས་བཀའ་སྩལ་པ། །འཁོར་བ་ཐོག་མ་མེད་པ་ནས། །ལྷན་ཅིག་སྐྱེས་པའི་སྒྲིབ་གཡོགས་ཀྱིས། །རིན་ཆེན་སེམས་ནི་དྲི་ཅན་བྱས། །ཟླ་བ་རབ་རིབ་སེལ་བྱེད་དེ། །མིག་གིས་རང་གི་རྡུལ་མི་མཐོང ། །སེམས་ཀྱིས་ད་ཉིད་མ་རྟོགས་པར། །ཐ་དད་གཟུང་འཛིན་སྣ་ཚོགས་འཛིན། །དེ་ཕྱིར་ལྟ་བའི་རྒྱལ་པོ་བསྟན། །མི་ཤེས་པ་ཡི་རབ་རིབ་ཀྱིས། །བདུད་རྩིའི་དེ་ཉིད་མ་ཤེས་ཏེ། །གཙང་དང་མི་གཙང་ལ་སོགས་བརྟགས། །དེ་ཕྱིར་སྤྱོད་པའི་རྒྱལ་པོ་བསྟན། །གནས་པའི་རྐྱེན་དང་གཡེང་བའི་རྐྱེན། །དེ་ཕྱིར་ཟུང་འཇུག་རྒྱལ་པོ་བསྟན། །རྐྱེན་དང་དབང་པོ་རབ་འབྲིང་གིས། །མཉམ་གཞག་རྗེས་ཐོབ་རྒྱལ་པོ་བསྟན། །མི་ཤེས་པ་ཡི་རབ་རིབ་ཀྱིས། །འཁྲུལ་པས་གཟུང་འཛིན་གཉིས་སུ་བརྟགས། །དེ་ཕྱིར་སེམས་ཀྱི་རྒྱལ་པོ་བསྟན། །ལྟ་སྤྱོད་འདི་ལ་ནན་ཏན་གྱིས། །དེ་ནས 87.39b ཐམས་ཅད་དགའ་ཞིང་མགུ་ནས་ཡི་རངས་ཏེ། ཕྱི་ནང་གི་མཆོད་པས་མཆོད་ནས་མི་སྣང་བར་གྱུར་ཏོ། །དཔལ་ཡེ་ཤེས་ཕྲེང་བའི་རྒྱུད་ཀྱི་རྒྱལ་པོ་ལྟ་སྤྱོད་ཟུང་དུ་འཇུག་པ་རྫོགས་སྷོ།། །།རྣལ་འབྱོར་མ་ཙནྡྲ་མཱ་ལེ་དང ། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། |